YUHANA

Ŋgwal bazlam ana

YUHANA

a tsik a

Tə zal bazlam Mbulum ka, a Yesuw Kiristi

¹Akahər ata piŋŋe, i təv ana Mbulum aka ge gər ahəɗ zukw tsiye ka, wele ana tə zalar bazlam Mbulum ka, a riŋ dukw ŋgar. Ŋgat ka, a riŋ mandza ŋa i təv Mbulum, dite ŋgat ka, Mbulum mbaŋa. ²Daga piŋŋe ka, ŋgat a riŋ i təv Mbulum. ³Mbulum a ge gà dukw tserdze ka, nda ahər ŋgar. Duwa ilik na Mbulum a ge nda ahər ŋgar tsiye ka, a riŋ tsa. ⁴Mesife gà duwa tserdze a dara ka, i təv ŋgar a, dite mesife ata ka, a vəlawa təv dzaydzay ŋa a gà mburma mbaŋa. ⁵Təv dzaydzay ŋa ata a də̀vawa ika magər luvuŋ, ama ka, luvuŋ a sle aà mimbete dər tsa.

⁶Akahər ata ka, Mbulum a slərra mburma ya, zləm ŋgar Yuhana. ⁷A dara ka, aà meɗìfè à təv dzaydzay ŋa a gà mburma, dite ka, gà na tàa tsaraka bazlam ŋgar ata tserdze ya ka, ta gəs təv dzaydzay ŋa ata a tsik a ter a ya. ⁸Ŋgat tsa na a ne təv dzaydzay ŋa ya. Ama a dara ka, aà meɗìfè à təv dzaydzay ŋa ata pəra. ⁹Təv dzaydzay ŋa ata ndzer ŋa ya ka, wele ana tə zalar «Bazlam Mbulum» a. A dara aka gər ahəɗ a ka, aà medìve ika magər gà mburma tserdze.

¹⁰Ŋgat ɗa ika gər ahəɗ. Ama ku mege Mbulum a ge gər ahəɗ nda ahər ŋgar tekeɗe ka, gà mburma ana iɗəm a, tə sər ŋgat tsa. ¹¹A dara ka, aka ahəɗ ŋgar a. Ama gà mburma ŋgar tàa gəs ŋgat tsa. ¹²Ama gà asiŋ ŋa kə̀la ka, ta waya ŋgat, tàa gəs ŋgat nda gəzləŋ tar lele. Tar ka, aka vəl a tar vatwa aà mene gà ɓəza Mbulum. ¹³Ti ne gà ɓəza Mbulum ka, a wa tar kamala ana mburma ti dzele a, ta we a ba ya tsa. Ti ne gà ɓəza Mbulum ka, agəra ana a vəl a tar mesife awiya ŋa ya.

¹⁴Ŋgat ana tə zalar «Bazlam Mbulum» a, na a ne mburma ya, dite ka, a ndza ɗa ika magər mər zaakwa ya. Maa ŋgat a ndzəɗa ŋgar ana a za gà dukw tserdze, Mbulum a vəl a Kəla ŋgar ata mifèndèz ŋa, a da dərra i təv ŋgar a. Ŋgat ka, mala ndzer ŋa. A gewa ka, dukw ana ŋgwal ŋa ya ɗekɗek.

¹⁵I təv ana a pàt aba ya ka, Yuhana aka tsik aà ŋgat parakkà, a gwa: «Araha na wur ana akahər ata i tsik ahər, i gwa: <A dere a i dəba gà ya mba. Ŋgat ka, a za iye kweleŋ fètìte. Aɗaba ŋgat a riŋ daga aà gər ana tàa wa iye zukw tsiye.> «

¹⁶Kwa tserdze kàa ŋgatakwa Əbay ŋgar, dite a pisewa a kwa dər ahəm ka, sik diŋdiŋ màdzànàpa ŋa. ¹⁷Mbulum aka vəl a kwa məpala ahəm nda ahər Musa. Ama a ge a kwa ŋgwal ŋgar, a ɗif a kwa à ndzer ŋgar ka, nda ahər Yesuw Kiristi. ¹⁸Wura aka ŋgat a Mbulum ilik tsidze. Ama Kəla ŋgar ata mifèndèz ŋa tə ndzawa i təv ilik ŋa nda ŋgat a, na a ɗif a kwa dər a.

Bazlam ana Yuhana metsìlwìɓè à mburma a yam a tsik a

Mata 3:1-12; Markus 1:1-8; Luka 3:1-18

¹⁹A pat duwa ka, gà bàba gà Yahuda ana i Yeruzalem a, tə slər gà asiŋ gà ɓəzla mandəva kuɗa a Mbulum ana i gwala Levi ya, nda gà asiŋ tar a təv Yuhana, aà megweɗer ka: «Kər ana, weke?» Tə daha a təv ŋgar, ta wiz ahər. Bazlam ana Yuhana a tsik a tar a ka, araha. ²⁰A tsik a tar parakkà ika miɗ mburma tserdze, a gwaɗa a tar: «Iye ka, *Kiristi, mala məmbàlà à mburma ana Mbulum a gwa, i ti slir a kurumehe a ya tsa.» ²¹Tə tsaraka bazlam ŋgar ata kataya ka, ta gwaɗar: «Kər ana, weke? Kər ana, Iliya ana akahər ata ya ya?»*fa* Yuhana a gwaɗa a tar aaka asa: «Iye ka, ŋgat tsa.» Ta gwaɗar aakaha asa mbaŋa: «Kər ana, mala məma à guma Mbulum ata Mbulum a gwa, i ti slir a kurumehe a ya ya?»*fb* A gwaɗa a tar aaka: «Awaŋ, iye ka, ŋgat tsa.» ²²Ta gwaɗar: «Dite kər dze ana, weke kəla ya? Ɗe a mər aba te. Ki gweɗe a aà ba yak dze ana, weke? Na dite mìi ta me a dər a gà mburma ana tə slərra mər a ya.» ²³Yuhana a gwaɗa a tar aaka: «Iye ka, wele ana Ezaya, mala məma à guma Mbulum ana akahər ata a tsik aà iye, a gwa:

<Mburma ŋa a riŋ i kusak,

à fèfil a ŋgəlakəkka, a gweɗe a:

Làmbaɗum aba vatwa a BATSAH kwa ŋa

a gəzləŋ kurum a fehhè lele.> «*fc*

²⁴I liwiŋ gà mburma ata tə daha a təv Yuhana, ta wiz ahər bazlam a ka, gà *Farisa iɗəm. ²⁵Tə daha, ta gwaɗar: «Na kər Kiristi tsa, dite kər Iliya tsa, nda gà kər mala məma à guma Mbulum ata tsidze ana, aàmala na ki tsilwiɓ a à mburma a yam a?» ²⁶Yuhana a gwaɗa a tar aaka: «Aɗaba iye ka, i tsilwiɓ a à mburma ka, a yam pəra, ama wele ŋgiɗ a riŋ, ika magər kurum, kà sərum ŋgat tsa. ²⁷Ŋgat ka, a dere a i dəba gà ya mba. A za iye nda ndzəɗa kweleŋ fètìte. I sle a aà mesirikaha a təv ŋgar, aà məpəla à liɓir tsàpà ŋgar tsidze.»

²⁸Gà dukw ata tserdze ta ge ba ka, i kwite Betaniya, ika lìdè dulwa Yurdan, i təv ana Yuhana a tsilwiɓewa iɗəm à mburma a yam a.

Yesuw a ne kəla təmaŋ Mbulum

Mata 3:13-17; Markus 1:9-11; Luka 3:21-22

²⁹Ndidwe ŋana ka, Yuhana a ŋgat a Yesuw a riŋ a dehe a a təv ŋgar. A gwaɗa a gà mburma ana i fataya: «Kəla təmaŋ ana Mbulum a vəl, ta kiɗ a aɗaba məpəla à bakal a mburma ya ka, araha, a deriŋa.*fd* ³⁰I fàfəl ka, aà ŋgat, na i gwa: <Wele ŋa a riŋ a dere a i dəba gà ya ka, à za iye nda ndzəɗa kweleŋ fètìte, na ŋgat a. Aɗaba ŋgat ka, a riŋ daga aà gər ana tàa wa iye zukw tsiye.> ³¹Iye piŋŋe tekeɗe, i sər ŋgat ana weke tsa. Ama iye, i dara aà metsìlwìɓè à mburma a yam ka, dite gà mburma Isərayel tə sər ŋgat.»

³²Yuhana a tsik ahər asa, a gwaɗa a tar: «Yàa ŋgat a Mezite Mesife Mbulum a riŋ a tarra i gər ŋa ya, zərawwa kamala maadagwar a, a dara, a ndza a bəɗ aka gər ŋgar. ³³Akahər ata Yàa sər ŋgat ana weke zukw tsa, ama Mbulum ana a slərra iye, aà metsìlwìɓè à mburma a yam a, a gweɗiŋ: <Ki ta ŋget a Mezite Mesife a terre a aka wele ŋa a riŋ a, dite a ndze a aka gər ŋgar.> A gweɗiŋ asa ka: <Wele ata na a ti tsilwiɓ a à mburma a Mezite Mesife Mbulum a.> « ³⁴Yuhana a gwa asa ka: «Yàa ŋgat a gà dukw ata ndzer, pàrsa iɗəm tsa. Aɗaba taŋa, na iye ihər i tsik a kurum a parakkà, ŋgat na Kəla Mbulum a.»

Gà ɓəzla mazazama Yesuw gà malahalah ŋana

³⁵Ndidwe ŋana ka, Yuhana a riŋ nda gà asiŋ gà ɓəzla mazazama ŋgat sula i fata asa. ³⁶A ŋgat a Yesuw ana a riŋ ihər a de a ya ka, a gwaɗa a tar: «Naha ka, wele ana a ne kəla təmaŋ, Mbulum a vəl, ta kiɗ a ya.» ³⁷Gà ɓəzla mazazama Yuhana ata sula ya, tə tsaraka dukw ana a tsik a ka, tə zazam Yesuw. ³⁸Wudəgə̀r Yesuw a mbəɗ à ba ka, aka ŋgat a a taraha, tar riŋ ti zezemehe a ŋgat. I dəba ŋa ya, a gwaɗa a tar: «Ki yehwim a là?» Ta gwaɗar: «Kər ana, mandza ŋa ana, i ŋga, Rabi?» Rabi ka, kamala megweɗe ya, mala medzeŋge duwa a mburma. ³⁹A gwaɗa a tar: «Dumara, tàkwa, dite ki sirwim a təv ga ana iye iɗəm a.» Tə da. Tə daha ka, ta ŋgat a təv ana ŋgat mandza ŋa iɗəm a. Tə ləm akaba pat ata, tə ndza akaba ka, aà gər ndzemde faɗ a, haa həvəɗ a ge.

⁴⁰Mìsle ŋgiɗ a riŋ ilik i liwiŋ gà mburma ata sula tə tsaraka bazlam Yuhana, dite tə zazam Yesuw a ka, zləm ŋgar Andire. Ŋgat ka, damər Simun Piyer. ⁴¹A le aà damər ŋgar Simun tsara ka, a gwaɗar: «Maa ŋgat a *Masihu, kamala megweɗe ya ka, *Kiristi, mala məmbàlà à mburma ana Mbulum a gwa, i slir a kurumehe a ya.» ⁴²I dəba ŋa ya, a laka Simun a təv Yesuw. Dite Yesuw a fə̀r ahər, a gwaɗar: «Kər ka, Simun, kəla Yuhana. Ti ta mbìɗek a à zləm, ti zelek a Kayfas», kamala megweɗe ya ka, Piyer. Taŋa ka, kuvəl.

Yesuw a zal a gà Filip nda Nataniyel

⁴³Ndidwe ŋana ka, Yesuw a waya à mbìɗ a gər aka ahəɗ Galile. I təv ana a riŋ a de a ya ka, tə lə̀ma nda Filip. A gwaɗar: «Zezem iye, kà tama.» ⁴⁴Filip a dara ka, i kwite Betsayida ana gà Andire nda Piyer tə ndzawa iɗəm a. ⁴⁵I dəba ŋa ya, gà Filip tə lə̀ma nda Nataniyel. A gwaɗar: «Maa ŋgat a wele ana Musa a tsik ahər i wakita məpala ahəm ŋgar a, dite gà ɓəzla məma à guma Mbulum ti tsik ahər mbaŋa ya. Zləm wele ŋa ka, Yesuw, kəla Yasufa ana i kwite Nazaret a.» ⁴⁶Nataniyel a gwaɗar: «Kà dzala ana, duwa a sle a aà medera ŋgwal ŋa lele i kwite Nazaret a ya?» Filip a gwaɗar aaka: «Dara, fə̀r ahər.» Ta mah ba, tə da.

⁴⁷Aləka Yesuw a fə̀r Nataniyel a riŋ a dehe a a təv ŋgar ka, a gwa aà ŋgat: «Araha na kəla gà Isərayel ana ndzer, wirwir i ba tsidze ya.» ⁴⁸Nataniyel a tsaraka taŋa ka, a gwaɗar: «Ge, kà sərara iye dze ana, i ŋga ya?» Yesuw a gwaɗar aaka: «Yàa ŋgatak aà huɗ gùrùv duwa aka na Filip aka zalak, kàa màhum ba zukw tsiye?» ⁴⁹Nataniyel a gwaɗar: «Batsah mala mesìnèkè à duwa a mburma, kər ka, Kəla Mbulum. Kər ka, batsah Əbay gà Isərayel.» ⁵⁰Yesuw a gwaɗar aaka: «Kə̀ gəs iye kamala Kəla Mbulum a ana, aɗaba ana i gwaɗak, Yàa ŋgatak aà huɗ gùrùv a ya? Yaw, na kataya ka, araha, ki ta ŋget a a gà dukw gà bàba ŋana hinne, tì zè a taŋa ya.» ⁵¹A gwaɗar asa: «Iye ihər i tsik a kurum a nda ndzer, pàrsa iɗəm tsa. Ki ta ŋgetwim a a kuvəl Mbulum ndzayìya mandə̀zlà ŋa ikaba ya, gà gawla Mbulum ti tsil aɗəmiŋa, dite gà asiŋ ŋa, ti terre a aka gər gà, iye, *wur ana a dara i təv Mbulum a mbaŋa.»*fe*

Mandə̀ɗà daala a bəra i kwite Kana

¹I dəba mehinne sula ya ka, tə ndə̀ɗ daala a bəra i kwite Kana ika ahəɗ Galile. Məmər Yesuw ibam, a riŋ i fata. ²Dite tàa zal a gà Yesuw nda gà ɓəzla mazazama ŋgat mbaŋa.

³I təv ana ta gìrìv a ya ka, meɗwìtsè mawà dukw duwa makwàsà ŋa a ndəv aà tar a. Mama Yesuw a fə̀r, aka ndəv ka, a dara a təv Yesuw a, a dara, a gwaɗar: «Dukw aaha ka, aka ndəv.» ⁴Ama Yesuw a gwaɗar: «Dukw ana i ge a ya ana, kər à na a tsikiŋ a ya, mama ga? Ama ka, aka sle biy gà zukw tsa.» ⁵Dite mama Yesuw a tsaraka kataya tsara ka, a daha, a gwaɗa a gà ɓəzla meslire ana i fataya: «Gwim gà dukw ana Yesuw a tsik a kurum a ya fit.»

⁶Gà gah duwa a riŋ i fata ndilik, gà Yahuda tə dzawa aɗəm yam aà məbàrà dər duwa nda ahər, kamala ana fəla tar a tsik a. Gà gah ata ka, yam a da a gà biy ŋgiɗ iɗəm ka, lìter dərməka, a gà biy ŋgiɗ ibam, lìter dərməka nda dzik səla. ⁷Ama Yesuw a daha, a gwaɗa a gà ɓəzla meslire ata: «Dumara, tafum yam a gà gah aka.» I dəba ŋa ya, tə daha, tə dzaya aɗəm yam ata pèslìsle pèslìsle. ⁸I dəba taŋa ya asa, Yesuw a gwaɗa a tar: «Tə̀fum yam aaha zaakwa, ka dum dərraha a təv batsah mala meslire wele ana a zal à dukw mezime ya, mə̀ mə̀ndzər te.» Tə tə̀f yam ata, tə dar dərraha. ⁹Batsah mala meslire wele ata a mə̀ndzər yam ata ka, a ne aaka meɗwìtsè mawà dukw ata makwàsà ŋa ya. A dzəm həmbasləslsla lele. Tə dara à dukuməŋa ana i ŋga ya ka, a sər tsa. Ama gà ɓəzla meslire ana tə tafaraha ya ka, tə sər, Yesuw na a ne dər duwa ya. Batsah mala meslire ata a zal a zal məkəs ana a zla ya, ¹⁰a gwaɗar: «Ku weke na aka zal a mburma ka, a vile a ter a dukw ana a dzəm a dzekwiŋ. Tàa sa aba ya ka, i dəba ŋa ya a vile a ter a na a dzəm tsiye kuɗa. Ama kər ka, kà tike aba ŋgwal ŋana ya haa kinehe.»

¹¹Yesuw a lah mege dukw mene aà mburma ata ka, i kwite Kana, ika ahəɗ Galile. Kərga taŋa ya, a pàt à ndzəɗa mezlibe ŋgar ana a za duwa tserdze ya. Aɗaba taŋa na gà ɓəzla mazazama ŋgat ta gəs ŋgat nda gəzləŋ tar a. ¹²I dəba ŋa ya ka, gà Yesuw ta mah ba i fataya, tə da a kwite Kafarnahum nda gà mama ŋgar, nda gà damər ŋgar, dite nda gà ɓəzla mazazama ŋgat. Tə ndza riŋ i fata mehinne zaakwa.

Yesuw a da a ga Mbulum batsah ŋana

Mata 21:12-13; Markus 11:15-17; Luka 19:45-46

¹³Aləka i təv ana *megirive Paska gà Yahuda aka à mendzera ya ka, Yesuw a da a Yeruzalem. ¹⁴A daha ka, a da a ga Mbulum batsah ŋana. A leha aɗəm aà gà ɓəzla madzàwà à gà sla, nda gà təmaŋ, nda gà huɗgum, dite gà ɓəzla məmbùrùɗà siŋgwe a riŋ ika tabəl tar mbaŋa. ¹⁵A zla liɓir, a slàslapa akaba, dite a ràrə̀slar, a daha, a dalawa dərra iɗəm gà sla nda gà təmaŋ a tserdze a bəra ya. A mbaɗa à gà tabəl gà ɓəzla məmbùrùɗà siŋgwe a bəɗ. A dzaya a tar à siŋgwe ŋa a bəɗ gwits gwits. ¹⁶I dəba ŋa ya, a gwaɗa a gà ɓəzla madzàwà à gà huɗgum ata: «Ndzəkum gà dukw aaha i faha ya, ka dum. Kà nwim à ga Tsir gà ka, ga tsakala tsa.» ¹⁷Gà ɓəzla mazazama ŋgat ta ŋgatar kataya ka, dukw ana mewetse ŋa i wakita Mbulum a, a ma a tarra a gər a. Ta wetse, ti tsik ahər, ta gwa ka: «Ga yak aaha ka, i waya hinne. I tike aɗəm madzala gà gər fit dze ka, a fata.»*fa*

¹⁸Ama gà bàba gà Yahuda tə tsam ahər, ta gwaɗar: «Ki sle a aà mege dukw mene aà mburma awara, na dite mìi sir a dər ka, tàa vəlak ndzəɗa aà mege dukw ata ya?» ¹⁹Yesuw a gwaɗa a tar aaka: «Yaw, taŋa ka, mbazlum à ga Mbulum batsah ŋa aaha, na dite ka, i huɗ mehinne makər a ka, na Yàa zlàzl aɗəm tsiye.» ²⁰Gà bàba gà Yahuda ata tə tsaraka taŋa ka, ta gwaɗar: «Yweh, taŋa ana, meme? Tə zlàzl ga Mbulum aaha batsah ŋa ya ka, mive dzik faɗ gəra ndilik ka, dite kər ka, i huɗ mehinne makər a ka, tseerì ki zlèzl a dze ana, meme, na taŋa ya?»

²¹Ama ga Mbulum ata Yesuw a riŋ ihər a tsik ahər a ya ka, a live dər aba à ba ŋgar a. ²²Aləka i təv ana a mət, a mbəlara i məməta ya ka, dukw ana a tsik ndeɗiŋa ya ka, aka màra a gər a gà ɓəzla mazazama ŋgat a kuɗa. Dite ta gəs bazlam ana ta wetse i wakita Mbulum a, nda bazlam ana Yesuw a tsik a.

Yesuw a sər dukw ana i gəzləŋ mburma ya tserdze

²³Akahər *megirive Paska ana Yesuw a riŋ i Yeruzalem a ka, gà mburma hinne ta ŋgat a gà dukw mene aà mburma ana a gewa ya, dite ta gəs ŋgat nda gəzləŋ. ²⁴Ama Yesuw ka, aka tike aà zləm tsa, aɗaba a sər madzala gà gər tar tserdze. ²⁵Ŋgat ka, wura a tsiker a dukw ana i ba mburma ya tə tsa, a sər dukw ana i gəzləŋ tar a tserdze.

Gà Yesuw nda Nikudimus

¹Wele duwa a riŋ batsah ŋa i liwiŋ gà na ta kwere a gà Yahuda ya mbaŋa, zləm ŋgar Nikudimus. Ŋgat ka, gà *Farisa. ²A pat duwa a da a təv Yesuw ndaàvəɗ. A daha, a gwaɗar: «Mala medzeŋge a mburma, mì sər ka, Mbulum na a slərra kər aà mesìnìkè à duwa a mburma ya kaɗəŋ, aɗaba wura a sle a aà mege gà dukw mene aà mburma kamala ana ki gewa ya tsa, na ahər Mbulum a riŋ aà ŋgat tsiye.»

³Yesuw a gwaɗar aaka: «Iye ihər i gweɗek a nda ndzer, pàrsa iɗəm tsa: Wura a sle aà mada a təv mekwere Əbay Mbulum tsa, na aka waba masula ŋa tsiye.» ⁴Nikudimus a gwaɗar: «Meme na wura batsah ŋa ka, a sle aà mewe a ba masula ŋa asa ya? Kù gwa ana, à mbìɗ a gər a hitwis mama ŋgar, dite ta we a ŋgat masula ŋa asa ya?»

⁵Ama Yesuw a gwaɗar aaka: «Iye ihər i gweɗek a nda ndzer, pàrsa iɗəm tsa: Wura a sle a aà mada a təv mekwere Əbay Mbulum tsa, na aka wa ba nda yam nda Mezite Mesife Mbulum tsiye. ⁶Dukw ana ta wa kamala mburma ya ka, ŋgat mburma dukw ŋgar. Ama na ta wa ŋgat nda Mezite Mesife Mbulum a ka, aka ŋgat mesife ana a dara i təv Mbulum a. ⁷Bazlam ana i gwaɗak, say ki wim a ba masula ŋa ya ka, ma ta gik kamala sunwa ya tsa. ⁸Himbiɗ a de a ka, a təv ana a sasar a. Ki tsereke a ka, miɓizle ŋa fàr fàr fàr, ama kà sər, a dara ana, i ŋga ya ka, kà sər tsa, dite a de a ana, a ŋga ka, wura a sər tsa asa. Kərga taŋa ya, na a ge ba nda wele ana ta wa ŋgat nda ndzəɗa Mezite Mesife Mbulum a mbaŋa.»

⁹Nikudimus a gwaɗar: «Wànà a ge a ba dze ana, meme?» ¹⁰Yesuw a gwaɗar aaka: «kər ka, batsah mala medzeŋge a mburma ana i gwala gà Isərayel a dze ana, meme na kà sər gà dukw ata tsiye? ¹¹Iye ihər i gweɗek a nda ndzer, pàrsa iɗəm tsa: Mìi fèfil a ka, aka gər gà dukw ana mì sər a, ndəna mì ŋgatar a. Ama a sàs a kurum megìsè bazlam ana mər ihər mìi tsik a ya tsa. ¹²Yàa tsik a kurum ɗa duwa ika gər ahəɗ ka, kàa gəsum aà iye tsəna, dite meme na ki giswim a dukw ana i tsik a kurum a aka gər dukw ana i mbulum i gər ŋa ya? ¹³Wura aka tsəl a təv Mbulum a gər ŋa ilik tsidze. Say iye, wur ana i dara i təv ŋgar a ilik, na i tarra iɗəm a.

¹⁴Kamala ana akahər ata Musa a zla ndzemde duwa ta və̀ɗ kamala mesiwiɗ a, a gə̀law a aram, a hitse dər a magər gà Isərayel ana i kusak i fataya,*fa* iye, wur ana i dara i təv Mbulum a tekeɗe, ta hitse a aà iye aà dizl kamala taŋa ya mbaŋa. ¹⁵Dite ku weke na aka gəs iye nda gəzləŋ a ka, ma ŋgat mesife ana à ndìv a tsa aà biybiy a. ¹⁶Kərga taŋa ya, Mbulum aka waya gà mburma ana ika gər ahəɗ a hinne. A slərra Kəla ŋgar ana mifèndèz ŋa ilik a, dite ka, ku weke na aka gəs ŋgat nda gəzləŋ ilik a ka, a dzeye a tsa, ama a ŋget a mesife ana à ndìv a tsa aà biybiy a. ¹⁷A slərra ŋgat aka gər ahəɗ a ka, aà mege seriye a mburma tsa. Ama a slərra ŋgat aka gər ahəɗ a ka, dite ta mbala nda ahər ŋgar ivaɗ.

¹⁸Wele ana aka gəs ŋgat nda gəzləŋ a ka, seriye à gis a ŋgat tsa. Ama wele ana aka gəs ŋgat tsiye ka, seriye aka mbər megìse ŋgat daga kinehe, aɗaba ana aka gəs Kəla Mbulum ata mifèndèz ŋa ilik a tsiye. ¹⁹Ama seriye Mbulum à gis a tar ka, aɗaba ana Mbulum a slərra təv dzaydzay ŋa aka gər ahəɗ a ka, ama gà mburma ta waya ka, luvuŋ ivaɗ, tsəka, a sàs a tar təv dzaydzay ŋa ata tsa, aɗaba mege dukw tar ana ta gewa ŋgwal ŋa tsiye. ²⁰Ku weke na a riŋ a ge a dukw ana ŋgwal ŋa tsiye ka, a sasar təv dzaydzay ŋa ata tsidze, dite a ndze a ka, i luvuŋ. Aɗaba a ge a magəɗa a megemir ŋgar ana a ge a ŋgwal ŋa tsa, a pèt aba a ya. ²¹Ama wele ana a ge a dukw ana ndzer a ka, a dere a a təv dzaydzay ŋa ya. Dite gà mburma ta ŋgat a gà megemir ana a ge a nda magəsa ahəm aà Mbulum a.»

Gà Yesuw nda Yuhana metsìlwìɓè à mburma a yam

²²I dəba ŋa ya, gà Yesuw nda gà ɓəzla mazazama ŋgat ta mah ba i fataya, tə da aka ahəɗ Yuda. Tə ndza i fata zaakwa, a tsilwiɓewa à mburma a yam. ²³Yuhana tekeɗe, a tsilwiɓewa à mburma a yam i kwite Aynun, bise nda kwite Selim mbaŋa, aɗaba yam a riŋ i fata ka, hinne. Gà mburma tə dawaha a təv ŋgar, dite a tsilwiɓewa à tar a yam. ²⁴Akahər ata ka, tàa gəs Yuhana, tàa tike ŋgat a daŋgay zukw tsa.

²⁵A pat duwa ka, gà asiŋ gà ɓəzla mazazama Yuhana tə dza ba aà mimbètsèba ahəm nda kəla gà Yahuda ŋgiɗ duwa, aka gər məbàrà ba nda gà dukw tar ana ta barawa kamala ana a sàs a fəla tar a ya. ²⁶Aɗaba taŋa, gà ɓəzla mazazama Yuhana ata tə daha a təv ŋgar. Tə daha ka, ta gwaɗar: «Mala medzeŋge a mər, wele ana kà lə̀mum akahər ata ika lìdè dulwa Yurdan, kà ɗe a mər dər a ka, ŋgat a riŋ a tsilwiɓewe a à mburma a yam, dite gà mburma tserdze ti dehe a a təv ŋgar asa ana, meme?»

²⁷Yuhana a gwaɗa a tar aaka: «Wura a sle aà meŋgete a duwa tsa, na Mbulum aka vəlar tsiye. ²⁸Kurum nda gər kurum ka, kurum gà ɓəzla sida gà, na Yàa gwa ka, iye ka, *Kiristi, mala məmbə̀là à mburma ana Mbulum a gwa, i ti slir a kurumehe a ya ya. Ama iye ka, Mbulum na a slərra iye, i làhara aka miɗ a pəra. ²⁹Wele ana a zla daala awiya ŋa ya ka, daala ata ka, biy ŋgar dukw ŋgar. Ama masla zal dəm ata ka, mehìtsè ŋa i təv ŋgar, a riŋ à dze a zləm a mifefile masla ŋgar ata a tsiker a ya. Aka tsaraka kataya ka, a ŋgeye a ba hinne. Kamala taŋa ya, iye tekeɗe, maŋgayaba aka rah a gəzləŋ ga kinehe ka, hinne mbaŋa. ³⁰Ŋgat ka, say à sìkèh a à batsah ŋa aka miɗ aka miɗ, ama biy gà ka, à nìkìɗiŋa.»

Wele ana a dara i mbulum a

³¹«Wele ana a dara i təv Mbulum i gər ŋa ya ka, a za mburma tserdze. Wele ana ɗa ika gər ahəɗ a ka, mburma gər ahəɗ pəra, dite a tsik a ka, aà gà dukw ana ɗa ika gər ahəɗ a mbaŋa. Ama wele ana a dara i təv Mbulum i gər ŋa ya ka, ŋgat ika gər mburma tserdze. ³²A tsik a ka, aà dukw ana a tsaraka ya, ndəna a ŋgatar a. Ama ku mege kataya tekeɗe ka, wura a gəs bazlam ŋgar tsa. ³³Ama ku weke na aka gəs bazlam ŋgar a ka, taŋa a ne a mala sida Mbulum, à pèt a à ndzer ŋana kaɗəŋ. ³⁴Aɗaba wele ana Mbulum a slərra ŋgat a ka, a me a ka, à bazlam ŋgar, aɗaba a vəlar Mezite Mesife ŋgar, a ràhar dər tsìsl a gəzləŋ. ³⁵Ŋgat ka, Tsir Kəla, a waya Kəla ŋgar, a dzar gà dukw a ahər tserdze, dite ma kwara. ³⁶Wele ana aka gəs Kəla Mbulum a ka, aka ŋgat mesife ana à ndìv a tsa aà biybiy a. Wele ana aka dzar zləm tsiye ka, a ŋget a mesife ata tsa, ama matsəɓatsəɓ Mbulum a riŋ a ndze a ika gər ŋgar.»

Gà Yesuw nda məkəs gà Samariya duwa

¹Gà *Farisa tə tsaraka, gà na ti zezem a Yesuw, dite ka, a tsilwiɓ à tar a a yam a ka, hinne, tə za gà biy Yuhana. ²Tsaatsa ndzer ŋana ka, Yesuw aka tsilwiɓ aɗəm à mburma tsa. Say gà ɓəzla mazazama ŋgat na ti tsilwiɓewa aɗəm à tar a. ³Aləka i təv ana Yesuw a tsaraka dukw ana gà Farisa ata ti tsik ahər a ka, a mah ba ika ahəɗ Yuda ya, à mbìɗ a gər aka ahəɗ Galile. ⁴Vatwa ana a da a fataya ka, say ndaka ahəɗ Samariya.

⁵I təv ana a riŋ a de a ya ka, a ndze a kwite duwa ika ahəɗ Samariya, tə zalar Sikar. Kwite ata ka, bise nda gùvàh Zakup ana a vəl a kəla ŋgar Yasufa akahər ata ya. ⁶Dite sùwà Zakup ana a le ya ka, i fata mbaŋa. Yesuw a ndzeha aà gùva sùwà ata ka, a ndza a bəɗ, aɗaba aka ya ba. Mendze ana ti ndzeha a fataya ka, tits magər pat aka ge.

^7-8I dəba ŋa ya, gà ɓəzla mazazama ŋgat tə da a huɗ kwite a mayaha dukw mezime. I təv ana tə da iɗəm a ka, məkəs gà Samariya duwa a daha aka matəfa yam. Yesuw a gwaɗar: «Viliŋ yam, i se a te.» ⁹Məkəs ata a gwaɗar: «Abaya kər ka, gà Yahuda, wànà meme na ki wiz aà iye a yam, aà iye ana gà Samariya ya?» A tsiker taŋa ka, aɗaba gà Yahuda tə lə̀mawa akaba à ahər nda gà Samariya tsa. ¹⁰Yesuw a gwaɗar aaka: «Na mege kà sər dukw ana Mbulum a vile a a mburma ya, dite kà sər iye na i wiz aà kər yam a ka, kər ivaɗ na ki wiz aà iye a yam ana a vile a mesife a mburma ya, dite ka, i vilek a ya.»

¹¹Məkəs ata a gwaɗar: «Əbay, araha sùwà kwitsikw, dite kwets dukw matəfara ŋa iɗəm a tekeɗe, a riŋ aà kər tsəna, ki ŋgeter a yam ata a vile a mesife a mburma ya dze ana, i ŋga ya? ¹²Batsah tsir kwa Zakup na a le a mər sùwà aaha akahər ata ya. Ŋgat nda gər ŋgar tekeɗe, aka sa iɗəm yam a mbaŋa. Dite gà ɓəza ŋgar nda gà dukw gənaw ŋgar tserdze ibam, tàa sa mbaŋa asa. Dite kər kà dzala ana, kà za Zakup ya, na kər a?» ¹³Yesuw a gwaɗar aaka: «Wur ana aka sa yam sùwà aaha ya ka, i dəba ŋa ya, yam à kìɗewe a ŋgat asa. ¹⁴Ama wur ana aka sa yam ana i viler a ya ka, yam à kiɗ a ŋgat diydiy asa tsa. Aɗaba yam ana i ta viler a ya ka, a ti ne a kamala biye yam ana ùwaɗ ùwaɗ à ŋgìzere a iɗəm a, a viler a mesife ana à ndìv a tsa aà biybiy a.»

¹⁵Məkəs ata a gwaɗar asa: «Əbay, kamkam, viliŋ yam ata, dite ka, yam ma ta kiɗ iye asa tsa, dite ka, i tə dara aka sùwà aaha aà matəfa yam diydiy asa tsa te.» ¹⁶Yesuw a gwaɗar: «Daha, tə zalaha a zal yak, ka dumara a faha ya.» ¹⁷Məkəs ata a gwaɗar aaka: «Zal gà a riŋ tsa.» Yesuw a gwaɗar asa: «Kù gwa zal yak a riŋ tsəka, ndzer. ¹⁸Aɗaba kàa da a zal ka, medzige ə̀zləm, dite wele ana kinehe kər i ma ŋgar a tekeɗe, zal yak ɓav tsa asa. Kà tsikiŋ ka, ndzer dukw ŋgar.»

¹⁹Məkəs ata a gwaɗar: «Əbay, i sər ka, kər mala məma à guma Mbulum. ²⁰Gà batsah tsir mər gà Samariya ana akahər ata ya, tə dzawa gurmits a bəɗ a Mbulum ka, ika gər kwite aaha, ama kurum gà Yahuda kù gwaɗum, təv mazàmbàɗà à Mbulum ka, i Yeruzalem ɗekɗek ana, meme?» ²¹Yesuw a gwaɗar aaka: «Daala aaha, gəs dukw ana i tsikik a ya, pat ŋa a dere a ka, mburma ti dze a gurmits a bəɗ a Mbulum i gər kwite aaha, kige tsa i Yeruzalem ɗekɗek tsa. ²²Kurum gà Samariya ka, kà sərum wele ana ki dzwìmer a gurmits a bəɗ a nda ndzer tsa. Ama mər gà Yahuda ka, mì sər wele ana mìi dzer a gurmits a bəɗ a. Aɗaba wele ana a mbil a à mburma ya ka, a dere a ka, i təv gà Yahuda ya. ²³Ama pat ŋgiɗ a deriŋa, kamala megweɗe ya ka, aka mbər mendzera, ama ka, Mezite Mesife Mbulum a vile a ndzəɗa a mburma aà mazàmbàɗà à Mbulum Tsir gà nda ndzer ŋa nda gəzləŋ ilik, aɗaba a sasar ka, na tì dzer a gurmits a bəɗ kataya ya. ²⁴Mbulum ka, Mezite Mesife, dite gà mburma ana a sàs a tar ti dzer a gurmits a a bəɗ a ka, say ti dzer a ka, nda ndzəɗa Mezìtè Mesife ata nda gəzləŋ ilik.»

²⁵Məkəs ata a gwaɗar: «I sər ka, *Masihu a deriŋa, wele ana tə zalar *Kiristi, mala məmbàlà à mburma ana Mbulum a gwa, i ti slir a kurumehe a ya. Aka dara ka, a ti ɗif a mər a à duwa tserdze.» ²⁶Yesuw a gwaɗar aaka: «Iye ŋa ka, naha i fèfilek a ya.»

²⁷I təv ana tar riŋ ta fèfil a ya ka, gà ɓəzla mazazama ŋgat aaha ndeɗiŋa ya, tàa màra tsara. Ta ŋgat a Yesuw ana tar riŋ ta fèfil a nda məkəs ata ya ka, a ge aà tar kamala sunwa ya. Ama wura ilik ika magər tar a aka wiz aà məkəs ata, aka gwaɗar ka: «Ki yehe a là na i təv ŋgar a?» kige tsa aka wiz aà Yesuw ka: «Aàmala na ki fèfilwim a nda ŋgat a?» tsa.

²⁸Məkəs ata a miyak à dzagwaya ŋgar a fata, a mbəɗ gər a kwite. A daha, a gwaɗa a gà mburma ana i fataya: ²⁹«Dumara, fə̀rum aà wele duwa a ɗemiŋara gà dukw ana i gewa akahər ata tserdze ya, aà are ya kwaŋ. Wànà a ge a ana, Kiristi, mala məmbàlà à mburma ana Mbulum a gwa, i ti slir a kurumehe a ya kəla ya?» ³⁰Gà mburma tə tsaraka kataya tsara ka, ta màhara ba ya, tə da a təv Yesuw ana ŋgat iɗəm a.

³¹I təv ana ndeɗiŋa, məkəs aaha a da iɗəm a, a huɗ kwite ya ka, gà ɓəzla mazazama Yesuw ta hamar, ta gwaɗar: «Mala medzeŋge mər, zəm dukw mezime aaha zaakwa te.» ³²Ama a gwaɗa a tar aaka: «Dukw mezime gà a riŋ pam, na i zim a ya, aɗaba kà sərum tsa.» ³³Gà ɓəzla mazazama ŋgat ata tə tsaraka kataya ka, ta gwaɗaba ika magər tar: «Ee, wura aka zlarra dukw mezime ŋgiɗ a kəla ya?»

³⁴Yesuw a gwaɗa a tar: «Dukw mezime gà ka, say mege dukw ana a sàs a wele ana a slərra iye ya, nda mandəva à mege megemir ana a viliŋ a ahər aà mege ya. ³⁵Kurum kù gwaɗum ana, a zeha kiye faɗ ka, ta pele a gà duwa i bəɗ a tsiye. Ama iye ihər i gweɗe a kurum ŋa: Fə̀rum aà gà gùvàh lele, gà wur gà dukw ana iɗəm a, tàa nàhaya, aka ge mipele ide. ³⁶Wele ana a pele a dukw i bəɗ a ka, a ŋget a dukw mayaba ŋgar daga aà kinehe ya, dite a yehe a gər a gà wur gà duwa. Gà dukw ata tserdze ya ka, kamala megweɗe ya ka, gà mburma ana ta ŋget a mesife ana à ndìv a tsa aà biybiy a. Kərga taŋa ya, gà wele ana a slige duwa, nda wele ana a pele a i bəɗ a ka, ta ŋgeye a ba məma. ³⁷Aɗaba bazlam minew ata ti tsik, ta gwa, wele ŋgiɗ a sligiŋa, mìsle ŋgiɗ a pele a i bəɗ a ka, ndzer kaɗəŋ. ³⁸Yàa slər kurum aà məpala dukw i gùvàh ana kurum kà fə̀tum tsiye. Gà mìsle ŋgiɗ na ta fət a, dite kurum ki ŋgeslwim a təv mifìte tar ata.»

³⁹Ama ka, gà Samariya ana i kwite ata ya hinne, ta gəs Yesuw nda gəzləŋ tar, aɗaba ana məkəs ata a gwaɗa a tar: «A ɗemiŋ dukw ana iye i gewa akahər ata tserdze ya» ya. ⁴⁰Aɗaba taŋa, i təv ana ti ndzeha a təv Yesuw a ka, ta hamar, dite ka, ma ndza i təv tar te. Yesuw a gəs bazlam tar ata kaɗəŋ. A ndza i təv tar ata mehinne sula. ⁴¹I huɗ mendze ŋgar ata ya ka, a tsik a tar bazlam Mbulum. Gà mìsle ŋgiɗ hinne, ta gəs ŋgat nda gəzləŋ asa, aɗaba dukw ana a tsik a tar a. ⁴²Ta gwaɗa a məkəs ata: «Mì gəs ŋgat nda gəzləŋ ka, aɗaba dukw ana kà ɗama a mər a ɗekɗek tsa, aɗaba mər tekeɗe, maa tsaraka bazlam ŋgar, dite mì sər ndzer, ŋgat ka, mala məmbàlà à mburma kaɗəŋ.»

Yesuw a mbəl à kəla batsah mala megemir ŋgumna duwa

⁴³Yesuw a ndza i fata mehinne sula ka, a mah ba i fataya, a de a aka ahəɗ Galile ana kwite ŋgar iɗəm a. ⁴⁴Ama kə̀la ka, Yesuw nda gər ŋgar a gwa: «Ta gis a mala məma à guma Mbulum i kwite ŋgar tsa.» ⁴⁵Tsaatsa, aləka a ndzeha a Galile ka, gà mburma ana ika ahəɗ ata ya, ta gəs ŋgat nda ahər sula lele, aɗaba tar tekeɗe, tàa da a *megirive Paska ata a Yeruzalem, dite tàa ŋgat a dukw ana Yesuw a ge akahər megirive ata ya mbaŋa.

⁴⁶Aləka i dəba ŋa ya, Yesuw a mbəɗ riŋ gər a Kana ika ahəɗ Galile i fata, a təv ana a lah mege iɗəm dukw mene aà mburma, a ne à yam dukw makwàsà ŋa həmbasləslsla ya. I təv ana Yesuw a riŋ i fataya ka, batsah mala megemir ŋgumna duwa a riŋ, kəla ŋgar a riŋ ŋgwala tsa i dukw məməta, mahə̀nà ŋa i kwite Kafarnahum, bise nda təv ata. ⁴⁷A tsaraka, Yesuw ana aka dara i Yuda ya aka ahəɗ Galile ya ka, a daha a təv ŋgar. A hamar, a gwaɗar: «Kamkam, da mbiliŋ à kəla gà duwa a riŋ à mìt a te.»

⁴⁸Yesuw a gwaɗar aaka: «Ama kurum ka, ki giswim a iye tsa, say na kàa ŋgatum a gà dukw mene aà mburma ana i ge a ya dzekwiŋ.» ⁴⁹Batsah mala megemir ŋgumna ata a gwaɗar aaka mbaŋa: «Əbay, ŋgulum tama tsara, mbàma aba, tsəka, kəla gà ata a ta mìtiŋa.» ⁵⁰Yesuw a gwaɗar: «Da a ma, kəla yak a mbiliŋa.» Wele ata a gəs dukw ana a tsiker a tsara, a mah ba, a da a ma kaɗəŋ.

⁵¹I təv ana wele ata a de a a ma, aka ndze a ma zukw tsiye ka, gà ɓəzla megemir ŋgar ta ŋgəzlaraha gər aà vatwa. Tə daha, ta gwaɗar: «Kəla yak ka, aka mbəl.» ⁵²A tsam aà tar, a gwaɗa a tar: «Dukuməŋa a ger ŋgulum dze ana, ndeɗime seyiŋ a?» Ta gwaɗar aaka: «A ger ŋgulum ka, ndavana ndaàwa nda ndzemde ilik ŋa.» ⁵³I fataya ka, wetititittè a màra a gər a tsir kəla ata ya kuɗa, tits akahər ana Yesuw a gwaɗar ka, kəla yak a mbil a ya. I dəba ŋa ya gà wele ata nda gà mburma ana i ga i ma ŋgar a tserdze, ta gəs Yesuw nda gəzləŋ.

⁵⁴Dukw ata a ge ba ka, i dəba na Yesuw a dara ika ahəɗ Yuda ya, a mbəɗ gər aka ahəɗ Galile ya. Taŋa na a ne dukw mene aà mburma ana masula ŋa a ge i fataya.

Yesuw a mbəl à mala magàha a bəɗ duwa aà gùva

duluv Baytidzata

¹I dəba ŋa ya ka, megirive gà Yahuda duwa aka ndze aɗəm, dite Yesuw a mbəɗ gər a Yeruzalem asa. ²Ama i fata ka, duluv duwa a riŋ bise aà gùva biye zlagam ana tə zalar biye hərmaga gà təmaŋ a. Zləm duluv ata ndaka ahəm gà Yahuda ka, Baytidzata. I fata ka, ga a riŋ mazlazla ŋa tsèke tsə̀ràh, dzə̀ɓər iɗəm ə̀zləm. ³Gà ɓəzla dukw məməta hinne ta hənawa iɗəm: Gà ɓəzla guluf, nda gà ɓəzla videl, dite nda gà ɓəzla magàha a bəɗ tserdze. {Tar riŋ ta bebe a yam ana a ɓezle a ya. ⁴Aɗaba a pat ŋgiɗ ka, gawla Mbulum a dawara, a ɓezle a dər. Aka ɓazla dər ka, gà ɓəzla dukw məməta ata ti de aɗəmiŋa. Dite malahalah ŋana a lah aɗəm a ka, a mbiliŋa, ku mege dukw məməta awara tekeɗe ya.}

⁵I liwiŋ gà mburma ata ka, wele duwa a riŋ, aka ndza i dukw məməta hinne, mive dzik makər gəra tsamakər. ⁶Aləka i təv ana Yesuw a ndzeha a təv gà mburma ata ya ka, a ŋgatar mahə̀nà ŋa zleleɓɓè, a sər ka, aka ndza i dukw məməta hinne. A gwaɗar: «A sàsak mimbile ya?» ⁷Mala dukw məməta ata a gwaɗar: «Əbay, wura a riŋ na dite à yè a iye a yam a tsa, na i təv ana aka ɓazla ya. I gwaɗawa, i dzik aba a aà matara aɗəm ka, mìsle ŋgiɗ à lèhiŋ aɗəmiŋa.» ⁸Yesuw a tsaraka kataya ka, a gwaɗar: «Hitse, zla bwitse yak, ka da ba.» ⁹I fataya tsara ka, wele ata a mbəl kaɗəŋ, a hitse, a zla bwitse ŋgar, a da ba.

Ama a pat ata a mbəl a ka, pat mesìfìkà ba gà Yahuda. ¹⁰Aɗaba taŋa, gà bàba gà Yahuda ta gwaɗa a wele ata: «Kay, naka ana meme, mbakum ka, pat mesìfìkà ba ya, məpala ahəm kwa aka vəlak vatwa aà mazla bwitse yak tsiye?» ¹¹Wele ata a gwaɗa a tar aaka: «Wele ana a mbəl à iye ya, na a gweɗiŋ ka, zla bwitse yak, ka daba ya.» ¹²Tə tsam ahər asa, ta gwaɗar: «Weke na a gwaɗak ka, daba ya?» ¹³Ama wele ata a sər, weke na a mbəl à iye ya ka, a sər tsa. Aɗaba Yesuw aka daba i fataya tsara, a miyak à gà mburma hinne i fata.

¹⁴I dəba ŋa ya, Yesuw a le aà wele ata i ga Mbulum batsah ŋana ka, a gwaɗar: «Araha, kinehe ka, kàa mbəl kuɗa. Ama kə̀la ka, ka ta ge bakal asa tsa, aɗaba dukw ŋgiɗ ma ta gik ba a gər, mà za taŋa tsa.» ¹⁵Wele ata a da i fataya, a daha, a gwaɗa a gà bàba gà Yahuda: «Yesuw na a mbəl à iye ya.» ¹⁶Aɗaba taŋa na gà bàba gà Yahuda ata tə dza ba aà mene are a Yesuw a, agəra ana a mbəl à wele ata a pat mesìfìkà ba ya. ¹⁷Ama Yesuw a gwaɗa a tar aaka: «Tsir gà a riŋ ihər a ge a megemir kəla pat, dite iye tekeɗe, i ge a kataya mbaŋa.» ¹⁸Gà bàba gà Yahuda tə tsaraka taŋa ka, ti yaha vatwa aà makə̀ɗà ŋgat. Ta kiɗ a ŋgat ka, aɗaba ana a nəs à məpala ahəm tar, a mbəl à mburma a pat mesìfìkà ba ya ɗekɗek tsa. Ta waya makə̀ɗà ŋgat ndeyndey ŋana ka, agəra ana a zal a Mbulum, a gwa ka: «Tsir gà», a geye akaba à ba ŋgar nda ŋgat a.

Ndzəɗa Yesuw Kiristi Kəla Mbulum

¹⁹Aɗaba taŋa, Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Iye Kəla ŋgar, i sle a aà mege duwa ilik nda ahər gà tsa, say i ge a ka, dukw ana i ŋgatar Tsir gà a gewa ya. Aɗaba dukw ana tserdze Tsir gà a gewa ya ka, iye Kəla ŋgar ŋa tekeɗe, i ge a kataya mbaŋa. ²⁰Aɗaba Mbulum a waya iye Kəla ŋgar, dite a riŋ a ɗifiŋ a à dukw ana ŋgat ŋa a ge a tserdze ya mbaŋa. A ti ɗifiŋ a à gà megemir gà bàba ŋa ana à zè a naha kinehe ya, aka miɗ mbaŋa asa. Ama taŋa na a ta ge aà kurum a kamala sunwa ya. ²¹Kamala Tsir gà ana a mbil a à mburma i məməta ya, a vile a ter a mesife awiya ŋa ya asa ka, iye Kəla ŋgar ŋa tekeɗe, i ta vile a mesife ata a gà na i pala tar a mbaŋa. ²²Seriye ka, Tsir gà a ge a nda ahər ŋgar tsa. Ama a viliŋ ndzəɗa a ahər a iye, Kəla ŋgar, aà mege ŋa. ²³A ge dər kataya ka, dite gà mburma tserdze tə̀ zlə̀b à iye kalkal, kamala ana tì zlibe a à Tsir gà ya mbaŋa. Wele ana à zlibe a à iye Kəla ŋgar tsiye ka, taŋa ka, a zlibe a à Tsir gà ana a slərra iye ya ɓav tsa.

²⁴Iye ihər i gweɗe a kurum a nda ndzer, pàrsa iɗəm tsa: Wele ana aka dza zləm a bazlam gà, dite aka gəs Mbulum ana a slərra iye ya asa ka, aka ŋgat mesife ana à ndìv a tsa aà biybiy a. Seriye à gis a ŋgat tsa, aka be aà məməta ya a mesife. ²⁵Iye ihər i gweɗe a kurum ŋa nda ndzer, pàrsa iɗəm tsa: Pat ŋa a deriŋa, kamala megweɗe ya ka, aka mbər mendzera kinehe, ama ka, gà məməta ti tsereke a biye ɗa Kəla Mbulum, dite ka, gà na tàa tsaraka ya ka, ta mbiliŋa. ²⁶Mbulum Tsir gà ka, ndzəɗa Mesife i ba ŋgar. Ama ka, aka viliŋ ndzəɗa ata a ahər a iye, Kəla ŋgar, mbaŋa, na dite i vile a mesife ata a mburma ya. ²⁷Ŋgat mbaŋa na a viliŋ ndzəɗa a iye, Kəla ŋgar, aà mege seriye aka gər gà mburma ya, aɗaba ana iye wele ana a dara i təv ŋgar a. ²⁸Gà dukw ata ma ta ge aà kurum kamala sunwa ya tsa. Aɗaba pat ŋa a dere a ka, gà məməta ana i biye ya tserdze, ti tsereke a biye ɗa gà. ²⁹Tàa tsaraka ka, ta hitsere a i gà dive tar a. Gà na tàa ge dukw ana ŋgwal ŋa ya ka, ta mbil a, dite ta ŋget a mesife ana à ndìv a tsa aà biybiy a. Ama gà na tàa ge dukw ana ŋgwal ŋa tsiye ka, ta mbilere a i tar ka, aà mehìtsè aka miɗ seriye Mbulum pəra.»

Mbulum na a ge sida Yesuw Kiristi ya

³⁰I dəba ŋa ya, Yesuw a gwaɗa a tar asa: «Iye nda gər gà ka, i sle a aà mege duwa ilik tsidze, say nda ndzəɗa Mbulum. I ge a seriye ka, kamala ana ŋgat a tsikiŋ a. Mege seriye ga ka, nda ndzer ŋa, aɗaba i zle ahər a tsa. Ama i ge a ka, dukw ana a sàs a wele ana a slərra iye ya, tsəka, biy na a sèsiŋ a tsa. ³¹Na iye ŋa na i gebe a sida ba gà ŋa ya ka, dite meme na gà mburma ti sir a dər, i tsik ka, ndzer ŋa ya? ³²Ama mìsle ŋgiɗ a riŋ na mala sida ga ya, dite i sər dər, dukw ana a tsik a à iye ya ka, ndzer kaɗəŋ.

³³Zləm wele ata ka, Yuhana. Akahər ata ka, kàa slərum gà mburma a təv ŋgar, dite ka, ma ɗe a kurumara à dukw ana i ge ya, wànà pàrsa ya, tsəna, ndzer kaɗəŋ a ya? Ama tə tsarakara ihər a ka, ndzer kaɗəŋ. ³⁴Iye ka, sida mburma a giŋ a ŋgulum tsa. Ama i tsik a kurum bazlam Yuhana ka, aà mazlàkà kurum, na dite ki mbelwim a ya. ³⁵Akahər ata Yuhana a ne ka, dzaydzay kamala lalampa ana à div a ya. Kàa gəsum bazlam ŋgar zaakwa, kàa ŋgayum ba i təv dzaydzay ŋgar ata ya mbaŋa. ³⁶Ama iye ka, mala sida gà a riŋ, a za biy Yuhana ana a ge ya. Aɗaba megemir ana iye ihər i ge a ya ka, biy Tsir gà ana a viliŋ a ahər a, dite na i ge a ya. Mege megemir ata na a ne mala sida gà, mburma ti sir a dər ka, Mbulum Tsir gà na a slərra iye kaɗəŋ a. ³⁷Tsir gà na a slərra iye. Ŋgat nda gər ŋgar tekeɗe, aka ge sida gà mbaŋa. Ama kàa tsarakum mifefile ŋgar tsidze, dite kàa ŋgatumar ilik tsa asa mbaŋa. ³⁸Kàa tikwim bazlam ŋgar a gər kurum, aà ma ndza i gəzləŋ kurum tsidze mbaŋa, aɗaba ana kàa gəsum iye, Kəla ŋgar ana a slərra iye tsiye. ³⁹Kurum ihər ki dzeŋgwim a wakita Mbulum kəla pat. Kà dzalum ka, ki ŋgetwim a iɗəm mesife ana à ndìv a tsa aà biybiy a. Tsaatsa i huɗ wakita ata ti tsik a ka, aka gər gà. ⁴⁰Dite kwets a sàs a kurum madàra a təv ga ya, aà meŋgete a mesife ata ndzer ŋa ya tsa.

⁴¹Iye ka, i yehe a mezlibe mburma ana tì zlibe a à iye ya tsa. ⁴²Ama i sər, kurum ka, kà wayum Mbulum tsa. ⁴³Aɗaba i dara ka, Mbulum Tsir gà na a slərra iye a təv kurum a. Ama ka, kàa gəsum iye tsa. Ama na bəla wura a dara a təv kurum a nda ndzəɗa ŋgar ka, ki giswim a ŋgat lele. ⁴⁴A sàs a kurum ka, mazàmbaɗàyà à ba kurum ɗekɗek pəra. Ama a sàs a kurum mayaha mezlibe ana a dara i təv Mbulum ana ŋgat ilik a tsa. Na kataya ana, dite meme na ki slwim a aà magəsa iye ɗar ɓav a? ⁴⁵Ama ka tə dzalum ka, i ta me a kurum a à bakal ika miɗ Tsir gà tsa. Na a ta me a kurum a à bakal ka, Musa ana kà tikwim madzala gà gər kurum a təv ŋgar a ivaɗ. ⁴⁶Na mege kàa gəsum bazlam Musa nda gəzləŋ kurum ndzer ka, ana ka, ki giswim a iye mbaŋa, aɗaba aka gər gà na a wetse bazlam akahər ata ya. ⁴⁷Araha kwets kàa gəsum dukw ana a wetse ya tsəna, dite meme na ki slwim a aà megìse bazlam gà asa ya?»

Yesuw a vəl dukw mezime a gà mburma hinne, ti ze a

dəbuw ə̀zləm

Mata 14:13-21; Markus 6:30-44; Luka 9:10-17

¹Aləka i dəba ŋa ya, Yesuw a mah ba i fataya, a daba aka lìdè duluv Galile. Tə zal a zləm duluv ata ka, Tiberiyas asa mbaŋa. ²Gà mburma hinne tə zazam ŋgat, aɗaba ana tàa ŋgat a dukw mene aà mburma ana a ge, a mbala à gà mburma i dukw məməta ya ya. ³Aləka ti ndzeha a fata ka, gà Yesuw nda gà ɓəzla mazazama ŋgat tə daha, tə tsala aka dìyes duwa, tə ndza riŋ a bəɗ a fata. ⁴Akahər ata ka, megirive gà Yahuda ana tə zalar Paska ya, aka à mendze aɗəm. ⁵Yesuw a fə̀r ikaba ya ka, gà mburma a riŋ ti dehe a a təv ŋgar hinne. Aɗaba taŋa, a gwaɗa a a Filip: «Ki slekwe aà mesìkimere a dukw mezime aaha ana, i ŋga ya, na aà mivile a gà mburma aaha ide ya?» ⁶A tsiker kataya ka, aà mesèmete dər, meme na Filip a gweɗe aaka a ya. Aɗaba ŋgat ŋa ka, aka səraba dukw ana a ge a ya. ⁷Filip a gwaɗar aaka: «Ku mege kà sə̀kəmakwara dukw mezime ŋa biy kur siŋgwe dərməka sula tekeɗe ka, a sle a ter a tsa, na dite bəla ku weke a ŋget a zaakwa zaakwa tekeɗe ya.» ⁸Mìsle ŋgiɗ ilik ika magər gà ɓəzla mazazama Yesuw ata ya, zləm ŋgar Andire, damər Simun Piyer, a gwaɗar: ⁹«Kəla duwa naha i faha ka, tapa ɗaf ihər ə̀zləm, nda kilif sula mbaŋa dze ana, taŋa na a ge a ŋgulum a gà mburma aaha hinne ya ya?»

¹⁰Yesuw a gwaɗa a gà ɓəzla mazazama ŋgat ata: «Gwaɗum a gà mburma tə ndzaya a bəɗ tserdze.» Gà mburma tə tsaraka kataya ka, tə ndzaya a bəɗ aka kwizir a riŋ mbèffe i bəɗ i fata hinne. Ama gà mburma ana i fataya, gà ɓəzla ga ɗekɗek ka, ti sle dəbuw ə̀zləm. ¹¹Yesuw a daha, a ndzək tapa ɗaf ata, a ge dərraha kəkaaha a Mbulum, dite a dzaya a ba a gà mburma ata mandza ŋa i bəɗ a. I dəba ŋa ya, a ndzək kilif ata, a ge dər kamala taŋa ya asa mbaŋa, dite ku weke a zəm dukw mezime ata ka, a sler kamala ana gəzləŋ ŋgar a waya ya. ¹²Tə zəm ɗaf ata a sleye a tar lele ka, Yesuw a gwaɗa a gà ɓəzla mazazama ŋgat ata: «Yahum akaba gər a gà asiŋ ŋa ana a zeha ya, kwizikw ma ze a bəɗ tsa.» ¹³Tə tsaraka kataya ka, tə daha, ti yaha gər a gà mezehe tapa ɗaf ata ə̀zləm ŋa, gà mburma tə zəm ihər a. Ti yahar gər ka, a raha a gà tàkwasa kurwa gəra sula.

¹⁴Gà mburma ata i fataya, ta ŋgat a dukw mene aà mburma ata Yesuw a ge ya ka, ta gwa: «Wele aaha ka, mala məma à guma Mbulum ana ta gwa, a dere a aka gər ahəɗ a ndzer kaɗəŋ.» ¹⁵Yesuw a səraba, gà mburma ata ti dere a, ti tike a ŋgat aà mene Əbay tar nda ndzəɗa ka, a mbəɗ gər, a tsəlaba aka dìyes ata à gər ŋgar.

Yesuw a de a ika gər yam a nda sik

Mata 14:22-33; Markus 6:45-52

¹⁶Aləka hawa a ge ka, gà ɓəzla mazazama Yesuw tə tarra aà sik kwite ata ya, aà gùva duluv a. ¹⁷Tə tsala a slə̀làh yam. Ta waya ti de a dər aka lìdè duluv ata, a Kafarnahum. I təv ana ti de a ya ka, həvəɗ a gəs tar aà vatwa, Yesuw aka ndze a təv tar zukw tsa. ¹⁸Duluv yam ata a dza ba aà miɓezle wàkit wàkit hinne, aɗaba himbiɗ a riŋ ihər a ge a nda ndzəɗa. ¹⁹I təv mede tar ata ya ka, tàa da ka, kiliwmeter ə̀zləm, kige tsa ndilik. Aləka ta fə̀r ikaba ya ka, ta ŋgataha a Yesuw a riŋ a de a ika gər yam a nda sik tsə̀pàk tsə̀pàk, bise aka à mendzeha a təv tar. Ta ŋgatar kataya ka, ta ge magəɗa hinne. ²⁰Ama Yesuw a gwaɗa a tar: «Ki gwim magəɗa tsa, iye na naha ya.» ²¹Ta waya magə̀saha ŋgat a slə̀làh yam a təv tar a fata zləmana ya. Tsam ka, tàa ndze aà gìgìze tsara, a təv ana a sàs a tar aà mede aɗəm a.

Gà mburma hinne ti yehe a Yesuw

²²Ndidwe ŋana ka, gà asiŋ gà mburma ana ti zeha i dəba i fataya, ti yehe a Yesuw. Tə dzala ka, ta gwa: Slə̀làh yam a da ka, ilik pəra ka, kwets Yesuw iɗəm ɓav tsa, gà ɓəzla mazazama ŋgat ɗekɗek na tə da dər ana, Yesuw dze ana, i ŋga? ²³Ama gà asiŋ gà slə̀làh yam ŋgiɗ tə dara i kwite Tiberiyas a bise nda təv ana ndeɗiŋa BATSAH kwa ŋa a zla dukw mezime, a ge dərraha kəkaaha a Mbulum, dite a vəl a mburma, tə zəm a. ²⁴Aləka gà mburma ata ta fə̀r ka, ku gà Yesuw nda gà ɓəzla mazazama ŋgat tekeɗe, tar riŋ i fata asa tsəka, tə tsala a gà slə̀làh yam ata, tə da a kwite Kafarnahum, a mayaha Yesuw a fata.

Yesuw a ne dukw mezime ana a vile a mesife a mburma ya

²⁵Ti ndze aka lìdè duluv ŋgiɗ ka, ti le aà Yesuw a fata kaɗəŋ. Ta gwaɗar: «Mala medzeŋge a mburma, kà dara a faha ya ana, ndeɗime?» ²⁶Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ki yehwim a iye ka, aɗaba na kàa zəmum ɗaf, a sle a kurum a ɗekɗek pəra, tsəka, kàa tikwim dukw mene aà mburma gà ana i ge ya aà ahər tsa. ²⁷Ka ta gwim megemir aɗaba dukw mezime ana ika gər ahəɗ, a ndze a hinne tsiye tsa. Ama gwim ka, aɗaba dukw mezime ana, a ndze a hinne, à ndìv a tsa aà biybiy, a vile a mesife a mburma ya ivaɗ. Dukw mezime ata a ndze a hinne, à ndìv a tsiye ka, iye, *wur ana a dara i təv Mbulum a, na a ta vile a a mburma ya. Aɗaba Mbulum Tsir gà na a viliŋ ndzəɗa aà mege dukw ata ya.»

²⁸I fataya ka, gà mburma ata tə tsam aà Yesuw, ta gwaɗar: «Mìi ge a dze ana, meme, na dite mìi ge a gà mege megemir ata a sàs a Mbulum a?» ²⁹Yesuw a gwaɗa a tar aaka: «Mege megemir ana Mbulum a veve a i təv kurum a ka, magəsa iye, iye wele ana Mbulum a slərra iye ya, nda gəzləŋ.» ³⁰Ta gwaɗar aaka: «Na kataya ana, ki ge a ana, medzibe dukw mene aà mburma awara, na mìi ŋgeter a ka, dite mìi gis a dər kər nda ndzer a? Ɗe a mər dər te. ³¹Aɗaba akahər ata i təv ana gà tsir kwa tə ndzawa i kusak, ti de a aka ahəɗ Kanan a ka, tàa zəm dukw mezime ana a dara i gər ŋa, tə zalar *mana ya, kamala ana ta wetse i wakita Mbulum, ta gwa ka: <Mbulum aka vəl a tar dukw mezime ana a dara i gər ŋa ya, tə zəm.> «*fa*

³²Yesuw a gwaɗa a tar aaka: «Iye ihər i tsik a kurum a nda ndzer, pàrsa iɗəm tsa: Dukw mezime ata akahər ata Musa a vəl a kurum i kusak a ka, na a dara i mbulum a nda ndzer a tsa. Ama dukw mezime ana Mbulum Tsir gà a vile a kurumara a i gər ŋa ya, na ndzer a. ³³Aɗaba dukw mezime ata Mbulum a vile a a mburma ya ka, nda ahər wur ana a tarra i gər ŋa ya. Ŋgat na a ne dukw mezime ata, a vile a mesife a mburma ya.» ³⁴Ta gwaɗar: «Əbay, vəl a mèr slala dukw mezime ata kəla pat te.» ³⁵Yesuw a gwaɗa a tar: «Iye na a ne dukw mezime ata a vile a mesife a mburma ya. Wur ana a dere a a təv ga ya ka, may a wir ahər a tsa, dite wur ana à gis a iye nda gəzləŋ ŋgar a tekeɗe ka, yam à kiɗ a ŋgat asa tsa mbaŋa.

³⁶Ama ar ka, kamala ana i lah metsike a kurum a, kàa ŋgetwimiŋ, dite kwets kàa gəsum iye nda gəzləŋ ɓav tsa. ³⁷Gà mburma ana Tsir gà a dziŋ tar tserdze ya ka, ti dere a a təv gà ya, dite iye tekeɗe ka, wur ana aka dara a təv ga ya ka, i niw a ŋgat tsa. ³⁸Aɗaba i tarra i gər ŋa ya ka, aà mege dukw ana a sèsiŋ a tsa. Ama i dara, i ge a ka, dukw wele ana a slər aakara iye ya. ³⁹Dukw ana a sàs a wele ana a slərra iye ya ka, araha: Gà mburma gà ana a dziŋ tar a ahər a ka, ilik ma dzeye tsa. Ama ka, i mbele a à tar i məməta ya, a pat mandəvandəv gər ahəɗ ivaɗ. ⁴⁰Dukw ana a sàs a Tsir gà ya ka, araha: Gà mburma ana tàa ŋgetiŋ, a iye, Kəla Mbulum, dite tàa gəs iye nda gəzləŋ tar a ka, ta ŋget a mesife ana à ndìv a tsa aà biybiy a, dite ka, i mbele a à tar i məməta ya, a pat ana gər ahəɗ à ndìv a ya.»

⁴¹I dəba bazlam ata Yesuw a tsik a tar a ka, gà mburma ata tə dza ba aà masàyà ahəm aka gər Yesuw hinne, a tsəɓ a tar, aɗaba ana a gwa: «Iye ka, i ne dukw mezime ana a tarra i gər ŋa ya» ya. ⁴²Ti tsik akaba ika magər tar, ta gwa: «Abaya ŋgat ka, mì sər gà tsir ŋgar nda mama ŋgar. Ŋgat ka, Yesuw, kəla Yasufa dze ana, meme na a gweɗe a ka, i tarra i gər ŋa ya ya?» ⁴³Yesuw a sər a taraha aka dukw ana tə dzala ya, a gwaɗa a tar: «Aàmala na ki seywim a aka iye ahəm kataya dze ya? Miyakum à mege arəv ana ki gwim aka iye a ika magər kurum a. ⁴⁴Aɗaba wura a sle a aà medera a təv ga ya tsa, say na Tsir gà ana a slərra iye ya, aka gəsara ŋgat a tsiye. Ama ku weke na aka dara a təv ga ya ka, i ta mbil a à ŋgat i məməta ya, a pat ana gər ahəɗ à ndìv a ya. ⁴⁵Akahər ata gà ɓəzla məma à guma Mbulum ta wetse i wakita, ta gwa ka: <Gà mburma tserdze ka, Mbulum nda gər ŋgar na a ɗif a ter a à guma ŋgar a.> Aɗaba taŋa, wur ana aka dza zləm a guma Tsir gà, dite aka gəs a ka, a dere a a təv ga ya.*fb* ⁴⁶Taŋa ka, kərga megweɗe ya, wura aka ŋgat a Tsir gà ilik ɓav tsa. Say iye, wur ana a dara i təv ŋgar a ilik na a ŋgatar a.

⁴⁷Iye ihər i gweɗe a kurum a nda ndzer, pàrsa iɗəm tsa: Wur ana aka gəs iye ya ka, aka ŋgat mesife ana à ndìv a tsa aà biybiy a. ⁴⁸Iye ka, i ne dukw mezime ana a vile a mesife a mburma ya. ⁴⁹Gà bàba gà tsir kurum ata akahər ata tə ndzawa i kusak a ka, tàa zəm dukw mezime ata tə zalar mana ya. Ama ku mege kataya tekeɗe, tàa mata. ⁵⁰Ama wur ana aka zəm dukw mezime ata ndzer, a dara i gər ŋa ya ka, à mìt a tsidze. ⁵¹Iye ka, i ne dukw mezime ana a tarra i gər ŋa ya. Na wura aka zəm dukw mezime ata ka, a ndze a birek birek aà biybiy, à mìt a tsa. Dukw mezime ata i vile a a mburma, dite na ta ŋget a dər mesife ya ka, slu ba gà.»

⁵²Agəra bazlam ata Yesuw a tsik a tar a ka, a vəl mimbètsè ahəm a gà mburma ata ika magər tar wuràpə̀ppa, ta gwa: «Wànà meme na wele aaha a sle a aà mivile a kwe a ba ŋgar ka, a ne a dukw mezime, ki zimekwe a ya?» ⁵³Aɗaba taŋa Yesuw a gwaɗa a tar: «Iye ihər i gweɗe a kurum a nda ndzer, pàrsa iɗəm tsa: Na kàa zəmum slu ba gà, iye, wur ana i dara i təv Mbulum a tsa, nda gà bəla kàa sum məmbəz ga tsəka, ki ŋgetwim a mesife ndzer ŋana tsa. ⁵⁴Ama wur ana a zim a slu ba gà, dite a se a məmbəz ga asa ya ka, aka ŋgat mesife ana à ndìv a tsa aà biybiy a. Dite i mbil a à ŋgat i məməta ya, a pat ana gər ahəɗ à ndìv a ya mbaŋa. ⁵⁵Aɗaba slu ba gà ka, dukw mezime ana ndzer ŋa ya, dite məmbəz ga ibam ka, dukw mese ana ndzer ŋa ya mbaŋa. ⁵⁶Wele ana a zim a slu ba gà, dite a se a məmbəz ga asa ya ka, ŋgat a ndze a i təv ga, dite iye tekeɗe, i ndze a i təv ŋgar mbaŋa. ⁵⁷Tsir gà, mala məvəla mesife na a slərra iye ya. Iye ihər i ndze a ka, aɗaba ŋgat. Kamala taŋa ya, ku weke na aka zəm slu ba gà ka, a ndze a aɗaba iye mbaŋa. ⁵⁸Aɗaba taŋa, iye ihər i tsik a kurum a asa: Taŋa na a ne dukw mezime ana ndzer ŋa, a dara i gər ŋa ya ya. Ama ar ka, kamala biy na gà tsir kurum tə zəm akahər ata, dite ta mata ya tsa. Ama ku weke na aka zəm dukw mezime ata i viler a ya ka, à mìt a tsa, a ndze a aà biybiy.» ⁵⁹Yesuw a tsik guma ŋgar ata ka, i ga mahàmà a Mbulum gà Yahuda ana i kwite Kafarnahum a.

Bazlam Yesuw ana a vile a mesife a mburma, à ndìv a tsa

aà biybiy a

Mata 16:13-20; Markus 8:27-30; Luka 9:18-21

⁶⁰Gà ɓəzla mazazama Yesuw tə tsaraka bazlam ŋgar ata tsara ka, gà asiŋ ŋa i liwiŋ tar hinne ta gwa: «Bazlam aaha ka, kuɗa ihər, weke na a sle a aà megìse ya?» ⁶¹Yesuw a səraha aka dukw ana i gər gà ɓəzla mazazama ŋgat ata tə dzala ya. A sər ka, a wir a ter a i gəzləŋ hinne. Aɗaba taŋa a gwaɗa a tar: «Wànà bazlam ata dze ana, a tsəɓ a kurum a? ⁶²Dite meme seyiŋ a, na ki ŋgetwimiŋ a a pat ŋgiɗ, a iye, wur ana i dara i təv Mbulum a, i ti tsil a a təv ana i dara iɗəm piŋŋe ya. ⁶³Mezite Mesife Mbulum na a vile a mesife a mburma ya, tsəka, ndzəɗa mburma a sle a duwa tsa. Gà bazlam ana i tsik a kurum a ka, na a vile a kurum a mesife ndzer ŋana, a dara i təv Mezite Mesife Mbulum a. ⁶⁴Ama ka, gà mìsle ŋgiɗ ika magər kurum tàa gəs iye nda gəzləŋ tar tsa.» Aɗaba Yesuw a sər gà mburma ana ta gis a ŋgat tsiye, nda wele ana a ta ge aà ŋget a ɗaf a daga piŋŋe. ⁶⁵Yesuw a səkah dər aaka asa, a gwaɗa a tar: «Aɗaba taŋa na i gwaɗa a kurum ka: Wura a sle a aà medere a a təv ga ya tsa, na Mbulum Tsir gà aka vəlarra vatwa ya tsiye.»

⁶⁶I təv ana gà ɓəzla mazazama ŋgat tə tsaraka bazlam ŋgar ata ya ka, gà asiŋ ŋa i magər tar hinne, ta məsak à mazazama ŋgat, ta mbəɗ gər a dəba. ⁶⁷I dəba ŋa ya, Yesuw a tsam aà gà ɓəzla mazazama ŋgat ana kurwa gəra sula a pala tar a, a gwaɗa a tar: «Kurum dze ana, wànà a sàs a kurum mede mbaŋa ya?» ⁶⁸Simun Piyer a gwaɗar aaka: «Batsah mər ŋa, mìi de a dze ana, a ŋga, mìi zezem a weke asa ya? Kər na kà vəl a mər bazlam ana a vile a mesife a mburma, à ndìv a tsa aà biybiy a. ⁶⁹Kinehe ka, maa gəs kuɗa, mì sər ka, kər ka, wele ana tsəɗaŋŋa, kà dara i təv Mbulum a.» ⁷⁰Yesuw a gwaɗa a tar aaka: «Wànà iye tsiye na a pala kurum kurwa gəra sula ya? Ama mìsle ŋgiɗ ilik ika magər kurum a ka, sitene.» ⁷¹A tsik taŋa ka, aà Yudas ana kəla Simun Iskariyut a. Aɗaba Yudas ka, ku mege ŋgat i liwiŋ gà mburma kurwa gəra sula ŋa aaha tekeɗe ka, a ta ge aà ŋgat a ɗaf.

Gà damər Yesuw ta gəs ŋgat nda gəzləŋ tsa

¹I dəba ŋa ya, Yesuw a sùwaya riŋ ika ahəɗ Galile tserdze. A sasar mede aka ahəɗ Yuda tsa, aɗaba ana a sàs a gà bàba gà Yahuda aà makə̀ɗà ŋgat a. ²Akahər ata ka, megirive gà Yahuda ana tə zalar *megirive mekìrìwè ga ya, aka à mendze aɗəm i Yeruzalem. ³Aɗaba taŋa na gà damər Yesuw ta gwaɗar ka: «Tàkwa i faha ya, a Yeruzalem, aka ahəɗ Yuda, dite ka, gà ɓəzla mazazama kər ana i fataya, ta ŋgat a dukw mene aà mburma ana ki ge a ya mbaŋa ya. ⁴Wura à kèhe a dukw ana a ge a ya tsa, na aka sasar ka, mburma tə sər ŋgat tserdze ya. Aɗaba na kər riŋ ihər ki ge a medzibe megemir ata ka, ge parakkà, gà mburma tserdze ta ŋgatak, na dite ti sir a ya.» ⁵Ama gà damər ŋgar ata ti tsikar kataya ka, ku mege tar tekeɗe, ta gəs ŋgat nda gəzləŋ ɓav tsa.

⁶Yesuw a gwaɗa a tar: «Məpàslà ahər mede gà ana Mbulum a pesliŋ a ka, aka ndze aɗəm zukw tsa. Ama i kurum ka, aka sle, ku mege ndeɗime, ki ziwim a ka, gər kurum. ⁷Kurum ka, gà mburma ti ne a kurum a are tətsà. Ama iye ka, ti niŋ a are, aɗaba ana i gwaɗawa, megemir tar ana ta ge ye a ka, lele tsiye. ⁸Ama kurum ka, dum a megirive ata. Iye ka, aka sle mede gà zukw tsa, aɗaba məpàslà ahər mede gà aka ndze aɗəm tsa.» ⁹A tsik a tar aba bazlam ata ya ka, ŋgat ŋa a ndzaba ika ahəɗ Galile.

Yesuw a da a *megirive mekìrìwè ga a Yeruzalem

¹⁰Aləka gà damər Yesuw tə da a megirive ata i Yeruzalem a ka, Yesuw tekeɗe, a dəɗ aka tar i dəba ya mbaŋa. Aləka ŋgat a ndzeha a fata ka, aka pàt aba a mburma parzakkà tsa kəla, a kaha ba. ¹¹Gà bàba gà Yahuda ana i fataya, ti yaha ŋgat i megirive ata ya hinne. Ta gwa: «Ŋgat dze ana, i ŋga?» ¹²Gà mburma tserdze ti tsikeye bazlam pampam nda akəl aka gər ŋgar hinne. Gà mìsle ŋgiɗ ka, ta gwa: «Wele ŋa ka, ŋgwal mburma.» Ama gà biy ŋgiɗ aaha ta gwa i tar: «Kataya tsa, ŋgwal mburma tsa, a bene a mburma.» ¹³Ama a sàs a wura aà meɗe à bazlam ŋa a bəra parakkà tsa, aɗaba ana ta ge magəɗa a gà bàba gà Yahuda ya.

¹⁴I huɗ megirive ata ya ka, Yesuw a da a batsah ga Mbulum. A daha, a dza ba aà metsìkè guma ŋgar a mburma. ¹⁵Bazlam ŋgar ata a tsik a ka, a ge aà gà bàba gà Yahuda ata kamala sunwa ya, tə dzala, ta gwa: «Meme na wele aaha a sər duwa hinne kataya ya? Dite kwets aka dzeŋge ɓav tsiye?» ¹⁶Yesuw a gwaɗa a tar aaka: «Guma aaha i tsik a ya ka, a dara ka, i madzala gà gər gà ya tsa. Ama a dara ka, i təv Mbulum ana a slərra iye ya. ¹⁷Wur ana a sasar a ge a dukw ana a tsahən aà Mbulum a ka, a sir a dər, guma gà aaha i tsik a ya ana, a dara ana, wànà i təv Mbulum a ya, tsəna, i madzala gà gər gà ya yà. ¹⁸Wur ana a tsik a bazlam ana a dara i madzala gà gər ŋgar a ka, a yehe a ka, meɗè zləm, dite gà mburma tə̀ zlə̀b à ŋgat. Ama wur ana a waya ka, mburma tə̀ zlə̀b à wele ana a slərra ŋgat a ka, ŋgat ka, mala ndzer, bakal i təv ŋgar tsidze. ¹⁹Magwaɗa ŋa ka, Musa aka vəl a kurum məpala ahəm Mbulum dze ana, dite wura aka gəs ahər ahəm i liwiŋ kurum a ilik tsidze ya. Aàmala na ki yehwim a vatwa aà mekìɗe iye asa ya?»

²⁰Gà mburma ata ta gwaɗar: «Ki be a a dala kəla yà? Weke na a yehe a vatwa aà makə̀ɗà kər a?» ²¹Yesuw a gwaɗa a tar aaka: «I ge megemir a pat mesìfìkà ba ilik pəra ka, a ge a kurum kamala dukw mene aà mburma ya tserdze dze ana, meme? ²²Kurum kà sərum, Musa a gwaɗa a kurum: <Kàa wum kəla, aka ge mehinne tsamakər ka, ki sèswimiŋa.>*fa* Nda ndzer kaɗəŋ ana, Musa yà na a lah metsìkè a kurum taŋa ya? Awaŋ, daga aà gər gà tsir kwa ya tsiye? Aɗaba bazlam Musa ata ka, ki seswim a mburma, ku mege pat ŋa aka ndze a pat mesìfìkà ba tekeɗe ya. Taŋa dze ana, meme? ²³Haa kinehe kurum riŋ ihər ki seseywim a mburma na pat ŋa aka ndze a pat mesìfìkà ba ya ana, aɗaba kà wayum bakal ma ta ge riŋ nda təv məpala ahəm Musa asa tsiye, dite aàmala na ki gwim a matsəɓatsəɓ nda təv gà, agəra ana i mbəl à mburma tsekwir tsekwir lele, a pat mesìfìkà ba ya? ²⁴Miyakum à mege seriye dukw ana ki dzelwim a nda gər a. Ki gwim a seriye ka, nda ndzer ŋa.»

Gà mburma ta gwa: «Wànà Yesuw ana, *Kiristi ya?»

²⁵Gà asiŋ gà mburma ana i Yeruzalem a, ta gwa: «Abaya naha ka, wele ana gà mburma ti yehe a vatwa aà makə̀ɗà ŋgat a. ²⁶Samatum kwaŋ. A riŋ à fèfil a parakkà ika magər gà mburma tserdze, dite ku wura a peler a ahəm tsa. Wànà gà Əbay kwa tə sər ŋgat ana Kiristi, mala məmbàlà à mburma ana Mbulum a gwa, i slir a kurumehe a ya kaɗəŋ kəla ya? ²⁷Ama ka, a ge a kataya tsa. Aɗaba mì sər na Kiristi a dere a ka, wura a sir a, a dara ana, i ŋga ya ka, ti sir a tsa. Ama wele aaha ka, kà sərakwa təv ŋgar ana a dara iɗəm a.»

²⁸Akahər ata ka, Yesuw a riŋ a tsik a guma ŋgar a mburma i ga Mbulum batsah ŋa ata ŋgəlakəkka. I huɗ guma ŋgar ata a tsik a ya ka, a gwa: «Kà sərum iye, dite kà sərum təv ana i dara iɗəm a ndzer a yà? Ama i dara ka, i ziwera gər gà ya tsa kəla. Wele ana mala ndzer ŋa ya, na a slərra iye ya. Ama kurum ka, kà sərum ŋgat tsa. ²⁹Iye ka, i sər ŋgat, aɗaba i dara ka, i təv ŋgar a, dite ŋgat na a slərra iye ya.» ³⁰I fataya tsara ka, ti yaha vatwa aà magəsa ŋgat. Ama wura ilik aka ləm ahər tsa, aɗaba məpàslà ahər ana Mbulum a tiker a ka, aka ndze aɗəm zukw tsa. ³¹Ama gà mburma i magər tar ta gəs ŋgat nda gəzləŋ tar. Gà mburma ata ta gwa: «Wele aaha ka, Kiristi ana Mbulum a gwa i sida ya, i slir a kurumehe a ya dukw ŋgar. Aɗaba meme na mburma ŋa a dere a, a ge a dukw mene aà mburma ka, à zè a dər biy na wele aaha a ge a kinehe ya ya?»

Tə slər gà ɓəzla makàslà ga Mbulum aà magəsa Yesuw

³²Gà *Farisa tə tsarakara dukw ana gà mburma ti tsik aà Yesuw nda akəl i liwiŋ tar a ka, tə dza akaba ahəm nda gà Əbay gà ɓəzla mandəva kuɗa a Mbulum. Tə daha, tə slər gà ɓəzla makàslà ga Mbulum ata, aà magəsa Yesuw. ³³Aləka tə daha ka, Yesuw a gwa: «I ndze a i təv kurum ka, zaakwa pəra, i dəba ŋa ya, i mbìɗ a gər a təv wele ana a slərra iye ya. ³⁴Ki ti yehwim a iye, ama ki ŋgetwim a iye tsa. Aɗaba ki slwim a aà mede a təv ana i ti de aɗəm a ya tsa.»

³⁵Gà bàba gà Yahuda ata tə tsaraka bazlam ŋgar ata kataya ka, ta gwaɗaba ika magər tar: «A ti de a dze ana, a ŋga, na dite ka, ki slekwe a aà mesire tə̀vəməŋa tsidze ya? Wànà a de a ana, a təv gà Yahuda ana ta gwitse aba aka ahəɗ diriŋ a liwiŋ gà Girek, a dzeŋge a ter a diriŋ i fata, dite ka, a dzeŋge a a gà Girek mbaŋa kəla ya? ³⁶Bazlam ŋgar ata a gwa: <Ki ti yehwim a iye, ama ki ta ŋgetwim a iye tsa, aɗaba ki slwim a aà mede a təv ana i de a a ya tsa> ana, a sasar megweɗe ana, là?»

Yam ana à ŋgìz a ùwaɗ ùwaɗ, a vile a mesife a mburma ya

³⁷A pat mandəvandəv megirive ata ka, megirive ŋgwal ŋa ana ndzer a kuɗa.*fb* A pat ata ka, Yesuw a hitse aà mbulum ika miɗ mburma tserdze, a fàfəl ŋgəlakəkka, a gwa: «Na yam aka kəɗ wura ka, ma dara a təv ga ya, ma sa. ³⁸Ar ka, kamala ana mewetse ŋa a riŋ i wakita Mbulum akahər ata, ta gwa: <Wur ana aka gəs iye nda gəzləŋ a ka, yam ana a vile a mesife a mburma ya, à ŋgìzere a i gəzləŋ ŋgar a ùwaɗ ùwaɗ.> « ³⁹Ama Yesuw a tsik a tar bazlam minew ata ka, aà Mezite Mesife Mbulum ana a ta vile a a gà na ta gəs ŋgat nda gəzləŋ a. Aɗaba akahər ata ka, gà mburma ata tàa ŋgat Mezite Mesife Mbulum zukw tsa, agəra ana Yesuw aka da a təv mezlibe ŋgar ana i təv Mbulum, tì zlibe a à ŋgat zukw tsiye.

Gà mburma tə ndzək ba ikaba ya təv pampam, agəra Yesuw

⁴⁰Gà mìsle ŋgiɗ ika magər gà mburma ata tə tsaraka bazlam ata tsara ka, ta gwa: «Wele aaka ka, mala məma à guma Mbulum ana ndzer, Mbulum a gwa, i slir a kurumehe a ya.» ⁴¹Gà asiŋ ŋa ta gwa asa: «Wele aaka ka, *Kiristi, mala məmbàlà à mburma ana Mbulum a gwa, i ti slir a kurumehe a ya.» Ama gà mìsle ŋgiɗ pam ta gwa: «Kataya tsa. Kiristi a dere a ana, ika ahəɗ Galile ya ɓav a? ⁴²Aɗaba wakita Mbulum a gwa ka, Kiristi a dere a ka, i gwala Dawda a i kwite Betelehem ana Dawda a ndzawa iɗəm akahər ata ya ana, meme?»*fc* ⁴³Kamala taŋa ya gà mburma tə ndzək ba ikaba ya təv pampam, agəra Yesuw. ⁴⁴A sàs a gà asiŋ ŋa, aà magəsa ŋgat zləmana, ama wura ilik aka ləm ahər tsa.

Gà Əbay gà Yahuda ta gəs Yesuw nda gəzləŋ tsa

⁴⁵I dəba ŋa ya, gà ɓəzla makàslà ga Mbulum ata ndeɗiŋa ya, ta mbəɗaha gər a təv gà Əbay gà ɓəzla mandəva kuɗa a Mbulum, nda gà *Farisa. Ti ndzeha ka, gà Əbay ata ta gwaɗa a tar: «Aàmala na kə̀ gə̀sumara ŋgat a tsiye?» ⁴⁶Gà mburma ata ta gwaɗa a tar aaka: «Wura aka fàfəl ilik kamala ŋgat a tsidze.» ⁴⁷Gà Farisa ta gwaɗa a tar: «E/?e, aka baza a kurum za mbaŋa ya? ⁴⁸Kà sərum, wura ŋgiɗ a riŋ ika magər gà Əbay kwa, nda gà asiŋ gà mburma mər gà Farisa ya ana, tàa gəs ŋgat nda gəzləŋ a? wura a riŋ tsa. ⁴⁹Say gà mburma ana taf, tə sər məpala ahəm Musa tsiye, na a gəs ŋgat a. Tar tserdze tàa nəs, Mbulum aka vəl a tar mezelme.»

⁵⁰Wele duwa a riŋ ilik ika magər gà Farisa ata, zləm ŋgar Nikudimus, wele ana a da a təv Yesuw akahər ata ya.*fd* A daha, a gwaɗa a tar: ⁵¹«Məpala ahəm kwa ka, aka vəl a kwa vatwa aà mege seriye aà mburma kataya tsa, say ki tserekikwe a ndzer ŋana a tsik a ya dzekwiŋ.» ⁵²Ta gwaɗar aaka: «Assàh, wànà kər ana, gà Galile mbaŋa kəla ya? Dzeŋge wakita Mbulum lele kwaŋ, dite ki sir a dər ka, mala məma à guma Mbulum ilik a dere a ika ahəɗ Galile ya tsa.» ⁵³{I fataya ka, ku mege weke a tsaraka taŋa ka, a daba a ma ŋgar.

Məkəs duwa tə tats à ŋgat aka mege muva

¹Ama Yesuw a da aà kwite ana tə zalar dìyes Ndzendzebire ya. ²Ndidwe ŋana i mèkwède hedwe ka, a mbəɗ gər a batsah ga Mbulum ata. A daha, a ndza a bəɗ. Gà mburma tserdze tə daha a təv ŋgar. Dite a dza ba aà metsike a tar guma ŋgar. ³I təv ana a riŋ a tsik a ter a ya ka, gà ɓəzla medzeŋge məpala ahəm Mbulum nda gà *Farisa ta gə̀saraha məkəs duwa, tə tats dər aka mege muva. Ta hitse dər aka miɗ mburma tserdze, ⁴ta gwaɗa a Yesuw: «Əbay, araha, mì tats à məkəs duwa naha aka mege muva. ⁵Ama Musa a gwaɗa a mər i təv məpala ahəm Mbulum a ka, na kàa lwim aà wura kataya ka, say makə̀ɗà ŋgat nda kur ana, dite kər dze ana, kù gwa aaka ana, meme?»*fa*

⁶Ti tsikar kataya ka, a sàs a tar magəsa ŋgat a gedzewe, dite ka, ta ŋget a vatwa aà məmàr à bakal mbaŋa. Ama Yesuw a tsaraka taŋa ka, luz a kal à gər ŋgar a bəɗ, a dza ba aà mewetse duwa aka ahəɗ nda kəla ahər.*fb* ⁷Tar riŋ ta wiz ihər a bazlam ata hiywe. I dəba ŋa ya, Yesuw a zla gər aà Mbulum, a gwaɗa a tar: «Wur ana ika magər kurum aka ge bakal ilik tsiye ka, mà làhar à kur dzekwiŋ.» ⁸I dəba ŋa ya, a mbə̀ɗaba gər aka mewetse dukw ŋgar ata a bəɗ asa. ⁹Tə tsaraka bazlam Yesuw ata kataya tsara ka, sùtùtùtwa ti lèlekweye fit. Na a lah aà medeye ka, gà bàba ŋana dzekwiŋ. Gà Yesuw ti zeha riŋ à gər tar nda məkəs ata ika miɗ ŋgar a.

¹⁰I dəba ŋa ya, a zla gər aà mbulum asa, a gwaɗar: «Məkəs aaha, gà mburma ana ta gəsara kər a ana, tar i ŋga? Seriye aka gəs kər tsa seyiŋ a?» ¹¹Məkəs ata a gwaɗar aaka: «Awaŋ, Əbay gà.» Yesuw a gwaɗar asa: «Iye tekeɗe ka, seriye ga à gis a kər ɓav tsa. Daba dukw yak, ama kəla ka, ka ta mà aka mege bakal asa tsa.»}

Yesuw ka, dzaydzay gər ahəɗ

¹²I dəba ŋa ya, Yesuw a fàfəl a gà mburma asa. A gwaɗa a tar: «Iye ka, dzaydzay gər ahəɗ. Wur ana a zezem a iye ya ka, a ti ndze a i luvuŋ asa tsa. Ama a ŋget a dzaydzay ŋa ana a vile a mesife a mburma ya.»

¹³Gà *Farisa a riŋ i fata, tə tsaraka kataya ka, ta gwaɗar: «Kər ki gebe a sida ba yak nda ahər yak pəra ana, meme na mìi sir a dər, ka tsik ka, ndzer ŋa ya?» ¹⁴Yesuw a gwaɗa a tar aaka: «Ku mege i ge ba sida nda ahər gà ŋa tekeɗe ka, ndzer hiywe, aɗaba iye ka, i səraba təv ana i dara iɗəm a, kige tsa, təv ana i de aɗəm a ya asa. Ama kurum kà sərum təv gà ana i dara iɗəm a, kige tsa, təv ana i de aɗəm a ya tsa. ¹⁵Ki gwim a seriye ka, biy gà mburma gər ahəɗ, kamala ana ki dzelwim a nda gər kurum a pəra. Ama iye ka, i ge a seriye aka gər wura tsidze. ¹⁶Ku mege i ge a seriye tekeɗe ka, seriye ga ka, ndaka vatwa ŋa, aɗaba i ge a seriye ata ka, nda mezìwè gər gà tsa. Mìi ge a ka, nda Tsir gà ana a slərra iye ya məma. ¹⁷Aɗaba kà sərum, mewetse ŋa a riŋ i wakita məpala ahəm kurum ka: <Na gà wura sula tàa tsik i sida ya, bazlam ŋa ilik ka, taŋa ka, ndzer kaɗəŋ.>*fd* ¹⁸Kamala taŋa ya, iye ŋa ka, i gebe a sida ba gà, dite Tsir gà ana a slərra iye ya tekeɗe, a riŋ a ge a sida gà asa mbaŋa.» ¹⁹Ta gwaɗar: «Tsir yak ŋa ana, i ŋga?» Yesuw a gwaɗa a tar aaka: «Kà sərum iye tsa, dite kà sərum Tsir gà ɓav tsa asa. Na mege kà sərum iye ka, ana ka, ki sirwim a Tsir gà mbaŋa.»

²⁰Yesuw a tsik bazlam ata ka, i təv ana a riŋ a tsik a guma ŋgar a mburma i batsah ga Mbulum, bise nda təv ana tə dzawa aɗəm dukw taf ana aɗaba Mbulum a. Ama wura aka gəs ŋgat tsidze, aɗaba məpàslà ahər ŋa ana Mbulum a tiker a ka, aka ndze aɗəm zukw tsa.

Yesuw a be aà ɗaf a gà na tàa gəs ŋgat nda gəzləŋ tsiye

²¹I dəba ŋa ya, Yesuw a gwaɗa a tar asa: «I debiŋa. Na Yàa da ka, ki ti yehwim a iye tekeɗe, taf masakəŋa. Ama kurum ka, ki metwim a i bakal kurum. Ki slwim a aà mede a təv ana i de aɗəm a ya tsa.»

²²Gà bàba gà Yahuda tə tsaraka kataya ka, ta gwaɗaba ika magər tar: «Wànà à kiɗ a ba ŋgar a, na a gwa ka, ki slwim a aà mede a təv ŋgar ana a de aɗəm a ya tsiye?» ²³Yesuw a gwaɗa a tar aaka asa: «Kurum kà wum ɗa ba ka, ika gər ahəɗ. Ama iye i dara ka, i gər ŋa ya. Kurum ka, gà mburma gər ahəɗ. Ama iye ka, mburma gər ahəɗ tətsà. ²⁴Aɗaba taŋa na i gwaɗa a kurum ka, ki ta metwim a i bakal kurum a. Aɗaba na kàa gəsum iye, <Wele ana iye ŋgat ŋa ya>*fe* nda gəzləŋ kurum tsəka, ki metwim a i bakal kaɗəŋ ndzer.» ²⁵Ta gwaɗar: «Kər ana, weke?» Yesuw a gwaɗa a tar aaka: «Iye ka, wele ana i tsikewa a kurum daga piŋŋe ya. ²⁶Taŋa gà bazlam aà iye i gà gər pampam hinne, na i tsik a kurum a zləmana, dite seriye à gis a dər kurum a. Ama i me a kurum a à bazlam wele ana a slərra iye ya ivaɗ. Ŋgat ka, mala ndzer ŋa. I me a dər a mburma ka, dukw ana i tsarakara i təv ŋgar a ɗekɗek, tsəka, i zle ahər a biy ga tsa.»

²⁷A tsik a tar bazlam ata ka, aà Tsir ŋgar, ama ka, tə sər tsa. ²⁸Aɗaba taŋa, Yesuw a gwaɗa a tar asa: «Na kàa kəɗum iye, *wur ana a dara i təv Mbulum a ka, ki sirwim a dər, iye ka, <Wele ana iye ŋgat ŋa ya> kuɗa. Dite ki sirwim a dər mbaŋa ka, i ge a duwa ilik nda ahər gà tsa, ama i me a ka, à dukw ana i tsarakara i təv Tsir gà ya. ²⁹Wele ana a slərra iye ya ka, a riŋ i təv ga. Aka miyak à iye à gər gà tsa, aɗaba iye ihər i ge a ka, dukw ana a dar a gər a ɗekɗek.» ³⁰I fataya tsara ka, gà mburma hinne ta gəs ŋgat nda gəzləŋ tar, aɗaba bazlam ŋgar ata a tsik a.

Wur ana a ge a bakal a ka, ŋgat ka, ɓele bakal

³¹I dəba ŋa ya, Yesuw a gwaɗa a gà Yahuda ana ta gəs ŋgat nda gəzləŋ a: «Na ki giswim a ahəm aà guma gà ka, kàa nwim gà ɓəzla mazazama iye nda ndzer. ³²Dite ki ti sirwim a ndzer ŋana. I dəba ŋa ya ka, ndzer ŋa ata a be a à kurum i ɓele ata ya.»

³³Gà asiŋ gà mìsle ŋgiɗ ta gwaɗar aaka: «Mər ka, gà gwala Abəraham. Ama ka, maa ne ɓele wura ilik tsidze. Dite meme na ki gweɗe a mər a ka, mìi ta be a i ɓele ya ya?» ³⁴Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Ku weke na a ge a bakal ka, ŋgat ka, i ɓele bakal pəra. ³⁵Ama ɓele ka, a ndze a i bəra mala ga ŋgar aà biybiy tsa, say kəla mala ga ana ti tike a aà ahər i təv maɗàmà ba tar aà biybiy a. ³⁶Kamala taŋa ya, na iye, Kəla Mbulum, Yàa be à kurum i ɓele ya ka, ki ziwwim a gər kurum ndzer. ³⁷I sər kurum. Kurum ka, gà ɓəza Abəraham seyiŋ. Ama kurum riŋ ihər ka, ki yehwim a vatwa aà makə̀ɗà iye, aɗaba ana kàa gəsum bazlam gà tsiye. ³⁸Iye ihər i tsik a kurum a ka, dukw ana Tsir gà ɗifiŋ dər a. Ama kurum ka, ki gwim a dukw ana tsir kurum a ɗif a kurum dər a mbaŋa.»

³⁹Ta gwaɗar aaka: «Na a ne batsah tsir mər ka, Abəraham.» Yesuw a gwaɗar: «Na mege kurum gà ɓəza Abəraham nda ndzer ka, ana ka, ki gwim a megemir ŋgar ana a ge akahər ata ya mbaŋa. ⁴⁰Ama iye ka, i tsikewa a kurum ndzer ŋa ana i tsarakara i təv Mbulum a. Ku mege kataya tekeɗe ibam ka, kurum riŋ ihər ki yehwim a vatwa aà mekìɗe iye dər akaba ivaɗ. Medzìbe dukw ata ki wìsehwim a ya ka, Abəraham aka ge ilik tsa. ⁴¹Kurum ihər ki meswim a ka, à dukw ana tsir kurum ata a gewa ya.»

Ta gwaɗar aaka: «Tsir mər ka, Mbulum ilik. Mər ka, gà madazla tsa.» ⁴²Yesuw a gwaɗa a tar: «Na Mbulum Tsir kurum ndzer ka, ana ki weywim a iye mbaŋa, aɗaba iye Kəla ŋgar. I dara ka, i təv ŋgar a. I dara ka, nda gər gà ya tsa, ŋgat na a slərra iye ya ivaɗ. ⁴³Aàmala na kà tsarakum dukw ana i tsik a kurum a ya tsiye? Aɗaba kàa slwim medzè zləm a bazlam gà tsa. ⁴⁴Tsir kurum ka, Əbay sitene. Ki gwim a tekeɗe ka, dukw ana a sasar a. Ŋgat mala makə̀ɗà mburma daga piŋŋe. Aka tsik dukw ana ndzer a ilik tsidze, aɗaba ana ndzer ŋgar a riŋ tsiye. I təv pàrsa ŋgar ata a sasa ya ka, hiywe a mətsawa i ŋgar ka, aà taŋa pəra, aɗaba ana ŋgat mala pàrsa, dite ŋgat tsir gà pàrsa ya asa.

⁴⁵Ama iye ka, iye ihər i tsik a ndzer. Aɗaba taŋa na kə̀ gəsum iye nda gəzləŋ tsiye. ⁴⁶Weke na ika magər kurum ka, a sle aà megweɗe a, Yàa ge bakal a? A riŋ tsa. Na iye ihər i tsik a ka, dukw ana ndzer ana, dite aàmala na kə̀ gəsum iye nda gəzləŋ tsiye? ⁴⁷Wur ana mburma Mbulum a ka, à dze a zləm a bazlam Mbulum. Ama kurum ka, gà ɓəza Mbulum tsa, aɗaba taŋa na kàa dzum zləm a bazlam ata tsiye.»

Aka ana tàa wa Abəraham zukw tsiye ka,

Yesuw a riŋ dukw ŋgar

⁴⁸Gà mburma ata ta gwaɗa a Yesuw: «Yawwa, maa gwaɗak tsiye, kər ka, gà Samariya, sitene i ba yak a?» ⁴⁹A gwaɗa a tar aaka: «Sitene i ba gà tsa, i zlibe a ka, aà Tsir gà. Ama kurum ka, ki fìrwim aà iye a kamala dukw taf masakəŋa ya. ⁵⁰Ama iye ka, i yehe a mezlibe ana gà mburma tì zlibe a à iye ya tsa. Wele ŋgiɗ a riŋ ilik na a waya mezlibe ata gà mburma tì zlibe a à iye ya. Wele ata na a ne mala masàsà ikaba seriye bazlam aaha ya. ⁵¹Iye ihər i gweɗe a kurum a nda ndzer, pàrsa iɗəm tsa: Wele ana aka gəs bazlam gà ya ka, à mìt a tsa, a ndze a aà biybiy.»

⁵²Gà mburma ata ta gwaɗar: «Ama mì sər kinehe ka, sitene i ba yak ndzer kuɗa. Akahər ata Abəraham aka mət, gà ɓəzla məma à guma Mbulum tekeɗe, tàa mata kuɗa ka, dite kər ki gweɗe a ka, wur ana aka gəs ahəm aà bazlam yak a ka, à mìt a tsidze ana, meme? ⁵³Na Abəraham tsir mər aka mət seyiŋ ana, wànà kər kà dzala ana, kà za ŋgat a? Dite gà ɓəzla məma à guma Mbulum tekeɗe, tàa mata asa ana, kər ana, weke?»

⁵⁴Yesuw a gwaɗa a tar aaka: «Na iye ŋa i zlibe a à ba ŋa ka, a ge a ŋgulum tsa. Ama Tsir gà ana a tike iye a təv mezlibe ana tì zlibe a à iye ya. Ŋgat ka, wele ana kù gwaɗum, Mbulum kurum a. ⁵⁵Ama ku mege kù gwaɗum ahər kataya tekeɗe ka, kà sərum ŋgat tsa. Iye ka, i sər ŋgat lele dukw ŋgar. Na bəla i gwa, i sər ŋgat tsəka, i ti ne a mala pàrsa kamala kurum a mbaŋa. Ama i sər ŋgat, dite i gis a ahəm ŋgar asa. ⁵⁶Batsah tsir kurum Abəraham aka ŋgaya ba hinne, i təv ana Mbulum a tsikar i sida ya, a ta ŋget a a pat gà ana i dere a ya. Aka ŋgatar, dite a ŋgaya ba hinne kaɗəŋ.»

⁵⁷Gà mburma ata ta gwaɗar: «Mive yak aka sle dzik ə̀zləm zukw tsəka, ki gweɗe a ka, Yàa ŋgat a Abəraham dze ana, meme?» ⁵⁸Yesuw a gwaɗa a tar aaka: «Iye ihər i gweɗe a kurum a nda ndzer, pàrsa iɗəm tsa: Aka ana tàa wa Abəraham zukw tsiye ka, iye riŋ.» ⁵⁹Tə tsaraka kataya ka, ta pala kur i bəɗ a, ta kelewa a dər ŋgat. Ama Yesuw a kaha ba aà tar a, ta ŋgatar asa tsa. I dəba ŋa ya ka, a dara aà tar i ga Mbulum batsah ŋa ata ya.

Yesuw a mbəl à wele duwa ta wa ŋgat guluf ŋa

¹A pat duwa, Yesuw a de a ika vatwa. A ŋgat a wele duwa, guluf ŋa. A gər ana ta wa ŋgat a, aka ŋgat a vatwa tsa. ²Gà ɓəzla mazazama Yesuw ta gwaɗar: «Mala medzeŋge a mər, ta wa wele aaha guluf ŋana, aɗaba bakal ŋgar a? Tsəna, agəra biy gà tsir ŋgar a?» ³Yesuw a gwaɗa a tar aaka: «Guluf ŋgar aaha ka, aɗaba bakal ŋgar tsa, dite agəra biy gà tsir ŋgar tsa asa. Ta wa ŋgat guluf ŋa tùtùrkùmma ka, dite ndzəɗa Mbulum mə̀ pàt aba nda təv ŋgar. ⁴Say ki gekwe a meslire wele ana a slərra iye ya, i təv ana pat a riŋ mba ya. Həvəɗ aka à mege. Aka ge ka, ku weke tekeɗe, a sle a aà megemir ŋa asa tsa. ⁵I təv ana iye ɗa ika gər ahəɗ mba ya ka, iye i ne təv dzaydzay gà mburma gər ahəɗ.»

⁶A tsik a tar aba mifefile ata ya ka, a tif tìzle a bəɗ, a həlaɓ, dite a ndə̀ɗ metìrfèneh ŋana, a bah aà are mala guluf ata. ⁷A gwaɗar: «Da, ta bara are a duluv ana tə zalar Siluwam a.» Zləm təv ata ka, kərga megweɗe ya, wele ana tə slərra ya. Mala guluf ata a daha, a bara are ŋgar a fata. Dite wurat are ŋgar a hə̀ndə̀k ba. Aləka a màra ka, a ŋgat a vatwa lele kuɗa.

⁸I dəba ŋa ya, gà ɓəzla biye hərmaga ŋgar ana ta mberaha ya, nda gà na ta ŋgatawar à ŋgèl a duwa aà gùva vatwa ya, ta gwa: «E/?, naha ka, wele ana a ndzawa aà gùva vatwa, a ŋgalawa duwa ya dìgiyè?» ⁹Gà mìsle ŋgiɗ ta gwa: «Kaɗəŋ, ŋgat ŋa.» Gà asiŋ ŋa ta gwa: «Awaŋ, ŋgat tsa, ama kə̀la ka, a ndzikiɗ ba ŋgat pəra.» Aɗaba taŋa, wele ata a gwaɗa a tar aaka: «Iye ŋa ndzer dukw ŋgar.» ¹⁰Ta gwaɗar aaka: «Dite meme na are yak a hə̀ndə̀k ba seyiŋ a?» ¹¹A gwaɗa a tar aaka asa: «A hə̀ndə̀k ba ka, wele ana tə zalar Yesuw a, a həlaɓ ahəɗ, a giŋ metìrfèneh ŋa aà are, dite na a gweɗiŋ: <Da, bara are a duluv Siluwam> a. I da, i ta bara are a fata kaɗəŋ ka, dite na araha i ŋgat a vatwa kuɗa ya.» ¹²Ta gwaɗar: «Mburma ŋa i ŋga, na kinehe ya?» A gwaɗa a tar: «I sər tsa.»

Gà *Farisa tə tsam bazlam aà wele ana a ndzawa guluf ŋa ya

¹³I dəba ŋa ya ka, tə da à wele ata are ŋgar a hə̀ndə̀k ba ya, a təv gà Farisa. ^14-15Tə daha ka, gà Farisa ata tə tsam ihər bazlam a. Ta gwaɗar: «Meme na kà mbəl, are yak a hə̀ndə̀k ba kinehe kuɗa dər a?» A gwaɗa a tar: «I ŋgat a vatwa ka, Yesuw a giŋ metìrfèneh ahəɗ aà are, dite i bara are, tsam ka, na i ŋgatar a.» Tsaatsa, pat ana Yesuw a həlaɓ metìrfèneh ahəɗ, a ge aà are a wele ata, a hə̀ndə̀k ba ya ka, a pat mesìfìkà ba. ¹⁶Gà asiŋ gà Farisa ta gwa: «Mì samata wele ana a ge a kataya ya ka, a sle aà madàra i təv Mbulum a tsa, aɗaba ana a ge a megemir, a tike a gər a məpala ahəm kwa a pat mesìfìkà ba tsiye.» Ama gà mìsle ŋgiɗ asa ta gwa: «Meme na wura a sle a aà mege medzibe gà dukw mene aà mburma aaha ya, na ŋgat mala bakal a?» Aɗaba taŋa tə ndzakaya ba iba ya vatwa pampam.

¹⁷Gà Farisa ta gwaɗa a wele ana are ŋgar a hə̀ndə̀k ba ya asa: «Dite kər a gè, kù gwa aà wele ana a hə̀ndə̀k are yak ana, meme?» A gwaɗa a tar: «I gweɗe a là, ŋgat ka, mala məma à guma Mbulum ndzer.» ¹⁸Ama gà bàba gà Yahuda ta gəs bazlam ŋgar ata a gwa: «Iye piŋŋe ka, guluf ŋa, dite i mbəl kinehe» ya tsa. Aɗaba taŋa tə daha, tə zal a gà tsir ŋa, ¹⁹aà matsama tar bazlam a. Ta gwaɗa a tar: «Wànà naha ana, kəla kurum kaɗəŋ a? Kù gwaɗum, kà wum ŋgat ka, guluf ŋa ya? A ge ba dze ana, meme, na dite a ŋgat a vatwa asa yà?» ²⁰Gà tsir wele ata ta gwaɗa a tar aaka: «Haya, mì sər, ŋgat ka, kəla mər. Mì wa ŋgat ka, guluf ŋa dukw ŋgar. ²¹Ama kinehe ka, mì sər meme na are ŋgar a hə̀ndə̀k ba ya tsa, dite mì sər wur ana a hə̀ndə̀kar ikəka ya tsa asa mbaŋa. Tsàmum aà ŋgat ŋa dukw ŋgar. Ŋgat ka, kəla ndirkiz mba tsa, a sle a aà metsike a kurum a dukw ana a geba nda ŋgat a.» ²²Gà tsir ŋgar ti tsik kataya ka, aɗaba ana magəɗa gà bàba gà Yahuda a ge a ter a ya. Aɗaba gà bàba gà Yahuda tàa mbər medzè akaba bazlam aka ndəv. Ta gwa: Wele ana aka gwa, Yesuw ka, *Kiristi, mala məmbàlà à mburma ana Mbulum a gwa, i ti slir a kurumehe a ya ka, ti delewere a ŋgat i gà ga Mbulum tar ata ya. ²³Aɗaba taŋa na gà tsir wele ata ta gwaɗa a tar: Tsàmum aà ŋgat ŋa, dukw ŋgar a. Ŋgat ka, kəla ndirkiz asa tsiye ya.

²⁴I dəba ŋa ya, gà Farisa tə zal a wele ata a ndzawa guluf ŋa ya masula ŋa asa. Ta gwaɗar: «Tsik dukw Mbulum ndzer ŋana kwaŋ, aɗaba mì sər ndzer, wele ata ka, mala bakal.» ²⁵Dite a gwaɗa a tar aaka: «Bəla ŋgat mala bakal, bəla ŋgat mala bakal tsəka, i sər tsa. Ama dukw ilik kə̀la ka, i sər. Aɗaba piŋŋe ka, iye guluf ŋa. Ama kinehe ka, Yàa ŋgat a vatwa dzaydzay lele kuɗa.» ²⁶Ama tar ka, hiywe tar riŋ ihər tì tsèmeye ahər a pəra, ta gwaɗar: «A ge aà kər dze ana, meme? Dite meme na a hə̀ndə̀kək ika are ya?» ²⁷Wele ata a gwaɗa a tar: «Yàa tsik a kurum dukw ana a geba nda iye ya aka ndəv, ama kàa dzùmar zləm tsa. Dite aàmala na a sàs a kurum metsereke masula ŋa asa ya? Wànà a sàs a kurum mene gà ɓəzla mazazama ŋgat mbaŋa kəla ya?» ²⁸Tə tsaraka taŋa ka, tə ndavayar pìslìɗìɗe hinne, ta gwaɗar: «Kər ka, mala mazazama wele ata. Ama mər ka, gà ɓəzla mazazama Musa. ²⁹Mì sər ka, Mbulum aka fàfəl a Musa akahər ata. Ama wele ata ka, mì sər təv ana a dara iɗəm a tsidze.»

³⁰Wele aaha a gwaɗa a tar aaka: «Ee, tsaka naha ka, dukw mene à mburma ya, na a hìndìkiŋ ika are ya, dite meme na kurum ka, kà sərum təv ana a dara iɗəm tsiye? ³¹Kà sərakwa ka, Mbulum a dze a zləm a mifefile gà ɓəzla bakal tsa. Ama a dze a zləm ka, a wele ana a dzer a gurmits a bəɗ, dite a ge a dukw ana a sasar a. ³²Daga aà gər ana ta ge gər ahəɗ a, wura aka tsaraka ka, tàa hə̀ndə̀k ika are ya a wur ana ta wa ŋgat guluf ŋa ya tsa. ³³Na mege wele aaha a dara ka, i təv Mbulum a tsəka, a sle a aà mege duwa tsidze.» ³⁴Ta gwaɗar aaka: «Iyyàh, kər ka, ta wa kər i bakal dukw yak daga piŋŋe ana, dite meme na ki ɗif a mər a à duwa ya?» Tsam ka, tə dalawara ŋgat i təv mayahaba gər tar a sarrrà.

Yesuw a fàfəl aka gər gà mburma ana ta ŋgat a vatwa ya,

ndəna ta ŋgatar tsiye

³⁵Yesuw a tsaraka, tàa dalawara ŋgat i təv mayahaba gər tar ata ya ka, a dza ba aà mayaha ŋgat. Aləka a le aà ŋgat ka, a gwaɗar: «Kàa gəs *wur ana a dara i təv Mbulum a nda gəzləŋ a?» ³⁶Wele ata a gwaɗar: «Wur ana a dara i təv Mbulum ana, weke, Əbay gà, na dite i gis a ŋgat a?» ³⁷Yesuw a gwaɗar: «Wele ana kər riŋ ihər ki ŋgeteriŋa, a fèfilek a kinehe ya gè.» ³⁸Wele ata a gwaɗar aaka: «Yàa gəs kər Batsah ga ŋa.» A daha, a dzar gurmits a bəɗ aka miɗ ŋgar.

³⁹Yesuw a gwaɗar: «I dara aka gər ahəɗ a ka, aà masàsà ikaba seriye a mburma ya. Gà ɓəzla guluf ta ŋgat a vatwa. Ama gà mburma ana ta gwa, mì ŋgat a vatwa ya ka, ti ne a gà ɓəzla guluf ivaɗ.» ⁴⁰Gà asiŋ gà *Farisa ana i təv ŋgar a, tə tsaraka bazlam ata ka, tə tsam ahər, ta gwaɗar: «Wànà kər kù gwa ana, mər gà guluf ŋa mbaŋa ya?» ⁴¹Yesuw a gwaɗa a tar aaka: «Na mege ki gwim gà ɓəzla guluf ka, ana ki gwim a i bakal tsa. Ama kù gwaɗum kinehe, mər gà guluf tsəka, kurum i bakal hiywe ivaɗ.»

Bazlam minew makəva gà təmaŋ

¹Yesuw a tsik a tar bazlam minew asa, a gwaɗa a tar: «Iye ihər i tsik a kurum a nda ndzer, pàrsa iɗəm tsa: Ama wur ana a de a a dagara gà təmaŋ ndaka biye hərmaga tsa, a de a ka, ndaka vatwa ŋgiɗ a ka, ŋgat a ne ka, mala akəl, à kìzele a mburma. ²Ama wur ana a de aɗəm a ndaka biye hərmaga ya ka, ŋgat ka, mala makəva gà təmaŋ. ³Na bəla wele ana a kesle a biye hərmaga ya ka, à hìndìk a i ga a mala makəva gà təmaŋ ata ya, a de aɗəmiŋa. A zel a a gà təmaŋ ŋgar nda zləm tar ilik ilik tserdze. Ti tserekiŋa, dite à kìvere a tar a bəra ya. ⁴Na aka kə̀vara tar a bəra ya ka, a ndze a ter a aka miɗ, dite gà təmaŋ ti zezemehe a ŋgat i dəba ya, aɗaba tə sər biye ɗa ŋgar. ⁵Ama ti sle aà mezezeme a wur ana tə sər ŋgat tsiye tsa. Ta vel a ihər a, aɗaba ana tə sər biye ɗa ŋgar tsiye.»

⁶Yesuw a tsik a tar guma ata ka, ndaka bazlam minew, ama tàa tsaraka bazlam ata a tsik ana, aka gər là ka, tə sər tsa, dèrze ikəka.

Yesuw a ne ka, mala makəva gà dukw ana ŋgwal ŋa ya

⁷I dəba ŋa ya, Yesuw a gwaɗa a tar asa: «Iye ihər i gweɗe a kurum a nda ndzer, pàrsa iɗəm tsa: Iye i ne hərmaga dagara gà təmaŋ. ⁸Gà mburma ana ti lìhiŋara tserdze ya ka, ti ne gà ɓəzla akəl, tàa kə̀zala mburma, ama gà təmaŋ tàa dza zləm a mifefile tar tsa. ⁹Iye na i ne biye hərmaga ya. Wele ana a de a a dagara ata nda təv ga ya ka, a mbiliŋa. A ŋget a vatwa mada aɗəm, nda madàra iɗəm a. Ŋgat ka, barbararra, kuɗa duwa a ger a tsa. ¹⁰Aɗaba mala akəl a dere a ka, aà mege akəl, aà makə̀ɗà mburma, dite aà manəsa à duwa ndzàɗak ndzàɗak a bəɗ. Ama iye i dara ka, dite gà mburma tə ndza barbararra, ta ŋgat mesife ana à ndìv a tsa aà biybiy a.

¹¹Iye i ne ka, mala makəva gà dukw ana ŋgwal ŋa ya. Mala makəva gà dukw ata ŋgwal ŋa ya ka, aka hadzal ba aà medzeye à mesife ŋgar, agəra gà təmaŋ ŋgar. ¹²Wur ana a ge a megemir siŋgwe ya ka, ŋgat ka, mala makəva gà dukw ana ndzer a tsa, aɗaba gà təmaŋ tekeɗe, gà biy ŋgar tsa. Bəla kəra dala aka hitse aà tar ka, a miyek a à tar, a velebiŋa. Dite kəra dala ata a dehe a, à gese a tar. Gà asiŋ ŋa aaha ta gwitse a aba sweyèh sweyèh a dala a təv ŋa. ¹³A vel a ka, aɗaba ana madzala gà gər ŋgar ka, aka dukw maya ba ŋgar ɗekɗek, a dzele a gà təmaŋ tsiye. ¹⁴Iye ka, i ne mala makəva gà dukw ana ŋgwal ŋa ya. I sər gà təmaŋ gà. Gà təmaŋ gà tekeɗe, tə sər iye mbaŋa, ¹⁵kamala ana Tsir gà a sər iye ya, dite iye tekeɗe, i sər ŋgat mbaŋa ya. Yàa hadzal ba aà medzeye à mesife gà agəra tar. ¹⁶Gà təmaŋ gà ŋgiɗ a riŋ i dagara aaha zukw tsa. Ama say i yehere a tar a mbaŋa. Ti ti dze a zləm a mifefile gà. Ta gew a ba a təv ilik ŋa. Ti ne akaba a palam ilik, mala makəva tar tekeɗe, ilik mbaŋa.

¹⁷Tsir gà a weye iye ka, aɗaba ana Yàa hadzal ba aà medzeye à mesife gà ya. Dite i sər ka, i ŋget a mesife ata asa. ¹⁸Wura a sle a aà mezle aà iye mesife gà ata ya nda ndzəɗa tsa. Ama iye ŋa i dzeye a à mesife gà. Dite ndzəɗa gà a riŋ aà maŋgata aɗəm asa. Kamala taŋa ya, i ge a ka, dukw ana Tsir gà a gweɗiŋ, ge ya.»

¹⁹Gà mburma ata tə tsaraka bazlam minew Yesuw ata ka, bazlam a da a tar aaba tsa, tə ndzaka ba ikaba ya təv pampam asa. ²⁰Gà asiŋ gà mìsle ŋgiɗ hinne ta gwa: «Sitene na i ba ŋgar a. Aàmala na ki dzèkwe a zləm a mifefile mala mibe a dala ya?» ²¹Gà mìsle ŋgiɗ ta gwa asa: «Wele ana sitene i ba ŋgar a ka, a sle aà mifefile a kataya tsa. Wànà sitene a sle a aà mahə̀ndə̀kà ika are ya a mala guluf a?»

Gà Yahuda ta gəs bazlam Yesuw tsa

²²Akahər ata ka, gà Yahuda ti tìkir a megirive məma à batsah ga Mbulum ana ta mà dər aà mbulum a, i Yeruzalem. Ta gewa megirive ata ka, akahər mə̀tasl. ²³Yesuw a riŋ i megirive ata mbaŋa. A riŋ à sìweye a aà huɗ màsàpàr ana tə zalar màsàpàr Salumun a, aà batsah ga Mbulum ata. ²⁴Gà Yahuda ata ta ŋgatar ka, ti yaha ba gər a təv ŋgar, ta gwaɗar: «Ki ti ɗif a mər a aba, kər ana kà dara i ŋga ya ana, ndeɗime? Na kər *Kiristi, mala məmbàlà à mburma ana Mbulum a gwa, i ti slir a kurumehe a ya ka, tsik a mər lele.»

²⁵Yesuw a gwaɗa a tar aaka: «Yàa tsik a kurum aka ndəv, ama a sàs a kurum megìse bazlam gà tsa. Gà megemir ŋgwal ŋa ana i ge a nda ndzəɗa Tsir gà ya na à pèt a kurum a dər ka, iye ana, weke ya mbaŋa. ²⁶Ama a sàs a kurum megìse nda gəzləŋ tsəka, aɗaba ana kàa nwim gà mburma gà tsiye. ²⁷Gà mburma gà ka, tì dze a zləm a mifefile gà. Ti ne kamala gà təmaŋ ana tì dze a zləm a mifefile mala makəva tar a. I sər tar, dite tar tekeɗe, tar riŋ ti zezem a iye mbaŋa. ²⁸I vile a ter a mesife ana à ndìv a tsa aà biybiy a, ta mete a tsidze, dite wura a sle aà mekìzelere a tar i ahər gà ya asa tsa. ²⁹Tsir gà na a dziŋ tar a ahər a ka, a za gà dukw ana tserdze ya. Aɗaba taŋa na wura a sle aà mekìzele a tar i ahər ŋgar a tsidze ya. ³⁰Mər ka, ilik nda Tsir gà.»

³¹Gà Yahuda ata tə tsaraka bazlam ŋgar ata kataya ka, tə ndzək kur a ahər, ta waya makàlàwà ŋgat asa. ³²Ama Yesuw a gwaɗa a tar: «Yàa ge gà megemir ŋgwal ŋa hinne ika miɗ kurum nda ndzəɗa Tsir gà. Ika magər gà dukw ata i ge tserdze ya ana, agəra awara ilik a na a sàs a kurum ki kelewwim ahər a iye nda kur a?» ³³Gà Yahuda ata ta gwaɗar aaka: «A sàs a mər makàlàwà kər ka, agəra ana ki ge gà megemir ŋgwal ŋa ya tsa. Ama aɗaba ana ka ne bakal à Mbulum, kà tsik ahər dukw ana ŋgwal ŋa tsiye ya. Kər ka, mburma məfara ŋa, tsəka, Mbulum tsa. Ama ka, a sàsak mene à ba yak Mbulum.»*fa*

³⁴Yesuw a gwaɗa tar aaka asa: «A riŋ mewetse ŋa i wakita məpala ahəm kurum ka, Mbulum a gwa: <Yàa tsik a kurum, kurum ka, ku weke a ne kamala Mbulum a.>*fb* ³⁵Kà sərakwa ka, ki slekwe a mimbete à dukw ana wakita Mbulum a tsik a tsa. Ama Mbulum a zal a gà mburma ana a tsik a tar bazlam ŋgar akahər ata ya ka, ku weke a ne kamala Mbulum a. ³⁶Iye kinehe tekeɗe, ŋgat na a zla iye, a slərra iye aka gər ahəɗ a. Dite ka, meme na ki slwim aà megweɗe a, i ne a dər bakal, agəra ana i gwa, iye Kəla Mbulum a? ³⁷Na i ge a ka, megemir Tsir gà tsəka, taŋa ka, wura mà gəs mifefile gà ɓav tsa. ³⁸Ama na bəla iye riŋ i ge a megemir ŋgar ka, ku mege kàa gəsum bazlam gà tsa tekeɗe, gəsum iye, aɗaba megemir ana iye ihər i ge a ya, na dite ki sirwim a dər parakkà ka, Tsir gà a riŋ mandza ŋa i təv ilik ŋa nda iye, iye tekeɗe, iye riŋ mandza ŋa i təv ilik nda ŋgat mbaŋa ya.»

³⁹I fataya tsara ka, ti yaha vatwa aà magəsa ŋgat asa. Ama ka, a be aà tar a.

⁴⁰I dəba ŋa ya, Yesuw a mbəɗ gər aka lìdè dulwa Yurdan asa, a təv ana Yuhana a tsilwiɓewa iɗəm à mburma a yam akahər ata ya. A daha, a ndza riŋ i fata zaakwa. ⁴¹Gà mburma hinne tə daha a təv ŋgar. Tə daha ka, ta gwa: «Yuhana ka, aka ge dukw mene aà mburma ilik tsidze, ama dukw ana a tsik nda təv wele aaha fit a ka, ndzer kaɗəŋ.» ⁴²Aɗaba taŋa gà mburma ana i fataya hinne, ta gəs ŋgat nda gəzləŋ.

Məməta Lazar

^1-2Wele duwa a riŋ, zləm ŋgar Lazar. Ŋgat a ndzawa ka, i Betaniya, i kwite ana gà damər ŋgar gà Mariya nda Marta tə ndzawa iɗəm a. Mariya ka, məkəs ana a ti dze a wirdè aka sik Yesuw, dite à bèh a ihər a nda ambəz ŋgar a. A pat duwa ka, Lazar ata a dəɗ a dukw məməta. ³Aɗaba taŋa na gà damər ŋgar ata gà dəm ŋa sula ya, tə slər mburma a təv Yesuw. Tə daha, ta gwaɗar: «Batsah mər ŋa, masla yak ŋgwala tsa, dukw məməta a geriŋa.» ⁴Yesuw a tsaraka kataya ka, a gwaɗa a tar: «Dukw məməta ŋgar ata ka, à mìt a dər a biye tsa. A ger a ka, aà meɗìfè à ndzəɗa Mbulum a mburma, dite tə sər mezlibe ana tì zlibe a à iye Kəla ŋgar a mbaŋa.»

⁵Ama Yesuw ka, a waya gà Marta ata nda gà damər ŋgar gà Lazar a ka, lele. ⁶Ku mege aka tsaraka Lazar a riŋ i dukw məməta ata kataya tekeɗe, a ndzaba riŋ i təv ana ŋgat riŋ iɗəm a pat sula asa. ⁷I dəba ŋa ya, a gwaɗa a gà ɓəzla mazazama ŋgat: «Mbə̀ɗakwa gər aka ahəɗ Yuda a təv Lazar a fata.» ⁸Gà ɓəzla mazazama ŋgat ata ta gwaɗar aaka: «Ee mala medzeŋge mər, aka ndza ka, hinne tsa na gà mburma ana i fataya, ta waya makàlàwà kər nda kur a ka, dite ki mbìɗekwehe a gər a fata asa ana, meme kuɗa ya?» ⁹Yesuw a gwaɗa a tar aaka: «Daga aà gər mèkwède ya, haa a hawa ana ki ŋgetekewe a a pat tsiye? Na wura à sìweye a ndaàpat ka, a ndif a sik tsa, aɗaba ŋgat a riŋ a ŋget a a vatwa dzaydzay i bəɗ lele. ¹⁰Ama wur ana à sìweye a ndaàvəɗ a ka, ŋgat na a ndif a sik a, aɗaba ziŋziŋ hinne, dzaydzay i təv ŋgar tsa.»

¹¹Yesuw a tsik a tar bazlam ata ka, a gwaɗa a tar asa: «Masla kwa Lazar ka, a riŋ ika mendze are. Ama ka, i ta piɗeke a dər.» ¹²Gà ɓəzla mazazama ŋgat ta gwaɗar aaka: «Na Lazar ka, mendze are ŋa pəra ka, a mbiliŋa, Batsah mər ŋa.» ¹³Tsaatsa a sàs a Yesuw aà megweɗe ka, Lazar ka, aka mət, ama gà ɓəzla mazazama ŋgat ta gwa i tar ka, ar ka, ika mendze are kaɗəŋ. ¹⁴I dəba ŋa ya, Yesuw a tsik a tar parakkà, a gwaɗa a tar: «Lazar ka, aka mət. ¹⁵I ŋgeye a ba aɗaba kurum, agəra ana a mət ka, iye riŋ i fata tsiye. Kamala taŋa ya, a ti zlèk a kurum i təv megìse ana ki giswim a iye nda gəzləŋ, ki sinikwim a dər ba ya. Ama kinehe ka, tàkwa a təv ŋgar, ta fə̀rakwa ŋgat.» ¹⁶Tumas, wele ana gà mawusa ya, a gwaɗa a gà asiŋ gà ɓəzla mazazama Yesuw: «Haya, tàkwa, ka matakwa akaba nda gà BATSAH kwa ŋa.»

Yesuw ŋgat mala məmbàlà à mburma i məməta ya

¹⁷Yesuw a ndzeha a Betaniya ka, Lazar aka ge i biye mehinne faɗ. ¹⁸Ama kwite Betaniya ata ka, bise nda Yeruzalem, a sle kiliwmeter makər tsa na ki de a i Yeruzalem a a fataya. ¹⁹Kamala taŋa ya, gà mburma hinne tə daha a təv gà Marta nda damər ŋgar Mariya, aà mege a tar wuɗàh, ta me a terehe a à arəv, agəra damər tar ana a mət a.

²⁰Marta a tsaraka Yesuw ana a riŋ a dehe a ya ka, a valaha a təv ŋgar, aà melime nda gà ŋgat. Ama Mariya ka, ŋgat a riŋ mandza ŋa i ma. ²¹Aləka Marta a ndzeha a təv Yesuw tsara ka, a gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mìt a tsa ti ibam. ²²Ama i sər, ku mege kinehe tekeɗe, Mbulum a vilek a dukw ana kàa wiz ahər a.» ²³Yesuw a gwaɗar: «Damər yak ata a mbilere a i məməta ya.» ²⁴Marta a gwaɗar aaka: «I sər ka, a ta mbilere a i məməta ya, i təv ana gà məməta tserdze ta mbele a a pat mandəvandəv gər ahəɗ a.»

²⁵Yesuw a gwaɗar aaka asa: «Iye na mala məmbàlà à mburma i məməta ya ya, dite iye asa na mala məvəla a tar mesife ya. Wur ana à gis a iye nda gəzləŋ a ka, ku mege aka mət tekeɗe, a mbiliŋa, a ndze a aà biybiy. ²⁶Wele ana aka gis iye, aka ŋgat mesife gà ata ya ka, mesife ŋgar à mìt a tsa, a ndze a aà biybiy. Wànà kàa gəs taŋa ya?» ²⁷Marta a gwaɗar aaka: «Haya, Yàa gəs, Batsah ga ŋa. I sər, kər ka, mala məmbàlà à mburma ana Mbulum a gwa ka, i ti slir a kurumehe a ya. Kər ka, Kəla Mbulum ana a gwa, a dere a aka gər ahəɗ a ya.»

Yesuw a tuwa

²⁸Marta a tsik aba bazlam ata ya ka, a mbəɗ gər a ma, a daha, a gəs damər ŋgar Mariya a zlawak, kətsah aà mburma ya. A tsiker nda akəl, a gwaɗar: «Əbay kwa aka dara, a zelekiŋa, a gwaɗak, dara.» ²⁹Mariya a tsaraka bazlam ata tsara ka, pewtsek a mba aba aà mede a təv ŋgar. ³⁰Ama Yesuw ka, a riŋ i təv ŋgar ana Marta a le ahər a mba hiywe. Aka ndze a kwite ata zukw tsa. ³¹Gà mburma ata ndeɗiŋa tə daha, ta màha à arəv a Mariya, tar riŋ mandza ŋa i ga. Ta ŋgat a Mariya ana a mbàra aba a bəra ya tsara ka, tə zazamara ŋgat a. Tə dzala i gər tar ka, ta gwa: A de a ka, aka dive, a ti tiwe a a fata.

³²Tsaatsa Mariya a de a ka, a təv ana Yesuw iɗəm a. A daha, a ŋgatar tsara ka, a dza gurmits a bəɗ aka miɗ ŋgar. A gwaɗar: «Batsah ga ŋa, ki ge ɗa i faha piŋŋe ka, ana ka, damər gà aaha à mìt a tsa ti ibam.» ³³Yesuw a fə̀r aà Mariya ka, a tiwiŋa, dite gà mburma ana tə dəɗ aakaha ya mbaŋa, tə dza akaba tuwa, a tsahən ahər tsa, a wir ahər a i gəzləŋ hinne, aka tsəɓar. ³⁴Dite a gwaɗa a tar: «Kà lwim kinehe ana, a ŋga?» Ta gwaɗar aaka: «Batsah mər ŋa, dara, mìi ɗek a dər.» ³⁵I təv ana ti de a ya ka, a dza ba aà tuwa kwàyìya hinne. ³⁶Gà mburma ana i təv ŋgar i fataya ka, ta gwa: «Fə̀rum na a tiwe a, a waya ŋgat hinne ya kwaŋ.» ³⁷Ama gà asiŋ ŋa ta gwa ika magər tar: «Ŋgat ana à hìndìk a ika are a mala guluf ana, dite aàla na a mbəl à Lazar i dukw məməta ŋgar aaha a mət dər a te tsiye?»

Yesuw a mbəlara à Lazar i məməta ya

³⁸Ama Yesuw ka, gəzləŋ a riŋ ihər a wir ahər a turturtur hinne asa. I dəba ŋa ya ka, a ndze aka dive kuɗa. Dive ata ka, melè ŋa i təv ana gìrdzìdzìhhe ya. Tə tàpàsl ahəraha beliŋ. Ta hə̀ndə̀k dər ahəraha. ³⁹A daha, a gwaɗa a tar: «Hə̀ndə̀kum ihər beliŋ a.» Marta, damər wele ana a mət a, a gwaɗar: «Batsah mər ŋa, kinehe ana, a ze a ana, hinne tsiye, aɗaba aka ge i biye ka, mehinne faɗ dze ana, taŋa ana, meme gwedziye?» ⁴⁰Yesuw a gwaɗar aaka: «Yàa gwaɗak ka, na kàa gəs iye nda gəzləŋ ka, ki ta ŋget a ndzəɗa Mbulum ana, Yàa tsikik tsiye?» ⁴¹Tə daha, ta hə̀ndə̀k ihər beliŋ ata ya. Yesuw a fə̀r a gəza mbulum, dite a gwa: «Tsir ga, iye ihər i gik a kəkaaha, aɗaba ana kàa dza zləm a dukw ana i wiz aà kər a. ⁴²I sər ka, ki tserekiŋ a dər hiywe. Ama i tsik taŋa ka, agəra gà mburma aaha i təv ga ya, dite tar tekeɗe, tə sər dər ka, kər na kà slərra iye ya kaɗəŋ ndzer.» ⁴³A tsik aba bazlam ata ya lele ka, a fàfəl nda ndzəɗa ŋgəlakəkka. A gwaɗa a Lazar: «Dara i biye ya, Lazar.» ⁴⁴Tsam ka, pakw məməta aaha a dara i dive ya kaɗəŋ, gà sik ŋgar nda are ŋgar fit mendìwìɗè ŋa nda petek. Are ŋgar tekeɗe, simbèkw makùmbuhwa ŋa. Yesuw a gwaɗa a tar: «Pə̀lum à ŋgat, ka məsakum dər, ma da ba.»

Gà bàba gà Yahuda ti yaha vatwa aà magəsa Yesuw

Mata 26:1-5; Markus 14:1-2; Luka 22:1-2

⁴⁵Gà mburma aaha ndeɗiŋa tə zazamaha Mariya ya ka, ta ŋgat a dukw mene aà mburma ata Yesuw a ge ya tserdze. I fataya tsara ka, gà mburma hinne ika magər tar a, ta gəs ŋgat nda gəzləŋ. ⁴⁶Ama gà asiŋ ŋa ika magər tar ibam, tə da təv gà *Farisa, tə daha, tə ɗama a tar dukw ana Yesuw a ge tserdze ya. ⁴⁷Ama gà Farisa ata nda gà Əbay gà ɓəzla mandəva kuɗa a Mbulum a, tə tsaraka kataya ka, ti yaha gər a gà asiŋ gà bàba ŋa ana ta kwere a mburma ya, ta gwaɗa a tar: «Ki gekwe a dze ana, meme na wele aaha a riŋ a geye a gà dukw mene aà mburma hinne ya? ⁴⁸Na kàa miyakukwa dər, ma ge ba dukw ŋgar ka, gà mburma fit ta gis a ŋgat nda gəzləŋ. I dəba ŋa ya, gà ɓəzla makwàrà mburma ana i Ruma ya, ti dere a, ta mbezle a à batsah ga Mbulum kwa leheɗ leheɗ, ti dzeye a à gwala kwa fit asa.» ⁴⁹Wele duwa a riŋ ilik ika magər tar, zləm ŋa Kayafas. Ŋgat na *batsah mala mandəva kuɗa a Mbulum ana a ndə̀vawar akahər ata ya. A hitse aà mbulum ika magər tar a, a gwaɗa a tar: «Kurum ka, kà sərum duwa tsa. ⁵⁰Kà sərum ana, ŋgulum mburma ilik mə̀ mət tsiye, ndəna, gà mburma kwa tserdze ti dzeye a ya?» ⁵¹A tsik bazlam ata ka, nda meweye ŋgar tsa. Agəra ana ŋgat batsah mala mandəva kuɗa a Mbulum akahər ata ya, a mà ka, à dukw ana Mbulum a waya, a ta ge a ba ika miɗ mba ya, kamala megweɗe ya: Yesuw à mìt a agəra gà gwala gà Yahuda tserdze. ⁵²Ama kə̀la ka, agəra tar ɗekɗek tsa, agəra gà mburma ana tar gà ɓəza Mbulum, tə dzaya ba vatwa sweyèh sweyèh ika gər ahəɗ tserdze ya mbaŋa. Dite ti yahaba gər a təv ilik ŋa, ti ne ba ilik.

⁵³Agəra bazlam Kayafas ata a tsik a ka, gà bàba gà Yahuda ti yaha vatwa aà makə̀ɗà Yesuw, daga aà pat ata tsara. ⁵⁴Aɗaba taŋa na a sàs a Yesuw aà mesìweye ndərzakka i təv are gà mburma ata i fataya asa tsiye. A mah ba i fataya, a da a kwite ana tə zalar Efərayim a. Kwite ata ka, aà gùva kusak. Tə ndzaba i fata nda gà ɓəzla mazazama ŋgat.

⁵⁵Akahər ata ka, megirive gà Yahuda ana tə zalar Paska ya, aka à mendze aɗəm. Ama gà mburma ana i gà kwite ŋgiɗ a pampam hinne, tə da a Yeruzalem, i təv ana megirive ata aka ndzera zukw tsiye. Ti ta bere a ba kamala ana fəla tar a tsik a. ⁵⁶Ama i təv ana tar riŋ i fataya ka, ti yaha Yesuw. Aləka i təv mendze tar ana i batsah ga Mbulum a ka, ta gwaɗaba ika magər tar: «Kà dzalum dze ana, a dere a a megirive aaha ya ya, na kù gwaɗum a?» ⁵⁷Aɗaba gà Əbay gà ɓəzla mandəva kuɗa a Mbulum, nda gà Farisa ta gwa: «Na wura aka sər təv ana Yesuw iɗəm a ka, ma ɗif dər,« ta gis a ŋgat.

Mariya a dza à wirdè aka sik Yesuw

Mata 26:6-13; Markus 14:3-9

¹A zeha mehinne ndilik na ta ge a *megirive Paska ya. Yesuw a mbəɗ gər a kwite Betaniya, a təv ana Lazar a ndzawa iɗəm a. Ŋgat ka, wele ana Yesuw a mbəlara à ŋgat i məməta ya. ²Aləka hawa a ge ka, ti der dukw mezime i fata. Marta a ndzək a taraha. Tə zəm akaba ɗaf ka, nda Lazar, dite nda gà asiŋ gà mìsle ŋgiɗ ana tə zal a taraha ya mbaŋa. ³I fataya ka, Mariya a zla wirdè ana a ze hwaŋŋà lele, tsakala ŋa hinne, à sìkim a ba tsiye. Wirdè ata ka, zlile dukuməŋa a riŋ tə zalar *nardin, tsìsl maràhà ŋa i kwalaba. A daha, a dzaya aka sik Yesuw. I dəba ŋa ya, a tàpàɗ ihər nda ambəz ŋgar a. Ga ata ka, hwaŋŋà a rah nda meze wirdè ata fit. ⁴Ama mìsle ŋgiɗ ilik ika magər gà ɓəzla mazazama ŋgat a, zləm ŋgar Yudas Iskariyut, wele ana a ta ge a ɗaf aà Yesuw a, a gwa: ⁵«Assàh, wirdè aaha ka, a sle kur siŋgwe dərməka makər dze ana, aàla na ta kal dər tsiye, ana ka, tì dzèye a siŋgwe ŋa a gà ɓəzla matawak a?» ⁶Tsaatsa a tsik bazlam ata kataya ka, aɗaba ana gà ɓəzla matawak ti ndzer are tsehe ya tsa. Ama aɗaba ana ŋgat mala akəl, a gəsawa kìywa ana tə dzawa aɗəm siŋgwe ya ka, a ndzə̀kawa ihər a zaakwa zaakwa ya. ⁷Ama Yesuw a gwaɗar: «Miyak à məkəs aka sifik. Aɗaba ŋgat ka, aka ge aà iye dukw ana ti ti zle a dər akaba iye a biye ya. ⁸Gà ɓəzla matawak ka, tar riŋ i təv kurum kəla pat, ama iye ka, i ndze a i təv kurum kəla pat tsa.»

Ti yaha vatwa aà makə̀ɗà Lazar

⁹Gà mburma hinne tə tsaraka Yesuw a riŋ i kwite Betaniya ka, ta mah ba, tə da a fata. Tə daha a fata ka, a təv ŋgar ɗekɗek tsa, aɗaba a sàs a tar məfə̀rà aà Lazar ana Yesuw a mbəlara à ŋgat i məməta ya mbaŋa. ¹⁰Aɗaba taŋa na gà Əbay gà ɓəzla mandəva kuɗa a Mbulum ta mà akaba à bazlam aà makə̀ɗà Lazar mbaŋa ya. ¹¹Aɗaba ŋgat na gà asiŋ gà mburma ana i fataya hinne, ta miyak à tar, ta gəs Yesuw nda gəzləŋ a.

Yesuw a da a Yeruzalem

Mata 21:1-11; Markus 11:1-11; Luka 19:28-40

¹²Ndidwe ŋana ka, gà mburma ana tə daha a *megirive Paska ata ya, tə tsaraka ka, Yesuw a riŋ a dehe a a Yeruzalem. ¹³Tə daha, tə sasara gà ahər dizl ɗaf duwa kamala tə̀ɓàh a, tə da dər aà vatwa aà melime dər nda gà ŋgat. I təv ana ti ndze aà vatwa, ti de a dər a ka, ta wideye nda ndzəɗa hinne, ta gwa: «Zlə̀bakwa à Mbulum. Mbulum BATSAH kwa ŋa mi pise ahəm a wele ana a slərra ya. Mbulum mi pise ahəm a Batsah Əbay gà Isərayel.»*fa* ¹⁴Ama Yesuw ka, a le aà hezweŋe duwa, a ndza aaka, a de a dərraha a fata kamala ana wakita Mbulum a tsik a, a gwa ka:

¹⁵«Gà mburma ana i kwite Siyuna ya,

ki gwim magəɗa tsa.

Araha, Əbay kurum naha a deriŋa,

mandza ŋa ika kəla hezweŋe.»*fb*

¹⁶Ama akahər ata ka, gà ɓəzla mazazama ŋgat tə sər bazlam ata a sasar aà megweɗe ana, là ka, tə sər zukw tsa. Say i təv ana aləka Yesuw a ta meŋgete a mezlibe ana tì zlibe a à ŋgat i təv Mbulum a dzekwiŋ, na dite a ma a tarra a gər a kuɗa ya. Ama ka, tàa ge aà ŋgat kalkal kamala ana wakita Mbulum a tsik, a ta ge a ba ya kaɗəŋ.

¹⁷Akahər ata, i təv ana Yesuw a zalaha a Lazar a dive, a mbəlara à ŋgat i məməta ya ka, gà mburma riŋ hinne i fata. Gà mburma ata ibam, tə ɗama dukw ana ta ŋgatar a tserdze, a gà mìsle ŋgiɗ. ¹⁸Aɗaba taŋa na gà mburma hinne tə da aà melime nda gà ŋgat aka vatwa ya. Aɗaba tàa tsaraka, ŋgat na a ge dukw mene aà mburma ata ya. ¹⁹Gà *Farisa ta ŋgatar kamala taŋa ya ka, ta gwaɗaba ika magər tar: «Ki gekwe a dze ana, meme na dukw ana ka dzalakwa aà mege tserdze ya ka, a ge a ŋgùlum tsiye? Araha, gà mburma tserdze tekeɗe, ti zezem a ŋgat ka, hinne asa ana, meme kuɗa ya?»

Gà asiŋ gà Girek əŋgal ti yaha Yesuw

Mata 16:24-25; Markus 8:34-35; Luka 9:23-24

²⁰Ika magər gà mburma ana tə daha a megirive ata a Yeruzalem, aà medzè gurmits a bəɗ a Mbulum akahər ata ya ka, gà asiŋ gà Girek iɗəm mbaŋa. ²¹Tə da a təv Filip ana a dara i kwite Betsayida ika ahəɗ Galile ya, tə daha, ta gwaɗar: «A sàs a mər maŋgata a Yesuw te ana, meme, wele aaha.» ²²Filip a tsaraka kataya ka, a da, a tsikeha a Andire. Dite tə da a təv Yesuw sula məma. Tə daha, ti tsiker. ²³Yesuw a gwaɗa a tar aaka: «Məpàslà ahər ŋa aka sle kuɗa. I huɗ mendze zaakwa ya ka, i ŋget a mezlibe ana tì zlibe a à iye, iye, wur ana i dara i təv Mbulum a ya. ²⁴Iye ihər i gweɗe a kurum a nda ndzer, pàrsa iɗəm tsa: Na tàa tike hwife daw ilik a biye tsəka, a ndze a kataya, à sìkèh a tsa. Ama na tàa slige ka, a sliliŋa. Say wur ŋa ata a gwinekiŋa, dite naha a ge a ba, a ge a wur hinne. ²⁵Wur ana aka waya ɗa mesife ŋgar ika gər ahəɗ aaha ya ka, aka miɗ mba ka, a dzeye a dər ivaɗ. Ama wur ana aka ge kəra i gər a mesife ŋgar a ka, wura a zle a ihər a tsa, a ne a biy ŋgar aà biybiy. ²⁶Na aka sàs a wura aà megiŋ meslire ka, say ma zezem iye. Ŋgat ka, a ti ndze a i təv ana i ti ndze aɗəm a ya. Aɗaba wur ana a giŋ a meslire ya ka, Tsir gà a ti zlibe a à ŋgat mbaŋa.»

Yesuw a tsik bazlam məməta ŋgar ana à mìt a ya

²⁷Yesuw a gwaɗa a tar asa: «Kinehe ka, arəv a de a aà iye ya ka, hinne. Dite i gweɗe a ana, meme ɓav a? Wànà i gweɗe a a tsir gà ana, zla ika iye mesewere are ana a ti le a aà iye aka miɗ mba ya ya? Awaŋ, ama ka, i gweɗe a kataya tsa. Aɗaba i dara ka, agəra mesewere are ata ya seyiŋ. ²⁸Ama i gweɗere a ivaɗ ka, Tsir gà, ge dukw ana, dite ka, mburma tì zlibe a à kər a.» I dəba bazlam ŋgar ata ya tsara ka, mifefile a ɗera i gər ŋa ya, Mbulum a gwa: «Yàa mbər meɗife à ndzəɗa gà ana tì zlibe a dər à iye ya, a mburma, dite i ɗif a ter a dər asa.»

²⁹Gà mburma ana i fataya tserdze, tə tsaraka mifefile ata. Gà asiŋ ŋa ta gwa: «A ge a ka, malaka mbulum.» Gà asiŋ ŋa ibam, ta gwa: «A ge a ka, gawla Mbulum a fàfəlar.» ³⁰Ama Yesuw a gwaɗa a tar: «Mifefile ata ta fàfəlara ya ka, agəra iye tsa, ama ka, aɗaba kurum. ³¹Kinehe ka, Mbulum a ge a seriye agəra gər ahəɗ aaha kuɗa. Kamala taŋa ya, a zle a Əbay aà Əbay gà mburma gər ahəɗ a, a delewe a ŋgat ŋa. ³²Iye ka, ta gis a iye, ti tike a iye aà dizl, ta hitse a dər akaba à iye aà mbulum. I dəba ŋa ya, i zelere a a gà mburma ya tserdze, tə dara a təv ga ya.» ³³A tsik bazlam ata ka, a ɗif dər meme na à mìt a ya.

³⁴Gà mburma ata ta gwaɗar: «Mì tsaraka i wakita məpala ahəm kwa ya ka, *Kiristi, mala məmbàlà à mburma ana Mbulum a gwa, i ti slir a kurumehe a ya ka, a ti ndzewe a aà bəra ka, aà biybiy ana, dite meme ana, ki gweɗe a ka, say ti tike a *wur ana a dara i təv Mbulum a ka, aà dizl, dite ta hitse a dər aà mbulum asa ya? Weke na a ne wur ana a dara i təv Mbulum a dze ya?» ³⁵Yesuw a gwaɗa a tar aaka: «Kinehe ka, dzaydzay a riŋ i təv kurum. Ama a ndze a kə̀la ka, zaakwa pəra. I təv ana dzaydzay ŋa ata a riŋ i təv kurum mba ya ka, dum aka miɗ tə̀ma, luvuŋ mà gəs kurum tsa. Aɗaba wur ana a de a i luvuŋ a ka, a sir a təv ana a de a aɗəm a ya tsa. Tìtìktìkka luvuŋ aka ndàr aka are. ³⁶Gəsum təv dzaydzay ŋa ata, ka zazamum i təv ana a riŋ i təv kurum mba ya, dite ka nwim gà mburma dzaydzay ŋa.»

Gà Yahuda ta gəs Yesuw nda gəzləŋ tar tsa

Yesuw a tsik aba bazlam ata ya tsara ka, a da, a kaha ba aà tar a. ³⁷Ku mege aka ge gà dukw mene aà mburma i təv are tar hinne tekeɗe ka, ta gəs ŋgat nda gəzləŋ tar tsidze. ³⁸Dukw ata a ge ba ka, kamala ana Ezaya, mala məma à guma Mbulum a tsik akahər ata ya, a gwa:

«Batsah mər ŋa, weke na a gəs bazlam mər a?

Dite weke na a sər ndzəɗa yak a?»*fc*

³⁹Ama gà mburma ata ti sle aà magəsa Yesuw nda gəzləŋ tsəka, kamala ana Ezaya a tsik a asa mbaŋa kaɗəŋ. ⁴⁰A gwa:

«Mbulum aka ge aà tar guluf.

Aka ne à tar mandàkugùrum aka ndəv.

Kamala taŋa ya, ta ŋgat a vatwa asa tsa,

tə sər gà dukw ata i metsehe tar asa tsa mbaŋa.

Dite kwets tàa mbəɗara ahəm

a təv ga ya ɓav tsa asa mbaŋa,

na dite i ta mbele à ter a ya.»*fd*

⁴¹Ezaya a tsik kataya ka, aɗaba ana a sər mezlibe ana tì zlibe a à Yesuw a, dite na a fàfəl aka gər ŋgar a.

⁴²Tsaatsa ku mege kataya tekeɗe ka, gà mburma hinne tàa gəs Yesuw nda gəzləŋ, ku mege ika magər gà Əbay gà Yahuda tekeɗe ibam a. Ama ta gəs meɗife dər a bəra tsəka, aɗaba ana gà *Farisa ti ti delewe a tar i ga mahàmà a Mbulum a ya. ⁴³A sàs a tar ka, tə da a gər a mburma, mà za biy Mbulum.

Dukw ana Yesuw a tsik a ya ka, à gis a mburma a seriye

⁴⁴Aləka i dəba ŋa ya ka, Yesuw a wideye ŋgəlakəkka. I huɗ Mewideye ŋgar ata ya ka, a gwa: «Wur ana aka gis iye nda gəzləŋ a ka, a gəs taŋa ka, iye ɗekɗek tsa, a gəs ka, wele ana a slərra iye ya mbaŋa. ⁴⁵Wur ana a riŋ ihər a ŋgetiŋ a ya ka, a ŋget a taŋa ka, a wele ana a slərra iye ya mbaŋa asa. ⁴⁶I dara aka gər ahəɗ a ka, aà məpàtà à dzaydzay ŋa a mburma, dite ka, gà mburma ana tàa gəs iye nda gəzləŋ tar a ka, tə ndza i luvuŋ asa tsa. ⁴⁷Na wura aka tsaraka bazlam gà ana i tsik a ya, aka gəs tsəka, iye tsa na a ge ahər a seriye ya. Aɗaba i dara ka, aà məmbə̀là à mburma ya, tsəka, aà mege aà tar seriye tsa. ⁴⁸Wur ana aka niw iye, aka gəs bazlam gà tsəka, seriye à gis a ŋgat a pat mandəvandəv gər ahəɗ ana Mbulum a ta ge a seriye aà mburma ya. Bazlam gà ana i tsik a ya pəra na à gis a ŋgat i seriye a pat ata ya. ⁴⁹Aɗaba i fàfəl ka, nda gər gà tsa, ama Tsir gà ana a slərra iye ya, na a gweɗiŋ, fàfəl, tsik naha, kige tsa tsik naaka ya. ⁵⁰I sər, dukw ana a tsikiŋ a ka, a vile a kurum a mesife ana à ndìv a tsa aà biybiy a. Agəra taŋa na dukw ana i tsik a ya ka, kalkal, kamala biy ana Tsir gà a gweɗiŋ, tsik a.»

Yesuw a bara sik gà ɓəzla mazazama ŋgat

Mata 23:11-12; Luka 22:24-28

¹Akahər ata ka, a zeha mehinne ilik na *megirive Paska gà Yahuda a ndze aɗəm a ya. Yesuw a sər dər tits mede a təv Tsir ŋgar ika gər ahəɗ a ide ka, aka sle kuɗa. Daga piŋŋe na a waya gà mburma ana ɗa ika gər ahəɗ, ti ne gà biy ŋgar a, dite na kinehe tekeɗe, a pat a tar dər parakkà à meweye ŋgar ana a waya tar hinne ya.

²A pat ata i hawa ka, tar riŋ ti zim a akaba a ɗaf nda gà ɓəzla mazazama ŋgat. Taŋa Əbay sitene aka mbər mivile madzala gà gər a gəzləŋ a Yudas, kəla Simun Iskariyut, dite ka, ma ge ɗaf aà Yesuw. ³Yesuw a sər ka, Tsir ŋgar aka mbər miviler a ba ndzəɗa aà makwàrà gà dukw ana tserdze ya. Ŋgat nda gər ŋgar a sər mbaŋa ka, a dara ka, i təv Mbulum a, dite a ta mbìɗ a gər tekeɗe ka, a təv ŋgar asa mbaŋa. ⁴I təv ana tar riŋ mayahaba gər ŋa i təv mazəma dukw mezime tar ata ya ka, a hitse aà mbulum, a suɗara ikaba petek a, a daha, a zla petek magà aba yam a, a dàn dər ba ŋgə̀rəɗ ika dəmkul a. ⁵A daha, a tə̀f yam a tasà, a dza dər ba aà məbàrà sik gà ɓəzla mazazama ŋgat ata, dite a tèpèɗ a dər aà tar yam ata ya. A dza ahər ba i təv wele ana a mbereha ya tsara.

⁶Aləka a ndze dər a təv Simun Piyer ka, a gwaɗa a Yesuw: «Gaa, Batsah ga ŋa, na a beriŋ a sik ana, kər ivaɗ a?» ⁷Yesuw a gwaɗar aaka: «Kà sər dukw ana i ge a ya tsa, na kinehe ya, ama ki sir a ka, aka miɗ mba.» ⁸Piyer a gwaɗar: «Awaŋ, kər ka, Batsah ga ŋa, ki beriŋ a sik ivaɗ tsa.» Yesuw a gwaɗar aaka: «Na Yàa barak sik tsəka, ki sleme a aà mendze i təv ilik ŋa asa tsa.» ⁹Simun Piyer a gwaɗar: «Batsah ga ŋa, na kataya ka, ka beriŋ ka, sik ɗekɗek tsa, beriŋ gà ahər nda gər mbaŋa.» ¹⁰Yesuw a gwaɗar: «Wur ana aka bara ba ya ka, a ndze a ka, tsəɗaŋŋa, a sasar məbàrà ba masula ŋa asa tsa. A bere a ka, say gà sik ɗekɗek pəra. Kinehe kurum tserdze ka, məbàrà ŋa. Ama kə̀la ka, wura ilik ika magər kurum ka, məbàrà ŋa tsa.» ¹¹Yesuw a sər wele ana a ta ge aà ŋgat a ɗaf a. Aɗaba taŋa na a gwaɗa a tar ka, kurum tserdze tsa na gà məbàrà ŋa ya ya.

¹²Aləka Yesuw a bara tar aba sik a lele ka, a mà akaba à gà petek ŋgar asa. A daha, a ndza a bəɗ a təv mazəma ɗaf tar ata. I dəba ŋa ya, a gwaɗa a tar: «Kà sərum dukw ana i ge a kurum a ya? ¹³Kurum ihər ki zelwimiŋ a mala medzeŋge a mər, kige tsa Batsah mər ŋa ka, ndzer kaɗəŋ, pàrsa iɗəm tsa. Aɗaba iye ka, kataya dukw ŋgar. ¹⁴Na iye mala medzeŋge a kurum, dite Batsah kurum ŋa asa, Yàa bara kurum sik seyiŋ ivaɗ ka, say kurum tekeɗe, ki bereywim a ba a sik kurum ika magər kurum ilik ilik tserdze kamala taŋa ya mbaŋa. ¹⁵Yàa ɗif a kurum dər, meme na ki gwim a ya, dite ka, ki geywim a ba dukw ana ŋgwal ŋa kamala biy na iye i ge a kurum a. ¹⁶Iye ihər i gweɗe a kurum a nda ndzer, pàrsa iɗəm tsa: Ɓele ka, à zè a mala ga ŋgar tsa, dite mala meslire à zè a wur ana a slər ŋgat a ɓav tsa asa. ¹⁷Kinehe ka, kà sərum taŋa. Maŋgayaba ika magər kurum ka, hinne, na kàa tikwim gər a guma aaha ya.

¹⁸I fàfəl taŋa ka, aka gər kurum ana tserdze ya tsa. Iye ŋa i sər gà mburma ana i pala tar a. Ama dukw ana mewetse ŋa i wakita Mbulum akahər ata ya ka, a ge a ba kalkal kamala taŋa ya kaɗəŋ. Aɗaba ta gwa ka: <Wele ana maa zəm akaba ɗaf a ka, a ti niŋ a are.>*fa* ¹⁹I tsik a kurum a aba ya daga kinehe, aka na dukuməŋa aka ndzera zukw tsiye, dite aka təv ana aləka aka ndzera ya ka, ki giswim a iye nda gəzləŋ, ki sirwim a dər, iye ka, Wele ana ŋgat ŋa ya ndzer kaɗəŋ. ²⁰Iye ihər i tsik a kurum a nda ndzer, pàrsa iɗəm tsa: Wele ana aka gəs mala meslire ana i slir a ya ka, a gəs taŋa ka, iye mbaŋa. Dite wele ana aka gəs iye ya ka, a gəs ka, wele ana a slərra iye ya mbaŋa asa.»

Yesuw a ɗif à Yudas ana a ta ge aà ŋgat a ɗaf a

Mata 26:20-25; Markus 14:17-21; Luka 22:21-23

²¹Yesuw a tsik a tar aba bazlam ata ya tsara ka, dùwaɗ arəv a da ihər a. A gwaɗa a tar: «Iye ihər i tsik a kurum a nda ndzer, pàrsa iɗəm tsa: Wura ilik ika magər kurum aaha kinehe ya, a ta ge aà iye a ɗaf.» ²²Gà ɓəzla mazazama ŋgat ata, tə tsaraka kataya ka, ta maya akaba à are ika magər tar ba bà ba ba tserdze. Ama tə sər bazlam ata a tsik ana, aà weke ka, tə sər tsa. ²³Wele ŋgiɗ ilik ika magər gà ɓəzla mazazama Yesuw ata ya, ŋgat ka, mandərkwasla ŋgar. A riŋ mandza ŋa i təv ŋgar bise. ²⁴Simun Piyer a zekweraha ahər, kamala megweɗe ya, mà tsam bazlam ata aà Yesuw ka, weke na a tsik ahər kataya ya? ²⁵Aɗaba taŋa, mandərkwasla Yesuw ata a dzadzakaha à gər ndàra a təv Yesuw. A gwaɗar: «Batsah mər ŋa, weke na kà tsik ahər kataya dze ya?» ²⁶Yesuw a gwaɗar aaka: «Yàa sàs ɗaf, Yàa ge ahər ala bùnùt, Yàa vəlar ka, wele ata na a ta ge aà iye a ɗaf a.» Aləka Yesuw a sàs ɗaf ata, a ge ahər ala, a vəl a Yudas, kəla Simun Iskariyut.

²⁷Yudas a gəs ɗaf ata tsara ka, Əbay sitene a dar a gəzləŋ. Yesuw a gwaɗar: «Dukw ana a sàsak aà mege ya ka, ge aba ya kinehe tsəma.» ²⁸Wura ilik ika magər gà mburma ana tar riŋ ti zim a ɗaf tserdze ya, aka sər, aàmala na Yesuw a tsiker taŋa ya ka, a sər tsa. ²⁹Aɗaba ana Yudas ŋgat ka, mala makàslà siŋgwe ya, na gà asiŋ ŋa i liwiŋ tar tə dzala, ta gwa: «A ge a ka, Yesuw a gwaɗar: <Da, tə sə̀kəmara gà dukw mezime aà *megirive Paska ya.> « Gà mìsle ŋgiɗ ta gwa: «A ge a ka, a gwaɗar: <Vəl duwa a gà ɓəzla matawak zaakwa.> « ³⁰Yudas a zəm ɗaf ata tsara ka, a dara a bəra ya ndaàvəɗ ata, aɗaba həvəɗ aka ge.

Məpala ahəm awiya ŋana

³¹Aləka i dəba Yudas ana a dara iɗəm a bəra ya ka, Yesuw a gwaɗa a tar: «Kinehe ka, mburma ta ŋget a a mezlibe ana tì zlibe a à iye, wur ana i dara i təv Mbulum a, dite ta ŋget a a mezlibe ana ti zlibe a à Mbulum nda təv ga ya mbaŋa. ³²Na mburma ta ŋget a a mezlibe ana tì zlibe a à Mbulum nda təv ga, iye, wur ana i dara i təv ŋgar a ka, Mbulum tekeɗe, a ɗif a ter a à mezlibe ana tì zlibe a à iye ya mbaŋa. Kinehe bise na a zle a ŋgat a təv mezlibe ŋgar ata tì zlibe a dər a. ³³Gà ɓəza gà, kinehe ka, iye ɗa i təv kurum tə̀ma. Ama kə̀la ka, i ndze a hinne asa tsa. Na Yàa da aà kurum a ka, ki ti yehwim a iye. Taŋa kinehe ka, i tsik a kurum aba dukw ana i tsik a gà bàba gà Yahuda ya: Ki slwim a aà mede a təv ana i de aɗəm ya tsa. ³⁴Araha, i tsik a kurum a məpala ahəm awiya ŋa. Dukw ana i tsik a ya ka, wayum ba kurum ilik ilik tserdze. Ki weywim a ba ka, kamala ana i waya kurum a mbaŋa. ³⁵Na kàa gwim dər kataya ka, gà mburma tserdze ti sir a dər, kurum ka, gà ɓəzla mazazama iye nda ndzer kaɗəŋ.»

Yesuw a ɗif à Piyer ana a ta gweɗe aà ŋgat a, i sər ŋgat tsiye

Mata 26:31-35; Markus 14:27-31; Luka 22:31-34

³⁶I fataya ka, Simun Piyer a gwaɗa a Yesuw: «Batsah ga ŋa, kà tsik kataya ana, ki de a ana, a ŋga?» Yesuw a gwaɗar aaka: «I de a ka, a təv ana ki sle a aà mezezeme iye tsiye. Say aka miɗ mba dzekwiŋ na ki ti zezem a iye ya.» ³⁷Piyer a gwaɗar: «Batsah ga ŋa, i sle aà mezezeme a kər tsəna, aàla? Aɗaba iye ka, Yàa hadzal ba aà medzeye à mesife gà aɗaba kər.» ³⁸Yesuw a gwaɗar aaka: «Kàa hadzal ba aà medzeye à mesife yak aɗaba iye ndzer a? Iye ihər i gweɗek a nda ndzer, pàrsa iɗəm tsa: Ələk guŋgwazl a ti tiwe a ka, kàa mbər megweɗe medzige makər, i sər ŋgat tsa.»

Yesuw ka, vatwa ana a da a təv Mbulum a

¹I dəba bazlam ata ya ka, Yesuw a gwaɗa a tar asa: «Arəv ma da aà kurum a tsa. Gəsum Mbulum nda gəzləŋ kurum, dite ka, gəsum iye mbaŋa. ²Gà ga a riŋ i bəra Tsir gà pampam hinne. Na mege təv riŋ tsəka, ana ka, i tsik a kurum a tsa. Kinehe ka, iye ihər i de a, i ti lèmbeɗe a kurum a aba təv mendze ata ya. ³Na Yàa da, Yàa làmbaɗa a kurumara aba təv mendze ata ya ka, i mbiɗere a gər a təv kurum a, dite i dzik a kurum a təv gà, kurum tekeɗe, ki ndzwim a i təv ana iye iɗəm a mbaŋa. ⁴Kurum ka, kà sərum vatwa təv ana iye ihər i de aɗəm a ya.»

⁵Tumas a gwaɗar: «Batsah mər ŋa, mì sər təv ana ki de aɗəm a ya tsa. Dite meme na mìi sle aà mesire a vatwa ŋa dze ya?» ⁶Yesuw a gwaɗar aaka: «Iye na a ne vatwa ata ya. Ki ŋgetwim a ndzer nda mesife ka, i təv ga ya mbaŋa. Wura a sle a aà mede a təv Tsir gà tsa, say na nda təv ga ilik tsiye. ⁷Na kàa sərum iye ka, ki sirwim a Tsir gà mbaŋa. Daga aà kinehe ya, kà sərum ŋgat, dite kàa ŋgatumar.»

⁸Filip a gwaɗar: «Batsah mər ŋa, ɗif a mər à Tsir yak ŋa, tsam ka, aka ndəv.» ⁹Yesuw a gwaɗar aaka: «Yàa ndza hinne na i təv kurum dze ana, kà sər iye tsa hiywe ya, Filip? Na wura aka ŋgetiŋ ka, a ŋgat taŋa ka, a Tsir gà mbaŋa. Aàmala na ki gweɗe a ka, say ɗif a mər à Tsir yak ŋa asa dzekwiŋ a? ¹⁰Wànà kàa gəs iye, kà sər tsiye ka, mər nda Tsir gà mandza ŋa i təv ilik ŋa ya? Gà bazlam ana i tsik a kurum a tserdze ya ka, nda meweye gà tsa. I mà ka, à biy Tsir gà ana mər mandza ŋa i təv ilik ŋa, a ge a megemir nda ahər gà ya. ¹¹Gəsum bazlam gà ana i gwaɗa a kurum ka, mər ilik nda Tsir gà, iye i təv ŋgar, ŋgat tekeɗe, i təv ga ya. Na kàa gəsum taŋa i tsik a kurum a tsəka, gəsum bazlam megemir aaha i gewa ya, àsla pəra ka, ide.

¹²Iye ihər i gweɗe a kurum a nda ndzer, pàrsa iɗəm tsa: Wele ana aka gəs iye nda gəzləŋ a ka, a ge a gà mege megemir ana iye ihər i ge a ya mbaŋa. A ta ge a ka, gà bàba gà megemir ana à ze a taŋa ya, aɗaba iye ihər i de a a təv Tsir gà. ¹³Dukw ana tserdze kàa wizwim nda zləm gà ya ka, i vile a kurum ŋa, na dite mburma ti zlibe a à Tsir gà, aɗaba iye ana Kəla ŋgar a. ¹⁴Na kàa wizwim duwa tserdze nda zləm gà ka, i vile a kurum ŋa.»

Mezite Mesife ana Yesuw a gwa ka, i ti slir a kurumere a ya

¹⁵Yesuw a gwaɗa a tar asa: «Na kàa wayum iye ka, ki giswim a məpala ahəm gà ana i tsik a ya mbaŋa. ^16-17I ta heme a a Tsir gà, ma slər a kurumara mìsle ŋgiɗ a, aà mazlàkà kurum, kamala megweɗe ya ka, Mezite Mesife ana a ɗif a kurum a à ndzer, a ndze a i təv kurum kəla pat aà biybiy a. Gà mburma ana ti zezem a gər ahəɗ ka, ti sle aà meŋgete a tsa, aɗaba ana tə sər tsa, dite ka, ta ŋgeter a tsa asa ya. Ama kurum ka, ki sirwim a ŋgat, aɗaba ana a dere a ka, a ndze a i gəzləŋ kurum, ki ndzwim a tserdze i təv ilik ŋa ya.

¹⁸Aɗaba taŋa, sərum dər ka, i ta miyek à kurum a à gər kurum kamala gà ɓəza kəla megile ya tsa. I mbiɗere a gər a təv kurum a. ¹⁹I huɗ mendze zaakwa ya ka, i de a ika gər ahəɗ a. Ama kə̀la ka, i ndze a i təv kurum hiywe. Aɗaba ana iye riŋ nda gà mesife ya, kurum tekeɗe, ki ti ndzwim a nda gà mesife ata mbaŋa. ²⁰Na pat ana Mezìtè Mesife Mbulum a dere a a təv kurum a, aka ndzera ka, ki ti sirwim a dər, mər ilik nda Tsir gà, iye riŋ i təv ŋgar, kurum tekeɗe, mandza ŋa i təv i ilik ŋa nda gà iye. Iye tekeɗe, iye riŋ mandza ŋa i gəzləŋ kurum.

²¹Wur ana aka gəs məpala ahəm gà, a dzar gurmits a bəɗ a ka, ŋgat na a waya iye ndzer a. Ama wele ana a waya iye ya ka, Tsir gà tekeɗe, a weye a ŋgat mbaŋa. Dite iye ibam, i weye a ŋgat asa mbaŋa. I ta pèter a à ndzəɗa gà.»

²²Wele ŋgiɗ pam, zləm ŋgar Yudas asa, tsəka, kəla Iskariyut tsa, a gwaɗa a Yesuw: «Batsah mər ŋa, meme na a sàsak ki pèt a mər a à ndzəɗa yak ka, a mər ɗekɗek a? Dite ki pèt a dər a gà mburma ana ti zezem a gər ahəɗ a tsiye?» ²³Yesuw a gwaɗar aaka: «Wur ana a weye a iye ya ka, a ti dze a gurmits a bəɗ a dukw ana i tsik a ya mbaŋa. Tsir gà a ta weye a ŋgat, dite ka, mər məma mìi dere a, mìi ndze a nda gà ŋgat. ²⁴Wele ana a waya iye tsiye ka, a dze a gurmits a bəɗ a mifefile gà ɓav tsa. Dukw ana kà tsarakum a ka, a dara ka, i madzala gà gər gà ya tsa. Ama a dara ka, i təv Tsir gà ana a slərra iye ya.

²⁵I tsik a kurum aba bazlam aaha ya ka, aɗaba ana iye ɗa i təv kurum mba ya. ²⁶Wele ana a ti zlèk a kurum a, kamala megweɗe ya, Mezite Mesife ana Tsir gà a ti slir a kurumere a avukw iye ya, a ti ɗif a kurum a à dukw tserdze, dite gà dukw ata i tsik a kurum a tserdze, ta mèye a kurumere a a gər a.

²⁷Ama kinehe i de a aà kurum a ka, i vile a kurum a aba matasla yam gà a gəzləŋ kurum a. Ki ndzwim a dər ɗa barbararra lele. I vile a kurum a ka, kamala biy ana gər ahəɗ a vile a kurum a ya tsa. Ki gwim magəɗa, arəv ma da aà kurum a tsa. ²⁸Kàa tsarakum dukw ana i gwaɗa a kurum ka: <I de a aà kurum a, dite i mère a a təv kurum a> ya. Na kàa wayum iye ka, ŋgeywim ba hinne, aɗaba ana kàa sərum dər, i de a a təv Tsir gà, ŋgat ka, batsah ŋa, a za iye ya. ²⁹Yàa tsik a kurum aba məpàslà ahər ŋa a gà dukw ata ti ta ge a ba aka miɗ mba i təv ana tàa ndzera zukw tsiye ya, dite i təv ana aka ndzera ya ka, ki giswim a nda gəzləŋ kuɗa. ³⁰Kinehe ka, i tsik a kurum a duwa hinne asa tsa, aɗaba Əbay gər ahəɗ aaha aka à mendzera. Ama kə̀la ka, ndzəɗa ŋgar a riŋ aà mekwere iye tətsà. ³¹Ama i ge a ka, kamala ana Tsir gà a gweɗiŋ, ge ya, na dite ku weke ma sər dər ka, i waya ŋgat a.

Kinehe ka, hitswim aà mbulum, tàkwa i faha ya.»

Bazlam minew dizl ɗaf duwa a ndzikiɗ ba hàndaza,

a we a hinne

¹Aləka Yesuw a gwaɗa a tar asa: «Iye ka, kamala ŋgwal dizl ɗaf ana a we a lele ya. Dite Tsir gà ka, a ne mala gùvàh, à fìtiŋa.*fa* ²Ahər ana a we a lele tsiye ka, a ses a ihər a. Ama ahər ana a we a ya ka, a tìrìtser a ahəm pəra, dite ka, ma zlala ahər, ma wa lele. ³Kurum kà nwim ka, tsəɗaŋŋa, aɗaba guma aaha i tsik a kurum a. ⁴21Ndzum i təv gà, kamala ahər dizl ɗaf ana mandza ŋa aà dizl ŋa ya, dite ka, iye tekeɗe, i ndze a i təv kurum. Ahər dizl ɗaf a sle aà mewe a à gər ŋgar tsa na ahəm dizl ŋa ihər tsiye. Kərga taŋa ya mbaŋa, ki slwim a aà mege duwa ilik tsa na kàa ndzum i təv ilik ŋa nda gà iye tsiye.

⁵Iye i ne ka, kamala dizl ɗaf ata ya, dite kurum kà nwim ka, gà ɓəza ahər ŋana. Wur ana a ndze a i təv ga, iye tekeɗe, i ndze a i təv ŋgar a ka, ŋgat a ne ka, kamala ahər dizl ɗaf ata a we a hinne ya. Ama wur ana a ndze a i təv gà tsiye ka, a sle a aà mege duwa ilik tsidze. ⁶Wele ana ŋgat i təv ga tsiye ka, Mbulum a niw a ŋgat. A ne a kamala ahər dizl ɗaf ana tə sàs ihər a, tì yè a a dala, dite a kwile a ya. Na aka kula ka, ti yeher a gər, dite tì dzer a akwa, a weniŋa. ⁷Na bəla kurum riŋ ki ndzwim a i təv gà, ki giswim a bazlam ga, ki zezemwim a lele ka, wizwim dukw ana a sàs a kurum a, ki ŋgetwimiŋa. ⁸Na kàa nwim kamala dizl ɗaf ata a wa hinne ya ka, gà mburma ti sir a dər ka, kurum gà ɓəzla mezezeme iye ndzer kaɗəŋ. Kamala taŋa ya, mezlibe ana tì zlibe a à Mbulum Tsir gà ya, à pèt a aba parakkà lele.

⁹I waya kurum ka, kamala Tsir gà ana a waya iye ya mbaŋa. Ndzum i təv meweye gà ana i waya kurum a kəla pat aka miɗ aka miɗ. ¹⁰Na kàa dzum gurmits a bəɗ a məpala ahəm gà kamala biy ana iye ihər i dze a a bəɗ a biy Tsir gà ya ka, ki ndzwim a i təv meweye gà ana i waya kurum a kəla pat, kamala iye ana mandza ŋa i təv meweye ŋgar ana a waya iye ya mbaŋa te. ¹¹I tsik a kurum gà dukw ata ka, dite maŋgayaba ana i ŋgeye a ba ya ka, ma ge i təv kurum, dite mà rah a gəzləŋ kurum tsìsl lele.

¹²Məpala ahəm gà ana i tsik a kurum a ka, araha: Wayum ba ilik ilik tserdze kamala iye ana i waya kurum a. ¹³Na wura a dzeye a à mesife ŋgar nda mezìwè gər ŋgar, aɗaba gà masla ŋgar ka, mawàyà ba a riŋ a zè a taŋa tsa. ¹⁴Kurum ka, gà masla gà, na kàa gwim dukw ana i gwaɗa a kurum, gwim a. ¹⁵I sle aà mezele a kurum a ka, gà ɓəzla meslire gà asa tsa, aɗaba gà ɓəzla meslire ka, tə sər dukw ana mala ga tar a ge a ya tsa. I zel a kurum a ka, gà masla gà ivaɗ. Kà sərum taŋa ka, aɗaba ana Yàa mbər meɗife a kurum à guma ana i tsarakara i təv Tsir gà ya fit. ¹⁶Kurum tsa na kà zlum iye kamala Batsah kurum ŋa ya. Ama iye na a pala kurum a, dite kà nwim gà ɓəzla mezezeme iye ivaɗ. I pala kurum ka, aà mege meslire gà, dite ka nwim kamala dizl ɗaf ata a we a hinne ya. Mege megemir kurum a de a aka miɗ aka miɗ, a ndze a aà biybiy. Kərga taŋa ya na, dukw ana ki wizwim a aà Tsir gà nda zləm gà ya ka, a vile a kurum ŋa. ¹⁷Aɗaba taŋa na kinehe iye ihər i gweɗe a kurum a ka, wayum ba kurum ilik ilik tserdze ya.»

Gà mburma gər ahəɗ ka, ti ne a are a gà Yesuw

nda gà mburma ŋgar

¹⁸Yesuw a gwaɗa a tar asa: «Na gà mburma ana ti zezem a gər ahəɗ a, tàa ne a kurum are ka, sərum dər ka, tàa mbər meniŋ are mbaŋa. ¹⁹Na mege kurum gà mburma ana ti zezem a gər ahəɗ a ka, ana ka, ta weye a kurum, aɗaba ana kà nwim gà mburma tar a. Ama kinehe ka, Yàa palara kurum i liwiŋ tar a, dite na kà nwim gà mburma tar asa tsiye. Aɗaba taŋa na gà mburma ana ti zezem a gər ahəɗ ti ne a kurum are ya. ²⁰Bazlam ana ndeɗiŋa i tsik a kurum a ka, mə̀ məts a kurum gər tsa, na i gwa ka, mala meslire a zè a mala ga ŋgar tsiye ya. Na tàa sèwèriŋ are ka, ti ti sèwèr a kurum a are mbaŋa. Na tàa dza gurmits a bəɗ a guma gà ka, ti ti dze a a bəɗ a biy kurum mbaŋa.

²¹Ama ti sèwèreye a kurum a are ata tserdze ya ka, agəra iye, aɗaba ana tàa sər wele ana a slərra iye ya tsiye. ²²Na mege i dara ndeɗiŋa, dite i tsik a tar gà bazlam tsəka, ana ka, Mbulum à gis a tar nda seriye ŋgar tsa. Ama kinehe ka, tàa tsaraka dukw ana i tsik a ya tserdze, dite ta ge a dər akaba bakal ka, bakal tar ata à pìl a asa tsa. ²³Wur ana aka niŋ are ya ka, a ne are ka, a Tsir gà mbaŋa. ²⁴Na mege ndeɗiŋa Yàa mbər mege gà megemir ana wura ilik ika magər tar a, aka ge tsiye tsəka, ana ka, Mbulum à gis a tar nda seriye ŋgar tsa. Ama kinehe, ku mege tàa ŋgat a gà megemir gà ana i ge ya tekeɗe ka, tar riŋ ti ne a mər a dər akaba are nda Tsir gà hiywe pəra. ²⁵Gà dukw ata ta ge a ba kataya ka, dite bazlam ana mewetse ŋa i wakita məpala ahəm tar a, mə̀ pàt aba lele, a gwa: <Ti niŋ are ka, taf masakəŋa.>*fb*

²⁶Ama wele ana à zlèk a kurum a ka, a deriŋa, kamala megweɗe ya, Mezite Mesife ana a ɗif a à ndzer ŋa a mburma ya. A dere a ka, i təv Tsir gà ya. Na Yàa da a təv ŋgar ka, i slir a kurumeriŋa. A tsik a a mburma tserdze, iye ana weke ka, a ne a mala sida gà. ²⁷Dite kurum tekeɗe, ki nwim a gà ɓəzla sida gà mbaŋa, aɗaba ana kurum riŋ mandza ŋa i təv ga daga piŋŋe ya.

¹I tsik a kurum a kataya ka, dite i təv ana gà mburma ti sèwèr a kurum a are ya ka, ka ta miyakum à megìse iye i gəzləŋ kurum a tsa. ²Ti ti delewere a kurum i ga mahàmà a Mbulum tar a. Pat ŋa a riŋ a ndzere a ka, wura à kiɗ a aà kurum a, a gweɗe a, i ge taŋa ka, dukw ana a tsahən aà Mbulum a. ³Ti ta ge a kataya ka, aɗaba ana tə sər Tsir gà tsiye, dite ka, tə sər iye tsa mbaŋa ya. ⁴Ama i tsik a kurum kataya ka, dite i təv ana gà pat ŋa tàa ndzera, tì sèwèr a kurum are kamala taŋa ya ka, ki sirwim a dər, a tsik a mər ka, ndzer kaɗəŋ.»

Mege megemir Mezite Mesife Mbulum

Yesuw a gwaɗa a tar asa: «I gəs metsike a kurum daga piŋŋe tsəka, aɗaba ana iye riŋ i təv kurum mba ya. ⁵Ama kinehe ka, i tsik a kurum a aba ya, aɗaba ana i de a aà kurum a, i de a a təv wele ana a slərra iye ya. Ama wura ilik i təv kurum a, a ta gweɗiŋ a ka, ki de a a ŋga tsa. ⁶Matsəɓatsəɓ i gəzləŋ kurum ivaɗ, aɗaba ana i gwaɗa a kurum ka, i de a aà kurum a ya. ⁷Ama dzùmar zləm, gəsum dukw ana i tsik a kurum a ya ka, ndzer kaɗəŋ. A ge a kurum a ŋgwal ŋa ka, na Yàa da à kurum a ivaɗ, aɗaba ana Yàa da tsəka, mala mazlàkà kurum ata a dere a a təv kurum a asa tsa. Ama na Yàa da ka, i slirre a təv kurum a.

⁸Na aka dara ka, a ɗif a à ndzer ŋa a gà mburma ana ti zezem a gər ahəɗ a, dite ti sir aaba a i bakal tar ana ta ge a ya, nda gà i dukw ana ŋgwal ŋa ika miɗ Mbulum a. Ti sir a mbaŋa ka, Mbulum na à ses a ikaba seriye tar a. ⁹A ti ɗe a ter a dər ka, tar gà ɓəzla bakal, aɗaba ana tàa gəs iye nda gəzləŋ tar tsiye. ¹⁰A ti ɗe a ter a asa ka, iye na ŋgwal ŋa ndzer ika miɗ Mbulum a. Ti sir a taŋa ka, aɗaba ana iye ihər i de a a təv Tsir gà, ki ta ŋgetwim a asa tsiye. ¹¹Dite a ti ɗe a ter a dər asa mbaŋa ka, Mbulum na a ti ses a ikaba seriye tar a ya, aɗaba ti sir a ka, seriye aka mbər megìse Əbay gər ahəɗ aaha kinehe ya.

¹²Taŋa gà dukw a riŋ aà metsike a kurum ka, hinne asa, ama ki slwim a aà mesire kinehe zukw tsa. ¹³Na Mezite Mesife Mbulum ata a ɗif a à ndzer a mburma ya, aka dara ka, a ɗif a kurum a à ndzer ŋgar ata aka gər duwa tserdze kuɗa. A ta fèfil a ka, nda ndzəɗa ŋgar tsa. Ama a ti tsik a kurum a ka, dukw ana a tsarakara i təv Tsir gà ya, dite à ta me a kurum a à gà dukw ana ti ta ge a ba ika miɗ mba ya mbaŋa. ¹⁴Gà mburma tì zlibe a à iye, aɗaba ŋgat, agəra ana a tsarakara bazlam i təv ga ya, dite na à me a kurum a dər a. ¹⁵Dukw ana i ahər Tsir gà tserdze ya ka, biy gà mbaŋa. Aɗaba taŋa, i gwa: Dukw ana Mezite Mesife Mbulum à me a kurum a dər a ka, i təv ga ya na a tsarakara ya.»

Matsəɓatsəɓ a ti ne a maŋgayaba

¹⁶Yesuw a gwaɗa a tar asa: «I huɗ mendze zaakwa ya ka, ki ta ŋgetwimiŋ a asa tsa, dite i huɗ mendze zaakwa ya asa ka, ki ta ŋgetwimiŋ a asa.»

¹⁷Gà asiŋ ŋa ika magər gà ɓəzla mazazama ŋgat ata tə tsaraka kataya ka, ta gwaɗaba ika magər tar: «Dukula na a sasar aà megweɗe i huɗ bazlam ŋgar ata, a gwa ka: I huɗ mendze zaakwa ya ka, ki ta ŋgetwimiŋ a asa tsa, dite ka, i huɗ mendze zaakwa ya ka, ki ta ŋgetwimiŋ a asa ya? Dite biy na a gwa asa ka: Aɗaba ana i de a a təv Tsir gà ya asa dze ya? ¹⁸Dukula na a ne i huɗ mendze ata zaakwa a tsik a ya? Ama kà sərakwa dər dukw ana a sasar aà metsike ya tsa.» ¹⁹I huɗ bazlam tar ata ya ka, Yesuw a sər a taraha aka dukw ana a sàs a tar aà mewize aà ŋgat a. A gwaɗa a tar aaka: «I gwaɗa a kurum ka, i huɗ mendze zaakwa ya ka, ki ta ŋgetwimiŋ a asa tsa, dite i huɗ mendze zaakwa ya asa ka, ki ta ŋgetwimiŋ a ya. Ama bazlam ata i tsik a ana, a wise a kurum gər a? ²⁰Iye ihər i tsik a kurum a nda ndzer, pàrsa iɗəm tsa: Ki gwim a arəv tur tur tur nda gà tuwa hinne, ama gà mburma ana ti zezem a gər ahəɗ a ka, ta ŋgeye a ba. Malahalah ŋa ka, ki gwim a arəv hinne, ama i dəba ŋa ya ka, arəv kurum ata a ne a maŋgayaba kuɗa. ²¹A ne kamala məkəs ana mawà kəla a dza ahər ba ya. Malahalah ŋa ka, arəv a de a ihər a hinne, aɗaba kəla ana a wir ahər a ya. Ama aləka aka wa ka, a ŋgeye a ba, aɗaba kəla ana a wa ya. Mawura ŋa ata aka mətsar gər tsara. ²²Kamala taŋa ya, i təv kurum tekeɗe, kataya mbaŋa. Taŋa i təv kurum i faha ka, ki gwim a arəv hinne. Ama i dəba ŋa ya ka, ki ta ŋgetekewebe a asa. Ki ta ŋgeywim a ba hinne, dite wura ilik a sle a aà mazla aà kurum dukw maŋgayaba ata ya asa tsa.

²³Pat ŋa aka ndzera ka, ki sirwim a lele, ki wizwim a aà iye duwa asa tsa. Iye ihər i tsik a kurum a nda ndzer, pàrsa iɗəm tsa: Dukw ana ki wizwim a aà Tsir gà tserdze nda zləm gà ya ka, a vile a kurum ŋa. ²⁴Haa kinehe tekeɗe, kàa wizwim duwa nda zləm gà zukw tsa. Ama ka, wizwim ahər, a vile a kurum a dukw ana kà wizwim a, dite ka, maŋgayaba mà rah a gəzləŋ kurum tsìsl lele.»

Yesuw a mba aà gà dukw ana ika gər ahəɗ tserdze ya

²⁵Yesuw a tsik a tar asa mbaŋa, a gwaɗa a tar: «I tsik a kurum gà dukw ata tserdze ya ka, mendzikiɗe ba duwa. Ama pat ŋgiɗ a ndzere a ka, i ta fèfil a kurum a bazlam mendzikiɗe ba duwa asa tsa. I ɗif a kurum a ka, à bazlam aka gər Tsir gà parakkà lele. ²⁶Pat ŋa ata aka ndzera ka, ki ta wizwim a duwa aà Tsir gà nda zləm gà. Iye ihər i gweɗe a kurum ŋa, iye na i ta hemer a aɗaba kurum a tsa. ²⁷Aɗaba ŋgat na a waya kurum a dukw ŋgar. A waya kurum ka, aɗaba ana kà wayum iye, kàa gəsum iye nda gəzləŋ, kà sərum dər, i dara ka, i təv ŋgar a ya. ²⁸I dara i təv Tsir gà i mbulum a aka gər ahəɗ a. Kinehe ka, i de a ika gər ahəɗ a, i mbìɗ a gər a təv ŋgar asa.»

²⁹Gà ɓəzla mazazama ŋgat ata tə tsaraka kataya ka, ta gwaɗar: «Araha, kàa fàfəl parakkà lele kuɗa, bazlam mendzikiɗe ba duwa iɗəm asa tsa. ³⁰Kinehe mì sər ka, kà sər duwa tserdze, ku mege ələk wura a dzele a, a wiz aà kər a duwa ka, kàa mbər mesirer aakaha. Aɗaba taŋa na mì gəs kər nda gəzləŋ, mì sər, kà dara ka, i təv Mbulum a ya.» ³¹Yesuw a gwaɗa a tar aaka: «Kinehe ana, kàa gəsum iye nda gəzləŋ kuɗa dər a? ³²Araha pat ŋa a deriŋa, àsla ka, aka ndzera aka ndəv, i təv ana sweyèh sweyèh ki tìzwim a ikaba ya tserdze, ku weke a de a a ma ŋgar, ki miyekwim a à iye à gər gà ilik a. Ama i ti ndze a ka, à gər gà ilik kaɗəŋ tsa, aɗaba Tsir gà a riŋ i təv ga hiywe. ³³I tsik a kurum gà dukw ata tserdze ya ka, dite kà ndzakwa nda gà iye, ki ŋgetwim a matasla yam a gəzləŋ zayya lele. Ika gər ahəɗ ka, ki sèwèrwim a are. Ama kə̀la ka, arəv ma da aà kurum a tsa, gəsum gəzləŋ, aɗaba Yàa mba aà gà dukw ana ika gər ahəɗ tserdze ya.»

Yesuw a heme a a Mbulum, agəra gà ɓəzla mazazama ŋgat

¹Yesuw a fàfəl a tar aba ya kataya tsara ka, a fə̀r a gəza mbulum, a gwaɗaha a Tsir ŋgar: «Tsir gà, məpàslà ahər yak ana kà pesliŋ a ka, aka ndze aɗəm kuɗa. Pat à ndzəɗa ana tì zlibe à iye a, Kəla yak a, dite na, gà mburma tekeɗe, tì zlibe à kər a nda təv gà ya mbaŋa. ²Kər kàa viliŋ ndzəɗa aka gər gà mburma tserdze, aɗaba taŋa na i sle a aà məvəla mesife ana à ndìv a tsa aà biybiy a, a gà na kà dziŋ tar a ahər a ya. ³Wur ana aka ŋgat mesife ana à ndìv a tsiye ka, a sər, kər na Mbulum ndzer a, dite a sər, iye Yesuw Kiristi ana kà slərra iye ya mbaŋa. ⁴A gər ana iye ɗa mandza ŋa ika gər ahəɗ a ka, Yàa ɗif à ndzəɗa yak ana tì zlibe à kər a, a mburma. Yàa ndəv à megemir yak ana kà slər aakara iye ya. ⁵Aɗaba taŋa kinehe ka, Tsir gà, zla iye a təv ndzəɗa ana tì zlibe a iɗəm à ma ya. Viliŋ ndzəɗa ana tə zləbawa à ma daga aà gər ana gər ahəɗ a riŋ zukw tsiye.

⁶Yàa ɗif à kər a gà mburma ana kà pala tar ika gər ahəɗ a, kà dziŋ tar ahər a. Tar ka, gà mburma ana ti ne gà biy yak, dite kà dziŋ tar a mbaŋa. Tàa dza gurmits a bəɗ a bazlam yak, tàa gəs aà kər ahəm. ⁷Tə sər kinehe, dukw ana tserdze kà dziŋ ahər a ka, a dara ka, i təv yak a. ⁸Aɗaba Yàa tsik a tar bazlam ana kà tsikiŋ a zləm, ki gweɗiŋ, daha, tsik a tar a. Dite tàa gəs lele, tàa sər dər, i dara ka, i təv yak a ndzer. Dite tàa gəs iye, tə sər ka, kər na a slərra iye ya mbaŋa.

⁹I hemek a aɗaba tar, tsəka, agəra gà mburma ana ti zezem a gər ahəɗ a tsa. Ama i hemek a ka, agəra gà mburma ana kà dziŋ tar a ahər a, aɗaba tar ka, gà mburma yak. ¹⁰Gà na gà biy yak a ka, taŋa biy gà mbaŋa, dite gà biy gà ka, gà biy yak mbaŋa asa, kwiye iɗəm tsa. Dite na ndzəɗa ana tì zlibe a à iye ya ka, a wideɗ a aba ika magər tar a. ¹¹Iye kinehe ka, kamala ana iye ɗa ika gər ahəɗ asa tsiye, iye ihər i dehe a a təv yak. Ama tar ka, mandza ŋa ɗa ika gər ahəɗ hiywe. Tsir gà, kər na tsəɗaŋŋa ya, kàa viliŋ ndzəɗa yak. Ama kinehe ka, kasla tar nda ndzəɗa ata kà viliŋ a mbaŋa asa, dite tə ndza ndèɓekke i təv ilik ŋa, kamala ana kà ndzawuma nda kər i təv i ilik ŋa ya mbaŋa. ¹²I huɗ mendze mər ana mì ndzawa akaba ɗa nda gà tar a ka, i kaslawa tar nda ndzəɗa yak ana kà viliŋ a. I gəs tar lele. Wura ilik ika magər tar a aka dzeye tsa, say wele ana a dzeye à ba ŋgar a, kamala ana akahər ata mewetse ŋa a riŋ i wakita Mbulum, ta gwa ka, a ta ge a ba ya. ¹³Ama kinehe ka, i dehe a a təv yak. I tsikewa gà bazlam ata tserdze ya ka, akahər ana iye ɗa ika gər ahəɗ mba ya, dite maŋgayaba ana i ŋgeye a ba ya ka, ma ge i təv tar, mà rah a gəzləŋ tar. ¹⁴Yàa mà a tar à bazlam yak ana kà tsikiŋara ya. Ama gà mburma ana ti zezem a gər ahəɗ a ka, ti ne a tar are, aɗaba ana tar gà mburma tar tsiye, kamala iye ana mburma tar tsiye mbaŋa. ¹⁵I heme a ka, dite kà ndzək tar ika gər ahəɗ a ɓav tsa, ama kasla tar i təv wele ana ŋgwal ŋa tsiye. ¹⁶Aɗaba tar ka, gà mburma ana ti zezem a gər ahəɗ a asa tsa, kamala iye ana mburma ŋgar tsiye mbaŋa. ¹⁷Ne à tar gà tsəɗaŋŋa, ɗif a tar à dukw ana ndzer a, dite ka, ti ne gà mburma yak ana ndzer kuɗa ya. Aɗaba bazlam yak na ndzer a. ¹⁸Kamala kər ana kà slərra iye aka gər ahəɗ ka, iye tekeɗe, iye ihər i slir a tar aà mege megemir gà ɗa ika gər ahəɗ mbaŋa. ¹⁹I vilek a mesife gà, aɗaba tar, dite tar tekeɗe, ti ne gà mburma yak nda ndzer ŋa mbaŋa.

²⁰Iye i hemek a ka, agəra tar ana i təv ga ya ɗekɗek tsa, ama agəra ga mburma ana ti ta gis a iye nda gəzləŋ aka miɗ mba, agəra guma tar ana ti tsik a ter a ya mbaŋa. ²¹Iye riŋ i hemek a ka, dite tar ata tserdze tə ndza i təv ilik ŋa. Tə ndza i təv ma kamala kər ana mandza ŋa i təv ga ya, Tsir gà, dite iye tekeɗe, mandza ŋa slìpèhhe i təv yak. Tə ndza i təv ma kamala taŋa ya, dite ka, gà mburma ana ti zezem a gər ahəɗ a, ta gəs ka, kər ana kà slərra iye ya ndzer kaɗəŋ. ²²Yàa vəl a tar ndzəɗa gà ana tì zlibe a iye, kamala ana kà viliŋ a mbaŋa te, dite ka, tə ndza i təv ilik ŋa kamala ma ana ilik a. ²³Iye i ndze a i təv tar, kamala ana kər ki ndze a i təv ga ya, dite ti ne ba ilik, ti ndze a i təv ilik ŋa tserdze. Dite gà mburma ana ti zezem a gər ahəɗ a ka, tə sər dər, kər na kà slərra iye ya ndzer a. Tə sər mbaŋa ka, kər kà waya gà mburma yak kamala ana kər kà waya iye ya mbaŋa.

²⁴Tsir gà, a sèsiŋ ka, gà mburma ana kà dziŋ tar a ahər a ka, ti ndze a a təv ana i ti ndze aɗəm ya mbaŋa, dite ta ŋgetiŋ i təv ndzəɗa gà ana tì zlibe a dər à iye, kà viliŋ Əbay a. Kà viliŋ ka, aɗaba ana kà waya iye daga aà gər ana gər ahəɗ mege ŋa zukw tsiye. ²⁵Tsir ga, kər ka, mala ndzer. Gà mburma ana ti zezem a gər ahəɗ a ka, tə sər kər tsa. Ama iye ka, i sər kər, dite gà mburma aaha kà dziŋ tar a ahər a tekeɗe, tə sər kər mbaŋa. Tə sər ka, kər na a slərra iye ya. ²⁶Yàa ɗif a tar aba à kər a. Ama a sèsiŋ ka, i ɗif a ter a dər hiywe aka miɗ aka miɗ asa, dite mawàyà ba yak ana kà waya iye ya, mà rah a gəzləŋ tar, iye tekeɗe, iye riŋ mandza ŋa i gəzləŋ tar mbaŋa.»

Magəsa Yesuw ana ta gəs a

Mata 26:47-56; Markus 14:43-50; Luka 22:47-53

¹Yesuw a ndəv à meheme ŋgar ata tsara ka, ta mah ba nda gà ɓəzla mazazama ŋgat, tə da aka lìdè meriyew duwa, tə zalar Kidirun. Tə daha ka, tə da a dzèrnè duwa a riŋ i fata. ²Yudas ana a ta ge a ɗaf aà Yesuw a tekeɗe, a sər təv ata mbaŋa. Aɗaba gà Yesuw nda gà ɓəzla mazazama ŋgat tə dawa aɗəm kəla pat tserdze. ³Aɗaba taŋa, gà Yudas tə daha nda gà asiŋ gà sliwdze gà Ruma duwa nda gà asiŋ gà ɓəzla makàslà ga Mbulum batsah ŋana. Na a sləraha tar ka, gà Əbay gà ɓəzla mandəva kuɗa a Mbulum, nda gà *Farisa. Tə daha ka, nda gà dukw ahər aà tar. Tə ndzək dərraha gà lalampa, nda gà dukuməŋa a riŋ tàa dza ahər mal ka, à gìsiŋa. Yudas na a ndzəkaha tar, a ndza a taraha aka miɗ a. ⁴Tsaatsa Yesuw ka, aka mbər mesire dukw ana a ta ge a ba nda ŋgat a. I təv ana ti ndzeha tsara ya ka, pəzlàŋ Yesuw a daha a təv tar. A gwaɗa a tar: «Ki yehwim a weke?» ⁵Ta gwaɗar aaka: «Mìi yehe a Yesuw, gà Nazaret.» Yesuw a gwaɗa a tar: «Iye ŋa naha seyiŋ.»

Yudas ana a ge a aà ŋgat ɗaf a, mehìtsè ŋa dzèŋŋe i təv tar. ⁶Tə tsaraka mifefile Yesuw ana a gwaɗa a tar: «Iye ŋa naha» ya ka, dàrdàrdàr ta mbəɗara gər a dəba ya, ɓə̀ràmə̀mə̀mma tə dzawa aà mbulum a. ⁷Yesuw a gwaɗa a tar asa: «Ki yehwim a dze ana, weke kəla ya?» Ta mà aaka, ta gwaɗar: «Mìi yehe a ka, Yesuw, gà Nazaret.» ⁸Yesuw a gwaɗa a tar aaka: «Yàa gwaɗa a kurum ana, iye ŋa naha tsiye? Iye ka, wele ana ki yehwim a ya. Miyakum à gà asiŋ gà mburma aaha, tə da.» ⁹A tsik taŋa ka, aɗaba bazlam ana a tsik a Tsir ŋgar ndeɗiŋa, a ta ge a ba ndzer, a gwa ka: «Yàa dzeye à gà mburma ana kà dziŋ tar a ahər a ilik tsidze» ya.

¹⁰I fataya ka, Simun Piyer a riŋ nda gà màsalamà, fə̀hhàt a ndzahara i ga ya. A daha, pats a lak dər a mala meslire *batsah mala mandəva kuɗa a Mbulum, a sàs dər ihər zləm ahər mezime a bəɗ a. Mala meslire ata ka, tə zalar Malkus. ¹¹Ama Yesuw a gwaɗa a Piyer: «Mà à màsalamà yak a ga ŋa. Wànà kà dzala i yak ana, i ti se a mesewere are ana Tsir gà a viliŋ a tsiye?»

Tə da à Yesuw aka miɗ Hanas

¹²I dəba ŋa ya, Əbay gà sliwdze, nda gà mburma ŋgar, dite nda gà ɓəzla makàslà ga Mbulum batsah ŋa ata, tə daha, ta gəs Yesuw, tə dzaw tez. ¹³Tə lah mede dər ka, a bəra Hanas, aɗaba ŋgat ka, *batsah mala mandəva kuɗa a Mbulum ana piŋŋe ya. A dehe a, a ger a seriye. Hanas ka, malpa Kayafas ana ŋgat batsah mala mandəva kuɗa a Mbulum ana akahər ata ya. ¹⁴Kayafas ata asa mbaŋa na a gwaɗa a gà bàba gà Yahuda ka, ŋgulum mburma ilik mə̀ mət, na ndəna mburma tserdze ti dzeye a ya ya.*fa*

Piyer a ɗe bərakə̀zəm a Yesuw

Mata 26:69-70; Markus 14:66-68; Luka 22:55-57

¹⁵Gà Simun Piyer nda mala mazazama ŋgiɗ duwa, tə dəɗ aka Yesuw tsikw a bəra *batsah mala mandəva kuɗa a Mbulum ata. Mala mazazama Yesuw ŋgiɗ ata ka, wele ata a sər ŋgat. A daha, kwìlis a dəɗ aka Yesuw a huɗ zlagam. ¹⁶Ama Piyer ka, a ndza ɗa i bəra slip aà gùva biye hərmaga zlagam ata. Aɗaba taŋa mala mazazama Yesuw ŋgiɗ ata ka, batsah mala mandəva kuɗa a Mbulum aaha a sər ŋgat, a dara ndàra a bəra ya, a dara ka, a fàfəl a dəm duwa a riŋ a kesle a biye hərmaga zlagam ata, dite ka, Piyer ma da a ga te. I fataya ka, ta geba məma. ¹⁷I təv ana ti de a ya ka, dəm ata a gwaɗa a Piyer: «Kər tekeɗe ka, mala mazazama wele ata dìgiy.» Piyer a gwaɗar aaka: «Awaŋ, iye mala mazazama ŋgat tsa.»

¹⁸Ama ndaàvəɗ ata ka, mə̀tasl a riŋ hinne. Aɗaba taŋa, gà ɓəzla meslire batsah mala mandəva kuɗa a Mbulum ata nda gà ɓəzla makàslà ga Mbulum batsah ŋa ata ta vàt riŋ akwa i huɗ zlagam ata. Piyer tekeɗe ka, a daha a təv tar, a waya mandza aà akwa ata mbaŋa.

*Batsah mala mandəva kuɗa a Mbulum a wiz bazlam

aà Yesuw a

Mata 26:59-66; Markus 14:55-64; Luka 22:66-71

¹⁹I dəba ŋa ya, batsah mala mandəva kuɗa a Mbulum ata a wiz bazlam aà Yesuw a, nda təv gà ɓəzla mazazama ŋgat a, dite nda təv guma ŋgar ana a tsikewa ya. ²⁰Yesuw a gwaɗar aaka: «I fàfəlawa ka, ndərzayya, ika miɗ mburma tserdze. I tsikewa guma gà i ga Mbulum batsah ŋana nda gà i gà ga mahàmà a Mbulum tserdze, kamala megweɗe ya ka, i təv ana gà Yahuda ti yahawaba aɗəm gər a. Yàa tsik duwa nda akəl ilik tsidze. ²¹Dite aàmala na ki wiz aà iye a bazlam kataya ya? Ŋgulum wiz ka, aà gà mburma ana tə tsaraka guma gà ya ivaɗ. Tar ka, tə sər dukw ana i tsikewa a tar a.»

²²Yesuw a tsik kataya tsara ka, mala makàslà ga Mbulum ilik ika magər tar ata i fataya, pay a lak a Yesuw, dite i dəba ŋa ya, a gwaɗar: «Kataya ya, na ki fèfil a a batsah mala mandəva kuɗa a Mbulum a?» ²³Yesuw a gwaɗar aaka: «Na Yàa tsik dukw ana ŋgwal ŋa tsiye ka, ɗifiŋ dər te. Ama na bəla Yàa tsik bazlam gà ka, nda ndzer ana, aàmala na kà lekiŋ a?»

²⁴I fataya ka, Hanas a slər ŋgat a təv Kayafas, batsah mala mandəva kuɗa a Mbulum ata, tsàmbaɗùkkwa madzàwà ŋa hiywe.

Piyer a ɗe bərakə̀zəm a Yesuw asa

Mata 26:71-75; Markus 14:69-72; Luka 22:58-62

²⁵Akahər ata ka, Piyer a riŋ mandza ŋa aà akwa ata hiywe. Gà asiŋ gà mburma ana i fataya, ta gwaɗar: «Kər ana, ilik aà gà ɓəzla mazazama wele aaha ya mbaŋa tsiye?» I fataya ka, Piyer a ɗe bərakə̀zəm a Yesuw asa, a gwaɗa a wele ata: «Iye ka, mala mazazama ŋgat tsa.» ²⁶Ama mìsle ŋgiɗ ilik ika magər gà ɓəzla meslire mala mandəva kuɗa a Mbulum a, damər wele ana Piyer a sàs ihər zləm a, a gwaɗar: «Yàa ŋgat a kurum ilik nda ŋgat i dzèrnè tsiye, dite ki gweɗe a ka, i sər ŋgat tsa ana, meme?» ²⁷Ama Piyer a gwaɗar aaka asa mbaŋa: «Gaa, iye tsa.» I dəba bazlam tar ata ya tsara ka, guŋgwazl a tuwa tsara.

Yesuw i sida ika miɗ Pilatus

Mata 27:1-2,11-14; Markus 15:1-5; Luka 23:1-5

²⁸Aləka aka mbulum ana a də̀v i mèkwède ya ka, ta mah ba i bəra Kayafas a, tə da à Yesuw a ga a bəra Pilatus, mala sik Əbay gà Ruma duwa. Aləka ti ndzeha a fata ka, gà Yahuda tàa pəts a ga a bəra wele ata tsa, aɗaba na tàa da aɗəm ka, tàa wisl aba tar i təv mazəma ɗaf Paska ana ti zim a dər akaba ya. ²⁹Aɗaba taŋa na Pilatus a dara i ga ya, a təv tar a. A gwaɗa a tar: «Kə gə̀sumara wele aaha ya dze ana, a ge la?» ³⁰Ta gwaɗar aaka: «Na ŋgat mala bakal tsəka, mìi gìsere a ŋgat a təv yak a tsa.» ³¹Pilatus a gwaɗa a tar: «Na kataya ka, dum à ŋgat, ka ta gwimer seriye, kamala ana məpala ahəm kurum a tsik a, dukw kurum.» Ta gwaɗar aaka: «Ama mər kəla ka, mìi sle a aà makə̀ɗà mburma tsa, ta pele a mər a ahəm.» ³²Dukw ata a ge ba kataya ka, kamala ana Yesuw a tsik aba a mburma piŋŋe ya, a gwaɗa a tar, i ta mìt a ka, ta hitse a à iye aà dizl, dite i mìt ahər a ya kaɗəŋ.

³³I fataya ka, Pilatus a mbəɗ gər a ga. A daha, a zalara a Yesuw a, dite ma daha a təv ŋgar. Aləka a daha ka, a gwaɗar: «Kər ana, Əbay gà Yahuda ya?» ³⁴Yesuw a gwaɗar aaka: «Kà tsik kataya ana, kà dzala i gər yak a, tsəna, mburma a tsikik a?» ³⁵Pilatus a gwaɗar: «Iye ana gà Yahuda ya? Na ti tsikiŋ a ya, gà gwala yak nda gà Əbay gà ɓəzla mandəva kuɗa a Mbulum kurum na ta gìsiŋara kər a tsəna, ahəm gà ya? Dze ana, wànà kàa ge duwa ya?» ³⁶Yesuw a gwaɗar aaka: «Iye ka, Əbay ana ɗa ika gər ahəɗ a tsa. Na mege kataya ka, gà ɓəzla meslire gà ta ge a gùvəl hinne, aɗaba iye, wura à gis a iye a gà bàba gà Yahuda tsa. Ama iye ka, Əbay ana ɗa ika gər ahəɗ a tətsà.» ³⁷Pilatus a gwaɗar aaka: «Tsaka kər ana Əbay dukw ŋgar a?» Yesuw a gwaɗar: «Kataya, iye ka, Əbay kaɗəŋ, kamala ana kà tsik a. I dara ka, aà metsìkè dukw ana ndzer ŋa ya, a gà mburma. Aɗaba taŋa na ta wa ɗa iye ika gər ahəɗ a. Wele ana a sasar ndzer ŋa ya ka, à dze a zləm a dukw ana i tsik a ya.» ³⁸Pilatus a gwaɗar: «Ndzer dze ana, kamala dukùla ya?»

Ta ge seriye məməta aka gər Yesuw

Mata 27:15-31; Markus 15:6-20; Luka 23:13-25

I dəba bazlam ŋgar ata ya ka, Pilatus a dara a təv gà mburma ata ya asa. A dara, a gwaɗa a tar: «Iye ka, Yàa ŋgat bakal ana wele aaha a ge ya tsa. ³⁹Ama kinehe i ge a dər ka, kamala ana kì gewakwa dər a, aɗaba kəla *megirive Paska ana aka ndzera ya ka, i pə̀lawa a kurumaha à mala daŋgay ilik, kərga biy na a sàs a kurum a. Dite a sàs a kurum, i pəl a kurumaha ana, à Əbay gà Yahuda aaha ya?» ⁴⁰Tar ata tserdze ya, tə tsaraka kataya ka, tə dza akaba bazlam nda Mewideye hinne, ta gwa: «Awaŋ, ŋgat tsa, a sàs a mər ki pìl a ka, à Barabas.» Tsaatsa Barabas ka, mala məbatsa mburma ivaɗ.

Mata 27:26-31; Markus 15:15-20

¹Aɗaba taŋa, Pilatus a vəl vatwa aà magəsa Yesuw kuɗa, ta gə̀zl nda megwiymbiɗ. ²Gà sliwdze tə daha, tə sàs adak, tə slàslapa akaba, ti ndìwìɗer dər gər. Ti tike aaka andiw nduzzwa ŋana asa. Tə dùwaya dər ŋgat kamala Əbay a. ³Ti sìrìkeha a təv ŋgar, ta gwaɗar: «Kər Əbay gà Yahuda, Mbulum mà sə̀kàhak à mendze yak aà biybiy.» Dite wuŋ wuŋ tə lakayar kuɗa.

⁴I fataya ka, Pilatus a dara a bəra ya asa, a dara, a gwaɗa a gà Yahuda ana ɗa i bəra ya: «Tsarakum, araha, ti de a kurumara à wele aaha a bəra ya, dite kà sərum dər ka, Yàa le aà bakal ŋgar ana a ge ya tsidze, na iye ya.» ⁵Yesuw a dara a bəra ya nda gà mendìwìɗè gər adak ata ya, nda gà andiw nduzzwa ŋa aaha ika ba asa. Pilatus a gwaɗa a tar: «Araha, mburma kurum naha.» ⁶Ama gà Əbay gà ɓəzla mandəva kuɗa a Mbulum, nda gà ɓəzla makàslà ga Mbulum ata, ta ŋgatar tsara ka, ta wideye ŋgəlakəkka hinne, ta gwa: «Ndwandway ŋgat aà dizl magə̀làwà ŋa, say ndwandway ŋgat aà dizl magə̀làwà ŋa ata ndzer.» Pilatus a gwaɗa a tar: «Kurum ŋa dum dər, ka tə ndwandwayum ŋgat aà dizl ata nda ahər kurum ŋa, tsəka, iye ka, Yàa le aà bakal ana biy makə̀ɗà ahər ŋgat a tsa, na iye ya.» ⁷Gà Yahuda ata ta gwaɗar aaka: «Mər ka, kamala biy ana a sàs a məpala ahəm mər a ka, say makə̀ɗà ŋgat ilik pəra. Aɗaba a gwa ka, iye Kəla Mbulum.»

⁸Pilatus a tsaraka bazlam tar ata ka, a ge magəɗa hinne asa. ⁹A mbəɗ gər a ga, a daha, a gwaɗa a Yesuw: «Kà dara dze ana, i ŋga ya kaɗəŋ a?» Ama Yesuw a gəs mifèfiler aaka tsa. ¹⁰Pilatus a gwaɗar asa: «Kə̀ gəs mifèfiliŋ aaka tsəna, aàla? Kà sər tsiye, iye ka, ndzəɗa gà a riŋ, Yàa waya ka, i pìl a à kəriŋa, kige tsa, i ndwendwey a kər aà dizl ata ya?» ¹¹Yesuw a gwaɗar aaka: «Ki sle aà mege aà iye duwa ilik tsidze, na Mbulum aka vəlak iye a ahər tsiye. Aɗaba taŋa na wele ana aka gə̀sak iye ya ka, bakal ŋgar a za biy yak fit a.» ¹²I dəba bazlam ata ya tsara ka, Pilatus a yaha vatwa, a waya məpəla à Yesuw hiywe. Ama gà Yahuda tə dza akaba bazlam ŋgəlakəkka nda Mewideye asa, ta gwa: «Na kàa pəl à wele aaha ka, kər ka, masla Əbay gà Ruma asa tsa. Aɗaba wele ana a ne à ba ŋgar batsah Əbay ya ka, taŋa ŋgat ka, mala mene are a batsah Əbay gà Ruma ata seyiŋ ivaɗ.»

¹³Pilatus a tsaraka bazlam ata ka, a dara à Yesuw a bəra ya asa. Ŋgat ŋa a daha, a ndza aka təv mendze ana a gewa ikəka seriye ya. Tə zal a təv ata ndaka ahəm gà Yahuda ka, Gabata, kamala megweɗe ya ka, dàmbàzlà ana tə zlàzl nda kur a. ¹⁴Pilatus a gwaɗa a gà Yahuda ata: «Batsah Əbay kurum naha.» Ta ge dukw ata ka, magər pat aka à mege, dite ndidwe ŋana ka, megirive Paska gà Yahuda. ¹⁵Ama tə tsaraka Pilatus ata a gwaɗa a tar ka, batsah Əbay kurum naha ya ka, tə dza ba aà Mewideye hinne. I huɗ Mewideye tar ata ya ka, ta gwa: «Gəs ŋgat, ka ndwandway ŋgat aà dizl magə̀làwà ŋa, say mekìɗe pəra.» Pilatus a gwaɗa a tar aaka: «Wànà iye i ndwendwey a batsah Əbay kurum aà dizl ata ya?» Gà Əbay gà ɓəzla mandəva kuɗa a Mbulum ta gwaɗar aakaha: «Batsah Əbay mər ŋgiɗ a riŋ tsa, say batsah Əbay gà Ruma pəra.» ¹⁶Aɗaba taŋa Pilatus ibam, a vəl Yesuw a ahər a gà sliwdze, dite ka, tə tə ndwandway ŋgat aà dizl magə̀làwà ŋa ata kuɗa.

Tə ndwandway Yesuw aà dizl magə̀làwà ŋa

Mata 27:32-44; Markus 15:21-32; Luka 23:26-43

I dəba ŋa ya, gà sliwdze ata ta mah ba nda gà Yesuw. ¹⁷Ti tiker dizl ata aà gər, dite ma zla. Tə da akabara i huɗ kwite ya, tsikw a tə̀vəməŋa a riŋ tə zalar ndaka ahəm gà Yahuda ka, Gwalgwata, kamala megweɗe ya ka, atasl gər. ¹⁸Ti ndze akabaha a fata ka, gà sliwdze ata tə daha, tə ndwandway Yesuw aà dizl ata. Tə ndwandway ahəraha gà mburma aà gà dizl ŋgiɗ a tsaka ŋgar a fata. Ilik ndaka tsèke ahər mezime, ilik ŋa aaha, aka tsèke ahər gùla. Yesuw ika magər tar.

¹⁹Pilatus a wetse bazlam ana ta kəɗ ahər ŋgat a, a ti tike dər aà dizl ata mbaŋa. Bazlam ana a wetse ya ka, a gwa: «Naha ka, Yesuw gà Nazaret, Əbay gà Yahuda.» ²⁰A wetse taŋa ka, ndaka ahəm ŋgiɗ pampam makər. Gà ahəm ata ka, ahəm gà Yahuda, naha ahəm gà Ruma, dite biy ŋgiɗ aaha ka, ahəm gà Girek. Gà mburma ana i fataya hinne, ti dzeŋgewa mewetse dukw ata aà dizl a, aɗaba təv ata ka, bise nda huɗ kwite, mburma iɗəm hinne. ²¹Gà Əbay gà ɓəzla mandəva kuɗa a Mbulum ta ŋgatar, ti dzeŋge taŋa ka, tə da a təv Pilatus, tə daha, ta gwaɗar: «Kà wetse kataya ka, lele tsa, na kù gwa, ŋgat ka, Əbay gà Yahuda ya. Ki wetse a ka, ki gweɗe a, ŋgat a ne à ba ŋgar ka, a gwa iye ka, Əbay ga Yahuda ivaɗ.» ²²Pilatus a gwaɗa a tar: «Dukw ana Yàa wetse kataya ka, a ndze a kamala taŋa ya hiywe.»

²³I təv ana ndeɗiŋa gà sliwdze tə ndwandway aba Yesuw aà dizl a ka, tə dzaya iba gà petek ŋgar a təv pampam faɗ. Ku weke ma ŋgat ilik ilik aà tar aà tar. Tə zla andiw ŋgar ana maŋgara ŋa suɗùkw təv meɗìmìke ihər tsiye, ²⁴ta gwaɗaba: «Naha ka, ka tayakwa ikaba ya tsa, ama ŋgulum ki gekwe aaka a tsetse ika magər kwa, ŋgada weke na a ŋget a ya?» Dukw ata a ge ba ka, kamala ana ta wetse i wakita Mbulum piŋŋe, ta gwa ka:

«Tàa dzaya ba gà petek gà ika magər tar,

dite tàa ge tsetse aka andiw gà.»*fa*

Kamala taŋa ya na gà sliwdze ata ta ge ya.

²⁵Gà mburma ana mehìtsè ŋa bise nda dizl ata tə ndwandway ahər Yesuw a ka, gà mama ŋgar, nda damər mama ŋgar dəm ŋa, nda gà Mariya, məkəs Kulupas, nda gà Mariya ana a dara i Magədala ya. ²⁶Yesuw a ŋgat a gà mama ŋgar nda mala mazazama ŋgat ana a waya ŋgat hinne ya, tar riŋ mehìtsè ŋa i təv ilik ŋa ya ka, a gwaɗa a mama ŋgar: «Naha ka, kəla yak, mama ga.» ²⁷I dəba ŋa ya, a gwaɗa a mala mazazama ŋgat ata a waya hinne ya: «Naha ka, mama yak mbaŋa.» I fataya tsara ka, mala mazazama Yesuw ata a zla məkəs ata a ma ŋgar.

Məməta Yesuw

Mata 27:45-56; Markus 15:33-41; Luka 23:44-49

²⁸I dəba ŋa ya, Yesuw a sər dukw ana Mbulum a slər aakara ŋgat a tserdze ka, aka ndəv na kinehe ya. A gwa: «Yam aka kəɗ iye.»*fb* A tsik kataya ka, kamala ana ta wetse akahər ata ya, dite ma ge ba kalkal kamala taŋa ya kaɗəŋ. ²⁹Ama meɗwìtsè mawà dukw duwa a ndza ndùlàkə̀kka kamala mbəlar a, a riŋ maràhà ŋa i duwa i fata. Kamala taŋa ya, gà sliwdze tə daha, tə zlara dukw ana pàfpàfə̀ffa, yam a de aɗəm a hinne ya. Ti tsilwiɓ dər a dukw ata. Tə dzak a zùbəl tsalaka dizl dukw duwa tə zalar *izup. Tə dzakaraha a bazlam, dite ka, mà ɗìvìts ihər yam ŋa ya. ³⁰Yesuw a ɗìvìts yam dukw ata tsara ka, a gwa: «Mege megemir gà tserdze ka, aka ndəv kuɗa.» I dəba ŋa ya, luz a kal à gər a bəɗ ka, a mət tsara.

Sliwdze duwa ilik a ge suwal a Yesuw aka wèlèɓè

³¹Ta kəɗ Yesuw ka, a pat ana dite pat mesìfìkà ba ndidwe ŋa ya. Aɗaba taŋa a sàs a gà bàba gà Yahuda tsa na məməta Yesuw a ndze a aà dizl magə̀làwà ŋa ata a pat mesìfìkà ba ya. Aɗaba ndeyndey ŋana ka, megirive a riŋ a pat ata ka, a ne aka tar ŋgwal ŋa, a za dər gà asiŋ gà pat ŋgiɗ ana dze ya. Agəra taŋa na tə da a təv Pilatus, tə daha, ta gwaɗar: «Kamkam, vəl a mər vatwa, gà sliwdze tə daha, ta haɓa à sik a gà mburma ata tə ndwandway tar aà dizl, na dite ta mete a bise, tì ndzikere a ihər tar a.» A gwaɗa a tar: «Haya.» ³²Aləka gà sliwdze ata tə daha, tə lah mahaɓa à sik a gà mburma aaha tə ndwandway akaba tar nda gà Yesuw tserdze ya. ³³Ti ndzeha a təv Yesuw, ta fə̀r ahər ka, aka mbər mimìte. Tə samata məməta ŋa ka, tàa haɓar à sik asa tsa. ³⁴Ama kə̀la ka, sliwdze duwa ilik a daha, ə̀bukw a ger suwal aka wèlèɓè, gà məmbəz nda yam tə zlalarra i biye ŋa ya.

³⁵Iye ana i ɗama gà bazlam ata ya ka, Yàa ŋgatar nda are gà, dite dukw ana i ɗama ya ka, ndzer kaɗəŋ. I sər, iye ka, i sese a pàrsa tsa, dite na kurum tekeɗe, ki giswim a nda gəzləŋ a. ³⁶Gà dukw ata ta ge ba kataya ka, aɗaba bazlam ana ta wetse i wakita Mbulum akahər ata ya, ma ɗif aba, ta gwa ka: «Ti ta heɓer a à atasl ŋgar ilik tsidze» ya.*fc* ³⁷Dite biy ana i wakita ŋgiɗ a, ma ɗif à ba asa, ta gwa ka: «Ti ta fir a à wele ana ta ger suwal a.»*fd*

Mazla məməta Yesuw a biye

Mata 27:57-61; Markus 15:42-47; Luka 23:50-56

³⁸I dəba ŋa ya, wele duwa a riŋ, zləm ŋgar Yasufa. A dara ka, i Arimatiya ya. Ŋgat ka, mala mazazama Yesuw. Ama kə̀la ka, say nda akəl pəra na a zezem a ya, aɗaba ana a ge magəɗa a gà bàba gà Yahuda ya. A daha a təv Pilatus, a ger kamkam, dite mə vəlar vatwa aà mazlàra məməta Yesuw aà dizl a. Pilatus a gəs, a gwaɗar: «Haya.» I dəba ŋa ya, a daha, a zlara məməta ŋa ata aà dizl a kuɗa. ³⁹Nikudimus, wele ana a da a təv Yesuw akahər ata ndaàvəɗ, a wiz ihər bazlam a,*fe* ŋgat tekeɗe, a daha a fata mbaŋa. A daha ka, nda gà wirdè gà dizl gà dukuməŋa a riŋ a ze hwaŋŋà lele, tə zalar *mira, biy ŋgiɗ ibam, *aluwa. Gà dukw ata ka, ti sle a agwada dzik makər. ⁴⁰Tar ata sula ya, tə zla məməta Yesuw. Ta mbe ahər petek herrè ŋa. I təv ana ta mbe a ya ka, tə ndàyawa ahər dukw ata hwaŋŋà ya, kamala ana gà Yahuda ta gewa à məməta ya.

⁴¹I təv ata tə ndwandway ahər Yesuw a ka, dzèrnè duwa a riŋ i fata. Ama i dzèrnè ata ka, dive duwa a riŋ melè ŋa awiya ŋa, tə̀vəməŋa ka, gìrdzìdzìhhe i giseh a. Dive ata ka, tàa tike aɗəm wura ilik zukw tsa. ⁴²Tə zla Yesuw, ti tike a dive ata bise ya tsara. Ti tike a fata ka, aɗaba mesìfìkà ba tar aka ndze aɗəm, ta ge a megemir tsa, dite ndidwe ŋana ti sifik a ba.

Yesuw a mbəlara i məməta ya

Mata 28:1-8; Markus 16:1-8; Luka 24:1-12

¹Aləka i dəba ŋa ya, a pat ladà i mèkwède hedwe, are aka da aaba ya zukw tsəka, Mariya ana a dara i Magədala ya, a wile aka dive Yesuw ata. A daha ka, a ŋgataha a beliŋ ata ta hə̀ndə̀k dər ahəraha ya, dzèŋŋe aà gùva ŋa, matapasla ŋara ihər a. ²A ŋgataraha kataya tsara ka, a val a təv gà Simun Piyer nda mala mazazama Yesuw ŋgiɗ ana Yesuw a waya ŋgat hinne ya, a daha, a gwaɗa a tar: «Tàa zlara məməta BATSAH kwa ŋa i biye ya, dite kwets mì sər təv ana ti tike aɗəm a tsa.»

³I fataya tsara ka, gà Piyer nda mala mazazama Yesuw ŋgiɗ ata, tə da aka dive ŋa mbaŋa. ⁴Ta val ka, tsàɓùr sula məma. Ama mala mazazama Yesuw ŋgiɗ ata a za wele aaha nda mivele, a lah aka dive. ⁵A daha, a kal à gər a bəɗ, a fə̀raha aɗəm ka, a ŋgataha a petek ana ta mbe ahər a ɓàvva i bəɗ. Ama aka pəts aɗəm tsa. ⁶Aləka Simun Piyer a daha i dəba ŋa ya ka, a pə̀tsaha aɗəm. A daha ka, a ŋgat a petek ata i bəɗ mbaŋa, ⁷dite a ŋgat a petek ana ti ndìwìɗ dər are Yesuw a mbaŋa asa. Petek ata ka, metìkè ŋa i təv gà asiŋ gà biy ŋgiɗ tsa, məpàɗà ŋa i təv ŋgiɗ pam. ⁸I dəba ŋa ya, mala mazazama Yesuw ata a lah aka dive ya, a pəts aɗəm mbaŋa. A daha, a samata kataya ka, a gəs, a sər dər ka, Yesuw aka mbəl i məməta ya ndzer kaɗəŋ. ⁹Aɗaba tàa tsaraka dukw ana wakita Mbulum a gwa akahər ata ka, Yesuw a ta mbilere a i məməta ya tsa, say pat ata kuɗa na tə sər dər a. ¹⁰I dəba ŋa ya, gà ɓəzla mazazama Yesuw ata sula ya, ta mbəɗ gər a ma.

Yesuw a pàt aba a Mariya ana a dara i Magədala ya

Mata 28:9-10; Markus 16:9-11

¹¹I dəba ŋa ya, Mariya a mbəɗ gər aka dive asa, a daha, a dza ba aà tuwa. I təv ana a riŋ a tiwe a ya ka, a kal à gər a bəɗ, a fə̀r dər a dive ata. ¹²A fə̀raha aɗəm ka, a ŋgataha a gà gawla Mbulum sula, tar riŋ mandza ŋa i təv ana ti tike aɗəm məməta Yesuw a. Tar nda gà petek herrè ŋa. I ŋgiɗ i təv gər, i ŋgiɗ ibam, i təv sik. ¹³Gà gawla Mbulum ata ta gwaɗar: «Daala aaha, aàmala na ki tiwe a ya?» A gwaɗa a tar aakaha: «Tàa zla Batsah ga ŋa, dite i sər təv ana ti tike aɗəm a tsa asa.»

¹⁴A tsik aba bazlam ata ya ka, wudəgə̀r a mbəɗ aba, a ŋgat a Yesuw, a riŋ mehìtsè ŋa i fata, ama a sər naha Yesuw ka, a sər tsa. ¹⁵Yesuw a gwaɗar: «Daala aaha, aàmala na ki tiwe a ya? Ki yehe a ana, weke?» Məkəs ata a dzala i gər ŋgar ka, a gwa: «A ge a ka, mala məfə̀tà təv ata.» Aɗaba taŋa, a gwaɗar aakaha: «Kəla nè, na kər na kà zla ya ka, ɗifiŋ à təv ana kà tike aɗəm a te, i ti zle a dukw gà.» ¹⁶Yesuw a gwaɗar aakaha: «Mariya.» Məkəs aaha a tsaraka kataya ka, a mbəɗ ahəm a təv ŋgar, a gwaɗaraha ndaka ahəm tar gà Yahuda: «Rabuni,« kamala megweɗe ya ka, mala medzeŋge mər, a de a dər a təv ŋgar. ¹⁷Yesuw a gwaɗar: «Kə̀ gəs ba aà iye tsa, aɗaba Yàa tsəl a təv Tsir gà zukw tsa. Ama ka, ka ta gwaɗa a gà damər ga ka, i tsil a a təv Tsir gà ana Tsir kurum mbaŋa ya. Ŋgat na Mbulum gà ya, dite biy kurum mbaŋa asa ya.» ¹⁸I fataya ka, Mariya ata a dara i Magədala ya, a da a təv gà ɓəzla mazazama Yesuw. A daha, a gwaɗa a tar: «Yàa ŋgat a BATSAH kwa ŋa.» Dite a ɗama a tar dukw ana Yesuw a tsiker a tserdze mbaŋa.

Yesuw a pàt aba a gà ɓəzla mazazama ŋgat

Mata 28:16-20; Markus 16:14-18; Luka 24:36-49

¹⁹Aləka i hawa ŋana a pat ladà ata ka, gà ɓəzla mazazama Yesuw ti yahaba gər a ga duwa, ta hə̀ndə̀kaha aaba nda lèkilè, aɗaba ta ge magəɗa a gà bàba gà Yahuda, agəra ana ta kəɗ Batsah tar ŋa ya. I dəba ŋa ya, tə sər aaba ka, dzìŋgìrzlìk Yesuw a riŋ ika magər tar i ga ata. A gwaɗa a tar: «Mandza zayzay ma ge i təv kurum.» ²⁰A tsik a tar aba ya kataya ka, a pàt a tar à gà girɗe ana aà ahər ŋgar a, ndəna aà wèlèɓè ya. Gà ɓəzla mazazama Yesuw ata ta ŋgatar ka, ta ŋgaya ba hinne, arəv a mà a taraha, aɗaba ana tàa ŋgat a Batsah tar ŋa ya. ²¹Yesuw a gwaɗa a tar asa: «Mandza zayzay ma ge i təv kurum. I slir a kurum aà mege megemir gà, kamala Tsir gà ana a slərra iye a təv kurum a mbaŋa.» ²²I dəba bazlam ata ya ka, a vizl aà tar mesife ŋgar, dite a gwaɗa a tar: «Taŋa i vəl a kurum ka, Mezite Mesife Mbulum, gəsum. ²³Na kàa pə̀lum à bakal a wura ka, Mbulum tekeɗe, à piler a dər mbaŋa. Ama na kàa pə̀lumar dər tsəka, ŋgat tekeɗe, à piler a dər ɓav tsa mbaŋa.»

Gà Yesuw nda Tumas

²⁴Ama a pat ana Yesuw a daha a təv tar, a pat a tar aba ya ka, Tumas, wele ana ŋgat mawusa ya, a riŋ ika magər tar tsa. ²⁵I dəba ŋa ya, gà asiŋ gà ɓəzla mazazama Yesuw ana tar riŋ i fataya, ta gwaɗa a Tumas: «Maa ŋgat a BATSAH kwa ŋa.» Ama Tumas a gwaɗa a tar aaka: «Na Yàa ŋgat a girɗe màsàmàsà ana i ahər ŋgar a, Yàa ləm ahər, nda gà Yàa ləm aà na ika wèlèɓè ya tsəka, i gis a bazlam kurum ata tsa.»

²⁶A ndza kwaskwa ilik ka, gà ɓəzla mazazama Yesuw ti yahaba gər a ga ata asa, dite pat ata ka, Tumas a riŋ i təv tar kuɗa. Tàa hə̀ndə̀k a ga ata kamala ana ndeɗiŋa ya asa, ama tə sər aaba ka, Yesuw a riŋ ika magər tar i ga ata asa. A gwaɗa a tar: «Mandza zayzay ma ge i təv kurum.» ²⁷I dəba ŋa ya, a gwaɗa a Tumas: «Dzakara ahər yak a faha ya, kà fə̀r ahər, kà ləm aà girɗe ana i ahər gà ya, dite kà ləm aà na ika wèlèɓè ga ya mbaŋa kwaŋ. Miyak à mimbètsè ahəm, dite kə̀ gəs kuɗa.» ²⁸Tumas a gwaɗar aaka: «Tsaka kər kaɗəŋ Batsah ga ŋa, kər ka, Mbulum ana i gewar meslire ya.» ²⁹Yesuw a gwaɗar: «Kə̀ gəs ka, aɗaba ana kàa ŋgetiŋ kuɗa ya. Ama kə̀la ka, maŋgayaba ika gər gà na ta gəs iye nda gəzləŋ ka, tàa ŋgetiŋ tsiye.»

Gà dukw ana mewetse ŋa i wakita ya

³⁰Akahər ata ka, Yesuw aka ge gà asiŋ gà dukw mene aà mburma ŋgiɗ pampam hinne ika miɗ gà ɓəzla mazazama ŋgat. Ama gà dukw ata ka, mewetse ŋa a riŋ i wakita aaha tsa. ³¹Ama gà dukw ana mewetse ŋa i faha ya ka, gà dukw ana, dite ki sirwim a dər, Yesuw ka, Kəla Mbulum ndzer. Ŋgat ka, mala məmbàlà à mburma ana Mbulum a gwa, i ti slir a kurumehe a ya. Ta wetse ka, dite ki ŋgetwim a mesife i təv ŋgar a, agəra ana kàa gəsum ŋgat nda gəzləŋ a.

Yesuw a pàt aba a gà asiŋ gà ɓəzla mazazama ŋgat təsəla

¹I dəba mendze zaakwa ya asa ka, Yesuw a pàt aba a gà asiŋ gà ɓəzla mazazama ŋgat aà gùva duluv Tiberiyas. Araha, i tsik a kurum a bazlam ana a pàt a tar aba ya: ²A pat duwa, gà asiŋ gà ɓəzla mazazama ŋgat a riŋ mandza ŋa i təv ilik ŋa. Gà mburma ata ka, gà Simun Piyer nda gà Tumas, wele ana ŋgat mawusa ya, nda gà Nataniyel ana a dara i Kana, ika ahəɗ Galile ya, nda gà ɓəza Zebede, dite nda gà ɓəzla mazazama ŋgat ŋgiɗ sula asa. ³I fataya ka, Simun Piyer a gwaɗa a tar: «Iye ka, i de a a magàsà kilif.» Ta gwaɗar aaka: «Mər tekeɗe, mìi de a mbaŋa, tàkwa tserdze.» Ta mah ba i fataya, tə da. Tə daha, tə tsala a slə̀làh yam, tì sìweye a dər ika gər yam ndaàvəɗ, nda gà dukw magàsà kilif ŋa aà tar. Ama i huɗ həvəɗ ata ya ka, sìkwèɗ tàa ŋgat kilif ilik tsidze.

⁴Aləka mbulum a də̀v, are a da aaba ya ka, Yesuw a daha, dzeŋ a hitse aà gùva yam ata. Ama gà ɓəzla mazazama ŋgat ka, tàa sər ka, ŋgat tsa. ⁵Yesuw a gwaɗa a taraha: «Kàa gasum kilif ŋa ibam a, gà ɓəza gà.» Ta gwaɗar aakara: «Awaŋ, maa gəs ilik tsidze.» ⁶A gwaɗa a taraha asa: «A za tikwim ndzàràwà kurum aà gùva yam ana ndaka tsèke ahər mezime kurum a kwaŋ, ki geswimiŋa.» Ti tike a fata ka, aha ŋana ta waya aà meŋgile dərraha a təv tar a slə̀làh yam a ka, gwediŋ gwediŋ ta mba ahər tsa, aɗaba kilif ana maràhà ŋa iɗəm fèɗìɗe ya. ⁷Mala mazazama Yesuw ana mandərkwasla ŋgar hinne ya, a gwaɗa a Piyer: «Naha ka, BATSAH kwa ŋa.»

Piyer a tsaraka kataya tsara ka, a tike akaba petek ŋgar, aɗaba ŋgat ka, mandza ŋa kataya, petek ikəka tsa. I dəba ŋa ya, kàp a yàra ba aka gər yam a, a waya madàra a təv ŋgar a. ⁸Gà asiŋ gà ɓəzla mazazama Yesuw ŋgiɗ aaha ti zeha aɗəm a, ta pakara slə̀làh yam ata a təv ana Yesuw iɗəm a, nda gà ndzàràwà aaha madànà ŋa ihər, kilif ata maràhà ŋa iɗəm. Tar ka, tə za ba diriŋ aà gùva yam ata ya tsa ibam, a ge a ka, kapakà sik dərməka. ⁹Aləka tə tarra i slə̀làh yam ata ya tsara ka, ta ŋgat a akwa a riŋ məvə̀tà ŋa i liwit, kilif ikəka mandàzà ŋa, nda ɗaf a riŋ i bəɗ. ¹⁰Yesuw a gwaɗa a tar: «Ndzəkumara gà kilif aka kə̀ gasum kinehe ya zaakwa, ka ndazakwa.» ¹¹Simun Piyer a daha, a tsəl a slə̀làh yam ata. A daha ka, a pə̀lara ihər à ndzàràwà ata nda kilif ŋa iɗəm ìdìp bàba ŋa ɗekɗek a. A ŋgəl dərra ihər a kətsah aà gùva yam ata ya zaakwa. Kilif ata iɗəm fit dze ka, dərməka nda dzik ə̀zləm gər a makər. Dite ndzàràwà ŋa aka nəs tsa seyiŋ, ku mege kilif ata aka be aɗəm hinne tekeɗe ya. ¹²I dəba ŋa ya, Yesuw a gwaɗa a tar: «Dumara, zəmakwa.» Ama ka, wura ilik ika magər gà ɓəzla mazazama ŋgat ata ya, aka mà aba aà arəv, aka gwaɗar ka, kər ana, weke tsidze. Aɗaba tə sər, ŋgat ka, Batsah tar ŋa. ¹³Yesuw a sìrìkeha a təv tar. A daha, a zla ɗaf ata, a sasa ikaba ya, a dzaya a tar. A ndzək kilif aaha, a dzaya a tar aaka asa mbaŋa.

¹⁴Taŋa ka, məpàtà aba məmakər ŋa ana Yesuw a pàtawa aba a gà ɓəzla mazazama ŋgat a, na à gər ana a mbəlara i məməta ya ya.

Gà Yesuw ta fàfəl nda Piyer

¹⁵Tə zəm aba ɗaf ata ya lele ka, Yesuw a gwaɗa a Simun Piyer: «Simun, kəla Yuhana, kà waya iye ana, kinehe, a za dər gà asiŋ gà dukw tserdze ya?» A gwaɗar aaka: «Haya, Batsah ga ŋa, kà sər ka, i waya kər.» Yesuw a gwaɗar: «Na kataya ka, ge gər a gà mburma gà ana ti zezem a iye kamala gà ɓəza gà təmaŋ a lele.» ¹⁶I dəba ŋa ya, a gwaɗa a Simun Piyer masula ŋa asa: «Simun, kəla Yuhana, kà waya iye ana, ndzer a?» A gwaɗar aaka: «Haya Batsah ga ŋa, kà sər ka, i waya kər ndzer.» Yesuw a gwaɗar: «Taŋa ka, kasla ɗa gà mburma gà ana ti zezem a iye, kamala gà təmaŋ a lele.» ¹⁷I dəba ŋa ya asa, a màr dər məmakər ŋa, a gwaɗar: «Simun, kəla Yuhana, wànà kà waya iye ana, ndzer kaɗəŋ a?» Bazlam Yesuw ata a màr dər məmakər ŋa, a gwaɗar: «Wànà kà waya iye yà, kà waya iye yà» ka, a tsəɓ a Piyer hinne. A gwaɗar: «Batsah ga ŋa, kà sər duwa tserdze. Dukw ana i gəzləŋ a tekeɗe ka, kà sər. Kà sər ka, i waya kər ndzer.» Yesuw a gwaɗar: «Ge gər a gà mburma gà ana ti zezem a iye kamala gà təmaŋ a lele. ¹⁸Iye ihər i gweɗek a nda ndzer, pàrsa iɗəm tsa: Akahər ana kər i gèlèɓè mba ya ka, kà dànawa ba ŋgewwè nda dukw dəmkul nda ahər yak, ki debe a a təv ana kà waya aà mede ya. Ama i təv ana kàa ge màndawal a ka, mìsle ŋgiɗ à gis a ahər yak a mbulum, à dèneyekehe a medène, dite a de a à kər a təv ana gəzləŋ yak a waya aà mede tsiye.» ¹⁹Yesuw a tsik bazlam ata nda təv Piyer kataya ka, a ɗifer à məməta ŋgar ana à mìt a, à zlibe a dər à Mbulum a. I dəba ŋa ya ka, Yesuw a gwaɗar: «Zezem iye.»

Gà Yesuw nda mala mazazama ŋgat ana

mandərkwasla ŋgar a

²⁰Piyer a mbəɗ aba ka, aka ŋgat a mala mazazama Yesuw ŋgiɗ ana mandərkwasla ŋgar, a riŋ a zezem a tar a. Wele ŋa ka, wele ana a sìrìk a təv Yesuw akahər ana ti zim a ɗaf Paska, a gwaɗar ka: «Batsah mər ŋa, weke na a ta ge aà kər a ɗaf ndzer a» ya. ²¹Piyer a ŋgatar ka, a gwaɗa a Yesuw: «Dite Batsah gà ŋa, dukùla na a ta ge a ba nda wele aaha ya?» ²²Yesuw a gwaɗar aaka: «Na i gwa kinehe ka, ma ndza aà bəra haa a pat ana Yàa màra ya ana, əla yak tiye? Kər ka, zezem iye pəra kwaŋ.» ²³A mbəɗ ba aà zləm a gà ɓəzla mazazama ŋgat ka, ta gwa: «Mala mazazama Yesuw ata ka, à mìt a asa tsa aà biybiy.» Tsaatsa Yesuw a gwaɗa a Piyer ka, kataya tsa. A gwaɗar ka: «Na i gwa kinehe ka, ma ndza aà bəra haa a pat ana Yàa màra ya ana, i yak là tiye?»

²⁴Tsaatsa mala mazazama Yesuw ata ti tsik ahər kataya ya ka, ŋgat na a ɗif à dukw ana Yesuw a ge tserdze, dite a wetse a wakita aaha ya. Ama kà sərakwa, dukw ana a tsik a ka, ndzer kaɗəŋ.

Mandəvandəv bazlam

²⁵Yesuw aka ge gà dukw pampam hinne asa. Na mege ta wetse gà dukw ŋgar ana a ge ya fit, a gà wakita ilik ilik tserdze ka, sik sik sik təv a sler a tsa, na i dzala ya.