1 YOHANA

¹ Cikukwandicila zizi so i nghani yo wumi yono yali yili baho ku wulawa mwamulizo. Ase cayihulika no kuyiwona ne meso getu sese co weneco, cayiwona no kuyibata kwe miwoko yetu sese co weneco. ² No wumi wuwo wali weza kwanzalikwa, ase cawuwona, nalu cikulonga, kanyhi cikumulonjelenyi zo wumi wuwo we cibitilila, wono wali ko Sogo yo munhu, hanyuma wukanzalikwa kuli’se. ³ Cico cono cawona, na cono cahulika, co cikumwanzizenyi nanye, nanye ho muhanje nase mu wumonga wono cina nawo no Sogo yo munhu no Mwanagwe Yesu Kilisito. ⁴ Cikumwandicilenyi nanye zizi, i nyemo yenyu ho yimemelecele. ⁵ I nghani yono cayihulika kuli Yesu, yono cikumulonjelenyi, nha yoyi, u Mulungu wo wuzelu, na muli mwene, musina hamba citi. ⁶ Holeka hono ciwe kutya cili wumonga nayo, na kuno ho cikwikala mu wutitu, cowa calonga wulambi mu wulonje na mu metumo. ⁷ Langa hono cikale mu wuzelu, nha vyono u mwene yali mu wuzelu, baho langa cowa no wumonga sese kwa sese, ne sakami yakwe Yesu Kilisito u Mwanagwe, yocikwema mu wubi wose. ⁸ Na hono ciwe kutya cisina wubi, cikwikonga co weneco, ne mbeka muli sese musina. ⁹ Langa hono ciwuvumile u wubi wetu, u mwene u Mulungu yo mwihuwilwa, kanyhi yali ling’ani, nayo kocinenela u wubi wetu wose, no kucikwema ne masutya getu gose. ¹⁰ Na hono ciwe kutya cikali sinetuma wubi, cowa camunoza u Mulungu nha mulambi, ne nghani yakwe yili musina muli sese.

¹ Mo wanangu nghumwandicilenyi zizi, ho mulece kwituma wubi. Ninga yisolaga munhu ketuma wubi, cina nayo yumonga mono kacilombelaga kuli Baba, yo Yesu Kilisito, mono yali ling’ani. ² Kilisito lye kumbiko lyono likuwuwusa u wubi wetu, hamba si wubi wetu sese du, langa u wubi we yinze yose. ³ Hono cigakamise i malajilizo go Mulungu, ale ho cosuma kumanyila lukulu vyono cimumanyile. ⁴ Na munhu hono yatye yamumanyile Mulungu, ninga kuno ho siyakugakamisa i malajilizo gakwe, u munhu yuyo mulambi, hamba ne mbeka yose yili musina muli mwene. ⁵ Ninga u munhu wo wose mono yakuyibate i nghani yo Mulungu, yuyo langa yo yena u wendo wo Mulungu muli mwene. Na mu nzila yiyo mo cikusuma kumanyila lukulu vyono cili muli mwene, ⁶ u munhu wo wose mono yakutya yali muli Mulungu, yimunojeye yawe yena i mikalile, nhe mikalile ya Yesu Kilisito. ⁷ Nyo wendece wangu, i lilajilizo lili lyono nghumwandicilenyi, si yilajilizo yipya yaye, langa lye lajilizo lililya lye katali du, lyono mwali mwina nalyo ku wulawa mwamulizo. Ne lilajilizo lilyo lye katali, yo nghani yi yilya yono mwayihulika. ⁸ Hamba nhavivyo i lilajilizo lili lyono nghumwandicilenyi, lye ’lajilizo lipya, ne mbeka yalyo, yikwijelela muli Kilisito na muli nyenye nhavivyo. Hambi u wutitu nha weza kuwuka, no wuzelu we mbeka weza kwamula kubulila. ⁹ Holeka mono yakutya yali mu wuzelu, akuno ho yamusulile u nduguye, munhu yuyo yakali yali mu wutitu. ¹⁰ Na mono yamwendile u nduguye, yuyo yali mu wuzelu, na muli mwene musina cinhu cinji co cose cono cosuma kumukobaza munhu yunji. ¹¹ Ninga mono yamusulile u nduguye, yuyo yakali mu wutitu, kanyhi yakujendela mu wutitu, hamba siyamanyile na kono yakubita, hambi u wutitu nha wumubofuze i meso. ¹² Nghumwandicilenyi nanye mo wana, vyono u wubi wenyu wakondya kuwusizwa mwitagwa lya Kilisito. ¹³ Nghumwandicilenyi nanye mo wasogo za munhu, hambi nha mumumanyile u mwene mono yali ho yuli, ku wulawa ha mwamulizo. Nghumwandicilenyi nanye mo wazelelo, vyono mumusumile ayulya u mubi. ¹⁴ Nghumwandicilenyi nanye mo wadodo, vyono mumumanyile u Sogo yo munhu. Nghumwandicilenyi nanye mo wa sogo zo munhu, vyono mumumanyile u mwene mono yali ho yuli ku wulawa ha mwamulizo. Nghumwandicilenyi nanye mo wazelelo, vyono muli vilungo, ne nghani yo Mulungu yikwikala muli nyenye, kanyhi mumusumile ayulya u Mubi. ¹⁵ Mulece kuzenda ze yinze, hamba zono zili mononze. U munhu mono yazendile za mononze, u wendo wo Mulungu siwosuma kwikala muli mwene. ¹⁶ I vinhu vyose vya mononze, wusulumizi wo muwili, i vinhu vyono i wanhu wakuviwona, wawa kuvisulumila, hamonga no wiwoni wono wukuletwa so sawo, vyose vivyo sivikulawa muli Baba, langa vikulawa mononze. ¹⁷ I yinze nayo yimalikaga hamonga ne vinhu vyayo vyono vikuleta masulumizi, langa mono ketumaga u wuhile wo Mulungu, yo yakwikala cibitilila. ¹⁸ Mo wanangu, alu ilipango lyo mudumo lyasejelela! Nanye mwali mwakondya kuhulika vyono u mulugu wa Kilisito yakuza, ne walugu wa Kilisito aluno wenji wakondya kuza, ku soko yiyo, holeka cikumanya vyono lipango lyo mudumo lyeza lili behi. ¹⁹ Ne wanhu wawo wakulawilila muli sese, ninga i mbeka, si wali wayetu, na ku soko yiyo holeka wakawuka, hambi mhali wawe mbeka wayetu, wali wawe wali hamonga na sese. Ninga alu wawuka, wakabita kono wakusaka, ho yijele calinze vyono si wali wayetu. ²⁰ Anye mwina u Muhe Mono Yelile mono mwajidilwa na Kilisito, holeka muyimanyile i mbeka. ²¹ Ninga nghumwandicilenyi si vyono lunji simuyimanyile i mbeka, aa, ng’o, langa ku soko vyono muyimanyile, na kanyhi mumanyile vyono wulambi wo wose siwulawaga mu mbeka. ²² Alu u mulambi yo nani? Yo yuyo mono si yakuvumila vyono Yesu yo Kilisito. No munhu we nhavivyo, yo mulugu wa Kilisito, si yakuwavumila wose, u Sogo yo munhu no Mwana. ²³ Hambi muli wose mono si yakumuvumila u Mwana, siyakumuvumila sunga no Sogo yo munhu, na muli wose mono yakumuvumila u Mwana, yo yena no Sogo yo Munhu. ²⁴ Holeka i nghani yiyilya yono mwayihulika ku wulawa mwamulizo, yikalaje mu zinhumbula zenyu. Ne nghani yiyilya yono mwayihulika, hono yikale muli nyenye, mokwikala nhondo zose muli mu wumonga no Mwana no Sogo yo Munhu. ²⁵ No wihuwizo wono yacihuwiziza ase, nha wowu, u wumi we cibitilila. ²⁶ Nimwandicilenyi zi zino ku soko ya awalya wono wakuhila kumwajilizenyi nyenye. ²⁷ Ninga ku lubavu lwenyu anye, Kilisito nha yamupelenyi u Muhe wakwe. Holeka hono yajendelele kwikala muli nyenye, mowa musina wuhile wa yunji wo wose kanyhi ho yamwijizenyi. Vyono u Muhe wakwe yo yakumwijizenyi zose, ne mejizo gakwe go ge mbeka, hamba si ga wulambi. Holeka mugebataje i mejizo go Muhe yuyo no kwikala muli Kilisito. ²⁸ Holeka mo wanangu mwikalaje muli mwene, ne lidaha lilaza kuwa lyaza, ciwe cikamile, ho cilece kuwa na soko yo kwihundika so cevu, mwizuwa lyo wuze wakwe. ²⁹ Mumanyile nha vyono Kilisito yo we ling’ani muno, holeka yinojeye munhu wo wose yamanye vyono mono yakwituma zo wiling’ano, yuyo yo mwana wo Mulungu.

¹ Alu lanjenyi ta, vyono u Sogo yo munhu yacenda muno muno, sunga citegwe cili wana wo Mulungu! Na mbeka vyo cinha. Na co cikuleka i yinze siyikucimanya, hambi nha si yimumanyile u Mulungu. ² Mo wendece wangu, alu ase cili wana wo Mulungu, ninga yikali sinejela calinze vyono colowa. Ninga cimanyile du vyono i cipango Kilisito kolo yakwijela, colokwihwana nayo, hambi nha colomuwona vyono yenha. ³ Na muli wose mono yena u witumbilo wuwu muli Kilisito yakwiyeza, nha vyono u mwene Kilisito yelile muno. ⁴ Munhu wo wose mono yakwituma wubi, yakuwubena u wulajilize wo Mulungu, hambi u wubi nha wo wubena u wulajilize. ⁵ Kanyhi mumanyile nha vyono Kilisito yaza ho yawuwuse u wubi wetu, na vyono, kanyhi muli mwene musina wubi wo wose. ⁶ Holeka muli wose mono yali muli Kilisito, siketumaga wubi, ninga u munhu wo wose mono yakwituma wubi, yakali si namuwona Kilisito, hamba kumumanya kose. ⁷ Anye wanangu, mulece kuvumila munhu yunji yamwajilizenyi. Na munhu wo wose mono yakwituma ze ling’ani, yuyo yo we ling’ani nha vyono Kilisito yali ling’ani muno. ⁸ Ninga mono yakwituma wubi, yuyo yo wa Setani, hambi Setani nha ketumaga zo wubi ku wulawa mwamulizo. Ninga u Mwana wo Mulungu yakaza mononze ho yayihodanje i milimo ya Setani. ⁹ Munhu wo wose mono yaleleywe muli Mulungu, siketumaga wubi, vyono yakondya kuwa no wuwe wa cinya Mulungu muli mwene, nayo sikosuma kwituma wubi vyono u mwene yawa mwana wo Mulungu. ¹⁰ Ninga muli wose mono siketumaga ze ling’ani, hamba mono siyamwendile u nduguye, yuyo yo si mwana wo Mulungu. Na wuwo wo wisimajile wa muli wana wo Mulungu ne wana wa Setani. ¹¹ Ne nghani yono mwayihulika ku wulawa mwamulizo nha yoyi. Yicinojeye ciyendaje! ¹² Cilece kuwa nha Kayini mono yatongwa na ayulya u Mubi, yakawa kumuwulaga u mwanakwawe. Na ku sokoci yamuwulaga? Ku soko i metumo gakwe gali mabi, ninga i metumo go mwanakwawe gali maswanu! ¹³ Holeka wandugu zangu, mulece kwizina lono i yinze yikumusulenyi. ¹⁴ Ase cimanyile vyono cakondya kuwuka mwifwa, cenjila mu wumi vyono ciwendile wandugu zetu. No munhu mono yasina wendo, kekalaga mwifwa. ¹⁵ Na mono yamusulile u nduguye, yuyo muwulaji, nanye mumanyile vyono u muwulaji wo wose, musina wumi we cibitilila muli mwene. ¹⁶ Ase cakondya kuwumanya wendo vyono co cici, hambi Kilisito nha yelavya u wumi wakwe ku soko yetu. Holeka nase yicinojeye ciwulavye u wumi wetu ku soko ye wandugu zetu. ¹⁷ Holeka munhu hono yawe yena zisawo za baha mononze, na hanyuma yamuwone nduguye yali mu wugaye, ninga ho yawe na nhumbula nghamu hamba kumuwonela lusungu ng’o, alu kosuma nhawule kutya yamwendile Mulungu? ¹⁸ Nye wanangu, wendo wetu wulece kuwa wa nonga du, langa wuweze wendo wa mu mbeka na mu witume. ¹⁹ Nhavivi vyo comanyila vyono ase cili wanhu wa mu mbeka, kanyhi cowa cisina mahwele hali Mulungu. ²⁰ Ku soko hamba yiwe ciselinji cetu cikucihosa, ninga cimanyile vyono u Mulungu yo muwaha yacizize ciselinji, na vyono u mwene yazimanyile zose. ²¹ Nye mo wendece wangu, i ciselinji cetu hono ciwe sicikucihosa cinji, ho ceza cina u wuluwuce hali Mulungu, ²² nase cosuma kubocela co cose cono colomba, hambi nha cigebate malajilizo gakwe, no kwituma zono zikumwendeza. ²³ Ne lilajilizo lyakwe nha lyoli, Cimwihuwile u Mwanagwe Kilisito, no kwiyenda sese wose, nha vyono yacilajiliza. ²⁴ Mono yakugebata malajilizo go Mulungu, yo kekalaga muli Mulungu, nayo Mulungu yakwikala muli mwene. Mu nzila yo Muhe mono Mulungu yacipela, nase mo cikumanyila vyono Mulungu yakwikala muli sese.

¹ Mo wendece wangu, mulece kumwihuwila munhu wo wose mono yakwiyitya yena Muhe wo Mulungu, langa mwamulaje mumulanjilile muno muno, ho muwone hono u munhu yuyo yakutongwa no Muhe wo Mulungu, hamba ng’o. Hambi i wawizi wenji wo wulambi nha wakwijela mononze. ² Na ayi yo nzila yo kumumanyila u munhu hono yakutongwa no Muhe wo Mulungu, muli wose mono yakuvumila vyono Kilisito yaza, yakawa munhu, u munhu yuyo yena Muhe wo Mulungu. ³ Ninga munhu wo wose mono si yakumuvumila Kilisito mu nzila yiyo, yuyo yasina u Muhe mulawa kuli Mulungu. U munhu yuyo yena u muhe mono yakulawa kuli ayulya u mulugu wa Kilisito, nanye mwakondya kumanya vyono yakuza, na aluno yakondya kuza yali mononze. ⁴ Ninga anye mo wana, muli wo Mulungu, kanyhi mwakondya kuwasuma wawo wawizi wo wulambi, hambi Muhe mono yali muli nyenye, nha yali vilungo muno muno, kuciza muhe mono yali muli wene, vyono wene wawo wo wanhu wa kononze. ⁵ I wene walongaga za mononze, nayo yinze yikuwa huliciza vyono wene wo wa mononze. ⁶ Ninga ase cili wo Mulungu. No munhu mono yamumanyile Mulungu, yuyo langa kacihulikaga, no munhu mono si wo Mulungu, ase si kacihulikaga. Holeka mumo mo cikusuma kumanyila u wisimajile wo Muhe we mbeka, no muhe wo wulambi. ⁷ Mo wendece wangu, ciyendaje, hambi u wendo nha wulawaga kuli Mulungu. Muli wose mono yena wendo, yuyo yo mwana wo Mulungu, kanyhi yamumanyile u Mulungu. ⁸ U munhu mono yawusina u wendo, yuyo siyamumanyile no Mulungu, hambi u Mulungu nha wo wendo. ⁹ Nayo Mulungu yawulajila u wendo wakwe kuli sese, vyono yamutuma mwanagwe we ciwene kononze, ho ciwutujile wumi muli mwene. ¹⁰ No wendo vyo winha nhavivi, si vyono ase camula kumwenda Mulungu, langa u mwene Mulungu yo yacenda, sunga yakawa kumutuma u Mwanagwe ho yawe yikumbiko lyo kuciwusiza wubi wetu. ¹¹ Nye mo wendece wangu, hono Mulungu yawe yacenda nha vivyo, yicinojeye nase ciyendaje. ¹² Hasina hamba hadodo u munhu mono yakondya kumuwona Mulungu, ninga hono ciyende, Mulungu yakwikala muli sese, no wendo wakwe wukuwa wukwilaniciye muli sese. ¹³ Cimanyile nha vyono, cikaye cili mu wumonga no Mulungu, nayo u Mulungu yakwikala yali mu wumonga nase, hambi u mwene nha yacipela u Muhe wakwe. ¹⁴ Ase cakondya kumuwona no kuwalonjela i wanji vyono u Sogo yo munhu, yamutuma yawe Mukomboza yinze. ¹⁵ Munhu wo wose mono yakuvumila vyono Yesu yo Mwana wo Mulungu, u Mulungu yakwikala muli munhu yuyo, nayo yakwikala muli Mulungu. ¹⁶ Holeka ase cimanyile, kanyhi cihuwiye u wendo wono Mulungu yena kuli sese. U Mulungu wo wendo, no munhu wo wose mono yakwikala mu wendo, yakwikala muli Mulungu, no Mulungu nayo yakwikala muli mwene. ¹⁷ U wendo wukwilaniciye muli sese, ho cisume kuwa cisina woga kwi’zuwa alilya lyo wuling’anizi, vyono mikalile yetu ya baha hono’nze, nha yihwanile na ayilya ya Kilisito. ¹⁸ Na hono howuli wendo, hasina woga, heya, vyono u wendo wono wukwilaniciye wukuwa wusina woga wo wose. Holeka u munhu mono yakali yena woga, yuyo yakali siyanakwilanicila mu wendo, vyono woga nha vihanjile no wulipicizwe. ¹⁹ Ase cina wendo, vyono Mulungu yamula kucenda. ²⁰ No munhu hono yatye vyono yamwendile Mulungu, akuno ho yamusulile nduguye, ayo yuyo mulambi. Vyono munhu mono si yamwendile nduguye mono yakumuwona ne meso, si kosuma kumwenda Mulungu mono si yakumuwona kwe meso. ²¹ Holeka ali lye lajilizo lyono Kilisito yacipela; Mono yamwendile Mulungu, yimunojeye yamwende no nduguye.

¹ U munhu wo wose mono yehuwiye vyono Yesu yo Kilisito, yuyo yo mwana wo Mulungu, na mono yamwendile u mulezi, yakuwa kumwenda no mwana wa yuyo mulezi. ² Mumo mo cikumanyila vyono ciwendile wana wo Mulungu, ko kumwenda u Mulungu no kugebata malajilizo gakwe, ³ vyono kumwenda Mulungu, wo wibate we malajilizo gakwe. Ne malajilizo gakwe si mazito. ⁴ Hambi muli wose mono yawa mwana wo Mulungu nha kosuma kuyisuma i yinze. Mumo mo cikuyisumila i yinze, u wihuwilo wetu. ⁵ Alu nani ’mbi mono kosuma kuyisuma i yinze? Yo yuyo mono yehuwiye vyono Yesu yo Mwana wo Mulungu. ⁶ Yesu Kilisito mono yaziza mu malenga go wubaputizo wakwe na mu sakami yo wufwe wakwe. Siyaziza mu malenga du, langa mu malenga ne sakami. No Muhe nayo yakuhomelela vyono yili mbeka, hambi u Muhe nha yo mbeka. ⁷ Holeka wali baho wahomelezi wadatu. ⁸ U Muhe, ne malenga, ne sakami, no wuhomelezi wa wawa wadatu wukilumba. ⁹ Holeka hono ciwe cikuwulumba u wuhomelezi we wanhu, u wuhomelezi wo Mulungu wo wucizize muno muno, na awuno wo wuhomelezi wono Mulungu yawulavya mweneco muli Mwanagwe. ¹⁰ Mono yakumwihuwila u Mwana wo Mulungu, u wuhomelezi wuwo muli mwene yena nawo, ninga mono siyamwihuwiye Mulungu, yakumunoza u Mulungu mulambi vyono siyehuwiye u wuhomelezi wono u Mulungu yawulavya muli Mwanagwe. ¹¹ No wuhomelezi weneco nha wowu: U Mulungu yacipela wumi we cibitilila, no wumi wuwo wuli muli Mwanagwe. ¹² Muli wose mono yena u Mwana wo Mulungu, yo yena u wumi wuwo, na mono yamusina u Mwana wo Mulungu, no wumi yawusina. ¹³ Nghumwandicilenyi ho mumanye vyono mwina wumi we cibitilila, anye mono mwihuwiye mwitagwa lyo Mwana wo Mulungu, ¹⁴ Nase cina wuluwuce hali Mulungu, hambi nha cimanyiye lukulu vyono hono cimulombe cinji ca mu wuhile wakwe, u Mwene yakuwa kucihulika. ¹⁵ Mwene yakuwa kucihulika lono cikumulomba, na kanyhi cimanyile vyono u mwene kacihulikaga lono cikumulomba, kanyhi cimanyile vyono kacipelaga vyose vyono cimulombaga. ¹⁶ U munhu hono yamuwone nduguye yakwituma wubi wono siwomufisa ku wufwe, yimunojeye yamulombele kuli Mulungu, nayo Mulungu komupela wumi. Nghulonga yiyi kuli awalya wono wetumile wubi wono si wo wufwe. Ninga ho wuli u wubi wono wudahile kumufisa munhu ku wufwe, nane singhutya vyono munojeye mumulombe Mulungu ku so wuwo. ¹⁷ I litumo lyo lyose lyono si lili mu ling’ani, wo wubi, ninga ko wuli wubi wono siwomufisa munhu ku wufwe. ¹⁸ Ninga cimanyile vyono muli wose mono yakondya kuwa mwana wo Mulungu, siketumaga wubi, ku soko u Mwana wo Mulungu yakumukamisa. Na yuyo u Mubi si kosuma kumutamisa yaye. ¹⁹ Cimanyile vyono ase cili wo Mulungu, hamba yiwe i yinze yose yili mu vilungo vya ayulya u Mubi. ²⁰ Cimanyile kanyhi, vyono Mwana wo Mulungu yakondya kuza, yakacipela ne mahala ho cimumanye Mulungu we mbeka, kanyhi cikale muli Mulungu we mbeka, muli Mwanagwe Yesu Kilisito. Na yuyu yo Mulungu we mbeka, na wuwu wo wumi we cibitilila. ²¹ Mo wanangu, mwilegaje ne milungu yo wulambi!