Ẹsteli

¹DINVIE é sọ wá jọ to azán Ahasuelusi tọn lẹ mẹ, (ehe we Ahasuelusi lọ he duahọlu, sọn India yèdọ jẹ Etiopia, to gbetato kantọ̀nṣinawe ji:) ²na to azán nẹlẹ mẹ, whenuena Ahasuelusi ahọlu sinai to ofìn ahọludu etọn tọn ji, he tin to Susani ohọnmẹ lọ mẹ, ³to owhè atọ̀ntọ ahọludu etọn tọn mẹ, wẹ é basi hùnwhẹ de hlan ahọvi etọn lẹpo po mẹmẹsi etọn lẹ po; huhlọn Pẹlsia po Media po tọn, mẹgbõgbo lẹ po ahọvi gbetatò lẹ tọn lẹ po, tin to e nukọn: ⁴whenuena é do adọkun ahọludu gigonọ etọn tọn po ogbégbo whanpẹ gìgodaho etọn tọn po hia azán susu, yèdọ azán kẹnnẹko. ⁵Whenuena yè hẹn azán helẹ pé, ahọlu sọ basi hùnwhẹ de hlan gbẹtọ he tin sẹpọ́ to Ṣuṣani ohònmẹ lọ mẹ lẹ, daho po pẹvi po, azán ṣinawe, to akànmaho ojipa ohònmẹ ahọlu lọ tọn tọn mẹ; ⁶dido avọ̀ wéwé tọn lẹ, amàmú tọn, po ofẹ́ tọn po, yè yí sislo alà dagbedagbe tọn lẹ po gèfunwunmẹ po do bla do alọgàn fataka tọn lẹ po dòtin malble tọn lẹ po go: timtim lẹ yín sika po fataka po tọn, to agbà malble ovè po wéwé po, po asavànọ po tọn de ji. ⁷Yé sọ na nánùnù yé to nuzinzán sika tọn lẹ mẹ, (nuzinzán lẹ yín alọpalọpa ode sọn awetọ go) po ovẹ̃n ahọlu tọn po to ogégé mẹ, kẹdẹdi sànúwiwà ahọlu lọ tọn. ⁸Nùnù lọ tin kẹdẹdi osén lọ; mẹde ma sọgan hẹnmẹnahuhlọn: na mọwẹ ahọlu lọ ko dè omẹ do ogán owhé etọn tọn lẹpo ji, na yé na do nọ wà kẹdẹdi homẹhùn omẹ dopodopo tọn. ⁹Vasti ahọsi lọ ga sọ basi hùnwhẹ de na yọnnusi lẹ to owhé ahọlu tọn gbè he yín Ahasuelusi ahọlu lọ tọn. ¹⁰To azán ṣinawetọ gbè, whenuena yè yí ovẹ̃n do hẹn ayiha ahọlu lọ tọ́n yín homẹhùnnọ, wẹ é degbèna Mẹhumani, Bizta, Halbona, Bigta, Abagta, Zetali, po Kalkasi po ojọ ṣinawe lẹ he nọ wàdevizọ́n to nukọn Ahasuelusi ahọlu lọ tọn lẹ, ¹¹nado hẹn Vasti ahọsi lọ wá ahọlu nukọn po ahọlu jẹgbakun lọ po, nado do whanpẹ etọn hia akọta lẹ po ahọvi lẹ po: na ewọ yín whanpẹnọ nado nọ pọ́n. ¹²Ṣigba ahọsi Vasti gbẹ́ nado wá to gbèdide ahọlu tọn ji gbọn ojọ lẹ lọ dali: enẹwutu ahọlu yín homẹgblenọ susu, adi etọn sọ to jiji to hòmẹ nẹ̃. ¹³Whenẹnu wẹ ahọlu lọ dọ hlan omẹ nuyọnẹntọ lẹ, he nọ yón ojlẹ lẹ, (na mọwẹ owalọ ahọlu lọ tọn, yin hlan mẹhe yón osẹ́n po whẹ̀dida po dali; ¹⁴omẹ awetọ sẹpọ́ ẹ wẹ Kalsena, Ṣẹtali, Adinata, Talsisi, Mẹlẹsi, Malsena, po Mẹmukani po, ahọvi ṣinawe Pẹlsia po Media po tọn lẹ, he nọ mọ nukunmẹ ahọlu lọ tọn, bo sọ nọ sinai mẹtintan to ahọludu lọ mẹ:) ¹⁵Etẹ́ wẹ mí na wà hlan ahọsi Vasti lọ kẹdẹdi osẹ́n, na ewọ ma ko wà kẹdẹdi aṣẹ ahọlu Ahasuelusi tọn gbọn ojọ lẹ lọ dali gba? ¹⁶Mẹmukani sọ gblọn to ahọlu lọ po ahọvi lẹ lọ po nukọn, dọmọ, Vasti ahọsi lọ ma wà núagò hlan ahọlu lọ ṣokẹdẹ gba, ṣigba hlan ahọvi lẹpo ga, podọ hlan akọta lẹpo he tin to gbetatò ahọlu Ahasuelusi tọn lẹpo mẹ. ¹⁷Na owàlọ ahọsi lọ tọn na wá gbangba jẹ yọnnu lẹpo de, nado hẹn asú yetọn lẹ zùn mẹhlo to nukun yetọn mẹ, whenuena yè na hẹnwádọ, dọmọ, Ahọlu Ahasuelusi degbèna Vasti ahọsi lọ nadó yín hinhẹn wá hòmẹ to e nukọn, ṣigba ewọ ma wá gba. ¹⁸Podọ azán he gbè wẹ ahọviyọnnu Pẹlsia po Media po tọn lẹ he ko sè owàlọ ahọsi lọ tọn tọn lẹ na nọ dọ mọnkọ hlan ahọvi ahọlu tọn lẹ Mowẹ ovlẹ po homẹgble susu po na fọ́n. ¹⁹Eyín é hùnhomẹna ahọlu, gbọ gbèdide ahọlu tọn de ni tón yì sọn de we, bo sọ gbọ yè ni wlan ẹn to osẹ̀n Pẹlsianu lẹ po Medianu lẹ po tọn lẹ ṣẹnṣẹn, dọ é ju yi blo, dọ Vaṣti sọ wá ahọlu Ahasuelusi nukọn ba blo; bo sọ gbọ ahọlu ni jó ahọlu tẹnmẹ etọn hlan mẹdẽvo he tin pónte hú ewọ. ²⁰Whenuena yè na lá asẹ ahọlu tọn he é na basi lẹ́do ahọludu etọn lẹpo, (na daho wẹ) asi lẹpo na nọ na ogbégbo hlan asú yetọn lẹ, hlan daho po pẹvi po. ²¹Didọ lọ sọ hùnhomẹna ahọlu lọ po ahọvi lẹ lọ po; ahọlu sọ wà kẹdẹdi ohó Mẹmukani tọn lọ: ²²na é do ohówé lẹ hlan do gbetatò ahọlu tọn lẹpo mẹ, do gbetatò dopodopo mẹ kẹdẹdi winwlan etọn, podọ hlan gbẹtọ lẹ dopodopo kẹdẹdi ogbè yetọn, na omẹ dopodopo na do hẹn ogándu to owhé etọn titi gbè, podọ na do lá ẹ kẹdẹdi ogbè omẹ etọn lẹ tọn.

¹TO onú helẹ godo, whenuena yè ko hẹn homẹgble ahọlu Ahasuelusi tọn miọn, é flin Vasti, po núhe é wà po, po asẹ he yè do e ji po. ²Whenẹnu wẹ mẹmẹsi ahọlu tọn lẹ he nọ wàdevizọ́n hlan ẹn lẹ dọmọ, Gbọ awhlivu whanpẹnọ ni yín dindinmọ na ahọlu lọ: ³bo sọ gbọ ahọlu ni dè ogán lẹ to gbetatò ahọludu etọn tọn lẹpo mẹ, dọ yé ni bẹ́ awhlivu whanpẹnọ lẹpo pli jẹ Ṣuṣani ohónmẹ lọ, do ohọ̀ yọnnu lẹ tọn mẹ, jẹ otògùn Hegai ojọ ahọlu lọ tọn mẹgopọntọ yọnnu lẹ tọn tọn mẹ: bo sọ gbọ ohú yetọn lọ na olẹ́wé ni yín nina yé: ⁴bo sọ gbọ yọnnuvu he hẹnhomẹhùn ahọlu ni yín ahọsi to otẹn Vasti tọn mẹ Onú lọ sọ hẹnhomẹhùn ahọlu lọ; bọ é sọ wà mọ.

⁵Ju dẽlẹ tin to Susan ohònmẹ lọ mẹ finẹ oyín mẹhetọn yín Mọldekai, visunnu Jaili tọn, visunnu Ṣimei tọn, visunnu Kisi tọn, Bẹnjamininu de; ⁶mẹhe yè ko bẹ́ yì sọn Jelusalẹm po mẹmẹglọ he yè ko bẹ́ yì lẹ po gọ́na Jekonia ahọlu Juda tọn, mẹhe Nẹbukadnẹzali ahọlu Babilọni tọn ko bó yì lẹ. ⁷Ewọ sọ hẹn Hadasa hẹji wá, enẹ wẹ, Esteli, viyọnnu tavẹ etọn tọn: na ewọ ma tindo otọ́ kavi onọ gba, yọnnuvu lọ sọ yín mẹdisán whanpẹnọ; podọ whenuena otọ́ etọn po onọ po yín osiọ, Mọldekai wẹ yi i na viyọnnu etọn titi. ⁸Mowẹ é sọ wá jọ, whenuena gbèdide ahọlu lọ tọn po aṣẹ etọn po yín sisè, podọ whenuena yè bé yọnnuvu susu plidopọ jẹ Ṣuṣani ohọ̀nmẹ lọ, jẹ ọtògùn Hegai tọn mẹ, wẹ yè yí Esteli do ohọ̀ ahọlu lọ tọn mẹ jẹ otògùn Hegai mẹgopọ́ntọ yọnnusi lẹ tọn lọ mẹ. ⁹Yọnnuvu lọ sọ hùnhomẹna ẹn, ewọ sọ mọ nukundagbe sọn e de; ewọ sọ na onú etọn lẹ ewọ na lẹ́wé, gọ́na mimá etọn lẹ, po yọnnuvu ṣinawe lẹ lọ po, he tin jẹ nado yín nina ẹn, sọn ohọ̀ ahọlu lọ tọn mẹ: é sọ ṣẹ̀tẹnna ẹn po yọnnuvu etọn lẹ po hlan otẹn dagbedagbe lọ mẹ sọn ohọ̀ yọnnu lẹ tọn mẹ. ¹⁰Esteli ma ko do omẹ etọn lẹ po hẹnnumẹ etọn lẹ po hia gba: na Mọldekai ko naṣẹ ẹ na é ma na do do e hia. ¹¹Mọldekai sọ nọ to zọnlinzin to azán popo gbè to akànmaho ohọ̀ yọnnu lẹ tọn tọn nukọn, nado yón le Esteli to wiwà do, po núhe na jọ do e go po. ¹²Dinvie whenuena yè hẹn nujemẹji yọnnuvú dopodopo tọn wá nado yì hòmẹ jẹ ahọlu Ahasuelusi de, godo he yè ko wà hlan ẹn kẹdẹdi osẹ́n na yọnnu lẹ, osùn wiawe, (na mọwẹ yè nọ hẹn azán olẹ́wé yetọn tọn lẹ pé do, nado dọ, osùn ṣidopo po amì ajọ̀gidi tọn po, osùn ṣidopo po owán vivinọ lẹ po, po onú lẹ po na lilẹ́wé yọnnu lẹ tọn,) ¹³lò to alọpa he ji wẹ yọnnuvú lẹ nọ wá jẹ ahọlu lọ de, nudepope é jlo yè nọ yí na ẹn nado yì po e po sọn ohọ̀ yọnnu lẹ tọn mẹ jẹ ohọ̀ ahọlu lọ tọn mẹ. ¹⁴To whèjai é yì, podọ to afọnnu é gọ̀ biọ ohọ̀ awetọ yọnnu lẹ tọn mẹ, jẹ otògùn Ọaasigazi, họ̀kọ́nsi ahọlu tọn lọ tọn mẹ, he to yọnnuyíyí lọ gopọ́n: ewọ ma sọ wá hòmẹ jẹ ahọlu lọ de gbède ba, adavo ahọlu hùnhomẹ to ewọ mọ, podọ enẹ yè nọ ylọ ẹ gbọn oyín dali. ¹⁵Dinvie whenuena yè hẹn nújẹmẹji Esteli tọn, viyọnnu Abihaili tavẹ́ Mọldekai tọn, mẹhe ko yí i na viyọnnu etọn lọsu, wá nado yì họ́mẹ jẹ ahọlu de, é ma biọ núde adavo núhe Hegai hòkọ́nsi ahọlu tọn lọ, nugopóntọ yọnnu lẹ tọn, dè. Esteli sọ mọ nukundagbe to nukun yé he to pinpọ́n ẹn lẹpo tọn mẹ. ¹⁶Mọwẹ yè hẹn Esteli jẹ ahọlu Ahasuelusi de biọ ohọ ahọlu tọn etọn mẹ to osùn aotọ mẹ, he yín osùn Tebẹti, to owhè ṣinawetọ ahọludu etọn tọn mẹ. ¹⁷Ahọlu sọ yiwanna Esteli hugan yọnnu lẹpo, é sọ mọ ojọmiọn po nukundagbe po to nukun etọn mẹ hú awhlivú lẹpo: sọmọ bọ ewọ yí ojẹgbakun ahọlu tọn lọ do ota nẹ̃, bo yí i do basi ahọsidaho to otẹn Yasti tọn mẹ. ¹⁸Whenẹnu wẹ ahọlu basi hùnwhẹ daho de hlan ahọvi etọn lẹpo po mẹmẹsi etọn lẹ po, yèdọ hùnwhẹ Esteli tọn; é sọ basi ojódo de hlan gbetatò lẹ, bo sọ na nunina lẹ, kẹdẹdi sànúwiwà ahọlu lọ tọn. ¹⁹Whenuena yè bẹ awhlivú lẹ plidopọ whlawetọ, whenẹnu wẹ Moldekai sinai to họ̀ngbo ahọlu tọn ji. ²⁰Esteli ma ko do hẹnnumẹ etọn lẹ kavi omẹ etọn lẹ hia gba; dole Mọldekai ko nasẹ ẹ do: na Esteli nọ basi gbèdide Mọldekai tọn, di whenuena yè to hinhẹn en to e de. ²¹To azán nẹlẹ me, whenuena Mọldekai sinai to hòngbo ahọlu tọn mẹ, awe sọn hòkọnsi ahọlu tọn le mẹ, Bigtani po Telẹsi po, sọn ehe nọ pọ́n ohòn lọ go nẹlẹ̃ mẹ, yín homẹgblenọ, bo sọ to dindin nado dè alọ lẹ do ahọlu Ahasuelusi go ²²Onú lọ sọ yín yínyọnẹn hlan Mọldekai, mẹhe do e hia hlan Esteli ahọsidaho; Esteli sọ dọ ẹnẹtọn lọ na ahọlu to oyín Mọldekai tọn mẹ. ²³Whenuena yè sọ basi odòdindin owhẹ̀hó lọ tọn, bọ yè sọ mọ ẹn nado yín mọ, yè do yé omẹ awelẹ agọ̀nnu to atin de go: yè sọ wlan ẹn to owé otànnugbo lẹ tọn mẹ to ahọlu lọ nukọn.

¹TO onú helẹ̃ godo wẹ ahọlu Ahasuelusi zé Hamani visunnu Hamedata Agaginu lọ daga, bo dè e donukọn, bo zé aisintẹn etọn do aga hú ahọvi he tin to e de lẹpo tọn. ²Mẹmẹsi ahọlu tọn he tin to hòngbo ahọlu tọn ji lẹpo, nọ dẹ́ hlan odò, bo nọ basi whékanbiọ hlan Hamani: na ahọlu ko degbè do mọ gbọn etọn dali. Ṣigba Mọldekai ma nọ dẹ́ hlan odò gba, é ma sọ nọ kànwhébiọ nẹ gba. ³Whenenu wẹ mẹmẹsi ahọlu lọ tọn lẹ, he tin to hòngbo ahọlu tọn ji lẹ, dọ hlan Mọldekai dọmọ, Etẹwutu wẹ hiẹ ma basi gbèdide ahọlu tọn gbà? ⁴Dinvie é sọ wá jọ, whenuena yé nọ to hódọ hlan ẹn egbesọegbesọ, bọ ewọ ma sọ tuntóai hlan yé, wẹ yé dọ na Hamani, nado pọ́n eyín owhẹhó Mọldekai tọn na nọte: na ewọ ko dọ na yé dọ Ju de wẹ ewọ. ⁵Whenuena Hamani mọ dọ Mọldekai ma dẹ́ hlan odò gba, bo ma sọ kànwhébiọ nẹ gba, whenẹnu wẹ Hamani yín gigọ́ na homẹgble. ⁶Ṣigba é lẹn ovlẹ nado dè alọ lẹ do Mọldekai kẹdẹ go; na yé ko do omẹ Mọldekai tọn lẹ hia ẹ: enẹwutu Hamani to dindin nado và Ju he tin lédo ahọludu Ahasuelusi tọn lẹpo pete, yèdọ omẹ Mọldekai tọn lẹ. ⁷To osùn tintan mẹ, he yín osùn Nisani, to owhè wiawetọ ahọlu Ahasuelusi tọn mẹ, Yé nọ dlan Puli, enẹ wẹ ovò lọ, to Hamani nukọn, sọn azán jẹ azán, podọ sọn osùn jẹ osùn, jẹ osùn wiawetọ mẹ he yín osùn Adali. ⁸Hamani sọ dọ hlan ahọlu Ahasuelusi dọmọ, Gbẹtọ dẽlẹ tin vúnvún pé bo sọ gbàbiọ gbẹtọ akọta lẹ ṣẹnṣẹn to gbetatò ahọludu towe tọn lẹpo mẹ; hùnkọhùnkọ sọ wẹ osẹ́n yetọn lẹ sọn omẹ nẹlẹ pó tọn mẹ; mọ yé ma sọ to osẹn ahọlu tọn lẹ yìn: enẹwutu é ma tin na ale ahọlu tọn nado natẹn yé gba. ⁹Eyín é hùnhomẹna ahọlu, gbọ é ni yín winwlan dọ yè ni và yé; Yẹn na sọ na talẹnti fataka tọn fọtọ́n ao do alọ enẹlẹ tọn lẹ mẹ he tindo aṣẹ àzọ́nwiwà ahọlu tọn lọ tọn, nado hẹn ẹn wá biọ akuẹhó ahọlu tọn lẹ mẹ. ¹⁰Ahọlu sọ dè alọkẹ́ etọn sọn alọ etọn mẹ, bo yí i na Hamani visunnu Hamedata Agaginu lọ tọn, kẹ̀ntọ Ju lọ tọn lọ. ¹¹Ahọlu sọ dọ hlan Hamani dọmọ, Yè na fataka lọ we, gbẹtọ lẹ ga, nado yí yé do wà dile é sọawuhia dagbe hlan we do. ¹²Whenẹnu wẹ yè ylọ wékantọ ahọlu tọn lẹ to osùn tintan lọ mẹ, to azán wiatọ́ntọ etọn ji, yè sọ wlan to finẹ kẹdẹdi ehe Hamani degbèna hlan ogán ahọlu tọn lọ, podọ hlan otògán he tin to toyíyí dopodopo ji lẹ, podọ hlan ahọvi gbẹtọ le tọn dopodopo; hlan tòyíyí dopodopo kẹdẹdi winwlan etọn, podọ hlan gbẹtọ lẹ dopodopo kẹdẹdi ogbè yetọn; to oyín ahọlu Ahasuelusi tọn mẹ wẹ yè wlan ẹn, yè sọ yí alọkẹ ahọlu tọn do dohia e. ¹³Yè sọ do ohówé lẹ hlan gbọn bédopò mẹ yì tòyíyí ahọlu tọn lẹpo mẹ, nado và, nado hù, podọ nado hẹn nado súdo, Ju lẹpo, yọ̀pọ po mẹho po, ovi ovu lẹ po yọnnu le po, to azán dopo mẹ, yèdọ to azán wiatòntọ osùn wiawetọ tọn ji, ehe yín osùn Adali, podọ nado bẹ ogblannu yé tọn na jawla de. ¹⁴Wekinkan de sọn winwlan lọ mẹ, dọ yè ni do do aṣẹ hlan gbonu to tòyiyi dopodopo mẹ, wẹ yè lá hlan akọta lẹpo, na yé ni do yín awuwletọ dai jẹ azán nẹ gbè. ¹⁵Wébẹ́dopọ lọ lọ yawu tọ́n yì gbọn gbèdide ahọlu lọ tọn dali, yè sọ na aṣẹ lọ jẹgbonu to Ṣuṣani ohọ̀nmẹ lọ: ahọlu lọ po Hamani po sọ sinai nado nù; ṣigba yè hẹn tòdaho Ṣuṣani tọn wlu.

¹WHENUENA Mọldekai yọ́n ehe yè wà lẹpo, Mọldekai tlẹn avọ̀ etọn lẹ, bo yí odẹ́vọ̀ do ogo po afín po, bo sọ tọ́n yì tòdaho lọ hòmẹ, bo yí awhá daho lélé de po vivẹ́ de po do dawhá: ²é sọ wá yèdọ to họ̀ngbo ahọlu tọn nukọn: na mẹde ma sọgan biọ họ̀ngbo ahọlu tọn mẹ po odẹ́vọ̀ po to ogo gba. ³Podọ to tòyíyí dopodopo mẹ, fidepope gbèdide ahọlu lọ tọn po aṣẹ etọn po wá, finẹ wẹ awubla daho te to Ju lẹ ṣẹnṣẹn, po nùbibla po, po avi po, po hukuhlu po ⁴Deviyọnnu Esteli tọn lẹ po họ̀kọ̀nsi etọn lẹ po wá bo dọ ẹ na ẹn; yè sọ hẹn ahọsi lọ yín adinọ badabada: é sọ do avọ̀ṣinṣinyọn hlan nado yí ṣinyọn Mọldekai, podọ nado dè odẹ́vọ̀ sọ sọn e go; ṣigba ewọ ma yí i gba ⁵Whenẹnu wẹ Esteli ylọ na Hataki, dopo sọn họ̀kònsi ahọlu lọ tọn lẹ mẹ, mẹhe é ko dè nado nọ yílizọ́n nẹ̃, bo naṣẹ ẹ nado yì Mọldekai de, nado yọ́n etẹ́ ehe yín, podọ etẹwutu wẹ é yín. ⁶Mowẹ Hataki tón yì Mọldekai de jẹ otẹn gbigblo tòdaho lọ tọn, he tin to họ̀ngbo ahọlu lọ tọn nukọn. ⁷Mọldekai sọ dọ nẹ̃ sọn ehe ko jọ lẹpo mẹ hlan ẹn, podọ sọha lẹndopọ akuẹ he Hamani ko dopagbe nado súahọ hlan akuẹhò ahọlu lọ tọn lẹ mẹ na Ju lẹ, nado và yé. ⁸E sọ yí wékinkan winwlan asẹ lọ tọn tọn nẹ̃ ga he yè do hlan gbonu to Ṣuṣani mẹ nado và yé, nado do e hia Esteli, podọ nado lá ẹ hlan ẹn; podọ nado nasẹ ẹ, na ewọ ni do yì whégbè jẹ ahọlu de, nado basi ovẹ́vẹ hlan ẹn, podọ nado basi okanbiọ to e nukọn, na hẹnnumẹ etọn lẹ. ⁹Hataki sọ wá bo dọ na Esteli ohó Mọldekai tọn lẹ lọ. ¹⁰Whenẹnu wẹ Esteli dọhó hlan Hataki, bo na owẹ́n de e hlan Mọldekai, dọmọ: ¹¹Devi ahọlu tọn lẹpo po gbẹtọ tòyíyí ahọlu lọ tọn lẹ tọn lẹpo po, wẹ yọnẹn, dọ mẹdepope, eyín sunnusi kavi yọnnusi, na wá jẹ ahọlu de biọ awá lọ hòmẹ, mẹhe yè ma ylọ, osẹ́n de tin na ẹn, dọ ye ni hù i, adavo hlan mẹhunkọ hlan mẹhe ahọlu na dlẹn ogánpò sikanọ lọ do, na é nido nọgbẹ́: ṣigba yè ma ko ylọ mi nado wá whégbè jẹ ahọlu de to azán ogbàn helẹ mẹ gba. ¹²Yé sọ dọ ohó Esteli tọn lẹ na Mọldekai. ¹³Whenẹnu wẹ Mọldekai degbèna yé gọ́ ogbè yì do na Esteli, A lẹn hẹ dewe dọ hiẹ na hòngán to ohó ahọlu lọ tọn mẹ hugán Ju lẹpo blo. ¹⁴Na eyín hiẹ tlẹ nabọẹ towe patapata to ojlẹ he mẹ, whenenu wẹ dèdote po whlẹngan po na tite hlan Ju lẹ sọn otẹn dèvo mẹ, ṣigba hiẹ po owhé otọ́ towe tọn po na súdo: podọ mẹnu wẹ yọn en eyin yè ma hen we wá jẹ áhọludu lọ mẹ na ojlẹ mọnkọ de di ehe? ¹⁵Whenẹnu wẹ Esteli degbèna yé gọ̀ ogbè yi do na Mọldekai, ¹⁶Yì, sinyan Ju he tinai to Ṣuṣani mẹ lẹpo plidopọ, mì ni bo blanù na mi, ma du ma nù azán atọ́n, zánmẹ kavi okle: Yẹn ga po deviyọnnu ṣie lẹ po na sọ blanù to wàlọ mọnkọ mẹ; podọ mọwẹ yẹn na yì whégbè jẹ ahọlu lọ de, he ma tin kẹdẹdi osẹ́n gba: podọ eyín yẹn súdo, yẹn súdo. ¹⁷Mowẹ Mọldekai yì, bo sọ wà kẹdẹdi ehe Esteli degbèna ẹn lẹpo.

¹E sọ wá jọ dinvie to azán atọ̀ntọ ji, wẹ Esteli yí ahọsi vọ́ etọn do ogo, bo site to awá ohọ̀ ahọlu lọ tọn tọn hòmẹ, pannukọn ohọ̀ ahọlu lọ tọn; ahọlu to aisinsin to ahọlufìn etọn ji to ahọluhọ̀ mẹ, pannukọn bibiọ ohọ́ lọ tọn mẹ. ²É sọ wá yín mọ, whenuena ahọlu lọ mọ Esteli ahọsi tote to awá lọ mẹ, wẹ ewọ mọ nukundagbe to nukun etọn mẹ: ahọlu sọ dlẹn ogánpò sikanọ he tin to alọ etọn mẹ lọ hlan Esteli. Mọwe Esteli dọ̀n sẹpọ́, bo sọalọ obẹ́nù ogánpò lọ tọn. ³Whenẹnu wẹ ahọlu dọ hlan ẹn, dọ, Etẹwẹ hiẹ jlo, Esteli ahọsi? podọ etẹwẹ okanbiọ towe? Yè na sọ na ẹn we yèdọ jẹ odá ahọludu lọ tọn. ⁴Esteli sọ dọmọ, Eyín é sọawuhia dagbe hlan ahọlu lọ, gbọ ahọlú lọ po Hamani po ni wá ojohémẹ he yẹn ko wleawuna nẹ̃ to azán he gbè lọ kọ̀n. ⁵Whenẹnu wẹ ahọlu lọ dọmọ, Hẹn Hamani nado basi awuya, na é nido yín wiwà dile Esteli ko dọ do. Mọwẹ ahọlu po Hamani po wá ojohẹ́mẹ he Esteli ko wleawuna lọ kọ̀n. ⁶Ahọlu sọ dọ hlan Esteli to ojohémẹ ovẹ̃n tọn lọ kọ̀n, dọ, Etẹwẹ okanbiọ towe? Yè na sọ yína we: etẹ́ sọ wẹ obiọ towe? yèdọ jẹ odá ahọludu lọ tọn é na yín yíyiwà. ⁷Whenẹnu wẹ Esteli gblọn bo dọmọ, Okanbiọ ṣie po obiọ ṣie po wẹ; dọ, ⁸eyín yẹn ko mọ nukundagbe to nukun ahọlu tọn mẹ, podọ eyín é hùnhomẹna ahọlu nado yí okanbiọ ṣie na mì, podọ nado yí obiọ ṣie wà, gbọ ahọlu lọ po Hamani po ni sọ wá ojohémẹ kòn he yẹn na wleawuna yé, yẹn na sọ wà to osọ̀ dile ahọlu ko dọ do. ⁹Whenẹnu wẹ Hamani tọ̀n yì to azán nẹ gbè gọ̀na ayajẹ po homẹhùn ayiha tọn po: ṣigba whenuena Hamani mọ Mọldekai to họ̀ngbo ahọlu lọ tọn ji, dọ é ma fọ́n tite kavi sisọ to e nukọn gba, yè sọ hẹn ẹn gọ̀ na homegble do Mọldekai go. ¹⁰Ṣogãn Hamani davà ede, bo yì whégbe; é sọ domẹhlan bo hẹn họntọn etọn lẹ wá po Zelẹṣi asi etọn po. ¹¹Hamani sọ pitàn gigo adọkun etọn tọn hlan yé, po gégé ovi etọn lẹ tọn po, po onú lẹpo po he mẹ ahọlu lọ ko do zé e daga te, podọ le é ko zé e do nukọn to ogán devi ahọlu tọn lẹ ji do. ¹²Hamani sọ dọ huganmọ dọ, Mowẹ, Esteli ahọsi lọ ma dike omẹ de ni wá whégbè po ahọlu lọ po jẹ ojohẹ́mẹ he é ko wleawuna lọ kọ̀n adavo yẹnlọ; podọ to osọ̀ ga yè ylọ mi gbọn e dali dopọ po ahọlu lọ po. ¹³Gãnṣo ehe lẹpo ma yí núde do gò to nukun ṣie mẹ gba, dẹ̀n sọ le yẹn nọ to Mọldekai Ju lọ mọ to aisinsin to họ̀ngbo ahọlu lọ tọn ji do. ¹⁴Whenẹnu wẹ Zelẹsi asi etọn po họntọn etọn lẹpo po dọ hlan ẹn dọmọ, Gbọ yè ni basi atin de ote awàgbà kandeao tọn, podọ to afọnnu hiẹ ni dọhó hlan ahọlu lọ na Moldekaì nido yín mẹzépla do enẹ ji: whenẹnu hiẹ ni yí ojimẹjọ do biọ whégbe yì po ahọlu lọ po jẹ ojohémẹ lọ kòn. Onú lọ sọ hẹnhomẹhùn Hamani; ewọ sọ hẹn atin lọ nado yín bibasi.

¹TO ozán nẹ mẹ amlọn ahọlu tọn hònyi sọn e de; é sọ degbè nado hẹn owé otohówé otànnugbo lẹ tọn lẹ tọn wá, yè sọ to yé hia to ahọlu nukọn. ²Yè sọ mọ winwlan, dọ Mọldekai ko dọ Bigtana po Telẹṣi po tọn, awe sọn ohòkònsi ahọlu tọn lẹ mẹ, sọn enẹlẹ he nọ họ̀ agbàji lọ lẹ mẹ, mẹhe ko din nado dèalọ lẹ do ahọlu Ahasuelusi ji. ³Ahọlu sọ dọmọ, Ogbégbò ogántọn po tẹwẹ yè ko wà hlan Mọldekai na ehe? Whenẹnu wẹ devi ahọlu tọn he to devizọ̀nwà hlan ẹn lẹ dọmọ, Núde ma tin yè wà hlan ẹn gba. ⁴Ahọlu bo dọmọ, Mẹnu wẹ tin to awánu? Dinvie yè ko hẹn Hamani wá biọ awánu ohọ̀ ahọlu tọn tọn mẹ, nado dọhó hlan ahọlu lọ nado zé Mọldekai pla atin lọ go he ewọ ko wleawuna nẹ̃. ⁵Devi ahọlu tọn lẹ sọ dọ hlan ẹn dọmọ, Dayi e go, Hamani to ote to awánu lọ mẹ. Ahọlu lọ sọ dọmọ, Gbọ é ni biọ whégbè wá. ⁶Mọwẹ Hamani biọ whégbè wá. Ahọlu sọ dọ hlan ẹn dọ, Etẹwẹ na yín wiwà hlan dawe lọ mẹhe ahọlu jọ̀jimẹ nado gbògbéna? Hamani didọ to ayiha etọn mẹ dinvie dọ, Hlan mẹnu wẹ ahọlu lọ na jòjimẹ nado gbògbéna hugan hlan yẹnlọsu. ⁷Hamani sọ dọ hlan ahọlu dọmọ, Na dagbe mẹhe ahọlu jòjimẹ nado gbògbéna, ⁸gbọ avọ̀ ni yín hinhẹnwá ehe ahọlu lọ nọ do, pó osò he ahọlu lọ nọ hẹ́ po, po ojẹgbakun ahọlu tọn po he yè nọ zé do ota etọn: ⁹po ni yín yíyí do alọ dopo sọn ogán yẹyinọ ahọlu lọ tọn pete tọn mẹ, na yé ni yí do vaṣọna dawe lọ mẹhe ahọlu lọ jọjìmẹ nado gbògbéna, bo sọ hẹn ẹn nado hẹ́ osọ̀nẹgbé gbọn tòdaho lọ mẹ luntòn, bo sọ to lilá to ewọ nukọn dọ, Le é na yín wiwà hlan dawe lọ do mẹhe ahọlu lọ jòjimẹ nado gbògbéna. ¹⁰Whenẹnu wẹ ahọlu dọ hlan Hamani dọ, Basi awuya, bo yi avọ̀ lọ po osọ́ lọ po, dile hiẹ ko dọ do, bo wà yèdọ mọ hlan Mọldekai Ju lọ, he nọ sinai to hòngbo ahọlu tọn ji: a dike núde depò sọn ehe hiẹ dọ lẹpo mẹ blo ¹¹Whenẹnu wẹ Hamani yí avọ̀ lọ po osò lọ po, bo vàsọna Mọldekai, bo hẹn ẹn nado hẹ̀sọ̀ gbọn aligbo tòdaho lọ tọn luntọ̀n, bo sọ to lilá to ewọ nukọn dọ, Le wẹ é na yín wiwà do hlan dawe lọ mẹhe ahọlu lọ jòjimẹ nado gbògbéna. ¹²Mọldekai sọ gọ̀ wá họ̀ngbo ahọlu lọ tọn ji. Ṣigba Hamani yawu jẹ owhé etọn gbè, awubibla bo tindo ota etọn yín nuṣinyọndo. ¹³Hamani sọ pitàn onú he ko jọ do e go lẹpo tọn hlan Zelẹṣi asi etọn po họntọn etọn lẹpo po. Whenẹnu wẹ omẹ nuyọnẹntọ etọn lẹ po Zelẹṣi asi etọn po dọ hlan ẹn dọmọ, Eyín Mọldekai, mẹhe nukọn hiẹ ko ṣẹ̀ nado to aijẹ te, tin sọn okún Ju lẹ tọn mẹ, hiẹ ma na pé e go gba, ṣigba hiẹ na jai to ewọ nukọn dandan. ¹⁴Le yé gbẹ̀ to hódọ hẹ ẹ, họ̀kọ̀nsi ahọlu tọn lẹ wá, bo yawu nado hẹn Hamani yì jẹ ojohòmẹ he Esteli ko wleawuna lọ kọ̀n.

¹MỌWE ahọlu po Hamani po wá nado nù hẹ Esteli ahọsi lọ. ²Ahọlu sọ vò dọ hlan Esteli to azán awetọ gbè to ojohẹ́mẹ ovẹ̃n lọ tọn kọ̀n dọ, Etẹwẹ okanbiọ towe, Esteli ahọsi? yè na sọ yína we: podọ etẹ́ wẹ obiọ towe? yèdọ jẹ odá ahọludu lọ tọn yè na sọ yíwà. ³Whenẹnu wẹ Esteli ahọsi lọ gblọn bo dọmọ, Eyín yẹn ko mọ nukundagbe to nukun towe mẹ, ahọlu È, podọ eyín é hẹnhomẹhùn ahọlu lọ, gbọ yè ni na ogbẹ́ ṣie mi to okanbiọ ṣie ji, po omẹ ṣie lẹ po to obiọ ṣie ji: ⁴na yè sà mìwlẹ, yẹn po omẹ ṣie lẹ po, nado yín vivà, nado yín hùhu, podọ nado yín súsúdo. Ṣigba eyín yè ko sà mí na mẹglọnọ sunnu po mẹglọnọ yọnnu po yẹn do ko nabọẹ ṣie, na nukunbia mítọn ma tin nado yín sọjlẹ do onúgú ahọlu lọ tọn go gba, ⁵Whenẹnu wẹ ahọlu Ahasuelusi dọhó bo dọ hlan Esteli ahọsi lọ dọmọ, Mẹnu wẹ ewọ, podọ fie wẹ ewọ te, he hà whlepọ́n to ayiha etọn mẹ nado wà mọ? ⁶Esteli sọ dọmọ, Mẹglatọ de podọ kẹ̀ntọ de, yèdọ Hamani mẹylankan he. Whenẹnu wẹ Hamani yín avọ̀satọ to ahọlu lọ nukọn po ahọsi lọ po. ⁷Ahọlu sọ tite to homẹgble etọn mẹ sọn ojohẹ́mẹ ovẹ̃n lọ tọn kọ̀n, bo yì biọ ohọ̀nmẹ jipa mẹ: Hamani sọ tite nado basi obiọ na ogbẹ́ etọn to Esteli ahọsi lọ de: na ewọ mọ dọ yè ko dotana oylan de do oji nẹ̃ gbọn ahọlu lọ dali. ⁸Whenẹnu wẹ Ahọlu lẹ́gó sọn ohònmẹ jipa lọ mẹ biọ otẹn ojohẹ́mẹ ovẹ̃n tọn lọ tọn mẹ; yè ko hẹn Hamani jai do adọzàn eheji Esteli te. Whenẹnu wẹ ahọlu dọmọ, Yèdọ Ewọ na whlẹnkànhẹ ahọsi lọ to nukọn ṣie to ohọ̀ lọ mẹ wẹ? Le ohó tón yì sọn onù ahọlu lọ tọn mẹ yé ṣinyọn Hamani nukunmẹ. ⁹Whenẹnu wẹ Halbona, dopo sọn họ̀kọ̀nsi lẹ mẹ he tin to ahọlu nukọn dọmọ, Dayi e go ga, atin ote awàgbà kandeao tọn he Hamani ko basi na Mọldekai, mẹhe dọhó dagbe na ahọlu lọ, to ote to owhé Hamani tọn gbè. Ahọlu lọ sọ dọmọ, Zé e pla do e go. ¹⁰Mowẹ yé zé Hamani pla do atin lọ go he é ko wleawuna na Mọldekai. Whenẹnu wẹ yè hẹn homẹgble ahọlu lọ tọn fá.

¹TO azán nẹ gbè wẹ ahọlu Ahasuelusi jó owhé Hamani kẹ̀ntọ Ju lẹ tọn tọn hlan Esteli ahọsi lọ. Mọldekai sọ wá ahọlu nukọn: na Esteli ko dọ núhe ewọ yín hlan ẹn. ²Ahọlu sọ yi alọkẹ etọn sẹ́, he é ko yi sọn Hamani si, bo yi i jó hlan Mọldekai. Esteli sọ zé Mọldekai do owhé Hamani tọn ji. ³Esteli sọ vọ́ hódọ to ahọlu nukọn bo ṣinyọn ai to alọ etọn le go, bo sọ vẹ̀ ẹ po odasin po nado dè okà Hamani Agaginu lọ tọn sẹ́, po ayihakan etọn he ewọ ko do kanyiha do Ju lẹ ji po. ⁴Whenẹnu wẹ ahọlu lọ dlẹn jẹgbonu hlan Esteli ogánpò sikanọ lọ. Mowẹ Esteli tite bo nọte to ahọlu lọ nukọn. ⁵E sọ dọmọ, Eyín é hẹnhomẹhùn ahọlu, podọ eyín yẹn mọ nukundagbe to nukun etọn mẹ, podọ onú lọ sọ sọawuhia jijlọ to ahọlu lọ nukọn, bọ yẹn sọ yín homẹhùnnọ to nukun etọn lẹ mẹ gbọ é ni yín winwlan nado diọ ohówé lẹ lọ he yè kanyihana gbọn Hamani visunnu Hame-data Agaginu lọ tọn dali he ewọ wlan nado và Ju lẹ he tin to tòyíyí ahọlu lọ tọn lẹpo mẹ: ⁶na nawẹ yẹn sọgan doakọnna do nado mọ oylan lọ he na wá jẹ omẹ ṣie lẹ de dọ? Kavi nawẹ yẹn sọ sọgan doakọnna do nado mọ dindọn hẹnnumẹ ṣie lẹ tọn? ⁷Whenẹnu wẹ ahọlu Ahasuelusi dọ hlan Esteli ahọsi lọ podọ hlan Mọldekai Ju lọ dọmọ, Dayi e go, yẹn ko na owhé Hamani tọn Esteli, podọ ewọ wẹ yé ko sọ zépla do atin lọ go, na ewọ zé alo etọn do Ju lẹ lọ ji wutu. ⁸Mìwlẹ ni wlanwé ga gbọn Ju lẹ lọ tọn dali dole e jlo mì do, to oyín ahọlu tọn mẹ, bo sọ yí alọkẹ ahọlu lọ tọn do dohia ẹ: na winwlan he yè wlan to oyín ahọlu tọn mẹ, bo sọ yí alọkẹ ahọlu lọ tọn do dohia wẹ omẹ de ma sọgan diọ. ⁹Whenẹnu wẹ yè ylọ wékantọ ahọlu lọ tọn lẹ to ojlẹ nẹ mẹ, to osùn atọ̀ntọ mẹ, he yín osùn Sivani, to azán etọn kònukunatọ̀ntọ ji; yè sọ wlan ẹn kẹdẹdi ehe Mọldekai degbèna lẹpo hlan Ju lẹ lọ, podọ hlan ogán lẹ po tògán lẹ po po ahọvi tòyíyí lẹ tọn lẹ po he tin sọn India jẹ Etíopia, tòyíyí kantọ̀nsinawe, hlan tòyíyí dopodopo kẹdẹdi wéwlanlọ etọn, podọ hlan akọta dopodopo di ogbè yetọn, podọ hlan Ju lọ lọ kẹdẹdi ogbè yetọn. ¹⁰Ewọ sọ wlanwé tò oyín ahọlu Ahasuelusi tọn mẹ, bo sọ yí alọkẹ ahọlu tọn do dohia ọ, bo sọ do ohówé lẹ hlan gbọn bẹ́dopọ lẹ dali to osọ́nẹgbé ji, hihẹ́ otlò awuyatọ lẹ ji he yè nọ to zinzán to azón ahọlu lọ tọn mẹ, he yè ji sọn osósú awe mẹ: ¹¹ehemẹ ahọlu lọ yína Ju lẹ he tin to tòdaho dopodopo mẹ nado bó yéde plidopọ, podọ nado nọte na ogbó yetọn, nado và, nado hù, podọ nado sú huhlọn gbẹtọ lẹpo tọn do po tòyíyí he na péhẹ yé po, vivu yetọn lẹ po yọnnusi lẹ po, podọ nado bẹ́ ogblannu yé tọn na jawla de, ¹²to azán dopo ji to tòyíyí ahọlu Ahasuelusi tọn lẹpo mẹ, enẹwọ, to azán ogbàntọ osùn wiawetọ tọn ji, he yín osùn Adali lọ. ¹³Kinkàn wéwinwlan lọ tọn, nado yín nina dogbonu na asẹ de, wẹ yè lá hlan akọta lẹpo to tòyíyí dopodopo mẹ, podọ na Ju lẹ na do yín awuwletọ do azán nọ gbè ji nado yíahọsuna yéde to kẹ̀ntọ yetọn lẹ go. ¹⁴Mọwẹ bẹ́dopọ lẹ lọ he hẹ́ otlò awuyatọ lẹ ji he yì, to zinzán to azọ́n ahọlu tọn mẹ lẹ tọ́n yì, yín yín awuyatọ zínzínnọ jei gbọn gbèdide ahọlu tọn dali; yè sọ na aṣẹ lọ dogbonu to Ṣuṣani ohọ̀nmẹ lọ mẹ. ¹⁵Mọldekai sọ tọ́n jẹgbonu yì sọn nukọn ahọlu lọ tọn to ahọluva jùjù tọn po wéwé po mẹ, po ojẹgbakun sika tọn daho de po, po otewu alà dagbedagbe de tọn po po ogèfanwunmẹ po: tòdaho Ṣuṣani tọn sọ dabobo bo yín homẹhùnnọ. ¹⁶Ju lẹ lọ sọ tindo hinhẹn po homẹhùn po, po ayajẹ po po ogbégbo po. ¹⁷Podọ to tòyíyí dopodopo mẹ, podọ to tòdaho dopodopo mẹ, fidepope gbèdide ahọlu lọ tọn po aṣẹ etọn po wá, Ju lẹ lọ tindo homẹhùn po ayajẹ po, ohùnwhẹ de po azán dagbe de po. Podọ mẹsusu sọn akọta aigba lọ tọn lẹ mẹ lẹzùn Ju; na yè hẹn obu Ju lẹ lọ tọn flẹjẹ yé ji.

¹DINVIE to osùn wiawetọ mẹ, he yín osùn Adali, to azán wiatòntọ doponẹ lọ tọn, whenuena gbèdide ahọlu tọn po asẹ etọn po dọ̀n sẹpọ́ nado yí do ohẹndi mẹ, to azán he mẹ na kẹ̀ntọ Ju lẹ tọn lẹ dotó nado tindo ogándù to yé ji; mimọdọ yè ko diọ ẹ do dèvo, dọ Ju lẹ tindo ogándù to yé he gbẹwanna yé lẹ ji; ²Ju lẹ bẹ́ yéde plidopọ to tòdaho yetọn lẹ mẹ lẹ́do tòyíyí ahọlu Ahasuelusi tọn lẹ mẹ, nado dèalọ do omẹ hunkọ he to dindin awugble yetọn ji: omẹ de ma sọ sọgan glọn yé; na yè hẹn osi yé tọn flẹjẹ akọta ewlẹ pó ji. ³Ahọvi tòyíyí tọn lẹpo, po oglosú lẹ po, po otògán lẹ po, po yé he nọ wà azón ahọlu tọn lẹ po gọalọna Ju lẹ; na yè hẹn osi Mọldekai tọn flẹjẹ yé ji wutu. ⁴Na mẹkiklo wẹ Mọldekài to owhé ahọlu tọn gbè, olinlin etọn sọ tón yì lédo otòyíyí lẹpo mẹ: na dawe lọ Mọldekai to lilẹ́zùn kiklo dejideji. ⁵Ju lẹ sọ yí lili ohi tọn do hò kẹ̀ntọ yetọn lẹpo, podọ hùhù po vivà po, bo sọ wà núhe yé jlo hlan yé he gbẹwanna yé lẹ. ⁶Podọ to Ṣuṣani ohònmẹ lọ mẹ Ju lẹ hù bo sọ và omẹ fowekanweko. ⁷Palsandata, po Dalfọni po, po Aspata po, ⁸po Polata po, po Adalia po, po Alidata po, ⁹po Palmasta po, po Alisai po, po Alidai po, po Vaizata po, ¹⁰visunnu ao Hamani visunnu Hamẹdata tọn tọn lẹ, kẹ̀ntọ Ju lẹ tọn lọ wẹ yé hù; aigba ogbànna lọ go wẹ yé ma zé alọ yetọn do gba. ¹¹To azán nẹ gbè yè hẹn osọha enẹlẹ tọn he yè hù to Ṣuṣani ohọ̀nmẹ lọ mẹ wá ahọlu nukọn. ¹²Ahọlu sọ dọ hlan Esteli ahọsi lọ dọmọ, Ju lẹ ko hù bo sọ và omẹ fọwekanweko to ṣusani ohònmẹ lọ mẹ, po visunnu ao Hamani tọn lẹ po; etẹwẹ yé ko wà lò to pipòtọ otòyíyí ahọlu lọ tọn lẹ mẹ! Dinvie etẹwẹ okanbiọ towe? yè na sọ yína we: kavi etẹ́ sọ wẹ obiọ towe deji? é na sọ yín wiwà. ¹³Whenẹnu wẹ Esteli dọmọ, Eyín é hẹnhomẹhùn ahọlu, gbọ é ni yín yína hlan Ju lẹ he tin to Ṣuṣani mẹ nado wà to osò ga kẹdẹdi aṣẹ egbé tọn, bo sọ gbọ visunnu ao Hamani tọn lẹ ni yín zépla do atin go. ¹⁴Ahọlu sọ degbè etọn mọ nado yín wiwà: yè sọ na asẹ tọ́njẹgbonu to Ṣuṣani mẹ; yé sọ zé visunnu ao Hamani tọn lẹ pla. ¹⁵Ju he tin to Ṣuṣani mẹ lẹ bẹ́ yéde plidopọ to azán wiẹnẹtọ osùn Adali tọn gbè ga, bo sọ hù omẹ fọdekanweko to Ṣuṣani mẹ; ṣigba ogbànna lọ ji wẹ yé ma zéalọ yetọn do gba. ¹⁶Ju dèvo lẹ he tin to tòyíyí ahọlu tọn lẹ mẹ bẹ́ yéde plidopọ, bo nọte na ogbẹ́ yetọn lẹ, bo tindo ogbọjẹ sọn kẹ̀ntọ yetọn lẹ si, bo sọ hù sọn yé he gbẹwanna yé lẹ mẹ fọtọ́n kandegbãntọ́n: ṣigba to ogbànna lọ ji wẹ yé ma zéalọ yetọn do gba. ¹⁷Ehe yín wiwà to azán wiatòntọ osùn Adali tọn mẹ, podọ to azán wiẹnẹtọ doponẹ lọ tọn mẹ yé gbọjẹ, bo sọ yí i do basi azán ohùnwhẹ́wiwà po homẹhùn po tọn de. ¹⁸Ṣigba Ju he tin to Ṣuṣani mẹ lẹ pli dopọ to azán wiatòntọ etọn gbè, podọ to azán wiẹnẹtọ etọn gbè; podọ to azán fọtóntọ doponẹ lọ tọn gbè yé gbọjẹ, bo sọ yí i dọ basi azán ohùnwhẹ́wiwà po homẹhùn po tọn de. ¹⁹Enẹwutu wẹ Ju gbeta lẹ tọn lẹ, he nọnọ̀ otò madodòkọnọ lẹ mẹ yí azán wiẹnetọ osùn Adali tọn lọ do basi azán homẹhùn po ohùnwhówiwà po tọn de, podọ azán dagbe de, po dido mimá lẹ hlan omẹ de hlan omẹ de tọn po.

²⁰Mọldekai wlan onú helẹ, bo do ohówó lẹ hlan Ju he tin to tòyíyí ahọlu Ahasuelusi tọn lẹpo mẹ, ehe sẹpọ́ po ehe to olá po, ²¹nado nọ naṣẹ yé na yé nido nọ yìn azán wiẹnẹtọ osùn Adali tọn lọ, po azán fọtóntọ doponẹ lọ tọn po, whèmẹwhèmẹ, ²²di azán lẹ ehe mẹ Ju lẹ tindo ogbọjẹ sọn kẹ̀ntọ yetọn lẹ si, podọ osùn lọ he yè diọ hlan yé sọn awubla mẹ do homẹhùn mẹ, podọ sọn ohòninò mẹ do azán dagbe de mẹ: na yé nido yí yé do basi azán hùnwhèwiwà po homẹhùn po tọn lẹ, po dido mimá lẹ hlan omẹ de hlan omẹ de tọn po, po nunina lẹ po hlan wamọnọ. ²³Ju lẹ lọ yígòna nado wà dile yé ko sè do, podọ dile Mọldekai ko wlan dohlan yé do; ²⁴na Hamani visunnu Hamẹdata, Agaginu lọ tọn lọ, kẹ̀ntọ Ju lẹpo tọn, kanyiha do Ju lẹ go nado và yé; bo ko dlẹn Puli, enẹ wẹ ovò lọ, nado sú yé do, podọ nado và yé; ²⁵ṣigba whenuena owhèhó lọ wá ahọlu nukọn, é degbè gbọn ohówé lẹ dali dọ ayihakàn ylankan etọn, he é ko do kanyiha do Ju lọ go, nido diọ gò do ota etọn titi ji; podọ na ewọ po visunnu etọn lẹ po nido yín zizópla do atin lẹ go. ²⁶Enẹwutu wẹ yé do nọ ylọ azán helè Pulimi kẹdẹdi oyín Puli tọn. Enẹwutu na ohó ohówó he tọn tọn lẹpo wutu, podọ enẹ he yé ko mọ gbọn owhèhó he tọn tọn dali, po enẹ he ko wá jẹ yé de po, ²⁷Ju lẹ lọ doai, bo sọ yí do yé ji, podọ do okún yetọn ji, podọ do mẹmọnkọ lẹpo ji he kòn yéde dopọ hlan yé de, do mọ dọ e ni ma do fé, dọ yé na nọ yìn azán awe helẹ kẹdẹdi winwlan etọn, podọ kẹdẹdi ojlẹ didè etọn lọ, to owhè lepo mẹ, ²⁸podọ yè nido nọ flin azán helẹ bo nọ yìn lẹ́dò whẹ̀ndo lẹpo me, whédo lẹpo, tòyíyí lẹpo, tòdaho lẹpo; podọ na azán Pulimi tọn helẹ ma na do fó sọn Ju lẹ ṣẹnṣẹn, kavi oflinnú yé tọn súdo sọn okún yetọn mẹ blo, ²⁹Whenẹnu wẹ Esteli ahọsi lọ, viyọnnu Abìhaili tọn, po Mọldekai Ju lọ po, yí huhlọn lẹpo do wlanwé nado hẹn ohówé awetọ Pulimi tọn he lódo ³⁰E sọ do ohówé lẹ hlan Ju lẹpo, hlan tòyíyí kantọ̀nṣinawe ahọludu Ahasuelusi tọn tọn lẹ mẹ, podọ ohó jijọho po nugbo tọn po, ³¹nado hẹn azán Pulimi tọn hel? lódo to ojlẹ didè yetọn lẹ mẹ, kẹdẹdi le Mọldekai Ju lọ po Esteli ahọsi lọ po ko nasẹ yé do, podọ dile yé ko doai na yé do podọ na okún yetọn lẹ, to owhèhó nùbibla lẹ tọn mẹ po awhá yetọn po. ³²Gbèdide Esteli tọn lọ sọ hẹn owhèhó Pulimi tọn helẹ lódo; yè sọ wlan ẹn do owé lọ mẹ.

¹AHỌLU lọ Ahasuelusi zé osènjọ de do aigba lọ ji, podọ do olòpo ohù tọn lẹ ji, ²Podọ owàlọ huhlọn etọn tọn lẹpo po hlọnhlọn etọn tọn po, po linlin gigọ́ kiklo Mọldekai tọn tọn lọ po, fìe ahọlu lọ zé e daga jẹ, be yè ma wlan yé to owé otànnugbo ahọlu Media po Pẹlsia po tọn lẹ tọn tọn lẹ mẹ? ³Na Mọldekai Ju lọ wẹ mẹbọdo ahọlu Ahasuelusi go, bo sọ klo to Ju lẹ ṣẹnṣẹn, podọ mẹkẹalọyí sọn agùndaho mẹmẹsunnu etọn lẹ lọ tọn mẹ; dindin dagbe omẹ etọn lẹ tọn, bo sọ nọ dọhó jijọho hlan okún etọn lẹpo.