Yewhehódọtọ

¹OHÓ yẹwhehódọtọ tọn, ovi Davidi tọn, he duáhọlu tó Jelusalẹm. ²Ovò to ovò mẹ, yẹwhehódọtọ lọ dọmọ, ovò to ovọ́ mẹ, popo lẹpo ovọ́ wẹ. ³Ale tẹwẹ gbẹtọ dù to magbọjẹ etọn he é basi to owhè glọ lẹpo mẹ. ⁴Whẹnudo dopo yì, whẹndo dèvo sọ wá: ṣigba aigba nọte kakadoi. ⁵Owhè ga zẹ̀, owhe sọ biọ, é sọ yawu yì otẹn etọn mẹ fie é zẹ̀ sọn. ⁶Jẹhọn to yìnyìfi jei huwaji dali, bo sọ nọ lẹ́gọ̀ do agewaji; é to yìnyìn lẹpó doi, jẹhon sọ lẹ́gọ̀ kẹdẹdi lilédo ẹton. ⁷Otọ̀ lẹpo wẹ to sisa biọ ohù mẹ; ṣigba ohù ma gọ, fie na otọ̀ lẹ, tọ sisa sọn, finẹ wẹ yé sọ gọ̀ do. ⁸Onú popo wẹ gó na azón; gbẹtọ ma sọgan dọ ẹ: pinpọ́n ma nọ si nukun, mọ otọ́ ma nọ gó na sisè. ⁹Onú he tin jàn wẹ na tin; podọ ehe yè ko basi jàn wẹ ehe yè na basi; onú yọ́yọ́ de ma tin to owhè glọ. ¹⁰Bé onú de tin ehe tọn dali yè dọmọ, pọ́n, yọ́yọ́ wẹ éhe é ko tin sọn whenu hóhó he ko tin jẹnukọnna mí. ¹¹Oflin ma tin na onú nukọn tọn; mọ oflin ma na sọ tin na onú godo tọn he ja, yé he ja lẹ de wẹ whenu godo tọn te.

¹²Yẹn yẹwhehódọtọ duahọlu do Islaeli ji to Jelusalẹm. ¹³Yen yí ayiha do, nado din podọ nado módona nuyọnẹn na onú he yè to wiwà to olọn glọ lẹpo tọn, magbọjẹ vivẹ́ he wẹ Jiwheyẹwhe yí na ovi gbẹtọ tọn lẹ nado jẹtukla to e mẹ, ¹⁴Yẹn ko mọ azọn he yè to wiwà to olọn glọ lẹpo; bo dayi e go, ovọ́ wẹ popo lepo, podọ homẹgble gbigbọ tọn. ¹⁵Ehe gbán, yè ma sọgan hẹn jlọ: ehe gbopò, yè ma sọgan yisọha na. ¹⁶Yẹn sọ dọhó hẹ ayiha dẽ tọn dọmọ, i dayi e go, yen tindo nuyonẹn daho, yen sọ yí do gó e hú yé omẹ pó he ko jẹnukọnna mi lẹ to Jelusalẹm; ayiha ṣie sọ mọ onú susu daho gbọn nuyọnẹn po zìnzìn po tọn dali. ¹⁷W henuena yẹn yí ayiha ṣie do nado yón nuyọnẹn podọ nado yọn ale nululu tọn; yẹn mọ dọ, ehe lọsu homẹgble gbigbọ tọn wẹ ga. ¹⁸Na to nuyọnẹn susu mẹ wẹ awubla susu te, ewọ he sọ to nuyọnẹn hẹn zùn susu, to awubla hẹn zùn susu.

¹YẸN dọ to ohò ṣie mẹ dọ, wá dinvie, yẹn na yí aihun-ayajẹ tọn do whle we pọ́n, enẹwutu to ogbẹ dù, sọ dayi e go, ovọ́ wẹ ehe ga. ²Yẹn dọ na nukiko ídọ Nulu wẹ hiẹ: podọ na aihunayajẹ tọn dọ etẹ wà wẹ hiẹ te? ³Yẹn lẹn to ayiha ṣie mẹ nado yí vẹ̃nhàn do hẹn agbasa ṣie ló, ṣigba yẹn to nuyọnen yí do to ayiha plọn; podọ nado yí alọ ṣie do nulu ji, kaka yẹn na do mọ onú he yọ́n na ovi gbẹtọ tọn, he yé do nọ wà to gbèzán yetọn: lẹpo mẹ, ⁴Yẹn wàzón daho na de yẹn gbá ohò susu na dẽ; yẹ́n do vẹn-gle na dẽ. ⁵Yẹn basi pákan po jipa dagbedagbe po na dẽ, yẹn sọ do atin; hunkọhunkọ sinsẹ́n tọn do yé mẹ. ⁶Yẹn basi tandó susu nado nọ bà osìn sọn yé mẹ do ozùnhe nọ hẹn atin jẹgbonu wá lẹ mẹ. ⁷Yẹ́n tindo devisunnu po deviyọnnu lẹ po, yẹn sọ tindo jidowhé lẹ: yẹn tindo adokun oyin-pó po lẹngbo dahòdahò po tọn lẹ hú yéheko tin jẹnukọnna mi to Jelusalẹm lẹpo. ⁸Yẹn sọ bẹ fataka pó sika pọ pli, adọkunnu ahọlu tọn po gbetatò lẹ tọn po, yẹn tindo ogán sunnu tọn le po ogán yọnnu tọn lẹ po, podọ vivi gbẹtọ homẹ ton, asi po yọnnu susu po. ⁹Mọwẹ yen klo bo sọ sudeji, hú yé he tin jẹnukọnna mi to Jelusalẹm lẹpo: nuyọnẹn ṣie sọ tin to dẽ. ¹⁰Onú depope nukun ṣie jlo yen ma yí whlá do e; yẹn ma sọ whlẹn onu ayajijẹ tọn de do ayiha ṣie; na ayiha ṣie jaya to azọn ṣie lẹpo mẹ; éhe sọ wẹ mimá ṣie sọn magbọjẹ ṣie lẹpo mẹ. ¹¹Whenuena yẹn pọn azọ́n he: alọ ṣie wà lepo, podọ magbọje he yẹn jẹtukla nado wà: sọ dayi e go, ovọ́ wẹ popo lẹpo, podọ homẹgble gbigbọ tọn, ale de ma tin to owhè glọ.

¹²Yẹn sọ lẹn nade nado pọ́n nuyọnẹn, alè, po nulu po: na etẹwẹ dawe he ja to ahọlu godo lọ na sọgan wà? yèdọ enẹ he yè ko wà pó. ¹³Whenẹnu wẹ yẹn mọ dọ nuyọnen hugán nulu, sọle hinhọ́n hugán zinvlu, dó ¹⁴Nukun nuyọnentọ tọn tin to ota etọn; ṣigba nulunọ to zọnlinzin to zinvlu mẹ: yen lọsu sọ yọnẹn ga dọ nuwàmẹ dopolọ wẹ to yé òmẹ pó wà. ¹⁵Whenẹnu wẹ yẹn dọ to ayiha ṣie mẹ dọ, Le é to jijọ do nulunọ go do, mọwẹ é to jijọ do yẹn lọsu go do, etẹwẹ yẹn yọnnuin hú na? Whenẹnu we yẹn dọ to ayiha ṣie mẹ dọ, ovó wẹ ehe lọsu ga. ¹⁶Na oflin ma tin na nuyọnẹntọ po nulunọ po kakadoi; na yè ni pọ́n ẹn dọ le ojlẹ he juwayi te, mọwẹ azán he ja te, yè na wòn popo lẹpo. Nawe nuyọnẹntọ to kúkú di nulunọ do? ¹⁷Enẹwutu yen gbẹwanna tintinto-gbẹ̀: na azón he yè wà to owhè glọ, oylan we na mi: na ovọ́ wẹ popo lẹpo, podọ homẹgble gbigbọ tọn wẹ.

¹⁸Nugbo yẹn gbẹwànna magbọjẹ ṣie hemẹ yẹn jẹtunla te to owhè glọ; na yẹn na jo e dai na òmẹ he ja to godo ṣie wutu. ¹⁹Mẹnu wẹ sọ yọnẹn eyín nuyọnẹntọ wẹ é na yín kavi nulunọ? gãnṣo ewọ wẹ na yín ogán azọ́n ṣie lẹpo tọn he mẹ yẹn do dẽ hia te di nuyọnẹntọ to owhe glọ. Ovọ́ wẹ ehe lọsu ga. ²⁰Enẹwutu yẹn danyì nado hẹn ayiha ṣie sọn magbọjẹ ṣie he mbasi to owhè glọ go. ²¹Na omẹ de tin, azọ́n mẹhetọn tin ío nuyọnẹn mẹ, podọ to zìnzìn mẹ, podọ to kunnumahu mẹ; gãnṣo mẹhe ma jẹtukla to e mẹ wẹ é na jo e dai na na mima etọn. Ehe ga ovọ́ wẹ, oylan dahodaho wẹ. ²²Na etẹ wẹ gbẹtọ tindo to magbọjẹ etọn lẹpo mẹ bọ é do to tuklajẹ to owhè glọ? ²³Na azán etọn lẹpo awubla wẹ, azọ́n etọn, homẹgble, nugbo, ayiha etọn ma gbọjẹ to ozán mẹ. Ehe lọsu ga ovọ́ wẹ;

²⁴Onú de ma yọn na gbẹtọ hú ni dù, bo sọ nù, podọ é ni hẹn ayiha etọn dù vivi onú dagbe tọn to magbọjẹ etọn mẹ. Ehe wẹ yen mọ ga dọ, Jiwheyẹwhe de wẹ é sọn. ²⁵Na mẹnu wẹ sọgan dùnú, kavi mẹnu ga wẹ sọgan yọ́n vivi hú mì? ²⁶Na Jiwheyẹwhe na nuyọnẹn, zìnzìn, po ayajijẹ po omẹ he jẹ to nukun etọn mẹ: ṣigba ylandonọ wẹ é yi yankọ na, nado to bibẹ́ pli podọ nado to tito pli na ewọ nido to yíyína omẹ dagbe to Jiwheyẹwhe nukọn. Ehe lọsu ovọ́ wẹ, homẹgble gbigbọ tọn wẹ.

¹ONÚDOPODOPO wẹ ojlẹ de tin na, podọ whenu na azọ́n lepo to owhè glọ. ²Whenu mẹ̀ji tọn de, po whenu kúkú tọn po, whenu dido tọn de, podọ whenu gbingbèn onú he yè do tọn de; ³whenu hùhù tọn de, podọ whenu hinhẹn jẹgángán tọn; whenu hihọ́ liai tọn de, podọ whenu zízédote tọn; ⁴whẹnu avívíví tọn de, podọ whenu nukiko tọn; whenu awubibla tọn de, podọ whenu wèdúdú tọn; ⁵whenu zánnu bibó kọnyingbé tọn de, podọ whenu zánnu bibẹ́ pli tọn: whenu yiyí alọ do dònmẹ do ogo tọn de, podọ whenu nado jagọ̀ sọn ome de to yiyí alọ do dọ̀nmẹ do ogo mẹ. ⁶Whenu dindinmọ tọn de, podọ whenu hinhẹn bú tọn; whenu yíyíwhlá tọn de, podọ whenu zizédlangbe tọn. ⁷Whenu hinhẹntlẹn tọn de, podọ whenu titò tọn; whenu abọẹninọ tọn de, podọ whenu hódido tọn; ⁸whenu wanyíyí tọn de, podọ whenu wangbéna tọn; whenu awhàn tọn de, podọ whenu jijọho tọn ⁹Ale tẹwẹ ewọ he to azónwàtindo to ehemẹ é to tuklajẹ te? ¹⁰Yẹn ko mọ oya he Jiwheyẹwhe na ovi gbẹtọ tọn lẹ nado to yaji to e mẹ. ¹¹E ko basi onú popo dagbedagbe to whenu etọn; é yí wẹkẹ do ayiha yẹtọn mẹ ga, mọ omẹ de ma sọgan mọ̀dona azón he Jiwheyẹwhe to wiwà son dòdo kaka jẹ opòdo. ¹²Yẹn yọnẹn dọ dagbe de ma tin tò yé mẹ, adavo na gbẹtọ ni to ayajẹ, bo sọ to dagbe wà to ayiha etọn mẹ. ¹³Podọ na mẹdopodopo ni to dùdù, bo sọ to nùnù, na é ni to vivi magbọjẹ etọn lẹpo tọn dù, nunina Jiwheyẹwhe tọn wẹ. ¹⁴Yẹn yọnẹn dọ onú depope he Jiwheyẹwhe wà na tin doidoi, yè ma sọgan yí núde dogọ́ ẹ, mọ yè ma sọgan dè núde sẹ sọn e mẹ; Jiwheyẹwhe ko sọ wa ẹ na gbẹtọ nido nọ dibu to nukọn etọn ¹⁵Onú he ko tin dai tin to dinvie, podọ ehe na wá tin é ko tin; Jiwheyẹwhe sọ kàn ehe ko juwayi biọ.

¹⁶Humọ yẹn sọ mọ to owhè glọ ofi whẹ̀dida tọn dọ oylan tin to finẹ; podọ to ofi dódó tọn, dọ ylanwiwà tin to finẹ. ¹⁷Yẹn dọ to ayiha ṣie mẹ dọ Jiwheyẹwhe na dawhẹ dódónọ po mẹylankan po tọn; na whenu de tin na tadona podọ na azọ́n lẹpo. ¹⁸Yẹn dọ to ayiha ṣie mẹ gbọn aisintẹn ovi gbẹtọ lẹ tọn dali; na Jiwheyẹwhe ni sọgan do yé hia, podọ na yé ni mọ dọ kanlin wẹ yelọsu na yéde ¹⁹Na onú he to ovi gbẹtọ tọn wà to kanlin wà; yèdọ onú dopolọ wẹ to yé wà: le tintan to kúkú; mọwẹ awetọ to kúkú; nugbo gbigbọ dopolọ wẹ yé omẹ pó tindo, mọ gbẹtọ ma tindo kiklo hú kanlin: na ovọ́ wẹ yé omẹ pó. ²⁰Fidoponẹ wẹ yé omẹ pó jei; Okù mẹ wẹ yé omẹ pó sọn, yé omẹ pó sọ diọ lẹzùn okọ́. ²¹Mẹnu wẹ yọ́n gbigbọ gbẹtọ tọn eyín é to oji hẹ dokò aga, podo gbigbọ kanlin tọn eyín é to tejẹ dokò aigba glọ. ²²Enẹwutu yẹn lẹn dọ núde ma tin bo yọ́n hú na gbẹtọ ni to ayajẹ to àzọ̀n etọn titi mẹ; na enẹ wẹ mimá etọn; na mẹnu wẹ na hẹn ẹn wá mọ onú he na tin to godo etọn.

¹MỌWẸ yẹn lé, bo sọ lẹn awusinyẹnnamẹ he yè to bibasi to owhè glọ lẹpo; yẹn sọ pọ́n dasìn yé he yè to awusinyẹnna lẹ tọn, yé ma sọ tindo homẹmiọnnamẹtọ; podọ to awusinyẹnnamẹtọ yetọn si wẹ huhlọn te; ṣigba yé ma tindo homẹmiọnnamẹtọ. ²Enẹwutu yẹn pa osiọ he ko kú é dẹn hú nutẹgbẹ he gbé sọ tin to ogbẹ̀. ³Nugbo ewọ he ma ko tin ponte hú yé omẹ awelẹ; mẹhe ma ko mọ azọn ylankan he yè to wiwà to owhè glọ.

⁴Dọgọ́, yẹn lẹn yankọ lẹpo, po nuyọnen azọ́n tọn lẹpo po, dọ ehe wẹ homẹkẹn mẹde tọn sọn kọmẹnu etọn de. Ovọ́ wẹ ehe ga, homẹgble gbigbọ tọn wẹ. ⁵Nulunọ hò alọ etọn do alọ mẹ, bo sọ dù olàn ede tọn ⁶Núdùdù alọgogo dopo po adọjai po, pọnte hú alọgogo awe he gọ́ na magbọjẹ po homẹgble gbigbọ tọn po.

⁷Whenẹnu wẹ lẹ́n ló, bo sọ mọ ovó to owhè glọ. ⁸Omẹ dopo akàn tin, é ma tindò omẹ awetọ; nugbo, e ma tindo ọvì, mọ e ma tindo nọvisunnu; gãnṣo opòdo ma tin to magbọjẹ etọn lẹpo mẹ: mọ adọkun ma pekọna nukun etọn; mọ é ma dọmọ, mẹnu wutu wẹ yen to magbọjẹ basi, bo de dagbe sọn gbigbọ ṣie si. Ehe lọsu ovọ wẹ, azón oyà tọn wẹ. ⁹Ome awe pọnte hú ome dopo; na yé tindo ale dagbe de na magbọie yeton. ¹⁰Na eyín yé jai, mẹde na ze ogbé etọn dote: ṣigba dindọn wẹ na ewọ he yín ewu dopo whenuena é jai; na é ma tindo mẹdẽvo he na ze e dote. ¹¹Dogọ́, eyín omẹ awe mlọnai do opó, whenẹnu wẹ ye na hlayozo: ṣigba nawẹ omẹ dopo na hlayozo do. ¹²Eyín omẹ dopo penu hẹ ewọ he tin dopo, omẹ awe na péhẹ ẹ: podọ okàn atọ̀nslodopọ ma yá winwén.

¹³Yòpọ yanọ he yín nuyọnẹntọ, pọ́nte hú yọnhọnọ po ahọlu nulunọ po he ma yọn le yè nọ lẹnnu do. ¹⁴Na gànhọ mẹ wẹ é tọ́n sọn wá, duahọlu: na awetọ lọ le yè ji i to ahọludu etọn me sọ lẹzùn wamọnọ. ¹⁵Yẹn mo yé he to ogbè bo to zọnlinzin to owhè glọ lepo, dọ yé tin po óvú lọ po, awetọ he nọte to oten etọn mẹ lọ. ¹⁶Opodo gbẹtọ tọn ma tin, yèdọ mẹhe ko tin jẹnukonna yelẹ tọn: yé mẹhe ja to godo etọn lẹ ma na jaya to ewọ mẹ. Nugbo ovọ́ wẹ ehe ga, homẹgble gbigbọ tọn wẹ.

¹SẸ̀ alọ towe do whenuena hiẹ jei ohò Jiwheyẹwhe tọn mẹ, bo wleawu nado sè hú nado basi ovẹ́ nulunọ tọn: na yé ma yọnẹn dọ yé to oylan wà gba. ²A yí onù towe do yawu blo, a sọ dike ayiha towe yawu dọ ohó to Jiwheyẹwhe nukọn blo, na Jiwheyẹwhe tin to olọn mẹ, hiẹ tin to: aigba ji; enẹwutu gbọ ohó towe ni yín vude. ³Na azọ́n susu dali wẹ odlọ nọ sọn; mọ gbọn ohó susu dali wẹ yè nọ yọ́n ogbè nulunọ tọn te. ⁴Whenuena hiẹ dopà hlan Jiwheyẹwhe, a nọte dẹn nado dèpà blo; na é ma tindo homẹhùnhùn de do nulunọ go gba. Sú ehe a dopà etọn. ⁵E pọnte dọ a ma dopá hú dọ a ni dopà bo ma dè e. ⁶A dike onù towe hẹn agbasa towe wàylan blo: a sọ dọ to mẹdagun Jiwheyẹwhe tọn nukọn dọ, nuyọnẹn wẹ blo; na etẹwutu wẹ Jiwheyẹwhe na gblehomẹ do ogbẹ̀ towe go, bo sọ hen azon alọ towe mẹ tọn gble ⁷Na le eyín odlọ susu mẹ wẹ ovó te, mọwẹ to oho susu mẹ ga: ṣigba hiẹ ni si Jiwheyẹwhe.

⁸Ey ín hiẹ mọ awusinyẹnnamẹ wamọnọ lẹ tọn, podo huhlọn yí do diọ whẹ̀dida po nugbo po to gbetatò de mẹ, a dike owhè lọ jawu do we blo: na mẹhe yì aga hugán to mehẹ yì aga họ́, podọ mẹhe yì aga hugán tin to ye nu ⁹Humọ ale aigba tọn omẹ popo tọn wẹ: yè to ahọlu lọsu sẹ̀n sọn ogle mẹ.

¹⁰Ewọ he yiwanna fataka, fataka ma na pékọ nẹ̃; mọ ewọ he yiwanna adọkun, adọkun ma na pékọ nẹ; Ovọ wẹ ehe ga. ¹¹Whenuena agbàn to susu deji, yé he sọ tọ dùdù i lẹ nọ to susu deji, dagbe tẹ́ tlẹ wẹ tin na ewọ he tindo é, adavo na yé ni yí nukun yetọn do to pinpọ́n ẹn. ¹²Vivi wẹ amlọn azọ́ntọ tọn, eyín é dùnú pẹvide kavi susu: ṣigba núpékọ adokunnọ tọn ma nọ dikẽ ni damlọn.

¹³Danú ylankan de tin bọ yẹn mọ to owhè glọ, yínylọna, adọkun he yè sọ whlá na awugble mẹhe tindo e tọn ¹⁴Na adọkun nẹlẹ súdo gbọn azọn ylankan dali; podọ eyín é sọ ji ovisunnu de, nude ma tin to alọ etọn mẹ. ¹⁵Le e zọ̀n tọ́n sọn ohò onọ etọn tọn mẹ, omẹ́ wẹ e na sọ lẹ́gọ̀ dile é wá do, é ma to na yí nude to magbọjẹ etọn mẹ, he é do hẹn to alọ etọn mẹ yì. ¹⁶Danú ylanylan wẹ ehe ga, dọ to ali lẹpo mẹ, le é wá do, mọwẹ é na yì do: ale té wẹ ewọ he to magbọjẹ basi na jẹhọn lọ tindo? ¹⁷To azán etọn lẹpo gbè ga, é to núdù to zinvlu mẹ, é sọ yín awublanọ susu, bo tindo lànmẹzọ̀n po homẹgble po.

¹⁸Dayi, e go, ehe yẹn mọ nado yín dagbe bo sọ jẹ na omẹ de wẹ nado dù, bo sọ nù, na é ni sọ to jijọho dù to magbọjẹ etọn he é basi to owhè glọ lẹpo me, to gbẹ̀zán etọn lẹpo mẹ, he Jiwheyẹwhe yí nẹ̃: na ehe wẹ mimá eton. ¹⁹Eyín Jiwheyẹwhe yí adọkun na mẹdepope, bo sọ na huhlọn ẹn nado dù to e mẹ: podọ nado yí mimá etọn, podọ nado jaya to magbọjẹ etọn mẹ: nunina Jiwheyẹwhe tọn wẹ ehe ga. ²⁰Na é ma na flin gbẹzán etọn susu de; na Jiwheyẹwhe yigbè nẹ̃ to homẹhùn ayiha etọn tọn mẹ wutu.

¹OYLAN de tin bọ yẹn mọ to owhè glọ, é sọ sù to gbẹtọ lẹ ṣẹnṣẹn. ²Mẹhe Jiwheyẹwhe yí adọkun, awubọ, po yẹyipo na, bọ onú de ma pò na ayiha etọn toonú he é jlo lẹpo mẹ, gãnṣo bọ Jiwheyẹwhe ma na huhlon ẹn nado dù to e mẹ, ṣigba jonọmẹ lẹ to dùdù i; ovó wẹ ehe, azọ̀n ylankan wẹ. ³Eyín sunnu de ji ovi kanweko, bo sọ tin owhè susu, sọmọ bọ azán owhè etọn tọn sù, bọ ayiha etọn ma gó na onú dagbedagbe, podọ yè ma disiọ etọn, yẹn dọ, ovi he yè ji azán mapémape pónte hú i. ⁴Na ovó po e po wẹ wá, é sọ yì to zinvlu mẹ, zinvlu wẹ yè na sọ yí ṣinyọndo oyín etọn. ⁵Humọ ewọ ma mọ owhè, é ma sọ yọ́n núde; ehe tindo ogbọjẹ hú awetọ. ⁶Yèdọ eyín é tlẹ tin owhè fọtọ́n whlawe, gãnṣo é ma ko mọ dagbe gba: bọ́ é ma yín òfì doponẹ wẹ yé omẹ pó jei? ⁷Magbọjẹ gbẹtọ tọn lẹpo wẹ na onù etọn, aigba yè ma ko pékọ na yiyi ayiha etọn tọn gba. ⁸Na ale tẹwẹ nuyọnẹntọ tindo hú nulunọ? etẹwẹ wamọnọ tindo he yón le yè nọ zinzọnlin to mẹgbẹ̀ le nukọn do? ⁹Ehe nukun mọ pọnte hú dindanpé ojlo tọn; ovó we ehe ga, homegble gbigbọ tọn wẹ.

¹⁰Ehe tin yè ko doyín nẹ̃ dai, yè ko sọ yọnẹn dọ, gbẹtọ wẹ: mọ é ma sọgan hoavùn hẹ ewọ he dohuhlọn hú i. ¹¹Dayi e go, onú susu wẹ tin bo nọ hen ovó ji deji, ale tẹwẹ gbẹtọ tindo? ¹²Na mẹnu wẹ yón onú he yón na gbẹtọ to aihọn he mẹ, sọha azán ovó etọn tọn he é to zinzán di oyó? na mẹnu wẹ sọgan dọ na gbẹtọ gbọn onú he na tin to godo etọn tọn dali to owhè glọ?

¹OYÍN dagbe yón hú nusisá he dewán akuẹgegenu tọn; okúzán hú gbẽgbe yè ji omẹ. ²E pónte na yì siọhumẹ hú na yì hùhwhegbé: na ehe wẹ opòdo gbẹtọ lẹpo tọn; mẹgbè ma sọ yí i do ayiha etọn mẹ. ³Awubia pónte hú nukiko; na gbọn nukunmẹ yinylọn mẹ yè hẹn ayiha jẹgángán. ⁴Ayiha nuyọnẹntọ tọn tin to siohumẹ; ṣigba ayiha nulunọ tọn tin to ohò aihun tọn mẹ. ⁵E pónte nado sè wọhẹ nuyọnẹntọ tọn hú na gbẹtọ ni dotó ohàn nulunọ tọn. ⁶Na di wúwú owun tọn to ozẹ́n glọ, mọwẹ nukiko nulunọ tọn te: ovó wẹ ehe ga. ⁷Nugbo, awusinyẹnnamẹ hẹn nuyọnẹntọ dalẹ: nunina sọ hẹn ayiha gble. ⁸Opòdo onú tọn pónte hú dòdo etọn; podọ ayiha mimiọnnọ hú ayiha saklanọ. ⁹A yawu to ayiha towe mẹ nado gblehomẹ blo, na homẹgble gbọjẹ to otù nulunọ tọn ji. ¹⁰Hiẹ dọ dọ, etẹwutu wẹ azán nukọn tọn pónte hú ehelẹ̃ blo? na hiẹ ma yí nuyọnen do kansè gbọn ehe tọn dali gba. ¹¹Nuyọnẹn yọnwhànpẹ di ogú de: podọ gbọn dali etọn ale tin na yé he to owhè mọ lẹ. ¹²Na agbó wẹ nuyọnẹn, yèdọ dile akuẹ yín agbó do: ṣigba ale zìnzìn tọn wẹ dọ, nuyọnẹn na ogb yé he tindo e lẹ. ¹³Tọn azọ́n Jiwheyẹwhe tọn, na mẹnu wẹ sọgan hẹn enẹ jlọ he ewọ basi do gbingbán? ¹⁴To jijọho zangbè, lẹnnu, dọ, le Jiwheyẹwhe do tintan do mọwẹ é da awetọ do, na ehe wutu dọ, na gbẹtọ ma na do mọ onu he ja to godo etọn.

¹⁵Onú popo wẹ yẹn mọ to àzán ovọ́ ṣie tọn gbè: nugbonọ tin bo dòn to dódó etọn mẹ, podọ mẹylankan tin bọ a, zán etọn dẹn to jijọ ylankan etọn me. ¹⁶Hiẹ basi dódo lankah blo; mọ hiẹ sọ yí dewe do basi nuyọnẹntọ lankàn blo; na etẹwutu wẹ hiẹ na và dewe? ¹⁷Hie basi oylan lankàn blo: mọ hiẹ sọ yín nulunọ blo; etẹwutu wẹ hie na kú whẹpo azán towo nado pé? ¹⁸E yòn na hiẹ ni té do ehe go; humọ hiẹ dè alọ towe sẹ̀ sọn ehe mẹ blo: na mẹhe dibu na Jiwheyẹwhe wẹ na gán sọn yé ome pó mẹ.

¹⁹Nuyọnẹn hẹn nuyonentọ dohuhlon hú huhlẹntọ ao he tin to otò mẹ. ²⁰Na gbẹto nugbonọ de ma tin to aigba ji, he to dagbe wà bo ma wàylan. ²¹Humọ a dayi ohó he yè to didọ lẹpo go blo; na hiẹ mkà sè devi towe to zùnzùn wè: ²²Na whlasusu wẹ ayiha towe yónẹn dọ hiẹlọsu ko zùn mẹdẽvo.

²³Odò ehe lẹpo tọn wẹ yẹn yí nuyọnẹn do din; yẹn dọi yẹn na yọnnuin: ṣigba aliho etọn dẹn do mi. ²⁴Ehe dẹn bo sọ siso gbàhugbahu, mẹnu wẹ sọgan din in mọ? ²⁵Yẹn yí ayiha ṣie do e go nado yọnẹn, podọ nado dindona, podọ nado din nuyọnẹn po zìnzìn po mọ, podọ nado yọ́n jijọ ylankan onulu tọn, yèdọ onulu po alẹdida po tọn. ²⁶Yẹn sọ mọ onú he vé hú okú, yèdọ yọnnu he ayiha etọn basi omọkanì po odò po, alọ etọn di homẹbla: mẹdepope he gọ homẹ Jiwheyẹwhe tọn hùn do na gán sọn e si; ṣigba ylandonọ wẹ yè na gbọn alọ etọn mẹ wle. ²⁷Dayi e go, ehé wẹ yẹn mọ, mọwẹ yẹwhehódọtọ dọ, to dòdin nẹ̃ dopodopo mẹ nado mọ soha etọn. ²⁸He ayiha ṣie gbẹ́ to dindinpé, ṣigba sunnusi dopo akàn to fọtọ́n mẹ wẹ yẹn mọ; ṣigba yọnnusi dopo to enẹlẹ mẹ, yẹn ma mọ gba. ²⁹Dayi e go, ehe dopo akan wẹ yẹn mọ dọ, Jiwheyẹwhe ko da gbẹtọ do titegbe ṣigba yé ko dọmó na dòdinnanú.

¹MẸNU wẹ di gbẹtọ nuyọnẹntọ? mẹnu wẹ sọ yọn tadèna onú tọn? nuyọnẹn hẹn nukunmẹ gbẹtọ tọn sẹ́, nukunsinsinyẹn etọn wẹ yè na sọ diọ. ²Yẹn lẹn hẹ we nado yìn osén aholu tọn, enẹ tọn wẹ na whiwhle Jiwheyẹwhe tọn wutu. ³A yawu nado tón yì sọn nukọn etọn blo: a nọte to onú ylankan mẹ blo: na onú he jlo e wẹ é nọ wà. ⁴Fie ohó ahọlu ton tin te, huhlọn tin to finẹ; menu wẹ sọ sọgan dọmó dọ, etẹ wà wẹ hiẹ te? ⁵Mẹdepope he yìn osẹ́n ma na yón onú ylanylan: ayiha gbẹtọ nuyọnẹntọ tọn whenu po whẹ̀dida po wẹ. ⁶Na onú he jlome lẹpo wẹ whenu po whẹ̀dida po tin na, enẹwutu oyà gbẹtọ tọn sù tọ ota etọn. ⁷Naé ma yón onú he ja wutu; menu wẹ sọgan dọ nẹ́: lè é na te do. ⁸Mẹde ma dohuhlọn to gbigbọ ji nado hen gbigbọ dote: mọ é ma sọ dohúhlọn to kúzángbè: ofligọ ma tin to awhàn lọ mẹ; mọ jijọ ylankan ma sọgan whlẹn klunọ yetọn lẹ, ⁹Onú he lẹpo wẹ yẹn mọ, bo sọ dayi azón he yè to wiwà to owhè glọ lẹpo go: whenu de tin ehe mẹ mẹde to gándù do omẹ awetọ ji: te na awugble etọn.

¹⁰Po enẹ po yẹn mọ didi ylankannọ lẹ lọ tọn, yé sọ wá oyòdo lọ kọn; yé hè ko sọ wà jijlọ lẹ yì sọn ofi wiwe lọ mẹ, bo sọ yín winwọn to tòdaho lọ mẹ: ehe ga ovọ́ wẹ. ¹¹Na yè ma hen whẹ̀dida di adonu do azón ylankan go, enẹwutu ayiha gbẹtọvi lẹ tọn jai to ohò yetọn mẹ nado: wa oylan. ¹²Eyín ylandonọ tlẹ wà oylan whlakanweko, bọ azán etọn sọ dite, ṣigba nugbo, yen yọnẹn dọ é na yọ́n na yé hẹ dibusi Jiwheyẹwhe lẹ, he dibu to nukọn etọn; ¹³ṣigba é ma ná yón na mẹylankan, mọ é ma na dòn azán etọn dite, he taidi oyẹ̀, na é ma dibu to nukọn Jiwheyẹwhe tọn wutu. ¹⁴Ovó de tin bọ yè to wiwa to aigba ji, dọ gbẹtọ nugbonọ tin, mẹhe go onu nọ jọ do di azọ́n mẹylankan tọn: podọ mẹylankan tin, mẹhe go onú nọ jọ do di azọ́n dódónọ tọn: Yẹn dọ ovó wẹ ehe ga. ¹⁵Whenẹnu wẹ yen pá aìhun, na gbẹtọ ma tindo onú dagbe to owhè glọ hú dùdù po nùnù po, podọ to ayajijẹ mẹ; na enẹ wẹ na nọte hẹ ẹ to magbọjẹ etọn mẹ to gbèzán etọn mẹ.

¹⁶Whenuena yẹn yí ayiha ṣie do nado yọ́n nuyọnẹn podọ nado yọ́n onú he yè to wiwa to aigba ji: (mẹde sa tin ga he mà mọ́ amlọn to okle po ozán po.) ¹⁷Whenẹnu wẹ yẹn pọ́n azon Jiwheyẹwhe tọn lẹpo, dọ gbẹtọ ma sọgan mọdona azón he yè to wiwà to owhè glọ gba: na eyín gbẹtọ tlẹ dovivẹnu nado dindona ẹn, gãnso e ma na sọgan mọ ẹn gba; humọ eyín gbẹtọ nuyonẹntọ lẹn nado dindona ẹn, gànẹo é ma na sọgan mọdona ẹn.

¹NA onú he wẹ yẹn lẹn to ayiha ṣie mẹ, yèdọ nado dindona ehe, dọ, dódónọ po nuyọnẹntọ po, po azón yetọn po, alọ Jiwheyẹwhe tọn mẹ wẹ é te: wanyinamẹ po wangbẹnamẹ po mẹhe yọnẹn de ma tin, ehe lẹpo tin to nukọn yetọn.

²Zẹnzẹn wẹ onú lepo te na yé omẹ pó; onú doponẹ wẹ to jijọ do dódónọ go, podọ do omẹy lankan go; do omẹ dagbe go, do wiwe, po mawé po go; do ewọ he to avọ́san po ewọ he ma to avọ́san po go; le omẹ dágbe te, mọwẹ ylandonọ te; podo ewọ he yí onú dowhle di ewọ he dibuna dẹhodo. ³Ehe wẹ oylan to onú he yè to wiwà tó owhè glọ lẹpo mẹ, dọ nuwiwà doponẹ wẹ to yé: omẹ popo go: podọ ayihagbẹtọvi lẹ tọn gọ na oylan, alọ́ sọ tin to ayiha yetọn mẹ whenuena yé tin to ogbè, podọ to enẹ godo, yé sọ yì osìọ lẹ de. ⁴Na mẹnu wẹ ewọ he yè dè, he tódido: megbè tọn tin na: na avún he to ogbè pónte hú kinnikinni kúkú. ⁵Na mẹhe to ogbẹ̀ yọnen dọ emi na kú; ṣigba osiọ lẹ ma yọ́n núde, mọ yé ma sọ tindo ale de ba; na oflin yetọn ko zùn winwọ̀n. ⁶Owanyi yetọn ga, po wangbẹnẹme yetọn po, po homẹkẹn yetọn po, é súdo to dinvie; mọ yé ma sọ tindo, mimá gbèdegbède to onú he yè to wiwà to owhè glọ mẹ ba.

⁷To yìyì na dewe, yí ayajijẹ do to núdùdú towe dù, bo sọ yí homẹhùnhùn do to! ovẹ̃n towe nù: na Jiwheyẹwhe kẹalọyí azón towe to dinvie. ⁸Gbọ avọ̀ towe ni nọ wé whepoponu: a sọ dike ota towe ba nusisá pò blo. ⁹Nọ yí homẹhùnhùn do nọ̀hẹ asi towe he hiẹ yiwanna to gbẹ̀zán ovọ́ towe tọn lẹpo mẹ; na enẹ wẹ mimá hiẹ tọn to aihọn he mẹ, podọ to magbọjẹ he hiẹ basi to owhè glo mẹ. ¹⁰Onú depope alọ towe mọ yín wiwá, yí huhlọn towe lẹpo do wà ẹ; na azọ́n ma tin, linlẹn ma tin, zinzán ma tin, kavi nuyọnẹn to kútomẹ fie hiẹ jei.

¹¹Yẹn gòdogodo bo sọ mọ to owhè glọ, dọ alewezun ma yín awuyatọ ton, awhàn ma yín huhlọntọ tọn, mọ núdùdù ma yín nuyọnẹntọ tọn, adọkun ma yín omẹ zìnzìn tọn, mọ nukundagbe ma sọ yín asiawàtọ tọn; ṣigba ojlẹ po kosọ po mẹ wẹ onú te na omẹ popo. ¹²Na gbẹtọ ma yọ́n whenu etọn ga; di whevi he yè wle to odò ylankan de mẹ, podo di ohè he yè wle to omò nu; mọwe yè to mọ̀do na gbẹtọvi lẹ to ojlẹ ylanylan mẹ whenuena é jai jẹ yé ji ajiji.

¹³Nuyọnẹn he wẹ yen mọ to owhè glọ, é sọ taidimẹ é klo na mi. ¹⁴Otò pevi de tin, po gbẹtọ vude po to e mẹ; ahọlu daho de sọ fọ́nawhàn yì e de, é sọ dosla do kòji nẹ̃, bo sọ gbá atọhò he klo do dànji nẹ̃. ¹⁵Yè sọ mọ dawe wamọnọ nuyọnẹntọ de to e mẹ, é sọ yí nuyọnen etọn do whlẹn otò lọ dai; ṣigba mẹde ma flinnú jẹ dawe wamọnọ lọ go gba. ¹⁶Whenẹnu wẹ yẹn dọmọ, nuyọnẹn pọ́nte hú huhlọn; ṣigba yè vlẹ dawe wamọnọ lọ, ogbè etọn ma sọ hùnú.

¹⁷Yè sè ohó gbẹtọ nuyọnẹntọ tọn abọẹabọẹ hú awhá ewọ he dugán to nulunọ lẹ ṣẹnṣẹn tọn. ¹⁸Nuyọnẹn pónte hú awhàn funnú: ṣigba ylandonọ dopo hẹn onú dagbe susu gble.

¹OSÙPÒ kúkú hẹn nusisá flusọ́ tọn gble na é na lùnwán ylankan: mọwẹ onulu pẹvide wà na ewọ he tin to nuyọnẹn po yẹyi po mẹ. ²Ayiha nuyọnẹntọ tọn tin to adusilọ etọn me; ṣigba ayiha nulunọ tọn tin to amìyọnlọ etọn mẹ. ³Podọ whenuena lununọ to zọnlinzin to aliho, nuyọnen etọn nọ zlọn yì, é bo na sọ dọ na ome dopodopo dọ nulunọ wẹ ewọ. ⁴Eyín ayiha ogán ton wlu do oji we, a jo oten towe do blo: na tajona nọ hòhuwhé ylando dàho. ⁵Oylan de tin he yẹn mọ to owhè glọ, di nuwàyìndo he sọn ahọlu de ⁶Yè zé onulu do otẹn yẹyi tọn mẹ, adọkunnọ lẹ sọ sinai to otẹn godo tọn mẹ. ⁷Yẹn mọ devi lẹ to osé ji, bọ ahọvi to zọnlinzin di devi to aigba. ⁸Ewọ he kùn odó de na jẹ e me; podọ mehe sọ to opá vún odàn na henadúi. ⁹Mẹhe to zánnu bli na sọ gbọn dali eton tindo awugble; podọ ewọ he sọ to nakezé wẹ é na dolẹgba. ¹⁰Eyín ogàn pònu, bọ ewo ma so gan onu eton, bé ewọ ni yí huhlọn do, ò: ṣigba ale nuyọnẹn tọn we nado do aliho hia. ¹¹Nugbo, eyín odàn henadú omẹ mado nújijlẹ; bé ale ma tin na nújlẹtọ gba. ¹²Ohó onù nuyọnentọ tọn wẹ ojọmiọn: ṣigba nuflo nulunọ tọn wẹ na zé ewlọsu mì. ¹³Dòdo ohó onù etọn mẹ tọn wẹ onulu, podọ opòdo ohó onù etọn mẹ tọn we alè dindọn tọn. ¹⁴Nulunọ ga gọ́ na ohó susu; gbẹtọ ma sogan dọ onú he na tin to godo etọn, mẹnu wẹ sọgan do nẹ̃. ¹⁵Magbọjẹ nulunọ tọn hẹn núsikọna ome dopodopo, na é ma yon le ye nọ yì oto me do. ¹⁶Dindòn wẹ na we, aigba E, whenuena ahọlu towe yín yọ̀pọ, bọ ahọvi towe lẹ to núdù, afọnnufú. ¹⁷Jijọhonọ wẹ hie, aigba E, whenuena ahọlu towe yín ovi yẹyinọ tọn, bọ ahọvi towe lẹ to núdù to ojlẹ he jẹ mẹ, na agbasa lilo he ma yín na vẹ̃nhan nùgóho. ¹⁸Gbọn awuwhle susu dali atin ohọ̀ tọn nọ dù dúdu; podọ gbọn alọ adidọ tọn mẹ, ohọ̀ sọ nọ to dùdúdùdu ¹⁹Nukiko wẹ yè nọ da hùnwhẹnu na, ovẹ̃n wẹ nọ hen homehùn, ṣigba akue wẹ nọ gblọngbena onú popo. ²⁰A zùn ahọlu blo, lala, éyín to linlẹn towe mẹ blo; a zùn adọkunnọ to abò towe mẹ blo; na ohẹ̀ oji aga tọn na zé ogbè lọ yì, onú he tindo awàfún na dọ owhẹ̀ lọ.

¹VÚNVÚN núdùdù towe do osìn nukunta; na hiẹ na mọ ẹn to azán susu godo. ²Yí mimá na ṣinawe podo na sinatòn ga, na hiẹ ma yón oylan he na tin to aigba ji. ³Eyín aslọ gọ na jikun, yé nọ túntún kòn do aigba ji: eyín atin họ jẹ hùwaji dali kavi jẹ agewaji dali, fie atin họ́ do finẹ wẹ é na nò. ⁴Ewọ he nọ dayi jẹhọn go ma to na donú gba; podọ ewọ he sọ to aslọ hopón ma to gbemẹnú na bé ⁵Le hiẹ ma yọ́n aliho jehon tọn, kavi le ohú nọ whẹ́n do to hohónọ hòmẹ: mọwe hiẹ ma sọgan yọ́n azọn Jiwheyẹwhe mehe to onú popo wa ton. ⁶Donú towe to afọnnufu, podọ to whèjai a hen alọ towe dote blo: na hiẹ ma yon ehe na wà dagbe, ehe kavi dọ́ntọn, kavi eyín yé omẹ awelẹ na yọ́n do zẹnzẹn. ⁷Nugbo hinhẹn vivi, onú dagbe sọ wẹ na nukun nado pọ́n owhè. ⁸Ṣigba eyín gbẹto tin hò owhè susu, bọ é sọ to ayajẹ to ye omẹ pó mẹ, gãnṣo gbọ ni flin azán zinvlu tọn, dọ é na sù. Onú he ja lẹpo ovo wẹ.

⁹To ayajẹ to, ovú whenu towe, hiẹ ome winyanwinyan E, bo so gbọ ayiha towe ni doawuyana we to ovú whenu towe, bo sọ to zọnlinzin to aliho ayiha towe ton ji, podọ to mimọ nukun towe tọn mẹ; ṣigba hiẹ ni yón ehe dọ, na onú helẹ Jiwheyẹwhe na hẹn we biọ whẹ̀dida mẹ. ¹⁰Enẹwutu hòn awubla sẹ́ sọn ayiha towe mẹ, bo sọ dè oylan sọn agbasa towe go: Na ovú po yòpọ whenu po ovọ́ wẹ yé.

¹FLIN medatọ towe to azán ovú whenu towe tọn, whenuena azán oylan tọn ma ko wá, bọ owhè ma ko sẹyamẹ, whenuena hiẹ na dọmọ, yen ma tindo homẹhùn to yé mẹ gba. ²Whe-nuena owhè kavi hinhọ́n, kavi osùn, kavi sùnwhlẹvu lẹ ma ko dozinvlu, bọ aslọ ma ko diọko to jikun godo. ³Azán he gbè whehọtọ lẹ na siso, bọ sunnu huhlọntọ lẹ na dé yéde, nùlitó lẹ na nabọe na yé ma sù sọmọde bà, podọ yé henọ pongbonu hlan sọn vẹsẹnu lẹ na dozinvlu ⁴Bọ ohọ̀n na sú to tòhòmẹ, whenuena zingidi osé tọn na huwhẹ́, bọ mẹde na sọ fọ́n to ogbè awhá ohó de tọn mẹ, bọ viyọnnu ohàn tọn lẹpo na yìdò. ⁵Podọ whenuena yé na dibuna ofi yì aga, bọ sisọsisọ na tin to aliho, bọ atin almọndi tọn na kọ́amà, bọ agànma na zùn agbàn de, bọ ojlo na sá, na dawe lọ jei owhé etọn dindẹn gbè wutu, awublatọ lẹ na sọ to dindanpé to aligbó lẹ ji. ⁶Kavi whẹpo okàn fataka tọn na wén, kavi whẹpo apánko sika tọn na gbà, kavi whẹpo tọzẹ́n na gbà to asisa tó, kavi whẹpo kẹkẹfọ na sùn to dotọ tó. ⁷Whenẹnu wẹ okọ́ na gọ̀ do aigba de dile é ko te, gbigbọ na sọ gọ̀ do Jiwheyẹwhe he na ẹn omẹ de. ⁸Ovó ovó tọn, yẹwhehódọtọ dọmo, popo lepo ovó wẹ.

⁹Podọ yẹwhehódọtọ lọ yọnnuìn wutu, é to nuyọnẹn plón gbẹtọ le ga; nugbo é payi dagbedagbe, é dindona, bo sọ yí hówhínwhẹ́n susu bọdai hajihaji. ¹⁰Yẹwhehódọtọ dindona nado mọ ohó vivi, ehe yè ko wlán, onú jijlọ wẹ, yèdọ ohó nugbo tọn lẹ.

¹¹Ohó nuyọnẹntọ tọn taidi owun, podọ di húngan he yè gbọn alọ nukòntọ agùn tọn lẹ whè, he yè yí na omẹ sọn lẹngbọhọtọ dopo de. ¹²Podọ donukọn, sọn ehe mẹ, ovi ṣie, sètónu: to owé susu pinplọn me, opòdo ma tin; owé susu hihia wẹ awuku agbasa tọn.

¹³Gbọ mí ni sè opòdo ohó lẹpo pete tọn: Dibusi Jiwheyẹwhe bo sọ yìn osén etọn lẹ: na ehe wẹ azọn gbẹtọ lẹpo tọn pete. ¹⁴Na Jiwheyẹwhe na hẹn azọ́n lẹ dopodopo wá whẹ̀dida kọ̀n, po onú whiwhlá lẹ dopodopo po, eyín é yín dagbe, kavi é yín yinylan.