1 Kọlintinu Lẹ

¹PAULU he yè ylọ nado yín Apọsteli Jesu Klisti tọn de gbọn ojlo Jiwheyẹwhe tọn dali, po Sostene mẹmẹsunnu mítọn po, ²hlan agùn Jiwheyẹwhe tọn he tin to Kọlinti, hlan yé he yè lèwé to Jesu Klisti mẹ lẹ, he yè ylọ nado yín mẹwiwe, hẹ omẹ popo he to oyín Jesu Klisti Oklunọ mítọn tọn ylọ lẹ to ofi popo, mẹhe yín Oklunọ yé po mí po tọn: ³ojọmiọn po jijọho po ni tin hlan mì sọn Jiwheyẹwhe Otọ́ mítọn de, podọ sọn Jesu Klisti Oklunọ de.

⁴Yẹn to pédona Jiwheyẹwhe ṣie to whepoponu na mì tọn wutu, na ojọmiọn he yè na mì to Jesu Klisti mẹ; ⁵dọ to onú popo mẹ yè hẹn mì wàdọkun to ewọ mẹ, to hódidọ lẹpo mẹ, podọ to oyọnẹn lẹpo mẹ; ⁶yèdọ dile yè hẹn okunnude Klisti tọn lódo to mì mẹ do. ⁷Sọmọ bọ mì ma yì godo to nunina depope mẹ; bo sọ to tenọpón gigòwá Jesu Klisti Oklunọ mítọn tọn: ⁸mẹhe na hẹn mì lódo hlan pòdo, na mì nido yín maylanwhẹnọ to azán Jesu Klisti Oklunọ mítọn tọn gbè. ⁹Nugbonọ wẹ Jiwheyẹwhe, gbọn mẹhe mẹ yè ylọ mì hlan kọndopọ Ovi etọn Jesu Klisti Oklunọ mítọn tọn.

¹⁰Yen vè mì, mẹmẹsunnu emi, gbọn oyín Jesu Klisti Oklunọ mítọn tọn mẹ, dọ mì omẹ póni nọ dọ onú dopolọ, podọ kinklan de tin to mì ṣẹnṣẹn blo; ṣigba dọ yè ni yí gbèsisọ do kòn mì dopọ to ayiha dopolọ mẹ podọ to linlen dopolọ me. ¹¹Na yè ko la hlan mi gbọn mì tọn dali, mẹmẹsunnu ṣie emi, gbọn yé he tin to whédo Kloe tọn mẹ lẹ dali, dọ wiwó tin to mì ṣẹnṣẹn ¹²Ehe wẹ yẹn vẹdo, na dopodopo mìtọn to didọmọ, Paulu tọn wẹ yẹn; Apọlo tọn wẹ yẹn; Kefa ton wẹ yẹn; Klisti tọn wẹ yẹn. ¹³Yè má Klisti pé wẹ? Paulu wẹ yè whè do satin go na mì? kavi oyín Paulu tọn mẹ wẹ yè baptizi mì do? ¹⁴Yẹn dopẹna Jiwheyẹwhe dọ yẹn ma baptizi ode mì tọn adavo Klispu po Gaiu po; ¹⁵na mẹde nikã dọ dọ yẹn baptizi to oyín ṣie titi mẹ. ¹⁶Yẹn baptizi whédo Stefana tọn ga: dogó ehelẹ, yẹn ma yọnẹn eyín yẹn sọ baptizi medevo de. ¹⁷Na Klisti ma do mi hlan nado baptizi gba, adavo nado dọyẹwhẹho wẹndagbe ton: é ma yín to nuyọnẹn ohó lẹ tọn mẹ gba, na satin Klisti tọn nikã zùn ovó.

¹⁸Na onulu wẹ yẹwhehodidọ satin tọn hlan yé he dòn lẹ; ṣigba hlan mìwlẹ he yè whlengan huhlọn Jiwheyẹwhe tọn wẹ ¹⁹Na yè wlan ẹn dọ,

²⁰Fie wẹ nuyọnẹntọ lọ te? fie wẹ wekantọ lọ te? fie wẹ nudòntọ owhenu he tọn te? be Jiwheyẹwhe ma ko hẹn nuyọnẹn aihọn he tọn zùn nulu ²¹Na mimọ dọ to nuyọnẹn Jiwheyẹwhe tọn mẹ aihọn gbọn nuyọnẹn etọn mẹ ma yón Jiwheyẹwhe gba, é yín homẹhùnnú Jiwheyẹwhe tọn dagbe gbọn onulu yẹwhehodidọ tọn mẹ nado whlẹn yé he yise lẹ gán. ²²Mimọ dọ Ju lẹ to ohia biọ, Gleki lẹ sọ to nuyọnẹn dinpe. ²³Ṣigba mìwlẹ to yewheho Klisti mẹwhedosatingo tọn dọ, zannuahlida de hlan Ju lẹ, podọ hlan Gleki lẹ onulu; ²⁴ṣigba hlan yé he yè ylọ lẹ, hlan Ju po Gleki po, huhlọn Jiwheyẹwhe tọn wẹ Klisti, podọ nuyọnẹn Jiwheyẹwhe tọn. ²⁵Na onulu Jiwheyẹwhe tọn yin nuyọnẹnnọ hú gbẹtọ lẹ wutu; podọ madogán Jiwheyẹwhe tọn yín huhlunnọ hú gbẹtọ lẹ.

²⁶Na mì mọ oylọ mìtọn, mẹmẹsunnu emi, dọ é ma yín nuyọnẹntọ susu gbọn agbasalan tọn mẹ, é ma yín hlọnhlọnnọ susu, é ma yín mẹgbógbo susu, wẹ yè ylọ gba; ²⁷ṣigba Jiwheyẹwhe ko dè onú aihọn tọn lẹ he lunu nado dowinyan nuyọnẹntọ lẹ, Jiwheyẹwhe ko sọ dè onú madogán aihọn tọn lẹ nado dowinyan onú he yin huhlọnnọ lẹ; ²⁸podọ onú hlo aihọn tọn lẹ, po onú he yè vivlẹ lẹ po, wẹ Jiwheyẹwhe dè, mọwẹ, onú he ma tin lẹ, nado hẹn onú he tin lẹ zún ovó; ²⁹na agbasalan de ma na do doawagun to Jiwheyẹwhe nukọn. ³⁰Ṣigba é de wẹ mì sọn to Klisti Jesu mẹ, mẹhe yè yí do basi nuyọnẹn, po dódó po, lẹ́wé po ofligò po hlan mí sọn Jiwheyẹwhe de: ³¹dọ, dile yè wlan ẹn dọ, Ewọ he to awagundo, mì gbọ é ni to awagundo to Oklunọ mẹ.

¹PODỌ yẹn, mẹmẹsunnu emi, whenuena yẹn wá mì de, é ma yín po owhanpẹ hógbè vivi tọn po, kavi nuyọnẹn tọn po, wẹ yẹn hẹn wá mì de whenuena yẹn to okunnude Jiwheyẹwhe tọn la hlan mì gba. ²Na yẹn ko magbè etọn ma nado yọ́n núde to mì ṣẹnṣẹn, adavo Jesu Klisti, podọ ewọ mẹwhedosatingo. ³Podọ yẹn ko tin to mì de to madogán mẹ, podọ to obu mẹ, podọ to sisọsisọ susu mẹ. ⁴Podọ hógbè ṣie po yẹwhehodidọ ṣie po ma yín to nuyọnẹn gbẹtọ tọn mẹ he yè do nọ diọ ayiha na omẹ gba, ṣigba to osọhia Gbigbọ tọn po huhlọn tọn po mẹ: ⁵na yise mìtọn ma nado nọte to nuyọnẹn gbẹtọ tọn mẹ, adavo to huhlọn Jiwheyẹwhe tọn mẹ.

⁶Ṣigba mìwlẹ nọ dọhó nuyọnẹn tọn to yé he pó lẹ ṣẹnṣẹn; ṣigba é ma yín nuyọnẹn aihọn he tọn, kavi ahọvi aihọn he tọn lẹ tọn, he nọ lẹzun ovó gba: ⁷ṣigba mìwlẹ to nuyọnẹn Jiwheyẹwhe tọn dọ to nudabla mẹ, yèdọ nuyọnẹn he whlá, he Jiwheyẹwhe ko doai jẹnukọnna aihọn hlan gigọ́ mítọn: ⁸ehe ahọvi aihọn he tọn lẹ de ma yọnẹn: na eyin yé ko yón ẹn, yé ma do whè Oklunọ gigo tọn do satin go gba. ⁹Ṣigba dile yè wlan ẹn dọ,

¹PODỌ yẹn, mẹmẹsunnu emi, yẹn ma sọgan dọhó hlan mì di hlan gbigbọnọ gba, ṣigba di hlan àgbasanọ, yèdọ di hlan ovivu to Klisti mẹ. ²Yẹn kò yí oyìnnọ́ do yìn mì, é ma yín ọlàn gba: na mìwlẹ ma ko sọgan yí; ì kaka jẹ dinvie, mọ mì ma tlẹ ko sọgan yí i to dinvie lọ. ³Na mì gbé sọ to agbasanọ yín: na sọle núvẹun, po wiwó po, po kinklan po tin to mì ṣẹnṣẹn, be mì ma to agbasano yín; bo sọ to zọnlinzin di gbẹtọ tọn? ⁴Na whenuena mẹde to didọmọ, Paulu tọn wẹ yẹn; bọ mẹdevo didọmọ, Apọlo tọn wẹ yẹn; be mìwlẹ má to agbasanọ yín? ⁵Mẹnu ka wẹ Paulu, podọ mẹnu wẹ Apọlo, adavo devizònwàtọ gbọn mẹhe dàli mì yise, yèdọ dile Oklunọ na omẹ dopodopo do? ⁶Yẹn do, Apọlo húsinna: ṣigba Jiwheyẹwhe wẹ to jideji na omẹ. ⁷Be mọwẹ é ma yín ewọ mẹhe do onú de, kavi ewọ mẹhe húsinna; adavo Jiwheyẹwhe he to jideji na omẹ. ⁸Ewọ mẹhe do, po ewọ mehe húsinna po dopo wẹ yé: podọ omẹ dopodopo na mọ ale etọn titi yí kẹdẹdi tuklajẹ etọn titi lọsu. ⁹Na azónyíwàhẹmẹtọ dopọ hẹ Jiwheyẹwhe wẹ mìwlẹ: oglelilẹ Jiwheyẹwhe tọn wẹ mìwlẹ, mì wẹ hòdidó Jiwheyẹwhe tọn.

¹⁰Kẹdẹdi ojọmiọn Jiwheyẹwhe tọn he yè na mi, di ogán didótọ de, yẹn ko do dòdó ai, mẹdevo sọ to didó do e ji; ṣigba mì gbọ omẹ dopodopo ni payi le é to didó do e ji do go. ¹¹Na dodó devo de ma tin bọ mẹde sọ sọgan doai hú ehe yè doai nẹ, he yín Jesu Klisti. ¹²Ṣigba eyín omẹ de dó sika, fataka, zannu akuẹgege tọn, atin, ogbé, ogbesanpo, do dòdó he ji; ¹³azón omẹ dopodopo tọn na sọawúhia; na azán lọ na la ẹ, na yè na dè e hia gbọn miyọn dali; podọ miyọn na whle azón omẹ dopodopo tọn pọ́n ehe nkọ é yín. ¹⁴Eyín azón omẹ de tọn he é dó do e ji nọte, ewọ na mọ ale yí. ¹⁵Eyín azón omẹ de tọn fiọ, onú na gú i: ṣigba yè na whlẹn ewlọsu gán; gãnṣo di gbọn miyọn mẹ.

¹⁶Be mì ma yọnẹn dọ tẹmpli Jiwheyẹwhe tọn wẹ mì, podọ Gbigbọ Jiwheyẹwhe tọn nọnọ̀ mì mẹ? ¹⁷Eyín omẹ depope hẹn tẹmpli Jiwheyẹwhe tọn súdo; ewọ lọ wẹ Jiwheyẹwhe na súdo; na wiwe wẹ tẹmpli Jiwheyẹwhe tọn, tẹmpli he mì yín.

¹⁸Mẹde klọ ede blo. Eyín omẹ de lẹn dọ e yín nuyọnẹntọ to mì mẹ to aihọn he mẹ, mì gbọ é ni lẹzun nulunọ, na é nido yín nuyọnẹntọ. ¹⁹Na nuyọnẹn aihọn he tọn onulu wẹ to Jiwheyẹwhe de Na yè wlan ẹn dọ, E wlé nuyọnẹntọ lẹ to nuyọnẹn yetọn titi mẹ. ²⁰Podọ, Oklunọ yón linlẹn nuyọnẹntọ tọn lẹ, dọ ovó wẹ yé. ²¹Enẹwutu mẹde doawagun to gbẹtọ mẹ blo. Na mìtọn wẹ onú lẹpo; ²²yín é yín Paulu, kavi Apọlo, kavi Kefa, kavi aihọn, kavi ogbé, kavi okú, kavi onú dinvie tọn, kavi onú he ja; mìtọn wẹ popo; ²³Klisti tọn wẹ mìwlẹ; Jiwheyẹwhe tọn sọ wẹ Klisti.

¹MI gbọ gbẹtọ ni nọ lẹn mítọn domọ, di devizònwàtọ Klisti tọn lẹ, podọ hònkọnsi nudabla Jiwheyẹwhe tọn lẹ tọn. ²Humọ yè biọ to hònkọnsi lẹ mẹ, dọ yè ni mọ omẹ lọ yín nugbonọ. ³Ṣigba to yẹn de onú pẹvi talala de wẹ é yín dọ yè nido to dòdìnna mi sọn mì de, kavi sọn whẹ̀dida gbẹtọ ton mẹ: mọwẹ, yọn ma dòdinna dèlọsu gba. ⁴Na yẹn ma yón núde do dẽ go gba; gãnṣo yè ma sùwhẹna mi gbọn ehe dali gba: ṣigba omẹ he to whiwhle mi pọ́n wẹ Oklunọ. ⁵Enẹwutu mì dawhéna nudepope jẹnukọnna ojlẹ lọ blo, kaka Oklunọ nado wá, mehe na hẹn onú zinvlu tọn he bé lẹ wá hinhọ́n me, bo nasọ hẹn linlẹn ayiha tọn lẹ sọawúhia: whenẹnu wẹ omẹ dopodopo na tindo pipa etọn to Jiwheyẹwhe de.

⁶Mẹmẹsunnu emi, onú helẹ wẹ yẹn ko tindo to apajlẹ mẹ zánhlan dẽ, po Apolo po na mìtọn wutu: dọ to mìwlẹ mẹ mìwlẹ nido plón ma nado lẹn do gbẹtọ go hú ehe yè wlan lẹ, na yè ma nado hẹn omẹ de sọn mì mẹ kla na omẹ de do mẹdevo ji. ⁷Na mẹnu wẹ hẹn hie nado gbọnvòna mẹdevo? etẹ hiẹ tindo bọ hiẹ ma mọyi? ṣigba eyín hiẹ mọ ẹn yí wẹ, etẹwutu ka wẹ hiẹ to awagundo taidi é ma yín dọ hiẹ mọ ẹn yí wẹ? ⁸Dinvie mìwlẹ yín omẹ he gó, dinvie mìwlẹ yín adọkunnọ, mìwlẹ to gándu di ahọlu matin mí: mọwẹ, yẹn sọ jlo dọ mì ni to gándu, na mìwlẹ ga nido dugán hẹ mì. ⁹Na, yẹn lẹn do Jiwheyẹwhe ko yí mí apọsteli lẹ do opòdo, di omẹ yè dè hlan okú; na yè yí mí do basi omẹ pinpọ́n de hlan aihọn, podọ hlan angẹli lẹ, podọ hlan gbẹtọ lẹ. ¹⁰Mí yín nulunọ na Klisti ton wutu, ṣigba mìwlẹ yín nuyọnẹntọ to Klisti mẹ; mìwlẹ yín madogánnọ, ṣigba mìwlẹ yín huhlọnnọ; mìwlẹ yín mẹwleyẹyina, ṣigba mìwlẹ yín mẹvivlẹ. ¹¹Yèdọ kaka je ojlẹ dinvie tọn mẹ huvẹ to mí hù, ové to mí hú, mí to omé, yè sọ to núli mí, mí ma sọ tindo ofi ninó de; ¹²mí to yaji, bo sọ yí alọ mítọn titi do to azónwà; yè to mí vlẹko, mìwlẹ to didona; yè to homẹkẹndo mí, mí to tasisẹ do e mẹ: ¹³yè to mí dèpò, mìwlẹ to vẹvẹ; yè yí mí do basi di odiho aihọn tọn; mí sọ yín ayámí onú lẹpo tọn kaka jẹ azán egbé tọn. ¹⁴Yẹn ma wlan onú helẹ nado dowinyan mì gba, ṣigba di ovi yiwanna ṣie lẹ yẹn to núkóna mì. ¹⁵Na le mì tle tindo núplónmẹtọ fọtọ́n ao to Klisti mẹ, gãnṣo mì ma tindo otọ́ susu gba: na Klisti Jesu mẹ wẹ yẹn dè mì tọ́n te gbọn wẹndage mẹ. ¹⁶Enẹwutu yẹn Vẹ mì, mì yín mẹhodotọ ṣie. ¹⁷Na onú he wutu wẹ yẹn do Timoti hlan mì, mẹhe yín ovi yiwanna ṣie, podọ nugbonọ to Oklunọ mẹ, mẹhe na hẹn aliho ṣie he tin to Klisti mẹ lẹ wá oflin mìtọn mẹ, dile yẹn to mẹplón do to ofì popo to agùn popo mẹ ¹⁸Mẹdelẹ to kikla, di yẹn ma tlẹ ja mì de gba. ¹⁹Ṣigba yẹn na wá mì de to yọ́yvie, eyín Oklunọ jlo; bo na yọnẹn, é ma yín ohógbè omẹ he to kikla lẹ tọn gba, adavo huhlọn lọ. ²⁰Na aholudu Jiwheyẹwhe ton ma tin to ohó mẹ gba, adavo to huhlọn mẹ. ²¹Etẹ wẹ mìwlẹ jlo? Yẹn na wá mì de po opò de po wẹ, kavi to owanyi po gbigbọ wàlọmimiọn tọn de po mẹ?

¹YE to didọ pé dọ galilọ de tin to mì ṣẹnṣẹn, galilọ he hunkọ dile yèdọ e ma tin to Kosi lẹ ṣẹnṣẹn, dọ omẹ de sọn mì mẹ yí asi otọ́ etọn tọn. ²Mìwlẹ sọ to kikla, bo ma kúkú blawú gba, na yè ni dè omẹ he wà onú he sọn mì ṣẹnṣẹn. ³Na yẹn nugbonugbo, le yẹn ma tin to mì de to agbasa mẹ, ṣigba bo tin to mì de to gbigbọ mẹ, yẹn ko dawhẹna ewọ, di yen tlẹ tin to mì de, omẹ he wà onú he lọ. ⁴To oyín Jesu Klisti Oklunọ mítọn tọn mẹ, whenuena mì pli dopọ, po gbigbọ ṣie po, po huhlọn Jesu Klisti Oklunọ mítọn tọn po. ⁵Nado jo omẹ mọnkọtọn de hlan Satani na hùsúdo agbasalan tọn, na yè nido whlẹn gbigbọ gán to azán Jesu Oklunọ tọn gbè. ⁶Awagundido mìtọn ma yin dagbe gba. Mì ma yọnẹn dọ otọn pẹvide wẹ nọ hẹn olinfín lẹpo ji? ⁷Enẹwutu mì plọ otón hóhó sè, na mì nido yín olinfín yóyọnọ, dile mì yín madotón do. Na juwayì mítọn ko yín nudosánvọna mí ga, yédọ Klisti: ⁸enẹwutu mì gbọ mí ni wà hunwhẹ lọ, é ma yín po otón hóhó po gba, kavi po otọ́n okẹn tọn po po kanyinylan po tọn gba; ṣigba po akla madotónnọ homẹwiwe po nugbo tọn po.

⁹Yẹn wlanwe hlan mì to episteli de mẹ ma nado dogbè hẹ ogàlọtọ lẹ: ¹⁰gãnṣo é ma yín hẹ ogàlọtọ aihọn he tọn lẹpo patapata gba, hẹ nukunkẹnnọ lẹ, kavi alọslonamẹtọ lẹ, kavi hẹ bosiọsẹntọ lẹ; na whenẹnu mì do na yì sọn aihọn mẹ. ¹¹Ṣigba dinvie yen wlanwe hlan mìma nado dogbé, eyín omẹ he yè ylọ mẹmẹsunnu de yín ogàlọtọ, kavi nukunkẹnnọ, kavi bosiọsẹntọ, kavi nutlọtọ, kavi ahannumunọ, kavi alọslonamẹtọ; mì dùnú hẹ omẹ mọtọnnkọ lala blo. ¹²Na etẹwẹ yẹn tindo nado wà po whèdidana yé omẹ he tin to gbonu lẹ po? mìwlẹ ma nọ dawhẹna yéhe tin to họmẹ lẹ? ¹³Sọle Jiwheyẹwhe to whẹ̀dana omẹ he tin to gbonu lẹ do. Enẹwutu mì dè omẹ ylankan lọ sè sọn mìde ṣẹnṣẹn.

¹ODE to mì mẹ, he tindo owhẹho de do awetọ etọn go, ha bo yì ofi o whẹ̀da tọn to mawàdódónọ nukọn, bo ma yín mẹwiwe lẹ nukọn? ²Mì ma yọnẹn dọ mẹwiwe lẹ wẹ na dawhèna aihọn? eyín yè na dawhèna aihọn gbọn mì dali, be mì yín mẹmajẹ nado dawhẹna owhẹho he whèhúgan lẹ? ³Mì ma yọnẹn dọ míwlẹ wẹ na dawhèna angẹli lẹ? nẹmunẹmu wẹ onú he yín ogbè he tọn? ⁴Eyín mìwlẹ whenẹnu tindo nado dawhè onú he yín ogbè he mẹ tọn lẹ, bó omẹ he ma diyín mìwlẹ nọ zé yé to agùn mẹ daga nado dawhè? ⁵Yẹn dọ ehe nado hẹn winyan hù mì. Mọ wẹ é yín, dọ yè ma sọgan mọ gbẹtọ nuyọnẹntọ de to mì ṣẹnṣẹn gba, omẹ he na tin sọgan nado dawhè to mẹmẹsunnu etọn lẹ ṣẹnṣẹn, ⁶Ṣigba mẹmẹsunnu to osén kòn yì po mẹmẹsunnu po, podọ enẹ to mayisenọ lẹ nukọn. ⁷Lala, nugugu gbidigbidi de wẹ e yín to mì mẹ, dọ mì tindo owhẹylọ lẹ mẹde po mẹde po. Etẹwutu mì ma nọ kuku gbọ yí ogúwhẹ? etẹwutu mì ma nọ kuku gbọ yín mẹbibàdù? ⁸Lala, mì wà nujagò, bo sọ ba omẹ du, podọ enẹ mẹmẹsunnu mìtọn lẹ. ⁹Be mì ma yọnẹn dọ mawàdódónọ lẹ ma na dugú ahọludu Jiwheyẹwhe tọn? Yè klọ mì blo; ogàlọtọ lẹ, kavi bosiosẹntọ lẹ, kavi ayòdetọ lẹ, kavi yọnnujọmẹ lẹ, kavi yé he nọ yí sunnu do hẹn yéde gble lẹ. ¹⁰Kavi ajotọ lẹ, kavi nukunkẹnnọ lẹ, kavi ahannumunọ lẹ, kavi mẹvlẹtọ lẹ, kavi alọslonamẹtọ lẹ de ma na dugu ahọludu Jiwheyẹwhe tọn. ¹¹Mọ wẹ mẹdelẹ te to mì mẹ; ṣigba yè ko klọ́ mì, ṣigba yè ko lè mì wé, ṣigba yè ko sùwhẹna mì to oyín Jesu Oklunọ tọn mẹ, podọ to Gbigbọ Jiwheyẹwhe mítọn tọn mẹ.

¹²Onú lẹpo wẹ jẹ na mi, ṣigba onú popo ma yín ale tọn: onú lẹpo wẹ jẹ na mi, ṣigba yè ma na hẹn mi wá huhlọn ode tọn glọ gba. ¹³Núdùdù lẹ na adọ̀go, adọ̀go na núdùdù lẹ: ṣigba Jiwheyẹwhe na hẹn ẹn po yé po wá ovò mẹ. Ṣigba agbasa ma tin na ogàlilọ gba, adavo na Oklunọ; podọ Oklunọ na agbasa. ¹⁴Jiwheyẹwhe he zé Oklunọ tite, na zé mìlọsu tite ga gbọn huhlọn etọn mẹ. ¹⁵Be mì ma yọnẹn dọ agbasa mìtọn lẹ awutugonu Klisti tọn wẹ yé? be yẹn na yí awutugonu Klisti tọn lẹ, bo hẹn yé zun awutugonu ogàlọtọ de tọn wẹ? E yín mọ blo ¹⁶Kavi mì ma yọnẹn dọ ewọ he kònawudopọ hẹ ogàlọtọ de yín agbasa dopo? na, awe lọ na yín agbasalan dopo, wẹ é dọ. ¹⁷Ṣigba ewọ he yè kòndopọ hlan Oklunọ yin gbigbọ dopo. ¹⁸Mì hòn na ogàlilọ. Ylando he gbẹtọ wà lepo tin to gbonu na agbasa; ṣigba ewọ he lọgà wàylando do agbasa etọn titi go. ¹⁹Kavi mì ma yọnẹn dọ agbasa mìtọn fiwiwe Gbigbọ Wiwe he tin to mì mẹ tọn de wẹ, ehe mì tindo sọn Jiwheyẹwhe de, podọ mì ma yín mìde titi tọn? ²⁰Na yè ko yí akuẹ sọha de do hò mì: enẹwutu mì nọ pagigona Jiwheyẹwhe to agbasa mìtọn mẹ, podọ to gbigbọ mìtọn mẹ, ehe yín Jiwheyẹwhe tọn lẹ.

¹GBỌN onú he mì wlanwe hlan mi lẹ tọn dali: E yòn na sunnu ma nado gàn do yọnnu go. ²Ṣigba na ogàlilọ tọn wutu, mì gbọ sunnu dopodopo ni tindo asi etọn titi, bo sọ gbọ yọnnu dopodopo ni tindo asú etọn titi. ³Mì gbọ asú lọ ni wà jlodagbe he jẹ hlan asi; mọkẹdẹ wẹ asi ni nọ wà hlan asú ga. ⁴Asi ma tindo huhlọn to agbasa etọn titi ji gba, adavo asú: mọkẹdẹ ga asú ma sọ tindo huhlọn to agbasa etọn titi ji gba, adavo asi. ⁵Mì bà mìnọzo dù blo, adavo é yín po gbèyiyi po na osã de, na mì nido jo mìde hlan odè; bo sọ gò wá nọpọ, na Satani ma nado whle mì pòn na temanọ mìtọn tọn wutu. ⁶Ṣigba gbèdide dali wẹ yẹn dọ ehe gbọn, é ma yín osén tọn gba. ⁷Na yẹn jlo dọ omẹ popo ni nò yèdọ dile yẹn lọsu te. Ṣigba omẹ dopodopo tindo nunina etọnetọn sọn Jiwheyẹwhe de, ode gbọn ehe dali, podọ devo gbọn enẹ dali.

⁸Enẹwutu yẹn dọ hlan tlẹnnọ lẹ po asúsiọsi lẹ po, E yòn na yé eyín yé gbọ bo nò dile yẹn te ⁹Ṣigba eyín yé ma sọgan hẹn ẹn, mì bo gbo yé ni wlealọ: na é pònte nado wlealọ hú nado túnwán. ¹⁰Ṣigba hlan alọwletọ lẹ wẹ yẹn dosénna, gãnṣo é ma yín yẹn gba, adavo Oklunọ, Mì dike asi klán sọn asú etọn de blo: ¹¹ṣigba eyín é klán, mì gbọ ni tin mawlealọhẹ, kavi yè ni hen ẹn gbọwhẹ hẹ asú etọn: mì sọ dike asú gbé asi etọn dai blo. ¹²Ṣigba hlan omẹ he po lẹ wẹ yẹn to didọ, é ma yín Oklunọ gba: Eyín mẹmẹsunnu de tindo asi he ma yise, bo homẹ etọn hùn nado nò hẹ ẹ, mì dike ewọ gbé ẹ dai blo. ¹³Yọnnu he sọ tindo asú he ma yise, eyín homẹ eton hùn nado nò hẹ ẹ, mì dike é jo e da: blo. ¹⁴Na yè lè asú he ma yise we gbọn asi dali, yè sọ lè asi he ma yise we gbọn asu dali; eyín é ma yín mọ ovi mìtọn lẹ yín mawe; ṣigba dinvie yé yín wiwe. ¹⁵Ṣigba eyin mayisenọ lọ klán, mì gbọ é ni klán. Mẹmẹsunnu de kavi mẹmẹyonnu de ma tin to sínsín glọ na owheho mọtonnkọ gba: ṣigba Jiwheyẹwhe ylọ mí hlan jijọho. ¹⁶Na etẹwẹ hiẹ yọnẹn hie asi, eya hie na whlen asú towe gán? kavi nawọ hie yọnẹn do, hiẹ asú, eya hie na whlẹn asi towe gán? ¹⁷Ṣigba dile Jiwheyẹwhe má hlan omẹ dopodopo, dile Oklunọ ylọ omẹ dopodopo do, mọwẹ mì ni gbọ é ni zinzọnlin do. Mọwẹ yẹn sọ doai do to agùn lẹpo mẹ. ¹⁸Mẹde tin he yín whègbonọ bọ yè ylọ? mì dike é sọ gò zùn whèmagbonọ blo. Yè ylọ mẹde to whẹmagbo mẹ? mì dike é yín whẹgbonọ blo. ¹⁹Owhẹgbo nutata wẹ, whẹmagbo nutata wẹ, adavo yìnyìn osén Jiwheyẹwhe tọn lẹ. ²⁰Mì gbọ omẹ dopodopo ni nò oylọ dopolọ mẹ ehe mẹ yè ylọ ẹ te. ²¹Yè ylọ we whenuena hie yín mẹmẹglọ? a hò e pọ́n blo: ṣigba eyín yè sọgan hẹn we jẹ medekannu, bo kúkú zán ene ²²Na omẹ he yè ylọ to Okluno mẹ, whenuena é yín mẹmẹglọ, mẹmẹdekannu Oklunọ tọn wẹ é yín: mọ dopolọ wẹ omẹ he yè ylọ, whenuena é yín mẹmẹdekannu, mẹmẹglọ Klisti tọn wẹ é yín. ²³Yè ko yí akuẹ sọha de do hò mì; mì sọ yín mẹmẹglọ gbẹtọ tọn blo. ²⁴Mẹmesunnu emi, mì gbọ omẹ dopodopo ni nọnọ̀ hẹ Jiwheyẹwhe to ehe mẹ yè ylọ ẹ te.

²⁵Ṣigba gbọn awhli lẹ tọn dali, yẹn ma tindo asẹ Oklunọ tọn de gba; ṣigba yẹn na whẹ̀dida ṣie, di omẹ he alọ etọn ko jẹ lẹblanu Oklunọ tọn go nado yín nugbonọ. ²⁶Enẹwutu yẹn lẹn dọ ehe yòn na magbọjẹ dinvie tọn wutu, yẹn dọ, é yòn na sunnu nado nò mọ. ²⁷Yè ko sín we do asi de go? a din dọ yè ni tún we sè blo. Yè ko tún we sè sọn asi de go? a sọ din asi de blo. ²⁸Ṣigba eyín hiẹ wlealọ, hiẹ ma wàylando gba; eyín awhli de wlealọ, ewọ ma waylando gba. Ṣigba omẹ mọtọnnkọ lẹ na tindo tukla to agbasalan mẹ; ṣigba yẹn hla mì dote. ²⁹Ṣigba yẹn dọ ehe, mẹmẹsunnu emi, ogli wẹ ojlẹ lọ: é pò, bọ omẹ he tindo asi lẹ ni taidi yé ma tindo de; ³⁰omẹ he to avivi lẹ, taidi yé ma viavi; omẹ he to ayajẹ lẹ, taidi yé ma jaya; omẹ he to hihò lẹ, taidi yé ma tindo; ³¹omẹ he to aihọn he zán lẹ, di omẹ mawànujagò do e: na owalọ aihọn he tọn to jujuyì. ³²Ṣigba yẹn jlo dọ mì ni tin matin otuklajẹ. Ome he gbọtlẹn nọ jẹtukla na onú he yín Oklunọ tọn lẹ, le é na wà onú he jlo Oklunọ do: ³³ṣigba ewọ he wlealọ nọ jẹtukla na onú he yín aihọn tọn le, le é na wà onú he jlo asi etọn dò. ³⁴Vogbingbọn tin ga to asi po awhli po ṣẹnṣẹn. Yọnnu he ma tindo asú nọ jẹtukla na onú he yín Oklunọ tọn lẹ, na é nido yín wiwe to agbasa mẹ podọ to gbigbọ mẹ: ṣigba ewọ he tindo asú nọ jẹtukla na onú aihọn tọn lẹ, le é na wà onú he jlo asú etọn do. ³⁵Ale mìtọn we yẹn dọ ehe na: e ma yín na yẹn nido yí do domò na mì we gba, adavo na enẹ he jẹ podọ na mì nido nọ sèn Oklunọ matin agòjodogodo: ³⁶Ṣigba eyín sunnu de lẹn dọ é ko wanú yìndo hlan awhli etọn go, eyín é ko zè owhè etọn go, eyín é jẹ ni yín mọ mì gbọ é ni wà onú he é jlo, é ma wàylando gba: mì gbọ yé ni wlealọ. ³⁷Ṣigba omẹ he nọte gligli to ayiha etọn mẹ, bo ma tindo, mananọmawà, ṣigba bo tindo buhlọn to ojlo etọn titi ji, bo ko sọ magbè etọn do mọ to ayiha etọn mẹ dọ é na whla awhli etọn, wẹ wàdagbe. ³⁸Mọwẹ omẹ he sọ na ẹn omẹ to alọwle mẹ wàdagbe; ṣigba omẹ he ma na ẹn omẹ to ólọwle mẹ wàdagbe hú. ³⁹Yè sín asi gbọn osén dali sọ le asú etọn tin to ogbè dẹn do: ṣigba eyín asú etọn kú, é vò nado yín mẹwlealọna hlan mẹhe jlo é; to Oklunọ mẹ kẹdẹ. ⁴⁰Ṣigba eyín é nọte mọ, donanọ daho wẹ ewọ, to linlẹn ṣie mẹ yẹn so lẹn ga dọ yẹn tindo Gbigbọ Jiwheyẹwhe tọn.

¹GBỌN onú yí do sánvọ́ hlan bosiọ lẹ tọn dali, mí yọnẹn dọ mí omẹ pó wẹ tindo oyọnen. Oyọnẹn nọ kla, ṣigba owanyi nọ hẹn omẹ dote. ²Eyín omẹ de sọ len dọ ewọ yon onú de, é ma ko yón núde dole é jẹ e ni yọnẹn do gba. ³Ṣigba eyín omẹ de yiwanna Jiwheyẹwhe, omẹ nẹ wẹ yín mẹyinyọnẹn etọn. ⁴Enewutu gbon dùdù onú nẹlẹ he yè na to avósán mẹ hlan bosio letọn dali, mìwlẹ yọnen dọ nutata wẹ bosiọ to aihọn mẹ, podọ Jiwheyẹwhe devo de ma tin adavo dopo. ⁵Na le é tlẹ yín do delẹ tin bọ yè to yiylọ yẹwhe, to olọn mẹ kavi to aihọn mẹ (dile yẹwhe susu tin, bọ Oklunọ sọ sù,) ⁶ṣigba hlan mìwlẹ Jiwheyẹwhe dopo wẹ tin, Otọ́, mẹhe de onú lẹpo sọn, mẹhe mẹ mìwlẹ te; Oklunọ dopo, Jesu Klisti, mẹhe dali onú lẹpo tin gbọn, podọ mìwlẹ gbọn e dali. ⁷Ṣigba oyọnẹn nẹ nkọ ma tin to omẹ popo homẹ gba: na mẹdelẹ yì ayiha he ma hia bosiọ di nutata do to dùdù i kaka jẹ ojlẹ he mẹ di onú he yè yí do sànvó hlan bosiọ; ayiha yeton he yín madogannọ, sọ zùn mawe. ⁸Ṣigba núdùdù ma pa mí hlan Jiwheyẹwhe gba: na é ma yín eyín mí dù, wẹ mi do yín mẹpónte; kavi eyín mí ma dù, wẹ mí do yín meylanhú gba. ⁹Ṣigba mì nọ payi na huhlọn mìtọn he nikã yín zannuahlída de hlan madogánnọ lẹ. ¹⁰Na eyín omẹ de mọ hie mẹhe tindo oyọnèn sinai to núdùdù kọn to tẹmpli bosiọ tọn mẹ, be ayiha etọn, eyín ewọ yín madogánnọ ma ka na jẹglo nado dù onú nẹlẹ he yè yí do sánvọ́ hlan bosiọ lẹ; ¹¹podọ gbọn oyọnẹn towe dali wẹ mẹmẹsunna madogánnọ na dọ và, mẹhe Klisti kú na? ¹²Ṣigba whenuena mì to ylanwà do mẹmẹsunnu lẹ go do le, bo sọ to awugblena ayiha madogánnọ yetọn, Klisti wẹ mì to ylanwà do. ¹³Enẹwutu eyín núdùdù hẹn mẹmẹsunnu ṣie dahli, yẹn ma to na dù olàn whenuena aihọn gbé to ote, na yẹn nikã hẹn mẹmẹsunnu ṣie dahli.

¹BE é ma yín apọsteli de wẹ yẹn? be yẹn ma yín mẹmẹdekannu? be yẹn ma ko mọ Jesu Klisti Oklunọ mítọn? é ma yín azón ṣie to Oklunọ mẹ wẹ mìwlẹ? ²Eyín yẹn ma yín apọsteli hlan mẹdevo lẹ, be apọsteli dódo wẹ yẹn hlan mìwlẹ: na hiadonu apọstelizón ṣie tọn wẹ mìwlẹ yín to Oklunọ mẹ. ³Hogbigblọn ṣie hlan yé he to dòdinna mi lẹ we: ehe, dọmọ, ⁴be mìwlẹ ma tindo huhlọn nado to dùdù, bo sọ to nùnù? ⁵Be mìwlẹ ma tindo huhlọn nado no hẹn asi he yín nọtú danpé, dile apọsteli he pò lẹ te; di mẹmẹsunnu Oklunọ tọn lẹ, po Kefa po? ⁶Kavi yẹn po Balnaba po kẹdẹ, be mí ma tindo huhlọn nado gbò azọ́nwà? ⁷Mẹnu wẹ nọ yì awhàn to ojlẹ de mẹ to akuẹzinzán ede tọn mẹ? mẹnu wẹ nọ do ojipa ovẹ̃n tọn bo ma nọ dù to sinsẹ́n etọn mẹ? kavi mẹnu wẹ nọ yìn okanlin, bo ma nọ dù to oyìnnọ́ okanlin lọ tọn mẹ? ⁸Yẹn to onú helẹ dọ di gbẹtọ wẹ? kavi osén ma dọ dopolọ ga? ⁹Ná yè wlan ẹn to osẹn Moṣe tọn mẹ dọ, Hiẹ ma na doajanuna oyín he to oli tùn. Be Jiwheyẹwhe to tuklajẹ na oyín wẹ? ¹⁰Kavi é dọ ẹ patapata na mítọn wutu? Na mítọn wutu dódo wẹ yè wlan ehe; na ewọ he to aigbajlo nido to aigbajlo to tódido mẹ; podo ewọ he to fìfle nado to fifle to tódido mimá tọn mẹ. ¹¹Eyín mìwlẹ ko do onu gbigbọnọ lẹ hlan mì, be onú daho de wẹ eyín mìwlẹ na gbọ̃n onú agbasanọ mìtọn lẹ? ¹²Eyín mẹdevo lẹ yín mimátọ huhlọn he tọn to mì ji, be éma yín mìwlẹ wẹ é jẹhẹ hú? Ṣigba mìwlẹ ma zán huhlọnhe gba: ṣigba mi to: oya onú lepo tọn ji, na mí nikã glọnalina wẹndagbe Klisti tọn ¹³Be mì ma yọnẹn dọ yé he to devizọ́nwà gbọn onú wiwe lẹ tọn dali nọ dù sọn onú tẹmpli tọn lẹ mẹ? podọ yé he nọ nọte to agbà kọ̀n lẹ yín mimáto hẹ agbà? ¹⁴Yèdọ mọ wẹ Oklunọ doai do dọ yé he to yẹwheho wẹndagbe tọn dọ lẹ ni nọ dù son wẹndagbe mẹ. ¹⁵Ṣigba yẹn ma zán de to ónú helẹ mẹ gba: mọ yẹn ma sọ wlan ohú helẹ na yè nido wà mọ hlan mi wutu gba: na e pọ́nte na mi nado kú hú dọ omẹ de nido hẹn awagundido ṣie zùn ovó ¹⁶Na le yẹn tlẹ to yẹwheho wẹndagbe tọn dọ sọ, yẹn ma tindo núde nado doawagun na: na mananọmawà tin to oji é; na, dindọn tin hlan mi, eyín yẹn ma dọyẹwheho wẹndagbe tọn! ¹⁷Na eyín yẹn yí ojlo do to onú helẹ wà, yẹn tindo ale de: ṣigba eyín é jẹagò do ojlo ṣie gó, yè ko yí ománamẹ wẹndaghe tọn dè hlan mi. ¹⁸Etẹ ka wẹ ale ṣie lò? Dọ, whenuena yẹn to yẹwheho wẹndagbe tọn dọ, yẹn nido yí wẹndagbe Klisti tọn basi matin ahidona, na yẹn ma nado zán huhlon ṣie agò to wẹndagbe mẹ. ¹⁹Na le yẹn tle yín mẹmẹdekannu sọn gbẹtọ lẹpo de sọ, gãnṣo yẹn yí dè do basi mẹmẹglọ hlan omẹ popo, na yẹn nido duale humọ. ²⁰Hlan Ju lẹ yẹn lé dè zùn Ju de, na yẹn nido duale Ju lẹ tọn: hlan yé he tin to osén glọ lẹ, taidi to osén glọ, na yẹn nido duale yé he tin to osén glọ lẹ tọn; ²¹hlan yé he tin matin osén lẹ, taidi matin osén, (he ma tin matin osén hlan Jiwheyẹwhe, ṣigba to osén glọ hlan Klisti,) na yẹn nido duale yé he tin matin osẹn lẹ tọn; ²²hlan madogánnọ lẹ yẹn lézùn madogánnọ, na yẹn nido duak madogánnọ lẹ tọn: yè yí mi do basionú popo hlan gbẹtọ lẹpo, na yen nido gbọn onú popo mẹ whlẹn pẹvide gán ²³Na wendagbe tọn wutu wẹ yẹn to ehe wà, na yẹn nido yín mimátọ to e mẹ hẹ mì. ²⁴Be mì ma yọnẹn dọ yé he to wezundo to alewezun mẹ lepo we dowezun, ṣigba ome dopo wẹ nọ mọ ale yí? Mì dowezun do mọ, na mì nido mọyi. ²⁵Omẹ dopodopo he to gándo na nukọpipé nọ yín wunzanọ to onú lepo mẹ. Yé to wiwà ẹ nado mọ ojegbakun gbìgble de yí; ṣigba mìwlẹ magble de. ²⁶Enẹwutu yẹn to wezundo do mọ, é ma yín di avidlatọ gba; mọ wẹ yẹn to akotokún yìn, é ma yín di nulili jẹhọn gba: ²⁷ṣigba yen to nútùn bo to awugblena agbasa ṣie, bo sọ to hinhẹn ẹn wá tàliai mẹ; dọ to nudepope mẹ, whenuena yẹn ko dọyẹwheho hlan mẹdevo lẹ, na yẹnlọsu nikã yín gbigbédai.

¹HUMỌ, mẹmẹsunnu emi, yẹn ma jlo mì ni yín madọnanọ gba, dọ otọ́ mítọn lẹpo ko tin to aslọ glọ, bo yé omẹ pó gbọn ohù mẹ wá yì; ²bọ yè baptizi yé omẹ pó hlan Moṣe to aslọ lọ mẹ podọ to ohù mẹ; ³bọ yé ome po dù núdùdù gbigbọnọ dopolọ; ⁴bọ yé omẹ pó sọ nù núnùnù gbigbọnọ dopolọ: na yé nù sọn Osé gbigbọnọ hé tọ yé hodo de mẹ: podọ Osé lọ wẹ Klisti. ⁵Ṣigba susu yetọn go wẹ homẹ Jiwheyẹwhe tọn ma hùn do susu gba, na yè sisé yé dlẹn to zùngbo mẹ. ⁶Ohia wẹ onú helẹ yín hlan mìwlẹ, na mìwlẹ nikã jlojlo to onú ylankan le mẹ glanglan, dile yewlẹ jlojlo do. ⁷Mì sọ yín bosiọsẹntọ dile adade yé tọn yín blo; dile yè wlan ẹn dọ, Gbẹtọèwlẹ sinai nado dù bo sọ nù, bo sọ fọ́nsite nado daihún. ⁸Mì dike mìwlẹ lọgà blo, dile adade yé tọn basi do, bọ gbẹtọ fọtọ́n-fọtọ́n donu konukunatọ̀n do jai to yé mẹ to gbèdopo. ⁹Mì sọ dike mìwlẹ whle Klisti pon blo, dile adade yé tọn ga whle e pọ́n do, bọ yè yí odàn do hù yé súdo. ¹⁰Mìwlẹ sọ hlun blo, dile adade yé tọn ga hlun do, bọ yè sọ hù yé súdo gbọn alọ mẹvatọ tọn mẹ. ¹¹Onú he lẹpo jọ hlan yé gbọn ali ohia tọn dali: yè sọ wlan yé na nukọ́namẹ mítọn, mẹhe ji opòdo owhenu tọn ja. ¹²Enẹwutu mì gbọ ewọ he lẹn dọ é to ote ni payi, é nikã jai. ¹³Owhlepọ́n de ma sa ko pla mì adavo ehe hunkọ tin ayà hlan gbẹtọ: ṣigba nugbonọ wẹ Jiwheyẹwhe, mẹhe ma na dike yè ni whle mì pọ́n hú ehe mì sọgan hẹn; ṣigba ewọ na deali de po owhlepón lọ po ga nado gán, na mìwlẹ nido tin sọgan nado doakón nẹ.

¹⁴Enẹwutu, mẹyiwanna ṣie vivẹ emi, mì hòn sọn boṣiọsinsẹ̀n kòn. ¹⁵Yẹn to hódọ hlan mì di gbẹtọ nuyọnẹntọ; mì lẹn ehe yẹn to didọ pọ́n. ¹⁶Kọfo odona tọn he mí to didona, é ma yín kọndopọ ohùn Klisti tọn wẹ? Akla he mí to kinkán é ma yín kọndopọ agbasa Klisti tọn wẹ? ¹⁷Na mìwlẹ mẹsusu yín akla dopo, agbasa dopo: na mí omẹ pó wẹ yín mimátọ akla dopo lọ tọn. ¹⁸Mì pọ́n Islaeli gbọn agbasalan tọn dali; é ma yín yé he dù to onú he yè do sánvọ́ mẹ lẹpo wẹ mimátọ to agbà tò? ¹⁹Etẹ dọ wẹ yẹn ka te? dọ bosiọ yín núde, kavi ehe yè yí do sánvọ́ hlan bosiọ nẹ lẹ wẹ yín núde? ²⁰Ṣigba yẹn dọ, dọ, onú he Kosi lẹ do sánvọ́, yé do sánvọ́ hlan aovi lẹ, é ma yín hlan Jiwheyẹwhe gba: yẹn ma sọ jlo dọ mìwlẹ ni kọndopọ hẹ aovi lẹ gba. ²¹Mìwlẹ ma sọgan nù kọfo Oklunọ tọn, po kọfo aovi lẹ tọn po gba: mìwlẹ ma sọgan yín mimátọ tafo Oklunọ tọn, po tafo aovi lẹ tọn po gba. ²²Mí ka to adidohomẹnẹ Oklunọ hlan awuwhàn wẹ? be mìwlẹ tindo huhlọn hú i wẹ?

²³Onú lẹpo wẹ jẹ na mi, ṣigba onú lẹpo ma yin ale tọn gba: onú lẹpo wẹ jẹ na mi, ṣigba onú lẹpo ma hẹn omẹ dote. ²⁴Mẹde din onú etọn titi blo, ṣigba omẹ dopodopo dagbe kọmẹnu etọn tọn. ²⁵Onú depope yè to sisa to lanflo mẹ, wẹ mì ni nọ dù, mì kàn núde se blo na ayiha wutu: ²⁶na Oklunọ tọn wẹ aigba, po gigọ́ etọn lẹ po. ²⁷Eyín ode yé he ma yise lẹ tọn ylọ mì do hunwhẹ de kòn, bọ é jlo mì nado yì; mì dù nudepope yè zé do mì nukọn, mì kàn núde biọ blo na ayiha wutu. ²⁸Ṣigba eyín mẹde dọ hlan mì, dọ, Yè yí ehe do sánvọ́ hlan bosiọ lẹ, mì dù blo, na ewọ he do e hia mì wutu, podọ na ayiha wutu: na Oklunọ tọn wẹ aigba, po gigọ́ etọn lẹ po: ²⁹yẹn dọ, ayiha, é ma yín towe titi gba, ṣigba mẹdevo tọn: etẹ wẹ yè na dọwhẹhẹ mẹdekannujẹ ṣie gbọn ayiha mẹdevo tọn dali na? ³⁰Na eyín yẹn gbọn ojọmiọn dali yín mimátọ, etẹwutu ka wẹ yè to ylankan dọ do ogo e na enẹ he yẹn dopé na? ³¹Enẹwutu eyín mì to dùdù, kavi eyín mì to nùnù, kavi nudepope mì to wiwà, mì nọ wà popo hlan gigo Jiwheyẹwhe tọn. ³²Mì doafọku mẹde blo, Ju, Kosi, kavi agùn Jiwheyẹwhe tọn de. ³³Yèdọ dile yẹn nọ wàjlo omẹ popo tọn to onú lẹpo mẹ do, bo ma sọ to ale ṣie titi din, adavo ale omẹ susu tọn, na yè nido whlẹn yé gán.

¹Mì yín mẹhodotọ ṣie, dile yẹn ga yín Klisti tọn do. ²Yẹn pa mì, mẹmẹsunnu emi, na mì to finflin mi to onú lẹpo mẹ, bo sọ to oséndoai lẹ yìn, dile yẹn yí yé na mì do. ³Ṣigba yẹn jlo mì ni yọnẹn dọ, Klisti wẹ ota omẹ dopodopo tọn; podọ sunnu wẹ ota yọnnu tọn; Jiwheyẹwhe sọ wẹ ota Klisti tọn. ⁴Sunnusi depope he to dèhọ kavi to dọdaidọ, to nuṣinyọn ota etọn mẹ é deyẹyi sọn ota etọn go. ⁵Ṣigba yọnnusi depope he to dẹ́ho kavi to didọdai to masìnyọnnu ota etọn mẹ, é deyẹyi sọn ota etọn go: na enẹ yin dopolọ taidi yè lùnda nẹ. ⁶Na eyín yọnnu yín maṣinyọnnutananọ, mì bo gbọ yè ni pada nẹ̃ ga: ṣigba eyín winyan wẹ é yín na yọnnu nado yín mẹpada kavi mẹlùnda, mì bo gbọ ni yín mẹṣinyọnnuta na. ⁷Na nugbo, é ma jẹ sunnusi ni ṣinyọnnu ota etọn gba, sọle ewọ yín ohiẹ po gigo Jiwheyẹwhe tọn po do: ṣigba yọnnu wẹ gigo sunnu tọn. ⁸Na yè ma dè sunnu sọn yọnnu go gba, ṣigba yọnnu wẹ yè dè sọn sunnu go. ⁹Mọ é ma yín yọnnu wẹ yè da sunnu na gba; ṣigba yọnnu wẹ na sunnu. ¹⁰Na onú he wutu wẹ é jẹ na yọnnu nado tindo huhlọn to ota etọn ji na angẹli lẹ tọn wutu. ¹¹Ṣigba yọnnu lọ ma tin matin sunnu, sunnu lọ ma tin matin yọnnu to Oklunọ mẹ gba. ¹²Na le yè dè yọnnu sọn sunnu go, mọkẹdẹ wẹ sunnu yín gbọn yọnnu dali ga; ṣigba Jiwheyẹwhe de we onú lẹpo sọn. ¹³Mì lẹn to mìde ṣẹnṣẹn: é jlọ dọ yọnnu ni hodè hlan Jiwheyẹwhe masinyonnuta? ¹⁴Be jijọ lọsu ma plón mì dọ, eyín sunnu tindo oda gblẹlẹ, winyan wẹ é yin hlan ẹn? ¹⁵Ṣigba eyín yọnnu tindo oda gblẹlẹ, gigo wẹ é yin hlan ẹn: na yè na oda etọn ẹn na nukunmẹṣunyonnu de. ¹⁶Ṣigba eyín mẹde sọawúhia nado yín aklọndintọ, mìwlẹ ma tindo owalọ mọtọnnkọ gba, kavi agùn Jiwheyẹwhe tọn lẹ.

¹⁷To asẹ he nina mì mẹ yẹn ma to mì pa gba, na mì wá plidopọ é ma yín na dagbe, adavo na gbigble ¹⁸Na tintan popo lẹpo tọn, whenuena mì wá plidopọ to agùn me, yẹn sè dọ kinklan tin to mì ṣẹnṣẹn; yen sọ yí i se apade. ¹⁹Na plọ́ngiglọ lẹ gama na nọma tin to mì ṣẹnṣẹn gba, na yè nido hẹn ye he yín mẹgànji to mì ṣẹnṣẹn lẹ sọawúhia. ²⁰Enẹwutu whenuena mì wa plidopọ do ofi dopo, ehe ma yín nado du tennúdùdù Oklunọ tọn gba ²¹Na to dùdu mìtọn mẹ omẹ dopodopo to tenunudùdù etọn titi dù to mẹdevo nukọn; huve to omẹ de hù, omẹ de to nùnùmu. ²²Etẹ? mì ma tindo owhe nado dù bo nù to e mẹ? kavi mì to agùn Jiwheyẹwhe tọn vlẹ, bo sọ to winyando omẹ he ma tindo lẹ? Etẹ we yẹn na dọ hlan mì? Yẹn ni pa mì to ehe me wẹ? Yẹn ma pa mì gba. ²³Na ehe yen moyi sọn Oklunọ de wẹ ehe yẹn yí na mì ga, dọ, Jesu Oklunọ to ozán mẹ gbègbe yè dè e hia, yi akla; ²⁴whenuena é dopé, é kán ẹn, bo dọmọ, Yí, dù: ehe wẹ agbasa ṣie he yè wén na mì: mì nọ wà ehe to oflin ṣie mẹ. ²⁵Mọkẹdẹ ga we kọfo, to tenunúdùdù godo, dọmọ, Kọfo he wẹ alènu yọ́yọ́ to ohùn ṣie mẹ mi nọ wà ehe, whedopopenu he mì to nùnù in, to oflin ṣie mẹ. ²⁶Na whedopopenu he mì to akla he dù, bo sọ to kọfo he nù, mì to okú Oklunọ ton la kaka é na do wá, ²⁷Enẹwutu medepope he na dù akla he, bo sọ nù kọfo Oklunọ tọn he jẹagò, na ylanwhẹ do agbasa po ohùn Oklunọ tọn po go. ²⁸Ṣigba mì gbọ gbẹtọ ni dindòna ede, bo gbọ ni dù sọn akla lọ me, bo sọ nù sọn kọfo lọ mẹ do mọ. ²⁹Na ewọ he dù bo sọ nù, é dù bo sọ nù whẹgbledo hlan ede, eyín é ma tunwun agbasa lọ. ³⁰Na ònú he wutu wẹ mẹsusu to mì ṣẹnṣẹn yín madogánnọ, bo sọ yín azònto, bọ mesusu so damlọn. ³¹Na eyín mí tunwún minọzo, yè ma na dawhèna mí gba. ³²Ṣigba whenuena yè to whẹdana mí, Oklunọ de wẹ yè to kọgòna mí gbọn, na yè ma nado gblewhẹdo mí po aihọn po. ³³Enẹwutu, mẹmẹsunnu ṣie em, whenuena mì wá plidopọ nado dùnú, mì nọ notepón mìnozo. ³⁴Eyín huvẹhù mẹdepope, mì gbọ ni dùnú to owhe gbè; na wiwá plidopọ mìtọn yín hlan whẹ̀dida blo. Pipòtọ wẹ yẹn na tò do kannukannu whenuena yẹn lewá.

¹GBỌN nunina gbigoonọ tọn lẹ dali, mẹmẹsunnu emi, yẹn ma jlo mì ni yín madọnanọ etọn gba. ²Mì yọnẹn dọ mìwlẹ ko yín Kosi dai, he yè hẹn yì bosiọ unbọpẹn helẹ de, dile yè gọkòna mì do. ³Enẹwutu yen na mì nado tunwun, dọ omẹ depope he to hódọ to Gbigbọ Jiwheyẹwhe tọn mẹ de ma dọ, Anatema wẹ Jesu gba: podọ ome depope ma sọgan dọ dọ Jesu wẹ Oklunọ, adavo to Gbigbọ Wiwe mẹ.

⁴Nunina hunkọhunkọ wẹ tin, ṣigba Gbigbọ dopolọ wẹ. ⁵Devizn hunkọhunkọ wẹ tin, ṣigba Oklunọ dopolọ wẹ. ⁶Azón hunkọhunkọ wẹ sọ tin, ṣigba Jiwheyẹwhe dopolọ wẹ mẹhe to azọn yé omẹ pó tọn wà to yé omẹ po mẹ. ⁷Ṣigba yè na awúsọhia Gbigbọ tọn hlan omẹ dopodopo nado duale gbọn e dali. ⁸Na yè gbọn Gbigbọ mẹ na ohó nuyọnẹn tọn hlan omẹ de; hlan mẹdevo ohó oyọnẹn tọn kẹdẹdi Gbigbọ dopolọ; ⁹hlan mẹdelẹ yise to Gbigbọ dopolọ mẹ; hlan mẹdelẹ nunina azọnhẹngbo tọn to Gbigbọ dopolọ mẹ; ¹⁰hlan mẹdelẹ nujawu bibasi; hlan mẹdelẹ odọdai; hlan mẹdelẹ wuntuntun gbigbọ lẹ; hlan mẹdelẹ ogbè hunkọhunkọ dido; hlan mẹdelẹ tadena: ¹¹ṣigba ehe lẹpo wẹ omẹ dopo lọ, yèdọ Gbigbọ dopolọ to bibasi; bo to mimá hlan omẹ dopodopó dovõvo dile é jlo e do.

¹²Na le agbasa yín dopo bo sọ tindo awutugonu susu, bọ awutugonu agbasa dopo lọ tọn lẹpo, he sù, yín agbasa dopo: mọ wẹ Klisti te ga. ¹³Na Gbigbọ dopo mẹ wẹ yè gbọn baptizi mí omẹ pó do agbasa dopo mẹ, eyín mí yín Ju kavi Kosi, eyín mí yín mẹmẹglọ kavi mẹmẹdekannu; yè ko hẹn mí omẹ pó nado nù: to Gbigbọ dopo mẹ. ¹⁴Na agbasa ma yín awutugonu dopo gba, ṣigba susu wẹ. ¹⁵Eyín afọ na dọ, dọmọ, Na yẹn ma yín alọ wutu yẹn ma yín agbasa tọn gba; enẹwutu be ewọ ma yin agbasa tọn? ¹⁶Eyín otọ́ na dọ, dọmọ, Na yẹn ma yín nukun wutu, yẹn ma yín agbasa tọn gba; enẹwutu be ewọ ma yín agbasa tọn? ¹⁷Eyín agbasa lẹpo pete yín nukun, fie wẹ nusisè te? Eyín popo lẹpo yín nusisè, fie wẹ nuwhlẹnnu lẹ te? ¹⁸Ṣigba dinvie Jiwheyẹwhe yí awutugonu lẹ dopodopo yé tọn do agbasa mẹ, dile é jlo e do. ¹⁹Eyín yé omẹ pó sọ yín awutugonu dopo, fie wẹ agbasa ka te? ²⁰Ṣigba dinvie yé yin awutugonu susu, ṣigba agbasa dopo wẹ. ²¹Nukun ma sọgan dọ hlan alọ, dọ, Yẹn ma jlo we na onú de: mọ ota ma sọ sọgan dọ hlan afọ, dọ, Yẹn ma jlo hiẹ na onú de. ²²Lala, nẹmunẹmu awutugonu agbasa tọn nẹlẹ, he sọawúhia nado yín malodo hú, yín onú yè ma sọgan nọma tindo. ²³Awutugonu agbasa tọn nẹlẹ, he mí hia nado yín omẹ yẹyi whè na, ehelẹ wẹ mí nọ do yẹyi susu ogo na; ofi mítọn he ma yónwhanpẹ lẹ sọ tindo whanpẹ susu hú. ²⁴Na ofì he yónwhanpẹ mítọn lẹ ma gbọagba: ṣigba. Jiwheyẹwhe ko basi agbasa do dopo, bo sọ na yẹyi susu hlan ofi he gbọagba, ²⁵na kinklan de ma na do tin to agbasa mẹ; ṣigba na awutugonu, lẹ nido tindo tuklajẹ dopolọ na yénọzo. ²⁶Eyín awutugonu de to yaji, awutugonu lẹpo wẹ nọ jiya po e po; kavi eyín yè gbògbena awutugonu de, awutugonu lẹpo wẹ nọ jaya po e po. ²⁷Dinvie agbasa Klisti tọn wẹ mì, awutugonu etọnetọn. ²⁸Jiwheyẹwhe ko sọ zé mẹdelẹ do agùn mẹ, tintan apọsteli lẹ, awetọ yẹwhegán lẹ, atọ̀ntọ mẹplọntọ lẹ, enẹgodo azọ́njawu lẹ, whenẹnu nunina azònhẹngbọ tọn lẹ, alọgọ lẹ, gándudu lẹ, ogbè hunkọhunkọ lẹ. ²⁹Bẹ yé omẹ pó wẹ apọsteli? Yé omẹ pó wẹ yẹwhegán? Yé omẹ pó wẹ mẹplọntọ? Yé omẹ pó wẹ azọ́njawu wàtọ? ³⁰Be yé omẹ pó wẹ tindo nunina azònhẹngbọ tọn? be yé omẹ pó wẹ nọ do ogbè bunkọhunkọ? be yé omẹ pó wẹ nọ detana? ³¹Ṣigba mì nọ yí awuyivi do din nunina he yón húgan: ṣigba yẹn sọ do aliho dagbedagbe he húgan de hia hlan mì.

¹EYÍN yẹn nọ yí ogbè gbẹtọ tọn po angẹli lẹ po tọn do dọhó bo ma tindo owanyi, yẹn lẹzun ogànvẹ̃ he to nudọ, kavi ajògàn gbègángánnọ de. ²Podọ eyín yẹn tindo nunina dọdai tọn, bo sọ yọn nudabla lepo, po oyọnẹn lẹpo po, eyín yẹn tindo yise lẹpọ, sọmọ bọ yẹn sọgan diọtẹnna osé lẹ, bo ma tindo owanyi, yẹn ma yín núde. ³Podọ eyín yẹn bé ajọnú ṣie lẹpo jo nado na núdùdù wamọnọ lẹ, eyín yẹn yí agbasa ṣie namẹ na yè ni do flọmiyọn, bo ma tindo owanyi, é ma doale de na mi. ⁴Owanyi nọ jiya dẹn, é sọ jòmẹ; onú ma nọ vẹunna owanyi; owanyi ma nọ yígo, é ma sọ nọ kla. ⁵E ma nọ hẹn ede wà onú jẹagò, é ma nọ din onú etọn titi, yè ma nọ hẹn ẹn gblehomẹ apla, é ma nọ lẹn ylankan; ⁶e ma nọ jaya to ylando mẹ, ṣigba é nọ jaya to nugbo mẹ; ⁷é nọ doakónna onú lẹpo, é nọ yí onú lẹpo se, é nọ dotó onú lẹpọ, bo sọ nọ sinyẹnlin na onú lẹpo. ⁸Owanyì ma nọ gbòvọ gbède; ṣigba yín dọdai lẹ wẹ, yé na gbòvọ; kavi ogbè hunkọhunkọ lẹ wẹ, yé na doalọte; kavi oyọnẹn wẹ, yé na zùn ovó. ⁹Na mí yọnẹn apadopo, mí sọ to didọdai apadopo. ¹⁰Ṣigba whenuena yè hẹn enẹ he pé wá whenẹnu wẹ yè na gbẹkò ehe tin to apadopo go. ¹¹Whenuena yẹn tin yọ̀pọ, yẹn nọ dọhó di yọ̀pọ de yẹn nọ tunwun di yọ̀pọ, yẹn nọ lẹnnú di yọ̀pọ; ṣigba whenuena yẹn lẹzun sunnu, yẹn jo yọpọnu lepo dai. ¹²Na dinvie mí to numọ blèblè to mẹpónnu de mẹ; ṣigba whenẹnu wẹ nukun na mọ nukun: dinvie yẹn yọnẹn apadopo; ṣigba whenẹnu wẹ yẹn na yọnẹn dile yè yón mi do. ¹³Dinvie yise, tódido, po owanyi pọ tin to ote, atọn helẹ; ṣigba ehe klohú to ehelẹ mẹ wẹ owanyi.

¹MI nọ doafọna owanyi bo sọ nọ din nunina gbigbọnọ lẹ, ṣigba hú enẹ na mì nido nọ dọdọdai. ²Na ewọ he dọhó to ogbè yè ma yọnẹn mẹ ma to hódọ hlan gbẹtọ gba, adavo hlan Jiwheyẹwhe: na mẹde ma yón onú he é to didọ gba; gãnṣo é to nudabla lẹ dọ to gbigbọ mẹ. ³Ṣigba ewọ he tọ didọdai to hódọ hlan gbẹtọ hlan hẹndote, homẹjladohó, po homẹmiọn po. ⁴Ewọ he to hódọ to ogbè yè ma yọnẹn mẹ to ede hẹndpte; ṣigba ewọ hẹ to didọdai to agùn hẹndote. ⁵Yẹn jlo dọ mì omẹ pó ni yí ogbè hunkọhunkọ do dọhó, ṣigba hu enẹ na mì nido nọ dọdọdai: na ewọ he to didọdai klohú omẹ he yí ogbè hunkọhunkọ do to hódọ, adavo é to tadena, na agùn nido mọ hẹndote yí. ⁶Dinvie, mẹmẹsunnu emi, eyín yẹn wá mi de bo to ogbè hunkọhunkọ do ale tẹwẹ yen na yin na mì, adavo yẹn na to hodọ hlan mì gbọn osọhia dali, kavi gbọn óyọnẹn dali, kavi gbọn didọdai dali, kavi gbọn oplọ́n dali? ⁷Yedọ onu he matin gbigbọ lẹ he nọ to nudọ, ován kavi ajalen, adavo yé do ogbè võvo, nawẹ yè na yọn onu he ovan kavi ajalẹn to dido dò? ⁸Na eyín opẹn do ogbè he ma tátá, mẹnu wẹ na hẹn ede dote hlan awhàn? ⁹Mọkẹdẹ wẹ mìwlẹ, adavo mì yí ódé do dọhó he boawú yinyọnẹn, nawẹ yè na yọn onú he yè dọ dó? na mìwlẹ na to hodọ da dovlo mẹ. ¹⁰E sọgan yín ogbè hunkọhunkọ wẹ tin to àihọn mé, ode to ye mẹ ma nọ matindo óhia. ¹¹Enẹwutu eyín yẹn ma yondona ogbè lọ, yẹn na yín akọmasegbè de hlan ewọ he to hódọ, ewọ he to hódọ nasọ yín akòmasegbè de hlan yẹn. ¹²Mowẹ mìwlẹ, sọle mì yín vivẹnunọ nunina gbigbọnọ lẹ tọn do, mì nọ din na mì nido lánkan hlan hẹndote agún tọn ¹³Enẹwutu mì gbọ ewọ he to hódọ to ogbè yè ma yọnẹn mẹ ni hodè na ewọ nidó nọ detana. ¹⁴Na eyín yen hodẹ to ogbè yè ma yọnen mẹ, gbigbọ ṣie to dèho nugbonugbo, ṣigba wuntuntun ṣie yín madosinsẹnnọ. ¹⁵Be etẹ ka wẹ? Yẹn na yí gbigbọ do hodè, yẹn nasọ yí wuntuntun do hodẹ ga: yẹn na yí gbigbọ do jihan, yẹn nasọ yi wuntuntun do jihan ga ¹⁶Kavi whenuena hiẹ na yi gbigbọ do dona, nawẹ ewọ he tin to otẹn nudemaplọnnọ lẹ tọn mẹ na dọ Niṣẹ do opẹdido towe gó do, na é ma tunwun onú he hiẹ dọ wutu? ¹⁷Na nugbonugbo hiẹ dopé dagbe, ṣigba omẹ devo ma mọ hẹndote yí gba. ¹⁸Yẹn dopẹna Jiwheyẹwhe ṣie, yẹn nọ do ògbè hunkọhunkọ hú mì omẹ pó: ¹⁹ṣigba yẹn na kúkú gbọ yí wuntuntun ṣie do dọhó aton to agún mẹ, na yẹn nido yí ogbè ṣie do plón mẹdevo, hú ohó fọtọ́n to ogbè yè ma yọnẹn mẹ.

²⁰Mẹmẹsunnu emi, mì yín yọ̀pọ to wuntuntun mẹ blo; to okèn mẹ mì yín yọ̀pọ, ṣigba to wuútuntun mẹ mì ni yín meho ²¹Yè wlan ẹn to osén mẹ dọ, Gbon gbẹtọ odé devo tọn dali po nufló devo po tọn dali wẹ yẹn na dọhó hlan omẹ hélẹ; gãnṣo yé ma tlẹ na sè ṣie, wẹ Oklunọ dọ. ²²Enẹwutu ohia de wẹ ogbè hunkọhunko yín, é ma yín hlan yé he yise lẹ gba, adavo hlan mayisenọ lẹ: ṣigba didọdai tin na ohia de e ma yín na mayisenọ le gba, adavo hlan yé he yise le. ²³Enẹwutu eyín agùn lepo pete plidopọ to ofì dopo, bọ omẹ popo yi ogbè hunkọhunkọ do to hódọ, bọ ye he yin nudemaplonnọ nele, kavi mayisenọ lẹ biọ owhe gbè, be yè ma na dọmọ nulunọ wẹ mì? ²⁴Ṣigba eyín omẹ popo to didọdai, bọ mayisenọ de bio owhé gbè, kavi ome he yín nudemaplọnnọ, mì omẹ pó wẹ na hen ẹn yon le ylando te, mì omẹ pó wẹ na dawhẹ̀ nẹ: ²⁵yè sọ hẹn onú bibẹ̀ ayiha tọn lẹ sọawúhia; ewọ nasọ sinyon núkunme etọn do bo na litaina Jiwheyẹwhe, bo nasọ domọ Jiwhéyewhe tin to mì mẹ nugbonugbo.

²⁶Be etẹ e yín whenẹnu, mẹmẹsunnu emi? whenuena mì wá plidopo bọ omẹ dopodopo to mì mẹ tindo psalm dopo, bo tindo oplọ́n dopo, bo tindo ogbè dopo, bo tindo osọhia dopo, bo tindo tadèna dopo. Mì gbọ yè ni nọ wà onú lepo hlan mẹhẹndote. ²⁷Eyín omẹ de to hódọ to ogbè yè ma yọnẹn mẹ, mì gbọ é ni yín omẹ awe, kavi é yín é sù talala ni yín atọ̀n, enẹ lọsu gbọn kannukannu; mì ni sọ gbọ omẹ dopo ni detana. ²⁸Ṣigba eyín tadenatọ de ma tin, mì bo gbọ é ni do onù abọẹ to agùn me; mì sọ gbọ ni to hódọ hlan ede podọ hlan Jiwheyẹwhe. ²⁹Mì gbọ yẹwhegán awe kavi aton ni dọhó, na mẹdevo le ni dawhè. ³⁰Eyín yè do onú de hia hlan omè dèvó he sinai to finẹ dali, mì gbọ omẹ tintan ni do onù etọn abọe. ³¹Na mì omẹ pó sọgan to didọdai dopodopo, na omẹ popo nido plónnu, na yè nido miọnhomena mì ome popo. ³²Mẹmẹglọ wẹ gbigbọ yẹwhegán lẹ tọn hlán yẹwhegán lẹ. ³³Na Jiwheyẹwhe ma yín nudaitọ númanúkannú tọn de gba, adavo jijọho tọn, dile é te to agùn mẹwiwe lẹ tọn lẹpo mẹ.

³⁴Mì gbọ yọnnu mìtọn lẹ ni do onù abọẹ to agùn lẹ me: na yè ma na hlan yé nado dọhó gba; ṣigba gbọ yé ni tin to taliai glọ, dile osén dọ do ga. ³⁵Eyín yé sọ jlo ọnú de na plọn, mi gbọ ye ni kanse asú yetọn lẹ to owhé gbè: na winyan wẹ é yín na yonnu lẹ nado nọ dọhó to agùn mẹ. ³⁶Etẹ? mì de wẹ ohó Jiwheyẹwhe tọn tọ́n sọn wá? kavi mì kẹdẹ de wẹ é wá?

³⁷Eyín omẹ de lẹn ede nado yín yẹwhegán de, kavi gbigbọnọ, mì gbọ é ni yi oyọnẹn onú he yẹn wlan hlan mì lẹ tọn ³⁸Ṣigba eyín omẹ de yín madọnanọ, mì gbọ e ni yín madọnanọ.

³⁹Enẹwutu, mẹmẹsunnu emi, mì nọ dovivẹnu nado dodọdai, mì sọ kọna omẹ nado yí ogbe hunkọhunkọ do dọhó blo. ⁴⁰Mì gbọ onú lẹpo ni yín wiwà do le é jẹ do, podọ to tẹnmẹtẹnmẹ.

¹HUMỌ, mẹmẹsunnu emi, wẹndagbe he yẹn ko dọyẹwheho etọn hlan mì ehe mìlọsu ko mọyí ga, ehe mẹ mì to ote te wẹ yẹn to ila hlan mi; ²gbọn ehe dali yè whlẹn mì gán, eyín mì yí onú he yẹn dọyẹwheho etọn hlan mì whlá to oflin mẹ, adavo dọ ovọ wẹ mì yise. ³Na jẹnukọnna popo ehe yẹn ko mọyí ga wẹ ehe yẹn yí na mì, le Klisti kú na ylando mítọn lẹ kẹdẹdile Owé wiwe lẹ dọ do; ⁴podọ yè di i, podọ é sọ tite to azán atọ̀ntọ gbè kẹdẹdile Owé wiwe lẹ dọ do: ⁵podọ yè mọ ẹn to Kefa de, podọ whenẹnu to omẹ wiawe lẹ de: ⁶enẹgodo yè mọ ẹn to mẹmẹsunnu he lán to fowekanweko ji le de whladopo; susu mẹhetọn pò jẹ dinvie, ṣigba vude ko mlọnai damlọn. ⁷To enẹgodo yè mọ ẹn to Jakobu de; podọ whenẹnu to apọsteli lẹpo dẹ. ⁸To godo yé omẹ popo tọn, yè mọ ẹn to yẹn de ga, di to omẹ he yè ji jẹnukọnna ojlẹ etọn de. ⁹Na yẹn wẹ godotọ apọsteli lẹ tọn pete, yẹn he ma jẹ yè do ylọ apọsteli de, na yẹn dohomẹkẹn agún Jiwheyẹwhe tọn wutu. ¹⁰Ṣigba gbọn ojọmiọn Jiwheyẹwhe tọn dali yẹn yín núhe yẹn yín: ojọmiọn etọn he yè kòn do oji e ma sọ yín to ovọ́ mẹ gba; ṣigba yẹn jẹtukla susugege hú yé omẹ pó: gãnṣo é ma yín yẹn, ṣigba ojọmiọn Jiwheyẹwhe tọn he tin po yẹn po wẹ. ¹¹Enẹwutu eyín é yín yẹn kavi yewlẹ, mọ wẹ mìwlẹ to yẹwhehodọ do, mọ wẹ mìwlẹ sọ to yiyise do.

¹²Be eyín yè to yẹwheho Klisti tọn dọ dọmọ é tite sọn osiọ lẹ mẹ, nawẹ omẹ delẹ to mì mẹ to didọ do dọ fọ́ngọnku osiọ le tọn de ma tin? ¹³Ṣigba eyín fọ́nsọnku osiọ lẹ tọn de ma tin, be yè ma zé Klisti tite gba; ¹⁴eyín yè ma sọ zé Klisti tite, be ovọ́ wẹ yẹwhehodidọ mítọn yín, ovọ́ wẹ yise mìtọn sọ yín ga. ¹⁵Mowẹ, yè sọ yí mí do mọ kunnudetọ Jiwheyẹwhe tọn lalonọ; na mí to kunnudena Jiwheyẹwhe dọ é ze Klisti tite wutu; mẹhe ewọ ma ze tite, eyín é yín mọ dọ osiọ lẹ ma tite gba. ¹⁶Na eyín osiọ lẹ ma tite, be yè ma ze Klisti tite gba; ¹⁷eyín yè mẹ sọ zé Klisti tite, be ovọ wẹ yise mìtọn yin; mì gbé sọ tin to ylando mìtọn lẹ mẹ ¹⁸Be yé he mlọnai damlọn to Klisti mẹ lẹ ga yín mẹdindọn. ¹⁹Eín é yín ogbẹ mẹ fì ṣokẹdẹ wẹ mí dotodido te to Klisti mẹ, be mìwlẹ wẹ lelènọ susu to gbẹtọ lẹpo mẹ.

²⁰Ṣigba dinvie yè zé Klisti tite sọn osiọ lẹ mẹ, é sọ lẹzun sinsén tintan yé he damlọn lẹ tọn. ²¹Na le é yín dọ gbẹtọ dali wẹ okú gbọn wá, gbẹtọ dali ga wẹ fọnsọnku osiọ lẹ tọn gbọn do wá. ²²Na dile omẹ popọ kú to Adam mẹ, mọ ga wẹ yè na hẹn omẹ popo yín ogbènọ to Klisti mẹ ²³Ṣigba omẹ dopodopo to kannu etọn titi mẹ: Klisti sinsẹ́n tintan lẹ; to godo yé he yín Klisti tọn lẹ to gigòwá whenu etọn. ²⁴Whenẹnu wẹ opòdo wá, whenuena é na ko jo ahọludu hlan Jiwheyẹwhe, yèdọ Oto; whenuena é na ko zín ogán lẹpo, po yẹyi lepo po, po huhlọn po do odò. ²⁵Na é ma na nọ maduahọlu, kaka é na do zín kèntọ lẹpo dai to afọ etọn glọ. ²⁶Kẹntọ he yè na súdo gbọn godo wẹ okú. ²⁷Na é ko yí onu lẹpo do afọ etọn glọ. Ṣigba whenuena é dọmọ onú lẹpo wẹ yè yí do afọ etọn oglọ, é sọawúhia dọ omẹ he yí onú lẹpo do oglọ etọn dopokẹdẹ wẹ pò. ²⁸Whenuena yè na yí ọnú lẹpo do oglọ etọn, whenẹnu wẹ Ovi na ede na yín mẹmẹglọ ga hlan ewọ he yí onú lẹpo do oglọ etọn, na Jiwheyẹwhe nido yin popo to onú popo mẹ.

²⁹E ma yín mọ etẹ wẹ yé he yè baptizi na osiọ lẹ wutu na wà, eyín osiọ lẹ ma tite lala? etẹwutu wẹ yè baptizi yé na osiọ lẹ wutu? ³⁰Etẹwutu wẹ mí to ote to owu mẹ to ojlẹ dopodopo mẹ? ³¹Yẹn ni dọvivẹvìvẹ gbọn awagundido mìtọn dali he yẹn tindo to Klisti Jesu Oklunọ mítọn mẹ, yen to kúkú egbésọ. ³²Eyín yẹn hoavun po kanlin po to Efesu di owalọ gbẹtọ tọn, ale tẹwẹ é do na mi? Eyín osiọ lẹ ma tite, mì gbọ mí ni to dudu bo to nùnù, na osò wẹ mí na kú. ³³Yè klọ mì blo: ogbé ylankan nọ hẹn awalọ dagbe gble. ³⁴Mi ton hlan dódo, mì waylando blo: na mẹdele ma tindo oyọnẹn Jiwheyẹwhe tọn: yen dọ ehe hlan winyan mìtọn.

³⁵Ṣigba mẹdelẹ na dọmọ, Nawẹ ye zé osiọ lè tite gbọn? agbasa tẹ po ye po wẹ na gọ? ³⁶Hiẹ gugutọ, yè ma nagbẹ onú he hie do gba, adavo é kú: ³⁷podọ ehe hiẹ do, é ma yín agbasa he na tin wẹ hiẹ do goa, ṣigba okun tata de wẹ, eyin e yìn oli kavi okún hunkọ devo: ³⁸ṣigba Jiwheyẹwhe na agbasa ẹ dole e jlo e do, podọ hlan okun dopodopo agbasa etọn titi. ³⁹Agbasalan lẹpo ma yín agbasalan dopolọ gba: ṣigba agbasalan gbẹtọ tọn de tin, agbasalan kanlin tọn devo, owhevi tọn devo, ohẹ lẹ tọn devo. ⁴⁰Agbasa ojiaganu lẹ tin ga, po agbasa okọmenù po: ṣigba ovo wẹ gigo ojiaganù tọn, ovò sọ wẹ gigo okómẹnù tọn. ⁴¹Ovò wẹ gigo owhè tọn, ovò wẹ gigo osùn tọn, ovò sọ wẹ gigo sunwhlẹvu lẹ tọn: na sunwhlẹvu de gbonvo na sunwhlẹvu devo to gigo me. ⁴²Mọwẹ fọ́nsọnku osiọ lẹ tọn te ga Yè do e gbigble mẹ: yè zé e tite magble mẹ: ⁴³yè do e madoyeyi mẹ: yè zé e tite gigọ mẹ: yè do e madogán mẹ: yè zé e tite huhlọn mẹ: ⁴⁴yè do e agbasa jọwamọnọ de mẹ; yè zé e tite agbasa gbigbọnọ de mẹ. Eyín agbasa jọwamọnọ de tin, agbasa gbigbọnọ de tin gà. ⁴⁵Mọwẹ yè wlan ẹn dọ, Yè yí Adam sunnu tintan do basi gbigbọ gbète; 3 yè sọ yí Adam godo tọn do basi gbigbọ megọdogbẹ tọn. ⁴⁶Ṣigba ehe yín gbigbọnọ ma wẹ yin tintan gba, adavo ehe yín jọwamọnọ; to godo wẹ ehe yín gbígbọnọ. ⁴⁷Sunnu tintan wẹ sọn aigba mẹ, aigbanù: sunnu awetọ wẹ sọn olọn mẹ. ⁴⁸Le aigbanù te, mọwẹ yé ga he yín aigbanù te; podọ le olọnnù te, mọwẹ yé ga he yín olọnnù te ⁴⁹Le mí hẹn ohia aigbanù tọn, mí na hen ohia olọnnù tọn ga.

⁵⁰Ehe wẹ yẹn to didọ, mẹmẹsunnu emi, dọ agbasalan po ohùn po ma sọgan dugú ahọludu Jiwheyẹwhe tọn gba; mọ gbigble ma sọ sọgan dugú magble tọn. ⁵¹Mì dayi e go, yẹn dọ nudabla de hia mì; Mí omẹ pó ma na damlọn gba, ṣigba mí omẹ pó wẹ ye na diọ, ⁵²plaun, to nukunwhiwhe dopo mẹ, to opẹ́n godo tọn ji: na opẹn na dọnu, yè nasọ ze osiọ lẹ tite magble, ye na sọ diọ mí ⁵³Na gbigble he na ze magble do jànwẹ, mọ wẹ kúkú he na ze maku do janwẹ. ⁵⁴Mọ whenuena gbigble he na ko ze magble do, bọ kuku he na ko zé maku do vó, whenẹnu wẹ yè na hẹn ohó he yè wlan sẹ, dọ, Yè zé oku mì to awhàngba mẹ ⁵⁵Okú È, fie awhangbà towete? Okú È, fie adi towe te? ⁵⁶Ylando wẹ adi okú tọn: podọ osén sọ wẹ huhlọnylando tọn. ⁵⁷Ṣigba opẹ tin hlan Jiwheyẹwhe, mẹhe na awhangba mí gbọn Jesu Klisti Oklunọ mítọn mẹ. ⁵⁸Enẹwutu, mẹmẹsunnu mẹyiwanna ṣie emi, mì yín tenọglinọ, maseafọ, bo nọ to susudeji to azón Oklunọ tọn mẹ whepoponu, sọle mì yọnẹn do dọ tuklajẹ mìtọn ma yín ovó to Oklunọ mẹ gba.

¹GBỌN akuẹjọ na mẹwiwe lẹ tọn dali, dile yẹn degbè hlan agùn Galatia tọn lẹ, mọwẹ mì ni to wiwà do ²To azán tintan awlẹn tọn gbè, mì gbọ omẹ dopodopo mìtọn ni yí do ede de to nudotẹn mẹ, dile Jiwheyẹwhe wàdagbe nẹ do, na sinyanpli ma na do tin to whenuena yẹn wá. ³Whenuena yẹn wá, omẹ depope he mì na kẹalọyi gbọn owé mìtọn lẹ dali, yé wẹ yẹn na dohlan nado hẹn nunina mìtọn hẹji yì Jelusalẹm. ⁴Eyín é sọ jẹ dọ yẹn ni yì ga, be yé na hodo mi yì. ⁵Yẹn na wá mì de, whenuena yẹn na gbon Makedonia ṣẹnṣẹn wa yì: na Makedonia ṣẹnṣẹn wẹ yẹn gbọn jèi. ⁶E sọgan sọ yín dọ yẹn na nọte, yèdọ, bo hlẹnavivọ hẹ mì, na mì nido do mi to zọnlin ṣie ji to fidepope he yẹn jei ⁷Na yẹn ma jlo nado mọ mì to aliho dinvie gba; ṣigba yẹn dotódido nado nọte vudẹ to mì de, eyín Oklunọ dike. ⁸Ṣigba yẹn na nọte to Efesu kaka jẹ Pẹntikọsti gbè. ⁹Na yè hùn ohòn daho magbòvó de hlan mi, kẹ̀ntọ susu sọ tin.

¹⁰Eyín Timoti wá, mì bo payi na é nido nò hẹ mì matin obu: na é to azón Oklunọ tọn wà, dile yẹn to wiwà do ga. ¹¹Enẹwutu mì dike mẹde vlẹ ẹ blo: ṣigba mì ni do e tón yì to zọnlin etọn mẹ jijọho mẹ, na é nido wá dẽ; na yẹn to nukundo e po mẹmẹsunnu lẹ po wutu ¹²Gbọn Apọlo mẹmẹsunnu mítọn tọn dali, yẹn to jijló susutalala dọ é ni wá mi de, po mẹmẹsunnu lẹ po: ṣigba é ma yín ojlo etọn lala nado wá to ojlẹ he mẹ gba; ṣigba whenuena é na tindo ojlẹ he bọawú, é na wá.

¹³Mì to alihó, mì nọte gli to yise mẹ, mì hẹn mìde di sunnu, mì ni yín huhlonnọ. ¹⁴Mì gbọ onú mìtọn lẹpo ni yín wiwà to owanyi mẹ.

¹⁵Yen ve mì, mẹmẹsunnu emi, (mì sà yón owhé Stẹfana tọn gbè, dọ yé wẹ Sinsén tintan Akaia tọn, podọ yé jo yéde hlan devizón mewiwe lẹ tọn) ¹⁶dọ mì ga ni nọ huwhẹ mìde hlan mẹmọtọnnkọ lẹ, podọ hlan omẹ depope he to alọgọna basi hẹ mí, bo sọ to tuklajẹ. ¹⁷Homẹ ṣie hùn na wiwá Stẹfana po Fọltunatu po, po Akaiku po tọn: na onú he pò to mì dali yé ko yí do gó ẹ ¹⁸Na yé ko hẹn awuya gbigbọ ṣie po mìtọn po: enẹwutu na mì ni nọ yí homẹhùnhùn do yí memotọnnkọ tọn le.

¹⁹Agùn Asia tọn lẹ dọnúdo mì, Akuila po Pliskila po dọnudo mì susu to Oklunọ mẹ, po agùn he tin to owhé yeton gbè po. ²⁰Mẹmesunnu lepo donúdo mì. Mì yí nùdonùgo wiwe do dọnúdo mìnọzo.

²¹Núdọdomẹ yẹn Paulu tọn sọn alọ ṣie titi mẹ. ²²Eyín mẹdepope ma yiwanna Jesu Klisti Oklunọ, mì gbọ ni yín Anatema. Malan-ata. ²³Ojọmiọn Jesu Klisti Oklunọ mítọn tọn ni tin po mì po ²⁴Owanyi ṣie ni tin to mì omẹ popo de to Klisti Jesu mẹ. Niṣẹ.