1 TESALUNIKE

MALAHALAH

wakita ana Pul a wetseha

a gà mburma Mbulum ana

i TESALUNIKE ya

¹Na a wetse wakita aaha ka, iye Pul, mər nda Silas, nda gà Timute. Mì wetseha ka, a kurum gà mburma Mbulum ana i Tesalunike ya. A kurum ana kàa nwim gà mburma Mbulum Tsir kwa, nda Yesuw Kiristi BATSAH kwa ŋa ya. Mbulum ma ge a kurum ŋgwal, mə vəl a kurum matasla yam a gəzləŋ zayya lele.

Pul a ge kəkaaha a Mbulum aɗaba gà mburma Mbulum ana

i Tesalunike ya

²Mì gewa kəkaaha a Mbulum kəla pat aɗaba kurum tserdze. Ku mege ndeɗime tekeɗe, i təv ana mìi heme a a Mbulum a ka, mì dzalawa a təv kurum, mìi hemer a ka, aɗaba kurum tserdze mbaŋa asa. ³Kəla pat a màwa a mərra a gər a, meme na kurum ihər ki gwim a megemir ŋgwal ŋa lele, aɗaba megìse kurum ana kə̀ gəsum Yesuw Kiristi nda gəzləŋ a ya. Dite asa ka, kurum ihər ki mirwim a aba sah hinne, aɗaba ana kà wayum ŋgat a, dite ki ndzwim a ɓəŋɓəŋ lele, nda metìkè madzala gà gər kurum a təv ŋgar a. ⁴Gà damər gà, mì sər ka, Mbulum a waya kurum. A pala kurum ka, dite ka nwim gà mburma ŋgar. ⁵Aɗaba akahər ana mì tsik a kurum bazlam ŋgwal ŋa ya ka, mì tsik a kurum nda mezìwè gà gər mər ɗekɗek tsa, ndzəɗa Mbulum iɗəm. Mezite Mesife ŋgar na a zlak ahər mər a, aɗaba mì sər ndzer, bazlam ata ka, pàrsa iɗəm tsa. I təv ana mər mandza ŋa ika magər kurum a ka, kà sərum, meme na mì ndza ika magər kurum a. Mì ge kamala taŋa ya ka, dite mà zlak kurum.

⁶Ama kurum kinehe ka, kàa dzum ba aà mazazama mede mər, nda biy BATSAH kwa ŋa. I təv ana kə̀ gəsum bazlam Mbulum a ka, ku mege mburma ti sèwèrewa a kurum dər akaba are hinne tekeɗe, ama kurum ka, kàa ŋgayum ba ivaɗ. Maŋgayaba ata ka, Mezite Mesife Mbulum na a vəl a kurum a. ⁷Kamala taŋa ya ka, kà ɗifwim à ŋgwal vatwa a gà mburma Mbulum ana ika ahəɗ Makaduniya ya, nda gà na i Akaya ya tserdze, ti sir a dər ka, meme na mendze tar ana ti ndze a ya. ⁸Aɗaba kurum na bazlam BATSAH kwa ŋa a ɗe zləm hinne ya. A ɗe zləm ka, ika ahəɗ gà Makaduniya, nda Akaya ata ɗekɗek tsa, ama gà mburma tserdze, ku mege i ŋga, tàa tsaraka megìse kurum ana kə̀ gəsum Mbulum nda gəzləŋ lele ya. Taŋa bazlam a riŋ na aà metsike a tar aka gər ŋa, a ge a ŋgulum a asa tsa. ⁹Ku mege i ŋga, i təv ana mì dawa aɗəm a ka, ti tsikewa a mər nda ahər tar, meme na kə̀ gəsum mər lele ya. Ta gwaɗa a mər mbaŋa ka, kàa miyakum aba à gà fəla kurum ana ki gewim a, dite ka, kà dzàwum gurmits a bəɗ a Mbulum ana ndzer, ŋgat a riŋ nda gà mesife ya. ¹⁰Kinehe ka, kurum ihər ki vevwim a Kəla ŋgar ana à mère a i gər ŋa i mbulum a ya. Kəla ata ka, Yesuw, wele ana Mbulum a mbəlara à ŋgat i məməta ya ya. Ŋgat na a ta beye a à kwa i matsəɓatsəɓ Mbulum ana mandza ŋa ika gər gà ɓəzla bakal a. A ta ge a ka, a pat seriye ŋgar ana aka ndze aɗəm a.

Mege megemir Mbulum ana Pul a ge i Tesalunike ya

¹Gà damər mər, aɗaba kurum kà sərum nda gər kurum, mede mər ana mì daha a təv kurum a ka, a ne taf masakəŋa tsa. ²Ama ələk mì ta medeha a təv kurum ka, tàa sèwèr a mər are i Filipiya hinne. Tàa ge a mər matawak ka, kurum kà sərum. Ama ku mege gà ɓəzla mene are mər riŋ hinne tekeɗe, Mbulum aka vəl a mər ndzəɗa, na dite mì ɗif a kurum à bazlam ŋgwal ŋa ana a dara i təv ŋgar a ya. ³I təv ana mì wiz mburma, dite ta gəs bazlam ata ya ka, mì mà à dukw ana a dara i madzala gà gər mər a tsa. Mì tsik ka, lele, wirwir iɗəm tsidze. Dite kwets mìi bene a mburma tsa asa mbaŋa. ⁴Ama mì tsik ka, dukw ana a sàs a Mbulum mì ɗif a tar dər a ivaɗ. Aɗaba a samata, mər ka, mì tsahən ahər, na dite a vəl a mər bazlam ŋgwal ŋa ata a ahər, mì ɗif a dər a mburma ya. I təv ana mì tsikewa ya ka, a sàs a mər, dite na mì da a gər a mburma ya tsa. Ama mì waya ka, na mìi de a a gər a Mbulum a ivaɗ. Ŋgat na a sər dukw ana i gəzləŋ mər tserdze ya.

⁵Kurum kà sərum, mər ka, maa tsik a kurum bazlam ana lìfèɗìɗe nda wirwir a ilik tsa, nda gà maa yaha dər duwa tsa asa mbaŋa. Dukw ana i wetse i faha ya ka, ndzer, Mbulum aka mbər mesire. ⁶Mìi yehe a ka, mezlibe ana gà mburma tì zlibe à mər a tsidze, ku mege i təv kurum, ku mege i təv gà mìsle ŋgiɗ tekeɗe ya. ⁷Ama ka, mìi sle a aà mewize aà kurum duwa kamala ana mər gà bàba ŋa ya dukw ŋgar, aɗaba ana mər ka, gà ɓəzla meslire Yesuw Kiristi ya. Ama mì waya ka, kataya tsa. Mì gəs kurum ka, lele, kamala məmər kəla ana a gele a gà ɓəza, a ge a ter a gər a ivaɗ. ⁸Mì waya kurum ka, hinne. Aɗaba taŋa, i təv ana mər mandza ŋa i təv kurum a ka, a sàs a mər na mìi ɗif a kurum a à bazlam ŋgwal ŋa ana a dara i təv Mbulum a ya. Ama ka, taŋa ɗekɗek tsa, a sàs a mər ka, mìi mete a aɗaba kurum, agəra ana mì waya kurum ka, hinne ya.

⁹Gà damər mər, megemir ana mì ge i təv kurum a ka, nda ndzəɗa na mì mər aba ya. Ama ka, mə̀ məts a kurum gər tsa, ndzum dər i gər hiywe: Aɗaba akahər ata mì ɗif a kurum à ŋgwal bazlam ana a dara i təv Mbulum a ya ka, maa ge megemir hinne, ku mege ndaàvəɗ, ku mege ndaàpat tekeɗe ya. Mì ge dər kataya ka, a sàs a mər na mì nikiɗ à kurum à dukw mezime ya tsiye. ¹⁰Kurum ka, kà sərum mede mər ana ŋgwal ŋa ya, dite Mbulum tekeɗe, a sər mbaŋa asa. Aɗaba akahər ana mər mandza ŋa ika magər kurum, gà na tàa gəs Mbulum a ka, mede mər ata ka, ŋgwal ŋa, bakal iɗəm tsa. Wura ilik a sle aà metsike aà mər a dukw ana ŋgwal ŋa tsiye tsidze. ¹¹Kurum kà sərum mbaŋa, mì zlak kurum ika magər kurum ilik ilik tserdze ka, kamala tsir kəla ana a ge a gər a gà ɓəza ŋgar a. ¹²Mì màwa a kurumaha à arəv, mì vəlawa a kurum ndzəɗa, dite mì hamawa a kurum ka, hinne asa mbaŋa, na dite mede kurum ana ki dwim a ya, mà tsahən aà Mbulum a. Ŋgat a zal a kurum ka, na dite ki dwim a a mekwere ŋgar, ki ti ndzwim a nda gà ŋgat i təv mezlibe ŋgar ana tì zlibe a dər a ya.

¹³Mìi misek a à mege kəkaaha a Mbulum tsidze, aɗaba akahər ana mì ɗif a kurum à bazlam Mbulum a ka, kàa gəsum kamala taŋa ya. Kurum kà sərum, bazlam ata a dara ka, i təv Mbulum a, tsəka, bazlam gà mburma ana taf masakəŋa ya tsa. Ndzer kaɗəŋ, bazlam ata ka, biy Mbulum dukw ŋgar. Ar ka, ndzəɗa ŋa, a ge a megemir i ba kurum ana kurum gà mburma Mbulum a. ¹⁴A kurum gà damər mər, kà nwim ka, kamala gà mburma Mbulum ana ika ahəɗ Yuda, ta gəs Yesuw Kiristi ya. Gà Yahuda ana i fataya ka, ta vəlawa a tar mesewere are hinne. Kamala taŋa ya, kurum kinehe tekeɗe, gà gwala kurum ihər tì sèwèr a kurum a are kataya mbaŋa. ¹⁵Gà Yahuda ata ka, ta batsawa gà ɓəzla məma à guma Mbulum ana akahər ata ya. Dite gà asiŋ ŋa ibam, tàa kəɗ Yesuw Kiristi BATSAH kwa ŋa mbaŋa asa. Dite araha kinehe asa ka, hiywe gà asiŋ ŋa ihər ti ne a mər a are hinne mbaŋa. Ama dukw ana ta ge a ya ka, a tsahən aà Mbulum tsidze. Tar ti ne ka, gà ɓəzla mene are a mburma tserdze. ¹⁶A sàs a tar ka, məpala a mər ahəm aà metsike bazlam Mbulum a gà asiŋ gà slala ŋgiɗ ana pampam tserdze, na dite Mbulum a mbil à ter a zləmana ya. Kamala taŋa ya, tə rah akaba à gà asiŋ gà bakal tar ana ta gewa ya fit kweleŋ tìsse, kamala ana ti live a duwa a kəzləm a. Ama matsəɓatsəɓ Mbulum tivvè ika gər tar, seriye ŋgar ibam, aka gəs tar kuɗa.

Gà mburma Mbulum ana i Tesalunike ya, ta kə̀v a Pul

¹⁷Gà damər mər, i təv ana mì mah ba, mì da aà kurum a ka, kàa kə̀vum a mər hinne. Mì da aà kurum a, i ŋgat a kurum a tsəka, nda are ɗekɗek pəra. Ama i gəzləŋ mər ka, kamala ana mər mandza ŋa i təv kurum a hiywe. Mì yahawa vatwa ka, hinne na mì waya məfə̀rà aka kurum asa ya. ¹⁸Aɗaba taŋa na a sàs a mər məmbə̀ɗaha gər a təv kurum a. Iye Pul nda gər gà, i gwaɗawa, i dehe a, i ta fir aka kurumere a asa te ka, sik diŋ. Ama ka, Əbay sitene aka vəl a mər vatwa tsa. ¹⁹Mì dzalawa aka kurum hiywe ka, aɗaba ana kurum gà mburma Mbulum a. Dite i huɗ madzala gà gər mər ata tekeɗe, mì dzalawa ka, aka dukw maya ba ana Mbulum a ta vile a kwe a ya. Mì dzalawa gà gər ata ka, aka gà asiŋ gà mburma Mbulum ŋgiɗ ɗekɗek tsa, aka kurum mbaŋa, dite na mì ŋgat maŋgayaba a gəzləŋ zayya ka, aɗaba kurum asa mbaŋa. Kurum kà nwim ka, kamala petek mendìwìɗè gər mər ana mì ta ge a dər zlapa, nda gà maŋgayaba ika miɗ Yesuw Kiristi BATSAH kwa ŋa, a pat ana à mère a ya. ²⁰Kaɗəŋ ndzer, tar ihər tì zlibe a à mər aɗaba kurum, dite mər tekeɗe, mìi ŋgeye a ba aɗaba kurum mbaŋa.

¹I təv ana maa tsarakara duwa i təv kurum a asa tsiye ka, mì slewa aà magəsa gəzləŋ asa tsa, mì gwa ka, mìi slirehe a Timute a təv kurum, dite mər ka, mìi ndze a ɗa à gər mər i Atina tə̀ma. ²Kurum kà sərum, Timute ka, damər kwa ana mər ihər mìi ge akaba a megemir nda gà ŋgat a. Mər nda gà ŋgat ka, mì tsikewa bazlam ŋgwal ŋa ana aka gər Yesuw Kiristi ya. Mì sləraha ŋgat a təv kurum ka, dite mà zlak kurum, mə̀ mà a kurumaha à arəv, dite ka, ki ŋgetwim a ndzəɗa ika vatwa Mbulum ɓəŋɓəŋ lele. ³Aɗaba a sàs a mər ka, wura ilik ma ta mà aà kurum a dəba ya, agəra mesewere are ana ki sèwèrwim a ika vatwa Mbulum a tsa. Aɗaba kurum kà sərum, vatwa ŋgiɗ a riŋ tsa, na dite kwa gà mburma Mbulum ki sèwèrekwe a are kamala taŋa ya ya. ⁴Taŋa, aka na mər riŋ i təv kurum mba ya ka, maa mbər metsìkè a kurum aba mesewere are ana ti ti sèwèr a kwe a aka miɗ mba ya. Dite araha kinehe kuɗa ka, kurum tekeɗe, kàa sərum, aka ge ba kamala taŋa ya kaɗəŋ. ⁵Aɗaba taŋa, i təv ana i sər, kurum ihər ki sèwèrwim a are ya ka, i sle aà magəsa gəzləŋ asa tsa. Kamala taŋa ya, i sləraha Timute a təv kurum ka, na dite i sir a dər, meme na ki ndzwim a ya ya. Wànà megìse kurum ana kə̀ gəsum Yesuw Kiristi nda gəzləŋ kurum ana, a de a aka miɗ aka miɗ a, tsəna, Əbay sitene aka bana kurum a. Na bəla kataya ka, taŋa megemir mər ana mì ge ika magər kurum a, a ne ka, taf masakəŋa.

Timute a màha à arəv a Pul

⁶Ama kinehe, Timute ana a daha, dite a màra a təv mər a ka, a tsik a mər dukw ana ŋgwal ŋa ya, na aka gər kurum a. A gwaɗa a mər, megìse kurum ana kə̀ gəsum Yesuw Kiristi nda gəzləŋ kurum a ka, a riŋ a de a aka miɗ aka miɗ, dite nda gà mawàyà ba kurum ana kà wayum ba ika magər kurum ilik ilik tserdze ya asa mbaŋa. Dite a gwaɗa a mər asa mbaŋa ka, kà dzalawum gà gər a təv mər hiywe, nda maŋgayaba lele. Mìi kiv a kurum a ka, hinne, kamala kurum ana ki kìvwim a mər a ya mbaŋa. ⁷Gà damər mər, maa sèwèr are ka, hinne, arəv aka da aà mər a. Ama i təv ana Timute a dara, a tsik a mər gà bazlam ata ya ka, a mà a məraha à arəv, aɗaba ana kurum riŋ ihər ki giswim a Yesuw Kiristi nda gəzləŋ kurum, a de a aka miɗ aka miɗ a. ⁸Na kurum ihər ki dwim a ika vatwa Mbulum lele ka, a ŋgeyewe a mər a ba i gəzləŋ hinne. ⁹Agəra maŋgayaba ata mìi ŋgeye a ba aɗaba kurum a ka, ku mege mì ge kəkaaha a Mbulum meme tekeɗe, a sle tsa. ¹⁰Mì hamawa ka, nda gəzləŋ ilik, ku mege ndaàpat, ku mege ndaàvəɗ, na dite ka, mə vəl a məraha vatwa aà məfə̀rà aka kurum asa ya. Aɗaba a sàs a mər ka, meɗìfè a kurum à dukw ana kà sərum zukw tsiye, na dite megìse ana kə̀ gəsum Yesuw Kiristi nda gəzləŋ kurum a, à sìkèh a aka miɗ aka miɗ.

¹¹I huɗ meheme ana mər ihər mìi heme a a gà Mbulum Tsir kwa nda Yesuw Kiristi BATSAH kwa ŋa ya ka, dite ta vəl a mər vatwa aà madaha a təv kurum. ¹²Mìi heme a a BATSAH kwa ŋa, dite mawàyà ba kurum ana ki weywim a ba ika magər kurum nda gà asiŋ gà mburma tserdze ya, mà səkah, ma ge a kurum hayaffà, ma da aka miɗ aka miɗ, na dite ki weywim a ba ka, kamala ana mì waya kurum mbaŋa ya. ¹³Kamala taŋa ya, BATSAH kwa ŋa ata a vile a kurum a ndzəɗa a gəzləŋ ɓəŋɓəŋ lele. A pat ana Yesuw Kiristi à mère a ya ka, bakal a ge a i təv kurum tsidze, ki ndzwim a tsəɗaŋŋa ika miɗ Mbulum Tsir kwa. A pat ata ka, gà Yesuw Kiristi nda gà mburma ŋgar tserdze na ta mère a ya.

Dukw ana a tsahən aà Mbulum a

¹Gà damər gà, dukw ana a zeha mìi tsik a kurum a ya ka, araha: Akahər ana àvə̀ɗaka mì ɗif a kurum ka, à mede ana a tsahən aà Mbulum a. Araha kaɗəŋ, mì sər ka, mede kurum aka ne kamala taŋa ya. Ama kinehe ka, mì ge a kurumaha kamkam hinne, nda zləm Yesuw BATSAH kwa ŋa: Zazamum ka, mede ata hiywe, səkahum dər aka miɗ aka miɗ asa. ²Aɗaba kurum kà sərum, mì ɗif a kurum ka, à dukw ana Yesuw BATSAH kwa ŋa a gwaɗa a mburma, gwim a. ³Aɗaba taŋa, dukw ana Mbulum a waya ka, nwim gà tsəɗaŋŋa ika miɗ ŋgar. Kamala megweɗe ya ka, ki gwim mezelme nda təv muva tsa. ⁴Taŋa ku mege weke ika magər kurum ka, tə ndza nda məkəs ŋgar ndaka vatwa ŋa lele, kamala ana a tsahən aà Mbulum a, mburma tə ta ŋgat vatwa aà məma à kurum a bakal tsidze. ⁵Ki ndzwim a nda gà tar ka, kamala meèweke ba kurum ana ŋgwala tsa, dzə̀lùwùwùrwùr a kwere a kurum a tsa. Aɗaba na a gewa kamala taŋa ya ka, gà mburma ana tə sər Mbulum tsiye. Ama kurum ka, ki gwim dər kamala taŋa ya tə tsa. ⁶Wura ilik ma ta ge bakal, a ge a wirwir aà damər ŋgar a nda təv məkəs ŋgar a tsidze. Aɗaba BATSAH kwa ŋa a ta vile a mesewere are ka, a gà na ta gewa gà medzibe gà dukw bakal ata kamala taŋa ya. Mì be a kurum à ɗaf, mì tsik a kurum aba taŋa ya ka, daga piŋŋe. ⁷Aɗaba Mbulum a zal a kwa ka, aà mege mezelme tsa. A zal a kwa ka, na dite ki nekwe a gà tsəɗaŋŋa ika miɗ ŋgar a ivaɗ. ⁸Aɗaba taŋa, na wura tətstəts aka raraɗaba ahər a zləm, a waya mandza zləm a bazlam ata tsəka, a niw taŋa ka, bazlam mburma tsa. Ama a niw ka, biy Mbulum, wele ana a vəl a kurum Mezite Mesife ŋgar ana tsəɗaŋŋa ya ivaɗ.

⁹Gà damər mər, a ge a ŋgulum tsa na i wetse a kurumaha aka gər mawàyà ba kurum ana, ki weywim a gà asiŋ gà damər kurum a. Aɗaba Mbulum nda gər ŋgar na a ɗif a kurum à mawàyà ba ata ya. ¹⁰Haya kaɗəŋ, kamala taŋa ya, kurum ihər ki weywim a gà mburma Mbulum ana ika ahəɗ Makaduniya ya tserdze mbaŋa. Ama ka, mìi ge a kurum a kamkam hinne asa, na dite mawàyà ba kurum ata ki weywim a ba ya, à sìkèh a aka miɗ aka miɗ a. ¹¹Mərum aba lele, na dite mendze kurum ana ki ndzwim a ya ka, zayya a ge a ŋgwal ŋa ya. Dzalum aka gà dukw kurum lele. Gwim megemir nda ahər kurum ŋa, kamala ana mì tsik a kurum akahər ata ya. ¹²Na kàa gwim dər kataya ka, gà na tàa gəs Yesuw Kiristi nda gəzləŋ tar zukw tsiye, ti zlibe a à kurum. Dite kurum tekeɗe, dukw mezime kurum riŋ mbaŋa, ki ŋgeleywim a aba duwa ya ɓav tsa asa mbaŋa.

Pat ana Yesuw BATSAH kwa ŋa à mère a ya

¹³Gà damər mər, a sàs a mər ka, sərum duwa aka gər gà məməta. Aɗaba arəv ma ta da aà kurum a kamala gà na ta veve a Yesuw tsiye tsa. ¹⁴Kwa ka, kà sərakwa ndzer, Yesuw aka mət, dite i dəba ŋa ya ka, Mbulum a mbəlara à ŋgat i məməta ya. Kamala taŋa ya tekeɗe, sərum dər ka, gà na tàa gəs Yesuw nda gəzləŋ tar a, aləka tàa mata ka, Mbulum a ta mbilere à ter a i məməta ya kataya mbaŋa, na dite ti ndze a i təv ilik ŋa nda gà Yesuw a.

¹⁵Kamala taŋa ya, duwa ma wise a kurum gər tsa. Aɗaba a pat ana BATSAH kwa ŋa à mère a ya ka, gà na tàa mata ya, ti ne a gà ɓəzla dəba ika kwa ana kwa riŋ mandza ŋa nda are ya ɓav tsidze. I tsik a kurum taŋa ka, dukw ana BATSAH kwa ŋa a ɗif dər à gər ŋgar a. ¹⁶A pat ata ka, Mbulum à fèfil a nda magala ŋgəlakəkka, na dite dukuməŋa à dze ahər a ba ya. Əbay ana ika magər gà gawla Mbulum a, a zeliŋa, dite ta vèt a mezleliŋ Mbulum mbaŋa. I dəba ŋa ya ka, BATSAH kwa ŋa a terre a i gər ŋa i mbulum a kuɗa. Dite gà mburma ana ta mata ya, tàa gəs ŋgat nda gəzləŋ tar a ka, tar na ti lèh a aà mimbilera i məməta ya. ¹⁷I dəba ŋa ya asa ka, Mbulum a yehe a kwe a gər, a kwa ana kwa riŋ mandza ŋa nda are ya, à dzik akaba a kwa a təv ŋgar nda hulɓukw. Kamala taŋa ya, kwa tserdze ki ti lìmekwe a nda gà BATSAH kwa ŋa i gər ŋa i fata, ki ndzekwe a i təv ŋgar aà biybiy kuɗa. ¹⁸Aɗaba taŋa, màyum baha à arəv nda bazlam ata ika magər kurum ilik ilik tserdze.

Hadzalakwa ba agəra Batsah kwa ana à mère a ya

¹Gà damər mər, a ge a kurum a ŋgulum tsa, na i wetse a kurumaha aka gər pat ana gà dukw ata ti ti ge a ba ya. ²Aɗaba kurum nda gər kurum kà sərum lele, pat ana BATSAH kwa ŋa a ta mère a ya ka, paf tsara, kamala mala akəl ana a de a a mege akəl ndaàvəɗ, sèrèh sèrèh wura a sir ahər a tsiye. ³I təv ana gà mburma ta gweɗe a ka, kwite mər zayzay lele, duwa a riŋ a ge a a mər a tsiye ka, tsaatsa taŋa ka, tits nda medzeye ana a le aà tar a kuɗa. Ti sle a aà mibeye iɗəm a tsidze. A ne a ka, kamala məkəs ana kəla i huɗ zìhhwe, ndzawraw à dze ahər a ba tsara ka, a we a ya. ⁴Ama kurum kinehe ka, kamala gà mburma ana i luvuŋ a asa tsa. Aɗaba taŋa, a pat ata ka, ma ti le aà kurum kamala mala akəl ana a de a a bəra mburma ya tsa. ⁵Aɗaba kurum tserdze ka, gà mburma ana ta gewa duwa parakkà i təv dzaydzay ŋa ndaàpat a ivaɗ, tsəka, kurum gà mburma ana ta gewa duwa ndaàvəɗ i luvuŋ a tsa. ⁶Aɗaba taŋa, ka tə ndzakwa ɓìlèffe ika mendze are kamala gà asiŋ gà mburma ŋgiɗ a tsa. Ama kwa ka, ndzakwa nda metsehe lele, kwarakwa ba kwa ivaɗ. ⁷Ndaàvəɗ na gà mburma ti ndzewa are ya. Dite ndaàvəɗ asa mbaŋa na bagwal ŋa gà ɓəzla mekweye ta kwayawa aà guzum a. ⁸Ama kwa kinehe ka, gà mburma ana mandza ŋa i təv dzaydzay ŋa ndaàpat a, tsəka, kwa gà na i luvuŋ a tsa. Aɗaba taŋa, ka ta kwayakwa tsa, say kwarakwa ba kwa lele, tàkwa aka miɗ aka miɗ nda magəsa Yesuw Kiristi nda gəzləŋ kwa, dite nda mawàyà ba ana ka wayakwa dər ba ika magər kwa ilik ilik tserdze ya asa mbaŋa. Aɗaba mege dukw ata ka, a ne kamala ana kà dùwayakwa ba nda *andiw sayaw, na dite duwa a ndzekwe a asa tsiye ya. Tikekwa madzala gà gər kwa ka, aka pat ana Yesuw Kiristi a ta mbil a à kwa fit kweleŋ a. Aɗaba ar ka, kamala *tazak ana ti tikewa a gər i təv mege gùvəl a. ⁹Aɗaba Mbulum a pala kwa ka, na dite a ta vile a kwe a mesewere are ya tsa. Ama a pala kwa ka, aà məmbàlà à kwa nda ahər Yesuw Kiristi BATSAH kwa ŋa ivaɗ. ¹⁰Ŋgat a mət ka, aɗaba kwa, na dite ki ti ndzekwe a i təv ilik ŋa nda gà ŋgat a. Ku mege kàa mbər mìtekwa, kige tsa ku mege kwa riŋ mandza ŋa nda are mba tekeɗe, a pat ana à mère a ya ka, ki ndzekwe a i təv ilik ŋa nda gà ŋgat. ¹¹Aɗaba taŋa, mùm a baha à arəv, kà zlakum ba ika magər kurum ilik ilik tserdze, kamala ana kurum riŋ ihər ki gwim a gà dukw ata kinehe ya.

Mandəvandəv mifefile nda mege wusa

¹²Gà damər mər, mər ihər mìi ge a kurumehe a kamkam hinne: Sərum ba nda gà na ta ge a megemir Mbulum ika magər kurum a. Tar ka, gà na BATSAH kwa ŋa a pala, a dza aɗəm tar ika magər kurum, dite ti ɗif a kurum à vatwa ŋgar a. ¹³Zlə̀bum à tar, ka wayum tar lele mbaŋa, aɗaba megemir tar ana ta ge a agəra kurum a. Kurum nda gà asiŋ gà mburma ŋgiɗ ana i təv mayahaba gər gà mburma Mbulum a tserdze, ndzum ika magər kurum ka, nda zay lele, maàga ma ge iɗəm tsa.

¹⁴Gà damər mər, mìi ge a kurum a kamkam asa: Bwim à ɗaf a gà ɓəzla màsar ana ti ndze a taf masakəŋa ya. Mùmaha à arəv a gà ɓəzla magəɗa, dite kà zlakum gà na ndzəɗa tar a riŋ tsiye mbaŋa. Gəsum gəzləŋ nda təv gà mburma tserdze, kà yum ba ika miɗ mburma tsa. ¹⁵Na wura aka ge a kurum dukw ana ŋgwal ŋa tsiye ka, gwim metsehe, ka ta mumar aɗəm à bakal ŋa tsa. Ama hiywe geywim ba ka, dukw ana ŋgwal ŋa ya ika magər kurum, dite a gà asiŋ gà mburma tserdze mbaŋa.

¹⁶Ŋgeyewim ba ka, kəla pat. ¹⁷Ka ta miyakum à mahàmà a Mbulum tsidze. ¹⁸Ku mege ndeɗime tekeɗe ka, gwim kəkaaha a Mbulum. Aɗaba a sasar ka, gwim kataya, na kurum gà mburma ana mandza ŋa i təv ilik ŋa nda gà Yesuw Kiristi ya.

¹⁹Ka ta palum ahəm a Mezite Mesife ŋgar tsa. ²⁰Dite ka ta fə̀rum aà bazlam gà na ta me a kurum a à guma Mbulum a ka, kamala za ya tsa mbaŋa asa. ²¹Dzikwim à gà bazlam ana mburma ti tsik a ya tserdze dzekwiŋ, na dite ki sirwim a dər ka, wànà a dara ana, i təv Mbulum a ya, tsəna, pàrsa ya ya, dite ka, kà gəsum dukw ana kà lwim ahər iɗəm ŋgwal ŋa lele ya. ²²Ama ka, miyakum à mege dukw bakal fit kweleŋ.

²³Mìi heme a a Mbulum ana a vile a kwe a matasla yam a gəzləŋ a, na dite ki nwim a gà mburma ŋgar, ki ndzwim a tsəɗaŋŋa kamala ŋgat ana a ndze a ya mbaŋa. Dite ma kasla mesife kurum nda madzala gà gər kurum nda gà ba kurum ŋa tserdze, na dite a pat ana Yesuw Kiristi BATSAH kwa ŋa à mère a ya ka, bakal a ge a i təv kurum tsidze ya. ²⁴Mbulum ana a zal a kurum a, na a ge a dukw ata kamala taŋa ya ya. Aɗaba ŋgat ka, a ge a dukw ana a gwa, i ta ge a ya ndzer kaɗəŋ.

²⁵Gà damər gà, hamum a Mbulum aɗaba mər mbaŋa.

²⁶Gwim wusa a gà mburma Mbulum tserdze nda gəzləŋ ilik.

²⁷Iye ihər i ge a kurum a kamkam hinne, nda zləm BATSAH kwa ŋa: Ka dzeŋgwim wakita aaha a gà asiŋ gà mburma Mbulum ŋgiɗ tserdze mbaŋa.

²⁸Yesuw Kiristi BATSAH kwa ŋa ma ge a kurum ŋgwal ŋa aka miɗ aka miɗ.