KULUSIYA

Wakita ana Pul a wetseha

a gà mburma Mbulum ana

i KULUSIYA ya

¹Iye Pul, wele ana Mbulum a zla iye, a ne à iye mala meslire Yesuw Kiristi ya. Mì wetse a kurumaha wakita aaha ka, mər nda Timute, damər kwa. ²Mì wetseha ka, a kurum gà mburma Mbulum ana i Kulusiya ya, a kurum ana kà nwim gà damər mər, kurum riŋ mandza ŋa i təv ilik ŋa nda gà Yesuw Kiristi, ki zezemwim a ŋgat nda gəzləŋ ilik a.

Mì heme a a Mbulum Tsir kwa, dite ma ge a kurum ŋgwal ŋa, mə vəl a kurum matasla yam a gəzləŋ zayya lele.

Pul a ge kəkaaha a Mbulum aɗaba gà mburma Mbulum ana

i Kulusiya ya

³Ku mege ndeɗime tekeɗe, i huɗ meheme mər ana mì hamawa a Mbulum aɗaba kurum a ka, mìi ger a kəkaaha, a ŋgat ana Tsir Yesuw Kiristi BATSAH kwa ŋa ya. ⁴Meheme ata mì hamawa a ka, aɗaba ana mì tsaraka meɗè zləm kurum ana kə̀ gəsum Yesuw nda gəzləŋ, dite kà wayum gà asiŋ gà mburma ŋgiɗ ana ika vatwa Mbulum a tserdze asa mbaŋa ya. ⁵Kurum ihər ki gwim a kamala taŋa ya ka, aɗaba ana kà tikwim madzala gà gər kurum aka ŋgwal dukw ana Mbulum a tike a kurum aba ya, i təv ŋgar i gər ŋa, kà sərum ka, ki ta ŋgetwim a ya. Ti ɗif a kurum à dukw ata Mbulum a gwa, i tike a aba ya aɗaba kurum a ka, i təv ana kà tsarakum bazlam ŋgwal ŋana ndzer a. ⁶Ŋgwal bazlam ata a ɗe a zləm, ku mege i ŋga, ika gər ahəɗ tserdze. Ar ka, kamala dizl ɗaf ana a gil a ba, dite ka, a we a hinne ya. Kamala taŋa ya, kurum tekeɗe ka, dukw ata a riŋ a de a aka miɗ aka miɗ ika magər kurum mbaŋa, daga aà gər pat ana kà lah metserekwim bazlam ata ya ka, kà sərum ndzer, kàa ndzwim are tsehe a Mbulum, aka ge a kurum ŋgwal ŋa. ⁷Kà lah metserekwim bazlam ŋgwal ŋa ata i təv Apafəras a. Ŋgat ka, wele ana mì waya ŋgat hinne, mìi ge a meslire Yesuw Kiristi i təv ilik ŋa ya. A ge a meslire Yesuw Kiristi i liwiŋ kurum ka, nda gəzləŋ ilik. A ge a ka, avukw mər. ⁸Ŋgat na a tsik a mər bazlam aka gər mawàyà mburma kurum ana kà wayum gà asiŋ gà mburma ŋgiɗ, nda ndzəɗa Mezite Mesife ana Mbulum a vəl a kurum a ya.

⁹Aɗaba taŋa, daga a pat ana mì tsaraka taŋa ya ka, mì hamawa a Mbulum kəla pat, aɗaba kurum. Mər ihər mìi hemer a ka, dite ma ɗif a kurum à dukw ana ŋgat a waya ya parakkà, a vile a kurum a metsehe ana Mezite Mesife ŋgar a vile a kurum a ya, na dite ki sirwim a dukw ana a de a ndaka vatwa ŋgar a. ¹⁰Kamala taŋa ya, mede kurum ana ika vatwa Mbulum a, a ge a ka, kamala ana a sàs a Yesuw Kiristi BATSAH kwa ŋa ya. Ki gwim a ka, dukw ana a tsahən ahər a tserdze. Ki gwim a ka, dukw ana ŋgwal ŋa ya, kamala dizl ɗaf ana a we a hinne gwètsik gwètsik a. Dite ka, ki sìkèhwim a à masəra Mbulum aka miɗ aka miɗ mbaŋa. ¹¹Mər ihər mìi hemer a mbaŋa ka, dite mə vəl a kurum ndzəɗa, ki ndzwim a ɓəŋɓəŋ lele, nda ndzəɗa ŋgar ana a za duwa tserdze ya. Kamala taŋa ya, ku mege ndeɗime tekeɗe, ki slwim a aà magəsa gəzləŋ i təv duwa ya tserdze, ki sìkèhwim a à mandza zayzay nda maŋgayaba i gəzləŋ kurum mbaŋa. ¹²A sèsiŋ ka, ki gwim a kəkaaha a Mbulum Tsir kwa kəla pat nda gà maŋgayaba ata i gəzləŋ kurum mbaŋa asa. Aɗaba ŋgat na a vəl a kurum vatwa, na dite ki ta ŋgetwim a dukw ana ŋgwal ŋa, a ti dzeye a a gà mburma ŋgar a ya. Dukw ata ka, i təv dzaydzay ŋgar ana i gər ŋa, à div a hinne ya. ¹³Aɗaba Mbulum Tsir kwa ata na a beyera à kwa i ahər Əbay ana mandza ŋa i lùvùŋ a ya. A ndzəkara iɗəm kwa ya ka, a dza kwa a təv mekwere Kəla ŋgar ana mandərkwasla ŋa ya. ¹⁴Nda ahər Kəla ŋgar ata na a mburuɗara kwa i ahər Əbay sitene ya, a pəl a kwa dər à bakal, dite na kə ŋgatakwa mezìwè gà gər kwa kuɗa ya.

Yesuw ka, Əbay ika gər gà dukw tserdze

¹⁵Wura a sle a aà meŋgete a Mbulum nda are tsidze.

Ama Yesuw Kiristi ana gà mburma ta ŋgatar a ka,

a ndzikiɗ ba kalkal kamala Mbulum a.

A ɗif a kwa dər, meme na a ndza ya ya.

Ŋgat ka, malkwara. Mendze ŋgar ka, piŋŋe,

à gər ana Mbulum aka ge gà duwa zukw tsiye.

¹⁶Aɗaba Mbulum a ge dukw tserdze ka,

nda ahər ŋgar: Gà dukw ana i gər ŋa ya,

nda gà dukw ana ika gər ahəɗ a mbaŋa.

A ge ka, gà dukw ana a ŋgeter a ba

nda are ya ɗekɗek tsa. Ama a ge ka,

gà dukw ana a ŋgatar ba tsiye mbaŋa.

Kamala megweɗe ya ka, gà dukw ana

gà ndzəɗa tar riŋ hinne i gər ŋa ya,

gà gawla Mbulum, nda gà Əbay tar ŋana tserdze.

Gà dukw ata Mbulum a geye tar tserdze ya ka,

nda ahər Kiristi, Kəla ŋgar,

dite a dza tar a ahər ka,

a Kəla ŋgar ata mbaŋa asa.

¹⁷Ŋgat a riŋ daga piŋŋe, akahər ana

Mbulum aka ge gər ahəɗ zukw tsiye.

Ŋgat na a kesle a gà duwa tserdze

nda ndzəɗa ŋgar a.

¹⁸Ŋgat Əbay ika gər gà mburma Mbulum mbaŋa.

Ŋgat na a kwere a tar, kamala metsehe ana

i gər mburma a kwere a ba mburma ya.

Mesife awiya ŋa a dza ahər ba ka,

i təv ŋgar mbaŋa asa.

Aɗaba Mbulum a lah məmbə̀lara à ŋgat

i məməta ya,

na dite a ne à ŋgat Batsah ŋa ika gər

gà duwa tserdze, ku mege awara tekeɗe ya.

¹⁹Aɗaba Mbulum a waya ka, Kəla ŋgar ma zla

ba ŋgar nda ndzəɗa fit kweleŋ.

²⁰A sàs a Mbulum mbaŋa ka, Kəla ŋgar ma sər ba

à gà dukw tserdze nda ŋgat,

gà dukw ana ika gər ahəɗ a,

nda gà na i mbulum i gər ŋa ya mbaŋa.

Kamala taŋa ya, a waya ka,

gà dukw ata ti ner are asa tsa,

tə ndza ika miɗ ŋgar zayzay lele ivaɗ.

A ge dər kataya ka, agəra məməta Kəla ŋgar ana

a dza à məmbəz ŋgar aà dizl magə̀làwà ŋa ya.

²¹Akahər ata ka, kurum tekeɗe, kurum mandza ŋa diriŋ aà Mbulum a, ka nwim gà ɓəzla mene are ŋgar, aɗaba madzala gà gər kurum ana ka dzalawum ŋgwala tsa, dite nda gà dukw ana ki gewim ŋgwala tsiye asa mbaŋa. ²²Ama kinehe ka, Mbulum aka gəs masla nda kurum, aɗaba Kəla ŋgar ana a ne mburma, dite a vəl mesife ŋgar a. Aɗaba taŋa, na kinehe a ne dər à kurum gà tsəɗaŋŋa ŋa, a de à kurum a a təv Mbulum, ki nwim a gà mburma ŋgar ana gà ŋgwal ŋa ya, dite ka, wura a sle aà mimè a kurum a à bakal asa tsiye. ²³Ama kə̀la ka, say na ki zezemwim a aka miɗ aka miɗ nda magəsa Mbulum nda gəzləŋ kurum kəla pat a. Ndzum ka, ɓəŋɓəŋ lele, madzala gà gər kurum ma ta ge wàkit wàkit tsa. Tikwim madzala gà gər kurum ka, aka dukw ana ka tsarakum i huɗ bazlam ŋgwal ŋana ya kəla pat. Bazlam ŋgwal ŋa ata ka, ti tsikeye a gà mburma ana ika gər ahəɗ a tserdze. Aɗaba Mbulum a slər iye, Pul, na dite i ɗif a dər a mburma mbaŋa ya.

Mege megemir Pul ana a ge aɗaba gà mburma Mbulum a

²⁴Kinehe ka, iye ihər i ŋgeye a ba aɗaba mesewere are ana i sèwèr a agəra kurum a. Kamala na akahər ata Yesuw Kiristi a sèwèr are ya ka, iye tekeɗe, i sèwèr a are aɗaba gà mburma ŋgar mbaŋa. Gà mburma ata ka, ti ne kamala ba ŋgar a. Mesewere are ana i sèwèr a kamala taŋa ya ka, i zlèk a kurum aà mesewere are ana ki sèwèrekwe a aɗaba ŋgat a, na dite megemir ŋgar ma da aka miɗ aka miɗ a. ²⁵Mbulum a zla iye ka, a ne à iye mala meslire kurum, kurum ana kə̀ gəsum ŋgat a. A gweɗiŋ ka, ɗif à bazlam gà a mburma tserdze parakkà, dite a kurum tekeɗe, a ge a kurum a ŋgulum mbaŋa. ²⁶Daga aà gər ana Mbulum a ge gər ahəɗ a, bazlam ata ka, makàhà ŋa aà mburma ya, dèrze ikəka, wura a sər tsa. Ama kinehe ka, aka pàt dər a gà mburma ŋgar parakkà lele. ²⁷A waya meɗìfè a tar dər ka, à dukw ana ŋgwal ŋa ndzer, a za dukw tserdze ya, dite ka, à zlèk a gà mburma tserdze, ku mege i ŋga tekeɗe ya. Na a ne dukw ata makàhà ŋa piŋŋe, dite araha, a pàt aba kinehe ya ka, Yesuw Kiristi na a riŋ mandza ŋa i gəzləŋ kurum a. Aɗaba taŋa, kàa tikwim madzala gà gər kurum a təv mezlibe ŋgar ana ti zlibe a à ŋgat a, ka sərum ka, ki ndzwim a a fata ndzer.

²⁸Yesuw Kiristi ata na mər ihər mìi tsik a bazlam ŋgar a mburma tserdze ya. Mìi tsik a ter a aba ya, mìi ɗif a ter a à duwa ka, nda metsehe ana Mbulum a vəl a mər a mbaŋa. Aɗaba a sàs a mər ka, gà mburma ti ne kamala ana Mbulum a waya ya, agəra ana tar mandza ŋa i təv ilik ŋa nda gà Yesuw Kiristi ya. ²⁹Aɗaba taŋa na iye ihər i mir a aba aà megemir ŋa hinne, nda ndzəɗa Yesuw Kiristi ana a viliŋ a ba ya, na dite ka, araha, i ge a dər megemir ŋa mbaŋa ya.

¹A sèsiŋ ka, ki sirwim a dər, meme na i mər aba hinne aɗaba kurum gà mburma Mbulum ana i Kulusiya ya, nda gà na i Lawdikiya ya, dite nda gà asiŋ gà mburma ana pampam tàa ŋgetiŋ zukw tsiye ya. ²I mər aba kataya ka, aà məma a kurumaha à arəv, dite ka wayum ba ika magər kurum ilik ilik tserdze, ka gawum ba a təv ilik ŋa. A sèsiŋ asa mbaŋa ka, sərum dukw ana Mbulum a pàt a kwa dər ndərzayya aka gər Yesuw Kiristi ya lele, madzala gà gər kurum ma ta ge wàkit wàkit tsa, na dite ka, ŋgat a ge a kurum a ŋgwal dukw ana a za duwa tserdze ya. Dukw ata a pàt a kwa dər a ka, à Yesuw Kiristi. ³Ŋgat na a vile a kwa a vatwa, na dite ki nekwe a gà ɓəzla metsehe, ki slekwe a aà masəra duwa aka gər Mbulum a. Metsehe ata ka, ŋgwal dukw ana lele, à sìkim a ba nda siŋgwe tsiye.

⁴Iye ihər i tsik a kurum a gà dukw ata ka, aɗaba wura ma ta bana kurum nda himmè bazlam, nda wirwir tsa. ⁵Sərum dər ka, ku mege iye riŋ i təv kurum tsa, iye diriŋ aà kurum a tekeɗe, madzala gà gər gà ka, a riŋ i təv kurum kəla pat. I ŋgaya ba hinne, aɗaba ana i tsaraka ka, ki zezemwim a Mbulum tèrihhwè ndaka vatwa ŋa lele, dite gəzləŋ kurum ibam, a ndze a ɓəŋɓəŋ i təv megìse kurum ana kə̀ gəsum Yesuw Kiristi ya ya.

Gwim metsehe nda təv gà ɓəzla məbànà mburma nda pàrsa

⁶Kinehe ka, kàa gəsum Yesuw Kiristi nda gəzləŋ kurum, ŋgat na a ne Batsah kurum ŋa ya. Aɗaba taŋa, mede kurum tekeɗe ma ge ka, kamala ana kurum gà mburma ŋgar, kurum riŋ mandza ŋa i təv ŋgar a. ⁷Ndzum ka, i ahər ŋgar, kamala dizl ɗaf ana nduŋŋa meŋgè zlile ŋa i biye ya. Megìse kurum ana kə̀ gəsum ŋgat nda gəzləŋ a ka, ma da aka miɗ aka miɗ, ma ge ɓəŋɓəŋ lele. Gəsum ka, dukw ana ti ɗif a kurum dər a, dite ka, ki gwim kəkaaha a Mbulum kəla pat mbaŋa.

⁸Gwim metsehe, aɗaba wura ma ta bana kurum nda madzala gà gər ŋgar ana taf masakəŋa, a gweɗe a kurum a ka, waytsà i sər duwa hinne ya tsa. Aɗaba metsehe ata a dara ka, i madzala gà gər fəla tar ana ta ge a ya, nda gà i təv gà Əbay sitene ana ika gər ahəɗ a ɗekɗek pəra, tsəka, a dara i təv Yesuw Kiristi ya tsa. ⁹Kà dzum aà tar zləm tsəka, aɗaba ana madzala gà gər Mbulum tserdze ka, i ba Yesuw Kiristi ya. Dukw ana a ne i təv Mbulum tserdze ya ka, i təv Yesuw Kiristi tekeɗe, kamala taŋa ya mbaŋa kaɗəŋ. ¹⁰Ŋgat ka, Əbay ika gər gà gawla Mbulum nda gà Əbay tar ŋa ana tserdze ya. Na kurum riŋ mandza ŋa i təv ilik ŋa nda ŋgat ka, gà dukw ana i təv ŋgar a ka, tàa ne gà biy kurum mbaŋa.

¹¹Kurum mandza ŋa i təv ilik ŋa nda gà ŋgat ka, Mbulum a ge a aà kurum a lambà ana mburma ti sir a dər ka, kurum kàa nwim gà mburma ŋgar a. Akahər ata piŋŋe ka, Mbulum a tsik a gà Yahuda, a gwaɗa a tar ka, tə sasa ba, na dite mburma ti sir a dər ka, tàa ne gà biy ŋgar a. Ama kinehe ka, lambà ana ta ge a aà kurum a ka, nda ahər mburma asa tsa. Ta ge a ka, nda təv Yesuw Kiristi. Ŋgat na a ndzəkara kurum i madzala gà gər kurum ana akahər ata a dawa à kurum a bakal a ya. ¹²Aɗaba i təv ana ti tsilwiɓ à kurum a yam a ka, a ne kamala ana tàa le akaba kurum a biye, a təv ilik ŋa nda gà Yesuw Kiristi ya. Dite i təv ana kà dumara i yam a tekeɗe ka, a ne kamala ana kà mbəlum akabara i məməta ya nda gà ŋgat a təv ilik ŋa ya asa mbaŋa, aɗaba ana kàa gəsum ŋgat nda gəzləŋ, ka sərum dər ka, Mbulum na a mbəlara à ŋgat i məməta ya, dite ka sərum dər asa ka, ŋgat na a sle a aà məmbàlà à kurum i məməta ya mbaŋa ya. ¹³Akahər ata piŋŋe ka, Mbulum a fə̀r aà kurum kamala ana kurum ka, gà məməta ŋa ya, agəra gà bakal kurum ana kì gewim a, dite aɗaba ana Yesuw Kiristi aka ge aà kurum lambà ŋgar ata zukw tsiye asa mbaŋa. Ama kinehe ka, Mbulum aka vəl a kurum mesife ana awiya ŋa ya i təv ilik ŋa nda gà Yesuw Kiristi. Ŋgat na a pəl à kwa i bakal a tserdze ya. ¹⁴Akahər ata piŋŋe ka, seriye Mbulum aka gəs kwa, aɗaba ana kàa zazamakwa məpala ahəm ŋgar tsiye. Ama i dəba ŋa ya ka, Mbulum a taya iba wakita ana a wetse aɗəm bakal kwa ya, a ndwandway aà dizl magə̀làwà ŋa, kamala megweɗe ya: Seriye ika gər kwa asa tsa. ¹⁵I təv ana Yesuw Kiristi a mət aà dizl magə̀làwà ŋa ata ya ka, ndzawndzaw a ndzək dukw ahər aà gà sitene ya, nda gà Əbay tar ana gà ndzəɗa tar a riŋ hinne ya tserdze. A mba aà tar. A ndaɗa aka tar hwarwa ika miɗ mburma tserdze.

Megìse ana Yesuw Kiristi a gəsara kwa ika vatwa ana

ŋgwala tsiye

¹⁶Aɗaba taŋa, wura ilik ma ta pala a kurum ahəm agəra gà dukw ana ki zimwim a ya, kige tsa, ki swim a ya tsa. Dite wura ma gwaɗa a kurum ka, zazamum megirive aaha, kige tsa, megirive kəla kiye ana a mbəz a, nda gà bəla agəra pat mesìfìkà ba ɓav tsa asa mbaŋa. ¹⁷Aɗaba gà dukw ata tserdze ya ka, ti ne kamala mendzikiɗe ba duwa ya ɗekɗek pəra. Ti ɗifewa dər a mburma akahər ata ka, à dukw ana ndzer, a ta ge a ba aka miɗ mba ya. Dukw ndzer ŋa ata ka, Yesuw Kiristi à gər ŋgar. ¹⁸Aɗaba taŋa, ka tə dzum zləm a dukw ana gà mburma ta gweɗe a ka, waytsà gà mər ŋa, dite a sàs a tar metsike a kurum aà dukw ana ki gwim a ya tsa. Ama gà mburma ata ta gweɗe a ka, say məvəla ba mesewere are, nda mazàmbàɗà à gà gawla Mbulum, na ŋgwal ŋa ya. Dite ti tsikewa ka, aka gər dukw ana ta gwa, waytsà mi ŋgatar i sunwa ya ya kəla pat pəra. Medzìbe gà mburma ata ka, ŋgakŋgakəkka tə sə̀ŋgə̀rawa à ba tar taf masakəŋa, nda madzala gà gər gà mburma ana ika gər ahəɗ a ɗekɗek. ¹⁹Tar ka, a sàs a tar mandza i təv ilik ŋa nda gà Yesuw Kiristi ana ŋgat BATSAH kwa ŋa ya tsa, tàa miyak dər. Ŋgat na a ne gər ŋa ya, dite gà mburma Mbulum ka, ti ne kamala ba ŋgar a. Gà na tar i ahər ŋgar a ka, a vile a ter a dukw ana a sle a ter a ya tserdze. Aɗaba tar ti ndze a ka, ndzəɗakkà nda gəzləŋ ilik, agəra ŋgat. Kamala taŋa ya, tì sìkèh a ika vatwa ŋgar kamala ana Mbulum a waya ya. A yaha gər a gà mburma ŋgar ata ka, na dite ti ne ba ilik nda gà ŋgat a, kamala ba mburma ana madzàvà ŋa ikaba nda gà mile ya.

²⁰Kurum kà sərum ka, kàa matum akaba nda gà Yesuw Kiristi a təv ilik ŋa. Kamala taŋa ya ka, gà sitene ta kwere a kurum asa tsa. Assàh, na kataya ana, aàmala na ki ndzwim a kamala kurum gà mburma ana ti zezem a gər ahəɗ a hiywe mba ya? Dite aàmala na ki zezemwim a gà məpala ahəm ata, ta gweɗe a kurum a ka: ²¹Ka zlum dukw aaha tsa, kà mə̀ndzərum dukw ata tsa, dite bəla kà lə̀mum aà dukw ata tsa asa mbaŋa ya. ²²Na a dzeŋge a gà məpala ahəm ata ka, mburma ɗekɗek. A dara ka, i madzala gà gər tar a pəra, tsəka, i təv Mbulum a tsa. Aɗaba gà dukw ata tàa ləm ahər tserdze ya ka, ti ndze a tsa, ŋgulum ta ge a dər megemir pəra. ²³Malahalah ŋa, gà mburma ti dzele a ka, ta gweɗe a: Məpala ahəm ata ka, kamala dukw ana a vile a metsehe a mburma hinne ya, aɗaba ana ta fàr akaba ndzəɗa aà mazazama fəla tar tèrihhwè, nda mahə̀nà à gər a bəɗ, nda gà məvəla ba mesewere are hinne mbaŋa. Ama tsaatsa, gà məpala ahəm ata ka, taf masakəŋa, biy na a ge a ŋgulum a mburma, dite ka, a kwere a dər meèweke ba ŋgar ɓav tsa.

Yesuw Kiristi aka ne à kurum gà awiya ŋa

¹Kurum kà sərum ka, kàa mbalum akabara i məməta ya nda gà Yesuw Kiristi ya. Aɗaba taŋa, dzalum ka, aka gà dukw ana i gər ŋa i Mbulum, i təv ŋgar ana ŋgat mandza ŋa iɗəm a ya. Ŋgat ka, a riŋ mandza ŋa ika tsèke ahər mezime Mbulum. ²Kamala taŋa ya, dzalum gà gər ka, aka gà dukw ana tar riŋ i təv Mbulum a, tsəka, aka dukw ana ika gər ahəɗ a tsa. ³Aɗaba kurum kà sərum ka, kàa matum. Ama Mbulum aka mbəlara à kurum i məməta ya. Dite mesife kurum ana awiya ŋa ya tekeɗe, ar ka, makàhà ŋa i təv Yesuw Kiristi i mbulum. ⁴Ndzer kaɗəŋ, Yesuw Kiristi na a ne mesife kurum a. Aləka i təv ana à mère a ya ka, kurum tekeɗe, ta ŋget a kurum a nda gà ŋgat, i təv ndzəɗa ŋgar ana tì zlibe a dər a mbaŋa.

⁵Aɗaba taŋa, miyakum à dukw ana ŋgwala tsa, kà dzalawum i gəzləŋ kurum a. Fə̀rum aà dukw ata ka, kamala ana aka mət, a sle a aà makwàrà kurum asa tsiye ya. Miyakum à mege mezelme nda təv muva, nda mege dukw hwarwa ana pampam a, nda gà ka ti nwim gà mìbìylà ŋa tsa mbaŋa. Ama meèweke ba kurum ma ta kwara kurum asa tsidze. Izittè ka ta gwim are aka dukw mburma tsa asa mbaŋa, aɗaba ana kàa gwim are aka duwa kamala taŋa ya ka, dukw ata a ne a kamala mbulum kurum a. ⁶Agəra gà dukw ata gà ŋgwala tsiye ka, Mbulum a ta gis a dər gà mburma ana ta gəs ahər ahəm tsiye tserdze, a seriye. ⁷Akahər ata ka, kurum tekeɗe, kàa gwim medzibe gà dukw ata mbaŋa.

⁸Ama kinehe ka, miyakum aba à gà dukw ata tserdze ya: Gà matsəɓatsəɓ nda gà dukw ana ta wir aà kurum a tərfə̀ɗ tərfə̀ɗ a, nda mene are a gà mìsle ŋgiɗ. Ka tə ndavayum a gà mìsle ŋgiɗ tsa, dite ka tsikwim manəsa bazlam aà wura tsa asa mbaŋa. ⁹Ka tə sasayum aaba pàrsa tsa, aɗaba kà sərum ka, kàa miyakum aba à mendze kurum ana akahər ata ya, nda gà dukw ana kà gewim tserdze ya. Aɗaba kwìtsìɓ kàa yum ikaba dukw ana miviya ŋa, kamala miviya petek a.

¹⁰Kàa ŋgatum mede ana awiya ŋa ya ivaɗ. A ne ka, kamala awiya petek ana ŋgulàɗə̀ɗɗa kà dzum akaba ya. Mbulum na a vəl a kurum madzala gà gər ata ya. A riŋ a ne a dər awiya ŋa kəla pat, na dite ki nwim a kamala ŋgat a ya. Dite ka, ki ti sirwim a ŋgat lele, à sìkèh a aka miɗ aka miɗ mbaŋa. ¹¹Aɗaba taŋa, duwa a riŋ na à dzik a ikaba kurum a pampam a asa tsa. Gà Yahuda nda gà na tar gà Yahuda tsiye ka, tar ka, ilik. Gà mburma ana tə sasa ba ya, nda gà na tàa sasa ba tsiye tekeɗe, pam tsa asa. Na mege kurum ka, gà slele, kige tsa, gà mburma ana i kusak tə sər duwa tsiye, nda gà bəla gà ɓele, kige tsa gà mburma ana ti ziwe a gər tar a tekeɗe, ar ka, pampam tsa asa mbaŋa. Mbulum à dzèye a ikaba tar a pampam asa tsəka, aɗaba ana Yesuw Kiristi a kwere a tar tserdze ya. Dite ŋgat asa na a riŋ mandza ŋa i gəzləŋ gà mburma ata a kwere a tar, ti ne gà biy ŋgar a.

¹²Mə məts a kurum gər tsa: Mbulum a pala kurum, na dite kà nwim gà biy ŋgar a. Ŋgat na a waya kurum a ya. Aɗaba taŋa, say mede kurum ma ge ka, ŋgwal ŋa, kamala i gà mburma ŋgar ana a ne à tar gà awiya ŋa ya. Gà asiŋ gà mìsle ŋgiɗ ti ndze a kurum are tsehe, kə̀ gəsum ba lele, Hənum ba à gər a bəɗ, ki gwim ŋgwal a gà mìsle ŋgiɗ, dite kə̀ gəsum gəzləŋ mbaŋa. ¹³Sərum ba ika magər kurum lele. Na bəla wura aka ge a kurum dukw ana ŋgwal ŋa tsiye ka, ka ta mumar aɗəm à bakal ŋa tsa, pə̀lumar dər seyiŋ ivaɗ. Pə̀lum a ba à bakal kamala ana BATSAH kwa ŋa a pəl a kurum dər a mbaŋa. ¹⁴Ndeyndey ŋa ka, wayum ba ika magər kurum ilik ilik tserdze. Aɗaba na kàa wayum ba kataya ka, ki ndzwim a i təv ilik ŋa ndìɓèkke lele nda gəzləŋ ilik ŋa. ¹⁵Matasla yam ana Yesuw Kiristi a vəl a kurum a ka, mà rah a gəzləŋ kurum lele. Aɗaba Mbulum a zal a kurum ka, na dite kà nwim ba ilik, ki ŋgetwim a mandza zayzay ata ya. Gwim kəkaaha a Mbulum kəla pat. ¹⁶Vəlum vatwa a bazlam Yesuw Kiristi, tsìsl mà rah a gəzləŋ kurum lele, ka dzalum aaka gà gər hiywe. Ɗifwim aba à vatwa ika magər kurum. Ɗifwim aba dər aba nda zèyezèye, kamala ana Mbulum a vəl a kurum metsehe ya. Zàmbaɗum à Mbulum nda gà dimis pampam. Làhum gà dimis ana Mezite Mesife ŋgar a ɗif a kurum dər a. Làhum gà dimis ata a Mbulum, nda megèr kəkaaha i gəzləŋ kurum hinne. ¹⁷Dukw ana ki gwim a ya, ndəna ki tsikwim a tserdze ya ka, gwim nda zləm Yesuw Kiristi BATSAH kwa ŋa. Ki gwim kəkaaha a Mbulum Tsir kwa nda zləm ŋgar mbaŋa.

Meme na gà mburma Mbulum ti ndze a ika magər tar a

¹⁸A kurum gà məkəs, gəsum ahəm aà gà zal kurum lele, aɗaba taŋa ka, a tsahən aà BATSAH kwa ŋa.

¹⁹Kurum gà zal tekeɗe, wayum gà məkəs kurum lele mbaŋa, kə kwarum akaba tar tsa.

²⁰A kurum gà ɓəza tekeɗe, gəsum ahəm aà gà tsir kurum, ku mege i təv dukula ya tserdze. Aɗaba na kàa gwim kataya ka, à tsehin a aà BATSAH kwa ŋa.

²¹A kurum gà tsir gà ɓəza mbaŋa ka, ka ti ɗifewim à metsehe a gà ɓəza kurum nda ndzəɗa tsa, aɗaba ti ndze a sleɓerekrek.

²²A kurum gà ɓele ibam, gəsum ahəm aà gà ɓəzla ga kurum i təv dukw ana ki gwim a ya tserdze. Ka ta gwim a tar megemir ka, tsèŋgèl tsèŋgèl i təv are tar a ɗekɗek tsa, na dite ka, ti zlibe a à kurum a ya. Ama gwim a tar meslire ka, tèrihhwè nda ndzer ŋa, aɗaba ana kurum ihər ki zlìbwim a à BATSAH kwa ŋa ya. ²³Mege megemir ana ki gwim a ya tserdze tekeɗe, gwim ka, nda gəzləŋ ilik. Gwim ka, kamala ana ki gwim a meslire batsah kwa ŋa ya, tsəka, a mburma tsa. ²⁴Kurum kà sərum ka, ŋgat na a ta vile a kurum a dukw maya ba, aɗaba megemir kurum a. Ki ta ŋgetwim a dukw ana a tike aba ya, i gər ŋa i Mbulum, a gwa, i ta vile a a gà mburma gà ya. Ama wele batsah ŋa ata ki gwim a meslire ŋgar a ka, Yesuw Kiristi. ²⁵Sərum dər, gà mburma ana ta ge a dukw ana ŋgwala tsiye ka, Mbulum a misek à ter a tsa, seriye ŋgar à gis a tar. Ku mege ŋgat weke tekeɗe ka, pam tsa. Aɗaba Mbulum ka, a wele a ikaba mburma ya tsa.

¹Kurum gà ɓəzla ga tekeɗe ka, gəsum gà ɓele kurum ndaka vatwa ŋa lele, kà fə̀rum aà tar ka, kamala za ya tsa. Aɗaba kurum kà sərum, kurum tekeɗe ka, Batsah kurum ŋa a riŋ i Mbulum, à gis a kurum lele mbaŋa.

Hamum a Mbulum kəla pat, dite ka nwim gà ɓəzla metsehe

²Ku mege ndeɗime tekeɗe ka, ndiɗikwime gər aà mahàmà a Mbulum, ka ti yum ba tsidze. I təv ana ki hemwimer a ya ka, gwimer kəkaaha mbaŋa, ³dite hamumar aɗaba mər asa. Hamumar ka, dite mə vəl a mər vatwa aà metsìkè bazlam ŋgar a mburma, dite mìi ɗif a ter a à dukw ana makàhà ŋa aka gər Yesuw Kiristi ya parakkà lele. Aɗaba kurum kà sərum, agəra ana i ɗif a dər kamala taŋa ya, na kinehe ta gəs iye a daŋgay a. ⁴Hamumar, na dite i sle a aà metsìkè bazlam ata a mburma ndərzayya lele ya. Aɗaba taŋa na a ne megemir gà ya.

⁵Gwim metsehe aɗaba mede kurum ana ki dwim a ya. Ma ge ka, ŋgwal ŋa lele, na nda təv gà mburma ana tàa gəs Mbulum nda gəzləŋ zukw tsiye. Ku mege ndeɗime, megìse kurum mə̀ pàt, ki gwim taŋa hiywe. ⁶Bazlam kurum ana ki tsikwim a ter a ya, ma ge ka, himmè lìfèɗìɗe lele, dite ka sərum dər mbaŋa ka, meme na ki fèfilwim a ter aaka a lele, a gà na ta wiz aà kurum a bazlam a ya.

Mege wusa

⁷Tikikus na a me a kurum a dər tserdze ka, meme na i ndza kinehe kuɗa ya ya. Ŋgat ka, damər kwa ana kà wayakwa ŋgat hinne ya. Aɗaba a riŋ a ge a megemir BATSAH kwa ŋa ka, nda gəzləŋ ilik mbaŋa. Mìi ge a megemir ka, mər məma, aɗaba Yesuw Kiristi. ⁸Iye ihər i slirehe a ŋgat a təv kurum, aà metsìkè a kurum ka, meme na i ndza ɗa ya, dite ka, aà məma a kurumaha à arəv asa mbaŋa. ⁹I slirehe a tar ka, tar nda Unesimus, kəla gà kwite kurum. Ŋgat tekeɗe ka, damər kwa ana mandərkwasla kwa, kà wayakwa ŋgat lele ya, a riŋ zezem a Yesuw Kiristi ka, nda gəzləŋ ilik mbaŋa. Tar sula məma, ti tsik a kurum a dukw ana a ge ɗa ba i faha ya.

¹⁰Aristarkus ana mər mandza ŋa ɗa i daŋgay məma ya, a ge a kurumaha wusa mbaŋa. Dite Markus, kəla damər Barnabas tekeɗe, a ge a kurumaha wusa mbaŋa asa. Na aka ndzeha a təv kurum ka, gəsum ŋgat lele. Aɗaba Yàa mbər metsike a kurumaha aba ya piŋŋe, dukw ana kà gwim agəra ŋgat a. ¹¹Yesuw ana tə zalar Yustus a, a ge a kurumaha wusa mbaŋa. Gà mburma ata makər a ɗekɗek, na tar ika magər gà Yahuda, tar riŋ mìi ge akaba a megemir nda gà iye, aɗaba mekwere Əbay Mbulum a. Tàa zlak iye ka, hinne.

¹²Apafəras ana a dara i kwite kurum a tekeɗe, a ge a kurumaha wusa asa mbaŋa. Ŋgat ka, mala megemir Yesuw Kiristi. Ku mege ndeɗime tekeɗe ka, a hamawa a Mbulum aɗaba kurum. A mərawa aba ka, hinne. A hamawa ka, na dite ki ndzwim a ɓəŋɓəŋ lele, ki nwim a gà bàba gà mburma ika miɗ Mbulum, dite ki sirwim a dukw ana Mbulum a waya ya lele, ki dzwìmer a zləm a. ¹³Iye ka, Yàa ŋgatar nda are gà, meme na a riŋ a ge a megemir hinne, aɗaba kurum, dite agəra gà mburma Mbulum ana i Lawdikiya ya, nda gà na i Hiyerapulis a mbaŋa ya. ¹⁴Luka, mala dàkwtar ana kà wayakwa ŋgat hinne ya, tar nda Demas ta ge a kurumaha wusa asa mbaŋa.

¹⁵Ki gwim wusa a gà mburma Mbulum ana i Lawdikiya ya. Dite ki gwim wusa a məkəs ana tə zalar Nimfa ya, nda gà mburma Mbulum ana ti yahawaba gər a ma ŋgar a tserdze mbaŋa. ¹⁶Na kàa dzeŋgwim wakita aaha ka, ka slərumaha a gà mburma Mbulum ana i Lawdikiya ya, ti dzeŋge mbaŋa te. Dite kurum tekeɗe ibam, ki ti dzeŋgwim a wakita gà ana i wetseha a gà Lawdikiya, ti slir a kurumehe a ya mbaŋa. ¹⁷Gweɗwimiŋ a Arkipus ka, mə̀ mər aba, mà ndəv à megemir ana Yesuw Kiristi a vəlar a ahər a.

¹⁸Iye Pul, nda ahər gà ŋa, na naha, i tsìmìɗ dər, i wetse a kurumaha bazlam aaha ya. I ge a kurumaha wusa. Mə̀ məts a kurum gər tsa, na iye ɗa mandza ŋa i daŋgay gədzə̀zlzla ya.

Mbulum ma ge a kurum ŋgwal tserdze.