MALAHALAH
wakita ana
YUHANA
a wetse ya
1Bazlam aka gər Yesuw Kiristi, mala məvəla a kwa mesife
1Mì wetse a kurumaha wakita aaha ka, aka gər bazlam ana a vile a mesife a mburma ya. Aka ana tàa ge gər ahəɗ zukw tsiye ka, bazlam ata a riŋ dukw ŋgar.*fa* Mər maa tsaraka bazlam ŋa, maa ŋgatar nda are mər mbaŋa. Maa fə̀r ahər kaɗəŋ, maa ləm ahər nda ahər mbaŋa asa. 2Mbulum a pàt à mesife ata ka, ndərzayya, maa ŋgatar. Aɗaba taŋa mì tsik a kurum ka, bazlam mesife ata mì ŋgatar a. Mìi ɗif a kurum a ka, à mesife ana à ndìv a tsa, a ndze a aà biybiy a. Akahər ata piŋŋe ka, a riŋ i təv Mbulum Tsir kwa. Taŋa na kinehe Mbulum a pàt a kwa dər kuɗa ya. 3Dukw ana mì ŋgatar a, ndəna mì tsaraka ya, na mìi tsik a kurum a mbaŋa, na dite kurum tekeɗe ka, ki gewim a à ba nda gà mər i təv gà dukw ata. Magàwà ba ana ki gewekwe a ba ya ka, nda gà Mbulum Tsir kwa, dite nda gà Yesuw Kiristi Kəla ŋgar asa. 4Mì wetse a kurumaha gà dukw ata ka, na dite maŋgayaba kwa ana ki ŋgeyekwe a ba ya ka, mà rah a gəzləŋ kwa lele ya.
Mbulum ka, təv dzaydzay ŋa
5Mbulum ka, təv dzaydzay ŋa, luvuŋ a riŋ i təv ŋgar kwizikw tsidze. Taŋa ka, dukw ana mì tsaraka i təv Yesuw Kiristi ya, na dite mì tsik a kurum a mbaŋa. 6Na ki gweɗekwe a ka, waytsà kàa sərakwa ba nda gà Mbulum, kàa gawakwa ba, dite kwa riŋ ki ndzekwe a i luvuŋ hiywe asa ka, taŋa ka, kà sàsakwa pàrsa, ki gekwe a ka, dukw ana ndzer ŋa ya tsa. 7Ama na kwa mandza ŋa i təv dzaydzay ŋa kamala Mbulum ana ŋgat mandza ŋa i təv dzaydzay ŋa ya ka, kàa gawakwa ba na taŋa ya. Məmbəz Yesuw Kəla ŋgar ana a dza dər aɗaba kwa ya ka, a bere a gəzləŋ kwa, à pìl a kwa a à bakal ana ki gewakwa ya tserdze.
8Na kwa ihər ki gweɗekwe a, mər ka, gà ɓəzla ndzer ŋa, bakal a riŋ i təv mər tsəka, taŋa ka, ki benekwe a ba kwa, ndzer ŋa a riŋ i təv kwa tsidze. 9Ama na kàa ɗifekwa à bakal kwa ana ki gekwa ya aka miɗ Mbulum ivaɗ ka, à pìl a kwe a à dukw ana ki gekwa ŋgwal ŋa tsiye. A bere a gəzləŋ kwa, nda mazlàra kwa i bakal kwa ata ya tserdze. Aɗaba ŋgat ka, mala ndzer ŋa, a ge a ka, dukw ana a gwa, i ge a ya kaɗəŋ. 10Na bəla ki gweɗekwe a, maa ge bakal tsəka, taŋa ka, kà nekwa à Mbulum ka, kamala ana mala pàrsa ya. Bazlam ana a tsik a kwa ya ka, a riŋ i təv kwa tsa.
2Yesuw Kiristi, ŋgat mala mazlàkà kwa
1Gà ɓəza gà, i wetse a kurumaha gà dukw ata ka, dite ka, ki gwim bakal asa tsa. Ama na bəla wura a ge a bakal ka, sərum dər, wele ŋgiɗ a riŋ mandza ŋa ika miɗ Mbulum Tsir kwa, a heme a aɗaba kwa. Wele ata ka, Yesuw Kiristi. Ŋgat ka, bakal ŋgar a riŋ tsa. 2Ŋgat na a dara, a mət kamala dukw ana ta kəɗ a Mbulum biy taf a, na dite Mbulum à pìl a kwe a dər à bakal kwa ya. Ama ka, bakal kwa ɗekɗek tsa na à pìl a dər a. A sle a aà məpəla à bakal a gà mburma ana ika gər ahəɗ tserdze ya mbaŋa.
3Na ki gekwe a dukw ana Mbulum a tsik a kwa ya ka, taŋa na a ɗif a kwa dər ka, ka sərakwa dər ŋgat ndzer kaɗəŋ a. 4Na wura a gweɗe a, waytsà i sər Mbulum, ama à gis a ahəm gà dukw ana a tsik a tsəka, a ne mala pàrsa masakəŋa, ndzer ŋa a riŋ i təv ŋgar tsa. 5Ama na wura a ge a dukw ana Mbulum a tsiker a ka, ŋgat ka, a waya Mbulum nda ndzer lele. Kamala taŋa ya na ki sirekwe a dər, ki ndzekwe a i təv ilik ŋa nda gà Mbulum, ki gewekwe a ba ya. 6Na wura a gweɗe a, iye riŋ mandza ŋa i təv ilik ŋa nda gà Mbulum kəla pat ka, say ma zazam mendze Yesuw Kiristi ana a ndza ɗa ya mbaŋa.
Mbulum a gwa: «Wayum ba lele»
7Gà masla gà, dukw aaha i wetse a kurumaha ya ka, dukw ana awiya ŋa, kàa tsarakum ilik zukw tsiye tsa. Ama ar ka, ilik nda məpala ahəm Mbulum ana kà tsarakum daga aà gər ana kà dzum ba aà mazazama Yesuw Kiristi ya. Məpala ahəm ata ka, miviye ŋa, bazlam ana kàa mbər metserekwim piŋŋe ya. 8Ku mege kataya tekeɗe ka, məpala ahəm aaha i wetse a kurumaha ya ka, awiya ŋa iɗəm mbaŋa asa. Ndzer ŋana ka, aka pàt aba. A pàt aba ka, nda təv Yesuw Kiristi, dite i təv mendze kurum ana kà ndzum ɗa ya mbaŋa. Kà sərum məpala ahəm ata awiya ŋa ya ka, aɗaba ana luvuŋ a riŋ à nikiɗ a ihər a, təv dzaydzay ŋa ana ndzer a, a riŋ à dze a ba aà medìve wuratətətətà kinehe kuɗa ya.
9Na wura a gweɗe a, iye ka, mandza ŋa i təv dzaydzay ŋa, ama a ne a are a mburma ka, sərum dər, wele ata ka, ar ka, i luvuŋ hiywe haa kinehe mba. 10Na bəla wur ana a waya mburma ya ka, sərum dər, ŋgat ka, mandza ŋa ka, i təv dzaydzay ŋa. Duwa a riŋ ilik i təv ŋgar na à gis a mìsle ŋgiɗ a bakal a tsa. 11Ama wur ana a ne a are a mburma ya ka, mendze ŋgar ana a ndze a tserdze ya ka, i luvuŋ. A de a ka, tàm tàm tàm a sər vatwa ana a de a dər a tsa, kamala ar ka, guluf ŋa. Aɗaba luvuŋ ata təɗàm təɗàm aka ne à ŋgat mala guluf.
12A kurum gà ɓəza gà, i wetse a kurumaha gà dukw aaha ka, aɗaba Mbulum aka mbər məpəla a kurum à bakal kurum. A pəl a kurum dər ka, agəra dukw ana Yesuw Kiristi a ge ya. 13A kurum gà bàba gà mburma ana ki gwim a megemir Mbulum a, i wetse a kurumaha dukw aaha ka, aɗaba kàa sərum wele ana ŋgat a riŋ daga piŋŋe aka ana tàa ge gər ahəɗ zukw tsiye ya. A kurum gà gawla ŋana, i wetse a kurumaha mbaŋa ka, aɗaba ana kàa pazum aba Əbay sitene a bəɗ a.
14A kurum gà ɓəza gà, i wetse a kurumaha asa ka, aɗaba ana kà sərum Mbulum Tsir kwa ya. A kurum gà bàba gà mburma ana ki gwim a megemir Mbulum a asa, i wetse a kurumaha ka, aɗaba ana kàa sərum wele ana ŋgat a riŋ daga piŋŋe aka ana tàa ge gər ahəɗ zukw tsiye ya. A kurum gà gawla ŋana asa, i wetse a kurumaha ka, aɗaba ana kurum gà ndzəɗa ŋa nda təv bazlam Mbulum a. A ndze a i gəzləŋ kurum, dite kà pazum dər Əbay sitene a bəɗ mbaŋa.
15Ka ta wayum dukw ana ŋgwal ŋa tsa ika gər ahəɗ a tsa. Na wura a waya dukw ata ka, a sle a aà mawàyà Mbulum Tsir kwa asa tsa. 16Kurum kà sərum, meme na gà dukw ana ika gər ahəɗ ti ndze a ya. Aɗaba gà mburma ti zezem a ka, dukw ana gəzləŋ tar a waya ta ge a ya ɗekɗek. Tàa ŋgat a duwa ka, ta ge aaka a are, ta waya dukw ata tsara, tì sìkèh a à ba tar ika miɗ mburma, ta ge a zlapa nda gà dukw tar ata ta ŋgat a. Gà dukw ata a sàs a tar aà mege tserdze ya, tə dara ka, ika gər ahəɗ a tsəka, i təv Mbulum Tsir kwa ya tsa. 17Sərum dər, gər ahəɗ aaha ka, a ndze a tsa, à ndìviŋa. Ku mege gà dukw ana iɗəm, gà mburma ta ge aaka a are tserdze ya tekeɗe ka, à ndìv a mbaŋa. Ama wur ana a ge a dukw ana Mbulum a waya ya ka, ŋgat a ndze a ka, aà biybiy.
Bazlam aka gər gà ɓəzla mene are Yesuw Kiristi
18Gà ɓəza gà, pat ana gər ahəɗ à ndìv a ya ka, aka à mendzera. Kamala ana kà tsarakum a ka, mala mene are Yesuw Kiristi a deriŋa. Ama ka, gà ɓəzla mene are Yesuw Kiristi kinehe ka, tàa dara hinne kaɗəŋ. Aɗaba taŋa na ki sirekwe a dər ka, gər ahəɗ aka à mendìve kaɗəŋ ndzer a. 19Gà mburma ata tə ndzawa piŋŋe ka, ika magər kwa ana kə̀ gə̀sakwa Mbulum a. Ama tə ndzawa ka, nda ndzer tsa. Aɗaba taŋa na tə da ika magər kwa ya ya. Na mege tə ndzawa ika magər kwa nda ndzer ka, ti de a i təv kwa ya tsa. Ama ta miyak à kwa, dite na kinehe kà sərakwa dər ndzer, ku wura ilik i liwiŋ gà mburma ata aka ndza nda gà mburma kwa nda ndzer ŋa ilik tsidze.
20Ama kurum tserdze ka, kà sərum gà dukw ana gà ndzer ŋa ya, aɗaba Kiristi na a vəl a kurum Mezite Mesife ŋgar a. 21I wetse a kurumaha ka, agəra ana kà sərum gà dukw ndzer ŋana zukw tsiye tsa. Seyiŋ tsa, i wetse a kurumaha ka, agəra ana kà sərum a ivaɗ. Ama kà sərum gà ndzer nda pàrsa ka, ti sle aà megewe a ba a təv ilik ŋa tsa mbaŋa.
22Na kataya ana, weke na a ne mala pàrsa ya? Na a ne mala pàrsa ka, say wur ana a gweɗe a aà Yesuw ka, Kiristi, mala məmbə̀là à mburma ana Mbulum a gwa, i slir a kurumehe a ya tsiye, ŋgat ka, kəla mburma pəra ya. Taŋa ka, ŋgat na mala mene are Kiristi ŋa ya. A niw gà Mbulum Tsir kwa nda Kəla ŋgar ŋa mbaŋa. 23Aɗaba wur ana aka niw Kəla Mbulum a ka, a niw taŋa ka, Tsir ŋgar ŋa mbaŋa. Ama wur ana aka gəs Yesuw, a sər, ŋgat Kəla Mbulum ndzer a ka, a gəs taŋa ka, Mbulum Tsir ŋana dze ya mbaŋa asa.
24Aɗaba taŋa, i tsik a kurum ŋa: Bazlam ana kà lah metserekwim aka gər Yesuw Kiristi ya ka, gəsum a gəzləŋ kurum ədəts lele. Na gà dukw ata kà tsarakum daga piŋŋe ya, ti ndze a i gəzləŋ kurum lele ka, taŋa kurum tekeɗe ka, kurum riŋ mandza ŋa i təv Kəla Mbulum nda gà Mbulum Tsir ŋgar ŋa, i təv ilik ŋa hiywe aà biybiy mbaŋa. 25Taŋa ka, bazlam mesife ana Kiristi a tsik a kwa i sida ya, a gwa, i ta vile a kwe a ya ka, mesife ana à ndìv a tsa aà biybiy a.
26I wetse a kurumaha gà dukw aaha ka, aka gər gà mburma ana ti yehe a vatwa aà məbànà kurum a. 27Ama kurum ka, Kiristi aka vəl a kurum Mezite Mesife Mbulum ana a ndze a i gəzləŋ kurum a. Aɗaba taŋa, mala medzeŋge a kurum ŋgiɗ pam ka, a riŋ asa tsa. Mezite Mesife ŋgar ata na a riŋ a dzeŋge a kurum a gà dukw tserdze kinehe kuɗa ya. Dukw ana a dzeŋge a kurum a ya ka, ndzer kaɗəŋ, pàrsa iɗəm tsa. Aɗaba taŋa na i tsik a kurum a: Gwim kamala ana a dzeŋge a kurum a ya, kamala megweɗe ya, ndzum i təv ilik ŋa nda Yesuw Kiristi kəla pat.
28Gà ɓəza gà, i tsik a kurum a asa ka, ndzum nda gà ŋgat i təv ilik ŋa, na dite, a pat ana à mère a ya ka, gəzləŋ kwa a ge a magəɗa tsiye, dite a ndze a hiywekukwà nda hwarwa ŋa ɓav tsa asa, na aka dara ya. 29Kurum kà sərum, Yesuw Kiristi ka, ŋgat mala ndzer ŋa. Aka ge bakal ilik tsidze. Aɗaba taŋa sərum dər, wur ana a ge a dukw ana ŋgwal ŋa ya ka, ŋgat ka, aka ne kəla Mbulum mbaŋa.
3Kwa ka, gà ɓəza Mbulum
1Fə̀rum kwaŋ, meme na Mbulum a waya kwa hinne ya, dite ka, a zal a kwa dər gà ɓəza ŋgar asa ya? Kàa nekwa ka, gà ɓəza ŋgar kaɗəŋ. Gà mburma gər ahəɗ aaha tə sər ka, kwa kàa nekwa gà ɓəza Mbulum tsəka, aɗaba ana tə sər Mbulum tsiye. 2Gà masla gà, kinehe ka, kàa nekwa gà ɓəza Mbulum, dite ki ti nekwe a gà dukùla na aka miɗ mba ya ka, ki sirekwe a zukw tsa. Ama kə̀la ka, kà sərakwa ndzer, na *Kiristi aka màra ka, ki ti ndzìkìɗekwe a ba kamala ŋgat a, aɗaba ki ŋgetekewer a parakkà, kamala ana ŋgat a ndza ya kaɗəŋ. 3Ku weke na aka tike madzala gà gər ŋgar a təv Yesuw Kiristi ana a ge a duwa kamala taŋa ya ka, a kesle a ba ŋgar i təv gà bakal a tserdze, kamala Kiristi ana aka ge bakal tsiye mbaŋa.
4Na wura a gewa bakal ka, a niw məpala ahəm Mbulum, aɗaba mege bakal ka, menìwè Mbulum nda dukw ana a pala ahər ahəm a mburma ya tserdze. 5Kurum kà sərum, Yesuw Kiristi a dara aka gər ahəɗ a ka, aà məbàrà aà kwa bakal kwa ana ki gekwe a ya. Ŋgat ka, bakal ŋgar a riŋ ilik tsidze. 6Aɗaba taŋa, wur ana a ndze a i təv ilik ŋa nda Yesuw Kiristi ya ka, a gewe a bakal asa tsa. Ama wur ana a gewe a bakal a ka, aka ŋgatar ilik zukw tsa, a sər ŋgat ɓav tsa asa mbaŋa.
7Gà ɓəza gà, wura ma ta paza a kurum za tsa. Aɗaba wur ana a gewa bakal tsiye ka, ŋgat na mala ndzer ŋa ika miɗ Mbulum kamala Kiristi ana ŋgat mala ndzer ŋa ika miɗ Mbulum mbaŋa ya. 8Ama wur ana aka miyak à mege bakal tsiye ka, ŋgat ka, i ahər Əbay sitene, aɗaba Əbay sitene ata a gewa ka, bakal daga aà gər ana ta ge gər ahəɗ a. Aɗaba taŋa na Yesuw Kiristi a dara aka gər ahəɗ a ka, aà medzeye à megemir Əbay sitene ata seyiŋ.
9Na wura aka ne kəla Mbulum ka, a gewe a bakal asa tsa. Aɗaba mesife ana Mbulum a vəlar a ka, a riŋ mandza ŋa i gəzləŋ ŋgar. A sle aà megewe a bakal asa tsəka, aɗaba ana Mbulum aka ne Tsir ŋgar a. 10Ama wur ana a gewa dukw ana ŋgwal ŋa tsiye ika miɗ Mbulum, kige tsa a waya mburma tsəka, ŋgat ka, mburma Mbulum tsa. Kamala taŋa ya na ki sirekwe a dər ikaba ya, naha ka, gà ɓəza Mbulum, kige tsa gà ɓəza Əbay sitene ka, aà gà dukw ata ta geye a ya.
Wayum ba
11Bazlam ana kà tsarakum daga aà malahalah ŋa ya ka, araha, a gwa ka: Ka wayakwa ba ilik ilik tserdze. 12Ka ti nekwa kamala Kayinu ana akahər ata ya tsa. Ŋgat ka, Əbay sitene na a vəlar ndzəɗa, dite na a kəɗ dər damər ŋgar ana məmər tar ilik a. Aàmala na a kəɗ ŋgat a? A kəɗ ŋgat ka, a samata megemir damər ŋgar ata a gewa ya ka, ŋgwal ŋa lele. Ama biy ŋgar ka, ŋgwala tsa.
13Gà damər gà, i təv ana gà mburma gər ahəɗ ti ne a kurum a are ya ka, ma ta ge aà kurum kamala dukw mene aà mburma ya tsa. 14Aɗaba kwa kà sərakwa kinehe ka, kwa i təv məməta asa tsa, kàa tàkwara iɗəm a. Kàa ŋgatakwa mesife ana awiya ŋa ya. Dite meme na ki sirekwe a dər ka, kàa ŋgatakwa mesife ata awiya ŋa ya ya? Ki sirekwe a dər ka, aɗaba ana ki weyekwe a gà damər kwa ana ika vatwa Mbulum a. Na wura a waya gà damər ŋgar ata tsəka, ar ka, i məməta hiywe mba. 15Dite wur ana a ne a are a damər ŋgar a ka, ŋgat a ne ka, mala makə̀ɗà mburma. Aɗaba kurum kà sərum, mala makə̀ɗà mburma ka, aka ŋgat mesife ana à ndìv a tsiye zukw tsa. 16Aɗaba Yesuw Kiristi ka, a waya kwa. A dara, a dzeye à mesife ŋgar aɗaba kwa. Taŋa na a ɗif a kwa dər ka, meme na ki ta weyekwe a gà damər kwa ana ika vatwa Mbulum a ya. Kwa tekeɗe ka, say vəlakwa mesife kwa aɗaba gà damər kwa mbaŋa. 17Na bəla wura a riŋ, kuɗa duwa a ger a tsa, dite ka, a ŋget a a damər ŋgar a riŋ, kuɗa duwa a sler a za hinne, ama ka, à zlèk a ŋgat tsəna, meme na a gweɗe a ka, i waya Mbulum asa ya? A riŋ tsa. 18Gà ɓəza gà, aɗaba gà dukw ata kataya ya ka, ka ta wayakwa gà damər kwa ana ika vatwa Mbulum a ka, nda bazlam ana ki fèfilekwere a ika arah taf masakəŋa ya pəra tsa. Ama ki weyekwe a tar ka, nda ndzer ŋa ara i gəzləŋ kwa ya mbaŋa, dite meweye kwa ata ki weyekwe a tar a ka, mə̀ pàt nda təv megemir kwa ana ki gekwe a ter a ŋgwal ŋa ya.
Gà ɓəza Mbulum ka, ta ge a magəɗa tsa na ika miɗ ŋgar a
19Na ki gekwe a kataya ka, ki sirekwe a dər, na kwa kà nekwa gà ndzer ŋa ika miɗ Mbulum a, dite gəzləŋ kwa a ndze a zayya ika miɗ ŋgar a mbaŋa. 20Ku mege madzala gà gər kwa ka ɗifekwa à bakal kwa ana ki gekwa ya tekeɗe ka, ki sirekwe a dər, Mbulum ka, Batsah ŋa, a za madzala gà gər kwa. Aɗaba ŋgat ka, a sər gà dukw ana tserdze ya. 21Aɗaba taŋa, gà masla gà, na bəla madzala gà gər kwa aà mege bakal asa tsa kaɗəŋ ka, taŋa ka, ki sirekwe a dər, ki slekwe a aà madàra aka miɗ Mbulum a ka, parakkà lele, magəɗa a gekwe a tsa. 22A vile a kwe a dukw ana ki wizekwe a aà ŋgat a ya tserdze mbaŋa, aɗaba ana kàa gə̀sakwa məpala ahəm ŋgar, ki gekwer a ka, dukw ana a tsahən aà ŋgat mbaŋa ya. 23Məpala ahəm ŋgar ana a tsik a kwa ya ka, araha. A gwa ka: Gə̀sakwa Yesuw Kiristi ana Kəla ŋgar a nda gəzləŋ kwa, dite ka wayakwa ba ika magər kwa ilik ilik tserdze kamala na Kiristi a tsik a kwa ya mbaŋa asa. 24Wur ana aka gəs məpala ahəm Mbulum a ka, a ndze a i təv ilik ŋa nda ŋgat. Mbulum tekeɗe ka, a ndze a i təv ilik ŋa nda ŋgat mbaŋa. Meme na ki sirekwe a dər ka, Mbulum a ndze a i təv ilik ŋa nda gà kwa ya? Ki sirekwe a dər ka, aɗaba Mezite Mesife ŋgar ana a vəl a kwa ya.
4Sərakwa ikaba à gà Mezite Mesife Mbulum a nda biy
mala mene are *Kiristi ya
1Gà masla gà, gà ɓəzla məma à guma Mbulum ana nda pàrsa ya ka, tar riŋ ika gər ahəɗ pampam hinne. Aɗaba taŋa, ka ta gəsum bazlam wur ana a gweɗe a kurum a ka, i tsik a kurum a bazlam Mbulum nda ndzəɗa Mezite Mesife ya bise tsara tsa. Say ki ndzekwim a bazlam ŋgar ata ka, nda metsehe, na dite ki sirwim a dər ka, a tsik ana, nda ndzəɗa Mezite Mesife Mbulum kaɗəŋ a, tsəna, pàrsa ya ya. 2Araha, meme na ki sirwim a dər, naha ka, Mezite Mesife Mbulum a: Wur ana a gweɗe a, Yesuw Kiristi a dara aka gər ahəɗ a, a ne mburma ya ka, wele ata na a ndze a nda Mezite Mesife ana a dara i təv Mbulum a ya. 3Ama wur ana a niw gà dukw ata a ɗeme ahər a duwa kataya ya ka, Mezite Mesife Mbulum a riŋ i təv ŋgar tsa. Aɗaba Mezite Mesife ŋgar ata a dara ka, i təv mala mene are Yesuw Kiristi ya. Piŋŋe ka, kurum kàa tsarakum na wele ata a ti dere a ya. Ama kinehe ka, aka ndzera aka gər ahəɗ a kaɗəŋ.
4Gà ɓəza gà, kurum kàa nwim ka, gà mburma Mbulum, kàa pazum aba gà ɓəzla məma à guma Mbulum ata nda pàrsa a bəɗ a. Aɗaba Mezite Mesife Mbulum ana i təv kurum a ka, a za mezite mesife ana i təv gà mburma gər ahəɗ a, nda ndzəɗa kweleŋ fètìte. 5Gà ɓəzla pàrsa ata ti ne ka, gà mburma gər ahəɗ. Aɗaba taŋa, bazlam tar ana ti tsik a ya tekeɗe ka, aka gər gà dukw ana ika gər ahəɗ a mbaŋa, dite gà mburma gər ahəɗ ibam, tseŋgikkè tì dze a ter aaka a zləm lele kuɗa. 6Ama kwa ka, kàa nekwa gà mburma Mbulum. Wur ana a sər Mbulum a ka, a dze a zləm a dukw ana ki tsikikwe a ya. Ama wur ana aka ne kəla Mbulum tsiye ka, à dze aà kwe a zləm tsa. Kamala taŋa ya na ki slekwe a aà masəra dər ikaba à gà mburma ata ya ka, wànà ti ndze a ana, nda Mezite Mesife ndzer ŋana ya, kige tsa nda mezite mesife ana a bene a mburma ya yà.
Mbulum ka, a waya mburma hinne
7A kurum gà masla gà, wayakwa ba ika magər kwa ilik ilik tserdze, aɗaba mawàyà ba kwa ana ki weyekwe a ba ya ka, a dara ka, i təv Mbulum a. Wur ana a wayawa mburma ya ka, ŋgat aka ne ka, kəla Mbulum. Ŋgat ka, a sər Mbulum mbaŋa. 8Wur ana a wayawa mburma tsiye ka, a sər Mbulum tsa, aɗaba Mbulum ka, ŋgat mala mawàyà ba nda gà mburma. 9Kamala taŋa ya na Mbulum a ɗif a kwe a à mawàyà ba ŋgar a. A slər a kwara Kəla ŋgar ana mifèndèz ŋa ilik a, aka gər ahəɗ a, na dite kə̀ ŋgatakwa dər mesife awiya ŋa aɗaba ŋgat a. 10Araha na dukw ana a ne mawàyà ba ya: Mbulum na a lah meweye kwa ya. A slər a kwara Kəla ŋgar a. A dara, a mət kamala dukw ana ta kəɗ a Mbulum biy taf a, na dite a pəl a kwa dər à bakal kwa ya, tsəka, kwa tsa na kà làhakwa aà mawàyà ŋgat a.
11A kurum gà masla gà, na Mbulum a waya kwa kamala taŋa ya ka, kwa tekeɗe ka, say wayakwa ba ika magər kwa kataya mbaŋa. 12Wur a riŋ aka ŋgat a Mbulum ilik zukw tsa. Ama ku mege kàa ŋgatakwar ilik tsa tekeɗe ka, aka ana ki weyekwe a ba ika magər kwa ilik ilik tserdze ka, Mbulum a ndze a i təv ilik ŋa nda gà kwa mbaŋa, dite mawàyà ba ŋgar ana a waya dər kwa ya ka, a ge a megemir i gəzləŋ kwa lele.
13Mbulum a vəl a kwa Mezite Mesife ŋgar. Aɗaba taŋa na kà sərakwa dər ka, ki ndzekwe a i təv ilik ŋa nda gà ŋgat a, dite ŋgat tekeɗe ka, a ndze a i təv ilik ŋa nda gà kwa mbaŋa. 14Mər ka, maa ŋgatar, na Mbulum Tsir kwa a slər a kwara Kəla ŋgar aka gər ahəɗ a ya, na dite a mbele a à mburma ya. Mì tsikewa a kurum ka, bazlam ata a ge ba ndzer kaɗəŋ. 15Wur ana a gweɗe a ka, Yesuw Kiristi ŋgat Kəla Mbulum a ka, Mbulum a ndze a i təv ilik ŋa nda gà ŋgat. Ŋgat tekeɗe ka, ti ndze a i təv ilik ŋa nda Mbulum mbaŋa. 16Mər ka, mì sər na Mbulum a waya kwa ya. Mì gəs taŋa ka, nda gəzləŋ mər lele mbaŋa.
Mbulum ŋgat ka, mala mawàyà mburma. Wur ana a waya Mbulum, dite a waya mburma asa ya ka, ti ndze a i təv ilik ŋa nda Mbulum. Mbulum tekeɗe, a ndze a i təv ilik ŋa nda ŋgat mbaŋa. 17Na kà wayakwa tar nda ndzer ŋa lele kamala taŋa ya ka, aləka a pat seriye Mbulum ana a ta ge a kwe a ya ka, ki gekwe a magəɗa tsidze. Ki gekwe a magəɗa tsəka, aɗaba mendze kwa ana ki ndzekwe a ika gər ahəɗ kinehe ya ka, ar ka, kamala mendze Yesuw Kiristi ana a ndza ɗa ika gər ahəɗ a mbaŋa. 18Wur ana Mbulum a waya ŋgat a ka, a ta ge a magəɗa tsa, aɗaba meweye Mbulum ana a waya kwa nda ndzer ŋa aka ge mege megemir i gəzləŋ kwa lele ka, a delewe a à kwa magəɗa ya fit dze. Dukw ana a ge a magəɗa a mburma ya ka, seriye Mbulum. Aɗaba taŋa, na wura a ge a magəɗa ka, meweye Mbulum ana a waya ŋgat a ka, ar i gəzləŋ ŋgar fit kamala ana a sàs a Mbulum a tsa.
19Kwa ihər ki weyekwe a gà Mbulum nda mburma ka, aɗaba Mbulum na a lah meweye kwa ya. 20Na wura a gweɗe a ka: «I waya Mbulum», ama ka, a riŋ a ne a are a mburma asa ka, wele ata ka, a sàs pàrsa masakəŋa. Aɗaba na bəla wura a weye a gà mburma ana a riŋ ihər a ŋgeter a ya tsəna, meme na a sle aà megweɗe a ka, i waya Mbulum ana aka ŋgatar ilik tsiye ya? A riŋ tsa, na taŋa ya. 21Məpala ahəm Yesuw Kiristi ana a tsik a kwa ya ka, araha. A gwa ka: Na wura a waya Mbulum ka, ma waya mburma mbaŋa.
5Bazlam məmbà aà dukw bakal gər ahəɗ
1Ku weke na aka gəs Yesuw Kiristi, a sər, ŋgat mala məmbə̀là à mburma ana Mbulum a gwa, i slir a kurumehe a ya ka, ŋgat aka ne ka, kəla Mbulum. Wur ana a waya tsir gà ɓəza ya ka, a weye a gà ɓəza ŋgar ŋa mbaŋa. 2Meme na ki sirekwe a dər ka, kà wayakwa gà ɓəza Mbulum a? Ki sirekwe a ka, say nda mawàyà ŋgat, nda magəsa məpala ahəm ŋgar. Kamala taŋa ya ka, ki weyekwe a tar nda ndzer kaɗəŋ. 3Na kà wayakwa Mbulum nda ndzer ka, kamala megweɗe ya, say ki gekwe a dukw ana a tsik a kwe a ya mbaŋa. Aɗaba gà məpala ahəm ŋgar ata ka, mawùràba aà mazazama ŋa tsa. 4Aɗaba gà na ti ne gà ɓəza Mbulum a tserdze, ku mege weke tekeɗe ka, a sle a aà məmbà aà dukw bakal gər ahəɗ. Dite meme na ki mbèkwe ahər a ya? Ama ki mbèkwe ahər a ka, nda megìse kwa ana kə̀ gə̀sakwa Yesuw Kiristi ya. 5Weke na a sle a aà məmbà aà dukw bakal gər ahəɗ a? Na a sle aà mimbè ahər a ka, say wur ana aka gəs Yesuw, a sər ŋgat ka, Kəla Mbulum ndzer a.
Gà dukw ana ti ɗif a kwa à Yesuw Kəla Mbulum a
6Yesuw Kiristi ata a dara aka gər ahəɗ a. A dara ka, a pəts a yam ana ti tsilwiɓ aɗəm a à ŋgat a, dite a dza à məmbəz ŋgar i təv ana a mət a. Ama kəla ka, yam ɗekɗek tsa na a ɗif a kwa dər ŋgat ana kamala weke ya ya. Nda məmbəz ŋgar ana a dza dər a mbaŋa. Mezite Mesife Mbulum na a ɗif a kwa à gà dukw ata ti ne ndzer ŋa ya ya. Aɗaba Mezite Mesife ata ka, a ses a pàrsa tsidze. 7Ama gà dukw makər na ti ɗifekwa à Yesuw Kəla Mbulum ndzer a. 8Gà dukw ata makər a ka, gà Mezite Mesife Mbulum nda yam, nda gà məmbəz. Gà dukw ata makər a, ti ne ka, fìh ilik pəra. 9Na bəla gà mburma ta ge a sida, ti ɗeme a dukw ana ta ŋgatar a, bazlam tar aka da akaba a təv ilik ŋa fìh ka, ki gesekwe a bazlam tar ata. Ama sərum dər, bazlam ana Mbulum a tsik a kwa ya ka, à zè a taŋa. Ŋgat ŋa na a ɗif a kwa à gà dukw ata aka gər Kəla ŋgar a. 10Aɗaba taŋa, na wura aka gəs Kəla Mbulum nda gəzləŋ ŋgar ka, a sir a gà dukw ata ti ne ndzer a i gəzləŋ ŋgar. Ama wur ana aka gəs bazlam Mbulum a gəzləŋ ŋgar tsiye ka, a ne à ŋgat mala pàrsa. Aɗaba aka gəs dukw ana Mbulum a tsik aka gər Kəla ŋgar a tsa. 11Dukw ana Mbulum a tsik a kwa ya ka, araha: A vəl a kwa mesife ana a ndze a aà biybiy a. Dite mesife ata a dara nda ahər Kəla ŋgar a. 12Wur ana aka gəs Kəla Mbulum a ka, aka ŋgat mesife ata. Ama wur ana aka gəs Kəla ŋgar ata tsiye ka, mesife ata a riŋ i təv ŋgar tsa.
Gà dukw ana kə̀ gə̀sakwa nda ndzer a
13I wetse a kurumaha gà dukw ata tserdze ya ka, a kurum ana kàa gəsum Kəla Mbulum a, na dite ki sirwim a dər ndzer, kàa ŋgatum mesife ana à ndìv a tsa aà biybiy a. 14Na ki gekwe a dukw ana a sàs a Mbulum a ka, à dze aà kwe a zləm i təv ana ki wizekwe ahər a gà duwa ya. Aɗaba taŋa na ki tèkwe a aka miɗ ŋgar ka, ki gekwe a magəɗa tsiye. 15Agəra taŋa asa, na kàa sərakwa ka, Mbulum a riŋ à dze a kwe a zləm i təv dukw ana ki wizekwe ahər a tserdze ya ka, ki sirekwe a dər, aka vəl a kwa gà dukw ata kà wizekwe ahər a tserdze ya mbaŋa.
16Ama bakal ŋgiɗ a riŋ ka, mburma ta mìt a dər tsa. Na bəla wura a riŋ a ŋget a a damər ŋgar ana ika vatwa Mbulum a, a riŋ a ge a medzibe bakal ata ka, ma hama a Mbulum aɗaba ŋgat, dite ka, Mbulum mə vəl mesife a damər ŋgar ata. I tsik kataya ka, agəra gà mburma ana ta ge a bakal, dite ka, ta mìt a dər tsiye ɗekɗek. Aɗaba bakal ŋgiɗ a riŋ ka, ta mìt a dər. Yàa gwa ka, hamum a Mbulum agəra gà mburma ana ta ge a medzibe bakal ata ya tsa. 17Gà dukw ana ta ge a ŋgwal ŋa tsiye tserdze ka, taŋa ka, bakal na ika miɗ Mbulum a. Ama kəla ka, gà asiŋ gà bakal ŋgiɗ a riŋ na gà mburma ta mìt a dər tsiye.
18Kà sərakwa dər, gà na ti ne gà ɓəza Mbulum a ka, ku mege weke, a gewe a bakal asa tsa, aɗaba Kəla Mbulum a riŋ a kesle a ŋgat. Kamala taŋa ya, Əbay sitene a sle aà melime aà ŋget a asa tsa.
19Kà sərakwa dər, kwa ka, gà mburma Mbulum. Ama gà asiŋ gà mburma gər ahəɗ tserdze ka, i ahər Əbay sitene.
20Kà sərakwa dər asa ka, Kəla Mbulum a dara aka gər ahəɗ a ka, a vəl a kwa metsehe, na dite ka, kà sərakwa Mbulum ndzer ŋana ya. Kà ndzakwa i təv ilik ŋa nda gà Mbulum ndzer ŋana ka, agəra ana kà ndzakwa i təv ilik ŋa nda gà Yesuw Kəla ŋgar a mbaŋa, kàa gawakwa ba ya. Ŋgat na Mbulum ndzer ŋana ya, dite ŋgat asa na a vəl a kwa mesife ana à ndìv a tsa aà biybiy a asa mbaŋa.
21A kurum gà ɓəza gà, kaslum ba kurum i təv gà fəla ana mburma tì zlìbeye a dər taf masakəŋa ya.