2 PIYER

MASULA

wakita ana

PIYER

a wetse ya

Wusa Piyer ana a ge ya

¹Na a wetse a kurumaha wakita aaha ka, iye Simun Piyer ana iye mala megemir Yesuw Kiristi ana i gewar meslire ya. I wetseha wakita aaha ka, a kurum ana kà gəsum Yesuw Kiristi nda gəzləŋ kurum tserdze, kalkal kamala mər ana mì gəs ŋgat mbaŋa ya ya. Vatwa megìse ata ka, dukw ŋgwal ŋa. Yesuw Kiristi a vəl a kwa vatwa ata ka, dite ku weke mà gəs ŋgat. Aɗaba ŋgat ka, mala ndzer ŋa, a wele a ikaba mburma ya tsa. Ŋgat ka, Mbulum, a mbəl à kwa i bakal kwa ya.

²I heme a a Mbulum, dite mà səkah a kurum à masəra ba kurum nda gà Yesuw Kiristi BATSAH kwa ŋa aka miɗ aka miɗ. Kamala taŋa ya, a pise a kurum a ahəm, à sìkèh a kurum a dər, a vile a kurum a matasla yam a gəzləŋ kurum mbaŋa.

Mede gà mburma Mbulum ana ti de a ya

³Kà sərakwa Mbulum ana a zal a kwa ya ka, aɗaba Yesuw Kiristi. A zal a kwa ka, na dite kə̀ ŋgatakwa magàwà akaba a təv mezlibe ŋgar ana tì zlibe a à ŋgat, ki zezemekwe a mendze ŋgar ana ŋgwal ŋa, a za gà dukw tserdze ya mbaŋa. Kamala taŋa ya, ŋgat nda ndzəɗa ŋgar ana hinne ya, a vəl a kwa dukw ana a sle aà kwe a tserdze ya, na dite araha, kə̀ ŋgatakwa mesife ana awiya ŋa ya, ki zezemekwe a ŋgat lele kamala ana a tsahən ahər mbaŋa ya. ⁴Kamala taŋa ya mbaŋa asa, a vəl a kwa gà dukw gà bàba ŋa ana akahər ata a tsik i sida ya, a gwa, i ta vile a kurum a ya. Gà dukw ata ka, ŋgwal ŋa ndzer, duwa a riŋ kamala taŋa ya tsidze. A ge kataya ka, dite ki beywim a aà dukw meèweke ana ŋgwal ŋa tsa ika gər ahəɗ, a bene a mburma ya, na dite ka, ki zlwim a ba ŋgar ŋgwal ŋa lele tsəɗaŋŋa ivaɗ a.

⁵Aɗaba taŋa, iye ihər i gweɗe a kurum a ka: Yahum vatwa nda ndzəɗa kurum fit, dite magəsa Yesuw Kiristi ana kə̀ gəsum a ka, mà səkah a gəzləŋ kurum, mə̀ pàt à mede kurum ana ŋgwal ŋa ya mbaŋa. Na kàa zazamum aka miɗ aka miɗ kataya ka, yahum vatwa aà mene gà ɓəzla metsehe mbaŋa asa. ⁶Ama ka, metsehe ɗekɗek tsa. Gəsum gəzləŋ i təv duwa ya tserdze mbaŋa. I təv ana kurum ihər ki kwerwim a ba kurum kamala taŋa ya ka, mərum aba. I təv məmərà aba kurum ata ya tekeɗe ka, gəsum ahəm aà Mbulum lele. ⁷Na kàa hənum à gər a bəɗ ka, wayum ba lele, aɗaba kurum ka, nda gà damər na ika vatwa Mbulum a. I təv mawàyà ba kurum ata ya mbaŋa ka, wayum gà asiŋ gà mburma ilik ilik tserdze mbaŋa. ⁸Na kàa gwim gà dukw ata aka miɗ aka miɗ kataya ka, mesire kurum ana ki sirwim a Yesuw Kiristi BATSAH kwa ŋa ya ka, à sìkèh a a gəzləŋ kurum, dite mendze kurum ana ki ndzwim a ya ka, à pèt a à dukw ana ŋgwal ŋa ya mbaŋa. ⁹Ama na wura a ge a gà dukw ata tsəka, a sər BATSAH kwa ŋa tsa. Ŋgat a ne ka, kamala mala guluf ana a ŋget a a duwa ka, zimirmir pəra ya. Ŋgat ka, məpəla à bakal ŋgar ana Mbulum a pə̀lar dər piŋŋe ya ka, aka mətsar gər na taŋa ya.

¹⁰Aɗaba taŋa, gà damər gà, mərum aba, ka miyakum à mege gà dukw ata tsidze, aɗaba mezele ana Mbulum a zal a kurum, a pala kurum a ka, ki gwim kataya. Na kàa gwim gà dukw ata ka, ki dzeywim a ika vatwa Mbulum a tsidze. ¹¹Kamala taŋa ya kaɗəŋ ndzer, Mbulum a ta vile a kurum a vatwa aà mada a mekwere Yesuw Kiristi BATSAH kwa ŋana a kwere a ya, dite ŋgat na mala məmbə̀là à kwa ya mbaŋa. Mekwere ata a ndze a ka, aà biybiy.

¹²Aɗaba taŋa na a sèsiŋ məma a kurumaha à gà dukw ata a gər kəla pat, dite ka, ka dzalum aaka gà gər a. Ku mege kà sərum, kàa zazamum gà bazlam ata ti ɗif a kurum dər nda ndzer a tèrihhwè tekeɗe. ¹³Ama na mesife gà a riŋ mba kamala naha ya ka, lele na i me a kurumaha a à gà dukw ata a gər, na dite ki ndzwim a are tsiye. ¹⁴Aɗaba i sər ka, mandza aà bəra gà a riŋ hinne asa tsa, na i miyek a à gər ahəɗ, i mìt a ya, kamala ana Yesuw Kiristi BATSAH kwa ŋa a tsikiŋ akahər ata ya. ¹⁵Aɗaba taŋa na i yehe a vatwa nda ndzəɗa gà fit dze, aà mege gà dukw ana Yàa sle ahər a tserdze, na dite ka, ki slwim a aà matəkəra aà gà dukw ata ya. Ta məts a kurum gər tsa, ku mege i dəba məməta gà tekeɗe ya.

Gà na ta ŋgat ndzəɗa Yesuw Kiristi ana ika gər

gà duwa tserdze ya

¹⁶Akahər ata ka, maa ɗif a kurum à ndzəɗa Yesuw Kiristi BATSAH kwa ŋana a ta mère a ya tserdze. Gà dukw ata mì tsik a kurum a ka, kamala ahəm hiyeŋ ana gà mburma ti ɗemere a ika arah a birek birek nda metsehe tar taf masakəŋa ya tsa. Ama mər ŋa nda ahər mər na mì ŋgatar parakkà nda ndzəɗa ŋgar ana ika gər gà duwa tserdze ya dukw ŋgar. ¹⁷I təv ana Mbulum Tsir ŋgar a zàmbaɗa à ŋgat, a vəlarra ndzəɗa mezlibe ana tì zlibe a à ŋgat a ka, mər riŋ i təv ŋgar i fata mbaŋa. Mbulum ana ŋgat mala ndzəɗa, a za gà dukw tserdze ya, a gwaɗarra: «Naha ka, Kəla gà ana mandərkwasla ŋa, i zla ŋgat a. Maŋgayaba gà fit dze ka, ika gər ŋgar.» ¹⁸Mər ŋa nda zləm mər na mì tsarakara mifefile ata i gəza mbulum a ya, i təv ana mər mandza ŋa nda gà ŋgat ika miɗ Mbulum i gər kwite ata ya.

¹⁹Taŋa ka, a səkah a kwa à magəsa dukw ana gà ɓəzla məma à guma Mbulum ti tsik akahər ata ya asa. Ama kinehe ka, gwim metsehe aà mandza zləm a bazlam tar ata lele, aɗaba a ndzikiɗ ba ka, kamala lalampa ana à pèt a à dzaydzay i təv luvuŋ a. Ki dzwìm a zləm ka, haa a pat ana à mbizere a ya. A pat ata ka, a ge a i gəzləŋ kurum parakkà kamala *mawusawus madə̀và mbulum ana à div a ya. Kamala megweɗe ya ka: Kiristi na a dere a nda gà dzaydzay ŋgar ata à wìtiɗe a i gəzləŋ kurum a.

²⁰Ama dukw ana a sèsiŋ metsike a kurum ndeyndey a ka, araha: Bazlam ana gà ɓəzla məma à guma Mbulum ti tsik akahər ata ya ka, ta wetse i wakita Mbulum, ta gwa, wura ilik a sle a aà masəra ŋa nda metsehe ŋgar tsa. ²¹Aɗaba gà bazlam tar ata tserdze ya ka, a dara ka, i metsehe mburma ya ilik tsidze. Mezite Mesife Mbulum na a da a gəzləŋ tar a, na dite ti tsik dukw ana tə tsaraka i təv Mbulum a ya.

Mege metsehe agəra gà ɓəzla pàrsa

Yuda 4-13

¹Akahər ata ka, gà ɓəzla məma à bazlam Mbulum ana nda pàrsa ya ka, tar riŋ ika magər gà mburma Mbulum gà Isərayel hinne. Ama kinehe ka, gà ɓəzla pàrsa ti ti ɗe a aba ika magər kurum kataya mbaŋa. Ti dere a, ta pèt a aba ka, nda wirwir, na ti dzeŋge a guma pàrsa tar ana ti dzeye a dər à mburma ya. Ti niw a Yesuw Kiristi BATSAH kwa ŋana a mbala à tar i bakal tar piŋŋe ya. Aɗaba gà dukw ata ta geye a kataya ka, seriye Mbulum a ta gis a tar ka, bise tsara, a dzeye à ter a fit kweleŋ. ²Gà mburma hinne ti ti zezem a vatwa tar ana ŋgwal ŋa tsiye. Aɗaba taŋa na gà mburma ana tə sər Mbulum tsiye, ti ti tsik a dukw ana ŋgwal ŋa tsiye aà vatwa Mbulum ana ndzer ŋa ya. ³Gà ɓəzla medzeŋge a mburma nda pàrsa ata ka, ta geye a are aka dukw mburma hiywe pəra. Ta bene a kurum nda wirwir, tì ses a pàrsa, na dite ki dzwìm a ter a siŋgwe ya. Daga piŋŋe, Mbulum ana ŋgat mala masàsà ikaba seriye mburma ya ka, aka hadzal ba aà mege a tar seriye. Pat ana a dzeye a à tar fit a ka, aka à mendze aɗəm.

⁴Ku mege gà gawla Mbulum ana ta ge bakal akahər ata ya tekeɗe ka, Mbulum aka məlak à tar kataya tsa. A gasa tar, a dza tar a akwa ana a mbete a tsa aà biybiy a. Tar ka, mandza ŋa i luvuŋ ana tìtìktìkka ya. Ti ndze a i fata, haa a pat ana Mbulum a ge a ter a seriye ya. ⁵Gà mburma ana akahər ata ta ge bakal a ka, Mbulum aka miyak à tar ɓav tsa asa. Ama a slərra batsah yam aka gà mburma ata ta gəs ŋgat tsiye. A rah aka gər ahəɗ peɗik peɗik, ti dzeye aɗəm fit. A mbala iɗəm a ka, à gà mburma tsamakər a ɗekɗek pəra. Gà Nuhu ana a tsikewa bazlam ŋgar a mburma ya, dite ka, a waya tə zazam vatwa ŋgwal ŋa, tar nda gà mburma ana i ga i ma ŋgar təsəla ya.*fa* ⁶Ama gà kwite ata tə zal a tar gà Suduma nda Gumura ya tekeɗe ka, i təv ana gà mburma ana i fataya, ta ge bakal a ka, Mbulum aka gəs tar a seriye mbaŋa. A wànà hilɓèk hilɓèk ika ahəɗ ata ya fit. Say na a zeha ka, bitekwe ŋa pəra.*fb* Kamala taŋa ya, a pàt dər kataya ka, dite gà mburma tə̀ samata, meme na a ta ge a seriye a gà na ta gəs ahəm ŋgar tsa tserdze ya. ⁷Akahər ata a mbəl à mburma ka, ilik pəra. A mbəl ka, à Ludu, agəra ana ŋgat ŋgwal ŋa ika miɗ ŋgar a. Ama gəzləŋ a wurawa aà ŋgat hinne, agəra dukw ana gà mburma ata i fata, ta gewa ŋgwala tsiye. ⁸A ndzawa ka, i liwiŋ gà mburma ata gà ŋgwal ŋa tsiye. Kəla pat a ŋgatawa a bakal tar ana ta gewa ya, nda mezelme bazlam ana ti tsikewa ya. A wur aà ŋgat i gəzləŋ turturtur hinne, aɗaba ana ŋgat ka, mala ndzer ŋa ya.

⁹Gà dukw ata ta geye ba akahər ata ya ka, ti ɗif a kwa dər ka, Mbulum a səraba dukw ŋgar, meme na a ta mbele a à gà mburma ŋgar i mesewere are tar ana tì sèwèr a ya. Ama a ɗif a kwe a dər asa ka, a sər dər, meme na a ta vile a mesewere are a gà na ta ge a dukw ana ŋgwal ŋa tsiye ya. A veve a dər haa a pat ana a ta ge a ter a seriye ya. ¹⁰Ama a ta vile a mesewere are ata ndeyndey ŋana ka, a gà na ta gewa dukw ana ŋgwal ŋa tsa, ti niw dər bazlam Əbay Mbulum a, ta waya mezezeme ka, dukw meèweke ba tar ɗekɗek a.

Ga ɓəzla medzeŋge bazlam ata a mburma nda pàrsa ya ka, ta gewa magəɗa a wura tsidze. Ti ndze a ka, ŋgakŋgakəkka, tì sìŋgìr a à gər tar ka, hinne. Ta ge a magəɗa a gà dukw ana i gəza mbulum, gà ndzəɗa tar a riŋ hinne ya tsa asa, ti sewle aà teriŋa. ¹¹Ku mege gà gawla Mbulum ana tə za gà ɓəzla medzeŋge bazlam Mbulum aaha nda pàrsa ya tekeɗe ka, ti sewle aà ter a ika miɗ Mbulum ɓav tsa. ¹²Ama gà mburma ata ta gewa ka, dukw ana nda madzala gà gər tar taf masakəŋa ya. Tar ka, kamala gà dukw dala ana ta weye a gà ɓəza, dite gà mburma ta gese a aà mibetseye ya. Ti tsik a dukw ana ŋgwal ŋa tsiye, aà gà dukw ana tə sər tsiye mbaŋa asa. Mbulum a ta bets a tar tìteh tìteh aà bəra ya kaɗəŋ, kamala na gà mburma ta batsawa gà dukw dala ata ya. ¹³Mbulum a vile a ter a mesewere are kamala na tar ti sèwèr a gà mburma ya mbaŋa.

Gà mburma ata, a sàs a tar ka, mazəma gər ahəɗ, nda mazazama meèweke ba tar ɗekɗek pəra. Ku mege nda pat ndərzayya ika miɗ mburma tekeɗe ka, ta ge a kataya pəra. Mendze tar ana ti ndze a ŋgwal ŋa tsiye ka, à nis a à zləm kurum. I təv ana tar mandza ŋa i təv kurum, ki zimwim akaba a dukw mezime i təv ilik ŋa ya ka, ti ndeɗe aka kurum a hwarwa masakəŋa. Ta bene a kurum nda wirwir. Tar ka, ta ŋgeye a ba hinne, agəra mibene tar ata ta bene a kurum a. ¹⁴Tar ta waya ka, məfə̀rà aà gà məkəs ɗekɗek pəra. Meèweke ba a be a tar i ba tar ka, hinne. Mege bakal a tsahən aà tar ka, hinne, ti ye a ba tsidze. Tàa ŋgat a wur ana ika vatwa Mbulum, ndzəɗa ŋgar a riŋ tsiye ka, ta bene a ŋgat, dite mà dəɗ a bakal kamala tar a mbaŋa. Tar ka, tàa mbər mesinike ba à mege are aka dukw mburma, nda mege pərzəz hiywe pəra. Medzìbe gà mburma ata ka, seriye Mbulum ika gər tar ndzer. ¹⁵Tar ka, tàa məsak à vatwa Mbulum, tə sər dukw ana ta ge a ya asa tsa, tàa dzeye. Tar ti zezem a ka, vatwa Biliyam, kəla Bawur, mala məma à guma Mbulum ana akahər ata ya. Akahər ata ka, Biliyam, ŋgat a sasar mege dukw ana ŋgwal ŋa tsiye ka, hinne, na dite a ŋget a siŋgwe ya.*fd* ¹⁶Ama Mbulum a palar ahəm, a ɗifer à metsehe, agəra ana a gəs ahər ahəm tsiye. Aɗaba hezweŋe ŋgar a fàfəlar kamala mburma ya. Ku mege hezweŋe a fàfəlawa tsa tekeɗe ya ka, aka fàfəlar, na a pat ata ya. A hə̀ndə̀k a vatwa a mala məma à guma Mbulum ata, dite ka, ma ta ge dukw gà welewele ata asa tsa.

¹⁷Gà mburma ata ti dzeŋge a bazlam pàrsa ya ka, ta bene a mburma. Tar ka, ti ndzikiɗ ba kamala biye yam ana ndèwsèlèŋŋe yam aka se iɗəm a ya. Dite ka, ti ndzikiɗ ba asa ka, kamala hulɓukw ana himbiɗ à sìweye a dər aà gəza mbulum pakàr pakàr masakəŋa, yam à dzer a iɗəm a tsiye ya. Ama tar ka, Mbulum aka làmbaɗa tar təv mawùràba ŋa ana i luvuŋ tìtìktìkka, are a da aba ya tsiye. ¹⁸Tar riŋ tì sìkèh a à ba tar ika miɗ mburma nda metsìkè aà tar bazlam ana taf masakəŋa ya. Ta bene a dər gà mburma ana kinehe tar riŋ ihər ti dere a i liwiŋ gà na mandza ŋa i luvuŋ, tə sər Mbulum tsiye, nda gireŋ a asa. Aɗaba a sàs a tar ka, tə dara a təv tar a, ta ge dukw ana gà meèweke ba tar ana ta gewa ya mbaŋa. ¹⁹Ta gweɗe a a gà mburma ata ka: Mìi vile a kurum a vatwa ana ki ziwwim a gər kurum a kuɗa. Ama tar ŋa ka, gà ɓele bakal, ti ziwe a ger tar ɓav tsa. Aɗaba kurum kà sərum, dukw ana a kwere a mburma ya, na a ne a ɓele à mburma ya. ²⁰Na wura a sər Yesuw Kiristi BATSAH kwa ŋana a mbil a à kwa ya ka, aka be aà gà dukw ana ŋgwal ŋa tsa ika gər ahəɗ, à nis a à mburma ya. Ama zàkwayiya ka, à mbìɗ a gər aka mege dukw ata ŋgwal ŋa tsiye, dite gà dukw ata ta kwere a ŋgat asa ana, meme? Kamala taŋa ya, mandəvandəv mendze ŋgar ana i dəba taŋa ya ka, ŋgwal ŋa tsa ndeyndey, à zè a dukw ana ŋgwal ŋa tsa, a ge akahər ana a sər Yesuw Kiristi zukw tsiye ivaɗ. ²¹Na kataya ka, ŋgulum na ma sər vatwa ana ndzer ŋa ya tsidze ya, ndəna a sər vatwa ana ndzer ŋa ya lele ka, dite i dəba ŋa ya, a məsak dər aba ya, a gəs ahəm dukw ana Mbulum a tsiker a asa tsiye ya. ²²Dukw ata a le a aà medzibe gà mburma ata ya ka, kamala ana ti tsik i huɗ bazlam minew ata ya kaɗəŋ. Ta gwa ka: «Kəra aka vənaha ka, kə̀ɗats kə̀ɗats à meh a à dukw ana a vənaha ya.»*fe* Ta gwa asa ka: «Tàa bara wèdèlìŋ lele ka, à mbìɗ a gər a dùluɓ, a mbeɗe aɗəm a aba tambàlum tambàlum asa.»

Mimèra Yesuw Kiristi ana à mère a ya

¹Gà masla gà ana i waya kurum hinne ya. Araha naha ka, wakita masula ŋa ana i wetse a kurumaha ya. I huɗ gà wakita ata sula ya ka, a sèsiŋ məma a kurumaha a gər ka, à gà dukw ana kàa mbər mesirwim a, na dite ki dzelwim aaka gà gər lele asa ya. ²I wetse bazlam ata ka, a sèsiŋ dukw ana gà ɓəzla məma à guma Mbulum ti tsik akahər ata ya ka, mə̀ məts a kurum gər tsa. Gà biy ŋgiɗ tsa dukw ana Yesuw Kiristi BATSAH kwa ŋana mala məmbə̀là à kwa a tsik a kurum a ka, mə̀ məts a kurum gər tsa, mə̀ mà a kurumara a gər a asa. A tsik a kurum bazlam ata ka, nda ahər gà ɓəzla meslire ŋgar ana a sləraha tar a təv kurum a.

³Dukw ana i tsik a kurumaha malahalah ŋa ya ka, wur bazlam. Sərum dər lele, mə̀ məts a kurum gər tsa asa: I təv ana gər ahəɗ à ndìv a ya ka, gà asiŋ gà mburma ana ti zezem a gà dukw meèweke ba tar ɗekɗek a ka, ti dere a, ti sewle aà kurum ŋa. ⁴Ta gweɗe a kurum a: «Aàla na Yesuw Kiristi a gwa, i mère a ka, aka màra kamala ana a tsik a tsiye? Araha, gà tsir mər tàa mata ka, ŋgat aka màra tsəna, meme? Aɗaba dukw ana ika gər ahəɗ tserdze ya ka, hiywe, kamala ana piŋŋe akahər ana Mbulum a ge ya dukw ŋgar, haa kinehe duwa aka mbəɗ ilik tsidze ana, aàla?»

⁵Gà mburma ata ti tsik bazlam ata kataya ya ka, a sàs a tar masəra dukw ana akahər ata Mbulum a ge ya tsa. Kamala megweɗe ya: Mbulum a ge gəza mbulum nda gər ahəɗ ka, nda bazlam ŋgar ata a tsik a. A lah mege gər ahəɗ ka, nda yam. Dite a vəl a ba vatwa a gà yam nda ahəɗ pampam kuɗa. ⁶Nda yam ata asa mbaŋa na siyèkw Mbulum a dzeye à gər ahəɗ akahər ata ya. Yam ata ka, batsah yam ana a rah aka gər ahəɗ fèɗìɗe, mburma ta mata aɗəm a. ⁷Ama gər ahəɗ nda gəza mbulum ana kinehe ya ka, ti ndze a ɓav tsa. Tits a təv ana Mbulum a tsik a ka, a wene a nda akwa hilɓèk hilɓèk kuɗa. Aɗaba kinehe ka, Mbulum a waya mandza zaakwa tə̀ma, haa a pat ana a ta ge a seriye a gà mburma tserdze, a bets a iɗəm gà na ta gəs ahəm ŋgar tsiye ya.

⁸A kurum gà masla gà ana i waya kurum hinne ya. Duwa ilik ma ta məts a kurum gər, kù gwaɗum ka, gà pat ilik nda mive dəbuw ka, tə za ba làŋa diriŋ a tsa, na ika miɗ Mbulum a. Aɗaba tar ka, ilik. ⁹Gà asiŋ gà mburma ŋgiɗ ihər ta gweɗe a: «Mbulum ka, mala mèhìnèkw, a dere a bise tsa, aɗaba dukw ana a tsik i sida ya, a gwa, i ge a ya ka, a ge a ba bise tsa ana, meme?» Ama ka, kataya tsa, a riŋ a ge a mba dukw ŋgar. A veve a ka, kurum seyiŋ ivaɗ. Aɗaba a sasar ka, a ze a kurumaha aà mendze kataya ka, ki mbiɗwim a à madzala gà gər kurum, wura ilik ma dzeye tsa. A waya mburma tserdze ta mbəɗ à gəzləŋ tar, ta miyak à bakal tar ivaɗ. ¹⁰Ku mege kataya tekeɗe, pat ŋa aka ndze aɗəm ka, Yesuw Kiristi BATSAH kwa ŋa à mère a ndzer, pàrsa iɗəm tsa. A mère a kəla ka, kamala mala akəl ana sèrèh a dere a ka, wura a sir ahər a tsiye. A pat ata ka, gà mburma ti tsereke a meɗè gà dukw ana a ɗe a ŋgùzlàr ŋgùzlar kamala malaka mbulum a, na gəza mbulum à ndìv a ya. Akwa a wene a gà dukw ata tserdze gà madzàvà ŋa aà gəza mbulum a, sirikw sirikw. Dite gà ahəɗ nda gà dukw ana ikəka tserdze ya tekeɗe ka, ndìrɓek ndìrɓek a weniŋa.

¹¹Na gà dukw ata tserdze ya, tì ndìv a kataya ka, gwim metsehe lele na i təv mendze kurum ana ki ndzwim a ya. Ama say ki ndzwim a ka, tsəɗaŋŋa lele. Zazamum nda gəzləŋ kurum ilik. Gəsum ahər ahəm nda təv gà duwa tserdze. ¹²Vavum pat ana Mbulum à mère a ya, kəla pat. Gwim mege megemir ŋgar tserdze lele, na dite à mère a bise ya. A pat ata ka, gəza mbulum a wene a sirikw sirikw, fit a nisiŋa. Dite mawusawus ana gà madzàvà ŋa aà gəza mbulum a ka, wàfùfùfùffa ta wilezliŋa, a tèkwe a, duwa ilik a zehe a tsidze. ¹³Ama ka, Mbulum a tsik i sida ya, a gwa: «I ge a gəza mbulum awiya ŋa, nda gər ahəɗ awiya ŋa asa mbaŋa.» Na a ndze a i fata ka, gà na ta ge a dukw ana ŋgwal ŋa ndzer a ɗekɗek. Taŋa na dukw ana ki sirwim a dər ka, a dere a ndzer, ki vevekwe a ya.

¹⁴Aɗaba taŋa, a kurum gà masla gà ana i waya kurum hinne ya. I tsik a kurum a ka, a kurum ana kurum riŋ ihər i vevwim a pat ana Yesuw Kiristi à mère a ya ka: Mərum aba nda ndzəɗa kurum fit dze, na dite mendze kurum ana ika miɗ Mbulum a ge a ŋgwal ŋa, ələk a fata ka, bakal a ge a i təv kurum tsidze ya. Sərum ba nda gà ŋgat i gəzləŋ kurum zayzay lele. ¹⁵Sərum dər ka, Yesuw Kiristi BATSAH kwa ŋa à mère a bise tsəka, aɗaba aka vəl a kwa vatwa ana a sasar ki mbìɗekwe a à gəzləŋ kwa, dite a mbele a à kwa ya. Pul, damər kwa ana kà waya kwa ŋgat hinne ya tekeɗe ka, aka dzeŋge a kurum dukw ata i huɗ wakita ŋgar a mbaŋa kaɗəŋ. A tsik ka, nda metsehe ana Mbulum a vəlar a. ¹⁶A tsikewa taŋa ka, kəla pat na a wetse aka gər gà dukw ata i huɗ gà wakita ŋgar a. Ama kəla ka, dukw ŋgiɗ a riŋ i huɗ gà wakita ŋgar ata ka, mawùràba ŋa, a tsereke a ba bise tsa. Gà mburma ata tə səraha duwa tsa, gəzləŋ tar a ndze a wèkit wèkit a ka, ta mbìɗ a à dukw ana bazlam ata a sasar aà megweɗe ya. Ti dzev aaka a ka, wìrɗìɗìɗe nda pàrsa. Ta ge a dər ka, kamala ana ta gewa à gà asiŋ gà bazlam ana i wakita Mbulum a mbaŋa. Kamala taŋa ya, tar ka, ta bets a ba tar nda ahər tar ŋa.

¹⁷Ama ka, a kurum gà masla gà ana i waya kurum hinne ya: Yàa tsik a kurum aba ya. Aɗaba taŋa, gwim metsehe lele, tsəka, gà mburma ata ta gəs ahəm aà Mbulum tsiye ka, ta bene a kurum aà mazazama dukw bakal tar ata, dite ka, ka miyakum à təv mendze kurum ana ŋgwal ŋa, a ɓezle a tsiye. ¹⁸Ama kurum ivaɗ ka, dum aka miɗ nda mazazama Yesuw Kiristi BATSAH kwa ŋana ŋgat mala məmbə̀là à kwa ya, na dite a ge a kurum a ŋgwal ŋa nda mesire kurum ana ki sirwim a ŋgat a ka, à sìkèh a aka miɗ aka miɗ bə̀ba ŋa. Mezlibe ŋgar ana gà mburma tì zlibe a à ŋgat a ka, tə̀ zlə̀b dər daga aà kinehe ya, haa aà biybiy. *Amin.