WUGUBULE

WUGUBULE

¹ Citabu acino, co cina zinghani ze metumo gono gagubulwa na Yesu Kilisito. U Mulungu yamugubulila Kilisito u wugubule wu wuno, ho yawalajile i wetumami wakwe zinghani zono si zotinya kwijela. Kilisito yamutuma malayika wakwe yamumanyize Yohana u mwitumami wakwe, i zinghani zizino, ² nayo Yohana yakazilonga zose zono yaziwona. Awuno wo wuhomelezi wakwe kuli ze nghani yo Mulungu, ne mbeka yono yagubulwa na Yesu Kilisito. ³ Yo mumoti munhu mono yakucisoma i citabu cicino, kanyhi wamoti wono wakuzihuliciza zinghani ze nghani yiyi yo wuwile, no kwibata zono zandicigwe mumu! Hambi cidaha nha casejelela, lono i zinghani zizi sizoleka kwijela. ⁴ Ane yo nene Yohana mono nghugandicila makanisa mupunghati, gono gali mu yisi ya Asiya. Ilihewa no mulamu vyeze kuli’nye ku wulawa kuli mwene mono hoyuli, mono yali ho yali, kanyhi mono yakuza, na kanyhi ku wulawa kuli i myuhe mupunghati yono yikalaga he’goda lyakwe lyo lukumyo, ⁵ kanyhi na ku wulawa kuli Yesu Kilisito, u muhomelezi mwihuwilwa, u mulongozi kuzukulwa muli wafu, mono yatemile i watemi we yinze. Mwene yacendile, na so isakami yakwe, yakaciwopola kulawa mu wubi wetu, ⁶ yakacinoza ciwe wutemi, ciwe wakohani, ho cimwitumamilo Mulungu u Sogwe. Ale, kuli mwene Yesu Kilisito, lweze lukumyo ne vilungo, cibitilila ne cibitilila! Heya. ⁷ Langa ta! Yakuziza mu mavunde! Ne wanhu wose wolomuwona, sunga na walya wono wamucinya no mugoha. Ne makungugo gose ga kono’nze, gololila ku soko yo mwene. Heya! Vyo yiweze. ⁸ “Ane yo nene wo Mwamulizo na wo Mudumo,” vyo yakutya Muwaha Mulungu u Mudaha Vyose, mono hoyuli, mono yali ho yali, na mono yakuza. ⁹ Ane yo nene Yohana u ndugu yenyu, na mu wilunza na Kilisito, nghuhanga hamonga nanye mu wukangalila magayo gono gakuwagana wose wono wali mu wutemi wakwe. Ane nawikwa mu cizingwa ca Patimo, ku soko yo kuyiganula nghani yo Mulungu ne mbeka ya Yesu. ¹⁰ Ale, mwizuwa linji, lizuwa lyo Muwaha, nghawa mu Muhe, nghahulika yizi yiwaha mu nyuma yangu linha mulilo we ndulele. ¹¹ Nalyo lizi lilyo likatya, “Wuzandikaje mu citabu cicino zose zono wukuziwona, wugategulile gaga i makanisa mupunghati, ku Efeso, ku Simulina, ku Peligamo, ku Tuwatila, ku Salidisi, ku Filadelifiya, na ku Lawodikeya.” ¹² Ale, nane nghelenga ku nyuma, ho sume kumuwona yuyo mono yalongane nane, baho nghawona wuwiko we zitala mupunghati za zahabu, ¹³ na haciligati yayo, hakawa hoyuli yunji yenha munhu, nayo yali yavwalile kanzo nhali na musipi wa zahabu mu mhambaga yakwe. ¹⁴ I zimvwili zakwe zali nzelu swee, zihwanile wuhamba, kotya seluji, ne meso gakwe gang’alalaga nha moto, ¹⁵ i migulu yakwe nayo, yang’alalaga nha cuma cizelu, cono cilenguywe mu moto no kukusuwa muno, ne lizi lyakwe likawa nhe’zi lya malenga menji gono gakuhuluma. ¹⁶ Na mu muwoko wakwe wo kulume, yakawa yadinghuye nyelezi mupunghati, na mu mulomo wakwe, mukalawa mumaje mukali kose kose. No wusu wakwe wang’alalaga nhe lizuwa likali. ¹⁷ Holeka nane naza kumuwona du, hobaho nghagwa ha magulu gakwe nha fwiye. Ninga mwene yakanjeleka muwoko wakwe wo kulume, yakatya, “Wulece kogopa! Ane yo nene wo Mwamulizo na wo Mudumo. ¹⁸ Ane yo nene mono nili mumi! Nali fwiye, ninga’lu nili mumi cibitilila ne cibitilila. Nina wulajilize we lifwa sunga na wa mu yinze ye wafu. ¹⁹ Holeka, alu wuzandikaje zizi zose zono wukuziwona, zono zokwijela lulu, na zono zolokwijela hanyuma. ²⁰ Ne nhunizo hundikwe ye zinyelezi zo mupunghati zono wuziwene mu muwoko wangu wo kulume, hamonga na hundikwe yo wuwiko wu wulya we zitala mupunghati za zahabu, nha yoyi, zi zilya i zinyelezi zo mupunghati, wo wamalayika we makanisa go mupunghati, na wulya u wuwiko mupunghati we zitala, go makanisa mupunghati.”

¹ “Kuli malayika we likanisa lya Efeso, wandice nhavi, “ ‘Ayi yo nghani yono yikulawa kuli mwene mono yazibate i zinyelezi mupunghati mu muwoko wakwe wo kulume, mono kajendaga haciligati yo wuwiko we zitala mupunghati ze zahabu. ² Manyile i metumo gako gose, niwumanyile no wuhidimbazi wako, hamonga no wukangalizi wako wose. Kanyhi manyile nha vyono si wukusuma kuwakangalila wanhu wabi, kanyhi na vyono wakondya kuwamanya awalya wono wakwiyitya watumwa, nawo wo si wene, kumbe wakulonga wulambi. ³ Agwe wuli ngola, kanyhi wakangalila mu wugaye winji muno, ku soko ye litagwa lyangu, hamba kukatala yaye. ⁴ Ninga hamba nhavivyo, nina nghani monga du kuli’gwe, vyono agwe alu si wunyendile kanyhi nha ha mwamulizo. ⁵ Ale, wukumbucile vyono wali winha ha mwamulizo, lono wali wukali sinagwa, nalu lono wakondya kugwa! Holeka alu wunene wubi wako, witume nha vyono wali kwituma ha mwamulizo. Na hono wulece kunena no kuwuleka wubi wako, nokuza kuli’gwe, nowuwusa u wuwiko wako we tala hanhu hayo. ⁶ Ninga hamba nhavivyo, nghukulumba ku soko ye cinhu cimonga du, vyono agwe wugasulile makani gono wakwituma Wanikolayi nha vyono na nene nigasulile.’ ⁷ “Mono yena makutu go kuhulicila, yazihulikaje zono u Muhe yakugalonjela i makanisa! ‘Nawo wono wosuma, nowapela i ling’ani yo kulye mana go mubici wo wumi, wono wuli mu mugunda wo Mulungu.’ ” ⁸ “Kuli malayika we likanisa lya Simulina, wandice nhavi, ‘Ayi yo nghani yono yikulawa kuli mwene mono wo Mwamulizo na wo Mudumo, mono yafwa no kuwumipa kanyhi. ⁹ Nigamanyile magayo gako, kanyhi sunga no wuciwa wako, ninga imbeka agwe ho wuli mugoli. Kanyhi niwumanyile no wutovulwe wono watovulwa na walya wono wakwiyitya Wayahudi, ninga ho si Wayahudi we mbeka, langa yipuga lye Setani. ¹⁰ Ninga agwe wulece kuzogopa azilya zono zokuziza no kukutajila sunga na mu wugaye. Wuhulicize! Setani yakuhila yamujelenyi ko kuwatajila wanji wayenyu mu jela, nanye motuga magayo mu vilo yikumi. Holeka, mweze muli wehuwilwa kuli’ne, sunga ko ku wufwe, nane nomupelenyi wumi, co cihumbilizwa cenyu co wusume wenyu.’ ¹¹ “Mono yena makutu go kuhulicila, yazihulikaje zono u Muhe yakugalonjela i makanisa! ‘Nawo wono wosuma, si wotamiswa ne lifwa lye kejete yaye.’ ” ¹² “Kuli malayika we likanisa lya Peligamo, wandice nhavi, ‘Ayi yo nghani ya mono yena mumaje mukali kose kose, yakutya, ¹³ Manyile kono wikaye. Agwe wikaye ku wikalo wuwaha wa Setani! Ninga hamba nhavivyo, wukali wibatiliye litagwa lyangu, hamba si wakana u wihuwilo wako wa kuli’ne, sunga na mu vilo vya Antipa, muhomelezi wangu mwihuwilwa, lono yawulajilwa i hanhu hono kekalaga Setani. ¹⁴ Ninga hamba nha vivyo, nina nghani zinji nyhefu kuli’gwe, vyono wanji wa muli nyenye, muli watyatyi wa Balamu mono yamufunda Balaki, ho yawawicile cikobazo i wana wa Isilayeli ho walye zindigwa zono zali zikumbiciywe vihwani, kanyhi wasenyhe. ¹⁵ Kanyhi kowali wanji wa muli nyenye, wanhu wono wakutyatya i mafundo ge Wanikolayi. ¹⁶ Holeka wunene wubi wuwo kanyhi wuwulece. Na hono wulece kunoza nhavivyo, ale nokuza kuli’gwe mbela mbela, nane nokwihoma ne wanhu wawo ko mumaje wono wukulawa mu mulomo wangu.’ ¹⁷ “Mono yena makutu go kuhulicila, yazihulikaje zono u Muhe yakugalonjela i Makanisa! ‘Nawo wono wosuma, nowapela ayilya mana yono hundikwe. Kanyhi nowapela yibwe yidodo yizelu lyono lyandicigwe yitagwa yipya, lyono munhu yunji sikosuma kulimanya, langa wawo du wono wolibocela.’ ” ¹⁸ “Kuli malayika we likanisa lya Tuwatila, wandice nhavi, ‘Ayi yo nghani yo Mwana wo Mulungu, mono i meso gakwe gakung’alala nha moto, ne migulu yakwe yikung’alala yinha shaba yono yikung’alala. ¹⁹ Nigamanyile i metumo gako gose. Kanyhi manyile no wendo wako, no wihuwilo wako, u witumami wako, hamonga no wukangalizi wako. Agwe aluno wukwituma viswanu muno si nha hamwamulizo. ²⁰ Ninga nina nghani monga du kuli’gwe, nayo yoyi, Agwe wukumukangalila ayulyo mucekulu mono yakucemwa Yezebeli, mono yakwiyitya mwene yo muwizi wo Mulungu. Mwene yuyo Yezebeli yakuwa kuwafunda, kanyhi yakuwasutizya i wetumami wangu wasenyhe no kulya zindigwa zono zikumbiciywe vihwani. ²¹ Nimuleceye cipango co kunena wubi wakwe, ningo mwene ho si yakusaka kwilega no wusenyha wakwe. ²² Alu, wuhulicize! Neza kumutaga mu citanda, i hanhu hono mwene hamonga na wose wono vyasenyhana nayo, wotuga magazo makali. Heya, ninga nonoza nhavivyo, hono walece kunena metumo gawo mabi gono vyetumana nayo. ²³ Kanyhi nowawulaga i watyatyi wakwe, i makanisa gose ho gamanye vyono, yo nene du mono nizimanyile zinhumbula ne mahweso ge wanhu. Nane nomulipa munhu wo wose muli nyenye nha vyono genha i metumo gakwe.’ ²⁴ “Ninga anye mo wanji mono muli kuko ku Tuwatila, mono si mukugatyatye mafundo gakwe yuyo Yezebeli, na kanyhi mono si mweyijiza cico cono wakucicema wakutya, ‘Ze cinyele za Setani,’ nghumulonjelenyi vyono si nomutwicenyi mutegulo wunji. ²⁵ Ninga munojeye mukamisize lukulu cono mwina naco lulu, sunga kolo neza kuza. ²⁶ “Wono wosuma no kukamisa sunga ko ku ndumo, hamonga no kwituma zo wuhile wangu, wawo nowapela wulajilize muli makungugo. ²⁷ Heya, nowapela i vilungo vivilya vyono nane navibocela kulawa kuli Baba. ²⁸ Nawo wogatema makungugo no kugadimila nghome ya cuma, no kugatulanjiza nha ciya ce lilongo. Kanyhi nowapela i nyelezi yi mwacinghunghu. ²⁹ Mono yena makutu go kuhulicila, yazihulikaje zono u Muhe yakugalonjela i makanisa!”

¹ “Kuli malayika we likanisa lya Salidisi wandice nhavi, “ ‘Ayi yo nghani yono yikulawa kuli mwene mono yena myuhe mupunghati yo Mulungu, hamonga ne zinyelezi mupunghati. Nigamanyile i metumo gako gose, manyile vyono wumanyice nha wuli mumi, kumbe ho wufwiye! ² Ale winuce! Wuzisikamye ziswanu zono zisigaye, lono nazo zikali si najililila lukulu. Hambi sunga nalu, nha nghali sininawona i metumo gako gawe gono gakwilaniciye hali Mulungu wangu. ³ Ale wukumbucile azilya zono wejizwa, na vyono wazihulika, wukazikamisa, ale, wukawanizaje u wuhile wako wubi. Na hono wulece kwikala meso ale, nokuziza nhinicizo nho muhizi, hamba sikocimanya ne cipango cono nokuziza. ⁴ Ninga hamba nhavivyo, ko wali wanji kuko ku Salidisi, wono si wavitipiza vivwalo vyawo. Awo wo wanojeye kujendana hamonga nane, akuno wavwalile vivwalo vizelu.’ ⁵ “Nawo wono wosuma, wovwikwa vivwalo vizelu nhavivi. Nane hamba si nogapatila lukulu i matagwa gawo mu citabu co wumi, kanyhi nowavumilila hali Baba na hali wamalayika wakwe, vyono wangu. ⁶ Mono yena makutu go kuhulicila, yazihulikaje zono u Muhe yakugalonjela i makanisa!” ⁷ “Kuli malayika we likanisa lya Filadelifiya wandice nhavi, ‘Ayi yo nghani yono yikulawa kuli mwene mono yelile kanyhi we mbeka, mono yena wufunguwo wa Dawudi, mono kawudigulaga, hamba hasina kanyhi munhu mono kosuma kudinda, mono kadindaga, hamba hasina kanyhi munhu mono kosuma kuwudigula. ⁸ Ninga manyile metumo gako gose! Langa ta, nakondya kuwudigula u mulango ha mwande yako, wono hasina munhu mono kosuma kuwudinda. Manyile vyono hamba wuwe wina vilungo vicefu, ninga hamba nhavivyo, wugebate ne mejizo gangu, wuyikamise ne nghani yangu, kanyhi hamba si walikana ne litagwa lyangu yaye. ⁹ Alu wuhulicize! Nokuletela wanhu we lipuga lya Setani, wanhu wono weyitezaga Wayahudi, kumbe ho walambi. Alu wawo nowaleta kuli’gwe wakufugamile hamwande yako, ho wamanye vyono ane mbeka nghwendile agwe. ¹⁰ Vyono agwe wakamisa i lilajilizo lyangu lyo wukangalile, ale nhavivyo nane nokukamisa mwi’pango lyo wugaye lyono likuwaziza wa kono’nze wose, no kuwajela wono wekaye mono’nze wose. ¹¹ Nghuza kuli’gwe musunho! Holeka wukamise muno muno cono wina ho yunji yalece kukusolela i cipegwa cako co wusume wako.’ ¹² “Wono wosuma, nowanoza wawe masumbili mu Nyumba yo Mulungu wangu, nawo hamba si wolowucila lukulu mumo. Kanyhi nokwandika muli wene litagwa lyo Mulungu wangu, ne litagwa lye likaya lyo Mulungu wangu, yo Yelusalemi yimhya, i likaya lyono lyotima kulawa ku wulanga ko Mulungu wangu. Kanyhi nokwandika ilitagwa lyangu yipya muli wene ¹³ Mono yena makutu go kuhulicila, yazihulikaje zono u Muhe yakugalonjela i makanisa!” ¹⁴ “Kuli malayika we likanisa lya Lawodikeya wandice nhavi, ‘Ayi yo nghani yono yikulawa kuli mono yakucemwa, yo “Heya”, Mwene yo muhomelezi mwihuwilwa na we mbeka, mono yo mwamulizo we viwumbwa vyose vyono u Mulungu yaviwumba. ¹⁵ Nigamanyile metumo gako gose! Manyile vyono agwe si wuli zizizi, hamba si wuli moto. Wali wuwe ciba, wuwe wuli kumonga du, zizizi hamba moto. ¹⁶ Alu vyono wuli civuce du, si wuli zizizi hamba si wuli moto, hodu nane nokufunya wuwuce mu mulomo wangu!’ ¹⁷ Agwe wukwiyitya, ‘Ane nili mugoli, nina vinhu vyose, hamba si nyanjize cinji co cose.’ Kumbe si wumanyile vyono agwe wuli musocele, kanyhi wuli munhu wo kuwonelwa lusungu, wuli muciwa, kanyhi wuli mubofu, kanyhi wusawuce! ¹⁸ Alu ane nghukupela yihala nhavi, wugule kwangu zahabu swanu muno, ho wuwe wuli mugoli mbeka. Kanyhi nghukunena, dedede, wugule ne vivwalo vizelu, wuvwale, ho wugubicize cevu ce cipwi cako. Wugule kanyhi ne mafuta, wibace mu meso gako ho wuwone. ¹⁹ Ane yo nene mono nghumulanjiza no kumutacila munhu wo wose mono nimwendile. Holeka wikamilizaje, wunene, wu wulece wubi wako. ²⁰ Wuhulicize ta! Ane nimile ha mulango, nghukong’onha. Munhu hono yalihulice lizi lyangu, no kudigulo mulango, ane nokwinjila mumo mu nyumba yakwe, nane nolizana nayo zindigwa, nayo kolya hamonga nane. ²¹ “Wono wosuma, wawo nowekaza hamonga nane mwi’goda lyangu lyo wutemi nha vyono ane no mweneco nasuma, nghawa kwikalana hamonga na Baba mwigoda lyakwe lyo wutemi. ²² Mono yena makutu go kuhulicila, yazihulikaje zono Muhe yakugalonjela i makanisa!”

¹ Hanyuma ya zizi, nghalanga, nghawona mulango wono wuli mwazi ku wulanga. Ne lizi lililya lyono nalihulika hamwamulizo, lyono lyali nha mulilo wa ndulele, likatya, “Wuze ahano hono kacanyha, nane nokulajila zinghani zono zilejela hanyuma.” ² Ho baho baho du nghawa mu Muhe. Kumbe kuko ku wulanga holili yigoda lyo wutemi, na mucanyha yalyo, yali yekaye yunji. ³ Nayo yuyo mono yali yekaye mwi’goda lilyo, ku wulangwe, yali yehwanile alimasi, ne libwe yidunghu yiswanu muno. Kanyhi kwali kolili licilalyambwa lye mvula, lyono likung’alala, na kuwulanje, linha lili dedede, nalyo likawa lipilime ligoda lyo wutemi mbavu zose. ⁴ Hakawa hogali magoda makumi mejete na mane gono gali galipilime ligoda lyo wutemi, na mu magoda gago, wali wekaye wawaha makumi mejete na wane, nawo wali wavwalile vivwalo vizelu, na mu mitwe yawo, wali wavwalile mikumbo ya zahabu. ⁵ I mamuli, ne lizi, hamonga ne madidimo mawaha, vyalawaga baho he’goda lyo wutemi. Sunga ne zitala mupunghati zo moto, nazo zakaga baho he’goda lyo wutemi. Ne zitala zizo, yo myuhe mupunghati yo Mulungu. ⁶ Na ha mwande ye ligoda lyo wutemi, hali ho cili cinhu cinji cono cihwanile malenga ga cilole, ne malenga gago gakawa gakung’alala kotye’bwe lyono likung’alala muno muno. Na mu mbavu zose ze ligoda lilyo lyo wutemi, mu wupilime walyo, kwali kovili viwumbwa vine vyumi. Ne viwumbwa vivyo vikawa vimemile meso, ku mwande na ku nyuma. ⁷ I ciwumbwa cilongozi cali cihwanile simba, ce kejete kotya ng’ombe, na ce kadatu cali cina futa kotya ya munhu, naco ce kane, cali cinha kotya numba yikuguluka. ⁸ Ne viwumbwa vivyo vyose vyono vine, vyali vina mabawa mutandatu mutandatu, kanyhi vyali vimemile meso, mugati na mudeha. Navyo vikalaga vikwimba hamba kuceha cilo ne misi, vikutya, “Welile, welile, welile, yo Muwaha Mulungu u Mudaha vyose mono yali, mono hoyuli, na mono yakuza.” ⁹ Na lono viwumbwa vivilya vine vyembaga zinyimbo zo kumukumya, na ze cogopo, hamonga no kumulumba yuyo mono yekaye mwi’goda lyo wutemi, mono kekalaga cibitilila ne cibitilila, ¹⁰ awalya i wawaha makumi mejete na wane, nawo wakagwa ha mwande ya yuyo mono yekaye mwi’goda lyo wutemi no kumuhemba yuyo mono kekalaga cibitilila ne cibitilila, nawo wakuyiwika mikumbo yawo ha mwande ye ligoda lyo wutemi akuno wakutya, ¹¹ “Agwe yo gwegwe go Muwaha nago Mulungu wetu, mono wunojeye lukumyo, ne lilumbo ne vilungo, hambi nha yo gwegwe muwumbi we vinhu vyose, na ku so wuhile wako, vyose vikawa, na vyose vyapegwa wumi no kuwumipa.”

¹ Hanyuma nghawona citabu mu muwoko wo kulume wa yuyo mono yali yekaye mwigoda lyo wutemi, ne citabu cico, cali candice mugati na kunze yayo, naco cali ciwopwe ne vinamatizo mupunghati. ² Kanyhi nghamuwona malayika we vilungo yakulonga ne’zi ’waha yakutya, “Nani ’mbi mono yanojeye kubena vivyo vinamatizo, sunga yacigubule ne citabu cico?” ³ Ninga hamba si yejela munhu wo wose ku wulanga, hamba mono’nze, hamba hasi ye yinze, mono yasuma kucigubula citabu cico, hamba kucilanga za mugati. ⁴ Holeka ane nghalila muno muno, vyono si hejela munhu mono yali yanojeye yacigubule no kucilanga za mugati yaco. ⁵ Hanyuma yumonga wa muli wawalya wawaha yakanonjela yakutya, “Wulece kulila! Wulanje ta! Simba wo mulango wa Yuda, wo lulelo lwa Dawudi, yakondya kusuma. Nayo yo kosuma kuvibena vinamatizo vivyo mupunghati, no kucigubula cico citabu.” ⁶ Hanyuma nghawona u Mwana we ngholo yemile haciligati ye ligoda lyo wutemi, yapilimwe mbavu zose na vivilya viwumbwa vyumi, hamonga na wawalya wawaha. Na yuyo Mwana we ngholo yakawa kwijela nha muwulagwe. Yali yena mahembe mupunghati, ne meso mupunghati, nayo yo myuhe mupunghati yo Mulungu, i myuhe yono yali yategulwa hanhu hose mono’nze yose. ⁷ U Mwana we ngholo yakacisola citabu mu muwoko wo kulume wa yu yulya mono yekaye mwigoda lyo wutemi. ⁸ Nayo yaza kucisola citabu cico du, avilya viwumbwa vine hamonga na walya wawaha makumi mejete na wane, wakagwa funama hamwande yo Mwana we ngholo. Nawo wose wali wena visumbi na bakuli za Zahabu, zono zali zimemile wuvumba, go malombo ge wanhu wo Mulungu. ⁹ Nawo wakemba u lwimbo aluno lupya. “Agwe yo gwegwe mono wunojeye wucisole citabu cico, no kubena vinamatizo vyayo. Vyono agwe wakondya kuwulagwa, wukamugulila Mulungu ne sakami yako, wose we zimbeyu zose, we zinonga zose, ne wanhu wose ne zinghungugo zose. ¹⁰ Yo gwegwe mono wawanoza wawe wutemi we wakohani, wamwitumamile Mulungu wetu, nawo wotema mono’nze.” ¹¹ Hanyuma nghalanga, nghahulika lizi lya wamalayika wenji muno wono si wakuwala, maelufu na maelufu. Wali wekaye walipilime ligoda lyo wutemi, navyo viwumbwa vine vyumi, hamonga na walye wawaha, ¹² wakalonga wenuye mazi gawo wakutya, “U Mwana we ngholo mono yawulagwe, yo yanojeye yabocele vilungo, wugoli, mahala, wusume, lukumyo ne lilumbo.” ¹³ Nghavihulika viwumbwa vyose vya ku wulanga na vya mono’nze, na vya kusi ye yinze, sunga na vya mu malenga, viwumbwa vyose du vya mono’nze, vikutya, “Kuli mwene mono yekaye mwigoda lyo wutemi, na kuli Mwana we ngholo, viweze wumoti, ne lilumbo, no lukumyo, no wuwaha cibitilila ne cibitilila!” ¹⁴ Na vilya viwumbwa vine vyumi, vikatya, “Heya vyo yiweze.” Na awalya wawaha wakagwa funama wakamuhemba.

¹ Hanyuma nghawa kumuwona u Mwana we ngholo yakucinamatula cinamatizo cinji ca muli vinamatizo vivilya mupunghati. Nghahulika ciwumbwa cimonga ca muli viwumbwa vine vyumi, cikulonga kwe’zi ’waha nhe’zi lye ’balalusi cikutya, “Wuze!” ² Nane nali neza kulanga, nghawona kumbe baho hoyili fwalasi monga nzelu. Na mono yali yali mucanyha yayo, yali yena wupinde, kanyhi yakapegwa no mukumbo. Nayo yakawuka baho nha mono yakondya kusuma, ho yajendelele kusuma. ³ Mwana we ngholo nayo yakacinamatula cinamatizo ce kejete. Nghahulika i ciwumbwa cumi ce kejete cikutya, “Wuze!” ⁴ Nane nali neza kulanga, kumbe kanyhi hakawa na fwalasi yinji ndunghu baho. Nayo mono yali yali mucanyha yayo, yakapegwa vilungo vyo kuleta wulugu mono’nze, wanhu wewulaje, kanyhi yakapegwa no mumaje muwaha muno. ⁵ Hanyuma kanyhi u Mwana we ngholo yakacinamatula cinamatizo ce kadatu. Nane nghahulika ci cilya ciwumbwa cumi ce kadatu cikutya, “Wuze!” Nane nghalanga, baho nghawona kanyhi fwalasi yinji nhitu. Na mono yali yali mucanyha yayo, yali yena mu muwoko wakwe vipimilo vyejete vyo kupimila wuzito. ⁶ Nghahulika cinhu cinji kotya nha yizi lyono likulawilila kuli vivilya viwumbwa vine vyumi. Nalyo lizi lilyo likatya, “Cibaba cimonga ca wusaje wa ngano, cogulwa dinali monga, na vibaba vidatu vya shayili, navyo vyogulwa dinali monga nhavivyo. Ninga wulanjilile, wulece kuhodanga mafuta hamba divayi!” ⁷ Hanyuma kanyhi Mwana we ngholo yakacinamatula cinamatizo ce we kane. Nghahulika ciwumbwa cumi ce kane cikutya “Wuze!” ⁸ Nane nghalanga, nghawona baho fwalasi yinji ye liwala lye silu. Ne litagwa lya mono yali yali mucanyha yayo, yacemwaga Wufwe, no Wuninyina vityatizye nayo. Ale, wawo wakapegwa vilungo mu lobo monga ye yinze ho wawawulaje wanhu ko mumaje, ne nzala, ne lihuhuji, na kwe malimu makali ga mono’nze. ⁹ Hanyuma kanyhi u Mwana we ngholo yakacinamatula i cinamatizo ce hano. Ale, hasi ye cikumbicilo co kufusiza wuvumba, nghawona awalya wono wawulagwa ku soko ye nghani yo Mulungu, na ku soko yo kuyiganula. ¹⁰ Nawo wakalila kwe’zi ’waha wakutya, “Agwe go Muwaha, mono welile kanyhi mono wuli mwihuwilwa, alo sunga vipulute vilo vilinga, ho wuze wuwaling’anize no kuwalipiciza wose wono wekaye mono’nze, ku soko yo wuwulagwe wetu wono wali kuciwulaga?” ¹¹ Nawo wakapegwa yumonga yumonga civwalo cizelu, wakalonjelwa vyono walindile lindile hadodo, sunga kolo lyakondya kuficilicila i liwalo lye wetumami wayawo, kanyhi ne wandugu zawo wono wowulagwa nha vyono wawulagwa weneco. ¹² Nane nghawona lono Mwana we ngholo yakacinamatula cinamatizo co mutandatu, kukawa ne’tulo yiwaha lye yisi, ne lizuwa likatukuwala nhe mwenda yititu no mwezi nawo, wukadunghuwala nha sakami. ¹³ Zinyelezi nazo zo wulanga, zikagwa hasi nha mana go mukuyu gono si gakangaye, vyono gakung’unhikaga lono mubici wayo wukusinjiswa ne mbeho mbaha. ¹⁴ No wulanga nawo wukajilila, wukawa nha kalatasi yono mhalingwe. Matunda gose hamonga ne vizingwa vyose, vikawuswa hanhu hayo. ¹⁵ I watemi wa mono’nze, ne wawaha, hamonga ne wawaha we wasilikale, ne wagoli, na we vilungo, ne wanhu wose, i wawanda ne walelele wakehundika mu mapango na mu mabwe mawaha muno ga mumatunda. ¹⁶ Wakawa kugalonjela matunda na gago mabwe mawaha muno muno wakutya, “Ale, cigwilenyi si, mucihundicize ha yuyo mono yekaye mwigoda lyo wutemi, kanyhi ho ciwe kutali ne likuwo lyo Mwana we ngholo! ¹⁷ Hambi lizuwa lyo kogofya, lye likuwo lyawo, nha lyakondya kuza. Alu nani ’mbi mono kosuma kwima no kwidoma nalyo?”

¹ Hanyuma ya zizo, nghawona wamalayika wane, wemile mu zinhuzi zose ze yinze vyono yine, akuno webatilize mbeho ze yinze, ho mbeho yilece kuputa mu’nze hamba hadodo, hamba mu yisi, hamba mu malenga, hamba mu mabici. ² Kanyhi nghamuwona malayika yunji yakulawilila ku lubavu lwe cilima yakubita kucanyha, akuno yena no mutozo wo Mulungu u mumi. Nayo malayika yuyo yakazoza kwe’zi ’waha, yakuwalonjela wawo wamalayika wane, wono wali wapejigwe vilungo vyo kuhodanga yisi ne malenga, ³ yakatya, “Mulece kuyihodanga yisi, hambe malenga, hambe mabici, sunga kolo cakondya kuwawicila citanjilo mu wusu wawo, i wetumami wo Mulungu wetu.” ⁴ Hanyuma nghahulika i liwalo lya wawo wono wawicilwa citanjilo, nawo wali nhavi, wanhu elufu igana limonga na makumi mane na yine we nghungugo yose ye wanhu wa Isilayeli. ⁵ Wo mulango wa Yuda, wali wanhu elufu yikumi na nyejete. Wo mulango wa Lubeni, elufu yikumi na nyejete wo mulango wa Gadi, elufu yikumi na nyejete. ⁶ Wo mulango wa Asheli, elufu yikumi na nyejete. Wo mulango wa Nafutali, elufu yikumi na nyejete. Wo mulango wa Manase, elufu yikumi na nyejete. ⁷ Wo mulango wa Simiyoni, elufu yikumi na nyejete. Wo mulango wa Lawi, elufu yikumi na nyejete. Wo mulango wa Isakali, elufu yikumi na nyejete. ⁸ Wo mulango wa Zabuloni, elufu yikumi na nyejete. Wo mulango wa Yusufu, elufu yikumi na nyejete. Wo mulango wa Benyamini, elufu yikumi na nyejete. ⁹ Hanyuma naza kulanga, nghawona yipuga yiwaha lye wanhu si wakuwala, wanhu we zimbeyu zose, ne zinghungugo zose, na we zinonga zose. Nawo wali wemile he’goda lyo wutemi, na hali Mwana we ngholo, akuno wavwalile vivwalo vizelu, kanyhi webate ne manhambi ge mitende mu mawoko gawo. ¹⁰ Wakalonga ne mazi mawaha, wakutya “I mhonelo yetu yikulawa kuli Mulungu wetu mono yekaye mwigoda lyo wutemi, kanyhi na kuli Mwana we ngholo!” ¹¹ Nawo wamalayika wose wakenuka, wakalipilima ligoda lyo wutemi, hamonga na wa walya wanyamhala hamonga na vivilya i viwumbwa vine. Wose wakagwa funama he’goda lyo wutemi, wakamuhemba Mulungu, ¹² wakutya, “Heya! I lilumbo no lukumyo, ne mahala, no wulumbe, ne cogopo, ne vilungo no wuwaha, viweze kuli Mulungu wetu cibitilila ne cibitilila! Heya!” ¹³ Yunji muyagwe na wa walya i wanyamhala, yakambuza yakutya, “Alu mwene wawa wono wavwalile vivwalo vizelu, wo wanhuci? Na kanyhi, walawa hayi wene?” ¹⁴ Nane nghamupitula nghamutya, “Muwaha, gwegwe wumanyile!” Nayo yakanonjela yakutya, “Wawa awa, wo wawalya wono wakola wapolile mugati yo wugaye wuwaha. Ne myenda yawo, wakayezeza mu sakami yo Mwana we ngholo, nayo yikawa mizelu swee. ¹⁵ Holeka wukuwawona wali he’goda lyo wutemi lyo Mulungu. Nawo wamwitumamilaga u Mulungu mu wuhembelo wakwe, misi ne cilo, nayo mono yekaye mwi’goda lyo wutemi, kokoma lihema lyakwe muli wene ho yawadime. ¹⁶ “Nawo si wolowonela lukulu nzala hamba nyhilu, ne lizuwa hamba moto wunji, si wolowatowa kanyhi, ¹⁷ hambi u Mwana we ngholo mono yali haciligati ye ligoda lyo wutemi, nha yo kolowa yo mudimi wawo, nayo kowatonga sunga ko ku mivwilo ye malenga go wumi. No Mulungu kogapatila lukulu mahozi gose ga mu meso gawo.”

¹ No Mwana we ngholo yali yeza kucinamatula i cinamatizo co mupunghati, ku wulanga kukawa twii, nha lipango lya nusu saa. ² Hanyuma nghawa kuwawona wa walya wamalayika mupunghati wono wemile hali Mulungu wakupegwa ndulele mupunghati. ³ Na malayika yunji yakaza, akuno yadinghuye cifusizo ca zahabu mu muwoko wakwe, nayo yakema ha cikumbicilo co kufusiza wuvumba. Nayo yakapegwa wuvumba winji ho yawulavye cilavywa hamonga ne malombo ge wanhu wose wo Mulungu, ho yagalavizye mu cikumbicilo ce zahabu cono cili he’goda lyo wutemi. ⁴ Ne lyosi lyo wuvumba hamonga ne malombo ge wanhu wo Mulungu, vikananucila mu muwoko wa malayika yuyo mono yali yali hali Mulungu. ⁵ Hanyuma yuyo, yakasola cifusizo, yakacimemya moto wono yawusola mu cikumbicilo, yakacigumila kono’nze. Baho hakawa na mabalalusi, ne mazi, ne mamuli, sunga ne litulo lye yisi. ⁶ Hanyuma wa walya i wamalayika mupunghati wono wali wena zindulele mupunghati, nawo wakewikaniza ho wazitowe. ⁷ Malayika u mulongozi yakayitowa ndulele yakwe. Hobaho yikagwa kono’nze mvula ya mabwe, yono yali yihangahanjile no moto, hamonga ne sakami. Ne libimha lye kadatu lye yinze likatakamila, ne libimha lye kadatu lye mabici likatakamila, hamonga ne mahanze gose ge dedede gakatakamila. ⁸ Nayo malayika we kejete yakayitowa ndulele yakwe. Na cinhu cinji kotye ’tunda yiwaha muno lyono likwaka moto, likagumilwa mwi’lenga. Ne libimha lye kadatu lye lilenga likawa sakami, ⁹ libimha lye kadatu lye viwumbwa vya mwi’lenga vikafwa, ne libimha lye kadatu lye zingalawa, nazo zikahodanjika. ¹⁰ Hanyuma malayika we kadatu nayo, yakayitowa ndulele yakwe. Ne nyelezi mbaha yono yakaga nha moto, yikagwa kulawa ku wulanga, nayo yikagwila mwi’bimha lye kadatu lye makolongo ne mivwilo ye malenga. ¹¹ (Inyelezi yiyo yicemwaga “Wusungu.”) Holeka libimha lye kadatu lye malenga, gakawa makali, ne wanhu wenji wakafwa ku soko yo wung’we we malenga gago, vyono gali geza makali. ¹² Malayika we kane nayo yakayitowe ndulele yakwe. Na hobaho libimha lye kadatu lye lizuwa, na lyo mwezi, na lye zinyelezi likatowa, sunga no wuzelu wayo, wukatukuwazwa libimha lye kadatu lyo wung’alale wayo. Ne libimha lye kadatu lye misi likawa lisina wuzelu, sunga ne libimha lye kadatu lye cilo, nalyo nhavivyo. ¹³ Nane naza langa, nghayiwona numba yiguluce yili kucanyha muno muno, nghahulika yikulonga kwe’zi iwaha yikutya, “Woyi he, woyi he, woyi he, kuli wono wowa wakali wekaye mono’nze, lono wamalayika wadatu wono wasigaye kolo wakuzitowa zindulele zawo!”

¹ Hanyuma malayika we hano nayo yakayitowa ndulele yakwe. Nane nghayiwona nyelezi yono yali yigwiye mono yisi, yilawiliye ku wulanga. Nayo nyelezi yiyo yikapegwa funguwo ye likombo lyo wuninyina. ² Ale, inyelezi yiyo yikalidigula lilyo i likombo lyo wuninyina, na mumo mwikombo mukalawa lyosi, likawa lyosi lye ’lambi yiwaha. Lizuwa no mwanya vikatukuwazwa no wutitu we lyosi lilyo lya mwikombo lyo wuninyina. ³ Ne zinzije zikalawila mumo mu lyosi lilyo, zikenjila mono’nze, kanyhi zikapegwa vilungo nha vye zinje. ⁴ Zinzije zizo zikalonjelwa vyono, zilece kuhodanga mahanze ge yinze, hamba dedede yose, hambe mibici yose, langa zibite zikawahodanje wanhu wawalya du wono wasina citanjilo co Mulungu mu vihanda vyo wusu wawo. ⁵ Ne zinzije zizo, si zakombolwa zikawulaje wanhu aa, ng’o, langa ziwagazaje du sunga myezi mihano. No wusungu wono i zinzije zowapela wanhu wawo, wowa nha wusungu wono kawuwonaga munhu lono yalumwa ne ’nje. ⁶ Na mwipango lilyo, wanhu walolondola lifwa, ninga si wololiwona ng’o, wolosulumila wafwe, ninga ilifwa lyolowatiza ⁷ I zinzije zizo ku wulangwe, zali zinha zifwalasi zono ziwikanizwe so wulugu. Na mu mitwe yazo, zali zina mikumbo yinha kotya ya zahabu, no wusu wazo, wali wihwanile nha wusu we wanhu. ⁸ Ne zimvwili zazo, zali zihwanile zimvwili ze wacekulu, ne meno gazo, gali genha meno ga Simba. ⁹ Zimhambaga zazo, zali zina vinji vigubicizwe, vinhu vyono vihwanile ngula ya cuma. I cihumbi ce mabawa gazo, cali cinha nha cihumbi ca magali menji, gono gakukwegwa ne zifwalasi nyinji, zono zikumanyhila ku wulugu. ¹⁰ Nazo zali zina micila ne mamiya nhe zinje, nazo zali zina vilungo vyo kuwalumila wanhu no kuwatamisa kwe micila yiyo, mu cidaha ca myezi mihano. ¹¹ Kanyhi zene zina no mutemi mono yazitemile, nayo yo malayika wa ku wuninyina, ne litagwa lyakwe ku nonga ye Cihebelaniya, wamucemaga, Abadoni, na kunonga ye Cigiliki kacemwaga, Apoliyoni, nha cinji “Muwulaji.” ¹² Zinghani zo wongomezwe, wulongozi wakondya kupuluta, ninga wukali wongomezwe wunji wejete wono wotyatya. ¹³ Hanyuma nayo malayika wo mutandatu, yakayitowa ndulele yakwe. Nane nghalihulika yizi linji likulawilila mu zimbavu yine zo wukumbicilo we zahabu, wono wali wuli hali Mulungu. ¹⁴ Ne lizi lilyo likamulonjela malayika wo mutandatu mono yali yena ndulele, likutya, “Ale! Wuwawopolele awalya wamalayika wane wono wawopwe kwi’kolongo liwaha lya Efulata!” ¹⁵ Nayo malayika yakawawopolela wawo wamalayika wane, wono wali wakondya kuwikanizwa so lipango lilyo, lye lizuwa lyo mwezi wuwo, wo mwaka wuwo, ho wawulaje libimha lye kadatu lye wanhu. ¹⁶ Nghahulika ne liwalo lye wasilikale wapanda fwalasi, wali waficile wasilikale milyoni magana mejete. ¹⁷ Ale, nhavivyo vyo naziwona zizo zifwalasi, hamonga na wawo wono wali wazipandile zizo zifwalasi. Nawo wali wena ngula mu zimhambaga zawo zono zali ndunghu nha moto, zono zali zina liwala lye bulu nhe libwe lyo wuguzi wukamu, lyono lina liwala lye mavunde, ne liwala lye henjelu, nhe cibiliti. Ne mitwe ye zifwalasi zizo, yali yinha nha mitwe ye zisimba, nawo moto ne lyosi, ne cibiliti, vyalawilaga mu milomo yazo. ¹⁸ Ne libimha lye kadatu lye wanhu, wawulagwa na gago mawulaji madatu, moto, ne lyosi, ne cibiliti, vyono vyalawilaga mu milomo yazo, ¹⁹ hambi vilungo vye zifwalasi zizo, nha vyali vili mu milomo yazo, sunga na mu micila yazo. Ne micila yazo yali yina mitwe, yihwanile ye zinzoka, nazo zetumamilaga i micila yiyo kuwatamisiza wanhu. ²⁰ I wanhu wanji wono wasigala, wono si wawulagwa no wongomezwe wuwo, nawo hamba si wanena, no kuvileka vinhu vyono wali wavinozize kwe miwoko yawo weneco, langa wakajendelela du kuhemba masetani, ne vihwani vye zahabu, na vye fweza, na vye shaba, na vye mabwe, na vye mabici, vinhu vyono sivikusuma hamba kuwona yaye, hamba kuhulika, hamba kujenda. ²¹ Hamba si wanena no kuwuleka wuwulaji wono wakwituma, hamonga no wuhawi wawo, hamonga no wusenyha wawo, sunga no wuhizi wawo.

¹ Hanyuma kanyhi nghamuwona malayika yunji mono yali vilungo, yakutima ku lawa kuwulanga. Nayo yali muvwikwe yivunde, hamonga ne licilalyambwa lye mvula mu mutwe wakwe. Wusu wakwe wali wihwanile lizuwa, ne migulu yakwe yali yinha masumbili ga moto. ² Na mu muwoko wakwe yali yebate citabu cidodo cigubulwe. Nayo yakawusimya u mugulu wakwe wo kulume mwi’lenga. ³ Nayo yakawa kucema kwe’zi ’waha muno muno, nha simba yikukoloma. Nayo yali yeza kuzoza muno, mabalalusi mupunghati nago gakabocelela ko mulizo muwaha muno muno. ⁴ Na gago i mabalalusi mupunghati lono galongaga, ane nghasaka kuzandika. Ninga nghahulika lizi likulawa ku wulanga, likutya, “Izinghani zizo ze mabalalusi mupunghati, zo nghani za cinyele, holeka wulece kuzandika!” ⁵ Kanyhi malayika yuyulya mono namuwona yemile mucanyha ye lilenga na mu yisi nghavu, yakawinula muwoko wakwe wo kulume ku wulanga, ⁶ yakelahiza mwi’tagwa lyo Mulungu mono kekalaga cibitilila ne cibitilila, u Mulungu mono yawumba wulanga ne vinhu vyose vyono vili mumo, sunga ne yinze na vyose vyono vili mumo, ne lilenga na vyose vyono vili mumo. Malayika yakatya, “I cipango co wulindila muno, alu camalika! ⁷ Langa mu cipango cono malayika wo mupunghati kololavizya lizi lyakwe, lono kolotowela ndulele yakwe, u Mulungu ho kolowukondeleza u wuhile wakwe we cinyele, nha vyono yali yawalonjela wetumami wakwe, wawizi.” ⁸ Hanyuma lizi li lilya lyono nalihulika likulongana nane baho ha mwamulizo, likalonga nane kanyhi, likutya, “Wubite wukacisole i citabu ci cilya cigubulwe, cono cili mu muwoko wa malayika mono yemile mwi’lenga mucanyha, na mu yisi nghavu.” ⁹ Hodu, nghawa kumubitila yuyo malayika, nghawa kumulonjela, yamhele citabu cico cidodo. Nayo malayika yakanyitya, “Ale wucisolaje, wucilye, na kolo wacitajila mu mulomo, kociwona cili muzinzi kotya wuci, ninga kolo wacimela, kociwona mu’nda yako cowa cikali!” ¹⁰ Ale, nghacisola i citabu cico cidodo kulawa mu mawoko ga yuyo malayika, nane nghawa kucilya, na mu mulomo wangu cikawa cili muzinzi kotya wuci, ninga nali neza cimela, cikawa cikali mu’nda yangu. ¹¹ Hanyuma kanyhi nghalonjelwa nhavi, “Yikunojeye kanyhi wuyiganule nghani yo Mulungu kuli wanhu wenji, ne zinghungugo, ne zinonga, ne watemi.”

¹ Hanyuma nghapegwa cidete cono cihwanile cibici co kupimila, nghalonjelwa nhavi, “Ale winukaje wukawupime u wuhembelo wo Mulungu, hamonga no wukumbicilo wo kufusiza wuvumba, kanyhi wuwawale ne wanhu wono wakuhembela mumo mu wuhembelo. ² Ninga wulece kulipima libululu lyono lili kunze yo wuhembelo, hambi libululu lilyo, nha lyapegwa wanhu we makungugo ganji, wanhu wono wolikanyanjila i likaya lyono lyelile mu myezi makumi mane na myejete. ³ Nane nowatuma wahomelezi wangu wejete, ho wayiganule i nghani yo Mulungu, mu cipango cico ce vilo elufu monga na magana mejete na makumi mutandatu, akuno wowa wavwalile vivwalo vye magunila.” ⁴ Ne wahomelezi wawo wejete, yo mibici myejete ye mizeyituni, ne zitala zinyejete zono zimaga hali Muwaha Mulungu we yinze. ⁵ Na hono munhu wo wose yejelele kuwatamisa, u moto wulawaga mu milomo yawo no kuwongomeza walugu wawo. Na munhu wo wose mono kokwijelela kuwatamisa, ale, yuyo nayo kowulagwa nhavivyo. ⁶ Wawo wena vilungo vyo kuwudindila wulanga, ne mvula ho yilece kutonya, mu cidaha cono wakuyiganula nghani yo Mulungu. Kanyhi wena vilungo vyo kuyihundusa i mivwilo yose ye malenga yiwe sakami, sunga ne vilungo vyo kusuma kuleta magayo ge liwala lyo lyose mono’nze, mwi’pango lyo lyose lyono weneco wendile. ⁷ Ninga kolo weza wakondya kuyiganula nghani yiyo yo Mulungu, nimu yono yolawila mwikombo lyo wuninyina, yokwihoma nawo, nayo yowasumiza no kuwawulaga. ⁸ Ne mivimba yawo, yokwikala mu zibalabala ze likaya liwaha, ihanhu hono u Muwaha wawo yatumbicilwa mu musalaba, i litagwa lye colecezo ce likaya lilyo, yo Sodoma, hamba Misili. ⁹ Ne wanhu we zimbeyu zose, na we zinonga zose, na we makungugo gose, sunga na we mawala gose, wojendelela kuyilanga i mivimba yiyo, sunga vilo vidatu na nusu, hamba siwoyikombola mivimba yiyo ho yizikwe. ¹⁰ Ne wanhu wose wono wekaye mono’nze, wowusecelela wufwe wa wawo wanhu wejete. Nawo wonoza sikukuu, no kwipela vipegwa munhu na muyagwe, vyono wawa wawizi wejete wali wawagaza muno, i wanhu wa mononze. ¹¹ Ninga vyaza kuwa vyapuluta vilo vivyo vidatu na nusu, u muhe wo wumi wukalawa kuli Mulungu wukawenjila wawo wawizi wejete, nawo wakenuka wakema wima, na wose wono wawawona, wakenjilwa no woga wuwaha. ¹² Hanyuma, ya zizo, wawo wawizi wejete, wakahulika lizi yiwaha likulawa ku wulanga, likuwalonjela likutya, “Nzonyi akuno kono canyha!” Nawo wakawa kubitila mwivunde kucanyha ku wulanga, akuno ne walugu wawo wakuwalanjilila du. ¹³ Na mwi’daha lilyo, likaza yitulo yiwaha lye’si, ne libimha lye likumi lye likaya likagwa. Ne wanhu elufu mupunghati wakawulagwa ku soko ye litulo lilyo lye yisi. Ne wanhu wono wasigala, wakawa kogopa muno, wakamukumyo Mulungu wa ku wulanga. ¹⁴ I magazo ge kejete gapuluta, ninga langa ta! I magazo ge kadatu gokuza musunho. ¹⁵ Hanyuma, nayo malayika wo mupunghati yakayitowa ndulele yakwe. Ne mazi mawaha gakahulikwa ku wulanga gakutya, “Alu u wutemi wa mononze, weza wo Muwaha wetu na Kilisito wakwe. Nayo kotema cibitilila ne cibitilila.” ¹⁶ Nawo i wawaha wa walya makumi mejete na wane, wono wali wekaye hali Mulungu, mu magoda gawo go wutemi, wakagwa funama, wakamuhemba Mulungu, wakutya, ¹⁷ “Muwaha Mulungu Mudaha vyose mono wuli ho yuli, na mono wali wuli baho! Cikukulumba, vyono kwitumamila vilungo vyako viwaha wukamula kutema! ¹⁸ Wanhu wono si wamumanyile Mulungu wakakolwa likuwo, vyono lidaha lye likuwo lyako lyakondya kuza, lyo kuwaling’aniza i wafu. Naco co cipango co kuwapelela ligawo lyawo wetumami wako wawizi wanhu wako, na wose wono walikumyaga, litagwa lyako, wawaha ne wadodo. Kanyhi co cipango co kuwongomeza wono wakuyongomeza yinze.” ¹⁹ I Nyumba yo Mulungu ku wulanga yikadigulwa, ne lisanduku lye cilagane cakwe, likejela mumo mu wuhembelo wakwe. Hanyuma vikawa kuza limuli, ne lizi, mabalalusi, ne matulo ge yisi, hamonga ne mvula mbaha ye mabwe.

¹ Hanyuma cikejela citanjilo ciwaha ku wulanga. Baho hali hoyuli mucekulu mono yali yavwicigwe lizuwa, no mwezi wukawa wuli hasi ye magulu gakwe, no mukumbo we zinyelezi yikumi na nyejete, zikawa mucanyha mu mutwe wakwe! ² Nayo mucekulu yuyo, yali yena’nda, nayo yakazoza muno ku soko ye nghunga no wusungu wo kusawa mwana. ³ I citanjilo cinji kanyhi cikejela ku wulanga. Kukawa na nzoka mbaha, ndunghu, yono yina mahembe yikumi, ne mitwe mupunghati, ne mitwe yiyo yikawa yina mutwe, no mukumbo wayo. ⁴ Lizoka lilyo likazikwejenha zinyelezi za mu mwanya, libimha lye kadatu, no mucila walyo, no kuzigumila kono’nze. Nalyo likema behi no mucekulu yuyo mono yali yeza behi no kusawa mwana, liwikanizize lukulu ho limumele mwana yuyo, baho du lono yakulelwa. ⁵ Nayo mucekulu yuyo yakalela mwana wa cilume, mono kotema muli makungugo gose no kuwadimila nghome ya cuma. Ninga u mwana yuyo, yakasukulwa no kutegulwa kuli Mulungu, kwi’goda lyakwe lyo wutemi. ⁶ Yuyo mucekulu nayo, yakamanyhila ku nyika, kono Mulungu yali yamuwiciye hanhu ha wutule, hanhu hono kosuma kudimwa mu vilo elufu monga, na magana mejete, na makumi mutandatu. ⁷ Hanyuma kukawa ne milewo ku wulanga, Mikayeli ne wamalayika wakwe, wakawa wakwihoma na lilyo lizoka. Nalyo lizoka hamonga ne wamalayika walyo, vikehoma na Mikayeli ne wamalayika wakwe. ⁸ Ninga lizoka likasumwa, no kuwulagwa, baho hakawa hasina kanyhi cilejeho co cose ku so lizoka ne wamalayika walyo co wikala ku wulanga. ⁹ Holeka ilizoka lilyo liwaha, likagumilwa kunze. Ne lizoka lilyo, yo nzoka yi yilya ye katali, yono kanyhi yicemwaga Ibilisi hamba Setani, mono kawakongaga we yinze wose. Heya likagumilwa kono’nze hamonga ne wamalayika walyo wose. ¹⁰ Hanyuma nghahulika lizi yiwaha likulawilila ku wulanga, likutya, “Alu mhonelo yono yikulawa kuli Mulungu, yakondya kuza! I vilungo no wutemi wo Mulungu wetu, wakondya kwijela. Na Kilisito wakwe kawulajila u wulajilize wakwe! Hambi ayulya mono kawasonjeza i wandugu zetu, mono yemile hali Mulungu, mono kawasonjezaga misi ne cilo, alu kagumilwa kononze. ¹¹ Nawo iwandugu zetu wakamusuma ku so sakami yo Mwana we ngholo, na kwe vilungo vye nghani yono wayiganula, kanyhi wawuwona no wumi wawo si cinji, hamba wafwe. ¹² Holeka musangalale anye nyo wulanga, hamonga na vyose vyono vili mumo. Ninga woyi he kuli’nye nyo yisi ne lilenga, hambi Setani nha kamuzizenyi akuno yena ne likuwo yiwaha, hambi nha yamanyile vyono vilo vyakwe vyono visigaye vyaza vicefu.” ¹³ Nalyo lizoka lyali lyeza manya vyono lyagumilwa hono hasi mono’nze, likanza kumusepa yu yulya mucekulu mono yalelo mwana we cilume. ¹⁴ Ninga mucekulu yuyo, nayo yakapegwa mabawa mejete ga numba, ho yaguluce yabite yakekale kutali ne lizoka lilyo, yabite yakekale ku nyika, hanhu hakwe hono kosuma kudimwa viswanu mu myaka midatu na myezi mutandatu. ¹⁵ Nalyo lizoka lilyo likadeka mu nyuma yo mucekulu yuyo, no kulavya malenga menji nhe kolongo mu mulomo walyo, nago malenga gago gakahuluma no kumutyatya munyuma u mucekulu yuyo, ho gamukwenghweleze no kumutegula kutali. ¹⁶ Ninga yinze yikamutaza mucekulu yuyo, yinze yikadiguka no kwahama nha mulomo, yikagamela malenga gago gose gono galawa mu mulomo we lizoka lilyo. ¹⁷ Holeka lizoka lilyo likawa kumusimbila yuyo mucekulu, hodu likawa kwibitila, likawa kubita no kwihoma na wanji we mbeyu yo mucekulu yuyo wose wono wakukamisa malajilizo go Mulungu, kanyhi wehuwilwa mu mbeka yono yaziza muli Yesu. ¹⁸ Nalyo lizoka likawa kwima he ’sangha lye lilenga.

¹ Hanyuma, nghawona yilimu linji likulawa kwi’lenga. Nalyo lyali lina mitwe mupunghati ne mahembe yikumi, ne mahembe gose limonga limonga, lyali lina mukumbo. Ne litagwa lye nhovu kuli Mulungu, lyali lyandikwe mu mitwe yiyo. ² Ne lilimu lilyo lyono nawona, lyali lihwanile nha suwi, ne migulu yalyo yikawa yihwanile nhe migulu ye dubu, no mulomo wukawa nha we simba. I lizoka li lilya, likalipela lilyo lilimu vilungo vyalyo, ne ligoda lyalyo lyo wutemi, hamonga no wuwaha winji. ³ No mutwe wumonga we lilimu lilyo, wejelaga nha wali wina yikomele yiwaha muno, ninga i nghomele yiyo yali yakondya kunoga. Ne lilimu lilyo likawapela mezino mawaha muno, i wanhu wose wa mono’nze, sunga wose wakawa kulityatya. ⁴ Wanhu wose wakalihemba lilyo lizoka, vyono lyalipela lilimu lilyo vilungo vyalyo. Kanyhi wakalihemba na lilyo lilimu nha vivilya wakutya, “Alo nani’mbi kanyhi mono kowa yenha ililimu lili? Hamba nani kanyhi mono kosuma kwihoma nalyo?” ⁵ Hanyuma yayo lilimu lilyo likakombolwa ho lilonje makani ge nhovu nha vyono lyendile, limutovule u Mulungu, kanyhi likakombolwa ho liwe no wulajilize, myezi makumi mane na myejete. ⁶ Hodu, nalyo likawa kwamula kumuliganga Mulungu, no kuliliga litagwa lyakwe, no wikalo wakwe, hamonga na wose wono wekaye ku wulanga. ⁷ Kanyhi lilimu lilyo, likakombolwa ho vihome wulugu no kuwasumiza i wanhu wo Mulungu. Kanyhi likapegwa wulajilize muli wanhu we zimbeyu zose, na wose we ndelwa monga, na we zinonga zose, na we makungugo gose. ⁸ Na wose wono wekaye mono’nze wolihemba, ninga awalya wono matagwa gawo mandikwe mu citabu co wumi co Mwana we ngholo, mono yawulagwa ku wulawo mwamulizo we yinze, wawo langa si wolihemba yaye. ⁹ “Holeka mono yena makutu go kuhulicila, ale yahulice! ¹⁰ Nawo wono wawicilwa ho wasolwe mateka, awo wolosolwa mateka du, nawo wono wawicilwa ho wawulagwe ko mumaje, awo nawo wolowulagwa ko mumaje du. Holeka yiwanojeye i wanhu wo Mulungu, wawe no wukangalile wuwaha hamonga no wihuwilo.” ¹¹ Hanyuma kanyhi, nghawona yilimu linji likulawila, likulawa kusi ye’si. Nalyo lyali lina mahembe mejete, gono genha ge nyana ye ngholo, nalyo lyalongaga nhe lizoka. ¹² Nalyo lyali lina wulajilize wono wukwilaniciye ku wulawa kwi ’limu lililya lilongozi, nalyo likavitumamila vilungo vivyo, baho du ha meso ge lilimu lilongozi. Kanyhi likawa kuyidindimiza yinze yose, hamonga na wose wono wali mumo, ho walihembe lilyo lilimu lilongozi, lyono lyali lina likomele yiwaha muno lyo wufwe, lyono lyali lyakondya kunoga. ¹³ Nalyo lilimu lilyo lye kejete likanoza mapoto mawaha, gono gasuma kuleta moto ku wulawa ku wulanga, wutime mono yinze hali meso ge wanhu. ¹⁴ Likawajiliza wanhu wenji wono wekaye mono’nze, ku so mapoto gago gono lyapegwa liganoze ha mwande ya alilya lilimu lilongozi. Nalyo lilimu lilyo likawalonjela wanhu wono wekaye mononze, wanoze cihwani, so kulipela yilumbo lilyo lilimu, lyono lyali lina likomele yiwaha muno, lyono lyatemangwa no mumaje, ninga alu likuwumipa kanyhi. ¹⁵ I lilimu lye kejete, likapegwa kanyhi wusume wo kuliputilila muhe cihwani ce lilimu lililya lilongozi, naco cihwani cikasuma kulonga, no kuwawulaga wanhu wose wono si wacihemba cihwani cico cene. ¹⁶ I lilimu lilyo likawadindimiza wose, i wadodo ne wawaha, i wagoli ne waciwa, i walelele ne wawanda, wawicilwe citanjilo mu miwoko yawo yo kulume, hamba mu wusu wawo. ¹⁷ I lilimu lilyo, likalemezeza lukulu munhu wo wose, yalece kugula hamba kuguza cinhu co cose, langa munhu yuyo du mono yena citanjilo cico, ce litagwa lya lilyo lilimu, hamba liwalo lye litagwa lilyo. ¹⁸ Baho ho howuli wizuce! Mono yena mahala, yo kosuma kuyimanya nhunizo ye liwalo lye lilimu lilyo, hambi nha liwalo lyono lina nhunizo yo munhu wo wutunga. Ne liwalo lilyo nha lyoli, magana mutandatu na makumi mutandatu na mutandatu.

¹ Hanyuma nghawona ilitunda lya Sayuni, no Mwana we ngholo yemile mucanyha ye litunda lilyo, hali howali ne wanhu yigana limonga na makumi mane na yine elufu, wono wali wemile hamonga nayo, wono wali wandikwe mu wusu wawo, litagwa lyo Mwana we ngholo hamonga ne litagwa lyo Sogwe. ² Nghahulika lizi kulawa ku wulanga, lizi lyono lyali nha lizi lya malenga menji kanyhi kotya nha mabalalusi mawaha. Lizi lyono nalihulika, likawa kanyhi nhe watowa masumbi wono wakugatowa i masumbi gawo. ³ Nawo wa walya i wanhu elufu yigana limonga na mkumi mane na yine, wembaga u lwimbo lupya ha mwande ye ligoda lyo wutemi, na hali avilya viwumbwa vine vyumi, hamonga na wa walya wawaha. Na hasina munhu mono yasuma kwijiza lwimbo lulo, langa hono si wa walya du, wanhu we ligana limonga na makumi mane na yine elufu, wono wagulwa mononze. ⁴ I wanhu wawo, wo wanhu wono weyikamisa mu wele wose, wono siwetuma makani go wusulumizi na we cicekulu, hambi wene nha wasindile. I wene wawo, wamutyatyaga Mwana we ngholo ko kose kono yakubita. Wawo wo wagulwa kulawa muli wanhu wanji, kanyhi wakawa wo walongozi kulavywa kuli Mulungu na kuli Mwana we ngholo. ⁵ Kanyhi hasina cidaha cinji co cose cono wakawa walambi, wasina hamba yilema lyo lyose. ⁶ Hanyuma nghamuwona kanyhi malayika yunji yaguluce mu wulanga, yena no Luganuzi Luswanu lwe cibitilila lo Mulungu, ho yaluganule kuli wanhu wose wono wekaye mono’nze, kuli makungugo gose, ne zimbeyu zose, ne wanhu we milonjele yose, na kuli wanhu wose we mawala gose. ⁷ Nayo malayika yuyo, yakalonga kwe’zi yiwaha yakutya, “Ale mumogopajo Mulungu, kanyhi mumukumye! Hambi cidaha co kulavye ning’aniza yakwe, nha cakondya kuza. Holeka mumuhembaje mweneco mono yawumba wulanga ne yinze, lilenga ne mivwilo ye malenga.” ⁸ Malayika we kejete nayo, yakamutyatya yu yulya mulongozi yakutya, “Woyi, lyagwa! Heya, lyagwa nye, li Babiloni liwaha lyagwa! Li Babiloni lyono lyawang’wesaga divayi yalyo, wanhu wose we makungugo gose, divayi yono nghali, divayi yo wusenyha walyo!” ⁹ Nayo Malayika we kadatu yakatyatilila munyuma wulonje we wayagwe, yakalonga kwe’zi yiwaha yakutya, “U munhu wo wose mono kolihemba lilimu lilyo, hamonga ne cihwani calyo, mu muwoko walyo, ¹⁰ ale, u munhu yuyo, koying’wa divayi ye likuwo lyo Mulungu, divayi yono yakondya kujidilwa mu cikombe ce likuwo lyakwe, kanyhi hamba si hanza hanzwe ne malenga yaye. U munhu yuyo kogazizwa mu moto ne cibiliti, hamwande ye wamalayika wono welile na hamwande yo Mwana we ngholo.” ¹¹ Lyosi lyo moto wo wugazwe wawo, lifunghaga cibitilila ne cibitilila. I wanhu wawo langa wono walihembaga lilimu lilyo hamonga ne cihwani calyo, kanyhi wakawicilwa ne citanjilo ce litagwa lyalyo, wawo wolowa wasina wucehe wo wose ku misi na ku cilo. ¹² Na ku soko yiyo, wanhu wo Mulungu wono wakakamisa malajilizo go Mulungu no kumwihuwila Yesu, yiwanojeye waweze no wukangalile. ¹³ Nghahulika kanyhi lizi kulawa ku wulanga likutya, “Wandice nhavi! Wo wamoti wanhu wono ku wulawa lulu, wakufwa akuno welunzize no Muwaha.” Nayo Muhe yakutya, “Heya! Woceha mu wulawa mu magazo gawo, hambi metumo ge nhuguti yawo nha gowatyatya.” ¹⁴ Nane naza langa, kumbe baho hakawa ne ’vunde yizelu. Na mucanyha ye livunde lilyo mwali mocili ciwumbwa cono cali cihwanile munhu. Yali yavwalile mukumbo wa zahabu mu mutwe wakwe akuno yebate ne hengo nghali mu muwoko wakwe. ¹⁵ Hanyuma malayika yunji nayo yakalawa mu Nyumba yo Mulungu, nayo yakamulonjela kwe’zi iwaha yu yulya mono yali yekaye mwi’vunde, yakutya, “Dedede, wuyitumamilaje hengo yako, wududule, hambi cipango ce ndudula nha cafika, i nhwanga ye yinze, yakondya kupya yaciziliza.” ¹⁶ Ale, ayulya mono yali yena hengo, mono yali yekaye mwi’vunde, yakayigumila hengo yakwe kono’nze, ne nhwanga ye yinze yikadudulwa. ¹⁷ Malayika yunji nayo yakalawa mu wuhembelo ku wulanga, nayo yena hengo nghali muno. ¹⁸ Yakaza malayika yunji nayo, yakulawa mu cikumbicilo, mono yo mulanjilizi muwaha wo moto. Nayo yakamulonjela kwe’zi ’waha yu yulya mono yene hengo nghali muno, yakumutya, “Ale, nagwe wubite wukayitumamile yiyo hengo yako inghali muno, wukadudule mavunda ge zabibu ye yinze, hambi zizabibu zayo nha zakondya kupya!” ¹⁹ Ale, nayo malayika yuyo, yakawa kuyigumila hengo yakwe kono’nze, yakazidudula zabibu ze yinze yakazitajila mu ciya ciwaha co kukobonjela zabibu, i ciya ce likuwo lyo Mulungu. ²⁰ Zabibu zikawa kuminyilwa mu ciya cico co kukobonjela zabibu, cono cali kunze ye likaya, sakami yikalawila mu ciya cico, musululuzi mutali wukafika nha kilometa magana madatu, no wung’welele wo kubita hasi nha mita nyejete.

¹ Hanyuma, nghawona citanjilo cinji ku wulanga, citanjilo ciwaha muno, kanyhi ca wizine. Baho hali na wamalayika wali mupunghati, wena magazo mupunghati ge ndumilizo. Ne likuwo lyo Mulungu lyomalicila mu magazo gago mupunghati. ² Nghawona cinhu cihwanile lilenga nha cilole, lyono lihangahanjile no moto. Nghawawona ne wanhu wa walya nhavivyo, wono walisuma lilimu lilya, hamonga ne cihwani calyo, i lilimu lyono litagwa lyalyo likutambulwa mu nzila ye liwalo lililya. Ne wanhu wawo wali wemile he’lenga lye cilole, akuno wena ne masumbi gono Mulungu yawapela. ³ Nawo wembaga u lwimbo lwa Musa u mwitumami wo Mulungu, no lwimbo lo Mwana we ngholo, wakutya, “Muwaha Mulungu, u Mudaha vyose i metumo gako ga wizine muno muno! Gwe go Mutemi we makungugo, zinzila zako zo zo wiling’ano kanyhi za mbeka! ⁴ Go Muwaha, alo nani’mbi mono si yakogopile gwegwe? Hamba nani’mbi mono si yakulikumya ilitagwa lyako? Agwe yo gwegwe mono welile du wuli wene. Ne makungugo gose gokuza kwako ho gakuhembe, hambi i metumo gako, nha gali ling’ani kanyhi gejeye ne wanhu wose.” ⁵ Hanyuma ya zizo, nghawona wuhembelo ku wulanga wudiguywe, wuli mwazi, na mugati yayo, molili lihema lyono likulajila vyono mbeka u Mulungu yali baho. ⁶ Ale, wamalayika wawalya mupunghati wono wena magazo mupunghati, wakalawa mumo mu wuhembelo, akuno wavwalile vivwalo vya bafuta, vyono vikung’alala muno muno, wena ne misipi ya zahabu mu zimhambaga zawo. ⁷ Hanyuma ciwumbwa cinji ciyagwe ne viwumbwa vivilya vine vyumi, cikawapela wawalya wamalayika mupunghati, mabakuli ga zahabu gono gamemile likuwo lyo Mulungu, mono kekalaga cibitilila ne cibitilila. ⁸ U wuhembelo wukamema lyosi lyono lyaletwa no lukumyo ne vilungo vyo Mulungu, hasina hamba munhu wo wose mono yasuma kwinjila mu wuhembelo, sunga gaze gakondye kumalika magazo mupunghati mawaha, ge wamalayika wawalya mupunghati.

¹ Hanyuma kanyhi nghahulika lizi yiwaha likulawa mu Nyumba yo Mulungu, lizi lilyo likuwalonjela wawalya wamalayika mupunghati, likutya, “Ale, mubite mukagamwaje mu yinze, gago mabakuli mupunghati ge likuwo lyo Mulungu.” ² Ale, malayika mulongozi yakabita yakalijidila libakuli lyakwe mu yinze. Ho baho baho kukawa malonda mabi muli wanhu, kanyhi gono gakuwatamisa muno muno, nago malonda gago, gakawa muli wanhu wose wono wali wena citanjilo ce lilimu lililya, na wawalya wono wacihemba cihwani calyo. ³ Nayo malayika we kejete yakalijidila libakuli lyakwe mwi’lenga. Nalyo lilenga likagaluka, likawa sakami yose, nha sakami ya munhu mono yafwiye, sunga ne viwumbwa vyumi vyose vya mwi’lenga vikafwa. ⁴ Malayika we kadatu nayo yakalijidila libakuli lyakwe mu makolongo na mu mivwilo ye malenga, navyo vyose vikagaluka sakami. ⁵ Nane nghamuhulika malayika muwaha u mulindilizi we malenga, yakutya, “Agwe Mono Welile mono wuli baha, na mono wali baho kulawa katali agwe wuli ling’ani mu ning’aniza yako yiyi yono wuyinozize. ⁶ Hambi nha wayimwaga sakami ye wanhu wako, sunga na ye wawizi, holeka nagwe kuwapela i sakami waying’we, na mbeka vyo yiwanojeye!” ⁷ Hanyuma nghahulika lizi kulawa mu cikumbicilo, likutya, “Heya go Mulungu u Mudaha vyose, i ning’aniza yako yo ye mbeka kanyhi ye ling’ani.” ⁸ Nayo malayika we kane yakalijidila libakuli lyakwe mwizuwa. Nalyo lizuwa likapegwa vilungo vyo kuwanyanya wanhu ko moto walyo. ⁹ Iwanhu wakanyanywa vibi muno muno, wakawa kumuliga Mulungu mono yena vilungo muli magazo gago mawaha. Ninga hamba si wawuleka u wubi wawo, no kumukumyo Mulungu ¹⁰ Malayika we hano nayo yakalijidila libakuli lyakwe mu wikalo wuwaha wa lililya lilimu. Uwutitu wukawa kudinda mu wutemi walyo, wanhu wakawa kwilumanga i zinimi zawo ku soko yo wusungu, ¹¹ wakamuliga Mulungu wa ku wulanga ku soko yo wusungu wawo we malonda gawo. Ninga hamba si wagaleka i metumo gawo mabi. ¹² Nayo Malayika wo mutandatu yakalijidila libakuli lyakwe mwikolongo liwaha lyono likucemwa Efulata. Ne malenga galyo gakawa kunyala, na mu nzila yiyo, yinzila yikawa kunozwa so watemi wono wazaga wakulawa kucilima. ¹³ Hanyuma nghawona myuhe midatu myavu yinha madelu, yikulawa mu mulomo wa lililya lizoka, na mu mulomo wa lililya lilimu, na mu mulomo wa yulya muwizi wo wulambi. ¹⁴ Ayi yo myuhe ye masetani, yono yinozaga mapoto. Yiyi myuhe midatu yo yiyo yono yiwabitilaga watemi we yinze yiyi yose, no kuwakonghola hamonga ho wehome wulugu wuwaha mwizuwa liwaha lyo Mulungu Mudaha vyose. ¹⁵ “Wuhulicize! Ane nghuza nha muhizi! Holeka, mumoti munhu mono yakwikala meso, no kuvwala myenda yakwe, ho yalece jenda cipwi ako na ako ha mwande ye wanhu.” ¹⁶ Hodu, yiyo imyuhe myavu yikawa kuwa kongholela hamonga wawo watemi, hanhu hono hacemwaga mu Cihebelaniya Halimagedoni. ¹⁷ Hanyuma, malayika wo mupunghati, nayo yakalijidile libakuli lyakwe mu mbeho. Ne lizi liwaha likahulikwa, likulawa mwigoda lyo wutemi, mu wuhembelo, likutya, “Yakondya kuwa!” ¹⁸ Kukawa na mamuli, mazozo, mabalalusi, ne litulo liwaha lye’si, litulo lye’si lyono likali si nejela hamba hadodo, ku wulawa lono Mulungu yamuwumbila munhu. ¹⁹ Ne likaya lililye liwaha likatemanulwa hali hadatu, ne makaya ga we makungugo gakagwa. Likaya liwaha lya Babiloni, Mulungu hamba si yalisemwa yaye. Yakaling’wesa i cikombe ce divayi ye likuwo lyakwe. ²⁰ Ne vizingwa vyose vikatiza, ne matunda nago hamba kwijela yaye. ²¹ Ne mvula ye mabwe mawaha, gono gali gena wuzito nha wa kilo makumi mahano limonga limonga, yikawatonyela wanhu. Nawo wanhu wakamutovula u Mulungu ku soko ye ligazo lye mvula yiyo ye mabwe. Ne ligazo lye mvula yiyo ye mabwe, lyali yigazo yiwaha muno muno.

¹ Yumonga wa muli wa walya wamalayika mupunghati wono wali wene mabakuli, yakanyiziza, yakanonjela yakutya, “Ta wuze! Nane nokulajila u wulipicizwe wono yapejigwe ayulyo u musenyha muwaha, i likaya alilya liwaha, lyono lizenjigwe behi ye makolongo menji. ² Ne watemi wa kono’nze wasenyha nayo, na wono wekaye kono’nze wakawa wang’wela so wung’wa i divayi yo wusenyha wakwe.” ³ Hanyuma nghasolwa no Muhe, yakanhegula sunga ko ku nyika. Na kuko, nghawona mucekulu yekaye mucanyha ye lilimu yidunghu. Ne lilimu lilyo lyali lyandicigwe matagwa ge nhovu hose, mu muwili walyo wose, nalyo lyali lina mitwe mupunghati ne mahembe yikumi. ⁴ No mucekulu yuyo yali yavwalile civwalo ce liwala lyo lugandu ne ndunghu, kanyhi yali yehambile zahabu, ne mabwe go wuguzi wukamu ne zilulu. Na mu muwoko wakwe yali yebate cikombe ca zahabu, cono cali cimemile makomaza, hamonga ne makani mabi, gono gakuwulajila wusenyha wakwe. ⁵ Nayo yali yandicigwe litagwa lya fumbo mu cihanda co wusu wakwe, ne litagwa lilyo lyali, “Babiloni i liwaha, u nyina we wasenyha, na we makani gose ge cikomaza ga mononze.” ⁶ Nghamuwona mucekulu yuyo yagalile i sakami ye wanhu wo Mulungu, ne sakami ye wanhu wono wawulagwa ku soko yo kumuganula Yesu. Nane nali muwona, nghezina wizine wuwaha muno muno. ⁷ Ninga malayika yakanonjela yakutya, “Alo, nhawule lu, wukwizina? Ale, ane nokulonjela i nhunizo ye zinghani ze cinyele zo mucekulu yuyu, na ze lilimu lilyo lyono limudinghuye, lyono lina mitwe mupunghati ne mahembe yikumi. ⁸ I lilimu lilyo lyono wuliwene, lyono lyali lyumi hamwamulizo, ninga aluno lyakondya kufwa. Ninga hamba nhavivyo, lili behi lyonanuka kulawa kwikombo lyo wuninyina, ninga lyokongomezwa. Na wono wekaye kono’nze, wokwizina, heya, wanhu wose wono i matagwa gawo si gandikwa mu citabu co wumi ku wulawa mwamulizo we’nze, wokwizina muno muno kolo wakuliwona i lilimu lilyo lyono ha mwamulizo lyali lyumi, hanyuma likafwa, na aluno likwijela kanyhi! ⁹ “Ninga baha, hakusaka mahala no wizuce! Vyono yiyo i mitwe mupunghati, go matunda mupunghati, no mucekulu yuyo yekaye mucanyha yago. Ne mitwe yiyo kanyhi, wo watemi mupunghati. ¹⁰ Muli watemi wawo mupunghati, i wahano wakondya kongomela, no monga yakali yatemile, na ayulya yunji, yakali si yanafika yaye, nayo kolo yeza kuza, kokwikala cipango cidodo du. ¹¹ Ne lilimu lilyo lyono lyali lyumi ha mwamulizo, alu si lyumi kanyhi, yo mutemi wo munana, ninga nayo yo yumonga na awalya i watemi wo mupunghati, ninga nayo yakubita ku wajilile. ¹² “Ne mahembe gagalya yikumi gono wugawene, wo watemi wono wakali si natema yaye. Ninga wopegwa vilungo vyo kutema saa monga du, hamonga na lililya lilimu. ¹³ Na wawa wose vyono wali yikumi, wose walonjeye kumonga, nawo wolipela lilimu lililya vilungo no wulajilize wawo wose. ¹⁴ Nawo wokwihoma no Mwana we ngholo, ningo Mwana we ngholo, hamonga na wawala wono yawacema, kanyhi yakawahagula, i wanhu wehuwilwa, kowasuma wawo, vyono u mwene yo Muwaha we wawaha, kanyhi yo Mutemi we watemi.” ¹⁵ Kanyhi malayika yakanyitya nhavi, “Agalya malenga gono wugawene bahalya hono yali yekaye yu yulya musenyha, go makungugo, iwanhu we mawala gose ne zinonga zose. ¹⁶ Ne mahembe gagalya yikumi gono wugawene, hamonga ne lilimu lililya, vyose vyomusula yuyo musenyha. Nawo womusolela vinhu vyose vyono yena navyo, womuleka yali cipwi, kanyhi wololya nghuli yakwe no kumuticimiza mu moto. ¹⁷ Hambi u Mulungu nha katajila mu zinhumbula zawo, wuhile wo kuwufisiliza wuhile wakwe, vyono welumbaniza weneco wose, no kulipela i lilimu u wulajilize wawo wo kutema, sunga kolo i nghani yo Mulungu yikuficilicila. ¹⁸ “No mucekulu yuyulya mono wumuwene, lyo alilya likaya liwaha lyono liwatemile watemi wa kononze.”

¹ Hanyuma ya zizi, nghamuwona malayika yunji yakutima kulawa ku wulanga. Yali yena vilungo viwaha, ne yinze yikamulikwa so wung’alale wakwe. ² Nayo yakalonga kwe’zi yiwaha, yakutya, “Ligwa Libabiloni liwaha, lingwa! Aluno weza wuli wikalo we masetani hamonga ne myuhe yiyi, kanyhi weza wuli wikalo we zindeje zinyavu, kanyhi ze cikomaza muno. ³ Hambi i makungugo gose, nha gakoligwe ku soko ye divayi nghali, yo wusenyha wakwe. Nawo watemi wa kono’nze wasenyha nayo, ne wasuluza wa kono’nze wagolipe ku soko ye mikalile yakwe yo wiyendeze, yono yisina wiyimile.” ⁴ Nghahulika lizi linji likulawa ku wulanga likutya, “Anye nyo wanhu wangu, muwuce muli mwene, ho mulece kuhanga nayo mu wubi wakwe, ho mulece kuwutuga u wulipicizwe wakwe. ⁵ Hambi u wubi wakwe, nha weza winji muno, nawo wilundice sunga ko ku wulanga, no Mulungu kakumbucila zinzila zakwe zo wubi wakwe. ⁶ Ale, mumutendelaje nha vyono yamutendelenyi nyenye, mumuwuyajizaje kejete nha vyono genha i metumo gakwe. Memyenyi i cikombe cakwe ko wung’we wukali kali kejete, si nho wung’we awulya wono u mwene yamupelenyi. ⁷ Mumupelaje magazo no wusungu, mu nghango yo wikumye wakwe, mu nghango ye mikalile yakwe yo wiyendeze. Hambi nha yakwiyitya mu nhumbula yakwe, ‘Ane nikaye baha, nili mutemi we cicekulu. Ane si nili mufwile, hamba si nowutuga wusungu!’ ⁸ Na ku soko yiyo, i magazo gakwe gomwagana mwizuwa limonga, wutamwa, wukalale, ne nzala. Nayo konyanywa mu moto, hambi u Muwaha Mulungu mono yakumuling’aniza, nha yo Mudaha vyose.” ⁹ I watemi wa kono’nze wono wasenyha nayo, no kwikala nayo mu mikalile yo wiyendeze, wololila, kolo wakuliwona lyosi lye likaya lilyo lyono likuticimila. ¹⁰ Nawo wolowa wemile kutali muno, wakugogopa i magazo gakwe, akuno wakutya, “Woyi he! Woyi, he kuli’gwe go Babiloni, i likaya litambule, kanyhi lye vilungo! Mwidaha lya saa monga du, u wulipicizwe wako wakondya kukuziza.” ¹¹ Ne wasuluza wa kono’nze wololila no kumwikunguziza, hambi, nha holowa hasina kanyhi munhu mono kosuma kugula vinhu vyawo vyo wusuluza, ¹² hasina kanyhi mono kogula zizahabu zawo, hamba fweza zawo, hamba mabwe gawo go wuguzi wukamu, hamba zilulu zawo, hamba bafuta ne myenda ye liwala lyo lugandu, hamba halili yawo ne myenda midunghu, ne viya vyose vye mawala gose ge mabici ge nghulunje, hamba viya vye mahembe ge zinhembo, hamba cuma ne malumalu, ¹³ hambo mudalasini, ne hati ye zimboga, wuvumba, manemane, wudi, divayi, mafuta, wusaje, ne ngano, ne zing’ombe, ne zingholo, ne zifwalasi, ne mikokoteni, hamba wawanda wawo, sunga no wumi we wanhu. ¹⁴ I wasuluza wakumutya, “Cambuzi cose cono wali wucilanjiliye, alu ceyagala, no wugoli hamonga no wumoti, vyose vyakondya kukuwucila, hamba si kosuma kuvituga kanyhi!” ¹⁵ I wasuluza wono wagolipa ku soko ye likaya lilyo, wolokwima kutali, ku soko yo woga we magazo gakwe, wolong’ung’ulika no kulila, ¹⁶ akuno wakutya, “Woyi he! Woyi he kuli’gwe go likaya liwaha. Wali wazowela kuvwala myenda ye bafuta ze liwala lyo lugandu ne ndunghu, hamonga no kwihamba kwe zizahabu, ne mabwe go wuguzi wukamu ne zilulu!” ¹⁷ Ninga alu wugoli wako wose wukuwucila mwi’pango lya saa monga du! Hanyuma i wajendya zingalawa wose, hamonga ne wanya mihinzo wawo wose, ne wajendela mwi’lenga, sunga na wose wono wetumaga milimo mwi’lenga, wose wakema kutali, ¹⁸ nawo wali kuliwona lyosi lyo moto wono waliticimiza, nawo wakalila kwe’zi yiwaha muno, akuno wakutya, “Kukali nawa ne likaya lyono linha nhe likaya lilino liwaha!” ¹⁹ Nawo wakeyitila manghundi mu mitwe yawo, akuno wakulila muno muno kwe mazi mawaha, wakutya, “Woyi he! Kuli’gwe go ’likaya liwaha! Lye kaya lyono wose wanye zingalawa zono zikujendela mwi’lenga mo wagolipila, so wugoli walyo. Ninga wakondya kwajiliza i vinhu vyawo vyose mwi’pango lya saa monga du!” ²⁰ Ale, wusecelele go wulanga ku soko yo wuhodanjice wakwe. Nanye nyo wanhu wo Mulungu, musecelele, nanye nyo watumwa ne wawizi, musecelele nhavivyo! Hambi u Mulungu nha kalilipiciza ku soko ye metumo galyo, gono lyamutendelenyi nyenye! ²¹ Hanyuma malayika yunji mono yali vilungo muno, yakenula libwe yiwaha, lyono lihwanile nho luzala luwaha lo kusajila, nayo yakaligumila mwi’lenga akuno yakutya, “Nhavivyo ne likaya liwaha lya Babiloni vyo lyogumilwa no kwajililila lukulu, hamba kwijela yaye. ²² Ne mazi ge watowa masumbi, ne watowa zing’oma, ne mazi ge watowa zifilimbi ne zindulele, si golohulikwa muli’gwe kanyhi. Hasina hamba munghula we liwala lyo lyose kanyhi, mono kosuma kwijela muli gwegwe, hamba ne lizi lyo luzala lo kusajila, si lyohulikwa kanyhi muli gwegwe. ²³ No wuzelu we tala si wokwijela kanyhi mugati yako, hamba mazi ge wa bwana halusi na bibi halusi nago si gohulikwa muli gwegwe kanyhi. Ne wasuluza wako wali wo wawaha kononze kose, na ku soko yo wuhawi wako, i makungugo gose gakakongwa.” ²⁴ I likaya lilyo lya Babiloni likalipicizwa, ku soko vyono, mugati yayo, yejela i sakami ye wawizi, ne sakami ye wanhu wo Mulungu, sunga ne sakami ye wanhu wose wono wawulagwa kono’nze.

¹ Hanyuma ya zizo, nghahulika cinhu, kotya lizi yiwaha lye mapuga ge wanhu wenji ku wulanga, likutya, “Muwaha yalumbwe! I mhono no lukumyo, ne vilungo, nha vyo Mulungu wetu! ² Hambi ining’aniza yakwe nha ya mbeka kanyhi ye ling’ani. Hambi nha kamuling’aniza u musenyha muwaha, mono yali yakondya kuyajiliza yinze ku so wusenyha wakwe. U Mulungu kamuling’aniza yuyo Babiloni likaya liwaha, vyono lyawawulaga i wetumami wakwe!” ³ Nawo wakazoza kanyhi wakutya, “Muwaha yalumbwe! Hambi i lyosi lyo moto wono woliticimiza likaya lilyo, nha lyowa kwikala likufungha cibitilila ne cibitilila!” ⁴ Nawo i wawaha wawalya makumi mejete na wane, hamonga ne viwumbwa vine vyumi, wakagwa hasi, wakamuhemba Mulungu mono yekaye mwigoda lyo wutemi, akuno wakutya, “Heya! Mulungu yalumbwe!” ⁵ Hanyuma lizi likalawa mwigoda lyo wutemi, likutya, “Mumulumbo Mulungu anye nyo wetumami wakwe wose, na wose mono mumogopile, i wadodo ne wawaha.” ⁶ Hanyuma kanyhi nghahulika lizi yiwaha lye lipuga yiwaha lye wanhu, na lye malenga menji, na lye mabalalusi mawaha, nalyo lizi lilyo likutya, “U Mulungu yalumbwe! Hambi u Muwaha, u Mulungu wetu, u Mudaha vyose, nha yo Mutemi! ⁷ Ale cisecelele kanyhi cisangalale, cimukumye, hambi i cipango ce halusi yo Mwana we ngholo nha cafika, bibi halusi nayo nha yewikaniza yakondya. ⁸ Nayo yavwalile mwenda we bafuta swanu, kanyhi yikung’alala!” (U mwenda wuwo we bafuta swanu go metumo maswanu ge wanhu wo Mulungu.) ⁹ Nayo malayika yakanonjela yakutya, “Wuzandikaje azino, Wamoti wono wacemeywe ku zindigwa ze halusi yo Mwana we ngholo!” Yakanonjela kanyhi yakutya, “Zizo zo nghani ze mbeka yo Mulungu.” ¹⁰ Ale, nane nghagwa hasi funama ha magulu gakwe, nghuhila nimuhembe. Ninga mwene yakanonjela yakutya, “Leka! Ane nane nili mwitumami du nha gwegwe, hamonga ne wanduguzo, ase wose mono ciyikamisaga i mbeka yiyilya yono Yesu yayigubula. Muhembo Mulungu!” Hambi i mbeka yono Yesu yayigubula, nha yo yikuwamulicila wawizi. ¹¹ Nghawona wulanga wugubuce, na kuko kukawa na fwalasi yinji nzelu swee, na mono yali yapandile mucanyha yayo, yacemwaga “Mwihuwilwa”, ne “Mbeka”. Yuyo mwene kehomaga ku soko ye ling’ani. ¹² I meso gakwe gali genha lilambi lyo moto, nayo yali yavwalile mikumbo minji mu mutwe wakwe. Nayo yali mwandice litagwa lyono yunji wo wose si kosuma kulimanya, langa mweneco du yali wene. ¹³ Kanyhi yali yavwalile civwalo cono cali cilowece mu sakami. Ne litagwa lyakwe yuyo yacemwaga, “I nghani yo Mulungu.” ¹⁴ Ne mapuga ga wa ku wulanga, gakamutyatya akuno wali mucanyha ye zifwalasi zinzelu, nawo wali wavwalile vivwalo vye bafuta nzelu, kanyhi yelile muno. ¹⁵ No mumaje mukali wukulawa mu mulomo wakwe, nayo kowasumila, we makungugo, u mumaje wuwo. Nayo yo mweneco mono kotema muli wene ne nghome ya cuma, akuno yakuminyila idivayi mu ciya co kuminyila zizabibu ze likuwo liwaha lyo Mulungu u Mudaha Vyose. ¹⁶ Na mu vivwalo vyakwe hamonga na mu mugulu wakwe, yali mwandikwe litagwa lya, “U Mutemi we watemi, no Muwaha we wawaha.” ¹⁷ Kanyhi nghawona malayika yunji yemile mwizuwa. Nayo yakalonga yazozize muno, yakucema i zindeje zose zono zikuguluka mu mwanya, yakuzitya, “Anye, nzonyi! Ale mwikongholelaje hamonga so ndigwa ye sikukuu yo Mulungu. ¹⁸ Ale, nzonyi muzilye zi nyama ze miwili ye watemi, na ze miwili ye wasilikale wawaha, ne ze miwili ye wanhu we vilungo, na ze miwili ye zifwalasi hamonga na wono wazipandaga, nzonyi mulye nyama ye miwili ye wanhu wose, i wanhu i walelele ne wawanda, i wadodo ne wawaha.” ¹⁹ Hanyuma nghawona lililya lilimu, hamonga, ne watemi wa kono’nze, hamonga ne wasilikale wawo, wekonghoye hamonga ho wehome na mono yapandile fwalasi, hamonga ne wanhu wakwe. ²⁰ Ninga lilimu lilyo likasolwa mateka, hamonga no muwizi wo wulambi, mono yanozaga mapoto ha mwande yalyo. (Na ku so mapoto gago, yasuma kuwajiliza wenji wono wali wena i citanjilo ce lilimu lilyo, kanyhi na wono wacihemba ne cihwani calyo.) Ne lilimu lilyo hamonga no muwizi yuyo, wose vyono wejete, wakagumilwa vyo womi du, mwilamba lyono lyakaga moto we cibiliti. ²¹ I wasilikale wawo, wakawulagwa ko mumaje wono walawa mu mulomo wa yuyo mono yali yapandile fwalasi. Ne zindeje zose zikalya zinyama ze miwili yawo sunga zikeguta.

¹ Hanyuma kanyhi nghawona malayika yunji yakutima kulawa ku wulanga, akuno yena ne funguwo ya kwikombo lyo wuninyina, akuno kanyhi yadinghuye ne manyolo mu muwoko wakwe. ² Malayika yuyo yakalibata lizoka, alilya lizoka lye katali, yo Ibilisi, hamba Setani, yakawa kuliwopa myaka elufu monga. ³ Malayika yakawa kuligumila kwikombo lyo wuninyina, yakawa kuwudinda mulango wo kwinjilila kuko, kanyhi yakawunamatiza ne cinamatizo, ho lilece kugajiliza makungugo kanyhi, sunga kolo yakondya kupuluta i myaka yiyo elufu monga. Ninga kolo yikupuluta myaka yiyo ye elufu monga, yinojeye liwopolelwe kanyhi kwe cipango cidodo du. ⁴ Nghawona magoda ge citemi hamonga ne wanhu wono wali wagekaliye. I wanhu wawo, wakapegwa vilungo vyo kuling’aniza. Nghawona kanyhi ne zinhumbula za wono wadumulwa mitwe yawo ku soko yo kumuganula Yesu, na ku soko yo kuyiganula nghani yo Mulungu. Wawano wo wawo wono si walihemba lilimu lililya hamonga ne cihwani calyo, kanyhi hamba si wawicilwa citanjilo mu mahanda go wusu wawo, hamba mu miwoko yawo. Wakawumipa kanyhi, no kutema hamonga na Kilisito myaka elufu monga. ⁵ (Na awalya wanji wono wali wafwa, si wawumipa, sunga yimalice myaka elufu monga.) Awuno wo wuzuce wulongozi. ⁶ Wena nyemo, kanyhi wamotile muno, wawo wose wono wakuhanga mu wuzuce wuwuno wulongozi. Hambi i lifwa lye kejete, nha lyowa lisina vilungo kanyhi muli wene, nawo wowa wakohani wo Mulungu na wa Kilisito, nawo wotemana hamonga nayo, myaka elufu monga. ⁷ Ne myaka yiyo elufu monga kolo yikumalika, Setani nayo ho yalawopolelwa yalawile mu jela. ⁸ Nayo kolawila mu jela, kanyhi yamule kugakonga i makungugo gose gono geyagaye kono’nze kose, wo wutya, Gogu na Magogu. Setani kowakongholela hamonga ho wehome, nawo wowa wenji wenha musawawa wa mu Mwejelele we lilenga. ⁹ Wakeyagala mu’si yose, wakayipilima nghambi ye wanhu wo Mulungu hamonga ne likaya lyo Mulungu, lyono Mulungu yalyendile. Ninga moto wukatima kulawa ku wulanga wukawaticimiza wose wose. ¹⁰ Na Setani mono yawakongaga, yakagumilwa mwi’lamba lyono likwaka moto we cibiliti, mumo mono molili alilya lilimu, hamonga no muwizi wo wulambi, nawo wowa kugazwa misi ne cilo, cibitilila ne cibitilila. ¹¹ Hanyuma nghawona ligoda liwaha lyo wutemi, yizelu, na mono yekaye mwi’goda lilyo. I yinze hamonga no wulanga, vikatiza ha mwande yo wusu wakwe, hamba si vyejelela lukulu kanyhi. ¹² Nane nghawona i wafu wawaha ne wadodo, wemile he’goda lyo wutemi, ne vitabu vikagubulwa. Hanyuma citabu cinji, i citabu co wumi, naco nhavivyo cikagubulwa. Iwafu wakaling’anizwa nha vyono genha metumo gawo, nha vyono yandikwe mu vitabu vivyo. ¹³ I lilenga nalyo, likawalavya kunze, i wafu wose wono wali wali mugati yalyo, i lifwa hamonga ne yinze ye wafu, vikawalavya kunze iwafu wose wono wali wali mumo. Na wose wakaling’anizwa nha vyono genha metumo gawo. ¹⁴ Hanyuma ilifwa hamonga ne yinze ye wafu, vikatagwa mwilamba lyo moto. Ne lilamba lilino lyo moto, lyo lifwa lye kejete. ¹⁵ No munhu wo wose mono litagwa lyakwe si lyejela lyandikwe mu citabu co wumi, u munhu yuyo yagumilwa mwilamba lyo moto.

¹ Hanyuma nghawona wulanga wupya ne yinze ’mhya. U wulanga wu wulya wulongozi ne yinze yi yilya nongozi, vyali vyawuka, ne lilenga nalyo hamba si lyejela kanyhi. ² Nghaliwona likaya lyono lyelile, nalyo likutima kulawa kuli Mulungu kucanyha, nayo yo Yelusalemi ’mhya. Nalyo lyali iwikanizize lukulu nha bibi halusi muhambwe viswanu, mono yawikanizwe so mulume wakwe. ³ Hanyuma kanyhi, nghahulika lizi yiwaha likalawilila he’goda lyo wutemi, likutya, “Lanje ta! U Mulungu kawunoza u wikalo wakwe muli wanhu. Nayo kokwikala muli wene, nawo wowa wanhu wakwe, nayo kowa Mulungu wawo. ⁴ U Mwene kogapatila lukulu mahozi gawo gose, mu meso gawo, kowa kusina lifwa, hamba wukalale, hamba cililo, hamba wusungu si vyolokwijela yaye, hambi zihuma nha zakondya kupuluta!” ⁵ Ayulya mono yali yekaye mwigoda lyo wutemi, nayo yakatya, “Lanje ta! Ane nghuzinoza zose ziwe ’mhya.” Yakanonjela kanyhi yakutya, “Yandikaje yiyi, hambi i zinghani zizino nha zo huwilwa, kanyhi za mbeka!” ⁶ Hanyuma yakawa kunonjela yakutya, “Zose ’lu, zakondya! Ane yo nene wo Mwamulizo na wo Mudumo. Nayo mono yakaluce, ane nomupela co kung’wa bwete, ku wulawa mu mivwilo ye malenga go wumi. ⁷ Nayo munhu wo wose mono kosuma, yuyo kopegwa cino nane nowa Mulungu wakwe, nayo kowa mwanangu. ⁸ Ninga i wanhu woga, na wono si wehuwiye, na wono wena metumo ge cikomaza, ne wawulaji, ne wasenyha, ne wahawi, na wono wakuhemba vihwani, sunga ne walambi wose, awo wose lifungu lyawo mugati ye lilamba lyono likwaka moto ne cibiliti, alyo lye’fwa lye kejete.” ⁹ Hanyuma, yunji wa muli wawalya wamalayika mupunghati, wono wali wena agalya mabakuli mupunghati, gono gali gamemile imagazo mupunghati go mudumo, yakanyiziza yakanyitya, “Nzoo kuno! Nane nokulajila bibi halusi, u mugolece wo Mwana we ngholo!” ¹⁰ Baho, malayika yakanhegulila mu Muhe ko kwitunda liwaha, kanyhi yitali, yakandajila i likaya lyono lyelile, yo Yelusalemi, nalyo likutima kulawa kuli Mulungu ku wulanga, ¹¹ likung’alala ku so lukumyo lo Mulungu. No wung’alale walyo, wukawa nha wung’alale we’bwe yiwaha lyo wuguzi wukamu, lyono likulengalenga nha cilole. ¹² I likaya lilyo lyali lina yijinji yitali muno kanyhi yigazi muno, nalyo lyali lina milango yikumi na myejete, nawo wamalayika i walindilize milango yikumi na wejete. Ne matagwa ge milango yikumi na myejete ya Isilayeli, yali myandikwe hacanyha ye milango yiyo. ¹³ Na kwali koyili milango midatu midatu mbavu zose ze lijinji. Kulubavu lwa kucilima milango midatu, nako kusumuka milango midatu, nako kutakama, milango midatu, na kumwezi nako, milango midatu nha vivyo. ¹⁴ Ne majinji gose ge likaya lilyo, gali mazenje mu mabwe yikumi na mejete go musinji, na mucanyha ye mabwe gago, mwali mwandikwe i matagwa ge watumwa yikumi na wejete wo Mwana we ngholo. ¹⁵ Yuyulya malayika nayo, mono yalongana nane, yali yena cibici ca zahabu co kupimila, ho yalipime likaya lilyo, hamonga ne milango yayo, ne majinji gayo. ¹⁶ Ne likaya nalyo, lyali lya mhilimo ya nhuzi yine, nalyo u wutali walyo ne cipinga calyo, vyali viling’aniye kose kose. Baho nayo malayika yakawa kulipima i likaya lilyo ne cibici cakwe, nalyo u wutali walyo ne cipinga calyo, no wima walyo, lyali nha kilometa elufu nyejete na magana mane. ¹⁷ Hanyuma, yakawa kugapima ne majinji gayo, nago gakawa mita makumi mutandatu mu cipimo ce meso ce cimunhu-munhu cono yacitumamila malayika. ¹⁸ Ne lijinji lye likaya lilyo, lyali lizenjeywe mabwe madunghu go wuguzi wukamu, ne likaya lyeneco, lyali yizenjelwe zahabu swanu muno, zono zikung’alala nha cilole. ¹⁹ Ne mabwe gono wali wazenjeye musinji we lijinji lilyo, gali mahambwe muno ne mabwe ge mawala gose go wuguzi wukamu. Ilibwe lilongozi lyo musinji, lyali yibwe yidunghu lyo wuguzi wukamu, nalyo lye kejete lyali lye’wala lya sapifilo, lye kadatu kalikedoni, lye kane zamaladi, ²⁰ lye hano, salidoniki, lyo mutandatu, saludiyo, na lyo mupunghati Kilisolito, lyo munana, belulo, lye ’cenda, topazi, lye likumi, kulusopilaso, lye kumi na monga yasinto, na lye likumi na nyejete, amesisito. ²¹ Nayo i milango yiyilya yikumi na myejete, zali lulu yikumi na nyejete, i milango yose yali yina mulango na lulu monga. Ne libalabala liwaha lye likaya, lyali yinozezwe zahabu swanu, yono yikung’alala nha cilole. ²² Hamba si nawona wuhembelo mwikaya lilyo, hambi u Muwaha Mulungu, u Mudaha vyose, hamonga na yuyulya u Mwana we ngholo, nha wo wuhembelo walyo. ²³ Ne likaya lilyo si likusaka izuwa, hamba mwezi, vilimulicile, hambi u lukumyo lo Mulungu nha lolukuwa kulimulicila, ne zitala zalyo, yo yuyo u Mwana we ngholo. ²⁴ Ne wanhu we makungugo gose wojendela mu wuzelu walyo, nawo watemi wa kono’nze woliletela u wugoli wawo. ²⁵ Ne milango ye likaya lilyo si yowa kudindwa ku misi, kanyhi hamba si yolodindilwa lukulu, hambi nha kowa kusina kanyhi cilo kuko. ²⁶ U lukumyo, hamonga no wugoli we wanhu we makungugo, wotegulwa mumo mugati ye likaya lilyo. ²⁷ Ninga hasina cisemunwa co cose cono colokwinjila mumo, hamba munhu wo wose mono ketumaga i makani ge cikomaza, hamba i makani go wulambi lambi, yuyo si kokwinjila mumo. Langa wono wokwinjila mumo mugati, wo wawalya du wono wandikwe mu citabu co wumi co Mwana we ngholo.

¹ Hanyuma kanyhi malayika yakandajila i likolongo lye malenga go wumi gono gakung’alala nha cilole, gakulawilila he’goda lyo wutemi lyo Mulungu, hamonga no Mwana we ngholo. ² Ne likolongo lilyo likuhuluma malenga, likolile hagati ye balabala mbaha ye likaya. Na mu mhelo ye likolongo lilyo, hali howuli mubici wo wumi, wono wukulela mikalo kali yikumi na nyejete kwa mwaka, wo wutya wukulela mwezi kwa mwezi, ne mahamha go mubici wuwo, yo miti yo kuponezya i wanhu we makungugo. ³ Na hasina hamba cinji co cose cono cilijitwe no Mulungu, cono cosuma kuwa mwikaya lilyo. Ligoda lyo wutemi lyo Mulungu na lyo Mwana we ngholo, lyo lyowa mwikaya lilyo, ne wetumami wakwe womuhemba. ⁴ Nawo wowuwona wusu wakwe, ne litagwa lyakwe lyokwandikwa mu mahanda go wusu wawo. ⁵ I cilo si colokwijela kanyhi, hamba si wolosaka wuzelu we tala hamba we’zuwa, hambi u Muwaha Mulungu nha kowamulicila, nawo wotema cibitilila ne cibitilila. ⁶ Malayika yakanonjela kanyhi yakutya, “Izinghani zizino zo ze mbeka, kanyhi huwilwa. U Muwaha Mulungu mono kawapelaga i wawizi u Muhe wakwe, yamutuma malayika wakwe yawalajile i wetumami wakwe i zinghani zono zinojeye zijele hanyuma.” ⁷ Yesu yakutya, “Ale wuhulicize ta! Ane nghuza musunho muno muno. Holeka yo mumoti munhu mono yakuzikamisa i zinghani zo wuwile wono wuli mu citabu cicino.” ⁸ Ane yo nene Yohana, mono naziwona no kuzihulika i zinghani zizino. Nane nali neza kukondya kuzihulika no kuziwona, hodu nghegumila hasi, ha mwande ye magulu ga yuyo malayika mono yandajila i zinghani zizino zose, nane nahilaga nimuhembe. ⁹ Ninga mwene malayika yakanonjela yakutya, “Lece noza nhavivyo. Ane nane nha nili mwitumami muyago du, hamonga ne wanduguzo i wawizi, na wose wono wakugakamisa i malajilizo gono gali mu citabu cicino. Muhembaje Mulungu!” ¹⁰ Yakanonjela kanyhi yakutya, “Wulecele lukulu kuzihundika i zinghani zo wuwile, zono zili mu citabu cicino, ziwe nha nghani ze cinyele, hambi i lidaha lyo wuficilicile wazo, nha lyasejelela. ¹¹ Ninga luno, mono yakwituma i zimbi, ale, yajendelele muno kwituma zizo i zimbi, nayo u mwavu, ale, yajendelele muno kuwa mwavu. Ale, nayo mono yakwituma ziswanu, yajendelele muno kwituma ziswanu. Nayo mono yelile, yajendelele muno kuwa yelile.” ¹² Yesu yakutya, “Wuhulicize! Ane nghuza musunho muno muno, kanyhi nghuleteleza no musahala wono nomupela munhu wo wose nha vyono genha i metumo gakwe. ¹³ Ane yo nene wo Mwamulizo na wo Mudumo, u Mulongozi na wo Mudumo.” ¹⁴ Wo wamoti wawo wono wakuvikanza i vivwalo vyawo, hambi wawo nha wo wowa ne ling’ani yo kulya mana go mubici wo wumi, kanyhi wo wowa ne ling’ani yo kukolela mu milango yalyo, no kwinjila mwi’kaya. ¹⁵ Ninga mabwa, ne wahawi, ne wasenyha, ne wawulaji, ne wahemba vihwani, sunga na wose wono wendile kulonga zo wulambi, wawo wose, si wokwinjilila lukulu mwi’kaya lilyo, langa wokwikala kunze du. ¹⁶ Ane yo nene Yesu, nimutuma malayika wangu, yamuhomelelenyi i zinghani zizino mu makanisa. Ane nili wo lulelo lwa Dawudi: Ane yo nene i nyelezi i mwacinghunghu, yono ying’alalaga ya hakali mitondo! ¹⁷ U Muhe hamonga na bibi halusi walonje watye, “Wuze!” Nayo u munhu wo wose mono yakuyihulika yiyi, nayo yatye, “Wuze!” Na mono yakaluce, ale yaze, nayo mono yakugasaka i malenga go wumi, yasole bwete. ¹⁸ Ane yo nene Yohana, nghuwasugula wose wono wakuzihulika i zinghani zo wuwile, zono zili mu citabu cicino, u munhu wo wose hono yonjeleze nghani yo yose mu zinghani zizino, u Mulungu nayo komonjeleza i magazo gono gandikwe mu citabu cicino. ¹⁹ No munhu wo wose hono yacepule nghani yo yose mu zinghani zo wuwile zono zili mu citabu cicino, nayo Mulungu komuwusiza i ligawo lyakwe lyo mubici wo wumi, ne ligawo lyakwe lya mwikaya lyono lyelile, nha vyono zilolosigwe mu citabu cicino. ²⁰ Nayo mono yakuhomelela zizino, yakutya, “Heya, mbeka! Nghuza musunho muno muno.” Heya. Na yiweze nha vivyo! Wuze go Muwaha Yesu! ²¹ Ilihewa lyo Muwaha Yesu, liwezane na nyenye wose. 441