1 TIMUTE

MALAHALAH

wakita ana Pul a wetseha

a TIMUTE ya

¹Na a wetse wakita aaha ka, iye Pul, mala meslire Yesuw Kiristi. Gà Mbulum, mala məmbə̀là à kwa, nda Yesuw Kiristi ata, wele ana kà sərakwa nda madzala gà gər kwa ka, a ta ge a dukw ana aka mbər metsìkè a kwa ya, na tə slərra iye ya ya. ²I wetseha wakita aaha ka, a kər Timute ana kà ne kəla gà ndzer a, aɗaba kàa gəs Yesuw nda gəzləŋ yak ilik.

Gà Mbulum Tsir kwa nda Yesuw Kiristi BATSAH kwa ŋa ta gik ŋgwal, ka ndza a tar are tsehe, dite ta vəlak matasla yam a gəzləŋ zayya lele.

Mege metsehe a gà mburma ana ti dzeŋge a duwa ka,

nda pàrsa ya

³A sèsiŋ ka, na ki ndze a riŋ i Efesiya ya, Timute, kamala ana i tsikik piŋŋe akahər ana i məsak riŋ à kər, i da aka ahəɗ Makaduniya ya. Ndza riŋ i fata, dite ka palawa ahəm a gà mburma ana tar riŋ i fata, ti tsik a bazlam Mbulum a mburma ndaka vatwa ŋa tsiye ya. ⁴Ki gweɗe a ter a asa ka, ta miyak à gà bazlam ana taf masakəŋa, ti tsik a i madzala gà gər tar a. Dite tə tə dzala gà gər aka gər zləm gà tsir tar ana akahər ata ya tsa. Ŋgulum ŋa a riŋ tsa. Aɗaba na tàa zazam bazlam tar ata ka, manəsa bazlam à sìkèh a ika magər tar hinne asa. Gà bazlam ata ka, kwets a riŋ à zlèk a gà mburma ana tar riŋ ti yehe a vatwa Mbulum a tsa. Aɗaba kà sərakwa vatwa ŋgar ka, say nda magəsa ŋgat nda gəzləŋ ilik. ⁵Ki tsik a ter a bazlam ata ka, dite ta waya mburma. Na aka sàs a tar mawàyà mburma ka, say gəzləŋ tar ma ge lele tsəɗaŋŋa, aruwaŋ ma ge iɗəm tsa. Ta gewa ka, dukw ana ŋgwal ŋa ya ɗekɗek. Dite ta gəs Mbulum nda gəzləŋ tar nda ndzer mbaŋa. Na tàa ge gà dukw ata fit ka, ta waya mburma kaɗəŋ. ⁶Gà mìsle ŋgiɗ pam ka, tar ka, tàa dzeye ika vatwa Mbulum a. Ta miyak à mege gà dukw ata. Ti tsik a i tar ka, bazlam ana a ge a ŋgulum asa tsiye. ⁷A sàs a tar medzeŋge məpala ahəm Mbulum a mburma, ta gweɗe a, waytsà mìi dzeŋge a kurum a nda ndzer. Tsaatsa, tə sər dukw ana ti tsik a ya tsa, kige tsa na ti dzeŋge a a mburma ya tsa.

⁸Kà sərakwa, məpala ahəm Mbulum ka, lele ndzer, na wura a ge a megemir ŋa ndaka vatwa ŋa ya. ⁹Ama kəla ka, dukw a riŋ ilik ma ta mətsakwa gər tsa. Aɗaba Mbulum a tike məpala ahəm ŋgar a bəɗ ka, agəra gà mburma ana tar gà ŋgwal ŋa ika miɗ ŋgar a tsa. A tike a bəɗ ka, agəra gà mburma ana tar riŋ ti nis a à vatwa ŋgar a ivaɗ, kamala megweɗe ya, agəra gà na tə tsaraka aaka zləm tsiye, dite gà na tə sər hwarwa tsidze ya, nda gà ɓəzla bakal, nda gà mburma ana mandzaɗak i gəzləŋ tar, tar riŋ ti sewle ahər a ya. A tike a bəɗ ka, agəra gà na ta bets a gà tsir tar nda gà məmər tar a, dite ka, ta bets a mburma fit a asa mbaŋa. ¹⁰Mbulum a tike məpala ahəm ŋgar a bəɗ asa ka, agəra gà na tar riŋ ta ge a mezelme nda təv muva ya, nda gà na ta waya mehinneha aà gà asləka ŋgiɗ kamala gà zal nda məkəs a. Dite nda gà na tar riŋ ti dzewe a à mburma aà ɓele ya, agəra gà ɓəzla pàrsa, nda gà ɓəzla sida ana ti tsik a dukw ana ndzer tsiye. Dite asa ka, agəra gà mburma ana tar riŋ ta ge a gà dukw ŋgiɗ pampam ŋgwal ŋa tsa, ti nis a dər à guma ŋgar ana ŋgwal ŋa ya ya. ¹¹Batsah meɗè à dukw aaha ka, a dara i bazlam ŋgwal ŋa ana Mbulum a tsikiŋ, a miyekiŋ dər ɗa a ahər a. Bazlam ŋgwal ŋa ata ka, biy mezlibe à Mbulum Batsah ŋana. Aɗaba ŋgat na a ne təv mipìsè ahəm nda maŋgayaba ana kəla pat a.

Mege kəkaaha a Mbulum agəra mendzer are tsehe

¹²Iye ihər i ge a kəkaaha a Yesuw Kiristi BATSAH kwa ŋa, agəra ana a zla iye kamala mala ndzer a. I ger a kəkaaha asa ka, aɗaba aka ne à iye mala meslire ŋgar asa mbaŋa. Aka viliŋ ndzəɗa aà megemir ŋgar ata asa. ¹³Aɗaba piŋŋe ka, Yàa tsik ahər dukw ana ŋgwala tsiye hinne, Yàa ndavayar hinne asa, Yàa sèwèr are a gà mburma ana ti zezem a ŋgat asa mbaŋa. Ama ku mege Yàa ge gà dukw ata kataya tekeɗe ka, Yàa ndze are tsehe a Yesuw Kiristi hinne. Aka giŋ dukw ana ŋgwal ŋa ya. Aɗaba akahər ata ka, Yàa gəs ŋgat nda gəzləŋ ilik zukw tsa. Dite i sər dukw ana i ge a ya tsa asa. ¹⁴Taŋa ŋgat BATSAH kwa ŋa aka pisiŋ ahəm hinne. Dite na kinehe a viliŋ ndzəɗa aà magəsa ŋgat nda gəzləŋ gà ilik, nda mawàyà ba ana a riŋ ika magər kwa mburma nda gà ŋgat a. ¹⁵Tsarakum, Yesuw a dara aka gər ahəɗ a ka, aà məmbàlà à gà ɓəzla bakal, kamala iye ana Yàa ge bakal ka, hinne, a za biy mburma tserdze ya. Bazlam aaha i tsik a ka, ŋgwal bazlam ndzer, pàrsa iɗəm tsa. Say gà mburma ta gəs a gəzləŋ tar lele. ¹⁶Naha i tsik taŋa ka, iye mala bakal batsah ŋana seyiŋ. Ama ka, Yàa ndze are tsehe a Yesuw Kiristi. Aka giŋ ŋgwal ŋa hinne. A giŋ ŋgwal ata ka, dite a ɗif a dər a mburma, meme na a gəs gəzləŋ kaɗəŋ a. I ndzer are tsehe ka, aɗaba a sasar aà mimèhe à arəv a mburma. Dite gà mburma ata tə sər ka, na tàa gəs ŋgat nda gəzləŋ ilik ka, ti ta ŋget a mesife ana à ndìv a tsa aà biybiy a aka miɗ mbaŋa. ¹⁷Ku weke mà zàmbaɗa à Əbay Mbulum ana mekwere ŋgar a ndze a aà biybiy a. Ŋgat na nda gà mesife ana à ndìv a tsiye. Ŋgat ilik na Mbulum Batsah ŋa, mburma a sle aà meŋgeter a tsiye. Mezembeɗe ma ge ka, biy ŋgar ilik. *Amin.

¹⁸Kər kinehe ka, kamala kəla gà ya, Timute. Yàa miyak aba à bazlam aaha a ahər yak a, kamala ana gà ɓəzla məma à guma Mbulum ti tsik piŋŋe ndakahər yak a. Dzala aka bazlam tar ata lele, ma ne dukw ahər yak. Dite megemir yak ma da aka miɗ aka miɗ nda ŋgwal ŋa. ¹⁹Bazlam Mbulum ma ndza i gəzləŋ yak kəla pat ndidwe ndidwe, aruwaŋ ma ta ge iɗəm tsa. Gà mìsle ŋgiɗ pam ka, tàa niw vatwa ata ŋgwal ŋa ya. Aɗaba taŋa, tar ka, tàa dzeye ika miɗ Mbulum a. Megìse tar a riŋ ta gis a Mbulum ndzer asa tsa. ²⁰I liwiŋ gà mburma ata ka, gà Himanayas nda Aleksandire. Yàa dza tar a təv mesewere are Əbay sitene, ti sir a gà gər lele ŋgwal ŋa, dite ti ti tsik dukw ana ŋgwal ŋa tsiye, aà Mbulum asa tsa.

Meme na mahàmà a Mbulum nda ndzer ŋa ya?

¹Malahalah dukw ana a sèsiŋ metsike a gà mburma Mbulum a ka, araha: Hamum a Mbulum agəra mburma tserdze. Ɗə̀vum a tar zləm a təv ŋgar, dite ka hamumar agəra tar. Gwimer kəkaaha, aɗaba tar ata tserdze ya mbaŋa. ²Hamumar agəra gà Əbay gà bàba ŋana, nda gà asiŋ ŋana tar riŋ ta kwere a mburma pampam asa mbaŋa. Hamumar ka, na dite ki ndzekwe a barbararra zayzay lele ya. Ki gekwe a magəɗa a Mbulum, dite ka, mede kwa tekeɗe, a ge a ika miɗ ŋgar lele ya. ³Na kàa gekwa gà taŋa ka, ŋgwal ŋa hinne, a tsahən aà Mbulum, mala məmbə̀là à kwa. ⁴Aɗaba a waya ka, na mburma tserdze ta mbala ya, dite tə sər dər guma ana ndzer a. ⁵Guma ata ka, biy mburma dze. Aɗaba Mbulum ka, ilik, dite wele ana a sər ba à gà mburma nda ŋgat a ka, ilik mbaŋa. Taŋa Yesuw Kiristi ana a ne mburma ya. ⁶A dara ka, a vəl mesife ŋgar aà məmbùrùɗà dərra mburma i bakal tar a tserdze. A ɗif dər a mburma, a sàs a Mbulum ka, mburma ta mbala fit dze. Mbulum nda gər ŋgar mbaŋa na a vəl pat ŋa, na dite a geba kataya ya. ⁷Aɗaba taŋa na Mbulum a slərra iye ya, i ne mala meslire ŋgar a. A slərra iye ya ka, aà meɗife à dukw ata a mburma, i tsik a guma ŋgar ndzer ŋana a gà mburma ana gà Yahuda tsiye, dite ka, ta gəs nda gəzləŋ ilik. I tsik taŋa ka, ndzer, tsəka, pàrsa iɗəm tsa.

⁸kamala taŋa ya, a sèsiŋ ka, gà asləka ta hama a Mbulum i təv mayahaba gər, ku mege i ŋga tserdze. Ta heme a ka, bakal ma ge i gəzləŋ tar tsa. Matsəɓatsəɓ ana tərfə̀ɗ tərfə̀ɗ a, nda mayaha ahəm tekeɗe, ma ge riŋ tsa asa mbaŋa.

⁹I gà məkəs ka, a sèsiŋ na ti dze akaba a gà petek ana a zle a arəv aà mburma ya tsa. Say petek ana ide zləməŋa pəra ya. Madùwàyà ba tar ma tə ndaha i tə̀vəməŋa ya tsa. Ti ta behe a à malàmà ambəz ŋger ŋger ŋger, dite ma zla arəv aà mburma ɓav tsa asa mbaŋa. Tə tə dza aaba dukw daala ana tsìrèslìslsle tsakala ŋa a beha hinne ya tsa asa. Tə tə dùwaya ba nda petek ana ɓə̀sl ɓə̀sl ɓə̀sl à sìkim a ba tsiye tsa mbaŋa. ¹⁰A sèsiŋ ka, megemir tar ana ta ge a ŋgwal ŋa ya na a ne a madùwàyà ba tar a ivaɗ. Gà məkəs ana ta gweɗe a, mìi ge a magəɗa a Mbulum a ka, ta ge kamala taŋa ya nda gəzləŋ tar ilik. ¹¹I təv ana ti tsik a ter a bazlam Mbulum a ka, tə̀ dza zləm lele, tə ndza tìytìy, ta həna à gər a bəɗ a wur ana a ɗif a ter a dər a. ¹²I vile a vatwa a gà məkəs, ta hitse a aka miɗ gà asləka, aà meɗe a tar à guma Mbulum tsa. A sèsiŋ na ta kwere a gà asləka ya ɓav tsa asa. Say ti ndze a ka, tìytìy. ¹³Ti ndze a kataya ka, aɗaba malahalah ŋa ka, Mbulum a lah mege ka, Adama, dite a ge Hawa, məkəs ŋgar i dəba ya. ¹⁴Masula ŋa ka, aɗaba Əbay sitene a baza za ka, a Hawa, tsəka, a Adama tsa. Kamala taŋa ya, məkəs na a ya məpala ahəm Mbulum a dala ya. ¹⁵Ku mege kataya tekeɗe, gà məkəs ka, ta mbele a mbaŋa, aɗaba ana tar riŋ ta we a ɓəza ya. Ama kə̀la ka, say na tar riŋ ta gis a Mbulum kəla pat nda gəzləŋ ilik, ta weye a mburma, ta ge a ŋgwal ŋa ika miɗ Mbulum, dite ka, tar riŋ ta hinne a à gər tar a bəɗ lìɓɓet kəla pat asa mbaŋa ya dzekwiŋ.

Gà bàba ŋa ana ika magər gà mburma Mbulum a

¹Na aka sàs a wura aà mene batsah ŋa ika magər gà mburma ana tar riŋ ti zezem a Yesuw Kiristi ya, aà meɗife a tar à metsehe ya ka, ŋgat ka, aka dzala aka ŋgwal megemir kaɗəŋ. Bazlam aaha i tsik a ka, ndzer. ²Ama wur ana a ge a megemir Mbulum ata ya ka, mede ŋgar ma ge ŋgwal ŋa lele nda təv gà mburma dze. Daala ma ge ihər ka, ilik. Ma ta kwaya à guzum tsa. Say ma ge ka, dukw ana ndaka vatwa ŋa lele ya. Dite gà mburma tə̀ zlə̀b à ŋgat. Say ma ge ka, mala məvəla ahər. Dite ma sər meɗìfè à metsehe a mburma lele mbaŋa. ³Ma ti ne ɓele guzum tsa. Ma ti ne mala tèrèŋgìz tsa asa mbaŋa. Say ma ne ivaɗ ka, mala himmè bazlam ana lìfèɗìɗe ya. Ma ti ne mala mege bazlam nda gà mburma tsa. Ma ta vəl gəzləŋ ŋgar a siŋgwe tsa asa. ⁴Say ma sər magəsa gà mburma ana i ga i ma ŋgar a lele. Ma ɗif à metsehe a gà ɓəza ŋgar, ta gəs ahər ahəm, ta hənar à gər a bəɗ lele asa. ⁵I tsik taŋa ka, aɗaba na wura aka sle aà magəsa gà mburma ana i ga i ma ŋgar a lele tsəna, meme na a sle a aà magəsa gà mburma Mbulum ɓav a? ⁶Wele ana à gis a gà mburma Mbulum ata ya ka, ma ti ne wur ana a gəs bazlam Mbulum kinkin a tsa, tsəka, biytsà à sìŋgìr a à ba ŋgar hinne ka, seriye Mbulum a ta gis a tar aka miɗ nda Əbay sitene mba. ⁷Wele ata à gis a gà mburma Mbulum a ka, mede ŋgar mà tsahən aà gà mburma ana ti zezem a Yesuw Kiristi tsiye mbaŋa, dite ta gis a bazlam ŋgar lele. Bəla na mede ŋgar ata aka ge ŋgwal ŋa tsəka, ta gweɗe a, ŋgat ka, ŋgwal mburma tsa. I fataya ka, aka dəɗ a ɓele Əbay sitene.

Gà mburma Mbulum ana tì zlèk a gà asiŋ gà mburma ŋgar a

⁸Ama mede gà mburma Mbulum ana tar riŋ tì zlèk a gà asiŋ gà mburma ŋgar a ka, ma ge lele mbaŋa. Ti tsikewa ka, dukw ana ndzer ŋa ya, ta màwa aka mifefile sula tsa. Ta beha à masà guzum tsa asa. Ta vəl gəzləŋ a mayaha siŋgwe hinne tsa asa mbaŋa. ⁹Say ta gəs bazlam ŋgwal ŋa ana Mbulum a ɗif dər a, nda gəzləŋ ilik kalkal lele kəla pat. ¹⁰Ama i təv ana ki dzwìm aɗəm a tar a ka, fə̀rum aà mede tar lele dzekwiŋ mbaŋa. Mede tar aka da a kurum a gər ndaka vatwa ŋa lele ka, taŋa ka, ti ne gà ɓəzla mazlàkà gà mburma Mbulum ana nda ndzer ŋa ya kuɗa. ¹¹Mede gà məkəs tar ibam, ma ge ka, ilik mbaŋa asa. Ti ti tsik manəsa bazlam aà mburma tsa. Ama ta gəs gəzləŋ i təv guzum a, tə ta kwaya tsa. Say megemir tar ma da ka, ndaka vatwa ŋa lele nda təv dukw tserdze, ta gawuwa ahəm sula tsa. ¹²Məkəs ma ge aà mala mazlàkà gà mburma Mbulum ka, ilik pəra. Say mà gəs gà ɓəza ŋgar, nda gà asiŋ gà mburma ana i ga i ma ŋgar a ka, lele. ¹³Na gà ɓəzla mazlàkà gà mburma ata ta ge a mege megemir ndaka vatwa ŋa lele ka, tàa ŋgat gər tar. I dəba ŋa ya, ta ŋget a vatwa, aà metsìkè bazlam Yesuw Kiristi parakkà lele kuɗa, aɗaba ana tàa gəs ŋgat ka, nda gəzləŋ ilik a.

Ŋgwal dukw ana Mbulum a ɗif dər a

¹⁴Yàa dzala aà madaha a təv yak bise, Timute. Ama ka, Yàa ndzeha zukw tsa. I wetsekaha wakita aaha pəra. ¹⁵Aɗaba ku mege Yàa ndzeha bise tsa tekeɗe ka, wakita aaha a ɗifek a à dukw ana i tsikik a zləmana ya, dite ka, ki sir a dər ka, meme na gà mburma ti sle a aà mede ika magər gà mburma Mbulum ndaka vatwa ŋa lele ya. Na a ne gà mburma ata ka, gà na tar riŋ i huɗ mayahaba gər gà mburma Mbulum ana ŋgat a vile a ter a mesife ya. Gà mburma ŋgar ata na ndəzlzlà ti ne mendweŋe bazlam ŋgar ana ndzer a. ¹⁶Bazlam ndzer ŋa ata Mbulum a ɗif a kwa dər, dite meme na kinehe ki ndzekwe a ika miɗ ŋgar a ka, batsah bazlam kaɗəŋ ndzer. Wura a sle a aà mimbetse tsa:

Bazlam ata ti tsik ka, aà Yesuw Kiristi ana

a dara aka gər ahəɗ a, dite a ne mburma ya.

Mezite Mesife Mbulum a ɗif dər ka,

ŋgat na ŋgwal ŋa lele ya.

Gà gawla Mbulum tserdze tàa ŋgatar.

Gà mburma ti tsikewa bazlam ŋgar

a gà mburma ana ika gər ahəɗ a tserdze.

Ama gà asiŋ ŋa, ku mege i ŋga tserdze,

tàa gəs ŋgat nda gəzləŋ.

I dəba ŋa ya, tsəɗak Mbulum a zla ŋgat

a təv mezlibe ŋgar ana tì zlibe a à ŋgat a.

Gà mburma ana ti tsik a bazlam ka, nda pàrsa ya

¹A pat ana gər ahəɗ aka à mendìve ya ka, gà asiŋ gà mburma ŋgiɗ ta miyek a à megìse tar ana ta gəs Yesuw nda gəzləŋ ilik a. Aɗaba tì dze a zləm ka, a gà mburma ana ti ɗif a ter a à duwa nda pàrsa ya. I dəba ŋa ya, ti zezem a ka, bazlam ana sitene a tsik a ter a ya ɗekɗek pəra. Na a ɗif a à gà dukw ata parakkà lele ka, Mezite Mesife Mbulum. ²Gà mburma ana ta pese a ter a za ya ka, gà ɓəzla mimbèhè are. Dukw ana ti tsik a ya ka, nda pàrsa. Gà mburma ata ka, ti ne kamala zlir akwa ana aà lùŋguɗ à gis a ka, a wir ahər a tsiye. Tar tekeɗe, ti dzele a aka bakal ana i gəzləŋ tar tsa asa. ³Ama tar ta gweɗe a a mburma ka, mazla daala ka, lele tsa, ta pele a ter a ahəm. Ta gweɗe a asa ka, mazəma dukw aaha, kige tsa dukw aaka ka, lele tsa, awisl. Tsaatsa, Mbulum a ge gà dukw ata ka, dite mburma tə zəm. Ama gà na ta gəs Yesuw Kiristi, tə sər gà dukw ana nda ndzer a ka, ta ge kəkaaha a Mbulum, dite tə zəm, a ge a duwa tsa. ⁴Aɗaba dukw ana Mbulum a ge a ya ka, ŋgwal ŋa fit dze. Ka tawalakwa ikaba gà dukw mezime ya pampam tsa. Ki gekwe a kəkaaha a Mbulum, dite ki zimekwe a pəra. ⁵Aɗaba dukw mezime tserdze ka, lele, agəra ana Mbulum a tsik kataya ya, dite agəra ana kàa hamakwa aka gər ŋa ya asa mbaŋa.

Ŋgwal mala megemir Yesuw Kiristi

⁶Na ki ɗif a à bazlam ata a gà na ti ne gà damər yak ika vatwa Mbulum a ka, ki ne a mala megemir Yesuw Kiristi ŋgwal ŋa ndzer. Dite gà bazlam Mbulum ana kə̀ gə̀sakwa, nda gà guma ŋgwal ŋa ana ki zezem a kamala dukw mezime ana kər riŋ ihər ki zim a kəla pat a ka, tì sìkèhek a à ndzəɗa yak aka miɗ aka miɗ. ⁷Ka tə dza zləm a gà guma məfara ŋa ana a tsahən aà Mbulum tsiye tsa. Say mede yak ma da ka, aka miɗ aka miɗ kamala ana a sàs a Mbulum a. ⁸Na wura a ge a màhaw ika dàɓa, à tètìɗ a à mile ŋgar ka, taŋa ka, a ge a ŋgulum a slu ba ŋgar zaakwa. Ama wur ana à tètìɗ a à magəsa ahəm aà Mbulum ika vatwa Mbulum kəla pat a ka, taŋa ka, a ger a ŋgulum hinne dze. Aɗaba a ge a ŋgulum ka, a mesife ŋgar ana kinehe ika gər ahəɗ a, dite a ta ge a ŋgulum a mesife ana ika miɗ à ndìv a tsa aà biybiy a asa mbaŋa. ⁹Bazlam aaha ka, bazlam ana ndzer, biy megìse nda gəzləŋ ilik a lele. ¹⁰Agəra taŋa na kə̀ gə̀sakwa megemir ŋgar, dite kà vəlakwar ndzəɗa kwa fit, ki mirekwe ahər a aba sah lele ya. Aɗaba kàa tikekwa madzala gà gər kwa fit a təv Mbulum ana a riŋ nda mesife ya. Ŋgat ka, mala məmbə̀là à mburma tserdze. Ndeyndey ŋa ka, gà na tàa gəs Yesuw Kiristi nda gəzləŋ tar ilik a.

¹¹Timute, tsik a tar, ta ge gà dukw ata, dite ka ɗif a tar dər lele. ¹²Aɗaba na kər gawla, gà ɓəza mba ya ka, wura ma ta fə̀r aà kər ka, kamala kəla ndirkiz a ndeyndey ɓav tsa. Ama say ki ɗif a à vatwa a gà ɓəzla mazazama Yesuw Kiristi ivaɗ. Tə dəɗ aka bazlam yak ana ki tsik a ya, mege nda gà dukw ana ki ge a ŋgwal ŋa ika miɗ tar tekeɗe ya, bəla nda təv mawàyà mburma ya, kige tsa nda təv guma ana kə̀ gəs nda gəzləŋ yak ika miɗ Mbulum a, ku mege nda təv gəzləŋ yak ana lele, aruwaŋ iɗəm tsiye tserdze mbaŋa. Na kàa ge kataya ka, mede yak a ɗe a ter a à vatwa, dite na ti zezem a vatwa ata ŋgwal ŋa ya. ¹³Dzeŋge bazlam Mbulum ana i wakita ŋgar a ika miɗ mburma tserdze kəla pat. Tsik a tar bazlam ata, dite ka ɗif a tar aaka à bazlam ŋa lele, haa a pat ana i leha aà kər a ya. ¹⁴Ka ta fə̀r aà ndzəɗa ana Mbulum a vəlak a, kamala dukw masakəŋa ya tsa. A vəlak ndzəɗa ata ka, daga piŋŋe, akahər ana gà ɓəzla məma à guma Mbulum ti ɗif à madzala gà gər Mbulum ana a dzala aɗaba kər a. A vəlak ka, ndakahər gà bàba ŋana ika magər gà mburma Mbulum, ta hamar, tə dzaya aka kər ahər a. ¹⁵Taŋa ka, tike gər aka dukw ata ki ge a ya lele. Ki ge nda gəzləŋ yak ilik. Aɗaba gà mburma ta fə̀r aà kər ka, meme na kər ihər ki sìkèh à mede yak ika miɗ Mbulum a. ¹⁶Ge metsehe a mede yak ana ki de a ika vatwa Mbulum a. Dite ki ge metsehe agəra dukw ana ki ɗif a dər a mburma ya asa mbaŋa. Ka zazam gà dukw ata kəla pat. Na kàa tiker gər kamala taŋa ya ka, ki ta mbil a à ba yak, dite ki mbil a à gà mburma ana ta gəs bazlam yak a asa mbaŋa.

¹Ka ti ɗif à metsehe a màndawal gà asləka nda magala tsa. Say ki ɗifer a dər ka, nda zèyezèye ŋa, kamala ana ŋgat ka, tsir yak a. Ki ɗif a dər a gà gawla gà mburma ibam ka, kamala ana ki tsik a ka, a gà damər yak a. ²Ki ɗe a dər a gà màndawal gà məkəs tekeɗe ka, kamala ana ki tsik a ka, a gà mama yak a. Dite a gà daala gà məkəs ibam ka, kamala ana ki tsik a ka, a gà damər yak gà dəm ŋana ya mbaŋa. Hwarwa ma ta ge a tar tsidze.

Mazlàkà gà madakwa gà məkəs ana wur tar a riŋ tsiye

³fafəl a gà madakwa gà məkəs ana wur tar a riŋ tsiye lele, kà zlak tar. ⁴Ama na madakwa məkəs ŋa a riŋ nda gà ɓəza, kige tsa nda gà ɓəza gà ɓəza ŋgar ka, say ki ɗif a ter a dər, meme na ti sle a aà magəsa gà mama tar lele ya, bəla məmər tar, kige tsa batsah məmər tar a. Malahalah ŋa ka, say gà ɓəza ata ti sinike a ba à mazlàkà tar dzekwiŋ, kamala gà tsir tar ana ta waya tar, ta gala tar piŋŋe ya. Aɗaba taŋa ka, a tsahən aà Mbulum. ⁵Ama madakwa məkəs ana wur ŋgar a riŋ tsa, biy mandza are tsehe ya ka, ŋgat a tike madzala gà gər ŋgar ka, a təv Mbulum ilik, a hemer a kəla pat i hawa i mèkwède, dite ka, mà zlak ŋgat. ⁶Ama kəla ka, madakwa məkəs ana aka waya ka, say dukw gər ahəɗ ɗekɗek a ka, a ne kamala məməta ŋa ya, ku mege ŋgat a riŋ nda are ŋgar tekeɗe ya. ⁷Aɗaba taŋa, ɗif a tar à guma ata, ta gəs gà mburma tar lele. Gà madakwa gà məkəs ata ibam, wura ma tə ɗə̀v a tar zləm a təv matsama bazlam tsa. ⁸Na wur ana a ge a gər a gà mburma ŋgar tsəka, ŋgwal ŋa tsa. Ndeyndey ŋa ka, wur ana a ge a gər a ga mburma ana i ga i ma ŋgar a tsiye. Taŋa ka, ŋgwìɗik aka miyak à bazlam Yesuw ana kə̀ gə̀sakwa ya. Ama ka, ŋgulum wur ana aka gəs Yesuw tsiye.

Mege megemir gà madakwa gà məkəs ana ta gewa ika magər

gà mburma Mbulum a

⁹Madakwa məkəs ŋa mive ŋgar a sle dzik ndilik tsəka, ka ta wetse zləm ŋgar a liwiŋ gà na tì zlèk a tar a tsa. Ki wetse a ŋgat ka, say na a da a zal ka, ilik pəra ya. ¹⁰Dite megemir ŋgar ana a ge a ya, gà mburma tə sər dər ka, ŋgwal ŋa lele, kige tsa na aka gala gà ɓəza ŋgar nda metsehe lele ya, nda gà bəla a gewa gər a gà mbəlakw ana tə dawaha a ma ŋgar a, dite bəla a barawa ahəɗ aà sik a gà mburma Mbulum ana tə dawaha mbaŋa ya, kige tsa na bəla a zlàkawa gà ɓəzla mesewere are asa ya. Na kàa ŋgatar, a gewa gà megemir ana ŋgwal ŋa ya kataya ka, wetse ŋgat kuɗa.

¹¹Ama kə̀la ka, ka ta wetse zləm gà madakwa gà məkəs ana gà daala ŋa ya tsa. Aɗaba na bəla meèweke gà zal aka gəs tar ka, ta miyek a à vatwa Yesuw Kiristi. ¹²Na tàa miyak dər ka, seriye Mbulum à gis a tar. Aɗaba megweɗe ana ta gwa ika miɗ Mbulum, mìi ge a meslire ŋgar, a sàs a mər gà zal asa tsiye ka, aka ne pàrsa. ¹³Ku mege bəla tə da a zal tsa ndeɗiŋa tekeɗe ka, ta mìts a ka, aà mayaha duwa zilikw zilikw ika biye hərmaga mburma ya ɗekɗek, sìrètitte ta ge a megemir ɓav tsa. Ndeyndey ŋa ta mìts a ka, aà melèvekè bazlam aà mburma ɗekɗek. Ta ge a tsàpà nda rawraw hinne, ti tsik a ka, bazlam ana biy metsike tsiye. ¹⁴Aɗaba taŋa na a sèsiŋ ka, ta wetse a zləm gà madakwa gà məkəs ana gà daala ŋa ya tsiye. I waya ka, tə da a zal asa, ta waya mawà kəla, dite ta ge gər a gà ɓəza tar, ta gəs tar lele. Na tàa ge kamala taŋa ya ka, gà ɓəzla mene are kwa ta ŋget a vatwa aà metsìkè aà kwa dukw ana ŋgwal ŋa tsiye asa tsa. ¹⁵I tsik kataya ka, aɗaba gà asiŋ gà madakwa gà məkəs ŋgiɗ a riŋ tàa miyak à vatwa Mbulum. Tàa mbəɗ gər aka mazazama Əbay sitene.

¹⁶Na məkəs ana a zezem a Yesuw Kiristi ya, wur ŋgar a riŋ madakwa ŋa ka, say mà zlak ŋgat, na ŋgwal ŋa ya. Aɗaba mazlàkà medzibe gà madakwa gà məkəs ata ka, gà mburma ana i ga Mbulum a tsa na à gis ahər a ahər a. Na aka zlak ŋgat ka, taŋa gà mburma ana i ga Mbulum a, ta ŋget a vatwa aà mazlàkà gà madakwa gà məkəs ana wura tar a riŋ tsiye lele.

Mede gà bàba ŋana ika magər gà mburma Mbulum a

¹⁷Gà bàba ŋana tar riŋ ta ge a megemir ndaka vatwa ŋa ika magər gà mburma Mbulum a ka, zlə̀bum à tar hinne. Ta ŋgat dukw maya ba tar mbaŋa. Ndeyndey ŋa ka, gà na tar riŋ ti tsik a bazlam Mbulum, ti ɗif a à guma ŋgar a mburma ya. ¹⁸Aɗaba Mbulum a gwa i wakita ŋgar a ka: «Na sla a riŋ a gik a megemir ka, ka tiker *tikwirek aka bazlam tsa.»*fa* Dite a gwa asa ka: «Wur ana aka ge megemir a ka, ma ŋgat dukw maya ba ŋgar mbaŋa.»*fb* ¹⁹Na wura aka dara a təv yak a, aà metsikik dukw ana ŋgwala tsa aà wele ana batsah ŋa ika magər gà mburma Mbulum a ka, ka ta gəs zukw tsa. Ki gis a ka, say na kàa tsaraka aà gà mburma ya sula, kige tsa makər a dzekwiŋ. ²⁰Na gà bàba ŋa ata tàa ge bakal ka, tsik a tar aà metsehe ika miɗ mburma tserdze, dite gà asiŋ gà mburma ŋgiɗ ta ge a magəɗa.

²¹Iye ihər i gik a kamkam, Timute, ika miɗ Mbulum, ika miɗ Yesuw Kiristi asa mbaŋa, dite ika miɗ gawla Mbulum ana a ndzək tar a: Ama zazam dukw ana i tsikik a nda ndzer. Iye ihər i gik a kamkam asa ka, ka tə dàn bemeze aà wura a tsa. Ama ka, ka ta wìy ba a wura aɗaba ana ŋgat wur yak a tsa asa. Ka ta ge kataya tsa, na i təv megemir yak a. ²²Na aka sàsak mazla wura aà megemir i ga Mbulum ka, say fə̀r aà metsehe ŋgar lele dzekwiŋ, dite na ki tike aɗəm a ŋgat, ki tiker a ahər aka gər a. Ka tə ndàb a bakal gà mìsle ŋgiɗ tsa. Ama say kasla iɗəm ba yak a lele.

²³Agəra dukw məməta ana a wurawa aà kər i hitwis a ka, ka sawa yam ɗekɗek tsa, say ki se a meɗwitse mawà dukw ana makwàsà ŋa ya zaakwa, dite mə pə̀lak à hitwis yak ana ŋgwal ŋa tsa, a wurawa aà kər kəla pat a.

²⁴Gà asiŋ gà mìsle ŋgiɗ riŋ ka, ti ndze a aka miɗ seriye dzekwiŋ tsa, na bakal tar à pèt a a bəra ndərzayya ya. Ama biy gà mìsle ŋgiɗ à pèt a ka, say na tàa ndze aka miɗ seriye ya dzekwiŋ. ²⁵Mege i təv megemir ana mburma ta ge a ŋgwal ŋa kinehe ya tekeɗe ka, à pèt a aba bise kamala taŋa ya mbaŋa. Ku mege aka pàt aba kinehe tsa tekeɗe ka, a sle a aà makàhà ba tsa, à pèt a aba aka miɗ mba.

Mendze gà ɓele ana tì zlibe a à gà ɓəzla ga tar a

¹Say gà ɓele ana ika magər kurum, ti ziwe a gər tar tsiye ka, tə̀ zlə̀b à gà ɓəzla ga tar lele. Na tàa zlə̀b à tar ka, wura a tsik a manəsa bazlam aà Mbulum asa tsa, kige tsa aà guma ana kwa ihər ki tsikikwe a ya tsa. ²Na bəla gà ɓəzla ga tar ata tar riŋ ti zezem a Yesuw Kiristi nda gà tar tserdze ka, tə ta dzala ka, mər ilik ika miɗ Yesuw Kiristi tsam ana, là ŋa ya, aàmala na mìi zlibe a à tar a asa ya tsa. Seyiŋ tsa, ŋgwal ŋa ka, ta ge a tar megemir nda gəzləŋ ilik lele, mà za dər na tə lah ahər piŋŋe ya. Aɗaba gà ɓəzla ga tar ata ta gəs Yesuw Kiristi nda gəzləŋ a, ta waya tar, dite tar tekeɗe, ta ge ŋgwal a gà mburma aaha mbaŋa. Araha, naha ka, gà dukw ana ki ɗif a dər a mburma, ki mbizle a ter aaka a, ta ge kamala taŋa ya.

Bazlam mazazama limana nda bazlam ŋgwal ŋa ana ndzer a

³Na wura a ɗif a ka, à bazlam ŋgiɗ pam, à gis bazlam Yesuw Kiristi BATSAH kwa ŋana ndzer a tsa, nda gà dukw ana ti ɗifewa a kwa dər agəra mede kwa ana ika miɗ Mbulum a tsəka, ⁴taŋa ŋgat ka, kamala mala hala gawla ana i liwiŋ mburma, à sìŋgìr a à ba ŋgar ka, tsaatsa, ŋgat ŋa a sər duwa tsidze ya. A sər i ŋgar ka, are mimbètsè ahəm, nda mayaha ahəm pìrèh pìrèh aà gà mburma ɗekɗek. Aɗaba wele ata aka ge gà dukw ata kataya ka, na ika magər tar nda gà mburma ka, say mene ba are, nda mege maàga kəla pat nda mandàvàyà ba, nda gà madzala gà gər gà dukw ana ŋgwal ŋa tsa masakəŋa taf nda təv mìsle ŋgiɗ a. ⁵Ama bazlam ana ti tsik a ika magər tar biy maàga ya ka, à ndìv a tsa, vìrìɗìɗɗe kəla pat. Aɗaba metsehe tar ana ti dzele a ya ka, kəzlah aka ndaha ika vatwa ya, dite ka, tə sər dukw ana ndzer a tsa asa. Aɗaba gà taŋa ti dzele a i tar ka, na tàa zazam vatwa Mbulum ka, limana tar a ge a riŋ ka, hinne.

⁶Kaɗəŋ, kàa zazam vatwa Mbulum nda ndzer ka, ki ŋget a limana hinne, kamala megweɗe ya ka, dukw ana à ndìv a tsa i təv ŋgar a. Ama ka, say na kàa ŋgaya ba a dukw ana kə ŋgat a pəra. ⁷Aɗaba ta wara kwa ya ka, sakurɗumma kataya, duwa aà kwa i ahər tsa. Ama ki slekwe a aà mendzìke dər duwa a ahər ɓav tsa na ki metekwe a ya asa mbaŋa. ⁸Aɗaba taŋa, na kàa ŋgatakwa dukw mezime nda petek ka, taŋa ka, biy kwa ide. ⁹Ama gà na ta waya mesikehe à limana hinne ya ka, Əbay sitene na a beze a ter a za ya, tì dìɗ a a ɓele ŋgar mba. Ti dzele a gà gər ka, aka meèweke gà dukw pampam. Gà dukw ata na a vile a ter a mendìfè sik masakəŋa ika vatwa ya ya, dite a nis à ter a, ti dzeye a kweleŋ a. ¹⁰Aɗaba madzala gà gər siŋgwe ka, a we a bakal tserdze vìrìɗìɗɗe kamala dukw ana mawà ŋa ya. Aɗaba gà mìsle ŋgiɗ a riŋ kataya, tàa məsak à vatwa Mbulum agəra ana tàa vəl gəzləŋ tar a siŋgwe, ti yehe a tsilikw tsilikw a. Dite ka, gəzləŋ a wir aà ter a hinne asa, aɗaba dukw ata ti yehe a nda madzala gà gər tar a.

Mandəva à meɗìfè à metsehe

¹¹Ama kinehe ka, Timute, kər ana mburma Mbulum a ka, are yak ma ta ge ika gà dukw ata ŋgwal ŋa tsiye tsa. Mər aba, dite ka ne mala ndzer ika miɗ Mbulum, zazam vatwa ŋgar lele. Vəlar gəzləŋ yak kəla pat. Ka waya mburma lele. Gəs gəzləŋ i təv dukw ana ŋgwal ŋa tsa tserdze ya, dite kà fàfəl a mburma lìfèɗìɗe asa mbaŋa. ¹²Ne mala aka miɗ i təv magəsa gəzləŋ ana ika vatwa Mbulum a, kamala gà wele ana tì dzìr a ba aà mivele, ta mir aaba a sah lele ya. Gəs vatwa mesife ana à ndìv a tsa aà biybiy a nda gəzləŋ yak, dite ma ne biy yak. Aɗaba Mbulum a zalak ka, aà mesife ata akahər ata kà tsik ika miɗ mburma hinne, meme na kə̀ gəs bazlam Yesuw Kiristi nda ndzer a gəzləŋ yak a ya. ¹³Iye ihər i gweɗek a nda zləm Mbulum, mala məvəla mesife a gà dukw ana tserdze ya, dite nda zləm Yesuw Kiristi, wele ana a tsik dukw ana ndzer a, ika miɗ Əbay Puntiyus Pilatus akahər ata ya: ¹⁴Tike gər a guma ata Mbulum a tsikik a. Ma ta mətsak gər tsa. Ka ta ge dukw ana, dite mburma ta mèk a à bakal ŋa ya tsa, haa a pat ana Yesuw Kiristi BATSAH kwa ŋa à mère a i mbulum a. ¹⁵A mère a ka, a pat məpàslà ahər ŋgar ana Mbulum a tsiker a. Aɗaba ŋgat na ndzəɗa ŋgar a za gà dukw tserdze ya. Ŋgat ka, Mbulum ilik. Ŋgat asa ka, təv mipìsè ahəm nda maŋgayaba kəla pat. Ŋgat na batsah ŋa ika gər gà Əbay tserdze ya, nda gà ika gər gà bàba ŋana tserdze ya asa mbaŋa. ¹⁶Aɗaba ŋgat ilik na a ndze a aà biybiy a. A ndze a ka, i təv dzaydzay ŋa ana wura a sle a aà mede aɗəm a tsiye. Wura a aka ŋgatar ilik tsa, dite kinehe tekeɗe, wura a riŋ a sle aà meŋgeter a zukw tsa asa ya mbaŋa. Gà mburma tə̀ zlə̀b à ŋgat, Əbay ŋgar ma ndza aà biybiy. *Amin.

¹⁷Gwaɗa a gà ɓəzla limana ana ika gər ahəɗ kinehe ya ka, ti ɗe à gər tar agəra limana tsa, dite tə ta fə̀r aà limana tar ata kamala dukw ana ŋgwal ŋa ndzer a tsa asa. Aɗaba tə sər pat ana à ndìv a ya tsa. Say tə dzala ka, Mbulum na ŋgwal ŋa ndzer, a vile a kwe a dukw tserdze ya, dite na ki ŋgeyekwe a dər ba ya. ¹⁸Gwaɗa a tar ka, say ta gewa ka, dukw ana ŋgwal ŋa ya, tə̀ zlak mburma lele, ta vəl ahər fə̀làh fə̀làh. Ta ge gà ɓəzla hə̀za tsa. ¹⁹Na tàa gewa kataya ka, ta kèhe a aba duwa ya ka, a təv ŋgwal ŋana lele, a nis a tsa, aləka ti ta ŋgeye a dər ba aka miɗ mba ya, na dite ka, ta ŋget a mesife ndzer ŋa ana i təv Mbulum a.

²⁰Ana mà Timute: Kasla megemir ana Mbulum a vəlak a ahər a lele, manəsa bazlam ma tə dara i bazlam yak a tsidze. Ka tə dza zləm a bazlam gà mburma ana ti tsik a ka, ta gwa i tar ka, metsehe, tsaatsa ŋgwal metsehe duwa tsiye ka, ma tə dara i bazlam yak a tsidze mbaŋa. ²¹I tsik taŋa ka, aɗaba gà asiŋ gà mburma ŋgiɗ a riŋ ta gwa, metsehe tar a riŋ ka, hinne. Tsaatsa, metsehe tar ŋa ka, ndìfwille masakəŋa. Tar ka, tàa dzeye ika vatwa Mbulum a.

Taŋa Mbulum mi pisewa a kurum ahəm hinne.