WAGALATIYA

WAGALATIYA

¹ Ane Pawulo u mutumwa, hamonga na we zindugu wose, wono wali hamonga nane, cikwandika kuli makanisa gono gali ku Galatiya. Ane nacemwa kuwa mutumwa, ninga si so wulajilize we wanhu, hamba si mu vilungo vyo munhu, ² langa mu vilungo vya Yesu Kilisito, na mu vilungo vyo Mulungu Baba, mono yamuzukula Yesu muli wafu. ³ Ilihewa no mulamu vyono vikulawa kuli Mulungu Baba, na kuli u Muwaha wetu Yesu Kilisito, viwezane nanye. ⁴ Kilisito yelavya mweneco ku soko yo wubi wetu, ku soko yo wendo wo Mulungu wetu no Sogo yetu, ho yaciponye mu yinze yiyi yimbi ya lulu. ⁵ Kuli mwene lweze lukumyo sunga cibitilila ne cibitilila. Heya ⁶ Nghwizina vyono cidaha cidodo du cono capuluta, nanye mweza kuwuka kuli yulya mono yamucemenyi mwi’hewa lya Kilisito, na luno mweza kutyatya kanyhi u Luganuzi Luswanu lunji. ⁷ Ninga i mbeka, howali wanhu wanji wono wakumuhanza-hanzenyi, wo wanhu wono wakuhila kulwajiliza u Luganuzi Luswanu lwa Kilisito. ⁸ Ninga hamba yawe yunji muli sese, hamba wawe Wamalayika wa ku wulanga, hono yamuganulilenyi u Luganuzi Luswanu lunji lono si lwinha lono camuganulilenyi, yuyo yeze mulijitwe! ⁹ Nha vyono camula kulonga, nhavivyo vyo nghulonga kanyhi, yunji wo wose hono yamuganulilenyi u Luganuzi Luswanu lunji lono si lwinha lono mwalubocela, yuyo yeze mulijitwe! ¹⁰ Alu’mbi kanyhi nghusaka wukombolwe wa nani, we wanhu hamba wo Mulungu? Hamba nghusaka kuwendeza wanhu lo? Na hono noze nhavivyo, kwaco, ane si nali niwe mwitumami wa Kilisito. ¹¹ Nye nyo wandugu zangu, nghusaka mumanye vyono u Luganuzi Luswanu lululya lono naluganula, si yali nghani yono yikulawa kuli wanhu. ¹² Hambi ane nha si nalubocela kulawa kuli wanhu, hamba si nejizwa na munhu, langa Yesu Kilisito mweneco yo yangubulila. ¹³ Hambi nha manyile vyono, mwazihulika i ze mikalile yangu ye katali yo wibata dini ye Ciyahudi, kanyhi na vyono naligazaga muno muno likanisa lyo Mulungu, sunga nghawa nili behi no kulihodanjila lukulu. ¹⁴ Heya, sunga nghawaciza wenji wanyawusi wayangu we lizika lyangu mu wibata yiyo dini ye Ciyahudi, nane kanyhi nghasimbilila muno muno mu wibate myoto ye walezi wetu. ¹⁵ Ninga u Mulungu, so lihewa lyakwe, yali yakondya kuhagula lono nali nghali hamba si nalelwa, nayo yakawa kunyhema ho nimwitumamile. ¹⁶ Nayo yaza yeza kulamula du kungubulila zo Mwanagwe, ho niluganule u Luganuzi lwakwe Luswanu kuli wanhu wono si Wayahudi, nane si nejelela kuwuza mahweso kuli wanhu wanji, ¹⁷ hamba si namula kubita ku Yelusalemi ho nghewone na awalya wono wanongolela kuwa watumwa, langa namula kubita ku Alabiya, na hanyuma nghawa kuwuya kanyhi ku Damesiki. ¹⁸ Na hanyuma yaza kupuluta myaka midatu, ho nghawa kubita ku Yelusalemi nghamumanye Kefa, nane cikekalana nayo vilo yikumi na vihano. ¹⁹ Nane hamba sicewona na watumwa wanji, langa cewona na Yakobo du u nduguye wo Muwaha. ²⁰ Azi zono nghumwandicilenyi, no Mulungu yamanyile vyono si nghulonga wulambi. ²¹ Hanyuma yayo nghawa kubita ku mbavu za ku Suliya na Kilikiya. ²² Na mwi’daha lilyo, nene no mweneco nghawa nghali namanyika kuli mhuga ye Wakilisito wa kuko ku Yudiya. ²³ I wene wali wacimanyile du cono wali wacihulice, vyono, “U munhu yuyulya mono yacigazaga baho ha lulongozi, alu yakuwuganula u wihuwilo wuwulya wono yajelaga kuwuhodanga.” ²⁴ Nawo wakamukumya u Mulungu ku soko yangu.

¹ Hanyuma yaza kupuluta myaka yikumi na mine, nghawuyajila kanyhi kubita ku Yelusalemi cina hamonga na Balanaba, nghamusola na Tito cikabitana nayo. ² No wubite wangu walawilila mu wugubule wono yangubulila Mulungu. Na muwihangulize we cinyele, nghasuma kuwaloloseza wawo iwalongola ze nghani yo Luganuzi Luswanu lono naluganula kuli wanhu wono si Wayahudi. Nanoza nhavivyo ho mulimo wangu wono nali nakondya kuwituma, sunga na wono nali nghali kuwituma, wulece kuwa nha nghani ya bwete. ³ Ninga sunga no muyangu Tito mono cali cina nayo mono yali Mugiliki, si yadindimizwa kwalama, ⁴ hamba yiwe hali howali wandugu wo wulambi wono wali wahijiliye Tito yalame. I wanhu wawa weyinjiza ko wusugu, wakawa kuwulondola u welecele wetu wono cina nawo muli Kilisito Yesu, ho wacinjize mu wuwanda. ⁵ Nase si celumbaniza nawo hamba hadodo, i mbeka yo Luganuzi Luswanu ho yikale muli nyenye nhondo zose. ⁶ Ninga i wanhu wawa wono wakutegwa wo walongola, hono mbeka vyo wali wenha, hamba yiwe si nhavivyo, kwangu si nghani yaye, hambi u Mulungu nha siyakuwa kuling’aniza so wulanga za kunze, ne wanhu wawa wali wasina cinji cono wali wadahile konjeleza mu Luganuzi lulu Luswanu nha vyono ane nghuluganula no mweneco. ⁷ Hamba nhavivyo, wali wamanyile vyono u Mulungu yo yanhuma kuluganula u Luganuzi Luswanu kuli wanhu wono si Wayahudi, nha vyono Petelo yali yatumigwe kuwaganulila i Wayahudi. ⁸ Ku soko vyono yuyo mono yamupela Petelo i vilungo vyo kuwela mutumwa kuli Wayahudi, yo yuyo kanyhi mono yamhela nane i vilungo vyo kuwela mutumwa kuli wanhu wono si Wayahudi. ⁹ Holeka wa Yakobo na Kefa hamonga na Yohana, wono wakwijela nha wo walongola wawaha, wali wamanyile vyono u Mulungu yo yamhela lihewa lilyo, holeka wakawa kucilamusa ane na Balanaba kwe miwoko yawo, wakulajila i citanjilo co wuhangane hamonga. Na yikawa yicinojeye ase ciketume u mulimo kuli wanhu wono si Wayahudi, wene nawo kuli Wayahudi. ¹⁰ Ninga hamba nhavivyo, wacilomba ase cinhu cimonga, nha cinji ciwakumbucile wanhu waciwa, na yo nghani yono nghuhidimbala muno kuyituma. ¹¹ Ninga Kefa yaza kuza ku Antiyokiya, namwimila cagalanze hamwande ya wose, ku soko yali yasutizye. ¹² Ku soko vyono ha mwamulizo, i wanhu wanji wono watumwa na Yakobo, lono wali wakali si nafika baho, Petelo vyalizanaga hamonga ne wanhu wono si Wayahudi. Ninga waza kufika wanhu wawo, hodu Petelo yakawa kulecela lukulu kulizana ne wanhu wono si Wayahudi, ku soko vyono yawogopa i wanhu wawo wono wahilaga i wanhu wono si Wayahudi walame. ¹³ Sunga ne wandugu wanji we Ciyahudi wakevumila hamonga na Petelo mwi’tumo lilyo lyo wukoci, sunga na Balanaba yakenjizwa nayo mu wukoci wawo. ¹⁴ Holeka nane naza kuwuwona u wuwe wawo wa mu mbeka yo Luganuzi Luswanu, vyono si wuli mu nzila yono yili mu mbeka, hobaho nghawa kumulonjela Kefa hali wose, nghamutya, “Hamba wuwe agwe wuli Muyahudi, ninga wukwikala mu mikalile nha vyono wekaye wanhu wono si Wayahudi, hamba si wikaye kotya Muyahudi! Alu kosuma nhawule kujela kuwadindimiza i wanhu wono si Wayahudi wekale mu mikalile ye Wayahudi?” ¹⁵ Heya mbeka, ase kulawa katali cili Wayahudi, hamba si cili wanhu we wono si Wayahudi, wawo i wahodanji! ¹⁶ Ninga cimanyiye lukulu vyono u munhu si kosuma kuvumilwa hali Mulungu ku soko yo kuwibata u Wulajilize, langa so kumwihuwila Yesu Kilisito du. Na sese cimwihuwiye Yesu Kilisito nhavivyo ho cisume kuvumilwa hali Mulungu mu nzila yo wihuwilo wetu kuli Kilisito, hamba si so wibate wo Wulajilize. ¹⁷ Alu hono yiwe mu wulondola wuvumilwe hali Mulungu muli Kilisito, cikwijela cili wabi nha vyono wenha i wanhu wono si Wayahudi, wule! Nghani yiyo yowa yina nhunizo yo wutya Kilisito yakutaza mu wituma wubi? Aa ng’o! ¹⁸ Langa hono niwe nghuzenga kanyhi cicilya cono nakondya kucikumula, baho langa nghwilajila vyono nili muhodanji. ¹⁹ Ku soko ane nakondya kufwa mu Wulajilize wuwo, u Wulajilize weneco wo wambulaga, ho niwe nili mumi muli Mulungu. Ane nawulagwa hamonga na Kilisito mu musalaba, ²⁰ ninga nghuwumipa, ninga yo si nene kanyhi, langa Kilisito yo yakuwumipa muli nene. No wumi wuwu wono nina nawo lulu, nghuwumipila u wihuwilo, u wihuwilo wa muli Mwana wo Mulungu mono yanyenda sunga yakelavya wumi wakwe ku soko yangu. ²¹ Si nghwenda kulema lihewa lyo Mulungu. Hono yiwe munhu kanozwaga ling’ani hali Mulungu mu nzila yo Wulajilize, kumbe Kilisito yafwa bwete.

¹ Anye mo Wagalatiya, mbeka mweza muli walele! Alo mono yamukulujenyi nani? Hamby inghani yo wutumbikwe wa Yesu Kilisito, nha mwanzalicilwa ha meso genyu. ² Alu nghusaka kumanya nghani monga du kuli’nye. Alu mwamubocela u Muhe wo Mulungu ho musume kwituma i metumo go Wulajilize, hamba ku soko ho muluhulice no kulwihuwila u Luganuzi Luswanu? ³ Alo nha wule muli walele nhavivi? Mwamuliziza zose mu wutazi wo Muhe wo Mulungu, alu mukuhila kumaliliziza mu vilungo vyenyu mo weneco? ⁴ Alo wo wutya, i zinghani zose zilya zono zamutujenyi zawa za bwete? Si yosumika yaye! ⁵ Ma, u Mulungu, yakawa kumupelenyi u Muhe kanyhi no kwituma mapoto muli nyenye, vyono mukuzifisiliza za mu Wulajilize hongo, hamba vyono mukuluhulika u Luganuzi Luswanu no kulwihuwila? ⁶ Ta, cilanje za Abulahamu; u mwene yamwihuwila u Mulungu, nayo u Mulungu yakamuvumila no kumuwona yali ling’ani. ⁷ Holeka mumanye vyono i wanhu wono wakumwihuwila, wawo wo wana wa Abulahamu. ⁸ I Mandiko Gono Gelile gakulajila vyono, u Mulungu kowanoza i wanhu wono si Wayahudi ho wavumilwe hali mwene mu nzila yo wihuwilo. Holeka i Mandiko Gono Gelile galongola kumulonjela Abulahamu u Luganuzi Luswanu gakutya, “I wanhu wose wono si Wayahudi wolomotesezwa muli gwegwe.” ⁹ Holeka wawo wono wena u wihuwilo, wolugutizwa nha vyono Abulahamu yalugutizwa vyono yali yehuwiye. ¹⁰ Holeka wose wono wetumbiye kufisiliza za mu Wulajilize du, wali mu wulijitwe, hambi i Mandiko Gono Gelile nha gakutya, “Muli wose mono si yakwibata no kufisiliza zose zono zandikwe mu citabu co Wulajilize, mulijitwe.” ¹¹ Nha yanzalikwe, vyono u Wulajilize si wosuma kumunoza munhu ho yavumilwe hali Mulungu, hambi i Mandiko nha gakutya, “Mono yakuvumilwa hali Mulungu ku so wihuwilo, yuyo kowumipa.” ¹² Hambi u Wulajilize no wihuwilo, siyo cinhu cimonga yaye, langa i Mandiko gakutya, “Mono kozifisiliza zose zono zikusakwa mu Wulajilize, yuyo kowumipa.” ¹³ Kilisito yacikomboza mu wulijitwe wo Wulajilize, hambi nha yawusola u wulijitwe wuwo ku soko yetu, vyono i Mandiko gakulonga, “Muli wose mono kotumbikwa mu musalaba, yuyo mulijitwe.” ¹⁴ Nghani yiyi yanozwa ho wulugutwe awulya wono yapegwa Abulahamu, wusume kuwaziza i wanhu wono si Wayahudi mu nzila ya Yesu Kilisito, na mu nzila yo wihuwilo, cisume kuwubocela u Muhe yulya mono u Mulungu yacihuwiziza. ¹⁵ Wandugu zangu, nomulonjelenyi i cihwanicizo ca mu mikalile yetu ye nhondo zose. Mwihwesaje ta muli ze cilagane ca wanhu wejete. I cilagane cila kuwa cawikwa cakondya, hamonga no kutajilwa sayini, hasina munhu mono kacidelengulaga, hamba kuconjeleza cinji. ¹⁶ Ale Abulahamu nayo yapegwa cilagane mweneco hamonga no lulelo lwakwe. Ne Mandiko si gakutya, “Ne zindelo zakwe.” Nha kotya wenji, langa gakutya “No lulelo lwakwe” nha kotya yumonga du nayo yo Kilisito. ¹⁷ Na cono nghusaka kucilonga nha coci, u Mulungu yanoza i cilagane cakwe kanyhi yakacikangaza, holeka u Wulajilize wono waza lono yali yakondya kupuluta myaka magana mane na makumi madatu, si wosuma kucidelengula i cilagane hamba kucinoza ciwe nha nghani ya bwete. ¹⁸ Hambi i cipegwa co Mulungu hono ciwe cikwitumbila u Wulajilize, i cipegwa cico si cosuma kwitumbila kanyhi i cilagane co Mulungu. Ninga u Mulungu yamupela Abulahamu ku soko ye cilagane. ¹⁹ Alu u Wulajilize waci? Wonjelezwa ho wuwulajile u wuhodanji co cici, sunga kolo yakuza ayulya wo lulelo lwa Abulahamu mono yalaganizwa. U Wulajilize waletwa na malayika ko muwoko wo mulamuzi. ²⁰ Yene yili mbeka vyono u mulamuzi si kasakwaga hono nghani yiwe kuli munhu monga, langa u Mulungu yo yumonga. ²¹ Alo u Wulajilize vikusutana ne vilagane vyo Mulungu? Ng’o si nhavivyo yaye! Hambi hono wali wulavywe Wulajilize wono wosuma kuwapela wanhu wumi, baho cali cisume kuvumilwa hali Mulungu mu nzila yo Wulajilize. ²² Ninga si nhavivyo, i Mandiko Gono Gelile gakondya kulonga nha vyono, i yinze yose yili mu vilungo vyo wubi, wono wehuwiye ho wapegwe i cilagane so wihuwilo muli Yesu Kilisito. ²³ Na lono cali cikali si napegwa wuwo u wihuwilo, u Wulajilize wali wuciwopile, sunga wugubulwe u wihuwilo wuwo wono wazaga. ²⁴ Holeka u Wulajilize wuwo wali nha mwijizi wetu sunga Kilisito yakaza, ho cisume kuvumilwa hali Mulungu mu nzila yo wihuwilo. ²⁵ Ninga alu vyono u wihuwilo waza, hodu, u Wulajilize wawa si mwijizi wetu kanyhi. ²⁶ Na mu nzila yo wihuwilo, anye wose mwawa wana wo Mulungu muli Kilisito. ²⁷ Nanye wose mono mwabaputizwa, mukelunza na Kilisito, alu mwamuvwala Kilisito. ²⁸ Holeka hasina kanyhi wisimajile wa muli Muyahudi na mono si Muyahudi, hamba muwanda no munhu mulelele, mucekulu hamba mulume. Hambi anye wose nha mwaweza cinhu cimonga muli Kilisito Yesu. ²⁹ Holeka anye hono muwe muli wakwe Kilisito, ale muli lulelo lwa Abulahamu, kanyhi mozibocela zizo ze cilagane co Mulungu.

¹ Ninga nghutya nhavi, u muhazi lono yakali mudodo, si visimajiye no mwitumami, hamba yiwe yo munya sawo yose. ² Mwipango lilyo lyose yakuwa yali mu mawoko ge walanjilizi ne wanyamhala, sunga vize vifice i vilo vyono vyatemezezwa no sogwe. ³ Nhavivyo nase lono cali cikali wadodo, cali cili wafugwa we myuhe yono yitemile mononze. ⁴ Ninga i vilo vyali vyeza kufika, u Mulungu yamutuma u Mwanagwe mono yalelwa no mucekulu, yakekala mu Wulajilize, ⁵ ho yawakomboze awalya wono wali mu Wulajilize, ase ho cinozwe wana wo Mulungu. ⁶ Alu vyono muli wana, u Mulungu yamutuma u Muhe wo Mwanagwe mu zinhumbula zetu, u Muhe mono kacemaga, “Aba,” wo wutya “Baba.” ⁷ Holeka alu agwe si wuli muwanda kanyhi, langa wuli mwana. Na vyono wuli mwana, holeka kozibocela zose zono u Mulungu yawawiciye i wanagwe. ⁸ I katali vyono mwali si mumumanyile u Mulungu, holeka mwayitumamilaga milungu yono si milungu ye mbeka. ⁹ Ninga alu vyono mwakondya kumumanya u Mulungu, lunji citye vyono mwakondya kumanyika no Mulungu, alu nhawule kanyhi mukuwuya ne nyuma no kuyitumamila kanyhi myuhe ayilya miciwa kanyhi yisoceye? ¹⁰ Mukuvicelelela i vilo, ne myezi, ne madaha, ne myaka! ¹¹ Ane nghogopa ku soko, yilece kuwa lunji u mulimo wono netuma muli nyenye, wuwe wusina cambuzi. ¹² Wandugu zangu, nghumunenenyi mweze mwinha nene, nha vyono nane ninha nyenye. Si mwanozeza wubi wo wose. ¹³ Mumanyile nha vyono u wutamwa wangu wo wamhela cilejeho co kumuganulilenyi u Luganuzi Luswanu ha lulongozi. ¹⁴ Hamba nhavivyo mwidaha lilyo si mwambedegala hamba kusemuna ku soko yo wusocele wangu, hamba muwe mwajelwa ho munoze nhavivyo, ninga mwambocela nha malayika wo Mulungu, kotya nha nali nawa yo Kilisito Yesu mweneco. ¹⁵ Nha mwali musangalaye, alu kanyhi cejela cici? Nghulonga mbeka, vyono mwipango lilyo mwali musume kugawusa meso genyu mumhele nene. ¹⁶ Alu ma! Neza nili mulugu wenyu vyono nghumulonjelenyi i mbeka? ¹⁷ Wawo i wanhu wanji wakumuhilenyi, ninga wuhile wawo si wuswanu. Wakuhila kumutemanulenyi na ane, ho muwendeze weneco, nha vyono wene wakumwendezenyi nyenye. ¹⁸ Heya, yene mbeka yo nghani swanu nhondo zose, hono wuwe no wuhile kwa wanji so ziswanu, kanyhi si mu cipango du cono ane nghali nili hamonga nanye. ¹⁹ Mo wanangu, ane kanyhi nghumugazicilenyi muno nha vyono kagazikaga mucekulu mono yali magulu mazito mu cipango co kusawa, sunga Kilisito yalaza kuwa yalunzwa muli nyenye. ²⁰ Yali yiwe yili ciba hono nali niwe hamonga nanye alu, ho nhuje wuwe wono wusikame muli nyenye. Hambi nha nina mahwele menji ku soko yenyu. ²¹ Munonjelaje ta, anye mono mukali kusaka kutemwa no Wulajilize, Wulenyi muwuhulice u Wulajilize vyono wukutya? ²² Yandicigwe mu Mandiko Gono Gelile, vyono Abulahamu yali yena wana wejete, yumonga yali mwana wo mucekulu u muwanda, na we kejete yali wo mucekulu mono yali si muwanda. ²³ Ayulya wo mucekulu muwanda yalelwa nha vyono yizoweywe, langa ayulya wo mucekulu mono yali si muwanda, yalelwa so cilagane co Mulungu. ²⁴ I zinghani zizo zikuwa nha hwani, i wacekulu wawo wejete yo hwani ye vilagane vyejete, i cilongozi co acilya cono canozezwa mwitunda lya Sinayi, ne hanhu hayo yo Hagali, ne wanagwe walelelwaga mu wuwanda. ²⁵ Nayo Hagali yakuwa nha lyo litunda lya Sinayi lyono lili ku Alabiya, nayo yo hwani ya Yelusalemi ya lulu yono yili mu wuwanda hamonga ne wanagwe. ²⁶ Ninga Yelusalemi ya ku wulanga, lye’kaya lilelele, nayo yo nyina yetu ase. ²⁷ Hambi nha yandikwe: “Wusecelele go mugumba mono si kulelaga wuzoze, wulile so nyemo agwe mono wusina wusungu wo kulela hambi i wana wa ayulya mono yalecigwe nha wenji, wacizize wa ayulya mono yena mulume.” ²⁸ Holeka alu wandugu zangu, anye muli wana wo Mulungu, so cilagane cakwe, nha vyono yali Isaka. ²⁹ Ninga nha vyono yinha mu vilo vivilya u mwana yuyulya mono yalelwa nha vyono yizoweywe, yamuwingaga ayulya mono yalelwa kwe vilungo vyo Muhe wo Mulungu, vyo yinha nhavivyo na mu vilo vivi. ³⁰ Ninga I Mandiko Gono Gelile gakutya nhawule? Gakutya nhavi, “Wumuwingaje u mucekulu muwanda hamonga no mwanagwe, hambi u mwana wo muwanda nha si kosuma kuhala hamonga no mwana wo mucekulu mono si muwanda.” ³¹ Holeka wandugu zangu, ase si cili wana wo muwanda, langa wo mucekulu mono si muwanda.

¹ Mu wulelele, Kilisito mo yaciwika, nayo yakasaka mo cikalaje mumo. Holeka mwime mukamile hamba mulece kuvumila kanyhi kuwa mu wuwanda. ² Ta muhulicize! Yo nene Pawulo mono nghulongana nanye, nghutya, Hono muvumile walame, wo wutya, Kilisito si komukwilenyi co cose. ³ Nghumulonjelenyi kanyhi calinze, vyono, muli wose mono kosuma kuvumila kwalama yowa yimunojeye yawibate u Wulajilize wose. ⁴ Holeka hono mukulanjilila muvumililwe hali Mulungu mu nzila yo Wulajilize, hodu mwakondya kwiwagula muli Kilisito, mweza muli kunze ye lihewa lyo Mulungu. ⁵ Ninga ku lubavu lwetu ase, cikulindila ko witumbilo vyono, covumilwa hali Mulungu kwe vilungo vyo Muhe, mu nzila yo wihuwilo. ⁶ Hambi hono ciwe cakondya kuwa muli Kilisito Yesu, kwalama hamba wula kwalama, mose musina cambuzi, i nghani yono yina cambuzi, wo wihuwilo wono wukwitumila mulimo mu wendo. ⁷ I mijendele yenyu nha yali miswanu, alu mono yamwimilenyi ho mulece kuyihulika i mbeka, yo nani? ⁸ Mono yakuwuleta u wuwe wuwo, yo si Mulungu mono yamucemenyi. ⁹ “I cisase cidodo cikuwa kuswaza lizanga lyose lyo wusaje.” ¹⁰ Ku soko yo wilunze wetu no Muwaha, holeka nina witumbilo wuwaha vyono nanye si mowa kanyhi no wuwe wunji wono wisimajiye no wuwe wangu. Nayo yuyo mono yakumwivyajizenyi hamba yawe vyono yenha, u Mulungu komulipiciza. ¹¹ Ane ku lubavu lwangu, anye mo wandugu zangu, hono niwe nghali kuganula vyono yinojeye kwalama, alu nhawule nghali kuwingwa-wingwa? Hamba nhavivyo u wuganule wangu muli zo musalaba wa Kilisito, si wali wulete cevu co cose. ¹² Nali nyende wawo wono wakumwivyajizenyi, wetemanje. ¹³ Hambi anye mo wandugu zangu, nha mwacemelwa wulelele. Ninga u wulelele wuwo wulece kuwa cikojelo co kutemwa ne masulumizi ga mononze. Langa munojeye mweze kwiyitumamila mu wendo. ¹⁴ Hambi u Wulajilize wose nha wukuwa kufisilizwa mu nghani monga du, nayo yoyi, “Wumwendaje u muyago nha vyono wiyendile go mweneco.” ¹⁵ Ninga hono mukwiyiluma kanyhi mukwiyilya kotya malimu, ale mulanjilile, mulece kwiyimala nyenye wose. ¹⁶ Holeka ane nghutya nhavi, i mijendele yenyu yeze kulongozwa no Muhe, nanye ho si motyatizya lukulu i masulumizi ga mononze. ¹⁷ Hambi i masulumizi ga mono’nze, nha vipinganaga no wuhile wo Muhe, no wuhile wo Muhe nawo, vipinganaga no wuhile we masulumizi ga mono’nze. Ne zinghani zizo zi nyejete si zikuwa kubitana hamonga, ku soko yiyo holeka si mosuma kwituma zono mwali mwende nyenye nyo weneco. ¹⁸ Na hono mutongwe no Muhe, si mowa kanyhi mu Wulajilize. ¹⁹ Ale, ne metumo ge ciyinze yinze nha gali calinze; nago nha goga, wusenyha, wavu, yihede, ²⁰ wukumbika vihwani, wuhawi, sili, wugombane, wivu, makuwo, wukowela, wiwanganile, ciyagalo, ²¹ simbili, wukolwe wo wujimbi, wubugu, na ganji gose gono genha gaga. Nghumulonjelenyi kanyhi nha vyono namula kumulonjelenyi, i wanhu wono wakwituma gono genha gago, si wokwinjila mu wutemi wo Mulungu. ²² Ninga zono zikwijela so wutongwa no Muhe, wo wendo, nyemo, mulamu, wukangalizi, wuswanu, wucemezi, wihuwilwa, ²³ wupolo no wiyimile. Hasina u Wulajilize wono wukusuma kuzimila zizi. ²⁴ I wakwe Kilisito, wakondya kuwuwulaga u wuwe wawo we ciyinze-yinze hamonga ne mahweso gayo i mabi ne masulumizi gayo. ²⁵ Holeka hono cikale mu wutazi wo Muhe, ciwutyatyaje no wutonji wayo. ²⁶ Cilece kuwa cili wedunhumuzi, cilece kwisagala, hamba kwiyiwonela wivu.

¹ Wandugu zangu, hono mumuwone munhu yunji yasutizye, anye mono mukutongwa no Muhe, mumukagaje u munhu yuyo ho yenozeleze, ninga mumunozeze nhavivyo ko wupolo, akuno mukwilanjilila nyenye nyo weneco ho mulece kwinjila mu majelo. ² Mwidinghuzaje zono zikumuvunenyi mu mikalile yenyu, na nhavivyo, ho mowufisiliza u Wulajilize wa Kilisito. ³ Munhu hono yewone kotya nha yali cinji, na kumbe ho si yali cinji, yuyo yakwikonga mweneco. ⁴ Ninga yinojeye munhu wo wose yeyipime viswanu i mikalile yakwe mweneco. Hono yiwe miswanu, ho kowa na co kwilumbila muli cono yetumile mweneco, hamba kowa yasina soko yo kwiling’aniza na munhu yunji. ⁵ Hambi u munhu wo wose nha yena u mutegulo wakwe mweneco wono yawudinghuye. ⁶ Ninga mono yakwijizwa i nghani yo Mulungu, vihanje no mwijizi wakwe mu ziswanu zose zono yena. ⁷ Mulece kukongwa, u Mulungu si wakunozeza nzwaji. Cono u munhu yakucihadika, co cico du co kolodudula kanyhi. ⁸ Mono yakuhadika ze masulumizi ge ciyinze-yinze, kolodudula mumo wuhodanjice, ninga hono yahadice zo Muhe, kolodudula mu Muhe u wumi we cibitilila. ⁹ Holeka cilece kukatala mu wituma ziswanu, ku soko hono cilece kukatala, codudula i nhwanga mu cipango cayo. ¹⁰ Holeka lono cikali cina cilejeho, yicinojeye ciwatendele wanhu wose i ziswanu, na ko muno i wandugu zetu wa mu wihuwilo wetu. ¹¹ Lanjenyi ta, vyono nyandice na mandiko mawaha gono nimwandicilenyi nene no mweneco no muwoko wangu. ¹² Wawo wono wakusaka kwilajila nha vyono waswanu so metumo go muwili, wo wawo wono wakuhila kumudindimizenyi nanye mwalame. Nawo wakunoza nhavivyo ku soko ya nghani monga du, nha cinji weneco ho walece kuwinjilizwa ku so musalaba wa Kilisito. ¹³ Hambi sunga na wawo du weneco wono walame, nha si wakuwibata u Wulajilize, alu wakuhila anye mwalame ho wawe ne citanjilo co kwilumbila mu miwili yenyu. ¹⁴ Ninga ane si nokwilumbila muli cinji co cose, hono si mu musalaba wo Muwaha wetu Yesu Kilisito langa, ku soko mu nzila yo musalaba wuwo, yiyo yinze yikawulagwa kuli nene, nane nghawulagwa kuli yinze. ¹⁵ Holeka kwalama hamba wuleka kwalama si cinji yaye, langa u wuwumbwe wupya co cinhu ciwaha. ¹⁶ Na wose wono wakuwutyatya u wotonji wuwu, u mulamu no lusungu vyeze muli wene, kanyhi u mulamu no lusungu vyeze kuli Waisilayeli i wahagulwa wo Mulungu. ¹⁷ Vyono nghulawa lulu, yunji yalece kungaza kanyhi, hambi ane nha ndinghuye mu muwili wangu mitozo ya Yesu. ¹⁸ Ilihewa lyo Mutwa wetu Yesu Kilisito liwezane nanye wandugu zangu. Heya.