RUF

RUF

BE KAWƆL

Nawomi nɛ Ruf be asheŋ

¹Jemanɛ nɛ demujipoana kraa juŋkpar Israɛl be efuli so ebi na be saŋko nɛ akoŋ tɔr efuli na so. Ndoŋ nna nɛ kanyɛn ko nɛ e shi Juda be kasawule so be kade nɛ baa tre Bɛtlɛhɛm na keta mbe eche nɛ mbinyɛnso anyɔ ŋ kaa n yɔ Mowab be efuli so nɛ b ya chena ndoŋ n wora nchɛnnyɔ. ²Kanyɛn na be ketre e daa la Elimelɛk nɛ mbe eche malɛ daa la Nawomi. Bumo be mbinyɛnbi anyɔ na malɛ be eko be ketre daa la Maalon nɛ enyɔsopo malɛ daa la Chilion. B daŋ shi Efrat be kanaŋ to nna ashi Bɛtlɛhɛm nɛ k wɔ Juda be efuli so na, n yɔ Mowab n ya kaa wɔtɔ.

³B wɔtɔ loŋ, nɛ Nawomi mo kul Elimelɛk ba wu ŋ ka mo nɛ mbe mbinyɛnso anyɔ na. ⁴Ndoŋ nna nɛ mbia anyɔ na ba ta n ta Mowab be efuli so be beche. Beche na be eko be ketre e daa la Orpa nɛ eko malɛ daa la Ruf. B wɔ ndoŋ loŋ m ba fo fanɛ nfɛ kudu. ⁵Kumo be kaman nɛ Maalon nɛ Chilion kikɛ ba wu ŋ ka Nawomi. Nawomi daa maŋ naa kɔ ekul, mo alɛ maŋ naa kɔ mbia.

⁶E wɔ Mowab nna nseŋ nu fanɛ Enyɛnpe Ebɔrɛ na wora mo ere Enyɛnpe Ebɔrɛ na be basa kechɛto n sa bumo ajibi. Nawomi ka nu loŋ na nɛ mo nɛ mo shacheana na bela ase nɛ b kaa Mowab m bɛta n yɔ Nawomi be efuli so. ⁷Kachako nɛ Nawomi nɛ mo shacheana na lar kakpa nɛ e daa wɔ na m pɛ ekpa m bɛta a yɔ Juda be efuli so.

⁸B ka bee yɔ nɛ Nawomi kaŋɛ bumo le: “Men bɛta a yɔ men nioana kutɔ. Enyɛnpe Ebɔrɛ na e ya kaa wora menyi kelela fanɛ kananɛ men wora ma nɛ menyi kulana kelela saŋɛ nɛ b daa wɔ ŋkpa to na.” ⁹Enyɛnpe Ebɔrɛ na e ya sa menyi be ekama echenakpa ashi mo kul popɔr pe. ¹⁰Kumo be kaman nɛ e pɛ m pɛ bumo to kashaso ŋ kela bumo nɛ bumo kikɛ shu n shu awɔrso ga nɛ mo shacheana na kaŋɛ Nawomi le: “Anyeeŋ bɛ fo so n yɔ fo basa kutɔ.”

¹¹Ndoŋ nna nɛ Nawomi leŋ bumo to ŋ kaŋɛ: “Ma mbia, men bɛta a yɔ menyi peana, ŋkpal manɛ so, m maaŋ naŋ nya bibinyɛn nɛ baaŋ ba ki men kulana, nɛ manɛ so nɛ k naŋ daga fanɛ men bɛ ma so n yɔ? ¹²Ma mbia, men bɛta a yɔ epe, ŋkpal manɛ so, naniere m bel ga nɛ ma kenaŋtiŋ n nya ekul. Hale nɛ tama kraa wɔtɔ n sa ma gba ŋko nɛ n nya ekul kanyɛ ere ŋ kurge mbinyɛnsobi gba, ¹³menyeeŋ tiŋ jo bumo hale nɛ b ba daŋ ŋ ki men kulana a? Menyeeŋ kini kekil nseŋ chena n jo bumo a? Ayai, ma mbia, loŋ maaŋ tiŋ n wora. Men be asheŋ kɔ ma kebɔltofinfin damta ga ŋkpal kananɛ Enyɛnpe Ebɔrɛ na be agbo ba anyi so na so.” Ama mbe agbo ba ma so a chɔ menyi.

¹⁴Nawomi ka kaŋɛ loŋ na nɛ mo nɛ mo shacheana na kikɛ naŋ shu. Kumo be kaman nɛ Orpa pɛ mo shache Nawomi to kashaso nseŋ kela mo, ama Ruf bre daŋ far nna n chɛ Nawomi.

¹⁵Ndoŋ nna nɛ Nawomi kaŋɛ Ruf le: “Keni, fo chamana e bɛta a yɔ mbe basa kutɔ nɛ mbe kade to be ademaŋ to na, fo alɛ gba e bɛta nɛ fo nɛ mo kikɛ e baa yɔ.”

¹⁶Nɛ Ruf kaŋɛ mo: “Sa maa kaŋɛ ma fanɛ n yige fo m bɛta a yɔ epe. Kaplɛkama nɛ fee yɔ, ndoŋ nɛ meeŋ yɔ. Kakpa nɛ feeŋ ya kaa wɔ, ndoŋ nɛ meeŋ baa wɔ. Fo basa beeŋ baa la ma basa nɛ fo Ebɔrɛ e baa la ma Ebɔrɛ.

¹⁷Kakpa nɛ feeŋ wu, ndoŋ nɛ meeŋ wu nɛ b puli ma ndoŋ. Nɛ mannɛ luwu e naaŋ barga ma nɛ fo to so, kusɔ kama nɛ n naaŋ kpal kumo so n shin nɛ ma nɛ fo barga abar, Enyɛnpe Ebɔrɛ na e bishi ma kɔnɔ ŋkpal loŋ so.” ¹⁸Nawomi ka wu fanɛ Ruf baŋ yili kumo mbe kagbene to nna fanɛ e beeŋ tu mo n yɔ na nɛ e yige kebaakaŋɛ mo fanɛ e bɛta a yɔ epe.

¹⁹Ndoŋ nna nɛ bumo beche anyɔ na ta loŋ m ba fo Bɛtlɛhɛm. B ka fo ndoŋ nɛ kade na kikɛ baga to ŋkpal bumo so nɛ kade na to be beche kooba nseŋ bishi abar le: “Ama Nawomi nde a?” ²⁰Ndoŋ nna nɛ Nawomi kaŋɛ bumo le: “Men sa maŋ naa tre ma Nawomi, men baa tre ma Mara, ŋkpal manɛ so, Enyɛnpe Ebɔrɛ Elempo na shin nna nɛ kebaawɔtɔ ki nyaŋnyaŋ n sa ma. ²¹N daŋ lar nfe nɛnɛ nna n yɔ ama Enyɛnpe Ebɔrɛ na naŋ bɛta ma m ba nɛ enɔfuloŋ. Amoso, manɛ so nɛ men kraa tre ma Nawomi nɛ kumo be kifito la ebel? Ŋkpal manɛ so, Enyɛnpe Ebɔrɛ na shin nɛ tɔrɔ ba ma so. Mo Enyɛnpe Ebɔrɛ Elempo koŋwule na e bar ma kumu lubi.”

²²To, kananɛ Nawomi nɛ mo shache Ruf nɛ e daa la Mowabche na daŋ shi Mowab be efuli so m ba Bɛtlɛhɛm nna na. B daŋ ba fo Bɛtlɛhɛm jemanɛ nɛ baa fara a buri akoŋboyu na nna.

Ruf nɛ Bowas ka tu abar be asheŋ

¹Nawomi mo kul be esa ko nɛ mo alɛ gba nɛ Elimelɛk kikɛ daŋ shi kanaŋ koŋwule to nɛ baa tre mo Bowas nɛ e daa la damawura nsaa kɔ ketre lela basa to na, daa wɔ Bɛtlɛhɛm nna. ²Kachako nɛ Ruf nɛ e shi Mowab na kaŋɛ Nawomi le: “Shin nɛ n yɔ basa be ndɔana to n ya keni, esa ko beeŋ wu ma kuwɔr n shin nɛ m bɛ mo so n shishi n shishi ajibi m ba a!” Nɛ Nawomi shuli so ŋ kaŋɛ mo: “To, m pibi, baa yɔ.” ³Ndoŋ nna nɛ Ruf lar n yɔ kudɔ ko to n ya bɛ kudɔ na to be beshumpo so a shishi. Kajaa Bowas nɛ e daŋ shi Elimelɛk be kanaŋ to na e la loŋ be kudɔ na wura.

⁴B wɔ ndɔ na to nna nɛ Bowas ya shir kaman n shi Bɛtlɛhɛm be kade to m ba chɔrɔ bumo ŋ kaŋɛ: “Ansaŋ ansaŋ nɛ kushuŋ!” Nɛ bumo alɛ shuli awɔrso ŋ kaŋɛ: “Awo enimu.”

⁵Kumo be kaman nɛ Bowas bishi mbe beshumpo na be enimu le: “Nɛ kasuŋgurbia mo malɛ nde?”

⁶Ndoŋ nna nɛ beshumpo be enimu na kaŋɛ Bowas le: “Mowabche nɛ e tu Nawomi n shi Mowab be efuli so m ba na nna. ⁷E ba nna m ba kule ma fanɛ n shin nɛ e bɛ beshumpo ere so a shishi a shishi. Mo alɛ ka baŋ murgi nfe chipur na kikɛ a shuŋ, kela koŋwule nɛ e baŋ yɔ kubuu to n ya wushi gbrɛ nseŋ naŋ lar.”

⁸Ndoŋ nna nɛ Bowas kaŋɛ Ruf le: “M pibi nu nfe. Sa maŋ naŋ yɔ kudɔ kama to n ya shishi, fo alɛ e sa maŋ kaŋ naŋ lar nfe. Baa wɔ nfe n tu ma mbita ere a shuŋ fo kushuŋ. ⁹Baa dara kudɔ ere to be mboŋ nɛ benyɛn na bee teŋi a teŋi nsaa bɛ mbita na so a shishi. Ŋ kaŋɛ ma beshumpo na fanɛ b baa da fo so n sa maŋ kaŋ tɔrɔ fo. Saŋkama malɛ nɛ achukoŋ pɛ fo, fo yɔ mpuya nɛ benyɛn na jɔ nchu m bɔlɔ m bɔlɔ n yili na to n ya nuu.”

¹⁰Bowas ka kaŋɛ loŋ na nɛ Ruf gbir bunyanso ŋ kaŋɛ le: “Manɛ nɛ fo wu ma alɛ efɔ so nsaa wu ma le be kuwɔr?”

¹¹Ndoŋ nna nɛ Bowas kaŋɛ mo le: “B kaŋɛ ma asɔ kama nyam nɛ fo wora n sa fo shache fɔnfɔŋ, yili jemanɛ nɛ fo kul wu kikɛ m ba fo mbre. B kaŋɛ ma kananɛ fo yige fo tuto nɛ fo nio nɛ fo efuli so nseŋ ba kaa wɔ basa nɛ fo maŋ nyi kutɔ nfe na kikɛ be asheŋ. ¹²Enyɛnpe Ebɔrɛ na beeŋ nɛfa fo ŋkpal asɔ nɛ fo wora na kikɛ so. Enyɛnpe Israɛl be Ebɔrɛ nɛ fo ta fo kumu m ba kaa bɔɔ enɔ fanɛ e keni so ere, e nɛfa fo ga.”

¹³Ndoŋ nna nɛ Ruf kaŋɛ Bowas: “N nyɛnpe, Ebɔrɛ e shin nɛ ma asheŋ e baa kraa bɔlɔ fo kenishi saŋkikɛ. M maŋ fo mbitaana ere be ekama be eyilikpa so, ama fo malga ma kutɔ nɛnɛ nseŋ wushi ma, fo kenya, be kagbene.”

¹⁴Keji be saŋɛ ka fo nɛ Bowas kaŋɛ Ruf le: “Ba nfe m ba sɔ ajibi nɛ epo n ya ji.”

Ruf ka ya tu kasɔteŋiwuraana na n chena na nɛ Bowas sa mo aboyu tɔso nɛ e we kananɛ e bee sha nɛ ako ka. ¹⁵Ruf ka naŋ koso nɛ e ya shishi nɛ Bowas kaŋɛ mbe beshumpo na le: “Hale nɛ e ya kaa shishi kakpa nɛ men teŋi asɔ ŋ kre ŋ kre n nase na gba men sa maŋ ju mo. ¹⁶Men ba muu nsaa yige amo nɛ men teŋi ŋ kre ŋ kre n nase na to be ako gba a nase mo nɛ e ba kaa shishi. Men sa maŋ kaa ŋmenyaŋ mo.”

¹⁷To, Ruf daŋ shishi asɔ na kudɔ na to loŋ hale nɛ epeŋi ya kaa tɔr nɛ e bri amo n nya fanɛ agbaŋkaŋ be bɔlɔ. ¹⁸E ka bri amo n chela n loge nɛ e sulɔ amo n yɔ epe n ya ŋini mo shache kusɔ nɛ e nya. Kumo be kaman nɛ e naŋ ta ajibi nɛ e ji ŋ ka na gba n sa mo shache na.

¹⁹Ndoŋ nna nɛ mo shache Nawomi bishi mo: “Nnɛ nɛ fo yɔ kabre n ya shishi? Nnɛ nɛ fo ya shuŋ? Ebɔrɛ e nɛfa enyɛn kama nɛ e shu fo so le ere!” Nɛ Ruf kaŋɛ mo shache Nawomi esa nɛ e ya shuŋ mbe ndɔ to na be asheŋ. E yɛ: “Kanyɛn nɛ n yɔ mbe ndɔ to na be ketre e la Bowas.” ²⁰Ndoŋ nna nɛ Nawomi kaŋɛ Ruf le: “Enyɛnpe Ebɔrɛ nɛ mbe kelela shi n sa bumo nɛ b wu nɛ bumo nɛ b wɔ ŋkpa to kikɛ na e nɛfa mo.” E ka malga loŋ n loge nɛ e kaŋɛ Ruf le: “Loŋ be kanyɛn na la an kurgepo gbagba nna. E la ekurgepo mo nɛ k daga fanɛ e keni anyi so nna.”

²¹Nɛ Ruf nɛ e shi Mowab be efuli so na naŋ kaŋɛ Nawomi le: “E kaŋɛ ma alɛ gba nna fanɛ m baa wɔ mbe beshumpo kutɔ a shishi hale nɛ b ya teŋi mbe asɔ kikɛ n loge.”

²²Ndoŋ nna nɛ Nawomi kaŋɛ mo shache Ruf: “Loŋ walɛ m pibi, fee tu Bowas be beshumpo a yɔ bɔ, ŋkpal manɛ so, fo yɔ esa ko be ndɔ to, baaŋ tiŋ n ya tɔrɔ fo ndoŋ.”

²³Amoso Ruf daŋ ta mbe kumu nna m mata Bowas be mbita na a shishi a shishi loŋ hale nɛ kasɔteŋi na kikɛ nyam ya loge pɔp. Le be jemanɛ ere kikɛ nɛ Ruf nɛ mo shache Nawomi e wɔtɔ.

Nawomi ka chɛ Ruf to be asheŋ

¹Kachako nɛ Ruf mo shache Nawomi kaŋɛ mo le: “M pibi, a maŋ daga fanɛ n fin echenakpa lela n sa fo a? Kakpa nɛ feeŋ nya fo gbagba be laŋ nɛ fo kul e baa keni fo so nɛnɛ a? ²To, baa nyiŋi fanɛ Bowas nɛ fee tu mbe mbita n ya kaa shishi na la anyi be esa nna. Amoso, nu nfe, kanyɛ ere e beeŋ ba wɔ kakpa nɛ baaŋ bri mbe asɔ nɛ e teŋi na, ³loŋ so wora manaŋ m bɛr nseŋ ta fo asɔbuuso nɛ a walɛ ga na m buu, nseŋ gbiti tulale dufɛso n yɔ kakpa nɛ baa bri asɔ na. Fo kaŋ yɔ ndoŋ, fo sa maŋ shin nɛ e pin fo asheŋ ama e ji nna n loge pɔɛŋ. ⁴E kaŋ ji n loge na nɛ fo dara kakpa nɛ e beeŋ dese. E kaŋ ya dese a di na nɛ fo ya maŋ mbe aya ase be kusɔbuuso so m buu n dese m mata mo. Nɛ fo wora loŋ e beeŋ kaŋɛ fo kusɔ nɛ k daga fanɛ fo naŋ wora.” ⁵Ndoŋ nna nɛ Ruf kaŋɛ Nawomi fanɛ kusɔ kama nɛ e kaŋɛ mo, e beeŋ wora kumo. ⁶Kumo be kaman nɛ e yɔ kakpa nɛ baa bri asɔ na n ya wora kusɔ nɛ mo shache ŋini mo na kikɛ nyam. ⁷Bowas ka ji nseŋ nuu n loge nɛ kagbene fuli mo nɛ e yɔ asɔ nɛ b bri na ase n ya dese. Ndoŋ nna nɛ Ruf wora boeŋ boeŋ n ya mige Bowas be aya ase be kusɔbuuso na m buu n dese m mata mo. ⁸B dese loŋ n ya fo kiidiso saŋko nɛ Bowas yeŋi n tiŋi ŋ kilgi ŋ keni nɛ eche ko e dese mbe aya ase. ⁹Nɛ Bowas bishi mo: “Wanɛ nde?” Nɛ Ruf kaŋɛ: “Ma, fo kenyache Ruf nna. Shin nɛ n luri fo kayul to, ŋkpal manɛ so, fo la ekurgepo mo nɛ e daga kekeni ma so nna.” ¹⁰Ndoŋ nna nɛ Bowas kaŋɛ mo le: “M pibi, Enyɛnpe Ebɔrɛ na e nɛfa fo. Kelela nɛ fo wora n sa ma ere shi ga a chɔ kumo nɛ fo teŋ wora n sa fo shache na. Mbrantiɛbia nɛ damawuraana wɔtɔ, ama fo maŋ ya kaa bɛ bumo so. ¹¹Amoso, m pibi, sa maa lɔ kufu, ŋkpal manɛ so, kade ere to ebi kikɛ nyi fo ka la eche nɛ fo kɔ da lela, amoso meeŋ wora asɔ nɛ fo kule ere kikɛ n sa fo. ¹²Kashenteŋ malɛ nna fanɛ n la fo kulana bumo kurgepo nna nɛ k daga fanɛ ŋ keni fo so, ama esa ko kraa wɔtɔ a la ma so enimu. ¹³Dese nfe nɛ kare e chɛ nɛ an keni, e beeŋ baa sha kesɔ fo a keni so a? E kaŋ shuli n sɔ fo, kumo ere, k walɛ, ama nɛ e kaŋ kini bre, mee nase kɔnɔ Ebɔrɛ nɛ e wɔ ŋkpa to ere be anishito nna fanɛ ma ere beeŋ sɔ fo a keni so. Amoso, dese nfe nɛ kare e chɛ.” ¹⁴Bowas ka kaŋɛ loŋ na nɛ Ruf dese mbe aya ase ndoŋ nɛ kaboŋ ya kaa fuli to nɛ e koso n yɔ pɔɛŋ nɛ kare chɛ nɛnɛ, saŋɛ na so esa kikɛ maaŋ wu mo, ŋkpal manɛ so, Bowas daa maa sha esa kama ka pin fanɛ eche ko ba ndoŋ. ¹⁵Ama pɔɛŋ nɛ Ruf lar Bowas kutɔ, le nɛ e daŋ kaŋɛ mo: “Deŋi fo shata ere m ba parga to n nase.” Nɛ Ruf wora loŋ, nɛ Bowas duga ayu fanɛ kudukudu be bɔlɔ n wɔtɔ Ruf be shata na to nseŋ chɛ mo to m maŋ amo so n sulɔ mo nɛ e ta n yɔ epe. ¹⁶Ruf ka fo epe nɛ mo shache Nawomi bishi mo le: “M pibi, nuso nɛ asheŋ ya kaa du n sa fo?” Ndoŋ nna nɛ Ruf ta kusɔ kama nɛ Bowas wora n sa mo kikɛ ŋ kaŋɛ Nawomi. ¹⁷Kumo be kaman nɛ e naŋ kaŋɛ Nawomi le: “Mo e sa ma ayu ere gba, nseŋ kaŋɛ fanɛ: ‘A maŋ daga ŋ ka ta enɔfuloŋ m bɛta n yɔ n shache kutɔ.’ ” ¹⁸Ndoŋ nna nɛ Nawomi kaŋɛ: “Jo ŋ keni kusɔ nɛ k beeŋ wora, ŋkpal manɛ so, Bowas be kagbene maaŋ dese mo kabre kikɛ ama e baŋ wu kesheŋ ere be edesekpa nna.”

Bowas ka ta Ruf ŋ ki mbe eche be asheŋ

¹Bowas nɛ Ruf ka barga abar kamɔnchɛ na be kaman nɛ Bowas ya chena agaŋgeeya ŋko kejaŋ nɛ k wɔ egbal nɛ b pɔr ŋ kulti kade na be kakpa nɛ baa kaa shɛr a ji deamu na so. Ndoŋ nɛ e wɔ loŋ nɛ Elimelɛk mo kurgepo mo nɛ Bowas daŋ kaŋɛ fanɛ mo e daga nɛ e ta Ruf ŋ keni so na ba kaa choŋ nɛ e tre mo ŋ kaŋɛ: “N teri, ba nɛ a ber kelejima.” Nɛ kanyɛn na ya chena mo kutɔ. ²Ndoŋ nɛ Bowas kule kade na to be benimu kudu ko nɛ b daa tase kejaŋ na so na fanɛ bumo alɛ gba e nu kesheŋ na. ³Kumo be kaman nɛ e kaŋɛ ekurgepo na le: “Nawomi nɛ e daŋ ya kaa wɔ Mowab be efuli so nseŋ bɛta m ba na bee sha kefa an kurgepo Elimelɛk be kasawule na nna. Amoso nɛ n ta kesheŋ na a ba fo anishito fanɛ fo shuli fanɛ feeŋ tɔ kumo ⁴basa nɛ b chena nfe ere kikɛ be anishito, ŋkpal manɛ so, fo e daga fo ka juŋkpar n nya loŋ be ekpa na pɔɛŋ nɛ ma alɛ e bɛ so. Ama nɛ fo maa sha ketɔ kumo bre, fo kaŋɛ nɛ m pin.” Ndoŋ nna nɛ kanyɛn na kaŋɛ: “Meeŋ tɔ kumo.” ⁵Nɛ Bowas kaŋɛ: “To, kachɛ kama nɛ fo baŋ tɔ kasawule na Nawomi kutɔ, kumo be kamɔnchɛ kikɛ ekulpoche Ruf nɛ e shi Mowab be efuli so na gba beeŋ ki fo eche. Saŋɛ na so kasawule na beeŋ shir a wɔ emo nɛ e wu na be kanaŋ to.” ⁶Ekurgepo na ka nu loŋ na nɛ e kaŋɛ: “Kumo ere m maaŋ baa sha ketɔ kumo, ŋkpal manɛ so, nɛ n wora loŋ, ŋ gbagba be kapetɛ be asheŋ beeŋ ba ki kpakpa. Amoso feeŋ tiŋ n tɔ kumo, ŋkpal manɛ so, ma ere maaŋ tiŋ n tɔ kumo.” ⁷To, dra na Israɛl malɛ be efuli so be basa daŋ baa sha kefa asɔ ŋko kechɛr asɔ le nɛ b daa wora. Bumo be eko daa lara mbe keya to be kesebeta nna a sa eko. Nɛ enyɔsopo na baŋ sɔ kesebeta na, kumo ere kesheŋ na yili mbra be ekpa so nna na. ⁸Amoso, ekurgepo na ka daŋ kaŋɛ Bowas fanɛ e tɔ kasawule na so, e daŋ lara mbe kesebeta nna n sa Bowas. ⁹Ndoŋ nna nɛ Bowas sɔ kesebeta na nseŋ kaŋɛ benimu na nɛ bekama nyam nɛ b daa wɔ ndoŋ na le: “To, kabre men kikɛ ji shɛda nna na fanɛ n tɔ Elimelɛk nɛ mbe mbia Chilion nɛ Maalon be kapetɛ kikɛ nyam ashi Nawomi kutɔ nna na. ¹⁰Kede be kaman, Mowabche Ruf nɛ mo kul Maalon wu ŋ ka na gba ki ma eche. Kumo be loŋ e naaŋ shin nɛ enyɛn nɛ e wu na be kapetɛ e baa wɔ mbe kanaŋ to nɛ mbe ketre malɛ e sa maŋ mur ashi mbe basa nɛ mbe kade to kikɛ. Amoso, kabre, menyee wora ma kumo be shɛda nna na!” ¹¹Ndoŋ nna nɛ benimuana na nɛ bekama nɛ b daa wɔ kejaŋ na so na kikɛ shuli ŋ kaŋɛ: “Mm, an kikɛ wora kumo be loŋ be shɛda. Enyɛnpe Ebɔrɛ e nɛfa eche nɛ e bee ba fo laŋ to na n shin nɛ e kurge mbia damta fanɛ Reechel nɛ Lia nɛ b daŋ chɛ abar ŋ kurge mbia damta n sa Jeekɔb nɛ kumo be loŋ shin nɛ Israɛl ki efuligboŋ na. Ebɔrɛ e shin nɛ fo dii dama ashi Efrata nsaa nya bunyaŋ ashi Bɛtlɛhɛm to. ¹²Enyɛnpe Ebɔrɛ e shin nɛ mbia mo nɛ feeŋ bɔla eche ere so n nya na e ba shin nɛ fo kanaŋ e baa du fanɛ Pɛrɛs nɛ Tama nɛ Juda daŋ kurge na be kanaŋ.”

Kananɛ Deevid be kanaŋ to ebi be asheŋ nite

¹³Kede be kaman nɛ Bowas ta Ruf ŋ ki mbe eche nɛ Enyɛnpe Ebɔrɛ chɛ mo to nɛ e di kedampo ŋ kurge ebinyɛn. ¹⁴Ndoŋ nna nɛ kade na to be beche kaŋɛ Nawomi le: “Kemaŋkura e baa la Enyɛnpe Ebɔrɛ na peya ŋkpal e ka sa fo enanabi nɛ e beeŋ keni fo so so. Ebɔrɛ e shin nɛ kebia na be ketre e baa dii ashi Israɛl be efuli so kikɛ! ¹⁵Nawomi, fo shache bee sha fo nseŋ wora asɔ damta n sa fo a chɔ asɔ nɛ mbinyɛnbi ashunu daa beeŋ wora. Kumo be kaman, naniere e sa fo enanabi nyɛnso mo nɛ e beeŋ baa leŋ fo to nseŋ ba kaa keni fo so ashi fo mbel to.” ¹⁶Nɛ Nawomi ta kebia na n deŋi aya so a keni mo so. ¹⁷Ndoŋ nna nɛ kade na to be beche kaŋɛ: “Nawomi nya ebinyɛn.” Kumo be kaman nɛ e nase kebia na Obɛd. Loŋ be Obɛd na e daŋ ba koso ŋ kurge Jɛsi nɛ mo alɛ koso ŋ kurge ewura Deevid na.

¹⁸Amoso kananɛ Pɛrɛs be kanaŋ lar n ya fo Ewura Deevid nde:

Pɛrɛs e daŋ kurge Hɛzrɔn nɛ

¹⁹Hɛzrɔn malɛ kurge Ram nɛ

Ram malɛ kurge Aminadab

²⁰nɛ Aminadab malɛ kurge Naashɔn

nɛ Naashɔn malɛ kurge Salmon nɛ

²¹Salmon malɛ kurge Bowas nɛ

Bowas malɛ ba kurge Obɛd nɛ

²²Obɛd malɛ kurge Jɛsi

nɛ Jɛsi malɛ kurge ewura Deevid.