YAKOBO

YAKOBO

¹ Nene Yakobo, umwitumami wo Mulungu, na wo Muwaha Yesu Kilisito, nghumwandicilenyi nyenye, nyo we milango yikumi na myejete, mono mwiyagaye kono’nze kose. Lamucenyi! ² Wandugu zangu, muweze na nyemo kolo mukuzizwa ne majelo ganji ganji, ³ hambi nha mumanyile vyono, kolo wihuwilo wenyu wukusuma kulewana ne majelo, womupelenyi ngola. ⁴ Kanyhi mweze mumanyile vyono, ingola yenyu yomutazenyi sunga ku ndumo, ho muwe mukamile kanyhi mukwilaniciye, ho mulece kucepucilwa na cinji co cose. ⁵ Na hono muyenyu yunji yawe yanjiye mahala, ale, yimunojeye yamulombe Mulungu mono komupela, hambi Mulungu nha kawapelaga wose ko winji, na kwe nhumbula swanu. ⁶ Ninga yimunojeye yalombe yehuwiye akuno yasina mahwele, go gose. Hambi u munhu mono yena mahwele nha yehwanile mawingo ge lilenga, gono gapemheluswaga no kugumilwa ako na ako ne mbeho. ⁷ Umunhu mono yenha nhavivyo, mono yena mahweso gono gali hejete, ⁸ nha kekalaga yakukangamyanga mu mikalile yakwe yose, holeka yalece kutya kopegwa co cose kulawa kuli Muwaha. ⁹ Ninga u Mukilisito muciwa, yimunojeye yawe na nyemo lono Mulungu yakumwinula, ¹⁰ nayo mugoli, yimunojeye yawe na nyemo lono yakugwiswa no Mulungu. Hambi umugoli nha kokwajilila nhe liluwa lya mu mbago. ¹¹ Hambi lizuwa nha lidulaga, na kolo likukalipa linyazaga mahanze, ne maluwa gayo gakung’unhikaga, no wuswanu wayo wose wuhodanjikaga. Ale nhavivyo, no mugoli nayo, kolo kongomezezwa mu metumo gakwe. ¹² Mumoti munhu mono yakukangalila wujelwe, hambi kolo yeza yasuma, nha kopegwa i cihumbilizwa co wumi cono Mulungu yawatemezezya wawalya wono wamwendile. ¹³ Na lono munhu yakujelwa, yalece kutya, “Nghujelwa no Mulungu.” Hambi u Mulungu nha sikosuma kujelwa no wubi, hamba mweneco, sikamujelaga munhu wo wose. ¹⁴ Ninga u munhu kajelwaga lono yakukwegwa no kusumwa ne masulumizi gakwe mweneco. ¹⁵ Na lono wusulumizi wenjipa wulelaga wubi, nawo wubi kolo wakangala, wulelaga lifwa. ¹⁶ Nye wandugu zangu wendece, mulece kukongwa. ¹⁷ Ivipegwa vyose viswanu ne vilavywa vyose vyono vikwilaniciye vilawaga ku wulanga, vilawaga kuli Sogo yo munhu, u Muwumbi we mazelu ga ku wulanga, mono yasina cipitupitu hamba yasina cinji co cose cono cosuma kumuletela wupituce. ¹⁸ So wendo wakwe mweneco, yacilela mu nghani yakwe ye mbeka, ho ciwe nha cili mikalo milongozi wa muli viwumbwa vyakwe. ¹⁹ Wandugu zangu wendece, kumbucilenyi nghani yiyi! Umunhu wo wose yeze mupelu kuhulika, ninga yalece kuwa mupelu kulonga, hamba yalece kuwa mupelu kusimba. ²⁰ Hambi u munhu mono yena likuwo, nha sikosuma kwituma zo wuhile wo Mulungu wono wuli ling’ani. ²¹ Holeka, muyilecelaje lukulu i mikalile yenyu mibi, ne mijendele yose yo wavu, mwiwice mu miwoko yo Mulungu, no kuyibocela nghani yiyilya yono hadikwe mu zinhumbula zenyu, yono yosuma kuziponya zinhumbula zenyu. ²² Mulece kwiyikonga nyo weneco, mu wuhuliciza i nghani yakwe du, langa mweze wetuma i nghani yakwe. ²³ Wo wose mono kahulikaga nghani yiyo, hamba kuyituma, yuyo yehwanile u munhu mono yakwilanga futa yakwe mwi’lole. ²⁴ Hambi nha kelangaga mweneco, hanyuma yayo kabita, na lulo lulo baho du kawa kwiyisemwa nha vyono yali yenha. ²⁵ Langa umunhu mono yakuwulanjisa muno muno wulajilize wono wukwilaniciye, wono wupelaga wanhu welecele, no munhu mono yakujendelela kuwibata, hamba sikuwuhulika du, no kuwusemwa hanyuma yayo, langa yakuwitumama, umunhu yuyo kowa mumoti muli vyose vyono yakwitumama. ²⁶ Na hono munhu yewone mweneco nha munhu mono yebate dini muno muno, ninga kuno siyakusuma kulwimila lulimi lwakwe, dini yakwe u munhu yuyo yikuwa yisina hamba cambuzi co cose, langa yakwikonga mweneco du. ²⁷ Hambi dini yono yelile, na yono yisina manamha manamha ha mwande yo Mulungu u Sogo yo munhu, nha yoyi: Kuwataza wana wono wasina walezi wawo, ne wacekulu wafwile mu wugaye wawo, no kwiyilanjilila go mweneco ho wulece kutipizwa ne yinze yiyi.

¹ Wandugu zangu, hono muwe mumwihuwiye u Muwaha Yesu Kilisito, u Muwaha wo lukumyo, mulecele lukulu kuwawagula wanhu. ² Lunji cilonje citye, munhu yunji mono yavwalile nyamwidole ye zahabu, ne vivwalo vitambule, hono yenjile mu mukung’ano wenyu, na baho kanyhi yenjile no munhu muciwa mono yavwalile vivwalo vitipiye. ³ Hono mumupele lilumbo lyono licizize hawaha, yuyulya mono yavwalile vivwalo vyono vikung’alala, no kumutya, “Agwe wikale ahano haswanu,” no kumutya yuyulya muciwa, “Agwe nagwe wime ahalya,” hamba “Wikale ahano hasi hono magulu gangu,” ⁴ wulenyi ma, wuwo wuwaguzi muli nyenye? Ma, na wuwo wulamuzi wenyu si wukulawilila mu mahweso mabi? ⁵ Wandugu zangu, wendece, hulicizenyi ta! U Mulungu yakondya kuwahagula iwanhu waciwa wa mu yinze yiyi, ho wawe wagoli wo wihuwilo, kanyhi wawubocele wutemi wono yawatemezeza wa walya wono wamwendile. ⁶ Ninga nye mukuwabedegala wanhu waciwa! Ninga iwagoli wo wawo wono wakumugazenyi no kumutegulenyi kuli Mahakama? ⁷ Wulenyi, si wo wawo wono walitovulaga litagwa lyenyu liswanu lyono mucemeywe? ⁸ Na hono muwe mukuwufisiliza u wulajilize wulya wo Wutemi, nha vyono yandicigwe mu Mandiko Gono Gelile: “Wumwendaje munhu muyago nha vyono wiyendile gwegwe go mweneco,” ale mowa mukunoza viswanu muno muno. ⁹ Ninga hono muwawagule wanhu, mukwituma wubi, nawo Wulajilize nha wukumuhosenyi nyenye vyono mwina wusutye. ¹⁰ Na mono yakubena lilajilizo limonga du lya mu Wulajilize, kowa wuhoswe wo kuwuhodanga Wulajilize wose. ¹¹ Hambi yu yulya mono yakatya, “Wulece kusenyha,” nha yo yatya kanyhi “Wulece kuwulaga.” Holeka hamba wuwe siwukuwa kusenyha, ninga wukuwulaga, agwe wakondya kuwubena wulajilize. ¹² Ale, holeka mweze kulonga no kwituma nhe wanhu wono wololing’anizwa no Wulajilize wono wuletaga welecele. ¹³ Hambi, u Mulungu nha kolowa yasina lusungu kolo yakumuling’aniza munhu mono yasina lusungu. Ninga lusungu lucizize wuling’anizi. ¹⁴ Nye wandugu zangu, alu kocili cambuzici, hono munhu yatye yena wihuwilo, ninga kuno ho siyakulajila imetumo gayo? Alu wuwo wihuwilo wosuma kumuponya wule? ¹⁵ Citye lunji, ndugu we cilume hamba we cicekulu yawe yasina mwenda hamba ndigwa. ¹⁶ Cowa cambuzici kuli’nye co kuwatya wawo, “Bitenyi mupolile mukote moto, mwigute,” hamba simukuwapela visakwa vyawo vyono wakuhila mu mikalile yawo? ¹⁷ Ale nhavivyo no wihuwilo weneco du wuli wene wono wusina metumo, wufwiye. ¹⁸ Ninga munhu yadahile kutya, “Agwe wina wihuwilo, ane nina metumo!” Ale! Wundajile ta vyono munhu kowa yena wihuwilo wono wusina metumo, nane nokulajila wihuwilo wangu mu metumo gangu. ¹⁹ Ma, agwe wukwihuwila vyono Mulungu yo yumonga? Viswanu! Ninga hamba ne macisi nago gehuwiye nhavivyo, na kuno gakucicima so woga. ²⁰ Go mulele ’gwe, ma, wukusaka kulajilwa vyono u wihuwilo wono wusina metumo wufwiye? ²¹ Ma, usetu Abulahamu yanoza wule sunga yakavumilwa no Mulungu? Yavumililwa mu metumo gakwe, lono yamulavizya mwanagwe Isaka mu cikumbicilo. ²² Ale, wona ta, vyono wihuwilo wakwe, wetumana ne metumo gakwe, u wihuwilo wakwe wukakwilanicizwa mu metumo gakwe. ²³ Holeka gakafisilizwa gagalya i Mandiko Gono Gelile gono gatezaga: “Abulahamu yakamwihuwilo Mulungu, na mu wihuwilo wakwe, yakavumilwa yawe munhu we ling’ani, holeka Abulahamu yakacemwa mwendece wo Mulungu.” ²⁴ Ale, mukuwona ta, vyono munhu kavumilwaga no Mulungu mu metumo gakwe hamba si mu wihuwilo wuli wene du. ²⁵ Na vyo yali yinha na kuli Lahabu u musenyha, nayo yavumilwa yawe we ling’ani ku soko vyono yawabocela wa walya i watandizi, no kuwatonga wakole nzila yinji. ²⁶ Ale, nha vyono umuwili wezaga wufwiye hono wusina muhe, nhavivyo no wihuwilo nawo, wezaga wufwiye hono wusina metumo.

¹ Wandugu zangu, wenji wa muli nyenye, mulece kuwa wejizi. Hambi nha vyono mumanyile, sese co wejizi colotuga wuling’anizwe wuwaha muno muno kuciza wanji. ² Hambi na sese wose nha cisutyaga kali kenji. Ninga hone munhu sikasutyaga mu wulonje wakwe, munhu yuyo kowa yakwilaniciye, kanyhi kosuma kuwimila muwili wakwe wose. ³ Ase ciziwicilaga zifwalasi lijamu mu milomo yazo ho zicihulice, na muwunoza nhavivyo mo cisumilaga kuzitegula ko kose kono cendile co weneco. |4B.tif|span|||I zifwalasi zono ziwopigwe no lubano (3:3) | ⁴ Ne zingalawa nazo kanyhi, hamba ziwe mbaha muno, nha zipitulwaga ne mabeho mawaha, ninga zipitulwaga ne cisukani cidodo vivi, ko kose kono mutonji yendile. ⁵ Ale nhavivyo no lulimi nalo, hamba luwe nha cilunzwa cidodo vivi co muwili, cikuwa kwiyikumya makani mawaha muno muno. Ne cinyesela cidodo vivi co moto naco citakamizaga mbago mbaha. ⁶ Ale nhavivyo no lulimi nalo, lwinha moto. Hambi nha lumemile wubi winji muno, nalo lwina cilejeho mu miwili yetu, kanyhi lutajilaga wubi mu miwili yetu yose. Wutakamizaga u wumi wetu wose nho moto wono wulawaga ku Gehena yeneco. ⁷ No munhu nayo, nha kasumaga kugafuga malimu, kanyhi yakondya kusuma kuvifuga i viwumbwa vyose vye malimu ga mu mbago, ne zindeje, ne mazoka, ne malimu ga mwilenga. ⁸ Ninga hasina munhu mono yasuma kulufuga lulimi. Lulimi co cinhu cibi, cono sicimilwaga, kanyhi lumemile sumu mbulaji. ⁹ Ko lulimi, cimulumbaga Muwaha no Sogo yetu. Na ko lulimi lulo kanyhi, ciwalijitaga wanhu, wanhu wono wawumbigwe mu hwani yo Mulungu. ¹⁰ Izinghani ze malijito na zo wulumbe, zose zilawaga mu mulomo monga. Nyo wandugu zangu, izinghani zizi sizinojeye ziwe nhavivi. ¹¹ Ma, cisima cimonga co muvwilo monga cisumaga ’mbi kuvwiza malenga mapolo ne malenga makali hamonga? ¹² Wandugu zangu, libici lyo mukuyu ma, lisumaga kulela zeyituni? Hamba muzabibu wusumaga kulela nghuyu? Hamba ne cisima co muvwilo we malenga ge cimwino mwino, sicisumaga kuvwiza malenga mapolo. ¹³ Ma, nani mono yena mahala no wizuce muli nyenye? Ale, yayilajilaje ta inghani yiyi, mu mikalile yakwe miswanu, na mu metumo gakwe maswanu, gono ganozwaga mu winenenyhezi ne mahala. ¹⁴ Ninga hono zinhumbula zenyu ziwe zimemile wivu, simbili no wiyendezi, ale, mulece kwikumya no kuyilambiza i mbeka, ku soko yo wikumizya i mahala genyu. ¹⁵ Mahala gono genha nhavivi, sigalawaga kucanyha ku wulanga, langa imahala gago ga kononze, kanyhi ga ciyinze yinze, na kanyhi ga cisetani. ¹⁶ Hambi nha ho hose hono howuli wivu no wiyendezi, baho ho howuli no wuma ne mabi mabi gose. ¹⁷ Ninga imahala gono galawaga kucanyha ku wulanga, gene gelile, gendile mulamu no wupolo, kanyhi galulaga wanhu, gamemile lusungu kanyhi galelaga mikalo ye metumo maswanu, gasina wuwaguzi hamba wukoci. ¹⁸ No wiling’ano, yo mikalo ye zimbeyu za wono wendile mulamu wahadicilaga mu mulamu.

¹ U wulugu no wisonji wose muli nyenye vilawaga hayi? Vilawaga mu masulumizi genyu mabi, gono galewanaga nhondo zose muli nyenye. ² Musulumilaga vinhu, na kolo mweza simukuvituga, hobaho mukwiwikaniza kuwulaga, mukusulumila muno kuvituga vinhu, ninga simukuvituga, holeka mwisongaga no kwitowa. Hambi nha simutugaga cico cono musakaga vyono simucilombaga kuli Mulungu. ³ Kanyhi kolo mukulomba simupegwaga, vyono mulombaga ko wuhile wubi, hambi nha mulombaga ho mwigutye imasulumizi genyu. ⁴ Anye muli wanhu mono si muli wehuwilwa, mwihwanile wasenyha. Simumanyile vyono munhu hono yawe kuyenda yinze, yawa mulugu wo Mulungu? Wo wose mono yakusaka yawe kuyenda yinze, yakwinoza yawe mulugu wo Mulungu. ⁵ Mulece kwihwesa mba vyono i Mandiko Gono Gelile galongaga zinghani za bwete, lono gatezaga, “Umuhe wono Mulungu yawika muli sese, wina wivu wuwaha.” ⁶ Ninga, lihewa lyono cikupegwa no Mulungu lili vilungo muno muno, nha vyono gatezaga i Mandiko, “Mulungu kawemilaga iwedunhumuzi, langa kawapelaga lihewa iwenenenyhezi.” ⁷ Holeka mwiwikaje mu wukamiswe wo Mulungu, mumwimile Setani, nayo komutizenyi. ⁸ Mumusejelelaje Mulungu, nayo komusejelelenyi. Kwemenyi miwoko yenyu nyo wahodanji! Mweze zinhumbula zenyu nyo wakoci! ⁹ Muzinguce, mugaye no kulila, uluseko lwenyu luweze cililo, ne nyemo yenyu yiweze wuzinguce wuwaha. ¹⁰ Mwinenenyheze hali Mulungu, nayo komwinulenyi. ¹¹ Wandugu zangu, mulece kwihosa nyenye wose. Mono yakumuhosa nduguye no kumuling’aniza, yuyo, yakuwuhosa kanyhi yakuwuling’aniza Wulajilize. Na hono wuwuhose Wulajilize, agwe siwukuwibata Wulajilize, langa wukuwuhosa. ¹² Hambi nha Mulungu yali wene du yo kawikaga wulajilize no kuling’aniza. Yo mweneco yali wene du mono yasumile kuponya no kongomeza. Alu, wuli nani gwegwe mono wukumuling’aniza u munhu muyago? ¹³ Ale, hulicizenyi ta, anye mono mutezaga, “Izuwali hamba mitondo, cobita kwikaya lyo wutunga, no kwikala kuko mwaka wose cikusuluza no kutuga cambuzi.” ¹⁴ Hamba simumanyile vyono wumi wenyu wowa wule ku mitondo! Hambi anye nha mwihwanile linghungulyosi lyono lijelaga cipango cidodo vivi du no kwajilila kanyhi. ¹⁵ Langa yali yinojeye mutye, “U Muwaha hono yacitaze cokwikala womi no kunoza aci hamba acilya.” ¹⁶ Ninga lu, mukwidunhumula no kwisaja, no widunhumuzi wono winha wuwu wo wubi. ¹⁷ Ale, no munhu mono siketumaga ziswanu zono yazimanyile, vyono zo zimunojeye yetume, ale yuyo yakwituma wubi.

¹ Nalu ta hulicizenyi anye nyo wagoli! Mulile no le kwikunguza so wugaye wenyu wono womuzizenyi. ² Isawo yenyu nha yawola, ne vivwalo vyenyu nha vyaligwa ne makuni. ³ Zizahabu zenyu ne mapesa genyu, gatuga nghangaga, ne nghangaga yiyo yowa wuhomelezi kuli’nye, nayo yomulyenyi miwili yenyu nho moto. Anye mwiwutila isawo mu vilo vivi vye ndumo! ⁴ Simwawalipa misahala i wetumami wono wetumo mulimo mu migunda yenyu. Lanjenyi ta vyono wakukalala? Icililo ca wawo wono wakududula mu migunda yenyu, cafika mu makutu go Muwaha Mulungu u Mudaha vyose. ⁵ Hambi nha mwekala kono’nze ne mikalile ye cinyemo-nyemo na yo kwiyendeza nyo weneco. Mwakondya kuzijinya zinhumbula zenyu nyo weneco so lizuwa lyo wuwulagwe. ⁶ Mwaling’anizwa no kumuwulaga munhu mono yasina wusutye, nayo hamba siyamugomolezezenyi nghani yo yose yono’mbi. ⁷ Ale, wandugu zangu, mweze no wukangalile sunga Muwaha kolo kokuziza. Lanjenyi ta u mulimi vyono kalindilaga ko wukangalile i ndudula yakwe yilete ndigwa swanu. Umwene kalindilaga ko wukangalile i mvula ye lifuku ne ye lihwela. ⁸ Na nyenye nhavivyo yimunojelenyi muwe na ngola, musikamye zinhumbula zenyu, hambi lizuwa lyo wuze wakwe Muwaha nha lyasejelela. ⁹ Wandugu zangu, mulece kwing’ung’ulicila nyenye wose, ho mulece kuling’anizwa no Mulungu. Hambi u Muling’anizi nha yeza behi no kwinjila ha mulango. ¹⁰ Wandugu zangu, hono muwe mukusaka kuwona musambo we ngola no wukangalile muli magazo, mwihwesaje ze wawizi wono waganulaga mwitagwa lyo Muwaha. ¹¹ Holeka ciwacemaga wawo wo wamoti ku soko vyono wakangalila. Mwakondya kuhulika zo wukangalile wa Jobu, kanyhi mumanyile vyono u Muwaha yamutendela ha ndumilizo. Hambi Muwaha nha yamemile nheto no lusungu. ¹² Ninga ko muno, wandugu zangu mulece kwilaha. Mulece kwilahiza ku wulanga, hamba mono’nze, hamba ku cilaha cinji co cose. Langa mutye “Heya” hono nhunizo yenyu yo heya, na “Ng’o” hono nhunizo yenyu yo ng’o, ho simoling’anizwa no Mulungu. ¹³ Ma, hoyuli munhu wo wose muli nyenye mono yena wugaye? Yimunojeye yalombe. Ma, hoyuli yunji musangalafu? Yimunojeye yembe zinyimbo zo wulumbe. ¹⁴ Ma, hoyuli yunji mono yatamigwe muli nyenye? Yimunojeye yawaceme iwanyamhala we Likanisa, nawo womulombela no kumubacila mafuta mwi’tagwa lyo Muwaha. ¹⁵ Na hono walombe wehuwiye yuyo mutamwa koponywa, u Muwaha komupela ciba, no wubi wono yali yetuma wonenelwa. ¹⁶ Ale, mweze kwiyivumilila mabi genyu, mwilombelaje, ho muponywe. Uwulombe wo munhu we ling’ani wina vilungo vyo kwituma nyinji. ¹⁷ Eliya yali munhu yenha sese. Yakalomba muno imvula yilece kutonya, nayo siyatonya mu’si myaka midatu na myezi mutandatu. ¹⁸ Ale, yakalomba kanyhi, ne mvula yikatonya kulawa ku wulanga, ne’si yikacindya zindigwa zayo. ¹⁹ Wandugu zangu, muyenyu yunji hono yajilile mu mbeka, na muyenyu yunji yamupitule, ²⁰ manyenyi vyono, yuyo mono yakumupitula munyo wubi, ku wulawa mu nzila yakwe yo wajilile, koyiponya i nhumbula yakwe mwi’fwa, no wubi winji wonenelwa.