FILIPIYA

Wakita ana Pul a wetseha

a gà mburma Mbulum ana

i FILIPIYA ya

¹Na a wetse wakita aaha ka, iye Pul, mər nda Timute ana mər gà ɓəzla meslire Yesuw Kiristi ya. Mì wetseha ka, a kurum gà mburma Mbulum ana i Filipiya, kurum riŋ mandza ŋa i təv ilik ŋa nda gà Yesuw Kiristi ya. Mì wetseha ka, a gà bàba ŋa ana ika magər kurum a, dite a gà ɓəzla mazlàkà kurum gà mburma Mbulum tserdze mbaŋa. ²Gà Mbulum Tsir kwa nda Yesuw Kiristi Batsah kwa ŋana ta pise a kurum ahəm, ta vəl a kurum matasla yam a gəzləŋ zayya lele.

Pul a hama a Mbulum aɗaba gà ɓəzla magəsa Yesuw ana

i Filipiya ya

³Ku mege ndeɗime tekeɗe, na kàa mwimiŋera a gər a ka, i hamawa a Mbulum aɗaba kurum. I gewar kəkaaha kəla pat. ⁴Meheme ata i hamawa aɗaba kurum a ka, nda gà maŋgayaba hinne. ⁵I gewar kəkaaha ka, aɗaba kàa gewakwa ba, kà zlàkawum iye aà megemir metsìkè bazlam ŋgwal ŋana, aà gər pat ana malahalah ŋa, kà nwim gà mburma Mbulum a, haa kinehe ya. ⁶I sər ndzer, Mbulum ana a dza ba aà megemir ŋgwal ŋa ata i gəzləŋ kurum a ka, a miyek a dər ŋgwìɗik kataya tsa. A ndìv a dər ka, haa a pat ana Yesuw Kiristi à mère a ya. ⁷Ŋgwal ŋa lele na iye ihər i dzele a kamala taŋa ya, dite i ndze a ka, ndzəɗakkà na agəra kurum a. Aɗaba kà dwimiŋ gər lele. Aɗaba kurum nda gà iye tserdze ka, Mbulum aka ge a kwa ŋgwal ŋa, na dite ki zlèkwim a iye ana gədzə̀zlzla mandza ŋa i daŋgay a, dite i təv ana i tsikewa ŋgwal bazlam ana biy Yesuw Kiristi ika miɗ seriye, i ɗif a à ndzer ŋana ya mbaŋa. ⁸Mbulum ka, a sər meme na i waya kurum hinne ya. Meweye ata i waya kurum a, a dara ka, i təv Yesuw Kiristi ya.

⁹I hamawa a Mbulum aɗaba kurum ka, dite mawàyà ba ana ki weywim a ba ika magər kurum ilik ilik tserdze ya, mà səkah aaka aka miɗ aka miɗ. Kamala taŋa ya ka, ki sirwim a ndzer ŋa lele, dite ki slwim a aà masəra ikaba à gà dukw ana naha ka, a da ndaka vatwa Mbulum, kige tsa, naha ka, a da dər tsiye. ¹⁰Kamala taŋa ya, ki pelwim a ikaba gà dukw ana ŋgwal ŋa ti de a ndaka vatwa Mbulum a, dite a pat ana Yesuw Kiristi à mère a, a ge a seriye ya ka, ki ndzwim a tsəɗaŋŋa lele, bakal i təv kurum tsa. ¹¹Ki nwim a gà ɓəzla mege dukw ana ŋgwal ŋa ya. Ki gwim a kəla pat, dite mede kurum à pèt aba a ka, ŋgwal ŋa lele, nda ndzəɗa Yesuw Kiristi. Gà na tàa samata kataya ya ka, tì zèmbeɗe a à Mbulum, tì zlibe a à ŋgat lele.

Yesuw na a za dukw tserdze ya

¹²A kurum gà damər gà, a sèsiŋ ka, sərum dər aà labara ana a le aà iye i faha ya. Megìse aaha ta gəs iye ya, a zlak ka, ŋgwal bazlam aaha biy Yesuw Kiristi ya ivaɗ, na dite ka, a de a aka miɗ aka miɗ, a ɗe a zləm a. ¹³Gà sliwdze ana ta kesle a ga Əbay a, nda gà asiŋ gà mburma ana ɗa i faha tserdze ya, tə sər kinehe, iye riŋ i daŋgay gədzə̀zlzla ka, agəra ana i ge a meslire Yesuw Kiristi ya. ¹⁴Aɗaba megìse aaha ta gəs iye a daŋgay a tekeɗe ka, a vəl ndzəɗa a gà damər kwa ana i liwiŋ gà mburma Mbulum a bagwal ŋa ɓəŋɓəŋ lele, a səkah a tar à megìse ana ta gəs BATSAH kwa ŋa ya. Magəɗa a ge a ter a asa tsa, ti tsik a bazlam Mbulum a mburma ka, parakkà, tə səkah dər ivaɗ.

¹⁵Ama kəla ka, gà asiŋ ŋa ika magər tar ti tsik a bazlam Yesuw Kiristi ŋgwìriŋŋà, ta ge a are ka, aka iye. Kige tsa a sàs a tar ka, mayaha aà iye ahəm. Ama gà asiŋ gà biy ŋgiɗ ti tsik a bazlam Mbulum ka, nda gəzləŋ ilik. ¹⁶Ta ge dər kataya ka, aɗaba ana ta waya iye, tə sər, Mbulum a slər iye a faha ka, dite i tsik a ŋgwal bazlam ana biy Yesuw Kiristi ya, a mburma, i ɗif a ter a à ndzer ŋana ya. ¹⁷Gà asiŋ ŋa ata ka, ti tsik a bazlam Yesuw Kiristi mbaŋa kaɗəŋ. Ama kəla ka, ta waya masəkaha à ba tar ɗekɗek. Ti tsik a ka, nda gəzləŋ ilik ndzer kaɗəŋ tsa. A sàs a tar ka, mesìkèhiŋ à mesewere are gà ana ɗa i daŋgay i faha ya.

¹⁸Ama taŋa ka, a wur aà iye tsa. Ku mege ti tsik a nda gəzləŋ ilik tsa, kige tsa bəla ti tsik a nda ndzer tekeɗe ya, ti ɗif a ka, à bazlam Yesuw Kiristi. Iye ka, i ŋgeye a ba agəra taŋa. Kaɗəŋ i ŋgeye a ba aka miɗ aka miɗ kamala taŋa ya. ¹⁹Aɗaba i sər, mendze gà ana i faha ya ka, duwa tserdze a ge a ba lele na i təv ga ya. Mbulum a mbil a à iye i mesewere are ya, aɗaba ana kurum riŋ ihər ki hemwimer a aɗaba iye ya, dite ka, Mezite Mesife Yesuw Kiristi à zlèk a iye mbaŋa.*fa* ²⁰Dukw ana i waya hinne, i tike aaka madzala gà gər gà ya ka, i ta ge a dukw ana dite ka, tuɗum tuɗum a ndeɗe a aka iye hwarwa ya ilik tsidze. Ama ka, gəzləŋ ga ma ndza ɓəŋɓəŋ lele. A sèsiŋ ka, mege kinehe, kige tsa bəla ndeɗime tekeɗe ka, gà mburma tə̀ zləbawa à Yesuw Kiristi aɗaba iye. Na iye riŋ mandza ŋa nda are ya, ku mege Yàa mət tekeɗe ka, tə̀ zlə̀b à ŋgat pəra kamala taŋa ya. ²¹Aɗaba kinehe iye riŋ mandza ŋa nda are ka, Kiristi a ne mesife gà, a za dər gà duwa tserdze. I təv ana Yàa mət tekeɗe ka, a giŋ a ŋgulum asa, i ŋget a nuba. ²²Ama kə̀la ka, na iye riŋ mandza ŋa nda are mba ka, i ge a megemir ana à zlèk a mburma ya. Kamala taŋa ya, a giŋ gərəŋ gərəŋ na i liwiŋ gà bazlam ata sula ya. I zle a iɗəm ana, awara ya ka, i sər tsa. ²³Kə̀zət gà dukw ata sula ya, ta ŋgil a aba à iye. Ama a sèsiŋ kə̀la asa mbaŋa ka, ŋgulum na i mìt a ya, dite mìi ndze a i təv ilik ŋa nda Yesuw Kiristi ya. Aɗaba taŋa ka, ŋgwal ŋa hinne, a za dər mendze ana i ndze a ɗa ika gər ahəɗ kinehe ya. ²⁴I zleŋe a mbaŋa, na mendze gà ana i ndze a nda are kinehe ya, a ge a ŋgulum hinne asa na aɗaba kurum a. ²⁵I samata, ŋgwal ŋa ka, taŋa. Aɗaba taŋa na dukw ana i sər ndzer, i ndze a aà bəra mba ya. Ki ti ndzekwe a i təv ilik ŋa nda gà kurum tserdze, na dite i zlèk a kurum ika vatwa Mbulum, ki sìkèhwim a aka miɗ aka miɗ i təv megìse kurum a, dite ki ta ŋgeywim a ba mbaŋa asa ya. ²⁶kamala taŋa ya, na tàa pəl à iye i daŋgay a ka, i ti ndzehe a a təv kurum, aà məfə̀rà aka kurum a fata asa. Dite ka, ki ŋgeywim a ba, ki zèmbeɗwim a à Yesuw Kiristi hinne aɗaba iye.

Mesewere are aɗaba Yesuw Kiristi

²⁷Ama duwa ilik ma ta məts a kurum gər tsa kəla. Mede kurum ma ge ka, ŋgwal ŋa, kamala bazlam ŋgwal ŋa ana Yesuw Kiristi a ɗif dər a. A sèsiŋ ka, ku mege Yàa ŋgat vatwa aà madaha a təv kurum, kige tsa bəla Yàa ŋgat tsa tekeɗe ka, i tserekere a mendze kurum ana ki ndzwim a ndìɓèkke, kurum masəra ba ŋa ŋgwal ŋa lele, metsehe kurum ilik a. Dite kurum riŋ ihər ki mirwim a aba aà megemir bazlam ŋgwal ŋa ata kə̀ gə̀sakwa nda gəzləŋ ilik kamala gà ɓəzla gùvəl a asa mbaŋa. ²⁸Ka ta gwim magəɗa aɗaba gà ɓəzla mene are kurum kwizikw tsidze. Na kàa gwim magəɗa tsəka, tar ti sir a dər, tàa dzeye ika miɗ Mbulum a. Ama kurum ka, kà sərum dər, Mbulum a ta mbil a à kurum ŋa. Mbulum na a ti ɗif a ter a à dukw ata ya. ²⁹Mbulum a vəl a kurum vatwa ka, dite kə̀ gəsum Yesuw Kiristi nda gəzləŋ. Ama ka, taŋa ɗekɗek tsa. A vəl a kurum vatwa ka, aà mesewere are, aɗaba ŋgat mbaŋa. ³⁰Kurum ka, kàa ŋgatum a məmərà aba gà ana ika vatwa Mbulum akahər ata ya. Ama kinehe tekeɗe ka, kurum riŋ ihər ki tserekwimiŋa, meme na i ge a gùvəl ata hiywe mba ya. Dite kurum tekeɗe, kàa patsum aɗəm, kurum riŋ ihər wìskikiɗkiɗ ki gwim a gùvəl ata mbaŋa.

Fə̀rum aà Yesuw, ka zazamum ŋgat

¹Kurum kà sərum ka, kurum riŋ mandza ŋa i təv ilik ŋa nda gà Yesuw Kiristi. Kamala taŋa ya na a vile a kurum a ndzəɗa a gəzləŋ kurum ɓəŋɓəŋ a. Meweye ŋgar ana a waya kurum a, na à me aà kurum a à arəv a. Kà sərum, kurum riŋ mandza ŋa ka, ndìɓèkke i təv ilik ŋa nda gà Mezite Mesife Mbulum. Kwa ihər ki weyekwe a ba ilik ilik tserdze ika magər kwa, dite na gà mburma ti ndzekwe a are tsehe mbaŋa ya. ²Aɗaba taŋa na kinehe i ge a kurum a kamkam a: Wayum ba ika magər kurum ilik ilik tserdze. Kamala taŋa ya, ndzum ka, madzala gà gər kurum ma ge ka, ilik. Bazlam kurum tekeɗe, ma ge ka, ilik mbaŋa. Na kàa gwim kamala taŋa ya ka, i ŋgeye a ba i gəzləŋ ga ndzəɗakkà. ³Ka tə dzalum ka, ba kurum ɗekɗek tsa. Dite ka tə sə̀ŋgə̀rum à ba kurum ɓav tsa asa. Hənum à gər kurum a bəɗ tiɓìzl ivaɗ. Fə̀rum aà gà asiŋ gà mìsle ŋgiɗ kamala ana tar ka, gà ŋgwal ŋa hinne, tə za dər kurum a. ⁴Ka ta gwim dukw ana a ge a ŋgulum a ba kurum a ɗekɗek tsa. Ama ki yehwim a ŋgwal ahəm ndaka təv gà mìsle ŋgiɗ mbaŋa. ⁵Gwim gà dukw ata ka, kəla pat, kamala madzala gà gər Yesuw Kiristi ana a waya ya.

⁶Aɗaba ku mege tar nda Mbulum ilik tekeɗe ka,

a sasar na a ne a kamala Mbulum a tsa.

⁷Aka dzala aka təv mendze ata ŋgwal ŋa ya tsidze.

A waya ka, a ge a meslire ivaɗ.

Ta wa ŋgat ka,

kamala ana ta wa mburma tserdze ya mbaŋa.

⁸I təv ana ŋgat a ne mburma ya ka,

a həna à gər ŋgar a bəɗ, a gəs ahəm aà Mbulum

tsikw haa a təv ana a mət a.

Məməta ŋgar ata a mət a ka,

tə ndwandway ŋgat aà dizl magə̀làwà ŋa

kamala ana ŋgat ka, mala makə̀ɗà mburma ya.

⁹Aɗaba taŋa na Mbulum a zla ŋgat,

a səkah à ŋgat ika gər gà duwa ya tserdze ya.

Dite a ɗer zləm ana a za gà zləm

gà dukw ŋgiɗ tserdze ya mbaŋa asa.

¹⁰A ge dər kataya ka,

na dite gà dukw ana a ge tar tserdze ya,

tàa tsaraka zləm Yesuw ka, ti dere a,

tì dzer a gurmits a bəɗ, tì zèmbeɗe a à ŋgat,

ku mege gà na i gəza mbulum,

nda gà na ika gər ahəɗ a, kige tsa,

gà na i təv gà məməta i biye tekeɗe ya.

¹¹Ku weke a gweɗe a parakkà:

«Yesuw Kiristi na Batsah ŋa ika gər

gà duwa ya tserdze ya.» Kamala taŋa ya,

tì zlibe a à Mbulum Tsir ŋgar mbaŋa.

Gà mburma Mbulum ka, ti ne təv dzaydzay ŋa

¹²A kurum gà masla gà ana i waya kurum hinne ya. Agəra ana kà sərum meme na Yesuw a gəs ahəm aà Mbulum a ka, kurum tekeɗe, gəsum ahər mbaŋa. Akahər ana iye i təv kurum a ka, kàa gəsum ahər ahəm lele. Ama kinehe, iye riŋ i təv kurum asa tsa tekeɗe ka, ki sìkèhwim a à metsehe, ki gwim a kataya hiywe. Kamala megweɗe ya: Mimbile ana Mbulum a mbəl à kurum a ka, say ki gwim a megemir ŋa nda ahər kurum ŋa mbaŋa. Ki gwim a ka, nda magəɗa Mbulum i ba slàɓ slàɓ, ki mirwim ahər aba a dzəŋdzəŋ lele. ¹³Aɗaba Mbulum a riŋ a ge a megemir i gəzləŋ kurum, na dite ki gwim a dukw ana a tsehin ahər a ya. A vile a kurum a ndzəɗa aà megemir ana ki gwim a ya mbaŋa.

¹⁴I huɗ megemir kurum ana ki gwim a tserdze ya ka, ka sayum ahəm aà Mbulum tsa, kà mbetswim aba ahəm nda təv ŋgar ŋgùrà ŋgùrà nda maàga tsa asa mbaŋa, ¹⁵na dite ka, ki ndzwim a tsəɗaŋŋa, bakal a ge a i təv kurum tsidze ya. Ki nwim a gà ɓəza Mbulum ana ta ge a bakal asa tsiye ya. Kurum riŋ mandza ŋa ka, i liwiŋ gà ɓəzla məbànà mburma nda gà na ta ge a dukw ana ŋgwal ŋa tsa ika gər ahəɗ aaha ya. Kurum ika magər tar ka, kamala gà màwùsàwùs ana dzaydzay tì div a aà gəza mbulum ndaàvəɗ a. ¹⁶Dite kurum asa mbaŋa na ki tsikwim a ter a bazlam ana a vile a mesife a mburma ya ya. Na kàa gwim kamala taŋa ya ka, a pat ana Yesuw Kiristi à mère a ya ka, i ŋgeye a ba ika miɗ ŋgar, aɗaba kurum. Aɗaba i sir a dər, megemir gà ana i ge nda mawura ba ŋa tserdze ya ka, i ya ba ka, taf masakəŋa tsa.

¹⁷Megìse kurum ana kə̀ gəsum Mbulum a ka, a ne kamala dukw taf masakəŋa ana kà kə̀ɗumar a. Ama na bəla ta kiɗ a iye ka, a ne a kamala ana i dzar à məmbəz gà kamala dukw taf masakəŋana ya mbaŋa. I səkah dər aaka ka, aka biy kurum ana kà vəlumar a. Na kataya ka, i ta ŋgeye a ba hinne, dite maŋgayaba ata a ge a i təv kurum mbaŋa. ¹⁸Kurum tekeɗe, ŋgeywim ba. Kamala taŋa ya, ki ŋgeyekwe a ba tserdze a təv ilik ŋa.

Gà Timute nda Apafaruditus

¹⁹Na Yesuw BATSAH kwa ŋa a waya ka, i dzala, i gwa, i ti slirehe a Timute a təv kurum bise, na dite i təv ana à mère a a təv ga ya ka, a dere a, a ɗifiŋ a dər, meme na kàa ndzum a. Dite à mìŋehe a à arəv kamala na a mà a kurum dərraha ya mbaŋa. ²⁰Wura a riŋ i faha na a dzele a gà gər aka megemir Yesuw Kiristi kamala iye ya ilik tsidze, say ŋgat ilik. Ŋgat ka, a waya mazlàkà kurum ndzer. ²¹Gà asiŋ gà mburma tserdze tə dzalawa ka, ba tar ɗekɗek, tsəka, tə dzalawa aka megemir Yesuw Kiristi tsa. ²²Ama Timute ka, kà sərum mede ŋgar ana ŋgwal ŋa ya. Mər nda ŋgat məma, mì tsikewa bazlam ŋgwal ŋa ana biy Yesuw Kiristi ya, a mburma. A zlàkawa iye aà megemir kamala kəla ana à zlèk a tsir ŋgar a. ²³Kamala taŋa ya, i dzala ka, i gwa, na tàa sèsiŋ ikaba seriye ga aaha ya tsara ka, i slirehe a ŋgat a təv kurum a faka. ²⁴Iye tekeɗe, i sər, na BATSAH kwa ŋa aka waya ka, i ti dehe a a təv kurum bise mbaŋa.

²⁵Kurum ka sərum damər kwa Apafaruditus, dite ŋgat mala meslire kurum ana kà slərumara ŋgat a təv ga ya ya, na dite à zlèk a iye i təv dukw ana a slewa aà iye hinne ya. Iye nda ŋgat ka, maa ge akaba megemir hinne i təv ilik ŋa. Maa ge akaba gùvəl məma, aɗaba Mbulum. Ama kinehe, i gwa ka, ŋgulum i slirehe a ŋgat, i me a dərraha a təv kurum. ²⁶Aɗaba a waya madaha a təv kurum hinne, gər aka wiser, ki kìvwimeriŋa, aɗaba ana ŋgat a tsaraka ka, ta gwa là, kàa tsarakum dukw məməta ŋgar aaha a gəs ɗa ŋgat a ya. ²⁷Ama dukw məməta ka, aka gəs ŋgat kaɗəŋ, aka à mimìte dər. Zàkwayiya ka, a ndze are tsehe a Mbulum, tsèkwìr aka mbəl. Ama ka, ŋgat ɗekɗek tsa na a ndzer are tsehe ya. Iye tekeɗe ka, Yàa ndzer are tsehe mbaŋa. A mbəl à ŋgat ka, aɗaba mesewere are ŋgiɗ ma tə səkah aka gər gà asa tsa. ²⁸Aɗaba taŋa i waya hinne na i mèhe a à ŋgat a təv kurum bise ya. Aləka kàa ŋgatumar, aka màha ka, ki ŋgeywim a ba, na dite i dəba ŋa ya, iye tekeɗe ka, i dzele a duwa asa tsiye. ²⁹Kamala taŋa ya, na bəla aləka aka ndzeha ka, gəsum ŋgat nda maŋgayaba lele, aɗaba ŋgat ka, damər kurum ana ika vatwa BATSAH kwa ŋa ya. Zlə̀bum à medzibe gà mburma ata kamala ŋgat a ya. ³⁰Aɗaba a zeha ka, kwizikw, aka à mimìte, agəra mege megemir Yesuw Kiristi. A dzala i gər ŋgar ka, a gwa, ku mege i mìt a tekeɗe ka, à zlèk a iye. Kamala taŋa ya, a zla təv mendze ata ka, avukw kurum, na dite à ndìv a à mege megemir ŋa kamala ana zləmana kurum ki zlèkwim a iye ya.

Meme na ki nekwe a gà ŋgwal ŋa ika miɗ Mbulum a?

¹Gà damər gà, i ndìv a à bazlam ŋa ka, nda magwàɗà a kurumaha ka: Ŋgeywim ba agəra ana kurum mandza ŋa i təv ilik ŋa nda gà BATSAH kwa ŋa ya. I ye a ba tsa, na aà mewetse a kurumaha gà bazlam ana i wetse a kurumaha akahər ata ya. I me a aka mewetse a kurumaha asa. Kamala taŋa ya na dite ki ndzwim a hiywe nda metsehe, duwa a ge a kurum a tsiye. ²Gwim metsehe nda təv gà na ta gewa dukw ana ŋgwal ŋa tsiye, ti ne kamala gà kəra ya, haraŋgaf haraŋgaf, dite ti tsetsef a duwa a mburma, ta gweɗe a ter a ka, sasayum ba ya. ³Ama kwa na gà masàsà ŋa nda ndzer a, tsəka, tar tsa. Kamala taŋa ya, kwa na kà nekwa gà mburma Mbulum a. Kwa asa na kà hamawukwa a Mbulum nda ndzəɗa Mezite Mesife ŋgar a. Dite ki ŋgeyekwe a ba ka, agəra ana kwa mandza ŋa i təv ilik ŋa nda gà Yesuw Kiristi ya. Ama kwa ka, ki dzèkwe a are aà dukw ana mburma ta gewa, ta gweɗe a naha ka, ŋgwal ŋa ya tsa.

⁴Na mege gà dukw ata ti ne ndzer ka, ana ka, iye tekeɗe, i ŋget a vatwa aà medzer zləm mbaŋa te. Na wura a gweɗe a, iye ka, ŋgwal ŋa, ama taŋa ka, i sle a aà metsìkè a, à zè a taŋa. ⁵Aɗaba iye ka, gà Yahuda ndzer ŋana, tar na ta wa iye ya. Kamala taŋa ya, iye tekeɗe, kəla gà Isərayel, dite iye ka, i gwala Benyamin. I təv ana ta wa iye, i ge mehinne tsamakər a ka, tə sàs iye. Nda təv mazazama məpala ahəm gà Yahuda ka, iye i liwiŋ gà *Farisa. ⁶Yàa zazam fəla gà Yahuda kalkal lele. Yàa ɗif dər a mburma tèrihhwè lele mbaŋa, i təv ana i sèwèr are a gà na tə zazam vatwa Yesuw a. Yàa nəs à məpala ahəm mər ilik tsidze. Nda təv fəla mər ka, iye ka, ŋgwal ŋa hinne.

⁷Akahər ata i dzala ka, i gwa: Gà dukw ata ka, a giŋ a ŋgulum, tì zlèk a iye. Ama kinehe, aɗaba Yesuw Kiristi ka, i fə̀r ahər kamala dukw taf masakəŋa ya, a giŋ a ŋgulum asa tsa. ⁸Ama kəla ka, ndzer kaɗəŋ, gà dukw ata ɗekɗek tsa, i fə̀r aà gà dukw ana tserdze ya ka, kamala dukw taf masakəŋa ya, aɗaba ana i sər Yesuw Kiristi Batsah ga ŋa ka, taŋa a zè a gà dukw ŋgiɗ tserdze. Aɗaba ŋgat ka, i miyek a à gà duwa tserdze. I fə̀r ahər ka, safar safar kamala gwastak ana masakəŋa ya, na dite i ta ŋget a Kiristi ya. ⁹Say mandza ŋa nda ŋgat ilik na i waya ya. Ama i ta gweɗe a ka, iye ŋgwal ŋa ika miɗ Mbulum, agəra dukw ana piŋŋe i ge ŋgwal ŋa, i zazam məpala ahəm gà Yahuda ya ka, i gweɗe a asa tsa. Ama kəla ka, duwa a riŋ ilik i sir a dər, i gweɗe a, iye ŋgwal ŋa ika miɗ ŋgar a ka, agəra ana i gəs Yesuw Kiristi nda gəzləŋ a. Mbulum na a ne à iye ŋgwal ŋa ya, aɗaba megìse ana i gəs ŋgat a.

¹⁰I waya ka, duwa ilik pəra. A sèsiŋ ka, masəra Kiristi nda ndzəɗa ŋgar ana a mbəl dərra i məməta ya ya. I waya asa ka, i ŋget a a mesewere ŋgar ana a sèwèr a mbaŋa, na dite i ne a kamala ŋgat ana a mət a. ¹¹Na Yàa ge kataya ka, ku mege meme, iye tekeɗe ka, i ta mbilere a i məməta ya, kamala ŋgat a mbaŋa asa.

Mərakwa aba aà mede a təv ana ki tèkwe aɗəm a ya

¹²I gweɗe a ka, Yàa ŋgat dukw ana i veve a ya ka, i tsik a tsa. Dite i gweɗe a asa ka, iye ka, ŋgwal ŋa, bakal a riŋ i təv ga tsəka, i gweɗe a tsa asa mbaŋa. Ama ka, i de a aka miɗ aka miɗ nda məmərà aba dzəŋdzəŋ, na dite i ŋget a gà dukw ata ya ivaɗ, aɗaba Yesuw Kiristi na a lah mezle iye, i ne mburma ŋgar a. ¹³Gà damər gà, i gweɗe a, gà dukw ata tàa ne biy gà ka, i gweɗe a zukw tsa. Ama dukw ilik na i ge a ya pəra: Yàa miyak à gà dukw ana i dəba ya, i mir a aba aà maŋgata dukw ana ika miɗ gà ya, kamala gà wele ana tì dzìr a ba aà mivele, ta waya maŋgata duwa ya. ¹⁴Iye ihər i vel a ɗegìrgìr aà mendze a təv ana i ndze a iɗəm a ya, dite i ta ŋget a dukw mayaba ana Mbulum a gwa, a ta vile a kwe a ya. Na a ne dukw mayaba ata ka, mesife awiya ŋa ana i ŋget a i təv ŋgar i gər ŋa aɗaba Yesuw Kiristi ya.

¹⁵Aɗaba taŋa, kwa ana kinehe kàa simekwa ika vatwa Mbulum a ka, say dzalakwa kamala taŋa ya. Na wura a dzele a dukw ŋgiɗ pam ika magər kurum a ka, Mbulum a ti ɗifer a dər parakkà. ¹⁶Ama kəla ka, ku mege meme tekeɗe, say zazamakwa ka, vatwa ana ki tèkwe a dər, kà zazamakwara haa kinehe ya.

¹⁷A kurum gà damər gà, kurum tserdze ka, gwim kamala iye ya. Fə̀rum aà gà na mede tar ŋgwal ŋa kamala mər ana mìi ɗif a kurum a à mede mər ana ŋgwal ŋa ya mbaŋa. ¹⁸Aɗaba gà mburma riŋ hinne na mede tar à pèt a ka, tar gà ɓəzla mene are a Kiristi ana a mət aà dizl magə̀làwà ŋa ya. Yàa tsikeye a kurum gà dukw ata ka, sik diŋ. Ama kinehe ka, i tsik a kurum a asa hiywe. I tsik a kurum a ka, ɓə̀zl ɓə̀zl nda gà tuwa aà are. ¹⁹A təv ana mandza aà bəra tar aka ndəv a ka, Mbulum a dzeye a à tar, ti de a a akwa ana a mbete a tsiye, aɗaba ana ti zezem a ŋgat tsiye. Tə zazamawa ka, dukw ana gəzləŋ tar a waya ya ɗekɗek pəra. Ta gewa ka, dukw ana zirìm zirìm a ndeɗe aka ter a hwarwa ya. Dite ka, ta ge a dər zlapa ivaɗ asa. Tə dzalawa ka, aka dukw gər ahəɗ ɗekɗek asa mbaŋa. ²⁰Ama kwa ka, gà mburma ana i ga i bəra Mbulum a. Kwa ihər ki vevekwe a Yesuw Kiristi BATSAH kwa ŋana mala məmbə̀là à kwa ya, dite a dere a i gər ŋa ya, aà malə̀mà akaba nda gà kwa ya. ²¹I təv ana a dere a ya ka, a ta mbìɗ a à ba kwa ana tsèfek tsèfek ndzəɗa iɗəm tsiye, na dite ba kwa a nis a asa tsa, a ndze a aà bəra aà biybiy kamala biy ŋgar ana ti zlibe a dər a. A ta ge a kamala taŋa ya ka, nda ndzəɗa ŋgar ana a kwere a gà duwa tserdze ya.

Meɗìfè à metsehe aka gər gà dukw ŋgiɗ pampam

¹Aɗaba taŋa, gà damər gà ana i waya kurum hinne ya, ndzum ka, nda gà ndzəɗa ɓəŋɓəŋ lele, na i huɗ mendze kurum ana kurum mandza ŋa i təv ilik ŋa nda gà BATSAH kwa ŋa ya. I waya kurum hinne, ki kìvwimiŋŋa, a sèsiŋ na i ŋget a kurum a asa ya. Iye ihər i ŋgeye a ba aɗaba kurum. Kurum kà nwim ka, gà ɓəzla sida megemir gà ana i ge ŋgwal ŋa ya.

²A kurum gà Avudiya nda Sintike, i ge a kurum a kamkam, agəra ana kurum riŋ mandza ŋa i təv BATSAH kwa ŋa ya ka, sərum ba lele. ³A kər masla gà ana ma ihər ki geme a megemir ŋa ilik a, iye ihər i gik a kamkam mbaŋa: Zlak gà məkəs ata, aɗaba tàa mər aba hinne, na i təv ana mì ge akaba mege megemir metsìkè bazlam ŋgwal ŋana biy Yesuw Kiristi a mburma ya, tar nda gà Kilemas, nda gà asiŋ gà ɓəzla megemir ana mì ge akaba megemir i təv ilik ŋa ya. Tar ata tserdze ya ka, Mbulum aka wetseye gà zləm tar a wakita a təv gà mburma ana ti ta ŋget a mesife awiya ya.

⁴Ŋgeywim ba kəla pat, agəra ana kurum mandza ŋa nda gà Yesuw BATSAH kwa ŋa a təv ilik ŋa ya. I tsik a kurum a asa: Ŋgeywim ba.

⁵Mburma tserdze ta fə̀r aà mede kurum, tə sər dər ka, meme na kà gəsum mburma lele, ki gwim a ter a ŋgwal ŋa ya. Mə̀ məts a kurum gər tsa, na mimè ana BATSAH kwa ŋa à mère a bise ya. ⁶Ka tə dzalum duwa kwizikw tsidze. Ama ɗifwim à gà dukw ana tàa sle aà kurum tserdze ya ka, a ahər a Mbulum ivaɗ. Hamumar, mà zlak kurum, dite ki gwimer a kəkaaha mbaŋa. ⁷Na kàa gwim kataya ka, Mbulum a vile a kurum a matasla yam a gəzləŋ zayya lele. A zè a dukw ana gà mburma ti sle a aà mesire nda metsehe tar a. Na kàa ŋgatum matasla yam ata ka, zayya a kesle a gəzləŋ kurum nda gà madzala gà gər kurum kuɗa, na dite duwa a ge a kurum a tsa, agəra ana kurum mandza ŋa i təv ilik ŋa nda gà Yesuw Kiristi ya.

⁸Gà damər gà, araha na dukw ana a zeha aà metsike a kurum a: Dzalum aka dukw ana ŋgwal ŋa, mburma tə zləbawa dər a, nda gà aka dukw ana ndzer, ki dzèkwer a gurmits a bəɗ a asa, dite aka dukw ana pàrsa iɗəm tsa, tsəɗaŋŋa lele, gà dukw ana a tsahən aà mburma, tə zàmbaɗawa dər a asa mbaŋa. Gwim metsehe a mege gà dukw ata. ⁹Zazamum ka, gà dukw ana i ɗif a kurum dər, dite kà zazaɗum ba dər aba à dukw ana kà tsarakumara ika arah ga ya, kà ŋgatumar ka, meme na i ge a ya mbaŋa. Kamala taŋa ya, Mbulum ana a vile a kwe a matasla yam a gəzləŋ kwa ya ka, a ti ndze a nda gà kurum.

Pul a ge a tar wusa agəra dukw ana ta vəlar a

¹⁰I ge kəkaaha a BATSAH kwa ŋa, dite i ŋgayaba hinne agəra ana kà dzalum gà gər aka iye ya asa. Ku mege piŋŋe tekeɗe ka, kàa dzalum aka iye kaɗəŋ. Ama kàa ŋgatum vatwa aà mezleke iye tsa pəra, na dite a ndza hinne kamala taŋa ya ya. ¹¹I tsik taŋa ka, agəra ana duwa a sle a aà iye ya tsa, aɗaba ana Yàa sinike ba aà mendze zayya i təv gà dukw ana i ŋgatawa ya, ¹²ku mege hinne, ku mege zaakwa pəra tekeɗe ya. Dite ku mege dukw mezime a riŋ aà iye mbes mbès mbes nda gà bəla a riŋ tsa, dite ku mege kuɗa duwa a giŋ a tsa, i dəba ŋa ya, duwa a sle aà iye a hinne asa mbaŋa tekeɗe ka, Yàa mbər mesire iba à gà mesewere are ya, nda mendze ana barbararra ya. ¹³I sər magəsa gəzləŋ i təv duwa tserdze ka, say nda təv Yesuw Kiristi ana a viliŋ a ndzəɗa ya. ¹⁴Ama ka, ku mege kataya tekeɗe ka, kàa gwim ŋgwal ŋa lele aà mezleke iye i huɗ mesewere are gà ana i sèwèr a kinehe ya.

¹⁵A kurum gà mburma ana i Filipiya ya, kurum kà sərum, aka ana i dza ba aà metsìkè a kurum bazlam ŋgwal ŋa ana biy Yesuw Kiristi ika ahəɗ Makaduniya ya ya, dite i zazəɗ dər aka miɗ, i da à kurum a ka, say kurum ɗekɗek na kà zlakum iye ya, tsəka, aɗaba gà asiŋ gà mburma Mbulum ŋgiɗ a riŋ mì ndzawa i təv tar ka, tàa viliŋ duwa tsa. ¹⁶I təv ana iye riŋ mandza ŋa i Tesalunike ya tekeɗe ka, kàa zlakum iye sik diŋ. Kurum na kà slirwimiŋaha duwa, aɗaba dukw ana a sle aà iye ya. ¹⁷Ama siŋgwe kurum tsa na a sèsiŋ i ŋget a ya. Seyiŋ tsa ivaɗ, gəzləŋ ga a ŋgeye a ba, aɗaba i sər ka, Mbulum a pise a kurum a ahəm, agəra dukw ana kà vilwimiŋ taf masakəŋa ya. ¹⁸Yàa ŋgat dukw ana kà slirwimiŋara nda ahər Apafaruditus a, aka ndzera aà iye ya. I samata dukw ata ka, a za i gər a dukw ana a sle aà iye ya. I dəba dukw ata kà slirwimiŋara ya ka, duwa aka sle aà iye ilik asa tsa. I ndze a ka, barbararra lele kuɗa. Gà dukw ata ka, gà ŋgwal ŋa ndzer, kamala dukw taf masakəŋa ana ta vile a a Mbulum, a ze a hwaŋŋà lele ika miɗ ŋgar, a tsahən ahər hinne ya. ¹⁹Mbulum ana i ge a meslire ŋgar a ka, Əbay ŋa hinne, ŋgaɓɓa. A ta vile a kurum a gà dukw ana ti sleye aà kurum a tserdze ya. A ta vile a ka, nda ahər Yesuw Kiristi. ²⁰Gà mburma tə̀ zlə̀b à Mbulum Tsir kwa ka, aà biybiy. *Amin.

Mege wusa

²¹Gwimiŋ wusa a gà na Yesuw Kiristi a pala tar i faka, ti ne gà mburma ŋgar a ilik ilik tserdze. Gà damər kwa ana tar mandza ŋa ɗa i təv ga i faha ya, ta ge a kurumaha wusa mbaŋa. ²²Gà asiŋ gà mburma Mbulum ana ɗa i faha ya tserdze, ta ge a kurumaha wusa mbaŋa asa. Ndeyndey ŋana ka, gà damər kwa ana ta ge a meslire i ga i bəra batsah Əbay gà Ruma ya.

²³Yesuw Kiristi BATSAH kwa ŋa mi pise a kurum ahəm ilik ilik tserdze.