TITUS

Wakita ana Pul a wetseha

a TITUS a

Mege wusa

¹Na a wetse wakita aaha ka, iye Pul ana i ge a megemir Mbulum, dite iye mala meslire Yesuw Kiristi ya mbaŋa. Ama Mbulum a slər iye ka, dite i tsik a bazlam ŋgar a gà na a pala tar a, na dite ta gis a ŋgat nda gəzləŋ, ti sir a guma ŋgar ana ndzer ŋa, a ɗifekwe a à mede kwa ana à tsehin a aà Mbulum a tserdze ya mbaŋa. ²I tsikewa kamala taŋa ya ka, na dite mburma ti sir a dər ka, ta ŋget a mesife ana à ndìv a tsa aà biybiy a. Aɗaba akahər ana Mbulum aka ge gər ahəɗ zukw tsiye ka, aka mbər metsike a kwa aba i sida ya, a gwa: «I ta vile a kurum a mesife ata.» Ŋgat ka, à ses a pàrsa tsidze. ³Ama tits a təv ana a ndze aɗəm a ka, a pàt a kwa à mesife ata a gwa, i ta vile a kurum a ya, i huɗ bazlam ŋgar ana ŋgwal ŋa, gà ɓəzla meslire ŋgar ti tsik a. Na a viliŋ bazlam ata a ahər ka, Mbulum ana ŋgat mala məmbə̀là à kwa, a gweɗiŋ, ti tsik a gà asiŋ gà mburma ŋgiɗ mbaŋa ya.

⁴I wetseha ka, a kər Titus ana kər kà ne kəla gà, kà nema ilik i təv megìse ana kə̀ gə̀sama Mbulum a ya.

I heme a a Mbulum Tsir kwa nda Yesuw Kiristi ana ŋgat mala məmbə̀là à kwa ya, ta gek ŋgwal ŋa, ta vəlak matasla yam a gəzləŋ zayya lele.

Mege megemir Titus ana a ge ika ahəɗ Kereta ya

⁵I məsak riŋ à kər ika ahəɗ Kereta ka, dite kà làmbaɗa dukw ana a zeha, Yàa sle aà malàmbàɗà ŋa asa tsiye ya. A sèsiŋ ka, ki pele a gà mburma, dite ki ne a à ter a gà bàba ŋa ika magər gà na ta gəs Mbulum a, ku mege i kwite awara tserdze. Ki ge a ka, kamala ana i tsikik a, ma ta mətsak gər tsa. ⁶Wur ana a ne a batsah ŋa ika magər gà mburma ana ta gəs Mbulum a ka, say ma ne ka, mala ndzer. Bakal ŋgar ma ge riŋ tsa, məkəs ŋgar tekeɗe, say ma ge ka, ilik pəra. Gà ɓəza ŋgar ibam ka, ta gəs Yesuw Kiristi nda gəzləŋ tar. Mede tar ma ge ka, ŋgwal ŋa, wura ma wala aà tar a agəra dukw ana ta ge a ŋgwal ŋa tsiye tsa, ta gəsawa ahər ahəm ka, lele mbaŋa. ⁷Say wur ana a ne a batsah ŋa ika magər gà na ta gəs Mbulum a ka, say ŋgat ma ge ka, mala ndzer ŋa, bakal ŋgar ma ge riŋ tsa, aɗaba ana ŋgat ka, mala meslire Mbulum a. Mà sə̀ŋgə̀r à ba ŋgar tsa, matsəɓatsəɓ ibam, ma ndzawar i gəzləŋ hiywe tsa, kige tsa, ma ne mala mekweye tsa, ma ge maàga nda mburma tsa asa, nda gà ma ne mala perziz siŋgwe tsa asa mbaŋa. ⁸Ama ma ne ka, mala mege gər a gà mbəlakw lele ivaɗ. Ma waya ka, mege dukw ana ŋgwal ŋa ya, ma ne mala metsehe, ma ge dukw ana ndzer a ika miɗ Mbulum tsəɗaŋŋa, bakal ihər tsa. Ma kwara ba ŋgar lele. ⁹Say ma kasla bazlam ndzer ŋa ana mì ɗifer dər a i gəzləŋ ŋgar lele. Kamala taŋa ya, a sle a aà medzeŋge bazlam ata a gà asiŋ gà mburma Mbulum, à me a terehe a à arəv. Dite a ŋget a vatwa aà meɗife à metsehe a gà ɓəzla mimbètsè ahəm ana ti niw bazlam ata ya, ika miɗ mburma tserdze mbaŋa.

¹⁰Aɗaba gà mburma a riŋ hinne na ti dze a zləm a bazlam Mbulum ana ti tsik a ya tsiye. Tar ti tsikewa ka, gà bazlam ana hinne pampam taf masakəŋa ya. Ta bene a mburma nda pàrsa mbaŋa asa. Na a gewa kamala taŋa ya ndeyndey ka, gà Yahuda ana ta waya masàsà ba, dite ta gweɗe a kurum a ka, sasayum ba ya. ¹¹Say ta handaka a taraha aà bazlam, aɗaba tar ihər tì ndzikere a gà mburma ana i ga i ma tar a pampam tserdze, ika vatwa ana ŋgwal ŋa ya, nda medzeŋge gà dukw tar ata ŋgwal ŋa tsa kweleŋ a. Aɗaba ta ge a kataya ka, dite aà ta ŋgat iɗəm siŋgwe ya hinne pəra. ¹²Wele duwa a riŋ ilik i liwiŋ gà mburma ata, ŋgat gà Kereta. Ŋgat ka, kìlìŋŋa, a sərawa gà dukw ana ti ta ge a ba ika miɗ mba ya ya. A gwaɗawa a gà mburma ana ɗa ika ahəɗ Kereta ya ka: «Gà ɓəzla pàrsa hiywe, na tar a. Tar ti ne ka, kamala gà dukw dala ana gà ŋgwal ŋa tsiye. Tar ka, gà màsar ŋa hinne asa, dite tar tə dzalawa ka, aka mazəma gà dukw mezime ana ti zimeye a a gà hitwis tar a ɗekɗek pəra.» ¹³Kaɗəŋ, wele ata a tsik a ka, ndzer. Aɗaba taŋa, kwara akaba tar kwirik kwirik, na dite ka, ta ge a metsehe, ti zezem a vatwa Mbulum lele ya. ¹⁴Kwara akaba tar ka, dite tə̀ dza zləm aà gà ahəm hiyeŋ gà Yahuda ana tə ɗamawa taf masakəŋa ya asa tsa. Tə tə zazam məpala ahəm gà mburma ana ta miyak à dukw ana ndzer ŋa ya asa tsa. ¹⁵I təv gà na gəzləŋ tar tsəɗaŋŋa məbàrà ŋa lele ika miɗ Mbulum a ka, dukw ana ta ge a tserdze ya tekeɗe, tsəɗaŋŋa ŋgwal ŋa lele mbaŋa.*fa* Ama gà na gəzləŋ tar ga ŋgwal ŋa tsa, ta gəs ahəm aà Mbulum tsiye ka, duwa a riŋ tsəɗaŋŋa i təv tar tsidze. Dukw ana tə dzalawa ya ka, ŋgwal ŋa tsa. Dite ku mege a sàs a tar mege dukw ana ŋgwal ŋa tsiye tekeɗe ka, gəzləŋ tar a wir a tsa, aka ne ba tar. ¹⁶Tar riŋ ihər ta gweɗe a ka, waytsà mì sər Mbulum ndzer, tsaatsa i təv gà dukw tar ana ta ge a ya ka, pàrsa, tə sər tsa. Tar ka, gà ŋgwal ŋa tsa fit, aɗaba ana a sàs a tar magəsa ahəm aà Mbulum tsiye, dite ka, tar tekeɗe, ti sle a aà mege dukw ana ŋgwal ŋa tsiye asa mbaŋa.

Dzeŋge a mburma ka, dukw ana ndzer ŋa ya

¹Ama kər kinehe, dzeŋge a mburma ka, dukw ana ndzer ŋa, a de a ndaka vatwa Mbulum a. ²Tsik a gà mburma ana gà màndawal ŋa ya ka, tə ta kwaya tsa. Mede tar ma ge ka, ŋgwal ŋa, dite gà mburma tì zlibe à ter a ya. Tə dzala gà gər ka, ndaka vatwa ŋa, ta gəs Mbulum a gəzləŋ tar lele. Ta waya gà asiŋ gà mburma ŋgiɗ nda gəzləŋ ilik ŋa, ta gəs gəzləŋ i təv meslè duwa ya tserdze. ³Gà məkəs ana gà màndawal ŋa ya tekeɗe ka, kataya mbaŋa. Gwaɗa a tar ka, mede tar ma ge ŋgwal ŋa lele, kamala ana a tsahən aà Mbulum a. Ti ti ne gà ɓəzla melèvekè ahəm aà mburma lèvèk lèvèk tsa, kige tsa ti ne ɓele guzum tsa asa. Say ti ɗif ka, à dukw ana ŋgwal ŋa ya, a gà asiŋ gà mburma ŋgiɗ ivaɗ, na dite ti zezem a tar a. ⁴Na tàa ge dər kataya ka, dite ti ɗif a dər a gà məkəs ana gà daala ŋa ya mbaŋa, meme na ta weye a gà zal tar, nda gà ɓəza tar a. ⁵Dite i dəba ŋa ya ka, tar tekeɗe, ti sle aà mene a gà ɓəzla metsehe, ta ge a muva tsa. Ta ge a megemir i gà ma tar tehteh lele. Ta gewe a ka, dukw ana ŋgwal ŋa ya, ta gis a ahəm aà gà zal tar lele mbaŋa. Na tàa ge dər kataya ka, wura a ti tsik a dukw ana ŋgwala tsiye, aà bazlam Mbulum tsa.

⁶Tsik a gà gawla kamala taŋa ya mbaŋa. Ta ge metsehe, ta kwara ba tar lele. ⁷Ama kər ka, ge dukw ana ŋgwal ŋa ya ɗekɗek pəra, na dite gà asiŋ gà gawla ata tàa fə̀r aà kər i təv gà dukw ana ki ge a ŋgwal ŋa tserdze ya ka, ti zezem a kamala biy yak ata ki ge a ya mbaŋa. I təv ana ki dzeŋge a ter a ya ka, dzeŋge a tar ndaka vatwa Mbulum nda gəzləŋ ilik ŋa. Ka ti tsik a tar aɗəm dukw ana taf masakəŋa ya tsa. ⁸Dzeŋge a tar ka, dukw ana ndzer, wura a sle a aà mewele aà kər a tsiye, na dite gà ɓəzla mene are yak tekeɗe ka, ta ge a hwarwa, aɗaba ana ta ŋget a vatwa aà metsìkè aà kər dukw ana ŋgwala tsa, zləmana ti tsik a ya asa tsiye.

⁹Gà ɓele tekeɗe ibam ka, tsik a tar, ta gəs ahəm aà gà ɓəzla ga tar kəla pat, nda təv dukw ana tserdze ya. Ta ge a tar dukw ana a tsahən aà tar a, tə̀ sə̀rdala, ti niw bazlam tar tsa. ¹⁰Tə zla aà tar duwa ya nda akəl a tsa asa. Ama ta ge ka, dukw ana ŋgwal ŋa ya ivaɗ, na dite gà ɓəzla ga tar ata ti sir a dər ka, tar gà ɓele ndzer a. Dukw ana ta ge a tserdze ya ka, na dite gà mburma tì zlibe a à bazlam ana ki dzeŋgekwe a aka gər Mbulum, mala məmbə̀là à kwa ya.

¹¹Ama gà mburma Mbulum ta ge gà dukw ata i tsik a. Aɗaba ŋgat ka, a pàt a kwa à ŋgwal ŋgar ana a ge a gà mburma tserdze ndərzakka ya, a waya məmbə̀là à kwa. ¹²Mbulum a ge a kwa ŋgwal ŋgar ata ka, dite kà zazamakwa mede ana ŋgwal ŋa tsiye, nda gà dukw gər ahəɗ ana meèweke ba kwa a waya ya asa tsa. Ki ndzekwe a ika gər ahəɗ ka, nda metsehe, nda mege dukw ana ndzer ŋgwal ŋa ya. Mede kwa na à tsehin a aà Mbulum a mbaŋa. ¹³Ndzakwa ka, nda mandza zləm, vavakwa pat ŋgwal ŋa ata Yesuw Kiristi, mala məmbə̀là à kwa à mère a ya. A mère a ka, nda mezlibe ŋgar ana tì zlibe a à ŋgat a. Ŋgat ka, Mbulum kwa batsah ŋa ana a za gà dukw tserdze ya. ¹⁴Ŋgat a dzeye à mesife ŋgar aɗaba kwa. Kamala taŋa ya na a pəl a kwa dər à bakal kwa tserdze ya. A bara aà kwa bakal kwa ya, na dite kà nekwa gà mburma ŋgar ana gà biy ŋgar, ta vile a ba aà mege gà megemir ana ŋgwal ŋa lele ya.

¹⁵Dzeŋge gà bazlam aaha i wetse dze ya, a mburma. Kà mà a taraha à arəv. Be à ɗaf a gà na tì dzer a zləm tsiye, ka pala a tar ahəm. fafəlawa a tar nda ndzəɗa ana Mbulum a vəlak a. Ka ta vəl vatwa a wura ilik aà metsìkè aà kər dukw ana ŋgwala tsiye tsa.

Mendze gà ɓəzla megìse ana ŋgwal ŋa ika vatwa Mbulum a

¹Tsik a gà mburma Mbulum lele, ta həna à gər a bəɗ a gà ɓəzla makwàrà mburma, nda gà ɓəzla meslire tar ana tə dza aɗəm tar a. Ta gəs aà tar ahəm, ta hadzal ba aà mege dukw ana ŋgwal ŋa ya kəla pat. ²Gwaɗa a tar ka, ti tsik dukw ana ŋgwal ŋa tsiye aà wura tsa. Ta gewa maàga tsa asa mbaŋa. Ama ti ne ka, gà ɓəzla magəsa gəzləŋ nda mazlə̀bà à gà mburma tserdze ivaɗ. ³Aɗaba akahər ata ka, kwa tekeɗe, metsehe kwa a riŋ tsa mbaŋa, kə̀ gə̀sakwa ahəm tsa, kàa dzeyekwa ika vatwa ndzer ŋana ya. Kà nekwa ka, gà ɓele dukw ana ba kwa a waya ya ɗekɗek. Kwa mandza ŋa ka, gà ɓəzla swalwa. Ki gewakwa are aka dukw mburma. Gà mìsle ŋgiɗ tàa nekwa are ka, kwa tekeɗe, kàa nekwa a tar aɗəm are mbaŋa. ⁴Ama ku mege kataya tekeɗe, Mbulum ana ŋgat mala məmbə̀là à kwa ya, aka pàt a kwa à ŋgwal ŋgar ana a ge a kwa akahər ata ya, dite meme na a waya kwa hinne ya. ⁵Kamala megweɗe ya, a mbəl à kwa ka, taf masakəŋa, kàa vəlakwar aɗəm duwa tsa. Bəla ki gweɗekwe a, a mbəl à kwa ka, agəra dukw ana ki gewakwar ŋgwal ŋa ya. Ama ka, kataya tsa. A mbəl à kwa ka, agəra ana kà ndzekwar are tsehe ya ɗekɗek pəra. A bara bakal ana i gəzləŋ kwa ya. A ge dər kataya ka, nda ndzəɗa Mezite Mesife ŋgar ana tsəɗaŋŋa ya. Kamala taŋa ya, a wa dər kwa masula ŋa asa, dite na kə̀ ŋgatakwa mesife ana awiya ŋa ya. ⁶Mbulum a vəl a kwa Mezite Mesife ŋgar ka, maràhà ŋa tìs lele, nda ahər Yesuw Kiristi, mala məmbàlà à kwa. ⁷A ge dər kamala taŋa ya ka, na dite kə̀ ŋgatakwa mesife ana à ndìv a tsa, kà sərakwa dər ka, a ta vile a kwe a ndzer a. A ta ge a kataya ka, aɗaba ana Mbulum a ge a kwa ŋgwal ŋa nda ahər Kiristi ya, dite araha na kinehe kà nekwa tsəɗaŋŋa ika miɗ ŋgar a. ⁸Dukw ana i tsikik a ya ka, ndzer kaɗəŋ, pàrsa iɗəm tsa.

A sèsiŋ ka, ki dzeŋge a gà dukw ata a gà mburma kəla pat, dite gà na ta gəs Mbulum a, ta ge dukw ana ŋgwal ŋa ya kəla pat mbaŋa. Aɗaba taŋa ka, lele, a ge a ŋgulum a gà mburma. ⁹Ama kər ka, da i təv gà bazlam ana tì dze akaba a taf masakəŋa ya. Na bəla ta fèfil a aka gər gà tsir tar ana akahər ata ya, nda gà bəla ta mbetsebe a ahəm agəra məpala ahəm Musa ka, ka ta fàfəl a tar aaka tsa. Aɗaba mege dukw ata ka, taf masakəŋa, tsəka, a ge a ŋgulum a mburma tsidze. ¹⁰Na wura a dzèbe a aà masàsà ikaba gà mburma Mbulum a ka, ɗifer à metsehe dzekwiŋ. Na aka miyak à mege dukw ata tsəka, ɗifer à metsehe masula ŋa asa. Na bəla aka tsaraka tsa asa hiywe ka, sifek miyak à ŋgat, ka ndzum akaba i təv ilik ŋa nda gà ŋgat asa tsa. ¹¹Kər kà sər medzibe gà mburma ata ka, wiyik tàa dzeye ika vatwa Mbulum a. Tar ka, gà ɓəzla bakal, ta bets a ba nda ahər tar ŋa.

Mandəvandəv wusa ana Pul a ge ya

¹²I slirehe a Artemas, kige tsa bəla Tikikus a təv yak a fata mba. Na kàa ŋgatar ka, yaha vatwa aà madaha a təv gà a Nikupulis a fata tsəma. Aɗaba i dzala ka, i gwa, i ti ndze a a fata tsəka, mə̀tasl aka à medzè ahər ba, haa a təv ana aka mah ba i bəɗ a dzekwiŋ. ¹³Zlak gà Zenas, mala meɗìfè à metsehe a mburma nda təv mege seriye ndzer ŋana, nda Apalus lele. Zlak tar i təv ana ti de a aka miɗ, ti dehe a a təv yak a. Ge a tar dukw ana a sàs a tar a, kuɗa duwa ma ge a tar tsa. ¹⁴Gà asiŋ gà mburma ma ana ta gəs Yesuw Kiristi kamala ma ya tekeɗe ka, say ti sinike ba aà mege dukw ana ŋgwal ŋa ya kəla pat mbaŋa, na dite ka, ti sir a dər, tì zlèk a gà na duwa aà tar tsiye ya. Na tàa ge dər kamala taŋa ya tsəka, megìse tar ana ta gəs a ka, a ge a ŋgulum ɓav tsa.

¹⁵Gà na mandza ŋa ɗa i təv ga ya, ta gikeha wusa mbaŋa. Ge a mər wusa a gà mburma Mbulum ana i fata tserdze, ti ne gà masla mər a.

Mbulum ma ge a kurum ŋgwal tserdze.