2 Ahọlu Lẹ

¹MOABI sọ ṣiatò hẹ Islaeli to okú Ahabi tọn godo. ²Ahazia sọ flẹ jai gbọn vẹséajlalanọ mẹ to abò etọn aganukọn tọn mẹ he tin to Samalia mẹ, bo sọ yín awutunọ: é sọ do mẹdagun lẹ hlan, bo dọ hlan yé dọmọ, Mì yì, kanbiọ sọn Baali-zebubi yẹwhe Eklọni tọn de eyín yẹn na gán sọn awutujijẹ he mẹ. ³Ṣigba angẹli OKLUNỌ tọn dọ hlan Elija Tiṣbinu lọ dọmọ, Tite, hẹji yì nado pé mẹdagun ahọlu Samalia tọn tọn lẹ, bo dọ hlan yé dọmọ, Be Jiwheyẹwhe de ma tin to Islaeli mẹ finẹ wutu, wẹ mì jei nado kanbiọ sọn Baali-zebubi yẹwhe Eklọni tọn de? ⁴Enẹwutu dinvie le wẹ OKLUNỌ dọ dọmọ, Hiẹ ma na jẹte sọn adọzan lọ jì fie yè hẹn we hẹji yì, ṣigba hiẹ na kú nugbonugbo. Elija so fọ́nyì. ⁵Mẹdagun lẹ lọ gọ̀ do e de, ewọ sọ dọ hlan yé dọmọ, Etẹ́ é yín bọ yè do hẹn mì lẹ́gọ̀? ⁶Yé sọ dọ hlan ẹn dọmọ, Dawe de heji wá nado pé mí, bo dọ hlan mí dọmọ, Mì yì, bo sọ gọ̀ do ahọlu he do mì hlan de, bo dọ hlan ẹn dọmọ, Le wẹ OKLUNỌ dọ dọmọ, Bé Jiwheyẹwhe de ma tin to Islaeli mẹ finẹ wutu, wẹ hiẹ do domẹhlan nado kanbiọ sọn Baali-Zebubi yẹwhe Eklọni tọn de? enẹwutu hiẹ ma na jẹte sọn adọzan lọ ji fie yè hẹn we hẹji yì, ṣigba hiẹ na kù nugbonugbo. ⁷Ewọ sọ dọ hlan yé dọmọ, Dawe na tọn nkọ wẹ ewọ he hẹji wá nado pé mì, bo sọ dọ ohó helẹ na mì? ⁸Yé sọ gblọn nẹ̃ dọmọ, Dawe ofúnnọ de wẹ ewọ, bo sọ yí homẹbla ayú tọn de bla do adaja etọn lẹ mẹ. Ewọ sọ dọmọ, Elija Tiṣbinu lọ wẹ ewọ. ⁹Whenẹnu wẹ ahọlu do awhàngán kandeao tọn de hlan ẹn po kandeao etọn po. Ewọ sọ hẹji yì e de: bo, dayi e go, ewọ sín aga okọta lọ tọn go. E sọ dọhó hlan ẹn dọmọ, Ome Jiwheyẹwhe tọn È, ahọlu dọmọ, Hiẹ ni jẹte wá. ¹⁰Elija sọ gblọn bo dọ hlan awhàngán kandeao tọn lọ dọmọ, Eyín yẹn yín omẹ Jiwheyẹwhe tọn de, gbọ miyọn ni jete sọn olọn wá, bo fiọ we po kandeao towe po. Miyọn sọ jete sọn olọn wá finẹ, bo fiọ ẹ po kandeao etọn po ¹¹E sọ vọ̀ awhàngán kandeao tọn devo dohlan po kandeao etọn po. Ewọ sọ gblọn bo dọ hlan ẹn dọmọ, Omẹ Jiwheyẹwhe tọn È, le wẹ ahọlu dọ, dọmọ, Hiẹ ni jẹte wá plaun. ¹²Ẹlija sọ gblọn bo dọ hlan yé dọmọ, Eyín yẹn yín omẹ Jiwheyẹwhe tọn de, gbọ miyọn ni jẹte sọn olọn wá, bo fiọ we po kandeao towe po. Miyọn Jiwheyẹwhe tọn sọ jẹte sọn olọn wá, bo fiọ ẹ po kandeao etọn po. ¹³Ewọ sọ vó awhàngán atọ̀ntọ kandeao tọn de dohlan po kandeao etọn po. Awhàngán kandeao tọn lọ sọ hẹji yì, bo wá bo họ́ do kligonu etọn lẹ ji to Elija nukọn, bo vẹ̀vẹ nẹ̃, bo dọ hlan ẹn dọmọ, Omẹ Jiwheyẹwhe tọn E, yẹn vẹ́ we, gbọ ogbẹ́ ṣie, po ogbẹ́ mẹmẹsi towe kandeao helẹ tọn po, ni yín nuvìvẹ́ to nukun towe mẹ. ¹⁴Dayi e go, miyọn jẹte wá finẹ sọn olọn, bo fiọ awhàngán nukọntọn awe kandeao tọn lẹ po kandeao yetọn lẹ po: ṣigba dinvie gbọ ogbè ṣie ni yín nuvivẹ́ to nukun towe mẹ. ¹⁵Angẹli OKLUNỌ tọn sọ dọ hlan Elija dọmọ, Jẹte yì po e po: a yín avosatọ sọn e de blo. Ewọ sọ tite, bo jẹte yì po e po jẹ ahọlu de. ¹⁶Ewọ sọ dọ hlan ẹn dọmọ, Le wẹ OKLUNỌ dọ dọmọ, Sọle hiẹ ko do mẹdagun lẹ hlan nado kanbiọ sọn Baali-Zebubi yẹwhe Eklọni tọn de, bé Jiwheyẹwhe de ma tin to Islaeli mẹ finẹ wutu nado kanbiọ sọn ohó etọn de? enẹwutu hiẹ ma na jẹte sọn adọzan lọ ji fie yè hẹn we hẹji yì, ṣigba hiẹ na kú nugbonugbo. ¹⁷Mowẹ ewọ kú kẹdẹdi ohó OKLUNỌ tọn he Elija ko dọ. Jeholami sọ ṣẹ̀ nado dùahọlu to otẹn etọn mẹ to owhè awetọ Jeholami tọn visunnu Jehọṣafati ahọlu Juda tọn tọn mẹ; na ewọ ma tindo visunnu de wutu. ¹⁸Dinvie pipòtọ owàlọ Ahazia tọn lẹ tọn he é ko wà, yè ma ka wlan yé to owé otànnugbo ahọlu Islaeli tọn lẹ tọn tọn mẹ?

¹E sọ wá jọ, whenuena OKLUNỌ na zé Elija hẹji gbọn jẹhọnlẹ́penọ de dali biọ olọn mẹ, wẹ Elija yì po Eliṣa po sọn Gilgali mẹ. ²Elija sọ dọ hlan Eliṣa dọmọ, dọngbàn to ofi, Yẹn vẹ́ we; na OKLUNỌ ko do mi hlan yì dẹn sọ Bẹtẹli. Eliṣa sọ dọmọ, Le OKLUNỌ to ogbẹ́, podọ le alindọn towe to ogbẹ́, yẹn ma na jó we do gba. Mowẹ yé jẹte yì Bẹtẹli. ³Visunnu yẹwhegán lẹ tọn lẹ he tin to Bẹtẹli tón wá Eliṣa de, bo dọ hlan ẹn dọmọ, Bé hiẹ yọnẹn dọ OKLUNỌ na zé mẹmẹnu towe sẹ́ sọn ota towe to egbẹ́? Ewọ sọ dọmọ, Nugbo, yẹn yón ẹn; mì nabọẹ mìtọn. ⁴Elija sọ dọ hlan ẹn dọmọ, Eliṣa, yẹn vé we, dọ̀ngbàn to ofi; na OKLUNỌ do mi hlan Jẹliko. Ewọ sọ dọmọ, Le OKLUNỌ to ogbẹ́, podọ le alindọn towe sọ to ogbẹ́, yẹ́n ma jó we do gba. Mowẹ yé zọ́n wá Jẹliko. ⁵Visunnu yẹwhegán lẹ tọ́n lẹ he tin to Jẹliko wá sẹpọ́ Eliṣa de, bo dọ hlan ẹn dọmọ, Bé hiẹ yọnẹn dọ OKLUNỌ na zé mẹmẹnu towe só sọn ota towe to egbẹ́? Ewọ sọ gblọn dọmọ, Yẹn yọ́n ẹn, mì nabọẹ mìtọn. ⁶Elija sọ dọ hlan ẹn dọmọ, Yẹn vẹ́ we, dòngbàn to ofi; na OKLUNỌ ko do mì hlan Jọdani. Ewọ sọ dọmọ, Le OKLUNỌ to ogbẹ̀, podọ le alindọn towe sọ to ogbẹ́, yẹn ma na jó we do gba. Yé omẹ awelẹ sọ to yìyì. ⁷Omẹ kandeao sọn visunnu yẹwhẹgán lẹ tọn lẹ mẹ sọ yì, bo ṣite pànnukòn yé to aganu: yé omẹ awelẹ sọ ṣite to Jọdani dali. ⁸Elija sọ yí awugbó etọn, bo bẹ̀ ẹ dopọ, bo hò osìn lẹ lọ, yè sọ má yé hlanfi podọ hlandọn, mọwẹ yé omẹ awelẹ gbọn aigba húhú ji yì gododọ̃n. ⁹E sọ wá jọ, whenuena yè ko hẹn yé yì gododọ̃n, wẹ Elija dọ hlan Eliṣa dọmọ, Biọ núhe yẹn na wà na we, whẹpo yẹ́n do yín zizé sọn de we. Eliṣa sọ dọmọ, Yẹn vẹ́ wẹ, gbọ mimá yẹndawe gbigbọ towe tọn de ni tin to oji e. ¹⁰Ewọ sọ dọmọ, Hiẹ ko biọ onú sinsinyẹn de: ṣogán, eyín hiẹ mọ mi whenuena yè to zizé mi sọn de we é na yín mọ hlan we; ṣigba eyín lala, é ma na yín mọ gba. ¹¹E sọ wá jọ, le yé gbẹ́ sọ to yìyì, bo to hódọ, wẹ, dayi e go, kẹkẹ miyọn tọn de sọawuhia to finẹ po osọ́ miyọn tọn lẹ po he dá yé omẹ awelẹ to ṣẹnṣẹn; Elija sọ hẹji gbọn jẹhọnlẹ́penọ de dali yì biọ olọn mẹ. ¹²Eliṣa sọ mọ ẹn, é sọ dawhá dọ, Otọ́ ṣie, otọ́ ṣie, kẹkẹ Islaeli tọn lẹ po osọ́nọ etọn lẹ po! E ma sọ mọ ẹn ba: é sọ hẹn avọ́ etọn titi lẹ go, bo tlẹn yé do awe. ¹³E sọ zé awugbó Elija tọn ga he flẹ́ sọn e de, bo gọ̀ yì, bo ṣite to okiti Jọdani tọn dali. ¹⁴É sọ zé awugbó Elija tọn lọ he flẹ́ sọn e de, bo hò osìn lẹ lọ, bo dọmọ, Fie OKLUNỌ, Jiwheyẹwhe Elija tọn te? whenuena ewọ ga ko sọ hò osìn lẹ, yè má yé hlanfi podọ hlandọn, Eliṣa sọ yì gododón. ¹⁵Whenuena visunnu yẹwhegán lẹ tọn lẹ he tin to Jẹliko pànnukọn ẹn mọ ẹn, yé dọmọ, Gbigbọ Elija tọn jẹ Eliṣa ji. Yé sọ wá nado pé e bo sọ dẹ́ yéde hlan aigba to nukọn etọn. ¹⁶Yé sọ dọ hlan ẹn dọmọ, Dayi e go dinvie, sunnusi huhlọnnọ kandeao tin finẹ tò mẹmẹsi towe lẹ de; Mi vé we, gbọ yé ni yì, bo din mẹmẹnu towe: eya gbigbọ OKLUNỌ tọn nikà ko zé e daga, bo zé e dlan osó de ji, kavi biọ agbadò de mẹ. Ewọ sọ dọmọ, Míwlẹ ma na domẹhlan gba. ¹⁷Whenuena yé vẹ́ ẹ kaka yè do hẹnwinyanhù i, é dọmọ, Mì domẹhlan. Enẹwutu yé do sunnusi kandeao hlan; yé to dindin in azán atọ̀n, ṣigba bo ma mọ ẹn. ¹⁸Yé sọ gọ̀ wá e de, whenuena é to gbàndọn to Jẹliko; é sọ dọ hlan yé dọmọ, Yẹn ma ka dọ hlan mì dọ, Mì yì blo?

¹⁹Omẹ tòdaho lọ tọn lẹ sọ dọ hlan Eliṣa dọmọ, Mì vẹ́ we, dayi e go, otẹn tòdaho he tọn, dile klunọ ṣie mọ do, yín whànpẹnọ: aigba osìn yín madota, aigba lọ sọ nọ jàsé. ²⁰Ewọ sọ dọmọ, Mì hẹn ogò yọ́yọ́ de wá dẽ, bo yí ojó do e mẹ finẹ. Yé sọ hẹn ẹn wá e de. ²¹E sọ tón yì asisa osìn lẹ tọn kòn, bo kón ojè do e mẹ finẹ, bo dọmọ, Le wẹ OKLUNỌ dọ, Yẹn ko hẹnazọ̀ngbọna osìn helẹ, okú kavi séjija de ma na sọ tin to finẹ sọnfiyì gbède ba. ²²Mowẹ yè hẹnazọ̀ngbọna osìn lẹ lọ jẹ egbé, kẹdẹdi ọhó Eliṣa tọn he é dọ.

²³E sọ hẹji sọn finẹ yì jẹ Bẹtẹli; le é to jihẹ jei to aliho, finẹ yọ̀pọ fìnfiin lẹ tón sọn tòdaho lọ mẹ ja, bo to vivlẹ ẹ, bo didọ hlan ẹn dọ, Hẹji yì, hiẹ ota pipanọ; hẹji yì, hiẹ ota pipanọ. ²⁴Ẹwọ sọ pọ́n godo etọn bo mọ yé, bo hodẹ̀do yé to oyín OKLUNỌ tọn mẹ. Finẹ beali-asi awe tọ́n sọn lẹ mẹ jẹgbonu wá, bo tlẹn ovi kandenukunawe sọn yé mẹ. ²⁵E sọ yì sọn finẹ jẹ osé Kalmẹli kọ́n, é sọ sọn finẹ gọ́yì Samalia.

¹DINVIE Jeholami visunnu Ahabi tọn sọ ṣẹ̀ nado dùahọlu to íslaeli ji to Samalia mẹ to owhè fọtọ̀nnukunatọ̀ntọ Jehọṣafati ahọlu Juda tọn tọn mẹ, bo sọ dùahọlu owhè wiawe. ²E sọ wà enẹ he yín oylan to nukun OKLUNỌ tọn mẹ; ṣigba di otọ́ sọn ma gba, podọ di onọ etọn ma gba: na é dè odòtin Baali tọn lọ sẹ́ ehe otọ́ etọn ko basi. ³Ṣogán ewọ jóawu hlan ylando Jeloboami visunnu Nebati tọn tọn lẹ, ehe é do hẹn Islaeli nado wàylando; é ma tọ́n sọn e mẹ gba.

⁴Dinvie ahọlu Moabi tọn yín lẹngbọyìntọ de; é sọ nọ na kanlinfún hlan ahọlu Islaeli tọn sọn lẹngbọvu fọtọ́n kanweko go, podọ sọn agbò fọtọ́n kanweko go. ⁵Ṣigba é sọ wá jọ, whenuena Ahabi yín oṣiọ, wẹ ahọlu Moabi tọn ṣiatẹ hẹ ahọlu Islaeli tọn. ⁶Jeholami sọ tọn yì sọn Samalia mẹ to ojlẹ nẹ mẹ, bo pli Islaeli lẹpo. ⁷E sọ yì bo domẹhlan Jehọṣafati ahọlu Juda tọn de, dọmọ, Ahọlu Moabi tọn to atẹ́ṣi hẹ mi: hiẹ na yì po yẹn po do Moabi ji nado funawhàn? Ewọ sọ dọmọ, Yẹn na hẹjiyì: yẹn tin dile hiẹ te, omẹ ṣie lẹ di omẹ towe lẹ, osọ ṣie lẹ di osọ́ towe lẹ. ⁸Ewọ sọ dọmọ, Aliho tẹwẹ mí na gbọn hẹji yì? Ewọ sọ gblọn dọmọ, Aliho zùngbo Edọmi tọn tọn. ⁹Mọwẹ ahọlu Islaeli tọn sọ yì, po ahọlu Juda tọn po, po ahọlu Edọmi tọn po: yé sọ basi olẹ́do gbéjizọnlin azán ṣinawe tọn tọn de: finẹ osìn de ma tin na awhànpa lọ, kavi na kanlin he to yé hodo lẹ. ¹⁰Ahọlu Islaeli tọn sọ dọmọ, Só! na OKLUNỌ ko ylọ ahọlu atọ̀n helẹ plidopọ nado jó yé do alọ Moabi tọn mẹ. ¹¹Ṣigba Jehọṣafati dọmọ, Bé yẹwhegán OKLUNỌ tọn de ma tin to ofi, na mí nido kanbiọ sọn OKLUNỌ de gbọn e dali? Dopo sọn mẹmẹsi ahọlu Islaeli tọn tọn lẹ mẹ sọ gblọn bo dọmọ, Eliṣa visunnu Ṣafati tọn tin to ofi, he kòn osìn do alọ Elija tọn lẹ go. ¹²Jehọṣafati sọ dọmọ, Ohó OKLUNỌ tọn tin to e de. Mowẹ ahọlu Islaeli tọn po Jehọṣafati po po ahọlu Edọmi tọn po sọ jẹte yì e de. ¹³Eliṣa sọ dọ hlan ahọlu Islaeli tọn dọmọ, Etẹ́ yẹn tindo nado wà po hiẹ po? hẹn we yì yẹwhegán otọ́ towe tọn lẹ de, po yẹwhegán onọ towe tọn lẹ po de. Ahọlu Islaeli tọn sọ dọ hlan ẹn dọ, Lala: na OKLUNỌ ko ylọ ahọlu atón helẹ plidopọ nado jó yé do alọ Moabi tọn mẹ. ¹⁴Eliṣa sọ dọmọ, Le OKLUNỌ awhànpa lẹ tọn to ogbẹ́, mẹhe nukọn yẹn ṣite te, nugbonugbo yín yẹn ma hò nukunmẹ Jehọṣafati ahọlu Juda tọn tọn pọ́n, yẹn ma to na pọ́n dali towe, kavi mọ we. ¹⁵Ṣigba dinvie mì hẹn alinọnhotọ de wá dẽ. E sọ wá jọ, whenuena alinọnhòtọ lọ to hihò, wẹ alọ OKLUNỌ tọn wá e ji. ¹⁶Ewọ sọ dọmọ, Le wẹ OKLUNỌ dọ, Mì hẹn agbadò he gó na avúndoe lẹ. ¹⁷Na le wẹ OKLUNỌ dọ, dọmọ, Mì ma to jẹhọn na mọ, mọ mì ma to jikun na mọ, gãnṣo yè na yí osìn do gọ́ agbadò nẹ: míwlẹ na sọ nù, mìwlẹ po kanlinyìnyìn mìtọn lẹ po po okanlin mìtọn lẹ po. ¹⁸Onú fufua de to OKLUNỌ nukọn wẹ ehe: ewọ ga na jó Moabinu lẹ do alọ mìtọn mẹ. ¹⁹Míwlẹ na sọ hò tòdaho dòkónọ lẹpo, po tòdaho whanpẹnọ lẹpo po, bo na hó atin, dagbe lẹpo, bò na sú asisanù osìn tọn lẹpo, bo na sọ yi zannu lẹ do hẹn ogle dagbe lẹpo gble. ²⁰E sọ wá jọ to afọnnu, to ojlẹ sinsán avọ́ tọn mẹ, wẹ, dayi e go, finẹ osìn gbọn aliho Edọmi tọn wá, yè sọ yí osìn do gọ́ Otọ̀ lọ. ²¹Dinvie whenuena Moabinu lẹ sè dọ yè hẹn ahọlu lẹ hẹji wá nado hòavùn hẹ yé, yè bé yé plidopọ, ehe tin sọgan nado zé awhàngbaja do ogo lẹpo, po mẹhe wàmẹho yé lẹ po, bo site to agbó ji. ²²Yé sọ fọ́n tite to afọnnu fù, owhè sọ vẹ́ do osìn lọ ji, Moabinu lẹ sọ mọ osìn lọ to aga pànnukọn yé bo bia di ohùn nkọ: ²³yé sọ dọmọ, Ohùn wẹ ehe; yè ko và ahọlu ewlẹ nugbonugbo, omẹ dopodopo ko hò hatọ etọn: enẹwutu dinvie, Moabi, fọ́n yì ogbanna lọ kòn. ²⁴Whenuena yé wá osla Islaeli tọn mẹ, Islaelinu lẹ fọ́n tite bo hò Moabinu lẹ lọ, mọwẹ yé hònyi to yé nukọn; yé sọ yi nukọn biọ aigba lọ mẹ bo to Moabinu lẹ lọ hò. ²⁵Yé sọ hó tòdaho lẹ lọ liai; podọ to ogle dagbedagbe aigba lọ tọn lẹpo ji wẹ omẹ dopodopo zé zannu etọn dlan, bo sọ gó ẹ; yé sọ sú asisanù osìn tọn lẹpo, bo họ́ atin dagbedagbe lẹpo: kaka jẹ Kilhaleseti kẹdẹ mẹ wẹ yé jó zannu etọn lẹ dai do; ṣogàn akòtopẹnọ lẹ yì lẹ́do e, bo sọ hò e. ²⁶Whenuena ahọlu Moabi tọn mọ dọ awhàn lọ yín sinsinyẹn talala na ẹn, é yí sunnusi nuọntọ̀nkanweko po e po he dòn ohi, nado zé agbó jẹ ahọlu Edọmi tọn de: ṣigba yé ma sọgan. ²⁷Whenẹnu wẹ é yí visunnu etọn mẹho he do ko dùahọlu to otẹn etọn mẹ, bo yí i do na nunina na avọ́ nunina mimẹ̀ de to odòkọ lọ ji. Homẹgble daho sọ tin to Islaeli gó to finẹ: yé sọ fọ́nyì sọn e de, bo gọ́ do aigba yetọn titi ji.

¹DINYIE nawe de sọn asi visunnu yẹwhegán lẹ tọn lẹ mẹ dawhá jẹ Eliṣa de, dọmọ, Asú ṣie mẹmẹsi towe yín osiọ: hiẹ sọ yọnẹn dọ mẹmẹsi towe nọ dibusi OKLUNỌ: yè sọ hẹn akuẹnọ lọ wá nado bẹ́ ovi ṣie awe lẹ do e de nado yín mẹmẹglọ. ²Eliṣa sọ dọ hlan ẹn dọmọ, Eté yẹn ni wà na we? dọ na mi; eté hiẹ tindo to owhé gbè? Ewọ sọ dọmọ, Deviyọnnu towe ma tindo onú depope to owhé gbè gba, adavo ozẹ́n amì tọn de. ³Whenẹnu wẹ é dọmọ, Yì, whé ozẹ́n lẹ sọn kọmẹnu towe lẹ si lẹ́do, yèdọ ozẹ́n vọ́tọ lẹ a whé vude blo. ⁴Hiẹ na sọ biọ họ̀mẹ, bo sú ohọ́n do we po visunnu towe lẹ po, bo to kinkọ̀n jẹgbonu do ozẹ́n nẹlẹ po mẹ; hiẹ na nọ zé enẹ he yín gigọ́ do apadopo. ⁵Mowẹ ewọ yì sọn e de, bo sù ohòn lọ do e podọ do visunnu etọn lẹ; yé sọ to ozẹ́n lẹ hẹn wá e de, ewo sọ to kinkòn jẹgbonu. ⁶E sọ wá jọ, whenuena ozẹ́n lẹ yín gigọ́, wẹ é dọ hlan visunnu etọn dọmọ, Sọ hẹn ozẹ́n de wá na mi dogọ́. Ewọ bo do hlan ẹn dọ, Ozẹ́n de ma sọ tin ba Amì lọ sọ gbò. ⁷Whenẹnu wẹ éwá bo dọ na omẹ Jiwheyẹwhe tọn lọ. Ewọ sọ dọmo, Yì, sà amì lọ, bo sú ahọ́ towe, hiẹ po visunnu towe lẹ po ni dù sọn pipòtọ mẹ.

⁸E sọ wá jó azán de ji, bọ Eliṣa zè do Sunẹmi fie nawe daho de te; ewọ sọ vẹ́ ẹ nado dù akla. Mowẹ é sọ yín, dọ whedepopenu é juwájei, é nọ lẹ́ biọ finẹ nado dù akla. ⁹Ewọ sọ dọ hlan asú etọn dọmọ, Dayi e go dinvie, Yẹn mọhlan dọ omẹ wiwe Jiwheyẹwhe tọn de wẹ ehe, he nọ jugbọn mi de whéwhè. ¹⁰Yẹn vẹ́ we, gbọ mí ni basi abò pẹvi de do adó go; bo gbọ mí ni zé adọzan de do finẹ nẹ̃, po tafo de po, po aisinnú de po, po zògbántin de po: é na sọ yín, whenuena é wá mí de, na é ni nọ gọ̀do finẹ. ¹¹E sọ wá jẹ azán de ji, bọ é wá finẹ, bo lẹ́ biọ abò lọ mẹ, bo sọ mlọn fine. ¹²Ewọ sọ dọ hlan Gehazi mẹmẹsi etọn dọmọ, Ylọ Ṣunaminu he Whenuena é ylọ ẹ, é site to nukọn nẹ. ¹³Ewọ sọ dọ hlan ẹn dọmọ, Dọ hlan ẹn dinvie dọmọ, Dayi e go, hiẹ ko yí nuwànamẹ he do yín nuwànamẹtọ na mí; etẹ́wẹ tin nado yín wiwà na we? yè ni dọhó towe hlan ahọlu, kavi hlan awhàngan awhànpa lọ tọn? Ewọ sọ gblọn dọ, Omẹ ṣie titi lẹ ṣẹnṣẹn wẹ yẹn ninò. ¹⁴Ewọ sọ dọmọ, Whenẹnu etẹ́wẹ tin nado yín wiwà hlan ẹn? Gehazi sọ gblọn dọmọ, Nugbonugbo ewọ ma tindo visunnu de gba, asú etọn sọ yín mẹho. ¹⁵Ewọ sọ dọmọ, Ylọ ẹ. Whenuena ewọ ylọ ẹ, é site to ohòn ji. ¹⁶E sọ dọmọ, To osa he mẹ, whenuena ojlẹ wá sọ́, hiẹ na dòn visunnu de dakọ́n. Ewọ sọ dọmọ, Lala, klunọ ṣie, hiẹ omẹ Jiwheyẹwhe tọn, a dolalo hlan deviyọnnu towe blo. ¹⁷Nawe lọ sọ mọ̀hò, bo ji visunnu de to osã nẹ ji, whenuena ojlẹ lọ sọ̀, dile Eliṣa dọ hlan ẹn do. ¹⁸Whenuena yè hen ovi lọ whẹ́n, é jẹ azán de ji, bọ é tón yi otọ́ etọn de to gbingbẹntọ lẹ de ¹⁹E sọ dọ hlan otọ́ etọn dọmọ, Ota ṣie, ota ṣie. Ewọ sọ dọ hlan mẹmẹsi etọn dọmọ, Hẹn ẹn yì onọ etọn de. ²⁰Whenuena ewọ ko zé e, bo hẹn ẹn wá onọ etọn de, é sín oklo etọn lẹ ji kakajẹ whèdakọ̀, bo sọ kú to whenẹnu. ²¹Ewọ sọ hẹji yì, bo tẹ́ ẹ do adọzan ome Jiwheyẹwhe tọn lọ tọn ji, bo sú ohòn do e, bo tón yì. ²²E sọ ylọ hlan asú etọn, bo dọmọ, Yẹn vẹ́ we, do dopo hlan mi sọn mẹmẹsi lẹ mẹ, podọ dopo sọn kẹtẹkẹtẹ le mẹ, na yẹn nido họnwezun jẹ omẹ Jiwheyẹwhe tọn de, bo sọ gọ̀ wá. ²³Ewọ sọ dọmọ, Etẹwutu wẹ hiẹ jei omẹ Jiwheyẹwhe ton de to egbe? é ma yín osùn yọ́yọ́ kavi gbọjẹzángbè Ewọ sọ dọmọ, E na yín dagbe. ²⁴Whenẹnu wẹ é blapana kẹtẹkẹtẹ de, bo sọ dọ hlan mẹmẹsi etọn dọmọ, Hùndo, bo zọnmì nukọn; a jókànna wèzun lọ na mi blo, adavo yẹn degbèna we. ²⁵Mọwẹ é yì, bo wá omẹ Jiwheyẹwhe tọn lọ de to osé Kalmeli kòn. E sọ wá jọ, whenuena omẹ Jiwheyẹwhe tọn lọ mọ ẹn to aganu ola, wẹ é dọ hlan Gehazi mẹmẹsi etọn dọmọ, Dayi e go, Sunaminu lọ tin to odón: ²⁶Yẹn vè we, họnwezun, dinvie nado pe e bo dọ hlan ẹn, domọ, Jijọho e yín to de we? jijọho é yín to asu towe de? jijọho é yín to ovi towe de? Ewọ so gblọn dọ, Jijoho é yín. ²⁷Whenuena é wá omẹ Jiwheyẹwhe tọn lọ de to okọta lọ ji, é tẹ do afọ etọn lẹ go. Gehazi sọ wá sẹpọ́ nado sisẹ ẹ sè; ṣigba omẹ Jiwheyẹwhe tọn lọ dọmọ, Gbọ sọn e go: na yè hẹn alindọn gblehomẹ to e hòmẹ: OKLUNỌ ko whla ẹ sọn dẽ, bo ma dọ na mi gba. ²⁸Whenẹnu wẹ é dọmọ, Yẹn ka biọ visunnu de sọn klunọ ṣie si? Yẹn ma ka dọ dọmọ, A klọ mi blo? ²⁹Whenẹnu wẹ é dọ hlan Gehazi dọmọ, Bla adaja towe lẹ, bo zé opò ṣie to alọ towe mẹ, bo yì aliho towe: eyín hiẹ pé sunnusi de, a dọnúdo e blo; eyín mẹdepope dọnúdo we, a sọ yígbèna ẹn blo: bo zé opò ṣie dò nukunmẹ ovi lọ tọn ji. ³⁰Onọ ovi lọ tọn sọ dọmọ, Le OKLUNỌ to ogbẹ́, podọ le alindọn towe to ogbẹ́, Yẹn ma na jó we do gba. Ewọ sọ tite, bo hodo e. ³¹Gehazi sọ jù yì yé nukọn, bo zé opò lọ do nukunmẹ ovi lọ tọn ji; ṣigba ogbẹ̀ de ma tin finẹ, kavi sisè. Enewutu é gọ̀ ja nado pé e, bo dọ nẹ̃ dọmọ, Yè ma fọ́n ovi lọ gba. ³²Whenuena yè hen Eliṣa wá biọ ohó lọ mẹ, dayi e go, ovi lọ ko yín oṣiọ, bọ yè tẹ́ do adọzan etọn ji. ³³Enẹwutu é yì hòmẹ bo sú ohòn do yé mẹawe lẹ, bo hodọ́ hlan OKLUNỌ. ³⁴E sọ hẹji yì, bo mlọn ovi lọ ji, bo yí onù etọn do onù etọn ji, podọ nukun etọn lẹ do nukun etọn lẹ ji, podọ alọ etọn lẹ do alọ eton lẹ ji: é so dlẹn ede do e ji; agbasalan ovi lọ tọn sọ gblọ ³⁵Whenẹnu wẹ é lé, bo to zọnlinzin whladopo hlannukọn hlangodo; bo sọ heji yì, bo sọ dlẹn ede do e ji: ovi lọ sìnyìn whla ṣinawe, ovi lọ sọ hùn nukun etọn lẹ. ³⁶E sọ ylọ Gehazi, bo dọmọ, Ylọ Ṣunaminu he. Mọwẹ ewọ ylọ ẹ. Whenuena yè hẹn ẹn wá hòmẹ do e de, é dọmọ, Ze visunnu towe. ³⁷Whenẹnu wẹ ewọ yì họ̀mẹ, bo họ to afọ etọn lẹ go, bo dẹ́ ede hlan aigba; é sọ zé visunnu etọn, bo tọ́n yì.

³⁸Eliṣa sọ vó gò wá Gilgali: huvẹ de tin fine to aigba lọ ji; visunnu yẹwhegán lẹ tọn lẹ tin aisinsin to nukọn e tọn: ewọ sọ dọ hlan mẹmẹsi etọn dọmọ, Zé ozẹ́n daho lọ do adò ji, bo pàn opada na visunnu yẹwhegán lẹ tọn lẹ. ³⁹Omẹ dopo sọ tón yì biọ danji nado sinyan omá lẹ, bo mọ ovẹ̃n wuju de, bo ṣinyan okún etọn lẹ gọ́ awupò etọn, bo wá bo já yé do ozẹ́n opada lọ tọn mẹ. ⁴⁰Mowẹ yé kọ̀n jẹgbonu na dawe ewlẹ nado dù. E sọ wá jọ, le yé to dùdù sọn opada lọ me, wẹ yé dawhá lélé, bo dọmo, Omẹ Jiwheyẹwhe ton E, okú tin to ozẹ́n lọ mẹ. Yema sọ sọgan dù sọn e mẹ. ⁴¹Ṣigba ewọ dọmọ, Whenẹnu mì yí olinfin wá. Ewọ sọ dlan ẹn do ozẹ́n lọ mẹ; é sọ dọmọ, Kòn jẹgbonu na gbẹtọ lẹ, na yé nido dù. Awugble de ma sọ tin to ozẹ́n lọ me gba.

⁴²Dawe de sọ sọn Baali-salisa mẹ wá, bo hẹn akla mlinmlin òko bale tọn sọn sinséntintan lẹ mẹ wá na omẹ Jiwheyẹwhe tọn lọ, po ohín gbadó ofé lẹ tọn po to apò etọn mẹ. E sọ domọ, Na hlan gbẹtọ lẹ, na yé nido dù. ⁴³Mẹmẹsi etọn sọ dọmọ, Eté, yẹn ni zé ehe do gbẹtọ kanweko nukọn? Ṣigba ewọ dọmọ, Na gbẹtọ lẹ, na yé nido dù; na le wẹ OKLUNỌ dọ dọmọ, Yé na dù, bo sọ pòdai sọn e mẹ. ⁴⁴Mọwẹ è zé e do yé nukọn, yé sọ dù, bo sọ pòdai sọn e mẹ, kẹdẹdi ohó OKLUNỌ tọn.

¹DINVIE Naamanì, awhàngán awhanpa ahọlu Silia tọn tọn, yín omẹ daho yẹyinọ de to mẹmẹnu etọn de, na gbọn é dali OKLUNỌ ko na awhàngbà hlan Silia wutu: ewọ sọ yin sunnu hlọnhlọnnọ tudido tọn de ga, ṣigba opòtọnọ de wẹ é yín. ²Silianu lẹ tón yì to ogbémẹ-gbọ́mẹ, bo ko hẹn mẹglọnọ tón wá sọn aigba Islaeli tọn ji viyọnnu pẹvi de; ewọ sọ nọ site to asi Naamani tọn nukọn. ³Ewọ sọ dọ hlan mẹmẹnu etọn dọmọ, Jlo Jiwheyẹwhe klunọ ṣie tin to yẹwhegán he tin to Samalia mẹ de! whenẹnu ewọ do hẹn ẹn jẹgángán sọn opò etọn mẹ. ⁴Mẹde sọ yì hòmẹ, bo dọ na klunọ etọn, dọmọ, Le po le po wẹ viyọnnu lọ he tin sọn aigba Islaeli tọn ji dọ. ⁵Ahọlu Silia tọn sọ dọmọ, Yì bo, yì, yẹn na sọ do ohówé de hlan ahọlu Islaeli tọn. Ewọ sọ fọ́nyì, bo yí talẹnti ao fataka tọn po e po, po wòwó siba tọn fọtọ́n ṣidopo po, po didiọ avọ̀ tọn ao po. ⁶E sọ hẹn ohówé lọ wá ahọlu Islaeli tọn de, dọmọ, Dinvie whenuena yè hẹn ohówé he wá de we, dayi e go, yẹn do Naamani mẹmẹsi ṣie hlan de we, na hiẹ nido hẹn ẹn jẹgángán sọn opò etọn mẹ. ⁷E sọ wá jọ, whenuena ahọlu Islaeli tọn ko hia ohówé lọ, wẹ́ é tlẹn avọ́ etọn lẹ, bo dọmọ, Yẹn wẹ Jiwheyẹwhe, nado hù podọ nado hẹn nọ ogbé, bọ dawe he do domẹhlan mi nado hẹn omẹ de jẹgángán sọn opò etọn mẹ? ṣigba yẹn vẹ́ mì, mì lẹn bo sọ pọ́n le é to aklọndin to ogo e do. ⁸E sọ yín mọ, whenuena Eliṣa omẹ Jiwheyẹwhe tọn sè dọ ahọlu Islaeli tọn ko tlẹn avọ́ etọn lẹ, wẹ é domẹhlan ahọlu de, dọmọ, Etẹwutu wẹ hiẹ tlẹn avọ̀ towe lẹ? gbọ é ni wá dé dinvie, ewọ na sọ yọnẹn dọ yẹwhegán de tin to Islaeli mẹ finẹ. ⁹Mowẹ Naamani wá po osé etọn lẹ po po kẹkẹ etọn lẹ po, bo site to ohón owhé Eliṣa tọn tọn go. ¹⁰Eliṣa sọ do mẹdagun de hlan e de, dọmọ, Yì bo lẹ́awu Jọdani mẹ whla ṣinawe, agbasalan towe na sọ gọ́ wá de we, hiẹ na sọ yín wiwe. ¹¹Ṣigba Naamani yín homẹgblenọ, bo jei, bo to didọmọ, Dayi e go, Yẹn to linlẹn dọ, Ewọ na tón wá dẽ nugbonugbo, bo ṣite, bo dawhá ylọ oyín Oklunọ Jiwheyẹwhe etọn tọn, bo mimi alọ etọn to otẹn lọ ji, bo hẹn opòtọnọ lọ jẹgángán. ¹²Abana po Falpali po, otọ́ Damasku tọn lẹ ma yín dagbe hu osìn Islaeli tọn lẹpo? Yẹn ma nọ lẹ́awu to yé mẹ, bo yín wiwe? Mowẹ é lẹ́ bo jei to adisisa de mẹ. ¹³Mẹmẹsi etọn lẹ sọ wá sẹpọ́, bo dọhó hlan ẹn, bo dọmọ, Otọ́ ṣie, eyín yẹwhegán lọ ko degbèna we wà onú daho de, bé hiẹ ma do ko wà ẹ? nemunẹmu ka we whenẹnu, whenuena é dọ hlan we dọ. Lẹ́awu, bo yín wiwe? ¹⁴Whenẹnu wẹ é jẹte yì, bo siọ ede whla ṣinawe to Jọdani mẹ, kẹdẹdi didọ omẹ Jiwheyẹwhe tọn lọ tọn, agbasalan etọn sọ vọ́ gọ̀ di do agbasalan ovi ovú de tọn mẹ, ewọ sọ yín wiwe. ¹⁵Ewọ sọ gọ̀ do omẹ Jiwheyẹwhe tọn lọ de, ewọ po ogbẹ́ etọn lẹpo po, bo wá, bo ṣite to e nukọn: é sọ dọmọ, Dayi e go, dinvie, yẹn yọnẹn dọ Jiwheyẹwhe de ma tin to aigba depope mẹ, adavo to Islaeli mẹ; enẹwutu dinvie, yí nunina de sọn mẹmẹsi towe de, yẹn vẹ́ we. ¹⁶Ṣigba ewọ dọmọ, Le OKLUNỌ to ogbè, mẹhe nukọn yẹn site te, yẹn ma na yí núde gba. Ewọ sọ to vẹ̀vẹ̀ nẹ̃ nado yí i; ṣigba é gbẹ́. ¹⁷Naamani sọ dọmọ, Eyín lala, yẹn sọ vẹ́ we, bo gbọ yè ni na mẹmẹsi towe agbàn awe otlo lẹ tọn sọn okó mẹ; na mẹmẹsi towe sọn dinvie zọnmì ma na sọ na avọ́ nunina mimẹ̀ kavi sánvọ́ hlan yẹwhe devo lẹ de de ba, adavo hlan OKLUNỌ de. ¹⁸To onú he mẹ OKLUNỌ ni jona mẹmẹsi towe; whenuena mẹmẹnu ṣie yì biọ ohọ̀ Limmọni tọn mẹ nado litai to finẹ, bọ ewọ zẹ́nmẹnu to alọ ṣie go, bọ yẹn sọ dó dẽ to ohọ̀ Limmọni tọn mẹ, whenuena yẹn dé dẽ to ohó Limmọni tọn mẹ, OKLUNỌ ni jona mẹmẹsi towe to onú he mẹ. ¹⁹Ewọ sọ dọ hlan ẹn dọmọ, To yìyì jijọho mẹ. Mọwẹ é fọ́nyì sọn e de dẹ́n do vú de.

²⁰Ṣigba Gehazi, mẹmẹsi Eliṣa omẹ Jiwheyẹwhe tọn tọn, dọmọ, dayi e go, mẹmẹnu ṣie ko hla Naamani Silianu he do, to ma yí to alọ etọn lẹ mẹ enẹ he é hẹn wá mẹ: le OKLUNỌ to ogbẹ́, yẹn na họ̀nwezun hodo e, bo yí núsọhade sọn e si. ²¹Mọwẹ Gehazi jẹmọna Naamani to godo. Whenuena Naamani mọ mẹde to wezundo ja to godo né, é jẹte sọn kẹkẹ mẹ nado pé e, bo sọ dọmọ, Dagbe wẹ popo? ²²Ewọ sọ dọmọ, Dagbe wẹ popo. Mẹmẹnu ṣie do mi hlan we, dọmọ, Dayi e go, yèdọ dinvie wẹ yọ̀pọ sunnu awe sọn visunnu yẹwhegán lẹ tọn lẹ mẹ yín wiwá de e sọn otò okọta Eflaimi tọn mẹ; yẹn vẹ́ we, na talẹnti fataka tọn dópo yé, po didiọ awe avọ̀ tọn lẹ po. ²³Naamani sọ dọmọ, Yín pékónọ, yí talẹnti awe. E sọ vẹ̀ ẹ, bo bla talẹnti awe fataka tọn do apò awe mẹ, po didiọ awe avọ̀ tọn lẹ lọ po, bo zé yé do awe sọn mẹmẹsi etọn lẹ mẹ ji; yé sọ hẹn yé to e nukọn ²⁴Whenuena é wá okọta lọ kọ̀n, é bẹ yé sọn alọ yetọn mẹ, bo kọ̀n yé do owhé gbè: é sọ gbọ omẹ ewlẹ ni yì, yéwlẹ sọ fọ́nyì. ²⁵Ṣigba ewọ wá whégbe, bo site to mẹmẹnu etọn nukọn. Eliṣa sọ dọ hlan ẹn dọmọ, Fie hiẹ gọ̀sọn, Gehazi? Ewọ sọ dọmọ, Mẹmẹsi towe ma yì ofi de gba. ²⁶Ewọ sọ dọ hlan ẹn dọmọ, Bé ayiha ṣie ma to yìyì po hiẹ po, whenuena dawe lọ sọ lẹ́ sọn kẹkẹ etọn mẹ nado pé we? ojlẹ de nado yi akuẹ e yín, podọ nado yí awu lẹ, po olivieligle lẹ po, po vẹ̃ngle lẹ po, po lẹngbọ lẹ po, po oyín lẹ po, devisunnu lẹ po deviyọnnu lẹ po? ²⁷Enẹwutu opo Naamani tọn na sẹ̀bọ̀ do de we, podọ do okún tọwe de kakadoi. Ewọ sọ tón yì sọn nukọn etọn opòtọnọ wéwé de taidi osìngó.

¹VISUNNU yẹwhegán lẹ tọn lẹ sọ dọ hlan Eliṣa dọmọ, Dayi e go, dinvie, otẹn fie mí to ninọ to nukọn towe yín jinján gbahu na mí. ²Mí vé we, gbọ mí ni yì jẹ Jọdani, omẹ dopodopo ni zé owhlẹtitli dopo sọn finẹ, bo sọ gbọ mí ni basi oten de to finẹ, fie mí ni nọ nọ́. Ewọ sọ gblọn dọ, Mì yí ³Mẹde sọ dọmọ, Yín pekònọ, yì po mẹmẹsi towe lẹ po, mí vẹ́ we. Ewọ sọ gblọn dọ, Yẹn nayì. ⁴Mowẹ eyì po yé po. Whenuena yé wá jẹ Jọdani, yé to atin sán liai. ⁵Ṣigba le mẹde to atin de họ́, asiọvi-ta flẹ́ biọ osìn mẹ: ewọ sọ dawhá, bo dọmọ, Ṣó, mẹmẹnu ṣie na yè whó e wẹ. ⁶Omẹ Jiwheyẹwhe tọn lọ sọ dọmọ, Fie é flẹ́ jẹ? Ewọ sọ do otẹn lọ hia ẹ. Ewọ sọ sán atin de, bo dlẹn ẹn do e mẹ finẹ, bo sọ hẹn ogán lọ nado fó. ⁷E sọ dọmọ, Zé e daga do de we. Mowẹ ewọ dè alọ etọn jẹgbonu, bo yi i.

⁸Dinvie ahọlu Silia tọn to awhànfun hẹ Islaeli; é sọ yí hónamẹ to mẹmẹsi etọn lẹ de, dọmọ, Ofi le po le po nkọ de mẹ wẹ osladido mìtọn na te. ⁹Omẹ Jiwheyẹwhe tọn lọ sọ domẹhlan ahọlu Islaeli tọn de, dọmọ, Payi dọ hiẹ gbọn ofi le nkọ de blo; na finẹ wẹ Silianu lẹ to tejẹ sọn ja. ¹⁰Ahọlu Islaeli tọn sọ domẹhlan ofi lọ he omẹ Jiwheyẹwhe tọn ko dọ nọ̀ bo ko sọ kọhó nẹ́ na; ewọ sọ whlẹn ede to finẹ, ma yín whladopo kavi whlawe. ¹¹Yè sọ hẹn ayiha ahọlu Silia tọn tọn yín tuklanọ talala na onú he. E sọ ylọ mẹmẹsi etọn lẹ, bo dọ hlan yé dọmọ, Mì ma to na dohia mi mẹnu sọn mí mẹ wẹ tin na ahọlu Islaeli tọn? ¹²Mẹde sọn mẹmẹsi etọn lẹ mẹ sọ dọmọ, Lala, klunọ ṣie, ahọlu È: ṣigba Eliṣa, yẹwhegán lọ he tin to Islaeli mẹ, nọ dọ na ahọlu Islaeli tọn ohó he hiẹ to didọ to adọzanbò towe me lẹ. ¹³Ewọ sọ dọmọ, Mì yì bo mọ fie é te, na yẹn nido domẹhlan bo plan ẹn wá. Yè sọ dọ nẹ̃, dọmọ, Dayi e go, Ewọ tin to Dotani mẹ. ¹⁴Enẹwutu é do osọ́ lẹ po kẹkẹ lẹ po hlan finẹ, po awhànpa daho de po: yé sọ wá to ozán mẹ, bo lédo tòdaho lọ pó. ¹⁵Whenuena yè hẹn mẹmẹsi omẹ Jiwheyẹwhe tọn tọn fọ́n to afọnnufù, bo tón yì, dayi e go, awhànpa de po osọ́ lẹ po po kẹkẹ lẹ po tin lédo tòdaho lọ. Mẹmẹsi etọn sọ dọ hlan ẹn dọmọ, ṢÓ, mẹmẹnu ṣie na mí na wà do? ¹⁶Ewọ sọ gblọn dọ, A dibu blo: na yé he tin to mí de yín susu hú yé he tin to yé de. ¹⁷Eliṣa sọ hodó, bo dọmọ, Yẹn vẹ́ we, OKLUNỌ, hùn nukun etọn lẹ, na é nido mọ. OKLUNỌ sọ hùn nukun yọ̀pọ sunnu lọ tọn lẹ; ewọ sọ mọ: bo dayi e go, ósọ lẹ tin gọ́ na osọ́ lẹ po kẹkẹ miyọn tọn lẹ po, lẹ́do Eliṣa pé. ¹⁸Whenuena yé jẹte wá e de, Eliṣa sọ vọ hodọ́ hlan OKLUNỌ, bo dọmọ, Yẹn vẹ́ we, yí nukunnumamọ do hò omẹ he lẹ. Ewọ sọ yí nukunnumamọ do hò yé kẹdẹdi ohó Eliṣa tọn. ¹⁹Eliṣa sọ dọ hlan yé dọmọ, Aliho lọ ma wẹ ehe gba, mọ ehe ma wẹ tòdaho lọ gba: mì to hihodo mi, yẹn na sọ hẹn mì jẹ dawe mẹhe mì to dindin lọ de. E sọ plan yé jẹ Samalia. ²⁰E sọ wá jọ, whenuena yè hẹn yé biọ Samalia mẹ, wẹ Eliṣa dọmọ, OKLUNỌ, hùn nukun omẹ helẹ tọn lẹ, na yé nido mọ. OKLUNỌ sọ hùn nukun yetọn lẹ, yé sọ mọ; bo, dayi e go, yé tin to gblagbla Samalia tọn mẹ. ²¹Ahọlu Islaeli tọn sọ dọ hlan Eliṣa, whenuena é mọ yé dọmọ, Otọ́ ṣie, yẹn na hò yé? yẹn na hò yé? ²²Ewọ sọ gblọn dọmọ, Hiẹ ma na hò yé gba: hiẹ ka na hò enẹlẹ he hiẹ ko yí ohi towe po ogá towe po do bẹ́ mẹglọnọ wẹ? Zé akla po osìn po do yé nukọn, na yé nido dù bo nù, bo sọ gó do mẹmẹnu yetọn dẹ̃. ²³Ewọ sọ wleawuna núdùdù daho na yé: whenuena yé ko sọ dù bo nù, é do yé hlan yì, yé sọ gò wá mẹmẹnu yetọn de. Ogbẹ́ Silia tọn lẹ ma sọ wá aigba Islaeli tọn ji gbède ba.

²⁴E sọ wá jọ to ehe godo, wẹ Bẹnihadadi ahọlu Silia tọn bẹ́ awhànpa etọn lẹpo pli, bo hẹji yì, bo glọn Samalia do e mẹ. ²⁵Huvẹ́ daho de sọ tin finẹ to Samalia mẹ: bo, dayi e go, yé glọn ẹn do e mẹ, kaka yè dọ to ota kẹtẹkẹtẹ tọn dopo sà na wọ̀wọ́ fataka tọn kanwe podọ dadẹnẹ kabì omí awhànnẹ tọn tọn de na wọ̀wọ́ fataka tọn atọ́n. ²⁶Le ahọlu Islaeli tọn jùwá jei to adó go, nawe de dawhá hlan ẹn dọmọ, Ahọlu E, klunọ ṣie, gọalọ. ²⁷Ewọ sọ dọmọ, Eyín OKLUNỌ ma gọalọna we gba, fie yẹn na gbọn gọalọna we? sọn agbà vẹ̃nlili tọn ji, kavi sọn vẹ̃ndatẹn? ²⁸Ahọlu sọ dọ hlan ẹn dọmọ, Etẹ́ wẹ wà we? Ewọ sọ gblọn dọmọ, Nawe he dọ hlan mi dọmọ, Jó visunnu tówe na mi ni dù i to egbé, mí na sọ dù visunnu yẹn tọn to osọ̀. ²⁹Mowẹ mí sọakúsìn visunnu yẹn tọn, bo sọ dù i: yẹn sọ dọ hlan ewọ to aihọngbe dọmọ, Jó visunnu towe, na mí ni dù i: ewọ sọ yí visunnu etọn whla. ³⁰E sọ wá jọ, whenuena ahọlu sè ohó nawe lọ tọn lẹ, wẹ é tlẹn avọ́ etọn lẹ; (dinvie ewọ ju gbọn adó go wá jei;) gbẹtọ lẹ sọ mọ, bo, dayi e go, é tindo odẹ́vọ̀ to agbasalan etọn go to hòmẹ. ³¹Whenẹnu wẹ é dọmọ, Jiwheyẹwhe ni wà mọ hlan mi podọ hú mọ ga, eyín ota Eliṣa visunnu Ọafati tọn tọn na nọte to e ji to azán he gbè. ³²Ṣigba Eliṣa sín owhé etọn gbè, mẹho lẹ sọ sinai po e po; ahọlu sọ do omẹ de hlan sọn e nukọn: ṣigba whẹpo mẹdagun lọ jẹ e de, é dọ hlan mẹho lẹ lọ dọmọ. Mì mọ le visunnu ayọdetọ de tọn he domẹhlan nado yí ota ṣie sẹ́? pọ́n, whenuena mẹdagun lọ wá, mì sú ohọ̀n lọ, bo hẹn ohón lọ go do e sinyẹnsinyẹn: bé ogbè afọ mẹmẹnu etọn tọn ma ka tin to godo nẹ̃? ³³Whenuena ewọ gbẹ́ sọ to hódọ po yé po, dayi e go, mẹdagun lọ jẹte wá e de: ewọ sọ dọmọ, Dayi e go, oylan he OKLUNỌ de e tin sọn; etẹwutu yẹn na do dọ̀ngbàn na OKLUNỌ dẹn sọ depope ba?

¹ELIṢA sọ dọmọ, Mí sè ohó OKLUNỌ tọn: le wẹ OKLUNỌ dọ, To osò to ojlẹ he nkọ mẹ yè na sà ojlẹ linfin dagbedagbe tọn dopo na ṣẹkle dopo, podọ ojlẹ bale tọn awe na ṣẹkle dopo, to họ̀ngbo Samalia tọn mẹ. ²Whenẹnu wẹ awhàngán alọ mẹhetọn go ahọlu nọ zẹ̀mnẹ gblọnna omẹ Jiwheyẹwhe tọn lọ, bo dọmọ, Dayi e go, eyín OKLUNỌ na tlẹ basi ovẹ́sẹ́ lẹ to olọn mẹ, onú he sọgan tin? Ewọ sọ dọmọ, Dayi e go, hiẹ na yí nukun towe lẹ do mọ ẹn, ṣigba hiẹ ma na dù sọn e mẹ gba. ³Dinvie to finẹ dawe pòtọnọ ẹnẹ tin to bibiọ hòngbo lọ mẹ tọn ji: yé sọ dọ ode hlan awetọ dọmọ, Etẹwutu mí sín ofi kaka mí kú? ⁴Eyín mí dọmọ, Mí na biọ tòdaho lọ mẹ, whenẹnu huvẹ tin to tòdaho lọ mẹ, mí na sọ kú to finẹ: podọ eyín mí sọ sín ofi jãnwẹ, mí kú ga. Enẹwutu dinvie mì wá, bo gbọ mí ni jai hlan awhànpa Silianu lẹ tọn de: eyín yé whlẹn mí do ogbó, mí na nọgbó; eyín yé sọ hù mí, mí na kú jãnwẹ. ⁵Yé sọ fọ́n tite to flìflì mẹ, nado yì osla Silianu lẹ tọn kòn: whenuena yè hẹn yé wá jẹ adà wédédé osla Silianu lẹ tọn tọn ji, dayi e go, omẹ de ma tin to finẹ. ⁶Na OKLUNỌ ko hẹn awhànpa Silianu lẹ tọn nado sè ogbè kẹkẹ lẹ tọn de, po ogbè osọ́ le tọn po, yèdọ ogbè awhànpa daho de tọn: yé sọ dọ ode hlan awetọ dọmọ, Pọ́n, ahọlu Islaeli tọn ko dapà ahọlu Hitinu lẹ tọn lẹ, po ahọlu Egiptinu lẹ tọn lẹ po do mí ji, nado wá mí ji. ⁷Enẹwutu yé tite bo họ̀nyì to flìflì mẹ, bo jó gohọ́ yetọn lẹ dai, po osọ́ yetọn lẹ po, po kẹtẹkẹtẹ yetọn lẹ po, yèdọ osla dole é te, bo họ̀nyì na ogbẹ́ yetọn. ⁸Whenuena pòtọnọ helẹ wá jẹ adà wédédé osla tọn ji, yé biọ gohọ́ de mẹ, bo dù bo sọ nù, bo bẹ́yì sọn finẹ fataka, po sika po, po avọ́ po, bo yì bo whla ẹ; yé sọ vọ́ gọ̀ wá, bo biọ gohọ̀ devo mẹ, bo sọ bẹ́yì sọn finẹ ga, bo sọ yì bo whla ẹ. ⁹Whenẹnu wẹ yé dọ ode hlan awetọ dọmọ, Mí ma dagbe wà gba: azán he azán owẹ́n dagbe de tọn wẹ, bọ míwlẹ sọ nabọẹ: eyín mí dòngbàn kaka jẹ afọnnu, oya na pla mí: enẹwutu dinvie mì wá, gbọ mí ni yì bo dọ na whógbetọ ahọlu tọn lẹ. ¹⁰Mọwẹ yé wá bo yì hònjihọtọ tòdaho lọ tọn de: yé sọ dọ na yé, dọmọ, Míwlẹ wá jẹ osla Silianu lẹ tọn kọ́n, bo, dayi e go, omẹ de ma tin to finẹ gba, kavi ogbè gbẹtọ tọn, adavo osó lẹ to sínsín, po kẹtẹkẹtẹ lẹ po to sínsín, po gohọ̀ lẹ po dole yé te. ¹¹Ewọ sọ ylọ hònjihọtọ lẹ; yé sọ dọ ẹ hlan whégbetọ ahọlu tọn lẹ. ¹²Ahọlu sọ tite to ozán mẹ, bo dọ hlan mẹmẹsi etọn lẹ dọmọ, Yẹn na dohia mì núhe Silianu lẹ to wiwà hlan mí. Yé yọnẹn dọ mí yín huvẹ́tọnọ; enẹwutu yè hẹn yé tọ́n yì sọn osla lọ mẹ nado whla yéde to danji mọ, dọmọ, Whenuena yé tọ́n wá sọn tòdaho lọ mẹ, mí na bẹ́ yé to ogbẹ́, bo biọ tòdaho lọ mẹ. ¹³Ode sọn mẹmẹsi etọn lẹ mẹ sọ gblọn bo dọmọ, Yẹn vẹ́ we, gbọ mẹdelẹ ni yí atón sọn osọ́ he pò lẹ mẹ, he yè jódai to tòdaho lọ mẹ, (dayi e go, yé tin di gégé Islaeli tọn lẹpo he yè jódai do e mẹ; dayi e go, yé tin di gégé Islaeli tọn lẹpo he yè và:) bo gbọ mi ni domẹhlan bo mọ. ¹⁴Enẹwutu yé yí kẹkẹ awe po osọ́ lọ po; ahọlu sọ domẹhlan mọji na awhànpa Silianu lẹ tọn, dọmọ, Mì yì bo mọ ¹⁵Yé sọ yì mọji na yé jẹ Jọdani: bo, pọ́n, aliho lọ lẹpo tin gọ́ na avọ́ lẹ po nuzinzán lẹ po, he Silianu lẹ zédlan to awuya yetọn mẹ. Mẹdagun lẹ lọ sọ gọ̀, bo dọ na ahọlu. ¹⁶Gbẹtọ lẹ sọ tón yì, bo yi osla Silianu lẹ tọn lọ do dùgbanna. Mowẹ yè sà ojlẹ linfin dagbedagbe tọn dopo na ṣẹkle dopo, podọ ojlẹ bale tọn awe na ṣẹkle dopo, kẹdẹdi ohó OKLUNỌ tọn. ¹⁷Ahọlu sọ dè awhàngán lọ alọ mẹhetọn go é nọ zẹn mẹ nado tindo aṣẹ họ̀ngbo ji lọ tọn: gbẹtọ lẹ sọ tùnafọ e ji to họ̀ngboji, bọ é sọ kú dile omẹ Jiwheyẹwhe tọn lọ ko dọ do, mẹhe dọhó whenuena aholu jete wá e de. ¹⁸E sọ wá jọ, dole omẹ Jiwheyẹwhe tọn lọ dọhó hlan ahọlu lọ do, dọmọ, Ojlẹ bale tọn awe na ṣẹkle dopo, podọ ojlẹ linfin dagbedagbe tọn dopo na ṣẹkle dopo, na tin to osọ̀ to ojlẹ he nkọ mẹ to họ̀ngbo Samalia tọn mẹ; ¹⁹bọ awhàngán nẹ gblọnna omẹ Jiwheyẹwhe tọn lọ, bo dọmọ, Dinvie, dayi e go, eyín OKLUNỌ na tlẹ basi ovẹ́sẹ́ lẹ to olọn mẹ, onú nẹhunkọ de sọgan tin? bọ ewọ sọ dọmọ, Dayi e go, hiẹ na yi nukun towe lẹ do mọ ẹn, ṣigba hiẹ ma na dù sọn e mẹ gba: ²⁰e sọ wá ṣẹ do mọ do e go; na gbẹtọ lẹ tùnafọ e ji to họ̀ngboji, bọ é kú.

¹DINVIE Eliṣa ko dọhó hlan nawe lọ visunnu mẹhetọn é gọ̀do ogbé, dọmọ, Tite, hiẹ po whégbetọ towe lẹ po ni yì, bo wáwási to fidepope hiẹ sọgan wáwáṣi te: na OKLUNỌ ko ylọ na huvẹ́ de; é na sọ wá aigba lọ ji ga owhè ṣinawe. ²Nawe lọ sọ tite, bo wà kẹdẹdi ohó omẹ Jiwheyẹwhe tọn tọn: ewọ sọ yì po whégbetọ etọn lẹ po, bo wáwáṣi to aigba Filistini lẹ tọn ji owhè ṣinawe. ³E sọ wá jọ to opòdo owhè ṣinawe lọ tọn, wẹ nawe lọ gọ̀ sọn aigba Filistini lẹ tọn ji: é sọ tọ́n yì nado dawhá jẹ ahọlu dè na owhé etọn podọ na aigba etọn. ⁴Dinvie ahọlu ko to hódọ po Gehazi mẹmẹsi omẹ Jiwheyẹwhe tọn tọn po, dọmọ, Yẹn vẹ̀ we, dọ onú daho he Eliṣa ko wà lẹpo na mi ⁵E sọ wá jọ, le ewọ to didọ na ahọlu le é gọ̀ ewọ he yín oṣiọ do ogbẹ̀ do, wẹ, dayi e go, nawe lọ, visunnu mẹhetọn é ko gọ̀do ogbẹ̀, dawhá jẹ ahọlú de na owhé etọn podọ na aigba etọn. Gehazi sọ dọmọ, Klunọ ṣie, ahọlu È, ehe wẹ nawe lọ, ehe sọ wẹ visunnu etọn lọ, mẹhe Eliṣa gòdo ogbè. ⁶Whenuena ahọlu sọ kanbiọ nawe lọ, é dọ nẹ̃. Mowẹ ahọlu dè azọ́ngán delẹ do e de, dọmọ, Gọ̀ ehe yín etọn lẹpo jó, po sinsẹ́n ogle lọ tọn lẹpo po sọn azán he gbè ewọ ko jó aigba lọ do, yèdọ kakajẹ dinvie.

⁷Eliṣa sọ wá Damasku; Beni-hadadi ahọlu Silia tọn sọ yín awutunọ; yè sọ dọ nẹ̃, dọmọ, Yè hẹn omẹ Jiwheyẹwhe tọn wá fidali. ⁸Ahọlu sọ dọ hlan Hazaẹli dọmọ, Yí nunina de to alọ towe mẹ, bo yì pé omẹ Jiwheyẹwhe tọn lọ, bo kanbiọ sọn OKLUNỌ de gbọn ewọ dali, dọmọ, Bé yẹn na gán sọn awutujijẹ he mẹ? ⁹Mowẹ Hazaẹli yì nado pé e, bo sọ yí nunina de po e po, yèdọ sọn onú dagbe Damasku tọn lẹpo mẹ, agbàn kanklosọ́póawenọ tọn kande, bo wá bo ṣite to e nukọn, bo dọmọ, Visunnu towe Bẹnihadadi ahọlu Silia tọn wẹ do mì hlan de we, dọmọ, Bé yẹn na gán sọn awutujijẹ he mẹ? ¹⁰Eliṣa sọ dọ nẹ dọmọ, Yì, dọ hlan ẹn dọmọ, Hiẹ na gán nugbonugbo; ṣogàn OKLUNỌ ko dohia mi dọ ewọ na kú nugbonugbo. ¹¹E sọ bọ̀ nukunmẹ etọn do e go din, kaka yè do hẹn winyanhú i: omẹ Jiwheyẹwhe tọn lọ sọ viavi. ¹²Hazaẹli sọ dọmọ, Etẹwutu wẹ klunọ ṣie to avivi? Ewọ sọ gblọn dọmọ, Na yẹn yọ́n oylan he hiẹ na wà do ovi Islaeli tọn lẹ go wutu: ofigángán yetọn lẹ hiẹ na si miyọn, podọ yọ̀pọ sunnu yetọn lẹ hiẹ na yí ohi do hù, bo na pótọ yọ̀pọ fiinflin yetọn lẹ, bo sọ ké yọnnu hòhónọ yetọn lẹ. ¹³Hazaẹli sọ dọmọ, Ṣigba etẹ́ wẹ mẹmẹsi towe, he tin di avún de, bọ ewọ na do wà onú daho he? Eliṣa sọ gblọn dọmọ, OKLUNỌ ko dohia mi dọ hiẹ na yín ahọlu to Islaeli ji. ¹⁴Whenẹnu wẹ é fọ́nyì sọn Eliṣa de, bo wá mẹmẹnu etọn de; mẹhe dọ hlan ẹn dọmọ, Etẹ́ Eliṣa dọ hlan we? Ewọ sọ gblọn dọmọ, Ewọ dọ na mi dọ hiẹ na gán nugbonugbo. ¹⁵E sọ wá jọ to aihọngbe, wẹ é yí adọzanjivò, bo ylọn ẹn do osìn mẹ, bo tẹ́ ẹ do nukunmẹ etọn ji, mọ wẹ ewọ kú: Hazaẹli sọ dùahọlu to otẹn etọn mẹ.

¹⁶To owhè atóntọ Joiami visunnu Ahabi ahọlu Islaeli tọn tọn mẹ, whenẹnu Jehọṣafati ko yín ahọlu Juda tọn, Jeholami visunnu Jehọṣafati ahọlu Juda tọn tọn ṣẹ̀ nado dùahọlu. ¹⁷Owhè gbànnukunawe mẹho ewọ yín whenuena é ṣè nado dùahọlu; é sọ dùahọlu owhè ṣinatọ̀n to Jelusalẹm mẹ. ¹⁸Ewọ sọ zinzọnlin to aliho ahọlu Islaeli tọn lẹ tọn lẹ mẹ, dile owhé Ahabi tọn wà do: na ewọ tindo viyọnnu Ahabi tọn hlan asi: é sọ to enẹ he yín oylan to nukun OKLUNỌ tọn mẹ wà. ¹⁹Ṣogãn OKLUNỌ ma jlo na và Juda gba, na Davidi mẹmẹsi etọn tọn wutu, le é gblọnadanna ẹn nado na zògbán de hlan ẹn na ovi etọn lọ whepoponu. ²⁰To azán etọn lẹ mẹ wẹ Edọmi ṣiatẹ sọn oglọ alọ Juda tọn mẹ, bo sọ basi ahọlu de do yéde ji. ²¹Whenẹnu wẹ Jolami juyì Zaili gododọ̃n, po kẹkẹ etọn lẹpo po po e po: é sọ tite to ozán mẹ bo hò Edọminu lẹ he lẹ́do e pé, po awhàngán kẹkẹ lọ tọn lẹ po: gbẹtọ lẹ sọ họ́nyì gohọ̀ yetọn lẹ kọ̀n. ²²Mowẹ Edọmi ṣiatẹ sọn oglọ alọ Juda tọn mẹ, jẹ egbé. Whenẹnu wẹ Libna sọ ṣiatẹ to ojlẹ doponẹ mẹ. ²³Pipòtọ owàlọ Jolami tọn tọn lẹ, po ehe é wà lẹpo po, yè ma ka wlan yé to owé otànnugbo ahọlu Juda tọn lẹ tọn lọ mẹ? ²⁴Jolami sọ damlọn po otọ́ etọn lẹ po, yè sọ di i do otọ́ etọn lẹ de to tòdaho Davidi tọn mẹ: Ahazia visunnu etọn sọ dùahọlu to otẹn etọn mẹ. ²⁵To owhè wiawetọ Jolami visunnu Ahabi ahọlu Islaeli tọn tọn mẹ wẹ Ahazia visunnu Jeholami ahọlu Juda tọn tọn ṣè nado dùahọlu. ²⁶Owhè konukunawe mẹho wẹ Ahazia yín whenuena é ṣẹ̀ nado dùahọlu; é sọ dùahọlu owhè dopo to Jelusalẹm mẹ. Oyín onọ etọn tọn wẹ Atalia viyọnnu Omli ahọlu Islaeli tọn tọn. ²⁷E sọ zinzọnlin to aliho owhé Ahabi tọn tọn mẹ, bo sọ wà enẹ he yín oylan to nukun OKLUNỌ tọn mẹ, dile owhé Ahabi tọn wà do: na ewọ yin yọ́nwhẹ́n owhé Ahabi tọn gbè tọn. ²⁸Ewọ sọ yì po Jolami visunnu Ahabi tọn po nado funawhàn hẹ Hazaẹli ahọlu Silia tọn to Lamọti-gileadi: Silianu lẹ sọ húnú Jolami. ²⁹Jolami ahọlu sọ lẹ́gọ̀ na yè nado pọ́n alán lẹ gbọna to Jezleẹli mẹ ehe Silianu lẹ do ogo nẹ́ to Lama, whenuena é to avùnho hẹ Hazaẹli ahọlu Silia tọn. Ahazia visunnu Jeholami ahọlu Juda tọn tọn sọ jẹte yì nado pọ́n Jolami visunnu Ahabi tọn to Jezleẹli mẹ, na ewọ yín awutunọ wutu.

¹ELIṢA yẹwhegán lọ sọ ylọ dopo sọn visunnu yẹwhegán lẹ tọn lẹ mẹ, bo dọ hlan ẹn dọmọ, Bla adaja towe lẹ, bo yí ogò amì tọn he do alọ towe mẹ, bo yi Lamọti-gileadi. ²Whenuena hiẹ jẹ finẹ, pọ́n to finẹ Jehu visunnu Jehọṣafati visunnu Nimẹi tọn tọn, bo yì whégbe bo hẹn ẹn tite sọn mẹmẹsunnu etọn lẹ ṣẹnṣẹn, bo sọ hẹn ẹn yì abò homẹnukọn tọn de mẹ. ³Whenẹnu yí ogò amì tọn lẹ, bo kọ́n ẹn do ota etọn ji, bo dọmọ, Le wẹ OKLUNỌ dọ, Yẹn ko yí we do dè ahọlu do Islaeli ji. Whenẹnu hùn ohọ́n, bo họ́nyì, a nọtedẹn blo. ⁴Mowẹ yọ̀pọ sunnu lọ, yèdọ yọ̀pọ sunnu yẹwhegán lọ yì Lamọti-gileadi. ⁵Whenuena é wá, dayi e go, awhàngán awhànpa lọ tọn lẹ tin aìsínsín; ewọ sọ dọmọ, Awhàngán E, yẹn tindo nùmẹwẹn de hlan we. Jehu sọ dọmọ, Hlan mẹnu sọn mí mẹpo mẹ? Ewọ sọ dọmọ, Hlan we, hiẹ awhàngán. ⁶Ewọ sọ tite, bo yì biọ whégbe; ewọ sọ kọ́n amì lọ do ota etọn ji, bo dọ hlan ẹn dọmọ, Le we OKLUNỌ dọ, Jiwheyẹwhe Islaeli tọn, yẹn ko yí we do dè ahọlu do omẹ OKLUNỌ tọn lẹ ji, yèdọ do Islaeli ji. ⁷Hiẹ na sọ hò owhé Ahabi mẹmẹnu towe tọn, na yẹn nido yíahọsu ohùn mẹmẹsi ṣie lẹ yẹwhegán lẹ tọn, po ohùn mẹmẹsi OKLUNỌ tọn lẹpo po tọn, to alọ Jẹzebẹli tọn mẹ. ⁸Na owhé Ahabi tọn pete na dọ̀n: yẹn na sọ sán ovi sunnu lẹpo sọn Ahabi de, ewọ he yè súhóndo po ewọ he yè jó do ote to Islaeli mẹ po. ⁹Yẹn na sọ basi owhé Ahabi tọn taidi owhé Jeloboami visunnu Nebati tọn tọn, podọ taidi owhé Baaṣa visunnu Ahija tọn tọn. ¹⁰Avún lẹ na sọ dù Jẹzebẹli to ogle Jezleẹli tọn mẹ, mẹde ma na sọ tin nado di i. Ewọ sọ hùn ohòn, bo hónyì. ¹¹Whenẹnu wẹ Jehu tón wá mẹmẹsi klunọ etọn tọn lẹ de: ode sọ dọ hlan ẹn dọmọ, Jijọho wẹ popo? etẹwutu wẹ ohatọ nulunọ he wá de we? Ewọ sọ dọ hlan yé dọmọ, Míwlẹ yón dawe lọ podọ núhe hódidọ etọn yín. ¹²Yé sọ dọmọ, Oyẹ́ wẹ; dọ na mí dinvie. Ewọ sọ dọmọ, Le po le po wẹ é dọ hlan mi, dọmọ, Le wẹ OKLUNỌ dọ, yẹn ko yi we do dè ahọlu do Islaeli ji. ¹³Whenẹnu wẹ yé klẹnun, bọ omẹ dopodopo yi avọ́ etọn, bo yi i do oglọ nẹ to aga agahẹnu lẹ tọn ji, bo kún opẹ́n lọ, dọmọ, Jehu yín ahọlu. ¹⁴Mowẹ Jehu visunnu Jehọṣafati tọn visunnu Nimṣi tọn ṣiatẹ hẹ Jolami. (Dinvie Jolami tọ Lamọti-gileadi hó, ewọ po Islaeli lẹpo po, na Hazaẹli ahọlu Silia tọn wutu: ¹⁵ṣigba yè hẹn Jolami lẹ́gọ́ yè nado hẹnazọ̀ngbọna to Jezleẹli mẹ sọn alán he Silianu lọ do ogo nẹ lẹ mẹ, whenuena é hòavùn hẹ Hazaẹli ahọlu Silia tọn) Jehu sọ dọmọ, Eyín ehe yín ayiha towe, bé whenẹnu a dike mẹde họ̀ngán bo tòn yì sọn tòdaho lọ mẹ blo, nado yi nado dọ ẹ to Jezleẹli mẹ blo. ¹⁶Mowẹ Jehu biọ kẹkẹ de mẹ, bo yì Jezleẹli; na Jolami mlọn finẹ. Yè sọ hẹn Ahazia ahọlu Juda tọn jẹte wá nado pòn Jolami. ¹⁷Dinvie hihọtọ ṣite to atọ̀họ̀ ji to Jezleẹli mẹ, é sọ bẹ́pòn Ogbẹ̀ Jehu tọn le é ja, bo dọmọ, Yẹn mọ ogbẹ de Jolami sọ dọmọ, Yí osọ̀nọ de, bo domẹhlan nado pó yé, gbọ é ni dọmọ, Jijọho é yín? ¹⁸Mọwẹ dopo yì to osọ ji nado pé e, bo dọmọ, Le wẹ ahọlu dọ, Jijọho é yín? Jehu sọ dọmọ, Etẹ́ hiẹ tindo nado wà po jijọho po? gọ̀ we do godo ṣie. Hihọtọ sọ aọ, dọmọ, Mẹdagun lọ wá jẹ yé de, ṣigba é ma sọ gò ja gba. ¹⁹Whenẹnu wẹ é sọ do awetọ de hlan gbonu to osọ́ ji, he wá yé de, bo dọmọ, Le wẹ ahọlu dọ, Jijọho é yin? Jehu sọ gblọn dọmọ, Eté hiẹ tindo nado wà po jijọho po? gù we do godo ṣie ²⁰Hihọtọ sọ dọ, dọmọ, Yè hẹn ewọ wá jẹ yé de, bo ma sọ gọ ja gba: kẹkẹdido lọ di kẹkẹdido Jehu visunnu Nimsi tọn tọn; na ewọ to kẹkẹdo awuyawuya. ²¹Jolami sọ dọmọ, Wleawu dai. Yé sọ jla kẹkẹ etọn do dai. Jolami ahọlu Islaeli tọn po Ahazia ahọlu Juda tọn po sọ tòn yì, mẹdopodopo to kẹkẹ etọn mẹ, yé sọ tọ́n yì nado pé Jehu, bo mọ ẹn to ogle Naboti Jẹzleẹlinu lọ tọn mẹ. ²²E sọ wá jọ, whenuena Jolami mọ Jehu, wẹ é dọmọ, Jijọho é yín, Jehu? Ewọ sọ gblọn dọmọ, Jijọho tẹ́, dẹn sọ mọ le gàlilọ Jẹzebẹli onọ towe tọn lẹ, po afinọn etọn lẹ po yín susu sọ mọ? ²³Jolami sọ lẹ́ alọ etọn lẹ, bo họ̀nyì, bo dọ hlan Ahazia dọmọ, Alẹ̀gbigba tin lò, Ahazia. ²⁴Jehu sọ dọ̀n ogába etọn po huhlọn etọn lẹpo po, bo hò Jolami to abọ̀ etọn lẹ ṣẹnṣẹn, ogá lọ sọ tọ̀n yì otu etọn mẹ, é sọ whọ̀ jẹte to kẹkẹ etọn mẹ. ²⁵Whenẹnu wẹ Jehu dọ hlan Bidkali awhàngán etọn dọmọ, Mì zé bo dlan ẹn do mimá ogle Naboti Jẹzleẹlinu lọ tọn tọn mẹ: na mì ni flin na le, whenuena yẹn po hiẹ po zọn dopọ to Ahabi otọ̀ etọn godo, OKLUNỌ zé agban he do e ji; ²⁶nugbonugbo yẹn mọ ohùn Naboti tọn to osọ, po ohùn visunnu etọn lọ tọn po, wẹ OKLUNỌ dọ; yẹn na sọ yí ahọsu to ogo we to, ogle he mẹ, wẹ OKLUNỌ dọ. Enewutu dinvie zé bo dlan ẹn do ogle aigba tọn lọ mẹ, kẹdẹdi ohó OKLUNỌ tọn. ²⁷Ṣigba whenuena Ahazia ahọlu Juda tọn mọ ehe, é họ̀n gbọn aliho ojipa tọn mẹ yì owhé. Jehu sọ hodo to e godo, bo dọmọ, Hò e to kẹkẹ mẹ ga: yé sọ hò e to jeiaga Guli tọn kòn, he tin to Ibleami dali. Ewọ sọ họ̀nyì jẹ Mẹgido, bo kú to finẹ. ²⁸Mẹmẹsi etọn lẹ sọ hẹn ẹn to kẹkẹ de mẹ yì Jelusalẹm, bo di i to olidò etọn mẹ po otọ́ etọn po to tòdaho Davidi tọn mẹ.

²⁹To owhè widopotọ Jolami visunnu Ahabi tọn tọn mẹ wẹ Ahazia ṣenado dùahọlu to Juda ji.

³⁰Whenuena yè hẹn Jehu jẹ Jezleẹli, Jẹzebẹli sè sọn e mẹ; é sọ sásẹndo nukun etọn lẹ, bo doaṣọna ota etọn, bo to gbonu pòn to ovẹ́sẹ́nu. ³¹Le Jehu pọn whégbe to họ̀ngbo ji, ewọ dọmọ, Jijọho é yín, hie Zimli, mẹhùtọ mẹmẹnu towe tọn? ³²Ewọ sọ zé nukunmẹ etọn daga hlan ovẹsé dali, bo dọmọ, Mẹnu wẹ tin to adà ṣie ji? mẹnu? Ojọ awe kavi atọ̀n, sọ pòn hlan e de. ³³Ewọ sọ dọmọ, Sisẹ ẹ dlan odò. Mowẹ yé sisẹ ẹ dlan odo: yè sọ mì ohùn etọn adade do adó go, podọ do osọ̀ lẹ go: é sọ zín in dai to afọ glọ. ³⁴Whenuena yè sọ hẹn ẹn wá whe gbe, é dù bo sọ nù; é sọ dọmọ, Mì pọ̀n nawe mẹhodùdo he go dinvie, bo di i: na viyọnnu ahọlu de tọn wẹ ewọ. ³⁵Yé sọ yì nado di i: ṣigba yé ma mọ de sọn e go hú otaka, po afo lẹ po, po alọpàhomẹ alọ etọn lẹ tọn lẹ po gba. ³⁶Enẹwutu yé sọ lẹ wá, bo dọ nẹ. Ewọ sọ dọmọ, Ehe wẹ ohó OKLUNỌ tọn, he é dọ gbọn mẹmẹsi etọn Elija Tiṣbinu lọ dali, dọmọ, To ogle Jezleẹli tọn lọ mẹ wẹ avún lẹ na dù agbasalan Jẹzebẹli tọn te: ³⁷Podọ oṣiọ Jẹzebẹli tọn na tin di ogbó to nukunmẹ danji tọn ji to ogle Jezleẹli tọn mẹ; mọ dọ yé ma to na dọmọ, Ehe wẹ Jẹzebẹli.

¹DINVIE Ahabi tindo visunnu kandegbàn to Samalia mẹ. Jehu sọ wlan ohówé lẹ, bo do hlan Samalia hlan mẹho Jezleẹli tọn lẹ, yèdọ mẹho lẹ, podọ hlan yé he hẹn visunnu Ahabi tọn lẹ hẹji wá lẹ, dọmọ, ²Dinvie saun le ohówé he jẹ mì de, mimọ visunnu mẹmẹnu mìtọn tọn lẹ tin to mì de, podọ kẹkẹ lẹpo osọ̀ lẹpo tin finẹ to mìde, tòdaho dòkọnọ lẹ ga, po awhàngbaja po; ³mì ni din mẹpọ̀nte talala bo sọ jẹ talala sọn visunnu mẹmẹnu mìtọn tọn lẹ mẹ, bo zé e do ofìn otọ̀ etọn tọn ji, bo sọ hòavùn na owhé mẹmẹnu mìtọn tọn. ⁴Ṣigba yé yín avọ̀satọ susutalala, bo sọ dọmọ, Dayi e go, ahọlu awe lẹ ma nọte tọ e nukọn gba: whenẹnu nawẹ míwlẹ na nọte do? ⁵Ewọ he tin to whégbetọ lẹ ji, po ewọ he sọ tin to tòdaho lọ ji po, mẹho lẹ ga, podọ yé he hẹn ovi lẹ hẹji wá, domẹhlan Jehu, dọmọ, Mẹmẹsi towe lẹ wẹ mí, bo na sọ wà ehe hiẹ degbèna mí lẹpo; míwlẹ ma na yí omẹ de do basi ahọlu gba: hiẹ ni wà enẹ he yín dagbe to nukun towe lẹ mẹ. ⁶Whenẹnu wẹ é wlan ohówé de whla awetọ hlan yé, dọmọ, Eyín mìwlẹ tin to awà ṣie ji, podọ eyín míwlẹ na tuntóai hlan ogbè ṣie, mì bo yí ota omẹ ewlẹ tọn visunnu mẹmẹnu mìtọn tọn lẹ, bo wá dẽ to Jezleẹli mẹ to osọ to ojlẹ he mẹ. Dinvie visunnu ahọlu tọn lẹ, yínyín gbẹtọ kandegbàn, tin to omẹ gbõgbo tòdaho tọn lẹ de, he hẹn yé hẹji wá. ⁷E sọ wá jọ, whenuena ohówé lọ jẹ yé de, wẹ yé bẹ́ visunnu ahọlu tọn lẹ lọ, bo hù yé, yèdọ gbẹtọ kandegbàn, bo bẹ́ ota yetọn lẹ lọ do oha lẹ mẹ, bo bẹ́ yé dohlan ẹn to Jezleẹli mẹ. ⁸Mẹdagun de sọ wá finẹ bo dọ nẹ, dọmọ, Yé ko hẹn ota visunnu ahọlu tọn lẹ tọn lẹ lọ wá. Ewọ sọ dọmọ, Mì do okiti awe to bibiọ hòngbo lọ tọn mẹ kakajẹ afọnnu. ⁹E sọ wá jọ to afọnnu, wẹ é tón yì, bo ṣite, bo dọ hlan gbẹtọ lẹpo dọmọ, Mìwlẹ yín dódónọ: dayi e go, yẹn ṣiatẹ hẹ mẹmẹnu ṣie, bo hù i: ṣigba mẹnu wẹ hù ehe lẹpo? ¹⁰Mì ni yọnẹn dinvie dọ núde sọn ohó OKLUNỌ tọn mẹ he OKLUNỌ dọ gbọn owhé Ahabi tọn dali tọn ma na flẹ̀ jẹ aigba gba: na OKLUNỌ ko wà enẹ he é dọ gbọn Elija mẹmẹsi etọn dali. ¹¹Mowẹ Jehu hò mẹhe pò sọn owhé Ahabi tọn gbè lẹpo to Jezleẹli mẹ, po omẹ gbõgbo etọn lẹpo po, po họntọn sẹpọ̀ etọn lẹpo po, po yẹwhenọ etọn lẹ po, kaka é ma do jó mẹde dai pò nẹ̃. ¹²E sọ tite bo tọ́nyì, bo yì Samalia. Le ewọ tin to ohọ̀ lẹngbọfunpa-tọn lẹngbọhọtọ lẹ tọn dali to aliho, ¹³Jehu sọ pé mẹmẹsunnu Ahazia ahọlu Juda tọn tọn lẹ, bo dọmọ, Mẹnu wẹ mìwlẹ? Yéwlẹ sọ gblọn dọmọ, Mẹmẹsunnu Ahazia tọn lẹ wẹ mí: mí sọ jẹte jei nado dọnúdo ovi ahọlu tọn lẹ, po ovi ahọluyọnnu lọ tọn lẹ po. ¹⁴Ewọ sọ dọmọ, Mì bé yé ogbẹ̀. Yé sọ bẹ̀ yé ogbẹ̀, bo hù yé to odò ohọ̀ lẹngbọfunpa-tẹn tọn dali, yèdọ sunnusi kandenukunawe; mọ ewọ ma jó depope dai sọn yé mẹ.

¹⁵Whénúena yè hẹn ẹn fọ́nyì sọn finẹ, é dùkosọna Jehonadabì visunnu Lekabi tọn ja nado pó e: é sọ dọnudo e, bo dọ hlan ẹn dọmọ, Ayiha towe yín jijlọ, dile ayiha ṣie yín jijlọ to ayiha towe de do? Jehonadabì sọ gblọn dọmọ, E yín. Eyín é yín, na alọ towe mi. Ewọ sọ na alọ etọn ẹn; ewọ sọ yí i daga do e de biọ kẹke lọ mẹ. ¹⁶Ewọ sọ dọmọ, Hodo mi wá, bo pọ̀n vivẹnu ṣie na OKLUNỌ. Mowẹ yé hẹn ẹn hé kẹkẹ etọn mẹ. ¹⁷Whenuena é wá Samalia, é hò ehe pò to Ahabi de to Samalia mẹ lẹpo, kaka é do và ẹ, kẹdẹdi ohó OKLUNỌ tọn, he é dọ hlan Elija. ¹⁸Jehu sọ bẹ́ gbẹtọ lẹpo plidopọ, bo dọ hlan yé dọmọ, Ahabi sẹ̀n Baali vude; ṣigba Jehu na sẹ̀n ẹn susu. ¹⁹Enẹwutu dinvie mì ni ylọ Yẹwhegán Baali tọn lẹpo do dẽ; taliaitọ etọn lẹpo, po yẹwhenọ etọn lẹpo po; mì dike mẹde whè blo: na yẹn tindo avọ̀ daho de nado basi hlan Baali; mẹdepope he yè na bapò, é ma to na nọ ogbẹ̀ gba. Ṣigba Jehu to wiwà ẹ to avàdome mẹ, hlan ojlo na ewọ nido và taliaitọ Baali tọn lẹ. ²⁰Jehu sọ dọmọ, Mì klan opli ayidego de do wiwe na Baali. Yé sọ la ẹ. ²¹Jehu sọ domẹhlan Islaeli lẹpo: taliaitọ Baali tọn lẹpo sọ wá, mọ wẹ sunnusi de ma pòai bo ma wá. Yé sọ wá biọ ohò Baali tọn mẹ; ohọ̀ Baali tọn sọ yín gigọ̀ sọn opòdo de jẹ awetọ. ²²E sọ dọ hlan ewọ he tin to yẹwhenọhọ̀ ji dọmọ, Hẹn yẹwhenọ-vọ̀ lẹ jẹgbonu wá na taliaitọ Baali tọn lẹ. E sọ hẹn yẹwhenọ-vù lẹ jẹgbonu wá na yé. ²³Jehu sọ yì, po Jehọnadabi visunnu Lekabi tọn po biọ ohọ̀ Baali tọn mẹ; é sọ dọ hlan taliaitọ Baali tọn lẹ dọmọ, Mì din, bo pòn dọ mẹde sọn mẹmẹsi OKLUNỌ tọn mẹ lẹ de ma tin to mì de to ofi gba, adavo taliaitọ Baali tọn lẹ kẹdẹ. ²⁴Yé sọ biọ hòmẹ nado sán avọ̀ lẹ po avọ̀ núnina mimẹ lẹ po. Dinvie Jehu ko dè sunnusi kanwe nẹ̃ do gbonu, bo dọmọ; Eyín depope sọn sunnusi lẹ mẹ mẹhe yẹn na hẹn wá do alọ mìtọn lẹ mẹ họ̀ngán, ewọ he gbọ é yì, ogbẹ̀ etọn na tin na ogbẹ̀ ewọ tọn. ²⁵E sọ wá jọ, saun le é basi dòdona avọ̀ nunina mimẹ̀ tọn, wẹ Jehu dọ hlan hihọtọ podọ hlan awhàngán lẹ dọmọ, Mì biọ hòmẹ yì, bo hù yé; mì dike mẹde jẹgbonu wá blo. Yé sọ yí onù ohi tọn do hò yé; hihọtọ po awhàngán lẹ po sọ fọ̀ yé dlan gbonu, bo sọ yì tòdaho ohọ̀ Baali tọn tọn mẹ. ²⁶Yé sọ hẹn odòtin he tin to ohọ̀ Baali tọn mẹ lẹ jẹgbonu wá, bo mẹ yé. ²⁷Yé sọ gbà odotin Baali tọn lọ liai, bo gba ohọ̀ Baali tọn liai, bo hen ẹn zùn ogbohọ de, kaka jẹ egbé he. ²⁸Le wẹ Jehu va Baali do sọn Islaeli mẹ ²⁹Ṣogãn sọn ylando Jeloboami visunnu Nebati tọn tọn lẹ mẹ, ehe é yí do hẹn Islaeli nado wàylando, Jehu ma tọ́nyi sọn yé godo gba, enẹ wẹ nado dọ, sika yìnvú lẹ he tin to Bẹteli mẹ, po ehe tin to Dani me lẹ po. ³⁰OKLUNỌ sọ dọ hlan Jehu dọmọ, Na hiẹ ko wà dagbedagbe to hinhẹn enẹ he yín jijlọ to nukun ṣie lẹ mẹ sẹ wutu, bo ko sọ wà hlan owhé Ahabi tọn kẹdẹdi ehè tin to ayiha ṣie mẹ lepo, visunnu towe whẹndo ẹnetọ tọn lẹ na sín ofìn Islaeli tọn ji. ³¹Ṣigba Jehu ma yi ayipipa de nado yí ayiha etọn lẹpo do zinzọnlin tọ osẹ́n OKLUNỌ tọn mẹ gba, Jiwheyẹwhe Islaeli tọn: é ma tọ́nyì sọn ylando lelọboami tọnmẹ, he é yí do hẹn Islaeli nado waylando.

³²To azán nele mẹ OKLUNỌ sẹ̀ nado to Islaeli sán whegli Hazaeli sọ to yé hò to age Islaeli tọn lẹpo ji. ³³Sọn Jọdani hlan whezẹtẹndali, aigba Gileadi tọn lẹpo, Gadinu le, po Leubeninu lẹ po, po Manasẹnu lẹ po, sọn Aloeli, he tin to agbado Alnọni tọn dali, yèdo Gileadi po Baṣani po. ³⁴Dinvie pipotọ owalọ Jehu tọn tọn lẹ, po ehe é wa lepo po, po hlọnhlọn etọn lepo po, yè ma ka wlan yé to owé otànnugbo ahọlu Islaeli tọn lẹ tọn mẹ? ³⁵Jehu sọ damlọn po otọ́ etọn lẹ po: yé sọ di i to Samalia mẹ. Jéhoahazi visunnu etọn sọ dùahọlu to otẹn etọn mẹ. ³⁶Ọjle he Jehu do dùahọlu to Islaeli to Samalia mẹ yín owhè koatọ́nnukunatọ̀n.

¹DINVIE whenuena Àtalìa onọ Ahazia tọn mọ dọ visunnu etọn yín osiọ, é tite bo và okun ahọluji lẹpo. ²Ṣigba Jehoseba, viyọnnu ahọlu Jolami tọn, nọviyọnnu Ahazia ton, zé Joaṣi visunnu Ahazia tọn, bo fìn in sọ yì sọn visunnu ahọlu tọn he yè hù lẹ ṣẹnṣẹn, yèdọ ewọ po anùnọ ètọn po, bo yí ye do adọhò mẹ; yé sọ whla ẹ sọn Atalià de, mọ wẹ ewọ ma yín hùhù do. ³Ewọ sọ tin whiwhla to e de owhè ṣidopo to ohò OKLUNỌ tọn mẹ: Atalìa sọ to ahọludu tò aigba lọ ji.

⁴To owhè ṣinawetọ mẹ Jehọiada domẹhlan bo hẹn awhàngan to kanweko ji lẹ, Kalinu lẹ tọn, po hihọtọ lẹ po, bo plan yé wá e de biọ ohọ̀ OKLUNỌ tọn mẹ; é sọ basi alẹ̀nù de po ye po, bo yí whiwhle de sẹnye de to ohọ̀ OKLUNỌ tọn me, bo sọ do visunnu ahọlu tọn lọ hia yé ⁵E sọ degbèna yé, dọmọ, Ehe wẹ onú he mìwlẹ na wà: odá atọ̀ntọ de sọn mì mẹ, he wa hòmẹ to gbọjẹzán ji, na yín hihọtọ ohihó owhé ahọlu tọn ton lẹ; ⁶podọ odá atọ̀ntọ de na tin to họ̀ngbo Suli go; podọ oda atọ̀ntọ de to hongbo go to hihọtọ godo: mọwẹ míwlẹ na hen hihọ̀ owhé lọ tọn do, bo sọ yín awhànglọntọ de. ⁷Ogbẹ́ awe sọn mì mẹ, yèdọ ehe yì gbonu to gbọjẹzán ji lẹpo, na hẹn hihọ́ owhé OKLUNỌ tọn ton go lẹ́do ahọlu. ⁸Mìwlẹ na sọ to lẹ́do ahọlu lọ pé, omẹ dopodopo po adánwànú etọn lẹ po to alọ etọn mẹ; podọ ewọ he wá biọ awhàngbé lẹ ṣẹnṣẹn, gbọ yè ni hù i: mì ni tin to ahọlu lọ de whenuena é tón jei gbonu, po whenuena é gọ ja whégbe po. ⁹Awhàngán to kanweko lẹ ji lẹ sọ wà kẹdẹdi ehe Jehọiada yewhenọ lọ degbèna lẹpo: yé omẹ dópodopo so bẹ́ omẹ etọn lẹ, enẹlẹ he tin nado wá whégbe to gbọjẹzan ji, po yé enẹlẹ po he tin nado tọn yì to gbọjẹzán ji, bo wá Jehọiada yewhenọ lọ de. ¹⁰Yewhenọ lọ sọ jó owhán lẹ po awọyínu lẹ po he ko yín ahọlu Davidi tọn, he ko tin to ohọ OKLUNỌ tọn mẹ na awhàngán to kanweko lẹ ji lẹ. ¹¹Ahọluwhàn so ṣite, omẹ dopodopo po adánwànú etọn lẹ po to alọ etọn mẹ, sọn adà adusi ohọ̀ tọn mẹ jẹ adà amiyọn ohò lọ tọn mẹ, jei gbọn agbà ohọ̀ lọ tọn dali, gbọn ahọlu lọ dali lẹ́do. ¹²Whenenu wẹ é hẹn ovi ahọlu tọn lọ jẹgbonu, bo yí ojẹgbakun lọ do e ji, bo sọ yí okunnuhó lọ na ẹn; bo yí i do basi ahọlu, bo sọ samisisána ẹn; ye sọ yí alọ yetọn lẹ dò hòpẹ́, bo dọmọ, Jiwheyẹwhe ni whlẹn ahọlu lọ. ¹³Whenuena Atalia ṣẹ̀ zíngidi ahọluwhàn lọ tọn po gbẹtọ lẹ tọn po, é wá gbẹtọ lẹ de biọ ohọ̀ OKLUNỌ tọn lọ mẹ: ¹⁴E sọ pọ́n, bo, dayi e go, ahòlu lọ ṣite to odòtin lọ kọ̀n, dile owàlọ yín, awhàngán lẹ po opẹ̀n lẹ po to ahọlu lọ kọ̀n; omẹ aigba lọ tọn lẹpo sọ to ayajẹ, bo to opẹ̀n lẹ kún. Whenẹnu wẹ Atalia tlẹn avọ̀ etọn lẹ, bo dawhá dọ, Onúblá, onúblá ¹⁵Jehọiada yẹwhenọ lọ sọ degbèna awhàngán kanweko lẹ tọn lẹ he yè dè do awhànpa lọ ji, bo dọ hlan yé dọmọ, Mì hẹn ẹn tón jẹ awhàngbẹ́ lẹ ṣẹnṣẹn; bo sọ yí ohi do hù ewọ he hodo e: na yewhenọ lọ dọmọ, Mì dike yè hù i to ohọ̀ OKLUNỌ tọn mẹ blo ¹⁶Mọwẹ yé basi aliho na ẹn; ewọ sọ gbọn aliho kuleji osọ́ lẹ tọn tọn yì jẹ owhé ahọlu tọn gbè: podọ finẹ wẹ yè sọ hù i do.

¹⁷Jehọiada sọ basi alẹ̀nù deto OKLUNỌ po ahọlu po po gbẹtọ lẹ po ṣẹnṣẹn, dọ yé ni yín omẹ OKLUNỌ tọn; to ahọlu lọ ga po gbẹtọ lẹ po ṣẹnṣẹn. ¹⁸Omẹ aigba lọ tọn lẹpo sọ yì ohò Baali tọn kọn, bo gbà ẹ liai; agbà etọn lẹ po boṣio etọn lẹ po wẹ yé gbà do flinflin lẹ́do, bo sọ hù Matani yẹwhenọ Baali tọn to agbà lẹ nukọn. Yẹwhenọ lọ sọ dè ogán lẹ do ohò OKLUNỌ tọn ji. ¹⁹E sọ bẹ́ awhàngán lẹ to kanweko lẹ ji, po Kalinu lẹ po po ahọluwhan lọ po, po gbẹtọ aigba lọ tọn lẹpo po; yé sọ hẹn ahọlu lọ jẹte wá sọn ohọ̀ OKLUNỌ tọn mẹ, bo gbọn aliho hòngbo ahọluwhàn tọn tọn ji jẹ owhé ahọlu tọn gbè. Ewọ sọ sín ofìn ahọlu lẹ tọn ji ²⁰Mọwẹ omẹ aigba lọ tọn lẹpo sọ to ayajẹ, todaho lọ sọ yín abọẹnọ: yé sọ yí ohi do hù Atalia to owhé ahọlu lọ tọn gbè. ²¹Jehoaṣi yín owhè ṣinawe mẹho whenuena é ṣẹ̀ nado to ahọludu.

¹OWHÈ ṣinawetọ Jehu tọn mẹ wẹ Jehoasi ṣẹ̀ nado dùahọlu; é sọ dùahọlu owhè kande to Jelusalẹm mẹ: oyín onọ etọn tọn wẹ Zibia Beẹli-seba tọn. ²Jehoasi sọ wà enẹ he yín jlọjlọ to nukun OKLUNỌ tọn lẹ mẹ to azán etọn lẹpo ehe mẹ Jehọiada yẹwhenọ to oplọnna ẹn. ³Ṣogàn yè ma bẹ́ otẹn yìaga lẹ sẹ̀ gba; gbẹtọ lẹ gbẹ́ sọ to avọ́sán bo sọ to nuyónwán mẹ̀ to otẹn yìaga lẹ mẹ.

⁴Jehoaṣi sọ dọ hlan yẹwhenọ lẹ dọ, Akuẹ onú hihiọ lẹ tọn lẹpo he yè hẹn biọ ohò OKLUNỌ tọn mẹ wá, to akuẹ yè zinzán mẹ, akuẹ gbẹtọ lẹ tọn na mẹhe omẹ dopodopo yín didoahina, po akuẹ lẹpo po he é biọ ayiha omẹ dopodopo tọn mẹ nado hẹnwá biọ ohọ̀ OKLUNỌ tọn mẹ, ⁵Gbọ yẹwhenọ lẹ ni bẹ́ ẹ hlan yé, omẹ dopodopo sọn mẹyinyọnẹn etọn si: yé na sọ vọ̀ tintlẹn ohò tọn lẹ jlado, fidepope yè na mọ tintlẹn de te. ⁶Ṣigba é sọ yín mọ, dọ to owhè konukunatọ̀ntọ ahọlu Jehoasi tọn mẹ yẹwhenọ lọ ma ko vẹ̀ tintlẹn ohọ̀ lọ tọn lẹ jlado gba. ⁷Whenẹnu wẹ ahọlu Jehoaṣi ylọ na Jehọiada yẹwhenọ lọ, podọna yẹwhenọ devo lọ, bo dọ hlan yé dọ, Etẹwutu mì ma do vẹ̀ tintlẹn ohọ̀ lọ tọn lẹ jlado? enẹwutu dinvie mì sọ yí akuẹ de sọn mẹyinyọ́nẹn mìtọn si ba blo, aigba mì nọ jó e na tintlẹn ohọ̀ lọ tọn lẹ. ⁸Yẹwhenọ lẹ lọ sọ yígbe dọ yé ma na yí akuẹ dé sọn gbẹtọ lẹ si ba gba, kavi vọ̀ tintlẹn ohọ̀ lọ tọn jlado gba. ⁹Ṣigba Jehọiada yẹwhenọ lọ yí apotinban de, bo tọn nuvo de to nùsú e tọn mẹ, bo zé e do agbà lọ kọ̀n, do adà adusi ji, dile omẹ de biọ ohọ̀ OKLUNỌ tọn mẹ ja: yẹwhenọ he to ohọ̀n họ̀ lẹ nọ yí do finẹmẹ akuẹ he yè hẹnwá biọ ohọ̀ OKLUNỌ tọn mẹ lẹpo. ¹⁰E sọ yín mọ, whenuena yé mọ dọ akuẹ yín gégé to apotinban lọ mẹ, wẹ wekantọ ahọlu tọn lọ po yẹwhenọ daho po hẹji wá, yé sọ bẹ́ daga do apò lẹ mẹ bo dọ akuẹ he yè mọ to ohọ̀ OKLUNỌ tọn mẹ lọ. ¹¹Yé sọ yí akuẹ he yè jlẹ lọ do alọ yé he wà azọ́n lọ lẹ tọn mẹ, he tindo nugopinpọ́n ohọ̀ OKLUNỌ tọn tọn lọ: yé sọ yí i do súahọ hlan atinpatọ lẹ po họ̀gbatọ lẹ po, he wàna to ohọ̀ OKLUNỌ tọn go lẹ, ¹²podọ hlan họ̀dotọ lẹ po pipatọ zannu tọn lẹ po, na hihò lidemẹ po zannu pipa po nado vọ̀ tintlẹn ohọ̀ OKLUNỌ tọn tọn lẹ jlado, podọ na ehe yè bé dai na ohọ̀ lọ nado nọ vọ ẹ jlado. ¹³Ṣigba na ohọ̀ OKLUNỌ tọn lọ yè ma ko basi kọfo fataka tọn lẹ, miyọnkansinú lẹ, ṣiklẹ lẹ, opẹ̀n lẹ, nuzinzán sika tọn lẹ depope, kavi nuzinzán fataka tọn lẹ, sọn akuẹ he yè hẹn wá biọ ohò OKLUNỌ tọn mẹ gba; ¹⁴Na yé yí enẹ na hlan yé he wa azọ̀n lọ lẹ, bo yí do vẹ̀ ohọ̀ OKLUNỌ tọn lọ jlado. ¹⁵Hugánmọ yé ma lẹn hẹ sunnusi lẹ gba, alọ mẹhetọn mẹ yé jọ́ akuẹ lọ do nado yí na hlan yé he wà azọ̀n lọ lẹ: na yé yí nugbo do zán. ¹⁶Akuẹ na avọ́ nunina whẹ̀yinylan tọn lẹ, podọ akuẹ na avọ́ nunina ylando tọn lẹ, yè ma hẹn biọ ohọ̀ OKLUNỌ tọn mẹ wá gba: yẹwhenọ lẹ tọn é yín.

¹⁷Whenẹnu wẹ Hazaeli ahọlu Silia tọn hẹji yì, bo péavùn hẹ Gati, bo yí i: Hazaẹli sọ zé nukunmẹ etọn nado hẹji yì Jelusalẹm. ¹⁸Joaṣi ahọlu Juda tọn sọ bẹ́ onú hihiọ lẹpo he Jehọṣafati, po Jolami po, po Ahazia po, otọ́ etọn lẹ, ahọlu Juda tọn lẹ, ko handowiwe, po onú hihiọ etọn titi lẹ po, po sika lẹpo po he yè mọ to adọkunnu ohọ̀ OKLUNỌ tọn tọn mẹ lẹ, podọ sọn ohọ̀ ahọlu tọn mẹ, bo do e hlan Hazaẹli ahọlu Silia tọn de: ewọ sọ tọ́n yì sọn Jelusalẹm. ¹⁹Dinvie pipòtọ owàlọ Joaṣi tọn tọn po ehe é wà lẹpo po, yè ma wlan to owe otànnugbo ahọlu Juda tọn lẹ tọn mẹ? ²⁰Mẹmẹsi etọn lẹ sọ tite, bo basi atẹ̀ de, bo hò Joaṣi to ohọ Milo tọn kọn, to aliho he jẹte yí jẹ Sila ji. ²¹Na Jozakali visunnu Ṣimeati tọn, po Jehozabadi visunnu Someli tọn po, mẹmẹsi etọn lẹ, hò e, é sọ ku; yé sọ di i po otọ́ etọn lẹ po to tòdaho Davidi tọn mẹ. Amazia visunnu etọn sọ dùahọlu to otẹn etọn mẹ.

¹TO owhè konukunatọ̀ntọ Joaṣi visunnu Ahazia tọn tọn mẹ, ahọlu Juda tọn, Jehoahazi visunnu Jehu tọn ṣè nado dùahọlu to Islaeli ji to Samalia mẹ, bo sọ dùahọlu owhè fọtọ̀nnukunawe ²Ewọ sọ wà enẹ he yín oylan to nukun OKLUNỌ tọn mẹ, bo sọ to ylando Jeloboami visunnu Nebati tọn tọn hodo, ehe é yí do hẹn Islaeli nado wàylando; é ma fọ́nyì sọn e mẹ gba. ³Yè sọ hẹn adi OKLUNỌ tọn jimiyọn do Islaeli ji, é sọ jó yé do alọ Hazaẹli ahọlu Silia tọn tọn mẹ, podọ do alọ Bẹni-hadadi visunnu Hazaẹli tọn tọn mẹ, jeijei ⁴Jehoahazi sọ vẹ̀ OKLUNỌ, OKLUNỌ sọ tuntóai hlan ẹn: na ewọ mọ nukunbia Islaeli tọn, na le ahọlu Silia tọn to nukunbiana yé do. ⁵(OKLUNỌ sọ na whlẹngantọ de Islaeli, mọ bọ yé do tọ́n yì sọn alọ Silianu lẹ tọn mẹ: ovi Islaeli tọn lẹ sọ nọ̀ gohọ̀ yetọn lẹ mẹ, di hóhówhenutọn. ⁶Ṣogãn yé ma fọ́nyì sọn ylando owhé Jeloboami tọn tọn lẹ mẹ gba, ehe é yí do hẹn Islaeli nado wàylando, ṣigba bo to zọnlinzin to e mẹ: Aṣela ga gbẹ́ sọ pòai to Samalia mẹ.) ⁷Na é ma pòdai sọn gbẹtọ lẹ mẹ hlan Jehoahazi gba adavo osọ́nọ kandeao, po kẹkẹ ao po, po afọnọ fọtọ́n ao po; na ahọlu Silia tọn và yé, bo basi yé taidi kọgudu to lìlido mẹ. ⁸Dinvie pipòtọ owàlọ Jehoahazi tọn lẹ, po ehe é wà lẹpo po, po hlọnhlọn etọn po, yè ma ka wlan yé to owé otànnugbo ahọlu Islaeli tọn lẹ tọn lẹ mẹ? ⁹Jehoahazi sọ damlọn po otọ́ etọn lẹ po; yé sọ di i to Samalia mẹ: Joaṣi visunnu etọn sọ dùahọlu to otẹn etọn mẹ.

¹⁰To owhè gbàntónnukunawetọ Joaṣi ahọlu Juda tọn tọn mẹ Jehoasi visunnu Jehoahazi tọn ṣè nado to ahọludu to Islaeli ji to Samalia mẹ, bo sọ dùahọlu owhè fọtọ̀nnukundopo. ¹¹E sọ wà enẹ he yín oylan to nukun OKLUNỌ tọn mẹ; é ma fọ́nyì sọn ylando Jeloboami visunnu Nebati tọn tọn lẹpo mẹ gba, ehe é yí do hẹn Islaeli nado wàylando: ṣigba é to zọnlinzin to e mẹ. ¹²Dinvie pipòtọ owàlọ Joaṣi tọn tọn lẹ, po ehe é wà lẹpo po, po hlọnhlọn etọn po ehe é yí do peavùn hẹ Amazia ahọlu Juda tọn, yè ma ka wlan yé to owe otànnugbo ahọlu Islaeli tọn lẹ tọn tọn mẹ? ¹³Joaṣi sọ damlọn po otọ́ etọn lẹ po; Jeloboami sọ sín ofìn etọn ji: yè sọ di Joaṣi to Samalia mẹ po ahọlu Islaeli tọn lẹ po.

¹⁴Dinvie Eliṣa sọ yín mẹjai awutunọ sọn awutujijẹ etọn mẹ ehetọn é kú: Joaṣi ahọlu Islaeli tọn sọ jẹte wá e de, bo viavi do e ji, bo dọmọ, Otọ́ ṣie, otọ́ ṣie, kekẹ Islaeli tọn lẹ po osónọ etọn lẹ po! ¹⁵Eliṣa sọ dọ hlan ẹn dọ, Yí ogába po ogá lẹ po: ewọ sọ yí ogába po ogá lẹ po do e de. ¹⁶E sọ dọ hlan ahọlu Islaeli tọn dọ, Yí alọ towe do ogába lọ ji: ewọ sọ yi alọ etọn do e ji. Eliṣa sọ yí alọ etọn lẹ do alọ ahọlu tọn lẹ ji ¹⁷E sọ dọmọ, Hùn ovẹ́sẹ́ hlanwhèzetẹn waji: ewọ sọ hùn in. Whenẹnu wẹ Eliṣa dọmọ, Sẹ́: ewọ sọ sẹ́. E sọ dọmọ, Ogá awhàngba OKLUNỌ tọn tọn, yèdọ ogá awhàngba tọn to Silia ji: na hiẹ na hò Silianu lẹ to Afẹki mẹ, kaka hiẹ ko do sú yé do. ¹⁸Ewọ sọ dọmọ, Bẹ́ ogá lẹ lọ: ewọ sọ bẹ́ yé. E sọ dọ hlan ahọlu Islaeli tọn dọ, Ho to aigba ji: ewọ sọ ho whlatọ̀n, bo doalọte. ¹⁹Omẹ Jiwheyẹwhe tọn lọ sọ yín homẹgblenọ do e go, bo dọmọ, Hiẹ do ko hò whla atọ́n kavi ṣidopo; whenẹnu hiẹ ko hò Silianu lẹ kaka hiẹ ko do sú i do: fietọn dinvie hiẹ na hò Silia whlatòn kẹde.

²⁰Eliṣa sọ kú, yé sọ di i. Dinvie awhàngbẹ́ Moabinu lẹ tọn lẹ wá aigba lọ ji to wiwá owhè tọn mẹ. ²¹E sọ wá jọ, le yé to dawe de di, wẹ, dayi e go, yé mọ awhàngbé de hlan; yé sọ zé dawe lọ dlan olidò Eliṣa tọn mẹ: ṣaun le dawe lọ jẹ ohú Eliṣa tọn lẹ ji, é hinhọn, bo fọ́n? e to afọ etọn lẹ ji.

²²Hazaẹli ahọlu Silia tọn sọ to nukunbiana Islaeli to azán Jehoahazi tọn lẹpo gbè. ²³Ṣigba OKLUNỌ yín jọmiọnnọ hlan yé, bo sọ tindo awubla to yé ji, bo sọ tindo yẹyi hlan yé, na alẹ̀nù etọn hẹ Ablaham, Isaki, po Jakobu po wutu, bo ma na do sú yé do, mọ é ma ko sọ ze yé dlan sọn nukọn etọn gba. ²⁴Hazaẹli ahọlu Silia tọn sọ kú; Beni-hadadi visunnu etọn sọ dùahọlu to otẹn etọn mẹ. ²⁵Jehoasi visunnu Jehoahazi tọn sọ vó yi sọn alọ Bẹni-hadadi visunnu Hazaẹli tọn tọn mẹ tòdaho lẹ he é ko bẹ sọn alọ Jehoahazi otọ etọn tọn mẹ gbọn awhàn dali. Whla atọ̀n wẹ Joaṣi hò e, bo sọ yí tòdaho Islaeli tọn lẹ gọ̀.

¹TO owhè awetọ Joaṣi visunnu Jehoabazi ahọlu Islaeli tọn tọn mẹ wẹ Amazia visunnu Joaṣi ahọlu Juda tọn tọn ṣẹ̀ nado dùahọlu. ²E yín owhé koatọ́n mẹbo whenuena é ṣẹ̀ nado dùahọlu; é sọ dùahọlu owhé koatọ́nnukunẹnẹ to Jelusalẹm mẹ: oyín onọ etọn tọn wẹ Jehoadini sọn Jelusalẹm. ³Ewọ sọ wà enẹ he yín jijlọ to nukun OKLUNỌ tọn lẹ mẹ, gãnṣo taidi Davidi otọ́ etọn ma gba: é wà kẹdẹdi ehe Joaṣi otọ́ etọn ko wà lẹpo. ⁴Ṣogãn yè ma bẹ́ otẹn yìaga lẹ sẹ̀ gba: gbẹtọ lẹ gbẹ́ sọ to avọ́sàn bo sọ to nuyọ́-nwán mẹ̀ to otẹn yiaga lẹ mẹ. ⁵E sọ wà jọ, saun le yè do ahọludu lọ ai to alọ etọn mẹ, wẹ è hù mẹmẹsi etọn lẹ he ko hù ahọlu otọ́ etọn: ⁶ṣigba é ma hù ovi hlọnhùtọ lọ lẹ tọn lẹ gba: kẹdẹdi enẹ he yè wlan to owé osẹ́n Moṣe tọn tọn mẹ, dile OKLUNỌ degbé do, dọmọ, Yè ma na hù otọ́ lẹ na ovi lẹ gba, mọ yè ma na sọ hù ovi lẹ na otọ́ lẹ gba; ṣigba omẹ dopo-dopo na kú na ylando etọn titi. ⁷E sọ hù sọn Edọmi mẹ fọtọ́n ao to Agbàdo Ojẹ tọn mẹ, ho sọ yí Sela gbọn awhàn dali, bo ylọ oyín e tọn Jokleẹli, jẹ egbé.

⁸Whenẹnu wẹ Amazia do mẹdagun lẹ hlan Jehoaṣi de, visunnu Jehoahazi visunnu Jehu tọn, ahọlu Islaeli tọn, dọmọ, Wà, gbọ mi ni pọ́n mi nọzo sọn nukunmẹ. ⁹Jehoaṣi ahọlu Islaeli tọn sọ domẹhlan Amazia ahọlu Juda tọn de, dọmọ, Atinwunnọ he tin to Lẹbanọni mẹ domẹhlan kedali he tin to Lẹbanọni mẹ de, dọmọ, Na viyọnnu towe hlan visunnu ṣie hian asi: ogbékanlin de he tin to Lẹhanọni mẹ sọ jugbọn finẹ ho zín atinwunnọ lọ do odò. ¹⁰Hiẹ nugbonugbo ko hò Edọmi, ayiha towe ko sọ zé we daga: dogigo etọn, bo sọ nọ̀ owhè gbè; na etẹwutu ka wẹ hiẹ to aklọndin hlan awugble towe, bọ hiẹ na do jai, yèdọ hiẹ, po Juda po to de we? ¹¹Ṣigba Amazia ma jlo na sè gba. Mọ wẹ Jehoaṣi ahọlu Islaeli tọn hẹji yì; ewọ po Amazia ahọlu Juda tọn po sọ pọ́n yé nọzo sọn nukunmẹ to Bẹti-ṣemẹṣi, he yín Juda tọn. ¹²Yè sọ yí Juda do gbigblehù kọ̀n to Islaeli nukọn; yé sọ hẹ̀nyì omẹ dopodopo do gohọ̀ etọn kọ̀n. ¹³Jehoaṣi ahọlu Islaeli tọn sọ wle Amazia ahọlu Juda tọn, visunnu Jehoaṣi visunnu Ahazia tọn tọn, to Bẹti-ṣemẹṣí, bo wà Jelusalẹm, bo gbà adò Jelusalẹm tọn liai sọn họ̀ngbo Eflaimi tọn jẹ họ̀ngbo lọnglọnẹnmẹ, awàgbà fowe. ¹⁴E sọ bẹ́ slka po fataka lẹpo po, po nuzinzán he yè mọ to ohọ̀ OKLUNỌ tọn mẹ lẹpo po, podọ to adọkunnu ohọ̀ ahọlu tọn tọn lẹ mẹ, po mẹdodego lẹ po ga, bo sọ lẹ́gọ̀ do Samalia. ¹⁵Dinvíe pipòtọ owàlọ Jehoaṣi tọn tọn lẹ he è wà, po hlọnhlọn etọn po, po le è hòavùn hẹ Amazia ahọlu Juda tọn po do, yè ma ka wlan yè to owé otànnugbo ahọlu Islaeli tọn lẹ tọn lẹ mẹ? ¹⁶Jehoaṣi sọ damlọn po otọ́ etọn lẹ po, yé sọ di i to Samalia mẹ do ahọlu Islaeli tọn lẹ de; Jeloboami visunnu etọn sọ dùahọlu to otẹn etọn mẹ.

¹⁷Amazia visunnu Joaṣi tọn ahọlu Juda tọn nọgbẹ̀ owhè fọtọ̀n to okú Jehoaṣi visunnu Jehoabazi tọn ahọlu Islaeli tọn tọn godo. ¹⁸Dinvie pipòtọ owàlọ Amazia tọn tọn, yè ma ka wlan yé to owé otannugbo ahọlu Juda tọn lẹ tọn tọn mẹ? ¹⁹Yé sọ basi atẹ̀ de po e po to Jelusalẹm mẹ; ewọ sọ họ̀nyì jẹ Lakiṣi: ṣigba yé domẹhlan ẹn to godo jẹ Lakiṣi, bo sọ hù i to finẹ. ²⁰Yé sọ hẹn ẹn to osọ́ lẹ ji wà: yé sọ di i to Jelusalẹm po otọ́ etọn lẹ po to tòdaho Davidi tọn mẹ. ²¹Omẹ Juda tọn lẹpo sọ yí Azalia, mẹhe yín owhè fọtọ̀nnukundopo mẹho, bo yí í do basi ahọlu to otẹn Amazia otọ́ etọn tọn mẹ. ²²Ewọ dó Elati, bo gọ̀ ẹ jò hlan Juda, enẹ godo ahọlu damlọn po otọ́ etọn lẹ po.

²³To owhè fọtọ̀ntọ Amazia tọn visunnu Joaṣi ahọlu Juda tọn tọn mẹ Jeloboami visunnu Joaṣi ahọlu Islaeli tọn tọn ṣẹ̀ nado dùahọlu to Samalia mẹ, bo sọ dùahọlu owhè kandenukundopo. ²⁴E sọ wà enẹ he yín oylan to nukun OKLUNỌ tọn mẹ: é ma fọ́nyì sọn ylando Jeloboami visunnu Nebati tọn tọn lẹ mẹ gba, ehe è yi do hẹn Islaeli nado wàylando. ²⁵E gọ̀ agboji Islaeli tọn jó sọn bibiọ whégbe Hamati tọn jẹ ohù Alaba tọn kọ̀n, kẹdẹdi ọbò OKLUNỌ tọn, Jiwheyẹwhe Islaeli tọn, ehe é dọ ghọn alọ mẹmẹsi etọn Jona visunnu Amitai yẹwhegán tọn tọn mẹ, he tin sọn Gati-hẹfeli. ²⁶Na OKLUNỌ mọ nukunbibia Islaeli tọn, dọ é yin vivẹ́ gbahu: na mẹde ma yín họ̀nsúdo kavi jódote, mọ alọgọtọ de ma tin to finẹ na Islaeli. ²⁷OKLUNỌ ma sọ dọ dọmọ é na gbidi oyín Islaeli tọn sẹ̀ sọn olọn glọ gba: ṣigba é whlẹn yè gbọn alọ Jeloboami visunnu Joaṣi tọn tọn me ²⁸Dinvie pipòtọ owàlọ Jeloboami tọn tọn lẹ, po ehe é wà lẹpo po, po hlọnhlọn etọn po, le é funawhàn do, podọ le è yi Damasku po Hamati po gọ̀ do, ehe ko yin Juda tọn, na Islaeli, yè ma ka wlan yé to owé otànnugbo ahọlu Islaeli tọn lẹ tọn tọn mẹ? ²⁹Jeloboami sọ damlọn po otọ́ etọn lẹ po, yèdọ po ahọlu Islaeli tọn lẹ po; Zekalia visunnu etọn sọ dùahọlu to otẹn etọn mẹ.

¹TO owhè koatọ́nnukunawetọ Jeloboami ahọlu Islaeli tọn tọn mẹ Azalia visunnu Amazia ahọlu Juda tọn tọn ṣẹ̀ nado dùahọlu. ²Owhè fọtọ́nnukundopo mẹho wẹ è yin whenuena é ṣẹ̀ nado to ahọludu; é sọ dùahọlu owhè kandewido-po to Jelusalẹm mẹ: oyín onọ etọn tọn wẹ Jekolia sọn Jelusalẹm mẹ. ³E sọ wà enẹ he yín jijlọ to nukun OKLUNỌ tọn lẹ mẹ kẹdẹdi ehe Amazia otọ́ etọn ko wà lẹpo. ⁴Ṣogãn yè ma bẹ́ otẹn ylaga lẹ sẹ̀ gba: gbẹtọ lẹ gbẹ̀ sọ to avọ́sàn bo sọ to nuyọ́-nwàu mẹ̀ to otẹn ylaga lẹ mẹ. ⁵OKLUNỌ sọ hò ahọlu lọ, mọ wẹ é yín opòtọnọ de jẹ azàn okú etọn tọn gbè, bo sọ nọ nọ́ ohọ́ ovò de mẹ. Jotani visunnu ahẹlu tọn tin to owhédo ji, to whẹ̀dana gbẹtọ aigba lọ tọn lẹ. ⁶Dinvle pipòtọ owàlọ Azalia tọn tọn lẹ, po ehe è wà lẹpo po, yè ma ka wlan yé to owé otànnugbo ahọlu Juda tọn lẹ tọn tọn lẹ mẹ? ⁷Azalia sọ damlọn po otọ́ etọn lẹ po; yé sọ di i do otọ́ etọn lẹ de to tòdaho Davidi tọn mẹ: Jotani visunnu etọn sọ dúahọlu to otẹn etọn mẹ.

⁸To owhè gbàntọ́nnukunatọ́ntọ Azalia ahọlu Juda tọn tọn mẹ wẹ Zekalia visunnu Jelohoami tọn dúahọlu tọ Islaeli ji to Samalia mẹ osún ṣidopo. ⁹E sọ wà enẹ he yín oylan tọ nukun OKLUNỌ tọn mẹ, dile otọ́ etọn lẹ ko wà do: è ma fọ́nyi sọn ylando Jeloboami visunnu Nebati tọn tọn lẹ mẹ gba, ehe é do hẹn Islaeli nado wàylando. ¹⁰Ṣalumi visunnu Jabẹṣi tọn sọ blanú do e go, bo hò e to gbẹtọ lẹ nukọn, bo hú i, bo sọ dúahọlu to otẹn etọn mẹ. ¹¹Dinvie pipòtọ owàiọ Zekalia tọn tọn lẹ, dayi e go, yè wlan yé to owé otànnugbo ahọlu Islaeli tọn lẹ tọn lẹ mẹ. ¹²Ehe wẹ ohò OKLUNỌ tọn he é dọ hlan Jehu, dọmọ, Visunnu towe lẹ jẹ whẹ̀ndo ẹnẹtọ na sin ofin Islaeli tọn ji. Mọ é sọ wà jọ.

¹³Ṣalumi visunnu Jahẹṣi tọn sọ ṣẹ̀ nado to ahọludu to owhè gbàntọ́nnukunẹnẹtọ Uzia ahọlu Juda tọn tọn mẹ; é sọ dúahọlu to otẹn osún dopo tọn mẹ to Samalia mẹ. ¹⁴Mẹnahẹmi visunnu Gadi tọn sọ hẹji yi sọn Pilza bo wá Samalia, bo hò Ṣalumi visunnu Jabẹṣi tọn to Samalia mẹ, bo hù i, bo sọ dùahọlu to otẹn etọn mẹ. ¹⁵Dinvie pipòtọ owàlọ Ṣalumi tọn tọn lẹ, po atẹ̀ he é hasi po, dayi e go, yè wlan yé to owé otànnugbo ahọlu Islaeli tọn lẹ tọn tọn lẹ mẹ. ¹⁶Whenẹnu wẹ Mẹnahẹmi hò Tilsa, po ehe tin finẹmẹ lẹpo po, po agboji etọn lẹ po, sọn Tilsa: na yé ma hùn hlan ẹn gba wutu enẹwutu é hò e; yọnnusi he tin aweji to finẹmẹ lẹpo wẹ é dèdomẹ́.

¹⁷To owhé gbàntọ́nnukunẹnẹtọ Azalia ahọlu Juda tọn tọn mẹ wẹ Mẹnahẹmi visunnu Gadi tọn ṣẹ̀ nado to ahọludu to Islaeli ji, bo sọ dùahọlu owhè ao to Samalia mẹ. ¹⁸E sọ wà enẹ he yín oylan to nukun OKLUNỌ tọn mẹ: é ma fọ́nyl to azán etọn lẹpo mẹ sọn ylando Jeloboami visunnu Nebati tọn tọn lẹ mẹ ehe é yi do hẹn Islaeli nado wáylando. ¹⁹Puli ahọlu Asilia tọn wá aigba lọ ji: Mẹnahẹmi sọ na talẹnti fataka tọn fọtọ́n Puli, na alọ etọn nido tin to e de nado bẹn ahọludu lọ li to alọ etọn mẹ. ²⁰Mẹnahẹmi sọ yi huhlọn do yi akuẹ to Islaeli si, yèdọ sọn omẹ gángán adọkun tọn lẹpo si, sọn omẹ dopodopo si ṣẹkle fataka tọn kandeao, nado yina ahọlu Asilia tọn. Mọ wẹ ahọlu Asilia tọn lọ lẹ́ godo, bo ma sọ nọte finẹ to algba lọ ji. ²¹Dinvie pipòtọ owàlọ Mẹnahẹmi tọn tọn lẹ, po ehe é wà lẹpo po, yè ma ka wlan yẹ́ to owé otànnugbo ahọlu Islaeli tọn lẹ tọn tọn lẹ mẹ? ²²Mẹnahẹmi sọ damlọn pọ otọ́ etọn lẹ po; Pẹkahia visunnu etọn sọ dùahọlu to otẹn etọn mẹ. ²³To owhè kandeaotọ Azalia ahọlu Juda tọn tọn mẹ wẹ Pẹkahia visunnu Mẹnahẹmi tọn ṣẹ̀ nado to ahọludu to Islaeli ji to Samalia mẹ, bo sọ dùahọlu owhè awe.

²⁴E sọ wà enẹ he yin oylan to nukun OKLUNỌ tọn mẹ: é ma fọ́nyi sọn ylando Jeloboami visunnu Nebati tọn tọn lẹ mẹ gba, ehe é yf do hẹn Islaeli nado wàylando. ²⁵Pẹka visunnu Lẹmalia tọn, awhàngàn etọn, blanù do e go, bo hò e to Samalia mẹ, to whéhia owhé ahọlu tọn tọn mẹ, gọ́na Algohi po Allẹ po; sunnusi kandeao sọn Gileadinu lẹ mẹ po e po: é sọ hù i, ho dùahọlu to otẹn etọn mẹ ²⁶Dinvie pipòtọ owàlọ Pẹkahia tọn tọn lẹ, po ehe é wà lẹpo po, dayi e go, yè wlan yé to owé otànnugbo ahọlu Islaeli tọn lẹ tọn tọn lẹ mẹ.

²⁷To owhè kandewdawetọ Azalia ahọlu Juda tọn tọn mẹ wẹ Pẹka visunnu Lẹmalia tọn ṣẹ̀ nado to ahọludu to Islaeli ji to Samalia mẹ, bo sọ dùahọlu owhé òko. ²⁸E sọ wà enẹ he yín oylan to nukun OKLUNỌ tọn mẹ: é ma fọ́nyì sọn ylando Jeloboami visunnu Nebati tọn tọn lẹ mẹ gba, ehe é yí do hẹn Islaeli nado wàylando. ²⁹To azán Pẹka ahọlu Islaeli tọn tọn lẹ mẹ wẹ Tiglati-pilẹsẹli ahọlu Asilia tọn wá, bo yí Ijọni, po Abẹli-bẹti-maaka po, po Janoa po, po Kedasi po, po Hazọli po, po Gileadi po, po Galile po, po aigba Naftali tọn lẹpo po; é sọ bẹ́ yé yi mẹglọnọ jẹ Asilia. ³⁰Hosea visunnu Ela tọn basi onúbla de do Pẹka visunnu Lẹmalia tọn go, bo hò e, bo hù i, bo sọ dùahọlu to otẹn etọn me, to owhè okotọ Jotani visunnu Uzia tọn tọn mẹ ³¹Dinvie pipòtọ owàlọ Pẹka tọn tọn lẹ, po ehe é wà lẹpo po, dayi e go, yè wlan yé to owé otànnugbo ahọlu Islaeli tọn lẹ tọn tọn lẹ mẹ.

³²To owhè awetọ Pẹka visunnu Lẹmalia ahọlu Islaeli tọn tọn mẹ wẹ Jotani visunnu Uzia ahọlu Juda tọn tọn ṣẹ̀ nado to ahọludu. ³³Owhè koatọ́n mẹho wẹ ewọ whenuena é ṣẹ̀ nado to ahọludu; é sọ dùahọlu owhè fọtọ̀nnukundopo to Jelusalẹm mẹ: oyín onọ etọn tọn wẹ Jeluṣa viyọnnu Zadọki tọn. ³⁴E sọ wà enẹ he yín jijlọ to nukun OKLUNỌ tọn lẹ mẹ: é wà kẹdẹdi ehe Uzia otọ́ etọn ko wà lẹpo. ³⁵Ṣogán yè ma bé otẹn yìaga lẹ sẹ́ gba: gbẹtọ lẹ gbó sọ to avósán bo sọ to nuyónwán mó to oten yìaga lẹ mẹ. E dó aga hòngbo ohọ̀ OKLUNỌ tọn tọn. ³⁶Dinvie pipòtọ owàlọ Jotani tọn tọn lẹ, po ehe é wà lẹpo po, yè ma ka wlan yé to owé otànnugbo ahọlu Juda tọn lẹ tọn tọn lẹ mẹ? ³⁷To azán nẹlẹ mẹ wẹ OKLUNỌ ṣè nado to Lẹzini ahọlu Silia tọn, po Pẹka visunnu Lẹmalia tọn po dohlan Juda ji. ³⁸Jotani sọ damlọn po otọ́ etọn lẹ po, yè sọ di i do otọ́ etọn le de to tòdaho Davidi otọ́ etọn tọn mẹ: Ahazi visunnu etọn sọ dùahọlu to otẹn etọn mẹ.

¹TO owhè fọtọ̀nnukunawetọ Pẹka visunnu Lẹmalia tọn tọn mẹ wẹ Ahazi visunnu Jotani ahọlu Juda tọn tọn ṣẹ̀ nado to ahọludu. ²Owhè òko mẹho wẹ Ahazi whenuena é ṣè nado to ahọludu; é sọ dùahọlu awhè fọtónnukundopo to Jelusalẹm mẹ: é ma sọ wà enẹ he yín jijlọ to nukun OKLUNỌ, Jiwheyẹwhe etọn tọn mẹ, di Davidi otọ́ etọn gba. ³Ṣigba é nọ to zọnlinzin to aliho ahọlu Islaeli tọn lẹ tọn mẹ, nugbo, bo sọ nọ hẹn visunnu etọn nado gbọn miyọn mẹ lùntón, kẹdẹdi osùnú kosi tọn lẹ, mẹhe OKLUNỌ bé dlan gbonu sọn ovi Islaeli tọn lẹ nukọn. ⁴E nọ sánvọ́ bo sọ nọ to nuyónwán mẹ́ to otẹn yìaga lẹ mẹ, podọ to okọta lẹ ji, podọ to atin mú lẹpo glọ. ⁵Whenẹnu wẹ Lẹzini ahọlu Silia tọn po Pẹka visunnu Lẹmalia ahọlu Islaeli tọn tọn po hẹji wá jẹ Jelusalẹm nado funawhàn: yé sọ glọn Ahazi do, ṣigba bo ma sọgan gbà ẹ gba. ⁶Ojlẹ nẹ mẹ wẹ Lẹzini ahọlu Silia tọn yí Ela gò do Silia de, bo yàn Ju lẹ sọn Ela mẹ: Silianu lẹ sọ wá jẹ Ela, bo nọ nò finẹ, jẹ azán he gbè. ⁷Mowẹ Ahazi do mẹdagun lẹ hlan Tiglati-pilẹsẹli ahọlu Asilia tọn de, dọmọ, Mẹmẹsi towe podọ visunnu towe yẹn yín: hẹji wá, bo whlẹn mi sọn alọ ahọlu Silia tọn tọn mẹ, podọ sọn alọ ahọlu Islaeli tọn tọn mẹ, he fọ́n do oji e lẹ. ⁸Ahazi sọ bẹ́ fataka po sika po he yè mọ to ohọ̀ OKLUNỌ tọn mẹ lẹ, podọ to adọkunnu ohọ̀ ahọlu tọn mẹ tọn lẹ, bo do e hlan na nunina de hlan ahọlu Àsilia tọn dè. ⁹Ahọlu Asilia tọn sọ tuntóai hlan ẹn: ahọlu Asilia tọn sọ hẹji yì Damasku ji, bo yí i, bo sọ bẹ́ gbẹtọ e tọn lẹ yì mẹglọnọ jẹ Kili, bo hù Lẹzini. ¹⁰Ahọlu Ahazi sọ yì jẹ Damasku nado pé Tiglati-pilẹsẹli ahọlu Asilia tọn, bo sọ mọ agbà he tin to Damasku: ahọlu Ahazi sọ do asà agbà lọ tọn, po ohia e tọn po hlan Ulija yẹwhenọ de, kẹdẹdi anazón etọn lẹpo. ¹¹Ulija yẹwhenọ lọ sọ dó agbà de: kẹdẹdi ehe ahọlu Ahazi dohlan sọn Damasku lẹpo, mọwẹ Ulija yẹwhenọ lọ basi i dote pọn ahọlu Ahazi wiwá sọn Damasku. ¹²Whenuena yè hẹn ahọlu wá sọn Damasku, ahọlu mọ agbà lọ: ahọlu sọ dòn sẹpọ́ agbà lọ kọ́n, bo na nunina to e jí. ¹³E sọ mẹ́ avọ́ nunina mimẹ̀ etọn, po avọ́ nunina jinulili etọn po, bo sọ kòn avọ́ nunina nùnù etọn, bo mì ohùn avọ́ nunina jijọho tọn etọn lẹ do agbà lọ ji. ¹⁴Agbà gànvẹ̃nọ lọ, he tin to OKLUNỌ nukọn, é hẹn sọn nukọn ohọ̀ lọ tọn wá, sọn agbà etọn po ohọ́ OKLUNỌ tọn po ṣẹnṣẹn, bo yí i do adà agewaji agbà etọn tọn ji. ¹⁵Ahọlu sọ degbèna Ulija yẹwhenọ lọ, dọmọ, To agbà daho lọ ji nọ mé avọ́ nunina mimẹ̀ afọnnu tọn, po avọ́ nunina jinulili whèjai tọn po; po avọ́ nunina mimẹ̀ ahọlu tọn po, po avọ́ nunina jinulili etọn lẹpo po, po avọ́ nunina mimẹ̀ gbẹtọ aigba lọ tọn tọn lẹpo po, po avọ́ nunina jinulili yetọn tọn po, po avọ́ nunina nùnù yetọn lẹ po; bo nọ mì ohùn avọ́ nunina mimẹ̀ tọn lẹpo do e ji, po ohùn avọ́ tọn lẹpo po: aigba agbà gànvẹnọ lọ na tin na mi nado nọ kanbiọ gbọn. ¹⁶Le wẹ Ulija yẹwhenọ lọ wà do, kẹdẹdi ehe ahọlu Ahazi degbèna lẹpo. ¹⁷Ahọlu Ahazi sọ sán otónu opòtin lẹ tọn lẹ sẹ́, bo sọ diọtẹnna ozẹ́nvla lọ sọn yé de; bo hẹn ohù lọ wá odò sọn oyìnsú gànvẹ̃ tọn ne tin to e glọ de, bo yí i do aigbatité zannu tọn de ji. ¹⁸Podọ otẹn ṣinyọnnudo na gbọjẹzán he yé ko dó to ohọ́ lọ mẹ, po gbonu-liho ahọlu tọn po, wẹ é gò do do ohò OKLUNỌ tọn, na ahọlu Asilia tọn tọn wutu. ¹⁹Dinvie pipòtọ owàlọ Ahazi tọn tọn he é wà, yè ma ka wlan yé to owé otànnugbo ahọlu Juda tọn lẹ tọn tọn lẹ mẹ? ²⁰Ahazi sọ damlọn po otọ́ etọn lẹ po, yè sọ di i do otọ́ etọn lẹ de to tòdaho Davidi tọn mẹ: Hezekia visunnu etọn sọ dùahọlu to otẹn etọn mẹ.

¹TO owhè wiawetọ Ahazi ahọlu Juda tọn tọn mẹ wẹ, Hosea visunnu Ela tọn ṣè nado to ahọludu to Samalia mẹ to Islaeli ji, bo sọ dùahọlu owhè sinẹnẹ. ²E sọ wà enẹ he yín oylan to nukun OKLUNỌ tọn mẹ, gãnṣo di ahọlu Islaeli tọn he tin to e nukọn lẹ ma gba. ³E ji wẹ Ṣalmanẹseli ahọlu Asilia tọn hẹji wá; Hosea sọ lẹzùn mẹmẹsi etọn, bo sọ hẹn nunina lẹ wá. ⁴Ahọlu Asilia tọn sọ mọ núbla to Hosea mẹ; na é ko do mẹdagun lẹ hlan Ṣọ yi ahọlu Egipti tọn de, bo ma na nunina de hlan ahọlu Asilia tọn gba, dile é nọ wà do whèmẹ whèmẹ: enẹwutu wẹ ahọlu Asilia tọn sú i do whégbe, bo sín in do gànhò mẹ. ⁵Whenẹnu wẹ ahọlu Asilia tọn hẹji wá aigba lẹpo ji lẹ́do, bo sọ hẹji yì jẹ Samalia, bo glọn ẹn do owhè atón. ⁶To owhè ṣinẹnẹtọ Hosea tọn mẹ, wẹ ahọlu Asilia tọn yí Samalia, bo bẹ́ Islaeli yì jẹ Asilia, bo dotẹnna yé to Hala mẹ, podọ to Habọli mẹ, to otọ́ Gozani tọn go, podọ to tòdaho Mẹdẹsi lẹ tọn lẹ mẹ. ⁷E sọ yín mọ, na ovi Islaeli tọn lẹ ko wàylando do OKLUNỌ Jiwheyẹwhe yetọn go wutu, he hẹn yé hẹji tón sọn aigba Egipti tọn ji sọn alọ Falo ahọlu Egipti tọn tọn glọ, bo sọ to budisi yẹwhe devo lẹ. ⁸Bo sọ to zọnlinzin to osẹ́ndoai kosi lẹ tọn lẹ mẹ, mẹhe OKLUNỌ bédlan gbonu sọn ovi Islaeli tọn lẹ nukọn, podọ sọn ahọlu Islaeli tọn lẹ mẹ, he yé ko plọn. ⁹Ovi Islaeli tọn lẹ wà to yẹ́mẹ onu he ma yín jijlọ lẹ do OKLUNỌ Jiwheyẹwhe yetọn go, yé sọ dó na yé otẹn yìaga lẹ to tòdaho yetọn lẹ mẹ, sọn atọhò hihọtọ lẹ tọn kọ̀n jẹ todaho dòkọnọ kọ̀n. ¹⁰Yé sọ zé daga na yé odòtin lẹ po Aṣelimi po do okota yìaga lẹpo ji, podọ to atin mú lẹpo glo: ¹¹finẹ wẹ yé sọ nọ to nuyọ́nwán mé te to otẹn yìaga lẹpo mẹ, dile kosi mẹhe OKLUNỌ bẹ́yì to yé nukọn lọ nọ wà do; bo sọ to onú ylanylan lẹ wà nado gblehomẹna OKLUNỌ hlan adi: ¹²yé sọ to boṣiọ lẹ sẹ́n, ehe tọn OKLUNỌ ko dọ hlan yé dọ, Míwlẹ ma na wà onú he gba. ¹³Gãnṣo OKLUNỌ sakunnu hlan Islaeli, podọ hlan Juda, gbọn alọ yẹwhegán lẹpo tọn mẹ, podọ sọn númọtọ lẹpo mẹ, dọmọ, Mì gọ́ sọn aliho ylanylan mìtọn lẹ mẹ, bo yìn gbèdide ṣie lẹ po osẹ́ndoai ṣie lẹ po, kẹdẹdi osẹ́n he yẹn degbèna otọ́ mìtọn lẹpo, po ehe yẹn dohlàn mì po gbọn alọ mẹmẹsi ṣie yẹwhegán lẹ tọn mẹ. ¹⁴Ṣogãn yé ma jlo na sè, ṣigba bo sinyẹn okò yetọn, taidi okọ̀ otọ́ yetọn lẹ tọn, mẹhe ma yise to OKLUNỌ Jiwheyẹwhe yetọn mẹ ¹⁵Yé gbẹ́ oséndoai etọn lẹ dai, po alẹ̀nù etọn po he é basi po otọ́ yetọn lẹ po, po aṣẹdai etọn lẹ po he é do sakunnu hlan yé; yé sọ to ovọ́ hodo, bo lẹzùn ovọ́, bo to yìyì hodo kosi he tin lẹ́do yé pé lẹ, gbọn mẹhe tọn dali OKLUNỌ naṣẹ yé dọ yé wà di yéwlẹ blo ¹⁶Yé sọ gbẹ́ gbèdide OKLUNỌ Jiwheyẹwhe yetọn tọn lẹpo dai, bo basi na yé boṣiọ kinkòn lẹ, yèdọ oyìnvú awe, bo sọ basi Aṣela de, bo sọ to awhànpa olọn tọn lẹpo litaina, bo sọ to Baali sẹ́n. ¹⁷Yé sọ nọ hẹn visunnu yetọn le po viyọnnu yetọn lẹ po nado nọ gbọn miyọn mẹ, bo sọ to aṣẹ po afinọn le po zán, bo sọ sà yéde nado to enẹ he yín oylan to nukun OKLUNỌ tọn mẹ wà nado gblehomẹna ẹn hlan adi. ¹⁸Enẹwutu wẹ OKLUNỌ do yín adinọ do Islaeli go talala, bo sọ diọtẹnna yé tọ́n sọn nukun etọn mẹ: mẹde yè ma pòdai adavo hẹnnu Juda tọn kẹdẹ. ¹⁹Juda ga ma sọ yìn gbèdide OKLUNỌ Jiwheyẹwhe yetọn tọn lẹ gba, ṣigba yé to zọnlinzin to osẹ́ndoai Islaeli tọn he yé basi lẹ mẹ. ²⁰OKLUNỌ sọ gbẹ́ okún Islaeli tọn lẹpo dai, bo bianukunna yé, bo sọ jó yé do alọ hẹngbletọ lẹ tọn mẹ, kaka é do bẹ́ yé dlan sọn nukun etọn mẹ. ²¹Na é fẹ́n Islaeli sọn owhe Davidi tọn gbè; yé sọ yí Jeloboami visunnu Nebati tọn do basi ahọlu: Jeloboami sọ yàn Islaeli sọn hihodo OKLUNỌ mẹ, bo sọ hẹn yé wàylando ylando daho de. ²²Ovi Islaeli tọn lẹ so to zọnlinzin to ylando Jeloboami tọn he é wà lẹ mẹ; yé ma fọ́nyì sọn e mẹ gba; ²³kaka OKLUNỌ do diọtẹnna Islaeli tọ́n sọn nukọn etọn, dole é dọ do gbọn alọ mẹmẹsi etọn yẹwhegán lẹpo tọn mẹ Mọwẹ yè bẹ́ Islaeli tón yì sọn aigba yetọn titi ji jẹ Asilia, kakajẹ azán he gbè.

²⁴Ahọlu Asilia tọn sọ hẹn gbẹtọ lẹ sọn Babilọni wá, podọ sọn Kuta, podọ sọn Awa, podọ sọn Hamati po Sefalivaimi po, bo dotẹnna yé to tòdaho Samalia tọn mẹ to otẹn ovi Islaeli tọn lẹ tọn mẹ; yé sọ yí Samalia na nutindo, bo sọ to tòdaho etọn lẹ mẹ nọ̀. ²⁵Mowẹ é sọ yín, to ṣaunṣaun ninò finẹ yetọn tọn mẹ, wẹ yé ma dibusi OKLUNỌ gba: enẹwutu wẹ OKLUNỌ do kinnikinni lẹ hlan yé ṣẹnṣẹn, he hù pẹde sọn yé mẹ. ²⁶Enẹwutu wẹ yé dọhó hlan ahọlu Asilia tọn, dọmọ, akọta he hie bẹ́ yì lẹ, bo dotẹnna to tòdaho Samalia tọn lẹ mẹ lẹ, ma yọ́n owàlọ Jiwheyẹwhe aigba lọ tọn tọn gba: enẹwutu wẹ é ko do kinnikinni lẹ hlan yé ṣẹnṣẹn, bo dayi e go, yé to yé hù, na yé ma yọ́n owàlọ Jiwheyẹwhe aigba lọ tọn tọn wutu ²⁷Whenẹnu wẹ ahọlu Asilia tọn degbè, dọmọ, Hẹn dopo sọn yẹwhenọ he mì hẹn sọn odọ̀n wá lẹ mẹ yì finẹ; bo gbọ yé ni yì bo nọ nọ̀ finẹ, bo sọ gbọ é ni plọn owàlọ Jiwheyẹwhe aigba lọ tọn tọn yé. ²⁸Mowẹ dopo sọn yẹwhenọ he yé ko bé sọn Samalia mẹ yì lẹ wá bo nọ Bẹtẹli mẹ, bo to yé plọn le yé do nọ dibusi OKLUNỌ do. ²⁹Ṣogãn akọta dopodopo to yẹwhe yetọn titi lẹ basi, bo oé yé do ohò otẹn yìaga tọn lẹ mẹ he Samalianu lẹ ko basi lẹ, akọta dopodopo to tòdaho yetọn le mẹ he mẹ yé to ninò ³⁰Omẹ Babilọni tọn le basi Sukọti-benọti, omẹ Kuta tọn lẹ basi Nẹlgali, omẹ Hamati tọn lẹ sọ basi Asima, ³¹Àvvinu lẹ basi Nibhazi po Taltaki po, Sẹfalivinu lẹ to ovi yetọn lẹ mẹ to miyọn mẹ hlan Adlamimalẹki po Ajuamimalẹki po, yẹwhe Sẹfalivaimi tọn lẹ. ³²Mowẹ yé dibusi OKLUNỌ, bo bibasi hlan yé sọn yéde ṣẹnṣẹn yẹwhenọ otẹn yìaga lẹ tọn lẹ, he to avósán na yé to ohò otẹn yìaga le tọn lẹ mẹ. ³³Ye to budisi OKLUNỌ, bo to yẹwhe yetọn titi le sèn kẹdẹdi owàlọ akọta lẹ ton mẹhe ṣẹnṣẹn yè bẹ́ yé sọn yì. ³⁴Jẹ egbé yé to wiwà kẹdẹdi owàlọ hóhó tọn lẹ: yé ma dibusi OKLUNỌ gba, mọ yé ma sọ to wiwà kẹdẹdi osẹ́ndoai yetọn lẹ gba, kavi kẹdẹdi aṣẹdai yetọn le, kavi kẹdẹdi osẹ́n kavi kẹdẹdi gbèdide he OKLUNỌ degbèna ovi Jakobu tọn lẹ, mẹhe é doyín Islaeli na; ³⁵mẹhe OKLUNỌ ko basi alọnù de hẹ, bo sọ nase yé, dọmọ, Míwlẹ ma na dibusi yẹwhe devo lẹ gba, kavi dé mìde hlan yé, kavi nọ sẹ́n yé, kavi sánvọ́ hlan yé: ³⁶ṣigba mẹhe yí huhlọn daho po awà dlẹn tọ́n de po do hẹn mì hẹji tọ́n sọn aigba Egipti tọn ji, ewọ we mì na nọ dibusi, podọ hlan ewọ wẹ mìwlẹ na nọ dẹ́ mìde, ewọ wẹ míwlẹ na sọ nọ sánvọ́ hlan: ³⁷osẹ́ndoai lẹ po aṣẹdai lẹ po, oṣẹn po gbèdide lọ po, ehe é wlan na mì, wẹ mìwlẹ na nọ payihado nado nọ to wiwà kakadoi; mìwlẹ ma na sọ dibusi yẹwhe devo lẹ gba: ³⁸podọ alẹ̀nù he e ko basi po mì po mì ma na wọn gba; mọ mìwlẹ ma na sọ dibusi yẹwhe devo lẹ gba: ³⁹ṣigba OKLUNỌ Jiwheyẹwhe mìtọn lọ wẹ mìwlẹ na nọ dibusi; ewọ na sọ whlẹn mì sọn alọ kẹ̀ntọ mìtọn lẹpo tọn mẹ ⁴⁰Ṣogãn yé ma tuntóai gba, ṣigba yé to wiwà kẹdẹdi owàlọ yetọn hóhó tọn. ⁴¹Mowẹ akọta helẹ to budisi OKLUNỌ do, bo sọ to boṣiọ kinkọ̀n yetọn lẹ sẹ̀n; ovi yetọn lẹ domọga, ovi ovi yetọn lẹ tọn lẹ, le otọ́ yetọn lẹ wà do, mọwẹ yé to wiwà do jẹ azán he gbè.

¹DINVIE é sọ wá jọ to owhè atọ̀ntọ Hosea tọn mẹ visunnu Ela ahọlu Islaeli tọn tọn, wẹ Hẹzekia visunnu Ahazi ahọlu Júda tọn tọn ṣẹ̀ nado to ahọludu. ²Owhè koatọ́n mẹho wẹ ewọ whenuena é ṣẹ̀ nado to ahọludu; é sọ duahọlu owhè koatọ́nnukunẹnẹ to Jelusalẹm mẹ: oyín onọ etọn tọn wẹ Abi viyọnnu Zekalia tọn lọ. ³E sọ wà enẹ he yín jijlọ to nukun OKLUNỌ tọn lẹ mẹ, kẹdẹdi ehe Davidi otọ́ etọn ko wà lẹpo. ⁴E diọtẹnna otẹn yìaga lẹ sẹ́, bo gbà odotin lẹ, bo sán Aṣela liai: é sọ gbà odàn gànvẹ̃ tọn hanyanhanyan he Moṣe basi; na jẹ azán nẹlẹ gbè ovi Islaeli tọn lẹ to nuyọnwán mẹ́ hlan ẹn; yè sọ nọ ylọ ẹ Nẹhuṣitani ⁵E dotódido to OKLUNỌ me, Jiwheyẹwhe Islaeli tọn; mọ dọ to godo e tọn mẹde ma tin di i to ahọlu Juda tọn lẹpo ṣẹnṣẹn, kavi to yé he ko tin nukọn e tọn lẹ ṣẹnṣẹn. ⁶Na e sẹ́bòdo OKLUNỌ de, é ma fọnyì sọn hihodo e mẹ gba, ṣigba bo to gbèdide etọn lẹ yìn, he OKLUNỌ degbèna Moṣe. ⁷OKLUNỌ sọ tin po e po; fìdepope é tọ́n yì é nọ doale: é sọ ṣatẹ hẹ ahọlu Asilia tọn, bo ma sẹ́n ẹn gba ⁸E hò Filistini lẹ jẹ Gaza po agboji etọn lẹ pọ, sọn atòhọ hihọtọ lẹ tọn kọ̀n jẹ tòdaho dokọnọ ji.

⁹E sọ wá jọ to owhè ẹnẹto ahọlu Hẹzekia ton mẹ, he yín owhè ṣinawetọ Hosea visunnu Ela ahọlu Islaeli tọn tọn mẹ, wẹ Sahmanẹseli ahọlu Asilia tọn hẹji wá Samalia ji, bo glọn ẹn do ¹⁰To opòdo owhè atọ̀n tọn yé yí i: yèdọ to owhè ṣidopotọ Hẹzekia tọn mẹ, he yín owhe ṣinẹnẹtọ Hosea ahọlu Islaeli tọn tọn mẹ, yè yí Samalia. ¹¹Ahọlu Asilia tọn sọ bẹ́ Islaeli yì je Asilia, bo bẹ́ yé do Hala mẹ, podọ do Habọli mẹ, to otò Gozani tọn ji, podọ to tòdaho Mẹde tọn lẹ mẹ: ¹²na yé ma sètónuna ogbè OKLUNỌ Jiwheyẹwhe yetọn tọn wutu, ṣigba bo gbà alẹ̀nù etọn, yèdọ ehe Moṣe mẹmẹsi OKLUNỌ tọn degbèna lẹpo, bo ma jio na sè e, kavi wà ẹ.

¹³Dinvie to owhè wiẹnẹtọ ahọlu Hẹzekia tọn mẹ wẹ Sẹnnakelibi ahọlu Asilia tọn hẹji wá tòdaho dòkọnọ Juda tọn lẹpo ji, bo yí yé. ¹⁴Hẹzekia ahọlu Juda tọn sọ domẹhlan ahọlu Asilia tọn de jẹ Lakisi, dọmọ, Yẹn ko wàdanu; ló sọn dẽ: enẹ he híẹ zé do oji e wẹ yẹn na hẹn. Ahọlu Asilia tọn sọ dè hlan Hẹzekia ahọlu Juda tọn talẹnti fataka tọn fọdekanweko po talẹnti ogbàn sika tọn po. ¹⁵Hẹzekia sọ na ẹn fataka he yè mọ to ohọ̀ OKLUNỌ tọn mẹ lẹpo, podọ to adọkunnu lẹ mẹ sọn ohọ́ ahọlu tọn mẹ. ¹⁶To ojlẹ nẹ mẹ wẹ Hẹzekia sán sika só sọn ohòn tẹmpli OKLUNỌ tọn tọn lẹ go, podọ sọn odòtin he Hẹzekia ahọlu Juda tọn ko búnúdo lẹ go, bo na ẹn hlan ahọlu Asilia tọn. ¹⁷Ahọlu Asilia tọn sọ do Taltani po Lab-salisi po po Labsakẹ po sọn Lakisi hlan ahọlu Hẹzekia de po awhàngbó daho de po jẹ Jelusalẹm Yé sọ hẹji yì bo wá Jelusalẹm. Whenuena yè hẹn yé hẹji wá, yé wá bo site tọ sìnwhinnu otándò aga tọn dali, he tin to odàn alihogbo, avọ̀yàntọ tọn tọn ji. ¹⁸Whenuena yé ko ylọ hlan ahọlu, Eliakimi visunnu Hilkia tọn, ye tin to whégbẹtọ lẹ ji, po Ṣẹbna wékantọ po, po Joa visunnu Asafi tọn tòhówókantọ lọ po tón wá yé de to fìnẹ ¹⁹Labṣakẹ sọ dọ hlan yé, dọmọ, Mì dọ hlan Hẹzekia dinvie dọmọ, Le wẹ àhọlu daho lọ, ahọlu Asilia tọn dọ, Adọgbómẹ tẹwẹ ehe mẹ hiẹ tódo te he yín? ²⁰Hiẹ to didọmọ ṣigba ohọ́ vọ́tọ dodo wẹ yé, Hónamẹ po huhlọn po tin to fìnẹ na awhàn. Dinvie mẹnu go hiẹ to didodo, bọ hiẹ ko do to atẹ́ẹi hẹ mi? ²¹Dinvie, dayi e go, hiẹ to didodo opò ofán gbigbà he tọn go, yèdo do Egipti go; ehego eyín omẹ de zẹ̀nmẹ, é na biọ alọ etọn mẹ yì, bo só ẹ: mọwẹ Falo ahọlu Egipti tọn yín hlan mẹhe to didodo e go lẹpo. ²²Ṣigba eyín mìwlẹ sọ dọ hlan mi dọmọ, Míwlẹ dotódido to OKLUNỌ Jiwheyẹwhe mìtọn mẹ ewọ ma wẹ enẹ otẹn yìaga mẹhetọn le podọ agbà mẹhetọn lẹ Hezekia ko bẹ́ ṣè, bo ko sọ dọ hlan Juda podọ hlan Jelusalẹm dọ, Mìwlẹ na nọ litai to agbà he nukọn to Jelusalẹm mẹ? ²³Dinvie enẹwutu, yẹn vẹ̀ mì, mì na ogodenú lẹ hlan mẹmẹnu ṣie ahọlu Asilia tọn, yẹn na sọ na osé fọtọ́n awe hiẹ, eyín hiẹ tin sọgan to awà towe ji nado dè hihọtọ lẹ do yé ji. ²⁴Nawẹ hiẹ na sọgan whenẹnu do lẹ́ nukunmẹ awhàngán dopo tọn sọn pẹvipete mẹmẹsi mẹmẹnu ṣie tọn tọn le mẹ, bo do to didodo Egipti go na kẹkẹ lẹ podọ na osónọ lẹ? ²⁵Yè ka hẹn yẹn hẹji wá matin OKLUNỌ do otẹn he ji nado sú i do wẹ? OKLUNỌ lọ wẹ dọ hlan mi dọ, Hẹji yì aigba he ji, bo sú i do. ²⁶Whenẹnu wẹ Eliakimi visunnu Hilkia tọn, po Ṣẹbna po, po Joa po, dọ hlan Labsakẹ dọmọ, Yẹn vẹ we, dọhó hlan mẹmẹsi towe lẹ to Siliagbè mẹ; na míwlẹ tunwun in: a sọ dọhó hẹ mí to Jùgbè mẹ, to otọ́ omẹ he tin to adó ji lẹ tọn lẹ mẹ blo. ²⁷Ṣigba Labṣakẹ dọ hlan yé dọmọ, Mẹmẹnu ṣie do mi hlan mẹmẹnu mìtọn de, podọ hlan de we, nado dọhó helẹ? é ma ka do mi hlan omẹ he sín adó ji lẹ, nado dù omí yetọn titi, podọ nado nù osìn yetọn titi po mì po? ²⁸Whenẹnu wẹ Labṣakẹ site, bo yí ogbè lélé do dawhá to Júgbè mẹ, bo dọhó, dọmọ, Mì sè ohó ahọlu daho tọn, ahọlu Asilia tọn. ²⁹Le wẹ ahọlu lọ dọ dọmọ, Mì dike Hẹzekia klọ mì blo; na ewọ ma na tin sọgan nado whlẹn mì sọn alọ etọn mẹ gba: ³⁰Mọ mì sọ dike Hẹzekia hẹn mì nado dotódido to OKLUNỌ lọ mẹ blo, dọmọ, OKLUNỌ lọ na whlẹn mí nugbo, podọ yè ma na jó tòdaho he do alọ ahọlu Asilia tọn tọn mẹ gba. ³¹Mì tuntóai hlan Hezekia blo: na le wẹ ahọlu Asilia tọn dọ dọmọ, Mì ni basi jijọho mìtọn po yẹn po, bo tọ́n wá dẽ; mì ni bo nọ dù omẹ dopodopo sọn ovẹ̃n etọn mẹ podọ omẹ dopodopo sọn ovòtin etọn mẹ, bo nù omẹ dopodopo osìn lẹ sọn amùzẹ́n etọn titi mẹ; ³²Kaka yẹn na do wá bo bẹ́ mì yì jẹ aigba taidi mìtọn titi de ji, aigba ogbadó po ovẹ̃n po tọn de, aigba akla po vẹ̃ngle lẹ po tọn de, aigba amì olivieli tọn po owín tọn po de, na mì nido tin to ogbè, bo kú blo mì tuntóai hlan Hẹzekia blo, whenuena é to whiwhẹhò mì, dọmọ, OKLUNỌ na whlẹn mì. ³³Yẹwhe akọta lẹ tọn lẹ depope-ko whlẹn aigba etọn sọn alọ ahọlu Asilia tọn tọn mẹ gbède? ³⁴Fie wẹ yẹwhe Hamati tọn lẹ te, po Alpadi tọn po? fie wẹ yẹwhe Sefalivaimi tọn lẹ te, Hẹna tọn, po Iwa po? yé ko whlẹn Samalia sọn alọ ṣie mẹ? ³⁵Mẹnu wẹ yé to yẹwhe otò lẹ tọn lẹpo ṣẹnṣẹn, he ko whlẹn otò yetọn sọn alọ ṣie mẹ, bọ OKLUNỌ lọ na do whlẹn Jelusalẹm sọn alọ ṣie mẹ? ³⁶Ṣigba gbẹtọ lẹ nabọẹ, yé ma sọ gblọn ohó de nẹ̃ gba: na gbèdide ahọlu tọn wẹ, dọmọ, Mì gblọn nẹ̃ blo. ³⁷Whenẹnu wẹ Eliakimi visunnu Hilkia tọn, he tin to whégbetọ lẹ ji, po Ṣẹbna wékantọ lọ po, po Joa visu-nnu Asafi tọn tòhókantọ lọ po, wá Hẹzekia de po avọ̀ yetọn lẹ po tintlẹn, bo dọ ohó Labṣakẹ tọn lẹ nẹ̃.

¹E sọ wá jọ, whenuéna ahọlu Hẹzekia sè e, wẹ e tlẹn avọ̀ etọn lẹ, bo yí odẹ́vọ̀ ṣinyọnna ede, bo yì biọ ohọ̀ OKLUNỌ lọ tọn mẹ. ²E sọ do Eliakimi, he tin to whégbetọ lẹ ji, po Ṣẹbna wékantọ lọ po, po mẹho yẹwhenọ lẹ tọn lẹ po, yè yí odẹ́vọ̀ ṣinyọnna, hlan Isaia yẹwhegán visunnu Amọzi tọn de. ³Yé sọ dọ hlan ẹn dọmọ, Le wẹ Hẹzekia dọ dọmọ, Azán tukla tọn de wẹ azán he; po owọhẹ tọn po, po oṣànko tọn po: na yè hẹn ovi lẹ wá aslọ̀nu, huhlọn ma sọ tin finẹ nado hẹnjẹ gbonu gba. ⁴E sọgan yín OKLUNỌ Jiwheyẹwhe towe na sè ohó Labsakẹ tọn lẹpo, mehe ahọlu Asilia tọn mẹmẹnu etọn ko dohlan nado vlẹ Jiwheyẹwhe ogbẹ̀nọ, bo na sọ wọhẹ ohó he OKLUNỌ Jiwheyẹwhe towe ko ṣè lẹ: enẹwutu zé odẹ́ towe daga na pipòtọ he yè pòdai lẹ. ⁵Mọwẹ mẹmẹsi ahọlu Hẹzekia tọn lẹ wá Isaia de. ⁶Isaia sọ dọ hlan yé dọmọ, Le wẹ mì na dọ hlan mẹmẹnu mìtọn dọmọ, Le wẹ OKLUNỌ dọ dọmọ, A yin avọ̀satọ ohó he hiẹ ko sè lẹ tọn blo, ehe mẹmẹsi aholu Asilia tọn tọn lẹ ko do doafọku mi. ⁷Dayi e go, yẹn na yí gbigbọ do e hòme, ewọ na sọ sè zingidi de, bo na sọ lẹ́gọ̀ do aigba etọn titi ji; yẹn na sọ hẹn ẹn nado jai gbọn ohi dali to aigba etọn lọsu ji.

⁸Mowẹ Labsakẹ sọ lẹ́gọ̀, bo mọ ahọlu Asilia tọn to awhànfun hẹ Libna: na é ko sè dọ yè ko hẹn ẹn fọ̀nyì sọn Lakisi. ⁹Whenuena é sè linlin Tilhaka aholu Etiopia tọn dọ, Dayi e go, yè hẹn ẹn tọn ja nado hoavùn hẹ we: é sọ vọ mẹdagun lẹ dohlan Hẹzekia de, dọmọ, ¹⁰Le wẹ mì na dọ hlan Hẹzekia ahọlu Juda tọn, dọmọ, A dike Jiwheyẹwhe towe mẹhe mẹ hiẹ dotódido te klọ we blo, dọmọ; Yè ma na na Jelusalẹm do alọ ahọlu Asilia tọn tọn mẹ gba. ¹¹Dayi e go, hiẹ ko sè núhe ahọlu Asilia tọn ko wà hlan aigba lẹpo, gbọn súsú yé do gbidigbidi dali: yè ka na whlẹn hiẹ wẹ? ¹²Yẹwhe akọta ẹ tọn lẹ ka ko whlẹn yé, he otò? ie lẹ ko súdo, Gozanì, po Halani po, po Lẹzefi po, po ovi Edẹni tọn lẹ po he tin to Telasali mẹ lẹ? ¹³Fie ahọlu Hamati tọn te, po ahọlu Alpadi tọn po, po ahọlu tòdaho Sẹfalivivaimi tọn tọn po, Hẹna tọn, po Iwa po? ¹⁴Hẹzekia sọ mọ ohówé lọ yí sọn alọ mẹdagun lẹ lọ tọn mẹ, bo hia ẹ: Hẹzekia sọ hẹji yì jẹ ohò OKLUNỌ tọn mẹ, bo tó ẹ dai to OKLUNỌ nukọn. ¹⁵Hẹzekia sọ hodẹ̀ to OKLUNỌ nukọn, bo dọmọ, OKLUNỌ E, Jiwheyẹwhe Islaeli tọn, he sinai to kẹlubimi lẹ ji, hiẹ wẹ Jiwheyẹwhe, yèdọ hiẹ sokẹdẹ, to ahọludu aigba tọn tọn lẹpo mẹ; hie wẹ basi olọn po aigba po. ¹⁶OKLUNỌ E, té otọ́ towe dai, bo sè; OKLUNỌ È, hùn nukun towe lẹ, bo pòn; bo sè ohó Sẹnnakẹlibi tọn lẹ lọ, ehe é do dowẹnhlan mi nado vlẹ Jiwheyẹwhe ogbènọ lọ. ¹⁷Sọn nugbo de mẹ, OKLUNỌ, ahọiu Asilia tọn lẹ ko hẹn akọta lẹ jẹvọ po aigba yetọn lẹ po, ¹⁸bo ko sọ fò yẹwhe yetọn lẹ dlẹn biọ miyọn mẹ: na yé ma yín yẹwhe de gba adavo azón alọ gbẹtọ lẹ tọn lẹ, atin po zannu po; enẹwutu yé ko sú yé do. ¹⁹Enẹwutu dinvie, OKLUNỌ È Jiwheyẹwhe mìtọn, hiẹ ni whlẹn mi sọn alọ etọn mẹ, yẹn vò we, na ahọludu aigba tọn lẹpo nido yọnẹn dọ hiẹ wẹ OKLUNỌ Jiwheyẹwhe, yèdọ hiẹ sokẹdẹ.

²⁰Whenẹnu wẹ Isaia visunnu Amọzi tọn dowẹnhlan Hẹzekia de, dọmọ, Le wẹ OKLUNỌ dọ, Jiwheyẹwhe Islaeli tọn, dọ yín hiẹ má tlẹ hodè hlan mi hlan Sẹnna kelibi aliọla Asilia tọn ji, yẹn ko sè we. ²¹Ehe wẹ oho he OKLUNỌ dọ gbọn etọn dali: viyọnnu awhli Ziọni tọn ko vle we bo ko sọ ẹàn we kò; viyọnnu Jelusalẹm ton ko mimí ota etọn do ogo we, ²²Mẹnu wẹ hiẹ to vivlẹ bo sọ doafọku? podọ mẹnu ji wẹ hiẹ to ogbè towe zédaga do, bo sọ to nukun towe lẹ zé do oji do aga go? yèdọ do Omẹ Wiwe Islaeli tọn Dopo lọ ji. ²³Gbọn mẹdagun towe lẹ dali hiẹ ko vlẹ OKLUNỌ, bo ko sọ dọmọ, Po gégé kẹkẹ ṣie lẹ tọn po po yẹn po wẹ yè hẹn hẹji wá jẹ aga osé lẹ tọn ji, jẹ adà homenukọn Lẹbanọni tọn lẹ ji; podọ yẹn na sán kedali etọn gà lẹ liai, po atin fili etọn whanpenọ lẹ po: yẹn na sọ biọ otẹnmẹ ninò etọn nukọnnukọn tọn mẹ, ozùnkàn odànji etọn sínsénnọ. ²⁴Yẹn ko kùn bo sọ nù osìn ojonọ lẹ, afọgbẹn afọ ṣie le ton wẹ yẹn na yí do hẹn otò Egipti tọn lẹ hú. ²⁵Hiẹ ma ka ko sè le yẹn wà ẹ do daidai, bo sọ do e sọn hóhó whenu? dinvie yẹn ko hẹn ẹn wá jọ, na hiẹ nido tin nado hẹn tòdaho odòkọnọ lẹ jẹvọ biọ okiti vivà tọn lẹ mẹ. ²⁶Enẹwutu wẹ tòmẹnu yetọn lẹ do yín huhlọn pẹvi tọn, yé yín butọnọ fuflutọ; yé tin di ogbó odanji tọn, podọ di amà omú, di ogbe to ohọta lẹ, podọ di ogbadó yè họ̀kọnyìnai whẹpo é do yín bibia. ²⁷Ṣigba yẹn yón ai sínsín towe, po tintón yì gbonu towe po, po whégbè bibiọ wá towe po, po kandùdù towe do oji po, ²⁸Na kandùdù towe do oji e tọn wutu, podọ na sakla towe yè hẹn hẹji wá biọ otọ́ ṣie lẹ mẹ, enẹwutu wẹ yẹn na yí omlẹn ṣie do awọntin towe mẹ, podọ ogàn ṣie do nùflo towe lẹ mẹ, yẹn na sọ hẹn we gò gbọn aliho he hiẹ gbọn wá ji. ²⁹Ehe na sọ yín ohia lọ hlan we: mìwlẹ na dù enẹ he wú wuju to owhè he mẹ, podọ to owhè awetọ mẹ enẹ he tónkùn sọn dopolọ mẹ; podọ to owhè atọ̀ntọ mẹ, mì ni do bo sọ gbẹ̃n, bo sọ do vẹ̃ngle lẹ, bo sọ dù sinsẹ́n etọn. ³⁰Podọ pipòtọ he yè hẹn hòngán sọn owhé Juda tọn gbè lẹ na sọ vọ́ adó yí henai hlandò, bo sọ sẹ́n hlanaga ³¹Na pipòtọ de na tón yì sọn Jelusalẹm, podọ yé he na họ̀ngán lẹ sọn Osó Zìọni mẹ; vivẹnu OKLUNỌ tọn na wà ehe. ³²Enẹwutu le wẹ OKLUNỌ dọ gbọn ahọlu Asilia tọn tọn dali, dọmọ, Ewọ ma na wá jẹ tòdaho he mẹ gba, kavi sẹ́ ogá de to fìnẹ gba, mọ é ma to na wá e nukọn po awọyínu po gba, kavi dlan agbó de do oji nẹ̃ gba. ³³Aliho he é gbọn do wá, dopolọ ji wẹ é na gó gbọn, ewọ ma na wá jẹ tòdaho he ji gba, wẹ OKLUNỌ dọ. ³⁴Na yẹn na yíwhẹ́ do tòdaho he ji nado whlẹn ẹn, na oyín ṣie titi tọn wutu, podọ na Davidi mẹmẹsi ṣie tọn wutu.

³⁵E sọ wá jọ to ozán nẹ mẹ, wẹ angẹli OKLUNỌ tọn tón yì gbonu, bo hò fọtọ́n kẹnnẹkoatọ́n sọn Asilianu lẹ mẹ: whenuena gbẹtọ lẹ tite to afọnnu fú dayi e go, yé omẹ pó yín gbẹtọ oṣiọ lẹ. ³⁶Mowẹ Sẹnnakelibi ahọlu Asilia tọn fọ́nyì, bo yì bo lẹ́góyì bo nọnọ̀ Nineve. ³⁷E sọ wá jọ, le é to taliai to ohò Nislọki yẹwhe etọn tọn mẹ, wẹ Adlamelẹki po Salezeli po yí ohi do hò e: yé sọ hónyì biọ aigba Alalati tọn mẹ. Esanhadọni visunnu etọn sọ dùahọlu to otẹn etọn mẹ.

¹TO azán nẹlẹ mẹ wẹ Hẹzekia yín awutunọ jẹ okú. Isaia yẹwhegán visunnu Amọzi tọn wá e de, bo dọ hlan ẹn dọmọ, Le wẹ OKLUNỌ dọ dọmọ, Do owhé towe do gànji; na hiẹ na kú, a ma to na gán gba. ²Whenẹnu wẹ é lẹ nukunmẹ etọn hlan adó, bo hodẹ́ hlan OKLUNỌ, dọmọ, ³OKLUNỌ È, yẹn vẹ́ we, flin dinvie, le yẹn yí ayiha pipé de do zinzọnlin to nukọn towe to nugbo mẹ do, bo ko sọ wà enẹ he yín dagbe to nukun towe mẹ. Hẹzekia sọ viavi talala. ⁴E sọ wá jọ whẹpo yè do hẹn Isaia tón yì gbonu biọ ṣẹnṣẹn adà tòdaho lọ tọn mẹ, wẹ ohó OKLUNỌ tọn wá e de, dọmọ, ⁵Sọ góyì, bo dọ hlan Hẹzekia ogán omẹ ṣie lẹ tọn lọ, dọmọ, Le wẹ OKLUNỌ dọ, Jiwheyẹwhe Davidi otọ́ towe tọn, Yẹn ko sè odẹ́ towe, yẹn ko sọ mọ odasìn towe lẹ: dayi e go, yẹn na hẹnazọ̀ngbọna we: to azán atọ̀ntọ gbè hiẹ na hẹji yì jẹ ohọ̀ OKLUNỌ tọn mẹ. ⁶Podọ yẹn na sọ go owhè fọtọ̀n do azán towe lẹ go; yẹn na sọ whlẹn we po tòdaho he po sọn alọ ahọlu Asilia tọn tọn mẹ; yẹn na sọ yíwhẹ̀ do tòdaho he ji na ṣie titi tọn wutu, podọ na Davidi mẹmẹsi ṣie tọn wutu. ⁷Isaia sọ dọmọ, yí aklahihi ovòtin lẹ tọn de, Yé sọ yí bo zé e do nutitó lọ ji, ewọ sọ jẹgángán. ⁸Hẹzekia sọ dọ hlan Isaia dọmọ, Etẹ́ wẹ na yin ohia lọ dọ OKLUNỌ na hẹnazọ̀ngbọna mi, podọ yẹn na hẹji yì je ohó OKLUNỌ tọn mẹ to azán atọ́ntọ gbè? ⁹Isaia sọ dọmọ, Ehe wẹ na yín ohia lọ hlan we sọn OKLUNỌ de, dọ OKLUNỌ na wà onú he he é ko dọ: oyẹ́ ni ka yì hlannukọn afọdide ao, kavi yì godo afọdide ao? ¹⁰Hẹzekia sọ gblon dọmọ, Onú fufua de wẹé yín na oyẹ́ nado jagọ̀ afọdide ao: lala, ṣigba gbọ oyé lọ ni gọ́ hlangodo afọdide ao. ¹¹Isaia yẹwhegán sọ dawháylọ OKLUNỌ: é sọ hẹn oyẹ́ lọ wá afọdide ao hlangodo, ehe dali é ko gbọn jẹte yì odò to owhèjlẹnú Ahazi tọn go.

¹²To ojlẹ nẹ mẹ Belodaki-haladani visunnu Baladani tọn, ahọlu Babilọni tọn, do ohówé lẹ po nunina de po hlan Hẹzekia de: na é ko sè dọ Hẹzekia ko yin awutunọ. ¹³Hẹzekia sọ tuntóai hlan yé, bo do ohò onú họakuẹ etọn lẹpo tọn lẹ hia yé, fataka, po sika po, po nuyọnwán lẹ po, po amì họakuẹ po, po ohò awhàngbaja etọn tọn po, po ehe yè mọ to adọkunnu etọn mẹ lẹpo po: núde ma tin to ohọ̀ etọn mẹ, kavi to ahọludutẹn etọn lẹpo mẹ, bọ Hẹzekia ma dohia yé gba. ¹⁴Whenẹnu wẹ Isaia yẹwhegán lọ wá ahọlu Hẹzekia de, bo dọ hlan ẹn dọmọ, Etẹ́wẹ omẹ helẹ dọ? podọ fie wẹ yé sọn wá de we? Hẹzekia sọ dọmọ, Otò dindẹn de mẹ wẹ yè hẹn yé sọn wá, yèdọ sọn Babilọni. ¹⁵Ewọ sọ dọmọ, Etẹ́wẹ yé ko mọ to ohó towe mẹ? Hẹzekia sọ gblọn dọmọ, Ehe tin to ohọ̀ ṣie mẹ lẹpo wẹ yé ko mọ: núde ma tin to adọkunnu ṣie lẹ mẹ he yẹn ma ko dohia yé gba. ¹⁶Isaia sọ dọ hlan Hẹzekia dọmọ, Sè ohó OKLUNỌ tọn. ¹⁷Dayi e go, azán lẹ wá, bọ yè na bẹ́ ehe tin to ohọ̀ towe mẹ lẹpo, podọ enẹ he otọ́ towe lẹ ko bépli do agbànhò mẹ jẹ egbé lẹ yì jẹ Babilọni: yè ma na pò núde dai, wẹ OKLUNỌ dọ. ¹⁸Podọ sọn visunnu towe lẹ mẹ he na tón sọn ogo we lẹ mẹ, ehe hiẹ na ji lẹ, wẹ yé na bé yì; yé na sọ yín ojó lẹ to ahọluwhé ahọlu Babilọni tọn tọn mẹ. ¹⁹Whenẹnu wẹ Hẹzekia dọ hlan Isaia dọmọ, Dagbe wẹ ohó OKLUNỌ tọn he hiẹ dọ. E sọ dọ dogó dọmọ, Mọ ma wẹ é ka yín, eyín jijọho po nugbo po na tin to azán ṣie lẹ mẹ? ²⁰Dinvie pipòtọ owàlọ Hẹzekia tọn tọn lẹ, po hlọnhlọn etọn lẹpo po, podọ le é basi otándò lọ do po sìnwhínnu lọ po, bo do nọ hẹn osìn wá biọ tòdaho lọ mẹ, yè ma ka wlan yé to owé otànnugbo ahọlu Juda tọn lẹ tọn tọn lẹ mẹ? ²¹Hẹzekia sọ damlọn po otọ́ etọn lẹ po: Manassẹ visunnu etọn sọ dùahọlu to otẹn etọn mẹ.

¹MANASSẸ yin owhè wiawe mẹho whenuena é sè nado to ahọludu; é sọ dùahọlu owhè kandefọtọ̀n to Jelusalẹm mẹ oyín onọ etọn tọn wẹ Hẹfzi-ba. ²Ewọ sọ wà enẹ he yín oylan to nukun OKLUNỌ tọn mẹ, di wàlọgbigble kosi tọn lẹ, mẹhe OKLUNỌ bédlan gbonu to ovi Islaeli tọn lẹ nukọn. ³Na é sọ vó otẹn yìaga he Hẹzekia otọ́ etọn ko súdo lẹ dó; é zé agbà lẹ dote na Baali, bo sọ basi Asela de, dile Ahabi ahọlu Islaeli tọn wà do, bo to taliaina awhànpa olọn tọn lẹpo, bo sọ to yé sẹ́n. ⁴E sọ dó agbà lẹ to ohò OKLUNỌ tọn mẹ, ehetọn OKLUNỌ dọmọ, Jelusalẹm mẹ wẹ yẹn na yí oyín ṣie do. ⁵E sọ dó agbà lẹ na awhànpa olọn tọn lẹpo to akànmaho ohọ̀ OKLUNỌ tọn tọn lẹ mẹ. ⁶E sọ hẹn visunnu etọn nado jù gbọn miyọn me, bo sọ plọn apajlẹnú, bo sọ zán afinọn lẹ, bo sọ nọ zán po yé he tindo aovi gbigbọ lẹ po po kẹnnsi lẹ po: é wà oylan to nukun OKLUNỌ tọn mẹ gbahugbahu nado gblehomẹna ẹn hlan adi. ⁷E sọ zé boṣio kinkòn Aṣela tọn, he é basi, do ohọ̀ OKLUNỌ tọn mẹ ehe OKLUNỌ dọ hlan Davidi po Sọlọmọni visunnu etọn po, dọmọ, To ohọ̀ he mẹ, to Jelusalẹm mẹ, ehe yẹn ko dè sọn whẹ́ndo Islaeli tọn lẹpo mẹ, wẹ yẹn na yi oyín ṣie do kakadoi: ⁸Mọ yẹn ma na hẹn afọ Islaeli tọn lẹ nado danyì sọn aigba he yẹn ko na otọ́ yetọn lẹ ji ba; eyín yé na payi sokẹdẹ nado wà kẹdẹdi ehe yẹn ko degbèna yé lẹpo, podọ kẹdẹdi osẹ́n he Moṣe mẹmẹsi ṣie ko degbèna yé lẹpo: ⁹ṣigba yé ma tuntóai gba: Manassẹ ko doavà yé nado wà enẹ he yín oylan hú ehe akọta lẹ lọ wà, mẹhe OKLUNỌ súdo to ovi Islaeli tọn lẹ nukọn. ¹⁰OKLUNỌ sọ dọhó gbọn yẹwhegán mẹmẹsi etọn lẹ dali, dọmọ, ¹¹Na Manassẹ ahọlu Juda tọn ko wà wàlọgbigble helẹ wutu, bo ko sọ yí yìnylan do wà lánhu ehe Amọlinu lẹ ko wà lẹpo, he tin to e nukọn lẹ, bo ko sọ hẹn Júda ga nado yí yẹwhe etọn lẹ do wàylando: ¹²Enewutu le wẹ OKLUNỌ dọ, Jiwheyẹwhe Islaeli tọn, Dayi e go, yẹn hẹn ovlan mọnkọ ja Jelusalẹm po Juda po ji, bọ otọ́ mẹdepope he sè linlin e tọn tọn awe lẹ tọn na siọ. ¹³Yẹn na dlẹn okàn Samalia tọn do Jelusalẹm ji, po nujlẹnusùnmi owhé Ahabi tọn tọn po: yẹn na sọ súnsún Jelusalẹm dile gbẹtọ de nọ súnsún núdùgbán de do, bo nọ súnsún in bo nọ to aga diọ do odò nẹ. ¹⁴Yẹn na sọ bé pipòtọ ogu ṣie tọn dlan hlan, bo jó yé do alọ kẹ̀ntọ yetọn lẹ tọn mẹ; yé na sọ lẹzùn nuyanwẹnna de po ogblannú de po hlan kẹ̀ntọ yetọn lẹpo; ¹⁵na yé ko wà enẹ he yín oylan to nukun ṣie mẹ wutu, bo ko to homẹgbledona mi hlan adi sọn azán otọ́ yetọn le tọn sọn Egipti gbọn, yèdọ do jẹ azán he gbè. ¹⁶Huganmọ Manassẹ kọn ohùn homẹvọnọ tọn dai glanglan, kaka é do gọ́ Jelusalẹm sọn opodo ode jẹ awetọ; dogọ́ ylando etọn ehe é yí do hẹn Juda nado wàylando, to wiwà mẹ enẹ he yín oylan to nukun OKLUNỌ tọn mẹ. ¹⁷Dinvie pipòtọ owàlọ Manassẹ tọn tọn lẹ, po ehe é wà lẹpo po, po ylando etọn he é do wàylando po, yè ma ka wlan yé to owé otànnugbo ahọlu Juda tọn lẹ tọn tọn mẹ? ¹⁸Manassẹ sọ damlọn po otọ́ etọn le po, yè sọ di i to ojipa owhé etọn titi tọn mẹ, to ojipa Uza tọn mẹ: Amoni visunnu etọn sọ dùahọlu to otẹn etọn mẹ.

¹⁹Amọni yin owhè konukunawe mẹho whenuena é ṣè nado to ahọludu; é sọ dùahọlu owhè awe to Jelusalẹm mẹ: oyín onọ etọn tọn wẹ Mesulemẹti viyọnnu Haluzi Jotba tọn tọn ²⁰E sọ wà ene he yín oylan to nukun OKLUNỌ tọn mẹ, dile Manassẹ otọ́ etọn wà do. ²¹Aliho he mẹ otọ́ etọn zinzọnlin te lẹpo mẹ wẹ ewọ zinzọnlin te, bo sọ to yẹwhe he otọ́ etọn sẹ̀n lẹ sẹ́n, bo sọ to taliaina yé: ²²é gbẹ́ OKLUNỌ dai, Jiwheyẹwhe otọ́ etọn lẹ tọn, bo ma sọ zinzọnlin to aliho OKLUNỌ tọn mẹ gba. ²³Mẹmẹsi Amọni tọn lẹ sọ blanú do e go bo sọ hù ahọlu lọ to owhé ẹwlọsu tọn gbè. ²⁴Ṣigba gbẹtọ aigba lọ ji tọn lẹ hù yé he blanú do Amọni ahọlu go lẹpo, gbẹtọ aigba lọ ji tọn lẹ lọ sọ yí Josia visunnu etọn do basi ahọlu to otẹn etọn mẹ. ²⁵Dinvie pipotọ owàlọ Amọni tọn tọn he e wà lẹ, yè ma ka wlan yé to òwé otànnugbo ahọlu Juda tọn lẹ tọn tọn le mẹ? ²⁶Yè sọ di i to olidò etọn mẹ to ojipa Uza tọn mẹ: Josia visunnu etọn sọ dùahọlu tó otẹn etọn mẹ.

¹OWHÈ wiawe mẹho wẹ Josia whenuena é ṣẹ̀ nado to ahọludu; é sọ dùahọlu owhè gbànnukundopo to Jelusalẹm mẹ: oyín onọ etọn tọn wẹ Jẹdida viyọnnu Adaia Bọzkati tọn tọn. ²E sọ wà enẹ he yín jijlọ to nukun OKLUNỌ tọn lẹ mẹ, bo sọ zinzọnlin to aliho Davidi otọ́ etọn tọn lẹpo mẹ, bo ma lẹ́ do apadopo jẹ alọ adusi kavi jẹ amiyọn gba.

³E sọ jọ to owhè fọtọ̀nnukunatọ̀ntọ Josia ahọlu tọn mẹ, wẹ ahọlu lọ do Ṣafani visunnu Azalia tọn, visunnu Mẹṣulami tọn, wékantọ hlan, jẹ ohò OKLUNỌ tọn mẹ, dọmọ, ⁴Hẹji yì jẹ Hilkia yẹwhenọ daho de, na é nido lendopọ akuẹ he yè hẹn wá biọ ohọ̀ OKLUNỌ tọn mẹ lọ, ehe họ́nkọ̀nsi ohọ́n lọ tọn ko bẹ́pli sọn gbẹtọ lẹ de: ⁵bo gbọ yé ni jó e do alọ azọ́ntọ lẹ lọ tọn mẹ he tindo nugòpọ́n ohọ̀ OKLUNỌ tọn tọn lọ: bo sọ gbọ yé ni jó e hlan azọ́ntọ lẹ lọ he tin to ohọ̀ OKLUNỌ tọn lọ mẹ, nado jla kikó ohọ̀ lọ tọn lọ do; ⁶hlan atinpatọ lẹ, podọ hlan kówàtọ lẹ, podọ hlan họ̀dótọ lẹ lọ; podọ na hihọ̀ atin-gbòbli po zannu pipa po nado jla ohò lọ do. ⁷Ṣogãn yè ma basi linlẹn akuẹ he yè jó do alọ yetọn mẹ lọ tọn to finẹ po yé po gba; na yé yí nugbo do zán. ⁸Hilkia yẹwhenọ daho sọ dọ hlan Ṣafini wékantọ lọ dọmọ, Yẹn ko mọ owé osẹ́n tọn lọ to ohọ̀ OKLUNỌ tọn mẹ. Hilkia sọ jó owé lọ hlan Ṣafini, ewọ sọ hia ẹ. ⁹Ṣafini wékantọ lọ sọ wá ahọlu de, bo sọ vọ́ ohó hẹn wá na ahọlu, bo dọmọ, Mẹmẹsi towe lẹ ko bẹ̀ akuẹ he yè mọ to ohò lọ mẹ lọ, bo ko sọ jó e do alọ azọ́ntọ lẹ he tindo nugòpọ́n ohò OKLUNỌ tọn tọn mẹ. ¹⁰Ṣafini wékantọ lọ sọ dọ na ahọlu, dọmọ, Hilkia yẹwhenọ lọ ko jó owé de na mi. Ṣafini sọ hia ẹ to ahọlu nukọn. ¹¹E sọ wá jọ, whenuena ahọlu ko sè ohó owé osẹ́n lọ tọn tọn lẹ, wẹ é tlẹn avọ̀ etọn lẹ. ¹²Ahọlu sọ degbèna Hilkia yẹwhenọ lọ, po Ahikamí visunnu Ṣafini tọn po, po Akbọli visunnu Mikaia tọn po, po Ṣafini wékantọ lọ po, po Asaia mẹmẹsi ahọlu lọ tọn po, dọmọ, ¹³Mì yì, kanbiọ sọn OKLUNỌ de na mi, podọ na gbẹtọ lẹ, podọ na Juda lẹpo, gbọn ohó owe he yè mọ he tọn lẹ tọn dali: na daho wẹ homẹgble OKLUNỌ tọn he yè hẹn jimiyọn do mí gó, na otọ́ mìtọn lẹ ma ko tuntóai hlan ohé owó he tọn lẹ wutu, nado nọ wà kẹdẹdi enẹ he yè wlan gbọn míwlẹ tọn dali, ¹⁴Mowẹ Hilkia yẹwhenọ lọ po Ahikami po, pó Akbọli po, po Ṣafini po, po Asaia po, yì Hulda yẹwhegán-yọnnu lọ de, asi Ṣalumi visunnu Tikva tọn, visunnu Halhasi tọn, họ̀kọ̀nsi avọ̀họ̀ tọn; (dinvie ewọ to Jelusalẹm mẹ nọ̀ tọ ohó awetọ mẹ;) yé sọ dọhó po e pó. ¹⁵Ewọ sọ dọ hlan yé dọmọ, Le wẹ OKLUNỌ dọ, Jiwheyẹwhe Islaeli tọn: dọmọ, Mì dọ na omẹ he do mì hlan mi, ¹⁶Le wẹ OKLUNỌ dọ, Dayi e go, yẹn na hẹn oylan wá ofile, podọ do tòmẹnu etọn lẹ ji, yèdọ ohó owé lọ tọn lẹ he ahọlu Juda tọn ko hia lọ: ¹⁷na yé ko gbé mi dai wutu, bo ko sọ to nuyọnwán mẹ́ hlan yẹwhe devo lẹ, na yé nido yí azọ́n alọ yetọn lẹ tọn lẹpo do hẹnhomẹgble mi hlan adi; enẹwutu wẹ yè na hẹn homẹgble jimiyọn do ofile go, yè ma sọ to na ṣi i gba. ¹⁸Ṣigba hlan ahọlu Juda tọn, mẹhe do mì hlan nado kanbiọ sọn OKLUNỌ de, le wẹ mì na dọ hlan ẹn, dọmọ, Le wẹ OKLUNỌ dọ, Jiwheyẹwhe Islaeli tọn, dọmọ: Gbọn ohó he hiẹ ko sè lẹ tọn dali, ¹⁹Na ayiha towe yín bibọ̀ wutu, bọ hiẹ ko sọ hùwhẹ dewe to OKLUNỌ nukọn, whenuena hiẹ sè núhe yẹn ko dọ do ofile go, odẹ do tòmẹnu etọn lẹ go, na yé nisọ lẹzùn ovọ́ de po dẹ́hodo de po, bo ko sọ tlẹn avọ̀ towe lẹ, bo sọ viavi to nukọn ṣie; yẹn ga ko sọ sè we, wẹ OKLUNỌ dọ. ²⁰Enẹwutu, dayi e go, yẹn na bẹ́ we pli hlan otọ́ towe lẹ de, yè na sọ bẹ́ we pli jẹ yòdò towe kọ́n jijọho mẹ, mọ nukun towe lẹ ma na mọ oylan lẹpo he yẹn na hẹn wá ofile ji gba. Yé sọ vọ́ ohó hẹn wá na ahọlu lọ.

¹AHỌLU domẹhlan, yé sọ bé mẹho Juda tọn lẹpo po Jelusalẹm tọn lẹ po plidopọ do e de. ²Ahọlu sọ hẹji yì jẹ ohọ̀ OKLUNỌ tọn mẹ, po omẹ Juda tọn lẹpo po po tòmẹnu Jelusalẹm tọn lẹpo po to e de, po yẹwhenọ lẹ po, po yẹwhegán lẹ po, po gbẹtọ lẹpo po, pẹvi po daho po: é sọ hia ohó owé alẹ̀nù lọ tọn tọn lẹ he yè mọ to ohò OKLUNỌ tọn mẹ to otọ́ yetọn lẹ mẹ. ³Ahọlu sọ site to odòtin lọ kọ́n, bo sọ basi alẹ̀nù de to OKLUNỌ nukọn, nado nọ yí ayiha etọn lẹpo, po alindọn etọn lẹpo po, do to zọnlinzin to OKLUNỌ godo, odẹ nado nọ to gbèdide etọn lẹ yìn, po kunnuhó etọn lẹ po, po oséndoai etọn lẹ po, nado hẹn ohó alẹ̀nù he tọn lẹ he yè wlan to owé he mẹ lódo: gbẹtọ lẹpo sọ nọte to alẹ̀nù lọ kọ̀n. ⁴Ahọlu sọ degbèna Hilkia yẹwhenọ daho lọ, po yẹwhenọ ohá awetọ tọn lẹ po, po họ́nkọ̀nsi ohọ́n lọ tọn lẹ po, nado hẹn nuzinzán lẹpo he yè basi na Baali, podọ na Aṣela, podọ na awhànpa olọn tọn lẹpo sọn tẹmpli OKLUNỌ tọn mẹ jẹgbonu wá: é sọ mẹ́ yé to gbonu Jelusalẹm tọn to danji Kidlọni tọn lẹ mẹ, bo sọ bẹ́ afín yé tọn lẹ yì jẹ Bẹti-eli. ⁵E sọ dè vòdunnọ lẹ sẹ́, mẹhe ahọlu Juda tọn ko do nado nọ mé nuyọnwán to otẹn yìaga lẹ me to tòdaho Juda tọn lẹ mẹ, po to otẹn he lẹ́do Jelusalẹm pó lẹ po mẹ́; yé he nọ mó nuyọnwán hlan Baali, hlan òwhè, odọ hlan osùn, podọ hlan sunwhlẹvu e mlindo òwhè lẹ, podọ hlan awhànpa olọn tọn lẹpo. ⁶E sọ hẹn Aṣela tọ́n sọn ohọ̀ OKLUNỌ tọn mẹ jẹgbonu wá, gbonu jelusalẹm tọn, jẹ tòpẹṣẹ Kidlọni, bo mé ẹn to tọ̀pẹṣẹ Kidlọni kọ́n, bo li i mọ́ pọdọpọdọ, bo sọ kòn sisọ etọn do oyọ̀do omẹ tata lẹ tọn lẹ ji. ⁷E sọ gbà ohọ̀ Sọdọminu lẹ tọn lẹ he tin to ohọ́ OKLUNỌ tọn mẹ liai, fie yọnnusi nọ lón gọhọ̀vò lẹ te na Asela. ⁸E sọ hẹn yẹwhenọ lẹpo tọ́n sọn tòdaho Juda tọn lẹ mẹ wá, bo sọ flu otẹn yìaga lẹ fie yẹwhenọ lẹ ko nọ mẹ́ nuyọnwán te, sọn Geba jẹ Beẹli-ṣeba; é sọ gbà otẹn yìaga họ̀ngbo lẹ tọn lẹ liai he tin to bibiọ whégbe họ́ngbo Jọsua tọn tọn mẹ otògán tòdaho lọ tọn, ehe tin to adusilọ dawe de tọn ji to hòngbo tòdaho lọ tọn ji. ⁹Ṣogãn yẹwhenọ otẹn yìaga lẹ tọn lẹ ma hẹji wá agbà OKLUNỌ tọn kọ́n to Jelusalẹm mẹ gba, ṣigba yé nọ to akla madotónnọ dù to mẹmẹsunnu yetọn lẹ ṣẹnṣẹn. ¹⁰E sọ flu Tofẹti, ehe tin to agbàdo ovi Hinọmi tọn lẹ tọn mẹ, na omẹ de ma na do hẹn visunnu etọn kavi viyọnnu etọn nado gbọn miyọn mẹ luntọ́n jẹ Molẹki kọ̀n gba. ¹¹E sọ bẹ́ osé he ahọlu juda tọn lẹ ko na hlan òwhè sọ́, to bibiọ whégbe ohọ́ OKLUNỌ tọn tọn mẹ, to abọ̀ Natani-melẹki ahọsi lọ tọn dali, he tin to agbègbè lẹ ji mẹ: é sọ yí miyọn do mẹ́ kẹkẹ òwhè tọn lẹ ¹²Agbà he tin to ohòta abò aga nukọn Ahazi tọn tọn ji lẹ, he ahọlu Juda tọn lẹ ko basi, po agbà he Manassẹ ko basi to akànmaho awe ohọ́ OKLUNỌ tọn tọn mẹ lẹ po, wẹ ahọlu gbà liai, bo tùn yé do odò sọn finẹ, bo kọ̀n kọgudu yé tọn do tọ̀pẹsẹ Kidlọni mẹ. ¹³Otẹn yìaga he tin to Jelusalẹm nukọn lẹ, ehe tin to alọ adusi osé ogble tọn tọn go, ehe Sọlọmọni ahọlu Islaeli tọn ko dó na Aṣitolẹti nugbigble Zidọninu lẹ tọn, podọ na Kemọṣi nugbigble Moabi tọn, podọ nu Milkọmi nugbigble ovi Amọni tọn lẹ tọn, wẹ ahọlu hẹn flu. ¹⁴E sọ gbà odòtin lẹ hanyanhanyan, bo sọ sán Aṣelimi lọ liai, bo sọ̀ yí ohú gbẹtọ lẹ tọn lẹ do gọ otẹn yetọn lẹ. ¹⁵Humọ agbà he tin to Bẹti-eli, podọ otẹn yìaga he Jeloboami visunnu Nebati tọn, mẹhe hẹn Islaeli nado wàylando, ko basi, yèdọ agbà nẹ po otẹn yìaga lọ po wẹ é gbà liai; é sọ mẹ́ otẹn yìaga lọ bo li i pọdọpọdọ, bo sọ mẹ́ Aṣela lọ. ¹⁶Podọ le Josia lẹ́ ede, é mọ olidò le he tin to finẹ to osé lọ mẹ; é sọ domẹhlan, bo bé ohú lẹ sọn olidò lẹ mẹ, bo mẹ́ yé to agbà lọ ji, bo hẹn ẹn flu, kẹdẹdi ohó OKLUNỌ tọn he omẹ Jiwheyẹwhe tọn lọ lá, mẹhe lá onú helẹ. ¹⁷Whenẹnu wẹ é dọmọ, Oflinnú té wẹ enẹ he yẹn mimọ? Omẹ tòdaho lọ tọn lẹ sọ dọ nẹ̃ dọmọ, Olido omẹ Jiwheyẹwhe tọn tọn wẹ, he sọn Juda wá, bo lá onú he hiẹ wà do agbà Bẹti-eli tọn go helẹ. ¹⁸E sọ dọmọ, Gbọ e ni tin; a dike omẹ de diọtẹnna ohú etọn lẹ blo. Mowẹ yé jó ohú etọn lẹ do, po ohú yẹwhegán he sọn Samalia wá lọ tọn lẹ po. ¹⁹Ohọ́ otẹn yìaga lẹ tọn lẹpo ga he tin to tòdaho Samalia tọn lẹ me, ehe ahọlu Islaeli tọn lẹ ko basi nado hẹnhomẹgble OKLUNỌ hlan adi, wẹ Josia bẹ́ sẹ́, bo sọ wà hlan yé kẹdẹdi owàlo he é ko wà to Bẹti-ẹli mẹ lẹpo. ²⁰E sọ hù yẹwhenọ otẹn yìaga lẹ tọn tọn he tin to finẹ lẹpo, to agbà lẹ ji, bo sọ mẹ́ ohú gbẹtọ lẹ tọn to yé ji; é sọ lẹ́gọ̀ do Jelusalẹm.

²¹Ahọlu sọ degbèna gbẹtọ lẹpo, dọmọ, Mì payi juwayi go hlan OKLUNỌ Jiwheyẹwhe mìtọn, dile yè wlan to owé alẹ̀nù tọn he mẹ do. ²²Nugbo yè ma ko payi juwáyì mọnkọ de go sọn azán whẹ̀datọ he to whẹ́dana Islaeli tọn lẹ mẹ gba, kavi to azán ahọlu Islaeli tọn lẹ lẹpo mẹ, kavi ahọlu Juda tọn lẹ tọn; ²³ṣigba to owhè fọtònnukunatọ́ntọ Josia ahọlu tọn mẹ wẹ yè payi juwáyì he go hlan OKLUNỌ to Jelusalẹm mẹ. ²⁴Humọ yé he tindo gbigbọ aovi lẹ, po kẹnnsi lẹ po, po hẹnnuvòdun po, po bosiọ lẹ po, podọ nugbigble he yè mọ to aigba Juda tọn mẹ po Julusalẹm po mẹ lẹpo, wẹ Josia bẹ́ sẹ́, na é nido hẹn ohó osén tọn lẹ he yè wlan to owé he Hilkia yẹwhenọ mọ to ohò OKLUNỌ tọn mẹ lódo. ²⁵Podọ jijlẹ do ewọ go ahọlu de ma ko tin to e nukọn, he yí ayiha etọn lẹpo, po alindọn etọn lẹpo po, po hlọnhlọn etọn lẹpo po do lẹ́ do OKLUNỌ de, kẹdẹdi osẹ́n Moṣe tọn lẹpo, mọ to é godo depope ma sọ fọ́n di i. ²⁶Ṣogan OKLUNỌ ma lẹ́ sọn kanyinylan homẹgble daho etọn tọn mẹ gba, ehe yè yí do hẹn adi etọn jimìyọn do Juda go, na homẹgble he Manasse ko yí do dohomẹgble nẹ tọn le wutu. ²⁷OKLUNỌ sọ dọmọ, Yẹn na diọtẹnna Juda ga sọn nukun ṣie mẹ, dile yẹn diọtẹnna Islaeli do, yẹn na sọ zé todaho he yẹn ko dè he dlangbe, yèdọ Jelusalẹm, po ohò ehe tọn yẹn dọ po dọmọ, Oyín ṣie na tin to finẹ. ²⁸Dinvie pipòtọ owàlọ Josia tọn tọn lẹ, po ehe é wà lẹpo po, yè ma ka wlan yé to owé otànnugbo ahọlu Juda tọn lẹ tọn tọn lẹ mẹ? ²⁹To azán etọn le mẹ wẹ Falo-neko ahọlu Egipti tọn heji yì péhẹ ahọlu Asilia tọn to otò Èuflate tọn kọ̀n. Josia ahọlu sọ hẹji yì péhẹ ẹ; ewọ sọ hù i to Mẹgido, whenuena é mọ ẹn. ³⁰Mẹmẹsi etọn lẹ sọ hẹn ẹn kúkú to kẹkẹ de mẹ sọn Mẹgido, bo hẹn ẹn wá Jelusalẹm, bo di i to olido etọn titi mẹ. Gbẹtọ aigba lọ ji tọn lẹ sọ yí Jehoahazi visunnu Josia tọn bo samisisána ẹn, bo yi i do basi ahọlu to otẹn otọ́ etọn tọn mẹ.

³¹Jehoahazi yín owhè konukunatọntọ mẹho whenuena é ṣẹ̀ nado to ahọludu; é sọ dùahọlu osùn atọ̀n to Jelusalẹm mẹ: oyín onọ etọn tọn wẹ Hamutali viyọnnu Jelemia Libna tọn tọn. ³²E sọ wà enẹ he yín oylan to nukun OKLUNỌ tọn mẹ, kẹdedi ehe otọ́ etọn ko wà lẹpo. ³³Falo-neko sọ yí i do gànhó lẹ mẹ to Libla to aigba Hamati tọn ji na é ma na do dùahọlu to Jelusalẹm mẹ gba; bo sọ yí aigba lọ do osènjijọ talẹnti kanweko fataka tọn po talẹnti sika tọn dopo po tọn kọ̀n. ³⁴Falo-neko sọ yi Eliakimi visunnu Josia tọn do basi ahọlu to otẹn Josia otọ́ etọn tọn mẹ, bo sọ diọ oyín etọn do Jehọiakimi: ṣigba é dè Jehoahazi sẹ́; é sọ wá jẹ Egipti, bo kú to finẹ. ³⁵Jehọiakimi sọ yí fataka po sika po na Falo; ṣigba é hẹn aigba lọ do sẹ́njọ mẹ nado nọ na akuẹ lọ kẹdẹdi gbèdide Falo tọn: é yí fataka lọ po sika po sọn gbẹtọ aigba lọ tọn lẹ si sọn omẹ dopodopo si kẹdẹdi sẹ́njijọ etọn nado yí i na hlan Falo-neko.

³⁶Jehọiakimi yín owhè koatọn mẹho whenuena é ṣẹ̀ nado to ahọludu; é sọ dùahọlu owhè widopo to Jelusalẹm mẹ: oyín onọ etọn tọn wẹ Zebida viyọnnu Pẹdaia Lumati tọn tọn. ³⁷E sọ wà enẹ he yín oylan to nukun OKLUNỌ tọn mẹ, kẹdẹdi ehe otọ́ etọn lẹ ko wà lẹpo.

¹TO azán etọn mẹ wẹ Nẹbukadnẹzali ahọlu Babilọni tọn hẹji wá, Jehọiakimi sọ lẹzùn mẹmẹsi etọn owhè atọ́n: whenẹnu wẹ é lẹ́ bo ṣatẹ hẹ ẹ. ²OKLUNỌ sọ do awhàn gbẹ Kaldeanu lẹ tọn lẹ hlan e ji, po awhangbẹ́ Silianu lẹ tọn lẹ po, po awhàngbẹ́ Moabinu lẹ tọn lẹ po, po awhàngbẹ́ ovi Amọninu tọn lẹ tọn le po, bo do yé hlan Juda JI nado sú i do, kẹdẹdi ohó OKLUNỌ tọn, he é dọ gbọn alọ mẹmẹsi etọn yẹwhegán lẹ tọn mẹ dali, ³Nugbo to gbedide OKLUNỌ tọn mẹ wẹ ehe do wá Juda ji, nado diọtẹnna yé sọn nukun etọn me, na ylando Manassẹ tọn lẹ, kẹdẹdi ehe é ko wà lẹpo; ⁴podọ ga na ohùn homẹvọnọ he é ko kọ̀ndai; na é yí ohùn homẹvọnọ do gọ́ Jelusalẹm: OKLUNỌ ma sọ jlo na jona ⁵Dinvié pipòtọ owàlọ Jehọiakimi tọn tọn lẹ, po ehe é wà lepo po, yè ma ka wlan ye to owé otànnugbo ahọlu Juda tọn lẹ tọn tọn lẹ mẹ? ⁶Mọwẹ Jehọiakimi damlọn po otọ́ etọn lẹ po: Jehọiakini visunnu etọn sọ dùahọlu to otẹn etọn mẹ, ⁷Ahọlu Egipti tọn ma sọ vọ tón sọn aigba etọn ji wá ba: na ahọlu Babilọni tọn ko yí, ehe yín ahọlu Egipti tọn lẹpo, sọn tòpẹsẹ Egipti tọn jẹ otò Euflate kòn.

⁸Jehọiakini yín owhè fọtọ̀nnukunatọ̀ntọ mẹho whenuena é ṣẹ̀ nado to ahọludu; é sọ dùahọlu to Jelusalẹm osùn atọ̀n: oyín onọ etọn tọn wẹ Nẹhusita viyọnnu Elnatani Jelusalẹm tọn tọn. ⁹E sọ wà enẹ he yín oylan to nukun OKLUNỌ tọn mẹ, kẹdẹdi ehe otọ́ etọn ko wà lẹpo. ¹⁰To ojlẹ nẹ mẹ mẹmẹsi Nẹbukadnẹzali ahọlu Babilọni tọn tọn lẹ hẹji wá jẹ Jelusalẹm, yè sọ glọn tòdaho lọ do e mẹ. ¹¹Nẹbukadnẹzali ahọlu Babilọni tọn sọ wá jẹ tòdaho lọ kòn, whenuena mẹmẹsi etọn lẹ to ginglọn ẹn do e mẹ; ¹²Jehọiakini ahọlu Juda tọn sọ tón yì jẹ ahọlu Babilọni tọn de, ewọ, po onọ etọn po, po mẹmẹsi etọn lẹ po, po ahọvi etọn lẹ po, po ojọ etọn lẹ po: ahọlu Babilọni tọn sọ wle e to owhè sinatòntọ ahọludùdu etọn tọn mẹ. ¹³E sọ bẹ́ adọkunnu ohò OKLUNỌ tọn mẹ tọn lẹpo, po adọkunnu ohò ahọlu tọn mẹ tọn lẹ po sọn finẹ yì, bo sán nuzinzán sika tọn lẹpo do flinflin, ehe Sọlọmọni ahọlu Islaeli tọn ko basi tọ tẹmpli OKLUNỌ tọn mẹ, dile OKLUNỌ ko dọ do. ¹⁴E sọ bé Jelusalẹm lẹpo yì, po ahọvi lẹpo po, po omẹ hlọnhlọnnọ tudido tọn lẹpo po, yèdọ mẹmẹglọ fọtọ́n ao, po anawàtọ lẹpo po po ayáwàtọ le po; mẹde ma pò, adavo ọmẹ wàmọnọ hunkọ sọn gbẹtọ aigba lọ ji tọn mẹ lẹ. ¹⁵E sọ hẹn Jehọiakini yí je Babilọni; po onọ ahọlu tọn po, po asi ahọlu tọn lẹ po, po ogán etọn lẹ po, po omẹ nukọntọ aigba lọ tọn lẹ po, wẹ é bé yì mẹglọnọ mẹ sọn Jelusalẹm mẹ jẹ Babilọni. ¹⁶Omẹ hlọnhlọn tọn lẹpo, yèdọ fọtọ́n ṣinawe po anawàtọ lẹ po po ayáwàtọ lẹ po fọtọ́n dopo, popo yé tọn huhlọnnọ podọ awuyatọ na awhàn, yèdọ yé wẹ ahọlu Babilọni tọn hẹnwá mẹmẹglọnọ jẹ Babilọni. ¹⁷Ahọlu Babilọni tọn sọ yí Matania nọvisunnu otọ́ etọn tọn do basi ahọlu to otẹn etọn mẹ, bo sọ diọ oyín eton do Zẹdekia.

¹⁸Zẹdekia yín owhè konukundopo mẹho whenuena é sẹ̀ nado to ahọludu; é sọ dùahọlu owhè widopo to Jelusalẹm mẹ: oyín onọ etọn tọn wẹ Hamutali viyọnnu Jelemia Libna tọn tọn. ¹⁹E sọ wà enẹ he yín oylan to nukun OKLUNỌ tọn mẹ kẹdẹdi ehe Jehọiakimi ko wà lẹpo ²⁰Na gbọn adi OKLUNỌ tọn mẹ wẹ é do wá jọ to Jelusalẹm mẹ podọ to Juda, kaka é do zé yé dlan sọn nukọn etọn: Zẹdekia sọ ṣatẹ po ahọlu Babilọni tọn po.

¹E sọ wá jọ to owhè ṣinẹnẹtọ ahọludùdù etọn tọn mẹ, to osùn aotọ mẹ, to azán aotọ osùn lọ tọn mẹ, wẹ Nẹbukadnẹzali ahọlu Babilọni tọn wá, ewọ po awhàn etọn lẹpo po, do Jelusalẹm jì, bo dosla do oji nẹ̃; yé sọ dó agbó lẹ lédo e pé. ²Mowẹ yè glọn tòdaho lọ do e mẹ jẹ owhè widopotọ ahọlu Zẹdekia tọn mẹ. ³To azán ṣinẹnẹtọ osùn ẹnẹtọ tọn ji ohùvó tin gbahugbahu to tòdaho lọ mẹ, mọ wẹ akla de ma tin na gbẹtọ aigba lọ tọn lẹ. ⁴Whenẹnu wẹ yè basi gbigbà de to tòdaho lọ mẹ, sunnusi awhàn tọn lẹpo hòn to ozán mẹ gbọn aliho họ̀ngbo tọn dali to adó awe lẹ ṣẹnṣẹn, he tin tò ojipa ahọlu tọn dali: (dinvie Kaldeanu lẹ tin to tòdaho lọ go lẹ́do pó:) ahọlu lọ sọ gbọn aliho Alaba tọn dali yì. ⁵Ṣigba awhàn Kaldeanu lẹ tọn yànmọna ahọlu lọ, bo pla ẹ to danfafa Jẹliko tọn lẹ ji: yè ko hẹn awhàn etọn lẹpo káta sọn e de. ⁶Whenẹnu wẹ yé wle ahọlu lọ, bo hẹn ẹn hẹji yì jẹ ahọlu Babilọni tọn de to Libla; yé sọ na whẹ̀dida do e ji. ⁷Yé sọ hù visunnu Zẹdekia tọn lẹ to nukun etọn lẹ nukọn, bo sọ dè nukun Zẹdekia tọn lẹ jẹgbonu, bo sín in do afọgàn lẹ mẹ, bo sọ hẹn ẹn yì jẹ Babilọni.

⁸Dinvie to osùn atóntọ mẹ, to azán ṣinawetọ osùn lọ tọn ji, ehe yín owhè fọtọ̀nnukunẹnẹtọ ahọlu Nẹbukadnẹzali tọn, ahọlu Babilọni tọn, wẹ Nẹbuzaladani awhàngán awhàngbẹ́ lọ tọn, mẹmẹsi ahọlu Babilọni tọn tọn de, wá jẹ Jelusalẹm: ⁹é sọ mè ohọ̀ OKLUNỌ tọn, po ohọ̀ ahọlu tọn po; po ohọ̀ Jelusalẹm tọn lẹpo po, yèdọ ohọ̀ daho lẹpo wẹ é yí miyọn do mẹ. ¹⁰Awhàn Kaldeanu lẹ tọn lẹpo, he tin to awhàngán awhàngbé lọ tọn de gbà adó Jelusalẹm tọn lẹ liai lédo. ¹¹Pipòtọ gbẹtọ he yè pòdai to todaho lọ me lẹ tọn, po yé he họ̀n yì nẹlẹ po, he họ̀nyì jẹ ahọlu Babilọni tọn de, po: pipòtọ mẹsusugégé tọn po, wẹ Nẹbuzaladani awhangán awhàngbẹ́ lọ tọn bẹ́yì mẹglọnọ. ¹²Ṣigba awhàngán awhàngbẹ́ lọ tọn pòdai son wamọnọ aigba lọ tọn mẹ nado yin vẹ̃ntinkọ̀nnọtọ podọ oglẹpòtọ lẹ. ¹³Odòtin ogànvẹ̃ ton lẹ he tin to ohọ̀ OKLUNỌ tọn mẹ, po ózẹ̀n lẹ po po oha gànvẹnọ he tin to ohò OKLUNỌ tọn mẹ po, wẹ Kaldeanu lẹ gbà hanyanhanyan, bo bẹ́ ogànvẹ̃ yé tọn yì jẹ Babilọni. ¹⁴Ozẹ́n lẹ, po fẹli lẹ po, po miyọnkànsinú lẹ po, po sivi lẹ po, po nuzinzán ogànvẹ̃ tọn lẹpo po ehe ye do nọ wadevizon lẹ, wẹ yé bẹ́ yì. ¹⁵Po gànzẹ́n miyọn tọn lẹ po, po ṣiklẹ lẹ po ye he yín sika tọn, to sika mẹ, podọ enẹ he yín fataka tọn lẹ, to fataka mẹ, awhàngán awhàngbẹ́ lọ tọn bẹ́ yé yì. ¹⁶Dòtin awe lẹ, ohù dopo lọ, po ozẹ̀n lẹ po, he Sọlọmọni ko basi na ohò OKLUNỌ tọn lọ; ogànvẹ̃ nuzinzán helẹ pó tọn tin matin ojlẹ. ¹⁷Agayì dòtin dopo tọn yín awàgbà fọtọ̀nnukunatọ̀n, podọ opòtin ogànvẹ̃ tọn de tin to e ji: agayì opòtin lọ tọn yín awàgbà atọ̀n; po azọnlinlòn po po pomeglanate po to opòtin lọ ji lẹ́do, sọn ogànvẹ̃ lẹpo mẹ: ehelẹ hùnkọ opòtin awetọ tindo po aznlinlòn po. ¹⁸Awhàngán awhàngbẹ́ lọ tọn sọ wle Sẹlaia ogán yẹwhenọ tọn, po Zẹfania yẹwhenọ awetọ lọ po, po họ̀njinọtọ atọ̀n họ̀ntonu lọ tọn lẹ po: ¹⁹podọ sọn tòdaho lọ mẹ é wle azọ́ngán de he yè dè do omẹ awhàn tọn lẹ ji; po omẹ atọ̀n sọn yé he nọ mọ nukunmẹ ahọlu lọ tọn po, he yè mọ to tòdaho lọ mẹ lẹ; po wékantọ lọ po, po awhàngán awhànpa lọ tọn po, he nọ dọ̀n gbẹtọ aigba lọ ji tọn lẹ plidopọ; po sunnusi kandeko po sọn omẹ aigba lọ ji tọn lẹ mẹ, he yè mọ to tòdaho lọ mẹ lẹ. ²⁰Nẹbuzaladani awhàngán awhàngbé lọ tọn sọ wle yé, bo hẹn yé wa jẹ ahọlu Babilọni tọn de, to Libla. ²¹Ahọlu Babilọni tọn sọ ho yé, bo hù yé to Libla to aigba Hamati tọn ji. Mowẹ yè bé Juda yì mẹglọnọ mẹ do sọn aigba etọn ji. ²²Podọ na gbẹtọ he yè pòdai to aigba Juda tọn mẹ lẹ tọn, mẹhe Nẹbukadnẹzali ahọlu Babilọni tọn pòdai lẹ, yèdọ to yé ji wẹ é yí Gedalia visunnu Ahikami tọn, visunnu Ṣafani tọn do basi otògán do.

²³Dinvie whenuena awhàngán awhàn le tọn lẹpo, yé po omẹ yétọn lẹ pò, sọ sè dọ ahọlu Babilọni tọn ko yí Gedalia do basi otogán, yé wá Gedalia de to Mizpa, yèdọ Iṣmaeli visunnu Nẹtania tọn, po Johanani visunnu Kalea tọn po, po Ṣelaia visunnu Tanhumẹti Nẹtofatinu tọn po, po Jaazania visunnu Maakatinu ton po, ye po omẹ yetọn lẹ po. ²⁴Gedalia sọ whle hlan yé podọ hlan omẹ yetọn lẹ, bo dọ hlan yé dọmọ, Mì dibu na mẹmẹsi Kaldianu lẹ tọn tọn wutu blo; mì nọ nò aigba lọ ji, bo nọ to ahọlu Babilọni tọn sẹ̀n, é nasọ yín dagbe po mì po. ²⁵Ṣigba é wá jọ to osùn ṣinawetọ mẹ, wẹ Iṣmaẹli visunnu Nẹtania tọn, visunnu Elisama tọn, sọn okún ahọluji tọn mẹ, wá, po omẹ ao po po e pó, bo hò Gedalia, bọ é kú, Ju lẹ po Kaldeanu he tin to e de to Mizpa lẹ po. ²⁶Gbẹtọ lẹpo, pẹvi po daho po, po awhàngán awhàn tọn lẹ po, tite, bo wá Egipti: na yé yín avọ̀satọ Kaldeanu lẹ tọn.

²⁷E sọ wá jọ to owhè gbàntónnukunawetọ mẹmẹglọ Jehọiakini ahọlu Juda tọn tọn mẹ, to osùn wiawetọ mẹ, to azán koatọ́nnukunawetọ osùn lọ tọn ji, wẹ Evilimẹlodaki ahọlu Babiloni tọn, to owhè he mẹ é ṣẹ̀ nado to ahọludu te, zé ota Jehọiakini ahọlu Juda tọn tọn daga sọn oganhè mẹ; ²⁸é sọ yí dagbe do dọhó hlan ẹn, bo zé ofìn etọn doji hú ofìn ahọlu he ko tin to e de to Babilọni mẹ lẹ tọn. ²⁹E sọ diọ awu ogànhè mẹ etọn tọn lẹ, bo sọ nọ to akla dù to e nukọn tẹgbẹtẹgbẹ to azán ogbè etọn tọn lẹpo mẹ ³⁰Podọ na nudègbàsọneji etọn, yè nọ na nudègbèsọneji de e tẹgbẹtẹgbẹ sọn ahọlu si, mimá do egbesọegbesọ, to azán ogbẹ̀ etọn lẹpo tọn mẹ.