WAEFESO

WAEFESO

¹ Yo nene Pawulo u mutumwa wa Kilisito Yesu so wuhile wo Mulungu, nghumwandicilenyi nyenye mo wanhu wo Mulungu mono muli ku [Efeso,] mo wehuwilwa mu wilunza na Kilisito Yesu. ² Nghumulombelenyi lihewa no mulamu vyono vikulawa kuli Mulungu u Sogo yetu na kuli Muwaha Yesu Kilisito. ³ Alenyi cimulumbe u Mulungu u Sogo yo Mutwa wetu Yesu Kilisito! Hambi mu wilunza na Kilisito, mumo mo yacimotezye ko kucipela ivipegwa vyose vye cimuhe kulawa ku wulanga. ⁴ U Mulungu yacihagula lono yinze yali yikali si nawumbwa, ho ciwe cili wakwe mu wilunza na Kilisito, ho ciwe celile mono cisina hamba yilema hali mwene, ku soko yo wendo wakwe. ⁵ U Mulungu yali yehwesize ku wulawa mwa mulizo vyono yacilete kwakwe ho ciwe wakwe mu nzila ya Yesu Kilisito. Vyo yali yendile na vyo yali yehwesize. ⁶ Ninga cimukumyaje u Mulungu ku soko ye lihewa lyakwe lyo lukumyo muli Mwanagwe mwendece. ⁷ Hambi nha cikukombozezwa mu sakami ya Kilisito, nha cinji u wubi wetu wukuwuswa, nhavivyo vyo winha u wuwaha we lihewa lyakwe, ⁸ lyono yacipela lisina cipimo! Kwe mahala no wumanye wakwe wose. ⁹ U Mulungu yacifisiliza cicilya cono yali yatemizye, yakacimanyiza zo wuhile wakwe wono wali wihundice, wono yali yewikanize kuwufisiliza mu nzila ya Kilisito. ¹⁰ U wuhile wuwo wono yali yawufisilize mwi’daha lyayo, wo wukongholeza hamonga iviwumbwa vyose, ho yavitowelele vyose viwe muli Kilisito, vya ku wulanga na vya kono’nze. ¹¹ Ivinhu vyose vinozezwaga mu wuhile no wulamuzi wo Mulungu, nayo u Mulungu yakacihagula ase, ho ciwe wanhu wakwe mu wendo wakwe, so wilunze wetu na Kilisito, ku soko yo wutemye wakwe wo wulawa mwamulizo. ¹² Holeka ase mono calongola kumwitumbila Kilisito, yicinojeye cilukumyaje u lukumyo lo Mulungu! ¹³ Nanye nyo wanhu we makungugo ganji, mwayihulika inghani ye Mbeka, wo wutya u Luganuzi Luswanu lono lwamuletelenyi u wukombozwe, mukamwihuwila Kilisito, nayo u Mulungu yakamuwicilenyi citanjilo so kumupelenyi u Muhe Mono Yelile mono yacihuwiziza, ho yalajile vyono ase cili wakwe. ¹⁴ Yuyo Muhe co cipingo co kuzibocelela zose zono u Mulungu yawehuwiziza iwanhu wakwe, ne nghani yiyi yo yikucimanyiza vyono u Mulungu kowakombozeza lukulu wose iwakwe. Cilukumyaje u lukumyo lwakwe! ¹⁵ Ku soko yiyi, nane naza kuhulika muli zo wihuwilo wenyu kuli u Muwaha Yesu, no wendo wenyu kuli wanhu wo Mulungu, ¹⁶ nghali si ninaleka kumulumba u Mulungu ku soko yenyu. Kanyhi nghumukumbucilenyi mu wulombe wangu, ¹⁷ ho u Mulungu wo Muwaha wetu Yesu Kilisito u sogo wo lukumyo, yamupelenyi u Muhe wakwe mono komupelenyi wizuce, no kumugubulilenyi ho mumumanye u Mulungu. ¹⁸ Nghumulomba u Mulungu yazidigule izinhumbula zenyu ho zisume kuwuwona u wuzelu wakwe, ho musume kuwutanga u witumbilo wono yamucemelenyi, no lukumyo luwaha lwe vipegwa vyono yawawicila iwanhu wakwe, ¹⁹ ho muvimanye ivilungo vyakwe vyono viwaha muno muno ku soko yetu sese mono cihuwiye. I vilungo vivyo vyono vikwituma mulimo muli sese, viling’aniye ne vilungo avilya iviwaha muno, ²⁰ vyono vyamuzukulila Kilisito muli wafu, yakamwikaza u kulume kwakwe ku wulanga. ²¹ Na kuko Kilisito yatemile muli walongola wose, no wuwaha, ne vilungo, ne cisumisumi cose, nayo yatemile mu wutambule wo wose wono wudahile kuwa mono yinze yiyino, sunga na mu yinze yono yikuza. ²² U Mulungu yakaviwika vyose ha magulu gakwe hasi, yakamuwika mwi Kanisa ho yawe muwaha muli vyose. ²³ Ilikanisa wo muwili wa Kilisito, no wukwilanicile nha wakwe mweneco mono yakuvikwilaniciza ivinhu vyose, hanhu hose.

¹ Nanye mwali mufwiye ku soko ye masutya no wubi wenyu. ² Na mwipango lilyo mwekalilaga mu mikalile mibi ya mononze yiyi, nanye mukawa mukumuhulika u muwaha wo muhe mubi we vilungo wa mu mwanya, wo muhe wono wuwatemile alu, iwanhu wono si wakumuhulika u Mulungu. ³ Hamba na sese cali cinha cinya wawo, cawutyatyaga u wusulumizi wetu we ciyinze yinze, no kwituma zinghani zizilya zono zayendezaga imiwili yetu ne mahala getu, kuciyinze yinze, vyono wenha wene nhavivyo na sese, ilikuwo lyo Mulungu lyali licinojeye licagane. ⁴ Ninga u Mulungu yo munya u lusungu lwinji. Yacenda ko wendo wuwaha, ⁵ hamba yiwe cali cifwiye ku cimuhe ku soko yo wubi wetu, yaciwumifya hamonga na Kilisito. Na ku so ilihewa lyo Mulungu, nanye mwaponywa. ⁶ Ku soko yo wilunza na Kilisito, Yesu, u Mulungu yacizukula hamonga nayo, ho cikateme hamonga nayo ku wulanga. ⁷ Nhavivyo vyo yenda kuwulajila kuli wanhu wa ku myaka yono yokuza, u wuwaha we lihewa lyakwe wono yacipela bwete so wilunze wetu na Kilisito Yesu. ⁸ Hambi nha mwakombozwa ku so lihewa lyo Mulungu mu nzila yo wihuwilo. Ne nghani yiyi si yili mu wuhidimbale wetu, langa cipegwa co Mulungu du. ⁹ Hamba si so metumo getu co weneco, ho munhu yalece kwilumba mu nghani yo yose. ¹⁰ Ase cili viwumbwa vyo Mulungu, na mu wilunze hamonga na Kilisito Yesu, yaciwumba ho cikale mu mikalile yo kwituma ziswanu, zono yaciwikaniziza cizitume. ¹¹ Nanye mono ku cihuma cenyu, muli wanhu mono si muli Wayahudi, mono mukucemwa, “Wono si mwalame” ne Wayahudi wono wakiyitya “Walame” u walame wono wanozwa ne miwoko mu miwili yawo, ninga mukumbucile nanye vyono mwali katali. ¹² Nanye lululya mwali mu musina Kilisito, mwali musiwanuce muli Waisilayeli, kanyhi mwali wejenzi, kanyhi mwali musina lifungu lyo lyose muli cilagane cicilya mu wihuwizo wuwulya. ¹³ Ninga alu vyono mwelunza na Kilisito Yesu, anye mono mwali kutali ha mwamulizo, mwasejelezezwa mu nzila ye sakami ya Kilisito. ¹⁴ Hambi Kilisito mweneco nha yo yaciletela u mulamu ko kuwanoza i Wayahudi ne wanhu wono si Wayahudi wawe nha ndugu monga. Yakalipambula ko muwili wakwe, i libupa lyono lyali liwatemanuye, no kuwaletela wulugu munhu na muyagwe. ¹⁵ Yakawuwusa u Wulajilize wuwulya we Wayahudi hamonga ne malajilizo gayo hamonga ne myoto yayo, na muli wawo iwejete yawawumbilize hamonga wawe munhu yumonga mupya mu wumonga na Yesu, no kunoza mulamu. ¹⁶ Kilisito yakawusiza lukulu u wulugu wawo, ko muwili wakwe, na ko musalaba wakwe yakawalunza wose vyono wejete wakawa ndugu monga, yakawalamula no Mulungu. ¹⁷ Hambi Kilisito nha yaza, yakaganula u Luganuzi Luswanu lo mulamu kuli nyenye mo wanhu mono si muli Wayahudi mono mwali muli kutali no Mulungu, sunga na kuli Wayahudi wono wali wali behi no Mulungu. ¹⁸ Holeka mu nzila yakwe ase wose, Wayahudi na wono si Wayahudi, cosuma kumubitila Baba mu Muhe monga. ¹⁹ Holeka alu anye si muli wajenzi kanyhi, hamba si muli wanhu wakola nzila kanyhi, langa muli Wanyawusi hamonga ne wanhu wo Mulungu, kanyhi muli wanhu we Nyumba yo Mulungu. ²⁰ Kanyhi muzenjigwe mu musinji wono wawikwa ne watumwa ne wawizi, nayo Yesu Kilisito mweneco lyo libwe lyo musinji. ²¹ U mwene yo yalibatilize ilizengo lyose no kuliwilusa sunga liwe Nyumba yo Mulungu yono yelile mu nzila yo Muwaha. ²² Nanye nhavivyo mu wilunza nayo, mukuzengwa hamonga ne wanhu wanji, ho muwe wikalo wo Mulungu mu nzila yo Muhe wakwe.

¹ Ku soko yiyo holeka ane no Pawulo no muwopwa wa Kilisito Yesu ku soko ya nyenye mono si muli Wayahudi, nghumulomba u Mulungu. ² Nitumbiye mwakondya kuhulika vyono u Mulungu, so lihewa lyakwe, yamhela u mulimo wuwu, niwitume so cambuzi cenyu. ³ Ane namanyizwa zizi mu nzila yo wugubulilwe wo wuhile wakwe wono wali wuhundicigwe. Nizandice kwa cifupi, izinghani zizi, ⁴ nanye kolo mukuzisoma izinghani zangu, mosuma kuwutanga u wumanye wangu wa muli zono zihundicigwe za muli Kilisito. ⁵ Zono katali wanhu si wamanyizwa, ninga alu u Mulungu yakondya kuwamanyiza iwatumwa, ne wawizi wakwe wono welile mu nzila yo Muhe. ⁶ Ne nghani yiyo yono yihundicigwe nha yoyi, vyono mu nzila yo Luganuzi Luswanu, iwanhu wono si Wayahudi mo wakutujila ilifungu lyawo hamonga ne Wayahudi muli zo wulugutwe wo Mulungu, wene nawo nha wali vilunzwa vyo muwili wuwulya, kanyhi wahanji wo wihuwizo wuwulya wono u Mulungu yawunoza mu nzila ya Kilisito Yesu. ⁷ Ane nanozwa ho niwe mwitumami wo Luganuzi Luswanu, ha nghango ye cipegwa ce lihewa lilya lyo Mulungu, lyono napegwa ha nghango yo witume we vilungo vyakwe. ⁸ Ane nili mudodo si nhe wanhu wo Mulungu wose, ninga napegwa ilihewa lyakwe, ho niwaganulile iwanhu wono si Wayahudi u wugoli wa Kilisito, wono wusina cipimo, ⁹ kanyhi ho niwalajile iwanhu wose wawone vyono wukufisilizwa u wuhile wo Mulungu wono wali wuhundicigwe. U Mulungu mono yaviwumba vinhu vyose, yayihundika inghani yakwe yiyo kulawa katali, ¹⁰ alu i wawaha ne vilungo vya ku wulanga ho vimanyizizwe mu nzila ye Likanisa, ho wasume kugamanya i mahala go Mulungu gono gena mihilimo minji. ¹¹ U Mulungu yayituma inghani yiyo nha vyono wali winha u wutemye wakwe we cibitilila, wono yawunozeza muli Kilisito u Muwaha wetu. ¹² Holeka mu wilunza na Kilisito, na mu nzila yo wihuwilo muli Kilisito, ase cikwijelela kumusejelela u Mulungu cisina woga. ¹³ Holeka nghumunenenyi, mulece kuyitukuwika i mitima yenyu, ku soko ye magayo gono nghugatuga ku soko yenyu, hambi gago nha gali ku soko yo lukumyo lwenyu. ¹⁴ Ku soko yiyo, holeka nane nghumufugamila u Sogo yo Munhu, ¹⁵ mono wo mwamulizo wa vyose vyono vili mono’nze na vya ku wulanga. ¹⁶ Nghumulomba u Mulungu, mu nghango yo wugoli wo lukumyo lwakwe, yamupelenyi u wusume wo Muhe wakwe, i vilungo vyo kuwa musikame mu wunhu wa mugati, ¹⁷ nayo Kilisito yekalaje mu zinhumbula zenyu ko wihuwilo. Nghumulomba muwe mukamile mu musinji wo wendo, ¹⁸ ho musume kumanya hamonga ne wanhu wo Mulungu wose, nha vyono winha u wendo wa Kilisito, vyono wutandalaga mu wugazi no wutali, no wima na hasi yayo. ¹⁹ Kanyhi muwumanye no wendo wa Kilisito, wono wucizize wumanye wose, ho mumemywe u wukwilanicile wose wo Mulungu. ²⁰ Ale kuli yuyo mono kwe vilungo vyakwe vyono vikwituma mugati yetu, yasumile kwituma zimbaha zono zicizize kuli zono cidahile kulomba hamba kwihwesa, ²¹ kuli yuyo lweze lukumyo mu Kanisa na muli Kilisito Yesu, mu mapango gose sunga ku myaka ne cibitilila. Heya.

¹ Holeka ane mono nili muwopwa ku soko vyono nghumwitumamila u Muwaha, nghumunenenyi mwikalilaje mu mikalile yono yiwunojeye u lucemo lwenyu lono mwacemelwa. ² Mweze muli wenenenyhezi nhondo zose, muli wapolo, mwina ngola, mwiyikangalilaje nyenye wose mu wendo. ³ Muhidimbale kuwibata wumonga wono wukuletwa no Muhe so wukamisa u mulamu wono wuli muli nyenye. ⁴ Ko wuli muwili wumonga no Muhe monga nha vyono winha u witumbilo wumonga wono mwacemelwa no Mulungu. ⁵ Koyuli Muwaha monga, wihuwilo wumonga no wubaputizo monga, ⁶ ko yuli u Mulungu yumonga yo Baba wa wose, mono yali kucanyha ya wose, nayo yakwituma mulimo muli vyose, kanyhi yali muli vyose. ⁷ Ninga capegwa wose yihewa munhu na lwakwe, mu nghango ye cipimo cono yapegwa na Kilisito. ⁸ Nha vyono gakutya i Mandiko: “Lono yabitila ku wulanga yakasola mateka yakawagawila iwanhu vipegwa.” ⁹ Alu lono yikulongwa yabita kucanyha wo wutya nhawule? Nhunizo yayo yili nhavi, halulongozi yatima sunga hono hasi mono yinze. ¹⁰ Alu yuyo mono yatima baha hono yinze, yo yuyo mono yabita sunga kucanyha muno yo wulanga wose, ho yasume kuyimemya yinze. ¹¹ Kanyhi yo mwene mono yawagawila iwanhu vipegwa. Wanji yakawawika wawe watumwa, wanji wawe wawizi, na wanji wawe waganula u Luganuzi Luswanu, na wanji wawe wadimi na wejizi. ¹² Yanoza nhavivyo ho yawawikanize i wanhu wose wo Mulungu, ku soko yo mulimo wo kumwitumamila Kilisito ho muwili wa Kilisito wuzengwe. ¹³ Sunga cize ciwuficile u wumonga wo wihuwilo no kumumanya u Mwana wo Mulungu; ho ciwe wanhu wono cikangaye no kuwuficila u wukwilanicile wa Kilisito mweneco. ¹⁴ Ho cilece kuwa kanyhi nha wana, wono cowa kugumilwa no kupemheluswa ako na ako mu mbeho ye mejizo gono gakutulwa ne wanhu wakonji, ho wawajilize wanji ko wusugu. ¹⁵ Ninga hono ciyikamise i mbeka na nhumbula yo wendo, cocila kwihwana na Kilisito muli vyose, mono yo Muwaha, ¹⁶ na mu wutonji wakwe mo vikulunzizwa hamonga i vilunzwa vyose vyo muwili, no muwili wose wukwitumbila u wutazi we vilunzwa vyakwe. Holeka icilunzwa hono citume u mulimo waco nha vyono yinojeye, ale u muwili wose wukuwiluka no kwizenga weneco mu wendo. ¹⁷ Ale, nghumusugulenyi mwitagwa lyo Muwaha, mulece kujendelela kwikala kanyhi mu mikalile nha ye wanhu wono si wamumanyile u Mulungu, wono i mahweso gawo gaweza wulele, ¹⁸ ne mahala gawo gali mu wutitu. Wali kutali no wumi wo Mulungu, ku soko yo wulele wono wuli muli wene so cibede cawo. ¹⁹ Wajiliye kanyhi wasina cevu, welavizye kwi’hede, wetumamilaga ividaha vyawo vyose mu wituma imakani ga cevu. ²⁰ Ninga anye alu vyo simweyijiza nhavivyo muli za Kilisito. ²¹ Ninga yimanyice vyono mwahulika zinghani zakwe, na vyono muli watyatyi wakwe, mukejizwa vyono yi mbeka yili muli Yesu. ²² Holeka mulecele lukulu i mikalile yenyu ye katali, u munhu muhuma mono yakuhodanjika so masulumizi go wukoci. ²³ Mwinozaje wupya mu zinhumbula na mu mahala genyu. ²⁴ Muwuvwalaje u wupya wo wunhu wono wawumbwa ku hwani yo Mulungu, wono wilajilaga mu mikalile ye mbeka, no wiling’ano no wele. ²⁵ Holeka muwulekaje u wulambi, yinojeye mweze kulongana ze mbeka munhu na muyagwe, vyono ase wose cili vilunzwa vyo muwili wa Kilisito. ²⁶ Na hono muwe mukoligwe ne likuwo, mulece kulumba ilikuwo lyenyu limutegulenyi ku wituma wubi, kanyhi mulece kwikala ne likuwo lyenyu sunga lizuwa liswa. ²⁷ Mulece kumupela Setani cilejeho. ²⁸ Mono yali muhizi, yalece kuhiza kanyhi, langa yanze kwituma i milimo miswanu kwe miwoko yakwe, ho yatuje cinhu co kumutuziza u muciwa. ²⁹ Ne makani mabi galece kuhulikwa muli nyenye hamba hadodo, izinghani zenyu ziweze zono zina cambuzi nhondo zose, zono zikuwazenga no kuwataza wanji, ho ziwapele lihewa wono wakumuhulicizenyi. ³⁰ Mulece kumukalaza u Muhe Mono Yelile wo Mulungu, hambi yuyo u Muhe nha yo citanjilo co Mulungu kuli nyenye, vyono anye muli wanhu wakwe, kanyhi co cihomelezi vyono ilizuwa lyokuza lono u Mulungu kolomukombozenyi. ³¹ Holeka mugalecelaje lukulu matemanuko, simbili, makuwo, mazozo, maligo, no wavu wose, viwucile lukulu muli nyenye. ³² Mweze na nhumbula swanu, mukwiwonela lusungu nyenye wose, mweze kwiyinenela nyenye wose nha vyono nayo u Mulungu yamunenelenyi nyenye mu nzila ya Kilisito.

¹ Alu vyono muli wana wendece wo Mulungu, yimunojelenyi muwe nha vyono yenha Mwene. ² Imikalile yenyu yeze kulongozwa no wendo, nha vyono Kilisito yacenda, yakelavya ku soko yetu cilavywa ce mhunjile swanu ne likumbiko lyono limwendezaga u Mulungu. ³ Ninga wusenyha, no wavu wose, hamba wusulumizi, vilece kutambulilwa lukulu muli nyenye, hambi nha vyo yinojeye kuli anye mo wana wo Mulungu. ⁴ Kanyhi i zinghani ze cevu, na zo wulele, na zo wiwanganile, zose zizo si nghani swanu kuli nyenye, langa yili ciba mweze kumulumba u Mulungu. ⁵ Kanyhi yinojeye mumanye vyono, musenyha, hamba mwavu, hamba u musulumizi (hambi u wusulumizi nha wo wukumbika vihwani,) hamba munhu wo wose mono yenha nhavivyo, si kosuma kutuga co cose mu wutemi wa Kilisito na wo Mulungu. ⁶ Mulece kumuvumila yunji yamukonjenyi na nghani zono zisina cambuzi, hambi nha ku soko ye zinghani zizo, ilikuwo lyo Mulungu likuwa kuwaziza iwana wono si wakumuhulika. ⁷ Holeka mulece kuhanga nawo. ⁸ Hambi ikatali nha mwali mu wutitu, ninga alu mweza muli mu wuzelu so wilunze wenyu no Muwaha. Holeka mwikalaje nhe wana wo wuzelu, ⁹ hambi imana go wuzelu nha gali mu wuswanu wose no wiling’ano ne mbeka. ¹⁰ Mujele kuzimanya za hayi zono zikumwendeza u Muwaha, ¹¹ kanyhi mulece kuhanga mu metumo ge citi gono si ganojeye, ninga mugawikaje mu wuzelu. ¹² Hambi izinghani zono zitumwaga cinyele, nha cevu hamba kuzilonga. ¹³ Ninga izinghani zose zono zitumilwaga mu wuzelu, imbeka yayo yiwezaga yili cagalanze. ¹⁴ Na co cose cono cikwanzalikwa cikuwa wuzelu. Na co cikuleka i Mandiko gakutya, “Wusinhuce agwe mono wugonile: Kanyhi wuzuce muli wafu nayo Kilisito kokubulilila.” ¹⁵ Ale mwilanjililaje mu mikalile yenyu. Mulece kwikala nhe walele, langa nha we mahala. ¹⁶ Mucitumamilaje viswanu i cilejeho cono mwina naco, ku soko alu i vilo avi vyaweza vibi. ¹⁷ Holeka mulece kuwa walele, ninga mujele kuzimanya zono zikumwendeza u Muwaha. ¹⁸ Mulece kugala wujimbi, hambi wuwo nha wuletaga i mikalile ye caka caka, langa mweze mumemile u Muhe Mono Yelile. ¹⁹ Mweze kwiduwanila nyenye wose mu zinghani za mu Zabuli, na nyimbo no wimbe we cinya Muhe, mumwimbile u Muwaha zinyimbo na Zabuli, mukumulumba mu zinhumbula zenyu. ²⁰ Mumulumbaje u Mulungu Baba nhondo zose ku soko ya zose, mwi’tagwa lyo Muwaha wetu Yesu Kilisito. ²¹ Mweze kwiyihulika nyenye wose ku soko yo kumogopa Kilisito. ²² Iwacekulu wawahulikaje iwalume zawo nha kotya kumuhulika Muwaha. ²³ Hambi u mulume nha yo yena uwulajilize kuli mugolece wakwe, nha vyono nayo Kilisito yena wulajilize mwi Kanisa, nayo Kilisito mweneco yo kayikombozaga Kanisa nha cinji u muwili wakwe. ²⁴ Alu nha vyono Likanisa likumuhulika Kilisito, ale nhavivyo ne wacekulu wawahulikaje walume zawo muli zose. ²⁵ Nanye mo walume muwendaje iwagolece zenyu nha vyono Kilisito yalyenda Likanisa, yakelavya mweneco cilavywa ku soko ye Likanisa. ²⁶ Yanoza nhavivyo ho yalyezeze mu nghani yakwe, yaliwice siya kuli Mulungu, lono yakondya kulyeza ko kulihovuga kwe malenga, ²⁷ ho yetujile Likanisa lyono lyelile, na lyono yiswanu, Likanisa lyono lisina manamha manamha hamba cilema, hamba ganji go gose gono genha gaga. ²⁸ Holeka yiwanojeye i walume wawende iwagolece zawo nha vyono wayendile imiwili yawo weneco. Mono yamwendile u mugolece wakwe, ye yendile mweneco. ²⁹ Hambi nha kusina munhu mono yawusulile u muwili wakwe mweneco, langa yakuwulisa kanyhi yakuwuvwika. Nhavivyo na Kilisito nayo vyo yakulidima Likanisa, ³⁰ hambi ase nha cili vilunzwa vyo muwili wakwe. ³¹ Nha vyono gakulonga i Mandiko Gono Gelile, “Ku soko yiyo u mulume kowaleka u Sogwe no nyina, vilunze no mugolece wakwe, nawo vyono wejete wowa muwili monga.” ³² Mu zinghani zizi moyili i mbeka yono yihundikwe mumo, nane nghuwona vyono yidomile kuli Kilisito ne Likanisa lyakwe. ³³ Ninga zikumupamizenyi na nyenye nhavivyo, vyono yimunojeye mulume wo wose yamwende mugolece wakwe nha vyono ye yendile mweneco, nayo u mucekulu, yimunojeye yamogope u mulume wakwe.

¹ Mo wana, muwahulice walezi wenyu mu Cikilisito, hambi yiyi nha yo nghani swanu. ² “Wuwogopaje u sogo no nyina yako,” ali lye ’lajilizo lilongozi lyono lyonjelezwe no wihuwizo, nha cinji, ³ “Ho wumote no kwikala myaka minji mononze.” ⁴ Nanye mo wasogo za munhu, mulece kuwasagala iwana wenyu mu nzila yo kuwakoza makuwo, langa muwalelelaje mu cogopo na mu mafundo ge Cikilisito. ⁵ Nanye mo wawanda, muwahulice iwawaha wenyu wa baha mononze kwa cogopo no wucicime, mweze kunoza nhavivyo na mitima mizelu kotya nha mukumwitumamila Kilisito. ⁶ Mulece kwituma nhavivyo lono wakumulanjenyi ho mwiyendeze kuli wene, langa mwitumaje kwe mitima yenyu nha vyono yendile u Mulungu, vyono anye muli wetumami wa Kilisito. ⁷ Mulece kwituma ku soko ye wanhu, langa mweze mwiwikanize kwituma ku soko yo Muwaha. ⁸ Mweze kukumbucila vyono munhu wo wose mono yakwituma ziswanu, kolobocela ziswanu kulawa kuli Muwaha, hamba yawe muwanda, hamba yawe munhu mono si muwanda, ⁹ Nanye mono mukwitumamilwa, muwatendelaje nhavivyo wawanda wenyu, mulece kuwogofya. Mweze kukumbucila vyono anye na wene nhavivyo, wose mwina u Muwaha yuyulya yumonga wa ku wulanga, mono lilumbo lyo munhu si cinji kuli mwene. ¹⁰ Ze ndumilizo, nghumusacenyi mweze muli vilungo muli Muwaha na ko wutazi we vilungo vyakwe viwaha. ¹¹ Muvwale i vitwalo vyono u Mulungu yakumupelenyi, ho musume kuwimila u wusugu wose wa Setani. ¹² Hambi u wulugu wetu nha si cikwihoma ne wanhu, langa cikwihoma ne litewa lyavu lya mu yinze ye cimuhe, cikwihoma ne watemi, ne wawaha na wono wena i vilungo, wono wayitemile i yinze yiyi ye citi. ¹³ Ku soko yiyo holeka muvwale vitwalo vyo Mulungu, ilizuwa lilyo kolo lyeza kufika, ho musume kuwimila u wihomi wo mulugu, na lono muwe mwehoma sunga ko ku mudumo, mwijele mukali mukamile. ¹⁴ Ale mwimaje mukamile! Ne mbeka yeze nha musipi mu viwino vyenyu, no wiling’ano weze nha civwalo co kumwimilenyi mu zimhambaga zenyu. ¹⁵ No wusaka kuluganula u Luganuzi Luswanu lo mulamu, wuweze nha malatu mu migulu yenyu. ¹⁶ Ninga ko muno, u wihuwilo, wuweze nha ngula mu miwoko yenyu nhondo zose, ho yimutazenyi kuzizimya i zisonga zo moto za ayulya u mubi. ¹⁷ Muyibocelaje mhonelo ho yiwe nha kofiya yenyu ya cuma, ne nghani yo Mulungu yiwe nha mumaje wono mukupegwa no Muhe Mono Yelile. ¹⁸ Mweze kulomba nhondo zose, mukulomba u wutazi wo Mulungu. Mweze kulomba madaha gose mu vilungo vyo Muhe. Mwikalaje meso, mulece kukatala, mukuwalombela i wanhu wose wo Mulungu. ¹⁹ Munombelaje na nene nha vivyo, lono nghuduwa, ho Mulungu yamhele cono nolonga, ho sume kuwamanyiza i wanhu sina woga, inghani yono yihundikwe yo Luganuzi Luswanu. ²⁰ Ane nili mutumwa ku soko ya lulo Luganuzi Luswanu hamba niwe alu nili mu jela. Ale lombenyi ho sume kuwa sina woga mu wuganule nha vyono yinojeye. ²¹ U ndugu yetu mwendece Tukiko no mwitumami mwihuwilwa muli Muwaha, komulonjelenyi zangu zose, ho musume kumanya cono nghwituma. ²² Alu nghumutuma yaze kuko kwenyu, ho yamulolosezenyi za kono kwetu, nanye ho musindamikwe mu zinhumbula zenyu. ²³ Nghulomba mulamu wuwe muli nyenye we zindugu wose, hamonga no wendo, no wihuwilo wono wukulawa kuli Mulungu Baba na kuli u Muwaha Yesu Kilisito. ²⁴ Nghulomba, ilihewa lyo Mulungu liweze muli wose wono wamwendile u Muwaha wetu Yesu Kilisito ko wendo wono wusina ndumilizo.