NA KESANINA PAPI
NA TURUPATU DATO
(1 CHRONICLES)
Na Vuresi Makaliana Na Omea Ara Totu Tana Papi Iani
I ka laoqira kaira na papi 1 ma 2 Turupatu Dato ara adidatoa na omea ara marenogoa i laoqira na papi 1 ma 2 Samuel ma 2 Taovia Tsapakae, me tavosi tetelo nomoa na rongona na omea ara gini goko. Ara ka ruka na omea ara ka tamani rongona loki bâ i laona na turupatuna niqira aqoaqo igira na taovia tsapakae tana Israel vaga ara marea tana 1 ma na 2 Turupatu Dato:
1) Na sauvulagiana laka atsa moa ti na rota loki sosongo e gadovikaira na vera ni Israel mi Juda, maia God e gini aqo na omea sui girani gana ke manaliginigira na omea aia e gini veke vanigira nina tinoni. Maia na tinoni e marekaira na papi Na Turupatu Dato e ngaoa ke sangaginigira na tinoni na noruana God laka aia sauba manana ke manalia na omea aia e vekenogoa vanigira, aia nogo ti aia e adidatoginia tana rongona ka niqira aqo tangirongo loki kaira a David ma Solomon. Me adidatogotoa tu niqira aqo dou ara tu naua tugira a Jehosapat, ma Hesekia ma Josia, ma niqira sasaga igira ara totu kakai babâ moa i konina God.
2) Na tsaritugutuguana tana e tuturiga na samasama vaniana God i laona na Vale Tabu i Jerusalem, me putsikae bâ na vavanona niqira aqo igira na manetabu ma na Levite tana aqona na samasama. Mi laona na mamare iani e laba vaga moa ti a David e botsangia na aqona na logoana na Vale Tabu ma na vavanona na lotu, atsa moa ti a Solomon nogo e logoa na Vale Tabu.
Na Omea Ara Marea Tana Papi Iani
Na soaqira na vasusudato 1:1–9:44
Na Mateana a Saul 10:1-14
Nina aqotagao a David 11:1–29:30
a. Na rota loki ara gadovia ma na omea loki aia e naugira 11:1–22:1
b. Na vangarau vania na logoana na Vale Tabu 22:2–29:30
1Tu Konina a Adam Me Tsau Bâ Konina a Abraham
(Tuturigana 5:1-32; 10:1-32; 11:10-16)
1A Adam aia na tamana a Set,
ma Set na tamana a Enos,
a Enos na tamana a Kenan,
2ma Kenan na tamana a Mahalalel,
ma Mahalalel na tamana a Jared.
3Ma Jared na tamana a Enok,
ma Enok na tamana a Metusela;
a Metusela na tamana a Lamek,
4a Lamek na tamana a Noa.
Ma Noa e tamanitugira tolu na dalena mane: tugira a Sem, ma Ham ma Japet.
5Mi tugirani nogo na dalena a Japet: a Gomer, ma Magog, ma Madai, ma Javan, ma Tubal, ma Mesek, ma Tiras, tugira nogo na mumuaqira na tinoni ara totu tana vera ara tangomalavuginia tu soaqira.
6Migira na kukuana a Gomer igira nogo na tinoni ni Askenas, mi Ripat, mi Togarma.
7Migira na kukuana a Javan igira nogo na tinoni ni Elisa, mi Spain, mi Siprus, mi Rodes.
8Mi tugirani nogo na dalena a Ham: a Kus, ma Ejipt, ma Libia ma Kanaan, igira nogo na mumuaqira na tinoni ara totu tana vera ara tangomalavuginia tu soaqira.
9Migira na kukuana a Kus igira nogo na tinoni ni Seba, mi Havila, mi Sabta, mi Raama, mi Sabteka.
Migira na kukuana a Raama, igira nogo na tinoni ni Seba ma Dedan.
10A Kus na tamana a Nimrod, aia na kesanina malagai tangirongo tana barangengo.
11Igira na kukuana a Ejipt igira nogo na tinoni ni Lidia, mi Anam, mi Lehab, mi Naptu,
12mi Patrus, mi Kaslu, mi Krete igira nogo na mumuaqira igira na Pilistia.
13Mi kaira na dalena a Kanaan, kaira nogo a Sidon, aia na idana dalena, ma Het, kaira na mumuaqira na tinoni ara totu tana vera ara tangomalavuginia ka soaqira.
14Maia goto a Kanaan na mumuaqira igira na Jebus, na Amor, na Girgas,
15na Hivi, na Arka, na Sini,
16na Arvad, na Semar, ma na Hamat.
17Mi tugirani nogo na dalena a Sem: a Elam, ma Asur, ma Arpaksad, ma Lud, ma Aram, ma Us, ma Hul, ma Geter, ma Mesek, tugira nogo tu mumuaqira na tinoni ara totu tana vera ara tangomalavuginia tu soaqira.
18Ma Arpaksad na tamana a Sela;
ma Sela na tamana a Eber.
19Ma Eber e tamanikaira ruka na dalena mane:
aia na kesanina ara soaginia a Peleg,1:19 Na soa Peleg tana goko Hibru e tangi vaga moa ‘tavota.’ na rongona tana tagu e mamauri moa ia ti ara tavota igira na tinoni tana barangengo,
ma na rukanina dalena aia nogo a Joktan.
20Migira na kukuana a Joktan igira nogo na tinoni ni Almodad, mi Selep, mi Hasarmavet, mi Jera,
21mi Hadoram, mi Usal, mi Dikla,
22mi Ebal, mi Abimael, mi Seba,
23mi Opir, mi Havila, mi Jobab.
24Miani nogo e vaga na vungu e talu tana duli tû konina a Sem me tsau bâ konina a Abram: a Sem, ma Arpaksad, ma Sela, 25ma Eber, ma Peleg, ma Reu, 26ma Serug, ma Nahor, ma Tera, 27ma Abram aia ara soaginigotoa a Abraham.
Igira na Kukuana a Ismael
28A Abraham e tamanikaira moa ruka na dalena mane: kaira nogo a Isaak ma Ismael. 29Mi tugira na dalena a Ismael tugira nogo a Nebaiot, ma Kedar, ma Adbeel, ma Mibsam, 30ma Misma, ma Duma, ma Masa, ma Hadad, ma Tema, 31ma Jetur, ma Napis, ma Kedema.
32Ma Abraham e tamanigotoa kesa na savana lê aia ko Ketura na soana, maia e vasuvania ara tu ono na dalena mane: a Simran, ma Joksan, ma Medan, ma Midian, ma Isbak, ma Sua. Ma Joksan e tamanikaira ruka na dalena mane: kaira a Seba ma Dedan. 33Ma Midian e tamanitugira tsege na dalena mane: a Epa, ma Eper, ma Hanok, ma Abida, ma Elda.
Igira na Kukuana a Esau
34A Isaak na dalena a Abraham aia e tamanikaira ruka na dalena mane, kaira nogo a Esau ma Jakob. 35Mi tugira na dalena mane a Esau, tugira nogo a Elipas, ma Reuel, ma Jeus, ma Jalam ma Kora. 36Mi tugira na dalena mane a Elipas, tugira nogo a Teman, ma Omar, ma Sepi, ma Gatam, ma Kenas, ma Timna ma Amalek. 37Mi tugira na dalena mane a Reuel, tugira nogo a Nahat, ma Sera, ma Sama, ma Misa.
Igira Ara Ida na Totu i Edom
38-42Igira ara ida na totuviana i Edom igira nogo na kukuaqira na dalena a Seir:
A Lotan, aia na mumuaqira na duli ka koniqira a Hori ma Homam. Ma Lotan e tamanina kesa na vavinena, ko Timna na asana.
Ma Sobal, aia na mumuaqira na duli tu koniqira a Alvan, ma Manahat, ma Ebal, ma Sepi, ma Onam.
Ma Sibeon, e tamanikaira ruka na dalena mane, kaira nogo a Aia ma Ana. Ma Ana na tamana a Dison, ma Dison na mumuaqira na duli tu koniqira a Hamran, ma Esban, ma Itran, ma Keran.
Ma Eser, aia na mumuaqira na duli tu koniqira a Bilan, ma Saavan ma Jaakan.
Ma Disan, aia na mumuaqira na duli ka koniqira a Us ma Aran.
Na Taovia Tsapakae ni Edom
43-50Tugirani nogo na taovia tsapakae ara vaitugugi na tagaoviana na vera ni Edom, kalina ara tau vati tamani taovia tsapakae igira na Israel:
A Bela na dalena a Beor ni Dinaba
a Johab na dalena a Sera ni Bosra
a Husam tana butona kao ni Teman
a Hadad na dalena a Bedad ni Avit aia nogo e tuliusigira na Midian tana vailabu tana kao ni Moab
a Samla ni Masreka
a Saul ni Rehobot-i-Kô
a Baal Hanan na dalena a Akbor
ma Hadad ni Pau ma na tauna, aia ko Mehetabel, na dalena a Matred ma na kukuana a Mesahab.
51Mi kalina e mate a Hadad, mi tugirani nogo na tinoni loki ara tu tagaovia na vera ni Edom: tugira nogo a Timna, ma Alva, ma Jetet, 52ma Oholibama, ma Ela, ma Pinon, 53ma Kenas, ma Teman, ma Mibsar, 54ma Magdiel ma Iram.
2Igira na Kukuana a Juda
1Ma Jakob e tamanitugira sangavulu ruka na dalena mane: tugira nogo a Reuben, ma Simeon, ma Levi, ma Juda, ma Isakar, ma Sebulun, 2na Dan, ma Josep, ma Benjamin, ma Naptali, ma Gad ma Aser.
3Ma Juda e tamanitugira tsege na dalena mane. Ara tu tolu ara tu botsa konina ko Batsua ni Kanaan: tugira nogo a Er, ma Onan, ma Sela. Ma Er na idana dalena e tabaru sosongo nina sasaga, ma na Taovia e tû me labumatesia. 4Mara ka ruka ara ka botsa konina ko Tamar na savana na dalena, kaira nogo a Peres ma Sera.
5Ma Peres e tamanikaira ruka na dalena mane, kaira a Hesron ma Hamul. 6Ma Sera na kulana e tamanitugira tsege na dalena mane: a Simri, ma Etan, ma Heman, ma Kalkol ma Darda. 7Ma Akan2:7 A Akan na asana vaga e totu tana Josua 7:1. Mi tana niqira mamare tabu na Hibru ara soaginia a Akar, ma na rongona na goko Akar ‘na rota seko loki.’ na dalena a Karmi, aia e kesa na kukuana a Sera, aia nogo e alomaia na rota seko loki e gadovigira na tinoni ni Israel kalina aia e aditamanina na omea ara balovaninogoa God.
8Ma Etan e tamani kesa lelê moa na dalena mane, aia nogo a Asaria.
Igirani Nogo na Vungu Tana Duli Konina a David na Taovia Tsapakae
9A Hesron e tamanitugira tolu na dalena mane: tugira nogo a Jerameel, ma Ram ma Kaleb.
10Ma na vungu e talu tana duli konina a Ram me tsau bâ konina a Jese e vaga iani: a Ram, ma Aminadab, ma Nason aia e kesa na tinoni tangirongo i laona na puku konina a Juda, 11ma Salmon, ma Boas, 12ma Obed ma Jese.
13Ma Jese e tamanitugira vitu na dalena mane: tugira nogo a Eliab, ma Abinadab, ma Sama, 14ma Netanel, ma Radai, 15ma Osem, ma David. 16Maia Jese e tamanikaira goto ruka na dalena daki, kaira ko Seruia ma ko Abigail.
Maia ko Seruia na dalena a Jese e vasutugira tolu na dalena mane: tugira a Abisai, ma Joab ma Asahel. 17Ma ko Abigail na rukanina dalena daki ia, e taugâ a Jeter kesa na kukuana a Ismael, mara ka tamanina kesa lelê moa ka daleqira mane, a Amasa na soana.
Igira na Kukuana a Hesron
18A Kaleb na dalena a Hesron e taugâ ko Asuba, mara ka tamanina kesa lelê moa ka daleqira daki, aia ko Jeriot na soana. Maia e tamanitugira tolu na dalena mane: tugira nogo a Jeser, ma Sobab, ma Ardon. 19Mi murina na mateana ko Asuba, maia Kaleb e taugagotoa ko Eprat, mara ka tamanina kesa lelê moa ka daleqira mane, a Hur na soana. 20Ma Uri aia nogo na dalena a Hur, ma Besalel aia na kukuana.
21Mi kalina e ono sangavulu nogo na ngalitupana a Hesron, maia e taugâ na dalena daki a Makir, na vavinena a Gilead. Mara ka tamanina kesa lelê moa ka daleqira mane, a Segub na soana. 22Maia Segub e tamanina kesa lelê goto moa na dalena mane, a Jair na soana. Ma Jair e tagaovigira rukapatu tolu na verabau tana butona kao ni Gilead. 23Mara ka tû kaira na taovia tsapakae ni Gesur mi Aram, mara ka tangoligira ono sangavulu na vera i laona na Gilead, kolukaira goto na vera tetelo ni Jair mi Kenat, migira goto na vera tetelo ara totu varangisigira. Igira sui na tinoni ara totu tana vera girani igira nogo na kukuana a Makir na tamana a Gilead. 24Mi murina na mateana a Hesron, maia Kaleb na dalena nogo ia e taugâ ko Eprat na tinamatena na tamana. Mara ka tamanina kesa lelê ka daleqira mane, a Asur na soana. Aia nogo e vaturia na vera ni Tekoa.
Igira na Kukuana a Jerameel
25Ma Jerameel na idana dalena a Hesron e tamanitugira tsege na dalena mane: tugira nogo a Ram na idana dalena, ma Buna, ma Oren, ma Osem ma Ahija. 26-27Ma Ram e tamanitugira tolu na dalena mane: tugira nogo a Maas, ma Jamin ma Eker. Ma Jerameel e adia kesa goto na daki tavosi, aia ko Atara na soana, mara ka tamanina kesa lelê moa ka daleqira mane, a Onam na soana. 28Ma Onam e tamanikaira ruka na dalena mane: kaira nogo a Samai ma Jada, maia Samai e tamanigotoa ara ka ruka na dalena mane, kaira nogo a Nadab ma Abisur.
29Ma Abisur e taugâ kesa na daki ko Abihail na soana, mara ka tamanikaira ruka ka daleqira mane, kaira a Aban ma Molid. 30Ma Nadab na kulana a Abisur e tamanikaira ruka na dalena mane: kaira a Seled ma Apaim. Maia Seled e mate me tau tamanina sa dalena mane. 31Ma Apaim aia na tamana a Isi, ma Isi na tamana a Sesan, ma Sesan na tamana a Alai.
32Ma Jada na kulana a Samai e tamanikaira ruka na dalena mane, kaira a Jeter ma Jonatan. Maia Jeter e mate me tau tamanina sa dalena mane. 33Ma Jonatan e tamanikaira ruka na dalena mane, kaira nogo a Pelet ma Sasa. Migirani sui lakalaka na kukuana nogo a Jerameel.
34Ma Sesan e tau tamanina sa dalena mane, igira moa na dalena daki. Maia e tamanigotoa kesa nina mane aqo, na mane ni Ejipt a Jara na soana. 35Ma Sesan e sauvania a Jara kesa vidaqira na dalena daki ke taugâ. Mara ka tamanina kesa ka daleqira mane, a Atai na asana. 36Na vungu tu konina a Atai me tsau bâ konina a Elisama e vaga iani: a Atai, ma Natan, ma Sabad, 37ma Eplal, ma Obed, 38ma Jehu, ma Asaria, 39ma Heles, ma Eleasa, 40ma Sismai, ma Salum, 41ma Jekamia ma Elisama.
Visana goto na Kukuana a Kaleb
42A Mesa aia na idana dalena a Kaleb ma na kulana a Jerameel. Ma Mesa na tamana a Sip, ma Sip na tamana a Maresa, ma Maresa na tamana a Hebron. 43Ma Hebron e tamanitugira vati na dalena mane: tugira nogo a Kora, ma Tapua, ma Rekem ma Sema. 44Ma Sema na tamana a Raham ma na kukuana a Jorkeam. Maia Rekem, na kulana a Sema, aia nogo na tamana a Samai, 45maia Samai na tamana a Maon, ma Maon na tamana a Betsur.
46Ma Kaleb e tamanigotoa kesa na savana lê, ko Epa na soana, maia e vasuvania ara tu tolu na dalena mane: tugira nogo a Haran, ma Mosa ma Gases. Ma Haran e tamanina kesa na dalena mane, a Gases goto na soana.
47Me kesa na mane a Jadai na soana e tamanitugira ono na dalena mane: tugira nogo a Regem, ma Jotam, ma Gesan, ma Pelet, ma Epa ma Saap.
48Maia Kaleb e tamanigotoa kesa na savana lê, aia ko Maaka na soana, maia e vasuvania e ruka na dalena mane, kaira a Seber ma Tirana. 49Mi muri, me tamanigotoa ruka na dalena mane: kaira a Saap aia e vaturia na vera ni Madmana; ma Seva aia e vaturikaira na vera ni Makbena mi Gibea.
Ma Kaleb e tamanigotoa kesa na dalena daki, ko Aksa na soana.
50Migirani goto na kukuana a Kaleb. A Hur na idana ka daleqira a Kaleb ma ko Eprat. Maia Sobal na dalena a Hur e vaturia na vera ni Kiriat Jearim, 51ma Salma na rukanina dalena e vaturia na vera ni Betlehem, ma Harep na tolunina dalena e vaturia na vera ni Betgader.
52Maia Sobal, aia e vaturia na vera ni Kiriat Jearim, maia nogo na mumuaqira na tinoni ni Haroe, ma na turina na tinoni ara totu i Menuhot, 53ma na mumuaqira goto na duli girani ara totu i Kiriat Jearim: igira na Itra, ma na Put, ma na Sumat, ma na Misra. Migira goto na tinoni i laona kaira na verabau ni Sora mi Estaol na tinonina goto nogo na duli girani.
54Ma Salma aia e vaturia na vera ni Betlehem, aia nogo na mumuaqira na tinoni ni Netopat, mi Atrot Bet Joab, migira na Sor aia e kesa nogo ka vidaqira kaira ruka na duli tana Manahat.
55Mi tugirani na duli na mane mamare ara tu totu tana vera ni Jabes: tugira nogo na Tira, na Simea, ma na Suka. Tugira na Ken sui moa tugira, mara tu taugalalo kolugira na Rekab.
3Igira na Dalena a David
1-3Tugirani nogo na dalena mane a David na taovia tsapakae ara tu botsa kalina aia e totu moa i Hebron:
Na kesanina a Amon, aia na dalena ko Ahinoam ni Jesreel,
na rukanina a Daniel, aia na dalena ko Abigail ni Karmel,
na tolunina a Absalom, aia na dalena ko Maaka, na dalena daki a Talamai na taovia tsapakae ni Gesur,
ma na vatinina a Adonija, aia na dalena ko Hagit,
ma na tsegenina a Sepatia, aia na dalena ko Abital
ma na oninina a Itream, aia na dalena ko Egla.
4Mi tugira sui ono na dalena tugirani ara tu botsa sui moa i Hebron tana tagu aia a David e tagao i tana i laona e vitu na ngalitupa me kesa turina.
Maia e tagao goto i Jerusalem i laona e tolu sangavulu tolu na ngalitupa, 5mara danga goto na dalena mane ara botsa vania i tana.
Ko Batseba na tauna, aia na dalena a Amiel, e vasuvania ara tu vati na dalena mane: a Simea, ma Sobab, ma Natan ma Solomon.
6Maia e tamanitugira goto siu na dalena mane tavosi: tugira nogo a Ibar, ma Elisua, ma Elpelet, 7ma Noga, ma Nepeg, ma Japia, 8ma Elisama, ma Eliada, ma Elipelet. 9Igirani sui na dalena a David, maia e tamanigira goto visana i koniqira igira na savana lê. Me kesa lelê moa na dalena daki, aia nogo ko Tamar.
Igira na Kukuana a Solomon
10Igirani nogo na soaqira babâ na kukuana a Solomon na taovia tsapakae:
A Solomon na tamana a Rehoboam,
ma Rehoboam na tamana a Abija,
ma Abija na tamana a Asa,
ma Asa na tamana a Jehosapat,
11ma Jehosapat na tamana a Jehoram,
ma Jehoram na tamana a Ahasia,
ma Ahasia na tamana a Joas,
12ma Joas na tamana a Amasia,
ma Amasia na tamana a Usia,
ma Usia na tamana a Jotam,
13ma Jotam na tamana a Ahas,
ma Ahas na tamana a Hesekia,
ma Hesekia na tamana a Manase,
14ma Manase na tamana a Amon
ma Amon na tamana a Josia.
15Ma Josia e tamanitugira vati na dalena mane: tugira nogo a Johanan ma Jehoiakim, ma Sedekia, ma Joahas.
16Ma Jehoiakim e tamanikaira ruka moa na dalena mane; kaira nogo a Jehoiatsin ma Sedekia.
Igira na Kukuana a Jehoiatsin
17Igirani nogo na kukuana a Jehoiatsin na taovia tsapakae, aia igira na Babilonia ara aditsekavanoa i veraqira. Ma Jehoiatsin e tamanitugira vitu na dalena mane: tugira nogo a Sealtiel, 18ma Malkiram, ma Pedaia, ma Senasar, ma Jekamia, ma Hosama, ma Nedabia. 19Maia Pedaia e tamanikaira ruka na dalena: kaira nogo a Serubabel ma Simei. Ma Serubabel e tamanikaira goto ruka na dalena mane, kaira nogo a Mesulam ma Hanania, me kesa na dalena daki, aia ko Selomit. 20Mi muri, maia e tamanitugira goto tsege na dalena mane: tugira nogo a Hasuba, ma Ohel, ma Berekia, ma Hasadia ma Jusab Hesed.
21Maia Hanania e tamanikaira ruka na dalena mane, a Pelatia ma Jesaia. Maia Jesaia na tamana a Repaia, ma Repaia na tamana a Arnan, ma Arnan na tamana a Obadia, ma Obadia na tamana a Sekania. 22Maia Sekania e tamanina kesa lelê moa na dalena mane, aia a Semaia, mara tu tsege na kukuana: tugira nogo a Hatus, ma Igal, ma Baria, ma Nearia ma Sapat. 23Ma Nearia e tamanitugira tolu na dalena mane: tugira nogo a Elioenai, ma Hiskia ma Asrikam. 24Ma Elioenai e tamanitugira vitu na dalena mane: tugira nogo a Hodavia, ma Eliasib, ma Pelaia, ma Akub, ma Johanan, ma Delaia, ma Anani.
4Igira na Kukuana a Juda
1Igirani nogo visana na kukuana a Juda: a Peres, ma Hesron, ma Karmi, ma Hur, ma Sobal. 2Maia Sobal na tamana a Reaia, ma Reaia na tamana a Jahat, ma Jahat ka tamaqira a Ahumai ma Lahad, kaira nogo na mumuaqira na tinoni ara totu i Sora.
3-4Ma Hur aia na idana ka daleqira kaira a Kaleb ma ko Eprat. Ma Hur migira na kukuana ara vaturia na vera ni Betlehem. Ma Hur e tamanitugira tolu na dalena mane: tugira nogo a Etam, ma Penuel ma Eser. Ma Etam e tamanigotoa tolu na dalena mane: a Jesreel, ma Isma ma Idbas, me kesa lelê moa na dalena daki, aia ko Haselelponi. Ma Penuel nogo e vaturia na verabau ni Gedor, ma Eser e vaturia na verabau ni Husa.
5Ma Asur, aia e vaturia na vera ni Tekoa, e tamanikaira ruka na tauna, kaira nogo ko Hela ma ko Naara. 6Mi kaira a Asur ma ko Naara ara ka tamanitugira vati ka daleqira: tugira a Ahusam, ma Heper, ma Temeni, ma Haahastari, 7Mi kaira a Asur ma ko Hela ara ka tamanitugira tolu ka daleqira mane: tugira nogo a Seret, ma Isar, ma Etnan.
8A Kos ka tamaqira kaira a Anub ma Sobeba, maia na mumuaqira na duli konina a Aharel na dalena a Harum.
9Me totu kesa na mane a Jabes na soana, aia e tangirongo loki bâ i laona nina vungu. Maia na tinana e soaginia a Jabes,4:9 Na soa Jabes tana goko Hibru e tangi vaga moa ‘vatsangi savi.’ rongona e gini vatsangisavi sosongo kalina e vasua. 10Ma Jabes e nonginongi vania na God ni Israel me tsaria, “Taovia God ko vangalaka vaniau, mo ko sauvaniau ke danga niqu butona kao. Mo ko totu kalavata koluau mo ko didia taniau pipi sui na omea e dona ke molorota vaniau.” Maia God e sauvania a Jabes na omea aia e nongia i konina.
Na Soaqira Goto Visana na Vungu Tavosi
11A Kaleb na kulana a Suha, e tamanina kesa lelê moa na dalena mane, aia a Mehir. Ma Mehir na tamana a Eston. 12Ma Eston e tamanitugira tolu na dalena mane: a Betrapa, ma Pasea, ma Tehina. Ma Tehina e vaturia na verabau ni Nahas. Ma tu kukuaqira na mane tugirani ara totu sui i Reka.
13Maia Kenas e tamanikaira ruka na dalena mane, a Otniel ma Seraia. Ma Otniel e tamanigotoa ka ruka na dalena mane, kaira a Hatat ma Meonotai. 14Ma Meonotai na tamana a Opra.
Ma Seraia na tamana a Joab, aia e kavia na poi i tana ara soaginia na Poi na Tinoni Sasaga tana Aqosi Omea Levolevo. Ara soagini vaganana ia rongona na tinoni sui tana poi ia ara dona sosongo na katsu omea levolevo.
15A Kaleb na dalena a Jepune e tamanitugira tolu na dalena mane: tugira nogo a Iru, ma Ela ma Naam. Maia Ela na tamana a Kenas.
16Ma Jehalelel e tamanitugira vati na dalena: tugira nogo a Sip, ma Sipa, ma Tiria ma Asarel.
17-18Ma Esra e tamanitugira vati na dalena mane: tugira nogo a Jeter, ma Mered, ma Eper, ma Jalon. Ma Mered e taugâ ko Bitia aia e kesa na dalena na taovia tsapakae ni Ejipt, mara ka tamanina kesa ka daleqira daki, aia ko Miriam, me ruka goto ka daleqira mane, kaira nogo a Samai ma Isba. Ma Isba e vaturia na vera ni Estemoa. Ma Mered e taugagotoa kesa na daki tana puku konina a Juda, mara ka tamanitugira tolu ka daleqira: tugira nogo a Jered, aia e vaturia na vera ni Gedor; ma Heber, aia e vaturia na vera ni Soko; ma Jekutiel, aia e vaturia na vera ni Sanoa.
19Ma Hodia e taugâ na tasina a Naham. Tana ka kukuaqira nogo kaira e tuturiga na duli konina a Garm, igira ara totu tana vera ni Keila, ma na duli konina a Maakat, igira ara totu tana vera ni Estemoa.
20Ma Simon e tamanitugira vati na dalena mane: tugira a Amon, ma Rina, ma Benhanan ma Tilon.
Ma Isi e tamanikaira ruka na dalena mane: kaira nogo a Sobet ma Bensohet.
Igira na Kukuana a Sela
21Ma Sela aia nogo e kesa vidaqira na dalena a Juda. Migirani nogo na dalena a Sela: a Er aia e vaturia na vera ni Leka; ma Laada aia e vaturia na vera ni Maresa; migira goto tana duli ara aqo tana vosipolo mara totu i Bet Asbea; 22ma Jokim migira na tinoni ara totu i Koseba; ma Joas ma Sarap, kaira ara ka taugâ na daki ni Moab, mi muri mara ka ba totu i Betlehem. Na mamarena na tsokopuku girani ara totu mai nogo tû i sau vasau. 23Igira sui na tinoni girani niqira aqo moa na katsu popovatu vania na taovia tsapakae, mara totu i ka laoqira na vera ni Netaim mi Gedera.
Igira na Kukuana a Simeon
24Ma Simeon e tamanitugira tsege na dalena mane: tugira nogo a Nemuel, ma Jamin, ma Jarib, ma Sera ma Saul. 25Ma Salum aia na dalena a Saul, ma Mibsam na dalena a Salum, ma Misma na dalena a Mibsam. 26Me tû konina a Misma ma na duli e babâ konina a Hamuel, ma Sakur, ma Simei. 27Ma Simei e tamanigira ara sangavulu ono na dalena mane me ono na dalena daki, migira moa na kulana ara tau tamanina danga na daleqira, maia nogo na rongona ti igira tana na puku konina a Simeon ara gini tau pabo sosongo vaga igira tana puku konina a Juda.
28Me tsau bâ tana tagu a David e taovia tsapakae, migira na kukuana a Simeon ara totuvia na vera girani: i Beerseba, mi Molada, mi Hasarsual, 29mi Bila, mi Esem, mi Tolad, 30mi Betuel, mi Horma, mi Siklag, 31mi Bet Markabot, mi Hasarsusim, mi Betbiri, mi Saaraim. 32Migira ara totuvigotoa ara tu tsege na vera tavosi: i Etam, mi Ain, mi Rimon, mi Token mi Asan, 33migira goto na vera tetelo ara totu polipoligira, me tsau bâ tana vera ni Baalat taba i tasi i ata. Migirani nogo na mamarena niqira vungu ma na nauna i tana ara totu.
34-38Migirani nogo na soaqira na mane ara ida tana niqira duli:
a Mesobab, ma Jamlek, ma Josa na dalena a Amasia, ma Joel,
ma Jehu na dalena a Josibia, ma Josibia na dalena a Seraia, ma Seraia na dalena a Asiel,
ma Elioenai, ma Jaakoba, ma Jesohaia, ma Asaia, ma Adiel, ma Jesimiel, ma Benaia,
ma Sisa aia na dalena a Sipi, ma Sipi na dalena a Alon, ma Alon na kukuana a Jedaia, ma Simri, ma Semaia.
Ma na rongona nogo na vungu i koniqira ara danga babâ moa, 39te ara vano mara totuvi poponoa na butona kao tabana i tasi, me tsau bâ tana isuisuna na vera ni Gerar tana poi tabana i longa, na laveana sa nauna dou i tana kara mutsamutsa niqira sipi. 40Mara tsodogira danga na nauna i tana e dato magobu dou na buruburu kesa tana poi mangasâ, tana e mangu mara tau goto dona na tinoni na liu bâ. Igira moa na kukuana a Ham ara totuvinogoa i tana i sau.
41Ma na omea vaga ia e laba tana tagu kalina a Hesekia e taovia tsapakae tana Juda. Ara sagelia na vera ni Gerar mara matesigira sui na tinoni ni tana, mara toroutsanigira niqira valepolo. Mara aditamaniqira na vera ia, mara ba totu saikesa i tana rongona e danga dou na buruburu vanigira niqira sipi. 42Migira goto ara tsege sangatu na tinoni tana puku konina a Simeon ara vano tana Edom tabana i longa. Mi tugira na dalena a Isi ara tu ida vanigira: tugira nogo a Pelatia, ma Nearia, ma Repaia ma Usiel. 43Ara ba matesigira sui lakalaka na Amalek ara kauvisu tana Edom. Me tû tana tagu ia migira ara totu saviliu nogo i tana.
5Igira na Kukuana a Ruben
1A Ruben aia na idana dalena a Jakob. Mi tana rongona a Ruben e sasi kolua kesa na tauna lê na tamana, te na omea sui nina aqo ke tangolidatoa rongona aia na idana dalena a Jakob, ara tangolidatoa igira na dalena a Josep. 2Me atsa moa ti a Josep e adidatoa nina omea sui na tamana, ma na puku konina a Juda e susuliga liusia aia, mi konina nogo ia e talu kesa na taovia tagao e tagaovigira pipi sui na puku tavosi. 3A Ruben, aia na idana dalena a Jakob, e tamanitugira vati na dalena mane: tugira a Hanok, ma Palu, ma Hesron ma Karmi.
4-6Mi tugirani nogo na kukuana a Joel tana vatavata babâ: a Semaia, ma Gog, ma Simei, ma Mika, ma Reaia, ma Baal, ma Beera. Maia Tiglat Pileser na taovia tsapakae ni Asiria e tangolia a Beera, aia e kesa vidaqira na ida tana puku, me aditsekavanoa i Babilon.
7Tana mamarena na tsokopuku ara totu na asaqira igira ara ida tana duli i laona na puku konina a Ruben: a Jeiel, ma Sekaria, 8ma Bela, aia na dalena a Asas ma na kukuana a Sema tana duli konina a Joel. Ma na duli iani ara totu i Aroer mi laona na butona kao tû i Aroer me tsau bâ i Nebo tabana i vava mi Baal Meon. 9Mara danga sosongo niqira buluka tana kao ni Gilead, te ara ba totuvigotoa na kao tabana i longa tsau tana kaomate i tabana mai na Kô Euprates.
10Mi tana tagu e taovia tsapakae a Saul, maia na puku konina a Ruben ara baginigira na Hagar, mara labumatesigira, mara ba totuvia niqira kao tana Gilead tabana i longa.
Igira na Kukuana a Gad
11Na puku konina a Gad ara totuvia na nauna e pala tave vania niqira kao na puku konina a Ruben tana butona na kao ni Basan, me vosa bâ i Saleka tabana i longa. 12A Joel aia nogo e ida vanigira sui, me tsari a Sapam, mara ka tsari kaira a Janai ma Sapat tana Basan. 13Mara tu vitu goto tu kulaqira tavosi ara tu ida i laoqira: tugira nogo a Mikael, ma Mesulam, ma Seba, ma Jorai, ma Jakan, ma Sia ma Eber. 14Igira na kukuana a Abihail na dalena a Huri. Mara tsokovisu vaganana iani na mumuaqira: a Huri na dalena a Jaroa; ma Jaroa na dalena a Gilead; ma Gilead na dalena a Mikael; ma Mikael na dalena a Jesisai; ma Jesisai na dalena a Jado; ma Jado na dalena a Bus. 15A Ahi na dalena a Abdiel ma na kukuana a Guni, aia nogo e ida tu koniqira na duli tugirani. 16Igira ara totuvia na butona kao ni Basan mi Gilead, i laona pipi na vera i tana, me pipi sui goto tana nauna i Saron i tana e totu na kao laka tana e dato dou na buruburu gaqira mutsa na buluka. 17Ma na mamarena na tsokopuku girani ara maregira nogo kalina a Jotam e taovia tsapakae tana Juda ma Jeroboam e taovia tsapakae tana Israel.
Niqira Alaala na Mane Vaumate Igira na Puku Tabana i Longa
18Mi tana puku tu koniqira a Ruben, ma Gad, ma na Manase Tabana i Longa, ara 44,760 niqira mane vaumate, igira sui ara dona dou sosongo na gini vailabu na tako ma na isi ma na parige. 19Migira ara vano na vailabu koluaqira na Hagar i Jetur, mi Napis mi Nodab. 20Migira ara vataraginia niqira amesi konina God mara nongia ke sangagira, ma God e rongomia niqira nonginongi me sangagira, me gini managaqira na tuliusiaqira na Hagar migira sui goto ara sai alaala kolugira. 21Mara laua i koniqira gaqira gala ara 50,000 na kamelo, me 250,000 na sipi, me 2,000 na asi, mara aditsekagira goto ara 100,000 na tinoni. 22Mara matesigira goto danga sosongo gaqira gala, rongona na vailabu ia nina kili nogo God. Migira ara ba totuvia na butona kao ia poi tsau tana tagu igira na Asiria ara aditsekavanogira.5:22 “tsau tana tagu na Asiria ara aditsekavanogira” Tana gana ngongo 733 B.C. igira na Asiria ara tangolia na Israel tabana i vava, ma niqira butona kao goto tabana i longa na Kô Jordan, mara aditsekagira na tinoni (reia tana 2 Taovia Tsapakae 15:29).
Igira na Manase Tabana i Longa
23Migira na Manase Tabana i Longa ara danga sosongo, mara ba totuvia na butona kao tana Basan me vosa tave tsau i Baal Hermon, mi Senir mi tana Vungavunga Hermon. 24Migirani nogo na tinoni lokiloki tana niqira duli: a Eper, ma Isi, ma Eliel, ma Asriel, ma Jeremia, ma Hodavia, ma Jadiel. Igira sui ara mane vaumate susuliga sosongo, mara ida tana niqira duli, me tangiloki na rongoqira.
Ara Aditsekagira na Puku Ara Totu Tabana i Longa
25Migira na tinoni ara tau totukakai i konina niqira God igira na mumuaqira, mara tû mara piloligi tania aia mara ba samasama vanigira niqira god na puku tavosi, igira nogo aia God e tsialigigira tania na kao ia. 26Mi tana, maia God e naua ma Pul na taovia tsapakae ni Asiria, aia ara soaginigotoa a Tiglat Pileser, ke bâ me ke bokia na veraqira. Maia e tuliusigira me aditsekavanogira na puku tu koniqira a Ruben, ma Gad, ma na Manase Tabana i Longa, me ba mologira kara totu pukuga i Hala, mi Habor, mi Hara, mi liligina goto na Kô Gosan.
6Igira Tana Duli Konina a Levi
1A Levi e tamanitugira tolu na dalena mane: tugira nogo a Gerson, ma Kohat ma Merari.
2Ma Kohat e tamanitugira vati na dalena mane: tugira nogo a Amram, ma Isar, ma Hebron, ma Usiel.
3Ma Amram e tamanikaira ruka moa na dalena mane: a Aaron ma Moses, me kesa lelê na dalena daki aia nogo ko Miriam.
A Aaron e tamanitugira vati na dalena mane: tugira nogo a Nadab, ma Abihu, ma Eleasar ma Itamar.
4-15Igirani nogo na kukuana a Eleasar tana vatavata babâ:
a Eleasar na tamana a Pinehas,
ma Pinehas na tamana a Abisua,
ma Abisua na tamana a Buki,
ma Buki na tamana a Usi,
ma Usi na tamana a Seraia,
ma Seraia na tamana a Meraiot,
ma Meraiot, na tamana a Amaria,
ma Amaria na tamana a Ahitub,
ma Ahitub na tamana a Sadok,
ma Sadok na tamana a Ahimaas,
ma Ahimaas na tamana a Asaria,
ma Asaria na tamana a Johanan,
ma Johanan na tamana a Asaria, aia nogo e Mane Tabu Loki i laona na Vale Tabu aia a Solomon na taovia tsapakae e logoa i Jerusalem,
ma Asaria na tamana a Amaria,
ma Amaria na tamana a Ahitub,
ma Ahitub na tamana a Sadok,
ma Sadok na tamana a Salum,
ma Salum na tamana a Hilkia,
ma Hilkia na tamana a Asaria,
ma Asaria na tamana a Seraia,
ma Seraia na tamana a Jehosadak, aia nogo a Nebukadnesar na taovia tsapakae e aditsekâ kolugira goto na tinoni sui tana Juda mi Jerusalem.
Visana goto na Kukuana a Levi
16Vaga ara marenogoa, a Levi e tamanitugira tolu na dalena mane: tugira a Gerson, ma Kohat ma Merari. 17Mi tugira sui ara tu tamanigotoa tu daleqira mane. A Gerson aia ka tamaqira a Libni ma Simei, 18ma Kohat aia tu tamaqira a Amram, ma Isar, ma Hebron ma Usiel; 19ma Merari ka tamaqira a Mali ma Musi.
20Mi tugirani nogo na kukuana a Gerson tana vatavata babâ: a Libni, ma Jahat, ma Sima, 21ma Joa, ma Ido, ma Sera, ma Jeaterai.
22Tugirani nogo na kukuana a Kohat tana vatavata babâ: a Aminadab, ma Kora, ma Asir, 23ma Elkana, ma Ebiasap, ma Asir, 24ma Tahat, ma Uriel, ma Usia, ma Saul.
25Ma Elkana e tamanikaira ruka na dalena mane, kaira a Amasai ma Ahimot. 26Migirani na kukuana a Ahimot tana vatavata babâ: a Elkana, ma Sopai, ma Nahat, 27ma Eliab, ma Jeroham, ma Elkana.
28Ma Samuel e tamanikaira ruka na dalena mane: kaira nogo a Joel na idana dalena, ma Abija na tumurina.
29Mi tugirani na kukuana a Merari tana vatavata babâ: a Mali, ma Libni, ma Simei, ma Usa, 30ma Simea, ma Hagia ma Asaia.
Igira Niqira Aqo Kara Raqa Linge Tana Vale Tabu
31Mi tugirani nogo na mane aia David na taovia tsapakae e molotugira kara tu raqa linge tana nauna na samasama i Jerusalem, murina ara adimaia na Bokisi na Taso6:31 “na Bokisi na Taso” Aia e kesa na bokisi gai ara baru poponoginia na qolumila laka, mi laona ara molotsavua kaira ruka na vatu i tana e totu na mamarena na Sangavulu Ketsa. i tana. 32Ara vaioligi na linge tana Valepolo tana e totu na Taovia, poi e tsau kalina a Solomon na taovia tsapakae e logoa na Vale Tabu i Jerusalem. 33Igirani nogo na asaqira na mane niqira aqo na raqa linge.
Tana duli konina a Kohat: aia Heman na dalena a Joel e raqa linge tana kesanina alaala. Mara tsokovisu vaganana iani na vungu i laona na duli konina a Joel me visu me ba tsau konina a Jakob: a Heman, ma Joel, ma Samuel, 34ma Elkana, ma Jeroham, ma Eliel ma Toa, 35ma Sup, ma Elkana, ma Mahat, ma Amasai, 36ma Elkana, ma Joel, ma Asaria, ma Sepania, 37ma Tahat, ma Asir, ma Ebiasap, ma Kora, 38ma Isar, ma Kohat, ma Levi, ma Jakob.
39Ma Asap aia e raqa linge tana rukanina alaala. Mara tsokovisu vaganana iani na vungu i laona na duli konina ia me visu me ba tsau konina a Levi: a Asap, ma Berekia, ma Simea, 40ma Mikael, ma Baaseia, ma Malkia, 41ma Etni, ma Sera, ma Adaia, 42ma Etan, ma Sima, ma Simei, 43ma Jahat, ma Gerson, ma Levi.
44Ma Etan tana duli konina a Merari e raqa linge tana tolunina alaala. Mara tsokovisu vaganana iani na vungu i laona na duli konina ia, me visu me ba tsau konina a Levi: a Etan, ma Kisi, ma Abdi, ma Maluk, 45ma Hasabia, ma Amasia ma Hilkia, 46ma Amsi, ma Bani, ma Semer, 47ma Mali, ma Musi, ma Merari, ma Levi.
48Migira gaqira sasanga na Levite tavosi ara mologira kara naua na aqo tavosi sui i laona na nauna na samasama.
Igira na Kukuana a Aaron
49Maia moa a Aaron, migira goto na dalena ma na kukuana niqira aqo na sauana na bulunagai uruuru ma na kodoputsa ara kodoa i kelana na belatabu. Igira goto nogo niqira aqo kara reitutugua pipi sui na aqona na samasama i laona na Nauna Tabu Loki Sosongo, ma na savoriana na sausau na sese mateqira niqira sasi na tinoni ni Israel. Mara naua na aqo sui girani taonia na vovorona na omea aia Moses nina maneaqo God e maregira. 50Tugirani nogo tu soaqira na dalena ma na kukuana a Aaron: a Eleasar, ma Pinehas, ma Abisua, 51ma Buki, ma Usi, ma Serahia, 52ma Meraiot, ma Amaria, ma Ahitub, 53ma Sadok, ma Ahimaas.
I Tana Ara Totu Igira na Levite
54Iani nogo na butona kao ara saunogoa vanigira na kukuana a Aaron tana duli konina a Kohat. Migira nogo ara adia na kesanina tuva tana kao ara sauvanigira na Levite. 55Ara tusuvanigira na verabau i Hebron tana butona kao ni Juda, kolugotoa na kao laka ara totu polipolia i tana e dato dou na buruburu. 56Mara sauvania a Kaleb na dalena a Jepune na tsatsapa tetelo, migira na uta polipolia na verabau ia. 57-59Tugirani nogo na verabau agana na mani tsogoravi6:57 “na vera agana na mani tsogoravi” Ti vaga kesa ke tavongani labumatesia kesa tinoni, maia e dona ke vano i laona kesa vidaqira na verabau girani me ke taopoi tania aia e lavea rongona e ngaoa na tangotugu (reia tana Josua 20:1-9). ara sauvanigira na kukuana a Aaron: i Hebron, mi Jatir, mi Libna, mi Estemoa, mi Hilen, mi Debir, mi Asan, mi Bet Semes, kolugira goto na kao laka i tana e dato dou na buruburu. 60Mi tana nina butona kao na puku konina a Benjamin ara sauvanigira na vera tugirani kolugira goto na kao laka i tana e dato dou na buruburu: i Geba, mi Alemet, mi Anatot. Mi tugira sui kolu ara tu sangavulu tolu na vera ara sauvanigira kara totuvia. 61Mi muri mara tsonikutsu mateqira na vungu tavosi i laona na duli konina a Kohat, mara sauvanigira sangavulu na vera tana niqira butona kao na puku konina a Manase Tabana i Tasi.
62Me vanigira na vungu i laona na duli konina a Gerson ara sauvanigira sangavulu tolu na vera tana tu niqira butona kao na puku tu koniqira a Isakar, ma Aser, ma Naptali, ma Manase Tabana i Longa tana Basan. 63Mara sangavulu ruka na vera tana tu niqira butona kao na puku tu koniqira a Ruben, ma Gad ma Sebulun, ara sauvanigira na vungu i laona na duli konina a Merari. 64Ara nauvaganana nogo igira na tinoni ni Israel kalina ara sau vera vanigira na Levite i tana kara ba totu, kolugira goto na kao laka ara totu polipolia na vera girani. 65Ara tsonikutsu matena te ara saugira na vera sui girani tana tu niqira butona kao na puku tu koniqira a Juda, ma Simeon, ma Benjamin.
66Mara sauvanigira visana vidaqira na vungu tana duli konina a Kohat visana na vera agana na mani toturavi kolugira goto na kao laka i tana e dato dou na buruburu tana niqira butona kao igira na puku konina a Epraim: 67i Sekem na vera agana na tsogoravi tana tetena ni Epraim, mi Geser, 68mi Jokmeam, mi Bet Horon, 69mi Aijalon, mi Gat Rimon. 70Mi tana niqira butona kao na Manase Tabana i Tasi ara sauvanigira na vera ni Aner mi Bileam, kolugira goto na kao laka ara totu polipolikaira i tana e dato dou na buruburu.
71Mara sauvanigira na vungu tana duli konina a Gerson na vera girani, kolugira goto na kao laka ara totu polipoligira i tana e dato dou na buruburu:
I laona niqira butona kao na Manase Tabana i Longa ara saua: i Golan tana Basan, mi Astarot.
72Mi tana niqira butona kao na puku konina a Isakar ara saua: i Kedes, mi Daberat, 73mi Ramot mi Anem.
74Mi tana niqira butona kao na puku konina a Aser ara saua: i Masal, mi Abdon, 75mi Hukok mi Rehob.
76Mi tana niqira butona kao na puku konina a Naptali ara saua: i Kedes tana Galilii, mi Hamon mi Kiriataim.
77Migira na vungu ara kauvisu tana duli konina a Merari ara sauvanigira na vera girani kolugira goto na kao laka ara totu polipoligira i tana e dato dou na buruburu:
Tana niqira butona kao na puku konina a Sebulun ara saua: i Rimono, mi Tabor.
78Tana niqira butona kao na puku konina a Ruben, tabana i longa na Kô Jordan tabana ba vania i Jeriko ara saua: i Beser tana na netana, mi Jasa, 79mi Kedemot mi Mepaat.
80Mi tana niqira butona kao na puku konina a Gad ara saua: i Ramot tana Gilead, mi Mahanaim, 81mi Hesbon mi Jaser.
7Igira na Kukuana a Isakar
1A Isakar e tamanitugira vati na dalena mane: tugira nogo a Tola, ma Pua, ma Jasub ma Simron.
2Ma Tola e tamanitugira ono na dalena mane: tugira nogo a Usi, ma Repaia, ma Jeriel, ma Jamai, ma Ibsam ma Semuel. Tugira sui ara tu ida tana vungu i laona na duli konina a Tola, mara tu mane vaumate tangirongo. Mi tana tagu e taovia tsapakae a David, ma na kukuaqira ara tsaulinogoa e 22,600 na tinoni.
3Ma Usi e tamanina kesa lelê moa na dalena mane, aia nogo a Israhia. Ma Israhia e tamanitugira vati na dalena mane, tugira nogo a Mikael, ma Obadia, ma Joel, ma Isia, mi tugira sui ara tu ida tana tu niqira vungu. 4Mara tu tamani danga sosongo tu tauqira ma tu daleqira, maia nogo te igira tu kukuaqira ara gini tangomana na sauana 36,000 na mane kara ba sangasage tana alaala na mane vaumate.
5Mi tana niqira mamare na tsokopuku igira sui lakalaka na vungu tana puku konina a Isakar ara maretsunâ na soaqira ara 87,000 na mane igira e tugugira na sangasage tana alaala na mane vaumate.
Igira Ka Kukuaqira a Benjamin ma Dan
6A Benjamin e tamanitugira tolu na dalena mane: tugira nogo a Bela, ma Beker, ma Jediael.
7Ma Bela e tamanitugira tsege na dalena mane: tugira nogo a Esbon, ma Usi, ma Usiel, ma Jerimot, ma Iri. Mi tugira sui ara ida tana vungu i laona na duli ia, mi tugira sui ara tu mane vaumate tangirongo goto. Mi laona tu kukuaqira ara totu 22,034 na mane igira e tugugira kara sangasage tana alaala na mane vaumate.
8Ma Beker e tamanitugira siu na dalena mane: tugira nogo a Semira, ma Joas, ma Elieser, ma Eleoenai, ma Omri, ma Jeremot, ma Abia, ma Anatot, ma Alemet. 9Mi tana niqira mamare na tsokopuku na kukuaqira pipi tana niqira vungu ara tsokoa e tsaulina 20,200 na mane igira e tugugira kara sangasage tana alaala na mane vaumate.
10A Jediael e tamanina kesa lelê moa na dalena mane, aia nogo a Bilan. Ma Bilan e tamanitugira vitu na dalena mane: tugira nogo a Jeus, ma Benjamin, ma Ehud, ma Kenaana, ma Setan, ma Tarsis, ma Ahisahar. 11Tugira nogo ara tu ida tana vungu i laona na duli, mi tugira sui ara tu mane vaumate tangirongo goto. Mi laona na kukuaqira ara tsokogira ara 17,200 na mane igira e tugugira kara sangasage tana alaala na mane vaumate. 12Mi kaira a Supim ma Hupim ara ka totu goto tana puku iani.
Ma Dan e tamanina kesa lelê moa na dalena mane, aia a Husim.
Na Kukuana a Naptali
13A Naptali e tamanitugira vati na dalena mane: tugira nogo a Jasiel, ma Guni, ma Jeser, ma Salu. Igira nogo na kukuana ko Bilha.7:13 Ko Bilha e kesa na tauna le a Jakob, ma ka tinaqira kaira a Dan ma Naptali.
Igira na Kukuana a Manase
14Ma Manase e tamanikaira ruka na dalena mane i konina na tauna lê na daki ni Aramea, kaira nogo a Asriel ma Makir. Ma Makir na tamana a Gilead. 15Ma Makir nogo e lavedaki vanikaira a Hupim ma Supim. Ma ko Maaka aia na vavinena a Makir. Ma na rukanina na dalena mane a Makir, aia nogo a Selopehad, maia e tamanigira moa visana na dalena daki.
16Ma na tauna a Makir ko Maaka goto na soana, e vasukaira ruka na dalena mane, ma ka soaqira a Peres ma Seres. Ma Peres e tamanikaira ruka na dalena mane, kaira nogo a Ulam ma Rakem. 17Ma Ulam e tamanina kesa lelê moa na dalena mane, a Bedan na soana. Igirani nogo na kukuana a Gilead na dalena a Makir ma na kukuana a Manase.
18Maia ko Hamoleket na vavinena a Gilead e tamanitugira tolu na dalena mane: tugira nogo a Isod, ma Abieser ma Mala. 19Ma Semida e tamanitugira vati na dalena mane: tugira nogo a Ahian, ma Sekem, ma Liki ma Aniam.
Igira na Kukuana a Epraim
20Igirani nogo na kukuana a Epraim tana vatavata babâ: a Sutela, ma Bered, ma Tahat, ma Eleada, ma Tahat, 21ma Sabad, ma Sutela. Mara ka ruka goto na dalena mane a Epraim, kaira a Eser ma Elead, i kaira ara matesikaira kalina ara ka tovoa na komiana niqira buluka na tinoni ara totu pukuga i Gat. 22Ma Epraim ka tamaqira e tangisikaira danga na dani, migira na kamana ara mai na vereana. 23Mi muri, maia e maturukolu tugua na tauna, maia e tiana me vasua kesa na dalena mane. Mara ka soaginia a Beria7:23 Na soa Beria tana goko Hibru e tangi vaga ‘e laba na omea seko.’ rongona na omea seko e laba i laona ka niqira tamadale.
24Ma Epraim e tamanigotoa kesa na dalena daki aia ko Seera na soana. Aia nogo e vaturigira na vera ara totu tana Bet Horon i Gotu ma na Bet Horon i Lao, mi Usen mi Seera.
25Ma Epraim e tamanitugua kesa goto na dalena mane, a Repa na soana, mi tugirani nogo na kukuana aia: a Resep, ma Tela, ma Tahan, 26ma Ladan, ma Amihud, ma Elisama, 27ma Nun ma Josua.
28Migirani nogo na butona kao igira ara tamanina mara totuvia: i Betel migira na vera polipolia, me vosa bâ i Naaran tabana i longa, mi Geser tabana i tasi, migira goto na vera polipolia. Mi kolukaira goto na verabau ni Sekem mi Aia, migira goto na vera polipolikaira.
29Migira na kukuana a Manase ara tagaovigira na verabau ni Bet Sean, mi Taanak, mi Megido mi Dor, migira na vera polipoligira.
Migira sui tana nauna girani i tana nogo ara totu igira na kukuana a Josep aia na dalena a Jakob.
Igira Kukuana a Aser
30Igirani nogo na kukuana a Aser. A Aser e tamanitugira vati na dalena mane: tugira nogo a Imna, ma Isva, ma Isvi, ma Beria; me kesa lelê moa na dalena daki, aia ko Sera.
31Maia Beria e tamanikaira ruka na dalena mane, kaira nogo a Heber ma Malkiel. Maia Malkiel nogo e vaturia na verabau ni Birsait.
32Ma Heber e tamanitugira tolu na dalena mane: tugira nogo a Japlet, ma Somer, ma Hotam; me kesa lelê moa na dalena daki, aia ko Sua.
33Ma Japlet e tamanigotoa tolu na dalena mane: tugira nogo a Pasak, ma Bimal ma Asvat.
34Ma Somer na kulana a Japlet e tamanitugira tolu na dalena mane; tugira nogo a Roga, ma Jehuba, ma Aram.
35Ma Hotam aia kesa goto na kulana a Japlet e tamanitugira vati na dalena mane: tugira nogo a Sopa, ma Imna, ma Seles ma Amal.
36Mi tugirani nogo kukuana a Sopa: a Sua, ma Harneper, ma Sual, ma Beri, ma Ira, 37ma Beser, ma Hod, ma Sama, ma Silsa, ma Itran, ma Beera.
38Mi tugirani nogo na kukuana a Jeter: a Jepune, ma Pispa ma Ara. 39Mi tugirani na kukuana a Ula: a Ara, ma Haniel, ma Risia.
40Igira sui girani na kukuana nogo a Aser. Igira ara ida tana niqira vungu, mara mane vaumate susuliga, mara tinoni tangirongo. Mi laona na mamarena niqira tsokopuka ara totu na soaqira 26,000 na mane igira e tugugira kara sangasage tana alaala na mane vaumate.
8Igira na Kukuana a Benjamin
1A Benjamin e tamanitugira tsege na dalena mane: a Bela na idana dalena, ma Asbel na rukanina, ma Ahara na tolunina, 2ma Noha na vatinina, ma Rapa na tsegenina.
3Mi tugirani na kukuana a Bela: a Adar, ma Gera, ma Abihud, 4ma Abisua, ma Naaman, ma Ahoa, 5ma Gera, ma Sepupan, ma Huram.
6-7Mi tugirani na kukuana a Ehud: tugira a Naaman, ma Ahija, ma Gera. Tugira nogo ara tu ida vanigira na vungu ara totu i Geba, mara turugira kara mololea i tana mara ba totu i Manahat. Ma Gera nogo aia ka tamaqira a Usa ma Ahihud e adivanogira.
8-9Ma Saharaim e tamanikaira ruka na tauna, aia ko Husim ma ko Baara, me tsonilekaira sui. Mi muri, kalina aia e ba totu i Moab, maia e taugagotoa ko Hodes, mara ka tamanitugira vitu ka daleqira mane: tugira nogo a Jobab, ma Sibia, ma Mesa, ma Malkam, 10ma Jeus, ma Sakia, ma Mirma. Mi tugira sui ka daleqira ara tu lia sui na ida tana vungu tu koniqira.
11Ma Saharaim e tamanikaira ruka goto na dalena mane konina ko Husim: kaira nogo a Ahitub ma Elpaal.
12Ma Elpaal e tamanitugira tolu na dalena mane: tugira nogo a Eber, ma Misam, ma Semed. Maia nogo a Semed e vaturikaira na verabau ni Ono, mi Lod, migira goto na vera tetelo ara totu polipolikaira.
Igira na Puku Konina a Benjamin i Gat mi Aijalon
13Kaira a Beria ma Sema ara ka ida vanigira na vungu ara totuvia na verabau ni Aijalon, mara tsialigigira na tinoni ara totu tana verabau ni Gat. 14Migirani nogo na kukuana a Beria: a Ahio, ma Sasak, ma Jeremot, 15ma Sebadia, ma Arad, ma Eder, 16ma Mikael, ma Ispa, ma Joha.
Igira na Puku Konina a Benjamin i Jerusalem
17Tugirani na kukuana a Elpaal: a Sebadia, ma Mesulam, ma Hiski, ma Heber, 18ma Ismerai, ma Islia ma Jobab.
19Mi tugirani na kukuana a Simei: a Jakim, ma Sikri, ma Sabdi, 20ma Elienai, ma Siletai, ma Eliel, 21ma Adaia, ma Beraia ma Simrat.
22Mi tugirani na kukuana a Sasak: a Ispan, ma Eber, ma Eliel, 23ma Abdon, ma Sikri, ma Hanan, 24ma Hanania, ma Elam, ma Antotija, 25ma Ipdeia ma Penuel.
26Mi tugirani na kukuana a Jeroham: a Samserai, ma Seharia, ma Atalia, 27ma Jaaresia, ma Elia, ma Sikri.
28Tugirani nogo na tinoni lokiloki ara tu ida tana vungu ara totu i Jerusalem.
Igira na Puku Konina a Benjamin i Gibeon mi Jerusalem
29A Jeiel aia nogo e vaturia na verabau ni Gibeon me ba totu i tana. Ma ko Maaka na tauna. 30Ma Abdon aia nogo na idana ka daleqira. Migirani goto ka daleqira tavosi: a Sur, ma Kis, ma Baal, ma Ner, ma Nadab, 31ma Gedor, ma Ahio, ma Seker, 32ma Miklot aia na tamana a Simea. Migira na kukuaqira ara totu i Jerusalem varangisigira moa igira na vungu tavosi tana niqira duli.
Na Vungu Konina a Saul
33Maia Ner na tamana a Kis, ma Kis na tamana a Saul na taovia tsapakae. Ma Saul e tamanitugira vati na dalena mane: tugira nogo a Jonatan, ma Malkisua, ma Abinadab, ma Esbaal.8:33 A Esbaal aia na soa ara soaginia a Isboset tana papi 2 Samuel 2:8, me visana goto tana butona i laona na 2 Samuel.34Ma Jonatan na tamana a Meribaal8:34 A Meribaal aia na soa ara soaginia a Mepiboset tana papi 2 Samuel 4:4, me visana goto tana butona i laona na 2 Samuel. aia na tamana a Mika.
35Ma Mika e tamanitugira vati na dalena mane: tugira nogo a Piton, ma Melek, ma Tarea ma Ahas. 36Ma Ahas na tamana a Jehoada, ma Jehoada tu tamaqira a Alemet, ma Asmavet ma Simri. Ma Simri aia na tamana a Mosa, 37ma Mosa na tamana a Binea. Ma Binea na tamana a Rapa, ma Rapa na tamana a Eleasa, ma Eleasa na tamana a Asel.
38Ma Asel e tamanitugira ono na dalena mane: a Asrikam, ma Bokeru, ma Ismael, ma Searia, ma Obadia ma Hanan. 39Ma Esek na kulana a Asel e tamanitugira tolu na dalena mane: tugira nogo a Ulam, ma Jeus, ma Elipelet.
40Migira sui na dalena mane a Ulam ara mane vaumate tangirongo mara dona sosongo goto na gini vanavana na parige. Igira sui kolu na dalena ma na kukuana mane a Ulam ara kesa sangatu tsege sangavulu. Igira na tinoni ara totu na soaqira ieni igira sui na puku konina a Benjamin.
9Na Tinoni ni Israel Ara Visu Tania na i Babilonia
1Igira sui na tinoni ni Israel ara maretsunâ na soaqira muritaonia niqira vungu i laona kesa na papi ara soaginia Niqira Papi Igira na Taovia Tsapakae Tana Israel.
God e tamivanigira na Babilonia kara aditsekavanogira na tinoni ni Juda i Babilon na matena niqira sasi. 2Igira na tinoni ara tangoli aqo tana Israel ara ida na visu tana niqira kao ma na veraqira kolugira goto na manetabu, ma na Levite, migira ara aqo tana Vale Tabu. 3Migira na tinoni i laoqira na puku tu koniqira a Juda, ma Benjamin, ma Epraim, ma Manase ara ba totu i Jerusalem.
4-6Migira ara 690 na vungu tana puku konina a Juda ara totu i Jerusalem.
Migira na kukuana a Peres na dalena a Juda ara moloa a Utai na dalena a Amihud ma na kukuana a Omri ke lia gaqira ida. Kaira a Imri ma Bani, kaira goto na mumuana a Peres.
Migira na kukuana a Sela na dalena a Juda ara moloa a Asaia aia e tinoni loki nogo tana nina vungu, ke lia gaqira ida.
Migira na kukuana a Sera na dalena a Juda ara moloa a Jeuel ke lia gaqira ida.
7-8Migirani nogo na tinoni tana puku konina a Benjamin ara totu i Jerusalem:
a Salu na dalena a Mesulam, ma Mesulam na dalena a Hodavia, ma Hodavia na dalena a Hasenua;
ma Ibneia na dalena a Jeroham;
ma Ela na dalena a Usi ma na kukuana a Mikri;
ma Mesulam na dalena a Sepatia, ma Sepatia na dalena a Reuel, ma Reuel na dalena a Ibnia.
9Migira sui kolu ara 956 na vungu tana puku konina a Benjamin ara totu i tana. Migira sui na mane e totu na soaqira ieni igira nogo ara ida tana niqira vungu.
Igira na Manetabu Ara Totu i Jerusalem
10-12Igirani nogo na manetabu ara totu i Jerusalem:
a Jedaia, ma Jehoiarib, ma Jakin
ma Asaria na dalena a Hilkia aia na ida i laona na Vale Tabu, mi tugirani nogo na mumuana a Asaria: a Mesulam, ma Sadok, ma Meraiot ma Ahitub;
ma Adaia na dalena a Jeroham, mi karani nogo na mumuana a Adaia: a Pasur ma Malkia;
ma Maasai na dalena a Adiel, mi tugirani nogo na mumuana a Maasai: a Jasera, ma Mesulam, ma Mesilemit ma Imer.
13Igira sui kolu ara 1,760 na manetabu ara ida tana niqira vungu. Migira sui ara dona dou sosongo na nauana pipi sui na aqo i laona na Vale Tabu.
Igira na Levite Ara Totu i Jerusalem
14-16Igirani nogo na Levite ara totu i Jerusalem:
A Semaia na dalena a Hasub, mi karani nogo na mumuana a Semaia: a Asrikam ma Hasabia tana duli konina a Merari;
ma Bakbakar, ma Heres ma Galal;
ma Matania na dalena a Mika, mi karani nogo na mumuana a Matania: a Sikri ma Asap;
ma Obadia na dalena a Semaia, mi karani nogo na mumuana a Obadia: a Galal ma Jedutun;
ma Berekia na dalena a Asa ma na kukuana a Elkana, aia e totu tana butona kao ara tamanina igira na tinoni ni Netopa.
Igira na Mane Matali Vale Tabu Ara Totu i Jerusalem
17Migirani nogo na mane matali Vale Tabu ara totu i Jerusalem: a Salum, ma Akub, ma Talmon ma Ahiman. Ma Salum nogo e ida tu laoqira. 18Me tsau bâ tana tagu ia, migira nogo na tinoni tana niqira duli kara pitumatsapa tabana i longa tana matsapakapu tana e sage na taovia tsapakae. Mi sau niqira aqo kara mataligira na matsapakapu tana nauna ara tototu igira na Levite.
19Maia Salum na dalena a Kore ma na kukuana a Ebiasap, kolugira goto na kulana tavosi tana duli konina a Kora, niqira aqo kara matalia na matsapana na Valepolo i tana e totu na Taovia, vaga nogo ara naua igira na mumuaqira i sau kalina igira ara reitutugua na nauna i tana e tototu na Taovia. 20Ma Pineas na dalena a Eleasar aia na kesanina e tangolia na aqo ieni i sau. Ma na Taovia e totu i konina aia.
21Ma Sekaria na dalena a Meselemia aia goto kesa na mane gana aqo na mataliana na matsapana na Valepolo i tana e totu na Taovia.
22Igira sui kolu ara 212 na mane ara viligira kara mataligira na matsapakapuna na vera. Ara maretsunâ nogo na soaqira taonigira na vera tetelo i tana ara totu. Kaira nogo a David na taovia tsapakae ma Samuel na propete ara ka moloa na aqo loki iani i sau vanigira na mumuaqira. 23Migira ma na kukuaqira ara tangolidatoa na aqona na mataliaqira na matsapakapuna na Vale Tabu. 24Mara tu vati na matsapakapuna na Vale Tabu, kesa e totu tabana i vava, me kesa tabana i ata, me kesa tabana i longa, me kesa tabana i tasi, me pipi kesa tana matsapakapu e totu kesa gaqira ida na mane matali e reitutugua. 25Migira na kamaqira na mane matali, igira ara totu tana vera tetelo gira, niqira aqo kara sangagira tana aqo na mataliana ma Vale Tabu, ma kara vaioligi pipi vitu na dani. 26Mi tugira vati gaqira taovia igira na mane matali matsapakapu, na Levite sui moa tugira, me ngolitugira goto na reitutuguaqira na voki i laona na Vale Tabu ma na vangana sui ara totu i laona. 27Mi tugira ara tototu varangisia moa na Vale Tabu, rongona tu niqira aqo nogo kara tu matalia na Vale Tabu ma kara tu sangavia na matsapana pipi tana matsaraka.
Igira na Levite Tavosi
28Migira visana na Levite tavosi niqira aqo kara reitutugugira na omea levolevo gana na gini aqo tana samasama. Ma kara matanigira dou kalina kara adirutsumigira, mi kalina kara molovisugira pipi kalina ara gini aqo sui. 29Migira goto visana na Levite niqira aqo kara reitutugugira na vangana sui tavosi na Vale Tabu, migira goto na pulaoa ma na uaeni ma na oela na olive, ma na bulunagai uruuru ma na papasa sisigini dou. 30Migira moa na manetabu niqira aqo kara lalogira na papasa sisigini dou.
31Maia kesa na Levite, a Matitia na soana, aia na idana dalena a Salum tana duli konina a Kora, nina aqo ke vangaraugira na sausau bitibiti.9:31 “na sausau bitibiti” Igira nogo na bredi tapetape ara aqosiginia na pulaoa ma na oela na olive ara bitia, mi muri mara savorigira vania God (reia tana Aqo Mane Tabu 2:4-6).32Migira na tinoni tana duli konina a Kohat niqira aqo kara vangaraugira na bredi tabu9:32 “na bredi tabu” Igira nogo sangavulu ruka na sivona bredi ara mologira kesa tana bela i laona na Vale Tabu pipi tana Dani na Sabat ngiti sausau vania God (reia tana Aqo Mane Tabu 24:5-9). vania na Vale Tabu pipi tana Dani na Sabat.
33Mara visana na tamadale tana vungu i laoqira na Levite niqira aqo kara reitutugua na linge tana Vale Tabu. Migira ara ida tana tamadale girani na valeqira ara totu tana vale varangisia na Vale Tabu, mara tau goto tangolia sa aqo tavosi rongona kara gini totu vangarau sailagi vania na aqo na linge na dani ma na bongi.
34Ma na mane sui girani ara ida tana vungu koniqira na Levite taonia na vasusudato tû mai nogo i koniqira na mumuaqira. Migira nogoria ara totu kalavata i Jerusalem.
Na Mumuana ma na Kukuana a Saul
(8:29-38)
35A Jeiel aia nogo e vaturia na verabau ni Gibeon me ba totu i tana. Ma ko Maaka na tauna. 36Ma Abdon aia nogo na idana ka daleqira. Mi tugirani goto ka daleqira tavosi: a Sur, ma Kis, ma Baal, ma Ner, ma Nadab, 37ma Gedor, ma Ahio, ma Sekaria, 38ma Miklot aia na tamana a Simea. Migira na kukuaqira ara totu i Jerusalem varangisigira moa igira na vungu tavosi tana niqira duli.
39Maia Ner na tamana a Kis, ma Kis na tamana a Saul na taovia tsapakae. Ma Saul e tamanitugira vati na dalena mane: tugira nogo a Jonatan, ma Malkisua, ma Abinadab, ma Esbaal.9:39 A Esbaal aia na soa ara soaginia a Isboset tana papi 2 Samuel 2:8, me visana goto tana butona i laona na 2 Samuel.40Ma Jonatan na tamana a Meribaal9:40 A Meribaal aia na soa soaginia a Mepiboset tana papi 2 Samuel 4:4, me visana goto tana butona i laona na 2 Samuel. aia na tamana a Mika. 41Ma Mika e tamanitugira vati na dalena mane: tugira nogo a Piton, ma Melek, ma Tarea, ma Ahas. 42Ma Ahas na tamana a Jara, ma Jara tu tamaqira a Alemet, ma Asmavet, ma Simri. Ma Simri aia na tamana a Mosa. 43Ma Mosa na tamana a Binea, ma Binea na tamana a Repaia, ma Repaia tamana a Eleasa, ma Eleasa na tamana a Asel.
44Ma Asel e tamanitugira ono na dalena mane: tugira nogo a Asrikam, ma Bokeru, ma Ismael, ma Searia, ma Obadia ma Hanan.
10Na Mateana a Saul
1Migira na Pilistia ara tû, mara ba na vailabugi koluaqira na Israel tana Vungavunga Gilboa. Mara danga sosongo na Israel ara labumatesigira i tana, migira moa visana ara tau mate, migira kolutugira goto a Saul ma na dalena ara viri tsogo sui. 2Migira na Pilistia ara ba tsauligira mara labumatesitugira na dalena a Saul, tugira nogo a Jonatan, ma Abinadab ma Malkisua. 3Mara ba saisaigana a Saul, ma nina pipili kesa vidaqira e ba gado i konina me gini boka seko sosongo. 4Ma Saul e tsarivania nina borau aia e kalagaia gana sagore, “Ko langâ nimu isi mo ko labumatesiginiau, rongona igira na ponotoba ni Pilistia girani kara tau tseqo poliau ma kara labumatesiau.” Ma na borau ia e matagu sosongo na nauvaganana ia. Mi tana ma Saul e tû, me adisegenia nina isi me puka bâ segeni i konina. 5Mi kalina na borau ia e reia laka a Saul e mate nogo, maia goto e puka bâ segeni i konina nina isi, me mate kolua a Saul. 6Aia nogo e vaga na mateana a Saul mi tugira tolu na dalena, me tagara goto sa kukuana a Saul ke adidatoa nina aqotagao. 7Mi kalina igira na Israel ara totu tana Poi ni Jesreel ara rongomia laka igira na mane vaumate ni Israel ara tsogo sui, ma Saul mi tugira na dalena ara tu mate nogo, mi tana migira sui ara tû, mara mololea na veraqira, mara tsogoligi. Mi muri, migira na Pilistia ara mai mara totuvia na veraqira.
8Mi tana dani murina na vailabu ia, migira na Pilistia ara vano na tsoraligiana na omea levo i koniqira na Israel ara mate tana vailabu, mi tana ara ba tsodoa na konina a Saul mi tugira tolu na dalena ara tu tsaromate tana Vungavunga Gilboa. 9Ara kuria na lovana a Saul mara tsoraligia gana tako, mi muri, mara mologira visana niqira mane adigoko kara ba turupatuna vanigira niqira god peropero ma niqira tinoni i laona na Pilistia popono laka e mate nogo a Saul. 10Mara adia gana sagore a Saul mara ba moloa i laona kesa niqira valetabu, mara pogakaea na lovana i laona nina valetabu niqira god Dagon. 11Mi kalina igira na tinoni ni Jabes tana Gilead ara rongomia na omea vaga igira na Pilistia ara nauvania a Saul, 12mara tû igira niqira mane malagai susuliga bâ mara ba aditsunâ na konina a Saul mi tugira na dalena, mara adivisutugira i Jabes. Mara qilutugira i tana i vavana kesa na gaitabu, mara tsoni vitoaqira segeni i laona e vitu na dani popono.
13Ma Saul e mate tana rongona aia e tau tsotsovata i konina na Taovia. Me tau murigira dou nina ketsa na Taovia; me tovoa moa laka ke basugira na tidaoqira na tinoni mate gana kara tsarivania nagua ke naua, 14me tau ba lavegoko i konina na Taovia. Mi tana ma na Taovia e labumatesia a Saul, me sauvania a David, aia na dalena a Jese, na susuliga agana na aqotagao.
11A David e Taovia Tsapakae Tana Israel ma na Juda
1Igira sui lakalaka na puku tana Israel ara ba laba i konina a David i Hebron mara tsarivania, “Igami sui na gabumu nogo igoe. 2I votangana, kalina a Saul e taovia tsapakae moa vanigita, igoe nogo o raqagira na toga ni Israel mara vano na vailabu, maia na Taovia nimu God e vekevanigo nogo laka igoe sauba ko idavanigira nina tinoni mo ko tagaovigira.” 3Mi tana, migira sui na ida tana Israel ara mai i Hebron i matana a David na taovia tsapakae. Mara tû mara nausaia niqira veke i matana God, laka aia David ke tagaovigira migira kara muridoua nina goko. Mi muri mara ninaginia a David na oela, maia e lia na taovia tsapakae tana Israel, vaga nogo na Taovia e vekenogoa tana mangana a Samuel.
4Mi muri, ma David na taovia tsapakae e aligiri kolugira sui na Israel, mara ba bokia na verabau ni Jerusalem. Mi tana tagu ia ara soaginia na vera ia Jebus, migira na Jebus igira ara totuvia idâ na kao ia ara tototu moa i tana. 5Migira na Jebus ara tsarivania a David laka aia sauba e utu saikesa ke tangomana na sage i laona na verabau ia, maia David e ba sage nomoa me tangolia niqira valekakai i Sion ara barapoliginia na vatu, me tû tana tagu ia ara soaginia na vera ia na “Verana a David”. 6Ma David e tsaria, “!Aia ke ida ke matesia kesa na Jebus sauba aia nogo ke lia na taovia tagao vanigira sui na alaala na mane vaumate!” Ma Joab, aia na dalena ko Seruia, aia nogo e ida na matesiana kesa na Jebus, te aia e lia gaqira taovia tagao. 7Mi tana rongona nogo a David e ba totu i laona na valekakai ia, te ara soaginia na “Verana a David”. 8Ma David e logo visutugua na turina na verabau ia, tuturiga tana nauna ara atsania tabana i longa na tetena, ma Joab e logovisua na turina tavosi. 9Ma David e dato susuliga babâ rongona na Taovia Susuliga Sosongo e totu i konina.
Nina Mane Vaumate Tangirongo a David
10Igirani nogo na soaqira igira nina mane vaumate tangirongo a David. Igira kolugira goto na tinoni sui tana Israel ara sangâ a David me gini lia na taovia tsapakae, vaga nogo na Taovia e veke idanogoa. Migira nogo ara sangâ a David te e gini dato susuliga na verana.
11Na kesanina aia nogo a Jasobeam tana duli konina a Hakmon, maia nogo tu gaqira ida “Tugira na Tolu”. Aia e baoginigira nina bao mara gini mate tolu sangatu na mane kesa moa kalina. 12Ma na rukanina i tu laoqira “Tugira na Tolu” e tangiloki tu soaqira, aia nogo a Eleasar na dalena a Dodo tana duli konina a Aho. 13Aia e sanga tabana kolua a David tana vailabu koluaqira na Pilistia i Pas Damim. Maia Eleasar e totu i laona kesa na uta na barli11:13 “na barli” Na piuna kesa na omea tsukatsuka vaga na raisi ara dona tinoni na ganiana. kalina igira na Israel ara tuturiga na tsogo, 14maia migira nina tinoni ara tu kakai i levugana na uta ia mara vailabugi kolugira na Pilistia. Ma na Taovia e sangâ me gini managana.
15Me kesa dani, ara tu tolu tu vidaqira na tolu sangavulu na mane vaumate susuliga bâ ara tu vano i konina a David aia e totu tana vatu loki varangisia kesa na vatuluma i Adulam, migira na alaala na Pilistia ara tototu moa tana Poi ni Repaim. 16Mi tana tagu ia, ma David e totu i kelana kesa na tetena ara barapoliginia na vatu, me kesa na alaala na Pilistia ara totuvia na vera ni Betlehem. 17Ma David e pada sosongolia na verana me tsaria, “!Ke dou sosongo kiki ti ke kesa ke ba saomai vaniau na kô tana tuvu e totu i ligisana na matsapakapuna na vera ni Betlehem!” 18Mi tugira tolu na mane vaumate susuliga bâ tugira ara tu rongomia kalina a David e goko vaganana ia, mara tu aligiri na vano mara tu liu tsapatugu bâ i levugaqira na Pilistia ara tototu i tana, mara tu ba saoa na kô tana tuvu ia mara tu adivisumai vania a David. Ma David e sove na inuviana; me adia moa me qetu lea vaga na sausau vania na Taovia, 19me tsaria, “!E utu saikesa kau inuvia na kô iani! !Me ti vaga kau inuvia, me ke vaga saikesa moa laka ti inau kau inuvia tu gabuqira na mane tugirani ara tu bisâ tu mauriqira!” Bâ, maia e sove saikesa na inuviana na kô ia. Igirani nogo tu niqira aqo malagai tugira tolu na mane vaumate tangirongo tugirani.
20Maia nogo a Abisai na kulana a Joab e ida vanigira “Igira na Tolu Sangavulu Tangirongo.” Aia e baoginigira nina bao mara gini mate tolu sangatu na mane me gini tangiloki na rongona i laoqira “Igira na Tolu Sangavulu.” 21Aia nogo e tangiloki bâ gana rongo i laoqira “Igira na Tolu Sangavulu” me lia gaqira ida, me tau moa tangiloki na rongona aia vaga tu rongoqira “Tugira na Tolu.”
22Ma Benaia na dalena a Jehoiada ni Kabseel aia goto kesa na mane vaumate tangirongo; maia e naugira danga na aqo malagai, me labumatesikaira goto ruka niqira mane vaumate susuliga bâ igira na Moab. Me kesa dani, tana tagu na bisi loki kalina e puka na snou,11:22 “na snou” Visana tana vera tana tagu na bisi loki na usa e dona ke kakolu, me sere vaga moa na poke kalina e tumu me tsavua na kao popono. maia e ba tsuna i laona kesa na qilu loki me labumatesia kesa na laeone e totu i laona. 23Maia e labumatesigotoa kesa na mane ni Ejipt aia e paquru me katsi sosongo e liusia e sangava kesa na katsina, me tangolia kesa na bao loki sosongo. Ma Benaia e tû me labuginia nina tila, me lauligitsakua nina bao tania na limana na mane ni Ejipt, me labumatesiginia. 24Igirani nogo nina aqo malagai a Benaia aia e kesa i laoqira “Igira na Tolu Sangavulu.” 25Aia e tangiloki rago na rongona i laoqira “Igira na Tolu Sangavulu,” me tau moa tangirongo loki vaga tu rongoqira “Tugira na Tolu.” Ma David e moloa a Benaia ke taovia vanigira nina mane matali segeni.
26-47Igirani nogo na soaqira na mane vaumate tavosi e tangiloki goto na rongoqira:
a Asahel, na kulana a Joab,
ma Elhanan na dalena a Dodo ni Betlehem,
ma Samot ni Harod,
ma Heles ni Pelet,
ma Ira na dalena a Ikes ni Tekoa,
ma Abieser ni Antot,
ma Sibekai ni Husa,
ma Ilai ni Aho,
ma Maharai ni Netopa,
ma Heled na dalena a Baana ni Nitopa,
ma Itai na dalena a Ribai ni Gibea tana Benjamin,
ma Benaia ni Piraton,
ma Hurai ni tana poi ligisana i Gaas,
ma Abiel ni Arba,
ma Asmavet ni Bahurim,
ma Eliaba ni Saalbon,
ma Hasem ni Gison,
ma Jonatan na dalena a Sagee ni Harar,
ma Ahiam na dalena a Sakar ni Harar,
ma Elipal na dalena a Ur,
ma Heper ni Mekera,
ma Ahija ni Pelon,
ma Hesro ni karmel,
ma Naarai na dalena a Esbai,
ma Joel na kulana a Natan,
ma Mibar na dalena a Hagri,
ma Selek ni Amon,
ma Naharai ni Beerot, aia nina mane kalagai sagore a Joab,
mi kaira a Ira ma Gareb ni Jatir,
ma Uria na Het,
ma Sabad na dalena a Alai,
ma Adina na dalena a Sisa aia e kesa na tinoni lokiloki tana puku konina a Ruben, kolua nina alaala segeni ara tolusangaulu na mane vaumate
ma Hanan na dalena a Maaka,
ma Jossapat ni Mitan,
ma Usia ni Astera,
mi kaira a Sama ma Jeiel ni Aroer, kaira na dalena a Hotam,
mi kaira a Jediael ma Joha ni Tis, kaira na dalena a Simri,
ma Eliel ni Mahava,
mi kaira a Jeribai ma Josavia kaira na dalena a Elnaam,
ma Itma ni Moab,
mi tugira a Eliel, ma Obed ma Jaasiel ni Soba.
12Igira na Benjamin Ara Ida Na Tsarimurina a David
1Mi kalina a David e totu moa i Siklag, i tana aia e ba tsogopoi tania a Saul na taovia tsapakae, mara mai saikolua a David danga na mane vaumate ara dona sosongo na aqona na vailabu. 2Igira nogo na tinoni tana puku konina a Benjamin, maia nogo nina puku goto a Saul. Igira ara dona sosongo na gini vanavana na pipili ma na gini tatai na kurupaqala atsa moa tana limaqira madoa se na mauliqira. 3-7Migira ara totu i vavana ka niqira tagao a Ahieser ma Joas, kaira na dalena a Semaa ni Gibea.
Migirani nogo na soaqira na mane vaumate girani:
kaira a Jesiel ma Pelet, kaira na dalena a Asmavet,
mi kaira a Beraka ma Jehu ni Anatot,
ma Ismaia ni Gibeon, aia e kesa na mane vaumate tangirongo maia e kesa goto na ida i laoqira “Igira na Tolu Sangavulu,”
mi tugira a Jeremia, ma Jahasiel, ma Johanan ma Josabad ni Gedera,
mi tugira a Elusai, ma Jerimot, ma Bealia, ma Semaria, ma Sepatia ni Harip,
mi tugira a Elkana, ma Isia, ma Asarel, ma Joeser ma Jasobeam tana duli konina a Kora,
mi kaira a Joela ma Sebadia ni Gedor, kaira na dalena a Jeroham.
Igira Na Gad Ara Tsarimurina a David
8Igira nogo na soaqira igira na mane vaumate tangirongo mara dona sosongo na aqona na vailabu ara talu tana puku konina a Gad, mara mai sai alaala kolugira nina mane vaumate a David, kalina aia e totu moa tana tetena ara barapoliginia na vatu i laona na kaomate. Na mane girani ara dona sosongo na gini vailabu na tako ma na bao, ma na mataqira ara rerei mataguniga vaga moa ti na laeone, mara ulo tsaku sosongo vaga moa ti na dia12:8 “na dia” E kesa na vatana na omea tuavati ara totu tana vera bisi i mao mara dona na tsotso kakai dou kalina ara ulo. ara mauri tana vungavunga. 9-13A Eser aia nogo gaqira taovia, me tsarimai a Obadia, me tsari a Eliab, me tsari a Mismana, me tsaria a Jeremia, me tsari a Atai, me tsari a Eliel, me tsari a Johanan, me tsari a Elsabad, me tsari a Jeremia, me tsari a Makbanai.
14Visana vidaqira na mane girani tana puku konina a Gad ara taovia oka nogo vanigira kesa toga na mane vaumate, migira visana ara vasini moa ara taovia vanigira kesa sangatu na mane vaumate. 15Mi laona na kesanina vula kesa tana ngalitupa, tana tagu kalina na Kô Jordan e tave loki na obona me tsipudato ruka tabana na kabikabina na kô, migira ara savu bâ, mara tsiatsogoligira na tinoni ara totu tana poina na kô kaira sui tabana i longa mi tasi.
Igira Na Benjamin ma na Juda Ara Tsarimurina a David
16Me kesa dani, migira kesa na alaala na mane tana puku ka koniqira a Benjamin ma Juda ara tû mara ba laba i konina a David tana tetena tana ara barapoliginia na vatu. 17Ma David e ba valalegira me tsaria, “Ti vaga igamu amu mai ieni rongona amu ngao mananâ kamu sangaau inau, me dou, au tamivanigamu kamu mai totu kolugami ieni. Me ti vaga igamu amu padâ na peroaqu moa inau ma na livuaqu i limaqira gaqu gala, me atsa moa ti inau kau tau tovoa na sekoliamui igamu, maia nogo niqira God na mumuada sauba ke donaginia na omea amu naua, maia nogo ke kedegamu.”
18Ma nina Tarunga Tabu God e totuvia kesa vidaqira, a Amasai na soana, aia nogoria sauba ke lia niqira taovia tagao i muri “Igira na Tolu Sangavulu”, maia e goko dato me tsaria,
“!A David na dalena a Jese, igami nimu tinoni nogo igoe!
!Na rago ke totu i konimu igoe, mi koniqira sui igira ara sangago!
Rongona God nogo e sanga tabana konimu igoe.”
Mi tana ma David e soalakagira, me molokaegira kara lia na mane tagao tana nina alaala na mane vaumate.
Igira Na Manase Ara Tsarimurina a David
19Migira visana na mane vaumate tana puku konina a Manase ara ba sanga tabana konina a David kalina a David e alavano kolugira na Pilistia na ba vailabu koluana a Saul na taovia tsapakae. Maia David e tau moa vano sangagira na Pilistia, rongona niqira taovia tsapakae na Pilistia ara matagunia ke tau tû me ke sauligigira bâ i limana a Saul aia nina taovia tana idana, me vaga ia migira ara raia ke visutugua i Siklag. 20Migirani nogo tu soaqira na mane vaumate ni Manase ara tu ba sangâ tabana konina a David kalina aia e visumai i Siklag: tugira nogo a Adna, ma Josabad, ma Jediael, ma Mikael, ma Josabad, ma Elihu, ma Siletai. Mi Manase tu veraqira nogo, tugira sui na mane tugirani ara tu taovia tagao vanigira nogo na toga na mane vaumate. 21Mi kalina ia, mi tugira ara tu mai sanga tabana konina David maia e molotugira kara tu taovia tagao vanigira nina mane vaumate, rongona tugira sui lakalaka ara tu mane vaumate tangirongo nogo. Mi muri bâ, kalina a David e lia nogo na taovia tsapakae tana Israel, mi tugira ara tu lia goto niqira taovia na alaala na mane vaumate ni Israel. 22Me varangi nogo ke pipi na dani, ara tau kuti na mai visana goto na mane tavosi, mara sangasage i laona nina alaala na mane vaumate a David, me vaga ia, me tau lelê oka mara danga sosongo bâ nina mane vaumate.
Na Mamarena na Dangaqira Nina Mane Vaumate a David
23-37Mi kalina a David e totu moa i Hebron, mara danga sosongo na mane vaumate tamani sagore ara sangasage tana nina alaala na mane vaumate, gana kara sanga na molokaeana a David ke lia na taovia tsapakae na tuguna a Saul, vaga e vekenogoa na Taovia. Iani nogo e vaga na dangaqira:
Igira na Juda: ara 6,800 na mane ara tamani tovu niqira tako ma niqira bao;
migira na Simeon: ara 7,100 na mane vaumate ara dona dou na aqona na vailabu;
migira na Levi: ara 4,600 na mane;
migira ara tsarimurina a Jehoiada na kukuana a Aaron: ara 3,700 na mane;
migira na kamana a Sadok aia kesa na mane vaolu e malagai sosongo tana vailabu: ara 22 na tinoni lokiloki;
migira na Benjamin, nina puku segeni nogo a Saul: ara 3,000 moa na mane, rongona na dangana na tinoni tana puku konina a Benjamin ara totukakai moa i konina a Saul;
migira na Epraim: ara 20,800 na mane ara tangirongo i laona niqira duli segeni;
migira na Manase Tabana i Tasi: ara 18,000 na mane ara viligira kara ba molokaea a David ke lia na taovia tsapakae;
migira na Isakar: ara 200 na mane tagao, kolugira na mane ara totu i vavana niqira tagao ma na mane tagao girani ara dona dou na pedeana na omea kara naua igira na Israel, mi tana tagu gua e dou vania na nauana;
migira na Sebulun: ara 50,000 na mane ara lavu nogo tana vailabu, mara tamaninogoa pipi moa vatana na vangana na vailabu mara padakuti matena moa na sangaana a David;
migira na Naptali: ara 1,000 na taovia tagao kolugira 37,000 na mane ara tangolinogoa niqira tako ma niqira bao;
migira na Dan: ara 28,600 na mane ara dona dou na aqona na vailabu;
migira na Aser: ara 40,000 na mane ara totu vangarau matena na vano tana vailabu;
Mi tugira na puku tabana i longa na Kô Jordan, tugira na Ruben, ma na Gad ma na Manase Tabana i Longa: ara 120,000 na mane ara dona na gini aqo pipi moa vatana na vangana na vailabu.
38Igira sui lakalaka na mane vaumate girani ara totu vangarau matena na vailabu, ara vano sui i Hebron, rongona ara padakuti matena nogo kara molokaea a David ke lia na taovia tsapakae kaputia na Israel popono. Migira sui lakalaka na tinoni tavosi goto tana Israel e kesa moa niqira papada laka a David ke lia niqira taovia tsapakae. 39Mara ba totu kolua a David i laona e tolu na dani, mi tana ara gania na mutsa mara inuvia na inu ara vangarau manogatinogoa vanigira igira gaqira verakolu. 40Me tu bâ i vava vasau tana puku tu koniqira a Isakar, ma Sebulun ma Naptali, na tinoni ara mai kolugira na asi, ma na kamelo, ma na buluka ara lutsangigira na mutsa, vaga na pulaoa, na gola, ma na vuana uaeni makede, ma na uaeni gana na inu ma na oela na olive. Mara adimaigotoa na buluka ma na sipi agana na matesiana ma na ganiana, rongona e laba na magemage loki i laona na kao popono ni Israel.
13Ara Adiligia na Bokisi na Taso Tania i Kiriat Jearim
1A David na taovia tsapakae e gokovigira sui nina mane sasanga, igira ara tagao vanigira kesa toga na mane vaumate migira goto ara tagao vanigira kesa sangatu na mane vaumate. 2Mi muri maia e tsarivulagi vanigira na toga sui tana Israel vaga iani, “Ti vaga igamu kamu tami, me ti vaga goto nina kili aia na Taovia nida God, me dou ti igita ka molovanogira visana na mane adigoko kara bâ i koniqira na kulada ara totu i laona na Israel popono, mi koniqira goto na manetabu ma na Levite ara totu tana veraqira, ma kara raigira kara mai sai sui ieni kolugita. 3Mi muri ti sauba ka vano ma ka ba adimaia nina Bokisi na Taso God, rongona igita a tau saikesa padalokia tû tana tagu e taovia tsapakae a Saul.” 4Me laoqira sosongo na tinoni na rongomiana na goko vaga ia, migira sui ara tabedoua.
5Me vaga ia, maia David e soasaigira sui lakalaka na toga ni Israel, tû tana votavota na kao ni Ejipt tabana i ata, me tsau tana Matana Sautu i Hamat tabana i vava, gana kara vano i Kiriat Jearim ma kara ba adivisumaia i Jerusalem nina Bokisi na Taso na Taovia. 6Ma David e aligiri kolugira nina toga mara vano i Baala, aia nogo i Kiriat Jearim tana butona kao ni Judea, na ba adiana nina Bokisi na Taso God, i tana e totu na asana na Taovia aia e totukae tana sasana i kelana na rapoqira na angelo. 7Mara ba laba tana valena a Abinadab, mara adirutsumia na Bokisi na Taso, mara molokaea i kelana kesa na terê vaolu. Mi kaira a Usa ma Ahio ara ka matalia na terê ia, 8maia David migira na toga sui ara gagavai tana susuligaqira popono gana na tsonikaeana God. Ara lilinge, mara taigira niqira itai tatangi, ma niqira kuku, mara rekesia niqira tsetsê mara uvia niqira tavuli.
9Mi kalina igira ara maitsau i Kidron tana nauna ara labududusi uiti, migira na buluka ara raqa terê ara tubulagi, maia Usa e tsaku e tabekaea na Bokisi na Taso ke tau puka. 10Mi tana tagu tsotsodo nogo ia, ma na Taovia e kore loki vania a Usa me labumatesia rongona aia e tavongani pele bâ na Bokisi na Taso. Ma Usa e mate nogo i tana i matana God 11maia nogoria na rongona ti e tû tana tagu ia me bâ mara soaginia tana nauna ia i Peres Usa.13:11 Na soa Peres Usa tana goko Hibru e vaga moa ‘gana kede a Usa.’ Me gini momosa sosongo tobana a David rongona na Taovia e kedea a Usa tana nina kore loki.
12Mi muri, ma David e matagunia God me tsaria, “?Sauba kau naukoeguania inau ti kau adi bâ na Bokisi na Taso kalina e vaga ia?” 13Mi tana, ma David e padâ ke tau goto adivanoa na Bokisi na Taso i Jerusalem. Me ba moloa moa tana valena kesa na mane ni Gat a Obed Edom na soana. 14Mi tana nogo e totu na Bokisi na Taso i laona e tolu na vula, maia na Taovia e vangalaka sosongo vania nina tamadale a Obed Edom migira sui na omea aia e tamanina.
14Na Omea e Naua a David i Jerusalem
1A Hiram na taovia tsapakae ni Tire e molovanogira visana nina mane adigoko i konina a David, me sauvania danga na kubuna na gai na sida,14:1 “na gai na sida” E kesa vatana na gaikakai e dato tana vungavunga i Lebanon, mara gini aqo sosongo tana logovale rongona e tau dona na tola tsaku. kolugira goto na mane katsuvatu ma na kamoda, kara ba logovania kesa na valena. 2Mi tana, maia David e dona gadovia laka na Taovia nogo e molovania ke taovia tsapakae kaputia na Israel popono, me naua me gini paladato bâ gana susuliga tana rongoqira nina tinoni segeni nogo aia.
3Mi tana i Jerusalem, ma David e taugagira goto visana na daki, me tamanigira goto visana na dalena mane ma na dalena daki. 4Migirani nogo na soaqira na dalena ara botsa vania a David i Jerusalem: a Samua, ma Sobab, ma Natan, ma Solomon, 5ma Ibhar, ma Elisua, ma Elpelet, 6ma Noga, ma Nepeg, ma Japia, 7ma Elisama, ma Beeliada, ma Elipelet.
A David e Tuliusigira na Pilistia
8Mi kalina igira na Pilistia ara rongomia laka ara molokaea a David me lia nogo na taovia tsapakae kaputia na Israel popono, migira ara tû mara aligiri na ba tangoliana. Mi kalina a David e rongomi vaganana ia, maia e tû kolugira nina mane vaumate me ba tsodogira i sautu. 9Migira na Pilistia ara tsau nogo tana Poi ni Repaim mara labunovotigira na tinoni ni tana, mara tuturiga na komiaqira niqira omea levo. 10Ma David e veisuâ God, “?Egua, laka igoe o ngaoa kau baginigira na Pilistia? ?Me laka sauba ko mologira i limaqu inau?”
Ma na Taovia e gokovisu vania me tsaria, “!Eo, ko baginigira! !Inau nogo sauba kau mologira i limamu igoe!”
11Mi tana, ma David e baginigira i Baal Perasim14:11 Na soa Baal Peresim tana goko Hibru e vaga moa ‘Na Taovia na Liutsapatugu.’ me tuliusigira. Me tsaria, “Na Taovia e aqoginiau inau ti au gini liu tsapatugu i levugaqira gaqu gala vaga moa kalina e tave na obo.” Aia na rongona ti ara soaginia tana nauna ia i Baal Perasim. 12Mi kalina igira na Pilistia ara viri tsogo migira ara mololegira i tana na titinonina niqira god peropero, ma David e ketsaligira nina tinoni kara kodogira sui.
13Me tau oka i muri, migira na Pilistia ara visumaitugua tana poina, mara tuturiga tugua na komiana niqira omea levolevo na tinoni. 14Me kesa goto kalina a David e lavegoko tugua i konina God, ma God e tsarivania, “Laka na baginiaqira ieni. Ko poli bâ i tabana, mi tana ko vangaraua na baginiaqira i ligisaqira na gai na balsam14:14 “na gai na balsam” E kesa vatana gai e dato tana kaomate me kokonaga na gaina, ma na oela tana vuana ara gini tali tinoni. ara totu tana. 15Mi kalina ti ko rongomia na kukutuna na tuaqira na alaala loki ara mamai i kelaqira na gai girani, mi tana ti igoe ko tû mo ko baginigira na Pilistia, rongona inau nogo sauba kau idaida vanigo na tuliusiaqira na alaala popono na mane vaumate ni Pilistia.” 16Ma David e naua moa na omea vaga God e ketsaliginia, me gini tangomana na tsiavisuaqira na Pilistia tû i Gibeon me tsau bâ i Geser. 17Ma gana tangirongo a David e kuvia pipi sui na nauna, maia na Taovia e naua, migira na puku tavosi sui ara gini mataguni sosongolia a David.
15Ara Vangarautugua na Adimaiana na Bokisi na Taso
1A David e logogira visana na vale vanisegenia i laona na Verana a David. Maia e vangaraugotoa kesa na nauna tana ke totu nina Bokisi na Taso God, me molokaea kesa na valepolo vania i tana. 2Mi muri maia e tsaria, “Igira moa na Levite niqira aqo kara kalagaia na Bokisi na Taso rongona igira lelê moa na Taovia e viligira nogo kara kalagaia ma kara aqo sailagi vania aia.” 3Me vaga ia, ma David e soagira na toga ni Israel kara saimaitugua i Jerusalem gana kara gini adimaia na Bokisi na Taso tana nauna aia e vangarau manogativaninogoa. 4Mi muri, maia e soamaigira goto na kukuana a Aaron migira na Levite. 5-10Igirani nogo na soaqira na manetabu ma na Levite ara sanga mai tana sai ia:
ara 120 tana duli konina a Kohat, kolua a Uriel gaqira ida;
mara 220 tana duli konina a Merari, kolua a Asaia gaqira ida;
mara 130 tana duli konina a Gerson, kolua a Joel gaqira ida;
mara 200 tana duli konina a Elisapan, kolua a Semaia gaqira ida;
mara 80 tana duli konina a Hebron, kolua a Eliel gaqira ida;
mara 112 tana duli konina a Usiel, kolua a Aminadab gaqira ida.
11Ma David e soamaikaira na manetabu a Sadok ma Abiatar, kolutugira goto ono na Levite tugirani: a Uriel, ma Asaia, ma Joel, ma Semaia, ma Eliel ma Aminadab. 12Ma David e tsarivanigira na Levite, “Igamu nogo gaqira ida igira tana duli na Levite. E dou igamu migira sui goto gamui sasanga na Levite tavosi kamu lesomale gana ke gini ulagamui na adimaiana nina Bokisi na Taso na Taovia na God ni Israel tana nauna inau au vangarau manogativaninogoa. 13Ma na rongona igamu na Levite amu tau bâ kamu sanga na kalagaiana na Bokisi na Taso tana idana, te na Taovia nida God e kedegami igami tana rongona ami tau samasama dou vania vaga e ulagana kami naua.”
14Mi muri, migira na manetabu ma na Levite ara vangarau dou segeniqira gana na kalagaimaiana nina Bokisi na Taso na Taovia God ni Israel. 15Migira na Levite ara kalagaiginia ruka na gai katsi tana kokoveqira, vaga nogo na Taovia e ketsalinogoa tana mangana a Moses.
16Ma David e ketsaligira gaqira ida na Levite kara viligira goto kara visana na Levite kara linge ma kara gini sinagi niqira itai tatangi ma kara rekesia niqira tsetsê tana magemage. 17-21Me vaga ia, migira ara viligira na Levite girani kara rekesia niqira tsetsê: a Heman na dalena a Joel, ma Asap na dalena a Berekia ma na kamana a Joel, ma Etan na dalena a Kusaia tana duli konina a Merari. Mara viligira goto na Levite girani kara sangagira ma kara taia niqira itai tatangi e tangi tsepi: igira nogo a Sekaria, ma Jaasiel, ma Semiramot, ma Jehiel, ma Uni, ma Eliab, ma Maaseia ma Benaia. Mara viligira na Levite girani kara taia na itai tatangi e tangi maququ: a Matitia, ma Elipelehu, ma Mikneia, ma Asasia mi kaira na mane matali vale tabu, kaira a Obed Edom ma Jeiel.
22Rongona aia Kenania e dona sosongo na linge ti ara vilia aia ke lia gaqira ida igira na alaala na Levite tana linge. 23-24Mara vilikaira a Berekia ma Elkana, kolukaira goto a Obed Edom ma Jehia kara tu matalia na Bokisi na Taso. Mara vilitugira goto na manetabu tugirani kara uvia na tavuli i matana na Bokisi na Taso: tugira nogo a Sebania, ma Josapat, ma Netanel, ma Amasai, ma Sekaria, ma Benaia ma Elieser.
Ara Adivanoa na Bokisi na Taso i Jerusalem
25Mi tana, ma David migira na tinoni lokiloki tana Israel ma gaqira taovia na mane vaumate, ara vano sui tana magemage loki tana valena a Obed Edom kara ba adia na Bokisi na Taso. 26Mara gini kodoputsa vitu na buluka mane me vitu na sipisipi, gana God ke sangaginigira na Levite kalina kara kalagaia na Bokisi na Taso. 27Ma David e sagelia na polo vovosi laka, migira sui goto ara linge maia goto a Kenania gaqira ida, migira sui goto na Levite ara kalagaia na Bokisi na Taso, igira sui ara sagelia na polo sere laka. Ma David e sageligotoa kesa na epod.15:27 “na epod” Aia e kesa na vatana na polo e sagelia na manetabu.28Mi tana migira sui lakalaka na Israel ara tsarimurina na Bokisi na Taso vano i Jerusalem, mara gugu dato tana magemage, mara uvi tavuli, mara rekesia niqira tsetsê, mara taigotoa niqira itai tatangi.
29Mi kalina ara adisagea na Bokisi na Taso i laona na verabau ia, maia ko Mikal na dalena a Saul e totu i valena me morotsuna bâ tana ovaovana na bisi me morosia a David na taovia tsapakae e gagavai me tsipudato tana magemage, ma ko Mikal e parâ na mumuta na reiana.
161Migira ara adia na Bokisi na Taso mara ba moloa tana sasana i laona na valepolo i tana aia David e vangarau manogativaninogoa. Mi muri, mara savorigira vania God na savori-kodokodo ma na sausau tangomana na tinoni kara ganipatâ na turina. 2Mi kalina a David e savorigira sui nogo na kodoputsa, maia e tû, me tabugira na tinoni tana asana na Taovia, 3me tuvaria na mutsa vanigira sui. Pipi na mane ma na daki ni Israel ara tango kesa sivona bredi, me kesa na paparina na velesina buluka kodokodo, me visana na vuana uaeni makede.
4Ma David e viligira visana na Levite kara totu sailagi i matana na Bokisi na Taso ma kara tau kuti na samasama vaniana na Taovia na God ni Israel, ma na soadouana ma na tsonikaeana. 5Me vilia a Asap ke lia gaqira ida, ma Sekaria gana sasanga. Mi tugira a Jeiel, ma Semiramot, ma Jehiel, ma Matitia, ma Eliab, ma Benaia, ma Obed Edom ma Jeiel kara tu taigira na itai tatangi. Ma nina aqo a Asap ke rekesia na tsetsê, 6mi kaira a Benaia ma Jahasiel na mane tabu kara ka uvisailaginia na tavuli i matana na Bokisi na Taso. 7Mi tana dani nogo ia ma David e mologinia a Asap migira gana sasanga na Levite tavosi kara tagaovia na linge na tsonikaeana na Taovia.
Na Linge na Tsonikaeana na Taovia
(Linge 105:1-15; 96:1-13; 106:1, 47-48)
8Soadoua na Taovia, katevulagia gana loki tsapakae;
tsarivanigira na puku tavosi sui na omea aia e naugira.
9Linge na tsonikaeana na Taovia;
katevulagigira na omea dou sui aia e naugira nogo.
10!Ka gini mage loki igita tana rongona igita nina tinoni nogo aia!
11Igita ka ba laba i konina na Taovia rongona aia ke sangagita;
ma ka totu sailagi i matana.
12-13Igamu na kukuana a Jakob aia nina maneaqo na Taovia,
migamu goto na kukuana a Israel na mane aia nogo God e vilia,
kamu padatugugira na valatsatasa loki God e aqosigira,
ma nina pedelaka aia e naua.
14Na Taovia aia nogo nida God;
ma nina ketsa ara kalegira na tinoni sui tana barangengo popono.
15Kamu laka na padaleana na vaitasogi God e naua kolugita,
maia e naua gana ke totu kalavata saviliu,
16aia nogo na vaitasogi e naukolua a Abraham
ma nina veke e nauvania a Isaak.
17Na Taovia e naua kesa na vaitasogi kolua a Jakob,
ma na vaitasogi ia sauba ke totu kalavata saviliu.
18Maia e tsarivania, “Inau sauba kau sauvanigo na kao ni Kanaan,
maia sauba ke lia nimu tamani segeni.”
19Igira nina tinoni God e tsaurae lê na dangaqira,
mara labavô i laona na kao ni Kanaan.
20Ara liu bamai moa tû kesa tana vera mara ba kesa tana vera tavosi,
me tû tana verana kesa na taovia tsapakae, mara bâ i konina kesa segeni.
21Mi tana tagu popono ia, ma God e tau tamivania ke kesa ke bingi sekoligira;
maia e parovatavigira na taovia tsapakae me tsarivanigira,
22“Kamu laka na sekoliaqira igira niqu tinoni inau au viligira;
ma kamu laka saikesa goto na peleaqira igira niqu propete.”
23!Linge vania na Taovia igamu na momoru taligu!
Pipi dani kamu katevulagia laka aia nogo e maurisigita.
24Katevulagia gana loki tsapakae vanigira na puku sui pipi tana vera,
ma kamu turupatuna vanigira na toga sui na omea loki aia e naugira.
25Na Taovia e loki tsapakae, me ulagana sosongo nomoa igita ka tsonikaea;
aia nogo igita ka kukuni loki tania liusigira bâ na god tavosi sui.
26Ma niqira god igira na puku tavosi sui na nununa lê moa na gai ara katsua,
maia moa nida Taovia igita aia nogo e vusâ na baragata.
27Na Taovia e loki tsapakae me tangiloki na rongona;
na susuligana aia ma na magemage e dangali poponoa nina Vale Tabu.
28Tsonikaea na Taovia igamu na toga sui tana barangengo,
tsonikaea gana loki tsapakae ma na susuligana.
29Soadatoa na asana tabu na Taovia;
adimaia nimui sausau ma kamu sage i laona nina Vale Tabu,
30migamu sui tana barangengo popono kamu gariri i matana aia.
Aia nogo e vaturikakaia na barangengo, me utu goto ke ratsu bamai.
31!Kara ka magemage kaira na barangengo ma na masaoka!
Katevulagi vanigira na puku tavosi sui laka God aia segeni moa e taovia tsapakae.
32Kara viri leleo takuti na tasi loki me pipi sui lakalaka na omea ara mauri i laona;
ma kara magemage igira na uta ma na omea sui i laoqira.
33Migira sui goto na gai i laona na legai atsi kara gudato tana magemage i matana na Taovia,
kalina aia ke mai na tagaoviana na barangengo.
34Soadoua na Taovia rongona aia segeni e dou sosongo;
ma nina galuve e totu saviliu.
35Kamu tsarivania, “God nimami vagamauri, ko maurisigami,
ko adisaigami mo ko adivisugami tania na totu i laoqira na puku tavosi,
rongona kami gini soadougo,
ma kami tsonikea na asamu tabu.”
36!Tsonikaea na Taovia na God ni Israel!
!Tsonikaea kalina nogo ia mi tana dani ma na dani!
Mi tana migira na toga sui ni Israel ara tsaria, “Amen” mara tsonikaea na Taovia.
Na Samasama i Jerusalem mi Gibeon
37Ma David e moloa a Asap kolugira gana sasanga igira na Levite tavosi kara ida kalavata tana aqona na samasama ara naua pipi dani i Jerusalem tana nauana i tana e totu na Bokisi na Taso. 38Me mologotoa a Obed Edom na dalena a Jedutun kolugira ara ono sangavulu alu na mane tana nina duli segeni nogo ia kara sangagira. Mi kaira a Hosa ma Obed Edom ara ka tagaovia na aqona na mataliaqira na matsapakapu.
39Maia Sadok na manetabu kolugira gana sasanga na manetabu tavosi ara totu moa i Gibeon, mara tagaovia na aqona na samasama vania na Taovia tana nauna na mani samasama i tana nogo. 40Me pipi tana matsaraka ma na ngulavi niqira aqo nogo igira kara kodogira na savori-kodokodo i kelana na belatabu, taoninogoa na omea ara marea tana papi na Ketsa aia na Taovia e sauvanigira na Israel. 41Mi kaira a Heman ma Jedutun ara ka totu kolugira goto i tana, kolugira goto visana ara viligira nogo gana kara lingena na tsonikaeana na Taovia rongona nina galuve vo oli. 42Mi kaira nogo a Heman ma Jedutun ara ka tagaovigira igira ara uvi tavuli migira ara rekesi tsetsê, migira sui goto na omea tatangi tavosi ara gini sinagi kalina ara lingena na tsonikaeana God. Migira na mane tana duli konina a Jedutun igira nogo ara tagaovia na aqona na mataliaqira na matsapakapu.
43Me sui ia, migira sui ara visutugua i veraqira, maia David goto e vano i valena me ba totu kolugira nina tamadale.
17Nina Goko a Natan Vania a David
1Me kesa dani kalina a David na taovia tsapakae e vasini moa totuvia na valena vaolu, e mologoko vania a Natan na propete ke mai laba i konina me tsarivania, “!Ko reia, inau au totuvia na vale dou ara aqosiginia na gai na sida, ma nina Bokisi na Taso God e totu moa i laona kesa na valepolo lê!”
2Ma Natan e tsarivania a David, “Ko bâ mo ko naua moa na omea o padâ i tobamu, rongona God nogo e totu kolugo.”
3Bâ, mi tana bongi nogo ia, ma God e gokovania a Natan me tsaria, 4“Ko bâ, mo ko tsarivania a David niqu maneaqo, laka inau na Taovia au tsarivania, ‘E tau igoe ko logovaniau na valequ i tana kau totu inau. 5E tû tana tagu inau au laumaurisigira na tinoni ni Israel tania i Ejipt me tsaumai i dani eni, minau au tau nogo totu i laona sa valetabu dou, au totu moa i laona na valepolo lê, mau dulikolugira pipi tana nauna igira ara vano. 6Me pipi tana nauna inau au vano kolugira na tinoni ni Israel, minau au tau goto vati veisua ke kesa vidaqira na ida igira inau nogo au viligira, laka na rongona gua ti igira ara tau vati logovaniau moa sa valetabu kara aqosiginia na gai na sida.’
7“Me vaga ia, migoe ko ba tsarivania a David niqu maneaqo laka inau nogo na Taovia Susuliga Sosongo au tsarivania, ‘Inau nogo au adiligigo igoe tania nimu aqo na reitutugu sipi i laona na poina, mau molokaego ko tagaovigira niqu tinoni ni Israel. 8Minau au totu kolugo igoe pipi sui tana nauna i tana o liu, mau tuliusigira pipi sui gamu gala kalina igoe o maimai moa i sautu. Me sauba inau kau naua me ke tangiloki bâ na rongomu liusigira na taovia loki sui tana barangengo. 9-10Mau vilinogoa na nauna i tana kara totu igira niqu tinoni ni Israel, me sauba kara totu kalavata i tana, me ke tau goto tangomana ke kesa ke bingi sekoligira, me utu goto kara maiginigira igira na tinoni vanga tangopeke seko vaga ara naua i sau. Inau au vekevanigo laka sauba kau tuliusigira sui gamu gala ma kau sauvanigo kara danga na kukuamu. 11Mi kalina ko mate igoe ma kara qilugo kolugira na mumuamu, minau sauba kau molokaea kesa na dalemu segeni nogo igoe ke lia na taovia tsapakae, me sauba kau vaturikakaia na verana. 12Maia nogoria sauba ke logovaniau kesa niqu valetabu, minau sauba kau naua ma nina puku taovia tsapakae sauba ke totu saviliu na dani ma na dani. 13-14Inau sauba kau lia na tamana, maia sauba ke lia na dalequ. Me utu goto kau mololea na galuveana aia, vaga au nauvania a Saul, aia inau au molotsunâ rongona igoe ko lia na taovia tsapakae. Minau sauba kau moloa ke tagaovigira sailagi niqu tinoni ma na veraqu. Ma nina puku taovia sauba e utu goto ke sui.’ ”
15Ma Natan e turupatuna vania a David pipi sui lakalaka na omea aia God e katevulagi vania.
A David e Soadoua God
16Mi tana ma David na taovia tsapakae e tû me ba sage i laona na Valepolo i tana e totu na Taovia, me totupuka i lao me nonginongi vaga iani, “Taovia God e tau saikesa ulagaqu inau migira niqu tamadale na omea igoe o naunogoa vaniau. 17Mi kalina ia, migoe o naugira danga bâ goto na omea; mo naugotoa na veke kalegira na kukuaqu i laona ke danga na ngalitupa ke mai. Migoe Taovia God, o goko vaniau vaga moa ti inau na tinoni loki sosongo. 18!Ma nagua goto tangomana kau tsarivanigo! Igoe o donadouginiau nogo inau nimu maneaqo, migoe o padalokiau nomoa. 19Igoe nogo o kilia mo tamia na nauvaniaqu na omea sui girani, mo tsarivulagi vaniau laka sauba ke koegua gaqu loki tsapakae tana tagu ke mai i muri. 20Taovia, e tagara goto ke kesa ke atsa kolugo igoe; migami ami dona sailagi nogo laka igoe segeni moa o God. 21Me tagara goto ke kesa na puku tavosi i lao eni ke atsa kolua na Israel, aia nogo igoe o laumaurisia tania na totu tseka, mo naua migira ara lia nimu tinoni segeni nogo igoe. Me gini tangiloki gamu rongo tana barangengo popono rongona na omea loki ma na omea ganataga sui igoe o naunogoa vanigira. Igoe o laumaurisigira nimu tinoni tania i Ejipt, mo tsialigigira na puku tavosi sui kalina igira nimu tinoni ara maimai moa i sautu. 22Migoe nogo o viligira na Israel kara lia sailagi nimu tinoni segeni, migoe Taovia o lia nogo niqira God.
23“Mi kalina ia Taovia God, ko manali sailaginia na veke igoe o naua tana rongoqu inau migira na kukuaqu, mo ko naugira na omea sui igoe o tsarinogoa laka sauba ko naua. 24Me sauba ke tangiloki na rongomu, migira na tinoni kara tsari sailaginia, ‘Na Taovia Susuliga Sosongo aia nogo e God kaputia na Israel popono.’ Me sauba ko naua ma niqu puku taovia tsapakae ke totukakai na dani ma na dani. 25Inau au gini malagai na nonginongi vanigo vaga iani igoe niqu God, rongona igoe nogo o saulabatigira vaniau inau nimu maneaqo na omea sui girani, mo tsarinogoa vaniau laka sauba ko naua migira na kukuaqu sauba kara tangolidatoa babâ na aqo taovia tsapakae. 26Igoe Taovia o God, migoe nogo o vekevaniau na omea dou sosongo vaga girani. 27Minau au nongigo igoe ko vangalaka vanigira na kukuaqu gana kara gini totudou sailagi i matamu igoe. Eo Taovia, igoe o vangalaka nogo vanigira, ma nimu vangalaka sauba ke totu sailagi i koniqira na dani ma na dani.”
18Gana Tangomana a David Tana Vailabu
1Me kesa tana tagu i muri, ma David e baginigira tugua na Pilistia me tuliusigira. Me tangolia niqira verabau ni Gat migira sui goto na vera tetelo ara totu polipolia. 2Maia e tuliusigira goto na Moab, mara totu i vavana nina tagao mara tsonitakesi vania.
3Mi muri, ma David e baginia a Hadadeser na taovia tsapakae ni Soba tana Siria, varangisia na butona kao ni Hamat, rongona tana tagu ia a Hadadeser e ngaoa laka ke tangolia na butona kao popono e totu ligisana na uluna na Kô Euprates. 4Ma David e ba laugira kesa na toga nina terê, me tangoligira vitu toga na mane sage tana ose, mara rukapatu toga na mane vaumate ara liu lê i lao. Maia e tangolivisugira na ose vaga e tugua moa kara raqagira kesa sangatu na terê, me logusigira sui na ose tavosi.
5Mi kalina igira na Siria ni Damaskus ara molovanoa kesa na alaala na mane vaumate kara ba sangâ a Hadadeser na taovia tsapakae, maia David e baginigira goto me labumatesigira ara rukapatu ruka toga na mane. 6Mi muri, maia e mologira nina mane vaumate kara totu babâ i laona niqira butona kao popono igira na Siria, migira goto na Siria ara totu i vavana nina tagao a David mara tsonitakesi vania. Na Taovia nogo e naua maia David e gini susuliga na tuliusiaqira gana gala pipi moa tana nauna. 7Ma David e laugira sui na tako qolumila ara kalagaia igira nina mane sasanga a Hadadeser me adivanogira i Jerusalem. 8Me adigotoa danga na tapalamila i Tibhat mi Kun, kaira ruka na verabau aia nogo a Hadadeser e tagaovi kaputikaira. Mi muri kalina e taovia tsapakae a Solomon maia e gini aqo na tapalamila girani na aqosiginiana na taqi, migira na tuguru loki, ma na vangana tapalamila na Vale Tabu.
9Mi kalina a Toi na taovia tsapakae ni Hamat e rongomia laka a David e tuliusinogoa nina alaala popono na mane vaumate a Hadadeser, 10maia e tû me molovanoa a Joram na dalena ke ba reia a David na taovia tsapakae me ke tsonikaea tana rongona aia e tuliusia a Hadadeser, rongona kaira nogo a Hadadeser ma Toi ara ka vaigalagi mara ka vailabugi danga nogo kalina. Ma Joram e adimai vania a David ngiti vangalaka danga na omea ara aqosiginia na qolumila, ma na siliva, ma na tapalamila. 11Ma David na taovia tsapakae e adigira me balogira sui vania na Taovia, kolugira goto na siliva ma na qolumila aia e laugira tana veraqira na puku tavosi aia e tangoligira sui nogo: i Edom, mi Moab, mi Amon, mi Pilistia mi Amalek.
12Ma Abisai, aia na dalena ko Seruia, e tuliusigira na Edom tana Qou ni Solo me labumatesigira sangavulu alu toga na vidaqira. 13Maia e mologira nina mane vaumate kara totu babâ i laona na Edom popono, migira na tinoni ni tana ara totu i vavana nina tagao a David. Na Taovia nogo e naua maia David e gini susuliga na tuliusiaqira gana gala pipi moa tana nauna.
14Ma David e tagaovi kaputia na Israel popono, me tovoa pipi kalina ke pedegoto me ke pedeatsa vanigira nina tinoni. 15Maia Joab na kulana a Abisai e taovia tagao vanigira na mane vaumate; ma Jehosapat na dalena a Ahilud e reitutugugira na papi tana ara maretsunagira pipi sui na omea ara laba; 16mi kaira a Sadok na dalena a Ahitub ma Ahimelek na dalena a Abiatar ara ka manetabu; ma Seraia aia nogo na mane mamare tana valena na taovia tsapakae; 17ma Benaia na dalena a Jehoiada e taovia vanigira nina mane matali segeni a David, migira na dalena segeni nogo a David na taovia tsapakae ara ka tangolia na aqo loki i vavana na tamaqira.
19A David e Tuliusigira na Amon ma na Siria
1Me kesa tana tagu i muri, ma Nahas na taovia tsapakae ni Amon e mate, maia Hanun na dalena e lia na taovia tsapakae. 2Ma David e tsaria, “Niqu aqo nomoa inau kau sauvulagia niqu tobalaka vania a Hanun, vaga nogo a Nahas na tamana e nauvaniau.” Mi tana, ma David e molovanogira visana nina mane adigoko kara ba i konina a Hanun, ma kara tsarivania laka aia David e gini melu na rongomiana na mateana na tamana.
Mi kalina ara ba tsau i Amon mara ba laba i konina a Hanun na taovia tsapakae, 3migira na tinoni lokiloki ni Amon ara tû mara tsarivania niqira taovia tsapakae, “?Laka o padâ igoe tana rongona nomoa a David e padalokia na tamamu, te aia e molomaigira na mane girani kara mai tsarivanigo laka a David e gini melu na rongomiana na mateana na tamamu? !Tagara saikesa! !Aia e molomaigira ieni gana kara togavia nida kao popono, mi muri ti aia ke mai me ke tangolia!”
4Mi tana, ma Hanun e tangoligira nina mane adigoko a David, me tsaraligia na ngolaqira, me putsikutia na poloqira sagesage gana ngongo na bunguqira, mi muri maia e molovisugira. 5Migira ara gini vangamâ loki sosongo na visutugua i vera. Mi kalina a David e rongomia e laba na omea vaga ia, maia e mologoko bâ vanigira kara ba totu moa i Jeriko, ma kara laka goto na laba visumaitugua i vera poi tsau kalina ke tû tugua na ngolaqira.
6Mi kalina igira na Amon ara reigadovia laka igira nogo ara tsukia te a David e lia gaqira gala, ma Hanun na taovia tsapakae e tû kolugira nina tinoni, mara saua e tolu sangavulu vati na kilo na siliva gana na voli terê migira na mane sage tana terê i koniqira na Mesopotamia i Longa, mi tana veraqira goto igira na Siria i Maaka mi Soba. 7Migira na tolu sangavulu ruka toga na terê kolugira goto nina mane vaumate na taovia tsapakae ni Maaka ara mai mara tototu varangisia i Medeba. Migira sui goto na Amon ara mai talu tana niqira verabau sui mara vangarau matena na vailabu.
8Mi kalina a David e rongomia e laba na omea vaga ia, maia e tû me molovanoa a Joab migira na alaala popono nina mane vaumate kara baginigira. 9Migira na Amon ara ala tsunamai mara ba tû tana sasaqira babâ tana matana vera ni Raba niqira verabau pukuga, migira na taovia tsapakae tavosi ara mai gana na sangaaqira ara ba totu goto tana sasaqira tana kao mangasâ.
10Mi kalina a Joab e reigadovia laka igira na gala sauba kara maiginia i nago mi tabana i muri goto, te aia e tû me viligira igira na mane vaumate susuliga bâ ni Israel, me mologira tana sasaqira babâ kara tû aro bâ i koniqira na Siria. 11Maia e mologira nina mane vaumate tavosi i vavana nina tagao a Abisai na kulana, maia e mologira kara tû aro bâ i koniqira na Amon. 12Maia Joab e tsarivania a Abisai, “Ti vaga ko reigira na Siria kara tuliusiau inau, migoe ko mai mo ko sangaau inau, ma ti vaga igira na Amon kara tuliusigo igoe, minau sauba kau bâ ma kau sangago igoe. 13!Ko susuliga mo ko malagai! Ida kaita ma ka ba vailabu susuliga mateqira ka nida tinoni, me vanigira goto nina verabau nida God. Me ke laba na omea vaga e kilia na Taovia.”
14Maia Joab migira nina mane ara babâ moa i sautu laka kara baginigira na Siria, migira na Siria ara pilovisu mara tsogo lê. 15Mi kalina igira na Amon ara reigira na Siria ara viri tsogovisu lê vaga ia, migira ara tû mara tsogo tanigotoa a Abisai mara visubatugua tana niqira verabau. Mi muri ma Joab e visutugua i Jerusalem.
16Mi kalina igira na Siria ara reigadovia laka na Israel ara tuliusigira nogo, mi tana migira ara soamaigira na mane vaumate ni Siria tana Kô Euprates tabana i longa, mara mologira kara totu i vavana nina tagao a Sobak, aia na taovia tagao vanigira nina alaala na mane vaumate a Hadadeser na taovia tsapakae ni Soba. 17Mi kalina a David e rongomi vaganana ia, maia e tû, me soasaigira sui na alaala na mane vaumate ni Israel, mara savu i tabana na Kô Jordan, maia e mologira kara tû tana sasaqira babâ ma kara tû aro bâ i koniqira na Siria. Mi tana e tuturiga na vailabu, 18migira na Israel ara takuvi visugira na alaala na mane vaumate ni Siria. Ma David kolugira nina mane vaumate ara labumatesigira ara vitu toga na mane adi terê ni Siria mara vati sangavulu toga na mane vaumate ara liu lê i lao. Mara labumatesigotoa a Sobak niqira taovia tagao na mane vaumate ni Siria. 19Mi kalina igira na taovia tsapakae ara totu i vavana nina tagao a Hadadeser ara reigadovia laka igira na Israel ara tuliusigira nogo, migira ara tû mara mololea a Hadadeser, mara aqosia na goto kolua a David, mara ba totu i vavana nina tagao aia. Me tû tana tagu ia, migira na Siria ara tau saikesa ngaoa na sangaaqira goto igira na Amon.
20A David e Tangolia na Vera ni Raba
1Mi kalina e sui nogo na tagu na bisi me tuturiga papara, tana tagu vaga nogo ia i laona na ngalitupa, igira na taovia tsapakae ara lavu na vano tana vailabu, maia Joab e aligiri me raqâ nina alaala na mane vaumate mara ba liuvia na kao ni Amon; maia David e totuvisu moa i Jerusalem. Migira ara ba totupolia na verabau ni Raba, mara bokia, mara toroutsani saikesalia. 2Mi kalina a David e ba laba i tana maia e adiligia na kepi qolumila e totu i lovana na titinonina a Molek niqira god na Amon, ma na mamavana ia e gana ngongo tolu sangavulu vati na kilo. Mi tana kepi taovia ia e totu kesa na vatu e loki matena, maia David e adia me molo bâ tana nina kepi taovia segeni. Me adigira goto danga sosongo na omea ara lautania na verabau ia. 3Maia e adigira goto na tinonina na verabau ia, me mologira kara aqovania tana soa, ma na tapala na pilokao ma na rarati. Maia e nauvanigira vaga goto igira na tinonina na vera tavosi sui tana Amon. Mi muri, maia migira nina mane ara visutugua i Jerusalem.
Na Vailabugi Koluaqira na Mumu ni Pilistia
4Mi muri bâ, me taratsi kesa goto na vailabu koluaqira na Pilistia i Geser. Mi tana ma Sibekai ni Husa e labumatesia kesa na mumû a Sipai na soana, mara gini pukavisu lê igira Pilistia.
5Me tau oka me labatugua kesa na vailabugi loki koluaqira na Pilistia, mi tana vailabu ia maia Elhanan na dalena a Jair e labumatesia a Lami na kulana a Goliat na mumû ni Gat, ma nina bao aia e varangi ke labuvati na matoluna.
6Mi muri mai, me kesa segeni goto na vailabugi e taratasi i Gat, mi tana e laba goto kesa na mumû aia e tamani e ono na kakauna tana ruka limana, mara ono goto tana kaira sui ruka tuana. Aia nogo na kukuaqira na mumû ni sau oka nogo. 7Aia e tsaigira na Israel, me tû a Jonatan aia na dalena a Sama na kulana a David me ba labumatesia.
8Mi tugirani tolu na mumû tugirani, ara tu mate i limaqira a David migira nina mane vaumate, mi tugira sui na kukuaqira na mumû ni Gat.
21A David e Naua na Tsoko Tinoni
1Maia Satan e ngaoa ke alomaia na rota vanigira na tinoni ni Israel, te aia e tû me moloa i tobana a David na padangao sosongoliana na tsokoana na dangaqira na tinoni popono tana Israel. 2Ma David e tû me ketsalia a Joab migira nina mane sasanga me tsarivanigira: “Kamu liu tana Israel popono, ke tû kesa tabana tana nida butona momoru igita me ke tsau bâ i tana e vosa, ma kamu tsokogira sui na tinoni. Minau au ngaoa kau donaginia ke visa vaga na dangaqira.”
3Ma Joab e tsarivania a David, “!Aia na Taovia ke naua migira na tinoni ni Israel kara pabo kesa sangatu kalina liusia bâ na dangana vaga ara totu nogo kalina eni! Taovia, igira sui na tinoni girani nimu maneaqo nogo igoe. ?Ma na rongona gua goto ti igoe o ngaoa na nauana na omea vaga iani? ?Matena gua o ngaoa ko tsukia ma kara gini sasi na tinoni sui tana Israel?” 4Maia na taovia tsapakae e tau rorongo me ketsalia nomoa a Joab ke naua na omea aia e raiginia ke naua. Ma Joab e aligiri me liuvi poponoa na kao ni Israel, mi muri maia e visutugua i Jerusalem. 5Me ba laba i konina a David na taovia tsapakae me tsarivulagi vania na dangaqira popono na mane e tugugira nogo kara sangâ tana vailabu: ara totu 1,100,000 tana Israel, mara 470,000 tana Juda. 6Me rongona a Joab e tau nogo reingaoa na ketsa na taovia tsapakae e molovania, te aia e tau goto tsokoa na dangaqira na mane ara totu tana puku ka koniqira a Levi ma Benjamin.
7Ma God e reisavi sosongolia na omea vaga ia, te aia e tû me kedegira na Israel. 8Ma David e tsarivania God, “!Inau nogo au tsukia kesa na sasi loki sosongo tana nauana na omea iani! Kiki Taovia, inau au naua kesa na omea bubulega sosongo, mau nongigo ko padalea moa niqu sasi.”
9Mi muri, maia na Taovia e tsarivania a Gad aia nina propete a David, 10“Ko bâ mo ko tsarivania a David laka inau au molovania ara tu tolu na omea, maia ke vilia ke kesa i tu laoqira. Minau sauba kau nauvania na omea aia nogo e vilia.”
11Ma Gad e bâ i konina a David, me tsarivulagi vania na goko vaga na Taovia e tsarinogoa me veisuâ, “Nagua o ngaoa? 12?Ke tolu na ngalitupa ke liu na uvirau i laona nimu butona kao? ?Se i laona ke tolu na vula popono ko tsogo tanigira gamu gala? ?Se i laona ke tolu na dani popono na Taovia ke labuginigo nina isi, me ke moloa na lobogu seko ke liuvia na veramu, me ke gini aqo nina angelo na moloana na mate i laona na vera popono ni Israel? Bâ, mi kalina ia ko tsarivaniau na omea gua o ngaoa inau kau ba tsarivania na Taovia.”
13Ma David e tsarivania a Gad, “!Inau e ponopala saikesa tobaqu! Mau tau moa ngaoa igira na tinoni lê kara kedeau. Molovania moa na Taovia aia segeni nogo ke kedeau, rongona aia moa e dona sosongo na galuve.”
14Mi tana maia na Taovia e moloa kesa na lobogu loki seko sosongo ke gadovigira na tinoni ni Israel, mara vitu sangavulu toga na tinoni ara gini mate. 15Mi muri, ma na Taovia e molovanoa kesa na angelo laka ke bâ toroutsani saikesalia na Jerusalem, maia e pilotoba tugua me tsarivania nina angelo, “!Ko laka! !E tugunogoa!” Mi tana tagu ia, ma na angelo e tutû i ligisana nina nauna na mani labududusi uiti a Arauna aia na Jebus.
16Ma David e morodato me reia na angelo e tutû i ka levugaqira na baragata ma na barangengo, me tangolia kesa na isi na limana, me vangaraua na toroutsaniana na Jerusalem. Mi tana ma David, migira sui lakalaka goto na tinoni lokiloki, ara sagelia na polo baubau papadana laka ara padasavia niqira sasi, mara tao tsuporu, ma na mataqira e pelea na kao. 17Ma David e nonginongi me tsaria, “God, inau nogo au tsukia na sasi iani. Inau nogo au ketsaligira kara liu na tsoko tinoni. ?Ma na tinoni girani na omea seko gua ara naua igira? Taovia niqu God, ko kedeau moa inau migira goto niqu tamadale, mo ko gaekikia moa na mauriqira nimu tinoni.”
18Maia nina angelo na Taovia e tsarivania a Gad ke bâ me ke ketsalia a David ke ba logoa kesa na belatabu vania na Taovia tana nina nauna na mani labududusi uiti a Arauna. 19Ma David e rongomangana na Taovia me muria nina ketsa me vano, vaga nogo a Gad e tsarivania. 20Mi tana dani ia maia Arauna mi tugira vati na dalena ara tu labududusi uiti tana niqira nauna na mani labududusi uiti, mi kalina ara tu reia na angelo ia, mi tugira na dalena ara tû mara tu tsogopoi. 21Mi kalina tsotsodo a Arauna e reia a David na taovia tsapakae e mamai varangi nogo, maia e mololea na nauna na mani labududusi uiti, me ba tao tsuporu, ma na matana e pelea na kao. 22Ma David e tsarivania, “Ko tsabiri vaniau nimu nauna na mani labududusi uiti, rongona inau kau logoa i tana kesa na belatabu vania na Taovia, gana ke utusiginia na lobogu seko loki ia. Minau sauba kau sauvanigo na matena popono.”
23Ma Arauna e tsarivania, “Taovia ko adia moa, mo ko nauginia moa na omea igoe o padavania. Migirani nogo na buluka gana ko gini savori-kodoputsa i kelana na belatabu, mo ko adigotoa na pava gana na labududusi uiti girani ma kara lia nimu lake, ma na uiti iani gana na savori vaniana na Taovia. Inau au sau lê vanigo na omea sui lakalaka girani.”
24Maia na taovia tsapakae e tsaria, “Tagara, niqu aqo nomoa inau kau sauvanigo na matena popono. Inau e utu vaniau kau sauvania na Taovia na omea igoe o tamanina mau tau voligira inau.” 25Maia e sauvania a Arauna ono sangatu na tavina na qolumila na matena nina nauna gana na labududusi uiti. 26Maia e logoa kesa na belatabu i tana vania na Taovia, me savorigira na savori-kodokodo ma na savori tangomana na tinoni kara ganipatâ na turina. Maia David e nonginongi, ma na Taovia e rongomia nina nonginongi, me molotsunamai na lake talu i gotu ke ganisuigira na savori-kodokodo ara totu i kelana na belatabu.
27Ma na Taovia e tsarivania na angelo ke molovisua nina isi tana lapana, maia na angelo e rongomangana. 28Ma David e reigadovia tana omea vaga ia e laba, laka na Taovia e rongomia nina nonginongi, me tû tana tagu ia, maia e savorigira na savori-kodoputsa i kelana na belatabu tana nina nauna na mani dudusi uiti a Arauna. 29Ma na Valepolo i tana e totu na Taovia aia nogo a Moses e aqosia tana kaomate, ma na belatabu i tana ara kodogira na savori-kodokodo ara ka tototu moa tana nauna na mani samasama i Gibeon tana tagu ia; 30ma David e utuvania ke bâ i tana me ke lavegoko i konina God rongona e mataguni sosongolia na isi e totu i konina nina angelo na Taovia.
221Me vaga ia ma David e tsaria, “Tana nauna nogo ieni sauba ke totu nina Valetabu na Taovia God. Mieni goto nogo sauba ke totu na belatabu i tana igira na tinoni ni Israel kara savorigira na savori-kodokodo.”
Na Aqona na Vangarau Logo Vale Tabu
2Aia David na taovia tsapakae e moloketsa vanigira sui lakalaka igira na tinonina na veratavosi ara totu tana kao ni Israel kara saisui i matana, maia e moloaqo vanigira. Mara visana vidaqira ara vangaraugira na vatu gana na logo Vale Tabu. 3Maia e sauvanigira na tsupu loki na tapala laka agana kara aqosiginigira na nila ma na omea na tangolisaiginiana na matsapa gai, ma na dangana sosongo na tapalamila e tau tangomana kesa ke donaginia e koegua gana mamava. 4Maia e gotosigokona kolugira na tinoni ni Tire mi Sidon kara adimai vania ke danga na kubuna na gai na sida. 5Maia David e pada vaganana iani, “Na Vale Tabu aia a Solomon na dalequ sauba ke logoa, nina aqo ke rereidou sosongo bâ ma kara padalokia igira sui tana barangengo popono. Maia Solomon na mane vaolu sosongo moa, me tau vati dona dou na aqo, me vaga ia minau nogo kau vangarau manogativania na omea sui.” Mi tana, maia David e tû, me vangarau manogatigira danga na vangana na mani logoana na Vale Tabu idavia na mateana.
6Maia e soamaia a Solomon na dalena ke mailaba i matana, me ketsalia ke logoa kesa na valetabu vania na Taovia na God ni Israel. 7Ma David e tsarivania, “Dalequ goe, inau au ngao sosongolia laka kau logoa kesa na valetabu tana tsonikaeana na Taovia niqu God. 8Maia na Taovia e goko vaniau nogo me tsaria. Igoe o matesigira danga sosongo na tinoni, mo sanga vailabu i laoqira danga goto na vailabu loki. Mi tana rongona nogo na labumate danga igoe o naugira, ti inau na Taovia au tau tamivanigo igoe ko logo valetabu vaniau. 9Minau sauba kau sauvanigo kesa na dalemu mane, maia sauba ke tagao tana rago laka, rongona inau sauba kau sauvania na rago kolugira sui gana gala. Maia sauba ko soaginia a Solomon,22:9 Na soa Solomon e talu tana goko Hibru ‘Salom,’ ma na rongona na goko ia ‘na rago ma na totu raviravi dou.’ rongona tana taguna nina aqotagao aia, inau sauba kau saua na rago vanigira na tinoni ni Israel ma kara toturavi dou. 10Maia nogo sauba ke logovaniau kesa niqu valetabu. Maia sauba ke lia na dalequ, minau sauba kau lia na tamana. Ma nina pukutaovia sauba ke adidato sailaginia na aqotagao tana Israel.”
11Maia David e goko babâ vania a Solomon me tsaria, “Mi kalina ia, dalequ igoe, na Taovia nimu God ke totu kolugo, maia ke manalivanigo nina veke e naua laka aia ke sangago mo ko gini tangomana na logoana kesa na valetabu vania. 12Maia na Taovia nimu God ke sauvanigo na papadagado ma na sasaga loki gana ko gini tagaovidoua na Israel muritaoninogoa nina Ketsa. 13Me ti vaga igoe ko muridougira sui lakalaka pipi nina ketsa ma nina vali aia na Taovia e sauvaninogoa a Moses laka kara muria igira na Israel, migoe sauba ko tangomana. Ko padakuti matena mo ko norua na Taovia, mo ko laka goto na tamivaniana sa omea ke molo matagu vanigo. 14Tana niqu aqo loki segeni nogo inau, au vangarau manogatigira sui nogo e liusia e 3,400 tani na mamavana na qolumila, me liusigotoa 34,000 tani na siliva gana na gini aqo tana logo Vale Tabu. Me totu manoga goto na dangana na tapalamila ma na tapala laka e utu na tsokoraeaqira. Mau molo manogatigira nogo na gai ma na vatu, me kilia igoe ko lave papabona goto ke danga bâ. 15Migoe o tamanigira nogo ara danga sosongo nimu tinoni aqo. Ara totu danga dou igira kara aqo tana katsuvatu, mi tana molopapi vatu mi tana gini aqo kamoda, mara danga sosongo goto na mane ara sasaga sosongo tana gini aqosi omea levolevo 16na qolumila, ma na siliva, ma na tapalamila ma na tapala laka. Bâ, mi kalina ia igoe ko tuturiga na aqo, maia na Taovia ke totu kolugo.”
17Ma David e moloketsa vanigira sui na tinoni lokiloki tana Israel kara sangâ a Solomon tana aqo iani. 18Me tsarivanigira, “Na Taovia nimui God aia e totu sailagi kolugamu, me saunogoa vanigamu na rago tana pipi sui nimui tabana. Aia e tamivaniau mau gini tangomana na sugutiaqira sui na tinoni ara totuvia na kao iani, mi kalina eni igira ara totu i vavana nimui tagao igamu ma nina tagaogotoa na Taovia. 19Bâ, mi kalina ia kamu bâ ma kamu aqovania na Taovia nimui God tana tobamui popono mi tana tidaomui popono. Kamu tuturiga na logoana na Vale Tabu gana kamu molosagea i laona nina Bokisi na Taso na Taovia, migira sui goto na omea tabu ara gini aqo tana samasama vaniana.”
231Mi kalina a David e tuqatuqa sosongo nogo, maia e molokaea a Solomon na dalena ke lia na taovia tsapakae tana Israel.
Niqira Aqo Igira na Levite
2Ma David na taovia tsapakae e soasaigira sui lakalaka na tinoni lokiloki tana Israel migira sui goto na manetabu ma na Levite. 3Maia e tsokogira sui na Levite tû tana tolu sangavulu na ngalitupaqira me bâ. Ma na dangaqira igira sui kolu e tsaulia tolu sangavulu alu na toga. 4Mi muri ma David e viligira rukapatu vati toga vidaqira kara tagaovia na aqona na Vale Tabu, mara ono toga kara reitutugugira na papi tana ara maretsunagira pipi na omea ara laba, ma kara pedegotolia niqira vaiganigi na tinoni, 5mara vati na toga niqira aqo kara mataligira na matsapakapu, mara vati goto na toga niqira aqo kara tsonikaea na Taovia ginia na taiana niqira omea tatangi aia nogo na taovia tsapakae e sauvanigira agana nogo na tsonikaeginiana na Taovia.
6Ma David e votagira na Levite i laona e tolu na alaala taoninogoa niqira duli: igira nogo na duli tû koniqira a Gerson, ma Kohat ma Merari.
7Ma Gerson e tamanikaira ruka na dalena mane: kaira nogo a Ladan ma Simei. 8A Ladan e tamanitugira tolu na dalena mane: tugira nogo a Jehiel, ma Setam, ma Joel, 9tugira nogo na ida tana duli konina a Ladan. A Simei e tamanitugira tolu na dalena mane: tugira nogo a Selomot, ma Hasiel ma Haran. 10-11Ma Simei e tamanitugira vati na dalena mane: e ida a Jahat, me tsari a Sina, me tsari a Jeus, me tsari a Beria. Mi kaira a Jeus ma Beria ara ka tau tamanina danga ka kukuaqira, me vaga ia mara tsokosaikaira vaga ti kaira kesa moa na duli.
12A Kohat e tamanitugira vati na dalena mane: tugira nogo a Amram, ma Isar, ma Hebron, ma Usiel. 13Ma Amram na idana dalena, aia nogo ka tamaqira a Aaron ma Moses. Ma Aaron migira na kukuana igira nogo God e balogira gana kara reitutugugira sailagi pipi sui na omea tabu, ma kara kodoa na bulunagai uruuru tana tagu na samasama vaniana na Taovia, ma kara aqo vania ma kara tabugira na tinoni tana asana nogo aia. 14Mi kaira na dalena mane a Moses aia nina maneaqo God, ara tsokosaikaira kolugira na Levite. 15A Moses e tamanikaira ruka na dalena mane, kaira nogo a Gersom ma Elieser. 16Maia nogo a Sebuel e ida vanitugira na dalena a Gersom. 17Ma Elieser e tamanina kesa moa na dalena mane, a Rehabia na soana, ma Rehabia e tamanigira danga sosongo na kukuana.
18Maia Isar na rukanina dalena mane a Kohat e tamanina kesa moa na dalena mane, a Selomit na soana, maia nogo na ida tana duli. 19Ma Hebron na tolunina dalena mane a Kohat e tamanitugira vati na dalena mane: tugira a Jeria, ma Amaria, ma Jehasiel ma Jekameam. 20Ma Usiel aia na vatinina dalena mane a Kohat e tamanikaira ruka na dalena mane, kaira nogo a Mika ma Isia.
21Ma Merari e tamanikaira ruka na dalena mane, kaira nogo a Mali ma Musi. Ma Mali e tamanigotoa ruka na dalena mane, kaira nogo a Eleasar ma Kis. 22Bâ, maia Eleasar e mate me tau goto tamanina sa dalena mane, na dalena daki moa. Migira na dalena daki ara taugagira na tasiqira savusavu, igira na dalena a Kis. 23Maia a Musi na rukanina dalena mane a Merari e tamanitugira tolu na dalena mane, tugira nogo a Mali, ma Eder ma Jeremot.
24Igirani nogo na kukuana a Levi tana niqira duli ma niqira vungu, me pipi gira sui ara maretsuna na soaqira. Me pipi gira na kukuana aia, tu tana rukapatu na ngalitupaqira me bâ ara sanga tana aqo i laona nina Vale Tabu na Taovia.
25Ma David e tsaria, “Na Taovia na God ni Israel e saunogoa na rago vanigira nina tinoni, maia segenina nogo sauba ke totu sailagi i Jerusalem. 26Me vaga ia, me tau goto kilia igira na Levite kara kalagai bamaia na Valepolo i tana e totu na Taovia, migira sui goto na omea levolevo ara gini aqo tana samasama.” 27Ma na susuina nina aqo a David e naua idavia na mateana, aia e maretsunâ na soaqira igira sui na Levite ara tsaulia rukapatu na ngalitupaqira kara sanga aqo tana Vale Tabu, 28me molovanigira kara tangoligira na aqo girani: kara sangagira na manetabu igira na kukuana a Aaron tana aqo na samasama i laona na Vale Tabu, ma kara reitutugugira na pakokana na Vale Tabu migira na voki i laona, ma kara malesigira pipi sui na omea tabu; 29kara reitutugugotoa na bredi ara savoria vania God, ma na pulaua ara gini aqo tana savori, migira na bredi tapetape tagara isti i laona, migira na sausau kodokodo, ma na pulaua ara lalo kolugotoa na oela na olive; ma niqira aqo goto kara tovoa na mamavana ma na dangana pipi sui na omea ara savoria tana Vale Tabu; 30ma kara tsonikaea ma kara soalokia na Taovia pipi tana matsaraka ma na ngulavi; 31me pipi goto tana tagu ara kodogira niqira sausau na tinoni vania na Taovia tana dani na Sabat, mi tana Dani Tabu na Vula Vaolu, migira goto tana dani tabu tavosi. Mara pedegotoa na dangana na Levite kara sanga na aqosiana na aqo vaga iani pipi dani. Ara mologira na Levite kara nau sailaginia na aqona na samasama vaniana na Taovia. 32Niqira aqo goto kara reitutugua na Valepolo tana e totu na Taovia ma nina Vale Tabu, ma kara sangagira na kamaqira igira na manetabu na kukuana a Aaron tana samasama i laona na Vale Tabu.
24Na Aqo Ara Molovanigira na Manetabu
1Igirani nogo na alaala na kukuana a Aaron. A Aaron e tamanitugira vati na dalena mane: tugira nogo a Nadab, ma Abihu, ma Eleasar ma Itamar. 2Mi kaira a Nadab ma Abihu ara ka mate idavia ka tamaqira, mara ka tau goto tamani ka daleqira. Bâ, mi kaira moa a Eleasar ma Itamar ka kulaqira, ara ka lia na manetabu. 3Ma David e molovotagira na kukuana a Aaron tana alaala babâ taoninogoa niqira aqo. Mara ka sangâ tana aqo ieni kaira a Sadok na kukuana a Eleasar, ma Ahimelek na kukuana a Itamar. 4Ara votagira na kukuana a Eleasar i laona sangavulu ono na alaala, migira na kukuana a Itamar i laona alu moa na alaala; ara pede vaganana ia rongona ara danga bâ na mane ara ida tana vungu i laoqira na kukuana a Eleasar. 5Mi tana rongona ara totu nogo visana ka kukuaqira kaira sui a Eleasar ma Itamar ara tagao tana Vale Tabu mara ida tana lotu, te igira ara gini aqo na tsonikutsu tana votaaqo vaniaqira. 6Migira nogo ka kukuaqira a Eleasar ma Itamar ara vaioligi tana tsonikutsu iani. Mi muri, maia Semaia na dalena a Netanel, aia e kesa niqira mane mamare na Levite e maretsunâ na soaqira. Ma na taovia tsapakae, migira nina mane sasanga, ma Sadok na manetabu, ma Ahimelek na dalena a Abiatar, migira goto na ida tana vungu manetabu mi tana vungu na Levite, igira sui ara sanga na moro ma na rorongo.
7-18Na kesanina tsonikutsu e gado tana vungu konina a Jehoiarib,
na rukanina tana vungu konina a Jedaia,
na tolunina tana vungu konina a Harim,
na vatinina tana vungu konina a Seorim,
na tsegenina tana vungu konina a Malkija,
na ononina tana vungu konina a Mijamin,
na vitunina tana vungu konina a Hakos,
na alunina tana vungu konina a Abija,
na siunina tana vungu konina a Jesua,
na sangavulunina tana vungu konina a Sekania,
na sangavulu kesanina tana vungu konina a Eliasib,
na sangavulu rukanina tana vungu konina a Jakim,
na sangavulu tolunina tana vungu konina a Hupa,
na sangavulu vatinina tana vungu konina a Jesebeab,
na sangavulu tsegenina tana vungu konina a Bilga,
na sangavulu ononina tana vungu konina a Imer,
na sangavulu vitunina tana vungu konina a Hesir
na sangavulu alunina tana vungu konina a Hapises,
na sangavulu siunina tana vungu konina a Petaia,
na rukapatunina tana vungu konina a Jeheskel,
na rukapatu kesanina tana vungu konina a Jakin,
na rukapatu rukanina tana vungu konina a Gamul,
na rukapatu tolunina tana vungu konina a Delaia,
ma na rukapatu vatinina tana vungu konina a Maasia.
19Igirani nogo na mane ara maretsunâ na soaqira kara naua niqira aqo i laona na Vale Tabu vaga nogo na Taovia God ni Israel e molovania a Aaron na mumuaqira.
Na Soaqira na Levite
20Igirani goto na soaqira na ida tana vungu konina a Levi ara tau vati mare soaqira moa:
a Subael i laoqira na dalena a Amram;
a Jedeia i laoqira na dalena a Subael;
21a Isia aia na ida i laoqira na dalena a Rehabia;
a Selemot tana vungu konina a Isar;
22a Jahat i laoqira na dalena a Selomit;
23mara tu vati i laoqira na dalena a Hebron: tugira nogo a Jeria na idana botsa, ma Amaria, ma Jehasiel ma Jekameam;
24a Mika i laoqira na dalena a Usiel;
ma Samir i laoqira na dalena a Mika;
25ma Isia na kulana a Mika;
ma Sekaria i laoqira na dalena a Isia;
26mara tu tolu i laoqira na dalena a Merari: tugira nogo a Mali, ma Musi ma Jaasia.
27ma Jaasia e tamanitugira tolu na dalena mane: tugira nogo a Soham, ma Sakur, ma Ibri. 28-29A Mali e tamanikaira ruka na dalena mane, kaira nogo a Eleasar ma Kis. Ma Eleasar e tau tamanina sa dalena mane, maia moa a Kis e tamanina e kesa lelê na dalena mane, a Jerameel na soana. 30Ma Musi e tamanitugira tolu na dalena mane: tugira nogo a Mali, ma Eder ma Jeremot.
Migirani nogo na vungu i laoqira na Levite.
31Igira ara ida pipi tana vungu kolugotoa kesa na tasiqira tetelo ara vaisangagi na tsonikutsu matena na votaana niqira aqo, vaga nogo na kamaqira igira na manetabu na kukuana a Aaron ara naua. Ma David na taovia tsapakae, ma Sadok, ma Ahimelek, migira na ida pipi tana vungu manetabu ma na Levite ara sanga na moro ma na rorongo.
25Igira ara Raqa Linge Tana Vale Tabu
1A David na taovia tsapakae kolugira goto niqira ida na Levite, igira nogo ara vilitugira na duli tugirani i laoqira na Levite kara tu ida tana aqona na samasama: tugira nogo na duli konina a Asap, ma Heman ma Jedutum. Niqira aqo girani kara katevulagia na gokona God tana taiana na itai tatangi ma na rekesiana na tsetsê. Migirani nogo na soaqira na tinoni ara viligira kara ida tana samasama, kolugotoa na vatana na aqo ke naua pipi kesa na alaala:
2Tugira vati na dalena mane a Asap: a Sakur, ma Josep, ma Netania ma Asarela. Tugira ara tu totu i vavana nina tagao a Asap, aia gana aqo ke katevulagia na gokona God kalina ti vaga na taovia tsapakae ke ketsalia ke naua.
3Tugira ono na dalena mane a Jedutun: tugira nogo a Gedalia, ma Seri, ma Jesaia, ma Simei, ma Hasabia ma Matitia. Mara tu aqo i vavana nina tagao tu tamaqira mara tu katevulagia na gokona God tana taiana na itai tatangi, mara tu lingena na tsonikaeana ma na soadouana na Taovia.
4Mara tu sangavulu vati na dalena a Heman: igira nogo a Bukia, ma Matania, ma Usiel, ma Sebuel, ma Jerimot, ma Hanania, ma Hanani, ma Eliata, ma Gidalti, ma Romamti Eser, ma Josbekasa, ma Maloti, ma Hotir, ma Mahasiot. 5God e sauvania a Heman aia nina propete na taovia tsapakae igira sangavulu vati na dalena mane me tolu goto na dalena daki vaga nogo aia e vekevaninogoa, gana kara pada mamavasiginia a Heman. 6Mi tugira sui na dalena a Heman ara tu rekesia tu niqira tsetsê, mara tu taigira na itai tatangi, i laona na Vale Tabu i vavana nina tagao tu tamaqira. Mi tugira nogo a Asap, ma Jedutun ma Heman ara tu naua tu niqira aqo i vavana nina ketsa na taovia tsapakae.
7Migira sui rukapatu vati na mane girani, kolugira goto na Levite tavosi ara sangagira, ara sasaga sosongo tana niqira aqo mara dona sosongo na linge. Migira sui kolu ara 288 na mane.
8Ara tsonikutsu matena na vota aqo vanigira sui, igira na tinoni vaolu ma na tinoni ganoga, igira ara aqo oka nogo migira goto ara vasini moa tuturiga.
9-31Migira na 288 na mane girani ara votagira taonia niqira vungu babâ i laona e rukapatu vati na alaala, mara sangavulu ruka i laona pipi kesa na alaala, kolua kesa ke ida vanigira.
Na kesanina tsonikutsu e gado konina a Josep tana vungu konina a Asap;
na rukanina konina a Gedalia;
na tolunina konina a Sakur;
na vatinina konina a Seri;
na tsegenina konina a Netania;
na ononina konina a Bukia;
na vitunina konina a Asarela;
na alunina konina a Jesaia;
na siunina konina a Matania;
na sangavulunina konina a Simei;
na sangavulu kesanina konina a Usiel;
na sangavulu rukanina konina a Hasabia;
na sangavulu tolunina konina a Sebuel;
na sangavulu vatinina konina a Matitia;
na sangavulu tsegenina konina a Jerimot;
na sangavulu ononina konina a Hanania;
na sangavulu vitunina konina a Josbekasa;
na sangavulu alunina konina a Hanani;
na sangavulu siunina konina a Maloti;
na rukapatunina konina a Eliata;
na rukapatu kesanina konina a Hotir;
na rukapatu rukanina konina a Gidalti;
na rukapatu tolunina konina a Mahasiot;
ma na rukapatu vatinina konina a Romamti Eser.
26Igira na Mane Matali Vale Tabu
1Igirani nogo na alaala na mane matali Vale Tabu. Tana duli konina a Kora ara moloa a Meselemia na dalena a Kore tana vungu konina a Asap. 2Ma Meselemia e tamanitugira vitu na dalena mane: a Sekaria na idana dalena, mara tu tsari a Jediael, ma Sebadia, ma Jatniel, 3ma Elam, ma Jehohanan ma Eliehoenai.
4Mi tugira goto na dalena mane a Obed Edom: A Semaia na idana dalena, mara tu tsari a Jehosabad, ma Joa, ma Sakar, ma Netanel, 5ma Amiel, ma Isakar ma Peuletai.
6-7Ma Semaia na idana dalena a Obed Edom e tamanitugira ono na dalena mane: tugira nogo a Otni, ma Repael, ma Obed, ma Elsabad, ma Elihu, ma Semakia. Mi tugira sui na mane tugirani ara mane tangirongo i laona tu niqira vungu rongona ara sasaga loki tana niqira aqo; mi kaira a Elihu ma Semakia ara ka sasaga sosongo goto ba.
8Igira sui ara talu tana vungu konina a Obed Edom ara ono sangavulu ruka na mane ara donadouginia na nauana na aqo iani.
9Mi laona na vungu konina a Meselemia ara sangavulu alu na mane ara donadouginia na nauana na aqo iani.
10Tana duli konina a Merari, a Hosa aia e tamanitugira vati na dalena mane: a Simri, aia na tamana e moloa ke lia na ida atsa moa aia e tau na idana dalena, 11ma Hilkia, ma Tebalia ma Sekaria. Migira sui kolu ara sangavulu tolu na tinoni tana vungu konina a Hosa ara lia na mane matali Vale Tabu.
12Ara votagira na mane matali Vale Tabu tana alaala muritaonia niqira vungu, mara moloaqo vanigira i laona na Vale Tabu vaga nogo igira na Levite tavosi. 13Me pipi na vungu atsa moa ara danga se ara tau danga na tinoni i laona, ara tsonikutsu gana kara donaginia na matsapakapu gua pipi vidaqira nina aqo ke matalia. 14Na tsonikutsu matena na matsapakapu tabana i longa e gado konina a Selemia, ma na matsapakapu tabana i vava e gado konina a Sekaria na dalena, aia kesa na mane e dona sosongo na sauparovata. 15Mara molovania a Obed Edom ke matalia na matsapakapu tabana i ata, migira na dalena kara mataligira na voki na mani mololaka omea. 16Mara molovanikaira a Supim ma Hosa kara ka matalia na matsapakapu tabana i tasi, ma na matsapakapu ni Saleket tana sautu dato. Mara vota tagu vanigira kara vaioligi na nauana na aqona na matali matsapakapu, ke sui kesa me ke ba kesa. 17Mi tabana i longa ara tu ono na mane matali ara tu aqo pipi dani, mi tabana i vava ara tu vati, mi ata ara tu vati. Mara tu vati goto na mane matali kara tu matalikaira pipi dani na voki na mani mololaka omea, ruka kesa voki me ruka kesa voki. 18Mi ligisana na kovokovo tabana i tasi ara tu vati na mane matali ara tu tû i ligisana na sautu, mara ka ruka goto ara ka tû i matana na kovokovo nogo ia. 19Iani nogo e tavota vaga gaqira aqo na mane matali tana duli ka koniqira a Kora ma Merari.
Igirani Goto visana na Aqo Tavosi Tana Vale Tabu
20Migira visana na Levite tavosi niqira aqo na reitutuguana na valebisi i laona na Vale Tabu, migira goto na voki na mani mololakaaqira na vangalaka ara balogira vania God. 21Maia a Ladan, aia e kesa vidaqira na dalena a Gerson, aia na mumuaqira igira visana alaala, kolugotoa na vungu konina a Jehiel na dalena nogo ia. 22Mi kaira ruka na dalena tavosi a Ladan, a Setam ma Joel, ara ka reitutugua na valebisi i laona na Vale Tabu migira na voki na mani mololaka omea.
23Ara moloaqo goto vanigira tu kukuaqira a Amram, ma Isar, ma Hebron ma Usiel.
24Ma Sebuel tana duli konina a Gerson na dalena a Moses, aia e taovia vanigira igira ara reitutugua na valebisi i laona na Vale Tabu. 25Mi konina a Elieser na kulana a Gersom, aia Sebuel e kamaga kolua a Selomit. A Elieser na tamana a Rehabia, ma Rehabia na tamana a Jesia, ma Jesia na tamana a Joram, ma Joram na tamana a Sikri, ma Sikri na tamana a Selomit. 26Maia Selomit migira na tinoni tana nina vungu niqira aqo na reitutuguaqira pipi sui na vangalaka aia David na taovia tsapakae e balovaninogoa God, ma niqira vangalaka goto igira ara ida tana vungu, mi tana duli, migira goto gaqira taovia na mane vaumate. 27Migira ara adigira visana na omea ara laugira tana vailabu, mara balogira gana na gini aqo tana Vale Tabu. 28Ma Selomit migira nina vungu niqira aqo na reitutuguaqira pipi sui na omea ara balonogoa gana na gini aqo tana Vale Tabu, kolugira goto na vangalaka ara tu saua tugira a Samuel na propete, ma Saul na taovia tsapakae, ma Abner na dalena a Ner, ma Joab na dalena ko Seruia.
Niqira Aqo na Levite Tavosi
29Mi laoqira na kukuana a Isar, ara vilia a Kenania migira na dalena kara reitutugua na mamarena pipi sui na omea ara maretsunanogoa, ma kara gotolia niqira vaiganigi igira na tinoni ni Israel.
30Mi laoqira na kukuana a Hebron, ara vilia a Hasabia kolugira kesa toga vitu sangatu na kamana, igira sui lakalaka ara mane tangirongo, mara mologira kara reitutugugira na omea sui e kalea na lotu me kalea na vera tana turina popono na Israel e totu tabana i tasi tana Kô Jordan. 31Ma Jeria aia e ida vanigira sui na kukuana a Hebron. Tana vati sangavulunina ngalitupa e taovia tsapakae a David, ara lalavegira na mane vaumate i laoqira na kukuana a Hebron, ti ara ba tsodogira visana na mane vaumate tangirongo ara totu i Jaser tana butona kao ni Gilead. 32Ma David na taovia tsapakae e viligira goto ruka toga vitu sangatu na ida tangirongo tana vungu i laoqira na kamana a Jeria, me mologira kara reitutugugira na omea sui e kalea na lotu, me kalea na vera, tana turina popono na Israel tabana i longa tana Kô Jordan, tana tu niqira butona kao na puku tu koniqira a Ruben ma Gad ma Manase Tabana i Longa.
27Igira Ara Tagao Vanigira na Mane Vaumate
1Iani nogo na soaqira babâ igira ara ida pipi tana vungu ma na duli tana Israel, migira goto niqira mane sasanga ara sangagira na tagaoviana na vavanona na aqo vania na taovia tsapakae. Pipi vula i laona na ngalitupa ara vaioligi na alaala, mi laona pipi alaala ara rukapatu vati toga na mane ara aqo i vavana aia e taovia tagao vanigira tana vula ia.
2-15Migirani nogo na soaqira na mane ara tagao pipi tana vula:
Tana kesanina vula: a Jasobeam na dalena a Sabdiel, aia nogo e kesa tana duli konina a Peres, na turina na puku konina a Juda.
Tana rukanina vula: a Dodai na kukuana a Ahohi, ma Milkot nogo gana sasanga aia.
Tana tolunina vula: a Benaia na dalena a Jehoiada na manetabu; aia nogo e ida vanigira “Na Tolu Sangavulu,” ma Amisabad na dalena e tugua tamana tana nina aqotagao tana alaala iani.
Tana vatinina vula: a Asahel na kulana a Joab, ma Sebadia na dalena a Asahel e tugua tamana tana nina aqo.
Tana tsegenina vula: a Samut na kukuana a Isar.
Tana ononina vula: a Ira na dalena a Ikes ni Tekoa.
Tana vitunina vula: a Heles aia kesa na Epraim ni Pelon.
Tana alunina vula: a Sibekai ni Husa, aia e kesa vidaqira i laona na duli konina a Sera, na turina na puku konina a Juda.
Tana siunina vula: a Abieser ni Anatot tana niqira butona kao na puku konina a Benjamin.
Tana savugavulunina vula: a Maharai ni Netopa, aia e kesa vidaqira i laona na duli konina a Sera.
Tana sangavulu kesanina vula: a Benaia ni Piraton tana niqira butona kao na puku konina a Epraim.
Mi tana sangavulu rukanina vula: a Heldai ni Netopa, aia nogo kesa na kukuana a Otoniel.
Igira Ara Ida Pipi tana Puku ni Israel
16-22Igirani nogo na soaqira na mane ara tagaovigira pipi na puku tana Israel:
a Elieser na dalena a Sikri e tagao tana puku konina a Ruben;
a Sepatia na dalena a Maaka e tagao tana puku konina a Simeon;
a Hasabia na dalena a Kemuel e tagao tana puku konina a Levi;
a Sadok e tagao tana puku konina a Aaron;
a Elihu, aia e kesa na kulana a David na taovia tsapakae, e tagao tana puku konina a Juda;
a Omri na dalena a Mikael e tagao tana puku konina a Isakar;
a Ismaia na dalena a Obadia e tagao tana puku konina a Sebulun;
a Jeremot na dalena a Asriel e tagao tana puku konina a Naptali;
a Hosea na dalena a Asasia e tagao tana puku konina a Epraim;
a Joel na dalena a Pedaia e tagao tana puku konina a Manase i Tasi;
a Ido na dalena a Sekaria e tagao tana puku konina a Manase i Longa;
a Jaasiel na dalena a Abner e tagao tana puku konina a Benjamin;
a Asarel na dalena a Jeroham e tagao tana puku konina a Dan.
23Mi kalina a David na taovia tsapakae e naua na tsoko tinoni, maia e tau adia na soaqira na tinoni tu tana rukapatu ngalitupaqira me tsuna, rongona na Taovia e vekenogoa laka aia ke naua migira na tinoni ni Israel kara danga vaga saikesa moa na veitugu tana masaoka. 24Maia Joab aia na dalena ko Seruia, e tuturiga moa na tsoko tinoni, me tau moa suilavaginia. God e kedegira na Israel rongona ara naua na tsoko tinoni iani, me vaga ia mara tau maretsunagira na dangana popono na tinoni i laona nina papi na mamare soa a David na taovia tsapakae.
Igira Ara Reitutugua Nina Omea Levolevo na Taovia Tsapakae
25-31Igirani nogo na soaqira igira niqira aqo na reitutuguana nina omea levo na taovia tsapakae:
A Asmavet na dalena a Adiel e reitutugugira nina voki na mololaka omea na taovia tsapakae;
a Jonatan na dalena a Usia e reitutugugira na voki na mololaka omea na vera;
a Esri na dalena a Kelub e reitutugugira na mane aqouta;
a Simei ni Rama e reitutugugira na uta na uaeni;
a Sabdi ni Sepam e reitutugugira na voki tana ara mololaka na uaeni;
a Baal Hana ni Geder e reitutugugira na gai na olive ma na gai mutsamutsa ara totu i tuana na vungavunga tabana i tasi;
a Joas e reitutugua na aqo na mololakaana na oela na olive;
a Sirtai ni Saron e reitutugugira na buluka ara totu tana kao dou i Saron;
a Sapat na dalena a Adlai e reitutugugira na buluka ara totu i laoqira na poi;
a Obil aia na Ismael e reitutugugira na kamelo;
a Jedeia ni Meronot e reitutugugira na asi;
ma Jasis aia na Hagar e reitutugugira na sipi ma na naniqoti.
Nina Mane Sauparovata a David
32Maia Jonatan na niana a David na taovia tsapakae e dona dou sosongo na sauparovata me sasani loki. Maia kolugotoa a Jehiel na dalena a Hakmoni kaira ara ka tagaovia niqira sasani igira na dalena na taovia tsapakae. 33Ma Ahitopel aia nina aqo na sauparovata vania na taovia tsapakae, ma Husai na Arka aia nogo na kulana dou sosongo na taovia tsapakae ma nina mane gana na parovataviana. 34Mi murina na mateana a Ahitopel, mi kaira a Abiatar ma Jehoiada, aia na dalena a Benaia, ara ka lia nina mane na sauparovata. Ma Joab nogo e lia na taovia tagao vanigira nina mane vaumate na taovia tsapakae.
28A David e Goko Matena na Logo Vale Tabu
1Ma David e ketsaligira sui na mane tagao tana Israel kara maisai sui i Jerusalem. Me vaga ia, migira sui na mane tagao pipi tana puku, migira ara reitutugugira na aqona na vera, migira na ida tana duli, migira ara reitutugugira na omea tatamani ma na buluka e tamanina na taovia tsapakae migira na dalena, kolugira goto igira sui na mane sasanga tana valena na taovia tsapakae, migira ara ida vanigira na mane vaumate, migira goto na mane tangirongo ara maisai sui i Jerusalem.
2Ma David e tû i mataqira me tsarivanigira, “Igamu gaqu verakolu, kamu rongomiau. Inau au ngaoa kau logoa kesa na vale kakai dou i tana ke gini toturavi dou nina Bokisi na Taso na Taovia nida God. Inau au vangarau manogatigira nogo danga na vangana gana na logoana kesa na valetabu na mani padalokiginiana na Taovia, 3maia e tau moa tamivaniau kau logoa, rongona inau au mane vaumate mau matesigira danga sosongo na tinoni. 4Na Taovia na God ni Israel e viliau nogo inau, migira goto na kukuaqu, kami tagaovi sailaginia na Israel. Maia e vilia na puku konina a Juda ke ida vanigira na puku sui, mi laoqira nogo na Juda aia e vilia nina vungu na tamaqu inau. Mi laona na vungu popono ia aia nogo e padangaoa ke adiau inau me ke molokaeau kau lia na taovia tsapakae kaputia na Israel popono. 5Maia e sauvaniau danga na dalequ mane, mi laoqira igira sui aia e vilia a Solomon ke tagaovi kaputia na Israel, nina vera nogo na Taovia.
6“Ma na Taovia e tsarivaniau, ‘A Solomon na dalemu, aia nogo sauba ke logoa niqu Vale Tabu. Inau au vilinogoa aia ke lia na dalequ, minau sauba kau lia na tamana. 7Minau sauba kau naua ma gana susuliga taovia tsapakae ke totu sailagi ti vaga aia ke murigira dou babâ niqu ketsa ma niqu vali sui vaga aia e naunogoa kalina eni.’
8“Bâ, mi kalina ia igamu niqu tinoni, i matana nogo nida God, mi matana na saikolu popono na tinoni ni Israel a totu ieni, igita nina tinoni na Taovia, inau au ketsaligamu kamu muridougira pipi sui na omea na Taovia nida God e ketsaligita nogo na nauana, gana igamu kamu gini tamanina babâ na kao dou iani, ma kamu molovanigira na kukuamui kara tangolidato sailaginia.”
9Mi tana ma David e gokovania a Solomon me tsaria, “Dalequ igoe, nimu aqo nomoa ko padalokia nina God na tamamu, mo ko tamia na aqo dou vania tana tobamu popono mi tana papadamu popono. Aia e donaginia pipi sui nida papada ma nida kili igita. Me ti vaga igoe ko vataragi i konina aia, maia sauba ke tabego; me ti vaga igoe ko piloligi tania, maia sauba ke piloligi sailagi tanigo goto igoe. 10Mo ko donadou laka aia nogo na Taovia e viligo nogo igoe ko logovania nina Vale Tabu. Mi kalina ia, ko bâ mo ko naua, mo ko padakuti matena dou.”
11A David e sauvania a Solomon na totovona gana na logoana na Vale Tabu migira sui goto na vale kara totu polia, migira goto na voki gana na mololakâ omea, migira sui goto na voki tavosi, ma na nauna tana ke lia na Nauna Tabu Loki Sosongo. 12Me tsarivanigotoa pipi na omea e padagira i tobana tana rongoqira na pakokana na Vale Tabu migira goto na voki ara totu poligira, mi tana rongogira goto na voki gana na mololakaaqira na vangana na Vale Tabu ma na vangalaka ara balonogoa vania na Taovia. 13Ma David e tsarivanigotoa nina papada tana rongona ke vota koeguania na aqo na manetabu ma na Levite ma na vavanona niqira aqo i laona na Vale Tabu, ma na reitutuguaqira na vangana sui ara gini aqo tana Vale Tabu. 14Me tsaritugutugu vania ke visa na dangana na siliva ma na qolumila kara gini aqo tana aqosiana na vangana girani, 15vania pipi na bilona bulu ma na gai na molodato na bilona na bulu iruiru, 16migira na bela ara aqosiginia na siliva, migira goto pipi na bela qolumila tana kara mologira na sivona bredi kara savori vania God. 17Maia e tsaritugutugu vanigotoa ke visa na dangana na qolumila laka kara gini aqo tana aqosiaqira na poka, ma na besini, ma na tosu, me ke visa na dangana na siliva ma na qolumila kara aqosiginigira na popo, 18me ke visa na dangana na qolumila laka kara aqosiginia na belatabu i tana kara kodoa na buluna gai uruuru, ma na aqosiginiana na terê gana na moloana ka nunuqira ruka na angelo ara ka tatakatsinia ka rapoqira i kelana nina Bokisi na Taso na Taovia. 19Ma David e tsaria “Na omea sui girani na limana segeni nogo na Taovia e maretsunaginigira na totovona maia e saumai vaniau kau gini aqo.”
20Mi muri ma David e tsarivania a Solomon na dalena, “Ko susuliga dou mo ko padakuti matena na nauana na aqo iani. Ko tuturiga na aqosiana, mo ko laka goto na tamivaniana sa omea ke utusigo. Na Taovia God aia inau au aqo vania, sauba ke totu kolugo. Aia sauba e utu goto ke mololego, me sauba ke totu kolugo poi tsau kalina ko suilavaginia na logoana nina Vale Tabu. 21Migira na manetabu ma na Levite au vota vanigira nogo na aqo kara naua i laona na Vale Tabu. Migira na maneaqo ara dona sosongo pipi vata na aqo ara ngao sosongolia kara sangago igoe, migira sui goto na tinoni ma niqira ida ara pitugo moa igoe ko tsarivanigira na omea kara naua.”
29Na Vangalaka Ara Saua Gana na Logoana na Vale Tabu
1Mi tana, ma David na taovia tsapakae e katevulagia i mataqira na toga sui ara saikolu i tana: “Aia Solomon na dalequ, aia nogo God e vilinogoa, maia e mane vaolu sosongo me tau vati dona dou na aqo. Me loki sosongo na aqo aia sauba ke naua, rongona na vale iani e tau na valena kesa na taovia tsapakae lê, na Vale Tabu vaninogoa na Taovia God. 2Au tovokakaia na vangarauaqira danga na vangana agana na logoana na Vale Tabu: na qolumila, na siliva, na tapalamila, na tapala laka, na tiba, ma na vatu loki matena, ma na vatu mamarega gana na inilau, ma na dangana na pavavatu. 3Mau paboginigotoa na siliva ma na qolumila tana niqu tamani segeni nogo inau rongona au padaloki sosongolia nina Vale Tabu God. 4Mau sauliusia 100,000 kilo na qolumila laka, me 240,000 kilo na siliva laka gana na inilauaqira na ponoponona na Vale Tabu 5ma na inilauaqira goto na omea sui kara aqosia igira na mane sasaga tana aqosi omea levolevo. ?Bâ, mi kalina ia, asei goto tangomana ke gini vangalaka sa nina omea vania na Taovia?”
6Mi tana, migira sui na ida tana duli mi tana puku, migira goto na taovia tagao vanigira na mane vaumate, migira ara reitutugua nina omea tatamani na taovia tsapakae ara tamisegeniqira kara saua 7na omea sui girani agana na gini aqo i laona na Vale Tabu: ke 170,000 kilo na qolumila, me 340,000 kilo na siliva, me 620,000 kilo na tapalamila, me liusigotoa 3,400,000 kilo na tapala laka. 8Migira ara tamanina na vatu loki sosongo matena ara saugira kara moloa i laona nina valebisi na Vale Tabu, aia nogo a Jehiel tana duli na Levite i konina a Gerson e reitutugua. 9Igira na tinoni ara tamidou na sauvaniana na Taovia na omea sui girani, mara gini mage rongona e danga sosongo na omea ara saua. Maia goto a David na taovia tsapakae e gini mage loki sosongo.
A David e Tsonikaea God
10Mi mataqira na toga sui ara saikolu i tana, a David na taovia tsapakae e tsonikaea na Taovia. Maia e tsaria, “!Igoe na Taovia nina God a Jakob na mumuamami, e ulagana kami tsonikae sailaginigo na dani ma na dani! 11Igoe o loki putsikae mo susuliga sosongo, mo marara loki, mo doulaka saikesa, mo taovia loki i gotu vasau, rongona pipi sui na omea i baragata mi barangengo nimu tamani nogo igoe, migoe o taovia tsapakae mo tagaovi kaputigira na omea sui. 12Pipi sui na tamani levo ma na tangirongo ara talumai moa i konimu igoe; igoe nogo o tagaovigira pipi sui na omea tana gamu susuliga loki mi tana nimu mana; migoe moa tangomana ko naua me ke tangirongo me ke susuliga asei moa igoe o ngaoa. 13Mi kalina ia, igami ami soadougo igoe nimami God mami tsonikaea na asamu tabu.
14“?Masei inau, masei igira niqu tinoni, ke ulagamami igami na sauana sa omea vanigo? Rongona na omea sui ara talumai sui moa i konimu igoe, migami ami sauvisu vanigo moa na omea igoe o tamaninogoa. 15Taovia, igoe o donagininogoa laka igami ami totu tsinogo moa i lao eni vaga nogo igira na mumuamami i sau. Na maurimami e liu putsi tsaku sosongo vaga moa ti na auau lê, me utu kami tangomana na tsogo taniana na mate. 16Taovia nimami God, igami ami adisaimai gira sui nogo na vangana levolevo agana na logoana kesa na valetabu na mani tsonikaeana na asamu tabu, ma na omea sui girani ara talumai moa i konimu, migira sui nimu tamani goto nogo igoe. 17Inau au dona laka igoe o tovolea na tobaqira pipi sui na tinoni, mo reingaogira moa igira e gotolaka niqira sasaga. Mi tana niqu gotolaka inau au gini mage na sauana na omea sui girani vanigo, mau reigotoa laka igira nimu tinoni ara saimai ieni ara gini mage sosongo goto na sauvaniamu niqira vangalaka. 18Taovia igoe tu niqira God a Abraham ma Isaak ma Jakob na mumuamami, au nongigo ko naua migira nimu tinoni kara padalokigo ma kara rongomangamu sailagi vaga ara naunogoa i dani eni, ma kara totukakai saviliu i konimu. 19Ko sauvania a Solomon na dalequ na kili sailaginiana na muriaqira tana tobana popono pipi sui nimu ketsa ma nimu vali, me ke logoa na Vale Tabu inau au vangarau manogati vaninogoa na vangana sui.”
20Mi muri, ma David e ketsaligira na toga me tsaria, “!Igamu sui kamu tsonikaea na Taovia nimui God!” Mi tana, migira sui lakalaka na toga ara saikolu i tana ara tsonikaea na Taovia niqira God na mumuaqira, mara tao tsuporu i matana na Taovia mi matana goto na taovia tsapakae.
21Mi tana dani i muri, migira ara adimaigira kesa toga na buluka mane, me kesa toga na sipi mane, me kesa toga goto na dalena sipi, mara gini savori-kodoputsa tana belatabu, kolugotoa niqira sausau na uaeni. Mi muri mara sauvanigira na tinoni kara gania na turina. 22Bâ, mi tana dani ia, migira ara mage loki sosongo taguna ara mutsamutsa mara inu i matana na Taovia.
Mara tû mara katevulagitugua na rukanina kalina laka a Solomon aia niqira taovia tsapakae. Mi tana asana na Taovia ara ninaginia a Solomon ke lia niqira tagao, mara ninagotoa a Sadok ke lia niqira manetabu. 23Me vaga ia, maia Solomon e adia nina sasana na totukae a David na tamana aia na Taovia segeni nogo e vaturia. Maia e lia na taovia tsapakae dou sosongo, migira sui na puku tana Israel ara rongomangana. 24Migira sui lakalaka na tinoni lokiloki ma niqira tagao na mane vaumate, migira sui goto na dalena tavosi a David ara vekea laka kara totukakai kalavata i konina a Solomon vaga niqira taovia tsapakae. 25Ma na Taovia e naua me gini tangiloki gana rongo a Solomon i laona na Israel popono, me naugotoa ma Solomon e gini loki tsapakae liusigira bâ na taovia tsapakae sui ara tagao idanogo tana Israel.
Na Mateana a David
26A David na dalena a Jese e tagaovi kaputi poponoa na Israel 27i laona e vati sangavulu na ngalitupa: i Hebron e vitu na ngalitupa, mi Jerusalem e tolu sangavulu tolu na ngalitupa. 28Maia David e mate kalina e tuqatuqa sosongo nogo, me tamani levo sosongo migira na tinoni sui ara padalokia, maia a Solomon na dalena e tugua na tamana tana nina aqo taovia tsapakae. 29Ma na turupatuna nina aqo a David na taovia tsapakae tû tana tuturigana me tsau tana susuina ara maretsunanogoa tana tu niqira papi tugira tolu na propete, a Samuel, ma Natan, ma Gad. 30I laona na papi girani e totu na mamarena na vavanona nina aqotagao ma na susuligana loki, migira sui lakalaka na omea ara laba vania aia, me vania na vera ni Israel, me vanigira sui goto na puku tavosi ara totu polipolia.