GALATIYA

Wakita ana Pul a wetseha

a gà mburma Mbulum ana

i GALATIYA ya

¹Na wetse wakita aaha ka, iye Pul, mala meslire Yesuw Kiristi. Meslire ata i ge a ya ka, mburma na a slər ahər iye ya tsa. Dite kwets ti tike aɗəm iye metike ɓav tsa asa. Ama ka, Yesuw Kiristi na a slər ahər iye ya kəla, tar nda Mbulum Tsir kwa ana a mbəlara à ŋgat i məməta ya ya. ²Mər ka, nda gà asiŋ gà damər kwa ana tar ɗa i təv ga ya tserdze, na mì ge a kurumaha wusa, a kurum gà mayahaba gər gà mburma Mbulum ana ika ahəɗ Galatiya ya. ³I heme a a gà Mbulum Tsir kwa nda Yesuw Kiristi BATSAH kwa ŋa, dite ta ge a kurum ŋgwal ŋa, ta vəl a kurum matasla yam a gəzləŋ zayya lele. ⁴Yesuw Kiristi a mət ka, aɗaba kwa, na dite Mbulum a pəl a kwa dər à bakal gər ahəɗ aaha ŋgwala tsiye, dite mà fàr aka kwa ndzəɗa asa tsa. A ge dər kataya ka, kamala ana Mbulum Tsir kwa a waya ya. ⁵Zàmbaɗakwa à Mbulum ka, aà biybiy. *Amin.

Bazlam ŋgwal ŋa ana biy Yesuw Kiristi ya ka, ilik pəra

⁶Dukw ana kurum ihər ki gwim a ya ka, a giŋ hə̀ɓakə̀kka, kamala dukw mene aà mburma ya. Araha, Mbulum a zal a kurum ka, dite ka nwim gà mburma ŋgar, nda ŋgwal ŋgar ana a ge a kurum a. Ama kurum ka, ka miyakum à ŋgat bise tsara ana, meme? Kurum kà zazamum ka, bazlam ŋgiɗ ana kù gwaɗum, ŋgwal ŋa, tsaatsa ka, ŋgwala tsiye ivaɗ. ⁷Bazlam ŋgwal ŋana ar ka, kamala ana i ɗif a kurum dər a, tsəka, biy ŋgiɗ a riŋ na a dara i təv Mbulum a ka, a riŋ tsa. I tsik a kurum kataya ka, aɗaba ana i samata ka, gà mìsle ŋgiɗ a riŋ na wis wis ta wise a kurum a à gər a. A sàs a tar ka, manəsa à bazlam ŋgwal ŋa ana biy Yesuw Kiristi ya, ta waya ka, ti tsik a pam. ⁸Ama na bəla wura a riŋ a ɗif a kurum a à bazlam ŋgwal ŋa biy ŋgiɗ pampam aba ndəna mər mì tsik a kurum a ka, Mbulum mə vəlar mezelme. Ku mege mər, nda gà bəla gawla Mbulum ana a dara i gər ŋa ya tekeɗe ka, pampam tsa, mà gəs ŋgat i seriye ya mbaŋa. ⁹Maa mbər metsike a kurum daga piŋŋe, dite kinehe tekeɗe, i me a aka metsìkè a kurum asa. I gwaɗa a kurum ka: Na wura a ɗif a kurum a à bazlam ŋgwal ŋa biy ŋgiɗ pampam aba nda biy ana kà lah metserekwim a ka, Mbulum mə vəlar mezelme.

¹⁰Kurum kà dzalum, i tsik taŋa dze ana, na dite gà mburma tə̀ zlə̀b à iye ya? Awaŋ, kataya tsa. A sèsiŋ ka, na Mbulum à zlibe a à iye ya. Kurum kù gwaɗum, dukw ata i ge a kataya ana, na dite i da a gər a mburma ya ya? Awaŋ, i ge a ka, meslire Yesuw Kiristi na iye ya. Aɗaba na mege i waya matsahəna aà mburma hiywe mba ka, ana ka, i ge a meslire ŋgar tsa.

Pul a ɗif dər, meme na a ne mala meslire Yesuw Kiristi ya

¹¹Gà damər gà, a sèsiŋ ka, sərum dər bazlam ŋgwal ŋa ana i ɗifewa a kurum dər a ka, a dara ka, i madzala gà gər mburma ya tsa. ¹²I tsaraka ka, i təv mburma ya tsa asa, dite kwets wura a sinikiŋ dər tsa asa mbaŋa. Ama Yesuw Kiristi à gər ŋgar na a ɗifiŋ dər a.

¹³Kurum ka, kàa tsarakum mede gà ana akahər ata ya, dite meme na i zazamawa fəla gà Yahuda nda ndzer ŋa ya. Akahər ata i sèwèrewa are a gà mburma Yesuw ka, hinne. I yahawa vatwa aà medzeye à tar fit. ¹⁴I huɗ madzala gà gər gà ata ya ka, i za dər gà asiŋ gà màndàla gà hinne, na nda mazazama fəla gà Yahuda ya. I vəl ba gà fit a məpala ahəm gà tsir mər, i ge ka, tèrihhwè lele.

¹⁵Ama ka, Mbulum a zla iye ya. A zla iye ka, daga piŋŋe, akahər ana tàa wa iye zukw tsiye. Kamala taŋa ya, a giŋ ŋgwal ŋa hinne, a zeliŋ, na dite i ger a meslire ya. Ama aka təv ana a tsahən ahər, i de a a kwite Damas a ka, ¹⁶a pètiŋ à Kəla ŋgar, na dite i tsik a bazlam ŋgwal ŋana aka gər ŋgar, a gà mburma ana tə sər Mbulum tsiye tserdze ya. Akahər ata ka, maa fàfəl nda wura, aà mewize ihər bazlam a tsa asa. ¹⁷Yàa da a Yeruzalem, aà mede a bəra gà na ti lèhiŋ aà mene gà ɓəzla meslire Yesuw Kiristi ya ɓav tsa asa mbaŋa. Ama ka, i mah ba tə̀lùwur ndaka tsèke ŋgiɗ tsara ivaɗ. I da aka ahəɗ Arabiya. Zàkwayiya ka, i màhara ba i fataya asa, i mbəɗara gər a Damas a. ¹⁸Aləka, mive makər a da iɗəm a ka, dite i da a Yeruzalem kuɗa. I da ka, aà malə̀mà akaba nda gà Piyer. Mì ndza akaba ka, kwaskwa sula pəra. ¹⁹Yàa ŋgat a mala meslire Kiristi ŋgiɗ asa tsidze. Say i ŋgat ka, a Zakup, damər Yesuw Kiristi BATSAH kwa ŋa.

²⁰Mbulum a sər dukw ana i tsik i fataya ka, ndzer, i ses a pàrsa tsidze.

²¹I dəba ŋa ya ka, i da a mesìweye ndaka ahəɗ gà Siriya nda Kilikiya. ²²Akahər ata ka, gà mburma Yesuw Kiristi ana tar riŋ ika ahəɗ Yuda ya, tə sər iye zukw tsa. ²³Ama kəla ka, tə tsarakawa dukw ana gà mìsle ŋgiɗ ti tsik aà iye ya ka, ta gwa: «Wele ana a sèwèrewa a kwa are piŋŋe ya ka, aka mbəɗ à madzala gà gər ŋgar. Kinehe a riŋ a tsik a ka, bazlam ŋgwal ŋana a mburma kuɗa, ku mege piŋŋe a yahawa vatwa aà medzeye à gà mburma ana ta gəs Yesuw nda gəzləŋ a tekeɗe ya.» ²⁴Tə tsaraka kataya ka, tə zàmbaɗa à Mbulum aɗaba iye, agəra dukw ana a mbəɗ à iye ya.

Meme na gà ɓəzla meslire Mbulum ta gəs Pul

ika magər tar lele ya

¹Mive kurwa gəra faɗ a da iɗəm a ka, mər nda Barnabas mì mbəɗ gər a Yeruzalem asa. Mì tike dər Titus aà mendzwil mbaŋa. ²I mbəɗ gər a fata ka, aɗaba Mbulum a gweɗiŋ, ge kataya. I ndzeha a fata ka, mì yahaba gər nda gà bàba ŋa ana ika magər gà mburma Mbulum a, kətsah a zlawak zaakwa. I ɗif a tar à bazlam ŋgwal ŋa na i tsikewa a gà na tə sər Mbulum tsiye ya. Aɗaba i waya megemir gà ana i gewa piŋŋe ya, tsikw aà na i da dər a təv tar tekeɗe ka, ma ne taf masakəŋa tsa. ³Taŋa Titus ana mì da akaba məma ya ka, ŋgat kəla gà Girek, masàsà ŋa tsa. Ama ka, gà bàba ŋa ata tàa fə̀r aaka ndzəɗa, aà mene kamala na ŋgat gà Yahuda ya tsa. ⁴Ama gà mburma ana ta ge a duwa ka, nda pàrsa ya, tə dawaha aka magər tar, ta gwa, say mà sàs ba. Tə daha aka magər tar ka, sereh sèrèh sereh sereh nda wirwir, aà masamata vatwa kwa ana ki ziwekwe a dər gər kwa ya, aɗaba ana kwa mandza ŋa i təv ilik ŋa nda gà Yesuw Kiristi ya. A sàs a tar ka, na ki nekwe a gà ɓele məpala ahəm gà Yahuda asa ya. ⁵Ama ka, maa gəs ahəm tar ku kwizikw tsidze. Aɗaba a sàs a mər ka, bazlam ŋgwal ŋana ma da aka miɗ hiywe nda ndzer, pàrsa iɗəm tsiye, na dite ki tserekwim a mbaŋa ya.

⁶I təv ana i ɗifewa a tar à bazlam ŋgwal ŋa ata i tsikewa ya ka, gà na ta fə̀rawa aà tar kamala gà bàba ŋa ika magər gà mburma Mbulum a ka, tàa tsikiŋ aaka bazlam ŋgiɗ awiya ŋa tsidze. Ama ku mege tar gà bàba ŋa, mege tar gà ɓəzla dəba tekeɗe ana, əla gà te ya. Aɗaba gà mburma tserdze ika miɗ Mbulum ka, ilik, tsəka, pampam tsa. ⁷Seyiŋ tsa, tə sər dər ivaɗ ka, Mbulum a viliŋ bazlam ŋgwal ŋana a ahər, a gweɗiŋ ka, daha, ti tsik a gà na tar gà Yahuda tsiye, kamala ana akahər ata a tsik a Piyer, a gwaɗar ka, daha, ti tsik a gà Yahuda ya mbaŋa. ⁸Tə sər Mbulum na a vəl ndzəɗa a Piyer, a slər ŋgat a təv gà Yahuda, dite ŋgat ŋa hiywe mbaŋa na a viliŋ ndzəɗa, a slər iye a təv gà na tar gà Yahuda tsiye ya. ⁹Gà Zakup nda Piyer, nda gà Yuhana ana ta fə̀rawa aà tar kamala gà bàba ŋa ika magər tar a ka, tar tə sər, Mbulum na a viliŋ megemir ata a ahər nda ndzer a. Aɗaba taŋa na ta vəl a mər ahər nda Barnabas ədəts lele, kamala megweɗe ya ka: Mege megemir mər ka, ilik na mi ŋgeyer ba ya. Mər nda gà tar na mì dza akaba bazlam, mì gwa, mìi de a, mìi ta ge a megemir ika magər gà na gà Yahuda tsiye ya. Ama tar ka, tə da a təv gà Yahuda. ¹⁰Ta wiz aà mər duwa ilik pəra. Ta gwaɗa a mər ka: «Zlakum gà ɓəzla matawak ana ika magər gà mburma Mbulum i Yeruzalem a.» Taŋa ka, dukw ana i vəl ba gà aà mege megemir ŋa ya mbaŋa.

Pul a ɗif à metsehe a Piyer i kwite Antakiya

¹¹Aləka i dəba ŋa ya ka, Piyer a daha a kwite Antakiya ka, i palar ahəm ika miɗ mburma tserdze, aɗaba ana a ge bakal a. ¹²I təv ana a ndzeha tsara ya ka, mì zəm akaba ɗaf, mər tserdze nda gà asiŋ gà mburma ana ti ne gà damər mər, tar gà Yahuda tsiye. Aləka i dəba ŋa ya ka, Zakup a sləraha mburma a təv mər. Ti ndzeha tsara ka, tsukwaɗ Piyer a hitse i təv mər a. A gəs mazəma akaba ɗaf nda gà mər asa tsa. A ge magəɗa a ga mburma Zakup ata ta waya masàsà ba ya. ¹³Gà asiŋ gà Yahuda ana i fataya, metsehe tar a mbəɗ aba, ta ge kamala ana Piyer a ge ya mbaŋa. Ku mege Barnabas tekeɗe, a ge aà ter a are, a waya ti zim akaba a ɗaf nda gà tar ana gà Yahuda tsiye, tsa mbaŋa. A dza ba aà mimbehe a tar are kamala tar a mbaŋa. ¹⁴Ama i samata, tə zazam vatwa bazlam ŋgwal ŋana ndzer a tsəka, i tsik a Piyer ika miɗ gà mburma Mbulum ata tserdze ya: «Kər ka, gà Yahuda. Ama ku mege kataya tekeɗe, kà ndzawa ɗa ka, kamala gà na tar gà Yahuda tsiye, haa kinehe. Kàa zazam məpala ahəm gà Yahuda tsəna, meme na ki gweɗe a a gà na tar gà Yahuda tsiye ka, mede tar ma ge kamala i gà Yahuda ya kinehe asa ya?

Ki mbilekwe a ka, agəra megìse kwa ana kə̀ gə̀sakwa

Yesuw Kiristi ya ɗekɗek

¹⁵Aɗaba kwa ka, ta wa kwa i gwala gà Yahuda, tsəka, kwa gà mburma ŋgiɗ ana tə sər məpala ahəm Mbulum tsiye tsa. ¹⁶Ama ku mege kataya tekeɗe, kà sərakwa ndzer, wura ilik ŋgwal ŋa ika miɗ Mbulum tsidze, say wele ana aka gəs Yesuw Kiristi nda gəzləŋ a. Tsəka, wele ana a tike madzala gà gər ŋgar aka məpala ahəm gà Yahuda ya ka, a ne a ŋgwal ŋa tsa. Kwa tekeɗe ka, kàa gə̀sakwa Yesuw Kiristi nda gəzləŋ, na dite Mbulum a samata taŋa ka, à gis a kwa kamala kwa gà ŋgwal ŋa ika miɗ ŋgar a. A ge kataya ka, agəra ana ka zazamakwa məpala ahəm gà Yahuda ya tsa. Aɗaba ta wetse i wakita Mbulum akahər ata ka, ta gwa: <Wura a ne a ŋgwal ŋa ika miɗ Mbulum agəra ana a zezem a məpala ahəm ata ya tsa.> «*fa*

¹⁷Aɗaba taŋa, ku mege mər gà Yahuda tekeɗe, mì ne ŋgwal ŋa ika miɗ Mbulum ka, aɗaba ana mì gəs Yesuw Kiristi nda gəzləŋ mər a. Na mər kataya ka, maa ne gà ɓəzla bakal ika miɗ məpala ahəm Mbulum kamala gà asiŋ gà mburma ŋgiɗ ana tserdze ya mbaŋa, aɗaba ana maa dza gurmits a bəɗ a məpala ahəm Mbulum ata asa tsiye. Taŋa dze ana, kamala megweɗe ya: Kiristi na a gəs mər a bakal a ya? Awaŋ, kataya tsidze. ¹⁸Ar ka, kamala naha ya ivaɗ: Na bəla wura a riŋ a miyek a à mazazama məpala ahəm gà Yahuda agəra ana a ger a ŋgulum tsiye, dite i dəba ŋa ya, à mbìɗ aaka a gər asa, à fir ahər a kamala dukw ana ŋgwal ŋa lele ya asa ka, a ge taŋa ka, dukw ana ŋgwal ŋa tsiye ika miɗ Mbulum. ¹⁹Ama məpala ahəm gà Yahuda ka, aka mbər medzeye à iye. I ne kamala ana iye məməta ŋa ya na nda təv məpala ahəm ata ya, aɗaba a giŋ a ŋgulum ika miɗ Mbulum asa tsa. Ama kinehe ka, Yàa ŋgat mesife ika miɗ Mbulum a. Akahər ata piŋŋe, i təv ana tə ndwandway Kiristi aà dizl magə̀làwà ŋa ya ka, mì mata akaba a təv ilik ŋa nda ŋgat. ²⁰Iye ka, mesife ana i ndze a dər kinehe ya ka, biy gà asa tsa. Ama ka, Kiristi na a ndze a nda mesife ŋgar i gəzləŋ gà ya. Mendze ana i ndze a ɗa ika gər ahəɗ kinehe ya ka, say nda magàsà Kəla Mbulum ata nda gəzləŋ. Ŋgat na a waya iye, dite a dzeye à mesife ŋgar aɗaba iye ya. ²¹Iye ka, i niw a ŋgwal Mbulum ana a ge a kwa ya tsidze. Na mege mburma a ne a ŋgwal ŋa ika miɗ Mbulum agəra ana a gewa dukw ana məpala ahəm a wiz ahər a ka, ana ka, kamala megweɗe ya: Kiristi a mət ka, taf masakəŋa, a ge a ŋgulum tsa. Ama kinehe ka, kataya tsa.

Gà məpala ahəm nda magəsa Yesuw Kiristi nda gəzləŋ

¹Kurum gà mburma ana ika ahəɗ Galatiya ya, metsehe kurum a riŋ tsa. Meme na ta bana kurum dze ya? Aɗaba Yàa ɗif a kurum dər parakkà lele, meme na Yesuw Kiristi a mət aà dizl magə̀làwà ŋa aɗaba kwa ya. ²I tsèm aà kurum a ka, duwa ilik pəra. Wànà Mezite Mesife ana Mbulum a vəl a kurum ana, agəra ana kà zazamum məpala ahəm gà Yahuda ya ya? Awaŋ, Mbulum a vəl a kurum Mezite Mesife ŋgar ka, agəra ana kàa dzum zləm a bazlam ŋgwal ŋana, dite kə̀ gəsum Yesuw Kiristi nda gəzləŋ kurum a. Wànà kataya tsiye? ³Dite aàla na metsehe kurum a riŋ tsiye? Aɗaba akahər ata piŋŋe ka, kàa dzum ba aà mede kurum nda ndzəɗa Mezite Mesife Mbulum lele. Dite araha kinehe ka, a sàs a kurum mandəva dər nda ndzəɗa ba kurum dze ana, meme? ⁴Mbulum aka pise a kurum ahəm nda təv gà dukw ŋgiɗ pampam, dite gà dukw ŋgiɗ ibam, tàa ge a kurum ba a gər hinne asa mbaŋa. Wànà kà dzalum dze ana, gà dukw ata ta geye ba ana, taf masakəŋa ya? Awaŋ, aɗaba i sər ndzer, gà dukw ata ta geye ba ya ka, a ne a taf masakəŋa tsa. ⁵Aɗaba Mbulum a riŋ ihər a vile a kurum Mezite Mesife ŋgar, dite a riŋ ihər a ge a gà dukw mene aà mburma ŋgiɗ pampam ika magər kurum mbaŋa asa. A ge taŋa dze ana, wànà agəra ana kà zazamum məpala ahəm gà Yahuda ya ya? Awaŋ, a ge taŋa ka, agəra ana kàa dzum zləm a bazlam ŋgwal ŋana, dite kàa gəsum Yesuw Kiristi nda gəzləŋ kurum a.

⁶Ka dzalum gà gər te tsiye? Meme na wakita Mbulum a fàfəl aka ger Abəraham a. A gwa ka: «Abəraham a gəs dukw ana Mbulum a tsiker a. Aɗaba taŋa na a ne à ŋgat ŋgwal ŋa ika miɗ ŋgar a.»*fa* ⁷Kamala taŋa ya, kinehe ka, kà sərum ndzer, na a ne gà ɓəza Abəraham nda ndzer ŋa ka, gà na ta gəs Mbulum nda gəzləŋ tar a. ⁸Akahər ata piŋŋe, ta wetse dukw ana a ta ge a ba aka miɗ mba ya, a wakita Mbulum ka, ta gwa: «A pat ŋgiɗ ka, gà mburma ana tə sər Mbulum tsiye, ta gis a ŋgat nda gəzləŋ tar, dite Mbulum tekeɗe, à gis a tar lele, a ne à ter a gà ŋgwal ŋa ika miɗ ŋgar.» Kamala taŋa ya, Abəraham a tsaraka bazlam ŋgwal ŋa ata ka, daga piŋŋe, i təv ana dukuməŋa aka ndze aɗəm zukw tsiye. Mbulum a gwaɗar ka: «I ta pise a ahəm a gà mburma ana ika gər ahəɗ tserdze ya, aɗaba kər.»*fb* ⁹Dite i dəba bazlam ata ya ka, Abəraham a gəs Mbulum nda gəzləŋ ŋgar, a piser ahəm. Ama gà asiŋ gà mìsle ŋgiɗ ana tàa gəs ŋgat nda gəzləŋ tar kamala Abəraham a tekeɗe, Mbulum a pise a ter a ahəm mbaŋa.

¹⁰Ama gà na ta gweɗe a ka, waytsà mìi ne a gà ŋgwal ŋa ika miɗ Mbulum, aɗaba ana mìi ge a dukw ana məpala ahəm a tsik a mər a ka, mezelme Mbulum ika gər tar. Aɗaba ta wetse i wakita Mbulum ka, ta gwa: «Na wura a zazamawa gà məpala ahəm ana ta wetse i wakita pampam tserdze ya tsəka, mezelme Mbulum ika gər ŋgar.»*fc* ¹¹Ama ka, kà sərakwa, wur ana a ne a ŋgwal ŋa ika miɗ Mbulum, agəra ana a zazam məpala ahəm gà Yahuda ya ilik tsidze. Aɗaba ta wetse i wakita Mbulum mbaŋa ka, ta gwa: «Wele ana aka gəs Mbulum nda gəzləŋ a, na a ne a ŋgwal ŋa ika miɗ ŋgar, dite a ndze a nda mesife ana ndzer a.»*fd* ¹²Ama na wura a waya a zezem a məpala ahəm gà Yahuda ka, taŋa bazlam magəsa Mbulum nda gəzləŋ iɗəm tsidze. Ar ka, pampam. Seyiŋ tsa, ar ka, kamala ana ta wetse i wakita Mbulum ka, ta gwa: «Na a ndze a nda mesife ata ivaɗ ka, wele ana a zezem a məpala ahəm gà Yahuda tèrihhwè lele, duwa ilik à mìts a iɗəm a tsidze ya.»*fe*

¹³Kamala taŋa ya, Mbulum a vəl a kwa mezelme ka, agəra na kà zazamakwa məpala ahəm ŋgar kweleŋ tsiye. Ama Kiristi a dara ka, a zla təv mendze kwa, na dite ka, Mbulum a vəlar mezelme ya. A ge dər kataya ka, a mbəlara à kwa i mezelme Mbulum ana a ta vile a kwe a zləmana ya. Ar ka, kamala ana ta wetse i wakita Mbulum a, ta gwa ka: «Wele ana tàa dàn ŋgat aà dizl a ka, mezelme Mbulum na ika gər ŋgar a.»*ff* ¹⁴Yesuw Kiristi a ge gà dukw ata kataya ka, agəra mipìsè ahəm ana Mbulum a tsik a Abəraham i sida ya, a gwaɗar, i ta vilek a ya ka, gà na tar gà Yahuda tsiye, ta ŋget a aɗaba Yesuw Kiristi ata mbaŋa. A ge mege dukw ŋgar ata asa mbaŋa ka, na dite ki ŋgetekewe a Mezite Mesife Mbulum ana a tsik i sida ya, a gwa, i ta vile a kwe a ya ka, agəra ana kə̀ gə̀sakwa ŋgat nda gəzləŋ kwa ya.

Dukw ana Mbulum a tsik i sida ya, a gwa,

i ta vile a a Abəraham a

¹⁵Gà damər gà, i ɗif a kurum a dər ka, nda mendzikiɗe ba dukw ana a ge a ɗa ba ika gər ahəɗ kinehe ya. Na bəla gà mburma sula tàa dza akaba ahəm dukw ana ti tsik a, tàa wetse aba ya fit, dite tàa ge ahər lambà ahər tar dze ana, taŋa ana, wura a riŋ a sle a aà medzeye à bazlam tar ata ya ya? Kige tsa, wura a sle a aà mesikehe dər aaka ya? Awaŋ, a riŋ tsa. ¹⁶Yawwa, i təv Mbulum tekeɗe, kamala taŋa ya mbaŋa. Akahər ata piŋŋe ka, Mbulum a tsik dukw ata i sida ya, a gà Abəraham, a gwa, i ta vile a teriŋa. Ama kəla ka, wakita Mbulum a gwa, a ta vile a a gà Abəraham ka, kamala tar ata hinne ya ka, aka tsik ɓav tsa. Ti tsik bazlam ata nda ndzer ka, aka gər mburma ilik ika magər gà ɓəza ŋgar a pəra. Kamala megweɗe ya: Aka gər *Kiristi. ¹⁷Dukw ana a sèsiŋ aà megweɗe ya ka, araha: Mbulum a ɗif à masəra ba ŋgar ana tə sər ba nda Abəraham a ka, nda təv dukw ana aka mbər metiker i sida ya, a gwa, i viler a ya. Aləka i dəba mive dərməka faɗ nda dzik makər a ka, Mbulum a ɗif à məpala ahəm a gà Yahuda. Kamala taŋa ya, məpala ahəm ata ka, a sle a aà mimbètè à masəra ba ana Mbulum aka mbər meɗife dər a Abəraham a tsa. Aka miyak à dukw ana a tsiker i sida ya, a gwa, a ta viler a ya tsidze. ¹⁸Na mege Mbulum a vile a duwa a mburma ka, agəra ana ti zezem a məpala ahəm gà Yahuda ya ka, ana ka, kamala megweɗe ya: A ta vile a ter a ka, agəra ana a tsik a tar i sida ya tsa. Ama tsaatsa, Mbulum a ge ŋgwal a Abəraham ka, aɗaba ana a tsiker i sida ya, a gwa, a ta ge a dər kataya ya.

¹⁹Na kataya ana, dite aàmala na Mbulum a ɗif à məpala ahəm ŋgar a gà Yahuda asa ya? A ɗif dər ka, na dite kà sərakwa aà dukw bakal ana ika miɗ kwa ya. A ge megemir ka, zaakwa tə̀ma, haa a təv ana kəla Abəraham ata, wele ana Mbulum a tsiker aba dukw ata i sida ya, aka dara ya kuɗa. I dəba ŋa ya, ndzəɗa məpala ahəm ata ka, aka ndəv. Aɗaba gà gawla Mbulum na tə da dərra i təv Mbulum, ti ɗif dər a wur ana a riŋ mandza ŋa ika magər gà Mbulum nda gà mburma ya mbaŋa. ²⁰Wele ana mandza ŋa ika magər kamala taŋa ya ka, hiywe taŋa ka, ŋgat mala məmaya ahəm. Ama i təv ana Mbulum a tsik dukw ata i sida ya, a Abəraham a, a gwa, i ta vile a ya ka, a tsik taŋa ka, à gər ŋgar, tsəka, mala mendze ata ika magər ŋa ya ka, a riŋ a ge a ŋgulum tsa.

Məpala ahəm Musa ka, a ge a megemir hiywe tsa

²¹Taŋa kamala megweɗe ya: Məpala ahəm dze ana, a sasar dukw ana Mbulum a tsik i sida ya tsiye? Awaŋ, kamala taŋa ya tsidze. Aɗaba na mege məpala ahəm a sle a aà məvəla mesife a mburma ka, ana ka, a sle a aà mene à tar gà ŋgwal ŋa ika miɗ ŋgar ndaka vatwa məpala ahəm ata mbaŋa. ²²Seyiŋ tsa, ar ka, kamala ana ta wetse i wakita Mbulum a, ta gwa ka, bakal na a kwere a gà mburma ana ika gər ahəɗ tserdze ya ivaɗ. A ge kataya ka, na dite dukw ana Mbulum a tsik i sida ya, a gwa, a ta vile a a mburma ya ka, nda ahər Yesuw Kiristi. Dukw ata a vile a ter a ya ka, agəra megìse tar ana ta gəs ŋgat nda gəzləŋ a.

²³Akahər ata piŋŋe ka, vatwa a riŋ, na dite gà mburma ta gis a Kiristi nda gəzləŋ a ka, a riŋ zukw tsa. Kwa ka, kamala wele ana gidziwwè mandza ŋa i daŋgay a, na kwa i ahər məpala ahəm gà Yahuda ya, haa təv ana Mbulum a vəl a kwa vatwa aà magəsa Yesuw Kiristi nda gəzləŋ kuɗa ya. ²⁴Kamala taŋa ya, məpala ahəm gà Yahuda ata ka, a ɗif a kwa à ŋgwal metsehe lele, haa a pat ana Kiristi a dara ya. Aɗaba a ge dər kataya ka, na dite Kiristi aka dara ka, Mbulum a ne à kwa a gà ŋgwal ŋa ika miɗ ŋgar, agəra ana kə̀ gə̀sakwa ŋgat nda gəzləŋ a ya. ²⁵Ama kinehe ka, vatwa a riŋ, na ki gìsekwe a Kiristi nda gəzləŋ kwa ya kuɗa. Aɗaba kwa i ahər məpala ahəm gà Yahuda ata, à tètìk a kwe a ya asa tsa.

²⁶Kamala taŋa ya, kurum tserdze ka, kàa nwim gà ɓəza Mbulum, aɗaba ana kàa gəsum Yesuw Kiristi nda gəzləŋ, dite kurum a riŋ mandza ŋa i təv ilik ŋa nda ŋgat a. ²⁷Ti tsilwiɓ à kurum a yam. Kamala taŋa ya ka, zlə̀lhaɗ kàa gawum ba nda gà Yesuw Kiristi, kàa zlum ba ŋgar. ²⁸Na bəla kər gà Yahuda, kige tsa bəla kər gà Yahuda tsəka, à lèh a duwa asa tsa. Kige tsa na bəla kər ka, ɓele, nda gà bəla kər ihər ki ziwe a gər yak tekeɗe ka, pampam tsa. Nda gà bəla kər asləka ŋa, kige tsa asa, kər məkəs ŋa ka, pampam tsa mbaŋa. Kamala taŋa ya, kurum tserdze kà nwim ka, ba ilik, aɗaba ana kàa gawum ba nda gà Yesuw Kiristi ya. ²⁹Ama na kurum gà mburma Kiristi ka, kamala megweɗe ya: Kurum ka, gà ɓəza Abəraham mbaŋa. Na kataya ka, ki ta ŋgetwim a dukw ana Mbulum a tsik i sida ya, a gwa, i ta vile a a gà Abəraham nda gà ɓəza ŋgar a tserdze mbaŋa.

¹A sèsiŋ i ɗif a kurum a dər ka, nda mendzikiɗe ba duwa: Ar ka, kamala kəla ana a ti zim a dukw tsir ŋgar ika miɗ mba ya. Aka na ŋgat kəla ndirkiz mba ya ka, tsìfekkwe kamala ɓele ya, ku mege ŋgat ŋa na a ti zim a gà dukw ata tserdze ya mba tekeɗe ya. ²Aka ana ŋgat kəla ndirkiz mba ya ka, gà mburma tsir ŋgar ata ta ger a metsehe lele, ta ger a gər mbaŋa, haa a pat ndzəɗa məpàslà ahər tsir ŋgar ana aka ndze aɗəm a. ³I təv kwa kinehe tekeɗe ka, kataya mbaŋa. Akahər ana kà nekwa kamala gà ɓəza mba ya ka, kwa mandza ŋa kamala gà ɓele ya, na i ahər gà sitene ana ta kwere a gər ahəɗ a ya. ⁴Ama i təv ana məpàslà ahər Mbulum a ndze aɗəm a ka, a slərra Kəla ŋgar a. Məkəs duwa na a wa ŋgat a. A zazam məpàslà ahər gà Yahuda mbaŋa, ⁵Na dite a bere a à tar i ahər məpala ahəm ata a kwere a tar a ya. A sàs a Mbulum ka, ki nekwe a gà ɓəza ŋgar nda ahər Kəla ŋgar ata.

⁶Dukw ana ki sirekwe a dər ndzer kaɗəŋ, kàa nekwa gà ɓəza ŋgar a ka, araha: Mbulum a slərra Mezite Mesife Kəla ŋgar a gəzləŋ kwa ya. Mezite Mesife ata ka, a riŋ a zel a a Mbulum «Aba,« kamala megweɗe ya ka: «Dede ga.» ⁷Kamala taŋa ya, kurum ka, gà ɓele sitene asa tsa, kurum ka, gà ɓəza Mbulum Tsir kwa ivaɗ. Ama na kurum gà ɓəza ŋgar ka, taŋa ka, ki ŋgetwim a gà dukw ana tserdze a ta vile a a gà ɓəza ŋgar a mbaŋa.

Pul a dzala gà gər hinne agəra gà mburma Mbulum ana

i Galatiya ya

⁸Aka ana kà sərum Mbulum tsiye ka, kurum kà nwim gà ɓele gà dukw ana pampam a, tsəka, biy Mbulum ndzer ŋana tsa. ⁹Ama kinehe ka, kà sərum Mbulum kuɗa. Ŋgulum i gweɗe a ka, Mbulum aka sər kurum ivaɗ. Assàh, dite meme na ki mbiɗwim a gər a dukw sitene ana taf masakəŋa, ndzəɗa iɗəm tsiye asa ya? Aàmala na a sàs a kurum mene gà ɓele tar asa dze ya? ¹⁰Aɗaba na kurum ihər ki gwim a metsehe a gà pat ŋa nda gà kiye ŋa, nda gà bəla ahər tə̀vəməŋa ana ti ndzeye aɗəm a pampam a, kige tsa mive ŋa ana aka ndze aɗəm ka, ki girivwim a ya. ¹¹I dzala gà gər ka, hinne, na aɗaba gà dukw ata kurum ihər ki gwim a ya. Bəla megemir gà ana i ge ika magər kurum a ka, a ne a taf masakəŋa.

¹²Gà damər gà, i ge a kurum a kamkam: Gwim ka, kamala iye ana i gewa ya. Iye tekeɗe, kamala kurum a mbaŋa, kwa ka, ilik. Kàa gwimiŋ dukw ana ŋgwal ŋa tsiye ɓav tsa. Ama kinehe ana, meme? ¹³Kurum kà sərum, malahalah ŋa ka, iye ŋgwala tsa, na i dza ba a təv kurum a, dite ka, na i ɗif a kurum à bazlam ŋgwal ŋana ya. ¹⁴Dukw məməta gà ata ka, aka vəl a kurum mesewere are. Ama ku mege kataya tekeɗe, kàa fə̀rum aà iye kamala za ya ɓav tsa. Dite kwets kàa dalawum aba iye ya ɓav tsa asa mbaŋa. Seyiŋ tsa ivaɗ, kàa gəsum iye lele, kamala ana iye ka, gawla Mbulum a kaɗəŋ, dite gəsum iye asa ka, kamala ana iye Yesuw Kiristi nda gər ŋgar a. ¹⁵Akahər ata ka, kə̀ ŋgayawum ba ka, hinne. I sər ndzer, na mege a ge a ba ka, ana ka, kàa ndzahumara gà are kurum i gər a, ùndzuɗ ùndzuɗ kàa dzwìmiŋ. Dite meme na ki ŋgeywim a ba kinehe asa tsiye? ¹⁶Kà fə̀rum aà iye kinehe ana, kamala ana i ne mala mene are kurum, agəra ana i tsik a kurum ndzer ŋa ya ivaɗ a?

¹⁷Gà mburma ata ti tsik a bazlam ŋgwal ŋa nda pàrsa ya ka, a sàs a tar na ŋgərəɗ ti dèn a aaba kurum a. Ama metsehe tar ka, a de a kalkal tsa. A sàs a tar ka, ki miyekwim a à iye ivaɗ, na dite ka, ki zezemwim a tar a. ¹⁸Ŋgwal ŋa lele seyiŋ na magəsa ahəm aà gà mìsle ŋgiɗ a. Ama say ki giswim a ahəm kə̀la ka, aà gà na ti zezem a vatwa ana ŋgwal ŋa ya. Ki giswim a hiywe, tsəka, i təv ana iye riŋ mandza ŋa i təv kurum a ɗekɗek pəra tsa. ¹⁹Gà ɓəza gà, iye ihər i sèwèr a are aɗaba kurum, kamala məkəs ana a we a kəla ka, tə̀pasəssà a wir ahər a ya. A riŋ a wir aà iye a ka, kamala taŋa ya, haa a təv ana kàa zlum ba Kiristi nda ndzer a. ²⁰I waya ka, madaha a təv kurum zləmana, na aà metsike a kurum gà dukw ata, na dite ki tikwim aaka a gà gər lele ya. Aɗaba a wisiŋ a gər ka, hinne, i sər dukw ana i tsik a kurum a ya tsa.

Bazlam aka gər gà Sara nda Agar

²¹A kurum gà mburma ana a sàs a kurum mandza gurmits a bəɗ a məpala ahəm Musa ya. Iye ihər i tsèm a aà kurum ŋa: Kàa tsarakum dukw ana məpala ahəm ata a tsik a dze ana, wànà kà sərum tsiye? ²²Aɗaba ta wetse i wakita məpala ahəm Musa ata ka, ta gwa: Abəraham ka, gà ɓəza ŋgar sula. I ŋgiɗ ka, ɓele na a wa ya, zləm məkəs ŋa Agar. Ama naha ka, biy məkəs ndzer ŋana, na a wa ŋgat a. Zləm ŋgar ka, Sara. ²³Kəla ɓele ata ka, ta wa nda mezìwè gər tar dukw tar. Ama biy məkəs ŋgiɗ aaha ka, a wa kataya tsa. A wa ka, aɗaba Mbulum na a tsik a Abəraham i sida ya, a gwaɗar, a ta ge a ba kataya ya. ²⁴Gà dukw ata ta geye ba kataya ka, a sasar à meɗife kwa dər ka, à dukw ŋgiɗ asa. Ki sirekwe a dər ka, i gà məkəs ata sula ya, tar ka, gà mendzikiɗe ba ŋa. Mendzikiɗe ba ata tekeɗe, biy masəra ba ana pampam, Mbulum a sər ba nda gà mburma ya. Agar, ɓele məkəs ŋa ata ka, ŋgat mendzikiɗe ba masəra ba ana Mbulum a sər ba nda Musa aà sik kwite duwa tə zalar Sinay a. Gà ɓəza ŋgar ka, ta waya tar gà ɓele. ²⁵Agar ka, kamala kwite Sinay ata ika ahəɗ Arabiya ya. Kamala taŋa ya tekeɗe, ar ka, kalkal nda kwite Yeruzalem ana kinehe ya mbaŋa. Aɗaba gà mburma ana ti tike madzala gà gər tar a fata tserdze ya ka, tar gà ɓele məpala ahəm Musa. ²⁶Ama kwite Mbulum ndzer ŋana ka, taŋa Yeruzalem ana i mbulum i gər ŋa ya. Ŋgat ka, ɓele tə tsa. Aɗaba ŋgat na a ne kamala mama kwa ya. ²⁷Ar ka, kamala ana mewetse ŋa i wakita Mbulum, ti tsik ahər a, ta gwa ka:

«Kər ana ìdil ŋa, kàa wa kəla ilik tsiye ka,

ŋgaya ba nda gà Mewideye huwwa hinne,

ku mege kər ana kàa ŋgat a mesewere are

mawà kəla duwa ilik tsa tekeɗe ya.

Aɗaba məkəs ana zal ŋgar a miyak dər a ka,

a ŋget a gà ɓəza hinne, à zè a dər

məkəs ana ti ndze a nda zal ŋgar lele ya.»*fa*

²⁸Gà damər ga, kurum ka, kà nwim gà ɓele Mbulum gà ndzer ŋana, aɗaba ana Mbulum a tsik i sida ya, a gwa, a ta ge a ba kamala taŋa ya ya. Ar ka, kamala ana Mbulum a tsik a Abəraham i sida ya mbaŋa, a gwaɗar akahər ata, ki ta ŋget a Izak a. ²⁹Ama akahər ata ka, kəla ana ta wa ŋgat kamala ana ta wuwa gà asiŋ gà ɓəza tserdze ya ka, a sèwèrewa are a biy ŋgiɗ aaha ta wa nda ndzəɗa Mezite Mesife Mbulum a. Kinehe tekeɗe, ar ka, kamala taŋa ya hiywe mba. ³⁰Ama ta wetse ana dukùla na i wakita Mbulum a? Ta gwa ka: «Dalawa məkəs aaha ɓele ŋa ya nda kəla ŋgar məma, aɗaba a ge a ba tsa na kəla aaha ka, a zim a dukw tsir ŋgar a. Say kəla məkəs ndzer ŋana na a ti zim a ya.»*fb* ³¹Kamala taŋa ya, gà damər gà, kwa kinehe ka, kàa nekwa kamala gà ɓəza ɓele ya tə tsa. Kwa ka, gà ɓəza məkəs ana ndzer ŋa ya.

Kà nwim gà ɓele məpala ahəm gà Yahuda asa tsa

¹*Kiristi ka, aka be à kwa i məpala ahəm gà Yahuda ya, na dite araha kinehe ki ziwekwe a gər kwa ya. Aɗaba taŋa, mərum aba aà mendze kamala taŋa ya. Wura ilik ma ti ne à kurum gà ɓele asa tsidze.

²Iye Pul, iye ihər i gweɗe a kurum ŋa: Na a sàs a kurum, tə sàs ba kurum ka, taŋa dukw ana Kiristi a ge aɗaba kurum a, a ge a kurum a ŋgulum asa tsidze. ³Iye ihər i gweɗe a kurum a asa: Ku mege weke na aka sàs ba ka, say a zezem a gà məpala ahəm fit dze, ilik a ze a dərraha tsa. ⁴A kurum gà mburma ana kù gwaɗum ka, Mbulum a ne à mər a gà ŋgwal ŋa ika miɗ ŋgar, agəra ana mìi zezem a məpala ahəm gà Yahuda ya ka, taŋa kurum nda gà Kiristi ka, zàmtàkàlla kàa zùm aba, kurum mandza ŋa i təv ilik ŋa asa tsa. Kàa mbəɗum dəba a ŋgwal dukw ana Mbulum a ge a kurum a. ⁵Ama mər ka, mì tike madzala gà gər mər a təv Mbulum. Ŋgat na a ne à mər a gà ŋgwal ŋa ika miɗ ŋgar a, agəra megìse ana mì gəs Kiristi nda gəzləŋ a. Taŋa na kinehe mər ihər mìi veve a pat ana mìi be a aà seriye ya, nda ndzəɗa Mezite Mesife ŋgar a. ⁶Na wura a riŋ aka gaw ba nda Kiristi ka, bəla ŋgat masàsà ŋa, kige tsa bəla masàsà ŋa tsa tekeɗe ka, a ge a ŋgulum tsa. Dukw ana a ge ŋgulum a ka, say megìse kwa ana kə̀ gə̀sakwa ŋgat nda gəzləŋ a. Dite megìse ata na a vile a kwe a ndzəɗa aà mawàyà gà mburma tserdze ya mbaŋa.

⁷Malahalah ŋa ka, kurum ihər ki dwim a aka miɗ aka miɗ nda mege gà dukw ana ŋgwal ŋa ya dze ana, weke na a pala a kurum ahəm aà mazazama gà dukw ata ndzer ŋa ya ya? ⁸Wele ana a bana kurum, a sasar ki gwim a kataya ya ka, taŋa ka, a dara i təv Mbulum ana a zal a kurum a tsa. ⁹Dukw ana gà mburma ti tsikewa ya ka, mə̀ məts a kurum gər tsa. Ta gwa: «Giɗe ana a kwasawa à duwa ya, ku mege tə ndà aaka kwizikw tekeɗe ka, a kwese a dər hinne.» ¹⁰I sər ndzer, kà wayum bazlam gà, ki dzelwim a metsehe ŋgiɗ pam tsa, aɗaba ana kwa mandza ŋa nda gà Yesuw Kiristi BATSAH kwa ŋa ya. Ama wele ana a riŋ a wise a kurum a à gər a ka, ku mege weke tekeɗe, seriye Mbulum ika gər ŋgar.

¹¹Gà damər gà, iye ka, na mege i ɗif a à bazlam Mbulum hiywe, nda metsìkè a mburma, sasayum ba, na dite Mbulum a ne à kurum a gà ŋgwal ŋa ika miɗ ŋgar a ka, ana ka, gà Yahuda ti sèwèriŋ a are tsidze, dite bazlam mandwàndwàyà Kiristi ana tə ndwandway aà dizl magə̀làwà ŋa ya tekeɗe ka, a tsìɓ a ter a tsa asa mbaŋa. Ama ka, i tsikewa kataya tsa. ¹²Gà mburma ata tə dzala ka, aka gər masàsàyà ba tar ɗekɗek, dite ta wise a kurum a dər à gər a ka, ŋgulum tə sasaya ba tar məndəɗ məndəɗ fit fayawaŋwaŋ.

¹³Gà damər gà, Mbulum a zal a kurum ka, dite ki ndzwim a nda mezìwè gà gər kurum, kàa beywim à məpala ahəm Musa ya. Na ki ziwim a gər kurum kamala taŋa ya ka, ka ta gwaɗum, mìi gewe a dukw ana ba mər a waya pəra ɓav tsa. Seyiŋ tsa, wayum ba ika magər kurum ilik ilik tserdze, dite ki geywim ba meslire ika magər kurum tserdze asa mbaŋa. ¹⁴Aɗaba dukw ana batsah ŋa i huɗ gà məpala ahəm tserdze ya ka, araha: «Waya mburma tserdze, ku mege weke, kamala ana kà waya ba yak a mbaŋa.»*fa* ¹⁵Ama na bəla ki geywim be a swalwa kamala gà dukw dala ana gà ŋgwala tsa, hə̀ràsə̀sa ta ŋgeleye a ba tar ŋa, kige tsa ta pepeɗe a ba ya ka, gwim metsehe lele, tsəka, ki ti dzeywimiŋa.

Mezite Mesife Mbulum nda dukw ana mburma a dzele a

i gəzləŋ ŋgar a

¹⁶Dukw ana a sèsiŋ i gweɗe a kurum a ya ka, araha: Vəlum vatwa a Mezite Mesife Mbulum, dite ka, ma ɗif a kurum à vatwa. Kamala taŋa ya, ka tə zazamum mege dukw ana ba kurum a waya ya asa tsa. ¹⁷Dukw ana meèweke ba mburma a waya mege ya ka, tar pampam nda dukw ana Mezite Mesife Mbulum a waya ki gekwe a ya. Mezite Mesife Mbulum ibam ka, a sasar dukw ana meèweke ba mburma a waya a ge a ya tsa mbaŋa. Gà dukw ata sula ya ka, tar riŋ ndzìzlzle ti nebe a are, ta geye aaba a gùvəl. Aɗaba taŋa na ka slwim aà mege dukw ana a sàs a kurum ki gwim a zləmana nda ndzer ŋa ya tsiye. ¹⁸Ama na bəla Mezite Mesife Mbulum na a lèh a kurum a aka miɗ a ka, taŋa ka, məpala ahəm Musa à fə̀r aka kurum a ndzəɗa asa tsa.

¹⁹Kà sərakwa tserdze, na dukw ana meèweke ba kurum a waya a ge a ya. Gà dukuməŋa ka: Mege mezelme nda təv muva, nda mege dukw hwarwa ana pampam a, nda mayaha gà məkəs ana tsilikw tsilikw a. ²⁰Dite nda mazàmbàɗà à dukw ana ta ge nda ahər tar, ti ne dər Mbulum tar a. Nda gà dukw gà mèdè ana ta ge a pampam a. Nda mene a ba are, nda maàga, dite nda mege are aka mburma, nda mege matsəɓatsəɓ ana tərfə̀ɗ tərfə̀ɗ nda təv gà mìsle ŋgiɗ a, nda gà ti dzele a ka, ba tar ɗekɗek, ti ndzek a iba mburma ya təv pampam, nda gà mandza akaba ahəm ana a riŋ i təv tar tsidze ya. ²¹Izittè ta ge a are aka dukw mburma, ta kweye a à guzum, ta gìrìv a dər hinne, zlarndaɗndaɗ ti zimeye ka, gà dukw ana ŋgwal ŋa ya, dite nda megeye gà medzibe gà duwa ŋgiɗ pampam asa kamala taŋa ya. Dukw ana i tsik a kurum piŋŋe ya ka, kinehe i me a aka metsìkè a kurum asa, i gwaɗa a kurum: Medzìbe gà mburma ana ta gewa gà dukw ata kamala taŋa ya ka, ti ta ŋget a təv mendze i *mekwere Mbulum ana a ta kwere a ya kwizikw tsidze.

²²Ama megemir Mezite Mesife Mbulum ka, pam. Ar ka, kamala dizl ɗaf ana a we a dukw ŋgwal ŋa ya. Gà dukw ata ka, mawàyà ba ana gà mburma ta weye a ba ya. Maŋgayaba, nda matasla yam ana i gəzləŋ tar a. Ta gis a gəzləŋ i təv gà dukw ŋgiɗ a pampam. Ta gis a mburma lele, ta ge a ter a ka, dukw ana ŋgwal ŋa ya. Tar ka, gà mburma ana gà ndzer ŋa ya. ²³Tar gà ɓəzla mahə̀nà à gər a bəɗ, ta kwere a ba tar lele. Gà na ta ge a kamala taŋa ya ka, seriye Mbulum à gis a tar tsidze. ²⁴Aɗaba gà mburma ana tar gà biy *Kiristi ya ka, ti niw gà dukw ana ŋgwal ŋa tsa, meèweke ba tar a waya ya. Ar ka, kamala ana tə ndwandway gà dukw ata aà dizl magə̀làwà ŋa ya. ²⁵Mezite Mesife Mbulum na a vəl a kwa mesife ya. Aɗaba taŋa, say ŋgat na a kwere a kwa ya. ²⁶Kà sə̀ŋgə̀rakwa à ba kwa tsa, dite ka tikekwa akaba matsəɓatsəɓ tsa, ki gekwa akaba are tsa asa mbaŋa.

Zlàkayakwa ba aà mazla mibe dukw ana a be hinne ya

¹Gà damər gà, na kàa fə̀rum mìsle ŋgiɗ a riŋ a ge a bakal ka, taŋa kurum ana kàa ŋgatum Mezite Mesife Mbulum a ka, zlakum ŋgat, dite mə̀ màra aka vatwa ŋgwal ŋana ya. Ama kə̀la ka, gwim nda mawàyà ba lele. Dite ku weke mege metsehe a gər ŋgar mbaŋa, na dite à dìɗ a a bakal ŋgar ata tsiye. ²Zlàkayum ba nda təv dukw ana mibe ŋa ika magər kurum a ilik ilik tserdze. Na kàa gwim kamala taŋa ya ka, taŋa ka, kàa gəsum ahəm aà məpala ahəm *Kiristi kaɗəŋ. ³Na wura aka fə̀r aà ba ŋgar kamala ana ŋgat batsah ŋa ya, ama tsaatsa ka, mburma taf masakəŋa, a sle a aà duwa tsa, taŋa ka, a riŋ a bene a ba ŋgar ivaɗ. ⁴Say ku weke ma zlaŋa mede ŋgar ana a de a ya. Mà samata ka, wànà ŋgwal ŋa ya, tsəna, ŋgwal ŋa tsiye ya? Na bəla aka samata ŋgwal ŋa ka, a ŋgeye a ba hinne, agəra megemir ŋgar ana a ge a nda ahər ŋgar a, tsəka, a da dər tsa na a ge aaba a zlapa ka, nda megemir mìsle ŋgiɗ a. ⁵Aɗaba ku mege weke, a ti tsik a megemir ŋgar ana a gewa ya ka, ika miɗ Mbulum mba.

⁶Wele ana a dza zləm aà medzeŋge bazlam Mbulum a ka, tə̀ dza ba dukw ana a ŋgat a nda wele ana a ɗifer à bazlam Mbulum ata ya.

⁷Ka banum ba kurum tsa, aɗaba wura a riŋ ilik a we a ahəm nda Mbulum tsidze. Aɗaba dukw ana mburma a slige a ya ka, say dukw ata mbaŋa na a mère a à ba ŋgar, ti ta pele a i bəɗ a. ⁸Na bəla wura a ge a ka, dukw ana a tsahən aà ba ŋgar a ɗekɗek ka, nuba ŋgar ana a ta ŋget a iɗəm a ka, məməta pəra. Ama na bəla a ge a megemir nda təv Mezite Mesife Mbulum ivaɗ ka, taŋa ka, a ŋget a nuba mesife ana à ndìv a tsa aà biybiy a, i ahər Mezite Mesife ata ya. ⁹Aɗaba taŋa, tàkwa aka miɗ aka miɗ nda mege dukw ana ŋgwal ŋa ya, ka ti yàkwa ba tsidze. Aɗaba na kàa yàkwa ba tsəka, aləka a təv məpàslà ahər Mbulum ana a tsik a ka, ki ta ŋgetekewe a dukw ana ŋgwal ŋa ya lele, kamala wele ana a pele a dukw ŋgar i bəɗ a ka, sik sik sik ŋgwal ŋa ya. ¹⁰Aɗaba taŋa, daga aà kinehe ya, na vatwa a riŋ ka, gekwa ŋgwal a gà mburma tserdze. Ndeyndey ŋana ka, a gà na ta gəs Yesuw Kiristi nda gəzləŋ a mbaŋa.

Mandəvandəv bazlam nda mege wusa

¹¹Kinehe ka, fə̀rum aà gà batsah alfebet ana gùràslə̀slə̀sla, iye ihər i wetse a kurumehe a nda ahər gà ŋa ya kuɗa. ¹²Na a gwaɗa a kurum, say ki seswim a ba kurum a ka, gà na ta waya, dite tə da a gər a gà mburma tserdze ya. Ta ge a dər kataya ka, na dite gà Yahuda ti sèwèr a ter a are asa tsiye. Aɗaba na bəla ti ndiɗik a gər aà metsìkè bazlam məməta *Kiristi ana a sèwèr are, a mət aà dizl magə̀làwà ŋa ya ka, ana ka, ta miyek a à tar tsa. ¹³Ama gà mburma ata ta waya masàsà ba hinne ya tekeɗe, tar ŋa ka, ti tike gər a məpala ahəm gà Yahuda tèrihhwè ɓav tsa. Ama a sàs a tar ki seswim a ba kurum ka, na dite ti sìŋgìr a à ba tar aɗaba kurum a. ¹⁴Iye ka, i ge a zlapa ti tsidze, say i ge a ka, nda məməta Yesuw Kiristi BATSAH kwa ŋana a mət aà dizl magə̀làwà ŋa ata ya ɗekɗek pəra. Aɗaba məməta ŋgar ata ka, dukw gər ahəɗ a ne taf masakəŋa na aà are gà ya. Ar ka, kamala ana tə ndwandway gà dukw ata aà dizl magə̀làwà ŋa ya mbaŋa. Iye tekeɗe ka, i ne kamala wur ana, a mət ahər a fata ka, dite a miyak à dukw gər ahəɗ a mbaŋa. ¹⁵Aɗaba na wura masàsà ŋa, kige tsa bəla masàsà ŋa tsəka, a tsik a duwa tsa. Na ge a ŋgulum ka, say na ki nekwe a gà mburma ana tàa ŋgat mesife awiya ŋa i təv Mbulum a ya. ¹⁶Gà mburma ana ti zezem a vatwa awiya ŋa ata ya ka, tar na ti ne gà mburma Mbulum gà Isərayel gà ndzer ŋana ya. Ti ndzer are tsehe, mə vəl a tar matasla yam a gəzləŋ zayya lele.

¹⁷Daga aà kinehe ya ka, wura ma ta wisiŋ à gər asa tsa. Aɗaba Yàa ne mburma Yesuw na i təv mesewere are ya. Girɗe megìzle ana aà iye ya, na a ɗif dər a.

¹⁸Gà damər gà, i heme a a Yesuw Kiristi BATSAH kwa ŋa, dite ma ge a kurum ŋgwal ŋa. *Amin.