ZAKAREYA

ANEBI ZAKAREYA

BE KAWƆL

Enyɛnpe Ebɔrɛ ka tre mbe basa fanɛ b bɛta m ba mo kutɔ be asheŋ

¹Ewurgboŋ Dariɔs ka ji Pɛshiya be efuli so be kuwura be kafɛ nyɔsopo to be kufɔl burwasopo to nɛ Enyɛnpe Ebɔrɛ na ta kubɔya ere n sa anebi Zakareya nɛ e la Berekia pibinyɛn nsaa la Ido mo nanabi na. ^2-3Le nɛ Enyɛnpetale Ebɔrɛ na daŋ kaŋɛ anebi Zakareya fanɛ e kaŋɛ basa na: “Ma Enyɛnpe Ebɔrɛ na daŋ nya agbo nna n wɔtɔ men nananyɛnana, ama nɛ men bɛta m ba ŋ kutɔ meeŋ sɔ menyi nseŋ chɛ menyi to. ⁴Men sa maa wora fanɛ men nanaana na. Dra na kikɛ nɛ anebiana na ta ma kubɔya na n sa bumo fanɛ b sa maa wɔ kebaawɔtɔ lubi to. Ama b daa maŋ nu n sa ma ŋko n wora ma mmalga kasonu. ⁵Men nanaana na nɛ anebiana na kikɛ maŋ naa wɔ ŋkpa to. ⁶N daŋ bɔla anebiana nɛ b la ma nyɛrbi na so nna n sa men nanaana ma mbraana nɛ kefiɛso be mmalga, ama b daa maŋ tuge ma, nɛ kumo be kasogberge ba bumo so. Kumo be kaman nɛ b chɛrga bumo be nfɛra nseŋ shuli so fanɛ ma, Enyɛnpetale Ebɔrɛ na e sa bumo kasogberge nɛ k daga bumo, fanɛ kananɛ ŋ kre kumo na.”

Anebi na ka ku egbaŋɛ be bɔrɛdare be asheŋ

⁷Ewurgboŋ Dariɔs ka ji kuwura na be kafɛ nyɔsopo be kufɔl kudukakosopo nɛ baa tre Shebat na be nchɛ adunyɔ nɛ ana nɛ Enyɛnpe Ebɔrɛ na naŋ sa ma kubɔya edare to kanyɛso. ⁸Ashi edare na to n daŋ wu esa ko ka dii gbaŋɛ peper nna m ba yili ndibi ko be afito ashi ketaŋɛ ko to, nɛ egbaŋɛ peper kpaw nɛ bepeper kunɔkunɔ nɛ befuful ko malɛ yil mbe kaman. ⁹Ndoŋ nna nɛ m bishi malaika nɛ e bee bugi asheŋ to a sa ma na le: “Manɛ nɛ egbaŋɛ ere bee ŋini?”

Nɛ e kaŋɛ ma: “Meeŋ ŋini fo kusɔ nɛ e bee ŋini.” ¹⁰Ndoŋ nna nɛ kanyɛn nɛ e daa yil ndibi na be afito na kaŋɛ ma le: “Enyɛnpe Ebɔrɛ na e shuŋi bumo fanɛ b ya nite n dara durnya ŋ keni.” ¹¹Kumo be kaman nɛ egbaŋɛdiipo na ba kaŋɛ malaika nɛ e yil ndibi na be afito na le: “An nite ŋ kulti durnya kikɛ nseŋ wu fanɛ kakpa kikɛ wora shruum nna a dese kagbenewushi so.” ¹²Nɛ malaika na kaŋɛ: “Enyɛnpetale Ebɔrɛ, fo ka nya agbo n wɔtɔ Jerusalɛm nɛ nde nɛ a wɔ Juda be efuli so na be nfɛ adushunu nde. Saŋɛ mo nɛ feeŋ wu bumo kuwɔr?”

¹³Ndoŋ nna nɛ Enyɛnpe Ebɔrɛ na ta kagbenewushi be mmalga nɛ e kɔ kechɛto n sa malaika na. ¹⁴Nɛ malaika na malɛ kaŋɛ ma fanɛ m ber kusɔ nɛ Enyɛnpetale Ebɔrɛ na kaŋɛ na be kubomboŋ. E yɛ: “Mee sha Jerusalɛm nɛ k la ma kadegboŋ cheembi na alegaiso, ¹⁵ama n nya agbo nna n wɔtɔ efuliana nɛ a wɔ kayurwushi to na ŋkpal manɛ so, n daŋ nya agbo gbrɛbi nna n wɔtɔ ma basa, nɛ loŋ be efuliana shin nɛ ma basa be awurfoŋ wora keshi n ti so. ¹⁶Amoso nɛ m bɛta m ba Jerusalɛm to nɛ m ba wu kadegboŋ na kuwɔr na. Baaŋ naŋ lɔŋɛ ma bɔrɛlambu na nɛ kadegboŋ na m pɔr.”

¹⁷Kumo be kaman nɛ Malaika na naŋ kaŋɛ ma fanɛ Enyɛnpetale Ebɔrɛ na yɛ: “Ma ndegboŋana na beeŋ naŋ dii dama. Ma alɛ beeŋ naŋ chɛ Jerusalɛm to nseŋ naŋ sɔ kumo ŋ ki ŋ gbagba be kadegboŋ.”

Alambɛ be bɔrɛdare be asheŋ

¹⁸Ade be kaman nɛ n naŋ ku bɔrɛdare ko n wu asɔbɔya be alambɛ ana ko. ¹⁹Ndoŋ nna nɛ m bishi malaika nɛ e bee malga ŋ kutɔ na le: “Alambɛ ere be kefito a?”

Nɛ e kaŋɛ: “Alambɛ na bee ŋini durnya to be efuli lempoana nɛ a shin nɛ Juda nɛ Israɛl nɛ Jerusalɛm to be basa pesaŋ to na nna.”

²⁰Kumo be kaman nɛ Enyɛnpe Ebɔrɛ na ŋini ma ebɔyɛpo ana ko. ²¹Nɛ m bishi le: “Manɛ nɛ ebɔyɛpo ere ba nɛ b ba wora?” Nɛ e kaŋɛ ma le: “B ba nna nɛ b ba funti nseŋ kɔ m pɔɔ efuli pɔtɛana nɛ a daŋ kɔ m pɔɔ Juda so n shin nɛ kumo be basa pesaŋ to na so nna.”

Efɔl karga asɔ be bɔrɛdare be asheŋ

¹Ndoŋ nna nɛ n naŋ ku bɔrɛdare n wu kanyɛn ko nɛ e kɔ efɔl karga asɔ to. ²Nɛ m bishi mo le: “Nnɛ nɛ fee yɔ?” Nɛ e kaŋɛ: “Mee yɔ nɛ n ya karga Jerusalɛm so, m pin kumo be nteŋ nɛ mpar nna.”

³Edare na to nɛ n wu malaika nɛ e malga ŋ kutɔ na ka bee yɔ nɛ malaika nyɔsopo ko malɛ ba shɛr mo to ⁴nseŋ kaŋɛ mo le: “Shile n ya kaŋɛ kabrantiɛbia nɛ e kɔ efɔl karga asɔ to na fanɛ Jerusalɛm to be basa nɛ asɔbɔya beeŋ ba wora keshi ga nɛ b maaŋ naŋ tiŋ m pɔr egbal gba ŋ kulti kumo. ⁵Enyɛnpe Ebɔrɛ na nase kɔnɔ fanɛ mo gbagba beeŋ ki fanɛ edɛ be egbal ŋ kulti kadegboŋ na a kuŋ kumo nsaa la kumo be kemaŋkura ashi kumo to.”

B ka tre basa nɛ b pɛ n yɔ kenyaya to m ba epe be asheŋ

^6-7Kumo be kaman nɛ Enyɛnpe Ebɔrɛ na kaŋɛ mbe basa le: “Ma e daŋ pesaŋ menyi to n sɔ kaplɛkama. Ama naniere men shile Babilɔn be efuli nɛ k wɔ kelargato be esoso na so m bɛta m ba Jerusalɛm to.” ⁸Kusɔ nɛ Enyɛnpetale Ebɔrɛ na shuŋi ma fanɛ n ya kaŋɛ efuli kama so ebi nɛ b daŋ kɔ m pɔɔ menyi nɛ men wɔ Jerusalɛm to so nseŋ sɔ menyi be asɔ na e la fanɛ,

Jerusalɛm du fanɛ Enyɛnpetale Ebɔrɛ na be kenishi nna. Kusɔ kama nɛ esa kama baŋ wora Jerusalɛm, mo nɛ amodoŋwura wora na. ⁹Amoso Enyɛnpe Ebɔrɛ na gbagba e naaŋ kɔ menyi nɛ men be benapo nseŋ shin nɛ basa nɛ b daa shuŋ menyi na e kɔ m pɔɔ menyi so nseŋ suge menyi be asɔ kikɛ. Aloŋ nɛ menyeeŋ pin fanɛ Enyɛnpetale Ebɔrɛ na gbagba e shuŋi ma.

¹⁰Kede be kaman nɛ Enyɛnpe Ebɔrɛ kaŋɛ le: “Jerusalɛmebi! Men boŋ nshɛ kagbenefuliso, ŋkpal manɛ so, mee ba nna nɛ ma nɛ menyi e ba kaa wɔtɔ!”

¹¹Loŋ be saŋɛ na efuli damtaana beeŋ ba Enyɛnpe Ebɔrɛ na kutɔ m ba ki mbe basa. E beeŋ ba chena menyi to nɛ men pin fanɛ mo e shuŋi ma menyi kutɔ. ¹²Juda beeŋ naŋ laŋɛ ŋ ki Enyɛnpe Ebɔrɛ na peya ashi mbe kasawule cheembi so nɛ Jerusalɛm e ki kadegboŋ mo nɛ e bee sha ga.

¹³Ekama e wora shruum ashi Enyɛnpe Ebɔrɛ na be anishito, ŋkpal manɛ so, e koso kakpa cheembi nɛ e wɔ na nna a ba.

Joshuwa nɛ Setani be asheŋ

¹Nɛ n naŋ ku bɔrɛdare n wu bɔrɛmatapo nimuso Joshuwa nɛ e yil Enyɛnpe Ebɔrɛ na be malaika kutɔ nɛ Setani malɛ yil Joshuwa be jisoso m mata mo e shin nɛ e ku asheŋ n deŋi mo. ²Ndoŋ nna nɛ Enyɛnpe Ebɔrɛ be malaika na kaŋɛ Setani le: “Enyɛnpe Ebɔrɛ na e fiɛ fo so, Setani! Enyɛnpe Ebɔrɛ nɛ mbe kasha wɔ Jerusalɛm so na e fiɛ fo so. Kanyɛn ere du fanɛ kadɛdibi nɛ b pee edɛ to nna.”

³Joshuwa daŋ buu asɔ biriso nna a yil ndoŋ. ⁴Ndoŋ nna nɛ malaika na kaŋɛ basa nɛ b daa yil ndoŋ na le: “Men lara kanyɛn ere be asɔ biriso nɛ e buu ere.” Kumo be kaman nɛ e kaŋɛ Joshuwa malɛ le: “N lara fo alubi ashi fo so, ma alɛ beeŋ naŋ sa fo asɔbuuso popɔr nɛ fo buu.”

⁵Kede be kaman nɛ e naŋ kaŋɛ basa na fanɛ b ta neemu popɔr m mɛa Joshuwa be kumu so. Ndoŋ nna nɛ b ta asɔbuuso popɔr m buu mo nɛ malaika na yil a keni.

⁶Nɛ malaika na leŋ Joshuwa to ŋ kaŋɛ le: ⁷Enyɛnpetale Ebɔrɛ na yɛ: “Nɛ fo baa wora ma mbraana kasonu nsaa shuŋ ashuŋ nɛ meeŋ baa sa fo bre, meeŋ shin nɛ fo baa keni ma bɔrɛlambu na nɛ kumo be kelɔnɛ so. Ma alɛ beeŋ baa nu fo kabɔrɛkule fanɛ kananɛ mee nu emalaika nɛ b wɔ ŋ kutɔ ere be kabɔrɛkule na.” ⁸Amoso fo, Joshuwa nɛ fo la bɔrɛmatapo nimuso nɛ fo braana bɔrɛmatapoana nɛ b wɔ nfe, e nu nɛnɛ. Menyi so nɛ echefoso be asheŋ lela kikɛ beeŋ bɔla so m ba, ŋkpal loŋ so mee sha kelara ma kayɛrbi nɛ e la ma ewura laraso na efuli nna. ⁹Kejembu nɛ ŋ kɔ a nase Joshuwa be anishito ere kɔ mba ashunu nna. Meeŋ sibɛ kusɔ ko n deŋi kumo so nseŋ ta kachɛ koŋwule n lara kasawule ere so ebi be alubi ashi bumo so. ¹⁰Kachɛ na kaŋ fo ekama beeŋ kela n tre mo kurgepoana nɛ b ba chena n ji kekurge kagbenewushiso ashi bumo be ndibi sɔrso be afito.

Kefitilatɔl be bɔrɛdare be asheŋ

¹Ndoŋ nna nɛ malaika nɛ e daa malga ŋ kutɔ na laŋɛ m ba tiŋi ma fanɛ ŋ ka daa di na, ²nseŋ bishi ma le: “Manɛ nɛ fo wu?”

Nɛ ŋ kaŋɛ: “N wu shuwa be kefitilatɔl nɛ ŋku wɔ kurwa to a bɛ kumo be esoso nɛ efitila ashunu wɔ kumo so. Efitila na be kekama kɔ kumo be kechɛbi be kaboŋ nna. ³Ɔlif be ndibi anyɔ ko daa yil m mata kefitilatɔl na be mba anyɔ so nna.” ⁴Ndoŋ nna nɛ m bishi malaika na le: “Ade ere be kifito e la manɛ?”

⁵Nɛ e bishi ma le: “Fo maŋ nyi a?”

Nɛ ŋ kaŋɛ: “M-m kowurnyɛn, m maŋ nyi.”

Enyɛnpe Ebɔrɛ ka nase kɔnɔ n sa Zerubabel be asheŋ

⁶Kumo be kaman nɛ malaika na kaŋɛ fanɛ n ta Enyɛnpetale Ebɔrɛ na be kubɔya ere n sa Zerubabel. E yɛ: “Feeŋ pɔɔ fo doŋana so ama mannɛ kena to be eleŋ ŋko kuwibi to be eleŋ nɛ feeŋ ta ŋ kɔ m pɔɔ bumo so. Ma Kiyoyu na be eleŋ so nɛ feeŋ ta m pɔɔ so.” ⁷Kusɔ kama nɛ k du fanɛ kebee a kagle fo to beeŋ foe fo anishito. Feeŋ lɔŋɛ bɔrɛlambu na m pɔr. Kachɛ nɛ feeŋ ta lalaloge be berkishi m mɔ kapɔr na so na, basa na kikɛ beeŋ boŋ to awɔrso ŋ kaŋɛ le: “Ebɔrɛ e nɛfa kumo! Ebɔrɛ e nɛfa kumo!”

⁸Kumo be kaman nɛ Enyɛnpe Ebɔrɛ na naŋ kaŋɛ ma le: ⁹“Zerubabel e nase bɔrɛlambu na be gbaltɔlase, mo alɛ beeŋ pɔr kumo n loge. Nɛ loŋ kaŋ wora, ma basa beeŋ pin fanɛ ma, Enyɛnpe Ebɔrɛ na, e shuŋi fo bumo kutɔ.

¹⁰Bekama nɛ b keni kananɛ asheŋ fara gbrɛ gbrɛbi kabre ere jiga na kaŋ wu kejembu nɛ kumo be asheŋ tir ga ere ka bɔɔ Zerubabel enɔ na, baaŋ ji eyur kagbenefuliso

Kumo be kaman nɛ malaika na naŋ kaŋɛ ma le: Efitilatɔl ashunu na e la Enyɛnpe Ebɔrɛ be anishi ashunu nɛ a bee keni a wu kusɔ kikɛ durnya ere kikɛ to na.”

¹¹Ndoŋ nna nɛ m bishi malaika na le: “Manɛ nɛ ɔlif be ndibi anyɔ nɛ a yil m mata kefitilatɔl na be bena nɛ jisoso na malɛ bee ŋini? ¹²Manɛ nɛ ɔlif be ndibi be ayabi anyɔ nɛ a mata shuwa be asɔ kulkulso tentembi anyɔ nɛ ɔlif be ŋku bee bɔla amo to a lar na malɛ bee ŋini?”

¹³Nɛ malaika na bishi ma le: “Fo maŋ nyi amo be afito a?”

Nɛ n yɛ: “M-m kowurnyɛn, m maŋ nyi.”

¹⁴Ndoŋ nna nɛ e kaŋɛ: “A yili nna n sa basa anyɔ na nɛ Enyɛnpe Ebɔrɛ na shin nɛ b duga ŋku n do bumo be amu so nseŋ lara bumo n yili fanɛ b baa shuŋ mo ere Ebɔrɛ nɛ e la durnya kikɛ be Enyɛnpe na.”

Kawɔl sibɛso nɛ k bee firgi na be asheŋ

¹Kede be kaman nɛ n naŋ to kenishi ŋ keni n wu kawɔl sibɛso ko ka bee firgi afu to. ²Nɛ malaika na bishi ma kusɔ nɛ n wu, nɛ ŋ kaŋɛ mo le: “N wu kawɔl sibɛso ka bee firgi afu to nna. Kumo be nteŋ to sa fanɛ ayadra adesa nɛ kumo be mparto malɛ sa fanɛ ayadra kuduanu nna.”

³Ndoŋ nna nɛ malaika na kaŋɛ ma: “B sibɛ kɔnɔsho nɛ k beeŋ ba durnya be kasawule so kikɛ nna n wɔtɔ kumo to. Kawɔl sibɛso na be kaba ko so bee kute kananɛ baaŋ lara eyu kikɛ ashi kasawule so nna, nɛ kaba nyɔsopo malɛ bee kute kananɛ baaŋ ju esa kama nɛ e bee bɔ ntaŋ a ku efɛ be asheŋ nna. ⁴Enyɛnpetale Ebɔrɛ na yɛ e beeŋ shin nɛ kɔnɔsho ere e luri eyu nɛ ekama nɛ e bee bɔ ntaŋ a ku efɛ kikɛ be elaŋana to nseŋ shir elaŋ na so hale nɛ a ya mur cheche.”

Eche nɛ e wɔ kelantaŋɛ to na be asheŋ

⁵Kumo be kaman nɛ malaika na naŋ lar ŋ kaŋɛ ma le: “Keni awɔlto, kusɔ pɔtɛ ko bee ba!”

⁶Nɛ m bishi mo: “Manɛ nna?”

Nɛ e kaŋɛ ma: “K la kelantaŋɛ nɛ k yili n sa basa nɛ b wɔ kasawule so kikɛ be alubi nna.”

⁷B ka bugi kelantaŋɛ na be buuso nɛ b ta epal n lɔŋɛ na nɛ n wu fanɛ eche ko e daa tase kumo to! ⁸Nɛ malaika na kaŋɛ: “Kache ere yili n sa kumu kpakpaso nna.” Kumo be kaman nɛ e naŋ ŋin kelantaŋɛ na be buuso m buu so kpakpa.

⁹Ŋ ka naŋ maŋ kumu so ŋ keni esoso nɛ n wu beche anyɔ ko nɛ b kɔ tɔkɔrkɔ be atɛ lempo ka firgi m ba ŋ kutɔ m ba fuu kelantaŋɛ na n firgi a yɔ. ¹⁰Ndoŋ nna nɛ m bishi malaika nɛ e daa malga ŋ kutɔ na le: “Nnɛ nɛ b kɔ kelantaŋɛ na a yɔ?”

¹¹Ndoŋ nna nɛ e kaŋɛ: “Babilɔn be efuli so nɛ b kɔ kumo a yɔ nɛ b ya pɔr lambu n ta kumo n wɔtɔ nɛ basa e baa bunyaŋ kumo ndoŋ.”

Egbaŋɛturko ana na be asheŋ

¹Kede be kaman nɛ n naŋ ku bɔrɛdare ko gba n wu egbaŋɛturko ana ko ka shi danyaŋ be abee anyɔ ko be kefɛato a ba. ²Gbaŋɛ peper e daa gberge sososo be gbaŋɛturko na nɛ gbaŋɛ lembir malɛ daa gberge kenyɔsopo na. ³Egbaŋɛ fuful e daa gberge gbaŋɛturko sasopo na nɛ egbaŋɛ muchɛr muchɛr malɛ daa gberge kenasopo na. Egbaŋɛ na kikɛ daa gberge amo eleŋso nna. ⁴Ndoŋ nna nɛ m bishi malaika na: “Gafrache, egbaŋɛturko ere be kifito a?”

⁵Nɛ e kaŋɛ: “A yili nna n sa ayoyu ana nɛ a shi Ebɔrɛ nɛ e la Enyɛnpe durnya kikɛ so na kutɔ m ba na.”

⁶Egbaŋɛ lembir na daa gberge gbaŋɛturko na nna a yɔ Babilɔn be efuli so nɛ k wɔ kelargato be esoso be kaba so na, nɛ egbaŋɛ fuful na malɛ daa yɔ epeŋitɔrkpa be kaba so nɛ bemuchɛr muchɛr na malɛ daa yɔ kelargato be kaseto be kaba so.

⁷Egbaŋɛ lempoana na ka daŋ lar m ba na b daa fin keyɔ durnya be efuli kama so kenishipereso nna. Ndoŋ nna nɛ malaika na kaŋɛ egbaŋɛ na le: “Meeŋ ya nite ŋ kulti durnya be efuli kikɛ so!” Nɛ b nu nseŋ yɔ. ⁸Kumo be kaman nɛ malaika na boŋ to ŋ kaŋɛ ma “Egbaŋɛ nɛ a yɔ Babilɔn be efuli so nɛ k wɔ kelargato be esoso be kaba so na e shin nɛ Enyɛnpe Ebɔrɛ na be agbo wushi.”

Joshuwa be kuwurwuro be asheŋ

⁹Ade be kaman nɛ Enyɛnpe Ebɔrɛ na naŋ kaŋɛ ma le: ^10-11“Sɔ shuwa nɛ gbiti be ŋkɛ ashi Helda nɛ Tobija nɛ Jedaya nɛ b la basa nɛ b shi Babilɔn be efuli so m bɛta na kutɔ n wora kuwurwuro. Kumo be kaman nɛ fo nɛ bumo e yɔ Josaya nɛ e la Zefanaiya pibinyɛn na pe n ya ta kuwurwuro na m buu bɔrɛmatapo nimuso Joshuwa nɛ e la Jehozadak pibinyɛn na. ¹²Kumo be kaman nɛ fo kaŋɛ mo fanɛ Enyɛnpetale Ebɔrɛ na yɛ: ‘Kanyɛn ko beeŋ shi kakpa nɛ fo wɔ ere n lar fanɛ keyimu ka pete na m ba lɔŋɛ Enyɛnpe Ebɔrɛ na be bɔrɛlambu na m pɔr. ¹³Mo e naŋ pɔr kumo n nya kemaŋkura fanɛ ewura na nseŋ ji mbe basa so kuwura. Mo nɛ bɔrɛmatapo ko beeŋ wora kɔnɔkoŋwule n chɛ abar to n shuŋ kayurwushiso.’ ¹⁴Kuwurwuro na beeŋ baa la kanyiŋi be kusɔ bɔrɛlambu na to n sa Heldai nɛ Tobija nɛ Jedaya nɛ Josaya nɛ e la Zefanaiya pibinyɛn na.”

¹⁵Basa beeŋ shi efuli wɔfɔ so m ba chɛ to n lɔŋɛ Enyɛnpe Ebɔrɛ na be bɔrɛlambu na m pɔr. B kaŋ lɔŋɛ kumo m pɔr n loge na nɛ feeŋ pin fanɛ Enyɛnpetale Ebɔrɛ na e shuŋi ma. Fo baa wora Enyɛnpe fo Ebɔrɛ na be mbraana kikɛ kasonu, ade kikɛ beeŋ wora m bɔlɔ so ashi fo kebaawɔtɔ to.

Enyɛnpe Ebɔrɛ na ka maa sha ekishi nɛ k maŋ shi kagbene to be asheŋ

¹Ewurgboŋ Dariɔs ka ji Pɛshiya be efuli so be kuwura be kafɛ nasopo to be kufɔl kpanusopo nɛ baa tre Keslɛv na be kachɛ nasopo to nɛ Enyɛnpe Ebɔrɛ na ta kubɔya n sa ma, Zakareya. ²Bɛtɛl be kade to ebi daŋ shuŋi Shareza nɛ Regɛm-Mɛlɛk nɛ bumo be benyɛn ko nna fanɛ b yɔ Enyɛnpetale Ebɔrɛ na be bɔrɛlambu to n ya kule Enyɛnpe Ebɔrɛ be nɛfa n sa bumo ³nseŋ naŋ bishi bɔrɛmatapoana na nɛ anebiana na le be kesheŋ bishiso ere: “An baa kraa shu nli nsaa kishi kufɔl nusopo na to fanɛ kananɛ an wora nfɛ damta ŋkpal b ka daŋ bure bɔrɛlambu na so a?”

⁴Ndoŋ nna nɛ Enyɛnpetale Ebɔrɛ na ta kubɔya ere n sa ma. ⁵E yɛ: “Kaŋɛ efuli na so ebi nɛ bɔrɛmatapoana na fanɛ mannɛ ma ere be kemaŋkura so nɛ b daa kishi nsaa shu nli kufɔl nusopo nɛ keshunusopo na to nfɛ adushunu nɛ a choŋ na. ⁶B ka daa ji a nuu na bre ma so nɛ b daa wora loŋ a?”

⁷Kubɔya koŋwule ere nɛ Enyɛnpe Ebɔrɛ na daŋ bɔla anebi juŋkparsoana na so m bɔ n sa basa nɛ b daa wɔ Jerusalɛm nɛ nde nɛ a kulti kumo na to saŋɛ nɛ b daŋ dii dama nsaa wɔ kayurwushi to na. Loŋ be jemanɛ na, basa damta daŋ chena kelargato be kaseto be keshishɛrsawule na nɛ abeesawule nɛ a wɔ epeŋitɔrkpa be kaba so na so nna.

Kusoe kpakpaso ka bar basa be kepɛ n yɔ efuli pɔtɛ so be asheŋ

⁸Ade be kaman nɛ Enyɛnpe Ebɔrɛ na naŋ sa ma le be kubɔya ere. ⁹E yɛ: “Dra dra na kikɛ nɛ n ta atande ere n sa ma basa ŋ kaŋɛ bumo le: ‘Men baa wora asheŋ nɛ amo be ekpa so, men baa la basa nsaa wora kelela nsaa wu abar kuwɔr. ¹⁰Men sa maa kɔrfɛ bekulpoche nɛ amunibi nɛ befɔ nɛ b chena menyi to nɛ betentaŋasepo. Menyi alɛ e sa maa fɛ nfɛra lubi a laŋɛ men braana be kaplɛa so ashi menyi be ŋgbene to.’ ”

¹¹Ama ma basa ta ŋkpensheŋ nna m pal kaman n sa ma nseŋ ti bumo be asoe ŋ kini kenu n sa ma. B daŋ kplaŋ ma so nna ¹²nseŋ wora bumo be ŋgbene kpakpa fanɛ awarabi nsaa maa kaŋ asoe a nu mmalga nɛ ma, Enyɛnpetale Ebɔrɛ na be Kiyoyu bɔla anebi juŋkparsoana so n ta n sa bumo na ŋko a bɛ ma mbra so. Amoso n daŋ nya agbo nna ga n wɔtɔ bumo. ¹³Ŋkpal b ka daŋ kini kenu n sa ma jemanɛ nɛ n daa malga bumo kutɔ na so, nɛ ma alɛ gba maŋ nu bumo be kekule. ¹⁴N daŋ pesaŋ bumo to nna n ya lɛ efuli pɔtɛana so fanɛ kananɛ afugboŋ bee pesaŋ asɔ to n ya kaa lɛ na, nɛ bumo be kasawule lela na dese fuloŋ nɛ esa kikɛ daa maŋ naa wɔ kumo so.

Enyɛnpe Ebɔrɛ na ka nase kɔnɔ fanɛ e ka beeŋ naŋ nɛfa Jerusalɛm be asheŋ

¹Ade kikɛ be kaman nɛ Enyɛnpetale Ebɔrɛ na naŋ ta kubɔya ere n sa ma, Zakareya. ²E yɛ: “Ŋ ka bee sha Jerusalɛm nɛ kumo to be basa alegaiso so, bumo doŋana be asheŋ bee nu ma agbo nna. ³Meeŋ naŋ bɛta m ba chena Zayɔn be kebee na so ashi Jerusalɛm to. Aloŋ nɛ ekama beeŋ pin fanɛ Jerusalɛm la ma beyirdapo be kadegboŋ nna nɛ Zayɔn malɛ la ma kebee cheembi. ⁴Basa belso nɛ baa keta akpabi a nite beeŋ naa gama a chena abar so ashi Jerusalɛm to ⁵nɛ mbinyɛnsobi nɛ bechesobi malɛ e sɔ agbembi so a pel.

⁶Kumo be kaman nɛ Enyɛnpe Ebɔrɛ na naŋ kaŋɛ: Basa nɛ baaŋ ka efuli na so beeŋ baa fɛ fanɛ loŋ maaŋ tiŋ n wora, ama kumo be kewora maŋ du ma so kpakpa. ⁷Meeŋ mɔlga ma basa ashi efuliana nɛ a wɔ epeŋilarkpa nɛ epeŋitɔrkpa na ⁸nseŋ bɛta bumo m ba chena Jerusalɛm to. Baaŋ ba kaa la ma basa nɛ ma alɛ e baa la bumo be Ebɔrɛ nsaa ji kuwura bumo so kashenteŋ nɛ kumo be ekpa so.”

⁹Kusɔ nɛ Enyɛnpetale Ebɔrɛ na naŋ kaŋɛ nde: “Mmalga nɛ ma anebiana na daŋ malga jemanɛ nɛ b daa tɔl ma bɔrɛlambu na be gbaltɔlase na nɛ menyee nu na, amoso men baa kɔ kenyɛn nsaa maa pɔ aba. ¹⁰Pɔɛŋ nɛ b pɔr bɔrɛlambu na nɛ esa kikɛ daa maa kɔ amansherbi nɛ e tiŋ m ber basa paa ŋko n haya asɔbɔya nɛ b shuŋ n sa mo. Esa kama malɛ daa maa tiŋ a kuŋ mbe kumu ashi mo doŋana be enɔ to. N daŋ shin nna nɛ basa fɛaŋ abar so a wɔtɔ nna. ¹¹Ama naniere bre, m maaŋ naŋ gberge menyi basa gbrɛbi nɛ men ka ere kusoe fanɛ kananɛ n daŋ wora bedarapo na jemanɛ nɛ k choŋ na. ¹²Meeŋ shin nɛ men dɔ n duu menyi be asɔduuso kayurwushiso. Menyi be afeelebi nɛ e bee sɔr asɔrso nɛ baa tre greeps na beeŋ sɔr nɛnɛ, nɛ bɔrɛ e ba ga nɛ men be kasawule e wora adɔjibi nɛnɛ. Ma efuli so be basa nɛ baaŋ ji efute na nɛ meeŋ nɛfa le be ekpa so. ¹³Efuli pɔtɛana be basa bee shoduu menyi Juda nɛ Israɛl be efuliana so ebi nna, ama meeŋ mɔlga menyi nseŋ shin nɛ men ki nɛfa be basa. Men baa kɔ kenyɛn nsaa maa lɔ kufu.”

¹⁴Ade be kaman nɛ Enyɛnpetale Ebɔrɛ na naŋ kaŋɛ: “Men nanaana ka daŋ shin nɛ n nya agbo na, n daŋ kre fanɛ meeŋ shin nɛ b ji jɛrbi nna nseŋ shin nɛ loŋ wora. ¹⁵Ama naniere mee kre kenɛfa Jerusalɛm to nɛ Juda be efuli so ebi nna. Amoso men sa maa lɔ kufu. ¹⁶Asɔ nɛ a daga fanɛ men baa wora e la kebaaji abar kashenteŋ nsaa ji asheŋ nɛ amo be ekpa so ashi menyi be demujikpaana saŋɛ na so kayurwushi beeŋ baa wɔ menyi to. ¹⁷Men sa maa kre kebaawora abar kulubi. Men sa maa bɔ ntaŋ a ji efɛ be eshɛda. Ŋ kishi le be alubiana ere kikɛ nna.”

¹⁸Kumo be kaman nɛ Enyɛnpetale Ebɔrɛ na naŋ kaŋɛ ma fanɛ ŋ kaŋɛ le. ¹⁹E yɛ: “Ekishi nɛ menyee kishi kufɔl nasopo nɛ kenusopo nɛ keshunusopo nɛ kudusopo to na beeŋ ki kayurji nɛ kagbenefuli be nchɛgboŋ n sa Juda be efuli so ebi. Amoso a daga fanɛ men baa sha kashenteŋ nɛ kayurwushi.”

²⁰Kede be kaman nɛ Enyɛnpetale Ebɔrɛ na naŋ kaŋɛ: “Jemanɛ ko bee ba nɛ basa damta e shi efuli pɔtɛana so be ndegboŋ damta to m ba Jerusalɛm to. ²¹Bumo nɛ b shi kadegboŋ koŋwule to beeŋ kaŋɛ abar le: ‘Anyee yɔ nna nɛ an ya bunyaŋ Enyɛnpetale Ebɔrɛ na nseŋ kule mo nɛ e nɛfa anyi. Amoso men ba nɛ an yɔ!’ ²²Basa damta beeŋ shi efuligboŋana so m ba Jerusalɛm to m ba bunyaŋ Enyɛnpetale Ebɔrɛ na nseŋ kule mo fanɛ e nɛfa bumo. ²³Loŋ be jemanɛ na so, eyiri pɔtɛ nɛ efuli pɔtɛana so be basa kudu beeŋ pɛ Israɛl be esa koŋwule be kale to nsaa kaŋɛ mo le: Shin nɛ an bɛ fo so a yɔ, ŋkpal manɛ so, an nu fanɛ Ebɔrɛ wɔ men kutɔ nna.”

Demuji nɛ k bee ba Israɛl mo doŋana so be asheŋ

¹Kubɔya nɛ k shi Enyɛnpe Ebɔrɛ na kutɔ nde: E yɛ, mbe anishi yuu edimɛdi kikɛ so nna, fɔŋfɔŋ eyiri yiri nɛ b wɔ Israɛl be efuli so na. Mo alɛ naŋ kaŋɛ fanɛ mbe demuji na beeŋ ba Hadrak nɛ kadegboŋ nɛ baa tre Damaskɔs na ashi Siriya be efuli so na so.

²Kumo be kaman mbe demuji beeŋ ba Hamaf be kade nɛ k mata Hadrak na gba so. Nde nɛ baa tre Tayɛ nɛ Sidɔn nɛ amo to be basa nyi kasheŋ wora ga na gba maaŋ lar demuji na to.

³Tayɛ be basa pɔr ebu lempo jeŋgreŋ ko a kuŋ bumo be amu nna nseŋ gbare shuwa nɛ gbiti m biti abar so fanɛ eshishɛr na! ⁴Ama Enyɛnpe Ebɔrɛ na beeŋ suge asɔ kama nɛ Tayɛ ebi na kɔ na. E beeŋ shin nɛ bumo be asɔ lela nɛ b kɔ na e mur teku to nɛ edɛ e ji kade na m mur cheche.

⁵Filisti be efuli so be basa nɛ b wɔ kade nɛ baa tre Ashkɛlɔn na beeŋ wu kusɔ nɛ k wora na nɛ kufu e pɛ bumo nɛ ebesa damta e ji basa nɛ b wɔ Gaza be kadegboŋ to na. Aloŋ e naŋ wora Ekrɔn be kadegboŋ to ebi gba. Bumo be tama beeŋ loge, ŋkpal b ka nyi fanɛ bumo alɛ gba beeŋ kɔ n tɔr so. Gaza beeŋ paŋ kumo be ewura nɛ Ashkɛlɔn e ki kade bureso a dese fuloŋ. ⁶Eyiri bubɔrɔ e naŋ ba sɔ Ashdɔd be kade na n chena, nɛ Enyɛnpe Ebɔrɛ na gbagba e shin nɛ Filistiebi na e ŋaba a maaŋ naa tiŋ m puchi kikɛ. ⁷Filistiebi na maaŋ naa we eblaŋ nɛ a kraa kɔ ŋklaŋ amo to ŋko a ji ajibi nɛ baa kishi. Bekama nɛ baaŋ ji efute na beeŋ ki ma basa a du fanɛ Juda be yiri to be kabuna ko be basa. Ekrɔnebi malɛ beeŋ ki ma basa fanɛ kananɛ Jebusiebi ki na. ⁸Ebɔrɛ yɛ: “Meeŋ baa kuŋ ma kasawule nɛ benapo nɛ baa kulti a mɔ basa na maaŋ nya kumo so m bɔla choŋ. M maaŋ sa kumukpakpasowuraana ekpa nɛ b naa kɔrfɛ ma basa. N wu awurfoŋ nɛ ma basa ji na kikɛ.”

Zayɔn be ewura popɔr na be asheŋ

⁹Ekama nɛ e wɔ Jerusalɛm to

e baa ji eyur nsaa wora awɔr kagbenefuliso!

Ŋkpal manɛ so menyi be ewura kɔ m pɔɔ so

nsaa ba menyi kutɔ;

e du boeŋ nna nseŋ dii kurmafɔlbi a ba.

¹⁰Enyɛnpe Ebɔrɛ na yɛ:

“Meeŋ lara kena to be egbaŋɛturko

nɛ egbaŋɛ ashi Israɛl be efuli so nɛ Jerusalɛm to.

Ata nɛ b lɔŋɛ ŋkpal kena so na

beeŋ buri to.

Meeŋ bar kayurwushi efuliana na so,

nɛ menyi be ewura e

yili teku ko ase a ji kuwura n ya fo teku nyɔsopo ase.

Mbe kuwurji beeŋ shi Yufreetes be Lɔr na ase

n ya fo durnya be ekar kikɛ.”

Kenaŋ laŋɛ Ebɔrɛ be basa m ba be asheŋ

¹¹Enyɛnpe Ebɔrɛ na yɛ:

“Ŋkpal ma nɛ menyi be kɔnɔkoŋwule

be ŋkre nɛ b ta esarga be ŋklaŋ m mɔ kumo so na so,

meeŋ lara menyi be basa ashi kenyaya nɛ k du

fanɛ kemaŋ chiŋgeliŋ nɛ k maŋ kɔ nchu na to.

¹²Men bɛta m ba menyi be kumɔlga

be kakpa lempo na nseŋ nya tama.

Ŋkpal manɛ so, kabre meeŋ laŋɛ asɔ

nɛ men daa kɔ na be ntuŋ anyɔso n sa menyi.

¹³Meeŋ ta Judaebi fanɛ enapo be keta na,

nseŋ ta Israɛlebi malɛ fanɛ ma atanyembi.”

Ma alɛ beeŋ naŋ ta Zayɔn be basa

fanɛ ma tokobi, ŋ kɔ Griikebi kena.

¹⁴Enyɛnpe Ebɔrɛ na beeŋ ba buu

mbe basa so fanɛ bɔrɛwɔlpa,

nseŋ to mbe atanyembi

fanɛ bɔrɛ ka nyɛkpɛ na.

Enyɛnpetale Ebɔrɛ beeŋ foŋ mbe kabel

nseŋ bɔla bɔrɛfu to n shi kelargato

be kaseto m ba.

¹⁵Enyɛnpetale Ebɔrɛ na beeŋ baa kuŋ mbe basa,

nɛ b kɔ m pɔɔ bumo doŋana so m mur bumo.

Baaŋ baa wora awɔr kena to fanɛ basa boo so

nseŋ shin nɛ ŋklaŋ e lar bumo doŋana be eyurana so

a shile fanɛ kananɛ bɔrɛmatapo bee chulgi

sarga be asɔbɔya be ŋklaŋ a wurge bɔrɛsure na so na.

¹⁶Kamɔnchɛ na Enyɛnpe Ebɔrɛ na

e naŋ mɔlga mbe basa fanɛ kananɛ

mbolpɔkpapo bee mɔlga mbe mbolpɔ

ashi kenishipere to na.

Baaŋ baa nyɛkpɛ mbe kasawule so

fanɛ kuwurwuro so be amaŋkanibi na.

¹⁷Baaŋ baa walɛ kebita kashenteŋto!

Mbifɔlbi beeŋ daŋ a kɔ eleŋ nɛnɛ

ŋkpal b ka beeŋ nya aboyu damta a ji

nsaa nya yabra popɔr a nuu so.

Enyɛnpe Ebɔrɛ na ka nase kumɔlga be kɔnɔ be asheŋ

¹Men kule Enyɛnpe Ebɔrɛ na bɔrɛchu kechali so. Mo e naa shin nɛ bɔrɛ bee mɔl a ba, a shin nɛ kasawule so bee nya kayul nɛ asɔduu bee kɔr a wora nɛ edimɛdi bee nya a ji. ²Basa bee yɔ agbir to nɛ bekpalpo kutɔ nna, ama asheŋ fuloŋ nɛ efɛsheŋ nɛ baa nya ashi bumo kutɔ. Beko bee kute edare be afito, ama bumo alɛ bee fule basa nna a sa bumo kagbenewushi fuloŋ. Ŋkpal loŋ so basa bee nite a kulti fanɛ mbolpɔ foeso nna. Asheŋ maa nyalɛ a sa bumo ŋkpal b ka maŋ kɔ esa nɛ e bee keni bumo so so.

³Enyɛnpe Ebɔrɛ na yɛ: “N nya agbo nna n wora befɔ nɛ baa ji kuwura ma basa so nsaa shin nɛ ŋ gberge bumo kusoe. Juda be efuli so be basa na la ma basa nna, nɛ ma Enyɛnpetale Ebɔrɛ na beeŋ baa keni bumo so. Baaŋ baa du fanɛ ma kena to be egbaŋɛ lempo nna. ⁴Bewura nɛ bejuŋkparpo nɛ gomena be ekrachi nimuso nɛ b kɔ eleŋ beeŋ shi Juda be yiri to n lar. ⁵Juda be basa beeŋ sɔ kelempo fanɛ benapo nɛ b kɔ m pɔɔ bumo doŋana so nsaa chichi bumo so fanɛ ekpa to be depɔ na. Ŋkpal Enyɛnpe Ebɔrɛ na ka wɔ bumo kutɔ so, baaŋ kɔ m pɔɔ bedoŋ nɛ b dii egbaŋɛ a kɔ gba so.

⁶Meeŋ sa Juda be basa eleŋ,

nseŋ mɔlga Israɛl be basa.

Meeŋ wu bumo kuwɔr

nseŋ bɛta bumo kikɛ m ba epe.

Baaŋ baa du fanɛ basa nɛ m maŋ naŋ kini ŋ ku so nna.

Ma e la Enyɛnpe bumo be Ebɔrɛ na;

ma alɛ beeŋ nu bumo be kabɔrɛkule.

⁷Israɛl be basa na beeŋ baa kɔ eleŋ fanɛ benapo,

nsaa kɔ kagbenefuli fanɛ eyabra nuupo.

Bumo be kaman to ebi beeŋ baa nyiŋi

kekɔmpɔɔso ere nɛ bumo be ŋgbene a fuli

ŋkpal kusɔ nɛ Enyɛnpe Ebɔrɛ na wora so.

⁸Meeŋ tre ma basa m ba gama abar so,

ma alɛ beeŋ mɔlga bumo nseŋ shin nɛ

b wora keshi a du fanɛ kananɛ b daa sa na.

⁹Hale ŋ ka shin nɛ b pesaŋ to

a wɔ efuli pɔtɛana so ere gba,

b kraa nyiŋi ma asheŋ ashi

mboŋ wɔfɔ na nna.

Bumo nɛ bumo be mbia beeŋ ji efute

nseŋ gama abar so m bɛta m ba epe.

¹⁰Meeŋ ya keta bumo n shi

Ijipt nɛ Asiriya be efuliana so m ba epe,

nɛ b ba chena bumo gbagba be kasawule so.

Meeŋ shin nɛ b chena Giliad nɛ

Lebanɔn be nsawule gba so,

n sɔ amo kikɛ so.

¹¹B kaŋ bɔla bumo be etɔrɔbi

nɛ e du fanɛ teku ere to a choŋ,

ma, Enyɛnpe Ebɔrɛ na beeŋ yɔɔ atili na

nseŋ shin nɛ Nail be lɔr nɛ k wɔ Ijipt be efuli so na

be kechimbi to be nchu e feeto.

Meeŋ shin nɛ Asiriyaebi be kamoowugboŋ na e ba kaseto,

nɛ Ijiptebi e paŋ bumo be eleŋgboŋ na.

¹²Meeŋ naŋ wɔtɔ ma basa eleŋ to,

nɛ b baa bunyaŋ ma nsaa wora ma kasonu.

Ma, Enyɛnpe Ebɔrɛ na e malga na!”

Belempo nyaŋnyaŋso be ketɔr be asheŋ

¹Lebanɔnebi men bugi menyi be mbuna,

nɛ edɛ e chɔɔ menyi be ndibi nɛ baa tre sida na!

²Seprɛs be ndibi, men baa shu nsaa boŋ to

ŋkpal manɛ so, sida be ndibi tɔr;

kemaŋkura be ndibi na kikɛ mur!

Bashan be ndibigboŋ, men baa shu nsaa boŋ to;

ŋkpal b ka ku kupogboŋ na to be ndibi

damta na kikɛ n lɛ so!

³Men nu mbolpɔkpapoana ka bee shu awɔrso;

ŋkpal bumo be mbolpɔ be ejikpa lela na ka mur so!

Men nu ebuluŋ ka bee munto;

ŋkpal Jɔɔdan be lɔrkar be kupogboŋ lela na ka mur so!

Mbolpɔkpapo anyɔ ko be asheŋ

⁴Kusɔ nɛ Enyɛnpe ma Ebɔrɛ na kaŋɛ ma nde: “Ta fo kumu ŋ ki fanɛ mbolpɔkpapo nɛ baa shin nɛ b mɔ mbe mbolpɔ. ⁵Basa nɛ b tɔ bumo na bee mɔ bumo nna nsaa ta bumo be amu a ji. Nɛ basa nɛ baa fa mbolpɔ na malɛ bee kaŋɛ le: ‘Mee di Ebɔrɛ epaŋ ŋkpal ŋ ka dii dama so!’ Mbolpɔkpapoana na gbagba maa shu mbolpɔ na so.”

⁶Nɛ Enyɛnpe Ebɔrɛ na naŋ kaŋɛ le: “M maaŋ naŋ shu ekama so ashi durnya ere to. Ŋ gbagba beeŋ ta basa na m bɔɔ bumo braana nɛ bewurjipoana enɔ nɛ b mur durnya ere cheche nɛ m maaŋ mɔlga kumo ashi bumo be enɔ to.”

⁷Ŋkpal loŋ so nɛ ŋ ki mbolpɔ nɛ b kɔ a yɔ nɛ b ya mɔ na be ekenipo, nseŋ ta akpabi anyɔ ŋ keta a kpa bumo na. N daa tre kuko ‘Kushuso’ nsaa tre kuko malɛ ‘Kɔnɔkoŋwule’ nna. ⁸Kufɔl koŋwule to nɛ n nya agbo n ju mbolpɔkpapo asa ko nɛ b daŋ kishi ma asheŋ ga na. ⁹Kumo be kaman nɛ ŋ kaŋɛ mbolpɔ na le: “M maaŋ naa la menyi be ekenipo. Bumo nɛ baaŋ wu, b wu. Bumo nɛ baaŋ mur malɛ e mur. Bumo nɛ baaŋ ka malɛ e baa pɛ abar a we.” ¹⁰Kumo be kamɔnchɛ nɛ m bu kekpabi nɛ mee tre ‘Kushuso’ na to, a ŋini fanɛ kɔnɔkoŋwule be ŋkre nɛ Enyɛnpe Ebɔrɛ nɛ efuliana na kikɛ kre na ku to. ¹¹Amoso kumo be kamɔnchɛ kikɛ nɛ kɔnɔkoŋwule be ŋkre na ku to. Basa nɛ baa tɔ mbolpɔ a fa na daa keni ma nna, nseŋ pin fanɛ Enyɛnpe Ebɔrɛ na bɔla kusɔ nɛ n wora ere so nna a malga a sa bumo. ¹²Kumo be kaman nɛ ŋ kaŋɛ bumo le: “Nɛ menyee sha, menyeeŋ tiŋ n ta ma kakɔka n sa ma. Ama nɛ menyi maaŋ sa, men baa kɔ.” Ndoŋ nna nɛ b sa ma gbiti be ndarbi adesa fanɛ amo e la ma kakɔka.

¹³Nɛ Enyɛnpe Ebɔrɛ na kaŋɛ ma le: “Ta amo n ya wɔtɔ bɔrɛlambu na be lɔkɔ na to.” Ndoŋ nna nɛ n ta gbiti be ndarbi adesa nɛ b fɛ fanɛ amo e daga ma na n ya wɔtɔ bɔrɛlambu be lɔkɔ na to. ¹⁴Kede be kaman nɛ n naŋ bu kekpabi nyɔsopo nɛ mee tre ‘kɔnɔkoŋwule’ na to, nɛ Juda nɛ Israɛl be kekurgeji ku to.

¹⁵Ndoŋ nna nɛ Enyɛnpe Ebɔrɛ na kaŋɛ ma le: “Naŋ laŋɛ ŋ ki mbolpɔkpapo nɛ e maŋ kɔ tɔnɔ kikɛ na. ¹⁶Ŋkpal manɛ so n lara mbolpɔkpapo ko fanɛ e ba kaa keni ma mbolpɔ so, ama mo shɛŋ maaŋ baa wɔ bumo nɛ baaŋ foe na to ŋko nɛ e nite n fin bewurbi na ŋko n chɛ bumo nɛ baa lɔ na ŋko ŋ kpa bumo nɛ b kɔ alenfia na n yɔ keji to. Ama bedanso na nɛ e beeŋ baa mɔ a we a ka awibi. ¹⁷Asheŋ maaŋ nyalɛ n sa loŋ be mbolpɔkpapo jiga nɛ e yige mbe mbolpɔ n lɛ na! Mbe eleŋ kikɛ beeŋ mur ashi kena to. Mbe kabre beeŋ wu, nɛ mbe jisoso be kenishi malɛ e tan!”

Jerusalɛm ka beeŋ nya kumo be kumu kachako so be asheŋ

¹Kubɔya nɛ k shi Enyɛnpe Ebɔrɛ na kutɔ a laŋɛ Israɛl be kaplɛa so na nde. Mo e to esoso nseŋ tɔl durnya n yili kumo be gbaltɔlase so, nseŋ sa dimɛdi ŋkpa na. ²E yɛ: “N yili kumo nna fanɛ Jerusalɛm e ki fanɛ yabra kurwa nɛ efuliana nɛ a mata kumo na e nuu m boo. Kananɛ baaŋ kre kena m ba kulti Jerusalɛm n wɔtɔ na, aloŋ nɛ baaŋ wora Juda be efuli na kikɛ so. ³Ama loŋ be jemanɛ na kaŋ fo, meeŋ shin nɛ Jerusalɛm e ki fanɛ kejembu gbɛgbɛso, nɛ efuli kama so ebi maaŋ tiŋ n fifir kumo. Bekama nɛ b wora ania nɛ b fifir kumo beeŋ doro bumo be amu. ⁴Loŋ be kachɛ na meeŋ shin nɛ kufugboŋ ko e tɔr gbaŋɛ kikɛ so nɛ eboŋ e tɔr amo be bediipoana so. Ma e naaŋ baa keni Juda be basa so. Meeŋ shin nɛ bumo doŋana be egbaŋɛ e tan. ⁵Kumo be kaman nɛ Juda be efuli so be mbunaana na be basa e kaŋɛ bumo be amu le: ‘Enyɛnpetale Ebɔrɛ na e naa sa mbe basa nɛ b wɔ Jerusalɛm to na eleŋ.’

⁶Jemanɛ na kaŋ fo, meeŋ shin nɛ Juda be efuli so be benimuana na e ki fanɛ edɛ ashi kupo to ŋko aboyu nɛ a wɔl a yil to. Baaŋ mur efuliana nɛ e kulti bumo na kikɛ. Ama shɛŋ maaŋ wora basa nɛ b wɔ Jerusalɛm be kadegboŋ na to na bre.

⁷Ma Enyɛnpetale Ebɔrɛ na e naŋ shin nɛ Juda be benapo e juŋkpar ŋ kɔ m pɔɔ so, saŋɛ na so kemaŋkura nɛ ewura Deevid be kaman to ebi nɛ basa nɛ b wɔ Jerusalɛm to beeŋ nya na maaŋ baa chɔ Juda be efuli so be basa nɛ b ka na peya. ⁸Loŋ be jemanɛ na, ma Enyɛnpe Ebɔrɛ na e naaŋ baa kuŋ bekama nɛ b wɔ Jerusalɛm to, nseŋ shin nɛ bumo to be bepɔshipo gba e baa kɔ eleŋ fanɛ ewura Deevid. Ewura Deevid be kamanebi beeŋ baa juŋkpar bumo fanɛ Ebɔrɛ be malaika gbagba na. ⁹Ma alɛ beeŋ mur efuli kama nɛ k beeŋ wora ania fanɛ k beeŋ kɔ Jerusalɛm kena.

¹⁰Ma, Enyɛnpe Ebɔrɛ na beeŋ shin nɛ kuwɔrwu nɛ kabɔrɛkule be kiyoyu e gbelge m ba ewura Deevid be kamanebi nɛ basa nɛ b wɔ Jerusalɛm to na kikɛ so. Baaŋ to kenishi n wu esa nɛ b da mo kekpa m mɔ na nseŋ shu mbe keeli fanɛ kananɛ baa shu ebi koŋwule be keeli na, nseŋ wora kuwɔr be asheŋ fanɛ esa nɛ e paŋ mbe wurkoŋnyɛn na. ¹¹Kushu nɛ k beeŋ baa wɔ Jerusalɛm to loŋ be kamɔnchɛ na beeŋ baa shi pasaa. K beeŋ baa du fanɛ b ka daa shu Hadad Rimɔn be keeli ashi Megido be keplasawule so na nna. ^12-14Kasawule na so be esa kikɛ ashi kanaŋ kama to beeŋ shu keeli. Benyɛn na bee barga bumo be amu ashi beche na to nna a shu. Ewura Deevid nɛ Neetan nɛ Livai nɛ Shimei be nnaŋ to ebi nɛ nnaŋ mo nɛ e ka na kikɛ to ebi gba be benyɛn nɛ beche beeŋ barga to a shu ntuŋ so.”

Kelar agbir nɛ anebi fɛpoana be asheŋ to be asheŋ

¹Nɛ Enyɛnpetale Ebɔrɛ naŋ kaŋɛ: “Jemanɛ ko bee ba nɛ kebuye ko e ba kaa bul nchu n fɔr ewura Deevid be kaman to ebi nɛ Jerusalɛm to be basa be alubi nɛ eyurpisheŋ kikɛ n lɛ. ²Jemanɛ na kaŋ fo, meeŋ mur agbirana be atre kasawule na so nɛ esa maaŋ naa nyiŋi amo be asheŋ gba kuraa. Ma alɛ beeŋ lara anebi fɛpoana na nɛ eyurpisheŋ be kiyoyu gba kasawule na so. ³Esa kama kaŋ naa kaŋɛ fanɛ mo ere bee wu abɔrɛsheŋ to nna a kaŋɛ, mo tuto nɛ mo nio gbagba e naŋ kaŋɛ fanɛ e daga luwu, ŋkpal e ka ku efɛ ŋ kaŋɛ fanɛ Enyɛnpe Ebɔrɛ na be kamalga nɛ e bee malga so. Nɛ e kraŋ kini a malga mo nio nɛ mo tuto gbagba e naaŋ da mo tokobi m mɔ. ⁴Loŋ be jemanɛ na kaŋ fo, anebi kikɛ maaŋ naa puchi mbe ebɔrɛdare so ŋko a wora anebi be aworbi ŋko a buu anebi be epiŋi a fule basa. ⁵Ama kusɔ nɛ e beeŋ kaŋɛ e la fanɛ, ‘Ma ere maŋ la anebi. Ma kebia to kikɛ edɔpo e la ma hale m ba fo kabre.’ ⁶Kumo be kaman nɛ esa naŋ bishi mo le: Nɛ manɛ e kpɛa fo eyur so le ere? E beeŋ kaŋɛ fanɛ, ‘N teri ko be laŋ to nɛ n nya amo.’ ”

B ka mɔ mbolpɔkpapo nɛ mbolpɔ pesaŋ to be asheŋ

⁷Kede be kaman nɛ Enyɛnpetale Ebɔrɛ na kaŋɛ: “Tokobi, koso ŋ kɔ mbolpɔkpapo nɛ e bee shuŋ a sa ma na m mɔ mo nɛ mbolpɔ na e yeŋ to m pesaŋ to. Saŋɛ na so meeŋ nya ŋ kɔ ma basa. ⁸Kasawule na so be basa na be ntuŋ asa to be ntuŋ anyɔ beeŋ wu m mur nɛ katuŋ koŋwule nawule e ka. ⁹Katuŋ koŋwule nɛ b ka na gba, meeŋ wora bumo ŋ keni nseŋ lɔŋɛ bumo so fanɛ kananɛ baa ta shuwa ŋko gbiti a wɔtɔ edɛ to a lɔŋɛ amo so na. Kumo be kaman pɔɛŋ nɛ baaŋ kule ma nɛ n nu n sa bumo nseŋ kaŋɛ bumo fanɛ b la ma basa nna, nɛ bumo alɛ e bugi to ŋ kaŋɛ fanɛ ma, Enyɛnpe Ebɔrɛ na, e la bumo be Ebɔrɛ.”

Enyɛnpe Ebɔrɛ ka beeŋ ji kuwura be asheŋ

¹Enyɛnpe Ebɔrɛ be demujiachɛ na bee ba. Kamɔnchɛ na nɛ baaŋ muu Jerusalɛm to be asɔ m barga to n sa abar ashi menyi gbagba be anishito. ²Enyɛnpe Ebɔrɛ na e naŋ gama efuli pɔtɛana na abar so nɛ b ba kɔ Jerusalɛm kena. Baaŋ pɔ kadegboŋ na so nseŋ luri elaŋ to m muu asɔ nseŋ pur beche. Baaŋ pɛ basa na be bargato ŋ ki anya n yɔ efuli pɔtɛana so, ama b maaŋ lara bumo nɛ baaŋ ka na bre kadegboŋ na to. ³Kumo be kaman nɛ Enyɛnpe Ebɔrɛ na e lar n ya kɔ efuli pɔtɛana na, fanɛ kananɛ e daŋ wora jemanɛ nɛ k choŋ na. ⁴Loŋ be jemanɛ na e beeŋ yili ɔlif be kebee nɛ k wɔ Jerusalɛm be epeŋilarkpa be kaba so na so nɛ k baŋɛ to anyɔ n tɔr ketaŋɛgboŋ nɛ k yili epeŋilarkpa m ba choŋ epeŋitɔrkpa na. Kumo be kaba koŋwule beeŋ tɔr a laŋɛ kelargato be esoso be kaba so nɛ kaba ko malɛ e tɔr a laŋɛ kelargato be kaseto be kaba so. ⁵Kumo be kaman nɛ men bɔla ketaŋɛ nɛ kebee na baŋɛ to anyɔ n dese n ya fo kakpa nɛ baa tre Azɛl na n shile. Kananɛ men nanaana daŋ shile saŋɛ nɛ kasawule daŋ gbuŋgbuŋ Juda be ewura Uziya be jemanɛ so na gbagba chap nɛ menyi alɛ gba beeŋ shile m mɔlga menyi be amu. Kumo be kaman nɛ Enyɛnpe Ebɔrɛ na nɛ mbe emalaika kikɛ e ba.

⁶Loŋ be kachɛ na kaŋ fo, kefulto ŋko awo ŋko kenyɔlɔ maaŋ baa wɔtɔ. ⁷K beeŋ baa la kachɛ nɛ k kɔr nchɛ kikɛ to nna. Karechɛ ŋko kanyɛ maaŋ naa wɔtɔ. Kanyɛ biri gba kakpa kraa beeŋ fulto parr. Enyɛnpe Ebɔrɛ na nawule e nyi saŋɛ nɛ loŋ beeŋ wora.

⁸Kachɛ na kaŋ fo, nchu nɛ a bee sa ŋkpa beeŋ shi Jerusalɛm to a shile. Nchu na be bargato beeŋ baa shile a luri teku nɛ baa tre Teku Wuso na to nɛ bargato malɛ e baa shile a luri kumo nɛ baa tre Mɛditerenia be Teku na to. Ketarso nɛ kechali so kikɛ nɛ nchu na beeŋ baa shile. ⁹Loŋ be jemanɛ na, Enyɛnpe Ebɔrɛ na e naaŋ baa ji durnya kikɛ so kuwura. Mo nawule be ketre nɛ ekama beeŋ baa nyi nsaa bunyaŋ mo nawule fanɛ Ebɔrɛ.

¹⁰Kasawule nɛ k yili Gɛba n dese n ya fo Rimmɔn a laŋɛ Jerusalɛm be kelargato be kaseto be kaba so na beeŋ ki fanɛ keshishɛrsawule nɛ baa tre Araba na. Ama Jerusalɛm bre beeŋ baa kraa yil kumo be kakpa nseŋ yili kabuna nɛ baa tre Bɛnjamin be Kabunagboŋ na n salga to n ya fo kumo nɛ baa tre Kukɔlɔ to be Kabunagboŋ, be kakpa nɛ kabuna ko daa wɔ na. K kraa beeŋ yili kakpa nɛ baa tre Hananɛl be Ebu jeŋgreŋ na n salga to n ya fo kakpa nɛ baa wora bewura be eyabra na. ¹¹Basa na beeŋ chena Jerusalɛm to ashi kayurwushi so nɛ k maaŋ naaŋ mur kikɛ.

¹²Enyɛnpe Ebɔrɛ na beeŋ shin nɛ kulɔ lubi e tɔr efuli pɔtɛana be basa nɛ baa kɔ Jerusalɛm kena na so. Bumo be eyurana nɛ anishi nɛ adonduloŋ kikɛ beeŋ bɛ a bɛlge nɛ b kraa keni.

¹³Loŋ be jemanɛ na kaŋ fo, Enyɛnpe Ebɔrɛ na beeŋ shin nɛ bumo be nfɛra e mel to nɛ kufu e pɛ bumo saŋɛ na so baŋ kilgi n tu abar a kɔ. ¹⁴Jemanɛ na so Juda be efuli so be basa beeŋ koso ŋ kɔ ŋ kuŋ Jerusalɛm. Baaŋ kɔ n suge efuli pɔtɛana na be basa be eshuwa nɛ egbiti nɛ asɔbuuso damta. ¹⁵Kulɔ lubi koŋwule na beeŋ tɔr Jerusalɛmebi bumo doŋana be egbaŋɛ nɛ ekurmafɔlbi nɛ enyɔma nɛ asɔbɔya be yiri yiri kikɛ nɛ b kɔ ashi bumo be keeyi to so.

¹⁶Kumo be kaman nɛ basa nɛ baaŋ ji efute ashi efuli pɔtɛana nɛ b daŋ kɔ Jerusalɛm kena na e baa yɔ Jerusalɛm to kafɛ kikɛ n ya kaa bunyaŋ Enyɛnpetale Ebɔrɛ na fanɛ bumo be ewura nsaa ji Abuu to be Kachɛgboŋ na. ¹⁷Bɔrɛ maaŋ naŋ ba efuli kama so ebi nɛ b kini keyɔ Jerusalɛm to n ya bunyaŋ Enyɛnpetale Ebɔrɛ na fanɛ bumo be ewura, be kasawule so kikɛ. ¹⁸Nɛ fanɛ Ijiptebi gba kini keji Abuu to be Kachɛgboŋ na, kulɔ lubi nɛ Enyɛnpe Ebɔrɛ na shin nɛ b k tɔr efuli pɔtɛana nɛ kini mo na so na beeŋ pɛ bumo alɛ gba. ¹⁹Kasogberge nɛ k beeŋ ba Ijipt be efuli nɛ efuli pɔtɛana nɛ a kini keji Abuu to be Kachɛgboŋ na so nna na.

²⁰Jemanɛ na kaŋ fo, baaŋ sibɛ ‘Baa du cheembi n sa Enyɛnpe Ebɔrɛ na’ n deŋi egbaŋɛ be adulombi so, nɛ bɔrɛlambu na to be mpuliya daŋɛso na e baa du cheembi fanɛ echeenshi cheembi nɛ a yil bɔrɛsure na ase na. ²¹Baaŋ ta mpuliya daŋɛso kikɛ ashi Jerusalɛm to nɛ Juda be efuli so kikɛ m bɔɔ Enyɛnpetale Ebɔrɛ na enɔ nɛ e wora amo cheembi. Basa nɛ baa lara esarga na beeŋ ta amo a daŋɛ esarga be eblaŋ. Jemanɛ na kaŋ fo, eyawujipo maaŋ naa wɔ Enyɛnpetale Ebɔrɛ na be bɔrɛlambu na to.