2 TESALUNIKE

MASULA

wàkita ana Pul a wetseha

a gà mburma Mbulum ana

i TESALUNIKE ya

¹Iye Pul, mì wetseha wakita aaha ka, mər nda gà Silas nda Timute. Mì wetseha ka, a kurum gà mburma ana i Tesalunike, kurum gà biy Mbulum Tsir kwa, nda Yesuw Kiristi BATSAH kwa ŋa ya. ²Mìi heme a a gà Mbulum Tsir kwa ata nda Yesuw Kiristi BATSAH kwa ŋa, ta ge a kurum ŋgwal, ta vəl a kurum matasla yam a gəzləŋ kurum zayya lele.

Mbulum a ti ses a ikaba seriye a gà mburma ya tserdze

³Gà damər mər, ku mege meme tekeɗe, say mìi ge a kəkaaha a Mbulum kəla pat aɗaba kurum. Taŋa ka, ŋgwal ŋa na mìi ge a kamala taŋa ya, aɗaba megìse kurum ana kə̀ gəsum Mbulum nda gəzləŋ kurum a ka, a riŋ à sìkèh a hinne ya. Dite mawàyà ba kurum ana ki weywim a ba ika magər kurum a tekeɗe, a riŋ a de a aka miɗ aka miɗ kamala taŋa ya mbaŋa ya. ⁴Aɗaba taŋa, i təv ana mì yahawa ba gər nda gà mburma Mbulum ŋgiɗ a ka, mì tsikewa a tar bazlam aka gər mendze kurum ana ki ndzwim a ya, nda maŋgayaba lele. Aɗaba ku mege gà mburma tar a riŋ ihər ti sèwèr a kurum a are, ti newa a kurum are hinne tekeɗe, kàa tə̀zum tsa, dafarəkrək kàa mərum aba ivaɗ. Dite megìse kurum ana kə̀ gəsum Yesuw Kiristi ya ka, a riŋ a de a aka miɗ aka miɗ mbaŋa. Maŋgayaba i təv mər hinne na taŋa ya.

⁵Taŋa na a ɗif a kwa dər parakkà, Mbulum a ti ses a ikaba seriye a gà mburma ya ka, nda ndzer ndaka vatwa ŋa ya. Agəra mesewere are kurum ata ka, sərum dər, Mbulum na a ta vile a kurum a vatwa, na dite ki slwim a aà mada a mekwere ŋgar a. Aɗaba mekwere ŋgar ata na kinehe kurum ihər ki sèwèrwim a are ya. ⁶Kaɗəŋ, Mbulum a ta ge a seriye ka, ndaka vatwa ŋa lele. Kamala megweɗe ya, a ta vile aɗəm a mesewere are a gà na tì sèwèr a kurum are ya. ⁷Dite kurum ana kinehe kurum ihər ki sèwèrwim a are ya ka, a ta vile a kwe akaba a mandza zayzay lele. Dukw ata a ta ge a ba ka, aka təv ana Yesuw Kiristi BATSAH kwa ŋa a dere a i gər ŋa i mbulum a ya. Tar nda gawla ŋgar ana gà ndzəɗa tar a riŋ hinne ya, na ti lekere a ŋgat a ya. ⁸A dere a ka, ŋgar ŋgar, nda gà akwa məvata ŋa. A ti sèwèr a dər are a gà na ti niw Mbulum a, dite nda gà na tì dze a zləm a bazlam ŋgwal ŋa ana ti ɗif a dər aka gər ŋgar a tsiye mbaŋa. ⁹Mesewere are tar ana ti ti sèwèr a ya ka, Mbulum a dzeye à ter a aà biybiy. A pele a ter a ahəm, dite na ti sle a aà mada a təv Yesuw Kiristi BATSAH kwa ŋa tsiye ya. Tar ka, ta ŋget a a ndzəɗa ŋgar ana ika gər gà duwa tserdze ya tsa. Dite ti ti ndze a i təv mezlibe ŋgar ana tì zlibe a dər a tsa asa mbaŋa. ¹⁰Gà dukw ata ti ta ge a ba kamala taŋa ya ka, a pat ana à mère a ya. A mère a ka, gà mburma ŋgar tì zlibe a à ŋgat. Gà na ta gəs ŋgat nda gəzləŋ a tserdze, a ge a ter a hayaffà i gəzləŋ, tì zèmbeɗe a à ŋgat. Ta gweɗe a, ŋgat ka, Batsah ŋa kaɗəŋ. Dite kurum tekeɗe, ika magər gà mburma ata mbaŋa, aɗaba ana kə̀ gəsum bazlam ŋgar ana mì ɗif a kurum dər a ya.

¹¹Aɗaba taŋa, mìi heme a a Mbulum kəla pat agəra kurum. Mìi hemer a ka, dite ma ne à kurum gà tsəɗaŋŋa, mendze kurum mə̀ pàt ka, ŋgwal ŋa, kamala ana ŋgat a waya, a zal a kurum a. Mìi hemer a asa ka, dite mə vəl a kurum ndzəɗa ŋgar aà mege gà dukw ana ŋgwal ŋa tserdze, a sàs a kurum ki gwim a ya. Dite nda gà megemir ana ki gwim a ka, agəra ana kə̀ gəsum ŋgat nda gəzləŋ kurum a ya. ¹²Na kàa gwim kamala taŋa ya ka, mburma tì zlibe a à zləm Yesuw BATSAH kwa ŋa, aɗaba kurum, dite tì zlibe a à kurum mbaŋa asa ka, aɗaba megemir ŋgar ana a riŋ a ge a i gəzləŋ kurum a. Gà dukw ata ti ta ge a ba kamala taŋa ya ka, aɗaba ana gà Mbulum Tsir kwa nda Yesuw Kiristi BATSAH kwa ŋa ta ge a kurum a ŋgwal ŋa ya. a

Mala mene are a Mbulum

¹Gà damər mər, kurum ihər ki vevwim a ka, pat ana Yesuw Kiristi BATSAH kwa ŋa à mère a ka, dite ki yehekwebe a gər a təv ŋgar a. Ama kəla ka, mìi ge a kurum a kamkam: ²Wàkit wàkit gər ma ta wise a kurum bise tsara tsa, na i təv ana gà mìsle ŋgiɗ ta gweɗe a kurum a ka, pat məmàra BATSAH kwa ŋa ya ka, aka ndze aɗəm kuɗa ya. Na bəla wura a ne à ba ŋgar kamala mala məma à guma Mbulum a, aka mà a kurum dər ka, magəɗa ma ta ge a kurum tsa. Kige tsa na kàa tsarakum à gà na ti tsikewa a kurum bazlam Mbulum a, nda gà bəla ta gweɗe a, iye Pul na a wetse taŋa ya ka, ka ta gəsum tsa. ³Wura ilik ma ta bana kurum tsidze. Aɗaba a pat ana à mère a ya ka, kataya tsa. Malahalah ŋa ka, say gà mburma hinne ti niw a Mbulum, nda gà wele ana a ner a are, a ti dzeye a iɗəm à ŋgat a, a dere a dzekwiŋ. Dite i dəba ŋa ya ka, pat ŋa a ndzere a kuɗa. ⁴Mala mene are ŋgar ata ka, a ge a gùvəl aà gà dukw ana gà mburma tì zlibe a dər a tserdze, ku mege nda təv Mbulum, mege nda təv dukùla tekeɗe ya. A gweɗe a ka, iye na a za gà dukw ata tserdze ya. Ama ndeyndey ŋa ka, a de a a ga Mbulum Batsah ŋana, a ti ndze a aka təv mendze ana gà mburma tì zlibe a dər a. A gweɗe a ka, iye na Mbulum a.

⁵Aka ana iye riŋ mandza ŋa i təv kurum a ka, Yàa tsik a kurum aba gà dukw ata ya dze ana, kà sərum asa tsiye? ⁶Kinehe ka, duwa a riŋ na a peler a ahəm aà madàra ya tə̀ma. Aɗaba kurum kà sərum dukw ana a ge a dər kamala taŋa ya ya. Ama i təv ana məpàslà ahər Mbulum aka ndze aɗəm a ka, mala mene are ŋgar ata a dere a kuɗa. ⁷Kaɗəŋ, ku mege kinehe, gà mburma hinne tàa mbər medzè ba aà menìwè Mbulum kamala taŋa ya. Dite kà sərakwa ndzəɗa wele ata ŋgwala tsiye a riŋ ka, aɗaba Mbulum na a ɗif a kwa dər a. Ama gà dukw ata ka, ti dere a zukw tsa. Say na wele ata a riŋ a peler a ahəm aà madàra kinehe ya, a de a iɗəm a dzekwiŋ, ⁸dite ka, mala mene are a Mbulum ata à pèt a aba kuɗa. Ama i təv ana Yesuw BATSAH kwa ŋa à mère a nda ndzəɗa ŋgar ana ika gər gà duwa tserdze ya ka, a dzeye a iɗəm à ŋgat a nda ndzəɗa mesife ŋgar ana a vizl aakara tìrr i bazlam ŋgar a kamala himbiɗ a ya. ⁹Mala mene are a Mbulum ata a dere a ka, nda ndzəɗa Əbay sitene ya. Kamala taŋa ya, a ta ge a gà dukw mene aà mburma pampam hinne, a sasar na a bene a dər mburma nda dukw pàrsa ŋgar ata ya. ¹⁰A ta ge a ka, gà dukw ana ŋgwala tsiye pampam aà məbànà dər gà na ti ti dzeye a akwa ana a mbete a tsa aà biybiy a tserdze nda dukw ŋgar ata. Ti ti sèwèr a are hinne, aɗaba ana a sàs a tar magəsa dukw ana ndzer a tsa, ti niw a. Na mege ta gəs ka, ana ka, Mbulum a mbil a à tar. ¹¹Agəra ana ta gəs ŋgat tsiye ka, Mbulum a ta vile a ter a madzala gà gər ana ŋgwala tsa hàɓəragawwa, a bene a tar aà ta gəs dukw pàrsa ata ya. ¹²Aɗaba taŋa na seriye Mbulum a ta gis a gà na ta gəs dukw ana ndzer a tsa, ta ŋgeye a ba ka, aà mege dukw ana ŋgwala tsa tserdze ya.

Mbulum a pala kurum ka, aà mə mbala à kurum

¹³Ama kurum kinehe ka, gà damər mər, say mìi ge a kəkaaha a Mbulum kəla pat, aɗaba kurum. Ŋgat ŋa na waya kurum a. Aɗaba a pala kurum ka, daga aà gər ana aka ge gər ahəɗ zukw tsiye, na dite ka, a mbil a à kurum nda ndzəɗa Mezite Mesife ŋgar ana a ne à kurum gà mburma ŋgar a. A mbil a à kurum ka, aɗaba ana kə̀ gəsum dukw ana ndzer a mbaŋa ya. ¹⁴Mbulum a zal a kurum ka, i təv ana mì ɗif a kurum à bazlam ŋgwal ŋa ana aka gər Yesuw Kiristi ya ya. A sasar ka, ki ŋgeywim a ba agəra ndzəɗa Yesuw Kiristi BATSAH kwa ŋana ika gər gà duwa tserdze ya mbaŋa. ¹⁵Aɗaba taŋa, gà damər mər, mərum aba nda təv megìse kurum ana kə̀ gəsum Yesuw Kiristi nda gəzləŋ a. Dum dər aka miɗ aka miɗ nda metìkè madzala gà gər aka dukw ana mì ɗif a kurum dər a. Ku mege mì tsik a kurum nda bazlam, nda gà ku mege mì wetse a kurumaha aka wakita tekeɗe ka, gəsum, tikwim a gər lele.

¹⁶Aɗaba Mbulum Tsir kwa a waya kwa. A ge a kwa ŋgwal ŋa. A vəl a kwa madzala gà gər aka ŋgwal dukw ana ka sərakwa, ki ta ŋgetekewe a aka miɗ mba ndzer a. Kamala taŋa ya, a riŋ à me a kwe a dərraha à arəv hiywe. Mìi hemer a ka, a tar nda Yesuw Kiristi BATSAH kwa ŋa, ¹⁷na dite ta me a kurumehe a à arəv, ta vile a kurum a ndzəɗa aà mege dukw ana ŋgwal ŋa ya kəla pat, nda metsìkè dukw ana ŋgwal ŋa ya hiywe mbaŋa asa.

Hamum a Mbulum aɗaba mər

¹Gà damər mər, naha ka, dukw ana mì ndìv a dər à bazlam aaha ya: Hamum a Mbulum aɗaba mər mbaŋa, dite na bazlam BATSAH kwa ŋa a de a aka miɗ bise tsara, mburma ta gis a nda megèr kəkaaha kamala ana a ge ba i təv kurum a mbaŋa ya. ²Dite hamum a Mbulum asa mbaŋa ka, ma kasla mər i təv gà mburma ana metsehe tar manəsa ŋa, ta ge a mər a dukw ana ŋgwala tsiye ya. Aɗaba gà mburma tserdze tsa na ta gis a bazlam Mbulum a.

³Ama BATSAH kwa ŋa a ge a kurum a dukw ana a tsik i sida ya hiywe. Ŋgat ka, a vile a kurum a ndzəɗa a gəzləŋ kurum ɓəŋɓəŋ lele. A kesle a kurum i təv Əbay sitene ya asa mbaŋa, na dite à mbè aà kurum a asa tsiye. ⁴BATSAH kwa ŋa ka, a riŋ à zlèk a mər mbaŋa, na dite mìi gis a kurum lele, mì sir a dər ka, kurum ihər ki gwim a ka, dukw ana mì ɗif a kurum dər a haa kinehe, dite ki ta gwim a hiywe kamala taŋa ya mbaŋa asa ya.

⁵Mìi heme a a BATSAH kwa ŋa, dite ma ɗif a kurum à vatwa, aà metsereke meme na Mbulum a waya kwa lele ya, dite nda mesimeha a mesewere are kamala Yesuw Kiristi ana a simereha mbaŋa ya.

Ku mege weke ma ge megemir lele

⁶Gà damər mər, mìi tsik a kurum a ka, nda zləm Yesuw Kiristi BATSAH kwa ŋa, mər ihər mìi gweɗe a kurum a ka: Ka ndzum i təv ilik ŋa nda gà asiŋ gà mburma Mbulum ana rìmme ti ndze a gà màsar ŋa, a sàs a tar megemir tsiye tsa. Aɗaba tar ka, ta gəs dukw ana mì tsik a kurum a tsa. ⁷Aɗaba kurum nda gər kurum ka, kà sərum mendze mər ana mì ndza i təv kurum akahər ata ya. Ama ka, lele na ki gwim a kamala mər ata ya. Aɗaba mər ka, gà màsar ŋa tsa. ⁸Kwets maa zəm dukw mezime aà gà mìsle ŋgiɗ a taf masakəŋa ɓav tsa. Ku mege ndaàvəɗ, ku mege ndaàpat tekeɗe, maa yà ba aà megemir ka, hinne na aà magàlà dər ba mər a. Aɗaba a sàs a mər na mì sèwèr a kurum are agəra dukw ana mìi zim a ya tsa. ⁹Mege dukw ata mì ge dər kamala taŋa ya ka, ana ka, mìi sle a aà mewize aà kurum a dukw mezime zləmana dukw ŋgar, bakal iɗəm tsa. Ama ka, mì ge megemir seyiŋ ivaɗ, aà meɗìfè a kurum dər ka, dite ki gwim kamala taŋa ya mbaŋa. ¹⁰Akahər ana mər mandza ŋa a riŋ i təv kurum a ka, maa tsik a kurum, mì gwaɗa a kurum ka: «Na wura a waya mege megemir tsəka, ma zəmawa dukw mezime ɓav tsa mbaŋa.»

¹¹Mì tsik a kurum kataya ka, aɗaba na mì tsaraka ka, ta gwa là, gà mìsle ŋgiɗ ika magər kurum ka, ŋgəɗatstsa ti ndze a kataya, a sàs a tar megemir tsidze. Ama na a ne megemir tar ka, tsap tsap mandàbàya aka bazlam. ¹²Medzìbe gà mburma ata ka, mìi pele a ter a ahəm nda zləm Yesuw Kiristi BATSAH kwa ŋa, mìi gweɗe a ter a ka, say ta ge megemir ndaka vatwa ŋa, dite ta ŋget a dukw mezime tar ana ti zim a nda ahər tar a ya.

¹³Ama kurum gà damər mər ka, dum aka miɗ aka miɗ nda mege dukw ana ŋgwal ŋa ya, ka ti yum ba tsidze. ¹⁴Na bəla wura a sasar magəsa ahəm aà dukw ana mì wetse i huɗ wakita aaha ya tsəka, sərum dər, wele ata ka, ka tə ndzum akaba i təv ilik ŋa nda gà ŋgat asa tsa, na dite ka, hwarwa a ger a ya. ¹⁵Ama kə̀la ka, ka ta fə̀rum aà ŋgat kamala mala mene are are kurum a tsa. Ki tsikwimer a ivaɗ ka, aɗaba ana ŋgat damər kurum a hiywe ya.

Mandəvandəv mifefile

¹⁶Mìi heme a a BATSAH kwa ŋana ŋgat mala məvəla zayzay a mburma ya, dite mə vəl a kurum matasla yam a gəzləŋ kəla pat ndaka vatwa ŋgiɗ pampam. BATSAH kwa ŋa ma ndza nda gà kurum tserdze.

¹⁷Iye Pul, i ge a kurumaha wusa. I wetse naha ka, nda ahər gà ŋa. Aɗaba i wetsewa zləm gà aka mandəvandəv wakita tserdze ka, kataya. Naha ka, mewetse dukw gà.

¹⁸Yesuw Kiristi BATSAH kwa ŋa ma ge a kurum ŋgwal ilik ilik tserdze kəla pat.