MALUKO

MALUKO

¹ Alu lo Luganuzi Luswanu lwa Yesu Kilisito u mwana wo Mulungu. ² Lukanzwa nha vyono lwandikwa mu citabu co muwizi Isaya: “Langa ta, nghumutuma mutumwa wangu yakulongolele; Mono kokunozelezeza i nzila yako. ³ I lizi lyo munhu lihulikwa ku nyika: Nozelezenyi i nzila yo Muwaha. Gololenyi wukolo wakwe.” ⁴ Yohana u Mubaputizi yejela ku nyika, yakuganula vyono yinojeye wanhu wanene no kubaputizwa, u Mulungu ho yawanenele u wubi wawo. ⁵ I wanhu kulawa mbavu zose za Yudiya, na wanya Yelusalemi wose wakamuziza Yohana, wakavumila wubi wawo, nayo yakawabaputiziza mwi’kolongo lya Yoludani. ⁶ Yohana, yali yavwalile civwalo cono cali cihonwe ko wusinga we ngamiya, no musipi we nyhingo mu ciwino cakwe. Ne ndigwa yakwe, yali nzije no wuci wa mu mbago. ⁷ Nayo yakaganula yakutya, “U Munhu yunji mono yena vilungo yanyhizize nene, yakuza mu nyuma yangu; nane si nghwiliye hamba kwinama, no kuwopola i mikowa ye malatu gakwe. ⁸ Ane nghumubaputizenyi ne malenga, ninga mwene kolomubaputizenyi mu Muhe Mono Yelile.” ⁹ Mu vilo vivyo, Yesu yakaza yakulawa ku Nazaleti, kwi ’kaya lya Galilaya, nayo yakabaputizwa na Yohana mwi’kolongo lya Yoludani. ¹⁰ Lo lulolulo Yesu yaza kulawila mu malenga, yakawona wulanga wudiguce, no Muhe yakumutimila mucanyha yakwe yenha nziwa. ¹¹ Ne lizi likahulikwa kulawa ku wulanga likutya, “Agwe yo gwegwe mwanangu mwendece; mono nyendezwe nagwe.” ¹² Lo lulolulo yakategulwa no Muhe ku nyika, ¹³ yakekala kuko vilo makumi mane yakujelwa na Setani. Yakawa kuko hamonga ne malimu ga mu mbago, nawo Wamalayika wakawa wakumwitumamila. ¹⁴ Nayo Yohana yaza kuwa yadindilwa mu jela, Yesu yakabita ku Galilaya, yakaganula u Luganuzi Luswanu lo Mulungu, yakutya, ¹⁵ “Icidaha cakwila, no wutemi wo Mulungu wasejelela. Nenenyi no kulwihuwila u Luganuzi Luswanu!” ¹⁶ Na lono yakolaga ha nhumbi ye lilamba lya Galilaya, yakawawona wanimula zisomba wejete, Simoni no muwahawe Andeleya, wakunimula zisomba no lwavu. ¹⁷ Yesu yakawatya, “Munhyatyaje, nane nomunozenyi muwe wanimula wanhu.” ¹⁸ Lo lulolulo wakazileka zinyavu zawo, wakamutyatya. ¹⁹ Nayo yali yeza kutela hamwande hadodo, yakawawona wa Yakobo no mwanakwawe Yohana iwana wa Zebedayo. Nawo nha vivyo wali wali mu ngalawa yawo wakuzinozeleza zinyavu zawo. ²⁰ Lo lulolulo Yesu yakawacema, nawo wakamuleka u Sogo yawo Zebedayo mu ngalawa, hamonga ne wetumami, wakamutyatya. ²¹ Wakafika mwikaya lya Kapelanawumi, na mwizuwa lye Sabato, Yesu yakenjila mu nhang’anilo yo wuhembelo, yakanza kwijiza. ²² Ne wanhu wose wono wamuhulika, wakezina i mejizo gakwe, hambi nha siyejizaga nha vyono wejizaga iwejizi wawo wo Wulajilize, langa yejizaga nha munhu mono yena wulajilize. ²³ Lo lulolulo munhu yunji we licisi lyavu, yakenjila mu nhang’anilo yo wuhembelo, ²⁴ yakazoza, yakutya, “Alu wina nghanici nase, agwe Yesu wa Nazaleti? Alo kuza ho wucongomeze? Nghumanyile vyono wuli nani, yo gwegwe mono welile wo Mulungu!” ²⁵ Yesu yakalitacila ilicisi lyavu yakutya, “Nyamala! Wulawile muli munhu yuyu.” ²⁶ Ale, lilyo licisi lyavu, likamuzuganga munhu yuyo, likazoza muno, likawa kulawila. ²⁷ I wanhu wose wakezina, wakewuza wakutya, “Alo cici co cici? Ma, go mejizo mapya lo? U Munhu ayu, yena wulajilize wo kugalajiliza i macisi mavu, sunga nago gakumuhulika!” ²⁸ I zinghani za Yesu zikatandala mbela mbela hanhu hose, mu yisi ya Galilaya. ²⁹ Yesu ne wejizwa wakwe, hamonga na Yakobo na Yohana, wakawuka mu nghang’anilo yo wuhembelo, wakabita ku kaya ya Simoni na Andeleya. ³⁰ Ale, u mukwewe we cicekulu wa Simoni, yali yagonile mu citanda yena mhungo. Nayo Yesu yali yeza kufika, wakamulonjela kamonga muli zo wutamwa wo mudala yuyo. ³¹ Yesu yakamubitila mudala yuyo, yakamwibata muwoko, yakamwinula. Ne mhungo yiyo yikamuleka, nayo yakanza kuwetumamila. ³² Icinyamihe, lono lizuwa lyali lyagwililicila, i wanhu wakamuletela Yesu iwatamwa wose, ne wanhu wono wali wena macisi mavu. ³³ I wanhu wose we likaya lilyo wakekongholela ha mwande yo mulango. ³⁴ Nayo Yesu yakawaponya wanhu wenji wono wali wena wutamwa we hayo hayo, yakagalavya macisi menji, ninga siyagakombola galonje cinji, hambi nha gali gamumanyile vyono mwene yo nani. ³⁵ I mitondo yaco lono kwali kukali nadandawuka, Yesu yakenuka yakabita kulomba i hanhu ha cilejeho hono hasina wanhu. ³⁶ Nawo wa Simoni ne wayagwe wakabita kumulondola. ³⁷ Nawo waza kumuwona wakamutya, “I wanhu wose wakukulondola gwegwe.” ³⁸ Yesu yakawatya, “Alenyi cibite ku vikaya vinji vye behi behi, ho nghaganule nako kuko, hambi nha ku soko yiyo, holeka naza.” ³⁹ Ale, yakapilima hanhu hose mu Galilaya, yakuganula mu matang’anilo gawo go wuhembelo no kulavya macisi. ⁴⁰ U munhu yunji wo wukoma yakamubitila Yesu, yakamufugamila, yakamulomba yakutya, “Hono wende, kosuma kunghwema!” ⁴¹ Yesu yakamuwonela lusungu, yakagolola muwoko wakwe, yakamupamiza yakamutya, “Nyendile, wukwemwe!” ⁴² Lo lulolulo wukoma wukamuleka munhu yuyo, yakawa mutelevu. ⁴³ Yesu yakamutya yabite mbela mbela akuno yakumukong’onheza yakutya, ⁴⁴ “Wulece kumulonjela munhu wo wose ze nghani yiyi, langa wubite wukelajile kuli mukohani, na kolo wakondya kuhomelela vyono wapona, ale, wulavye i cilavywa nha vyono yalajiliza Musa, ho yiwe wuhomelezi kuli mwene so wupone wako.” ⁴⁵ Ninga munhu yuyo yakabita yakanza kuyitandaza inghani yiyo hanhu hose, no kulonga nghani nyinji, sunga na Yesu si yasuma kwinjila mwikaya lyo lyose ciwonelela. Ne nghani yiyo yikamunoza yekale kunze ihanhu ha cilejeho hono hasina wanhu. Ninga hamba nhavivyo, wakamubitila iwanhu wakulawa mbavu zose.

¹ Vyaza kupuluta vilo vicefu, Yesu yakawuya ku Kapelanawumi, iwanhu wakahulika vyono yali ha kaya. ² Ale, wakaza wanhu wenji muno, wakamema, sunga na ha mulango hakawa hasina hamba cilejeho. Nayo Yesu yakawaganulila inghani yakwe, ³ no munhu yunji mono yali yadejepe, yakaletwa kuli mwene yadinghuywe na wanhu wane. ⁴ Ku soko yo winji we wanhu, siwasuma kumutegula behi na Yesu. Holeka wakapula mwi’tembe hono hali hoyali Yesu. Wali waza kondya kutuga hanhu ho kumukozeza, wakamutimya munhu yuyo mono yali yagonile mu citanda. ⁵ Yesu yaza kuwuwona uwihuwilo wawo, yakamutya munhu yuyo mono yadejepe, “Go mwanangu kunenelwa wubi wako.” ⁶ Iwejizwa wanji wo Wulajilize wono wali wekaye baho, wakehwesa mu zinhumbula zawo wakutya, ⁷ “Yadahile nhawule kulonga nha vivyo? Ayu yakumutovula Mulungu! Vyono hasina munhu mono kosuma kunenela wubi, langa u Mulungu mweneco du, yo yasumile kunenela wubi.” ⁸ Ninga Yesu yakagamanya kamonga i mahweso gawo, yakawatya, “Alu socici mukwihwesa nhavivyo mu zinhumbula zenyu? ⁹ Alu yahayi imhelu muno, yo kumutya u munhu yuyu mono yadejepe, kunenelwa wubi wako, hamba yo kumutya, ‘Winuce, witwice citanda cako wubite?’ ¹⁰ Ale, nghusaka mumanye vyono, u Mwana wo Munhu, yena wulajilize wo kunenela wubi we wanhu kono’nze.” Baho yakamutya u munhu yuyo mono yadejepe, ¹¹ “Nghukulonjela, winuce, witwice citanda cako, wubite ku kaya!” ¹² Ne wanhu wose lono wali wakali wamulanjile, u munhu yuyo yakenuka lwa kamonga yaketwika i citanda cakwe, yakawa kubita. ¹³ Yesu yakabita kanyhi ku nhumbi ye lilamba. Lipuga lye wanhu likamuziza, nayo yakanza kuwejiza. ¹⁴ Nayo Yesu lono yapulutaga, yakamuwona Lawi mwana wa Alifayo, yekaye ha hofisi yo kutowezeza kodi. Yesu yakamutya, “Wunhyatyaje!” Lawi yakenuka, yakamutyatya. ¹⁵ Hanyuma, lono Yesu yali yekaye ha meza yakulya zindigwa mu kaya ya Lawi. I watoweza kodi wenji hamonga ne wanyo wubi wali wamutyatizye Yesu, sunga na wenji wa muli wene, wali wekalane hamonga nayo, hamonga ne wejizwa wakwe ha meza ye zindigwa. ¹⁶ Ale, iwejizi wacefu wo Wulajilize wono wali Wafalisayo, waza kumuwona Yesu yakulya zindigwa hamonga ne wanhu wabi ne watoweza kodi, wakawawuza iwejizwa wakwe, wakutya, “Alu socici yakulya zindigwa hamonga ne watoweza kodi ne wanhu wabi?” ¹⁷ Yesu yaza kuwahulika, yakawatya, “Wono si watamigwe, siwasakaga muganga, langa wawalya du wono watamigwe. Sinizize niwaceme wono wali ling’ani, langa i wanyo wubi.” ¹⁸ Kukawa mwipango linji, iwejizwa wa Yohana ne wejizwa we Wafalisayo, wali walekaga kulya ndigwa. Ale, iwanhu wakaza, wakamuwuza Yesu, wakutya, “Alu socici iwejizwa wa Yohana ne wejizwa we Wafalisayo, walekaga kulya ndigwa, ninga iwejizwa wako siwalekaga kulya ndigwa?” ¹⁹ Nayo Yesu yakawatya, “Alu wono walalikwe ku halusi, wolecelaci kulya ndigwa hono bwana halusi yakali hamonga nawo? Na mu mapango gose lono wakali hamonga na bwana halusi, siwosuma kuleka kulya ndigwa. ²⁰ Ninga lyolofika i lizuwa lono bwana halusi kolosolwa muli wene, baho langa ho wololeka kulya ndigwa. ²¹ “Hasina munhu mono katemaga cilaka mu mwenda mupya, no kucihoneleza mu civwalo cihuma. Na hono yanoze nhavivyo, icilaka cico cipya, cototoloka mu civwalo cihuma, no wudemuce wayo wokwatilila hawaha. ²² Hamba hasina munhu mono katajilaga divayi mhya mu mifuko ye zinyhingo zihuma. Na hono yanoze nhavivyo, i divayi nha yoyibahula imifuko, nayo divayi hamonga ne mifuko yiyo vyohodanjika. Langa idivayi ’mhya, yitajilwaga mu mifuko ye zinyhingo zimhya!” ²³ Kukawa, mwizuwa linji lye Sabato, Yesu yapulutaga yakolile mu migunda yo wuhemba. Nawo i wejizwa wakwe wakanza kubena imaso go wuhemba mu nzila. ²⁴ Iwafalisayo wakamutya, “Langata! So cici wakwituma i nghani yono yili mwiko kwituma mwizuwa lye Sabato?” ²⁵ Nayo Yesu yakawatya, “Alu mukali nasoma yaye, vyono yetuma Dawudi mwipango lono yali yadabuka? U mwene hamonga ne wayagwe wono yali yena nawo, ²⁶ mwene yenjila mu Nyumba yo Mulungu mu vilo vyono Abiyazali yali mukohani muwaha, yakalya i mikate yono yali cilavywa kuli Mulungu. Yono Iwakohani wali wene du wo wali wakomboywe kulya i mikate yiyo. Ninga hamba nhavivyo, Dawudi yakayilya, kanyhi yakawapela ne wayagwe nawo wakalya.” ²⁷ Holeka Yesu yakawalonjela yakutya, “Sabato yiwicigwe so cambuzi ce wanhu, ninga iwanhu si wawicigwe so Sabato.” ²⁸ Na ku soko yiyo, Mwana wo Munhu yo Muwaha, kanyhi yo Muwaha we Sabato.

¹ Yesu yakenjila kanyhi mu nghang’anilo yo wuhembelo, na mumo mugati mwali moyuli u munhu mono yali yena muwoko wono wudejepe. ² Baho hali howali wanhu wono wakasaka watuje nghani yo kumusonjezeza Yesu, holeka wakawa walindiye, wawone hono komuponya u munhu yuyo, mwizuwa lye Sabato. ³ Nayo Yesu yakamutya u munhu yuyo mono yali yena u muwoko wono wudejepe, “Wuze hano hono mwande!” ⁴ Ale yakawawuza, yakutya, “Wulenyi ti, yili ling’ani mwizuwa lye Sabato kwituma viswanu hamba kwituma vibi? Kuponya wumi hamba kuwulaga?” Ninga iwene hamba siwalonga cinji yaye. ⁵ Baho u mwene Yesu yakawalanga wose kwe ’kuwo, akuno yakukalala ku soko yo wukamu we zinhumbula zawo. Hanyuma yakamulonjela umunhu yuyo, yakutya, “Golola muwoko wako!” Nayo yakawugolola u muwoko wakwe, nawo wukawa wapona kanyhi. ⁶ Lo lulolulo i Wafalisayo wakalawila kunze ye nhang’anilo yo wuhembelo, nawo wakeheha hamonga ne cipuga ce wanhu wa Helode, vyono womuwulaga Yesu. ⁷ Yesu yakawuka baho hamonga ne wejizwa wakwe, yakabita ku nhumbi ye lilamba, ne lipuga lye wanhu likamutyatya. I wanhu wawo, walawa ku Yelusalemi, Yudiya, ⁸ Idumeya, ku nhumbi ye likolongo lya Yoludani, Tulo na Sidoni. Iwanhu wawo wenji, wakamuziza Yesu ku soko vyono wali wahulika ze metumo menji mawaha, gono Yesu yali yetuma. ⁹ Yesu yakawalonjela iwejizwa wakwe, wamuwikanizize ingalawa monga, lipuga lye wanhu ho lilece kumumemelela. ¹⁰ Yali yawaponya wanhu wenji, ne watamwa wose wamumemelelaga ho wamupamize. ¹¹ Ne wanhu wono wali wena i macisi mavu, waza kumuwona, wakagwa hali mwene no kuzoza, wakutya, “Agwe yo gwegwe Mwana wo Mulungu!” ¹² Ninga mwene Yesu yakagakong’onheza muno i macisi mavu, galece kumukumusa kuli wanhu vyono u mwene yo nani. ¹³ Yesu yakabita kwi’tunda, yakawacema kuli mwene wawalya wono yali yendile mweneco. Ale, wakamubitila, ¹⁴ Nayo yakawahagula wanhu yikumi na wejete wono yawacemela litagwa lye “Watumwa,” yakawatya, nimuhagulenyi anye ho muwezane nane. Nane nomutumenyi mubite mukaganule, ¹⁵ kanyhi muwe no wulajilize wo kulavizya imacisi mavu. ¹⁶ Ale, wawo ikumi na wejete wono wahagulwa, wowano, Simoni (mono Yesu yakamucemela litagwa lya Petelo), ¹⁷ Yakobo na Yohana, iwana wa Zebedayo (Yesu yakawacemela vyono wejete litagwa lya Bowanelege, nhunizo yayo “Wana we lididimo,”) ¹⁸ Andeleya na Filipo, Batolomayo, na Matayo, na Tomaso, na Yakobo mwana wa Alifayo, na Tadayo, na Simoni Mukanani, na ¹⁹ Yuda Musikaliyota mono yamugaluka Yesu. ²⁰ Ale, Yesu yakabita ku kaya. Ne lipuga lye wanhu likekonghola kanyhi, sunga Yesu ne wejizwa wakwe siwasuma kutuga cilejeho co kulya zindigwa. ²¹ Ale, iwanduguze za Yesu waza kuyihulika inghani yiyo, wakabita kumwibata, hambi i wanhu nha watezaga vyono yamangha lukwale. ²² Nawo iwejizi wo Wulajilize wono walawa ku Yelusalemi, wakatya, “Ayu yena Belizebuli! Kanyhi, yakugalavya i macisi, kwe vilungo vyo muwaha we macisi.” ²³ Baho Yesu yakawacema, yakawalonjela mu vihwanicizo, yakutya, “Alu Setani kosuma wule kumulavya Setani? ²⁴ Na hono wutemi wigawe vipuga vipuga vyono vikwihoma, uwutemi wuwo siwojendelela hamba hadodo. ²⁵ Na hono kaya yigawe mu vipuga vipuga vyono vikwihoma, i kaya yiyo yotecemela. ²⁶ Ale, holeka na hono wutemi wa Setani wigawe vipuga vipuga, siwosuma kujendelela hamba hadodo, langa wotecemelela lukulu. ²⁷ “Hasina munhu mono kasumaga kubena kaya yo munhu we vilungo no kumusolela isawo yakwe, langa sunga yamule kumuwopa u munhu yuyo we vilungo, baho ho kosuma kumusolela isawo yakwe. ²⁸ “Mbeka nghumulonjelenyi, iwanhu wonenelwa wubi wawo wose hamonga ne matovulo gawo gose. ²⁹ Ninga mono komutovula u Muhe Mono Yelile, yuyo sikonenelelwa lukulu, langa yeza yena lisutya lyo wubi we cibitilila.” ³⁰ (Yesu yalonga nhavivyo ku soko vyono wene watezaga, “Ayu yena licisi lyavu.”) ³¹ U nyina wa Yesu ne wanduguze wakaza baho, wakema hanze, wakamutegulila nghani vyono wakusaka kumuwona. ³² Ne lipuga lye wanhu lyali likaye baho limupilime. Ale, wakamulonjela, wakutya, “U nyina yako ne wanduguzo wali kunze wakukusaka wakuwone.” ³³ Nayo Yesu yakawapitula, yakutya, “Yaya ne wandugu zangu wo wa nani?” ³⁴ Baho yakawalanga i wanhu wono wali wamupilime, yakatya, “Lanjenyi ta! Awa wo wa yaya ne wandugu zangu. ³⁵ No munhu wo wose mono kokwituma u wuhile wo Mulungu, yuyo yo ndugu yangu, no lumbu lyangu nayo yo yaya.”

¹ Yesu yakanza kwijiza kanyhi, akuno yali ha nhumbi ye lilamba. Ne lipuga yiwaha lye wanhu likamupilima, sunga yikawa yimunojeye mwene yenjile mu ngalawa no kwikala mwi’lamba. I wanhu wakawa wekaye mu’si nghavu, ha nhumbi ye lilamba. ² Nayo yakawejiza nghani nyinji mu vihwanicizo, na mu mejizo gakwe yakawalonjela, yakutya, ³ “Hulicizenyi ta! U mumiza mbeyu yakabita kumiza mbeyu. ⁴ Na lono yazimizaga, zinji zikalagala mu nzila, ne zindeje zikaza zikazilya. ⁵ Zinji zikalagala mu mabwe hono hali hasina muhangha mwinji, nazo zikacindika mbela, mbela, na vyono u muhangha wali siwutelile, ⁶ lizuwa lyaza walika, zikawomba, na vyono milela yayo yali yisina vilungo, zikanyala. ⁷ Zinji zikalagala mu mamivya, ne mamivya gakahoga no kuzititiliza, nazo hamba sizalela mikalo. ⁸ Zinji zikalagala mu muhangha muswanu, zikawiluka no kulela: zinji zikalela mhece makumi madatu, zinji makumi mutandatu, na zinji yigana.” ⁹ Ale Yesu yakawatya, “Hulicizenyi ta, mono yena makutu go kuhulicila, yahulice.” ¹⁰ Na lono Yesu yali yali wene, wanji wa muli wawalya wono wamuhuliciza, wakamuziza hamonga na walya we likumi na wejete, nawo wakamuwuza ze vihwanicizo vivyo. ¹¹ Nayo Yesu yakawatya, “Anye mupejigwe kumanya ze cinyele zo wutemi wo Mulungu, ninga kuli walya wono wali kunze, wolonjelwa zose mu vihwanicizo. ¹² ‘Ho walanje mbeka, ninga walece kuwona. Wahulicize mbeka, Ninga walece kwizuka. Hono si nhavivyo, wali wamupitucile u Mulungu, nayo yali yawanenele.’ ” ¹³ Ale, Yesu yakawawuza yakutya, “Alu anye simukucimanya i cihwanicizo cici? Alu ho mosuma wule kucimanya icihwanicizo co cose cilya? ¹⁴ U mumiza mbeyu, kamizaga inghani yo Mulungu. Hanji i nghani yiyo yikuwa kugwiswa mu nzila, ¹⁵ ne wanhu wa mu nzila wakuyihulika, ninga kolo wayihulika, Setani yakuza no kuyiwusa inghani yiyo yono yihadikwe muli wene. ¹⁶ I wanhu wanji wehwanile nhe zimbeyu zilya zono zagwila mu mabwe. Kolo wakuyihulika inghani yiyo wakuyibocela mbela mbela na nyemo. ¹⁷ Ninga siyikuwenjila no kuwa na milela muli wene, nawo wakujendelela kuyibata inghani yiyo cidaha cidodo du, na kolo wukwijela wugaye, hamba wuwinjilizwe so nghani yiyo, hodu wakutukuwike i mitima yawo, no kuyileka kamonga. ¹⁸ Iwanhu wanji nawo, wehwanile nhe zimbeyu zilya zono zagwila mu mamivya. Aco co cihwanicizo ca wawo wono wakuyihulika inghani yiyo, ¹⁹ ninga i mahwele ga kononze yiyi, ne makoco ge sawo, ne masulumizi ge mawala gose, gakuwenjila no kuyititiliza inghani yiyo, nawo hamba siwakulela mikalo. ²⁰ Ninga iwanhu wanji, wehwanile nhe zimbeyu zilya zono zamizwa mu muhangha muswanu. Awa wo wakuyihulika i nghani yiyo, wakuyibocela, no kulela mikalo: wanji makumi madatu, na wanji makumi mutandatu na wanji igana limonga.” ²¹ Yesu yakajendelela kuwalonjela yakutya, “Ma, i wanhu wakolelezaga tala wayileta kugati no kuyigubika ne bakuli hamba kuyiwika mwi’vungu lye citanda? Ng’o ye! Langa wayiwikaga mucanyha yo wuwiko wayo. ²² Holeka co cose cono cihundikwe nha cokwanzalikwa calinze, na co cose cono cigubikwe, cogubulwa. ²³ Ale, hulicenyi, hono mwina makutu!” ²⁴ Yakawatya kanyhi, “Hulicizenyi muno muno cono mukuhulika! I cipimo cico cono mukwitumamila kuwapimila i wanhu wanji, co cico du cono u Mulungu nayo kolokwitumamila kumupimilenyi na nyenye, kanyhi molokonjelezwa. ²⁵ Hambi mono yena cinji nha kopegwa kuciza. Nayo mono yasina cinji, sunga na cono yena naco nha kosolelwa.” ²⁶ Yesu yakajendelela kutya, “Uwutemi wo Mulungu wihwanile u munhu mono yakuhadika mbeyu mu mugunda. ²⁷ Mu cilo yakugona, na mu misi yali meso, na mwipango lilyo, zimbeyu zikucindika no kuwiluka ninga mwene siyamanyile vyono zikunozeka. ²⁸ U muhangha weneco wo wunozaga zimbeyu ziwiluce no kulela mikalo; zamulaga kutula mahamha mapya hanyuma yayo yiso, na mu ndumilizo yayo, zimhece zimemile mwi’so. ²⁹ Na lono wuhemba wapya, munhu yuyo yakwanza kuyitumamila nzolo yakwe, hambi cipango ce ndudula nha caza.” ³⁰ Kanyhi Yesu yakatya, “Alu cowihwaniciza na cici u Wutemi wo Mulungu? Hamba ciwuloloseze mu cihwanicizoci? ³¹ Wihwanile nhe mbeyu ye haladali, yono ndodo kuciza mbeyu zose. ³² Ninga kolo yahadikwa, yicindikaga no kuwa ibici iwaha kuciza mabici gose ga mu mugunda. Ne manhambi gayo gawezaga mawaha, sunga ne zindeje za mu mbago zisumaga kuzenga manhuli gazo mu mubeho wayo.” ³³ Nayo yawaganulila i nghani yakwe mu vihwanicizo vinji vinha vivi, yaduwa nawo sunga mu nghango yono wasuma kwizuka. ³⁴ Nayo siyalonga nawo co cose cono cali cisina cihwanicizo, ninga lono yali hamonga ne wejizwa wakwe, wene, yawalolosesaga zose. ³⁵ Mu cinyamihe, mwi’zuwa lilyo, Yesu yakawatya iwejizwa wakwe, “Alenyi cilowoce, cibite ku nhumbi nzagwe ye lilamba.” ³⁶ Ale, wakalileka ilipuga lye wanhu, wakamusola Yesu mu ngalawa yono yali yali mumo. Baho hali hozili ne zingalawa zinji nha vivilya. ³⁷ Baho, wukawa kwanza mukukunzo muwaha we mbeho, imawingo gakayitowa i ngalawa yiyo sunga yikanza kumema malenga. ³⁸ Nayo Yesu yali yali kunyuma ye ngalawa yagonile, yeciwize muto. Ale, i wejizwa wakamusinhusa wakamutya, “Mwijizi, alu wukuwona si cinji vyono caza kongomela?” ³⁹ Ale, Yesu yakasinhuka, yakalitacila lilyo likukunzo liwaha lye mbeho, no kugatya i mawingo ge lilenga, “Nyamala! Tule!” Baho i mbeho yikatula hakanyamala twii. ⁴⁰ Hanyuma yayo Yesu yakawatya iwejizwa wakwe, “Alu nhawule mukogopa?” Alo mukali musina wihuwilo? ⁴¹ Nawo wakogopa muno, wakawa kwiwuza wakutya, “Alu mwene yuyu yo nani, ta? Mono sunga ne mbeho ne mawingo ge lilenga vikumuhulika?”

¹ Ale, wakafika ku nhumbi nzagwe ye lilamba, mu’si ye Wagelasene. ² Yesu yaza kutima mu ngalawa, hobaho viketang’anila na munhu yunji mono yali yena licisi lyavu, yakulawa ku vitenjelo. ³ U munhu yuyo yekalaga mu vitenjelo, hamba hasina munhu mono yasuma kanyhi kumuwopa ne manyolo. ⁴ Hambi nha kali kenji wamuwopaga ne zipingu hamonga ne manyolo, ninga mapango gose yasumaga kugadumula manyolo gago, no kuzibenanga zipingu zizo, hamba hasina munhu mono yasuma kumwimila. ⁵ Na mu misi ne cilo, yekalaga mu vitenjelo, na mu matunda, yakuzoza no kwidemulanga ne mabwe. ⁶ Nayo yaza kumuwonela Yesu kutali, yakamumanyhilila, yakamuhemba, ⁷ akuno yakulonga kwe’zi ’waha yakutya, “Gwe, Yesu, go Mwana wo Mulungu Mono Yalawiliciye, alu wina nghanici nane? Mwi’tagwa lyo Mulungu, nghulomba wulece kungaza!” ⁸ (Nayo yalonga nhavivyo vyono Yesu yali yamulonjela yatya, “Go licisi lyavu, wulawile muli munhu ayu.”) ⁹ Holeka Yesu yakamuwuza, yakutya, “Alu litagwa lyako gwegwe nani?” Nayo yakapitula, yakutya, “Litagwa lyangu nene ‘Mhuga’ hambi ase nha cili wenji.” ¹⁰ U munhu yuyo yakamunena Yesu, yalece kugawinga gago macisi mavu mu’si yiyilya. ¹¹ Ale kwali ne’tewa yiwaha lye zingubi likudima ha mwejelele we litunda. ¹² Ale, imacisi gago gakamunena Yesu, gakutya, “Wucitegulaje ku zingubi zizo, cikenjile muli zene.” ¹³ Nayo yakagakombola. Ale, gago macisi mavu gakalawila, gakenjila mu zingubi zizilya. Ne litewa lyose lye zingubi elufu nyejete, likavulumucila he weta zikenjila mwi’lamba, no kufwila mumo. ¹⁴ Nawo wadimi we zingubi zizo wakatiza, wakayiganula i nghani yiyo kwi’kaya na mu migunda. Iwanhu wakaza ho wawone nyhici yono yiweye. ¹⁵ Wakamuziza Yesu, wakamuwona no munhu yuyulya mono yali yena litewa lye macisi yekaye hasi, yavwalile ne myenda, yena ne mahala gakwe, yatulile, nawo wakogopa muno. ¹⁶ Ne wanhu wono waziwona zizo, wakawaloloseza wanhu wanji vyono yimuweye u munhu mono yali yena macisi, na ze zingubi zizilya. ¹⁷ Nawo, wakanza kumunena yawuce mu’si yawo. ¹⁸ Na lono Yesu yenjilaga mu ngalawa, u munhu yuyulya mono yali yena imacisi, yakamunena yawezane nayo. ¹⁹ Ninga Yesu siyamuvumila. Langa yakamutya, “Wubite ku kaya yako, ku wanduguzo, wukawalonjele zimbaha zose zono u Muwaha yakutendeye na vyono yakuwoneye lusungu.” ²⁰ Ale, munhu yuyo yakabita, yakanza kuganula kuko ku Dekapoli i zimbaha zose zono Yesu yamutendela, ne wanhu wose wakezina muno muno. ²¹ Nayo Yesu yakalowocela kanyhi mu ngalawa ku nhumbi nzagwe ye lilamba. Ne lipuga yiwaha lye wanhu likekongholela ha mwande yakwe, nayo yakawa yemile ha nhumbi ye lilamba. ²² Baho yakaza yunji wa muli wawaha we nhang’anilo yo wuhembelo, litagwa Iyakwe Yayilo. Nayo yaza kumuwona Yesu, yakagwa hamwande ye magulu gakwe, ²³ yakamunena muno yakutya, “Umuhinza wangu mudodo yatamigwe, yali behi no kufwa. Cibite nghukunena, wukamuwicile miwoko yako, ho yapone no kuwumipa!” ²⁴ Ale, Yesu yakabitana nayo. Ne liwuta yiwaha lye wanhu likamutyatya, likawa limufinhile mbavu zose. ²⁵ Na muli wene mwali moyuli mucekulu yunji mono yali yena wutamwa wo wuzaze we sakami myaka yikumi na myejete. ²⁶ Umucekulu yuyo yali yagazika muno ne waganga wenji. Na hamba yawe yali yakondya kwitumamila sawo yakwe yose so wulagulwe, ninga siyatuga ciba hamba hadodo, langa wutamwa wakwe ho wukacila kuwa wubi muno muno. ²⁷ Yali yakondya kuzihulika zinghani za Yesu, holeka yakaziza ku mugongo wa Yesu, yakekokomeza mu mwinji we wanhu wono wali wumufinhile Yesu mbavu zose, ²⁸ akuno yakwiyitya, “Hono mhamize civwalo cakwe du, nopona.” ²⁹ Hodu, yakawa kucipamiza i civwalo ca Yesu, no wuzaze wakwe we sakami, wukawa kuduma lwa kamonga, nayo yakehulika mu muwili wakwe nha vyono yaponywa wutamwa wakwe. ³⁰ Nayo Yesu yakamanya kamonga vyono vilungo vya muli mwene vyalawa. Hobaho, yakalipitucila lipuga lye wanhu, yakawuza, yakutya, “Alo nani mwene mono yamhamize i civwalo cangu?” ³¹ Iwejizwa wakwe wakamutya, “Wukuwona vyono wanhu wenji wakufinhile mbavu zose, alu nhawule wukuwuza wukutya nani mwene mono yakupamize?” ³² Ninga Yesu yakajendelela kulanga langa kose kose ho yamuwone yuyo mono yanozize nhavivyo. ³³ Baho umucekulu yuyo, vyono yali yamanyile zono zimuweye, yakaza akuno yakucicima so woga, yakagwa hamwande ya Yesu no kulonga ze mbeka zose. ³⁴ Nayo Yesu yakamutya, “Go muhinza, wihuwilo wako wukuponya. Wubite wupolile, no wutamwa wako wuponele lukulu.” ³⁵ Na lono Yesu yali yakali yakulonga, iwanhu wakaza kulawa ku kaya yo muwaha we nhang’anilo yo wuhembelo, wakamutya, “Umuhinza wako yakondya kufwa. Alu nhawule wukali wukumugaza Mwijizi?” ³⁶ Ninga mwene Yesu hamba siyacelelela cono walonga, langa yakamutya muwaha we nhang’anilo yo wuhembelo, “Wulece kogopa, wihuwile du.” ³⁷ Hamba siyaleka munhu yunji wo wose vibitane nayo, langa Petelo du, na Yakobo na Yohana u mwanakwawe wa Yakobo. ³⁸ Wakafika ku kaya yo muwaha we nhang’anilo yo wuhembelo, nayo Yesu yakahulika lizozo, ne cililo. ³⁹ Yakenjila ku gati, yakawatya, “Alu nhawule mukuzoza no kulila? U muhinza nha siyafwiye yaye, langa yagonile du.” ⁴⁰ Ninga wene wakamuseka. Nayo, yakawalavyaniza wose kunze, yakawasola usogwe no nyina wo muhinza yuyo, hamonga na wawalya iwejizwa wakwe, wakenjila kugati kono kwali kowuli u muvimba wo muhinza yuyo. ⁴¹ Yesu yakamwibata muwoko, yakamutya, “Talita kumi.” Nhunizo yayo, “Go muhinza nghukulonjela, winuce!” ⁴² Lo lulolulo umuhinza yakenuka, yakanza kujenda. (Yali yena myaka ikumi na myejete.) Baho, iwanhu wakezina muno muno kuciza. ⁴³ Nayo Yesu yakawakong’onheza muno, walece kuyitandaza inghani yiyo kuli wanhu. Hanyuma yakawa kuwalonjela wamupele muhinza zindigwa.

¹ Yesu yakawuka baho yakabita ku citumbi cakwe, ne wejizwa wakwe wakamutyatya. ² Ne lizuwa lye Sabato lyaza fika, yakanza kwijiza mu nhang’anilo yo wuhembelo. Ne wanhu wenji wono wamuhulika wakezina, wakatya, “Alu kazisola hayi i zinghani zizi? Na mahalaci gaga gono yapejigwe? Kanyhi, yakwituma wule i metumo gaga mawaha go wizine gono yakwituma? ³ Alu ma, si yo yuyu muselemala, umwana we cilume wa Malyamu u muwahawe wa Yakobo, na Yose na Yuda na Simoni? Ne walumbuze ma, si wali baha hono hetu? Holeka wakatuga mahwele nayo.” ⁴ Nayo Yesu yakawatya, “Umuwizi katugaga lilumbo hanhu hanji hose, ninga si katugaga lilumbo mu’si yakwe, na mu wanduguze na mu kaya yakwe.” ⁵ Hamba siyasuma kwituma mapoto baho, langa yakawawicila miwoko watamwa wacefu, yakawaponya. ⁶ Yakezina muno so wuleka kwihuwila kwawo. Ale, Yesu yakapilima mu vikaya vyono vyali vili behi behi, yakwijiza wanhu. ⁷ Nayo yakawacema wawalya i wejizwa we likumi na wejete, yakanza kuwatuma wejete wejete. Yakawapela vilungo vyo kulavizya macisi mavu, ⁸ nayo yakawalajiliza yakutya, “Kolo mukubita mu muhinzo, mulece kusoleleza cinji co cose, langa musole nghome du. Mulece kusoleleza mukate, hamba mufuko wo kulombela, hamba pesa mu mifuko yenyu. ⁹ Muvwale malatu, ninga mulece kuvwala kanzo nyejete nyejete.” ¹⁰ Kanyhi yakawatya, “Ho hose hono mobocelwa mu kaya, mwikalaje mumo, sunga kolo mweza kuwuka i hanhu baho. ¹¹ Ne hanhu ho hose hono iwanhu wolema kumubocelenyi hamba kumuhulicenyi, muwuce baho, ninga mukung’unhe manghundi gono gali mu magulu genyu, ho yiwe wuhomelezi kuli wene.” ¹² Ale, wakatuluka, wakaganula wanhu wanene. ¹³ Wakagalavya macisi menji, wakawabaka watamwa wenji mafuta, wakawaponya. ¹⁴ Ale, umutemi Helode yakazihulika zizo zose, hambi ilitagwa lya Yesu nha lyali likumucile muno hanhu hose. Ne wanhu wanji watezaga, “Yohana Umubaputizi nha kazuka muli wafu, na ku soko yiyo holeka ivilungo vye mapoto vikwituma mulimo muli mwene.” ¹⁵ Ninga wanhu wanji wakatya, “Umunhu yuyo yo Eliya.” Iwanji wakatya, “Yuyu yo muwizi kotya muyagwe ne wawizi.” ¹⁶ Ninga Helode yaza kuzituga zinghani zizi, yakatya, “Yuyu yo Yohana! Namudumula mutwe, ninga’lu yazuka.” ¹⁷ Baho halulongozi, Helode mweneco yali yalajilize vyono Yohana yebatwe, nayo yakamufunga mu jela. Nayo Helode, yanoza nhavivyo, ku soko ya Helodiyasi mono Helode yali yamutolile, na kuno kumbe ho yali mugolece wa Filipo, u mwanakwawe. ¹⁸ Vyono Yohana yamutya, Helode, “Mwiko kuli’gwe kumutola u mugolece wo mwanakwenyu.” ¹⁹ Holeka Helodiyasi yakamusula muno muno Yohana, yakasaka sunga yamuwulaje, ninga hamba nhavivyo, siyasuma yaye. ²⁰ Na Helode yamogopaga Yohana, hambi nha yali yamanyile vyono mwene yali munhu we ling’ani kanyhi yelile, holeka yakamukamisa. Helode yali yendile kumuhuliciza Yohana, hamba yiwe kolo yamuhuliciza, yagazikaga muno. ²¹ Ale, mwizuwa linji, cikejela cilejeho, mwizuwa lyo wulelwe wakwe Helode. Nayo Helode yakawanozeza ndigwa iwanyamhala we libalaza lyakwe, iwasilikale ne wawaha wa Galilaya. ²² Ale, umwana we cicekulu wa Helodiyasi yakenjila, yakavina, nayo yakawendeza muno, umwene Helode ne wajenzi wakwe. Umutemi yakamutya u muhinza yuyo “Wunombaje co cose cono wendile nane nokupela.” ²³ Kanyhi yakamwilahila, yakutya, “Co cose cono konomba, nokupela, hamba liwe lipinga lyo wutemi wangu.” ²⁴ Baho u muhinza yuyo yakalawila kunze, yakabita kumuwuza unyina yakutya, “Alu yaya, nombeci!” Nayo nyina yakamutya, wulombe “Umutwe wa Yohana u Mubaputizi.” ²⁵ No muhinza yakamubitila umutemi ko musunho, yakamulomba yakutya, “Nghusaka wumhele lulu baha mu ciya, umutwe wa Yohana u Mubaputizi.” ²⁶ Umutemi yakakalala muno muno, ninga ku so wilahize wakwe, na ku so wajenzi wakwe wono wali ha zindigwa, siyenda kumulemeza. ²⁷ Ale, umutemi yakamulajiliza umusilikale yakabita, yakamudumula mutwe Yohana mumo mu jela, ²⁸ Yakawuletela mu ciya, yakamupela yuyo muhinza, nayo muhinza yakamupela nyina. ²⁹ Nawo Iwejizwa wa Yohana, waza kuzihulika zizo, wakabita wakawusola u muwili wakwe, wakawuzika mu citenjelo. ³⁰ Nawo iwatumwa wawalya, wakawuya, wakekongholela ha mwande ya Yesu, wakamulonjela zose zono wanoza na zono wejiza. ³¹ Ne wanhu wenji muno wazaga no kubita, sunga na Yesu ne wejizwa wakwe siwasuma kutuga hamba cilejeho co kulya ndigwa. Holeka Yesu yakawalonjela iwejizwa wakwe yakutya, “Alenyi cibite sese cili wene hanhu hono hasina wanhu, ho mukacehe hadodo.” ³² Wakawuka weneco wali wene mu ngalawa, wakabita hanhu hono hasina wanhu. ³³ Ninga hamba nhavivyo, wanhu wenji wakawawona vyono wakubita, nawo wakawamanya. Holeka wanhu wenji wakalawa mu makaya gose, wakamanyhila kuko kono Yesu ne wejizwa wakwe wabitaga, wakalongola kufika. ³⁴ Nawo wali weza kutima hasi ye ngalawa, Yesu yakagawona i mapuga mawaha ge wanhu, yakawawonela lusungu, hambi nha wali wenha zingholo zono zisina mudimi. Nayo yakanza kuwejiza nghani nyinji. ³⁵ Imapango ge misi gali gakondya puluta. Nawo iwejizwa wakwe wakamubitila Yesu, wakamutya, “Alu ahano nha nyika, ne lizuwa nha lyasweza. ³⁶ Holeka wakombolaje wanhu wabite ku migunda na ku vikaya vye behi behi, wakegulile ndigwa.” ³⁷ Ninga Yesu yakawatya, “Nyenye nyo weneco muwapelaje zindigwa.” Nawo wakamuwuza wakutya, “Alu cibite cikagule mikate ya pesa, dinali magana mejete, ho ciwapele zindigwa?” ³⁸ Nayo Yesu yakawawuza, yakatya, “Alu ’nye mwina mikate milinga?” Bitenyi mukayilanje. Waza manya wakamutya, “Hoyili mikate mihano ne zisomba nyejete.” ³⁹ Baho, Yesu yakawalajiliza iwejizwa wawalonjele iwanhu wose wekale hasi mu mahanze ge dedede vipuga vipuga. ⁴⁰ Nawo wakekala hasi vipuga vipuga vya wanhu igana limonga limonga, na vye wanhu makumi mahano mahano. ⁴¹ Hanyuma yayo Yesu yakayisola i mikate yiyilya mihano ne zisomba zizilya zinyejete, yakagalamila kucanyha, yakamulumba Mulungu, yakayibegula i mikate, yakawapela i wejizwa wakwe wawagawile wanhu. Ne zisomba zizilya zinyejete nazo yakawagawila wose. ⁴² Ne wanhu wose wakalya, wakeguta. ⁴³ Wakatondoleza ivibegulwa vye mikate na vye zisomba, wakamemya nhoto yikumi na nyejete. ⁴⁴ Nawo wono walya i mikate yiyo, wali walume elufu yihano. ⁴⁵ Lo lulolulo Yesu yakawalajiliza iwejizwa wakwe wenjile mu ngalawa, walongole kubita ku Betesayida, ku nhumbi ye lilamba, lono mwene yali yakali kugelaga i mapuga ge wanhu. ⁴⁶ Na lono yali yawelaga yakondya, yakabita kwi’tunda kulomba. ⁴⁷ Yaza kuwa cinyamihe i ngalawa yali yili ha ciligati ye lilamba, nayo yali mweneco yali wene du mu’si nghavu. ⁴⁸ Ale, yakawawona iwejizwa wakwe wakugazika muno kuyijendya ingalawa, hambi imbeho nha yali vidomile nawo. Na lono kwali kweza behi no kudandawuka, Yesu yakawabitila i wejizwa wakwe yakujenda mucanyha ye malenga. Yakasaka kuwapuluta. ⁴⁹ Ninga wakamuwona yakujenda mucanyha ye malenga, nawo watezaga mba yisoce, wakazoza. ⁵⁰ Hambi nha wose wali weza kumuwona, wakogopa muno muno. Nayo Yesu yakalonga nawo, yakutya, “Mutulane, yo nene, mulece kogopa!” ⁵¹ Hanyuma yayo, yakenjila mu ngalawa yono wali wali mumo, ne mbeho yikanyamala. Nawo wakezina muno, ⁵² hambi nha wali wakali sinezuka inhunizo yo kuwalisa wawalya i wanhu we elufu yihano. I mahala gawo gali gakali si nazibata yaye. ⁵³ Wakalowoka lilamba, wakafika kuyisi ya Genesaleti, wakayiwopa ingalawa ha mwejelele. ⁵⁴ Nawo wali weza kutima hasi ye ngalawa, lo lulolulo iwanhu wakamumanya Yesu lwa kamonga. ⁵⁵ Hobaho wakawa kupilima mbela mbela muyisi yiyilya yose, wakanza kuwadinghula iwatamwa mu vitanda vyawo, wakawategula ko kose, kono wamuhulika Yesu vyono kowa yali kuko. ⁵⁶ Na ko kose kono Yesu yabitaga, mu vikaya na mu makaya, hamba mu migunda, iwanhu wakawawika iwatamwa mu zisokoni, wakamunena wapamize hamba licindo lye civwalo cakwe du. Nawo wose wono wamupamiza, wakapona.

¹ Iwafalisayo wanji hamonga ne wejizi wo Wulajilize, wono wali wazize kulawa ku Yelusalemi, wakekongholela ha mwande ya Yesu. ² Wakawona vyono iwejizwa wakwe wanji, walizaga mikate ne miwoko yono yitipiye, yono simizuguzwe. ³ (Hambi Iwafalisayo ne Wayahudi wanji wose, nha webate imyoto ye wasewo: siwalizaga cinji, hono wakali sinezuguza miwoko yawo vyono yinojeye. ⁴ Kanyhi, siwalizaga cinji co cose cono ciguligwe ku sokoni, sunga wamule wacizuguze. Kanyhi hoyili myoto yinji yono wayibocela kuwulawa katali, kotya kukwema vikombe, nyungu ne viya vye vyuma vizelu.) ⁵ Holeka Iwafalisayo ne wejizi wo Wulajilize wakamuwuza Yesu, wakutya, “Alu so cici wejizwa wako siwakuyicelelela imyoto yono cayibocela kulawa ku wakuku zetu, langa wene walizaga zindigwa ne miwoko yono yitipiye?” ⁶ Nayo Yesu yakawapitula yakawatya, “Nye nyo wakoci! Umuwizi Isaya yamuwililenyi ze mbeka lono yandika yakutya: ‘U Mulungu yakutya, I wanhu wawa wanumbaga kwe milomo yawo du, ninga mu zinhumbula zawo wali kutali nane. ⁷ No wuhembi wawo wa kuli’ne hamba si wukwiliye cinji, hambi zinghani zono wejizaga, nha malajilizo ga cimunhu-munhu du.’ ⁸ “Anye mukulileka lilajilizo lya Mulungu no kwibata imalajilizo ge wanhu.” ⁹ Nayo Yesu yakajendelela kutya, “Anye nha mumanyile kwilega ko wusugu ililajilizo lyo Mulungu, ho muyityatye imyoto yenyu! ¹⁰ Hambi Musa nha yakalajiliza yakatya, ‘Wuwogopaje Usogo no Nyina yako,’ na ‘Mono yakulonga vibi kuli sogwe hamba kuli nyina, yimunojeye yuyo yafwe.’ ¹¹ Ninga anye mukwijiza vyono, ‘Hono munhu yena icinhu cono yali yadahile kuwataziza usogwe hamba unyina yakwe, ninga kanyhi ho yatye, icinhu cico yo Kolubani (nhunizo yayo cilavywe kuli Mulungu), ¹² ati holeka si yimunojeye kanyhi yawataze i walezi wakwe.’ ¹³ Holeka nhavivyo vyo mukuyibedegala inghani yo Mulungu, so imejizo genyu gono mukwibocezana. Kanyhi mukwituma makani ganji menji gono genha gago.” ¹⁴ Yesu kanyhi yakalicema i lipuga lye wanhu, yakalilonjela yakutya, “Muhulicizaje wose, kanyhi mwizuce. ¹⁵ Hasina cinji cono cikwinjila mugati yo munhu cono cikulawa munze cono cosuma kumwavufya munhu. Langa cono cilawaga mugati yo munhu co cikuwa kumwavufya munhu. [ ¹⁶ Ale hulicenyi hono mwina makutu!]” ¹⁷ Yaza kulileka i lipuga lye wanhu no kwinjila mu kaya, iwejizwa wakwe wakamuwuza inhunizo ye cihwanicizo cico. ¹⁸ Nayo yakawatya, “Alu, hamba na nyenye simukwizuka hongo? Alu simukwizuka vyono i cinhu cono cikulawa munze no kwinjila mugati yo munhu si cosuma kumwavufya munhu yaye, ¹⁹ hambi nha sicikumwinjila mu nhumbula yakwe, langa cikwinjila munda yakwe du, na hanyuma yayo cilawanizaga kunze ku coloni?” (Na lono yalongaga zizo, Yesu yakazinoza ndigwa zose, swanu ku wulye.) ²⁰ Yesu yakajendelela kutya, “Cono cilawaga mugati yo munhu co cimwavufya munhu. ²¹ Hambi mugati, mu zinhumbula ze wanhu nha mo galawaga mahweso mabi, gono gakuleta wusenyha, wuhizi, wuwulaji, ²² wusulumizi, wutili, wubugu, wubi, wukoci, wusisi, maligo, wiwoni no wulele. ²³ Imabi gaga gose, go galawaga mugati yo munhu, nago goga kuwa kumwavufya munhu.” ²⁴ Nayo Yesu yakawuka baho, yakabita ku yisi ya Tulo. Na kuko yakenjila mu kaya yinji yono siyasaka munhu yunji yamanye, ninga hamba nhavivyo, siyasuma kwihundika. ²⁵ Na baho mucekulu yunji mono u muhinza wakwe yali yena licisi, yakazihulika zinghani za Yesu. Hodu yakawa kuza, yakagwa hasi ha mwande ye magulu ga Yesu. ²⁶ Nayo umudala yuyo, yali si Muyahudi, yali mulelelwa mu yisi ye Wasilofoyinike. Ale, yakamulomba Yesu yalilavye licisi lyavu muli muhinza wakwe. ²⁷ Nayo Yesu yakamutya, “Wulece ta wana wamule kwiguta, hambi nha si viswanu kusola zindigwa ze wana, kuwa kuzigumilila zimbwa.” ²⁸ Ninga umudala yuyo yakatya, “Heya ’gwe Muwaha, ninga hamba ne zimbwa zono zili he ’vungu lye meza ye zindigwa, zilizaga i vidodo dodo vyono vikulagazwa ne wana.” ²⁹ Nayo Yesu yakamutya, “Ku so wulonje wuwo, ale, wubite. Ilicisi lyakondya kulawila mo muhinza wako!” ³⁰ Nayo yakabita ku kaya yakwe, yakamwagana umuhinza wakwe yagonile mu citanda, ne licisi lyakondya kumulawa. ³¹ Hanyuma yayo Yesu yakawuka mu’si ya Tulo, yakakolela mu Sidoni, yakafika kwi’lamba lya Galilaya, yakakolela mu’si ya Dekapoli. ³² Ale, wakamuletela munhu mono yali cibwibwi kanyhi yali ciziwi, wakamunena yamuwicile miwoko. ³³ Nayo Yesu yakamutezeza ha mhelo ye lipuga lye wanhu, yakenjiza vidole vyakwe mu makutu, yakafunya mate no kumupamiza mu lulimi lwakwe. ³⁴ Hanyuma yayo yakagalamila kucanyha ku wulanga, yakang’ula, yakamutya, “Efata, wo wutya, Diguka.” ³⁵ Lo lulolulo imakutu gakwe gakadiguka no wuwopwe wo lulimi lwakwe lukahogoha, yakanza kulonga viswanu. ³⁶ Yesu yakawalajiliza walece kumulonjela munhu ze litumo lilyo. Ninga mu nghango vyono yacila kuwalemeza, yo nghango yono nawo wakacila muno kuyitandaza i nghani yiyo. ³⁷ I wanhu wakezina muno muno, wakatya, “Kanoza zose viswanu, yakuwanoza we ciziwi wahulice, na we cibwibwi walonje!”

¹ Mu vilo vivyo lipuga yiwaha lye wanhu likekonghola kanyhi, nawo wali wasina ndigwa. Ale, Yesu yakawacema iwejizwa wakwe, yakawatya, ² “Nghuwawonela lusungu wanhu wawa, hambi nha cekalana nane vilo vidatu, nawo wasina cinji co kulya. ³ Nane hono niwakombole wabite kwawo akuno wadabuce, wozilika mu nzila, hambi wayawo wanji nha walawa kutali.” ⁴ Nawo wejizwa wakwe wakamuwuza, wakutya, “Alu ahano nha nyika, ho yolawa hayi mikate yono yosuma kuwegutya i wanhu wawa wose?” ⁵ Nayo Yesu wakawawuza, yakutya, “Alu ’nye mwina mikate milinga?” Nawo wakamutya, “Mupunghati.” ⁶ Ale, yakawalajiliza wanhu wekale hasi. Nayo yakayisola mikate yiyilya vyono yili mupunghati, yakamulumba Mulungu, yakayibegula, yakawapela iwejizwa wakwe wawagawile wanhu, nawo wakawagawila. ⁷ Kanyhi wali wena ne visomba vicefu. Nayo Yesu yakavilugutiza, yakalajiliza wavigawe kuli wanhu nhavivyo. ⁸ Iwanhu wakalya, wakeguta. Wakatondoleza ivibegulwa vyono vyasigala wakamemya nhoto mupunghati. ⁹ Nawo wono walya wali waficile nha wanhu elufu yine. Yesu yakawakombola, ¹⁰ lo lulolulo yakenjila mu ngalawa hamonga ne wejizwa wakwe, yakabita ku yisi ya Dalamanuta. ¹¹ Iwafalisayo wakaza, wakanza kwiwuza na Yesu. Nawo wakawa kumujela, wakamusaka yawanozeze citanjilo cono cikulajila vyono mwene yena wukombolwe kulawa ku wulanga. ¹² Yesu yakakalala muno mu nhumbula yakwe, yakatya, “Alu so cici u lulelo lulu lukusaka citanjilo? Mbeka nghumulonjelenyi lulelo lulu silopegwa citanjilo co cose.” ¹³ Hodu yakawaleka, yakenjila kanyhi mu ngalawa, yakalowoka ku nhumbi nzagwe ye lilamba. ¹⁴ Iwejizwa wakasemwa kusoleleza ne mikate, nawo wali wena mukate monga du mu ngalawa. ¹⁵ Yesu yakawakong’onheza, yakutya, “Lanjenyi ta! Mweze musujile kuli cisase ce Wafalisayo ne cisase ca Helode.” ¹⁶ Iwejizwa wakanza kulongana weneco wose, wakutya, “Alu yakulonga nha vivyo vyono cisina mikate.” ¹⁷ Nayo Yesu yakamanya cono walongaga, yakawatya, “Alu so cici mukulongana nyo weneco wose vyono musina mukate? Alo mukali sinezuka du, hamba kumanya ng’o? Alo i zinhumbula zenyu zikamupe? ¹⁸ Alu nha mwina ne meso, simukuwona? Nha mwina ne makutu, simukuhulika? Alu simukukumbucila, ¹⁹ i cidaha cilya lono nayibegula mikate yiyilya mihano, no kuwapela wanhu elufu yihano? Wulenyi, mwatondola nhoto yilinga zono zali zimemile vibegulwa vyono vyasigala?” Wakamutya, “Ikumi na nyejete.” ²⁰ “Na lono nayibegula mikate yiyilya mupunghati no kuwapela wanhu elufu yine, ma, mukatondola nhoto yilinga zono zali zimemile vibegulwa vyono vyasigala?” Wakamutya “Mupunghati.” ²¹ Nayo yakawatya, “Alu sunga nalu mukali si nezuka du?” ²² Yesu yakafika ku Betesayida hamonga ne wejizwa wakwe. Na kuko, wanhu wakamuletela munhu yunji we cibofu, wakamunena yamupamize. ²³ Nayo Yesu yakamwibata muwoko munhu yuyo we cibofu, yakamutegula kunze ye cikaya ca Betesayida. Yakamubaka mate mu meso, yakamuwicila miwoko yakwe, yakamuwuza, yakutya, “Wule, wukusuma kuwona cinji.” ²⁴ Nayo u munhu yuyo we cibofu yakalanga, yakatya, “Nghuwawona wanhu wakwijela kotya mabici gakujenda.” ²⁵ Hanyuma yayo Yesu yakamuwicila kanyhi miwoko yakwe mu meso gakwe, nayo yakanugula muno, ne vilungo vyakwe vyo kuwona vikamuwuyila yakaviwona vyose viswanu nha vyono vinha. ²⁶ Yesu yakamutya yabite ku kaya kwawo, yakamukong’onheza, yakutya, “Wulece hamba kwinjila mu cikaya!” ²⁷ Hanyuma Yesu ne wejizwa wakwe wakabita ku vikaya vya Kayisaliya Filipi. Nawo lono wali wali mu nzila, Yesu yakawawuza iwejizwa wakwe, yakutya, “Alu wanhu wanhezaga nene nani?” ²⁸ Wakamutya, “Wanhu wanji watezaga gwegwe yo Yohana u Mubaputizi, na wanji Eliya, ninga wanji watezaga wuli yumonga muyagwe ne wawizi.” ²⁹ Nayo yakawawuza, yakutya, “Ninga anye nanye ma? Munhezaga nene nani?” Petelo yakamutya, “Agwe yo gwegwe Kilisito.” ³⁰ Hanyuma Yesu yakawakong’onheza walece kumulonjela munhu wo wose zinghani zakwe. ³¹ Yesu yakanza kuwejiza iwejizwa wakwe, yakutya, “Yimunojeye u Mwana wo Munhu yatuje magazo menji no kulemwa ne wanyamhala, ne wakohani wawaha ne wejizi wo Wulajilize. Kowulagwa na hanyuma ye vilo vidatu, kozuka.” ³² Yesu yakawalonjela nghani yiyo calinze. Holeka Petelo yakamuteza Yesu ha mhelo, yakanza kumutacila. ³³ Ninga Yesu yakapituka, yakawalanga iwejizwa wakwe, yakamutacila Petelo yakutya, “Wuce hali’ne Setani! Imahweso gako si mahweso go Mulungu, langa ga cimunhu-munhu.” ³⁴ Hanyuma Yesu yakalicema i lipuga lye wanhu, hamonga ne wejizwa wakwe, yakawatya, “Hono munhu wo wose yasace yawe mutyatyi wangu, yimunojeye yekapise mweneco, yawudinghule umusalaba wakwe. ³⁵ Hambi munhu mono yakuhila kuwuponya wumi wakwe mweneco, nha kowajiliza, langa munhu mono kowajiliza u wumi wakwe, ku soko yangu na ku soko yo Luganuzi Luswanu, yuyo, langa kowuponya u wumi wakwe. ³⁶ Alu ma, u munhu kocituga cambuzici, hono yayituje yinze yose kono yalila, ninga yawajilize u wumi wakwe? ³⁷ Hamba munhu kolavyaci, cihomele wumi wakwe? ³⁸ Umunhu wo wose wa mu lulelo luluno lubi, lono si lukumucelelela Mulungu, hono yambonele soni nene, hamonga ne mejizo gangu, Umwana wo Munhu nayo, kolomuwonela soni u munhu yuyo, mwipango lyono kokuziza mu nhojo yo Sogwe, hamonga ne wamalayika wono welile.”

¹ Yesu yakajendelela kuwalonjela yakutya, “Mbeka nghumulonjelenyi, vyono, ho wali wanji wono wali bahano, wono si wolofwa, lono wakali si nawuwona wutemi wo Mulungu wukuziza mu vilungo.” ² Vyaza puluta vilo mutandatu, Yesu yakawasola Petelo, na Yakobo na Yohana, yakawategula kwi’tunda litali wali wene. Na kuko lono wali wamulanjile, Yesu yakapituka futa yakwe, ³ ne vivwalo vyakwe vikang’alala, vikawa vizelu swee, hamba musina munhu wo wose mononze yose, mono yali yasumile kuvyeza viwe vizelu swee nha vivilya. ⁴ Ale, Eliya na Musa nawo wakaza wakalongana na Yesu. ⁵ Nayo Petelo yakamutya Yesu, “Mwijizi, nha viswanu muno muno vyono cili baha. Holeka ciba cizenje vibanda vidatu, cimonga cako, cimonga ca Musa na cimonga ca Eliya.” ⁶ Umwene ne wayagwe wakogopa muno, sunga yikamunoza Petelo yalece kumanya na cono yakulonga. ⁷ Ale, likaza yivunde likawagubika, ne lizi likahulikwa likulawa mwi’vunde lilyo, likutya, “Ayu yo Mwanangu mwendece wangu, mweze kumuhulika.” ⁸ Lo lulolulo iwejizwa wakalanga kanyhi, ninga siwawona munhu yunji, langa Yesu du yali wene, hamonga na weneco hodu. ⁹ Na lono watimaga hasi ye litunda, Yesu yakawakong’onheza, walece kumulonjela munhu wo wose zono waziwene, sunga u Mwana wo Munhu kolo yakuzuka muli wafu. ¹⁰ Ale, wakebata lilajilizo lilyo, akuno wakwiwuza wuza weneco wose i nhunizo yo wuzuce muli wafu co cici. ¹¹ Nawo wakamuwuza Yesu, wakutya, “Alu iwejizi wo Wulajilize nha watezaga vyono yinojeye Eliya yamule kuza?” ¹² Nayo yakawatya, “Heya, Eliya kokwamula kuza kuviwikaniza vyose. Ninga hamba nhavivyo, nhawule, lu, yandicigwe mu Mandiko Gono Gelile, vyono, u Mwana wo Munhu kotuga magazo menji no kobedegalwa? ¹³ Ninga nghumutyenyi, vyono Eliya nha yakondya kuza, nawo wakamutendela vyose vyono wahilaga, nha vyono yali yandiciywe mwene.” ¹⁴ Nawo wali weza kuwagana awalya iwejizwa wanji, wakawona lipuga yiwaha lye wanhu baho. Na wanji wa mu wejizi wo Wulajilize, wewuzaga nawo. ¹⁵ Lo lulolulo ilipuga lililya lye wanhu lyaza kumuwona Yesu, wose wakezina muno, wakamumanyhilila wamulamuse. ¹⁶ Nayo Yesu yakawawuza yakutya, “Alu mukwiwuza cici nawo?” ¹⁷ Baho munhu yunji wa mwipuga lililya lye wanhu yakapitula, yakutya, “Go Mwijizi, ndeta mwanangu kuli ’gwe, yena licisi lyono likamunoza yawe cibwibwi. ¹⁸ Na nhondo zose kolo lyeza kumwibata, limugwisaga hasi, no kumunoza yalavye cifulo mu mulomo, akuno yakugwezula ne meno gakwe, kanyhi yakuganda muwili wose. Nane nghawalomba iwejizwa wako walilavye licisi lilyo, ninga hamba siwalisuma ng’o.” ¹⁹ Nayo Yesu yakapitula, yakutya, “Nye nyo lulelo lono lusina wihuwilo! Alu cokwikalana nanye sunga nili? Alu nomukangalilenyi sunga nili? Ale ta, mundetelaje yuyo muzelelo.” ²⁰ Wakamuleta kuli mwene. Lo lulolulo licisi lilyo lyeza kumuwona Yesu, likamuzuganga umwana yuyo, nayo mwana yuyo yakagwa hasi, yakegalagaza no kulavya cifulo mu mulomo wakwe. Yesu yakamuwuza u sogwe yo mwana yuyo, yakutya. ²¹ “Alu zizino zamwijelela ku wulawa nili?” Nayo yakapitula, yakatya, “Kulawa wudodo wakwe. ²² Na kali kenji licisi lilyo, limugwisizaga mu moto na mu malenga, ho limongomezeze lukulu. Ale, holeka hono wusume, wuciwonele lusungu no kucitaza.” ²³ Yesu yakamutya, “Ati hono kosuma! Zose nha zisumice kuli munhu mono yena wihuwilo.” ²⁴ Baho, u sogo yo mwana yakalila ne’zi iwaha, yakutya, “Nihuwiye! Ninga uwihuwilo wangu wanjiye, wunhazaje.” ²⁵ Nayo Yesu yaza kuliwona lipuga lye wanhu lyeza kumwikongholela lumangho hamwande yakwe, yakalitacila lililya licisi lyavu yakulitya, “Agwe go licisi mono wukumunoza u mwana yuyu yawe cibwibwi kanyhi yawe ciziwi, nghukutya, wulawe muli mwana yuyu, hamba wulece kwinjila muli mwene kanyhi!” ²⁶ Baho licisi lilyo likazoza, likamugwisa u mwana yuyo hasi, hanyuma ho likawa kulawila muli mwene. No mwana yakawa nha yafwiye, sunga na wanji wakatya, “Yakondya kufwa!” ²⁷ Ninga mwene Yesu yakamwibata muwoko wakwe, yakamwinula, nayo yakema. ²⁸ Nayo Yesu yaza kwinjila mu kaya, iwejizwa wakwe wakamuwuza cinyele wakutya, “Alu nhawule ase sicasuma kulilavya?” ²⁹ Nayo yakawatya, “Licisi lye liwala lili, silisumikaga kulavywa, langa ko wulombe du.” ³⁰ Yesu ne wejizwa wakwe wakawuka baho, wakajendelela no muhinzo, wakakolela mu yisi ya Galilaya. Yesu siyenda iwanhu wakumanye kuko kono yali, ³¹ kusoko yawejizaga iwejizwa wakwe. Yakawatya, “Umwana wo Munhu kolavywa kuli wanhu wono womuwulaga, ninga kolo yawulagwa, hanyuma ye vilo vidatu kozuka kanyhi.” ³² Ninga i wejizwa hamba si wezuka ze nghani yiyo. Nawo wakogopa kumuwuza. ³³ Ale, wakafika ku Kapelanawumi. Na lono yali mu nyumba yakawawuza, yakutya, “Mwali kwiwanganilaci mu nzila?” ³⁴ Ninga wene wakanyamala, hambi mu nzila nha wewanganilaga weneco wose vyono nani ’mbi muwaha muli wene. ³⁵ Yesu yakekala hasi, yakawacema wawalya we likumi na wejete, yakawatya, “Hono munhu yakuhila yawe mulongozi, yimunojeye yawe wa munyuma wa wose, na mwitumami wa wose.” ³⁶ Ale, yakamusola mwana mudodo, yakamuwika haciligati yawo, yakamukumbatila, hanyuma yakawatya, ³⁷ “Mono yakumubocela mwana mudodo mono yenha yuyu mwi’tagwa lyangu, yakumbocela nene, na mono yakumbocela nene, siyakumbocela nene du, langa yakumubocela yuyo mono yanhuma.” ³⁸ Yohana yakamutya, “Mwijizi, cimuwona munhu yunji yakwitumamila i litagwa lyako no kugalavya macisi, nase cajela kumulemeza vyono mwene si muyagwe na sese.” ³⁹ Ninga mwene Yesu yakawatya, “Mulece kumulemeza, hambi nha hasina munhu mono konoza yipoto yiwaha mwi’tagwa lyangu, na kunji kanyhi ho yasume kulonga nghani ’mbi muli’ne. ⁴⁰ Vyono, mono si yali sili nase, ale yuyo yo muyetu. ⁴¹ Munhu wo wose mono komupelenyi cikombe ce malenga go kung’wa, vyono anye muli wanhu wakwe Kilisito, mbeka sikolokwanjila kutuga i cihumbilizwa cakwe. ⁴² “Munhu wo wose mono komunoza yumonga wa mu wadodo wawa wono wanyihuwiye yetume wubi, yali yiwe yili ciba, u munhu yuyo yawopelezwe mu singo lizala liwaha no kutagwa mwi’lenga. ⁴³ No muwoko wako hono wukwiwajize, ale wuwudumulaje! Hambi nha yili ciba kuli’gwe winjile mu wumi, akuno wusina muwoko monga, si nho kuwa ne miwoko yose vyono myejete no kubita ku moto we Gehena. [ ⁴⁴ Na mumo, i masomi sigafwizaga, no moto wayo siwuzimaga yaye.] ⁴⁵ No mugulu wako hono wukwiwajize, ale wuwudumulaje! Hambi nha yili ciba kuli’gwe kwinjila mu wumi akuno wusina mugulu monga, si nho kuwa ne migulu yose vyono myejete no kutagwa mu moto we Gehena. [ ⁴⁶ Na mumo, i masomi gayo sigafwizaga, no moto wayo siwuzimaga yaye.] ⁴⁷ Ne liso lyako hono likwiwajize, ale wuliwusaje wulitaje, hambi nha yili ciba kuli’gwe winjile mu wutemi wo Mulungu wina liso limonga du, si nho kuwa ne meso gako gose vyono mejete, no kutagwa mu moto we Gehena. ⁴⁸ Na mumo i masomi gayo sigafwizaga, no moto siwuzimaga yaye. ⁴⁹ Hambi wose nha wolopembelwa mu moto. ⁵⁰ Umwino nha muswanu, ninga hono wususulice, cinhuci kanyhi cono cogomoleza indaso yayo? Muweze no mwino muli nyenye nyo weneco, kanyhi mweze kwikala mwilamuye nyenye wose.”

¹ Nayo Yesu yakawuka baho, yakabita ku yisi ya Yudiya, sunga ko ku nhumbi nzagwe ye likolongo lya Yoludani. Ilipuga lye wanhu likamuziza kanyhi, nayo yakawejiza kanyhi nha vyono yali yazoweye. ² Ale, Iwafalisayo wakamuziza, wakasaka kumujela, wakamuwuza, wakutya, “Wule, munhu yena wukombolwe yamupele u mugolece wakwe talaka.” ³ Nayo Yesu yakawapitula yakawatya, “Ma, Musa yamupelenyi wulajilizeci?” ⁴ Nawo wakatya, “Musa yalajiliza vyono, u mulume kosuma kumupela umugolece wakwe talaka no kumuleka.” ⁵ Nayo Yesu yakawatya, “Musa, yamwandicilenyi lilajilizo lilyo, ku soko yo wukamu we zinhumbula zenyu. ⁶ Ninga ku wulawa ku mwamulizo wo wuwumbwe we yinze, u Mulungu yawumba mulume no mucekulu. ⁷ Holeka mulume kowaleka u sogwe no nyina, no kwilunza no mugolece wakwe, ⁸ nawo vyono wejete wowa muwili monga. Ku soko yiyo si wejete kanyhi, langa muwili monga. ⁹ Holeka cono yacilunza Mulungu, munhu yalece kucitemanula.” ¹⁰ Nawo wali weza kwinjila kanyhi mu nyumba, iwejizwa wakwe wakamuwuza ze nghani yiyo. ¹¹ Nayo yakapitula yakawatya, “Munhu wo wose mono komuleka mugolece wakwe, no kutola yunji, yakwipela wusenyha kuli mugolece wakwe. ¹² No mucekulu nayo mono yakumuleka u mulume wakwe, no kutolwa na yunji, nayo yakusenyha.” ¹³ Iwanhu wakamuletela Yesu iwana wadodo ho yawapamize, ninga wene iwejizwa wakawatacila. ¹⁴ Nayo Yesu yaza kuziwona zizo, yakakolwa yikuwo, yakawatya iwejizwa wakwe, “Walecenyi wawo iwana wadodo wanyizize, mulece kuwemila, hambi u wutemi wo Mulungu nha wuli so wanhu wono wenha iwana wadodo wawa. ¹⁵ Nane nghumulonjelenyi mbeka, vyono, munhu wo wose mono siyakuwubocela u Wutemi wo Mulungu nha mwana mudodo, hamba sikokwinjila mu wutemi wuwo ng’o.” ¹⁶ Ale, yakawadinghula mu miwoko yakwe, yakawawicila miwoko, yakawalugutiza. ¹⁷ Na lono Yesu yatulukaga kanyhi ku muhinzo wakwe, u munhu yunji yakamuziza lumangho, yakafugama hamwande yakwe, yakamuwuza, yakutya, “Go Mwijizi muswanu, nhende wule ho niwutuje u wumi we cibitilila?” ¹⁸ Nayo Yesu yakamutya, “Alu so cici wukunyhema muswanu? Hasina yunji mono muswanu, langa Mulungu yali wene du. ¹⁹ Alu wugamanyile imalajilizo? Wulece kusenyha, wulece kuhiza, wulece kuhomelela wulambi, wuwogopaje usogo no nyina yako.” ²⁰ Nayo yakamutya, “Mwijizi, gose gaga nigebate ku wulawa wudodo wangu.” ²¹ Nayo Yesu yakamulanga, yakamwenda, yakamutya, “Alu wukusakwa witume nghani monga du, nayo yoyi, wubite wukaguze ivinhu vyose vyono wina navyo, wukawapele waciwa, nagwe kowa na sawo ku wulanga, hanyuma ho wuze wunhyatye.” ²² Nayo yali yeza kuzihulika zizo, hamba si yendezwa yaye, yakawuka akuno yakalaye, hambi nha yali yena sawo nyinji. ²³ Yesu yakalanga kose kose, yakawatya iwejizwa wakwe, “Nha kukamu ta kuli wagoli, kuwinjila mu Wutemi wo Mulungu.” ²⁴ Ne wejizwa wakezina muno so zinghani zakwe. Yesu yakawalonjela kanyhi, yakatya, “Nyo wanangu, kukamu muno kuwinjila mu Wutemi wo Mulungu! ²⁵ Ninga kupelu kuli ngamiya yikole mu cilanga co lusing’ani, si nha u munhu mugoli kuwinjila mu Wutemi wo Mulungu.” ²⁶ Ne wejizwa wakwe wakezina muno, wakewuza weneco wose, wakutya, “Alu nani ’mbi mono kosuma kupona?” ²⁷ Nayo Yesu yakawalanga, yakawatya, “Kuli wanhu siyisumice, ninga si nhavivyo kuli Mulungu, hambi kuli Mulungu, zose nha zisumice.” ²⁸ Nayo Petelo yakamutya, “Ase nase ma? Lanje, ase caleka vyose cikakutyatya!” ²⁹ Yesu yakatya, “Mbeka nghumulonjelenyi, vyono, munhu wo wose mono yalecile kaya, hamba wawahaze, hamba walumbuze, hamba nyina, hamba sogwe, hamba migunda ku soko yangu na ku soko yo Luganuzi Luswanu, ³⁰ mu mapango gaga, kopegwa kali ’gana no kuciza, zikaya, wawahaze, walumbuze, nyina, wana, ne migunda, hamonga ne magazo, ne vilo vyono vikuza, kobocela wumi we cibitilila. ³¹ Ninga wenji iwalongozi wolowa wa munyuma, na wa munyuma, wolowa walongozi.” ³² Ale, wali wali mu nzila wakubita ku Yelusalemi, nayo yali yawalongoleye. Nawo iwejizwa wakwe wakogopa muno, ne wanhu wono wawatyatyaga wakogopa. Nayo Yesu yakawasola kanyhi wali wene hamhelo, wawalya we likumi na wejete, yakanza kuwalonjela zizo zono zomwagana, ³³ “Yakawatya, Hulicizenyi ta! Cikubita ku Yelusalemi, na kuko u Mwana wo Munhu, kokombolwa kuli wakohani wawaha ne wejizi wo Wulajilize, nawo womuling’aniza yawulagwe, no kumukombola kuli wanhu wono si Wayahudi. ³⁴ Nawo womuzwajiza, womufunyila mate, womukunanga no kumuwulaga. Hanyuma ye vilo vidatu kozuka.” ³⁵ Yakobo na Yohana, wana wa Zebedayo, wakamuziza Yesu wakamutya, “Mwijizi cikusaka wucinozeze cinhu cono cokulomba.” ³⁶ Nayo Yesu yakawawuza, yakutya, “Alu mukusaka nimunozezenyi ci?” ³⁷ Wakatya, “Wucikombole ase cikale yumonga ku lubavu lwako lo kulume na yunji ku lubavu lwako lo kucekulu, kolo wukwinjila mu nhojo yako.” ³⁸ Yesu yakawatya, “Simumanyile cono mukulomba! Ma, mosuma kung’wa cikombe ce Magazo cono ane nong’wa, hamba kubaputizwa nha vyono nobaputizwa ’ne?” ³⁹ Wakapitula, wakamutya, “Cosuma.” Yesu yakawatya, “I Cikombe cono nog’wa heya mbeka nanye mong’wa, kanyhi mobaputizwa nha vyono nobaputizwa’ne. ⁴⁰ Ninga ku wikala kulume hamba kucekulu kwangu, si mulimo wangu kunoza, langa wopegwa wawo wono wawikanizizwa.” ⁴¹ Wawalya iwejizwa wanji we likumi waza kuzihulika zizo, wakanza kuwasimbila wa Yakobo na Yohana. ⁴² Nayo Yesu yakawacema yakawatya, “Mwene mumanyile vyono wono watezwaga watemi we Makungugo, vyono wawatemaga wanhu wawo kwe vilungo, ne wawaha wawo vyono wena wulajilize muli wanhu wawo. ⁴³ Ninga kuli’nye, yilece kuwa nhavivyo, langa mono kosaka kuwa muwaha muli nyenye, yimunojeye yawe mwitumami wenyu. ⁴⁴ Mono yakusaka kuwa mulongozi, yimunojeye yawe mwitumami wa wose. ⁴⁵ Hambi u Mwana wo Munhu nha si yaza ho yetumamilwe, langa yetume no kusuza u wumi wakwe so wukombozwe we wanhu wenji.” ⁴⁶ Ale, wakafika ku Yeliko, nayo Yesu lono yawukaga mwi’kaya lilyo, yena ne wejizwa wakwe, hamonga ne lipuga yiwaha lye wanhu, u munhu yunji mwilombelezi we cibofu, mono yacemwaga Batilimayo mwana wa Timayo, yali yekaye ha mhelo ye libalabala. ⁴⁷ Nayo yali yeza kuhulika vyono yo Yesu wa ku Nazaleti mono yakupuluta hanhu baho, hodu yakanza kuzoza, yakutya, “Gwe Yesu, Mwana wa Dawudi Wumbonele lusungu!” ⁴⁸ Ne wanhu wenji wakamutacila ho yanyamale, ninga mwene ho yakacila muno kuzoza, yakutya, “Mwana wa Dawudi, Wumbonele lusungu.” ⁴⁹ Nayo Yesu yakema, yakatya, “Mucemenyi.” Ale, wakamucema yuyo we cibofu, wakamutya, “Wisindamice! Winuce, yakukucema.” ⁵⁰ Nayo yakacigumila icivwalo cakwe, yakazumha, yakamubitila Yesu. ⁵¹ Yesu yakamuwuza, yakutya, “Alu wukusaka nghutendele wule?” Yuyo we cibofu yakamutya, “Mwijizi, nghulomba sume kuwona kanyhi.” ⁵² Nayo Yesu yakamutya, “Ale wubite, wihuwilo wako wakuponya.” Lo lulolulo yuyo we cibofu yakasuma kuwona kanyhi, nayo yakamutyatya Yesu mu muhinzo.

¹ Na lono wali weza behi na Yelusalemi, wakafika ku Betifage na ku Betaniya, behi ne Litunda lye Mizeyituni. Baho yakawatuma wejete wa muli wejizwa wakwe, ² yakawatya, “Bitenyi ku citumbi cono cili kumwande yenyu. Na kolo mukwinjila mumo, mokwagana nyana ya ndogowe mbopwe, yono yikali netumamilwa na munhu. Ale, muyiwopolelaje muyilete. ³ Hono munhu yunji yamuwuzenyi, ‘Alu so cici mukunoza nhavivyo? “Muteze,” Umuwaha yakuyisaka, ninga kanyhi koyigomola bahano musunho.’ ” ⁴ Ale, nawo wakabita, wakayagana nyana monga ye ndogowe mu nzila mbopwe ha mulango. Nawo lono wayiwopolaga, ⁵ wanhu wanji wono wali wemile baho, wakawawuza wakutya, “Alu so cici mukuyiwopola nyana yiyo ye ndogowe?” ⁶ Nawo wejizwa wakapitula nha vyono wali walonjeywe na Yesu, nawo wakawaleka wabite. ⁷ Wakamutegulila Yesu yiyo nyana ye ndogowe. Wakatandika myenda yawo mucanyha ya yiyo nyana ye ndogowe, nayo Yesu yakekala mucanyha yayo. ⁸ Ne wanhu wenji wakatandika myenda yawo mu nzila, wanji nawo wakatandika manhambi ge mabici gono watema mu migunda. ⁹ Ne wanhu wose wono wali walongoleye, na wawalya wono watyatyaga mu nyuma, wakazoza wakutya, “Yalumbwe Mulungu! Mumoti yuyo mono yakuziza mwi’tagwa lyo Muwaha! ¹⁰ Nha wumoteswe u wutemi wono wukuza wa Dawudi usogo yetu. Yalumbwe Mulungu kucanyha ku wulanga!” ¹¹ Nayo Yesu yali yeza kwinjila mwi’kaya lya Yelusalemi, yakabita sunga ko ku Nyumba yo Mulungu, yakavilanga vinhu vyose. Ninga vyono cali ceza cinyamihe, yakabita ku Betaniya hamonga na wawalya we likumi na wejete. ¹² Ne mitondo yaco, lono walawaga ku Betaniya, Yesu yakadabuka. ¹³ Baho, yakawuwonela cidaha u mukuyu wono wali wudedewaye mahamha menji. Yakawubitila ho yawone hono wuwe wina mikalo yo yose. Nayo yaza kuwuficila, yakawagana wusina hamba mukalo wo wose, langa mahamha gali wene du, hambi nha cali cikali sinaficila i cipango co mukuyu kulela mikalo. ¹⁴ Baho yakawutya mukuyu, “Hasina munhu mono kolya kanyhi mikalo yako sunga cibitilila.” Nawo iwejizwa wakwe wakazihulika i zinghani zizo. ¹⁵ Ale, wakafika ku Yelusalemi. Yesu yakenjila mu Nyumba yo Mulungu, yakanza kuwawinjila kunze i wanhu wono waguzaga no kugula vinhu mumo. Yakazigwisanga izimeza za wawalya wono wakawaga zipesa, ne magoda ga wawalya wono waguzaga zinziwa. ¹⁶ Hamba si yamukombola munhu wo wose yakole mu Nyumba yo Mulungu yadinghuye cinji. ¹⁷ Hanyuma yakawejiza, yakutya, “Yandikwa, ‘Nyumba yangu yocemwa nyumba yo wulombelo kuli makungugo gose! Ninga ’nye mwayinoza mhango ye wahizi!’ ” ¹⁸ Nawo Iwakohani wawaha ne wejizi wo Wulajilize, wali weza kuzihulika zizo, wakanza kulondola nzila yo kumongomezeza. Ninga hamba nhavivyo wamogopa, ku soko i lipuga lye wanhu likezina muno so mejizo gakwe. ¹⁹ Na lono yali yeza kuwa cinyamihe, Yesu ne wejizwa wakwe wakawuka mwi’kaya. ²⁰ Nawo lono wapulutaga, hakali mitondo muno, wakawuwona mukuyu wuwulya wanyala wose, sunga ne milela yayo. ²¹ Nayo Petelo yakawukumbucila, yakamutya Yesu, “Mwijizi, langa ta! Umukuyu wuwulya wono wawulijita, wanyala!” ²² Yesu yakawatya, “Mwihuwilenyi Mulungu. ²³ Nghumulonjelenyi mbeka vyono, hono munhu yalilonjele litunda lili yatye, ‘Wukulice wutagwe mwi’lenga!’ Hono yalonje kuno yasina mahwele mu nhumbula yakwe, langa yehuwiye vyono zose zono yalonjile zonozeka, heya kotendelwa inghani yiyo. ²⁴ Holeka nghumutyenyi, lono mukulomba no kusaka cinji, mwihuwile du vyono mwakondya kupegwa, nanye mozituga. ²⁵ Kolo mukwima no kulomba, muwanenelaje wose wono wamusutizyenyi nghani yo yose, nayo u Sogo yenyu mono yali ku wulanga ho komunenelenyi nanye i masutya genyu. [ ²⁶ Ninga hono mulece kuwanenela wanji i masutya gawo, hambo sogo yenyu mono yali ku wulanga sikomunenelenyi nanye imasutya genyu yaye.]” ²⁷ Wakafika kanyhi ku Yelusalemi. Na lono Yesu yajenda jendaga mu Nyumba yo Mulungu, Iwakohani wawaha, ne wejizi wo Wulajilize, ne wanyamhala, wakamubitila, ²⁸ wakamuwuza, wakumutya, “Alu mwene wukuzinoza zinghani zizi ko wulajilizeci? Alo nani mono yakupelile u wulajilize wo kuzinoza zinghani zizi?” ²⁹ Nayo Yesu yakawatya, “Nane nomuwuzenyi nghani monga, hono mumhitule, ale, nane ho nomulonjelenyi vyono ko wulajilizeci holeka nghuzinoza zinghani zizi. ³⁰ Wulenyi, ma, u wulajilize wa Yohana wo kubaputiza walawa ku wulanga hamba kuli wanhu? Ta, mhitulenyi.” ³¹ Nawo wakanza kwiwanganila weneco wose, wakutya, “Hono citye, ‘Walawa ku wulanga.’ Nayo kociwuza yatye, ‘Alu so cici simwamwihuwila?’ ³² Na hono citye, ‘Walawa kuli wanhu!’ ” Wakogopa i lipuga lye wanhu, hambi wose nha wali wehuwiye vyono Yohana yali muwizi mbeka. ³³ Holeka wakamupitula Yesu wakatya, “Ase sicimanyile.” Nayo Yesu yakawatya, “Alu hamba na nene kumbe sinomulonjelenyi vyono ko wulajilizeci holeka nghuzinoza i zinghani zizino.”

¹ Yesu yakanza kulongana nawo mu cihwanicizo yakutya, “Munhu yunji yalima mugunda we mizabibu. Yakawusitila no mululu, na haciligati yayo, yakahimba likombo lyo kukobonjela divayi, yakazenga ne cilingo citali. Yakawukoza mugunda wuwo kuli walimi, u mwene yakatuluka muhinzo sunga ku yisi ya kutali. ² Na mu wupilo we mikalo, yakatuma mwitumami wakwe kuli wawalya iwalimi, ho yamuletele mikalo yo mugunda wakwe. ³ Ninga wawalya walimi wakamwibata, wakamutowanga, wakamuwinga yasina hamba cinji. ⁴ Yakatuma kanyhi mwitumami yunji, na yuyu nayo kanyhi, wakamutula mazeya mu mutwe, no kumutendela vibi. ⁵ Nayo yuyulya munya mugunda, yakatuma mwitumami yunji kanyhi, ninga iwalimi wawo wakamuwulaga. Na wanji, wenji wono watumwa, wanji wakatowangwa, na wanji wakawulagwa. ⁶ Nayo yakawa yakali yasigaliywe no munhu monga du, nayo yo mwanagwe mwendece. Na handumilizo, yakamutuma yuyo akuno yakutya, ‘Womogopa mwanangu.’ ⁷ Ninga iwalimi wawo wakalongana weneco wose, wakutya, ‘Ayu yo muhazi, alenyi nye cimuwulaje, ho wuhazi wakwe wuwe wetu!’ ⁸ Holeka wakamwibata, wakamuwulaga, no kumugumila kunze yo mugunda wuwulya we mizabibu. ⁹ “Ale lu, u munya mugunda ho kotendaci? Kokuza yawongomeze i walimi wawo, no kuwukoza mugunda wuwo we mizabibu kuli wanhu wanji. ¹⁰ Wulenyi, si mwasoma i Mandiko gaga gono gakutya, ‘Ilibwe lyono walilema iwazenji alu lyanozwa liwe lyo libwe liwaha lyo musinji, ¹¹ U Muwaha yoyayinozize inghani yiyi, nayo yo nghani yo wizine kuli’se.’ ” ¹² Iwakohani wawaha ne Wejizi wo Wulajilize ne wanyamhala, wakatanga vyono i cihwanicizo cico calongaga weneco. Holeka wakajela kumwibata, ninga wakalyogopa i lipuga lye wanhu. Holeka wakamuleka wakawa kubita. ¹³ Ale, Iwafalisayo wanji, hamonga ne watyatyi we cipuga ca Helode, watumwa ho wamugwizize Yesu mu wulonje wakwe. ¹⁴ Wakamubitila, wakamutya, “Mwijizi, nha cimanyile vyono agwe uli munhu we mbeka, mono kulongaga ze mbeka du, hamba sikucelelelaga munhu wo wose. Hamba lilumbo lya munhu, nha si cinji kuli’gwe, ninga kuwejizaga imbeka ye nzila yo Mulungu. Wule, viswanu kumulipa kodi Kayisali, hamba ng’o? Alu cilavye, hamba cilece kulavya?” ¹⁵ Ninga mwene Yesu yali yawumanyile u wukoci wawo, holeka yakawatya, “Alu so cici mukunjela? Mundajilaje ta silinje niyilanje.” ¹⁶ Nawo wakamulajila. Nayo yakawawuza, yakutya, “Hwani yiyi no lwandiko lulu vya nani?” Wakamutya, “Vya Kayisali.” ¹⁷ Yesu yakawatya, “Mumulavizye Kayisali vyakwe Kayisali, nayo Mulungu vyakwe Mulungu.” Wakamwizina muno. ¹⁸ Iwasadukayo wono watezaga kusina wuzuce, wakamuziza Yesu wakamuwuza, wakutya, ¹⁹ “Mwijizi, Musa yacilajiliza yakatya nhavi: ‘Hono munhu yafwe, yalece mugolece yasina mwana, yinojeye umwanakwawe yamuhale mugolece yuyo mufwile, ho yamulelele wana umuwahawe mono yafwa.’ ²⁰ Ale, kwali na wanhu mupunghati walume, sogo yawo yumonga. Umulongozi yakatola, yakafwa yasina wana. ²¹ Na we kejete yakamutola yuyo mucekulu, nayo kanyhi yakafwa yasina wana, na we kadatu nayo nha vivyo. ²² Nawo wose vyono wali wali mupunghati, wakafwa wasina wana. Na hanyuma yayo, nayo yuyo umugolece mufwile yakafwa. ²³ Ale, mwi’zuwa kolo wanhu wakuzuka, u mucekulu yuyo kolowa mugolece wa nani? Hambi wose vyono wali wali mupunghati nha wali wamutolile.” ²⁴ Nayo Yesu yakawatya, “Anye nyo weneco musutizye muno, vyono si mugamanyile i Mandiko Gono Gelile hamba ivilungo vyo Mulungu. ²⁵ Hambi iwanhu kolo wakuzuka, nha siwolotola hamba kutolwa yaye, langa wolowa wehwanile ne wamalayika wa ku wulanga. ²⁶ Ninga ze wafu vyono wazukulagwa, Alo simunasoma citabu ca Musa mwifungu lyono likulonga ze cititika cono cakaga moto? U Mulungu yamulonjela Musa yakatya, ‘Ane yonene Mulungu wa Abulahamu, na Isaka na Yakobo.’ ²⁷ Holeka u mwene yo si Mulungu we wafu langa we womi. Anye mukuwa kusutya muno muno.” ²⁸ Yunji wa muli wejizi wo Wulajilize yakaza, nayo yakawuhulika u wiwanganile wawo. Nayo yaza kumuwona Yesu vyono yawapitula viswanu, yakasejelela yakamuwuza yakutya, Ati, mu malajilizo gose, i lilajilizo lilongozi lyo lya hayi? ²⁹ Nayo Yesu yakamutya, “Ililongozi lyoli, ‘Hulicize ta Isilayeli! U Muwaha Mulungu wetu, mweneco du yo Muwaha. ³⁰ Nagwe wumwendaje Muwaha Mulungu wako kwe nhumbula yako yose, na ko mutima wako wose, na kwe mahala gako gose, na kwe vilungo vyako vyose.’ ³¹ Na lye kejete lyo’li, ‘Wumwendaje muyago nha vyono wiyendile go mweneco. Hasina lilajilizo linji yiwaha lyono licizize gaga.’ ” ³² Ale, yuyulya umwijizi wo Wulajilize yakamutya, “Ale viswanu Mwijizi! Kulonga mbeka vyono u Mulungu yumonga du, hamba hasina yunji langa mwene du. ³³ Holeka yimunojeye munhu yamwende u Mulungu kwe nhumbula yakwe yose, na kwe mahala gakwe gose, na kwe vilungo vyakwe vyose, no kumwenda muyagwe nha vyono yeyendile mweneco. Ne Nghani yiyi yo mbaha muno yicizize sunga ne vilavywa vyo kunyanywa hamonga ne makumbiko ganji gose kuli Mulungu.” ³⁴ Nayo Yesu yaza kuwona vyono umunhu yuyu yamupituye kwe mahala, yakamutya, “Agwe si wuli kutali no wutemi wo Mulungu.” Hanyuma ya zizo hasina munhu mono yejelela kanyhi kumuwuza cinji. ³⁵ Na lono Yesu yejizaga mu Nyumba yo Mulungu, yakawuza yakutya, “Alu nhawule iwejizi wo Wulajilize watezaga vyono Kilisito yo mwana wa Dawudi? ³⁶ Na Dawudi mweneco mu wutongwe no Muhe Mono Yelile yalonga yakatya, ‘U Muwaha yamulonjela Muwaha wangu yakatya, Wikale ku lubavu lwangu lo kulume, sunga kolo nghuwika iwalugu wako wukanyago we magulu gako.’ ³⁷ “Na Dawudi mweneco nha yakumucema Kilisito, Muwaha. Alu Kilisito ho kowa wule mwanagwe kanyhi?” Ne lipuga lye wanhu likawa limuhulicize akuno lisangalaye muno. ³⁸ Mu mejizo gakwe Yesu yalonga yakutya, “Musuguce kuli wejizi wo Wulajilize, wono wendile kujenda jenda ako, na ako akuno wavwalile zikanzo zinhali no kulamuswa ne wanhu kwe cogopo mu Sokoni, kanyhi wendile kwikala mu magoda matambule mu matang’anilo go wuhembelo, ³⁹ no kwikala i hanhu hatambule mu zindigwa ze zisikukuu. ⁴⁰ Wakuwewonela i wacekulu wafwile, no kuwasolela i vinhu vyawo, akuno wakwikonjeleza ko kulomba wulombe wutali muno! Ninga mwizuwa lyo wuling’anizwe, wolotuga wulipicizwe wuwaha muno.” ⁴¹ Yesu yali yekaye behi ne lisanduku lyo wuwiko we zisawo. Nayo yakawa yakulanjilila vyono wanhu wenji walavyaga zipesa no kuzitajila mu wuwiko we zisawo ze Nyumba yo Mulungu. Iwagoli wenji wakalavya pesa nyinji. ⁴² Baho yakaza mudala yunji muciwa kanyhi mufwile, nayo yakalavya vipesa vyejete vyono vina cifo ca sendi ’kumi. ⁴³ Baho Yesu yakawacema iwejizwa wakwe yakawatya, “Mbeka nghumulonjelenyi, mudala ayu muciwa kanyhi mufwile, nha kalavya kuciza wanji wose wono watajiye zipesa mwi’sanduku lyo wuwiko we zisawo. ⁴⁴ Hambi wose nha walavya ku wulawa mu wucizilize wo winji we zisawo zawo, ninga mudala ayu, hamba yawe nha muciwa, ninga kalavya vyose vyono yena navyo, kalavya vyose vyono yali yetumbiye so wuwumipe wakwe.”

¹ Na lono Yesu yalawilaga kunze ye Nyumba yo Mulungu, yunji wa muli wejizwa wakwe yakamutya, “Mwijizi, langa ta imabwe gaga, ne mazengo gaga vyono ga wizine.” ² Nayo Yesu yakamutya, “Ma, wukugawona mazengo gaga mawaha? Hasina hamba libwe limonga lyono lyolosigala mucanyha ye libwe liyagwe, hambi gose nha golokumulwa.” ³ Na lono Yesu yali yekaye mucanyha ye Litunda lye Mizeyituni vidomile ne Nyumba yo Mulungu, Petelo na Yakobo na Yohana na Andeleya wakamuwuza cinyele, wakutya, ⁴ “Wucilonjelaje ta zinghani zizi zolowa za nili? Ne citanjiloci cono colajila vyono zinghani zizi zili behi kufisilizwa?” ⁵ Yesu yakanza kuwalonjela yakutya, “Musuguce, ho mulece kukongwa na munhu. ⁶ Hambi wenji nha wolokuza, nawo wolokwitumamila i litagwa lyangu, wakutya, ‘Ane yo nene!’ Nawo wolowajiliza wanhu wenji. ⁷ Nanye kolo mukuhulika zo wulugu ne zinganuzi zo wulugu, mulece kogopa. Hambi zinghani zizi nha sizoleka kuza, ninga indumilizo yeneco yikali sinaza. ⁸ Ne likungugo linji lyolokwihoma ne likungugo liyagwe, no wutemi wunji wolokwihoma no wutemi wuyagwe, ne hanhu hose, holowa ne matulo ne mazala. Ne zinghani zizi, wowa kotya nha wo mwamulizo wo wusungu wo kulelela mwana. ⁹ “Ninga ’nye musuguce. Hambi iwanhu nha wolomutegulenyi kuli mahakama, no kumutowenyi mu matang’anilo go wuhembelo. Molotegulwa ha mwande ye walongola ne watemi ku soko yangu, ho muhomelele kuli wene. ¹⁰ Ninga yinojeye u Luganuzi Luswanu lwamule kuganulwa kuli makungugo gose. ¹¹ Nawo kolo wakumwibatenyi, no kumutegulenyi kuli mahakama, mulece kutuga mahwele vyono molongaci, ninga i lipango lilyo kolo lyafika, ale mulonje co cose cono molopegwa, hambi nha si nyenye mono mololonga, langa yo Muhe Mono Yelile. ¹² No munhu kolomukombola unduguye yawulagwe, nayo usogo yo munhu, kolomukombola umwanagwe, iwana nawo wolowatowanga iwalezi wawo no kuwawulaga. ¹³ Ne wanhu wose wolomusulenyi’nye, ku soko ye litagwa lyangu. Ninga mono kolokangalila sunga ko ku ndumo, yuyo yo kolopona. ¹⁴ “Molowona liwifyo lyo wuhodanjice limile hono si hanhu halyo. (Mono yakusoma yezuce nhunizo yayo!) Na baho iwanhu wono wali mu Yudiya, wamanyhile mu matunda. ¹⁵ No munhu mono yali kucanyha ye litembe yalece kutima hasi no kwinjila mu kaya yakwe ho yasole cinji. ¹⁶ Na mono yali ku mugunda, yalece kuwuya kusola civwalo cakwe. ¹⁷ Ninga woyi he ’nye kuli wawo wono wena mida na wono wakosa mu vilo vivyo! ¹⁸ Mulombe i zinghani zizi, ho zilece kwijela mu vilo vye mbeho nghali. ¹⁹ Hambi mwipango lilyo, nha kolowa no wugazwe wono wukali sinejela ku wulawa vyono u Mulungu yayiwumba yinze sunga nalu, hamba siwulejela kanyhi. ²⁰ Na hono u Muwaha yali yalece kuvicepula i vilo vivyo, hasina hamba munhu mono yali yapone. Ninga ku soko ye wahagulwa wakwe, holeka Muwaha yavicepula i vilo vivyo.” ²¹ “Holeka hono munhu yamutyenyi, ‘Lanjenyi ta, Kilisito ayu hano!’ hamba lunji yatye, ‘Mulanje yali ahalya,’ mulece kumwihuwila. ²² Hambi nha wolokwijela wanhu wo wulambi lambi wono wokwiyitya weneco yo Kilisito, ne wawizi wo wulambi lambi, nawo wolonoza vitanjilo ne mezino, ho wajilize i wahagulwa wo Mulungu, hono yisumice. ²³ Ninga anye musuguce. Hambi ane nha nimulonjelenyi zinghani zizi zose lono zikali sizinejela yaye. ²⁴ “Ale, mu vilo vivyo, wulaza kuwa wapuluta u wugaye wuwo, ilizuwa lyolotukuwala no mwezi siwolosana ng’o. ²⁵ Ne zinyelezi zologwa ku wulawa ku wulanga, ne vilungo vya ku wulanga vyolosinjiswa. ²⁶ Ale baho ho wolomuwona u Mwana wo Munhu yakuziza mu mavunde kwe vilungo viwaha ne nhojo. ²⁷ Hanyuma yayo kolowatuma wamalayika wakwe, kolowakonghola iwahagulwa wakwe kulawa ku zimbavu zose yine za kono’nze, ku wulawa ku mwamulizo we yinze, sunga ko ku ndumo nyagwe ye yinze.” ²⁸ “Alu mwiyijizizaje ta mu mukuyu i cihwanicizo aci, I manhambi gayo lono gakwamula du kutula i mahamha, anye mukumanya vyono lifuku lyasejelela. ²⁹ Ale nhavivyo na nyenye, kolo mukuwona zinghani zizo zeza kuwa nhavivyo, ale mumanye nha vyono u Mwana wo Munhu yaza yali behi muno muno. ³⁰ Nane nghumulonjelenyi mbeka, vyono ululelo lulu silopuluta ng’o sunga zinghani zizi zose ziwe zakondya kufisilizwa. ³¹ Uwulanga ne’nze zolopuluta, ninga zinghani zangu sizolopuluta ng’o.” ³² “Ninga kusina munhu wo wose mono yamanyile lizuwa hamba cipango cico vyono cokuza nili, hambe wamalayika wa ku wulanga, hambo mwana wo munhu, langa Baba yali wene du, yo yamanyile. ³³ Musuguce, mwikalaje meso, hambi nha simumanyile cipango cico hono cokuza nili. ³⁴ Yolowa nha munhu mono yakuwuka mu kaya yakwe yakubita ku muhinzo, yakuwalecela i wetumami wakwe wulajilize, munhu no mulimo wakwe, yakamulonjela no mulindiliza mulango yekale meso. ³⁵ Ale, mwikalaje meso, hambi nha simumanyile munya kaya kolokuza nili, na lunji yolowa mu cinyamihe, mu cilo mugati, mu nzogolo hamba hakali mitondo. ³⁶ Mwikalaje meso hono yaze nhinicizo ho yalece kumwaganenyi mugonile. ³⁷ Na zono nghumulonjelenyi nyenye, nghuwalonjela na wose, nghutya, Mwikalaje meso!”

¹ Na lono vyali vikali vilo vyejete du, ho yiwe sikukuu ya Pasaka na ye mikate yono siyisasize. Iwakohani wawaha ne wejizi wo Wulajilize, walondolaga nzila yo kumwibata Yesu ko wusugu ho wamuwulaje. ² Ninga hamba nhavivyo wakatya, “Cilece kumwibata mwizuwa lye sikukuu, ho yilece kuwa wuma muli wanhu.” ³ Nayo Yesu lono yali yali ku Betaniya, mu kaya ya Simoni Mukoma. Na lono yalizaga zindigwa ha meza, yakaza mucekulu yunji mono yali yena supa ye mafuta go wulenzi go wuguzi wukamu, yakayitula supa yiyi, yakamujidila Yesu mafuta gago mu mutwe wakwe. ⁴ Na wanji wa muli wanhu wono wali wali baho, wakasimba wakawa kulongana weneco wose wakutya, “Alu so cici mafuta gaga gajilizwe caka caka nha vivi? ⁵ Hambi nha gali gaguzwe pesa zono zificile dinali magana madatu, ho wapegwe waciwa!” Hodu wakamutacila u mucekulu yuyo. ⁶ Ninga Yesu yakawatya, “Mulecenyi, alu nhawule mukumugaza? Kanyitumila mulimo muswanu. ⁷ Hambi iwaciwa nha muwezanaga nawo nhondo zose, holeka mosuma kuwataza mwipango lyo lyose lyono mwendile. Ninga ane, si mosuma kuwezana nane nhondo zose. ⁸ U Mwene kanoza nha vyono yadahile, kawubaka umuwili wangu mafuta so wuwikanizwe wo wuzikwe wangu mu citenjelo. ⁹ Nane nghumulonjelenyi mbeka, vyono, ho hose mono yinze yose, hono loganulwa u Luganuzi Luswanu, ilitumo lili lyono yetumile u mucekulu yuyu, lyowa kulongwa so cikumbucizo cakwe.” ¹⁰ Ale, Yuda Musikaliyota, muyagwe na wawalya we likumi na wejete, yakabita kuli wakohani wawaha ho yamukombole Yesu kuli wene. ¹¹ Nawo Wakohani wawaha weza kuhulika inghani yiyo, wakasecelela muno, wakalagana nayo vyono womupela zipesa. Hodu nayo Yuda yakawa kwanza kulondola cilejeho co kumukombola Yesu kuli wene. ¹² Na mwizuwa lilongozi lye sikukuu ye mikate yono siyisasize, mwipango lyono wawulajilaga nyana ye ngholo we Pasaka, iwejizwa wakwe wakamuwuza, wakutya, “Wukusaka cikuwikanizize hayi ndigwa ye Pasaka?” ¹³ Ale, Yesu yakawatuma wejete wa muli wejizwa wakwe yakuwatya, “Bitenyi kwi’kaya, na kuko mokwitang’anila na munhu yunji yadinghuye njilo ye malenga. Ale, mumutyatyaje yuyo, ¹⁴ sunga ko ku kaya yono kokwinjila, mumutye munya kaya, ‘Umwijizi yakutya, cili hayi cumba cangu cono nolila Pasaka hamonga ne wejizwa wangu?’ ¹⁵ Nayo komulajilenyi cumba ciwaha ca ku golofa cono ciwikanizizwe lukulu, kanyhi cihambigwe. Ale mucitenjelaje mu cumba cico.” ¹⁶ Iwejizwa wakatuluka, wakabita kwi’kaya, nawo wakagana vyose viwikanizwe nha vyono Yesu yali yawalonjeye. Wakawa kuyitenga i ndigwa ye Pasaka. ¹⁷ Yaza kuwa cinyamihe. Yesu yakaza hamonga ne wejizwa wakwe we likumi na wejete. ¹⁸ Na lono walizaga zindigwa ha meza, Yesu yakatya, “Mbeka nghumulonjelenyi, muyenyu yunji mono cikulizana hamonga nane, kongaluka.” ¹⁹ Baho iwejizwa wakwe wakanza kukalala, hanyuma wakawa kwanza kumuwuza Yesu yumonga yumonga, wakutya, “Ma yo nene?” ²⁰ Yesu yakawatya, “Muyenyu yumonga wa muli nyenye yikumi na wejete, mono cikulilizana i nhonje hamonga nane mu bakuli. ²¹ Mbeka u Mwana wo Munhu nha kofwa nha vyono i Mandiko Gono Gelile gakulonga zo mwene, ninga, woyi he, kuli munhu yuyo mono yakumugaluka Mwana wo Munhu! Yali yiwe yili ciba kuli munhu yuyo, yalece kulelwa!” ²² Na lono walizaga, Yesu yakasola mukate, yakalumba, yakawubegula no kuwapela wejizwa wakwe akuno yakutya, “Solenyi awu wo muwili wangu.” ²³ Hanyuma yayo yakasola ne cikombe naco, yakamulumba Mulungu, yakawapela, nawo wose wakacing’wela i cikombe cico. ²⁴ Yesu yakawatya, “Ayi yo sakami yangu yono yikukangaza i cilagane co Mulungu, isakami yono yikwitika so wanhu wenji. ²⁵ Mbeka nghumulonjelenyi, sinong’wa kanyhi divayi ye zabibu, sunga mwizuwa alilya lono noloying’wa divayi yimhya, mu wutemi wo Mulungu.” ²⁶ Ale baho wakemba lwimbo, nawo waza kondya, wakatuluka, wakabita kwi’tunda lye Mizeyituni. ²⁷ Yesu yakawatya wejizwa wakwe, Anye wose motiza no kundeka nili wene, hambi i Mandiko Gono Gelile nha gakutya, “Nolomutowa u mudimi, ne zingholo nazo zolokwiyagala ako na ako.” ²⁸ Ninga kolo nakondya kuzuka, nomulongolelenyi ku Galilaya. ²⁹ Nayo Petelo yakamutya, “Hamba wose watize wakulece wuli wene, ninga ane si nokulecela lukulu!” ³⁰ Nayo Yesu yakamutya, “Mbeka nghukulonjela Petelo, vyono i cilo cici lono i nzogolo yowa yikali nalila kali kejete, agwe kowa wakondya kunghana kali kadatu.” ³¹ Ninga Petelo yakehinda muno kulonga yakutya, “Hamba hono yiwe yinojeye cifwizane hamonga nagwe, ane sinokulecela lukulu hamba hadodo.” Ne wejizwa wose nawo wakalonga nhavivyo. ³² Ale, wakaza ku cigundu cono cacemwaga Getisemane. Yesu yakawatya iwejizwa wakwe, “Ikalenyi baha, ane lono nghali kulomba.” ³³ Ale, yakawa kuwasola wa Petelo, na Yakobo na Yohana, yakawa kwanza kugazika no kuwona wusungu mu nhumbula yakwe. ³⁴ Yakawatya, “I nhumbula yangu yina wukalale wuwaha wono wunhuliye muno muno. Ale, mwikalaje bahano akuno mwilanjiliye.” ³⁵ Yakatela ha mwande hadodo, yakagwa hasi, yakalomba vyono, hono yiwe yisumice, yalece kucagana cipango cico ce magazo. ³⁶ Yakatya, “Gwe Baba, kuli’gwe zose nha zisumice. Ale wumbusizaje icikombe cicino ce magazo. Ninga si vyono nyendile nene, langa yiwe nha vyono wendile gwegwe.” ³⁷ Hanyuma yayo, yakaza kuli wejizwa wawalya wadatu, yakawagana wagonile. Ale, yakamuwuza Petelo, yakutya, “Simoni, alu, wagona? Si wusumile kwikala meso hamba saa monga du? ³⁸ Yakawa kuwatya, mwikalaje meso, mulombe ho mulece kwinjila mu wujelwe. Mbeka nhumbula yendile, ninga muwili wusoceye.” ³⁹ Yakabita kulomba kanyhi yakuwuyajila kulonga zinghani zizilya du. ⁴⁰ Ale, yakaza kanyhi kuli wejizwa wakwe, yakawagana wagonile. Nhondo hamba si wasuma bwete no kunugula ne meso gawo. Hamba siwamanya na yono wopitula. ⁴¹ Nayo yali yeza kuwaziza lwe kadatu yakawatya, “Alu mukali mugonile mucehile? Ninga alu hodu zakwila! Icipango nha cakondya kuza! U Mwana wo Munhu yakukombolwa kuli wanhu wabi. ⁴² Ale, yinucenyi, cibite. Lanjenyi ta, ayo u munhu mono yakungaluka yaza!” ⁴³ Na lono Yesu yali yakali yakulonga, lanje, Yuda yuyulya u muyagwe na wawalya iwejizwa we likumi na wejete, yakawa kuza, hamonga ne lipuga lye wanhu, wena ne mimaje ne zishale. Iwanhu wawo wali watumigwe ne Wakohani wawaha, ne wejizi wo Wulajilize hamonga ne Wanyamhala. ⁴⁴ Nayo Yuda u mugaluci, yali yakondya kuwapela citanjilo yakutya, “Yuyo mono nomunonela, ale, yo yuyo mono mukumusaka, nanye mumwibataje mumutegule hasi yo wulindilizi.” ⁴⁵ Nayo Yuda yaza kuza du, yakawa kumubitila Yesu, yakawa kumutya, “Mwijizi!” Hanyuma yakawa kumunonela. ⁴⁶ Ale, iwanhu wawo wakamwibata Yesu. ⁴⁷ Ninga yunji muyagwe na wawalya wono wali wemile hamonga na Yesu, yakawukwega u mumaje wakwe, yakamutowa muwanda wo Mukuhani muwaha, yakamubuha likutu. ⁴⁸ Nayo Yesu yakawatya, “Alu muza mwina ne mimaje hamonga ne zishale ho munyibate nha kotya nili muhizi? ⁴⁹ Na kumbe nhondo zose nawezanaga nanye nghwijiza mu Nyumba yo Mulungu, ninga simwanyibata ng’o. Ninga alu yinojeye i Mandiko Gono Gelile gafisilizwe.” ⁵⁰ Ale baho iwejizwa wakwe wose wakamuleka, wakatiza. ⁵¹ Baho hali hoyuli muzelelo yunji mono yamutyatyaga Yesu, akuno yekumbile mwenda we bafuta. Nawo wakajela kumwibata. ⁵² Ninga mwene yakawesukula, yakawuleka u mwenda wuwulya we bafuta, yakatiza yali cipwi. ⁵³ Ale, wakamutegula Yesu kuli Mukohani Muwaha, kono Iwakohani wawaha wose, ne wanyamhala ne wejizi wo wulajilize wali wekongholeye. ⁵⁴ Nayo Petelo yakawa yakumutyatya Yesu, yakujendela kutali, Petelo yakenjila mwi’kumbo lyo Mukohani Muwaha, yakekala hamonga ne walindilizi, yakawa yakota moto. ⁵⁵ Iwakohani wawaha ne Libalaza lyose, wakalondola wuhomelezi wo kumusitacila Yesu ho wamuwulaje, ninga hamba si wawutuga yaye. ⁵⁶ Ne wanhu wenji wakahomelela zo wulambi kuli Yesu, no wuhomelezi wawo wali wusutane. ⁵⁷ Ale, na wanji nawo wakema, nawo wakahomelela zo wulambi kuli Yesu, wakutya, ⁵⁸ “Ase camuhulika umunhu yuyu yakutya, Ane noyimwagula i Nyumba yiyino yo Mulungu yono yizenjigwe ne miwoko, na mu vilo vidatu, ane noyizenga yinji yono siyizenjigwe ne miwoko.” ⁵⁹ Ninga, hamba nhavivyo, u wuhomelezi wawo nawo, wali wusutane. ⁶⁰ Ale, Mukohani Muwaha yakema haciligati yawo, yakamuwuza Yesu, yakutya, “Alu, siwukupitula cinji? Nghanici yono wakukuhomelela i wanhu wawa?” ⁶¹ Ninga u mwene yakanyamala twii, hamba kulonga cinji. Mukohani Muwaha yakamuwuza kanyhi yakutya, “Ma, alu yo gwegwe Kilisito. U mwana wo Mulungu Mulugutizwe?” ⁶² Nayo Yesu yakapitula, yakutya, “Heya yo nene. Na kanyhi, molomuwona u Mwana wo Munhu yekaye ku lubavu lo kulume lwa Mono yena Vilungo, yakuziza mu mavunde ga ku wulanga.” ⁶³ Baho Mukohani Muwaha yakavidemulanga i vivwalo vyakwe vye cikohani, akuno yakutya, “Hambi alu kanyhi cikusaka wuhomelezi wa cici? ⁶⁴ Hambi nha muwuhulika nyo weneco u wotovule wakwe!” Alu ’nye mukuwona wule? Wose wakatemya vyono yimunojeye yawulagwe. ⁶⁵ Ale ho baho baho du, wanji wa muli wene, wakanza kumufunyila mate, wakamugubika wusu, wakamutowanga makofi no kumutya, “Ale wutambule ta, nani mono yakutowile!” Sunga ne wetumami wakamusola, nawo wakamutowanga makofi. ⁶⁶ Na lono Petelo yali yakali he kumbo, yunji wa muli wetumami we cicekulu wo Mukohani Muwaha yakaza. ⁶⁷ Yaza kumuwona Petelo yakota moto, yakamulanga, yakamutya, “Hamba na gwegwe wali hamonga na Yesu wa Nazaleti.” ⁶⁸ Ninga mwene Petelo yakakana, yakutya, “Si manyile hamba singhwizuka yono wukulonga!” Hanyuma yayo Petelo yakatuluka yakalawila kunze. Baho inzogolo nayo yikawa kulila. ⁶⁹ No muhinza yuyulya yaza kumuwona kanyhi Petelo, yakanza kanyhi kuwalonjela i wanhu wono wali wemile baho, yakutya, “U Munhu ayu nayo mama, muyawo.” ⁷⁰ Nayo Petelo yakakana kanyhi. Na hanyuma yayo hadodo, iwanhu wono wali wemile baho wakamutya Petelo, “Mbeka nagwe uli muyawo, hambi nagwe ha wuli Mugalilaya.” ⁷¹ Ninga Petelo yakanza kwilijita no kwilaha yakutya, “Ane si nimumanyile munhu ayu mono mukumulonga.” ⁷² Baho nayo inzogolo yikawa kulila lwe kejete. Hobaho Petelo yakakumbucila vyono Yesu yali yamulonjeye, vyono “Lono inzogolo yowa yikali siyinalila kali kejete, agwe kowa wakondya kunghana kali kadatu.” Hodu Petelo yakalila muno muno tobo ne mahozi.

¹ Wali weza kwela hakali mitondo muno muno, iwakohani wakalaganila kumonga, hamonga ne wanyamhala ne wejizi wo Wulajilize, hamonga ne libalaza lyose, wakamuwopa Yesu ne manyolo, wakamutegula no kumukombola kuli Pilato. ² Nayo Pilato yakamuwuza Yesu, yakutya, “Alu yo gwegwe u Mutemi we Wayahudi?” Nayo Yesu yakatya, “Nha kulonga gwegwe.” ³ Nawo Wakohani wawaha wakamusonjeza Yesu nghani nyinji. ⁴ Pilato yakamuwuza kanyhi Yesu, yakutya, “Alu si wukupitula hamba cinji? Langa ta vyono wakukusonjeza nghani nyinji.” ⁵ Ninga Yesu siyapitula hamba cinji, sunga na Pilato yakezina. ⁶ Mu vilo vyose vye Sikukuu ye Pasaka, Pilato yali yazoweye kumuwopolela mufungwa yumonga mono wamusakaga. ⁷ Ale, kwali na munhu yunji mono yacemwaga Balaba, mono yali yafunjigwe hamonga ne wafyuzi wanji ku soko yo wuleta wufyule no wuwulaji. ⁸ Ne wanhu wenji wakamuziza Pilato wakamulomba yawanozeze nha vyono yali yazoweye nhondo zose. ⁹ Nayo Pilato yakawawuza, yakutya, “Alu, mukusaka nimuwopolelenyi u Mutemi we Wayahudi?” ¹⁰ Nayo yalonga nhavivyo, ku soko yali yamanyile calinze, vyono iwakohani wawaha wamukombola Yesu kuli mwene ku soko yo wivu du. ¹¹ Ninga i wakohani wawaha wakawasagahaza wanhu ho wamulombe Pilato yawawopolele Balaba. ¹² Nayo Pilato yakawawuza kanyhi, yakutya, “Alu mukusaka nimunozeci munhu ayu mono mumucemaga Mutemi we Wayahudi?” ¹³ Nawo wanhu wose wakazoza kanyhi, wakutya, “Wumutumbice mu musalaba!” ¹⁴ Ninga mwene Pilato yakawawuza, yakutya, “Ku sokoci? Kahodanga cici?” Ninga wene ho wakacila muno kuzoza, wakutya, “Wumutumbice mu musalaba!” ¹⁵ Nayo Pilato vyono yahila kulyendeza i lipuga lye wanhu, hodu, yakamuwopolela Balaba ku wulawa mu jela. Yakalajiliza vyono Yesu yakunwe ne viboko, na hanyuma yayo, yakamukombola yatumbikwe mu musalaba. ¹⁶ Ale, iwasilikale wakamutegula Yesu kugati, kwi’kumbo lye likulu, wakekonghola i liwumbi lyose lye wasilikale. ¹⁷ Wakamuvwika Yesu mwenda we liwala lyo lugandu, wakatawa cipombelo ce mamivya, wakamuvwika mu mutwe. ¹⁸ Wakawa kwanza kumulamusa wakutya, “Lamucenyi Mutemi we Wayahudi!” ¹⁹ Wakamutowa mu mutwe ne lidete, wakamufunyila mate, wakamufugamila no kumuhemba. ²⁰ Waza kondya kumuzwajiza, wakamuvula mwenda wuwulya we liwala lyo lugandu, wakamuvwika i vivwalo vyakwe, hanyuma yayo wakamutegula kunze, ho wakamutumbice mu musalaba. ²¹ Na lono wali wali mu nzila wakubita, waketang’anila na munhu yunji mono kacemwaga Simoni, munya Kilene. Mwene yali yo sogwe wa wa Alekizanda na Lufo, na mwidaha lilyo mwene yalawaga ku mugunda. Ale wakamudindimiza, yadinghule umusalaba wa Yesu. ²² Hodu wakawa kumutegula Yesu sunga hanhu hono hacemwaga Goligota, nhunizo yayo “Hanhu ha cipala.” ²³ Wakamupela Yesu divayi yono yali yihangahanjile ne manemane, ninga mwene yakayilema. ²⁴ Ale wakamutumbika mu musalaba, wakagawana vivwalo vyakwe ko kutowa kula, ho walamule nani kotuga cici. ²⁵ Nayo yali saa tatu hakali mitondo ilipango lono wamutumbicila mu musalaba. ²⁶ No wusonjezwe wakwe wali wandikwe hacanyha yo musalaba, nhavi, “U mutemi we Wayahudi.” ²⁷ Ne wahizi wejete nawo wakatumbikanwa hamonga na Yesu. Yunji ku lubavu lwakwe lo kulume no muyagwe ku lubavu lwakwe lo kucekulu. [ ²⁸ Baho gakafisilizwa i Mandiko Gono Gelile gono gakutya, “Yakawalilizanwa hamonga ne Wahodanji.”] ²⁹ Ne wanhu wono wakolaga hanhu baho, wakamutovula, akuno wakuzugunza i mitwe yawo wakutya, “A, he! Gwe go munya kuyimwagula Nyumba yo Mulungu no kuyizenga mu vilo vidatu! ³⁰ Ale ta, wutime mu musalaba, wiponye go mweneco!” ³¹ Nawo wakohani wawaha hamonga ne wejizi wo Wulajilize, wakamuzwajiza wakutya, “Yawaponyaga wanji, ninga kwiponya mweneco siyakusuma! ³² Ati mwene yo Kilisito, u Mutemi wa Isilayeli! Ale, lu ta, yatime mu musalaba ho ciwone no kwihuwila.” Sunga ne wanhu wawalya wono watumbikwa mu musalaba hamonga nayo, nawo wakamutovula. ³³ Ku wulawa mu saa sita ye misi, sunga ku saa tisa ye misi, kukawa kutitu tuku mu’si yose. ³⁴ Na mu saa tisa ya mu misi, Yesu yakalila ne’zi iwaha yakutya, “Eloyi, Eloyi, lama Sabakatani.” Nhunizo yayo, “Gwe go Mulungu wangu, Gwe go Mulungu wangu, alu so cici wukundeka?” ³⁵ Na wanji wa muli wanhu wono wali wemile bahalya wali weza kuhulika nhavivyo, wakatya “Hulicizenyi! Yakumucema Eliya.” ³⁶ No munhu yunji yakamangha, yakazabika sifongo mu Siki, yakayitajila mwidete yakamupela ho yang’we akuno yakutya, “Leka ta cilanjilile hono Eliya kokuza yamutimye mu musalaba.” ³⁷ Yesu yakalonga ne’zi iwaha, hodu yakawa kufwa. ³⁸ Ne libupa lyo mwenda lya mu Nyumba yo Mulungu likademuka hejete, likalawilila kucanyha sunga ho hasi. ³⁹ No muwaha yunji we wasilikale mono yali yemile ha mwande yakwe, yali yeza kuwona vyono Yesu yakulonga ne’zi yiwaha no kufwa, yakatya, “Mbeka umunhu ayu, yali Mwana wo Mulungu!” ⁴⁰ Na baho kanyhi, hali howali we cicekulu wanji wono wazilanjililaga zizo akuno wemile kutali, muli wawo mwali na Malyamu Magadalena, na Salome, na Malyamu unyina wa Yakobo u mudodo na Yose. ⁴¹ Wawa wamutyatya Yesu lono yali yali ku Galilaya no kumwitumamila. Kanyhi kwali na we cicekulu wanji wenji wono wakaza ku Yelusalemi hamonga nayo. ⁴² Ne cipango ce cinyamihe cikawa cakondya kufika. Ne lizuwa lilyo lyali lyo lizuwa lyo Wuwikanize, lizuwa lyono likulecela Sabato. ⁴³ Baho yakaza Yusufu munya Alimataya, umwitumami we Libalaza liwaha, mono yali yena lilumbo yiwaha muno. No mwene nayo yali yalanjiliye uwuze wo Wutemi wo Mulungu. Ale, yakamubitila Pilato akuno yasina woga, yakalomba yapegwe u muwili wa Yesu. ⁴⁴ Pilato yakezina muno, yaza kuhulika vyono Yesu yali yakondya kufwa. Ale, yakamucema muwaha we wasilikale yigana, yakamuwuza hono Yesu yali yakondya kufwa cidaha. ⁴⁵ Nayo Pilato yaza kulonjelwa no muwaha yuyo we wasilikale yigana, vyono Yesu yali yakondya kufwa, hodu yakamukombolela Yusufu yawusole muwili wakwe. ⁴⁶ Baho Yusufu yakagula sanda ye bafuta, yakawutimya hasi muwili wuwo, yakawudajiliza ne sanda. Yakawuwika mu citenjelo cono cali cituligwe mwi’talawe, hanyuma yayo yakabidusiza libwe yiwaha ku mulango we citenjelo. ⁴⁷ Malyamu Magadalena na Malyamu unyina wa Yose nawo wakahawona baho hono yawicigwe.

¹ Ne lizuwa lye Sabato lyeza kupuluta, Malyamu Magadalena, na Salome na Malyamu unyina wa Yakobo, wakagula mafuta ge mhunjile swanu, ho wakawubace muwili wa Yesu. ² Mwi’zuwa lye Jumapili wakelawila ku citenjelo hakali mitondo muno muno, lono lizuwa lyasosomokaga. ³ Nawo wakawa wakulongana weneco wose, wakutya, “Alu nani ’mbi mono kociwusiza i libwe lilyo mu mulango we citenjelo?” ⁴ Ninga wali weza kulanga nhavi, wakawona i libwe lyakondya kubidusizwa ha mhelo (Nalyo lyali yibwe yiwaha muno.) ⁵ Nawo wali weza kwinjila mu citenjelo, wakamuwona mumo muzelelo yunji mono yali yavwalile civwalo cizelu swee, yekaye ku lubavu lo kulume, nawo wakezina muno muno. ⁶ Ninga u muzelelo yuyo yakawatya, “Mulece kwizina. Mukumulondola Yesu wa Nazaleti mono yatumbikwa mu musalaba. Kazuka, ahano yali hasina. Lanjenyi ta, hono wali wamuwicile. ⁷ Ale bitenyi mukawalonjele i wejizwa wakwe hamonga na Petelo, vyono yakuwalongolela ku Galilaya. Na kuko ko momuwona nha vyono yamulonjelenyi.” ⁸ Ale, wakawuka baho ha citenjelo lumangho, hambi nha wacicima so woga no wizine. Hamba si wasuma kumulonjela munhu wo wose nghani yinji, hambi nha wogopa muno muno. [ ⁹ Nayo Yesu yaza kuzuka mwizuwa lye Jumapili hakali mitondo muno, yakamula kwilajila kuli Malyamu Magadalena, mono Yesu yamulavya macisi mupunghati. ¹⁰ Nayo Malyamu Magadalena yakabita, yakawalonjela wawalya wono wali wali hamonga na Yesu, na mwipango lilyo, wene walilaga no kukalala. ¹¹ Ninga waza kuhulika vyono Yesu nha mumi, na vyono Malyamu Magadalena kamuwona, hamba siwehuwila yaye. ¹² Hanyuma yayo Yesu yakejela kuli wejizwa wejete yena futa yinji. Iwejizwa wawo wabitaga ku mugunda. ¹³ Nawo wakabita wakawalonjela iwayawo. Nawo nhavivyo hamba siwehuwila yaye. ¹⁴ Na ku ndumilizo, Yesu yakejela kuli wejizwa we likumi na monga, lono walizanaga ha meza. Nayo yakawatacila muno so wuleka kwihuwila kwawo, no wukamu we zinhumbula zawo, hambi nha siwawehuwila wawalya wono wamuwona lono yali yazuka. ¹⁵ Yesu yakawatya, “Bitenyi ku yinze yose, mukaluganule u Luganuzi Luswanu kuli wanhu wose. ¹⁶ Na yuyo mono kokwihuwila no kubaputizwa yo koponywa. Na yuyo mono si kokwihuwila yo kololing’anizwa. ¹⁷ Ne vitanjilo vivi, vyowezana hamonga na wawo wono wehuwiye: mwi’tagwa lyangu mo wolavizya macisi, wolonga milonjele mipya. ¹⁸ Na hono webate nzoka, hamba kung’wa cinji co cose cono cina sumu, sicowatamisa yaye.” Kanyhi wowawicila miwoko yawo i watamwa, nawo watamwa wopona. ¹⁹ U Muwaha Yesu yaza kondya kulongana nawo, yakabocelwa ku wulanga, yakekala ku lubavu lo kulume lo Mulungu. ²⁰ Nawo iwejizwa wakabita wakawa wakuganula hanhu hose. Nayo u Muwaha yaketuma mulimo hamonga nawo, no kuyifisiliza inghani yiyo, kwe vitanjilo vyono vyawezanaga hamonga nawo.]