WAFILIPI

WAFILIPI

¹ Yo nene Pawulo na Timoteyo, i wetumami wa Yesu Kilisito, cikumwandicilenyi anye nyo wanhu wo Mulungu kuko ku Filipi, mono mwalunzwa na Kilisito Yesu, hamonga nanye mo walongola ne watazi mu Kanisa. ² Ilihewa no mulamu vyono vikulawa kuli Mulungu Sogo yetu, no kulawa kuli Muwaha Yesu Kilisito. ³ Nghumulumba u Mulungu wangu kolo nghumukumbucilenyi ho hose, ⁴ na kolo nghumulombelenyi wose, nghulomba nina nyemo, ⁵ ku soko nha vyono mwanhaza mu mulimo wo Luganuzi Luswanu ku wulawilila mwi’zuwa alilya lilongozi sunga izuwali. ⁶ Holeka nitumbiye vyono, u Mulungu mono yawanza u mulimo wuwu muswanu muli nyenye, kowujendeleza sunga ko ku wukondelecele mwi’zuwa lilya lya Kilisito Yesu. ⁷ Na vyo yinojeye nimwihwesezenyi, hambi nha nghumukumbucilenyi nhondo zose mu nhumbula yangu. Hambi na nyenye wose, nha muhanjile na nene, mwi’hewa lyono yamhela u Mulungu ho nilutetele no kulukangaza u Luganuzi Luswanu, mwi’daha lili lono nili mu jela, na kanyhi sunga na bahalya ha lulongozi lono nali nghali nawopwa mu jela. ⁸ U Mulungu yamanyile vyono nghulonga mbeka, lono nghukangaza vyono, so wendo wuwulya du wa Yesu Kilisito, nghuhila muno kumuwonenyi. ⁹ U wulombe wangu wowu, nghulomba u wendo wenyu wucile konjelezeka muno muno, hamonga no wumanye we mbeka, hamonga no wutanje wose, ¹⁰ ho musume kuhagula zinghani ziswanu. Baho ho mowa mwina nhumbula nzelu, kanyhi musina yilema sunga ko Kwi’zuwa lya Kilisito. ¹¹ I mikalile yenyu yomemywa zose zono zili mbeka na swanu, zono Yesu Kilisito mweneco kosuma kumupelenyi, ku soko yo lukumyo ne lilumbo lyo Mulungu. ¹² Ale wandugu zangu, nghuhila mumanye vyono, zose zono zanyagana, zanhaza muno mu wujendeleza u Luganuzi Luswanu. ¹³ Hambi nha ku soko ya zizo, i walindilizi wose we likulu, hamonga na wanji wose wa baha, wamanyile vyono nili mu jela, ku soko vyono ane nghumwitumamila Kilisito. ¹⁴ Na wuwu wuwopwe wangu wawanoza we zindugu wenji wawe no wihuwilo muli Muwaha, sunga wakucila kuwa ne vilungo mu wuganula i nghani yo Mulungu wasina woga. ¹⁵ Yili mbeka, ho wali wayawo wanji wono wakumuganula Kilisito ku soko vyono wena wivu, kanyhi wo wanhu wono wendile wugombane, ninga wanji wakumuganula Kilisito kwa mutima muzelu. ¹⁶ Awa wakwituma nhavivyo ko wendo, hambi nha wamanyile vyono u Mulungu yo yamhelile u mulimo wuwu wo kulutetela u Luganuzi Luswanu. ¹⁷ Ninga wawo wanji wakumuganula Kilisito ko wisumanize hamba si kwa nhumbula nzelu, wakuganiciza nha vyono wonyonjelezeza i magayo mu wuwopwe wangu. ¹⁸ Ale du kanyhi, si nghani yaye, ninga ane nghusangalala vyono ceza cili wanhu mono cikumuganula Kilisito mu zinzila zose, hono yiwe mu mutima muswanu, hamba mu mutima mubi. Kanyhi nojendelela kusangalala. ¹⁹ Hambi nha manyile vyono, so wulombe wenyu na ku so wutazi wo Muhe wa Yesu Kilisito ane nokombozwa. ²⁰ U wuhile wangu no witumbilo wangu, ho ndece kulemwa mu wufisiliza u mulimo wangu, langa nojendelela kuwa na nhumbula yono yikamile mu mapango gose na ko muno mwipango lili, ho mu mikalile yangu yose, hono niwe nghali mumi hamba hono niwe nafwa, nimutujile Kilisito lilumbo. ²¹ Hambi wumi co cici? Ane ku lubavu lwangu, ku wikala mumi nha Kilisito, na ku wufwe kukuleta cambuzi ciwaha. ²² Ninga hono mu wikala mumi nosuma kwituma u mulimo wono wina cambuzi ciwaha, baho nhondo cono nokwihaga co si manyile! ²³ Ninga ha mwande yangu ho zili nghani nyejete. Nghusulumila kuwuka mu wumi wuwu, ho nghekale hamonga na Kilisito, hambi nha yo nghani swanu muno, ²⁴ ninga hono njendelele kwikala mumi, yo nghani yono yina cambuzi muno kuli nyenye. ²⁵ Kanyhi nina witumbilo so nghani yiyi, manyile vyono nojendelela kwikala mumi hamonga na nyenye wose, ho sume kuwonjeleza u wujendelele wenyu ne nyemo mu wihuwilo. ²⁶ Ale nilaza kuwa hamonga nanye kanyhi, ho mowa mwina soko yo kwilumbila muli nene mu wilunza na Kilisito Yesu. ²⁷ Ninga nghani mbaha yoyi, i mikalile yenyu yiweze yilunojeye u Luganuzi Luswanu lwa Kilisito, nane hono sume kuza kwenyu, hamba ndece kusuma kuza, hulice vyono mwimile mukamile mwina nhumbula monga, na vyono mukwihoma no wulugu muli hamonga, kanyhi mwina no mutima wumoga ku soko yo wihuwilo wo Luganuzi Luswanu. ²⁸ Mulece kuwogopa walugu wenyu, langa mweze muli vilungo nhondo zose, na yiyo yo yomukangazizenyi vyono wene wosumwa, anye mosuma, hambi u Mulungu mweneco nha yo yakumupelenyi u wusume. ²⁹ Hambi anye nha mwapegwa cipegwa co kumwitumamila Kilisito, si so kumwihuwila du, langa na so kugazwa ku soko yakwe nhavivilya. ³⁰ Alu mudahile kuwa hamonga nane mu wihomi wo wulugu. U wulugu wuwuno, wo wulugu wuwulya wono mwawuwona cikwihoma nawo bahalya ha mwamulizo, na nghali kwihoma nawo sunga na lulu nha vyono mukuhulika.

¹ Alu wulenyi mikalile yenyu ya muli Kilisito, yikumupelenyi vilungo? Hamba wendo wakwe wukumusindamicenyi? Aluno ma, mwina wumonga no Muhe Mono Yelile, kanyhi mukwiwonela lusungu no kwikalalila nyenye wose? ² Ale muyifisilizizaje i nyemo yangu mu wuwa na mutima monga, wendo monga, nhumbula monga no wuhile wumonga. ³ Mulece kwitumila nghani yo yose mu mutima wo wivu, hamba mu widunhumuzi wa bwete, mweze mwina winenenyhezi nyenye wose, na munhu wo wose yamuwonaje muyagwe yo yamucizize lilumbo sinha mweneco. ⁴ Halece kuwa na yunji mono yakulondola cambuzi cakwe mweneco du, langa cambuzi co muyagwe. ⁵ Muweze no wuwe wuwulya wono yali yena nawo Kilisito Yesu. ⁶ U Mwene ku cihuma, nhondo zose yali Mulungu ninga si yehwesa vyono u wuwa sawa no Mulungu ceze nha cinhu cono cidahile kudindimilwa kwa vilungo. ⁷ Ninga yakenda kuzileka zizo zose mweneco, yakasola u wuwe wo mwitumami, yakawa yenha wanhu yakehwana kotya wanhu. ⁸ Yakenenenyheza, yakawa na cihuliko sunga ko ku wufwe, heya, wufwe wa mu musalaba. ⁹ Holeka u Mulungu yakamukumya muno yakamupela i litagwa lyono licizize i matagwa gose. ¹⁰ Ku so lilumbo lye litagwa lya Yesu ho vinhu vyose vya ku wulanga, na vya kono’nze na vya kusi ye yinze, vifugame hamwande yakwe, ¹¹ Na munhu wo wose yavumile vyono Yesu Kilisito yo Muwaha, mu lukumyo lo Mulungu Baba. ¹² Ale anye wendece wangu, lono nali nili hamonga nanye, mwahulikaga nhondo zose, sunga na lulu hambe nili kutali nanye, anye mujendelele ne cihuliko. Mweze kwituma milimo akuno mwina ne cogopo no wucicime ku soko ye mhonelo yenyu, ¹³ hambi u Mulungu nha yo ketumaga u mulimo muli nyenye nhondo zose, no kumupelenyi u wusume wo kusaka no kufisiliza zose zono zili mu wulunji wo wuhile wakwe mweneco. ¹⁴ Mwitumaje zose akuno musina wung’ung’ulice hamba wiwanganile, ¹⁵ ho muwe wanhu waswanu, wono wasina yilema, kanyhi mweze watelevu nha wana wo Mulungu wono wekaye mu yinze yiyi yo wubi yono yajiliye. Mobulila muli wene, kotya i zinyelezi vyono zikuwa kuwumulika u wulanga, ¹⁶ hono muyibate mukamile i nghani yo wumi. Nane baho ho notujila i nghani yo kwilumbila mwizuwa lilya lya Kilisito, hambi nha ho yolokwijelela vyono u wuhidimbazi wangu hamonga no mulimo wangu si vyajilila bwete. ¹⁷ Ninga hamba ndavywe hamonga no wihuwilo wenyu wono lye kumbiko kuli Mulungu, hodu nosecelela muno kanyhi nosangalalana na nyenye wose mu nyemo yiyo. ¹⁸ Holeka na nyenye nhavivyo, yiwanojeye musecelele no kusangalalana nane mu nyemo yenyu. ¹⁹ Mu wilunze no Muwaha, nina witumbilo vyono nosuma kumutuma Timoteyo kuko kwenyu vilo vivi, ho sinyhimale nane kolo nghumanya zenyu. ²⁰ Hambi nha sina munhu yunji mono yenha yuyo, mono kozilanjilila zenyu nha yuyu. ²¹ Hambi wanji wose nha wakulondola i zawo weneco, si nho kulondola za Yesu Kilisito. ²² Nyenye weneco mumanyile vyono Timoteyo yakamile, u mwene na nene, cihwanile vyono yenha u mwana no sogwe, cali kwitumama hamonga ku soko yo Luganuzi Luswanu. ²³ Holeka nitumbiye vyono nomutuma yaze kuko kwenyu nila neza kuwona vyono zowa zinha. ²⁴ Nane nitumbiye muli Muwaha vyono si noleka kuza kuko kwenyu vilo vivi. ²⁵ Ninga nawona cinojele nimutumilenyi ndugu yetu Epafulodito, u mwitumami muyangu no mulewani muyangu, mono mwanhumila, nayo yakanhaza mu visakwa vyangu. ²⁶ Yena wuhile wuwaha wo kumuwonenyi nyenye wose, nayo yakukalala muno nha vyono mwahulika yali yatamigwe. ²⁷ Heya nha yali yatamigwe behi no kufwa. Ninga u Mulungu yamuwonela lusungu, kanyhi si mwene du, langa na nene, ho ndece kuwa mu wukalale wono wucizize. ²⁸ Holeka nghuhila muno nimutumilenyi, nanye kolo mukumuwona kanyhi, ho musecelele, nane u wuzinguce wangu wucepuce. ²⁹ Ale mumubocelaje na nyemo kotya ndugu muli Muwaha. Kanyhi yiwanojeye muwapelaje lilumbo wanhu wono wenha mwene, ³⁰ vyono yali yeza kufwa so mulimo wa Kilisito, ho yasume kumhela u wutazi, wono anye si mwasuma kumhela.

¹ Ze ndumilizo wandugu zangu, musecelelele muli Muwaha! Si nghukatala kwandika kanyhi zizilya zono nali nakondya kumwandicilenyi bahalya ha lulongozi, hambi nha zomonjelezenyi u wuswanu. ² Mwilegaje na wawo wono wetumaga wavu, wawo wono wenha mabwa, wanhu wono wakukangaza u witemanje mu muwili. ³ Ne wanhu wono mbeka walame, yo sese, si wawo wene, hambi ase nha cikumuhemba u Mulungu mu nzila yo Muhe wakwe, kanyhi cikuwuwona u lukumyo mu wilunze na Kilisito Yesu. Nase si citumbiye zinghani za munze du. ⁴ Nane nhavivyo nali ndahile kwitumbila i zinghani za munze, na hono hawe hoyuli munhu mono yakwihwesa vyono yadahile kwitumbila zinghani za munze, ane nina i soko mbaha muno yo kwihwesa nhavivyo; ⁵ ane nalama lizuwa lyo munana mu wulawa mwi’zuwa lyono nalelelwa, ane nili we nghungugo ya Isilayeli, wo mulango wa Benyamini, nili Muhebelaniya mweneco. Na kuli zo wibata u wulajilize, ane nali nili Mufalisayo, ⁶ nane nali nili mupiligazi muno, ninga naligazaga likanisa. Na ku so wiling’ano wono wukutujilwa mu wuhulika u wulajilize, ane nghawa sina yilema lyo lyose. ⁷ Ninga muli zizo zose zono nali kwihwesa vyono zo ze cambuzi, nghaziwona vyono kumbe wambuce du, ku soko ya Kilisito. ⁸ Heya, hamba si nhavivyo du, ninga nghawona vyono vyose wo wambuce wa bwete, ku so wuswanu wo wumumanya Kilisito Yesu u Mutwa wangu. Hambi nha ku so mwene, ane navumila kugaleka gose, nane nghagawona gago gose nha takataka, ho nimutuje Kilisito, ⁹ no kwilunziza nayo lukulu. Alu ane si nghuwusacila lukulu kanyhi u wiling’ano wa mu wuhulika u wulajilize, hambi alu nha nawutuga u wiling’ano wono wukwijelela mu nzila yo kumwihuwila Kilisito, u wiling’ano wono wukulawa kuli Mulungu, wono wukuziza mu wihuwilo. ¹⁰ Nane cono nghuhila, ho nimumanye u mwene Kilisito, kanyhi nivimanye ne vilungo vyo wuzuce wakwe, no kuhanga i magayo gakwe, no kwihwana nayo, ¹¹ nghwitumbila vyono nane nhavivyo nolozukulwa muli wafu. ¹² Si nghwiwona vyono kotya nakondya kusuma, hamba vyono nakondya kuwa nghwilaniciye, langa nghujendelela kusimbilila ho nicituje i cipegwa cono nebatilwa na Kilisito Yesu. ¹³ Mbeka wandugu zangu, si nghwiwona nha vyono nakondya kucituga i cipegwa cico, ninga nghwituma nghani monga du, nghuzisemwa zono zakondya kupuluta, nghuhidimbalila za kumwande. ¹⁴ Holeka nili mu lumangho nanjile ku wulunji wangu ho nicituje i cipegwa cicilya cono lo lucemo lo Mulungu so mikalile ya kucanyha mu nzila ya Kilisito Yesu. ¹⁵ Ale, ase wose mono cikwilaniciye mu mikalile ye Ci kilisito, yicinojeye ciweze no wuwe wuwuno. Ninga hono wawe wanji muli nyenye wakwihwesa visimajiye, ale u Mulungu komugubulilenyi nghani yiyo. ¹⁶ Ninga yicinojeye cijendelele ku mwande mu nghango yo wulajilize wono cali cina nawo sunga nalu. ¹⁷ Wandugu zangu, mujendelele wose kunyiga nene. Camupelenyi wijizwe wuswanu wa muli sese, holeka muwahulikaje wawo wono wakuwutyatya u wijizwe wuwo. ¹⁸ Nakondya kumulonjelenyi nghani yiyi kali kenji, nalu kanyhi nghuwuyajila kumulonjelenyi kwa mahozi, vyono, howali wanhu wenji wono walugu wo Musalaba wa Kilisito. ¹⁹ Ninga u mudumo wawo wowa ku moto, vyono zinda zawo nha yo mulungu wawo, wakuwona nha lukumyo muli zinghani zono ziwanojeye waziwonele cevu, wehwesaga za kononze du. ²⁰ Ninga ase cili wanya ku wulanga, nase cikumulindiliza cikaluce muno, u Mukombozi yaze ku wulawa ku wulanga, u Muwaha Yesu Kilisito. ²¹ Mwene koloyihundusa i miwili yetu yono yifwizaga, ho yiwe yihwanile no muwili wakwe wo lukumyo, so vilungo vyono yadahile kuviwicila vinhu vyose hasi yo wutemi wakwe.

¹ Holeka wandugu zangu wendece, nina nyhilu muno yo kumuwonenyi, hambi anye nha yo nyenye nyemo yangu, no mukumbo wo lukumyo lo wusume wangu. Holeka nyo wendece wangu, vyo yinojeye kuli anye, mweze mukamile muli Muwaha. ² Anye Ewudiya na Suntike, nghumulombenyi dedede mujele kuwa mwilumbanizize kumonga kotya munhu no mwanakwawe, muli Muwaha. ³ Nagwe go mwitumami muyangu mwihuwilwa, nghukunena wuwatazaje wadala wawo, hambi nha wetuma wahidimbaye u mulimo wo kuluganula u Luganuzi Luswanu, hamonga nane na Kelementi, hamonga ne wetumami wayangu wanji wose, wono i matagwa gawo, gandicigwe mu citabu co wumi. ⁴ Holeka musecelelele nhondo zose, muli Muwaha! Kanyhi nghutya, Musecelele! ⁵ Muweze wapolo kuli wanhu wose. U Muwaha yali behi. ⁶ Mulece kwihwelela muli cinji co cose, langa mu wulombe wenyu, mumulombaje u Mulungu i visakwa vyenyu, mumulombaje akuno mukumulumba mu zinhumbula zenyu. ⁷ No mulamu wo Mulungu wono wucizize u wumanye wose we wanhu, womukamisenyi zinhumbula ne mahala genyu mu wilunza na Kilisito Yesu. ⁸ Ze ndumilizo wandugu zangu, mugamemyaje mahweso genyu ne zinghani ziswanu zono zili mbeka, swanu, na ze ling’ani, zono zilenguce, zono zikwendeza na ze cogopo. ⁹ Mwitumaje zono mweyijiza, na zono mwabocela kulawa kwangu, i zinghani zangu, ne metumo gangu. Nayo u Mulungu wo mulamu, kowezana nanye. ¹⁰ Mu wilunze wangu no Muwaha, yikawa nyemo mbaha kuli’ne, kanyhi mukatuga ne cilejeho co kulajila vyono mukali mukunghumbucila. Na hono cilonje i mbeka, munghumbucilaga vilo vyose, ninga du, si mwatuga cilejeho co kuyilajila nghani yiyo. ¹¹ Si nghulonga nhavivi yiwe nha kotya nghusaka cinji, hambi nha neyijiza kuwa nyheye ne vinhu vyono nina navyo, ¹² hono viwe vinji hamba vicefu. Nizoweleze kuwa nyheye no wuwe wo wose, ne hanhu hono nili hoyuli; u wuwe wo kuca no wuwe we nzala, no wuwe wo kuwa na vinji kuciza no wuwe wo wucepucilwe. ¹³ Nosuma kuwa mu wuwe wo wose, hambi Kilisito nha yo kamhelaga i vilungo. ¹⁴ Ninga anye mwanoza viswanu so wuhanga nane mu magayo gangu. ¹⁵ Nanye nyo Wafilipi mumanyile vyono yo nyenye muli wene mono mwanhaza ha mwamulizo wo wuganule wangu wo Luganuzi Luswanu, lono nawukaga kuwulawa ku Makedoniya, yo nyenye du muli wene mono mwali hamonga nane mu cambuzi na mu wambuce wangu. ¹⁶ Na lono nali kuko ku Tesalonike akuno nghuhila wutazi, anye mukandetela, kanyhi hamba si kamonga. ¹⁷ Mulece kwihwesa nha vyono nyendile kubocela vipegwa du, langa nghusaka i cambuzi conjelezwe mu viwutwa vyenyu. ¹⁸ Ale, nakondya kuvibocela vinhu vyose vyono mukamhela, kanyhi vicizize kuciza na vyono navihilaga. Alu nina navyo vyose ku soko Epafulodito yakondya kundetela i vipegwa vyenyu. Vipegwa vivino vikuwa nha vilavywa vye mhunjile swanu, likumbiko lyono likuvumilwa no kumwendeza u Mulungu. ¹⁹ Holeka u Mulungu wangu ku soko yo wugoli wakwe wuwaha mu nzila ya Kilisito, komupelenyi i visakwa vyenyu vyose. ²⁰ Ale u lukumyo lweze kuli Mulungu wetu no Sogo yetu, cibitilila ne cibitilila. Heya. ²¹ Nghumulamusenyi anye mo wanhu wose wo Mulungu mono muli wa Kilisito Yesu. We zindugu wono wali hamonga nane wakumulamusenyi. ²² I wanhu wose wo Mulungu wono wali baha, na ko muno wono wali Mwikulu lyo Mutemi, wose wakumulamusenyi. ²³ Ilihewa lyo Muwaha Yesu Kilisito liwezane nanye wose.