NA PAPI
NA TANGITANGI
(LAMENTATIONS)
Na Vuresi Makaliana Na Omea Ara Marea Tana Papi Iani
Na papi iani Na Tangitangi ara marea tana tagu kalina igira na Babilon ara toroutsani poponoa na Jerusalem, migira na tinoni ni Juda ara tangisia niqira verabau dou sosongo. Tana idana Jerusalem aia na verabau i tana e totu nina Vale Tabu God, aia na papadana vanigira na tinoni ni Israel laka God e totu i laoqira. Mi kalina igira na Babilon ara toroutsania na Jerusalem, me gini puka lê goto niqira tutuni, me ponopala sosongo na tobaqira. Mara gini padasavi mara tangitangi. Ma na linge girani igira na Tsiu ara gini aqo pipi ngalitupa tana samasama kalina e gado na dani na vitoa ma na tangitangi i tana ara padavisua na toroutsa seko e gadovia na veraqira i sau.
Na Omea Ara Totu Tana Papi Iani
Na melu loki e gadovia na Jerusalem 1:1-22
Gana kede na Jerusalem 2:1-22
Na kede ma na amesi 3:1-66
E taveo popono na Jerusalem 4:1-22
Ara nongia God ke galuvegira 5:1-22
1Na Melu Loki e Gadovia Na Jerusalem
1!Eo kiki, e totu mangu lê nomoa na verabau ni Jerusalem,
i tana ara mauri danga sosongo na tinoni i sau!
Maia nogo na verabau ara padaloki sosongolia tana barangengo popono,
mi kalina ia e vaga saikesa moa ti na daki tinamate.
Aia e paladato bâ i laoqira na vera sui,
mi kalina ia ara aditsekagira sui na tinonina.
2Mi tana bongi popono aia e ngangai moa;
ma na kô na matana e sarara tsuna tana ngorana.
Mi laogira sui lakalaka na kulana ni sau,
e tau lelê goto totuvisu ke kesa ke verea.
Igira ara tabana kolua tana idana ara tû mara sauligia,
mi kalina ia igira sui ara vaigalagi kolua.
3Igira gana gala na Juda ara rotasi sosongoligira nina tinoni,
mara turuginigira kara vanoligi tania na veraqira,
mara ba totu piriutsa bamai tana vera tavosi,
i tana e tagara goto sa nauna tangomana kara ba totu rago.
Migira moa gaqira gala ara tupoligira, me tau goto tangomana kara tsogo.
4Igira sui na sautu ara vano kalea i Sion ara totu mangu lê,
me tagara nogo ke kesa ke mai na samasama i laona na Vale Tabu tana dani tabu.
Migira na matsapakapuna na verabau ia ara totu mangu lê,
migira na manetabu ara kukungu moa.
Ma na baka daki ara dona na linge i tana, ara tangitangi moa kalina ia.
Ma na Sion segenina goto e totu tana rota loki.
5Me managaqira igira gana gala na Jerusalem; mara tagaovi kaputia.
Na Taovia e naua, maia e gini rota loki mateqira nina sasi danga aia e naugira.
Ara tangoligira na dalena mara aditsekavanogira.
6Gana tangirongo na Jerusalem aia na omea ni sau nogo.
Migira nina tinoni lokiloki ara vaga saikesa na dia1:6 “na dia” Aia e kesa na vatana na omea tuavati ara totu tana vera bisi i mao mara dona na tsotso kakai kalina ara ulo. ara gini maluku na vitoa.
Mara tau nogo susuliga kalina ara tsogo tanigira na mane na rugu.
7Aia na Jerusalem e padavisua moa gana tangirongo ni sau.
Mi kalina aia e puka tana limaqira gana gala, me tagara goto kesa ke sangâ.
Migira gana gala ara tseqopolia mara kiataginia tana rongona e totu toroutsa lê.
8Jerusalem e tsukigira danga na sasi loki me gini totu marasibiga,
Migira ara padalokia i sau ara reipeâ kalina ia, rongona ara reia e totu malaiole lê.
Eo, aia segenina nogo e kukungu me tsavupoia na matana tana vangamâ.
9Nina sasaga tabaru ara totu malemale saikesa,
maia e tau moa gini boe na omea kara laba vania i muri.
Aia nogo na rongona te e gini puka saikesa gana susuliga,
me tagara goto ke kesa ke verea.
Maia e tsaria, “!Taovia, ko galuveau kiki tana niqu rota loki,
rongona igira gaqu gala ara tuliusiau nogo!”
10Migira gana gala ara komigira pipi sui nina omea loki matena.
Eo, maia e reigira goto kalina ara ba sage i laona na Vale Tabu,
i tana na Taovia e tongo vanigira na tinoni ni veratavosi kara sage bâ i laona.
11Igira nina tinoni ara kukungu kalina ara lalave gaqira mutsa.
Mara tsabirigira niqira omea levolevo loki matena
gana kara tsodoqolona na mani voli gaqira mutsa ke tangoligira ma kara gini mauri.
Maia na Jerusalem e tsaria, “!Taovia ko morosimaiau kiki, mo ko reia niqu rota loki!”
12Maia e tsarigotoa vanigira igira sui ara liuputsi i tana:
“!Kamu morosiau inau!
E tagara goto sa tinoni ke vatsangia na rota loki vaga au vatsangia inau,
na rota aia na Taovia e moloa ke gadoviau tana nina tobamomosa loki.
13“Na Taovia e molotsunamaia na lake talu i gotu, me iru i laoqu inau.
Me moloa gaqu taviti mau sogo nogo i laona.
Mi muri maia e piloligi taniau me moloau kau vatsangi savi sailagi.
14“Na Taovia e sorisaigira pipi sui niqu sasi,
me virigi poligira tana lioqu, me ngoliau na mamavaqira mau gini maluku sosongo.
Na Taovia e sauligiau vanigira gaqu gala, mau gini tau saikesa susuliga na labuvisuaqira.
15“Na Taovia e sove tanigira sui niqu mane vaumate susuliga.
Me molomaia kesa na alaala na mane vaumate ni veratavosi kara matesigira sui niqu mane vaolu.
Mara tsogori rapasigira niqu tinoni,
vaga saikesa moa na vuana uaeni ara tsogori rapasigira tana nauna na mani rapasi uaeni.
16“Aia nogo na rongona ti e gini sarara tsuna na kô na mataqu.
Me tagara goto ke kesa tangomana ke vereau se ke malagaisiau.
Igira gaqu gala ara tuliusiau nogo, migira niqu tinoni ara tau goto tamanina sa omea.
17“Inau au abea na limaqu tana nono, me tagara goto ke kesa ke ngaoa na sangaaqu.
Ma na Taovia e soamaigira gaqu gala kara maiginiau pipi moa tabana.
Minau au vaga moa ti kesa na omea marasibiga i mataqira.
18“Ma na omea e nauvaniau na Taovia e gotolaka saikesa, rongona inau au petsakoe mangana.
Kamu rongomiau inau igamu na tinoni pipi sui tana vera.
Kamu morosiau mai tana niqu rota.
Ara aditsekagira sui niqu mane ma niqu daki vaolu.
19“Minau au soagira igira ara tabana koluau i sau, migira sui ara sove saikesa na sangaaqu.
Migira niqu manetabu ma na tinoni lokiloki ara viri mate sui tana niqu sautu loki,
kalina ara lalave gaqira mutsa gana ke tangoligira ma kara gini mauri.
20“!Taovia ko morosiau tana niqu rota loki, e ponopala sosongo na tobaqu!
Ma na kosuqu e tarese tana melu mateqira niqu sasi.
Ara lamutasigira niqu tinoni tana sautu loki,
me atsa goto moa i laona na vale me laba goto na mate.
21“Ko rongomiau kalina au kukungu. E tagara kiki ke kesa ke vereau.
Igira gaqu gala ara gini mage sosongo rongona igoe o alomaia na rota seko loki ke gadoviau.
Ko molomaia na dani na tangotugu vaga igoe o veke nogoa.
Ko naua migira gaqu gala kara vatsangia na rota loki vaga au vatsangia inau.
22“Ko kedegira matena pipi sui niqira sasaga tabaru.
Eo, ko kedegira vaga o kedeau inau mateqira niqu sasi.
Au kukungu tana rota loki, me ponopala sosongo na tobaqu.”
2Na Taovia e Kedea na Jerusalem
1Tana nina momosatoba loki na Taovia aia e molomaia na rodo ke tsavu poponoa na Sion.
Na Jerusalem, aia na verabau rereidou sosongo i sau, mi kalina ia na Taovia e vuipukali saikesalia.
Mi tana dani nina kore loki, me atsa moa nina Vale Tabu me vano tanigotoa aia.
2Na Taovia e toroutsanigira pipi sui na tsatsapa tetelo tana Juda me tau goto gaea ke kesa.
Me vui pukaligira na valekakai ara barapoliginia na vatu ara dilâ na vera.
Me alomaia na paluvangamâ tana kao popono ia mi koniqira sui goto nina tinoni tagao.
3Mi tana nina momosatoba loki na Taovia e adipukalia gada susuliga igita na Israel.
Me sove saikesa na sangaada igita kalina ara mai igira gada gala.
Aia e kore loki sosongo vanigita vaga moa ti na lake kalina e ganigira na omea sui lakalaka.
4Maia na Taovia e narimaigira nina pipili i konida vaga saikesa moa ti na gala.
Me matesigira sui igira igita a padalokigira.
Mieni nogo tana Jerusalem a vatsangia nomoa na paparana nina kore loki.
5Na Taovia e lia vaga saikesa nogo ti na gala, maia e toroutsani poponoa na Israel.
Me vui pukaligira sui na valekakai, ma na valeqira igira na taovia tsapakae.
Me alomaia vanigira na tinoni ni Juda na melu loki e vo sui.
6Maia e tairutugotoa na Vale Tabu i tana igita a samasama vania.
Me suilavaginigira na dani tabu ma na Dani na Sabat.
Me atsa moa na taovia tsapakae se na manetabu, mara vatsangigotoa na susuligana nina kore loki.
7Na Taovia e sove tania nina belatabu, me vanoligi tania nina Vale Tabu.
Me tami vanigira nogo na gala kara vui pukaligira na ponoponona.
Mara sage bâ tana Vale Tabu, mi tana ara gugû tana magemage, vaga a naua igita kalina a lokisia kesa na dani tabu.
8Na Taovia e padakuti matena nogo laka igira sui na baravatuna na Sion kara viri puka.
Aia e tovoa na katsiqira gana ke gini vui pukaligira sui lakalaka.
Maia e naua migira na kusudato ma na baravatu ara viri tsaro toroutsa sui i lao.
9Migira na matsapakapu ara susû tana kao,
mara tarutu na tapala katsi gana na rave kakaiginiaqira.
Mi kalina ia, maia na taovia tsapakae, migira na tinoni lokiloki sui ara aditsekavanogira nogo.
Migira na manetabu ara tau goto nogo sasanigira na tinoni tana rongona na Ketsa,
maia na Taovia e tau nogo laba malemale vanigira na propete tana moro.
10Migira na tuqatuqa ni Jerusalem ara totu muimui moa i lao,
mara ulia na papasa tana lovaqira mara sagelia na polo baubau papadana na melu.
Migira na baka daki ara tsuporu tsuna moa tana kao.
11Minau na mataqu ara gini pasa nogo na ngangai, me gini ponopala sosongo tobaqu,
me gini tarese na kosuqu na reiaqira niqu tinoni ara viri mate sui,
migira na baka ma na meomeo ara gini mateluvu na vitoa tana sautu loki na verabau.
12Ara vitoa mara marou, mara ngangai vania na tinaqira ke palagira.
Mara puka tana sautu loki vaga moa ti ara boka tana vailabu,
babâ, mara viri mate tana limana na tinaqira.
13?Are kiki Jerusalem, e livugaluvemu, ma nagua goto kau tsarivanigo?
?Ma kau verego koegua kiki goto inau?
E tagara goto ke kesa ke tsodoa na rota loki vaga iani.
Gamu rota e loki vaga saikesa na kema.
?Masei nomoa tangomana ke laumaurisigo?
14Migira nimu propete e utu goto kara tsarivanigo sa omea ke mana.
Ara perogo moa, mara tau kateli vanigo nimu sasi,
mo gini padâ laka e tau kilia ko padasavigira nimu sasi ti ko gini mauri.
15Igoe Jerusalem, igira sui na tinoni ara liuputsi tanigo ara reipeago moa.
Mara viruviru lovaqira mara kiataginigo.
Mara tsaria, “?Laka iani nogoria na verabau rereidou sosongo ara gini magemage na barangengo popono tana rongona ri iani?”
16Igira sui gamu gala ara kiataginigo, mara gilugamu, mara galego,
mara tsaria, “!Igami ami toroutsania aia!
!Eo, e oka nogo igami ami pipitua ke labamai na dani iani, mi kalina ia ami morosinogoa!”
17Na Taovia e naunogoa na omea aia e vorogokona nogo, me manalia na omea aia e pede okanogoa.
Aia e tau goto gaego, me pukuli saikesalia gamu susuliga,
me tami vanigira gamu gala kara tseqo poligo, ma kara tuliusigo.
18!Igoe Jerusalem ko ngangaidato vania na Taovia!
Ma na kô na matamu ke tsatsali vaga moa na ko tatave na bongi ma na dani.
!Ko laka goto mango na ngangai ma na padasavi!
19Ko tû tugua, mo ko ngangaidato vania moa na Taovia tana bongi popono.
!Ko katevulagi vania nimu rota sui, mo ko nongia
ke galuvegira na dalemu ara viri mate na vitoa pipi tana tsuruna sautu!
20!Taovia ko moromai! !Ko morosigira igira igoe o rotasi sosongoligira!
!Igira na daki ara gania na konina na daleqira galugaluve!
!Na gala ara matesigira na manetabu ma na propete i laona saikesa nogo na Vale Tabu!
21Mara matesigira goto na tinoni vaolu, ma na tuqatuqa, ma na dakidaki,
me viri tsaro na mateqira tana sautu loki.
Migoe o tau goto gaegira, mo bâ labumatesigira moa tana danina nimu momosatoba loki.
22Igoe nogo o soagira gaqu gala kara mai tseqo poliau.
Me tau tangomana goto ke kesa ke tsogopoi tana danina nimu momosatoba loki.
Ara labumatesigira sui na dalequ, igira inau au aragodougira mau galuve sosongoligira.
3Na Kede, Na Padasavi, ma na Amesi
1Na Taovia e kore sosongo vaniau inau, me kedeau mau gini rota loki sosongo.
2Maia e tsialigiau bâ tana rodo pulipuli,
3me ramitsiau tana dani popono, me tau goto gaeau.
4Aia e naua me gini tsuna na kokoraqu me gavigavi lê, me bokugira sui na suliqu.
5Aia e barapoliginiau na rota loki ma na padasavi.
6Me moloau kau ba totu tana rodo, vaga moa igira na tinoni ara mate oka nogo.
7Aia e soriginiau na itai tapala, mau gini tau tangomana na tsogoligi.
8Au ngangaidato vania God laka ke sangaau, maia e tau goto rongomia niqu nonginongi.
9Me pipi moa nauna i tana inau au ngaoa kau liu aia e kekevosia niqu sautu, me moloa na vatu loki ke utukapusiau.
10Aia e totupituau vaga moa kesa na bea, me tsipuliau vaga moa ti na laeone.
11Aia e takuvi tsariau mau gini tova tania na sautu, me gati ngotsingotsiau, me mololeau i tana.
12E naria nina parige me mataniginiau nina pipili.
13E vanasiginiau nina pipili mara sage tsapatugu tana koniqu.
14Igira sui na tinoni ara matemauri na kiataginiaqu tana dani popono, mau lia gana niqira mani gilu.
15Na rota loki aia lelê moa e sauvaniau ngiti gaqu mutsa ma gaqu inu.
16Aia e tai bokuginia na livoqu na kubakuba, me susuvaginia na lovaqu tana kao.
17Me tau nogo totu na rago i tobaqu, mau padale saikesalinogoa nagua vaga na mage. 18Mau padâ laka e utu nogo kau mauri oka, me utu goto kau norua sa omea i konina na Taovia.
19Au padatugutugua niqu rota loki, ma na niqu totu bamai lê vaga moa e tagara sa veraqu,
ma na papadana ia e vaga moa ti na tabatu seko vaniau.
20Mau pada sailaginia nomoa, me gini ponopala saikesa na tobaqu.
21Me atsa moa e vaga ia, ma na amesi e dangaliau tugua kalina au padatugua na omea iani:
22Nina galuve vo oli na Taovia e utu ke sui,
ma nina tobalaka vanigita e tau goto kuti,
23ara ka dato vaolu vaga na aso pipi tana matsaraka.
24Mau tsaria, “Taovia igoe segeni moa au tamanina inau, mi konimu nogo au vataraginia niqu amesi.”
25Eo, na Taovia e dou sosongo vania asei moa e norua aia.
26Me vaga ia, me dou bâ vanigita ka berengiti ma ka pipitu poi tsau kalina ke mai me ke laumaurisigita.
27Me dou goto bâ ti vaga igita ka sasania na berengiti vaga ia kalina igita a tinoni vaolu moa.
28Kalina na Taovia ke molorota vanigita me dou ka totu mui dodo segenida moa,
29ma ka molotsunali segenida ma ka pipitu, e tau utu aia ke galuvegita tugua.
30Me atsa moa ti kara labugita ma kara peagita, me dou vanigita moa.
31Na Taovia e dona sosongo na galuve, me utu nomoa ke sove tanigita sailagi.
32Me atsa moa ti aia ke molomelu vanigita, maia sauba ke galuvegita nomoa, rongona nina galuve e vô ke sui.
33Maia e tau gini mage kalina e kilia ke moloa na melu ma na rota ke gadovigita.
34Na Taovia e tau saikesa reingaoa kalina ara tsogori tsunagira igira ara totu sosori,
35mara tongo vanigira na omea God Susuliga Sosongo e taminogoa vanigira,
36me donaginigotoa kalina ara tau naua na pedegoto tana tinete.
37E utu saikesa ke laba sa omea ti vaga God ke tau tami talua ke laba.
38Atsa moa na omea dou ma na omea seko, ara ka dona sui na laba tana nina ketsa moa na Taovia.
39?Rongona gua igita ka tsaria danga na goko kalina e gadovigita na kedena nida sasi?
40Ka vilekedoua nida omeomea, ma ka pilovisu i konina na Taovia.
41Ka sangavia na tobada vania God aia e totu i baragata ma ka tsarivania,
42“Taovia, igami ami sasi sosongo mami piloligi tanigo, migoe o tau padale vanigami nimami sasi.
43“O takuvigami mo labumatesigami, ma na koremu loki e tsavupoia na galuvemu.
44E vaga moa ti e totu kesa na parako bau matolu sosongo e utusia nimami nonginongi ke liu sage bâ i laona.
45Migoe o naua, migami ami gini lia vaga na tsupu na kutso tana barangengo.
46“Igira sui gamami gala ara peagami mara tsirigami moa.
47Ami liu nogo tana rota loki ma na mate; mami totu moa tana utu ma na matagu.
48“Ma na kô na mataqu e tsatsali vaga moa na ko tatave kalina au reigira niqu tinoni ara viri mate sui.
49Me sauba na kô na mataqu ke rô saviliu, me utu goto ke mamatsa,
50poi tsau igoe Taovia ko morotsunamai tû i gotu i baragata mo ko reigami.
51E gini melu sosongo na tobaqu kalina au reia na omea e laba vanigira na dakina niqu verabau iani.
52“Inau au sogo vaga saikesa moa na manu i laona niqira taviti gaqu gala, igira ara tau tamanina sa rongona kara gini reisaviau inau.
53Ara tsonisage mamauriau i laona kesa na qilu loki, mara vongo kapusiginia na vatu loki.
54E dadato na kô me varangi nogo ke popoisiau, mau padâ laka e varangi nogo kau mate.
55“Mi laona na qilu loki ia, inau au ngangaidato vanigo igoe Taovia,
56mau tsaria, ‘Ko laka na rongomileana niqu ngangaidato vanigo ko sangaau.’ Migoe o rongomiau.
57Mo gokovisu vaniau mo tsaria, ‘Ko laka na matagu.’
58“Migoe Taovia o mai mo laumaurisiau.
59Ko isutuguqu rongona igoe o donaginigira nogo na omea seko sui igira ara nauvaniau.
60Mo donaginigotoa laka igira gaqu gala ara reisavi sosongoliau, mara voro gaqu mate.
61“Igoe Taovia, o rongomigira nogo kalina ara goko peaau, mo donaginigotoa pipi sui niqira vorogoko popoi.
62Tana dani popono ara totu matengana moa na vaitsari gaqu moa inau, mara vorogokona moa na omea seko kara nauvaniau.
63Tû tana matsaraka, me ba tsau tana bongi, ara totu matengana moa na gilugaqu.
64“Taovia, ko kedegira tana rongona na omea seko ara nauvaniau.
65!Ko vealaginigira me ke ponopala saikesa na tobaqira!
66!Ko takuvi tsarigira, mo ko matesiligigira saikesa tania na barangengo!”
4Na Rota Loki e Gadovia na Jerusalem
1Reia bâ nida qolumila angaanga ara pura nogo kiki kalina ia,
ma na vatuna na Vale Tabu ara viri totu piriutsa bamai tana sautu loki.
2Migira na mane vaolu ni Sion, igira igita a padaloki sosongoligira vaga moa ti na qolumila laka,
mi kalina ia ara nauvanigira vaga saikesa moa ti na popovatu lê.
3Me atsa moa na tinaqira na pai atsi mara dona kara tsutsudougira na daleqira,
migira moa niqu tinoni inau ara vaga saikesa moa na vatana na manu ara soaginia na “ostrik”4:3 “na ostrik” Aia e kesa vatana na manu e totu i Afrika, me katsi na tuana ma na liona. E vanovano tsaku sosongo me vô moa na lovo. Me dona ke susuvaginia lovana tana one kalina e reia kesa na omea seko e maimaiginia. ara tsoni taumala na daleqira.
4Ara mologira na daleqira tetelo kara gini mate na vitoa ma na marou.
Migira na baka ara ngangaisi gaqira me tagara goto ke kesa ke palagira.
5Migira na tinoni ara lavu na ganiana na mutsa dou bâ, ara gini mate na vitoa tana sautu loki.
Migira ara dato tana mauri laka ara ba gesi gaqira mutsa tana tsavutsavu.
6Na Taovia e kede sekoli sosongoligira bâ niqu tinoni
liusigira na tinoni ni Sodom, igira aia e molotsunamaia na lake ke iruvi novotigira.
7I sau igira nida tinoni lokiloki ara tinoni dou sosongo, me dato magobu dou na koniqira,
me marabu angaanga dou na kokoraqira vaga moa na vatu angaanga loki matena.
8Mi kalina ia ara tsaro bamai moa tana sautu loki mara tau goto reigadovigira,
me dava nogo na ngoraqira, ma na kokoraqira e makede vaga moa na gai makede, mara suli lê moa.
9Migira ara mate tana vailabu ara dou bâ liusigira igira ara mate tana vitoa,
igira ara rota oka sosongo ti ara mate, me tagara sa gaqira mutsa ke tangoligira kara gini mauri.
10Migira na daki dou ara galuve sosongoligira na daleqira,
ara tû mara kuki segenia na daleqira ngiti gaqira mutsa kalina igira na gala ara toroutsania na Jerusalem.
11E botsalaba nina kore loki na Taovia
me mololakena na Sion me iru sui saikesa.
12E tagara goto sa tinoni sa nauna, atsa moa igira niqira taovia tagao na veratavosi,
ke tutunina laka tangomana ke kesa ke bokia na matsapakapuna na Jerusalem me ke sage bâ i laona.
13Me gini laba vaga ia tana rongona igira nina propete ara sasi sui,
ma nina manetabu ara tsutsukibo tana matesileaqira na tinoni dou.
14Migira nina tinoni tagaovera ara liu tavetada tana sautu loki vaga saikesa moa na mane doko,
ma na poloqira e dangali poponoa na gabu me gini marasibiga na peleaqira.
15Migira na tinoni ara gû mara tsaria, “!Vanoligi igamu!
!Amu bau sosongo! !Kamu laka na mai varangi konimami igami!”
Me vaga ia, migira ara bâ tonavigira na vera sui, me tagara goto ke kesa ke soalakagira.
16Ma na Taovia e tau goto boeginigira,
maia segenina nogo e sarangasigira.
Me tau goto gaegira nida manetabu ma nida tinoni tagaovera.
17Igita a totu matengana moa na pituana na sasanga ke talumai i konina kesa na veratavosi,
ma momoro tatavata poi tsau kalina a tau nogo tangomana na moro.
Migita a pipitu lê moa, me tagara goto ke kesa ke mai sangagita.
18Migira gada gala ara matanigita pipi nauna, ma tau goto tangomana ka liu tana sautu.
Nida tagu na mauri e putsi nogo, me labamai nogo na dani na mate.
19Migira ara takuvigita ara tsaku liusigira na manusata ara lovotsuna tana masaoka.
Ara takuvi tsarigita tana tetena, mara ba novotigita tana kaomate.
20Mara tangolia aia e tagaovigita dou sosongo,
aia nogo na taovia tsapakae na Taovia God e vilinogoa,
aia igita a norua laka ke dilagita tanigira sui ara ngaoa na bokiana na verada.
21Kamu magemage ma kamu kia babâ moa igamu na tinoni ni Edom mi Us.
Na rota loki sauba ke gadovigamu goto igamu;
migamu goto sauba kamu taposasa malaiole tana vangamâ.
22Na vera ni Sion e sese mateqira nogo nina sasi.
Ma na Taovia sauba ke tau goto tami kami totu tsinogo babâ.
Migoe moa Edom, sauba na Taovia ke kedego, me ke adilabatigira i malena nimu sasi.
5Ara Nongia God Ke Galuvegira
1Taovia, ko padatugua na omea ara laba vanigami igami.
Ko morosigiami mai, mo ko reia nimami paluvangamâ.
2Igira nimami omea tatamani sui ara totu i limaqira na tinoni ni veratavosi;
mara mai totuvigotoa na valemami.
3Migira gamami gala ara matesigira na tamamami,
mi kalina ia ara tinamate sui igira na tinamami.
4Migami nimami aqo kalina ia kami volia na kô gana na inu,
ma na lake gana na kuki.
5Ara turuginigami kami aqo kakai, mami gini kolae sosongo nogo,
mara tau goto tamivanigami na mango.
6E kilia kami ba nono gamami mutsa i koniqira na Ejipt ma na Asiria
ti kami gini tangomana na mauri.
7Migira nogo na mumuamami ara sasi sosongo, mi kalina ia igira ara mate nogo,
migami ami rota na matena niqira sasi.
8Igira na tseka ara tagaovi kaputigami,
me tagara goto ke kesa tangomana ke laumaurisigami tania na limaqira.
9Igira na tinoni vanga labumate ara liuvia nimami kao popono;
migami ami bisâ na maurimami kalina ami ba lavea gamami mutsa.
10Ami vitoa mami gini masagi,
poi tsau kalina na kokoramami e papara vaga moa na lake tana umu.
11Mi tana Vungavunga Sion ara raqagira na taumami mara sasi kolugira,
mara nauvaganana goto vanigira na dalemami daki pipi tana vera tetelo tana Juda.
12Ara adigira nimami tinoni lokiloki mara ligoti tsauraginigira,
mara tau goto kukuni tanigira nimami tuqatuqa.
13Ara turugira nimami mane vaolu kara aqo na gotsa uiti vaga moa na tseka;
ma nimami borau ara gini gainigogo na kalagaiana na ivogo na lake mamava.
14Migira na tuqatuqa ara tau nogo ba totu tana matsapakapuna na verabau,
migira na tinoni vaolu ara tau goto nogo dona na gini sinagi niqira itai tatangi.
15Na magemage e vanoligi saikesa nogo tania na maurimami;
ma nimami linge na gavai e oli me lia na tangitangi.
16Me tagara lelê goto sa omea ke kauvisu i laoqira pipi sui na omea ami gini kaekae,
me gini puka lê gamami tangirongo.
E sarevo sosongo nomoa vanigami rongona ami sasi.
17-18Igami ami padavisua na Vungavunga Sion e totu mangu lê segenina,
migira moa na omea tuavati atsi ara liu bamai i laona.
Me gini melu sosongo na tobamami,
me dangadato na kô tana matamami me gini utugana na momoro.
19Migoe Taovia o taovia tsapakae saviliu,
me sauba ko tagao tsau bâ tana susuina na dani.
20?Ma na rongona gua ti o tsonilegami mo padalegami oka vaga sagata ia?
21-22?Se laka igoe o sove tanigami saikesa?
?Me laka e tau dona ke tamani susuina nimu kore loki?
!Taovia, igami ami ngaoa na visutugua i konimu! !Ko adivisugami!
Ko vaolusitugua na maurimami, ma kami totu dou vaga nogo tana idana.