2 TIMOTEYO

¹ Ane yo nene Pawulo, mono u Mulungu yakasaka ho niwe mutumwa wa Kilisito Yesu, ² nane nghukwandicila agwe Timoteyo, go mwanangu u mwendece. Lihewa, no lusungu no mulamu, vyono vikulawa kuli Mulungu Baba na kuli Kilisito Yesu u Muwaha wetu, vyeze hamonga nagwe. ³ Nghumulumbo Mulungu mono nghumwitumamila ne ciselinji ciswanu, nha vyono wanoza i wasogo zangu, nghumulumbo Mulungu nhondo zose lono nghukukumbucila mu wulombe wangu misi ne cilo. ⁴ Kanyhi nghugakumbucila i mahozi gako, nane nghusulumila muno muno ciwone nagwe, i nyemo yangu ho yimeme. ⁵ Nane nghuwukumbucila wihuwilo wako we mbeka, no wihuwilo wono yali yena nawo mamayo Loyisi, hamonga no nyina yako Ewunike. Nane nitumbiye vyono na gwegwe vyo winha. ⁶ Co cikuleka nghukukumbuciza, wucifwanghanizaje i cipegwa cono wapegwa no Mulungu, lono nakuwicilila i miwoko yangu. ⁷ Hambi u Muhe mono capegwa no Mulungu, si Muhe mono kocinoza ciwe woga, a, a, ng’o, langa yo Muhe mono kocipela wendo no wiyidime. ⁸ Ale, holeka wulece kuwona cevu kumuhomelela u Muwaha wetu Yesu, hamba wulece kuwona cevu ku soko yangu nene no mufungwa, mono funjigwe ku soko yakwe, Yesu. Ninga wuhanje magazo ku soko yo Luganuzi Luswanu, mu nghango ye vilungo vyono Mulungu yakukupela. ⁹ Mwene yacikomboza, kanyhi yakacicema ciwe wanhu wakwe mweneco, si ku soko vyono cinojeye so metumo getu, aa, ng’o, ninga ku so wuhile wakwe mweneco, na so lihewa lyakwe. Nayo yakacipela i lihewa lilyo ku soko ya Kilisito Yesu, lono vilo vyali vikali si vinawa. ¹⁰ Ninga alu cakondya kugubulilwa so wuze wo Mukombozi wetu Yesu Kilisito, u mwene yakondya kuvidumizya lukulu i vilungo vye lifwa, nayo yakawanzalika u wumi wono wusina lifwa, mu nzila yo Luganuzi Luswanu. ¹¹ Nayo u Mulungu yahagula nene, ho niwe mutumwa, kanyhi niwe mwijizi ku soko yo kuluganula Luganuzi Luswanu, ¹² na ku soko yiyo, holeka nghutamiswa nhavivi. Holeka nghali nina witumbilo wuwaha, hambi nha nimumanyile mono namwihuwila, kanyhi manyiye lukulu vyono mwene kocikamisa cicilya cono yanghoza, sunga Mwizuwa lilya. ¹³ Holeka wugakamisizaje lukulu i mafundo gagalya ge mbeka gono nakwijiza, kanyhi wikalaje du mu wihuwilo na mu wendo wetu wuwo, mu wilunza na Kilisito Yesu. ¹⁴ Inghani yiyilya swanu yono wakozwa, wuyikamisizaje mu nzila ye vilungo vyo Muhe Mono Yelile, mono kekalaga muli sese. ¹⁵ Kanyhi nha vyono wumanyile, i wanhu wose wono wali mu yisi ya Asiya, wakondya kundeka, na muli wawo, moyuli Fugelo na Helimogene. ¹⁶ U Muwaha yayiwonelaje lusungu mhuga ya Onesifolo, vyono yasangalazaga kali kenji mu nhumbula yangu, hamba si yawona cevu vyono ane nali funjigwe mu jela, ¹⁷ langa yali yeza kufika du ku Lumi, hobaho yakamula kunondola yasimbiliye muno, sunga yakambona. ¹⁸ U Muwaha yamuwonele lusungu Mwi’zuwa lilya! Kanyhi na gwegwe nhavivyo, wuzimanyile viswanu zi nyinji zono yanyitumamila kuko ku Efeso.

¹ Holeka agwe mwanangu Timoteyo, weze ne vilungo mwihewa lyono cikulituga so wilunza na Kilisito Yesu. ² Ale, wugasolaje i mafundo gono wagahulika nghuganula ha mwande ye wahomelezi wenji, nagwe wuwakoze wanhu wehuwilwa, wono nawo wosuma kuwejiza wanji nhavivyo. ³ Wuhanje mu magazo nha musilikale mwihuwilwa wa Kilisito Yesu. ⁴ U musilikale lono yali ku wulugu, keyimilaga zose ze mikalile ye nhondo zose, ho yasume kumwendeza u muwaha wakwe mono yamwandika wusilikale. ⁵ Nayo u munhu wo wose mono kesumanizaga mu midawalo, si kosuma kwisumaniza viswanu no kusuma, sunga yabocele ne cipegwa co wusume wakwe, hono yalece kutyatya u wityatye wono wukusakwa mu midawalo. ⁶ Nayo u mulimi mono yakondya kwituma mulimo muzito, yuyo yanojeye yabocele i lifungu lilongozi lye nhwanga. ⁷ Ale, Timoteyo, wuzihwesaje muno zizo zono nghulonga, hambi u Muwaha nha kokupela wusume wo kuzizuka zose. ⁸ Wumukumbucilaje Yesu Kilisito mono yazukulwa muli wafu, mono yali wa mululelo lwa Dawudi, nha vyono lukulonga u Luganuzi Luswanu lono niluganulaga. ⁹ Na ku soko yiyo yo kuluganula Luganuzi Luswanu, holeka ane nghugazika, na kanyhi holeka mbopigwe ne manyolo nha nili musutyi. Ninga inghani yo Mulungu siyosuma kuwopwa ne manyolo, ¹⁰ holeka nghukangalila muli vyose ku soko ye wahagulwa wo Mulungu, nawo nhavivyo ho watuje u Wukombozi wono wukuziza mu nzila ya Yesu Kilisito, kanyhi wono wuletaga lukumyo lwe cibitilila. ¹¹ No wulonji wuwu wo we mbeka, wono wukutya, “Hono ciwe cafwizana nayo, ale, cowumipana nayo nhavivyo. ¹² Na hono cijendelele no wukangalile, ale, colotemana nayo nhavivyo. Ninga hono cimukane, ale, kolocikana nayo nhavivyo. ¹³ Na hono cilece kuwa wehuwilwa, ninga mwene kekalaga mwihuwilwa cibitilila. Hambi mwene nha sikosuma kwiyikana mweneco.” ¹⁴ Ale, wuwakumbucizaje wanhu wako izinghani zizino, kanyhi wuwalonjelaje hali Mulungu, vyono walecele lukulu wiwanganile wa mu zinghani. Hambi wiwanganile wuwo, nha si wukwiliye cinji hamba hadodo, langa wuletaga wuhodanjice wuwaha kuli awalya wono wakuwuhulika. ¹⁵ Wupiligale muno kwiwika mu mikalile ye lilumbo hali Mulungu nha mwitumami mono si yakuwuwonela cevu u mulimo wakwe, kanyhi mono yakwijiziza mu wulunji inghani ye mbeka. ¹⁶ Kanyhi wilegaje mu wiwanganile we ciyinze-yinze na wo wulele, hambi zizo nha zicilaga kuwatemanula wanhu, no kuwawika kutali no Mulungu. ¹⁷ I mafundo ge liwala lilyo, genha lilonda lyono lilizaga muwili. Ne wanhu wono wejiza imejizo gago, muli wawo wo wa Humenayo na Fileto. ¹⁸ Awo wajilila, kanyhi wali kutali ne mbeka, kanyhi wakuwatajila wanji mu wukangamyanje mu wihuwilo wawo, vyono ti, u wuzuce wetu wakondya kupuluta. ¹⁹ Ninga musinji wono wukamile, wono wawikwa no Mulungu si wusinjisikaga yaye, na mucanyha yo musinji wuwo, zandikwe zinghani azi, “U Muwaha yawamanyile i wakwe,” na kanyhi, “Na muli wose mono yakwiyitya, mwene yo wo Muwaha, yimunojeye yeleje no wavu.” ²⁰ Mu makaya mawaha, mozili bakuli ne viya vye mawala gose, viya vinji vya fweza, vinji vya zahabu, vinji vya mbawo, na vinji vya wulongo, na vinji viwicigwe viwe vitumamilwa vye siya, na vinji kanyhi viwe vitumamilwa vye nhondo zose. ²¹ Holeka hono munhu yeyeze ko kwilega ne makani gago gose go wavu, yuyo yo kowa co ciya ce vitumamilwa vye siya, vyono yakondya kuwikwa siya, nayo yuyo yakumunojezo Muwaha wakwe, nayo kanyhi yakuwa yewikanizize lukulu so mulimo wo wose muswanu. ²² Ale, kanyhi wilegaje no wusulumizi we cizelelo zelelo, wutyatye wiling’ano, wihuwilo, wendo, mulamu, hamonga ne wanhu wose wono wakumulomba Muwaha kwe nhumbula swanu. ²³ Kanyhi wilegaje no wuwanji wo wulele, na we ciwula mahala, wumanyile vyono zizo ziletaga wugombane. ²⁴ Yimunojeye mwitumami wo Muwaha yalece kugombana ne wanhu. Langa yimunojeye yawe mupolo kuli wanhu wose, yeze mwijizi muswanu, kanyhi mono yena no wukangalizi, ²⁵ mono mupolo, lono yakuwalanjiza walugu wakwe, lunji u Mulungu kowapela cilejeho co kunena, nawo ho wayimanye i mbeka. ²⁶ Nawo u wizuce wawo, ho wowawuyila kanyhi, nawo ho wawuce mu mutego wa Setani mono yali yakondya kuwebata no kuwanoza wamuhulice muli zose zono yakuzisaka mwene.

¹ Weze kukumbucila vyono, mu vilo vya ku ndumo, vyolokuza vipango vyo wugaye. ² Iwanhu wolowa weyenda weneco, wono wena masulumizi ge mapesa, wewoni, wenyanyaguzi, waligo Mulungu, wolowa wasina cihuliko kuli walezi wawo, wono wasine ’lumbo, kanyhi wabi, ³ wolokuza wanhu wono wolowa wasina wendo mu zinhumbula zawo, wono wasina lusungu, wasonjezi, wabuguci, kanyhi wakali, nawo wocisula cinhu co cose i ciswanu, ⁴ wolowa wagaluci, we lizeze, kanyhi wamemile widunhumuzi, nawo wokwenda zo wiyendeza weneco, si nho kumwendo Mulungu. ⁵ Kunze yawo wokwijela nha wanhu wono wamogopilo Mulungu, ninga akuno ho wakuvilema ivilungo vyakwe. Holeka wilejelaje lukulu ne wanhu we liwala lilyo. ⁶ Na wanji muli wene, wo wabitaga mu zinyumba ze wanhu, no kuwateka wacekulu wasocele, wono wavunice ne mitegulo yo wubi, na wono wakutongwa no wusulumizi we mawala gose, ⁷ wacekulu wono wajelaga kwiyijiza nhondo zose, ninga siwasumaga hamba hadodo kuyimanya i mbeka. ⁸ Ne wanhu we liwala lilyo wawanganaga ne mbeka nha vyono Yane na Yambule, wawangana na Musa. ⁹ Ninga hamba si wosuma kujendelela muno, hambi u wulele wawo nha wokwijela calinze hali wose. Na vyo yali kuli Yane na Yambule. ¹⁰ Ninga agwe Timoteyo, wagebata i mejizo gangu, ne mikalile yangu, no wuhile wangu mu mikalile yangu, u wendo wangu, ne ngola yangu, ¹¹ wuwinjilizwe no wugazwe wangu. Kanyhi wuzimanyile zose zono zikanyagana ku Antiyokiya, na ku Ikoniyo, na ku Lusitela. Nane nakangalila wuwinjilizwe wuwaha muno! Ninga Muwaha yakamhonya muli zose zizo. ¹² Na muli wose mono yakuhila kwikala mu mikalile yono yikumwendeza Mulungu, mu wilunza na Kilisito Yesu, yimunojeye sunga yawinjilizwe du. ¹³ Ninga i wanhu wabi ne wakonji, awo wojendelela kuwa wabi du, wakuwakonga wayawo, kanyhi sunga na weneco wakukongwa. ¹⁴ Ninga agwe go mweneco, wikalaje mu mbeka yiyilya yono wejizwa kanyhi wukayivumila muno muno. Na wono wakwijiza wuwamanyile, ¹⁵ kanyhi wukumbuciye vyono wulawa wudodo wako wagamanya i Mandiko Gono Gelile gono gosuma kukupela lihala lyono lyokuletela mhonelo mu nzila yo wihuwilo wono wuli muli Kilisito Yesu. ¹⁶ I Mandiko gose Gono Gelile, gandikwa mu nzila yo wutonji wo Mulungu, nago gakwiliye mu mikalile yo wiling’ano, ¹⁷ u munhu mono yakumwitumamilo Mulungu ho yawe yakwilaniciye, kanyhi yakondelezezwe lukulu ku wituma i milimo miswanu yose.

¹ Nane nghukukong’onheza hali Mulungu na hali Kilisito Yesu, mono kowaling’aniza wanhu i womi ne wafu, na ku soko vyono yakuza kutema nha Mutemi, ² holeka wuyiganulaje nghani yiyo, wiyohaje du kuyiganula (mu cipango cono cinojeye, hamba yiwe mu cipango cono si cinojeye), kalipile no kulanjiza, kanyhi wuwaswaswanizaje wanhu wose, akuno wukuwejiza ko wukangalizi wose. ³ I lipango lyokuza lyono wanhu si wolokwenda kugahuliciza i mejizo ge mbeka, langa wene wokwenda kutyatya masulumizi gawo weneco, no kwilundila wejizi wenji wono wowalonjela zinghani zizo du zono i makutu gawo gowa gewikanize kuwuhulicize. ⁴ Hamba si wokwendela lukulu kuyihulika imbeka, langa wokwenda kuzihulicila zisimo zo wulambi. ⁵ Agwe, ninga wikalaje meso muli zose, wukangalile magazo, witumaje u mulimo wo muganula Luganuzi Luswanu, wuwufisilizizaje lukulu u witumami wako. ⁶ Ninga ane ku lubavu lwangu, niwikanize du, ku wulavywa niwe yikumbiko, ne lidaha lyo wufwe wangu nha lyasejelela. ⁷ Hidimbala muno mu wisumanize, muhinzo niwumala viswanu, sunga no wihuwilo nawo niwukamisa. ⁸ Alu yisigaye yo wubocela i cipegwa co wisumanize wangu, ku soko ye mikalile yo wiling’ano, i cipegwa cono Muwaha Muling’anizi we ling’ani, kolomhela Mwizuwa lilya, kanyhi hamba si nene du nili wene, langa na wose wono wakulanjilila ko wendo i mazizo gakwe. ⁹ Wuhidimbale kuza kuli’ne mbela. ¹⁰ Hambi Dema nha yandeka, mwene yenda ze yinze ya lulu, yakabita ku Tesalonike. Kileseke nayo yabita ku Galatiya, na Tito yabita ku Dalumatiya. ¹¹ Alu yo Luka yali wene du mono yali hamonga nane bahano. Wumusolaje Maluko muzane nayo, hambi nha kosuma kumhelo’tazi mu mulimo wangu. ¹² Tukiko nayo, namutuma akulya ku Efeso. ¹³ Nagwe kolo wukuza, wundetelezezaje ne likoti lyangu lyono nalileka kwa Kalupo ku Tulowa, wundetelaje ne vitabu vivilya, ko muno avilya vyono vinozezwe nyhingo. ¹⁴ Ayulya u mutyani we vyuma vidunghu, mono kacemwaga Alekizanda, yanhendela vibi muno muno, ningo Muwaha komulipa nha vyono genhe metumo gakwe. ¹⁵ Ale, wilanjililaje kuli mwene, hambi nha yayibezaga inghani yetu ko wukali muno. ¹⁶ Ha witetele wangu wulongozi, hasina hamba munhu monga mono yema ku lubavu lwangu, langa wose wandeka. Ninga Mulungu yalece kuwawalila wubi wawo! ¹⁷ Ningo Muwaha yali yali hamonga nane, yamhela vilungo, sunga nghasuma kuyiganula inghani nha vyono yinha, i wanhu wono si Wayahudi ho wayihulice, kanyhi nghaponywa mu waling’anizwe wo kuwulagwa. ¹⁸ Holeka u Muwaha si koleka kumhonya muli makani gose i mabi, kanyhi konghamisa sunga ko ku wutemi wakwe wa ku wulanga. Ale, kuli Mwene, lweze lukumyo cibitilila ne cibitilila! Heya. ¹⁹ Ale, wuwalamusaje wa Pilisika na Akila, hamonga ne mhuga ya Onesifolo. ²⁰ Elasito yasigala ku Kolinto, nayo Tulofimo namuleka ku Mileto, vyono yali yatamigwe. ²¹ Ale, wusimbilile kuzo kwangu lono lipango lye cinyuli likali sinafika. Ewubulo, Pude, Lino, na Kilawudiya wose wakukulamusa, sunga na we zindugu wanji, wose wakukulamusa. ²² Ale, du, u Muwaha yawezane nagwe mu nhumbula yako. Ne lihewa liwezane nanye wose.