3 YUHANA

MƏMAKƏR

wakita ana

YUHANA

a wetse ya

Mege wusa

¹Iye batsah mburma ana ika magər gà mburma Mbulum a, i wetseha wakita aaha ka, a kər Gayus, masla gà ana i waya kər nda ndzer a ŋa ya. ²A kər masla gà ana i waya kər hinne ya. Iye ihər i heme a a Mbulum ka, dite mendze yak ana ki ndze a ya ka, zayzay lele, duwa ma gik ba a gər tsa na i təv meslè duwa ya mbaŋa asa. I sər, madzala gà gər yak mandza ŋa ka, zayzay lele na ika miɗ Mbulum a. ³Aɗaba gà asiŋ gà damər kwa ana a riŋ ika vatwa Mbulum a, tə dawara a təv ga ya, ta gweɗiŋ ka, kər riŋ ihər ki zezem a dukw ana ndzer ŋa biy Mbulum a nda gəzləŋ ilik ŋa. I sər ka, kà gewa gà dukw ata kaɗəŋ. Yàa ŋgaya ba hinne, na i tsaraka bazlam ata ya. ⁴Ku mege ndeɗime na i tsaraka, gà ɓəza gà riŋ ihər ti zezem a vatwa ana ndzer ŋa ya ka, i ŋgaya ba hinne. I ndze a ka, ndzəɗakkà, duwa a riŋ ilik aka ŋgeyiŋ ba i gəzləŋ kamala taŋa ya tsidze.

Mezlibe ana tə zlə̀b à Gayus a

⁵A kər masla gà ana i waya kər hinne ya. I samata ka, kər ihər ki ge a megemir kalkal lele na i təv mezleke ana ki zlèk a gà damər kwa ana ika vatwa Mbulum a, ku mege tar ka, gà mbəlakw ana tə dara a liwiŋ kurum a tekeɗe ya. ⁶Gà mburma ana ki ge a tar gər a, na tə dara, ti tsik ika miɗ gà mburma Mbulum ana ɗa i faha ya, meme na kà waya tar hinne ya. Iye ihər i gik a kamkam: Zlàkawa tar aka miɗ aka miɗ kamala taŋa ya asa, na i təv ana ta meh a ba i təv yak a. Ki zlèk a tar ka, kamala ana a tsahən aà Mbulum a mbaŋa. ⁷Mede tar ata ti deye a ya ka, aɗaba megemir Yesuw Kiristi. Ama tàa gəs duwa ilik i ahər aà gà na tə sər Mbulum tsiye tsidze. ⁸Aɗaba taŋa, kwa gà mburma Mbulum ka, say zlàkawukwa medzibe gà mburma ata, na dite ki gìsekwe a ba a ahər i təv megemir ana ti de a dər, ta ge a aɗaba bazlam ndzer ŋa ana biy Mbulum a ya.

Bazlam aka gər gà Diyutirefes nda Demetiriyus

⁹Wakita kə̀la ŋa ana i wetseha ya ka, a mayahaba gər gà mburma Mbulum ana i təv kurum i fataya. Ama Diyutirefes, wele ana gəlnday gəlnday a waya mene batsah tar ŋa ya ka, a gəs bazlam gà ana i tsiker a tsidze. ¹⁰Aɗaba taŋa na Yàa daha a təv kurum ka, i ɗif a à bakal ŋgar ana a ge a ya tserdze parakkà ika miɗ mburma tserdze, kamala ana a ses aà iye pàrsa, a tsik aà iye dukw ana ŋgwala tsiye. Ama a geye a ka, gà dukw ata ɗekɗek tsa. Bakal ŋgar ana ndeyndey ŋa ya ka, a gəs gà mburma Mbulum ana tə dawara a təv ŋgar a tsa. Dite ŋgat asa ka, a riŋ kwìlekikkè a pele a ahəm a gà na a sàs a tar məvəla ahər a gà mburma ata ya, a delewe a tar i liwiŋ gà mburma Mbulum ata ya mbaŋa asa.

¹¹Masla gà ana i waya kər hinne ya. Kər ka, ka tə zazam mede gà mburma ana gà ŋgwal ŋa tsiye tsa. Say zazam ka, dukw ana ŋgwal ŋa ya ivaɗ. Aɗaba wur ana a gewa duwa ŋgwal ŋa ya ka, aka ne mburma Mbulum. Ama wur ana a gewa dukw ana ŋgwal ŋa tsiye ka, ŋgat ka, aka sər Mbulum zukw tsa.

¹²Demetiriyus ka, mege weke à zlibe a à ŋgat, a tsik ahər a dukw ana ŋgwal ŋa ya. Ndzer ŋgar ana a gewa ya, na à zlibe a à ŋgat a mbaŋa. Mər tekeɗe ka, mì gwa ahər ŋgwal ŋa. Aɗaba kər kà sər, dukw ana maa tsik ahər kataya ka, ndzer kaɗəŋ, pàrsa iɗəm tsa.

Mandəva à mege wusa

¹³Gà bazlam ŋgiɗ a riŋ pampam hinne na a sèsiŋ i tsikik a zləmana ya. Ama i waya na i wetsekeha aka wakita ya tsa. ¹⁴I dzala ka, iye ŋa i dehe a a təv yak bise ivaɗ, na dite ka, ki lìmime akabiŋa, aà məfàfə̀là akaba lele ya.

¹⁵Matasla yam ma ge i gəzləŋ yak zayya lele. Gà masla yak ana i faha tserdze ya ka, ta gekaha wusa mbaŋa. Dite geye wusa a gà masla mər ana riŋ i fataya, ilik ilik tserdze mbaŋa asa.