2 WATESALONIKE

¹ Ane Pawulo na Silivano hamonga na Timoteyo, cikumwandicilenyi anye nyo we likanisa lya kuko ku Tesalonike, mono muli wanhu wo Mulungu Baba na wo Muwaha Yesu Kilisito. ² Ilihewa no Mulamu wono wukulawa kuli Mulungu Baba na ko Muwaha wetu Yesu Kilisito, weze muli nyenye. ³ Nye wandugu zangu, yicinojeye ceze kumulumbo Mulungu nhondo zose ku soko yenyu. Kanyhi yicinojeye cinoze nhavivyo, vyono u wihuwilo wenyu wukucila muno muno, sunga no wiyendi wenyu wukucila konjelezeka muno muno. ⁴ Holeka nase cikwilumbila muli nyenye mu makanisa go Mulungu, cikuwona lukumyo luwaha, vyono mukujendelela mu wihuwilo hamonga no wukangalizi wenyu wa mu wuwingwe, hamonga ne magazo gono mukugatuga. ⁵ Na zizo zose, zikucimanyiza vyono u wuling’anizi wo Mulungu wo we ling’ani, ne ndumilizo yayo ho mowa muwunojeye u Wutemi wakwe wono wukuleka anye mukugazwa. ⁶ No Mulungu kokwituma ling’ani; kowalipa u wugaye, wawo wono wukumugazenyi anye, ⁷ nayo komupelenyi wuceho anye mono mukugazika, na sese nhavivyo. Nayo kokwituma i nghani yiyo mwidaha lyono u Muwaha kolokwijelela kulawa ku wulanga, hamonga ne wamalayika wakwe wawaha, ⁸ hamonga ne malambi go moto, ho yawalipicize wawalya wose wono wakumulema u Mulungu, na wawalya wono si wakuluhulika u Luganuzi Luswanu lo Muwaha wetu Yesu. ⁹ No wulipicizwe wawo, wolowa wajilile we cibitilila, no kutemanulilwa lukulu no lukumyo lwakwe luwaha, ¹⁰ kolo yakuza mwizuwa lilyo no kulubocela u lukumyo ne lilumbo kulawa kuli wanhu wose wono wamwihuwiye. Nanye nhavivyo, molowa wayagwe na wawo, hambi nha mwayibocela i nghani yono camuletelenyi. ¹¹ Na ku soko yiyo, holeka si cidilaga kumulombelenyi. Cikumulomba u Mulungu wetu yamupelenyi vilungo vyo kusumila kukangalila kwikala mikalile yono yamucemelenyi. Cikumulomba, kwe vilungo vyakwe, yawukwizilize u wuhile wenyu wo wituma i ziswanu, hamonga no kuwufisiliza u mulimo wenyu wo wihuwilo. ¹² Na muli zizo, i litagwa lyo Muwaha wetu Yesu mo lyotujila lukumyo muli nyenye, nanye mowutuga lukumyo muli mwene ku soko ye lihewa lyo Mulungu wetu na lyo Muwaha Yesu Kilisito.

¹ Alu zo wuze wo Muwaha wetu Yesu Kilisito, na zo wukongholwa hamonga wetu, ho cikale nayo. Cikumunenenyi muno muno wandugu zetu, ² vyono mulece kuwa na mahwele ge mbela mbela mu zinhumbula zenyu, hamba mulece kogopa so wulonje wo wutya, “I lizuwa lyo Muwaha lyakondya kuza.” Lunji yikwihweswa vyono i nghani yiyi yikulawilila mu wuwile wunji wunji, hamba mu wuganule, hamba mu baluwa yono yikutegwa vyono yilawiliye kono kwetu. ³ Mulece kukongwa na munhu wo wose mu nzila yo yose yilya. Hambi i lizuwa lilyo nha silyosuma kuza, sunga awulya u Wubezi Wuwaha wamule kuza, ayulya u Munhu mubi yamule kwijela mono u mudumo wakwe wo wajilile wo lukulu. ⁴ U Mwene kovibeza vyose vyono i wanhu wakuviwona nha Mulungu, hamba cono wakucihemba. Heya, yadahile kwinjila no kwikala sunga mu Nyumba yo Mulungu no kwiyitya mweneco yo Mulungu. ⁵ Alo si mukukumbucila vyono namulonjelenyi zizi zose lono nali nili hamonga nanye? ⁶ Ninga alu hocili cinhu cono cikumwimila, sunga na nyenye mucimanyile i cinhu cico. Holeka, yuyo u Mubi kolokwijelela mwi’daha lyakwe lyono limunojeye yejele. ⁷ Hamba nhavivyo, yuyo u Mubi mono si yakwijela luno, yakwituma i milimo yakwe lulu, ninga si kosuma kwijela sunga ayulya mono yakumwimila yawuswe. ⁸ Ale baho ho yuyo nayo u Mubi ho kolokwijelela, ninga u Muwaha Yesu kolo yakuza, kolomuwulaga ko muhe wo mulomo wakwe, no kumwajiliziza lukulu ko wung’alale wo wuze wakwe. ⁹ Nayo yuyo u Mubi, kolokuziza mu vilungo vya Setani, no kunoza vitanjilo vye mawala gose ne mezino go wulambi, ¹⁰ nayo kokwitumamila u wulambi we mawala gose kuli awalya wono wali mu wajilile. Wawo nawo wolokwajilila ku soko vyono si wawubocela hamba si wayenda yiyilya i mbeka ho wapone. ¹¹ Holeka nayo u Mulungu yakawawika hasi ye vilungo vyo wajilile, ho wawihuwile u wulambi. ¹² Ne ndumilizo yayo ho yiwe, wose wono si wakuyihuwila i mbeka, langa wakwiyendeza no wubi woling’anizwa. ¹³ Yicinojeye cimulumbe u Mulungu nhondo zose ku soko yenyu anye i wandugu zetu, anye mono mwendigwe no Muwaha, hambi u Mulungu nha yamuhagulenyi ku wulawa ku mwamulizo ho muponywe kwe vilungo vyo Muhe, ho munozwe muwe wanhu wakwe wono mwelile mu nzila yo wihuwilo wenyu mu mbeka. ¹⁴ Nayo u Mulungu yamucemelenyi mu nzila yo Luganuzi Luswanu lono camuganulilenyi; nayo yamucemenyi ho mubocele i lifungu lyenyu mu lukumyo lo Muwaha wetu Yesu Kilisito. ¹⁵ Holeka wandugu zangu, mwibatilaje lukulu i mejizo gagalya gono camwijizizenyi mu wuganule wetu, na mu zibaluwa zetu. ¹⁶ Nase cikumulomba u Muwaha wetu Yesu Kilisito mweneco, hamonga no Mulungu Baba mono yacenda, na so lihewa lyakwe yakacipela u wutuzwe we cibitilila hamonga no witumbilo wuswanu, ¹⁷ yazituzaje zinhumbula zenyu kanyhi yamusikamyenyi ho musume kwituma no kulonga ziswanu nhondo zose.

¹ Ale, ze ndumilizo wandugu zangu, mucilombelaje, nghani yo Muwaha ho yicile kutandala mbela mbela, kanyhi ho yibocelwe kwe lilumbo nha vyono yinha muli nyenye. ² Lombenyi, kanyhi ho Mulungu yaciponye mu mawoko ge wanhu wono wajiliye kanyhi wabi, hambi nha si wose wono wayihuwiye nghani yiyi. ³ Ninga u Muwaha yo mwihuwilwa. U Mwene komusikamyenyi kanyhi komudimenyi viswanu kuli ayulya mubi. ⁴ Nayo u Muwaha yakucipela u witumbilo wuwaha ku soko yenyu, nase citumbiye du vyono mokwituma, kanyhi vyono mojendelela kwituma zizilya zono camulonjelenyi. ⁵ U Muwaha yamutonjenyi zinhumbula zenyu mu wendo wo Mulungu, kanyhi na mu wukangalizi wono Kilisito yakucipela. ⁶ Nye wandugu zangu, cikumulajilizizenyi mwi’tagwa lyo Muwaha wetu Yesu Kilisito, mwilegaje na we zindugu wose wadoba na wono kanyhi si wakugatyatya malajilizo gono cawapela. ⁷ Nanye nyo weneco mumanyile nha vyono munojeye mutyatye luzu lwetu. Vyono ase lono cali cili hamonga nanye, si cali wadoba. ⁸ Hamba si calya ndigwa ya munhu wo wose bwete si cimulipile. Cetumaga milimo cihidimbaye hamonga no wugazice ku misi na ku cilo, ho cilece kuwa mutegulo kuli munhu wo wose muli nyenye. ⁹ Canoza nhavivyo, si vyono kotya si yali yicinojeye citazwe nanye, langa vyono cikusaka kumupelenyi luzu. ¹⁰ Lono cali cili hamonga nanye, cali kumulonjelenyi cikutya, “U munhu wo wose mono yakulema kwituma i milimo, nayo yalece kupegwa zindigwa yalye.” ¹¹ Cikuzilonga zizo vyono cihulika vyono muli nyenye mo wali wanji wayenyu wadoba kanyhi wono si wendile kwituma mulimo wo wose, langa wene wendile kwiyinjiza du mu zinghani za wanhu wanji. ¹² Mwitagwa lyo Muwaha wetu Yesu Kilisito, cikuwalajiliza kanyhi cikuwasugula wanhu we liwala lilyo vyono yiwanojeye wawe no wunhu wuswanu, kanyhi wetume milimo ho wetujile vyawo weneco. ¹³ Ninga anye nyo wandugu zangu, mulece kukatala mu wituma ziswanu. ¹⁴ Yidahile kuwa kuko koyuli munhu yunji mono si yakuyihulika nghani yiyi yono cikumuletelenyi mu baluwa yiyi. Na hono yiwe nhavivyo, ale yinojeye anye mumwanzalice u munhu yuyo, kanyhi mulece hamba kuhanga nayo mu nghani yo yose, nayo ho yawone cevu. ¹⁵ Ninga hamba nhavivyo, mulece kumunoza u munhu yuyo nha mulugu, langa mumufundaje nha kotya ndugu yenyu. ¹⁶ U Muwaha mweneco, yo mwamulizo wo mulamu, yamupelenyi mulamu nhondo zose muli zose. U Muwaha yawezane na nyenye wose. ¹⁷ Ko muwoko wangu nene no mweneco nghwandika nhavi: U mulamu wono wukulawa kuli Pawulo! Navyo nhavivi vyo nghuwa kutajila sayini mu zi baluwa zose, na vyo nghuwa kwandika. ¹⁸ Ilihewa lyo Muwaha wetu Yesu Kilisito liwezane na nyenye wose.