LUKA

LUKA

¹ Go we Lilumbo Teyofilo: Vyono wenji wakasaka muno kwandika, zinghani azilya zono zetumwa muli’se! ² Wakandika nha vyono calonjelwa na awalya wono wewonelela weneco kulawa mwamulizo, no kulwanza Luganuzi lulo. ³ Nane lono nakondya kuzilangalanga kulawa mwamulizo, mbona viswanu nghwandicile nha vyono zinha go we Lilumbo Teyofilo, ⁴ ho wusume kumanya imbeka ye zinghani zono wejizwa. ⁵ Mu vilo vyono Helode yali mutemi wa Yudiya, kwali na mukohani mono yacemwaga Zekaliya, mono wali wali hamonga mu witumami na Abiya, Mugolece wakwe yacemwaga Elizabeti, muyagwe ne wana wa Haluni. ⁶ Wose vyono wejete, wali wali ling’ani hali Mulungu, wali webate myoto ne malajilizo gose go Mulungu. ⁷ Ninga wali wasina mwana, vyono Elizabeti yali mugumba, nawo wene Zekaliya na Elizabeti, wose wali wakombipa muno. ⁸ Mwizuwa linji, lono Zekaliya yetumaga mulimo wakwe wo Wukohani mu Nyumba yo Mulungu, ⁹ mu wilecele wo witumami, vyono wo moto wo Wukohani, lwali lwakwe kwinjila hanhu hono helile no kufusa wuvumba. ¹⁰ Lipuga lye wanhu walombaga hadeha mwi’pango lyo kufusiza. ¹¹ Malayika wo Muwaha Mulungu yakamulawila, yemile ku lubavu lo kulume lwe cikumbicilo co kufusiza. ¹² Zekaliya yali yeza kumuwona, yakagazika mu nhumbula, no woga wukamwibata. ¹³ Ninga malayika yakamutya, “Zekaliya, wulece kogopa, hambi wulombe wako nha wuhulikwa, no mugolece wako Elizabeti kokulelela mwana wa cilume, nagwe komucemela litagwa lyakwe Yohana. ¹⁴ Nagwe kowa na nyemo no wusangalale, na wenji wolowusangalalila wulelwe wakwe. ¹⁵ Kowa muwaha hali Muwaha Mulungu, si kolowa kung’wa divayi hamba cing’wegwa co wugale, ¹⁶ nayo komemywa Muhe Mono Yelile ku wulawa mu’nda yo nyina. ¹⁷ Kolowapitula wenji wa muli wana wa Isilayeli wamupitucile Muwaha Mulungu wawo. Nayo komulongolela Muwaha yakutongwa mu vilungo na mu Muhe kotya Eliya, no kuwalamula wasogo zo munhu ne wana wawo. Kowanoza we cibede, wawe mu mahala ge we ling’ani, kumuwikaniziza u Muwaha wanhu wakwe.” ¹⁸ Zekaliya yakamutya yuyo Malayika, “Noyimanya nhawule nghani yiyo? Hambi ne nha neza mukombi, no mugolece wangu nayo yawa mukombi.” ¹⁹ Malayika yakamupitula yakatya, “Ane nili Gabuliyeli, mono nyimaga hali Mulungu, nane nhumwa ho nongane nagwe, nghuletele Luganuzi lulu Luswanu. ²⁰ Alu hulicize, vyono si wihuwiye zinghani zangu, alu kowa cibwibwi, nagwe si kosuma kulonga, sunga zizi zono nghulonjeye kolo zakondya kufisilizwa.” ²¹ Na mwi’pango lilyo wanhu wali wamulindiye Zekaliya, akuno wakwizina so wucele wakwe mu Nyumba yo Mulungu. ²² Nayo yaza kulawila, si yasuma kulongana nawo, ninga yakawa kuwanozeza vitanjilo ne mawoko gakwe, yakekala cibwibwi. ²³ Lidaha lyo witumami wakwe lyaza malika, yakawuya ku kaya yakwe. ²⁴ Ne vilo vyaza puluta, Elizabeti u mugolece wakwe yakawa yatuga ’nda. ²⁵ Yakehundiciza myezi mihano, yakutya, “Alu Muwaha Mulungu kanhendela nhavivi, kambusiza lilema lyangu hali wanhu.” ²⁶ Mu mwezi wo mutandatu, malayika Gabuliyeli yatumwa no Mulungu, yabite kwi’tumbi lyono likucemwa Nazaleti ya ku Galilaya. ²⁷ Ko muhinza mono yacemwaga Malyamu, mono yali mubanywe na Yusufu we mhuga ya Dawudi. ²⁸ Malayika yakenjila mu nyumba yakwe, yakamutya, “Lamucenyi Malyamu mono wuli mulugutwe! U Muwaha nha yali hamonga nagwe.” ²⁹ Malyamu yaza kuzihulika zinghani zizo, yakehwelela muno, yakehwesa mu nhumbula yakwe, alu izinghani zizi zina nhunizoci? ³⁰ Malayika yakamutya, “Wulece kogopa Malyamu; hambi Mulungu nha kakupela lihewa. ³¹ Lanje, kotuga ’nda, kolela mwana wa cilume, na komupela litagwa Yesu. ³² Mwene kowa Muwaha, nayo kocemwa mwana wo Mulungu Mono Yalawiliciye, no Muwaha Mulungu, komupela ligoda lyo sogwe Dawudi; ³³ nayo kotema mhuga ya Yakobo cibitilila, no wutemi wakwe si wulawa na ndumo.” ³⁴ Malyamu yakamutya Malayika, “Yosumika wule nghani yiyi, ane nha si manyile mulume?” ³⁵ Malayika yakapitula yakamutya, “U Muhe mono yelile kokuziza, ne vilungo vyo Mulungu Mono Yalawiliciye vyokusiciliza. Holeka mwana mono kolela, kocemwa Yelile, Mwana wo Mulungu. ³⁶ Na langa ta, nduguyo Elizabeti nayo mu wukombi wakwe, yena ’nda na mwezi awu wo wo mutandatu, munhu mono wanhu watezaga mugumba. ³⁷ Hambi nha hasina yono si yisumikaga hali Mulungu.” ³⁸ Malyamu yakatya, “Langa ta, ane nili mwitumami wo Muwaha ziwe muli’ne nha vyono wulonjile.” Nayo Malayika yakawa kutuluka. ³⁹ Vyaza kupuluta vilo vicefu, Malyamu yakenuka musunho, yakabita ku kaya yinji yono yili mu matunda ga Yudiya. ⁴⁰ Yakenjila mu kaya ya Zekaliya, yakamulamusa Elizabeti. ⁴¹ Kukawa Elizabeti yali yeza kuhulika du wulamuse wa Malyamu, mwana yakedawala na nyemo mu’nda yakwe. Nayo Elizabeti yakamemywa Muhe Mono Yelile, ⁴² yakenula lizi lyakwe, yakatya, “Wuli Mulugutwe muli wacekulu wose, na yuyo mono kolelwa nagwe, nayo Mulugutwe. ⁴³ Alu ne nili nani sunga nyina yo Muwaha wangu yanyizize? ⁴⁴ Nghukulonjela vyono, neza hulika du lizi lyo wulamuse wako, u mwana kawa kwidawala na nyemo mu’nda yangu. ⁴⁵ Wuli mumoti ’gwe mono wihuwiye, vyono zofisilizwa zono Muwaha yakulonjeye.” ⁴⁶ Nayo Malyamu yakatya, “Inhumbula yangu yikumukumya Muwaha, ⁴⁷ No muhe wangu wumusangalaliye Mulungu Muponyi wangu. ⁴⁸ Hambi nha kawulanga wuciwa wo mwitumami wakwe! Hambi langa ta, vyono kulawa zuwali, iwanhu wose nha wonyitya nili mumoti. ⁴⁹ Hambi Mulungu mono yali vilungo nha kanhendela mawaha Ne litagwa lyakwe lyelile. ⁵⁰ No lusungu lwakwe luli kuli wanhu wose wono wamogopaga. ⁵¹ Kawugolola u muwoko wakwe we vilungo Kaweyagaza wasisi mu mahweso ge zinhumbula zawo. ⁵² Kawagwisa watemi mu magoda gawo Yakawenula waciwa. ⁵³ Wono wena nzala, kawegutya ne vinhu viswanu, Ne wagoli, kawawinga wali bwete. ⁵⁴ Kamutaza Isilayeli mwitumami wakwe Ho yakumbucile lusungu lwakwe. ⁵⁵ Vyono yawalonjela walezi wetu, Kuli Abulahamu no lulelo lwakwe sunga ku cibitilila.” ⁵⁶ Malyamu yakekalana na Elizabeti myezi midatu, hanyuma yakawa kuwuya kwawo. ⁵⁷ Vilo vya Elizabeti vyo kusawila vikafika, yakasawa mwana wa cilume. ⁵⁸ I wayagwe ne wanduguze waza kuhulika vyono Muwaha kamupela kwa winji lihewa lyakwe, wakasangalalana nayo. ⁵⁹ Kukawa mwi’zuwa lyo munana, ho wakaza wakamutegula mwana, ku calamo, wahilaga kumupela litagwa lyo sogwe Zekaliya. ⁶⁰ Ninga u nyina yakatya, “Ng’o, langa kocemwa Yohana.” ⁶¹ Wakamutya, “Mu wanduguzo nha musina yunji mono kacemwaga litagwa lilyo?” ⁶² Wakamusonhelela sogwe, ho yalonje i litagwa lyono yakusaka u mwanagwe yacemelwe. ⁶³ Nayo yakasaka cibawo, yakandika, yakutya, “Itagwa lyakwe Yohana.” Wose wakezina. ⁶⁴ Ho baho no mulomo wakwe wukadiguka, no lulimi lwakwe lukahogoha, yakalonga yakumulumba Mulungu. ⁶⁵ Woga wukawebata wose wono wali wekaye behi nawo, na zizo zose zikahulikwa kose mu matunda ga Yudiya. ⁶⁶ Na wose wono wazihulika, wakaziwika mu zi nhumbula zawo wakutya, “Alo kowa yenha wule mwana yuyu.” Hambi i vilungo vyo Muwaha nha vili hamonga nayo. ⁶⁷ No sogwe Zekaliya yakamemywa Muhe Mono Yelile, yakalonga nghani yo Mulungu yakutya, ⁶⁸ “Yalumbwe Muwaha Mulungu wa Isilayeli. Hambi nha kawaziza, kawanozeza wukombozwe wanhu wakwe. ⁶⁹ Kacipela Mukombozi we vilungo mu mhuga ya Dawudi u mwitumami wakwe. ⁷⁰ Nha vyono yehuwiza katali, mu milomo ye wawizi wakwe wono welile, ⁷¹ nha vyono kocikomboza wulawa mu walugu wetu, na mu miwoko ya wose wono wacisulile. ⁷² Yakatya, kowawonela lusungu walezi wetu. No kukumbucila cilagane cakwe cono celile. ⁷³ Wilahe wono yamwilahila Abulahamu u kuku yetu nha vyono kocipela sese, ⁷⁴ ho cikombozwe ku wulawa mu miwoko ye walugu wetu, ho cimwitumamile cisina woga. ⁷⁵ Celile na cili ling’ani hali mwene, vilo vyetu vyose vyo wikale wetu. ⁷⁶ Nagwe, mwanangu, kocemwa muwizi wo Mulungu Mono Yalawiliciye muli vyose, hambi nha kolongola ha mwande yo Muwaha wumunozelezeze nzila yakwe. ⁷⁷ Ho wuwamanyize wanhu wakwe vyono woponywa so wunenelwe wo wubi wawo. ⁷⁸ U Mulungu wetu mupolo, kanyhi yali lusungu. Koleta wuzelu wo wukombozwe, wucizize ku wulawa ku wulanga, ⁷⁹ no kuwamulicila wono wekaye mu citi ce lifwa. No kuyitonga migulu yetu mu nzila yo mulamu.” ⁸⁰ U mwana yakawiluka, yakonjelezeka vilungo mu nhumbula, yakekala mu nyika, sunga mwizuwa lyo wilajile wakwe kuli wanhu wa Isilayeli.

¹ Mu vilo vivyo lono Yohana yali yalelwa, Kayisali Awugusito, yakalajiliza vyono wanhu wose wono wali hasi yo wutemi wakwe wandikwe. ² Lulo lo lwandiko lulongozi lono lwandikwa lono Kuleniyo yali yatemile Suliya. ³ Wose wakabita kwandikwa, munhu na kaya yakwe. ⁴ Yusufu nayo yakatuluka kulawa Nazaleti ya Galilaya, yakabita ku Betelehemu mu yisi ya Yudiya kono yalelelwa u mutemi Dawudi. Vyono mwene nayo yali we mhuga ya Dawudi, ⁵ ho yandikwe hamonga na Malyamu, mono yali mubanywe nayo, lono yali yakataye ne’nda. ⁶ Kukawa lono wali wali kuko, likawa kufika lizuwa lyakwe lyo kulelela. ⁷ Yakasawa u mwanagwe we cilume mwana mulongozi, yakamuvwika myenda yo wugalika, yakamuwika mu ciya co wulilo we mitugo, vyono siwatuga cilejeho mu nyumba ye wajenzi. ⁸ Ku lubavu lulo, kwali kowali wadimi wono walindilizaga mitugo yawo ne cilo. ⁹ Hobaho Malayika wo Muwaha yakawalawila, u lukumyo lo Muwaha lukawang’alalila, wakenjilwa na woga. ¹⁰ Malayika yakawatya, “Mulece kogopa, ane nghumuletelenyi Luganuzi Luswanu lwe nyemo mbaha kuli wanhu wose, ¹¹ hambi izuwalili nha mulelelwa Muponyi ku soko yenyu, mu kaya ya Dawudi, yo Kilisito u Muwaha. ¹² Aci co citanjilo kuli’nye, Momwagana mugalika yavwicigwe myenda yo wugalika, yagonile mu ciya co wulilo we mitugo.” ¹³ Lo lulo baho kukawa na Wamalayika wenji kulawa ku wulanga, wakelunza na yuyo Malayika, wakamukumya Mulungu wakutya, ¹⁴ “Lukumyo kuli Mulungu kucanyha, na kono’nze mulamu kuli wanhu wono wakumunojeza.” ¹⁵ Kukawa Wamalayika waza kuwuya ku wulanga, wadimi wawo wakeyitya, cibite le sunga ko ku Betelehemu, cikalanje nghani yiyi yono yiweye, vyono yacimanyize Muwaha. ¹⁶ Wakabita lumangho, wakawagana wa Malyamu na Yusufu, no mugalika yagonile mu ciya co wulilo we mitugo. ¹⁷ Nawo waza kumuwona u mwana yuyo, wakayanzalika nghani yono walonjelwa yo mwana yuyo. ¹⁸ Na wose wono wahulika wakezina zizo zono walonjelwa ne wadimi. ¹⁹ Ninga Malyamu yakazikamisa zinghani zizi zose, yakazihwesa mu nhumbula yakwe. ²⁰ Wadimi wawo wakawuya, wakawa kumukumya no kumulumbo Mulungu, so zose zono wazihulika na zono waziwona, nha vyono walonjelwa. ²¹ Vyaza kupuluta vilo munana vyo kumutegula mwana ku calamo, yakacemwa litagwa lyakwe, YESU, lililya lyono yacemelwa na Malayika lono yali yakali nategulwa ’nda. ²² Vyaza kuficila vilo vyo wezwe wawo, ko wulajilize wa Musa, wa Yusufu na Malyamu wakamusola mwana, wakabita nayo ku Yelusalemi, wamuwice hali Muwaha. ²³ Mu Wulajilize wa Musa yandikwe “Mwana wo wose we cilume u mulongozi kulelwa, kosiwanulwa yawe wo Muwaha.” ²⁴ Wakalavya cilavywa, Nziwa nyejete, lunji nyana za nghunda nyejete, nha vyono yasakwaga mwilajilizo lyo Muwaha. ²⁵ Baho hali na munhu ku Yelusalemi litagwa lyakwe Simiyoni, no munhu yuyo, yali yali ling’ani na mwihuwilwa kuli Mulungu, yalanjililaga muno wukombozwe we Waisilayeli. No Muhe Mono Yelile yali yali muli mwene. ²⁶ Nayo yagubulilwa no Muhe Mono Yelile nha vyono si kolofwa, lono yakali namuwona Kilisito wo Muwaha. ²⁷ Na ko wutonji wo Muhe Mono Yelile, Simiyoni yakenjila mu Nyumba yo Mulungu, ne walezi wa Yesu waza muleta mwana Yesu, mu Nyumba yo Mulungu, ho wamutendele nha vyono Wulajilize wukutya. ²⁸ Simiyoni yamubocela mwana Yesu mu miwoko yakwe, akuno yakumulumbo Mulungu, yakutya, ²⁹ “Alu Muwaha wafisiliza wihuwizo wako, wumukombole mwitumami wako yabite yapolile. ³⁰ Hambi meso gangu nha gayiwona mhonelo yako. ³¹ Yono wayikondeleza hali wanhu wose. ³² Wuzelu wo kuwagubulila wono si Wayahudi. No lukumyo lwe wanhu wako Waisilayeli.” ³³ U sogwe wa Yesu no nyina, wakawa kwizina zizo zo mwana zono Simiyoni yazilonga. ³⁴ Simiyoni yakawalugutiza, yakamulonjela nyina Malyamu, “Muli mwana yuyu, wenji wa muli Waisilayeli wokwajilila, na wenji wopona. ³⁵ Nayo kowa citanjilo cono wanhu siwocisaka, ho gagubulwe mahweso ga wenji, sunga na gwegwe, wusungu wono winha mumaje mukali, wocinya nhumbula yako.” ³⁶ Kwali koyuli muwizi yumonga wa cicekulu, mukombi muno, mwana wa Fanuweli, wo mulango wa Asheli, nayo yali yekalana no mulume wakwe myaka mupunghati du kulawa vyono wetola. ³⁷ Nayo yakekala mufwile sunga mu cipango cico, nayo yali yafika myaka makumi munana na mine ku wulawa u wulelwe wakwe. Na mu cipango cico cose, si yawukaga mu Nyumba yo Mulungu, na mu wuleko kulya, no kumuhemba Mulungu cilo na misi. ³⁸ Na mu cipango cico Ana yakalawila, nayo yakanza kumulumba Mulungu, nayo yakalonga zo mwana yuyo kuli wose wono walanjililaga wukombozi wa Yelusalemi. ³⁹ Nawo walezi waza kondya kufisiliza zose za mu wulajilize wo Muwaha, wakawuya kwawo ku Nazaleti mu yisi ya Galilaya. ⁴⁰ No mwana yakawiluka, no kutuga vilungo, yakamemywa mahala, ne lihewa lyo Mulungu likawa muli mwene. ⁴¹ Ne walezi wa Yesu wabitaga myaka yose ku Yelusalemi, mu cidaha ce Pasaka. ⁴² U mwana yaza ficila myaka yikumi na myejete, wabitana nayo ku Pasaka nha vyono wali wazoweye. ⁴³ Vilo vyali kondya, wakatuluka kuwuya kwawo. Ninga Yesu yasigala ku Yelusalemi, hamba walezi wakwe si wali wamanyile. ⁴⁴ Ninga wehwesa vyono yali mwipuga lye wanhu, wakajenda muhinzo we zuwa limonga, hanyuma wakamula kumulondola mu wandugu zawo na mu wayawo, ⁴⁵ waza kuwa si wamuwene, wakawuya ku Yelusalemi, wakumulondola. ⁴⁶ Kukawa vyaza kupuluta vilo vidatu, wakamwagana yali mu Nyumba yo Mulungu yekaye haciligati ye wejizi, yakuwahuliciza, akuno yakuwawuza: ⁴⁷ na wose wono wamuhulicizaga, wakezina mahala gakwe ne mapitulo gakwe. ⁴⁸ Nawo i walezi wakwe waza kumwagana, wakezina. Malyamu u nyina, yakamutya, “Mwanangu, alo so cici kucitendela nhavi? Langa ta, ane no sogo, cali kukulondola cikalaye.” ⁴⁹ U mwene yakawatya, “So cici lo mwali kunondola? Alo si mwali mumanyile vyono yinojeye niwe mu Nyumba ya Baba?” ⁵⁰ Ninga walezi wakwe hamba si wezuka nghani yiyo yono yawalonjela. ⁵¹ Hodu, yakawuya nawo sunga ku Nazaleti. Yakawa ne cihuliko kuli wene. U nyina yakazikamisa zinghani zizi zose mu nhumbula yakwe. ⁵² Nayo Yesu yakajendelela mu mahala no wuwiluce, nayo yakacila kwendwa no Mulungu ne wanhu.

¹ Mu mwaka we likumi na mihano wo wutemi wa Kayisali Tibeliya, Pontiyo Pilato yali mutemi wa Yudiya, na Helode yali mutemi wa Galilaya, no mwanakwawe Filipo yali mutemi wa zi’si za Ituleya na Telakoniti, nayo Lusaniya, yali mutemi wa Abilene, ² na Anasi na Kayafa wali wo wukohani wuwaha. Mu cipango cico, i nghani yo Mulungu yikamuziza Yohana u mwana wa Zekaliya ku nyika. ³ Yohana yakabita mu yisi yose yono yipilime Yoludani, yakawa kuganula vyono yiwanojeye wanhu wanene no kubaputizwa, ho Mulungu yawawusize wubi wawo. ⁴ Nha vyono yandikwe mu citabu co muwizi Isaya, “Lizi lya munhu likuhulikwa ku nyika, Nozelezenyi nzila yo Muwaha, Gololenyi wukolo wakwe, ⁵ Malolo gose gafucilizwe, Ne matunda ne vigongo vyose vitenjelemulwe, Ne vipeto vigololwe, Ne zinzila zono zina makombo zitelemezwe. ⁶ Ne wanhu wose wowona u wukombozwe wo Mulungu.” ⁷ Holeka yakawalonjela wanhu wenji wono wamubitilaga ho yawabaputize, “Anye nyo zindelo ze zinzoka, mono yamusugulenyi mutize likuwo lyo Mulungu lyono likuza nani? ⁸ Holeka mulajile mu metumo genyu nha vyono mwakondya kunena.” Hamba mulece kwamula kutya mu wiganicize wenyu, “Ase Abulahamu yo sogo yetu.” Ane nghumulonjelenyi mbeka, vyono Mulungu yadahile kugapitula i mabwe gaga gawe wana wa Abulahamu. ⁹ Sunga nalu nhemo mbikwe ha masina ge mabici, no mubici wo wose wono siwukulela mikalo miswanu, wotemangwa no kutajilwa mu moto. ¹⁰ Wanhu wenji wakamuwuza wakutya, “Alu citende wule?” ¹¹ Yakapitula yakawatya, “Mono yena misweko myejete, yamugawile muyagwe mono yasina, na mono yena ndigwa, yatende nhavivyo.” ¹² Watoweza kodi nawo wakaza ho wabaputizwe, wakamuwuza, “Gwe mwijizi, na’se ma citende wule?” ¹³ Yakawatya, “Mulece kutoweza kodi kuciza nha vyono mwalajilizwa.” ¹⁴ Ne wasilikale nawo wakamuwuza wakutya, “Ase ma, nase citende wule?” Yakawatya, “Mulece kogofya munhu, hamba kuwasolela wanhu vinhu vyawo kwe vilungo, hamba kumusonjeza munhu wo wose ko wulambi, mukwizwe ne misahala yenyu.” ¹⁵ Vyono wanhu walanjililaga cinji, wakawa kwiwuza mu zinhumbula zawo za Yohana, “Alu yidahice lunji yo mwene Kilisito?” ¹⁶ Yohana yapitula yakawatya wose, “Ane nghumubaputizenyi mu malenga, ninga yakuza mono yali vilungo kuciza ane, hamba si nghwiliye kukowolola mikowa ye malatu gakwe, mwene komubaputizenyi mu Muhe Mono Yelile na mu Moto. ¹⁷ U mwene yenha munhu mono yebate luheneko mu mawoko gakwe, ho yezeze lukulu cuga cakwe, no kututicila wuhemba mu nyumba yakwe; ninga mawaje yagaticimize no moto wono si wuzimaga.” ¹⁸ Hamonga ne zinghani zinji nyinji, Yohana yakawakong’onheza i wanhu akuno yakuwaganulila Luganuzi Luswanu. ¹⁹ Ninga Yohana yamutacila Helode u muwaha we yisi ku soko vyono yali yamusolile Helodiya u mugolece wo mwanakwawe, no kumutola, na ku so mabi gose gono yatendaga Helode. ²⁰ Na Helode yakonjeleza wubi wakwe so kumudindila Yohana mu jela. ²¹ Kukawa waza kubaputizwa wanhu wose, Yesu nayo yakabaputizwa, na lono yalombaga, wulanga wukagubuka, ²² no Muhe Mono Yelile yakamutimila, futa yakwe, yehwanile nziwa, lizi likalawa ku wulanga likutya, “Agwe yo gwegwe Mwanangu mwendece, mono nyendezwe nagwe.” ²³ Yesu mweneco lono yamulila u witumami wakwe calinze, yali yaficile nha myaka makumi madatu, ne wanhu waganicizaga vyono mwene yo mwana wa Yusufu mwana wa Heli. ²⁴ Heli yali mwana wa Matati, mono yali mwana wa Lawi, mwana wa Meliki, mwana wa Yanayi, mwana wa Yusufu, ²⁵ mono yali mwana wa Matatiya, mwana wa Amosi, mwana wa Nahumu, mwana wa Hesili mwana wa Nagayi, ²⁶ mono yali mwana wa Maati, mwana wa Matatiya, mwana wa Semeyini, mwana wa Yoseki, mwana wa Yuda, ²⁷ mono yali mwana wa Yowanani, mwana wa Lesa, mwana wa Zelubabeli, mwana wa Salatiyeli, mwana wa Neli, ²⁸ mwana wa Meleci, mwana wa Adi, mwana wa Kosamu, mono yali mwana wa Elimodomu, mwana wa Eli, ²⁹ mono yali mwana wa Yoshuwa, mwana wa Eliyezeli, mwana wa Yolimu, mwana wa Matati, mwana wa Lawi, ³⁰ mono yali mwana wa Simiyoni, mwana wa Yuda, mwana wa Yusufu mwana wa Yonamu, mwana wa Eliyakimu, ³¹ mono yali mwana wa Meleya, mwana wa Mena, mwana wa Matata, mwana wa Natani, mwana wa Dawudi, ³² mono yali mwana wa Yese, mwana wa Obedi, mwana wa Bowazi, mwana wa Salimoni, mwana wa Nasoni, ³³ mono yali mwana wa Aminadabu, mwana wa Adimini, mwana wa Alini, mwana wa Hezeloni, mwana wa Pelezi, mwana wa Yuda, ³⁴ mono yali mwana wa Yakobo, mwana wa Isaka, mwana wa Abulahamu, mwana wa Tela, mwana wa Naholi, ³⁵ mono yali mwana wa Selugu, mwana wa Leyu, mwana wa Pelegu, mwana wa Ebeli mwana wa Sela, ³⁶ mono yali mwana wa Kayinani, mwana wa Alipakishadi, mwana wa Semu, mwana wa Noha, mwana wa Lameci, ³⁷ mono yali mwana wa Metusela, mwana wa Enoci, mwana wa Yaledi, mwana wa Mahalaleli, mwana wa Kayinani, ³⁸ mono yali mwana wa Enosi, mwana wa Seti, mwana wa Adamu, mono yali wo Mulungu.

¹ Ale Yesu yawuyaga yakulawa kwi’kolongo lya Yoludani, yamemile Muhe Mono Yelile, yakatongwa no Muhe yabite ku nyika. ² Yekala kuko ku nyika vilo makumi mane yakujelwa na Setani. Nayo si yalizaga cinji mu vilo vivyo vyose, navyo vyaza puluta, yakadabuka. ³ Holeka Setani yakamutya, “Hono yo gwegwe Mwana wo Mulungu, wulonje libwe lili liwe mukate.” ⁴ Yesu yakamupitula, yandikwa “Munhu si ko kwikala mumi so ndigwa du.” ⁵ Hanyuma Setani yakamutegula hacanyha, hanhu hono hali henucile, yakamulajila matemi gose ga kononze lwa kamonga. Setani yakamutya, ⁶ “Nokupela gwegwe vilungo vivi vyose, ne zinhojo zayo; hambi nha nakombolelwa nene, na muli wose mono nyendile, nghumupela. ⁷ Ale hono wufugame hali nene, vivi vyose vyowa vyako.” ⁸ Nayo Yesu yakapitula yakamutya, “I Mandiko gakutya, ‘Komuhemba Mulungu wako, no komwitumamila mweneco yali wene du.’ ” ⁹ Setani yakamutegula ku Yelusalemi, yakamuwika mucanyha ye litembe lye Nyumba yo Mulungu, yakamutya, “Hono yo gwegwe mwana wo Mulungu, wilugaje baha sunga ho hasi, ¹⁰ hambi nha yandikwa: ‘Kokulajiliziza Wamalayika wakwe wakukamise,’ ¹¹ kanyhi, ‘Wokwambilila mu mawoko gawo. Ho wulece kwikobala mugulu wako mwibwe.’ ” ¹² Yesu yakapitula yakamutya, “Yandikwa, ‘Wulece kumujelo Muwaha Mulungu wako.’ ” ¹³ Nayo Setani yaza kukondya majelo gose, yakawa kumuleka hadodo. ¹⁴ Baho Yesu yakawuya ku Galilaya kuno yamemile vilungo vyo Muhe Mono Yelile. Ne zinghani zakwe zikatandala mu yisi yose yono yipilime. ¹⁵ Nayo yejizaga wanhu mu matang’anilo gawo go wuhembelo akuno yakulumbwa na wose. ¹⁶ Yesu yakabita ku Nazaleti kono yawilucila, yakenjila mu nhang’anilo yo wuhembelo mwizuwa lye sabato nha vyono yali yazoweye, yakema yasome Mandiko Gono Gelile. ¹⁷ Yakapegwa citabu co muwizi Isaya, yakacigubula hanhu hono hali handicigwe nhavi, ¹⁸ “U Muhe wo Muwaha yali muli nene Kasiwanula, ho niwaganulile waciwa Luganuzi Luswanu, Kanhuma niwalonjele wono wafunjigwe, nha vyono wowopolelwa, Ne wabofu, vyono wowona kanyhi, ¹⁹ Kanhuma ho niwakomboze wono wakwiwonelwa, no kuwalonjela i cipango cono u Mulungu kowakomboza wanhu wakwe.” ²⁰ Yaza kukondya kusoma, yakacigubika icitabu, yakamupela u mwitumami, yakekala, ne meso ga wose wono wali wali mu nhang’anilo yo wuhembelo gakawa gamulanjile. ²¹ Nayo yakamula kuwatya, “Izuwa lili nha vyono muhulice lwandiko lulu lukusomwa, lwakondya kufisilizwa.” ²² Wose wakendezwa nayo, wakezina so zinghani ziswanu zono yalonga, wakatya, “Yuyu si yo mwana wa Yusufu?” ²³ Yakawatya, na lunji mononjela nghani yiyi, “Go muganga, wilagule go mweneco, na kanyhi motya, ‘Muli zose zono cahulika wukwituma ku Kapelanawumi, wuzitumaje na baha kanyhi mwitumbi lyako.’ ” ²⁴ Yakawatya, “Mbeka nghumutyenyi, hasina muwizi mono kavumilwaga mu yisi yakwe mweneco. ²⁵ Ninga mbeka nghumutyenyi, kwali kowali wafwile wenji mu Isilayeli mu vilo vya Eliya, lono wulanga wukadindwa myaka midatu na myezi mutandatu, kukawa na nzala mbaha mu yisi yose. ²⁶ Hamba nhavivyo, Eliya si yatumwa kuli yunji wowose, langa yatumwa kuli mucekulu mufwile du wa ku Saleputa mu yisi ya Sidoni. ²⁷ Kanyhi mu yisi ya Isilayeli, mu cipango ca Eliya muwizi, kwali kowali watamwa wenji wo wukoma, hamba nhavivyo hasina wowose mono yakwemwa, langa hono si Namani du munhu wa Suliya.” ²⁸ Na wose wono wali wali mu nhang’anilo yo wuhembelo, waza kuzihulika zizo, wakakolwa nelikuwo, ²⁹ wakenuka, wakamulavyaniza Yesu kunze ye likaya lyawo, lyono lyali lizenjigwe mucanyha ye cigongo, wakamutegula sunga ku nhenenhuko ye cigongo cico, ho wamugumile hasi. ³⁰ Ninga Yesu yakakolela haciligati yawo yakawa kubita. ³¹ Hanyuma Yesu yakabita kwitumbi lya Kapelanawumi, mu yisi ya Galilaya yakawa kuwejiza mwizuwa lye Sabato. ³² Wakezina so wulajilize wono yali yena nawo mu wijize wakwe. ³³ Mumo mu nhang’anilo yo wuhembelo mwali moyuli munhu mono yali yena muhe we licisi lyavu, yakabalaluka ne lizi iwaha, yakutya. ³⁴ “Gwe Yesu wa Nazaleti, cina nghanici nagwe? Alo kuza wucongomeze? Nghumanyile gwegwe yo nani, yo Gwegwe Mono welile wo Mulungu.” ³⁵ Ninga Yesu yakalitacila yakutya, “Nyamale, wuwuce muli munhu yuyo.” Ne licisi lyaza kumubamiliza hasi, haciligati yawo, likawa kuwuka muli munhu yuyo, hamba kumutamisa yaye. ³⁶ Wose wakezina, wakawa kulongana weneco wose, wakutya, “Ayi yo nghani yo wizine, hambi nha ko wusume no wulajilize, yakugalajiliza i macisi gawuce, nago gakuwuka.” ³⁷ Ne zinghani za Yesu zikatandala hanhu hose mu yisi yiyo. ³⁸ Yesu yakawuka mu nhang’anilo yiyo yo wuhembelo, yakenjila mu nyumba ya Simoni, u mukwewe we cicekulu wa Simoni, yali yebatwe na mhungo mbaha, wakamulomba yamuponye, ³⁹ Yesu yakema behi nayo, yakayitacila mhungo, nayo yikamuleka. Ho baho yakawa kwinuka no kuwetumamila. ⁴⁰ Lono lizuwa lyali lyeza behi no kugwila, wose wono wali wena watamwa we matamwa ge hayo hayo, wakawaleta kuli mwene, nayo yakawawicila miwoko yakwe wose, yakawaponya. ⁴¹ Ne macisi gakalawa muli wenji, gakubalaluka, gakutya, “Yo gwegwe Mwana wo Mulungu.” Ninga Yesu yakagatacila, hamba si yagaleka galonje, hambi nha gali gamumanyile vyono yo Kilisito. ⁴² Ale waza kwela, Yesu yakabita hanhu hono hasina wanhu, ne wanhu wakawa kumulondola, na waza muwona, wakahila kumugoma yalece kuwuka kwawo. ⁴³ Ninga mwene yakawatya, “Yinojeye nganule Luganuzi Luswanu lo wutemi wo Mulungu na mu matumbi ganji, hambi nha co caleka nghatumwa.” ⁴⁴ Yakawa kuganula mu matang’anilo go wuhembelo ga ku Yudiya.

¹ Izuwa linji Yesu yali yemile ha nhumbi ye lilamba lya Genesaleti, ne wanhu wenji wali wamupilime, wakuyihuliciza Nghani yo Mulungu, ² yakawona ngalawa nyejete zili ha mwejelele we lilamba; ninga wanimula zisomba wali walawaniza wakuzikwema zinyavu zawo, ³ Yesu yaza kwinjila mu ngalawa yimonga yono yali ya Simoni, yakamusaka Simoni yayitezeze mu malenga kutali hadodo no mwejelele we lilamba, yakekala mu ngalawa yakagejiza mapuga ge wanhu yekaye mu ngalawa. ⁴ Yaza kondya kulonga, yakamutya Simoni, “Wuyitezaje i ngalawa sunga ha cisolo, mukazitajile zinyavu zenyu ko wunimule we zisomba.” ⁵ Simoni yakapitula yakatya, “Muwaha, cititilika cilo cose sunga wela cikunimula somba, hamba kutuga cinji, ninga ku so wulonje wako, nozitajila zinyavu.” ⁶ Nawo waza noza nhavivyo, wakatuga somba nyinji muno, sunga ne zinyavu zawo zikanza kudemuka, ⁷ wakawacema wayawo wono wali mu ngalawa yinzagwe, waze wawataze, nawo wakaza, wakazimemya zisomba mu zi ngalawa zose vyono nyejete, sunga zikawa behi no kudodomela. ⁸ Simoni Petelo yaza kuziwona zizo, yakafugama hamwande ya Yesu, yakutya “Wuwuce hono hangu, Gwe Muwaha, hambi ane nha nili munhu mubi.” ⁹ Simoni hamonga ne wayagwe wose, wezina ku soko yo wunimule we zisomba nyinji nhavivilya. ¹⁰ Yakobo na Yohana nawo nhavivyo, wana wa Zebedayo, wono wali wahanjile na Simoni. Yesu yakamutya Simoni, “Wulece kogopa, vyono wukulawa lulu kowa kuwanimula wanhu.” ¹¹ Nawo waza kuzileta zingalawa zawo kwi’sangha, wakaleka vyose, wakamutyatya. ¹² Kukawa Yesu lono yali mu kaya yinji, mwali na munhu mutamwa wa wukoma muwili wose, nayo yaza kumuwona Yesu, yakafugama yakamunena Yesu yakutya, “Gwe go Muwaha, hono wende, kosuma kunghwema.” ¹³ Yesu yakagolola muwoko wakwe, yakamupamiza, yakutya, “Nyendile wukwemwe.” Lo lulolulo wukoma wukamuleka. ¹⁴ Nayo Yesu yakamutya “Wulece kumulonjela yunji: langa wubite, wukelajile kuli mukohani, wukalavye cilavywa so wezwe wako, nha vyono Wulajilize wa Musa wukutya, ho wuwe wuhomelezi kuli wene vyono wapona.” ¹⁵ Ninga zinghani za Yesu zikacila kumanyika hanhu hose. Ne wanhu wenji wakekonghola ho wamuhulicize, no kuponywa wutamwa wawo. ¹⁶ Ninga mwene yakabita hanhu hono hasina wanhu no kulomba. ¹⁷ Kukawa mwizuwa linji lono Yesu yejizaga: Wafalisayo ne wejizi wo Wulajilize, wono walawa ku vitumbi vyose vya Galilaya na Yudiya na Yelusalemi wali wekaye baho; ne vilungo vyo Mulungu vyo kuponyezya watamwa vikawa muli mwene. ¹⁸ Hobaho wakaza wanhu wamudinghuye mu citanda munhu mono yali yadejepe muwili wose; wakajela kumwinjiza kugati, wamuwice hali Yesu. ¹⁹ Ninga so winji we wanhu, si watuga nzila yo kwinjilila, holeka wakapula mwi’tembe, wakamutimizya mutamwa mwi’langa, hamonga ne citanda cakwe sunga ho hali Yesu. ²⁰ Yesu yaza kuwona wihuwilo wawo vyono wuwaha, yakamutya yuyo munhu. “Mwendece, kunenelwa wubi wako.” ²¹ Wejizi wo Wulajilize ne Wafalisayo wakanza kwihwesa, wakutya, “Yuyu yo munhu ci, mono yakumutovula Mulungu? Hasina munhu mono kosuma kunenela wubi, langa hono si Mulungu yali wene.” ²² Ninga Yesu yakawatanga mahweso gawo, yakapitula yakawatya, “Alo mukwihwesa cici mu zinhumbula zenyu?” ²³ Ya hayi yono mhelu, kutya Kunenelwa wubi wako, hamba kutya winuce wujende? ²⁴ Ninga nyendile mumanye vyono u Mwana wo Munhu yena Wulajilize kono’nze kunenela wubi. Baho yakamutya munhu mono yali yadejepe, “Winuce, wudinghule citanda cako wubite ku kaya.” ²⁵ Hobaho munhu yuyo mono yali yadejepe, yakenuka ha mwande ya wose, yakadinghula citanda cakwe, yakabita ku kaya, akuno yakumukumyo u Mulungu. ²⁶ Wose wakezina no kwibatwa no woga, wakamukumya Mulungu, wakutya, “Nye, ciwona mezino zuwali!” ²⁷ Hanyuma yayo Yesu yakalawila, yakamuwona mutoweza kodi yunji litagwa lyakwe Lawi yekaye mu hofisi, Yesu yakamutya “Wunhyatye.” ²⁸ Nayo yakavileka vyose, yakamutyatya. ²⁹ Yuyo Lawi, yakamunozeza Yesu zindigwa mu nyumba yakwe. Hakawa yipuga yiwaha lye watoweza kodi, na wanji wono wali vikalane nawo ha zindigwa. ³⁰ Wafalisayo ne wejizi wo Wulajilize wakawang’ung’ulicila wejizwa wakwe; wakutya, “Alo so cici mukulizana kanyhi mukung’wezana ne watoweza kodi ne wanyo wubi?” ³¹ Yesu yakapitula yakawatya, “Iwanhu waswanu si wakusaka muganga; langa walya wono watamigwe. ³² Hambi nha si naza kuwacema i wanhu waswanu, langa i wanyo wubi, ho wanene.” ³³ Nawo wakamutya Yesu, “Kenji wejizwa wa Yohana walekaga kulya, kanyhi walombaga; ne wejizwa we Wafalisayo nawo wanozaga nhavivyo; ninga wejizwa wako, walizaga kanyhi wang’wezaga.” ³⁴ Nayo Yesu yakawatya, “Mosuma ’mbi kuwasaka i walalikwa ha halusi, walece kulya lono wakali wena na bwana halusi? ³⁵ Ninga vilo vyolokuza; kolo wasolelwa bwana halusi, ho wololecela kulya mu vilo vivyo.” ³⁶ Yesu yakawalonjela cihwanicizo; “Hasina munhu mono kademulaga cilaka mu civwalo cipya, yaciwicile mu civwalo cihuma, na hono yanoze nhavivyo, kowa yademula civwalo cipya, ne cilaka cico ce civwalo cipya hamba si vyosuma kwiling’anila ne civwalo cihuma. ³⁷ Hamba hasina munhu mono katajilaga divayi mhya, mu mifuko ye zinyhingo zihuma, hambi divayi mhya nha yoyibahula i mifuko, nayo divayi yokwitika, ne mifuko yohodanjika. ³⁸ Langa divayi mhya, yinojeye kutajilwa mu mifuko ye zinyhingo zimhya. ³⁹ Hamba hasina munhu mono kosulumila kanyhi kung’wa divayi mhya, lono yakondya kung’wa divayi huma, hambi nha yakutya, ‘Divayi huma yo swanu muno.’ ”

¹ Mwi’zuwa linji lye Sabato, Yesu yakakola mu migunda yo wuhemba; Wejizwa wakwe wakabena maso go wuhemba, wakagafijiha ne miwoko, wakasola zimhece wakalya. ² Ninga Wafalisayo wanji wakawawuza, “Nhawulenyi mukwituma yono yili mwiko mwizuwa lye Sabato?” ³ Yesu yakapitula yakawatya, “Alo nghani yiyi si mwasoma, vyono yetuma Dawudi, mwene hamonga na wono yali yena nawo, mwipango linji lono wali wadabuka? ⁴ Vyono yenjila mu Nyumba yo Mulungu, yakalya i mikate yono yali cilavywa kuli Mulungu, yakawapela ne wayagwe wono yali yena nawo; mikate yono yali miwikwe hali, langa wakohani du wali wene?” ⁵ Yesu yakawatya, “U Mwana wo Munhu yo Muwaha we Sabato.” ⁶ Kukawa mu Sabato yinji, Yesu yakenjila mu nhang’anilo yo wuhembelo, yakejiza, na mumo mwali na munhu mono muwoko wakwe wo kulume wali wudejepe. ⁷ Wejizi wo Wulajilize ne Wafalisayo, wasakaga watuje nghani yo kumusonjezeza Yesu, holeka wakawa walindiye wawone hono komuponya munhu yuyo mwizuwa lye Sabato. ⁸ Ninga Yesu yakawamanya i mahweso gawo, yakamutya u munhu wo muwoko wono wudejepe “Winuce, wime haciligati.” ⁹ Yakenuka yakema haciligati. Yesu yakawatya, Nghumuwuzenyi, “Wulenyi, mwiko lu kwituma viswanu mu Sabato, hamba kwituma vibi? Kuponya wumi, hamba kwajiliza?” ¹⁰ Yaza kuwalanga wawalya wose wono wali wali baho, yakamutya yuyulya munhu, “Golola muwoko wako.” Nayo yakawugolola; no muwoko wakwe wukawa kunoga. ¹¹ Ninga wene wakakolwa muno ne likuwo, wakalongana weneco wose vyono wosuma kumutendela vibi Yesu. ¹² Lizuwa linji Yesu yakabita kwi’tunda, kulomba; yakekala kuko cilo cose sunga wukela, yakumulomba Mulungu. ¹³ Waza kwela, yakawacema wejizwa wakwe, yakahagula muli wene, wanhu yikumi na wejete, wawo yakawacemela litagwa lye “Watumwa.” ¹⁴ Simoni mono Yesu yamupela litagwa lya Petelo na Andeleya mwanakwawe, na Yakobo na Yohana, na Filipo na Batolomayo, ¹⁵ na Matayo na Tomaso, na Yakobo na Alifayo, ¹⁶ na Simoni mono yacemwaga Zelote, na Yuda na Yakobo, na Yuda Musikaliyota, mono hanyuma yakamugaluka Yesu. ¹⁷ Yaza kutima kwi’tunda hamonga nawo, Yesu yakema hanhu hono hali hali wuhihi, hatendemaye, na baho hali howali Wejizwa wakwe wenji, no winji we wanhu wono walawa mbavu zose za Yudiya, na Yelusalemi, na ku mhwani yose ya Tulo na Sidoni, wose wakaza wamuhulicize Yesu, no kuponywa zinhamwa zawo. ¹⁸ Na wono wagazagwa ne macisi, wakaponywa. ¹⁹ Ne wanhu wose wasakaga wamupamize, hambi vilungo nha vyalawaga muli mwene, vikawaponya wose. ²⁰ Yesu yakawapitucila wejizwa wakwe yakatya, “Muli wamoti nyo waciwa: hambi wutemi wo Mulungu nha wenyu. ²¹ Muli wamoti ’nye mono muli nzala alu, hambi nha molokwigutywa. Muli wamoti ’nye mono mukulila alu, hambi nha moloseka. ²² “Muli wamoti ’nye, kolo wanhu wakumusulenyi, na kolo wakumusiwanulenyi, no kumulijenyi, no kuliviza litagwa lyenyu nha wetuma vibi, ku soko yo Mwana wo Munhu. ²³ Mu cidaha cico zilakwijela zizo, nhondo muze musecelele mwizuwa lilyo so nyemo. Hambi wuhumbilizwe wenyu nha wuwaha ku wulanga. Hambi walezi zawo nha vyo wawatendela i wawizi. ²⁴ Ninga woyi he ’nye mono muli wagoli! Hambi nha mwapegwa mwakondya wusindamice wenyu. ²⁵ Woyi he ’nye mono mwigute aluno, hambi nha molodabuka. Woyi he ’nye mono mukuseka aluno, hambi nha molokalala no kulila. ²⁶ Woyi he nye kolo wakumulumbizenyi wanhu wose, hambi walezi wawo nha vyo wawatendela i wawizi wo wulambi.” ²⁷ “Ninga ane nghumutyenyi anye mono mukuhuliciza, Muwendaje i walugu wenyu, muwatendelaje viswanu wono wakumusulenyi. ²⁸ Muwalugutize wono wakumulijitenyi, muwalombele wono wakumutendelenyi vibi. ²⁹ Munhu hono yakutowe mu luzagasa lumonga, wumupitusize no luzagasa luyagwe; munhu hono yakuboce likoti lyako, wumulecelaje ne shati yako. ³⁰ Muli wose mono yakukulomba cinji, wumupelaje, na mono yakukusolela sawo yako, wulece kuyisaka yakugomolele. ³¹ Muwatendelaje wanhu wose, nha vyono anye mukusaka wene wamutendelenyi nyenye. ³² “Hambi hono muwe kuwenda du wono wakumwendenyi, mowa mwina lilumboci? Hasina. Ku soko hamba ne wanyo wubi nawo, nha wetumaga nhavivyo. ³³ Na hono muwe kuwatendela viswanu wono wakumutendelenyi viswanu du, mowa mwina lilumboci? Hambi nha sunga ne wanyo wubi nawo nha watendaga nhavivyo. ³⁴ Na hono muwe kuwakopesa wono mwitumbiye vyono womugomolelenyi kanyhi, mowa mwina lilumboci? Ku soko sunga ne wanyo wubi nawo nha wawakopesaga i wanyo wubi wayawo, ho wagomolelwe kanyhi vyono viling’aniye. ³⁵ Vyo si yinha, ninga muwendaje walugu wenyu, muwatendelaje viswanu, mweze kuwakopesa, kuno si mukulanjilila kugomolelwa. No wuhumbilizwe wenyu wowa wuwaha, nanye mowa wana wo Mulungu Mono Yalawiliciye Muli Vyose: hambi mwene nha muswanu kuli wono wasina lilumbo na kuli wabi. ³⁶ Mweze no lusungu nha vyono u Sogo yenyu yali lusungu.” ³⁷ “Mulece kuwaling’aniza wanji, nanye ho si moling’anizwa no Mulungu, mulece kuwahosa wanji, nanye si molohoswa: muwanenelaje wanji, nanye molonenelwa. ³⁸ Wapelenyi wanji vyono wakusaka, nanye molopegwa, Heya molobocela mu miwoko yenyu cipimo ciswanu cisindilwe, cisinjisizwe, cono cimemeleceye, no kumwajika. Hambi nha mu cipimo cicilya du cono mwitumamilaga kuli wanji, co cico du cono Mulungu nayo kolomujelelenyi na nyenye.” ³⁹ Yesu yakawalonjela cihwanicizo cici “Wulenyi, u mubofu kosuma ’mbi kumutonga mubofu muyagwe? Hamba hadodo, wose wogwila mwikombo. ⁴⁰ U mwijizwa kowa nho mwijizi wakwe. ⁴¹ Kosuma nhawule kuciwona cilagala cono cili mu liso lyo nduguyo, hamba si kukumbucilaga libici lyono lili mu liso lyako go mweneco? ⁴² Hamba kosuma nhawule kumutya nduguyo, ‘Ndugu yangu, leka ta nghuwuse i cilagala cono cili mu liso lyako, na akuno si wukulanga libici lyono lili mu liso lyako go mweneco?’ Go mukoci ’gwe, wamule kuwusa libici lyono lili mu liso lyako, ho kosuma kuwona viswanu no kusuma kuwusa icilagala cono cili mu liso lyo nduguyo.” ⁴³ “Hasina libici liswanu lyono lilelaga mikalo mibi, hamba libici libi lyono lilelaga mikalo miswanu. ⁴⁴ Wanhu wawutanjilaga mubici mu mikalo yayo. Kanyhi yili calinze, vyono, wanhu si wahepaga mikuyu mu mamivya, hamba si wahepaga zabibu mu mabijili. ⁴⁵ Munhu muswanu, kalavyaga ziswanu kulawa mu viwutwa vyakwe vya mu nhumbula yakwe. No munhu mubi nayo kalavyaga izimbi kulawa mu viwutwa vyakwe vya mu nhumbula yakwe, hambi munhu nha kalongaga kulawa muli zono zimemile mu nhumbula yakwe.” ⁴⁶ “Nghuwona mukunyitya, ‘Muwaha, Muwaha,’ akuno si mukwituma zono nghulonga? ⁴⁷ Nomulonjelenyi cihwanicizo cono cokwila, kulajila vyono yenha mono yakunyiziza, no kuzihulika zinghani zangu no kuzituma. ⁴⁸ Yuyo yehwanile munhu mono yakuzenga kaya, mono yahimba hasi muno, no kuwika musinji wa mabwe, gakaza malenga menji, gakayikundujiza kaya yiyo, hamba kuyisinjisa ng’o, vyono yali yizenjigwe mu musinji wono wukamile. ⁴⁹ Ninga mono yakuzihulika zinghani zangu, hamba kwituma cinji, yuyo yehwanile munhu mono yazenga kaya yakwe mu muhangha caka du, hamba kuwicila musinji, malenga gakayikundujiza kaya yiyo, nayo yikagwa no kuhodanjicila lukulu.”

¹ Yaza kukondya kulonga zinghani zakwe zose hali wanhu, Yesu yakabita ku Kapelanawumi. ² Kuko kwali na muwaha we wasilikale yigana, Mulumi, mono yali yena mwitumami wakwe mono yali yamwendile muno. Mwitumami yuyu yali yatamigwe yeza yali behi no kufwa. ³ Nayo yaza hulika za Yesu, yakamutumila i walongola wanji we Wayahudi, wabite wakamulombe Yesu ho yaze yamuponye mwitumami wakwe. ⁴ Nawo wazafika kuli Yesu, wakamunena muno, wakutya “Ayu yanojeye wumutendele nghani yiyi, ⁵ hambi nha yawendile wanhu wetu, nayo yo mwene mono yacizenjela ne nhang’anilo yetu yo Wuhembelo.” ⁶ Yesu yakabitana nawo. Na lono yali yasejelela behi ne kaya, yuyo muwaha we Wasilikale yigana, yakamutumila wendece wakwe wamulonjele Yesu. “Muwaha wulece kwigaza, hambi ne nha si nghwiliye agwe winjile mu kaya yangu. ⁷ Kanyhi nane nghwiwona vyono si nghwiliye kuza kuli gwegwe; ninga wulonje du, no mwitumami wangu kopona. ⁸ Hambi nane nha nili hasi yo wulajilize we wawaha, nina wasilikale wangu. Nane nghumutya ayu, ‘Bita’ nayo yakubita, nghumutya yunji, ‘Wuze’ nayo yakuza, na hono nimutye mwitumami wangu, ‘Wunoze nhavi,’ nayo yakunoza.” ⁹ Yesu yaza kuhulika zizi, yakamwizina no kumukumya yuyulya u muwaha we wasilikale. Hanyuma yakawapitucila we lipuga lye wanhu wono wamutyatyaga, yakawatya. “Nghali nawona wihuwilo wuwaha nha wuwu, hamba mu Isilayeli.” ¹⁰ Nawo wono watumwa waza kuwuya ku kaya, wakamwagana yuyulya mwitumami yanoga. ¹¹ Hanyuma hadodo, Yesu yakabita kwitumbi lyono litezagwa Nayini, Wejizwa wakwe hamonga na wanhu wenji, wakabitana nayo. ¹² Ale, yaza sejelela he ’lango liwaha lyo kwinjilila mwi’kaya, yakawona wanhu wadinghuye muzelelo mono yafwiye, mwana we ciwene wo mucekulu mufwile. Wanhu wenji wa mwi’kaya lilyo, wali wali hamonga no mucekulu yuyo. ¹³ Nayo Muwaha yali yeza kumuwona mucekulu yuyo, yakamuwonela lusungu, yakamutya, “Wulece kulila.” ¹⁴ Yakasejelela behi, yakacipamiza citanda cono wali wamudinghuliye mono yali yafwiye, nawo wono wali wamudinghuye wakema. Nayo Yesu yakatya, “Muzelelo, nghukulonjela, Winuce.” ¹⁵ Yuyo mono yali yafwiye, yakenuka, yakekala, no kwamula kulonga. Na Yesu yakamupelo nyina. ¹⁶ Wanhu wose wakebatwa no woga, wakamulumba u Mulungu, wakutya, “Muwizi muwaha kalawila mwetu; no Mulungu kaza kuwakomboza wanhu wakwe.” ¹⁷ Ne nghani yakwe yiyi yikamanyika mu Wuyahudi mose, na mu yisi yose yono yipilime. ¹⁸ I wejizwa wa Yohana, wakamuganulila Yohana zizo zose, Yohana yakawacema wejete, wayagwe ne wejizwa wakwe, ¹⁹ yakawatuma wabite kuli Muwaha wakamuwuze “Alu agwe! Yo yulya mono yakuza, hamba cimulanjilile yunji?” ²⁰ Wejizwa wawo wejete waza kumubitila Yesu, wakatya, “Yohana u Mubaputizi kacituma kwako cikuwuze: ‘Ati! Yo gwegwe mono yakuza, hamba cimulanjilile yunji?’ ” ²¹ Mu cipango cico, Yesu yakawaponya wenji mu zinhamwa, no wugazwe, ne macisi, ne wabofu wenji yakawapela wuwone. ²² Yesu yakawapitula yakawatya, “Mubite mukamulonjele Yohana zono muwene na zono muhulice; i wabofu wakuwona, wono wali citewe wakujenda viswanu, wono watamigwe wukoma wakukwemwa, ne waciwa wakuganulilwa u Luganuzi Luswanu. ²³ Yo mumoti mono si yakuwona cikobazo muli nene.” ²⁴ Waza kutuluka wono watumwa na Yohana, Yesu yakanza kuwalonjela mapuga ge wanhu, za Yohana. “Mwene mwabitaga kunyika kulanga cici?” Mwasakaga kuwona lihanze lyono lyayumvywagwa ne mbeho? ²⁵ Ninga mwabitaga kulanga cici? Mwabitaga kumuwona munhu mono yavwalile vivwalo vye cimalidadi? Lanjenyi, wono wena vivwalo vyo lukumyo, no kwikala mu mikalile yo wumote wa za mononze, wekalaga mu zinyumba ze watemi! ²⁶ Ta munonjelaje, mwalawa kulanga cici, Mwabitaga kumuwona muwizi lo? Heya, mbeka mono yamucizize no muwizi. ²⁷ Yuyu Yohana yo yakulongwa mu Mandiko Gono Gelile, “Langa ta, nghumutuma mutumwa wangu, yakutyo Muwaha, nghumutuma yakulongolele no kukunozelezeza nzila.” ²⁸ Yesu yakatya, “Mu wana wose we wanhu, hasina mono yamucizize Yohana u Mubaputizi. Hamba nhavivyo, u mudodo muno mu wutemi wo Mulungu yo muwaha si nho mwene.” ²⁹ Wanhu wose ne watoweza kodi, wali weza hulika, wakawukumya u wuswanu wo Mulungu, wawo wo wawo, wono wali wakondya kubaputizwa mu wubaputizo wa Yohana. ³⁰ Ninga Wafalisayo ne wejizi wo Wulajilize, wakawulema wuhile wo Mulungu wono wali wuwanojeye, wakalema sunga no kubaputizwa na Yohana. ³¹ Yesu yakajendelela kutya: “Holeka nowehwananiza wanhu we ndelo yiyi na cinhuci? Wo wanhu wono wenha wule? ³² Wenha wana wadodo wono wekaye mu Sokoni, wono welonjelaga awa na walya; wakutya, Cimutowelenyi zifilimbi, nanye hamba kuvina ng’o, calila nanye hamba kulila ng’o. ³³ Hambi Yohana u Mubaputizi nha yaza si yalizaga ndigwa, hamba si yang’wezaga divayi, nanye mukatya, Yena lukwale. ³⁴ U Mwana wo Munhu nha yaza, yakulya no kung’wa, nanye mukatya, Langa ta munhu ’yu mubuguci, na mung’wa divayi, mwendece we watoweza kodi ne wanyo wubi! ³⁵ Hamba nhavivyo, I mahala go Mulungu gejela vyono maswanu kuli wose wono wakugavumila.” ³⁶ Mufalisayo yunji yakamusaka Yesu yalye ndigwa kwakwe. Nayo yakenjila mu nyumba ya yuyo Mufalisayo yakekala yalye ndigwa. ³⁷ Na mwitumbi lilyo, mwali moyuli mucekulu yunji mono yali yena mikalile mibi. Nayo yaza kumanya vyono Yesu yali yekaye yakulya mu kaya yo Mufalisayo, yakaleta supa ya mafuta ge mhunjile swanu, ³⁸ yakema behi na Yesu, yakulila, ne mahozi gakwe gakamusululila Yesu mu magulu. U Mucekulu yuyo yakayipata migulu ya. Yesu kwe zimvili zakwe. Yakamunonela muno migulu, yakawabaka ne mafuta gagalya. ³⁹ U Mufalisayo yuyo mono yamucema Yesu, yaza kuziwona zizo, yakatya mu nhumbula yakwe, “Munhu ayu yali yawe muwizi, yali yamutanje mucekulu yuyu vyono yenha na vyono mubi.” ⁴⁰ Yesu yakamutya yuyo Mufalisayo “Simoni nina nghani yo kukulonjela.” Nayo Simoni yakatya, “Lonje Mwijizi.” ⁴¹ Yesu yakatya “Kwali na wanhu wejete wono wali wamukopile munhu yumonga mapesa. Yunji yali yakopile silinje magana mahano, no muyagwe, silinje makumi mahano. ⁴² Waza kuwa wasina co kulipa, yuyo munhu yakawanenela wose vyono wejete. Ale, wa hayi muli wawa wejete, mono kocila kumwenda yuyo munhu mono yawakopesa zipesa?” ⁴³ Simoni yakapitula yakatya, na lunji, yuyo mono yaneneywe nayo mugawa muwaha, yo komwenda muno munhu yuyo. Yesu yakamutya “Kulonga mbeka.” ⁴⁴ Hanyuma yakamupitucila mucekulu, no kumutya Simoni, “Kumuwona ta mucekulu yuyu? Ane ninjila mu nyumba yako, malenga go kuzuguza magulu gangu, si wumheye ng’o. Ninga mucekulu ayu, kasuluziza mahozi gakwe mu magulu gangu no kugapata kwe zimvili zakwe. ⁴⁵ Agwe si wunoneye; ninga ayu neza kwinjila, si yalecile kunonela muno magulu gangu. ⁴⁶ Agwe si wumbacile mafuta mu mutwe: ninga ayu kambaka mafuta mu magulu gangu. ⁴⁷ Holeka nghukutya, wendo wakwe wukulajila vyono, hamba yawe yali yena wubi winji, kanenelwa. Ninga wowose mono kanenelwaga nghani ndodo, yo kendaga hadodo.” ⁴⁸ Yesu yakamutya u mucekulu, “Kunenelwa wubi wako.” ⁴⁹ Na walya wono wali wekaye nayo ha ndigwa, wakanza kutya mu zinhumbula zawo “Yuyu yo nani mwene, mono yakusuma kunenela wubi?” ⁵⁰ Nayo Yesu yakamutya u mucekulu, “Wihuwilo wako wukuponya; wubite wupolile.”

¹ Hanyuma ya zizo, Yesu yakakola mu makaya na mu vitumbi, yakulonga no kuganula Luganuzi Luswanu lo wutemi wo Mulungu. Na awalya we likumi na wejete wali wali hamonga nayo. ² Hamonga ne wacekulu wanji wono Yesu yawaponya macisi ne zinhamwa zinji, nawo wali wali hamonga nayo. Wawo wo wa Malyamu mono (yacemwaga Magadalena,) muli yuyo galawa macisi mupunghati. ³ Na Yowana u mugolece wa Cuza u mwitumami mulongola wa Helode, na Susana, na wanji wenji. Wacekulu wawo wawetumamilaga Yesu ne wejizwa wakwe mu sawo yawo weneco. ⁴ Lipuga liwaha lye wanhu, wekongholaga, na wanhu wenji wakawa kumuziza Yesu wakulawa mu matumbi gose. Nayo yakawalonjela cihwanicizo cici, ⁵ “U mumiza mbeyu yalawila kumiza mbeyu yakwe, na lono yamizaga, zinji zikalagala mu nzila; wakola nzila wakazikanyanjila, zindeje zikazilya. ⁶ Zinji zikalagala hono hogali mabwe, zikota ninga zikanyala, vyono zali zisina malenga. ⁷ Zinji zikalagala mu mabici ge mamivya, zikawilukana hamonga ne mamivya, gakazititiliza. ⁸ Zimbeyu zinji zikalagala mu muhangha muswanu, zikawiluka, zikalela mhece yigana.” Yaza kukondya kulonga zizo, yakalonga ne yizi yiwaha, yakatya “Holeka muhulice, hono mwina makutu.” ⁹ Ne wejizwa wakwe wakamuwuza Yesu nhunizo ye cihwanicizo cico. ¹⁰ Yakawatya, “Anye mupegwa kumanya zono zihundicigwe zo wutemi wo Mulungu, ninga kuli wanji, vyo si yinha. Langa wene walonjelwaga mu vihwanicizo, hono wakuwona, ho walece kuwona, na hono wakuhulika, ho walece kwizuka.” ¹¹ Ale, ne nhunizo ye cihwanicizo cici nha yoyi. I mbeyu yo nghani yo Mulungu. ¹² Zono zalagala mu nzila, zikulajila iwanhu wono wakuyihulika nghani, hanyuma Setani yakuza yakuyiwusa yiyo nghani mu zinhumbula zawo, ho walece kwihuwila no kupona. ¹³ Azilya zono zalagala hono hogali mabwe, zikulajila iwanhu wono wakuyihulika nghani no kuyibocela na nyemo. Ninga nha vyono zinha zimbeyu zizo, iwanhu wawo wakuwa wasina milela, wono wehuwilaga kwa cidaha du, na kolo wakujelwa, wakuwuya ne nyuma. ¹⁴ Na zono zalagala mu mabici ge mamivya, co cihwanicizo ce wanhu wono wakuyihulika nghani, ninga mu wujendelele wawo, wakuzinjilizwa ne mahwele ne zisawo, no wiyendeze we mikalile yiyi, nawo siwakulela mikalo yono yikangaye. ¹⁵ Nazo zono zalagala mu muhangha muswanu wo wanhu wono wakuyihulika nghani, no kuyikamisa kwa nhumbula swanu na ye cihuliko. Nawo wakulela mikalo mu wukangalile. ¹⁶ “Wanhu si wakolelezaga tala no kuyigubiciza, hamba kuyiwika mwi’vungu lye citanda; langa wayiwikaga ha wuwiko wayo, wanhu wono wakwinjila mugati, wawone wuzelu wayo. ¹⁷ Nghani yo yose yono hundikwe yolokwanzalikwa, na ze cinyele zolomanyika, no kulawila kuzelu. ¹⁸ Holeka mwiyihenje vyono mukuhulika. Hambi mono yena, nha kopegwa; na mono yasina, kosolelwa sunga na cono yakutya yena naco.” ¹⁹ Baho, u nyina ne wanduguze wa Yesu wakamuziza, ninga si wasuma kwiwona nayo so winji we wanhu. ²⁰ Yesu yakalonjelwa, vyono u nyina ne wanduguze wali kunze, wakusaka kumuwona. ²¹ Ninga Yesu yakawalonjela wanhu wose, “Yaya ne wandugu zangu, wo walya wono wakuyihulika nghani yo Mulungu no kuyitumama.” ²² Kukawa mwizuwa linji, Yesu yakenjila mu ngalawa mwene ne Wejizwa wakwe; yakawatya, “Cilowoce ku nhumbi nzagwe ye lilamba.” Wakatuluka. ²³ Ninga lono wajendelelaga mu ngalawa, mwene Yesu yakebatwa na nhongo, yakagona. Likatima likukunzo yiwaha lye mbeho mwilamba: malenga gakawa kwanza kwinjila mu ngalawa, wakawa wali mu mbali mbaha. ²⁴ Wejizwa wawalya wakamubitila Yesu, wakamusinhusa wakutya “Muwaha, Muwaha, ceza kufwa!” Yesu yakasinhuka, yakavitacila imbeho ne mawingo mawaha ge malenga, gakatula, hakanyamala twii. ²⁵ Yakawatya i wejizwa wakwe “Wihuwilo wenyu wuli hayi ’mbi? Ninga wene wakezina no kogopa, wakeyitya, Alo munhuci yuyu, sunga i mbeho ne malenga yakuvilonjela, vinyamale, navyo vikumuhulika!” ²⁶ Yesu ne wejizwa wakwe wakajendelela no muhinzo wakafika mu yisi ya Wagelasene, yono vidomile na Galilaya ku nhumbi ye lilamba. ²⁷ Nayo Yesu yaza kutima mu’si viketang’anila na munhu monga mono yali yena macisi, yakulawa mwi’kaya, u munhu yuyo mu vilo vinji si yavwalaga myenda, hamba si yekalaga mu kaya, langa yekalaga mu vitenjelo. ²⁸ Yaza kumuwona Yesu, yakazoza, yakagwa hali mwene, yakabalaluka na lizi yiwaha yakatya, “Alo wina nghanici nase, Yesu go Mwana wo Mulungu Mono Yalawiliciye Muli Vyose? Nghukunena wulece kungaza.” ²⁹ Hambi nha yalilajiliza licisi lilawanize muli munhu. Hambi nha lyamwibataga kenji. Hamba yiwe wanhu wamuwikaga mugati no kumuwopa ne vyuma; ninga yavidumulaga viwopelo kali kenji, ne licisi lilyo lyamuwinjilaga ku nyika. ³⁰ Yesu yakamuwuza, litagwa lyako gwegwe nani? Yakatya litagwa lyangu nene “Mhuga,” vyono macisi menji gali gamwinjiye munhu yuyo. ³¹ Gago macisi gakamunena Yesu yalece kugalajiliza gawuce no kwajilila mwikombo lyono lisina mudumo. ³² Kwali ne ’tewa lya ngubi nyinji, likudima ha mwejelele we litunda. Ale gago macisi gakamunena Yesu yagakombole genjile muli zene. Nayo Yesu yakagakombola. ³³ Imacisi gakalawa muli munhu, gakenjila mu zingubi, nazo zingubi zikavulumucila mwilamba, zikafwila mumo mu malenga. ³⁴ I wadimi waza kuziwona zono ziweye, wakatiza, wakabita kuwalonjela wanhu wa mwi’kaya na mu’si. ³⁵ Wanhu wakaza wazilanje zono ziweye; wakafika kuli Yesu, wakamuwona munhu mono yali yalavywa macisi, yavwalile myenda, yena ne mahala gakwe; yekaye ha magulu ga Yesu, wakogopa muno. ³⁶ Nawo wono waziwona zizo, wakawaloloseza wanhu wawo vyono munhu yuyo yaponyigwe. ³⁷ Ne wanhu wose we yisi ya Wagelasene wakebatwa no woga wuwaha, holeka wakamunena Yesu yawuce, yabite. Nayo Yesu yakenjila mu ngalawa, yakawuka. ³⁸ Ninga u munhu mono yalavywa macisi, yakamunena viwezane nayo, ninga Yesu si yamulumba, langa yakamutya. ³⁹ “Wuwuye kwenyu, wukalolose zimbaha zono Mulungu yakutendeye.” Yakabita, yakaganula hanhu hose mwi’kaya lilyo, zimbaha zono yatendelwa na Yesu. ⁴⁰ Nayo Yesu yaza kuwuya ku nhumbi nzagwe ye lilamba, wanhu wenji wakamubocela na nyemo, hambi nha wamulindilaga wose. ⁴¹ Baho yakaza munhu, litagwa lyakwe Yayilo, nayo yali muwaha we nhang’anilo yo wuhembelo, yakagwa ha magulu ga Yesu, yakamunena yaze kwakwe; ⁴² hambi nha yali yena mwana wa cicekulu we ciwene, kotya wa myaka yikumi na myejete, nayo yali yeza behi no kufwa. Ninga Yesu lono yabitaga wanhu wenji wakamumemela. ⁴³ Na mumo mwi’puga lye wanhu, mwali na mucekulu yunji mono yali yena wutamwa wo wuzaze we sakami myaka yikumi na myejete, [nayo hamba yawe yali yetumamila sawo yakwe yose mu waganga,] ninga hasina hamba yumonga mono yasuma kumuponya. ⁴⁴ U mucekulu yuyo, yakaziza ku mugongo wa Yesu, yakapamiza limhembo lye civwalo cakwe, na hobaho du, u wuzaze wakwe we sakami wukaduma kamonga. ⁴⁵ Yesu yakawuza, “Alo nani mono yamhamize?” Wakakana wose. Nayo Petelo yakatya, “Muwaha, wanhu wenji wakupilime no kukonyeceza.” ⁴⁶ Ninga Yesu yakatya, “Ho yuli munhu mono yamhamize, hambi nha manyile vilungo vilawa muli nene.” ⁴⁷ No mucekulu yaza wona vyono si kosuma kwihundika, yakelajila akuno yakucicima so woga, yakagwa hali Yesu, yakalolosa hali wanhu wose cono cilecile yakumupamiza Yesu, na vyono yakondya kuponywa kamonga. ⁴⁸ Yesu yakamutya, “Go muhinza, wihuwilo wako wukuponya, wubite wupolile.” ⁴⁹ Na lono Yesu yali yakali kulonga, Yayilo yakaletelwa nghani kulawa ku kaya kwakwe, vyono, “U mwanago yakondya kufwa, wulece kumugaza Mwijizi.” ⁵⁰ Ninga Yesu yaza kuzihulika zizo, yakamulonjela Yayilo yakatya, “Wulece kogopa. Wihuwile du, nayo mwanago kopona.” ⁵¹ Yaza kufika kukaya ya Yayilo si yamukombola yunji wenjilane nayo, langa Petelo, na Yohana, na Yakobo, ne walezi wo muhinza yuyo du. ⁵² Wanhu wose, walilaga, ku soko yo mwana yuyo. Ninga Yesu yakawatya, “Mulece kulila, hambi mwana nha siyafwiye, langa yagonile nhongo du.” ⁵³ Nawo wakamuseka, hambi nha wali wamanyile vyono yafwiye. ⁵⁴ Ninga Yesu yakamwibata muwoko, yakacema yakutya “Go muhinza winuce.” ⁵⁵ Muhe wo muhinza wukamuwuyila, yakenuka kamonga, Yesu yakalajiliza wamupele ndigwa. ⁵⁶ Walezi wakwe wakezina, ninga Yesu yakawalajiliza, walece kumulonjela munhu kuli zizo zono zijeye

¹ Yesu yakawacemela hamonga we likumi na wejete, yakawapela vilungo no wulajilize muli macisi gose, no kuponya zinhamwa. ² Yakawatuma kuganula zo wutemi wo Mulungu, no kuponya watamwa. ³ Yakawatya, “Lono mukubita, mulece kusola cocose, hamba nghome, hamba mufuko, hamba ndigwa, hamba mapesa, hamba mulece kuwa na kanzo nyejete nyejete. ⁴ Ne nyumba yo yose yono mokwinjila no kubocelwa, ale mwikalaje mumo du, sunga kolo mukuwuka mu citumbi cico. ⁵ Wanhu hono walece kumubocelenyi, muwuce mwi’kaya lilyo, na lono mukuwuka, mugakung’unhaje manghundi gono gali mu magulu genyu, gawe wuhomelezi kuli wene.” ⁶ Wakatuluka, wakakola mu vitumbi, wakaganula Luganuzi Luswanu, no kuponya watamwa hanhu hose. ⁷ Ale, Mutemi Helode, yazihulika zose zono zinozigwe; yakawa na mahwele, vyono wanji watezaga, Yohana kazuka mu wafu, ⁸ na wanji watezaga, Eliya kalawila, na wanji watezaga, vyono muyagwe ne wawizi we katali kazuka. ⁹ Ninga Helode yakatya, “Yuyu Yohana namudumula mutwe; alu kowa nani yuyo, mono nghuhulika zizi?” Yahilaga yamuwone Yesu. ¹⁰ Ne watumwa waza kuwuya, wakamuganulila Yesu zono wetuma zose. Nayo Yesu yakawasola wali wene, wakabita kwi’kaya lyono litezagwa Betesayida. ¹¹ Ninga i wanhu waza kumanya kono yabitile, wakamutyatya: Yesu yakawabocela, yakawaganulila zo wutemi wo Mulungu, nawo wono wasakaga kuponywa, yakawaponya. ¹² Ne lizuwa lono lyali lyeza lili behi no kugwila, wakaza we likumi na wejete, wakamutya, “Wuwelagaje wanhu wabite ku vitumbi na mu’si yono yipilime, wakalondole wugono ne zindigwa; hambi kuno nha cili mu nyika.” ¹³ Ninga Yesu yakawatya, “Muwapele nyenye ndigwa walye.” Wakatya, “Ase cisina cinji, langa mikate mihano du na somba nyejete, lunji cibite co weneco cikawagulile ndigwa wanhu wawa wose!” ¹⁴ (Hambi nha wali walume kotya elufu yihano). Yesu yakawatya wejizwa wakwe, “Muwalonjele wanhu wekale vipuga vipuga vya wanhu makumi mahano mahano.” ¹⁵ Wejizwa wakanoza nha vyono wakalonjelwa, wakawekaza wose. ¹⁶ Baho Yesu yakayisole mikate yiyilya mihano, ne zisomba zinyejete, yakagalamila ku wulanga, yakamulumbo Mulungu, yakavibegula, yakawapela wejizwa wakwe wawagawile wanhu. ¹⁷ Wakalya wose wakeguta; wakatondoleza i vibegulwa vyono vyasigala, wakamevya nhoto yikumi na nyejete. ¹⁸ Mwizuwa linji Yesu yalombaga yali wene, i Wejizwa wakwe wali wena nayo. Yakawawuza, “Alu wanhu wanhezaga nene nani?” ¹⁹ Wakapitula “Wakutya, Yohana u Mubaputizi, ninga wanji wakutya, yo gwegwe Eliya, na wanji wakutya, yumonga muyagwe ne wawizi we katali kazuka.” ²⁰ Baho yakawawuza, “Ninga anye ma, munhezaga nene nani?” Petelo yapitula yakatya, “Kilisito wo Mulungu.” ²¹ Ninga Yesu yakawalajiliza walece kumulonjela yunji nghani yiyi, yakutya, ²² “U Mwana wo Munhu, si koleka kugazwa muno no kulemwa ne wanyamhala ne wakohani wawaha, ne wejizi wo Wulajilize, no kuwulagwa, ne lizuwa lye kadatu kozuka.” ²³ Hanyuma yakawalonjela wanhu wose, “Yunji wowose hono yahile kuza munyuma yangu, yimunojeye yekapise mweneco, yadinghule musalaba wakwe vilo vyose, yanhyatye. ²⁴ Hambi muli wose mono yakuhila kuyiponya nhumbula yakwe, yuyo yo koyajiliza; ninga muli wose mono koyajiliza nhumbula yakwe kusoko yangu, yuyo yo koyiponya. ²⁵ Hambi munhu kotuga cambuzici, hono yatuje u wugoli wose wa mono yinze, ko kwiyajiliza hamba kwiyambuza mweneco? ²⁶ Hambi muli wose mono kombonela soni nene ne zinghani zangu, nayo u Mwana wo Munhu kolomuwonela soni, yalaza kuziza mu nhojo yakwe, na yo Sogwe, na ye Wamalayika wono welile. ²⁷ Ninga mbeka nghumulonjelenyi, howali wamonga wono wemile baha, wono si wofwa lono wakali si nawuwona wutemi wo Mulungu.” ²⁸ Kukawa nha vilo munana vyapuluta, lono zali zakondya kulongwa zinghani zizi, Yesu yakawasola Petelo na Yohana na Yakobo, yakabitana nawo kwi’tunda, kulomba. ²⁹ Na lono yalombaga, futa yo wusu wakwe yikapitula, ne vivwalo vyakwe vikawa vizelu, vikung’alala. ³⁰ Na kumbe, wanhu walume wejete wakejela, wakalongana nayo, nawo wali wa Musa na Eliya, ³¹ wono wejela mu nhojo, wakawa kulongana nayo zo wufwe wakwe wono wofisilizizwa ku Yelusalemi. ³² Ale, Petelo, na wono wali hamonga nayo wali watimbile na nhongo, ninga wakenuka, wakayiwona nhojo yakwe, wakawawona na wawalya iwalume wejete wono wali wemile nayo. ³³ Kukawa lono wawo walume wejete wawukaga, Petelo yakamutya Yesu, “Muwaha, viswanu vyono cili baha, cizenje vibanda vidatu; cimonga cako, cimonga ca Musa, cimonga ca Eliya.” I mbeka, Petelo yalongaga zizi, akuno hamba siyakumanya na cono yakulonga. ³⁴ Na Petelo lono yalongaga zizi, ho baho baho likaza yivunde, likawagubika no mubeho: na waza kugubikwa ne livunde, i wejizwa wakogopa muno muno. ³⁵ Lizi likalawa mwivunde, likutya, “Ayu yo Mwanangu muhagulwa wangu: mweze kumuhulika.” ³⁶ Lizi lyaza nyamala, yakejela Yesu yali wene. Nawo i wejizwa wakanyamala, hamba kumulonjela yunji cinji vilo vivyo muli zono wawona. ³⁷ Kukawa mitondo yaco, lono Yesu ne wejizwa wakwe wadatu, watenenhukaga kulawa ku kulya kwi’tunda, yipuga yiwaha lye wanhu liketang’anila na Yesu. ³⁸ Na munhu yunji wa mwipuga lilyo, yakabalaluka yakutya, “Gwe Mwijizi, nghukunena wumulanje mwanangu, mwanangu we ciwene. ³⁹ Licisi limwibataga liwa munoza kawa kuzoza muno, kanyhi limupelaga cinzilisa, ne cifulo ciwa kumulawa mu mulomo. Nalyo lijendelelaga kumugaza muno, hamba kumulecela mbela. ⁴⁰ Nane nghawanena wejizwa wako walilavye; hamba siwasuma kulilavya.” ⁴¹ Yesu yakapitula yakatya, “Anye waco mo lulelo lono lusina wihuwilo mono mwajiliye, alo cowa kwikalana nanye, no kumukangalilenyi sunga nili?” Hanyuma yakamulonjela yuyo munhu, “Mulete kuno mwanago.” ⁴² Ale, lono yuyo mwana yazaga kuli Yesu, licisi likamugwisa hasi. Ninga Yesu yakalitacila licisi lyavu, yakamuponya mwana, yakamupela sogwe. ⁴³ Ne wanhu wose wakezina muno so vilungo viwaha vyo Mulungu. Ale, wawalya wanhu lono wezinaga so zose zono yetuma, Yesu yakawatya wejizwa wakwe, ⁴⁴ Muteje makutu genyu, muzikamise zinghani zizi: “U Mwana wo Munhu nha kolavywa mu mawoko ge wanhu.” ⁴⁵ Ninga wene si wezuka nhunizo ye nghani yiyi, hambi nghani yiyi nha yali hundikwe kuli wene, ho walece kuyitanga; nawo wakogopa kumuwuza ze nghani yiyi. ⁴⁶ I wejizwa wakawa kwiwanganila weneco wose, mono kowa muwaha kuciza wayagwe yo wa hayi. ⁴⁷ Ninga Yesu yakagamanya mahweso gono gali mu zinhumbula zawo, holeka yakasola mwana mudodo, yakamuwika behi nayo, ⁴⁸ Yakawatya. “Muli wose, mono komubocela mwana yuyu mudodo mwi’tagwa lyangu, yakumbocela nene: na muli wose mono yakumbocela nene, yakumubocela mono yanhuma, hambi u mudodo muno muli nyenye, nha yo muwaha wa wose.” ⁴⁹ Yohana yakawacilila yakatya, “Muwaha, camuwona yunji yakulavizya macisi mwi’tagwa lyako; cikamulemeza, hambi nha si yakujendana na’se.” ⁵⁰ Ninga Yesu yakamutya, “Mulece kumulemeza: hambi mono si yali cinyume nanye, ayo muyenyu.” ⁵¹ Kukawa, vilo vyo wunyasulilwe wakwe Yesu wo kubitila ku wulanga vyeza kusejelela, mwene Yesu yakawa yena yo wubita ku Yelusalemi. ⁵² Yakatuma watumwa walongole; wakabita, wakenjila mu citumbi cinji ce Wasamaliya, ho wamuwikanizize lukulu hanhu. ⁵³ Ninga wanyawusi wa baho siwavumila kumubocela, vyono yali yadomile ku Yelusalemi. ⁵⁴ Holeka i wejizwa wakwe, Yakobo na Yohana waza kuziwona zizo, wakatya. “Ati Muwaha, alu wendile cilonje moto wutime kulawa ku wulanga, wuwatakamize, [nha vyono yatenda Eliya]?” ⁵⁵ Yesu yakapituka yakawatacila. [Yakatya, “Si mumanyile vyono winha muhe wenyu.”] ⁵⁶ Yesu hamonga ne wejizwa wakwe wakawuka wakabita ku citumbi cinji. ⁵⁷ Nawo lono wajendaga mu nzila, yunji yakamutya Yesu, “Nokutyatya kono wukubita kose.” ⁵⁸ Yesu yakamutya, “Zinyhewe zina mamwina, ne zindeje za mucanyha zina manhuli, ninga Mwana wo Munhu yasina ho kuceha.” ⁵⁹ Hanyuma, yakamutya yunji, “Wunhyatye.” Ninga yuyo yakatya, “Muwaha, wunghombole namule mbite nghamuzice sogo yangu.” ⁶⁰ Yesu yakamutya, “Wuwalekaje wafu wazice wafu wawo; langa agwe wubite wukanze kuganula zo wutemi wo Mulungu.” ⁶¹ Na yunji nayo yakatya, “Nokutyatya Muwaha; ninga wamule wunghombole nghelaje wa mu nyumba yangu.” ⁶² Yesu yakamutya, hasina munhu mono yebate lisili lyo kulimila, kanyhi yalanje kunyuma, yuyo si yakwiliye mu wutemi wo Mulungu!

¹ Hanyuma yayo Muwaha yakawahagula wanji makumi mupunghati na wejete, yakawatuma wejete wejete, walongole wabite mu vitumbi vyose na hanhu hose hono kobita mwene. ² Yakawatya, “Ndudula yo mbaha, ninga wetumami wacefu. Holeka, mumulombaje munya mugunda, yawatume waduduzi mu mugunda wakwe. ³ Alu mubite, ninga mulanjilile, nghumutumenyi nyenye nhe zingholo zono zikubita haciligati ye maminzi. ⁴ Mulece kusola mufuko wa mapesa, hamba mufuko wo kulombela, hamba malatu: mulece kutaga cilejeho so kumulamusa wowose mu nzila. ⁵ Na mu kaya yo yose yono mokwinjila muwalamusaje nhavi, ‘Nyumba yiyi yeze yipolile.’ ⁶ Na hono muwe moyali mwana wo mulamu, mulamu wenyu womwikalila; ninga hono hawe hasina, womuwuyilenyi nyenye kanyhi. ⁷ Mukekalaje mu nyumba yiyo, muwe kulya no kung’wa vyono womupelenyi; hambi mwitumami nha yanojeye yapegwe musahala wakwe. Mulece kubita kaya ayi na ayi. ⁸ Ne likaya lyo lyose lyono mokwinjila, hono wamubocelenyi, mulye vyono motenjelwa. ⁹ Mukawaponye watamwa wono wali mumo, mukawatye, ‘U wutemi wo Mulungu wumusejelelenyi.’ ¹⁰ Ninga likaya lyo lyose lyono mokwinjila, hono si wakumubocelenyi, lawilenyi, mubite mu zinzila zayo mutye, ¹¹ ‘Sunga ne manghundi ga mwi’kaya lyenyu gono gacinamatiye mu magulu getu, cikumukung’unhilenyi nyenye, ho yiwe suguzi kuli’nye. Ninga mumanye vyono wutemi wo Mulungu wakondya kumusejelelenyi.’ ¹² Mbeka nghumutyenyi, mwizuwa lilya, likaya lilyo lyolotuga wulipicizwe wuwaha si nha Sodoma.” ¹³ “Woyi he nye kuli’gwe Kolazini! Woyi he nye kuli’gwe Betesayida! Hambi imapoto gono ganozwa mwenyu hono gali ganozwe mu Tulo na Sidoni, mhali wanhu wa kuko wavwale magunila, no kwikala mu mavu, wakulajila vyono wanena. ¹⁴ Hamba nhavivyo, mwi’zuwa lyo wuling’anizwe, anye molobocela wulipicizwe wuwaha muno, sinha we wanhu wa Tulo na Sidoni. ¹⁵ Nagwe Kapelanawumi wukuhila kwiyinula sunga ko ku wulanga? Ng’o ye, kovulumuswa sunga kono kowali wafu.” ¹⁶ Hanyuma yakatya, “Mono yakumuhulicizenyi nyenye, yakuhulika na nene. Na mono yakulema kumubocelenyi nyenye, yakulema kumbocela nene. Munhu wowose mono yakulema kumbocela nene, yakulema kumubocela mono yanhuma.” ¹⁷ Ale wawalya we makumi mupunghati ne wejete wakawuya wasangalaye, wakutya, “Muwaha, sunga ne macisi gali kucihulika lono cali kulitambula litagwa lyako.” ¹⁸ Mwene Yesu yakawatya, “Namuwona Setani yakugwa yakulawa ku wulanga kotya limuli. ¹⁹ Alenyi, nimupelenyi nyenye u wulajilize wo kukanyaga zinzoka ne zinje, no wulajilize wa muli vilungo vyose vya ayulya mulugu, hamba hasina cinji co cose cono comutamisenyi. ²⁰ Hamba nhavivyo, mulece kusecelela vyono macisi gakumuhulicenyi; langa musecelele vyono matagwa genyu gandikwa ku wulanga.” ²¹ Mu cipango cico Yesu yakamemywa Muhe Mono Yelile yakatya; “Nghukulumba, Gwe Baba, Mukala wulanga ne yinze, vyono kuzihundika zizi kuli we mahala no wizuce, wukawagubulila i wadodo, heya Baba, vyo yakwendeza gwegwe.” ²² Hanyuma yakatya, “Baba yaviwika vyose mu miwoko yangu, hamba hasina mono yamumanyile Mwana yo wa hayi, langa Baba, hamba mono yamumanyile Baba yo wa hayi; langa Mwana, na muli wose mono Mwana yakuhila kumugubulila zizo.” ²³ Yakawapitucila wejizwa wakwe, yakawalonjela cinyele, “Wamoti wono wakuzilanga zono mukuzilanga nyenye. ²⁴ ‘Mbi mbeka wawizi wenji ne watemi, nha wasulumilaga kuziwona zono mukuziwona, ninga hamba si waziwona, kanyhi wazihulice zono mukuzihulika, ninga hamba si wazihulika.’ ” ²⁵ Na yunji mwijizi wo Wulajilize yakema yakamujela Yesu, yakutya, “Ati Mwijizi, notenda wule ho niwutuje u wumi we cibitilila?” ²⁶ Yesu yakamuwuza, “Ma, i Mandiko gakutya nhawule?” Kusomaga wule? ²⁷ Nayo yakapitula yakatya, “Komwendo Muwaha Mulungu wako kwe nhumbula yako yose, na ko mutima wako wose, na kwe vilungo vyako vyose, na kwe mahala gako gose. Na kanyhi wumwende muyago nha vyono wiyendile go mweneco.” ²⁸ Yesu yakamutya, “Kupitula viswanu. Ale, wuketume nhavivi, nagwe kowumipa.” ²⁹ Ninga u mwijizi wo Wulajilize vyono yahilaga kwinoza muswanu, yakamuwuza Yesu, “U muyangu yo nani kanyhi.” ³⁰ Yesu yakapitula yakatya, “Kwali na munhu yatenenhukaga yakulawa Yelusalemi yakubita ku Yeliko, yakamanyhilwa ne wahizi, wono wamuboka vinhu vyakwe, wakamutowanga, wakamuleka yagonile baho yali behi no kufwa. ³¹ Kukawa baho Mukohani yunji, nayo yakatenenhucila mu nzila yiyo; yaza kumuwona, yakamupuluta. ³² No Mulawi nayo nhavivilya, yaza kufika bahalya, yakamuwona, nayo yakamupuluta. ³³ Ninga Musamaliya yunji, lono yajendaga, yakafika hono hoyali yuyo munhu. Nayo yaza kumuwona du, yakamuwonela lusungu. ³⁴ Yakamusejelela behi, yakazibaka mafuta ne divayi zinghomele zakwe, no kuziwopa ne bandeji, yakamupandiza mu ndogowe yakwe, yakamuleta ku nyumba yo wuficilo we wajenzi, yakawa kumutamya. ³⁵ Mitondo yaco yakalavya pesa dinali nyejete, yakamupela munya nyumba, yakatya, ‘Wumutamye yuyu, na muli vyose, cono kociziliza mu witumamile, ale, kolo nghuwuya nokugomolela.’ ” ³⁶ Yesu yakamuwuza, “Muli wawa wadatu wa hayi mono yakulajila vyono yali muyagwe na ayulya mono yatowa ne wahizi?” ³⁷ Mwijizi wo Wulajilize yakatya, “Yuyulya mono yamuwonela lusungu.” Yesu yakamutya, “Ale, nagwe wubite wuketume nhavivyo.” ³⁸ Ale, lono wajendaga, wakenjila mu citumbi cinji, na mucekulu yunji litagwa lyakwe Malita, yakawabocela ku nyumba yakwe. ³⁹ Malita yali yena mwanakwawe mono yacemwaga Malyamu, yuyu yakekala behi na Yesu, yakuhuliciza zinghani zakwe. ⁴⁰ Ninga Malita yepiganzaga na milimo minji. Malita yakamubitila Yesu, yakamutya, “Ati Muwaha, si wukuwona vyono vibi, hono mwanakwetu yakundeceleza nitumame nili wene? Ale wumutye yanhaze.” ⁴¹ Ninga Muwaha yamupitula yakatya, “Gwe Malita, Malita, nhawule wukwigaza no kwihwelela ku soko ya vinhu vinji, ⁴² ninga cono cikusakwa cinhu cimonga du; hambi Malyamu nha kehaga ligawo liswanu lyono si kosolelwa na munhu.”

¹ Mwi’zuwa linji, lono Yesu yalombaga hanji, yaza kondya kulomba, yunji muyagwe ne wejizwa wakwe, yakamutya, “Muwaha cikukunena wucijize na sese kulomba nha vyono Yohana u Mubaputizi yawejiza iwejizwa wakwe.” ² Yesu yakawatya, “Kolo mukulomba mweze kutya, ‘Baba, Itagwa lyako lyezwe, Wutemi wako wuze. ³ Wucipele vilo vyose ndigwa zetu, zono zikwiliye izuwa ne zuwa. ⁴ Wucinenele wubi wetu hambi na sese, nha ciwanenelaga wose wono wacisutizyaga. Kanyhi wulece kucitegula mu wujelwe.’ ” ⁵ Yakawatya, “Hambi nani wa muli nyenye mono kowa na mwendece wakwe, mono komubitila mu cilo mugati, yakumutya, ‘Mwendece, nghukulomba wunyazime mikate midatu; ⁶ hambi mwendece wangu nha kanyiziza kalawa muhinzo, nane sina ndigwa yo yose yo kumupela.’ ⁷ Alu wihwesaje, hono mwendece wako yakupitule akuno yali kugati yawe kutya, ‘Wulece kungaza: mulango wakondya kudindwa, cigonile ne wanangu, sinosuma kwinuka nghupele!’ Yowa wule? ⁸ I mbeka, si kokwinuka yamupele vyono mwendece wakwe, langa ku soko yo wulombelombe wono si wukuduma wo munhu yuyo, kokwinuka yamupele vyono yakusaka. ⁹ “Nane nghumutyenyi: Lombenyi mopegwa; londolenyi nanye motuga; mukong’onhe nanye modigulilwa. ¹⁰ Hambi mono yakulomba nha yakupegwa; na mono yakulondola, yakutuga; na mono yakukong’onha, yakudigulilwa. ¹¹ Mwana hono yamulombe sogwe somba, wulenyi, sogwe komupela nzoka hanhu ha somba? ¹² Hamba hono yamulombe ligangha, komupela ’nje? ¹³ Hono anye mono muli wabi, mumanyile kuwapela wana wenyu vinhu viswanu, u sogo yenyu wa ku wulanga yo yacilile, kowapela Muhe Mono Yelile wono wakumulomba.” ¹⁴ Mwi’zuwa linji Yesu yalavyaga licisi lyono lyali limunozize munhu yumonga kuwa yali cibwibwi. Kukawa licisi lyaza kulawa, munhu yuyo yakawa kulonga; ne mapuga ge wanhu wakezina. ¹⁵ Ninga wayawo wakatya, “Kalavizyaga macisi mu vilungo vya Belizebuli u muwaha we macisi.” ¹⁶ Wanji wakamujela, wakasaka yawalajile citanjilo co wukombolwe kulawa ku wulanga. ¹⁷ Ninga mwene yaza kugamanya mahweso gawo, yakawatya, “Wutemi wowose wono witemanuye weneco mapuga mapuga gono gatemanuce, si wosuma kujendelela, nhavivilya ne zinyumba nazo, zimalikaga monga monga. ¹⁸ Nhavivyo na Setani nayo, hono yetemanuye mweneco, wutemi wakwe ho wokwima wule? Nhawule alu mukutya ti, ane ndavizyaga macisi mu vilungo vya Belizebuli? ¹⁹ Alu ane hono niwe nghulavizya macisi mu vilungo vya Belizebuli, i wana wenyu ma, wakuwa kulavizya mu vilungo vya nani? Holeka wawa wo waling’anizi. ²⁰ Ninga hono niwe nghulavizya macisi mu vilungo vyo Mulungu, ale mumanye vyono wutemi wo Mulungu, wakondya kumuzizenyi.” ²¹ Munhu we vilungo, mono yewikanizize lukulu ne vitwalo vyakwe, kolo yakuyidima nyumba yakwe, zisawo zakwe zikwikala zili mutulano; ²² ninga hono yaze yunji mono yamucizize vilungo, yamutowe no kumusumiza, yakumuboka vitwalo vyakwe vyono yetumbiye, no kuvigawa vyose vyono yena navyo. ²³ Mono si cili hamonga na nene ayo yali cinyume nane; nayo mono si cikongholanaga na nene, keyagazaga. ²⁴ “Licisi lyavu kolo likuwingwa kulawa muli munhu, lijendajendaga mu nyika likulondola hanhu ho kuceha: kolo si likuhawona, likutya, ‘Nowuya ku nyumba yangu kono nalawilila.’ ²⁵ Na kolo likuwuya, likuyagana nyumba yiyo fwagulwe, kanyhi nozelezwe viswanu muno muno. ²⁶ Hobaho likubita likusola macisi ganji mupunghati gono mabi muno kuciza lyeneco, gose gakubita kwinjila muli munhu yuyo, ne mikalile yo munhu yuyo, yikuwa mibi muno si nhe milongozi.” ²⁷ Kukawa lono yalongaga zizi, u mucekulu yunji wa mwipuga lye wanhu, yakabalaluka ne lizi iwaha, yakamutya, “Yamotile, mucekulu mono yakulela, no kukosa.” ²⁸ Nayo Yesu yakamutya, “Heya, ninga wamoti muno wanhu wono wakuyihulika nghani yo Mulungu no kuyikamisa.” ²⁹ Ne lipuga lye wanhu lyaza kucila kumuziza, Yesu yakawalonjela yakatya, “Lulelo lulu lubi; lulondolaga citanjilo; ninga si lopegwa citanjilo cocose, langa citanjilo ca Yona. ³⁰ Nha vyono Yona yali citanjilo kuli wanhu wa Ninawi, ale nhavivyo no Mwana wo Munhu nayo kowa citanjilo kuli lulelo lulu. ³¹ U mutemi we cicekulu wa kutakama, kolokwima ha wuling’anizwe we wanhu wo lulelo lulu, nayo kololuwona vyono lwina masutya. Hambi mwene nha yaza kulawa kutali, yakaza yahulicize mahala ga Solomona; kumbe mono yamucizize Solomona, yali baha. ³² I wanhu wa Ninawi wolokwima ha wuling’anizwe wo lulelo lulu, nawo wololuwona vyono lwina masutya. Hambi wene nha wanena so wuganule wa Yona; na langa ta, mono yamucizize Yona yali baha.” ³³ “Hasina munhu, lono yakoleleza tala, yakuyiwika kanyhi ha wuhundiko, hamba kuyigubiciza ne bakuli, langa wayiwikaga ha wuwiko wayo, wanhu wono wakwinjila mugati wawone wuzelu wayo. ³⁴ Iliso lyako yo tala yo muwili wako, liso lyako hono liwe yitelevu, muwili wako wose wumemile wuzelu. Ninga liso lyako hono liwe yibi, no muwili wako wowa wumemile wutitu. ³⁵ Ale wulanjilile wuzelu wono wuli muli gwegwe wulece kuwa wutitu. ³⁶ Holeka hono u muwili wako wose wuwe wumemile wuzelu, na hawe hasina hanji hohose kanyhi hono hena wutitu, u muwili wuwo wowa wina u wumemelecele wo wung’alale, nha vyono tala yikukumulicila wuzelu wayo.” ³⁷ Yesu yaza malila kulonga, Mufalisayo yunji yakamusaka yalye ndigwa kwakwe; nayo yakabita yakekala ha ndigwa. ³⁸ Yuyo Mufalisayo yakezina kuwona vyono Yesu yakulya zindigwa si yamuye kwizuguza. ³⁹ U Muwaha yakamutya, “Alu nye nyo Wafalisayo, mukwemaga cikombe ne sahani kunze yayo, ninga muli’nye mugati, mumemile wuhizi no wubi. ⁴⁰ Nye nyo walele, u munoza ya kunze yo si munoza ya mugati kanyhi? ⁴¹ Muwapelaje waciwa vinhu vyono vili mugati; na vinji vyose, vyowa vili ling’ani kuli’nye.” ⁴² “Ninga woyi he nyo Wafalisayo! Hambi nha mulifyaga wanhu zaka, sunga na mu hati yose yo kutajila mu zindigwa, sunga na mu fwene, ne zimboga zinji, kuno mukuleka ling’ani no wendo wo Mulungu. Ninga zizi cinojele mwali muzitume hamba kuleka zinji. ⁴³ Woyi he nyo Wafalisayo! Ku soko mwendile kwikala kumwande mu magoda matambule mu matang’anilo go wuhembelo, ne milamu ye cogopo mu minadi. ⁴⁴ Woyi he nye! Hambi nha mwinha vitenjelo vyono si vijelaga, ne wanhu wono wakuvikanyaga si wamanyile.” ⁴⁵ Na yunji wa mu wejizi wo Wulajilize yakapitula yakamutya, “Mwijizi, hono wukulonga zizi, wukucitovula na sese.” ⁴⁶ Yesu yakatya, “Woyi he nye, kanyhi na nyenye nyo wejizi wo Wulajilize! Hambi nha mukuwatwika wanhu mitegulo, yono si yikusumika kuwudinghule, na nyenye mo weneco, si mukusuma hamba kuyipamiza ne cidole cenyu, ho muwataze mitegulo yiyo.” ⁴⁷ Woyi he nye, nha muzengaga vitenjelo vye wawizi, ne wasenyu wo wawawulaga. ⁴⁸ Vyo mukuhomelela, kanyhi mukwilumvya ne metumo ge wasenyu, hambi wene nha wo wawawulaga wawo wawizi, nanye mukuzenga vitenjelo vyawo. ⁴⁹ Ku soko yiyo kanyhi, mahala go Mulungu gakutya, “Nolowatumila wawizi ne watumwa; ninga wolowawulaga wayawo wanji, na wanji wolowagaza.” ⁵⁰ Ho zisakwe muli lulelo lulu, zisakami ze wawizi wose zono zetika, vyono kwalawa mwamulizo we yinze; ⁵¹ ndawililo sakami ya Habeli sunga sakami ya Zekaliya, mono yawulajilwa haciligati ye cikumbicilo ne hanhu hono helile; heya nghumutyenyi ’nye, vyono u lulelo lulu lololipicizwa ku soko ye metumo mabi. ⁵² “Woyi he mo wejizi wo Wulajilize! Hambi nha mwawuhundika wufunguwo wo mulango we mahala, nyenye mo weneco si mwenjila, na wono wenjilaga mwawemila walece kwinjila.” ⁵³ Yaza kuwuka kuko, wejizi wo Wulajilize ne Wafalisayo, wakanza kumutimvya muno, no kumusolasola yalonje nghani nyinji; ⁵⁴ ho wamugwizize mu wulonje.

¹ Baho lono wanhu maelufu menji wali wetang’anila, sunga wakawa kwikanyanjila, Yesu yakamula kuwalonjela wejizwa wakwe, “Musuje kuli cisase ce wafalisayo wo wukoci. ² Ninga cocose cono cigubicizwe, cologubulwa, na cocose cono cihundikwe, c ololawila kuzelu. ³ Holeka muli zose zono mwalonjela kutitu, i wanhu wolozihulicila mu wuzelu, na zono mwepwepwelaga cinyele ne milango midinde, zolokwanzalicilwa mu matembe mucanyha.” ⁴ Nane nghumutyenyi anye mo wendece wangu, “Mulece kuwogopa wono wawulagaga muwili, na hanyuma yayo si wosuma kwituma cinji. ⁵ Ninga nghumulajilenyi mono yinojeye mumogope: Mogopenyi mwene, mono yena wulajilize wo kumutajilila munhu mu moto we gehena, kolo yakondya kuwulaga, heya ye, nghumutyenyi, Mumogopaje yuyo. ⁶ Yimanyice vyono vikobobole vihano, vigulwaga kwa sendi kumi, si nha vivyo? Ninga hamba cimonga Mulungu si kacisemwaga. ⁷ Ninga sunga ne zimwvili za mu mitwe yenyu mbalwe zose. Alenyi mulece kogopa, anye muvicizize vikobobole vinji.” ⁸ Nghumulonjelenyi mbeka, muli wose mono yakumvumilila hali wanhu, vyono wangu, Mwana wo Munhu nayo kolomuvumilila hali Wamalayika wo Mulungu, vyono munhu yuyo wakwe. ⁹ Ninga mono yakunghanila hali wanhu, nayo kolokanilwa hali Wamalayika wo Mulungu. ¹⁰ Na muli wose mono kolonga nghani yono kuli Mwana wo Munhu, konenelwa; ninga mono yakumutovula u Muhe Mono Yelile si konenelwa. ¹¹ Na kolo wakumutegulenyi mu matang’anilo go wuhembelo, na kuli wawaha, ne watemi, muze mulece kwihwelela molopitula nhawule, hamba mololonga ci. ¹² Hambi u Muhe Mono Yelile nha kolomwijizenyi mu cipango cico zono mololonga. ¹³ Munhu yunji wa mwipuga lye wanhu, yakamutya, “Mwijizi, wumulonjele muwaha wangu cigawane zisawo zono yacilecela sogo yetu.” ¹⁴ Yesu yakamutya, “Gwe mwendece wangu, mwene mono yanheye niwe mulamuzi lunji mugawi muli nyenye, nani?” ¹⁵ Yakawatya wose, “Lanjenyi ta, mwiyikamisaje mu wusulumizi wose, hambi u wumi wo munhu nha si wutugaga mulamu ku soko yo winji we vinhu vyono yena navyo.” ¹⁶ Yakawalonjela cihwanicizo yakutya, “Kwali na mugoli yunji, mugunda wakwe wukafisa muno. ¹⁷ Yakehwesa mu nhumbula yakwe yakatya, ‘Alu ’mba notenda wule, hambi nha sina ho kuwika ndigwa zangu?’ ¹⁸ Yakatya, Notenda nhavi, nogamwagula i madongha gangu, nzenje ganji mawaha, mo nowika wuhemba wangu wose, ne zisawo zangu. ¹⁹ Ho nowutya wumi wangu, ‘Go wumi, alu wina sawo nyinji yono yokukwila kwa myaka minji, alu wucehe, wulye, wung’we, wusangalale.’ ²⁰ Ningo Mulungu yakamutya, ‘Go mulele gwe, mu cilo cici du wumi wako nha wosolwa na zono wiwikanizize zowa za nani?’ ” ²¹ Yesu yakamalila ko wutya, “Ale, vyo yinha kuli munhu mono yakwiwicila sawo ku soko yakwe mweneco, nayo si mugoli kuli Mulungu.” ²² Yesu yakawatya wejizwa wakwe, “Ku soko yiyo holeka nghumutyenyi anye. Mulece kwihwelela so ndigwa yono molya ho mwikale womi, hamba so myenda yono mosaka so miwili yenyu. ²³ Hambi wumi nha wucizize zindigwa, no muwili wucizize vivwalo. ²⁴ Nha vyono mahowe, si gahadikaga, hamba kududula, gasina madongha hamba nyumba, nayo u Mulungu kagalisaga: ko muno anye muzicizize zindeje! ²⁵ Nani ’mbi muyenyu, hono yawe kwihwelela, mono kosuma konjeleza vilo vyo wumi wakwe? ²⁶ Ale hono anye si mukusuma kuyinoza nghani ndodo nha yiyo, so cici mukwihwelela zinji? ²⁷ Mulanje maluwa vyono gotaga, si getumaga cinji, hamba kubota; ninga nghumutyenyi, sunga na Solomona mu nhojo yakwe yose, si yali yavwalile vyono linha liluwa limonga liyagwe na gaga. ²⁸ Ninga u Mulungu hono yagavwice nhavivyo mahanze ga mu mugunda, gono gali baha izuwali, ne mitondo gowa kutagwa mu moto; si kocila ’mbi kumuvwicenyi nyenye? Anye wo wihuwilo wucefu! ²⁹ Holeka mulece kugazika mu mahala genyu, akuno mukuhangawicila cono molya, hamba cono mong’wa. ³⁰ Hambi zizi zose nha zo wakuzigazicila i wanhu wono si wamumanyile Mulungu, ninga Sogo yenyu nha yamanyile vyono mukuvisaka i vinhu vivi. ³¹ Langa, mwamule muwulondole wutemi wo Mulungu, na zizo zose mokonjelezwa. ³² “Mulece kogopa anye mo cipuga cidodo, hambi Sogo yenyu nha yendile kumupelenyi wutemi. ³³ Muguze zisawo zenyu zose zono mwina nazo, muwapele i zipesa waciwa, mwinozeze mifuko yono si yisakalaga, mwiwicile sawo ya ku wulanga kono si yilacepuka. Kono si kasejelelaga muhizi, hamba makuni si gahodangaga. ³⁴ Hambi hono hoyili sawo yako, nhavivyo no mutima wako nawo wowa wuli baho. ³⁵ “Mweze mwiwikanize muli yoyose yono yokwijela, ne misipi yenyu yeze miwope mu viwino, ne zitala zenyu ziwe kwaka; ³⁶ nanye muwe nhe wanhu wono wakumulindila mutwa wawo, kolo yakuwuya kulawa mu zindigwa ze halusi; kolo yakuza yakukong’onha, ho wamudigulile lwa kamonga. ³⁷ Wowa wamoti wetumami wawo wono mutwa wawo kolo yakuza, yakuwagana wekaye meso, mbeka nghumutyenyi, yuyo mutwa wawo, kokwiwopa musipi mu ciwino, kowekaza wene ha zindigwa, no kuwetumamila. ³⁸ Hambe nha mu cilo mugati, hamba yiwe hakali mitondo muno behi no wusiku kwela, hono yawagane wali nhavivilya, wo wamoti wetumami wawo. ³⁹ Ninga yiyi mumanye vyono, hono munya kaya yali yamanye mazizo go muhizi, yali yekale meso, hamba si yali yayilece kaya yakwe yibenwe. ⁴⁰ Holeka na nyenye mwiwikanizaje, hambi Mwana wo Munhu nha kokuziza mwipango lyono si muganicize.” ⁴¹ Petelo yakamutya, “Muwaha, cihwanicizo cici wukucilonjela sese du, hamba wanhu wose?” ⁴² U Muwaha yakatya, “Nani ’mbi u mwitumami mwihuwilwa kanyhi we mahala? Yo yulya mono mutwawe komuwika yawe mwitumami mu nyumba yakwe, ho yawagawile ndigwa mu cidaha cono cikwiliye?” ⁴³ Mumoti mwitumami yuyo, u mutwawe kolo yakuza hono yamwagane yakunoza nhavivi. ⁴⁴ Mbeka komulecela yayilanjilile i sawo yakwe yose. ⁴⁵ Ninga mwitumami yuyo hono yatye mu nhumbula yakwe, “U mutwa wangu yakutinya kuwuya.” Nayo yakwamula kuwatowa wetumami we cilume na we cicekulu, no kulya no kung’wa no kugala wujimbi, ⁴⁶ u mutwawe kokuza mwi’zuwa lyono si yakulanjilila, na mwi’pango lyono si yamanyile, nayo mutwawe kumukunanga muno, no kumuwika mwi’gawo limonga na wono si wehuwiye. ⁴⁷ Ninga mwitumami yuyo mono yali yamanyile wuhile wo mutwawe, nayo si yewikanize kwituma zo wuhile wo mutwawe, yuyo kotowa muno muno, ⁴⁸ ninga mono si yali yamanyile yono yimonojeye yetume, nayo ketuma zono zinojeye wulipicizwe, yuyo kotowa hadodo. Mono yapejigwe vinji, vyosakwa vinji, nayo mono wamukoza vinji muno, wolosaka vinji kuciza kuli mwene. ⁴⁹ “Naza kwasa moto kono’nze, nane nghusaka wuwe wakondya kukolela. ⁵⁰ Nina wubaputizo wono yinojeye niwubocele; alu mwene vyono nghugazika sunga niwufisilize!” ⁵¹ Mulece kwihwesa ’mba naza kuleta mulamu kononze? Hamba hadodo, si mulamu, langa witemanuce. ⁵² Ku wulawa lulu, wowa mu nyumba monga wanhu wahano, wokwitemanuka, wadatu kuli wejete, wejete kuli wadatu. ⁵³ Wolokwitemanuka, sogo yo munhu no mwanagwe we cilume, no mwana we cilume no sogwe; nyina yo munhu no mwanagwe we cicekulu, no mwana we cicekulu no nyina; mukwewe we cicekulu no mugolece wo mwanagwe, no mugolece wo mwana no mukwewe we cicekulu. ⁵⁴ Yesu yakagatya mapuga ge wanhu, “Kolo mukuwona livunde likulawa kumwezi, lwa kamonga mukutya, mvula yikuza.” Na mbeka yikutonya. ⁵⁵ Na lono mukuwona mbeho ya kutakama yikuputa, mukutya, “Lizuwa lyo walika muno.” Na vyo yikuwa. ⁵⁶ Nye mo wakoci, mumanyile kutanga ivitanjilo vye yisi no wulanga, ninga so cici lo si mukusuma kumanya nhunizo ye vidaha vivi? ⁵⁷ “So cici si mukusuma kumanya nyenye mo weneco, ya hayi yono yinojeye? ⁵⁸ Ku soko mono yakukusitaka, lono yakukutegula kuli mahakama, yowa yili ciba kuli’gwe, hono mwilumbanize nayo lono mukali mu nzila; ho yalece kukutegula ha mwande ya hakimu, nayo hakimu yakutegule kuli musilikale, no musilikale yakutajile mu jela. ⁵⁹ Nghukulonjela, sikolawaniziza lukulu kuko, sunga kolo kukondya kulipa sendi ye ndumilizo ye fayini yako.”

¹ Madaha gago, kwali kowali wanhu wanji wono wamulonjela Yesu ze wanhu wa ku Galilaya, wono Pilato yawawulaga mu cipango cono wawulagaga mitugo yawo ye makumbiko. ² Nayo Yesu yakawatya, “Alu mukuwona Wagalilaya wawo wali wabi muno kuciza Wagalilaya wose, vyono watamiswa nhavivyo? ³ Nghumutyenyi, ng’o, ye; ninga na nyenye hono mulece kunena, molofwa wose nhavivyo. ⁴ Hamba wanhu walya we likumi na munana wono wagwilwa no munala ku Silowami, wakawulagwa, mukuwona wawo wali wabi, wacizize wose wono wekaye ku Yelusalemi? ⁵ Nghumutyenyi, ng’o, ye, ninga nanye hono mulece kunena, molofwa wose nhavivyo.” ⁶ Hanyuma Yesu yakawalonjela cihwanicizo cici. “Munhu yunji yali yena mukuyu muhadikwe mu mugunda wakwe; u munhu yuyo yakabita yakusaka kuhepa mikalo mu mukuyu wuwo, ninga yakawagana wukali si nalela hamba hadodo. ⁷ Yakamutya u mulindiliza mugunda, langa ta, myaka yiyi midatu, nizaga ho hepe mikalo mu mukuyu wuwu, hamba kuyiwona ng’o, ale wutemangaje; so cici lo wukwidawalila muhangha bwete?” ⁸ Nayo yakapitula yakamutya, “Muwaha, wuwulekaje kanyhi mwaka ’wu, niwuzuwile, niwukupile ne suji; ⁹ nawo hono wulele mikalo hanyuma, viswanu; ninga hono wulece kulela, langa ho kowutemanga.” ¹⁰ Yesu yakawa yakwijiza mu nhang’anilo yinji yo wuhembelo, mwizuwa lye Sabato. ¹¹ Baho hali na mucekulu mono yali mutamwa myaka yikumi na munana, yali yena licisi lyavu lyono lyali limwinjiye, na ku soko yiyo, u muwili wakwe yali yekunyile, hamba siyasumaga kugoloka hamba nhavi. ¹² Yesu yaza kumuwona yakamucema, yakamutya, “Yaya, waponywa wutamwa wako.” ¹³ Yakamuwicila miwoko yakwe; lo lulo lulo muwili wakwe wukagoloka, yakamulumbo Mulungu. ¹⁴ Ninga u muwaha we nhang’anilo yo wuhembelo yakasimba, vyono Yesu yamuponya u mucekulu yuyo mwi’zuwa lye Sabato, na ho baho yakawa kuwalonjela wanhu wono wali wekonghoye baho, yakutya, “Ko vili vilo mutandatu vyo kwitumila mulimo, holeka mu vilo vivyo, mweze kuza kulagulwa, langa mwizuwa lye sabato ng’o.” ¹⁵ Ninga Muwaha yakamupitula, yakatya, “Nye mo wakoci, ma, muli nyenye, moyuli yunji mono si katulusaga ng’ombe yakwe hamba ndogowe yakwe, no kuzing’wesa mwizuwa lye sabato? ¹⁶ Alu yuyu, nayo mwana wa Abulahamu, mono Setani yali yamulemaze mu myaka yiyi yikumi na munana, wulenyi, si vyali viswanu kumuponya mu wutamwa wakwe wuwo mwizuwa lye Sabato?” ¹⁷ Yaza kukondya kulonga zizi, walugu wakwe wakapuwa wose; ne wanhu wose wakasecelela, ku so zinghani ze lilumbo zose, zono zetumwa no mwene. ¹⁸ Yesu yakawuza; Uwutemi wo Mulungu winha wule? Nowihwananiza na cici? ¹⁹ Wihwanile ne mhece ya Haladali, yono munhu yunji yakayisola, yakayihadika mu mugunda wakwe, yikacindika, yikawiluka, wukawa mubici, ne zindeje za mucanyha zikazenga i manhuli gazo mu manhambi gayo. ²⁰ Kanyhi yakawawuza, “Nowuling’aniza na cici U wutemi wo Mulungu? ²¹ Wihwanile ne cisase cono yasola mucekulu yunji, yakacihanza hanza mu wusaje we ’debe limonga, sunga wose wukatumba.” ²² Yesu yakajendelela no muhinzo wakwe yakubita ku Yelusalemi kuno yakukolela mu makaya na mu vitumbi, yakuganula. ²³ Munhu yunji yakamuwuza; “Ati Mwijizi, alu wono wakupona wacefu?” ²⁴ Yesu yakawatya, Muhidimbale kwinjila mu mulango mufinyu, hambi nha nghumulonjelenyi mbeka, vyono wenji wojela kwinjila, ninga si wosuma. ²⁵ Cipango cokuza, cono munya kaya kokwinuka, no kudinda mulango, nanye molokwanza kwima kunze, no kukong’onha ha mulango, mukutya, “Muwaha, wucidigulile mulango.” Nayo kolopitula yawe kumutyenyi, “Si nghumumanyenyi kono mulawile!” ²⁶ Nanye mokwanza kumulonjela, mukutya, “Ase yo sese mono calizaga no kung’wa hamonga nagwe, nagwe wejizaga mu vitumbi vyetu.” ²⁷ Nayo kolotya, “Nghumutyenyi, simanyile kono mulawile; muwuce hono mwande yangu, anye wose mono mwitumaga zo wubi.” ²⁸ Kuko kolowa cililo no kugwezula meno, baho mulaza wawona Abulahamu, Isaka na Yakobo ne wawizi wose, wali mu wutemi wo Mulungu, ninga anye mukutagwa kunze! ²⁹ Wanhu wolokuza wakulawa kucilima na kumwezi, kusumuka na kutakama, wokuza no kwikala ha zindigwa mu wutemi wo Mulungu. ³⁰ Na lanjenyi ta, kowali wa munyuma wono wolowa walongozi, na kowali walongozi wono wolowa wa munyuma. ³¹ Mu cipango cico Wafalisayo na wanhu wanji wakamuziza Yesu, wakumutya, “Wuwuce baha wubite hanhu hanji: hambi Helode nha yakuhila kukuwulaga.” ³² Yesu yakawatya “Bitenyi nye mukalilonjele licewe lilyo. Langa ta, izuwali ne mitondo, nghulavya macisi no kuponya watamwa, ne lizuwa lye kadatu nowa nayikondeleza i milimo yangu.” ³³ Hamba nhavivyo izuwali, ne mitondo ne cilawu, yinojeye njendelele no muhinzo; hambi nha si yinojeye muwizi yawulajilwe kunze ya Yelusalemi. ³⁴ “Yelusalemi! Gwe Yelusalemi! Kuwawulagaga wawizi, no kuwatowa na mabwe wono wakutumwa kuli’gwe! Kalinga nali kuhila kuwakongholela wanago hamonga, nha vyono nghuku yikunyanjilaga viziyoziyo vyayo mu mabawa gayo, ninga walemaga? ³⁵ Lanje ta i Nyumba yo Mulungu wako yolekwa. Heya, mbeka, nghumutyenyi, Si molombona ng’o sunga kolo mukutya, ‘Yo mumoti mono yakuziza mwitagwa lyo Muwaha.’ ”

¹ Mwizuwa linji lye Sabato, Yesu yakenjila kulya ndigwa, mu nyumba ya yumonga muyagwe ne wawaha we Wafalisayo, wanhu wono wali wali baho wakawa wakumulanjilila. ² Ale, hali Yesu, hali hoyuli yunji mono yali yena wutamwa wo kuvimba muwili. ³ Nayo Yesu, yakawawuza wejizi wo Wulajilize ne Wafalisayo yakutya, “Wulenyi, yili mwiko kumuponya munhu mwizuwa lye Sabato hamba ng’o?” ⁴ Ninga wene hamba siwapitula cinji. Yesu yakamwibata mutamwa, yakamuponya, yakamukombola yabite. ⁵ Hanyuma yakawatya, “Nani lu wa muli nyenye mono yena mwanagwe lunji ng’ombe, hono yigwile mwi’sima, mono si koyinimula kamonga mwizuwa lye Sabato?” ⁶ Nawo hamba siwasuma kumupitula kanyhi kuli zizi. ⁷ Yesu yakawawona wawalya wono walalikwa, vyono wakwihaga magoda matambule, yakawalonjela cihwanicizo, yakuwatya. ⁸ “Hono wucemwe na munhu ku ndigwa ze halusi, wulece kwikala mwigoda litambule; lunji kowa mono yena lilumbo yakucizize agwe, mucemwe nayo, ⁹ na kolo munya kaya yakuza yakutye, ‘Wumutelele ayu.’ Ale ho kokwanza kuwona soni kwikala mwigoda lya kunyuma. ¹⁰ Ninga hono wucemwe, wubite wukekale mwigoda lya kunyuma, kolo yakuza munya kaya, yakutye, ‘Wayiko, sejelele kono mwande,’ baho ho kowa ne lilumbo ha meso ga wose wono mwikalane. ¹¹ Hambi muli wose mono yakwikumya mweneco, nha konyetywa, nayo mono yakwinyetya, yo kokumywa.” ¹² Hanyuma Yesu yakamulonjela na yuyo mono yali yamucemile, “Kolo wukwitumama ndigwa ze misi lunji ze mihe, wulece kuwacemela wendece wako, hamba wanduguzo, hamba we cimanyi, hamba wagoli wayago; ku soko nawo wokucemela kanyhi, nagwe kowa wahalizwa. ¹³ Ninga hono witumame ndigwa nyinji, wuwacemelaje waciwa, na we vilema, na wono wakusenzegula, ne wabofu; ¹⁴ nagwe kolugutizwa, hambi nha wasina vyo kukuhaliza; nagwe kolohalizwa no Mulungu ha wuzuce wa we ling’ani.” ¹⁵ Na yunji muyagwe na wono wali wekalane na Yesu ha ndigwa, yaza kuhulika zizi, yakatya, “Yo mumoti mono kololya ndigwa mu wutemi wo Mulungu.” ¹⁶ Yesu yakamupitula, “Munhu yunji yanoza ndigwa nyinji za cinyamihe; yakawalalika wanhu wenji. ¹⁷ I cipango co kulila zindigwa caza kufika, yakatuma mwitumami wakwe yawalonjele wono walalikwe waze, hambi nha vyakondya vyose.” ¹⁸ Wakanza wose yumonga yumonga kulavya vikojelo. Umulongozi yakamulonjela u mwitumami yakatya, “Ngula mugunda, na yinojeye mbite nghawulanje; nghukunena wundece.” ¹⁹ Yunji yakatya, “Ngula ng’ombe yikumi za kulima, alu nghubita kuzijela, nghukunena wundece.” ²⁰ Na yunji yakatya, “Nhola mucekulu, holeka sinokuza.” ²¹ U mwitumami yulya yakawuya yakamulonjela zizi munya kaya. Baho munya kaya yakebatwa ne likuwo, yakamutya mwitumami wakwe, “Wulawanize mbela wubite mu zinzila zimbaha ne zindodo za mwi’tumbi, wukawalete kuno waciwa, na we vilema, ne wabofu, na wono wakusenzegula.” ²² Hanyuma u mwitumami yakatya, “Muwaha zose zono wulonjile, zanozwa zakondya, ninga hakali hocili cilejeho.” ²³ U muwaha yuyo yakamutya mwitumami, “Wulawanize wubite mu mapalilo na mu mawimbi wukawadindimize wenjile, nyumba yangu ho yimeme. ²⁴ Hambi nha nghumutyenyi, hasina hamba yumonga wa muli wawo wono walalikwe, mono kolojeza ndigwa yangu.” ²⁵ Ale, baho mapuga mawaha ge wanhu, wakabitana na Yesu. Nayo yakawapitucila yakawatya. ²⁶ Munhu wo wose mono yakuza kuli nene, si kowa mwijizwa wangu, langa sunga yawe yanyendile nene si nha vyono yawendile u sogwe, no nyina, ne walumbuze, heya, sunga no wumi wakwe mweneco. ²⁷ Munhu mono siyakudinghula musalaba wakwe mweneco, no kunhyatya nene, si kosuma kuwa mwijizwa wangu. ²⁸ Hambi nani muli nyenye, mono yakuhila kuzenga Munala, mono si kokwamula kwikala yawale cifo cayo, ho yamanye hono yena nazo zo kuwukondelezeza? ²⁹ Ho yilece kuwa lunji kolo yawusimya musinji, hamba kuwukondeleza. Wanhu womuseka, ³⁰ wakutya; “Munhu ayu yanza kuzenga, ninga si yasuma kukondeleza. ³¹ “Hambi mutemici, mono kosaka kubita kwihoma no Mutemi muyagwe, mono si kokwamula kwikala yehwese. Mwene yena wasilikale elufu yikumi, hono kosuma kwihoma na yulya mono yena wasilikale elufu makumi mejete? ³² Hono yawone si kosuma, kotuma wetumami wakwe yakalondole mulamu, lono mutemi yuyo yunji yakali kutali.” ³³ Yesu ho yakawa malila yakutya, “Ale nhavivyo na muli nyenye, mono si yakuleka vyose vyono yena navyo, sikosuma kuwa mwijizwa wangu.” ³⁴ “Mwino muswanu; ninga mwino weneco hono wuwe wususulice, wogomolezezwa nhawule ndaso yayo? ³⁵ Si wukwiliye kanyhi hamba mu mugunda, hamba kuwa mboleya bwete langa wawutagaga du kunze caka. Holeka muhulice, hono mwina makutu!”

¹ Izuwa linji watoweza kodi ne wahodanji wenji, wakabita kumuhuliciza Yesu. ² Wafalisayo na wejizi wo Wulajilize, wakanza kung’ung’ulika wakutya, “Lanjenyi ta munhu ayu! Yakuwabocela wanyo wubi no kuhanga nawo mu zindigwa.” ³ Yesu yakawalonjela cihwanicizo cici yakutya: ⁴ “Mwene, munhu hono yawe yena ngholo yigana, na hono yajilize monga, kanozaga wule? Kozileka azilya makumi cenda ne cenda kwidimo, yabite yakayilondole yono yajiliye, sunga yayiwone. ⁵ “Na kolo yayiwona, yakuyiwegala mu mawega gakwe yasangalaye. ⁶ Nayo kolo yakuwuya kwakwe, yakuwacema wendece wakwe ne wayagwe, yakuwatya, ‘Cisangalalane nane, hambi nha niyiwona ngholo yangu yono yali yajiliye.’ ⁷ Ale, nghumutyenyi, kowa nyemo nhavivyo ku wulanga so munhu mubi monga mono yakunena, si nha awalya wanhu makumi cenda ne cenda wono wakiwona wali ling’ani wono si wakusaka kunena. ⁸ “Hamba mukuwona wule! Lunji mucekulu mono yena silinje yikumi, na hono yajilize monga, konoza wule? Kokoleleza tala, no kufwagula nyumba, no kusakula sakula sunga yayiwone. ⁹ Nayo kolo yakuyiwona, yakuwacema wendece wakwe ne wayagwe, yakutya, ‘Cisangalalane nane, hambi nha nayiwona silinje yangu yono nali nyajilize.’ ¹⁰ Ale, nghumutyenyi, vyo wosangalala wamalayika wo Mulungu, ku soko yo munhu monga munyo wubi mono yakunena.” ¹¹ Yesu yakajendelela kulonga yakutya, “Kwali na munhu yunji, yali na wana walume wejete. ¹² U mudodo yakamutya sogwe, ‘Baba wungawile ligawo lye sawo lyono nohalila.’ Nayo sogo yawo yakawagawila sawo yakwe. ¹³ Hanyuma ya vilo vicefu, u mwana mudodo yakawa kuguza u wuhazi wakwe, yakatuluka ne zipesa zakwe zono yazituga, yakabita yisi yinji ya kutali, kono yeyagaziza sawo yakwe mu mikalile mibi. ¹⁴ Nayo yaza malila lukulu vyose, kukawa nzala mbaha ku yisi yiyo, yakanza kugaya. ¹⁵ Yakalomba mulimo kuli munhu yunji wa mu yisi yiyo, nayo yakamutegula ku migunda yakwe yakadime magubi. ¹⁶ Nayo yasulumilaga yegutye yinda yakwe ne salagunga yono galizaga magubi; hamba yunji si yamupela cinji co kulya. ¹⁷ Ninga yaza kukumbucila, yakatya, ‘Mwene, wetumami wa baba nha wenji, wono wakwiguta zindigwa wakusigaza, nane nghufwa kuno ne nzala! ¹⁸ Nobita kuli baba, nimulonjele, nitye, Baba, nimusutizyo Mulungu, nghusutizya na gwegwe nhavivyo. ¹⁹ Si nojeye kanyhi kucemwa mwanago. Wunozaje niwe nha yunji muyagwe ne wetumami wako.’ ²⁰ Ale, yakawa kwanza u muhinzo wo kuwuya kuli sogwe. Nayo lono yali yakali kutali, u sogwe yakamuwona, yakamuwonela lusungu, yakamumanyhilila, yakamulamusa ko kumukumbatila, no kumunonela muno. ²¹ Nayo mwana yakamutya sogwe, ‘Baba, nimusutizyo Mulungu, nghusutizya na gwegwe nhavivyo. Sinojeye kanyhi kucemwa mwanago.’ ²² Ninga usogwe yakawatya wetumami wakwe. ‘Letenyi mbela mwenda muswanu mumuvwice; muvwicenyi nyamwidole ne malatu. ²³ Muwulaje ne ng’ombe yono yijinile cinoze sikukuu, cilye, cisangalale. ²⁴ Hambi yuyu mwanangu nha yali nha yafwiye, kumbe mumi, yali yajiliye, ninga alu kejela.’ Hobaho wakawa kwanza kuyinoza sikukuu. ²⁵ “Mwipango lilyo, u muwahawe yali yakali ku mugunda. Lono yawuyaga, yaza kusejelela behi ne kaya, yakahulika ng’oma no wuvina. ²⁶ Yakamucema yunji muyagwe ne wetumami, yakamuwuza yakutya, ‘Alo ko cilici?’ ²⁷ Mwitumami yuyo yakamutya, ‘Mwanakwenyu kawuya, no sogo kamuwulajila ng’ombe yono yijinile, vyono yamuboceye yapolile, kanyhi mutelevu.’ ²⁸ “Yuyo muwahawe yakakolwa ne likuwo, hamba si yenda kwinjila na mu kaya. Nayo sogwe yakalawila kunze, yakamuneneleza yenjile. ²⁹ Ninga mwene yapitula yakamutya sogwe, ‘Kumbucile baba, vyono myaka yiyi yose nghwitumamilaga, hamba nghali si nabeza malajilizo gako, ninga wumhelile cici? Wukali namhela hamba cipene cidodo vivi, ho noze nane sikukuu ne wendece wangu. ³⁰ Ninga yeza kuza du mwanago ayu, mono yalya sawo yako hamonga ne wasenyha, kuwa kumuwulajila ng’ombe yono yijinile.’ ³¹ U sogwe yakamutya, ‘Mwanangu, agwe nha cikalanaga nane nhondo zose, na vyose vyono nina navyo nha vyako. ³² Ninga yali yicinojeye cinoze sikukuu no kusangalala; hambi ayu mwanakwenyu, nha yali kotya yafwiye, kumbe mumi; yali yajiliye ninga alu yejela.’ ”

¹ Yesu yakawalonjela wejizwa wakwe, “Kwali na munhu yunji mugoli, mono yali yena mwitumami wakwe; yuyo mwitumami yakasonjezwa vyono yakwitumamila caka sawo yo mugoli. ² Nayo mugoli yakamucema, yakamutya, nghanici yiyi yono hulice muli gwegwe?” Ale wulavye liwalo lya vyono kubocelaga, na vyono kwitumamilaga mu sawo yangu, hambi nha si kosuma kuwa kalani kanyhi. ³ Mwitumami yakehwesa mu nhumbula yakwe, alu muwaha wangu yeza kumbusa mu mulimo wo wukalani, alu nonoza cici? Vilungo vyo kulimila sina; ku wilombelezi nako kotya nili muciwa, yo nghani ya cevu. ⁴ Aa! Alu namanya vyono notenda, kolo nawuswa mu mulimo, wanhu ho wanyhemele mu zinyumba zawo. ⁵ Ale, yakawacema we migawa yo mutwawe wose, yakamutya mulongozi, “Wukuzijilwaci no mutwa wangu?” ⁶ Nayo yakatya, “Mapipa yigana limonga ga mafuta ga alizeti.” Kalani yakamutya, “Sola ceti cako co mugawa, wikale mbela wandice makumi mahano.” ⁷ Yaza kondya, yakamutya yunji, “Agwe ma nagwe, wukuzijilwaci?” Nayo yakatya, “Magunila yigana limonga ga wuhemba.” Kalani yakamutya, “Sola ceti cako co mugawa, wandice makumi munana.” ⁸ Yuyo muwaha, yakamukumya yuyo mwitumami mono si mwihuwilwa, vyono yanoza ko wusugu. Hambi wanhu wa kononze yiyi, nha wasugu muno kuli zawo si nhe wanhu wo wuzelu. ⁹ Nayo Yesu yakajendelela kutya. “Nane nghumutyenyi, Mwinozeze wayendi wayenyu mu wulawa mu zisawo zimbi za mononze, kolo yikumalika, ho wamubocelenyi ku wikalo we cibitilila.” ¹⁰ Wo wose mono kowa mwihuwilwa mu nghani ndodo muno, yo kowa mwihuwilwa na mu nghani mbaha, na wo wose mono si mwihuwilwa mu nghani ndodo, si kowa mwihuwilwa mu nghani mbaha. ¹¹ Ale, hono si muli wehuwilwa mu zisawo zimbi za mononze, nani ’mbi mono komukozenyi zisawo ze mbeka? ¹² Na hono mukali nawa wehuwilwa mu sawo yono si yenyu, yo nani mono komukozenyi i zisawo ze mbeka? ¹³ “Hasina mwitumami mono kosuma kuwetumamila watwa wejete, ku soko, lunji komusula yumonga na kumwenda muyagwe, hamba komuhulika yuyo yumonga no kumubedegala u muyagwe. Holeka si mosuma kumwitumila u Mulungu ne sawo.” ¹⁴ Ninga Wafalisayo wali weza kuzihulika zizo zose, vyono wene wali wendile muno sawo, wakamubedegala Yesu. ¹⁵ Nayo yakawatya, “Anye mwinozaga muli waswanu ha meso ge wanhu, ninga Mulungu yo yazimanyile zinhumbula zenyu, hambi cono cijelaga cina lukumyo hali wanhu, Mulungu yakuciwona nha takataka du.” ¹⁶ U Wulajilize ne mandiko ge wawizi, vyali vili baho, sunga mwidaha lya Yohana u Mubaputizi, vyono wulawa lululya u Luganuzi Luswanu lo wutemi wo Mulungu lukuganulwa, no munhu wo wose yakuwinjila kwe vilungo. ¹⁷ Ninga kupelu wulanga ne yinze kuwumalice, si nha lwandiko lumonga lwa mu Wulajilize kupatwa. ¹⁸ Muli wose mono yakumuleka mugolece wakwe, no kutola yunji, yakusenyha, nayo mono yakumutola mono yapejigwe talaka no mulume wakwe, nayo yakusenyha. ¹⁹ Ale, kwali na munhu yunji mugoli, yavwalaga myenda yo wuguzi wukamu muno, myenda ye liwala lyo lugandu na bafuta swanu. Yekalaga yakumota vilo vyose. ²⁰ Hali ho yuli muciwa yunji, litagwa lyakwe Lazalo, mono yali yena vilonda mu muwili wose, nayo yali yawicigwe ha mulango wa yuyo mugoli. ²¹ Yasulumilaga yapegwe vifukufuku vyono vyagwizaga ha wulilo wo mugoli, sunga ne mabwa, gazaga gakumunamha malonda gakwe. ²² “Baho u muciwa yakafwa, wamalayika wakamusola, yakekala behi na Abulahamu, u mugoli nayo yakafwa, yakawikwa mu citenjelo. ²³ Yuyo mugoli, lono yali yali mu wusungu wukali kuko ku hanhu ha myuhe ye wabi, yakenula meso gakwe, yakamuwona Abulahamu, na Lazalo yali behi nayo, ²⁴ Yakacema yakatya, ‘Baba Abulahamu, wumbonele lusungu ye, wumutume Lazalo, yazabice hambe cisonje ce cidole cakwe mu malenga, yamhoze lulimi lwangu; hambi nha nghuwona wusungu mu moto wuwu.’ ²⁵ Ninga Abulahamu yakatya, ‘Mwanangu, wukumbucile vyono, lono agwe wali wukali mumi, wamotaga vyako viswanu, na Lazalo yakabocela i vibi, ninga lu baha mwene mutuzwe, nagwe wuli mu wusungu. ²⁶ Na muli zizi zose, hagati yetu na nyenye, lyawikwa likombo yitali muno, ho walece kusuma kulowoka, wakulawa akuno no kuza kuko kwenyu, hamba wa kuko kulowoka kuza kono kwetu.’ ²⁷ Yuyo mono yali mugoli, yakatya, ‘Heya baba, ale nghukulomba, wumutume Lazalo yabite ku kaya ya Baba, ²⁸ hambi nha nina wanakwetu wahano; yakawasugule, walece kuza nawo hanhu hano ha wusungu.’ ²⁹ Ninga Abulahamu yakatya, ‘Wanduguzo, wena nawo wa Musa ne Wawizi, wawahulice wawo.’ ³⁰ Ninga mwene yakatya, ‘Ng’o ye baba Abulahamu; langa hono yabite yunji kuli wene mono yazucile mu wafu, wonena.’ ³¹ Nayo Abulahamu yakatya, ‘Hono walece kuwahulika Musa ne Wawizi, hamba yunji yenuce mu wafu, si wokwihuwila yaye.’ ”

¹ Yesu yakawatya wejizwa wakwe; “I mewajizo gono gakuwakwega wanhu ho wetume wubi; si goleka kuza, ninga woyi he kuli munhu yuyo mono yakugaleta! ² Ciba yali yawopelezwe lizala yiwaha mu singo, yatagwe mwi’lenga, si nha kumwiwajiza mudodo monga muyagwe na wawa. ³ Mulanjilile! Hono nduguyo yakusutizye, wumukaje; na hono yanene wumunenelaje. ⁴ Hamba yakusutizye kali mupunghati, mwizuwa limonga, na hono yakusutya yakukuziza no kukutya ‘Nghunena,’ wumunenelaje.” ⁵ Iwatumwa wakamutya, “Muwaha, Wuconjeleze wihuwilo.” ⁶ Nayo Muwaha yakawatya, Hono mwali muwe no wihuwilo wudodo kotya nhe mhece ya haladali, mwali muwulonjele mubici wuwu wo mukuyu mukutya, kulice wukehadice mwi’lenga, nawo wali wumuhulicenyi. ⁷ “Lunji, citye muli nyenye, yunji yena mwitumami mono yali kwi’lima, hamba yali ku wudimi we zingholo; wulenyi kolo yawuya, kulawa ku mugunda, komulonjela yuyo mwitumami, ‘Wuze lulu baha wulye zindigwa?’ ⁸ Ng’o, langa komutya, ‘Wunhenjele nilye; witunje, wunyitumamile, sunga nghondye kulya no kung’wa, hanyuma nagwe ho kolya no kung’wa?’ ⁹ Si komulumba mwitumami vyono ketuma zono yalajilizwe? ¹⁰ Ale na nyenye nhavivyo, kolo mukukondya kwituma zose zono mulajilizwe, mutye, ‘Ase cili wetumami mono cisina cambuzi, cifisiliza du zono zali zicinojeye kwituma.’ ” ¹¹ Kukawa Yesu lono yabitaga ku Yelusalemi, yakakolela mu mipaka ya Samaliya na Galilaya. ¹² Nayo lono yenjilaga mu citumbi cinji, waketang’anila nayo wanhu yikumi wo wukoma, wali wemile kutali. ¹³ Wakenula mazi gawo, wakutya, “Yesu Muwaha, Wuciwonele lusungu.” ¹⁴ Yaza kuwawona, yakawatya, “Bitenyi mukelajile kuli wakohani.” Kukawa lono wabitaga, wakawa kwezwa. ¹⁵ No muyawo monga, yaza wona vyono yapona, yakawuya yakumulumbo Mulungu ne lizi yiwaha; ¹⁶ yakegwisa hasi ha mwande ye magulu ga Yesu, akuno yakumulumba. Nayo yali Musamaliya. ¹⁷ Baho Yesu yakatya, “Alu, si wali wanhu yikumi wono wezigwe? Awalya we licenda wali hayi lu? ¹⁸ Si yejeye yunji mono yazize kumupela Mulungu lilumbo, langa mujenzi ayu du?” ¹⁹ Hanyuma yakamutya yuyo munhu, “Winuce wubite, wihuwilo wako wukuponya.” ²⁰ Mwipango linji, Wafalisayo wamuwuza Yesu wakutya, “U wutemi wo Mulungu wolokuza nili?” Nayo yakawapitula, yakatya, “U wutemi wo Mulungu si wuzizaga mu nzila yono yikwijela ne meso. ²¹ Hamba hasina mono kolosuma kutya, ‘Awu aha.’ Hamba lunji, ‘Awulya ahalya.’ Hambi wutemi wo Mulungu nha wuli muli nyenye.” ²² Hanyuma yakawatya wejizwa wakwe, vyolokuza vilo, lono molohila kuwona lizuwa limonga, lya mu vilo vyo Mwana wo Munhu, hamba si mololiwona. ²³ Ne wanhu wolomulonjelenyi wakutya, “Lanjenyi ta yali ahalya.” Mulece kubita, hamba kuwatyatya. ²⁴ Hambi nha vyono linha limuli, lono likumulika likulawa ku lubavu lumonga lo wulanga, sunga ku lubavu luyagwe lo wulanga; vyo kolowa no Mwana wo Munhu mwizuwa lyakwe. ²⁵ Ninga lono zikali si nawa zizo, sikoleka kwamula kutamiswa vibi, no kulemwa no lulelo alu. ²⁶ Nha vyono zali mu vilo vya Noha, vyo zolowa vilo vyo Mwana wo Munhu. ²⁷ Wanhu wajendelelaga kulya no kung’wa, kutola no kutolwa, sunga mwi’zuwa lililya lyono Noha yenjilila mu safina. Lihwazi likaza, likawawulaga wose. ²⁸ Ale, yolowa nha vyono zali mu vilo vya Loti; wanhu wajendelelaga kulya no kung’wa, kugula no kuguza, kuhadika zimbeyu no kuzenga. ²⁹ Ninga mwizuwa lililya lyono yawucila Loti mu Sodoma, moto we cibiliti wukatonya nha mvula kulawa ku wulanga, no kuwawulaga wose. ³⁰ Nhavivyo vyo yolowa yinha mwizuwa lilyo lyono kologubulilwa u Mwana wo Munhu. ³¹ “Mwizuwa lilyo, munhu wo wose mono kolowa mwi’tembe lye nyumba yakwe, yalece kutima ho yasole vinhu vyakwe vyono vili mu nyumba. Na mono kolowa ku mugunda nhavivyo yalece kuwuya. ³² Kumbucilenyi zono zamwagana u mugolece wa Loti. ³³ Muli wose mono kolondola kuponya nhumbula yakwe, koyajiliza, ninga muli wose mono koyajiliza, yo koyiponya. ³⁴ Nghumutyenyi, mwizuwa lilyo ne cilo, wolowa wagonile wanhu wejete hamonga, yumonga kolosolwa, no muyagwe kololekwa. ³⁵ Wacekulu wejete wolowa wakusajila hamonga; yumonga kolosolwa, no muyagwe kololekwa. [ ³⁶ “Wanhu wejete wolowa mu mugunda; yumonga kolosolwa, no muyagwe kololekwa.]” ³⁷ Baho wakamuwuza, “Hayi lo Muwaha?” Nayo yakawatya, “Kono ko wuli muvimba, kuko ne zindi ko zolokwikongholela.”

¹ Hanyuma Yesu yakawalonjela cihwanicizo Wejizwa wakwe, yakuwalajila vyono yiwanojeye kulomba nhondo zose, walece kukatala. ² Yakatya, “Kwali na hakimu mwitumbi linji, mono si yamogopago Mulungu hamba kumucelelela munhu wo wose. ³ Mwitumbi lilyo, mwali na mucekulu mufwile; mono yazaga kali kenji kuli hakimu yuyo, yakumulomba yawalamule no mulugu wakwe. ⁴ Hakimu yuyo yakamula kulemalema kali kenji, ninga hanyuma yakehwesa mu nhumbula yakwe, yakatya, ‘Hamba niwe sinimogopaga Mulungu, hamba kumucelelela munhu wo wose, ⁵ ninga vyono mucekulu ayu mufwile yakungaza, nomulamulila, ho yalece kujendelela kunghataza so wuze wakwe wa kenji na kenji.’ ” ⁶ U Muwaha yakajendelela kutya, “Hulicenyi ta, zono yalonga yuyo hakimu mubi. ⁷ Alu ma, Mulungu nayo, si kowalamulila wahagulwa wakwe wono wamulililaga misi ne cilo? Hambi kocela kuwataza? ⁸ Nghumutyenyi, mbeka kowalamulila mbela mbela. Ninga hamba nhavivyo, wulenyi, kolo yakuza kono’nze Mwana wo Munhu, kolowagana ’mbi wihuwilo mono’nze?” ⁹ Hanyuma Yesu yakawalonjela cihwanicizo cici, awalya wono wewonaga nha waswanu, no kuwabedegala wayawo wose. ¹⁰ “Wanhu wejete wabita ku Nyumba yo Mulungu kulomba, yumonga yali Mufalisayo, no muyagwe yali mutoweza kodi.” ¹¹ Yuyo Mufalisayo yakema, yakawa kulomba cinyele mu nhumbula yakwe yakutya, “Gwe Mulungu, nghukulumba vyono ane si ninha wanhu wanji, wabugu, wakonyi, wasenyha, nghukulumba vyono ane si ninha ayu mutoweza kodi. ¹² Mu vilo mupunghati ndekaga kulya kejete, ndavyaga zaka, muli vyono sawaga vyose.” ¹³ Ninga ayulya mutoweza kodi yakema kutali, hamba si yenda no kwinula meso gakwe ku wulanga, ninga yaketowa mu mhambaga ko wukalale, yakatya, “Gwe Mulungu wumbonele lusungu ane no mubi.” ¹⁴ Nghumutyenyi, yuyo mutoweza kodi, yawuya kwakwe kuno yakondizye kwilamula no Mulungu. Ninga ayulya u Mufalisayo, si nhavivyo. Hambi muli wose mono yakwikumya mweneco, nha konyetywa na mono yakwinyetya yo kokumywa. ¹⁵ Wanhu wakamuletela Yesu i wana wadodo, ho yawawicile miwoko yakwe. Ninga iwejizwa waza kuwawona, wakawatacila no kuwemila. ¹⁶ Ninga Yesu yakawacemela kuli mwene, yakutya, “Walecenyi wana wadodo wanyizize, mulece kuwalemeza; hambi wutemi wo Mulungu, nha we wanhu wono wenha wawa. ¹⁷ Mbeka nghumutyenyi, muli wose mono si kowubocela wutemi wo Mulungu nho mwana mudodo, si kokwinjila mumo ng’o.” ¹⁸ Na mulongola yunji, Muyahudi, yakamuwuza Yesu, yakutya, “Ati Mwijizi muswanu, nhende wule, ho niwutuje wumi we cibitilila?” ¹⁹ Yesu yakamutya, “Alo so cici wukunyhema muswanu? Hasina yunji muswanu, langa yumonga, yo Mulungu du. ²⁰ Wugamanyile malajilizo, ‘Wulece kusenyha; Wulece kuwulaga; Wulece kuhiza; Wulece kulavya wuhomelezi wa wulambi. Wuwogopaje usogo no nyina yako.’ ” ²¹ Mwene yakatya, “Gaga gose nigakamisaga, vyono nalawa wudodo wangu.” ²² Nayo Yesu yaza kuzihulika zizo, yakamutya, “Wukali wanjiye nghani monga du; wuguze vyose vyono wina navyo, wukawagawile waciwa, nagwe kowa na sawo ku wulanga; hanyuma ho wuze wunhyatye.” ²³ Ninga yuyo munhu yaza kuzihulika zizi, yakakalala muno; hambi nha yali mugoli muno. ²⁴ Nayo Yesu yaza kumuwona vyono yakalaye, yakatya, “Kukamu kuli wono wena sawo ku winjile mu wutemi wo Mulungu! ²⁵ Kupelu kuli ngamiya yikole mu cilanga co lusing’ani, si nho mugoli kwinjila mu wutemi wo Mulungu.” ²⁶ Wanhu nawo waza kuhulika, wakatya, “Nani ’mbi mono kosuma kupona?” ²⁷ Ninga Yesu yakatya, “Zono si zisumice kuli wanhu, nha zisumice kuli Mulungu.” ²⁸ Nayo Petelo yakamuwuza, “Ase nase ma? Caleka zikaya zetu cikakutyatya.” ²⁹ Yesu yakawatya, “Mbeka nghumutyenyi, Munhu wo wose mono yalecile kaya, hamba mugolece, hamba wawahaze, lunji wanakwawe, hamba walezi, hamba wana, so wutemi wo Mulungu, ³⁰ kopegwa zono zicizize kenji mu myaka yiyi ya lulu, no kubocela wumi we cibitilila mu yinze yono yikuza.” ³¹ Yesu yakawasola wali wene, wawalya we likumi na wejete, yakawatya, “Lanjenyi, alu cikubita ku Yelusalemi, na kuko zose zono yandicilwa Mwana wo Munhu ne wawizi, si zoleka kufisilizwa. ³² Hambi nha kolavywa kuli wanhu wono si Wayahudi, nawo womutendela vibi, no kumufunyila mate. ³³ Nawo womutowanga ne mijeledi; womuwulaga, ninga mwizuwa lye kadatu kozuka kanyhi.” ³⁴ Ninga wene si wezuka nghani hamba monga, nghani yiyi yikawa hundikwe kuli wene, hamba si watanga yono yalongwaga. ³⁵ Kukawa Yesu yaza sejelela ku Yeliko, hali na mubofu yunji yekaye ha nzila, yakwilombeleza, ³⁶ nayo yaza kuhulika lipuga lye wanhu likupuluta, yakawuza, “Alo ko cilici?” ³⁷ Wakamutya, “Yesu wa Nazaleti yakupuluta.” ³⁸ Nayo yakabalaluka yakutya, “Yesu go mwana wa Dawudi wumbonele lusungu.” ³⁹ Wanhu wono wali walongoleye, wakamutacila wakutya yanyamale, ninga mwene ho yakacila kucemeleza muno, “Go mwana wa Dawudi wumbonele lusungu.” ⁴⁰ Yesu yakema, yakawatya wamulete kuli mwene. Nayo mubofu yaza kusejelela, Yesu yakamuwuza, ⁴¹ “Wukusaka nghutendele wule?” Nayo yakapitula, “Muwaha, nghulomba wumhele kuwona kanyhi.” ⁴² Yesu yakamutya, “Ale wuwone, Wihuwilo wako wukuponya.” ⁴³ Lo lulolulo mono yali yali cibofu yakawa kuwona, yakamutyatya Yesu, akuno yakumukumya Mulungu. Ne wanhu wose, waza wona zizo, wakamukumya Mulungu.

¹ Yesu yakenjila mwi’kaya lya Yeliko, na lono yakolaga mu zinzila za mwi’kaya lilyo, ² hali na munhu, litagwa lyakwe Zakayo. Munhu yuyo yali muwaha we Wakalani watoweza kodi, kanyhi yali munhu mugoli. ³ Yahilaga kumuwona Yesu yamumanye; ninga ku soko yo winji we wanhu, kanyhi vyono mwene yali mufupi; hamba siyasuma. ⁴ Hobaho yakalongolela lumangho, yakananuka mu mukuyu, ho yasume kumuwona Yesu, hambi nha yakolaga nzila yiyo. ⁵ Nayo Yesu yaza fika bahalya, yakagalamila, yakamutya, “Zakayo wutime mbela, hambi zuwali nha yinojeye niswe mu kaya yako.” ⁶ Zakayo yakatima mbela mbela, yakamubocela na nyemo. ⁷ Wanhu wose waza kuwona zizo, wakawa kwanza kung’ung’ulika wose, wakutya, “Kenjila kuduwa kuli munhu mubi.” ⁸ Ninga Zakayo yakema, yakamulonjela Yesu, yakamutya, “Lanje ta, Muwaha, Nusu ye sawo yangu nowagawila waciwa; na hono niwe namusolela yunji cinji ko wusugu, nomugomolela mwi’walo lilyo kali kane.” ⁹ Yesu yakamutya, “Zuwali mhonelo yinjila mono kaya yiyi, vyono mwene nayo, mwana wa Abulahamu. ¹⁰ Hambi Mwana wo Munhu nha yaza kulondola no kuponya i wanhu wono wajiliye.” ¹¹ Mu cipango lono wanhu wali wakali wahulicize zizo, Yesu yakawalonjela cihwanicizo. (Baho yali yasejelela ku Yelusalemi, ne wanhu wawo wehwesaga vyono mwipango yidodo du, u wutemi wo Mulungu wowa wafika.) ¹² Holeka yakawatya, “Kwali na munhu yunji mutambule, mono yatuluka, yakabita ku yisi ya kutali, yakabocele wutemi ho yawuye. ¹³ Na lono yali yakali si natuluka, yakawacema wetumami wakwe yikumi, yakawagawila pesa munhu ne liwalo lyakwe, yakawatya. ‘Muzinozezaje wusuluza zipesa zizi, sunga nize mbuye.’ ¹⁴ Ninga wanya wusi wayagwe wakamusula, holeka wakatuma watumwa, wabite wakatye. ‘Si cikusaka yuyu yateme muli sese.’ ¹⁵ “Yuyo munhu yakawuya ku kaya akuno yakondya kupegwa wutemi. Ho baho yakatuma wacemelwe kwakwe wetumami wawalya wono yawapela zipesa zizilya, ho yamanye cambuzi cono watujile mu wusuluza. ¹⁶ U mwitumami mulongozi yakaza, yakatya, ‘Muwaha, zipesa zako zono wamhela, zonjelezeka kali kumi.’ ¹⁷ Nayo yakamutya, ‘Ale, kunoza viswanu, wuli mwitumami muswanu. Vyono wali mwihuwilwa mu nghani ndodo muno, ale weze muwaha mu makaya kumi.’ ¹⁸ U mwitumami we kejete yakaza, yakatya, ‘Muwaha, cijela cambuzi kali kahano muli zizilya zipesa zono wukamhela.’ ¹⁹ Yakamutya nayo, ‘Nagwe weze muwaha mu makaya mahano.’ ” ²⁰ U mwitumami yunji nayo yakaza yakatya, “Muwaha sole pesa zako, nazikamisa mbope mu citambala, ²¹ hambi nha nakogopa vyono agwe wuli munhu mukali. Agwe wuli munhu mono kusolaga cono si wawika, no kududula cono si wahadika.” ²² Nayo yakamutya, “Nokusumila mu wulonje wako, wuli mwitumami mubi ’gwe. Wali wumanyile vyono ane nili munhu mukali, mono solaga cono sinawika, no kududula cono si hadice, ²³ alo so cici si wayiwika sawo yangu mu benki, nane nali niyisole yina ne cambuzi ha wuwuye wangu?” ²⁴ Yakawatya wono wali wemile baho, “Mumubokaje zizo zipesa, mumupele ayulya mono yatujile cambuzi kali kumi.” ²⁵ Nawo wakamutya, “Muwaha, ayu yena cambuzi cico kali ’kumi.” ²⁶ Nayo yakawatya, “Muli wose mono yena nha kopegwa; no konjelezwa. Ninga mono yasina, kosolelwa sunga na cono yena naco. ²⁷ Ninga wawo walugu wangu, wono si wali wendile niwe mutemi wawo, waletenyi kuno, muwawulajile hamwande yangu.” ²⁸ Yesu yaza kondya kulonga zizi, yakalongola kubita ku Yelusalemi. ²⁹ Kukawa yaza sejelela ku Betifage na Betaniya, he ’tunda lye Mizeyituni, yakawatuma wejizwa wakwe wejete, ³⁰ yakawatya, “Bitenyi ku citumbi cono cili ha mwande yenyu, na kolo mukwinjila mu citumbi, mowona nyana ye ndogowe yiwopigwe, yono yikali hamba si netumamilwa na munhu. Muyiwopole, muyilete baha.” ³¹ Hono munhu yamuwuzenyi, so cici lo mukuyiwopola, mumulonjelaje mutye, “U Muwaha yakuyisaka.” ³² Nawo wono watumwa wakabita, wakawona nha vyono yawalonjela. ³³ Nawo lono wayiwopolelaga nyana ye ndogowe, wanye ndogowe wakawawuza, “Nhawule mukuyiwopolela i ndogowe yiyi?” ³⁴ Nawo wakawapitula, wakatya, “U Muwaha yakuyisaka.” ³⁵ Wakayileta kuli Yesu, wakatandika myenda yawo mu nyana ye ndogowe, wakamupandiza Yesu. ³⁶ Nayo Yesu yakajendelela no muhinzo, akuno yapandile mu ndogowe, ne wanhu wakatandika myenda yawo mu nzila. ³⁷ Nayo yaza sejelela behi na Yelusalemi, ha nhenenhuko ye litunda lye Mizeyituni, i wejizwa wakwe mu winji wawo, wakanza kusangalala no kumulumbo Mulungu kwe ’zi yiwaha, so metumo mawaha gono wagawona, ³⁸ wakutya, “Mumoti u Mutemi mono yakuziza mwitagwa lyo Muwaha, Mulamu ku wulanga, no lukumyo lweze kuli Mulungu.” ³⁹ Wafalisayo wanji wono wali wali mwi’puga lye wanhu, wakamutya Yesu, “Mwijizi wanyamazaje wejizwa wako wanyamale.” ⁴⁰ U mwene yakawapitula, yakatya, “Nghumulonjelenyi anye vyono, hono wawa wanyamale, mabwe gago gozoza.” ⁴¹ Nayo yaza sejelela, yakaliwona likaya yakalililila, ⁴² yakutya, “Yali yiwe yili ciba hono nagwe wali wumanye mwizuwa lili, inghani yo mulamu! Ninga alu yihundicizwe ha meso gako. ⁴³ Hambi vilo nha vyolokuziza, lono Walugu wako wolokupilima no kukutejela kose kose. ⁴⁴ Wolokongomeza gwegwe, hamonga ne wanago wono wali mumo. Nawo si wolokusigaziza hamba libwe limonga mucanyha mwibwe liyagwe, vyono si watanga ilipango lyono Mulungu yaziza kukuponya.” ⁴⁵ Hanyuma Yesu yakenjila mu Nyumba yo Mulungu, yakanza kuwawinjila kunze wono wambazaga, ⁴⁶ yakuwatya, “Yandikwa, Nyumba yangu yowa nyumba yo kulombela; ninga anye mwayinoza kuwa mhango ya Wahizi.” ⁴⁷ Yesu yakawa kwijiza vilo vyose mu Nyumba yo Mulungu. Ninga Wakohani wawaha, ne wejizi wo Wulajilize ne walongola we wanhu, wasakaga kumuwulaga, ⁴⁸ ninga si wayiwona nzila yo kunozeza zizo. Hambi wanhu wose nha wali wamumemeleye, wakumuhuliciza muno.

¹ Kukawa mwi’zuwa linji, lono yawejizaga wanhu mu Nyumba yo Mulungu, no kuganula Luganuzi Luswanu, Wakohani wawaha ne wejizi wo Wulajilize ne wanyamhala wakamuziza, ² wakatya, “Wucilonjele ta! Wukuzinoza zizi ko wulajilizeci?” ³ Yesu yakawatya, “Nane nomuwuzenyi nghani monga, ⁴ u wulajilize wa Yohana wo kubaputiza, walawa kuli Mulungu hamba kuli wanhu?” ⁵ Wakanza kulongana weneco wose wakatya: “Hono citye walawa ku wulanga, mwene kotya, ‘Alo so cici si mwamwihuwila?’ ⁶ Na hono citye, walawa kuli wanhu, wanhu wose wocitowanga ne mabwe, hambi wose nha wehuwiye vyono Yohana yali muwizi.” ⁷ Hodu, wakamutya, “Sicimanyile wulajilize wuwo kono walawa.” ⁸ Nayo Yesu yakawatya, “Hamba na nene si nomulonjelenyi, ko wulajilizeci wono wukuleka nghunoza zizi.” ⁹ Yesu yakajendelela kuwalonjela wanhu cihwanicizo cici. “Munhu yunji yalima mugunda wa mizabibu, yakawika walimi, mwene yakabita ku yisi yinji ya kutali, yakekala kuko vilo vinji. ¹⁰ Mwipango lyo wupilo we mizabibu, yuyo munhu yakatuma mwitumami wakwe kuli wawalya walimi, wamupele mikalo ya mu mugunda we mizabibu, ninga walimi wakamutowa, wakamuwinga yali bwete. ¹¹ Yuyo munhu yakatuma mwitumami yunji kanyhi; nayo wakamutowa nhavivilya no kumutendela vibi, wakamuwinga yali bwete. ¹² Yakatuma sunga na we kadatu; nayo wakamutamisa no kumutaga kunze.” ¹³ Ayulya munya mugunda yakehwesa; “Alu notenda wule? Nomutuma mwanangu mwendece, lunji yuyo womogopa.” ¹⁴ Ninga walimi waza muwona, wakalongana weneco wose, wakutya, “Ayu yo muhazi, alenyi ’nye cimuwulaje, wuhazi wuwe wetu.” ¹⁵ Wakamulavyaniza mu mugunda we mizabibu, wakamuwulaga. Yesu yakawawuza, “Alu u munya mugunda konoza nhawule kuli wawo walimi? ¹⁶ Kolokuza yawawulaje walimi wawo, no mugunda we mizabibu, kopela walimi wanji.” I wanhu waza kuzihulika i zinghani zizo, wakabeza wakatya, “Siyosumika hamba hadodo.” ¹⁷ Ninga Yesu yakawalanga, yakawatya, “Mandiko gaga gono Gelile, alu gena nhunizo ci? ‘Ilibwe lyono walilema Wazenji, Alu lyonozwa kuwa yiwaha lyo musinji!’ ¹⁸ Munhu wo wose mono kogwila mucanyha ye libwe lilyo, kobenanjika-benanjika, na hono limugwile munhu wo wose, lyomutijinha tici-tici.” ¹⁹ I wejizi wo Wulajilize ne Wakohani wawaha, wakatanga vyono cihwanicizo cici, cali ciwadomile weneco, na ku soko yiyo, wahilaga wamwibate baho baho, ninga wakogopa wanhu. ²⁰ Holeka wakawa wakulondola-londola cilejeho cono cikwiliye. Wakawafupa wanhu wanji, wenoze nha wanhu waswanu, wakawa kuwatuma wabite wamugwizize Yesu mu wulonje wakwe, ho wasume kumwibata no kumutegula ku wawaha we Selekali. ²¹ Wawo watandizi, wakamuwuza wakutya, “Ati Mwijizi, cimanyile vyono wukulonga kanyhi wukwijiza nghani ze mbeka; cimanyile vyono si kulangaga lilumbo lya munhu, langa kwijizaga mu mbeka nzila yo Mulungu. ²² Ale cilonjelaje ta, hono viswanu kuli ase kumulipa kodi Kayisali, hamba ng’o?” ²³ Ninga Yesu yakatanga wusugu wawo, yakawatya, ²⁴ “Ndajilenyi pesa, wulenyi, yina hwani ya nani no lwandiko lwa nani?” ²⁵ Nawo wakatya, “Vya Kayisali.” Yesu yakawatya, “Ale mumulavizye Kayisali vyakwe Kayisali, no Mulungu vyakwe Mulungu.” ²⁶ Hamba si wasuma kumugwiziza nghani yiyi baho hali wanhu, holeka wakanyamala twii, wakwizina lipitulo lyakwe. ²⁷ Hanyuma, Wasadukayo, wawo wono watezaga, wafu si wazukaga; wakamuziza Yesu wakamuwuza wakutya. ²⁸ “Ati Mwijizi, Musa yacandicila, vyono munhu hono yafwilwe no muwahawe mono yali yatolile mugolece, no kumuleka mugolece yuyo yasina wana, u mwanakwawe yamutole yuyo mugolece ho yamutujile muwahawe wana. ²⁹ Ale, kwali na wanhu mupunghati walume, wana wa munhu yumonga, u mulongozi yakatola mucekulu, hanyuma yakafwa si yaleka mwana. ³⁰ Nayo wekejete [yakamutola mucekulu yuyo, nayo yakafwa,] ³¹ na we kadatu nhavivilya. Zikawa nha vivyo sunga kuli wose vyono wali mupunghati, na wose wakafwa hamba kuleka wana. ³² Hanyuma u mucekulu yuyo nayo yakafwa. ³³ Alu mwizuwa lyono wafu wolozuka, mucekulu yuyu kolowa mugolece wa wahayi muli wawa? Hambi wose mupunghati nha wali wamutolile.” ³⁴ Yesu yakawatya, “I wanhu wa kononze yiyi, watolaga, watolwaga, ³⁵ ninga awalya wono Mulungu kowapela kulificila lizuwa lyo wuzuce we wafu, si wolotola hamba kutolwa. ³⁶ Na mbeka hamba si wolofwa kanyhi yaye, hambi nha wokwihwana ne wamalayika; nawo wo wana wo Mulungu, vyono wazukulwa kulawa mu wafu. ³⁷ Ninga wafu vyono wazukaga, sunga na Musa yayilajila nghani yiyo mu Mandiko gono Gelile, za ha cititika cono cakaga moto, lono yakumucema Muwaha, yakumutya, u Mulungu wa Abulahamu, Isaka na Yakobo. ³⁸ Holeka mwene si Mulungu we wafu, langa Mulungu wa awalya iwomi. Hambi wose nha wakuwumipila muli mweneco.” ³⁹ Wanji wa muli Wejizi wo Wulajilize wakatya, “Mwijizi, kulonga viswanu muno muno.” ⁴⁰ Hamba si wejelela kumuwuza nghani yinji kanyhi. ⁴¹ Yesu yakawawuza, “Nhawule yikutegwa vyono Kilisito yo mwana wa Dawudi? ⁴² Hambi Dawudi mweneco nha yakulonga mu citabu ce Zabuli, ‘U Muwaha yamutya Muwaha wangu Wikale ha muwoko wangu wo kulume, ⁴³ Sunga kolo nghuwanoza iwalugu wako wawe nha yigoda lyo kuwicila migulu yako.’ ⁴⁴ Dawudi vyo yakumucema mwene, ‘Muwaha,’ alu ho kawa mwanagwe nhawule kanyhi?” ⁴⁵ Ne wanhu wose lono wali wamuhulicize, Yesu yakawalonjela wejizwa wakwe, ha mwande ye wanhu wose, ⁴⁶ “Musuguce kuli wejizi wo Wulajilize wono wendile kujenda ako na ako wavwalile kanzo. Na kanyhi wendile kulamuswa kwa cogopo ne wanhu mu zisokoni, kanyhi wendile kwikala hanhu hatambule, mu matang’anilo go wuhembelo, no kwikala hanhu hatambule ha zindigwa ze zisikukuu. ⁴⁷ Wene wakuwewonela iwacekulu wafwile, no kuwasolela ivinhu vyawo, akuno wakwinoza nha waswanu, so wulomba wulombe wutali muno ko wukoci. Wawo wotuga wulipicizwe wuwaha muno muno mwizuwa lye ning’aniza.”

¹ Yesu yakalanga, yakawona wagoli wono watajilaga vilavywa vyawo mu wuwiko we zisawo ze Nyumba yo Mulungu. ² Yakamuwona no mucekulu yunji mufwile muciwa muno, yakutajila mumo vifweza vidodo vyejete vifwiye sendi ikumi. ³ Yakatya, “Mbeka nghumutyenyi, u mufwile ayu muciwa nha katajila nyinji si nha wanji wose. ⁴ Hambi wawa wose nha watajila mu vilavywa kulawa muli vyono vicizilize mu wugoli wawo, ninga mucekulu ayu, hambe muciwa, kalavya vyose vyono yali yena navyo, vyono yali yetumbiye so wuwumipe wakwe.” ⁵ Wayagwe ne wejizwa wakwe, waduwilaga ze Nyumba yo Mulungu, vyono yihambigwe ne mabwe go wuguzi wukamu, hamonga ne vilavywa vyono vyalavywa kuli Mulungu. Yesu yakatya, ⁶ “Gaga gose gono mukugawona, vilo vyolokuza, lono si lyololekwa baha libwe limonga mucanyha mwi’bwe liyagwe, lyono si lyologwiswa hasi.” ⁷ Wakamuwuza, wakutya, “Ati Mwijizi, zizi zolowa za nili? Ne citanjilo cayo cici, cono colajila vyono zeza zili behi kwijela?” ⁸ Yesu yakawatya, “Musuje ho mulece kukongwa, hambi nha wenji wokuza wono wokwitumamila ilitagwa lyangu, wakutya, ‘Yo nene.’ na kanyhi, ‘Cidaha casejelela.’ Ninga anye mulece kuwatyatya! ⁹ Na kolo mukuhulika zinghani zo wulugu ne mawuma, muze mulece kogopa; hambi zizi nha si zoleka kwamula kwijela; ninga ndumilizo yikali.” ¹⁰ Hanyuma yakawalonjela, yakutya, likungugo vyokwitowa ne likungugo liyagwe, no wutemi vyokwitowa no wutemi wuyagwe, ¹¹ golowa matulo mawaha hanhu hose, kanyhi kolowa na nzala mbaha, ne matamwa go kwileceza. Kolowa ne vinhu vijenzi vya kogofya, ne vitanjilo viwaha vya ku wulanga. ¹² Ninga lono zikali si nawa zizi zose, womwibatenyi, no kumutegulenyi mu matang’anilo go wuhembelo, no kumudindilenyi mu zijela, motegulwa hali watemi ne walongola, ku soko ye litagwa lyangu. ¹³ Na yiyi yomupelenyi cilejeho co kulonga zo Luganuzi Luswanu. ¹⁴ Holeka mwikamise mu zinhumbula zenyu, mulece kwiyandila kwihwelela vyono mokwitetela, ¹⁵ hambi nha nomupelenyi mahala no wizuce wo kulonga, vyono walugu wenyu wose si wosuma kuvimila hamba kupinga. ¹⁶ Iwalezi wenyu, ne wandugu zenyu, na we cimanyi, ne wendece wenyu, womugalucenyi, na wanji wa muli nyenye mowulagwa. ¹⁷ Ne wanhu wose womusulenyi ku soko ye litagwa lyangu. ¹⁸ Ninga hamba luvwili lumonga lwa mu mitwe yenyu, silokwajilila. ¹⁹ Mu wukangalizi wenyu, moponya wumi wenyu. ²⁰ “Ninga kolo mukuwona Yelusalemi yipilimwe ne walugu, ale, mumanye vyono wongomezwe wayo wasejelela. ²¹ Hobaho wono wali mu Yudiya, watizize mu matunda; na wono wali mugati yayo wawuce, nawo wono wali mu migunda, walece kwinjila mwikaya lilyo. ²² Hambi ivilo vivyo nha vyo vilo vyo wulipicizwe, ho zose zono zandikwa zifisilizwe. ²³ Woyi he kuli wono wena mida, na wono wakosa mu vilo vivyo! Hambi nha golowa magayo mawaha mu yisi, ne likuwo lyo Mulungu lyowaziza wanhu wawa. ²⁴ Wanji wowulagwa no mumaje, wanji wolosolwa mateka, wategulwe ku nghungugo zose, ne likaya lya Yelusalemi, lyolokanyagwa ne wanhu we makungugo ganji, sunga vipango vyawo vilawa fisilizwa.” ²⁵ “Na kolowa na vitanjilo mwi’zuwa na mu mwezi na mu zinyelezi; ne makungugo kono’nze golowa na magayo, wena mahwele so mukukunzo we lilenga ne mawingo gayo. ²⁶ Wanhu wozilika ku soko yo woga, lono wakulanjilila gono gakuza kono’nze, hambi i vilungo vyo wulanga nha vyolosinjisika. ²⁷ Hobaho ho wolomuwonela Mwana wo Munhu, yakuziza mwivunde ne vilungo ne nhojo mbaha. ²⁸ Ninga gaga kolo gakwamula kwijela, mwinule mitwe yenyu mugalamile kucanyha, vyono wukombozi wenyu wasejelela.” ²⁹ Yakawalonjela cihwanicizo: “Lanjenyi ta, u mukuyu ne mabici ganji, ³⁰ lono mukuwona gamula kutula mahamha, mukuwona na mumanyile mo weneco vyono lifuku lyeza lili behi. ³¹ Nanye nha vivyo, kolo mukuwona gaga gakwijela, mumanye vyono wutemi wo Mulungu waza wuli behi. ³² Mbeka nghumutyenyi, lulelo lulu lolowa lukali napuluta, sunga zize zifisilizwe zose. ³³ Wulanga ne yinze zolopuluta, ninga zinghani zangu si zilapuluta yaye.” ³⁴ “Ninga musuje, zinhumbula zenyu zize zilece kuvuhigwa ko wubuguci, no wugale, ne mahwele go wikale wuwu, lizuwa lilyo ho lilece kumutinicizenyi nha mutego. ³⁵ Hambi nha vyo lyolowaziza nha mutego, wose wono wekaye mono’nze yose. ³⁶ Ninga mwikalaje meso mu mapango gose, mweze kulomba, ho mutuje vilungo vyo kusumila kugatiza gaga gose gono golowa, no kwima hali Mwana wo Munhu.” ³⁷ Na mu vilo vyose ku misi, Yesu yejizaga mu Nyumba yo Mulungu, na ku cilo, yabitaga kugona mwi’tunda lye Mizeyituni. ³⁸ Ne wanhu wose welawilaga ku Nyumba yo Mulungu wamuhulicize.

¹ Ale vikasejelela vilo vyo kulila mikate yono siyisasize, vyono vitezagwa vye Pasaka. ² Ne Wakohani wawaha ne wejizi wo Wulajilize walondolaga nzila ho wamuwulaje Yesu: ninga wogopaga wanhu. ³ Setani yakamwinjila Yuda mono yacemwaga Musikaliyota, mono yali muyagwe na walya i watumwa we likumi na wejete. ⁴ Yuda yakabita, vikalongana ne wakohani wawaha ne walindilizi we Nyumba yo Mulungu, inzila yono wokwitumamila yo kumugaluka Yesu no kumulavya kuli wene. ⁵ Nawo wakasecelela, no kulagana nayo vyono womupela mapesa. ⁶ Nayo Yuda yakavumila, yakalondola cilejeho ciswanu co kumukombolela Yesu kuli wene, ne lipuga lye wanhu walece kumanya. ⁷ Lizuwa lye mikate yono siyisasize likafika. Nalyo lye zuwa lyono nyana ye ngholo so Pasaka si yoleka kuwulagwa. ⁸ Holeka Yesu yakawatuma Petelo na Yohana, yakutya “Bitenyi mukaciwikanizize Pasaka, cilye.” ⁹ Nawo wakamuwuza, “Wukusaka cikakuwikanizize hayi?” ¹⁰ Yakawatya, “Hulicizenyi ta, kolo mukufika ku mujini, mokwitang’anila na munhu wa cilume, yadinghuye njilo ye malenga, mumutyatyaje yuyo sunga ko ku nyumba yono kokwinjila. ¹¹ Nanye mumulonjele munya nyumba mutye, ‘U Mwijizi yakuwuza, yakutya, Ati nyumba ya hayi, mono nolila Pasaka ne Wejizwa wangu?’ ¹² Nayo komulajilenyi cumba ciwaha ca ku golofa ciwikanizize lukulu, kuko ko mukatenje.” ¹³ Wakabita, wakawona nha vyono Yesu yawalonjeye, wakayitenga i ndigwa ye Pasaka. ¹⁴ I cipango caza fika, Yesu yakekala kulya zindigwa hamonga ne watumwa wakwe. ¹⁵ Yakawatya, “Nali kuhila muno cihanje nanye Pasaka yiyi, lono nghali natamiswa, ¹⁶ hambi nha nghumulonjelenyi, si nololya kanyhi, sunga yifisilizwe mu wutemi wo Mulungu.” ¹⁷ Yakasola cikombe, yakalumba, yakatya, “Mubocele aci, mung’we wose, ¹⁸ hambi nha nghumutyenyi, si nolong’wa kanyhi divayi ya Zabibu sunga wutemi wo Mulungu wuze.” ¹⁹ Hanyuma, yakasola mukate yakalumba yakawubegula, yakawapela, yakutya, [“Awu wo muwili wangu wono weza kulavywa ku soko yenyu, Mweze noza nha vivi so wukumbucila nene.” ²⁰ Yakanoza nha vivyo ne cikombe, waza kondya kulya, yakatya, “I cikombe cici, co cilagane cipya co Mulungu, cono cikukangazizwa mu sakami yangu, yono yeza kwitika ku soko yenyu.] ²¹ “Ninga mulanje, yuyo mono kongaluka yali hamonga nane baha ha zindigwa hono meza. ²² Heya mbeka, u Mwana wo Munhu yakubita kuwulagwa nha vyono yatemezezwa, ninga woyi he kuli munhu yuyo mono komugaluka.” ²³ Baho wakanza kwiwuza weneco wose, wakutya, “Alo kowa wa hayi muli wene mono koyinoza nghani yiyi.” ²⁴ Kwali na wiwanganile muli wawo watumwa, muli za wahayi mono yakwihweswa vyono yo kowa muwaha muli wene. ²⁵ Yesu yakawatya, “Iwatemi we Makungugo wawatemile wanhu wawo kwe vilungo. Ne watemi wawa, watezwaga watazi wa wanhu. ²⁶ Ninga yilece kuwa nhavivyo muli nyenye, langa u muwaha muli nyenye yaweze nha mudodo, nayo mono kowa mulongozi, yaweze nha mono yakwituma. ²⁷ Hambi wa hayi muwaha, mono yekaye ha ndigwa, hamba mono yakwitumama? Ane nghuwona, yuyu mono yekaye ha ndigwa yo muwaha. Ninga hamba yiwe nhavivyo, ane hali nyenye ninha mono yakwitumama. ²⁸ “Ninga anye yo nyenye mono mwali muli hamonga nane mu mapango gose mu majelo gangu, ²⁹ nane nomupelenyi wutemi, nha vyono Baba yamhela. ³⁰ Musume kulya no kung’wa ha wulilo wangu mu wutemi wangu. Nanye molokwikala mu magoda go wutemi mukuwaling’aniza i milango yikumi na myejete ya Isilayeli.” ³¹ “Simoni, Simoni wuhulicize, Setani yakomboywe ho yamupetenyi anye nha vyono munhu kapetaga wuhemba, ³² ninga ane nghukulombela agwe Simoni, wihuwilo wako ho wulece kucepuka; nagwe kolo wukumbuyila kanyhi, ho wuwasikamye wanduguzo.” ³³ Nayo Petelo yakatya, “Muwaha, ane niwikanize cibitane nagwe sunga ko ku jela, hamba no kufwa du hamonga nagwe.” ³⁴ Yesu yakamupitula yakatya, “Nghukulonjela Petelo, zuwali lono nzogolo yowa yikali sinalila, kowa wakondya kunghana kali kadatu wukutya, si wumanyile ane.” ³⁵ Yesu yakawawuza wejizwa wakwe yakutya “Lululya lono nghamutumenyi mwali musina mufuko wa mapesa, hamba mukoba, hamba malatu, wulenyi, mwanjila cinji?” Wakatya, “Ng’o.” ³⁶ Nayo yakawatya, “Ninga alu, mono yena mufuko wa pesa, yawusolaje, na mono yena mukoba nhavivyo. Nayo mono yasina mumaje yaguze musweko wakwe, yagule mumaje. ³⁷ Hambi nha nghumutyenyi, vyono yiyi yono yandikwa mu Mandiko Gono Gelile, ‘Yawalilizanwa hamonga ne wahodanji.’ Siyoleka kufisilizwa. Hambi yono yatemezezwa, nha yeza kuficila ku mudumo wayo.” ³⁸ Nawo wakatya, “Muwaha, wulanje, ayi mimaje myejete,” nayo yakawatya, “Hodu yakwila.” ³⁹ Yesu yakalawila, yakabita kwi’tunda lye Mizeyituni nha vyono yali yazoweye, ne wejizwa wakwe wakamutyatya. ⁴⁰ Nayo yaza fika hanhu baho, yakawatya, “Lombenyi ho mulece kwinjila mu wujelwe.” ⁴¹ Yakatemanuka kuli wene yakabita wutali wa nghanzo ye’bwe lyono ligumiywe, yakafugama yakalomba, yakutya, ⁴² “Baba, hono wende, wumbusize cikombe cici co Wusungu, ninga si wuhile wangu, langa wuhile wako witumwe.” [ ⁴³ Malayika kulawa ku wulanga, yakamulawila, yakamupela vilungo. ⁴⁴ Nayo vyono yali mu wusungu wuwaha, yakehinda kulomba, ne lituguti lyakwe, likawa nha mabanhi ga Sakami gakasulula ho hasi.] ⁴⁵ Nayo yaza kondya kulomba, yakawaziza wejizwa wakwe, yakawagana wagonile so wuzinguce, ⁴⁶ yakawatya, “Alo nye, nhawule mugonile? Inucenyi ta mulombe, ho mulece kwinjila mu wujelwe.” ⁴⁷ Lono yali yakali kulonga, walanje nhavi, lipuga lye wanhu likaza, lina na mono yacemwaga Yuda, muyagwe na walya, iwatumwa we likumi na wejete, yawalongoleye. Nayo Yuda yakamusejelela Yesu ho yamunonele. ⁴⁸ Ninga Yesu yakamutya, “Yuda, alo wukumugaluka Mwana wo Munhu ko wunonele hongo?” ⁴⁹ Nawo wejizwa wakwe waza kuwona zono zikwitumwa baho, wakatya, “Muwaha citumamile mimaje yetu?” ⁵⁰ Muyawo yunji yakamutowa no mumaje u mwitumami wo Mukohani muwaha, yakamubuha likutu lyo kulume. ⁵¹ Baho Yesu yakatya, “Lecenyi ta hadodo.” Yakamupamiza likutu munhu yuyo, yakamuponya. ⁵² Yesu yakawatya wakohani wawaha, ne wawaha we walindilizi we Nyumba yo Mulungu ne wanyamhala wono waza kumwibata. “Alu muza kunyibata mwina ne mimaje ne zinhumbi, kotya nha nili muhizi? ⁵³ Lono caswezanaga nanye nhondo zose mu Nyumba yo Mulungu, nha si mwasuma kunyibata, ninga aci co cipango cenyu, co cipango co wutemi we citi.” ⁵⁴ Wakamwibata Yesu, wakamulongoza, wakamutegula ku kaya yo Mukohani muwaha. Na Petelo yakamutyatya yakujendela kutali. ⁵⁵ No moto wali mupembwe haciligati ye likumbo lya kunze, nawo wakekala hamonga, na Petelo yakekala mu ciligati yawo. ⁵⁶ Mwitumami yumonga we cihinza, yaza kumuwona Petelo yekaye behi no moto, yakamulanga muno, yakatya, “Munhu ayu nayo yali hamonga na Yesu.” ⁵⁷ Ninga Petelo yakakana yakutya, “Gwe go muhinza! Ane sinimumanyile.” ⁵⁸ Na hanyuma hadodo munhu yunji yakamuwona Petelo, yakatya, “Na gwegwe wuli muyawo.” Ninga Petelo yakatya, “Go munhu ’gwe, ane yo si nene.” ⁵⁹ Hanyuma kanyhi yaza kupuluta kotya saa monga, yunji nayo yakajendelela kulonga yakutya, “Mbeka yuyu nayo yali hamonga nayo, hambi nayo nha kalawa ku Galilaya.” ⁶⁰ Ninga Petelo yakatya, “Go munhu ’gwe, si manyile zono wukulonga.” Na lulo baho du lono yali yakali kulonga zizo, nzogolo yikalila. ⁶¹ U Muwaha Yesu yakapituka yakamulanga Petelo. Nayo Petelo yakayikumbucila nghani yono yalonjelwa no Muwaha yono yamutya, “Zuwali lono nzogolo yowa yikali si nalila, kowa wakondya kunghana kali kadatu.” ⁶² Baho Petelo yakalawila kunze, yakalila muno muno. ⁶³ I wanhu wawalya wono wamwibata Yesu, wakamutowa no kumuzwajiza. ⁶⁴ Wakamuwopa na citambala ku meso, wakamuwuza, wakutya, “Ta wucitambulilaje, mono yakutowile nani? ⁶⁵ Wakamutovulanga no kumulonganga makani menji ga maligo.” ⁶⁶ Waza kwela, mukung’ano we walongola we wanhu, wakekongholela hamonga ne Wakohani wawaha hamonga ne wejizi wo Wulajilize, wakamutegula Yesu hamwande ye libalaza lyawo. ⁶⁷ Nawo wakamutya, “Cilonjelaje ta, hono yo gwegwe Kilisito.” Ninga mwene yakawatya, “Hamba nimulonjelenyi, si mokwihuwila ng’o, ⁶⁸ na hamba hono nimuwuzenyi, si momhitula. ⁶⁹ Ninga ku wulawa lulu, momuwona u Mwana wo Munhu yekaye ku muwoko wo kulume wo Mulungu.” ⁷⁰ Baho wose wakatya, “Alu wo wutya agwe wuli Mwana wo Mulungu hongo?” Nayo yakawatya, “Nyenye mukulonga vyono, he yo nene.” ⁷¹ Nawo wakatya, “Alu kanyhi cosaka wuhomelezi wa cici? Hambi sese weneco nha cimuhulika yakulonga ko mulomo wakwe mweneco.”

¹ Yikenuka mhuga yose, wakamuleta kuli Pilato. ² Wakanza kumusonjeza, wakutya, “Cimuwona yuyu yakuwafunda vibi i wanhu wetu, yakulemeza walece kulipa kodi kwa Kayisali, yakwiyitya ati mwene yo Kilisito Mutemi.” ³ Pilato yakamuwuza Yesu yakutya, “Ati, yo gwegwe Mutemi we Wayahudi?” Yesu yakamupitula, yakatya, “Kulonga he gwegwe.” ⁴ Pilato yakawalonjela Wakohani wawaha ne lipuga lye wanhu yakutya, “Ane singhuwona lisutya lyo lyose muli munhu yuyu.” ⁵ Ninga wene wakacila kutya, “Yakusagahaza wanhu so mafundo gakwe, mu yisi yose ya Yudiya, yamuliziza ku Galilaya sunga naluno alu, yali baha.” ⁶ Pilato yaza hulika zizo yakawuza yakutya, “Alu munhu yuyu munya Galilaya?” ⁷ Nayo yaza manya vyono Yesu yali mu wutemi wa Helode, yakamutegula kuli Helode, hambi mwene Helode nha yali yali mu Yelusalemi vilo vivyo. ⁸ Nayo Helode yakasecelela muno yali yeza kumuwona Yesu, hambi nha yali yahulika za Yesu, holeka yalanjililaga vilo vinji, yasume kumuwona kwe meso gakwe mweneco. Hamonga na zizo, yali yetumbiye kumuwona Yesu yakunoza citanjilo. ⁹ Helode yakamuwuzawuza Yesu nghani nyinji, ninga Yesu siyamupitula cinji. ¹⁰ Wakohani wawaha ne wejizi wo Wulajilize, wakema, wakehinda muno muno kumusonjeza. ¹¹ Helode hamonga ne Wasilikale wakwe, wakamukoza cevu Yesu, no kumuzwajiza; hanyuma wakamuvwika mwenda we citemitemi, wakamugomola kuli Pilato. ¹² Lizuwa lilyo ho welamulila wa Helode na Pilato, hambi nha wali wesulile. ¹³ Pilato yakawacemela hamonga Wakohani wawaha ne walongola ne wanhu, ¹⁴ yakawatya, “Mundetela munhu ayu, mukutya, yakufunda wanhu vibi, ale hulicizenyi, lono nimuwuzize hali nyenye, si mbwene hamba wusutye wo wose muli mwene, muli zizo zono mukumusonjeza, ¹⁵ hamba si nene du, langa sunga na Helode siyawene yisutya lyo lyose, na yo yilecile kamugomola kanyhi kono kwangu. Holeka yikwijela vyono munhu yuyu, si yanozize nghani yo yose yimbi, yono yoleka yawulagwe. ¹⁶ Holeka notya yakunwe viboko, hanyuma nomukombola.” [ ¹⁷ Na mu zi sikukuu za Pasaka, Pilato yali yimunojeye yawawopolele mufungwa monga.] ¹⁸ Ninga wose wakazozeza hamonga, wakutya “Wumuwusaje ayu, langa wuciwopolele Balaba.” ¹⁹ (Balaba yo munhu mono yatajilwa mu jela, so wuma wono yawuleta mweneco mwi’kaya, kanyhi na ku soko yo wuwulaji.) ²⁰ Pilato yahilaga kumuwopolela Yesu, holeka yakawalonjela kanyhi, ²¹ ninga wene wakazoza, wakutya, “Wumutumbice mu musalaba, Wumutumbice mu musalaba!” ²² Pilato yakawatya lwe kadatu, “Alu kahodanga nghanici munhu ayu? Ane si mbwene lisutya lyo lyose muli mwene lyono lyoleka yafwe, holeka nomukuna viboko, hanyuma nimuwopolele.” ²³ Ninga wene wakacila kuzoza muno muno, wakutya, yimunojeye Yesu yatumbikwe mu musalaba. Ne ndumilizo, nhondo mazi gawo gakasuma. ²⁴ Holeka Pilato yakadumula nghani vyono wuhile wawo wufisilizwe. ²⁵ Yakamuwopolela Balaba mono wamusakaga, mono yali mudindile mu jela, ku so wuma no wuwulaji, ninga yakamukombola Yesu kuli wene, wamutendele vyono wasakaga. ²⁶ Na lono wamutegulaga, waketang’anila na munhu monga mono yacemwaga Simoni, munya Kilene, yalawaga mu matumbi. Wakamwibata, wakamupiciza musalaba, wetembase na Yesu. ²⁷ Wakamutyatya wanhu wenji muno; na mumo mwali mowali wacekulu wono wamulililaga muno. ²⁸ Ninga Yesu yakawapitucila, yakatya, “Nye wacekulu wa Yelusalemi! Mulece kundilila ane, langa mwiyililile nyenye nyo weneco ne wana wenyu. ²⁹ Hambi lanjenyi, vilo nha vyolokuza vyono wanhu wolotya. ‘Wamoti iwagumba, na we zinda zono si zilelaga, ne matombo gono si gosaga.’ ³⁰ Mwipango lilyo i wanhu ho wolokwanza kugalonjela matunda, ‘Mucigwilaje.’ ne vigongo, ‘Mucigubice.’ ³¹ Hono wanhu wakutenda zizi mwibici lidece, ma mwibici likavu ho zowa wule?” ³² Wakawasola kanyhi na wanhu wanji wejete, wahodanji, wawulagwe hamonga na Yesu. ³³ Nawo waza fika hanhu hono hatezagwa, “Cipala,” ho wamutumbika Yesu mu musalaba hamonga na wawalya wahodanji wejete, yunji ku muwoko wo kulume u muyagwe ku muwoko wo kucekulu. ³⁴ Yesu yakatya, “Baba, wuwanenele, hambi nha si wamanyile yono wakwituma. Hanyuma wakagawana vivwalo vyakwe mu nzila yo kutowa kula.” ³⁵ Wanhu wakawa wemile baho wakulanga. Ne walongola wakamuzwaga, wakutya, “Yaponyaga wanji, alu yeponye mweneco hono yo mweneco Kilisito wo Mulungu, u muhagulwa wakwe.” ³⁶ Ne wasilikale nawo wakamuzwaga, wakaza, wakamupela siki, ³⁷ wakutya, hono yo gwegwe Mutemi we Wayahudi, ale wiponye go mweneco. ³⁸ Hacanyha yakwe wakawika Mandiko gono gakutya “Ayu yo Mutemi we Wayahudi.” ³⁹ Yu monga muli wawalya wahodanji, wono watumbikwa mu misalaba hamonga nayo, yakamutovula yakutya, “Alo si yo gwegwe Kilisito? Ale wiponye go mweneco, wuciponye na sese.” ⁴⁰ Ninga muhodanji muyagwe yakamutacila, yakatya, “Alu ’gwe, si wukumogopa Mulungu hamba hadodo? Nagwe wuli mu wulipicizwe wuwo. ⁴¹ Nase mbeka yo ling’ani yetu, hambi nha cikulipicizwa nha vyono yicinojeye ku so metumo getu. Ninga Munhu ayu, siyetuma cinji cibi.” ⁴² Hanyuma yakatya, “Yesu wunghumbucile kolo wukuza mu wutemi wako.” ⁴³ Yesu yakamutya, “Mbeka nghukulonjela, izuwalili du, cowezana nane ku Wulanga.” ⁴⁴ Yikawa nha saa sita ye misi, lizuwa likatukuwala, citi cikadinda mu yisi yose, sunga saa tisa, ⁴⁵ ne libupa lyo mwenda lyono lyali litumbikwe mu Nyumba yo Mulungu, likademuka haciligati. ⁴⁶ Yesu yakalila ne lizi yiwaha yakatya, “Baba, nghuwika muhe wangu mu Miwoko yako.” Yaza kukondya kulonga zizi, hodu yakawa kufwa. ⁴⁷ U muwaha we wasilikale yigana, yaza kuwona zono ziweye, yakamukumya Mulungu, yakutya, “Mbeka munhu ayu, yali yali ling’ani.” ⁴⁸ Ne wanhu wose wono wali wekongholeye baho kuzilanga zizo, waza wona zono ziweye, wakawuya kwawo wakwibinha mu zimhambaga so wukalale. ⁴⁹ We cimanyi wakwe wose, ne wacekulu wono wamutyatyaga Yesu wakulawa Galilaya, wakema kutali wakuzilanjilila zizi. ⁵⁰ Kukawa na munhu yunji litagwa lyakwe Yusufu, mono yali munya citumbi cinji, ce Wayahudi, cono cicemwaga Alimataya. Yali munhu muswanu na wa cogopo. ⁵¹ Mono yalanjililaga u wuze wo wutemi wo Mulungu. Yali muyagwe na walya we libalaza liwaha lye Wayahudi. Ninga hamba nhavivyo siyelumbaniza mwi’tumo lyawo lilyo. ⁵² Mwene yakabita kuli Pilato yakawulomba u muwili wa Yesu. ⁵³ Yakawutungula mu musalaba, yakawuwopa na mwenda wa bafuta, yakawuzika mu citenjelo cono catulwa mwibwe, cono cali cikali sinawikwa munhu. ⁵⁴ Ilizuwa lilyo, lyali lizuwa lye Ijumaa, no wuwikanize we lizuwa lye Sabato wali weza kwanza. ⁵⁵ Ne wacekulu wawalya wono wamutyatyaga Yesu ku wulawa ku Galilaya, wakamutyatya Yusufu, wakacilanga citenjelo, na vyono u muwili wa Yesu wazikwa. ⁵⁶ Wakawuya kwawo, wakanozeleza mafuta ge mhunjile swanu. Na mu Sabato wakaceha nha vyono yalajilizwa.

¹ Mwizuwa lye Jumapili, hakali mitondo muno muno, wacekulu wawalya wakabita ku citenjelo, wategulize ne manukato gono wali wawikaniza. ² Wakawona vyono libwe lyabidusizwa hamhelo ye citenjelo. ³ Wali weza kwinjila mugati ye citenjelo, hamba siwawuwona u muwili wo Muwaha Yesu. ⁴ Na lono wali wakali kwizina so nghani yiyi, hobaho wakawona wanhu wejete, wono wali wavwalile myenda yono yikung’alala, wemile behi nawo. ⁵ Wacekulu wawo wakenjilwa no woga, wakenamya wusu wawo hasi. Hobaho i wanhu wawalya wejete wakawatya, “Alo so cici mukumulondola u mumi muli wono wafwiye? ⁶ Si yali baha ye, kazuka, kumbucilenyi vyono yakamulonjelenyi lono yali yakali ku Galilaya; ⁷ lono yatya, u Mwana wo Munhu si koleka kukombolwa kuli wanhu wabi, nawo womutumbika mu musalaba ne lizuwa lye kadatu kozuka kanyhi.” ⁸ Baho wacekulu wawalya wakazikumbucila zinghani zakwe. ⁹ Wakawuya kulawa ku citenjelo, wakawaganulila walya i watumwa we likumi na monga, ne wayawo wose, zinghani zizi zose. ¹⁰ Na wono wawaganulila iwatumwa zinghani zizi, wali wa Malyamu Magadalena, na Yowana, na Malyamu u nyina wa Yakobo: hamonga ne wacekulu wanji, wono wali wali hamonga nawo. ¹¹ Nawo i watumwa wakaziwona nghani zizi kotya nha nzwaji du, holeka si wehuwila. ¹² Ninga Petelo yakenuka, yakabita lumangho sunga ku citenjelo. Nayo yaza kusunjilila mugati mu citenjelo, yakawona myenda ye bafuta du yili wene. Yakawuya kwakwe, akuno yakwizina muli zizo zono ziweye. ¹³ Na mwizuwa lililya, wanhu wejete wayagwe ne wejizwa wa Yesu, wabitaga ku citumbi cono catezagwa Emawu, cihinzo ca kilometa yikumi na monga kulawa ku Yelusalemi. ¹⁴ Nawo wasimulilaga zizo zose zono zali zijeye. ¹⁵ Kukawa lono wasimulilaga no kwiwuza, Yesu mweneco yakejela yakajendana nawo. ¹⁶ Wakamuwona kwe meso, ninga si wasuma kumumanya. ¹⁷ Yakawatya, “Nghanici zono mukujenda mukwiganulila?” Wakema akuno wasininghaye. ¹⁸ Yumonga litagwa lyakwe Kileyopa, Yakapitula yakamutya, “Alo ’gwe wuli mujenzi wuli wene mu Yelusalemi, ho wulece kuzimanya zizi zono ziweye mumu mu vilo vivi vicefu?” ¹⁹ Nayo yakawatya, “Nghanici lo?” Nawo wakamutya, “Zinghani zono zamutuga Yesu wa Nazaleti. Mono yali muwizi we vilungo mu mulimo, na mu zinghani hali Mulungu, na hali wanhu wose. ²⁰ Wakohani wawaha ne watemi wetu, wamulavya, yaling’anizwe yafwe, wakawa kumutumbika mu musalaba. ²¹ Nase cetumbilaga cikutya, yo mwene mono kokomboza Isilayeli. Na muli zizi zose, izuwali lye zuwa lye kadatu kulawa vyono zanozwa zizi. ²² Na kanyhi wacekulu wanji wa mu mhuga yetu wacitinusa, wono welawiye ku citenjelo. ²³ Nawo hamba si wawuwene muwili wakwe, weza kuwuya, wawa kutya, wamalayika wawalawila, wono wateye vyono mumi. ²⁴ Na wanji wayetu wabita ku citenjelo, nawo wawona vyono yo nha vivyo du, vyono walonjile wacekulu, ninga mwene Yesu si wamuwene.” ²⁵ Nayo Yesu yakawatya “Nhawule muli walele nhavivi, kanyhi muli wakamu mu zinhumbula zenyu, kuzihuwila zose zono walonga wawizi? ²⁶ Wulenyi, si yali yimunojeye Kilisito kugazwa nhavivyo, ho yenjile mu nhojo yakwe?” ²⁷ Yesu yakawaloloseza zose za mu Mandiko Gono Gelile, zono zali zimunojeye mwene, ku wulawilila kuli Musa, sunga na mu wawizi wose. ²⁸ Waza kusejelela ha citumbi cono wabitaga; nayo yakawa nha yakupulutiza, ²⁹ ninga wene wakamunena wakutya, “Wikalaje nase, hambi lizuwa nha lyaswa, ne citi ceza kwinjila.” Yakenjila nawo mu citumbi, yakekala nawo. ³⁰ Kukawa, lono yali vikalane nawo ha ndigwa, yakawusola mukate, yakawulugutiza, yakawubegula, yakawapela. ³¹ I meso gawo gakenzelulwa, wakamumanya. Ninga mwene yakawuka si wamuwene. ³² Wakeyitya, “Wule ’ti, zinhumbula zetu si zali nha zikwaka muli’se lono yali kulongana nase mu nzila, na lono yali kuciloloseza ze mandiko?” ³³ Wakenuka lulo baho, wakawuya ku Yelusalemi, wakawagana wawalya i watumwa we likumi na monga wekonghoye, hamonga na walya wanji wono wali nawo; ³⁴ wakutya “U Muwaha kazuka mbeka, kelajila kuli Simoni. ³⁵ Nawo wa walya i wanhu wejete, wakawalonjela zizilya zono waziwene mu nzila, na vyono wamutanga Yesu mu wubegule wo mukate.” ³⁶ Na wawalya i wejete lono walongaga zizi, Yesu yakema haciligati yawo, yakawatya, “U mulamu weze muli’nye.” ³⁷ wakatinuka, no woga wukawebata, wakutya lunji wawona mwenzenze. ³⁸ Ninga mwene yakawatya, “So cici mwina woga, na so cici mwina mahwele mu zinhumbula zenyu? ³⁹ Lanjenyi mawoko gangu ne magulu gangu, vyo yo nene mweneco, munyalabataje munanje; hambi mwenzeze nha wusina muwili ne mafupa, nha vyono mukumbona ane nina navyo.” ⁴⁰ Yaza longa zizi, yakawalajila mawoko gakwe, ne magulu gakwe. ⁴¹ Na lono wali wakali si wakwihuwila so nyemo no wizine, Yakawatya “Mwina cinji co kulya baha?” ⁴² Wakamupela cibimha ca somba cinyanywe. ⁴³ Yakasola yakalya ha meso gawo. ⁴⁴ Yakawatya, “Azi zo nghani zono namulonjelenyi, lono nali nghali hamonga nanye, nha vyono yali yinojeye kuzifisiliza zose, zono nandicilwa mu wulajilize wa Musa, na mu wawizi, na mu Zabuli.” ⁴⁵ Hanyuma yakawagubulila mahala gawo, ho wasume kugatanga Mandiko Gono Gelile. ⁴⁶ Yakawatya, “Vyo yandikwa, vyono yimunojeye Kilisito yatamiswe, na mwizuwa lye kadatu yimunojeye yazuce muli wafu. ⁴⁷ Na kanyhi yinojeye mwi’tagwa lyakwe, kuganula wunene, no wuwopolelwe wo wubi, kuli makungugo gose, kwamuliziza ku Yelusalemi. ⁴⁸ Nanye yo nyenye mono muli wahomelezi wa zizi. ⁴⁹ Nane nomuletelenyi yuyo mono Baba yehuwiza vyono komutuma, ninga mulindilize mumo mwi’kaya, sunga muvwikwe i vilungo avilya vya kucanyha.” ⁵⁰ Yakawategula sunga ku Betaniya, yakenula miwoko yakwe, yakawalugutiza. ⁵¹ Kukawa lono yawalugutizaga, yakawaleka, yakasolwa, yakabita ku wulanga. ⁵² Nawo wakamuhemba, wakawuya ku Yelusalemi wena ne nyemo mbaha, ⁵³ wakekala vilo vyose mu Nyumba yo Mulungu akuno wakumulumba Mulungu.