TITO

¹ Ane yo nene Pawulo, u mwitumami wo Mulungu, kanyhi mutumwa wa Yesu Kilisito nghwandika. Ane haguywe ho niwuzenje u wihuwilo we wahagulwa wo Mulungu no kuwatonga ho wayimanye i mbeka yo wuhembi wetu, ² wono u musinji wayo wo wowitumbilo wo kuwutujila u wumi we cibitilila. U Mulungu mono si kalongaga wulambi, yacihuwiziza u wumi wuwo mu myaka ye katali lono yali yikali si nawa, ³ ne lidaha lyono likwiliye lyali lyeza kufika, yakalyanzalicila mu nghani yakwe. Ane napegwa i nghani yiyo, ho niyanzize mu wulajilize wo Mulungu, u Mukombozi wetu. ⁴ Nghukwandicila agwe Tito go mwanangu we mbeka mu wihuwilo wono cihanjile sese wose. Ilihewa no mulamu wono wukulawa kuli Mulungu Baba, na kuli Kilisito Yesu, u Mukombozi wetu. ⁵ Ane nakuleka ku Kilete ho wunozeleze zono zasigala zono zali zikali nakamilicila, kanyhi ho wuwahagule wanyamhala wa Kanisa no kuwawika mu makaya gose. Ninga weze kukumbucila zono nakulajiliza, ⁶ vyono yimunojeye u munyamhala wa Kanisa yawe munhu mono yena mugolece yumonga du, kanyhi yinojeye ne wanagwe weze wehuwiye, wono si wali nyono hamba si wali cibede. ⁷ Nayo Asikofu vyono yo mulanjilizi wo mulimo wo Mulungu, holeka yimunojeye yawe munhu mono yasina yilema. Yalece kuwa mwidunhumuzi, hamba kuwa mukolwa ne likuwo mbela, hamba mukolwa ku wujimbi, hamba mufyuzi, hamba si musulumila cambuzi cono si ce ling’ani. ⁸ Langa yimunojeye yawe mucemezi, kanyhi mono yakwenda iziswanu. Kanyhi yimunojeye yawe munhu mutuvu, we ling’ani. ⁹ Yimunojeye kanyhi, yebatile lukulu i nghani huwilwa nha vyono wukwijizwa. Holeka kosuma kuwataza wanji so mafundo ge mbeka no kusuma kuwalajila i masutya gawo wono wakuwanga kuli ze mafundo gago. ¹⁰ Hambi nha ko wali wenji wono wasina cihuliko, ko muno wa walya wono wapituka wakulawa mu dini ye Ciyahudi na wo wawo wono wasina cihuliko, wono wakuwajiliziza na wanji mu wulele wawo. ¹¹ Yiwanojeye i milomo yawo yidindwe, hambi nha weza kuwahodanga i wanhu wose so mejizo gawo gono si gawanojeye wejize, nawo wakwituma zizo ko wuhile wubi wo kusaka ho watuje mapesa. ¹² Sunga muyawo monga; muyagwe ne wawizi wawo yalonga mbeka lono yatela, “Wakilete walambi nhondo zose, wenha malimu, wabugu na kanyhi wadoba!” ¹³ Holeka ku soko yiyo yikunojeye wuwakalipile muno muno, ho wawe no wihuwilo wono wukwilaniciye. ¹⁴ Walece kujendelela ne zisimo ze bwete ze Ciyahudi, hamba i malajilizo ge wanhu gono gakwibuka muli wanhu wono wayilema i mbeka. ¹⁵ Zose zelile kuli wono welile, ninga kuli we makomaza na wono si wehuwiye, kusina cono celile, hambi i mahala gawo sunga ne viselinji vyawo nha vitipizwe. ¹⁶ I wanhu wono wenha wawo, watezaga ati wamumanyile u Mulungu, ninga kumbe mu metumo gawo ho wamukanaga. Wo wanhu we makomaza, kanyhi wali cibede, hamba si wakwiliye kanyhi mu nghani yo yose i swanu.

¹ Ninga agwe yikunojeye wuganule ze mafundo ge telele. ² Wuwalonjelaje i wakombi vyono yiwanojeye waweze ne cisindo, wawe watuvu, weyimizi, kanyhi waweze no wihuwilo we telele, wawe no wendo hamonga no wukangalizi. ³ Wuwalonjelaje sunga ne wadala nawo nhavivyo yiwanojeye wawe ne mikalile yo wumogopa u Mulungu, walece kuwa wasonjezi hamba kuwa wawanda wo wujimbi. Yiwanojeye wawe kwijiza i ziswanu, ⁴ ho wawazoweleze i wahinza kuwenda i walume zawo hamonga ne wana wawo, ⁵ kanyhi weze weyimizi akuno wali cisindo, wawe kuzilanjilila viswanu i zinghani za mu zinyumba zawo, kanyhi waweze ne cihuliko kuli walume zawo, ho nghani yo Mulungu yilece kubedegalwa. ⁶ Ne wazelelo nawo nha vivyo, wuwafundaje wawe no wiyimizi. ⁷ Yikunojeye gwegwe go mweneco weze wina musambo we metumo maswanu. Weze wuli mutuvu, ne mafundo gako geze gena wuzito. ⁸ Ne zinghani zako zilece kuwa na wuhoswe wo wose, i walugu wako ho wapuwe, walaza kuwa wasina cibi cinji co cose cono wocilonga muli’se. ⁹ Yiwanojeye nawo i wetumami wawahulice iwawaha wawo, no kuwendeza muli zose. Walece kuwangana nawo, ¹⁰ hamba kuwahiziza i vinhu vyawo. Ninga yiwanojeye walajile vyono wene waswanu, kanyhi wehuwilwa nhondo zose, ho wasume kugatujila lilumbo yiswanu i mafundo go Mulungu u Mukombozi wetu ku soko ye metumo gawo gose. ¹¹ Hambi ilihewa lyo Mulungu nha lyanzalikwe ku soko yo wukombozwe we wanhu wose. ¹² Ne lihewa lilyo likucijiza ciwulekaje wavu wose no wusulumizi wose wa mononze, ciweze no wiyimizi, ho cikale mu mikalile ye ling’ani yo kumogopa u Mulungu mono yinze yiyi ya lulu, ¹³ akuno cikulilindila lizuwa alilya i liswanu lyono cilitumbiye, mu cipango cono lokwijelela u lukumyo lo Mulungu Muwaha no Mukombozi wetu Yesu Kilisito. ¹⁴ Mono yelavya mweneco ho yacikomboze mu wavu wetu wose, ho yacinoze ciwe cisina yilema ase co wanhu wakwe mweneco, wanhu wono wena wuhile wo kwituma metumo maswanu. ¹⁵ Ale, wuwafundaje zizo, kanyhi wuwitumamilaje u wulajilize wako wose, akuno wukuwaswaswaniza no kuwasugula wono wakukuhuliciza. Munhu wo wose yalece kukubedegala.

¹ Wuwakumbucizaje wanhu wawogope i walongola, na wono wena u wulajilize, wawahulice, kanyhi weze wewikanizize lukulu ku wituma zose ziswanu. ² Wuwalonjelaje vyono walece kumuliga munhu wo wose, langa wekalaje welamuye akuno wakwiyihulika, kanyhi weze wapolo kuli wanhu wose. ³ Hambi mu vipango vinji, nase nha cali walele, kanyhi cili cibede, cali cajiliye. Cali cili wawanda we masulumizi ne makani ga mononze. Cekalilaga mu mikalile yo wavu no wivu, wanhu wakacisula, nase cikawasula. ⁴ Ninga caza kugubulwa i cidaha co wuswanu no wendo wo Mulungu, Mukombozi wetu, ⁵ yakacikomboza. Si yacikomboza ku soko ye nghani yo yose swanu yono cetuma sese, langa yacikomboza ku soko yo lusungu lwakwe, mu nzila yo Muhe Mono Yelile mono yakucipela ho cilelwe wupya, no kuwa ne mikalile mipya ko kucikwema kwe malenga. ⁶ U Mulungu yakacijidila yasina cipimo zo Muhe Mono Yelile muli Yesu Kilisito, Mukombozi wetu, ⁷ na ku so lihewa lyakwe ho cisume kuvumilwa hali Mulungu no kuwubocela u Wumi we cibitilila wono ciwitumbiye. ⁸ Ne nghani yiyi ya mbeka. Nghukulomba wuzilongaje wusimbiliye zinghani zi zino, ho wawalya wono wamwihuwiye u Mulungu wawe no wuhile wo kucitumamila cilejeho cawo mu wituma ziswanu, zono swanu na zono zina cambuzi kuli wanhu. ⁹ Ninga wilegaje mu wuwanji wo wulele, hamba mu wiwanganile wo wuwale we zindelo ze wakoko, no wugomvi, no wiwanganile muli zo Wulajilize. I zinghani zizo zisina hamba cambuzi kanyhi za bwete du. ¹⁰ U munhu mono yakuleta matemanuko, wumukagaje kamonga ne kejete, ninga hanyuma wumulekaje nha vyono yenha. ¹¹ Nagwe wumanyile vyono munhu we liwala lilyo yakondya kwajililila lukulu, no wubi wakwe wukumuhomelela nha vyono musutyi. ¹² Nilawa kuwa namutuma u kwako Alitema hamba Tukiko, wuhidimbale wuze kono Nikapoli wumbone, hambi nha nalamula vyono nowa kuko mwipango lye cinyuli. ¹³ Wuhidimbale kumutaza u mwana Zena u mukamisa uwulajilize hamonga na Apolo, ho wasume kwanza ze mihinzo yawo, kanyhi wulanjilile walece kwanjila cinji co cose cono wakusaka. ¹⁴ Yiwanojeye wanhu wetu weyijize vyono yiwanojeye kuvitumila vidaha vyawo mu wituma ziswanu, ho wawataze wono wena wanjile we mbeka, ne mikalile yawo nayo yeze mikalile yono yinojeye. ¹⁵ Wose wono nili hamonga nawo, wakukulamusa. Wuwalamusaje wose wono wacendile mu wihuwilo. Ilihewa lyo Mulungu liwezane na nyenye wose.