2 PETELO

¹ Ane yo nene Simoni Petelo, u mwitumami no mutumwa wa Yesu Kilisito. Nghumwandicilenyi nyenye mono so wuswanu wo Mulungu wetu, hamonga no Mukombozi Yesu Kilisito, mwapegwa u wihuwilo wuwulya wo wuguzi wukamu wono capegwa na sese. ² Ilihewa no Mulamu vyeze kuli’nye mu wumumanyo Mulungu, na Yesu Kilisito Mutwa wetu. ³ Mu vilungo vyakwe vyo wulungu, u Mulungu yacipela vyose vyono cisakaga, ho cisume kwikala mu mikalile yo kumogopo Mulungu, no kumumanya mwene mono yacicema ho ciwuhanje ulukumyo no wuswanu wakwe mweneco. ⁴ Hambi muli zizo nha yakondya kucipela vipegwa viwaha vyo wuguzi wukamu vyono yacihuwiziza, na ku so vipegwa vivyo, ho musume kuhanga u wuwe wakwe wo wulungu. ⁵ Holeka mupiligale muno konjeleza wuswanu wo wihuwilo wenyu, kanyhi monjeleze no wizuce mu wuswanu wenyu, ⁶ mu wizuce namo, monjeleze wiyimile, na mu wiyimile namo, monjeleze ngola, mu ngola namo, monjeleze wogopo Mulungu. ⁷ Mu wogopo Mulungu namo, monjeleze wenda ndugu, na mu wenda ndugu namo, monjeleze wendo. ⁸ Na kolo mukuwa no winji wa zizi zose, zomunozenyi muwe muli wetumi, no kutuga cambuzi mu wumumanya Mutwa wetu Yesu Kilisito. ⁹ Ninga munhu mono yazisina zizi zose, yaweza mubofu, hambi nha si yakusuma kuwona, kanyhi yasemwa vyono yakondya kukwemwa u wubi wakwe we katali. ¹⁰ Ale, holeka, wandugu zangu, piligalenyi muno muno kulunoza lulo ulucemo lwenyu lono mwacemelwa no Mulungu, luwe nghani ye cibitilila mu mikalile yenyu, na hono mwikale nhavivyo, simosuma kuwulecela lukulu uwihuwilo wenyu. ¹¹ Na yiyo yo yoleka mosuma kupegwa wiling’ano wono wukwilaniciye, wo kwinjilila mu wutemi wo Mutwa wetu no Mukombozi wetu Yesu Kilisito. ¹² Holeka nane nojendelela kumukumbucizenyi nhondo zose zinghani zizi, hamba muwe mwakondya kuzimanya, kanyhi mukamile mu mbeka yono mwayibocela. ¹³ Nghwihwesa yowa nghani swanu kuli’ne, mu mapango gose gono nowa nghali nili mumi kononze, njendelele kumusikamyenyi no kumukumbucizenyi ze zinghani zizi. ¹⁴ Hambi nha manyile vyono naza behi kuwuwika mu citenjelo umuwili wangu wuwu wono wufwizaga, nha vyono u Muwaha yanonjela calinze. ¹⁵ Holeka nopiligala kumupelenyi nzila yo kuzikumbucilila zinghani zizi nhondo zose, hamba lono niwe nakondya kufwa. ¹⁶ Mu vilo vyono cawejizenyi ze nyiza yakwe mbaha u Mutwa wetu Yesu Kilisito, sicatyatya zisimo ze cibwete bwete zono zisina nhunizo yo yose. Ase cikawuwona ulukumyo lwakwe ne meso getu co weneco. ¹⁷ Ase cali baho mu cipango lono yapelelwa lilumbo, no kukumywa no Mulungu Sogo yo munhu, lono lizi likamuziza kulawa kuli mwene, mono yo Lukumyo Luwaha, likutya, “Ayu yo Mwanangu mwendece mono nyendezwe nayo.” ¹⁸ Kanyhi, sese co weneco cikalihulika lizi lilyo kulawa ku wulanga lono cali cili hamonga nayo kucanyha ye litunda lililya lyono lyelile. ¹⁹ Kanyhi sunga ne zinghani ze wawizi zikuyihomelela nghani yiyi, nanye mukunoza viswanu hono mukuyibata, hambi nha yinha tala yono yikumulika hanhu hatitu, sunga lizuwa lililya kolo likusomoza, no wuzelu we nyelezi yimwacinghunghu, kolo wukubulila mu zinhumbula zenyu. ²⁰ Ninga hamonga na zizo, mukumbucile vyono, hasina munhu wo wose, mono kosuma kulolosa mweneco zo wuwizi wono wuli mu Mandiko Gono Gelile. ²¹ Hambi nha hasina nghani yo wuwile yono yina ndawililo ye cimunhumunhu, langa iwanhu wayilonga inghani yo Mulungu nha vyono watongwaga no Muhe Mono Yelile.

¹ Wakalawila wawizi wo wulambi muli wanhu, nhavivyo kanyhi, iwejizi wo wulambi wololawila sunga na muli nyenye. Ne wanhu we liwala lilyo, wololeta i mafundo go wiwajize no kumukana Muwaha mono yakawakomboza, na mu nzila, yiyo wokwiletela musunho u wongomezwe wawo weneco. ² Kanyhi ne wanhu wenji wolozityatya zizo zinzila zawo zimbi, sunga na wanji woloyibedegala Inzila ye mbeka ku soko yawo. ³ Na ku soko ye masulumizi gawo mabi, wolokwisavizya muli nyenye, kolo wakumulonjelenyi zinghani zo wulambi-lambi. No wulipicizwe wawo wakondya kuwikanizwa kulawa katali, siwocela yaye. Nayo mono kowongomeza, yali meso! ⁴ Na lono wamalayika wetumila u wubi, u Mulungu si yawawonela lusungu yaye, langa yakawataga mu moto we Gehena, nawo wafunjigwe mumo walindiye Lizuwa lililya lyo wuling’anizwe. ⁵ Kanyhi u Mulungu hamba siyayitetela yinze ye katali, yaleta lihwazi lye malenga mu’si yiyilya ye wanhu wono si wamogopago Mulungu, ninga Noha mono yaganulaga u wiling’ano, u Mulungu yakamuponya hamonga ne wanhu wanji mupunghati. ⁶ Kanyhi Mulungu yakagalipiciza makaya ga Sodoma na Gomola, yakagaticimiza no moto tici-tici, yakaganoza gawe nha suguzi kuli wanhu wono siwamogopaga Mulungu. ⁷ Yakamuponya Loti munhu muswanu, ne mikalile mibi ye muswanu, wanhu wawo wafyuzi. ⁸ Hambi Loti nha yakekalana ne wanhu wawo, na mu vilo vinji, inhumbula yakwe yali yina mahwele mawaha, yeza kuhulika ze metumo gawo mabi. ⁹ Ale, holeka, Muwaha yamanyile kuwaponya mu wulipicizwe sunga Mwizuwa lililya lyo wuling’anizwe. ¹⁰ Na ko muno wa walya wono watyatyaga imasulumizi mabi go muwili na wono wakubedegala no kulema kutemwa no Mulungu. Iwanhu we liwala lilyo, wasina cihuliko kanyhi wedunhumuzi, hambi nha watovulaga, kanyhi wasina cogopo kuli viwumbwa vyono vyelile vya kucanyha. ¹¹ Ninga wamalayika wono wena u wulajilize ne vilungo kuciza wawo iwejizi wo wulambi, siwawasitakaga no kuwaliganga wene wawo hamwande yo Muwaha. ¹² Iwanhu wawo wono waligaga co cose cilya cono siwacimanyile, wenha i malimu gono gasina mahala, gono gakuwa kulelwa, na hanyuma yayo gebatagwa no kuwulagwa. Wokongomezwa ku soko yo wuhodanji wawo weneco. ¹³ Kanyhi wolipwa magazo ku soko ye magazo gono wesaciye weneco. Ne nyemo yawo yili mu wunoza, co cose cono cikwigutya imasulumizi gawo go muwili, kanyhi wakuzinoza zizo mu misi du mugati. Iwanhu we nhavivyo wakuleta cevu hamonga na soni mbaha, kolo mwekonghola hamonga nawo, mu wulye we zindigwa zenyu ze zisikukuu, akuno wakuzisecelela i zinzila zawo zo wukoci. ¹⁴ Ne meso gawo gamemile wusenyha wose, sunga ne masulumizi gawo go kwituma wubi, si gamalikaga hamba hadodo. Wawo wo wakuwa kuwakonga-konga wanhu wono wasoceye sunga wawagwiziza mu mitego. Ne mitima yawo yizoweleze mu wusulumizi we zisawo. Iwanhu wawo wali mu wulijitwe wo Mulungu! ¹⁵ Hambi nha wayileka inzila yono yigolocile, wajilila no kuyityatya nzila yono yayityatya Balamu, mwana wa Beyoli, mono yenda yatuje cambuzi mu wituma zo wulambi-lambi, ¹⁶ yakatacilwa ku soko yo wubi wakwe. Ne ndogowe yono siyilongaga, yikalonga ne lizi lye wanhu, ndogowe yikawupezezya lukulu ulukwale lwa yuyo muwizi. ¹⁷ Iwanhu wawo wenha mivwilo yono yinyalile, kanyhi wenha mavunde gono gapemheluswaga ne mbeho mbaha, no wikalo wawo wono wawiciywe, nha hanhu hono howuli wutitu wuwaha. ¹⁸ Hambi nha walongaga zinghani zo wiwoni zono zisina nhunizo, kanyhi wegetumamilaga imasulumizi gawo mabi go muwili ho wawagwise awalya wono wakondya kwilega mu wanhu wono wekalaga mu wajilile. ¹⁹ Wawehuwizaga wanhu wanji, wakutya, ati wowa welecele, akuno kumbe weneco ho wawanda wo wuhodanjice. Hambi u munhu nha yakuwa muwanda wa cinhu co cose cilya, cono cikondizye kumusumiza. ²⁰ Ne wanhu wono wali wakondya kupona mu muwuhodanjice we yinze, mu nzila yo kumumanya Muwaha no Mukombozi wetu Yesu Kilisito, kanyhi hanyuma yayo, wakeyendela weneco kugwizwa no kutemwa kanyhi no wuhodanjice wuwo, i mikalile yawo yowa mibi muno kuciza ya halulongozi. ²¹ Hambi nha yanda yiwe ciba kuli wene hono wali walece kuyimanya hamba hadodo, inzila yiyo yo wiling’ano, sinha kuyimanya, na hanyuma yayo, kuyileka no kulitaga lilajilizo lyono lyelile lyono walibocela. ²² Hambi nha howuli mulongo wono wutezaga, Libwa ligawuyilaga kanyhi imadeko galyo lyeneco. “No mulongo wunji wutezaga, Ligubi lyono lihovugwe, libiducizaga kanyhi mu madabaga!” Nhavivyo vyo yimile lu kuli wene.

¹ Nyo wendece wangu, ayi yo baluwa yangu ye kejete yono nghumwandicilenyi. Na mu zibaluwa zizo zinyejete, nali kujela kumuswaswanizenyi i mahweso maswanu ga mu mahala genyu, ko kumukumbucizenyi zinghani zizi. ² Nyendile mumanye, kanyhi mukumbicile zinghani zono zalongwa ne wawizi wono welile, na lililya lilajilizo lyo Muwaha no Mukombozi, lyono mwapegwa ne watumwa wenyu. ³ Mukwamula kumanya vyono mu vilo vya ku ndumo wolokuza wanhu wono mikalile yawo yitemigwe ne masulumizi gawo mabi. Wolomuzwajizenyi nyenye, ⁴ no kutya, “Yehuwiza vyono kolokuza! Ninga lu yali hayi? Hambi nha zinghani zo zizo du vyo yinha, ku wulawa lono wafwila wa kuku zetu ne nyikala ye vinhu vyo yiyilya du, nha vyono yali kulawo mwamulizo we yinze!” ⁵ Iwanhu wawo, wasemwaga na vyono Mulungu yalonga, u wulanga ne yinze vikawa kuwumbwa. Ne yinze yikawumbwa ku wulawa mu malenga, na kwe malenga, ⁶ na kwe malenga gago nha cinji i malenga gagalya ge lihwazi liwaha, yinze ya lululya yikongomezwa. ⁷ Ninga wulanga ne yinze za lulu mbikwe ne nghani yo Mulungu, ziwiciywe moto. Ziwicigwe ku soko ye lizuwa lililya lono wanhu wono siwamogopile Mulungu wololing’anizwa no kongomezwa. ⁸ Ninga nyo wendece wangu, mulece kusemwa cinhu cimonga! Hamwande yo Muwaha, hasina wisimajile we lizuwa limonga, ne myaka elufu, kuli mwene vyose co cimonga du. ⁹ Hambi Muwaha nha sikacelaga kuzifisiliza zizilya zono yehuwiza, nha vyono wanhu wanji wehwesaga vyono kocela. Umwene yena ngola ku soko yenyu, hambi nha siyendile hamba hadodo muyenyu yunji yajilile, langa yakuwasaka wose wafice ku wunene. ¹⁰ Lizuwa lyo Muwaha lyolokuza nha muhizi. Mwizuwa lilyo, wulanga wolokwajilila ne cihumbi ciwaha, ne vinhu vyayo vyo kulawa katali vyolokongomezwa no moto, nayo yinze yolokwajilila, hamonga ne vinhu vyose vyono vili mumo. ¹¹ Ale, hono vinhu vyose vyohodangwa nha vivi, ma, anye munojeye muwe wanhu we nha wule? Munojeye muwe ne nyikala yono yelile no kumogopo Mulungu, ¹² akuno mulilindiye lizuwa lilya lyo Mulungu, no kulisunhaniza lize mbela mbela, i lizuwa lyono wulanga wolokongomezwa no moto no kuhodangwa, ne vinhu vyayo vye katali, vyolokwenjedulwa. ¹³ Ninga’se, ku so wihuwizo wakwe, cilindiye wulanga wupya ne’nze mhya, mono wumemile wiling’ano. ¹⁴ Holeka nyo wendece wangu, vyono mulilindiye lizuwa lilyo, mupiligale kwiyeza muno muno, muwe musina manamha-manamha hali Mulungu, ho mowa no mulamu nayo. ¹⁵ Munojeye muwuwone u wukangalizi wo Muwaha, vyono co cilejeho cono yakumupelenyi, ho muponywe, nha vyono Pawulo ndugu yetu mwendece yakamwandicilenyi, kuno yakwitumamila i mahala gono yapegwa no Mulungu. ¹⁶ Zizo zo kalongaga mu zibaluwa zakwe zose, lono yakuduwila ze nghani yiyo. Hozili nghani nyhefu mu zibaluwa zakwe zono nghamu kuwizuce, zo nghani zono i wanhu walele, wono wasina musinji wazipitulanyaga nha vyono wazipitulaga zinji ze Mandiko Gono Gelile. Wakwiyiletela uwongomezwe wawo weneco. ¹⁷ Ninga’nye, nyo wendece wangu, mwakondya kuyimanya nghani yiyi, holeka mweze musujile, ho mulece kwajilizwa ne masutya ge wahodanji, no kugwa ku wulawa mu wusikame wenyu wono wukamile. ¹⁸ Ninga mujendelele kuwilucila mwihewa no mu wumanyo Mutwa wetu no Mukombozi Yesu Kilisito. U lukumyo lweze kuli mwene, kulawa lulu na ku cibitilila Heya.