2 TIMUTE

MASULA

wakita ana Pul a wetseha

a TIMUTE ya

Pul a wizeha Timute

¹Na a wetsekaha wakita aaha ka, iye Pul, mala meslire Yesuw Kiristi. Mbulum a waya, na dite a zla iye aà meslire ŋgar ata ya. A slər iye ka, aà meɗìfè à mesife ana a tsik ahər, a gwa ka, a ta vile a kwe a nda ahər Yesuw Kiristi ya. ²I wetseha ka, a kər Timute ana kà ne kəla gà, i waya kər nda ndzer a.

Gà Mbulum Tsir kwa nda Yesuw Kiristi BATSAH kwa ŋa ta gik ŋgwal, ka ndza a tar are tsehe, dite ta vəlak matasla yam a gəzləŋ zayya lele.

Pul a ge kəkaaha a Mbulum agəra Timute

³I təv ana Yàa zlaŋa aɗaba kər a ka, i gewa kəkaaha a Mbulum ana i gewar meslire nda gəzləŋ ilik, nda ndzer ŋa ya. Meslire ana i gewa ya ka, kamala gà tsir gà ana akahər ata ta gewar a mbaŋa. Ku mege ndaàpat, ku mege ndaàvəɗ tekeɗe ka, i hamawa a Mbulum aɗaba kər, i gewar kəkaaha kəla pat. ⁴Tuwa yak ata akahər ata ka tuwa aka iye ya i təv ana kà tama aba ya ka, aka mìtsiŋ gər tsa. Kər riŋ ki kìviŋ a ka, hinne. A sèsiŋ ka, ki ŋgetemebe a asa, na dite maŋgayaba à rèh a a gəzləŋ gà ya. ⁵I dzalawa gà gər ka, aka megìse yak ana kə̀ gəs Mbulum nda gəzləŋ ilik, nda ndzer ŋa ya mbaŋa. Gà batsah məmər yak Luwisa nda mama yak Afinike na tə lah aà magəsa Mbulum nda gəzləŋ ilik kamala taŋa ya ya. Ti tikewa madzala gà gər tar ka, aka ŋgat kəla pat. Ama i sər ndzer, kər tekeɗe ka, kər riŋ nda medzibe megìse ata mbaŋa.

Pul a màha à arəv a Timute

⁶Aɗaba taŋa, i gik a kamkam, mə̀ mətsak gər tsa. Akahər ana i tikik ahər aka gər a ka, Mbulum aka vəlak ahər ndzəɗa aà megemir ŋgar lele. A vəlak ka, biy taf masakəŋa. Ama kinehe ka, ndzəɗa ata ma da aka miɗ aka miɗ dzəŋdzəŋ lele, tsəka, mà nikiɗ aà kər a tsa. ⁷Aɗaba Mezite Mesife ana Mbulum a vəl a kwa ya ka, aka ne à kwa gà ɓəzla magəɗa tsa. Ama a vəl a kwa ka, ndzəɗa ivaɗ, nda meweye kwa ana ki weyekwe a mburma ya, dite nda makwàrà ba kwa ana ki kwerekwe a ba ya ivaɗ asa.

⁸Aɗaba taŋa, tsik bazlam BATSAH kwa ŋana a mət aà dizl magə̀làwà ŋa ya a gà mburma ka, parakkà lele, ki ge dər magəɗa tsidze. Dite ku mege iye riŋ i daŋgay gədzə̀zlzla agəra ana i zezem a ŋgat a tekeɗe, ki ge dər hwarwa ika miɗ mburma tsa asa mbaŋa. Ama ka, hadzal ba yak aà mesewere are nda iye, aɗaba bazlam ŋgwal ŋana ivaɗ. Mbulum na a vilek ahər a ndzəɗa ya. ⁹Ŋgat ka, aka mbala à kwa. A zal a kwa ka, a ne à kwa gà mburma ŋgar. A ge dər kataya ka, agəra ana ki gewakwar ŋgwal ŋa ya tsa. A ge taŋa ka, aɗaba ana a waya mege kataya ya pəra. Ŋgwal ŋgar ata a ge a kwa nda ahər Yesuw Kiristi ya ka, daga piŋŋe, akahər ana gər ahəɗ a riŋ zukw tsiye. ¹⁰Ama kinehe ka, aka pàt aba kuɗa, aɗaba ana Yesuw Kiristi, mala məmbàlà à kwa ata a dara aka gər ahəɗ a ya. A dara ka, a zla aà kwa ndzəɗa məməta ya, na dite məməta a ge a kwa a duwa asa tsa, a ɗif a kwe a à mesife ana à ndìv a tsiye ndərzayya lele kuɗa ya. Gà dukw ata tserdze ya ka, ŋgwal bazlam na a ɗif dər a. ¹¹Bazlam ata ka, Mbulum na a slər dərra iye ya. A sasar na i tsik a a mburma tserdze, i ɗif a ter a dər lele ya.

¹²Aɗaba taŋa na kinehe i sèwèr a are kamala naha ya. Ama ka, i ge a magəɗa ɓav tsa. Aɗaba i sər na wele ana i gəs ŋgat nda gəzləŋ gà ya. Dite i sər ndzer asa ka, dukw ana aka viliŋ a ahər a ka, a kesle a lele, haa a pat ana a ta ge seriye ya. ¹³Zazam ka, dukw ana ndzer ŋa kà tsaraka i təv ga ya. Dite bazlam gà ata ka, sər dər ndzer, meme na ki tsik a a mburma ya. Ki ge a dukw tserdze ka, nda megìse yak ana kə̀ gəs Mbulum nda gəzləŋ a, dite nda mawàyà ba yak ana kà waya mburma ya mbaŋa. Ama kàa sle aà mege kataya ka, aɗaba ana kər riŋ mandza ŋa i təv ilik ŋa nda Yesuw Kiristi ya. ¹⁴Kasla ŋgwal dukw ata Mbulum a vəlak a ahər a lele. Aɗaba Mezite Mesife Mbulum ana mandza ŋa i gəzləŋ kwa ya, na a vilek ahər a ndzəɗa ya.

Mendze Pul ana a ndza ya

¹⁵Kamala taŋa ya, kər kà sər, gà asiŋ gà mburma ana a riŋ ika ahəɗ Asiya i faka ya, tàa miyak à iye ŋgwìɗik. Ku mege gà Figelas nda Hermegenas tekeɗe ka, tar i liwiŋ tar mbaŋa. ¹⁶I heme a a BATSAH kwa ŋa, na dite gà mburma ana i ga i bəra Winesifarus a, ti ndzer a are tsehe ya. Aɗaba ku mege iye riŋ i daŋgay tekeɗe ka, wele ata a ge a hwarwa a mburma, aɗaba iye tsa. A mèwiŋaha à arəv ka, hinne. ¹⁷I təv ana a ndzera a kwite Ruma a fataya ka, a dza ba aà mayaha iye tsara, haa a təv ana a ŋgat iye ya. ¹⁸Ama kər nda gər yak ka, kà sər dər lele mbaŋa, meme na akahər ata a giŋ ŋgwal ŋa hinne i kwite Efesiya ya. BATSAH kwa ŋa mà zlak ŋgat, na dite a ndze are tsehe a Mbulum a pat seriye ŋgar a.

Mala megemir Yesuw Kiristi ndzer ŋana

¹Kəla gà, ndza ka, ɓəŋɓəŋ lele agəra ŋgwal Mbulum ana a gik nda ahər Yesuw Kiristi ya, dite ndzəɗa yak ma səkah aaka. ²Bazlam ana akahər ata kà tsarakawa i təv ga ya, ika miɗ gà mburma hinne ya ka, mà dər a gà mburma ana tar gà ɓəzla ndzer ŋa ya, dite ka, tar ti sle aà mimè a dər a gà mìsle ŋgiɗ mbaŋa ya.

³Tikema gər ka, aà mege megemir Yesuw Kiristi nda ndzer ŋa kamala mala gùvəl ana a geye a ikaba ya ya. Hadzal ba yak aà mesewere are nda iye aɗaba ŋgat. ⁴Kamala taŋa ya, sliwdze ana ndzer ŋa a de a a gùvəl ka, a wisebe a à gər nda megemir ana i ma ŋgar ŋa ya asa tsa. Aɗaba a sasar megemir ŋgar ma da a gər ka, a batsah ŋgar ŋa ɗekɗek pəra. ⁵Wele ana a tètìɗ a à mile ŋgar, a vel a sah lele, a sasar a ndze a a təv ana a ndisl aɗəm a ya tekeɗe ka, aka gwa, i lèh a aka miɗ mburma ka, say na bəla a vel a ka, ndaka vatwa ŋa lele ya dzekwiŋ, na dite ta viler a dukw maya ba ŋgar a. ⁶Dite mala mifìte ibam ka, a ge a megemir lele, a ye a ba dzekwiŋ, na dite à lèh aà mimìndzir a dukw ŋgar ana a pala i bəɗ a, a zim a ya. ⁷Ama dzala gà gər ka, aka dukw ana i tsik a, a ge a ba kataya ya. Kər kà sər ka, BATSAH kwa ŋa na a zlèk a kər, dite ki tsereke a lele, ki sir a ikaba à gà duwa ya tserdze ya.

⁸Madzala gà gər yak ma da ka, a təv Yesuw Kiristi kəla pat. Aɗaba ŋgat a dara ka, i gwala Dawda a. Mbulum na a mbəlara à ŋgat i məməta ya, kamala ŋgwal bazlam ata i tsik, i ɗifewa dər a mburma ya mbaŋa. ⁹Aɗaba ŋgwal bazlam ata na iye ihər i sèwèr a are, tə dàn iye i daŋgay nda tsitsirɓe gədzə̀zlzla, kamala ana iye mala bakal a ya. Ama bazlam Mbulum kə̀la ka, tsitsik tsitsik ti sle aà meŋgete a, dite ta gis a a daŋgay tsidze. ¹⁰Aɗaba taŋa, i simehe a mesewere are tserdze ka, agəra gà mburma ana Mbulum a pala tar a, dite tar tekeɗe ka, ta mbele a nda ahər Yesuw Kiristi, ti de a a təv mipìsè ahəm ŋgar nda təv maŋgayaba ŋgar ana a ndze a aà biybiy a. ¹¹Bazlam ana ndzer a ka, araha, na ki slekwe aà metìkè aaka a madzala gà gər kwa ya:

Na kàa matakwa akaba a təv ilik ŋa

nda gà Yesuw Kiristi ka, kwa tekeɗe,

ki ti ndzekwe a nda gà mesife

i təv ilik ŋa nda gà ŋgat mbaŋa.

¹²Na kàa gə̀sakwa gəzləŋ i təv gà mesewere are ya

nda gà ŋgat ka, kwa tekeɗe,

ki ta kwerekwe akaba a gər ahəɗ

nda gà ŋgat tserdze mbaŋa asa.

Ama na bəla kwa kàa miyakukwa à ŋgat ka,

ŋgat tekeɗe, a ta miyek a à kwa mbaŋa te.

¹³Ama ku mege megìse kwa a riŋ tsa,

ki nekwe a à ŋgat bakal tekeɗe,

ŋgat ka, mala ndzer ŋa hiywe.

Aɗaba dukw ana aka mbər megweɗe,

i ge a ka, a ge a kaɗəŋ,

a sle a aà masàsà pàrsa tsidze.

Mala megemir Mbulum ndzer ŋana

¹⁴Mà à bazlam ata a zləm a gà mburma Mbulum ana tserdze ya. Gwaɗa a tar ka, ta miyak à mimbètsèba ahəm ana ika magər tar a. Ka pala a tar ahəm ika miɗ Mbulum. Aɗaba bazlam ata ka, taf masakəŋa, tsəka, a ge a ŋgulum tsidze. A nis a ka, à gà na tə dzar zləm a ivaɗ. ¹⁵Mər aba, ka ndaɗa akaba hwarwa tsa, na dite mege megemir yak ana ki ge a ya ka, à tsehin a aà Mbulum a. Mà à bazlam Mbulum ka, ndaka vatwa ŋa, tsəka, ka zle ahər tsa. Ama kà nikiɗ dər ihər a tsa asa. Na kàa ge dər kamala taŋa ya ka, kàa ne mala megemir Mbulum ndzer. ¹⁶Ama ka, ka tə dza zləm a mifefile gà mburma ana ti zezem a vatwa Mbulum tsiye tsa. Aɗaba gà bazlam tar ata ka, taf masakəŋa, tì tìz a dər ka, aà Mbulum a ivaɗ. ¹⁷Gà bazlam tar ana ti dzeŋge a a mburma ya ka, ar ka, kamala mbəlak ana à sìkèh a wànə̀nə̀nna ya. Ika magər tar ka, gà Himanayas nda Filitus. ¹⁸Tar ka, tàa miyak à vatwa ndzer ŋana. Ta gwa: «Mimbile kwa ana ki mbilekwe a i məməta ya ka, aka mbər mege ba aka ndəv.» Tsaatsa, pàrsa. Kamala taŋa ya, ti dzeye a ka, à mburma ika vatwa Mbulum a hinne. ¹⁹Ama gà mburma ana Mbulum a pala tar a ka, ndzer kaɗəŋ, pàrsa iɗəm tsa. Ti ne ka, kamala madzàha ga ana tə dzàha ɓəŋɓəŋ lele, a mbezle a tsiye. Dukw ana mewetse ŋa agəra tar a ka, ta gwa: «BATSAH kwa ŋa ka, a sər gà na ti ne ga mburma ŋgar a.»*fa* Dite a gwa asa ka: «Wur ana aka gwa, iye mburma Mbulum a ka, say mə miyak à mege dukw ana ŋgwala tsa a gewa ya.»

²⁰Kər kà sər, i ga i bəra Əbay ka, gà maŋgara gà gərwa a riŋ pampam hinne. Gà biy ŋgiɗ ka, ta və̀ɗ nda gura ana à sìkim a ba tsiye, kige tsa nda ndzemde. Dite gà biy ŋgiɗ asa ka, ta pàpə̀z dizl. Biy ŋgiɗ ibam, ta ŋgar nda dwaɗwa. Gà asiŋ ŋana ka, tə tsahən lele, tsireŋŋè tì dze a aba ya, ta ge a dər megemir ka, a pat megirive. Ama gà asiŋ ŋa aaha ka, ta kwiris a dər dukw aruwaŋ pəra. ²¹A riŋ ika magər gà mburma kamala taŋa ya mbaŋa. Gà biy ŋgiɗ ka, gà ŋgwal ŋa. Gà biy ŋgiɗ ibam, gà ŋgwala tsa. Aɗaba taŋa, na wele ana aka dara i liwiŋ gà mburma ata ya ka, aka bara ba ŋgar tsəɗaŋŋa lele, idep dukw bakal duwa i təv ŋgar asa tsa. A ge a megemir Mbulum ka, kəla pat ndaka vatwa ŋa lele. A ne a ka, kamala maŋgara dukw ata ŋgwal ŋa, a ge a ŋgulum a mala ga ya. Aɗaba dukw ata a ge a dər ka, dukw ana ŋgwal ŋa ya ɗekɗek.

²²Aɗaba taŋa, kər ka, Timute, ka zazam dukw gà asiŋ gà gawla ana ta ge a ŋgwala tsa pampam a tsa. Ama mər aba, dite ka ne mala ndzer ŋa ika miɗ Mbulum, kə̀ gəs ŋgat nda gəzləŋ kəla pat. Ka waya gà Mbulum nda mburma lele, dite ki ndzwim a lele nda gà mburma ana ta hamawa a Mbulum, tar gà tsəɗaŋŋa ya asa mbaŋa. ²³Ama ka, ka tə dza zləm a gà bazlam gà mburma ana ti tsik a taf masakəŋa ya tsa. Aɗaba medzibe gà mburma ata ka, tə sər duwa tsa. Ka ta gəs tsidze. Ama kər ka sər, gà dukw ata tì sìkèh a ka, à məpàlàba ahəm ika magər kurum ɗekɗek. ²⁴Aɗaba kər mala megemir a Mbulum ka, ki mbetswimbe a ahəm nda gà mìsle ŋgiɗ tsa. Ki fèfil a mburma ka, lìfèɗìɗe seyiŋ ivaɗ. Dite ki ɗif a ter a à vatwa ndzer ŋana ta gis a dər Mbulum a lele. Ki gis a gəzləŋ i təv gà dukw ana ta gik a ya. ²⁵Na bəla gà ɓəzla mene are yak ta gəs mege dukw ana ŋgwal ŋa ya tsəka, ɗif a tar dər nda zèyezèye nda himmè bazlam ivaɗ. Na kàa tsik a tar kamala taŋa ya ka, biytsà Mbulum a vile a ter a metsehe, ta mbìɗ a à madzala gà gər, na dite ta gis a vatwa ndzer ŋana ya. ²⁶Tàa ŋgat metsehe kataya ka, ti sle a aà mibeyera i mekwere Əbay sitene ya kuɗa. Aɗaba piŋŋe ka, ŋgiziw ŋgiziw aka gasa tar a ziwiɗ ŋgar kamala ana ta gəs takurah nda ziwiɗ a, na dite ka, ta ger a dukw ana a sasar a ya.

Məmìyàkà à Mbulum ana gà mburma ti ta miyek a dər

a pat mandəvandəv gər ahəɗ a

¹Sər dər, na pat mandəvandəv gər ahəɗ aka à mendzera ka, mendze kwa a ge a mawùràba ŋa hinne. ²Aɗaba a pat ata ka, gà mburma ata ti ti dzele a ka, ba tar ɗekɗek, a ta ses a ter a ka, mayaha gər a siŋgwe hinne, nda mege zlapa, ŋgakŋgakəkka tì sìŋgìr a à ba tar. Ti ti ndeveye a a mburma. Gà ɓəza ta gis a ahəm aà gà tsir tar asa tsidze. Ku weke a ta fir a aà dukw ana tsəɗaŋŋa biy Mbulum a ka, kamala za ya. Ti ta ge a kəkaaha aɗaba dukw ana ta ge a ter a ya tsidze. ³Gà mburma ata ta weye a gà asiŋ gà mburma ana i ga i ma tar a asa tsa. Ti ndze a ka, tesìw tesìw nda matsəɓatsəɓ ŋa. Dite vìrìɗìɗìɗɗe ti tsik a dukw ana ŋgwala tsiye aà gà mìsle ŋgiɗ asa mbaŋa. Ama tar ka, ta kwere a ba i təv dukw ana ŋgwala tsiye tsa. Dite ta ge a madzək a mburma ka, hinne. Ti ne are a dukw ana ŋgwal ŋa ya ivaɗ. ⁴Ti dzewe a à mburma a gà ɓəzla mene are tar. Dite tar ka, dukw ana tàa tsik i sida ya, tàa gwa, mìi ge a ya ka, ta ge a tsa. Tì sìkèh a à ba ka, hinne, ta weye a Mbulum tsa. Ta weye a ka, ba tar ɗekɗek ivaɗ. ⁵Gà medzibe gà mburma ata ta gweɗe a, waytsà mər ka, gà mburma Mbulum. Tsaatsa tàa gəs Mbulum ana a sle aà mivile a ter a ndzəɗa, dite à mbìɗ a à madzala gà gər tar a ka, ta gəs tsa. Medzìbe gà mburma ata ka, tsàkàlàk ndza aà tar a diriŋ. ⁶Aɗaba ku mege kinehe tekeɗe ka, gà asiŋ ŋa ika magər tar a, sereh sereh ti deye a a gà ga pampam, a sàs a tar ka, ta beneye a mburma. Ta bene a ndeyndey ŋana ka, gà məkəs ana gà falày ŋa ya, dite ka, ta gəs bazlam tar ata. Gà na tàa gəs a kuɗa ka, bakal a be a tar deɓìz deɓìz hinne, ta gewa ka, gà dukw meèweke ba tar ana pampam ta waya ya. ⁷Gà medzibe gà məkəs ata ka, a sàs a tar ti sinike a ba à duwa kəla pat. Ama ka, ti sir a dukw ana ndzer a ɓav tsa. ⁸Gà ɓəzla məbànà mburma ata ka, tàa niw dukw ana ndzer a, kamala gà Yanas nda Yembires ana ti niw bazlam Musa, ta màr à bakal akahər ata ya mbaŋa. Metsehe ana i gər tar a ka, manəsa ŋa fit. Tàa dzawa ika vatwa Mbulum ana zləmana ta gis a a gəzləŋ tar a. ⁹Ama megeye gà dukw tar ata ka, a de a aka miɗ hinne tsa. Aɗaba megeye gà falày gà dukw tar ata ŋgwal metsehe iɗəm tsiye ka, à pèt a ndərzayya ika miɗ mburma tserdze, kalkal kamala biy gà Yanas nda Yembires ana akahər ata a pàt aba ya mbaŋa.

Mandəvandəv meɗìfè à metsehe

¹⁰Ama kər ka, kàa gəs dukw ana i dzeŋgewa a mburma ya, kàa zazam lele. Dite kàa zazam mede gà ana i dawa i liwiŋ gà mburma Mbulum a, nda dukw ana a sèsiŋ i gewa i huɗ mege megemir gà ya mbaŋa. Dite megìse gà ana i gəs Mbulum nda gəzləŋ a, nda miveve ga, dite nda mawàyà mburma ana i waya ya tekeɗe, kàa ge tèrihhwè asa mbaŋa. Mendze gà ana i mà aba à arəv ɓəŋɓəŋ ika miɗ Mbulum a, ¹¹nda gà matawak ana ta gewiŋ a, nda mesewere are gà ana i sèwèrewa ya ibam, makàhà ŋa aà kər a tsa mbaŋa asa. Kàa sər mesewere are ana a le aà iye ika ahəɗ gà Antakiya nda Ikuniya, nda gà i Listira ya tserdze. Ti sèwèriŋ are hinne ka, i fata. Ama ku mege tàa ge à iye kataya tekeɗe ka, BATSAH kwa ŋa a bewera aà iye i gà dukw ata ya tserdze. ¹²Ama ka, ku mege weke na a sasar a ge a dukw ana a tsahən aà Mbulum a, aɗaba ŋgat mandza ŋa i təv ilik ŋa nda Yesuw Kiristi ya ka, ta ger a matawak ndzer, dukw ŋgar. ¹³Taŋa gà mburma ana ta gewa duwa ŋgwala tsiye, nda gà na ta bene a mburma nda pàrsa ya ka, tì sìrìk a tsàkàlàk i təv Mbulum a, ti de a dər aka miɗ aka miɗ. Ta bene a gà mìsle ŋgiɗ, dite tar ŋa tekeɗe, gà mìsle ŋgiɗ aaha ta bene aɗəm a tar ŋa mbaŋa. ¹⁴Ama kər kinehe ka, zazam bazlam ana ndzer ŋa, ti ɗifek dər aɗaba Mbulum, dite ka tike aaka madzala gà gər yak fit dze ya. Zazam aka miɗ aka miɗ nda gəzləŋ ilik, ka miyak dər tsa. Aɗaba kà sər ndzer, gà na ti dzeŋgek a lele, ¹⁵dite kàa sər bazlam ana Mbulum a tsik a ka, daga aà gər ana kər kəla ndirkiz mba ya mbaŋa. Taŋa na a vilek a metsehe, dite ki mbil a dər a. Ki mbil a ka, aɗaba megìse yak ana kə̀ gəs Yesuw Kiristi nda gəzləŋ ilik a. ¹⁶Dukw ana mewetse ŋa a riŋ i huɗ wakita Mbulum tserdze ya, a dara ka, ika arah Mezite Mesife Mbulum a. Dukw ana i huɗ wakita ya ka, à zlèk a kwa, aà meɗìfè à vatwa Mbulum a mburma. A pèt a kwe a à gà bakal kwa ndərzayya, nda meɗìfè a kwa à metsehe lele asa mbaŋa, na dite ki gekwe a dukw ana ŋgwal ŋa ika miɗ ŋgar, ki sìkèhekwe a dər a. ¹⁷Mezite Mesife ata a ge dər kamala taŋa ya ka, na dite gà na ti ne gà mburma Mbulum a ka, ta hadzal ba aà mege dukw ana a sàs a Mbulum a. Aɗaba tàa ŋgat ndzəɗa a ahər tar, aà mege dukw ata ŋgwal ŋa ya tserdze.

¹Iye ihər i gik a kamkam ika miɗ gà Mbulum nda Yesuw Kiristi. Aɗaba Yesuw ka, wele ana a ta ge a seriye a mburma tserdze ya, ku mege gà na tar riŋ nda gà mesife ya, ku gà na tàa mata ya asa mbaŋa. Kər kà sər ndzer, a ta mèriŋa, na dite ka, a de a a mekwere ŋgar ana a ta kwere a ya. ²Ama kər ka, i gik a kamkam: Tsikewa bazlam Mbulum a mburma hiywe, ku mege bəla a tsahən aà tar tsa tekeɗe ya. Na bəla ta ge a dukw ana ŋgwal ŋa tsiye ka, ɗif a tar à metsehe lele, dza aà tar magəɗa, aɗaba gà bakal tar, dite kà ma a taraha à arəv aɗaba mazazama vatwa Mbulum. Dzeŋge a tar dukw ana a de a ndaka vatwa Mbulum a kəla pat, ka ti ya ba tsa. ³Aɗaba pat ŋa a ndzere a mba ka, gà mburma tì dze a zləm a wele ana a ɗif a ter a à ndzer ŋa ya asa tsa. Ama a ti ses a ter a ka, mazazama dukw meèweke ba tar ɗekɗek pəra. Kamala taŋa ya, ti ti yehe a gà ɓəzla medzeŋge a mburma meyehe, dite ti dzeŋge a tar ka, dukw ana hùhunnà a ge a ter a tsegèɗik i zləm lele ya. ⁴Ti ti dze a zləm aà dukw ana ndzer a asa tsa. Ti ti mbìɗ a aba nda təv gà guma ana pàrsa iɗəm a, ti ti dzer a zləm lele ivaɗ. ⁵Ama kər ka, ge metsehe à dukw ana ndzer a tèrihhwè lele, ka zazam aka miɗ aka miɗ. Bàs gəzləŋ i təv gà mesewere are ana tì sèwèrek a ya. Tsik bazlam ŋgwal ŋana a mburma, ma ɗe zləm ŋgarra lele, mà səkah aka miɗ aka miɗ. Ge megemir ana zləma Mbulum aka vəlak a ahər a.

⁶Aɗaba iye kinehe ka, i ne kamala dukw taf ana ta vile a a Mbulum a. Pat ana i miyek a à gər ahəɗ, ta kiɗ a iye ya ka, aka à mendze aɗəm. ⁷Iye ka, Yàa ge megemir Yesuw Kiristi nda gəzləŋ ilik, kamala gà wele ana tì dzìr a ba aà mivele, ta mir aaba a sàh lele ya. Yàa ndəv à dukw ana Mbulum a gweɗiŋ, ge ya, kamala gà wele ata ta vel a a təv ana ti ndisl aɗəm a ya. Yàa gəs Yesuw Kiristi nda gəzləŋ ilik. Yàa məsak dər tsa. ⁸Kinehe ka, dukw mayaba gà a riŋ a veve a iye i təv Mbulum. A viliŋ a ka, aɗaba ana i ne ŋgwal ŋa ika miɗ ŋgar a. Kamala taŋa ya, a pat ana Yesuw Kiristi BATSAH kwa ŋa, wele ana ŋgat mala masàsà ikaba seriye ya nda ndzer a, aka dara ka, à piliŋ a dukw mayaba gà fit. Ama ka, a iye ɗekɗek tsa. Gà na ta veve a ŋgat, à kiv a ter a hinne, ta waya ma dara a təv tar a tekeɗe, ta ŋget a dukw mayaba tar mbaŋa.

Pul a tsik dukw ana a ge ba aɗaba ŋgat a

⁹Kamkam, dara a təv ga ya bise, kə gasa aaba tsa. ¹⁰Aɗaba Demas ka, aka miyak à iye, agəra ana a sasar dukw gər ahəɗ hinne, a be a ŋgat i gəzləŋ a. Aka da a kwite Tesalunike. Ama Kereskes ibam, aka da aka ahəɗ Galatiya. Dite Titus tekeɗe, aka da aka ahəɗ Dalmatiya mbaŋa. ¹¹Say Luka pəra na mandza ŋa ɗa i təv ga ya. Na ki dere a ka, ŋgulum ki dwimera nda Markus a məma. Aɗaba ŋgat ka, a sle a aà mazlàkà iye lele mbaŋa. ¹²Ama Tikikus ka, Yàa sləraha ŋgat a kwite Efesiya. ¹³I təv ana ki dere a ya ka, ka da nda kwite Turuwas. Aɗaba andiw gà duwa a riŋ i tikewa akaba aà mə̀tasl a, aka mətsa a riŋ i fata i bəra Karpus. Kàa daha ka, ka zliŋara a faha ya te. Dite kà ndzìkiŋ dərra gà wakita ga a riŋ i fataya asa mbaŋa. Ki ndzikiŋara a ndeyndey ka, gà wakita ana malàmbàɗà ŋa nda kwiye ya.

¹⁴Aleksandire, mala mivìɗe duwa, aka giŋ dukw ana ŋgwal ŋa tsiye hinne. Ama ka, BATSAH kwa ŋa à mèr aɗəm a à bakal kalkal dukw megemir ŋgar ana a gewa ya. ¹⁵Kər ka, ge metsehe agəra ŋgat lele, tsəka, bəla a ti yehe a vatwa aà megìk dukw ana ŋgwala tsiye asa mbaŋa. Aɗaba ŋgat ka, a ŋgewa vatwa a bazlam mər hinne, a sasar mər tsidze.

¹⁶A pat ana ta gəs iye aka miɗ mala seriye malahalah ŋa, dite i fàfəl ikaba ya ka, mala mezleke iye a riŋ ilik tsidze. Tàa miyak à iye tserdze. Ku mege ta ge kataya tekeɗe, Mbulum ma ti tike bakal ŋa aka gər tar ɓav tsa. ¹⁷Ama kəla ka, BATSAH kwa ŋa aka zlak iye, a viliŋ ndzəɗa, na dite i tsik bazlam Mbulum a mburma parakkà, i həmbər duwa tsa, dite ka, ku mege weke ɗa i faha ika magər gà na tar ga Yahuda tsiye ka, ma tsaraka ya. BATSAH kwa ŋa a be à iye i ahər məməta ya, kamala ana ta bera à duwa i bazlam azil a. ¹⁸Ŋgat ka, a ta be a à iye i dukw ana ŋgwala tsiye tserdze asa mbaŋa. A kesle a iye lele, na dite i de a a təv mekwere ŋgar ana i gər ŋa ya ndzer a. Kamala taŋa ya, mezlibe ana tì zlibe a à ŋgat a ka, ma ne biy ŋgar aà biybiy. Zàmbaɗakwa à ŋgat. *Amin.

Mandəvandəv mege wusa

¹⁹Giŋ wusa a gà Piriska nda zal ŋgar Akila, dite a gà mburma ana i bəra Winesifarus a tserdze mbaŋa. ²⁰Arastus ŋgat ka, a ndze a riŋ i kwite Kurintiya. Dite Tarufimus ka, i miyak à ŋgat i kwite Miletus, agəra ana a sle a mendzera tsa, aɗaba dukw məməta ya. ²¹I gik kamkam, dara a təv ga ya bise, na dite ələk mə̀tasl à dze ahər a ba ka, kàa mbər medera ya.

Gà Awubulus nda Pudenas nda gà Linus, nda gà Kəlawdiya məkəs ŋa, nda gà asiŋ gà mburma ana ɗa ti ne gà damər kwa ika vatwa Mbulum i faha ya tserdze, ta gikeha wusa mbaŋa.

²²Iye ihər i heme a a BATSAH kwa ŋa, dite ma ndza i təv yak hiywe. Mbulum mi pisewa a kurum ahəm tserdze.