WAHEBELANIYA

WAHEBELANIYA

¹ I katali u Mulungu yalonga ne wasetu kali kenji, na mu nzila nyinji, mu nzila ye wawizi, ² ninga mu vilo avi vyo mudumo, kalongana nase mu nzila yo Mwanagwe. Na muli mwene, u Mulungu mo yayiwumbila yinze, kanyhi yakamuwika ho yaviteme vinhu vyose. ³ U mwene wo wubulile wo lukumyo lo Mulungu, kanyhi yo hwani ye mbeka yo Mulungu mweneco, nayo yakuyisikamizya yinze mu nghani yakwe ye vilungo. Lono yali yakondya kuwanenela wanhu u wubi wawo, yakekala ku wulanga ku lubavu lo kulume lo Mulungu Mono Yalawiliciye. ⁴ U Mwana yo muwaha yacizize wa malayika, nha vyono i litagwa lyono yapegwa no Mulungu, yiwaha muno si nhe litagwa lyawo. ⁵ Hambi u Mulungu nha si yamulonjela hamba hadodo malayika wakwe yunji yatye, “Agwe wuli Mwanangu, Ane neza nili sogo zuwali?” ⁶ Ninga u Mulungu lono yamutumila kononze u Mwanagwe mulelwa mulongozi, yatya nhavi, “Ne wamalayika wose wo Mulungu, yiwanojeye wamuhembe.” ⁷ Na kuli ze wamalayika, u Mulungu yakutya, “U Mulungu yakuwanoza wamalayika wakwe kuwa myuhe, ne wetumami wakwe kuwa lilambi lyo moto.” ⁸ Ninga kuli zo Mwana, u Mulungu yakutya, “U wutemi wako agwe go Mulungu, wikalaga cibitilila ne cibitilila. Nagwe kuwadimaga i wanhu wako kwe ling’ani. ⁹ Agwe wendile u wiling’ano, wukazisula i zimbi. Na ku soko yiyo holeka u Mulungu, u Mulungu wako yakuhagula, kanyhi yakakupela nyemo mbaha muno muno kuciza i wayago.” ¹⁰ Kanyhi yakutya, “Muwaha, agwe yo gwegwe mono wayiwumba yinze baho ha mwamulizo, no wulanga wo mulimo wo muwoko wako, ¹¹ Azo zomalika, ninga agwe kokwikala cibitilila, na zose zosakala kotya mwenda, ¹² Nagwe kozipetya nha civwalo nazo zokawanizwa nha mwenda, ninga agwe, yo gwegwe du cibitilila, ne myaka yako si yiladuma yaye.” ¹³ Kanyhi u Mulungu si yamulonjela hamba hadodo yunji wa muli wamalayika wakwe yatye, “Wikalaje ku muwoko wangu wo kulume sunga kolo nakondya kuwanoza i walugu wako wawe nha wukanyago we magulu gako.” ¹⁴ I Wamalayika, yo myuhe du yono yikumwitumamila u Mulungu, nayo u Mulungu kawatumaga ho wawataze wawalya wono wowubocela u wukombozwe.

¹ Holeka yicinojeye cicile kuzikamisa muno zose zono cazihulika, ho cilece kwajilizwa. ² Inghani yi yilya yono wapegwa i walezi wetu na malayika, yikejela vyono yali nghani ya mbeka, sunga muli wose mono si yasuma kuyityatya hamba kuyihulika, yalipicizwa nha vyono yali yimunojeye. ³ Alu ase ma! Ho coponela hayi hono ciyileceleze mhonelo mbaha nha yiyi? Yono yamula kulongwa no Muwaha mweneco, na wono wahulika, wakacihomelela vyono yili mbeka. ⁴ Nayo u Mulungu yakonjeleza u wuhomelezi wakwe nhavivyo, lono yanozeza vitanjilo ne mezino ge mawala menji, na lono yawagawila wanhu i vipegwa vyo Muhe Mono Yelile nha vyono mweneco yali yendile. ⁵ U Mulungu si yawawika Wamalayika ho wawe watemi mu yinze yilya yono cikuyilonga. ⁶ Kanyhi hanji mu Mandiko hakutya nhavi: “Hambi u munhu co cici, agwe go Mulungu sunga wumukumbucile, hamba u mwana wo munhu co cici sunga wumulanjilile? ⁷ Wamunoza mudodo si nhe wamalayika kwa cipango cidodo. Wamuvwika mukumbo wo lukumyo ne lilumbo. ⁸ Nagwe wukaviwika vyose ha magulu gakwe ho yaviteme.” Nha vyono yikulongwa vyono, u Mulungu yamuwika u munhu ho yawe mutemi muli vinhu vyose, hamba si yasigaza cinji hamba cimonga. Ninga hamba nhavivyo, cikali si cikumuwona munhu mono yatemile i vinhu vyose kwa lulu. ⁹ Langa cikumuwona Yesu mono yanozwa mudodo kwa cipango cidodo si nhe wamalayika, na so i lihewa lyo Mulungu, yafwe ku soko ye wanhu wose. Sunga nalu cikumuwona yakondya kutemywa ko lukumyo ne lilumbo, ku soko yo wutamiswe we lifwa. ¹⁰ Nayo yali yili ling’ani, vyono u Mulungu mono kaviwumbaga i vinhu vyose no kuvibatiliza, yo yamunoza Yesu yawe yakwilaniciye mu nzila yo wugazwe wakwe, ho yasume kuwaleta wana wenji ku lukumyo lwakwe. Hambi Yesu nha yo yakuwatonga ku mhonelo. ¹¹ Hambi u mwene nha yo yakuweza wanhu u wubi wawo, hanyuma mwene hamonga na wose wono wakondya kwezwa, wose wakuwa na Baba yumonga. Holeka nayo Yesu si yakuwona soni kuwatya wawo wanduguze, ¹² nha vyono yakutya, “Gwe go Mulungu, nowalonjela i wandugu zangu ze metumo gako. Nane nokukumizya mu ciligati yo wihangulize wawo.” ¹³ Kanyhi yakutya, “Nowuwika u witumbilo wangu muli Mulungu.” Na kanyhi, “Ane nili baha hamonga ne wana wono wamhela agwe go Mulungu.” ¹⁴ Alu nha vyono yinha, i wana wawo nha vyono mwene yakuwacema, wo wanhu wono wena muwili ne sakami, nayo Yesu mweneco, yakawa nha vyono wenha wene, nayo yakasola i hwani yawo yakawa munhu. Yanoza nhavivyo, ho yiwe so wufwe wakwe, yamusumile lukulu Setani, mono yena i vilungo vye lifwa, ¹⁵ na mu nzila yiyo ho yawakomboze wose wono mu mikalile yawo yose wali mu wuwanda wo woga we lifwa. ¹⁶ Hambi nha yili calinze, vyono u mwene si yaza ho yawataze wamalayika, langa nha vyono i Mandiko gakutya, “Yakuwataza wo lulelo lwa Abulahamu.” ¹⁷ Holeka yali yimunojeye yehwane wanduguze muli zose, ho yawe Mukohani wawo Muwaha, mono yali lusungu kanyhi mwihuwilwa muli zose zono zibitile kuli Mulungu, ho wubi we wanhu wunenelwe. ¹⁸ Nayo alu kosuma kuwataza wono wakujelwa, hambi nayo mweneco nha yajelwa kanyhi yakatamiswa.

¹ Ale, anye wandugu zangu, mo wanhu wo Mulungu, mono mwacemwa no Mulungu, mwihwesaje za Yesu mono u Mulungu yamutuma yawe Mukohani Muwaha wo wihuwilo wetu. ² U mwene yali mwihuwilwa kuli Mulungu mono yamuhagula ho yetume u mulimo wakwe, nha vyono Musa nayo yali mwihuwilwa mu nyumba yose yo Mulungu. ³ Nha vyono u muzenji we kaya yo katugaga i lilumbo muno si nhe kaya yeneco. Nayo Yesu nhavivyo yo yanojeye yatuje lilumbo yiwaha si nha Musa. ⁴ Hambi i zikaya zose, nha zina u muzenji wayo, ninga u Mulungu yo muzenji we vinhu vyose. ⁵ Musa yali mwihuwilwa mu nyumba yose yo Muwaha nho mwitumami, nayo yakazilonga i zinghani zono u Mulungu yali yazilonje hanyuma. ⁶ Langa Kilisito yo mwihuwilwa nho mwana mono yena wulajilize mu nyumba yo Mulungu. Ne nyumba yakwe yo sese, hono cibatilile lukulu zo wuluwuce wetu wa muli cono citumbiye. ⁷ Holeka nha vyono yakulonga u Muhe Mono Yelile, yakutya: “Holeka i zuwali hono muhulice lizi lyo Mulungu, ⁸ Mulece kuzikamufya zinhumbula zenyu, nha vyono wali i wasogo zenyu, lono wamubezeza u Mulungu, nha vyono wanoza ku nyika mwizuwa lililya, lono wamujelela u Mulungu. ⁹ Kuko i wasogo zenyu wasagala, wakanjela yakutya u Muwaha, hamba wawe wali waziwona zono nali nakondya kwituma mu myaka makumi mane.” ¹⁰ Ku soko yiyo nane nghawakolelwa likuwo i wanhu wawa, nghawa kutya, “I mahweso ge wanhu wawa gajiliye, wakali si nazimanya zinzila zangu.” ¹¹ Holeka nghakolwa ne likuwo, nghawa kwilahiza nghutya, “Si wokwinjila mu wuceho wono nali niwawiciye.” ¹² Holeka wandugu zangu, mwilanjililaje, halece kuwa na yunji muli nyenye, mono yena i nhumbula yimbi nhavivyo, mono si yehuwiye no kumuleka u Mulungu mumi. ¹³ Ninga mweze kwiyilanjiza nhondo zose, lono hakali kutegwa, “I zuwali,” muyenyu yunji yalece kukamufywa no wukoci wo wubi no kuwa ne cibede. ¹⁴ Hambi ase nha ceza cili hamonga na Kilisito, soko ciwe ciwukamise muno muno u witumbilo wetu wono cali cina nawo hamwamulizo. ¹⁵ I Mandiko gakutya nhavi: “I zuwali hono muhulice lizi lyo Mulungu mulece kuzikamufya zinhumbula zenyu nha vyono wanoza wasogo zenyu lono wamubezeza u Mulungu.” ¹⁶ Hambi wa nani wono walihulika lizi lyo Mulungu ninga wakamubeza? Wo wawo wose wono watongwa na Musa ku wulawa ku Misili. ¹⁷ Kanyhi wa nani wono u Mulungu yawakolelwa likuwo mu myaka makumi mane kuko ku nyika? ¹⁸ U Mulungu lono yelahiza yakutya, “Si wokwinjila mu wuceho wono nali niwawiciye.” Yawalongaga wa nani? Yalongaga muli za wawo i wabezi. ¹⁹ Holeka cikuwona vyono si wasuma kwinjila kuko, vyono wali si wehuwiye.

¹ U Mulungu yacihuwiza vyono cosuma kuwutuga u wuceho wuwo wono yawulonga. Holeka ceze kogopa, yilece kuwa na lunji, muyenyu yunji yanjile ku winjila mu wuceho wuwo. ² Hambi nha caganulilwa u Luganuzi Luswanu nha vyono lwaganulwa kuli wawo wanhu we katali. Ninga i nghani yiyo si yawakwila cinji, hamba wawe wayihulika, ninga si wasuma kuyibocela ko wihuwilo. ³ Ninga ase mono cihuwiye, cikwinjila mu wuceho wuwo wono u Mulungu yawihuwiza. Nha vyono yatya, “Nghakolwa ne likuwo, nghelahiza, nghatya, ‘Si wokwinjila mu wuceho wono nali niwawiciye.’ ” U Mulungu yazilonga zizo, hamba yiwe u mulimo wakwe wali wakondya kumalika ku wulawilila lono yayiwumbila yinze. ⁴ Hambi i Mandiko nha gakulonga hanji ze lizuwa lyo mupunghati. “U Mulungu yakaceha mwizuwa lyo mupunghati, yakayileka milimo yakwe yose.” ⁵ Ne nghani yiyi yikulongwa kanyhi, “Si wokwinjila mu wuceho wono nali niwawiciye.” ⁶ Wawo wono walongola kuganulilwa u Luganuzi Luswanu si wasuma kwinjila mu wuceho wuwo so wuwula kwihuwila kwawo. Ninga ho wali wanji wono wapejigwe kwinjila mumo. ⁷ Ne nghani yiyi yili calinze, hambi u Mulungu nha yaliwika lizuwa linji lyono likucemwa “I zuwali.” U Mulungu yalilonjela lizuwa lilyo muli Dawudi mu myaka minji yono yali yakondya kupuluta, nha vyono i Mandiko gono gatambuywe. “Hono muhulice lizi lyo Mulungu zuwali mulece kuzikamufya zinhumbula zenyu.” ⁸ Hono Yoshuwa yali yawapele u wuceho wuwo wanhu wawo, Mulungu si yali yalonje kanyhi ze lizuwa linji. ⁹ Holeka u wuceho wuli baho kuli wanhu wo Mulungu, nha vyono u mwene Mulungu yaceha mwizuwa lyo mupunghati. ¹⁰ Hambi muli wose mono kowutuga u wuceho wono u Mulungu yehuwiza, nha koceha mu milimo yakwe, nha vyono u Mulungu yaceha mu mulimo wakwe. ¹¹ Holeka cihidimbale, ciwutuje u wuceho wuwo, ho halece kuwa yunji muli nyenye yanjile kuwinjila mu wuceho wuwo, nha vyono wanoza wawo, ku soko yo wuleka kwihuwila kwawo. ¹² Hambi nghani yo Mulungu nha nyumi kanyhi nyitumi, kanyhi nghali yicizize u mumaje mukali kose kose, kanyhi yicinyaga sunga ku wutemanula i nhumbula no Muhe, sunga hono vihanjiye i vilunzwa vyo muwili no musopo. Ne nghani yiyo yisalangulaga u wuhile ne mahweso ga mu zinhumbula ze wanhu. ¹³ Kanyhi hasina hamba ciwumbwa co cose cono cihundice hali Mulungu, ninga vyose vili calinze ha meso gakwe. Na ase wose cololonga hali mwene ze metumo getu munhu na lwakwe. ¹⁴ Hambi nha yicinojeye ciwibatilile lukulu u wihuwilo wetu. Hambi nha cina u Mukohani Muwaha, Yesu u Mwana wo Mulungu, mono yenjila mweneco sunga kuli Mulungu. ¹⁵ Nayo yuyu u Mukohani wetu Muwaha si yenha mono si kosuma kuhanga nase mu wusocele wetu, langa u mwene yo Mukohani Muwaha mono yajelwa nha sese muli zose, ninga si yetuma wubi. ¹⁶ Holeka cisejelele kwi’goda lye lihewa lyo Mulungu, cisina woga, ho ciwonelwe lusungu, kanyhi cilituje ne lihewa lyono lyosuma kucitaza mwidaha lono cikusaka u wutazi.

¹ U Mukohani wo wose Muwaha, kahagulwaga kulawa muli wanhu ho yamwitumamile u Mulungu so wanhu, ho yalavye i vilavya ne makumbiko ku soko yo wubi wawo. ² Na vyono u mwene nayo yali mu wusocele, holeka kosuma kuwawonela u lusungu wono si wamanyile cinji ne wasutyi. ³ Vyono na mweneco nayo musocele, holeka yimunojeye yalavye likumbiko, si ku soko ye wanhu du, langa na ku soko yo wubi wakwe mweneco. ⁴ Hasina munhu mono kosuma kwisolela mweneco lilumbo lyo kuwa Mukohani Muwaha. Langa munhu wo wose yakuwa kuhagulwa no Mulungu yawe Mukohani Muwaha nha vyono Haluni. ⁵ Nha vivyo na Kilisito nayo, si yesolela mweneco i lilumbo lyo kuwa Mukohani Muwaha, langa u Mulungu yo yamutya: “Agwe wuli Mwanangu ane neza nili Sogo zuwali.” ⁶ Nha vyono yalonga kanyhi hanji: “Agwe wuli Mukohani cibitilila mu wutyatya u wityatye wo wukohani wa Melicizedeki.” ⁷ Nayo Yesu lono yekalaga baha mono yinze, yakalila muno muno ne mahozi, lono yamuhembaga no kumulomba u Mulungu, mono yali yena vilungo vyo kumuponezya mwifwa, nayo yahulicizwa ku soko yali yamogopile u Mulungu. ⁸ Ninga u mweneco hambe yali Mwana wo Mulungu, yeyijiziza i cihuliko mu nzila yo wutamiswe wono wamwagana. ⁹ Nayo yaza kukwilanicizwa, yakawa wo mwamulizo wo wukombozi we cibitilila kuli wose wono wakumuhulika, ¹⁰ nayo u Mulungu yakamuhagula ho yawe Mukohani Muwaha mu wutyatya u wityatye wo wukohani wa Melicizedeki. ¹¹ Cina nyinji zo kulonga mu nghani yiyi, ninga kukamu kumulolosezenyi, ku soko anye si muli wapelu ku wizuce. ¹² Ninga alu yali yimunojelenyi muwe mweza muli wejizi, ninga kumbe mukali mukusaka munhu yunji wo kumwijizenyi i mejizo malongozi ge nghani yo Mulungu, holeka mwaweza nha mukusaka mele, hamba si ndigwa nghavu yaye. ¹³ Na muli wose mono yimunojeye yang’we mele, yuyo yakali mugalika, yakali nawumanya u wiling’ano co cici. ¹⁴ Ninga i ndigwa i nghavu, yiwanojeye i wanhu wono wakangaye, wono wakusuma kuzitanga no kuzihagula i ziswanu ne zimbi.

¹ Holeka cijendelele kumwande kuli zono zikangaye, kanyhi cilece kwikala mu mejizo ge myamulizo ge Cikilisito. Si yicinojeye ciwice u musinji mu wuwuyajila kanyhi mu mafundo gagalya go mwamulizo, nha vyono kotya i metumo mafu, kumwihuwila u Mulungu, ² i mafundo go wubaputizo, no wuwicilwe we miwoko, wuzuce we wafu, no wuling’anizwe we cibitilila. ³ Ase cijendelele kumwande! Na yiyo yo conoza, hono u Mulungu yendile. ⁴ Hambi alu kuli wanhu wono wakondya kuwubeza u wihuwilo wawo, yosumika nhawule kuwagomola ho wanene kanyhi? Ku soko i wanhu wawo wali wakondya kuwa mu wuzelu wo Mulungu, wali wakondya kucijeza ne cipegwa ciswanu ca ku wulanga, kanyhi no kuhanjizwa mu Muhe Mono Yelile, ⁵ wali wakondya kuwujeza no wuswanu we nghani yo Mulungu, ne vilungo vya mu yinze yono yikuza, ⁶ hanyuma kanyhi wakawa kuwubena u wihuwilo wawo! Si yosumika kuwagomola ho wanene kanyhi, vyono wakumutumbika kanyhi u Mwana wo Mulungu kejete, kanyhi wakumupela cevu ca cagalanze. ⁷ U Mulungu kawulugutizaga u muhangha wono wuyibocelaga i mvula yono yikuwutonyela kenji na kenji, no kucindya i zimbeyu zono zina cambuzi kuli wono walimilwa. ⁸ Ninga hono u muhangha wuwo wucindye mabici ge mamiya, na ganji caka, wukuwa wusina cambuzi, wukuwa wuli behi no wulijitwa no Mulungu, no mudumo wayo wukuwa wutakamizwe mu moto. ⁹ Ninga hamba ciwe cikulonga nhavivi, mo wendece wetu, cina witumbilo wuwaha muli zo wuwe wenyu, cimanyile vyono mwabocela u wulugutizwe muli azilya i ziswanu ze mhonelo yenyu. ¹⁰ Hambi u Mulungu nha si kawezaga yasina ling’ani, u mwene si kowusemwa mulimo wenyu wono mwetuma, hamba u wendo wono mwawulajila ku soko ye litagwa lyakwe, mu witumami wenyu wono mwawetumamila, na vyono sunga na lulu mukali mukuwetumamila i wanhu wakwe. ¹¹ Hambi u wuhile wetu kuli nyenye nha wowu, cikumusacenyi wose muli nyenye, munhu yalajile u wuhijilile wuwo du, sunga ko ku mudumo wo wumemelecele wo witumbilo wenyu. ¹² Mulece kuwa wadoba, langa muweze nha awalya wono wehuwiye, na wono wena u wukangalizi, ho wazibocele zono u Mulungu yazihuwiza. ¹³ U Mulungu lono yamupelela Abulahamu u wihuwizo, yelahiziza mwitagwa lyakwe mweneco, hambi nha hasina yunji muwaha mono yamucizize u Mulungu, mono u Mulungu yali yelahize. ¹⁴ U Mulungu yatya, “Mbeka nghukwihuwiza vyono nokumotya, kanyhi no lulelo lwako lokonjelezeka.” ¹⁵ Abulahamu yalindiliza ko wukangalizi, holeka yakacibocela cono u Mulungu yamwihuwiziza. ¹⁶ I wanhu lono wakwilahiza, welahizizaga kuli muwaha mono yawacizize, no wilahize wuwo wumalaga u wuwanji wose. ¹⁷ Nayo u Mulungu, yawukangaziza u wihuwizo wakwe mu wilahize, na muli zizo, yakawalajila calinze, wawo wono yawehuwiziza, vyono si kowupitula kanyhi u wuhile wakwe wuwo. ¹⁸ Holeka ho vili vinhu vi vyejete, u wihuwizo no wilahize, vyono si vyosuma kukawanika, na hamba muli zizo, u Mulungu si kosuma kulonga wulambi. Holeka ase mono camanyhilila ku wukamiswe wakwe, cikupegwa mu mitima yo wukamisa muno u witumbilo wono wuli ha mwande yetu. ¹⁹ No witumbilo wuwo wukuwa nha cimizo mu mikalile yetu. No witumbilo wuwo wukamile kanyhi wa mbeka mbeka, kanyhi wukwinjila sunga ko kwi’bupa lye Nyumba yo Mulungu ya ku wulanga, sunga ko kugati ya hono helile hayo. ²⁰ Nayo Yesu yo yalongola kwinjila mumo ku soko yetu, nayo yawa Mukohani Muwaha cibitilila, mu wutyatya u wityatye wo wukohani wa Melicizedeki.

¹ Melicizedeki yali mutemi wa Salemi, kanyhi yali Mukohani wo Mulungu Mono Yalawiliciye Muli Vyose. Nayo Abulahamu lono yalawaga ku wulugu kono yawawulaga i watemi, Melicizedeki viketang’anila nayo, yakamuluguta, ² nayo Abulahamu yakamugawila i lipinga lye likumi lya muli vyose vyono yali yena navyo. (Ne nhunizo nongozi ye litagwa lili lya Melicizedeki, wo wutya, “U mutemi wo wiling’ano,” na vyono u mwene yali mutemi wa Salemi, ilitagwa lilyo nalyo lina nhunizo yo wutya, “U mutemi wo Mulamu.”) ³ U sogwe no nyina si wakutambulwa, sunga ne ndelwa yakwe si yitambuywe, si yikulongwa hamba nili lono yalelelwa, hamba nili lono yafwila. Langa yanozwa yenha Mwana wo Mulungu, kekalaga Mukohani cibitilila. ⁴ Holeka mudahile kuwona vyono u munhu yuyu yali munhu we lilumbo muno. Baba Abulahamu yamupela i lipinga limonga lye likumi lya mu vinhu vyose vyono yavigalula ku wulugu. ⁵ Kanyhi cimanyile nhavivilya nha vyono winha u wulajilize, i wana wa Lawi wono wo Wakohani, wena ling’ani yo kusola lipinga lye likumi kuli wanhu, wo wutya kuli wandugu zawo, hamba wawe nawo wo wana wa Abulahamu. ⁶ Ninga yuyo Melicizedeki si yali we ndelwa ya Lawi, ninga hamba yiwe nhavivyo, yabocela lipinga lye likumi kuli Abulahamu, kanyhi yakamuluguta u mwene mono yali yapegwa u wihuwizo wo Mulungu. ⁷ Ninga mbeka si za kuwanga hamba hadodo, vyono mono kalugutaga yo muwaha yacizize ayulya mono yakulugutwa. ⁸ Kanyhi na wawo i wakohani wono wakubocela lilyo lipinga lye likumi, nha wanhu wono wafwizaga, ninga ahano mono yakubocela lye likumi, nha cinji Melicizedeki, yikulongwa vyono si kafwizaga. ⁹ Holeka cidahile kutya vyono, Abulahamu lono yalavyaga lipinga lye likumi, Lawi, (mono wanagwe wabocelaga lipinga limonga lye likumi) nayo yalavya, lipinga lye likumi nhavivilya. ¹⁰ Hambi Lawi nha yali yakali si nalelwa, langa kotya nha yali yakali mu muwili wo sogwe Abulahamu, mu cipango lono Abulahamu wetang’anilila na Melicizedeki. ¹¹ No wulawilila mu wukohani wa Lawi, i wanhu wa Isilayeli wapegwa u Wulajilize. Holeka mhali u witumami we Walawi wali wuwe wukwilaniciye, mhali hawe hasina soko yo kuza u wukohani wunji wono wisimajiye, u wukohani wono wukutyatya u wityatye wo wukohani wa Melicizedeki, hamba si awulya wa Haluni. ¹² Holeka hono u wukohani wukawanice, hobaho yinojeye no Wulajilize nawo wukawanice. ¹³ Nayo u Muwaha wetu mono zizi zose zikulongwa muli mwene, yali wa mbeyu yinji, na hasina hamba yumonga wa mu mbeyu yakwe mono yetuma mulimo nha mukohani ha wukumbicilo. ¹⁴ Langa yimanyice calinze vyono u mwene yalelelwa mu mulango wa Yuda yono Musa si yawutambula lono yalongaga muli ze wakohani. ¹⁵ Kanyhi ne nghani yiyi yili calinze muno, vyono mukohani yunji mono yehwanile na Melicizedeki yakondya kuza. ¹⁶ U mwene si yanozwa yawe mukohani mu nzila yo wulajilize ne malajilizo ge cimunhumunhu, langa mu vilungo vyo wumi wono wusina mudumo. ¹⁷ Hambi i Mandiko nha gakutya: “Agwe wuli mukohani cibitilila ku wutyatya u wityatye wo wukohani wa Melicizedeki.” ¹⁸ Holeka i lilajilizo lililya lilongozi likapatwa, ku soko vyono lyali lisina vilungo, kanyhi lyali si likwiliye cinji. ¹⁹ Vyono i lilajilizo lya Musa si lyasuma kukwilaniciza cinji. Ninga aluno i hanhu hayo, hakondya kuwicilwa u witumbilo u wuswanu wucizize, wono so wuwo, ase cosuma kumusejelela u Mulungu. ²⁰ Hamonga na zizo, ahano ho wuli no wilahize wo Mulungu. Ninga mu cipango lono wanji walya wanozwaga kuwa wakohani, u wilahize hali hasina. ²¹ Ninga Yesu yanozwa kuwa mukohani mu nzila yo wilahize, lono u Mulungu yamulonjela yakutya, “U Muwaha yelahiza hamba si kowukawaniza kanyhi u wuhile wakwe. Agwe wuli mukohani cibitilila.” ²² Holeka ku wulawa mu wisimajile wuwuno, Yesu yaweza wukangaze we cilagane ciswanu cicizize. ²³ Kanyhi kowuli wisimajile wunji nhavivyo, wawo i wakohani wanji, wali wenji, ku soko vyono wafwizaga, na holeka si wasumaga kujendelela no mulimo wawo. ²⁴ Ninga Yesu si yehwanile na wawo, vyono u mwene kekalaga cibitilila, no wukohani wakwe si wuladuma yaye. ²⁵ Holeka u mwene, yadahile nhondo zose kuwaponezya lukulu wose wono wakumubitila u Mulungu muli mwene, hambi u mwene nha kekalaga cibitilila yakuwalombela hali Mulungu. ²⁶ Holeka Yesu yo Mukohani Muwaha mono kocikwila muno muno mu visakwa vyetu. U mwene Yelile, yasina hamba yilema, hamba wubi muli mwene musina, yali musina mwipuga lya wanyo wubi, nayo yenuywe sunga ko ku wulanga. ²⁷ Mwene si yenha awalya i wakohani wanji, yasina soko yo kukumbika nhondo zose, yinongozi ku soko yo wubi wakwe mweneco, na hanyuma ku soko yo wubi we wanhu. Mwene nha yanozeza lukulu kamonga du, mwipango lono yelavizya mweneco, nayo yakwiliye vilo vyose. ²⁸ U Wulajilize wa Musa, wawahagulaga wanhu wono wali wena wusocele, wo wawe wakohani wawaha, ninga u wihuwizo wo Mulungu, wono yawunoza mu nzila yo wilahize, wono waza hanyuma yo Wulajilize, wakondya kumuhagula u Mwana mono yanozwa yakwilaniciye cibitilila.

¹ Ale ne nghani mbaha yono cikuyilonga nha yoyi: Ase cina u Mukohani Muwaha we nhavivi, mono yali ku wulanga mono yekaye ku muwoko wo kulume we ligoda lyo wuwaha lyo Mulungu u Mudaha vyose. ² Mwene ketumaga u mulimo wo Wukohani Muwaha i Hanhu Hono Helile muno, nha cinji, mugati ye lihema lililya lye mbeka lyono lyazengwa no Muwaha, hamba si na munhu yaye. |78A.tif|span|||U mukohani muwaha (8:1-2) | ³ Hambi u Mukohani Muwaha wo wose, nha yakuwikwa ho yamulavizye u Mulungu vilavya ne makumbiko, holeka no Mukohani wetu Muwaha yimunojeye nayo yawe ne cinhu co kulavya. ⁴ Holeka u Mwene mhali yawe munya baha hono’nze, si yali yasume kuwa mukohani hamba hadodo, hambi nha kowali wakohani wanji, wono wakulavya vilavywa mu nzila yo Wulajilize. ⁵ No witumami wawo wuwo wo wukohani, co cihwani du no muzizi wa azilya zono zili ku wulanga. Na vyo yali na kuli Musa. Lono yali yeza behi no kunoza i lihema lililya, u Mulungu yamulonjela yakatya, “Wunoze zose ziwe nhe hwani yono walajilwa kwi’tunda.” ⁶ Alu ninga Yesu, yakondya kupegwa u witumami we cikohani, wuswanu wucizize si nha wawo, nha vyono yacikangaza i cilagane ciswanu cicizize muli wanhu no Mulungu, hambi u musinji wayo nha wuli mu wihuwizo mu zinghani ziswanu zicizize muno. ⁷ Hambi i cilagane cicilya i cilongozi mhali ciwe cisina yilema, nha mhali kuwe kusina soko ye cilagane ce kejete. ⁸ Ninga u Mulungu yawahosa wanhu wakwe lono yalonjela yakutya: “Langa ta, i vilo vyolokuza yakutya u Muwaha, lono nolonozeza i cilagane cipya ne wanhu wa Isilayeli, hamonga na womulango wa Yuda. ⁹ Ne cilagane cico si cowa cihwanile ne cilagane acilya lono nawebatila muwoko niwahamye mu yisi ya Misili. Hambi nha si wekalaga mu cilagane cangu. Holeka nane sinawalanga, yakutya u Muwaha. ¹⁰ Ne cilagane cono nonoza ne wanhu wa Isilayeli mu vilo vyono vikuza nha cocino, nologenjiza i malajilizo gangu mu mahala gawo, kanyhi nologandika mu zinhumbula zawo. Nane nolowa Mulungu wawo nawo wolowa wanhu wangu. ¹¹ Hasina kanyhi munhu mono kolomwijiza u muyagwe. Hamba mono kolomutya u nduguye yatye, ‘Wumumanyaje u Muwaha.’ Hambi wanhu wose i wadodo ne wawaha nha wolomanya nene. ¹² Nane nolowanenela u wubi wawo hamba si nowukumbucila kanyhi yaye.” ¹³ Na muwulonje wa muli ze cilagane cipya, u Mulungu yakondya kucisakaza acilya i cilongozi, na muli co cose cono cikusakala no kuhumapa, cokwajilila mbela.

¹ I cilagane cilongozi cali cina u wityatye wayo wo wuhembi ne hanhu hono helile ha wuhembelo, hono hali hazenjigwe ne wanhu. ² Hali holili lihema linozwe, lyono hanze yayo lyali lina hanhu hono hacemwaga i “Hanhu Hono Helile.” Na baho ho hali no wuwiko we tala, ne meza ne mikate yono yali cilavywa kuli Mulungu. ³ Na hanyuma ye libupa lye kejete, hali ne lihema lyono lyacemwaga i “Hanhu Hono Helile muno.” ⁴ Mumo mo mwali cifusizo ca zahabu so kufusiza wuvumba ne lisanduku lye cilagane, nalyo lyali yihiliwe zahabu mbavu zose, na mugati yalyo, mwali na ciya ca zahabu cono cali cina mana, ne nghome ya Haluni yono yali yitulile mahamha, hamonga na azilya i zimbawo zi nyejete zono zali zandicigwe i cilagane. ⁵ Na mucanyha ya lilyo lisanduku, mwali na viwumbwa vyono vyalajilaga vyono u Mulungu yali baho, ne mabawa gavyo gali gacitile mubeho hanhu hono u wubi wukuwusizwa. Ninga alu si cosuma kulonga monga monga muli zinghani zizo. ⁶ I mipango yiyo yikafisilizwa, nawo wukawa wo moto kuli wakohani, wo kwinjila nhondo zose mwihema lilongozi lya kunze wakwituma u witumami wawo. ⁷ Ninga mwihema lye kejete, u Mukohani Muwaha du, yo yenjilaga yali wene, nayo yanozaga nhavivyo kwa mwaka kamonga du. Na lono yakwinjila mugati, yategulizaga ne sakami ho yamulavizye u Mulungu ku soko yakwe mweneco na ku soko yo wubi wono wanhu wetumiye mu wuwula kumanya weneco. ⁸ Na ku wulawa mu wityatye wuwo, u Muhe Mono Yelile yakwijiza calinze vyono, mu cipango cico lono lihema lilongozi lya kudeha likali limile, ne nzila yo kwinjilila i Hanhu Hono Helile nayo yikali si yinadigulwa. ⁹ Ne nghani yiyi yo hwani ye vidaha vya lulu. Yikulajila vyono vilavywa ne makumbiko, vyono vikulavywa kuli Mulungu, si vyosuma kuzinoza zinhumbula za wono wakuhemba, ziwe zikwilaniciye, ¹⁰ hambi zizi zose zono zili mu zindigwa, no wung’we na mu wityatye wunji wunji wo wihovuji. Vyose vivyo go malajilizo ga munze du; ne vilungo vyayo vyoficila ku mudumo wayo, kolo u Mulungu yakuvinoza wupya i vinhu vyose. ¹¹ Ninga Kilisito lono yaza, u Mukohani Muwaha we ziswanu zose zono aluno zakondya kuza. U Mwene yakwituma u mulimo wakwe mwihema liswanu, na lyono likwilaniciye muno, lyono si yinozwe ne miwoko ye wanhu, nha cinji lyono si lya mononze yiyi yono yawumbwa. ¹² U Mwene yenjila i Hanhu Hono Helile kamonga du, kanyhi hamba si yasoleleza ne sakami ye mhene, hamba ya ng’ombe, langa yenjila so sakami yakwe mweneco, yakaciletela u wukombozi we cibitilila. ¹³ I wanhu wono wali wetipiza ku ci dini wasumaga kwezwa no kuwa welile, lono wamizizwa i sakami ye mhene na ye ng’ombe, hamonga ne mavu ge ndama. ¹⁴ Ninga mu sakami ya Kilisito zitumwaga nghani mbaha kuciza! Vyono mu vilungo vyo Muhe we cibitilila, Kilisito yelavya mweneco ho yawe likumbiko lyono likwilaniciye kuli Mulungu. I sakami yakwe yocikwema i viselinji vyetu mu metumo gono gakuleta u wufwe, ho cimwitumamile u Mulungu u mumi. ¹⁵ Holeka Kilisito yo munoza i cilagane cipya mono wa walya wono wacemwa no Mulungu, ho wawubocele wihuwizo wono wehuwizwa wo wuhazi we cibitilila. Vyono i lifwa lyakwe likuwakomboza wanhu mu wulawa mu masutya ga galya gono wasutya mwidaha li lilya lye cilagane cilongozi. ¹⁶ Hambi nha vyo yinha, i zinghani ze ndumilizo zono kalajilizaga munhu, nha zikuwa kuvumilwa du lono u wufwe wo munhu yuyo mono yawulavivye u wulajilize wuwo wakondya kukangazwa. ¹⁷ U wulajilize si wosuma kufisilizwa, sunga langa i lifwa liwe lyakondya kwijela, vyono u wulajilize wusina nhunizo, hono mono yawulavizye yakali mumi. ¹⁸ Si holeka sunga ne cilagane cicilya i cilongozi, si casuma kuwikwa hono hasina sakami. ¹⁹ U lulongozi, Musa yawanziza wanhu wose ze malajilizo gose nha vyono yali mu Wulajilize, hanyuma yakasola i sakami ye ndama hamonga ne malenga, yaketumamila mahamha go mubici wono wukucemwa hisopo, hamonga no wuhamba wudunghu, yakacimiziza i citabu cicilya co Wulajilize hamonga ne wanhu wose. ²⁰ Musa yakatya, “Ayi yo sakami yono yikukangaza i cilagane cono yamulajilizenyi u Mulungu, holeka mucihulikaje.” ²¹ Musa yakalimiziza sakami lililya lihema nhavivilya hamonga ne viya vyo witumami. ²² Holeka nha vyono winha u Wulajilize, i vinhu vyose vyosuma kwezwa ne sakami, holeka no wubi nawo wukuwuswa du lono sakami yetika. ²³ Ale, i vinhu vivi vyono yo hwani du ya vye mbeka vya ku wulanga, vikawa vinojeye navyo vyezwe mu nzila yiyo. Ninga alu vya ku wulanga vikusaka likumbiko liswanu lyono licizize. ²⁴ Hambi Kilisito nha si yenjila i hanhu Hono Helile hono hazenjigwe ne miwoko ye wanhu, hono henha hwani du ya acilya ce mbeka. Langa u Mwene yenjila ku wulanga du kweneco kono aluno yemile hali u Mulungu ku soko yetu. ²⁵ U Mukohani Muwaha we Wayahudi kenjilaga i Hanhu Hono Helile mwaka na mwaka akuno yadinghuye ne sakami ye zi mitugo; ninga Kilisito si yenjila mumo ko kwilavya mweneco kali kenji, ²⁶ hambi nha hono yali yiwe nhavivyo, nha yali yimunojele Kilisito yagazwe kali kenji ku wulawa mu mwamulizo wo wuwumbwe we yinze. Ninga alu vipango avi lono vikusejelela ku mudumo wayo, u mwene yejela kamonga du, ho yawuwuse u wubi mu wilavya mweneco kuwa yikumbiko. ²⁷ Ale nha vyono wanhu wose wafwizaga kamonga du, na lono wakondya kufwa wakwima ha mwande yo wuling’anizwe wo Mulungu, ²⁸ nhavivyo nayo Kilisito, yelavya likumbiko lwa kamonga du ho yawuwuse u wubi wa wenji. Nayo yalaza kuza lwe kejete, ho yalece kuziza so wihoma no wubi, langa so kuwakomboza wawo wono wakumulindila.

¹ U wulajilize we Wayahudi yo si hwani yono yikwilaniciye ya ze mbeka, langa muzizi du we ziswanu zono zikuza. I makumbiko gago gakuwa kulavywa nhondo zose mu mwaka na mwaka. Alu u Wulajilize wosuma nhawule kuwanoza awalya wono wakuhemba mu nzila ye makumbiko gago, ho wawe wakwilaniciye. ² Mhali wawo i wanhu wo Mulungu wakondizye kwezwa u wubi wawo, si wali wewone kanyhi vyono wena wubi, ne makumbiko gago gose gali gadume. ³ Hamba nhavivyo, makumbiko gago ganozwaga mwaka na mwaka so kuwakumbuciza wanhu u wubi wawo. ⁴ Nha vyono i sakami ye zinzeku ne zimhene nha si yosumila lukulu kuwuwusa u wubi. ⁵ Holeka nayo Kilisito lono yazaga kononze, yamulonjela u Mulungu yakatya: “Si wasaka likumbiko hamba cilavywa, ninga wanozelezezo muwili. ⁶ Si wukwendezwa ne vilavywa vyo kunyanywa vili muvilima vyono si vitemasetemase, hamba vyo kuwusa wubi.” ⁷ Baho nane nghatya, “Ane nili baha ’gwe go Mulungu niwikanize kuwituma u wuhile wako, nha vyono nandicilwa mu citabu co Wulajilize.” ⁸ Ha lulongozi yakatya, “Si wukusaka, hamba si wukwendezwa ne likumbiko ne cilavywa, hamba i vilavywa vyo kunyanywa vili muvilima so wubi.” Yalonga nhavivyo, hamba yiwe i vilavywa vivi vyose vikuwa kulavizywa mu wityatye wo Wulajilize. ⁹ Kanyhi yakatya, “Ane nili baha ’gwe go Mulungu, ho nitume zo wuhile wako.” Baho u Mulungu ho yagawusiza i makumbiko ge katali, ne hanhu hayo yakawika i likumbiko linji limonga. ¹⁰ Holeka vyono Yesu Kilisito yafisiliza u wuhile wo Mulungu, ase mo cikwezezwa u wubi wetu mu nzila ye likumbiko lyo muwili wakwe lyono yalilavya, lyono lyakondya kamonga du. ¹¹ U Mukohani wo wose we Ciyahudi, ketumaga u witumami wakwe mu wuhembi nhondo zose, akuno yakulavya makumbiko ga galya du kali kenji, i makumbiko gono si gasumaga kuwuwusa wubi. ¹² Ninga Kilisito yalavya ilikumbiko limonga du ku soko yo wubi, i likumbiko lyono likondizye cibitilila, hanyuma yakekala ku lubavu lo muwoko wo kulume wo Mulungu. ¹³ Na kuko yalindiye sunga kolo i walugu wakwe wakuwikwa hasi ye migulu yakwe. ¹⁴ Na ku so cilavywa cakwe cimonga, yawanoza no kuwa wakwilaniciye cibitilila, wawo wono wakwezwa u wubi wawo. ¹⁵ Nayo u Muhe Mono Yelile yakucilonjela uwuhomelezi wakwe, Lulongozi yakutya, ¹⁶ “Aci co cilagane cono nolagana nawo mu vilo vyono vikuza, yakutyo Muwaha: Nolowika i malajilizo gangu mu zinhumbula zawo, no kugandika mu mahala gawo.” ¹⁷ Kanyhi yakutya, “Si nolowukumbucila kanyhi u wubi wawo, hamba ne metumo gawo go wuhodanji. ¹⁸ Holeka u wubi lono wakondya kuwuswa, howa hasina kanyhi soko yo kulavizya i cilavywa co kuwusizo wubi.” ¹⁹ Ale wandugu zangu, mu sakami ya Yesu, mo capelelwa i nhumbula yono yisina woga yo kwinjilila i Hanhu Hono Helile. ²⁰ Mwene yo yacitulila i nzila mhya, nzila yo wumi, yono yikoleye mwibupa, nha cinji mu nzila yo muwili wakwe mweneco. ²¹ Holeka cina u Mukohani Muwaha mono yena u wulajilize mu nyumba yo Mulungu. ²² Holeka cimusejelelaje u Mulungu ne nhumbula yo winenenyhezi no wihuwilo wono wumemeleceye, mu nhumbula yono yezigwe mu ciselinji cibi, na mu miwili yono yihovugwe ne malenga mazelu. ²³ Ciwukamisaje u witumbilo wetu wono cikuwuvumila, hambi u Mulungu mono yawunoza u wihuwizo wakwe nha mwihuwilwa. ²⁴ Kanyhi cihindaje mu wikombaniza sese wose munhu na muyagwe, akuno cikwiyoha kwiyikwejenhela ku wendo no wituma ziswanu. ²⁵ Cilece kuwuleka u wityatye wuwulya wo witang’anila hamonga, nha vyono wanozaga wanji. Kanyhi yicinojeye kwiyitaza sese wose, nha vyono mukuwona, i lizuwa lilya lyo Muwaha lyeza lili behi. ²⁶ Hambi hono cijendelele kwituma wubi ne nyono, na lono cakondya kuyimanya i mbeka, hasina kanyhi likumbiko lyono lyosuma kulavywa so wuwusizwe wo wubi. ²⁷ Langa yono yisigaye yowa yo wulanjilila ko woga, u wuling’anizwe wo Mulungu no moto mukali wono wolowamala wose wono wakumulema u Mulungu. ²⁸ U munhu wo wose mono yabezaga u wulajilize wa Musa yawulagwaga hamba kuwonelwa lusungu, hamwande yo wuhomelezi we wanhu wejete hamba wadatu. ²⁹ Wulenyi, u munhu mono yakumubedula u Mwana wo Mulungu, no kuyibedegala i sakami ye cilagane co Mulungu cono ca mweza, u munhu yuyo mono yakumutovula u Muhe wo Mulungu, yimunojeye yapegwe wulipicizwe wuwaha nha cici? ³⁰ Hambi nha cimumanyile ayulya mono yatya, “U wulipicize wina nene, ane nolipiciza.” Na kanyhi mono yatya, “U Muwaha kolowaling’aniza i wanhu wakwe.” ³¹ Ku wugwila mu miwoko yo Mulungu mumi yo nghani ya kogofya muno muno. ³² Ninga muzikumbucilaje zono zejela mu vilo vivilya i vilongozi lono mwali mwenzeluswa no wuzelu wo Mulungu. Ku soko hamba yiwe mwatuga wugazwe winji mu vilo vivyo, ninga mwakangalila. ³³ Hanji mukawa kutovulwa no kukozwa cevu cagalanze, na hanji mwali mwendezwe kwilunza na walya wono wagazwaga nhavivyo. ³⁴ Mwahangana u wugazwe ne wafungwa, na lono mwabokwaga zisawo zenyu, mwakangalila na nyemo, hambi nha mwali mumanyile vyono mwina sawo yono swanu muno muno kanyhi yono yikalaga cibitilila. ³⁵ Holeka mulece kuwutaga u wuluwuce wenyu, hambi nha womuletelenyi wuhumbilizwe wuwaha. ³⁶ Ninga mukusaka muwe no wukangalile, ho musume kwituma zono yakuzisaka Mulungu, ho mucibocele cono yehuwiza. ³⁷ Nha vyono gakutya i Mandiko: “Hambi nha cikali cidaha cidodo du, nayo mono yakuza, ho kokuza, hamba si kotinya yaye, ³⁸ Ninga u munhu wangu we ling’ani kokwihuwila no kuwumipa, ninga hono yawuye kanyhi ku nyuma, ane sinokwendezwa nayo.” ³⁹ Ninga ase si cili wayagwe na walya wono wakuwuya ne nyuma, no kwajilila, langa ase cihuwiye no kuponywa i zinhumbula zetu.

¹ Wuwa no wihuwilo, wo wutya wo wumanyile lukulu we vinhu vyono citumbiye, kwitumbilila lukulu muli vyono siciviwonaga kwe meso. ² Hambi i wanhu we katali, nha watujila u wuvumilwe no Mulungu ku soko yo wihuwilo wawo. ³ Na so wihuwilo, ase cimanyile nha vyono yinze yawumbilwa mu Nghani yo Mulungu; i vinhu vyono vijelaga ku wulawa mu vinhu vyono si vijelaga. ⁴ So wihuwilo, Habeli yamulavizya u Mulungu likumbiko lyono lyali yiswanu muno licizize lya Kayini. Na so wihuwilo wakwe yavumilwa no Mulungu nha munhu we ling’ani; u Mulungu mweneco yavivumila i vilavywa vyakwe. Na so wihuwilo wakwe, hamba yawe yakondya kufwa, ninga yakali yakulonga. ⁵ So wihuwilo, Enoci yanyasulwa no Mulungu, hamba si yafwa. Hamba si yejela kanyhi, hambi u Mulungu nha yali yamunyasula. Ne Mandiko gakutya, vyono yamwendezaga u Mulungu lono yali yakali si nanyasulwa no Mulungu. ⁶ Holeka si yosumika kumwendeza u Mulungu hono hasina wihuwilo. Vyono u munhu wo wose mono yakusaka kumwendeza u Mulungu, yimunojeye yehuwile vyono u Mulungu yali baho, na kanyhi vyono u Mwene kawakamisaga wose wono wakumulondola. ⁷ So wihuwilo, Noha yasugulwa no Mulungu kuli za kumwande zono yali yakali si yanasuma kuziwona yaye. Yamuhuliko Mulungu, yakanoza ligalawa lyono yaponela u mweneco hamonga na we mhuga yakwe wose. Na mu wulawilila muli zizo, i yinze yikaling’anizwa, nayo Noha yakatuga u wiling’ano wono wukulawilila mu wihuwilo. ⁸ So wihuwilo, Abulahamu yamuhuliko Mulungu lono yacemelwa yabite ku yisi yono u Mulungu yali yamupele yiwe yakwe. Hamba yiwe si yali yamanyile kono yabitaga, ninga yakahama. ⁹ So wihuwilo, yakekala nha mujenzi mu yisi yono u Mulungu yamwihuwiziza. Yakekala kuko mwihema nha vyono wekalaga wa Isaka na Yakobo, wono nawo wahanga u wihuwizo wuwo. ¹⁰ Hambi Abulahamu nha yalindilaga likaya lyono lina u musinji wono wukamile, i likaya lyono u Mulungu mweneco yo munghula mono yalihwesa no kulizenga. ¹¹ So wihuwilo, sunga Sala yehuwila vyono u Mulungu kawufisilizaga u wihuwizo wakwe, holeka yakapegwa vilungo vyo kutuga ’nda, hamba yawe yali yakondya kupuluta i vilo vyo kutujila i mida so wukombi. ¹² Holeka mu wulawa mo munhu yuyo yumonga, Abulahamu hamba yawe yali yeza nha yafwiza, walelwa i wanhu wono si wakuwala, wenha i zinyelezi za ku wulanga no musawawa wa mwi’lenga. ¹³ Ne wanhu wawa wose wafwa wena no wihuwilo. Nawo wafwa lono wakali si nabocela u wihuwilo wono u Mulungu yali yehuwize, ninga waziwonela kutali, wakasecelela, no kuvumila calinze vyono wene wali wajenzi kanyhi wajendi kono’nze. ¹⁴ Ne wanhu wono wakulonga nha zizo, wakulajila calinze vyono wakuyilondola yisi yawo weneco. ¹⁵ Na hono wali wawe wakuyikumbucila yisi kono walawilila katali, wali watuje i cilejeho co kuwuyila kuko kanyhi. ¹⁶ Ninga alu wakusaka i yisi ya ku wulanga. Holeka u Mulungu nayo si yakuwona soni hono wamutye Mwene Mulungu wawo, ku soko vyono Mwene yakondya kuwawikaniziza i kaya. ¹⁷ So wihuwilo, Abulahamu yamulavya u mwanagwe Isaka ho yawe likumbiko, lono u Mulungu yamujelaga. Na yuyo Abulahamu yali yabocela u wihuwizo wo Mulungu, ninga, hamba nhavivyo, yavumila kumulavya yikumbiko u mwanagwe we ciwene, ¹⁸ hamba yiwe u Mulungu yali yakondya kumulonjela. “U lulelo lwako lolawa muli Isaka.” ¹⁹ Abulahamu yehuwila vyono u Mulungu kosuma kuwazukula i wafu: na ku lubavu lunji, mbeka Abulahamu yamutuga kanyhi u mwanagwe kulawa kuli wafu. ²⁰ So wihuwilo, Isaka yawaluguta wa Yakobo na Esawu, ho watuje u wumoteswe wono wolokuza hanyuma. ²¹ So wihuwilo, Yakobo lono yali yeza behi no kufwa, yawaluguta wana wose wa Yusufu, yakamuhembo Mulungu akuno yayegamiye ne nghome yakwe. ²² So wihuwilo, Yusufu lono yali yeza behi no kufwa, yazilonga zo luhamo lwe Waisilayeli ku wulawa ku yisi ya Misili, yakawalecela ne malajilizo kuli ze mafupa gakwe. ²³ Sowihuwilo, i walezi wa Musa wamuhundika yuyo mwana mu myezi midatu, lono yali yalelwa. Wamuwona vyono yali mwana muswanu, hamba si wawogopa u wulajilize wo mutemi. ²⁴ So wihuwilo, Musa lono yali yeza munhu mututu, yalema kucemwa mwana wo muhinza wa Falawo. ²⁵ Yakawona vyono yili ciba yagazanwe hamonga ne wanhu wo Mulungu, si nho kwiyendeza no wuswanu wo wubi kwa cidaha cidodo. ²⁶ Yakamanya vyono, ku wutuga magazo ku soko ya Kilisito, ko cili cambuzi ciwaha muno muno, si nho u wugoli wose wa mu Misili, hambi nha yali yalanjiliye u wuhumbilizwe wa hanyuma. ²⁷ So wihuwilo, Musa yahama ku wulawa ku yisi ya Misili, hamba kogopa i likuwo lyo mutemi, na hamba si yawuya ku nyuma, hambi nha yali nha munhu mono yakondya kumuwona u Mulungu yu yulya mono si kejelaga. ²⁸ Na so wihuwilo, yanoza Pasaka, yakalajiliza i sakami yimizwe mu milango, ho yu yulya malayika u muwulaji yalece kuwawulaga wana walelwa i walongozi wa Isilayeli. ²⁹ So wihuwilo, i wanhu wa Isilayeli walowoka lilenga lya Shamu, kotya nha yali yisi nghavu; ninga Wamisili wali weza kujela nawo kunoza nhavivyo, wakafwila wose mu malenga. ³⁰ So wihuwilo, i majinji ge likaya lya Yeliko gakagwa, lono wanhu wa Isilayeli wali wakondya kugapilima mu vilo mupunghati. ³¹ Na so wihuwilo, Lahabu mono yali musenyha, si yajililana hamonga na awalya wono wamubeza Mulungu, ku soko vyono yawacemela ko mulamu awalya i watandizi. ³² Alu nolonga cici kanyhi, hambi cilejeho nha si conghondya ho nonje za Gidiyoni, Balaki, Samusoni, Yefuta, na Dawudi, na Samwili na ze wawizi. ³³ So wihuwilo, wawa wose wehoma ne watemi, wakasuma. Wetuma zo wiling’ano, nawo wakabocela zono yehuwiza u Mulungu. Wadinda i milomo ye masimba, ³⁴ wayizimya myoto mikali, wakapona mu wuwulagwe no mumaje. Wali wasocele, ninga wakatuga vilungo. Wali wena inhumbula yono yisina woga mu wulugu, wakagasuma i malugu ge wajenzi. ³⁵ Ne wacekulu wono wali wehuwiye, wakagomolelwa i wafu wawo wakondya kuzukulwa. Wanji muli wene wakalema kuwopolelwa, wakatamiswa vibi sunga wakafwa, ho watuje u wuzuce no kwinjila mu mikalile imiswanu yono yicizize muno. ³⁶ Wanji wakazwajizwa no kukunangwa ne viboko, na wanji kanyhi wakawopwa ne manyolo no kutajilwa mu jela. ³⁷ Watowangwa ne mabwe, wakademulangwa, wakawulagwa no mumaje. Wakawa kupilima-pilima wavwalile nyhingo ze zingholo ne zimhene, wakawa waciwa, wono wagazwa no kutendelwa vibi. ³⁸ Hamba ne yinze si yali yinojeye kuwa ne wanhu wawo. Wakawa kudumanjila mu nyika na mu matunda; wekalaga mu mapango na mu makolongo ge yisi. ³⁹ Ne wanhu wawa wose wejela vyono wali wali vilungo so wihuwilo wawo. Hamba nha vivyo, si wabocela zono u Mulungu yawehuwiziza, ⁴⁰ hambi u Mulungu nha yali yehwesize i nghani swanu muno kuciza ku soko yetu; wo wutya wene ho waze wawutuje u wukwilanicizwe hamonga na sese.

¹ Ase cina yipuga yiwaha lye wahomelezi wono wali ha mwande yetu. Holeka ku soko yiyo ciyilegaje muli vimizi vyose vyono vikucimila, hamonga no wubi wono wucinamatiye muno muno. Kanyhi cimanyhe ko wukangalizi mu witije wono wuli ha mwande yetu. ² Akuno cikumulanga Yesu mono wo mwamulizo wo wihuwilo wetu, no kuwukwiza. Mono, ku soko ye nyemo yono yali yawiciywe u mwene, yakangalila u wufwe wa mu musalaba, hamba kulanga ze cevu cakwe, alu yekaye ku lubavu lo kulume lwe ligoda lyo lukumyo lyo Mulungu. ³ Ale, mwihwesaje ta, kuli zono zamwagana Yesu, nha vyono yakangalila u wiwanganile wuwaha nha wuwu kuli wanhu wanyo wubi. Holeka mulece kutukuwika mitima yenyu hamba kukatala. ⁴ Hambi nha mukali si nehoma mukwisumaniza no wubi, sunga muficile ku wita sakami yenyu. ⁵ Wulenyi, alu mwazisemwa i zinghani zono u Mulungu yakulonga nanye nha wanagwe? “Mwanangu, wulece kubedegala i mafundo go Muwaha, hamba wulece kutukuwika u mutima wako kolo yakukukalipila. ⁶ Hambi u Muwaha nha kamufundaga wo wose mono yamwendile kanyhi kawatowaga iwana wose wono yakuwabocela.” ⁷ Holeka muwukangalililaje u wutowe, hambi nha wo wufundwe; u Mulungu yakumutendelenyi anye nha wanagwe. Hambi yo mwanaci mono si kafundwaga no sogwe? ⁸ Ninga hono mulece kufundwa nhe wana wanji, ale kumbe si muli wanagwe, langa muli wana watumulwa. ⁹ Ninga hamba nhavivyo, ase ciwogopile walezi wetu wono wacilela, hamba na hono wakucifunda. Holeka yicinojeye cimuhulice muno muno u Sogo yetu we cimuhe ho ciwumipe. ¹⁰ I walezi wetu wa baha hono yinze, wacifunda kwa cipango du, nha vyono wawonaga viswanu weneco, ninga u Mulungu yakucifunda ku so cambuzi cetu sese co weneco, ho cihanje u wele wakwe. ¹¹ No wufundwe wo wose, si cinhu ca nyemo, langa co cinhu ca kukalaza. Ninga awalya wono wafundwa no kuwa no wunhu wuswanu, i ndumilizo nha wodudula wuhumbilizwe wo mulamu wono wukulawa mu mikalile yo wiling’ano! ¹² Holeka muyinulaje i miwoko yenyu yono yidejepe, no kugasikamya mafugamilo genyu gono gatimbile. ¹³ Mujendelele kujendela mu nzila yono yigoloce, u mugulu wono wulemaye ho wulece kutamiswa, langa wuponywe. ¹⁴ Muweze no wuhile wo kuwa na mulamu ne wanhu wose. Mwikalaje mu mikalile yono yelile, ku soko vyono, hasina u munhu mono kosuma kumuwona u Muwaha Mulungu, hono yawe yayisina mikalile yono yinha yiyo. ¹⁵ Muhidimbale muno muno, ho yunji yalece kulyajiliza i lihewa lyo Mulungu. Mwilanjililaje, lisina lyo wusungu lilece kutula muli nyenye, no kuwawulaga wanhu wenji ko wusungu walyo. ¹⁶ Muhidimbale, ho halece kuwa muli nyenye na munhu yunji, musenyha hamba munhu mono si yakumogopo Mulungu nha vyono Esawu, mono yawuguza u wiling’ano wakwe wo kuwa u mulelwa u mulongozi ku soko yo wulye wa kamonga. ¹⁷ Nanye mumanyile nha vyono, sunga na lono yasakaga kuwutuga kanyhi wuwulya u wulugutwe wono wali wakwe, yakalemwa, hambi nha si yacituga kanyhi cilejeho co kunena, hamba yiwe yacilondola muno akuno ne mahozi. ¹⁸ Hambi nha simuficile kwi’tunda lya Sinayi, lyono lyosuma kwibatika nha vyono wanoza wanhu wa Isilayeli, kanyhi mukali nafika kono kowuli moto wono wakaga, ha wutitu, ne citi, na ha mukukunzo, ¹⁹ no mulizo we ndulele ne lizi lye zinghani. Wawo wono walihulika lizi lilyo, wakanena walece kuyihulika kanyhi nghani yinji, ²⁰ hambi nha si wasuma kulikangalilila lilajilizo lyono walajilizwa. “Mono kolipamiza litunda lili hamba wuwe mutugo, kopondangwa ne mabwe sunga yafwe.” ²¹ Na zizi zose zikejela nha nghani za kogofya muno, sunga na Musa yakatya, “Ane nghogopa muno no kucicima.” ²² Ninga anye muficile mwi’tunda lya Sayuni, ku kaya yo Mulungu mumi. Muficile Yelusalemi, ilikaya lya ku wulanga, kono wekonghoye wa malayika maelufu menji si wakuwala. ²³ Mwaficila ku wutang’ano wuwaha we walelwa iwalongozi wo Mulungu, wono matagwa gawo gandicigwe ku wulanga. Mwimile hali Mulungu u muling’anizi wa wose, na hamwande ye myuhe ye wanhu we ling’ani wono wanozwa wakwilaniciye. ²⁴ Muficile kuli Yesu u munoza i Cilagane, Cipya mono i sakami yakwe yamwajika yikulonga ziswanu muno si nha ya Habeli. ²⁵ Holeka mulanjilile, mulece kulema kumuhuliciza mono yakulongana nanye. Nha vyono awalya wono walema kumuhuliciza ayulya mono yawasugula hono yinze, si wapona yaye. Alu ase cosuma kupona wule hono cileme kumuhuliciza ayulya mono yakucisugula, mono yalawa ku wulanga? ²⁶ Mwi’pango lilyo lizi lyayisinjisa yinze, ninga alu yehuwiza yakutya, “Noyisinjisa yinze, kanyhi hamba si yinze du langa sunga no wulanga nhavivyo.” ²⁷ I nghani yiyi kanyhi, yikucilajila vyono i vinhu vyose vyono vyawumbwa vyosinjiswa no kuwuswa, ho visigale avilya vyono si vikusinjiswa. ²⁸ Holeka ase, yicinojeye cilumbe muno, vyono cikuwubocela u wutemi wono si wukusinjisika. Ciweze ne lilumbo no kumuhemba u Mulungu mu nzila yono yikumwendeza, hamonga no winenenyhezi ne cogopo; ²⁹ hambi u Mulungu wetu mbeka nha moto mukali wono wukutakamiza.

¹ Mujendelele mu wendo we cindugu. ² Mulece kusemwa kuwacemela wajenzi; hambi mu wituma nhavivyo, wanji nha wawacemela i wamalayika wula kumanya. ³ Mweze kuwakumbucila i wawopwa nanye muwe nha kotya muwopanwe nawo. Kanyhi mweze kotya mukugazika nha weneco. ⁴ U wutole wuweze ne cogopo kuli wanhu wose, i walume ne wacekulu yiwanojeye weze wehuwilwa kuli munhu na muyagwe. Hambi u Mulungu nha kowaling’aniza i wanhu we mikalile mibi ne wasenyha. ⁵ Mulece kuwa muli wasulumizi ku zipesa, langa mweze muceye ne vinhu vyono mwina navyo. Hambi u Mulungu mweneco nha yatya, “Si nokulecela lukulu, hamba si nokutaga.” ⁶ Holeka cikulonga cisina woga: “U Muwaha yo mutazi wangu, si nokogopa. Hambi u munhu konoza cici?” ⁷ Mweze kuwakumbucila i walongola wenyu wono wamulonjelenyi i nghani yo Mulungu. Mwihwesaje ze njenda yawo, muwegaje u wihuwilo wawo. ⁸ Yesu Kilisito yo yuyo du igolo ne zuwali, na ku cibitilila. ⁹ Mulece kutyatya ze mafundo ganji ganji ge cijenzi. I lihewa lyo Mulungu lyo likucisikamya i zinhumbula zetu, hamba si myoto ya mu wulye; hambi i malajilizo nha si gamutaza hamba hadodo u munhu wo wose mono yagatyatya. ¹⁰ Ase cina cikumbicilo cono awalya wono wakwituma mwihema lye Wayahudi, wasina wukombolwe wo kulya vinhu vyayo. ¹¹ U Mukohani Muwaha we Ciyahudi, kaletaga i sakami ye mitugo, i Hanhu Hono Helile, no kulavya makumbiko ku soko yo wubi ninga i zinyama ze mitugo zizo nha zikuwa kuticimizizwa kunze ye nghambi. ¹² Yo soko, nayo Yesu, yagazizwa kunze ye likaya, sunga yakafwa, ho yaweze i wanhu so sakami yakwe mweneco. ¹³ Ale nase cimubitile kuko kunze ye nghambi, akuno cidinghuye u wumondwe wakwe. ¹⁴ Hambi akuno kono yinze nha cisina likaya lyono likalaga; langa cikulilondola lyono likuza. ¹⁵ Ale nhondo, mu nzila ya Yesu, cimulavizyaje u Mulungu, likumbiko lyo lukumyo nhondo zose, wo wutya, u lukumyo lono lukuletwa ne wanhu wono wakulivumila litagwa lyakwe. ¹⁶ Mulece kusemwa kwituma i ziswanu no kwitaza nyenye wose, hambi zizo nha lye kumbiko lyono likumwendeza u Mulungu. ¹⁷ Muwahulikaje i walongola wenyu, no kwibata zono wakulonga; hambi nha wakuzidima i zinhumbula zenyu mu cilo na mu misi, kanyhi si woleka kulolosa zo witumami wawo hali Mulungu. Na hono muwahulice, nawo ho wokwituma i milimo yawo kwa nyemo, ninga hono yilece kuwa nhavivyo, wokwituma no wukalale, na si yo wana cambuzi kuli nyenye. ¹⁸ Mucilombelaje na sese. Cimanyiye lukulu vyono cina ciselinji ciswanu, hambi nha cendile kwituma yono yili ling’ani nhondo zose. ¹⁹ Nghumunenenyi muno muno, munombelaje, ho Mulungu yangomole u kwenyu mbela mbela, nha vyono yosumika. ²⁰ U Mulungu yamuzukula u Muwaha wetu Yesu Kilisito mono yo Mudimi wetu Muwaha we zingholo, ku soko yo wumwaje we sakami yakwe yono yakangaza i cilagane ce cibitilila. ²¹ U Mulungu wo mulamu, yamukwilanicizenyi mu ziswanu zose, ho mwitume wuhile wakwe; nayo yetume muli sese, zono zikumwendeza mweneco mu nzila ya Kilisito. Kuli mwene, weze lukumyo cibitilila ne cibitilila. Heya. ²² Holeka nghumunenenyi wandugu zangu, muyihulicizaje mutulile i nghani yiyi yo wulanjizwe. Hambi ayi nha baluwa fupi du yono nimwandicilenyi. ²³ Nyendile kumumanyizenyi nha vyono u ndugu yetu Timoteyo yakondya kudigulilwa kulawa mu jela. Na hono yeyandile kuza akuno, nolokuzana nayo kolo nghuza u kwenyu. ²⁴ Ale, muwalamusaje i walongola wenyu wose, hamonga ne wanhu wo Mulungu! I wandugu zetu wanya akuno ku Italiya, wakumulamusenyi. ²⁵ Lihewa lyo Mulungu liwezane nanye wose.