IGIRA NA LINGE TABU
(PSALMS)
Na Vuresi Makaliana Na Omea Ara Marea Tana Papi Iani
Na papi Na Linge Tabu ara soaginigotoa Na Papi na Psalm aia nogoria na papi i tana ara totu niqira linge tabu ma niqira nonginongi igira na tinoni ni Israel, mara totu i laona na Papi na Mamare Tabu. Me tau kesa moa tinoni, me tau i laona kesa moa na tagu ara maregira na linge tabu girani. I laona e danga sosongo na tagu, igira na tinoni ni Israel ara tsakosaigira babâ, mara gini aqo kalina ara tû na lotu vania God. Mi murimai moa ti ara molosagegira i laona niqira Papi na Mamare Tabu.
Mi laoqira na linge tabu ma na nonginongi girani, ara totu visana agana na mani lotu tana tsonikaeana ma na samasama vaniana God. Visana agana na nongiana God ke sangagira, me ke reitutugugira, me ke maurisigira. Visana na nongiana rongona ke padalea niqira sasi. Visana na lingena na soadouana God rongona nina vangalaka vanigira, ma na nongiana laka ke kedegira gaqira gala. Ara visana vidaqira na nonginongi girani ara kalea kesa moa tinoni, mara visana ara kalegira na tinonina na vera popono. Visana ara adilabatia nina papada popoi kesa tinoni, migira visana ara adilabatia niqira kili ma niqira vavatsangi igira sui nina tinoni God.
A Iesu goto e gini aqo na linge tabu tana sasani tinoni mi tana nonginongi, vaga ara marea tana Turupatu Tabu Vaolu tana rongona a Iesu Kristo. Maia nogoria na rongona ti na Papi na Linge Tabu e gini lia na papi na nonginongi ara padaloki sosongolia bâ igira na tinoni Kristiano tû mai tana tuturigana.
Na Omea Ara Totu Tana Papi Iani Igira sui kolu ara 150 na Linge Tabu, mara votagira tsege tana papi vaga iani:
Papi Kesa Linge 1–41
Papi Ruka Linge 42–72
Papi Tolu Linge 73–89
Papi Vati Linge 90–106
Papi Tsege Linge 107–150
1PAPI KESA
Na Magemage Manana
1Ke mage aia na tinoni
e sove tania na muriana niqira totokoe igira na tinoni seko,
me tau muria niqira sasaga igira na tinoni sasi,
se e tau goto dona ke sangatotu i laona niqira sai igira ara peâ na mangana God.
2Na tinoni dou vaga ia, e tsodoginia nina magemage tana muriana nina Ketsa na Taovia,1:2 “nina Ketsa na Taovia” Ara soaginigotoa na ‘Tora’. E kaletugira tsege na papi idaida i laona niqira Mamare Tabu igira na Hibru.
me tau kuti na padaana i tobana na dani ma na bongi.
3Aia e vaga moa ti kesa na gai e vovodato i ligisana na ko tsatsali,
me gini molo vuana dou tana tagu laka,
me tau goto dona ke matsele lê na rauna.
Maia na tinoni vaga ia e tangomana sailagi pipi tana aqo sui e naua.
4Migira na tinoni seko ara tau goto dona kara nauvaganana ia;
igira ara vaga ti na rau matemate lê, e mai na guguri me lovosaginigira lê.
5Igira na tinoni sasi sauba God ke kedegira,1:5 “God ke kedegira” Tana dani na Pede Loki.
me ke molovotagira1:5 “ke molovotagira” Na tinoni sasi e utu vanigira kara tamanipata kolugira na tinoni dou tana magemage na mauri saliu. tanigira nina tinoni segeni nogo God.
6Na Taovia aia e mataligira me reitutugugira igira e gotolaka niqira sasaga,
migira na tinoni seko ara muria moa na sautu e kalea na mate saliu.
2Aia na Taovia Tsapakae God e Vilinogoa
1?Rongona gua ti igira na puku tavosi sui ara vorogokona sai na kore loki?
?Egua vaga ti igira na toga ara naua niqira vorogoko tagara rongona lê?
2Igira na taovia tsapakae ni lao eni ara tû, mara vangarau segeniqira nogo,
migira sui na tagao ara vorogokona sai na tukapusiana na Taovia,
ma na tukapusiana goto na taovia tsapakae aia e vilinogoa.
3Mara tsarivaganana, “Ida gita ma ka nusiligia tanigita
na sosorina ka niqira tagao kaira ara ka soriginigita.”
4Ma na Taovia, aia e totu tana sasana i baragata,
e kiataginigira, me gilugaqira.
5Mi muri maia e tû, me parovatavigira tana korena loki,
me molo matagu loki sosongo vanigira tana nina momosa.
6Me tsarivaganana vanigira,
“Inau segeniqu nogo au turuvaginia aia au vilia ke lia na taovia tsapakae,
mi Sion2:6 “mi Sion” Aia na vungavunga i tana e totu na Vale Tabu. nogo tana niqu vungavunga tabu au molovania ke totu.”
7Me goko aia na taovia tsapakae ia, me tsaria,
“Inau sauba kau katevulagigira na omea sui aia na Taovia e tsarinogoa vaniau.
Aia e tsarivaganana vaniau, ‘Igoe nogo na dalequ; mi dani eni nogo inau au lia na tamamu.
8Ko nongia i koniqu, minau sauba kau tusugira vanigo na puku tavosi sui;
ma na barangengo popono sauba ke lia nimu tamani igoe.
9Me sauba ko tairutuginigira na itoro tapala;
mo ko rutugira ma kara tarutu vaga saikesa nogo na popo vatu.’ ”
10Kalina ia, ma kamu rongomidoua niqu goko parovata iani, igamu sui na taovia tsapakae;
kamu pukudoua na sasani iani, igamu na tagao sui tana barangengo:
11Kamu aqo vania moa na Taovia tana kukuni loki.
12Kamu gariri ma kamu tsuporu i matana;
ke tau tavongani labadato tsaku na korena,
me ke tavongani novotigamu lê na mate.
Eo, kara mage igira sui ara dona na ba totu raviravi i konina aia.
3Nina Nonginongi Kesa Tinoni Tana Matsaraka Rongona God Ke Sangâ
1!Taovia, ara danga sosongo bâ gaqu gala,
mara danga sosongo ara tsonikidaqu!
2Igira ara goko mara tsarivaganana iani tana rongoqu,
“Sauba God e utu lelê ke sangaa.”
3Migoe saikesa moa Taovia, o vaga gaqu tako;
o sangaau mau gini tangomana,
mo malagaisiau mau gini tukakai.
4Au nongia na Taovia ke sangaau,
me tû tana nina vungavunga tabu3:4 “nina vungavunga tabu” Aia nogo na Vungavunga Sion i Jerusalem i tana e totu na Vale Tabu ma na valena na taovia tsapakae. aia e rongomiau.
5Au tsaro mau maturu,
maia na Taovia e reitutuguau tana bongi popono.
6Inau au tau matagunigira na toga gaqu gala,
igira ara tupoliau tabana mi tabana.
7!Taovia ko mai! !Niqu God, ko maurisiau!
Ko kedegira sui gaqu gala,
mo ko pualasilea gaqira susuliga gana na sekoliginiaqu.
8Na tangomana e talumai i konimu igoe Taovia,
migoe ko tû mo ko vangalaka vanigira nimu toga.
4Nina Nonginongi Kesa Tinoni Tana Ngulavi Rongona God Ke Sangâ
1!Niqu God, igoe nogo o isutuguqu!
Mi kalina ti kau nongigo, migoe ko rongomia niqu nonginongi.
Kalina inau au totu i laona na rota, migoe nogo o sangaau.
Mi kalina eni au nongigo ko rongomia niqu nonginongi.
2?Sauba ke oka koegua sagata kamu tsiriau lê igamu na tinoni?
?Me ke oka koegua sagata kamu padalokigira igira na omea tagara rongona;
ma kamu gini boe moa na muriana na omea peropero lê?
3Padatugudoua laka na Taovia aia e viligira nogo igira e goto niqira sasaga kara lia nina tinoni segeni,
maia nogoria e rongomiau inau kalina au soâ.
4Kamu gariri tana matagu ma kamu mololea na nauana na sasi;
ma kamu pada mamavasia na omea iani,
kalina kamu tsaro mui i nigemui.
5Savoria nimui vangalaka dou vania na Taovia,
mi konina nogo aia, kamu vataraginia nimui tutuni.
6Ara danga sosongo rago ara nonginongi vaga iani:
“!Taovia ko tusumaia vanigami ke danga bâ na vangalaka.
Mi tana nimu galuve ko moromai i konimami!”
7Eo, ma na magemage dou igoe o saunogoa vaniau
aia e loki liusi sosongolia bâ na mage ara tamanina igira,
kolu pipi sui niqira lakana na mutsa ma na uaeni.
8Kalina inau au tsaro, mau dona na maturu saviliu;
rongona igoe segeni moa Taovia o vangataoau dou sosongo.
5Nina Nonginongi Kesa Tinoni Rongona God Ke Reitutugua
1Taovia, ko rongomia niqu tsaqina goko,
mo ko rongomigotoa niqu ngangaidato vanigo.
2!Ko rongomiau kalina au nongigo ko sangaau,
igoe niqu God ma niqu taovia tsapakae!
Au nonginongi vanigo Taovia;
3migoe o rongomia na tatangina na lioqu tana matsaraka.
Mi kalina e dato na aso inau au saua niqu savori vanigo,
mau tû mau pipitugo.
4God, igoe o tau saikesa reingaoa na aqo seko ara dona na nauana igira na tinoni;
mo tau goto tamia ke kesa na omea seko ke totu i matamu.
5E seko sosongo vanigo na reiaqira na tinoni vanga kaekae;
mo reisavi sosongoligira sui na tinoni vanga nauseko.
6Igoe o tsogori pukaligira sui na tinoni vanga peropero,
mo pea sosongoligira igira na lapiruka, migira na vanga tangopeke seko.
7Eo, mi tana rongona moa nimu galuve loki igoe,
te e gini tau utu vaniau na mai i laona na valemu;
ma na samasama i laona na Valemu Tabu
ma na tsuporu vaniamu tana kukuni loki.
8!Taovia, ara totu danga sosongo gaqu gala!
Igoe ko ida vaniau ma kau dona na muriana na omea igoe o kilia;
ko gotolia vaniau na sautu tana kau liu.
9Nagua sui moa ti kara tsaria igira gaqu gala me utu saikesa vaniau kau tutunina;
igira ara kilia moa na raqasasili tinoni.
Na mangaqira e gini mabulu na pero,
me dangaligira na tabatu na mate.
10Migoe God, ko tusuvanigira na matena niqira tsutsukibo;
me ke gadovisu segeni i koniqira na omea seko ara vangaraua na nauana.
Ko tsialigigira tania na matamu rongona na sasi danga ara tsukia,
mara petsakoe loki vanigo igoe.
11Kara gini magemage igira sui ara toturavi dou i konimu igoe;
kara lilinge sailagi tana mage loki.
Ko reitutugugira dou igira ara padalokia na asamu;
matena tana rongomu nogo igoe ti igira ara gini dona na mage loki manana.
12Rongona igoe Taovia o vangalaka vanigira igira ara muridoua na gokomu;
ma nimu galuve e dilagira vaga nogo ti na tako.
6Na Nonginongi tana Tagu na Rota
1!Taovia ko laka na kore ma na goko kakai vaniaqu!
!Ko laka na kedeaqu tana nimu momosatoba!
2!Au maluku sosongo nogo Taovia; ko galuveau!
Ko sangaau ma kau susuliga tugua; e labe nogo na koniqu popono,
3ma na tidaoqu goto e rota loki sosongo.
?Taovia, sauba ke oka koegua sagata ko pipitu ti ko mai sangaau?
4Taovia ko mai tsaku mo ko maurisiau;
tana nimu galuve ko laumaurisiau tania na mate.
5Rongona i laona na barangengo na mate6:5 “na barangengo na mate” Igira na tinoni ni sau ara padâ laka na tinoni sui kalina ara mate ara tsuna sui kesa tana nauna i pikana na barangengo i tana ara totu mui saviliu tana rodo ma na papasa. e tagara lelê ke kesa ke dona na padavisuamu.
Me tagara ke kesa ke dona na tsonikaeamu i tana.
6Au gini kolae sosongo na melu;
pipi tana bongi na nigequ e gini kudo popono niqu ngangai;
ma gaqu lulunga e gini pori popono na kô na mataqu.
7E kakai sosongo vaniau na momoro;
me viri kubi popono na mataqu tana rota na ngangai
rongona na omea ara naua vaniau igira gaqu gala.
8!Kamu baligi taniau igamu na tinoni seko!
Na Taovia e rongominogoa niqu ngangai.
9E rongomiau kalina au ngangaidato vania rongona aia ke sangaau,
maia e tabedoua niqu nonginongi.
10Migira gaqu gala, sauba ke ponopala lê na tobaqira rongona e tau managaqira;
me sauba kara tavongani vangamâ loki ma kara sugavisu lê.
7Na Nongiana God Rongona na Pedegoto
1Taovia niqu God, inau au mai i konimu, rongona igoe ko reitutuguau.
Ko isutuguqu mo ko laumaurisiau tanigira igira sui ara takuviau.
2Kara tau mai vaga na laeone ma kara tangoliau
ma kara kalagaiau vano kesa tana nauna
i tana ke tau totu kesa ke isutuguqu.
Mi tana kara qoru rapasiau.
3-4Eo, igoe niqu Taovia mo niqu God,
ti vaga inau au naua ke kesa na omea seko vaninogoa kesa tinoni,
se ti vaga inau au tavongani keli lê vania kesa kulaqu,
se au tavongani labulea kesa gaqu gala tagara sa rongona,
eo, me ti vaga au naumananâ na omea vaga gira,
5!mi tana, me dou moa ti igoe ko tamivanigira gaqu gala
kara takuviau ma kara tangoliau,
ma kara tsoni pukaliau i lao ma kara labumatesiau,
ma kara moloau kau tsaro mate lê tana kao!
6!Ke botsalaba na koremu Taovia!
Ko tukae, mo ko tukapusia niqira momosatoba igira gaqu gala.
Ko tavurake segenimu mo ko sogogaqu inau.
Na pedegoto saikesa moa aia nogo igoe o kilia.
7Me vaga ia, mo ko adisaigira pipi sui lakalaka na toga ma kara totu poligo,
migoe ko tagaovi kaputigira popono tû tana sasamu i gotu vasau.
8Igoe nogo na taoviana na pedegoto vanigira na mamatana na tinoni.
Igoe Taovia ko sangaau me ke gini managaqu,
rongona igoe o donagininogoa laka inau au tau tsukia sa sasi.
9Igoe nogo God o gotolaka,
mo pede gotosia pipi na papada ma na kili ara totu popoi i laona na tobamami.
Ko utusia niqira sasaga tabaru igira na tinoni sasi,
mo ko saupeluna vanigira na tinoni e goto na tobaqira.
10God aia nogo e reitutuguau;
maia e maurisigira igira e goto na tobaqira.
11God aia e gotolaka tana nina pede,
me kedegira pipi dani igira na vanga tsutsukibo.
12Ti vaga igira kara tau olia niqira sasaga,
me sauba God ke asâ nina isi me ke vavanga.
E narinogoa nina parige me vangaraua na suiana.
13Me adimanogatigira nogo gana sagore e totu na omea agana na ketso tinoni i konina,
me matanigira nogo nina pipili iruiru.
14Kamu reia bâ niqira omeomea na tinoni vanga tsutsukibo gira;
igira nogo ara nausautuna na nauseko mara dona sosongo na goko valovalo.
15Ma na taviti ara moloa laka kara gini sogo na tinoni tavosi i laona,
migira segeni nogo ara ba sogo i laona.
16Me vaga ia, migira ara gini gadovikede segeni tana rongona niqira nauseko segeni nogo.
Ma na kore loki igira ara naua e kidivisu me gadovigira segeni.
17Au soadoua na Taovia tana rongona e gotolaka nina pede.
Au lingena na tsonikaeana na Taovia aia e Susuliga Sosongo.
8Gana Tangirongo God Ma Gana Loki na Tinoni Lê
1!Taovia igoe nogo nimami Taovia!
E tangi loki na rongomu polia na barangengo popono.
Ma niqira tsonikaeamu igira na tinoni e labadato i gotu tana baragata,
2mara lingena igira na baka pasa migira goto na baka tetelo.
Igoe o totu bibiu dou tanigira sui gamu gala.
Mo utusia asei ti vaga aia ke tovoa na tukapusiamu.
3Kalina inau au morodato i gotu tana masaoka aia igoe nogo o aqosia,
mau reigira na vula ma na veitugu igoe nogo o mologira tana sasaqira,
4?ma nagua sagata aia na tinoni ti igoe o ba padaloki sosongoli vaganana ia;
maia ma na tinoni lê moa, migoe o reitutugudou sosongolia vaga ia?
5Migoe nogo o aqosia aia, gana ke totu palatsuna vanigo segeni moa igoe.
Migoe o molokaea kolu mararana ma gana tangisoa.
6Migoe o viliginia aia ke tagaovi kaputigira na omea sui igoe o aqosigira.
Mo molokaea ke ida vanigira pipi na omea vovola sui:
7igira na sipi ma na buluka, migira goto na omea tuavati atsi sui;
8igira na manu ma na tsetse
ma na omea mamauri sui i laona na tasi.
9!Taovia igoe nogo nimami Taovia!
E tangi loki na rongomu polia na barangengo popono.
9Na Soadouana God Rongona E Gotolaka Nina Pede
1Tana tobaqu popono sauba kau tsonikaego Taovia.
Sauba kau tau kuti na turupatuna bamai igira na omea loki sui igoe o naugira.
2Sauba kau linge tana mage na matemu igoe.
Sauba kau lilinge ma kau tsonikaego igoe God Susuliga Sosongo.
3Kalina igira gaqu gala ara reigo igoe o labamai, ara pilo mara tsogovisu sui;
ara puka tsuna i lao mara viri mate sui.
4Igoe o totu tana nimu sasana na totukae, mo saua na pede gotolaka;
migoe nogo o sogogaqu inau.
5Igoe o kedegira na tinoni ponotoba,
mo matesigira na tinoni vanga tsutsukibo;
me sauba ke tagara goto ke kesa ke padavisugira.
6Igira gamami gala ara nanga saviliu nogo;
igoe o toroveoa popono niqira verabau,
ma na tinoni sui ara padalegira saikesa nogo.
7Ma na Taovia aia e taovia tsapakae na dani ma na dani;
me turuvagininogoa nina sasana na totukae gana na pede tinoni.
8Aia e tagaovia na barangengo tana nina gotolaka;
me pedegira na puku sui kolua nina pede gotolaka.
9Na Taovia aia niqira raravi igira ara bingi sekoligira,
maia niqira nauna agana na tsogoravi kalina ti ke laba na tagu seko.
10Igira ara donaginigo Taovia, sauba kara norugo,
rongona e utu vanigo igoe ko tsonilegira igira ara mai i konimu.
11!Linge na tsonikaeana na Taovia, aia nogo e tagao i Sion!
!Katevulagia vanigira na puku sui na omea aia e naugira!
12God e padagira moa igira ara rota;
me tau goto padalea niqira ngangaidato ara nauvania,
me kedegira igira ara rotasigira.
13!Ko galuveau Taovia!
Ko reigira na rota sui ara tsukivaniau igira gaqu gala.
Ko laumaurisiau tania na mate Taovia,
14ma kau ba tû i mataqira na toga ni Jerusalem,
ma kau katevulagi vanigira na omea vaga inau au tsonikaeginigo.
Sauba kau gini magemage tana rongona igoe o laumaurisiau inau.
15Na tinoni ponotoba ara tsaia na qilu,
migira segeni nogo ara puka i laona.
Ara moloa niqira taviti,
migira segeni nogo ara ba sogo i laona.
16Na Taovia e sauvulagi segenina tana nina pede gotolaka,
migira na tinoni vanga tsutsukibo ara sogo i laona niqira aqo seko igira segeni nogo ara naua.
17Na mate aia saikesa moa e totupitugira igira sui na tinoni vanga nauseko,
migira sui goto ara sove tania God.
18Igira ara kilia na sasanga sauba e utu kara totu sekona lê sailagi moa.
Ma niqira amesi igira ara tau tamanina sa omea sauba e utu ke puala lê saviliu.
19!Ko tukae Taovia! !Ko laka na tamivaniaqira na tinoni kara suamangamu lê moa!
Ko vaturigira na tinoni ponotoba i matamu mo ko pedegira.
20Ko naua ma kara matagunigo igoe Taovia,
ma kara donaginia laka igira na tinoni lê moa.
10Na Nonginongi Gana na Pedegoto
1?Rongona gua ti igoe o ba totu ao vaga sagata ia Taovia?
?Egua vaga ti o taopoi tanigami kalina e ngoligami na rota?
2Ara kaekae sosongo nomoa igira na tinoni vanga tsutsukibo,
mara rotasigira na tinoni ara tau tamanina sa omea.
Ko sogotigira i laona na taviti igira segeni nogo ara aqosia.
3Na tinoni vanga tsutsukibo e gini kaekae na omea seko aia e padâ i tobana;
ma na tinoni vanga susugu e goko seko me sove tania na Taovia.
4Na tinoni vanga tsutsukibo aia e tau dona ke boeginia na Taovia;
mi tana nina kaekae e pada i tobana laka e tagara sa God.
5Na tinoni vanga tsutsukibo e tangomana rago pipi tana omea sui aia e naua.
Maia e tau lelê padagadovigira nimu pedelaka igoe Taovia;
me peagira lê igira gana gala.
6E goko segenina me tsarivaganana,
“Sauba nomoa e utu kau puala lê inau;
Me sauba e utu goto ke sekoliau sa omea.”
7I laona na mangana aia e danga moa na gokoseko, na pero, ma na gorara tinoni;
mi vavana na lapina e totu na goko vavanga ma na goko saisai.
8E dona ke taopoi bamai i laona na vera,
me area na labumatesiaqira na tinoni e dou niqira sasaga.
E tuvigira igira e reia laka e utu vanigira kara sanga segeniqira;
9me pipitu i laona nina nauna na mani taopoi vaga moa ti na laeone.
E totu pitugira na tinoni ara tau tamanina sa omea,
ti ke sogotigira tana nina taviti me ke raqaligigira.
10Na susuligana loki nogo aia e liusiginigira na tasagana;
me tsogori rapasigira.
11Aia na tinoni vanga tsutsukibo e goko segenina me tsarivaganana,
“!E tau lelê gini boe God na omea vaga gira!
!Aia e maturukapusinogoa na matana, me sauba e utu lelê vania ke morosiau inau!”
12!Taovia ko tû mo ko kedegira na tinoni vanga tsutsukibo girani!
!Laka na padaleaqira igira ara rota!
13?Nagua e padâ na tinoni vanga tsutsukibo aia te e peâ God
me tsari segenina i tobana, “E utu lelê God ke kedeau inau”?
14Eo, migoe Taovia o morosiragoa na omea vaga aia e naua.
Mo donaginigotoa na vatsangisavi ma na rota e gadovigira na tinoni dou,
migoe o gini boe sailagi na sangaaqira.
Na tinoni e utu vania ke sanga segenina, aia nogoria e molo segenina i limamu igoe;
migoe nogo o sangagira sailagi igira e utu kara sanga segeniqira.
15Ko adipukalia na susuligaqira na tinoni vanga tsutsukibo
ma na tinoni vanga nauseko;
mo ko kedegira tana rongona na omea seko ara naua
poi ke tsau kalina kara tau naugotoa.
16Na Taovia aia nogo e taovia tsapakae saviliu na dani ma na dani.
Migira sui ara dona na samasama vaniaqira na god tavosi
sauba kara tavongani nangaligi lê tania nina kao aia.
17Migoe Taovia sauba ko rongomia niqira nonginongi igira ara totu palatsuna;
me sauba igoe ko malagaisigira.
18Me sauba ko rongomigotoa niqira ngangaidato igira na baka tinamate, migira ara bingisekoligira;
migoe segenimu nogo sauba ko sogogaqira,
ti ke gini utugana vanigira na tinoni lê na molo matagu goto vaniaqira.
11Na Vataragi Kakai i Konina na Taovia
1Inau au norukakaia na Taovia rongona aia ke ravisiau.
Mamu bule rago igamu ti amu tsarivaganana vaniau iani,
“Ko lovoligi bâ tana vungavunga vaga kesa na manu,
2rongona igira na tinoni vanga tsutsukibo ara tû tana rodona,
mara nari manogatinogoa niqira parige mara matania niqira pipili,
rongona kara vanasiginigira na tinoni dou.
3Me tau saikesa tangomana vania sa tinoni dou ke naua sa omea
kalina ara taveo lê vaganana na omea sui lakalaka.”
4Ma na Taovia aia e totu rago i laona nina valetabu;
me tamanina nina sasana na totu i baragata.
E morosigira na tinoni pipi tana nauna sui
me donaginia na omea sui igira ara naua.
5Aia e vilekegira na douna ma na sekona tana atsa;
me reisavi sosongoligira igira ara dona moa na sekoli tinoni.
6Maia nogoria te aia e naua me gini tumu tsunamai na madaova gagâ
ma na papasa mila iruiru i koniqira na tinoni vanga tsutsukibo;
me kedeginigira na guguri papara.
7Na Taovia aia e gotolaka me reingaoa na omea e dou me goto;
migira ara naudou vaganana ia sauba kara totu sailagi i matana aia.
12Nina Nonginongi Kesa Tinoni Rongona God Ke Sangâ
1!Taovia ko mai mo ko sangagami!
E tagara goto sa tinoni dou ke totuvisu;
me tau goto tangomana na tsodoana sa tinoni ke goto nina sasaga.
2Igira sui lakalaka ara vaiperogi moa;
mara gini vaivalogi moa niqira goko puipui.
3!Ko tû Taovia, mo ko muisia na lapiqira puipui!
Ko vongo kapusia na mangaqira igira ara gini goko kaekae mara tsarivaganana ia,
4“Tana nida tsaqina goko segeni nogo igita a adia na omea igita a ngaoa.
Eo, me sauba nomoa ka tsariragoa na omea igita a ngaoa na tsariana,
me utu lelê ke kesa ke tongo vanigita.”
5Ma na Taovia e tû me tsaria, “Eo, mi kalina ia inau sauba kau mai,
rongona ara bingi sekoligira igira ara tau tamanina sa omea,
mara kukungu tana rota igira ara kilia na sasanga.
Minau sauba kau ravisigira ma kara gini totu dou vaga ara amesi sosongolinogoa ke laba vanigira.”
6Nina veke sui na Taovia ara mana saviliu.
Ara vaga moa na siliva
ara kukia vitu kalina tana lake romaroma me male.
7-8Igira na tinoni vanga tsutsukibo ara totu pipi tana nauna sui,
migira na tinoni sui lakalaka ara padalokia moa na omea e seko.
Migoe Taovia ko ravisigami dou pipi kalina,
mo ko maurisigami tanigira na tinoni seko vaga gira.
13Nina Nonginongi Kesa Tinoni Rongona God Ke Sangâ
1?Laka sauba ke oka koegua sagata ko padaleau igoe Taovia?
?Egua, laka ko padaleau saviliu?
?Me ke oka koegua sagata goto ko taopoi taniau?
2?Me ke oka koegua sagata e kilia inau kau vatsangia na rota tana tidaoqu,
me ke melu loki na tobaqu na dani ma na bongi?
?Me ke oka koegua sagata goto igira gaqu gala kara tuliusiau?
3Ko moromai i koniqu Taovia niqu God, mo ko rongomia niqu nonginongi.
Ko turuvaginivisua na susuligaqu, rongona kau tau mate lê.
4Mo ko laka goto na tamivaniaqira gaqu gala kara tsaria, “Reia bâ, igita a tuliusia aia.”
Ko laka goto na tamivaniaqira kara gini magemage kalina e managaqira mara sugutiau.
5Minau au noru kalavatavia nimu galuve vo oli;
me sauba nomoa kau gini magemage tana rongona igoe sauba ko laumaurisiau.
6Sauba kau lilinge vanigo Taovia,
matena igoe o dou sosongo vaniau.
14Na Tinoni Sui Ara Sasi
(Linge 53)
1Igira na bule ara tsarisegenia i tobaqira,
“E tagara sa God.”
Eo, igira sui ara seko pitsu nogo,
me seko saviliu pipi niqira sasaga;
me tagara goto sa vidaqira ke naua sa omea ke goto.
2Ma na Taovia aia e totu tana sasana i gotu,
me morotsuna i koniqira na mamatana tinoni sui,
ti vaga ke reigira kara visana i laoqira kara sasaga,
ma kara samasama vania.
3Migira sui lakalaka ara viri liu sasi sui moa;
pipi gira sui ara atsa sui tana seko.
E tagara goto ke kesa vidaqira ke naua na omea ke goto,
eo, e tagara goto ke kesa lelê.
4Te e tû na Taovia me veisua,
“?Me laka ara tau vati sasaga moa igira na tinoni vanga nauseko girani?
E lia vaga moa ti ngiti gaqira mutsa na sekoliaqira niqu tinoni inau,
mara tau saikesa dona na nonginongi vaniaqu inau.”
5Me sauba igira kara matagu loki ma kara gariri,
rongona God aia nogo e totu kolugira igira ara rongomangana.
6Na tinoni vanga nauseko ara tovoa laka kara utusia nina aqo na tinoni palatsuna,
ma na Taovia aia segeni nogo e sogogana.
7Inau au amesi sosongolia ke talu mai i Sion ke kesa
aia ke laumaurisigira na tinoni ni Israel.
!Eo, me sauba kara mage loki sosongo igira na toga ni Israel
kalina aia na Taovia ke naua me ke dou visutugua niqira mauri!
15Na Omea God e Kilia Na Tinoni Ke Naua
1?Taovia asei nomoa e ulagana ke sage bâ i laona nimu Vale Tabu?
?Masei nomoa e ulagana ke samasama vanigo i Sion tana nimu vungavunga tabu?
2Aia moa na tinoni e rongomangana God pipi tana omea sui,
me nau sailaginia na omea e goto.
Ma nina tsaqina goko ara mana mara male sui,
3me vô na keli pero.
Maia e tau naua kesa na omea ke seko vanigira na kulana,
me tau goto dona ke govula gaqira goko bamai igira gana verakolu.
4Aia e peagira igira God e sove tanigira nogo,
me padalokigira igira ara rongomangana na Taovia.
Me manalia pipi kalina na omea aia e vekea na nauana,
atsa moa ti ke tsodoa na rota i laona.
5E tamiqolo vanigira na tinoni tavosi,
me tau nongi papabona kalina igira ara tuguvisu vania nina qolo.
Me tau goto tami ke adiqolona na sanga kesa tabana tana pede,
me ke keliseko vanigira na tinoni dou.
Eo, na tinoni aia e naudou vaganana ia, sauba ke dona na tukakai saviliu.
16Na Nonginongi na Noruana God
1Au norugo igoe God ko reitutuguau.
Minau kau totu ravi dou i konimu.
2Au goko vania na Taovia mau tsaria, “Igoe nogo niqu Taovia.
Ma na omea dou sui inau au tamanina ara talumai sui i konimu igoe.”
3Ara doulaka saikesa igira ara totukakai i konina na Taovia.
Me gini mage loki na tobaqu inau na totu koluaqira na tinoni vaga gira.
4Migira moa ara viri ulo bâ i koniqira na god tavosi
mara alomai vanigira segeni danga na rota.
Minau sauba ke utu saikesa vaniau kau sangapata kolugira tana niqira savori kodoputsa;
me sauba e utu goto kau samasama vanigira niqira god.
5Taovia, igoe saikesa moa gaqu tuva,
mo tusuvaniau na omea sui au kilia vania na mauriqu.
Migira na omea sui kara labamai vaniau i muri
ara totu sui nogo tana limamu igoe.
6!Ara dou sosongo nomoa nimu vangalaka gira igoe o sauvaniau!
!Eo, ara dou manana nomoa!
7Au tsonikaego Taovia, rongona igoe o mataliau dou.
Me atsa moa ti tana bongi migoe o tagaovia na papadaqu.
8Au pada sailaginigo moa Taovia.
Igoe o totu varangisiau, me tagara goto sa omea tangomana ke sekoliau.
9Maia nogoria na rongona ti e gini dou sosongo na tobaqu mau gini magemage,
mau totu raviravi dou i konimu igoe.
10Rongona igoe nogo o dilaau mau gini savi tania na susuligana na mate.
Me sauba e utu vanigo ko tsonilea vania na verana na mate kesa aia e totukakai i konimu.
11Igoe sauba ko tusuvulagi vaniau na sautu e vano kalea na mauri.
Igoe o totu varangisiau me gini danga tovu niqu magemage,
ma niqu mage na totu i matamu igoe e utu goto ke sui.
17Nina Nonginongi na Tinoni e Male Dou na Tobana
1Taovia ko rongomivatavia niqu ngangaidato vanigo tana rongona na pedegoto.
Ko boeginiau kalina au nongigo ko sangaau.
Ko tû mo ko rongomia niqu nonginongi,
rongona e tagara goto ke kesa na gokopero e dona ke rutsu i mangaqu.
2Sauba ko pedegotosiau moa,
rongona igoe nogo o donaginia na omea e gotolaka.
3Igoe nogo o donaginia na laona na tobaqu.
Igoe o mai nogo i koniqu tana bongi,
mo vilekegira sui niqu sasaga.
Mo tau goto tsodoa ke kesa na omea seko i laoqu.
4Au tau goto tsonia ke kesa na goko ke seko vaga ara naua igira visana.
Inau au muridougira pipi sui nimu ketsa,
mau tau goto muria niqira sautu igira na tinoni vanga momosatoba.
5Au muri sailaginia nimu sautu igoe,
mau tau lelê soba tania.
6Au nonginongi dato vanigo igoe niqu God,
rongona au dona laka sauba ko rongomia niqu nonginongi.
Ko aromai i koniqu, mo ko rongomigira niqu tsaqina goko.
7Ko saulabatia vanigami nimu galuve loki mo ko maurisigami.
I ligisamu nogo igoe ami totu raviravi dou tanigira gamami gala.
8Ko reitutuguau vaga igoe o reitutugua na lakana matamu.
Ko molopoiau tana auauna na rapomu,17:8 “tana auauna na rapomu” Na papadana laka God e reitutugugira nina tinoni me aragogira dou.
9kara tau sekoliau igira na tinoni vanga tsutsukibo.
Igira gaqu gala ara ngaoa na matesiaqu ara totu poliau.
10Mara tau goto galuveau mara goko kaekae sosongo.
11Ara tupoliau nogo kalina eni, iava moa i tana ti kau pilo bâ;
mara lalave sautuna na raqa tsunaaqu.
12Ara pituau vaga moa ti na laeone veveiga,
mara ngaoa moa kara ngotsiau.
13!Taovia ko mai tsaku!
Ko butogira gaqu gala me ke tau lelê managaqira.
Ma nimu isi ko maurisiginiau tania na limaqira na tinoni vanga tsutsukibo.
14Ko maurisiau tania na limaqira igira ara tamanina na omea sui ara kilia i lao eni.
E dou ti ko kedeginigira na rota vaga igoe o vangarau manogatinogoa vanigira,
me ke gini tugugira goto igira na daleqira,
me ke kauvisu goto visana turina vanigira na daleqira tetelo i muri.
15Minau kiki moa sauba kau morosilakamu igoe, rongona au tau naua sa omea ke sasi.
Mi kalina inau kau mamata, me sauba ke dangatovu i tobaqu na magemage na totu i matamu igoe.
18Nina Linge a David Matena Aia e Managana
1!Au galuve sosongoligo Taovia!
Igoe nogo na susuligaqu.
2Na Taovia aia nogo niqu reitutugu,
aia nogo niqu baravatu kakai.
Niqu God aia nogo e reitutuguau,
mi konina nogo aia inau au totu raviravi dou.
Aia e dilaau vaga moa na tako,
maia nogo e isutuguqu me ravisiau.
3Inau au ngangaidato vania na Taovia,
maia e laumaurisiau tania na limaqira gaqu gala.
!Tsonikaea na Taovia!
4Na sosorina na mate ara virigi poliau,
ma na panuna na lualua ara karara tsavuau.
5Na sosorina na mate ara virigi poliau,
ma na qilu e manganga nogo me totu pituau.
6I laona niqu rota inau au ngangaidato vania na Taovia.
Au ngangaidato vania niqu God rongona aia ke sangaau.
Mi laona nina vale tabu, aia e rongomia na tatangina na lioqu.
Me rongomivatavia niqu ngangaidato vania.
7Mi tana, ma na barangengo e kakanu loki me olaola takuti.
Ma na pukuqira na masaoka ara viri kakasisi,
rongona nogo God e kore loki sosongo.
8Na pungu bau e ngusu rutsumai tana babana isuna.
Na iruna na lake loki ma na madaova gagâ ara rutsu tana mangana.
9E ratsi ovatia na masaoka me tsunamai,
kolu parako bau i vavana tuana.
10E gini lovo tsaku tana rapona na angelo,
me gini vanovano na rapona na guguri.
11E gini popolo popono moa na rodo,
ma na parako na usa matolu e totu polipolia.
12Ma na kolina na usa kakai vaga na vatu ma na lapina na lake
ara talumai i laona na angaanga e ida vania,
mara tsulu tsapatugu tana parako bau.
13Mi tana, ma na gokona na Taovia aia e totu tana parako,
e poda loki vaga na vivisa;
mara rongomia na tangina na liona
aia e God Susuliga Sosongo.
14Maia e gini vanavana nina pipili me sarangasigira gana gala,
me naua me kirapi na angaanga me gini tsia tsogoligira.
15Na pakokana na maorodo e mamatsa kuti lê,
ma na pikana na barangengo e totu labalaba lê,
kalina igoe Taovia o taimataqira gamu gala,
mo goraragira tana nimu momosa loki.
16Aia na Taovia e tû i gotu me tatango tsunamai i lao me tangoliau,
me raqakaeau tania na mao rodo.
17E laumaurisiau tania na limaqira susuliga igira gaqu gala
me tanigira sui goto igira ara reisaviau
igira nogoria ara susuliga liusiau inau.
18Kalina inau au totu moa i laona na rota loki, migira ara maiginiau,
maia segeni nogo na Taovia e reitutuguau.
19Aia e sangaau mau gini tanusi tania na rota,
maia e laumaurisiau rongona e reingao sosongoliau.
20Na Taovia e sauvaniau na peluna rongona au naua na omea e goto i matana,
maia e soadouau rongona e male dou niqu sasaga.
21Inau au muridoua nina ketsa na Taovia.
Mau tau goto piloligi tania niqu God.
22Au muritaonigira pipi sui nina vali,
mau tau goto petsakoe mangana.
23Maia e donagininogoa laka inau au tau tsukia sa sasi,
mau parovatavi segeniqu kau tau naua sa omea e seko.
24Maia nogo na rongona ti aia e gini tusuvaniau na peluna,
rongona inau au naua na omea e goto i matana;
ma na rongona goto aia e donagininogoa laka e male dou niqu sasaga inau.
25Taovia, igoe o mana vanigira igira ara mana vanigo.
Mo dou saviliu vanigira igira e doulaka niqira sasaga.
26Igoe o sauvulagia nimu sasaga male vanigira igira ara sasaga male i matamu.
Mo reisavigira igira e tabaru niqira sasaga.
27Igoe o maurisigira igira ara totu palatsuna.
Mo molotsunaligira igira ara sasaga kaekae.
28Eo Taovia, igoe nogo niqu marara.
Niqu God, igoe nogo o mararasiligia na rodo e totu i tobaqu.
29Igoe o malagaisiau agana inau kau gini susuliga na baginiaqira gaqu gala.
Mo susuligasiau gana kau tsipu kaoniginia niqira bara.
30!Na God iani ara gotolaka pipi sui nina aqo aia e naugira!
!Ma nina tsaqina goko sui ara mana saikesa!
Aia e vaga saikesa nogo ti na tako
vanigira igira sui ara ba totu raviravi i konina.
31Na Taovia aia segenina moa e God.
God segeni moa aia nida isutugu.
32Maia nogo na God e sangaau inau te au gini susuliga,
maia nogo e mataliau te au gini liu dou tana sautu.
33Me naua na tuaqu kara tsotso kakai dou, vaga moa na tuana na dia,18:33 “na dia” Aia e kesa na vatana na omea tuavati ara totu tana vera bisi i mao, mara dona na tsotso kakai dou kalina ara ulo.
me adiravisiau bâ tana kelana na vungavunga.
34Aia e sasaniginiau na omea sui gana na vailabu,
rongona kau gini tangomana na gini vanavana na parige susuliga bâ.
35Igoe nogo Taovia o reitutuguau mo maurisiau.
Igoe o sangaau me gini tangi loki gaqu rongo,
ma na susuligamu e tangoliau mau gini totu raviravi dou.
36Igoe nogo o mangâ na sautu vaniau tana kau liu bâ,
me gini tau tsotso terere na tuaqu.
37Inau au takuvigira gaqu gala mau tangoligira,
mau tau goto mango poi tsau kalina au labupukaligira sui.
38Au labupukaligira me utu vanigira goto kara tû,
mara viri pukatsuna sui i tuaqu.
39Igoe nogo o sauvaniau na susuliga gana na vailabu
te au gini tangomana na tuliusiaqira gaqu gala.
40Igoe nogo o naua mara gini tsogo lê taniau igira gaqu gala,
mau labumatesigira igira sui ara reisaviau.
41Ara lavea kesa ke sangagira, me tagara lelê ke kesa ke sanga na maurisiaqira.
Ara ngangaidato vania na Taovia, maia e tau goto rongomia niqira nonginongi.
42Inau au tsogori rapasigira,
migira ara rapa vaga saikesa ti na papasa lê na guguri e uvisalagira bamai lê.
Au tsogorigira lê vaga moa ti na boko tana sautu.
43Igoe o maurisiau tania na limaqira na tinoni vanga livusuguradi,
mo molokaeau mau gini tagaovi kaputigira na puku danga.
Migira na tinoni inau au tau vati donaginigira moa, igira goto ara lia sui moa niqu tinoni inau.
44Igira na tinoni na puku tavosi ara mai tsuporu i mataqu,
mi kalina ara rongomia niqu goko migira ara tû mara rongomangaqu.
45E viri puka lê sui gaqira susuliga,
mara gariri lê kalina ara rutsu tania niqira baravatu kakai.
46!Na Taovia aia e totu mamauri manana! !Tsonikaea aia niqu reitutugu!
Katevulagia gana loki tsapakae God aia e maurisiau.
47Aia e sauvaniau na tangomana na tuliusiaqira igira gaqu gala,
maia e mologira danga na puku tavosi i limaqu inau,
48me maurisiau tania na limaqira gaqu gala.
Eo Taovia, igoe nogo o sangaau te au gini tangomana na tuliusiaqira gaqu gala,
mo isutuguqu tanigira na tinoni vanga tangopeke seko.
49Maia nogoria na rongona ti inau au gini tsonikaego i laoqira na puku sui;
mau teâ na linge na tsonikaeamu.
50God e saua na tangomana loki sosongo vania nina taovia tsapakae,
me sauvulagia nina galuve e vo oli vania aia e vilinogoa,
vaninogoa a David migira na kukuana na dani ma na dani.
19Na Omea Vovola Sui Ara Sauvulagia Gana Loki Tsapakae God
1!Na masaoka e katevulagia gana loki tsapakae God!
!I tana nogo e totu maka saikesa na omea vaga aia e aqosinogoa!
2Pipi kesa dani e katevulagia na omea iani vania na dani ke mai i muri.
Me pipi na bongi e tsaritutugua vania na bongi ke mai i muri.
3Mara tau goto gini aqo sa turupatu se sa tsaqina goko, me tau goto tangilaba sa omea.
4mara rongomisuia nomoa tsau tana vovosana na barangengo.
God e logoa tana masaoka kesa na vale vania na aso,
5maia na aso e labadatomai tana matsaraka vaga na mane tauga vaolu e magemage me rutsu tania na valena,
me vaga goto kesa na mane susuliga e silovia na vaipunigi tana ulo.
6Aia e tuturiga tana kesa tabana na masaoka,
me ba savu taligu tabana.
Tagara goto ke kesa na omea tangomana ke popoi tania na paparana.
Nina Ketsa na Taovia
7Nina ketsa na Taovia e gotolaka;
me saua vanigita na susuliga vaolu.
Nina goko na Taovia ara mana sui,
mara saua na sasaga loki vanigira ara tau sasaga katsi.
8Igira nina ketsa na Taovia ara goto sui,
mara gini magemage igira ara muridougira.
Nina ketsa sui na Taovia ara maka saikesa,
mara mararasia na papadana na tinoni.
9Na kukuni taniana na Taovia aia na sasaga e dou,
me sauba ke totu babâ saviliu na dani ma na dani.
Ma nina pede na Taovia ara mana;
mara goto sui pipi kalina.
10Ara dou putsikae liusia bâ na qolumila laka;
mara pui liusia bâ na puina na bulumitsua.
11I koniqira nogo na ketsa girani au adi sasani inau nimu maneaqo;
ma na peluna loki e pitugira igira ara muridougira.
12?Masei nomoa tangomana ke rei malesaginigira pipi nina sasi segeni?
!Ko vulimalesiau Taovia tanigira niqu sasi ara totu popoi!
13Ko maurisiau tanigira goto igira niqu sasi au tamia manana na nauana.
Mo ko laka na tamivaniaqira kara tagaoviau goto.
Mi tana nogo ti ke gini gotolaka niqu sasaga,
ma kau totu tanusi tania na sekona na sasi.
14Au nongigo Taovia, ko tamidoua na adiaqira pipi niqu tsaqina goko ma niqu papada ma kara dou sui i matamu.
!Taovia, igoe nogo niqu reitutugu mo niqu vagamauri!
20Na Nonginongi Tana Rongona Na Tangomana Tana Vailabu
1!Na Taovia ke rongomia nimu nonginongi kalina igoe ko totu i laona na rota!
!Ma nina God a Jakob aia nogo ke reitutugugo! 2Aia nogo ke sangago tû tana nina Vale Tabu,
me ke saua bâ vanigo nina sasanga tû i Sion.
3Maia nogo ke tabedougira pipi sui nimu sausau,
me ke reingaogira pipi nimu kodoputsa.
4Ke saua vanigo na omea sui o kilia,
me ke naua me ke gini managamu pipi sui tana omea igoe o ngaoa na nauana.
5Mi tana ti igita sui ka gudato tana magemage matena e managamu igoe,
ma ka lokisiginia nimu tangomana tana tsonikaeana nida God.
God aia nogo ke tusuvanigo na omea sui igoe o nongia i konina.
6Mi kalina eni au donaginia laka na Taovia nogo e tusua na tangomana vania nina taovia tsapakae aia segeni e vilinogoa;
me rongomia nina nonginongi tû i gotu tana nina baragata tabu,
mi tana susuligana nogo ia, ti aia e tusuvania na tangomana loki sosongo.
7Visana ara vataraginia gaqira susuliga tana niqira terê na vailabu,
mara visana tavosi tana niqira ose,
migita a norua moa na susuligana na Taovia nida God.
8Na vatana na tinoni vaga igira, sauba kara tubulagi ma kara puka lê,
migita sauba ka tukae ma ka tsotsovata kakai.
9Taovia ami nongigo ko tusuvania na taovia tsapakae na tangomana,
mo ko rongomigami kalina kami soago ko sangagami.
21Na Tsonikaeana God Rongona na Tangomana
1Taovia, e mage sosongo aia na taovia tsapakae rongona igoe o tusuvania na susuligamu.
Maia e magemage loki rongona igoe o sangâ me gini managana.
2Igoe o tusuvania na omea aia e kilia i tobana,
mo sauvania na omea sui aia e nongia i konimu.
3O mai i konina kolua nimu vangalaka loki sosongo,
mo molokaea i lovana gana kepi qolumila.
4Aia e nongigo ke mauri, migoe o sauvania na mauri,
na mauri oka me tagara ke tau sui.
5E loki tsapakae rongona igoe nogo o sangâ,
igoe nogo o sauvania gana tangirongo ma gana susuliga loki.
6Ma nimu vangalaka igoe ara totu kalavata i konina na dani ma na dani.
Me gini dangatovu tobana na magemage na totu i matamu igoe.
7Na taovia tsapakae aia e norukakaia moa na Taovia Susuliga Sosongo.
Ma na rongona na Taovia e galuve sailaginia vaganana ia,
ti aia sauba ke gini totu ravi dou pipi kalina.
8Na taovia tsapakae sauba ke tû me ke tangoligira sui gana gala.
Eo, sauba ke tangoligira sui lakalaka igira ara tobaseko vania.
9Mi kalina ti vaga aia ke labamai me sauba ke kodogira sui tana lake loki.
Na Taovia sauba ke konomigira tana korena,
ma na lake sauba ke ganisuigira.
10Me ke tagara lelê goto sa vidaqira igira na kukuaqira ke pipidi,
sauba na taovia tsapakae ke labumatesigira sui lakalaka.
11Igira ara nauragoa niqira gokosai, mara vorogokona laka kara labua,
me utu moa ke managaqira.
12Sauba aia ke tû me ke vanasiginigira nina pipili,
me ke naua ma kara pilo ma kara tsogoligi.
13!Ami tsonikaego Taovia tana rongona na susuligamu loki!
Eo, sauba kami linge ma kami tsonikaea na susuligamu.
22Na Ngangaidato Tana Tagu na Rota Ma na Linge na Tsonikaeana God
1?Niqu God, niqu God,22:1 “Niqu God” Iani na goko a Iesu e tsaritugua kalina aia e tsautsau tana gai ulutaligu (Mat 27:46; Mrk 15:34). egua sagata kiki ti o tsonileau?
Inau au ngangai savosavo bâ i konimu,
?megua ti o tau sangaau?
2Tana dani popono au soago igoe niqu God,
migoe o tau lelê goto tugua niqu nonginongi;
mi tana bongi mau tau goto mango na sosoa.
3Migoe o Tabu Sosongo, mo totukae tana sasamu.
Migoe nogo aia igira na tinoni ni Israel ara tsonikaea.
4Igira na mumuamami ara vataraginia niqira vainoru i konimu;
ara norukakaigo igoe, migoe o maurisigira.
5Ara soago, migoe o didia tanigira na omea seko;
mara norugo igoe, mara tau paluvangamaqira lê.
6!Minau moa au tau nogo lia vaga sa tinoni, au vaga saikesa moa ti na meri lê,
migira sui na tinoni ara peaau lê mara tsiri sosongoliau!
7Igira sui ara morosiau mara gilugaqu;
mara lualapi vaniau mara lengulengu lovaqira.
8Mara tsarivaganana vaniau, “Igoe o vataragi i konina na Taovia.
?Megua aia ti e tau laumaurisigo?
?Me ti vaga na Taovia e galuvego manana,
megua aia ti e tau sangago?”22:8 Na goko tana buto iani igira na Tsiu ara tsarivania a Iesu kalina aia e tsautsau tana gai ulutaligu (Mat 27:43).
9Taovia, igoe nogoria o aragoau i tobana tinaqu tsau kalina au botsa vaolu,
mo reitutuguau kalina au tsutsu moa i konina tinaqu.
10Eo, tû tana dani au botsa vaolu, inau au vataragi saikesa moa i konimu igoe;
migoe saikesa moa niqu God pipi kalina.
11!Vaga ia, mo ko laka saikesa goto na vano ao taniaqu!
Na omea seko ara totu varangisiau nogo
me tagara goto ke kesa ke sangaau.
12Ara danga sosongo gaqu gala,
ara totu polipoliau vaga moa ti na alaala na buluka mane;
vaga saikesa moa ti na alaala na buluka mane momosa ni Basan.
13Ara ngunguru loki mara manganga vaga moa ti na laeone
ara viri tsiputsaka mara ngotsiau.
14E nanga lê sui na susuligaqu inau,
vaga moa ti na kô e nara lê tana kao.
Ara viri tapiu sui na suliqu tania na sasaiqira;
ma na kosuqu e rono lê vaga moa ti na kadele kalina e iru.
15Ma na lioqu e mamatsa lê vaga moa ti na papasa,
ma na lapiqu e bulukakai kolua na baragata na mangaqu.
Igoe o mololeau vania na papasana na mate.
16Eo, kesa na alaala na tinoni seko tsaikore ara tupoliau;
vaga moa ti na alaala popono na pai atsi ara mai sagavisai i koniqu;
mara lobatia na limaqu ma na tuaqu.
17Ara lalaba lê sui na suliqu.
Migira gaqu gala ara moro tatavata mai i koniqu mara vusuliau.
18Ara tsonikutsu tana daisi mateqira na poloqu
mara tuvarivotagira i laoqira segeni.
19!Migoe Taovia ko laka kiki na totu ao taniaqu!
!Ko mai tsaku mo ko isutuguqu!
20Ko maurisiau tania niqira isi;
mo ko lauligia na mauriqu tanigira na pai atsi girani.
21Ko laumaurisiau tania na mangaqira na laeone girani;
e maluku lê na koniqu tana reiana na kakatsaqira na buluka atsi girani.
22Sauba kau katevulagi vanigira niqu toga na omea sui igoe o naugira;
me sauba kau tsonikaego i laona niqira saikolu ma kau tsaria:
23“!Kamu soalokia na Taovia igamu sui nina tinoni!
!Migamu sui na kukuana a Jakob kamu tsonikaea!
!Migamu na toga ni Israel, kamu samasama vania!
24Aia e tau dona ke reilea se ke peâ na rota e gadovigira na tinoni ara tau tamanina sa omea;
me tau goto dona ke piloligi tanigira.
Aia e rongomigira kalina ara soâ ke sangagira.”
25I laona na saikolu popono inau sauba kau tsonikaego igoe mateqira na omea loki igoe o naugira;
mi mataqira sui igira ara mai samasama vanigo
sauba inau kau savoria na kodoputsa vaga au vekenogoa.
26Igira ara tau tamanina sa mutsa sauba nomoa kara mutsa masu;
migira ara lalavea na Taovia sauba kara soalokia.
!Kara mauri tana magemage na dani ma na dani!
27Igira na puku sui sauba kara padatugua na Taovia.
Me pipi tana nauna sui tana barangengo sauba kara pilovisumai i konina aia;
migira na mamatana sui na tinoni sauba kara samasama vania moa aia.
28Na Taovia aia segeni moa e taovia loki tsapakae,
me tagaovi kaputigira na puku na tinoni sui lakalaka.
29Migira sui pipi na tinoni vanga kaekae sauba kara tsuporu vania moa aia;
migira sui pipi tinoni ara dona mate sauba kara tao tsuporu i matana.
30Migira sui na vatavata kara botsamai i muri sauba kara aqovania ia.
Eo, sauba kara gini turupatuna tana rongona na Taovia vanigira sui kara botsamai i muri.
31Me sauba kara tsarivanigira igira ara tau vati botsa moa:
“Na Taovia aia nogo e maurisigira nina tinoni.”
23Kesa na mane pitusipi e tudumigira bâ nina sipisipi tana maomao na ko maroga. (23:1-2)
Na Taovia Aia Nogo Nida Reitutugusipi
1Na Taovia aia nogo niqu reitutugusipi;
me pipi sui na omea au kilia mau adia.
2Aia e tamivaniau kau tsaro ma kau mango i laona na uta i tana e marao dou rago na buruburu,
me tudumiau bâ tana maomao na ko maroga.
3Aia e vaolusia na susuligaqu.
Me tudumiau bâ tana sautu goto vaga aia e vekenogoa.
4Atsa moa ti inau kau liu i laona na rodo pulipuli,
me sauba e utu goto kau matagu,
rongona igoe nogo Taovia o totu koluau.
Ma gamu itoro ma nimu bao igoe o reitutuguginiau.
5Igoe o vangarau manogatia na mutsa vuruga laka vaniau,
i mataqira sui gaqu gala;
mo soalakaau mala tinoni loki,
mo dangalia niqu bilo me danga tsiriri.
6Au dona laka igoe sauba ko dou kalavata vaniau mo ko galuveau tana mauriqu popono;
mi laona na valemu segeni nogo igoe Taovia,
i tana kau totu saviliu na dani ma na dani.
24God Aia na Taovia Tsapakae Loki
1Na barangengo migira sui pipi na vangana i laona nina omea nogo na Taovia;
migira sui goto ara mauri i laona ara nina nogo aia.
2Aia e logoa na barangengo tana mao rodo,
me vaturia na tsutsuvatuna tana levugana na kema.
3?Laka asei nomoa e ulagana ke dato bâ tana nina vungavunga na Taovia?
?Masei e tugua ke sage bâ tana nina Vale Tabu?
4Igira moa e male dou niqira sasaga ma niqira papada,
mara tau samasama vanigira na god peropero,
mara tau goto dona kara naua na veke peropero lê.
5Igira nogo na Taovia sauba ke vangalaka vanigira me ke maurisigira;
God sauba ke adilabatia laka ara tinoni dou mara tau sasi.
6Igira nogoria na vatana na tinoni vaga gira, ara dona na lalaveana God,
ma na mailaba i matana nina God a Jakob.
7Sangavigira na matsapakapu,
sangavigira na banina na matsapa saliu,
me ke sagemai na taovia tsapakae loki.
8?Masei aia na taovia tsapakae loki vaga ia?
Aia nogo na Taovia e susuliga me putsikae sosongo,
aia nogo na Taovia e tangomana tana vailabu.
9Sangavigira na matsapakapu,
sangavigira na banina na matsapa saliu,
me ke sagemai na taovia tsapakae loki.
10?Masei aia na taovia tsapakae loki vaga ia?
!Na Taovia aia e tangomana tana vailabu
aia nogoria na taovia tsapakae loki!
25Nina Nonginongi Kesa Tinoni Rongona God Ke Matalia Me Ke Reitutugua
1Vanigo Taovia inau au saudatoa niqu nonginongi.
2Igoe nogo niqu God, minau au noru saikesaligo.
!Ko laka na tamiana kara paluvangamaqu lê;
mo ko laka na tamivaniaqira gaqu gala kara gini mage rongona igira ara tuliusiau inau!
3E utu ke paluvangamaqira igira ara norugo igoe,
migira moa ara tsaku sosongo na sove taniamu, e dou ti ko paluvangamaqira.
4Taovia ko sasaniau nimu sautu,
mo ko saulabatigira vaniau.
5Ko sasaniau ma kau gini dona na mauri muriana nimu sautu mana,
rongona igoe nogo niqu God, mo vagamaurisiau.
Minau au norugo sailagi.
6Taovia ko padatugua nimu doulaka ma nimu galuve vo oli,
aia na galuve o sauvulagia tû i sau nogo.
7Mo ko laka goto na padatuguaqira niqu sasi au naua kalina au tinoni vaolu moa.
!Tana nimu galuve vo oli ma nimu tobalaka ko padaau Taovia,
rongona igoe o dou sosongo!
8Rongona na Taovia aia e gotolaka me dou saviliu,
te e sasanigira na tinoni sasi na liu tana sautu dou.
9E mataligira bâ tana sautu goto igira ara palatsuna,
me sasanigira na muriana nina kili.
10Pipi sui nina sautu na Taovia ara pukuga tana manana ma na galuve,
vanigira ara manalia niqira vaitasogi ara naukolua aia,
mara muridougira nina ketsa.
11Taovia, ko padatugua nimu veke o naua, mo ko padalegira niqu sasi,
rongona ara danga sosongo nogo.
12Igira ara dona na kukuni taniana na Taovia,
sauba aia ke sasanigira na sautu kara muria.
13Me sauba kara tau goto kuti na tamaniana na omea levo,
migira na daleqira kara tangolidatoa niqira kao i muri.
14Na Taovia e kulaga dou sosongo kolugira igira ara kukuni tania,
me kakaisia nina vaitasogi aia e naua kolugira.
15Au lave sailaginia moa na sasanga i konina na Taovia,
maia e tukapusia na tuaqu tania niqira taviti ara molovaniau.
16Taovia ko pilomai i koniqu mo ko galuveau,
rongona inau au totu segeniqu mau maluku sosongo.
17Ko nusiligigira taniau gaqu boe ara ngoliau,
mo ko maurisiau tanigira sui na rota ara gadoviau.
18Ko reia niqu melu ma niqu rota,
mo ko padalegira sui niqu sasi.
19Ko morosigira ara danga sosongo gaqu gala,
migira ara reisavi sosongoliau.
20Ko isutuguqu mo ko maurisiau.
Mo ko laka na tamivaniaqira kara tuliusiau lê,
rongona inau au mai kau totu ravi i konimu.
21Niqu sasaga dou ma niqu sasaga goto igira nogo kara tangoliau,
rongona inau au vataraginia niqu vainoru i konimu moa igoe Taovia.
22!God, ko maurisigira nimu toga ni Israel
tania pipi sui niqira rota!
26Nina Nonginongi Kesa na Tinoni Dou
1Taovia ko saulabatia laka inau au tau sasi,
rongona au naua moa na omea e goto i matamu,
mau noru kalavatavigo igoe.
2Ko vilekea na laoqu mo ko tovoleau Taovia;
ko pedea na laona na sasagaqu ma na papadaqu.
3Nimu galuve vo oli e mataliau,
me tudumiau sailagi tana sautuna na manana.
4Au tau dona na dulikoluaqira na tinoni e tabaru niqira sasaga.
Mau tau goto dona kau naua sa omea kolugira na tinoni vanga malapalu.
5Au reisavi sosongolia na dulikoluaqira na tinoni seko,
mau sove tanigira na tinoni vanga tsutsukibo.
6Taovia, inau au vulia na limaqu kau gini sauvulagia laka inau au tinoni dou mau tau sasi,
mau sanga na samasama poliana nimu belatabu.
7Au lingena na linge tabu na soadouamu
mau katevulagia pipi sui nimu aqo loki igoe o naugira.
8Au reingao sosongolia na vale i tana o totu igoe Taovia,
na nauna i tana e totu na mararamu.
9Ko laka na matesiaqu saisai koluaqira na tinoni sasi;
ko gaeau moa tania na kede e totupitugira na tinoni vanga vailabumate,
10igira ara tau kuti na nauana na omea e seko,
mara lavu pipi kalina moa na adiqolona na tangopeke.
11!Minau moa au naua pipi kalina na omea e goto;
me vaga ia, me dou ti igoe Taovia ko galuveau mo ko maurisiau!
12Na tuaqu ara tukakai nogo tana sautu atsa;
mi laona niqira saikolu igira nimu tinoni inau au tsonikaego igoe Taovia.
27Kesa na Nonginongi na Tsonikae
1Na Taovia aia nogo niqu marara ma na pukuna niqu sasanga.
?Masei goto sauba kau matagunia?
Na Taovia nogo aia e reitutuguau tanigira pipi sui na omea seko.
?Masei kau matagunigotoa?
2Kalina igira na tinoni seko ara mai saisai gaqu mara tovoa laka kara matesiau,
migira ara tubulagi lê mara viri puka sui.
3E atsa moa ti vaga igira na alaala popono na mane vaumate kara tupoliau,
me utu lelê goto kau matagu.
Me atsa moa ti igira gaqu gala kara saisai gaqu,
minau sauba kau norukakaia moa God.
4E kesa moa na omea au nongia i konina na Taovia;
e kesa lelê moa na omea au kilia:
aia nogoria laka kau totu saviliu moa tana na valena na Taovia tana mauriqu popono.
Mi tana kau reia na douna na Taovia,
ma kau nongia ke sauvulagia vaniau na sautu i tana kau liu.
5I laona na tagu na rota aia sauba ke ravisiau.
Aia sauba ke moloau kau totu raviravi dou i laona nina Vale Tabu,
me ke molokaeau ma kau totu dou i kelana na vatu loki.
6Me vaga ia, minau sauba kau tangomana na tuliusiaqira gaqu gala ara totu poliau.
Mi tana gu loki ma na magemage, inau sauba kau savori-kodoputsa vania i laona nina Vale Tabu;
me sauba kau lilinge ma kau tsonikaea na Taovia.
7!Ko rongomiau Taovia kalina inau kau gudato vanigo!
!Ko galuveau mo ko rongomia niqu nonginongi!
8Kalina igoe o goko mo tsaria,“Ko mai mo ko samasama vaniau,”
minau au gokovisu vanigo mau tsaria,“Eo Taovia, sauba kau bâ.
Au kili sosongolia kau reilakana na matamu.
9!Ko laka goto na totu popoi taniaqu!”
Ko laka na kore vaniaqu;
ma na tsialigiaqu lê inau nimu maneaqo.
Igoe nogo o sangaau tû i sau nogo;
vaga ia, mo ko laka goto na mololeaqu ma na tsonikidaqu,
igoe nogo niqu God ma niqu vagamauri.
10Atsa moa ti kaira na tamaqu ma na tinaqu kara ka tsonikidaqu,
ma na Taovia aia sauba nomoa ke aragoau.
11Ko sasaniau Taovia, ma kau donaginia na omea vaga igoe o ngaoa kau naua,
mo ko idagana vaniau bâ tana sautu atsa dou,
rongona ara danga sosongo gaqu gala.
12Ko laka na mololeaqu i limaqira gaqu gala,
igira ara keliseko vaniau mara area na sekoliaqu.
13Inau au tutunina laka sauba kau reilakana
na douna na Taovia kalina au mamauri moa i lao eni.
14Ka norukakaia moa na Taovia.
Ka tutunina, ma ka malagai.
Eo, ka noru saikesalia moa na Taovia.
28Nina Nonginongi Kesa Tinoni Rongona God Ke Sangâ
1Taovia igoe nogo niqu reitutugu, minau au ngangaidato vanigo.
!Ko rongomia niqu nonginongi!
Ti vaga igoe ko tau goto tugumaia niqu nonginongi,
minau sauba kau lia vaga moa igira ara ba tsuna tana barangengo na mate.
2Ko rongomiau kalina kau ngangaidato vanigo rongona ko sangaau,
mi kalina goto ti kau abedato bâ na limaqu kalea nimu Vale Tabu.
3Ko laka na kede sekoliaqu kolugira na tinoni vanga tsutsukibo,
me kolugira goto igira ara nausasi,
igira ara dona moa na goko puipui vanigira na kulaqira,
mi laona na tobaqira e totu moa na tobaseko.
4Ko kedegira matena na omea vaga ara naua,
me matena goto niqira sasi ara tsukia.
!Ko kedegira tana rongona pipi sui niqira sasaga tau dou ara naua!
Eo, ko tusuvanigira na omea e tugua kara gini vatsa.
5Ara tau lelê gini boe tana rongona na aqo God e naugira nogo,
se tana rongona na omea aia e aqosigira.
Me vaga ia, maia sauba ke kedegira
me ke matesiligigira saikesa.
6Tsonikaea na Taovia,
rongona aia e rongomiau kalina au ngangaidato vania laka ke sangaau.
7Na Taovia e reitutuguau me isutuguqu sailagi;
minau au noru saikesalia.
Maia e sangaau me naua mau gini totu tana magemage;
minau au tsonikaea tana linge na magemage dou.
8Na Taovia e reitutugugira nina tinoni;
maia e isutuguna me maurisia nina taovia tsapakae vivili.
9Ko maurisigira nimu tinoni Taovia,
mo ko vangalaka vanigira igira igoe o tamanigira.
Ko lia gaqira reitutugu dou,
mo ko aragodougira na dani ma na dani.
29Na Gokona na Taovia e Tangi i Laona na Legai Loki
1Tsonikaea na Taovia igamu sui na dalena God,
tsonikaea gana loki tsapakae ma na susuligana.
2Tsonikaea na asana tabu na Taovia;
tao tsuporu vania na Taovia kalina aia ke labamai.
3Na gokona na Taovia e kuvia na maorodo;
na gokona God Susuliga e poda loki vaga na quluqulu,
ma na ileilena na gokona e quluvia na kema popono.
4Na gokona na Taovia e maququ putsikae tana susuligana loki.
5Na gokona na Taovia e kidigira na gai na sida,29:5 “na gai na sida” E kesa na vatana na gaikakai e dato tana vungavunga i Lebanon, mara gini aqo sosongo tana logovale rongona e tau dona na tola tsaku.
tsau tana gai na sida ni Lebanon.
6Maia e naua migira na vungavunga ni Lebanon ara tsipukae vaga saikesa moa ti na dalena buluka,
ma na Vungavunga Hermon e tsipuleka vaga moa ti na buluka mane vaolu.
7Na gokona na Taovia e naua me kirapi na angaanga.
8Ma na gokona e naua me gini kakanu popono na legai mangu;
na Taovia e kanulia na legai mangu ni Kades.
9Na gokona na Taovia e birugira na gai loki,
me rusia na rauqira mara viri dudu sui.
Migira sui ara totusai i laona na Vale Tabu ara gudato mara tsaria,
“!Tsonikaea God!”
10Na Taovia e tagaovi kaputia na maorodo;
maia e taovia tsapakae na dani ma na dani.
11Na Taovia e saua na susuligana vanigira nina tinoni,
me saugotoa nina rago vanigira.
30Kesa na Nonginongi na Soadouana God
1Au tsonikaego Taovia rongona igoe nogo o maurisiau,
mo tau tamivanigira gaqu gala kara tseqo poliau.
2Taovia niqu God, au ngangaidato vanigo ko sangaau,
migoe o maurisiau,
3mo tangolivisuau tania na qilu.
E varangi nogo kau puka tana qouna na mate,
migoe o sogogaqu mau gini mauri.
4Lingena na tsonikaeana na Taovia,
igamu sui na tinoni amu galuvea.
Padatugugira na omea dou sui God e naunogoa vanigamu,
ma kamu soadoua.
5Nina kore e vô ke totu oka,
ma nina galuve moa e dona ke totu saviliu.
Ke rutsu na kô i matada tana bongi,
mi tana matsaraka ma na mage ke visutugua i tobada.
6Tana idana inau au pada laka au tukakai nogo te au tsarisegeniqu,
“Inau sauba e utu goto kara tuliusiau.”
7Migoe nogo Taovia o dou vaniau.
Mo didikapusiau dou vaga moa ti na vungavunga kakai.
Mi muri mo tû mo taopoi taniau,
minau au gini matagu loki.
8Inau au soago Taovia;
mau ngasugo kakai rongona ko sangaau mau tsaria:
9“?Laka nagua sauba igoe ko tamaniginia tana rongona na mateaqu?
?Laka nagua ke pelugo tana rongona na vanoaqu tana qilu?
?Laka igira ara mate nogo tangomana kara tsonikaego igoe?
?Me laka e tugua igira kara gini goko tana rongona nimu doulaka saviliu igoe?
10!Taovia ko rongomiau, mo ko galuveau!
!Taovia ko mai mo ko sangaau!”
11Igoe o olinogoa niqu tangitangi me gini lia na linge ma na gavai;
migoe o adiligi taniau niqu melu
mo pologiniau na magemage.
12Vaga ia, me sauba e utu saikesa vaniau kau totu mui lê;
sauba nomoa kau linge ma kau tsonikaego igoe.
Taovia igoe nogo niqu God,
me sauba kau soadougo na dani ma na dani.
31Na Nonginongi na Norukakaiana God
1Taovia inau au mai kau toturavi i konimu.
Ko laka na tamivaniaqira gaqu gala kara liusiau lê.
!Igoe nogo na God na gotolaka;
mau nongigo ko maurisiau!
2!Ko rongomiau mo ko maurisiau tsaku!
Ko lia vaga niqu mani toturavi,
niqu baravatu kakai gana kau gini mauri tanigira gaqu gala.
3Eo, igoe nogo o reitutuguau mo isutuguqu.
Ko mataliau mo ko tudumiau vaga igoe o vekenogoa vaniau.
4Ko sautuligiau tania na taviti ara molomanogati vaniau nogo;
ko ravisiau me ke tau gadoviau sa omea seko.
5Tana limamu igoe au livua na tidaoqu.31:5 Na tuturigana na buto 5 a Iesu e tsaria idavia na mateana (Luka 23:46).
Sauba nomoa ko maurisiau Taovia;
rongona igoe nogo na God o mana saviliu.
6Igoe o reisavigira igira ara samasama vanigira na god peropero.
Minau au norugo moa igoe.
7Sauba ke laoqu sosongo ma kau gini magemage loki
tana rongona nimu galuve vo oli.
Igoe nogo o morosigira niqu rota,
mo donaginigira na omea seko ara laba vaniau.
8Igoe o tau goto tamivanigira gaqu gala kara tangoliau;
mo tamivaniau kau liu bamai iava moa tana kau ngaoa na liu.
9Ko galuveau Taovia,
rongona inau au totu i laona na rota loki.
Na mataqu ara gini qisi nogo na ngangai loki;
minau au seko pitsu saikesa nogo kiki.
10Au kolae sosongo nogo tana rongona e ngoliau na melu loki;
ma niqu ngangai aia nogo e kukurisia na mauriqu.
Au gini maluku tana rongona pipi na omea seko ara gadoviau,
me tsau tana suliqu goto ara viri maluku lê sui.
11Igira sui lakalaka gaqu gala ara reisaviau,
migira sui gaqu verakolu ara gilugaqu;
migira sui ara donadouginiau ara mataguniau moa;
mi kalina ara tsodoau i sautu, mara tsogoligi taniau.
12Igira sui lakalaka ara padaleau popono, vaga saikesa moa ti au mate oka nogo.
Minau au vaga saikesa nogo ti na omea e seko lê ara tsoniliginogoa.
13Au rongomigira danga gaqu gala ara viri gagasa polipoliau,
mau gini matagu loki sosongo.
Ara vorogokona sai laka kara labumatesiau.
14Minau au norugo moa igoe niqu Taovia;
mau tsaria, “Igoe nogo niqu God.”
15Igoe nogo o reitutuguau sailagi;
ko maurisiau tanigira gaqu gala,
me tanigira goto igira ara rotasi sosongoliau.
16Taovia, tana nimu galuve ko moromai i koniqu inau nimu tinoni;
mo ko maurisiau tana nimu galuve vo oli.
17Inau au soago Taovia;
ko laka na tamivaniaqu ke paluvangamaqu lê.
Igira moa na tinoni vanga tsutsukibo igira nogo ke paluvangamaqira,
ma kara tsuna dodo i lao tana barangengo na mate.
18Ko muisigira igira na vanga peropero
igira sui ara dona na molokae segeniqira ma na goko peapea,
mara tsirigira na tinoni e gotodou niqira sasaga.
19!Ara dou sosongo rago nomoa na omea dou
igoe o mololakâ vanigira ara kukuni tanigo!
Na tinoni sui lakalaka ara donaginia laka igoe o dou sosongo,
mo reitutugugira dou igira ara norugo.
20Igoe o molopoigira dou tana nauna raviravi dou i konimu igoe,
tania niqira vorogoko sai na tinoni.
Mo mologira kesa tana nauna raravi dou,
popoi tania niqira gokotsiri gaqira gala.
21!Tsonikaea na Taovia!
!Aia e sauvulagi vaniau nina galuve loki
kalina igira gaqu gala ara tupoliau mara ngaoa na labumatesiaqu!
22Inau au matagu loki mau tsaria i tobaqu,
“Igoe o tsialigiau nogo tania na matamu.”
Me tagara. Igoe o rongomia moa niqu ngangaidato vanigo,
kalina inau au nongigo ko sangaau.
23Galuvea na Taovia igamu sui nina tinoni.
Na Taovia e reitutugugira igira sui ara totukakai i konina,
me kedegira na tinoni vanga kaekae
vaga nogo e tugua na matena niqira sasaga ara naua.
24Migamu kamu tukakai ma kamu malagai,
igamu sui amu norua na Taovia.
32God e Dona Ke Padalea Nina Sasi na Tinoni e Pilo Tobana
1Kara mage igira God e padale vanigira nogo niqira sasaga seko,
migira e tanusi nogo niqira sasi.
2Ke mage na tinoni aia na Taovia e tau keli vania laka e naua sa omea e seko,
me male tanigira pipi sui na vatana na pero.
3Kalina inau au tau vati koevulagia moa niqu sasi,
ma na koniqu popono e gini maluku sosongo na ngangai tana dani popono.
4Na dani ma na bongi o kedeau moa Taovia;
ma na susuligaqu popono e vanoligi sui,
vaga moa na kolobu e mamatsa tsaku lê tana paparana na aso.
5Te au tû mau koevulagia i matamu niqu sasi;
mau tau goto tiapoigira niqu sasaga seko.
Au tsaria moa vania na Taovia, “Taovia au koevulagigira niqu sasi i matamu.”
Migoe o nusiligigira taniau pipi sui niqu sasi.
6Vaga ia, migira sui na tinoni ara totukakai i konimu igoe,
e dou kara dona na nongiamu tana tagu na rota;
mi kalina ti ke tavongani tave na obo loki na rota,
me sauba ke utu vania ke tsauligira.
7Taovia igoe nogo niqu mani taopoi.
Me sauba igoe ko maurisiau tania na omea seko sui.
Au lilinge dato vanigo rongona igoe nogo o maurisiau,
mo reitutuguau dou.
8Ma na Taovia e tsarivaniau, “Inau sauba kau sauvulagi vanigo na sautu i tana igoe ko liu bâ;
minau nogo sauba kau sasanigo ma kau mataligo.
9Migoe ko laka goto na bubulega vaga gira na ose se na asi, igira ara tau sasaga,
me kilia moa kara tagaoviginigira kesa na itai ara soria i manqaqira,
ti kara gini vano tana ke pedevanigira na tamanina kara bâ.”
10Igira na tinoni vanga tsutsukibo sauba nomoa kara tsodo rota,
migira moa ara norua na Taovia
ara totu raviravi dou tana nina galuve vo oli.
11Kamu magemage ma kamu linge igamu e goto nimui sasaga,
tana rongona na omea dou sui na Taovia e naugira.
!Eo, kamu gudato tana mage igamu sui amu rongomangana aia!
33Kesa na Linge na Tsonikae
1Igamu sui amu totugoto nogo i matana na Taovia kamu gudato tana magemage,
rongona na omea dou sui aia e naunogoa vanigamu.
Kamu soalokia igamu sui amu ronqomanqana dou.
2Taia nimui tuqulu ma kamu soadoua na Taovia.
Linge vania tana itai tatangi.
3Linge na linge vaolu vania aia.
!Taidoua nimui itai tatangi, ma kamu gudato tana magemage!
4Nina goko na Taovia ara mana sui;
me tugua ka norugira dou pipi nina aqo sui.
5Na Taovia e reingaoa na omea e dou me gotolaka;
ma nina galuve vo oli e dangaliginia na barangengo.
6E moloketsa moa na Taovia me vusaginia na baragata,
me goko moa mara laba na aso ma na vula ma na veitugu.
7Maia e sarosaigira na tasi sui kesa moa tana nauna;
me vongo kapusia na kema ke totu dodo i laona nina bara.
8!Na barangengo popono ke kukuni tania na Taovia!
!Migira sui pipi na mamatana tinoni tana barangengo kara padalokia!
9Mi kalina aia e goko me botsalaba na barangengo;
e moloketsa moa aia mara botsalaba na omea sui.
10Na Taovia e tabarusia niqira pede na puku tavosi sui.
Aia nogo e tongo kapusigira me gini utu vanigira kara tangomana
na nauana na omea ara vangaraua na nauana.
11Migira moa nina pede na Taovia ara totukakai na dani ma na dani;
ma na omea aia e padagira ara totu saviliu babâ.
12Ke mage aia na puku na tinoni i tana ara tamivania God ke Taovia vanigira.
!Eo kara mage igira sui na tinoni God e viligira nogo
kara lia nina tinoni segeni!
13Na Taovia e tû i gotu me morotsuna mai
me reigira pipi na mamatana tinoni sui lakalaka.
14E tû tana sasana na totukae me morotsuna i koniqira
igira sui ara mauri i barangengo.
15Aia e botsangia pipi sui niqira papada
me donaginigira pipi na omea sui ara naua.
16Igira na taovia tsapakae ni lao eni ara tau dona kara gini tangomana tana susuligaqira moa niqira alaala na mane vaumate;
migira na mane vaumate ara tau dona ke gini managaqira tana susuligaqira segeni moa igira.
17Igira na ose na vailabu ara tau lelê tamani segeni kesa na susuliga agana na gini tangomana tana vailabu;
atsa moa ti ara susuliga sosongo me tau moa tugugira kara laumaurisigira na tinoni.
18Na Taovia e mataligira igira ara kukuni tania,
mara norua nina galuve vo oli.
19E lauvisugira tania na mate;
me maurisigira tana tagu na uvirau.
20Igita a norukakaia na Taovia;
aia nogo e reitutugugita me sangagita.
21Igita a gini magemage tana rongona nogo aia;
ma norukakaia na asana tabu.
22Taovia, nimu galuve vo oli ke totu sailagi i konimami
rongona igami ami norugo moa igoe.
34Na Tsonikaeana God Tana Rongona Aia e Dou Sosongo
1Inau sauba kau soadou sailaginia na Taovia;
ma na mangaqu sauba ke tau goto kuti na tsonikaeana.
2Eo, sauba kau tsonikaea rongona na omea dou sui aia e naugira.
!Kara rorongo ma kara gini magemage igira sui ara bingi sekoligira!
3!Kamu sangapata koluau na tsonikaeana na Taovia;
igita sui kolu ka tsonikaea na asana!
4Inau au soâ na Taovia maia e rongomiau,
me adiligi taniau pipi sui niqu matagu.
5Igamu sui kamu moro bâ i konina na Taovia, ma kamu gini mage,
me sauba e utu goto kamu gini vangamâ.
6Igira e tagara kesa ke sangagira ara soâ na Taovia, maia e rongomigira;
me maurisigira tania pipi sui niqira rota.
7Nina angelo na Taovia e totu kolugira igira ara kukuni tania na Taovia,
me laumaurisigira.
8Kamu tovoa ma kamu reisegenimui laka e dou manana na Taovia.
Ara mage igira ara totu raviravi i konina.
9Kukuni tania na Taovia igamu sui lakalaka nina tinoni,
rongona igira sui ara kukuni tania aia ara tamanina na omea sui ara kilia.
10Atsa moa na laeone, mara dona goto kara noga ma kara vitoa lê;
migira moa ara rongomangana na Taovia, e utu goto kara noga sa omea dou.
11Kamu mai i koniqu igamu na tinoni vaolu, ma kamu rongomi vatavia niqu goko,
minau kau sasaniginigamu na pada mamavasiana na Taovia.
12?Egua, laka amu ngaoa ke dou na maurimui?
?Laka amu kilia na mauri katsi ma na magemage sailagi?
13Ti vaga ia, ma nimui aqo kamu mololea na turupatu seko
ma na goko peropero.
14Piloligi tania na nauseko ma kamu naua moa na omea e dou;
mi tana tobamui popono kamu ngongoragi matena moa na totu tana goto ma na rago.
15Na Taovia e mataligira igira e goto niqira sasaga,
me rongomigira kalina ara ngangaidato vania;
16me tukapusigira igira ara naua na omea e seko,
rongona kalina ti kara mate, ma kara padalegira tsaku.
17Igira e goto dou niqira sasaga ara soâ na Taovia, maia e rongomigira,
me laumaurisigira tania pipi sui na rota e gadovigira.
18Na Taovia e totu varangisigira igira e ponopala na tobaqira;
me maurisigira igira ara padâ laka e utu vanigira nogo kara lia sa omea.
19Na tinoni dou e gadovia danga na rota,
ma na Taovia e maurisia tanigira sui;
20na Taovia e reitutugudou saikesalia,
me tagara goto ke tau takutsi ke kesa na sulina.
21Igira na vanga tsutsukibo sauba kara gini mate na tsutsukibo;
Migira ara reisavigira lê na tinoni e goto dou niqira sasaga sauba God ke kedegira.
22Ma na Taovia aia sauba ke maurisigira nina tinoni;
me utu ke kedegira igira ara ba totu raviravi i konina.
35Nina Nonginongi Kesa Tinoni Rongona God Ke Sangâ
1!Taovia, ko tukapusigira igira ara tukapusiau,
mo ko vailabu kolugira igira ara vailabu koluau inau!
2Ko adia gamu tako ma gamu sagore
mo ko mai isutuguqu.
3Ko saukaea nimu bao ma nimu kilekile,
mo ko tukapusigira igira ara takuviau.
Mo ko veke vaniau laka sauba nomoa ko maurisiau inau.
4!Ko utusigira igira ara tovoa laka kara labumatesiau inau;
ko naua me ke paluvangamaqira lê!
!Migira ara vorogokona na labuaqu inau,
kara sugavisu lê me ke ponopala na tobaqira!
5!Kara vaga moa na rau matemate lê e lovosaginia na guguri
kalina ke tû nina angelo na Taovia me ke tsialigigira!
6!Ma na sautu tana kara liu ke rodo me ke madali,
kalina nina angelo na Taovia ke takuvigira!
7Ara tau lelê tamanina sa niqira rongona mara tû mara tavongani molovaniau gaqu taviti,
mara tsaia na qilu e qou gana kau puka i laona.
8Ma na mate sauba ke tavongani gadovigira kalina igira ara tau padâ;
sauba kara sogo segeni i laona niqira taviti ara molovaniau,
ma kara puka tana qou loki ara tsaia vaniau ma kara mate i laona.
9Mi tana ti inau kau gini mage tana rongona na omea e naua na Taovia,
me sauba kau gini magemage rongona aia e maurisiau.
10Mi tana tobaqu popono sauba kau tsarivania na Taovia,
“?Taovia asei nomoa ke vaga igoe?
Igoe o maurisigira ara maluku tania na limaqira igira ara susuliga liusigira;
migira ara tau tamanina sa omea tania na limaqira igira ara rotasigira.”
11Igira na tinoni seko ara tû mara tavongani keli vaniau lê
tana rongona na tsutsukibo inau au tau donaginia.
12Ara tuguvisu vaniau na seko tuguna na omea dou au naua,
me gini ponopala saikesa na tobaqu.
13Minau au tau nauvaganana vanigira ia. Tagara.
Mi kalina igira ara lobogu, minau au roku,
mau tsoni vitoaqu segeni.
Au ulutsuna na lovaqu mau nonginongi kakai vanigira,
14vaga moa kalina au nonginongi vania kesa na kulaqu se kesa na tasiqu.
Au liubamai kiki moa tana melu
vaga moa kalina kesa e roku rongona e mate na tinana.
15Kalina inau au totu moa i laona na rota, migira sui ara gini mage,
mara saikolumai mara gilugaqu.
Migira goto na tinoni inau au tau donaginigira ara totu matengana na lumuaqu.
16Igira ara gilugaqu babâ moa,
mara vusuliau tana kore.
17?Me laka ke oka koegua sagata ko momoro lê moa igoe Taovia?
!Ko mai mo ko laumaurisiau tania na limaqira igira ara sekoliau,
ko maurisiau tanigira na laeone girani!
18Mi tana ti sauba inau kau soadougo i laona niqira saikolu nimu tinoni;
ma kau tsonikaego i mataqira igira sui.
19Ko laka na tamivaniaqira gaqu gala, igira na vanga pero,
kara mage rongona ara tuliusiau inau.
Ko laka na tamivaniaqira igira ara reisaviau lê tagara sa rongona
kara kiataginiau tana niqu rota.
20Ara tau goto dona kara tsonia sa goko laka;
ara dona moa na botsangiana pipi vatana na goko pero kalegira na tinoni ara tobarago.
21Ara tû mara gudato mara keli vaniau, mara tsarivaganana,
“!Lelê, ami reia na omea igoe o naua!”
22Eo, migoe nogo Taovia o reinogoa na omea iani.
!Vaga ia, mo ko laka na totu mui Taovia;
ko laka goto na totu ao taniaqu vaga sagata ia!
23Ko aligiri Taovia mo ko isutuguqu;
ko tsaku niqu God mo ko sogogaqu.
24Taovia igoe o gotolaka saikesa,
me vaga ia mo ko sauvulagia laka inau na tinoni dou mau tau sasi;
mo ko laka na tamivaniaqira gaqu gala kara gini mage matena ara tuliusiau.
25Ko laka goto na tamivaniaqira kara goko ma kara tsarisegeniqira vaga iani,
“!Dou! !E laba vaninogoa na omea igita a kilia!
!Reia! !Igita a matesinogoa!”
26Migoe Taovia ko naua, ma kara luvu lê igira ara gini mage tana rongona na rota e gadoviau inau,
me ke ponopala lê na tobaqira,
migira ara koesegeniqira mara tsaria laka ara dou bâ liusiau inau,
igoe ko naua, me ke tsavugira popono na vangamâ me ke paluvangamaqira.
27Migira moa ara ngaoa laka ke managaqu inau,
kara tû ma kara gudato tana magemage ma kara tsari sailaginia,
“!E loki tsapakae manana na Taovia!
Aia e gini mage na reiana kalina e managana nina tinoni aqo.”
28Mi tana nogo ti sauba inau kau katevulagia laka igoe Taovia o gotolaka,
ma kau tsonikaego sailagi na dani popono.
36E Tabaru Nina Sasaga na Tinoni
1Na sasi e totu pukuga me aqoaqo i laona na tobana na tinoni vanga tsutsukibo;
maia e reisavia God me tau dona na kukuni taniana.
2Mi tana rongona nogo aia e padaloki segenina vaga ia,
te e gini padâ laka God tagara ke tau tsodovulagia nina sasi me ke kedeginia.
3Nina goko ara seko sui, me dangatovu na pero i laona;
e tau lelê naua sa omea sasaga se sa omea dou.
4Mi kalina aia e tsaro i nigena me totu matengana moa na pada manogatiana na omea seko sauba aia ke naua;
me tau lelê goto naua sa omea ke dou,
me tau goto dona na sove taniana pipi na omea e seko.
God Aia e Doulaka Saviliu
5Taovia nimu galuve vo oli e dato e suâ na baragata;
ma nimu sasaga mana e vosadato tana masaoka.
6Nimu gotolaka e dato ao vaga ti na vungavunga;
ma nimu pedegoto e vaga moa na maona na mao rodo i tasi.
Na tinoni me pipi na omea mamauri sui ara totu dou i limamu igoe.
7!Igoe God, e loki tsapakae nomoa nimu galuve vo oli!
Migami sui nimu tinoni ami dona kami ba totu raviravi i vavana na rapomu igoe.
8Mami gania na mutsa dangadanga vaga igoe o vangaraua vanigami;
mo tamia vanigami kami inu tana ko loki e talumai tana nimu doulaka segeni igoe.
9Igoe nogo na uluna na mauri sui.
Mi tana rongona nimu marara igoe ti igami ami reiginia na marara.
10Ko laka goto kuti na galuveaqira babâ igira ara donaginigo
mo ko naudou vanigira igira ara totugoto i matamu igoe.
11Mo ko laka goto na tamivaniaqira igira na tinoni vanga kaekae kara tsogori pukaliau,
se igira na tinoni vanga tsutsukibo kara tsialigiau lê.
12Ko reia iava tana ara puka bâ igira na tinoni seko.
Mi tana nogo ara tsatsaro, me utu goto kara tangomana na tukae tugua.
37Na Omea Ara Totupitugira na Tinoni Seko ma na Tinoni Dou
1Laka na boeginiana niqira sasaga tabaru igira na tinoni vanga tsutsukibo;
laka goto na masugu vaniaqira igira ara naua na omea e sasi.
2Igira sauba kara tavongani nangaligi lê vaga na buruburu makede e nanga lê;
sauba kara mate lê vaga moa na rauna na omea tsukatsuka e rara lê.
3Migamu kamu norua moa na Taovia ma kamu naua na omea e dou;
me sauba kamu mauri oka tana kao mi tana kamu toturavi dou,
me ke tagara sa omea seko tangomana ke sekoligamu.
4Lalavea nimui magemage i laona moa na Taovia,
maia sauba ke tusuvanigamu na omea sui amu kilia.
5Sausegenimui vania na Taovia;
norukakaia moa aia, maia sauba ke sangagamu.
6Sauba ke naua me ke maka saikesa nimui sasaga gotolaka,
vaga nogo na makana na aso tana niaso vota.
7Kamu totu dodo i matana na Taovia, ma kamu pipitu tsau kalina aia ke sangagamu;
laka na gini boe tana rongoqira igira ara tamani omea danga,
se igira ara tangomana na nauana pipi kalina na omea seko ara botsangi segenia i tobaqira.
8Laka goto na kore ma na momosatoba;
na omea vaga gira e tsukivanigita moa na puka tana sasi.
9Migira moa ara norukakaia na Taovia sauba kara tamanina na kao,
migira na tinoni vanga tsutsukibo sauba kara tsialigigira lê.
10E utu ke oka ma kara nanga lê igira na tinoni vanga tsutsukibo;
migamu sauba kamu lalavegira me utu goto kamu tsodovulagigira.
11Migira moa na tinoni ara totu palatsuna sauba kara tamanina na rago.
ma kara totu magemage tana kao lakataga ma na rago.
12Na tinoni vanga tsutsukibo e vorogokona na sekoliana na tinoni dou,
me vusulia tana kore.
13Ma na Taovia e kiataginigira moa igira na tinoni vanga tsutsukibo,
matena aia e dona manoga nogo laka na tinoni vaga ia sauba ke tau oka ma kara mate.
14Igira na tinoni vanga tsutsukibo ara langanogoa niqira isi mara naria niqira parige,
na mani labuaqira igira ara tau tamanina sa omea, migira ara kilia na sasanga,
ma na labutsapiaqira igira e goto niqira sasaga.
15Me sauba ke pilovisu niqira isi segeni me ke matesigira,
ma niqira parige ke tabokuboku lê.
16Na omea tetelo lê e tamanina kesa na tinoni dou,
e dou bâ liusia niqira tamani levo na tinoni vanga tsutsukibo.
17Rongona na Taovia sauba ke adiligia na susuligaqira igira na tinoni vanga tsutsukibo,
me ke reitutugudougira na tinoni dou.
18Eo, na Taovia e reitutugudougira igira ara rongomangana,
ma niqira kao sauba kara tamanina sailagi na dani ma na dani.
19Me sauba e utu goto kara dona na rota kalina ke laba na tagu seko;
me sauba kara tamanina na mutsa ke tugugira tana tagu na uvirau.
20Migira na tinoni vanga tsutsukibo sauba kara mate;
migira ara gala vania na Taovia sauba kara tavongani dudu lê vaga moa ti na tsitsi atsi.
Eo, sauba kara nangaligi lê vaga moa ti na pungu na lake.
21Na tinoni vanga tsutsukibo e kaoni omea me vô na tuguvisuana;
maia moa na tinoni dou e dona na gini galuve tinoni nina omea.
22Igira moa aia na Taovia e soadougira sauba kara tamanina na kao,
migira aia e tobaseko vanigira sauba ke tsialigigira lê.
23Na Taovia e tudumia na tinoni tana sautu tana ke liu
me reitutugugira igira ara dou i matana.
24Me ti vaga kara puka, me sauba e utu vanigira kara tsaro saikesa,
rongona na Taovia sauba ke tatatuugira ma kara tu tugua.
25Minau au tuqatuqa nogo kalina eni, mau mauri oka sosongo nogo,
mau tau moa vati reia laka na Taovia ke dona na tsonileana ke kesa na tinoni e dou nina sasaga,
se igira na dalena kara dona na nongi mutsa bamai. E utu.
26Pipi kalina moa aia e dona na gini vangalaka nina omea,
me tamidou vanigira kara kaoni qolo i konina,
me gini dou sosongo tobana tana rongoqira na dalena.
27Kamu piloligi tania na omea seko ma kamu naua moa na omea e dou;
mi tana ti sauba igira na kukuamui kara mauri dou sailagi tana rago;
28rongona na Taovia e reingao sosongolia na omea e goto,
me utu sosongo vania ke mololegira nina tinoni ara rongomangana dou.
Aia e reitutugugira saviliu na dani ma na dani,
ma na kukuaqira igira na tinoni vanga tsutsukibo sauba aia ke tsialigigira saikesa.
29Igira na tinoni e gotolaka niqira sasaga sauba kara tamanina na kao,
ma kara mauri kalavata i laona na dani ma na dani.
30Nina tsaqina goko kesa tinoni dou ara sasaga,
mara dona kara mana saviliu.
31Maia e puku kalavatavia nina ketsa God i laona na tobana
me utu goto ke liuligi tania.
32Na tinoni vanga tsutsukibo e dona na tuviana na tinoni dou
me ngaoa ke labumatesia;
33ma na Taovia e utu ke mololea na tinoni dou vania na susuligana gana gala,
se ke tamia kara pedematea kalina ara raqâ tana pede.
34Norukakaia na Taovia ma kamu muridougira nina ketsa sui;
maia sauba ke padalokigamu me ke tusuvanigamu na kao,
migamu sauba kamu reia kalina aia ke tû me ke tsialigigira igira na tinoni vanga tsutsukibo.
35Inau au donagininogoa kesa na mane vanga tsutsukibo e dona sosongo na sekoli tinoni;
maia e dato liusigira bâ na tinoni sui vaga saikesa nogo ti kesa na gai na sida i Lebanon.37:35 “na gai na sida” Reia tana 29:5.
36Mi muri tau oka, minau au liu i tana, maia e tau nogo totu tana;
au lalavea tana, mau tau saikesa reilakana.
37Reia kesa na tinoni dou, morosia kesa aia e gotolaka nina sasaga;
aia segeni moa e totu tana rago kolugira na tinoni tavosi
mara danga na kukuana.
38Migira na tinoni sasi sauba kara mate sui,
migira sui na kukuaqira kara luvu takuti.
39Na Taovia e maurisigira igira na tinoni ara totugoto i matana
me reitutugudougira tana tagu na rota.
40Aia e sangagira me maurisigira;
me laumaurisigira tanigira na tinoni vanga tsutsukibo
rongona ara dona kara vano totu raviravi i konina aia.
38Nina Nonginongi Kesa Na Tinoni e Gadovia na Rota
1!Taovia, ko laka na kedeaqu tana koremu!
2Igoe o bokaliginiau nimu pipili;
mo surukeliginiau na limamu mau puka.
3Rongona nogo na koremu igoe,
ti inau au gini vatsangi savi loki sosongo.
Na kokoraqu popono e gadovia na lobogu matena niqu sasi.
4Inau au gini lulumi tana obona niqu sasi;
ara ngoliau me mamava sosongo vaniau na kalagaiaqira.
5Rongona nogo inau au bubulega sosongo,
te ara gini mabulu mara sigini seko sosongo na voraqu.
6Au gogovagi tsuna i lao, mau taquruquru;
mau gini totu moa na ngangai na dani popono.
7Inau au masagi loki ma na koniqu e papara vaga na lake,
me varangi nogo kau mate.
8Inau au seko pitsu mau taquruquru saikesa nogo;
e melu sosongo na tobaqu, mau gini kukungu na vatsangi savi.
9Taovia igoe o dona ida nogo na omea sui inau au kilia;
mo rongomigira nogo pipi sui niqu kukungu.
10Na kosuqu e butubutu loki, mau tau nogo susuliga,
ma na mataqu e pasapasa lê sui nogo.
11Migira na kulaqu ma gaqu verakolu ara sove na mai varangisiau,
rongona inau au vora seko.
Me atsa goto igira na kamaqu mara totuligi taniau sui.
12Igira ara ngaoa na matesiaqu ara tsoni tavitiqu.
Migira ara ngaoa na sekoliaqu ara gokona kara tsogori pukaliau saikesa,
mara tau goto kuti na vorogokona sai na sekoliaqu.
13Minau au vaga moa na tinoni e mui na kulina, me utu vania na rorongo.
Mau vaga goto na tinoni e bulu na lapina, me utu vania na goko.
14Au vaga saikesa moa ti kesa na tinoni e tau dona ke gokovisu
rongona e utu vania na rorongo.
15Minau au norugo sailagi moa Taovia.
Migoe niqu Taovia ma niqu God sauba ko rongomia niqu nonginongi.
16Ko laka na tamivaniaqira gaqu gala kara gini mage kalina ara reia inau au rota.
Ko laka goto na tamivaniaqira kara vaitsari gaqu kalina au puka.
17E varangi saikesa nogo kau puka,
mau tau nogo kuti na vatsangi savi sosongo.
18Au koevulagia niqu sasi,
mau gini padasavi loki sosongo.
19Igira moa gaqu gala ara mauri dou rago mara susuliga sosongo.
Mara danga ara reisaviau lê tagara sa rongona.
20Igira ara tuguvisuginia na seko na omea dou inau au naua,
mara reisaviau rongona inau au tovoa na nauana na omea e goto.
21!Taovia, ko laka na tsoniligiaqu!
!Niqu God, ko laka na totu ao taniau!
22!Ko sangaau kalina nogo ia, rongona igoe niqu Taovia ma niqu vagamauri!
39Nina Ngangaidato Kesa Tinoni Aia E Ngoli Sosongolia na Rota
1Inau au goko mau tsarivaganana,
“Inau sauba kau parovata dou sosongo tana rongoqira na omea inau kau naua,
me sauba kau tau goto tamivania na lapiqu ke raqaau ma kau puka tana sasi.
Sauba kau tau goto tsaria sa omea
kalina kara totu varangi igira na tinoni seko.”
2Eo, au totu mui dodo rago moa, mau tau goto tsonia sa tsaqina goko.
?Ma nagua vaniau?
Ma niqu rota e loki babâ moa,
3me bingi sosongoliau na matagu.
Au papada sosongo me seko babâ moa na tobaqu;
me gini utu vaniau goto na bariana te au tû mau veisuâ na Taovia:
4“?Taovia sauba ke oka koegua sagata kau mauri inau?
?Kengisa sauba kau mate?
Ko tsarimai vaniau ke oka koegua ti ke laba na susuina na mauriqu.”
5!Igoe nogo o kukurisia vaganana ia na mauriqu inau!
I matamu igoe na mauriqu inau e lia mala omea lê moa.
E mana saikesa nomoa laka pipi sui na tinoni mamauri ara vaga lê moa kesa na guguvina tetelo lê na guguri,
6ma na vavanona e vaga lê moa ti na auau lê.
Na omea sui aia e gini boe sosongo na nauaqira ara puala lê sui.
Aia e tsakosaigira na vangana sui na omea levolevo,
me tau lelê goto donaginia laka asei nomoa ke aditamanina.
7?Vaga ia, ma nagua goto kau pitua inau Taovia?
Minau au noru kalavatavigo moa igoe.
8Ko nusiligigira taniau pipi sui niqu sasi,
mo ko laka na tamivaniaqira na tinoni bubulega kara gilugaqu.
9Sauba kau totu mui lê moa, ma kau tau goto tsonia sa tsaqina goko,
rongona igoe nogo o naua te e gini gadoviau na rota vaga ia inau.
10!Ko laka goto na labuaqu vaga ia!
E varangi nogo kau gini mate gaqu davadava o tsonivaniau igoe.
11Igoe o kedea na tinoni matena nina sasi tana taimatana,
mo sekoligira nina omea levolevo aia e padalokigira sosongo, vaga moa ti ke ganigira na mosu.
!Manana saikesa nomoa, na tinoni aia e vaga lê moa kesa na guguvina tetelo lê na guguri!
12Ko rongomia niqu nonginongi Taovia,
mo ko rongomi vatavia niqu ngangaidato vanigo.
Ko laka na ponotiana na kulimu kalina inau au nongigo ko sangaau.
Rongona inau au nimu tinoni totogoro moa igoe kesa tana tagu tetelo lê moa,
vaga nogo igira na mumuaqu i sau.
13Ko mololeau ma kau totu segeniqu rongona kau gini tamanina na tagu tana kau totu magemage
idavia kau mate ma kau tagara nogo inau.
40Kesa na Linge na Tsonikae
1Au pipitu sosongolia na Taovia ke sangaau;
maia e gogoro tsuna me rongomia niqu nonginongi.
2Me tû me raqadatoau tania na qiluna na mate,
me tanigotoa na bilolona na kao.
E molokaea na tuaqu tana vatu
mau tsotso tana kakaina.
3Aia e sasaniau kesa na linge vaolu,
na linge na mani tsonikaeana na Taovia nida God.
Migira na dangana sauba kara reia na omea vaga iani, ma kara gini totu parovata,
me sauba ti igira goto kara dona na noruana na Taovia.
4Ara mage igira ara norudou mananâ na Taovia,
igira ara tau pilo bâ i koniqira na titinonina na god peropero,
se kara dona na sangapata koluaqira igira ara samasama vanigira.
5!Igoe nogo o Taovia mo nimami God mo naugira vanigami danga na omea;
me tagara goto ke kesa ke atsa kolugo igoe!
Igoe nogo o naumanogati vanigami danga na omea dou sosongo.
!Me utugana saikesa vaniau kau tsaritutugugira sui,
rongona igira ara danga seko sosongo!
6Taovia, igoe o tau kilia na kodoputsa ma na sausau;
mo tau goto nongia laka kara savori-kodokodo vanigo na omea tuavati tana belatabu,
na mani sese mateqira na sasi.
Tagara, migoe o sauvaniau na kuliqu gana kau rongomiginigo,
7te inau au goko mau tsaria vanigo, “Ieni inau;
na omea igoe o kilia kau naua ara totu sui nogo i laona na papi na Ketsa.
8!Niqu God, au gini mage manana na nauana na omea igoe o kilia!
Mau tangoligira kakai nimu ketsa tana tobaqu popono.”
9Igoe Taovia o dona nogo laka i laona niqira lotusai nimu tinoni,
inau au tau goto kuti na katevulagiana vaniaqira na turupatu dou laka igoe nogo o suivisugami.
10Au tau goto molopoia i tobaqu segeni na turupatu dou ia laka igoe nogo o suivisugami.
Au katevulagia pipi kalina laka igoe o doulaka saviliu mo ngaoa moa ko sangagami.
I laona niqira lotusai nimu tinoni inau au tau totu mui
tana rongona nimu doulaka saviliu ma nimu galuve vo oli.
11Taovia inau au dona dou nomoa laka sauba e utu ko mololegotoa na galuveaqu.
Nimu galuve vo oli ma nimu tobalaka saviliu,
sauba kara ka tangoliau sailagi.
Nina Nonginongi Kesa Tinoni Rongona God Ke Sangâ
(Linge 70)
12!Inau e danga sosongo na omea seko ara totupoliau,
eo, ara danga sosongo me utu na tsokoraeaqira!
Niqu sasi ara poropoliau sosongo,
me utugana vaniau kau moro;
ara danga liusigira na kolina na ivuqu i lovaqu,
mau tau saikesa goto malagai.
13!Taovia, ko mai tsaku mo ko maurisiau!
14Ko utusigira igira ara tovoa laka kara labumatesiau inau
mo ko naua me ke ponopala lê na tobaqira.
Ko naua migira sui ara gini mage rongona inau au totu moa tana rota
kara sugavisu me ke paluvangamaqira lê.
15Igira ara totu matengana na gilu gaqu inau
kara gini vangamâ loki matena e tau managaqira.
16Migira sui ara mai totu raviravi i konimu igoe
ke dou na tobaqira ma kara gini magemage.
Migira sui ara soadougo rongona igoe o maurisigira,
kara tau kuti na tsariana, “!E loki sosongo nomoa na Taovia!”
17Inau au maluku lê mau tau tamanina sa omea,
migoe Taovia, o tau moa padaleau.
!Igoe niqu vagamauri mo niqu God,
ko mai kiki tsaku mo ko sangaau!
41Nina Nonginongi Kesa Na Tinoni Lobogu
1Kara mage igira ara dona na sangaaqira na tinoni ara tau tamani sa omea;
rongona kalina ke gadovigira na rota, ma na Taovia sauba ke sangagira.
2Na Taovia sauba ke vangataogira me ke aragoa na mauriqira,
me ke naua ma kara mage na totu tana kao aia e saua vanigira,
me utu goto ke tsonilegira ma kara ota lê i limaqira gaqira gala.
3Na Taovia sauba ke sangagira kalina ti kara lobogu,
me ke naua ma kara mauri dou tugua.
4Minau au tsarivaganana, “Au sasi vanigo Taovia, migoe ko galuveau mo ko maurisiau.”
5Igira gaqu gala ara keli seko vaniau,
mara tsaria, “?Sauba kengisa ti ke mate ia ma ka gini padale saikesalia?”
6Kalina igira ara mai na tsigoviaqu mara tsonia moa na goko kobakoba lê.
Ara tsakosaigira na turupatu peropero tana rongoqu inau,
mi muri mara vano mara gini goko gaqu bamai pipi tana nauna sui.
7Igira sui ara reisaviau ara gini gagasa tana rongoqu inau,
mara gini aqo na papada laka ke laba vaniau sa omea seko liuliu bâ.
8Mara tsarivaganana, “Aia e tango sosongo nomoa,
me utu vanigotoa ke dou.”
9Maia goto na kulaqu dou bâ aia au noru saikesalia,
maia e mutsapata koluau, sui, me tû me gativisuau.
10Ko galuveau Taovia, mo ko naua ma kau susuliga doutugua,
ma kau tuguvisu vanigira gaqu gala na omea seko vaga ara nauvaniau.
11Me ke utu vanigira goto kara tuliusiau inau,
mi tana ti inau kau reigadoviginia laka igoe Taovia o tobadou vaniau nomoa inau.
12Igoe sauba ko sangaau rongona inau au naua na omea e goto,
me sauba ko tamivaniau ma kau totu sailagi i matamu.
13!Tsonikaea na Taovia, aia niqira God na Israel!
!Tsonikaea kalina eni, mi tana dani ma na dani tagara ke tau sui!
!Amen, Amen!
42PAPI RUKA
Nina Nonginongi Kesa Tinoni Aia e Totu Tsinogo
1Vaga moa na dia42:1 “na dia” Reia tana 18:33. e kili sosongolia ke tsodoa kesa na ko vuravura bisibisi dou,
aia saikesa nogo au vaga inau,
au kili sosongolia goto kau tsodogo igoe niqu God.
2Au marou tana rongomu igoe na God na mauri.
?Sauba kengisa nomoa ti kau bâ ma kau reilakana na matamu?
3Na dani ma na bongi inau au ngangai moa,
ma na kô na mataqu e lia gaqu mutsa;
pipi kalina moa ara veisuaau igira gaqu gala mara tsaria,
“?Laka iava e totu nimu God igoe?”
4E seko manana nomoa na tobaqu kalina au padavisugira na omea ara laba i sau,
kalina au dulikolugira na toga mami bâ tana valena God
mau idana sautu vanigira kalina ami vavano i tana,
migira na toga ara magemage mara lilinge mara gudato tana tsonikaeana God.
5?Megua vaga inau ti au melu sosongo vaga ia kalina?
?Megua vaga ti e ponopala sosongo na tobaqu?
Sauba kau noru saikesalia moa niqu God,
ma kau tsonikaetugua
aia niqu vagamauri ma niqu God.
6-7Iani tana vera i tana au totu tsinogo kalina ia e melu loki sosongo na tobaqu,
ma niqu papada e pilovisutugua i konina niqu God.
Aia nogo e molovanigira na panu loki na rota kara karara tsavua na tidaoqu,
ma na qulututuna ke kuviau,
vaga kalina na tatarina na sasavu
e talu i kelana na Vungavunga Hermon ma na Vungavunga Misar,
me tuavata tsuna bâ tana Kô Jordan.
8Na Taovia ke sauvulagi vaniau nina galuve vo oli i laona na dani male,
rongona ti inau kau gini tangomana na linge tana bongi,
ma na lotu vaniana God aia na pukuna na mauriqu.
9Au tû, mau tsarivania God aia e reitutuguau,
“?Matena gua te o padaleau igoe?
?Egua vaga ti niqu aqo moa inau kau tsodorota babâ vaga ia
tana niqira tobaseko ara naua vaniau igira gaqu gala?”
10Ara bingiginiau sosongo niqira goko peapea,
mara totu matengana moa na veisuaqu sailagi,
“?Laka iava e totu nimu God igoe?”
11?Megua vaga inau ti au melu sosongo vaga ia?
?Megua vaga ti e ponopala sosongo na tobaqu?
Sauba kau noru saikesalia moa niqu God,
ma kau tsonikaetugua
aia niqu vagamauri ma niqu God.
43Nina Nonginongi Kesa Tinoni Aia e Totu Tsinogo
(Na Tugutana na Linge 42)
1!Niqu God kiki, ko sauvulagia laka inau au tau sasi,
mo ko isutuguqu tania na limaqira igira ara peago igoe,
ko maurisiau tanigira na tinoni vanga pero migira na tinoni seko!
2Igoe nogo o reitutuguau.
?Megua vaga ti o mololeau kalina ia?
?Megua vaga ti niqu aqo inau kau tsodorota babâ moa vaga ia,
tana niqira tobaseko ara nauvaniau igira gaqu gala?
3Ko saumaia vaniau na mararamu ma nimu mana;
igira nogo kara tudumiau
ma kara adivisuau bâ i Sion tana nimu vungavunga tabu,
mi tana nimu Vale Tabu i tana o totu sailagi igoe.
4Mi tana ti sauba inau kau ba tû i matana nimu belatabu igoe niqu God,
igoe nogo na pukuna niqu magemage.
Me sauba kau taia niqu itai tatangi ma kau lingena na tsonikaeamu,
igoe God mo niqu God.
5?Megua vaga inau te au melu sosongo vaga ia?
?Megua ti e ponopala sosongo na tobaqu?
Sauba kau noru saikesalia moa niqu God,
ma kau tsonikaetugua,
aia niqu vagamauri ma niqu God.
44Na Tinoni ni Israel ara Nongia God Ke Reitutugugira
1Igira nogo na mumuamami ara turupatuna vanigami,
tana rongona na omea loki igoe God o naugira tana taguqira igira,
tana dani ara putsi oka nogo.
Eo, ami rongomiginia na kulimami segeni,
2laka igoe segenimu nogo o tsialigigira na tinoni ponotoba
mo turuvaginigira nimu toga tana niqira kao.
Me laka igoe o kedegira na puku tavosi,
mo naua mara gini pabo babâ nimu tinoni segeni igoe.
3Igira ara tau sugutia na vera ia tana gini vailabu niqira isi;
me tau gini managaqira tana susuligaqira segeni moa igira. Tagara.
Igoe nogo o galuve sosongoligira,
mo mararasigira, mo totu kolugira,
mo sangaginigira nimu mana ma na susuligamu segeni nogo te e gini managaqira.
4Igoe nogo niqu taovia tsapakae mo niqu God;
igoe o naua mara gini tangomana nimu toga,
5mi tana gamu susuliga nogo igoe ti igami ami tuliusiginigira gamami gala.
6Au tau lelê goto norua niqu parige
se niqu isi segeni kara ka maurisiau,
7migoe saikesa nogo o maurisigami tanigira gamami gala,
mo tuliusigira igira ara reisavigami.
8Sauba kami tau goto kuti na tsonikaeamu
ma na soadouamu na dani ma na dani.
9Mi kalina eni igoe o sove tanigami tugua mo tamivanigira gamami gala kara tuliusigami;
mo tau nogo totu i laoqira nimami alaala na mane vailabu igami.
10Igoe o naua mami tsogo tanigira lê gamami gala,
migira ara tû mara laugira lê nimami omea levo.
11Igoe nogo o tamigami vanigira te ara labumatesigami mala sipi.
Mo sarangasigami mami gini tsogo saranga bamai tana vera tavosi ao.
12Mo tû mo tsabirigami igami nimu tinoni segeni,
mo kilia na qolo tetelo lê kara voliginigami,
vaga saikesa moa ti igami na omea lê mami tau tugua sa omea i matamu igoe.
13Migira ara totu tana vera i ligisamami ara reia na omea vaga igoe o naua vanigami,
mara tsirigami mara kiataginigami lê.
14Igoe nogo o naua vanigami te ara gini gilugamami lê i laoqira na puku tavosi sui,
mara lengulengu lovaqira vanigami mara tsirigami.
15Minau au totu sailagi moa tana vangamâ;
ma niqu vangamâ e tsavuau popono
16kalina au rongomia niqira goko tsiri ma niqira goko peapea
ara naua vaniau igira gaqu gala migira sui goto ara reisaviau.
17Na omea sui vaga girani ara laba vanigami,
atsa moa ti igami ami tau padalego igoe,
mami tau kutsia nimami tabana na vaitasogi igoe o naua kolugami.
18Migami ami tau piloligi tanigo igoe,
mami tau goto petsakoe vanigo ma kami sove na muriana nimu ketsa igoe. Tagara goto.
19Migoe o tû mo mololegami kami totu segeni i laoqira na omea tuavati atsi;
mo tsavuginigami na rodo pulipuli.
20Me ti vaga igami kami mololenogoa na samasama vaniamu igoe nimami God,
ma kami tû ma kami nonginongi vania sa god tavosi,
21migoe sauba ko donaginia nomoa,
rongona igoe nogo o donaginigira na omea sui ara totu popoi i laona na tobana tinoni.
22Mi tana rongomu segeni nogo igoe te ara labumatesigami pipi kalina,
mara naua vanigami vaga saikesa nogo ti na sipi ara vangaraua na labumatesiaqira.
23!Ko mamata Taovia! ?Egua te o mamaturu moa?
!Ko tû! !Ko laka na sove tanigami saikesa!
24?Egua ti o taopoi tanigami vaga ia?
!Ko laka na padaleamami tana nimami rota ma nimami vatsangi savi!
25Igami ami puka mami taquruquru saikesa nogo tana kao;
ami tsaro seko lê tana papasa.
26!Ko mai mo ko sangagami!
!Tana nimu galuve vo oli ko maurisigiami!
45Gana Linge na Tauga Na Taovia Tsapakae
1Na tsaqina na goko laka ara labadato tana papadaqu,
kalina inau au tê gana linge na taovia tsapakae.
Na lapiqu e vaga saikesa moa ti nina peni na mani mamare kesa na tinoni e dona sosongo na mamare.
2Igoe o rerei dou bâ liusigira na mane sui.
Igoe kesa e tangi dou laka nimu goko
ma God e soadougo pipi kalina.
3Ko kautsikakaia na basana nimu isi igoe taovia tsapakae susuliga sosongo.
E laba maka takuti na makana gamu tangirongo.
4!Sage tana nimu ose mo ko bâ kolu susuligamu mo ko gini tangomana tana vailabu,
rongona ko gini isutuguna me ke gini tukakai na pedegoto ma na pedemana!
Na susuligamu nogo ke sangago me ke gini managamu na tuliusiaqira gamu gala.
5Nimu pipili sui ara viri vavanga,
mara rutua na kosuqira gamu gala.
Migira na puku tavosi sui ara viri puka lê i tuamu.
6Na veramu tana o taovia tsapakae, aia God nogo e tusua vanigo,
sauba ke totu saviliu na dani ma na dani.
Igoe o tagaoviginigira nimu tinoni tana gotolaka saikesa.
7Igoe o reingaoa na omea e goto mo reisavia na omea e seko.
Aia nogoria na rongona ti aia God nimu God e viliginigo igoe
me ninaginigo na oela na mage
liusigira sui na taovia tsapakae tavosi.
8Na vuruna na bulunagai ma na ko sisigini dou ara viri sigini tana polomu.
O gini mage na rongomiana na tatangina na tuqulu ara taivanigo i laona na vale taovia
i tana ara baruginia na omea sere e talu tana livona na elepani.
9I laona na alaala na baka daki ara totu i matamu igoe ara totu na daleqira igira na taovia tsapakae.
Mi tana tabana madoa nimu sasana totu igoe e tutû na daki taovia
me gini inilau na qolumila laka.
10Igoe nina aneane na taovia tsapakae, ko rongomi vatavia na goko kau tsarivanigo,
ko padalegira nimu tinoni segeni ma na valena tamamu.
11Mi tana ti na taovia tsapakae ke reingaoa na rereimu dou;
aia nogo nimu taovia, ma nimu aqo igoe ko kukuni tania.
12Igira na tinoni ni Tire sauba kara adimai vanigo niqira vangalaka;
migira na tinoni tamani omea danga sauba kara saugotoa niqira omea levolevo vanigo
rongona ara ngaoa igoe ko gini padalokiginigira.
13!Maia na dalena daki na taovia tsapakae aia e totu moa i laona na vokina, me dou sosongo bâ na rereina!
Na polona ara vosiginia na terete qolumila.
14E sagelia na polo mamarega levolevo mara tudumi vanoa i matana na taovia tsapakae,
mara tsarimurina visana goto na daki tsamu igira nogo ganaduli.
15Tana magemage loki igira ara mai
mara sage tana valena na taovia tsapakae.
16Igoe niqu taovia tsapakae sauba ko tamanigira ke danga na dalemu mane
gana kara gini adidatoa na puku taovia i koniqira na mumuamu igoe,
migoe nogo sauba ko mologira ma kara tagaovi kaputia na barangengo popono.
17Mi tana linge iani au tea vanigo inau
sauba ke totu kalavata gamu tangirongo na dani ma na dani tagara ke tau sui.
Migira na tinoni sui lakalaka sauba kara tsonikaego igoe tana tagu sui moa ke bâ me ke bâ.
46God e Totu i Konida
1God aia nogo nida raravi ma na susuligada,
e totu varangisigita me vangaraua na sangaada tana tagu na rota.
2Vaga ia, me sauba e utu goto igita ka matagu,
atsa moa ti vaga na barangengo ke kasisi popono,
ma na vungavunga kara luvu takuti i laona na mao rodo.
3Me atsa moa ti vaga na tasi ke ngusudato me ke karara na panu
me ke kasiligira na vungavunga ma kara tatsora.
Me atsa moa migita e utu goto ka matagu.
4Tana verana God, mi tana valena tabu God aia e Taovia Susuliga Sosongo,
e totu kesa na ko loki
e saua na mage dou vanigira sui ara totu i tana.
5Ma God aia e totu pukuga tana vera loki ia, me gini utu ke taveo.
Mi tana matsaraka rovorovo maia sauba ke mai me ke sangâ.
6Migira na puku tavosi ara viri matagu loki sosongo,
ma na veraqira igira na taovia tsapakae sui ara viri taveo popono.
Nina goko God e poda loki, ma na barangengo popono e nangaligi lê.
7Aia na Taovia Susuliga Sosongo e totu i konida igita.
Nina God a Jakob aia nogo e ravisigita.
8Mai ma kamu reigira na omea sui e naugira na Taovia.
Kamu morosigira na omea ganataga sui aia e naugira tana barangengo.
9Aia e tukapusigira na vailabu loki sui ara laba pipi nauna tana barangengo.
E bokugira na parige, me kutsigira na bao,
ma na tako sui e kodogira tana lake.
10Me tsarivaganana, “Kamu mololea na vailabugi, ma kamu donaginia laka inau nogo God,
mau loki tsapakae i laoqira na puku sui,
mau loki tsapakae kaputia na barangengo popono.”
11Aia na Taovia Susuliga Sosongo e totu i konida igita;
nina God a Jakob aia nogo e ravisigita.
47God e Tagaovi Kaputia Na Barangengo Popono
1!Igamu na tinoni sui kamu taporia na limamui,
ma kamu gudato vania God tana linge na mage!
2Rongona na Taovia Susuliga Sosongo e kukuniga sosongo,
me taovia tsapakae kaputia na barangengo popono.
3Aia nogo e sangagita ti igita a gini tangomana kaputigira na toga
me naua migita a gini tagao kaputigira na puku tavosi sui.
4Aia nogo e vilivanigita na kao tana igita a totu konina,
migita a gini kaekae na tamaniana, igita nina tinoni aia e galuvegita dou sosongo.
5God e dato ke ba totu tana nina sasana na totukae i gotu.
Ara gudato tana mage mara uvigira na tavuli.
6!Lingena na tsonikaeana nida God,
lingena na tsonikaeana nida taovia tsapakae!
7!God aia nogo e taovia tsapakae kaputia na barangengo popono,
ka linge vania ma ka tsonikaea!
8God e totukae tana nina belatabu
me tangoli kaputigira na puku sui.
9Igira niqira tagao na puku tavosi sui ara viri labasai
kolugira nina tinoni nina God a Abraham.
Aia e susuliga sosongo bâ liusigira pipi sui lakalaka na alaala na malagai;
maia segeni e taovia loki tsapakae.
48I Sion Nogo na Verana God
1Na Taovia e loki me ulagana kara tsonikae sosongolia bâ
i laona nina verabau nida God, tana nina vungavunga tabu.
2I Sion nina vungavunga God e datoga sosongo me dou sosongo bâ na rereina;
na verana na taovia tsapakae loki e moloa na magemage loki vania na barangengo popono.
3Mi laona na vera ia ara totu na valekakai,
ma God e sauvulaginogoa laka i tana nogo na tinoni kara ba totu raviravi dou.
4Igira na taovia tsapakae sui lakalaka ara viri saikolu mai
laka kara bokia na vungavunga Sion.
5Mi kalina ara mailaba mara reilakana, mara novo mate;
mara gini matagu loki mara tsogoligi sui.
6Mi tana ara viri gagariri mara vatsangia na rota loki,
vaga saikesa nogo na daki kalina e varangi ke vasua kesa na baka,
7me vaga goto kalina na vaka ara tsodoa na legai loki mara likelike bamai.
8Igita a rongominogoa na omea God e naua,
mi kalina eni igita a reilakana nogo
i laona na verana nida God, aia na Taovia Susuliga Sosongo;
maia nogo sauba ke reitutugu kalavatavia na vera ia na dani ma na dani tagara ke tau sui.
9I laona nimu Vale Tabu igoe God,
igami ami padatugua na galuvemu vo oli.
10Migira sui na tinoni pipi tana nauna sui ara tsonikaego igoe,
ma gamu tangirongo e liuvia na barangengo popono.
Igoe o gini tagao na pedegoto.
11!Kara gini magemage na toga sui ni Sion!
Pipi sui nimu pede igoe o naua ara mana sui.
!Kara gini magemage igira ara totu i laoqira na verabau ni Juda!
12Igamu nina tinoni God, kamu polia na vera ni Sion ma kamu tsokogira sui pipi na kusu ara vaturigira i tana;
13kamu reigira dou na baravatuna na vera ia, ma kamu vilekegira dou na valekakai ara totu i laona,
rongona kamu gini turupatuna vanigira na vatavata kara botsamai i muri bâ;
14ma kamu tsarivanigira,
“Aia nogoria e God nida God e totu saviliu na dani ma na dani;
aia nogo sauba ke tudumigita tana tagu sui ke bâ me ke bâ.”
49E Bubulega na Tinoni e Tsotsovata Tana Nina Omea Danga
1!Igamu na tinoni sui kamu rongomia na omea iani!
Rongovata igamu na toga pipi sui tana nauna,
2ke tû tana tinoni loki me tsau tana tetelona,
igira ara tamani omea danga kolugira goto igira ara tau tamanina sa omea.
3E maka sosongo na omea inau au padâ i tobaqu na tsariana.
Sauba kau gini goko na tsaqina na goko sasaga.
4Me sauba kau tsarivanigamu ke visana na gokotabana.
ma kau nusirongoqira vanigamu kalina au taia na itai tatangi.
5Inau au tau dona kau matagu tana tagu seko
kalina ara tupoliau igira gaqu gala,
6igira ara tsotsovata segeni tana niqira omea levolevo danga
mara gini kaekae tana niqira tamani danga.
7Na tinoni aia segeni e tau tangomana ke suivisu segenina;
me tau goto tangomana vania ke tsonimatena vania God rongona na maurina,
8rongona na qolo na tsonimatena na maurina tinoni e loki seko sosongo bâ.
Me atsa moa ti ke danga sosongo na qolo ke tsonia, me utu goto ke tugua
9na maurisiana tania na qilu,
me ke mauri sailagi babâ moa.
10Reia, na tinoni sasaga maia goto e dona goto ke mate,
atsa vaga goto igira na tinoni bubulega migira ara tau sasaga.
Igira sui sauba kara molovisua niqira omea levolevo ara tamanina ke totu vanigira na kukuaqira.
11Ma na qiluqira i tana nogo na veraqira saviliu.
I tana kara totu sailagi na dani ma na dani,
atsa moa ti tana idana igira ara tamanina niqira kao segeni.
12Gana tangirongo kesa tinoni e tau tangomana ke didia me ke tau gadovia na mate.
Aia sauba nomoa ke mate vaga goto igira sui pipi na omea mamauri lê.
13Reia na omea e gadovigira igira ara noru segeniqira moa,
ma na omea e totupitugira igira ara totukae tana vangana niqira omea levolevo danga,
14na matemate e totupitugira vaga moa na sipi ara totupitua na matesiaqira,
ma na Mate aia nogo sauba ke lia niqira reitutugu.
Migira nogo na tinoni e goto niqira sasaga sauba kara tagaovi kaputigira,
ma na koniqira igira ke ratsa tsaku lê
i laona na barangengo na mate ao tania na veraqira.
15Ma God sauba aia ke suivisuau inau,
me ke laumaurisiau tania na susuligana na mate.
16Laka na gini tobaseko kalina amu reia kesa tinoni e tamanigira danga nina omea levolevo,
me papabo babâ moa nina tamani.
17E utu saikesa vania ke adigira kalina aia ke mate;
nina omea levolevo e utu kara dulikolua kalina aia ke tsuna i laona na qilu.
18Atsa moa ti vaga kesa tinoni aia e gini dou sosongo tobana rongona na douna nina mauri i lao eni,
mara gini tsonikaea rongona aia e tangomana sosongo pipi tana omea sui e naua,
19maia goto sauba ke sangapata kolugira na guana ma na guana sui na totu tana mate,
i tana na rodo ke totu sailagi na dani ma na dani, me utu ke sui.
20Gana tangirongo kesa tinoni e tau tangomana ke didia me ke tau gadovia na mate;
aia sauba nomoa ke mate vaga goto igira sui pipi na omea mamauri lê.
50Na Samasama Vaga e Ulagana i Matana God
1God na Taovia Susuliga aia nogo e goko;
me soagira sui na tinoni tana barangengo popono,
e tû tana e dato na aso me vosa bâ tana e sû.
2Na mararana God e talumai tû i Sion,
aia na verabau e dou laka na rereina.
3Nida God e maimai, me tau mai muimui lê;
na lake loki e liu i matana,
ma na legai loki e totu polipolia.
4Aia e soakaira na gotu ma na lao kara ka mai reia
kalina aia ke pedevotagira nina tinoni.
5Me tû me tsarivaganana, “Kamu adimaigira i mataqu igira sui niqu tinoni,
igira ara naua niqira vaitasogi koluau
mara pukuginia niqira kodoputsa ara savoria vaniau.”
6Na baragata e katevulagia laka God aia e gotolaka,
maia segenina nogo e ulagana ke pede tinoni.
7Ma God e tsaria, “Rorongo mai igamu niqu tinoni, minau kau goko vanigamu;
sauba kau kateli vanigamu igamu na Israel.
Inau nogo God nimui God.
8Inau au tau gini totokoe vanigamu tana rongona nimui sausau
ma na savori-kodokodo amu savorigira sailagi vaniau. Tagara.
9Mau tau goto kilia igira nimui buluka mane
se nimui naniqoti ara totu tana nimui bara.
10Pipi sui na omea tuavati ara totu i laona na legai igira ara niqu tamani sui inau,
migira sui goto na buluka ara totu tana toga ma na toga na tetena.
11Migira sui na manu atsi ara niqu tamani goto inau,
migira sui goto pipi na omea mamauri ara viri totubamai.
12“Eo, me ti vaga inau kau dona na vitoa, me sauba e utu inau kau nongi mutsa i konimui igamu,
rongona na barangengo popono ma na vangana sui i laona igira sui lakalaka niqu omea nogo inau.
13?Egua amu pada ngatsua laka inau au gania na velesina na buluka,
se au inuvia na gabuqira na naniqoti?
14Kamu soadouau moa inau nimui God ngiti nimui savori-kodoputsa vaniaqu,
ma kamu manalidougira nimui veke sui amu nauvaniau inau na Taovia Susuliga Sosongo.
15Kamu soaau tsaku kalina ti ke laba vanigamu sa omea seko,
minau sauba kau maurisigamu,
mi tana nauvaganana ia, ti igamu kamu gini tsonikaeau manana inau.”
16Me tû God me tsarivanigira igira na vanga tsutsukibo,
“?E koegua igamu ti na mangamui e tsokogira lê niqu ketsa?
?Megua vaga ti amu gini vaigokovigi lê tana rongona niqu vaitasogi inau au naua kolugamu?
17Migamu amu reisavia moa kalina inau au totosasaga vanigamu,
mamu sove tanigira niqu ketsa.
18Mamu lia moa na kulaqira pipi sui na tinoni komikomi amu tsodogira,
mamu liupata kolugira na tinoni vanga kiboga.
19“Na mangamui e tau goto kuti na goko seko.
Ma na lapimui e botsangia danga na goko pero.
20Amu tototu, mamu keli lê vanigira na tasimui segeni,
mamu adikaea pipi niqira sasi.
21Igamu nogo amu naugira na omea sui vaga girani,
minau au tau lelê goto tsaria sa omea vanigamu,
Migamu amu padâ laka inau au vaga moa igamu.
Eo, mi kalina eni inau kau totosasaga kakai vanigamu
ma kau adilabati vanigamu i malena nimui sasi.
22“Kamu rorongomai igamu amu peâ na mangaqu inau,
se kau tau tû ma kau matesigamu sui,
me ke tau goto tangomana ke kesa ke laumaurisigamu.
23Aia e soadouau ngiti savori-kodoputsa, aia nogo e tsonikaeau manana,
minau sauba manana kau maurisigira pipi gira sui ara rongomangaqu.”
51Nina Nonginongi Kesa Tinoni Rongona God Ke Padalegira Nina Sasi
1Ko galuveau Taovia niqu God tana nimu galuve vo oli.
!Tana rongona nogo nimu galuve loki
ko veoligigira niqu sasi!
2!Ko vulimaleau saikesa tanigira sui niqu tsutsukibo,
mo ko malesiau tania niqu sasi!
3Au reigadovigira niqu sasi,
ma niqu sasi au naugira ara totu sailagi i mataqu.
4Taovia inau au sasi vanigo, igoe segeni moa au sasi vanigo,
mau naua na omea e seko i matamu.
Vaga ia, me ulagamu nomoa igoe ko pedeau inau;
mo naudoua nomoa igoe kalina o kedeau.
5Inau au tinoni sasi nogo tû tana dani au botsa,
tumai nogo tana tagu au totu i tobana tinaqu mau tinoni sasi nogo.
6Igoe o kilia na tinoni kara mana me ke goto dou na tobaqira;
me vaga ia, minau au nongigo ko dangaliginia na tobaqu nimu sasaga loki.
7Ko adiligi taniau niqu sasi, me sauba kau male;
ko vulimaleau me sauba kau sere maka saikesa vaga moa na snou.51:7 “na snou” Visana tana vera tana tagu na bisi loki na usa e dona ke kakolu me sere vaga moa na poke kalina e tumu me tsavua na kao popono.
8Ko tamivaniau ma kau rongomia na tatangina na magemage loki;
me atsa moa ti vaga igoe o tsogori rapasiau mau taquruquru saikesa nogo,
minau sauba kau dona nomoa na magemage tugua.
9Ko vongo kapusia na matamu ko tau reigira niqu sasi,
mo ko veoligigira popono niqu tsutsukibo.
10Niqu God, ko naua me ke maletugua na tobaqu.
Ko vaolusia na tidaoqu ma kau totukakai i konimu.
11Ko laka kiki na tsonikidaqu
ma na tongo vaniaqu nimu Tarunga Tabu.
12Ko molovisua i tobaqu na mage rongona igoe o suivisuau nogo;
mo ko naua ma kau madodo na rongomangamu.
13Mi tana ti inau kau madodo na sasaniaqira na tinoni sasi na muriaqira nimu ketsa,
migira kara tû ma kara pilovisumai i konimu igoe.
14Ko gaea na mauriqu igoe niqu God, mo ko maurisiau,
me sauba inau kau gini mage na katevulagiana laka igoe nogo o gotolaka saikesa.
15Taovia ko sangavia na mangaqu
minau sauba kau tsonikaego sailagi.
16Igoe o tau nogo kilia na tinoni kara savori-kodoputsa vanigo.
Me ti vaga inau kau nauvanigo na savori-kodokodo,
migoe e utu goto ko reingaoa.
17Ngiti niqu kodoputsa aia nogoria niqu molotsunali segeniqu i matamu igoe niqu God;
me utu igoe ko sove tania kesa aia e molotsunali segenina me pilotoba tanigira nina sasi.
18Niqu God ko tobadou vania na vera ni Sion mo ko sangâ;
ko logo visutugua na baravatuna na vera ni Jerusalem.
19Mi tana nogo ti sauba igoe ko reingaogira nimami kodoputsa,
ma nimami savori-kodokodo vanigo;
migami sauba kami savorigira na buluka mane tana nimu belatabu.
52Nina Pede God ma Nina Vangalaka
1?Rongona gua ti igoe na tinoni loki o gini goko kaekae
tana rongona na omea seko o naua vanigira nina tinoni God?
2Tana dani popono igoe o totu matengana moa na vorogokona na sekoliaqira na tinoni tavosi;
na lapimu e vavanga vaga na risa.
Mo tavongani botsangia na gokopero pipi kalina.
30 padalokia bâ na omea seko liusia na omea dou,
ma na peropero liusia na manana.
4!Na vanga pero igoe, mo dona sosongo na sekoliginiaqira na tinoni nimu tsaqina goko peropero!
5Vaga ia, ma God sauba ke sekoli pitsugo saviliu;
aia sauba ke tangoligo me ke raqaligigo tania na valemu;
me ke adiligigo tania na barangengo na mauri.
6Igira na tinoni e gotodou niqira sasaga sauba kara reia e laba vanigo na omea vaga gira, ma kara gini matagu loki;
mi muri ma kara tû ma kara kiataginigo ma kara tsarivaganana,
7“Reia bâ na mane iani, aia e tau norua God laka aia ke ravisia,
maia e norua moa laka tana nina omea levolevo danga e tugunogoa,
me padâ laka i laona nogo nina tsutsukibo ke totu ravidou.”
8Minau au vaga saikesa moa ti kesa na gai na olive52:8 “na gai na olive” Tana niqira papada na Tsiu na gai na olive na papadana na tamani omea danga ma na toturavi dou. aia e vovodato i laona na valena God;
au norukakaia na galuvena God aia e vo oli na dani ma na dani.
9Inau sauba kau soadougo sailagi igoe niqu God tana rongona na omea sui igoe o naugira;
mi mataqira nimu toga sui
sauba inau kau katevulagia laka igoe o dou sosongo.
53Na Tinoni Sui Ara Sasi
(Linge 14)
1Igira na bule ara tsarisegenia i tobaqira,
“E tagara sa God.”
Igira sui ara seko pitsu nogo,
me seko saviliu pipi niqira sasaga;
me tagara goto ke kesa vidaqira ke naua sa omea ke goto.
2God aia e totu tana sasana i gotu, me morotsuna i koniqira na mamatana tinoni sui,
ti vaga ke reigira kara visana i laoqira kara sasaga,
ma kara samasama vania.
3Migira sui lakalaka ara piloligi tania God,
pipi gira sui ara atsa sui tana seko.
E tagara goto ke kesa vidaqira ke naua na omea ke goto,
eo, e tagara goto ke kesa lelê.
4Te e tû na Taovia me veisua, “?Me laka ara tau vati sasaga moa igira na tinoni seko girani?
E lia vaga moa ti ngiti gaqira mutsa na sekoliaqira niqu tinoni inau,
mara tau saikesa dona na nonginongi vaniaqu.”
5Me sauba igira kara viri matagu loki,
na matagu vaga e tau vati gadovigira moa kesa dani,
rongona God sauba ke sarangasia na suliqira igira gaqira gala nina tinoni segeni.
God e sove tanigira saikesa nogo igira,
maia nogoria te e gini managaqira na Israel na tuliusiaqira.
6Inau au amesi sosongolia laka ke kesa ke talumai i Sion
maia ke laumaurisigira na tinoni ni Israel.
!Sauba kara mage loki sosongo nomoa igira na tinoni ni Israel
kalina God ke naua me ke dou visutugua niqira mauri!
54Kesa Tinoni e Nongia God Ke Reitutugua Tanigira Gana Gala
1!Niqu God, tana susuligamu ko maurisiginiau;
mi tana susuligamu loki ko isutuguqu!
2!Niqu God ko tabea niqu nonginongi;
mo ko rongomidoua niqu tsaqina goko!
3Igira na mane kaekae ara maiginiau;
migira na vanga sekoli tinoni ara tovoa laka kara labumatesiau,
mara tau goto dona kara boeginia God.
4Ma God aia nogo e sangaau.
Na Taovia aia nogo e isutuguqu.
5God ko gini aqo niqira sasaga tabaru gaqu gala ma na kedena ke gadovisu i koniqira segeni.
Igoe nogo ko matesigira rongona igoe o doulaka saviliu vaniau.
6Sauba kau gini mage na savori-kodoputsa vanigo, igoe niqu Taovia;
ma kau soadougo rongona igoe o dou sosongo.
7Igoe nogo o laumaurisiau tanigira pipi sui na omea seko ara gadoviau,
minau au reia kalina igoe o tuliusigira igira sui gaqu gala.
55Nina Nonginongi Kesa na Tinoni Aia na Kulana e Sauligia
1!Igoe niqu God ko rongomia niqu nonginongi;
laka na pilo taniana niqu ngangaidato vanigo!
2Rongomiau mo ko tuguvisu vaniau niqu goko;
inau au gini seko pitsu nogo na omea seko danga ara ngoliau.
3Mau gini matagu mate niqira goko rarara igira gaqu gala,
ma niqira galaleleo igira na tinoni vanga tsutsukibo.
Ara tsukivaniau me gadoviau danga na rota;
mara kore sailagi vaniau moa mara reisaviau.
4Au matagu mate,
me parikukutsi na kokoraqu tana mataguna na mate.
5E mamara sosongo na tobaqu tana matagu mau gariri;
na matagu loki e labusekoliau popono nogo.
6Au kili sosongolia ti kau tamanina na rapoqu vaga na kulukulu,
rongona kau gini lovoligi ma kau tsodoa sa nauna i tana kau mango rago.
7Kau tangomana na lovoligi ao sosongo
ma kau bâ totu sa tana legai mangu.
8I tana sauba kau tsodotsakua sa nauna i tana kau ba totu raviravi
tania na vona na guguri ma na legai loki.
9!Taovia ko virisia niqira goko igira gaqu gala!
Au reia niqira kore loki ma niqira galagugû na tinoni danga i laona na verabau,
10na dani ma na bongi ara polipolia na vera ia,
mara dangaliginia na omea seko ma na sasi loki ara naua.
11Na mate e totu pipi sui tana nauna,
ma na vaitsogoritsunagi ma na vaibulesigi e dangali poponoa na sautu i laona na vera.
12Ti vaga kesa gaqu gala ke gilugaqu,
me sauba inau kau berengiti moa;
me ti vaga kesa aia e reisaviau ke goko kaekae vaniau,
me tau utu vaniau kau taopoi tania.
13Migoe nogo gaqu duli, ma gaqu aqo kolu, ma na kulaqu dou sosongo,
igoe nogo o naua vaniau na omea seko vaga ia.
14Tana idana kaita ka dona na vaigokovigi sai dou,
ma na samasama sai i laona na Vale Tabu.
15!Au amesia na mate ke tavongani novotigira gaqu gala
kalina e tau vati tsau niqira tagu na mate;
ma kara tsuna mamauri i laona na barangengo na mate!
Na seko e totu popono i laona na valeqira mi laona na tobaqira.
16Minau au soâ na Taovia God laka aia ke sangaau,
maia sauba nomoa ke maurisiau.
17Tana matsaraka mi tana niaso mi tana ngulavi bongi55:17 Pipi dani tana matsaraka mi tana niaso mi tana ngulavi bongi niqira tagu na nonginongi nogo igira na Tsiu.
au tatamanga mau kukungu dato vania,
maia sauba ke rongomia na tatangina niqu goko.
18Maia sauba ke sangaau ma kau gini tangomana tana vailabu au naua,
rongona ara danga sosongo gaqu gala ara saisai gaqu.
19God aia e tagao tû mai nogo tana tuturigana tsotsodo,
maia sauba ke rongomiau me ke tsogoripukalia gaqira susuliga igira,
rongona ara sove na oliana niqira sasaga,
mara tau goto dona na mataguniana aia.
20Aia gaqu duli dou sosongo tana idana aia nogo e tû me sugutigira na kulana;
me veogira goto nina veke aia e naua kolugira tana idana.
21Nina tsaqina goko ara pui dou,
mi laona na tobana e totu moa na reisavi tinoni;
ma nina tsaqina goko ara malutsi liusia bâ na oela,
mara vavanga saikesa nogo vaga moa ti na isi vavanga.
22Mololakagira na omea sui ara ngoligo i limana na Taovia,
maia sauba ke isutugumu;
aia e utu ke tamia na tinoni e goto niqira sasaga kara pukavisu lê.
23Migoe God sauba ko tsonibagira na vanga labumatesi tinoni ma na vanga pero, ma kara ba puka tana qiluqira
kalina na turina popono na mauriqira e totu moa.
Minau moa sauba kau noru saikesaligo moa igoe.
56Nina Nonginongi Kesa Tinoni E Norua God
1Niqu God ko galuveau,
rongona ara mai saisai gaqu;
igira gaqu galu ara rotasiau sailagi.
2Tana dani popono ara saimai igira ara reisaviau rongona kara sekoliau.
Mara danga sosongo ara vailabu koluau inau.
3Mi kalina inau au matagu,
minau au vataraginia niqu vainoru i konimu igoe Taovia Susuliga Sosongo.
4Au norukakaia moa God mau tau matagu;
au tsonikaea rongona na omea aia e vekenogoa vaniau.
?Me vaga ia, ma na seko gua tangomana kesa na tinoni lê moa ke nauvaniau inau?
5!Tana dani popono igira gaqu gala ara tovokakaia na rotasiaqu;
pipi kalina moa ara totu matengana na lave sautuna na sekoliaqu!
6Ara totusai tana nauna gana na taopoi
mara tuvia pipi na omea sui inau au naugira,
mara pada laka kara labumatesiau.
7!Ko kedegira niqu God, na matena niqira nauseko ara naua;
ma na koremu ko tuliusiginigira na tinoni vaga gira!
8Igoe o donagininogoa laka e ponopala sosongo na tobaqu;
mo reia kalina e rutsu na kô i mataqu.
?Me laka o tau maretsunagira nogo i laona nimu papi igoe?
9Tana dani ti kau soago,
migoe sauba ko tsialigigira gaqu gala ma kara tsogo sui.
Minau au dona nogo laka God aia e totu tabana koniqu inau
10aia nogoria na Taovia au tsonikaea rongona nina veke e naua vaniau.
11I konina nogo ia inau au tsotsovata, me sauba e utu kau matagu.
?Me vaga ia, ma na seko gua tangomana kesa na tinoni lê moa ke nauvaniau inau?
12Eo, niqu God sauba kau savori vanigo na omea au vekenogoa vanigo;
sauba kau saua vanigo niqu savori na soadou,
13rongona igoe nogo o laumaurisiau tania na mate,
mo sangaau dou mara gini tau tangomana na tuliusiaqu igira.
Aia nogoria ti inau au gini dona na liu bâ dou i matamu igoe niqu God,
tana mararamu o mararasiginigira igira ara mauri.
57Nina Nonginongi Kesa Tinoni Rongona God Ke Sangâ
1Ko galuveau kiki niqu God, ko galuveau,
rongona inau au mai kau toturavi i konimu.
Tana auauna na rapomu57:1 “Tana auauna na rapomu” Reia tana 17:8. igoe inau kau toturavi
poi tsau ke puka na legai loki.57:1 “na legai loki” Na papadana kesa na omea seko sauba ke laba.
2Inau au ngangaidato vania God Susuliga Sosongo,
vania God aia e sauvaniau na omea sui au kilia.
3Aia e totu i baragata sauba ke rongomia niqu nonginongi me ke maurisiau;
maia nogo sauba ke tuliusigira igira ara bingi sekoliau.
God sauba ke tusuvulagi vaniau nina galuve vo oli ma nina doulaka saviliu.
4Ara totu poliau igira gaqu gala,
vaga saikesa moa ti na laeone veveiga.
Na livoqira ara vaga moa na bao ma na pipili;
ma na lapiqira ara vaga na isi vavanga.
5Niqu God, ko saulabatia tana masaoka laka igoe o loki tsapakae,
ma na mararamu ke tsavu poponoa na barangengo.
6Igira gaqu gala ara tsoninogoa niqira vugo gana kara sogotiginiau;
minau au totu popono nogo i laona na melu.
Igira ara tsaia na qilu tana niqu sautu,
migira segeniqira nogo ara puka i laona.
7!Minau au noru saikesaligo moa niqu God;
me sauba kau linge ma kau tsonikaego!
8!Mamata igoe na tidaoqu!
!Mamata goto kagamu niqu itai tatangi ma niqu tuqulu!
Minau sauba kau galisigotoa na aso.
9Sauba kau soadougo igoe Taovia i laoqira na puku tavosi sui.
Sauba kau tsonikaego i laoqira na tinoni toga.
10Nimu galuve vo oli e dato me suâ na baragata;
ma nimu doulaka e peledatoa na masaoka.
11Niqu God ko saulabatia tana masaoka laka igoe o loki tsapakae,
ma na mararamu ke tsavu poponoa na barangengo.
58Na Nongiana God Rongona Ke Kedegira na Tinoni Vanga Tsutsukibo
1?Egua igamu na tinoni tagao, laka igamu amu dona na votagoko laka?
?Me laka igamu amu pedeginigira na tinoni sui tana pedegoto laka?
2!Tagara saikesa! I laona tobamui amu padagira moa na omea seko sauba kamu naugira,
mamu sekoli sosongoligira na tinoni i laona na vera.
3Na tinoni vanga nauseko ara liu sasi tana mauriqira popono;
tû tana dani ara botsa ara dona moa na tsoniana na gokopero.
4E dangaligira popono na tabatu na mate vaga moa ti na muata vogata;
mara ponotia na kuliqira vaga moa kesa na muata kuli mui,
5maia e utu vania ke rongomia na tatangina nina goko na tinoni aia e dona na tangoliana lê na muata me utu ke gatia,
se ke rongomia nina linge kesa tinoni titidaoga aia e sasaga sosongo.
6Niqu God ko tû mo ko bokua na livoqira na laeone veveiga girani.
7Kara nangaligi lê vaga moa na kô kalina e nara bamai me nanga lê tana kao;
kara mate lê vaga moa na buruburu ara tsogoria tana sautu.
8Kara nanga lê vaga moa na kena e nanga lê kalina e molo bangona tana kao.58:8 “na kena e nanga lê kalina e molo bangona tana kao” Niqira papada na tinoni ni sau laka e mate lê na kena kalina e molo bangona tana kao.
Ma kara vaga goto kesa na baka e mate nogo i laona na tobana tinana,
maia e tau lelê goto reilakana na aso.
9Kalina igira kara tau nogo padâ, ma God sauba ke tsaku sosongo me ke vutiligigira lê,
vaga moa kalina na tinoni e vutiligigira na buruburu seko.
Mi tana nina momosatoba loki God, aia sauba ke uviligigira lê
kalina igira ara mamauri moa.
10Migira na tinoni e goto niqira sasaga sauba kara gini magemage
kalina kara reia God e kedegira na tinoni sasi;
sauba kara vulia na tuaqira tana gabuqira na tinoni vanga tsutsukibo.
11Igira na toga sauba kara tsarivaganana,
“Igira na tinoni e goto niqira sasaga ara adipeluna manana konina God;
eo, e mana saikesa laka God e totu manana,
maia e pedegira na tinoni sui tana barangengo.”
59Nina Nonginongi Kesa Tinoni Rongona Kara Tau Labua
1!Niqu God ko maurisiau tania na limaqira gaqu gala;
ko isutuguqu tanigira igira ara ngaoa na labumatesiaqu!
2!Maurisiau tanigira na tinoni seko gira;
ko laumaurisiau tanigira igira na vanga matesi tinoni!
3!Reigira bâ! Igira ara tû mara pipitu nogo rongona kara labumatesiau;
igira na alaala na tinoni seko sosongo ara saikolumai nogo rongona kara tangoliau.
Me tau tana rongona sa niqu sasi inau se kesa na omea tau goto au naunogoa,
4me tau goto tana rongona ke kesa niqu sasi inau au naua Taovia,
ti igira ara gini aligiri tsaku na mai vailabugi koluau.
5!Ko tû tsaku, Taovia God Susuliga Sosongo, ko mai mo ko sangaau;
igoe na God ni Israel igoe segeni ko reigira igira!
!Ko mamata, mo ko kedegira na tinoni ponotoba girani;
mo ko laka goto na gaeaqira na tinoni vanga tabaru vaga gira!
6Igira ara labavisumai tana ngulavi,
mara ngunguru bamai vaga saikesa moa ti na alaala na pai i laona na verabau.
7Rongomia bâ niqira goko peapea ma niqira goko vavanga ara tsonia.
Na lapiqira e vaga saikesa moa ti na isi i laona na mangaqira,
mara pada ngatsua laka e tau rongomigira moa ke kesa.
8Migoe Taovia o kiataginigira moa;
mo tsirigira sui na tinoni ponotoba.
9Minau au noru kalavatavia na susuligamu igoe;
rongona igoe nogo niqu God o niqu mani totu raviravi inau.
10Niqu God e galuveau maia sauba ke mai i koniqu;
maia ke tamivaniau ma kau reia kalina ke tuliusigira sui gaqu gala.
11Niqu God, ko laka na labumatesiaqira,
rongona ti vaga kara mate, me sauba niqu tinoni kara padalegira saikesa.
Sarangasigira moa ginia na susuligamu mo ko tuliusigira,
igoe nogo Taovia gamami tako igami.
12Na sasi e totu sailagi moa tana tutubena na mangaqira;
pipi gira sui lakalaka niqira tsaqina goko ara tsonia ara sasi sui moa.
!Migoe ko naua migira kara sogo segeni i laona niqira kaekae!
Rongona nogo ara dona sosongo na vatsa seko ma na goko peropero,
13te e dou igoe ko matesiligigira tana koremu loki;
mo ko matesiligigira saikesa.
Mi tana nogo ti igira sui lakalaka na tinoni kara donaginia
laka igoe nogo God o tagao popono i laona na Israel,
migoe nogo o tagaovi kaputia na barangengo popono.
14Igira gaqu gala ara visumai tana ngulavi,
mara viri kokongo bamai vaga na pai i laona na verabau,
15ara vaga saikesa moa na pai ara kuviraru bamai rongona ara lave mutsa,
mara ngunguru loki sosongo ti vaga kara tau tsodoa na mutsa ke tugugira.
16Minau sauba kau lingena tana rongona na susuligamu igoe, niqu God,
me pipi tana matsaraka inau sauba kau gini linge loki tana rongona nimu galuve vo oli.
Igoe nogo niqu mani tsotsovata
mo ravisiau tana tagu e gadoviau na rota.
17Igoe nogo na susuligaqu, me sauba kau lingena na tsonikaeamu.
God nogo aia niqu mani toturavi,
God nogo e sauvaniau nina galuve vo oli.
60Kesa Niqira Nonginongi Igira na Israel Kalina e Tau Managaqira
1God igoe o sovetanigami nogo, migoe nogoria o naua te e gini tau managamami;
o kore sosongo vanigami nogo, mi kalina eni ami ngasugo ko pilovisumai i konimami.
2Igoe segenimu nogo o naua me kasisi na kao, me gini tangiti;
mi kalina eni e dou ti igoe ko mavusia na bokana, rongona e varangi nogo ke toroutsa popono.
3Igoe segeni nogo o naua vanigami igami nimu tinoni te ami gini rota loki sosongo;
mami gini tapulepule bamai vaga moa ti ami inu mami bule.
4Igoe o parovatavigira nogo igira ara kukuni tanigo,
rongona ke tau gadovigira niqira bao igira gaqira gala.
5Ko rongomia nimami nonginongi,
mi tana susuligamu loki ko laumaurisigami igami nimu tinoni galugaluve.
6Ma God aia e tû tana nina Vale Tabu me tsarivaganana,
“Inau au tangomana sui nogo,
me sauba kau votâ na kao ni Sekem,
ma kau tuvarivotâ na Poi ni Sukot vanigira niqu tinoni.
7I Gilead niqu nogo inau, mi Manase goto;
i Epraim gaqu kepi tapala,
mi Juda gaqu itoro na taovia tsapakae.
8Mi Moab ke lia niqu popo na vulivuli,
mi tana Edom sauba kau tsonidatoa gaqu porotua,
na papadana laka inau nogo au tamanina i tana.
Me mana nogo gaqu tana vailabugi koluaqira na Pilistia,
mau gini gudato tana magemage.”
9?Niqu God, laka asei nomoa sauba ke adiau bâ i laona na verabau ara poliginia na baravatu kakai?
?Masei sauba ke tudumiau bâ i Edom?
10?Egua laka igoe o sove tanigami manana nomoa igami?
?Me laka tagara ko tau goto dulikolugira nimami alaala na malagai?
11Ko sangagami na tukapusiaqira gamami gala,
rongona nina sasanga na tinoni lê aia e tau lelê lia sa omea.
12Me ti vaga igoe God ko totu tabana kolugami igami, me sauba ke managamami;
rongona igoe nogo sauba ko tuliusigira igira gamami gala.
61Nina Nonginongi Kesa Tinoni Rongona God Ke Reitutugua
1!Niqu God ko rongomia niqu ngangaidato vanigo;
mo ko rongomi vatavia niqu nonginongi!
2!Au totu ao tania na veraqu, me ponopala sosongo na tobaqu,
mau soago igoe ko sangaau!
Ko adiau bâ kesa tana nauna i tana kau totu raviravi dou,
3rongona igoe nogo niqu reitutugu,
o susuliga mo sugutigira gaqu gala.
4Tamivaniau moa ma kau ba totu i laona nimu Vale Tabu tana mauriqu popono;
ma kau tsodoa na nauna raviravi dou i vavana na rapomu igoe.61:4 “na rapomu” Iani e kalengatsua na Bokisi na Taso e totu tana Nauna Tabu Putsikae i laona na Vale Tabu i Jerusalem. Mi kelana na Bokisi ia e totu ka nunuqira ruka na angelo. Aia nogo e vaga nina sasana na totukae God i barangengo.
5Igoe God o rongominogoa niqu veke au naua vanigo,
mo tusunogoa vaniau na omea vaga ara tamanina igira ara kukuni tanigo igoe.
6!Ko paboa na maurina na taovia tsapakae;
me ke mauri babâ ke oka me ke oka!
7Ko naua maia ke tagao saviliu i matamu igoe niqu God;
mo ko reitutugua tana nimu galuve vo oli ma nimu doulaka saviliu.
8Vaga ia, minau sauba kau lingena sailagi na tsonikaeamu,
kalina au sauvanigo pipi dani na omea inau au vekenogoa vanigo.
62Na Linge na Noruana God
1Au pitu saikesalia moa God laka aia ke maurisiau;
mi konina segeni moa aia au tsotsovata.
2Aia segeni moa e reitutuguau me maurisiau;
maia moa nogo e isutuguqu,
me utu goto kara tulisiau igira.
3?Sauba ke oka koegua sagata igamu kamu tsipu bâ i konina kesa
ma kamu tsoni pukalia,
vaga moa ti aia e kesa na bara tolatola lê?
4Migamu amu ngaoa moa laka kamu aditsunâ tania nina sasana totukae;
mamu gini mage moa na tsoniana na goko peropero.
Tana mangamui lê igamu amu soadouginia,
mi laona na tobamui amu vealaginia moa.
5Minau au pitua moa God ke sangaau,
rongona i konina nogo aia au vataraginia niqu amesi.
6Aia segenina moa e reitutuguau me maurisiau;
maia moa nogo e isutuguqu,
me utu goto kara tuliusiau igira.
7God segenina moa e maurisiau me molokaeau;
maia segenina moa niqu reitutugu susuliga;
maia nogo niqu mani toturavi.
8Igamu niqu tinoni kamu noru sailaginia moa God.
Katevulagia vania aia pipi na omea sui e ngoligamu,
rongona aia nogo nida mani totu raviravi.
9Na tinoni sui lakalaka ara vaga saikesa moa ti na guguvina tetelo lê moa na magomago;
igira sui tû tana lokina me tsau tana tetelona e tau lelê goto tugugira sa omea.
Molokaegira tana omea na tovomamava, ma gaqira mamava e tau goto tugua sa omea;
ara malamala lê liusia na malamalana kesa na guguvina tetelo na mamagona tinoni.
10Laka na vataraginiana nimui amesi tana tangopeke seko;
laka goto na amesiana kamu tamaniginia sa omea tana komi;
me atsa moa ti vaga ke pabo babâ moa na vangana nimui omea tatamani, migamu kamu laka saikesa na tsotsovata i koniqira.
11E danga kalina inau rongominogoa God e goko me tsarivaganana,
“Inau segeniqu nogo au tamanina na susuliga,
12ma niqu galuve vanigira na tinoni e vo oli.”
Eo, igoe segenimu moa Taovia o saupeluna vanigira pipi tinoni
taonia nina aqo dou aia e naugira.
63Nina Nonginongi Kesa e Silovia Na Morosiana God
1God igoe nogoria niqu God, minau e silovi sosongoliau na reiamu igoe.
Na koniqu popono e amesigo moa igoe;
ma na tidaoqu e gini marou tana rongomu,
vaga saikesa moa ti na kao mamatsa lê,
me tagara sa kô ke malobusia,
na tidaoqu e gini marou tana rongomu igoe.
2Ko tamivaniau ma kau ba reigo tana nimu Vale Tabu,
ko tamivaniau ma kau reilakana na susuligamu ma na mararamu.
3Na galuvemu vo oli e dou liusia bâ na mauri,
maia nogoria ti inau sauba kau gini tsonikaego sailagi.
4Sauba kau tau kuti na soadouamu tana mauriqu popono,
ma kau abedato vanigo na limaqu tana nonginongi.
5Na tidaoqu sauba ke masu vaga tana dani na kavomutsa,
me sauba kau gini mage na lingena vanigo na linge na tsonikaeamu.
6Mi kalina au tsaro i nigequ, mau padavisugo;
mi tana bongi popono inau au padago moa igoe,
7rongona igoe nogo o tau kuti na sangaaqu sailagi.
Minau au totu raviravi dou i konimu,
vaga na dalena kokoroko i vavana na rapona tinana,
mau linge tana magemage.
8Inau au tatango kakai i konimu,
ma na limamu igoe e ravisiau.
9Migira ara tovoa laka kara labumatesiau inau,
sauba kara ba tsuna i laona na barangengo na mate.
10Sauba kara mate tana vailabu loki
migira na pai atsi kara gania na koniqira.
11Ma na taovia tsapakae sauba ke gini magemage
rongona igoe nogo God o sangâ te e gini managana.
Migira sui ara naua niqira veke tana asana God sauba kara tsonikaea aia,
ma na mangaqira igira na vanga peropero sauba God ke vongogira saikesa.
64Nina Nonginongi Kesa Tinoni E Nongia God Ke Reitutugua
1!Niqu God ko rongomia niqu nonginongi
inau au totu i laona na rota loki!
!Au matagunigira gaqu gala,
mau nongigo ko maurisiau ma kau tau mate!
2Ko reitutuguau dou ma kau mauri tania niqira togigokosai ara naua igira na tinoni vanga tsutsukibo,
me tanigira goto na alaala na tinoni seko.
3Igira ara asa vavangâ na lapiqira vaga moa ti na isi;
mara matania niqira tsaqina goko na keliseko vaga moa ti na pipili.
4Mara taopoi mara vanasigira igira e goto niqira sasaga,
ara tau goto matagu, mara tavongani vanasigira lê.
5Ara gini vaimalagaisigi segeniqira niqira vorogokosai na nauseko;
mara gini togigokona laka iava tana igira kara molokapusia niqira taviti.
Mara tsarivaganana, “?Masei nomoa sauba ke reigita?”
6Ara vorogokona sai laka kara naua na omea seko mara tsaria,
“Igita a botsangia na nauana kesa na tsutsukibo loki sosongo.”
Eo, na papada e totu popoi i laona na tobana tinoni e kakai sosongo nomoa na padagadoviana.
7Ma God sauba aia ke vanasiginigira nina pipili,
me sauba kara tavongani boka tsaku lê.
8Sauba nomoa ke matesiligigira matena niqira tsaqina gokoseko vaga ara tsonia;
migira sui kara reigira sauba kara lengulengu lovaqira vanigira.
9Migira sui lakalaka na tinoni sauba kara matagu loki,
sauba kara padavisua na omea loki God e naugira,
ma kara gini turupatuna bamai.
10Migira sui na tinoni e goto niqira sasaga sauba kara gini magemage rago
tana rongona na omea loki aia na Taovia e naugira.
Me sauba kara ba totu raviravi dou i konina aia;
igira sui na tinoni dou sauba kara tsonikaea.
65Na Linge na Tsonikaeana Ma na Soadouana God
1Igoe God e ulagamami sosongo nomoa ti kami tsonikaego i Sion,
ma kami manaligira na veke ami naua vanigo,
2rongona igoe o rongomigira manana nimami nonginongi.
Igira na tinoni sui sauba kara labamai i matamu igoe,
3tana rongona niqira sasi ara tsukia.
Ma nimami sasi igami ara bingi sekoligami,
migoe o padalegira vanigami moa.
4Kara mage igira igoe o viligira nogo;
igira igoe o adigira kara totu i laona nimu Vale Tabu.
Sauba igami kami gini mage loki sosongo
tana rongoqira na omea dou sosongo igoe o tusuvanigami i laona na valemu,
i tana nimu Vale Tabu.
5Igoe o rongomia nimami nonginongi mo sangagami te ami gini tangomana.
God igoe nogo o maurisigami.
Migira na toga pipi tana nauna sui polia na barangengo popono,
me savu taligu tabana na tasi ao ara norugo sui moa igoe.
6Tana susuligamu nogo igoe o turuvaginigira na vungavunga tana sasaqira,
mo saulabatiginia gamu mana loki sosongo.
7Igoe nogo o beatasia na kukutuna na tasi loki
ma na leleona na kararana na panu;
ma niqira galagugû na tinoni.
8Na barangengo popono e kadangaginia na omea loki sosongo vaga igoe o naugira.
Migira na tinoni sui e tû kesa tabana na barangengo me bâ tsau kesa tabana,
ara reigira mara gudato tana magemage.
9God igoe o aragodou sosongolia na kao mo molomaia na usa ke malobusia;
mo naua me gini lia na kao lakataga.
Igoe o dangaliginigira na vuravura na kô;
mo tusuvanigami nogo na omea tsukatsuka sui kami tsukâ tana kao.
Miani nogo e vaga nimu aqo igoe Taovia:
10Igoe o molomaia na usa me tumulia na tavugi tana uta,
me malobusiginia na kao,
kara gini kutsu ma kara dato dou na volana vaolu na omea tsukatsuka.
11!Tana nimu galuve loki igoe o saua vanigami na mutsa lakaga dou sosongo!
Pipi sui tana nauna tana igoe o liu ara totutovu na omea dou sui.
12Na sipi ma na buluka ara mutsamutsa tana e dato dou na buruburu,
ma na uta danga ara viri dato dou tana tetena mara gini magemage loki.
13Na sipi ara dangalia na poi popono;
mi tana qouna e tovusi poponoa na uta na uiti.
Eo, igira na omea sui lakalaka ara gudato mara lilinge tana magemage.
66Mi tana qouna e tovusi poponoa na uta na uiti. (65:13)
Na Linge na Tsonikaeana Ma na Soadouana God
1!Igamu sui na toga kamu gudato vania God tana magemage!
2!Lingena na tsonikaeana na asana tabu;
katevulagia gana tangirongo!
3Tsarivania God, “!Ara loki sosongo manana na omea sui igoe o naugira!
Eo, e loki sosongo nomoa na susuligamu,
aia na rongona ti igira gamu gala ara taotsuporu i matamu tana matagu.
4Igira sui na tinoni tana barangengo popono ara samasama vanigo;
ara lingena na tsonikaeamu igoe,
mara lingena na tsonikaeana na asamu.”
5Mai ma kamu reigira na omea sui God e naugira,
nina aqo loki aia e naugira i laoqira na tinoni.
6Aia e olia na mao me lia na kao mamatsa;
migira na mumuada ara liusavu lê tana mamatsana.
Mi tana ti igita a gini magemage mateqira na omea loki vaga God e naugira.
7Aia e tagao kalavata saviliu ginia na susuligana tsapakae,
me morosigira dou na omea sui ara naua igira na puku sui.
Vaga ia ma kara laka na kaekae igira ara sove na rongomangana.
8Tsonikaea nida God igamu na puku na tinoni sui;
me ke tangilaba i malena na tatangina nimui tsonikaeana.
9Aia nogo e mologita ka mauri
me tau tamia vanigita ka puka lê.
10Igoe God o tovolegami nogo;
vaga na siliva kalina ara kukia tana lake rongona ke gini male,
aia goto e vaga kalina igoe o tovolegami igami.
11O tamivanigami kami sogo i laona na taviti,
mo molokaea na kalagai mamava tana kokovemami.
12Mo tû mo tamivanigira gamami gala kara tsogorigami lê;
migami ami liu i laona na lake ma na obo loki.
Bâ, mi kalina eni igoe nogo o adigami bâ kesa tana nauna raviravi.
13Me sauba inau kau adigira bâ na savori-kodokodo i laona na valemu;
ma kau savori vanigo na omea inau au vekenogoa vanigo.
14Sauba kau sauvanigo na omea au tsarinogoa laka kau saua vanigo
kalina au totu i laona na rota loki.
15Sauba kau savori vanigo na sipi agana na mani kodoana tana belatabu;
ma kau gini kodoputsa na buluka mane ma na nanigoti,
ma na punguna na kodoputsa ia sauba ke vulosudato tana masaoka.
16Igamu sui na tinoni amu kukuni tania God kamu mai ma kamu rorongo,
minau sauba kau tsarivulagia vanigamu na omea sui aia e naunogoa vaniau inau.
17Au ngangaidato vania laka aia ke sangaau;
mau lingena na tsonikaeana.
18Me ti vaga inau kau tau koevulagigira niqu sasi,
ma na Taovia e utu lelê goto ke rongomiau.
19Ma God e rongomiau manana nomoa inau;
maia e rongomi vatavia niqu nonginongi.
20Au tsonikaea God rongona aia e tau sove na rongomiana niqu nonginongi,
me tau goto tongo vaniau nina galuve vo oli.
67Kesa na Linge na Soadouana God
1Igoe God ko galuvegami mo ko vangalaka vanigami,
mi tana nimu galuve ko irovigami,
2mi tana nogo ti igira sui tana barangengo popono kara donaginia na omea o kilia igoe;
migira sui na puku kara donaginia laka o ngaoa manana na maurisiaqira.
3!Na tinoni sui kara tsonikaego igoe nimami God;
igira sui lakalaka na tinoni kara tsonikaego!
4Eo, igira sui na puku kara magemage ma kara lilinge,
rongona igoe o tagaovigira na tinoni sui tana gotolaka,
mo mataligira pipi na mamatana tinoni tana barangengo popono.
5!Na tinoni sui kara tsonikaego igoe nimami God;
igira sui lakalaka na tinoni kara tsonikaego!
6E manana sosongo laka God nida God e vangalaka vanigita;
te e gini lakaga dou na mutsa i laona nida uta.
7God e vangalaka manana vanigita;
me dou ti igira na tinoni sui tsau bâ tana vovosana na barangengo kara kukuni tania aia.
68Kesa na Linge na Tsonikaeana God Rongona Aia e Mataligira Dou Nina Tinoni
1God e tavurake me sarangasigira gana gala.
Migira sui ara reisavia aia ara viri tsogoligi sui.
2Aia e tû me tsialigigira lê
vaga moa kalina na guguri e lovosaginilea na punguna lake,
migira na vanga tsutsukibo ara nanga tsaku lê i matana God,
vaga moa na kadele e rono lê kalina e parâ na lake.
3Igira na tinoni e gotodou nogo niqira sasaga ara gini magemage na tû i matana God;
me dou na tobaqira mara gudato tana magemage.
4Linge vania God, lingena na tsonikaeana na asana;
vangaraua na sautu vania aia e totukae i kelana na parako.
!Na Taovia nogo na asana, migamu kamu gini mage na tû i matana!
5God aia e totu i laona nina Vale Tabu,
me aragogira na baka tinamate me reitutugugira na daki tinamate.
6Aia e tusua na vale kara tamanina igira ara totu segeniqira,
me nusigira ara totu sosori me mologira kara totu magemage tana kao lakataga.
Migira ara sove tania God, sauba kara totu saviliu moa tana kaomate.
7Kalina igoe God o idavanigira nimu toga,
mo raqâ na alaala mo liu taligu tana kaomate,
8e gini kakanu popono na barangengo, ma na masaoka e tumuli tsunamai na usa,
rongona nogo e mai na God ni Sinai, na God ni Israel.
9Igoe nogo Taovia o moloa ke tumutsuna na usa dou,
mo gini malobusitugua nimu kao pura.
10Mi tana nauna nogo ia migira nimu tinoni ara logoa na veraqira;
mi tana nimu galuve loki igoe o kutigira na tinoni ara tau tamanina sa omea.
11Ma na Taovia e saua nina ketsa vanigira,
migira danga na daki ara adibamaia na turupatuna mara tsaria,
12“!Igira na taovia tsapakae ma niqira alaala na mane malagai ara viri tsogoligi sui!”
Migira na daki ara totuvisu moa i vera ara tuvarivotagira na omea sui na mane ara laua tana vailabu:
13igira visana na nunuqira na kulukulu ara baro popono ginia na siliva,
ma na rapoqira e pilapila tana qolumila laka.
?Megua vaga ti visana vidamui igamu amu tototu lê tana baraqira na sipi tana tagu popono na vailabu?
14Mi kalina aia na God Susuliga Sosongo e takuvi rasavaginigira na taovia tsapakae tana Vungavunga Salmon,
maia e moloa na snou68:14 “snou” Reia tana 51.7. ke tsuna i tana.
15!Mi Basan aia e kesa tuqana na vungavunga loki
me tamanina danga sosongo na tsotsokina i gotu!
16?Ma na rongona gua ti tû i kelana na tsotsokimu
igoe o reipeâ na vungavunga aia God e vilinogoa laka ke totu i tana?
!Eo, na Taovia nogo sauba ke totu saviliu i tana!
17Na Taovia e mai nogo talu i Sinai,
kolugira nina malagai ara totu i laona na toga ma na toga niqira terê susuliga gana na vailabu,
me ba sage i laona na nauna tabu.
18Maia e dato bâ i gotu vasau,
me adigira kolua danga na tinoni aia e laugira tana vailabu;
me adigira goto danga na vangalaka igira nogo na tinoni ara sove tania ara sauvania.
Eo, na Taovia God sauba ke totu i tana.
19Tsonikaea na Taovia,
aia e kalagaigira gada kalagai mamava na dani ma na dani,
aia nogo nida God e maurisigita.
20Nida God igita aia na God e maurisigita;
Maia nogo na Taovia nida Taovia,
aia e laumaurisigita nogo tania na mate.
21Me sauba manana nomoa God ke tû me ke resea na lovaqira gana gala,
migira sui goto ara tau kuti na nauana babâ moa niqira sasaga tabaru.
22Na Taovia e tsarinogoa, “Sauba inau nogo kau adivisugira gamui gala tania i Basan;
ma kau adivisugira tania na mao rodo na kema,
23mi tana ti igamu kamu gini tsotso i laona na gabuqira igira,
ma nimui pai kara lopilopia na gabuqira poi kalina kara masu tania.”
24Niqu God ma niqu taovia tsapakae, igira na tinoni sui ara reia kalina igoe o tangomana vaga ia,
mo visumai tana magemage loki,
mo sage bâ i laona nimu Vale Tabu.
25Igira na alaala na linge ara idaida i nago,
migira ara uvi riga mara taigira na omea tatangi ara maimai i muri,
mi levuga buto igira na baka daki ara rerekesia niqira tsetsê.
26Migira sui ara gugû mara tsaria,
“!Tsonikaea God i laona niqira saikolu nina tinoni;
tsonikaea na Taovia igamu sui na kukuana a Jakob!”
27Ara idaida igira na puka konina a Benjamin, aia na puku tetelo bâ i laoqira,
mara tsari igira na ida tana puku konina a Juda kolugira niqira alaala,
mara tsarimai igira na ida tana puku ka koniqira a Sebulun ma Naptali.
28Niqu God, ko saulabatia na susuligamu,
aia na susuligamu igoe o gini aqo tana suivisuamami igami.
29I laona nogo nimu Vale Tabu i Jerusalem
igira na taovia tsapakae sui ara adibâ vanigo niqira vangalaka.
30Taovia ko tû mo ko taimataqira na Ejipt, igira na omea tuavati atsi ara mauri i laona na gaugau;
ko taimataqira na puku tavosi sui, igira na alaala na buluka mane kolu daleqira,
poi tsau kalina igira sui kara mai tao tsuporu i matamu ma kara tusulea vanigo niqira siliva.
!Sarangasigira igira na tinoni ara padangaoa moa na nauana na vailabu loki!
31Igira na taovia tsapakae ni Ejipt sauba kara mologira visana na tinoni loki na tuguqira
ma kara bâ i Jerusalem;
migira na Sudan sauba kara abedatoa na limaqira tana nonginongi vaniana God.
32Linge vania God igamu na vera loki sui tana barangengo,
kamu lingena na tsonikaeana na Taovia,
33vania aia e dona ke liu i kelana na masaoka,
tana masaoka ni sau nogo.
Rongomia aia kalina e gû me tangi loki sosongo na liona.
34Katevulagia na susuligana loki God;
aia e tagaovi kaputigira igira na Israel,
ma na susuligana loki e totu tana masaoka.
35!E kukuniga sosongo niqira God na Israel
kalina aia e talumai i laona nina Vale Tabu!
Maia e tusua na susuligana loki vanigira nina toga sui.
!Tsonikaea God!
69Nina Ngangaidato Kesa Tinoni Rongona God Ke Sangâ
1!Niqu God ko savokaeau!
Na mao e vosadato mai nogo i lioqu.
2Au lulumi nogo i laona na boko mate,
i tana e tagara nogo sa kao kakai;
mau totu nogo i laona na mao rodo,
me varangi sosongo kau lulumi tana panu loki.
3Inau au kolae sosongo nogo na sosoa,
me kara nogo na lioqu.
E kade nogo na mataqu,
kalina au pipitugo igoe ko sangaau.
4Ara danga liusia bâ na kolina na ivuqu igira ara reisaviau lê moa tagara sa rongona.
Migira gaqu gala ara tsonia danga na gokopero tana rongoqu;
ara susuliga sosongo igira mara area na labumatesiaqu inau.
Ara tû mara raiau kau tusuvisua vanigira na omea au tau komia.
5Niqu God, igira sui niqu sasi ara tau goto popoi tanigo;
migoe o dona nogo laka inau na tinoni bubulega lê moa.
6!Laka na tamivaniaqu kau paluvangamaqira igira ara norugo dou igoe,
igoe Taovia God Susuliga Sosongo!
!Laka goto na tamivaniaqu kau naua ma kara gini vangama lê igira ara samasama vanigo igoe,
igoe na God ni Israel!
7Tana rongomu nogo igoe te ara gini goko peapea vaniau inau,
mau gini vangamâ sosongo.
8Mau lia vaga moa ti na tinoni labavô i laoqira na tasiqu,
mau mala tinoni ni vera tavosi i laomami igami kesa vale.
9Ma na padalokiana na Valemu Tabu igoe niqu God,
e iru nomoa i laoqu vaga saikesa nogo na lake;
ma na goko peapea vaga ara peaginigo igira,
ara gadovisumai i koniqu inau.
10Inau au tsoni vitoaqu segeni mau molotsunali segeniqu i matamu igoe,
migira na tinoni ara peaau lê moa.
11Au sagelia na polo na roku,
migira ara kiataginiau moa.
12Ara tû mara vaitsari gaqu bamai tana sautu loki,
migira goto na tinoni ara inubule ara tavongani tê linge tana rongoqu inau.
13Minau moa Taovia sauba kau nonginongi vanigo babâ moa,
migoe niqu God ko tuguvisua niqu nonginongi kalina moa igoe ko pedea.
Tana nimu galuve loki au ngasugo ko rongomia niqu nonginongi,
rongona igoe o mana saviliu mo vekenogoa laka sauba ko maurisiau.
14Ko savokaeau ma kau tau lulumi tana boko mate;
laumaurisiau tania na limaqira gaqu gala,
me tania na maona na kô loki.
15Ko laka na tamiana ke tave tsavuau na obo loki;
mo ko laka na tamiana kau lulumi tana mao rodo
se kau tsoku i laona na qilu.
16!Rongomiau Taovia rongona igoe o dou sosongo ma nimu galuve e vo oli!
!Tana nimu galuve loki ko pilovisumai i koniqu inau!
17Laka na taopoi taniaqu inau nimu maneaqo.
!Au totu saikesa kiki i laona na rota loki
ko rongomiau kalina ia!
18Ko mai i koniqu mo ko maurisiau;
laumaurisiau tanigira gaqu gala.
19Igoe o dona nogo niqira gokopea ara nauvaniau,
ara paluvangamaqu mara tau kukuni taniau;
mo donaginigira pipi sui gaqu gala.
20Niqira gokopea ara sekoliau pitsu
me gini ponopala saikesa na tobaqu.
Au amesia laka ke kesa ke galuveau, me tagara ke kesa,
me ke kesa ke vereau, mau tau goto tsodoa ke kesa.
21Mi kalina au vitoa, migira ara palaginiau na tabatu;
kalina au marou, mara sauvaniau na ko vavai.
22Eo, migoe ko naua ma niqira mutsakolu ke sekoligira lê;
mi kalina ti kara gania na turina na mutsa ara gini kodoputsa,
me ke lia nogo gaqira taviti.
23!Ko dokolia na mataqira ma kara koko sui!
!Ko naua me ke viri maluku sui na gotuqira!
24Na koremu loki ke poda laba vanigira;
ma nimu tobamomosa ke takuvigira.
25Ma kara totu mangu lê na nauna i tana ara totu niqira mane malagai;
me ke tau goto totuvisu mamauri ke kesa i laona niqira valepolo.
26Ara rotasigira igira igoe o kedegira nogo;
mara gini gogoko tana rongona niqira rota igira igoe nogo o bokaligira.
27Ko maretsunâ na turupatuna pipi sui lakalaka niqira sasi;
mo ko laka na tamivaniaqira kara sangapata na totu i laona na veramu igoe.
28Ko veoligia na soaqira tania na papi na mauri;
mo ko laka goto na tamiana kara marea na soaqira kolua na soaqira igira nimu tinoni igoe.
29Inau au totu moa i laona na rota me ponopala saikesa na tobaqu.
!Migoe niqu God ko savokaeau mo ko maurisiau!
30Minau sauba kau linge ma kau tsonikaea niqu God;
sauba kau katevulagia gana tangirongo, ma kau soadoua sailagi.
31Na omea vaga ia e dou sosongo bâ i matana God liusia na savori vaniana na buluka,
liusia bâ na gini savori-kodoputsa vaniana na buluka mane ganoga nogo.
32Mi kalina igira na tinoni ara bingi sekoligira kara reia e laba vaga ia,
me sauba kara gini magemage loki sosongo.
Migira goto ara samasama vania God sauba ke gini pidi na tobaqira.
33Rongona na Taovia e rongomi vatavigira igira ara kilia na sasanga,
me utu ke padalegira nina tinoni ara totu moa i laona na vale sosori.
34Tsonikaea God igamu sui na omea mamauri amu totu i baragata mi barangengo mi laona na tasi.
35Sauba God ke maurisia nomoa na Jerusalem,
me ke logovisugira tugua na vera sui tana Juda.
Migira nina tinoni segeni nogo aia sauba kara mauri i tana ma kara tamanina na kao;
36migira na kukuaqira nina tinoni aqo sauba kara tangolidatoa babâ na kao ia,
migira sui ara padalokia God sauba kara mauri dou i tana.
70Nina Nonginongi Kesa Tinoni Rongona God Ke Sangâ
1!Niqu God ko maurisiau!
!Taovia ko sangaau kalina ia!
2Ko utusigira igira ara tovoa laka kara labumatesiau inau,
mo ko naua me ke ponopala lê na tobaqira.
Ko naua migira sui ara gini mage rongona inau au totu moa tana rota
kara sugavisu sui me ke paluvangamaqira lê.
3Migira ara totu matengana na gilu gaqu inau,
kara gini vangamâ loki kalina ara reia laka e tau managaqira.
4Migira sui ara mai i konimu igoe,
ke dou na tobaqira ma kara gini magemage.
Migira sui ara soadougo rongona igoe o maurisigira,
kara tau kuti na tsariana, “!Nida God aia e loki sosongo nomoa!”
5Inau au maluku lê mau tau tamanina sa omea;
niqu God ko mai tsaku.
!Taovia igoe nogo niqu vagamauri,
ko mai tsaku mo ko sangaau!
71Nina Nonginongi Kesa na Tuqatuqa
1Taovia, inau au gini mai rongona kau totu raviravi dou i konimu;
ko laka saikesa na tamiana kara tuliusiau lê.
2Ko sangaau mo ko tangotuguqu, rongona igoe nogo o gotolaka saikesa.
!Ko rongomi vataviau mo ko maurisiau!
3Ko didisiau, mo ko lia niqu mani toturavi
i tana kau bâ totu raviravi,
rongona igoe nogo o ravisiau mo isutuguqu.
4Niqu God ko laumaurisiau tania na limaqira na tinoni vanga tsutsukibo,
mi tania na susuligaqira na tinoni sasi migira na vanga sekoli tinoni.
5Taovia God i konimu nogo au vataraginia niqu amesi;
tû kalina au tinoni vaolu minau au molo kalavatavia niqu vainoru i konimu igoe.
6Tana mauriqu popono au vataragi i konimu segeni moa igoe;
migoe nogo o reitutuguau tû tana dani au botsa.
Minau sauba kau tsonikaego sailagi.
7Danga na tinoni ara morosia na omea ara laba vaniau inau,
mi tana nogo igira ara gini dona laka igoe nogo o susuliga mo ravisiau.
8Tana dani popono inau au tsonikaego igoe
mau katevulagia gamu loki tsapakae.
9Ko laka saikesa na tsonileaqu kalina eni rongona inau au tuqatuqa sosongo nogo;
mo ko laka goto na vano taniaqu kalina eni rongona inau au maluku sosongo nogo.
10Igira gaqu gala ara ngaoa laka kara labumatesiau;
mara vorogokona sai na sekoliaqu.
11Ara tû mara tsarivaganana, “Kamu reia bâ ia, God e vanoligi taninogoa.
Ida gita ma ka takuvia ma ka tangolia.
E tagara nogo ke kesa ke laumaurisia tanigita.”
12!Ko laka goto na totu ao sosongo taniau vaganana igoe niqu God;
niqu God ko mai tsakutsaku mo ko sangaau!
13Ko naua migira ara ngaoa laka kara sugutiau inau
ke tau nogo managaqira ma kara mate lê sui.
Migira ara tovoa na sekoliaqu,
igoe ko naua ma kara seseada me ke paluvangamaqira lê.
14I konimu segeni moa igoe, inau sauba kau vataraginia niqu amesi;
sauba kau tsonikaego babâ moa igoe.
15Me sauba kau tau kuti na gini turupatuna tana rongona nimu doulaka saviliu;
mi tana dani popono sauba kau gini goko moa na douna nimu sasaga igoe o maurisiginiau,
atsa moa ti e utu vaniau moa na padagadoviana.
16Sauba kau tsonikaea na susuligamu igoe Taovia God;
sauba kau katevulagia nimu doulaka, nimu segeni igoe.
17Igoe nogo o sasaniau tû kalina au tinoni vaolu,
minau au tau goto mololea na tsarivulagiana babâ moa
na rongogira pipi nimu aqo dou sosongo igoe o naugira.
18!Mi kalina eni inau au tuqatuqa pitsu nogo, me senge sui nogo na ivuqu,
migoe niqu God ko laka na vano taniaqu!
Ko totu kalavata koluau kalina inau au katevulagia na susuligamu ma na lokimu
vanigira na vatavata sui kara botsamai i muri.
19Nimu gotolaka igoe God e dato e suâ na masaoka.
Igoe nogo o naugira danga na omea loki sosongo bâ;
me tagara goto kesa ke vaga igoe.
20Migoe nogo o molomaia vaniau danga na rota ma na omea seko,
migoe goto nogo sauba ko aragovisuau tugua,
me sauba ko didia taniau na vano tana qilu.
21Igoe sauba ko paboa niqu tangirongo me ke loki babâ,
me sauba ko vereau tugua.
22Inau sauba manana kau tsonikaego tana taiana vanigo niqu itai tatangi.
Kesa na vatana niqira itai tatangi igira na Israel. (71:22)
Sauba kau tsonikaea nimu doulaka tsapakae igoe niqu God.
Tana niqu itai tatangi nogo inau, sauba kau gini linge vanigo igoe
na God ni Israel igoe o tabu loki manana.
23Inau sauba kau guloki tana magemage kalina kau taia vanigo niqu itai tatangi;
mi tana tobaqu popono sauba kau lilinge vanigo,
rongona igoe nogo o laumaurisiau.
24Eo, tana dani popono inau sauba kau gini turupatuna tana rongona nimu gotolaka tsapakae igoe,
rongona igira ara tovoa laka kara sekoliau inau
e tau lelê managaqira me paluvangamaqira lê.
72Na Nongiana God Ke Gini Dou Nina Aqo Aia na Taovia Tsapakae
1God ko sasania na taovia tsapakae me ke gini dona na pedegoto;
ko patakoluginia nimu pedegoto segeni nogo igoe,
2rongona aia ke pede gotosiginigira nimu tinoni,
me ke tagaovidouginigira igira ara bingi sekoligira.
3Ko naua me ke peluga sosongo na vuana niqira aqo tana vera ia,
ma kara vatsangia na douna nimu gotolaka.
4Ko sangâ na taovia tsapakae me ke isutuguqira igira ara tau tamanina sa omea;
me ke sangagira igira ara kilia na sasanga,
me ke tuliusigira igira ara bingi sekoligira.
5Migira nimu tinoni igoe kara samasama vanigo tana tagu popono kalina e sina na aso
me marara na vula tana tagu tagara ke tau sui.
6Ko sangâ me ke dou nina sasaga na taovia tsapakae,
ke dou vaga moa ti na usa e tumutsuna tana poi popono
me gini malobu dou na kao.
7Tana maurina aia, ke gini dato varimauri na pedegoto ma na rago
poi ke rodo saikesa na mararana na vula.
8Ke tagaovidougira nina tinoni ke tû kesa tabana na tasi me ke tsau bâ kesa tabana,
ke tû tana Kô Loki Euprates me ke tsau bâ tana vovosana na barangengo.
9Migira na tinoni ara totu tana kaomate sauba kara tsuporu tsuna i matana aia;
migira gana gala sauba kara puka kovoragi tsuna tana kao.
10Migira na taovia tsapakae ni Spain mi tasi taligu,
sauba kara saua vania niqira vangalaka;
migira na taovia tsapakae ni Arabia mi Etiopia sauba kara adimai vania niqira sausau.
11Eo, igira sui lakalaka na taovia tsapakae sauba kara ba tsuporu i matana;
migira na tinoni sui sauba kara aqo vania.
12Aia e laumaurisigira na tinoni ara tau tamanina sa omea kalina igira ara ngangaidato vania,
migira goto ara kilia na sasanga me tagara ke kesa ke sangagira.
13E galuvegira igira ara maluku lê mara totu sekona lê;
me aragoa niqira mauri igira e tagara kesa ke sangagira.
14E laumaurisigira tania na limaqira igira ara bingi sekoligira mara rotasigira;
rongona aia e padaloki sosongolia na mauriqira igira.
15!Ke mauri oka na taovia tsapakae!
!Kara tusuvania na qolumila e talumai i Arabia;
ma kara nongia God vania pipi kalina,
ma nina vangalaka God ke totu saviliu i konina!
16Mi tana nina kao nogo ia kara dato danga sosongo na sila,
migira na vungavunga ke tsavugira popono na omea tsukatsuka,
ma kara lakaga dou vaga tana kao lakataga i Lebanon.
Migira na tinoni kara viri danga pipi tana vera,
vaga moa na buruburu e dangalia na lelegai popono.
17Kara tsonikaea na asana na taovia tsapakae;
ma kara tau goto padalea na dani ma na dani;
ma gana tangirongo ia ke totu kalavata vaga moa na aso.
Migira na tinoni pipi tana vera sui kara tsonikaea
ma kara nongia God ke vangalaka vanigira
vaga nogo aia e vangalaka vania na taovia tsapakae.
18!Tsonikaea na Taovia na God ni Israel!
Aia segeni moa e naugira na omea dou sui lakalaka.
19!Tsonikaea na asana tabu na dani ma na dani!
Ma na mararana loki ke dangali poponoa na barangengo.
!Amen, Amen!
20Iani nogo na susuina nina nonginongi a David na dalena a Jese.
73PAPI TOLU
Nina Pedegoto God
1God aia e dou manana vanigira nomoa na Israel,
me vanigira goto igira e male na tobaqira.
2Inau, e varangi nogo kau tubulagi ma kau puka;
me varangi nogo ke nangaligi lê niqu tutuni.
3Rongona inau au masugu vanigira na tinoni kaekae
kalina au reia e vano dou pipi na omea vanigira na tinoni vanga tsutsukibo.
4Igira ara tau goto vatsangia na sosongo;
ara susuliga mara mauri dou.
5Ara tau vatsangia na rota vaga e gadovigira na tinoni tavosi;
me tau goto laba vanigira na omea seko vaga e laba vanigira visana.
6Me vaga ia, migira ara sagelia na kaekae vaga moa ti gaqira liolio,
mara gini tsatsavu na momosatoba vaga moa ti na poloqira;
7pipi na vata sui na nauseko e rutsumai talu tana tobaqira,
mara tau kuti na lave sautuna na aqosiana na tsutsukibo.
8Ara kiataginigira na tinoni tavosi mara goko seko vanigira;
ara kaekae mara vorogokona sailagi na bingi sekoliaqira na tinoni tavosi.
9Ara tsonia na gokoseko e kalea God i baragata;
mara padaloki segeniqira, mara raigira na tinoni sui tana barangengo popono kara rongomangaqira.
10Ara nauvaganana ia, migira goto nina tinoni God ara tû mara pilo bâ i koniqira,
mara tutunina tsaku na omea sui moa igira ara tsaria.
11Mara tsarivaganana, “Sauba God e utu ke donaginia;
aia e totu i Gotu Vasau e utu ke tsodovulagia.”
12Aia saikesa nogo e vaga niqira sasaga igira na vanga tsutsukibo.
Ara tamaninogoa danga niqira omea, mara tau kuti na adipapabona.
13Inau au parovatavi segeniqu mau totu male,
mau tau goto tsukia sa sasi.
?Ma nagua e peluau?
14God igoe nogo o naua mau gini rota loki tana dani popono;
me pipi tana matsaraka igoe o kedeau.
15Me ti vaga inau kau tsonia na goko kaekae vaga igira ara tsonia,
mi tana ma niqu sasaga ke tau nogo ulagana nina sasaga kesa nimu tinoni igoe.
16Au tovokakaia na padagadoviana na omea iani,
mau tau nogo tangomana, e kakai sosongo vaniau,
17poi tsau kalina au ba sage i laona nimu Vale Tabu igoe.
Mi tana moa ti inau au padagadovia na omea vaga sauba ke laba vanigira na tinoni vanga tsutsukibo.
18!Eo, igoe sauba ko tû mo ko mologira tana nauna e madali sosongo,
mo ko naua ma kara puka ma kara mate!
19Sauba ke gadovigira na mate seko,
ma kara nanga tsaku lê.
20Igira ara vaga moa na bolebole e nanga tsaku lê tana matsaraka;
mi kalina igoe Taovia o aligiri na tû, migira sui ara viri nangaligi lê.
21Mi kalina e vavai sosongo na tobaqu
mara seko sui niqu vavatsangi,
22mi tana inau au bule mau vaga moa ti na omea tuavati e tau tamani sasagana;
mau tau goto padagadovigo igoe.
23Minau au totu varangisigo sailagi moa igoe,
ma na limamu o tangoliginiau.
24Ma nimu totosasaga o tudumiginiau tana sautu goto,
mi tana susuina, migoe sauba ko adiau bâ i konimu ma kau totu kolugo tana mararamu i baragata.
25?Masei goto kau norua i baragata ti ke tagara igoe?
?Me ti kau totu kolugo nogo igoe, ma nagua goto kau reingaoa tana barangengo?
26Atsa moa ti kaira na koniqu ma na tidaoqu kara ka tau nogo susuliga,
migoe nogo God o lia na susuligaqu;
migoe saikesa moa au kiligo.
27Igira ara piloligi tanigo igoe, sauba manana kara nanga lê sui.
Migoe sauba ko matesigira sui igira ara tau totu kakai i konimu.
28!Minau moa e dou sosongo bâ vaniau na totu varangisiamu igoe niqu God,
ma na totu raviravi dou i konimu igoe niqu Taovia ma niqu God,
ma na katevulagiana na omea dou sui igoe o naugira!
74Na Nonginongi Tana Tagu Ara Rota Loki Igira na Israel
1?God rongona gua ti igoe o piloligi tanigami vaga ia?
?Egua igoe, laka sauba ko kore sailagi vanigira moa nimu tinoni?
2Ko padatugugira nimu tinoni, igira igoe nogo o viligira i sau,
igira igoe segenimu o suivisugira tania na totu tseka kara gini lia nimu puku segeni.
Mo ko padatugugotoa na Vungavunga Sion i tana igoe o totu i sau.
3Liu bâ i tana, mo ko reigira na omea sui ara toroutsa sui nogo;
igira nogo gamami gala ara sekoligira sui lakalaka na omea levolevo i laona na Vale Tabu.
4Migira gamu gala ara viri gudato i laona nimu Vale Tabu;
mara turuvaginia niqira pulaqe i tana vaga na papadana laka e managaqira.
5Ara kavigira sui na tuguruna na valemu
vaga moa ti ara kavia na gai lê.
6Niqira rarati ma niqira molo
ara taitapaliginigira sui na pava damadama.
7Mara tungigotoa nimu Vale Tabu;
mara tangopekea na nauna i tana igira nimu tinoni ara samasama vanigo.
8Mara ngaogotoa kara tsogori rapasigami ma kami rapa saikesa;
mara tungigira pipi sui na peo tabu ara totu i laona na veramami.
9Me tau goto totuvisu kesa na papadana laka igami ami nimu tinoni igoe;
me tagara goto sa propete ke totuvisu,
me tau goto dona kesa ke ngisa ti ke sui na laba na omea vaga ia.
10?God, sauba ke oka koegua igira gamami gala kara kiataginigo igoe?
?Se laka kara totu matengana sailagi moa na soa sekoliana na asamu igoe?
11?Megua igoe ti o sove na sangaamami igami?
?Rongona gua ti o bunivisua na limamu?
12Migoe nogo God o taovia tsapakae vanigami tû mai nogo tana tuturigana tsotsodo,
mo sogogamami nogo danga sosongo kalina.
13Na limamu susuliga igoe o sarovotaginia na tasi
mo tapalia na lovaqira igira na tuqana na omea mamauri ara totu i laona na tasi;
14mo tairutugira na lovana Levaitan, aia na tuqana vigo na vua
ma na konina o palaginigira na omea tuavati ara totu i laona na goana atsi.
15Igoe nogo o aqosigira na ko vuravura ma na ko tsatsali;
migoe o korasigira mara mamatsa lê na ko loki.
16O aqosia na dani ma na bongi;
mo molo kalavatavikaira na aso ma na vula tana ka sasaqira;
17migoe o molovania tana ke vosa na barangengo;
mo moloa na taguna na bisi ma na taguna na papara.
18Mo ko padatugugotoa Taovia laka igira gamu gala ara totu matengana moa na kiataginiamu lê,
igira ara tau tutunimu, mara peago moa.
19Migami nimu tinoni ami tau tangomana kami nausegenia sa omea.
!Migoe ko laka mololegami tana limaqira gamami gala;
laka goto padalegami igami nimu tinoni igira ara rotasigami sosongo!
20Padatugua na vaitasogi igoe o naunogoa kolugami.
Ko reia, na tangopeke seko e totu nogo pipi tana nauna e rodo i laona na veramami.
21Laka na tamiana kara paluvangamaqira lê igira ara bingi sekoligira nogo;
mo ko sangagira igira ara tau tamanina sa omea,
migira goto e tagara kesa ke sangagira, migira kara gini tsonikaego.
22!God, ko tû mo ko isutugumu segeni!
Padatugua laka igira na tinoni ara tau tutunimu igoe ara totu matengana moa na kiataginiamu tana dani popono.
23Mo ko laka goto na rongomileana niqira gû ara naua tana tobakore igira gamu gala,
niqira galaleleo sailagi ara naua igira ara tau totu tabana kolugo igoe.
75Nina Aqo God na Pede Tinoni
1!Igami ami soadougo igoe nimami God,
ami soadougo manana!
Ami katevulagia na lokimu igoe,
mami gini goko tana rongoqira na omea dou laka igoe o naugira.
2Maia God e goko me tsarivaganana,
“Tana tagu inau au titinogoa,
i tana nogo sauba inau kau tû ma kau pedegira na tinoni sui tana pede atsa.
3Me atsa moa ti vaga igira pipi na omea mamauri sui kara gariri,
ma na barangengo ke kakasisi popono,
minau sauba kau tangolikakaia na pukuna me ke totu kalavata moa.
4Mau tsarivanigira igira na tinoni vanga tsutsukibo laka kara tau goto kaekae;
5mau tsarigotoa vanigira kara mololea na koesegeniqira.”
6Na pedegoto e tau talumai i longa se i tasi,
se i vava se i ata,
7maia nogo God nina aqo na pede,
maia sauba ke kedegira visana, me ke nusigira visana.
8Na Taovia e tangolia kesa na tseu
na uaeni susuliga na korena e totu i laona.
Maia e qetua, migira sui lakalaka na tinoni vanga tsutsukibo ara inuvia;
ara inuvi korasia me tau lelê goto totuvisu sa kukuduna.
9Minau e utu saikesa kau mololea na gini goko babâ tana rongona nina God a Jakob,
se na gini linge na tsonikaeana.
10God aia sauba ke kutivanigira na susuligaqira igira na tinoni vanga tsutsukibo,
me ke naua me ke dadato babâ gaqira susuliga igira na tinoni e goto niqira sasaga.
76Na Linge na Tsonikaeana God Tana Rongona e Managana
1Igira ara totu tana vera ni Juda igira ara donaginia God.
Ma na asana e tangiloki tana Israel popono.
2Maia e tamanina na verana i Jerusalem;
me totu i gotu tana Vungavunga Sion.
3Mi tana nogo e bokua niqira parige igira na gala,
ma niqira tako ma niqira isi, eo, me pipi sui goto niqira omea levolevo gana na vailabu.
4!God, igoe o loki tsapakae sosongo!
Me tangiloki na rongomu kalina igoe o labavisumai talu tana vungavunga
i tana igoe o tuliusigira gamu gala.
5Mo lauligia tanigira niqira mane vaumate susuliga
pipi niqira omea levelevo ara laua tana vailabu,
mi kalina ia, migira sui ara mate pitsu sui nogo,
me puala lê sui gaqira susuliga.
6Mi kalina igoe nina God a Jakob o tû mo goraragira,
migira sui niqira ose kolugira ara sage koniqira ara viri puka mara mate lê sui.
7Migoe moa Taovia igira na tinoni sui ara kukuni tanigo sosongo.
Mi kalina igoe o kore loki me tau goto tangomana kesa ke baria.
8Tû i gotu i baragata igoe o sauvulagia nimu pedegoto vanigira na tinoni sui.
Ma na barangengo e gini matagu loki sosongo me totu mui lê,
9kalina igoe o tû na vota makaliana na gokona nimu pedegoto,
ma na maurisiaqira igira ara bingi sekoligira ieni i barangengo.
10Niqira momosatoba nogo igira gamu gala e tsukilâ, te ara gini tsonikaego igira nimu tinoni;
migira moa ara tau mate tana vailabu
sauba kara lokisigira nimu dani tabu igoe.
11Tusuvania na Taovia nimui God na omea igamu amu veke vaninogoa;
adimai vania nimui vangalaka igamu sui na puku amu totu varangi.
Kamu kukuni tania God,
12aia e molotsunaligira na tinoni taovia vanga kaekae
me molo matagu sosongo vanigira na taovia loki tsapakae ni lao eni.
77Na Ngangaidato Vania God Tana Tagu na Rota
1Inau au ngangaidato vania God;
au ngangaidato maia e rongomiau.
2I laona niqu rota, minau au nongia na Taovia;
mi tana bongi popono au abedatoa na limaqu tana nonginongi,
me tagara sa omea tangomana ke vereau.
3Mi kalina inau au padâ God, mau ngangai i laona na tobaqu;
mi kalina au totu mui mau papada, me ponopala lê na tobaqu.
4Aia e tongovaniau na maturu mau mamata moa na bongi popono;
au padasavi sosongo me gini utugana vaniau na goko.
5Au padavisugira na tagu ni sau
mau padavisugira goto na ngalitupa ara putsi oka nogo.
6Tana bongi popono au totu tû moa mau papada sosongo;
au totu mui mau papada mau veisua segeniqu vaga iani:
7“?Laka sauba nomoa na Taovia ke sove tanigita saviliu?
?Me laka sauba e utu saikesa ke reingaogita tugua?
8?Laka aia e tau nogo galuvegita?
?Me laka e tau nogo ngaoa na manaliana nina veke e naua vanigita?
9?Me laka God e padalenogoa na saugaluve vaniada?
?Me laka nina kore e oligininogoa na aqona nina galuve?”
10Mi muri minau au tsaria, “Ma na omea inau au gini rota loki bâ na padaana e vaga iani:
laka God e tau nogo susuliga.”
11Taovia, sauba kau padatugugira nimu aqo loki igoe o naugira nogo;
me sauba kau padavisugira na omea loki ganataga sui igoe o aqosigira nogo i sau.
12Sauba kau papada tana rongoqira pipi sui lakalaka na omea igoe o naugira;
sauba kau totu mui ma kau padatugugira pipi nimu aqo loki sui.
13Pipi na omea igoe God o naugira ara tabu sui.
Me tagara goto sa god ke loki atsa kolugo igoe.
14Igoe nogo na God o aqosigira na valatsatsa;
mo sauvulagia gamu susuliga i laoqira na puku na tinoni sui.
15Tana susuligamu loki nogo igoe o laumaurisigira nimu tinoni,
igira nogo ka kukuaqira kaira a Jakob ma Josep.
16Kalina igira na ko loki ara reigo igoe God, migira ara matagu sosongo,
ma na maorodo na tasi e gariri tana matagu.
17Migira na parako ara tumuli tsunamaia na usa;
ma na quluqulu e poda tana masaoka,
ma na angaanga e kirapi me liu pipi nauna.
18Ma na maququna nimu quluqulu e liu ao sosongo,
ma na kirapina na angaanga e angavi poponoa na barangengo;
me kakanu na barangengo popono.
19Igoe o liu tsapatugu i laona na panu;
mo savu bâ i laona na maorodo na tasi
me tau tangomana kesa ke reia na maleamu.
20Migoe o tudumigira nimu tinoni toga vaga nogo e kesa e reitutugudougira nina sipi,
mo molokaira a Moses ma Aaron kara ka ida vanigira.
78Aia God Migira Nina Tinoni
1Igamu niqu tinoni, kamu rongomidoua na omea inau sauba kau sasaniginigamu,
ma kamu rongomi vatavia na omea sauba kau tsaria.
2Inau sauba kau gini aqo na tsaqina na gokolia tana sasaniamui,
ma kau vuresia vanigamu na omea ara totu popoi tû i sau nogo,
3igira na omea igita a rongomigira nogo ma donaginigira,
na omea vaga igira na tamada ara turupatuna vanigita nogo.
4Migita ka laka na poiaqira tanigira na daleda;
ka turupatuna vanigira na vatavata kara botsamai i muri
tana rongona gana susuliga loki na Taovia, migira na omea loki aia e naugira,
ma na omea ganataga sui aia e aqosigira nogo.
5Aia e tusugira nina ketsa vanigira na tinoni ni Israel,
ma na vovorona nina vali vanigira na kukuana a Jakob.
Maia e raigira na mumuada
kara sasanigira na daleqira na vovorona nina ketsa,
6rongona ti na vatavata i muri kara donaginigira goto,
mi muri bâ migira goto kara sasaniginigira goto na daleqira.
7Mi tana nauvaganana nogo ia, ti sauba igira kara gini molo kalavatavia niqira vainorugi i konina God
ma kara gini tau padalea na omea vaga aia e aqosigira nogo,
ma kara muridougira pipi kalina na vovorona nina ketsa.
8Mi tana ti igira kara tau gini usuligira na mumuaqira,
igira na alaala na vanga petsakoe ma na livusuguradi,
igira nogo ara tau vataragini kakaia niqira vainorugi konina God
mara tau goto dona kara totukakai i konina.
9Mi tana tagu e laba na vailabu, migira niqira alaala na mane vaumate na Epraim
ara viri tsogovisu lê kolua niqira parige ma niqira pipili.
10Mara tau goto manalia niqira tabana na vaitasogi ara naua kolua God;
mara sove goto na muriana nina ketsa.
11Ara padalegira sui na omea aia e aqosigira,
migira goto na valatsatsa ara reia aia e naugira.
12I mataqira nogo na mumuaqira God e aqosigira na valatsatsa,
tana poiatsa ni Soan tana kao ni Ejipt.
13Aia e sarovotâ na tasi me tudumigira mara liu mamatsa i laona;
maia e naua ma na tasi e totukakai tabana mi tabana vaga moa ti na ponopono na vale.
14Mi tana dani maia e mataliginigira kesa na parako,
mi tana bongi popono kolua na mararana na lake.
15Aia e tapaligira na maragova i laona na kaomate,
me tusuvanigira na kô e talumai tana maragova, vaga moa ti e maodato tana kao.
16Maia e naua ma na ko e tavongani vuramai talu tana maragova
me tatave vaga moa ti na ko loki.
17Ma na tinoni gira ara sasi babâ moa i matana God,
mi laona na kaomate ara petsakoe vania God Susuliga Sosongo.
18Igira ara tû mara tovolea God
mara turuginia ke saua vanigira na vatana na mutsa koegua igira ara kilia.
19Ara goko levolevo vania God mara tsarivaganana,
“?Egua laka e tangomana vania God ke tusulea vanigita na mutsa tana kaomate vaga ieni?
20Eo, me mana rago nomoa laka aia e toubâ na maragova
me tabusi tsunamai na kô,
?me laka egua, e tangomana goto ia ke palaginigita na bredi,
me ke sauvanigira goto nina toga na velesina sabo?”
21Mi kalina na Taovia e rongomigira nina tinoni ara goko vaganana ia, maia e kore,
me tû me kodoginigira na lake,
ma na korena e loki goto bâ vanigira,
22rongona igira ara tau saikesa tutunina God,
mara tau goto tutunina laka aia e ngaoa na laumaurisiaqira.
23Mi tana maia e goko bâ vania na masaoka i gotu,
me ketsalia ke ova na matsapana;
24maia e sautsunamai gaqira mutsa kara gania,
aia nogoria na mana e talumai i gotu.
25Me vaga ia, migira ara gania gaqira mutsa na angelo,
maia God e tusua vanigira na dangana vaga ara kilia.
26Maia e naua me mai kakai na guguri votu,
mi tana susuligana goto ia e sualaginikaea na guguri e palamai i ata;
27maia e molomaia vanigira nina tinoni danga na manu,
vaga na dangana na vatuna na one i tasi;
28mara viri lovopuka polipolia niqira valepolo.
29Migira na tinoni ara tû mara adigira, mara ganigira mara masu;
aia God e tusuvanigira na dangana vaga igira ara padangaoa.
30Mi kalina igira ara sugulimutsangaqira
mara mutsamutsa moa,
31ma God e kore loki vanigira
me labumatesigira niqira mane susuliga bâ,
igira nogo niqira mane vaolu sosongo igira na Israel.
32Me atsa moa ti igira na tinoni ara reilakana na omea danga God e nauvanigira,
migira ara totu matengana na sasi babâ moa;
me atsa moa ti ara reigira goto na valatsatsa aia e naua i mataqira, migira ara tau lelê norua aia.
33Me vaga ia, ma God e suilavagini lea vanigira niqira dani
vaga saikesa moa kesa na guguvina tetelo na magomago,
me tavongani me gadovigira na mate tau vangarau.
34Me pipi kalina God e matesigira visana vidaqira,
mi tana migira na toga ara pilovisumaitugua i konina,
mara padasavigira niqira sasi mara nonginongi kakai vania God.
35Mara padavisutugua laka tana idana aia nogo God niqira reitutugu,
maia na God Susuliga Sosongo aia nogo niqira vagamauri.
36Me pipi sui niqira tsaqina goko ara tsaria, na perona segeni moa;
e tagara kesa lelê na omea igira ara tsaria ke mana.
37Ara tau totukakai i konina aia;
mara tau goto manalia niqira tabana na vaitasogi ara naukolua.
38Ma God aia e galuvegira nomoa nina tinoni.
Me padale vanigira niqira sasi
me tau kede sekoligira.
Me danga sosongo kalina aia e berengiti kolugira
me tangolivisutugua na korena me tau kore vanigira.
39Rongona aia e donagadovia laka igira na tinoni lê moa,
ara vaga saikesa moa na guguri e bisimai me tau oka me nanga lê tugua.
40!E danga sosongo kalina igira ara petsakoe vania tana kaomate;
me gini melu tobana!
41Na dani ma na dani igira ara tau goto kuti na tovoleana God,
mara molorota vania aia na God Tabu Loki ni Israel.
42Igira ara padale saikesalia na susuligana loki,
ma na dani i tana aia e laumaurisigira tania na limaqira gaqira gala,
43me naugira na omea loki ganataga ma na valatsatsa
tana poi ni Soan tana kao ni Ejipt.
44Mi tana ma God e naua migira na ko loki ara lia na gabu,
migira sui na tinoni tana Ejipt ara gini tau tamani kô gana na inu.
45Me mologira na kulikuli kara viri dangali poponoa na veraqira ma kara gati sekoligira,
ma na qori kara sekolia niqira kao.
46Me mologira na kipo kara ganisuia niqira omea tsukatsuka,
ma kara sekolia niqira lelegai popono.
47Aia e matesiginia na kolina na usa kakai niqira itai na uaeni,
ma na bisi loki niqira gai mutsamutsa.
48Ma na kolina na usa kakai e matesiginigotoa niqira buluka,
ma na angaanga e matesiginia niqira sipi.
49Aia e galasi sosongolia me momosa loki tobana,
me poda na korena, me moloa na rota loki ke gadovigira,
mara mai vaga moa ti na alaala na angelo na mate.
50Aia e tau goto dona ke baria na korena
se ke gaea na mauriqira,
maia e tû me labuginigira na rota seko loki.
51Aia e labumatesigira sui na daleqira mane botsaida
i laoqira pipi na tamadale tana Ejipt popono.
52Mi muri maia e tudumi rutsumigira nina tinoni tania na Ejipt
vaga moa ti kesa na mane reitutugu sipi,
me mataligira tana laona na kaomate.
53Aia e idagana sautu vanigira, mara tau goto matagunia sa omea;
migira moa gaqira gala, aia e naua me kokoponotigira na tasi, mara viri mate sui.
54Me adibagira nina tinoni tana nina kao tabu,
tana vungavunga aia segenina nogo e laua.
55Maia e tsialigigira na tamanina nogo i tana,
kalina igira nina tinoni ara maimai moa i sautu,
me tuvarivotâ niqira kao i laoqira na puku ni Israel,
me saua na valeqira kara tamanina igira nina tinoni nogo ia.
56Me atsa moa na Taovia e naua vanigira vaga ia,
migira ara petsakoe vania God Susuliga Sosongo
mara tovolea babâ moa.
Migira ara tau nogo muria nina ketsa,
57mara petsakoe mara tau mana vania, vaga saikesa nogo ara naua igira na tamaqira i sau,
niqira omeomea e vaga moa na pipili kekevo, me utu na noruaqira.
58Na peona niqira god peropero ara gini tsaia na korena God
kolugira goto niqira titinonina na god peropero, me gini momosa loki bâ na tobana God.
59Ma God e gini kore loki sosongo kalina e reia na omea vaga ia,
me sove saikesa tanigira nina tinoni.
60Maia e tû, me vanoligi saikesa tania nina valepolo i Silo,
na vera i tana aia e mauri i konida i sau.
61Me tamivanigira gada gala kara laua tanigita na Bokisi na Taso,78:61 “Bokisi na Taso” Aia e kesa na bokisi gai ara baru poponoginia na qolumila laka, mara molotsavua i laona kaira na vatu i tana e totu na mamarena na Sangavulu Ketsa.
aia nogo na papadana na susuligana ma gana loki tsapakae God.
62Aia e tobaseko vanigira nina tinoni segeni nogo ia
te e tamivanigira gaqira gala kara tû ma kara labumatesigira.
63Igira niqira mane vaolu ara viri mate sui tana vailabu,
ma niqira daki vaolu e tagara kesa ke taugagira.
64Migira na manetabu ara viri mate sui tana isi,
migira na tinamateqira ara tau tamivanigira kara tangisigira.
65Mi tana susuina, maia na Taovia e mamata me tû vaga moa ti aia e vasini mamata tania na maturu;
e vaga saikesa moa kesa na mane susuliga e ulavia na uaeni.
66Ti aia e tû me tsialigigira saikesa igira gana gala,
me paluvangamaqira saviliu.
67Me sove tanigira moa igira na kukuana a Josep,
me tau goto viligira na puku konina a Epraim.
68Maia e tû moa, me ba viligira na puku konina a Juda,
ma na Vungavunga Sion aia nogo e reingao sosongolia bâ.
69Mi tana nogo aia e logoa nina Vale Tabu
vaga nogo na verana i baragata;
me aqosia ke totukakai vaga nogo na barangengo
aia e totu kakai na dani ma na dani.
70Maia e vilia a David nina maneaqo;
me adiligia tania nina bara na sipi,
71i tana nogo aia e reitutugugira nina alaala na sipi,
me moloa ke lia na taovia tsapakae tana Israel,
niqira reitutugu dou igira nina tinoni God.
72Maia David e reitutugudougira rago me tau padaloki segenina,
me taovia dou sosongo vanigira.
79Igira na Israel Ara Nongia God Ke Maurisigira
1God igoe, igira na tinoni ponotoba ara mai mara totuvinogoa na veramu.
Mara tangopekea nimu Vale Tabu,
mara toroutsani poponoa na Jerusalem.
2Mara labumatesigira nimu tinoni, mara molovanigira na manusata kara gania na koniqira,
ma na koniqira nimu maneaqo ara lia gaqira mutsa na omea tuavati atsi.
3Ara reoa na gabuqira nimu tinoni igoe vaga moa ti na kô lê,
me naravia na Jerusalem popono,
me tagara lelê ke kesa ke totuvisu me ke qilugira igira ara mate.
4Igira sui na puku tavosi ara totu poligami ara peagami
mara kiataginigami mara tsirigami.
5?Taovia kiki igoe, laka sauba nomoa ko kore vanigami saviliu?
?Egua laka na koremu ke iru babâ moa vaga na lake?
6Ko piloa na koremu me ke ba gado i koniqira na puku tavosi igira ara tau donaginigo,
i koniqira na tinoni ara tau dona kara lotu vanigo.
7Rongona igira nogo ara labumatesigira nimu tinoni igoe;
mara toroutsania na veramu.
8Mo ko laka na kedeamami igami tana rongona niqira sasi ara naua igira na mumuamami.
Ko galuvegami kalina nogo ia,
rongona igami ami seko pitsu nogo.
9Nimami God ko sangagami mo ko maurisigami;
ko laumaurisigami mo ko padale vanigami nimami sasi,
rongona ke gini tangiloki na soamu igoe.
10?Ara gua vaga igira na puku tavosi te ara tû mara veisuagami igami,
“?Laka iava e totu nimui God igamu?”
Taovia, ko tamivanigami ma kami reia kalina igoe ko kedegira na puku tavosi
tana rongona ara reoa na gabuqira nimu maneaqo.
11Rongomi vatavia niqira kukungu igira ara totu sosori,
ma na susuligamu loki ko nusiginigira igira ara pedematesigira nogo.
12Taovia, ko tuguvisu vanigira igira na puku tavosi ke vitu kalina
tana rongona pipi sui niqira goko peapea ara naua vanigo.
13Mi tana ti igami sui nimu toga igoe, igami na sipina nimu bara,
sauba kami soadougo sailagi,
ma kami tsonikaego na dani ma na dani.
80Na Nongiana God Ke Turuvagini Visutugua na Veraqira
1Taovia, igoe niqira Reitutugusipi igira na Israel, ko rongomigami;
igoe o matalidougira nimu sipi, ko rongomigami.
Igoe o totu tana sasamu na totukae i kelana na rapoqira na angelo,
2ko sauvulagi segenimu vanigira na puku tu koniqira a Epraim, ma Benjamin ma Manase.
!Ko sauvulagi vanigami gamu susuliga;
mai mo ko laumaurisigami!
3!God, igoe ko adivisugami!
!Ko galuvegami, me sauba kami mauri!
4?Taovia God Susuliga Sosongo, sauba ke oka koegua sagata goto ko kore
mo ko sove na rongomiana niqira nonginongi nimu tinoni?
5Igoe o sauvanigami na rota ke lia gamami mutsa,
ma na dangana na bilo na kô na matamami kami inuvia.
6Mo tamivanigira na puku tavosi ara totu poligami kara laua nimami kao;
migira gamami gala ara tsirigami lê.
7!Ko adivisugami, God Susuliga Sosongo!
!Sauvulagi vanigami na galuvemu, me sauba igami kami gini mauri!
8Taovia igoe nogo o tû mo vutiligia kesa na itai na uaeni80:8 “na itai na uaeni” Na papadana nogo igira na tinoni ni Israel. tania na vera ni Ejipt,
mo tsialigigira na puku tavosi tamanina kao,
mo bâ tsukâ na itaina uaeni ia tana niqira kao igira.
9Igoe o arago maledoua kesa na nauna i tana ke dato dou;
ma na lamuna e tatango tsuna ao tana kao, me liuvia na kao popono.
10Na auauna e ausigira na vungavunga sui;
e tamumurau me ausigira goto na gaina sida80:10 “na gai na sida” Reia tana 29:5. loki.
11Ma na arana e tabegara me tsavua na kao popono e tsau bâ tana Tasi Mediteranean kesa tabana
me tsau saviliu tana Kô Euprates kesa tabana.
12?Me rongona gua ti igoe o vuipukalia na baravatu ara polia nimu uta?
Mo ko reia, kalina ia igira sui ara liu bâ i tana ara komia moa na vuana uaeni i laona;
13ma na bô atsi ara viri tsogori pukalia na gaina,
migira na omea tuavati atsi80:13 “na bô atsi...ma na omea tuavati atsi” Na papadana igira gaqira gala na Israel. ara gania na vuana.
14!Ko pilovisumai i konimami igoe God Susuliga Sosongo!
!Tû i gotu i baragata ko morosigami i lao eni,
mai mo ko maurisigira nimu tinoni!
15Ko mai mo ko maurisia nimu itai na uaeni igoe nogo o tsukâ,
na volana vaolu igoe nogo o aragodou sosongolia,
me gini dato varimauri.
16!Igira gamami gala ara kavi pukalia mara soqoi lakena,
ko tû igoe mo ko kore vanigira mo ko matesigira!
17Ko aragogira mo ko isutuguqira nimu puku igoe nogo o viligira,
igira na puku igoe o naua mara gini susuliga.
18Me sauba e utu goto igami kami piloligi tanigo tugua;
ko maurisigami, migami sauba kami tsonikae sailaginigo.
19Taovia God Susuliga Sosongo, ko adivisugami.
Ko sauvulagia vanigami na galuvemu, me sauba igami kami gini mauri.
81Kesa na Linge Gana Tana Dani Loki
1!Gudato tana mage vania God aia nogo gada sasanga;
linge na tsonikaeana nina God a Jakob!
2Tuturiga na uviriga ma ka rekesi tsetsê,
ka taidougira nida itai tatangi ma nida tuqulu.
3Ka uvia na tavuli tana nida dani loki,
kalina e dato na vula vaolu, mi tana saipono.
4Iani nogo e vaga na ketsa vanigira na tinoni ni Israel,
ma na parovata e talumai i konina nina God a Jakob.
5Aia e moloa vanigira na tinoni ni Israel kara muria
kalina aia e bokia na vera ni Ejipt.
Au rongomia na tatangina na liona kesa au voginia e goko me tsarivaniau:
6“Inau nogo au sulutsunâ na kalagai mamava tania na kokovemui;
mau adiligia na tsupu na vatu amu tabeleginia na limamui.
7Mi kalina igamu amu totu tana rota mamu soaau,
minau au tû mau maurisigamu.
Tana niqu nauna na mani taopoi i laona na tulonga,
inau au rongomia nimui nonginongi.
Mau tovolegamu tana kô vuravura i Meriba.
8Igamu niqu tinoni, kamu rongomia niqu goko parovata.
!Igamu na Israel, ti vaga kamu tami moa kiki na rongomiaqu!
9Kamu laka saikesa goto na samasama vaniana ke kesa na god segeni.
10Inau na Taovia nimui God,
minau nogo au adirutsumigamu tania na vera ni Ejipt.
Kamu manganga, minau kau kala na mutsa ma kau moloa i laona na mangamui.
11“Migira niqu tinoni ara sove na rongomiaqu;
eo, igira na Israel ara sove na rongomangaqu.
12Me vaga ia, minau au tamivanigira moa kara muria na tobaqira segeni,
ma kara naua na omea sui moa igira segeni ara padangaoa.
13!Ti vaga niqu tinoni kara rongomiau moa inau;
ma kara naua na omea inau au ketsaligira kara naua!
14Minau kau tau goto kisâ na bingi sekoliaqira gaqu gala
ma na tuliusiaqira sui.
15Mi tana ti igira sui ara reisaviau inau kara tao tsuporu i mataqu tana matagu;
ma gaqira kede ke totu saviliu me ke tau goto sui na dani ma na dani.
16Migamu moa sauba kau palaginigamu na uiti dou laka,
ma kamu gini vatsa na ganiana na bulumitsua.”
82God Aia na Tagao Loki Tsapakae
1Aia God nogo e tagaovia na totogoko i laona niqira saikolu i baragata;
mi laona niqira saikolu igira na god aia e sauvulagia nina papada me tsarivanigira:
2“!Igamu nimui aqo ti kamu molole saikesalia na pede riu;
ma na bulu bâ koniqira na tinoni vanga tsutsukibo!
3Kamu isutuguqira igira ara tau tamanina sa omea, migira goto na baka tinamate;
ma kamu pede atsaligira igira ara kilia na sasanga, migira goto e tagara kesa ke sangagira.
4Kamu laumaurisigira tania na limaqira na tinoni vanga nauseko.
5“!E pono nomoa na tobamui igamu, mamu tau dona sa omea!
Igamu amu liu saikesa moa i laona na rodo,
ma na pedegoto e nanga taninogoa na barangengo.
6Minau au tsaria laka ‘Igamu na god,
eo, igamu sui na dalena nogo na God Susuliga Sosongo.’
7Me sauba nomoa igamu kamu mate vaga nogo igira sui na tinoni lê;
ma na maurimui sauba ke tamani susuina vaga nogo na mauriqira pipi sui na tinoni taovia.”
8God, ko mai mo ko tagaovia na barangengo;
rongona igoe nogo o tamanigira na puku na tinoni sui lakalaka.
83Na Nonginongi Rongona God Ke Tuliusigira Gaqira Gala Igira na Israel
1!God, ko laka na mui lê moa;
ko laka na totudodo ma na tû mui lê moa!
2!Reigira bâ gamu gala! Ara viri aligiri takuti;
migira sui ara tobaseko vanigo ara sove na rongomangamu igoe.
3Ara naudodoa moa niqira vorogoko tana rongona na sekoliaqira nimu tinoni igoe;
ara vorogokona sai na sekoliaqira igira igoe o retutugugira.
4Ara tû mara tsarivaganana, “Ida gita, ma ka ba toroutsania na puku ia,
me ke nanga saikesa i tobaqira na tinoni na papadana na Israel.”
5Igira na vera sui ara tamisai
mara vorogokona na sekoliamu igoe Taovia;
6igira nogo na tinoni ni Edom migira na Ismael;
na tinoni ni Moab migira na Hagri;
7na tinoni ni Gebal, mi Amon mi Amalek,
mi Pilistia mi Tire.
8Ma na Asiria goto ara sangapata kolugira,
na tinoni sui girani ara sanga tabana koniqira na kukuana a Lot.
9Taovia ko tû, mo ko nauvanigira na omea vaga o nauvanigira na Midian,
me vaga o nauvanikaira a Sisera ma Jabin tana Kô Kison.
10Igoe o tuliusigira i Endor,
ma na koniqira ara viri ratsa lê tana kao.
11Mo ko nauvanigira gaqira ida na omea vaga o nauvanikaira a Oreb ma Seeb;
ko tûliusigira sui gaqira tagao vaga o naua vanikaira a Seba ma Salmuna,
12kaira ara ka tû mara ka tsarivaganana, “Ida gita, ma ka aditamanida na kao tana e tamanina God.”
13God ko sarangasigira vaga moa ti na papasa lê,
vaga goto na rau matemate lê e lovosaginia na guguri.
14Me ke vaga na lake e iruvia na lelegai popono,
ma na vungavunga e gania na lake,
15ko vaga goto igoe, ko tsialigigira ginia nimu tulonga loki,
mo ko totoposuligira ginia nimu guguri loki.
16Taovia ko paluvangamaqira babâ moa,
poi tsau kalina kara donaginia na susuligamu igoe.
17Ko tuliusigira, mo ko naua ma kara matagu loki saviliu;
ma kara gini mate tana vangamâ.
18Mi tana ti kara gini donaginia laka igoe segeni moa o Taovia,
mo taovia loki tsapakae kaputia na barangengo popono.
84Na Ngao Sosongoliana Na Sage i Valena God
1!Inau au padaloki sosongolia nimu Vale Tabu, igoe Taovia Susuliga Sosongo!
2!Mau kili sosongolia kau ba totu i tana!
E siloviau sosongo laka kau ba totu i laona nina Vale Tabu na Taovia.
Tana tobaqu popono inau au linge tana magemage vania aia na God mamauri.
3Migira goto na manubau, mara dona na logoana na binuqira,
migira na pikapikamasanga, mara tamanina na valeqira segeni tana nimu Vale Tabu;
mara mololaka na daleqira tetelo ligisana nimu belatabu,
igoe Taovia Susuliga Sosongo, niqu taovia tsapakae mo niqu God.
4Ara mage sosongo nomoa igira ara mauri i laona nimu Vale Tabu,
mara lingena sailagi na tsonikaeamu igoe.
5Ara gini mage sosongo igira ara tsotsovata kakai i konimu igoe,
igira e silovigira sosongo na liu tana sautu e vano kalea na Vungavunga Sion.
6Mi kalina igira ara liu tsapatugu bâ tana qou mamatsa ni Baka,
ma na ko vuravura e tavongani vura dato i tana;
me tumu na usa tana matsaraka mara gini dangadanga na maomao na kô.
7Migira ara susuliga babâ moa kalina ara vanovano i sautu;
mi kalina kara ba tsau i Sion mi tana ti sauba kara reia God, aia e God loki liusigira na god sui.
8Igoe Taovia God Susuliga Sosongo, ko rongomia niqu nonginongi.
Igoe nina God a Jakob ko rongomi vataviau.
9God, ko vangalaka vania nimami taovia tsapakae,
aia na taovia tsapakae igoe o vilinogoa.
10Kesa lelê moa na dani na totu i laona nimu Vale Tabu igoe
e dou liusia bâ kesa na toga na dani na totu kesa tana nauna segeni;
kau reingaoa bâ na totu moa i matsapana na valena niqu God,
liusia bâ na totu i laona na valeqira na tinoni vanga tsutsukibo.
11Na Taovia aia nogo nida reitutugu, ma nida taovia tsapakae loki bâ,
aia nogo e vangalaka vanigita me padalokigita.
Me tau goto dona ke tongoa kesa na omea dou
vanigira igira ara naua na omea e goto i matana.
12!Taovia Susuliga Sosongo, ara mage manana igira ara norukakaigo igoe!
85Na Nongiana God Ke Douvisutugua na Vera
1Taovia igoe o galuve sosongolia nimu kao;
mo naua migami na Israel ami douvisutugua.
2Igoe o padale vanigira nogo niqira sasi igira nimu tinoni,
mo veoligi vanigira pipi sui niqira nauseko ara naua.
3Mo tau nogo kore vanigira,
mo mololenogoa nimu momosatoba vanigira.
4Ko adivisugami tugua, igoe God nimami vagamauri,
mo ko laka goto na reisaviamami.
5?Egua, laka sauba ko kore saviliu vanigami moa?
?Me laka nimu momosatoba ke tau goto sui?
6Ko naua migami sauba kami tukakai tugua,
migami nimu tinoni sauba kami gini tsonikaeaginigo.
7Taovia ko sauvulagia vanigami nimu galuve vo oli,
mo ko sangagami ma kami gini mauri.
8Inau sauba kau rongomi vatavia na omea God ke tsarivaniau.
Aia e vekea laka sauba ke saua na rago vanigita igita nina tinoni segeni,
ti vaga igita ka tau visutugua tana sautu sasi a muria i sau.
9Aia e vangaraunogoa laka ke maurisigira igira ara kukuni tania,
maia sauba ke totu kalavata kolugita i laona na verada.
10Mi tana tagu ia, sauba igira na tinoni kara dona na vaigaluvegi ma na vaitabegi;
me ke gotodou niqira sasaga, ma kara totu tana rago.
11Niqira sasaga mana na tinoni ke talu i lao me ke ba tsau dato i gotu;
ma nina gotolaka God ke tû i gotu me ke morotsuna mai i lao.
12Eo, na Taovia sauba ke paboa nida tamani igita,
ma kara lakaga dou sui nida uta.
13Na gotolaka ke idaida vania na Taovia
me ke vangaraua na sautu vania.
86Na Nonginongi Tana Tagu na Rota
1Taovia ko rongomiau mo ko sangaau,
rongona au maluku sosongo me tagara kesa ke sangaau.
2Laumaurisiau tania na mate, rongona inau au totukakai i konimu;
ko laumaurisiau rongona inau nimu tinoni aqo mau norugo manana igoe.
3Igoe nogoria niqu God, me vaga ia me dou ti ko galuveau;
minau au nonginongi vanigo tana dani popono.
4Taovia ko naua me ke mage na tobaqu inau nimu tinoni aqo,
rongona niqu nonginongi e dato i konimu.
5Igoe o dou sosongo vanigami, mo padalegira moa nimami sasi,
me loki sosongo nomoa nimu galuve vo oli vanigira sui ara nongigo.
6Taovia ko rongomia niqu nonginongi;
mo ko rongomiau kalina kau ngangaidato vanigo ko sangaau.
7Kalina au totu tana rota loki minau au soago igoe,
rongona au dona laka sauba ko rongomia niqu nonginongi.
8E tagara goto sa god ke tsauligo igoe Taovia,
e tagara goto ke kesa ke naugira na omea vaga igoe o naugira.
9Igira sui na puku na tinoni igoe o aqosigira,
sauba kara mailaba i matamu ma kara tao tsuporu sui vanigo,
ma kara tsonikaea gamu loki tsapakae.
10Igoe o susuliga sosongo mo aqosigira na omea dou sui;
migoe segenimu o God.
11Ko sasaniau Taovia na omea vaga igoe o ngaoa inau kau naua,
minau sauba kau rongomangamu dou manana.
Ko sasaniau na aqo dou vaniamu tana susuligaqu popono.
12Me sauba inau kau tsonikaego tana tobaqu popono Taovia niqu God,
ma kau katevulagia gamu loki tsapakae na dani ma na dani.
13!E loki sosongo nomoa nimu galuve vo oli vaniau!
Igoe nogo o laumaurisiau tania na qilu.
14Niqu God, igira na tinoni kaekae ara tau goto kuti na mai sailagi na sekoliaqu;
e kesa na alaala popono igira na vanga sekoli tinoni ara tovoa laka kara labumatesiau inau,
migira ara tau goto dona kara boeginigo igoe.
15Migoe Taovia o tobalaka sosongo mo God na galuve,
mo berengiti sailagi mo mana saviliu.
16Ko pilomai i koniqu mo ko galuveau;
ko susuligasiau mo ko maurisiau,
rongona inau au aqo dou vanigo vaga saikesa nogo e nauvanigo na tinaqu.
17Taovia ko sauvulagimaia kesa na papadana nimu galuve vaniau;
mi tana ti igira sui ara tobaseko vaniau kara gini vangamâ
kalina kara reia laka igoe nogo o vereau mo sangaau.
87Na Linge na Tsonikaeana Na Vera ni Jerusalem
1Maia na Taovia e logoa nina verabau i kelana na vungavunga tabu;
2maia e padalokia na verabau ni Jerusalem liusigira bâ na vera tavosi sui tana Israel.
3Igoe nina verabau God ko rongomigira
na omea dou rago aia e tsaria tana rongomu igoe:
4“Kalina inau kau maretsuna na soaqira igira na puku sui ara rongomangaqu inau,
me sauba inau kau adisagekaira goto na Ejipt ma na Babilon;
migira sui na tinoni ni Pilistia, mi Tire, mi Sudan,
sauba kau tsokosaigira goto kolugira na tinonina na Jerusalem.”
5Mi tana rongona i Sion, sauba kara tsaria
laka aia nogo niqira vera pukuga na puku sui,
maia nogo na Taovia Susuliga Sosongo sauba ke vaturikakaia.
6Aia na Taovia sauba ke maretsuna na soaqira pipi sui lakalaka na mamatana tinoni,
me ke tsaria laka igira sui na Jerusalem sui moa.
7Migira kara gavai ma kara lilinge ma kara tsaria,
“I Sion nogo e talumai pipi sui nida omea dou.”
88Nina Ngangaidato Kesa Rongona God Ke Sangâ
1Taovia God niqu vagamauri, inau au ngangaidato vanigo tana dani popono,
mi tana bongi goto minau au mailaba i matamu igoe.
2!Ko rongomia niqu nonginongi;
mo ko tabea niqu ngangaidato vanigo rongona ko sangaau!
3Na rota danga sosongo ara puka tsavuau,
me varangi nogo kau mate.
4Inau au vaga saikesa nogo igira sui ara ngari mate;
au tau saikesa nogo susuliga.
5Ara tsonileau nogo i koniqira igira ara mate;
mau vaga saikesa moa igira ara lamutasigira, mara tsaro nogo i laona na qiluqira,
igira igoe o padale saikesaligira nogo,
me utu saikesa vanigo goto ko sangagira.
6Igoe o tsonitsunaau nogo tana qilu i lao vasau,
tana qou i tana e rodo pulipuli.
7Ma na koremu loki e kobiau,
minau au tsaro rapa i vavana na panuna.
8Igoe nogo o tsukivanigira na kulaqu te ara gini tsonileau;
migoe goto o naua te ara gini sibi taniau.
Ara vongo kaputiau me utu vaniau kau tsogo;
9ma na mataqu ara pasa lê nogo tana rongona na rota loki e gadoviau.
Pipi na dani au soago Taovia
mau abedato vanigo na limaqu tana nonginongi.
10?Megua laka igoe o dona na nauvalatsatsa vanigira igira ara mate nogo?
?Me laka igira ara mate nogo, ara dona kara maurivisutugua ma kara tsonikaego igoe?
11?Me laka igira ara totu nogo tana qilu ara dona na gini goko tana rongona nimu galuve vo oli?
?Se laka ara gini goko tana rongona nimu doulaka igoe i laoqira igira ara mate sui nogo?
12?Me laka igira ara totu tana nauna rodorodo vaga ia, kara dona na reiaqira na valatsatsa igoe o naugira?
?Migira ara mate mara padalegira saikesa nogo, laka ara dona na reilakana nimu galuve laka igoe?
13Taovia inau au soago ko sangaau;
pipi tana matsaraka inau au nonginongi vanigo.
14?Taovia, rongona gua ti o sove taniau inau?
?Egua ti o piloligi taniau vaga ia?
15Me tuturiga kalina inau au tinoni vaolu, me gadoviau na rota loki me varangi saikesa nogo kau mate;
mau gini vatsangi savi sosongo nogo tana ngongolina na kede igoe o naua vaniau.
16Nimu momosatoba loki e bingi rapasiau;
migoe o labusekoliau mau gini seko pitsu popono.
17Tana dani popono igira ara virupoliau vaga moa na obo;
ara tupoliau mara saisai gaqu.
18Migoe o naua migira goto na kulaqu varavara ara gini vanoligi taniau sui,
ma na rodo pulipuli aia moa ngiti gaqu duli inau.
89Niqira Linge Ara Naua Kalina e Seko na Veraqira
1Taovia, inau sauba kau lingena sailagi tana rongona nimu galuve vo oli;
ma kau katevulagia na manana nimu doulaka saviliu na dani ma na dani.
2Mau donaginigotoa laka nimu galuve sauba ke totu saviliu,
ma na manana nimu doulaka ke totu pukuga kalavata vaga na masaoka i gotu.
3Taovia igoe nogo o tsaria, “Inau au naunogoa kesa na vaitasogi kolua na mane inau au vilinogoa;
au gini veke nogo vania a David niqu maneaqo mau tsarivania,
4‘Inau sauba kau molokaea kesa na kukuamu igoe, maia ke adidatoa nimu aqo taovia tsapakae;
ma kau vaturia nimu bela taovia, me ke totu saviliu na dani ma na dani.’ ”
5Igira sui i gotu ara linge mateqira na omea loki sui igoe o aqosigira;
migira na angelo i gotu ara lingena tana rongona nimu doulaka saviliu Taovia.
6Me tagara goto ke kesa i gotu ke atsa kolugo, igoe Taovia;
me tagara lelê goto sa vidaqira igira ara totu i gotu kara kesaniatsa kolugo igoe.
7Igira sui ara kukuni tanigo sosongo i laona niqira saikolu;
igira sui ara kadangaginigo manana igoe.
8Taovia God Susuliga Sosongo, e tagara goto ke kesa ke tsaulina na susuligamu igoe;
me pipi sui tana omea igoe o mana saviliu Taovia.
9Igoe o tagaovi kaputia na susuligana na tasi loki;
mo beatasia kalina e karara loki na panuna.
10Igoe o tsogori rapasia Rahab, aia na tuqana vigo na omea loki, mo labumatesia;
mi tana susuligamu loki igoe o tuliusiginigira gamu gala.
11Na baragata nimu tamani nogo igoe, ma na barangengo goto;
migoe nogo o volâ na barangengo migira na omea sui i laona.
12Igoe o aqosia na turina i vava ma na turina i ata;
mi kaira na Vungavunga Tabor ma na Vungavunga Hermon ara ka linge vanigo tana magemage.
13!O susuliga tsapakae nomoa igoe!
!E loki tsapakae manana gamu susuliga!
14Igoe o palakae mo tagaovigira na tinoni tana gotolaka ma na pedegoto;
ma nimu galuve vo oli ma gamu mana saviliu ara labamaka i laoqira pipi sui na omea igoe o naugira.
15!Ara mage sosongo igira na tinoni ara linge na tsonikaeamu igoe Taovia,
mara mauri i laona na mararana nimu galuve!
16Tana rongomu nogo igoe, ti igira ara gini totu magemage tana dani popono,
mara soalokigo tana rongona nimu galuve loki vanigira.
17Igoe nogo na pukuna na susuligamami,
mi tana nimu galuve, igoe o naua migami ami gini tangomana.
18Igoe nogo Taovia o vilia vanigami aia kesa ke reitutugugami;
igoe na God Tabu ni Israel, igoe nogo o tusuvanigami gamami taovia tsapakae.
Nina Veke God Vania a David
19I laona kesa na moro i sau nogo igoe o tsarivaganana vanigira nimu tinoni:
“Inau au sanganogoa aia kesa na mane vaumate susuliga;
mau tusuvaninogoa na sasana na totukae aia e kesa au vilinogoa i laoqira na toga.
20Au molokaenogoa niqu maneaqo a David aia ke lia na taovia tsapakae
kalina inau au ninaginia na oela tabu.
21Ma na susuligaqu sauba ke totu sailagi i konina,
ma gaqu susuliga sauba ke sangâ me ke tukakai.
22Migira gana gala sauba e utu lelê kara tangomana na tukapusiana;
migira na tinoni vanga tsutsukibo sauba ke utu sosongo vanigira kara tuliusia aia.
23Sauba kau tsogori rapasigira igira ara tau gana tabana kolu aia,
ma kau labumatesigira sui igira ara tobaseko vania.
24Sauba kau galuvea ma kau totu kalavata kolua;
sauba kau sangâ maia ke gini tangomana sailagi.
25Sauba kau pabovania na verana
me ke tû tana Tasi Mediteranean me ke vosa bâ tana Kô Euprates.
26Maia sauba ke tsarivaganana vaniau,
‘Igoe nogo na tamaqu ma niqu God;
igoe niqu reitutugu ma niqu vagamauri.’
27Eo, inau sauba kau nauvania maia ke lia vaga na dalequ botsaida,
me ke loki liusigira pipi na taovia tsapakae sui.
28Sauba kau galuve sailaginia,
ma niqu vaitasogi au naukolua sauba ke totu saviliu me utu goto ke sui.
29Ma nina puku taovia tsapakae nogo ia, sauba ke tukakai vaga moa na masaoka
migira moa na kukuana aia sauba kara tau kuti na lia taovia tsapakae.
30“Ma ti vaga igira na kukuana ia kara sove tania niqu ketsa
ma kara tau mauri muria na omea inau au ketsaligira,
31ma kara tau goto gini boe na rongomiaqira niqu totokoe,
ma kara tau murigira niqu vali,
32mi tana minau sauba kau kedegira tana rongona niqira sasi ara naua;
me sauba kau ramitsigira kakai matena na omea seko sui igira ara tsukia.
33Me atsa moa ti igira kara nauvaganana ia,
minau sauba e utu kau mololegotoa na galuveana a David
se kau tau manalia niqu veke au nauvania.
34Eo, sauba e utu goto kau kutsia na vaitasogi au naukolua,
se kau tangolivisua ke kesa turina na omea au gini vekevaninogoa.
35“Niqu veke au naunogoa tana asaqu tabu e utu goto kau olia;
sauba e utu goto kau perolea a David.
36Migira na kukuana aia sauba kara vaitugugi datodato,
minau sauba kau reitutugu sailaginia na verana
vaga nogo na sinana na aso e sina kalavata me vo sui.
37Ma na verana ia sauba ke totukakai sailagi
vaga nogo na vula e sina sailagi i gotu tana masaoka,
me sauvulagia vanigira na tinoni sui laka niqu goko inau ara mana saviliu.”
Ara Tangitangi Rongona Igira na Gala Ara Tuliusia na Taovia Tsapakae
38Mi kalina ia, migoe o kore sosongo vania na taovia tsapakae igoe o vilinogoa;
mo tû mo vanoligi tania mo sove saikesa tania.
39Igoe o kutsia nimu tabana na vaitasogi o naukolua nimu maneaqo,
mo tsonia bâ tana boko gana kepi taovia.
40Mo toroveogira na barana na verana,
mo toroutsanigira pipi sui nina vale kakai.
41Migira sui ara liu i tana ara komigira nina omea levolevo;
migira sui ara totu tana vera varangi ara reivaganana ia mara kiataginia.
42Igoe o sangagira gana gala mara gini tangomana na tuliusiana aia,
me gini dou sosongo na tobaqira igira.
43Igoe o parusigira sui nina isi vavanga
maia e gini tau managana tana vailabu.
44Igoe o adiligi sui vaninogoa na papadana gana tangisoa,
mo tsonitsuna i lao nina sasana na totukae.
45O nauvania maia e tuqatuqa tsaku lê kalina aia e tau vati tsau moa gana tagu ke tuqatuqa,
mo paluvangamana saikesa.
46?Taovia, laka sauba ko taopoi saviliu nomoa igoe?
?Sauba ke oka koegua sagata na koremu ke iru vaga na lake?
47!Ko padatugua laka e kurikuri lê na mauriqu;
mo ko padatugugotoa laka igoe nogo o aqosigami, migami ami tinoni lê sui moa mami dona mate!
48?Me laka asei tangomana ke mauri saviliu me ke tau mate?
?Me ke koegua vaga na tinoni ti ke tongo segenina me ke tau vano tana qilu?
49?Taovia, laka iava kalina ia na papadana nimu galuve vo oli igoe o sauvanigami i sau?
?Me laka iava ara totu igira na veke igoe o naugira vania a David?
50Laka na padaleana laka inau nimu maneaqo ara gokotsiri vaniau,
mau gini vatsangisavi niqira goko seko dangadanga ara tsonivaniau igira na tinoni ponotoba.
51!Taovia, igira gamu gala ara vaitsirigana na taovia tsapakae igoe o vilinogoa!
Ara gokotsiri vania moa pipi tana nauna tana aia e liu bâ.
52!Tsonikaea na Taovia na dani ma na dani!
!Amen, Amen!
90PAPI VATI
God e Totu Saliu Ma na Maurina Tinoni e Kukuri Lê Moa9:0 Na soana na Linge iani tana goko Hibru e vaga iani: Kesa Nina Nonginongi a Moses Aia Nina Maneaqo God.
1Taovia, igoe nogo nimami raravi na dani ma na dani.
2Idavia o aqosigira na vungavunga,
mo vusâ na barangengo ma na vangana sui i laona,
migoe o God saviliu nogo,
me sauba ko God na dani ma na dani.
3Igoe nogo o ketsaligira na tinoni kara visutugua i tana ara talu,
kalina igoe o tsarivaganana iani,
“Igamu na dalena tinoni kamu visutugua tana kao.”
4I matamu igoe, na toga na uvi ara vaga moa ti e kesa lelê moa na dani;
mara vaga moa ti na dani i noa, aia e labamai me nanga lê tugua,
e vaga moa ti e kesa turina tetelo lê moa na bongi.
5Igoe o adiligigami vaga moa ti na tatarina na obo;
na maurimami e nanga lê tsaku vaga moa ti na bolebole.
Mami vaga moa na buruburu e vovodato tana matsaraka,
6mi laona na dani e dato me molo latsena dou,
mi tana ngulavi e matsele me tavongani mate lê.
7Igoe o labuginigami na koremu loki;
mami gini matagu sosongo tana rongona nimu momosatoba loki.
8Igoe o morosigira sailagi nimami sasi,
atsa goto moa igira nimami sasi ara totu popoi, migoe o morosigira sui.
9Ma nimu kore loki nogo igoe, e kutsibuto lea na maurimami igami;
me gini nangaligi tsaku vaga moa ti na gagasa lê.
10E vitu sangavulu lelê moa na ngalitupa igami ami dona na mauri tsaulina,
se e alu sangavulu na ngalitupa ti vaga kami tangosuli.
Mi laoqira ami tsodoa moa na vatsangisavi ma na rota;
na mauri e tau oka me sui lê, migami ami nangaligi lê.
11?Masei bâ e vatsanginogoa na susuligana popono na koremu igoe?
?Masei e donaginia na matagu loki nimu momosatoba e dona ke alomaia?
12Vaga ia, mo ko sasanigami ma kami gini padagadovia laka e kurikuri lê moa na maurimami,
ma kami gini sasaga.
13?Ke oka koegua sagata goto ke totu nimu momosatoba vanigami?
!Taovia ko galuvegami igami nimu tinoni aqo!
14Pipi tana matsaraka ko dangaliginigami nimu galuve vo oli,
ma kami gini dona na mage ma na linge pipi dani tana maurimami popono.
15Kalina ia ko tusuvanigami na magemage loki
ke atsalina na melu loki igoe o moloa vanigami nogo tana idana,
i laoqira na ngalitupa danga igami ami totu moa tana rota.
16Ko tamivanigami igami nimu tinoni aqo kami reilakana nimu aqo loki igoe o naugira;
mo ko tamivanigira goto na kukuamami kara reilakana na susuligamu loki.
17Taovia nimami God, ami nongigo ko vangalaka vanigami.
Ko sangagami ma kami gini tangomana tana omea sui ami naugira.
91God Aia e Reitutugugita
1Aia moa e dona na ba toturavi i konina na Taovia,
ma na totu kalavata i vavana nina reitutugu aia e Susuliga Sosongo,
2aia moa e tugua ke tsarivaganana vania,
“Taovia igoe nogo o isutuguqu mo reitutuguau.
Igoe niqu God; minau au norugo.”
3Aia sauba ke ravisigo tanigira pipi sui na vatana na taviti ara totu popoi,
me tanigira goto na lobogu seko sui.
4Aia sauba ke tsavupoiginigo na rapona,
migoe sauba ko totu raviravi dou i laona nina reitutugu aia;
ma nina doulaka na Taovia sauba ke lia gamu tako me ke isutugumu.
5Me utu goto ko matagunia sa omea ke sekoligo tana bongi,
se sa omea seko ke tavongani gadovigo tana dani,
6se na lobogu seko e dona ke laba tana rodo,
se na rota seko loki e dona ke matesi tinoni tana danimale.
7Me atsa moa ti ke kesa na toga kara puka ma kara mate i ligisamu,
ma kara sangavulu na toga kara mate polipoligo,
me utu nomoa ke kesa na omea seko ke sekoligo igoe.
8Sauba igoe ko morosiginia na matamu segeni nogo na kede ke gadovigira na tinoni vanga tsutsukibo.
9Igoe o dona na ba totu raviravi i konina na Taovia,
mo tamivania aia e Susuliga Sosongo ke reitutugugo.
10me vaga ia, me utu goto ke kesa na omea seko loki ke gadovigo,
me ke tagara goto sa rota seko ke ba varangisia na valemu.
11Rongona God sauba ke ketsaligira nina angelo kara reitutugugo
iava moa tana igoe ko vano.
12Me sauba igira kara pailaginigo na limaqira
rongona na tuamu ke tau gado tana vatu.
13Migoe sauba ko tsogorigira lê na laeone ma na muata,
igira na laeone veveiga ma na muata vogata.
14God e tsaria, “Inau sauba kau maurisigira igira ara galuveau,
ma kau reitutugudougira igira ara donaginia laka inau nogo niqira Taovia.
15Mi kalina ti igira kara nongiau kau sangagira,
minau sauba kau sangagira;
me ti vaga ke gadovigira na rota, minau sauba kau totu i koniqira.
Sauba kau laumaurisiqira ma kau molokaegira.
16Me ngiti peluna vanigira, inau sauba kau mologira ma kara mauri oka;
inau nogo sauba kau maurisigira.”
92Kesa na Linge na Tsonikaeana God
1Taovia, e ulagana sosongo nomoa kami soadougo,
ma kami linge na tsonikaeamu igoe God Susuliga Sosongo,
2ma kami tsarivulagia pipi tana matsaraka na douna nimu galuve vo oli,
ma nimu doulaka pipi tana bongi,
3tana tatangina na itai tatangi
ma na leleuna na tuqulu.
4Au gini mage na reiaqira na omea loki igoe o naugira Taovia;
mi tana rongona nogo na omea igoe o naugira,
ti inau au gini linge vanigo tana mage.
5!Taovia ara loki sosongo nomoa na omea igoe o naugira!
!Ma nimu papada ara vano ao sosongo bâ!
6Ma na omea vaga ia, aia na tinoni bule e utugana vania ke donaginia;
ma na tinoni tau sasaga e utu goto vania ke padagadovia.
7Me atsa moa ti igira na vanga tsutsukibo kara vovodato vaga moa ti na buruburu lê,
migira na vanga nauseko kara tamani levo,
me sauba nomoa ko matesiligigira sui lakalaka,
8rongona igoe nogo Taovia o loki tsapakae saviliu na dani ma na dani.
9Migami ami dona nogo laka igira gamu gala igoe sauba nomoa kara mate,
me sauba ko sarangasigira na tinoni vanga tsutsukibo.
10Igoe o naua minau au gini susuliga vaga moa na buluka atsi;
igoe o vangalaka sosongo vaniau, minau au gini mage loki.
11Au reilakana kalina igoe o tuliusigira gaqu gala,
mau rongomia niqira kakanga igira na vanga tsutsukibo.
12Migira na tinoni ara totugoto i matana God, sauba kara dato magobu dou vaga nogo na gai na niu tana kao dou;
ma kara katsi vaga na gai na sida92:12 “na gai na sida” Reia tana 29:5. ni Lebanon.
13Ara vaga moa na gai ara tsukagira i laona na valena na Taovia,
mara dato magobu i laona nina Vale Tabu nida God.
14Me atsa moa ti vaga ke sui nogo niqira tagu na vua, mara vua babâ moa,
mara susuliga me marao dou na rauqira.
15Mi tana nogo e sauvulagia laka na Taovia e gotolaka,
aia nogo e reitutuguau, me tagara goto ke kesa na omea ke seko i konina.
93God Aia na Taovia Tsapakae
1Na Taovia aia nogo e taovia tsapakae.
E susuliga sosongo me tangiloki na rongona.
Aia nogo e vaturikakaia na barangengo,
me utu goto ke ratsu bamai.
2Taovia kalina ara tau vati tuturiga moa na omea sui, migoe o totu ida nogo.
mo taovia tsapakae tû nogo tana tuturigana.
3Taovia, e poda loki na kararana na panu tana kema;
me manunu loki sosongo na tatangina.
4Migoe Taovia o susuliga sosongo i gotu i baragata,
susuliga liusia bâ na kararana na baro i levugana na kema,
susuliga liusia bâ na panuna na tasi.
5Taovia, nimu ketsa ara totu saviliu,
ma nimu Vale Tabu igoe e tabu loki sosongo,
na dani ma na dani.
94God Aia Nogo e Pedegira na Tinoni Sui
1!Taovia igoe nogo na God o dona na kede tinoni;
ko tû mo ko saulabatia na koremu!
2!Igoe nogo o pedegira na tinoni sui;
ko tû mo ko kedegira na tinoni vanga kaekae vaga e ulagaqira!
3?Sauba ke oka koegua goto kara magemage igira na vanga tsutsukibo?
?Laka sauba ke oka koegua Taovia?
4?Sauba ke oka koegua goto kara kaekae igira na tinoni vanga nauseko
ma kara gini goko kaekae matena na omea seko ara naua?
5Ara tsogori rapasigira nimu tinoni igoe Taovia;
mara bingi sekoligira igira o tamanigira.
6Ara labumatesigira na daki tinamate migira goto na baka tinamate,
mara lamutasigira na tinoni ni veratavosi igira ara totu i laomami igami.
7Mara tû, mara tsarivaganana, “Na Taovia e tau lelê morosigami;
na God ni Israel aia e tau goto boeginigami igami.”
8?Niqu tinoni igamu, egua sagata ti amu bubulega vaga ia?
?Me sauba kengisa ti kamu sasaga?
9?God aia e aqosia na kulida, me laka e utu vania ke rorongo?
?Maia e aqosia na matada, me laka e utu vania ke moro?
10?Aia e totosasaga vanigira na puku sui, me laka ke tau goto kedegira?
?Aia nogo e taraigira na tinoni sui lakalaka, me laka e tau lelê sasaga aia?
11Na Taovia e donagininogoa niqira papada na tinoni;
me laka ara lovolovo lê moa, tau tamani sa rongona dou.
12!Taovia, e dou sosongo vania na tinoni igoe o totosasaga vania,
maia igoe o sasaniginia na muriana nimu ketsa!
13Tinoni vaga ia igoe o moloa ke mango rago tania na tagu na rota,
poi tsau kalina kara tsaia na qilu i tana kara puka igira na vanga tsutsukibo.
14Na Taovia sauba e utu ke mololegira nina tinoni;
me utu goto ke tsonilegira igira aia e tamanigira.
15Mi laoqira na vale na pede sauba kara pede gotosigira tugua na tinoni,
migira sui e goto niqira sasaga sauba kara muria na omea ara pedea.
16?Me laka asei e isutuguqu inau tanigira na vanga tsutsukibo gira?
?Masei e sangaau na tukapusiaqira na vanga nauseko gira?
17Me ti vaga na Taovia ke tau nogo sangaau inau,
me ke oka nogo kau tsaro i laona na qilu.
18Au tsaria, “Au puka nogo”;
migoe Taovia o tatatuuau ginia nimu galuve vo oli.
19Me pipi kalina e ponopala na tobaqu me ngoliau danga na omea,
migoe o vereau mau gini magemage tugua.
20Igoe o sove tanigira na tinoni pede ara dona na pedeseko,
igira ara pilosekolia na ketsa dou tsavuginia niqira pedeseko,
21igira ara vorogokona na sekoliaqira na tinoni dou,
mara pedematesigira igira ara tau tsukia sa sasi.
22Maia na Taovia e isutuguqu inau;
ma niqu God e reitutuguau.
23Aia nogo sauba ke kedegira tana rongona niqira tsutsukibo ara naua igira,
me ke matesigira matena niqira sasi;
na Taovia nida God sauba ke tû me ke labumatesigira sui.
95Kesa na Linge na Tsonikaeana God
1!Kamu mai ma ka tsonikaea na Taovia!
!Ida ma ka linge tana mage vania God aia e reitutugugita!
2Ka tû i matana ma ka soadoua,
ka linge tana mage ma ka tsonikaea.
3Rongona na Taovia aia e God susuliga sosongo,
maia e taovia tsapakae susuliga liusigira pipi sui na god tavosi.
4Aia e tagaovi kaputia na barangengo popono,
e tû i lao vasau, me tsau dato tana vungavunga i gotu vasau.
5Na tasi nina nogo na Taovia rongona aia nogo e aqosia;
ma na kao goto rongona aia segenina nogo e vusâ.
6!Mai, ma ka tsuporu ma ka samasama vania;
ka tsunatuturu i matana na Taovia aia e aqosigita!
7Aia nida God, migita a nina tinoni, maia e reitutugugita,
me palagita vaga moa ti kesa nina alaala na sipi.
I dani eni kamu rongomia na omea aia e tsaria,
8“Igamu kamu laka goto na baribari,
vaga ara naua igira na kukuamui i sau i Meriba,
me vaga goto tana dani tana kaomate i Masa.
9I tana igira ara tovoleau inau,
atsa moa ti ara reilakana nogo na omea loki inau au naua vanigira.
10I laona e vati sangavulu ngalitupa inau au qisi tanigira na tinoni girani.
Mau tsaria, ‘!Igira ara petsakoe sosongo,
mara sove na muriaqira niqu ketsa!’
11Mau gini kore loki sosongo, mau vatsa vanigira mau tsaria:
‘Sauba ke utu saikesa vanigamu kamu sage tana kao
i tana inau au padâ kau mologamu kamu ba mango!’ ”
96God na Taovia Loki Tsapakae
1!Lingena na linge vaolu vania na Taovia!
!Linge vania na Taovia igamu na momoru taligu!
2!Linge vania na Taovia ma kamu tsonikaea!
Pipi dani kamu katevulagia laka aia nogo e maurisigita.
3Katevulagia gana loki tsapakae vanigira na puku sui,
ma kamu turupatuna vanigira na toga sui na omea loki aia e naugira.
4Na Taovia e loki tsapakae, me ulagana sosongo nomoa igita ka tsonikaea;
aia nogo igita ka kukuni loki tania liusigira bâ na god tavosi
5Ma niqira god igira sui na puku tavosi na nununa lê moa na gai ara katsua,
maia moa nida Taovia igita aia nogo e vusâ na baragata.
6Na Taovia e loki tsapakae me tangi loki na rongona;
na susuligana aia ma na rereidouna ara labamaka popono i laona nina Vale Tabu.
7Tsonikaea na Taovia igamu na toga sui tana barangengo,
tsonikaea gana loki tsapakae ma na susuligana.
8Soadatoa na asana tabu na Taovia;
adimaia nimui sausau ma kamu sage i laona nina Vale Tabu.
9!Samasama vania na Taovia tana tobamale,
migamu sui tana barangengo popono kamu gariri i matana aia!
10Ma kamu katevulagia vanigira na puku tavosi sui laka “!God aia segeni moa e taovia tsapakae!
Aia nogo e vaturikakaia na barangengo, me utu goto ke ratsu bamai;
me sauba aia nogo ke pedegira na tinoni sui tana pedegoto.”
11!Kara ka magemage kaira na barangengo ma na masaoka!
!Kara viri leleo takuti na tasi loki me pipi sui lakalaka na omea ara mauri i laona;
12kara magemage igira na uta ma na omea sui i laoqira!
Migira sui goto na gai i laona na legai kara gudato tana mage,
13rongona na Taovia e mai nogo na pedeana na barangengo.
Maia sauba ke pedegira na tinoni sui tana barangengo
tana pedegoto ma na pedelaka.
97God Aia na Tagao Loki Tsapakae
1!Na Taovia e taovia tsapakae! !Igoe na barangengo ko gini magemage!
!Migamu goto na momoru sui ni tasi kamu mage loki!
2Na parako ma na rodo ara polipolia;
maia e tagaovigira na tinoni sui tana gotolaka ma na manana.
3Na lake iruiru e idaida vania,
me iruvigira sui gana gala ara totu polipolia aia.
4Nina angaanga e mararasi poponoa na barangengo;
ma na barangengo e reia me gariri loki.
5Migira na vungavunga ara rono lê vaga moa na kadele kalina e iru,
i matana na Taovia aia e tagaovia na barangengo popono.
6Na baragata e katevulagia laka aia e gotolaka saikesa,
migira sui na puku na tinoni ara reivulagia gana loki tsapakae.
7Migira sui ara samasama vanigira na god peropero kara paluvangamaqira lê;
rongona igira sui na god tavosi ara palatsuna i matana na Taovia mara tsuporu vania.
8Igira na tinoni ni Sion ara gini magemage,
migira sui na verabau tana Juda ara gini mage loki sosongo
tana rongoqira nimu pedegoto igoe Taovia.
9Taovia Susuliga Sosongo, igoe nogo o tagaovi kaputia na barangengo popono;
migoe o loki liusigira bâ pipi sui na god tavosi.
10Na Taovia e galuvegira igira ara reisavia na sasaga seko;
maia e reitutugudoua na mauriqira nina tinoni;
me laumaurisigira tania na susuligaqira na tinoni vanga tsutsukibo.
11Na marara e mararasigira na tinoni dou,
ma na magemage e dangaligira igira e goto niqira sasaga.
12!Kamu mage igamu sui amu totugoto i matana na Taovia,
kamu padatugua na omea sui aia e naugira,
ma kamu soadoua na asana tabu!
98God Aia e Tagaovi Kaputia Na Barangengo
1!Lingena na linge vaolu vania na Taovia;
rongona aia nogo e naugira na omea loki!
Tana nina mana segeni mi tana susuligana tabu
aia e gini managana.
2Na Taovia nogo e katevulagia laka e managana;
me sauvulagia na susuligana loki vanigira na puku sui.
3E manalinogoa nina veke e nauvanigira na toga ni Israel
ma nina galuve vanigira e totu kalavata me vô ke oli.
Migira na tinoni pipi tana nauna sui ara reia kalina e managana nida God.
4!Igamu sui tana barangengo popono, kamu gudato vania na Taovia tana magemage;
kamu tsonikaea me ke tangidato nimui linge na magemage!
5!Linge na tsonikaeana na Taovia!
!Taigira na itai tatangi!
6Uvigira na riga ma kara tangi na tavuli,
gudato tana mage vania na Taovia aia nogo nida taovia tsapakae.
7!Igoe na tasi loki, me pipi sui lakalaka na omea ara mauri i laomu, kamu viri leleo takuti;
migoe na barangengo, migira na tinoni sui ara mauri i laomu kamu lilinge!
8Igamu na ko loki sui kamu tapotapo;
migamu sui na tetena, kamu linge kolu tana magemage i matana na Taovia,
9rongona aia e mai nogo na pedeana na barangengo.
Maia sauba ke pedegira na tinoni sui tana barangengo
tana pedegoto ma na pedelaka.
99God Aia na Taovia Loki Tsapakae
1Na Taovia aia nogo e taovia tsapakae;
migira na tinoni sui ara gariri i matana.
Aia e totu tana nina sasana na totukae i kelana na rapoqira na angelo,
me gini kakasisi popono na barangengo.
2Na Taovia e susuliga sosongo i Sion;
me loki tsapakae kaputigira na puku sui.
3Migira na tinoni sui sauba kara tsonikaea na lokina ma gana tangirongo na asana tabu.
!Aia segeni e tabu loki!
4Taovia Tsapakae Susuliga, igoe o reingaoa na omea e goto;
migoe nogo o turuvaginia na pedegoto ma na pedelaka i laomami igami na Israel;
5!Tsonikaea na Taovia nida God;
samasama vania i matana nina sasana na totukae!
!Aia segeni e tabu loki!
6Mi kaira a Moses ma Aaron ara ka lia nina manetabu,
ma Samuel aia kesa e dona na nonginongi vaniana;
tugira ara tu soâ na Taovia maia e rongomia tu niqira nonginongi.
7Na Taovia e totu i laona kesa na parako loki me goko vanigira nina tinoni;
migira ara murigira na ketsa ma na vali aia e tusua vanigira.
8Taovia niqu God, igoe o rongomia niqira nonginongi nimu tinoni;
mo sauvulagia vanigira laka igoe nogo na God na galuve mo dona na padaleana niqira sasi,
atsa moa ti igoe o kedegira tana rongona niqira sasi.
9!Tsonikaea na Taovia nida God;
samasama vania tana nina vungavunga tabu!
Na Taovia nida God aia segeni e tabu loki.
100Kesa na Linge na Tsonikaeana God
1!Igamu sui na momoru taligu, kamu linge vania na Taovia ma kamu tsonikaea!
2!Samasama vania na Taovia tana magemage; mailaba i matana kolua nimui linge na magemage!
3Laka saikesa goto na padaleana laka na Taovia aia e God.
Aia nogo e aqosigita, me tamanigita;
igita a nina tinoni, ma nina sipi nogo aia.
4Sage bâ i laona nina Vale Tabu,
mi tana kamu soadoua ma kamu tsonikaea.
Kamu soadoua ma kamu tsonikaea na asana.
5E dou manana na Taovia
ma nina galuve e vo sui,
maia e mana saviliu na dani ma na dani.
101Nina Veke Kesa na Taovia Tsapakae
1Taovia sauba kau teâ kesa na linge tana rongona nimu galuve ma nimu pedegoto,
ma kau lingena vanigo.
2Me sauba kau tovoa ke gotodou pipi kalina niqu sasaga.
?Migoe Taovia ke ngisa ti ko mai mo ko sangaau?
Inau sauba kau tovoa ke male dou niqu sasaga i laona na valequ,
3me utu goto kau tamivania sa omea seko ke totu i laona.
Au reisavi sosongolia niqira omeomea igira ara piloligi tania God;
mau tau goto ngaoa kara sage i valequ.
4Me sauba kau sove tania pipi na papada e tau goto,
mau tau goto ngaoa kau sanga i laona kesa na omea e seko.
5Sauba kau suilavaginia nina guguri aia e vaitsari gaqira popoi na tinoni tavosi;
me utu goto kau berengiti kolua na tinoni vanga kaekae me dona moa na padaloki segenina.
6Sauba kau tabedougira igira ara totukakai konina God,
ma kau tamivanigira kara totu koluau i laona na valequ.
Migira e gotodou niqira sasaga,
sauba kau tamivanigira kara aqo vaniau.
7Sauba ke tagara goto sa tinoni e dona na pero ke totu i laona na valequ;
me utu kau tamivania sa tinoni vanga malapalu ke mai totu i mataqu inau.
8Me pipi dani moa sauba kau tau kuti na matesiaqira
igira na vanga tsutsukibo ara totu i laona na verada;
ma kau tsialigigira pipi sui na tinoni vanga nauseko
tania nina verabau na Taovia.
102Nina Nonginongi Kesa na Tinoni Vaolu e Ngolia na Rota Loki
1!Taovia ko rongomi vatavia niqu nonginongi,
ko rongomiau inau au ngangaidato vanigo rongona ko sangaau!
2!Kalina inau au totu i laona na rota loki,
migoe ko laka na piloligi taniaqu!
!Ko rongomi vataviau,
mo ko tuguvisu tsakua niqu nonginongi kalina kau soago!
3Na mauriqu e vaga moa na punguna lê na lake;
e dato me tau oka me nangaligi lê;
ma na koniqu e papara vaga moa na lake.
4Na kosuqu e mamatsa lê vaga moa na buruburu makede;
ma na tobaqu e tau nogo padâ na mutsa.
5Au rota mau kukungu loki;
e tsuna sui nogo na kokoraqu, mau suli lê moa.
6Mau vaga moa na manu atsi i laona na kaomate,
mau vaga moa goto na tei e totu i laona na vera mangu ara vanotaninogoa.
7Au tsaro mamata;
mau vaga moa kesa na manu e totu segenina i kelana kesa na vale.
8Tana dani popono ara tsiriau moa igira gaqu gala;
migira ara peaau ara gini vatsa seko na soaqu.
9-10Tana rongona nogo na koremu ma nimu momosatoba loki vaniau igoe,
ti na tora e lia gaqu mutsa,
ma na kô na mataqu e lalokoluginia gaqu kô na inu.
Migoe o tangoliau mo tsoniligiau.
11Na mauriqu e kurikuri lê vaga moa na auau tana ngulavi;
mau vaga moa na buruburu makede lê.
12Migoe moa Taovia o taovia tsapakae na dani ma na dani;
migira na vatavata sui sauba kara padavisugo sailagi.
13Me sauba ko tû mo ko galuvetugua na vera ni Sion;
e labamai nogo na tagu na galuveana aia;
kalina ieni nogo na tagu dou vania na sangaana.
14Igira nimu tinoni aqo igoe ara padalokia i Sion,
atsa moa aia e taveo popono nogo;
mara galuvea moa, atsa moa ti e totu toroutsa saikesa.
15Igira na puku sui sauba kara kukuni tania na Taovia;
migira sui na taovia tsapakae tana barangengo sauba kara matagunia na susuligana.
16Mi kalina na Taovia ke logovisutugua na vera ni Sion,
mi tana sauba ke saulabatia gana loki tsapakae.
17Me ke rongomitugua niqira nonginongi nina tinoni,
igira aia e mololegira nogo mara totu moa tana seko.
18Maretsunâ vanigira na vatavata sauba kara botsamai i muri na omea na Taovia e naugira nogo,
rongona kara gini tsonikaegotoa igira ara tau vati botsa moa.
19Na Taovia e totu tana sasana tabu i gotu,
me morotsuna mai i lao tana barangengo.
20Aia e rongominogoa niqira kukungu igira ara totu tana vale sosori,
me nusigira lê igira ara pede vanigira nogo laka kara matesigira.
21Maia nogoria na rongona ti kara katevulagia na asana na Taovia i Sion,
ma kara tsonikaea i Jerusalem,
22kalina igira na puku sui kara saikolumai i tana,
ma kara samasama vania na Taovia.
23Aia nogo na Taovia e naua ti e gini maluku sosongo na koniqu kalina au tinoni vaolu moa;
aia nogo e kukurisia na mauriqu.
24Niqu God ko laka mavi na adiligiaqu kalina ia,
inau au tau vati tuqatuqa moa.
Taovia igoe o totu saviliu na dani ma na dani;
25i sau nogo igoe o vusâ na barangengo,
ma na limamu segeni nogo o aqosiginia na baragata.
26Migira na omea sui, sauba kara nangaligi lê kesa dani,
migoe moa sauba ko totu saviliu;
eo, sauba kara nguta lê igira sui vaga moa na polo.
Migoe sauba ko tsoniligigira lê vaga moa na polo ngutanguta,
me sauba kara nanga lê sui.
27Migoe o totu atsa vaga saviliu moa,
ma na maurimu e utu goto ke sui.
28Migira na dalemami igami sauba kara totu bibiu dou,
migira sui na kukuamami sauba kara totu raviravi dou
i vavana nimu reitutugu igoe.
103Nina Galuve God
1!Na tidaoqu ke tsonikaea na Taovia!
!Ma na tobaqu popono ke tsonikaea na asana tabu!
2Na tidaoqu ke soalokia na Taovia,
ma kau laka goto na padaleana laka aia e dou sosongo vaniau.
3Aia e padalegira pipi sui niqu sasi
me maurisiau tanigira pipi sui gaqu lobogu.
4Aia e maurisiau tania na qilu,
me dangaliginiau na galuvena e vo oli.
5Aia e dangaliginia na mauriqu na omea dou,
rongona kau gini vaolu babâ, ma kau susuliga vaga moa na manuloki.
6Na Taovia e gotolaka i laona pipi nina aqo,
me pedegoto tabana koniqira igira ara bingi sekoligira.
7Me saulabati vania a Moses na omea aia e pada manogatinogoa ke naua.
Me tamivanigira na tinoni ni Israel kara reilakaqira na omea loki aia e naugira.
8Na Taovia e doulaka me dona sosongo na galuve,
e kisa rago na kore me totu saviliu nina galuve vo oli.
9Aia e tau dona ke katelivisu vanigita sailagi moa nida sasi;
me vô ke kore saviliu.
10E tuguragoa aia ke kedegita, maia e tau moa kedegita,
se ke tangotugu matena igita a sasi vania.
11E loki sosongo nina galuve na Taovia vanigira ara kukuni tania,
e loki vaga nogo na aona e tû i lao tana kao me tsaudato i gotu vasau tana masaoka.
12Aia e tsoniligigira ao saikesa nida sasi,
e vaga moa na aona e tû tana e dato na aso me tsaubâ i tana e sû.
13Me vaga na tamaqira na baka e galuvegira na dalena,
me vaga goto na Taovia e galuvegira igira sui ara kukuni tania.
14Aia e donaginia na omea gua aia e aqosiginigita,
me padavisua laka igita na kao lê moa.
15Ma na maurida igita e vaga moa ti na buruburu lê.
Igita a vovodato vaga moa ti na tsitsi atsi;
16me mai na guguri me gadovia me tavongani dudu lê
me tagara goto ke kesa ke dona na reiana tugua.
17Ma nina galuve vo oli na Taovia e totu saviliu vanigira igira ara kukuni tania,
ma nina doulaka e totu saviliu vanigira na vatavata ma na vatavata,
18igira ara manalia niqira tabana na vaitasogi koluana God,
mara muridougira pipi sui nina ketsa.
19Na Taovia e vaturia nina sasana na totukae i gotu i baragata;
maia e taovia tsapakae kaputigira na omea sui.
20Kamu tsonikaea na Taovia igamu sui na angelo susuliga,
igamu amu rongomangana aia,
mamu muridougira nina ketsa.
21!Kamu tsonikaea na Taovia igamu na omea susuliga sui ni gotu,
migamu sui goto nina tinoni aqo amu naua na omea aia e kilia!
22Kamu tsonikaea na Taovia igamu sui na omea mamauri aia e aqosigamu, mamu totu pipi tana nauna sui i tana aia e tagao.
!Na tidaoqu ke tsonikaea na Taovia!
104Na Tsonikaeana God Aia e Volagira na Omea Sui
1!Na tidaoqu ke tsonikaea na Taovia!
!Taovia niqu God, igoe o loki tsapakae!
Migoe o taovia loki tsapakae me tangi loki na rongomu;
2mo gini tsatsavu popono na marara.
Igoe nogo o vuresia na baragata vaga moa ti na valepolo,
3mo logoa na valemu i kelana na ko loki i gotu.
O gini aqo na parako mala vaga nimu terê,
mo sagekae i kelana na rapona na guguri.
4Ma na guguri e lia nimu mane adigoko
ma na kirapina na angaanga e lia vaga ti nimu maneaqo.
5Igoe o vaturikakaia na barangengo,
me utu goto ke ratsu bamai.
6Mo tsavuginia na kema vaga kesa na polo sagesage katsi,
ma na kô o tsavuginigira popono na vungavunga.
7Mi kalina igoe o railigigira na ko loki, migira ara tsogo,
ara viri tsogoligi tsaku kalina ara rongomigo igoe o soalaginia vanigira nimu ketsa.
8Ara viri liu katsara tsuna tabana na vungavunga
mara bâ totu tana qou,
tana nauna igoe o vangarau manogatinogoa vanigira.
9Igoe o vota vanigira na nauna i tana kara totu,
mo tongo vanigira kara laka na saviliusiana,
mo nauvanigira vaga ia rongona kara tau tsavutugua na barangengo popono.
10Igoe o mologira na bugu kara viri vuradato i laona na poi popono,
migira na kô loki kara tave tana qou i levugaqira na vungavunga.
11Igira nogo ara lia gaqira kô na inu igira na omea tuavati atsi;
migira na asi atsi ara inu me gini malobu na lioqira.
12Mi kelaqira na gai ara totu varangi i tana,
igira na manu ara aqosia na binuqira, mara tao mara lilinge.
13Tû i gotu igoe o molomaia na usa ke tumuligira na vungavunga,
ma na barangengo o dangali poponoginia nimu vangalaka igoe.
14Igoe o naua me gini dato na buruburu me lia gaqira mutsa na buluka,
mara dato goto na volana na omea tsukatsuka vanigira na tinoni kara tsukâ,
rongona igira kara gini tamanina gaqira mutsa,
15ma niqira uta na uaeni gana kara gini magemage,
ma niqira oela na olive gana ke gini angaanga dou na kokoraqira,
ma gaqira bredi kara gini susuliga.
16Ma na usa e tumutsuna dou i koniqira na gai na sida104:16 “na gai na sida” Reia tana 29:5. ni Lebanon
igira nina gai segeni nogo na Taovia, aia nogo e tsukagira.
17I kelaqira nogo igira na manu ara aqosia na binuqira;
migira na tsou ara tamani binuqira i kelaqira na gai na aru.
18Igira na naniqoti atsi ara mauri tana vungavunga dato,
migira na pai atsi ara totu popoi tana babana vatu.
19Igoe o aqosia na vula ke votagira na tagu babâ i laona pipi na ngalitupa;
ma na aso e donaginia na tagu tana aia ke sû.
20Igoe o aqosia na bongi, mi laona na rodo
pipi sui na omea tuavati atsi ara viri laba rutsumai.
21Migira na laeone vaolu ara ngunguru loki kalina ara lave gaqira,
ara lavebamaia gaqira mutsa aia God nogo e saua vanigira.
22Mi kalina e dato na aso, migira ara visutugua tana babaqira
mara tsaro rago i tana.
23Migira na tinoni ara tû mara vano na nauana niqira aqo,
mara aqo babâ poi e tsau tana ngulavi.
24!Taovia, ara danga sosongo na omea igoe o aqosigira!
!Tana nimu sasaga loki nogo igoe o aqosiginigira
mara dangali tovua na barangengo!
25Na kema igoe o aqosia, e loki me dama sosongo,
ara loki mara tetelo na omea ara mauri i laona,
me utu kesa ke tsokoraegira.
26Igira na vaka danga ara liu bamai i laona,
ma Leviatan e oloolo me tsipubamai i laona,
aia na tuqana vigo na tsetse loki igoe nogo o aqosia.
27Igira sui lakalaka ara norugo moa igoe
ko tusuvanigira gaqira mutsa tana tagu igira ara ngaoa.
28Migoe nogo o sauvanigira gaqira mutsa, migira ara gania;
o palagira mara mutsa masu.
29Mi kalina igoe o piloligi tanigira, migira ara matagu;
mi kalina igoe o adiligia niqira magomago, migira ara mate lê
mara visutugua tana kao tana nogo ara talu.
30Mi kalina moa igoe o sauvanigira na magomago migira ara mauri,
migoe o vaolusia na maurina na barangengo.
31!Gana loki tsapakae na Taovia ke totu saviliu na dani ma na dani!
!Maia na Taovia ke gini mage na morosiaqira na omea sui aia e aqosigira!
32Aia e morotsunamai moa, me kakasisi popono na barangengo;
e pele bâ gira lê moa na vungavunga, me viri vulosudato na pungu loki.
33Inau sauba kau linge vania na Taovia tana mauriqu popono;
pipi dani tana mauriqu sauba kau linge na tsonikaeana niqu God.
34Ke gini laona sosongo aia na rongomiana niqu linge,
rongona aia nogo na pukuna niqu magemage.
35Kara nanga tania na barangengo igira sui na tinoni seko;
ma kara mate igira sui na vanga tsutsukibo.
!Tsonikaea na Taovia igoe na tidaoqu!
!Tsonikaea na Taovia!
105God Migira Nina Tinoni
1Soadoua na Taovia,
katevulagia gana loki tsapakae;
tsarivanigira na puku sui na omea aia e naugira.
2Linge na tsonikaeana na Taovia;
katevulagigira na omea dou sui aia e naugira nogo.
3Ka gini mage loki igita, tana rongona igita a nina tinoni nogo aia;
migira sui goto ara samasama vania kara gini magemage loki.
4Igita ka bâ i konina na Taovia rongona aia ke sangagita;
ma ka totu sailagi i matana.
5-6Igamu na kukuana a Abraham aia nina maneaqo na Taovia;
migamu goto na kukuana a Jakob na mane aia God e vilia;
kamu padatugugira na valatsatsa loki God e aqosigira,
ma nina pedelaka aia e naua.
7Na Taovia aia nogo nida God;
ma nina ketsa ara kalegira na tinoni sui tana barangengo popono.
8Aia sauba ke padatugu sailaginia moa na vaitasogi e naua kolugira i sau,
ma nina veke sauba kara totu kalavata saviliu vanigira na toga ma na toga na vatavata.
9Me sauba ke manalia nina vaitasogi aia e naua kolua a Abraham,
ma nina veke e naua vania a Isaak.
10Na Taovia e naua kesa na vaitasogi kolua a Jakob,
ma na vaitasogi ia sauba ke totu kalavata saviliu.
11Maia e tsarivania, “Inau sauba kau sauvanigo na kao ni Kanaan,
maia sauba ke lia nimu tamani segeni.”
12Igira nina tinoni God e tsaurae lê na dangaqira;
mara labavô i laona na kao ni Kanaan.
13Ara liubamai moa, tû kesa tana vera mara bâ kesa tana vera tavosi,
mara tû tana verana kesa na taovia tsapakae, mara bâ i konina kesa segeni.
14Mi tana tagu popono ia, ma God e tau tamivania ke kesa ke bingi sekoligira;
maia e parovatavigira na taovia tsapakae me tsarivanigira,
15“Kamu laka na sekoliaqira igira niqu tinoni inau au viligira;
ma kamu laka saikesa goto na peleaqira igira niqu propete.”
16Mi kalina na Taovia e naua me liu na uvirau tana veraqira i Kanaan
me adiligi tanigira pipi sui gaqira mutsa,
17maia e tû, me moloa a Josep aia ara tsabiria mala tseka,
ke idavano i Ejipt.
18Ara soriginia na tuana a Josep na itai tapala,
ma na liolio tapala ara kurua tana liona,
19me babâ vaga ia poi tsau kalina ara laba na omea sui vaga aia e katevulagigira ida nogo,
ma na gokona na Taovia e sauvulagia laka na omea aia Josep e tsaria ara mana sui.
20Mi muri, ma na taovia tsapakae ni Ejipt e mologira nina maneaqo kara ba nusilea a Josep,
aia nogo niqira taovia na puku tavosi e nusilea tania na vale sosori.
21Maia e moloa ke taovia loki tana verana,
me ke tagaovi kaputigira nina tamani sui,
22me ke ida vanigira igira nina mane sasanga na taovia tsapakae
me ke totosasaga vanigira igira nina mane na sauparovata vania na taovia tsapakae.
23Mi muri bâ, ma Jakob goto e vano i Ejipt
me ba totu kalavata i tana.
24Ma na Taovia e molovanigira nina tinoni kara danga na daleqira,
me naua migira ara susuliga liusigira gaqira gala.
25Maia nogo e naua ti igira na Ejipt ara reisavigira nina tinoni,
mara perobulesigira sosongo.
26Mi muri, maia e molo bâ vanigira a Moses nina maneaqo, ma Aaron aia e vilinogoa.
27Mi kaira nogo ara ka gini aqo na susuligana God,
mara ka naugira danga na valatsatsa tana Ejipt.
28God e moloa na rodo ke tsavua na vera popono,
migira na tinoni ni Ejipt ara petsakoe moa mara sove na rongomangana.
29E olia niqira ko loki me lia na gabu
me matesigira sui niqira tsetse.
30Ma na qori ara dangalia na vera popono,
me tsau bâ tana valena na taovia tsapakae, ara bâ danga goto i laona.
31Ma God e moloketsa mara laba danga na lango ma na ngitsu,
mara viri vururu i laona na vera popono.
32Ngiti usa aia e molotsunamaia na kolina na usa kakai kolu angaanga tana veraqira;
33e sekoli vanigira popono pipi niqira uta na uaeni kolu niqira gai mutsamutsa sui,
me bokugira sui lakalaka pipi na gai ara totu i tana.
34Aia e moloketsa, mara laba danga sosongo na kipo,
me utu na tsokoraeaqira;
35migira ara ganigira pipi sui lakalaka na rauna na omea tsukatsuka tana vera ia;
mara ganigira goto na mutsa sui ara tsukagira.
36Aia e matesigira sui na baka mane botsaida i laoqira na tamadale sui tana Ejipt.
37Mi muri, maia e adirutsumigira na tinoni ni Israel tania na Ejipt;
migira ara anguniligigira na siliva ma na qolumila,
me pipi gira sui ara mauri dou mara susuliga rago.
38Migira na Ejipt ara matagunigira sosongo,
mara gini mage moa kalina igira na Israel ara vanoligi tanigira.
39God e moloa na parako ke didisigira nina tinoni tana dani,
mi tana bongi ma na lake e mararasi vanigira na sautu.
40Igira ara nono gaqira i konina, maia e molovanigira gaqira manubau;
me sauvanigira na mutsa e talu i gotu kara gania ma kara gini vatsa.
41Aia e toua na maragova, ma na kô e bubusu tsunamai,
me sarara me mao popono tana kaomate vaga moa ti kesa na ko loki.
42E padavisua nina veke tabu
aia e nauvaninogoa a Abraham nina maneaqo.
43Ti aia e gini adirutsumigira nina tinoni vivili,
migira ara lilinge mara gugû loki tana magemage.
44Maia e tû, me tusulea vanigira niqira kao igira na tinoni tavosi,
me tamivanigira kara aditamaniqira niqira uta.
45Aia e nauvanigira vaga ia ti igira nina tinoni
kara gini muridougira pipi sui nina ketsa ma nina vali.
!Tsonikaea na Taovia!
106God e Doulaka Vanigira Nina Tinoni
1!Tsonikaea na Taovia!
Soadoua na Taovia rongona aia e dou sosongo;
ma nina galuve e totu saviliu.
2?Asei nomoa tangomana ke tsarivulagia pipi na omea loki sui aia e naugira nogo?
?Masei sagata e tugua ke tsonikaea vaga e ulagana?
3Kara mage igira ara muridougira nina ketsa,
mara madodo pipi kalina na nauana na omea e goto.
4Taovia ko padaau goto inau, kalina igoe ko sangagira nimu tinoni;
mo ko maurisiau goto inau kalina ko maurisigira igira.
5Ko tamivaniau ma kau reia na douna niqira mauri igira nimu tinoni vivili,
ma kau sangapata kolugira tana niqira magemage,
ma niqira tobamage igira na tinoni igoe o tamanigira.
6Igami ami sasi vaga nogo ara naua igira na mumuamami;
ami tsutsukibo mami sasaga seko.
7Kalina igira na mumuamami ara totu i Ejipt ara tau saikesa padagadovia na aqo loki sui igoe o naugira;
mara padalegira nogo na tagu danga i tana igoe Taovia o sauvulagia vanigira nimu galuve.
Mi tana Tasi Tsitsi igira ara tû, mara petsakoe mangana moa aia e Susuliga Tsapakae.
8Maia e laumaurisigira nomoa, vaga nogo aia e vekenogoa,
rongona ke gini sauvulagia na susuligana loki.
9Aia e ketsalia na Tasi Tsitsi me mamatsa takuti;
me idavigira na toga mara liusavu tana kao mamatsa.
10Aia e maurisigira tanigira igira ara reisavigira;
me laumaurisigira tania na limaqira gaqira gala.
11E saivisutugua na tasi me lumigira sui gaqira gala,
me tagara lelê goto sa vidaqira ke mauri.
12Mi tana, migira nina tinoni ara gini tutunina nina veke aia e naua vanigira,
mara tû, mara linge na tsonikaeana.
13Me tsaku sosongo ara padalegira na omea aia na Taovia e naua vanigira,
mara muria na tobaqira segeni;
mara tau pitua nina totokoe na Taovia.
14Mi tana kaomate igira ara kili sosongolia kara mutsa masu;
te ara tû mara tovolea God;
15maia e sauvanigira na omea igira ara nongia i konina,
me mologotoa kesa na lobogu seko sosongo ke gadovigira.
16Mi tana i laona na kaomate, igira ara masugu vanikaira a Moses ma Aaron,
kaira nina maneaqo tabu na Taovia.
17Mi tana e tavongani manganga kesa na qilu loki tana kao,
me konomi poponoa a Datan,
me qilupoitugira a Abiram ma nina tamadale;
18me tavongani botsa na lake i koniqira igira gaqira dulikolu,
me kodogira popono na tinoni vanga tsutsukibo gira.
19Mi kalina igira ara totu moa i Sinai,
mara aqosia kesa na buluka qolu me lia niqira god;
mara tû mara samasama vania na god peropero ia;
20mara padalokia na nununa lê na omea tuavati e dona na gani buruburu,
liusia bâ na padalokiana gana loki tsapakae God.
21Mara padalea na God aia e laumaurisigira
ginia nina aqo e nauginia na susuligana loki i Ejipt.
22!Na omea loki sosongo nomoa aia e aqosigira i tana!
!Na omea ganataga sosongo nomoa aia e naugira tana Tasi Tsitsi!
23Mi kalina God e tsaria laka sauba aia ke pedematesigira nina tinoni,
maia Moses nina maneaqo vivili e tû, me tongo vania God,
me tangolivisu vania na korena ke tau pedematesigira.
24Mi muri, migira ara sove tania na kao lakataga dou,
rongona igira ara tau tutunina nina veke God e naua vanigira.
25Ara tototu moa i laona niqira valepolo mara goko ngulungulu,
mara tau ngaoa na rongomi vataviana na Taovia.
26Te e tû na Taovia, me vatsa vanigira
laka aia ke matesigira lê i laona na kaomate,
27me ke sarangasigira na kukuaqira i laoqira na tinoni ponotoba,
me ke molovanigira kara bâ mate tana vera tavosi.
28Mi muri, i Peor, igira nina tinoni God ara sanga na samasama vaniana Baal,
mara gania na omea ara gini savori-kodoputsa vanigira na nununa lê na god peropero.
29Mi tana nauvaganana ia migira ara tsaiginia na korena na Taovia,
me gini botsadato i laoqira kesa na lobogu loki seko sosongo.
30Me tû a Pinehas, me kedegira igira ara naua na sasi vaga ia,
me gini totupuka na lobogu seko loki e gadovigira.
31Me tû nogo tana tagu ia, migira na tinoni ni Israel
ara padalokia a Pinehas tana rongona nina aqo ia,
me sauba kara tau kuti na padalokiana babâ vaga ia tana tagu sui ke mai i muri.
32Mi tana ko vuravura ni Meriba igira na toga ara tsaigotoa na korena na Taovia,
me gini seko vania a Moses tana rongoqira igira.
33Niqira sasaga ara naua e galasi sosongolia na tobana Moses,
me gini gokotsonitsaku sosongo me tau papada talu ti ke goko.
34Igira ara tau matesigira sui na tinoni ponotoba
vaga na Taovia e ketsaligira kara naua,
35mara tauga lalo kolugira moa
mara muria moa niqira sasaga ponotoba.
36Mara tû nina tinoni God, mara samasama vanigira niqira god peropero,
mi tana nauvaganana ia ti ara alomai segenia gaqira matemate.
37Ara gini kodoputsa na daleqira mane ma na daleqira daki
vanigira na god peropero ni Kanaan.
38Ara matesigira na daleqira boruboru,
ma na kao e gini bau popono na gabuna na lamuta.
39Mi tana rongona ara nauvaganana ia, mara gini tau nogo totumale i matana God.
Ara muria moa na kilinauseko i tobaqira segeni,
mara tau goto totukakai konina God.
40Vaga ia, ma na Taovia e kore vanigira nina tinoni;
e galasi sosongolia na reiana niqira sasaga.
41Me tû, me molobagira tana limaqira na tinoni ponotoba,
migira gaqira gala ara tagaovi kaputigira.
42Gaqira gala ara bingi sekoligira,
mara nautsekagira.
43Danga kalina na Taovia e laumaurisigira nina tinoni,
migira ara petsakoe babâ vania moa,
mara puka babâ moa tana sasi.
44Maia na Taovia e rongomigira nomoa kalina igira ara ngangaidato vania,
me galuvegira tana niqira rota.
45Tana rongoqira nogo igira, ti aia e gini padavisua na taso e naukolugira,
mi tana nina galuve loki ti aia e mololetugua na sekoliaqira.
46Me naua me gini pilo na tobaqira igira ara bingi sekoligira nina tinoni
mara galuvegira tugua na Israel.
47Taovia nimami God, ko maurisigami,
mo ko adivisugami tania na totu i laoqira na puku tavosi,
ma kami visutugua tana nimami kao segeni nogo,
rongona kami gini soadougo,
ma kami tsonikaea na asamu tabu.
48!Tsonikaea na Taovia na God ni Israel;
ka tsonikaea kalina ia mi tana dani ma na dani!
Ida gita sui lakalaka ma ka tsaria, “!Amen!”
!Tsonikaea na Taovia!
107PAPI 5
Na Tsonikaeana God Rongona Aia e Doulaka
1“!Ka soadoua na Taovia, rongona aia e dou;
ma nina galuve e totu saviliu!”
2Pipi gamu sui aia e maurisigamu nogo
kamu tsaritugutugua na tsaqina goko iani na mani tsonikaeana na Taovia.
Aia nogo e laumaurisigamu tania na limaqira gamui gala,
3me adivisugamu talu tana vera tavosi,
i longa mi tasi, i ata mi vava.
4Visana vidamui ara sarevo bamai lê tana kaomate i tana e tau liu bâ sa sautu,
mara tau tangomana na tsodoana kesa na vera tana kara totu.
5Igira ara vatsangia na vitoa ma na marou
mara padâ laka sauba nomoa kara seko nogo.
6Mi laona niqira rota migira ara tû mara ngangaidato vania na Taovia,
maia e maurisigira tania na rota loki e gadovigira.
7Maia e idagana sautu vanigira mara gini liu tana sautu goto,
mara ba laba kesa tana verabau i tana nogo kara ba totu.
8Niqira aqo nomoa igira kara soadoua na Taovia tana rongona nina galuve vo oli,
mi tana rongoqira goto na omea dou sui aia e nauvanigira.
9Aia e naua mara vatsa na inu igira ara marou,
me masuliginigira na mutsa dou igira ara vitoa.
10Visana e pono saikesa na tobaqira mara totu moa tana rodo,
mara rota i laona na vale sosori i tana ara soriginigira na itai tapala,
11rongona ara petsakoe mara tau ngaoa na muriana nina ketsa na God Susuliga Sosongo,
mara sove tania nina totosasaga aia e nauvanigira.
12Ara aqo kakai me gini maluku sosongo na koniqira;
mi kalina ara puka me tagara nogo ke kesa ke sangagira.
13Mi laona niqira rota loki vaga ia, migira ara tû mara ngangaidato vania na Taovia,
maia e maurisigira tania na rota loki e gadovigira.
14Me adirutsumigira tania na totu ponotoba sosongo ma na totu tana rodo,
me kabakutigira na itai tapala ara soriginigira.
15Niqira aqo nomoa igira kara soadoua na Taovia tana rongona nina galuve vo oli,
mi tana rongoqira goto na omea dou sui aia e nauvanigira.
16Aia e taitapaligira na matsapa ara aqosiginigira na tapalamila,
me taimitsigira na tapala sui ara raveginigira na matsapa.
17Visana ara bule, mara rota tana rongona niqira sasi ara naua,
mi tana rongona goto niqira sasaga tabaru;
18me sibi na tobaqira na ganiana na mutsa
me varangi sosongo nogo kara mate.
19Mi laona niqira rota loki vaga ia, migira ara tû mara ngangaidato vania na Taovia,
maia e maurisigira tania na rota loki e gadovigira.
20Maia e goko moa, migira ara gini susuliga visutugua,
me maurisigira tania na qilu.
21Ma niqira aqo nomoa kara soadoua na Taovia tana rongona nina galuve vo oli,
mi tana rongoqira goto na omea dou sui aia e nauvanigira.
22Ma niqira aqo goto kara soadoua kolua niqira savori-kodoputsa,
mi laona niqira linge na magemage kara katevulagigira na omea sui aia e naugira.
23Mara visana ara aqo tana vaka mara liu bamai i mao
mara tsodoa na mauriqira i laona na tasi.
24Mara reigira na omea na Taovia e naugira,
na omea loki sui aia e naugira i laona na mao rodo.
25Aia e goko moa, me mai na guguri loki
me karara na panu.
26Ma na vaka ara tsoni tana panu mara dato i gotu,
mara tsuna mara labusagi i laona na mao.
Migira na mane na vaka ara matagu mate me vane gaqira poqa.
27Mara tapulepule bamai vaga moa ti ara inu bule,
mara tau goto dona nagua kara naua ti kara maurisiginia na vaka.
28Mi laona niqira rota loki vaga ia ara ngangaidato vania na Taovia,
maia e maurisigira tania na rota loki e gadovigira.
29E pukalia na susuligana na legai loki,
me beatasia na tasi.
30Ara gini mage loki rongona e beata tugua na tasi,
ma na Taovia e adigira bâ tana manga i tana ara sulungana.
31Ma niqira aqo nomoa igira kara soadoua na Taovia tana rongona nina galuve vo oli,
mi tana rongoqira goto na omea dou sui aia e nauvanigira.
32Ma niqira aqo goto kara katevulagia gana loki tsapakae i laona niqira saikolu na tinoni,
ma kara tsonikaea i matana niqira totusai igira gaqira ida.
33Na Taovia e naua, ma na ko loki ara tavongani mamatsa lê,
me tongo vanigira na ko vuravura mara tau tsatsali votu.
34Aia e olia na kao lakataga me gini lia na kaomate,
me utu ke dato sa omea i konina,
rongona niqira tsutsukibo ara naua igira na tinoni ara totu i tana.
35Aia e olia na kaomate mara maodato na kô i konina,
mi tana kao mamatsa ara vuradato na kô.
36Aia e tamivanigira igira ara vitoa kara ba totu i tana,
migira ara bâ mara logo veraqira i tana.
37Ara aqoa niqira uta, mara tsukâ niqira itai na uaeni,
mara pitsugira na vuana danga sosongo.
38Aia e vangalaka sosongo vanigira nina tinoni, migira ara tamanina e danga na daleqira;
mara pabo babâ goto niqira alaala na buluka.
39Mi kalina igira gaqira gala ara tuliusigira nina tinoni God mara paluvangamaqira,
mara bingi sekoligira sosongo mara totu tana rota,
40mi tana, ma na Taovia e tû me pea sosongoligira gaqira ida igira gaqira gala,
me naua mara viri sarevo bamai lê tana kaomate i tana e tau liu sa sautu.
41Maia e laumaurisigira tania niqira totu rota igira ara kilia na sasanga,
me naua migira na daleqira ara pabo babâ vaga moa ti na sipi.
42Igira na tinoni e gotodou niqira sasaga ara reia e laba na omea vaga ia, me gini dou sosongo na tobaqira,
migira na vanga tsutsukibo ara totu mui lê moa.
43Igamu na tinoni amu sasaga, e dou kamu padatugutugugira na omea girani,
ma kamu katevulagia laka nina galuve na Taovia e vo oli.
108Kesa Tinoni e Nongia God Ke Sangâ Na Tukapusiaqira Gana Gala
1!Inau au noru saikesaligo moa niqu God!
!Me sauba kau linge ma kau tsonikaego!
!Mamata igoe na tidaoqu!
2!Mamata goto kagamu niqu itai tatangi ma niqu tuqulu!
Me sauba inau kau galisigotoa na aso.
3Sauba kau soadougo igoe Taovia i laoqira na puku sui.
Ma kau tsonikaego i laoqira na tinoni sui.
4Nimu galuve vo oli e dato me suâ na baragata;
ma nimu gotolaka e peledatoa na masaoka.
5Niqu God ko saulabatia tana masaoka laka igoe o loki tsapakae,
ma na mararamu e tsavu poponoa na barangengo.
6Ko rongomia niqu nonginongi,
mi tana susuligamu loki ko laumaurisigira nimu tinoni igira igoe o galuve sosongoligira.
7Ma God aia e tû tana nina Vale Tabu me tsarivaganana,
“Inau au tangomana nogo,
me sauba kau votâ na kao ni Sekem,
ma kau tuvarivotâ na poi ni Sukot vanigira niqu tinoni.
8I Gilead niqu nogo inau, mi Manase goto;
I Epraim gaqu kepi tapala,
mi Juda gaqu itoro na taovia tsapakae.
9Mi Moab ke lia niqu popo na vulivuli,
mi tana Edom sauba kau tsonidatoa gaqu porotua,
na papadana laka inau nogo au tamanina i tana.
Me sauba kau gudato tana magemage rongona e managaqu tana vailabugi kolugira na Pilistia.”
10?Niqu God, laka asei nomoa sauba ke adiau bâ i laona na verabau ia ara poliginia na baravatu kakai?
?Masei sauba ke tudumiau bâ i Edom?
11?Egua laka igoe o sove tanigami manana nomoa igami?
?Me laka e utu goto ko dulikolugira nimami alaala na mane vaumate na vano tana vailabu?
12Ko sangagami na tukapusiaqira gamami gala,
rongona nina sasanga na tinoni lê e tau lelê lia sa omea.
13Me ti vaga God ke totu tabana kolugita igita, me sauba ke managada,
rongona aia nogo sauba ke tuliusigira igira gada gala.
109Nina Ngangaidato Kesa Tinoni i Laona Nina Rota
1!Inau au tsonikaego igoe niqu God; migoe ko laka na totu mui lê moa!
2Igira na tinoni vanga tsutsukibo ma na vanga pero ara maiginiau inau.
Ara tsaria danga na gokopero tana rongoqu inau,
3mara tsonigira goto danga na gokoseko tana rongoqu,
mara tavongani maiginiau lê tagara sa rongona.
4Igira ara reisaviau, atsa moa ti inau au galuvegira dou
mau nonginongi vanigira.
5Ara tuguvisu vaniau moa na omea seko na tuguna na omea dou inau au nauvanigira,
minau au galuvegira, migira ara reisaviau.
6Taovia e dou ti ko vilia ke kesa na manepede e dona na pedeseko ke pedea gaqu gala,
mo ko naua me ke kesa gana gala segeni nogo ia ke tû me ke kelivania.
7!Kara vilekea nina sasaga ma kara tsodovulagia laka aia nogo e tsutsukibo manana;
me atsa moa nina nonginongi maia goto ke lia vaga ti na sasi!
8!Ma na maurina ia ke varangi nogo ke tsau tana susuina;
me ke kesa segeni ke adia na sasana tana nina aqo!
9!Migira na dalena kara tinamate,
ma na tauna ke totu tinamate lê goto!
10!Migira na dalena kara tau tamanina sa valeqira, ma kara nono gaqira moa;
ma kara tsialigigira goto tania na nauna sekoseko i tana ara totu!
11Ma na tinoni aia e kaoni i konina ke tû, me ke adiligi tania pipi nina omea tatamani sui,
migira na tinoni tavosi aia e tau donaginigira kara aditamaniqira na omea sui aia e aqo matena.
12Me ke tagara goto ke kesa ke dou vania,
se ke reitutugugira dou igira na baka tinamate aia e mate tanigira.
13Migira sui na kukuana kara viri mate sui,
ma na asana kara padale saikesalia igira na vatavata kara botsamai i muri.
14Maia na Taovia ke padatugugira na sasi sui ara naua igira na mumuana
me ke tau goto padalegira na sasi e tsukia na tinana.
15!Na Taovia ke pada sailaginia moa niqira sasi igira,
ma na asaqira gaqu gala kara nangaligi saikesa nogo tania na papadaqira na tinoni!
16Na mane ia e tau saikesa padâ na galuveaqira na tinoni;
e rotasigira moa me labumatesigira igira ara tau tamani omea,
migira ara kilia na sasanga, migira e tagara kesa ke sangagira.
17!Aia e dona sosongo na vealaginiaqira na tinoni, me dou ti kara vealaginigotoa aia!
!Aia e tau ngaoa ke vangalaka vanigira na tinoni tavosi, me ke laka goto kesa na vangalaka vaniana!
18!Aia e lavu sosongo na gokoseko vaga moa aia e lavu na sagelipolo;
ma nina gokoseko segeni aia kara sage tana kokorana vaga moa ti na kô,
mi tana sulina goto vaga moa ti na oela!
19Kara tsavuginia vaga moa ti na polo,
ma kara totu polipolia sailagi vaga moa ti na itai na sori polona.
20!Taovia aia nogo ko kedegira vaganana igira gaqu gala,
igira ara tsonia na gokoseko sosongo kaleau inau!
21Migoe moa Taovia niqu God, ko sangaau vaga igoe o vekenogoa,
mo ko laumaurisiau tana rongona nimu galuve vo oli.
22Inau au tau tamanina sa omea mau kilia na sasanga,
mau rota sosongo i laona na tobaqu.
23Me varangi kau nanga lê vaga moa na auau tana ngulavi e tsaku me nanga lê;
mau vaga moa na gonegone e tavâ na guguri.
24Au vitoa sosongo me gini maluku na koniqu me labe lê na tuturuqu,
mau suli lê moa.
25Mi kalina igira na tinoni ara morosiau, mara kiataginiau moa,
mara lengulengu lovaqira vaniau.
26!Ko sangaau Taovia niqu God,
mi tana nimu galuve vo oli ko maurisiau!
27Ko naua migira gaqu gala kara gini donaginia
laka igoe nogoria o vagamaurisiau inau.
28Molo vanigira kara gokoseko vaniau inau, migoe moa ko padalokiau.
Ko naua me ke tau managaqira igira ara rotasiau,
mi tana ke gini mage na tobaqu inau nimu tinoni aqo.
29Ko paluvangamaqira igira gaqu gala;
na vangamâ ke tsavugira popono vaga moa ti gaqira polo sagesage.
30Inau sauba kau gokodato ma kau soadoua na Taovia.
Sauba kau tsonikaea i laona niqira saikolu nina tinoni,
31rongona aia nogo e isutuguna na tinoni e tau tamanina sa omea
me laumaurisia tanigira ara pedematesia.
110Na Taovia ma na Taovia Tsapakae Aia e Vilinogoa
1Na Taovia e tsarivania niqu taovia:
“Ko totu ieni tana madoaqu,
poi tsau kalina kau tsogori tsunagira gamu gala ma kara tseka vanigo.”
2Sauba na Taovia ke tû i Sion me ke pabovanigo gamu susuliga, me ke tsaria:
“Igoe ko tagaovi kaputigira gamu gala.”
3Mi tana dani igoe ko labugira gamu gala,
migira nimu tinoni sauba kara sangago lê.
Vaga nogo na kolobu tana matsaraka bongibongi
igira nimu borau sauba kara mai i konimu tana vungavunga tabu.
4Na Taovia e vatsa nogo me utu goto ke olia nina veke.
Aia e tsarivaganana:
“Igoe o manetabu saviliu
vaga nogo a Melkisedek.”
5Na Taovia e totu nogo tana madoamu,
mi kalina aia ke kore loki, me sauba ke tuliusigira igira sui na taovia tsapakae.
6Maia sauba ke kedegira na puku tavosi,
ma na kubuqira na tinoni mate kara viri tsaro i tana ara vailabu.
Aia nogo ke tuliusigira na taovia tsapakae sui tana barangengo popono.
7Ma na taovia tsapakae aia, sauba ke inuvia na kô e tsatsali tave ligisana na sautu,
aia nogo ke gini susuliga me ke managana.
111Na Tsonikaeana na Taovia
1!Tsonikaea na Taovia!
Tana tobaqu popono sauba kau soadoua na Taovia
i laona niqira saikolu igira nina tinoni.
2!Ara dou sosongo nomoa na omea na Taovia e aqosigira!
Migira sui ara gini magemage na adiaqira, ara ngaoa kara padagadovigira dou bâ.
3Ma na omea sui aia e aqosigira ara sauvulagia laka aia e loki tsapakae,
me kukuniga sosongo,
me gotolaka saviliu.
4Na Taovia e ngaoa igita ka tau padalegira nina aqo loki aia e naugira;
maia e tobalaka vanigita me galuvegita.
5Aia e sau gaqira mutsa igira ara kukuni tania;
me utu saikesa ke padalea nina vaitasogi e naua kolugira.
6Aia e sauvulaginogoa na susuligana vanigira nina toga,
kalina e tusuvanigira niqira kao igira na tinoni ni veratavosi.
7Aia e gotolaka me mana saviliu tana omea sui e aqosigira.
Migira sui pipi nina ketsa e ulagada sosongo igita ka norugira.
8Igira nina ketsa God ara totu kalavata saviliu,
rongona ara talumai tana nina gotolaka ma nina mana saviliu.
9Aia nogo e laumaurisigira nina tinoni,
me naua kesa na vaitasogi saliu kolugira.
!Aia segeni e tabu loki me susuliga tsapakae!
10Na kukuni taniana na Taovia aia nogoria na sautu agana na lia tinoni sasaga.
Mara sasaga manana igira sui ara muridougira nina ketsa.
!Maia nogo ka tsonikaea na dani ma na dani!
112Nina Magemage Kesa na Tinoni Dou
1!Tsonikaea na Taovia!
Ke mage aia na tinoni e kukuni tania na Taovia,
me gini mage na muriana nina ketsa sui.
2Ma na dalena na tinoni dou sauba kara lia tinoni loki tana veraqira;
migira sui na kukuana aia sauba kara soalokigira.
3Ma nina tamadale sauba kara tamani omea levo,
ma nina tamani aia sauba ke pabo babâ na dani ma na dani.
4Na marara e maka tana rodo vanigira na tinoni e dou niqira sasaga,
igira ara dona na galuve ma na sangaaqira na tinoni tavosi, me goto niqira sasaga i matana God.
5Ke mage na tinoni e vangalaka me dona na gini sanga tinoni nina qolo,
me goto pipi kalina nina sasaga i laona nina aqo.
6Na tinoni dou vaga ia sauba e utu ke puka lê tana nina aqo;
migira na tinoni sauba kara pada sailaginia moa.
7Me utu ke matagu kalina ke rongomia e laba na omea seko.
Rongona e kakai sosongo nina tutuni,
me noru saikesalia moa na Taovia.
8E tau goto dona ke padasavi se ke matagu,
rongona aia e dona nogo laka sauba e utu ke managaqira igira gana gala.
9Aia e vangalaka sosongo vanigira ara kilia na sasanga,
ma nina aqo galuve e utu goto ke sui.
Maia sauba ke tinoni loki tana verana,
migira na toga sui sauba kara padalokia.
10Migira na tinoni vanga tsutsukibo ara reivaganana ia, mara gini kore sosongo;
mara vusulia tana tobamomosa, mi muri mara ba nanga lê;
mara tau goto adia na omea ara amesia kara tamanina.
113Na Linge na Tsonikaeana na Taovia Rongona Aia e Dou Sosongo
1!Tsonikaea na Taovia!
!Igamu nina tinoni aqo na Taovia
kamu tsonikaea na asana!
2!Soadoua na asana na Taovia i dani eni,
mi tana dani ma na dani!
3Ke tû tana e dato na aso, me ke tsau bâ tana e sû, kamu tsonikaea na asana na Taovia.
4Na Taovia e tagaovi kaputigira na mamatana tinoni sui;
ma na mararana e tsaudato i gotu vasau tana masaoka.
5Me tagara goto ke kesa ke atsa kolua na Taovia nida God.
Aia e totu i gotu ba vasau,
6me gogoro tsuna
ke reigira na omea sui i gotu mi lao.
7E tatatuugira tania na papasa igira ara tau tamanina sa omea;
me sulukaegira tania niqira rota loki igira ara kilia na sasanga,
8me naugira kara dulisai kolugira na tinoni taovia,
igira ara taovia tagao vanigira nina tinoni.
9Maia e galuvea na daki tauga e mamane, me sauvania danga na dalena;
me gini mage sosongo na daki ia i laona na valena.
!Tsonikaea na Taovia!
114Na Linge na Bongi Tabu na Paseka
1Kalina igira na toga ni Israel ara mololea i Ejipt,
kalina igira na kukuana a Jakob ara mololea niqira kao na tinoni ni veratavosi,
2mi tana ma na Juda ara lia nina tinoni tabu na Taovia,
ma na Israel ara lia nina tamani segeni nogo aia.
3Ma na Tasi Tsitsi e morosia na omea vaga ia, me tû me tsogoligi;
ma na Kô Jordan e tavongani tsobo lê na tatarina.
4Na vungavunga ara viri tsiputsaka vaga moa na naniqoti;
migira na tetena ara viri tsipubamai vaga moa na dalena sipi.
5?Nagua e laba vanigo ti o gini tsogoligi igoe na Tasi Tsitsi?
?Migoe na Kô Jordan e gua vaga ti e tavongani tsobo lê na tatarimu?
6?Migamu na vungavunga egua vaga ti amu tsiputsaka vaga moa na naniqoti?
?Migamu na tetena egua vaga ti amu tsipubamai vaga moa na dalena sipi?
7Igoe na barangengo, ko kasisi i matana na Taovia, aia nina God a Jakob,
8aia nogo e oligira na nauna vatuvatuga mara lia na mao qilomoti na kô,
mi tana maragova ara bugudato mai na vuravura.
115E Kesa Moa na God Manana
1Taovia e ulagana igami kami tsonikaego igoe segeni moa, me tau igami,
rongona nimu galuve e vo oli, migoe o mana saviliu vanigami.
2?Egua vaga ti igira na puku tavosi ara veisuagita mara tsaria,
“?Laka iava e totu nimui God igamu?”
3Ma nida God igita e totu i baragata;
me naugira na omea sui aia e padangaoa.
4Ma niqira god igira ara aqosiginigira na siliva ma na qolumila,
ma na limana tinoni nogo ara aqosiginigira.
5Ara tamaniragoa na mangaqira, me utu kara goko,
ma na mataqira, me utu kara gini moro.
6Ara tamaniragoa na kuliqira, me utu kara gini rorongo,
ma na isuqira, me utu kara siginigadoviginia sa omea.
7Ara tamanina na limaqira, me utu kara tapogadoviginia sa omea;
ma na tuaqira, me utu kara gini vanovano;
me utu goto ke tangilaba sa niqira goko.
8Migira sui ara aqosigira na titinonina na god peropero mara norugira,
kara usuligira nogo na god peropero igira segeni nogo ara aqosia.
9Migamu na toga ni Israel kamu norua moa na Taovia.
Aia nogo e sangagamu me reitutugugamu.
10Kamu norua na Taovia, igamu sui nina manetabu God.
Aia nogo e sangagamu me reitutugugamu.
11Kamu norua na Taovia, igamu sui amu samasama vania aia.
Aia nogo e sangagamu me reitutugugamu.
12Na Taovia e padatugugita me sauba ke vangalaka vanigita;
maia sauba ke tabugira sui nina toga ni Israel,
migira sui goto nina manetabu God.
13Aia sauba ke vangalaka vanigira sui ara kukuni tania,
tû tana tinoni loki me tsau bâ i koniqira na tetelona.
14!Na Taovia ke tusuvanigamu na dalemui
igamu, migira goto na kukuamui!
15!Me ke tabugamu na Taovia
aia e aqosia na baragata ma na barangengo!
16Na baragata nina segeni moa na Taovia,
ma na barangengo e sauvanigira na tinoni kara tamanina.
17Igira ara mate nogo ara tau nogo dona na tsonikaeana na Taovia,
ara tsuna nogo tana vera na totu mui lê.
18Migita a mamauri moa, nida aqo ka soadoua aia
i dani eni mi tana dani ma na dani.
!Tsonikaea na Taovia!
116Kesa Mane e Putsi Tania na Mate Me Soadoua God
1Au galuvea na Taovia rongona aia e rongomiau;
me rongomi vatavigira niqu nonginongi.
2Aia e rongomiau
pipi kalina au ngangaidato vania.
3Na sosorina na mate ara totu polipoliau;
ma na papadana na qiluqilu e koviau popono;
me ngoli sosongoliau na matagu ma na padasavi.
4Te au tû, mau ngangaidato vania na Taovia mau tsaria,
“!Taovia au ngasugo ko maurisiau!”
5Na Taovia e doulaka me mana saviliu.
Eo, nida God igita e dona sosongo na galuve tinoni.
6Na Taovia e reitutugugira igira e tagara kesa ke sangagira;
mi kalina igira ara tovoa laka kara sekoliau inau, maia e laumaurisiau.
7Ko mango rago igoe na tidaoqu,
rongona aia na Taovia e dou sosongo vaniau.
8Na Taovia e maurisiau tania na mate;
maia nogo e saluvaligia na kô na mataqu,
me utusigira gaqu gala na tuliusiaqu.
9Me vaga ia, minau au dona na liu i matana na Taovia
tana verana na mauri.
10Au tutunina babâ moa na Taovia, atsa moa ti au tsaria,
“Inau au seko pitsu nogo.”
11Me atsa moa goto kalina au matagu sosongo mau tsaria,
“E tagara nomoa kiki ke kesa kau noru kalavatavia inau.”
12?Ma na omea gua tugua kau sauvania na Taovia
rongona aia e dou sosongo vaniau?
13Sauba kau savori vania na sausau na uaeni
na mani soadouana rongona aia e maurisiau.
14Mi laona nogo niqira saikolu igira nina tinoni
sauba inau kau sauvania na omea au vekenogoa vania.
15!E gini padasavi sosongo na Taovia
kalina e mate kesa nina tinoni!
16Taovia inau nimu tinoni aqo;
mau aqo vanigo vaga nogo na tinaqu e naua.
Migoe nogo o maurisiau tania na mate.
17Me sauba kau savori vanigo na kodoputsa na mani soadouamu
ma kau saudatoa niqu nonginongi vanigo.
18-19I mataqira nimu tinoni sui,
tana savuna matsapana nimu Vale Tabu i Jerusalem,
sauba kau manalia na omea au vekenogoa vanigo.
!Tsonikaea na Taovia!
117Na Linge na Tsonikaeana na Taovia
1!Tsonikaea na Taovia igamu na puku sui!
!Tsonikaea igamu pipi sui na mamatana tinoni!
2E loki sosongo nina galuve na Taovia,
maia e mana saviliu vanigita.
!Tsonikaea na Taovia!
118Na Nonginongi na Soadouana God Rongona na Tangomana tana Vailabu
1Soadoua na Taovia rongona e dou aia,
ma nina galuve e totu saviliu.
2Igira na tinoni ni Israel kara tsaria,
“Nina galuve e totu saviliu.”
3Migira nina manetabu God kara tsaria,
“Nina galuve e totu saviliu.”
4Migira sui goto ara kukuni tania na Taovia kara tsaria,
“Nina galuve e totu saviliu.”
5I laona niqu rota loki inau au ngangaidato vania na Taovia,
maia e rongomiau me laumaurisiau.
6Na Taovia e totu i koniqu, me utu kau matagu.
?Me vaga ia ma nagua tangomana ke kesa ke nauvaniau?
7Na Taovia e totu tabana koluau inau me sangaau,
me sauba kau reia kalina aia ke tuliusigira gaqu gala.
8E dou bâ na noruana na Taovia,
liusia na noruaqira na tinoni lê.
9E dou bâ na noruana na Taovia,
liusia na noruaqira na tinoni taovia.
10!Ara danga rago gaqu gala ara tupoliau;
mi tana susuligana nogo na Taovia inau au labumatesigira sui!
11Igira ara tupoliau tabana mi tabana;
!mi tana susuligana nogo na Taovia inau au labumatesigira sui!
12Ara viri vururu poliau vaga moa ti na lango na bulumitsua,
mara viri iru tsaku lê vaga moa kalina ara tungia na itai kokonaga,
mi tana susuligana nogo na Taovia inau au tangomana na labumatesiaqira sui.
13Igira gaqu gala ara surukeliau,
me varangi sosongo nogo kara tuliusiau.
Maia nogo na Taovia e tû me sangaau;
14na Taovia nogo e sangaau te au gini malagai mau susuliga;
maia nogo e laumaurisiau.
15Kamu rongomigira nina tinoni God,
ara gudato tana mage i laona niqira valepolo
rongona e managaqira.
Mara tsaria, “!Na susuligana loki na Taovia e naua te e gini laba na omea vaga ia!
16!Na susuligana nogo na Taovia e sangagita,
migita a gini tangomana tana vailabu!”
17Inau e utu goto kau mate; sauba kau totu mamauri moa,
ma kau katevulagigira na omea sui e naua na Taovia.
18Aia e kede sosongoliau,
me tau moa tamivaniau kau mate.
19!Sangavi vaniau na matsapana na Vale Tabu,
minau sauba kau sage i laona ma kau soadoua na Taovia!
20Iani nogo na matsapana na Taovia;
migira segeni moa na tinoni ara totugoto i matana God tangomana kara sage i laona.
21Au tsonikaego Taovia matena igoe o rongomia niqu nonginongi, mo maurisiau.
22Na vatu igira na mane logovale ara tsoniligilea
aia tsotsodo e lia na vatu tamani rongona pukuga bâ vanigira sui.
23!Na Taovia nogo e naua te e gini laba vaga ia,
me gini dou sosongo vanigita na reiana!
24!I dani eni nogo na dani i tana e managana na Taovia,
ida gita ma ka lilinge ma ka magemage!
25!Ko maurisigami Taovia, ko maurisigami!
!Taovia ko sangagami, ma kami gini tangomana!
26!Aia God ke soadoua aia e mai tana asana na Taovia!
Tû tana nina Vale Tabu na Taovia igami ami soadougo.
27Na Taovia aia nogo e God; maia e dou sosongo vanigita.
Kamu tangolia na gabana gai tana limamui
ma kamu liu polia na belatabu.
28Igoe niqu God, minau sauba kau soadougo.
Igoe niqu God, me sauba kau tsonikaego.
29Soadoua na Taovia rongona e dou aia,
ma nina galuve e totu saviliu.
119Nina Ketsa na Taovia
1Kara mage igira e goto saikesa niqira sasaga,
mara mauri muria nina ketsa na Taovia.
2Kara mage igira ara muridougira nina ketsa,
mara rongomangana tana tobaqira popono.
3Mara tau dona na nauana sa omea seko;
mara muridoua nina sautu na Taovia.
4Taovia igoe o tusuvanigami nogo nimu ketsa,
mo raiginigami kami muridougira.
5!Inau au amesi sosongolia laka kau totukakai
tana muridouaqira pipi sui nimu totosasaga!
6Ti vaga inau kau pada sailaginigira pipi sui nimu ketsa,
me sauba e utu kau paluvangamaqu.
7Sauba kau tsonikaego tana tobagoto,
kalina au sasania tana rongona nimu pede gotolaka.
8Inau sauba kau muridougira sui nimu ketsa;
migoe ko laka saikesa na vanoligi taniaqu.
Na Muridouaqira Nina Ketsa na Taovia
9?Ke naukoeguania kesa na tinoni vaolu ti ke gini male dou nina sasaga?
Tana muridouaqira moa pipi nimu ketsa igoe.
10Tana tobaqu popono inau au tovokakaia laka kau aqo dou vanigo igoe;
ko laka na tamivaniaqu kau liuligi tanigira nimu ketsa.
11Inau au puku kalavatavigira nogo nimu ketsa i laona tobaqu,
rongona kau gini tau naua kesa na omea ke seko i matamu.
12Taovia inau au tsonikaego;
migoe ko sasaniau nimu sautu.
13Sauba kau tsaritugutugugira pipi na ketsa
igoe o saugira nogo vanigami.
14E laoqu sosongo nomoa na muriana nimu ketsa,
liusia bâ na tamani omea levo danga.
15Sauba kau padalokigira nimu totosasaga;
ma nimu sasani sauba kara totu sailagi i mataqu.
16Au reingao sosongoligira nimu ketsa;
me utu goto kau padalegira.
Na Magemage Tana Muridouaqira Nina Ketsa na Taovia
17Taovia ko tobadou vaniau inau nimu tinoni aqo,
minau kau gini mauri ma kau muridougira pipi sui nimu goko.
18Ko sangavia na mataqu, ma kau reiginigira
na omea dou sui ara totu i laona nimu ketsa.
19Inau au mauri i lao eni kesa tana tagu tetelo moa;
vaga ia, mo ko laka na molopoi vaniaqu nimu ketsa.
20Pipi kalina moa e silovi sosongolia na tobaqu
tana rongona au ngao sosongolia kau donaginigira nimu pede goto.
21Igoe o totosasaga vanigira ara kaekae;
ko vealaginigira igira ara sove na muriaqira nimu ketsa.
22Ko didia taniau niqira goko tsiri ma niqira goko peapea,
rongona inau au muridougira nimu ketsa.
23Atsa moa ti igira na tagaovera ara vorogokona na labuaqu,
minau sauba kau tau kuti na pada sailaginiana nimu ketsa igoe.
24Au gini mage sosongo na rongomiana nimu totosasaga igoe,
igira nogo ara sauparovata vaniau.
Na Padakuti Matena na Muriana Nina Ketsa na Taovia
25Au tsaro sekoseko lê i laona na papasa;
igoe ko tatatuuau vaga igoe o vekenogoa.
26Au koevulagi vanigo nogo na omea sui au naugira, migoe o rongomiau;
ko sasaniau na muriana nimu sautu.
27Ko sangaau ma kau gini padagadovigira nimu ketsa,
ma kau padatugutugugira na omea dou sui igoe o naugira.
28E ngoli sosongoliau na melu;
ko kakaisiau vaga igoe o vekenogoa.
29Ko sangaau ma kau tau liu tana sautu sasi,
mi tana nimu galuve loki ko sasaniginiau nimu ketsa.
30Au vili segeniqu nogo laka kau totukakai i konimu;
mau pada sailaginia moa nimu pedegoto.
31Taovia, inau au murigira nogo na omea o sasaniginiau,
migoe ko laka na tamivaniaqira kara paluvangamaqu lê.
32Sauba kau tau goto kisâ na muriaqira nimu ketsa,
rongona igoe nogo sauba ko mararasia na tobaqu ma kau gini padagadovigira dou bâ.
Na Nonginongi Matena Na Padagadovi Omea
33Taovia ko sasaniau tana rongoqira nimu ketsa,
minau sauba kau muridougira pipi kalina.
34Ko vuresi makalia nimu ketsa vaniau, minau sauba kau muridoua;
sauba kau muridoua tana tobaqu popono.
35Ko tudumiau tana sautuna nimu ketsa,
rongona i tana nogo au gini mage sosongo na totu.
36Ko moloa i tobaqu na padangaoana na muriaqira nimu ketsa,
liusia bâ na tamani omea danga.
37Ko sangaau ma kau tau gini boe na omea ara tau tamani rongona;
migoe ko galuveau vaga o vekenogoa.
38Ko manalia nimu veke igoe o naunogoa vaniau inau nimu tinoni aqo.
na veke vaga o nauvanigira igira ara rongomangamu.
39Ko maurisiau tania niqira goko tsiri au kadangagini sosongolia;
ma nimu pedegoto igoe ara dou sosongo nomoa.
40Au ngao mananâ kau muridougira nimu ketsa;
mi tana nimu gotolaka igoe ko vaolusia na mauriqu.
Na Noruana Nina Ketsa na Taovia
41Taovia ko sauvulagi vaniau nimu galuve,
mo ko maurisiau vaga igoe o vekenogoa.
42Mi tana ti inau kau gini tangomana na tuguvisuana niqira goko igira ara goko peapea vaniau,
rongona inau au norugira nimu goko igoe.
43Sangaau ma kau dona na tsoniana na goko mana pipi kalina,
rongona au vataraginia niqu amesi tana nimu pedegoto igoe.
44Sauba kau muri sailaginia nimu ketsa,
na dani ma na dani.
45Me tau tangomana sa omea ke utusiau,
rongona au tovoa pipi kalina moa na muriaqira nimu ketsa.
46Minau sauba kau tau goto gini vangamâ
na katevulagiaqira nimu ketsa vanigira na taovia tsapakae.
47Au gini mage sosongo na muriaqira nimu ketsa,
rongona au reingao sosongoligira.
48Au pada mamavasigira mau padalokigira nimu ketsa;
me sauba kau tau kuti na padatugutuguaqira nimu totosasaga.
Na Pada Mamavasiana Nina Ketsa na Taovia
49Ko padatugua nimu veke o nauvaniau inau nimu tinoni aqo;
i tana nogo au vataraginia niqu amesi.
50Mi laona niqu rota loki, maia nogo e vereau
rongona nimu veke aia nogo e maurisiau.
51Igira na tinoni vanga kaekae ara tsiriau sailagi moa,
minau au tau goto mololea na muriana nimu ketsa.
52Taovia, kalina inau au padavisugira nimu pedegoto ni sau,
e gini piditugua na tobaqu.
53Mi kalina au reigira na vanga tsutsukibo ara kutsigira nimu ketsa,
me galasiau sosongo inau.
54Tana mauriqu kurikuri ni lao eni,
inau au teagira na linge tana rongoqira nimu ketsa.
55Mi tana bongi au padago moa igoe Taovia,
mau padavisua nimu ketsa.
56Au muridougira nimu ketsa,
aia nogoria te e gini magemage na tobaqu.
Na Padangaoana Nina Ketsa na Taovia
57Taovia, igoe segeni moa au kilia inau;
mau vekevanigo laka sauba kau muridougira nimu ketsa sui.
58!Tana tobaqu popono au nongigo
ko galuveau vaga o vekenogoa!
59Au vilekegira niqu sasaga,
mau vekea laka kau murigira nimu totosasaga igoe.
60Me utu goto kau kisâ, sauba kau tsaku sosongo nomoa
na muriaqira nimu ketsa.
61Igira na vanga tsutsukibo ara molomanogati vaniau nogo gaqu taviti kau sogo i laona,
minau au tau moa padalea nimu ketsa.
62Tana levugata inau au mamata,
mau tsonikaego tana rongona nimu pede gotolaka.
63Au dulikolugira igira sui ara kukuni tanigo,
mara muridougira nimu ketsa.
64Taovia nimu galuve vo oli e dangali poponoa na barangengo;
ko sasaniau ma kau donaginigira nimu ketsa sui.
Nina Ketsa na Taovia Ara Sanga Sosongoligira na Tinoni
65Taovia, igoe o manalinogoa nimu veke o nauvaniau,
mo dou sosongo vaniau inau nimu tinoni aqo.
66Ko tusuvaniau na sasaga loki ma na donalevo,
rongona au norugira nimu ketsa.
67Tana idana kalina igoe o tau vati kedeau, minau au muria moa na sautu sasi,
mi kalina eni inau au muridounogoa nimu goko.
68!Igoe o dou sosongo mo galuve sosongoliau!
Ko sasaniau nimu ketsa.
69Igira na tinoni vanga kaekae ara tsonia danga na goko pero tana rongoqu inau,
minau au muridougira moa nimu totosasaga tana tobaqu popono.
70Igira na tinoni girani ara tau lelê sasaga,
minau moa au tsodoa gaqu magemage tana muriana nimu ketsa.
71E dou sosongo vaniau kalina igoe o kedeau,
rongona i tana nogo au gini sasani na muridouaqira nimu ketsa.
72Ma na ketsa igoe o sauvaniau, e tamani rongona loki vaniau
liusia na qolu sui tana barangaengo popono.
Nina Ketsa na Taovia e Goto Saviliu
73Igoe nogo o aqosiau mo reitutuguau;
ko mararasia na tobaqu ma kau gini sasanigira dou nimu ketsa.
74Igira ara kukuni tanigo sauba kara gini mage sosongo kalina kara morosiau inau,
rongona au norukakaia nimu veke igoe.
75Taovia au donaginia laka nimu votapede sui ara gotolaka saikesa,
me laka o kedeau rongona igoe o mana sosongo vaniau.
76Nimu galuve vo oli ke vereau,
vaga o vekenogoa vaniau inau nimu tinoni aqo.
77Ko galuveau, minau sauba kau mauri,
rongona au padalokia nimu ketsa.
78Ko paluvangamaqira igira na tinoni vanga kaekae ara keliseko vaniau;
minau moa sauba kau padatugutugugira nimu totosasaga.
79Ko naua migira sui ara kukuni tanigo mara donaginigira nimu ketsa,
kara mai i koniqu inau.
80Ko sangaau ma kau muridougira saikesa nimu ketsa,
ma kau tau paluvangamaqu lê.
Nina Nonginongi Kesa Tinoni Rongona God Ke Maurisia Tanigira Gana Gala
81Taovia, au kolae sosongo na pituamu ko mai mo ko maurisiau;
mau vataraginia niqu amesi tana nimu tsaqina goko igoe.
82Na mataqu ara qisi nogo na pituana na omea igoe o vekenogoa,
mau veisuago, “?Laka sauba ke ngisa ti ko mai sangaau inau?”
83Inau au sekopitsu lê vaga moa ti na todo119:83 “na todo na uaeni” Aia na oliolina na goko ‘wineskin’, maia e kesa na vatana todo ara aqosiginia na kokorana na omea tuavati mara dona na molo tsavuana na uaeni i laona. purapura na uaeni ara tsoniliginogoa;
mau tau moa vati padalegira nimu ketsa.
84?Me sauba ke oka koegua sagata inau kau pipitu?
?Me ke ngisa ti sauba ko kedegira igira ara rotasiau inau?
85Na tinoni vanga kaekae, igira ara tau dona na muriana nimu ketsa,
igira nogo ara tsai manogatinogoa na qilu agana kau puka i laona.
86Igira sui nimu ketsa igoe e tugu sosongolia kami norugira kakai;
migira moa na tinoni kaekae ara rotasiginiau niqira goko pero.
!Migoe Taovia ko mai mo ko sangaau!
87E varavara nogo kara tangomana na labumatesiaqu,
minau au tau goto mololea na muriaqira nimu ketsa.
88Tana nimu galuve vo oli ko gaea na mauriqu,
rongona kau gini muridougira nimu ketsa.
Na Tutunina Kakai Nina Ketsa na Taovia
89Taovia, nimu tsaqina goko igoe sauba ke totu saviliu na dani ma na dani;
aia e totu kalavata nogo i gotu i baragata.
90Mo mana saviliu vanigira pipi sui na vatavata na tinoni;
migoe nogo o vaturia na barangengo tana sasana, mi tana nogo e totu kalavata.
91Igoe nogo o ketsaligira na omea sui te igira ara totu kalavata tsaumai nogo i dani eni,
rongona na omea sui ara aqo vanigo moa igoe.
92Ti vaga nimu ketsa igoe ke tau nogo lia na pukuna niqu magemage,
me tau utu ti kau gini mate nogo na rota loki ara gadoviau.
93Minau sauba e utu saikesa kau padalegira nimu totosasaga,
rongona igira nogo igoe o maurisiginiau inau.
94!Inau nimu nogo igoe, ko maurisiau!
Au tovokakainogoa na muridouaqira nimu ketsa.
95Igira na tinoni vanga tsutsukibo ara tuviau laka kara labumatesiau,
minau sauba kau padagira kakai moa nimu ketsa igoe.
96Au dona laka e tagara goto ke kesa na omea e dona ke dou saviliu,
ma nimu ketsa moa igoe e dou saviliu.
Na Padalokiana Nina Ketsa na Taovia
97!Taovia au reingao sosongolia nimu ketsa!
Mau papadâ moa tana dani popono.
98Nimu ketsa e totu koluau pipi kalina,
aia nogo te au gini sasaga sosongo liusigira bâ igira gaqu gala.
99Inau au padagadovia dou bâ liusigira pipi sui gaqu tarai,
rongona inau au padatugutugugira dou nimu totosasaga.
100Au sasaga loki liusigira na tuqatuqa,
rongona au muridougira nimu ketsa igoe.
101Inau au sove saikesa tanigira pipi sui na aqo seko,
rongona au ngaoa kau muridoua nimu tsaqina goko igoe.
102Au tau goto rongomilegira nimu totosasaga,
rongona igoe segeni moa gaqu tarai inau.
103!Ara pui sosongo nomoa nimu tsaqina goko igoe
ara pui liusia bâ na bulumitsua!
104Au adia na sasaga loki tana nimu ketsa nogo igoe,
maia nogoria na rongona te au gini reisavigira pipi na vatana na aqo seko.
Na Marara e Talumai Tana Nina Ketsa na Taovia
105Nimu tsaqina goko igoe e vaga moa na laeti e ida vaniau,
ma na marara e sausautu vaniau.
106Inau au vekenogoa mau gini vatsa,
laka sauba kau muridougira nimu totosasaga igoe.
107Taovia, inau au rota loki sosongo nomoa;
ko maurisiau babâ vaga igoe o vekenogoa.
108Taovia, ko tabedoua niqu nonginongi na soadouamu au sauvanigo,
migoe ko sasaniau na muridouaqira nimu ketsa.
109Pipi kalina moa inau au vangaraua na bisaana na mauriqu,
mau tau vati padalea moa nimu ketsa.
110Igira na vanga tsutsukibo ara molomanogati vaniau nogo gaqu taviti kau sogo i laona,
minau au tau vati kutsigira nimu ketsa igoe.
111Igira sui nimu ketsa ara niqu tamani saviliu nogo inau,
eo, igira nogo te e gini magemage na tobaqu.
112Au padanogoa kau muridougira sailagi nimu ketsa
poi tsau tana dani kau mate.
Na Totu Raviravi Dou i Laona Nina Ketsa na Taovia
113Inau au reisavi sosongoligira igira ara tobaruka vanigo igoe Taovia,
mau padalokia nimu ketsa.
114Igoe moa o isutuguqu mo reitutuguau;
minau au vataraginia niqu amesi tana nimu veke igoe.
115Kamu baligi taniau igamu na tinoni vanga nauseko.
Minau sauba kau muridougira nina ketsa niqu God.
116Ko kakaisiau ma kau gini susuliga vaga igoe o vekenogoa,
minau sauba kau gini mauri.
!Ko laka na tamiana ke puala lê niqu amesi!
117Ko tangoliau, minau sauba kau totu raviravi dou,
ma kau gini boe sailagi na muriaqira nimu ketsa.
118Igoe o sove tanigira igira sui ara tau murigira nimu ketsa;
me puala lê sui niqira vorogokona na perobulesi tinoni.
119Tana nimu papada igoe, igira sui na vanga tsutsukibo ara vaga moa na kutso lê,
vaga ia, minau au padalokigira moa nimu totosasaga igoe.
120Au matagunigo igoe;
mau mataguni sosongoligira goto nimu pedelaka.
Na Muridouaqira Nina Ketsa na Taovia
121!Inau au naua moa na omea e goto me dou;
migoe ko laka na mololeaqu i limaqira gaqu gala!
122!Ko vekevaniau laka sauba ko sangaau inau nimu tinoni aqo;
mo ko laka na tamivaniaqira na tinoni vanga kaekae kara bingi sekoliau!
123Au qisi nogo na pituamu ko mai mo ko maurisiau tanigira gaqu gala,
mo ko manali vaniau na omea igoe o vekenogoa.
124Tana nimu galuve vo oli ko galuveau,
mo ko sasaniginiau nimu ketsa.
125Inau nimu tinoni aqo nogo igoe; ko mararasia na tobaqu
rongona kau gini padagadoviginigira nimu sasani.
126Taovia, e laba nogo na tagu tana e dou igoe ko naua kesa na omea,
rongona igira na tinoni ara sove na muriana nimu ketsa.
127Minau moa au reingao sosongoligira nimu ketsa liusia na qolumila,
me liusigotoa bâ na qolumila laka.
128Aia nogoria na rongona ti inau au muridougira pipi sui nimu totosasaga,
mau reisavigira pipi sui na sautu sasi.
Na Padangaoana na Muriana Nina Ketsa na Taovia
129Nimu sasani igoe ara doulaka saikesa;
minau au murigira sui tana tobaqu popono.
130Na nusirongona nimu sasani igoe e dona ke mararasigira,
me ke tusua na sasaga loki vanigira igira ara tau sasaga katsi.
131E gini ova na mangaqu
tana amesiaqira nimu ketsa igoe.
132Ko pilomai i koniqu mo ko galuveau,
vaga nogo igoe o nauvanigira igira sui ara galuvego.
133Ko sangaau vaga igoe o vekenogoa ma kau tau puka lê,
ko laka na tamivaniana na kilinauseko ke tagaoviau.
134Ko maurisiau tanigira ara bingi sekoliau,
ma kau gini tangomana na muridouaqira nimu ketsa.
135Ko totu varangisiau
mo ko sasaniau nimu ketsa.
136Au rota na ngangai me rutsu na kô na mataqu vaga moa kalina e tave na ko loki,
rongona igira na tinoni ara tau muridoua nimu ketsa.
Nina Ketsa na Taovia e Goto Saviliu
137Taovia igoe o gotolaka,
ma nimu ketsa sui ara goto saviliu.
138Ara mana mara goto sui
igira na ketsa igoe o sauvanigami.
139Na momosatoba e iru i tobaqu vaga moa ti na lake,
rongona igira gaqu gala ara tau gini boe na rongomiaqira nimu tsaqina goko igoe.
140!E mana sosongo nomoa nimu veke igoe!
!Minau au padaloki sosongolia!
141Inau tau sa rongona tinoni mara peaau lê,
mau tau moa rongomilegira nimu sasani.
142Nimu gotolaka sauba ke totu saviliu,
ma nimu ketsa e mana sailagi.
143E ngoliau na rota ma na padasavi,
migira moa nimu ketsa igoe te e gini magemage na tobaqu.
144Nimu totosasaga ara goto saviliu;
ko sangaau ti kau padagadovigira, ma kau gini mauri.
Nina Nonginongi Kesa Tinoni Rongona God Ke Sangâ
145!Taovia, tana tobaqu popono au nongigo;
ko rongomiau minau sauba kau muridougira nimu ketsa!
146Au ngangaidato vanigo,
ko maurisiau, minau sauba kau muri kalavatavigira nimu ketsa.
147Kalina e tau vati dato moa na aso, minau au ngangaidato vanigo ko sangaau;
au vataraginia niqu amesi tana nimu veke igoe o naunogoa vaniau.
148Tana bongi popono au tsaro mamata moa,
rongona kau padatugutugua moa nimu totosasaga.
149!Taovia, tana nimu galuve vo oli ko rongomiau;
ko galuveau mo ko aragodoua na mauriqu!
150Ara maimai varangi nogo igira ara area na labumatesiaqu inau,
igira ara tau saikesa muria nimu ketsa igoe.
151Migoe moa Taovia o totu varangisiau,
me pipi sui nimu ketsa ara totu pukuga kalavata.
152I sau nogo inau au donaginigira nimu totosasaga;
me laka igoe o naugira kara totu kalavata na dani ma na dani.
Nina Ngangaidato Kesa Rongona God Ke Sangâ
153Ko morosia niqu rota mo ko maurisiau,
rongona inau au tau goto reilea nimu ketsa.
154Ko isutuguqu mo ko laumaurisiau;
ko maurisiau vaga igoe o vekenogoa.
155Igira na vanga tsutsukibo sauba e utu kara tsaulia na mauri saliu,
rongona ara tau murigira nimu ketsa.
156!Ma nimu galuve igoe Taovia e loki sosongo;
ko galuveau mo ko laumaurisiau!
157Atsa moa ti ara danga sosongo gaqu gala ara bingi sekoliau,
minau au tau goto terevia na muridouaqira nimu ketsa igoe.
158Mi kalina au reigira igira ara piloligi tanigo, mau reisavigira sosongo
rongona ara sove na muriaqira nimu ketsa igoe.
159Ko reia Taovia, inau au padaloki sosongoligira nimu totosasaga.
!Migoe tana nimu galuve vo oli ko maurisiginiau!
160Nimu ketsa igoe e pukuga tana manana,
ma nimu pede gotolaka sui ara totu saviliu.
Na Padalokiana Nina Ketsa na Taovia
161Migira na tinoni taovia ara labuau lê tagara rongona,
minau au kukuni tanisosongolia moa nimu ketsa igoe.
162Au gini mage loki sosongo inau tana rongoqira nimu veke,
vaga saikesa nogo kalina kesa e tsodovulagia kesa na moi e danga na qolo i laona.
163Inau au reisavi sosongoligira pipi sui na goko pero,
mau reingao sosongolia moa nimu ketsa igoe.
164E vitu kalina i laona kesa na dani inau au soadougo
tana rongoqira nimu pede gotolaka.
165Igira ara padalokia nimu ketsa ara totu dou tana rago,
me tagara goto ke kesa na omea tangomana ke tubulaginigira.
166Taovia inau au pitu sosongoligo igoe ko maurisiau,
mau naua na omea igoe o ketsaliginiau.
167Inau au muridougira nimu sasani;
mau padalokigira tana tobaqu popono.
168Au muridougira nimu ketsa ma nimu totosasaga;
migoe segeni nogo o reigira na omea sui inau au naua.
Nina Nonginongi Kesa Rongona God Ke Sangâ
169!Taovia, ko tamia ke laba i konimu niqu ngangaidato rongona ko sangaau!
Ko mararasia na tobaqu vaga igoe o vekenogoa.
170!Ko rongomia niqu nonginongi,
mo ko maurisiau vaga igoe o vekenogoa!
171Sauba kau tsonikaego sailagi,
rongona igoe o sasaniginiau nimu ketsa.
172Sauba kau linge tana rongona nimu ketsa,
rongona igira sui nimu ketsa ara gotolaka.
173Ko totu vangarau pipi kalina na sangaaqu,
rongona inau au muridougira nimu ketsa.
174!Taovia, au pitu sosongolia laka igoe ko laumaurisiau!
Au tsodovulagia na magemage i laona nimu ketsa.
175Ko sauvaniau na mauri, ma kau gini tsonikaego;
ma nimu totosasaga kara sangaau.
176Au sarevo bamai vaga moa ti na sipi e nanga;
vaga ia, migoe ko mai mo ko laveau inau nimu tinoni aqo,
rongona inau au tau saikesa padalegira nimu ketsa.
120Nina Nonginongi Kesa Rongona God Ke Sangâ
1Kalina au totu i laona na rota loki,
minau au ngangaidato vania na Taovia,
maia e rongomiau.
2Au nonginongi vaga iani: “Ko maurisiau Taovia,
tanigira igira na vangapero ma na vanga bulesi tinoni.”
3?Igamu na vangapero laka nagua sauba God ke nauvanigamu?
?Me sauba ke kedegamu koegua?
4!Kolugira nogo nina pipili vavanga kesa na malagai,
me kolugotoa na madaova romaroma!
5Na totu i laomui igamu e seko sosongo atsa vaga moa ti na totu i Mesek,
se i laoqira na tinoni ni Kedar.120:5 “Mesek...Kedar” Kaira ruka na butona vera ara ka totu ao, migira na Tsiu ara padâ laka igira na tinoni ara totu i tana ara tinoni atsi.
6!Au totu oka sosongo nogo
i laoqira na tinoni ara reisavia na mauri tobarago!
7Mi kalina inau au gini goko tana rongona na rago,
migira ara ngaoa moa na vailabu.
121Na Taovia Aia Nogo Nida Reitutugu
1?Inau au morodato tana vungavunga;
me laka iava sauba ke talumai aia ke sangaau?
2Na Taovia aia e aqosia na baragata ma na barangengo
aia nogo sauba ke sangaau inau.
3E utu ke tamivanigo ko tubulagi;
aia nimu reitutugu me totu mamata sailagi.
4Eo, aia niqira reitutugu na Israel
e tau dona ke varivari matana se ke maturu.
5Na Taovia aia nogo sauba ke mataligo;
aia e totu kalavata i ligisamu gana ke reitutugugo.
6Me utu ke sekoligo na aso tana dani,
mi tana bongi na vula tagara goto.
7Na Taovia sauba ke didia tanigo pipi sui na omea seko;
me ke reitutugua na maurimu.
8Aia sauba ke mataligo kalina ko vano mi kalina ko visumai
i dani eni mi tana dani ma na dani.
122Na Tsonikaeana na Vera ni Jerusalem
1Au gini mage sosongo kalina au rongomia ara tsarivaniau,
“Ida ma ka vano tana valena na Taovia.”
2!Mi kalina ia, migita a mai sage nogo
i laona na matsapana na vera ni Jerusalem!
3I Jerusalem aia nogo na verabau ara arago visutugua
me totu na gotolaka ma na tobarago i laona.
4Mi konina nogo ia ara kalemaia igira na duli sui ni Israel,
igira nina tinoni nogo na Taovia,
rongona e totu nogo i laona na mamarena nina ketsa na Taovia
laka i tana nogo kara soadoua.
5Mi tana goto nogo ara totukae igira na taovia tsapakae ni Israel
na pedeaqira niqira tinoni.
6Ka nonginongi rongona na rago ke totu tana Jerusalem,
ma ka tsaria: “Igira ara padalokigo igoe kara tamanina ke danga niqira omea dou.
7Ma na rago ke totu i laona nimu baravatu,
migira sui nimu tinoni kara totu bibiu dou tana valeqira.”
8Tana rongoqira nogo igira na kamaqu ma na kulaqu,
ti inau au gini tsarivania na Jerusalem: “!Na rago ke totu i konimu!”
9Mi tana rongona na valena na Taovia nida God
minau au nonginongi vanigo ko gini totu dou sailagi.
123Kesa Tinoni e Nongia God Ke Galuvea
1Taovia au morodato i konimu,
i gotu i tana igoe o totu mo taovia.
2Vaga nogo na maneaqo e tau kuti na moro bâ sailagi moa i konina gana taovia,
me vaga na dakiaqo e moro bâ sailagi moa i konina gana daki taovia,
me vaga goto igami sauba kami moro bâ sailagi moa i konimu igoe na Taovia nimami God,
poi tsau kalina igoe ko galuvegami.
3Ko galuvegami Taovia, ko galuvegami;
ami kolae nogo na rongomiana niqira goko peapea igira na tinoni tavosi.
4Ara tsiri sekoligami oka sosongo nogo igira ara tamani omea danga,
mara peagami igira na vanga kaekae.
124God Aia Nogo e Reitutugugira Nina Tinoni
1?Sauba kegua vaga ti na Taovia ke tau nogo totu tabana konida igita?
!Israel, ko gokovisu mai!
2“Ti vaga na Taovia ke tau nogo totu tabana i konida igita
kalina igira gada gala ara mai na labuada,
3mi tana ti igira kara konomigita mamauri
tana niqira momosatoba loki ara nauvanigita;
4ma na obona na ko loki ke adivotugita,
me ke tsavugita popono,
5ma na tatarina ke virugita me ke lumigita.”
6Ida gita ma ka soadoua na Taovia,
aia e tau tamivanigira gada gala kara labugita ma ka mate sui.
7Igita a tsogoligi tanigira vaga moa na manu kalina e lovoligi tania nina taviti na mane na rugu;
me takuti lê niqira taviti, migita a tsogoligi lê.
8Na Taovia aia e aqosia na baragata ma na barangengo,
aia nogo e sangagita.
125God e Aragogira Dou Nina Tinoni
1Igira ara norua na Taovia ara vaga moa na Vungavunga Sion,
aia e utu lelê ke olaola, me utu goto ke ratsubamai.
2Na Taovia e mataligira dou nina tinoni,
me vaga igira na vungavunga ara viri totu polipolia na Jerusalem,
vaga goto na Taovia aia e totu polipoligira nina tinoni,
i dani eni mi tana dani ma na dani.
3Igira na vanga tsutsukibo e utu kara tagaovikaputi sailaginia na veraqira na tinoni e goto niqira sasaga.
Me ti vaga kara nauvaganana ia, me tau utu igira segeni goto na tinoni dou kara naua na omea e seko.
4Taovia ko naudou vanigira igira e dou niqira sasaga,
mara muridougira nimu ketsa.
5Mi kalina igoe ko tû na kedeaqira na vanga tsutsukibo,
mo ko kedegira goto igira ara sove na muriana nimu sautu.
!Na rago ke totu i Israel!
126Igira na Israel Ara Nongia God Ke Sangagira
1!Kalina na Taovia e adivisugita mai i Jerusalem,
e vaga moa ti igita a bolebole lê!
2!Igita a kiakia sosongo, ma lilinge tana mage!
Mi tana migira na puku tavosi ara gini goko tana rongoda mara tsaria,
“Na Taovia e naua na omea loki sosongo vanigira igira.”
3!Eo, na omea loki manana nomoa aia e nauvanigita tana tagu ia,
migita a gini magemage sosongo!
4Taovia, ko adivisugami mai tana veramami,
ke vaga nogo kalina e tumu na usa me tavetugua na kô tana ovo mamatsa.
5Igira ara tsutsuka tana ngangai,
sauba kara tsuri tana magemage.
6Igira ara ngangai kalina ara tsukâ niqira omea tsukatsuka,
sauba kara lilinge ma kara magemage
kalina kara angunigira mai na lakana niqira uta.
127Na Tsonikaeana God Tana Rongona Nina Doulaka
1Ti vaga na Taovia ke tau sangâ na logovale,
ma niqira aqo igira ara logovale e puala lê;
me ti vaga na Taovia ke tau reitutugua na vera,
ma niqira aqo igira ara matali vera e puala lê goto.
2E tagara sa rongona na aqo kakai matena na mauri,
na tû matsaraka bongibongi ma na liusiana na tagu na maturu tana bongi.
Rongona na Taovia e tusu lê omea vanigira ara galuvea
kalina igira ara maturu.
3Na tamani baka aia nogo na vangalaka e talumai i konina na Taovia;
igira nogo nina sausau manana God vanigita.
4Igira na dalena mane kesa tinoni e tamanigira kalina aia e vaolu moa,
ara vaga na pipili tana limana kesa na malagai.
5Ke mage aia na mane e tamanigira danga nina pipili vaga ia.
Sauba igira kara sangâ me ke managana
kalina aia ke tsodogira gana gala tana sasana na pede.
128God e Saupeluna Vanigira Ara Rongomangana
1Ara mage igira ara kukuni tania na Taovia,
mara mauri murigira nina ketsa.
2Na aqo na limamu sauba ko tsodoginia na maurimu;
me sauba ko gini magemage mo ko tamanina na omea danga.
3Ma na taumu sauba ke vaga na itai na uaeni vuaga i laona na valemu,
migira na dalemu sauba kara tutû polia nimu bela na mutsa vaga moa na vasuna na olive.
4Eo, sauba na Taovia ke vangalaka vaganana vania na mane
aia e kukuni tania.
5!Na Taovia ke tabugo tû i Sion!
Mo ko reia nina dato dou na vera ni Jerusalem
pipi dani tana maurimu popono.
6!Ko mauri oka mo ko reigira na kukuamu!
!Na rago ke totu i Israel!
129Igira na Israel Ara Nongia God Ke Kedegira Gaqira Gala
1Igoe Israel, ko tsarivanigami laka e koegua vaga ti igira gamu gala ara rotasigo moa,
tuturiga kalina igoe o vavaolu moa.
2“Tû kalina inau au vavaolu moa
igira gaqu gala ara rotasi sosongoliau,
mara tau lelê susuliga liusiau.
3Ara ramitsia na gotuqu me viri kukubuabua
vaga moa na rereina na tavugi ara ovua tana uta.
4Maia na Taovia, aia e gotolaka sosongo,
e laumaurisiau tania na mauri tseka.”
5Igira sui ara reisavia Sion
ke tau managaqira ma kara sugavisu lê.
6Igira sui kara vaga saikesa moa na buruburu e vovodato lê i kelana na vale,
e tau vati dato loki me makede lê;
7e tagara goto ke kesa ke tsakogira,
se ke ivogogira me ke adilakagira.
8Me tagara goto ke kesa ke liu bâ i tana me ke tsaria vanigira na goko vaga iani:
“Na Taovia ke vangalaka vanigamu.
Igami ami soadougamu tana asana na Taovia.”
130Kesa Tinoni e Nongia God Ke Sangâ
1I laona niqu rota loki au ngangaidato vanigo Taovia.
2!Taovia ko rongomia niqu nonginongi;
ko rongomiau kalina au ngangaidato vanigo ko sangaau!
3?Ti vaga igoe ko tsokogira sui nimami sasi,
me sauba asei ke ulagana na ba tû i matamu igoe?
4Migoe o padalegira moa nimami sasi,
rongona o ngaoa igami kami kukuni tanigo.
5Au pitu sosongolia na Taovia ke sangaau,
mau norukakaia moa nina tsaqina goko.
6Au amesia na Taovia ke sangaau,
liusia niqira amesi igira na mane matali tana bongi
kalina ara pitu sosongolia ke vovomai tsaku na dani.
7Igamu na tinoni ni Israel, kamu norukakaia na Taovia,
rongona nina galuve e vo oli,
maia e padangao sailaginia ke maurisigira nina tinoni.
8Eo, sauba ke maurisigira nina tinoni ni Israel
tanigira pipi sui niqira sasi.
131Na Noruana God
1Taovia, inau au mololenogoa niqu sasaga kaekae
mau tau nogo padaloki segeniqu.
Mau tau goto gini boe kau donaginigira na omea loki sui,
se na omea ara aotsau liusia na sasagaqu.
2Tagara, inau au totu dodo moa me rago na tobaqu,
vaga saikesa moa na baka tetelo kalina e tsaro dodo i limana tinana.
Na tobaqu inau e totu rago dodo vaga goto ia.
3!Igamu na Israel, kamu norukakaia na Taovia,
i dani eni mi tana dani ma na dani!
132Na Tsonikaeana na Vale Tabu
1Taovia, ko laka na padaleana a David
migira sui na rota loki aia e tsodonogoa.
2Taovia, ko padavisua na omea aia e vekea
me gini vatsa vanigo igoe nina God Susuliga a Jakob, kalina aia e tsarivaganana,
3“Sauba kau tau goto sage i valequ se kau tsaro i niqequ;
4sauba kau tau goto mango se kau maturu,
5poi tsau kalina kau aqosivania sa valena na Taovia,
tana ke totu nina God Susuliga a Jakob.”
6I Betlehem nogo ami rongomia tana rongona na Bokisi na Taso,
mami ba tsodovulagia i laona nina kao a Jearim.
7Mami tsarivaganana, “Ida ma ka vano tana valena na Taovia;
ida ma ka ba samasama vania i matana nina sasana na totukae.”
8Taovia, ko tû, mo ko sagemai tana nimu Vale Tabu kolua na Bokisi na Taso,
aia na papadana na susuligamu igoe,
mo ko totu sailagi ieni na dani ma na dani.
9Migira nimu manetabu kara nau sailaginia na omea e goto i matamu;
migira nimu toga sui kara gudato vanigo tana magemage.
10Taovia, tana rongona nogo a David nimu maneaqo,
ko laka na piloligi taniana na taovia tsapakae igoe o vilinogoa.
11Igoe o naua kesa na veke vania a David mo vatsa,
ma na veke ia sauba e utu goto ko veoa.
Igoe o tsarivaganana iani, “Inau sauba kau molokaea kesa vidaqira na dalemu igoe ke lia na taovia tsapakae,
maia nogo ke adidatoa na aqotagao i murimu igoe.
12Me ti vaga igira na dalemu kara manalia niqira tabana na vaitasogi au naukolugamu,
ma kara muridoua niqu ketsa au tusunogoa vanigira,
ma na daleqira goto igira sauba kara tugugo igoe tana lia sailagi na taovia tsapakae.”
13Na Taovia e vilinogoa i Sion;
me ngaoa ke lia na verana tana ke totu.
Aia e tsarivaganana:
14“Ieni nogo na nauna au vilinogoa,
mieni nogo sauba kau totu saviliu na dani ma na dani.
15Inau sauba kau tusuvania Sion na omea sui e kilia gana ke gini mauri;
me sauba kau masuliginigira na mutsa igira nina tinoni ara tau tamani sa omea.
16Sauba kau tabugira nina manetabu i laona pipi sui niqira aqo ara naua,
migira sui nina tinoni sauba kara linge ma kara gudato tana magemage.
17Mieni nogo sauba kau vaturia kesa na kukuana a David ke taovia tsapakae loki;
ma na puku i konina aia sauba kara tangolidatoa nina aqotagao.
18Inau sauba kau paluvangamaqira popono igira gana gala,
ma kau naua ma gana susuliga ke pabo babâ me ke totu kakai saviliu.”
133Na Mauri Tobasai Tana Rago
1!E dou sosongo rago na rereina
kalina igira nina tinoni God ara mauri tobasai tana rago!
2E vaga moa ti na oela loki matena ara qetua i lovana a Aaron me sarara tsuna tana ngolana,
me porisia na liona na polona sagesage katsi.
3Me vaga goto na kolobu tana Vungavunga Hermon
me puka i kelaqira na tetena i Sion.
I tana nogoria na Taovia e vekevanigira
laka sauba kara tamanina na mauri saliu.
134Na Linge Vania God Tana Ngulavi
1Mai ma kamu tsonikaea na Taovia, igamu sui nina tinoni aqo,
igamu amu aqo vania i laona nina Vale Tabu tana bongi.
2!Abedatoa na limamui tana nonginongi i laona na Vale Tabu
ma kamu tsonikaea na Taovia!
3!Na Taovia aia e vusâ na baragata ma na barangengo,
ke tû i Sion me ke tabugamu!
135Kesa na Linge na Tsonikaeana na Taovia
1!Tsonikaea na Taovia!
Tsonikaea na asana igamu nina tinoni aqo na Taovia,
2igamu amu tutû i laona na valena na Taovia,
i laona nina Vale Tabu nida God.
3Tsonikaea na Taovia rongona aia e dou sosongo;
lingena na tsonikaeana na asana rongona aia e tobalaka vanigita.
4Na Taovia e vilivani segenia a Jakob,
migira na Israel kara lia nina tinoni segeni aia.
5Au donagininogoa laka e loki manana nida Taovia,
aia e loki liusigira pipi sui na god.
6Maia e aqosigira na omea sui moa aia e padangaoa
i baragata mi barangengo,
i laona na tasi mi tana maorodo i lao vasau.
7Aia nogo e naua mara tû na parako na legai loki talu tana vovosana na barangengo;
e naua me botsa na angaanga i laona na usa loki,
me molomaia na guguri e talu i tana aia e mololakanogoa.
8Mi Ejipt aia e labumatesigira sui na daleqira mane botsaida i laoqira na tinoni ma na omea tuavati sui.
9Mi tana goto aia e aqosigira danga na valatsatsa ma na omea ganataga,
ke kedeginia na taovia tsapakae kolugira sui goto nina mane sasanga.
10Aia e toroutsanigira danga na puku tavosi,
me matesigira danga na taovia tsapakae susuliga.
11Igira nogo a Sihon, niqira taovia tsapakae na Amor,
ma Og, aia na taovia tsapakae ni Basan,
migira sui lakalaka na taovia tsapakae ni Kanaan.
12Aia e adia niqira kao igira me sauvanigira nina tinoni,
vanigira igira na Israel kara tamanina.
13Taovia, sauba kara tau kuti na katevulagiana sailagi laka igoe nogo o God manana;
migira na vatavata sui sauba kara padavisugo moa igoe.
14Na Taovia sauba ke isutuguqira nina tinoni;
aia sauba ke galuvegira nina tinoni ara aqovania.
15Igira niqira god na puku tavosi ara aqosiginigira moa na siliva ma na qolumila;
ma na limana tinoni nogo ara aqosiginigira.
16Ara tamanina rago na mangaqira, me utu kara goko,
ma na mataqira, me utu kara gini moro.
17Ara tamanina na kuliqira, me utu kara gini rorongo,
me tau goto tangomana kara magomago.
18!Migira sui ara aqosigira mara norugira,
kara lia vaga saikesa nogo na titinonina na god peropero ara aqosi segeniqira nogo igira!
19!Tsonikaea na Taovia igamu na tinoni ni Israel;
tsonikaea aia igamu nina manetabu God!
20!Tsonikaea na Taovia, igamu na Levite;
tsonikaea aia igamu sui amu samasama vania!
21Tsonikaea na Taovia i Sion,
mi Jerusalem goto na verana.
!Tsonikaea na Taovia!
136Kesa na Linge na Soadouana God
1Soadoua na Taovia, rongona e dou aia,
ma nina galuve e totu saviliu.
2Soadoua aia e loki tsapakae bâ liusigira pipi sui na god;
rongona nina galuve e totu saviliu.
3Soadoua aia e susuliga putsikae bâ liusigira pipi sui na taovia;
rongona nina galuve e totu saviliu.
4Aia segeni moa e dona ke aqosi valatsatsa loki;
rongona nina galuve e totu saviliu.
5Mi tana nina sasaga loki nogo aia e aqosiginia na baragata;
rongona nina galuve e totu saviliu.
6E ovukaea na barangengo tana maorodo;
rongona nina galuve e totu saviliu.
7Aia e volakaira na aso ma na vula;
rongona nina galuve e totu saviliu.
8Na aso ke tagaovi kaputia na dani;
rongona nina galuve e totu saviliu.
9Ma na vula migira na veitugu kara tagaovi kaputia na bongi;
rongona nina galuve e totu saviliu.
10Aia e labumatesigira na daleqira mane botsaida igira na Ejipt;
rongona nina galuve e totu saviliu.
11Aia e adirutsumigira na toga ni Israel tania i Ejipt;
rongona nina galuve e totu saviliu;
12tana susuligana nogo na limana aia e nauginia,
rongona nina galuve e totu saviliu.
13Aia e sarovotâ na Tasi Tsitsi;
rongona nina galuve e totu saviliu;
14maia e ida vanigira nina toga mara liu tsapatugu bâ i konina;
rongona nina galuve e totu saviliu.
15Maia e lumia na taovia tsapakae ni Ejipt kolugira nina alaala na mane vaumate;
rongona nina galuve e totu saviliu.
16Aia e ida vanigira nina toga mara liu tana kaomate;
rongona nina galuve e totu saviliu.
17Aia e labumatesigira na taovia tsapakae susuliga;
rongona nina galuve e totu saviliu.
18Maia e labumatesigira goto na taovia tsapakae tangirongo;
rongona nina galuve e totu saviliu.
19Aia nogo a Sihon, niqira taovia tsapakae igira na Amor;
rongona nina galuve e totu saviliu;
20maia a goto a Og na taovia tsapakae ni Basan;
rongona nina galuve e totu saviliu.
21Me adia niqira kao igira me sauvanigira nina tinoni;
rongona nina galuve e totu saviliu;
22me tusulea niqira kao vania Israel nina tinoni aqo ia;
rongona nina galuve e totu saviliu.
23Aia e tau padalegita kalina igira ara tuliusigita;
rongona nina galuve e totu saviliu.
24Maia e laumaurisigita tania na limaqira gada gala;
rongona nina galuve e totu saviliu.
25Aia e palagira pipi na omea mamauri sui;
rongona nina galuve e totu saviliu.
26Soadoua God aia e totu i baragata;
rongona nina galuve e totu saviliu.
137Niqira Linge na Melu Igira na Israel Kalina Ara Totu Tsinogo
1I liligina na ko loki ni Babilon igita a totu i lao,
ma ngangaisia i Sion.
2Tana araqira nogo na gaimelu i tana
igita a tsauraginikaegira nida itai tatangi.
3Igira ara raqa tsekagita ara raigita ka linge vanigira;
mara tsarivaganana vanigita:
“Kamu lingena vanigami kesa na linge ni Sion.”
4?Me ke koegua igita ti ka lingena na linge na Taovia
ieni tana niqira kao na veratavosi?
5!Ti kau padalego Jerusalem,
ke mate na limaqu madoa me ke gini utu goto na taiana na itai tatangi!
6!Ke bulu nomoa na lapiqu tana baragatana mangaqu
ti kau padalego Jerusalem,
ti kau tau padalokigo liusigira niqu magemage sui!
7Taovia, ko padatugua na omea ara naua igira na tinoni ni Edom
tana dani ara tangolia na Jerusalem.
Ko padatugua na goko vaga igira ara totu matengana na tsariana,
“!Vuipukalia aia me ke toroutsa saikesa!”
8Igoe Babilon ko rorongo, sauba kara toroutsanigo igoe.
Ke mage aia e tangotugumami igami me ke labuvisugo
tana rongona na omea seko igoe o naua vanigami igami,
9me ke adigira na dalemu boruboru
me ke pisagira tana vatu.
138Kesa na Nonginongi na Soadouana God
1Taovia, au soadougo tana tobaqu popono;
mau tsonikaego i mataqira na angelo.
2Au tsuporu vanigo i matana nimu Vale Tabu,
mau tsonikaea na asamu rongona igoe o mana vaniau ma nimu galuve e vo oli;
mo sauvulagia vaniau laka na asamu igoe,
migira sui nimu ketsa, ara loki tsapakae.
3Mi kalina inau au soago, migoe o rongomiau;
ma na susuligamu nogo igoe o susuligasiginia na tidaoqu.
4Taovia, igira sui na taovia tsapakae tana barangengo
ara rongomia na omea igoe o tsaria,
me sauba kara tsonikaeginigo.
5Sauba kara linge tana rongoqira na omea sui o aqosigira,
rongona na mararamu igoe e loki tsapakae.
6E atsa moa ti igoe o paladato bâ i gotu vasau,
migoe o arago sosongoligira nomoa igira ara totu palatsuna,
migira ara kaekae e tau tangomana vanigira kara taopoi tanigo igoe.
7Atsa moa ti e gadoviau na rota danga,
migoe o maurisiau.
Igoe o sugaria niqira momosatoba gaqu gala,
mi tana susuligamu o laumaurisiau.
8Taovia, au dona laka sauba ko manaligira na omea sui igoe o vekenogoa vaniau,
rongona nimu galuve e totu saviliu.
Ko suilavaginia na aqo igoe o tuturiga nogoa i laona tobaqu.
139God e Donagira na Omea Sui
1Taovia, igoe o vilekeau, mo donaginiau popono nogo.
2Igoe o donaginigira sui na omea inau au naua;
o totu ao moa mo padagadovigira nomoa pipi niqu papada.
3Igoe o reiau moa ti kau aqo se kau mango;
mo donaginigira nogo pipi sui niqu aqoaqo.
4Atsa moa ti au tau vati goko moa,
migoe o dona idanogoa na omea sauba kau tsaria.
5Igoe o totu pipi nauna polipoliau inau;
mi tana susuligamu igoe o reitutuguau.
6Ma nimu dona igoe tana rongoqu inau e vano ao bâ,
e ao tanisosongolia bâ na omea e tugua kau padagadovia inau.
7?Laka iava tangomana inau kau ba tsogopoi tanigo igoe?
?Miava tangomana inau kau taopoi tania na matamu?
8Ti vaga kau tsogodato i baragata, migoe o totu nogo i tana;
me ti vaga kau ba tsaro tana barangengo na mate, migoe o totu nogo i tana.
9Me ti vaga kau lovoligi ao liusia tana e dato na aso,
se kau ba totu kesa tana nauna ao sosongo i tana e sû na aso,
10migoe o totu nogo i tana gana ko idagana sautu vaniau,
mo totu nogo i tana rongona ko gini sangaau inau.
11Me ti vaga kau ngasua na rodo pulipuli ke poiau,
se na marara e totu poliau ke oli me ke lia na bongi,
12eo, me atsa moa ti na rodo pulipuli maia e tau lelê rodo vanigo igoe,
ma na bongi aia e marara maka saikesa vaga moa ti na dani.
Na rodo pulipuli ma na mararana na dani ara ka kesaniatsa moa i matamu igoe.
13Igoe nogo o aqosigira pipi na turina na koniqu inau,
mo molosaigira i laona na tobana tinaqu.
14!Au tsonikaego mau kukuni tanigo Taovia rongona igoe o aqosiau dou sosongo,
migira sui na omea igoe o aqosigira ara dou sui!
Migoe o donaginiau popono.
15Mi kalina na suliqu ara tuturiga moa na sai i tobana tinaqu,
mau lokiloki popoi moa i tana,
migoe o donagininogoa laka inau au totu i tana,
16mo reiau kalina au tau vati botsa moa.
Idavia kalina au tau vati botsa moa,
migoe o maretsunagira sui nogo i laona nimu papi
na dani igoe o pedevaniau kau mauri tsaulia.
17!God, e utugana sosongo vaniau kau tsaulia nimu papada igoe;
ara danga sosongo vaga sagata ia!
18Me ti vaga kau tsokosaigira, me sauba kara danga liusia na vatuna na one.
Mi kalina kau mamata tania na maturu, minau kau totu kolugo moa igoe.
19!Niqu God, au kili sosongolia laka igoe ko labumatesigira na tinoni vanga tsutsukibo!
!Au amesi sosongolia laka igira na tinoni vanga tangopeke seko kara mololeau inau!
20Igira ara goko tangopeke seko tana rongomu igoe;
mara soasekolia na asamu.
21!Taovia, inau au reisavi sosongoligira igira ara reisavigo igoe!
!Mau pea sosongoligira igira ara petsakoe vanigo igoe!
22Inau au reisavi sosongoligira nomoa tana tobaqu popono,
rongona gamu gala igoe ara lia vaga goto ti gaqu gala inau.
23Ko vilekeau igoe niqu God, mo ko donaginia na sasagaqu;
ko tovoleau, mo ko tsodovulagigira popono na papadaqu.
24Mo ko reia ti vaga ke totu moa na seko i laoqu,
mo ko mataliau ma kau muria na sautuna na mauri saliu.
140Kesa Tinoni e Nongia God Ke Reitutugua
1Taovia, ko maurisiau tanigira na tinoni seko;
ko laumaurisiau tanigira na tinoni vanga tangopeke seko.
2Igira ara vorogokona sailagi moa na nauana na omea seko,
mara tsaikore sailagi.
3Na lapiqira e vaga moa na muata e dona na gatimatesi tinoni;
ma niqira tsaqina goko ara gini sekoli tinoni, vaga moa na muata vogata e totu na tabatu i konina.
4Taovia, ko maurisiau tania na limaqira na tinoni vanga tsutsukibo;
ko laumaurisiau tanigira na tinoni vanga tangopeke seko,
igira ara vorogokona na tsogori pukaliaqu.
5Igira na tinoni kaekae ara vangaraunogoa vaniau gaqu taviti;
ara molo kapusia niqira pidipidi tana kau liu bâ,
mara matalogoa niqira taviti gana kau sogo i laona.
6Minau au tsarivania na Taovia, “Igoe nogo niqu God.”
!Taovia, ko rongomia niqu ngangaidato vanigo rongona igoe ko sangaau!
7Taovia niqu God, igoe nogo o susuliga na sogogaqu,
mi tana tagu na vailabu igoe nogo o dilaau.
8Taovia, ko laka na tamivaniaqira na vanga tsutsukibo na adiana na omea ara kilia;
mo ko laka goto na tamivaniaqira ke managaqira tana omea ara vorogokona.
9Ko laka na tami ke managaqira igira gaqu gala;
mo ko naua ma na omea seko igira ara ngaoa na nauvaniaqu inau, ke kidivisu me ke gado i koniqira segeni.
10Ko naua ma na vatu romaroma ke puka bâ i koniqira;
ma kara tsonitsunagira i laona na qilu loki ma kara tau lelê goto rutsu tania.
11Ko laka goto na tamiana ke managaqira igira ara dona na keliseko;
mo ko naua me ke kesa na omea seko ke gadovigira na vanga tsaikore ma kara mate.
12Taovia, inau au donanogoa laka igoe o isutuguqira igira ara tau tamanina sa omea,
mo aqosia na pedegoto vanigira igira ara kilia na sasanga.
13Igira e gotodou niqira sasaga sauba kara tsonikaego;
me sauba kara totu sailagi i matamu igoe.
141Na Nonginongi na Ngulavi
1!Taovia, au soago, ko tsaku mo ko sangaau kalina ia!
Ko rongomi vataviau kalina kau soago.
2Ko adidoua niqu nonginongi vaga moa na pungu na bulunagai uruuru,
ma na limaqu au abedatoa vanigo vaga moa na savori-kodoputsa tana ngulavi.
3Taovia, ko reitutugudoua na mangaqu,
mo ko mataligira dou niqu goko.
4Ko didia taniau na nauana na omea seko
ma na sangasage i laona niqira sasaga tabaru igira na tinoni seko.
Mo ko laka goto na tamivaniaqu kau sangapata tana niqira kavomutsa.
5E dou moa ti vaga kesa na tinoni dou ke kedeau me ke totosasaga vaniau tana galuve,
minau moa e utu saikesa kau tamivanigira na tinoni vanga nauseko kara tsonikaeau,
rongona inau au nonginongi sailagi vania God ke kedegira tana rongona niqira sasaga tabaru.
6Mi kalina kara tangoligira igira niqira tagao ma kara tsonitsunaligira tana maragova,
mi tana ti igira na toga kara donaginia laka nina goko na Taovia ara mana sui.
7Ma na suliqira kara viri totu piriutsa bamai tana mangana na qilu,
vaga moa na takutina gai ara tala mesimesigira.
8Minau au norugo babâ moa igoe niqu Taovia ma niqu God
mau mai kau totu ravidou i konimu.
!Migoe ko laka saikesa na tamivaniaqira kara matesiau!
9Ko tukapusia na taviti ara molomanogati vaniau nogo,
ma niqira pidipidi ara moloa igira na vanga nauseko.
10Migira na vanga tsutsukibo kara sogo segeni i laona niqira taviti,
minau moa kau liusavi tania.
142Nina Nonginongi Kesa Tinoni Rongona God Ke Sangâ
1Au ngangaidato vania na Taovia rongona aia ke sangaau;
mau amiami tsai vania.
2Au tsarivulagi vania pipi sui na omea ara ngoliau;
migira goto na rota sui ara gadoviau.
3Mi kalina e varavara nogo kau pukavisu lê,
maia e dona sui nogo niqu omeomea.
Tana sautu tana sauba kau liu inau,
igira gaqu gala ara molopoia vaniau gaqu taviti.
4Mi kalina au moro bamai i ligisaqu,
mau tau nogo reia ke kesa ke sangaau,
tagara goto ke kesa ke reitutuguau,
se ke boeginiau.
5Taovia au ngangaidato vanigo ko sangaau;
Taovia igoe nogo niqu reitutugu;
igoe segeni moa au ngaoa kau tamanina tana mauri ni lao eni.
6Rongomivatavia niqu ngangaidato vanigo ko sangaau,
rongona inau au seko pitsu nogo.
Laumaurisiau tanigira gaqu gala;
igira ara susuliga liusiau nogo inau.
7Ko adiligi taniau na rota loki ara bingi sekoliginiau;
mi tana ti inau kau tsonikaego i laona niqira saikolu nimu tinoni,
tana rongona igoe o dou sosongo vaniau.
143Nina Nonginongi Kesa Tinoni Rongona God Ke Sangâ
1!Taovia, au nongigo ko rongomia niqu nonginongi!
!Tana nimu gotolaka ko rongomia niqu ngangaidato vanigo;
mi tana nimu doulaka ko gokovisu vaniau!
2Laka kiki na raqaaqu tana pede inau nimu tinoni aqo,
rongona e tagara kesa ke tau sasi i matamu igoe.
3Aia gaqu gala e takuviau
me tsogori pukaliau saikesa.
Maia e tsonisageau tana rodo pulipuli,
mau vaga saikesa nogo igira ara mate oka nogo i sau vasau.
4Me vaga ia, me varavara nogo kau pukavisu lê,
mau seko pitsu saikesa nogo.
5Inau au padavisugira na dani ara vano putsi nogo;
mau papada tana rongoqira na omea sui igoe o aqosigira;
mau pukugira sui i tobaqu na omea igoe o naugira nogo.
6Inau au abedatoa na limaqu vanigo tana nonginongi;
ma na tidaoqu e gini marou tana rongomu igoe vaga saikesa moa na kao mamatsa lê.
7!Taovia, kalina nogo ia ko tugumai vaniau niqu goko!
E puka lê sui nogo niqu amesi.
Ko laka goto na taopoi taniaqu,
kau tau vaga igira ara ba tsuna nogo tana barangengo na mate.
8Pipi tana matsaraka ko molopapada vaniau tana rongona nimu galuve vo oli,
rongona i konimu nogo igoe au vataraginia niqu vainoru.
Niqu nonginongi ara datolaba i konimu igoe;
ko tusuvulagi vaniau na sautu kau muria.
9Taovia, au bâ i konimu rongona igoe ko reitutuguau;
ko laumaurisiau tanigira gaqu gala.
10Igoe nogo niqu God;
ko sasaniau na nauana na omea igoe o kilia kau naua.
Ko tobadou vaniau, mo ko mataliau tana sautu dou.
11Taovia ko laumaurisiau vaga igoe o vekenogoa;
mi tana nimu galuve ko maurisiau tanigira na rota loki ara gadoviau.
12Tana rongona nogo nimu galuve vaniau igoe, ko labumatesigira gaqu gala,
mo ko toroutsanigira sui igira ara bingi sekoliau,
rongona inau nimu tinoni aqo nogo inau.
144Kesa na Taovia Tsapakae e Soadoua God Rongona e Managana tana Vailabu
1!Tsonikaea na Taovia aia e reitutuguau!
Aia nogo e sasaniau na aqona na vailabu,
me vangarauau na vano tana vailabu.
2Aia nogo e reitutuguau me isutuguqu,
me ravitiau me vagamaurisiau,
mi konina nogo aia au totu raviravi dou.
Maia e mologira na puku sui tana limaqu inau.
3?Taovia, nagua sagata na tinoni ti igoe o ba padaloki sosongoli vaganana ia?
?Maia na tinoni lê moa, egua ti o gini boe sosongo tana rongona ia?
4Aia e vaga moa ti kesa na guguvina lê na guguri;
ma na bongina ara vaga moa na auau lê, ara laba mara nangaligi tsaku.
5Taovia, ko ratsia na masaoka me ke ova, mo ko tsunamai;
ko pelegira lê moa na vungavunga, me sauba ke viri vulosudato na pungu loki.
6Ko naua me ke kirapi na angaanga mo ko sarangasigira gamu gala.
Ko gini vanavana nimu pipili ma kara viri tsogoligi sui.
7Ko sautsuna mai na limamu,
mo ko raqakaeau tania na ko mao sosongo, mo ko maurisiau;
laumaurisiau tania na limaqira na tinoni ni veratavosi girani,
8igira ara tau lelê dona na tsariana sa goko mana,
me atsa moa ti kara vatsa mara peropero moa.
9Niqu God, sauba kau lingena vanigo kesa na linge vaolu;
sauba kau gini sinagi vanigo na itai tatangi ma kau linge vanigo.
10Igoe o sangagira na taovia tsapakae sui mara gini tangomana tana vailabu,
mo laumaurisia a David nimu maneaqo.
11Maurisiau tanigira gaqu gala seko sosongo;
mo ko laumaurisiau tania na limaqira na tinoni ni veratavosi,
igira ara tau lelê dona na tsariana sa goko mana,
me atsa moa ti kara vatsa mara peropero moa.
12Ko naua migira na dalemami mane vaolu
kara vaga moa na gai tsukatsuka ara dato susuliga.
Migira goto na dalemami daki kara vaga moa na tuguru ara katsu lelevoa,
mara turuvaginigira tana tsuru i valena na taovia loki.
13Mo ko naua migira nimami vale na mololaka mutsa
kara danga tovu pipi vatana na mutsa i laona.
Migira nimami sipi kara tau kuti na botsa na vaoluna ma kara danga babâ.
14Migira goto nimami buluka kara vasugira ke danga na daleqira,
ma kara tau goto vasusu seko se kara reolea na daleqira.
Me ke tau goto laba na ngangai na rota i laona nimami sautu loki.
15!Ke mage aia na puku i tana ara laba na omea dou vaga girani!
!Kara mage igira na tinoni aia God nogo niqira Taovia!
145Kesa na Linge na Tsonikaeana God
1Sauba kau tsonikaego sailagi igoe niqu God ma niqu taovia tsapakae;
ma kau soadougo na dani ma na dani.
2Pipi dani moa sauba kau soadougo,
ma kau soalokia na asamu na dani ma na dani.
3Na Taovia e loki tsapakae me ulagana kara tsonikae sosongolia,
ma gana loki tsapakae e utu na padagadoviana.
4Taovia, pipi na vatavata na tinoni sauba kara katevulagia vania na vatavata ke botsamai i muri
na omea loki sui igoe o naugira.
5Sauba kara gini gogoko tana rongona gamu loki tsapakae ma gamu tangirongo,
minau sauba kau padavisugira na omea dou sui igoe o naugira nogo.
6Migira na tinoni sui sauba kara gini gogoko tana rongoqira na omea loki susuliga igoe o naugira,
minau sauba kau katevulagia gamu loki tsapakae.
7Sauba igira kara gini gogoko bamai tana rongoqira pipi sui nimu aqo galuve,
ma kara lilinge tana rongona igoe o doulaka.
8Na Taovia e doulaka, me dona sosongo na galuve,
e kisâ rago na kore me totu saviliu nina galuve vo oli.
9Aia e tobadou vanigira na tinoni sui,
me ngongoragi mateqira na omea sui aia e aqosigira.
10Taovia, pipi sui na omea igoe o vusagira sauba kara tsonikaego,
migira sui nimu toga sauba kara soadougo.
11Sauba kara gini goko tana rongona gana loki tsapakae na veramu,
ma kara katevulagia na susuligamu loki.
12rongona i tana ti igira sui na tinoni kara donaginia na omea loki putsikae igoe o naugira,
ma na mararana tsapakae na veramu.
13Igoe o taovia tsapakae saviliu,
mo tagaovi kaputigira na tinoni sui na dani ma na dani.
Na Taovia e manaligira na omea sui aia e vekea,
mara dou saviliu pipi na omea sui aia e naugira.
14Aia e sangagira igira ara totu tana rota;
me tatatuugira igira ara puka.
15Igira na omea mamauri sui ara moro bâ i konimu igoe,
migoe o tusuvanigira na mutsa ara kilia gana kara gini mauri.
16Igoe o vangalaka sosongo vanigira na tinoni sui
mo vanigira na omea e tugugira sui.
17Na Taovia e gotolaka pipi tana omea aia e naua,
ma na omea sui aia e naua e aqosigira tana galuve.
18Aia e totu varangisigira igira ara nongia,
igira ara soa mananâ tana tobaqira popono.
19Aia e tusule vanigira igira ara kukuni tania na omea sui ara nongia i konina;
me rongomia niqira ngangaidato vania me maurisigira.
20Na Taovia e reitutugugira igira sui ara galuvea,
me sauba ke matesigira na vanga tsutsukibo.
21Minau sauba kau tau kuti na tsonikaeana na Taovia;
migira sui lakalaka goto na omea vovola kara tsonikaea na asana tabu na dani ma na dani.
146Na Tsonikaeana God Aia na Vagamauri
1!Tsonikaea na Taovia!
!Igoe na tidaoqu ko tsonikaea na Taovia!
2Sauba kau tsonikaea tana mauriqu popono;
sauba kau linge vania niqu God pipi dani tana mauriqu popono.
3Laka na vataraginiana nimui vainoru i koniqira gamui ida ni lao eni,
rongona e tau tangomana sa tinoni lê ke maurisigamu.
4Kalina kara mate, kara visutugua tana kao;
mi tana dani ia pipi sui niqira vorogoko sauba kara sui lê.
5Ke mage na tinoni aia e norua nina God a Jakob ke sangâ,
me tsotsovata moa i konina na Taovia nina God,
6aia e aqosia na baragata ma na barangengo ma na tasi,
me pipi sui na omea i laoqira.
Na Taovia e manaligira pipi sui nina veke,
7me saua na pedegoto vanigira igira ara bingi sekoligira,
me palagira igira ara vitoa.
Na Taovia e nusigira igira ara totu tana vale sosori,
8me naua mara moro na koko.
Maia e tatatuugira igira ara puka;
me reingaogira nina tinoni igira e goto niqira sasaga.
9Na Taovia e reitutugugira igira na veratavosi ara mai totu i verada;
me sangagira na daki tinamate kolu daleqira,
me pualasia niqira vorogoko igira na vanga tsutsukibo.
10Na Taovia aia nogo e taovia tsapakae saviliu.
Nimui God nogo igamu na Sion sauba ke tagao saviliu na dani ma na dani.
!Tsonikaea na Taovia!
147Na Tsonikaeana God Aia E Susuliga Sosongo
1!Tsonikaea na Taovia!
E dou igita ka linge ma ka tsonikaea nida God.
Eo, e goto me ulagana sosongo ka tsonikaea.
2Na Taovia e vaturi visutugua na vera ni Jerusalem,
me adivisugira tugua na Israel ara totu tsinogo.
3Aia e veregira igira e ngoligira na melu,
me talia na bokaqira.
4Aia nogo e pedea na dangaqira na veitugu,
me molo soana pipi kesa vidaqira.
5E loki tsapakae me susuliga sosongo nida Taovia;
ma nina sasaga loki e utu na tsarituguana.
6Na Taovia e sulukaegira igira ara palatsuna;
me tsogori rapasigira tana kao igira na vanga tsutsukibo.
7Kamu lingena na soadouana na Taovia;
kamu taia na itai tatangi vania nida God.
8E vuresia na parako i gotu tana masaoka,
me molomaia na usa ke tumulia na barangengo,
me naua mara gini dato dou na buruburu tana tetena.
9Aia e palagira na omea tuavati sui
me kutigira na dalena kaokao kalina ara nongigaqira.
10Na Taovia e tau vataraginia nina magemage i koniqira na ose susuliga,
se i koniqira na mane vaumate malagai. Tagara.
11Maia e gini mage moa na reiaqira na tinoni ara kukuni tania,
migira ara norua nina galuve vo oli.
12!Tsonikaea na Taovia igoe Jerusalem!
!Migoe Sion ko tsonikaea nimu God!
13Aia nogo e ravekakaisigira sui na matsapamu,
me vangalaka vanigira nimu tinoni.
14Aia e moloa na goto tana vovotana nimu kao,
me masuliginigo gamu mutsa laka.
15Aia e moloa nina goko me liuvi tovusia na barangengo,
ma na omea aia e ketsalia ara laba tsaku lê.
16Aia e moloa na snou ke tsunamai
me ke tsavua na barangengo popono.
17!Aia e moloa ke tsunamai na kolina na usa kakai vaga moa na kubakuba;
me tagara goto ke kesa ke baria na bisina!
18Maia e moloketsa moa me rapa lê na aesi e kakaisia na kô;
me molomaia na guguri, ma na kô e tsatsali tavetugua.
19Aia e moloa nina goko vanigira nina tinoni,
ma nina ketsa ma nina totosasaga vanigira na Israel.
20Maia e tau goto nauvaganana ia vanigira na puku tavosi,
tagara, igira ara tau donaginigira nina ketsa.
!Tsonikaea na Taovia!
148Na Omea Sui i Gotu mi Lao Kara Tsonikaea God
1!Tsonikaea na Taovia!
Tsonikaea na Taovia igamu sui amu totu i gotu vasau.
2Tsonikaea igamu sui nina angelo,
migamu sui goto nina alaala na malagai susuliga ni gotu.
3Tsonikaea kagamu na aso ma na vula;
tsonikaea igamu na veitugu amu mokemoke.
4Tsonikaea igamu amu totu i gotu vasau,
migamu goto na kô sui amu totu i kelana na masaoka.
5!Igira sui lakalaka kara tsonikaea na asana na Taovia!
Rongona aia nogo e ketsalia ti igira ara botsamai;
6mi tana nina ketsa moa aia, migira ara gini totu kalavata saviliu tana sasaqira,
me utu goto kara petsakoe vania.
7Tsonikaea na Taovia igamu sui tana barangengo,
igamu na tuqana vigo na omea loki i laona na tasi me pipi na maorodo na kema;
8na angaanga ma na kolina na usa kakai,
na snou ma na parako,
migamu goto na guguri susuliga amu murigira nina ketsa.
9Tsonikaea igamu na tetena ma na vungavunga,
na vuagai mutsamutsa sui ma na goana atsi;
10migamu sui na omea tuavati, na ladogana ma na atsina,
ma na omea amu tere tana kao ma na manu.
11Tsonikaea na Taovia igamu sui na taovia tsapakae migamu na toga sui,
migamu goto na tinoni taovia ma na tagaovera tavosi sui tana barangengo;
12na baka daki ma na borau,
na tuqatuqa ma na kavekave, migamu goto na baka pasa.
13!Igira sui lakalaka kara tsonikaea na asana na Taovia!
Rongona na asana aia e loki liusigira bâ na soa sui tavosi;
ma gana loki tsapakae e dato ao liusia na barangengo ma na baragata.
14Aia e galuve sosongoligira nina tinoni ni Israel,
me vaturikakaia na veraqira,
rongona ti igira sui nina tinoni kara tsonikaea.
!Tsonikaea na Taovia!
149Kesa na Linge na Tsonikaeana na Taovia
1!Tsonikaea na Taovia!
Linge na linge vaolu vania na Taovia.
Tsonikaea i laona niqira saikolu igira nina tinoni.
2!Kamu gini magemage igamu na Israel, rongona God nogo e aqosigamu;
kamu gini mage loki igamu na toga ni Sion, tana rongona nimui taovia tsapakae!
3Tsonikaea na asana ma kamu gavai vania;
taigira na kuku ma na itai tatangi tana tsonikaeana.
4Na Taovia e reingao sosongoligira nina tinoni;
E molokaegira igira ara palatsuna mara gini tangomana tana vailabu.
5Kara gini magemage nina tinoni God rongona e managaqira tana vailabu,
kara linge tana magemage na bongi popono.
6Kara gudato kalina ara tsonikaea God,
kolua na isi vavanga tana limaqira,
7gana kara tuliusiginigira na puku tavosi sui,
ma kara kedegira na tinoni i laoqira;
8kara soriginigira na itai tapala niqira taovia tsapakae;
ma niqira ida tana barina na itai tapala;
9ma kara kedegira na puku tavosi sui vaga nogo God e ketsaligira kara naua.
Iani nogo e vaga niqira tangomana igira nina tinoni God.
!Tsonikaea na Taovia!
150!Tsonikaea na Taovia!
1!Tsonikaea na Taovia!
!Tsonikaea God i laona nina Vale Tabu!
!Tsonikaea gana susuliga i gotu i baragata!
2Tsonikaea tana rongoqira na omea loki sui aia e naugira.
Tsonikaea gana loki tsapakae.
3Tsonikaeginia na uvi tavuli.
Tsonikaeginia na tai itai tatangi ma na tuqulu.
4Tsonikaeginia na tai kuku ma na gavai.
Tsonikaeginia na tai itai tatangi ma na uvi uete.
5Tsonikaeginia na rekesiana na tsetsê.
Tsonikaeginia na tatangina loki na valaqe.
6!Tsonikaea na Taovia igamu sui na omea mamauri!
!Tsonikaea na Taovia!