2 WAKOLINTO

¹ Kulawa kuli nene Pawulo, no mutumwa wa Kilisito Yesu, so wuhile wo Mulungu, no ndugu yetu Timoteyo. Cikumwandicilenyi anye mono muli we likanisa lyo Mulungu, lyono lili kuko ku Kolinto, hamonga ne wanhu wose wo Mulungu we hanhu hose mu Akaya. ² Ilihewa no mulamu vyono vikulawa kuli Mulungu u Sogo yetu, na kuli u Muwaha wetu Yesu Kilisito, viweze muli nyenye. ³ Yalumbwe u Mulungu u Sogo yo Mutwa wetu Yesu Kilisito, Baba mono yena lusungu, kanyhi yo Mulungu mono kaletaga u wutuzwe wose. ⁴ Mwene yo kacitazaga ase mu wugazice wetu wose, nase ho cisume kuwatuza wanji mu wugazice wose, mu nzila yo wutuzwe wuwo wono cikulubocela kulawa kuli Mulungu. ⁵ Heya, mu nghango ye magayo ga Kilisito vyono gakucila muli’se, ale, mu nghango yiyo nase mo cikucilila kusindamikwa nayo. ⁶ Holeka hono ciwe cikutuga wugazice, cikugazika ku soko yo wusindamikwe ne mhonelo yenyu. Na kanyhi lono cikusindamikwa, cikusindamikwa ho nanye mutuje wusindamikwe, ne vilungo vyo wukangalila magazo gaga, gono sunga na sese cikagakangalila. ⁷ Holeka uwitumbilo wetu wa muli’nye, wusikame muno muno, kanyhi cimanyile vyono, hono muhanje nase i magazo getu, vyo mohanga no wusindamice wetu nhavivyo. ⁸ Nye nyo wandugu zetu, ase cikusaka kumumanyizenyi, ze magazo gono gacagana ku yisi ya Asiya, i magayo gago gali mawaha muno, sunga gakaciwusiza no witumbilo wose wo kwikala cili womi. ⁹ Heya, cikawa nha wanhu mono ciwiciywe kuwulagwa. Ninga zizi zose, zejela ho cisume kwiyijiza vyono yicinojeye cilece kwiyitumbila co weneco, langa cimwitumbile Mulungu, mono kawazukulaga i wafu. ¹⁰ U Mwene yaciponya mu mbali mbaha ye lifwa, kanyhi yakali yakujendelela kuciponya, nase cimuwiciye u witumbilo wetu du, nha vyono kajendelelaga kanyhi kuciponya, ¹¹ nha vyono mukucitaza so wulombe wenyu. Holeka u wulombe wenyu wono mukucilombela muno, wopitulwa, no Mulungu kocilugutiza, na wanhu wenji wokwinula i mazi gawo, wawe kumulumbo Mulungu ku soko yetu. ¹² Ase cikwilumbila cinhu cimonga du, vyono viselinji vyetu vikucihomelela vyono, mu wikale wetu wa mono yinze yiyino na ko muno muli’nye, cekala ko winenenyhezi wose hamonga no wele wa mu nhumbula, wono wukulawa kuli Mulungu, hamba si catongwa ne lihala lye cimunhu-munhu, langa catongwa ne lihewa lyo Mulungu. ¹³ Holeka cikumwandicilenyi nanye izinghani zono mosuma kuzisoma no kuzizuka. ¹⁴ Ninga hamba yiwe aluno mukucizuka hadodo du, nitumbiye vyono hanyuma mocizucila lukulu, Mwizuwa alilya lyo Muwaha wetu Yesu, ho muze musume kwilumbila muli sese, nha vyono nase colokwilumbila muli nyenye. ¹⁵ Holeka ku so witumbilo wuwo, nahilaga kwamula kuza kwenyu ho mutuje lihewa lye kejete. ¹⁶ Nahilaga ngholele kwenyu lono nghubita ku Makedoniya, na lono nghuwuya nhavivyo, ho nhuje u wutazi wenyu so muhinzo wangu wo kubita ku Wuyahudi. ¹⁷ Wulenyi! Mukwihwesa lono nahimaga zizo, nahimaga nha munhu mono yasina wusimyo? Mukwihwesa ane nghunozeza u wulamuzi wangu mu mahweso ge cimunhumunhu nha cinji nghutya “Heya” ne “Ng’o” ho baho hose? ¹⁸ Ninga u Mulungu yo we mbeka yose, holeka azilya zono camulonjelenyi anye, si zali nghani za “Heya” ne “Ng’o.” ¹⁹ Vyono Kilisito Yesu, u Mwana wo Mulungu, mono ane na Silivano na Timoteyo camuganulilenyi anye, si yali munhu wa “Heya” na “Ng’o,” langa u mwene yo “Heya” yo Mulungu nhondo zose. ²⁰ Ku soko vyono muli mwene u wihuwizo wose wo Mulungu waweza “Heya.” Holeka ku soko yiyo, i “Heya” yetu yikuwa kulongwa mu nzila ya Kilisito, ku soko yo kumukumyo Mulungu. ²¹ U Mulungu mweneco yo kacisikamyaga ase hamonga na nyenye mu wilunza na Kilisito, kanyhi yo kacisiwanulaga, ²² kanyhi yo yaciwicila mutozo wo kuwela cili sawo yakwe mweneco, kanyhi yakacipela no Muhe Mono Yelile mu zinhumbula zetu, ho ciwe co cipingo ca zose zono yaciwiciye. ²³ No Mulungu yo muhomelezi wangu, mwene yo yayimanyile i nhumbula yangu! Ane, sinawuyajila kanyhi kuza ku Kolinto, ku soko du yo kumuwonelenyi lusungu. ²⁴ Ase si cikusaka cimutemenyi mu wihuwilo wenyu, anye mono mwakondya kuwa mukamile mu wihuwilo wenyu. Langa yicinojeye, ciwitume u mulimo hamonga nanye, ku soko ye nyemo yenyu.

¹ Holeka ndumula nghani mu nhumbula yangu vyono, ndece kumuzizenyi kanyhi no kumukalazenyi. ² Hambi hono nimukalazenyi anye, alu nani kanyhi mono konhuza? Hono si wawalya du wono nawakalaza! ³ Holeka namwandicilenyi vyono, si nasaka kumuzizenyi ho nghalazwe nanye, anye mono munojeye muwe yo nyemo yangu. Nane manyiye lukulu nha vyono, hono ane niwe nina nyemo, nanye wose mukuwa mwina nyemo nhavivilya. ⁴ Hambi ha lulongozi, nha namwandicilenyi hamonga no wukalale wuwaha ne mahozi, hamonga no wusungu mu nhumbula, ninga si namwandicilenyi ho nimukalazenyi, aa, ng’o, langa nasakaga ho nimulajilenyi nha vyono ane nimwendilenyi muno muno. ⁵ Holeka hono hawe hoyuli yunji mono yamukalaze muyagwe yunji, ale, si vyono kanghalaza nene, langa kamukalazenyi anye wose. Nane si nghusaka nijele niwe mukali muno muno muli mwene. ⁶ U wulipicizwe wono yakondya kuwutuga kulawa kuli wenji wa muli nyenye, hodu womukwila wuwo du. ⁷ Alu yono yisigaye ku lubavu lwenyu, yinojeye anye mumunenele munhu yuyo, kanyhi mumusindamice, ho yalece kucila muno kuwa no wukalale no kutukuwika mutima wakwe. ⁸ Holeka nghumunenenyi, anye mwilajilaje kuli mwene vyono mumwendile. ⁹ Na cono caleka nghandika baluwa yiyilya, nasakaga ho manye hono mweza muli cihuliko muli zose. ¹⁰ Hono mumunenele munhu cinji, ale, nane nghumunenela nhavivyo u munhu yuyo. Hambi ane hono nghulavya wunenezi, hono mbeka cili baho cinhu co kunenela, ale, nghunenela ku soko yenyu hali Kilisito, ¹¹ ho cilece kumupela Setani cilejeho co kucikonjela, hambi u wuhile wakwe nha ciwumanyile vyono winha. ¹² Lono nali neza kufika ku Tulowa kuluganula u Luganuzi Luswanu lwa Kilisito, nghagana u mulango wuli mwazi ku soko yo mulimo wo Muwaha. ¹³ Ninga si nasuma kutula mu mutima wangu, vyono si namwagana u ndugu yetu Tito. Na yo soko yono yikaleka nghamwilajenyi wose bahalya no kubita Makedoniya. ¹⁴ Ninga u Mulungu yalumbwe, mono yakucitonga nhondo zose mu wilunza na Kilisito. U mwene yakucipela wusume wo kutandaza i mbeka ya Kilisito, kotya nha mhunjile swanu muno hanhu hose. ¹⁵ Hambi ase nha cinha mhunjile swanu yono Kilisito yakumulavizyo Mulungu, i mhunjile swanu yono yikuwaficila wanhu wose wono wakupona, na wono wakwajilila. ¹⁶ Kuli’walya wono wakwajilila, i mhunjile yiyo yikuwa nha munungho mubi kuli wene, yikuleta ’fwa, ninga kuli’walya wono wakuponywa, i mhunjile yiyo, yikuwa mhunjile swanu kuli wene yono yikuleta wumi. Alu nani ’mbi mono kosuma kuwituma u mulimo we liwala lilyo? ¹⁷ Ase si cinha wanji wono wayinozezaga nghani yo Mulungu wusuluza. Ninga ase cikuyiganula inghani yo Mulungu kwe nhumbula nzelu hali Mulungu, mono cakondya kwilunza na Kilisito, kanyhi nhe wanhu wono watumigwe no Mulungu.

¹ Alo yiyi yikulajila nha vyono cikwamula kanyhi kwiyilumba co weneco? Hamba cikusaka baluwa zo wulumbwe wetu zizo kwenyu hamba zilawe kwenyu, nhe wanji? ² Ninga anye nyo weneco yo nyenye mono muli baluwa yetu, kanyhi yo baluwa yono nyandikwe mu zinhumbula zetu, ho munhu wo wose yasume kuyiwona no kuyisoma. ³ Kanyhi yili calinze, nha vyono anye muli baluwa ya Kilisito yono yaletwa ne miwoko yetu. Ne baluwa yeneco siyandikwe ko wino, aa ng’o, langa nyandikwe ko Muhe wo Mulungu mumi, hamba si nyandikwe mu cibanhi ce’bwe, langa nyandikwe mu zinhumbula ze wanhu. ⁴ Nase cikulonga zizino ku soko yo witumbilo wetu wono cina nawo kuli Mulungu mu nzila ya Kilisito. ⁵ Ninga si vyono ase cosuma kwitumila nghani yinji yo yose mu vilungo vyetu co weneco, langa u wusume wetu wose, wulawaga kuli Mulungu, ⁶ hambi nha yo mweneco du mono yacipela u wusume wo kuwela i wetumami we cilagane Cipya, cono si cilagane co wulajilize wono mwandikwe, langa Cilagane co Muhe. Hambi u wulajilize wono mwandikwe, nha wuletaga yifwa, ningo Muhe, wuwumifyaga. ⁷ U Wulajilize waziza mu mandiko gono gali mandice mu vibanhi vye mabwe. Hamba yiwe u mudumo wayo waweza yifwa, u lukumyo lo Mulungu lukawa lucilile muno muno, sunga ne wanhu wa Isilayeli hamba siwasuma kwidoma no kuwulanga wusu wa Musa ku soko yo wung’alale wayo. Na kumbe u wung’ale wuwo, wali wa cipango cidodo du. Holeka u witumami wa cico cono caleta lifwa, kumbe ciketumilwa mu lukumyo luwaha nhavivyo, ⁸ ale, uwitumami wo Muhe, wo wina ulukumyo lono lucilile muno muno. ⁹ Holeka hono hawe hali howuli lukumyo mu witumami wuwo wono waleta i ning’aniza, ale, yili calinze muno, vyono u witumami wulya wono wukuleta u wuvumilwe hali Mulungu, wowa no lukumyo lono lucilile muno muno. ¹⁰ Holeka alu, ulukumyo lono lucilile muno muno, lwakondya kusola cilejeho co lukumyo alulya lono lwaza baho ha lulongozi, wono wilumbi wayo luno, wakondya kupuluta. ¹¹ Holeka hono ci cilya cono cali ca cipango cidodo du, cali cino lukumyo lwayo, acilya cono cikalaga cibitilila, cowa cina lulumyo lono lucilile muno muno. ¹² Vyono wo wuwu wo witumbilo wetu, holeka ase cikulonga cisina woga hamba hadodo. ¹³ Kanyhi ase, si cikwituma nha kotya Musa mono yakawa yimunojeye yawufunicize ne citambala wusu wakwe, wanhu wa Isilayeli ho walece kuwuwona u wung’alale wuwulya wono wali weza kufwililicila. ¹⁴ Ninga i mahala gawo gakamufywa. Sunga na lulu, lono cikusomwa i citabu ce Cilagane Cigwana, i cicitizo cico nha cikali cili baho du. Ne cicitizo cico cosuma kuwuswa du, lono munhu yakondya kwilunza na Kilisito. ¹⁵ Heya, sunga ne zuwalili du baha, ho hose lono wukusomwa Wulajilize wa Musa, mahala gawo gawezaga magubice. ¹⁶ Ninga i cicitizo cico cosuma kuwuswa, nha vyono gakutya i mandiko kuli za Musa, “Yali yeza kumupitucila Muwaha, ne cicitizo cakwe cikawa kuwuswa.” ¹⁷ Na ahano hono yikutya “U Muwaha,” nha cinji wo wutya, “U Muhe,” na ho hose hono ho yuli u Muhe wo Muwaha, baho ho ho wuli no welecele. ¹⁸ Holeka ase wose mono si cifunicize wusu wetu, cikululajila lukumyo lo Muwaha kotya nha mwi’lole, no lukumyo lulo nalo lono lukulawa kuli Muwaha, mono wo Muhe, wucikawanizaga ho cihwane muno muno ne cihwani cakwe, ku so lukumyo lono lucilile.

¹ Holeka, u Mulungu ku soko yo lusungu lwakwe luwaha, yacipela u mulimo wuwuno ho ciwitume, holeka nase si cikutukuwika mitima. ² Nase cakondya kuzilecela lukulu i zinghani zose ze cevu, na ze cinyele. Hamba si cili mu mikalile kanyhi yo wukonji, hamba kuyipitulasa nghani yo Mulungu, langa cikuyilajila i mbeka mu witume mbeka, na mu nzila yiyo, mo cikwiwicilila mu wulamuzi we viselinji vye wanhu, hali Mulungu. ³ Hambi u Luganuzi Luswanu lono cikuluganula, hono luhundikwe, lowa luhundikwe kuli wono wakwajilila du. ⁴ Wawo si wehuwiye vyono mulungu we yinze yiyino yawatajila wutitu mahala gawo, ho walece kuwuwona calinze u wuzelu wo Luganuzi Luswanu lo lukumyo lwa Kilisito, mono yo cihwani ce mbeka co Mulungu. ⁵ Hambi ase, nha si cikwiyiganula sese co weneco, langa ’se cikumuganula Kilisito mono yo Muwaha, nase nha cili wetumami wenyu ku soko ya Yesu. ⁶ U Mulungu mono yatya, “Uwuzelu wubulile mu wutitu,” yo yuyo kanyhi mono yakuwa kuzibulilila ne zinhumbula zetu, kanyhi yo kacipelaga u wumanye wose wo lukumyo lo Mulungu, wono wukuwa kung’alala mu wusu wa Kilisito. ⁷ Hamba nhavivyo, ase mono cina cico i ciwutwa co Muhe, cihwanile i viya vye lilongo, ho yijele calinze vyono i vilungo vivyo viwaha, vikulawa kuli Mulungu hamba si muli sese co weneco. ⁸ Cikugazika nhondo zose, ninga hamba nhavivyo si cikukatala, kanyhi cikwihwelela, ninga si cikutukuwika mitima yaye, ⁹ cina walugu wenji, ninga wutazi wuli baho, hamba ciwe cikugwiswa ho hasi, ninga si cikongomezwa yaye. ¹⁰ Ase cikalaga cidinghuye mu miwili yetu nhondo zose i lifwa lya Yesu, uwumi wa Yesu nawo nhavivilya ho wanzalikwe mu miwili yetu. ¹¹ Heya, vyono mu mikalile yetu yose, cili mu mbali ye lifwa ku soko ya Kilisito, u wumi wakwe Yesu ho wanzalikwe mu muwili wetu wuwu wono wukufwa. ¹² Nha cinji wo wutya, i lifwa likwituma mugati mwetu, ninga nawo wumi wukwituma mugati mwenyu. ¹³ I Mandiko Gono Gelile gakutya, “Nehuwila, holeka nghalonga.” Nase nhavivyo ku soko yo wuwa ne nhumbula yiyo yo wihuwilo, cihuwiye, na holeka ku soko yiyo, nase cikulonga. ¹⁴ Nase cimanyile vyono, u Mulungu mono yamuzukula u Muwaha Yesu muli wafu, kocizukula nhavivilya na sese hamonga na Yesu, no kucinyasula hamonga nanye no kuciwika hali mwene. ¹⁵ Na zizi zose zili ku soko ye cambuzi cenyu nyenye, ho yiwe nha kotya, lihewa lyo Mulungu, likuwaficila wanhu wenji muno muno, nawo ho wasume kulavya lilumbo muno muno ko lukumyo lo Mulungu. ¹⁶ Holeka si cikutimba, u munhu wetu wa kunze hamba yakombipe, ninga mugati mwetu, cikunozwa wapya nhondo zose. ¹⁷ Hambi u wugaye wono cikuwutuga nha wudodo, kanyhi wa cidaha cidodo vivi du, ninga hamba nhavivyo, wosuma kucipela u lukumyo lono lucizize u wulanjilile wetu wose, u lukumyo lono lusina ndumo. ¹⁸ Holeka ase cikuvilanjilila muno muno vinhu vyono si vijelaga, hamba si vinhu vyono vijelaga. Ku soko vyono vijelaga, nha vya cidaha cidodo du, ninga avilya vyono si vijelaga, vyo vikalaga cibitilila.

¹ Hambi nha cimanyile vyono, kaya yiyi ya kono’nze yono cikaye lulu, wo wutya u muwili wetu, kolo yeza yapambulwa, u Mulungu nha kocipela kaya yinji kuko ku wulanga, kaya yono yayinoza mweneco yo wikalo we cibitilila, yono si yizenjigwe ne miwoko. ² Hambi mu wikala u kaya yiyi, nha citamikaga, cikuhila muno muno kuvwikwa mu wikalo wetu wono wuli ku wulanga. ³ Heya yicinojeye civwikwe nhavivyo, ho cize cilece kwima ha mwande yo Mulungu akuno cisina vivwalo. ⁴ Holeka lono cikali cili mu kaya yiyi ya kono’nze, cikulila vyono cikanyicizwe, ninga si vyono cikuhila kuwuvula u muwili wuwu wono wukufwa, aa ng’o, langa cikusulumila ho civwikwe awulya wono si wufwizaga, acilya cono cifwizaga, ho cimelelwe lukulu no wumi. ⁵ U Mulungu mweneco yaciwikaniziza u wukawanizwe wuwo, nayo yacipela u Muhe wakwe wuwe co cipingo ca vyose vyono yaciwiciye. ⁶ Holeka ase cina nhumbula yono yikamile nhondo zose. Kanyhi cimanyile vyono mu wikala mu muwili wuwu du, cikuwa cili kutali no Muwaha. ⁷ Hambi nha cikujendela wihuwilo, hamba si ko wuwone yaye. ⁸ Ninga hamba nhavivyo, cikamile du. Kanyhi cali cende cihame mu wikalo wuwuno wa mu muwili no kuhamila kuli Muwaha. ⁹ Ninga hamba nhavivyo, i mbaha yono yicizize muno, cikuhidimbala muno cimwendeze, lono cikali cili bahano mono yinze, hamba kuko. ¹⁰ Hambi ase wose nha yowa yicinojeye kwima he’goda lyo wuling’anizi lya Kilisito, u munhu wo wose, ho yabocele zono zimunojeye, nha vyono genha i metumo gakwe gono yetumaga, lono yali yakali yekaye mononze, hono maswanu, hamba mabi. ¹¹ Ale, ase ciyimanyile soko yo kumogopela u Muwaha, holeka ku soko yiyi, cikwihinda kuwakwega wanhu. U Mulungu yacimanyiye lukulu, nane nitumbiye vyono na nyenye nhavivyo mucimanyiye lukulu mu viselinji vyenyu. ¹² Si vyono cikusaka kwiyendeza kuli’nye, ng’o, langa cikusaka cimulajilenyi zisoko zetu, zono zikuleka cikwilumbila muli nyenye, ho mutuje soko yo kuwapitula awalya wono wakwiyilumbila vyono wenha, u wuwe wawo wa kunze, si nha vyono wenha mu nhumbula. ¹³ Hono ciwe cikwijela nha cina lukwale, ako ko ko Mulungu, na hono ciwe cina mahala gono gatulile, ayo cowa co cambuzi cenyu. ¹⁴ Hambi ase nha citemigwe no wendo wa Kilisito, mono cikwizuka nha vyono u munhu monga du, yafwa ku soko ya wose, nayo yiyo yikulajila nha vyono, wose wakuhangana i lifwa lyakwe. ¹⁵ Umwene yafwa ku soko ye wanhu wose, wawalya wono wakuwumipa, ho walece kwiwumipila weneco, langa wawe womi ku soko yo mwene mono yafwa, yakazukulwa ku soko yawo. ¹⁶ Holeka ku wulawa lulu, ase si comumanya munhu wo wose mu nzila ye cimunhumunhu. Hamba yiwe camumanyila Kilisito mu nzila ye cimunhumunhu, ninga alu si nhavivyo kanyhi. ¹⁷ No munhu wo wose hono vilunze na Kilisito, yakuwa ciwumbwa cipya, i ze katali zapuluta, alu zaweza mhya. ¹⁸ Na zizi zose wo mulimo wo Mulungu mweneco kucilamula ase no mweneco mu nzila ya Kilisito, yakawa kucipela nase u mulimo wo kuwanoza wanhu welamule nayo. ¹⁹ Wo wutya, u Mulungu yakuyilamula yinze no mwene mu nzila ya Kilisito, no kuleka kuwawalila wanhu u wubi wawo. Umwene yacipela nghani yo kuwalamula i wanhu no Mwene. ²⁰ Holeka ase cili watumwa so Kilisito, nayo Mulungu mweneco yakucitumamila sese, cimunenenyi anye. Holeka cikumunenenyi ku so Kilisito, mwilamule no Mulungu. ²¹ Kilisito yali yasina wubi, ninga Mulungu yamunoza yawe wubi ku soko yetu, nase mu wilunza nayo, ho cisume kuhanga u wiling’ano wo Mulungu.

¹ Holeka nase vyono cikwituma mulimo hamonga no Mulungu, cikumunenenyi mulece kuvumila i lihewa lyo Mulungu lyono mwabocela, lyajilile bwete. ² Hambi u Mulungu nha yakutya nhavi; “Mwi’daha lyono lyali linojeye, lo nakuhulicila. Mwi’zuwa lyono lyali linojeye wuponywe, baho ho nakutaziza.” Lanje, aluno ho hanojeye muno muno, kanyhi izuwalili lyo lizuwa lye mhonelo! ³ Na kanyhi vyono si cikusaka ciwe ne lilema lyo lyose mu witumami wetu, holeka si cendile kumuwicila munhu wo wose cikobazo co cose. ⁴ Langa cikuhila kwilajila nha vyono ase mbeka cili wetumami wo Mulungu muli zose, ko wukangalizi wuwaha mwi’pango lyo wutamiswe, mu magayo na mu wusungu wuwaha. ⁵ Cikatowangwa, cikatajilwa mu jela, no kuhowelezwa cagalanze, cetuma mulimo kuciza sunga cikakatala, cikagona meso hamba kulya. ⁶ Cikwilajila nha vyono cili wetumami wo Mulungu mu nzila yo wele wa mu nhumbula, mu wumanye, mu wukangalile, mu wunhu wuswanu, ko Muhe Mono Yelile, na ko wendo we mbeka wono wusina hamba wukonji, ⁷ mu nghani ye mbeka, na kwe vilungo vyo Mulungu. No wiling’ano, co citwalo cetu co kwitaziza ku lubavu lo kulume no lubavu lo kucekulu. ⁸ Nhondo zose ciwikanize kutuga lukumyo, kupegwa lilumbo no kubedegalwa, kuhoswa no kukumywa. Cikwijela nha cili walambi, kumbe ase ho cikulonga mbeka, ⁹ cikwijela nha wanhu wono si wamanyice, kumbe ho cimanyice kuli wanhu wose, cikwijela nhe wanhu wono wafwiye, kumbe nha vyono mukuwona, ase ho cili womi du. ¹⁰ Hamba ciwe catuga wulipicizwe, ninga si cikawulagwa yaye, hamba ciwe cina wuzinguce, ninga cikusangalala nhondo zose, hamba ciwe ciciwape muno muno, ninga cikuwagolifya wanhu wenji, cijelaga nha cili wanhu mono cisina cinji co cose, ninga kumbe ho cina navyo i vinhu vyose. ¹¹ Nye Wakolinto nyo wandugu zetu wendece, calongana nanye calinze, ne zinhumbula zetu zili calinze muno muno. ¹² Na hono muwe mukuwona ko cili cikobazo co cose cilya, i cikobazo cico cili muli nyenye nyo weneco, ninga si cili kulubavu lwetu yaye. ¹³ Alu nghulongana nanye nha wanangu, nghutya, ale mudigule zinhumbula zenyu, nha vyono ase cikanoza. ¹⁴ Mulece kwihwana ne wanhu wono si wehuwiye. Alu ’mbi u wuswanu no wavu, vyosuma kwilumvya? Hamba u Wuzelu no wutitu, vyosuma kuwezana hamonga? ¹⁵ Alo Kilisito kosuma nhawule kwilumvya na Setani? Hamba mono yehuwiye, ho kosuma kulagana nhawule na mono si yehuwiye? ¹⁶ Hamba howuli wulaganeci we Nyumba yo Mulungu ne vihwani vyo wulambi? Hambi ase nha cili wuhembelo wo Mulungu mumi. Nha vyono Mulungu mweneco yalonga yakatya, “Nowunoza u wikalo wangu wuwe muli wene, na muli wene mo nowa jendela, nane nowa Mulungu wawo, nawo wowa wanhu wangu.” ¹⁷ Holeka u Muwaha kanyhi yakutya, “Ale muwuce muli wene, mweze musiwanuce mulece kupamiziza lukulu cinhu cavu nane ho nomubocelenyi. ¹⁸ Ane nowa Sogo yenyu, nanye mowa wanangu, we cilume na we cicekulu u Muwaha Mono u Mudaha Vyose, vyo yakutya.”

¹ Holeka nyo wendece, vyono cakondya kupegwa i vilagane vivyo, yicinojeye nase ciyeze muli zose zono zosuma kucitipiza mu miwili, sunga na mu zinhumbula zetu, ho ciwe celile muno muno, no kwikala mu mikalile yono yimogopile Mulungu. ² Ale cikulomba mu cipele cilejeho mu zinhumbula zenyu! Ase cikali namusutizya munhu wo wose, hamba ku muhodanga munhu wo wose, hamba kumukonga munhu wo wose. ³ Ane si nghulonga nhavivi ho nimuling’anize munhu wo wose, hambi nha nakondya kulonga vyono anye muli mugati mu zinhumbula zetu, sunga ku wufwizane, hamba ku wuwumipane hamonga. ⁴ Nina witumbilo wuwaha muno muno, lono nghulongana nanye, kanyhi nghwilumbila muli nyenye! Hamonga no wugaye wetu wose, alu nakondya kutuga wutuzwe no wusangalale wuwaha muno. ⁵ Hamba lono caficila Makedoniya, si casuma kuceha, hambi nha cali cipilimwe ne magayo mbavu zose, kudeha, milewo, kugati nako woga. ⁶ Ninga Mulungu mono yakuwapela vilungo wono wasoceye, yakacipela vilungo nase so wuze wa Tito. ⁷ Ninga si so wuze wakwe Tito du wono wacisangalaza, ku soko yo wusindamikwe wono mwamupela. Mwene yaciloloseza nha vyono mwendile muno kwiwona nane, kanyhi na vyono mwina wukalale, na vyono mukuhila kunhetela. Ne nghani yiyi yikusangalaza muno. ⁸ Holeka hamba niwe namukalazenyi so baluwa yangu, ninga ane no mweneco si nghuwona soko yo kukalala. Heya, manyile vyono baluwa yiyo yikamupelenyi wukalale, ninga wali wukalale wa cidaha cidodo du. ⁹ Ninga alu nina wusangalale, singhusangalala vyono namukalazenyi, langa vyono wukalale wenyu wamunozenyi mupitule wuhile wenyu no kunena. Wukalale wuwo wetumamilwa no Mulungu, holeka ku soko yiyi ase si camutendelenyi nghani yo yose’mbi. ¹⁰ Hambi u wukalale wono witumamilwaga no Mulungu, nha wuletaga wupituce wa mu nhumbula, u wupituce wono wuletaga mhonelo, holeka hasina soko yo kuwona nha wambuce. Ninga u wukalale we ciyinze-yinze, awo wuletaga ’fwa. ¹¹ Alu mosuma kuwona vyono u Mulungu yawitumamila wuwo u wukalale wenyu. Lanje vyono mweza muli wahidimbazi, mu wilajile vyono musina malema go gose, mu makuwo, mu wutinuswe no woga, mu wuwa ne nyhilu yo wituma ziswanu, mu wogopo Mulungu, akuno mwiwikanize nhondo zose kwihoma ne zinghani zose zono si zinojeye. Mwakondya kwilajila nha vyono musina yilema lyo lyose mu nghani yiyi. ¹² Holeka hamba niwe nghandika baluwa yiyilya, si nayandika ku soko yo munhu musutyi, hamba si nayandika ku soko yo munhu mono yasutizywe. Ane nayandika ho zijele calinze hali Mulungu vyono mwina no wuhidimbale ku soko yetu. ¹³ Holeka nase cikatuzwa muno muno. Hamba nhavivyo, si vyono catuzwa du, langa vyono na Tito nayo yakacisangalaza muno ne nyemo yono yali yena nayo, i nyemo yono yalawilila mu wusangalaze wenyu wono mwamusangalaza inhumbula yakwe. ¹⁴ Holeka nane nimukumizyenyi muno hali mwene, akuno manyiye lukulu, vyono si nghwikonga mu nghani yiyo. Hambi nha cikuwa kumulonjelenyi nghani za mbeka nhondo zose, holeka na lono cikumukumizyenyi ha mwande ya Tito, si nghani za wulambi yaye, langa za mbeka. ¹⁵ Holeka no wendo wa mu nhumbula yakwe kuli’nye, wokonjelezeka muno, ko muno lono yakukumbucila vyono anye wose muli cihuliko, na vyono mwamubocela mwene ne cogopo ciwaha hamonga no wucicime. ¹⁶ Nane nghusangalala muno muno vyono aluno nosuma kumwitumbilenyi muno muli zose.

¹ Kanyhi nyo wandugu zetu, cendile cimumanyizenyi ze lihewa lyono u Mulungu yagapelile makanisa ga Makedoniya. ² Wose wono wehuwiye wono wali kuko, vyono watuga majelo mawaha so wugaye, ninga hamba nhavivyo inyemo yawo yikonjelezeka muno, sunga wakawa wacemezi muno, hamba wawe wali waciwa muno muno. ³ Nosuma kuhomelela vyono wali wacemezi mu nghango ye vilungo vyawo no kuciziliza. Kanyhi ko wuhile wawo weneco du, ⁴ wakacinena muno wapegwe cilejeho co kuhanga nase mu witumami wuwu wo kuwataza wanhu wo Mulungu wono wali mu Wuyahudi. ⁵ Ayo yali yo nghani yono si cali ciyilanjiliye hamba hadodo! Hambi nha wamula kwiyilavya weneco kuli Muwaha, hanyuma ho wakawa kwiyilavya na kuli’se nhavivilya nha vyono winha uwuhile wo Muwaha. ⁶ Holeka cikamunena Tito mono yawamula u mulimo wuwu, yamutazilizenyi, ho musume kuwituma u witumami wuwuno wo wendo muli nyenye. ⁷ Vyono mukwizize vyose, mu wihuwilo, wulonje, wumanye, wupiligazi wo kwituma i ziswanu, sunga na mu wendo wenyu wa kuli’se. Holeka, cikuhila mucile muno mu witumami wuwuno wo wendo. ⁸ Si nghumupelenyi yilajilizo, langa nghuhila kulajila du nha vyono wanji wena wuhidimbazi wo wutazi, ho sume kuwumanya u wendo wenyu vyono wa mbeka. ⁹ Hambi anye nha mulimanyile lihewa lyo Mutwa wetu Yesu Kilisito, nha vyono mwene hamba yawe yali yakwizize vyose, ninga yakenoza nha muciwa ku soko yenyu, anye ho mugolipile mu wuciwa wakwe. ¹⁰ Ku soko ye nghani yiyi, ane nghumutyenyi nhavi, yinojeye mwitume zizilya zono mwamula mwekazo. Vyono yo nyenye mwali walongozi kusola nghanzo yo kulamula kwituma nhavivyo. ¹¹ Ale muwukondelezaje u mulimo wuwo, mu nghango ye nyhilu yono mwina nayo yo kulavyo ’tazi, mwitumaje nhavivyo ko wuhidimbazi, muwukondelezeze mu nghango nha vyono mosuma. ¹² Hono munhu yawe yena mutima wo wutazi, u Mulungu nayo kabocelaga co cose cono u munhu yuyo kosuma kulavya, Mwene si kakanililaga yaye. ¹³ Ninga si munojeye monjelezwe wugaye wenyu, wanji ho wasume kucepulilwa umutegulo wawo wo kulavya wutazi, aa ng’o, ninga yicinojeye cilanje u muling’ano wa kose kose hamonga ne ling’ani. ¹⁴ Co cose cono mwina naco cono cicizize, yinojeye cico ciwataze awalya wono wena wanjile, nawo kolo watuga vyono vicizize, ho wamutazenyi nanye mu visakwa vyenyu, na mu nzila yiyo, ho mowa mweza muli muling’ano. ¹⁵ Nha vyono i Mandiko gakutya, “Mono yakonghola ko winji, hamba siyatuga kuciziliza, nayo mono yakonghola vicefu, hamba si yanjiza.” ¹⁶ Nghumulumbo Mulungu mono yamupela Tito i nhumbula yono yina nyhilu nhe yangu yo kumupelenyi wutazi. ¹⁷ Ninga si yalumba ku soko vyono camulomba yanoze nhavivyo, langa sunga no mweneco yali yena nyhilu muno yo wutazi, sunga yakasuma kulamula mweneco du, ho yaze kuko kwenyu. ¹⁸ Alu cikumutumiliza hamonga no ndugu yetu yunji mono u lukumyo lwakwe lutandaye mu makanisa gose ku soko yo wuganula u Luganuzi Luswanu. ¹⁹ Hamonga na zizo, mwene yehagwa ne makanisa gose, ho ciwe jendana nayo lono cikwitumama u witumami wetu wuwuno wo wendo, witumami wono cikwituma so lukumyo lo Muwaha no kulajila wuhile wetu wuswanu, wo kuhila kulavya wutazi. ²⁰ Cikuhila kwilega yunji yalece kucihosa ku soko yo wulanjilizi we vipegwa vyono civilavizye sese. ²¹ Ninga wuhile wetu, cikusaka citume viswanu du hali Muwaha, sunga na hali wanhu nhavivyo. ²² Hamonga ne wandugu zetu wawo, cimutuma no ndugu yetu yunji, mono cakondya kumuwona kali kenji, vyono u mwene nayo yena wuhidimbazi wo wutazi, sunga na lulu yena witumbilo wuwaha na nyenye. ²³ Tito yo muyangu, mono cikwituma hamonga u mulimo ku soko yenyu. Ninga kuli za awano wandugu zetu wanji wono vikuzana nawo, awo watumwa ne makanisa nu lukumyo lwa Kilisito. ²⁴ Holeka muwalajilaje u wendo wenyu, i makanisa ho gasume kuwona vyono cina ling’ani yo kwilumba so nyenye.

¹ Hambi nhe kataza lya bwete kumwandicilenyi kuli zo witumami wenyu wuwo, ku soko ye wanhu wo Mulungu wono wali ku Wuyahudi. ² Manyile vyono mwina nhumbula yo wutazi, nane nghalumba ku soko yenyu so nghani yiyo kuli wanhu we Makedoniya. Nawalonjela nghatya, “Wandugu zetu wono wali ku Akaya, wali wewikanize kunoza wutazi ku wulawa mwekazo.” Holeka u wihinde wenyu, wakondya kuwaswaswaniza wanhu wenji muno. ³ Alu nghuwatuma wandugu zetu wawo, u wilumbe wetu wa muli’nye, ho wijele vyono si nghani ya bwete, na kanyhi vyono mwiwikanizize lukulu so wutazi wenyu nha vyono nalonga. ⁴ Yilece kuwa kanyhi i wanhu we Makedoniya kolo wakuza hamonga nane, cimwaganenyi mukali newikaniza, baho ase cowa cakozwa cevu, ne cevu naco cono mocituga nyenye nyo weneco, cowa si cakulonga, vyono ase cowa cakondya kumwitumbililenyi lukulu. ⁵ Holeka mbona viswanu vyono yinojeye niwanene wandugu zetu wawa, wanongolele kuza kwenyu, ho wasume kuviwikaniziza lukulu vipegwa vyenyu viwaha, navyo viwe vyawikanizwa kolo nghuza, vyono mwehuwiza. Ne vipegwa vivyo, vilajile mbeka, nha vyono vilavywa ko mutima muzelu, hamba si ko wudindimizwe yaye. ⁶ Ninga mweze kukumbucila vyono, “U munhu mono yakuhadika ko wucefu, nayo kolo dudula wucefu, nayo munhu mono yakuhadika ko winji, ale, kolodudula ko winji.” ⁷ Holeka munhu wo wose yalavye mu nghango nha vyono yalamuye, ninga yiweze ko mutima muzelu, hamba si ko wukalale, hamba kwe dindimiza, hambi u Mulungu, nha kamwendaga u munhu mono kalavyaga no wusangalale. ⁸ U Mulungu kosuma kumupelenyi kuciza vyono mukuhila, ho muwe muvikwizize vyose mu visakwa vyenyu, ho mucile kuwa watazi mu milimo yose miswanu, ⁹ nha vyono gakulonga i Mandiko Gono Gelile, gakutya, “Mwene kalavyaga ko wuswanu kawapelaga waciwa, no wuswanu wakwe wikalaga cibitilila.” ¹⁰ Nayo u Mulungu mono kamupelaga mbeyu mulimi, no kumupela i ndigwa yo kulya, komupelenyi nanye zimbeyu zono mukuhila, nayo kozicindisa no kuziwilusa, hamonga no kumupelenyi ndudula mbaha ku soko yo weza mutima wenyu. ¹¹ Nayo komugolifyenyi nhondo zose muli vyose, wanhu ho wasume kumulumbo Mulungu, ku soko ye vipegwa vyenyu vyono wakuvibocelela mu miwoko yetu. ¹² Hambi u mulimo wuwu wono welile wono mukuwituma, si vyono wowataza i wanhu wo Mulungu du, langa wowanoza wanhu wenji wamulumbe Mulungu. ¹³ Na ku soko ye citanjilo cono cikwijela so mulimo wetu wuwu, i wanhu womukumyo Mulungu ku soko yo Luganuzi Luswanu lwa Kilisito lono mukuluvumila, kanyhi na ku soko yo wuswanu wono mukuwatendela wene hamonga ne wanhu wose. ¹⁴ Holeka wojendelela kumulombelenyi ko mutima wose, ku soko ye lihewa lyono u Mulungu yamupelenyi. ¹⁵ U Mulungu yalumbwe so cipegwa cakwe cono ase si cosuma kucikumya nha vyono yicinojeye.

¹ Ane yo nene no mweneco Pawulo, mono nghwijela nili mupolo lono nili hamonga nanye, ninga ho nili mukali lono nili kutali nanye, nghumunenenyi ko lusungu no wuswanu wa Kilisito. ² Nghumunenenyi mulece kusagahiza ho niwe nili mukali kolo neza kuza, hambi nha manyiye lukulu, vyono nowakalipila wose wono wakwihwesa vyono, ase cikaye mu mikalile ye ciyinze yinze. ³ Heya mbeka cikaye mononze, ninga si cikwihoma ciyinze yinze. ⁴ Hambi i vitwalo vyono cikwitumamila mu wihomi wetu, nha si vitwalo vye ciyinze yinze, langa vyo vilungo vyo Mulungu vyono vigwisaga magomawakali gose. Nase cikusuma kuwugwiza u wusugu-sugu wose wo wulambi, ⁵ no kuvikumulanga vimizi vyose vyo wiwoni, vyono vikwimila u wumanyo Mulungu, cikugakwega i mahweso gose, no kuganoza gamuhulice Kilisito. ⁶ Mulawa mweza kuwa mwakwilanicila mu cihuliko, ale, ase ciwikanizize lukulu kuwulipiciza u wula cihuliko wose. ⁷ Anye waco mulangaga za kunze du. Wulenyi, ho yuli munhu wo wose mono yakwihwesa vyono mwene yo wa Kilisito? Ale viswanu! Ninga yehwesaje nhavivilya nha vyono nase cili wakwe Kilisito nha vyono mwene yuyo wa Kilisito. ⁸ Hamba niwe nghwijela nha naciziliza muno u wilumbi wangu so wulajilize wono u Mulungu yacipela, u wulajilize wo kumusikamyenyi nyenye, hamba si so kumugwisenyi yaye. ⁹ Si nyendile mwihwese nha vyono nghusaka kumogofyenyi so baluwa zangu. ¹⁰ Yunji yadahile kutya, “Baluwa za Pawulo nzito, kanyhi zina nghani zono zili vilungo, ninga mwene lono yali hamonga nase, yo munhu musocele, sunga lono yakuduwa du, koziwona i zinghani zakwe kotya si cinji ng’o.” ¹¹ No munhu mono yakulonga nhavivyo, ciba yakumbucile vyono, hasina wisimajile na zono candikaga mu zibaluwa zetu lono cili kunji, na zono cokwituma lono cowa cili baho hamonga nanye. ¹² Hamba nhavivyo, si cali cisume kwijelela kwiwika hamba kwiyihwananiza na awalya wanhu wono wakwiyikumya weneco. I wanhu wono wakwiyinoza weneco kuwa nha cipimo co kwiyipimila weneco, kanyhi wakwiyiling’aniza weneco wose, wawo wasina wizuce. ¹³ Ninga ase si cosuma kwiyilumba kuciza ha nghango, langa u wilumbe wuwo wowa wuli mu nghango yo mulimo wono u Mulungu yacipela, u mulimo wono cikuwituma sunga na kuko kwenyu. ¹⁴ Alu nanye vyono muli mu nghango yiyo, nase si casuma kuciza nghango yiyo lono cazizo kwenyu, kumuletelenyi u Luganuzi Luswanu lwa Kilisito. ¹⁵ Holeka nase si cikwilumbila mulimo wono wanji wetuma, si nhe nghango yono capegwa, langa citumbiye vyono u wihuwilo wenyu wocila kuwiluka, nase ho cituje mulimo muwaha muno muli nyenye mu nghango yi yilya du yono yaciwicila Mulungu. ¹⁶ Baho lu, ho cosuma kuluganula u Luganuzi Luswanu na mu zisi zinji zono zili kutali na kono kwenyu, na yowa si nghani yo kwilumbila mulimo wono wetuma wanhu wanji kunhu kunji. ¹⁷ Nha vyono i Mandiko gakulonga gakutya, “U munhu wo wose mono yakusaka kwilumba, yimunojeye yelumbile muli yono yetumo Muwaha.” ¹⁸ Nayo mono yakuvumilwa, si yulya mono yakwiyikumya mweneco ng’o, langa yo yulya muno Muwaha yakumukumya.

¹ Mwali munghangalilile hadodo du, hamba niwe nha nili mulele ku lubavu lunji! Heya, ale munghangalilile ta hadodo. ² Ane nha nghumuwonelenyi wivu, ninga wivu wa kuli Mulungu, hambi anye nha mwihwanile u muhinza musindile mono nimubanyiye u mulume monga du, nayo yo Kilisito. ³ Ninga nghogopa yilece kuwa nhe lizoka lyono ko wusugu walyo wo wulambi, likamukoca Hawa, i mahweso genyu gadahile kwajilizwa no kuwuleka u wihuwilwa wenyu we mbeka kuli Kilisito. ⁴ Hambi nye nha mukumukangalila u munhu wo wose mono kokuza no kumuganula Yesu mono yesimajiye na yulya mono camuganula, kanyhi mukubocela muhe no luganuzi vyono visimajiliye lukulu no Muhe no Luganuzi vyono mwavibocela kulawa kuli’se. ⁵ Si nghwihwesa vyono ane nili mudodo si nha wawo “I Watumwa wenyu wono wakumucile!” ⁶ Lunji nowa sina wunghula wo wulolosa milonjele, ninga u wumanye awo langa nina nawo, ne nghani yiyi cayilajila calinze kuli’nye hanhu ho hose, na mu vipango vyose. ⁷ Hamba si namudayenyi musahala wo wose, lono namuganulilenyi u Luganuzi Luswanu lo Mulungu, langa nenenenyheza ho sume kumwinulenyi anye. Alo nanoza vibi? ⁸ Lono netumaga mulimo muli’nye, i visakwa vyangu nha vyalawaga mu makanisa ganji. Nha cinji wo wutya nawasolela sawo yawo, ho sume kumwitumamilenyi anye. ⁹ Na lono nali nanye, hamba si namugaza munhu wo wose so wusaka pesa, langa i wandugu zetu wono wakalawa Makedoniya, wo wandetela vyose vyono nasakaga. Kanyhi nelanjilila muno muno ho ndece kuwa mutegulo kuli’nye, mu nzila yo yose yilya, na nojendelela du kunoza nhavivyo. ¹⁰ Nane nghwihuwiziza mu mbeka ya Kilisito yono yili muli’ne, nha vyono hasina cono cosuma kunyimila mu wilumbe wangu so nghani yiyi hanhu ho hose mu Akaya. ¹¹ Alo nhawule nghulonga nhavivi? Vyono si nimwendilenyi nyenye? Ninga Mulungu yamanyile vyono nimwendilenyi nyenye muno! ¹² Nojendelela kwituma du nha vyono nghwituma alu, ho ndece kuwapela cilejeho awalya wono wakusaka kutuga icilejeho co kwilumbila nha vyono ati wakwituma mulimo nha sese. ¹³ Hambi wawo nha wo watumwa wo wulambi, wetumami wo wukonji, wono wakwinoza nha watumwa wa Kilisito. ¹⁴ Kanyhi hamba si nghani ya wizine, hamba na Setani mweneco nha kenozaga kawa nha malayika wo wuzelu! ¹⁵ Holeka si nghani mbaha yaye, hono wawo i wetumami wakwe wenoze nha wetumami wo wiling’ano. Ninga mudumo wawo, wocituga cico cono ciwanojeye vyono genhe metumo gawo. ¹⁶ Kanyhi nghutya, Munhu yalece kumbona ane nha nili mulele. Ninga hono munyihweseze nhavivyo, ale munozaje nha nili mulele nhavivyo du, nane ho nicituje co kwilumbila hadodo vivi. ¹⁷ Naco cono nghucilonga aluno, si nghulonga cono yandajiliza Muwaha, hambi mu nghani yiyi yo wilumbe, ane nghuyilonga du nha nili mulele. ¹⁸ Alu vyono kowali wenji wono wakwilumbila za mononze, ale nane nhavivyo nokwilumba. ¹⁹ Anye muli we mahala, na holeka mukuwakangalila i walele! ²⁰ Mukusuma kumukangalilila sunga no munhu mono yakumunozenyi muwe wawanda, u munhu mono kumusolelenyi vinhu vyenyu, mono yakumwiwonelenyi, mono yakumubedegalenyi no kumutowenyi ku wusu! ²¹ Nane nghuvumilila cevu, vyono ase cali cisoceye mu wituma zizi zose. Ale du kanyhi, na yiwe vyono yowa, ninga hono hawe hoyuli yunji wo wose mono yakwijelela kwilumbila muli cinji co cose, alu nghulonga nha munhu mulele, nane nokwijelela nhavivyo. ²² Wule, alo wene Wahebelaniya? Ale na nene nhavivyo. Hamba wene Waisilayeli lo? Nane nhavivyo. Wene wamu lulelo lwa Abulahamu? Hamba na nene. ²³ Alo iwene wetumami wa Kilisito? Na nene ye, alu nhondo, neza kulonga cimangha-lukwale, ane nili mwitumami wa Kilisito kuciza wene. Ane netuma mulimo muzito muno muno, nadindilwa mu jela kali kenji muno, nghatowangwa kali kenji, sunga nghawa nili behi no kufwa kali kenji. ²⁴ Kali kahano nghakunwa viboko vivilya makumi madatu ne cenda ne Wayahudi. ²⁵ Nakunangwa ne viboko kadatu, nghabogolangwa ne mabwe kamonga, kanyhi nghabenecelwa ne nghalawa mwi’lenga kali kadatu, na kamonga nekala mumo mu malenga cilo cose sunga wukela, kanyhi nghaswa muno misi yose. ²⁶ Kenji na kenji mu mihinzo yangu, netang’anilaga na mbali nyinji, zimbali zo wulapuce we malenga mu makolongo, zimbali ze malimu makali, zimbali ze wahizi, zimbali zono zalawaga kuli wanyawusi wayangu Wayahudi, na zono zalawaga kuli waono si Wayahudi, ne zimbali za mu makaya mawaha, zimbali za mu mbago, zimbali za mwi’lenga, ne zimbali zono zikulawa kuli wandugu wo wulambi! ²⁷ Netuma mulimo hamonga ne magayo, nekala meso hamba kugona cilo cose kali kenji, nghadabuka no kuwona nyhilu. Nghaleka kulya, nghekala mu mbeho nghali, akuno sina myenda. ²⁸ Ninga hamonga na zinji nyinji, kocili cono cikumvuna nhondo zose, nha cinji u mulimo we makanisa gose. ²⁹ Hono hoyuli yunji musocele, ale nane nili musocele nhavivyo, na munhu wo wose hono yakwejelwe mu wubi, nane nghutuga wukalale muno. ³⁰ Holeka hono yiwe yinojeye nilumbe, ale, nokwilumbila wusocele wangu. ³¹ U Mulungu Sogo yo Muwaha Yesu, ilitagwa lyakwe lilugutwe cibitilila! U Mwene yamanyile vyono si nghulonga wulambi. ³² Lono nali Damesiki, u muwaha we yisi, mono yali yali hasi yo mutemi Aleta, yalidimaga likaya lya Damesiki, ho yasume kunyibata. ³³ Ninga nghatimizizwa mu nhoto mbaha, nghakozwa mwidilisha sunga ko kunze, holeka nghatiga mu miwoko yakwe.

¹ Mulece nilumbe, hamba yiwe si yinojeye. Ninga nolonga luno kuli zo wulajilwe no wugubulilwe vyono yamhela Muwaha. ² Nimumanyile munhu yunji Mukilisito, mono mu myaka i kumi na mine yono yipulute, u munhu yuyo, yakasolwa yakategulwa sunga ko ku wulanga we kadatu. (Ninga langa simanyile vyono, lono yali yali kuko, hono yali yali mu muwili, hamba mu muhe azo zo Mulungu yamanyile.) ³ Nghuwuyajiza kanyhi kutya, manyile du vyono u munhu yuyo, yasolwa sunga ko ku Paladiso. (Langa si manyile hono yali yali kuko mu muwili hamba mu muhe, u Mulungu yamanyile.) ⁴ Ninga kuko yazihulika zinghani ze cinyele, zono u munhu siyanojeye kuzilonga. ⁵ Holeka nokwilumbila munhu yuyo, ninga si nokwilumba nene no mweneco, langa mu wusocele wangu du. ⁶ Na hono nali nyende kwilumba, si nali niwe nili mulele hamba hadodo, hambi nha nali niwe nghulonga ze mbeka du. Ninga alu si nosuma kwilumba, hambi nha sinyendile munhu yunji yanyihweseze kuziza nha vyono yakumbona no kuhulika kulawa kuli’ne. ⁷ Ninga ho ndece kwilumba so zinghani zizi zimbaha zono nagubulilwa, napegwa wusungu mu muwili wangu kotya yimiya, u mwitumami wa Setani, mono yakunhowa, ho ndece kwilumba kuciza. ⁸ Nane nghamunena Muwaha kadatu so nghani yiyi, ho yimbucile. ⁹ Ninga Mwene yakanhya, “Ilihewa lyangu likukwiliye, hambi vilungo vyangu nha vikwilanicizwaga lono wuli mu wusocele.” Ninga ane nyendile muno kwilumbila wusocele wangu, ho vilungo vya Kilisito vikale muli’ne. ¹⁰ Holeka nyheye kanyhi nyendezwe du, hono mu wusocele, mu wubedegalwe, mu wugaye, mu wuwinjilizwe, na mu magazo ku soko ya Kilisito, hambi lono nili musocele, nha ho nghuwela nili vilungo. ¹¹ Alu naweza nha nili mulele, ninga yo nyenye mono mundindimize ho niwe nhavivyo. Hambi anye, nha yo nyenye mono mwali munojeye munumbe. Vyono, hamba niwe si nili cinji yaye, ninga hamba nhavivyo, ane si nili mudodo kuciza wawo i “Watumwa wenyu wono wakumucile.” ¹² I mapoto ne mezino vyono vikulajila calinze vyono nane nili mutumwa, nha vyonozezwa muli nyenye ko wukangalizi wose. ¹³ Hambi cinhuci cono mwafutigwa kuciza makanisa ganji, langa hono si nene du mono si nasaka nimugazenyi ho mumhele u wutazi wenyu? Ninga hamba nhavivyo nghumulombenyi munenele so wuleka kumupelenyi i cilejeho cico co kumhela wutazi wenyu! ¹⁴ Ninga aluno nakondya kwiwikaniziza lukulu ku wuza kwenyu lwe kadatu, ninga si nomutunyenyi mumhele co cose. Hambi ane nha si nghulondola sawo yenyu langa nghumulondolenyi nyenye nyo weneco. Hambi nha yiwanojeye walezi wo wawawicile viwutwa i wana wawo, si nhe wana kuwawicila viwutwa i walezi wawo. ¹⁵ Ane nyendezwe muno nitumile cono nina naco, sunga ko ku wilavizya lukulu nene no mweneco, ku soko ye cambuzi ce zinhumbula zenyu. Alu hongo monyenda hadodo, vyono ati’ne nimwendilenyi anye muno muno? ¹⁶ Ale du kanyhi, ninga ane no mweneco si namuvunenyi yaye. Na lunji yunji kosuma kutya, “Pawulo vyono musugu, alu yakondya kumwibatenyi ko wusugu wakwe.” ¹⁷ Wulenyi nakondya kumukalipilenyi mu nzila ya munhu wo wose mono namutuma kwenyu? ¹⁸ Ane namucema Tito, nghawa kumutumilenyi mwene hamonga no ndugu yetu yunji. Ninga wulenyi, Tito yakamukalipilenyi? Alu si mumanyile vyono Tito na nene cikutongwa no Muhe yuyo yumonga? Na vyono cikalaga mu mikalile yono yihwanile? ¹⁹ Lunji mukwihwesa vyono, sunga nalu cikali cikwitetela hali’nye! Ninga cikuzilonjela i zinghani zizi hali Mulungu akuno cilunzize na Kilisito. Ninga soko ye zinghani zizo zose, nye nyo wedece wangu, ho musume kuzengwa. ²⁰ Nane nghogopa vyono na lunji kolo nghuza kwenyu, nomwaganenyi mu wuwe wono si wukunyendeza, nane baho lu, si noleka kuwa mu wuwe wono si mwendile nanye. Nane nghogopa yilece kuwa lunji ko wuli wugombane, wivu, makuwo, wubuguci, maheho, nzwaji ze caka caka, wusomenghanya, wiwoni, no wisagale muli nyenye. ²¹ Kanyhi nghogopa, na lunji kolo neza kuza mu muhinzo wuwo wono nokuza, u Mulungu wangu komhela u wula nyemo hali nyenye, nane nolila ku soko ya wenji wa muli nyenye wono wetuma wubi hamba kunena wuwo wavu wawo, ne masulumizi gawo mabi, hamonga ne mawubi gawo go wusenyha wawo, gono wali wakondya kwituma.

¹ Alu lo lwe kadatu lo kuza kwenyu. “I makamu go gose, gahulicizwe hamwande ye wahomelezi wejete hamba wadatu.” I Mandiko vyo gakutya. ² Nakondya kulonga nha vyono yali yinha mu muhinzo we kejete, nalu nghulonga kanyhi lono nili kutali nanye, vyono wawalya wose wono wetuma wubi hamba kunena yaye, sunga na wawalya wanji, kolo nghuza, ale woviwona. ³ Alu langa ho mokwiwonelela nyo weneco, vyono Kilisito yakulonjela muli nene. Mono kuli’nye, Kilisito si yasoceye yaye, langa i vilungo vyakwe vikwituma muli nyenye. ⁴ Hamba yiwe nha yatumbicilwa mu musalaba mu wusocele, ninga alu yakuwumipa kwe vilungo vyo Mulungu. Nase cisoceye nhavivyo so wilunza nayo, ninga ciwumipana hamonga nayo kwe vilungo vyo Mulungu ku soko yenyu. ⁵ Ale mwiyijele nyo weneco ho mumanye hono mbeka mwina wihuwilo. Mwiyihenje nyo weneco. Alo si mumanyile vyono Kilisito Yesu yali muli nyenye? Na hono yiwe si nhavivyo, anye waco mwalemwa. ⁶ Ninga nitumbiye nha vyono anye mumanyile vyono ase cikali nalemegwa. ⁷ Cikumulomba u Mulungu, ho mulece kwituma wubi wo wose, ninga si vyono ho cijele nha wanhu wono wakondya kusuma, langa ho musume kwituma ziswanu, hamba ase ciwe kwijela kotya nha cilemigwe. ⁸ Hambi nha si cosuma kwituma cinji kusutana ne mbeka, vyono u wusume wono cina nawo, nha cina wusume wo kuyijendeleza mbeka. ⁹ Ninga cikusangalala vyono cili wasocele, langa anye muli vilungo, holeka cikulomba muwuficile u wukwilanicile. ¹⁰ Ale holeka nghuyandika baluwa yiyi lono nili kunji, nilawa neza kufika kuko, ho ndece kuwa nili mukali kuli’nye no kuwitumamila u wulajilize wono napegwa no Muwaha, u wulajilize wo kumusikamyenyi hamba si wo kumugwisenyi yaye. ¹¹ Na ye ndumilizo, wandugu zangu, nghutya, mwikalaje! Mweze mukamile, muwibataje muno muno u wijize wangu, mweze mulaganiye kumonga, mwikalaje mwilamuye. Nayo u Mulungu wo wendo no mulamu, kowa hamonga nanye. ¹² Mwilamusizaje mu winonele wono welile. I wanhu wose wo Mulungu wono wali akuno, wose wakumulamusenyi muno. ¹³ Ilihewa lyo Mutwa wetu Yesu Kilisito, no wendo wo Mulungu, no wuhanje wo Muhe Mono Yelile, viwezane nanye wose.