ZEFANIYA

ANEBI ZEFANAIYA

BE KAWƆL

¹Jemanɛ nɛ Ammɔn pibinyɛn Josaya daa la Juda be ewura na, nɛ Enyɛnpe Ebɔrɛ na ta kubɔya ere n sa Zefanaiya nɛ e la Kushi pibinyɛn na. Kushi mo tuto e daa la Gedaliya nɛ mo alɛ mo tuto daa la ewura Hɛzekaya pibinyɛn Amariya.

Enyɛnpe Ebɔrɛ be demujiachɛ na be asheŋ

²Le nɛ Enyɛnpe Ebɔrɛ na daŋ kaŋɛ: “Meeŋ shin nɛ kusɔ kikɛ e mur kasawule so. ³Ma alɛ beeŋ mur edimɛdi nɛ asɔbɔya nɛ mbuibi nɛ ekɔrɔtɔ kikɛ. Meeŋ bar basa lubi kaseto nseŋ mur nyiŋgbasa kikɛ kasawule ere so. Esa kikɛ maaŋ pete. Ma, Enyɛnpe Ebɔrɛ na e kaŋɛ na.

⁴Meeŋ gberge Jerusalɛm to nɛ Juda be efuli so be basa kikɛ kusoe. Meeŋ mur kegbir nɛ baa tre Baal na be kushuŋ kikɛ ashi ndoŋ nɛ ekama maaŋ naaŋ nyiŋi kegbirwura nɛ e daa keni kumo so na gba kuraa. ⁵Ma alɛ beeŋ mur bekama nɛ baa dii achoŋi so n ya kaa jɔŋɛ epeŋi nɛ kufɔl nɛ achɛkpabi ase a bunyaŋ amo na. Kumo be kaman nɛ n mur bekama nɛ baa bunyaŋ ma a kaŋɛ fanɛ ma e wɔ bumo, ama nsaa ta kegbir nɛ baa tre Mɔlɛk na be ketre a bɔ ntaŋ na gba. ⁶Meeŋ mur bekama nɛ b pal kaman n sa ma nseŋ kini ma kutɔ be kebaa ba nɛ m baa ŋini bumo ekpa na gba.”

⁷Men wora shruum ashi Enyɛnpetale Ebɔrɛ na be anishito, ŋkpal manɛ so, mbe demujiachɛ na taga to. E bela ase nɛ e ta mbe basa n lara sarga nseŋ kela n tre bedoŋ fanɛ b ba kɔ Juda kena n suge bumo be asɔ eleŋ so. ⁸Kumo be kaman nɛ Enyɛnpe Ebɔrɛ na naŋ kaŋɛ le: “Loŋ be kachɛ na, meeŋ gberge efuli na be benimuana na nɛ ewura be bibinyɛn nɛ bekama nɛ baa bɛ befɔ be edaŋkaresheŋ so na kikɛ kusoe.” ⁹Meeŋ gberge bekama nɛ baa shuŋ nnyamase be agbir nɛ bekama nɛ baa yuri nsaa mɔ basa a sɔ asɔ a bɔlɔ bumo be agbir be ebuana na kusoe.

¹⁰Kede be kaman nɛ Enyɛnpe Ebɔrɛ na naŋ kaŋɛ: “Loŋ be kachɛ na, menyeeŋ nu kushu damta ashi Jerusalɛm be kabunagboŋ nɛ baa tre Kɔrɔtɔ na ase. Menyi kraa beeŋ nu b kaa bee boŋ to awɔrso ashi kadegboŋ na to be echenakpa popɔr na nseŋ nu awɔrgboŋ ko fanɛ asɔ ka tɔr m bure na ashi abee so. ¹¹Menyi nɛ men wɔ kegbɛto be kebonfu so na e baa boŋ to a shu ga, ŋkpal manɛ so, menyi be eyawujipoana maŋ naa wɔtɔ. Bekama nɛ baa ta gbiti a ji yawu na beeŋ mur cheche.

¹²Kumo be jemanɛ so, meeŋ chɔɔ fitila so n nite ŋ keni Jerusalɛm to n fin bekama nɛ asheŋ maŋ tir bumo nɛ baa kaŋɛ fanɛ Enyɛnpe Ebɔrɛ na maaŋ wora kulubi ŋko kelela na, nseŋ gberge bumo kusoe. ¹³Basa pɔtɛ beeŋ suge bumo be asɔ lela kikɛ nseŋ bure bumo be nwu. B maaŋ nya n chena nwu nɛ bumo gbagba pɔr to ŋko n nya bumo be ndibisɔrso be asɔrso nɛ baa tre greeps na be nsa n nuu.”

¹⁴Enyɛnpe Ebɔrɛ be kachɛgboŋ na taga to. K fo n loge gba kuraa! K beeŋ baa la kachɛ lubi nɛ benapo lempo nɛ b kɔ kenyɛn ga gba beeŋ baa boŋ to a shu kenishipereso nna. ¹⁵Kamɔnchɛ na beeŋ baa la agbo lubi nɛ etɔrɔ nɛ kayurnyaŋ damta nɛ ebesa nɛ kemur nɛ tentembiri mina nɛ awɔlpa be kebuuso be kachɛ nna. ¹⁶Kumo alɛ beeŋ naa la kachɛ nɛ kena to be mbel be kushu beeŋ sɔ kaplɛkama nɛ basa e baa boŋ to a cha awɔr ashi ndegboŋ nɛ b pɔr egbalana ŋ kulti nɛ a kɔ mboŋ lempo jeŋgreŋ na kikɛ to.

¹⁷Ade kikɛ be kaman, nɛ Enyɛnpe Ebɔrɛ na naŋ kaŋɛ le: “Meeŋ ta kafɔŋ damta n lɛ enyiŋgbasa so nɛ b baa nite a laa a laa fanɛ etanpo na. B wora alubi n da ma so, naniere bumo be ŋklaŋ beeŋ wurge fanɛ nchu na nɛ bumo be kebuni e dese kasawule m bɛ.”

¹⁸Kachɛ nɛ Enyɛnpe Ebɔrɛ na be agbogboŋ na beeŋ gbelge bumo so na, eshuwa nɛ egbiti nɛ b kɔ na kikɛ gba maaŋ tiŋ m mɔlga bumo. Mbe agbo na beeŋ koso fanɛ edɛ m mur kasawule kikɛ. Nɛ esa kama nɛ e wɔ durnya to be kebaawɔtɔ e ba ekar epul to.

Nfɛra be kechɛrga be asheŋ

¹Kanishinyɔrpaŋ be efuli be basa ere, men ba abar so ²pɔɛŋ nɛ afu e foŋ menyi n ya lɛ fanɛ afɔfɔ ŋko pɔɛŋ nɛ Enyɛnpe Ebɔrɛ na be agbogboŋ na e kaa alegaiso m ba menyi so. ³Menyi bekama nɛ men la bebɔlpo ashi kasawule ere so na e baa bar menyi be amu kaseto nsaa nu a sa Enyɛnpe Ebɔrɛ na. Men baa wora kusɔ nɛ k walɛ nsaa bar menyi be amu kaseto a sa mo. Nɛ men wora loŋ, ashere menyeeŋ gelge kasogberge kachɛ nɛ Enyɛnpe Ebɔrɛ na be agbo beeŋ koso na.

Asheŋ ka maaŋ nyalɛ n sa efuliana nɛ a kulti Israɛl na be asheŋ

⁴Shɛŋ maaŋ naŋ ka a wɔ Filistiebi be ndegboŋana ere to. Shɛŋ maaŋ ka Gaza to. Ekama beeŋ kaa ashi Ashkɛlɔn be kade to. Baaŋ ju Ashdɔd be basa malɛ n lar kapiidi nseŋ ta kena n ya purgi basa nɛ b wɔ Ekrɔn na, nɛ b shile n lar bumo be kade na to. ⁵Asheŋ maaŋ nyalɛ n sa menyi Filistiebi nɛ men chena teku ase na. Enyɛnpe Ebɔrɛ na tiŋ n ji menyi demu nseŋ ji m bri menyi. E beeŋ mur menyi nɛ menyi to be ekoŋwule gba maaŋ ka. ⁶Menyi be kasawule nɛ k dese teku ase na beeŋ ki kakpa nɛ mbolpɔkpapo beeŋ baa yuu bumo be ebuana nɛ mbolpɔ be aluu. ⁷Juda be efuli so be basa nɛ baaŋ ji efute na beeŋ sɔ menyi be kasawule n chena so. Baaŋ baa kpa bumo be mbolpɔ a yɔ keji to ndoŋ nsaa di nwu nɛ a wɔ Ashkɛlɔn na to. Enyɛnpe bumo be Ebɔrɛ na beeŋ baa wɔ bumo kutɔ nseŋ shin nɛ b naŋ dii dama.

⁸Kumo be kaman nɛ Enyɛnpetale Ebɔrɛ na kaŋɛ le: “N nu Mowab nɛ Ammɔn be basa ka bee tege nsaa wora ma basa eyurto a ji njɔŋ fanɛ baaŋ sɔ bumo be kasawule. ⁹Ŋ ka baa la Enyɛnpe Ebɔrɛ nɛ e bee sa ŋkpa nsaa la Israɛl be Ebɔrɛ ere, m bɔ ntaŋ fanɛ Mowab nɛ Ammɔn be basa beeŋ mur fanɛ ndegboŋ nɛ baa tre Sodɔm nɛ Gomɔra na. Mowab nɛ Ammɔn be nsawule beeŋ ki kakpa nɛ basa beeŋ baa kur nfɔl nɛ afitiri e sɔ ndoŋ kikɛ. Ma basa nɛ baaŋ ji efute na beeŋ suge bumo be kasawule nɛ asɔ kikɛ eleŋso.”

¹⁰Kusɔ nɛ k beeŋ ba Mowab nɛ Ammɔn be basa so ŋkpal bumo be kamoowu nɛ kebaatege nsaa wora Enyɛnpetale Ebɔrɛ na be basa eyurto so nna na. ¹¹Enyɛnpe Ebɔrɛ na be asheŋ beeŋ pɛ bumo kufu, jemanɛ nɛ e beeŋ mur kasawule na so be agbirana kikɛ na. Efuliana nɛ a wɔ teku ase kikɛ be basa beeŋ bunyaŋ Enyɛnpe Ebɔrɛ na ashi bumo gbagba be nsawule so.

¹²Enyɛnpe Ebɔrɛ na be tokobi na beeŋ mɔ Itiopia be basa gba.

Demuji nɛ k beeŋ ba Asiriya be efuli so be asheŋ

¹³Enyɛnpe Ebɔrɛ na beeŋ ta mbe eleŋgboŋ m mur Asiriya be efuli nseŋ shin nɛ kadegboŋ nɛ baa tre Ninɛve na e bure n dese fanɛ keshishɛrsawule nɛ k maŋ kɔ nchu na. ¹⁴Ndoŋ beeŋ ki asɔbɔya be yiri kikɛ be edesekpa. Egbuŋgbula be yiri kikɛ beeŋ baa jɔŋɛ egbal bure so na so nsaa shu a wɔtɔ etokuro to. Baaŋ gboŋi sida be ndibi nɛ b ta m buu nwu na so na kikɛ. ¹⁵Kusɔ nɛ k beeŋ wora kadegboŋ nɛ baa ji njɔŋ kumo to nsaa puchi kumo be eleŋ so, a fɛ fanɛ shɛŋ shɛŋ maaŋ tiŋ n wora kumo na nna na. Kumo be basa bee fɛ nna fanɛ kadegboŋ kikɛ maŋ naŋ fo kumo so ashi durnya ere to. K beeŋ ki kade bureso, kakpa nɛ kupuŋ to be asɔbɔya kikɛ beeŋ baa dese nɛ ekama e baa choŋ a wu kumo nsaa pɛ kɔnɔ a kooba.

Jerusalɛm be kulubi nɛ kumɔlga be asheŋ

¹Asheŋ maaŋ nyalɛ n sa Jerusalɛm be kadegboŋ na, ŋkpal k ka la kapuni nɛ kasuge nɛ kɔrfɛ nɛ kakpa nɛ b kini Ebɔrɛ na so. ²Jerusalɛmebi maa nu a sa Enyɛnpe Ebɔrɛ ŋko a sɔ mbe keŋini. Bumo alɛ maa ta bumo be yirda a deŋi Enyɛnpe Ebɔrɛ so ŋko a fin kechɛto mo kutɔ. ³Kumo be ekrachi du fanɛ ebuluŋ nɛ a bee munto nna, nɛ kumo be demujipoana malɛ du fanɛ ejiŋkaamu nɛ a bee pɛ kusɔ kanyɛso a ji nɛ, kare be kechɛ kachipurso nɛ shɛŋ maŋ naŋ ka na nna. ⁴Kumo be anebiana malɛ daa kɔ ŋkpensheŋ be kebaawɔtɔ nna nɛ basa maaŋ tiŋ n yirda bumo. Nɛ bɔrɛmatapoana malɛ bee ta eyurpi a yɔ kakpa cheembi nɛ baa bunyaŋ Ebɔrɛ, nsaa bɔla mbe mbra na so a nya bumo be aparsheŋ. ⁵Ama Enyɛnpe Ebɔrɛ kraa wɔ kadegboŋ na to a wora kusɔ nɛ k daga, nsaa ji asheŋ nɛ amo be ekpa so karechɛ kikɛ. Basa nɛ b maŋ niŋi na bre maa ŋana anishinyɔr nsaa wɔtɔ a wora alubi saŋkama.

⁶Le nɛ Enyɛnpe Ebɔrɛ kaŋɛ: “M mur efuli damtaana nseŋ bure amo be ndegboŋana be egbalana nɛ ebulempo jeŋgreŋana kikɛ. Esa kama maŋ naa wɔ ndegboŋ na to. Basa malɛ gba maŋ naa nite amo be abɔrbi so nɛ kakpa kikɛ wora shruum. ⁷N daa nyi fanɛ kumo be loŋ beeŋ shin nɛ ma basa e ta bunyaŋ n sa ma nseŋ sɔ kasogberge nɛ n sa bumo na nna, ama k maŋ chɛr ko nɛ b naŋ bɛta a wora alubi nɛ a chɔ amo nɛ b daa wora dra na gba.

⁸Menyi ere e jo a keni kachɛ nɛ meeŋ wu efuliana na kulubi nseŋ ji amo demu na. N tiŋ n yili kumo fanɛ meeŋ gama efuliana na nɛ kuwurjiana kikɛ abar so nseŋ shin nɛ ma agbo nɛ k bee suse fanɛ edɛ na e ba bumo so. Meeŋ nya agbo ga m mur durnya ere kikɛ.

⁹Kumo be kaman nɛ n chɛrga basa nɛ b wɔ efuliana na so be ŋgbene nɛ b naa bunyaŋ ma, Enyɛnpe Ebɔrɛ na nawule. ¹⁰Ma basa nɛ b pesaŋ to nɛ bumo nɛ baa bunyaŋ ma kashenteŋto beeŋ shi hale Itiopia be efuli so be elɔrana be mba ndoŋ m bar esarga m ba sa ma. ¹¹Jemanɛ na kaŋ fo, anishinyɔr maaŋ pɛ menyi nɛ men la ma basa ŋkpal men ka daŋ kini ma nseŋ lar ma kaman na so. Ŋkpal manɛ so, meeŋ ju bekama nɛ b kɔ kamoowu nɛ ŋkpensheŋ be kebaawɔtɔ ashi menyi to, saŋɛ na so menyi maaŋ naŋ kini ma nseŋ lar ma kaman ashi ma kebee cheembi na so. ¹²Bekama nɛ b du boeŋ nsaa bar bumo be amu ase kashenteŋto na bre, m maaŋ ju bumo, ŋkpal b ka ta bumo be yirda n deŋi ma so so. ¹³Israɛl be basa nɛ b ka na bre maaŋ wora kulubi, bumo alɛ maaŋ ku efɛ ŋko a na a fule basa. Asheŋ beeŋ baa nite nɛnɛ a sa bumo nɛ shɛŋ maaŋ naa fɔŋ bumo. Esa kikɛ maaŋ naŋ tiŋ n ta kufu n da bumo.

Kagbenefuli be kashɛ be asheŋ

¹⁴Israɛlebi, men baa boŋ nshɛ awɔrso kagbenefuliso!

Jerusalɛmebi, menyi alɛ gba e baa ji eyur kagbenefuliso!

¹⁵Ŋkpal manɛ so, Enyɛnpe Ebɔrɛ na

shin nɛ menyi be kasogberge fo ekar.

E shin nɛ men doŋana bɛta ashi menyi so.

Mo alɛ e la Israɛl be Ebɔrɛ nɛ e wɔ menyi kutɔ na,

men sa maŋ naa ŋana kufu kusɔ ko so.

¹⁶Jemanɛ ko bee ba nɛ b kaŋɛ Jerusalɛmebi le:

‘Men sa maa ŋana kufu! Menyi alɛ e sa maŋ pɔ aba

ŋko a yil chaam ŋkpal kufu so!

¹⁷Ŋkpal manɛ so, Enyɛnpe menyi be Ebɔrɛ na wɔ men kutɔ,

mbe eleŋgboŋ na e naa kɔ a pɔɔ so a sa menyi.

Menyi be asheŋ bee bɔlɔ mo kenishi ga,

nɛ mbe kasha bee sa menyi ŋkpa popɔr.

Mbe kagbene bee fuli menyi so nna

nɛ e bee boŋ nshɛ kagbenefuliso.’

¹⁸Kumo be kaman nɛ Enyɛnpe Ebɔrɛ na naŋ kaŋɛ le:

‘Meeŋ lara kagbenejija nɛ k bee kaa ba

men be kejigboŋana to na

ashi menyi so, ŋkpal manɛ so,

k la egbɛ nɛ ŋaba nna a deŋ menyi so.

¹⁹Jemanɛ na kaŋ fo, meeŋ gberge bekama

nɛ b kɔrfɛ menyi na kusoe.

Ma alɛ beeŋ mɔlga ebobi

nseŋ gama basa nɛ b pesaŋ to na abar so.

Meeŋ shin nɛ bumo be nyɔmɔ e ki bunyaŋ n sa bumo,

nɛ durnya kikɛ e baa kpaŋ bumo.

²⁰Loŋ be jemanɛ na, meeŋ gama menyi be basa abar so

m bar bumo epe.

Ma alɛ beeŋ shin nɛ menyi be ketre e dii durnya kikɛ to,

nseŋ shin nɛ men naŋ dii dama.’ ”

Ma, Enyɛnpe Ebɔrɛ e kaŋɛ na!