1 Tẹsalonikanu Le

¹PAULU, Silvanu, po Timoti po, hlan agùn Tẹsalonikanu lẹ tọn, to Jiwheyẹwhe Otọ, po Jesu Klisti Oklunọ po mẹ: Ojọmiọn po jijọho po hlan mì son Jiwheyẹwhe Oté mítọn, po Jesu Klisti Oklunọ mítọn po de.

²Mìwlẹ pédona Jiwheyẹwhe whepoponu na mì omẹ pó, mí sọ to mì flin to òdẹ́ mítọn mẹ; ³mìwlẹ to flinflin mágbọjẹ azón yise tọn mìtọn, po tuklajijẹ owanyi tọn mìtọn po, podọ homẹfa tódido tọn mìtọn to Jesu Klisti Oklunọ mítọn mẹ to Jiwheyẹwhe Otọ́ mítọn nukọn; ⁴mìwlẹ yọnen, mẹmẹsunnu mẹyiwanna, didè mìtọn gbọn Jiwheyẹwhe dali. ⁵Na wẹndagbe mítọn ma wá mì de to ohó kẹdẹ mẹ gbá, ṣigba to huhlọn mẹ ga, to Gbigbọ Wiwe mẹ, podọ to tudido susu mẹ; dile mìwlẹ ko yọ́n omẹ he hunkọ mìwlẹ yín to mì ṣẹnṣẹn ná: mì wutu. ⁶Mìwlẹ sọ lẹzun mẹhodotọ mítọn, po Oklunọ tọn po, mì ko sọ yí ohó lọ to nukunbibia susu mẹ, po ayajijẹ Gbigbọ Wiwe tọn po: ⁷mọ mìwlẹ sọ lẹzun ohia de hlan omẹ he yise lẹpo to Makedonia po Akaia po. ⁸Na sọn mì de wẹ ohó Oklunọ tọn ko dònu jẹgbonu, é ma yín to Makedonia po Akaia po kẹdẹ gba, ṣigba to ofi popo ga wẹ linlin yise mìtọn tọn hlan Jiwheyẹwhe de ko gbapé ai; sọmọ bọ mìwlẹ ma sọ tindo ohó depope na dọ ba. ⁹Na yélọsu ko dọ ohó gbọn mí tọn dali, na alọ he ji mí gbọn do tén do mì ji tọn, le mì lé sọn bosiọ kòn do Jiwheyẹwhe de do, nado nọ sèn Jiwheyẹwhe gbènọ nugbonọ; ¹⁰podọ nado nọtepọ́n Ovi etọn sọn olọn mẹ, mẹhe ewọ ko fọ́n dogbó sọn osiọ lẹ mẹ, yèdọ Jesu lọ, mẹhe to mí whlẹn sọn homẹgble he ja mẹ.

¹NA mìlọsu mẹmẹsunnu, yón le tintan mítọn do mì ji te, dọ é ma lezun tata gba; ²ṣigba ehegodo mìwlẹ ko jiya jẹnukọn, bọ yè sò yí owinyan do sayahẹ mí to Filippi, dile mìwlẹ yọnẹn do, mìwlẹ to tudo do Jiwheyẹwhe mítọn go nado dọ ohó wẹndagbe Jiwheyẹwhe tọn hlan mì to wiwó susu mẹ. ³Na homẹjladohó mítọn ma yín alibubu tọn, kavi mawé tọn, kavi oblu tọn gba. ⁴Ṣigba yèdọ dile yè ko dikena mí sọn Jiwheyẹwhe de nado yí wendagbe do naplọnme mọwẹ mìwlẹ to; o hódọ do: é ma yín di mehe gbẹtọ nukundagbe din gba, adavo Jiwheyẹwhe, mẹhe dòdinna ayiha mítọn. ⁵Na mìwlẹ ma yí whedepopenu do zán ohó oklọ tọn de, dile mi yọnẹn do, kavi nukunkẹn yí do súwunvi; Jiwheyẹwhe we kunnudetọ: ⁶kavi gbẹtọ de wẹ mìwlẹ to gigo din te, mọ é ma yín mìwlẹ de, kavi mẹdevo de, whenuena mi do huhlọn nado yín tuklano hlan mì di Apọsteli Klisti tọn lẹ. ⁷Ṣigba mìwlẹ to dẹ̃dewà to mì ṣẹnṣẹn, dile ovipontọ nọ to ayìpa ovi etọn lẹ go do: ⁸mọwe mìwlẹ to homẹdagbe basi do mì go, mi so jlo nado yí na mì, é ma yín wẹndagbe Jiwheyẹwhe tọn kẹdẹ gba, ṣigba gbigbọ mìlọsu iọn ga, na mìwlẹ lezun mẹyiwanna hlan mi wutu. ⁹Na mì flin, mẹmẹsunnu, azón mítọn po magbọjẹ mítọn po: na mìwlẹ ma gbọjẹ to ozán po okle po, na mí ma jlo akuẹ na zán mẹdepope to mì mẹ wutu, mí ko sọ dọyẹwheho wẹndagbe Jiwheyẹwhe tọn tọn hlan mì. ¹⁰Mì wẹ kunnudetọ, po Jiwheyẹwhe po ga, le mìlọsu yín wiwe do, dódónọ, mahuwhẹ to ṣẹnṣẹn mì yisenọ lẹ ton: ¹¹dile mì yón le mí nọ jlahomẹdona omẹ dopodopo to mì mẹ do, bọ yè sọ to homẹmiọnna mì, bo sọ to hókọna mì dile otọ́ nọ basi na ovi etọn-lẹ do. ¹²Na mí nido zinzọnlin dole é jẹ na Jiwheyẹwhe tọn do, mẹhe ylọ mì do ahọludu po gigo etọn po mẹ.

¹³Na ehe lọ tọn wutu ga wẹ mí to opédona Jiwheyẹwhe magbọjẹ, na, whenuena mì yí ohó Jiwheyẹwhe tọn, ehe mì sè sọn mí de, mì ma yí i di ohó gbẹtọ tọn gba, ṣigba le é te to nugbo mẹ, ohó Jiwheyẹwhe tọn he to azónwà talala to mì he yise le mẹ ga. ¹⁴Na, mẹmẹsunnu emi, mì basi mehodotọ na agùn he tin to Judé he to Klisti Jesu mẹ lẹ: na mìwlẹ jiya dopolọ hunkọ ga to otòmẹnu mìtọn lẹ de, dile yéwlẹ jiya to Ju lẹ de do ga: ¹⁵mẹhe hù Jesu Oklunọ, po yẹwhegán yetọn titi lẹ po, yé yí homẹken do yàn mí jẹgbonu; yé ma sọ wà ojlo Jiwheyẹwhe tọn, bo sọ jẹagò dọ omẹ pó go: ¹⁶bo to kikọna mí ma nado dọhó hlan Kosi lẹ na yè nido whlẹn yé gán, nado gó ylando yetọn wá aga whepoponu: ṣigba homẹgble gọwá ota yetọn jẹ podo.

¹⁷Ṣigba mìwlẹ, mẹmẹsunnu, mẹhe yè yí sọn mì de to ojlẹ gli de mẹ to nukunta, é ma yín to ayiha mẹ gba, mìwlẹ to owanyi daho talala yí do to vivẹnudo humo nado mọ nukun mìtọn mẹ. ¹⁸Enewutu wẹ mìwlẹ to jijlo nado wá mì de, yèdo yẹn Paulu, whlẹdopo podọ to whlawetọ, ṣigba Satani glọnalina mí. ¹⁹Na etẹ wẹ tódido mítọn, kavi ayajijẹ mítọn, kavi ojegbakun gigodido tọn? Be yèdọ é ma yín mì wẹ, to Jesu Klisti Oklunọ mítọn nukọn to gigòwá etọn whenu? ²⁰Na mìwlẹ wẹ gigo po ayajijẹ mítọn po.

¹ENẸWUTU whenuena mí ma sọ gan sinyẹnlin dẹn ba, mí lẹn dọ é yón nado jo mí dopokẹdẹ do Ateni. ²Bo do Timoti, mẹmẹsunnu mítọn, devizónwàtọ Jiwheyẹwhe tọn, azóngbé mítọn to wendagbe Klisti tọn mẹ hlan, nado hẹn mì lódo, podọ nado miọnhomẹna mì gbọn yise mìtọn dali: ³na yè ma na do yí nukunbibia helẹ do hẹn mẹdepope sẹ́afọ gba: na mìlọsu ko yọnẹn dọ yè ko dè mí do e mẹ. ⁴Na whenuena mìwlẹ tin to mì de, mí ko dọ na mì jẹnukọn nugbo dọ, mí tin nado jiya nukunbia tọn; yèdọ dile é wá jọ do, bọ mì sọ yọnẹn do. ⁵Na ehe tọn wutu, whenuena yẹn ma sọgan sinyẹnlin dẹn ba, yẹn dowẹn hlan nado yón yise mìtọn, vlavo whlepóntọ nẹ ko whle mì pọ́n, bọ magbọjẹ mítọn nasọ yín tata ⁶Ṣigba to dinvie, whenuena Timoti sọn mì de wá mí de, bo sọ hẹn wendagbe yise mìtọn tọn po owanyi mìton tọn po wá, bo dọ mì do oflin dagbe mítọn whepoponu, bo sọ jlo talala nado mọ mí, dile mlwlẹ jlo nado mọ mì do ga: ⁷enẹwutu, mẹmẹsunnu, mí do homẹmimiọn to mì ji to tukla po nukunbibia mítọn lẹpo po mẹ gbọn yise mìtọn dali. ⁸Na mìwlẹ tin to ogbó to dinvie, eyín mìwlẹ nọte gligli to Okluno mẹ. ⁹Na opó tẹwẹ mìwlẹ nasọ to dido na Jiwheyẹwhe na mì tọn wutu, na ayajijẹ lẹpo ehe mẹ mìwlẹ to ayajẹ to Jiwheyẹwhe mítọn nukọn te na mìwlẹ tọn wutu; ¹⁰to ozán po okle po, mìwlẹ to dẹ́ho talala dọ, na mí ni sọgan mọ nukun mìtọn, na mìwlẹ nido hẹn ehe pò to yise mìtọn mẹ sọgbè?

¹¹Be Jiwheyẹwhe lọsu, Otọ́ mítọn, po Jesu Klisti Oklunọ mítọn po, ni deali mítọn jẹ mì de. ¹²Na Oklunọ ni hẹn mì sudeji, na mì ni sọ to susu owanyi mẹ hlan mìnọzọ, podọ hlan gbẹtọ lẹpo, yèdọ dile mí to bibasi hlan mì dali do. ¹³Na é nido hẹn ayiha mìtọn lódo to whẹmagbledo mẹ to owalọ wiwe mẹ to Jiwheyẹwhe nukọn, yèdo Otọ́ míton, to gigòwá Jesu Klisti Oklunọ mítọn tọn whenu po mẹwiwe etọn lepo po.

¹HUMỌ mìwlẹ to mì vè, mẹmẹsun nu, bo sọ to tùdohomẹna mì to Jesu Oklunọ mẹ, dọ dile mì ko kealọyi to mí de, le mì do nọ zinzonlin do, podọ nado wà onú he jlo Jiwheyẹwhe, mọwe mì ni to susudeji gege ²Na mì yon asẹ he hunko mi yí na mì le gbọn Jesu Oklunọ mẹ. ³Na ehe wẹ ojlo Jiwheyẹwhe tọn, yèdọ jijọwiwe mìtọn, dọ mì ni dapána ogàlilọ: ⁴na dopodopo to mì mẹ nido yón le é do nọ zán onú zinzán eton do to jijọwiwe po yeyi po mẹ; ⁵e ma yín to wantúntún me gba, yedọ di Kosi he ma yọn Jiwheyẹwhe lẹ: ⁶mẹdepope wà ylando blo, é sọ klọ mẹmẹsunnu etọn to nudepope mẹ blo: na Oklunọ wẹ ahọsuyitọ to onú helẹ ji wutu, dile mí dọ na mì jẹnukọn, bo sọ to kunnudena ga. ⁷Na Jiwheyẹwhe ma ylọ mí do mawé kòn gba, adavo do jijọwiwe mẹ. ⁸Enẹwutu mẹdepope he to omẹ vleko, é ma to gbẹtọ vlẹko gba, adavo Jiwheyẹwhe mẹhe yí Gbigbọ Wiwe etọn na mí ga.

⁹Ọigba gbọn owanyi mẹmẹsunnu lẹ tọn dali, mì ma do dọ yẹn ni kanwe hlan mì gba: na yè ko plón mìlọsu sọn Jiwheyẹwhe de nado nọ yiwanna mìnọzo. ¹⁰Nugbo, mì sọ to bibasi i hlan mẹmẹsunnu he tin to Makedonia lẹpo: ṣigba mí sọ to mì vọ́, mẹmẹsunnu emi, dọ, mì ni to susudeji talaía; ¹¹podọ na mì ni nọ payi talala nado nọ nò abọẹ, bo nado nọ wàzón mìlọsu tọn, bo sọ nọ yí alọ mìlọsu tọn do wàzón, yèdọ dile mí nasẹ mì do; ¹²na mì nido zinzọnlin pipé hẹ yé he tin to gbonu lẹ, mì sọ jẹhẹn onú depope tọn blo.

¹³Ṣigba yẹn ma na jlo dọ mì ni yin madọnanọ gba, mẹmẹsunnu emi, gbọn yé he damlọn lẹ tọn dali: dọ mì blawú blo, yèdọ di omẹ delẹ he matindo todido. ¹⁴Na eyín mìwlẹ yise dọ Jesu kú bọ sọ fọ́n, yèdọ mọwẹ Jiwheyẹwhe na hẹn yé he damlọn to Jesu mẹ le wá po e po do. ¹⁵Na ehe wẹ mí dọ hlan mì gbọn ohó Oklunọ tọn dali, dọ, mí he tin to ogbè bo sọ pò jẹ gigòwá Oklunọ tọn whenu lẹ, ma na jẹnukọnna yé he damlọn lẹ gba ¹⁶Na Okìunọ lọsu na jẹte sọn olọn me, abobo, ogbè angẹligán tọn, po opèn Jiwheyẹwhe tọn po po e po: osiọ he tin to Klisti mẹ lẹ whé wẹ na fọ́n: ¹⁷whenenu wẹ yè na zé mí he pò to ogbè lẹ do aga po ye po to aslọ mẹ, nado pó Oklunọ to aga: mọwẹ mí na tin to Oklunọ de kakadoi. ¹⁸Enẹwutu mì nọ yí ohó helẹ do miọnhomẹna mìnọzo.

¹ṢIGBA gbọn ojle po owhenu tọn po dali, mẹmẹsunnu emi, mì ma sọ do dọ, yen ni sọ to owé wlan hlan mì gba. ²Na mìlọsu yọnẹn hézehéze dọ, azán Oklunọ tọn ja di ajotọ to ozán mẹ. ³Na whenuena yé to didọmo, Jijọho po gingán po; whenẹnu wẹ dindọn ajiji wá ota yetọn, kẹdẹdi ajlú to yọnnu he mọhò ji; yé ma sọ to na gán ⁴Ṣigba mì, mẹmẹsunnu, mì ma tin to zinviu mẹ, bọ azán lọ nado pla mì di ajotọ gba. ⁵Na mì omẹ pó wẹ ovi hinhọ́n tọn, ovi okle tọn: mì ma yín ozán tọn, kavi zinvlu tọn gba. ⁶Enẹwutu mì dike mí damlọn, dile mẹdevo lẹ to wiwà do blo; ṣigba mì gbọ mí ni nọ họ́ mìde, bo sọ yín huwhénọ. ⁷Na ye he nọ damlọn lẹ, nọ damlọn to ozán me; ye he sọ nọ nùahanmú lẹ, nọ nùahanmú to azán mẹ ⁸Ṣigba mì gbọ, mí he yín okle tọn lẹ, ni yin huwhéno, na mí ni nọ zé otùnudo yise tọn po owanyi tọn po dogo; podọ na ogángbakun, tódido owhlẹngan tọn. ⁹Na Jiwheyẹwhe ma dè mí na homegble gba, adavo nado mọ whlẹngan yí gbọn Jesu Klisti Oklunọ mítọn mẹ, ¹⁰mẹhe kú na mí, dọ eyín mí fon, kavi eyín mí damlọn, na mí nido nò ogbẹ́ dopọ to e de. ¹¹Enẹwutu mì nopo do miọnhomẹna mìnọzo, bo sọ nọ do mìnọzọ daga yèdọ dile mì nọ wà do ga.

¹²Mí sọ to vivè mì, mẹmẹsunnu, dọ mì ni yon yé he to azón wà to mì ṣẹnṣẹn le, he to ogán yín na mì gbọn Oklunọ tọn dali lẹ, bo sọ to núkóna mì; ¹³nado nọ doyẹyi ogo na yé talala to owanyi mẹ na azọn yetọn wutu. Bo sọ nọ nò jijọho hẹ mìnọzọ. ¹⁴Mí sọ jlahomẹdona mì, mẹmẹsunnu, na mì ni nọ kọhona ylanwatọ lẹ, mì nọ miọnhomẹna ayi mawhiwhẹnọ lẹ, mì nọ gọalọna madogánno le, mì sọ nọ sinyenlin hẹ gbẹtọ lẹpo. ¹⁵Mì payi, na mẹdepope yí oylan do sú oylan hó mẹdepope blo, ṣigba mì nọ dafọna ehe yín dagbe whepoponu, to mìlọsu ṣẹnṣẹn podọ hlan gbẹtọ lepo. ¹⁶Mì nọ jaya whepoponu. ¹⁷Mì nohodè magbọje. ¹⁸Mì no dopé to onú popo mẹ: na ehe we ojlo Jiwheyẹwhe tọn to Klisti Jesu mẹ hlan mì dáli. ¹⁹Mì hen Gbigbọ si blo ²⁰Mi gbewanna dodai blo. ²¹Mì nọ dindona onú popo dagbedagbe, mì hẹn ehe yín dagbe go gligli: ²²Mì nò ola na onú he yín oylan lẹpo.

²³Na Jiwheyẹwhe jijọho tọn lọsu ni klọ mì zùn wiwe mlenmlẹn; yẹn sọ to dèho hlan Jiwheyẹwhe dọ yè ni yí gbigbọ, ayiha, po agbasa mìtọn lẹ po whlá to pipa mẹ hlan gigòwá Jesu Klisti Oklunọ mítọn tọn whenu. ²⁴Nugbonọ wẹ ewọ he ylo mì, mehe nasọ hẹn ẹn di ga.

²⁵Mẹmẹsunnu, mì nọ hodè na mí.

²⁶Mì yí nùdonùgo wiwe do dọnúdo mẹmẹsunnu lẹpo. ²⁷Yẹn degbèna mì gbọn Ọklunọ dali do, yè ni hia owé he hlan mẹmẹsunnu wiwe lẹpo.

²⁸Na ojọmiọn Jesu Klisti Oklunọ mítọn tọn ni tin to mì de. Niṣẹ.