Efesunu Lẹ

¹PAULU Apọsleli Jesu Klisti tọn de, gbọn-ojlo Jiwheyẹwhe tọn mẹ, hlan mẹwiwe he tin to Efesu lẹ, podọ hlan yisenọ to Klisti Jesu mẹ lẹ: ²Ojọmiọn, po jijọho po hlan mì sọn Jiwheyẹwhe Otọ́ mítọn de, podọ sọn Jesu Klisti Oklunọ de.

³Donanọ we Jiwheyẹwhe Otọ́ Jesu Klisti Oklunọ mítọn tọn, mẹhe yí odona gbigbọnọ lẹpo to oten he tin to olọn lẹ mẹ do dona mí to Klisti me: ⁴yèdọ dile é ko dè mí to e mẹ jenukonna dòdó aihọn tọn, na mí nido yín wiwe, podọ matin mọdọ do omẹ go to nukọn eton to owanyi me: ⁵meheko dè mí na sọdodovi ovi lẹ tọn gbọn Jesu Klisti mẹ na ede, kẹdẹdi homẹdagbe ojlo eton tọn, ⁶na pipa gigo ojọmiọn etọn tọn, ehemẹ yè ko hẹn mìwlẹ zùn omẹ kẹalọyi to Mẹyiwanna lọ mẹ. ⁷Mẹhe mẹ mìwlẹ ko mọ ofligò yí te gbọn ohùn etọn mẹ, ojona ylando tọn, kẹdẹdi adọkun susu ojomiọn etọn tọn; ⁸ehe ewọ ko yí nuyọnẹn lepo, po zìnzìn po do basi na mí susugege; ⁹mẹhe ko yí nudabla ojlo etọn ton hia mí, kẹdẹdi homẹdagbe ètọn he é ko lẹndai to ede homẹ: ¹⁰dọ, tó mimá ojlẹ gigọ́ lo tọn mẹ, ewọ nido hò onú lẹpo pli do dopo to Klisti mẹ, eyín ehè tin to olọn me, po ehe tin to aihọn mẹ po; yèdọ to ewọ mẹ: ¹¹to mẹhe mẹ mìwlẹ ko mọ ogú de yí te ga, mi he yè ko dè di wédido mẹhe to azón onú lẹpo tọn wa tọn, kẹdẹdi linlẹn ojlo ewlọsu tọn tọn ¹²Na mìwlẹ nido yín pipa gigo etọn ton, mẹhe dotu to Klisti me jẹnukọn lẹ. ¹³Mẹhe go mìwlẹ dotu lo ga, ehegodo mì ko sò ohó nugbo tọn lọ wẹndagbe whlẹngan mìtọn tọn; podọ ehegodo mì ko yise ga, mẹhe me yè yí Gbigbọ Wiwe opagbe tọn do dohia mì gò tè ¹⁴Ehe yín gòdenú ogú mítọn tọn, kakajẹ ofligò adọkun he yè hò na pipa gigo ètọn tọn me.

¹⁵Enẹwutu yẹn ga, to ehegodo yen ko sè yise mìtọn to Jesu Oklunọ me, po owanyi na mẹwiwe lẹpo po tọn, ¹⁶yẹn ma gbọjẹ nado dopé na mì wutu gba, yen sọ to oyín mìtọn ylọ to odọ ṣie lẹ mẹ; ¹⁷dọ, na Jiwheyẹwhe Jesu Klisti Oklunọ mítọn tọn, Otọ́ gigo ton, nido na gbigbọ nuyọnẹn tọn po osọhia tọn po hlan mì to oyọnẹn etọn mẹ: ¹⁸na le yè hẹn nukun nuyọnẹn mìtọn tọn zà; na mì nido yón etẹwẹ oylọ tódido onú etọn tọn yín, podọ etẹ adọkun gigo gududu etọn tọn to mewiwe le mẹ yín, ¹⁹po etẹ kiklo huhlọn etọn daho hlan mì mẹhe yise lẹ po tọn yín, kẹdẹdi hinhlọn huhlọn etọn tọn, ²⁰ehe é do wàzo Netọn to Klisti mẹ, whenuena é fọ́n ẹn sọn osiọ lẹ mẹ, bo sọ hẹn ẹn sinai to adusi ewlọsu tọn mẹ to otẹn he to olọn lẹ mẹ, ²¹yì aga hú otẹn ogán tọn, huhlọn, hlọnhlọn, po gigo daho po, po oyín he yè nọ ylọmẹ lẹpo po, é ma yín to aihọn he mẹ kẹdẹ, ṣigba to ehe ja mẹ ga: ²²é sọ yí onú lẹpo do afọ etọn glọ, 1 bo sọ yí na ẹn nado yín ota to onú lẹpo ji, agùn lé, ²³ehe yín agbasa etọn, gigé mẹhetọn gé onú popo to onú popo mẹ.

¹MI wẹ é ko fọ́n do ogbé, mí he ko ku to oylan wiwà po ylando po mẹ; ²to ehe mẹ mìwlẹ ko to zọnlinzin te to hóhó whenu kẹdẹdi owalọ aihọn he tọn, kedẹdi ahọvi huhlon agàhomẹ tọn ton, gbigbọ he to azọ́nwà to dinvie to ovi tólivive tọn lẹ mẹ: ³to mẹhe mẹ mí omẹ pó ga ko do owalọ mítọn to hóhó whenu to wantúntún agbasalan mítọn tọn mẹ, bọ mí sọ to ojlo agbasalan tọn po homẹ tọn po hẹn di; gbọn jijọ dali ovi homẹgble tọn wẹ mí, yèdọ, kẹdẹdi mẹdevo lẹ. ⁴Ṣigba Jiwheyẹwhe, he yín adọkunnọ to lẹblanu mẹ, gbọn owanyi daho etọn me ehe é do yiwanna mí, ⁵yèdọ whenuena mìwlẹ ko kú to ylando mẹ, é ko sọ fọ́n mí do ogbẹ̀ dopo hẹ Klisti, (gbọn ojọmiọn mẹ wẹ yè whlẹn mì gán;) ⁶yè ko zé mí daga hẹ ẹ, bo sọ hẹn mí sinai dopọ hẹ ẹ, to otẹn he to olọn lẹ mẹ, to Klisti Jesu mẹ: ⁷na to aihọn he ja mẹ, na é nido yí adọkun ojọmiọn etọn tọn hia susu to homedagbe etọn mẹ hlan mìwlẹ dali to Klisti Jesu mẹ. ⁸Na gbọn ojọmiọn mẹ wẹ yè whlẹn mì gán gbọn yise mẹ; podọ enẹ lọ ma sọ yín mìlọsu tọn gba; nunina Jiwheyẹwhe tọn wẹ: ⁹é ma yín gbọn azọ̀n tọn mẹ gba, na mẹde nikã yígo. ¹⁰Na mìwlẹ wẹ alọnuzọ́n etọn, he yè da to Klisti Jesu mẹ na àzọ́n dagbe lẹ, ehe Jiwheyẹwhe ko dè dai donukọn na mí nido nọ zinzọnlin to yé mẹ.

¹¹Enẹwutu mì flin do, to hóhó whenu mìwlẹ ko yín Kosi to agbasalan mẹ, yé he yè nọ ylọ Owhẹmagbo gbon enẹ he yè ylọ Owhẹgbo to agbasalan me, he yè yí alọ do basi; ¹²dọ ojlẹ he mẹ mí tin matindo Klisti, yínyín akọdevo sọn otògbé Islaeli mẹ tọn, podọ ojonọ sọn opagbe alènu le tọn mẹ, mí tin mado tódido, podọ mado Jiwheyẹwhe to aihọn mẹ: ¹³ṣigba dinvie to Klisti Jesu mẹ mì he ko tin to aganu bóbó to hóhó whenu wẹ yè so hẹn sẹpọ́ gbọn ohùn Klisti tọn me ¹⁴Na ewọ wẹ jijọho mítọn, mẹhe basi awe lẹ do dopo, bo sọ hó adó he yè do gbohè nẹ to ṣẹnṣẹn; ¹⁵bo sọ hù okèn nẹ súdo to agbasalan ewlọsu tọn mẹ, yèdọ osén asẹ lẹ tọn, ehe tin to ogbèdai lẹ me; na é nido da gbẹtọ yọ́yọ́ dopo to ewlọsu mẹ sọn awe lẹ mẹ, mọwẹ é to jijọho basi; ¹⁶podọ nido hẹn yé omẹ awe lẹ gbọwhẹ hẹ Jiwheyẹwhe to agbasa dopo mẹ gbọn satin lọ mẹ, é ko sọ hù ọkẹn lọ to e me: ¹⁷e sọ wá bo to yẹwheho jijọho tọn dọ hlan mì he tin to aganu bóbó lẹ, podọ hlan mẹhe sẹpọ lẹ. ¹⁸Na gbọn ewọ mẹ wẹ mí omẹ awe le ko mọ ali gbọn Gbigbọ dopo de jẹ Otọ de. ¹⁹Be enẹwutu mì ma sọ yín ojonọ po ogbéjinu po ba gba, ṣigba tòdopomẹnu hẹ mẹwiwe le, po whédo Jiwheyẹwhe tọn mẹ tọn le po; ²⁰yè sọ to mì zé dote do dodó Apọsteli lẹ, po yewhegán lẹ po tọn ji, Jesu Klisti lọsu wẹ osé gángán lọngíọnẹn rọn; ²¹mẹhe mẹ yè yí yẹyi lẹpo do wàzón ọhò lọ tọn te dopọ, he to whinwhén yì aga na tẹmpli wiwe de to Oklunọ mẹ: ²²mehe me yè sọ to mí dó dopọ te ga na aisintẹn Jiwheyẹwhe tọn de to Gbigbọ lọ mẹ.

¹NA ehe wutu wẹ yẹn Paulu ogàntọ Jesu Klisti tọn na mì Kosi lẹ tọn wutu, ²eyín mìwlẹ ko sè linlin azón mánamẹ ojọmiọn Jiwheyẹwhe tọn tọn he yè na mi hlan mì dali: ³le gbọn osọhia dali wẹ yè ko yí nudabla lọ zùn yinyọnẹn hlan mi te; (kẹdẹdile yẹn wlanwe ohó pẹvide tọn do donukọn, ⁴whenuena mìwlẹ hia ẹ, na mì nido tunwun nuyọnẹn ṣie to nudabla Klisti tọn mẹ gbọn e dali.) ⁵Ehe yè ma ko sọhia ovi gbẹtọ tọn lẹ gbède to hóhó whenu devo lẹ me, kẹdẹdile yè sọ yé hia dinyie hlan Aposteli etọn wiwe lẹ po yẹwhegán lẹ po to Gbigbọ mẹ; ⁶na Kosi lẹ nido yín whedutọgbé po agbasa dopo lọ tọn, po, podọ máhẹtọ opagbe etọn tọn to Klisti mẹ gbọn wendagbe mẹ: ⁷ehe tọn yè yí mi do basi devizọnwatọ, kẹdedi nunina ojọmiọn Jiwheyẹwhe tọn tọn he yè yí na mi, gbọn huhlọnzọn etọn me. ⁸Na yen, he whè gbahú godotọ to mẹwiwe lepo me, wẹ yè yí ojọmiọn he na, na yẹn nido dọyẹwheho dinmamọdòna adọkun susu Klisti tọn tọn hlan Kosi lẹ; ⁹podọ nado hen gbẹtọ lẹpo mọ etẹ we kọndopọ nudabla tọn lo, ehe yè sọ whlá to Jiwheyẹwhe mẹhe da onú lẹpo mẹ, Bọn owhenu lẹpo mẹ; ¹⁰nu dinvie yè nido hẹn nuyọnẹn hunkọhunkọ susugege Jiwheyẹwhe tọn zùn yinyọnẹn hlan ogán lẹ, po huhlọn he tin to otẹn olọn tọn lẹ po mẹ gbọn agùn lọ mẹ, ¹¹kẹdẹdi lẹndai madopodo lọ he yè ka lẹndai to Klisti Jesu Oklunọ mítọn me ¹²mẹhe dali mìwlẹ do tugbigbo te, ali po tudido po ga gbọn yise mẹ to ewọ me ¹³Enẹwutu yẹn biọ dọ mì wadidọ blọ na tuklajijẹ ṣie na mì tọn wutu, ehe yín gigo mìtọn.

¹⁴Na ehe wutu wẹ yẹn do tin to oklota to Otọ́ Jesu Klisti Oklunọ mítọn tọn de, ¹⁵mẹhe mẹ yè ylọ oyín whédo he tin to olọn mẹ po aihọn mẹ lepo po tọn te, ¹⁶na ewọ nido yí na mì, kẹdẹdi adọkun gigo etọn tọn, nado yí huhlọn do hẹn mì dogán gbọn Gbigbọ etọn mẹ to gbẹtọ homẹ tọn me; ¹⁷na Klisti nido nò ayiha mìtọn mẹ gbọn yise dali; dọ le yè ko yí afọ mìtọn hẹnai, bo sọ yí dòdó mìtọn hẹnai to owanyi mẹ do, ¹⁸Na mìwlẹ nido tunwun hẹ mẹwiwe lẹpo ga, onú he gbigblo, tedidi, sisọsiso, po ojiyiyi po yín; ¹⁹podọ nado yón owanjù Klisti tọn, he suhú nuyọnẹn, na mì nido gó na gigọ́ Jiwheyẹwhe tọn lẹpo.

²⁰Be na ewọ he sọgan basi susu hú ehe mí to bibiọ lẹpo, kavi hú ehe mí to linlẹn, kẹdẹdi huhlọn he to azónwà to mìwlẹ mẹ, ²¹ewọ wẹ gigo tin hlan to agùn mẹ podọ to Klisti Jesu mẹ, jẹ whẹndo lẹpo mẹ, kaka doidoi. Niṣẹ.

¹ENẸWUTU yẹn ogàntọ Oklunọ tọn to vivé mì dọ, na mìwlẹ ni to zọnlinzin dole é jẹ do na oylọ he mẹ yè ylọ mì do. ²To ayiwhiwhẹ lẹpo mẹ to wàlọmimiọn lẹpo mẹ, podọ to linsinsinyen mẹ, na mì ni nọ yí mìnọzọ to owanyi mẹ; ³na mìwlẹ ni sọ nọ yí tudido do nọ hẹn Gbigbọ do dopo to pọninọ jijoho tọn mẹ. ⁴Na agbasa dopo, po Gbigbọ dopo po wẹ tin, kẹdẹdile yè ylọ mì do tódido dopo mẹ, to oylọ mìtọn mẹ; ⁵Oklunọ dopo, yise dopo, baptẹm dopo, ⁶Jiwheyẹwhe dopo Otọ́ omẹ popo tọn, mẹhe tin to omẹ popo ji, podọ gbọn omẹ popo me, podọ to mì omẹ popo mẹ. ⁷Ṣigba hlan dopodopo mítọn wẹ yè yí ojọmiọn na, kẹdẹdi ojlé nunina Klisti tọn. ⁸Enẹwutu wẹ é dọmọ, Whenuena é ko hẹji yì aga, é plan mẹglọnọ lẹ do wlé awhànkanlinmọ, Bo sọ na nunina gbẹtọ lẹ. ⁹(Na ehe, é hẹji, etẹ ka wẹ, adavo dọ ewọ whéwhé ga wẹ ko jẹte yì aigba sabọ? ¹⁰Omẹ dopo he ko jete wẹ ko sọ hẹji yì fie yì aga hú olọn lẹpo, na é nido gò onú lepo.) ¹¹E sọ yí na mẹdelẹ azón apọsteli tọn; podọ na mẹdelẹ azọ̀n yẹwhegán tọn; na mẹdelẹ azọn evangehsti tọn; na mẹdelẹ azọ̀n lẹngbọhọtọ tọn po azọ̀n mẹplọntọ tọn po; ¹²nado hẹn mẹwiwe lẹ sọgbè, na devizònwiwà, nado hẹn agbasa Klisti tọn dote: ¹³kaka mí omẹ pó na do wá nò dopo to yisé mẹ, podọ to oyọnẹn Ovi Jiwheyẹwhe tọn tọn mẹ, hlan gbẹtọ he sọgbè de, hlan ojlẹnu tedidi gigò Klisti tọn: ¹⁴na sọn dinvie yì, mí ma yín yọ̀pọ ba, he yè na nọ doyìgọyìgọna, bọ yè na yí jẹhọn Òplón tọn lẹpo do nọ hẹn danpé, gbọn oklọ gbẹtọ tọn dali, po nuyọnẹn bublu tọn po, gbọn ehe mẹ yé nọ tọwù do nuglọ na oklọ; ¹⁵ṣigba mí ni nọ dọ nugbo to owanyi mẹ, na mí nido to whinwhẹn yì aga to ewọ mẹ to onú lẹpo mẹ, mẹhe yín ota, yèdọ Klisti: ¹⁶sọn mẹhe de yè yí yẹyi do sín agbasa lẹpo pli dopọ, bo sẹ̀awubọ dopọ gbọn ehe mẹ̀ yè gò agomẹ lẹpo, kẹdẹdi azọ́n he mọ nọ diọ lọ to òjlẹnu awà popo tọn mẹ, nado hẹn agbasa lọ sudeji hlan didó daga ede tọn to owanyi mẹ.

¹⁷Bé enẹwutu ehe wẹ yẹn dọ, bo sọ to kunnude to Oklunọ mẹ, sọn dinvie yì mì sọ zinzọnlin dile Kosi devo lẹ to zinzin do blo, to ovò ayiha yetọn tọn mẹ. ¹⁸Wuntùntùn yé he tọn do zinvlu, hé yè hẹn zùn akọdevo sọn ogbè Jiwheyẹwhe tọn mẹ, na mayọnen he tin to yé homẹ tọn wutu, na sinsinyẹn ayiha yétọn tọn wutu: ¹⁹yé mẹhe ayiha yetọn jẹglo, bọ yé sọ yí yéde na wantúntún, nado nọ yí nukunkẹn do wàzòn mawé tọn, po wọnkuku po. ²⁰Ṣigba yè ma yi Klisti do plòn mì do mọ gba; ²¹eyín mì ko segbè etọn nugbo, bọ yè ko sọ plòn mì sọn e de kedẹdile nugbo lọ yín to Jesu mẹ: ²²dọ mì ni klọn do apadopo owalọ ogbè mìtọn hóhó tọn; gbẹtọ hóhó lọ, he ko gblezọn hẹdẹdi wantúntún he gọ na oklọ, ²³na mì ni lẹzun yòyọ́ to gbigbọ ayiha mìtọn tọn mẹ; ²⁴na mì ni sọ zé gbẹtọ yọ́yọ́ lọ dogo, mẹhe yè da to dòdó mẹ di apajlẹ Jiwheyẹwhe tọn, podọ to jijọ wiwe nugbo tọn mẹ.

²⁵Enẹwutu mì jo lalodido dai, na mì omẹ pó ni nọ dọ nugbo hẹ kọmẹnu etọn; na awutugonu mìnọzo tọn wẹ mí. ²⁶Eyín mì gblehome, mì wàylando blo; mì sọ dike owhè biọ do homẹgble mìtọn ji blo: ²⁷mì na otẹn lẹgba blo. ²⁸Ewọ he nọ jajo, sọ jajo ba blo, ṣigba ni nọ wakoe, bo nọ yí alọ ètọn do wàzòn onú dagbe tọn, na ewọ nido tindo nado na mẹhe ma tindo. ²⁹Mì dike hógbè gbigble de tòn sọn onù mìtọn mẹ blò, ṣigba ehe yòn zinzán na didó daga, dile onú te do, na e nido wàzòn ojọmiọn tọn hlan mẹhe sè lẹ. ³⁰Mì hẹn homẹgblena Gbigbọ Wiwe Jiwheyẹwhe tọn blo, mẹhe yè ko yí do dohia mì go jẹ ofligòzángbè. ³¹Mì gbọ adi lẹpo, homẹfiọ, homẹgble, nutlọ, po ohó ylankan po, yè ni dè e sọn mì de po homẹkẹn lẹpo pò ga. ³²Mì nọ wà dagbe hlan mìnọzo, mì do homẹmimiọn, mì nọ jo ylando mìnọzo tọn, yèdọ dile Jiwheyẹwhe tó Klisti mẹ ko jona mì do.

¹ENẸWUTU mì yín mẹhodotọ Jiwheyẹwhe tọn di ovi yiwanna lẹ; ²bo nọ zinzọnlin to owanyi mẹ, yèdọ dile Klisti yiwanna mí ga, bọ é sọ yí ede na mí di nunina, podọ di avọ̀ hlan Jiwheyẹwhe na onú vivi he whénwan gblingblin de. ³Ṣigba ogàlilọ, pò mawé lẹpo po, kavi nukunkẹn, yè sọ ylọ oyín etọn to mì ṣẹnṣẹn ba blo, dile é jẹ na mẹwiwe lẹ do; ⁴na é bo yín ofén, kavi hógblo, kavi aslanyìnyìn; ṣigba mì kúkú gbọ bo nọ dopé. ⁵Na mì kọ yọn ehe dọ, ayòdetọ de ma tin, kavi omẹ mawé, kavi nukunkẹnnọ, hè yín bọsiọsẹntọ de, ma tindo ogú to ahọludu Klisti tọn po Jiwheyẹwhe tọn po mẹ gba. ⁶Mì dike mẹdepope yí ohó vò do kíọ mì blo; na ónú helẹ tọn wutu wẹ homẹgble Jiwheyẹwhe tọn ja ovi tólivivẹ tọn lẹ ji. ⁷Enẹwutu mì yín máhẹtọ po yé po blò. ⁸Na mìwlẹ ko yín zinvlu dai, ṣigba dinvie mì ko zùn hinhọ́n to Oklunọ mẹ; mì nọ zinzọnlin kẹdẹdi ovi hinhọ́n tọn lẹ: ⁹(na sinsẹ́n Gbigbọ tọn-tin to dagbewa, dódó, po nugbo lẹpo pó mẹ;) ¹⁰mì nọ dindona onú he yín alọkẹyi hlan Oklunọ ¹¹Mì dogbé hẹ azọ̀n zinvlu tọn he madosinsén blo, ṣigba mí kúkú gbo bo nọ wọhẹ yé ¹²Na winyannu we nado nọ dọ onú nẹlẹ he yè wà to nuglọ gbọn ye dali ¹³Ṣigba onú he yè nọ wọhẹ lẹpo wẹ yè yí hia gbọn hinhọ́n mẹ; na nudepope he sọawúhia wẹ hinhọ́n. ¹⁴Enẹwutu wẹ é dọmọ, Fọ́n, hiẹ he damlọn, bo sọ fón sọn okú mẹ, Klisti na na hinhọ́n we.

¹⁵Enẹwutu mì nọ payi do zinzọnlin to jijọ pipé mẹ, é ma yín di nulunọ gba, ṣigba di nuyọnẹntọ. ¹⁶Mì nọ fli ojlẹ; na ylankan wẹ azán lẹ wutu. ¹⁷Enewutu mì yín wunvinọ blo, ṣigba mì ni tunwun onú he ojlo Oklunọ tọn yín go. ¹⁸Mì sọ gọ́ na ovẹ̃n blo, ehe mẹ wàzẹjlego te; ṣigba mì gó na Gbigbọ. ¹⁹Mì nọ dọhó hẹ mìnọzo to ohàn wiwe mẹ, to ohàn pipa tọn mẹ, podọ to ohàn gbigbọnọ me, mì nọ kehàn, bo sọ nọ jihan gbèplì to ayiha mìtọn mẹ hlan Oklunọ; ²⁰bo nọ dopé whepoponu na onú lẹpo hlan Jiwheyẹwhe Otọ́ to oyín Jesu Klisti Oklunọ mítọn tọn mẹ; ²¹Mì nọ basi mẹmẹglọ hlan mìnọzo to osi Jiwheyẹwhe tọn mẹ.

²²Mì asi lẹ emi, mì nọ basi mẹmẹglọ hlan asú mìtọn lẹ taidi hlan Oklunọ. ²³Na asú wẹ ota asi tọn dile Klisti yín ota agùn tọn do; ewọ sọ wẹ Whlẹngantọ agbasa tọn. ²⁴Enẹwutu dile agùn yín mẹmẹglọ hlan Klisti do, mọ wẹ asi lẹ ga ni yín hlan asú yetọn lẹ to onú popo mẹ. ²⁵Mì asú lẹ emi, mì yiwanna asi mìtọn lẹ, yèdọ dile Klisti ga yiwanna agùn lọ do, bo sọ yí ede nẹ, ²⁶na ewọ nido klọ bo sọ yí lèwé osìn tọn do lè ẹ wé gbọn ohó lọ dali. ²⁷Na ewọ nido dẽ tọ́n hlan ede agùn gigonọ de, he ma do diho, kavi ehe gbì, kavi onú mọhunkọ tọn lẹ; ṣigba nido wé bo mado apa. ²⁸Mọkẹdẹ wẹ é jẹ na asú lẹ ni nọ yiwanna asi yetọn lẹ kedẹdi agbasa yéde tọn. Mẹhe yiwanna asi ètọn, é yiwanna ede. ²⁹Na mẹhe gbẹwanna agbasalan ede tọn de ma tin gbède; adavo ni to yìnyìn in, bo sọ to yẹyi wlé nẹ, yèdọ dile Klisti ga nọ basi na agùn do. ³⁰Na mìwlẹ wẹ awutugonu etọn, agbasalan etọn, po ohú agbasa etọn me tọn po. ³¹Ehe wutu wẹ sunnu na jo otọ́ etọn po onọ po dai, bo na sẹbọ do asi etọn go, bọ yé omẹ awe lẹ nasọ lẹzun agbasalan dopo. ³²Nudabla daho wẹ ehe: ṣigba Klisti po agùn tọn po wẹ yẹn to didọ. ³³Ṣigba na dopodopo mìtọn ni yiwanna asi etọn domọ yèdọ di ede; na yọnnu ni yí yẹyi do gbogbena asú etọn.

¹MÌ ovi emi, mì setónuna mejitọ mìton lẹ to Oklunọ me; na ehe we jlọjẹ. ²Gbogbéna otọ́ towe po onọ po; he yín osén tintan po opagbe po; ³na é nido yín dagbe na we, podọ na hiẹ nido nọ aihọn mẹ den. ⁴Podọ, mí otọ́ emi, mì hẹn homẹgblena ovi mìtọn lẹ blo, ṣigba mì nọ plón yé to hihò po hokónamẹ Okluno tọn po mẹ.

⁵Mì mẹmẹsi lẹ emi, mì setónuna yé he yín mẹmẹnu mìtọn lẹ dile agbasalan tọn te, to osi po sisọsisọ po mẹ, to ayiha dopo mẹ, di hlan Klisti; ⁶E ma yín yè mo mẹnukunta di mẹhe to gbẹtọ nukundagbe din tọn gba, ṣigba di mẹmẹsi Klisti tọn lẹ, mì nọ wà ojlo Jiwheyẹwhe ton son aviha mẹ; ⁷podọ to yíyí homẹdagbe do wàzón mẹ di hlan Oklunọ, é ma sọ yín hlan gbẹtọ gba: ⁸na mì ni yonẹn dọ onú dagbe depope mẹde wà, dopolọ wẹ é na mọ yí sọn Oklunọ de, yín e yín mẹmẹglọ, kavi mẹmẹdekannu. ⁹Podọ, mì mẹmẹnu le emi, mì basi dopolọ hlan yé, mì nọ dè alọ nutlọ mìtọn tọn po; na mì ni sọ yọnẹn dọ, Memenu mìtọn tin to ólọn mẹ ga; mẹhòpón gbẹtọ tọn ma tin to e de.

¹⁰To popolepo mẹ, mì yín huhlọnnọ to Oklunọ mẹ, podọ to hinhlọn huhlọn etọn tọn mẹ. ¹¹Mì zé gbaja Jiwheyẹwhe tọn lẹpo bla dogo, na mì nido nọte pehẹ bublu lẹgba tọn. ¹²Na é ma yín agbasalan po ohùn po wẹ mìwlẹ to ahidi hẹ gba, ṣigba hẹ ogan lẹ, hẹ huhlọn lẹ, hẹ nukontọ zinvlu aihọn he tọn lẹ, hẹ nútegbè gbigbọnọ lẹ to otẹn he tin to olọn lẹ mẹ. ¹³Enẹwutu mì zé gbaja Jiwheyẹwhe tọn lẹpo bla dogo, na mì nido nọavùnte to azán ylankan gbè, whenuena mì ko basi pópo vò, nado nọte. ¹⁴Mì nọte, enẹwutu, di mehe yè yí gbaja nugbo tọn do bla adaja na lẹ, na mi ni sọ bla otùnudo dódó tọn lọ dogo; ¹⁵na yè ni sọ yí awùwle wẹndagbe jijọho tọn do dofọpana afọ mìtọn. ¹⁶To popo lẹpo ji, mì yí sagba yise tọn hẹn, ehe mì na yí do simiyọn ogá meylankan ton lẹpo. ¹⁷Mì ni sọ yí ogángbakun whlẹngan tọn, po ohi Gbigbọ tọn po he yín ohó Jiwheyẹwhe tọn ¹⁸mì nọ yi whepoponu do hodé, to odè po ové lẹpo po mẹ, to Gbigbọ mẹ, na mì ni sọ nọ hó mìde to enẹ mẹ to vivẹnu lepo mẹ, po ovẹ̀ po na mewiwe lepo; ¹⁹podọ na yen, na yè nido na ogbè mi, na yẹn nido yí tugbigbo do kònu ṣie, nado hẹn nudabla wẹndagbe tọn zùn yinyọnẹn, ²⁰na ehe yẹn yín wendagun to ogàn mẹ; na yẹn nido yí tugbigbo do dohó to e me, dile é jẹ na mi nado dohó do.

²¹Ṣigba na mìwlẹ ga nido yón owhé ṣie, po le yẹn to bibasi do po, Tikiku, mẹmẹsunnu yiwanna, devizònwàtọ nugbonọ to Oklunọ mẹ, na do onú lẹpo hia mì: ²²mehe yẹn dohlan mi na ehe dopo lọ wutu, na mìwlẹ nido yón owhè mítọn, podọ na ewọ nido nahomẹmimiọn ayiha mìtọn.

²³Jijọho ni tin hlan mẹmẹsunnu le, owanyi po yise po, sọn Jiwheyẹwhe Otọ́ de, podọ sọn Klisti Oklunọ de. ²⁴Na ojọmiọn nì tin hẹ omẹ he yí homẹ wiwe do yiwanna Jesu Klisti Oklunọ mítọn lẹ. Niṣẹ.