LINGE NA GALUVE

NA LINGE NA GALUVE

Na Vuresi Makaliana Na Omea Ara Marea Tana Papi Iani

I laona na papi iani Na Linge na Galuve ara maregira visana na linge na galuve kesa na mane e nauvania kesa na daki, ma na daki ia e tuguvisu vania na mane. Ma na papi iani ara soaginigotoa Nina Linge a Solomon, rongona visana ara padâ laka a Solomon nogo e maregira na linge girani.

Ara danga tana papi i laona na Mamare Tabu ara gini gokolia laka na Israel nina daki God. Mi kalina igira na Tsiu ara tsokoa na papi iani, ara padâ e sauvulagia nina galuve loki God vanigira na Israel, ma niqira galuve loki na Israel vania God. Mi kalina igira na Kristiano ara tsokoa na papi iani, ara padâ e sauvulagia nina galuve loki a Iesu Kristo vania na saikolu na lotu, ma nina galuve loki na saikolu na lotu vania a Iesu Kristo.

Na Omea Ara Totu Tana Papi Iani

Na kesanina linge 1:1–2:7

Na rukanina linge 2:8–3:5

Na tolunina linge 3:6–5:1

Na vatinina linge 5:2–6:3

Na tsegenina linge 6:4–8:4

Na ononina linge 8:5-14

¹Na linge dou liuliu bâ e marea a Solomon.

Na Kesanina Linge

Na Daki

²Ko laka kiki na kuti na domiaqu;

rongona nimu galuve vaniau e dou liusia bâ na uaeni.

³E sigini dou sosongo na vurumu;

ma na tatangina na soamu e dou sosongo vaniau vaga moa kalina ara qetua na ko sisigini.

!Aia nogo na rongona ti ara ngao sosogoligo goto igira na daki tavosi!

⁴Ko adiau moa inau ma ka ka tsogoligi;

ko adiau i laona nimu voki mo ko lia niqu taovia tsapakae.

Mi kaita sauba ka gini magemage na totu sai.

Igoe o galuve sosongoliau,

mi kaita ka ka gini mage manana.

Ka nida mage e dou liusia bâ na gini mage na inu uaeni.

!Aia nogo na rongona ti igira sui na daki ara ngao sosongoligo igoe!

⁵Kamu rorongo mai igamu na daki ni Jerusalem.

Inau e bora rago na kokoraqu, mau rereidou sosongo nomoa.

Au bora vaga saikesa na valepolo tana kaomate ni Kedar,

mau rereidou vaga saikesa nogo na polokatsi ara tsauraginia tana valena a Solomon.

⁶Kamu laka moa na reipeaaqu rongona e bora na kokoraqu,

na aso moa e rangiau te e gini bora na kokoraqu.

Igira na tasiqu ara kore sosongo vaniau

mara turuau kau ba aqo i laona na uta na uaeni.

Mau tau goto tamani sa tagu kau arago kikia na koniqu segeni.

⁷Migoe niqu udu, ko tsarivaniau,

?Iava tana sauba igoe ko adivanogira nimu sipi kara gania na buruburu?

?Miava tana sauba kara ba toturavi kalina ke papara na aso tana niaso vota?

?Me rongona gua te e kiligotoa kau ba lavego i laoqira niqira sipi igira na mane pitusipi tavosi?

Na Mane

⁸?Igoe niqu udu o rerei dou sosongo liusigira na daki sui, laka o tau vati donaginia moa na nauna ia?

Ko bâ mo ko muria na maleaqira na sipi,

mo ko ba mologira nimu dalena naniqoti kara mutsamutsa

i ligisaqira niqira valepolo igira na mane pitusipi.

⁹Eo, igoe niqu udu o rerei dou laka

ma gamu inilau ara rerei dou saikesa,

vaga moa na inilau ara inilauginigira na ose ara raqâ nina terê na taovia tsapakae ni Ejipt.

¹⁰Ma na ngoramu e rereidou sosongo kolua gamu tsaukuli,

ma na liomu kolua gamu liolio ara aqosiginia na vatu angaanga.

¹¹Migami sauba kami aqosi vanigo gamu inilau qolumila

ma kami baruginia na siliva.

Na Daki

¹²Niqu taovia tsapakae e tsaro i nigena,

me siginia na vuruna niqu sede.

¹³Niqu udu e vaga moa na veveqona na papasa sisigini dou

e tsaro tana aseasequ.

¹⁴Niqu udu e vaga saikesa moa na tsitsi sisigini dou

ara viri taporatsa i laona na uta na uaeni i Engedi.

Na Mane

¹⁵!Na vanga rerei dou nomoa na rereimu igoe niqu udu;

me mauri manana nomoa na matamu!

Na Daki

¹⁶!Na vanga uluvao laka nomoa na rereimu igoe niqu udu galugaluve;

eo, igoe o rerei dou manana nomoa!

Na buruburu marao dou sauba ke lia ka nigeda.

¹⁷Ma na gai na sida sauba ke lia na gogona ka valeda,

ma na aru ke lia na gasona.

¹Inau kiki au vaga moa na tsitsi atsi ni Saron,

vaga kesa na vulevule i laona na qouna.

Na Mane

²Vaga kesa na vulevule e dato i laoqira na itai kokonaga,

aia saikesa nogo e vaga niqu udu inau i laoqira na daki sui.

Na Daki

³Vaga kesa na gai na gaviga i laoqira na gai sui tana goana,

bâ, maia saikesa nogo niqu udu galugaluve i laoqira na mane vaolu sui.

Mau gini mage sosongo na totu raviravi tana auauna na gai ia,

ma na vuana e puisi sosongolia na lioqu.

⁴Maia e adisageau tana nina vale na kavomutsa

me tsavu poponoginiau nina galuve.

⁵Niqu udu galugaluve au gini maluku sosongo na padangaoamu igoe.

Ko palaginiau kiki na vuana uaeni makede

ma na vuana na gaviga

ma kau gini susuliga visutugua.

⁶Niqu udu e moloa na limana mauli i vavana na lovaqu,

ma na madoana e kasoginiau.

⁷Igamu na daki ni Jerusalem kamu vatsa vaniau,

tana asaqira na dia ma na omea tuavati atsi ara dona sosongo na ulo tsaku,

laka sauba kamu tau goto adikaegokona na vainaugi

poi kalina ke tsau segeni gana tagu.

Na Rukanina Linge

Na Daki

⁸Inau au rongomia na tatangina na liona niqu udu.

Aia e ulo gaukuti mai tana vungavunga.

⁹Niqu udu e vaga kesa na dia vaolu e dona sosongo na ulo tsaku.

E mai tutû nogo i buriti na valequ,

me morosage tana ovaovana bisi.

¹⁰Me goko vaniau.

Na Mane

Niqu udu galugaluve kiki ko tsunamai

mo ko dulikoluau.

¹¹E sui nogo na tagu na bisi, me tau nogo tumu na usa,

¹²mara taporatsa sui nogo na tsitsi.

E tsau nogo na tagu na linge,

mara viri tangi na kulukulu polia na verada.

¹³Na vuaqira na gai mutsamutsa ara tuturiga nogo na mada,

mara latse nogo na itai na uaeni, ma na vuruqira e liuvi poponoa na kao.

Niqu udu galugaluve kiki ko tsunamai

mo ko dulikoluau.

¹⁴Igoe o vaga saikesa na kulukulu e taopoi

tana tagerena na maragova.

Kiki, ko rutsu mai mo ko tamivaniau kau reia na ngoramu uluvao laka,

ma kau rongomia nina tangi laka na liomu.

¹⁵Tangoligira na pai atsi tetelo,

e tau dou kara ba sekolia na uta na uaeni

rongona ara latse nogo.

Na Daki

¹⁶Aia niqu mane nogo inau, minau nina daki nogo aia.

Aia e palagira nina sipi i levugaqira na vulevule.

¹⁷Idavia ke votu na uniko

me ke nanga lê na rodona na bongi,

igoe niqu udu galugaluve ko visumai kiki,

vaga moa na dia vaolu e ulo tsaku tana vungavunga ni Beter.

¹Pipi tana bongi kalina au maturu,

au bolea moa aia au ngao sosongolia.

Au lalave bamaia, mau tau goto ba tsodoa.

²Au liu bamai i laona na sautu loki

ma na pakokana na verabau.

Au lalave bamaia aia au ngao sosongolia.

Au momoro bamai rago mau tau goto tsodoa.

³Migira na mane matali ara matalia na verabau ara morosiau.

Minau au tû mau veisuagira, “?Laka amu tau reikikia niqu udu inau?”

⁴Mi kalina tsotsodo au mololegira igira mau ba tsodoa.

Mau tangoli kakaia, mau tau goto tamivania ke vano,

poi tsau kalina au adivanoa i valena tinaqu,

i laona nogo nina voki aia e vasuau.

⁵Igamu na daki ni Jerusalem kamu vatsa vaniau

tana asaqira na dia ma na omea tuavati atsi ara dona sosongo na ulo tsaku,

laka sauba kamu tau goto adikae gokona na vainaugi

poi tsau ke tsau segeni gana tagu.

Na Tolunina Linge

Na Daki

⁶?Nagua vaga ia e maimai talu tana kaomate

vaga moa na kakoluna na pungu,

me sigini dou vaga moa na bulunagai uruuru ma na mira,

me pipi sui na vatana na sede ara dona na tsabiriana igira ara tsabiri omea levo?

⁷!Reia bâ! Kesa na sasana na totukae dou sosongo ara kalagaimaia,

maia nogo a Solomon e totukae i kelana;

mara ono sangavulu na mane vaumate ara dulikolumaia,

igira na mane vaumate susuliga liuliu bâ tana Israel.

⁸Igira sui lakalaka ara dona sosongo na gini vailabu na isi,

me danga nogo kalina ara sangâ tana vailabugi loki.

Me pipi vidaqira e tango kesa nina isi,

mara totu vangarau pitugira na gala kara tau maiginigira tana bongi.

⁹A Solomon na taovia tsapakae ara kalagaimaia tana nina sasana na totukae tamani valena

ara aqosiginia na gai laka.

¹⁰Na tuguruna ara poroginia na siliva,

ma na valena ara tsavuginia na polo ara tula mamaregasiginia na terete qolu.

Ma na mani totukae ara tsavuginia na polo tsitsibora,

ara vosi valakasidoua igira na daki ni Jerusalem.

¹¹Igamu na daki ni Sion, kamu mai ma kamu reia a Solomon na taovia tsapakae.

Aia e sagelia gana kepi taovia aia na tinana e molovaninogoa i lovana

tana nina dani na mutsasai na tauga,

aia nogo na dani na mage loki vania.

Na Mane

¹Na vanga rerei dou nomoa na rereimu igoe niqu udu;

me mamauriga manana nomoa na matamu i murina na polo o tsavuginia na ngoramu.

Ma na ivumu ara gavai vaga moa na alaala na naniqoti

ara tsipu lekaleka tsuna tana tetena ni Gilead.

²Migira na livomu ara sere maka vaga moa na sipi

ara vasini moa putsia na ivuqira mara tsagi malegira.

Me tau goto nanga sa vidaqira;

ara totu dou sui saikesa.

³Ma na tutubena mangamu ara ka tsitsi dou vaga moa na polo tsitsi marara;

mara ka rerei dou rago kalina igoe o goko.

Ma na ngoramu e maka dou saikesa i murina na polo o tsavuginia na matamu.

⁴Ma na liomu e rereidou vaga moa nina kusudato a David,

kolua gamu liolio vaga moa ti kesa na toga gaqira tako na mane vaumate ara tsauragini polia na liomu.

⁵Ma na tsutsumu kaira ara ka vaga moa ruka na dia batso

ara ka mutsamutsa i laoqira na vulevule.

⁶Igoe o vaga kesa na vungavunga i tana ara totu danga na bulunagai sisigini dou.

Mi tana inau sauba kau ba totu poi tsau kalina ke votumai na unikô

me ke nanga lê na rodona na bongi.

⁷!Na vanga rerei dou nomoa na rereimu igoe niqu udu;

me tagara goto sa tuputupu bau tana kokoramu!

⁸Igoe niqu aneane galugaluve ko dulikoluau,

mi kaita ka tsuna tania na Vungavunga Lebanon.

Ko tsuna mai tû i kelana na Vungavunga Amana,

ma na Vungavunga Senir ma na Vungavunga Hermon,

i tana ara totu igira na laeone ma na kusi atsi.

⁹Niqu udu galugaluve o resea na kosuqu.

Mi kalina au reia na matamu

ma na liolio o sagelia

me sekolia na papadaqu.

¹⁰Nimu galuve e naua mau gini mage loki sosongo,

igoe na kosuqu popono ma na tauqu.

Ma nimu galuve e dou liusia bâ na uaeni;

ma nimu sede e sigini dou liusigira bâ pipi na papasa sisigini dou.

¹¹Niqu udu galugaluve,

nimu goko e rorongo dou sosongo vaniau,

vaga moa na puina na bulumitsua

ma na tsetserena na miliki tana mangaqu;

ma na polomu ara sigini dou vaga moa na siginina na gai ni Lebanon.

¹²Igoe na kosuqu popono ma niqu aneane,

igoe o vaga kesa na uta ara barapoliginia na vatu me totu totongo,

me kesa na vuravura tabu e totu i laona.

^13-14Mi tana ara dato magobu dou na gai tsukatsuka sui.

Visana na gai e gani dou na vuaqira,

mara visana ara sigini dou.

Visana ara aqosiginia na sede sisigini dou,

mara visana ara tsonia tana mutsa me gini pui dou.

Visana ara aqosiginia na inilau mamarega levolevo,

mara visana ara aqosiginia na bulunagai uruuru,

me danga goto na vatana na ko sisigini dou.

¹⁵Igoe o vaga na vuravura na kô e lesoviginia na uta,

ma na okookona na ko tatave,

ma na masarina na kô e tsuna bâ tana Vungavunga ni Lebanon.

Na Daki

¹⁶Ko mamata igoe na Guguri ni Vava.

Migoe na Guguri ni Ata ko liuvia niqu uta;

me ke gini tavosa bamai na vuruna dou niqu uta.

Tamivania niqu udu ke mai tana nina uta

me ke gania gana vuana gai puipui dou bâ.

Na Mane

¹Igoe na kosuqu popono ma niqu aneane,

inau au sage bâ nogo i laona niqu uta.

Au angunikolugira nogo niqu omea sisingini dou;

mau gania gaqu bulumitsua,

mau inuvia gaqu uaeni ma gaqu miliki.

Na Alaala na Daki

Eo, kagamu gamu udu kamu ka mutsa ma kamu ka inu,

poi tsau kalina kamu ka masu dou.

Na Vatinina Linge

Na Daki

²Mi kalina au maturu, ma na kosuqu e mamata moa.

Mau bolea laka niqu udu e mai kidikidi i matsapa.

Na Mane

Niqu udu, igoe na kosuqu popono, ma niqu kulukulu,

ko sangavi vaniau na matsapa ma kau sage bâ.

Na lovaqu e porisinogoa na kolobu,

ma na lavo e tsavu poponoa na ivuqu.

Na Daki

³Inau au tsoraliginogoa na poloqu,

?Ma na rongona gua kau sagelitugua?

Inau au vulimalenogoa na tuaqu.

?Ma na rongona gua ti kau bausitugua?

⁴Niqu udu e tatangomai tana matsapa,

me gini pidi na kosuqu rongona aia e mai varangi nogo.

⁵Mau tû laka kau ba sangavi vania na matsapa me ke sagemai.

Ma na sede tana limaqu e porisia na tatangolina na matsapa.

⁶Mau sangavia na matsapa vania niqu udu,

maia e vano kiki nogo.

Mau padavisua moa nina goko, me gini seko na tobaqu.

Mau lave bamaia, mau tau goto ba tsodoa;

mau soâ, maia e tau goto kiki gokovisu vaniau.

⁷Migira na mane matali baravatu ara tsodoau kalina ara liu polia na verabau;

mara tangoliau mara labu bokaliau;

mara tsoraligia na poloqu tsavugotu.

⁸Igamu na daki ni Jerusalem, kamu veke vaniau

laka ti vaga kamu tsodoa niqu udu

me sauba kamu tsarivania laka au gini maluku sosongo na padangaoana.

Na Alaala na Daki

⁹Igoe o uluvao laka liusigira na daki sui.

?Ko tsarivanigami laka nagua e tavosi i konina nimu udu tanigira na mane sui tavosi?

?Ma nagua e gini tavosi i konina aia te o ngaoa igami kami veke vanigo vaga ia?

Na Daki

¹⁰E uluvao laka na rereina niqu udu me susuliga;

aia e dou liuliu bâ i laoqira na sangavulu na toga.

¹¹Ma na ngorana e madao dou me angaanga vaga moa na qolumila;

me sasala dou mate na ivuna,

me bau vaga moa na ivuna na kaokao.

¹²Mi kaira na matana ara ka maka dou vaga moa na ivuna na kulukulu e leso sui me tutû tana liligina ko tatave.

¹³Ma na ngolana e vaga moa na uta i tana ara totu danga na omea sisigini dou.

Ma na mangana e vaga moa na vulevule,

ma na mamagona e sigini dou vaga moa na sede.

¹⁴Mi kaira na limana ara ka patsotso dou,

me moloa tana kakauna na ringi e totu na vatu angaanga i laona,

ma na konina e madao dou vaga moa na livona na elepani

ara baruginia na vatu bora angaanga loki matena.

¹⁵Mi kaira na kakabana ara vaga moa ruka na tuguru ara aqosiginia na vatu sere,

mara ka tukae bâ tana tuguta qolumila.

Me rerei dou sosongo vaga moa na Vungavunga ni Lebanon,

kolugira nina gai na sida katsi.

¹⁶Me tangi dou rago nomoa nina goko

me pipi na omea i konina au reingao sosongolia inau.

Maia saikesa nogo na rereina niqu udu galugaluve,

igamu na daki ni Jerusalem.

Igira na Alaala na Daki

¹Igoe o uluvao laka liusigira na daki sui.

?Laka iava vaga e vano nimu udu?

Ko tsarivanigami iava tana e liu bâ nimu udu,

migami kami sangago na laveana.

Na Daki

²Niqu udu e vano nogo tana nina uta,

i tana ara dato na gai sisigini dou.

Mi laona nogo nina uta aia e ba palagira nina sipi,

me angunikolugira na vulevule.

³Aia niqu mane nogo inau, minau nina daki nogo aia.

I levugaqira na vulevule aia e palagira nina sipi.

Na Tsegenina Linge

Na Mane

⁴Niqu udu igoe o rereidou sosongo vaga moa na verabau ni Tirsa,

mo uluvao laka vaga moa na Jerusalem,

mi kalina au morosigo igoe e datokesa na mamagoqu

vaga moa ti kalina au morosia kesa na omea rereidou sosongo liuliu bâ.

⁵Ko moroligi taniau igoe

rongona na matamu ara bulesiau.

Na ivumu ara gavai vaga moa na alaala na naniqoti

ara tsipu lekaleka tsuna tana tetena ni Gilead.

⁶Migira na livomu ara sere maka vaga moa na alaala na sipi

ara vasini moa tsagi malegira.

me tau goto nanga sa vidaqira;

mara totu dou sui saikesa.

⁷Ma na ngoramu e maka dou rago i murina na polo o tsavuginia na matamu.

⁸E dou moa ti vaga na taovia tsapakae ke tamanigira kara ono sangavulu na savana daki taovia,

ma kara alu sangavulu na savana lê,

me ke utu na tsokoraeaqira nina daki vaolu.

⁹Minau, e kesa lelê moa na daki au galuve sosongolia,

maia e uluvao laka vaga moa na kulukulu.

Maia segeni lelê moa ngiti dalena daki na tinana

maia e padaloki sosongolia bâ liusigira na dalena mane.

Migira sui na daki vaolu ara morosia mara tsonikaea;

migira goto na daki taovia ma na savana lê na taovia tsapakae ara tsonikaea.

¹⁰?Asei vaga aia e maka vaga na marara tana matsaraka?

Aia e uluvao laka me maka dou sosongo na matana,

me toratora vaga moa na aso se na vula,

me gini datokesa na mamagoqu kalina au reia.

¹¹Minau au liu tsunamai i laoqira nogo na gai na gatsoga

na reiaqira na omea tsukatsuka vaolu i laona na poi,

ma na morosiana na rauqira vaolu na itai na uaeni,

ma na latseqira na gai mutsamutsa.

¹²Ma na padaana niqu udu e dato susuliga i tobaqu inau

me naua mau gini pada laka au loki liuliu bâ i laoqira niqu tinoni.

Na Alaala na Daki

¹³Baka daki ni Sulam ko visumai, ko visumai,

ma kami morosigo.

Na Daki

?Na rongona gua ti amu ngaoa laka kamu morosiau inau

vaga moa ti au gavai i mataqira na tinoni?

Na Mane

¹!Niqu udu igoe, e uluvao laka rago na rereimu!

Na tuamu ara ka rereidou rago i laona gamu porotua.

Ma na kakabamu ara ka paquru mara ka rereidou

vaga saikesa nogo na titinoni e katsua kesa na mane e dona sosongo na katsu taoni omea levo tana vatu.

²Ma na tsuruna na pepemu e vaga moa kesa na bilo

e vô ke kora na uaeni i laona.

Ma na tobamu e vaga moa kesa na ivogo na uiti

ara inilau polipoliginia na vulevule.

³Mi kaira na tsutsumu ara ka vaga moa ruka na dia batso.

⁴Ma na liomu e vaga moa na kusudato sere maka dou.

Ma na matamu ara ka rerei vaga moa na maomao

ligisana na matsapakapuna na verabau ni Hesbon.

Ma na isumu e rerei dou vaga moa na kusudato ni Lebanon

aia e arokalea bâ i Damaskus.

⁵Ma na lovamu e totu paladato vaga moa na Vungavunga Karmel.

Ma na ivumu e sasala me bau angaanga,

ma na rereina e raqâ na matana tinoni atsa moa ti na taovia tsapakae.

⁶Igoe niqu udu o uluvao laka mo rerei dou sosongo;

minau au galuve sosongoligo.

⁷Igoe o dato goto dou vaga moa na gai na niu

ma na tsutsumu ara ka vaga moa na vuana.

⁸Minau sauba kau datovia na niu ia,

ma kau pitsua na vuana.

Ma na tsutsumu ara ka vaga moa na vunguna na vuana uaeni,

ma na mamagomu e sigini dou vaga moa na vuruna na gaviga,

⁹ma na mangamu e pui dou vaga moa na uaeni dou laka

e taqetu tsavua na tutubena mangaqu ma na livoqu.

Na Daki

¹⁰Inau nina daki nogo aia, maia e padangao sosongoliau inau,

¹¹Kiki niqu udu, ko mai ma ka ka vano

ma ka totu sa tana vera tetelo ma ka ka maturu i tana.

¹²Ma ka mamata bongibongi ma ka ba morosigira

ti kara tuturiga na dato igira na itai na uaeni,

ma kara taporatsa nogo na latseqira,

me ti kara latse goto igira na gai mutsamutsa.

Mi tana nogo ti inau sauba kau sauvanigo niqu galuve.

¹³Igoe niqu udu galugaluve, au tsakosaigira nogo danga na vuana gai mutsamutsa,

mau mologira tana savuna matsapana ka valeda,

gana igoe ko gania.

Visana au pitsu idagira nogo, mara visana au vasini moa pitsugira.

Mi kaita ka ka siginia na vuruna na “mandrake,”

aia e naua ka ka gini vaireingaogi.

¹Kiki, ke dou sosongo ti vaga igoe na tasiqu manana,

ma na tinaqu goto moa inau e tsutsugo.

Me ti ke vaga ia, mi kalina kau ba tsodogo i sautu loki

me tau utu inau kau domigo, me ke tagara goto ke kesa ke pada sa rongona.

²Ma kau adivanogo i valena tinaqu,

i tana igoe ko sasaniginiau na galuve.

Me sauba kau sauvanigo na uaeni

au lalokoluginia na papasa puipui,

gana ko inuvia.

³Igoe o moloa na limamu mauli i vavana na lovaqu,

ma na madoamu o kasoginiau.

⁴Igamu na daki ni Jerusalem kamu vatsa vaniau inau

laka sauba kamu tau goto adikae gokona na vainaugi

poi kalina ke tsau segeni nina tagu.

Na Ononina Linge

Na Alaala na Daki

⁵?Asei daki vaga ia e maimai talu tana kaomate,

me kulakula kolunogoa nina udu?

Na Daki

Inau nogo au ba galisigo i vavana na gai na gaviga,

i tana nauna nogo igoe o botsa.

⁶Ko laka goto na ngaoana sa daki segeni, minau segeni moa;

mo ko laka goto na kasoana sa daki segeni, inau segeni moa.

Na galuve e susuliga vaga saikesa moa na mate;

ma na vaikiligi e susuliga vaga goto na mate.

Maia e botsadato vaga moa na lapina lake

me iru vaga moa na lake loki e vô mate.

⁷Me tau goto tangomana na kô ke tsi matesia;

me tagara goto sa obo ke tangomana na munuana.

Me ti vaga kesa ke tovoa na voliginiana na galuve nina omea tatamani,

maia e utu saikesa ke tangomana, me sauba moa kara peâ.

Na Tasina na Daki

⁸I tugita tu tamanina kesa tasida vaolu,

ma na tsutuna ara ka tau vati tû moa.

?Ma nagua vaga sauba ka tu nauvania

kalina ke ngaoa sa mane na taugaana?

⁹Ti vaga aia na tasida ke vaga na baravatu,

migita sauba ka logovania kesa na kusudato ma ka inilauginia na siliva.

Me ti aia ke vaga na matsapakapu,

migita sauba ka dilaginia na pava ara aqosiginia na gai na sida.

Na Daki

¹⁰Inau na baravatu,

ma na tsutsuqu ara ka vaga ruka na kusudato.

Ma niqu udu e donagininogoa laka kalina inau au totu kolua aia

me rago dou na tobaqu.

Na Mane

¹¹Aia Solomon e tamanina kesa nina uta na uaeni

tana nauna ara soaginia i Baal Hamon.

Migira ara ngaoa na aqo i laona nina uta na uaeni ia

e kilia kara tusuvania kesa toga na tavina siliva.

¹²E dou moa ti a Solomon ke aditamanina nina toga na tavina siliva,

migira na mane aqouta kara aditamaniqira ruka sangatu vaga na vovolina niqira aqo.

!Minau au tamanina kesa niqu uta na uaeni segeni!

¹³Igoe niqu udu o totu nogo i laona na uta,

minau au ngaoa kau rongomia na tatangina na liomu,

migira goto gaqu duli ara pitugotoa kara rongomia kalina ko goko.

Na Daki

¹⁴Kiki niqu udu, ko visumai tsaku,

vaga moa na dia vaolu e ulo gaukuti mai tana kelaqira na vungavunga

i tana ara dato na gai sisigini dou.