SƆLƆMƆN BE NSHƐ

EWURA SƆLƆMƆN BE NSHƐ

¹Sɔlɔmɔn be nshɛ to be kebelbelso.

Sososo be kashɛ

Eche shaso be kashɛ

²Pipe ma kɔnɔ kasha so;

fo kasha bɔ nsa;

³nɛ fo efɛa wɔ ebel ga.

Fo ketre du viim nna fanɛ b ka chulgi tulale n wurge nna.

Nɛ besuŋgurbi bee wu fo so.

⁴Keta ma nɛ an nya manaŋ n yɔ;

Ma ewura, keta ma n yɔ fo ebu to manaŋ.

Ndoŋ nɛ anyi be ŋgbene beeŋ fuli anyi,

nɛ an nuu nsa nseŋ ji anyi be amu.

Nɛ beche bee sha fo, kumo be ekpa so nna.

⁵Jerusalɛm be beche,

ma kayurwule biri nna, ama ma alɛ walɛ kebita.

N nyɔ gbitigbiti nna fanɛ Keeda be ewajɛbu

nɛ a wɔ keshishɛrsawule so na,

ama ma kebita du nna fanɛ Sɔlɔmɔn be lambu to be epatisa

⁶Men sa maŋ mɛrge anishi n cha ma ŋkpal epeŋi ka chɔ ma nɛ m biri gbitigbiti so.

N siponyɛnana e daŋ nya agbo n wora ma

nseŋ shin nɛ n ya ka keni asɔrso

nɛ baa tre greep na be ndɔ so.

Nɛ m maŋ naa nya saŋɛ a sa ma eyur nɛ k ki loŋ na.

⁷N jipo, ŋini ma kakpa nɛ fee yɛr fo mbolpɔ nɛ baa ya kaa ji,

nɛ kakpa nɛ baa dese a wushi kapaso.

Ŋkpal manɛ so,

k maŋ daga fanɛ n ya kaa na fo braana be mbolpɔ to a fin fo.

Enyɛn na be kashɛ

⁸Beche to be kebita,

nɛ fo maŋ nyi ndoŋ gba fo bɛ mbolpɔ na be aya so.

Keta fo mboebi n yɔ kejito

a mata mbolpɔkpapoana na be ewajɛbu na ase.

⁹N jipo, fee shin nɛ mee wora yireŋ yireŋ nna fanɛ

egbaŋɛnyɛn nɛ a bee gberge

ewura Fɛɛro be gbaŋɛturko na ka wu gbaŋɛche na.

¹⁰Akonde bee shin nɛ fo kebita bee lar alegaiso nna,

nɛ fo kubɔtoshembi malɛ bee nyɛkpɛ fanɛ shuwa na. ¹¹Anyeeŋ ta shuwa nɛ gbiti n lɔŋɛ akonde n sa fo.

Eche na be kashɛ

¹²Ma kowurnyɛn ka tase mbe ejikpa nɛ ma tulale be efɛa ya ber mo.

¹³N jipo, fo du fanɛ tulale nna ashi ma anyipo be nfɛato.

¹⁴N jipo, fo du nna fanɛ kedibi nɛ baa tre hena na be atoto ashi kudɔ nɛ k wɔ kade nɛ baa tre Engedi na to.

Enyɛn na be kashɛ

¹⁵N jipo, fo kebita maŋ kɔ ebarkasa,

fo anishi du fanɛ lepɔ be anishi nna.

Eche na be kashɛ

¹⁶N jipo fo walɛ keyɛrbi,

m baŋ maŋ wu fo maaŋ teŋ n chena.

Anyeeŋ dese afitiri bumbuŋ so kasha so

fanɛ gedo nɛ an wora kejafɔ n dese so na;

¹⁷nɛ ndibi nɛ baa tre sida nɛ seprɛs na be kiyoyul e buu anyi so.

¹N du fanɛ ketoto nɛ baa tre rosi na nna ashi kakpa nɛ baa tre Sharɔn na

ŋko ketoto nɛ baa tre lili nɛ k wɔ ketaŋɛ to na.

Enyɛn na be kashɛ

²Kananɛ ketotodibi lela bee kaa wea ewidibiana to na, loŋ gbagba chap nɛ n jipo du ashi besuŋgurbi to.

Eche na be kashɛ

³Kananɛ mangodibi bee wea ndibi pɔtɛ to ashi kupo to na nɛ n jipo du ashi mbrantiɛbia to.

Kumo be kiyoyul to be kechena wɔ ebel nna

nɛ kumo kusɔrso bee wora ma kɔnɔ to ebel ga

⁴Fo yɛr ma fo kejigboŋ be ebu to

n ya ŋini ma fo kasha alegaiso.

⁵Sa ma asɔrso nɛ baa tre greep na be awɔlso nɛ amo nɛ baa tre apɔl na nɛ n ji n nya eleŋ,

ŋkpal manɛ so fo kasha shin nɛ mee lɔ nna.

⁶N jipo be enɔ bena sɔ ma kumu to nna

nɛ mbe enɔjiso malɛ bee lala ma so kasha so.

⁷Jerusalɛm be beche,

men nase kɔnɔ n sa ma

nseŋ bɔ chibir nɛ shantaŋ be ntaŋ

fanɛ men maaŋ chuchɔl kasha

nɛ kumo be saŋɛ maŋ naŋ fo.

Kashɛ nyɔsopo

Eche na be kashɛ

⁸N nu n jipo be ebɔl!

Mo e shi abee nɛ apreŋ so n shile a tɛto n gbelge to a ba ma kutɔ na.

⁹N jipo du nna fanɛ chibir na.

Mo e yil egbal be kaman a jule a keni tokuro to a dara ebu to na.

Enyɛn na be kashɛ

¹⁰Le nɛ n jipo kaŋɛ ma: “Ma eshapo, niŋi to;

ma kebita lela, ba nɛ an yɔ!

¹¹Kechali loge nna na, nɛ bɔrɛ ku.

¹²Ndibi fara a wora atoto

nɛ basa fara a lɔŋɛ asɔ to nsaa boŋ nshɛ kaplɛkama,

nɛ elepɔ be kushu sɔ kiyi to.

¹³Ndibi nɛ baa tre figi na fara a sɔr,

nɛ asɔrso nɛ baa tre greep na fara a futi

nɛ amo be atoto be efɛa sɔ kaplɛkama.

Amoso n jipo koso nɛ an yɔ;

ma kebita lela, ba nɛ an yɔ!

¹⁴Fo du nna fanɛ lepɔ nɛ e ŋana kefalta to ashi kebeegboŋ so na.

Shin nɛ n wu fo anishito;

nseŋ nu fo ebɔl belbelso na.

¹⁵Shin nɛ an pɛ ejiŋkaamu wurbi nɛ baa jija anyi be asɔrso nɛ baa tre greep na be kudɔ na,

ŋkpal manɛ so greep be asɔrso na bee futi nna.

Eche na be kashɛ

¹⁶Ma eshapo la meya nna, nɛ ma alɛ gba la mo peya;

Atoto nɛ baa tre lili na be kakpa nɛ e bee yɛr mbe asɔbɔya kejito.

¹⁷N jipo du fanɛ chibir nna a wɔ kebee so hale nɛ kare e ya cha

nɛ tentembiri e foe.”

¹Ŋ ka dese ma gedo so kanyɛso nɛ n jipo be asheŋ ba ma kagbene to;

nɛ ŋ keni bena nɛ jiso m maŋ wu mo.

²Nɛ ŋ koso n nite n kilgi to kade na kikɛ to;

n nite kumo be abɔrbi kikɛ nɛ kumo be alɔnɛ kikɛ so n fin ma jipo,

ama m maŋ wu mo.

³Nɛ basa nɛ baa keni kade na so kanyɛso na shɛr ma to

nɛ m bishi bumo: “Men wu n jipo a?” ⁴Ma nɛ bumo ka baŋ barga abar gbrɛ nɛ n wu ŋ jipo.

Nɛ n far n chɛ mo kiŋkiŋ;

M maŋ naŋ yige mo to.

Kumo be kaman nɛ ŋ keta mo n yɔ n nio be ebu to;

ebu nɛ b kurge ma kumo to na gbagba to.

⁵Jerusalɛm be beche, men nase kɔnɔ n sa ma

nseŋ bɔ chibir nɛ shantaŋ be ntaŋ fanɛ

men maaŋ chuchɔl kasha

nɛ kumo be saŋɛ maŋ naŋ fo.

Kashɛ Sasopo

Eche na be kashɛ

⁶Wanɛ e shi keshishɛrsawule so

a ba fanɛ edishi ka bee kaa kululu loŋ,

nɛ etulale kpakpaso fanɛ mɛr nɛ fraŋkinsensi

nɛ eyawujipoana bee fa na be efɛa bɛ mo so loŋ?

⁷Sɔlɔmɔn nɛ b sulɔ mbe kekpata so a ba

nɛ Israɛl be benapo kpakpaso adeshe bee kuŋ mo.

⁸Benapo na kikɛ la benapo lempo nɛ b nyi kena to nɛnɛ nna.

B nyi tokobi be keta ŋ kɔ nɛnɛ.

Bumo be ekama malɛ di tokobi nna nseŋ wora shiriya

a jo kusɔ nɛ k beeŋ wora kanyɛso nna.

⁹Lebanɔn be ndibi lela nɛ ewura Sɔlɔmɔn ta n lɔŋɛ mbe kekpata na.

¹⁰Gbiti nɛ e daŋ ta n wora kumo be ndibi tenteŋ na,

nseŋ ta shuwa malɛ n wora kumo be kaseto be ndibi na.

Wajɛ peper kunɔkunɔ nɛ e daŋ ta n ta kumo be kaseto.

Jerusalɛm be mbichebi e daŋ lue kumo be epunto be asɔ kikɛ.

¹¹Zayɔn be beche, men lar m ba keni ewura Sɔlɔmɔn

ka buu kuwurwuro;

kuwurwuro nɛ mo nio

daŋ ta m buu mo mbe kejafɔ achɛ

nɛ k shin nɛ mbe kagbene fuli mo ga na.

Enyɛn na be kashɛ

¹N jipo fo lar kebita nɛnɛ bre.

Fo kebita maŋ kɔ ebarkasa.

Keni kananɛ fo anishi walɛ nɛnɛ

a wɔ shata to fanɛ lepɔ ka wɔ kesha to na.

Nɛ fo emin bee gbungbuŋto fanɛ mboe

ka shi Giliad be kebee so a gbelge to a ba na.

²Fo anyii fuli nna parr

fanɛ mbolpɔ nɛ b baŋ bɛr n ji kebita na.

Amo kikɛ bɛ abar so nna yɛɛr.

K kama maŋ gbaŋ.

³Fo kɔnɔpurbi nyɔ nna m pere kpeŋ fanɛ kechɛbi peper na;

fo kɔnɔ be kapɔr walɛ.

Fo ŋgbuŋ du kulkulbi nna a walɛ nsaa nyɛkpɛ fo shata to.

⁴Fo kubɔ du nna shirembi fanɛ ketempreŋ jeŋgreŋ nɛ ewura Deevid pɔr na.

Kumo so nɛ b daa ta benapo be abɛlso be asɔkuŋso ŋgboŋto ŋgboŋto a shiga na.

⁵Fo anyipo yil nna jɔŋjurɔmbi

fanɛ echibir anyɔ ka lar kepla so a ji na.

⁶Meeŋ nya manaŋ n yɔ

abee nɛ apreŋ nɛ a kɔ etulale nɛ asɔ dufɛso be efɛa na so

pɔɛŋ nɛ kaboŋ e bugi to nɛ kare e chɛ.

⁷Fo baa walɛ kebita nna nɛnɛ;

Ŋ jipo, fo kebita maŋ kɔ emɔrɔ kikɛ.

⁸Ma kejafɔ, shin nɛ an lar Lebanɔn.

An lar Lebanɔn be abeegboŋ

nɛ baa tre Amana,

nɛ Senir nɛ Hɛɛmɔn na to,

Amo be alaŋ to nɛ ebuluŋ nɛ ebuful bee di na.

⁹Esipoche, ma kagbene pɛ fo ga;

ma kagbene pɛ fo kashenteŋto nna.

Ma nɛ fo be anishi ka baŋ wora abar anyɔ

nɛ n wu kananɛ fo kubɔtoshembi bee nyɛkpɛ na

nɛ ma kagbene laŋɛ fo so.

¹⁰N jipo nɛ ma kejafɔ, fo kasha bee bɔlɔ ma kenishi ga.

Fo kasha bɔ nsa,

nɛ fo etulale be efɛa chɔ asɔ dufɛso kama.

¹¹Ma kejafɔ, fo kɔnɔ be kepipe wɔ ebel nna fanɛ mushoŋ.

Nɛ fo kudonduloŋ bee wora ma ebel,

fanɛ mushoŋ nɛ kenyipochu na.

Fo asɔbuuso to be efɛa wɔ ebel nna

fanɛ Lebanɔn be ndibi nɛ baa tre sida na be efɛa.

¹²N sipoche nɛ ŋ jipo,

fo du fanɛ kudɔbi nɛ b pɔr egbal ŋ kulti nna

ŋko kebuye nɛ b ti so n yili n na.

¹³Ndoŋ nɛ asɔduuso bee wora nɛnɛ

nsaa sɔr asɔrso jiso lela nɛ baa tre pomegranates na,

nɛ asɔrso dufɛso lela nɛ baa tre naad nɛ hena na;

¹⁴nɛ amo nɛ baa tre safrɔn nɛ kalamus nɛ sinamɔn na,

nɛ ndibi nɛ baa ta a wora duwu be yiri yiri

fanɛ mir nɛ alowe nɛ asɔ nɛ a kɔ efɛa belbelso

be yiri kikɛ na.

¹⁵Fo du fanɛ kebuye nna ashi kudɔbi to,

kakpa nɛ nchu lela bee bul na;

ŋko kabombi nɛ k shi Lebanɔn be kebeegboŋ na so

m ba shin nɛ kakpa wushi na nna.

Eche na be kashɛ

¹⁶Shin nɛ afu e ta ma kudɔbi na to be efɛa

n ya ber ŋ jipo,

nɛ n jipo e ba luri kumo to

n daŋ kumo be asɔrso lela na ŋ keni.

Kashɛ Nasopo

Enyɛn na be kashɛ

¹M ba ma kudɔbi to,

ŋ jipo, nɛ ma kejafɔ.

N chala ma etulale nɛ asɔ dufɛso

Ŋ ji ma mushoŋkɔrfɔ nɛ mushoŋchu;

nseŋ nuu ma nsa belbelso nɛ kenyipochu.

Eche na be kashɛ

Ji nseŋ nu kanaŋkama so nɛ fee sha;

shin nɛ kasha e boo fo.

Eche na be kashɛ

²Mee di nɛ ma kagbene maa di.

Ŋ ku edare fanɛ n jipo ka ba ŋmɛa ma kukuloŋ.

Enyɛn na be kashɛ

N jipo nɛ ma eshapo, nɛ fo du fanɛ lepɔ,

bugi ma nɛ n luri;

ŋkpal manɛ so bunyaŋ tɔr ma so nna;

nɛ ma kumu nɛ ma emin kikɛ pɔ.

Eche na be kashɛ

³Ma ere teŋ wora shiriya nɛ n dese nna,

manɛ nna nɛ n naa ta ma asɔ a buu?

N tiŋ n fɔr ma aya nna,

n naaŋ shin nɛ a wora eyurpi a?

⁴Ndoŋ nna nɛ n jipo ba pɛ kukuloŋ na to nɛ e bugi,

nɛ ma kagbene fara a ku.

⁵Nɛ ŋ koso nɛ n bugi kukuloŋ na n sa mo,

nɛ etulale bee chise ma enɔ nɛ ashilbi so

a do kukuloŋ na be kelagatobi so.

⁶Ŋ ka bugi kukuloŋ na nɛ n jipo maŋ naa wɔtɔ;

e tiŋ n yɔ,

nɛ k tɔrɔ ma ga.

Nɛ ŋ keni a fin mo, ama m maŋ wu mo.

Nɛ n tre mo ama m maŋ nu mbe ebɔl.

⁷Nɛ basa nɛ baa keni kade na so na

bee kulti m ba tu ma

m bri ma,

n doro ma nseŋ suge ma kusɔbuuso.

⁸Jerusalɛm be beche,

meeŋ kaŋ wu n jipo,

manɛ nɛ menyeeŋ kaŋɛ mo?

Men kaŋɛ mo fanɛ kasha shin nɛ mee lɔ.

Eche na be kashɛ

⁹Beche to be kebita, nuso bre nɛ fo jipo na baa du ga?

E walɛ nna a chɔ ekama a;

Nɛ fo kpal mo so a bishi anyi ade kikɛ a?

Eche na be kashɛ

¹⁰N jipo walɛ keyɛrbi nna, nsaa kɔ eleŋ nɛnɛ.

E wɔ basa ŋgboŋ kudu gba to feeŋ wu mo.

¹¹Mbe kumu du nna fanɛ shuwa,

nɛ mbe emin du mɔlɔ mɔlɔ

nseŋ biri gbiti gbiti fanɛ mɔmɔ na.

¹²Mbe anishi du nna fanɛ elepɔ

ka ya biri kepa nɛ kumo be nchu ki fanɛ kenyipochu

nɛ b lar m ba kaa jɔŋ na.

¹³Mbe ŋgbuŋ walɛ nna fanɛ kudɔbi

nɛ k kɔ afantaŋ nɛ asɔrso nɛ amo be efɛa wɔ ebel.

Nɛ mbe kɔnɔpurbi du fanɛ atoto nɛ baa tre lili

nɛ a bee dufɛ viim na.

¹⁴Mbe mbre pɔl nɛnɛ nna fanɛ eshuwadibi na,

nɛ e wɔtɔ enɔ to be mpinibi lela.

Mbe eyur walɛ nna fanɛ

b ka lɔŋɛ jebote be kinyi so

nɛ k bee nyɛkpɛ

nɛ b ta abitasɔ nɛ baa tre safai na

n ji kumo kebita na.

¹⁵Mbe aya kɔ eleŋ nna fanɛ

b ka ta ajembu kpakpaso m pɔr n yili shuwa so na;

e yil jirembi nna

fanɛ ndibi nɛ baa tre sida na

ka yil Lebanɔn be abee so na.

¹⁶Mbe kɔnɔ be kepipe wɔ ebel nna,

nɛ mbe kusɔ kama malɛ bee par ma.

To, Jerusalɛm be beche, kananɛ n jipo nɛ ma eshapo na du nna na.

Eche na be kashɛ

¹Beche to be kabita nnɛ fo jipo na yɔ?

Kaba mo so nɛ fo jipo na bɔla, nɛ an chɛ fo to n fin mo?

Eche na be kashɛ

²N jipo yɔ mbe kudɔbi

nɛ kumo to be ndibi

be afantaŋ kɔ efɛa belbelso na to nna.

E ya kaa sa mbe mbolpɔ ajibi nna,

nsaa chala mbe atoto nɛ baa tre lili na.

³N la n jipo peya nna nɛ n jipo malɛ gba la meya.

E bee sa mbe mbolpɔ ajibi ashi atoto

nɛ baa tre lili na be kudɔbi na to nna.

Kashɛ Nusopo

Enyɛn na be kashɛ

⁴N jipo, fo walɛ kebita nna fanɛ ndegboŋ nɛ baa tre Tiiza,

nɛ Jerusalɛm na.

Fo alɛ bee tia aya nna fanɛ esoji ka keta etuuta

m bɛ abar so a nite na nna.

⁵Kpele fo anishi ashi ma so,

ŋkpal manɛ so, a bee shin nna nɛ mee chena a gben.

Fo emin bee gbuŋgbuŋ to nna

fanɛ mboe ka shi Giliad be kebee so

a gbelge to a ba kaseto na.

⁶Fo anyii fuli nna parr

fanɛ mbolpɔ nɛ b bɛr nɛnɛ.

Fo anyii bɛ abar so nna yɛɛr.

K kama maŋ gbaŋ n tɔr.

⁷Fo ŋgbuŋ du kulkulbi nna,

a walɛ nsaa nyɛkpɛ fo shata to.

⁸Hale nɛ n nya bewurche adeshe nɛ bejipo aduburwa

nɛ besuŋgurbi nɛ esa maaŋ tiŋ ŋ karga gba,

⁹fo nawule nɛ meeŋ lara.

Fo e walɛ fanɛ lepɔ,

nsaa la fo nio pibiche koŋwule.

Fo nɛ bechefɔlbi nɛ bewurche

nɛ bekama bee kpaŋ,

a boŋ nshɛ a fur fo.

¹⁰Wanɛ e ya kaa ba fanɛ karechɛso loŋ;

a walɛ kebita nsaa nyɛkpɛ so fanɛ epeŋi

ŋko kufɔl ka fara a lar?

Wanɛ e naa tia aya fanɛ achɛkpabi damta

ka lar awɔlto m bɛ abar so loŋ?

¹¹N daŋ n yɔ ndibisɔrso be kudɔbi to nna

nɛ n ya keni fanɛ afeelebi

nɛ a bee sɔr asɔrso

nɛ baa tre greeps na,

nɛ amo nɛ baa tre pomegranates na,

teŋ fara a wora atoto a?

Eche na be kashɛ

¹²Ama n tia kaa pin

nɛ ma nfɛra yɛr ma n jipo be kasha so

fanɛ gbaŋɛturko be ediipo

ka bee yɔ kena to na.

Eche na be kashɛ

¹³Bɛta m ba, bɛta m ba!

Shulaim be kanaŋ to be kebichebi,

bɛta m ba cha ŋ ŋini anyi.

Eche na be kashɛ

Manɛ nna nɛ menyee sha fanɛ men wu ma kacha

basa damta ere to?

Enyɛn na be kashɛ

¹Fo la ewurbi pibi nna,

nɛ asɛbta bee nyalɛ fo aya to ga.

Fo abembi walɛ nna

nseŋ ku nchule fanɛ kubɔtoshembi na.

²Fo kejapulo du kulkulbi nna

fanɛ kawulunchu nɛ nsa maa paŋ kumo to kikɛ na.

Nɛ fo eyur walɛ nsaa du shirembi

fanɛ ketɛmbɔ nɛ b lɔŋɛ so ŋ kreto n yili

nɛ atoto nɛ baa tre lili na kulti kumo.

³Fo anyipo yil nna jɔŋjurɔmbi

fanɛ echibir anyɔ ka lar kepla so a ji na.

⁴Fo kubɔ du shirembi nna

fanɛ jebote be kenyii be

ketempreŋ jeŋgreŋ na.

Fo anishi bee kpa edɛ nna

fanɛ Heshbɔn be kade to be nchu

nɛ a dese m mata Baf Rabbin be kabunagboŋ na.

Nɛ fo kamuna lar jurɔmbi fanɛ Lebanɔn be kebeegboŋ

nɛ k shoŋi Damaskɔs be kaba so na.

⁵Fo kumu wɔ esoso nna

fanɛ kebeegboŋ nɛ baa tre kamɛl na.

Nɛ fo emin walɛ nsaa nyɛkpɛ so

nɛ bewura gba maa keni amo a moɛ.

⁶Fo lar kebita ga;

fo kebita maŋ kɔ emɔrɔ.

⁷Fo wɔ nteŋ nna

a du sherembi fanɛ kebii be kedibi na;

nɛ fo anyipo cha abar fanɛ asɔrso ka cha abar na.

⁸Meeŋ dii kebii be kedibi na

n chuge kumo be asɔrso.

Fo anyipo du nna fanɛ asɔrso nɛ baa tre greeps na n sa ma.

Nɛ fo efute du viim n sa ma fanɛ asɔrso nɛ baa tre apɔl na.

⁹Kepipe fo kɔnɔ bee wora ma ebel

a chɔ nsa belbelso nɛ baa tre wain na.

Eche na be kashɛ

Amo be kenuu e wɔ ebel ga na.

¹⁰N la ma eshapo peya nna,

nɛ e bee sha ma ga.

¹¹N jipo, ba nɛ an yɔ edekarso,

n ya di ndoŋ ŋklade.

¹²Shin nɛ an wule ŋ koso

n ya keni, afeelebi nɛ a bee sɔr greeps na fara a futi a?

Ŋko asɔrso nɛ baa tre pomegranates na

bee wora atoto a?

An kaŋ yɔ ndoŋ na

nɛ meeŋ ŋini fo ma kasha.

¹³Atoto be efɛa sɔ ndoŋ be kaplɛkama nna.

N jipo lela, asɔrso lela dra nɛ a popɔr kikɛ

nɛ n fin n yili fo.

¹Fo daa la n siponyɛn

nɛ ma nɛ fo nyipo kenyipo koŋwule nna;

n daa beeŋ tiŋ m pipe fo kɔnɔ kasha so kaplɛkama;

nɛ esa kikɛ maaŋ tiŋ m bugi kɔnɔ.

²Meeŋ keta fo m ba n nio nɛ e bela ma na be laŋ to;

m ba sa fo ŋ gbagba be nsa belbelso

nɛ a shi asɔrso nɛ baa tre pomegranates na to.

³Fo enɔ bena suse ma kumu to nna

nɛ fo enɔjiso malɛ bee lala ma so kasha so.

⁴Jerusalɛm be beche

men nase kɔnɔ n sa ma

fanɛ men maaŋ chuchɔl kasha

nɛ kumo be saŋɛ maŋ naŋ fo.

Kashɛ Shesopo

Eche na be kashɛ

⁵Wanɛ nɛ mo jipo

e pɛ abar be enɔ to

n shi keshishɛrsawule so

a ba ere?

Eche na be kashɛ

Ndibi nɛ baa tre apɔl na be kifi to

nɛ n chɔlta fo;

ndoŋ nɛ fo nio di fo kedampo

ŋ kurge fo na.

⁶Sa maŋ naŋ sha esa kikɛ n ti ma so.

Baa sha ma nawule

Kasha kɔ eleŋ nna fanɛ luwu.

Kasha beeŋ tiŋ m mɔ esa.

Kasha bee suse nna fanɛ edɛ

⁷Nchu maaŋ tiŋ n duŋ kasha be edɛ,

Ŋko n fɔr kumo n lɛ.

Fo maaŋ tiŋ n ta amansherbi n tɔ kasha.

Eche na mo siponyɛnana

⁸An kɔ an sipochebi ko nɛ e maŋ naŋ daŋ.

Nɛ enyɛn ba kaa sha mo,

nuso nɛ anyeeŋ wora?

⁹Nɛ e daa la egbal nna

an daa beeŋ wora gbiti be kusɔ kuŋso

ŋ kuŋ mo.

Nɛ e daa la kabuna nna

an daa beeŋ wora sida be kedibi be kukuloŋ

n ti mo so.

Eche na be kashɛ

¹⁰N la egbal nna

nɛ ma anyipo du fanɛ kumo be ketempreŋ jeŋgreŋ

nɛ n jipo bee keni ma

nɛ mbe kagbene bee fuli mo.

Enyɛn na be kashɛ

¹¹Ewura Sɔlɔmɔn kɔ asɔrso nɛ baa tre greep na

be kudɔbi nna ashi Baal Hamɔn,

E daa kɔ kudɔ na nna a haya a sa basa

a sɔ gbiti be ndarbi kagboŋ ekama kutɔ.

¹²Ewura Sɔlɔmɔn beeŋ tiŋ a kɔ mbe gbiti be ndarbi,

nɛ basa na malɛ e baa kɔ bumo be tɔnɔ.

Ama ma ere be asɔrso

nɛ baa tre greep be kudɔbi na

la n nawule peya nna Eshaponyɛnso na

¹³Fo nɛ fo teriana wɔ kudɔbi to nna a ber bare,

shin nɛ ma alɛ gba e nu fo ebɔl.

Eche na be kashɛ

¹⁴N jipo lela

shile manaŋ fanɛ chibir

ka shi kebeegboŋ

nɛ ndibi nɛ amo be efɛa wɔ ebel yil so na,

m ba ma kutɔ.