YAKUBA

Wakita ana

YAKUBA

a wetse ya

¹Iye Zakup, mala megemir gà Mbulum nda Yesuw Kiristi BATSAH kwa ŋa. I geha wusa a gà mburma Mbulum ana tə dzaya aba vatwa ilik ilik ku mege a ŋga aka gər ahəɗ tserdze ya.

Mbulum a vile a metsehe a gà na ta gəs ŋgat a

²A kurum gà damər gà ana ika vatwa Mbulum a. Na bəla gà dukw mesewere are ana ti dzik a à kurum pampam a, tàa le aà kurum ka, ŋgeywim ba ivaɗ. ³Aɗaba kà sərum, medzike ata ti dzik a à kurum a ka, na bəla kàa miyakum à magəsa Mbulum tsəka, à sìkèh a kurum a à ndzəɗa a gəzləŋ kurum ɓəŋɓəŋ lele. ⁴Ama kə̀la ka, gwim metsehe lele, na dite ndzəɗa ata a de a aka miɗ aka miɗ, i təv dukw ana tserdze ya ya. I dəba ŋa ya, ki nwim a ŋgwal ŋa lele, ki ywim a kuɗa duwa asa tsidze ya.

⁵Na wura a riŋ ilik ika magər kurum, daɗəkɗəkka, a sər dukw ana a ge a ika vatwa Mbulum a tsəka, ma wiz aà Mbulum, a ɗifer a dər. Aɗaba ŋgat a vile a duwa a mburma ka, nda gəzləŋ ilik, a niw a dər tsa. ⁶Ama say a wiz kə̀la ka, nda megìse i gəzləŋ ŋgar lele, tsəka, nda gəzləŋ sula tsa. Aɗaba wur ana madzala gà gər i gəzləŋ ŋgar pampam a ka, a ndzikiɗ ba kamala duluv yam ana himbiɗ a ɓezle a dər wàkit wàkit, a tsele akaba a ya. ⁷Ama wur ana kataya ya ka, ma ta gwa ka, i ŋget a duwa i təv Mbulum a tsa. ⁸Aɗaba wur ana kamala taŋa ya ka, a sər gà gər dukw ana a ge a ya tsa. Madzala gà gər ŋgar ibam, i təv ilik ŋa tsa asa.

Gà mala matawak, nda mala limana

⁹Mala mazazama Yesuw ana matawak ŋa ika magər kurum a ka, ma ŋgaya ba, aɗaba Mbulum aka səkah à ŋgat. ¹⁰Ama mala mazazama Mbulum ana limana ŋgar a riŋ hinne ya tekeɗe ka, ma ŋgaya ba mbaŋa, aɗaba Mbulum aka mà à ŋgat a bəɗ, aka vəlar aɗəm dukw ana ŋgwal ŋa ya ivaɗ. Aɗaba mala limana ka, ti dzeye akaba a nda limana ŋgar kamala mibezè kwizir ana a bize a ya. ¹¹Na pat aka zlara ahər a mbulum a ka, kwizir ata a ɓwitiŋa, dite mibìzè ŋa na tekeɗe, à dzèwe a ihər a, à tsehin a asa tsa, a gwinekiŋa. Kamala taŋa ya, mala limana ibam, a dzeye a kataya mbaŋa, na aka məts aà megemir limana ŋgar ɗekɗek a.

Dukw ana a dzik a à mburma ya

¹²Maŋgayaba ika gər wur ana a mir a aba i təv gà dukw ana ti dzik a à ŋgat a tserdze ya. Ama na aka mər aba i təv gà dukw ata ti dzik a à ŋgat a ka, a ŋget a dukw maya ba ŋgar, kamala megweɗe ya, mesife ana Mbulum a gwa i sida ya ka, i ta vile a a gà mburma ana ta waya iye ya. ¹³Na duwa aka dzik à wura ka, ma ta gwa ka, Mbulum na a dzik à iye ya tsa. Aɗaba wura a sle a aà məbàzà za a Mbulum aà dukw ana ŋgwal ŋa tsiye tsa. Dite Mbulum tekeɗe, a beze a za a wura aà mege dukw ana ŋgwal ŋa tsiye tsa asa mbaŋa. ¹⁴Ama say madzala gà gər ana ŋgwal ŋa tsa, i gəzləŋ mburma ya ivaɗ na a beze a za a mburma aà mege bakal a. ¹⁵Aɗaba na meèweke madzala gà gər ata aka rah a gəzləŋ ka, a we a bakal. Dite i dəba ŋa ya, bakal ata aka səkah ka, ki mìt a kuɗa.

¹⁶Ama kinehe ka, a kurum gà damər gà ana i waya kurum hinne ya, kà dàɗum a ba à gər tsa. ¹⁷Aɗaba gà dukw ana gà ŋgwal ŋa lele ndzer a ka, a dere a ka, i təv Mbulum i gər ŋa ya. Na a vile a gà dukw ata masakəŋa ya ka, Mbulum, mala mege gà dukw ana tì div a dzaydzay, tar riŋ madzàvà ŋa aà gəza mbulum a. Mbulum ka, à mbìɗ a à ba ŋgiɗ tsa. Luvuŋ a riŋ i təv ŋgar tsa. Ŋgat ka, kamala pat ana à dìɗiŋa, dite sìsiye à mbìɗ a aba ya tsa asa mbaŋa. ¹⁸Ŋgat na a waya, a vəl a kwa mesife awiya ŋa na i təv guma ŋgar ndzer ŋana a tsik a. A sasar na ka nekwa gà malahalah ŋana i liwiŋ gà dukw ana a ge tserdze ya.

Matsaraka bazlam Mbulum ka, nda zləm ɗekɗek tsa

¹⁹A kurum gà damər gà ana i waya kurum hinne ya. Tsarakum dukw ana i tsik a kurum a ya, dukw ilik ma ta məts a kurum gər tsa: Ku weke mà dza zləm a dukw ana ti tsiker a ya dzekwiŋ. Ama ma dzala dukw ana a tsiker a ika arah ŋgar a lele, dite ma tsik kuɗa. Mà gəs gəzləŋ i təv matsəɓatsəɓ ana a dere a i gəzləŋ ŋgar a mbaŋa. ²⁰Aɗaba matsəɓatsəɓ ka, a sle aà mege a dukw ana a sàs a Mbulum a tsa. ²¹Aɗaba taŋa, miyakum aba à dukw bakal ana tserdze ya, ki gwim asa tsa. Hənum à gər a bəɗ aka miɗ Mbulum, gəsum bazlam ŋgar ana a dzəv a gəzləŋ kurum kamala madzàvà duwa ya, dite ka, a sle a aà mimbile dər à mesife kurum kuɗa ya.

²²Ama ka tə dzalum matsaraka bazlam Mbulum ka, nda zləm ɗekɗek tsa. Say ki gwim a dukw ana a tsik a kurum a ya mbaŋa. ²³Wur ana à dze a zləm a bazlam Mbulum pəra, ama a ge a dukw ana Mbulum a tsik a tsəka, a ndzikiɗ ba ka, wur ana a samata ba ŋgar i kwataramà ya. ²⁴A fə̀r aà ba ə̀ba ilik tsara, aləka a de a i fataya ka, a sər ba ŋgar a ndza ana, meme ka, a sər asa tsiye. ²⁵Ama wur ana a dzele a məpala ahəm Mbulum, dite a ge a metsehe a megemir ŋa lele kəla pat a ka, ŋgat ka, pam. Aɗaba aka tsaraka ka, à mìtser a gər tsa, à gis a gà bazlam ata ivaɗ. Taŋa wele ata ka, mipìsè ahəm ika gər ŋgar, Mbulum a piser a ahəm lele. Məpala ahəm Mbulum ata ka, ŋgwal ŋa ndzer, aɗaba ŋgat na a sle a aà mibeye à kwa i bakal a ya.

²⁶Na wura ika magər kurum, aka ne à ba ŋgar mala ndzer ŋa, a gweɗe a, iye mala mazazama Mbulum, ama na aka ge metsehe a gà bazlam ana a dere a ika arah ŋgar a tsəka, a bana ba ŋgar nda mazazama Mbulum masakəŋa taf. ²⁷Dukw ana Mbulum Tsir kwa ana i gər ŋa a waya ki zezemekwe a nda ndzer ŋa ya ka, araha: Mege gər a gà ɓəzla matawak ana wur tar a riŋ tsiye, nda gà madakwa gà məkəs ana ti sèwèr a are hinne ya. Dite wur ana a ge a kataya ka, ma kasla ba ŋgar mbaŋa, i təv gà bakal ana ika gər ahəɗ ti sle aà mibene a ŋgat asa tsiye.

Ka walum ikaba mburma ya tsa

¹A kurum gà damər gà, na kàa gəsum Yesuw Kiristi BATSAH kwa ŋana a za gà dukw tserdze, tì zlibe a dər a ka, ka ta walum ikaba mburma ya tsa. ²Na bəla gà mburma sula tàa daha a ga Mbulum kurum, mìsle ŋgiɗ mala limana, petek ikəka lele, matsərəɗ gura i ɓəza ahər, biy na tsakala ŋa hinne, à sìkim a ba tsiye. Ama mìsle ŋgiɗ aaha ka, mala matawak, ŋgat a daha ka, gà manəsa petek masakəŋa taf na ikəka ya. ³Dite kurum ka, ki zlìbwim a à mala petek aaha lele, ki gweɗwimer a: «Dara, ndza iɗəm aka təv mendze ŋgwal ŋa a faha ya.» Ama mala matawak ka, ki gweɗwimer a, «Kər ka, daha, ndza a bəɗ a faka, kige tsa, dara, ndza a bəɗ aà sik mər a faha.» ⁴Na ki welwim a ikaba mburma ya kataya ka, taŋa ki gwim a ka, bakal. Aɗaba ki gwim a taŋa ka, nda madzala gà gər ana ŋgwal ŋa tsiye.

⁵Kurum gà damər gà ana i waya kurum hinne ya, tsarakum. Aɗaba Mbulum a pala gà ɓəzla matawak ata ika gər ahəɗ a ka, dite ta ŋgat dukw ana ŋgwal ŋa ya, agəra megìse ana ta gəs Yesuw Kiristi ya. Mbulum a ta vile a ter a mekwere Əbay ŋgar ana a gwa i sida ya, i ta vile a a gà mburma ana ta waya iye ya. ⁶Ama kurum ka, ki fìrwim a aà gà ɓəzla matawak kamala za ya dze ana, meme? Aɗaba gà Əbay gər ahəɗ na ti sèwèrewa a kurum are, ti de à kurum a aka miɗ seriye ya, tsəka, gà ɓəzla matawak tsa. ⁷Dite tar asa tsiye na ti tsik a dukw ana ŋgwal ŋa tsa aà zləm ŋgwal ŋa ana Mbulum a ɗe a kurum dər a?

⁸Na ki zezemwim a məpala ahəm nda ndzer kamala ana Mbulum a gwa i wakita ka: «Wayum mburma, kamala na kà wayum ba kurum a»*fa* ka, kàa gwim lele. ⁹Ama na bəla ki welwim a ikaba mburma ya ka, ki gwim a taŋa ka, bakal. Seriye məpala ahəm Mbulum ata ka, aka gəs kurum. ¹⁰Na wura a zezem a gà məpala ahəm Mbulum tserdze, ama aka məsak à biy ŋgiɗ ika magər ŋa ya ka, taŋa ka, aka nəs à gà asiŋ aaha tserdze ya mbaŋa. ¹¹Aɗaba Mbulum a gwa ka: «Ki ge muva tsa.»*fb* A gwa asa mbaŋa ka: «Kə̀ kəɗ mburma tsa.»*fd* Kamala taŋa ya, na bəla wura aka ge muva tsa, ama aka kəɗ mburma ka, kamala ana a ge muva ya. Aka nəs à məpala ahəm Mbulum ata fit dze, ku mege aka ge muva tsa tekeɗe ibam a. ¹²Aɗaba taŋa i tsik a kurum ŋa, i təv gà bazlam ana ki ti tsikwim a ya, kige tsa, i təv gà dukw ana ki ta gwim a tserdze ya ka, mə̀ məts a kurum gər tsa, sərum dər ka, Mbulum a ta ge a kwe a seriye, a wiz aà kwiŋa, wànà kàa gekwa megemir məpala ahəm ŋgar ana a gwa, a sle a aà mibeye à kwa i seriye ŋgar a ibam a, tsəna kàa gekwa tsiye? ¹³Na wura ɗa ika magər kwa, mburma a ndzer are tsehe tsəka, wur ata tekeɗe, i təv ana Mbulum a ta ger a seriye ya ka, a ndzer a are tsehe tsa mbeete. Ama na mburma aka ndzek are tsehe ka, kər tekeɗe, ki ti ndze a are tsehe a Mbulum ika miɗ seriye mbaŋa.

Magəsa Mbulum nda megemir ŋa

¹⁴A kurum gà damər gà, na bəla wura a gweɗe a: «Iye ka, Yàa gəs Mbulum nda gəzləŋ ga», ama a ge a dukw ana Mbulum a tsik a tsəna, megìse ŋgar ata ana, a ger a ŋgulum, a mbil a à ŋgat ɓav a? ¹⁵Bəla gà damər kurum a riŋ ika vatwa Mbulum, petek tar a riŋ tsa, nda gà dukw mezime tekeɗe, a riŋ tsa asa. ¹⁶Dite bəla mìsle ŋgiɗ ika magər kurum a, a gweɗe a ter a: «Ndzum nda zay lele, Mbulum mi pise a kurum ahəm, mə vəl a kurum petek, nda dukw mezime», nda bazlam pəra, a sasar a vile a ter a biy ŋgar tsəna, taŋa ana, a ge a ŋgulum a? Awaŋ, a ge a ŋgulum tsa. ¹⁷Kamala taŋa ya mbaŋa na i təv megìse ana ki giswim a Mbulum a. Na ki gwim a megemir ŋa tsəka, duwa a riŋ a ge a ŋgulum tsa.

¹⁸Bəla wura a gweɗe a gà mìsle ŋgiɗ ka: «Tàa gəs Mbulum nda gəzləŋ tar, gà biy ŋgiɗ ibam, ta gewa gà dukw ana ŋgwal ŋa ya.» Ama i gweɗere a ka: «Ɗifiŋ à megìse yak ana kə̀ gəs Mbulum a, dite ka, ki gewa dukw ana ŋgwal ŋa tsiye asa ya. Iye tekeɗe ka, i ɗifek a à biy ga ana i gewa ŋgwal ŋa ya, dite kər ki sir a dər ka, Yàa gəs Mbulum a.» ¹⁹Kər kə̀ gəs ana Mbulum ana ŋgat ilik a tsiye? Taŋa ka, lele. Ama kə̀la ka, gà sitene tə sər mbaŋa, ti dzedzeriŋa, ta ger a magəɗa hinne.

²⁰Kər ana metsehe yak a riŋ ba ya? Meme na ki ɗiŋ a à wur ana a gweɗe a: «Yàa gəs Mbulum», ama ka, a ge a dukw ana ŋgwal ŋa ya tsa, dze ana, wànà megìse ŋgar ata ana, a ge a ŋgulum a? ²¹Fə̀rum kwaŋ, meme na Mbulum a gəs Abəraham tsir kwa ata kamala mburma ŋgar ŋgwal ŋa lele ya. Mbulum a gəs ŋgat ana, agəra megemir ana a ger a tsiye? Aɗaba akahər ata a zla Izak kəla ŋgar aà mekìɗè a Mbulum, a ne dər kamala dukw masakəŋa ya. ²²Kà sər mendze Abəraham ana a ndza ya. Ŋgat ka, a gəs Mbulum lele. Dite a ge dukw ana a sàs a Mbulum a mbaŋa. Dukw ana a ge ya ka, a ndəv à megemir Mbulum ana a gəs a. ²³Kamala taŋa ya na dukw ana i wakita Mbulum ta wetse ya kaɗəŋ. Ta gwa ka, «Abəraham a gəs bazlam ana Mbulum a tsikar a, nda gəzləŋ ŋgar lele. Dite na Mbulum a gəs ŋgat kamala mburma ŋgar a.»*fe* Aɗaba taŋa, mewetse ŋa a riŋ mbaŋa, na Mbulum a gəs masla nda Abəraham a.*ff* ²⁴Yawwa samatum, aɗaba mburma a ne a ŋgwal ŋa i təv Mbulum ka, nda megemir ŋa mbaŋa, tsəka, nda megìse ɗekɗek tsa.

²⁵Kige tsa, kamala dəm duwa muva ŋa, tə zalar Rahab a mbaŋa. A ne ŋgwal ŋa ika miɗ Mbulum ka, aɗaba ana a kaha gà ɓəzla meslire gà Yahuda ana tə daha ìzliɗ ìzliɗ aà masamata ikaba təv i kwite ata ya, aà gà ma ŋgar a. Aləka a ɗif a tar à vatwa ŋgiɗ pam, na dite ta beye a dər aà gà mburma ata ta waya magàsà tar a.*fg* ²⁶Ama ar ka, kamala ba mburma ya. Ba ana mesife iɗəm tsiye ka, a ge a ŋgulum tsa. Kamala taŋa ya, wur ana a gəs Mbulum nda gəzləŋ, dite ka, a ge a megemir ŋa tsiye ka, a ge a ŋgulum ɓav tsa mbaŋa.

Mege metsehe a bazlam ana a dere a ika arah a ya

¹Gà damər gà, gà mburma ana ika magər kurum a fit tsa na ti ti ne a gà ɓəzla meɗìfè à bazlam Mbulum i ga Mbulum a mburma ya. Aɗaba kà sərum, seriye ana ti ta ge a à kwa, a kwa ana ki ɗifekwe a à guma Mbulum a ka, mawura ba ŋa, à zè a biy gà asiŋ gà mìsle ŋgiɗ. ²Aɗaba kwa riŋ tserdze i huɗ gà dukw ŋgiɗ pampam kwa riŋ ihər ki gekwe a bakal. Ama wur ana a ge a bakal i huɗ gà bazlam ŋgar ana a tsik a ya tsəka, ŋgat na a ne ŋgwal ŋa ndzer a, ku mege i təv gà dukula ya tekeɗe. Ŋgat ka, a sle a aà makàslà ba ŋgar i təv gà duwa ya tserdze mbaŋa. ³Samatum gà na tə də̀gə̀zawa piris a kwaŋ, say ti tiker a tsarlàw a bazlam dzekwiŋ, na dite piris a ɗìgìr a mivele lele kamala ana a sàs a mala piris a ya. ⁴Fə̀rum aà gà slə̀làh yam mbaŋa asa. Gà biy ŋgiɗ a riŋ ka, gà bàba ŋa hinne. I təv ana a de a ya ka, himbiɗ tekeɗe hinne mbaŋa na a ge a ya. Ama ku mege kataya tekeɗe, dukw məpaka ŋa ka, hinne tsa kwizikw masakəŋa. Aka sàs a mala slə̀làh yam ata ka, kìw à mèr a dər à gər, a de a dər a təv ana a sasar a de aɗəm a ya lele. ⁵Arah mburma tekeɗe, kamala taŋa ya mbaŋa. Ku mege hinne tsa kwizikw ibam, a tsikara gà dukw ana gà bàba ŋa, a mba aà duwa hinne ya.

Samatum akwa ana hinne tsa kwizikw ka, a wene a batsah kusak fit a kwaŋ. ⁶Arah mburma a ndzikiɗ ba ka, akwa ana wànə̀nə̀nna kataya ya mbaŋa. Aɗaba taŋa, mayaha gər bakal ana ki gekwe a ika gər ahəɗ tserdze ya, a dara ka, ika arah ana mandza ŋa i bazlam mburma ya. Arah à nis a à mendze mburma ana a ndze a ya fit kweleŋ. A tike a akwa ana à nis a à mendze ŋgar ata, daga akahər ana ta we a ŋgat a, haa a təv ana à mìt a ya. Akwa ata a dere a ka, i təv akwa ana a mbete a tsa aà biybiy a asa mbaŋa. ⁷Ama mburma ka, a sle aà mimbè aà gà dukw ana Mbulum a ge nda gà mesife iɗəm tserdze ya, kamala gà ɗiyeŋ, nda gà mesiwiɗ, nda gà dukw ana i yam tserdze ya ka, mburma a mba ahər fit dze. ⁸Ama arah mburma ka, wura a sle a aà makwàrà ŋa ilik tsidze. Ar ka, ŋgwal ŋa tsa ndeyndey dze, à gis a ba a ahər tsidze. Kamala mawur ana à kiɗ a mburma ya, a dere a ka, ika arah a. ⁹Nda arah kwa ata asa ka, kwa riŋ ihər ki zèmbeɗekwe a dər à Əbay Mbulum Tsir kwa mbaŋa. I dəba ŋa ya, nda arah ata asa hiywe ki ndeveyekwe a dər a gà mburma tserdze, ku mege Mbulum a ge tar, ti ndzikiɗ ba ŋgat tekeɗe ya. ¹⁰Bazlam mazàmbàɗà aà Mbulum nda biy mandàvàyà a mburma fit dze a dara ka, ika arah ŋa ya ilik dze ana, meme, gà damər gà? Kataya ka, a ge a ba tsidze, na taŋa ya. ¹¹Yam ana tsəɗaŋŋa ndəna aruwaŋ iɗəm, a dzəm tsa, ti sle aà meŋgìzere a i biye yam ŋa ya ilik dze ana, a riŋ a, na taŋa ya? ¹²A kurum gà damər gà, kà sərum dizl gùrùv ka, a sle aà mewe a uliviye tsa. Hàndaza ibam ka, a sle aà mewe a gùrùv tsa asa mbaŋa. Kamala taŋa ya mbaŋa, yam ana a dzəm a tekeɗe, ti sle aà mede akabara a i biye yam ŋa ya ilik ndəna hə̀ràɓə̀ɓa, a dzəm tsiye ɓav tsa asa mbaŋa.

Metsehe ŋgwal ŋa ana a dara i təv Mbulum a

¹³Wura a riŋ ika magər kurum metsehe ŋgar a riŋ, a sər duwa hinne ya? Na aka ge riŋ ka, mə̀ pàt à megemir ana lele, i təv mendze ŋgar ana a ndze a ya, dite ma həna à gər a bəɗ asa mbaŋa. Aɗaba aka həna à gər a bəɗ ka, gà mburma ti sir a dər, metsehe ŋgar a riŋ kaɗəŋ. ¹⁴Ama na bəla kurum riŋ nda gà mege are aka dukw mburma, kige tsa mege maàga a riŋ ika magər kurum huwwa kəla pat, nda madzala dukw ana ŋgwala tsiye nda təv mburma ka, ka ta gwim aba zlapa tsa, kàa nwim pàrsa à dukw ndzer ŋana. ¹⁵Medzìbe metsehe ata a dara ka, i təv Mbulum ana i gər ŋa ya tsa. A dara ka, ika gər ahəɗ a, nda gà i madzala gà gər mburma ya, nda gà i təv Əbay sitene ya ivaɗ. ¹⁶Aɗaba na gà mburma ta geye a are aka duwa, nda gà bəla menèba are a riŋ, kige tsa, ta geye aba a hə̀za ka, mendze tar ka, aka nəs, a de a kalkal asa tsa, nda gà dukw ana ŋgwal tsiye pampam hinne tekeɗe, tar riŋ i təv tar mbaŋa. ¹⁷Ama metsehe ana ndzer ŋa a dere a i təv Mbulum i gər ŋa ya ka, pam, tsəka, duwa a riŋ ihər manəsa ŋa tsa. A ndze a ka, tsəɗaŋŋa. Na wura a ndze a nda gà medzibe metsehe ata i gəzləŋ ŋgar ka, a zlere a mandza zayzay a, nda masə̀ràba ya, nda gà magəsa aba ahəm a. Dite ŋgat asa ka, mburma a ndzer a are tsehe hinne. A ge a ka, dukw ana ŋgwal ŋa ya kəla pat. A wele a ikaba mburma ya tsa. Melèvekè nda məbànà mburma i təv ŋgar tsa asa mbaŋa. ¹⁸Gà na matasla yam i gəzləŋ tar, ti sir a ba à mburma ya ka, ta ŋget a iɗəm dukw maya ba tar i fataya mbaŋa. Kamala megweɗe ya, dukw ana ta ge a ya tserdze ka, a ge a ba lele, a da gər a Mbulum.

Kə̀ gəsum masla nda gər ahəɗ tsa

¹Maàga nda magə̀zlà ba a dara aka magər kurum dze ana, i ŋga ya? A dara ana, i meèweke kurum ana ŋgwal ŋa tsa, a be a kurum zeɓir zeɓir i gəzləŋ kəla pat a tsiye? ²Ka wayum gà duwa pampam hinne, ama ki ŋgetwim a tsa. Ki gwim a are aka dukw mburma, nda menèba are mbaŋa, ama ki ŋgetwim a ɓav tsa dər akaba asa. Aɗaba gà dukw ata na kinehe kurum riŋ ihər ki gwim a maàga, nda magə̀zlà ba ika magər kurum a. Ki ŋgetwim a gà dukw ata kà wayum a tsəka, aɗaba ana kàa hamum a Mbulum tsiye. ³Ku mege kàa hamumar tekeɗe, ki ŋgetwim a tsa, agəra ana kàa hamumar ndaka vatwa ŋa tsiye, nda gà na a sàs a kurum ka, dukw ana kurum kà wayum ki ŋgeywim a dər ba i gəzləŋ kurum ɗekɗek a.

⁴A kurum ana ki gwim a duwa kataya kamala gà ɓəzla muva ya, kà sərum ti tsiye, na wura aka waya dukw gər ahəɗ hinne ka, ŋgat a ne mala mene are Mbulum a? Aɗaba taŋa na wura à gis a masla nda gər ahəɗ ka, ŋgat a ne mala mene are Mbulum ivaɗ. ⁵Kurum kù gwaɗum ana, dukw ana ta wetse i wakita Mbulum ana, dukw masakəŋa taf a? A gwa ka: «Mbulum a ge a are aka mesife ana a vəl a kwa ya. A waya, na dite ki mèkwer a dər a.»*fa* ⁶Ama ndzəɗa ŋgar ana a vəl a kwa ya ka, a za dər gà dukw meèweke ana i gəzləŋ kwa ya tserdze. A de a ka, aka miɗ aka miɗ kamala ana mewetse ŋa a riŋ i wakita Mbulum ka, ta gwa: «Mbulum a niw a gà ɓəzla zlapa, dite a vile a ndzəɗa a gà na ta həna à gər a bəɗ a.»*fb* ⁷Aɗaba taŋa, gəsum ahəm aà Mbulum. Məsakum à Əbay sitene, dite a vel a à kurum a. ⁸Sìrìkwim a təv Mbulum. Ŋgat tekeɗe, à sìrìk a a təv kurum mbaŋa. A kurum gà ɓəzla bakal, dumara, barum bakal aà ahər kurum a. A kurum ana madzala gà gər i gəzləŋ kurum mandzalama sula ya, miyakum aba à madzala gà gər ata ŋgwal ŋa tsiye. ⁹Ndzum ka, kamala ana ki sèwèrwim a are ya, tuwum hinne, aɗaba bakal kurum, kəɗum ba ivaɗ. Sawla kurum ana ki sewlwim a zləmana ya ka, nwim dər tuwa mbaŋa. Maŋgayaba kurum ana ki ŋgeywim a ba ya tekeɗe ka, nwim dər matsəɓatsəɓ i gəzləŋ kurum ivaɗ asa. ¹⁰Hənum à gər a bəɗ aka miɗ Mbulum, dite Mbulum tekeɗe, a ti sìkèh a à kurum a dər mbaŋa.

Kà mum à bakal mburma tsa

¹¹Gà damər gà, ka ti tsikwim dukw ana ŋgwal ŋa tsiye aà mburma tsa. Na wura aka tsik dukw ana ŋgwal ŋa tsiye aà damər ŋgar, kige tsa à mèr a à bakal mbaŋa ka, taŋa ka, a tsik dukw ata ŋgwal ŋa tsiye ka, aà məpala ahəm Mbulum. A mà à bakal ka, a ŋgat mbaŋa. Avukw ana à gis a məpala ahəm ŋgar a ka, a ne mala məmàr à bakal ivaɗ dze ana, meme? ¹²Mbulum ilik na a vəl məpala ahəm a mburma ya. Dite ŋgat ilik asa na mala masàsà ikaba seriye mburma ya asa mbaŋa. Aɗaba ŋgat ilik na mala ndzəɗa ana a sle a aà məmbə̀là à mburma i məməta ya, kige tsa aà medzeye à tar asa mbaŋa ya. Dite kər dze ana, weke na ki me a à bakal a mburma ya?

Ki gwim zlapa tsa

¹³A kurum gà mburma ana ki gweɗwim a: «Və̀ɗəna, kige tsa ndidwe ka, mìi meh a ba, mìi de a a metsèkèle a kwite ŋa a təv ŋa, mìi ve a riŋ i fata ilik, na dite mìi ŋget a siŋgwe hinne ya.» Ama dzum zləm a dukw ana i tsik a kurum a ya: ¹⁴Kurum dze ana, meme na kà sərum dukw ana a ta ge a ba i təv kurum a ndidwe ya ya? Mesife kurum a ndze a dze ana, hilè na kà sərum a? Mesife kurum ka, kamala hədzək ana a dwiz a, zàkwayiya ka, a riŋ asa tsa, aka mbete ya. ¹⁵Ŋgulum ki gweɗwim a ivaɗ ka: «Mege Mbulum a vile a mər a vatwa ka, mìi ndze a nda mesife mər, mìi ge a naha, kige tsa mìi ge a naaka.» ¹⁶Ama kinehe ka, kurum riŋ ihər ki gilwim a à gər hinne, nda mege zlapa ana, taŋa dze ana, lele yà? Mege zlapa ana kataya ka, lele tsa. ¹⁷Aɗaba taŋa, na wura a sər naha ka, dukw ana ŋgwal ŋa ya, ama a ge a taŋa tsəka, a ge a ka, bakal.

Gà ɓəzla limana ta ge metsehe

¹A kurum gà ɓəzla limana, dzum zləm a dukw ana i tsik a kurum a ya: Ama ka, tuwum ba kurum, gwaɗum ka: «Waya ba mər a, waya ba mər a.» Aɗaba pat mesewere are na a riŋ a dere a aka gər kurum a. ²Limana kurum a gwinekiŋa. Gà petek kurum tekeɗe, gà mumbùkw ti zimiŋa. ³Maŋgəz à gis a siŋgwe kurum ndiɓilèk kweleŋ. Maŋgəz ata a ɗif a kurum a dər ka, à sida akwa ana a ta wene a ba kurum, à nis a ya. Ki yehwim a gər ka, a limana kurum pəra, dite ki vevwim a dər ka, pat seriye Mbulum ana kinehe aka à mendze aɗəm, à ndìv a à gər ahəɗ ana, meme? ⁴Dite kurum ki benwim a gà mburma ana ta pele kurum a gà duwa i bəɗ a, ki zimwim a tar nda wirwir, ki vilwim a ter a dukw mayaba tar tsa ana, meme? Tsarakum, tuwa gà mburma ata ti tiwe a nda Mewideye ya. Tuwa tar ata a geha zləm a Mbulum ana a kwere a gà duwa tserdze ya. ⁵Mendze kurum ana ki ndzwim a ɗa ika gər ahəɗ a ka, kà nwim gà ɓəzla məburnun. Ki gwim a ka, dukw ana a sàs a kurum a ɗekɗek pəra. Kurum ihər ki zimwim a gà duwa hinne, ki gilwim a dər ba ndaɗawuzwuz, kamala gà sla ana ta bets a tar a. ⁶Kurum ihər ki ŋgewwim a gər a mburma, ku mege tàa ge bakal tsa tekeɗe ya, ki betswim a dər akaba tar pəra mbaŋa. Ama tar ka, tàa ge aà kurum maàga tsa.

Magəsa gəzləŋ

⁷Aɗaba taŋa, gà damər gà, gəsum gəzləŋ, haa a pat ana Yesuw Kiristi BATSAH kwa ŋa à mère a a təv kwa ya ya. Fə̀rum aà mala mifìte ana à gis a gəzləŋ a kwaŋ. A veve a yam daw, a sligiŋa. I dəba ŋa ya, a veve a pat ana duwa à nèh a, yam a de a a ma ya, haa a pat ana a pele a gà dukw ŋgar ata i bəɗ a ya mbaŋa. ⁸Kurum tekeɗe ka, gəsum gəzləŋ kamala taŋa ya mbaŋa. Mərum aba, ka ti ywim ba tsa, aɗaba pat ana BATSAH kwa ŋa à mère a ya ka, aka à meslele.

⁹Gà damər gà, ka tə sayum aaba ahəm tsa, na dite seriye Mbulum ata à gis a kurum tsiye. Aɗaba ŋgat ana a ge a seriye ya ka, araha mehìtsè ŋa, aka à mendzera aka biye hərmaga ya. ¹⁰Gà damər gà, dzalum gà gər aka gà ɓəzla məma à guma Mbulum ana ti tsik bazlam ŋgar akahər ata ya. I təv ana tar riŋ tì sèwèr a are ya ka, ta mà aba à arəv, ta gəs gəzləŋ. Ama kurum tekeɗe ka, gwim kamala tar ana ta gəs gəzləŋ, ta mər aba ya mbaŋa. ¹¹Kwa ihər ki gweɗekwe aà ter a ka, tar gà ɓəzla maŋgayaba, Mbulum aka pise a tar ahəm, aɗaba ana ta mər aba ya. Kàa tsarakum magəsa gəzləŋ Ayuba mbaŋa, meme na a mà aba à arəv i təv mesewere are ana a sèwèr a. Ama kà sərum dukw ana Mbulum a vəlar i dəba mesewere are ŋgar ata a sèwèr a mbaŋa asa. Aɗaba mburma a ndze a are tsehe a Mbulum ka, hinne. A ge a ter a ŋgwal ŋa kaɗəŋ.

¹²Gà damər gà, bazlam ana batsah ŋa ka, araha: I təv ana bəla ki tsikwim a duwa i sida ya ka, ka ta mbaɗum tsidze. Ka ta mbaɗum nda zləm Mbulum tsa asa. Ku mege nda zləm gər ahəɗ, kige tsa nda zləm gà duwa ŋgiɗ pampam tekeɗe, ka ta mbaɗum dər tsa. Na bəla bazlam ana kàa gwaɗum aaka «haya» ka, ki gweɗwim a «haya» pəra. Kige tsa kàa gwaɗum «awaŋ» ka, ma ndisl aka taŋa pəra. Ma tə za i gər a taŋa ya tsa, tsəka, ki bwim a i seriye Mbulum ana a ge a ya tsa.

Mahàmà a Mbulum agəra gà ɓəzla dukw məməta

¹³Na wura a riŋ ika magər kurum à sèwèr a are ka, ma hama a Mbulum, dite Mbulum mà zlak ŋgat. Na wura a riŋ a ŋgeye a ba ka, mà lah dimis, mà zàmbaɗa à Mbulum. ¹⁴Na bəla wura a riŋ ika magər kurum ŋgwala tsəka, ma zal a gà bàba gà mburma ana i liwiŋ gà ɓəzla mazazama Yesuw a, tə dara, ta hama a Mbulum aɗaba ŋgat. Dite ta bàhar mal aà are zaakwa nda zləm Yesuw Kiristi BATSAH kwa ŋa. ¹⁵Na tàa hama a Mbulum nda ndzer, tə sər ka, Mbulum a tsereke a meheme mər ata ka, dukw məməta ata ka, Mbulum à mèreba a à ndzəɗa, a mbiliŋa. Na bəla aka ge bakal ka, Mbulum à piler a dər mbaŋa.

¹⁶Aɗaba taŋa, pə̀lawum aba à bakal ika magər kurum, ku weke a heme a a Mbulum aɗaba mìsle ŋgiɗ tserdze mbaŋa asa. Dite Mbulum a mbele a à kurum i dukw məməta ya. Aɗaba meheme wele ana ŋgat mala ndzer ŋa ika miɗ Mbulum a ka, ndzəɗa ŋa, a sle a aà duwa hinne. ¹⁷Fə̀rum aà Iliya ana akahər ata ya kwaŋ. Ŋgat ka, mburma kamala kwa ya mbaŋa. Ama ka, a hama a Mbulum nda gəzləŋ ilik, a gwa i huɗ meheme ŋgar ata ya ka: «Yam mà dza ɗa i faha asa tsa mive makər nda mezehe ŋa» ka, aka dza tsa kaɗəŋ. ¹⁸Aləka a ta megeha i dəba ŋa ya ka, a hama a Mbulum asa, a gwa: «Yam mà dza asa.» Aləka i dəba meheme ŋgar ata ya asa ka, tiɓits yam a dza kaɗəŋ asa. Dukw mezime a mbəɗ gər aka meslile.*fa*

¹⁹Gà damər gà, na wura ika magər kurum a aka dəɗ ika vatwa Mbulum a ka, mìsle ŋgiɗ ma daha, mə̀ mà aakara à ŋgat a asa. ²⁰Sərum dər ka, na wura aka màra à mala bakal ika vatwa ana ŋgwal ŋa tsiye ka, taŋa ka, a mbəl à wele ata i məməta ya. Ku mege bakal ŋgar a riŋ hinne tekeɗe ka, Mbulum à piler a dər.