SUNWA YUHANA

SUNWA

ana a da

aka YUHANA ya

Malahalah mifefile ana aka gər wakita aaha ya

¹Wakita aaha a fàfəl ka, aka gər dukw ana Yesuw Kiristi a ɗif dər a gà na ta ge a megemir a Mbulum a. Aɗaba Mbulum na a gwaɗar, ɗif a tar dər a, dite ka, tə sər aà dukw ana a ta ge a ba bise ya. Aɗaba taŋa na Yesuw Kiristi a slərra gawla ŋgar a təv Yuhana ana mala meslire ŋgar a, dite na a ɗifer à gà dukw ata ya. ²Ama Yuhana ata a mà ka, à dukw ana a ŋgatar nda are ŋgar a tserdze, kamala megweɗe ya, a mà ka, à bazlam Mbulum nda gà dukw ana Yesuw Kiristi a ɗifer dər à ndzer ŋa ya tserdze. ³Maŋgayaba ika gər wele ana a sle a aà medzeŋge bazlam aaha a dara i təv Mbulum a. Dite gà na tə tsaraka bazlam sunwa ata tì dzer a zləm a tekeɗe, maŋgayaba ika gər tar mbaŋa. Aɗaba sərum dər, gà dukw ata tserdze ya ka, aka à mendze aɗəm.

Yuhana a geha wusa a gà mburma Mbulum ana

i gà kwite ŋgiɗ pampam təsəla ya

⁴Iye Yuhana, i wetseha wakita aaha a gà mayahaba gər gà mburma Mbulum ana i təv pampam təsəla ika ahəɗ Asiya ya. Dukw ana i wetse ya ka, araha: Mbulum mi pise a kurum ahəm, mə vəl a kurum matasla yam a gəzləŋ zayya lele. Ŋgat ka, wele ana mandza ŋa aà bəra aà biybiy, à gər ana gər ahəɗ a riŋ zukw tsiye. Ŋgat a riŋ kinehe, dite ŋgat a riŋ a ta mère a aka gər ahəɗ a mbaŋa asa ya. Dite gà Mezite Mesife ŋgar ana təsəla*fa* gà mehìtsè ŋa ika təv mendze Əbay ŋgar a tekeɗe, ta pise a kurum ahəm, ta vəl a kurum matasla yam a gəzləŋ zayya mbaŋa. ⁵Dite Yesuw Kiristi ana ŋgat mala sida nda ndzer ŋa ya tekeɗe ibam, mi pise a kurum ahəm, mə vəl a kurum matasla yam ata a gəzləŋ mbaŋa asa. Ŋgat ka, wele ana a lah məmbə̀lara i məməta ya. Ŋgat ka, Əbay ana ika gər gà Əbay gər ahəɗ tserdze ya.

Ŋgat ka, a waya kwa, a dzeye à mesife ŋgar aɗaba kwa. Agəra ana a dza à məmbəz ŋgar ata ya ka, a beye dər à kwa i ahər bakal kwa ya. ⁶A dza kwa a təv mekwere Əbay ŋgar ana a kwere a ya. Dite a ne à kwa gà ɓəzla mandəva kuɗa a Mbulum aà mege meslire a Mbulum Tsir ŋgar ata mbaŋa asa. Gà mburma tserdze tì zlibe a à ŋgat, ta gweɗe a, ndzəɗa tserdze a ne ka, biy ŋgar aà biybiy. *Amin.

⁷Gwim metsehe, a dere a ka, nda hulɓukw a.*fb* Ku weke a ŋgeteriŋa, ku mege gà na ta geyer suwal a tekeɗe ya. Gà slàla pampam ika gər ahəɗ tserdze, ti tiweye aaba a aɗaba ŋgat. A ta ge a ba ka, kamala taŋa ya kaɗəŋ ndzer. Amin.

⁸Mbulum BATSAH kwa ŋana ŋgat Əbay ika gər gà duwa tserdze ya, a gwa ka: «Iye na malahalah ŋa ika gər gà duwa tserdze ya, dite iye asa na i ti ndìv a à gà duwa tserdze ya mbaŋa asa.» Ŋgat ka, wele ana mandza ŋa ɗa aà bəra aà biybiy, à gər ana gər ahəɗ a riŋ zukw tsiye. Ŋgat a riŋ kinehe, dite ŋgat a ta mère a aka gər ahəɗ a asa mbaŋa.

Yesuw Kiristi a pàt à ba a Yuhana

⁹Iye Yuhana, damər kurum na a wetse a kurumaha wakita aaha ya. Iye nda gà kurum ka, kwa mandza ŋa i təv ilik ŋa nda gà Yesuw Kiristi. Aɗaba taŋa, iye kinehe ka, i sèwèr a are kamala kurum a mbaŋa. Iye riŋ ihər i bès a gəzləŋ mesewere are ata nda gà kurum, na dite ki ndzekwe a i *mekwere Mbulum ana a kwere a ya, nda gà kurum tserdze asa mbaŋa ya. Iye ka, ta gəs iye, tə da à iye aka ahəɗ ana malàwàrà ŋa nda yam, tə zalar Patmus a. Megìse ana ta gəs iye ya ka, agəra ana i tsikewa bazlam Mbulum parakkà, i gwaɗawa ka: «Yesuw na a ɗif a kwa à vatwa ndzer ŋana ya.» ¹⁰A pat duwa ka, Mezite Mesife Mbulum a dara aka gər gà ya. A pat ata ka, pat mazlə̀bà à BATSAH kwa ŋa. I fataya ka, i tsarakara mifefile ŋa a ɗera i dəba gà ya. A ɗe ka, ŋgarra lele, kamala məvata mezleliŋ ana ta vèt a ya, nda ndzəɗa hinne. ¹¹A gweɗiŋ: «Dukw ana ki ŋgeter a ya ka, wetse aka wakita. Kàa wetse aba ya ka, ka sləraha a gà mayahaba gər gà mburma Mbulum ana i gà kwite ŋgiɗ pampam təsəla ya, a gà Efesiya ya, ndəna i Samirna ya, nda gà na i Pergamus a, dite nda gà na i Tiyatira ya, nda gà i *Sardis a, nda gà i Filadelfiya ya, dite nda gà na i Lawdikiya ya tserdze mbaŋa.»

¹²I tsaraka kataya tsara ka, i mbəɗ à ba ndàra a dəba. I gwa ka, i fìrehe a aà wele ana a fèfiliŋera ya. Mimbìɗe ata i mbəɗ à ba ya ka, i ŋgataha a gà dukw duwa a riŋ təsəla, məvàɗà ŋa nda gura ana tsakala ŋa hinne, à sìkim a ba tsa, gà akwa ikəka pampam ndwatsndwatsutstswa ya. ¹³I magər gà dukw ata ka, i ŋgataha a duwa a riŋ iɗəm mehìtsè ŋa dzèŋŋe kalkal kamala mburma ya. Petek ikəka zùbəl ŋa tàs a bəɗ aka dəba sik. Dite madànà ba ŋa ə̀ŋgəts i gəzləŋ a nda slarapa duwa məvàɗà ŋa nda gura ana tsakala ŋa à sìkim a ba tsiye mbaŋa. ¹⁴Ambəz gər ŋgar ka, a ndza herrè kamala slewize ya. Are ŋgar tekeɗe ka, a də̀v kamala akwa ya. ¹⁵Sik ŋgar ka, a də̀v ndizze kamala ndzemde ana ti tike a akwa ya. Mifefile ŋgar ka, a ɗe hinne kamala meɗe mazaw ana à dze a a bəɗ dzuruvva ika madzundzuruv a. ¹⁶Gà mawusawus təsəla magàsà ŋa i ahər mezime ŋgar. Dite màsalamà ana a zəm hapəpəpa, matasla ŋa tsèke sula ya, a dere a ka, i bazlam ŋgar a. Yam are ŋgar ka, a də̀v twiytwiy kamala pat ana à div a nda magər pat a. ¹⁷Aləka i ŋgatar kataya ka, tazl i dəɗ aà mbulum a, aka miɗ ŋgar a fata, kamala ana iye məməta ŋa ya. I dəba ŋa ya ka, a daha, a tike aka iye ahər mezime ŋgar, dite a gweɗiŋ: «Magəɗa ma gik tsa. Iye na malahalah ŋa ika gər gà duwa tserdze ya. Dite iye asa na i ti ndìv a à gà duwa tserdze ya asa mbaŋa. ¹⁸Iye ka, wur ana a ndze a aà bəra nda gà mesife ya. Ama ka, Yàa mət, i dəba ŋa ya ka, Yàa mbəlara i məməta ya asa. I ndze a aà bəra nda mesife ka, aà biybiy. Iye ka, ndzəɗa ŋa ika gər məməta, nda gà ika gər təv mendze gà məməta ana tar mandza ŋa iɗəm a asa mbaŋa. ¹⁹Aɗaba taŋa, dukw ana ki ŋgeter a kinehe ya ka, wetse aba ya. Malahalah ŋa ka, dukw ana a ge ba kinehe ya, dite i dəba ŋa ya, dukw ana a ta ge a ba aka miɗ mba ya. ²⁰Ama gà mawusawus a təsəla ŋa aaha kə̀ ŋgatar i ahər mezime gà ya, dite gà lalampa ana təsəla, akwa iɗəm məvàɗà ŋa nda gura ana tsakala ŋa hinne ya ka, i ɗifek a à ndzer ŋana aka gər gà dukw ata. Aɗaba gà mawusawus ata təsəla ya, kamala megweɗe ya ka, gà gawla Mbulum ana a dza tar aka gà mayahaba gər gà mburma Mbulum ata təsəla ya. Dite gà məvàɗà gà lalampa ata təsəla ya tekeɗe, kamala megweɗe ya ka, gà mayahaba gər gà mburma Mbulum ata təsəla ya mbaŋa asa.»

Bazlam ana Yesuw a tsikeha a gà mburma Mbulum ana

i kwite Efesiya ya

¹Wele ata a gweɗiŋ asa: «Wetseha bazlam aaha a gawla Mbulum ana i kwite Efesiya, a kesle a gà mburma Mbulum a.*fa* Ki wetse a ka, bazlam aaha:

Bazlam ŋa na a tsik ka, wele ana gà mawusawus ata təsəla magəsa ŋa i ahər ŋgar a, dite ŋgat ka, wele ana a riŋ à sìweye a ika magər gà dukw ata təsəla, məvàɗà ŋa nda gura ana tsakala ŋa hinne, gà akwa ikəka ndwatsndwatsutstswa ya. ²Gwaɗar ka: I sər megemir kurum ana ki gwim a ya tserdze. I sər ka, kàa mərum aba aà megemir gà ka, hinne, dite kàa gəsum gəzləŋ i mesewere are kurum ana kà sèwèrwim a mbaŋa asa. I sər asa ka, kàa gəsum aaba gà na ta ge a dukw ana ŋgwala tsiye, aà mendze ika magər kurum tsidze. Gà mburma ana ta gwaɗawa, waytsà mər ka, gà ɓəzla meslire Mbulum a ka, kà dzikwim à tar, ka sərum dər ka, tar gà ɓəzla pàrsa taf masakəŋa. ³Kurum riŋ ihər ki mirwim a aba a hinne, ku mege kurum riŋ ihər ki sèwèrwim a are aɗaba iye tekeɗe ka, kàa yum ba tsidze. ⁴Ama kəla ka, duwa a riŋ ilik ika magər kurum na i samata ka, ŋgwala tsiye. Dukuməŋa ka, aɗaba ana kà wayum iye kamala ana kà lah mawayum iye akahər ata piŋŋe ya asa tsiye. ⁵Dzalum gà gər ka, aka mede kurum ana akahər ata piŋŋe ya. Ki dzelwim a ka, aɗaba la na mì dəɗ ika vatwa ya. Ama kinehe ka, mbəɗum à madzala gà gər kurum, dite kà mùm aka megemir ana ŋgwal ŋa kà lah megwim akahər ata piŋŋe ya asa. Na ki mbiɗwim a à madzala gà gər kurum tsəka, i dere a a təv kurum a, i zle a aà kurum məvəɗa dukw ata akwa ikəka ndwatsndwatsutstswa ya. ⁶Ama dukw ana ki gwim a ŋgwal ŋa, i zlibe a dər à kurum a ka, aɗaba ana kurum riŋ ihər ki nwim a are a dukw ana gà Nikulas ta ge a ŋgwala tsa, kamala ana iye tekeɗe ka, i ner are mbaŋa ya.

⁷Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayaha ba gər gà mburma Mbulum a lele.

Gà na tàa mba aà dukw bakal gər ahəɗ a ka, i ti dzèye a ter a mawà dizl ɗaf ana madzàvà ŋa i gùvàh Mbulum, a vile a mesife a mburma ya, ti zimiŋa.»

Bazlam ana Yesuw a tsikeha a gà mburma Mbulum ana

i kwite Samirna ya

⁸Wele ata a gweɗiŋ asa: «Wetse bazlam aaha a gawla Mbulum ana i kwite Samirna, a kesle a gà mburma Mbulum a. Ki wetse a ka, bazlam aaha:

Bazlam ŋa na a tsik ka, wele ana malahalah ŋa ika gər gà duwa tserdze ya, dite ŋgat na à ndìv a à gà dukw ata tserdze ya mbaŋa asa. Wele ata ka, aka mət, ama aka mbəlara i məməta ya asa. ⁹I sər mesewere are kurum ana tì sèwèr a kurum a ya. Taŋa kurum ka, gà ɓəzla matawak asa. Ama i təv gà ka, kurum gà ɓəzla limana ivaɗ.*fb* Dite gà dukw ana ti tsik aà kurum ŋgwala tsiye tekeɗe, i sər mbaŋa. Na a tsikewa gà dukw ata kamala taŋa ya ka, gà na ta gwaɗawa, làŋa mər ka, gà Yahuda ya. Ama tsaatsa, tar ka, ti zezem a dukw gà Yahuda nda ndzer ŋa tsa. Tar ka, gà ɓəzla mazazama Əbay sitene. ¹⁰Taŋa damər mesewere are kurum aaha ki sèwèrwim a kinehe ya, à sìkèh a aka gər kurum a ka, aka à mendze aɗəm. Ama kəla ka, ki gwim magəɗa tsa. Sərum dər ka, Əbay sitene a ta gese a gà mìsle ŋgiɗ ika magər kurum a, a daŋgay bise. A dzik a à kurum, ki ŋgetwim a mesewere are i huɗ mehinne kurwa ya. Bàsumaraha, na ku mege ta bets a kurum tekeɗe ya. Na kàa mərum aba kamala taŋa ya ka, i ti dzèye a kurum a gà dukw mayaba kurum, kamala megweɗe ya ka, mesife ana à ndìv a tsa aà biybiy a.

¹¹Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.

Gà na tàa mər aba i mesewere are ya, ku mege ta bats tar tekeɗe ka, mesife tar a dzeye a tsidze.»

Bazlam ana Yesuw a tsikeha a gà mburma Mbulum ana

i kwite Pergamus a

¹²Wele ata a gweɗiŋ asa: «Wetseha bazlam aaha a gawla Mbulum ana i kwite Pergamus, a kesle a gà mburma Mbulum a. Ki wetse a ka, bazlam aaha:

Bazlam ŋa, na a tsik ka, wele ana màsalamà ŋgar a riŋ matasla ŋa hapəpəpa, a zəm tsèke sula ya. ¹³I sər təv ana kurum mandza ŋa iɗəm a. Təv ata ka, i mekwere Əbay sitene ana a kwere a ya. Ama kəla ka, kàa miyakum à iye tsa, kàa dum aka miɗ nda megìse kurum ana kə̀ gəsum iye nda gəzləŋ kurum a, ku mege i təv ana ta kəɗ aà kurum Antipas, wele ana mburma gà ndzer, a ɗif à zləm gà tekeɗe ya. Ta kəɗ ŋgat ka, ika magər kurum a, i təv ana Əbay sitene mandza ŋa iɗəm a. ¹⁴Ama kəla ka, duwa a riŋ ika magər kurum, na i samata ka, ŋgwala tsiye. Aɗaba gà asiŋ gà mburma ŋgiɗ ika magər kurum, ti zezem a ka, dukw Balaam ana a dzeŋge a mburma akahər ata ya. Ŋgat ka, a ɗif à duwa a Balak, dite ka, meme na a bene a gà mburma Isərayel a bakal a. Dukw ana ta bana ahər tar a ka, ta papəɗ slu ana tə tàwàl dər fəla ya, nda mege mezelme nda təv muva mbaŋa asa.*fd* ¹⁵Gà mìsle ŋgiɗ a riŋ ika magər kurum ka, ta gewa kamala taŋa ya mbaŋa. Tar ti zezem a ka, dukw ana gà mburma gà Nikulas ti dzeŋge a ya.*fe* ¹⁶Mbəɗum à madzala gà gər kurum, tsəka, i dere a a təv kurum a nda gà màsalamà ata a dere a i bazlam gà ya ya. I ge a dər gùvəl aà gà mburma kurum ata.

¹⁷Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.

Gà na tàa mba aà dukw bakal a ka, i ta vile a ter a ɗaf ata makàhà ŋa i mbulum, tə zalar *mana ya.*ff* I ti dzèye a ter a kur ana herrè ŋa ya mbaŋa. Ika kur ata ka, zləm awiya ŋa mewetse ŋa ikəka. Ama zləm ata ka, wura a sər tsa, say wele ana aka ŋgat a.»

Bazlam ana Yesuw a tsikeha a gà mburma Mbulum ana

i kwite Tiyatira ya

¹⁸Wele ata a gweɗiŋ asa: «Wetseha bazlam aaha a gawla Mbulum ana i kwite Tiyatira, a kesle a gà mburma Mbulum a. Ki wetse a ka, bazlam aaha:

Bazlam ŋa, na a tsik ka, Kəla Mbulum, wele ana are ŋgar a də̀v kamala akwa ya, dite ŋgat ka, wele ana sik ŋgar ndizze kamala ndzemde ana ti tike a akwa ya asa mbaŋa. ¹⁹I sər dukw ana kurum ihər ki gwim a ya. I sər ka, kurum riŋ ihər ki weywim a ba ika magər kurum, ki dwim a dər aka miɗ aka miɗ nda megìse kurum ana kə̀ gəsum iye nda gəzləŋ a, dite kurum ihər ki giswim a gəzləŋ i təv gà duwa ya tserdze mbaŋa. I sər meme na kurum ihər ki zlèkeywim a ba ika magər kurum, dite meme na ki sìkèhwim a à megemir kurum ana ŋgwal ŋa ya asa mbaŋa. ²⁰Ama kəla ka, duwa a riŋ ilik ika magər kurum ana a tsahən aà iye tsiye. Dukuməŋa ka, aɗaba ana kà vəlum vatwa a məkəs aka tə zalar Izebel a, aà mandza ika magər kurum a. Ŋgat ka, a gwa, waytsà iye ka, mala məma à guma Mbulum, tsaatsa taŋa ka, a bene a dər gà mburma gà ana ta giŋ a meslire ya. Dukw ana a dzeŋgewa a tar a ka, mege mezelme nda təv muva nda məpapəɗa slu ana tə tàwàlawa dər fəla ya. ²¹Ama ka, Yàa vəlar vatwa zaakwa, na à mbìɗ a à madzala gà gər ŋgar zləmana ya. Ama a sasar tsa, a de a aka miɗ ka, nda mege mezelme ŋgar ata hiywe pəra. ²²Aɗaba taŋa, i tike ahər a mesewere are hinne ika təv mehinne ŋgar. Dite gà na ta gewa akaba muva ata nda gà ŋgat tserdze ya tekeɗe, ti ti sèwèr a are hinne mbaŋa. Ti ndziŋ a are tsehe tsidze, say na bəla tàa mbəɗ à madzala gà gər tar, tàa miyak à mege dukw bakal tar ata ya dzekwiŋ, ²³tsəka, i ta bets a gà ɓəza ŋgar mbaŋa, na dite gà mayahaba gər gà mburma Mbulum tserdze ti sir a dər ka, iye na i sər dukw ana gà mburma tə dzala i gər tar, nda gà dukw ana a tsahən aà tar a ya. Kurum tserdze ka, i ti dzèye a kurum a gà dukw mayaba kurum, ku weke kalkal nda megemir ŋgar ana a ge ya.

²⁴Ama kurum gà asiŋ ana i Tiyatira ya, kurum ka, kàa zazamum guma məkəs ata tə tsa. Kurum ka, kà sinikwim à dukw ata ta gwa ahər, makàhà ŋa i huɗ ŋa ka, biy Əbay sitene ya tsa. Aɗaba taŋa, duwa ŋgiɗ a riŋ na aà metsike a kurum, dite ki gwim a ya ka, a riŋ asa tsa, say dukw ata pəra. ²⁵Gəsum dukw ana ŋgwal ŋa, kà sinikwim dər ba ya, nda ndzəɗa ɓəŋɓəŋ lele, haa a pat ana i ta mère a ya. ²⁶Gà na ta mbè a aà dukw bakal, dite ta ge a dukw ana i waya ya, haa a pat mandəvandəv ŋa ya ka, i ta vile a ter a ndzəɗa aka gər gà slàla gà mburma tserdze. ²⁷Ndzəɗa ata i ta vile a ter a ya ka, kalkal kamala ndzəɗa Tsir gà ana a viliŋ ahər a mbaŋa. Ti ti kwere a mburma ka, nda ndzer ŋa nda ndzəɗa. Ta bets a iɗəm gà mburma ana gà ŋgwala tsiye, kamala wur ana a bets a magùzlaŋgur gà mesigire ana huluɓ huluɓ a. ²⁸Ama ndzəɗa tar ata, ti sir a dər ka, aà *mawusawus madə̀và mbulum ana i vile a ter a mbaŋa ya.

²⁹Na wura a riŋ gər ŋgar aka ge aà metsereke ya ka, mà dza zləm a dukw ana Mezite Mesife Mbulum a riŋ ihər a tsik a a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana

i kwite *Sardis a

¹Wele ata a gweɗiŋ asa: «Wetseha bazlam aaha a gawla Mbulum ana i kwite Sardis, a kesle a gà mburma Mbulum a. Ki wetse a ka, bazlam aaha:

Na a tsik bazlam ŋa ka, wele ana gà Mezite Mesife Mbulum təsəla*fa* mandza ŋa i təv ŋgar, dite gà màwùsàwùs təsəla i ahər ŋgar asa mbaŋa ya. I sər megemir kurum ana kurum ihər ki gwim a ya. Ta gweɗe a kurum a ka, waytsà kurum riŋ nda gà mesife kaɗəŋ, ama tsaatsa pàrsa. Kurum ka, gà məməta ŋa ivaɗ. ²Pìɗekwim, ka vəlum aba ndzəɗa, dite na ki ta metwim a kweleŋ tsiye. Aɗaba Yàa dzik à kurum, i samata, mede kurum ika miɗ Mbulum ka, a de a zukw tsa. ³Dzalum gà gər ka, aka bazlam ŋgwal ŋa ana kà tsarakum akahər ata ya. Megìse kurum ata kə̀ gəsum ɓəŋɓəŋ lele ya ka, mə̀ məts a kurum gər tsa. Ama kinehe ka, mbəɗum à madzala gà gər kurum, dite kə̀ gəsum lele nda gəzləŋ ilik asa. Aɗaba taŋa, na kàa pìɗekwim tsəka, sərum dər, i ti dere a a təv kurum a ka, sèrèh kamala mala akəl a. Ki sirwim a pat ana i ti dere a a təv kurum a tsa. ⁴Ama gà mìsle ŋgiɗ a riŋ ika magər kurum i Sardis ka, tàa ge aruwaŋ aà gà petek tar tsidze. Tar ka, ti diŋ a gər lele. Ti ti dzèye akaba a ka, gà petek ana herrè ŋa ya. Dite mər nda gà iye ka, mìi ti sìweye akaba a i təv ilik ŋa. ⁵Kamala taŋa ya, na i ti dzèye a gà petek herrè ŋa aka gà na ta mbè a aà dukw bakal a. Tar ka, i mbete a à gà zləm tar ika wakita gà na tàa ŋgat mesife ya tsidze. I təv ana iye riŋ ika miɗ gà Tsir gà nda gà gawla ŋgar a ka, i gweɗe a parakkà, gà mburma aaha ka, gà biy gà.

⁶Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a riŋ a tsik a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana

i kwite Filadelfiya ya

⁷Wele ata a gweɗiŋ asa: «Wetseha bazlam aaha a gawla Mbulum ana i Filadelfiya, a kesle a gà mburma Mbulum a. Ki wetse a ka, bazlam aaha:

Na a tsik bazlam ŋa ka, wele ana tsəɗaŋŋa, bakal ihər tsa, dite ŋgat ka, mala ndzer ŋa asa ya. Lèkilè Əbay Dawda ka, i ahər ŋgar. Na bəla aka hə̀ndə̀k i duwa ya ka, wura ilik a sle aà mehìndìkè aɗəm a tsidze, kige tsa, na bəla aka hə̀ndə̀k aɗəm ka, wura ilik a sle a aà mehìndìkè iɗəm a tsa asa mbaŋa. ⁸I sər megemir kurum ana kurum ihər ki gwim a ya. Dite i sər asa ka, ndzəɗa kurum ka, hinne tsa, kwizikw pəra. Ama ku mege kataya tekeɗe, kàa giswim aà iye ahəm agəra dukw ana i tsik a kurum a. Kàa miyakum à iye tsidze. Araha, iye ka, Yàa hə̀ndə̀k a kurum i biye hərmaga ya. Wura ilik a sle a aà mahə̀ndə̀kà ŋa aɗəm asa tsa. ⁹Dzwìmiŋ zləm lele. Araha na dukw ana i ta ge a nda gà mburma ata ti zezem a Əbay sitene ya, tar ta gwaɗawa, làŋa mər ka, gà Yahuda ya, tsaatsa tar ka, ti zezem a dukw gà Yahuda ŋa nda ndzer ɓav tsa, tar ka, gà ɓəzla pàrsa masakəŋa taf: Ama i slirehe a tar a təv kurum. Ti dehe a, tì zlibe a à kurum nda mandza gurmits a bəɗ aka miɗ kurum, dite na ti sir a dər ka, iye riŋ i waya kurum a. ¹⁰Kurum ka, kàa gəsum aà iye ahəm, kàa mərum aba i təv gà mesewere are ya, kamala ana i tsik a kurum a. Aɗaba taŋa, i kesle a kurum a pat gà mesewere are ana ti ti dere a ika miɗ mba ya. Ama ti dere a ka, aka gər gà mburma ana ika gər ahəɗ a tserdze, aà medzìkè à tar. ¹¹Yàa à mimèra ka, bise. Gà dukw kurum ana ŋgwal ŋa, kà sinikwim dər ba ya ka, gəsum nda ndzəɗa ɓəŋɓəŋ lele, tsəka, gà mìsle ŋgiɗ ti ndzeke a aà kurum gà dukw mayaba kurum a. ¹²Gà na tàa mba aà dukw bakal a ka, i ti ndweŋ a tar kamala mendweŋe ya, i batsah ga Mbulum gà, dite ti ndze a i fata ka, hiywe. I ta wetse aà ter a zləm Tsir gà Mbulum, nda zləm kwite ŋgar ŋa mbaŋa asa. Ama kwite ata ka, Yeruzalem awiya ŋa ana a slirre a i gər ŋa i təv ŋgar ŋa ya. Dite i wetse aà ter a zləm gà awiya ŋana mbaŋa.

¹³Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»

Bazlam ana Yesuw a tsikeha a gà mburma Mbulum ana

i kwite Lawdikiya ya

¹⁴Wele ata a gweɗiŋ asa mbaŋa: «Wetseha bazlam aaha a gawla Mbulum ana i Lawdikiya, a kesle a gà mburma Mbulum a. Ki wetse a ka, bazlam aaha:

Na a tsik bazlam ŋa ka, wele ana tə zalar *Amin a, ŋgat ka, mala sida Mbulum ana ndzer, à ses a pàrsa tsidze ya. Dukw ana Mbulum a ge tserdze ya, a dara ka, i təv ŋgar a mbaŋa. ¹⁵I sər dukw ana kurum ihər ki gwim a ya. Aɗaba i sər, ki zezemwim a iye ka, nda gəzləŋ ilik ŋa tsa, dite kwets kà niwim iye ɓav tsa. Ana ka, ŋgulum ki zezemwim a iye nda gəzləŋ ilik, kige tsa, ki niwim a iye. ¹⁶Ama kurum ka, daɗəkɗəkka ika magər ŋa masakəŋa. Kamala taŋa ya ka, a sèsiŋ tsa. Aɗaba taŋa na i tifere a kurum i bazlam gà ya kamala tìzle ya ya. ¹⁷Kurum ki gweɗwim a i gər kurum ka, waytsà mər ka, gà Əbay ŋa, maa ŋgat duwa tserdze, kuɗa duwa a ge a mər a asa tsa. Ama kurum ŋa kà sərum aaba tsa. Kurum ka, gà ɓəzla mesewere are ivaɗ. Ti zleŋe a kurum, kurum ka, gà matawak hinne, sagurɗumɗum petek ika kurum tsa, dite kurum ka, gà guluf asa mbaŋa. ¹⁸Aɗaba taŋa kinehe ka, iye ihər i tsik a kurum a dukw ana ki gwim a ya: Ama ka, dumara, ka sakamum gura ana tàa làmbaɗa nda akwa tsəzlzla lele i təv ga ya, dite ka, ki nwim a gà Əbay nda ndzer ŋa kuɗa ya. Dumara, sakamum gà petek ana herrè ya mbaŋa, kà dzàyum akaba, na dite ka, ki ndzwim a kataya sagurɗumɗum, hwarwa a ge a kurum a asa tsiye. Sakamum yàwuf are, dite ka geywim a gà are kurum asa mbaŋa, na dite ki ŋgetwim a a vatwa lele asa ya. ¹⁹Iye ka, gà mburma ana i waya tar a ka, i kwere akaba a tar, i ɗif a ter a à metsehe. Aɗaba taŋa, mbəɗum à madzala gà gər kurum, ka zazamum iye nda gəzləŋ kurum ilik. ²⁰Tsarakum, iye riŋ mehìtsè ŋa aà gùva biye hərmaga, i lek a a dukw mahə̀ndə̀kà a ga. Wur ana aka tsaraka mifefile gà, dite aka hìndìkiŋ i ga ya ka, i de a a ga a ma ŋgar. Mìi zim akaba a ɗaf sula məma nda ŋgat tsùrùzl a təv ilik ŋa. ²¹Gà na tàa mba aà dukw bakal a ka, i vile a ter a vatwa, tə dara, mìi ti ndze a nda gà iye, ika təv mendze mekwere gà. Ar ka, kamala iye ana i mba aà gà dukw bakal a mbaŋa. Kinehe ka, mər riŋ mandza ŋa i təv ilik ŋa nda Tsir gà ika təv mendze mekwere ŋgar ata mbaŋa.

²²Na wura a riŋ gər ŋgar aka ge aà metsereke ka, mà dza zləm a dukw ana Mezite Mesife Mbulum a tsik a a gà mayahaba gər gà mburma Mbulum a lele.»

Mezlibe ana tì zlibe a à Mbulum i gər ŋa i mbulum a

¹I dəba ŋa ya, i fə̀r aà gəza mbulum ka, i ŋgataha a biye hərmaga mada a mbulum mahə̀ndə̀kà ŋa iɗəm a tùwaŋŋà. I tsarakara mifefile wele ata ndeɗiŋa, a fèfiliŋara, a ɗe kamala mezleliŋ a asa. Wele ata a gweɗiŋ ka: «Tsəlara a gər ŋa a faha ya, na dite i ɗifek a à dukw ana a ta ge a ba aka miɗ mba ya.» ²Ama i fataya tsara ka, Mezite Mesife Mbulum a dara aka gər gà ya. I samata ka, təv mendze Əbay a riŋ i gər ŋa i mbulum, wura a riŋ mandza ŋa ikəka. ³Wele ata ka, a tsahən ndzer. Yam are ŋgar a də̀v ka, kamala gà ŋgwal gà kur ata tə zal a tar gà *yaspa nda *sardis, tə də̀vawa twiy twiy twiy a. Təv mendze Əbay ata ka, màkə̀làh Mbulum a lawara tits. A də̀v ka, kamala ŋgwal kur ŋgiɗ ata tə zalar *imiradi ya mbaŋa. ⁴Gà təv mendze Əbay ŋgiɗ pampam dzik səla gəra faɗ, dìndìhtìhhe na ti le a təv mendze ata ya. I fata ka, gà bàba gà mburma a riŋ dzik səla gəra faɗ mbaŋa, tar gà mandzàyà ŋa ikəka. Gà petek ana ika tar a ka, tə ndza herrè. Dite gà felère tar riŋ i gà gər tar məvàɗà ŋa nda gura, kamala felère Əbay ana a ndze a dər a. ⁵Na a dara ika magər təv mendze ata ya ka, gà mewìtìɗè mbulum nda malaka ŋa ana a ɗewa dèɗìɗìɗè ya. Ika miɗ təv mendze Əbay ata ka, gà akwa a riŋ ŋgaŋŋa kamala gà lalampa ya təsəla, gà məvata ŋa. Ama gà akwa ata təsəla ya ka, kamala megweɗe ya, gà Mezite Mesife Mbulum ana a riŋ təsəla*fa* gà mehìtsèyè ŋa ika miɗ Mbulum a. ⁶Ika miɗ batsah təv mendze ata ka, duwa a riŋ kamala duluv a. A də̀v ka, twiytwiy kamala kwataramà ya, are a da iɗəm a ndzihndzih lele.

I fata ka, gà dukuməŋa a riŋ faɗ, tə lawara təv mendze ata tits aka magər. Gà dukw ata ka, tar riŋ nda gà mesife. Are aà tar ndwatsndwatsutstswa hinne, nda dəba asa, ndaka miɗ asa fit dze. ⁷Dukw malahalah ŋana ka, a ndzikiɗ ba azil. Dite masula ŋana ka, a ndzikiɗ ba kəla sla ana vugul ŋa ya. Məmakər ŋana ka, yam are ŋgar a ndzikiɗ ba kamala mburma ya. Dite dukw məfaɗ ŋana tekeɗe, a ndzikiɗ ba ka, zləra ana a bewa ndaà gəza mbulum a. ⁸Gà dukw ata tserdze ya ka, gà gwezleviyek aà tar ndilik ndilik asa. Dite are aà gwezleviyek ata ka, ndwatsndwatsutstswa, ku mege nda bəra, ku mege nda huɗ ŋa tekeɗe ya. Tar ihər tə làhawa dimis, ku mege ndaàpat, ku mege ndaàvəɗ hiywe pəra. I huɗ malàhà dimis tar ata tì lèh a ya ka, ta gwaɗawa:

«Kər Əbay Mbulum ka, batsah ŋa.

Kər ka, tsəɗaŋŋa. Bakal i təv yak tsa.

Gà ɓəzla bakal tekeɗe,

ti ndze a i təv yak tsa asa.

Ndzəɗa yak a riŋ ika gər gà duwa tserdze.

Kər riŋ mandza ŋa aà bəra biybiy,

à gər ana gər ahəɗ a riŋ zukw tsiye.

Kər riŋ kinehe, dite kər riŋ

ki ta mère a aka gər ahəɗ a mbaŋa asa ya.»

⁹Kamala taŋa ya, gà dukw ata faɗ a, tə làhawa dimis mazàmbàɗà dər à Mbulum, wele ana mandza ŋa ika təv mendze Əbay ata, dite ŋgat wele ana a ndze a ka, aà biybiy asa ya. Tì zlibe a dər à ŋgat, ta ger a kəkaaha. ¹⁰I təv ana tar riŋ ta ge a kamala taŋa ya ka, gà bàba gà mburma dzik səla gəra faɗ ŋa ata, tə dza gurmits a bəɗ aka miɗ Mbulum, wele ana mandza ŋa ika təv mendze Əbay ata ya, dite ŋgat wele ana a ndze a aà biybiy a asa mbaŋa. Tì zèmbeɗe a à ŋgat. Tì dzik a dər gà felère Əbay tar ata i gər a, tì dze a dər a bəɗ, aka miɗ ŋgar, ta gwaɗawar:

¹¹«Kər ka, Mbulum, dite kər Batsah mər ŋa.

Kər na ki ge gà duwa tserdze ya. A ge ba ka,

aɗaba ana kər kà waya ma ge ba ya.

Aɗaba taŋa na kər ilik ka, ŋgwal ŋa,

kà sle na mburma tserdze tì zèmbeɗe a à kər,

tì zlibe a à kər nda magəsa aà kər ahəm a.»

Tə zàmbaɗa à wele ana a ne Kəla Təmaŋ Mbulum a

¹I dəba ŋa ya ka, i ŋgataha a wakita i ahər wele ata mandza ŋa ika təv mendze Əbay a. Ar ka, məpàɗà ŋa i ahər mezime ŋgar. Mewetse duwa a riŋ ika wakita ata tsèke sula sula. Ta gasa nda dukw magəsa wakita təv pampam təsəla, na dite wura à pìl a dər ikaba ya tsiye. ²I dəba ŋa ya asa ka, i ŋgataha a gawla Mbulum duwa ndzəɗa ŋa, a riŋ à fèfil a nda magala ŋgəlakəkka. A gwa: «Weke na ŋgwal ŋa ika miɗ Mbulum, a sle a aà meŋgeheke ihər dukw magəsa wakita aaha ya, dite à pìl a dər ikaba ya ya?» ³Ama a fàfəl aba ya ka, tə ndza ɗikɗik, tàa ŋgat a wura tsidze. Ku mege i mbulum i gər ŋa, ku mege i huɗ biye, dite ku mege i ŋga tekeɗe ka, wura a riŋ tsa, na a sle aà məpala ikaba wakita ata aà mifìrè aɗəm a. ⁴I fataya ka, i tuwa hinne, aɗaba ana wura a riŋ ŋgwal ŋa ika miɗ Mbulum na à pìl a ikaba wakita ata ya, dite à fir aɗəm a ka, a riŋ tsiye. ⁵Ama i fataya ka, wura ilik ika magər gà bàba gà mburma ata dzik səla gər faɗ a, a gweɗiŋ: «Ka tə tuwa tsa. Tsaraka kwaŋ, aɗaba Əbay ana tə zalar azil a, a dara ka, i gwala Yuda ya, dite i hwife Əbay Dawda a asa. Ŋgat ka, a mba aà duwa tserdze. A sle aà meŋgeheke ihər dukw magəsa wakita ata təv pampam təsəla ya, dite à pìl a ikaba wakita ata ya.»

⁶I dəba ŋa ya ka, i ŋgataha a Kəla Təmaŋ, a riŋ ika magər ŋa, ika miɗ təv mendze Əbay ata. I fataya ka, gà bàba gà mburma ata nda gà dukw ata tar nda gà mesife faɗ a, tə lawara ŋgat tits. Ama Kəla Təmaŋ ata ka, kamala ana tàa kəɗ ilik a. Gà mbukum aà gər ŋgar təsəla, dite gà are ŋgar tekeɗe, təsəla mbaŋa. Gà are ata ka, gà Mezite Mesife Mbulum ana gà mehìtsè ŋa ika miɗ Mbulum, a slərawa tar, ku mege a ŋga, aka gər ahəɗ tserdze ya. ⁷Kəla Təmaŋ ata a da a təv wele ana ŋgat mandza ŋa ika təv mendze Əbay ata ya, a daha, a zla ihər wakita ata i ahər mezime ŋgar a. ⁸I təv ana a zla ya ka, gà bàba gà dukw ata faɗ nda gà mesife ya, dite nda gà bàba gà mburma dzik səla gər faɗ ŋa ata, tə daha, tə dzar gurmits a bəɗ aka miɗ ŋgar. Gà bàba gà mburma ata tserdze ya ka, tar nda gà gandzavəl i ahər. Dite gà ŋgwal gà tasà ana məvəɗa ŋa nda gura ya, aà tar mbaŋa. Dukw duwa iɗəm, na tàa wànà ka, a ze kamala wirdè ya, a zewa aà Mbulum hwaŋŋà lele. Dukw ata a ɗif ka, à meheme gà mburma Mbulum ana ta hemer a ya. ⁹Tə lah dimis awiya ŋana. I huɗ malàhà dimis tar ata tì lèh a ya ka, ta gwa:

«Kər na ŋgwal ŋa ika miɗ Mbulum,

ka sle aà mazla wakita ata,

dite ki ŋgeheke a ihər dukw ata magàsà ŋa ya.

Aɗaba kər ka, tàa kəɗ kər kamala

dukw ana ta kəɗ a Mbulum taf masakəŋa ya.

Məmbəz yak ana kà dza dər a ka,

kà mbùrùɗar dərra mburma a Mbulum a.

Ku mege tə dara ika gà ahəɗ ana pampam

ika gər ahəɗ tserdze ya, gà na slala tar pam,

nda gà təv gà mendze tar pampam,

kige tsa gà ahəm tar tekeɗe, pampam a.

Kàa ndzəkara tar a, kàa dzàɗa a Mbulum.

¹⁰Dite kàa dza tar a təv mekwere

Əbay yak ana ki kwere a ya.

Ka ne à tar gà ɓəzla mandəva kuɗa a Mbulum

aà megèr megemir ika miɗ ŋgar mbaŋa asa.

Ti ta kwere a gà mburma ana ika gər ahəɗ a.»

¹¹I fataya tsara ka, i ŋgataha a gà gawla Mbulum hinne, ti sle dəbuw diŋ lufùw, a ɗeme a ba tsa. Tə lawara təv mendze Əbay ata tits, nda gà bàba gà dukw ata faɗ nda gà mesife iɗəm a, dite nda gà bàba gà mburma ata mbaŋa. I tsarakara dimis tar ana tì lèh a ya. ¹²I huɗ malàhà dimis tar ata tì lèh a ya ka, ta wideye a dər ŋgəlakəkka, ta gwa:

«Kəla Təmaŋ ata ta kəɗ a ka,

a sle aà duwa tserdze.

Dite duwa tserdze ka, biy ŋgar asa mbaŋa.

Metsehe ŋgar a riŋ, a za gà duwa fit.

Aɗaba ndzəɗa tserdze ka, i ahər ŋgar.

Gà mburma tə̀ zlə̀b à ŋgat, tə̀ zàmbaɗa dər,

ta gwa, ŋgat ka, BATSAH kwa ŋa kaɗəŋ.»

¹³I dəba ŋa ya asa ka, i tsarakara gà dukw ana Mbulum a geye tar tserdze ya: Gà na i gər ŋa i Mbulum a, nda gà na ika gər ahəɗ a, dite nda gà na tar i biye, nda gà i huɗ yam a. Tar ata tserdze ya, tar riŋ tì lèh a dimis. I huɗ malàhà dimis tar ata tə lah a ka, ta gwa:

«Zàmbaɗakwa à gà wele ana ŋgat

mandza ŋa ika təv mendze Əbay a,

nda wele ana ŋgat kamala Kəla Təmaŋ a.

Zlə̀bakwa à tar. Aɗaba ndzəɗa tserdze

a dara ka, i təv tar a.

Ki gekwe a tar kəkaaha aà biybiy.»

¹⁴Dite gà dukw ata faɗ tar nda gà mesife ya, ta gwa aaka: «*Amin.» I dəba ŋa ya, gà bàba gà mburma ata tə dza gurmits a bəɗ aka miɗ gà na tar mandza ŋa ika təv mendze Əbay ata ya, tə zàmbaɗa à tar.

Kəla Təmaŋ a ŋgwàhakaya aà gà dukw magàsà wakita ata ya

¹Aləka i dəba ŋa ya, i fə̀r aà Kəla Təmaŋ ata ka, a daha, a dza ba aà maŋgwàhàkà ihər dukw magəsa wakita ata Mbulum a gasa dər təv pampam təsəla ya. A ŋgwàhaka ihər malahalah ŋa ya ilik. I fataya ka, i tsarakara mifefile i təv gà dukw ata faɗ nda gà mesife ya. Biy ŋgiɗ ilik i magər tar a, a gwa: «Nakaya.» Mifefile ŋgar ata a ɗe ka, gùrumumma, kamala malaka Mbulum a. ²I fə̀r ikaba ya ka, i ŋgataha a piris duwa a ndza herrè, wura aka tsəl aaka, a riŋ nda gà lìkiɗ i ahər ŋgar, tàa tiker felère Əbay a gər. Ŋgat na a mba aà duwa tserdze ya. Aka da a gùvəl ka, à mbè a aà mburma asa mbaŋa.

³I dəba ŋa ya ka, Kəla Təmaŋ ata a ŋgwàhaka ihər dukw magəsa wakita masula ŋana ya. Dite i tsarakara mifefile masula ŋa ika magər gà dukw ata faɗ nda gà mesife ya. A gwa: «Nakaya» asa. ⁴I fataya tsara ka, piris ŋgiɗ a dara iɗəm a. A ndza nduzzwa kamala məmbəz a. Wur ana a tsəl aaka ya ka, tàa vəlar batsah màsalamà a ahər, dite ta vəlar vatwa aà mazlàra gùvəl aka gər ahəɗ a, na gà mburma ta bets a ba ya.

⁵Aləka i dəba ŋa ya ka, Kəla Təmaŋ ata a ŋgwàhaka ihər dukw magəsa wakita məmakər ŋana ya asa. I fataya ka, i tsarakara mifefile məmakər ŋa ika magər gà dukw ata faɗ ŋa nda gà mesife ya. A gwa: «Nakaya» asa mbaŋa. I fə̀r ikaba ya ka, i ŋgataha a piris lìviŋ lìviŋ ŋana. Wele ana mandza ŋa ikəka ya ka, a riŋ nda gà dukw melìvè duwa i ahər ŋgar. ⁶I tsarakara mifefile ika magər gà dukw ata faɗ ŋa nda gà mesife ya. A gwa: «Siŋgwe ana gà ɓəzla megemir ta ŋget a i huɗ miveke ilik a ka, a sle a duwa tsa. Tì sìkim a dər ŋgwal daw ka, agwada ilik pəra. Kige tsa na bəla tì sìkim a dər màdàgà ka, a sle a agwada makər ɗekɗek. Ama biy gà mal nda meɗwìtsè dukw makwàsà ŋana ka, tsakala ŋa ma ge hiywe kamala ana a ndzawa ya dukw ŋgar.»

⁷I dəba ŋa ya ka, Kəla Təmaŋ ata a ŋgwàhaka ihər dukw magəsa wakita məfaɗ ŋana ya. Dite i tsarakara mifefile məfaɗ ŋa ika magər gà dukw ata faɗ nda gà mesife ya. A gwa: «Nakaya» asa. ⁸Aləka i fə̀r ikaba ya ka, i ŋgataha a piris duwa a ndza kusuh kusuh. Wele ana a tsəl aaka ya tekeɗe ka, zləm ŋgar Məməta. Təv ana aka da aɗəm a ka, bazlam məməta na a zezem a ŋgat a. Gà mburma gər ahəɗ tserdze ka, tàa tarətsa ba ikaba ya təv pampam faɗ. Gà gwala ŋgiɗ ilik ka, tàa vəlar vatwa aà məbatsa iɗəm tar a nda gà duwa ŋgiɗ a pampam. A bets a tar nda màsalamà. Gà biy ŋgiɗ ta mete a à may, kige tsa, à dukw məməta, dite gà asiŋ ŋa aaha asa ka, gà dukw dala ta betseye a tar.

⁹I dəba ŋa ya asa ka, Kəla Təmaŋ ata a ŋgwàhaka ihər dukw magəsa wakita mazləm ŋana ya. Dite i ŋgataha a gà mezite gà məməta tar a riŋ aà huɗ təv ana ta batsawa aaka duwa a Mbulum a. Ta batsaya gà mburma ata ka, aɗaba ana ta gəs bazlam Mbulum lele, ti tsikewa a mburma ka, parakkà ya. ¹⁰Gà mburma ata ta wideye nda magala ŋgəlakəkka. I huɗ Mewideye tar ata ya ka, ta gwa: «Batsah mər ŋa, kər ka, tsəɗaŋŋa. Dukw ana ki tsik a ya ka, nda ndzer kaɗəŋ. Dite ndeɗime na ki gese a gà mburma ana ta batsawa mər ika gər ahəɗ, ki ge a ter a seriye ya?» ¹¹I fataya ka, tə dzaya aka tar gà petek herrè ŋa tserdze, ku mege weke. Dite ta gwaɗa a tar: «Vavum zaakwa tə̀ma asa. Aɗaba say ta batsaya gà asiŋ gà damər kurum ana ta ge a megemir a Mbulum a asa dzekwiŋ, kamala ana ta batsaya kurum a mbaŋa ya. Aləka i təv ana aka geba fit kamala ana Mbulum a tsik a, tàa bats tar ka, seriye ata a ta ge a ba kuɗa.»

¹²I dəba ŋa ya, i fə̀r aà Kəla Təmaŋ ata asa ka, a ŋgwàhaka ihər dukw magəsa wakita mendilik ŋana ya asa. A ŋgwàhaka ihər a tsara ka, gər ahəɗ a ɓazla wàkit wàkit hinne. Pat a mbəɗ ba ŋgiɗ kamala petek ana a ndza lìviŋ lìviŋ a. Dite kiye tekeɗe, a mbəɗ ba ŋgiɗ, a ndza nduzzwa kamala məmbəz a asa. ¹³Gà mawusawus tə dzawara aà gəza mbulum a ɓə̀ràmə̀mma kamala mandàɓalak gùrùv ana himbiɗ a dza dərra a bəɗ a mbaŋa. ¹⁴Gəza mbulum a dzeye fit kweleŋ, kamala wakita ana ta paɗa akaba ya. Gà gər kwite nda gà ahəɗ ana malàwàrà ŋa nda yam a tserdze, ta hitseye aà mbulum, tə daya i gà təv mendze tar ana tə ndzawawa iɗəm a. ¹⁵Kamala taŋa ya, gà mburma tserdze ta kahaya ba. Tə tə̀z a biye, nda gà a sləlak aà kwite. Gà ɓele nda gà na ti ziwe a gər tar a tserdze, tə tə̀z, tə daha, ta kahaya ba. Ku mege gà Əbay gər ahəɗ nda gà ɓəzla sik tar, nda gà bàba gà sliwdze, ku mege gà na limana tar a riŋ hinne ya, nda gà na ndzəɗa tar a riŋ a tekeɗe, ta kahaya ba mbaŋa. ¹⁶Ta gwaɗa a gà gər kwite nda gà gùrum: «Hurukwayum ba aka mər, kə̀ kahayum mər, dite na wele ata mandza ŋa ika təv mendze Əbay a, a ŋget a mər a asa tsa, nda gà matsəɓatsəɓ Kəla Təmaŋ ata tekeɗe, a ŋget a mər tsa asa mbaŋa ya. ¹⁷Aɗaba pat ana ti ta gis a gà mburma a seriye ya ka, aka à mendze aɗəm. Ama a pat ata ana, weke na a be a iɗəm a ya?»

Gà mburma gà Isərayel ana Mbulum a geye aà tar lambà ya

¹I dəba ŋa ya ka, i ŋgataha a gà gawla Mbulum faɗ, tar gà mehìtsèyè ŋa i gà təv ana himbiɗ a dawara iɗəm a təv pampam faɗ a. Ta pala ahəm a gà himbiɗ ata faɗ a, dite ka, ta ge ika gər ahəɗ, tə ləm aà gà ahəɗ nda yam, nda gà dizl ɗaf asa tsiye. ²I fataya ka, i ŋgataha a gawla Mbulum ŋgiɗ asa mbaŋa. A dara ika tsèke pat ana a mbəzawara ya, a riŋ a tsil a aà mbulum. Na magəsa ŋa i ahər ŋgar ka, dukw mege lambà aà gà mburma Mbulum, wele ana nda gà mesife ya. A zal a gà asiŋ gà gawla Mbulum ŋgiɗ ata, a gà na Mbulum a vəl a tar ndzəɗa aà menise à gà ahəɗ nda yam a. A zal a tarra nda magala ya ŋgəlakəkka. ³A gwaɗa a tar: «Ka nəsum à gà ahəɗ nda yam, nda gà dizl ɗaf zukw tsa. Say ki gekwe a lambà aà yemere a gà ɓəzla meslire Mbulum kwa dzekwiŋ.» ⁴Ama ti tsikiŋ, ta gweɗiŋ, gà mburma ndaw na ta ge a ter a lambà ata ya. Ama tar fit dze ka, dəbuw dərməka nda dəbuw dzik faɗ gəra faɗ (l44000). Gà mburma ata tə dara ka, i gà gwala Isərayel a tserdze. ^5-8Dəbuw kurwa gəra sula, tə dara i gwala Yuda ya, dəbuw kurwa gəra sula i gwala Ruben a, dite gà biy ŋgiɗ asa, i gwala gà Gad nda Aser a, nda gà Naftali nda Manasse, dite Simeyun, Levi, Issakar, Zabulun, dite gà Yasufa nda Benyamin. Gà tar ata tserdze ya ka, dəbuw kurwa gəra sula sula, lambà Mbulum aà tar.

Ga mburma ana hinne, tə dayara ika magər gà slàla ŋgiɗ ana

pampam tserdze ya

⁹I dəba ŋa ya asa, i ŋgataha a gà mburma ana hinne, wura a sle a aà maɗàmà ŋa tsiye. Gà mburma ata tə dara ka, ika ahəɗ ana pampam ika gər ahəɗ a, ku mege gà na slàla tar pampam a tserdze, nda gà təv gà mendze tar pampam, kige tsa gà ahəm tar ibam, pampam a. Tar gà mandzàyà ŋa ka, ika miɗ təv mendze Əbay Mbulum, nda gà ika miɗ Kəla Təmaŋ ata mbaŋa. Gà petek ana ika tar a ka, herrè. Ku weke nda gà slàmbah tə̀ɓàh i ahər ŋgar, tì zèmbeɗe a dər à tar. ¹⁰Gà tar ata tserdze ya, ta fàfəl ka, nda magala ŋgəlakəkka. I huɗ mifefile tar ata ya ka, ta gwa: «Mbulum ana mandza ŋa ika təv mendze Əbay ŋgar a, nda Kəla Təmaŋ na ta mbala à mər a.» ¹¹Gà gawla Mbulum tserdze tə lawara təv mendze Əbay ata nda gà bàba ŋa ana ika miɗ Mbulum a, dite nda gà bàba gà dukw ata faɗ nda gà mesife ya tits. Tə dza gurmits a bəɗ aka miɗ Mbulum, ika miɗ təv mendze Əbay ŋgar ata, tə zàmbaɗa à ŋgat. ¹²I huɗ mezembeɗe tar ata ya ka, ta gwa: «*Amin. Ar ka, kataya kaɗəŋ, ndzəɗa tserdze ka, i ahər Mbulum. Metsehe ŋgar a riŋ a za duwa tserdze. Ŋgat ka, ndzəɗa ŋa. Gekwar kəkaaha, kà zlə̀bakwa à ŋgat, zàmbaɗakwa à ŋgat aà biybiy. Ku weke a gweɗe a, ŋgat ka, Batsah ŋa kaɗəŋ. Amin.»

¹³Gà bàba gà mburma ata dzik səla gəra faɗ a, i ŋgiɗ ilik ika magər tar a, a gweɗiŋ: «Kà sər gà mburma aaha nda gà petek herrè ŋa ika tar a ya? Tə dara ana, i ŋga ya?» ¹⁴I gwaɗar: «Awaŋ, batsah ga ŋa, kər ivaɗ na a sər tar a. Iye ka, i sər tar tsa.» I dəba ŋa ya, a gweɗiŋ asa: «Gà mburma aaha ka, gà na tì sèwèr a are hinne aka mandəvandəv gər ahəɗ aaha ya. Ama ka, tàa bàs gəzləŋ, tàa miyak à vatwa Mbulum tsidze. Ta baraya gà petek tar a nda məmbəz Kəla Təmaŋ ata, na dite ka, a ndza herrè ya. ¹⁵Aɗaba taŋa na kinehe tar riŋ mandza ŋa ika miɗ təv mendze Əbay Mbulum hiywe ya. Ku mege ndaàpat, mege ndaàvəɗ tekeɗe, tar riŋ ta ger a meslire i ga ŋgar a. Əbay ata ŋgat mandza ŋa ika təv mendze ŋgar a na a riŋ a kesle a tar a. ¹⁶May a ta ge a ter a asa tsa. Dite yam tekeɗe, a ta bets a tar asa tsa mbaŋa. Pat a wene a tar tsa, ku mege dukw ŋgiɗ a wir aà ter a asa tsidze. ¹⁷Aɗaba Kəla Təmaŋ ata ika magər təv mendze Əbay ata ya, na a ti ne a mala makəva tar, a ɗif a ter a à vatwa biye yam ana a vile a mesife a mburma ya ya. Dite Mbulum tekeɗe, a bere a tuwa yemere ika gà are tar a tserdze asa mbaŋa.»

Kəla Təmaŋ ata a ŋgwàhaka ihər à dukw magəsa wakita

matəsəla ŋana ya kuɗa

¹Aləka i dəba ŋa ya ka, Kəla Təmaŋ ata a zla wakita ata asa, a ŋgwàhaka ihər dukw magəsa ŋa matəsəla ŋana ya. I təv ana a ŋgwàhaka dər ihər a ka, gà dukw ana i gər ŋa i mbulum a tserdze, tə ndza ɗikɗik, ta fèfil a asa tsidze, haa a sle mìnwit dzik makər. ²I dəba ŋa ya, i ŋgataha a gà gawla Mbulum ana tar təsəla, tar gà mandzàyà ŋa ika miɗ Mbulum a. Tə dzaya a tar gà mezleliŋ təsəla a ahər, ku weke nda biy ŋgar.

³Gawla Mbulum a riŋ nda gà tasà malàmbàɗà ŋa nda gura ana tsakala ŋa hinne ya, i ahər ŋgar. Tasà ata ka, ta wanawa aɗəm dukw ana a zewa aà Mbulum hwaŋŋà ya. Ŋgat ka, a dara, a hitse dər aka miɗ a təv ana ta vəlawa aaka duwa a Mbulum a. Tə dzar aɗəm dukw ana ta wanawa ya hinne, na dite a wenere a aka təv ata ya. A wenere a ka, aka miɗ təv mendze Əbay ŋgar ata. Ama i təv ana a riŋ ihər a wene a ya ka, a ge dər akaba nda biy gà mburma ana tserdze ti ne gà biy ŋgar, ta hamawa a. ⁴Hədzək dukw ata a wànà ya, a dara i ahər gawla Mbulum ata mehìtsè ŋa ika miɗ Mbulum a, a tsəl aà gəza mbulum, dite Mbulum a tsaraka meheme gà mburma ŋgar ana ta hemer a ya mbaŋa. ⁵Aləka i dəba ŋa ya ka, gawla Mbulum ata a zla tasà ata a wànà iɗəm duwa a Mbulum a, a zla akwa ika təv ana ta wanawar aaka duwa ya mbaŋa. Bùtùkw a nda a tasà ata. Dite fakw a ya dər akabara aka gər ahəɗ a. I təv ana a yàra aba ya ka, malaka mbulum a dza ba aà meɗe hinne, ŋgùzlàr ŋgùzlàr, dite mbulum a wìtiɗ wùtəɗ wùtəɗ, gər ahəɗ a dzadzar hinne mbaŋa asa.

Ta vèt a gà mezleliŋ ndilik

⁶I dəba ŋa ya, gà gawla Mbulum ata təsəla nda gà mezleliŋ aà tar i ahər a, ta hadzal ba aà mivizleye aɗəm.

⁷Tsam ka, gawla Mbulum malahalah ŋana a vizl a biy ŋgar. Aləka a vizl aɗəm ka, gà aləndza nda gà akwa magàwà ŋa aaba nda məmbəz, tə dzàyawara aka gər ahəɗ a. I fataya ka, gər ahəɗ a tarətsa ba ikaba ya təv pampam makər. Təv ana dukw ata a dzawa aɗəm a ka, akwa a wànà iɗəm a fit, nda gà dizl ɗaf ŋa dze. Mege kwizir tekeɗe, aka zeha aɗəm asa tsidze.

⁸I dəba ŋa taŋa ya ka, gawla Mbulum masula ŋana a vizl a mezleliŋ ŋgar. Aləka a vizl aɗəm kataya ka, tə zla batsah dukuməŋa a riŋ kamala kwite ya, akwa a riŋ ihər a wene a ŋgar ŋgar ŋgar. I fataya ka, ti yà dukw ata a batsah duluv. Tsam ka, yam ata a tarətsa ba ikaba ya təv pampam makər, dite təv ana ti yà aɗəm a fataya tsara ka, a ne məmbəz. ⁹Dite gà dukw ana i huɗ yam biy ŋgiɗ ata ya ka, ta mataya aɗəm fit. Gà slə̀làh yam ana ikəka ya tekeɗe, tə nəsaya mbaŋa.

¹⁰Dite gawla Mbulum məmakər ŋana, a vizl a mezleliŋ ŋgar. A vizl aɗəm ka, batsah mawusawus ana akwa ihər, a wene a də̀kəɗ də̀kəɗ a, a dəɗara i mbulum a, aka gər ahəɗ a. Gà biye yam nda gà dula tə tarətsa ba ikaba ya, təv pampam makər. Təv ana aka dəɗ aɗəm a ka, a nis a dər fit. ¹¹Mawusawus ata ka, zləm ŋgar Ɗìwèkìke. Yam ana aka dəɗ aɗəm a ka, a ndze a ɗìwèkìke. Gà mburma ana tə saya yam ata ya ka, ta mata hinne, aɗaba ana a ndza ɗìwèkìke ya.

¹²I dəba ŋa ya ka, gawla Mbulum məfaɗ ŋana a vizl a mezleliŋ ŋgar mbaŋa. A vizl aɗəm ka, a lak a gà pat nda kiye, nda gà mawusawus. Tar ka, kamala ana matarətsa ŋa ikaba ya təv makər a. Dite təv ana tàa lak aɗəm a ka, a ndze a lìviŋ lìviŋ kamala taŋa ya. Tar ka, tə də̀v lele asa tsa. Ku mege ndaàpat, mege ndaàvəɗ tekeɗe, təv dzaydzay matarətsa ŋa ikaba ya təv pampam makər. Tsèke pat ŋgiɗ ilik ka, a də̀v ndaàpat asa tsa, dite tsèke kiye ŋgiɗ ilik tekeɗe, a də̀v ndaàvəɗ asa tsa mbaŋa.

¹³I dəba ŋa ya ka, i ŋgataha a zləra, a riŋ ɗevivvè diriŋ a be a ndaà gəza mbulum. A fàfəl ŋgəlakəkka. I huɗ mifefile ŋgar ata ya ka, a gwa: «Waya ba kurum a, waya ba kurum a, kurum gà mburma ana ika gər ahəɗ a ka, ki ŋgetwim a mesewere are hinne. Aɗaba ana gà gawla Mbulum riŋ makər mba, gà na tàa vizleye a gà mezleliŋ tar zukw tsiye. Ama na aləka tàa vizleye aɗəm ka, mesewere are ŋa a dere a ka, ndeyndey.»

¹I dəba ŋa ya asa mbaŋa ka, gawla Mbulum mìizlam ŋana a vizl a mezleliŋ ŋgar. I təv ana a vizl aɗəm a ka, i ŋgat a mawusawus duwa a dəɗara i mbulum a aka gər ahəɗ a. Mawusawus ata ka, tàa vəlar lèkilè a ahər, aà mahə̀ndə̀kà dər i biye ana kwitsikw a. ²Aləka a hə̀ndə̀k dər iɗəm a ka, hədzək a dara iɗəm a tùtùkwtùkkwa kamala hədzək akwa ana ti tike aà batsah kusak a. Hədzək ata ka, a kaha gà gəza mbulum nda pat, a ge ziŋziŋ hinne. ³Dite i dəba ŋa ya ka, gà dzara na tə dayara i hədzək ata ya ya. Ta vəl a tar ndzəɗa, ti neye kamala gà hìrde ya. ⁴Ta gwaɗa a tar: «Ka zəmum kwizir tsa, kige tsa ka nəsum à slàmbah dukw mezime nda gà dizl ɗaf tsidze. Say ki dzeywim a ka, à gà mburma ana lambà Mbulum a riŋ ika yemere tar tsiye ɗekɗek pəra.» ⁵Ama ka, tàa vəl a tar vatwa aà məbatsa mburma a biye fit kweleŋ tsa kəla. Ta vəl a tar vatwa ka, aà mesewere a tar are biy kiye ə̀zləm pəra. Medze gà dzara ata ti dzeye à ter a ya ka, a wir aà ter a ka, hinne. Mewire ŋa ka, kamala biy hìrde ya. ⁶I huɗ kiye ə̀zləm ŋa ata ya ka, mburma ta waya məməta agəra mesewere are ata. Ama ka, ta ŋget ahər a vatwa ɓav tsa. Məməta a tsahən aà tar ka, hinne, ta weye a mimete iɗəm a, ama ka, məməta a sìrìk a ter a vatwa ivaɗ.

⁷Gà dzara ata ka, ti ndzikiɗ ba kamala piris ana tə dùwaya, ti de a dər a gùvəl a. Ika gà gər tar ka, duwa a riŋ ikəka kamala felère Əbay ana malàmbàɗà ŋa nda gura ya. Dite yemere tar tekeɗe ka, kamala biy mburma ya. ⁸Ambəz gər tar ka, zùbəl ŋa birìɓ kamala biy gà məkəs a asa. Gà zlir ana i bazlam tar a tekeɗe, a ndza kamala biy azil a. ⁹Duwa a riŋ aà gà gəzləŋ tar kamala andiw mege gùvəl a malàmbàɗà ŋa nda ndzemde. Gà gwezleviyek ana aà tar a, a ɗe a ka, dèɗìɗìɗìɗe kamala gà piris ana hinne, ta ŋgil a à gà muta, tì tìz a dər a gùvəl a. ¹⁰Dzimir aà tar kamala i hìrde ya. Aɗaba taŋa tar tekeɗe, ti dze a mburma kataya mbaŋa. Gà dzimir tar ata na ta vəl a tar ndzəɗa aà medzeye a mburma i huɗ kiye ata ə̀zləm a. ¹¹Əbay tar ka, gawla na a kwere a tar i batsah biye ata kwitsikw a. Tə zalar ndaka ahəm gà Ibəranikwa ka, «Abadun», ndaka ahəm gà Girek tekeɗe ibam, «Apuliyun», kamala megweɗe ya ka, «Mala Swalwa. »

¹²Kamala taŋa ya, gà malahalah mesewere are ata tàa da iɗəm a ka, a zehe a gà mesewere are a riŋ sula na ti dere a ya asa.

¹³I dəba ŋa ya ka, gawla Mbulum mendilik ŋana a vizl a mezleliŋ ŋgar. I təv ana a vizl aɗəm a ka, i tsarakara mifefile duwa a ɗera i təv ana ta vəlawa aaka duwa a Mbulum a. Ama təv ata ka, ika miɗ Mbulum, məvəɗa ŋa ka, nda gura ana tsakala ŋa hinne ya. ¹⁴Mifefile ata a fàfəl a ka, a gawla Mbulum mendilik ŋa aaha. A gwaɗar: «Pəl à gà gawla faɗ ŋa ata tə dànaya tar aà gìgìze dula ata tə zalar Efrat a.» ¹⁵Gà gawla ata faɗ a ka, Mbulum a tike a tar məpàslà ahər, na dite ka, ta ger a megemir i huɗ mive ata ya, kige tsa i huɗ kiye ata ya, nda gà i huɗ pat ata ya mbaŋa, nda gà ku mege i huɗ ler ata ya tekeɗe ya. Kamala taŋa ya, a ndzək tar, dite tə daha, tə tarətsa ba ikaba mburma ya təv pampam makər. Dite ka, ta bats iɗəm tsèke ŋgiɗ a ilik. Kamala taŋa ya asa, mifefile ata a ɗe aba ya ka, gawla Mbulum ata a daha, a pəl à tar kuɗa. ¹⁶I fataya ka, i ŋgataha a gà sliwdze tar. Tar ka, hinne, tə tsala aka piris, dite ta gweɗiŋara: «Mayahaba gər gà mburma ana i fataya ka, miliyuŋ dərməka sula.» ¹⁷I huɗ sunwa gà ata a da aka iye ya ka, i ŋgataha a gà na tə tsala aka piris a. Tar ka, nda gà petek gùvəl ika tar, mewetse ŋa pampam makər, nduzzwa kamala akwa ya, biy ŋgiɗ mbulum mbulum, dite biy ŋgiɗ aaha ka, a ndza za kəla za kəla asa mbaŋa. Gər gà piris tar ŋa a ndzikiɗ ba ka, kamala gər azil a. Na a dara i gà bazlam tar a ka, gà akwa nda hədzək, nda gà dukuməŋa a riŋ a wanawa ka, wàfùfùffa kamala asana ya. ¹⁸Gà dukw ata pampam makər a, na a vəl màdzànàpa mesewere are ata a mburma, a bats aà tar ata mandza ŋa təv pampam makər a, tsèke ŋgiɗ ilik. Kamala megweɗe ya ka, gà akwa ata nda gà hədzək, nda gà dukw ata a wanawa wàfùfùffa kamala asana ya na a bats tar a. ¹⁹Aɗaba gà piris ata, na a vəl a tar ndzəɗa ka, gà bazlam nda gà dzimir tar na aà məbatsa gà mburma ya. Ama dzimir tar asa ka, gər ikəka, a ndzikiɗ ba i mesiwiɗ, ti dze a dər a mburma.

²⁰Ama gà asiŋ gà mburma ana tàa mata à gà mesewere are ata makər a tsiye ka, tàa mbəɗ à gəzləŋ tar ɓav tsa. Tə da aka miɗ aka miɗ nda mandza gurmits a bəɗ a sitene, nda gà dukw tar ana ta geye nda ahər tar ŋa, ta vaɗa gà asiŋ a nda gura ya. I ŋgiɗ ibam, nda ndzemde pampam. Biy ŋgiɗ asa tə làmbaɗa nda kur, nda gà biy ŋgiɗ asa ka, ta papazaya gà dizl. Gà dukw ata tserdze ya ka, ta ŋget a duwa tsa, ti tsereke a zləm tsa, dite ti de a nda gà sik tar ɓav tsa asa mbaŋa. Ama ku mege kataya tekeɗe ka, tì dzèye a ter a dər akaba gurmits a bəɗ hiywe pəra. ²¹Gà mburma ata ka, tə daba aka miɗ aka miɗ nda megeye gà dukw tar hiywe. Tàa miyak à məbatsa mburma, nda matawala gà duwa tsa. Tàa vəl ba tar a mege mezelme nda təv muva, nda gà megeye akəl tar hiywe. Tə da dər aka miɗ aka miɗ kamala taŋa ya, tàa mbəɗ à gəzləŋ tar tsa.

Gawla Mbulum nda gà wakita Kəla Təmaŋ

¹I dəba ŋa ya, i ŋgataha a gawla Mbulum ŋgiɗ duwa ndzəɗa ŋa asa, a tarra i mbulum a, aka gər ahəɗ a. Ar ka, tits malàwàrà ŋa nda hulɓukw. A ne aaka kamala petek ŋgar a. Màkə̀làh mbulum a lawara gər ŋgar tits, dite yemere ŋgar ka, a wàwùzl are hinne, kamala pat a. Dite sik ŋgar tekeɗe, a ndzikiɗ ba kamala arah akwa ya. ²I fata ka, kəla wakita duwa a riŋ i ahər ŋgar, məpəla ŋa dər ikaba ya. A ɓəl sik ahər mezime ŋgar ka, aka batsah duluv. Ama sik ahər gùla ka, a tike aka ahəɗ. ³A fàfəl ka, nda magala kamala azil ana à ŋgìrìz a ya. A fàfəl aba ya kamala taŋa ya ka, i tsarakara malaka mbulum a, a ɗe sik təsəla, a fàfəlar aakara. ⁴I tsarakara malaka mbulum ata a ɗe ya ka, a sèsiŋ mewetse dukw ana a tsik a zləmana. Ama ka, i tsarakara mifefile ŋgiɗ duwa a ɗera i mbulum asa. Wele ŋa a gweɗiŋara ka: «Ka wetse dukw ata malaka mbulum a tsik sik təsəla ya tsa. Wura ilik ma sər tsidze.»

⁵I dəba ŋa ya, gawla Mbulum ata i ŋgatar, a tike sik ŋgiɗ aka batsah duluv a, dite biy ŋgiɗ a tike aka ahəɗ a ka, a zla ahər mezime ŋgar a mbulum. ⁶A mbaɗa nda zləm Mbulum, wele ana ŋgat mandza ŋa nda mesife aà biybiy, a geye gà gəza mbulum nda gər ahəɗ, dite nda gà yam, nda gà dukw ana iɗəm tserdze ya asa mbaŋa ya. I huɗ mimbeɗe ŋgar ata ya ka, a gwa: «Dukuməŋa ka, a ge a mèhìnèkw asa tsa. A ge a ba ka, kinehe bise. ⁷I təv ana gawla Mbulum matəsəla ŋana a vizl a mezleliŋ ŋgar a ka, Mbulum a ti ndìv a à gà dukw ana makàhà ŋa, a gwa, a ta ge a ba ya. Ama a ta ge a ba a ka, kalkal kamala ana a tsik piŋŋe a gà ɓəzla meslire ŋgar, a gà na ta màwa à guma ŋgar a.»

⁸I dəba ŋa ya ka, wele ana a fèfiliŋara i mbulum a, a gweɗiŋara: «Daha, zla wakita ata məpəla ŋa dər iba ya ya, i ahər gawla Mbulum ata sik ŋgar mehìtsè ŋa ika batsah duluv, dite biy ŋgiɗ ika ahəɗ a.» ⁹Kamala taŋa ya, i daha a təv gawla Mbulum ata. I gwaɗar: «Kamkam, viliŋ kəla wakita aaha te.» Dite a gweɗiŋ: «Ahiŋ, papəɗ. Na kàa papəɗ ka, a ndze a aà kər a i bazlam a gwingwin, kamala amum a. Ama na kàa nde ka, a wirek a huɗ.» ¹⁰I dəba ŋa ya ka, i daha, i zla ihər wakita ata i ahər ŋgar a, i tikeha. I papəɗ ka, a ndza aà iye gwingwin kamala amum a kaɗəŋ. Ama aləka i nde ka, a wiriŋ huɗ.

¹¹I dəba ŋa ya, ta gweɗiŋ asa: «Ki ta me a à gà dukw ana Mbulum a ta ge a nda təv gà slàla ŋgiɗ pampam, nda təv gà ahəɗ ŋgiɗ pampam nda gà Əbay tar ŋa tserdze, ku mege ta fèfil a ndaka gà ahəm awara pampam tekeɗe ya. Ki ta me a à bazlam dukw ana Mbulum a ti tsikik a ya.»

Gà ɓəzla sida Mbulum sula

¹I dəba ŋa ya, ta viliŋ guvùkw a ahər kamala dukw melìvè dər duwa ya, dite ta gweɗiŋ: «Hitse, ka daha, ka live dər ga Mbulum batsah ŋana, nda dukw ana iɗəm ta vəlawa aaka duwa a Mbulum a tserdze, ŋgada ar ana, hilè ya? Dite ka, ka ɗamaya gà mburma ana ta hamawa iɗəm a Mbulum i fataya mbaŋa. ²Ama ka, ka ti live varavada ŋana i bəra ya tsa kəla, miyak dər pəra. Aɗaba təv ata ka, Mbulum aka mbər mivile a gà mburma ana tə sər ŋgat tsiye. Ti ti nis a à ŋgwal kwite ata tsəɗaŋŋa, ga Mbulum ata iɗəm a, i huɗ kiye dzik faɗ gəra sula ya.*fa* ³I ti slir a gà ɓəzla sida sula, dite tì dzèye akaba a petek bùhwa biy na duwa a sle aà tar a. Ti ti ɗif a à bazlam gà a gà mburma, a təv ana aka ndze aɗəm a, kamala megweɗe ya, ti ɗif a dər ka, i huɗ mehinne dəbuw nda dərməka sula nda dzik ndilik a.»

⁴Gà ɓəzla sida ata sula gà mehìtsè ŋa ika miɗ Mbulum BATSAH kwa ŋana ŋgat mala makwàrà gər ahəɗ a. Tar ka, kamala gà dizl uliviye ana sula ya. Dite tar asa ka, kamala gà lalampa ana sula ya asa mbaŋa. ⁵Aləka na bəla gà ɓəzla mene are tar ta gweɗe a ka, waytsà, mìi ge a ter a dukw ana ŋgwala tsiye ka, akwa a ti dere a i bazlam tar a, a bets a tar. Kamala taŋa ya, ku mege weke na a waya, a ge a ter a swalwa ka, à mìtiŋa. Vatwa a riŋ, na dite a bere a iɗəm a tsa, bàlaarì pəra. ⁶I təv ana tar ihər ta me a à guma Mbulum a ka, ndzəɗa tar a ta ge a a riŋ aà mahə̀ndə̀kà a gəza mbulum, na dite ka, yam à dze a asa tsiye. Tar ka, ndzəɗa tar a riŋ aà məmbə̀ɗà à gà yam, a ne a nduzzwa kamala məmbəz a mbaŋa. Dite tar ka, ndzəɗa tar a riŋ aà məvəla gà mesewere are pampam a gà mburma ana ika gər ahəɗ a, kamala ana ta waya ya asa mbaŋa.

⁷I təv ana tàa ndəv aba à metsìkè bazlam Mbulum tar ata ya ka, duwa a riŋ a ti tsil aka terre a i biye ya, a ta ge aà ter a gùvəl. A mbè aà teriŋa, dite a bets a tar. ⁸Ama gà məməta tar ata ka, wura a ti leye a tar tsa, ti ti ndze a ika dàlàbə̀rà, i magər kwite ana ta kəɗ aɗəm Batsah tar ŋa ya. Zləm kwite ata a ne ka, kamala Suduma ya, kige tsa, Ezipt ya. ⁹Ama gà məməta tar ata ka, gà mburma ana i gà slàla ŋgiɗ pampam tserdze ya, ti deyere a i gà kwite tar a pampam, kige tsa, gà na ta fàfəlawa ndaka gà ahəm ŋgiɗ pampam a tekeɗe ka, ti dere a, ta fìreye aà ter a mehinne makər nda mezehe ŋa. Ti ta vile a ter a vatwa aà melèyè tar ata tsidze. ¹⁰Dite gà mburma ana ika gər ahəɗ a tserdze, ti ta ŋgeye a ba, agəra ana tàa bats gà mburma ata sula ya ya. Ta gìrìveyiŋa, tì dzèye a ba a gà dukw ana biy taf masakəŋa ya. Ti ta ŋgeye a ba ka, aɗaba ana ta gweɗe a ka, gà ɓəzla məma à guma Mbulum aaha ka, tàa sèwèr a mər are hinne, nda bazlam Mbulum ana ti tsikeyewa a mər a ya. ¹¹Aləka i dəba mehinne makər nda mezehe ŋa ya ka, Mbulum a vizl mesife ŋgar a ba a gà ɓəzla məma à guma ŋgar ata, dite na ta ŋgat mesife asa ya. I təv ana tàa ŋgat a ka, hùrum ta hitse aà mbulum. Dite gà na tàa ŋgat a tar kamala taŋa ya ka, ta ge magəɗa hinne kuɗa. ¹²I dəba ŋa ya, gà ɓəzla məma à guma Mbulum ata sula ya, tə tsarakara mifefile i mbulum a ŋgəlakəkka, a gwaɗa a tarra: «Tsalumara a mbulum a faha ya.» Kamala taŋa ya, tə tsala a mbulum ka, nda magər hulɓukw ika miɗ gà ɓəzla mene are tar ata ya tserdze. ¹³I fataya tsara ka, ahəɗ a ɓazla wàkit wàkit hinne. Tsèke batsah kwite ŋgiɗ ilik ika magər gà kurwa ŋa ata ya, bìrìm a mbazla fit. Kwite ata a mbazla ya ka, a bats mburma dəbuw təsəla. dite gà asiŋ gà mburma ana ti zeha ya ka, ta ge magəɗa hinne, tə zàmbaɗa à Mbulum ana i gər ŋa, mala makwàrà gà duwa tserdze ya.

¹⁴Kamala taŋa ya, na mesewere are masula ŋa ata aka ndəv iɗəm a ka, məmakər ŋana aka à mendzera bise asa mbaŋa.

Mezleliŋ matəsəla ŋana

¹⁵I dəba ŋa ya ka, gawla Mbulum matəsəla ŋana a vizl a mezleliŋ ŋgar. A vizl aɗəm ka, i tsarakara gà mifefile duwa ndzəɗa ŋa, a ɗeyera i mbulum a parakkà lele. I huɗ mifefile ata ya ka, ta gwa: «Gà Mbulum batsah kwa ŋa nda mala məmbə̀là à mburma ŋgar ana a zla ŋgat kamala Əbay a, na tar ihər ta kwere a gər ahəɗ a kuɗa. Mekwere tar ata a ndze a ka, aà biybiy.»

¹⁶Gà dukw ata ti ɗe kataya ka, gà bàba gà mburma ata dzik səla gəra faɗ gà mandzàyà ŋa ika təv mendze Əbay tar ata ika miɗ Mbulum a, tə dzaya gurmits a bəɗ, dite tə zàmbaɗa à Mbulum. ¹⁷I huɗ mezembeɗe tar ata ya ka, ta gwa:

«Mbulum Batsah mər ŋa,

kər ka, kər riŋ daga piŋŋe,

aà gər ana gər ahəɗ a riŋ zukw tsiye.

Dite kinehe tekeɗe, kər riŋ

nda gà mesife hiywe asa mbaŋa.

Mər ihər mìi gik a kəkaaha,

aɗaba ndzəɗa yak ana

duwa tserdze i ahər yak a.

Kà pàt dər a mburma parakkà,

kər na mala makwàrà dukw ana tserdze ya.

¹⁸Gà mburma ana i gà slàla ŋgiɗ,

tar gà biy yak tsiye, tar riŋ ihər

ta ge a matsəɓatsəɓ nda təv yak ka, hinne.

Aɗaba taŋa, kinehe ka, pat ana kər

ki ge a matsəɓatsəɓ nda təv tar a ka,

aka sle kuɗa. Pat ŋa aka sle mbaŋa

na ki ge a seriye a gà na ta mata ya ya.

Dite aka sle mbaŋa na ki ta vile a

dukw maya ba a gà ɓəzla məma à guma yak a.

Ki vile a dukw maya ba ata ka,

a gà mburma yak tserdze mbaŋa,

ku mege tar gà bàba ŋa, nda gà bəla

tar gà ɓəza ŋa tekeɗe ya. Ki vile a ka,

a gà na ta gəsawa aà kər ahəm tserdze ya.

Dite gà na tə nəs à gər ahəɗ a ka,

ki ti dzeye a iɗəm à tar a fit kweleŋ.»

¹⁹I dəba ŋa ya, gà bàba ŋa ata ta fàfəl aba ya ka, ga Mbulum batsah ŋana i gər ŋa i mbulum a, a hə̀ndə̀k ba iɗəm a tùwaŋ. Sahər duwa a riŋ iɗəm i fata.*fb* Sahər ata ka, wakita ana a ɗif à masəra ba gà Mbulum ana nda gà mburma ya, iɗəm i fata. Sahər ata ka, ku mege weke a ŋgataraha ɗazlzlà lele kuɗa. I fataya ka, mbulum a dza ba aà mewìtiɗe wùtəɗ wùtəɗ nda malaka mbulum ana a lekeye a gùɗùm gùɗùm a. Dite gər ahəɗ a ɓazla wàkit wàkit hinne asa. Gà aləndza ibam, gwidiɓiɓiɓe tə dzara i mbulum a.

Madalawa batsah kə̀rəm ana a dalawa məkəs duwa ya

¹I dəba ŋa ya ka, i ŋgataha a duwa batsah ŋa, a pàt aba aà gəza mbulum. A ge aà iye kamala dukw mene aà mburma ya. Dukw ana i ŋgatar a ka, məkəs duwa a tike akaba pat kamala petek a. Dite kiye ka, aà huɗ sik ŋgar. A ndìwìɗ gər ŋgar ka, nda gà mawusawus kurwa gəra sula. A ne aaka kamala felère Əbay a. ²Məkəs ata ka, huɗ i gər ŋgar zlèɗìɗe, aka à mewe. A riŋ a wir ahər a hinne, tə̀pasəssà a tiwe a dər aaba.

³I dəba ŋa ya ka, i ŋgataha a dukw ŋgiɗ batsah ŋa, a pàt aba aà gəza mbulum asa. I ŋgataha aɗəm a dukuməŋa a ndza nduzzwa, a ndzikiɗ ba ka, batsah kə̀rəm. Gər ikəka təsəla. Dite mbukum aà gər ka, kurwa. Gà gər ata ikəka tserdze ya ka, felère Əbay ikəka fit. ⁴I fataya ka, a ŋgəlayara à gà mawusawus tsèke məmakər ŋana ya, nda dzimir ŋgar a. Dite tsèke biy ŋgiɗ ilik ika magər ŋa ya, a dza dərra aka gər ahəɗ a. A dza dərra ka, ŋgat ŋa dzeŋ a hitse aka miɗ a məkəs ata a we a kəla ya, na aka wa kəla ata ka, à gis a, à pèpìɗ a ihər a. ⁵Məkəs ata a we a kəla ata ka, asləka ŋa. Ŋgat a ti ne a ka, Əbay ana a ta kwere a gà slàla ana pampam ika gər ahəɗ tserdze nda ndzəɗa ya. Aləka a wa kəla ata ka, Mbulum a zla a təv ŋgar tsara, ta val dər aka miɗ Mbulum ana ŋgat ika təv mendze Əbay a. ⁶Ama məkəs ata ka, ŋgat a valaba a dala, a təv ana Mbulum a làmbaɗar a. Mbulum a ta ger a riŋ gər i fata. A ndze a riŋ i fata ka, mehinne dəbuw nda dərməka sula nda dzik ndilik.

⁷I dəba ŋa ya, ta ge riŋ gùvəl i gər ŋa i mbulum. Gà Misel nda gà gawla ŋgar na ta ge gùvəl aà *kə̀rəm ata ya. Dite gà kə̀rəm ata nda gà gawla ŋgar tekeɗe, ta ge aà tar gùvəl mbaŋa. ⁸Ama gà Misel ka, ta mba aà tar. Gà kə̀rəm ata ka, tàa vəl a tar vatwa aà mandza i gər ŋa i mbulum asa tsa. ⁹Ti yàra iɗəm batsah kə̀rəm ata a bəra ya. Ŋgat ka, miviye mesiwiɗ ana akahər ata a banawa ɗa gà mburma ika gər ahəɗ a. Tə zalar ka, Əbay sitene, kige tsa *Sadan. Kùtsùkw ti yàra iɗəm ŋgat aka gər ahəɗ a, tə dzara à tar a ka, nda gà gawla ŋgar ata ya tserdze.

¹⁰I dəba ŋa ya, i tsarakara mifefile duwa i gəza mbulum a, a fàfəl ŋgəlakəkka. I huɗ mifefile ŋgar ata ya ka, a gwa:

«Kinehe ka, Mbulum aka mbala à kwa fit kweleŋ.

A pàt ka, à ndzəɗa ŋgar ana

a za duwa tserdze ya.

Ŋgat na mala makwàrà mburma ya.

Kinehe ka, *Kiristi, wele ana Mbulum

a gwa, i ti slir a kurumehe a ya ka,

aka pàt à ndzəɗa ŋgar kuɗa.

Aɗaba tàa yàra iɗəm wele ana

a gewa seriye aà gà damər kwa ya.

A gewa aà tar seriye ka, ika miɗ Mbulum,

ku mege ndaàpat, ku mege ndaàvəɗ tekeɗe ya.

¹¹Ama gà damər kwa ata ka, tàa mba aà ŋgat.

Ta mba ahər ka, aɗaba Kəla Təmaŋ ana

a mburuɗ tar nda məmbəz ŋgar a.

Ta mba ahər asa ka, aɗaba ana

ti tsikewa bazlam Mbulum a mburma ya.

Kamala taŋa ya, ta vəl gà mesife tar a ahər ka,

a Mbulum. Ku mege ta mete a tekeɗe ka,

ti dzele a tsa.

¹²Aɗaba taŋa, maŋgayaba ma ge

i gər ŋa i mbulum, nda gà na a riŋ

mandza ŋa i fataya tserdze, ŋgayum ba.

Ama kurum gà gər ahəɗ nda batsah duluv ka,

waya ba kurum a, aɗaba

Əbay sitene ana a tarra a təv kurum a ya.

A riŋ a ge a matsəɓatsəɓ nda təv kurum ka,

hinne, aɗaba ana a sər ka, mendze ŋgar a riŋ

hinne asa tsa, kwizikw pəra ya.»

¹³Ama kə̀rəm ata a samata, tàa yàra ŋgat aka gər ahəɗ a ka, a dza ba aà madalawa məkəs ata a wa kəla asləka ŋa ya. ¹⁴Ama məkəs ata ka, tàa dzàyar gwezleviyek zləra sula, na dite a be a dər a dala, a təv ana Mbulum a ta kesle a iɗəm ŋgat a ya. A ti ndze a i fata ka, mive makər nda mezehe ŋa. I fata ka, kə̀rəm ana a ne mesiwiɗ ata ya, a sle a aà magəsa ŋgat asa tsa. ¹⁵Aləka kə̀rəm ata ka, à vìnehere a yam i bazlam ŋgar a kamala maazaw ana i batsah dula ya, dite ka, ma zazam məkəs ata, ma zlala à ŋgat. ¹⁶Ama ka, Mbulum aka zlak məkəs ata, gər ahəɗ a hə̀ndə̀k ba ikaba ya tùwaŋ, dite yam ata a dara i bazlam kə̀rəm ata ya, a zlala aɗəm fit. ¹⁷Aləka kə̀rəm ata a samata kataya tsara ka, a ge matsəɓatsəɓ hinne nda təv məkəs ata. A mbəɗara gər a dəba ya, a dara, a ge gùvəl aà gà asiŋ gà ɓəza ŋgar ŋgiɗ. Gà ɓəza ŋgar ata ka, gà na ta gəsawa ahəm aà Mbulum, nda mazazama ndzer Yesuw ana a ɗif dər a ya. ¹⁸I dəba ŋa ya ka, kə̀rəm ata a da, a ta mendzeba aà gùva batsah duluv.

Gà dukw dala duwa sula

¹Aləka i dəba ŋa ya ka, i ŋgataha a dukw dala duwa, a tsəlara i yam ata ya. Gər ikəka ka, təsəla. Gà mbukum ŋgar tekeɗe ka, kurwa. Ga mbukum ata aà gər ŋgar tserdze ya ka, felère Əbay ikəka fit. Gà gər ŋgar ata tserdze ya mbaŋa ka, ta wetse aaka gà zləm gà bazlam ana ŋgwala tsa pampam, biy mandàvàyà dər a Mbulum a. ²Dukw dala ata i ŋgatar a ka, ar kamala də̀var a. Sik ŋa ka, dùfùkw lele, gèher ikəka ndzavalaŋlaŋ kamala biy batsah dukw ana a ndzikiɗ ba mavəl a. Bazlam ŋgar tekeɗe ka, kamala biy azil a. *Kə̀rəm ata ka, a vəl ndzəɗa ŋgar fit a dukw dala ata. Dite dukw ata a daha, a ndza aka təv mendze Əbay ŋgar, aɗaba aka ŋgat ndzəɗa aà mekwere dukw tserdze. ³Aləka i samata dukw dala ata ka, gər ŋgar ŋgiɗ ilik ka, kamala ana tàa sàs ikəka ya, aka mət a. Ama kəla ka, mbəlak ŋa aka pàha. Dukw dala ata a ge aà gà mburma ana ika gər ahəɗ tserdze ya ka, kamala dukw mene aà mburma ya. Tə dza ba aà mazazama ŋgat tsara. ⁴Gà mburma tserdze, tə zàmbaɗa à kə̀rəm ata nda ndzer, aɗaba ana a vəl ndzəɗa ŋgar a dukw dala ata ya. Dite tə zàmbaɗa à dukw ata mbaŋa. Ta gwa: «Weke na batsah ŋa kamala dukw dala aaha ya? Dite weke asa ya na a sle aà mege ahər a gùvəl a? Wura a riŋ kamala taŋa ya tsidze.»

⁵Dukw dala ata ka, tàa vəlar vatwa aà mege zlapa ŋgarra ika miɗ mburma, dite aà mandàvàyà a Mbulum mbaŋa asa. A ŋgat ndzəɗa aà mege kamala taŋa ya ka, i huɗ kiye dzik faɗ gəra sula ya. ⁶I fataya ka, a dza ba aà mandàvàyà a Mbulum agəra metsìkè dukw ana a tsik aà zləm ŋgar ŋgwala tsiye, dite a ndavaya a təv mendze ŋgar, nda gà na tar riŋ mandza ŋa i gər ŋa i mbulum a tserdze asa mbaŋa. ⁷Ta vəlar vatwa aà mege gùvəl aà gà mburma Mbulum mbaŋa, dite ka, mə̀ mba aà tar. Ta vəlar ndzəɗa aà makwàrà gà ahəɗ ana pampam tserdze ika gər ahəɗ a mbaŋa asa, dite aà makwàrà gà mburma ana slàla tar pam, nda gà təv gà mendze tar pampam, kige tsa gà ahəm tar tekeɗe ka, pampam a. Tar ka, i ahər ŋgar tserdze, ta gis a ahər a ahəm. ⁸Gà mburma ana ika gər ahəɗ a tserdze, ti ti dzèyer a gurmits a bəɗ. Ama say gà mburma ana tàa wetse zləm tar aka wakita gà na ta ŋget a mesife ya, na tì dzer a gurmits a bəɗ tsiye. Ama tar ka, tàa wetseye gà zləm tar daga aka ana tàa ge gər ahəɗ zukw tsiye ya. Wakita ata ka, biy Kəla Təmaŋ ana ta kəɗ a.

⁹«Ku mege weke na gər ŋgar aka ge aà metsereke ka, mà dzar zləm lele.*fa* ¹⁰Wele ana Mbulum aka gwa ahər, ta gəs a daŋgay a ka, ta gis a ŋgat kaɗəŋ. Dite wele ana Mbulum aka gwa, ta kəɗ nda màsalamà ya tekeɗe ka, ta kiɗ a dər ŋgat kaɗəŋ asa. Aɗaba taŋa, gà mburma Mbulum ka, say ta gəs gəzləŋ, tə da aka miɗ aka miɗ nda magəsa ŋgat. Kamala taŋa ya ka, gəzləŋ tar a ndze a ɓəŋɓəŋ lele.»

¹¹I dəba ŋa ya ka, i ŋgataha a dukw dala duwa a riŋ a ndàra gər i ahəɗ a. Mbukum ihər sula kamala i təmaŋ a. Ama a fàfəl kə̀la ka, kamala kə̀rəm a. ¹²Ndzəɗa ŋgar a riŋ kamala malahalah dukw dala ata ya mbaŋa. A gewa megemir ŋgar ka, ika miɗ malahalah dukw dala ata. A fàr ndzəɗa aka gà mburma ana ika gər ahəɗ a, nda gà dukw ana iɗəm a tserdze, a gwaɗa a tar: «Zàmbaɗum à malahalah dukw dala ata mbəlak ŋgar aka pàha ya.» ¹³A gewa ka, gà dukw mene aà mburma ana gà bàba ŋa pampam hinne ya. I huɗ dukw ana a gewa ya ka, akwa a terre a aka gər ahəɗ a ndərzayya aà are mburma ya tserdze. ¹⁴Agəra ana ta vəlar ndzəɗa aà megeye gà dukw mene aà mburma ata ika miɗ malahalah dukw dala ata ya ka, a bana dər gà mburma gər ahəɗ. A gwaɗa a tar: «Gwim mendzikiɗe ba malahalah dukw dala ata ta ger mbəlak nda màsalamà ka, dite a mbəl iɗəm a. Kà zàmbaɗum à ŋgat.» ¹⁵Dukw dala ata ka, aka ŋgat ndzəɗa aà mivizle mesife a mendzikiɗe ba dukw dala ata. Dite mendzikiɗe ba dukw dala ata aka dza ba aà mifefile ka, a bats gà na ti niw mazàmbàɗà à ŋgat a tserdze. ¹⁶Dite dukw dala ata malahalah ŋa ndeɗiŋa ya ka, a kwara gà mburma tserdze. Ku mege gà bàba ŋa, nda gà na meɗè zləm tar a riŋ tsiye, dite ku mege gà Əbay nda gà ɓəzla matawak, kige tsa, gà ɓele nda gà na ti ziwe a gər tar a tekeɗe, tar ka, i ahər ŋgar. A gwa, say ta geye lambà akahər mezime tar, kige tsa aka yamere tar asa mbaŋa. ¹⁷Wele ana lambà ata a riŋ ihər tsiye ka, a sle a aà masàkàmà duwa, kige tsa aà madzàwà à duwa tsidze, say gà na lambà ata a riŋ aà tar a. Na a ne lambà ata ka, zləm dukw dala ata, kige tsa maɗàmà gà dukw ana tə ɗamawa nda zləm ŋgar ŋa ya.

¹⁸Ama ka, say gà mburma ta ge metsehe lele. Aɗaba wele ana metsehe ŋgar a riŋ a ka, a ti sir a gà maɗàmà gà dukw ata. Aɗaba maɗàmà gà dukw ata ti ɗif a ka, à gà mburma ana masakəŋa ya. Maɗàmà ŋa ka, dərməka ndilik nda dzik ndilik gəra ndilik.

Dimis ana gà mburma Mbulum tì lèh a i mbulum i gər ŋa ya

¹I dəba ŋa ya, i samata asa ka, i ŋgataha a Kəla Təmaŋ a riŋ mehìtsè ŋa ika gər kwite ana tə zalar Siyuna ya.*fa* Ŋgat a riŋ i fata, tar nda gà mburma ana ta wetseye zləm ŋgar, nda gà zləm tsir ŋgar aka yemere tar a. Gà mburma ata ka, tar dəbuw dərməka nda dəbuw dzik faɗ gər faɗ. ²I dəba ŋa ya, i tsarakara mifefile ana a ɗera i gər ŋa i mbulum a. A ɗera ka, kamala maazaw ana a dze a a bəɗ dzuruvva aà madzundzuruv a. Dite a ɗe asa ka, gùrumumma kamala malaka mbulum a. Ama mifefile ata i tsarakara ya ka, a tsahən hinne, ar ka, kamala ana tì dze a gandzavəl a mbaŋa asa. ³Gà mburma ata dəbuw dərməka nda dəbuw dzik faɗ gəra faɗ a ka, tar gà mehìtsèyè ŋa ika miɗ təv mendze Əbay Mbulum, nda gà ika miɗ gà bàba ŋana, dite ika miɗ gà dukw ata faɗ ŋa nda gà mesife ya. Tar riŋ tì lèh a dimis awiya ŋa. Ama dimis tar ata ka, wura a sər malàhà ŋa tsidze, say gà mburma ata Mbulum a mbùrùɗaha tar ika gər ahəɗ a ya. ⁴Gà mburma ata ka, tar gà tsəɗaŋŋa, tàa ləm aà gà məkəs tsidze. Tar ti zezem a ka, Kəla Təmaŋ ata i sik a i sik a, haa a təv ana a de aɗəm a ya. Tar ti ne ka, gà biy Mbulum nda Kəla Təmaŋ. Tar na Mbulum a mbala à tar ika magər gà mburma ana ika gər ahəɗ a ya. ⁵Tar ka, pàrsa a riŋ i bazlam tar tsa, dite dukw ŋgiɗ a riŋ ilik na ta ge a ka, ta me a ter a iɗəm à bakal a tsidze.

Gà gawla Mbulum makər

⁶I dəba ŋa ya ka, i ŋgataha a gawla Mbulum ŋgiɗ duwa a riŋ ɗevivivvè diriŋ, a be a ndaà gəza mbulum. A dara ka, aà meɗìfè à bazlam ŋgwal ŋa ana a ndze a aà biybiy a. A tsik a ka, a gà mburma ana ika gər ahəɗ a tserdze, ku mege a gà na slàla tar pam, nda gà təv gà mendze tar pampam, kige tsa gà ahəm tar tekeɗe, pampam a. ⁷Gawla Mbulum ata a tsik a tar ka, nda magala ŋgəlakəkka. I huɗ mifefile ŋgar ata ya ka, a gwaɗa a tar: «Gwim magəɗa a Mbulum. Dzùmar gurmits a bəɗ, dite kà zlə̀bum à ŋgat. Aɗaba pat ŋgar ana a ta ge a seriye a mburma ya ka, aka à mendze aɗəm. Zàmbaɗum à ŋgat, aɗaba ana a ge gà gəza mbulum nda gər ahəɗ, nda gà batsah duluv, dite nda gà yam ana à ŋgìzere a i biye ya.»

⁸I dəba ŋa ya, i ŋgataha a gawla Mbulum ŋgiɗ masula ŋa, a dara i dəba biy ŋgiɗ aaha ya. Ŋgat a gwa ka: «Babila batsah kwite ata ka, Mbulum aka mbàzla dər bìrìm fit kweleŋ. Kwite ata na a fàr ndzəɗa aka mburma tserdze, ku mege gà slàla awara tekeɗe, aà masàyà meɗwìtsè dukw mese ŋgar ana makwàsà ŋa ya, kamala megweɗe ya ka, aà megeye mezelme nda təv muva.»

⁹I dəba ŋa ya ka, gawla ŋgiɗ məmakər ŋana a dara asa. A fàfəl nda magala ŋgəlakəkka, a gwa: «Gà na tar riŋ tì dzèye a gurmits a bəɗ a dukw ata a dara i yam a, dite nda mazàmbàɗà à mendzikiɗe ba ŋgar ŋa ya ka, gà na tàa ge lambà ŋa aka yemere tar, kige tsa akahər tar mbaŋa ya ka, ta beye a tsa.*fb* ¹⁰Tar ka, ti ti seye a meɗwìtsè dukw ana ndùlàkə̀kka makwàsà ŋa biy Mbulum a, kamala megweɗe ya ka, mesewere are ana Mbulum a ta vile a ter a ya. Aɗaba matsəɓatsəɓ ŋgar ana a tsəɓar aka gər tar a ka, a ti rèh a ter a dər a kəzləm dìts. Dukw ana ŋgwal ŋa ya ka, ar iɗəm ilik tsidze. Wur ana aka dza gurmits a bəɗ a dukw dala ata ya ka, kùm tì yè a ŋgat a akwa ana dukw ata iɗəm, a wanawa wàfùfùffa kamala asana ya. Kamala taŋa ya, ti ti sèwèr a are ika miɗ gawla Mbulum ata tsəɗaŋŋa ya, dite ika miɗ Kəla Təmaŋ asa mbaŋa. ¹¹Hədzək akwa ata a ti sèwèr a are a gà mburma ata ya ka, a ti tsil a aà gəza mbulum aà biybiy. Aɗaba wur ana aka zàmbaɗa à dukw dala ata, kige tsa à mendzikiɗe ba ŋgar ŋa, dite tàa wetse zləm ŋa aà ba tar a ka, ti ta ŋget a mesìfìkà ba kwizikw tsidze. Tì sèwèr a are ka, kəla pat, ku mege ndaàpat, ku mege ndaàvəɗ asa mbaŋa.»

¹²Aɗaba taŋa, kurum gà mburma Mbulum ana kurum ihər ki giswim ahər a ahəm, kə̀ gəsum Yesuw nda gəzləŋ kurum a ka, mərum aba. Gəsum gəzləŋ ɓəŋɓəŋ lele.

¹³I dəba ŋa ya ka, i tsarakara mifefile i mbulum a asa, a gweɗiŋ: «Wetse dukw ana i tsikik a ya. Bazlam ŋa ka: Gà na ta mataya i megemir Mbulum a ka, maŋgayaba ika gər tar, daga aà kinehe ya.» I fataya ka, Mezite Mesife Mbulum a gwa aaka: «Haya, kamala taŋa ya kaɗəŋ. Aɗaba mege megemir tar ka, aka ndəv, tì sifik a ba ka, nda gà maŋgayaba. Aɗaba dukw megemir tar ana ta ge ŋgwal ŋa ya ka, ndərzayya, makàhà ŋa asa tsa.»

Məpala gà duwa i bəɗ a

¹⁴Aləka i dəba ŋa ya, i samata ka, i ŋgataha a hulɓukw duwa herrè, duwa a riŋ mandza ŋa iɗəm kamala mburma ya. Felère Əbay a riŋ i gər ŋgar, malàmbàɗà ŋa nda gura ana tsakala ŋa hinne ya. Dite matwaha duwa a riŋ i ahər ŋgar matasla ŋa hapəpəpa asa mbaŋa. ¹⁵I dəba ŋa ya ka, gawla Mbulum ŋgiɗ a dara i ga Mbulum batsah ŋa ata ya asa. A zalaha a wele aaha ndeɗiŋa mandza ŋa i hulɓukw a, a fàfəlaraha ŋgəlakəkka. A gwaɗaraha: «Dara à matwaha yak a, kà slə̀vaya dər gà dukw ana gà manàhà ŋa ika gər ahəɗ a. Aɗaba kinehe ka, gər ahəɗ aka nah, məpala gà duwa i bəɗ a ide.» ¹⁶I dəba bazlam ŋgar ata ya tsara ka, wele ata mandza ŋa i hulɓukw a, a dara à matwaha ŋgar ata ya kaɗəŋ. A sàs dər gà dukw ana ika gər ahəɗ a fit kuɗa.

¹⁷Aləka i dəba ŋa ya ka, i ŋgataha a gawla Mbulum ŋgiɗ, a dara i gər ŋa i mbulum a asa. Ŋgat tekeɗe, a dara i ga Mbulum batsah ŋa ata i gər ŋa ya mbaŋa. Matwaha a riŋ ihər i ahər ŋgar matasla ŋa hapəpəpa asa.

¹⁸I dəba ŋa ya, gawla Mbulum ŋgiɗ a dara i təv ana ta vəlawa aaka a riŋ duwa a Mbulum a. Ŋgat ka, mala malàmbàɗà à akwa. A zalaha a biy ŋgiɗ aaha matwaha mazəma ŋa hapəpəpa i ahər ŋgar a. A fàfəlaraha ŋgəlakəkka. A gwaɗaraha: «Samata kwaŋ, gà mawà gà dukw ana ika gər ahəɗ a ka, tàa nàhaya lele. Aɗaba taŋa, dara à matwaha yak a, ka da dərraha aka gər ahəɗ, slə̀vaya dərra iɗəm a.» ¹⁹Kamala taŋa ya, gawla Mbulum ata a dara à matwaha ŋgar a kaɗəŋ. A daha, a slə̀vaya dərra gà mawà gà dukw ata iɗəm a. I dəba ŋa ya, a ndzək mawà gà dukw ata, a daha, a dza a təv ana ti ɗwitsewa aɗəm a. Ama gà dukw ata fit dze, ti ɗif a ka, à matsəɓatsəɓ Mbulum ana a riŋ à tsìɓer a hinne ya. ²⁰Təv ata ti ɗwitsewa aɗəm mawà dukw ata ya ka, kətsah aà guva kə̀sà ya zaakwa. I təv ana ta ɓəl aaka, na dite ta ŋget a a meɗwìtsè ŋana ya ka, məmbəz na a dara iɗəm a ya ivaɗ. Məmbəz ata a zlala ka, mbàwwa kamala yam ana i dula ya. A zlala ka, kiliwmeter dərməka makər, ndàra a biye ka, bats aaka màkəɓatsa piris.

Gà gawla Mbulum ana tar nda gà mandəvandəv

mesewere are ya

¹I dəba ŋa ya ka, i ŋgataha a batsah dukw ŋgiɗ aà gəza mbulum asa. A ge aà iye ka, kamala dukw mene aà mburma ya. I ŋgataha ka, a gà gawla Mbulum təsəla nda gà dukw mesewere dər are a mburma aà tar i ahər ilik ilik, aɗaba tì ndìv a dər ka, à matsəɓatsəɓ Mbulum ana a riŋ à tsìɓer a, à tètìk a ter a dər a.

²I dəba ŋa ya asa ka, i ŋgataha a dukuməŋa a riŋ, a ndza kamala duluv yam ana à div a twiytwiy kamala kwataramà ya, dite akwa iɗəm asa ya mbaŋa. I fataya ka, i ŋgataha a gà mburma ana ta mba aà dukw dala ata ya. Tàa dzar gurmits a bəɗ, nda mendzikiɗe ba ŋgar ŋa, nda gà zləm ŋgar ata ti ɗer maɗàmà duwa ya tsidze. Gà mburma ata tserdze ya ka, tar gà mehìtsèyè ŋa aà guva duluv ata a də̀v kamala kwataramà ya. Tar ka, nda gà gandzavəl ana Mbulum a dzaya a tar a i ahər. ³Tar ihər tì lèh a dər dimis Musa ana ŋgat mala meslire Mbulum, a lah akahər ata ya. Dite i dəba ŋa ya, tə lah dimis wele ana ŋgat kamala Kəla Təmaŋ a mbaŋa. I huɗ malàhà dimis tar ata tə lah a ka, ta gwa:

«Mbulum BATSAH kwa ŋa ka,

mala makwàrà duwa tserdze.

Mege megemir yak ana ki ge a ya ka,

batsah ŋa. Ar ka, ŋgwal ŋa ndzer.

Kər na Əbay ika gər ahəɗ tserdze ya.

Dukw ana ki dzele a ya, ndəna

ki ge a ya ka, kalkal lele.

Kər ka, mala mege dukw ana ŋgwal ŋa ndzer a.

⁴Batsah mər ŋa, ku weke ka, a gik a magəɗa.

Wele ana a gweɗe a ka, i zèmbeɗe a

à kər tsiye dze ana, weke?

Aɗaba kər ilik na tsəɗaŋŋa ya.

Gà mburma ana ku mege i ŋga

ika gər ahəɗ tserdze ya,

ti dere a aka miɗ yak a,

tì dzèk a gurmits a bəɗ,

aɗaba ana tar tserdze

tàa ŋgat a megemir yak ana

ki ge ndaka vatwa ŋa lele ya.»

⁵I dəba ŋa ya ka, i samata meme na ta hə̀ndə̀k i ga Mbulum batsah ŋa ana i gər ŋa i mbulum a, kamala megweɗe ya ka, mekìrìwè ga petek ana gà mburma tə lə̀mawa akaba aɗəm nda gà Mbulum a. ⁶Dite i ŋgataha a gà gawla Mbulum ata təsəla, nda gà dukw mesewere dər are a mburma aà tar i ahər ilik ilik a asa. Tar riŋ ti dere a i ga ata ya, gà petek ana ika tar a ka, gà herrè ŋa ɗekɗek, tsəɗaŋŋa lele. Tar ka, gà madànàyà ba ŋa i gəzləŋ a nda gà slarapa ana malàmbàɗà ŋa nda gura ya. ⁷Biy ŋgiɗ ilik ika magər gà dukw ata faɗ nda gà mesife ya, a daha, a dzaya gà tasà təsəla màlàmbàɗà ŋa nda gura, a gà gawla Mbulum ata təsəla ya, ku weke nda biy ŋgar. Gà tasà ata ka, tìsse tìsse maràhàyà ŋa nda matsəɓatsəɓ Mbulum, wele ana a ndze a nda gà mesife aà biybiy a. A riŋ a ge a matsəɓatsəɓ hinne turtur nda təv gà mburma. ⁸Ama ga Mbulum ata ka, maràhà ŋa tùtùkwtùkkwa nda hədzək. Hədzək ata a dara ka, i təv mezlibe Mbulum ana tì zlibe a dər, dite i təv ndzəɗa ŋgar a asa mbaŋa. Ama wura ilik a sle a aà mede a ga Mbulum ata tsidze, say gà mesewere are ata təsəla ya, tì ndìv a i ahər gà gawla Mbulum ata ya dzekwiŋ.

Gà tasà ata nda gà matsəɓatsəɓ Mbulum iɗəm a

¹I dəba ŋa ya ka, i tsarakara mifefile ana a ɗera ŋgəlakəkka i ga Mbulum ata ya ya. I huɗ mifefile ata ya ka, ta gwaɗa a gà gawla Mbulum ata təsəla ya: «Dumaha, kà dzàyum à gà matsəɓatsəɓ Mbulum ana i gà tasà kurum ata ya, a bəɗ aka gər ahəɗ. Dzàyum dər ka, a gà təsəla ŋa ata i tasà ya fit dze.»

²I dəba mifefile ata ya tsara ka, gawla Mbulum malahalah ŋana, a daha, a dza à biy ŋgar aka gər ahəɗ. A dza à bəɗ tsara ka, gà mbəlak ana ti wir a hinne ya, mbùkw mbùkw a pàtaya aba aka gà mburma ana lambà dukw dala ata aà tar, dite tə zàmbaɗawa à mendzikiɗe ba ŋgar ŋana asa mbaŋa ya.

³Aləka gawla Mbulum masula ŋana a daha, a dza à dukw ana i tasà ŋgar a ka, a batsah duluv. A dza dər tsara ka, yam ata a ne kamala məmbəz ana a dara i məməta ya. Tsam ka, gà dukw ana i yam ata ya tserdze, fit ta mata aɗəm.

⁴I dəba ŋa ya, gawla Mbulum məmakər ŋana a daha, a dza à dukw ana i tasà ŋgar a ka, a gà dula, nda gà a biye yam ana a ŋgəzawa ya. Dite gà yam ata tekeɗe, ti neye kamala məmbəz a mbaŋa. ⁵I fataya ka, i tsarakara gawla Mbulum ana a kaslawa gà yam a. A zàmbaɗa à Mbulum, a gwaɗar: «Kər ilik na tsəɗaŋŋa ya. Kər ka, kər riŋ daga piŋŋe, aà gər ana gər ahəɗ a riŋ zukw tsiye. Dite kinehe tekeɗe, kər riŋ nda gà mesife hiywe asa mbaŋa ya. Kər ki ge a seriye aaha a mburma ka, ndaka vatwa ŋa lele. ⁶Gà mburma aaha ka, tə dzayawa à məmbəz gà ɓəzla məma à guma yak a bəɗ, nda biy gà asiŋ gà mburma yak ana tserdze ya, tàa batsaya tar. Ama kinehe ka, ki vile a ter a məmbəz ata, dite tə sa mbaŋa te. Kamala taŋa ya, ta ŋget a dukw mayaba tar kaɗəŋ.» ⁷I dəba bazlam ŋgar ata ya ka, i tsarakara mifefile i gər ŋa ya, a ɗera ika təv ana ta vəlawa aaka duwa a Mbulum a. A gwa: «Haya kaɗəŋ, kər Mbulum Batsah mər ŋa ka, mala makwàrà gər ahəɗ tserdze. Kər ka, mala ndzer, ki gewa seriye a gà mburma ka, ndaka vatwa ŋa lele, pàrsa iɗəm tsa.»

⁸I dəba ŋa ya asa ka, gawla Mbulum məfaɗ ŋana a dza à dukw ana i tasà ŋgar a, aka pat. Tsam ka, a vəlar ndzəɗa aà mewire hinne, ndàzza kamala akwa ya, na a wene a mburma ya. ⁹I təv ana a wànà tar kamala taŋa ya ka, gà mburma ata tə ndavaya a zləm Mbulum, aɗaba ana a slər aka tarra mesewere are ata ya ya. Ama ka, tàa mbəɗ à gəzləŋ tar, dite tàa dza gurmits a bəɗ a Mbulum ɓav tsa, ti niw ŋgat ivaɗ.

¹⁰I dəba ŋa ya asa ka, gawla Mbulum mìizlam ŋana a daha, a dza à dukw ana i tasà ŋgar a, aka təv mendze Əbay dukw dala ata. I təv ana a dza dər tsara ya ka, luvuŋ a ge ziŋziŋ hinne i mekwere ŋgar ana a kwere a ya tserdze. Gà mburma ta papaɗa dər zlir hinne, aɗaba mewire mesewere are tar ata a wir aà ter a ya. ¹¹Ama ku mege kataya tekeɗe ka, tàa mbəɗ à gəzləŋ tar, dite tàa miyak à gà dukw ana ta gewa ya tsidze. Tə ndavaya a Mbulum ana i gər ŋa ya ivaɗ, aɗaba mesewere are gà dukw ata nda gà mbəlak tar ata a wir aà ter a ya.

¹²I dəba ŋa ya, gawla Mbulum mendilik ŋana a daha, a dza à dukw ana i tasà ŋgar a, a batsah dula ana tə zalar Efrat a. A dza dər ka, yam ana i dula ata ya, a se ndes tsara. Kamala taŋa ya, gà Əbay ana ti dere a ndaka tsèke pat ana a mbəzawara ya, ta ŋget a vatwa, ti dere a aà mege gùvəl aka lìdè ŋgiɗ a kuɗa. ¹³I dəba ŋa ya ka, i ŋgataha a gà sitene ana gà ŋgwala tsa ndeyndey a, makər.*fa* Tar ka, kamala gà makwambaɗùkw a. I ŋgiɗ a dara ka, i bazlam *kə̀rəm a. Dite biy ŋgiɗ ibam, a dara i bazlam dukw dala ata ya. I ŋgiɗ asa ka, a dara i bazlam mala məma à guma Mbulum ata nda pàrsa ya. ¹⁴Gà sitene ata tə dara ka, i təv Əbay tar ŋana ya. Ta gewa ka, gà dukw mene aà mburma ana pampam a. Ti de a a təv gà Əbay gər ahəɗ tserdze. Ti yehe a ter a gər aà mege gùvəl aà Mbulum BATSAH kwa ŋana a za duwa tserdze ya, a pat ana a ta pèt a à ndzəɗa ŋgar a.

¹⁵Yesuw a gwa: «Gwim metsehe, tsarakum, aɗaba i ti dere a ka, sèrèh kamala mala akəl a. Ama maŋgayaba ika gər wele ana petek ika ba ŋgar a, dite ka, a ndze a are tsa asa ya. Aɗaba Yàa dara ka, ma tə da kataya sàgùrɗùmma kataya ze petek, dite ka, hwarwa a ger a ika miɗ mburma ya tsa.»

¹⁶Gà sitene ata makər a ka, ti yaha gər a gà Əbay a tə̀vəməŋa a riŋ tə zalar ndaka ahəm gà Yahuda ka, Armagadan.

¹⁷I dəba ŋa ya ka, gawla Mbulum matəsəla ŋana a daha, a dza à dukw ana i tasà ŋgar a, a himbiɗ aà gəza mbulum. A dza dər aba ya ka, mifefile duwa a ɗera nda magala ya ŋgəlakəkka i təv mendze Əbay Mbulum i ga Mbulum batsah ŋa ata ya. A gwa ka: «Aka ndəv.» ¹⁸I fataya ka, mewìtìɗè mbulum a dza ba aà mewìtiɗe wùtəɗ wùtəɗ. Dite malaka mbulum a lakaya ŋgùzlar ŋgùzlar, dite gər ahəɗ a ɓazla hinne wàkit wàkit asa. A gər ana Mbulum a ge mburma ya ka, gər ahəɗ aka ɓazla kamala taŋa ya ilik tsidze. A ɓazla ka, a za duwa tserdze. ¹⁹Dite asa gər ahəɗ a taya ba ikaba ya tùhak tùhak. Huɗ kwite batsah ŋana tə zalar Babila ya, a tarətsa ba ikaba ya təv pampam makər, dite gà asiŋ kwite ana ika gər ahəɗ a tserdze, ta mbazla mbaŋa. Kamala taŋa ya, aɗaba kwite Babila ata ka, aka məts gər a Mbulum tsa. A ge matsəɓatsəɓ hinne nda təv ŋgar. Ar ka, kamala dukw ana a dzəm tsəka, a gweɗere a, sa, kà ndəv dər iɗəm a ya. ²⁰Kamala taŋa ya, gà ahəɗ ana malàwàrà ŋa nda yam a tserdze, tə dzawa a huɗ yam, dite gà kwite zùbəl ŋa ta mbazlaya bìrìm bìrìm fit, wura aka ŋgatar asa tsa. ²¹Gà bàba gà aləndza tə dzawara i mbulum a ɓàràmakkà hinne. Ama aləndza ata ilik ka, kiliw dzik faɗ. A dzawara ka, aka gà mburma ya. Gà mburma ata ka, tə ndavaya dər akaba a Mbulum, aɗaba ana ti sèwèr a are hinne agəra aləndza ata ya. Aɗaba mesewere are ata ka, ŋgwala tsa ndeyndey, a za duwa tserdze.

Bazlam aka gər dəm duwa muva ŋa

¹I dəba ŋa ya ka, gawla Mbulum ŋgiɗ ilik ika magər gà gawla Mbulum ata təsəla, dite gà tasà aà tar i ahər təsəla asa ya, a dara a təv gà ya, a gweɗiŋ: «Dara, i ɗifek a dər, meme na Mbulum a ta vile a mesewere are a dəm ata muva ŋa ya. Dəm ata muva ŋa ya ka, kamala megweɗe ya, kwite ana mazlazla ŋa aà gùva gà dula pampam hinne ya. ²Ŋgat ka, gà Əbay ana ika gər ahəɗ a tserdze, ta geyewa muva nda gà ŋgat. Dite asa ka, gà mburma ana ika gər ahəɗ a tserdze, tə sayawa guzum ŋgar, ta kwayawa dər, ta gewa dər muva nda gà ŋgat mbaŋa asa.»*fa*

³I dəba ŋa ya asa ka, Mezite Mesife Mbulum a dara aka gər gà ya, dite gawla Mbulum ata a da à iye a kusak. Iye riŋ i ndze a i fata ka, i ŋgataha a məkəs duwa, ŋgat mandza ŋa ika dukw dala. Dukw dala ata a ndza ka, nduzzwa. Gà gər ikəka təsəla. Gà mbukum ŋgar ka, kurwa. Aà ba ŋana tekeɗe, maràhà ŋa nda mewètsèyè gà duwa ihər. Gà dukw ata ta wetseye ya ka, gà ŋgwala tsa ndeyndey, ti ndeveye a dər a Mbulum. ⁴Məkəs ata ka, petek ikəka nduzzwa, dite petek ŋgiɗ ka, a ndza ndizze ndeyndey. A dùwaya ba nda dukw maslawa ŋgar hinne, gà gura nda gà medzibe gà kur ana pampam, tsakala ŋa hinne, à sìkim a ba tsiye. Dite kup duwa a riŋ malàmbàɗà ŋa nda gura i ahər ŋgar mbaŋa. Kup ata ka, maràhà ŋa nda dukw bakal, dukw ana biy metsike tsiye, kamala megweɗe ya ka, megeye muva ŋgar ana a gewa ya. ⁵Ta wetse zləm ŋa aka yemere ŋgar. Dukw ata ta wetseye ahər a ka: «Iye batsah kwite Babila, məmər gà dəm ana gà muva ŋa ya, dite nda megeye gà dukw ana ŋgwala tsa, ika gər ahəɗ tserdze ya.» Ama zləm kwite Babila ka, dèrze ikəka, na aà metsereke ya. ⁶I samata məkəs ata ka, makwàyà ŋa nda məmbəz gà mburma Mbulum ana a sa ya. Ta batsaya gà mburma ata ka, aɗaba ana ti ɗifewa à zləm Yesuw parakkà ya. Dite məkəs ata ka, a sa məmbəz tar.

I ŋgatar ka, a ge aà iye kamala dukw mene aà mburma ya hinne. ⁷Dite gawla Mbulum ata a gweɗiŋ: «Aàmala na a ge aà kər kamala dukw mene aà mburma ya ya?» A gweɗiŋ asa: «Tsaraka, i ɗifek a à dukw ana makàhà ŋa aka gər gà məkəs aaha nda dukw dala ata gà gər ikəka təsəla, gà mbukum ŋgar ibam, kurwa, dite məkəs ata mandza ŋa ikəka ya: ⁸Dukw dala ata kə ŋgatar a ka, a riŋ nda gà mesife piŋŋe, ama kinehe ka, mesife ŋgar a riŋ asa tsa. Dite a ta mère a i biye ana kwitsikw ŋa ya ka, bise asa mbaŋa. Aka màra ka, Mbulum a ta kiɗ a ŋgat a biye fit kweleŋ. Akahər ana Mbulum a ge gər ahəɗ a ka, aka wetse aba zləm gà mburma ana ti ta ŋget a mesife ya, a wakita ŋgar a, dite gà na aka wetseye tar tsiye tekeɗe, tar riŋ i ŋgal mbaŋa. Gà taŋa aka wetseye tsiye, ti ta ŋget a dukw dala ata ka, a ta ge aà ter a kamala dukw mene aà mburma ya. Aɗaba piŋŋe ka, a riŋ nda gà mesife ŋgar, dite kinehe ka, a riŋ nda mesife asa tsa. Ama a pat ŋgiɗ ka, a ta mère a mba asa.

⁹Wur ana a tsereke a dukw ata ka, say na Mbulum aka vəlar metsehe ya. Aɗaba gà gər ata təsəla ya ka, kamala megweɗe ya, gà kwite ana təsəla, məkəs ata mandza ŋa ikəka ya. Dite ti ɗif a ka, à gà Əbay ana təsəla ŋa ya mbaŋa. ¹⁰Ama mekwere gà Əbay gà ə̀zləm ŋana ika magər tar a ka, aka ndəv. Biy ŋgiɗ ilik ka, a riŋ a kwere a hiywe mba. Ama biy ŋgiɗ ilik ka, mekwere ŋgar aka ndze aɗəm zukw tsa. Aɗaba ŋgat aka da a mekwere aləka ka, a ti ndze a iɗəm hinne tsa. ¹¹Dukw dala ata a riŋ nda gà mesife piŋŋe ya, ama kinehe ka, a riŋ asa tsiye. Ŋgat ka, Əbay matsamakər ŋana. Aɗaba piŋŋe ka, a riŋ i liwiŋ gà Əbay ata təsəla ya. Aka màra ka, Mbulum a ti dzeye a iɗəm à ŋgat a fit a biye.

¹²Gà mbukum ata kurwa kə̀ ŋgatar a ka, ti ɗif a à gà Əbay ana kurwa, tàa da a mekwere tar zukw tsiye. Ama ka, ti ti dzèye a ter a ndzəɗa aà mekwere nda gà dukw dala ata, i huɗ mendze zaakwa ya. ¹³Gà Əbay kurwa ŋa ata tserdze ya ka, tə dza akaba bazlam a təv ilik ŋa. Ti ti dzèye a gà ndzəɗa tar tserdze ka, a dukw dala ata, dite ka, ma kwara. ¹⁴Ti ta ge a gùvəl aà wele ana a ndzikiɗ ba Kəla Təmaŋ a. Ama ŋgat ka, a ti zè a tar nda ndzəɗa, à mbè aà teriŋa. Aɗaba ŋgat ka, batsah ŋa ika gər gà bàba ŋana, dite ika gər gà Əbay ŋa ana ta kwere a ya mbaŋa asa. Gà mburma ŋgar ti zezem a ŋgat ka, nda gəzləŋ ilik. A zal a tar, dite a pala tar ka, aà ti zezem a ŋgat. Kamala taŋa ya, tar tekeɗe, ti ta mbè aà ter a mbaŋa.»

¹⁵I dəba ŋa ya, gawla Mbulum ata a gweɗiŋ asa: «Yam ata kə̀ ŋgatar, dəm muva ŋa ata a ndza aà gùva ŋa ya ka, a sasar meɗife à gà mburma ana gà slàla tar pampam, nda gà na ta fèfil a ndaka gà ahəm ŋgiɗ pampam, ku mege i ŋga ika gər ahəɗ tserdze ya. ¹⁶Dite dukw dala ata nda gà mbukum kurwa kə̀ ŋgatar a ka, ti ti ne a are a dəm ata muva ŋa ya. Ti ti dzik a ihər gà dukw maslawa ŋgar a fit, a ndze a ɗwàzɗwàzuzzwa kataya. I fataya ka, ta gìsebiŋa, ta pèpìɗiŋa. Mezehe ŋana ka, ta wene a nda akwa tewer tewer fit kweleŋ. ¹⁷Aɗaba Mbulum na a vəl metsehe a gà Əbay ata kurwa ya, dite ka, tə dza akaba ahəm ika magər tar, ta vəl ndzəɗa tar a dukw dala ata tserdze, aà ma kwara à gər ŋgar. Mbulum a ge dər kataya ka, aà ta ge a dukw ana a sasar a, dite ka, dukw ana a tsik piŋŋe, a gwa, a ta ge a ba ya ka, aka ge ba kaɗəŋ a.

¹⁸Ama məkəs ata kə̀ ŋgatar a ka, a sasar à meɗife à batsah kwite ana a kwere a gà Əbay ana ika gər ahəɗ tserdze ya.»

Mimbezle kwite Babila ana a mbazla ya

¹I dəba ŋa ya ka, i ŋgataha a gawla Mbulum ŋgiɗ a riŋ a tarra i gər ŋa i mbulum a. Ndzəɗa ŋgar ka, batsah ŋa hinne. Dite medìve ŋgar ana à div a ya ka, a ge dzaydzay ika gər ahəɗ tserdze. ²A fàfəl nda magala ŋgəlakəkka. I huɗ mifefile ŋgar ata ya ka, a gwa: «Batsah kwite Babila aka mbazla bìrìm, leheɗ leheɗ. Babila aka mbazla fit kweleŋ. Kwite ata ka, a ne təv mendze gà sitene. Gà medzibe gà sitene ana pampam a ka, i fata, nda gà məmba ana gà ŋgwala tsiye ka, tsakufkuf tar mandza ŋa i gà rəŋga ŋa. ³Kwite Babila ata aka mbazla ka, aɗaba ana a vəl ba ŋgar fit aà mege mezelme nda təv muva ya. Gà mburma ana ika gər ahəɗ a tserdze, tàa saya guzum ŋgar, dite gà Əbay gər ahəɗ ana tserdze ya, tàa geye muva nda gà ŋgat asa mbaŋa. Gà ɓəzla metsèkèle ibam, ta geye Əbay hinne ka, agəra kàzlàŋa ŋgar ana sik sik sik, a tsahən aà mburma ya.»

⁴I dəba ŋa ya, i tsarakara mifefile ŋgiɗ, a ɗera i gər ŋa i mbulum a. I huɗ mifefile ata ka, a gwa: «Kurum gà mburma gà ka, dumara i liwiŋ tar a, tsəka, na bəla ka dzum ahər aà bakal tar ka, ki ta ŋgetwim a mesewere are kamala tar a mbaŋa. ⁵Dum ika magər tar a, aɗaba bakal tar ka, aka beha hinne, a ɗeme a ba tsa. Mbulum a sər, dukw tar ata ta geye ŋgwala tsiye ka, aka mətsar gər tsa. ⁶Ta mà a tar aɗəm à mesewere are ŋa kamala ana tar ti sèwèr a mburma ya mbaŋa. Dukw tar ana ta ge a gà mìsle ŋgiɗ a ka, ta mà a tar dər aɗəm, mà za taŋa. Na bəla tàa tə̀f meɗwìtsè dukw tar ata ŋgwala tsa, makwàsà ŋa ya, a mburma dits a kəzləm ka, tə tafa a tar aɗəm kəzləm sula mbaŋa te. ⁷Ta vəl a tar mesewere are hinne, arəv ma da dər aà tar a dùwaɗ, kamala Əbay tar ana ta ŋgat hinne, ta gewa məburnun a mbaŋa. Ta gwaɗawa i gər tar ka: <Waytsà mər ka, gà Əbay, kwite mər mandza ŋa ka, hùɓùkkwa kamala mendze madakwa məkəs a tsa. Labara duwa a ta ge a ba i təv mər tsidze.> ⁸Aɗaba taŋa, mesewere are a ti dere a aka gər tar a ka, gər melik tsara. Gà dukw məməta nda tuwa, nda gà may ti dere a aka kwite tar a ka, pat ŋa ilik. Dite akwa a wene a tar hilɓèk hilɓèk fit mbaŋa. Aɗaba Mbulum BATSAH kwa ŋa ilik na batsah ŋa ya. Ŋgat na a ge a ter a seriye ya.»

⁹I təv ana gà Əbay ata ika gər ahəɗ tserdze ta geyewa muva i kwite ata ya, ti ta ŋget a a hədzək akwa ana a wene a kwite ata ya ka, ti tiweye aaba a hinne, gəzləŋ a wir aà teriŋa. Aɗaba i təv ana tar mandza ŋa iɗəm a ka, kìɗìŋŋa madzala gà gər tar aà mege məburnun pəra. ¹⁰Ti ta hitse a ka, diriŋ aà kwite ya, aɗaba ti ta ge a magəɗa hinne, agəra mesewere are ana a geba i fataya. Ta gweɗe a ka: «Waya ba mər a, waya, batsah kwite Babila aaha ndzəɗa ŋa hinne ya, a mbazla leheɗ leheɗ gər melik tsara ana, meme?»

¹¹Gà ɓəzla metsèkèle ana ika gər ahəɗ tserdze ya tekeɗe, ti tiwe aaba a hinne, arəv a wir aà ter a mbaŋa, agəra kwite ata a wànà ya, aɗaba ana wura a ti sekeme a gà dukw tar ata asa tsiye ya. ¹²Gà dukw tar ata ka: gà gura nda gà ndzemde məvəɗa siŋgwe ana tsəzlzla ya, nda gà kur ana pampam tsakala ŋa hinne, à sìkim a ba tsiye, dite nda gà petek sak, nda gà na a ndza nduzzwa ya, ndəna a ndza ndizze ndeyndey a, nda gà asiŋ gà petek ana gà ŋgwal ŋa pampam a. Dite gà dukw ana tə dzawuwa dər a mbaŋa ka, gà dizl ana pampam, gà tsakala ŋa hinne, à sìkim a ba tsiye, nda gà dukw ana tə làmbaɗaya nda zlir matswaslu ya, kige tsa, nda dizl ŋgwal ŋana. Gà asiŋ gà biy ŋgiɗ ka, ta vaɗa ara, nda ndzemde məvəɗa kur siŋgwe, kige tsa, nda gà kwàtamà mbaŋa asa. ¹³Gà mburma ata tə dzawuwa ka, à gà medzibe gà wirdè ana a ze hwaŋŋà lele ya mbaŋa, dite nda gà slàmbah gà dukw ana a ze lele ya asa mbaŋa. Tə dzawuwa a gà guzum nda mal, nda gà daw, nda gà gùfa, dite nda gà sla nda təmaŋ, nda gà piris, nda puspus ana tə dànawa aà gà piris, nda gà mburma ana ti ne à tar gà ɓele ya mbaŋa. Wura a ti sìkim a duwa i ahər tar a asa tsidze. Kamala taŋa ya, ti tiwiŋa, ta gweɗe a a gà mburma ana i kwite ata ya: ¹⁴«Gà dukw ata gà matsahəna ŋa, kà wayum mesikime ya ka, a riŋ asa tsa. Gà limana kurum nda gà Əbay kurum tserdze ka, aka ndəv, ki ŋgetwim a asa tsidze.» ¹⁵Dite gà ɓəzla metsèkèle ana ta ŋgatawara siŋgwe hinne i kwite ata ya ka, ti ta hitse a diriŋ aà təv ata ya, aɗaba ta ge a magəɗa agəra mesewere are ana a geba i fataya. Ti ti tiwe aaba a hinne, ta ge a matsəɓatsəɓ. ¹⁶Ti ta gweɗe a ka: «Waya ba mər a, waya, batsah kwite aaha aka mbazla bìrìm kweleŋ dze ana, meme? Ar ka, kamala məkəs ana a dza akaba petek nduzzwa ŋa, ndəna a ndza ndizze ndeyndey a, dite nda gà petek sak ana ŋgwal ŋa lele ya. Madùwàyà ba ŋgar ata ka, nda gà ŋgwal gà dukw maslawa ana ta vaɗa nda gura, biy ŋgiɗ ibam, tə làmbaɗa nda kur ana tsakala ŋa hinne, à sìkim a ba tsiye. ¹⁷Ama kinehe gà dukw ŋgar ata ka, tàa nəsaya fit gər melik tsara ana, meme?»

Dite gà mburma ana gà slə̀làh yam tar a riŋ nda gà ɓəzla məpaka ŋa, nda gà ɓəzla megemir tar, dite nda gà taŋa tə sùwayawa nda slə̀làh yam a tserdze, ta ŋgatawa iɗəm dukw mayaba tar a ka, ti ta hitse a diriŋ aà kwite ata ya mbaŋa. ¹⁸Tàa ŋgataha a hədzək akwa ana tùtùkwtùkkwa, a tsəl aà mbulum a ka, ta fàfəl nda magala ŋgəlakəkka, ta gwa: «Kwite ŋgiɗ a riŋ kamala kwite aaha ya ka, a riŋ asa tsidze.» ¹⁹Tə tuwaya aaba hinne, tə ndàya ahəɗ a gər, ta fàfəl nda magala ŋgəlakəkka, ta gwa: «Waya ba mər a, waya, batsah kwite aaha a mbazla ya. Gà na slə̀làh yam tar a riŋ, ta ŋgatawara iɗəm limana i fataya ka, hinne. Ama, araha kinehe ka, aka nəs gər melik tsara ana, meme?»

²⁰Kurum gà mburma ana i gər ŋa i mbulum a, ŋgayum ba agəra kwite aaha a mbazla ya. A kurum gà ɓəzla meslire Mbulum, nda gà ɓəzla məma à guma ŋgar, dite nda gà asiŋ gà mburma ŋgar tserdze, ŋgayum ba, aɗaba Mbulum aka ge a tar seriye agəra dukw ana ta gewa a kurum a.

²¹I dəba ŋa ya ka, gawla Mbulum ana ndzəɗa ŋa hinne ya, a daha, a zla batsah kur ana kamala bur melìgire ya, dìɗìm a yà a batsah duluv, dite a gwa: «Batsah kwite Babila tekeɗe, tì yè a ka, nda ndzəɗa kamala taŋa ya mbaŋa. Ziwiɗ wura a ta ŋgeter a asa tsidze. ²²Gà mburma ana i kwite kurum ata ti dzeyewa gandzavəl a, nda gà na tə làhawa dimis a, dite nda gà na ta vàtawa vagam, kige tsa, mezleliŋ a ka, tar riŋ asa tsa. Kamala taŋa ya, duwa ilik a ti ɗere a i təv kurum a asa tsidze. Ti ta ŋget a a gà ɓəzla malàmbàɗà gà duwa i təv kurum asa tsa mbaŋa. Wura a tserekere a gà melìgire ana a ɗewara i təv kurum ata ya asa tsidze. ²³Gà lalampa kurum tekeɗe, ti ti div a dzaydzay asa tsa mbaŋa, na i təv kurum a. Ti ti tsereke a Mewideye duwa huwwa biy gà na ti ndzek a gà daala ya, nda gà daala ana ti deye a a zal a asa tsidze, na i fataya. Aɗaba piŋŋe ka, gà ɓəzla metsèkèle ana i kwite kurum a, tə za dər gà asiŋ ŋa ana ika gər ahəɗ tserdze ya, nda limana. Dite kà banayawum mburma tserdze, ku mege i ŋga, nda gà dukw gà mèdè kurum ata nda pàrsa ya. Aɗaba taŋa na a nəs à kurum nda seriye ya.»

²⁴Mbulum a samata məmbəz gà ɓəzla məma à guma ŋgar nda biy gà mburma ŋgar ana tserdze a dza à bəɗ a ka, i kwite tar. Kamala taŋa ya, məmbəz gà na ta batsaya tar ika gər ahəɗ tserdze ya ka, ika gər tar.

¹I dəba ŋa ya ka, i tsarakara mifefile duwa a ɗera i mbulum a, a ɗe ka, kamala ana gà mburma hinne ta fèfil a ya. Ta gwa ka:

«Zàmbaɗakwa à Mbulum.

Ŋgat na a mbəl à kwa ya.

Mezlibe ana tì zlibe a dər a ka, hinne.

Ndzəɗa ŋgar ka, a za duwa tserdze.

²Ŋgat ka, mala ndzer ŋa,

a gewa seriye a mburma ka,

ndaka vatwa ŋa lele hiywe.

Aka gəs dəm ata muva ŋa ya, nda seriye,

aɗaba ana a nəs à mburma ika gər ahəɗ tserdze

nda mege dukw ŋgar ata ŋgwala tsiye ya.

A vəlar mesewere are ka,

agəra ana a bats gà ɓəzla meslire ŋgar,

a dza à məmbəz tar a bəɗ a.»

³I dəba ŋa ya ka, ta mà aaka asa, ta gwa:

«Zàmbaɗakwa à Mbulum,

agəra hədzək ana a tsilere a i kwite ata ya ka,

à ndìv a tsa, a tsil a aà mbulum ka,

kamala taŋa ya aà biybiy.»

⁴I dəba ŋa ya asa ka, gà bàba ŋa ata dzik səla gəra faɗ a, nda gà dukw ata faɗ nda gà mesife ya, tə dza gurmits a bəɗ aka miɗ Mbulum ana ŋgat mandza ŋa ika təv mendze Əbay ŋgar a. Tə zàmbaɗa à ŋgat, ta gwa: «Zàmbaɗakwa à Mbulum. *Amin.»

Mandə̀ɗà daala wele ana a ndzikiɗ ba Kəla Təmaŋ a, a bəra

⁵I fataya ka, mifefile ŋgiɗ duwa a ɗera i təv mendze Əbay ata ya. A gwa ka:

«Zlə̀bum à Mbulum BATSAH kwa ŋa,

kurum gà ɓəzla meslire ŋgar

nda gà na tə dzawar gurmits a bəɗ a tserdze,

ku mege kurum gà bàba ŋana, kige tsa,

kurum gà ɓəza ŋana tekeɗe ya.»

⁶Aləka ka, i tsarakara mifefile ŋgiɗ duwa ya, a ɗera asa ka, kamala ana gà mburma hinne ta fèfil a ya. A ɗera asa ka, kamala maazaw ana a dze a a bəɗ dzuruvva ika madzundzuruv a ya. Dite a ɗera asa ka, ŋgùzlar kamala malaka mbulum ana a lak nda ndzəɗa ya. Dukw ana i tsaraka ya ka, ta gwa:

«Zàmbaɗakwa à Mbulum BATSAH kwa ŋa,

aɗaba ndzəɗa fit dze ka, i ahər ŋgar.

Ŋgat na a kwere a duwa tserdze ya.

⁷Ŋgayakwa ba ndzəɗakkà, dite kà zlə̀bakwa à ŋgat,

aɗaba pat məpàslà ahər wele ata

a ndzikiɗ ba Kəla Təmaŋ a, aka sle.

A zle a daala kuɗa. Makasl ŋgar ata ka,

aka lə̀mbaɗa ba a bəɗ lele,

a riŋ ihər a veve a ŋgat.

⁸Tàa vəlar ŋgwal petek ana

aruwaŋ ihər tsa kìlèfìffe,

dite a də̀v tizlzlè asa ya.

A tike aka ba.»

Ŋgwal petek ata ka, kamala megweɗe ya, ŋgwal dukw ana gà mburma Mbulum ta ge a ya.

⁹I dəba ŋa ya asa ka, gawla Mbulum a gweɗiŋ: «Wetse aka wakita ka: Maŋgayaba ika gər gà mburma ana tàa zal a tar, ta gwaɗa a tar, dumara a megirive mandə̀ɗà daala Kəla Təmaŋ a bəra ya ya.» Dite gawla Mbulum ata a gweɗiŋ asa: «Bazlam aaha ka, ndzer, pàrsa iɗəm tsa. A dara ka, ika arah Mbulum a.» ¹⁰I tsaraka kataya ka, i dza gurmits a bəɗ aka miɗ ŋgar, i waya mazàmbàɗà à ŋgat. Ama a gweɗiŋ: «Ki ge kamala taŋa ya tsa. Aɗaba iye tekeɗe ka, mala mege megemir Mbulum taf masakəŋa, kamala kurum ana nda gà damər yak kà zazamum ndzer Yesuw ana a ɗif dər a ya. Seyiŋ tsa, zàmbaɗa ka, à Mbulum ivaɗ.»

Ndzer Yesuw ata a ɗif dər a, na a vile a ndzəɗa a gà ɓəzla məma à guma ŋgar a.

Wele ana a tsəl aka piris herrè ŋa ya

¹¹I dəba ŋa ya ka, i ŋgataha a gəza mbulum mahə̀ndə̀kà ŋa iɗəm a tùwaŋŋà. Dite piris herrè ŋa a riŋ mehìtsè ŋa iɗəm i fata dzèŋŋe. Wele duwa a riŋ mandza ŋa ikəka tùŋŋa, tə zalar «Mala ndzer ŋa, wele ana a gewa duwa ka, ndaka vatwa ŋa ya. » A ge a seriye a mburma, à gis a ka, ndaka vatwa ŋa mbaŋa. ¹²Are ŋgar ka, ndìzlzle kamala arah akwa ya. Felère i gər ŋgar, dite a ndìwìɗ gər nda lèrèwdze Əbay ŋgar digiɗìzze. Ta wetse zləm duwa aà ba ŋgar. Ama zləm ata ka, wura a sər tsa, say ŋgat ŋa à gər ŋgar ɗekɗek pəra na a sər a. ¹³Tùmbùlum ŋgar ka, gwizem gwizem məmbəz ihər hinne. Zləm ŋgar ana ti ɗer a ka, «Bazlam Mbulum. » ¹⁴Gà slàla gà sliwdze ana pampam i gər ŋa i mbulum a, na tə zazam ŋgat a. Tar gà mandzàyà ŋa ika gà piris ana tə ndza herrè ya. Gà petek ana ika tar a ka, gà ŋgwal ŋa lele herrè, aruwaŋ ihər tsa asa mbaŋa. ¹⁵Dukw ana a dere a i bazlam ŋgar a ka, màsalamà ana matasla ŋa, a zəm hapəpəpa ya. A kweteɓe a dər akaba ka, gà mburma ana ta gəs ahəm ŋgar tsiye tserdze. A ne a ka, Əbay ana a ta kwere a tar nda ndzəɗa ika gər tar a tserdze. A ta ɓile a aka ter a ka, mbiymbiy kamala manàhà dukw ana ti ɗwitsewara iɗəm yam ŋa ya. Kamala taŋa ya, a ti ɗif a à taŋa ka, à matsəɓatsəɓ Mbulum ana ŋgat mala makwàrà gər ahəɗ tserdze ya. ¹⁶Petek ŋgar ka, ta wetse ahər zləm ŋgar, nda gà aka gus ŋgar mbaŋa. Ta wetse ka: «Əbay ika gər gà Əbay tserdze, dite ŋgat asa ka, Batsah ŋana ika gər gà bàba ŋana ya.»

¹⁷I dəba ŋa ya ka, i ŋgataha a gawla Mbulum ŋgiɗ, a riŋ mehìtsè ŋa dzèŋŋe ika are pat. A fàfəl nda magala ŋgəlakəkka, a zalara a gà məmba ana ta beyewa ndaà gəza mbulum a tserdze. A gwaɗa a tar: «Dumara, kà yahum ba gər aka batsah megirive ana Mbulum a ge a ya. ¹⁸Dumara, kà zəmum məməta gà Əbay nda biy gà sliwdze, dite nda gà Əbay tar ŋana mbaŋa. Ka zəmum məməta gà piris nda biy gà na tə tsala aaka ya, dite nda məməta gà mburma ana tserdze ya asa mbaŋa, ku mege biy gà ɓele nda biy gà na ti ziwe a gər tar a, dite ku mege biy gà gawla nda gà na tar gà ɓəza ndirkiz mba tekeɗe ya.»

¹⁹I dəba ŋa ya, i ŋgataha a dukw dala ata tar nda gà Əbay gər ahəɗ, nda gà sliwdze tar, ti yahaba gər aà mege gùvəl aà gà wele ana mandza ŋa ika piris herrè ŋa ata ya, nda gà sliwdze ŋgar. ²⁰I təv ana tar ihər ta ge a gùvəl ata ya ka, gà wele ata nda gà sliwdze ŋgar a, ta gasa gà dukw dala ata nda wele ana a gwa aà ba ŋgar ka, waytsà iye mala məma à guma Mbulum, tsaatsa pàrsa ya fit. Aɗaba ŋgat na a geye gà dukw mene aà mburma ika miɗ dukw dala ata ya. Kamala taŋa ya, a banawa gà na lambà dukw dala ata aà ba tar, dite bəla ku mege gà na tə dzawa gurmits a bəɗ a mendzikiɗe ba ŋgar a ya. Gà wele ata nda gà sliwdze ŋgar a, ta gasa gà dukw dala ata nda mala məma à guma ŋgar a ka, tə dza à tar a magər akwa kamala a duluv a, nda are kataya. Ama akwa ata ka, ar ka, kamala dukw ana a wene a wàfùfùffa ya. ²¹Ama gà sliwdze dukw dala ata ka, mala piris aaha ndeɗiŋa ya, a batsaya tar fit nda màsalamà ana a dere a i bazlam ŋgar a ya.*fa* Dite gà məmba tserdze tə dara, ti yahaba gər, tə zəm gà məməta tar ata fit ka, a sleye a tar huɗ zìhhwe zìhhwe.

Bazlam aka gər mive dəbuw

¹I dəba ŋa ya ka, i ŋgataha a gawla Mbulum ŋgiɗ, a tarra i gər ŋa i mbulum a. Na i ahər ŋgar ka, lèkilè duwa a riŋ ihər biy mahə̀ndə̀kà dər i biye ana kwitsikw hinne ya. Dite batsah tsitsirɓe ana zùbəl ŋa hinne ya, i ahər ŋgar mbaŋa asa. ²A daha, a gəs *kə̀rəm ata, kamala megweɗe ya ka, mesiwiɗ ana akahər ata piŋŋe ya. Ŋgat ka, Əbay sitene, zləm ŋgar ka, *Sadan. I dəba ŋa ya, hə̀ndə̀sl a dàn dər ŋgat. A ndza i medènè mive dəbuw. ³Aləka gawla Mbulum ata kùtsùkw a yà dər akaba ŋgat a biye ana zùbəl ŋa kwitsikw a. A hə̀ndə̀k ahəraha aɗəm a fata nda lèkilè. A dza aaka atwa, dite na i huɗ mive ata dəbuw a ka, a sle a aà məbànà gà mburma ana ika gər ahəɗ a asa tsiye. Aləka mive dəbuw ŋa ata a da iɗəm a ka, ti ta pìlere a iɗəm à ŋgat a. Ama a ndze a aà bəra ka, hinne asa tsa, zaakwa pəra.

⁴I dəba ŋa ya asa ka, i ŋgataha a gà təv mendze gà Əbay. Gà mburma a riŋ mandza ŋa ikəka. Mbulum a vəl a tar ndzəɗa aà mege seriye a gà mburma ŋgiɗ. Dite ka, i ŋgataha a gà mezite gà mburma ana tə sasaya ika tar gər a ya mbaŋa. Tə sasaya ika tar a ka, aɗaba ana ti tsikewa parakkà, Yesuw ka, BATSAH kwa ŋa, dite agəra ana ti ɗifewa à bazlam Mbulum a mburma ya asa mbaŋa. Aɗaba tar ka, tàa dza gurmits a bəɗ a dukw dala ata, kige tsa, a mendzikiɗe ba ŋgar ŋa tsidze. Dite tàa gəs lambà ŋgar aà mege aka yemere tar, ku mege aà ahər tar ɓav tsidze. I ŋgat a tar ka, tar riŋ nda mesife. Tar nda gà Yesuw ka, gà Əbay, ta kwere a mive dəbuw. ⁵Taŋa na a ne ka, gà malahalah ŋana ta mbalara i məməta ya ya. Ama gà asiŋ gà mburma ŋgiɗ ka, tàa mbalara i məməta ya zukw tsa, say mive dəbuw ŋa ata à ndìv a iɗəm a dzekwiŋ. ⁶Kamala taŋa ya ka, maŋgayaba a ta ge a i təv gà mburma ana tàa lah aà məmbə̀lara i məməta ya ya. Mbulum a pise a ter a ahəm. Tar ka, mesife tar a dzeye a asa tsidze. Ti ti ne a ka, gà ɓəzla mandəva kuɗa ika miɗ gà Mbulum nda Yesuw Kiristi. Tar nda gà Yesuw Kiristi ka, ti ta kwere a i huɗ mive dəbuw a.

Mbulum aka mba aà Əbay sitene

⁷Na tàa dàn Əbay sitene a daŋgay, aka ndza iɗəm mive dəbuw ka, i dəba ŋa ya, ti ta pìlere a iɗəm à ŋgat a. ⁸Aləka aka ta medera iɗəm a ka, a de a, a bene a gà mburma ana ika gər ahəɗ tserdze ya asa. Gà ahəɗ ata ka, tə zal a tar gà Gakw, nda Magakw. Dite Əbay sitene ata ka, a ti zeleye a ter a tserdze, ti yehebe a gər a təv ilik ŋa, na dite ka, ti de a, ti ta ge a gùvəl aà Mbulum a. Tar ka, twìɗèkìkke hinne, kamala hewiyeŋ ana i dula ya. ⁹I ŋgat a tar ka, tàa hadzalaya ba, aà mede ku mege i ŋga ya, ara ika gər ahəɗ a tserdze. Tə daha, tə lawaraya gà təv mendze gà mburma Mbulum, nda kwite ana Mbulum a waya hinne ya. Ama tə lawara tar tits ka, akwa a tar aka tarra i mbulum a, birɗek a wanaya tar fit. ¹⁰Dite i dəba ŋa ya ka, Əbay sitene, wele ana a banaya tar a ka, ta gəs, kùtsùkw ti yà ŋgat a akwa ana kamala duluv a. Akwa ata a wene a ka, wàfùfùffa. I fataya ka, tàa mbər mandza aɗəm à gà dukw dala nda mala məma à guma ŋgar ata nda pàrsa ya. Tì sèwèr a are i fata, ku mege ndaàpat, ku mege ndaàvəɗ hiywe aà biybiy.

Mandəvandəv seriye Mbulum ana a ta ge a ya

¹¹I dəba ŋa ya ka, i ŋgataha a təv mendze Əbay duwa, a ndza herrè. Wele duwa a riŋ mandza ŋa ikəka. Gà gər ahəɗ nda gəza mbulum ta ge magəɗa kwàrkwàr hinne, silit tə tə̀z ihər a, dite ka, wura a ta ŋget a ter a ziwiɗ asa tsidze. ¹²I fataya asa ka, i ŋgataha a gà məməta tserdze asa mbaŋa, ku mege gà bàba ŋana nda gà ɓəza ŋana tekeɗe ya. Tar gà mehìtsèyè ŋa ika miɗ təv mendze Əbay ata. I dəba ŋa ya asa ka, mìsle ŋgiɗ a handaka ikaba gà wakita ya. Ta wetse aɗəm ka, dukw ana gà mburma ta geye ya, dite ka, ta hə̀ndə̀k ikaba wakita ŋgiɗ a asa mbaŋa. Ama i huɗ wakita ŋgiɗ ata ka, ta wetse aɗəm zləm gà mburma ana tàa ŋgat mesife ya. Ta handaka ikaba wakita ata ya ka, Mbulum a ge seriye a gà mburma ata ta mata ya. A sàs a tar ikaba seriye ŋa ya ka, kalkal dukw megemir tar ana ta geye ya. Dukw ata ka, a riŋ mewetse ŋa i huɗ wakita ata dukw ŋgar. ¹³Ku mege gà mburma ana ta mataya i batsah duluv a tekeɗe ka, yam ata à mère a à tar a. Gà məməta ana i biye i təv mendze gà məməta ya tekeɗe ka, tə dayara iɗəm a mbaŋa. Mbulum a geye a tar seriye tserdze, kalkal kamala biy megemir tar ana ta ge ya. ¹⁴I dəba ŋa ya ka, tə dza à gà dukw ana ta bets a mburma ya, nda gà təv mendze gà məməta ana ti ndze a iɗəm a, a akwa ata kamala duluv a. Akwa ata ka, təv məməta gà mburma ana ti ta mete a masula ŋa ya. ¹⁵Ku mege weke, na zləm ŋgar mewetse ŋa i huɗ wakita gà mburma ata tàa ŋgat mesife ya tsəka, tì yè a ŋgat a akwa ata kamala duluv a mbaŋa.

Awiya gəza mbulum nda gər ahəɗ ana awiya ŋa ya

¹I dəba ŋa ya asa ka, i ŋgataha a gà gəza mbulum awiya ŋana nda gər ahəɗ ana awiya ŋa ya. Ama gà gəza mbulum malahalah ŋana, nda gər ahəɗ malahalah ŋana ka, tar riŋ asa tsa, tàa dzeye. Dite batsah duluv tekeɗe, a riŋ asa tsa, aka dzeye mbaŋa. ²I fataya ka, i ŋgataha a kwite ana tsəɗaŋŋa ya. Ama kwite ata ka, Yeruzalem awiya ŋa ana a tarra i gər ŋa i mbulum a ya. Mbulum a lə̀mbaɗa ka, lele, a tsahən ndzer. Ar ka, kamala daala ana a lə̀mbaɗa ba ŋgar tsèɓtsèɓ lele, a waya a de a a zal a. ³I dəba ŋa ya asa ka, i tsarakara mifefile duwa, a ɗera ika təv mendze Əbay ata ya. Ta fàfəl nda magala ŋgəlakəkka, ta gwa: «Araha, Mbulum aka lə̀mbaɗa təv mendze ŋgar ika magər gà mburma ka, dite ti ndze a nda gà tar. I dəba ŋa ya, ti ne a gà mburma ŋgar mbaŋa. Ŋgat à gər ŋgar na a ne Mbulum tar a. ⁴A ta bere a aà tar tuwa à are tar a tserdze. Ti ta mete a asa tsa, dite gà dukw ana à tsìɓ a ter a ya ka, a riŋ asa tsa mbaŋa. Ti tiwe a asa tsa, dite duwa ilik a ta wir aà ter a asa tsidze. Gà dukw ana gà miviye ŋa ya tserdze ka, ti ta ge a riŋ asa tsa.»

⁵I dəba ŋa ya ka, wele ana mandza ŋa ika təv mendze Əbay ata ya, a gwa: «Tsarakum, araha i ta geye a gà duwa tserdze ka, gà awiya ŋa.» I dəba ŋa ya asa ka, a gweɗiŋ: «Wetse taŋa fit aka wakita, aɗaba bazlam aaha ka, ndzer, pàrsa iɗəm tsa.» ⁶A gweɗiŋ asa: «Gà bazlam ata tserdze ya ka, aka ge ba, aka ndəv. Iye na i lah aà megeye gà duwa tserdze ya. Iye riŋ daga aka na gà duwa tserdze tar riŋ zukw tsiye, dite ka, iye na i ti ndìv a à gà duwa tserdze ya asa mbaŋa. Ku mege weke, na bəla yam aka kəɗ ŋgat ka, ma dara, i viler a biy taf, a siŋa. Yam ata a dere a ka, i biye yam ana a vile a mesife a mburma ya. ⁷Wur ana aka mba aà dukw bakal gər ahəɗ a ka, a ŋget a gà dukw ata. Iye i ti ne a Mbulum Tsir ŋgar, dite ŋgat tekeɗe, a ti ne a kəla gà mbaŋa. ⁸Ama gà na ta ge a magəɗa ya, nda gà na ta gəs bazlam Mbulum nda ndzer tsiye, dite nda gà na gəzləŋ tar manəsa ŋa ya, gà ɓəzla məbatsa mburma nda gà ɓəzla megeye muva, nda gà mèdè, kige tsa, gà na tə zàmbaɗawa à gà fəla tar a, nda gà ɓəzla pàrsa, gà tar ata tserdze ya ka, tì dzèwe a ter a a akwa ana kamala duluv a, a wene a wàfùfùffa ya. I fata kuɗa, na məməta masula ŋa ya.»

Bazlam aka gər Yeruzalem awiya ŋana

⁹I dəba ŋa ya, mìsle ŋgiɗ ilik i liwiŋ gà gawla Mbulum ata təsəla, gà tasà aà tar i ahər, maràhàyà ŋa nda gà mandəvandəv mesewere are iɗəm təsəla akahər ata ya, a dara a təv ga ya. A dara ka, a gweɗiŋ: «Dara, i ɗifek a à daala ana Kəla Təmaŋ a zle a ya.» ¹⁰I fataya tsara ka, Mezite Mesife Mbulum a dara aka gər gà ya, dite gawla Mbulum ata a da à iye a gər kwite batsah ŋa ana zùbəl ŋa saləllà hinne ya. Mi daha ka, a ɗifiŋ à Yeruzalem ana tsəɗaŋŋa, a tarra i gər ŋa i mbulum a ya. ¹¹Kwite ata ka, a də̀v twiytwiy kamala kur ana tsakala ŋa hinne, à sìkim a ba tsiye. A wìtiɗe a ka, kamala kwataramà ya, nda gà kamala kur ana tə zalar *yaspa ya mbaŋa asa. Ndzəɗa ana tì zlibe a dər à Mbulum a, na a riŋ a wìtiɗ a i fataya. ¹²Ama kwite ata ka, malàwàrà ŋa tits nda zlagam. Zlagam ata ka, dàbàsa ŋa dəbazəzza, dite zùbəl ŋa kwitsikw asa mbaŋa. Gà biye hərmaga ihər ka, kurwa gəra sula. Gà gawla Mbulum kurwa gəra sula, tar gà mehìtsè ŋa ika biye hərmaga ata, tar riŋ ta kesliŋa. Dukw mahə̀ndə̀kà biye hərmaga ata ka, ta wetse ahər zləm gà slàla Isərayel ana pampam kurwa gər sula ya. ¹³Kwite ata ka, gwezleviyek tsèke faɗ. I huɗ gà təv ata faɗ a ka, biye hərmaga ihər makər makər: Makər ndaka tsèke pat ana a mbəzawara ya, makər ndaka tsèke pat ana à dìɗ a ya, dite makər ndaka tsèke gular, makər ŋa aaha ndaka tsèke yam asa mbaŋa. ¹⁴Zlagam ata ka, madzàha ŋa nda gà kur kurwa gəra sula. Ta wetse ahər zləm gà ɓəzla meslire Mbulum ana kurwa gəra sula ya mbaŋa. Tar ka, gà ɓəzla mazazama Kəla Təmaŋ ata. Taŋa gà kur ata tserdze ya ka, zləm gà mburma ata ikəka ilik ilik tserdze.

¹⁵Gawla Mbulum ata a fèfiliŋ a ka, zəva duwa a riŋ ihər məvəɗa ŋa nda gura i ahər ŋgar. Zəva ata ka, dukw melìvè duwa. A daha ka, a live dər gà kwite ata nda biye hərmaga ŋa, nda zlagam ŋa ana a lawara kwite ata tits a. ¹⁶Kwite ata ka, ar tsèke faɗ, dite a geye akaba kalkal asa mbaŋa. Gawla Mbulum a live kwite ata nda zəva ŋgar ata. A live ka, ar maya simir ide ide dəbuw kurwa gəra sula tsèke faɗ. Dite zùbəl ŋana tekeɗe, kalkal kamala taŋa ya mbaŋa. ¹⁷I dəba ŋa ya ka, gawla Mbulum ata a daha, a live zlagam ata. Zùbəl ŋana ka, zùbəl tsegwilek dərməka nda dzik faɗ gəra faɗ. A live dukw ata ka, kalkal kamala ana gà mburma ti liveyewa duwa ya. ¹⁸Tə zlàzl zlagam ata ka, nda kur ana tə zalar yaspa ya. Kwite ata ka, tə zlàzl nda gura ana tsakala ŋa hinne ya. A wìtiɗ a ka, kamala kwataramà ya. ¹⁹Tə làmbaɗa zlagam ata ka, nda gà medzibe gà kur ana pampam, a tsahən hinne ya. Gà malahalah gà kur ana tə dza dərraha zlagam ata ya ka, biy ŋgiɗ tə zalar yaspa. Masula ŋana ka, tə zalar *safira. Məmakər ŋana asa ka, tə zalar *kaldedun. Dite məfaɗ ŋana ka, tə zalar *imiradi. ²⁰Mìizlam ŋana ka, tə zalar *sardunik. Mendilik ŋana tə zalar *sardis. Matəsəla ŋana ka, tə zalar *kirisulit. Matsamakər ŋana ka, tə zalar *beril. Metswiɗ ŋana ka, tə zalar *tupas. Makurwa ŋana tekeɗe, tə zalar *kirisuparus. Makurwa gəra ilik ŋana ka, tə zalar *hiyesin. Dite makurwa gəra sula ŋana ka, *amistus. ²¹Kamala taŋa ya, gà biye hərmaga ana ihər a ka, kurwa gəra sula. Kəla dukw mahə̀ndə̀kà aɗəm ŋa ka, malàmbàɗà ŋa nda kur ana tə zalar perile ya. Ama gà bàrama ana i huɗ kwite ata ya ka, tə làmbaɗa nda gura ana tsakala ŋa hinne, à wìtiɗe a twiytwiy kamala kwataramà ya.

²²Ama kəla ka, Yàa ŋgataha a ga Mbulum a huɗ kwite ata tsa, aɗaba gà Mbulum BATSAH kwa ŋana a za duwa tserdze ya, nda wele ana a ndzikiɗ ba Kəla Təmaŋ a, tar riŋ i fata. Təv ata na a ne təv meheme ya. ²³I samata ka, gà kiye nda pat riŋ tì div a i kwite ata asa tsa. Medìve tar ka, a ge a ŋgulum asa tsa, aɗaba ndzəɗa ana tì zlibe a dər à Mbulum a, na à div a i fataya. Dite Kəla Təmaŋ ata, na a ne lalampa i kwite ata ya mbaŋa. ²⁴Kamala taŋa ya, gà mburma ana i gà slàla pampam ika gər ahəɗ tserdze ya, ti ti sìweye a i təv dzaydzay ŋa ata i kwite ata ya. Dite gà Əbay gər ahəɗ ti ndzekehe aɗəm a gà limana tar, ta vile a a Mbulum. ²⁵Gà dukw mahə̀ndə̀kà biye hərmaga ata ka, ti ti ndze a tùwaŋŋà, mahə̀ndə̀kà ŋa iɗəm a wurwas kataya. Ku mege ndeɗime tekeɗe, ta hìndìk aɗəm a tsa, aɗaba i fata ka, həvəɗ a riŋ a ta ge a asa tsidze. ²⁶Gà mburma ti ti ndzekehe aɗəm a gà ndzəɗa ŋgwal gà dukw tar ana ika gər ahəɗ a tserdze. Ti de a dərraha a fata, aà mazàmbàɗà dər a Mbulum. ²⁷Ama gà dukw ana gà ŋgwal ŋa tsa tserdze ya ka, ti ti de aɗəm a tsa. Gà na gà gəzləŋ tar gà manəsa ŋa ya, nda gà ɓəzla pàrsa ka, vatwa tar a riŋ aà mada aɗəm tsidze. Na a de aɗəm a ka, say gà mburma ana ta ŋgat mesife, ta wetse zləm tar a wakita Kəla Təmaŋ a.

¹Aləka i dəba ŋa ya ka, gawla Mbulum ata a ɗifiŋ à dula duwa a riŋ i fata mbaŋa. Aɗaba yam ana i dula ata ya ka, a vile a mesife a mburma. A də̀v ka, twiytwiy hinne. A dara ka, ika təv mendze gà Mbulum nda Kəla Təmaŋ a. ²A zlele a ka, mbàwwa ndaka magər bàrama ana i huɗ kwite ata ya. Na aà gùva yam ata ka, dizl ɗaf duwa a riŋ na a vile a mesife a mburma ya. Ar ka, tsèke sula, ndaka tsèke ahər mezime, dite naha ndaka tsèke ahər gùla asa mbaŋa. A we a ka, medzige kurwa gəra sula, na i huɗ mive ilik a ya. Kəla kiye a we a sik ilik. Slàmbah ŋana ka, a mbele a à gà slàla gà mburma ana ika gər ahəɗ pampam a tserdze. ³Gà dukw ana Mbulum a vəl a tar mezelme tserdze ya ka, ti de a a kwite ata tsidze.

Təv mendze ana i fataya ka, i gà Mbulum, nda Kəla Təmaŋ. Dite gà na ti zezem a ŋgat a ka, ti ti dzer a gurmits a bəɗ. ⁴Tar ka, ti ta ŋget a a are ŋgar. Dite ka, ti ta wetse a zləm ŋgar aka yemere tar. ⁵Həvəɗ ka, a ta ge a i fata asa tsa. Aɗaba gà pat nda lalampa ka, ti ta ge a ŋgulum asa tsa. Mbulum BATSAH kwa ŋa à gər ŋgar na à div a ka, a vile a ter a dzaydzay a. Dite tar ka, ti ta ge a Əbay aà biybiy.

Yesuw a riŋ a deriŋa

⁶I dəba ŋa ya ka, gawla Mbulum a gweɗiŋ: «Gà bazlam aaha ka, gà ndzer ŋa, pàrsa iɗəm tsa. Mbulum BATSAH kwa ŋa, mala məvəla Mezite Mesife ŋgar a gà ɓəzla məma à guma ŋgar na a slərra gawla ŋgar a, dite ka, a ɗif à dukw ana a ta ge a ba bise ya, a gà ɓəzla meslire ŋgar.»

⁷Yesuw a gwa: «Tsarakum, dzum zləm lele. Iye ka, Yàa à mimèra bise. Maŋgayaba ika gər gà na ta gis a ahəm aà gà bazlam ana i huɗ wakita aaha ya, aɗaba Mbulum na a ɗif dər a.»

⁸Iye Yuhana na i tsaraka gà dukw ata tserdze ya, nda zləm gà, dite i ŋgatar nda are gà asa mbaŋa ya. Aləka i tsaraka, i ŋgat a gà dukw ata tserdze ya ka, i dza gurmits a bəɗ aka miɗ gawla Mbulum ata a ɗifiŋ dər a, i waya mazàmbàɗà à ŋgat. ⁹Ama ka, aka viliŋ vatwa tsa. A gweɗiŋ asa: «Iye tekeɗe ka, mala meslire Mbulum, kamala kurum ana nda gà damər yak kà màwum à guma ŋgar, kə̀ gə̀sawum ahəm aà gà bazlam ana i huɗ wakita aaha tserdze ya mbaŋa. Ama seyiŋ tsa, zàmbaɗa ka, à Mbulum ivaɗ.» ¹⁰I dəba ŋa ya ka, Yesuw a gweɗiŋ asa: «Ka ta kaha gà bazlam ata Mbulum a ɗifek dər, kər ihər ki wetse a a huɗ wakita ya tsa, ɗif dər a mburma. Aɗaba gà dukw ata ti ta ge a ba ka, bise. ¹¹Iye ihər i gweɗe a a gà mburma ana ta gewa dukw ana ŋgwala tsiye: Na a sàs a kurum megeye bakal ka, dum a ba dər aka miɗ aka miɗ dukw kurum. A kurum gà na gà gəzləŋ kurum manəsa ŋa, aruwaŋ iɗəm a ka, na a sàs a kurum ki ndzwim a kataya ka, dum dər aka miɗ aka miɗ, aruwaŋ kurum ata ma ndza aà kurum pəra. Ama wele ana ŋgwal ŋa, a tsahən aà Mbulum a ka, ma da aka miɗ aka miɗ nda mege dukw ana ŋgwal ŋa ya. Dite wele ana ŋgat tsəɗaŋŋa ika miɗ Mbulum a tekeɗe ka, ma da aka miɗ aka miɗ nda mazazama kamala taŋa ya mbaŋa.»

¹²I dəba ŋa ya, Yesuw a gwa asa: «Gwim metsehe lele. Yàa à mimèra bise. I ta mère a ka, nda gà dukw mayaba gà mburma i ahər gà, i ta pìl a dər, ku mege weke a ŋget a kalkal kamala megemir ŋgar ana a gewa ya dukw ŋgar. ¹³Aɗaba iye na i lah aà megeye gà duwa tserdze ya. Iye riŋ daga aka ana gà duwa tserdze tar riŋ zukw tsiye. Iye na malahalah ŋa ika gər gà duwa tserdze ya, dite ka, iye na i ti ndìv a à gà dukw ata tserdze ya asa mbaŋa.»

¹⁴Kamala taŋa ya, maŋgayaba a ta ge a i təv gà na ta bereye a aà gà petek tar a tsəɗaŋŋa lele ya. Tar na ti ta ŋget a vatwa, aà mada a ŋgwal kwite ata ya. Dite tar asa na ti ta ŋget a vatwa aà mazəma mawà dizl ɗaf ata a vile a mesife a mburma ya mbaŋa. ¹⁵Ama gà na tar ti ne kamala gà kəra ya, nda gà ɓəzla mèdè, nda gà na ta gewa muva ya, kige tsa, gà na ta batsawa mburma ya, nda gà na tə dzawa gurmits a bəɗ ka, a fəla tar a, nda gà ɓəzla pàrsa ana ta waya masàsà pàrsa ya ka, bàlaarì tar ti ndze a ka, i bəra, ti de a a ŋgwal kwite ata tsidze.

¹⁶«Iye Yesuw na i slər a kurumara gawla Mbulum gà ya, na dite a ɗif a kurum à dukw ata, a kurum gà mburma Mbulum ana mayahaba gər ŋa i təv ilik ŋa, ku mege i ŋga tserdze ya. Iye ka, wele ana kà vavawum ɗa ŋgat daga piŋŋe ya. I dara ka, i gwala Dawda a. Dite iye asa ka, *mawusawus madə̀và mbulum ana a də̀v parakkà lele ya.»

¹⁷I fataya ka, gà Mezite Mesife Mbulum nda makasl Kəla Təmaŋ ata ta gweɗe a: «Dara.»

Ku mege weke na aka tsaraka taŋa ka, ta gweɗere a: «Dara.»

Wele ana yam aka kəɗ ŋgat a ka, ma dara. Dite wele ana a waya yam ana a vile a mesife a mburma ya ka, ma dara, ta viler a biy taf, ti niwer a dər tsa.

Mandəvandəv mifefile

¹⁸Iye Yuhana, i be a à ɗaf a gà mburma ana ti tsereke a gà bazlam ana i huɗ wakita aaha, Mbulum a ɗif a tar dər a tserdze. Wur ana à sìkèh a dər aaka ya ka, Mbulum tekeɗe, a ti sikehe a à mesewere are ana ti ɗif dər i huɗ wakita aaha ya mbaŋa. ¹⁹Dite wele ana à nikiɗ a dər ihər a ya mbaŋa ka, Mbulum tekeɗe, a ti dzik a ihər mawà dizl ɗaf ata a vile a mesife a mburma ya, nda gà təv mendze ana i huɗ kwite ata tsəɗaŋŋa, ti ɗif dər i huɗ wakita aaha ya mbaŋa asa.

²⁰Ama iye, wele ana i ɗif à gà dukw aaha ndzer, pàrsa iɗəm tsiye, iye riŋ ihər i gweɗe a kurum a ka: «Iye riŋ aà vatwa, i dere a ka, bise.»

Kwa gà mburma Mbulum tserdze ka, gwaɗakwar: «Haya, dara, Yesuw Batsah mər ŋa.»

²¹Ŋgwal ana Yesuw BATSAH kwa ŋa a ge a kwa ya ka, ma ndza i təv kurum gà mburma ŋgar tserdze aà biybiy.