Amọsi

¹OHO Àmọsi tọn lẹ, mẹhe tin to kanlinyìntọ Tekoa tọn lẹ ṣẹnṣẹn, he ewọ mọ gbọn Islaeli tọn dali, to azán Uzia ahọlu Juda tọn tọn lẹ mẹ, podọ to azán Jeloboami tọn, visunnu Joaṣi ahọlu Islaeli tọn ton lẹ mẹ, owhè awe jẹnukọnna aigbawhinwhàn lọ.

²Ewọ sọ dọmọ, OKLUNỌ na li son Ziọni mẹ, bo sọ do ogbè etọn sọn Jelusalẹm mẹ; podọ fininó lẹngbọhọ́tọ lẹ tọn lẹ na blawu, podọ aga Kalmẹli tọn na sọ yé.

³Le wẹ OKLUNỌ dọ, Na osẹ́nmẹjẹ Damasku tọn atọ̀n, mọwẹ, na ẹnẹ, yẹn ma na bẹ́ ohó ṣie dù gba; na yé ko yí núzinzán kúndènú oganyu tọn do dèkunna Gileadi wutu: ⁴ṣigba yẹn na do miyọn de hlan biọ owhé Hazaeli tọn gbè, é bo na sọ dù ohọnmẹ Bẹni-hadadi tọn lẹ súdo. ⁵Yẹn na wẹ́n opátin Damasku tọn, bo sọ sán ewọ he sinai to ofìn Avẹni tọn ji, podọ ewọ he hẹn ogánpò go sọn owhé Bẹti-edeni tọn gbè: podọ gbẹtọ Silia tọn lẹ na yì biọ mẹmẹglọ mẹ jẹ Kili, wẹ OKLUNỌ dọ. ⁶Le wẹ OKLUNỌ dọ: Na osénmẹjẹ Gala tọn atọ̀n, mọwe, na ẹnẹ, yẹn ma na lẹ́ oya etọn yì gba; na yé bẹ́ yì mẹglọno mẹmẹglọ blebu de, nado jó yé do hlan Edọmi: ⁷ṣigba yen na do miyọn de hlan adó Gala tọn ji, é bo na sọ dù ohọ̀nmẹ etọn lẹ súdo: ⁸podọ yẹn na so sán tòmẹnu lọ sẹ̀ sọn Aṣdọdi mẹ, po ewọ he hẹn ogánpò lọ go po son Askelọni mẹ; podọ yẹn na lẹ́ alọ ṣie do Eklọni go, podọ pipotọ; Filisfetzii lẹ tọn na súdo, wẹ OKLUNỌ JIWHEYẸWHE dọ.

⁹Le wẹ OKLUNỌ dọ: Na osẹ́nmẹjẹ Tile tọn atọ̀n, mọwẹ, na ẹnẹ, yẹn ma na lẹ́ oya etọn yì gba; na ye jó mẹmẹglọ blebu de hlan Edọmi wutu, bo ma sọ flin alẹnù mẹmẹsunnu tọn: ¹⁰ṣigba yẹn na do miyọn de hlan adó Tile tọn ji, é bo na sọ dù ohọ̀nme etọn lẹ súdo.

¹¹Le wẹ OKLUNỌ dọ: Na osẹ́nmẹjẹ Edọmi tọn atọ̀n, mọwẹ, na ẹnẹ, yẹn ma na lẹ́ oya etọn yì gba; na ewọ yí ohi do domọna nọvisunnu etọn wutu, bo sọ gble homẹyọn etọn lẹ, bọ adi etọn sọ to tintlen tẹgbẹtẹgbẹ, ewọ bo sọ whla homegble etọn kakadoi: ¹²ṣigba yẹn na do miyọn de hlan Temani ji; é na sọ dù ohọ̀nmẹ Bozla tọn Iẹ súdo.

¹³Le wẹ OKLUNỌ dọ: Na osẹ́nmẹjẹ ovi Amọni tọn lẹ tọn atọ̀n, mọwẹ, na enẹ, yen ma na lẹ́ oya etọn yì gba; na yé ko kẹ̀ yọnnu ohònọ Gileadi tọn lẹ wutu, na ye nido hẹn agboji yetọn klo: ¹⁴ṣigba yẹn na pla miyọn de to odòkọ Laba tọn mẹ, é bo na sọ dù ohọ̀nmẹ etọn lẹ súdo, po abobopo to azán awhàn tọn lọ mẹ, po jehọndaho de po to azán jẹhọnahizi tọn lọ mẹ: ¹⁵podọ ahọlu yetọn na yì biọ mẹmẹglọ mẹ, ewọ po ahọvi etọn lẹ po dopọ, wẹ OKLUNỌ dọ.

¹LE wẹ OKLUNỌ dọ: Na osẹ́nmẹjẹ Moabi tọn atọ̀n, mọwẹ, na ẹnẹ, yẹn ma na lẹ́ oya etọn yì gba; na ewọ mẹ̀ ohú ahọlu Edọmi tọn tọn lẹ zùn aòn: ²ṣigba yẹn ná do miyọn de hlan Moabi ji, éna sọ dù ohọ̀nme Kelioti tọn lẹ súdo; Moabi na sọ kú po zingidi po, po abobo po, po núdidọ opẹ̀n ton po: ³podọ yẹn na sọ sán whẹ̀datọ lọ sẹ sọn gblagbla etọn mẹ, bo na sọ hù ahọvi lẹpo po e po, wẹ OKLUNỌ dọ.

⁴Le wẹ OKLUNỌ dọ: Na osẹ́nmẹjẹ Juda tọn atọ̀n, mọwẹ, na ẹnẹ, yẹn ma na lẹ́ oya etọn yì gba; na yé ko gbẹ́ osẹ́n OKLUNỌ tọn dai wutu, bo ma sọ yìn osẹ́ndoai etọn lẹ gba, podọ olalo yeton lẹ ko hẹn yé nado buali, ehe otọ́ yetọn lẹ zinzonlin hodo: ⁵ṣigba yẹn na do miyọn de hlan Juda ji, é bo na sọ dù ohọ̀nmẹ Jelusalẹm tọn lẹ súdo.

⁶Le wẹ OKLUNỌ dọ: Na osẹ́nmẹjẹ Islaeli tọn atọ̀n, mọwẹ, na ẹnẹ, Yẹn ma na lẹ́ oya etọn yì gba; na yé ko sà dódónọ na fataka wutu, podọ agbatọnọ na afọpa afọawe lẹ tọn de: ⁷he to nùkẹ̀ do kọgudu aigba tọn to ota wamọnọ lẹ tọn ji, bo lẹ́ aliho homẹmiọnnọ lẹ tọn dapadopo: podọ dawe de po otọ́ etọn po na yì jẹ yọnnuvú dopolọ de, nado flu oyín wiwe ṣie; ⁸yé sọ hẹn yéde mlọnai to adà agbà dopodopo tọn ji to avọ́ yè yí to afanu lẹ ji, podọ yé to ovẹ̃n omẹ di omẹ yè ko wleahọ́ lẹ nkọ tọn nù to ohọ̀ Jiwheyẹwhe yetọn tọn mẹ. ⁹Gãnṣo wẹ yẹn và Amọlinu lọ súdo to yé nukọn, jiyìyì mẹhetọn tin taidi jiyìyì kedali lẹ tọn, podọ ewọ sọ yín huhlọnnọ di oaki lẹ; gãnṣo yẹn và sinsẹ́n etọn súdo to aga, podọ adọ̀ etọn lẹ sọn oglọ. ¹⁰Yẹn sọ hẹn mì hẹji tón sọn aigba Egipti tọn mẹ ga, bo sọ to mì do owhè kande to zùngbo mẹ, nado yí aigba Amọlinu lọ tọn na nutindo. ¹¹Podọ yẹn zé tite sọn visunnu mìtọn lẹ mẹ na yẹwhegán lẹ́, podọ sọn yọ̀pọ sunnu mìtọn lẹ mẹ na Nazilinu lẹ. Yèdọ é ma yín le wẹ la, Mì ovi Islaeli tọn emi? wẹ OKLUNỌ dọ. ¹²Ṣigba mìwlẹ na, ovẹ̃n Nazilinu lẹ nado nọ nù; bo sọ dosẹ́nna yẹwhegán lẹ, dọmọ, Mì dọdọdai blo. ¹³Dayi e go, Yẹn na fìnọn mì to otẹn mìtọn mẹ, dile agbànkẹkẹ he gọ́ na amàkọ̀ yín fìnfinọn do. ¹⁴Podọ fibẹ̀tado na dẹ́n awuyatọ, podọ huhlọnnọ ma na nahuhlọn gándido etọn, mọ hlọnhlọnnọ lọ ma na whlẹn alindọn etọn gba: ¹⁵mọ ewọ he hẹn ogába lọ go ma na nọte gba; podọ ewọ he yín awuyanọ afọ tọn ma na whlẹn ede gba: mọ ewọ he hẹ́ osọ́ lọ ma na whlẹn alindọn etọn gba: ¹⁶podọ ewọ he yín tudotọ to hlọnhlọnnọ lẹ ṣẹnṣẹn na họ̀nyì mẹmẹ to azán nẹ gbè, wẹ OKLUNỌ dọ.

¹MI sè ohó he he OKLUNỌ ko dọ do mì go, Mì ovi Islaeli tọn emi, do whédo lẹpo pete go he yẹn hẹn hẹji tón sọn aigba Egipti tọn mẹ wa, dọmọ, ²Mìwlẹ kẹdẹ wẹ yẹn yọnẹn son whédo aigba tọn lepo mẹ: enẹwutu yen na dla oylanwà mìtọn; lepo pọ́n to mì ji. ³Bé mẹawe na zinzọnlin to opọ́, adavo yé ha? ⁴Bé kinnikinni de na li to zùnkan mẹ, whenuena ewọ ma ko tindo nuyanwẹnna de? bé kinnivú de na dawhá son odò etọn mẹ, eyín ewọ ma ko wle núde? ⁵Bé ohẹ́ de; sọgan jẹ omọ̀ de mẹ to aigba ji, fle yè ma do okàn de do nẹ? bé omọ̀ de na fẹ́ sọn aigba mẹ, bo ma wle núde lala? ⁶Bé yè na kún opẹ̀n lọ to tòdaho de mẹ, bọ gbẹtọ lẹ ma na yín avosatọ? bó oylan na jọ do tòdaho de go, bọ OKLUNỌ ma wẹ ko wà ẹ? ⁷Nugbonugbo OKLUNỌ JIWHEYẸWHE ma na wà núde, adavo ewọ dè asli etọn hia hlan devi etọn yẹwhegán lẹ. ⁸Kinnikinni lọ ko li, mẹnu wẹ ma na sinú? OKLUNỌ JIWHEYẸWHE ko dọhó, mẹnu wẹ ma na dọdọdai?

⁹Mì dèmisẽlu to ohọ̀nmẹ lẹ lọ ji to Aṣdọdi, podọ to ohọ̀nmẹ lẹ lọ ji to aigba Egipti tọn mẹ, bo dọmọ, Mì bẹ́ míde pli do osé Samalia tọn lẹ ji, bo dayi núhe zingidi daho he to enẹ mẹ yín go, po awusinẹn lẹ po to gblagbla etọn mẹ. ¹⁰Na yé ma yón nado nọ wà ojlojẹ gba, wẹ OKLUNỌ dọ, mẹhe tò huhlọnnú po ajojijẹ po dote to ohọ̀nmẹ yetọn lẹ mẹ ¹¹Enẹwutu le wẹ OKLUNỌ JIWHEYẸWHE dọ: Mẹglatọ de na tin finẹ, yèdọ lẹ́do aigba lọ pó: podọ ewọ na hẹn huhlọn towe jẹte sọn hiẹ mẹ, yè na sọ hẹn ohọ̀nmẹ towe lẹ gble. ¹²Le wẹ OKLUNỌ dọ: Le lẹngbọhótọ gbì asá awe sọn onù kinnikinni tọn mẹ do, kavi owhẹ́ otó de tọn; mọwẹ ovi Islaeli tọn lẹ na yín gbìgbì do he sinai to Samalia mẹ to lọnglọnẹn aimlọnnú de tọn mẹ, podọ to Damasku mẹ to adọzan de ji. ¹³Mì sè, bo sọ sakunnu do owhé Jakob tọn ta, wẹ OKLUNỌ JIWHEYẸWHE dọ, Jiwheyẹwhe awhànpa lẹ tọn. ¹⁴Na azán lọ gbè he yẹn na dla osẹ́nmẹjẹ Islaeli tọn lẹ pọ́n to e ji, yẹn na dla agbà Bẹti-eli tọn lẹ pọ́n ga, podọ azo agbà lọ tọn lẹ na yín sinsán sẹ́, bo sọ flẹ jẹ aigba. ¹⁵Podọ yẹn na hò ohọ avivọmẹ tọn po ohò alúnlúnmẹ tọn po; podọ ohọ̀ ajlankudú tọn lẹ na súdo, podọ ohọ̀ susu na sọ tindo opòdo de wẹ OKLUNỌ dọ.

¹MI sè ohó he, mì oyìnvú Baṣani tọn emi, he tin to osó Samalia tọn mẹ lẹ, he to awuhẹnsinẹn wamọnọ lẹ, he to agbatọnọ lẹ pẹ́te, he dọ hlan klunọ yetọn lẹ dọmọ, Mì hẹnwá, bo sọ gbọ mí ni nù. ²OKLUNỌ JIWHEYẸWHE ko whle gbọn owiwe etọn dali, dọ, pọ́n, azán lẹ na wá mì ji, bọ yé na yí omlẹn lẹ do zé mì yì, podọ pipòtọ mìtọn lẹ po omlẹn whèvi tọn lẹ po. ³Mìwlẹ bo na sọ jẹgbonu yì gbọn zizẹ́ lẹ mẹ, omẹ dopodopo titegbè to ewọ nukọn; mìwlẹ na sọ dlẹn míde biọ Halmọni mẹ, wẹ OKLUNỌ dọ.

⁴Mì wá jẹ Bẹti-eli, bo jẹsẹ́nmẹ; jẹ Gilgali, bo hẹn osẹ́nmẹjẹ jideji; bo sọ hen avósánnú mìtọn lẹ wá afọnnuafọnnu po madao mìtọn lẹ po azán atònatòn; ⁵bo sọ na nunina opẹ́dido tọn de gbọn mimẹ̀ dali sọn enẹ he yè dotọ́n mẹ, bo sọ lá avọ́ nunina ojlo tọn lẹ bo sọ dèmisẽluna yé: na ehe wẹ mìwlẹ jlo, mì ovi Islaeli tọn emi, wẹ OKLUNỌ JIWHEYẸWHE dọ. ⁶Podọ yẹn ga ko sọ na owéwé adú lẹ tọn mì to tòdaho mìtọn lẹpo mẹ, podọ odindẹ́n akla tọn to otẹn mìtọn lẹpo mẹ: gãnṣo mìwlẹ ma ko lẹ́gọ̀ do de, wẹ OKLUNỌ dọ. ⁷Podọ yẹn ga ko sọ dọ̀n ojikun dogodo sọn mì de, whenuena osùn atọ̀n gbé sọ tin ai jẹ ojijẹ whenu: podọ yẹn hẹn ẹn nado jajikun do tòdaho de ji, bo sọ hẹn ẹn ma nado jajikun do tòdaho awetọ ji: yè hẹn jikunja do apá de ji, podọ apá he ji é jajikun do ma yọ́ gba. ⁸Mọwe tòdaho awe kavi atọ̀n to dindanyì jẹ tòdaho de kọ̀n nado nù osìn, bo ma sọ yín pékọnọ gba: gãnṣo mìwlẹ ma sọ lẹ́gọ̀ do yẹn de, wẹ OKLUNỌ dọ. ⁹Yẹn ko yí òfufú po odọ́ po do hò mì: gégé ojipa mìtọn lẹ ton po ovẹngle mìtọn lẹ po po ovotin mìtọn lẹ po po atin olivieh mìtọn lẹ po wẹ ahlí ko dùsúdo: gãnṣo mìwlẹ ma ko lẹ́gọ̀ do yẹn de gba, wẹ OKLUNỌ dọ. ¹⁰Yẹn ko do azònylankan hlan mì ṣẹnṣẹn kẹdẹdi Egipti tọn nkọ: yẹn ko sọ yí ohi do hù yọ̀pọ sunnu mìtọn lẹ, po mẹmẹglọ osé mìtọn lẹ tọn po; podọ yẹn ko sọ hẹn owán osla mìtọn tọn nado hẹji yèdọ wá biọ awọntinslo mìtọn lẹ mẹ: gãnṣo mìwlẹ ma ko lẹ́gọ̀ do yẹn de gba, wẹ OKLUNỌ dọ. ¹¹Yẹn ko sisẹ́ dẽlẹ dlẹn to mì ṣẹnṣẹn, di whenuena Jiwheyẹwhe sisẹ́ Sọdọmi po Gomola po dlẹn, míwlẹ bo sọ tin di mìyọn tin lùn tón sọn jiji mẹ: gãnṣo mìwlẹ ma ko lẹ́gọ̀ do yẹn de gba, wẹ OKLUNỌ dọ. ¹²Enẹwutu le wẹ yẹn na wà hlan we, hiẹ Islaeli: podọ na yẹn na wà ehe hlan we wutu, wleawu nado din Jiwheyẹwhe towe mọ, Hiẹ Islaeli. ¹³Na, pọ́n, ewọ he basi osé lẹ, bo sọ dá ojẹhọn, bo sọ lá núhe linlẹn etọn yín hlan gbẹtọ, he hẹn afọnnu zùn zinvlu, bo sọ nọ gbọn otẹn yìaga aigba tọn lẹ ji; oyín etọn wẹ, OKLUNỌ Jiwheyẹwhe awhànpa lẹ tọn.

¹MI sè ohó he ehe yẹn zé daga na avigbè de to mì ji, Mì owhé Islaeli tọn emi. ²Yè hẹn awhli Islaeli tọn jai; ewọ ma na tite ba: ewọ mlọnai mẹgbìgbẹ́ to aigba etọn ji; mẹde ma tin finẹ nado zé e tite gba. ³Na le wẹ OKLUNỌ Jiwheyẹwhe dọ, dọmọ: Tòdaho he jẹgbonu yì fọtọ́n dopo na tindo kanweko dopo jódai, podọ enẹ he jẹgbonu yì kanweko dopo na tindo ao jódai, hlan owhé Islaeli tọn. ⁴Na le wẹ OKLUNỌ dọ hlan owhé Islaeli tọn, dọmọ, Mì din mi, mì bo na nọgbè: ⁵ṣigba mì din Bẹti-eli blo, mọ biọ Gilgali mẹ blo, bo sọ ju jẹ Beẹli-seba blo: na Gilgali nugbonugbo na yì biọ mẹmẹglọ mẹ, podọ Bẹti-èli na lẹzùn ovọ́. ⁶Mì din OKLUNỌ, mì bo na sọ nọgbẹ̀; ewọ nikã gbà tón taidi miyọn to owhé Josẹfu tọn mẹ, bọ é dùsúdo bọ mẹde ma tin finẹ nado ṣi ì to Bẹti-eli mẹ: ⁷mì mẹhe lẹ́ whẹ̀dida do ogbò, bo sọ zé dódó liai jẹ aigba; ⁸mì din ewọ he basi Pleiade lẹ po Onioni po, bo sọ lé zinvlu gọ́ngọ́n biọ afọnnu mẹ, bò sọ yí ozán do hẹn okle dozín; he ylọ osìn ohù tọn lẹ, bo sọ kọ̀n yé tón do nukunmẹ aigba tọn ji; oyín etọn wẹ OKLUNỌ; ⁹he hẹn dindọn nado dèabi to huhlọntọ lẹ ji, mọwẹ dindọn wá odòkọ ji. ¹⁰Yé gbẹwanna ewọ he to mẹwọhẹ to họngbo lọ mẹ, podọ yé sọ gbẹ́na ewọ he to hódọ jlọjlọ, ¹¹Enẹwutu sùsọle mìwlẹ tùnafọ wamọnọ ji, bo sọ yí oblu oli tọn sọn ewọ de: mìwlẹ ko do ohọ̀ lẹ sọn zannu pipa mẹ, ṣigba mì ma na nọ̀ yé mẹ gba; mì ko do vẹ̃ngle dagbedagbe lẹ, ṣigba mìwlẹ ma na nù ovẹ̃n etọn gba. ¹²Na yẹn yọ́n le osẹ́nmẹjẹ mìtọn lẹ yín sọhasusu do podọ le ylando mìtọn lẹ yín hlọnhlọnnọ do; mì mẹhe miannukunna nugbonọ, he to onúbla de yí, podọ he lẹ́ agbatọnọ lẹ dapadopo to họngboji sọn ojlọjẹ yetọn mẹ. ¹³Enẹwutu ewọ he yín zìnzìntọ na nọabẹ to ojlẹ mọnkọ de mẹ; na ojlẹ yinylan de wẹ. ¹⁴Mì nọ din dagbe, é yín oylan blo, na mìwlẹ nido nọgbè: podọ mọwẹ OKLUNỌ, Jiwheyẹwhe awhànpa lẹ ton na tin to mì de, dile mì dọ do. ¹⁵Mì gbẹwanna oylan, bo yiwanna dagbe, bo sọ hẹn whẹ̀dida lódo to họngbo lọ ji: é sọgan yín dọ OKLUNỌ, Jiwheyẹwhe awhànpa lẹ tọn, na yín ojọmiọnnọ hlan pipòtọ Josẹfu tọn lẹ. ¹⁶Enẹwutu le wẹ OKLUNỌ dọ, Jiwheyẹwhe awhànpa lẹ tọn, OKLUNỌ, dọmọ: Avihàn na tin to aliho gbó lẹpo mẹ; yé na sọ to didọ to alihogbó lẹpo mẹ dọ, Há! há! yé bo na sọ ylọ oglesi lọ nado blawu, bo sọ lá avihàn hlan omẹ mọnkọ he yín nuyónwàtọ avigbè tọn. ¹⁷Podọ avihàn na sọ tin to vẹ̃ngle lẹpo mẹ: na yẹn na ju gbọn gblagbla hiẹ tọn mẹ, wẹ OKLUNỌ dọ. ¹⁸Dindọn hlan mì he jlo azán OKLUNỌ tọn etẹwutu wẹ mì na do tindo azán OKLUNỌ tọn lọ? zinvlu éyín, hinhọn ma gba. ¹⁹Di eyín omẹ de họ̀nyì sọn kinnikinni de de, bọ bẹali de pé e; kavi biọ ohò mẹ yì bo yí alọ etọn do adó go, bọ odàn de hẹnadú i. ²⁰Bé azán OKLUNỌ tọn lọ ma na yín zinvlu, podọ hinhọ́n ma gba? yèdọ dozín talala, podọ sisẹ́ de ma to e mẹ? ²¹Yẹn gbẹwanna, yẹn vlẹ hùnwhẹ́ mìtọn lẹ, podọ yẹn ma na whlẹ́n owánvivi de pọ́n to obẹ́pli ayidego mitọn lẹ mẹ gba. ²²Mọwẹ, yín mìwlẹ tlẹ na avọ́ nunina mimẹ̀ lẹ mi po avọ́ nunina mìtọn jinulili tọn lẹ po, yẹn ma na kẹalọyí yé gba: mọ yẹn ma na sọ hò avọ́ nunina opẹ́ tọn sọn kanlin jonọ mìtọn lẹ tọn mẹ pọ́n gba. ²³Hiẹ ni dè hùnhlungbè ohàn towe lẹ tọn sè sọn dé; na yẹn ma na sè núdidọ viọli towe lẹ tọn gba. ²⁴Ṣigba gbọ whẹ̀dida ni bli jẹte dì osìn lẹ, podọ dódó dì tọ̀sìsa he sisakakadoi de. ²⁵Owhé Islaeli tọn emì, bé mìwlẹ hẹn avọ̀sánnu lẹ po avọ́ nunina jinulili tọn lẹ po wá jẹ dẽ to zùngbo mẹ owhè kande? ²⁶Mọwẹ, mìwlẹ na zégohọ̀túntún Molọki tọn lọ daga, otẹn wiwe bosiọ mìtọn lẹ tọn, sunwhlẹvu yẹwhe mìtọn tọn lọ, he mì basi hlan míde. ²⁷Enẹwutu wẹ yẹn na hẹn mì nado biọ mẹmẹglọ mẹ yi jẹ Damasku godo, wẹ OKLUNỌ dọ, oyín mẹhetọn yín Jiwheyẹwhe awhànpa lẹ tọn.

¹DINDỌN hlan yé he tin blẹo to Ziọni mẹ, podọ hlan yé he yín gingán to osó Samalia tọn mẹ, omẹ gbogbo lẹ sọn nukọntọ akọta lẹ tọn mẹ, mẹhe de owhé Islaeli tọn wá ²Mì juyì jẹ Kalnẹ, bo pọ́n; podọ sọn finẹ mì yì jẹ Hamati daho lọ: whenẹnu mì jẹte yì Gati Filistini lẹ tọn: yé tin pọ́nte hú ahọludu helẹ la? kavi agboji yetọn yín daho hú agboji mìtọn la? ³Mì he dè azán ylanylan lọ sẹ́ do aganu, bo sọ hẹn aisinsin huhlọnnọ tọn nado sẹpọ́ wá; ⁴he mlọnai to adọzan ajlankudú tọn lẹ ji, bo sọ dlẹn yéde to númẹzẹn yetọn lẹ ji, bo to lẹngbọvú lẹ sọn kanlinpa mẹ dù, podọ oyìnvú lẹ sọn gblagbla apó lọ tọn mẹ; ⁵he to ohàn gblolo lẹ ji do núdidọ viọli tọn ji; he dowé núzinzán ohàngbè tọn lẹ na yéde, taidi Davidi tọn; ⁶he to nùnù to apánkó ovẹ̃n tọn lẹ mẹ, bo sọ nọ yí núsisa he péde lẹ do sanusisána yéde; ṣigba yè ma hẹn yé sadi na nukunbiamẹ Josẹfu tọn gba. ⁷Enẹwutu dinvie wẹ yé na yì mẹglọnọ hẹ tintan he yì mẹglọnọ, podọ opaṣa yé he nọ dlen yéde lẹ tọn na ju wáyi. ⁸OKLUNỌ JIWHEYẸWHE ko whle gbọn ede dali, wẹ OKLUNỌ dọ, Jiwheyẹwhe awhànpa lẹ tọn, dọmọ; Yẹn gbẹ́na osakla Jakob tọn, bo sọ gbẹwanna ohọ̀nmẹ etọn lẹ: enẹwutu wẹ yẹn na jó tòdaho lọ do po núhe tin to e mẹ lẹpo po. ⁹E na sọ wá jọ, eyin omẹ ao pò to owhé dopo gbè, wẹ yé na kú. ¹⁰Podọ whenuena otavẹ́ omẹ de tọn yí i do, yèdọ èwọ he mẹ̀ ẹn, nado hẹn ohú lẹ tẹ́n jẹgbonu sọn owhé lọ gbè, bo na sọ dọ hlan ewọ he tin to ofi nukọnnukọn owhé lọ gbè tọn dọ, Mẹdepope gbẹ́ sọ tin to de we finẹ? ewọ bo na dọmọ, Lala; whenẹnu wẹ ewọ na dọmọ, Nọabọẹ towe; na míwlẹ ma na sọgan dọhóylọ oyín OKLUNỌ tọn tọn gba. ¹¹Na, dayi e go, OKLUNỌ degbè, é na sọ yí okikẹ̀ lẹ do hò ohọ̀ daho lọ, podọ ohọ̀ pẹvi lọ po zizẹ̀ lẹ po. ¹²Bé osọ́ lẹ na dowezun to osé ji? bé omẹde na yi oyín lẹ do jloaigba to finẹ? bọ mìwlẹ ko do lẹ́ whẹ̀dida do ovivẹ́ mẹ, podọ osinsẹ́n dódó tọn do ogbò mẹ: ¹³mì he to ayajẹ to ovọ́ onú de tọn mẹ, he didọmọ, Bé míwlẹ ma ko yi azò lẹ hlan míde gbọn huhlọn mítọn titi dali? ¹⁴Na, dayi e go, Owhé Islaeli tọn E, yẹn na zé akọta de tite do mì ji, wẹ OKLUNỌ, Jiwheyẹwhe awhànpa lẹ tọn dọ; yé na sọ hẹnnukunbia mì sọn bibiọ họmẹ Hamati tọn mẹ jẹ tọ̀pẹsẹ Alaba tọn kòn.

¹LE we OKLUNỌ JIWHEYẸWHE dohia mi do: bo, dayi e go, ewọ basi owẹ̀n lẹ to whẹwhẹwhenu kùntintón wága whinwhẹ́n agọ̀gbọnẹn tọn tọn mẹ; bo, pọ́n, whinwhẹ́n wága agọ̀gbọnẹn sinsán ahọlu tọn lẹ godo wẹ. ²Podọ é sọ wá jọ dọ whenuena yé basi opòdo ogbé aigba lọ tọn dùdù pó, whenẹnu wẹ yẹn dọmọ, OKLUNỌ È, JIWHEYẸWHE, yẹn vẹ́ we, jona: nawẹ Jakob ha nọte do? na mẹpẹvi wẹ ewọ. ³OKLUNỌ sọ diọlinlẹn gbọn ehe tọn dali: é ma na yín gba, wẹ OKLUNỌ dọ.

⁴Le wẹ OKLUNỌ JIWHEYẸWHE dohia mi do: bo, dayi e go, OKLUNỌ JIWHEYẸWHE ylọ nado hoavùn gbọn miyọn dali; é bo sọ dù odògbó lọ súdo, bo do ko sọ dù mimá lọ. ⁵Whenẹnu wẹ yẹn dọmọ, OKLUNỌ E, JIWHEYẸWHE, yẹn vẹ̀ we, doalọte; nawẹ Jakob na nọte do? na mẹpẹvi wẹ ewọ. ⁶OKLUNỌ sọ diọlinlẹn gbọn ehe tọn dali: ehe ga ma na yín gba, wẹ OKLUNỌ JIWHEYẸWHE dọ.

⁷Le wẹ ewọ dohia mi do: bo, dayi e go, OKLUNỌ site to adó de ji he yè yí nujlẹkàn de do basi, po nujlẹkàn de po to alọ etọn mẹ. ⁸OKLUNỌ bo sọ dọ hlan mi, dọ, Amọsi, etẹ́ hiẹ mọ? Yẹn bo sọ dọmọ, Nujlẹkàn de. Whenẹnu wẹ OKLUNỌ dọmọ, Dayi e go, yẹn zé nujlẹkàn de do gblagbla Islaeli omẹ ṣie lẹ tọn mẹ, Yẹn ma na sọ ju gbọn yé dali gbède ba: ⁹podọ otẹn yìaga Isaki tọn lẹ na yín ojẹvọ, podọ fiwiwe Islaeli tọn lẹ na sọ yín aimlọn gbọvọ́; podọ yẹn na sọ yí ohi do fọ́n do Jeloboami ji.

¹⁰Whenẹnu wẹ Àmazia yẹwhenọ Bẹtieli ton domẹhlan Jeloboami ahọlu Islaeli tọn de, dọmọ, Amọsi ko blanú do ọji we to gblagbla owhé Islaeli tọn tọn gbè: aigba lọ ma tin sọgan nado hẹn whó etọn lẹpo gba. ¹¹Na le wẹ Amọsi dọ dọmọ, Jeloboami na kú gbọn ohi dali, podọ Islaeli na sọ yín hinhẹn yì mẹglọnọ mẹ tón sọn aigba etọn mẹ. ¹²Amazia sọ dọ hlan Amọsi ga dọ, Hiẹ númọtọ E yì, hiẹ ni họ̀nyì biọ aigba Juda tọn mẹ, bo dù akla finẹ, bo sọ nọ dọdodai to finẹ: ¹³ṣigba a sọ dọdọdai to Bẹti-eli ba blo: na fiwiwe ahọlu tọn é yín, podọ owhé ahọlu tọn é yín. ¹⁴Whenẹnu wẹ Amọsi gblọn bọ dọ hlan Amazia dọ, yẹn ma yín yẹwhegán de, mọ yẹn ma sọ yín visunnu yẹwhegán de tọn; ṣigba lẹngbọyìntọ de wẹ yẹn, podọ jladotọ atin sikomọle tọn de: ¹⁵OKLUNỌ bo sọ dè mi sọn lẹngbọpa hihodo mẹ, OKLUNỌ bo sọ dọ hlan mi dọ, Yì, dọdọdai hlan Islaeli omẹ towe lẹ. ¹⁶Enẹwutu dinvie hiẹ ni sè ohó OKLUNỌ tọn: Hiẹ dọmọ, A sọ dọdọdai do Islaeli go blo, podọ a sọ kùn ohó towe do owhé Isaki tọn go blo; ¹⁷enẹwutu le wẹ OKLUNỌ dọ: Asi towe na yín ogàlọtọ de to tòdaho lọ mẹ, podọ visunnu towe lẹ po viyọnnu towe lẹ po na jai gbọn ohi dali, aigba towe na sọ yín mimá gbọn okàn dali; podọ hiẹ lọsu na kú to aigoa he yín mawó de mẹ, podọ Islaeli nugbonugbo na yín hinhẹn yì mẹglọnọ mẹ tọ́n sọn aigba etọn ji.

¹Le wẹ OKLUNỌ JIWHEYẸWHE dohia mi do: bo dayi oha sinsẹ́n alúnlúnmẹ tọn de go. ²Ewọ sọ dọmọ, Amọsi, etó hiẹ mọ? Yẹn sọ dọmọ, Oha sinsẹ̀n alúnlúnmẹ tọn de. Whenẹnu wẹ OKLUNỌ dọ hlan mi dọ, Yè hẹn opòdo wá Islaeli omẹ ṣie lẹ ji; Yẹn ma na sọ ju gbọn yé dali ba, ³Podọ ohàn ohọ̀nmẹ tọn Iẹ na yín hukùhlu to azán nẹ gbè, wẹ OKLUNỌ Jiwheyẹwhe dọ: agbasa oṣiọ lẹ na yín susu, to otẹn lẹpo mẹ wẹ yé ko bẹ̀ yé dlan jẹgbonu: yín abọẹnọ ⁴Mì Sè ehe, mì he do zé agbatọnọ lẹ mì emi, bo sọ hẹn wamọnọ aigba lọ tọn lẹ nado gbọ̀agbá, ⁵dọmọ, Whetẹnu wẹ yè na hẹn osùn yọ́yọ́ yì, na míwlẹ nido sà ogbado? Podọ gbọjẹzán lọ, na míwlẹ nido hùn oli jẹgbonu? hinhẹn ẹfa lọ whè, podọ ṣekẹli kiklo, bo sọ yí oyẹ̀ do zán po nujlẹgàn oklọ tọn po; ⁶na míwlẹ nido họ̀ wamọnọ lẹ na fataka, po agbatọnọ lẹ po na afọpa afọ lẹ tọn de, bo sọ sà ogugú oli tọn lọ, ⁷OKLUNỌ ko whle gbọn gigo, daho Jakob tọn dali dọ, Nugbonugbo yẹn ma na wọn depope to azọ́n yetọn lẹ mẹ gba. ⁸Bé aigba lọ ma na sisọ na ehe, podọ omẹ dopodopo he nọ nọ̀ e mẹ blawu? mọwẹ, é na fọ́n tite pete taidi Otò lọ; é na yín tuklanọ bo sọ vó siọ, taidi Otọ̀ Egipti tọn. ⁹E na sọ wá jọ to azán nẹ gbè, wẹ OKLUNỌ JIWHEYẸWHE dọ, wẹ yẹn na hẹn owhè nado jẹte yì to klekle, podọ yẹn na sọ hẹn okẹ́mẹ dozín to okle ṣá mẹ. ¹⁰Yẹn bo na sọ lẹ́ ohùnwhẹ mìtọn lẹ zùn awubla, podọ ohàn mìtọn lẹ zùn avigbè; podọ yẹn na hẹn odẹ́-vọ̀ hẹaga wá adaja lẹpo ji, podọ opipá to ota lẹpo ji; podọ yẹn na sọ basi i di awubla na visunnu dopoakan de, podọ opòdo etọn di azán vivẹ́pá de. ¹¹Dayi e go, azán lẹ wá, wẹ OKLUNỌ JIWHEYẸWHE dọ, na yẹn na do ohùvẹ́ de hlan aigba lọ mẹ, ohùvẹ́ akla tọn de ma gba, mọ onùgblaosìn tọn de ma gba, ṣigba sisè ohó OKLUNỌ tọn lẹ tọn. ¹²Yé na sọ to dindan sọn ohù mẹ jẹ ohù mẹ, podọ sọn agéwaji yèdọ jẹ whèzẹtẹnji; yé na to wezundo yìgodo yìnukọn nado din ohó OKLUNỌ tọn, bo ma na sọ mọ ẹn. ¹³To azán nẹ gbè wẹ awhli whànpẹnọ lẹ po yọ̀pọ sunnu lẹ po na kúpà na onùgbla. ¹⁴Yé he nọ whle gbọn ylando Samalia tọn dali, bo dọmọ, Le Jiwheyẹwhe towe togbẹ̀, Dani È; podọ, Le aliho Beẹli-ṣeba tọn togbẹ́; yèdọ yé na jai, bo ma na fọ́n tite ba.

¹YẸN mọ OKLUNỌ tote to agbà lọ ji: ewọ bo sọ dọmọ, Hò opòta lẹ, na ohọntonu lẹ nido whàn: bo sọ gbà yé hanyanhanyan sọn ota popo yé tọn mẹ; yẹn bo na sọ yí ohi do hù godotọ yé tọn lẹ: ewọ he sí sọn yé mẹ ma na họ̀n yì, podọ ẹwọ he họ̀ngán to yé mẹ, ma na yín whinwhlẹn gba. ²Yín yé tlẹ kùndò biọ kútomẹ mẹ, alọ ṣie na dè yé sọn finẹ; podọ yín yé tlẹ ylanú jẹ olọn, yẹn na hẹn yé jẹte sọn finẹ wá. ³Podọ yín yé tlẹ yí yéde whla to aga Kalmẹli tọn mẹ, yẹn na dinmọ bo sọ de yé tón sọn finẹ; podọ yín yé tlẹ yín whiwhla sọn nukun ṣie mẹ to asabọ ohù tọn mẹ, yẹn na degbèna odàn lọ sọn finẹ, é bo na sọ hẹnadú yé. ⁴Podọ yín ye tlẹ yì biọ mẹmẹglọ mẹ to kẹ̀ntọ yetọn lẹ nukọn, yẹn na degbèna ohi lọ sọn finẹ, é bo na sọ hù yé: podọ yẹn na ze nukun ṣie lẹ do yé ji na oylan, podọ na dagbe ma gba. ⁵Na, OKLUNỌ, JIWHEYẸWHE awhànpa lẹ tọn wẹ ewọ he sọalọ aigba lọ bọ é yọ́, podọ yé he nọ nọ̀ e mẹ lẹpo wẹ na blawu; podọ é na sọ tite daga pete taidi Otọ̀ lọ; bo na sọ vọ́ siọ taidi Otọ̀ Egipti tọn lọ; ⁶ewọ he do abò etọn lẹ to olọn mẹ wẹ ewọ, bo ko sọ basi ozàhọ̀ etọn to aigba ji; ewọ he ylọ na osìn ohù tọn lẹ, bo kọ̀n yé tọn do nukunmẹ aigba tọn ji; oyín etọn wẹ OKLUNỌ. ⁷Bé míwlẹ ma tin di ovi Etiopianu lẹ tọn lẹ hlan mi, mì ovi Islaeli tọn emi? wẹ OKLUNỌ dọ. Bé yẹn ma ko hẹn Islaeli hẹji tón sọn aigba Egipti tọn mẹ wá, podọ Filistini lẹ sọn Kaftọli mẹ, podọ Silianu lẹ sọn Kili mẹ? ⁸Dayi e go, nukun OKLUNỌ JIWHEYẸWHE tọn lẹ tin to ahọludu oylannọ lọ ji, podọ yẹn na và ẹ súdo sẹ̀ sọn nukunmẹ aigba tọn mẹ; ṣigba dọ yẹn ma na và owhé Jakob tọn súdo mlẹnmlẹn gba, wẹ OKLUNỌ dọ. ⁹Na, pọ́n, yẹn na degbè, yẹn bo na sọ hẹn owhé Islaeli tọn nado nọ diọ yìgodo yìnukọn; to akọta lẹ ṣẹnṣẹn, taidi le yè nọ jàn ogbadó to nujànnú de mẹ do, gãnṣo okún pẹvikinun ma na flẹ jẹ aigba ji. ¹⁰Ylandonọ sọn omẹ ṣie lẹ mẹ lẹpo na kú gbọn ohi lọ dali, he didọmọ, Oylan ma na pla mí mọ glọnalina mí gba.

¹¹To azán nẹ gbè wẹ yẹn na zé gohọ̀túntún Davidi tọn he yè họ́ daga, bo sọ tlẹ zizẹ́ etọn lẹ; podọ yẹn na sọ zé adótò etọn lẹ daga, podọ yẹn na sọ do e di azán hóhówhenu lẹ mẹ tọn; ¹²na yé nido yí pipòtọ Edọmi tọn na nutindo, po akọta lẹpo po, he yè yiylọ gbọn oyín ṣie dali, wẹ OKLUNỌ he to ehe wà dọ ¹³Dayi e gọ, azán lẹ ja, wẹ OKLUNỌ dọ, bọ aigbajlotọ lọ na pla ojiyatọ lọ, podọ lilitọ vẹ̃nsinsẹ́n lẹ tọn pla ewọ he to okún do; podọ osó lẹ na nọ kùn ovẹ̃n vivi dai; podọ okọta lepo na sọ yọ́. ¹⁴Podọ yẹn na sọ vọ mẹmẹglọ Islaeli omẹ ṣie lẹ tọn hẹnwá, yé bo na sọ do tòdaho gbọvọ́ lẹ, bo sọ nọ nọ̀ yé mẹ; podọ yé na do vẹ̃ngle lẹ, bo sọ nù ovẹ̃n etọn; yé na basi ojipa lẹ ga, bo sọ dù sinsẹ́n son yé mẹ. ¹⁵Yẹn bo na sọ do ye do aigba yeton ji, podọ yé ma na sọ yín dọnsùn gbède ba sọn aigba yetọn he yẹn ko na yé mẹ, wẹ OKLUNỌ Jiwheyẹwhe towe dọ.