1 WATESALONIKE

¹ Ane Pawulo, hamonga na Silivano na Timoteyo, cikumwandicilenyi anye mo mhuga ye likanisa lya ku Tesalonike, mo wanhu wo Mulungu Baba, no Muwaha Yesu Kilisito. Lihewa lyeze muli nyenye hamonga no Mulamu. ² Cikumulumba u Mulungu, ku soko yenyu nyenye wose nhondo zose, no kumukumbucilenyi nhondo zose mu wulombe wetu. ³ Nase cikumukumbucilenyi hali Mulungu Baba, vyono mukulajila u wihuwilo wenyu mu witume, na vyono u wendo wenyu wo wukumupelenyi u witume wo wupiligazi, kanyhi na vyono u witumbilo wenyu wukamile muli u Muwaha wetu Yesu Kilisito. ⁴ Mo wandugu zangu, hambi nha cimanyile vyono, u Mulungu yamwendilenyi, kanyhi na vyono yamuhagulenyi muwe wanhu wakwe, ⁵ vyono lono camuganulilenyi u Luganuzi Luswanu, si wali mu wulonje du, langa na mu vilungo vyo Muhe Mono Yelile, akuno cimanyiye lukulu, vyono, i nghani yiyo yali ya mbeka. Mumanyile vyono cekalanaga hamonga nanye, cekalaga ku soko ye cambuzi cenyu. ⁶ Nanye mukega u wuwe wetu, hamonga no kumwiga u Muwaha. Hamba muwe mwatuga wugaye, ninga mwayibocela nghani mu nyemo yono yikulawa mu Muhe Mono Yelile. ⁷ Holeka anye mweza muli musambo muswanu kuli wose wono wehuwiye we Makedoniya na ku Akaya. ⁸ Hambi nha ku soko yo wuhidimbazi wenyu, i nghani yo Muwaha yakondya kuhulikwa, hamba si kuko ku Makedoniya na ku Akaya du, langa sunga no wihuwilo wenyu wa kuli Mulungu, nha wakondya kuhulikwa hanhu hose. Kanyhi cisina za kulonga. ⁹ Hambi i wanhu wawo weneco nha wakuciganulila nha vyono caza kwenyu, ne nghango ya vyono mwacibocela, na vyono mukaleka vihwani, no kumupitucila u Mulungu mumi na we mbeka, ¹⁰ na luno mumulindilize u Mwanagwe yatime kulawa ku wulanga, mono u Mulungu yamuzukula muli wafu, yo Yesu, mono yakuciponya ne likuwo lyo Mulungu lyono likuza.

¹ Hambi nha mumanyile nyo weneco wandugu zetu, u wuze wetu wa kuko kwenyu vyono si wali wa bwete. ² Mumanyile vyono catamiswa, no kutovulwa akulya ku Filipi, lono cali cikali si nafika u kwenyu ku Tesalonike. Hamba kuwe kwali kowuli wiwanganile winji, ninga u Mulungu wetu, yakacipela wuluwuce wo kumuganulilenyi u Luganuzi lwakwe Luswanu. ³ Ne nghani yono cikumusinjenyi, si nghani ya wulambi, hamba lunji yono yina wuhile wubi, hamba si cendile ho cimukonje munhu wo wose. ⁴ Ase cilongaga nhondo zose nha vyono yendile u Mulungu, hambi nha yo mweneco mono yaciwona ase cikwiliye, yakawa kucipela u mulimo wuwu wo Luganuzi Luswanu. Wo si wuhile wetu hamba hadodo ho ciwendeze wanhu, langa cikuhila kumwendeza u Mulungu, mono yazimanyile zinhumbula zetu sunga mo mugati. ⁵ Nanye mumanyile vyono lono caziza kwenyu, si caza ne zinghani zo wutelemezi, hamba si cetumamila u wulonji wo wusugu wo kwihundika cinji muli sese, u Mulungu yo muhomelezi! ⁶ Hamba si calondola lilumbo muli wanhu hamba muli nyenye, hamba kulawa kuli munhu wo wose, ⁷ ninga ase nha vyono cili wetumami wa Kilisito, cali cisume kusaka cinji kwenyu. Ninga ase cikawa wapolo lono cali cili hamonga nanye, nha vyono yenha u nyina yo munhu muli wanagwe. ⁸ Ale nhavivyo, vyono cikamwendenyi anye muno muno, cikawa ciwikanize kumugawilenyi si u Luganuzi Luswanu du lo Mulungu, langa sunga no wumi wetu. Nhavivyo nanye vyo mwali mo wendece wetu! ⁹ Nye wandugu zangu, mukumbuciye vyono cetuma u mulimo hamonga ne magaziko. Lono camuletelenyi u Luganuzi Luswanu lo Mulungu, hambi nha cetumaga mulimo ku misi na ku cilo, ho cilece kuwa mutegulo kuli munhu wo wose muli nyenye. ¹⁰ Nanye nyo weneco muli wahomelezi, no Mulungu nayo muhomelezi nha vivyo, vyono i mikalile yetu hali nyenye mono mwihuwiye, vyono yali miswanu kanyhi ye ling’ani yono yisina yilema. ¹¹ Kanyhi mumanyile nyo weneco vyono ase camutendelenyi nyenye yumonga yumonga, nha vyono u sogo yo munhu kawatendelega wanagwe mweneco. ¹² Cikamulanjizenyi, kanyhi cikamusindamicenyi, no kumuswaswanizenyi, ho mwikale mu mikalile yono yikumwendeza u Mulungu mono yamucemenyi ho muhanje u Wutemi no lukumyo lwakwe mweneco. ¹³ Kanyhi cina ne soko yinji yo kumulumbila u Mulungu; lono camuletelenyi i nghani yo Mulungu, anye mwayihulika kanyhi mukayibocela si nha vyono yinha nghani yono yikulawa kuli wanhu, langa mwayibocela nha nghani yo Mulungu, nayo mbeka vyo yinha. Hambi u Mulungu nha yakwituma muli nyenye mono mwihuwiye. ¹⁴ Nye wandugu zangu, nanye nha zamwaganenyi zono zagagana i Makanisa go Mulungu ga ku Yudiya, zinghani zono zawagana i wanhu wa Kilisito Yesu. Nanye mwatamiswa ne wanyawusi wayenyu, nha vyono iwene nawo wagazwa ne Wayahudi wayawo, ¹⁵ wono wamuwulaga u Muwaha Yesu ne wawizi, wakacigaza sunga na sese nhavivyo. Iwanhu wono si wakumwendeza u Mulungu, kanyhi wali sili ne wanhu wose. ¹⁶ Kanyhi wakajela kucimila cilece kuwaganulila wanhu wono si Wayahudi i nghani yono yosuma kuwapela mhonelo. Na mumo mo wakumemelezeza i liwalo lyo wubi wawo wono wetumaga nhondo zose. Ninga alu i likuwo lyo Mulungu liwagwiliye. ¹⁷ Nye wandugu zangu, u witemanuce wetu na nyenye, wali wa cipango du, kanyhi no witemanuce wuwu wali wa mu muwili du hamba si wa mu nhumbula. Ninga hanyuma ye cipango cifupi, cikamwisukwenyi muno no kuhila kumuwonenyi kanyhi! ¹⁸ Holeka cikawona viswanu ho cize kuko kwenyu kanyhi. Nane no Pawulo najela ho nize kuko kwenyu nghanghulo monga hamba ne kejete, ninga Setani yakacimila. ¹⁹ Wulenyi cilaza kwima hali Muwaha Yesu yalaza kuza, u lukumyo lo wusume wetu wolowa cici? Wolowa nyenye nyo weneco, vyono anye yo nyenye, wo witumbilo wetu ne nyemo yetu. ²⁰ Heya, hambi nha yo nyenye lukumyo lwetu ne nyemo yetu!

¹ Holeka vyono si casuma kukangalila kanyhi, cikawona vyowa viswanu cilekwe cili wene ku Atene, ² cikamutumilenyi ndugu yetu Timoteyo, kanyhi mwitumami muyetu muli Mulungu mu wuganule u Luganuzi Luswanu lwa Kilisito. Cikamutumilenyi ho yaze yamusikamyenyi no kumusindamicenyi, ³ ho wihuwilo wa yunji muli nyenye wulece kucepuka ku soko ye magazo gago. Ninga anye mumanyile nha vyono yicinojeye cinjile mu magazo. ⁴ Hambi mbeka lono cali kwenyu, nha camula kumulonjelenyi vyono cowa kutamiswa, na vyono mumanyile, na mbeka vyo yikawa. ⁵ Ku soko yiyo holeka nane nghamutumilenyi Timoteyo. Vyono si nasuma kulindila kanyhi, holeka nghamutumilenyi ho hulice muli zo wihuwilo wenyu. Yilece kuwa na lunji u mukonji yamujelenyi, no mulimo wose wono cawituma muli nyenye wuwe wa bwete! ⁶ Ninga alu Timoteyo yakondya kuwuya kono kwetu, yakulawa u kwenyu, nayo kacilonjela nghani za nyemo kuli zo wihuwilo wenyu no wendo wenyu. Kacilonjela kanyhi vyono mukucikumbucila nhondo zose na vyono mwina wuhile wo kuciwona ase, nha vyono na sese cina wuhile wo kumuwonenyi nyenye. ⁷ Nase cisindamikwa muno mu wugaye ne matamiso getu gose, ku soko yo wihuwilo wenyu. ⁸ Hambi alu nha cili womi mbeka, hono mwime mukamile muli Muwaha. ⁹ Alu cosuma kumulumba u Mulungu wetu ku soko yenyu. Cikumulumba so nyemo yono cina nayo hali mwene ku soko yenyu. ¹⁰ Cikumulomba u Mulungu cihidimbaye kwe mitima yetu yose cilo na misi, ho yacipele i cilejeho co kumuwonenyi wusu na wusu, ho cisume kuzinozeleza zono zikali zicepuce mu wihuwilo wenyu. ¹¹ Nase cikumulomba u Mulungu u Sogo yetu mweneco, no Muwaha wetu Yesu, yaciwikanizize nzila yo kuza u kwenyu. ¹² U Muwaha yamupelenyi wiyendi nyenye wose, no kucila muno kuwenda i wanhu wose, nha vyono ase cimwendilenyi nyenye. ¹³ Holeka nayo komukamyenyi zinhumbula zenyu, nanye mowa mukwilaniciye mu wele hali Mulungu no Sogo yetu, mwipango lono kolokuziza u Muwaha wetu Yesu hamonga ne wakwe wose.

¹ Ze ndumilizo wandugu zangu, nha vyono mweyijiza kuli sese vyono munojeye mwikale ho mumwendeze u Mulungu. Nayo yili mbeka vyo mwikalaga. Alu cikumulombenyi kanyhi cikumunenenyi mwitagwa lyo Muwaha Yesu, vyono alu ho mucile muno kuwituma viswanu. ² Hambi nha mumanyile i malajilizo gono camupelelenyi mu wulajilize wo Muwaha Yesu. ³ U Mulungu yakumusacenyi anye mweze mwelile kanyhi mwilejele lukulu mu mikalile yo wusenyha. ⁴ Anye nyo walume, yinojeye munhu na lwakwe yeyijize nha vyono yimunojeye kwikala no mugolece wakwe mu wele ne lilumbo, ⁵ ninga si mu masulumizi mabi nhe wanhu we makungugo ganji wono si wamumanyile u Mulungu. ⁶ Holeka munhu wo wose yalece kumusutizya hamba kumukapa u muyagwe mu nghani yiyi. Hambi nha cakondya kumulonjelenyi muli zizo kanyhi cikamusugulenyi vyono u Muwaha kowalipiciza wono wakwituma zono zinha zizo. ⁷ U Mulungu si yacicema ho cikale mu mikalile yo wusenyha, langa ho cikale mu wele. ⁸ Holeka mono yakugabedegala i mejizo gago, si yakumubedegala munhu, langa yakumubedegala u Mulungu mweneco mono yakumupelenyi u Muhe wakwe Mono Yelile. ⁹ Hasina soko yo kumwandicilenyi vyono munojeye kuwenda i wandugu zenyu wono wehuwiye. Hambi nha mwijizwe no Mulungu vyono munojeye kwiyenda nyenye wose. ¹⁰ Hambi nha vyo mukunoza nhavivyo kuli wandugu zenyu wose mu Makedoniya mose. Holeka wandugu zangu cikumulombelenyi ho mucile muno. ¹¹ Kanyhi mweze no wuhile wo kwikala mu mikalile yo wutuvu, munhu wo wose yepiganzizaje i zakwe mweneco, kanyhi yetume i milimo ne miwoko yakwe mweneco nha vyono camulonjelenyi bahalya ha lulongozi. ¹² Na muli zizo mo mokwitujila lilumbo yiswanu kuli awalya wono wakali si wanawa Wakilisito, kanyhi mowa musina soko yo kuwetumbila wanji ku soko ye visakwa vyenyu. ¹³ Nyo wandugu zangu, cikuhila muyimanye i mbeka ya kuli walya wono wakondya kufwa, ho mulece kuwa na wukalale nhe wanhu wono wasina u witumbilo. ¹⁴ Ase cihuwiye vyono Yesu yafwa, yakazuka, na ku soko yiyo, holeka nase cihuwiye vyono u Mulungu kowaleta hamonga na Yesu wawalya wose wono wawuka mononze akuno wamwihuwiye u mwene. ¹⁵ Na yiyi yono cikumulonjelenyi go mejizo go Muwaha, ase mono cili womi, mono cowa cikali cisigaye, mwidaha lyono yakuziza u Muwaha, si colowalongolela awalya wono wakondya kuwuka mononze. ¹⁶ Hambi nha wololavywa u wulajilize, lizi lya malayika muwaha, ne lizi lye ndulele yo Mulungu, nayo u Muwaha mweneco kolotima kulawa ku wulanga. Hobaho awalya wono wawuka kononze akuno wamwihuwiye Kilisito, wololongola kuzukulwa. ¹⁷ Hanyuma nase nhondo mono cili womi mwidaha lilyo, colonyasulanwa nawo mu mavunde no kumuhinjiliza u Muwaha, ale nhavivyo colowezana no Muwaha cibitilila. ¹⁸ Ale mwisindamicilaje mu zinghani zizi.

¹ Nye wandugu zangu, hasina soko yo kumwandicilenyi muli ze madaha ne vipango vya muli zizo zono zokuza. ² Hambi nha mumanyile nyo weneco vyono, i lizuwa lyo Muwaha lyolokuza nha muhizi vyono kazaga ku cilo. ³ I wanhu kolo wakutya, “Mulamu kanyhi kupolile.” Hobaho ho wukuziza u wuhodanji wono wukuwaziza nhinicizo! Nazo zizo zowaziza nhinicizo nho wusungu wo kulela vyono wukuwa kumuziza u mucekulu lono yakusawa, ne wanhu hamba si wosuma kwilega. ⁴ Ninga anye nyo wandugu zangu si muli mu citi yaye, holeka ne lizuwa lilyo si linojeye limuzizenyi nhinicizo nho muhizi. ⁵ Anye wose muli wanhu wono mwikaye mu wuzelu, muli wanhu wa mu misi. Ase si cili wanhu wa ku cilo hamba wa mu wutitu. ⁶ Holeka cilece kugona zinhongo nha vyono wanji, langa yicinojeye cikale meso kanyhi ciweze no wiyimile. ⁷ Wono wagonaga, wagonaga ku cilo, na wono wagalaga, wakuwa kugala ku cilo. ⁸ Ninga ase cili wanhu wa mu misi, holeka yicinojeye ciwe no wiyimile. Yicinojeye civwale u wihuwilo no wendo viwe nha civwalo cono cosuma kucicitiza mu mhambaga, kanyhi no witumbilo wetu we mhonelo, yiwe nha kofiya ya cuma. ⁹ Hambi u Mulungu nha si yacihagula ho citamiswe mwi’kuwo lyakwe, langa ho ciyituje i mhonelo mu nzila yo Muwaha wetu Yesu Kilisito, ¹⁰ mono yafwa ku soko yetu, ho cikalane hamonga nayo, hamba ciwe cili womi, hamba hono ciwe cakondya kufwa. ¹¹ Holeka mwisindamikaje no kwitaza munhu na muyagwe nha vyono mukunoza lulu. ¹² Ninga cikumunenenyi wandugu zangu, muwapelaje cogopo awalya wono wakwituma muli nyenye, wawo wono wakumutonjenyi no kumwijizenyi muli ze mikalile ye Cikilisito. ¹³ Muwalumbizaje muno no kuwenda ku soko yo mulimo wono wakwituma. Kanyhi mweze mwilamuye nyenye wose. ¹⁴ Kanyhi cikumunenenyi wandugu zangu, muwafundaje i wanhu wadoba, muwasinyhimikaje we zinhumbula zinyoga, muwebatilizaje wono wasoceye, kanyhi mweze na ngola kuli wose. ¹⁵ Mulanjilile, munhu wo wose yalece kumugomolezeza u muyagwe wubi na wubi, langa wuhile wenyu, weze wo kwitendela ziswanu nhondo zose munhu na muyagwe, no kuwatendela ziswanu wanhu wose. ¹⁶ Mweze museceleye nhondo zose, ¹⁷ akuno mukulomba musina wudile, ¹⁸ mweze mwina ne lilumbo muli zose. Hambi wuwo nha wo wuhile wo Mulungu kuli nyenye mu wilunze wenyu na Kilisito Yesu. ¹⁹ Mulece kumwimila u Muhe Mono Yelile; ²⁰ mulece kuwubedegala wuwizi. ²¹ Ninga mweze kuvijela vinhu vyose; mukamise muno muno ziswanu, ²² kanyhi mwilegaje mu mawala gose ge zimbi. ²³ No Mulungu mono kacipelaga mulamu, yamunozenyi muwe mwelile muli zose, yamukamisenyi nyenye, u muhe, no wumi ne miwili yenyu, ho mulece kuwa na yilema lyo lyose ha wuze wo Muwaha wetu Yesu Kilisito. ²⁴ Nayo mono yamucemenyi nyenye, nha konoza nhavivyo, hambi Mwene nha mwihuwilwa. ²⁵ Nye wandugu zangu, mucilombelaje na sese nhavivyo. ²⁶ Muwalamusizaje wandugu zetu wose mu citanjilo co wendo. ²⁷ Nghumukong’onhezenyi mwitagwa lyo Muwaha, vyono muwasomelaje we zindugu wose i baluwa yiyi. ²⁸ Ilihewa lyo Muwaha wetu Yesu Kilisito, liwezane na nyenye wose.