2 Otànnugbo Lẹ

¹YÈ sọ nahuhlọn Sọlọmọni visunnu Davidi tọn to ahọludu etọn mẹ, OKLUNỌ Jiwheyẹwhe etọn sọ tin to e de, bo sọ hẹn ẹn klo talala ²Sọlọmọni sọ dọhó hlan Islaeli lẹpo, hlan awhàngán fọtọ́n lẹ tọn lẹ po kanweko lọ tọn lẹ po, podọ hlan whẹ̀datọ lẹ, podọ hlan ahovi dopodopo to Islaeli lẹpo mẹ, ogán owhe otọ́ lẹ tọn tọn lẹ. ³Mowẹ Sọlọmọni, po agùn lẹpo po to e de, yì jẹ oten yìaga he tin to Gibeọni; na finẹ wẹ ogohọ̀ opli Jiwheyẹwhe tọn tọn lọ te, he Moṣe mẹmẹsi OKLUNỌ tọn ko basi to zùngbo mẹ. ⁴Ṣigba alki Jiwheyẹwhe tọn lọ wẹ Davidi ko hẹn hẹji wá sọn Kiliati-jealimi jẹ otẹn he Davidi ko wleawudai na ẹn mẹ: na é ko pẹ́n ogohọ̀ de na ẹn to Jelusalẹm. ⁵Humọ agbà gànvẹ tọn, he Bezalẹli visunnu Uli tọn, visunnu Huli tọn, basi, tin finẹ to gohọ̀túntún OKLUNỌ tọn nukọn: Sọlọmọni po agùn lọ po sọ din hlan e de. ⁶Sọlọmọni sọ hẹji yì finẹ jẹ agbà gànvẹ tọn lọ kòn to OKLUNỌ nukọn, he tin to ogohò opli tọn lọ dali, bo sọ na avọ́ nunina mimẹ̀ fọtọ́n to e jì.

⁷To ozán nẹ mẹ wẹ Jiwheyẹwhe sọawuhia hlan Sọlọmọni, bo dọ hlan ẹn dọ, Bio núhe yẹn na na we. ⁸Sọlọmọni sọ dọ hlan Jiwheyẹwhe dọmọ, Hiẹ ko do dagbewà daho hia hlan Davidi otọ́ bo ko yí mi do basi ahọlu to otẹn etọn me. ⁹Dinvie, OKLUNỌ E Jiwheyẹwhe, gbọ yè ni hẹn opagbe towe hlan Davidi otọ́ ṣie lẹ́do: na hiẹ ko yi mi do basi ahọlu to gbẹtọ lẹ de ji he taidi kọgudu aigba tọn to ogégé mẹ. ¹⁰Na nuyọnẹn po oyọnẹn po mi dinvie, na yẹn nido nọ yì gbonu bo gọ nọ wá whégbe to gbẹtọ he lẹ nukọn: na mẹnu wẹ sọgan dawhèna gbẹtọ towe he lẹ, he yín daho mọnkọ? ¹¹Jiwheyẹwhe sọ dọ hlan Sọlọmọni dọmọ, Na ehe ko tin to ayiha towe mẹ wutu, podọ hie ma ko biọ adọkun, kavi onúyọnna, kavi ogbégbona, kavi ogbé yé he gbẹwanna we lẹ tọn, mọ hiẹ ma tlẹ ko biọ ogbẹ̀ gà gba; ṣigba bo biọ nuyọnen po oyọnẹn po na dewe, na hiẹ nido nọ dawhèna omẹ ṣie lẹ, to mehe ji yẹn hẹn we yín ahọlu te: ¹²nuyọnẹn po oyọnẹn po yè na hlan we; yẹn na sọ na adọkun we, po onúyọnna po, po ogbégbona po, ehe hunkọ mẹde sọn ahọlu lẹ mẹ he ko tin to nukọn na we lẹ ma ko tindo, mọ depope to godo towe ma na tindo mọhunkọ. ¹³Mowẹ Sọlọmọni gọ̀ sọn gbéjizọnlin etọn ji jẹ otẹn yìaga he tin to Gibeọni, sọn ogohọ̀ opli tọn lọ nukọn, jẹ Jelusalẹm; é sọ to ahọludu to Islaeli ji.

¹⁴Sọlọmọni so bé kẹkẹ lẹ po osónọ lẹ po pli: é sọ tindo kẹkẹ fọsinawe, po osónọ fọtọ́n wiawe po, he e dotenna do tòdaho kẹkẹ tọn lẹ mẹ, podọ to ahọlu de to Jelusalẹm mẹ. ¹⁵Podọ ahọlu sọ hẹn fataka po sika po nado tin to Jelusalẹm mẹ di zannu lẹ, po kedali lẹ po é hẹn nado tin di atin sikamole he tin to dòdòmẹ lẹ, na ogégé. ¹⁶Egipti mẹ wẹ yè hẹn osé he Sọlọmọni tindo lẹ sọn; ajọtọ ahọlu tọn lẹ nọ mọ yé yí to opó mẹ, ogònu dopodopo to ahidona de ji. ¹⁷Yé sọ bé wá aga, bo hẹn kẹkẹ de sọn Egipti wá na ṣẹkle fataka tọn nuọntọ̀n, po osé de po na kàntọ̀ngbàn: podọ ahọlu Hitinu lẹ tọn lẹpo, po ahọlu Silia tọn lẹ po, wẹ yé nọ hẹn yé wá na mọ gbọn akuẹta yetọn dali.

¹DINVIE Sọlọmọni to ayihakàn nado dó ohò de na oyín OKLUNỌ tọn, po ohọ̀ de po na aholudu etọn. ²Sọlọmọni sọ dè gbẹtọ fọtọ́n kandegbàn nado hẹn agbàn le, po gbẹtọ fọtọ́n kanwe po he yín atinṣántọ to osé lẹ mẹ, podọ fọtọ́n atọ̀n po nuọntọn po nado nọ pọ́n yé go. ³Sọlọmọni sọ domẹhlan Hulami ahọlu Tile tọn de, dọmọ, Dile hiẹ zán po Davidi otọ́ ṣie po do, bo do kedali lẹ hlan ẹn nado dó ohò de nẹ nado nọ̀ e mẹ, yèdọ mọ hiẹ nl zán hẹ mi do. ⁴Dayi e go, yẹn to ohọ̀ de dó na oyín OKLUNỌ Jiwheyẹwhe ṣie tọn, nado klan ẹn do wiwe hlan ẹn, podọ nado nọ mè to e nukọn nuyọnwán nuwhénwán vivi lẹ tọn de, podọ na akla-adlọ tẹgbẹ̃tẹgbẹ̃ tọn, podọ na avọ nunina mimẹ̀ afọnnu po whejai po tọn lẹ, to gbọjẹzán lẹ ji, podọ to osùn yọ́yọ́ lẹ ji, podọ to hùnwhẹ dido OKLUNỌ Jiwheyẹwhe mítọn tọn lẹ ji Ehe wẹ ogbèdai de doidoi hlan Islaeli. ⁵Podọ ohò he yẹn to didó lọ daho wẹ: na daho wẹ Jiwheyẹwhe mítọn to yẹwhe lẹpo ji. ⁶Ṣigba mẹnu wẹ sọgan nado dó ohọ́ de nẹ̀, mimọ olọn po olọn olọn lẹ tọn po ma sọgan hẹn en? mẹnu yẹn yín whenẹnu, bọ yẹn na do dó ohó de nẹ̃, adavo nado nọ mẹ̀ nuyọnwán to e nukọn kẹdẹ? ⁷Enẹwutu dinvie do omẹ ananọ de hlan mi nado wàzọ́n to sika mẹ, podọ to fataka mẹ, podọ to ogànvẹ́ mẹ, po ogànyù po mẹ, podọ to avọ̀gèfunwunmẹ me, po ovènọ po, po ofẹ́nọ po, po ewọ he sọgan wana nado kọ̀n nukinkòn alọpalọpa lẹpo tọn le, nado tin to omẹ ananọ he tin to dẽ to Juda mẹ podọ to Jelusalẹm mẹ lẹ de mehe Davidi otọ́ ṣie ko wleawudai lẹ. ⁸Do atin kedali lẹ hlan mi ga, atin fili lẹ, po atin algumi lẹ po, sọn Lẹbanọni mẹ: na yẹn yọnẹn dọ mẹmẹsi towe lẹ sọgan wàna nado sán atinlidemẹ to Lẹbanọni mẹ; bo, dayi e go, mẹmẹsi ṣie lẹ na tin to mẹmẹsi towe lẹ de. ⁹Yèdọ nado wleawu atinlidemẹ tọn na mi to ogégé mẹ: na ohò he yẹn tin awuwle nado dó lọ na yín jawu daho. ¹⁰Bo, dayi e go, yẹn na na hlan mẹmẹsi towe lẹ, atinsántọ he to atinlidemẹ sán lẹ, ojlẹ fọtọ́n òko oli tùntùn tọn lẹ, podọ ojlẹ fọtọ́n òko bale tọn lẹ, po ojlẹ fọtọ́n òko bati ovẹ̃n tọn lẹ po, po ojlẹ fọtọ́n òko bati amì tọn lẹ po. ¹¹Whenẹnu wẹ Hulami ahọlu Tile tọn lọ gblọn to wéwinwlan, he é dohlan Sọlọmọni de mẹ dọ, Na OKLUNỌ yiwanna omẹ etọn lẹ wutu, wẹ é yí we do basi ahọlu to yé ji ¹²Hulami sọ dọ humọ dọ, Donanọ OKLUNỌ ni yín, Jiwheyẹwhe Islaeli tọn, he basi olọn po aigba po, mẹhe ko na hlan Davidi ahọlu visunnu nuyọnẹntọ yè yí ohóyọnẹn po wuntùntùn po ṣinyọnna de, he do dó ohọ̀ de na OKLUNỌ, po ohò de po na ahọludu etọn ¹³Podọ dinvie yẹn ko do dawe ananọ de hlan, yè yí wuntùntùn ṣinyọnna, yèdọ Hulami otọ́ ṣie. ¹⁴Visunnu nawe de tọn sọn viyọnnu Dani tọn lẹ tọn mẹ, otọ́ etọn dawe Tile tọn de, anawàtọ nado wàzón to sika mẹ, podọ to fataka mẹ, to ganvẹ mẹ, to gànyẹ̃ mẹ, to zannu mẹ, podọ to atinlidemẹ mẹ, to avọ̀gèfunwunme mẹ, to avọ̀fẹ́nọ mẹ, podọ to alavọ́ dagbedagbe mẹ, podọ to ovẹ̃nọ mẹ; nado kòn ga nukinkọ̀n alọpa depope tọn, podọ nado dinmọ nudinmọ depope: na yè nido dè otẹn de hlan ẹn to omẹ ananọ towe lẹ de, podọ to omẹ ananọ klunọ ṣie Davidi otọ́ towe tọn lẹ de. ¹⁵Enẹwutu dinvie oli po bale lọ po, amì po ovẹ̃n lọ po, ehe tọn klunọ dọ, gbọ é ni dohlan mẹmẹsi etọn lẹ: ¹⁶Míwlẹ na sọ sán atin sọn Lẹbanọni mẹ, sù sọ le hiẹ na biọ: mí na sọ hẹn ẹn wá de we to asalo lẹ mẹ gbọn ohù mẹ jẹ Jọpa; hiẹ na sọ zé e hẹji yì jẹ Jelusalẹm. ¹⁷Sọlọmọni sọ hia ojonọ he tin aigba Islaeli tọn mẹ lẹ, kẹdẹdi hihia ehe Davidi otọ́ etọn do hia yé: yè sọ mọ yé fọtọ́n kantọ̀ngbànnukunatọ̀n po nuọntọ̀n po. ¹⁸E SỌ dè fọtọ́n kandegbàn sọn yé mẹ nado nọ hẹn agbàn lẹ, po fọtọ́n kanwe po he yín atinsántọ lẹ to osé lẹ mẹ, podọ nugopọntọ fọtọ́n atọ̀n po nuọntọ̀n po nado nọ dè gbẹtọ lẹ do azón kọ̀n.

¹WHENẸNU wẹ Sọlọmoni ṣẹ̀ nado to ohọ̀ OKLUNỌ tọn lọ dó to Jelusalẹm to osé Molia mẹ, fie OKLUNỌ sọawuhia hlan Davidi otọ́ etọn te, he é basi dai to otẹn lọ mẹ ehe Davidi ko dèhia, to ovẹ̃n-gbà Olnani Jebusinu lọ tọn mẹ. ²E sọ ṣẹ́ nado to didó to azán awetọ osùn awetọ tọn mẹ, to owhè ẹnẹtọ ahọlúdu etọn tọn mẹ. ³Dinvie ehelẹ we dòdó he Sọlọmọni doai na didó ohò Jiwheyẹwhe tọn lọ tọn. Ote gbọn awàgbà lẹ dali kẹdẹdi jijle tintan yín awàgbà kandeko, ogblo awàgbà òko. ⁴Agbasẹ he tin to ohò lọ nukọn, ote e tọn kẹdẹdi ogblo ohó lọ tọn, yín awàgbà òko, jiyìì kantọ̀n: é sọ yí sika dagbedagbe do ṣinyọn ẹn. ⁵Ohọ̀ klohu lọ é yí atin fili do tẹzà na, he é yí sika dagbedagbe do ṣinyọn, bo basi odétin lẹ po gẹ́dó lẹ po do e ji finẹ. ⁶E sọ yí zannu akuẹgégónu tọn lẹ do bú ohò lọ na owhànpẹ: Sika lọ sọ yín sika sọn Palvaimi mẹ. ⁷E yí sika do ṣinyọn ohò lọ ga, lidemẹ lẹ, ovẹ̃ngbà lẹ, po adó etọn lẹ po, po ohọ́n etọn lẹ po; bo sọ kọ̀n kẹlubimi do adó lẹ ji. ⁸E sọ basi ohọ̀ wiwe gbahugbahu lọ; ote etọn kẹdẹdi ogblo ohọ̀ lọ tọn, yín awàgbà òko, ogblo etọn awàgbà oko: é sọ yí sika dagbedagbe do ṣinyọn ẹn; he yín talenti nuọntọ̀n. ⁹Ojlẹ húngàn lẹ tọn yín ṣẹkle sika tọn kande. E sọ yí sika do ṣinyọn abò aga nukọn tọn lẹ. ¹⁰Podọ to ohò wiwe gbahugbahu lọ mẹ é basi kẹlubimi awe sọn azẹ́n bosiọ tọn mẹ; yé sọ yí sika do ṣinyọn yé. ¹¹Awà kẹlubimi lẹ lọ tọn lẹ yín awàgbà òko na ote: awà kẹlubimi ode tọn jín awàgbà atọ́n, he jẹ adó ohò lọ tọn go; awà awetọ lọ sọ yín awàgbà atọ́n mọkẹdẹ, he jẹ awà kẹlubimi awetọ tọn go. ¹²Awà kẹlubimi awetọ lọ tọn yin awàgbà atọ́n, he jẹ adó ohò lọ tọn go: awà awetọ lọ sọ yín awàgbà atọ̀n ga, he sọnù awà kẹlubimi awetọ tọn go. ¹³Awà kẹlubimi helẹ tọn dlẹn yéde awàgbà oko jẹgbonu: yénọte to afọ yetọn lẹ ji, nukunmẹ yetọn lẹ sọ tín pànnukọn ohò lọ. ¹⁴E sọ basi nukunmẹnu avọ̀fẹnọ tọn, po ogèfunwunmẹ po, po avọ̀vẹ̃nọ po, po alavọ̀ dagbedagbe po, bo sọ basi kẹlubimi do e go. ¹⁵E sọ basi do ohọ̀ lọ nukọn ga odòtin awe awàgbà kòatọ́n tọn na jiyìyi, podọ opòtin he tin to aga dopodopo yé tọn tọn yín awàgbà atọ́n. ¹⁶E sọ basi gèdè lẹ to ozọ́nji mẹ, bo yí yé do aga odòtin lẹ lọ tọn lẹ ji; é sọ basi pomeglanate kanweko, bo yí yé do gẹ̀dè lẹ lọ ji. ¹⁷E sọ ze odòtin lẹ lọ do aga to tẹmpli lọ nukọn, ode to alọ adusi ji, awetọ to amiyọn ji; bo ylọ oyín ehe to alọ adusi ji tọn dọ Jakini, podọ oyín ehe to amiyọn ji tọn dọ Boazi.

¹HUMO é basi agbà gànvẹ̃ tọn de, awàgbà òko ote etọn, podọ awagbà òko ogblo etọn, podọ awàgbà ao jiyìyi etọn. ²E basi ozẹnvla kinkọ̀n awàgbà ao tọn ga sọn otónu jẹ otónu, lẹ́do to lobòto mẹ, jiyìyi etọn yín awàgbà atón; okàn awàgbà ogban tọn de lẹ́do e pété ³To oglọ e tọn wẹ apajlẹ agó lẹ tọn te, ehe lẹ́do e pétó awàgbà ao, he lẹ́do ozẹnvla lọ pété, agó lẹ lọ tin to oha awe ji, yé kọ̀n whenuena yè kọ̀n yé. ⁴E nọte to oyín wiawe ji, atọ̀n to pinpọ́n hlan agewàji, atọ̀n pinpọ́n hlan whèyìhọ dali, atọ̀n pinpọ́n hlan hù, wàji dali, atọ̀n sọ to pinpọ́n hlan whèzẹtẹn dali: yè sọ zé ozẹnvla lọ do yé ji aga, adà yetọn godo tọn lẹpo tin to homẹ. ⁵E sọ yín alọgbigblo titli dopo, yè sọ basi otónu etọn taidi otónu kọfo de tọn, taidi ovòvó li tọn de: é yí bo sọ hẹn bati fọtọ́n atọ̀n. ⁶E sọ basi awuletò ao ga, bo yí atọ̀n do alọ adusi, podọ atón mọ do amiyọn, nado nọ lẹawu to yé mẹ: onú mọtọnko lẹ he yín avọ́ nunina mimẹ́ tọn lẹ yé nọ lẹawu to yé mẹ: ṣigbi ozẹnvla lọ tin na yẹwhenọ lẹ nado nọ lẹawu to e mẹ. ⁷E sọ basi zògbántin sika tọn ao kẹdẹdi ogbèdai lọ gbọn yé tọn dali; é sọ zé yé do tẹmpli mẹ, atọ̀n to alọ adusi ji, atọ́n mọ to amiyọn ji. ⁸E sọ basi tafo ao ga, bo bé yé do tẹmpli mẹ, atọ́n to adà adusi ji, atọ́n me to amiyọn ji. E sọ basi ṣiklẹ sika tọn kanweko. ⁹Huganmọ é basi awánu yẹwhenọ lẹ tọn, po awánu daho lọ po, po ohòn lẹ po na awánu lọ, bo sọ yí gànvẹ̃ do ṣinyọn ohọ̀n yé tọn lẹ. ¹⁰E sọ zé ozẹnvla lọ do adà adusi ohọ̀ lọ tọn go hlan whèyìhò dali pannukọn hùwàji dali. ¹¹Hulami sọ basi ozẹ́n lẹ, po fẹli lẹ po, po ṣiklẹ lẹ po. Mọwẹ Hulami basi vivò wiwà azón lọ tọn he é wà na Sọlọmọni ahọlu to ohò Jiwheyẹwhe tọn lọ mẹ: ¹²odòtin awe lẹ, po odla lẹ po, po opòta awe lẹ po he tin to aga odòtin lẹ lọ tọn ji, po anazọnlinlọn awe lẹ po nado nọ ṣinyọn odla awe opòta lẹ lọ tọn lẹ ji he tin to aga odòtin lẹ lọ tọn; ¹³po pomeglanate fòwe lẹ lọ po na anazọ̀nlinlọn awe lẹ; oha pomeglanate tọn awe na anaznlinlọn dopodopo, nado ṣinyọn odla awe opòta lẹ lọ tọn lẹ ji he tin to odotin lẹ lọ ji. ¹⁴E basi pòtin lẹ ga, bo sọ basi ozẹnvla lẹ do pòtin lẹ lọ ji; ¹⁵ozẹnvla dopo, po oyín wiawe po to e glọ. ¹⁶Ozẹ́n lẹ lọ ga, po fẹli lẹ lọ po, po opla lẹ lọ po, po nuzinzán etọn lẹpo po, wẹ Hulami otọ́ etọn basi na Sọlọmọni ahọlu na ohọ̀ OKLUNỌ tọn lọ sọn gànvẹ̃ sisẹ́ mẹ. ¹⁷To danfafa Jọdani tọn ji wẹ ahọlu kòn yé te, to okòyigba mẹ to Sokọti po Zeleda po ṣẹnṣẹn. ¹⁸Le wẹ Sọlọmọni basi nuzinzán he lẹpo do to ogégé mẹ na yè ma sọgan mọ ojlẹ gànvẹ̃ lọ tọn ¹⁹Sọlọmọni sọ basi nuzinzán lẹpo he tin to ohọ̀ Jiwheyẹwhe tọn lọ mẹ, agbà sikanọ ga, po tafo lẹ lọ po ehe ji aklaadlọ lọ te; ²⁰po zogbántin lẹ lọ po po miyọngbán yetọn lẹ po, sọn sika dagbedagbe mẹ na yé nido to jiji kẹdẹdi ogbedai lọ to zọnji lọ nukọn; ²¹po ovòvó lẹ lọ po, po miyọngbán lẹ po, po obẹ́ lẹ po, sọn silia mẹ, podọ enẹ sika dagbe; ²²po zogbánsinú lẹ po, po ṣiklẹ lẹ po, po osivi lẹ po, po gànzẹ́n lẹ po, sọn sika dagbedagbe mẹ: podọ na bibiọ ohọ̀ lọ mẹ tọn tọn, ohọ̀n etọn hòmẹ tọn lẹ na otẹn wiwe gbahugbahu lọ, podọ ohọ̀n ohọ̀ lọ tọn lẹ, nado dọ, sọn tẹmpli mẹ, tin sọn sika mẹ.

¹LE wẹ yè vọ́ azọ́n he Sọlọmọni wà na ohò OKLUNỌ tọn lọ do. Sọlọmọni sọ bẹ́ onú he Davidi otọ etọn ko klandowiwe lẹ wá họmẹ, yèdọ fataka lọ, po sika lọ po, po nuzinzán lẹpo po, bo yi yé do adọkunnu ohọ̀ Jiwheyẹwhe tọn tọn lẹ mẹ.

²Whenẹnu wẹ Sọlọmọni plì mẹho Islaeli tọn le, po ogán whẹndo tọn lẹpo po, podọ ahọvi owhé otọ lẹ tọn lẹ sọn ovi Islaeli tọn lẹ me do Jelusalẹm, nado hẹn alki alẹnù OKLUNỌ tọn lọ hẹji sọn tòdaho Davidi tọn mẹ wá, he yín Ziọni. ³Omẹ Islaeli tọn lẹpo sọ pli yéde do ahọlu de to hùnwhẹ kòn, he tin to osùn ṣinawero mẹ. ⁴Mẹho Islaeli tọn lẹpo sọ wá, Levinu le so ze alki lọ daga. ⁵Yé sọ hẹn alki lọ daga po ogohọ̀ oplì tọn lọ po, po nuzinzán wiwe lẹpo po he tin to Ogohọ̀ lọ mẹ; ehelẹ wẹ yẹwhenọ Levinu lẹ hen wá aga. ⁶Sọlọmọni ahọlu po agùn Islaeli tọn lẹpo po, he yè pli do e de, tin to alki lọ nukọn, bo yí lẹngbọ lẹ po oyín lẹ po do to avọ́sàn he yè ma sọgan dọ kavi hia na gbahugbahu. ⁷Yẹwhenọ lẹ sọ hẹn alki alẹ́nù OKLUNỌ tọn tọn lọ wá whégbe jẹ otẹn etọn mẹ, biọ zọ́nji ohọ̀ lọ tọn mẹ, jẹ otẹn wiwe gbahugbahu lọ mẹ, yèdọ awà kẹlubimi lẹ tọn lẹ glọ. ⁸Na kẹlubimi lẹ lọ dlẹn awà yetọn lẹ jẹgbonu to otẹn alki lọ tọn ji, kẹlubimi lẹ lọ sọ ṣinyọn alki lọ ji po opò etọn lẹ po to aga. ⁹Opò lẹ lọ yín ogà sọmọ bọ yè to obẹ́nu opò lẹ lọ tọn lẹ mọ sọn alki kọ̀n to zọ́nji lọ nukọn; ṣigba yè ma mọ yé to gbonu gba: finẹ é sọ te, jẹ egbé. ¹⁰Nude ma tin to alki lọ mẹ adavo tafo awe lẹ lọ he Moṣe yí do finẹ to Holẹbi, whenuena OKLUNỌ basi alẹ́nù de po ovi Islaeli tọn lẹ po, whenuena yé gò sọn Egipti. ¹¹E sọ wá jọ, whenuena yè hẹn yẹwhenọ le tọ́n wá sọn otẹn wiwe lọ mẹ, (na yẹwhenọ he tin finẹ lẹpo ko lè yéde wé, bo ma sọ to ayipa okanta yetọn lẹ go gba; ¹²Levinu lẹ ga he yín hànjitọ le, popó yé tọn, yèdọ Asafl, Hemani, Jẹdutuni, po visunnu yetọn lẹ po po mẹmẹsunnu yetọn lẹ pò, tò tó alavọ̀ dagbedagbe mẹ, po ajogàn lẹ po, po asiazọ́n hànjinu lẹ po, po ajalẹn lẹ po, ṣite to opòdo whèzẹtẹn agbà lọ tọn ji, yẹwhenọ kantọ̀n gọ́na yé yí opẹ́n lẹ dò to kúnkún:) ¹³yèdọ é sọ wá jọ, whenuena opẹ̀nkúntọ lẹ po hànjitọ lẹ po tin di mẹdopo, nado kún zẹ̃nzẹ̃n nado yín sisè to pipà po pẹ́didona OKLUNỌ po mẹ; whenuena yé zé ogbè yetọn daga po opèn lẹ lọ po, po ajògàn lẹ lọ po, po nuzinzán hàngbè tọn lẹ po, bo to OKLUNỌ pà, dọmọ, Na ewọ yín yínyọ́n: na lẹblanu etọn to ote doidoi: dọ whenẹnu wẹ yè yí aslọ do gọ́ ohọ̀ lọ, yèdọ ohọ̀ OKLUNỌ tọn lọ, ¹⁴sọmọ bọ yẹwhenọ lẹ lọ ma sọ sọgan Ṣite nado wàdevizọ́n gbọn aslọ lọ tọn dali: na gigo OKLUNỌ tọn gọ́ ohọ Jiwheyẹwhe tọn lọ.

¹WHENẸNU wẹ Sọlọmọni dọhó dọmọ, OKLUNỌ ko dọ e na nọ nọ̀ zinvlu titli mẹ. ²Ṣigba yẹn ko dó ohọ̀ fininọ̀ tọn de na we, po otẹn de po na we nado nọ nọ̀ e mẹ doidoi. ³Ahọlu sọ lẹ́ nukunmẹ etọn, bo sọ dona agùn Islaeli tọn lẹpo: agùn Islaeli tọn lẹpo sọ ṣìte. ⁴Ewọ sọ dọmọ, Donanọ OKLUNỌ yín, Jiwheyẹwhe Islaeli tọn, he yí onù etọn do dọhó hlan Davidi otọ ṣie, bo ko sọ yí alọ etọn le do hẹn ẹn di, dọmọ, ⁵Sọn azán he gbè yẹn hẹn omẹ ṣie lẹ jẹgbonu sọn aigba Egipti tọn ji wá, yen ma dé tòdaho de sọn whẹndo Islaeli tọn lẹ de mẹ nado dó ohọ̀ de do e mẹ, na oyín ṣie nido tin to finẹ gba; mọ yẹn ma sọ dè omẹ de nado yín ahọvi to Islaeli omẹ ṣie lẹ ji gba: ⁶ṣigba yẹn ko dè Jelusaíẹm, na oyín ṣie nido tin to finẹ; bo ko sọ dè Davidi nado tin Islaeli omẹ ṣie lẹ ji. ⁷Dinvie é ko tin to ayiha Davidi otọ́ ṣie tọn mẹ nado dó ohọ̀ de na oyín OKLUNỌ tọn, Jiwheyẹwhe Islaeli tọn. ⁸Ṣigba OKLUNỌ dọ hlan Davidi otọ́ ṣie dọmọ, Le é ko tin to ayiha towe mẹ nado dó ohọ̀ de na oyín ṣie, hiẹ wà dagbe bọ é ko do tin to ayiha towe mẹ: ⁹ṣogàn hiẹ ma na dó ohọ̀ lọ gba; ṣigba visunnu towe he na tọ́n wá sọn adaja towe lẹ mẹ, ewọ na dó ohọ̀ lọ na oyín ṣie. ¹⁰OKLUNỌ ko sọ yí ohó etọn he é dọ basi; na yè fọ́n mi daga to otẹn Davidi otọ ṣie tọn mẹ, bo sín ofìn Isìaeli tọn ji, dile OKLUNỌ gblọnadan do, bo ko sọ dó ohọ̀ lọ na oyín OKLUNỌ tọn, Jiwheyẹwhe Islaeli tọn. ¹¹Finẹ yẹn ko sọ zé alki lọ do, ehemẹ alẹ̀nù OKLUNỌ tọn te, he é basi po ovi Islaeli tọn lẹ po.

¹²E sọ ṣite to agbà OKLUNỌ tọn lọ nukọn to nukun agùn Islaeli tọn lẹpo tọn me, bo tẹ alọ etọn lẹ jegbonu: ¹³(na Sọlọmọni ko basi apẹ́pẹ gànvẹ̃ tọn de, tedidi awàgbà atón tọn, podọ awàgbà atọ́n gbigblo, podọ awàgbà atọ̀n jiyìyi, bo ko zẹ́ e do ṣẹnṣẹn awánu lọ tọn; é ji é ṣite te, bo jẹklo to oklo etọn lẹ ji to agùn Islaeli tọn lẹpo nukọn, bo tẹ́ alọ etọn lẹ jẹgbonu hlan olọn:) ¹⁴é sọ dọmọ, OKLUNỌ È, Jiwheyẹwhe Islaeli tọn, Jiwheyẹwhe de ma tin taidi we, to olọn lọ mẹ, kavi to aigba mẹ; mẹhe yìn alẹ̀nù po lẹblanu po hẹ mẹmẹsi towe lẹ he to zọnlinzin to nukọn towe po ayiha yetọn lẹpo po: ¹⁵mẹhe ko yìn hẹ mẹmẹsi towe Davidi otọ́ ṣie enẹ he hiẹ ko gblọnadanna ẹn: nugbo, hiẹ yí onù towe do dọ, bo ko sọ yí alọ towe do hẹn ẹn di, dile é te to egbé he. ¹⁶Enẹwutu dinvie, OKLUNỌ È, Jiwheyẹwhe Islaeli tọn, yìn hẹ mẹmẹsi towe Davidi otọ́ ṣie enẹ he hiẹ ko gblọnadan nẹ̃, dọmọ, Finẹ sunnu de ma na dén we to nukun ṣie mẹ nado sín ofìn Islaeli tọn ji; eyín ovi towe lẹ payi do aliho yetọn go ṣokẹdẹ, nado nọ zinzọnlin to osẹ́n ṣie mẹ dile hiẹ to zìnzìn to nukọn ṣie do. ¹⁷Enẹwutu dinvie, OKLUNỌ È, Jiwheyẹwhe Islaeli tọn lọ, gbọ yè ni hẹn ohó towe zùn nugbo, he hiẹ dọ hlan Davidi mẹmẹsi towe. ¹⁸Ṣigba Jiwheyẹwhe to wiwà lọsulọsu mẹ ka na nọ̀ gbẹtọ lẹ de to aigba go wẹ? dayi e go, olọn podọ olọn olọn lẹ tọn lọ ma sọgan hẹn we; whè sù sọ na ohọ̀ he yẹn ko dó he ¹⁹Gãnṣo hiẹ ni tindo mẹnukuntapọ́n hlan odẹ̀ mẹmẹsi towe tọn, podọ hlan ovẹ̀ etọn, OKLUNỌ È Jiwheyẹwhe ṣie, nado tuntóai hlan awhá lọ podọ hlan odẹ̀ he mẹmẹsi towe to hihò to nukọn towe: ²⁰na nukun towe lẹ nido yín hùnhùn hlan ohò he kòn to okle po ozán po, yèdọ hlan otẹn lọ kọ̀n fìetọn hie ko dọ dọ hiẹ na yí oyín towe do finẹ; nado nọ tuntóai hlan odẹ̀ he mẹmẹsi towe na nọ hò hlan otẹn he kọ̀n. ²¹Hiẹ ni bo tuntóai hlan ové mẹmẹsi towe tọn lẹ, po Islaeli omẹ towe lẹ po tọn, whenuena yé na hodẹ̀ hlan otẹn he kọ̀n: nugbo, hiẹ ni sè sọn otẹn fininọ̀ towe mẹ, yèdọ sọn olọn mẹ; podọ whenuena hiẹ sè, jona. ²²Eyín omẹ de wàylando do kọmẹnu etọn go, bọ yè yí whiwhle de do e ji nado hẹn ẹn nado whle, bọ ewọ sọ wá bo whle to agbà towe nukọn to ohò he mẹ: ²³whenẹnu hiẹ ni sè sọn olọn mẹ, bo wà, bo dawhèna mẹmẹsi towe lẹ, yíyíahọsu to mẹylankan lọ go, nado hẹn aliho etọn wá ota etọn titi ji; po sùsùwhẹna dódónọ lẹ po, nado na ẹn kẹdẹdi odódó etọn. ²⁴Podọ eyín yè hò Islaeli omẹ towe lẹ liai to kẹ̀ntọ lẹ nukọn, na yé ko wàylando do ogo we wutu; bo na sọ vọ́ diọ bo yígbèna oyín towe, bo hodẹ̀ bo sọ basi ovẹ̀ to nukọn towe to ohọ̀ he mẹ: ²⁵whenẹnu hiẹ ni sè sọn olọn mẹ, bo jona ylando Islaeli omẹ towe lẹ tọn, bo sọ vọ́ yé hẹn wá jẹ aigba he hiẹ na hlan yé podọ hlan otọ́ yetọn lẹ mẹ. ²⁶Whenuena yè sú olọn daga, bọ ojikun de ma tin, na yé ko wàylando do ogo we wutu; eyín yé hodẹ̀ hlan otẹn he kòn, bo yígbèna oyín towe, bo sọ diọ sọn ylando yetọn mẹ, whenuena hiẹ bianukunna yé: ²⁷whenẹnu hiẹ ni sè to olọn mẹ, bo jona ylando mẹmẹsi towe lẹ tọn, po Islaeli omẹ towe lẹ tọn po, whenuena hiẹ plọn yé aliho dagbe hemẹ yé do nọ zinzọnlin te; bo do ojikun hlan aigba towe ji, he hiẹ ko na hlan omẹ towe lẹ na ogú de. ²⁸Eyín hùvé tin to aigba lọ mẹ finẹ, eyín azònylankan tin finẹ, eyín hòkọnyìngbé tin finẹ kavi ovájijẹ, owẹ́n kavi agbonọpatin; eyín okẹntọ yetọn lẹ glọn yé do to aigba tòdaho yetọn lẹ tọn mẹ; núdotuklamẹ depope kavi awutujijẹ depope tin finẹ; ²⁹odẹ̀ kavi ovẹ́ depope yín bibasi gbọn omẹ depope dali, kavi gbọn Islaeli omẹ towe lẹpo dali, he na yọnẹn omẹ dopodopo núdotuklamẹ etọn titi po awubla etọn titi po, bo na té alọ etọn lọ jẹgbonu hlan ohọ̀ he kọ̀n: ³⁰whenẹnu hiẹ ni sè sọn olọn mẹ otẹn fininò towe, bo jona, bo sọ gọ̀jo hlan omẹ dopodopo kẹdẹdi aliho etọn lẹpo, ayiha mẹhetọn hiẹ yọnẹn; (na hiẹ, yèdọ hiẹ sokẹdẹ, wẹ yọ́n ayiha ovi gbẹtọ lẹ tọn tọn lẹ;) ³¹na yé nido dibusi we, nado nọ zinzọnlin to aliho towe lẹ mẹ, dẹ̀n sọ le yé tin to aigba lọ mẹ he hiẹ ko na hlan otọ́ mítọn lẹ. ³²Humọ gbọn ojonọ lọ tọn dali, he ma tin sọn Islaeli omẹ towe lẹ mẹ gba, whenuena é na sọn otò dindọ̀n de mẹ wá na oyín towe daho tọn wutu, po alọ hlọnhlọnnọ towe po, po awà dindlẹn hlan gbonu towe po; whenuena yé na wá bo hodẹ̀ hlan ohò he kọ̀n: ³³whenẹnu hiẹ ni sè sọn olọn mẹ, yèdọ sọn otẹn finin towe mẹ, bo wà kẹdẹdi ehe ojonọ lọ dawhá hlan we na; na akọta aigba tọn lẹpo nido yón oyín towe, bo sọ nọ dibusì we, dile Islaeli omẹ towe lẹ to wiwà do, podọ na yé nido yọnẹn dọ yè ylọ ohò he ehe yẹn dó lọ gbọn oyín towe dali. ³⁴Eyín omẹ towe lẹ tón yì nado funawhàn hẹ okẹntọ yetọn lẹ, aliho depope hiẹ na do yé hlan gbọn, bọ yé sọ hodẹ̀ hlan we hlan tòdaho he kòn be hiẹ ko dè, po ohò lọ po he yẹn ko dó na oyín towe: ³⁵whenẹnu hiẹ ni sè odè yetọn po ovó yetọn po sọn olọn mẹ, bo sọ hẹn owhèhó yetọn go. ³⁶Eyín yé wàylando do ogo we, (na omẹ de ma tin he ma wàylando,) bọ hiẹ yín adinọ to yé de, bo sọ jó yé hlan okẹntọ lọ, sọmọ bọ yé bé yé mẹmẹglọ yì jẹ aigba de dindèn kavi sẹpọ́ ji; ³⁷gãnṣo eyín yé na fiinnu jẹ yéde go to aigba fie yè bé yé yì mẹmẹglọ te, bo vó diọ, bo sọ basi ovọ́ hlan we to aigba mẹglọnọ yetọn tọn lọ ji, dọmọ, Míwlẹ ko wàylando, míwlẹ ko ylannúwà, bo ko sọ wà ylankan; ³⁸eyín yé yí ayiha yetọn lẹpo po alindọn yetọn lẹpo po do lẹ́gọ̀ do de we to aigba mẹglọnọ yetọn tọn mẹ, fie yé ko bé yé yì mẹmẹglọ te, bo sọ hodẹ hlan aigba yetọn kòn, he hiẹ na hlan otọ́ yetọn lẹ, podọ tòdaho he hiẹ ko dè, podọ hlan ohò lọ kòn he yẹn ko dó na oyín towe: ³⁹whenẹnu hiẹ ni sè sọn olọn mẹ, yèdọ sọn otẹn fininọ́ towe mẹ, odẹ́ yetọn po ovẹ̀ yetọn lẹ po, bo sọ hẹn owhẹ̀hó yetọn go; bo so jona omẹ towe he ko wàylando do ogo we lẹ. ⁴⁰Dinvie, Jiwheyẹwhe ṣie È, yẹn vẹ̀ we, gbọ nukun towe lẹ ni yín hùnhùn, po otọ́ towe lẹ po ni yín didoai, hlan odẹ̀ he yè basi to otẹn he mẹ go. ⁴¹Enẹwutu, OKLUNỌ È Jiwheyẹwhe, tite biọ otẹn gbigbọjẹ towe mẹ lò, hiẹ, po alki huhlọn towe tọn lọ po: OKLUNỌ E Jiwheyẹwhe, gbọ yè ni yí whlẹngan do ṣìnavọ̀na yẹwhenọ towe lẹ, bo sọ gbọ mẹwiwe towe lẹ ni to ayajẹ to dagbewà towe mẹ. ⁴²OKLUNỌ E Jiwheyẹwhe, a lẹ́ nukunmẹ mẹyíamisisádodè towe tọn sẹ̀ blo: nọ flin lẹblanu Davidi mẹmẹsi towe tọn lẹ.

¹DINVIE whenuena Sọlọmọni ko basi opòdo odẹ̀hihò tọn de, miyọn jẹte sọn olọn mẹ wá, bo fìọ avọ́ nunina mimẹ lọ, po avọ́sánnu lẹ po; gigo OKLUNỌ tọn sọ gọ́ ohọ̀ lọ mẹ. ²Yẹwhenọ lẹ ma sọ sọgan biọ ohọ̀ OKLUNỌ tọn lọ mẹ yi gba, na gigo OKLUNỌ tọn gọ́ ohọ̀ OKLUNỌ tọn lọ wutu. ³Ovi Islaeli tọn lẹpo sọ to pinpọ́n, whenuena miyọn lọ to tejẹ ja, gigo OKLUNỌ tọn lọ sọ tin to ohọ̀ lọ ji; yé sọ dẹ́ yéde po nukunmẹ yetọn lẹ po hlan aigba to aigbatitó lọ ji, bo litai, bo na opé lẹ hlan OKLUNỌ, dọmọ, Na ewọ yín yínyón; na lẹblanu etọn to ote doìdoi. ⁴Whenẹnu wẹ ahọlu po gbẹtọ lẹpo po na avọ́sánnu to OKLUNỌ nukọn. ⁵Sọlọmọni ahọlu sọ na avọ́sánnu de oyín fọtọ́n kònukunawe, po lẹngbọ fọtọ́n kantọ̀n po. Mowẹ ahọlu po gbẹtọ lẹpo po klan ohò Jiwheyẹwhe tọn lọ do wiwe. ⁶Yẹwhenọ lẹ sọ ṣite, kẹdẹdi azọ́ntẹn yetọn lẹ; Levinu lẹ ga po nuzinzán ohàngbè OKLUNỌ tọn tọn lẹ po, he Davidi ahọlu ko basi lẹ nado nọ na opé lẹ hlan OKLUNỌ, na lẹblanu etọn to ote doidoi, whenuena Davidi to pipà gbọn devizọ́nwiwà yetọn dali: bọ jẹwhenọ lẹ to opẹ́n lẹ kún to yé nukọn; bọ Islaeli lẹpo sọ ṣite. ⁷Humọ Sọlọmọni sọ hiọ ṣẹnṣẹn awánu lọ tọn he tin to ohọ̀ OKLUNỌ tọn lọ nukọn; na finẹ wẹ é na avọ́ nunina mimẹ̀ lẹ te, po ojó avọ́ nunina jijọho tọn lẹ po: na agbà gànvẹ̃nọ lọ he Sọlọmọni basi ma tin sọgan nado hẹn avọ́ nunina mimẹ̀ lọ, po avọ́ nunina jinulili lọ tọn po, po ojó lọ po gba wutu. ⁸Mowẹ Sọlọmọni wà hùnwhè lọ to ojlẹ nẹ mẹ azán ṣinawe, po Islaeli lẹpo po to e de, agùn daho talala de, sọn bibiọ whégbe Hamati tọn jẹ tọ̀pẹsẹ Egipti tọn. ⁹Podọ to azán ṣinatọ̀ntọ ji yé do opli ayidego de: na yé payi klandowiwe Agbà lọ tọn go azán ṣinawe, po hùnwhè lọ po azán ṣinawe. ¹⁰To azán kònuatòntọ osùn ṣinawetọ tọn ji é do gbẹtọ lẹ hlan yì jẹ ogohò yetọn lẹ mẹ, ayajẹnọ po homẹvivinọ ayiha tọn po na dagbewà he OKLUNỌ dohia hlan Davidi, podọ hlan Sọlọmọni, podọ hlan Islaeli omẹ etọn lẹ.

¹¹Le Sọlọmọni vọ̀ ohọ̀ OKLUNỌ tọn lọ do, po ohọ̀ ahọlu tọn po; po ehe biọ ayiha Sọlọmọni tọn mẹ wá lẹpo po nado basi to ohọ̀ OKLUNỌ tọn mẹ, podọ to ohọ̀ etọn titi mẹ, é yíwà po ale po. ¹²OKLUNỌ sọ doawuhia hlan Sọlọmọni to ozán mẹ, bo dọ hlan ẹn dọ, Yẹn ko sè odẹ̀ towe, bo ko sọ dè otẹn he hlan dẽ na ohọ̀ avọ́ tọn de. ¹³Eyín yẹn sú olọn daga bọ ojikun de ma tin, kavi eyín yẹn degbèna owẹ̀n nado dù aigba lọ, kavi eyín yẹn do azònylankan hlan ṣẹnṣẹn omẹ ṣie lẹ tọn; ¹⁴eyín omẹ ṣie lẹ, he yè ylọ gbọn oyín ṣie dali na hòhùwhẹ́ yéde, bo hodẹ̀, bo din nukunmẹ ṣie, bo sọ diọ sọn aliho ylankan yetọn lẹ mẹ; whenẹnu wẹ yẹn na sè sọn olọn mẹ, bo na sọ jona ylando yetọn, bo na sọ hẹnazngbọna aigba yetọn. ¹⁵Dinvie nukun ṣie lẹ na yín hùnhùn, po otó ṣie lẹ po didoai, hlan odè he yè basi to otẹn he mẹ. ¹⁶Na lò wẹ yẹn dè bo sọ hiọ ohọ̀ he, na oyín ṣie nido tin to finẹ doidoi: nukun ṣie lẹ po ayiha ṣie po na nọ tin finẹ jeijei. ¹⁷Podọ na hiẹ tọn, eyín hiẹ na nọ zinzọnlin to nukọn ṣie dile Davidi otọ́ towe zìn do, bo sọ nọ wà kẹdẹdi ehe yẹn degbèna na we lẹpo, bo na sọ nọ payi oṣéndoai ṣie lẹ po whẹ̀dida ṣie lẹ po go; ¹⁸whenẹnu wẹ yẹn na hẹn ofìn ahọludu towe tọn lódo kẹdẹdile yẹn nùalẹ po Davidi otọ̀ towe po do, dọmọ, Omẹ de ma na dén we nado yín ahọvi to Islaeli mẹ. ¹⁹Ṣigba eyín mì diọ yí, bo gbẹ́ osẹ́ndoai ṣie lẹ po gbèdide ṣie lẹ po dai he yẹn zé do mì nukọn, bo na yì bo to yẹwhe devo lẹ sẹ́n, bo to taliaina yé: ²⁰whenẹnu wẹ yẹn na dòn yé sún po adò lẹ po sọn aigba ṣie he yẹn ko na yé ji; podọ ohọ̀ he, he yẹn ko hiọ na oyín ṣie, wẹ yẹn na sọ zédlan sọn nukọn ṣie, yẹn na sọ hẹn ẹn zùn hówhinwhẹn de po asàgbè de po to akọta lẹpo ṣẹnṣẹn. ²¹Podọ ohọ̀ he, he tin jiyìyì mọ, yè na hẹn awuji mẹdepope he na jù gbọn e dali, bo na sọ dọmọ, Etẹwutu OKLUNỌ wà le hlan aigba he, podọ hlan ohò he go? ²²Yé na sọ gblọn dọmọ, Na yé gbẹ́ OKLUNỌ dai wutu, Jiwheyẹwhe otẹ́ yetọn lẹ tọn lọ, he hẹn yé tón sọn aigba Egipti tọn ji wá, bo hẹn yẹwhe devo lẹ go, bo to taliaina yé bo sọ to yé sẹ̀n: enẹwutu wẹ é hẹn oylan he lẹpo wá yé ji.

¹E SỌ wá jọ to opòdo owhè òko tọn mẹ, ehemẹ Sọlọmọni ko dó ohọ̀ OKLUNỌ tọn lọ te, po ohọ̀ etọn titi po, ²wẹ Sọlọmọni dó yé tòdaho lẹ lọ he Hulami ko na hlan Sọlọmọni, bo sọ hẹn ovi Islaeli tọn lẹ nado nọ nọ̀ finẹ.

³Sọlọmọni sọ yì Hamati-zoba de, bo sọ gló e. ⁴E sọ dó Tadinoli to zùngbo mẹ, po tòdaho agbànhọ̀ tọn lẹpo po, he é dó to Hamati mẹ. ⁵E dó Bẹti-holọni aga tọn lọ ga, po Bẹti-holọni odò tọn po, tòdaho odòkọnọ lẹ, po adó lẹ po, hugbo lẹ, po opátin lẹ po; ⁶po Baalati po, po tòdaho agbànhọ̀ tọn lẹpo po he Sọlọmọni tindo, po tòdaho lẹpo po na kẹkẹ etọn lẹ, po tòdaho lẹ po na osọ́nọ etọn lẹ, po ehe Sọlọmọni jijlo lẹpo po nado dó na homẹhùnnú to Jelusalẹm mẹ, podọ to Lẹbanọni mẹ, podọ to aigba ahọludutẹn etọn tọn lẹpo mẹ. ⁷Na omẹ he yè pòdai lẹpo tọn sọn Hitinu lẹ mẹ, po Amọlinu lẹ po, po Pẹlizinu lẹ po, po Hivinu lẹ po, po Jẹbusinu lẹ po, he ma tin sọn Islaeli mẹ lẹ; ⁸sọn ovi yetọn lẹ mẹ he yè pòdai to yé godo to aigba lọ ji, mẹhe ovi Islaeli tọn lẹ ma hùsúdo, sọn yé mẹ wẹ Sọlọmọni fọ́n osẹ̀njijọ mẹsèntọ lẹ tọn de dote te jẹ egbé he ⁹Ṣigba Sọlọmọni ma basi mẹmẹsi de na azọ́n etọn sọn ovi Islaeli tọn lẹ mẹ gba; ṣigba yé yín omẹ awhàn tọn lẹ, po nukọntọ awhàngán etọn lẹ tọn po, po ogán kẹkẹ etọn lẹ tọn po po osọ̀nọ etọn lẹ tọn po. ¹⁰Ehelẹ wẹ gbonugán nukọntọ Sọlọmọni ahọlu tọn lẹ, yèdọ fọdekandeao, he nọ hẹn ogándu to gbẹtọ lẹ ji. ¹¹Sọlọmọni sọ hẹn viyọnnu Falo tọn hẹji sọn tòdaho Davidi tọn mẹ wá jẹ ohọ̀ he é dó na ẹn mẹ: na é dọmọ, Asi ṣie ma na nò ohò Davidi ahọlu Islaeli tọn tọn lọ mẹ gba, na otẹn lẹ lọ yín wiwe wutu, fie alki OKLUNỌ tọn lọ ko wá jẹ.

¹²Whenẹnu wẹ Sọlọmọni na avọ̀ nunina mimẹ̀ lẹ hlan OKLUNỌ to agbà OKLUNỌ tọn lọ ji, he é dó to agbasẹ lọ nukọn, ¹³yèdọ dile onúwà azán dopodopo tọn biọ do, nunina kẹdẹdi gbèdide Moṣe tọn lọ, to gbọjẹzán lẹ ji, podọ to osùn yọ̀yọ̀ lẹ ji, podọ to hùnwhẹ̀ dido lẹ ji, whlatọ̀n to owhè lọ mẹ, yèdọ to hùnwhè akla madotọ́n tọn lọ mẹ, podọ to hùnwhẹ̀ osẹ̀zán ṣinaweṣinawe tọn lẹ mẹ, podọ to hùnwhè gohọ̀túntún lẹ tọn mẹ. ¹⁴E sọ dèhia, kẹdẹdi ogbèdoai Davidi otọ̀ etọn tọn, okanta yẹwhenọ lẹ tọn lẹ hlan sinsẹ̀n yetọn, po Levinu lẹ po hlan aṣẹ yetọn lẹ, nado nọ pà, podọ nado nọ wàdevizọn to yẹwhenọ lẹ nukọn, dile onúwà azán dopodopo tọn lọ biọ do: họ̀njinọtọ lẹ ga gbọn okanta yetọn lẹ dali to hòngbo dopodopo kọ̀n: na mọwẹ Davidi omẹ Jiwheyẹwhe tọn lọ degbè do. ¹⁵Yé ma sọ klanyì sọn gbèdide ahọlu tọn lọ mẹ jẹ yẹwhenọ lẹ po Levinu lẹ po de gbọn owhẹ̀hó depope tọn dali, kavi gbọn adọkunnu lẹ tọn dali gba. ¹⁶Dinvie azọ́n Sọlọmọni tọn lẹpo wẹ yè ko wleawudama jẹ azán ododo ohò OKLUNỌ tọn lọ tọn tọn gbè, kaka yè do vò ẹ. Mowẹ yè sọ hẹn ohọ̀ OKLUNỌ tọn lọ yín matiu.

¹⁷Whenẹnu wẹ Sọlọmọni yì Ezioni gebeli de, po Eloti po de, to ohù tó to aigba Edọmi tọn mẹ. ¹⁸Hulami sọ do ohún lẹ hlan ẹn gbọn alọ mẹmẹsi etọn lẹ tọn lọ mẹ, po mẹmẹsi he tindo oyọnẹn ohù tọn lẹ po; yé sọ wá po mẹmẹsi Sọlọmọni tọn lẹ po jẹ Ofili, bo bẹ́ talẹnti sika tọn fọwekandeao sọn finẹ wá, bo sọ hẹn yé wá Sọlọmọni ahọlu de.

¹WHENUENA ahọsi Seba tọn sè sọn linlin Sọlọmọni tọn mẹ, é wá nado yí nukanbiọ sinsinyẹn lẹ do mọdòna, Sọlọmọni to Jelusalẹm, po áigbahún daho gédegéde de po, po kanklosọpóawenọ lẹ po he hẹn nuwhẹnwán lẹ, po sika po to ogégé mẹ, po zannu akuẹgégénu lẹ po: whenuena yè sọ hẹn ẹn jẹ Sọlọmọni de, é dọhó ehe tin to ayiha etọn mẹ lẹpo po e po. ²Sọlọmọni sọ dọ nukanbiọ: etọn lẹpo nẹ̃: nudepope ma tin whiwhla sọn Sọlọmọni de he é ma dọ nẹ̃ gba. ³Whenuena ahọsi Ṣeba tọn lọ ko mọ nuyọnẹn Sọlọmọni tọn lọ, po ohọ̀ he e ko dó lọ po, ⁴Po núdùdù tafo etọn tọn po, po aisínsín mẹmẹsi etọn lẹ tọn po, po nugopọ́n devizónwàtọ etọn lẹ tọn po, po avọ̀dogo yetọn po; kọfohẹntọ etọn lẹ ga, po avọ̀dogo yetọn po; po jihẹ́nú etọn he é do nọ hẹjì yì jẹ ohọ́ OKLUNỌ tọn kòn pó; gbigbọ de ma sọ tin to e hòmẹ ba. ⁵E bọ dọ hlan ahọlu dọ, Linlin nugbo de é yín he yẹn sè to aigba ṣie titi mẹ sọn owàlọ towe lẹ mẹ, podọ sọn nuyọnẹn towe mẹ. ⁶Ṣogãn yẹn ma yí ohó yetọn lẹ sè gba, kaka yẹn do wá, nukun ṣie lẹ ko sọ mọ ẹn: bo, dayi e go, yè ma dọ odá oklo nuyọnẹn towe lọ tọn tọn na mi gba: hiẹ hugán linlin he yẹn sè lọ. ⁷Jijọhonọ wẹ omẹ towe lẹ jijọhonọ sọ wẹ mẹmẹsi towe helẹ, he nọ site to whepoponu to nukọn towe, bo nọ to nuyọnẹn towe sè. ⁸Donanọ OKLUNỌ Jiwheyẹwhe towe yín, he hùnhomẹ to hiẹ mẹ, nado zé we do ofìn etọn ji, nado yín ahọlu na OKLUNỌ Jiwheyẹwhe towe: na Jiwheyẹwhe towe yiwanna Islaeli wutu, nado hẹn yé lódo doidoi, enẹwutu wẹ é yí we do basi ahọlu to yé ji, nado nọ basi whẹ̀dida po dódó po. ⁹E sọ na talẹnti sika tọn kantọ̀n ahọlu, po nuwhẹnwán lẹ po to susu gégé mẹ, po zannu akuẹgégénu lẹ po: nuwhẹnwán mọnkọ depope ma tin di ehe ahọsi Seba tọn na hlan Sọlomọni ahọlu. ¹⁰Mẹmẹsi Hulami tọn lẹ ga, po mẹmẹsi Sọlọmọni tọn lẹ po, he hẹn sika sọn Ofili mẹ wá lẹ, sọ hẹn algumu lẹ po zannu akuẹgégénu lẹ po wá ¹¹Ahọlu sọ basi aila lẹ na ohọ̀ OKLUNỌ tọn lọ, podọ na ohọ̀ ahọlu tọn lọ, po ajalẹn lẹ pọ po asiazọ́n hànjinu lẹ po na hànjitọ lẹ: yè ma ko mọ mọnkọ depope to aigba Juda tọn mẹ daijẹnukọn gba. ¹²Sọlọmọni ahọlu sọ na hlan ahọsi Ṣeba tọn ojlo etọn lẹpo, nudepope é biọ, madọ enẹ he é hẹn wá ahọlu de tọn. Mowẹ é lẹ́ bo yì aigba etọn titi ji, ewọ po mẹmẹsi etọn lẹ po.

¹³Dinvie ojlẹ sika tọn he nọ wá Sọlọmọni de to owhè dopo mẹ yín talẹnti sika tọn nuọntẹn-kandekoatọ́nnukundopo; ¹⁴madọ enẹ he nusàtọ lẹ po ajọtọ lẹ po hẹn wá tọn: ahọlu Alabia tọn lẹpo po otògán tòpẹvi tọn lẹ po to sika po fataka po hẹnwà Sọlọmọni de. ¹⁵Sọlọmọni ahọlu sọ basi núdodènna lẹ sọn sika tùntùn mẹ: ṣẹkle nuọntọ̀n sika tùntùn tọn yì na núdodènna dopo. ¹⁶E sọ basi awọyínu fọdekanweko sọn sika tùntùn mẹ; sẹklẹ fọdekanweko sika tọn yì na awọyínu dopo: ahọlu sọ bẹ́ yé do ohọ̀ zùnkan Lẹbanọni tọn lọ tọn mẹ. ¹⁷Humọ ahọlu sọ basi ofìn daho ajlankúdu tọn de, bo yí sika dagbedagbe do tó ẹ. ¹⁸Aila ṣidopo wẹ finẹ jẹ ofìn lọ go, po tokloafọligbó sika tọn de po, he yè whè do ofìn lọ go, po omẹ̀zẹn lẹ po to adà awe lẹ mẹ to otẹn aisinnu lọ tọn dali, kinni awe to ote to omèzèn lẹ lọ damẹ. ¹⁹Kinni wiawe ṣite to adà dopo lọ go podọ to awetọ go to aila ṣidopo lẹ lọ ji: yè ma ko basi mọtọnkọ de to ahọludu depope mẹ gba. ²⁰Podọ nuzinzán núnùnú Sọlọmọni ahọlu tọn lẹpo tin sọn sika mẹ, po nuzinzán ohọ̀ zùnkan Lẹbanọni tọn lọ tọn tọn lẹpo po tin sọn sika dagbedagbe mẹ: yè ma hia fataka do núde mẹ to azán Sọlọmọni tọn lẹ mẹ gba. ²¹Na ahọlu tindo ohun lẹ he nọ yì Talsisi po mẹmẹsi Hulami tọn lẹ po: whladopo to owhè atọ̀n mẹ wẹ ohún Talsisi tọn lẹ nọ wá, he nọ hẹn sika po fataka po, ajlankúdu, po aziza lẹ po, po ahlinhán le po wá. ²²Mowẹ Sọlọmọni ahọlu húgán ahọlu aigba tọn lẹpo to adọkun po nuyọnẹn po mẹ. ²³Ahọlu aigba tọn lẹpo sọ nọ din nukunmẹ Sọlọmọni tọn, nado nọ sè nuyọnẹn etọn, he Jiwheyẹwhe yí do ayiha etọn mẹ. ²⁴Yé omẹ dopodopo sọ nọ hẹn nunina etọn wá, nuzinzán fataka tọn lẹ, po nuzinzán sika tọn lẹ po, avọ́, ogbàja po nuwhẹnwán lẹ po, osọ́ lẹ, po otlo lẹ po, osọha de to whèmẹ whèmẹ. ²⁵Sọlọmọni sọ tindo họ̀nu-apó lẹ fọtọ́n ẹnẹ na osọ́ lẹ po kẹkẹ lẹ po, po osọ́nọ fọtọ́n wiawe po, he é bẹ́kọ̀n do kẹkẹ tòdaho lẹ mẹ, podọ to ahọlu de to Jelusalẹm. ²⁶E sọ dùahọlu to ahọlu lẹpo ji sọn Otò lọ mẹ yèdọ jẹ aigba Filistini lẹ tọn ji, podọ jẹ agbègbè Egipti tọn ji. ²⁷Ahọlu sọ hẹn fataka nado tin to Jelusalẹm mẹ di zannu lẹ, kedali lẹ wẹ é sọ hẹn nado tin di atin sikomole lẹ he tin to dòdò mẹ, na ogégé. ²⁸Yé sọ tò osé lẹ hẹnwá na Sọlọmọni sọn Egipti, podọ sọn aigba lẹpo ji.

²⁹Dinvie pipòtọ òwalọ Sọlọmọni tọn lẹ tọn, tintan po godotọn po, yè ma ka wlan yé to otàn Natani yẹwhenọ lọ tọn mẹ, podọ to odọdai Ahija Ṣiloninu lọ tọn lọ mẹ, podọ to númimọ Iddo númọtọ lọ tọn le mẹ gbọn Jeloboami visunnu Nebati tọn lọ tọn dali? ³⁰Sọlọmọni sọ dùahọlu to Islaeli lẹpo ji to Jelusalẹm mẹ owhè kande. ³¹Sọlọmọni sọ damlọn po otọ́ etọn lẹ po, yè sọ di i to tòdaho Davidi otọ́ etọn tọn lọ mẹ: Lehoboami visunnu etọn sọ dùahọlu to otẹn etọn mẹ.

¹LEHOBOAMI sọyì jẹ Ṣekẹmi: na Islaeli lẹpo wẹ yè hẹn wá jẹ Ṣekẹmi nado yí i do basi ahọlu. ²E sọ wá jọ, whenuena Jeloboami visunnu Nebati tọn sè sọn e mẹ, (na ewọ tin to Egipti mẹ, fie é ko họ̀nyì sọn Sọlọmọni ahọlu nukọn,) wẹ Jeloboami lẹ́gọ́ sọn Egipti. ³Yé sọ domẹhlan bo ylọ ẹ; Jeloboami po Islaeli lẹpo po wá, yé sọ dọhó blan Lehoboami, dọmọ, ⁴Otọ́ towe hẹn oglepọ̀nu mítọn fiẹawu: enẹwutu dinvie hiẹ ni hẹn sinsẹ̀n fiẹawu otọ́ towe tọn lọ, po oglepònu pinpọ́n he é yí do mí ji lọ po fuahú, míwlẹ na sọ nọ sẹn we. ⁵Ewọ sọ dọ hlan yé dọ, Mì ni gọ́ wá dẽ to azán atọ̀n godo. Gbẹtọ lẹ lọ sọ fọ́nyì. ⁶Ahọlu Lehoboami sọ yí hónamẹ po sunnu mẹho lẹ po, he ko nọ ṣite to Sọlọmọni otọ́ etọn nukọn whenuena é gbẹ́ tin to ogbẹ́, dọmọ̀, Hónamẹ té míwlẹ na mi nado hẹn ogbègblọn gọ̀yì omẹ he lẹ de? ⁷Yé sọ dọhó hlan ẹn, dọmọ, Eyín hiẹ yín dagbenọ hlan omẹ he lẹ, bo hẹnhomẹhùn yé, bo dọ ohó dagbe lẹ hlan yé, whenẹnu yé na yín mẹmẹsi towe lẹ doidoi. ⁸Ṣigba é gbẹ́ hónamẹ sunnu mẹho lẹ tọn lọ dai he yé na ẹn, bo yí hónamẹ po yọ̀pọ sunnu lẹ po he yè hẹn whẹ́n daga po e po lẹ, he nọ ṣite to e nukọn lẹ. ⁹E sọ dọ hlan yé dọ, Hónamẹ té mlwlẹ na, na mí nido hẹn ogbègblọn gọyl omẹ he lẹ de, mẹhe ko dọhó hlan mi lẹ, dọmọ, Hẹn oglepònu he otọ́ towe ko yí do mí ji fuahú? ¹⁰Yọpọ sunnu he yè hẹn whén po e po lẹ sọ dọhó hlan ẹn, dọmọ, Le wẹ hiẹ na dọ hlan omẹ he dọhó hlan we lẹ, dọmọ, Otọ́ towe hẹn oglepònu mítọn pọ́n, ṣigba hiẹ ni hẹn ẹn fuahú hlan mí; le wẹ hiẹ na dọ hlan yè dọ, Alọviyẹyẹ ṣie pẹvi yín tlitlihú hú adaja otọ́ ṣie tọn lẹ. ¹¹Podọ dinvie dọ otọ́ ṣie yí oglepọ̀nu pinpẹ́n de do doagbànna mì, yẹn na dèdogó oglepònu mítọn: otọ́ fie yí mẹhòba lẹ do wòhẹ mì, ṣigba aklekle lọ wẹ yẹn na yí do wòhẹ mì ¹²Mowẹ Jeloboami po gbẹtọ lẹpo po wá Lehoboami de to azán atọ̀ntọ lọ gbè, dile ahọlu nagbè do, dọmọ, Mí ni sọ gòwá dẽ to azán atóntọ lọ gbè. ¹³Ahọlu sọ yí ogbèylan do gblọnhóna yé; Lehoboami ahọlu sọ gbẹ́ hónamẹ sunnu mẹho lẹ tọn dai, ¹⁴Bo dọhó hlan yé kẹdẹdi hónamẹ yọ̀pọ sunnu lẹ lọ tọn, domọ, Otọ́ ṣie hẹn oglepọ̀nu mítọn pẹ́n, ṣigba yẹn na dèdogọ́ hlan enẹ: otọ́ ṣie yí mẹhoba lẹ do wọhẹ mì, ṣigba aklekle lẹ yẹn na yí do wọhe mì. ¹⁵Mọwẹ ahọlu ma tuntóai hlan gbẹtọ ewlẹ gba; na Jiwheyẹwhe de wẹ yè hẹn ẹn sọn wá, na OKLUNỌ nido hẹn ohó etọn lódo, he é dọ gbọn alọ Ahija Ṣiloninu lọ tọn mẹ hlan Jeloboami visunnu Nebati tọn. ¹⁶Whenuena Islaeli lẹpo mọ dọ ahọlu ma tuntóai hlan yé gba, gbẹtọ lọ sọ gblọnna ahọlu, dọmọ, Mimá tẹ́ mí tindo to Davidi mẹ? mọ míwlẹ ma sọ tindo ogú de to visunnu Jesse tọn lọ mẹ gba: omẹ dopodopo jẹ gohọ̀ mítọn lẹ kọ́n, Islaeli emi: dinvie pọ́n owhé towe titi go, Davidi. Mowẹ Islaeli lẹpo tọnyì jẹ ogohò yetọn lẹ kọ̀n. ¹⁷Ṣigba na ovi Islaeli tọn lẹ tọn, he nọ nò tòdaho Juda tọn lẹ mẹ, Lehoboami dùahọlu to yé ji. ¹⁸Whenẹnu wẹ Lehoboami ahọlu do Hadolami hlan, mẹhe tin osẹ́njọ̀ lọ ji; ovi Islaeli tọn lẹ lọ sọ dlan zannu lọ do e, bọ ewọ sọ kú. Lehoboami ahọlu sọ yawu nado hẹn ede hẹji jẹ kẹkẹ etọn kọ́n, nado họ̀nyì jẹ Jelusalẹm. ¹⁹Mowẹ Islaeli satẹ do owhé Davidi tọn go, jẹ azán he gbè.

¹WHENUENA yè hẹn Lehoboami wá jẹ Jelusalẹm, é pli owhé Juda tọn lẹ po Bẹnjamini po, omẹ didè fọtọ́n kẹnnẹko, he yín awhànfuntọ lẹ, nado hòavùn hẹ Islaeli, nado vọ́ ahọludu lọ hẹnwá Lehoboami de. ²Ṣigba ohó OKLUNỌ tọn wá jẹ Ṣemaia omẹ Jiwheyẹwhe tọn de, dọmọ, ³dọhó hlan Lehoboami visunnu Sọlọmọni tọn, ahọlu Juda tọn, podọ hlan Islaeli lẹpo to Juda po Bẹnjamini po mẹ, dọmọ, ⁴Le wẹ OKLUNỌ dọ, Mìwlẹ ma na hẹji yì gba, kavi hòavùn hẹ mẹmẹsunnu mìtọn lẹ gba: omẹ dopodopo ni gọ̀yì ọwhe etọn gbè; na de wẹ onú he sọn. Mowẹ yé tuntóai hlan ohó OKLUNỌ tọn lẹ lọ, bo gọ̀ sọn yìyì: Jeloboami ji mẹ. ⁵Lehoboami sọ nò Jelusalẹm mẹ, bo dó tòdaho le na awhànglọn to Juda mẹ. ⁶E sọ dó Beti-lehẹmi ga, po Etami po, po Tekoa pọ, ⁷po Bẹti-zuli po, po Soko po, pọ Adulami po, ⁸po Gati pp, po Malẹsa po, po Zifi po, ⁹po Adọlaimi po, po Lakisi po, po Azeka po, ¹⁰po Zola po, po Àijalọni po, po Heblọni po, he tin to Juda mẹ podọ to Bẹnjamini mẹ, tòdaho dòkọnọ lẹ. ¹¹E sọ hẹn fihlado huhlọnnọ lẹ sinyen, bo yí awhàngán do ye mẹ, po agbànhọ núdùdù tọn po, amì po ovẹ̃n po. ¹²Podọ to tòdaho susu dopodopo mẹ é yí awọyínu lẹ po owhán lẹ po do, bo hẹn yé dohuhlọn talala. Juda po Bẹnjamini po sọ yín etọn. ¹³Yẹwhènọ lẹ po Levinu lẹ po he tin to Islaeli lẹpo mẹ gò do e de sọn agbègbè yetọn lẹpo ji. ¹⁴Na Levinu lẹ jó agbóhòmẹ yetọn lẹ po nutindo yetọn po dai, bo wá Juda po Jelusalẹm po: na Jeloboami po visunnu etọn lẹ po dlan yé yìngbe, na yé ma na do hẹn azón yẹwhenọ tọn di hlan OKLUNỌ: ¹⁵é sọ dè nẹ̃ yẹwhenọ lẹ na otẹn yìji lẹ, podọ na alúnkùn lẹ, podọ na oyìnvu he é ko basi lẹ. ¹⁶Podọ to yé godo, sọn whẹndo Islaeli tọn lẹpo mẹ, mẹmọ he zé ayiha yetọn do nado nọ to OKLUNỌ din lẹ, nọ wá Jelusalẹm nado sánvọ́ hlan OKLUNỌ, Jiwheyẹwhe otọ́ yetọn lẹ tọn. ¹⁷Mowẹ yé nahuhlọn ahọludu Juda tọn, bo sọ hẹn Lehoboami visunnu. Sọlọmọni tọn lọ dohuhlọn, owhè atọ̀n: na yé zinzọnlin owhè atọ̀n, to aliho Davidi po Sọlọmọni po tọn mẹ. ¹⁸Lehoboami sọ da asi de nẹ̃, Mahalati viyọnnu Jẹlimoti visunnu Davidi tọn tọn po Abihaili viyọnnu Eliabi visunnu Jesse tọn tọn po; ¹⁹é sọ ji visunnu lẹ nẹ́: Jẹusi, po Ṣemalia po, po Zohami po. ²⁰Podọ e godo é yí Maaka viyọnnu Àbsalọmi tọn; ewọ sọ ji Abija nẹ̃, po Atai po, po Ziza po, po Ṣelomiti po. ²¹Lehoboami sọ yiwanna Maaka viyọnnu Absalọmi tọn lọ hógan asi etọn lẹpo po yọnnuyíyí etọn lọ po; (na asi fọtọ̀nnukunatọ̀n é yí, po yọnnuyíyí kandeko po, bo sọ ji visunnu koatọ́nnukuntọ̀n po viyọnnu kandeko po.) ²²Lehoboami sọ dè Abija visunnu Maaka tọn lọ nado yín nukọntọ, yèdọ ahọvi to mẹmẹsunnu etọn lẹ ṣẹnṣẹn: na é yín ayihanọ nado yí i do basi ahọlu. ²³E sọ yí nuyọnẹn do zán, bo má sọn visunnu etọn lẹpo mẹ lẹ́do aigba Juda po Bẹnjamini po tọn lẹpo ji, jẹ tòdaho dòkọnọ dopodopo me: é sọ na nudùdù yé tó ogégé mẹ. E sọ din asi susu na yé.

¹E sọ wá jọ, whenuena yè hẹn ahọludu Lehoboami tọn lódo, bọ é yín huhlọnnọ, wẹ é gbẹ́ osẹ́n OKLUNỌ tọn dai, podọ Islaeli lẹpo po e po. ²E sọ wá jọ to owhè atóntọ Lehoboami ahọlu tọn mẹ, wẹ Sisaki ahọlu Egipti tọn hẹji wá Jelusalẹm ji, na yé ko wàylan do OKLUNỌ go wutu, ³po kẹke fọsidopo po, po osọ́nọ fọtọ́n kandeko po: gbẹtọ lẹ yín matin osọha he wá po e po sọn Egipti; Lubimi, ukiimi lọ, po Etiopinu lọ po ⁴E sọ yí todaho dòkọnọ lẹ he yin Juda ton lẹ bo sọ wa jẹ Jelusalẹm. ⁵Dinvie Ṣemaia; yẹwhegán lọ sọ wá Lehoboami de, po ahọvi Juda tọn lẹ po de, he yè pli dọpọ do Jelusalẹm na Ṣisaki tọn wutu, bo sọ, dọ hlan yé dọ, Le wẹ OKLUNỌ dọ dọmọ, Mìwlẹ ko gbẹ́ mi dai, enẹwutu wẹ yẹn ga jó mì do alọ Sisaki tọn mẹ. ⁶Whenẹnu wẹ ahọvi Islaeli tọn lẹ po ahọlu lọ po húwhẹ́ yede; yé sọ dọmọ, Dódónọ wẹ OKLUNỌ. ⁷Whenuena ỌKLUNỌ mọ dọ yé húwhẹ́ yéde, ohó OKLUNỌ tọn sọ wá Ṣemaia de, dọmọ, Yé ko húwhó yéde; yẹn ma na sọ vá yé gba: ṣigba yẹn na na owhlẹngan de yé, yè ma na sọ kọ̀n homẹgble ṣie jẹgbonu do Jelusalẹm ji gbọn alọ Sisaki tọn mẹ gba. ⁸Ṣogãn yé na yín mẹmẹsi etọn lẹ; na yé nido yón sinsẹ̀n ṣie, po sinsẹ̀n ahọludu otò lẹ tọn lẹ tọn. ⁹Mọwẹ ahọlu Egipti tọn heji wá Jelusalẹm ji, bo bé adọkunnu ohò OKLUNỌ tọn tọn lẹ yì, po adọkunnu ohọ́ ahọlu tọn tọn lẹ po; é bẹ́ popo yì: é bẹ́ awọyínu sika tọn lẹ he Sọlọmọni basilẹ yì ga. ¹⁰Lehoboami ahọlu sọ basi awọyínu gànvẹ tọn lẹ do otẹn yetọn mẹ, bo bẹ́ yé do alọ awhàngán ahọluwhán lọ tọn lẹ mẹ, he to ohọ̀n ohọ̀ ahọlu tọn lọ tọn họ́. ¹¹E sọ yin mọ dọ whedeuopenu ahọlu biọ ohọ̀ OKLUNỌ tọn mẹ wẹ ahọluwhàn nọ wá bo hẹn yé, bo sọ hẹn yé wá biọ abọ̀ ahọluwhàn lọ tọn mẹ. ¹²Whenuena ewọ sọ húwhẹ́ ede, homẹgble OKLUNỌ tọn diọ sọn e de, dọ ewọ ma to na sọ và ẹ patapata gba: podọ humọ yè sọ to onú dagbe lẹ mọ to Juda mẹ finẹ ¹³Mowẹ Lehoboami ahọlu nahuhlọn ede to Jelusalẹm mẹ, bo to ahọludu: na Lehoboami yín owhè kandenukundopo mẹho whenuena é ṣẹ̀ nado to ahọludu, é sọ dùahọlu owhè fọtọ̀nnukunawe to Jelusalẹm mẹ, tòdaho he OKLUNỌ ko dè sọn whẹndo Islaeli tọn lẹpo mẹ, nado yí oyín etọn do finẹ: oyín onọ etọn tọn wẹ Naama Ammọninu lọ, ¹⁴E sọ wà enẹ he yín oylan, na é ma zé ayiha etọn do nado nọ din OKLUNỌ wutu. ¹⁵Dinvie owalọ Lehoboami tọn lẹ, tintan po godotọn po, yè ma ka wlan yé to otàn Ṣemaia Yẹwhegán lọ tọn lẹ, po Iddo numọtọ po tọn mẹ, kẹdẹdi whẹndo lẹ tọn nkọ? Awhàn lẹ sọ tin finẹ to Lehoboami po Jeloboami po ṣẹnṣẹn to whepoponu. ¹⁶Lehoboami sọ damlọn po otọ́ etọn lẹ po, yè sọ di i to tòdaho Davidi tọn mẹ: Abija visunnu etọn sọ dùahọlu to otẹn etọn mẹ.

¹TO owhè fọtọ̀nnukunatọ̀ntọ Jeloboami ahọlu tọn mẹ wẹ Abija sè nado to ahọludu to Juda ji. ²Owhè atọ̀n wẹ é dùahọlu to Jelusalẹm mẹ: oyín onọ etọn tọn wẹ Mikaia viyọnnu Ulieli tọn sọn Gibea. Awhàn sọ tin to Abija po Jeloboami po ṣẹnṣẹn. ³Abija sọ yí awhànfuntọ omẹ tudotọ awhàn tọn lẹ tọn de do pli awhàn, yèdọ omẹ sinsinyan fọtọ́n fòwe: Jeloboami sọ tò awhàn do haji omẹ sinsinyan fọtọ́n fẹ̀nẹ do oji nẹ̃, mẹhe yín omẹ hlọnhlọnnọ tùdido tọn lẹ. ⁴Abija sọ fọ́n site to osé Zemalaimi ji, he tin to okọta otò Eflaimi tọn mẹ, bo dọmọ, Jeloboami E po Islaeli lẹpo po, mì sè mi; ⁵míwlẹ ma ka jẹ nado yọnẹn dọ OKLUNỌ, Jiwheyẹwhe Islaeli tọn, na ahọludu to Islaeli ji hlan Davidi doidoi, yèdọ hlan ẹn podọ hlan visunnu etọn lẹ gbọn alẹnù ojó tọn de dali? ⁶Gãnṣo Jeloboami visunnu Nebati tọn, mẹmẹsi Sọlọmọni visunnu Davidi tọn tọn fọ́n site, bo to atẹ̀si hẹ klunọ etọn. ⁷Yè sọ bé omẹ vónu lẹ pli do e de, visunnu Beliali tọn lẹ, he-nahuhlọn yéde do Lehoboami visunnu Sọlọmọni tọn ji, whenuena Lehoboami yín yọ́pọ́ ayihabibọnọ, bo ma sọgan péhẹ yé. ⁸Podọ dinvie mì sọ to lilen nado gboalina ahọludu OKLUNỌ tọn to alọ visunnu Davidi tọn lẹ tọn mẹ; mìwlẹ sọ yín mẹsusu gégé de, oyìnvu sika tọn he Jeloboami basina mì na yẹwhe lẹ sọ tin to mì de to finẹ. ⁹Mìwlẹ ma ko yàn yẹwhenọ OKLUNỌ tọn lẹ jẹgbonu, visunnu Aalọn tọn lẹ, po Levinu lẹ po, bo ko sọ basi yẹwhenọ lẹ na mì kẹdẹdi owàlọ akọta aigba dẽvo lẹ tọn lẹ tọn? sọmọ dọ mẹdepope he wá nado yí oyìnsú ovu de po agbò ṣinawe po do klan ede do wiwe, dopolọ nido yín yẹwhenọ yé he ma yín yẹwhe le tọn de. ¹⁰Ṣigba na míwlẹ tọn, OKLUNỌ wẹ Jiwheyẹwhe mítọn, mìwlẹ ma ko sọ gbẹ́ ẹ dai gba; míwlẹ tindo yẹwhenọ lẹ he to devizọ́nwà hlan OKLUNỌ, visunnu Aalọn tọn lẹ, po Levinu lẹ po to azọ́n yetọn mẹ: ¹¹yé sọ to avọ́ nunina mimẹ lẹ, po nuyọnwán vivi po mẹ̀ hlan OKLUNỌ to afọnnu po whèjai po; yé nọ tò akla-adlọ lẹ ga do otẹn mẹ to tafo wiwe lọ ji; po zògbántin sika tọn lọ po po miyọngbán etọn lẹ po, nado to jiji to whèjai-whèjai: na míwlẹ to aṣẹ OKLUNỌ Jiwheyẹwhe mítọn tọn lọ yìn; ṣigba mìwlẹ ko gbẹ́ ẹ dai. ¹²Bo, dayi e go, Jiwheyẹwhe tin to mí de to ota mítọn, po yẹwhenọ etọn lẹ po po opẹ̀n zínhiho tọn lẹ lọ po nado kún zínhiho dè do mì ji. Ovi Islaeli tọn lẹ emi, mì hòavùn hẹ OKLUNỌ blo, Jiwheyẹwhe otọ́ mítọn lẹ tọn; na mí ma na dùale gba. ¹³Jeloboami sọ hẹn wuvivà de nado gbọn yé godo wá: mọwẹ yé tin to Juda nukọn, wuvivà lọ sọ tin to yé godo. ¹⁴Whenuena Juda pọ́n godo, dayi e go, awhàn lọ tin to yé nukọn po godo po: yé sọ dawhá hlan OKLUNỌ, yẹwhenọ lẹ sọ yí opẹ̀n lẹ lọ do kún. ¹⁵Whenẹnu wẹ omẹ Juda tọn lẹ na abóbó de: podọ le omẹ Juda tọn lẹ dabóbó, é sọ wá jọ, wẹ Jiwheyẹwhe hò Jeloboami po Islaeli lepo po to Abija po Juda po nukọn. ¹⁶Ovi Islaeli tọn lẹ sọ họ̀nyì to Juda nukọn: Jiwheyẹwhe sọ jó yé do alọ yetọn mẹ. ¹⁷Abija po omẹ etọn lẹ po sọ yí hùhù daho de do hù yé: mọwẹ omẹ sinsinyan fọtọ́n fowekanweko jai finẹ alántọ́ṣiọ sọn Islaeli mẹ. ¹⁸Le wẹ yè hẹn ovi Islaeli tọn lẹ wá oglọ do to ojlẹ nẹ mẹ, ovi Juda tọn lẹ sọ gbawhàn, na yé dódo OKLUNỌ go wutu, Jiwheyẹwhe otọ́ yetọn lẹ tọn. ¹⁹Abija sọ yànmọna Jeloboami to godo, bo yí tòdaho lẹ sọn e si, Bẹti-eli po tòpẹvi etọn lẹ po, Jesana po tòpẹvi etọn lẹ po, po Eflọni po po tòpẹvi etọn lẹ po, ²⁰Mọ Jeloboami ma sọ mọ huhlọn yí to azán Abija tọn lẹ mẹ ba: OKLUNỌ sọ hò e, é sọ ku. ²¹Ṣigba Abija sọ lẹzùn hlọnhlọnnọ, bo yí asi wiẹnẹ hlan ede, bo ji visunnu kònukunawe, po viyọnnu fọtọ̀nnukundopo po. ²²Podọ pipotọ owalọ Abija tọn le tọn, po aliho etọn lẹ po, po didọ etọn lẹ po, yè wlan to otànwẹ́ yẹwhegán Iddo tọn mẹ.

¹MỌWẸ Abija sọ damlọn po otọ́ etọn lẹ po, yé sọ di i to tòdaho Davidi tọn mẹ, Asa visunnu etọn sọ dùahọlu to otẹn etọn mẹ: to azán etọn lẹ mẹ aigba lọ yin abọẹnọ owhè ao. ²Asa sọ wà enẹ he yín jijlọ to nukun OKLUNỌ Jiwheyẹwhe etọn tọn lẹ mẹ: ³Na é bé agbà ojono lẹ sè, po oten ylji lẹ po, bo gbà odotin lẹ liai, bo sọ sán Aṣelimi lọ liai; ⁴bo sọ degbèna Juda nado nọ din OKLUNỌ, Jiwheyẹwhe otọ́ yetọn le tọn, podọ nado nọ basi osẹn lọ po gbèdide lọ po. ⁵E sọ bé otẹn yiji lẹ po owhe-bosiọ lẹ po tọn sọn tòdaho Juda tọn lẹpo mẹ ga: ahọludu lọ sọ yín abọẹnọ to e nukọn. ⁶E sọ dó tòdaho dòkọnọ lẹ to Juda mẹ: na aigba lọ yín abọẹnọ, é ma sọ tindo awhàn de to owhè nẹlẹ mẹ gba; na OKLUNỌ ko na ogbọjẹ ẹ wutu. ⁷Na é dọ hlan Juda dọ, Mì gbọ mí ni dó tòdaho helẹ, bo sọ basi adó lẹ lẹ́do yé, po atọ̀họ̀ lẹ po, họngbo lẹ, po opatin lẹ po; aigba gbẹ́ sọ tin to mí nukọn, na mi to OKLUNỌ Jiwheyẹwhe mítọn din wutu; míwlẹ ko din in, ewọ ko sọ na ogbojẹ mí to adà lẹpo ji. Mowẹ yé dó bo sọ dùale. ⁸Asa sọ tindo awhànfuntọ lẹ de he hẹn gáhẹnu lẹ po owhán lẹ po, sọn Juda mẹ fọtọ́n fọdekanweko; podọ sọn Bẹnjamini mẹ, he nọ hẹn awọyínu lẹ bo nọ dọ̀n ogábá lẹ, fọtọ́n fọdekanwe: ehe lẹpo wẹ omẹ hlọnhlọnnọ tudido tọn lẹ. ⁹Zela Etiopianu lọ sọ tón wá yé ji finẹ po awhànfuntọ fọtọ́n fọtọ́n tọn de po, po kẹkẹ fọdekanweko po; é sọ wá jẹ Malẹṣa. ¹⁰Whenẹnu wẹ Asa tón yì nado pe e, yé sọ do awhàn do titò mẹ to agbadò Zefata tọn mẹ to Malẹsa. ¹¹Asa sọ dawhá hlan OKLUNỌ Jiwheyẹwhe etọn, bo dọmọ, OKLUNỌ, vògbingbọn de ma tin finẹ to de we nado gọalọ, to hlọnhlọnnọ kavi ewọ he ma tindo huhlọn de po ṣẹnṣẹn: OKLUNỌ E Jiwheyẹwhe mítọn, gọalọna mi; na míwlẹ dódo ogo we, podọ to oyín fowe mẹ wẹ yè hẹn mí wá mesusu he lẹ ji. OKLUNỌ E, hiẹ wẹ Jiwheyẹwhe mítọn; a dike gbẹtọ glonú to mí ji blo. ¹²Mọwẹ OKLUNỌ hò Etiopianu lẹ lọ to Asa nukọn, podọ to Juda nukon; Etiopianu lẹ lọ sọ họ̀nyì. ¹³Asa po ome he tin to e de lẹ po sọ yànmona yé jẹ Gelali: susu sọmọ sọ jai sọn Etiopianu lẹ mẹ to finẹ bọ yé ma sọ sọgan mọ yéde ba; na yè và yé to OKLUNỌ nukọn, podọ to awhànpa etọn nukon; yé sọ bé ogblannu susu gégé yì. ¹⁴Yé sọ ho todaho lẹpo lédo Gelali pé; na obu OKLUNỌ tọn wa yé ji: ye sọ gble tòdaho lọ lẹpo; na ogblannu susu wẹ tin finẹ to ye mẹ ¹⁵Yé họ̀ ogohọ̀ kanlinpa tọn lẹ ga, bo sọ bẹ́ lẹngbọ lẹ yì to gégé mẹ po kanklosọpóawenọ lẹ po, bo gò do Jelusalẹm.

¹GBIGBỌ Jiwheyẹwhe tọn sọ wá Azalia visunnu Odẹdi ton ji: ²é sọ tón yì nado pé Asa, bo dọ hlan ẹn dọmọ, Asa, po Juda lẹpo po po Bẹnjamini po, mì Sè mi: OKLUNỌ tin to mì de, whenuena míwlẹ tin to ewọ de; podọ eyín mìwlẹ din in, é na yín mimọ sọn mì mẹ; ṣigba eyín mì gbẹ́ ẹ dai, ewọ na sọ gbẹ́ mì dai. ³Dinvie na osã dindẹn lẹ wẹ Islaeli ko tin matin Jiwheyẹwhe nugbonọ lọ, podọ matin yẹwhenọ mẹplóntọ de, podọ matin osẹn lo: ⁴ṣigba whenuena yé gọ̀ do OKLUNỌ Jiwheyẹwhe Islaeli tọn de to nukunbibia yetọn me, bo din in, yè mọ ẹn sọn yé mẹ. ⁵Podọ to ojlẹ nẹlẹ̃ mẹ jijọho de ma tin fine hlan ewọ he tọ́n yì, kavi hlan ewọ he wá whégbe gba, ṣigba homẹgble daho lẹ tin to tòmẹnu aigba lọ lẹ tọn lẹpo ji. ⁶Yè sọ gbà yé hanyanhanyan, akọta do akọta ji, tòdaho do todaho ji: na Jiwheyẹwhe gblehomẹ do yé go po mẹgigla lẹpo po. ⁷Ṣigba mì ni yín huhlonnọ, bo ma sọ dike alọ mítọn le yín jijẹ̀ blo: na yè na suahọ azọ́n mítọn. ⁸Whenuena Asa sè ohó helẹ̃, po odọdai Odẹdi yẹwhegán lọ tọn po, é yí tudido, bo sọ dè osùnú lẹpo tọ́n sẹ̀ sọn aigba Juda po Benjamini tọn lẹpo po mẹ, podọ sọn tòdaho he é ko yí sọn okọta otò Eflaimi tọn mẹ lẹ; é sọ hẹn agbà OKLUNỌ tọn jẹyọ́yọ́, he tin to agbàsẹ OKLUNỌ tọn nukọn. ⁹E sọ pli Juda po Bẹnjamini lepo po, po yé he wáwási to yé de lẹ po sọn Eflaimi po Manássẹ po mẹ, podọ sọn Simeoni mẹ: na yé flẹ jẹ e de sọn Islaeli mẹ to ogégé mẹ, whenuena yé mọ dọ OKLUNỌ Jiwheyẹwhe etọn tin to e de. ¹⁰Mọwẹ yé pli yéde dopo do Jelusalẹm to osùn atọ̀ntọ mẹ, to owhè fọtọ̀ntọ ahọludu Asa tọn tọn mẹ ¹¹Yé sọ sánvọ́ hlan OKLUNỌ to azán nẹ mẹ, sọn ogblannu he yé hẹn wá lẹ mẹ, oyín nuọntọ̀nkanweko po lẹngbọ fọtọ́n ṣinawe po. ¹²Yé sọ biọ alẹnù lọ mẹ nado yí ayiha yetọn lẹpo po alindọn yetọn lẹpo po do din OKLUNỌ, Jiwheyẹwhe otọ́ yetọn lẹ tọn; ¹³podọ mẹdepope he ma din OKLUNỌ, Jiwheyẹwhe Islaeli tọn lọ, yè ni hù, eyín pẹvi kavi daho, eyín sunnu kavi yọnnu. ¹⁴Yé sọ yí ogbè lélé de po abóbó po po opèn le po po afìnván lẹ po do whle hlan OKLUNỌ. ¹⁵Juda lẹpo sọ jaya do whiwhle lọ go: na yé ko yí ayiha yetọn lẹpo do whle, bo sọ yí ojlo yetọn pete do din in; é sọ yín mimọ sọn yé mẹ; OKLUNỌ sọ na ogbọjẹ yé lẹ́do pé. ¹⁶Maaka onọ Asa ahọlu tọn ga, é dè ewọ sọn yínyín ahọsi mẹ, na ewọ ko basi boṣiọ osù tọn de na Aṣela de wutu; Asa sọ sán boṣiọ etọn liai, bo sọ basi kọgudu e tọn, bo sọ mè ẹn to tọpẹsẹ Kidlọni kọ̀n. ¹⁷Ṣigba yè ma bẹ́ otẹn ylji lẹ tón sẹ́ sọn Islaeli mẹ sogàn ayiha Asa tọn yín pipé to azán etọn lẹpo mẹ ¹⁸E sọ hẹn onú he otọ́ etọn klandowiwe lẹ wá biọ ohọ̀ Jiwheyẹwhe tọn mẹ, podọ ewlọsu ko klan fataka, po sika po, po nuzinzán lẹ po dowiwe. ¹⁹Awhàn de ma sọ tin ba jẹ owhè gbàntọ́ntọ ahọludùdù Asa tọn tọn mẹ.

¹TO owhè gbàntónnukundopotọ ahọludùdù Asa tọn tọn mẹ, wẹ Baaṣa ahọlu Islaeli tọn hẹji yì Juda ji, bo dó Lama, na é ma na do dikẽna omẹ depope nado tọ́n yì kavi wá whégbe jẹ Asa ahọlu Juda tọn de gba. ²Whenẹnu wẹ Asa bẹ́ fataka tón po sika po tọ́n sọn adọkunnu ohọ̀ OKLUNỌ tọn tọn le mẹ, podọ sọn ohọ̀ ahọlu tọn mẹ jẹgbonu, bo dohlan Bẹni-hadadi ahọlu Silia tọn he nọ nọ Damasku, dọmọ, ³Alẹ̀nùhó de tin to yẹn po hiẹ po ṣẹnṣẹn, dile é te to otọ́ ṣie po otọ́ towe po ṣẹnṣẹn do: dayi e go, yẹn fataka po sika po hlan we: yì, gbà alẹ́nùhó towe po Baaṣa ahọlu Islaeli tọn po, na é nido fọnyì sọn dẽ. ⁴Bẹni-hadadi sọ tuntóai hlan Asa ahọlu, bo do awhangán awhànfuntọ etọn lẹ tọn lẹ hlan tòdaho Islaeli tọn lẹ ji; ye sọ hò Ijọni, po Dani po, po Abẹlmamii po, po agbànhò tòdaho Naftali tọn lẹpo po. ⁵E sọ wá jọ, whenuena Bẹni-hadadi sè wẹ é jó didó Lama tọn do, bo sọ gbọ azón etọn doalọte. ⁶Whenẹnu wẹ Asa ahọlu yí Juda lẹpo; yé sọ bé zannu Lama tọn lẹpo yì, po atinlidemẹ etọn po, ehe Baaṣa yí do to didó lẹ; é sọ yí do dó Geba po Mizpa po. ⁷Podọ to ojlẹ nẹ mẹ wẹ Hanani númọtọ lọ wá Asa ahọlu Juda tọn de, bo dọ hlan ẹn dọmọ, Na hiẹ ko dódo ahọlu Silia tọn go wutu, bo ma ko dódo OKLUNỌ Jiwheyẹwhe towe go gba, enẹwutu wẹ awhànpa ahọlu Silia tọn tọn do hòngán sọn alọ towe mẹ. ⁸Etiopianu lẹ po Lubimi po ma ka yín awhànpa dahogbo de, po kẹkẹ lẹ po po osọ́nọ lẹ po mẹsusu talala? gãnṣo, na hiẹ dódo OKLUNỌ go wutu, ewọ jó yé do alọ towe mẹ. ⁹Na nukun OKLUNỌ tọn lẹ to godo po nukọn po yì lẹ́do aigba lẹpo pete, nado do ede hia huhlọnnọ na ayiha yé mẹhetọn yín pipé hlan e de lẹ tọn wutu Hiẹ ko wà oklenọnu to ehe mẹ; na sọn dinvieyì hiẹ na tindo awhàn lẹ. ¹⁰Whenenu wẹ Asa yín homẹgblenọ do numọtọ lọ go, bo yí i do ohọ̀ ogànhọ̀ tọn mẹ; na ewọ tin to adanjijẹ de mẹ po e po na onú he tọn wutu. Asa sọ biánukunna adade sọn gbẹtọ lẹ mẹ to òjlẹ nẹ mẹ. ¹¹Bo, dayi e go, owalọ Asa tọn lẹ, tintan po godotọn po, pọ́n, yè wlan yé to owé ahọlu Juda po Islaeli po tọn lẹ tọn mẹ. ¹²To owhè gbàntónnukunẹnẹtọ ahọludùdù etọn mẹ wẹ yè hẹn Asa jẹawutu to afọ eton lẹ mẹ; awutuje etọn yín; kiklò talala: gãnṣo to awutujẹ etọn mẹ é ma din hlan OKLUNỌ de gba, adavo hlan amànọ lẹ de. ¹³Asa sọ damlọn po otọ́ etọn lẹ po, bo kú to owhè kandenukundopotọ ahọludùdù etọn tọn mẹ. ¹⁴Yé sọ di i do olidò etọn titi lẹ mẹ, he é ko kùn dote na ede to tòdaho Davidi tọn mẹ, bo tó ẹ do adọzán mẹ he yè yí owán vivi lẹ po alọpa nuwhẹnwán hùnkọ susu lẹ tọn po he yè wleawuna gbọn anà amahọ̀tọ lẹ tọn dali: yé sọ basi mimẹ̀ daho talala de nẹ.

¹JEHỌSAFATI visunnu etọn sọ dùahọlu to otẹn etọn mẹ, bo nahuhlọn ede do Islaeli ji. ²È sọ dotẹnna awhàn lẹ do tòdaho dòkọnọ Juda tọn lẹpo mẹ, bo sọ dè ahọluwhàn lẹ do aigba Juda tọn ji, podọ to todaho Eflaimi tọn lẹpo he Asa otọ́ etọn ko yí lẹ mẹ ³OKLUNỌ sọ tin to Jehọṣafati de, na e zinzọnlin to aliho tintan Davidi otọ́ etọn tọn lẹ mẹ wutu, bo ma sọ din hlan Baalimi de gba; ⁴ṣigba din hlan Jiwheyẹwhe otọ́ etọn tọn de, bo sọ to zọnlinzin to gbèdide etọn lẹ mẹ, bo ma yín to wiwà kẹdẹdi Islaeli tọn lẹ gba. ⁵Enẹwutu OKLUNỌ hẹn ahọludu lọlódo to alọ etọn mẹ; Juda lẹpọ sọ hẹn nunina lẹ wá Jebosafati de; ewọ sọ tindo adọkun po ogbégbò po to ogégé mẹ. ⁶Ayiha etọn sọ yín zédaga to aliho OKLUNỌ tọn lẹ mẹ: podọ huganmọ é dè otẹn yìji lẹ po Asẹlimi po sẹ̀ sọn Juda mẹ. ⁷To owhè atọ̀ntọ ahọludùdù etọn tọn mẹ é do ahọvi lẹ hlan ga, yèdọ Bẹni-haili, po Obadia po, po Zekalia po, po Nẹtanẹli po, po Mikaia po, nado nọ plónmẹ to tòdaho Juda tọn lẹ mẹ; ⁸Levinu lẹ po yé po, yèdọ Ṣemaia, po Nẹtania po, po Zebadia po, po Asahẹli po, po Semilamoti po, po Jehonatani po, po Adonija po, po Tobija po, po Tọbiadonija po, Levinu lẹ lọ; podọ to ye de Elisama po Jeholami po, Yẹwhenọ lẹ lọ. ⁹Yé sọ to mẹplọn to Juda mẹ, tintindo owé osẹ́n OKLUNỌ tọn tọn lọ to yé de; yé to yìyì lẹ́do tòdaho Juda tọn lẹpo pé, bo to mẹplọn to gbẹtọ lẹ ṣẹnṣẹn. ¹⁰Obu OKLUNỌ tọn sọ flẹ jẹ ahọludu aigba lẹ tọn lẹpo ji he tin lédo Juda pé, mọwẹ yé ma sọ hasi awhàn de do Jehọṣafati ji. ¹¹Mẹdẽlẹ sọn Filistini lẹ mẹ hẹn nunina lẹ wá Jehọṣafati de, po fataka po na osèn jọ; Alabianu lẹ ga nọ hẹn kanlinpa lẹ wá nẹ̃, agbò fọtọ́n ṣinawe é lán nuọntọ̀nkanweko, po alunkùn fọtọ́n ṣinawe é lán nuọntọ̀nkanweko po. ¹²Jehọṣafati sọ to susudeji talala; é sọ dó whéhla lẹ po tòdaho agbànhò tọn lẹ po to Juda mẹ. ¹³E sọ tindo azón susu to tòdaho Juda tọn lẹ mẹ; po omẹ awhàn tọn lẹ po, omẹ hlọnhlọnnọ tudido tọn lẹ, to Jelusalẹm mẹ. ¹⁴Ehe sọ wẹ osọha yé tọn kẹdẹdi owhé otọ́ yetọn lẹ tọn lẹ: sọn Juda mẹ, awhàngán fọtọ́n lẹ tọn lẹ; Adna awhàngán lọ, podọ to e de omẹ hlọnhlọnnọ tudidotọn lẹ fọtọ́n fọdekanweko: ¹⁵awetọ hlan e de Jehohanani awhàngán lọ, podọ to e de fọtọ́n fọdekanwe; ¹⁶awetọ hlan e de Amasia visunnu Zikli tọn, mẹhe yí ojlo do jó ede hlan OKLUNỌ; podọ to e de omẹ hlọnhlọnno tudido tọn fọtọ́n fọde: ¹⁷sọn Bẹnjamini mẹ; Eliada dawe hlọnhlọnnọ tudido tọn de, podọ to e de fọtọ́n fọde yè yí ogába po awọyínu po do sọnúdogona: ¹⁸podọ hlan e de Jehozabadi, podọ to e de fọtọ́n kẹnnẹko wleawuna dote na awhàn. ¹⁹Ehelẹ wẹ yé he nọ ṣite to ahọlu de lẹ, gọ́na enẹlẹ mẹhe ahọlu dè do tòdaho dòkọnọ lẹ mẹ lẹ́do Juda lẹpo.

¹DINVIE Jehọṣafati tindo adọkun po ogbegbo po to ogégé mẹ; é sọ kòn asijiakò dopọ po Ahabi po. ²To owhè nẹmude godo é jẹte yì Ahabi de to Samalia. Ahabi so hù lẹngbọ lẹ po oyín lẹ po nẹ̃ to ogégé mẹ, podọ na gbẹtọ he tin to e de lẹ, bo sọ do e nado hẹji yì Lamoti-gileadi po e po. ³Ahabi ahọlu Islaeli tọn sọ dọ hlan Jehọṣafati ahọlu Juda tọn dọmọ, Hiẹ na yì Lamọti-gileadi po yẹn po? Ewọ sọ gblọn nẹ dọ Le yẹn te wẹ hiẹ te, podọ omẹ ṣie lẹ di omẹ towe lẹ mìwlẹ na sọ tin to de we to awhàn lọ mẹ. ⁴Jehọṣafati sọ dọ hlan ahọlu Islaeli tọn lọ dọmọ, Yẹn vè we, kanbiọ to ohó OKLUNỌ tọn si to egbe. ⁵Whenẹnu wẹ ahọlu Islaeli tọn pli yẹwhegán lẹ dopọ, sunnu fowe, bo dọ hlan yé dọmọ, Míwlẹ na yì Lamọti-gileadi nado fùnawhàn, kavi yẹn na jódo? Yé sọ dọmọ, Hẹji yì; na Jiwheyẹwhe na jó e do alọ ahọlu tọn mẹ. ⁶Ṣigba Jehọṣafati dọmọ, Yẹwhegán OKLUNỌ tọn de ma tin to ofi gba, na mí nido kanbiọ sọn e de? ⁷Ahọlu Islaeli tọn sọ dọ hlan Jehọṣafati dọmọ, Dawe dopo de gbé tin gbọn mẹhe dali míwlẹ sọgan kanbiọ sọn OKLUNỌ de: ṣigba yẹn gbẹwan nẹ̀; na é ma nọ dọdọdai dagbe gbọn yẹn tọn dali gba, adavo oylan to whepoponu; dopolọ wẹ Mikaia visunnu Imla tọn. Jehọṣafati sọ domọ, A dike ahọlu dọ mọ blo. ⁸Whenẹnu wẹ ahọlu Islaeli tọn ylọ ojọ de, bo dọmọ; Hẹn Mikaia visunnu Imla tọn wá plàun. ⁹Dinvie ahọlu Islaeli tọn po Jehọṣafati ahọlu Juda tọn po sinai mẹdopodopo to ofìn etọn ji, tẹ̀kò to otewu yetọn lẹ mẹ, yé sinai to otẹn vlala de mẹ to bibiọ ohòngbo Samalia tọn mẹ tọn; yẹwhegán lẹpọ sọ to dọdaidọ to yé nukọn. ¹⁰Zẹdekia visunnu Kenaana tọn sọ basi azò gànyu tọn lẹ na ẹn, bo dọmọ, Le wẹ OKLUNỌ dọ, Ehele wẹ hiẹ na yí do sisẹ́ Silianu lẹ, kaka yé do yín vivà. ¹¹Yẹwhegán lẹpo sọ dọdọdai mọ, dọmọ, Heji yì jẹ Lamọti-gileadi, bo sọ dùale: na OKLUNỌ na jó e do alọ ahọlu tọn mẹ. ¹²Mẹdagun he yì nado ylọ Mikaia dọhó hlan ẹn, dọmọ, Dayi e go, oho yẹwhegán lẹ tọn lẹ yí onù dopo do lá dagbe hlan ahọlu: enẹwutu yẹn vẹ̀ we, gbọ ohó towe ni tin di dopo yẹ́wlẹ tọn tọn, hiẹ ni sọ dọ dagbe. ¹³Mikaia sọ dọmọ, Le OKLUNỌ to ogbẹ̀, nuhe Jiwheyẹwhe ṣie dọ, enẹ wẹ yẹn na dọ. ¹⁴Whenuena yè sọ hẹn ẹn jẹ ahọlu de, ahọlu lọ dọ hlan ẹn dọmọ, Mikaia, míwlẹ na yì Lamọti-gileadi nado fùnawhàn kavi yẹn nagbọjódo? Ewọ sọ dọmọ, Mì hẹji yì bo, bo sọ dùale; yè na sọ jó yé do alọ mítọn mẹ. ¹⁵Ahọlu sọ dọ hlan ẹn dọmọ, Whla susu na yẹn na donùsù wedọ hiẹ dọ núdehlanmi blo adavo nugbo lọ to oyín OKLUNỌ tọn mẹ? ¹⁶Ewọ sọ dọmọ, Yẹn mọ Islaeli lẹpo vúnvún pé to osé lẹ ji, di lẹngbọ he ma tindo lẹngbọhọtọ: OKLUNỌ sọ dọmọ, Ehelẹ ma tindo mẹmẹnu de gba; gbọ yé ni lẹ́gọ̀ omẹ dopodopo do owhé etọn gbè to jijọhọ mẹ. ¹⁷Ahọlu Islaeli tọn lọ sọ dọ hlan Jehọṣafati dọmọ, Yẹn ma ko dọ na we dọ é ma na dọdọdai dagbe gbọn yẹn tọn dali, adavo oylan? ¹⁸E sọ dọmo, Enẹwutu mì sè ohó OKLUNỌ tọn: yẹn mọ OKLUNỌ aísínsín to ofìn etọn ji, awhànpa olọn tọn lẹpo ṣite to alọ adusi etọn ji podọ to amiyọn etọn ji. ¹⁹OKLUNỌ sọ dọmọ, Mẹnu wẹ na do Ahabi ahọlu Islaeli tọn, na é nido hẹji yì bo jai to Lamọti gíleadi? Ode sọ dọ kẹdẹdi ehe hunkọ, awetọ sọ dọ kẹdẹdi enẹ hunkọ. ²⁰Gbigbọ de sọ tón wá gbonu, bo ṣite to OKLUNỌ nukọn, bo dọmọ, Yẹn na do e. OKLUNỌ sọ dọ hlan ẹn dọ, Gbọn etẹ́ tọn dali? ²¹Ewọ sọ dọmọ, Yẹn na tón yì gbonu, bo na yín gbigbọ lalonọ de to onù yẹwhegán etọn lẹpo tọn mẹ. Ewọ sọ dọmọ, Hiẹ na dọ ẹ, bo na sọ glonu ga: tọ́n yì, bo wà mọ, ²²Enẹwutu dinvie, dayi e go, OKLUNỌ ko yí gbigbọ lalonọ de do onù yẹwhegán towe helẹ tọn mẹ; OKLUNỌ ko sọ dọ oylan gbọn towe tọn dali. ²³Whenẹnu wẹ Zẹdekia visunnu Kenaanani tọn sẹpọ́ wá, bo hò Mikaia to alaka go, bo dọmọ Aliho té gbigbọ OKLUNỌ tọn gbọn yì sọn dẽ nado dọhó hlan we? ²⁴Mikaia sọ dọmọ, Dayi e go, hiẹ na mọ to azán nẹ gbè, whenuena hiẹ na yì biọ abò nukọntọn de mẹ nado whla dewe. ²⁵Ahọlu Islaeli tọn lọ sọ dọmọ, Mì wle Mikaia, bo hẹn ẹn gò do Amọni otògán tòdaho tọn lọ de, podọ do Joaṣi visunnu ahọlu tọn lọ de; ²⁶bo dọmọ, Le wẹ ahọlu lọ dọ dọmọ, Yí ehenọ do ogànhò lọ mẹ, bo yí akla nukunbia tọn, po osìn nukunbia tọn po do to yìnyìn in, kaka yẹn do lẹ́gọ̀ to jijọho mẹ. ²⁷Mikaia sọ dọmọ, Eyín hiẹ lẹ́gọ̀ to jijọho mẹ nugbo, bé OKLUNỌ ma ko dọhó gbọn yẹn dali gba. E sọ dọmọ, Sè, mì gbẹtọ lẹ, popo mì tọn. ²⁸Mọwẹ ahọlu Islaeli tọn po Jehọṣafati ahọlu Juda tọn po hẹji yì jẹ Lamọti-gileadi. ²⁹Ahọlu Islaeli tọn sọ dọ hlan Jehọṣafati dọmọ, Yẹnna diọunna dẽ, bo yì biọ awhàn lọ mẹ; ṣigba hiẹ ni yí tewu towe do ogo. Mọwẹ ahọlu Islaeli tọn diọunna ede; yé sọ yì biọ awhàn lọ mẹ. ³⁰Dinvie ahọlu Silia tọn ko degbèna awhàngán kẹkẹ etọn lẹ tọn lẹ, dọmọ, Mì hòavùn hẹ mẹpẹvi kavi mẹdaho de blo, adavo hẹ ahọlu Islaeli tọn kẹdẹ. ³¹E sọ wá jọ, whenuena awhàngán kẹkẹ lẹ lọ tọn lẹ mọ Jehọṣafati, wẹ yé dọmọ, Ahọlu Islaeli tọn wẹ. Enẹwutu wẹ yé lẹ́kọ̀ nado hòavùn hẹ ẹ: ṣigba Jehọṣafati dawhá daga, OKLUNỌ sọ góalọna ẹn; Jiwheyẹwhe sọ do yé nado klónyì sọn e de. ³²E sọ wá jọ, whenuena awhàngán kẹkẹ lẹ tọn lẹ lọ mọ dọ é ma yín ahọlu Islaeli tọn wẹ gba, wẹ yé lẹ́ gò sọn mọdona ẹn mẹ. ³³Dawe de lẹ sọ dọ̀n ogába etọn madodego de, bo hò ahọlu Islaeli tọn to opétẹn oganwu lọ tọn ṣẹnṣẹn: enẹwutu wẹ é do hlan kẹkẹnọ etọn dọmọ, Diọ alọ towe, bo hẹn mi tọ́n sọn awhànpa lọ mẹ; na yè doalán mi badabada. ³⁴Awhàn lọ sọ sinyẹn to gbènẹgbe: ṣogàn ahọlu Islaeli tọn hẹn ede dote to kẹkẹ etọn mẹ pannukọn Silianu lẹ kakajẹ whèjai: to ojlẹ yìyì odò owhè tọn tọn damẹ é kú.

¹JEHỌSAFATI ahọlu Juda tọn sọ lẹ́gọ̀ do owhé etọn gbè jijọho mẹ do Jelusalẹm. ²Jehu visunnu Hanani numọtọ lọ tọn sọ tón yì nado: pé e, bo dọ hlan Jehọṣafati ahọlu dọmọ, Hiẹ do ka nọ gọalọna mẹylankan, bo sọ yiwanna yé he gbẹwanna OKLUNỌ wẹ? na onú he homẹgble tin to oji wesọn OKLUNỌ nukọn. ³Ṣogãn yè mọ onú dagbe lẹ to hiẹ mẹ, to ehe mẹ hiẹ bẹ́ Aseloti sẹ̀ sọn aigba lọ mẹ, bo ko sọ zé ayiha towe do nado to Jiwheyẹwhe din.

⁴Jehọṣafati sọ nọ̀ Jelusalẹm: é sọ vọ́ tọ́n yì to gbẹtọ lẹ ṣẹnṣẹn sọn Beẹli-seba jẹ okọta otọ̀ Eflaimi tọn kọ̀n, bo sọ hẹn yé gọ̀ wá jẹ OKLUNỌ de, Jiwheyẹwhe otọ́ yeton lẹ tọn. ⁵E sọ dè whẹ̀datọ lẹ do aigba lọ mẹ lẹ́do tòdaho dòkọnọ Juda tọn lẹpo pé, tòdaho mẹtọnmẹtọn, ⁶bo sọ dọ hlan whẹ̀datọ ewlẹ dọmọ, Mì nọ lẹn núhe mì to wiwà lẹ pọ́n: na mì ma to whẹ̀da na gbẹtọ gba, adavo na OKLUNỌ; ewọ sọ tin to mì de to whẹ̀dida mẹ. ⁷Enẹwutu dinvie gbọ osi OKLUNỌ tọn ni tin to mì ji; mi payi bo wà ẹ: na oylanwà de ma tin to OKLUNỌ Jiwheyẹwhe mítọn de gba, kavi mẹhopọ́n gbẹtọ lẹ tọn, kavi yíyí nunina lẹ tọn. ⁸Humọ to Jelusalẹm mẹ Jehosafati dè sọn Levinu lẹ po yewhenọ lẹ po mẹ, podọ sọn nukọntọ owhé otọ Islaeli tọn lẹ tọn tọn le mẹ na whẹ̀dida OKLUNỌ tọn, podọ na nudindọn lẹ. Ye sọ lẹ́gọ̀ wá Jelusalẹm. ⁹E sọ nasẹ yé, dọmọ, Le wẹ mì na nọ wà do to osi OKLUNỌ tọn mẹ, po dódo po, po ayiha pipe de po. ¹⁰Podọ whedepopenu nudindọn depope na wá mì de sọn mẹmẹsunnu mítọn lẹ de he nọ nọ̀ tòdaho yetọn lẹ mẹ, to ohùn po ohùn po ṣẹnṣẹn, to osén po gbèdide po ṣẹnṣẹn, osẹ́ndoai lẹ po whẹ̀dida lẹ po, mìwlẹ na nọ kọhóna yé dọ yé yín whẹylantọ hlan OKLUNỌ de blo, mọ bọ homẹgble na wá míwlẹ ji po mẹmẹsunnu mítọn lẹ po ji: mì ni nọ wà ehe, mì ma sọ to na yín whẹylantọ gba. ¹¹Bo, dayi e go, Amalia ogán yẹwhenọ lọ tin to mì ji to whẹhó OKLUNỌ tọn lẹpo mẹ; po Zebadia visunnu Ismaẹli tọn lọ po, ogándùtọ owhé Juda tọn tọn lọ, to whẹ̀hó aholu ton lẹpo mẹ: Levinu lẹ ga na yín gbonugán lẹ to mì nukọn. Mì yín huhlọnnọ bo wà, OKLUNỌ ni tin to dagbenọ lọ de.

¹E sọ wá jọ to ehe godo, wẹ ovi Moabi tọn lẹ, po ovi Ammọni tọn lẹ po, po yé po mẹdẽlẹ sọn Ammọninu lẹ mẹ wá Jehọṣafati ji nado fùnawhàn. ²Whenẹnu wẹ mẹdẽle wá he dọ na Jehọṣafati, dọmọ, Mẹsusu talala de lẹ wá ji we sọn ohù gododọ̃n sọn Silia; bo, dayi ego, ye tin to Hazazọni-tamali mẹ (dopolọ wẹ Ẹni-gedi). ³Jehọṣafati sọ dibu bo zé ede do nado din hlan OKLUNỌ de; é sọ lá nùbibla de lẹ́do Juda lẹpo pé. ⁴Juda sọ pli yéde dopọ nado din alọgọ sọn OKLUNỌ mẹ: yèdọ tòdaho Juda tọn lẹpo mẹ we yé sọn wá nado din OKLUNỌ. ⁵Jehosafati sọ ṣite to agùn Juda po Jelusalẹm po tọn mẹ, to ohọ̀ OKLUNỌ tọn mẹ, to awánu yọ́yọ́ lo nukọn; ⁶E sọ dọmọ, OKLUNỌ È, Jiwheyẹwhe otọ́ mítọn lẹ tọn, hiẹ ma wẹ Jiwheyẹwhe to olọn me? podọ hiẹ ma sọ wẹ ogándutọ to ahọludu akọta lẹ tọn lẹ ji? podọ alọ towe mẹ wẹ huhlọn po hlọnhlọn po te, sọmọ bọ mẹde ma tin sọgan nado glọn we. ⁷Hiẹ, Jiwheyẹwhe mítọn È, ma wẹ ko yàn tòmẹnu aigba he tọn lẹ jẹgbonu to Islaeli ome towe lẹ nukọn, bo na ẹn hlan okún Ablaham họntọn towe tọn doidoi? ⁸Yé sọ nọ nò ẹ mẹ, bo ko sọ dó fìwiwe de na we to e mẹ na oyín towe, dọmọ, ⁹eyín oylan wá mí ji, ohi, whẹ̀dida, kavi azọ̀nylankan, kavi hùvẹ́, mí na nọ ṣite to ohọ̀ he nukọn, pódọ to nukọn towe, (na oyín towe tin to ohọ̀ he mẹ,) bo dawhá hlan we to nukunbia mítọn mẹ, hiẹ na nọ sè bo sọ whlen. ¹⁰Bé dinvie, dayi e go, ovi Ammọni po Moabi po tọn lẹ po osó Seili po, mẹhe hiẹ ma jlo Islaeli ni gbà, whenuena yé tọ́n wá sọn aigba Egipti tọn ji, ṣigba yé lẹ́ dapadopo sọn yé de, bo ma và ye gba; ¹¹dayi e go, le yé suahọ mí do, nado wá nado zé mí dlan sọn nutindo towe mẹ, he hiẹ na mí nado dugú. ¹²Jiwheyẹwhe mítọn È, hiẹ ma ka na dawhèna yé? na míwlẹ ma tindo hlọnhlọn de to ogbẹ́ daho he wá mí ji hè ji gba; mọ míwlẹ ma sọ yọn etẹ́ nado wà: ṣigba nukun mítọn lẹ tin to ogo we. ¹³Juda lẹpo sọ ṣite to OKLUNỌ nukọn, po mẹflinflin yetọn lẹ po, asi yetọn lẹ, po ovi yetọn lẹ po. ¹⁴Whenẹnu Jahaziẹli visunnu Zekalia tọn lọ, visunnu Bẹnaia tọn lọ, visunnu Jeiẹli tọn lọ, visunnu Matania tọn lọ, Levinu lọ, sọn visunnu Asafì tọn lẹ mẹ, ji wẹ gbigbọ OKLUNỌ tọn wá to gblagbla agùn lọ tọn mẹ; ¹⁵ewọ sọ dọmọ, Mì tuntóai, Juda lẹpo, po mì tòmẹnu Jelusalẹm tọn lẹ po, po hiẹ Jehọṣafati ahọlu po: le wẹ OKLUNỌ dọ hlan mì, Mìwlẹ dibu blo, mì sọ yín avọ̀sato gbọn linlẹn mẹsusu gégé he tọn lẹ dali blo; na awhan lọ ma yín mítọn gba, Jiwheyẹwhe tọn wẹ. ¹⁶To osọ̀ mì ni jẹte yì yé ji: dayi e go, jeiaga Zizi tọn wẹ yé gbọn heji ja; mìwlẹ na sọ mọ yé to opòdo agbadò lọ tọn, to zùngbo Jeluẹli tọn nukọn. ¹⁷Míwlẹ ma do avùn na hò to awhàn he mẹ gba, mì tò mìde, mì ni ṣite abọẹ, bo mọ whlengan OKLUNỌ tọn to mì de, mì Juda po Jelusalẹm po emi ¹⁸Jehọṣafati sọ dẹ́ ota etọn po nukunmẹ etọn po hlan aigba: Juda lẹpo po tòmẹnu Jelusalẹm tọn lẹ po sọ ṣinyọn ai to OKLUNỌ nukọn, to taliaina OKLUNỌ ¹⁹Levinu lẹ, sọn ovi Kohalinu lẹ tọn lẹ mẹ podọ sọn ovi Kolahinu lẹ tọn lẹ mẹ, sọ fọ́n site nado yí ogbè lélé talala de do pà OKLUNỌ, Jiwheyẹwhe Islaeli tọn. ²⁰Yé sọ tite to afọnnu fu, bo tọ́n yì biọ zùngbo Tekoa tọn mẹ: le yé tọ́n jei, Jehọṣafati ṣite bo dọmọ, Juda È po tòmẹnu jelusalẹm tọn lẹ po emì, mì sè mi; mì ni yise to OKLUNỌ Jiwheyẹwhe mítọn mẹ, mọwẹ yè na hẹn mì lódo do; mì ni sọ yí yẹwhegán etọn lẹ sè, mọwẹ mìwlẹ na sọ dùale do. ²¹Whenuena é ko yí hónamẹ po gbẹtọ lẹ po, é dè yé he na nọ jihàn hlan OKLUNỌ, bo sọ pà to owhànpa owiwe tọn mẹ, le yé to tin-tón jei to awhànfùntọ lẹ nukọn, bo to didọmọ, Mì na opẹ́ lẹ hlan OKLUNỌ; na lẹblanu etọn tote doidoi. ²²Whenuena yé ṣè nado to hànji podọ nado to pipà, OKLUNỌ dè wùvàtọ lẹ do owù mẹ do ovi Ammọni tọn lẹ ji, Moabì, po osé Seili po, he yè hẹn wá Juda ji; yè sọ hò yé. ²³Na ovi Ammọni po Moabi po tọn lẹ ṣite pannukọn tòmẹnu osé Seili tọn lẹ, nado hù bo sọ và yé gbidigbidi: whenuena yé ko basi vivọ̀ tòmẹnu Seili tọn lẹ de, omẹ dopodopo to alọgọna nado và awetọ. ²⁴Whenuena Juda wá jẹ atọ̀họ̀ zùngbo lọ tọn kọ̀n yé to mẹsusu ewlẹ pọ́n, bo, dayi e go, osiọ kúkú flẹ jẹ aigba wẹ yé, mẹde ma tin he họ̀ngán gba. ²⁵Whenuena Jehọṣafati po omẹ etọn lẹ pò wá nado bẹ́ ogblannu yé tọn, yé mọ to yé ṣẹnṣẹn adọkunnu lẹ po gbẹtọ ṣiọ lẹ po to ogégémẹ, po asọdonu akuẹgégénu tọn lẹ po, he yé dè yìngbe na yéde, suhu ehe yé sọgan bẹ́ yì: yé tin to ogblannu lẹ lọ bibẹ́ mẹ azán atọ̀n, é tin sù sọ mọ. ²⁶To azán ẹnẹtọ gbè yé dòn yéde pli do agbadò Belaka tọn mẹ; na finẹ wẹ yé dona OKLUNỌ te: enẹwutu wẹ yè do nọ ylọ oyín otẹn lọ tọn dọ Belaka kakajẹ egbé. ²⁷Whenẹnu wẹ yé lẹ́gọ̀, omẹ Juda po Jelusalẹm tọn lẹ po dopodopo, po Jehọṣafati po to nukọn yé tọn, nado vọ́ gọ̀ yì Jelusalẹm po ayajẹ po; na OKLUNỌ ko hẹn yé nado jaya to kẹ̀ntọ yetọn lẹ ji. ²⁸Ye sọ wá Jelusalẹm po asiazọn hànjinu lẹ po po ajalẹn lẹ po po opẹ̀nlẹ po jẹ ohọ̀ OKLUNỌ tọn lọ mẹ. ²⁹Obu jiwheyẹwhe tọn sọ tin to ahọludu otò lẹ tọn lẹ ji, whenuena yé sè dọ OKLUNỌ hòavùn hẹ kẹ̀ntọ Islaeli tọn lọ. ³⁰Mọwẹ ahọluigba Jehọsafati tọn tin abọẹ: na Jiwheyẹwhe etọn na ogbọjẹ ẹ lẹ́do pé.

³¹Jehọṣafati sọ to ahọludu to Juda ji: é yín owhè gbàntọ́n mẹho whenuena é ṣẹ̀ nado to ahọludu; é sọ dùahọlu owhè koatọ́n to Jelusalẹm mẹ: oyín onọ etọn tọn wẹ Azuba, viyọnnu Ẹilhi tọn lọ. ³²E sọ zinzọnlin to aliho Asa otọ́ etọn tọn mẹ, bo ma lẹ́ dapadopo sọn e mẹ, bo sọ to enẹ he yín jijlọ to nukun OKLUNỌ tọn lẹ mẹ wà. ³³Ṣogãn yè ma bẹ́ otẹn yìji lẹ ṣẹ gba; mọ jẹ dinvie gbẹtọ ewlẹ ma ko zé ayiha yetọn lẹ do hlan jiwheyẹwhe otọ́ yetọn lẹ tọn de gba. ³⁴Dinvie pipòtọ owalọ Jehọṣafati tọn lẹ tọn, tintan po godotọn po, dayi e go, yè wlan yé to otàn Jehu visunnu Hanani tọn tọn lọ mẹ, he yè yído owé ahọlu Islaeli tọn lẹ tọn mẹ.

³⁵To ehe godo wẹ Jehọṣafati ahọlu Juda tọn kòn ede dopọ po Ahazia ahọlu Islaeli tọn po; dopolọ yí oylan susu do wa: ³⁶é kọ̀n ede dopọ po e po nado basi ohún lẹ nado nọ yì Talsisi: yé sọ basi ohún lẹ lọ to Eziọni-gebeli mẹ. ³⁷Whenẹnu wẹ Eliezeli visunnu Dodavahu tọn sọn Malẹsa mẹ dọdọdai do Jehọṣafati go, dọmọ, Na hiẹ kón dewe dopọ po Ahazia po wutu, OKLUNỌ ko và azọ́n towe lẹ. Yè sọ gbà ohún lẹ lọ, bọ yé ma sọ tin sọgan nado yì jẹ Talsisi gba.

¹JEHỌSAFATI sọ damlọn po otọ́ etọn lẹ po, yè sọ di i do otọ́ etọn lẹ de to tòdaho Davidi tọn mẹ: Jeholami visunnu etọn sọ dùahọlu to otẹn etọn mẹ. ²E sọ tindo mẹmẹsunnu lẹ visunnu Jehọṣafati tọn lẹ lọ, Azalia, po Jehieli po, po Zekalia po, po Azalia po, po Mikaeli po, po Sefatia po: ehe lẹpo wẹ visunnu Jehọṣafati ahọlu Islaeli tọn tọn lẹ. ³Otọ́ yetọn sọ na nunina susu yé, sọn fataka mẹ, podọ sọn sika mẹ, podọ sọn onú hòakue lẹ mẹ, po tòdaho dòkọnọ lẹ po to Juda mẹ: aigba ahọludu lọ wẹ é na hlan Jeholami, na ewọ wẹ plónji lọ wutu. ⁴Dinvie whenuena yè zé Jeholami daga do ahọludu otọ́ etọn tọn lọ ji, bo ko sọ nahuhlọn ede, é yí ohi do hù mẹmẹsúnnu etọn lẹpo podọ susu ga sọn ahọvi Islaeli tọn lẹ mẹ. ⁵Owhè gbànnukunawe mẹho wẹ Jeholami whenuena é ṣẹ̀ nado to ahọludu; é sọ dùahọlu owhè ṣinatòn to Jelusálem mẹ. ⁶E sọ zinzọnlin to aliho ahọlu Islaeli tọn lẹ tọn mẹ, dile owhé Ahabi tọn wà do: na é tindo viyọnnu Ahabi tọn hlan asi: é sọ wà enẹ he yín oylan to nukun OKLUNỌ tọn mẹ. ⁷Ṣogãn OKLUNỌ ma jlo na và owhé Davidi tọn gba, na alẹ̀nù he é ko basi pó Davidi po tọn wutu, podọ dile é gblọnadan do nado na miyọngbán de hlan ẹn podọ hlan ovi etọn lẹ to whepoponu. ⁸To azán etọn lẹ mẹ wẹ Edọmi ṣiatẹ̀ sọn oglọ alọ Juda tọn mẹ, bo basi ahọlu de do yéde ji. ⁹Whenẹnu wẹ Jeholami juyì gododọn po awhàngán etọn lẹ po, po kẹkẹ etọn lẹ po po e po: é sọ tite to ozán mẹ, bo hò Edọminu he lédo e lẹ, po awhàngán kẹkẹ lẹ tọn lẹ po. ¹⁰Mowẹ Edọmi ṣiaté do sọn oglọ alọ Juda tọn mẹ, jẹ egbé: whenẹnu Libna sọ siató to ojlẹ doponẹ mẹ sọn oglọ alọ etọn mẹ: na é ko gbẹ́ OKLUNỌ, Jiwheyẹwhe otọ́ etọn lẹ tọn dai wutu. ¹¹Humọ é ko sọ basi otẹn yìji lẹ to osé Juda tọn lẹ mẹ, bo sọ hẹn tòmẹnu Jelusalẹm tọn lẹ nado to yìyì to galilọ de mẹ, bo sọ hẹn Juda buali. ¹²Ohówé de sọ wá e de sọn Elija yẹwhegán lọ de, dọmọ, Le wẹ OKLUNỌ Jiwheyẹwhe Davidi otọ́ towe tọn dọ, dọmọ, Na hiẹ ma ko zinzọnlin to aliho Jehọṣafati otọ́ towe tọn lẹ mẹ wutu, kavi to aliho Asa ahọlu Juda tọn tọn lẹ mẹ; ¹³ṣigba bo ko zinzọnlin to aliho ahọlu Islaeli tọn lẹ tọn mẹ, bo ko sọ hẹn Juda po tòmẹnu Jelusalẹm tọn lẹ po nado to yìyì to ogalilọ de mẹ, taidile owhé Ahabi tọn wà do; bo ko sọ hù mẹmẹsunnu owhé otọ́ towe tọn tọn lẹ ga, he tin pọ́nte hú hilọsu: ¹⁴dayi e go, OKLUNỌ na yí azònylankan daho de do hò omẹ towe lẹ, po ovi towe lẹ po, po asi towe lẹ po, po agbàn towe lẹpo po: ¹⁵hiẹ na sọ tindo awutujijẹ daho gbọn azọ̀n adọ̀go towe mẹ tọn dali, kaka adọ̀go towe na wọ̀ jẹgbonu gbọn awutujijẹ lọ tọn dali to egbesọ egbesọ. ¹⁶OKLUNỌ sọ fọ́nadan gbigbọ Filistini lẹ tọn do Jeholami ji po Alabianu lẹ tọn po he tin to Etiopianu lẹ dali: ¹⁷yé sọ hẹji wá Juda ji, bo gbà biọ e mẹ, bo bẹ́ agbàn he yè mọ to ohò ahọlu tọn mẹ lẹpo yì, po visunnu etọn lẹ po ga, po asi etọn lẹ po; sọmọ bọ yè ma pò visunnu de dai nẹ ba, adavo Jehoahazi ojivọ sọn visunnu etọn lẹ mẹ. ¹⁸To ehe lẹpo godo OKLUNỌ yí azọ̀n masèama de do hò e to adọgo etọn mẹ. ¹⁹E sọ wá jọ, to yìyì ojlẹ tọn mẹ, to opòdo owhè awe tọn mẹ, wẹ adọ̀go etọn wò jẹgbonu gbọn awutujijẹ etọn tọn dali, é sọ kú gbọn azọ̀n sinyẹnsinyẹn lẹ lọ dali Omẹ etọn lẹ ma sọ basi mimẹ̀ de nẹ̀ gba, taidi mimẹ̀ otọ etọn lẹ tọn. ²⁰Owhè gbànnukunawe mẹho wẹ ewọ whenuena é sẹ̀ nado to ahọludu, é sọ dùahọlu owhè ṣinatòn to Jelusalẹm mẹ: é sọ fọ́nyì matin yínyín ojlonọ; yé sọ di i to tòdaho Davidi tọn mẹ, ṣigba é ma yín to olidò ahọlu lẹ tọn lẹ mẹ gba.

¹TÒMẸNU Jelusalẹm tọn lẹ sọ yí Ahazia visunnu etọn ọjivó do basi ahọlu to otẹn etọn mẹ; na ogbé omẹ he wá jẹ osla lọ mẹ po Alabianu le po ko hù viwhinwhẹn lẹpo. Mowẹ Ahazia visunnu Jeholami ahọlu Juda tọn tọn sọ to ahọludu. ²Owhè kandenukunawe mẹho wẹ Ahazia whenuena é sẹ́ nado to ahọludu; é sọ dùahọlu owhè dopo to Jelusalẹm mẹ: oyín onọ etọn tọn wẹ Atalia viyọnnu Omli tọn lọ. ³Ewọ ga zinzọnlin to aliho owhé Ahabi tọn tọn lẹ mẹ: na onọ etọn wẹ hónamẹtọ etọn nado nọ yí kanyìnylan do wà. ⁴E sọ wà enẹ he yín oylan to nukun OKLUNỌ tọn mẹ, dile owhe Ahabi tọn wà do: na yé wẹ hónamẹtọ etọn lẹ to okú otọ́ etọn tọn godo hlan dindọn etọn. ⁵E zinzọnlin to hónamẹ yetọn mẹ ga, bo sọ yi po Jeholami visunnu Ahabi ahọlu Islaeli tọn tọn po nado fùnawhàn hẹ Hazaẹli ahọlu Silia tọn to Lamọti-gileadi: Sihanu lẹ doalán ogo na Jolami. ⁶E sọ lẹ́gọ̀ nado yín azònhẹngbọnanọ to Jezleẹli mẹ sọn alan he yé na ẹn to Lama lẹ, whenuena é to avùnhò po Hazaẹli ahọlu Silia tọn po. Azalia visunnu Jeholami ahọlu Juda tọn tọn sọ jẹte yì nado pọ́n Jeholami visunnu Ahabi tọn to Jezleeli mẹ, na ewọ yín awutunọ wutu. ⁷Dinvie dindọn Ahazia tọn Jiwheyẹwhe de wẹ é sọn, ehe mẹ ewọ yì Jolami de: na whenuena yè hẹn ẹn wá, é tón po Jeholami po yi Jehu visunnu Nimsi tọn ji, mẹhe OKLUNỌ ko samisisána nado sán owhé Ahabi tọn sẹ̀. ⁸E sọ wá jọ, whenuena Jehu to whẹ̀dida lọ hen ṣẹ̀ to owhé Ahabi tọn lọ ji, wẹ é mọ ahọvi Juda tọn lẹ, po visunnu mẹmẹsunnu Ahazia tọn lẹ tọn lẹ po, to devzọ́nwà hlan Ahazia, bo sọ hù yé. ⁹E din Ahazia, yé sọ wle e, (dinvie é ko to bibẹ́ to Samalia mẹ,) yé sọ hẹn ẹn wá Jehu de, bo hù i; yé sọ di i, na yé dọmọ, Visunnu Jehọṣafati tọn wẹ ewọ, mẹhe yí ayiha etọn lẹpo do din OKLUNỌ. Owhé Ahazia tọn ma sọ tindo huhlọn nado hẹn ahọludu lọ go ba.

¹⁰Dinvie whenuena Atalia onọ Ahazia tọn mọ dọ visunnu etọn yín osiọ, é tite bo sọ và okùn ahọluji owhé Juda tọn tọn lẹpọ. ¹¹Ṣigba Jehọsabeati, viyọnnu ahọlu tọn lọ yí Joaṣi visunnu Ahazia tọn, bo fìn in yì sọn visunnu ahọlu tọn he yè hù lẹ ṣẹnṣẹn, bo yí i po anónọ etọn lọ po do adọ́họ́ mẹ. Mowẹ Jehọsabeati, viyọnnu ahọlu Jeholami tọn lọ, asi Jehọiada yẹwhenọ lọ tọn (na ewọ wẹ noviyọnnu Ahazia tọn,) whla ẹ sọn Atalia de, mọwẹ ewọ ma hù i gba. ¹²E sọ tin to yé de whiwhla to ohọ̀ Jiwheyẹwhe tọn lọ mẹ owhè ṣidopo: Atalia sọ to ahọludu to aigba lọ ji.

¹TO owhè ṣinawetọ mẹ Jehọiada nahuhlọn ede, bo bẹ́ awhàngán kanweko lẹ tọn lẹ, Azalia visunnu Jelohami tọn, po Iṣmaẹli visunnu Jehohanani tọn po, po Azalia visunnu Obẹdi tọn po, po Maaseia visunnu Adaia tọn po, po Elisafati visunnu Zikli tọn po, biọ alẹ̀nù mẹ po e po. ²Yé sọ gbọn Juda mẹ yí, bo pli Levinu lẹ sọn tòdaho Juda tọn lẹpo mẹ, po nukọntọ owhé Islaeli ton lẹ tọn tọn lẹ po, yé sọ wá Jelusalẹm ³Agùn lẹpo sọ basi alẹ̀nù de po ahọlu lọ po to ohọ̀ Jiwheyẹwhe tọn mẹ. Ewọ sọ dọ hlan yé dọmọ, Dayi e go, visunnu ahọlu tọn lọ na dùahọlu, dile OKLUNỌ dọ do gbọn visunnu Davidi tọn lẹ tọn dali. ⁴Ehe wẹ onú he mìwlẹ na wà: odá atọ̀ntọ sọn mì he biọ họ̀mẹ wá to gbọjezán ji le tọn, sọn yẹwhenọ lẹ mẹ podọ sọn Levinu lẹ mẹ, na yín họnjidetọ ohọ̀n lẹ tọn lẹ; ⁵odá atọ̀ntọ de na sọ tin to owhé aholu tọn gbè; odá atọ̀ntọ de to họ̀ngbo dòdonu tọn ji: podọ gbẹtọ lẹpo na sọ tin to awánu ohọ̀ OKLUNỌ tọn ton lẹ mẹ. ⁶Ṣigba mì dike mẹde biọ ohọ̀ OKLUNỌ tọn mẹ wá blo, adavo yẹwhenọ lẹ, po yé he to devizọ́nwà sọn Levinu lẹ mẹ po; yé wẹ na wá hòmẹ, na yéwlẹ yín wiwe: ṣigba gbẹtọ lẹpo na pọ́n hihọ́ OKLUNỌ tọn go. ⁷Levinu lẹ na lẹ́do ahọlu lọ pé, omẹ dopodopo po adanwànu etọn lẹ po to alọ etọn mẹ; podọ mẹdepope he biọ ohọ̀ mẹ wá, gbọ yè ni hù i: mìwlẹ ni sọ tin to ahọlu lọ de whenuena é to whégbe biọ ja, po whenuena é tón jei gbonu po. ⁸Mọwẹ Levinu lẹ po Juda lẹpo po wà do kẹdẹdi ehe Jehọiada yẹwhenọ lọ degbèna: yé sọ bẹ́ omẹ dopodopo omẹ etọn lẹ, yé he tin nado wá hòmẹ to gbọjẹzán gbè lẹ, po yé nẹlẹ̃ he tin nado tọ́n jẹgbonu to gbọjẹzán gbè lẹ po; na Jehọiada yẹwhenọ lọ ma kija okànta lẹ lọ gba. ⁹Jehọiada yẹwhenọ lọ sọ jó owhán lẹ lọ po gáhẹnu lẹ po, po awọyínu lẹ po, he yín Davidi ahọlu tọn, he ko tin to ohọ̀ Jiwheyẹwhe tọn mẹ na awhàngán kanweko lẹ tọn lẹ. ¹⁰E sọ tò gbẹtọ lẹ, omẹ dopodopo po adanwànu etọn po to alọ etọn mẹ, sọn adà adusi ohò lọ tọn mẹ jẹ adà amiyọn ohó lọ tọn me, to ohaji gbọn agbà ohọ̀ lọ tọn dali, to ahọlu lọ de lẹ́do. ¹¹Whenẹnu wẹ yé hen visunnu ahọlu tọn lọ jẹgbonu wá, bo yí ojẹ́gbakun lọ do e ji, bo sọ yí aṣẹdai lọ nẹ̀, bo yí i do basi aholu: Jehọiada po visunnu etọn lẹ po sọ samisisá nẹ̀; yé sọ dọmọ, Jiwheyẹwhe ni whlẹn ahọlu lọ. ¹²Whenuena Atalia sè zingidi gbẹtọ lẹ tọn to wèzundo bo sọ to ahọlu lọ pà, é wá gbẹtọ lẹ de biọ ohò OKLUNỌ tọn mẹ: ¹³é sọ pọ́n, bo, dayi e go, ahọlu lọ ṣite to odòtin etọn go to họ̀ntònu lọ, awhàngán lẹ po opèn lẹ po to ahọlu de; gbẹtọ aigba lọ ji tọn lẹpo sọ to ayajẹ, bo sọ yí opèn lẹ do kún; hànjitọ lẹ ga to aihúnda to nuzinzán ohangbè tọn lẹ ji, bo sọ to ohànjiji pipà tọn ke. Whenẹnu wẹ Atalia tlẹn avọ́ etọn lẹ, bo dọmọ, Atẹ̀, atẹ̀. ¹⁴Jehọiada yẹwhenọ lọ sọ hẹn awhàngán kanweko lẹ tọn he yè tò do awhànpa lọ ji lẹ jẹgbonu wá, bo dọ na yé dọmọ, Mì hẹn ẹn tón sọn ogbẹ lẹ ṣẹnṣẹn; po mẹhe hodo e depope po, gbọ yè ni yí ohi do hù i: na yẹwhenọ lọ dọmọ, Mì hù i to ohọ̀ OKLUNỌ tọn mẹ blo. ¹⁵Mowẹ yé jó aliho nẹ̃; é sọ yì okule họ̀ngbo osé ji owhé ahọlu tọn gbè: yé sọ hù i to finẹ.

¹⁶Jehọiada sọ basi alẹ̀nù de to ede po gbẹtọ lẹpo po ṣẹnṣẹn, po ahọlu lọ po, dọ yé ni yín omẹ OKLUNỌ tọn. ¹⁷Gbẹtọ lẹpo sọ yì ohọ̀ Baali tọn mẹ, bo gbà ẹ liai, bo sọ gbà agbà etọn lẹ po boṣiọ etọn lẹ po do fìinflin mẹ, bo sọ hù Matani yẹwhenọ Baali tọn lọ to agbà lẹ nukọn. ¹⁸Jehọiada sọ dè azọ́n ohọ́ OKLUNỌ tọn mẹ tọn lẹ to oglọ alọ yẹwhenọ Levinu lẹ lọ tọn lẹ mẹ, mẹhe Davidi ko mápé ohọ̀ OKLUNỌ tọn mẹ, nado nọ na avọ́ nunina mimẹ̀ OKLUNỌ tọn lẹ, dile yè wlan to osẹ́n Moṣe tọn mẹ do, po ayajijẹ po po hànjiji po kẹdẹdi didọ Davidi tọn. ¹⁹E sọ tò họ̀njidetọ lẹ do họ́ngbo ohọ̀ OKLUNỌ tọn lẹ lọ ji, dọ mẹde he yín mawé to onú depope mẹ ma na do biọ e mẹ. ²⁰E sọ yí awhàngán kanweko lẹ tọn lẹ, po yẹ yinọ lẹ po, po tògán gbẹtọ lẹ tọn lẹ po, po gbẹtọ aigba lọ tọn lẹpo po, bo sọ hẹn ahọlu lọ jẹte sọn ohò OKLUNỌ tọn lọ mẹ wá: yé sọ gbọn họ̀ngbo aga tọn ji wá jẹ ohọ̀ ahọlu tọn mẹ, bo sọ zé ahọlu lọ do ofìn ahọludu lọ tọn ji ²¹Mọwẹ gbẹtọ aigba lọ tọn lẹpo sọ jaya, tòdaho lọ so yín abọẹnọ: yé sọ yí ohi do hù Atalia.

¹OWHÈ ṣinawe mẹho wẹ Joaṣi whenuena e ṣè nado to ahọludu, é sọ dùahọlu owhè kande to Jelusalẹm mẹ: oyín onọ etọn tọn we Zibia sọn Beẹli-seba mẹ. ²Joaṣi so wà enẹ he yín jijlọ to nukun OKLUNỌ tọn lẹ mẹ to azán Jehọiada yẹwhenọ lọ ton lẹpo me. ³Jehọiada dà asi awe e so ji visunnu lẹ po viyọnnu lẹ po. ⁴E so wá jọ to ehe godo, wẹ Joaṣi yín ayihanọ nado jla ohò OKLUNỌ tọn do. ⁵E sọ pli yẹwhenọ lẹ po Levinu lẹ po dopọ, bo dọ hlan yé dọmọ, Mì tón yì jẹ todaho Juda tọn lẹ mẹ, bo ṣinyan sọn Islaeli lẹpo mẹ akuẹ nado nọ vọ́ ohọ̀ Jiwheyẹwhe mítọn tọn lọ jlado to owhèmẹ whèmẹ, bo sọ mọ dọ mì hẹn whẹ̀hó lọ yá. Ṣogãn Levinu le ma hẹn ẹn yá gba. ⁶Ahọlu sọ ylọ na Jehọiada ogán lọ, bo dọ hlan ẹn dọmọ, Etẹwutu wẹ hiẹ ma biọ sọn Levinu lẹ de nado hẹn otakuẹ Moṣe mẹmẹsi OKLUNỌ tọn tọn lọ, sọn agùn lọ si na Islaeli, sọn Juda me podọ sọn Jelusalẹm mẹ wá na ogohò asẹdai tọn lọ? ⁷Na visunnu Atalia, nawe ylankan nẹ tọn lẹ, ko gbà ohò Jiwheyẹwhe tọn lọ; podọ onú klandowiwe ohọ̀ OKLUNỌ tọn mẹ tọn lẹpo ga wẹ ye bẹna Baalimi. ⁸Mowẹ ahọlu lọ degbè, ye sọ basi apòtinbau de, bo zé e do gbonu to hòngbo ohọ̀ OKLUNỌ tọn tọn ji ⁹Yé sọ basi mìsẽlu de lẹ́do Juda po Jelusalẹm po nado hen otakuẹ he Moṣe mẹmẹsi Jiwheyẹwhe tọn ko zé do Islaeli to zùngbo mẹ wá hòmẹ na OKLUNỌ. ¹⁰Ahọvi lẹpo po gbẹtọ lepo po sọ to ayajẹ, bo sọ henwá hòmẹ, bo kọ̀n do apòtinbau lọ mẹ, kaka yé do basi pó. ¹¹E sọ yín mọ, dọ ojle he mẹ yè hẹn apòtinbau lọ jẹ azọ̀nhọ ahọlu tọn mẹ gbọn alọ Levinu lẹ tọn mẹ, podọ whenuena yé mọ dọ akuẹ susu tin finẹ, wékantọ ahọlu tọn lọ po ogán azọ́ngán yẹwhenọ lọ tọn po nọ wa bo kọ̀n sọn apòtinbau lọ mẹ, bo nọ zé e, bo sọ nọ hẹn ẹn yì otẹn etọn mẹ. Le wẹ yé nọ to wiwà egbesọegbesọ, bo pli akuẹ to ogégé mẹ ¹²Ahọlu lọ po Jehọiada po sọ nọ na ẹn hlan omẹ nkọ to azọ̀n sinsẹ̀n ohọ̀ OKLUNỌ tọn lọ tọn tọn wà lẹ; yé sọ dàpà họ̀dótọ lẹ po atinpatọ lẹ po, nado jla ohọ̀ OKLUNỌ tọn lọ do, podọ omẹ nkọ to ogànyù po gànvẹ̃ po basi lẹ ga nado vọ́ ohọ̀ OKLUNỌ tọn lọ basi. ¹³Mowẹ azọ́ntọ lẹ wàzọ́n, azọ̀nhẹngbọ sọ yì aga to azón lọ ji, yé sọ zé ohò Jiwheyẹwhe tọn do otẹn etọn mẹ, bo sọ nahuhlọn ẹn. ¹⁴Whenuena yé ko sọ basi i po, yé hẹn pipòtọ akuẹ lọ tọn wá aholu po Jehọiada po nukọn, ehetọn yè do basi nuzinzán lẹ na ohò OKLUNỌ tọn lọ, yèdọ nuzinzán lẹ nado nọ wadevizọ̀n, podọ nado nọ yí do sánvò, po ṣivi lẹ po, po nuzinzán sika po fataka po tọn lẹ. Yé sọ nọ na avọ nunina mimò lẹ to ohọ̀ OKLUNỌ tọn mẹ to whepoponu to azán Jehọiada tọn lepo mẹ. ¹⁵Jehọiada sọ whẹ́n pòyọnho bo sọ yín azán susu tọn, é sọ kú; owhè kantọ̀nao mẹho wẹ ewọ whenuena é kú. ¹⁶Yé sọ di i to tòdaho Davidi tọn mẹ to ahọlu lẹ ṣẹnṣẹn, na é ko wà dagbe to Islaeli mẹ wutu, podọ hlan Jiwheyẹwhe po ohọ̀ etọn po kòn. ¹⁷Dinvie to okú Jehọiada tọn godo wẹ ahọvi Juda tọn lẹ wá, bo basi whékanbiọ hlan ahọlu lọ. Whenẹnu wẹ ahọlu tuntóai hlan yé. ¹⁸Yé sọ gbé ohò OKLUNỌ tọn dai, po Jiwheyẹwhe otò yetọn lẹ tọn po, bo sọ to Aṣelimi po boṣio le po sẹ̀n: homẹgble sọ wá Juda po Jelusalẹm po ji na whẹyínylan yetọn he. ¹⁹Gãnṣo é do yẹwhegán lẹ hlan yé de nado vọ yé hẹnwá OKLUNỌ de; yé sọ sàkunnu do yé ji: ṣigba yé ma jlo na na otọ́ gba. ²⁰Gbigbọ OKLUNỌ tọn sọ wa Zekalia visunnu Jehọiada yẹwhenọ tọn ji; é sọ ṣite hute gbẹtọ lẹ, bo dọ hlan yé dọmọ, Le wẹ Jiwheyẹwhe dọ, Etẹwutu wẹ mìwlẹ gbẹ̀ gbedide OKLUNỌ tọn le, bọ mìwlẹ ma do sọgan dùale? na mìwlẹ ko gbẹ́ OKLUNỌ dai wutu, ewọ ga ko sọ gbẹ́ mì dai. ²¹Yé sọ blanú do e go, bo dlan zannu le do e to gbèdide ahọlu lọ tọn ji to awanu ohọ̀ OKLUNỌ tọn tọn mẹ. ²²Le wẹ Joaṣi ma flin dagbewà he Jehọiada otò etọn ko wà hlan ẹn, ṣigba bo hù visunnu etọn. Whenuena é to kúkú, é dọmọ, OKLUNỌ ni pọn ẹn, bo sọ kàn ẹn biọ. ²³E sọ wa jọ to opòdo owhè lọ tọn, wẹ awhànfuntọ Silianu lẹ tọn hẹji wá e ji: yé sọ wá Juda po Jelusalẹm po, bo và ahọvi gbẹtọ lẹ tọn lẹpo, sọn gbẹtọ ewlẹ ṣẹnṣẹn, bo do ogblannu yé tọn lẹpo hlan jẹ ahọlu Damasku tọn de. ²⁴Na awhànfuntọ Silianu lẹ tọn lẹ wá po ogbé pẹvi gbẹtọ lẹ tọn po; OKLUNỌ sọ jo awhànpa daho talala de do alọ yetọn mẹ, na yé ko gbọ́ OKLUNỌ dai wutu, Jiwheyẹwhe otọ̀ yetọn lẹ tọn. Mowẹ yé hẹn whẹ̀dida sọ to Joaṣi ji. ²⁵Whenuena yè hẹn yé fọ̀nyì sọn e de, (na yé jó e dai to awutujijẹ daho de mẹ,) mẹmẹsi etọn titi lẹ blanú do e ji na ohùn visunnu Jehọiada yẹwhenọ lọ tọn lẹ tọn, bo sọ hù i to adọzán etọn ji, é sọ kú: yé sọ di i to tòdaho Davidi tọn mẹ, ṣigba yé ma di i to olido ahọlu lẹ tọn lẹ mẹ gba. ²⁶Ehelẹ sọ wẹ yé he blanú do e go lẹ; Zabadì visunu Simeati, Ammọninu-yọnnu lọ tọn, po Jehozabadi visunnu Ṣimliti Moabmuyọnnu lọ tọn po. ²⁷Dinvie gbọn visunnu etọn lẹ tọn dali, po oklo agbàn yè zé do e ji lẹ tọn po, po ovódó ohò Jiwheyẹwhe tọn lọ tọn po, dayi e go, yè wlan yé to otànwé owé ahọlu lẹ tọn tọn mẹ. Amazia visunnu etọn sọ dùahọlu to otẹn etọn mẹ.

¹OWHÈ koatọ́n mẹho wẹ Amazia whenuena é sẹ nado to ahọludu; é sọ dùahọlu owhè koatọ́nnukunẹnẹ to Jelusalẹm mẹ: oyín onọ etọn tọn wẹ Jehoadani sọn Jelusalẹm mẹ. ²E sọ wà enẹ he yín jijlọ to nukun OKLUNỌ tọn lẹ mẹ, ṣigba é ma yín po ayiha pipé de po gba. ³Dinvie é sọ wá jọ, whenuena yè hẹn ahọludu lọ lódo hlan ẹn, wẹ é hù mẹmẹsi etọn lẹ he hù ahọlu otọ́ etọn. ⁴Ṣigba é ma hù ovi yetọn lẹ gba, ṣigba wà kẹdẹdi enẹ he yè wlan to osẹ́n mẹ to owé Moṣe tọn mẹ, dile OKLUNỌ degbè do, dọmọ, Otọ́ lẹ ma na kú na ovi lẹ gba, mọ ovi lẹ ma sọ to na kú na otọ́ lẹ gba; ṣigba omẹ dopodopo na kú na ylando etọn titi. ⁵Humọ Amazia bé Juda pli, bo naṣẹ yé kẹdẹdi owhé otọ́ yetọn lẹ tọn lẹ tọn, to oglọ awhàngán fọtọ́n lẹ tọn lẹ tọn po awhàngán kanweko lẹ tọn lẹ po, yèdọ Juda lẹpo po Bẹnjamini po: é sọ hia yé sọn owhè òko mẹho mẹ yìaga, bo sọ mọ yé sunnusi ṣinṣinyan fọtọ́n fọdekanweko, sọgan nado tọ́n yì nado fùnawhàn, he sọgan hẹn owhán po awọyínu po go ⁶E sọ dàpà omẹ hlọnhlọnnọ tudido tọn lẹ ga fọtọ́n kanweko sọn Islaeli mẹ na talẹnti fataka tọn kanweko. ⁷Ṣigba omẹ Jiwheyẹwhe tọn de wá e de, dọmọ, Ahọlu È, a dike awhànfuntọ Islaeli tọn lẹ yì po hiẹ po blo; na OKLUNỌ ma tin to Islaeli de gba, nado dọ, to ovi Eflaimi tọn lẹpo de. ⁸Ṣigba eyín hiẹ na yì, yí tudido do wà, yín huhlọnnọ na awhàn lọ: Jiwheyẹwhe na zé we liai to kẹ̀ntọ lọ nukọn; na Jiwheyẹwhe tindo huhlọn nado gọalọ podọ nado zé liaii ⁹Amazia sọ dọ hlan omẹ Jiwheyẹwhe tọn lọ dọmọ, Ṣigba eté mìwlẹ na ka wà na talẹnti fataka tọn he mí na hlan awhànfuntọ Islaeli tọn lẹ? Omẹ Jiwheyẹwhe tọn lọ sọ gblọn dọmọ, OKLUNỌ tin sogan nado na we sù húgan ehe. ¹⁰Whenẹnu wẹ Amazia klan yé, nado dọ, awhànfuntọ he yè hẹn wá e de sọn Eflaimi mẹ lẹ, nado gọ̀ yì owhé: enẹwutu wẹ yè hẹn adi yetọn jimiyọn do Juda go susu, yé sọ lẹ́gọ̀yì owhé to adi zògbe mẹ. ¹¹Amazia sọ yí tudido, bo plan omẹ etọn lẹ tọ́n, bo yì jẹ Agbadò Ojẹ tọn lọ mẹ, bo sọ họ̀ fọtọ́n ao sọn ovi Seili tọn lẹ mẹ. ¹²Ovi Juda tọn lẹ sọ bẹ́ fọtọ́n ao dèvo yì to ogbẹ́, bo hẹn yé wá jẹ aga osé lọ tọn, bo zé yé liai sọn aga osé lọ tọn, bọ yè sọ gbà yé do flinflin. ¹³Ṣigba omẹ awhàn lọ tọn he Amazia gọ̀ dohlan lẹ, na yé ma na do yì po e po nado funawhàn gba, ṣinyọn tòdaho Juda tọn lẹ ji, sọn Samalia yèdọ jẹ Bẹti-họlọni, bo sọ hò fọtọ́n atọn sọn yé mẹ, bo sọ bé ogblannu susu.

¹⁴Dinvie é sọ wá jọ godo he yè hẹn Amazia ja sọn hùhù Edọminu lẹ tọn mẹ, wẹ é hẹn yẹwhe ovi Seili: tọn lẹ tọn lẹ wá, bo zé yé dote nado yín yẹwhe etọn lẹ, bo sọ dẹ́ ede to yé nukọn, bo sọ nọ mẹ nuyọnwán hlan yé. ¹⁵Enẹwutu wẹ yè hẹn adi OKLUNỌ tọn jimiyọn do Amazia ji, é sọ do yẹwhegán de hlan ẹn he dọ hlan ẹn dọmọ, Etẹwutu wẹ hiẹ to dindin to yẹwhe gbẹtọ ewlẹ tọn lẹ godo, he ma ko whlẹn omẹ yetọn titi lẹ sọn alọ towe mẹ? ¹⁶E sọ wá jọ, le é to hódọ po e po, wẹ ahọlu dọ hlan ẹn dọmọ, Mí ka ko basi we sọn hónamẹ ahọlu lọ tọn mẹ wẹ? gòdemẹ; etẹwutu wẹ yè na hò hiẹ? whenẹnu wẹ yẹwhegán lọ gòdemẹ, bo dọmọ, Yẹn yọnẹn dọ Jiwheyẹwhe ko magbè nado và we, na hiẹ ko wà ehe wutu, bo ma ko sọ tuntóai hlan hónamẹ ṣie.

¹⁷Whenẹnu wẹ Amazia ahọlu Juda tọn yí oplọ́n, bo domẹhlan Joaṣi, visunnu Jehoahazi tọn visunnu Jehu tọn, ahọlu Islaeli tọn, dọmọ, Wá, gbọ míwlẹ ni pọ́n mínọzo to nukunmẹ. ¹⁸Joaṣi ahọlu Islaeli tọn sọ domẹhlan Amazia ahọlu Juda tọn de, dọmọ, Atinwunnọ he tin to Lẹbanọni mẹ domẹhlan kedali he tin to Lẹbanọni mẹ de, dọmọ, Na viyọnnu towe hlan visunnu ṣie hlan asi: gbékanlin he tin to Lẹbanọni mẹ de sọ jugbọn finẹ, bo sọ tùnafọ atinwunnọ lọ ji dodò. ¹⁹Hiẹ dọmọ, Pọ́n, hiẹ ko hò Edọmi; ayiha towe wẹ hiẹ sọ zé daga nado gblọnadan: dinvie nọ̀ owhé gbè; etẹwutu wẹ hiẹ na do dinaklọn hlan awugble towe, na hiẹ na do jai, yèdọ hiẹ, po Juda po to de we? ²⁰Ṣigba Amazia ma jlo na sè gba; na é tin sọn Jiwheyẹwhe de, na é nido jó yé do alọ kẹ̀ntọ yetọn lẹ tọn mẹ, na yé ko din to yẹwhe Edọmi tọn lẹ godo wutu. ²¹Mowẹ Joaṣi ahọlu Islaeli tọn hẹji yì; ewọ po Amazia ahọlu Juda tọn po sọ pọn yénọzo to nukunmẹ to Bẹtisemẹsii he yín Juda tọn. ²²Yè sọ yí juda do gbigblehú kọ̀n to Islaeli nukọn; yé sọ họ̀nyì omẹ dopodopo jẹ ogohọ̀ etọn mẹ. ²³Joaṣi ahọlu Islaeli tọn sọ wle Amazia ahọlu Juda tọn, yisunnu Joaṣi visunnu Jehoahazi tọn tọn lọ, to Bẹtisẹmẹsi, bo sọ hẹn ẹn wá Jelusalẹm bo sọ gbà adó Jelusalẹm tọn liai sọn họ̀ngbo Eflaimi tọn ji jẹ họ̀ngbo lọnglọnẹnmẹ, awàgbà fowe. ²⁴E sọ bé sika po fataka lẹpo po, po nuzinzán he yè mọ to ohọ̀ Jiwheyẹwhe tọn mẹ to Obẹdi-edọmi de lẹpo po, po adọkunnu ohọ́ ahọlu tọn mẹ tọn lẹ po, po ogòdèmẹ lẹ po ga, bo sọ lẹ́gọ́ do Samalia mẹ.

²⁵Amazia visunnu Joaṣi ahọlu Juda tọn tọn nọ̀gbẹ́to okú Joaṣi visunnu Jehoahazi tọn tọn gọdo owhè fọtọ́n. ²⁶Dinvie pipòtọ owalọ Amazia tọn tọn lẹ, tintan po godotọn po, dayi e go, yè ma ka wlan yé to owé ahọlu Juda po Islaeli po tọn lẹ tọn mẹ? ²⁷Dinvie sọn ojlẹ he mẹ Amazia lẹ́ sọn hihodo OKLUNỌ mẹ yé basi núbibla de do e ji to Jelusalẹm mẹ; é sọ họ̀nyì jẹ Lakisi: ṣigba yé domẹhlan godo nẹ̃ jẹ Lakisi, bo sọ hù i to finẹ. ²⁸Yé sọ hẹn ẹn wá to osé lẹ ji, bo di i to otọ́ etọn lẹ de to tòdaho Juda tọn lọ mẹ.

¹OMẸ Juda tọn lẹpo sọ yí Uzia, mẹhe yín owhè fọtọ̀nnukundopo mẹho, bo yí i do basi ahọlu to otẹn Amazia otọ́ etọn tọn mẹ. ²E dó Elọti bo gò ẹ jó do Juda de, to enẹ godo ahọlu damlọn to otọ́ etọn lẹ de. ³Owhè fọtọ̀nnukundopo mẹho wẹ Uzia whenuena é ṣẹ́ nado dùahọlu; é sọ dùahọlu owhè kandewiawe to Jelusalẹm mẹ: oyín onọ etọn tọn wẹ jẹkilia sọn Jelusalẹm mẹ. ⁴E sọ wà enẹ he yín jijlọ to nukun OKLUNỌ tọn ẹ mẹ, kẹdẹdi ehe Ámazia otọ́ etọn ko wà lẹpo. ⁵E sọ zé ede do nado nọ din Jiwheyẹwhe to azán Zekalia tọn lẹ mẹ mẹhe tindo wuntùntùn to onúmọ Jiwheyẹwhe tọn mẹ: podọ dẹn sọ le é din OKLUNỌ, wẹ Jiwheyẹwhe hẹn ẹn nado dùale. ⁶E sọ tọ́n yì bo fùnawhàn po Filistini lẹ po, bo gbà adó Gati tọn liai, po adó Jabnẹ tọn po, po adó Aṣidọdi tọn po; é sọ dó todaho lẹ to oto Aṣidọdi tọn mẹ, podọ to Filistini lẹ ṣẹnṣẹn ⁷Jiwheyẹwhe sọ gọalọ nẹ̃ to Filistini lẹ lọ ji, podọ to Alabianu he nọ nọ́ Guli-baali po Mẹunimi lẹ lọ po mẹ. ⁸Ammọninu lẹ sọ na nunina lẹ hlan Uzia: oyín etọn sọ di péai yèdọ jẹ bibiọ Egipti tọn mẹ; na é sù huhlọn talala. ⁹Humọ Uzia dó atọ̀họ́ lẹ to Jelusalẹm mẹ to hòngbo lọnglọnẹnmẹ ji podọ tó agbadò hòngbo ji, podọ to lilẹ́ adó lọ tọn ji, bo hẹn yé dohuhlọn, ¹⁰E sọ dó atọ́nò lẹ to zùngbo lọ mẹ, bo sọ kùn avúndòe susu, na é tindo kanlinpa susutalala; to dòdòklidò lọ mẹ ga, podọ to danfáfá ji: é sọ tindo oglesi lẹ po vẹnlàdètọ lẹ po to osé lẹ mẹ podọ to odànji ṣẹ́nṣẹ́nnọ lẹ mẹ; na é yíwanna oglepipò. ¹¹Humọ Uzia tindo awhàníuntọ omẹ avùnhíhò tọn lẹ, he nọ tọ́n yì nado funawhàn to ogbémẹ gbémẹ, kẹdẹdi osọha hibia yetọn tọn he yè basi gbọn Jélẹli owékantọ lọ po Maaseia gbonugán lọ po dali, to alọ Hanania tọn glọ, dopo sọn awhàngán ahọlu lọ tọn lẹ mẹ. ¹²Osọha nukọntọ owhé otọ́ lẹ tọn lẹ tọn tọn pete, yèdọ omẹ hlọnhlọnnọ tudido tọn lẹ, yín fọtọ́n awe po nuọntọ̀n po. ¹³Pòdọ alọ yetọn glọ wẹ awhànfuntọ pinplọn lẹ de te, fọtọ́n fọdekanwekoatọ́nnukunawe po fowekanweko po he nọ basi awhàn po huhlọn daho po, nado gọalọna ahọlu lọ to kẹ̀ntọ lọ ji. ¹⁴Uzia sọ wleawudai na yé, yèdọ na awhànpa lẹpo lọ, awọyínu lẹ, po owhán lẹ po, po awhàngbakún lẹ po, po awu ogàn tọn lẹ po, po ogába lẹ po, po zannu lẹ po na akòtopódindlan. ¹⁵E sọ basi adaunnú lẹ to Jelusalẹm mẹ, he yè ṣẹbasi gbọn omẹ ananọ lẹ dali, nado tin to atọ̀họ̀ lẹ go podọ to osòhùvo lẹ ji, nado nọ sé ogá lẹ po zannu daho lẹ po mọkẹdẹ. Oyín etọn sọ di yì nukọnnukọn; na yè gọalọ nẹ̃ badabada, kaka é do yín huhlọnnọ.

¹⁶Ṣigba whenuena ewọ ko yín huhlọnnọ, yè zé ayiha etọn daga mọ bọ ewọ yí gbigblẹ do wà, ewọ sọ wàylando do OKLUNỌ Jiwheyẹwhe etọn go; na ewọ yì biọ tẹmpli OKLUNỌ tọn mẹ nado mẹ́ nuyọnwán to agbà nuyọnwán tọn lọ ji. ¹⁷Azalia yẹwhenọ lọ sọ yì hòmẹ hodo e, po yẹwhenọ OKLUNỌ tọn kanwe po po e po, he yín omẹ tudotọ lẹ: ¹⁸yé sọ gbòalina Uzia ahọlu, bo dọ hlan ẹn dọmọ, E ma yín towe gba, Uzia, nado mẹ̀ nuyọnwán hlan OKLUNỌ gba, Ṣigba yẹwhenọ lẹ visunnu Aalọn tọn lẹ tọn wẹ, he yè klandowiwe lẹ nado nọ mẹ̀ nuyọnwán: tọ̀n sọn fiwiwe lọ mẹ; na hiẹ ko wàylando; mọ é ma na yín na ogbégbò towe sọn OKLUNỌ Jiwheyẹwhe de gba. ¹⁹Whenẹnu wẹ Uzia tin homẹgble; é tindo nuyọnwángbán de to alọ etọn mẹ nado mè nuyọnwán; whenuena é tin homẹgble po yẹwhenọ lẹ po, opò lọ gbà jẹgbonu to nukọn nè to yẹwhenọ lẹ lọ nukọn to ohọ̀ OKLUNỌ tọn mẹ, to adà agbà nuyọnwán tọn lọ mẹ. ²⁰Azalia yẹwhenọ nukọntọ lọ, po yẹwhenọ lẹpo po, sọ pọ̀n ẹn, bo, dayi e go, ewọ yín opòtọ de to nukọn etọn mẹ, yé sọ yawu sisẹ̀ ẹ sọn finẹ jẹgbonu; nugbo, ewlọsu yawu ga nado tòn jẹgbonu, na OKLUNỌ ko hò e wutu. ²¹Uzia ahọlu sọ yín opòtọnọ de jẹ azán okú etọn tọn gbè, bo sọ nọ nọ̀ ohọ̀ ovò de mẹ, yínyín opòtọnọ de tọn wutu; na yè sán ẹn sẹ̀ sọn ohọ̀ OKLUNỌ tọn mẹ: Jotami visunnu etọn sọ tin to owhé ahọlu tọn ji, bo to whẹ̀dana omẹ aigba lọ ji tọn lẹ. ²²Dinvie pipòtọ owálọ Uzia tọn lẹ tọn, tintan po godotọn po, wẹ Isaia yẹwhegán lọ, visunnu Amọzi tọn lọ, wlan. ²³Mọwẹ Uzia damlọn po otọ̀ etọn lẹ po; yé sọ di i to otọ̀ etọn lẹ de to odàn ṣiọdi tọn ji he yín ahọlu lẹ tọn; na yé dọmọ, Opòtónọ de wẹ ewọ: Jotani visunnu etọn sọ dùahọlu to otẹn etọn mẹ.

¹OWHÈ koatọ́n mẹho wẹ Jotani whenuena é ṣè nado to ahọludu; é sọ dùahọlu owhè fọtọ̀nnukundopo to Jelusalẹm mẹ: oyín onọ etọn tọn wẹ Jelusa viyọnnu Zadọki tọn lọ. ²E sọ wà enẹ he yín jijlọ to nukun OKLUNỌ tọn lẹ mẹ, kẹdẹdile Uzia otọ̀ etọn wà do: ṣogàn é ma biọ tẹmpli OKLUNỌ tọn mẹ. Gbẹtọ lẹ gbé sọ yí gbigble do to wiwà. ³E dó hòngbo aga ohọ̀ OKLUNỌ tọn tọn lọ, podọ to adọ́ Ofeli tọn go wẹ é dó susu do. ⁴Humọ é dó tòdaho lẹ to okọta otò Juda tọn mẹ, podọ to zùnkan lẹ mẹ wẹ é sọ dó whéhla lẹ po atọ̀họ̀ lẹ po do. ⁵E hòavùn ga po ahọlu ovi Ammọni tọn lẹ tọn po, bo sọ hugán yé. Ovi Ammọni tọn lẹ sọ na talẹnti fataka tọn kanweko e to owhè doponẹ mẹ, po ojlẹ fọtọ́n ao oli tọn po, po fọtọ́n ao bale tọn po Sù sọmọ wẹ ovi Ammọni tọn lẹ na hlan ẹn, to owhè awetọ mẹ ga, podọ to atọ̀ntọ mẹ. ⁶Mọwẹ Jotani lẹzun hlọnhlọnnọ, na é tò aliho etọn lẹ to OKLUNỌ Jiwheyẹwhe etọn nukọn wutu. ⁷Dinvie pipòtọ owalọ Jotani tọn lẹ tọn, po awhàn etọn lẹpo po, po aliho etọn lẹ po, dayi e go, yè wlan yé to owé ahọlu Islaeli po Juda po tọn lẹ mẹ. ⁸Owhè koatọ́n mẹho wẹ ewọ whenuena é ṣẹ̀ nado to ahọludu, bo sọ dùahọlu owhè fọtọ̀nnukundopo to Jelusalẹm mẹ. ⁹Jotani sọ damlọn po otọ̀ etọn lẹ po, yé sọ di i to tòdaho Davidi tọn lọ mẹ: Ahazi visunnu etọn sọ dùahọlu to otẹn etọn mẹ.

¹OWHÈ òko mẹho wẹ Ahazi whenuena é ṣè nado to ahọludu; é sọ dùahọlu owhè fọtọ̀nnukundopo to Jelusalẹm mẹ: é ma sọ wà enẹ he yín jijlọ to nukun OKLUNỌ tọn lẹ mẹ, di Davidi otọ̀ etọn gba. ²Ṣigba é zinzọnlin to aliho ahọlu Islaeli tọn lẹ tọn lẹ mẹ, bo sọ basi boṣiọ kìnkọ̀n lẹ na Baalimi. ³Humọ é mè nuyọnwán to agbadò visunnu Hinnọmi tọn lọ tọn mẹ, bo sọ mẹ̀ ovi etọn lẹ to miyọn mẹ, kẹdẹdi ahẽlunú kosi lẹ tọn lẹ, mẹhe OKLUNỌ bẹ́ dlan gbonu to ovi Islaeli tọn lẹ nukọn. ⁴E sọ to avọ̀sán bo to nuyọnwán mè to otẹn yìji lẹ mẹ, podọ to okọta lẹ go, podọ to atin mú lẹpo glọ. ⁵Enẹwutu wẹ OKLUNỌ Jiwheyẹwhe etọn do jó e do alọ ahọlu Silia tọn tọn mẹ; yé sọ hò e, bo sọ bẹ́ yì sọn etọn mẹ mẹsusu mẹmẹglọ gégé tọn de yì, bo sọ hẹn yé wá jẹ Damasku. Yè sọ jó e ga do alọ ahọlu Islaeli tọn tọn mẹ, mẹhe yí hùhù daho de do hò e ⁶Na Pẹka visunnti Lẹmalia tọn hù fọtọ́n kàntọ̀n to Juda mẹ to azán dopo mẹ, popo yé tọn omẹ tudotọ lẹ; na yé ko gbé OKLUNỌ, Jiwheyẹwhe otò yetọn lẹ tọn dai wutu. ⁷Zikli, dawe hlọnhlọnnọ Eflaimi tọn de, hù Maaseia visunnu ahọlu tọn lọ, po Azlìkami ogándutọ owhé lọ tọn po, po Elkana he tin to ahọlu lọ de po. ⁸Ovi Islaeli tọn lẹ sọ bẹ́ mẹglọnọ fọtọ́n fọde yọnnusi lẹ, visunnu lẹ, po viyọnnu lẹ po, yì sọn mẹmẹsunnu yetọn lẹ mẹ, bo sọ bẹ́ ogblannu susu ga sọn yé de, bo sọ hẹn ogblannu lẹ lọ wá jẹ Lamalia. ⁹Ṣigba yẹwhegán OKLUNỌ tọn de tin to finẹ, oyín mẹhetọn yín Odẹdi: é tòn yì nado pẹ́ awhànpa he wá jẹ Samalia lẹ, bo dọ hlan yé dọmọ, Dayi e go, na OKLUNỌ, Jiwheyẹwhe otọ̀ mítọn lẹ tọn tin homẹgble po Juda po wutu, wẹ é do jó yé do alọ mítọn mẹ, mìwlẹ ko sọ hù yé to adánjìjẹ de mẹ hẹji yì jẹ olọn. ¹⁰Podọ dinvie míwlẹ to wédo nado whla do oglọ Juda po Jelusalẹm po tọn na mẹglọnọ-sunnu po mẹglọnọyọnnu po hlan mì: ṣigba é ma ka tin finẹ yèdọ to mì de ylando mítọn titi tọn lẹ do OKLUNỌ Jiwheyẹwhe mítọn go? ¹¹Enẹwutu dinvie mì ni sè mi, bo gọ̀ mẹglọnọ lẹ lọ dohlan, he mì ko do wle mẹglọno sọn mẹmẹsunnu mítọn lẹ mẹ: na homẹgble zògbe OKLUNỌ tọn tin to mì ji. ¹²Whenẹnu wẹ dẽlẹ sọn nukọntọ ovi Eflaimi tọn lẹ tọn lẹ mẹ, Azalia visunnu Johanani tọn lọ, Bẹlẹkia visunnu Mesilẹmọti tọn lọ, po Jehizkia visunnu Ṣalumi tọn lọ po, po Amasa visunnu Hadlai tọn lọ po, fọ́n ṣite do yé he gọ̀ sọn awhàn lọ lẹ go, ¹³bo dọ hlan yé dọmọ, Míwlẹ ma na hẹn meglọnọ lẹ lọ wá hòmẹ ofi gba: na míwlẹ wedona enẹ he na hẹn ylando de do OKLUNỌ go wá miwlẹ ji, nado hẹn ylando mítọn lẹ po oylanwà mítọn po jideji: na daho wẹ oylanwà mítọn, homẹgble zògbe sọ tin finẹ to Islaeli ji. ¹⁴Mowẹ ome gbajamẹ lẹ lọ jó meglọnọ lẹ lọ po ogblannu lẹ lọ po dai to ahọvi lẹ po agùn lẹpo po nukọn. ¹⁵Omẹ he yè ko ylọ gbọn oyín dali lẹ fọ́n tite, bo bẹ́ mẹglọnọ lẹ lọ, po ogblannu lẹ lọ po bo doavọ̀ ehe yè hẹn jẹmẹ́ to yé ṣẹnṣẹn lẹpo, bo tò yé, bo doafọpana yé, bo na yé nado dù podọ nado nù, bo sọ samisisána yé, bo bè madogánnọ sọn yé mẹ lẹpo yì to kẹtẹkẹtẹ lẹ ji, bo hẹn yé wá jẹ Jẹliko, tòdaho atin odó tọn lẹ tọn, jẹ mẹmẹsunnu yetọn lẹ de: whenẹnu wẹ yé lẹ́gọ̀ do Samalia.

¹⁶To ojlẹ nẹ mẹ wẹ Ahazi ahọlu domẹhlan ahọlu Asilia tọn de nado gọalọ nẹ. ¹⁷Na Edọminu lẹ ko sọ vọ́ wá bo ko hò Juda, bo sọ bẹ́ mẹglọnọ lẹ yì. ¹⁸Filistini lẹ ga ko glọn tòdaho dòdòklido tọn lẹ demẹ, podo sọn hùwaji Juda tọn mẹ, bo ko yí Bẹti-semẹsi, po Aijalọni po, po Gedeloti po, po Soko po gọ́na otò etọn lẹ, po Timna po gọ́na otò etọn lẹ, Gimzo ga po otò etọn po: yé sọ nọ nò finẹ. ¹⁹Na OKLUNỌ hẹn Juda wá odò na Ahazi ahọlu Islaeli tọn wutu; na é ko yí sanwhiwhlẹ do zán to Juda mẹ, bo sọ wàylan badabada do OKLUNỌ go ²⁰Tilgati-pilnẹseli ahọlu Asilia tọn sọ wá e de, bo bianukun nẹ̃, ṣigba ma nahuhlọn ẹn gba. ²¹Na Ahazi ko bẹ́ mimá de sọn ohó OKLUNỌ tọn mẹ yì, podọ sọn ohọ̀ ahọlu lọ po ahọvi lẹ po tọn mẹ, bo na ẹn hlan ahọlu Asilia tọn lọ: ṣigba é ma gọalọ nẹ̃ gba. ²²Podọ to ojlẹ nukunbia etọn tọn me wẹ é sọ vọ́ ylanwà do OKLUNỌ go te, Ahazi ahọlu he dopolọ. ²³Na é sánvọ́ hlan yẹwhe Damasku tọn, he hò e lẹ: é dọmọ, Na yẹwhe ahọlu Silia tọn lẹ tọn lẹ nọ gọalọna yé wutu, enẹwutu wẹ yẹn na nọ sánvọ́ hlan yé, na yé nido gọalọna mi. Ṣigba nuvàpò e tọn wẹ yé, po Islaeli lẹpo po tọn. ²⁴Ahazi sọ bẹ́ nuzinzán ohọ̀ Jiwheyẹwhe tọn mẹ tọn lẹ plidopọ, bo sán do flinflin nuzinzán ohọ̀ Jiwheyẹwhe tọn mẹ tọn lẹ, bo sọ sú ohọ̀n ohọ̀ OKLUNỌ tọn tọn lẹ; é sọ basi agbà lẹ to lọnglọnẹn Jelusalẹm tọn dopodopo mẹ. ²⁵Podọ to tòdaho to ovò Juda tọn lẹpo mẹ wẹ é basi otẹn yìji lẹ do nado nọ mè nuyọnwán hlan yẹwhe devo lẹ, bo sọ hẹnhomẹgble OKLUNỌ, Jiwheyẹwhe otọ́ yetọn lẹ tọn, hlan adi. ²⁶Dinvie pipòtọ owalọ etọn lẹ tọn, po aliho etọn lẹpo po, tintan po godotọn po, dayi e go, yè wlan yé to owẹ́ ahọlu Juda po Islaeli po tọn lẹ tọn mẹ. ²⁷Ahazi ṣọ damlọn po otọ́ etọn lẹ po, yé sọ di i to tòdaho lọ me, yèdọ tó Jelusalẹm mẹ; na yé ma hẹn ẹn wá biọ oyọ̀whe ahọlu Islaeli ton lẹ tọn lẹ mẹ gba: Hezekia visunnu etọn sọ dùahọlu to otẹn etọn mẹ.

¹HẸZEKIA ṣẹ̀ nado to ahọludu whenuena é yín owhè koatọ́n mẹho; é sọ dùahọlu owhè koatọ́nnukunẹnẹ to Jelusalẹm mẹ: oyín onọ etọn tọn wẹ Abija viyọnnu Zekalia tọn lọ. ²E sọ wà enẹ he yín jijlọ to nukun OKLUNỌ tọn lẹ mẹ, kẹdẹdi ehe Davidi otọ́ etọn ko wà lẹ. ³Ewọ to owhè tintan ahọludu etọn tọn mẹ, to osùn tintan mẹ, hùn ohọ̀n ohọ̀ OKLUNỌ tọn tọn lẹ, bo vọ́ yé jlado. ⁴E sọ hẹn yẹwhenọ lẹ po Levinu lẹ po wá họ̀mẹ, bo bẹ́ yé plidopọ do otẹn gbigblo lọ mẹ to whèzẹtẹn wàji, ⁵bo dọ hlan yé dọmọ, Mì sè, mì Levinu lẹ emì; mì lẹ mìde wé dinvie, bo sọ lẹ́ ohọ̀ OKLUNỌ tọn, Jiwheyẹwhe otọ́ mítọn lẹ tọn wé, bo sọ bẹ́ odìhó lọ tọ́n jẹgbónu sọn otẹn wiwe lọ mẹ. ⁶Na otọ́ mítọn lẹ ko wàylando, bo sọ wà enẹ he yín oylan to nukun OKLUNỌ Jiwheyẹwhe mítọn tọn mẹ, bo ko sọ gbẹ́ ẹ dai, bo sọ lé nukunmẹ yetọn lẹ sẹ́ sọn fininò OKLUNỌ tọn go, bo ko lẹ́ godo yetọn lẹ. ⁷Yé ko sọ sú ohọ̀n agbasẹ̀ tọn lẹ ga, bo ko si miyọngbán lẹ, bo ma sọ to nuyọnwán mé gba, kavi na avọ́ nunina mimẹ̀ lẹ to otẹn wiwe lọ mẹ hlan Jiwheyẹwhe Islaeli tọn gba. ⁸Enẹwutu wẹ homẹgble OKLUNỌ tọn do tin to Juda po Jelusalẹm po ji, bọ é sọ do jó yé nado yín tùnhlan godo po nukọn po, nado yín awujiji de, po pislọdidè de po, dile mì yí nukun mítọn lẹ do mọ do. ⁹Na, pọn, otọ́ mítọn lẹ ko jai gbọn ohi lọ dali, visunnu mítọn lẹ po viyọnnu lẹ po po asi mítọn lẹ po sọ tin to omẹglọnọ mẹ na ehe. ¹⁰Dinvie é tin to ayiha ṣie mẹ nado basi alẹ̀nù de po OKLUNỌ po, Jiwheyẹwhe Islaeli tọn, na adi zògbe etọn nido diọkọ sọn mi de. ¹¹Visunnu ṣie emì, mì yín awugbọpònọ blo: na OKLUNỌ ko dè mì nado nọ ṣite to e nukọn, nado nọ wàdevizọ́n hlan ẹn, podọ na mì ni do yín devizọ́nwàtọ etọn lẹ, bo sọ nọ mẹ̀ nuyọnwán.

¹²Whenẹnu wẹ Levinu lẹ tite, Mahati visunnu Ámasai tọn lọ, po Joẹli visunnu Azalia tọn lọ po, sọn visunnu Kohatinu lẹ tọn lẹ mẹ: podọ sọn visunnu Mẹlali tọn lẹ mẹ, Kisi visunnu Abdi tọn lọ, po Azalia visunnu Jehalelẹli tọn lọ po: podọ sọn Gẹlṣọninu lẹ mẹ, Joa visunnu Zimma tọn lọ, po Edẹni visunnu Joa tọn lọ po: ¹³podọ sọn visunnu Elizafani tọn lẹ mẹ, Ṣimli po Jeuẹli po: podọ sọn visunnu Asafì tọn lẹ mẹ, Zekalia po Matania po: ¹⁴podọ sọn visunnu Hemani tọn lẹ mẹ, Jehuẹli po Ṣimẹi po: podọ sọn visunnu Jedutuni tọn lẹ mẹ, Ṣemaia po Uzlẹli po. ¹⁵Yé sọ pli mẹmẹsunnu yetọn lẹ, bo lẹ̀ yéde wé, bo yì hòmẹ, kẹdẹdi gbèdide ahọlu lọ tọn gbọn ohọ́ OKLUNỌ tọn lẹ lọ dali, nado klọ́ ohọ̀ OKLUNỌ tọn lọ wé. ¹⁶Yẹwhenọ lẹ lọ sọ yì hèmẹ jẹ hòmẹ nukọn ohọ̀ OKLUNỌ tọn lọ tọn mẹ, nado klọ́ ẹ wé, bo sọ hẹn mawé he yé mọ to tẹmpli OKLUNỌ tọn lọ mẹ lẹpo tọ́n wá biọ awánu ohọ́ OKLUNỌ tọn lọ tọn mẹ. Levinu lẹ sọ bé ẹ bo hẹn ẹn tọ́n jẹ gbangba jẹ tọ̀pẹsẹ Kidlọni kòn. ¹⁷Dinvie yé ṣẹ̀ to azán tintan osùn tintan tọn ji nado lẹ̀wé, podọ to azán ṣinatòntọ osùn lọ tọn gbè wẹ yé wá jẹ agbasẹ̀ OKLUNỌ tọn kọ̀n; yé sọ lẹ̀ ohọ̀ OKLUNỌ tọn lọ wé to azán ṣinatòn lẹ lọ mẹ: podọ to azán fọtọ̀nnukundopotọ osùn tintan tọn gbè yé basi opòdo de. ¹⁸Whenẹnu wẹ yé yì hòmẹ jẹ Hezekia ahọlu lọ de to ohònmẹ, bo dọmọ, Mí ko kló ohò OKLUNỌ tọn lọ wé, po agbà avọ́ nunina mimẹ̀ po, gọ́na nuzinzán etọn lẹpo, po tafo akla-adlọ tọn lọ po, gọ́na nuzinzán etọn lẹ. ¹⁹Humọ nuzinzán lẹpo, he Ahazi ahọlu to ahọludu etọn mẹ bẹ́ yìngbé lẹ whenuena é wàylando, wẹ mí ko wleawuna bo sọ lèwé; bo, dayi e go, yé tin to agbà OKLUNỌ tọn lọ nukọn.

²⁰Whenẹnu wẹ Hẹzekia ahọlu tite to afọnnufũ, bo pli ahọvi tòdaho lọ tọn lẹ, bo hẹji yì jẹ ohọ̀ OKLUNỌ tọn lọ mẹ. ²¹Yé sọ hẹn oyìnsú ṣinawe wá, po agbò ṣinawe po, po lẹngbọvu ṣinawe po, po alunkùn ṣinawe po, na avọ́ nunina ylando tọn de na ahọludu lọ podọ na fiwiwe lọ na Juda. E sọ degbèna yẹwhenọ visunnu Aalọn tọn lẹ lo nado yí yé do sánvọ́ to agbà OKLUNỌ tọn lọ ji. ²²Mowẹ yé hù oyìnsú lẹ lọ, yewhenọ lẹ sọ yi ohùn lọ, bo mì in do agbà lọ go: yé sọ hù agbò lẹ lọ, bo sọ mì ohùn lọ do agbà lọ ji: yé sọ hù lẹngbọvu lẹ lọ ga, bo sọ mì ohùn lọ do agbà lọ ji. ²³Yé sọ hẹn alunkùn lọ lọ wá sẹpọ́ na avọ́ nunina ylando lọ tọn to ahọlu lọ po agùn lọ po nukọn; yé sọ bé alọ yetọn lẹ do yé ji: ²⁴yẹwhenọ lẹ lọ sọ hù yé, yé sọ yí ohùn yetọn do basi avọ́ nunina ylando de tọn to agbà lọ ji, nado basi ovẹ̀se na Islaeli lẹpo: na ahọlu ko degbè na yè ni do basi ovó nunina mimẹ̀ lọ po avọ́ nunina ylando lọ tọn po na Islaeli lẹpo. ²⁵E sọ zé Levinu lẹ do ohọ̀ OKLUNỌ tọn lọ mẹ po ajògàn lẹ po, po asiazọ́n hànjinu lẹ po, po ajalẹn lẹ po, kẹdẹdi gbèdide Davidi tọn, po Gadi numọtọ ahọlu tọn lọ tọn po, po Natani yẹwhegán lọ po: na gbèdide tin sọn OKLUNỌ de gbọn yẹwhegán etọn lẹ dali. ²⁶Levinu lẹ sọ site po nuzinzán Davidi tọn lẹ po, podọ yẹwhenọ po opẹ̀n lẹ lọ po. ²⁷Hẹzekia sọ degbè nado na avọ́ nunina mimẹ̀ lọ to agbà lọ ji. Whenuena avọ́ nunina lọ ṣẹ̀, ohàn OKLUNỌ tọn lọ ṣè ga, po opẹ̀n lẹ po, dopọ po nuzinzán Davidi ahọlu Islaeli tọn tọn lẹ po. ²⁸Agùn lẹpo sọ litai, hànjitọ lẹ to hànji, opẹ̀nkúntọ lẹ to kúnkún; ehe lẹpo yìyìmọ kaka yè do basi avọ́ nunina mimẹ̀ pó. ²⁹Whenuena yé ko basi opòdo avọ́sán tọn de, ahọlu lọ po mẹhe tin to e de lẹpo po dẹ́ yéde bo litai. ³⁰Humọ Hẹzekia ahọlu po ahọvi lẹ lọ po degbèna Levinu lẹ nado yí ohó Davidi tọn lẹ, po Asafì numọtọ lọ tọn po do jihàn pipà tọn lẹ hlan OKLUNỌ. Yé SỌ yí homẹhùn do jihàn pipà tọn lẹ, yé sọ dó ota yetọn lẹ bo litai. ³¹Whenẹnu wẹ Hẹzekia gblọn bo dọmọ, Mìwlẹ ko klan mìde do wiwe dinvie, mì sẹpọ́ wá bo hẹn avọ́sánu lẹ po avọ́ nunina opó tọn lẹ po wá biọ ohọ́ OKLUNỌ tọn lọ mẹ. Agùn lọ sọ hẹn avọ́sánnu lẹ po avọ́ nunina opó tọn lẹ po wá hòmẹ; podọ susu mẹhe tin sọn ayiha ojlonọ de mẹ lẹ hẹn avọ́ nunina mimẹ̀ lọ wá. ³²Osọha avọ́ nunina mimẹ̀ lẹ lọ tọn, he agùn lọ hẹnwá, yín oyìnsú kandegbàn, po agbò kanweko po, po lẹngbọvu fọde po: ehe lẹpo tin na avọ́ nunina mimẹ̀ de hlan OKLUNỌ. ³³Onú klandowiwe lọ wẹ oyín nuọntọ̀n po lẹngbọ fọtọ́n atọ̀n po. ³⁴Ṣigba yẹwhenọ lẹ tin whè gbahu, sọmọ bọ yé ma sọgan kọ́n avọ́ nunina mimẹ̀ lẹ lọ: enẹwutu wẹ mẹmẹsunnu yetọn Levinu lẹ do gọalọna yé, kaka yè do dodòna azọ́n lọ, podọ kaka yẹwhenọ lọ do lẹ̀ yéde wẹ́: na Levinu lẹ yín tenọglinọ to ayiha mẹ nado lẹ yéde wé hú yẹwhenọ lẹ lọ. ³⁵Avó nunina mimẹ̀ le ga tin to ogégé mẹ, po ojó avọ́ nunina jijọho tọn lẹ lọ po, po avọ́ nunina nùnù lẹ po na avọ́ nunina mimẹ̀ dopodopo. Mowẹ yè tò sinsẹ̀n ohọ̀ OKLUNỌ tọn lọ tọn do kannukannu. ³⁶Hẹzekia sọ jaya po gbẹtọ lẹpo po, na enẹ he Jiwheyẹwhe ko wleawudai na gbẹtọ lẹ lọ tọn wutu: na ajiji wẹ yè wà onú lọ.

¹HẸZEKIA sọ domẹhlan Islaeli po Juda lẹpo po, bo sọ wlan ohówé lẹ ga hlan Eflaimi po Manassẹ po, na yé ni do wá jẹ ohọ́ OKLUNỌ tọn mẹ to Jelusalẹm, nado payi ojuwayi go hlan OKLUNỌ, Jiwheyẹwhe Islaeli tọn. ²Na ahọlu ko yí hónamẹ, po ahọvi etọn lẹ po, po agùn lẹpo po to Jelusalẹm mẹ, nado nọ payi ojuwayi go to osùn awetọ mẹ. ³Na yé ma sọgan payi e go to ojlẹ nẹ mẹ gba, na yẹwhenọ lẹ ma ko ló yéde wé to osọha sùpé mẹ gba wutu, mọ gbẹtọ lẹ lọ ma ko pli yéde dopọ to Jelusalẹm gba. ⁴Onú ọ sọ yín jijlọ to nukun ahọlu lọ tọn lẹ mẹ po agùn lọ lẹpo po tọn mẹ. ⁵Mowẹ yé sọ do aṣẹ̀ de ai nado basi lila lẹ́do Islaeli lẹpo, sọn Beẹli-seba mẹ yèdọ jẹ Danì, na yé ni do wá nado payi ojuwayi go hlan OKLUNỌ, Jiwheyẹwhe Islaeli tọn to Jelusalẹm: na yé ma ko nọ payi e go sọn ojlẹ dindẹn mẹ to hùnkọ mọtọnnkọ mẹ dile yè wlan ẹn do gba. ⁶Mowẹ wégbànhẹntọ lẹ lọ yì po ohówé ewlẹ po sọn ahọlu po ahọvi etọn lẹ po de lẹ́do Islaeli po Juda lẹpo po, podọ kẹdẹdi gbèdide ahọlu tọn, dọmọ, Mì ovi Islaeli tọn emì, mì ni sọ vọ́ gọ̀ do OKLUNỌ de, Jiwheyẹwhe Ablaham, Isaki, podọ Islaeli tọn, na é nido lẹ́gọ̀ do pipòtọ he yè hẹn họ̀ngán sọn mì mẹ sọn alọ ahọlu Asilia tọn lẹ tọn mẹ de. ⁷Mìwlẹ sọ tin di otọ́ mítọn lẹ blo, podọ di mẹmẹsunnu mítọn lẹ, he wàylando do OKLUNỌ go, Jiwheyẹwhe otọ́ yetọn lọ tọn, sọmọ bọ é jó yé hlan gbigbà, dile mi to mimọ do ⁸Dinvie mìwlẹ sọ yín tasinẹntọ blo, dile otọ́ mítọn lẹ yín; ṣigba mì ni jó mìde hlan OKLUNỌ, bo sọ biọ fiwiwe etọn me, he é ko lẹ́wé doidoi, bo sọ nọ to OKLUNỌ Jiwheyẹwhe mítọn sẹ́n, na adi zògbe etọn nido diọ sọn mì de. ⁹Na eyín mì sọ vó diọ do OKLUNỌ de, mẹmẹsunnu mítọn lẹ po ovi mítọn lẹ po na mọ lẹblanu to yé he to yé planyì mẹglọnọme lọ nukọn, bo na sọ vọ́ gó wá biọ aigba he mẹ: na dagbewanyinọ po lẹblanu nọ po wẹ OKLUNỌ Jiwheyẹwhe mítọn, bo ma na sọ diọ nukunmẹ etọn sọn mì de gba, eyín mìwlẹ lẹ́gò do e de. ¹⁰Mowẹ wégbànhẹntọ lẹ lọ gbọn tòdaho mẹ jẹ tòdaho mẹ lódo otò Eflaimi po Manassẹ po tọn, yèdọ jẹ Zẹbuluni: ṣigba yé kò yé hlan oṣànkò, bo sọ to yé vlẹ. ¹¹Ṣogãn susu sọn Aṣeli po Manassẹ po mẹ podọ sọn Zẹbuluni mẹ hùwhẹ́ yéde, bo wá jẹ Jelusalẹm. ¹²To Juda mẹ ga wẹ alọ Jiwheyẹwhe tọn tin te nado na ayiha dopo yé, nado nọ basi gbèdide ahọlu lọ tọn po ahọvi le lọ tọn po gbọn ohọ́ OKLUNỌ tọn dali. ¹³Emẹ gbẹtọ plidopọ do to Jelusalẹm, nado payi hùnwhẹ akla madotón tọn go to osun awetọ mẹ, agùn daho talala de. ¹⁴Yé sọ tite bo bé agbà he tin to Jelusalẹm mẹ lẹ sẹ́, podọ agbà na nuyọnwán lẹpo wẹ yé bẹ́ sé, bo bé yé dlan do tòpẹṣẹ Kidlọni mẹ. ¹⁵Whenẹnu wẹ yé hù juwayì lọ to azán wiẹnẹtọ osùn awetọ lọ tọn gbè: yẹwhenọ lẹ po Levinu lẹ po sọ yín winyannọ, bo lẹ́ yéde wé, bo sọ hẹn avọ́ nunina mimẹ̀ lẹ wá biọ ohọ̀ OKLUNỌ tọn mẹ. ¹⁶Yé sọ ṣite to otẹn yetọn mẹ kẹdẹdi okànnu yetọn, kẹdẹdi osẹ́n Moṣe omẹ Jiwheyẹwhe tọn lọ tọn: yẹwhenọ lẹ lọ mì ohùn lọ he yé mọyí sọn alọ Levinu lẹ tọn mẹ. ¹⁷Na mẹsusu wẹ tin to agùn lọ mẹ he ma ko lẹ́ yéde wé gba: enẹwutu we Levinu lẹ do tindo asọ ojuwayi lẹ lọ hùhù tọn na omẹ dopodopo he ma yín wiwe, nado lẹ́ yé wé hlan OKLUNỌ. ¹⁸Na omẹ susu gbẹtọ lẹ tọn de, yèdọ susu sọn Eflaimi po Manassẹ po mẹ, Isakali po Zẹbuluni po, ma ko klọ́ yéde wé gba, gãnṣo wẹ yé dù ojuwayi lọ gbọ̀nvo hú le yè wlan ẹn do. Na Hẹzekia ko hòdẹ́ na yé, dọmọ, OKLUNỌ dagbe lọ ni jona omẹ dopodopo. ¹⁹He zé ayiha etọn do nado din Jiwheyẹwhe, OKLUNỌ lọ, Jiwheyẹwhe otọ́ etọn lẹ tọn, yín yè ma tlẹ ko klọ́ ẹ wé kẹdẹdi yìnyìn fiwiwe lọ tọn. ²⁰OKLUNỌ sọ tuntóai hlan Hẹzekia, bo sọ hẹn azọ̀ngbọna gbẹtọ ewlẹ. ²¹Ovi Islaeli tọn lẹ he tin finẹ to Jelusalẹm sọ payi hùnwhé akla madotón tọn lọ go azán ṣinawe po homẹhùn daho po: Levinu lẹ po yẹwhenọ lẹ po sọ to OKLUNỌ pà to gbèpogbè, yí hànjinu gbèzìnzìnnọ lẹ do to hànji hlan OKLUNỌ. ²²Hẹzekia sọ yí homẹmiọn do dọhó hlan Levinu he yè hẹn yọnana to sinsẹ̀n OKLUNỌ tọn mẹ lẹpo. Mowẹ yé dù hùnwhẹ́ lọ lédo na azán ṣinawe, bo to avọ́sánnu avọ́ nunina jijọho tọn lẹ na, bo sọ to ogbèyí basi hlan OKLUNỌ, Jiwheyẹwhe otọ́ yetọn lẹ tọn. ²³Agùn lọ pete sọ yi hónamẹ nado payi azán ṣinawe awetọ go: yé sọ yí homẹhùn do payi azán ṣinawe awetọ go. ²⁴Hẹzekia ahọlu Juda tọn ko na hlan agùn lọ na avọ́ le oyínsú fọtọ́n po lẹngbọ fọtọ́n ṣinawe po; ahọvi lẹ sọ na hlan agùn lọ oyìnsú fọtọ́n po lẹngbọ fọtọ́n ao po: osọha yẹwhenọ lẹ tọn susu de sọ lé yéde wé. ²⁵Agùn Juda tọn lẹpo gọ́na yẹwhenọ lẹ po Levinu lẹ po po agùn he sọn Islaeli lẹpo po, po ojonọ he sọn aigba Islaeli tọn ji wá lẹ po, po he nọ nò Juda po, sọ jaya. ²⁶Mọwẹ homẹhùn daho sọ tin finẹ to Jelusalẹm mẹ: na sọn osã Sọlọmọni visunnu Davidi tọn ahọlu Islaeli tọn lọ tọn mẹ hunkọ mọtọn de ma ko tin to Jelusalẹm mẹ gba. ²⁷Whenẹnu wẹ yẹwhenọ lẹ po Levinu lẹ po tite bo dona gbẹtọ lẹ: yè sè ogbè yetọn, odẹ́ yetọn sọ hẹji wá jẹ fininò etọn wiwe mẹ, yèdọ jẹ olọn mẹ.

¹DINVIE whenuena yè hẹn ehe lẹpo vọ̀, Islaeli he tin finẹ lẹpo tọ́n yì jẹ tòdaho Juda tọn lẹ mẹ, bo gbà odòtin lẹ do flinflin, bo kùn Aṣelimi liai, bo gbà otẹn yìji lẹ po agbà lẹ po liai sọn Juda po Bẹnjamini lẹpo po mẹ, to Eflaimi mẹ ga po Manassẹ po, kaka yé ko do và yé mepó. Whenẹnu wẹ ovi Islaeli tọn lẹpo lẹ́gọ̀, omẹ dopodopo do nutindo etọn kọ̀n, biọ tòdaho yetọn titi lẹ mẹ. ²Hẹzekia sọ dè okànta yẹwhenọ lẹ po Levinu lẹ tọn po kẹdẹdi okànta yetọn lẹ, omẹ dopodopo kẹkẹdi sinsẹ̀n etọn, yẹwhenọ lẹ lọ po Levinu lẹ lọ po na avọ́ nunina mimẹ̀ lọ podọ na avọ́ nunina jijọho tọn lẹ, nado nọ wàdẹvizọ́n, podọ nado nọ na avọ́ nunina opẹ́ lẹ tọn, podọ nado nọ na pipà to họ̀ngbo osla OKLUNỌ tọn lẹ tọn lọ mẹ. ³E sọ dè mimá ahọlu tọn ga sọn agbàn etọn mẹ na avọ́ nunina mimẹ̀ lẹ, nado dọ, na avọ́ nunina mimẹ̀ afọnnu po whèjai tọn lẹ po, po avọ́ nunina mimẹ̀ lẹ po na gbọjẹzán lẹ, podọ na osùn yọ́yọ́ lẹ lọ, podọ na hùnwhẹ́ didè lẹ, dile yè wlan to osẹ́n OKLUNỌ tọn mẹ do. ⁴Humọ é degbèna gbẹtọ he nọ nọ̀ Jelusalẹm mẹ lẹ nado nọ na mimá yẹwhenọ lẹ po Levinu lẹ tọn po, na yé nido jó yéde hlan osén OKLUNỌ tọn. ⁵Ṣaun le gbèdide tón wá, wẹ ovi Islaeli tọn lẹ na to ogégó mẹ sinsóntintan gbadó tọn, ovón, po amì po, po owín po, po jideji danji tọn lẹpo po; podọ madao onú lẹpo tọn wẹ yé hẹnwá họ̀mẹ to ogégó mẹ. ⁶Ovi Islaeli po Juda po tọn lẹ, he nọ nọ́ tòdaho Juda tọn lẹ mẹ, yewlẹ ga hẹn madao oyín po lẹngbọ lẹ po tọn wá hòmẹ, po madao onú klandowiwe lẹ tọn po he yè do dopà hlan OKLUNỌ Jiwheyẹwhe yetọn, bo sọ bẹ́ yé do gọ̀nùgọ̀nù. ⁷To osùn atọ̀ntọ mẹ yé ṣẹ̀ nado dó dòdo ogònù lẹ tọn ai, bo sọ vẹ̀ yé to osùn ṣinawetọ mẹ. ⁸Whenuena Hẹzekia po ahọvi lẹ lọ po wá bo mọ ogọ̀nù lẹ lọ, yé dona OKLUNỌ, po Islaeli omẹ etọn lẹ po. ⁹Whenẹnu wẹ Hẹzekia sọ kanbiọ to yẹwhenọ lẹ po Levinu lẹ po de gbọn ogọ̀nù lẹ lọ tọn dali. ¹⁰Azalia ogán yẹwhenọ lọ, sọn owhé Zadọki tọn gbè, gblọn nẹ́ bo dọmọ, Sọn whenuena gbẹtọ ṣẹ̀ nado to avọ́nú lẹ hẹnwá biọ ohọ́ OKLUNỌ tọn mẹ, míwlẹ ko dù bo sọ tindo pékọ, bo sọ-pò susu dai: na OKLUNỌ ko dona omẹ etọn lẹ; podọ enẹ he yè pòdai wẹ obẹ́pli daho he. ¹¹Whenẹnu wẹ Hẹzekia degbè nado wleawu abọ̀ lẹ tọn dai to ohọ̀ OKLUNỌ tọn mẹ; Yé sọ wleawuna yé. ¹²Yé sọ hẹn avónú lẹ wá hòmẹ po madao lẹ lọ po po onú klandowiwe lẹ po po nugbowà po: Konania Levinu lọ wẹ ogándutọ to yé ji, podọ Ṣimei nọ visunnu etọn wẹ awetọ. ¹³Jehieli, po Azalia po, po Nahati po, pọ Asahẹli po, po Jelimọti po, po Jozabadi po, po Ellẹli po, po Ismakia po, po Mahati po, po Bẹnaia po, wẹ nugopóntọ lẹ to alọ Konania po Ṣimei nọvisunnu etọn po tọn glọ, gbọn didè Hẹzekia ahọlu lọ tọn dali, po Azalia ogándutọ ohọ́ Jiwheyẹwhe tọn lọ tọn po. ¹⁴Podọ Kọle visunnu Imna Levinu lọ tọn, họ̀njidetọ to whèzẹntẹn họ̀ngbo ji, tin to avọ́ nunina ojlonọ Jiwheyẹwhe tọn lẹ ji, nado nọ má avọ́nú OKLUNỌ tọn lẹ, po onú wiwe gbahugbahu lẹ po. ¹⁵Podọ to oglọ ewọ tọn wẹ Edẹni, po Miniamini po, po Jeṣua po, po Ṣemaia po, po Amalia po, po Ṣekania po te, to tòdaho yẹwhenọ lẹ tọn lẹ mẹ, to azọ́ntẹn dido yetọn mẹ, nado nọ na hlan mẹmẹsunnu yetọn lẹ gbọn okànta lẹ dali, podọ hlan daho di hlan pẹvi: ¹⁶Gọ́na yé he yè hia gbọn whédo dali sọn asu lẹ mẹ, sọn owhè atọ̀n mẹho yìaga, yèdọ omẹ dopodopo he biọ ohọ̀ OKLUNỌ tọn mẹ, dile azọ́n azán dopodopo tọn biọ do, na sinsẹ̀n yetọn to asẹ yetọn lẹ mẹ kẹdẹdi okànta yetọn; ¹⁷podọ yé he yè hia gbọn owhedo dali lẹ sọn yẹwhenọ lẹ mẹ gbọn owhé otọ́ yetọn lẹ tọn lẹ dali, po Levinu lẹ po sọn owhè òko mẹho yìaga, to asẹ yetọn lẹ mẹ gbọn okànta yeton lẹ dali; ¹⁸podọ yé he yè hia gbọn vhédo dali lẹ sọn omẹ flinflin yetọn lẹpo mẹ, asi yetọn lẹ, po visunnu yeton lẹ po, po viyọnnu yetọn lẹ po, gbọn whendo lẹpo mẹ: na to azọ́ntẹn dido yetọn mẹ yé lẹ yéde wé to owiwe mẹ: ¹⁹Na visunnu Aalọn Yewhẹnọ lọ ton lẹ ga, he tin to danjì agboji todaho yetọn lẹ tọn tọn ji me, to todaho susu mẹ, ome he yè ylọ gbọn oyìn dali lẹ tin finẹ, nado nọ na mimá lẹ hlan asú lẹpo to yẹwhenọ lẹ ṣẹnṣẹn, podọ hlan yé he yè hia gbọn whédo dali to Levinu le lọ ṣẹnṣẹn. ²⁰Le wẹ Hẹzekia wà do lẹdo Juda lẹpo pé; ewọ sọ wà enẹ he yín dagbe po jijlọ po po nugbo po to OKLUNỌ Jiwheyẹwhe etọn nukọn. ²¹Podọ to azọ́n dopodopo he é ṣẹ̀ mẹ to sinsẹn ohò Jiwheyẹwhe tọn lọ tọn me, podọ to osẹ́n mẹ, podọ to gbèdide lẹ mẹ nado nọ din Jiwheyẹwhe etọn, ayiha etọn lẹpo é do nọ wà ẹ, bo sọ dùale.

¹TO onú helẹ godo, po nugbo he po, Sẹnnakelibi ahọlu Asilia tọn wá, bo biọ Juda mẹ, bo dosla do tòdaho dòkọnọ lẹ ji, bo to linlẹn nado yí yé na ede ²Whenuena Hẹzekia mọ dọ yè hẹn Sẹnnakelibi wá, podọ yè hẹn ẹn lẹ̀ nado hòavùn hẹ Jelusalẹm, ³E yí hónamẹ po ahọvi etọn lẹ po po omẹ hlọnhlọnnọ etọn lẹ po nado glọn osìn asisa lẹ tọn lẹ he tin to tòdaho lọ godo; yé sọ gọalọ nẹ. ⁴Mowẹ yè bẹ́ gbẹtọ susu plidopọ, ye sọ glọn asisa lẹpo, po tọpẹse he to sisa gbọn ṣẹnṣẹn aigba lọ tọn po, dọmọ, Etẹwutu wẹ ahọlu Asilia tọn lẹ ka na do wá, bo mọ osìn susu? ⁵Esọ yi tudido, bo dó adó he yè gbà liai lọ bo fọ́n ẹn daga hlan atòhò lẹ po adó devo po to gbonu, bo sọ nahuhlọn Milo to tòdaho Davidi tọn lọ mẹ, bo sọ basi adánwànu lẹ po awọyínu lẹ po to ogégé mẹ. ⁶E sọ dè awhàngán awhàn tọn lẹ do gbẹtọ lọ ji, bo bẹ́ yé plidopọ do e de to otẹn gbigblo lọ mẹ to họ̀ngbo tòdaho lọ tọn ji, bo sọ yí homẹmiọn do dọhó hlan yé, dọmọ, ⁷Mì ni yín huhlọnnọ, po tudido dagbe de tọn po, mì yín avosatọ kavi apọ̀nọ na ahọlu Asilia tọn blo, kavi podọ na mesusu he tin to e de lẹpo: na kiklohugan de tin to mi de hú to yé de. ⁸Awa agbasalan tọn de wẹ to ewo de; ṣigba to míwlẹ de wẹ OKLUNỌ Jiwheyẹwhe mítọn te nado gọalọna mí, podọ nado fùn awhàn mítọn lẹ. Gbẹtọ lẹ sọ hẹn yéde gbọjẹ do ohó Hẹzekia ahọlu Juda tọn tọn lẹ ji.

⁹Ehe godo wẹ Sẹnnakelibi ahọlú Asilia tọn do mẹmẹsi etọn lẹ hlan Jelusalẹm, (dinvie ewọ tin to Lakisi nukọn, po huhlọn etọn lẹpo po po e po,) je Hẹzekia ahọlu Juda tọn de, podọ jẹ Juda he tin to Jelusalẹm lẹpo de, dọmọ, ¹⁰Le wẹ Sẹnnakelibi ahọlu Asilia tọn dọ dọmọ, Etẹgo wẹ mìwlẹ dotudo, bọ mì do nọ nọ̀ oglọndo lọ mẹ to Jelusalẹm mẹ? ¹¹Hẹzekia ma ka to whiwhẹhò mì, nado jó mì nado kú gbọn hùvẹ́ dali podọ gbọn onùgbla dali, dọmọ, OKLUNỌ Jiwheyẹwhe mítọn na whlẹn mí sọn alọ ahọlu Asilia tọn tọn mẹ? ¹²Hẹzekia dopolọ ma wẹ ko bẹ́ otẹn yìji etọn lẹ po agbà etọn lẹ po sẹ̀, bo sọ degbèna Juda po Jelusalẹm po, dọmọ, Mwlẹ na nọ litai to agbà dopo nukọn, podọ é ji wẹ mìwlẹ na nọ mẹ̀ nuyọnwán te? ¹³Mìwlẹ ma yọ́n núhe yẹn po otọ́ ṣie lẹ po ko wà hlan akọta aigba lẹ tọn lẹpo? Bé yẹwhe akọta aigba lẹ tọn tọn lẹ de tin aliho depope sọgan nado whlẹn aigba yetọn sọn alọ ṣie mẹ? ¹⁴Mẹnu wẹ finẹ to yẹwhe akọta nẹlẹ tọn lẹpo ṣẹnṣẹn he otọ́ ṣie ko và gbidigbidi bo sọgan whlẹn omẹ etọn lẹ sọn alọ ṣie mẹ, bọ Jiwheyẹwhe mìwlẹ tọn na do tin sọgan nado whlẹn mì sọn alọ ṣie mẹ? ¹⁵Enẹwutu dinvie mì dike Hẹzekia klọ mì blo, kavi howhiwhẹ mì do alọpa he ji blo, mọ mì sọ yí i se blo: na yẹwhe akọta kavi ahọludu depope tọn ma ko tin sọgan nado whlẹn omẹ etọn lẹ sọn alọ ṣie mẹ gba podọ sọn alọ otọ́ ṣie lẹ tọn mẹ gba, whẹ́podọ Jiwheyẹwhe mìwlẹ tọn na whlẹn mì sọn alọ ṣie mẹ? ¹⁶Mẹmẹsi etọn lẹ sọ dọhó humọ do OKLUNỌ Jiwheyẹwhe go, podo do Hẹzekia mẹmẹsi eton go. ¹⁷E sọ wlan ohówé lẹ ga, nado vlẹ OKLUNỌ kò, Jiwheyẹwhe Islaeli tọn podọ nado dọhó do e go, dọmọ, Dile yẹwhe akọta aigba lẹ tọn lẹ tọn, he ma ko whlẹm, en omẹ etọn lẹ sọn alọ ṣie mẹ do, mọwẹ Jiwheyẹwhe Hẹzekia tọn ma na whlẹn omẹ etọn lẹ sọn alọ ṣie mẹ do. ¹⁸Yé sọ yí ogbè lélé de do dawhá to ogbè Ju tọn mẹ hlan omẹ Jelusalẹm tọn lẹ he tin to adó go lẹ, nado dobuna yé, podọ nado dotukla yé; na yé nido yí todaho lọ ¹⁹Yé sọ dọhó Jiwheyẹwhe Jelusalẹm tọn lọ tọn di yẹwhe akọta aigba lẹ tọn lẹ tọn tọn, he yín azọ́n alọ gbẹtọ lẹ tọn lẹ tọn ²⁰Hẹzekia ahọlu lọ, po Isaia yẹwhegán visunnu Amọzi tọn lọ po, sọ hodẹ na ehe tọn wutu, bo dawhá hlan olọn mẹ. ²¹OKLUNỌ sọ do angeli de hlan, he sán omẹ hlọnhlọnnọ tudido tọn lẹpo sẹ̀, nukọntọ lẹ lọ po awhàngán lẹ po, to osla ahọlu Asilia tọn tọn lọ mẹ. Mowẹ é lẹ́gọ̀ po winyan nukunmẹ tọn po jẹ aigba etọn titi mẹ. Whenuena yè sọ hẹn ẹn wá biọ ohọ̀ yẹwhe etọn tọn mẹ, yé he tón sọn adọ etọn titi mẹ wá lẹ sọ yí ohi do hù i to finẹ. ²²Le wẹ OKLUNỌ whlẹn Hẹzekia po tòmẹnu Jelusalẹm tọn lẹ po do sọn alọ Sẹnnakelibi ahọlu Asilia tọn tọn mẹ, podọ sọn alọ mẹdevo lẹpo tọn mẹ, bo sọ to yé bẹ to awà lẹpo ji. ²³Mẹsusu sọ hẹn nunina lẹ wá OKLUNỌ de jẹ Jelusalẹm, po onú akuegégénu lẹ po jẹ Hẹzekia ahọlu Juda tọn de: mọ bọ ewọ yín mẹzédaga to nukun akọta lẹpo tọn mẹ sọn whenẹnuzọ̀nmi.

²⁴To azán nẹlẹ mẹ wẹ Hezekia yín awutunọ yèdọ jẹ okú: é sọ hodẹ hlan OKLUNỌ; ewọ sọ dọhó hlan ẹn bo na ohia de e. ²⁵Ṣigba Hẹzekia ma sọ vọ́ gọ̀jo kẹdẹdi dagbewà yè wà hlan ẹn gba; na yè zé ayiha etọn daga: enẹwutu wẹ homẹgble do tin to e ji, podo tò Juda po Jelusalẹm po ji. ²⁶Ṣogãn Hẹzekia húwhé ede na sakla ayiha etọn tọn lọ, ewọ po tòmẹnu Jelusalẹm tọn le po, mọ wẹ homẹgble OKLUNỌ tọn lọ ma sọ wá yé ji to azán Hẹzekia tọn lẹ mẹ gba. ²⁷Hẹzekia sọ tindo adọkun susutalala po ogbégbò po: é sọ din nudotẹn lẹ dai nẹ̃ na fataka, podọ na sika, podọ na zannu akuegégénu lẹ, podọ na nuwhẹnwán lẹ, podọ na awọyínu lẹ, podọ na nuzinzán dagbedagbe alọpa lẹpo tọn; ²⁸agbànhọ̀ lẹ ga na jideji ogbadó tọn po ovẹ̃n po po amì po; po kanlindotẹn lẹ po na alọpa kanlin lẹ tọn, po lẹngbọpa lẹ po to apó lẹ mẹ. ²⁹Humọ é din tòdaho lẹ dai nẹ̃, po nútindo lẹngbọpa lẹ po, po oyìnpamẹ le po to ogégé mẹ: na Jiwheyẹwhe ko na adokunnu susu talala ẹ. ³⁰Hẹzekia dopo he lọ ga ko glọn asisanu osìn Gihọni tọn tọn aga tọn, bo hẹn yé tiregbe jẹte wá adá whèyìhọ todaho Davidi tọn ton ji. Hẹzekia sọ dùale to azọ̀n etọn lẹpo mẹ. ³¹Ṣogãn to azón mẹdagun lẹ tọn mẹ sọn ahọvi Babilọni tọn lẹ tọn de, mẹhe domehlan jẹ e de nado kàn núdabla he yè wà to aigba etọn mẹ tọn biọ, Jiwheyẹwhe jo e do, nado whle e pon, na ewo nido yọ́n ehe tin to ayiha etọn mẹ lẹpo. ³²Dinvie pipòtọ owalọ Hẹzekia tọn tọn le, po owalọ dagbe etọn lẹ po, dayi e go, yè wlan yé to onúmọ Isaia yẹwhegán visunnu Amọzi tọn lọ tọn mẹ, to owé aholu Juda po Islaeli po tọn lẹ tọn mẹ. ³³Hezekia sọ damlọn po otọ́ etọn le po, yé sọ di i to ojeiaga oyọwhé visunnu Davidi tọn lẹ tọn mẹ: Juda lẹpo po tòmẹnu Jelusalẹm tọn lẹ po basi ogbégbò nẹ to okú etọn whenu. Manassẹ visunnu etọn sọ dùahọlu to otẹn etọn mẹ.

¹OWHÈ wiawe mẹho wẹ Manassẹ whenuena é ṣè nado to ahọludu; é sọ dùahọlu owhè kandefọtọ́n to Jelusalẹm mẹ. ²Ewọ sọ wà enẹ he yín oylan to nukun OKLUNỌ tọn mẹ, kẹdedi osùnú okosi lẹ tọn, mehe OKLUNỌ zédlan to ovi Islaeli tọn lẹ nukọn. ³Na é sọ vọ̀ otẹn yìji he Hẹzekia oto etọn ko gbà liai lẹ dó: é sọ tùn agbà lẹ na Baalimi, bo sọ basi Aselọti, bo sọ to taliaina awhànpa olọn tọn lẹpo, bo sọ to yé sẹ̀n. ⁴E dó agbà lẹ to ohọ̀ OKLUNỌ tọn mẹ, ehetọn OKLUNỌ dọmọ, Jelusalẹm mẹ wẹ oyín ṣie na te dòidoi. ⁵E sọ dó agbà lẹ na awhànpa olọn tọn lẹpo to awánu awe ohọ OKLUNỌ tọn tọn lẹ mẹ. ⁶Ewọ ga hẹn ovi etọn lẹ nado gbọn miyọn mẹ luntọ́n to agbadò visunnu Hinnọmi tọn tọn mẹ: é sọ plọn apajlẹnú, bo nọ zán afinọn lẹ, bo sọ plọn owẹ́n, bo sọ nọ zán po yé he tindo kẹnunsi gbigbọ lẹ po, podọ hẹ azétọ lẹ: é wà oylan susu to nukun OKLUNỌ tọn mẹ, nado dohomẹgble nẹ̃ jẹ adiji. ⁷E sọ zé boṣiọ pipa vòdun he é ko basi tọn lọ dote, to ohọ̀ Jiwheyẹwhe tọn mẹ, ehe tọn Jiwheyẹwhe dọ hlan Davidi podọ hlan Sọlọmọni visunnu etọn dọmọ, To ohọ̀ he mẹ, podọ to Jelusalẹm mẹ, he yẹn ko dè sọn whẹndo Islaeli tọn lẹ mẹ, wẹ yẹn na yí oyín ṣie do doidoi: ⁸mọ yẹn ma sọ to na diọtẹnna afọ Islaeli tọn sọn aigba lọ ji ba gba he yẹn ko dè na otọ́ mítọn lọ; eyín yé na nọ payi ṣokẹdẹ nado wà ehe yẹn degbèna yé lẹpo, yèdọ osẹn lọ lẹpo po osẹ́ndoai lẹ lọ po po ogbèdoai lẹ lọ po gbọn alọ Moṣe tọn mẹ. ⁹Manassẹ sọ hẹn Juda po tòmẹnu Jelusalẹm tọn lẹ po nado buali, mọ wẹ yé sọ wà, oylan hú ehe akọta lẹ wá, mẹhe OKLUNỌ và to ovi Islaeli tọn lẹ nukọn. ¹⁰OKLUNỌ sọ dọhọ́ hlan Manassẹ podọ hlan omẹ etọn lẹ: ṣigba yé ma payi e go gba. ¹¹Enẹwutu wẹ OKLUNỌ hẹn awhàngán awhànpa ahọlu Asilia tọn lọ tọn tọn lẹ: wá yé ji, he wle Manassẹ to kọgàn lẹ mẹ, bo sọ yí afọgàn lẹ do sín in, bo hẹn ẹn yì jẹ Babilọni. ¹²Podọ whenuena é tin to nukunbia mẹ, é din OKLUNỌ Jiwheyẹwhe etọn, bo sọ whìwhẹ ede talala to Jiwheyẹwhe otọ́ etọn lẹ tọn nukọn. ¹³E sọ hodó hlan ẹn, é sọ yín mẹvivẹ sọn e de, é sọ sè ovẹ́ etọn, bó sọ vọ ẹ hẹnwá Jelusalẹm biọ ahọludu etọn mẹ. Whenẹnu wẹ Manassẹ yọnẹn dọ OKLUNỌ ewọ wẹ Jiwheyẹwhe.

¹⁴Dinvie to ehe godo é dó adó gbonu tọn jẹ todaho Davidi tọn kọ̀n, to whèyìhọ wàji Gihoni tọn go, to agbadò lọ mẹ, yèdọ jẹ bibiọ whégbe whèvi họ̀ngbo ji mẹ; é sọ lẹ́do Ofẹli pé, é sọ fọ́n ẹn daga jiyìyi talala de: é sọ dè awhàngán tudotọ lẹ do tòdaho dòkónọ Juda tọn lẹpo mẹ. ¹⁵E sọ bẹ́ yẹwhe alọpade ewlẹ só po vodun lọ po sọn ohọ́ OKLUNỌ tọn lọ mẹ, po agbà he é dó to osé ohọ̀ OKLUNỌ tọn tọn mẹ lẹpo po, podọ to Jelusalẹm mẹ, bo bé yé dlan sọn tòdaho lọ mẹ. ¹⁶E sọ dó agbà OKLUNỌ tọn, bo sọ na avọ́ nunina jijọho tọn lẹ to e ji finẹ po avọ́ nunina opédidọ tọn po, bo sọ degbèna Juda nado nọ to OKLUNỌ, Jiwheyẹwhe Islaeli tọn, sẹ̀n. ¹⁷Ṣogán gbẹtọ lẹ gbó sọ to avọ́ basi to otẹn yìji lẹ mẹ, ṣigba hlan OKLUNỌ Jiwheyẹwhe yetọn kẹdẹ wẹ. ¹⁸Dinvie pipòtọ owalọ Manassẹ tọn tọn lẹ, po odẹ̀ etọn po hlan Jiwheyẹwhe etọn, podọ ohó númọtọ lẹ tọn lẹ he dọhó hlan ẹn to oyín OKLUNỌ tọn mẹ, Jiwheyẹwhe Islaeli tọn, dayi e go, yè wlan yé, to owalọ ahọlu Islaeli tọn lẹ tọn lẹ ṣẹnṣẹn. ¹⁹Odẹ́ etọn ga, podọ le Jiwheyẹwhe yín mẹvivẹ sọn e de do, po ylando etọn lẹpo po, po oylanwà etọn po, po otẹn ehe mẹ é dó otẹn yìji lẹ do po, bo zé Aṣelimi po boṣiọ pipa lẹ lọ po daga, whẹpo é do whiwhẹ ede: dayi e go, yè wlan yé to otàn Hozai tọn mẹ. ²⁰Mowẹ Manassẹ damlọn po otọ́ etọn lẹ po, yé sọ di i to ohọ̀ etọn titi mẹ: Amọni visunnu etọn sọ dùahọlu to otẹn etọn mẹ. ²¹Owhè kònukunawe mẹho wẹ Amọni whenuena é ṣẹ̀ nado to ahọludu; é sọ dùahọlu owhè awe to Jelusalẹm mẹ. ²²Ewọ sọ wà enẹ he yín oylan to nukun OKLUNỌ tọn mẹ, dile Manassẹ otọ́ etọn wà do: Amọni sọ sánvọ́ hlan bosiọ pipa lẹpo lọ he Manassẹ otọ́ etọn ko basi lẹ, bo sọ to yé sẹ̀n. ²³E ma sọ whiwhẹ ede to OKLUNỌ nukọn, dile Manassẹ otọ́ etọn whiwhẹ ede do gba; ṣigba Amọni dopo he lọ to oylandowà pludo pludo. ²⁴Mẹmẹsi etọn lẹ sọ ṣiatẹ hẹ ẹ, bo hú i to ohọ̀ etọn titi mẹ. ²⁵Ṣigba omẹ aigba lọ tọn lẹ hù yé he ṣiatẹ hẹ Amọni ahọlu; omẹ aigba lọ tọn lẹ lọ bọ yí Josia visunnu etọn do basi ahọlu to otẹn etọn mẹ.

¹OWHÈ ṣinatọ̀n mẹho wẹ Josia whenuena é ṣẹ̀ nado to ahọludu; é sọ dùahọlu owhè gbànnukundopo to Jelusalẹm mẹ. ²E sọ wà enẹ he yín jijlọ to nukun OKLUNỌ tọn lẹ me, bo sọ to zọnlinzin to aliho Davidi otọ́ etọn tọn lẹ mẹ, bo ma diọ do apadopo jẹ alọ adusi kavi jẹ amiyọn gba. ³Na to owhè ṣinatọ̀ntọ ahọludu etọn tọn mẹ, whenuena é gbẹ́ sọ tin to ovú, wẹ é ṣẹ̀ nado to Jiwheyẹwhe Davidi otọ́ etọn tọn din: podọ to owhè wiawetọ mẹ é ṣẹ̀ nado klọ́ Juda po Jelusalẹm po wé sọn otẹn yìji lẹ mẹ, po Aṣelimi lọ po, po boṣiọ pipa lẹ lọ po, podo boṣiọ kinkọ̀n lẹ lọ. ⁴Yé sọ gbà agbà Baalimi tọn lẹ lọ liai to e nukọn; podọ owhè-boṣiọ lẹ lọ, he tin to yé ji aga, é sán liai; po Aṣelimi lo po, po boṣiọ pipa lẹ lọ po, po boṣiọ kinkọ̀n lẹ lọ po, wẹ é sọ gbà hanyanhanyan, bo li yé zùn kọgudu, bo húnhún in do yọdò yé he ko sánvọ́ hlan yé lẹ tọn lẹ ji. ⁵E sọ mẹ́ ohú yẹwhenọ ewlẹ tọn lẹ to agbà yetọn lẹ ji, bo sọ klọ́ Juda po Jelusalẹm po wé. ⁶Podọ mọ wẹ é sọ wà to tòdaho Manassẹ tọn lẹ mẹ po Eflaimi po, po Simeọni po, yèdọ jẹ Naftali, to gbigbà yetọn lẹ mẹ lẹ́dolẹ́do. ⁷E sọ gbà agbà lẹ lọ liai, bo sọ tùn Aṣelimi lọ po boṣiọ pipa lẹ lọ po zùn mimẹ̀, bo Sán owhè-bosiọ lẹpo lẹ lọ liai gbọn aigba Islaeli tọn lẹpo ji, bo sọ lẹ́gò jẹ Jelusalẹm.

⁸Dinvie to owhè fọtọ̀nnukunatọ̀ntọ ahọludu etọn tọn mẹ, whenuena é ko klọ́ aigba lọ wé, pọ ohọ̀ lọ po, wẹ é do Ṣafini visunnu Azalia tọn lọ hlan, po Maaseia otògán tòdaho lọ tọn po, po Joa visunnu Joahazi tòhówékantọ lọ tọn po, nado vọ́ ohọ̀ OKLUNỌ Jiwheyẹwhe etọn tọn jlado. ⁹Yé sọ wá Hilkia ogán yẹwhenọ lọ de, bo jó akuẹ lọ he yè hẹnwá biọ ohọ́ Jiwheyẹwhe tọn lọ mẹ, he Levinu lẹ, nugopóntọ ohọ̀n tọn lẹ, ko ṣinyan sọn alọ Manassẹ po Eflaimi po tọn mẹ, podọ sọn pipòtọ Islaeli tọn lẹpo mẹ, podọ sọn Juda po Bẹnjamini lẹpo po mẹ, podọ sọn tòmẹnu Jelusalẹm tọn lẹ mẹ. ¹⁰Yé sọ jó e do alọ azọ́ntọ lẹ lọ tọn mẹ he tindo nugopọ́n ohọ́ OKLUNỌ tọn lọ tọn; podọ azọ́ntọ he to azọ́nwà to ohò OKLUNỌ tọn lọ mẹ lẹ jó e nado dó bo sọ vọ́ ohọ́ lọ jlado; ¹¹Yèdọ hlan atinpatọ lẹ podọ hlan didótọ lẹ wẹ yé jó e na, nado hò zannu sinsán po whlẹlidemẹ po na sìnpla lẹ, podọ nado basi atingbòbli lẹ na ohọ̀ he ahọlu Juda tọn lẹ ko hẹngble lẹ. ¹²Omẹ ewlẹ sọ wà azón lọ nugbonugbo: nugopọ́ntọ yé tọn lẹ wẹ Johati po Obadia po, Levinu lẹ, sọn visunnu Mẹlali tọn lẹ mẹ; po Zakalia po po Mẹṣulami po, sọn visunnu Kohatinu lẹ tọn mẹ, nado nọ zé e do nukọn: podọ mẹdevo lẹ sọn Levinu lẹ mẹ popo he sọgan wànà nuzinzán ohàngbè tọn lẹ. ¹³Yé tin to hinhẹntọ agbàn lẹ tọn lẹ ji ga, bo nọ dè popo he nọ wàzọn to sinsẹ̀n alọpa lẹpo tọn mẹ do nukọn: podọ sọn Levinu lẹ mẹ finẹ wẹ wékantọ lẹ te, po gbonugán lẹ po po hònjinọtọ lẹ po. ¹⁴Whenuena yé hẹn akuẹ lọ tón wá he yé hẹnwá biọ ohọ̀ OKLUNỌ tọn lọ mẹ, wẹ Hilkia yẹwhenọ lọ mọ owé osẹ́n OKLUNỌ tọn tọn lọ he yè na gbọn alọ Moṣe tọn mẹ. ¹⁵Hilkia sọ gblọn bo dọ hlan Ṣafani wékantọ lọ dọmọ, Yẹn ko mọ owé osẹ́n tọn lọ to ohọ̀ OKLUNỌ tọn mẹ. Hilkia sọ jó owé lọ hlan Ṣafani. ¹⁶Ṣafani sọ hẹn owé lọ yì ahọlu de, humọ sọ hẹn ohó wá ahọlu lọ de, dọmọ, Ehe yè jó do alọ mẹmẹsi towe lẹ tọn mẹ, yé wà ẹ. ¹⁷Yé ko sọ kòn akuẹ he yè mọ to ohọ̀ OKLUNỌ tọn lọ mẹ, bo ko jó e do alọ nugopọ́ntọ lẹ lọ tọn mẹ, podọ do alọ azọntọ lẹ lọ tọn mẹ. ¹⁸Ṣafani wékantọ lọ sọ dọ na ahọlu lọ, dọmọ, Hilkia yẹwhenọ lọ ko jó owé de na mi. Ṣafani sọ hia enẹ mẹ to ahọlu lọ nukọn. ¹⁹E sọ wá jọ, whenuena ahọlu ko sè ohó osén lọ tọn lẹ, wẹ é tlẹn avọ̀ eton lẹ. ²⁰Ahọlu sọ degbèna Hilkia, po Ahikami visunnu? afani tọn lọ po, po Abdọni visunnu Mika tọn lọ po, po Ṣafini wékantọ lọ po, po Asivà mẹmẹsi ahọlu tọn lọ po, dọmọ, ²¹Mì yì, kanbiọ sọn OKLUNỌ de na mi, podọ na yé he yè pòdai to Islaeli mẹ po Juda po mẹ, gbọn ohó owé he yè mọ lẹ lọ tọn tọn dali: na daho wẹ homẹgble OKLUNỌ tọn he yè kọ̀n jẹgbonu do mi ji, na otọ́ mítọn lẹ ma ko payi ohó OKLUNỌ tọn lọ go wutu, nado nọ wà kẹdẹdi ehe yè wlan to owé he mẹ gba. ²²Mowẹ Hilkia, po yé mẹhe ahọlu ko degbèna lẹ po, yì Hulda yẹwhegán—yọnnu lọ de, asi Ṣalumi visunnu Tokhati tọn lọ tọn, visunnu Hasla tọn lọ, nugopọntọ avọ̀pòtin lọ tọn; (dinvie é nọ nò Jelusalẹm mẹ to okó awetọ mẹ;) yé sọ dohó hlan ẹn jẹ enẹ ji. ²³Ewọ sọ dọ hlan yé dọmọ, Le wẹ OKLUNỌ dọ, Jiwheyẹwhe Islaeli tọn: Mì dọ na omẹ lọ he do mì hlan dẽ, ²⁴Le wẹ OKLUNỌ dọ, dayi e go, yẹn na hẹn oylan wá otẹn he ji, po tòmẹnu etọn le po ji, yèdọ dẹ̀hodo he yè wlan to owé lọ mẹ lẹpo he yé ko hia to ahọlu po Juda po nukọn: ²⁵Na yé ko gbẹ́ mi dai wutu, bo ko to nuyọnwán mè hlan yẹwhe devo lẹ, na yé nido yí azọ́n alọ yetọn lẹ mẹ tọn lẹpo do dohomẹgblena mi jẹ adiji; enẹwutu wẹ yè do kọ̀n homẹgble ṣie tọ́n do otẹn he ji, podọ yè ma to na ṣi i. ²⁶Ṣigba hlan ahọlu Juda tọn, mẹhe do mi hlan nado kanbiọ sọn OKLUNỌ de, le wẹ mì na dọ hlan ẹn, dọ Le wẹ OKLUNỌ dọ, Jiwheyẹwhe Islaeli tọn: Gbọn ohó he hiẹ ko sè lẹ tọn dali, ²⁷Na ayiha towe yín bibọ̀ wutu, podọ hiẹ sọ whiwhẹ dewe to Jiwheyẹwhe nukọn, whenuena hiẹ sè ohó etọn do otẹn he go, podọ do tòmẹnu etọn lẹ go, bo ko sọ whiwhẹ dewe to nukọn ṣie, bo ko sọ tlẹn avọ́ towe lẹ, bo sọ viavi to nukọn ṣie; yẹn ga ko sọ sè we, wẹ OKLUNỌ dọ. ²⁸Dayi e go, yẹn na ṣinyan we do otọ́ towe lẹ de, yè na sọ ṣinyan we jẹ yọdò towe kọ̀n to jijọhọ mẹ, mọ nukun towe lẹ ma to na mọ oylan lẹpo he yẹn hẹnja otẹn he ji, po tòmẹnu etọn lọ po ji gba. Yé sọ hẹn ohó wá na ahọlu lọ.

²⁹Whenẹnu wẹ ahọlu domẹhlan bo sinyan mẹho Juda po Jelusalẹm po tọn lẹpo plidopọ. ³⁰Ahọlu sọ hẹji yì jẹ ohọ́ OKLUNỌ tọn lọ mọ, po mẹho Juda tọn lẹpo po po tòmẹnu Jelusalẹm tọn lẹ po, po yẹwhenọ lẹ po, po Levinu lọ po, po gbẹtọ lẹpo po, daho po pẹvi po: é sọ hia to otọ́ yetọn lẹ mẹ ohó owé alẹ̀nù lọ tọn he yè mọ to ohọ̀ OKLUNỌ tọn mẹ tọn lẹpo. ³¹Ahọlu sọ site to otẹn etọn mẹ, bo basi alẹ̀nù de to OKLUNỌ nukọn, nado nọ zinzọnlin to OKLUNỌ godo, podọ nado nọ, yí ayiha etọn lẹpo, po alindọn etọn lepo po do payi gbèdide etọn lẹ go, po asẹdai etọn lẹ po, po osẹ́ndoai etọn lẹ po, nado yí ohó alẹ̀nù lọ tọn lẹ he yè wlan to owé he mẹ basi. ³²E sọ hẹn mẹhe yè mọ to Jelusalẹm po Bẹnjamini po mẹ lẹpo nado nọte to e kọn. Tòmẹnu Jelusalẹm tọn lẹ sọ wà kẹdẹdi alẹ̀nù Jiwheyẹwhe tọn lọ, Jiwheyẹwhe otọ́ yetọn lẹ tọn. ³³Josia sọ bẹ́ osùnú lẹpo tọ́n sọn otò he yín ovi Islaeli tọn lẹpo mẹ, bo sọ hẹn mẹhe yè mọ to Islaeli mẹ lẹpo nado nọ sèn, yèdọ nado nọ sèn OKLUNỌ Jiwheyẹwhe yetọn. Azán etọn lẹpo gbè yé ma fọ́nyì sọn OKLUNỌ hihodo mẹ gba, Jiwheyẹwhe otọ́ yetọn lẹ tọn lọ.

¹JOSIA sọ payi juwayì de go hlan OKLUNỌ to Jelusalẹm mẹ: yé sọ hù juwayi lọ to azán wiẹnẹtọ osùn tintan tọn lọ ji. ²E sọ dè yẹwhenọ lẹ do asẹ yetọn lẹ mẹ, bo dotuhomẹna yé do sinsẹ̀n ohọ̀ OKLUNỌ tọn tọn lọ kọ̀n. ³E sọ dọ hlan Levinu lọ he nọ plọn Islaeli lẹpo, he yín wiwe hlan OKLUNỌ dọmọ, Mì yí alki wiwe lọ do ohọ̀ he Sọlọmọni visunnu Davidi tọn ahọlu Islaeli tọn ko dó lọ mẹ; agbàn de ma na sọ tin to abó mítọn lẹ ji ba: dinvie mì ni to OKLUNỌ Jiwheyẹwhe mítọn sẹ̀n, po Islaeli omẹ etọn lẹ po. ⁴Bo wleawuna mìde kẹdẹdi owhé otọ́ mítọn lẹ tọn lẹ gbọn okànta mítọn lẹ dali, kẹdẹdi owéwlan Davidi ahọlu Islaeli tọn tọn, podọ kẹdẹdi owéwlan Sọlọmọni visunnu etọn tọn. ⁵Bo ṣite to otẹn wiwe lọ mọ kẹdẹdi mimá owhé otọ́ lẹ tọn ovi mẹmẹsunnu mítọn gbẹtọ ewlẹ tọn lẹ tọn, bo gbọ mimá de ni tin na dopodopo sọn owhé otọ́ Levinu lẹ tọn de mẹ. ⁶Bo sọ hù juwayì lọ, bo sọ lẹ̀ mìde wé, bo wleawu na mẹmẹsunnu mítọn lẹ, nado nọ wà kẹdẹdi ohó OKLUNỌ tọn gbọn alọ Moṣe tọn mẹ. ⁷Josia sọ na hlan ovi gbẹtọ ewlẹ tọn lẹ, sọn lẹngbọpa lọ mẹ, lẹngbọvu lẹ po gbọgbọẹvu lẹ po, popo yé tọn na avọ́ nunina juwayi tọn lẹ, hlan mẹhe tin to finẹ lẹpo, jẹ osọha fọtọ́n ogbàn tọn, po oyìnsú fọtọ́n atọ̀n po: ehelẹ tìn sọn agbàn ahọlu tọn lọ mẹ. ⁸Ahọvi etọn le sọ na na avọ́ nunina ojlonọ de hlan omẹ ewlẹ, hlan yẹwheno lẹ, podọ hlan Levinu lẹ. Hilkia po Zekalia po po Jehlẹli po, ogándutọ ohò Jiwheyẹwhe tọn tọn lẹ, na hlan yẹwhenọ lẹ na avọ́ nunina juwayì tọn lẹ whékanlin pẹvipẹvi fọtọ́n awe po nuọntọ̀n po, po oyín fọdekanweko po. ⁹Konania ga, po Ṣemaia po po Nẹtanẹli po, mẹmẹsunnu etọn lẹ, po Hasabia po po Jeiẹli po po Jozabadi po, nukọntọ Lẹvinu lẹ tọn lẹ na hlan Levinu le na avọ nunina juwayì lọ tọn lẹ, owhékanlin pẹvipẹvi fọtọ́n atón, po oyín fowekanweko po. ¹⁰Mowẹ yè wleawuna sinsẹ̀n lọ, yẹwhenọ lẹ sọ ṣite to otẹn yetọn mẹ, po Levinu lẹ po gbọn okànta yetọn lẹ dali, kẹdẹdi gbèdide ahọlu lọ tọn. ¹¹Yé sọ hù juwayì lọ, yẹwhenọ lẹ so mì ohùn lọ, he yé mọyí sọn alọ yetọn mẹ, Levinu lẹ sọ kọn yé. ¹²Yé sọ diọtẹnna avọ́ nunina mimẹ̀ lẹ lọ, na yé nido jó yé nado yi do sánvọ́ hlan OKLUNỌ kẹdẹdi mimá owhé otọ́n lẹ tọn lẹ sọn ovi gbẹtọ ewlẹ tọn lẹ mẹ, dile yè wlan to owé Moṣe tọn me do. Mowẹ yé sọ yí oyín lẹ do wà. ¹³Ye sọ yí miyọn do mẹ̀ juwayì lọ kẹdẹdi ogbèdai lọ: avọnú wiwe lẹ wẹ yé sọakusìn to ozẹ́n lẹ mẹ, podọ to pannpán lẹ mẹ, podọ to ogànzẹ́n lẹ mẹ, bo sọ hẹn yé plaun jẹ ovi omẹ ewlẹ tọn lẹ de. ¹⁴To enẹgodo wẹ yé wleawu na yéde, podọ na yẹwhenọ lẹ; na yè hẹn yẹwhenọ lẹ visunnu Aalọn tọn lẹ yín mavonọ to nina avọ́ nunina mimẹ̀ le lọ po ojó lọ po mẹ kakajẹ tenu: enẹwutu wẹ Levinu lẹ nọ wleawu na yéde, podọ na yẹwhenọ visunnu Aalọn tọn lẹ lọ. ¹⁵Hànjitọ lẹ visunnu Asafi tọn lẹ sọ tin to otẹn yetọn mẹ, kẹdẹdi gbèdide Davidi tọn, po Asafì po, po Hemani po, po Jẹdutuni numọtọ ahọlu lọ tọn po; họ̀njinọtọ lẹ sọ tin to họ̀ngbo dopodopo ji: yé ma tindo nado fọ́nyì sọn sinsẹ̀n yetọn kọ̀n gba, na mẹmẹsunnu yetọn Levinu lẹ to awúwlena yé. ¹⁶Mowẹ yè wleawuna sinsẹ̀n OKLUNỌ tọn do to gbènẹgbè, nado payi juwayì lọ go, podọ nado na avọ́ nunina mimèlẹ to agbà OKLUNỌ tọn lọ ji, kẹdẹdi gbèdide ahọlu Josia tọn. ¹⁷Ovi Islaeli tọn he tin to finẹ lẹ payi juwayì lọ go to ojlẹ nẹ mẹ, po hùnwhẹ akla madotón tọn po azán ṣinawe. ¹⁸Juwayì sọ jlọ do enẹ go de ma ko tin he yè payi e go to Islaeli mẹ sọn azán Samueli yẹwhegán lọ tọn lọ mẹ; mọ depope sọn ahọlu Islaeli tọn lẹ mẹ ma ko payi juwayì mọtọnnkọ de go dile Josia payi e go do, po yẹwhenọ lẹ po, po Levinu lẹ po, po Juda lẹpo po po Islaeli he tin to finẹ lẹ po, po tòmẹnu Jelusalẹm tọn lẹ po. ¹⁹To owhè fọtọ̀nnukunatọ̀ntọ ahọludu Josia tọn tọn mẹ wẹ yè payi juwayì he go te. ²⁰To ehe godo, whenuena Josia ko wleawuna tẹmpli lọ, we Neko ahọlu Egipti tọn hẹji yì nado hòavùn hẹ Kalkẹmisi to Euflate dali: Josia sọ tón yì péhẹ ọ. ²¹Ṣigba é do mẹdagun lẹ hlan e de, dọmọ, Eté wẹ yẹn tindo nado wà po hiẹ po, hiẹ ahọlu Juda tọn? Yẹn ma wá oji we to egbé he gba, adavo do ohò he ji yẹn tindo awhàn te; Jiwheyẹwhe ko sọ degbèna mi nado basi niyaniya: hiẹ ni sẹ̀ gbọ sọn alọwhlẹn hẹ Jiwheyẹwhe go mẹ, mẹhe tin to dẽ, na é ma na do và we gba. ²²Ṣogãn Josia ma jlo lẹ nukunmẹ etọn sọn e de, ṣigba bluanna ede, na é nido hòavùn hẹ ẹ, bo ma sọ tuntóai hlan ohó Neko tọn lẹ, sọn onù Jiwheyẹwhe tọn mẹ gba, bo sọ wá nado hòavùn to agbadò Mẹgido tọn lọ mẹ. ²³Gásétọ lẹ sọ ségá do ahọlu Josia; ahọlu sọ dọ hlan mẹmẹsi etọn lẹ dọmọ, Zé mi sẹ́; na yè dalán mi badabada. ²⁴Mowẹ mẹmẹsi etọn lẹ zé e sọn kẹkẹ lọ mẹ, bo zé e do kẹkẹ awetọ he é tindo mẹ, bo hẹn ẹn wá jẹ Jelusalẹm; é sọ kú, yè sọ di i to oyọwhé otọ́ etọn lẹ tọn lọ mẹ. Juda lẹpo po Jelusalẹm po sọ blawu na Josia. ²⁵Jẹlemia sọ doavigbè na Josia: sunnu hànjitọ lẹpo po yọnnu hànjitọ lẹ po sọ dọhó Josia tọn to avigbè etọn lẹ mẹ jẹ egbé he; yé sọ yí yé do basi gbèdai de to Islaeli mẹ: bo, dayi e go, yè wlan yé to avigbè lẹ lọ mẹ. ²⁶Dinvie pipòtọ owalọ Josia tọn tọn lọ, po owalọ dagbe etọn lẹ po, kẹdẹdi enẹ he yè wlan to osẹ́n OKLUNỌ tọn mẹ, ²⁷po owalọ etọn lẹ po, tintan po godotọn po, dayi e go, yè wlan yé to owé ahọlu Islaeli po Juda po tọn lẹ tọn mẹ.

¹WHENẸNU wẹ omẹ aigba lọ tọn lẹ yí Jehoahazi visunnu Josia tọn lọ, bo yí i do basi ahọlu to otẹn otọ́ etọn tọn mẹ to Jelusalẹm mẹ. ²Owhè kònukunatọ̀n mẹho wẹ Joahazi whenuena é ṣẹ̀ nado to ahọludu; é sọ dùahọlu osùn atón to Jelusalẹm mẹ. ³Ahọlu Egipti tọn sọ yàn ẹn sọn ofìn ji to Jelusalẹm, bo sọ sàwhédo aigba lọ to talẹnti fataka tọn kanweko mẹ po talẹnti dopo sika tọn po. ⁴Ahọlu Egipti tọn sọ yí Eliakimi nọvisunnu etọn do basi ahọlu to Juda po Jelusalẹm po ji, bo diọ oyín etọn do Jehọiakimi. Neko sọ yí Joahazì nọvisunnu etọn, bo hẹn ẹn yì jẹ Egipti.

⁵Owhè koatọ́n mẹho wẹ Jehọiakimi whenuena é ṣẹ̀ nado to ahọludu; é sọ dùahọlu owhè widopo to Jelusalẹm mẹ: é sọ wà enẹ he yín oylan to nukun OKLUNỌ Jiwheyẹwhe etọn tọn mẹ. ⁶E ji wẹ Nẹbukadnẹzali ahọlu Babilọni tọn hẹji wá, bo sín in do afọgàn lẹ mẹ, nado hẹn ẹn yi jẹ Babilọni. ⁷Nẹbukadnẹzali ga bé sọn nuzinzán ohọ̀ OKLUNỌ tọn tọn lẹ mẹ yì jẹ Babilọni, bo bẹ́ yé do tẹmpli etọn mẹ to Babilọni. ⁸Dinvie pipòtọ owalọ Jehọiakimi tọn tọn lẹ, po osùnú etọn he é wà lẹ po, po enẹ he yè mọ to e mẹ po, dayi e go, yè wlan yè to owé ahọlu Islaeli po Juda po tọn lẹ tọn mẹ: Jehọiakini visunnu etọn sọ dùahọlu to otẹn etọn mẹ.

⁹Owhè ṣinatòn mẹho wẹ Jehọiakini whenuena é ṣẹ̀ nado to ahọludu; é sọ dùahọlu osùn atọ̀n po azán ao po to Jelusalẹm mẹ: é sọ wà enẹ he yín oylan to nukun OKLUNỌ tọn mẹ. ¹⁰Podọ to ológò owhè lọ tọn ahọlu Nẹbukadnẹzali dowẹnhlan, bo hẹn ẹn wá jẹ Babilọni, po nuzinzán dagbedagbe ohọ́ OKLUNỌ tọn mẹ tọn lẹ po po e po, bo sọ yí Zẹdekia nọvisunnu etọn do basi ahọlu to Juda po Jelusalẹm po ji.

¹¹Owhè kònukundopo mẹho wẹ Zẹdekia whenuena é ṣẹ̀ nado to ahọludu; é sọ dùahọlu owhè widopo to Jelusalẹm mẹ: ¹²E sọ wà enẹ he yín oylan to nukun OKLUNỌ Jiwheyẹwhe etọn tọn mẹ; é ma whiwhẹ ede to Jẹlemia yẹwhegán he to hódọ sọn onù OKLUNỌ tọn mẹ lọ nukọn gba. ¹³Ewọ sọ ṣiatẹ hẹ ahọlu Nẹbukadnẹzali, mẹhe ko hẹn ẹn whle gbọn Jiwheyẹwhe dali: ṣigba é hẹn okọ̀ etọn sinyẹn, bo sọ hẹn ayiha etọn sinyẹn sọn lilẹ́ do OKLUNỌ de mẹ, Jiwheyẹwhe Islaeli tọn. ¹⁴Humọ ogán yẹwhenọ lẹ tọn lẹpo, o gbẹtọ ewlẹ po, wàylando susu talala kẹdẹdi osùnú kosi tọn lẹpo; yé sọ flu ohọ́ OKLUNỌ tọn he é ko hiọ to Jelusalẹm mẹ. ¹⁵OKLUNỌ, Jiwheyẹwhe otọ́ yetọn lẹ tọn, sọ domẹhlan yé gbọn mẹdagun etọn lẹ dali, tite to afọnnufù bo to mẹdohlan; na é tindo awubla to omẹ etọn lọ ji wutu, podọ to otẹn fininò etọn ji: ¹⁶ṣigba yé sàn mẹdagun Jiwheyẹwhe tọn lọ kò, bo sọ vlẹ ohó etọn lẹ, bo sọ yí yẹwhegán etọn lẹ do to avlẹda, kaka homẹgble OKLUNỌ tọn do tite do omẹ etọn lẹ ji, kaka bọ ojlado de ma sọ tin ba. ¹⁷Enẹwutu wẹ é hẹn ahọlu Kaldeanu lẹ tọn wá yé ji, mehe yi ohi do hù yọ̀pọ sunnu yetọn lẹ to ohọ̀ fiwiwe yetọn tọn me, bo ma sọ tindo awubla to yọ̀pọ sunnu ji kavi awhli, sunnu mẹho kavi yọ́nhónọ: é jó yé popo do alọ etọn mẹ. ¹⁸Podọ nuzinzán ohọ̀ Jiwheyẹwhe tọn tọn lẹpo, daho po pẹvi po, podọ adọkunnu ohò OKLUNỌ tọn tọn lẹ, po adọkunnu ahọlu tọn lẹ po; po ahọvi etọn lẹ tọn po; ehe lẹpo wẹ é hẹnwá jẹ Babilọni. ¹⁹Ye sọ mẹ̀ ohò Jiwheyẹwhe tọn, bo gbà adó Jelusalẹm tọn liai, bo sọ yí miyọn do fiọ hònmẹ etọn lepo, bo sọ và nuzinzán dagbedagbe etọn lẹpo. ²⁰Podọ yé he hòngán sọn ohi mẹ lẹ wẹ é bé yì jẹ Babilọni; yé sọ yín mẹmẹsi hlan ẹn podọ hlan visunnu etọn lẹ kaka jẹ ogándu ahọludu Pelsia tọn tọn mẹ: ²¹Nado hẹn ohó OKLUNỌ tọn sẹ gbọn onù Jelemia tọn mẹ, kaka aigba ko do wàwhè gbọjẹzán etọn lẹ tọn: na sọle ewọ mlọnai vójẹ é to ayipa gbọjẹzán go, nado hẹn owhè kandegbàn lọ pe.

²²Dinvie to owhè tintan Kilusi ahọlu Pẹlsia tọn tọn mẹ, na ohó OKLUNỌ tọn gbọn onù Jẹlemia tọn mẹ yè nido hẹn di, OKLUNỌ fọ́n gbigbọ Kilusi ahọlu Pẹlsia tọn tọn daga, bọ é basi mìsẽlu de lẹ́do ahọludu etọn lẹpo pé, bo yí i do owéwlan mẹ ga, dọmọ, Le wẹ Kilusi ahọlu Pẹlsia tọn dọ, dọmọ, Ahọludu aigba tọn lẹpo wẹ OKLUNỌ, Jiwheyẹwhe olọn tọn, ko na mi; é ko sọ nasẹ mi nado dó ohọ̀ de nẹ to Jelusalẹm mẹ, he tin to Juda mẹ. Mẹdepope tin finẹ to mì ṣẹnṣẹn sọn omẹ etọn lẹpo mẹ, OKLUNỌ Jiwheyẹwhe etọn ni tin po e po, bo sọ gbọ é ni hẹji yì.