WAKOLOSAYI

WAKOLOSAYI

¹ Yo nene Pawulo u mutumwa wa Kilisito Yesu ko wuhile wo Mulungu, na ndugu yetu Timoteyo, ² cikumwandicilenyi anye mo wanhu wo Mulungu mono muli ku Kolosayi, mo wandugu zetu wehuwilwa muli Kilisito. Ilihewa no mulamu wono wukulawa kuli Mulungu u Sogo yetu viwezane nanye. ³ Cikumulumba u Mulungu u sogo yo Mutwa wetu Yesu Kilisito, nhondo zose, mwi’daha lyono cikumulombelenyi. ⁴ Hambi nha cahulika zo wihuwilo wenyu muli Kilisito Yesu na muli zo wendo wenyu kuli wanhu wose wo Mulungu. ⁵ Hambi nha mwazihulika zo witumbilo, wono wukwijela muli mwene baho ha lulongozi du, lono mwayihulicila inghani ye mbeka yo Luganuzi Luswanu. Holeka aluno u wihuwilo wenyu, no wendo wenyu, vili mu nghani yiyilya yono mwayitumbila yono muwiciywe viswanu ku wulanga. ⁶ No Luganuzi Luswanu, lukucila kulela mikalo, no kutandala mono yinze mose, nha vyono lwaza kwenyu nyenye, ku wulawa mwi’zuwa lililya lyono mwahulicila ze lihewa lyo Mulungu no kumanya vyono yili mbeka. ⁷ Mweyijiza ze lihewa lyo Mulungu kulawa kuli Epafula u mwitumami muyetu, u mwitumami mwihuwilwa wa Kilisito ku soko yetu. ⁸ U mwene yo yacilonjela zo wendo wenyu wono mwapegwa no Muhe. ⁹ Ku soko yiyo nase kanyhi, vyono calawa lizuwa lyono cahulicila i zenyu, si cidilaga kumulombelenyi. Cikumulomba u Mulungu yamumemyenyi u wumanye wose wo wuhile wakwe, yamumemyenyi mahala gose no wutanje wono wukuletwa no Muhe wakwe. ¹⁰ Baho langa ho mosuma kwikala nha vyono yikumunojeza u Muwaha, no kwituma nhondo zose zo wuhile wakwe. Ne mikalile yenyu yowa yina mana gose ge metumo maswanu, nanye mocila muno kuwiluka mu wu mumanya u Mulungu. ¹¹ U Mulungu yamupelenyi vilungo no wusume wakwe wo lukumyo, ho muwe na ngola muli vyose kanyhi hamonga no wukangalile. ¹² Akuno mukumulumba kwa nyemo u Sogo yo munhu mono yamupelenyi u wusume ho muwe ne ’fungu lyenyu mu zinghani zo Mulungu zono yawawicila i wanhu wakwe mu wutemi wo wuzelu. ¹³ U Mwene yacikomboza mu wulawa mu vilungo vye citi, yakacileta cipolile mu wutemi wo Mwanagwe u mwendece, ¹⁴ muli yuyo mo cikukombozezwa, nha cinji u wubi wetu wukunenelwa. ¹⁵ Kilisito yo hwani yeneco yono yikwijela yo Mulungu mono si kejelaga. U mwene yo Mwana u mulongozi kulelwa, kanyhi yo muwaha yacizize viwumbwa vyose. ¹⁶ Hambi nha muli mwene mo Mulungu yaviwumbila vinhu vyose vyono vili mono yinze na vyono vili ku wulanga, vinhu vyono vijelaga ne vinhu vyono si vijelaga, we magoda matambule, ne Watemi, i Wawaha na wose wono wena u wulajilize. Vivi vyose u Mulungu yaviwumbila muli mweneco, na ku soko yakwe. ¹⁷ Kilisito yali yali baho na lono viwumbwa vyose vikali si nawa, na vyose vikamisizwe muli mwene, navyo vyose vikalaga nha vyono vyawikwa. ¹⁸ U Mwene Kilisito wo mutwe wo muwili wakwe, nha cinji likanisa, u Mwene wo mwamulizo wo wumi wa wuwo umuwili. U Mwene yo Mwana mulongozi kulelwa mono yazukulwa muli wafu, u Mwene ho yawe mulongola du kutali muli vinhu vyose. ¹⁹ Hambi u Mulungu nha yawona vyono u Mwana nayo yena u wukwilanicile wose wo wulungu muli mwene. ²⁰ Holeka u Mulungu yadumula nghani kuyilamula yinze no mweneco. U Mulungu yakanoza mulamu mu nzila ye sakami ya Kilisito mu musalaba, holeka yakawa yakondya kuvilamula vinhu vyose no mwene, ivinhu vya mono’nze na vya ku wulanga. ²¹ Na nyenye katali mwali mutemanuywe no Mulungu, kanyhi mwali walugu wakwe ku soko ye mahweso genyu ne metumo i mabi. ²² Ninga alu so wufwe wo Mwanagwe mono yekala baha mono’nze, u Mulungu yakondya kwilamula nanye, ho yamuletenyi hali mwene mwelile, musina yilema. ²³ Ninga munojeye mujendelele kuwa wehuwilwa mu wusimyo wono wukamile, hamba kutezwa mu witumbilo wo Luganuzi Luswanu lono mwaluhulika. Ane Pawulo nili mwitumami wa lulo u Luganuzi Luswanu lono lwakondya kuganulwa kuli wanhu wose wa mono’nze. ²⁴ Alu nghusecelela mu matamiso gangu so nyenye, hambi nha ku soko ye magayo gangu ga baha hono yinze, nghumemeleza cono cali cicepuce mu magayo ga Kilisito ku soko yo muwili wakwe, likanisa. ²⁵ Nane nanozwa ho niwe mwitumami we likanisa, nha vyono winha u mulimo wo Mulungu wono yamhela so cambuzi cenyu, wuwikanize wo kuyiganula inghani yakwe ko wukwilanicile, ²⁶ yo nghani yono yali hundikwe kuli wanhu wose kulawa katali na katali, ninga aluno yakondya kuwamanyiza wanhu wakwe. ²⁷ Ninga u wuhile wo Mulungu, yakusaka yawamanyize i wanhu wakwe ze nghani mbaha yiyi na zo lukumyo, vyono vili so wanhu wose. Ne nghani yeneco nha yoyi: Kilisito yali muli nyenye, ne nghani yiyo yo yikumanyiza vyono anye mohanga u lukumyo lo Mulungu. ²⁸ Na ku soko yiyo, holeka cikumuganula Kilisito kuli wanhu wose, cikuwasugula wose kanyhi cikuwafunda wose mu mahala gose, ho cisume kuwaleta wose hali Mulungu akuno wakondizye kuwa wakangaye muli Kilisito. ²⁹ Holeka ku soko yiyo, ane nghwituma mulimo akuno hidimbaye mu vilungo vya Kilisito vyono vikwituma muli nene.

¹ Hambi nha nghusaka mumanye vyono netuma mulimo ko wuhidimbazi ku soko yenyu, ku soko ya wanya Lawodikeya, na ku soko ya wose wono wakali si nambona wusu wangu. ² Nghunoza nhavivi, i zinhumbula zawo ho zitule, no kulunzizwa hamonga mu wendo, ho wamemywe mbeka yono yikuletwa no wumanye we mbeka. Na mu nzila yiyo, ho woyimanyila ne nghani yo Mulungu yono yihundikwe, hambi nha yo Kilisito mweneco. ³ Muli mwene mo wuhundikwe u winji wose we mahala no wumanye. ⁴ Holeka nghumulonjelenyi vyono, munhu wo wose yalece kumukonjenyi na nghani za wulambi, hamba ziwe nha swanu muno. ⁵ Hambi ane hamba niwe nili kutali nanye ku muwili, ninga ku cimuhe nili hamonga nanye, kanyhi nghusangalala kuwona u wusikame wenyu wono mwimiye hamonga, mu wihuwilo wenyu muli Kilisito. ⁶ Alu vyono anye mwakondya kumuvumila Kilisito Yesu yawe Muwaha, ale mwikalilaje lukulu muli mwene. ⁷ Kanyhi munojeye muhomele milela muli mwene no kwizenga muli mwene kanyhi musikame mu wihuwilo wenyu nha vyono mwejizwa. Muweze ne lilumbo iwaha. ⁸ Mulanjilile, munhu yunji yalece kumwajilizenyi ko wusugu no wukoci we wanhu wono wusina cambuzi, wono wukulawilila mu mejizo ge zisimo ze wanhu, na mu myuhe yono yitemile, hamba si Kilisito mweneco! ⁹ Ku soko muli mwene Kilisito mu hwani yo munhu, mo mowuli wukwilanicile wose wo Mulungu. ¹⁰ Nanye mwapegwa wumi wono wukwilaniciye mu wilunza hamonga nayo. U Mwene yo Muwaha kuli myuhe yose yono yitemile sunga na kuli wawaha wose. ¹¹ Na mu wilunza hamonga na Kilisito, anye mwakondya kwalama, ninga si walame wono wukunozwa ne wanhu, langa u walame wono wukunozwa na Kilisito mweneco, u walame wa mu wukombozwe mu wuwe wo wubi. ¹² Hambi lono mwabaputizizwa, nha mwazikanwa hamonga na Kilisito, na kanyhi mumo mu wubaputizo nha mwazukulanwa hamonga nayo mu nzila yo wihuwilo wenyu mu vilungo vyo Mulungu mono yamuzukula muli wafu. ¹³ Mu mapango ganji, anye mwali mufwiye ku soko ye masutya genyu, na ku soko vyono mwali muli wanhu mono si muli Wayahudi. Ninga u Mulungu yamupelenyi anye wumi hamonga na Kilisito. U Mulungu yakondya kucinenela u wubi wetu wose, ¹⁴ yakapatila lukulu u lwandiko lono lwacizijilaga lono lwali lucidomile, hamonga no wulajilize wayo, yakaluwusiza lukulu, yakalukomanhila mu musalaba. ¹⁵ Kuko Kilisito, ko yavisumila i vilungo vyose vya yiyo i myuhe yono yitemile, hamonga ne vilungo vye wawaha, yakawanoza kuwa cinhu ca cevu, cagalanze, ko kuwakwejenha kotya ngaluzi mu wujendelele wo wusume wakwe. ¹⁶ Holeka mulece kuvumila munhu wo wose yamuwicilenyi wulajilize wo wose muli vyono mukulya hamba kung’wa, hamba mu wuwala i mazuwa mawaha, hamba zi sikukuu zo mwezi mupya, hamba Sabato. ¹⁷ I zinghani zizo nha muzizi du wa zono zolowa, ninga i mbeka yeneco, yo Kilisito. ¹⁸ Kanyhi mulece kuvumila kuling’anizwa na munhu yunji, mono yakwinoza nha munhu we lilumbo ku soko yo wuwona wugubulilwe wakwe, no kwisacila u winenenyhezi wo wulambi, no wuhembi wo kuhemba wamalayika. U munhu mono yenha nhavivyo yalelepeye mu mahala go wulele ge ciyinze yinze. ¹⁹ Kanyhi yetemanuye na Kilisito mono wo mutwe wo muwili wuwo. Muli Kilisito, u muwili wose wukuliswa no kulunzwa hamonga i vilunzwa ne zinghwali zayo, nawo wuwilukaga nha vyono u Mulungu yendile. ²⁰ Anye mwafwizana hamonga na Kilisito no kukombozwa mu vilungo vye myuhe yono yitemile ya mononze. Alu nhawule kanyhi mwikaye mu mikalile ya kotya muli we yinze yiyi? Na so cici muwicilwe wulajilize, ²¹ “Mulece kwibata aci! Mulece kujeza acilya, hamba Mulece kupamiza acilya!” ²² I zinghani zizo zose zili mu vinhu avilya vyono vihodanjikaga kamonga du lono vikwitumamilwa, ago nha malajilizo ne mafundo ge ci munhu munhu du. ²³ I mbeka, malajilizo gago gakwijela galawiliye mu mahala ga mu wuhembi wo kwisacila weneco, no winenenyhezi wo wulambi, no kuwugaza u muwili, ninga mbeka si gakwiliye hamba nhavi ku wimila u wusulumizi wo muwili.

¹ Holeka hono muwe mwazukulanwa hamonga na Kilisito, muhidimbale kulondola za kucanyha, kono ko yuli Kilisito, yekaye ku lubavu lo kulume lo Mulungu. ² Mwibataje mukamise zinghani za ku wulanga, ninga si zono zili mono’nze. ³ Hambi anye nha mwafwa, no wumi wenyu wuhundikanwe hamonga na Kilisito muli Mulungu. ⁴ Na Kilisito wo wumi wenyu we mbeka, yalaza kwijela, ale, anye nanye baho ho molokwijela hamonga nayo mu lukumyo. ⁵ Holeka muwuwulajilaje lukulu u wusulumizi wa mono’nze wono wukali wuli muli nyenye, nha kotya, wusenyha, wavu, wumala-nyinji, wuhile wubi, wusulumizi, wo wuhemba vihwani. ⁶ Na ku soko ye makani gago, holeka i likuwo lyo Mulungu likuwa kuwaziza wose wono wasina cihuliko kuli mwene. ⁷ Mu mapango ganji, nanye mwekalaga mu mikalile ya muli gago lono mwali mukali mutemigwe nago. ⁸ Ninga alu yiwanojeye mugalecele lukulu gago gose, likuwo, wusungu, simbili, maligo, hamba i zinghani zono si zinojeye ze cevu, zilece kulonjelwa lukulu mu milomo yenyu. ⁹ Mulece kwiyilambila nyenye wose, vyono anye mwakondya kuwuvula u wunhu wuhuma hamonga ne metumo gayo gose, ¹⁰ no kuwuvwala u wunhu wupya. Wono wukujendelela kunozelezwa no Mulungu mono yawuwumba, nha vyono yinhe hwani yakwe, ho mumumanye u Mulungu mu wukwilanicile wose. ¹¹ Na mu wuwe wuwo, musina kanyhi wisimajile kuli mono si Muyahudi no Muyahudi, kuli mono yalame na mono si yalame, u musomi na mono si yasomile, u muwanda no munhu mwelecele. Langa vyose vili muli Kilisito du, nayo Kilisito yali muli vyose. ¹² Anye muli wanhu wo Mulungu, u mwene yamwendenyi anye kanyhi yakamuhagulenyi. Holeka nanye muvwale i nhumbula yo lusungu, wuswanu, winenenyhezi, wupolo, no wukangalizi. ¹³ Mwikangalilaje no kwinenela nyenye wose hono yunji yawe yena nghani kuli muyagwe, yiwanojeye mweze kwiyinenela nyenye wose nha vyono u Muwaha yamunenelenyi anye, nanye vyo mweze kunoza. ¹⁴ Ne mbaha yono yicizize zose, mwikalanaje mu wiyendi nyenye wose. Hambi u wendo nha wo wukuwa kuvilunziza i vinhu vyose mu wumonga wono wukwilaniciye. ¹⁵ No mulamu wa Kilisito wuteme mu zinhumbula zenyu, hambi ku soko yiyo, nanye nha mwacemwa ho muwe muwili wuwo wumonga. Kanyhi muwe mwina lilumbo! ¹⁶ I nghani ya Kilisito yikalaje muli nyenye, hamonga no wugoli wayo wose. Mwiyijizaje nyenye wose munhu na muyagwe, akuno mukwiyilanjiziza mu mahala gose. Mwimbaje Zabuli, na nyimbo, no wimbe we cinya Muhe, mumwimbilaje u Mulungu mu zinhumbula zenyu kwe lilumbo. ¹⁷ Na zose zono mukwituma, mu wulonje, hamba mu witume, mwitumilaje zose mwitagwa lyo Muwaha Yesu, akuno mukumulumbila u Mulungu Baba muli mwene. ¹⁸ Anye mo wagolece, muwahulice walume zenyu, hambi nha vyo yendile u Muwaha. ¹⁹ Nanye mo walume, muwendaje wagolece zenyu, kanyhi mulece kuwa wakali kuli wene. ²⁰ Nanye mo wana muwahulice walezi wenyu nhondo zose, hambi nha vyo yinojeye muli Muwaha. ²¹ Anye nanye mo walezi, mulece kuwakalaza i wana wenyu ho walece kuyitukuwika i mitima yawo. ²² Nanye mo wetumami, muwahulikaje i wawaha wenyu wa mononze muli zose, si mwipango lono muli hamwande yawo du ho mwiyendeze kuli wene, langa mwitumaje kwe mitima yenyu yose, akuno mukumogopa u Muwaha. ²³ Na zose zono mowa kwituma, muzitumaje kwe mitima yenyu yose, ku soko yo Muwaha hamba si ku soko ya munhu. ²⁴ Akuno mukumanya vyono u Mulungu kolomupelenyi i mafungu go wuhazi gono yawawiciye i wanhu wakwe. Mumwitumamilaje Kilisito u Muwaha! ²⁵ Mono yakwituma i zimbi, nha kololipwa nha vyono genha i metumo gakwe i mabi. Hambi u Mulungu nha yasina wuhijila mbejele.

¹ Nanye mo wawaha, muwatendelaje kwe ling’ani ne mbeka i wetumami wenyu, akuno mukukumbucila vyono nanye nha vivyo mwina u Muwaha wenyu ku wulanga. ² Mweze kulomba nhondo zose, kanyhi mweze kulanjilila lono mukulomba, akuno mukumulumba u Mulungu. ³ Mucilombelaje na sese nhavivyo, u Mulungu ho yacipele i cilejeho co kuyiganulila i nghani yakwe Kilisito yono hundikwe. Alu ane nili mu jela ku soko ya yiyo. ⁴ Holeka munombelaje ho sume kulonga nha vyono yinojeye, mu nghango yono yosuma kuyanzalika i nghani yiyo. ⁵ Mwikalaje nawo kwa mahala wono si wehuwiye, kanyhi mwitumamilaje viswanu i cilejeho cono mwina naco. ⁶ No wulonje wenyu nhondo zose weze wuswanu, wono wukwendeza, kanyhi mumanye vyono yimunojelenyi kuwapitula viswanu i wanhu wose. ⁷ U ndugu yetu mwendece, Tukiko, u mwitumami mwihuwilwa, no mwitumami muyetu mu mulimo wo Muwaha, yo komulonjelenyi zose. ⁸ Yo yilecile nghumutuma, ho yamusindamicenyi zinhumbula zenyu kolo mwahulika i zetu. ⁹ Nayo yakuza yena na Onesimo u ndugu yetu mwendece kanyhi mwihuwilwa, u munyawusi muyenyu. Nawo womulonjelenyi zose zono zikwitumwa baha. ¹⁰ Na Alisitaliko mono yali mu jela hamonga na nene, yakumulamusenyi, sunga na Maluko u mwihwawe wa Balanaba, nayo nha vivyo, (Mono mwalajizizwa, vyono hono yaze kwenyu mumubocelaje.) ¹¹ Nhavivilya na Yoshuwa mono kacemwaga Yusito, nayo yakumulamusenyi. Na muli wanji Wayahudi wono wabocela u wihuwilo, wo wawa du wali wene wono cikwitumana nane mulimo ku soko yo wutemi wo Mulungu, na kanyhi wo wakunhaza muno muno. ¹² Na Epafala nayo u munyawusi muyenyu, kanyhi u mwitumami wa Kilisito Yesu, nayo yakumulamusenyi. Kanyhi yakumulombelenyi nyenye nhondo zose ko wupiligazi, ho mwime mukamile, mukangale, mulece kusinjisika muli zose zono yakuzisaka u Mulungu. ¹³ Ndahile kumuhomelela vyono yakwituma yahidimbaye ku soko yenyu na ku soko ye wanhu wanya Lawodikeya, na wanya Hiyelapoli. ¹⁴ Luka, u muganga wetu mwendece, hamonga na Dema, wose wakumulamusenyi. ¹⁵ Muwalamusaje i wandugu zetu wose wa kuko ku Lawodikeya, mumulamusaje no lumbu lyetu Nimufa, hamonga na wono wehuwiye wose wono wetang’anililaga mu nyumba yakwe. ¹⁶ Kolo mwakondya kuyisoma i baluwa yiyi, nhondo yisomwe ne Wakilisito wa ku Lawodikeya, nanye nhondo muyisomaje i baluwa yono wayituga wene. ¹⁷ Mumulonjelaje na Alikipo yawitumaje viswanu u mulimo wono yapegwa no Muwaha. ¹⁸ Nghwandika zizino ko muwoko wangu nene no mweneco, u Mulamu wono wukulawa kwangu nene Pawulo. Mweze kukumbucila vyono ane mbopigwe ne manyolo. Ilihewa lyo Mulungu lyeze na nyenye.