KELARAŊŊINI

KAWƆL NƐ ESHUŊIPO JƆN SIBƐ NƐ BAA TRE

KELARAŊŊINI

NA

¹Yesu Kristo be asɔ nɛ Ebɔrɛ sa mo nɛ e lara ŋ ŋini mbe anya nde. A la asɔ nɛ a maaŋ chɛr nseŋ wora nna nɛ e shuŋi mbe kabɔ fanɛ e ba lara amo ŋ ŋini ma, mbe kenya Jɔn ²nɛ ma alɛ ji asɔ nɛ n wu na kikɛ be shɛda, amo e la fanɛ Ebɔrɛ be kamalga nɛ asɔ nɛ Yesu Kristo malga na kikɛ be asheŋ. ³Nɛfa la ekama nɛ e bee kraŋ abɔrɛsheŋ be kewuŋkaŋɛ be mmalga ere nɛ bekama nɛ baa nu amo nsaa ta asɔ nɛ n sibɛ n wɔtɔ amo to a wɔtɔ bumo be ŋgbene to na peya nna, ŋkpal manɛ so, amo be saŋɛ na bee taga to.

Jɔn ka bee chɔrɔ asɔri ashunu na be asheŋ

⁴Kawɔl ere shi ma Jɔn kutɔ nna a yɔ asɔri ashunu mo nɛ a wɔ Eeshia be kasawule so na kutɔ. Kuwɔr be kakɛ nɛ kagbenewushi e shi esa nɛ e daa wɔtɔ nseŋ kraa wɔtɔ ŋkeŋ naa ba na nɛ ayoyu ashunu mo nɛ a wɔ mbe kuwurputi be anishito na kutɔ a la menyeya. ⁵Loŋ be kuwɔr be kakɛ koŋwule na nɛ kagbenewushi na e shi Yesu Kristo nɛ e la shɛdajipo nɛ esa beeŋ tiŋ n yirda na, mo alɛ nseŋ juŋkpar bubuni kikɛ n tiŋi luwu to nseŋ naa la kasawule ere so be bewura be esa nɛ e bee ji bumo so kuwura na kutɔ m ba.

E bee sha anyi nna ga nseŋ bɔla mbe ŋklaŋ so na n sɔ anyi ashi alubi to n yige, ⁶nseŋ ta anyi ŋ ki mbe kuwura to ebi nɛ bɔrɛmatapoana nɛ an baa shuŋ mbe Ebɔrɛ nɛ Etuto na. Kemaŋkura nɛ eleŋ e baa la Yesu Kristo peya saŋkikɛ mbaanaayɔ. Amɛn. ⁷Men keni mo nɛ awɔlpa kulti a ba na, kenishi kama malɛ beeŋ wu mo n ta bumo nɛ b ta kusɔ n da mo m mɔ na n ti so nɛ kasawule ere so be basa kikɛ e shu ŋkpal mo so. Kumo be loŋ bre maŋ kɔ emɔrɔ. Amɛn.

⁸Enyɛnpe Ebɔrɛ na yɛ: “Ma e la Alfa nɛ Omega, Enyɛnpetale mo nɛ e daa wɔtɔ nseŋ kraa wɔtɔ nseŋ naa ba na.”

Kewuŋkaŋɛ na be sososo be asheŋ

⁹Kachako b shin nɛ ma Jɔn, men kurgepo nɛ an kikɛ bee ji awurfoŋ nsaa la kuwura na to be basa a kɔ kanyiti a yil to ŋkpal Yesu so na ya kaa wɔ kepla nɛ baa tre Patmɔs na so ŋkpal ŋ ka daŋ malga Ebɔrɛ be kamalga na nseŋ daŋ ji Yesu be shɛda so. ¹⁰Enyɛnpe be kachɛ ko mbe kiyoyu koso ma kikɛ to nɛ n nu ebɔl ka wora awɔr ma kamanto fanɛ kabel na. ¹¹Ebɔl na yɛ: “Sibɛ asɔ nɛ feeŋ wu ere n wɔtɔ kawɔl to nseŋ ta kawɔl na n sa nɛ b ya sa asɔri ashunu na. Asɔriana nɛ a wɔ Ɛfeses nɛ Smɛɛna nɛ Pɛɛgamem nɛ Tayataira nɛ Saadis nɛ Filadɛlfia nɛ Laodisiya na.”

¹²Ŋ ka nu asheŋ ere nɛ ŋ kilgi nɛ ŋ keni ebɔl na wura nseŋ wu shuwa be kefitilatɔl ashunu. ¹³Shuwa be kefitilatɔl ashunu na malɛ to n wu esa ko fanɛ dimɛdi pibinyɛnso ka buu piŋi nɛ k gbelge n ya fo mbe ayadra so nɛ shuwa be kreso paŋgelambi ko ŋ kre mbe nteto. ¹⁴Mbe kumu nɛ emin daŋ fuli nna parr fanɛ ateebi ŋko abɔrɛjembubi nɛ mbe anishi malɛ daa du fanɛ edɛ be adondulombi. ¹⁵Mbe ayadra daa du fanɛ katishaŋ peper nna a kpa edɛ fanɛ b ka lara amo edɛ to m bel amo na nɛ mbe ebɔl malɛ daa gbri fanɛ nchu damta ka bee shile na. ¹⁶E daa kɔ achɛkpabi ashunu nna mbe enɔjiso to nɛ tokobi jinnɔnyɔ jiso ko shi mbe kɔnɔ to n lar. Mbe anishiakpa malɛ daa kpa edɛ nna fanɛ epeŋi ka bee nyaŋɛ ga na.

¹⁷Ŋ ka wu mo na nɛ n tɔr mbe anishito fanɛ ŋ ka wu na. Ndoŋ nna nɛ e ta mbe enɔjiso n deŋi ma so nseŋ kaŋɛ: “Sa maa lɔ kufu, ma e la Faraŋko nɛ Lalaloge, ¹⁸ma e la emo nɛ e wɔ ŋkpa to na. N daŋ wu nna, ama naniere n tiŋi nna a wɔ ŋkpa to mbaanaayɔ. Ma alɛ e kɔ luwu nɛ bubuni to be kakpa be eleŋ. ¹⁹Amoso, sibɛ asɔ nɛ fo wu ere, asɔ nɛ a wɔtɔ naniere nɛ amo nɛ a beeŋ wora kachako so na n nase. ²⁰Achɛkpabi ashunu nɛ fo wu ma enɔjiso to na nɛ shuwa be kefitilatɔl ashunu na be wulo na be afito nde: Achɛkpabi ashunu na e la asɔri ashunu na be emalaika nɛ kefitilatɔl ashunu na malɛ la asɔri ashunu na.”

Kubɔya nɛ k yɔ Ɛfeses be kade to be asɔri to be asheŋ

¹E yɛ: “Sibɛ kawɔl ere n sa Ɛfeses be kade to be asɔri be malaika na ŋ kaŋɛ mo le:

‘Mmalga ere shi esa nɛ e kɔ achɛkpabi ashunu mbe enɔjiso to nsaa na shuwa be kefitilatɔl ashunu na to na kutɔ nna. ²N nyi men be aworbi kikɛ a nyi kananɛ men shuŋ ga nseŋ naa nyi kananɛ men kɔ kanyiti a yil to. N nyi kananɛ menyi nɛ basa lubi maaŋ tiŋ n chena nsaa nyi fanɛ men wora basa nɛ b yɛ b la beshuŋipoana, bumo alɛ ŋkaa maŋ la na ŋ keni n wu fanɛ befɛpo e la bumo. ³N nyi kananɛ men kɔ kanyiti a yil to nɛ kananɛ menyee ji tɔrɔ ŋkpal ma ketre so, menyi alɛ ŋkaa maa pɔ aba.

⁴Ama kusɔ lubi nɛ n wu menyi so nde fanɛ men lɛ men be sososo be kasha na. ⁵Men keni ketɔr gboŋgboŋi nɛ men tɔr na. Men lar men be alubi to nseŋ naa wora asheŋ nɛ men daa wora sososo na. Nɛ men baa maŋ lar men be alubi na to, meeŋ ba menyi kutɔ m ba ta men be kefitilatɔl ashi kumo be eyilikpa. ⁶Ama kusɔ nɛ k walɛ menyi e la fanɛ men kishi katuŋ nɛ baa tre Nikolawsebi na be asheŋ fanɛ kananɛ ma alɛ gba kishi kumo be asheŋ na.

⁷Ekama nɛ e kɔ asoe, e baa nu asɔ nɛ Kiyoyu na bee kaŋɛ asɔriana na.

Ekama nɛ e kɔ m pɔɔ so, meeŋ sa mo ekpa nɛ e ji ŋkpa be kedibi nɛ k wɔ Ebɔrɛ be kakpa lela nɛ baa tre ndoŋ Paradisi to na be kusɔrso na.’ ”

Kubɔya nɛ k yɔ Smɛɛna be kade to be asɔri to be asheŋ

⁸Kede be kaman nɛ e naŋ kaŋɛ: “Sibɛ kawɔl ere n sa Smɛɛna be kade to be asɔri be malaika na ŋ kaŋɛ mo le:

‘Mmalga ere shi emo nɛ e la sososo nɛ lalaloge nseŋ daŋ wu n naŋ tiŋi a wɔ ŋkpa to na kutɔ nna. ⁹N nyi men be etɔrɔ nsaa nyi men be ketir be asheŋ, ama kashenteŋ bre, damawuraana e la menyi. Ma alɛ kraŋ naa nyi mmalga lubi mo nɛ basa nɛ baa tre bumo be amu Juwebi, bumo alɛ ŋkaa maŋ la na bee malga a gbiti menyi, ama bumo alɛ la Setani be katuŋ to be basa nna. ¹⁰Men sa maŋ kaa ŋana asheŋ nɛ a bee shin nɛ a ba menyi so ere. Mee kaŋɛ menyi nna na fanɛ alubipo na beeŋ shin nɛ b ta menyi be beko n ti ebu nɛ e wora menyi ŋ keni nɛ men ji tɔrɔ nchɛ kudu. Ama men baa yil to kpakpa loŋ n ya kaa fo luwu to be keluri to gba nɛ n sa menyi ŋkpa be kuwurwuro na.

¹¹Ekama nɛ e kɔ asoe e baa nu asɔ nɛ Kiyoyu na bee kaŋɛ asɔriana na.

Ekama nɛ e kɔ m pɔɔ so, luwu nyɔsopo na maaŋ doro mo kikɛ.’ ”

Kubɔya nɛ k yɔ Pɛɛgamem be kade to be asɔri to be asheŋ

¹²Nɛ e naŋ kaŋɛ: “Sibɛ kawɔl ere n sa Pɛɛgamem be kade to be asɔri be malaika na ŋ kaŋɛ mo le:

‘Mmalga ere shi emo nɛ e kɔ tokobi jinnɔnyɔ jiso to na kutɔ nna. ¹³N nyi kakpa nɛ men wɔ ere be asheŋ, kakpa nɛ Setani baa tase gbagba. Ŋkeshin nɛ menyi alɛ maa lar ma ketre na kaman. Men maŋ lar men be yirda nɛ men kɔ ma so na kaman kikɛ, hale ma shɛdajipo nɛ esa beeŋ tiŋ n yirda na Antipas nɛ b daŋ mɔ men be kadegboŋ na to, kakpa nɛ Setani baa wɔ na be jemanɛ na kikɛ. ¹⁴Ama asɔ lubi gbrɛbi nɛ n wu menyi so nde: Men kɔ basa ko menyi to ndoŋ nɛ baa bɛ Balaam be keŋini so, Balaam mo nɛ e daŋ ŋini Balak kananɛ e beeŋ fule Israɛlebi nɛ b ji nlɔŋɛjibi nseŋ naŋ fule bumo n wɔtɔ kesakalea be keji to na. ¹⁵Beko malɛ gba wɔ menyi to a bɛ katuŋ nɛ baa tre Nikolawsebi na be keŋini so. ¹⁶Amoso, men lar loŋ be alubi na to, nɛ mannɛ aloŋ, m maaŋ chɛr nseŋ ba menyi kutɔ m ba ta ma kɔnɔ to be tokobi m ba kɔ bumo.

¹⁷Ekama nɛ e kɔ asoe e baa nu asɔ nɛ Kiyoyu na bee kaŋɛ asɔriana na.

Ekama nɛ e kɔ m pɔɔ so, meeŋ sa mo manna ŋana so na be ako. Kumo be kaman nɛ n naŋ sa mo kejembu fuful mo nɛ b sibɛ kumo so ketre popɔr mo nɛ esa nɛ e bee sɔ kejembu na nawule nyi na.’ ”

Kubɔya nɛ k yɔ Tayataira be kade to be asɔri to be asheŋ

¹⁸Nɛ e naŋ kaŋɛ: “Sibɛ kawɔl ere n sa Tayataira be kade to be asɔri be malaika na ŋ kaŋɛ mo le:

‘Mmalga ere shi Ebɔrɛ Pibinyɛn mo nɛ mbe anishi du fanɛ edɛ be adondulombi nɛ mbe ayadra malɛ bee kpa edɛ fanɛ katishaŋ peper na kutɔ nna.

¹⁹N nyi men be aworbi nɛ men be kasha nɛ yirda, nɛ kananɛ menyee shuŋ beko nseŋ naa nyi kanyiti nɛ men kɔ a yil to. Ma alɛ naa nyi fanɛ naniere menyee wora asheŋ ga a chɔ kananɛ men daa wora sososo na. ²⁰Ama kusɔ nɛ n wu menyi so e la fanɛ, men sa kache Jɛzebel mo nɛ e bee tre mbe kumu abɔrɛsheŋ be ewuŋkaŋɛpo na ekpa nna nɛ e wɔtɔ a ŋini nsaa shin nɛ ma anya bee luri kesakalea be keji to nseŋ naa shin nɛ baa ji nlɔŋɛjibi. ²¹N sa mo saŋɛ nɛ e lar mbe alubi to, ama e maa sha kelar mbe kesakalea na to. ²²Amoso, meeŋ ta kulɔ n lɛ mo so nɛ e dese kelaŋ so ŋkeŋ shin nɛ bumo nɛ baa tu mo a ji kesakalea na malɛ e nu ebesa ga ama b baŋ lar bumo be alubi na to nna. ²³Ma alɛ beeŋ naŋ shin nɛ mbe mbia e wu n wu nɛ asɔriana na kikɛ to ebi e pin fanɛ ma e la esa nɛ e bee mige ŋgbene nɛ nfɛraana to a wu amo to na. Ma alɛ beeŋ ka ekama be kusɔ nɛ e wora kikɛ be kukɔ. ²⁴Ama menyi Tayatairaebi nɛ men ka ŋkaa maa bɛ loŋ be keŋini na so nseŋ maŋ naŋ bii asɔ nɛ beko bee tre Setani be wulo be keŋini chiŋgeliŋana na so na bre, m maaŋ naŋ ta kegben kama n ti menyi so. ²⁵Ama men baa kɔ asɔ nɛ men tea kɔ ere to hale nɛ n ya ba.

²⁶Esa kama nɛ e kɔ m pɔɔ so ŋkaa kɔ ma aworbi na to n ya fo lalaloge na, meeŋ sa amodoŋwura eleŋ nɛ k bee ji efuliana so ²⁷nɛ amodoŋwura na e ta kagbene kpakpaso n ji kuwura bumo so n wora bumo fanɛ kananɛ esa bee kaa buri kaba to na. Eleŋ na beeŋ baa du fanɛ kananɛ ŋ gbagba nya eleŋ ashi n Tuto kutɔ na. ²⁸Ma alɛ beeŋ naŋ sa amodoŋwura karechɛso be kechɛkpabi na.

²⁹Amoso, ekama nɛ e kɔ asoe e baa nu asɔ nɛ Kiyoyu na bee kaŋɛ asɔriana na.’ ”

Kubɔya nɛ k yɔ Saadis be kade to be asɔri to be asheŋ

¹Nɛ e kaŋɛ: “Sibɛ kawɔl ere n sa Saadis be kade to be asɔri be malaika na ŋ kaŋɛ mo le:

‘Mmalga ere shi esa nɛ e kɔ Ebɔrɛ be ayoyu ashunu nɛ achɛkpabi ashunu na to na kutɔ nna. N nyi men be aworbi kikɛ, n nyi men ka kɔ ketre basa kutɔ fanɛ men wɔ ŋkpa to nna, ama men wu nna a wɔtɔ. ²Men tiŋi ashi loŋ be kebaawɔtɔ na to nseŋ wɔtɔ men be kabɔrɛbɛso na be mboŋ nɛ a ka a shin nɛ a mur na eleŋ to, nɛ mannɛ aloŋ, amo alɛ gba beeŋ mur kuraa. Ŋkpal manɛ so, m maŋ wu men be aworbi ka walɛ a bɔlɔ ma Ebɔrɛ be kenishi. ³Amoso, men baa nyiŋi asɔ nɛ men daŋ sɔ nseŋ nu na kikɛ. Men baa bɛ amo so nseŋ lar alubi to. Nɛ men baŋ maŋ tiŋi men be loŋ be kebaawɔtɔ na to, meeŋ ba fanɛ eyu nɛ men maaŋ pin saŋɛ nɛ meeŋ purgi menyi. ⁴Men kraa kɔ basa gbrɛbi ko ashi Saadis to nɛ eyurpi kama maŋ gbiti bumo be asɔbuuso na. Bumo alɛ beeŋ tu ma n nite m buu asɔ fuful, ŋkpal manɛ so, b daga loŋ.

⁵Ekama nɛ e kɔ m pɔɔ so beeŋ buu asɔ fuful fanɛ bumo. M maaŋ kpra mbe ketre ashi ŋkpa be kawɔl na to kikɛ, ama meeŋ ji mbe shɛda n sa n Tuto nɛ mbe emalaika.

⁶Ekama nɛ e kɔ asoe e baa nu asɔ nɛ Kiyoyu na bee kaŋɛ asɔriana na.’ ”

Kubɔya nɛ k yɔ Filadɛlfia be kade to be asɔri to be asheŋ

⁷Nɛ e kaŋɛ: “Sibɛ kawɔl ere n sa Filadɛlfia be kade to be asɔri be malaika na ŋ kaŋɛ mo le:

‘Mmalga ere shi ma, emo nɛ e du cheembi nsaa la kashenteŋwura nsaa kɔ Ewura Deevid be sɔfi to na kutɔ nna. Kusɔ nɛ m bugi, esa kikɛ maaŋ tiŋ n ti kumo, kusɔ kama malɛ nɛ n ti, esa kikɛ maaŋ tiŋ m bugi kumo. ⁸N nyi men be aworbi. Men nu nfe, m bugi kabuna mo nɛ esa kikɛ maaŋ tiŋ n ti na n yili menyi. N nyi men ka maŋ kɔ eleŋ ga, ama men ta ma mmalga n wɔtɔ men be ŋgbene to ŋkaa maŋ lar ma ketre na kaman. ⁹Men nu nfe, basa nɛ b wɔ Setani be katuŋ to, befɛpo na, bumo e wɔtɔ a tre bumo be amu Juwebi, bumo alɛ maŋ la na, meeŋ shin nɛ b ba gbir men be anishito n shin nɛ b pin fanɛ ma e sha menyi. ¹⁰Ŋkpal men ka bɛ kusɔ nɛ ŋ kaŋɛ menyi fanɛ men baa yili to kanyitiso na so so, ma alɛ gba beeŋ kuŋ menyi ashi kechɔŋkeni be jemanɛ mo nɛ k bee ba durnyaebi kikɛ so m ba wora basa nɛ b wɔ kasawule so kikɛ ŋ keni na. ¹¹M maaŋ naŋ chɛr nseŋ ba, men baa kɔ kusɔ nɛ men tea kɔ to na to kpakpa nɛ esa kikɛ e sa maŋ tiŋ n sɔ men be kekɔmpɔɔso be tɔnɔ.

¹²Ekama nɛ e kɔ m pɔɔ so, meeŋ ta mo ŋ ki ma Ebɔrɛ be lambu to be shabɔrɛ. Mo alɛ maaŋ naŋ lar kumo to kikɛ nɛ n sibɛ ma Ebɔrɛ be ketre nɛ ma Ebɔrɛ be kadegboŋ be ketre n deŋi mo so. Kade na e la Jerusalɛm popɔr nɛ k bee shi ma Ebɔrɛ kutɔ ashi ebɔrɛso a ba na. Ma alɛ beeŋ naŋ sibɛ ma ketre popɔr n deŋi mo so.

¹³Ekama nɛ e kɔ asoe, e baa nu asɔ nɛ Kiyoyu na bee kaŋɛ asɔriana na.’ ”

Kubɔya nɛ k yɔ Laodisiya be kade to be asɔri to be asheŋ

¹⁴Nɛ e naŋ kaŋɛ: “Sibɛ kawɔl ere n sa Laodisiya be kade to be asɔri be malaika na ŋ kaŋɛ mo le:

‘Mmalga ere shi ma nɛ n la Amɛn nɛ kashenteŋ be shɛdajipo nɛ baaŋ tiŋ n yirda na nɛ n la Ebɔrɛ be kepɔrso kikɛ be gbaltɔlase na kutɔ nna. ¹⁵N nyi men be aworbi kikɛ fanɛ men la basa nɛ men maŋ wushi, menyi alɛ maŋ naa tushi. Men daŋ baa la basa nɛ b wushi ŋko bumo nɛ baa tushi, k daa beeŋ baa kɔ kifito. ¹⁶Ama ŋkpal men ka du yulɛyulɛbi fanɛ nchu a maa tushi, menyi alɛ maŋ naŋ wushi na so, meeŋ luu menyi ashi ma kɔnɔ to n lɛ. ¹⁷Men yɛ: An dii dama n nya kusɔ kama nyam nɛ anyee sha, anyi maŋ naa sha shɛŋ. Ama menyi alɛ maŋ nyi fanɛ men la awurfoŋwuraana nɛ basa nɛ bumo be asheŋ kɔ kuwɔr nɛ betirpo nɛ betanpo nɛ basa delgeso nna. ¹⁸Amoso, mee sa menyi nfɛra nna fanɛ men tɔ shuwa mo nɛ a maŋ kɔ saŋgre kikɛ amo to ŋ kutɔ, saŋɛ na so menyeeŋ dii dama. Men tɔ asɔbuuso fuful gba ashi ŋ kutɔ m buu men be anishinyɔr be eyurkpaŋ na so nseŋ tɔ kudur malɛ gba n fɔr men be anishiana so n tiŋ a wu. ¹⁹Ma ere, basa nɛ mee sha nɛ mee fiɛ so nsaa ŋini bumo ekpa, amoso, men yeŋi so n lar men be alubi to.

²⁰Men nu nfe, n yil kabuna to nna a ŋmɛa, ekama nɛ e nu ma ebɔl nseŋ bugi kabuna n sa ma, meeŋ luri mo kutɔ n tu mo n ji nɛ mo alɛ gba e tu ma n ji.

²¹Esa kama nɛ e kɔ m pɔɔ so, meeŋ sa mo ekpa nɛ e tu ma n chena ma kuwurputi so fanɛ kananɛ ŋ kɔ m pɔɔ so nseŋ chena n Tuto kutɔ ashi mbe kuwurputi so na.

²²Ekama nɛ e kɔ asoe, e baa nu asɔ nɛ Kiyoyu na bee kaŋɛ asɔriana na.’ ”

Kabɔrɛbunyaŋ ashi ebɔrɛso be asheŋ

¹Ade kikɛ be kaman nɛ ŋ keni nɛ kabuna bugi a yil ebɔrɛso. Nɛ ebɔl mo nɛ n daŋ juŋkpar n nu nɛ k bee malga ŋ kutɔ fanɛ kabel na kaŋɛ ma le: “Dii m ba nfe nɛ ŋ ŋini fo asɔ nɛ a beeŋ wora asheŋ ere kikɛ be kaman.” ²Epul na to nɛ Kiyoyu Cheeŋ na koso ma kikɛ to nɛ ŋ keni n wu kuwurputi ebɔrɛso nɛ esa ko tase kumo so. ³Esa nɛ e daa tase ndoŋ na daa kpa edɛ nna palpal, a du fanɛ kejembu nɛ baa tre jaspa na nna, nseŋ pere kpaiŋ fanɛ kejembu nɛ baa tre saadie na. Kabɔrɛnyaŋgelambi ko malɛ daa du fanɛ ɛmeraldi be kejembu nɛ k la kefitiri bumbuŋ nawule na daŋ kulti kuwurputi na. ⁴Nwurputi adunyɔ nɛ ana ko malɛ gba daŋ chambɔ ŋ kulti kuwurputi mo na nɛ bejuŋkparpo adunyɔ nɛ ana chena n chena amo so. B daŋ buu asɔ fuful nna nseŋ buu shuwa be nwurwuro. ⁵Ndoŋ nna nɛ bɔrɛ shi kuwurputi na akpa a ponte to a gbri le gbrugbru nsaa nyɛkpɛ palpal nɛ efitila ashunu yil kuwurputi na be anishito a suse. Ndia ashunu na e la Ebɔrɛ be ayoyu ashunu na. ⁶Kusɔ ko malɛ daa du fanɛ digi a dese fanɛ teku kuwurputi koŋwule na be anishito a wu to kleembi. Asɔbɔya keniso ana ko malɛ gba daa yil kuwurputi na be mboŋ ana nna nsaa kɔ anishi amo be anishito nɛ amo be mmanto be kaplɛkama. ⁷Sososo be kusɔbɔya keniso na daa du fanɛ buluŋ nna nɛ kenyɔsopo daa du fanɛ kena nɛ kesasopo daa kɔ anishiakpa fanɛ nyiŋgbasa nɛ kenasopo malɛ daa du fanɛ kusore ka bee firgi. ⁸Asɔbɔya keniso ana na be kekama daa kɔ atɛ ashe nna nɛ anishi malɛ sɔ bumo be eyurana kikɛ so hale bumo be atɛana to kikɛ. Kapa nɛ kanyɛ b daa maa lo to kikɛ, b daŋ baa boŋ le nna:

“Enyɛnpetale Ebɔrɛ e la cheembi cheembi cheembi.

Mo e daa wɔtɔ nseŋ kraa wɔtɔ ŋkeŋ naa ba na.”

⁹Saŋkama malɛ asɔbɔya keniso na bee sa esa nɛ e tase kuwurputi na so na nsaa wɔ ŋkpa to mbaanaayɔ na kemaŋkura nɛ bunyaŋ nɛ kechɔrɔ nna. ¹⁰Bejuŋkparpo adunyɔ nɛ ana na bee jɔŋɛ esa nɛ e tase kuwurputi so na nna nseŋ bunyaŋ mo koŋwule nɛ e wɔ ŋkpa to mbaanaayɔ na. Baa bugi bumo be nwurwuro nna a nase kuwurputi na be anishito nsaa kaŋɛ le:

¹¹“An Nyɛnpe nɛ an be Ebɔrɛ,

fo e daga kenya kemaŋkura nɛ bunyaŋ nɛ eleŋ,

ŋkpal manɛ so, fo e to kusɔ kikɛ,

fo alɛ be keparso nɛ b to kusɔ kama nɛ k wɔ ŋkpa to.”

Kawɔl sibɛso nɛ Kpakpafɔlbi na be asheŋ

¹Ndoŋ nna nɛ n wu kawɔl sibɛso ka wɔ esa nɛ e daŋ chena kuwurputi na so be enɔjiso so. Kasibɛ e daŋ bɔlɔ kumo be anishito nɛ kamanto kikɛ nɛ b ta tɔɔnɛ be kebersobi ashunu m pɛ kumo. ²Ndoŋ nɛ n wu malaika lempo ko ka bee ponte awɔrso a bishi le: “Wanɛ e daga nɛ e tiŋ m bu m bu kawɔl sibɛso be tɔɔnɛ be abersobi ashunu na?” ³Ama esa kikɛ daa maŋ wɔ ebɔrɛso ŋko kasawule so ŋko kasawule be kaseto nɛ e tiŋ m bugi kawɔl sibɛso na ŋko nɛ e tiŋ ŋ keni kumo to gba. ⁴Ndoŋ nna nɛ n shu ga ŋkpal esa kikɛ ka daa maŋ wɔtɔ nɛ e daga nɛ e tiŋ m bugi kawɔl sibɛso na ŋko nɛ e tiŋ ŋ keni kumo to na so. ⁵Ŋ ka bee shu na nɛ bejuŋkparpoana na be eko kaŋɛ ma: “Sa maa shu, keni Juda be kanaŋ to be buluŋ, Ewura Deevid mo Nanabigboŋ na kɔ m pɔɔ so ŋkaa beeŋ tiŋ m bu m bu abersobi ashunu na nseŋ tiŋ m bugi kawɔl sibɛso na.”

⁶Ndoŋ nna nɛ n wu Kpakpafɔlbi ka yil kuwurputi na akpa be nferinto nɛ asɔbɔya keniso ana na nɛ bejuŋkparpo na kulti kumo. Kpakpafɔlbi na daa du fanɛ b ka mɔ mo nna. E daa kɔ alambɛ ashunu nɛ anishi ashunu nɛ a la Ebɔrɛ be ayoyu ashunu nɛ e shuŋi amo m ba kasawule ere so na nna. ⁷Mo e daŋ ba esa nɛ e daŋ chena kuwurputi na so na kutɔ m ba sɔ kawɔl sibɛso na ashi mbe enɔjiso to.

⁸E ka sɔ kawɔl sibɛso na nɛ asɔbɔya ana na nɛ bejuŋkparpo adunyɔ nɛ ana na gbir Kpakpafɔlbi na be anishito. Bumo be ekama daa kɔ goji nɛ shuwa be ntishaŋ mo nɛ duwu bɔlɔ m bɔlɔ amo to a la Ebɔrɛ be basa be kabɔrɛkuleana nna. ⁹Nɛ b boŋ kashɛ popɔr ko a kaŋɛ:

“Fo e daga nɛ fo ta kawɔl sibɛso na

nseŋ tiŋ m bu m bu kumo be

tɔɔnɛ be abersobi na,

ŋkpal manɛ so, fo nɛ b daŋ mɔ

nɛ fo ta fo ŋklaŋ n tɔ basa n sa Ebɔrɛ ashi yiri kama to

ebi to nɛ ŋgbar kikɛ to ebi to

nɛ basa kama to ebi to nɛ efuli kama so ebi to na.

¹⁰Fo ta bumo ŋ ki an be Ebɔrɛ be kuwura to ebi

nɛ bɔrɛmatapoana nɛ b baa shuŋ mo

nɛ b ba ji kuwura kasawule so.”

¹¹Kumo be kaman nɛ n naŋ keni nseŋ nu emalaika damtaana nɛ ŋgboŋ to be ŋgboŋ kudu be ebɔlana. B daŋ kulti kuwurputi na nna nɛ asɔbɔya keniso ana nɛ bejuŋkparpo na ¹²nsaa boŋ le awɔrso a kaŋɛ:

“Kpakpafɔlbi nɛ b mɔ na e daga

nɛ e nya eleŋ nɛ dama nɛ kanyiasheŋ

nɛ kuwibi to be eleŋ nɛ bunyaŋ nɛ kemaŋkura nɛ epaŋ be kedi.”

¹³Ndoŋ nna nɛ n nu kusɔtoso kikɛ nɛ k wɔ ebɔrɛso nɛ kasawule so nɛ kasawule be kaseto nɛ etekuana so nɛ amo nɛ a wɔ amo to kikɛ verr ka bee boŋ a kaŋɛ le:

“Kapandi nɛ bunyaŋ nɛ kemaŋkura nɛ eleŋ e baa la emo nɛ

e tase mbe kuwurputi so na

nɛ Kpakpafɔlbi na peya

mbaanaayɔ.”

¹⁴Ndoŋ nna nɛ asɔbɔya keniso ana na kikɛ shuli ŋ kaŋɛ: “Amɛn.” Nɛ bejuŋkparpoana na gbir n dese kasawule m maŋ mo so.

Tɔɔnɛ be abersobi na be asheŋ

¹Nɛ n wu Kpakpafɔlbi na ka bu tɔɔnɛ be abersobi ashunu na be kuko to nseŋ nu asɔbɔya keniso ana na be kuko ka ta ebɔl ŋ kaŋɛ awɔrso fanɛ bɔrɛ be egbri ŋ kaŋɛ: “Ba!” ²Ndoŋ nna nɛ ŋ keni nɛ gbaŋɛ fuful e yil. Kumo be ediipo daa kɔ keta to nna nɛ b ta kuwurwuro n sa mo nɛ e dii gbaŋɛ na n lar ndoŋ fanɛ ekɔmpɔɔsopo nɛ e ya kɔ m pɔɔ so.

³Kpakpafɔlbi na ka naŋ bu tɔɔnɛ be kebersobi nyɔsopo na to nɛ n nu kusɔbɔya keniso nyɔsopo ka tre: “Ba!” ⁴Ndoŋ nna nɛ gbaŋɛ ko malɛ naŋ lar m ba m pere le kpaw. B daŋ sa kumo be ediipo eleŋ nna fanɛ e lara kagbenewushi ashi kasawule so nɛ basa e baa mɔ abar. B daŋ ta tokobi gboŋgboŋi ko nna n sa mo.

⁵Kpakpafɔlbi na ka bu tɔɔnɛ be kebersobi sasopo na to nɛ n nu kusɔbɔya keniso sasopo na ka tre: “Ba!” Ndoŋ nna nɛ ŋ keni nɛ gbaŋɛ lembir ko e yil. Kumo be ediipo daa kɔ kusɔ nɛ b kɔ a ta egbɛ na nna ashi mbe enɔ to. ⁶Ndoŋ nna nɛ n nu kusɔ ko ka shi asɔbɔya keniso ana na to ŋ gbri m ba fanɛ ebɔl na a kaŋɛ le: “Ta aboyu be kurwa be bargato malɛ be bargato nɛ amo be yawu la lebra be kachɛ koŋwule be kakɔka na nseŋ ta gari be kurwa be bargato malɛ be bargato asa n sɔ lebra be kachɛ koŋwule be kakɔka. Ama sa maŋ kaŋ tɔrɔ ŋku na nɛ yabra belbelso na bre.”

⁷Kpakpafɔlbi na ka bu tɔɔnɛ be kebersobi nasopo na to nɛ n nu kusɔbɔya keniso nasopo na ka kaŋɛ: “Ba!” ⁸Ndoŋ nna nɛ ŋ keni nɛ gbaŋɛ peperbi ko yil. Kumo be ediipo nɛ b daa tre Luwu, nɛ emo nɛ b daa tre Bubuni be Kakpa na malɛ bɛ mo so. B daŋ sa bumo eleŋ nɛ baaŋ ta m mɔ kasawule so be kenasopo na nna nɛ b ta tokobi m mɔ nseŋ naŋ bar akoŋ nɛ alɔ nɛ asɔbɔya lubiana.

⁹Nɛ Kpakpafɔlbi na bu tɔɔnɛ be kebersobi nusopo na nɛ n wu basa nɛ b mɔ ŋkpal b ka daŋ malga Ebɔrɛ be kamalga na so nɛ ŋkpal shɛda mo nɛ b ji na so na be ayoyu ashi bɔrɛsure na be kaseto. ¹⁰Nɛ b ponte awɔrso ga m bishi: “Enyɛnpe Lempo nɛ fo du cheembi nsaa kɔ kashenteŋ, nuso be kechɛr nɛ fo kraa shin nɛ fo chɛr ga pɔɛŋ nseŋ ji kasawule ere so be basa demu m bishi anyi be luwu be kuwule?” ¹¹Ndoŋ nna nɛ b ta epiŋi fuful n sa bumo be ekama nseŋ kaŋɛ bumo fanɛ b baa kraa jo gbrɛ pɔɛŋ nɛ bumo braana anya nɛ bumo kurgepoana mo nɛ basa beeŋ mɔ fanɛ kananɛ b daŋ mɔ bumo alɛ gba na nyam e ya ba abar so.

¹²Ndoŋ nna nɛ n naŋ keni n wu Kpakpafɔlbi na ka naŋ bu tɔɔnɛ be kebersobi shesopo na to nɛ kasawule be kebembeŋgboŋ ko gbuŋgbuŋ kasawule ga nɛ epeŋi kilgi m biri to a du fanɛ fusa lembir na nɛ kufɔl malɛ pere to le kpaiŋ fanɛ ŋklaŋ na. ¹³Nɛ achɛkpabi mo nɛ a wɔ awɔlpa so na tɔr kasawule yɛɛr fanɛ afugboŋ ka bee gbaŋgbaŋ mpoli bumbuŋ a lɛ na. ¹⁴Ndoŋ nna nɛ awɔlpa na fara a foe ma anishito fanɛ b ka bee bɔɔ kelaŋ to na, nɛ kebee kikɛ nɛ kepla kikɛ tia ashi amo be eyilikpaana. ¹⁵Ndoŋ nna nɛ kasawule so be bewurgboŋ nɛ bumo nɛ baa ji kuwura beko so nɛ esoji be benimu nɛ damawuraana nɛ belempo nɛ basa kikɛ, anya nɛ bumo nɛ b wɔ bumo be amu kikɛ ŋana abeelaŋana nɛ abee be afaltagboŋana to. ¹⁶Ade be kaman nɛ b fara a tre abeegboŋana na nɛ afaltaana na fanɛ a ka la enyiŋgbasa a kaŋɛ amo le: “Men tɔr anyi so n ta anyi ŋ ŋana esa nɛ e tase mbe kuwurputi so na nɛ Kpakpafɔlbi na be agbo so. ¹⁷Ŋkpal manɛ so, kachɛgboŋ nɛ k la bumo be agbo be kachɛ na fo nɛ wanɛ malɛ e naaŋ tiŋ n yili bumo be anishito?”

Israɛlebi be basa ŋgboŋ kalfa nɛ ŋgboŋ adena nɛ ŋgboŋ ana be asheŋ

¹Asheŋ ere kikɛ be kaman nɛ n wu emalaika ana ka yil a yil kasawule ere be abonfu ana akpa m pɛ kasawule ere so be afu ana na to ŋ keta, saŋɛ na so afu kikɛ maaŋ ber kasawule so ŋko m ber eteku so ŋko m ber kedibi kama so. ²Ndoŋ nna nɛ n naŋ wu malaika ko ka shi bɔrɛfito a ba nsaa kɔ Ebɔrɛ mo nɛ e wɔ ŋkpa to na be tɔɔnɛ be kebersobi to. Nɛ e tre emalaika ana nɛ b ta eleŋ m bɔɔ bumo enɔ na fanɛ b tɔrɔ kasawule ere nɛ eteku na awɔrso ³ŋ kaŋɛ bumo le: “Men sa maŋ tɔrɔ kasawule ere ŋko teku ŋko ndibi pɔɛŋ nɛ an ya ta tɔɔnɛ be abersobi n dulgi Ebɔrɛ be anya kikɛ be nsɔto.”

⁴Le be kamalga ere be kaman nɛ n nu kananɛ basa nɛ b dulgi na kikɛ sa. B daa wɔ basa ŋgboŋ kalfa nɛ ŋgboŋ adena nɛ ŋgboŋ ana ashi Israɛlebi be nnaŋ na kikɛ to. Kanaŋkama nɛ kananɛ bumo be basa dulgiso daa sa nde: ⁵Juda be kanaŋ to ebi daa wɔ basa ŋgboŋ kuduanyɔ nɛ Ruben be kanaŋ to ebi daa wɔ ŋgboŋ kuduanyɔ nɛ Gad be kanaŋ to ebi gba daa wɔ basa ŋgboŋ kuduanyɔ. ⁶Nɛ Ashɛr be kanaŋ to ebi daa wɔ basa ŋgboŋ kuduanyɔ nɛ Naftali be kanaŋ to ebi daa wɔ basa ŋgboŋ kuduanyɔ nɛ Manase be kanaŋ to ebi daa wɔ basa ŋgboŋ kuduanyɔ, ⁷Simiɔn be kanaŋ to ebi gba daa wɔ basa ŋgboŋ kuduanyɔ nɛ Livai be kanaŋ to ebi gba daa wɔ basa ŋgboŋ kuduanyɔ nɛ Isakar gba peya daa wɔ basa ŋgboŋ kuduanyɔ. ⁸Nɛ Zɛbyulɔn be kanaŋ to ebi daa wɔ basa ŋgboŋ kuduanyɔ nɛ Josɛf be kanaŋ to ebi malɛ gba daa wɔ basa ŋgboŋ kuduanyɔ n ta Bɛnjamin malɛ gba peya ŋgboŋ kuduanyɔ n ti so.

Jimaŋ damta nɛ b buu epiŋi fuful na be asheŋ

⁹Ade be kaman nɛ ŋ keni n wu jimaŋ damta ko nɛ esa kikɛ maaŋ tiŋ ŋ karga bumo ka yil kuwurputi na nɛ Kpakpafɔlbi na be anishito. B daŋ shi efuli kama so nɛ yiri kama to nɛ basa kama to nɛ ŋgbar kama to nna m buu epiŋi fuful nseŋ daŋ keta abii be ayabiana. ¹⁰Nɛ b boŋ to awɔrso ŋ kaŋɛ le:

“Kumɔlga kikɛ shi an be Ebɔrɛ

nɛ e tase mbe kuwurputi so

nɛ Kpakpafɔlbi na kutɔ nna.”

¹¹Saŋɛ ere malɛ kikɛ nɛ emalaika na kikɛ yili ŋ kulti kuwurputi na nɛ bejuŋkparpoana na nɛ asɔbɔya keniso ana na. Ndoŋ nna nɛ b gbir nseŋ dese kasawule kuwurputi na be anishito m maŋ Ebɔrɛ so ¹²ŋ kaŋɛ le:

“Amɛn.

Kapandi nɛ kemaŋkura

nɛ kanyiasheŋ nɛ kechɔrɔ

nɛ bunyaŋ nɛ eleŋ

nɛ kuwibi to be eleŋ

e baa la an be Ebɔrɛ na peya mbaanaayɔ.

Amɛn.”

¹³Ndoŋ nna nɛ bejuŋkparpoana na be eko bishi ma: “Nuso be basa e la basa nɛ b buu epiŋi fuful ere nɛ nnɛ nɛ b shi?” ¹⁴Ndoŋ nna nɛ ŋ kaŋɛ mo le: “Ebunyampo, fo e nyi.” Nɛ e kaŋɛ ma: “Bumo e la basa nɛ b ji n lar tɔrɔgboŋ to na nseŋ fɔr bumo be epiŋi n ta amo n wɔtɔ Kpakpafɔlbi na be ŋklaŋ to nɛ a fuli parr na. ¹⁵Amoso, b baa wɔ Ebɔrɛ be kuwurputi be anishito a shuŋ mo kapa nɛ kanyɛ ashi mbe bɔrɛlambu to nna nɛ mo koŋwule nɛ e tase mbe kuwurputi so na malɛ bee ta mbe kebaawɔtɔ a kuŋ bumo. ¹⁶Akoŋ maaŋ naŋ pɛ bumo, achukoŋ malɛ gba maaŋ pɛ bumo. Epeŋi maaŋ mɔ bumo, ebeldɛ malɛ gba maaŋ mɔ bumo. ¹⁷Ŋkpal manɛ so, Kpakpafɔlbi nɛ e wɔ kuwurputi na be nferinto na e naaŋ ki bumo be ekpapo n yɛr bumo mboŋ nɛ ŋkpa be nchuana bee bul nɛ Ebɔrɛ malɛ e kpra anishichubi kikɛ ashi bumo be anishiana to.”

Kebersobi shunusopo na be asheŋ

¹Kpakpafɔlbi na ka bu tɔɔnɛ be kebersobi shunusopo na to nɛ kakpa wora shruum fanɛ awa be bargato ashi ebɔrɛso. ²Nɛ n wu emalaika ashunu mo nɛ b yil Ebɔrɛ be anishito na nɛ b ta mbel ashunu m bɔɔ bumo enɔ.

³Nɛ malaika ko malɛ ka kɔ shuwa be kusɔjɔduwu to m ba yili bɔrɛsure na akpa. B daŋ ta duwu damta ko nna fanɛ e ta n wea Ebɔrɛ be basa be kabɔrɛkuleana to n ta m ba deŋi shuwa be bɔrɛsure na so ashi kuwurputi na be anishito. ⁴Ndoŋ nna nɛ duwu na be edishi nɛ Ebɔrɛ be basa be kabɔrɛkuleana na shi malaika nɛ e yil Ebɔrɛ be anishito na be enɔ to n dii n yɔ. ⁵Ndoŋ nna nɛ malaika na ta shuwa be kusɔjɔduwu na n lara edɛ ashi bɔrɛsure na to m bɔlɔ kumo n ta edɛ na ŋ kpa n wurge kasawule so. E ka wora loŋ na nɛ bɔrɛ ponte ŋ gbri n nyɛkpɛ pɛlpɛl nɛ kasawule gbuŋgbuŋ to.

⁶Ndoŋ nna nɛ emalaika ashunu mo nɛ b daa kɔ mbel ashunu na to na wora shiriya nɛ b foŋ mbel na.

⁷Malaika juŋkparso na ka foŋ mbe kabel nɛ abɔrɛjembubi nɛ edɛ wea ŋklaŋ to m ba wurge kasawule so nɛ kasawule be ntuŋ nsa be katuŋ koŋwuleso chɔɔ nɛ ndibi kikɛ be ntuŋ nsa be katuŋ koŋwuleso chɔɔ nɛ kefitiri bumbuŋ kama chɔɔ.

⁸Nɛ malaika nyɔsopo na malɛ foŋ mbe kabel nɛ kusɔ ko fanɛ kebee gboŋgboŋi lar a suse edɛ le wuloŋwuloŋ n ya tɔr teku to nɛ teku na be ntuŋ nsa be katuŋ koŋwuleso kilgi ŋklaŋ. ⁹Nɛ asɔ keniso mo nɛ a wɔ teku na to na be ntuŋ nsa be katuŋ koŋwuleso wu nɛ ekuloŋgboŋ be ntuŋ nsa be katuŋ koŋwuleso mur.

¹⁰Ndoŋ nna nɛ malaika sasopo na malɛ foŋ mbe kabel nɛ kechɛkpabi gboŋgboŋi ko shi awɔlpa so a suse fanɛ kabulpi na m ba tɔr elɔrana nɛ mbombiana be ntuŋ nsa be katuŋ koŋwuleso to. ¹¹Kechɛkpabi na be ketre e la Kerkra. K ka tɔr nchuana na to na nɛ amo be ntuŋ nsa be katuŋ koŋwuleso ki kerkra nɛ basa damta nu amo nseŋ wu ŋkpal a ka ki kerkra na so.

¹²Ade be kaman nɛ malaika nasopo na malɛ foŋ mbe kabel nɛ kusɔ ko ŋmɛa epeŋi be mba asa be kaba koŋwuleso nɛ kufɔl be mba asa be kaba koŋwuleso nɛ achɛkpabi be ntuŋ nsa be katuŋ koŋwuleso, saŋɛ na so, kefulto be ntuŋ nsa be katuŋ koŋwuleso ki m biri to nɛ karechɛ be ntuŋ nsa be katuŋ koŋwuleso nɛ kanyɛso be ntuŋ nsa be katuŋ koŋwuleso kikɛ paŋ kefulto.

¹³Nɛ n naŋ keni n wu kusore ka wɔ esoso kumu so a firgi nsaa tre awɔrso a kaŋɛ: “Asheŋ maaŋ nyalɛ, asheŋ maaŋ nyalɛ, asheŋ maaŋ nyalɛ n sa basa nɛ b wɔ kasawule ere so kikɛ ŋkpal mbel be kushu mo nɛ emalaika asa mo nɛ b ka na bee shin nɛ b foŋ nɛ a wora na so.”

¹Nɛ malaika nusopo foŋ mbe kabel nɛ n wu kechɛkpabi ka shi awɔlpa so m ba tɔr kasawule nɛ b ta kemaŋ nɛ k maŋ kɔ ekar na nɛ baa tre kumo Abis na be esɔfi n sa kumo. ²Kechɛkpabi na ka bugi kemaŋ nɛ k maŋ kɔ ekar na nɛ edishi lar fanɛ a ka shi edɛgboŋ ko to na. Nɛ epeŋi nɛ awɔlpa kikɛ biri to ŋkpal edishi mo nɛ a shi kemaŋ na to so. ³Ndoŋ nna nɛ elotɔr malɛ shi edishi na to m ba kasawule so a kɔ eleŋ a duŋ a besa fanɛ kasawule so be nna. ⁴B daŋ kaŋɛ loŋ be elotɔr na nna fanɛ b sa maŋ wora kasawule so be afitiri ŋko asɔ duuso ŋko kedibi kikɛ shɛŋ she basa nɛ b daa maa kɔ Ebɔrɛ be tɔɔnɛ be kebersobi bumo be nsɔto so na. ⁵B daa maŋ sa bumo eleŋ na nna nɛ b mɔ basa na, ama b daŋ sa bumo eleŋ na nna nɛ b tɔrɔ bumo afɔl anu. Ebesa mo nɛ b daa beeŋ nu na malɛ daa du fanɛ kana ka duŋ esa na nna. ⁶Amo be jemanɛ na basa beeŋ fin luwu ŋ gben, baaŋ yɛlga luwu, ama luwu beeŋ shile bumo. ⁷Elotɔr na daa du fanɛ egbaŋɛ mo nɛ b bela ase n yili nɛ a yɔ kena to na nna. Asɔ ko daa buu bumo be amu so nna fanɛ b ka buu shuwa be nwurwuro na nɛ bumo be anishiakpaana malɛ daa du fanɛ edimɛdi be anishiakpaana. ⁸Bumo be eminana daa du fanɛ beche be emin nna nɛ bumo be anyii malɛ daa du fanɛ ebuluŋ be anyii. ⁹Bumo be ŋgbene so be asɔ kuŋso daa du fanɛ abɛlso peya nna nɛ bumo be atɛana to be egbri daa du fanɛ egbaŋɛ damta nɛ egbaŋɛturko ka bee shile a luri kena to na nna. ¹⁰B daa kɔ ndu nɛ mboŋ duŋsoana nna fanɛ nna peyaana. Ndu na malɛ to nɛ b daa kɔ eleŋ mo nɛ k bee tiŋ a tɔrɔ basa afɔl anu na. ¹¹Bumo be ewura mo nɛ e daa ji kuwura bumo so daa la kemaŋ nɛ k maŋ kɔ ekar nɛ baa tre kumo Abis na to be malaika nna nɛ Hibruwebi bee tre mo Abadɔn nɛ Griikebi malɛ bee tre mo Apɔliɔn.

¹²‘Asheŋ maaŋ nyalɛ n sa basa’ juŋkparso be saŋɛ na choŋ, naniere a ka ‘asheŋ maaŋ nyalɛ n sa basa’ nyɔsopo be saŋɛ nɛ k ba.

¹³Ndoŋ nna nɛ malaika shesopo na foŋ mbe kabel nɛ n nu ebɔl ka shi shuwa be bɔrɛsure mo nɛ k daa yil Ebɔrɛ be anishito na n lar. Asɔ ana ko daa yuu a yuu kumo so fanɛ kumo be alambɛ ¹⁴ŋ kaŋɛ malaika shesopo nɛ e daa kɔ kabel to na le: “Shin nɛ emalaika ana mo nɛ b kre lɔrgboŋ nɛ baa tre Yufreetes akpa na e nya bumo be amu n yɔ.” ¹⁵Ndoŋ nna nɛ b lara emalaika ana nɛ b daŋ ta bumo n yili awa ere to gbagba nɛ kabre be kachɛ ere gbagba nɛ kufɔl ere gbagba to nɛ kafɛ ere gbagba to na fanɛ b mɔ dimɛdi be kepɔrso to be ntuŋ nsa be katuŋ koŋwuleso. ¹⁶Benapo mo nɛ b daa maa na aya so daa wɔ basa ŋgboŋ to be ŋgboŋ alfa anyɔ. N daŋ nu kananɛ b sa na. ¹⁷Egbaŋɛ nɛ bediipo mo nɛ n daŋ wu bɔrɛdare na to na daa du le nna: Bumo be ŋgbene so be asɔ kuŋso daŋ pere nna kpaiŋ fanɛ ŋklaŋ nseŋ naŋ nyɔɔ tuum fanɛ gra n naa la kachɔnɔnyifu fanɛ jɛrbi. Egbaŋɛ na be amu daa du fanɛ ebuluŋ be amu nna nɛ edɛ nɛ edishi nɛ asɔ chɔɔso ko fanɛ jɛrbi shi bumo be nnɔ to n lar. ¹⁸Ndoŋ nna nɛ kɔnɔso be etɔrɔ be asɔ asa na, amo e la edɛ nɛ edishi nɛ jɛrbi nɛ a shi amo be nnɔ na to m mɔ edimɛdi be ntuŋ nsa be katuŋ koŋwuleso na. ¹⁹Egbaŋɛana na be eleŋana daa wɔ bumo be nnɔ to nɛ amo be ndu to nna, ŋkpal manɛ so, bumo be ndu daa du fanɛ awɔ nna a kɔ amu mo nɛ a bee tɔrɔ basa. ²⁰Edimɛdi mo nɛ asɔ na daa maŋ mɔ nɛ b daŋ ka na daa maŋ lar bumo be alubi mo nɛ b daŋ ta bumo be enɔana n wora na to, bumo alɛ daa maŋ yige kebaashuŋ alizinaana nɛ eshuwa nɛ egbiti nɛ ntishaŋana be agbirana nɛ ajembu nɛ ndibi mo nɛ a maaŋ tiŋ n nu ŋko n tiŋ n wu asɔ ŋko n nite na to. ²¹Bumo alɛ maŋ naŋ lar bumo be kamɔ nɛ ŋkilgi nɛ kesakaleasheŋ nɛ bumo be kayu to.

Malaika ko nɛ kawɔl sibɛso be asheŋ

¹Ndoŋ nna nɛ n naŋ wu malaika lempo ko malɛ gba ka shi ebɔrɛso a ba nɛ kuwɔlpa mea mo kikɛ so nɛ kabɔrɛnyaŋgelambi ko chambɔ mbe kumu so. Mbe anishiakpa daa du fanɛ epeŋi nna nɛ mbe aya daa du fanɛ edɛ ka lara adondulombi nɛ a du fanɛ eshabɔrɛ na. ²E daa kɔ kawɔl sibɛsobi ko to nna nɛ k bugi a wɔ mbe enɔ to nseŋ ta mbe keya jiso n yuu teku so nseŋ ta mbe bena be keya malɛ n yuu kasawule so ³nseŋ wora awɔr ko fanɛ buluŋ ka munto na. E ka wora awɔr na nɛ bɔrɛ be egbri ashunu na sɔ n shuli so.

⁴Bumo alɛ ka baŋ shuli so na nɛ n daa shin nɛ n sibɛ nseŋ naŋ nu ebɔl ka shi ebɔrɛso ŋ kaŋɛ ma: “Ta tɔɔnɛ be kebersobi m ber asɔ nɛ bɔrɛ be egbri ashunu na ka kaŋɛ na nsaa maŋ sibɛ asheŋ na n nase.” ⁵Ndoŋ nna nɛ malaika mo nɛ n daŋ wu nɛ e yil teku nɛ kasawule so na maŋ mbe enɔjiso so n yɔ ebɔrɛso ⁶nseŋ bɔ esa nɛ e wɔ ŋkpa to mbaanaayɔ na, emo nɛ e to ebɔrɛso nɛ asɔ nɛ a wɔ kumo to na kikɛ nseŋ to kasawule nɛ asɔ nɛ a wɔ kumo to na kikɛ nseŋ naŋ to teku nɛ asɔ nɛ a wɔ kumo to na kikɛ nseŋ kaŋɛ le: “K maaŋ naŋ chɛr nɛ saŋɛ na e fo. ⁷Ama saŋɛ nɛ malaika shunusopo na beeŋ foŋ mbe kabel na, Ebɔrɛ beeŋ shin nɛ mbe wulo be kesheŋ naseso na e fo kumo be ekar n lar efuli fanɛ kananɛ e daŋ kaŋɛ mbe anya nɛ b la anebiana na.”

⁸Ndoŋ nna nɛ n naŋ nu ebɔl mo nɛ k daŋ shi ebɔrɛso m ba nɛ n nu kumo na ka naŋ kaŋɛ ma le: “Choŋ n ya deŋi kawɔl sibɛsobi mo nɛ k bugi to a deŋ malaika mo nɛ e yil teku nɛ kasawule so na be enɔ to.” ⁹Nɛ n yɔ malaika na kutɔ n ya kaŋɛ mo fanɛ e ta kawɔl sibɛsobi na n sa ma nɛ e kaŋɛ ma: “Ta kumo n we. K beeŋ ki kerkra fo epun to, ama fo kɔnɔ to bre, k beeŋ wora ebel fanɛ mushoŋ.” ¹⁰Ndoŋ nna nɛ n deŋi kawɔl sibɛsobi na ashi malaika na be enɔ to n ta n we. K daŋ baŋ wora ma kɔnɔ to ebel nna fanɛ mushoŋ, ama ŋ ka ta kumo m min nɛ ma epun to wora ma kerkra. ¹¹Ndoŋ nna nɛ b naŋ kaŋɛ ma le: “A daga fanɛ fo naŋ lɔŋɛ n wu abɔrɛsheŋ ŋ kaŋɛ basa damta nɛ efuliana so ebi damta nɛ ŋgbarana to ebi damta nɛ bewura damta be asheŋ.”

Eshɛdajipo anyɔ be asheŋ

¹B daŋ ta kedibi ko fanɛ kekpabi nna n sa ma nseŋ kaŋɛ ma le: “Ta kumo n ya karga kananɛ Ebɔrɛ be lambu na sa nseŋ naŋ karga bɔrɛsure na nɛ basa nɛ b wɔ lambu na to a maŋ Ebɔrɛ so na gba. ²Ama sa maŋ ta kusɔ kargaso na ŋ karga lambu na be laŋ na bre, ŋkpal manɛ so, b ta ndoŋ nna n sa nnyamase, bumo alɛ beeŋ nɔkɔr kadegboŋ cheembi na to afɔl adena nɛ anyɔ. ³Ma alɛ beeŋ sa ma shɛdajipoana anyɔ eleŋ nɛ b wu abɔrɛsheŋ ŋ kaŋɛ amo be nchɛ kagboŋ nɛ alfa anyɔ nɛ adeshe na kikɛ to, amo be saŋɛ malɛ kikɛ to baaŋ buu kagbenejija be asɔbuuso.” ⁴Eshɛdajipo anyɔ na e la Ɔlif be ndibi anyɔ nɛ kefitilatɔl anyɔ mo nɛ amo kikɛ yil Enyɛnpe mo nɛ e wɔ kasawule ere na be anishito na. ⁵Nɛ ekama baa sha ketɔrɔ bumo, edɛ beeŋ shi bumo be nnɔ to m ba mur bumo doŋana. Kananɛ esa kama nɛ e beeŋ baa sha ketɔrɔ bumo beeŋ wu nna na. ⁶Basa anyɔ ere beeŋ baa kɔ eleŋ nɛ b tiŋ n shin nɛ bɔrɛ e sa maŋ shi awɔlpa so m ba, saŋɛ nɛ baaŋ baa wu abɔrɛsheŋ a kaŋɛ na kikɛ. Bumo alɛ nseŋ naa kɔ eleŋ nɛ b tiŋ n shin nɛ nchuana e ki ŋklaŋ nseŋ naŋ tiŋ n ta tɔrɔ be yiri kama saŋɛ damta kama nɛ baa sha n lɛ kasawule so.

⁷B kaŋ ji bumo be shɛda n loge, kusɔbɔya lubi mo nɛ e shi kakpa nɛ baa tre Abis na beeŋ ba kɔ bumo kena m pɔɔ bumo so nseŋ mɔ bumo ⁸nɛ bumo be eyurana e baa dese kadegboŋ na to be kubɔrbi ko so. Kade na du fanɛ Sodɔm nɛ Ijipt nna, amoso, Sodɔm nɛ Ijipt nɛ b nase kumo, kakpa koŋwule mo nɛ b daŋ kegbir bumo Nyɛnpe kedibi largato so na. ⁹Basa beeŋ shi basa kama to nɛ yiri kama to nɛ ŋgbar kama to nɛ efuliana so ebi to ŋ keni bumo be eyurana ka dese nchɛ asa nɛ bargato nseŋ kini keshin nɛ b puli amo. ¹⁰Kasawule so be basa be ŋgbene beeŋ fuli bumo ŋkpal basa anyɔ na be luwu so. Baaŋ ji bumo be amuana nseŋ kɛ ŋ kɛ abar asɔ ŋkpal kananɛ anebi anyɔ na daŋ bar kasawule ere so ebi tɔrɔ nsaa maŋ naa wɔtɔ na so.

¹¹Nchɛ nsa nɛ bargato na be kaman nɛ ŋkpa be efute shi Ebɔrɛ kutɔ m ba luri bumo to nɛ b niŋi to nɛ kufu pɛ basa na be ekama nɛ e wu bumo na ga. ¹²Ndoŋ nna nɛ b nu ebɔl ka shi ebɔrɛso ŋ kaŋɛ bumo: “Men dii a ba nfe.” Ndoŋ nna nɛ b luri awɔlpa to a yɔ ebɔrɛso nɛ bumo doŋana yil a keni bumo.

¹³Amo be saŋɛ na malɛ gbagba to nɛ kasawule be kebembeŋgboŋ ko ba beeŋ ndoŋ nɛ kadegboŋ na to be ntuŋ kudu be katuŋ koŋwuleso tɔr nɛ kebembeŋ na mɔ basa ŋgboŋ ashunu. Nɛ kufu pɛ basa nɛ b daŋ ka na nɛ b sa Ebɔrɛ nɛ e wɔ ebɔrɛso na kemaŋkura.

¹⁴‘Asheŋ maaŋ nyalɛ n sa basa’ nyɔsopo be saŋɛ na choŋ nna na, a ka gbrɛbi nɛ kesasopo e ba.

Kabel shunusopo na be asheŋ

¹⁵Ndoŋ nna nɛ malaika shunusopo na foŋ mbe kabel nɛ awɔr damtaana chɛ ashi ebɔrɛso a kaŋɛ le:

“Eleŋ mo nɛ k bee ji kuwura durnya ere so na ki an

Nyɛnpe nɛ mbe Kristo peya,

mo alɛ beeŋ ji kuwura na mbaanaayɔ.”

¹⁶Ndoŋ nna nɛ bejuŋkparpo adunyɔ nɛ ana nɛ b daŋ chena bumo be nwurputi so ashi Ebɔrɛ be anishito na gbir nseŋ dese kasawule m maŋ Ebɔrɛ so ¹⁷a kaŋɛ le:

“Enyɛnpetale Ebɔrɛ mo nɛ e daa wɔtɔ nseŋ kraa wɔtɔ na,

anyee chɔrɔ fo ga fanɛ fo ta fo eleŋgboŋ na n shuŋ

nseŋ fara nɛ fo ji kuwura naniere.

¹⁸Efuli so ebi daŋ nya agbo nna,

ama fo agbo be saŋɛ nɛ baaŋ ji bubuni demu na fo,

saŋɛ nɛ feeŋ ka fo anya kukɔ,

fo anebiana nɛ fo basa kikɛ, bekama nɛ baa ŋana fo ketre,

bewurbi nɛ begboŋi nyam be saŋɛ na fo.

Saŋɛ na fo nɛ fo mur basa nɛ baa jija

kasawule ere na.”

¹⁹Ndoŋ nna nɛ Ebɔrɛ be lambu nɛ k wɔ ebɔrɛso na bugi nɛ an wu mbe kɔnɔkoŋwule be ŋkre be deka ashi mbe lambu na to. Nɛ bɔrɛ nyɛkpɛ palpal m ponte to ŋ gbri n wɔtɔ nɛ kasawule gbuŋgbuŋ to nɛ abɔrɛjembubi gbɛgbɛsoana ko ba tɔr.

Kache ko nɛ kusɔ gbeyeso ko be asheŋ

¹N yil nna nɛ alemaŋkar be tɔɔnɛ be kusɔ ko lar ebɔrɛso. Kache ko daŋ buu epeŋi nsaa yil kufɔl malɛ so nɛ kuwurwuro ko malɛ kɔ achɛkpabi kuduanyɔ kumo to a wɔ mbe kumu so. ²E daŋ di kedampo nna n fara nɛ e kurge nɛ k bee besa mo nɛ e bee shu awɔrso. ³Ndoŋ nna nɛ tɔɔnɛ be kusɔ ko malɛ naŋ lar ebɔrɛso. Kusɔ gbeyeso peper gboŋgboŋi ko nna nɛ k daa du fanɛ laŋchaŋ n daa kɔ amu ashunu nɛ alambɛ kudu nɛ nwurwuro ashunu malɛ wɔ mbe amu so. ⁴Ndoŋ nna nɛ kusɔ na ta kumo be kodu ŋ kpata achɛkpabi be ntuŋ nsa be katuŋ koŋwuleso ashi awɔlpa so m ba lɛ kasawule.

Kumo be kaman nɛ kusɔ gbeyeso na kilgi a yil kache nɛ e di kedampo na be anishito nɛ kache na e kurge nɛ e ta kebia na n we epul na to. ⁵Ndoŋ nna nɛ kache na kurge ebinyɛn mo nɛ e beeŋ ba ta kagbene kpakpaso n ji efuli kama so ebi kuwura. Kache na ka kurge kebia na nɛ b ba fuu kebia na epul na to n yɔ Ebɔrɛ nɛ mbe kuwurputi ase. ⁶Nɛ kache na malɛ shile n luri kiyi to be kakpa nɛ Ebɔrɛ lɔŋɛ n yili mo fanɛ e baa wɔ ndoŋ a nya kekeniso nchɛ kagboŋ nɛ alfa anyɔ nɛ adeshe na.

B ka kɔ kena ashi ebɔrɛso be asheŋ

⁷Kumo be kaman nɛ kena ku ebɔrɛso. Malaika nɛ baa tre Maikel na nɛ mbe emalaika nɛ kusɔ gbeyeso na nɛ mbe emalaika e daa kɔ abar. ⁸Ama kusɔ gbeyeso na nɛ mbe emalaika be eleŋ daa maŋ fo Maikel nɛ mbe emalaika peya so, amoso, b daa maŋ naŋ nya kakpa ebɔrɛso n chena. ⁹B daŋ ta kusɔ gbeyeso gboŋgboŋi na nna n lɛ kasawule so. Mo e la kusɔkpaŋ dra nɛ baa tre alubipo ŋko Setani mo nɛ e bee fule durnya kikɛ na. B daŋ ta mo nɛ mbe kaman to ebi kikɛ nna n lɛ kasawule.

¹⁰Ndoŋ nna nɛ n nu ebɔl ko awɔrso ashi ebɔrɛso ka bee kaŋɛ le:

“Naniere bre Ebɔrɛ ŋini mbe eleŋ

fanɛ mo e la Ewurgboŋ na

nɛ mbe kumɔlga na ba.

Naniere bre mbe Kristo na ŋini mbe eleŋ,

ŋkpal manɛ so,

b ta an niopibiana be alubiwupo mo

nɛ e bee wu bumo kulubi kapa nɛ kanyɛ

ashi Ebɔrɛ be anishito na n lɛ kasawule.

¹¹Kpakpafɔlbi na be ŋklaŋ na

nɛ bumo be shɛda be kamalga na

nɛ b ta m pɔɔ mo so,

ŋkpal manɛ so,

b daa maŋ sha bumo be amu ga hale saŋɛ

nɛ b daa shin nɛ b luri luwu to gba na.

¹²Amoso, ebɔrɛsoana nɛ menyi

nɛ men wɔ amo to na kikɛ,

men shin nɛ men be ŋgbene e fuli menyi.

Ama asheŋ maaŋ nyalɛ n sa

kasawule nɛ etekuana bre,

ŋkpal manɛ so,

alubipo na gbelge n yɔ menyi kutɔ nɛ agbo damta,

ŋkpal manɛ so,

e nyi mbe saŋɛ ka maŋ naa shi.”

Kusɔ gbeyeso nɛ kache na be asheŋ

¹³Kusɔ gbeyeso na ka wu fanɛ b ta mo n lɛ kasawule so nɛ e ta m bɛ kache mo nɛ e daŋ kurge ebiyɛn na so. ¹⁴Ama b daŋ sa kache na kusoregboŋ be atɛ anyɔ nna fanɛ e ta n firgi n shile kusɔkpaŋ na n yɔ kiyi to, mbe kakpa, fanɛ b ya kaa keni mo so nfɛ asa nɛ bargato. ¹⁵Ama kusɔkpaŋ na daŋ fuu nchu nna ashi mbe kɔnɔ to fanɛ lɔr na a sha fanɛ a tu kache na n ta amo be eleŋ ŋ kpata mo n lɛ. ¹⁶Ama kasawule e daŋ chɛ kache na to m bugi kumo be kɔnɔ to n ta lɔr mo nɛ kusɔ gbeyeso na daŋ fuu ashi kumo be kɔnɔ to na n nuu. ¹⁷Ndoŋ nna nɛ kusɔ gbeyeso na diewu ga n wora kache na nseŋ kilgi m bɛta n yɔ nɛ e ya kɔ kache na be kaman to ebi nɛ b ka na kena. Bumo e la basa nɛ baa ta Ebɔrɛ be mmalga naseso a wɔtɔ bumo be ŋgbene to nsaa ji Yesu be shɛda na.

¹⁸Nɛ kusɔ gbeyeso na kilgi a yil teku ase be shishɛr so.

Asɔbɔya anyɔ ko be asheŋ

¹Ndoŋ nna nɛ n naŋ wu kusɔbɔya gboŋgboŋi ko ka shi teku to a lar a kɔ alambɛ kudu nɛ amu ashunu nɛ nwurwuro kudu wɔ mbe alambɛana na so. Amu na malɛ be kekama so b daŋ sibɛ ketre mo nɛ k bee ji Ebɔrɛ emɔrɔ nna n deŋi kumo so. ²Kusɔbɔya mo nɛ n daŋ wu na daa du fanɛ karmɛ nna nɛ mbe aya malɛ daa du fanɛ shishiri be aya nɛ mbe kɔnɔ malɛ daa du fanɛ buluŋ be kɔnɔ. Kusɔ gbeyeso na daŋ sa kusɔbɔya na mo gbagba be eleŋ nɛ mbe kuwurputi nɛ eleŋ damta nna. ³Kusɔbɔya na be amu na be kuko daa du fanɛ k ka daŋ nya doro mo nɛ k beeŋ tiŋ m mɔ mo nna, ama b daŋ chɛ loŋ be doro na, nɛ mamachi pɛ durnya kikɛ nɛ b bɛ kusɔbɔya na so. ⁴Basa daa maŋ kusɔ gbeyeso na so nna ŋkpal e ka daŋ ta mbe eleŋ n sa kusɔbɔya na so nseŋ maŋ kusɔbɔya na gba so nseŋ bishi le: “Wanɛ malɛ e naa du fanɛ kusɔbɔya ere? Wanɛ e naaŋ tiŋ ŋ kɔ mo kena?” ⁵B daŋ sa kusɔbɔya na kɔnɔ nna nɛ e malga ŋkpenso be mmalga nɛ mmalga mo nɛ a bee ji Ebɔrɛ emɔrɔ nseŋ nya ekpa nɛ e ji mbe eleŋ afɔl adena nɛ anyɔ. ⁶Ndoŋ nna nɛ e bugi mbe kɔnɔ a malga a gbiti Ebɔrɛ nseŋ ta mmalga lubi n jija mbe ketre nɛ kakpa nɛ e wɔ nɛ bumo nɛ b wɔ ebɔrɛso na kikɛ. ⁷B daŋ sa mo ekpa nna fanɛ e kɔ Ebɔrɛ be basa kena m pɔɔ bumo so. B daŋ naŋ sa mo eleŋ yiri kama to ebi so nɛ basa kama to ebi so nɛ ŋgbar kama to ebi so nɛ efuli kama so ebi so nna. ⁸Basa nɛ b wɔ kasawule ere so kikɛ beeŋ ba maŋ kusɔbɔya na so. Loŋ be basa na e la bekama nɛ b maŋ sibɛ bumo be atre n wɔtɔ Kpakpafɔlbi nɛ b daŋ mɔ durnya be sososo na kikɛ be kawɔl na to na.

⁹Ekama nɛ e kɔ asoe e nu. ¹⁰Ekama nɛ k dese fanɛ e yɔ kenyaya to, e beeŋ yɔ kenyaya to. Ekama nɛ k dese fanɛ tokobi nɛ baaŋ ta m mɔ mo, tokobi nɛ baaŋ ta m mɔ mo.

Kede e naa ŋini fanɛ a daga fanɛ Ebɔrɛ be basa e baa kɔ kanyiti nɛ yirda.

Kusɔbɔya nɛ k shi kasawule so n lar na be asheŋ

¹¹Ndoŋ nna nɛ n naŋ wu kusɔbɔya ko ka shi kasawule so n lar. E daa kɔ alambɛ anyɔ nna fanɛ Kpakpafɔlbi peya, ama mo alɛ daa malga nna fanɛ kusɔ gbeyeso gboŋgboŋi nɛ k du fanɛ laŋchaŋ na nna. ¹²E daŋ ta kusɔbɔya juŋkparso na be eleŋ kikɛ nna n wora asheŋ ashi mbe anishito nseŋ shin nɛ kasawule nɛ kumo be basa e maŋ kusɔbɔya juŋkparso nɛ b daŋ chɛ mbe doro mo nɛ k daa beeŋ tiŋ m mɔ mo na so. ¹³E daŋ wora emamachisheŋ gboŋgboŋi nna hale n shin nɛ edɛ shi ebɔrɛso m ba kasawule nɛ ekama wu amo. ¹⁴Ŋkpal emamachisheŋ mo nɛ b daŋ sa mo eleŋ fanɛ e wora ashi kusɔbɔya juŋkparso na be anishito so, e daŋ fule durnya ere to ebi nna. E daŋ kaŋɛ bumo nɛ b wɔ durnya ere to kikɛ fanɛ b pɔr kaduli nɛ k baa la bunyaŋ a sa kusɔbɔya mo nɛ b daŋ ta tokobi n doro ama nɛ e kraa wɔtɔ na. ¹⁵B daŋ sa kusɔbɔya nyɔsopo na eleŋ nna fanɛ e fute ŋkpa n wɔtɔ kusɔbɔya juŋkparso na be kaduli to, saŋɛ na so, e beeŋ malga nseŋ shin nɛ b mɔ bekama nɛ b kini kemaŋ mo so na. ¹⁶Kusɔbɔya na daŋ tintiŋ ekama nna, bewurbi nɛ begboŋi kikɛ, damawuraana nɛ betirpo, anya nɛ bumo nɛ b wɔ bumo be amu fanɛ ekama e nya ndulgi mbe enɔjiso so ŋko mbe kɔsɔto so. ¹⁷Saŋɛ na so, esa kikɛ maaŋ tiŋ n tɔ shɛŋ ŋko n fa kusɔ ko ama amodoŋwura baa kɔ ndulgi mo nɛ k la kusɔbɔya na be ketre na nna ŋko mbe ketre be lamba nna.

¹⁸Kede bre la kanyiasheŋ be asheŋ nna. Ekama malɛ nɛ e kɔ nfɛra e pin kusɔbɔya na be lamba na to, ŋkpal manɛ so, k la dimɛdi be lamba nna. Lamba na e la alfa ashe nɛ adeshe nɛ ashe.

Bumo nɛ b sɔ n yige na be kashɛ be asheŋ

¹Nɛ n naŋ keni n wu Kpakpafɔlbi na ka yil Zayɔn be kebee so. Mo nɛ basa ŋgboŋ kalfa nɛ ŋgboŋ adena nɛ ŋgboŋ ana nɛ b daŋ sibɛ mbe ketre nɛ mo Tuto na be ketre n deŋi bumo be nsɔto so na e daa yil. ²Ndoŋ nna nɛ n nu ebɔl ko ka shi ebɔrɛso ŋ gbri m ba fanɛ nchu damta ka bee shile nseŋ daŋ naa du fanɛ bɔrɛ ka bee gbri eleŋso na. Ebɔl mo nɛ n daŋ nu na daŋ naa du fanɛ ejaŋjilaŋlampoana ka bee laŋ bumo be ejaŋjilaŋ nna. ³Nɛ b boŋ kashɛ popɔr ashi kuwurputi na be anishito nɛ asɔbɔya keniso ana nɛ bejuŋkparpo na be anishito. Esa kikɛ daa maaŋ tiŋ ŋ koya kashɛ na she basa ŋgboŋ kalfa nɛ ŋgboŋ adena nɛ ŋgboŋ ana mo nɛ b sɔ n yige kasawule so na. ⁴Bumo e la basa nɛ b maŋ di beche n jija bumo be amu na, b daa maŋ nyi beche. Kaplɛkama nɛ Kpakpafɔlbi na bee yɔ, b bɛ mo so nna. B daŋ sɔ bumo ashi edimɛdi to nna n yige n shin nɛ b du fanɛ asɔrso juŋkparso mo nɛ baaŋ ta n lara sarga n sa Ebɔrɛ nɛ Kpakpafɔlbi na. ⁵Efɛsheŋ kama daa maŋ shi bumo be nnɔ to n lar kikɛ, kulubisheŋ kama daa maŋ do bumo be ekama so.

Emalaika asa na be asheŋ

⁶Ndoŋ nna nɛ n naŋ wu malaika ko ka wɔ esoso kumu so a firgi nsaa kɔ baru lela nɛ k wɔtɔ mbaanaayɔ na to nɛ e bɔ kumo n sa basa nɛ b wɔ kasawule ere so n sa efuli kama so ebi nɛ yiri kama to ebi nɛ ŋgbar kama to ebi nɛ basa kama to ebi. ⁷Kumo be kaman nɛ e kaŋɛ awɔrso fanɛ: “Men baa ŋana Ebɔrɛ nsaa maŋkura mo, ŋkpal manɛ so, mbe demuji be saŋɛ na fo naniere. Men baa maŋ emo nɛ e to ebɔrɛso nɛ kasawule nɛ teku nɛ mbombiana kikɛ na so.”

⁸Kede be kaman nɛ n naŋ wu malaika nyɔsopo ka ta m bɛ ejuŋkparso na so a kaŋɛ le: “E tɔr, Babilɔn be kade lempo na tɔr. E shin nɛ efuli kikɛ so ebi nuu mbe kesakalealubisheŋ be nsa na.”

⁹Ndoŋ nna nɛ malaika sasopo ta m bɛ bumo so a kaŋɛ awɔrso le: “Ekama nɛ e bee maŋ kusɔbɔya na nɛ mbe kaduli na so nseŋ nya mbe ndulgi mbe kɔsɔto so ŋko mbe enɔ so, ¹⁰amodoŋwura beeŋ nuu Ebɔrɛ be agboso be nsa nɛ b maŋ ta shɛŋ n cha amo to na nseŋ duga amo n wɔtɔ Ebɔrɛ be agbo be kawiebi to na gba. Baaŋ ta edɛ nɛ jɛrbi n wɔtɔ mo ebesa to, emalaika cheembiana na nɛ Kpakpafɔlbi na be anishito. ¹¹Edɛ mo nɛ a bee sa bumo ebesa na be edishi baa wɔtɔ nna mbaanaayɔ. Kapa nɛ kanyɛ bumo nɛ baa maŋ kusɔbɔya na nɛ mbe kaduli na so ŋko ekama nɛ e nya mbe ketre be lamba na daa maa kɔ ewushi kikɛ.”

¹²Kede e naa ŋini fanɛ a daga fanɛ Ebɔrɛ be basa, bumo e la basa nɛ baa ta Ebɔrɛ be mmalga naseso a wɔtɔ bumo be ŋgbene to nsaa maa lar Yesu kaman na e baa kɔ kanyiti.

¹³Ndoŋ nna nɛ n nu ebɔl ka shi ebɔrɛso ŋ kaŋɛ ma le: “Sibɛ le n nase: Kagbenefuli la bekama nɛ b wɔ Enyɛnpe to nseŋ wu naniere mbaanaayɔ na peya nna.” Nɛ Kiyoyu Cheeŋ na kaŋɛ: “Kashenteŋto, baaŋ wushi ashi bumo be kegben ere to, ŋkpal manɛ so, bumo be aworbi beeŋ ba bɛ bumo so n yɔ.”

Kasawule be kasɔteŋi na be asheŋ

¹⁴Ŋ ka naŋ keni nɛ n wu kuwɔlpa fuful ko nɛ esa ko malɛ du fanɛ nyiŋgbasa pibinyɛn na ka tase ndoŋ a kɔ shuwa be kuwurwuro mbe kumu so nɛ loji jiso ko malɛ wɔ mbe enɔ to. ¹⁵Ndoŋ nna nɛ malaika ko malɛ lar ebɔrɛso be bɔrɛlambu na to n tre esa nɛ e daa tase kuwɔlpa na so na awɔrso ŋ kaŋɛ mo le: “Ta fo loji n teŋi asɔ, ŋkpal manɛ so, kasɔteŋi be jemanɛ fo, ŋkpal manɛ so, kasawule be asɔ nɛ baaŋ teŋi na be jemanɛ na fo.” ¹⁶Ndoŋ nna nɛ emo nɛ e daa tase kuwɔlpa na so na fili mbe loji na to ŋ gbaari kasawule so nɛ kasawule so be asɔ kikɛ teŋi.

¹⁷Nɛ malaika ko malɛ ba shi ebɔrɛso be bɔrɛlambu na to n lar, mo alɛ gba a kɔ loji jiso to. ¹⁸Bede malɛ kikɛ be kaman nɛ malaika ko malɛ nɛ e daa kɔ edɛ be eleŋ shi bɔrɛsure na akpa m ba tre emo nɛ e daa kɔ loji jiso na to na awɔrso ŋ kaŋɛ mo le: “Ta fo loji jiso na ŋ ku kasawule so be waindibi be asɔrso na, ŋkpal manɛ so, asɔrso na bel.” ¹⁹Ndoŋ nna nɛ malaika na fili mbe loji na to m ba kasawule so n chala kumo be waindibi be asɔrso na nseŋ ta amo ŋ kpa n wɔtɔ Ebɔrɛ be agbo be kusɔ nyaŋasɔrso na to. ²⁰Nɛ b nyaŋ asɔrso na ashi kusɔ nyaŋasɔrso na to ashi kadegboŋ na be ekarso nɛ ŋklaŋ lar asɔ na to ashi amo be kemaŋ na to n teŋi to n dese n fo emayɛl alfa anyɔ nɛ amo be jeŋgreŋ malɛ daŋ fo fanɛ kekargato be ayadra anu.

Emalaika ashunu nɛ etɔrɔ ashunu na be asheŋ

¹Ndoŋ nna nɛ n naŋ wu alemaŋkar be kesheŋ ko awɔlpa so. K daa la mamachi be kesheŋ gboŋ ko nna. Emalaika ashunu nɛ etɔrɔ ashunu mo nɛ a daa la lalaloge be etɔrɔ na e daa la, ŋkpal manɛ so, amo be kaman nɛ Ebɔrɛ be agbo bee wushi.

²Ndoŋ nna nɛ n wu kusɔ ko ka du fanɛ digi nɛ edɛ be weato a dese fanɛ teku nɛ basa nɛ b daŋ kɔ kusɔbɔya na nɛ mbe kaduli na nɛ mbe ketre be lamba na m pɔɔ so na yil m mata teku na. B daa yil nna a kɔ ejaŋjilaŋ ko nɛ Ebɔrɛ daŋ ta n sa bumo na to. ³B daa yil nna a kɔ amo a boŋ anebi Mosis, Ebɔrɛ be kenya na be kashɛ nɛ Kpakpafɔlbi na be kashɛ a kaŋɛ:

“Enyɛnpetale Ebɔrɛ,

Enyɛnpe fo asheŋ woraso kɔ mamachi pasaa!

Fo nɛ fo la efuli kama be Ewura na,

fo ekpa niŋi nsaa kɔ kashenteŋ amo to pasaa!

⁴O, Enyɛnpe, wanɛ e wɔtɔ ŋkaa maaŋ ŋana fo

nsaa maaŋ sa fo ketre na kemaŋkura?

Ŋkpal manɛ so,

fo nawule e du cheembi.

Efuli kama so ebi malɛ kikɛ beeŋ ba kachako

m ba maŋ fo so,

ŋkpal manɛ so, fo demuji niŋisoana na lar efuli.”

⁵Kede be kaman nɛ ŋ keni n wu shɛda be wajɛbu na be bɔrɛlambu ka bugi a yil ebɔrɛso. ⁶Ndoŋ nna nɛ emalaika ashunu ko nɛ etɔrɔ ashunu ko shi bɔrɛlambu na to n lar. B daŋ buu m buu asɔbuuso lela nna nɛ a walɛ so n fuli le parrbi nseŋ ta shuwa be kreso peŋgeleŋ peŋgelembi ko ŋ kre bumo be ntetoana so. ⁷Ndoŋ nna nɛ asɔbɔya keniso ana na be eko ta shuwa be ntishaŋ ashunu mo nɛ Ebɔrɛ mo nɛ e wɔ ŋkpa to mbaanaayɔ na be agbo daŋ bɔlɔ m bɔlɔ amo na n sa emalaika ashunu na. ⁸Ade be kaman nɛ edishi shi Ebɔrɛ be kemaŋkura to nɛ mbe eleŋ to n sɔ bɔrɛlambu na kikɛ to nɛ esa kikɛ malɛ daa maŋ tiŋ n luri bɔrɛlambu na to hale nɛ emalaika ashunu na be etɔrɔ ashunu na ya loge.

Ebɔrɛ be agbo be ntishaŋ ashunu be asheŋ

¹Ndoŋ nna nɛ n nu ebɔl ko ka shi ebɔrɛso be bɔrɛlambu na to m ba malga awɔrso a kaŋɛ a kaŋɛ emalaika ashunu na le: “Men ya chulgi Ebɔrɛ be agbo nɛ k bɔlɔ ntishaŋ ashunu na to n wurge kasawule so.”

²Nɛ malaika juŋkparso na ta mbe katishaŋ nɛ agbo na n chulgi n wurge kasawule so nɛ achuu lubi besaso ko ba basa nɛ b kɔ kusɔbɔya na be ndulgi nɛ bumo nɛ b maŋ kumo be kaduli so na so.

³Ndoŋ nna nɛ malaika nyɔsopo na ta mbe katishaŋ nɛ agbo na n chulgi n wurge teku so nɛ nchu na ki fanɛ dimɛdi mo nɛ e wu be ŋklaŋ nɛ kusɔ keniso kama nɛ k daa wɔ teku na to na wu.

⁴Malaika nyɔsopo na be kaman nɛ esasopo na malɛ ta mbe katishaŋ nɛ agbo na n chulgi n wurge elɔrana nɛ mbombiana so nɛ a kilgi ŋklaŋ. ⁵Ndoŋ nna nɛ n nu malaika mo nɛ e daa kɔ nchuana na be eleŋ na ka kaŋɛ le:

“Fo nɛ fo daa wɔtɔ nseŋ kraa wɔtɔ na,

wora asheŋ m bɔla ekpa ashi le be demuji ere to.

⁶Ŋkpal b ka mɔ fo basa laraso nɛ anebiana n lara bumo be ŋklaŋ so,

fo alɛ gba ta ŋklaŋ n sa bumo nɛ b nuu.

Kusɔ nɛ k baŋ daga bumo nna na.”

⁷Nɛ n nu ebɔl ka shi bɔrɛsure na akpa ŋ kaŋɛ:

“Enyɛnpetale Enyɛnpe Ebɔrɛ,

fo demuji kɔ kashenteŋ nseŋ niŋi pasaa.”

⁸Ndoŋ nna nɛ malaika nasopo na ta mbe katishaŋ nɛ agbo na n chulgi n wurge epeŋi so nɛ k nya eleŋ n chɔɔ basa fanɛ edɛ. ⁹Edɛ damta na daŋ chɔɔ basa ga nɛ b malga ŋ gbiti Ebɔrɛ mo nɛ e kɔ etɔrɔ na be eleŋ na be ketre nseŋ kini kelar bumo be alubi to m maŋkura mo.

¹⁰Malaika nasopo na be kaman nɛ enusopo na malɛ ta mbe katishaŋ nɛ agbo na n chulgi n wurge kusɔbɔya na be kuwurputi so, nɛ mbe kakpa nɛ e bee ji kuwura kikɛ ki tentembiri gbrum nɛ basa duŋ bumo be adonduloŋ ebesa so ga ¹¹nseŋ malga ŋ gbiti Ebɔrɛ nɛ e wɔ ebɔrɛso na. B daŋ wora loŋ nna ŋkpal bumo be ebesa na nɛ bumo be achuuana na so so, ama b daŋ kini kelar bumo be alubi mo nɛ b daŋ wora na bre to.

¹²Nɛ malaika shesopo na malɛ ta mbe katishaŋ nɛ agbo na n chulgi n wurge lɔrgboŋ nɛ baa tre Yufreetes na so nɛ kumo be nchu kikɛ feeto nɛ k wɔl n lɔŋɛ ekpa a dese a jo bewura mo nɛ b shi bɔrɛfito na.

¹³Ndoŋ nna nɛ n wu ayoyu lubi asa ko ka du fanɛ etaŋgbaga n shi kusɔ gbeyeso na nɛ kusɔbɔya juŋkparso na nɛ anebi fɛpo na be nnɔ to n lar. ¹⁴A la mbuibi lubiana be ayoyu nna a wora emamachisheŋ a yɔ durnya ere kikɛ be bewura kutɔ n ya kaa chala bumo a jo Enyɛnpetale Ebɔrɛ be kachɛgboŋ be kena na.

¹⁵“Men nu nfe, meeŋ ba menyi to fanɛ eyu. Kagbenefuli baa la ekama nɛ e maa di, mo alɛ nsaa kɔ mbe asɔbuuso to na peya nna, saŋɛ na so, e maaŋ delge so n nite nɛ anishinyɔr e pɛ mo.” ¹⁶Ndoŋ nna nɛ ayoyu na bar bewura abar so ashi kakpa nɛ Hibruwebi bee tre Aamagɛdɔn na.

¹⁷Nɛ malaika shunusopo na ta mbe katishaŋ nɛ agbo na n chulgi n wurge esoso nɛ ebɔl ko shi bɔrɛlambu na to awɔrso ŋ kaŋɛ: “Asheŋ na wora.” ¹⁸Ndoŋ nna nɛ bɔrɛ nyɛkpɛ pelpel nseŋ gbri m ponte to n wɔtɔ nɛ kebembeŋgboŋ ko beeŋ kasawule so ga. Dimɛdi ka fara a wɔ kasawule so kikɛ kebembeŋ kama maŋ naŋ lubi fanɛ kumo. Kede e daŋ lubi ga a chɔ kebembeŋ kama. ¹⁹Nɛ kadegboŋ na barga to ntuŋ nsa so nɛ durnya to be ndegboŋ kama mur. Nɛ Ebɔrɛ nyiŋi Babilɔn lempo nseŋ ta katishaŋ mo nɛ k bɔlɔ mbe agbo damta be nsa na n sa fanɛ e nuu. ²⁰Esa daa maŋ naa wu kebeegboŋ kama, nɛ kepla kama malɛ daŋ foe. ²¹Nɛ abɔrɛjembubi gboŋgboŋiana ko nɛ amo be egbɛ daa la egbɛ to be pɔŋ kalfa na shi awɔlpa so m ba tɔr basa so. Nɛ basa malga ŋ gbiti Ebɔrɛ ŋkpal abɔrɛjembubi na be tɔrɔ na so, ŋkpal manɛ so, tɔrɔ lubi gbagba e daa la.

Sakalechegboŋ na be asheŋ

¹Ndoŋ nna nɛ emalaika ashunu mo nɛ b daa kɔ ntishaŋ ashunu na be eko ba ŋ kutɔ m ba kaŋɛ ma: “Ba nɛ ŋ ŋini fo kananɛ baaŋ gberge sakalechegboŋ na kusoe. Mo e chena nchu damtaana so na. ²Kasawule ere so be bewurgboŋ nɛ sakalechegboŋ na ji abar kesakalea so nɛ durnya ere to be basa malɛ nuu mbe kesakalea be nsa m boo.” ³Kede be kaman nɛ malaika na keta ma kiyoyu to n yɔ kiyi to, ndoŋ nɛ n ya wu kache ko nɛ e tase kusɔbɔya peper ko so nɛ b sibɛ kabɔrɛtegeso be atre n deŋi kusɔbɔya na kikɛ so. Kusɔbɔya na daa kɔ amu ashunu nɛ alambɛ kudu nna. ⁴Kache na daŋ buu jilmaso be wajɛ peper kunɔkunɔ nɛ wajɛ peper soo nna nɛ shuwa nɛ ajembubi lela nɛ amo be yawu du kpakpa na nɛ abitasɔ kikɛ wɔ mo so a nyɛkpɛ palpal. E daa kɔ shuwa be kawiebi mo nɛ k bɔlɔ alemaŋkar be alubi be asɔ nɛ kesakalea be eyurpi to nna. ⁵Le be wulo be ketre ere nɛ b daŋ sibɛ n deŋi mbe kasɔto so: “Babilɔn lempo, kesakaleajipoana bumo nio nɛ emo nɛ kasawule so be alemaŋkar be alubi kikɛ shi mo kutɔ.” ⁶N daŋ wu fanɛ kache na daŋ nuu Ebɔrɛ be basa laraso be ŋklaŋ nɛ bumo nɛ b daŋ ji Yesu be shɛda na be ŋklaŋ nna m boo.

Ŋ ka wu mo nɛ k wora ma kanaŋ ko ga. ⁷Ndoŋ nna nɛ malaika na kaŋɛ ma: “Manɛ e ba nɛ kesheŋ ere wora fo kanaŋ ko loŋ? Meeŋ bugi kache na nɛ kusɔbɔya nɛ e bee dii nɛ e kɔ amu ashunu nɛ alambɛ kudu na be wulo be kesheŋ na to ŋ ŋini fo.

⁸Kusɔbɔya mo nɛ fo wu na daa wɔ ŋkpa to nna, ama naniere e maŋ naa wɔ ŋkpa to. A ka gbrɛbi nɛ e shi kemaŋ nɛ baa tre Abis na to n lar nɛ b mur mo. Basa nɛ b wɔ durnya ere to nɛ b maŋ sibɛ bumo be atre n wɔtɔ ŋkpa be kawɔl na to saŋɛ nɛ durnya ere fara kikɛ na kaŋ wu kusɔbɔya na, bumo be nnɔ beeŋ mɔ bumo, ŋkpal manɛ so, e daa wɔ ŋkpa to nna, ama naniere e maŋ naa wɔtɔ, ama mo alɛ kraa beeŋ naŋ ba. ⁹Kede bre la kagbene mo nɛ k kɔ kanyiasheŋ be demu nna. Amu ashunu na la abeebi ashunu mo nɛ kache na tase so nna, nɛ amo alɛ la bewurgboŋ ashunu. ¹⁰Bumo be benu maŋ naa wɔtɔ nɛ ekoŋwule kraa wɔtɔ nɛ a ka ekoŋwule nɛ e lar. Mo alɛ kaŋ ba, a daga fanɛ e chena gbrɛbi. ¹¹Kusɔbɔya mo nɛ e daa wɔ ŋkpa to ŋkaa maŋ naa wɔtɔ na e la ewura burwasopo. E la beshunu mo nɛ b fara m ba na to be eko nna a yɔ nɛ e ya mur. ¹²Alambɛ kudu mo nɛ fo wu na la bewurgboŋ kudu ko nna nɛ b maŋ naŋ fara a ji kuwura, ama baaŋ nya ekpa n tu kusɔbɔya na n ji kuwura awa koŋwule. ¹³Bumo basa kudu na kikɛ kɔ nfɛra koŋwule nna a kɔ bumo be eleŋ nɛ ekpa nɛ b kɔ kikɛ a sa kusɔbɔya na. ¹⁴Baaŋ kɔ Kpakpafɔlbi na kena, ama Kpakpafɔlbi na beeŋ pɔɔ bumo so, mo e la benyɛnpe to be Enyɛnpe nɛ bewura to be Ewura na. Saŋɛ na so, mo nɛ mbe basa treso nɛ bumo koŋwule na la basa laraso nseŋ naa la mbe bebɛsopo mo nɛ b maa lar mo kaman na beeŋ baa wɔtɔ.” ¹⁵Ndoŋ nna nɛ malaika na naŋ kaŋɛ ma: “Nchuana nɛ fo daŋ wu na, kakpa nɛ sakaleche na tase na be kifi to e la basa be nnaŋ to nɛ ejimaŋ nɛ efuliana so ebi nɛ ŋgbarana to ebi. ¹⁶Kusɔbɔya na nɛ alambɛ kudu mo nɛ fo wu na beeŋ kishi sakaleche na. Baaŋ sɔ kusɔ kama nɛ e kɔ ŋ ka mo eyurkpaŋ n yili. Baaŋ we mo nseŋ ta edɛ m mur mo. ¹⁷Ŋkpal manɛ so, Ebɔrɛ ta kusɔ nɛ e bee sha nɛ k wora na n wɔtɔ bumo be ŋgbene to nɛ baa sha kewora loŋ. Bumo kikɛ beeŋ nya kɔnɔkoŋwule n ta bumo be eleŋ n sa kusɔbɔya na nɛ e ji kuwura loŋ hale nɛ Ebɔrɛ be kɔnɔ e ya bɔla. ¹⁸Kache mo nɛ fo wu na e la kadegboŋ mo nɛ k bee ji kuwura kasawule so be bewura so na.”

Babilɔn be ketɔr be asheŋ

¹Kede be kaman nɛ n wu malaika ko ka shi ebɔrɛso a ba. E daa kɔ eleŋ ga nɛ mbe kananɛ e bee kpa edɛ na malɛ daŋ fuli to n sɔ kasawule so be kaplɛkama. ²E ka bee ba na nɛ e ponte eleŋso ŋ kaŋɛ:

“K tɔr, Babilɔn be kade lempo tɔr!

Babilɔn ki alizinaana be kowu nɛ ayoyu lubiana kikɛ be eŋanakpa

nɛ mbuibi jiga mo nɛ basa kishi kikɛ be eŋanakpa.

³Ŋkpal manɛ so,

efuli kama so ebi nuu mbe

kesakalealubisheŋ be nsa na.

Kasawule ere so be bewurgboŋ

tu mo n ji kesakalea

nɛ durnya to be yawujipoana na malɛ bɔla mbe dama

be kebaawɔtɔ to n dii dama.”

⁴N daŋ naŋ nu ebɔl ko ka shi ebɔrɛso ŋ kaŋɛ:

“Ma basa, men lar mbe asheŋ to,

saŋɛ na so men maaŋ tu mo

n luri mbe alubi na to,

saŋɛ na so men maaŋ nya mbe etɔrɔ na be kekama.

⁵Ŋkpal manɛ so, mbe alubi dii n deŋi abar so nna n ya fo ebɔrɛso

nɛ Ebɔrɛ malɛ bee nyiŋi mbe alubi na kikɛ.

⁶Men wora mo kananɛ e wora menyi na gbagba chap.

Men laŋɛ kusɔ kama nɛ e wora menyi na

ŋ ka mo loŋ be ale anyɔ.

Men shin nɛ mbe kawiebi

nɛ e ta n wora nsa n sa menyi na e bɔlɔ a kɔ eleŋ

ale anyɔ a chɔ amo nɛ e sa menyi na.

⁷Men sa mo tɔrɔ nɛ kagbenejija ga

nɛ a fo fanɛ kananɛ e daŋ sa mbe kumu kemaŋkura nɛ dama na,

ŋkpal manɛ so, le nɛ e wɔtɔ a kaŋɛ mbe kumu:

‘Ewurche e la ma nɛ n tase.

M maŋ la ekulpoche, kagbenejija maaŋ tu ma kikɛ.’

⁸Ŋkpal loŋ so,

mbe etɔrɔ kikɛ beeŋ tu mo kachɛ koŋwule.

A beeŋ baa la luwu nɛ kushu nɛ akoŋ.

Edɛ beeŋ ji mo, ŋkpal manɛ so, Enyɛnpe Ebɔrɛ

nɛ e bee ji mo demu na

la elempo nna.”

⁹Kasawule so be bewura mo nɛ b ji kesakalea nseŋ naŋ tu mo n ji mbe dama na kaŋ wu edɛ mo nɛ a bee chɔɔ mo na be edishi, baaŋ boŋ to n shu anishichubi ŋkpal mo so. ¹⁰Ebesa mo nɛ e beeŋ ji na be asheŋ beeŋ pɛ bumo kufu nɛ b yili kufɔ nseŋ kaŋɛ:

“O fo, kadegboŋ ere,

asheŋ nya fo, asheŋ nya fo.

O Babilɔn, eleŋ be kadegboŋ,

awa koŋwule nawule to nɛ fo ta

n nya fo kasogberge na.”

¹¹Kasawule so be yawujipoana malɛ gba beeŋ boŋ to nseŋ shu ŋkpal mo so, ŋkpal esa kikɛ ka maaŋ naŋ tɔ bumo be asɔ so. ¹²B nyi esa kikɛ ka maaŋ naŋ tɔ bumo be eshuwa nɛ egbiti nɛ ajembubi lela nɛ amo be yawu du kpakpa na nɛ abitasɔ nɛ ewajɛ fuful lela nɛ jilmaso be ewajɛ peper kpaw nɛ ago be ewajɛ nɛ ewajɛ peper kunɔkunɔ nɛ ndibi be nnaŋ to nɛ amo be efɛa wɔ ebel nɛ asɔ nɛ b ta ejebotenyi n lɔŋɛ nɛ asɔwurbi kikɛ nɛ b ta yawu kpakpaso be ndibi ŋko ntishaŋ peper ŋko abɛlsoana ŋko awarabi lelaana n lɔŋɛ. ¹³Baaŋ shu, ŋkpal manɛ so, b nyi esa kikɛ ka maaŋ naŋ tɔ bumo be ndibi be asɔrso mo nɛ basa kɔ a wora ŋku dufɛsoana na nseŋ naa nyi b ka maaŋ tɔ asɔ nɛ b kɔ a wora ŋku mɛlɛmɛlɛbi nɛ bumo be duwu nɛ mir nɛ fraŋkinsensi nɛ bumo be nsa nɛ ɔlifs be ŋku nɛ nyifu peso nɛ bumo be atuwe nɛ bumo be ana nɛ mbolpɔ nɛ egbaŋɛ nɛ egbaŋɛturkoana nɛ anya, kumo e la fanɛ basa be ayoyu gbagba na. ¹⁴Baaŋ kaŋɛ mo le: “Asɔ lela mo nɛ fo daŋ ta fo kagbene n wɔtɔ fanɛ fo nya na kikɛ choŋ nna na. Fo dama nɛ fo kemaŋkura na kikɛ foe, esa kama malɛ maaŋ naŋ wu asɔ na kikɛ.” ¹⁵Eyawujipoana nɛ b fa asɔ na m bɔla fo so n ji yawu n dii dama na beeŋ ŋana mbe tɔrɔ na nseŋ yili kufɔ m boŋ to n shu anishichubi. ¹⁶Baaŋ boŋ to ŋ kaŋɛ le: “O kadegboŋ, asheŋ nya fo, asheŋ nya fo, fo nɛ fo daa buu asɔ fuful lela nɛ jilmaso be ewajɛ peper kpaw nɛ ewajɛ peper kunɔkunɔ nseŋ daŋ ta eshuwa nɛ ajembubi lela nɛ amo be yawu du kpakpa na nɛ abitasɔ a mea fo eyur kikɛ so na, ama keni, awa koŋwule to nɛ loŋ be dama damta na kikɛ mur na.” ¹⁷Ekuloŋgboŋ be katɛrɛ nimuso kikɛ nɛ bekama nɛ b wɔ ekuloŋgboŋ to a nite teku so, befarpoana na kikɛ nɛ bekama nyam nɛ baa bɔla nchu so a ji na kikɛ beeŋ yili kufɔ ¹⁸n shu awɔrso ŋkpal b ka wu edɛ mo nɛ a bee chɔɔ mo na be edishi so ŋ kaŋɛ: “Cha, kade mo malɛ e daŋ naŋ fo kadegboŋ ere so?” ¹⁹Kumo be kaman nɛ b ta shishɛr n wurge bumo be amuana so ŋkeŋ boŋ to n shu anishichubi ŋ kaŋɛ:

“O kadegboŋ,

asheŋ nya fo, asheŋ nya fo.

Kadegboŋ ere to nɛ bekama nɛ b kɔ ekuloŋgboŋana

a shuŋ tekuana so na bɔla mbe

dama so n dii dama,

ŋkeshin nɛ awa koŋwule to nɛ e mur kuraa!

²⁰Ebɔrɛsoebi,

men shin nɛ men be ŋgbene e fuli menyi,

ŋkpal mbe kemur ere so.

Ebɔrɛ be basa laraso nɛ beshuŋipoana nɛ anebiana,

men shin nɛ men be ŋgbene e fuli menyi, ŋkpal manɛ so,

Ebɔrɛ gberge mo kusoe nna ŋkpal kusɔ nɛ e wora menyi na so.”

²¹Ndoŋ nna nɛ malaika lempo ko maŋ kejembu ko so,

kumo nɛ kuboogboŋ sasa

n ta kumo ŋ kpa n wɔtɔ teku to nseŋ kaŋɛ:

“Loŋ nɛ baaŋ ta Babilɔn be kadegboŋ n lɛ kasawule so eleŋso

nɛ ekama maaŋ naŋ wu kumo kikɛ.

²²Esa maaŋ naŋ nu ejaŋjilaŋlampoana

be asheŋ ŋko nshɛbompoana

be asheŋ ŋko nlopifompoana

be asheŋ ŋko mbelfompoana be asheŋ fo to kikɛ.

Esa maaŋ naŋ wu basa

nɛ baa shuŋ a ji yawu kama fo to.

Esa malɛ maŋ naŋ

nu kubo kikɛ be egbri fo to.

²³Esa maaŋ naŋ wu fitila be kefulto fo to kikɛ ŋko n naŋ

nu kejafɔ bumo kulana nɛ kejafɔana be ebɔlana ashi fo to.

Fo yawujipoana e daa la durnya ere to kikɛ be bejuŋkparpo,

fo alɛ be ŋkilgi e daŋ shin nɛ durnya kikɛ foe ekpa.”

²⁴Mo, Babilɔn na to nɛ b daŋ wu anebiana

nɛ Ebɔrɛ be basa laraso nɛ bekama nyam

nɛ b daŋ mɔ kasawule ere so na be ŋklaŋ.

¹Ade be kaman nɛ n nu kusɔ ko fanɛ jimaŋ damta ko be ebɔlana ka shi ebɔrɛso a boŋ to awɔrso a kaŋɛ le:

“Halleluya.

Kumɔlga nɛ kemaŋkura nɛ eleŋ la an be Ebɔrɛ na peya nna.

²Mo alɛ be demuji kɔ kashenteŋ nna nseŋ niŋi.

E gberge sakalechegboŋ mo nɛ e ta mbe kesakaleasheŋ

n jija kasawule ere na kusoe.

E bishi mo kuwule ŋkpal mbe anya be ŋklaŋ so.”

³Ndoŋ nna nɛ basa na naŋ boŋ to ŋ kaŋɛ:

“Halleluya. Edishi mo nɛ a bee shi mo to

a lar na bee dii nna mbaanaayɔ.”

⁴Nɛ bejuŋkparpo adunyɔ nɛ ana na nɛ asɔbɔya keniso ana gbir n dese kasawule m maŋ Ebɔrɛ mo nɛ e daa tase kuwurputi so na so nseŋ kaŋɛ awɔrso:

“Amɛn. Halleluya.”

⁵Ndoŋ nna nɛ ebɔl shi kuwurputi na akpa ŋ kaŋɛ:

“Menyi nɛ men la mbe anya na,

men di an be Ebɔrɛ na epaŋ,

menyi nɛ men ŋana mo na kikɛ,

bewurbi nɛ begboŋi kikɛ,

men di mo epaŋ.”

⁶Mmalga ere be kaman nɛ n nu kusɔ ko ka gbri fanɛ jimaŋ damta ka wora awɔr na. Awɔr na daŋ naa gbri fanɛ nchu damta ka bee shile nna nseŋ daŋ naa gbri fanɛ bɔrɛ ka bee ponte to a boŋ to a kaŋɛ le:

“Halleluya.

Ŋkpal manɛ so, an Nyɛnpetale Enyɛnpe Ebɔrɛ na e wɔ kuwura a ji.

⁷Men shin nɛ anyi be ŋgbene

e fuli anyi n dese nɛ an sa mo kemaŋkura.

Ŋkpal manɛ so,

Kpakpafɔlbi be kejafɔachɛ na fo

nɛ mbe kejafɔ malɛ gba bela ase n loge.

⁸E nya wajɛ fuful lela nyɛkpɛso nɛ k walɛ so nɛ e buu.

Kusɔbuuso lela na

e naa yili fanɛ Ebɔrɛ be basa laraso

be alelasheŋ be aworbi.”

⁹Ndoŋ nna nɛ malaika na kaŋɛ ma le: “Sibɛ n nase fanɛ: Kagbenefuli la bumo nɛ b tre fanɛ b ba Kpakpafɔlbi na be kejafɔ be kejigboŋ to na.” Kumo be kaman nɛ e kaŋɛ le n ti so: “Ade la Ebɔrɛ be kashenteŋ be mmalga nna.” ¹⁰Ndoŋ nna nɛ ŋ gbir n dese kasawule mbe anishito nɛ m maŋ mo so nɛ e kaŋɛ ma: “A maŋ daga fanɛ fo wora loŋ, ŋkpal manɛ so, n la fo barkasa kenya nna fanɛ fo nɛ fo niopibiana nɛ b bɛ Yesu be shɛda be ekpa so na, Ebɔrɛ e daga fanɛ fo baa maŋ mo so.” Ŋkpal manɛ so, kashenteŋ mo nɛ Yesu lara ŋ ŋini na e la Kiyoyu mo nɛ e bee leŋ anebiana na to.

Gbaŋɛ fuful be ediipo na be asheŋ

¹¹Ndoŋ nna nɛ n wu ebɔrɛso ka bugi nɛ gbaŋɛ fuful yil. Kumo be ediipo be ketre e la Kebaayɛawora nɛ Kashenteŋ. Ekpa niŋiso nɛ e bee bɔla a ji demu nsaa kɔ kumo a kɔ kena. ¹²Mbe anishi daa du fanɛ edɛ nɛ a bee suse nna wuloŋwuloŋ nɛ nwurwuro damta malɛ wɔ mbe kumu so. B daŋ sibɛ ketre ko nna n deŋi mo so nɛ mo nawule kpeŋ nyi kumo. ¹³Mbe kusɔbuuso naŋ nyɔɔ ŋklaŋ nna nɛ mbe ketre daa la Ebɔrɛ be Kamalga. ¹⁴Ebɔrɛso be benapo daŋ buu wajɛ fuful lela nɛ a walɛ so n fuli parr nna n dii egbaŋɛ fuful m bɛ mo so. ¹⁵Ndoŋ nna nɛ tokobi jiso ko mo nɛ e beeŋ ta ŋ ŋe efuliana so ebi n nase lar mbe kɔnɔ to. E beeŋ ta kagbene kpakpaso n ji kuwura bumo so. Mo gbagba e naaŋ nyaŋ asɔ nɛ a wɔ Enyɛnpetale Ebɔrɛ be agbo be kusɔ nyaŋasɔrso na to. ¹⁶Ketre mo nɛ k daa deŋ mbe piŋi nɛ mbe kebembi so e la:

“BEWURA TO BE EWURA NƐ BENYƐNPE TO BE ENYƐNPE.”

¹⁷Nɛ n wu malaika ko ka yil epeŋi so nseŋ malga awɔrso ŋ kaŋɛ mbuibi nɛ a bee firgi kumu so na kikɛ le: “Men ba. Men shɛr Ebɔrɛ be kejigboŋ na ase ¹⁸n ji bewurgboŋana be eyurana nɛ benapo be benimuana be eyurana nɛ basa lempoana be eyurana nɛ egbaŋɛ nɛ amo be bediipo nɛ basa kikɛ be eyurana nɛ bumo nɛ b wɔ bumo be amu nɛ bumo nɛ b la anya nɛ bewurbi nɛ begboŋi kikɛ be eyurana.”

¹⁹Ndoŋ nna nɛ n wu kusɔbɔya na nɛ kasawule ere so be bewura nɛ bumo be benapo ka shɛr m ba nɛ b ba kɔ gbaŋɛ na be ediipo na nɛ mbe benapo kena. ²⁰Nɛ b pɛ kusɔbɔya na n ta anebi fɛpo mo nɛ e daŋ wora emamachisheŋ damta kusɔbɔya na be anishito na n ti so. Emamachisheŋ na nɛ e daŋ ta n fule bumo nɛ b daŋ nya kusɔbɔya na be ndulgi na nseŋ maŋ mbe kaduli so na. B daŋ ta kusɔbɔya na nɛ anebi fɛpo na nna ŋ kpa n wɔtɔ edɛ mo nɛ jɛrbi wɔ amo to a chɔɔ na to nna nɛ b kraa keni. ²¹Kumo be kaman nɛ b ta tokobi mo nɛ k daŋ shi gbaŋɛ na be ediipo na be kɔnɔ to n lar m mɔ bumo nɛ b daŋ ka na kikɛ nɛ mbuibi ba ji bumo be eyurana m moɛ ŋ kini.

Nfɛ kagboŋ na be asheŋ

¹Nɛ n wu malaika ko ka shi ebɔrɛso a ba nɛ kemaŋ mo nɛ baa tre Abis na be esɔfi wɔ mo kutɔ, mo alɛ nseŋ naa kɔ ŋgbɛlɛbi gboŋgboŋi ko mbe enɔ to. ²Ndoŋ nna nɛ e ya nyaŋ kusɔ gbeyeso, mo e la dra na kikɛ be kusɔkpaŋ nɛ baa tre mo koŋwule alubipo ŋko Setani na ŋ kre mo n nase nfɛ kagboŋ. ³E ka kre mo n loge nɛ e ta mo n lɛ n wɔtɔ kemaŋ nɛ baa tre Abis to na nseŋ ber kumo so n ta tɔɔnɛ be kebersobi n dulgi kumo n ti so, saŋɛ na so e maaŋ naŋ nya n fule efuliana so ebi, ama nfɛ kagboŋ na ya choŋ nna. Nfɛ kagboŋ na be kaman a daga fanɛ b saŋɛ mo n lɛ gbrɛbi.

⁴Nɛ n naŋ wu kuwurputiana nɛ bumo nɛ b daa tase amo so na kikɛ. B daŋ sa bumo ekpa nna fanɛ b ji basa demu. Ma alɛ daŋ naŋ wu basa nɛ b daŋ mɔ ŋkpal b ka daŋ ji Yesu be shɛda so nɛ ŋkpal b ka daŋ malga Ebɔrɛ be kamalga na so na be ayoyu. Bumo alɛ daa maŋ maŋ kusɔbɔya na ŋko mbe kaduli na so, bumo alɛ daa maŋ naa kɔ mbe ndulgi na bumo be nsɔto so ŋko bumo be enɔana so. B daŋ naŋ nya ŋkpa nna n tu Kristo n ji kuwura nfɛ kagboŋ. ⁵Bubuni mo nɛ b daŋ ka na bre daa maŋ tiŋi luwu to ama nfɛ kagboŋ na e ba choŋ.

⁶Ketiŋi luwu to juŋkparso nna na. Kagbenefuli nɛ kebaawɔtɔ cheembi la bekama nɛ b ti bumo nɛ baaŋ tiŋi luwu be ketiŋi juŋkparso na to so. Luwu nyɔsopo na maŋ kɔ eleŋ bumo so. Baaŋ ki Ebɔrɛ nɛ Kristo be bɔrɛmatapoana, bumo alɛ beeŋ tu mo n ji kuwura nfɛ kagboŋ.

Setani be kemur be asheŋ

⁷Nfɛ kagboŋ na be kaman, baaŋ saŋɛ Setani ashi mbe kabuti to. ⁸Nɛ e lar n fule efuliana so ebi ashi kasawule so be abonfu ana kikɛ, bumo e la Gɔg nɛ Magɔg ebi na n shɛr bumo nɛ b kɔ kena. Bumo be keshi daa sa fanɛ teku ase be shishɛr. ⁹Nɛ b yili kasawule be mparto be kaba ko n nite m ba choŋ kaba ko ŋ kulti Ebɔrɛ be basa laraso n wɔtɔ bumo be kakpa, kumo e la kadegboŋ shaso na. Ama edɛ daŋ shi esoso nna m ba mur basa nɛ b daŋ kulti Ebɔrɛ be basa n wɔtɔ na. ¹⁰Ndoŋ nna nɛ b ta alubipo mo nɛ e daŋ fule bumo na n lɛ n wɔtɔ edɛ mo nɛ jɛrbi wɔ amo to a chɔɔ na be kepa to, kakpa nɛ b daŋ ta kusɔbɔya na nɛ anebi fɛpo na n lɛ to na. Baaŋ tɔrɔ bumo ga kapa nɛ kanyɛ mbaanaayɔ.

B ka ji bumo nɛ b wu na demu be asheŋ

¹¹Ndoŋ nna nɛ n naŋ wu kuwurputigboŋ fuful ko nɛ esa nɛ e daa tase kumo so. Nɛ kasawule nɛ awɔlpa foe mbe anishito a maŋ naa kɔ kakpa ndoŋ. ¹²Nɛ n wu bubuni, begboŋi nɛ bewurbi kikɛ nɛ b yil kuwurputi na akpa nɛ b bugi nwɔl. Amo be kaman nɛ b bugi kawɔl ko malɛ, kumo e la ŋkpa be kawɔl na. Nɛ b bɔla nwɔlana na to ŋ keni n wu asɔ nɛ ebuni kama daŋ wora n yili amo so n ji mo demu. ¹³Nɛ etekuana shin nɛ basa nɛ b daŋ wu amo to na lar nɛ luwu nɛ bubuni be kakpa malɛ gba shin nɛ basa nɛ b daŋ wu a wɔ amo to na malɛ gba lar nɛ b yili asɔ nɛ ekama daŋ wora so n ji mo demu. ¹⁴Ndoŋ nna nɛ b ta luwu nɛ bubuni be kakpa malɛ n lɛ n wɔtɔ edɛ be kepa to. Edɛ be kepa na e la luwu nyɔsopo na. ¹⁵Esa kama nɛ b daa maŋ sibɛ mbe ketre n wɔtɔ ŋkpa be kawɔl na to, b ta mo nna n lɛ edɛ be kepa na to.

Ebɔrɛso popɔr nɛ kasawule popɔr na be asheŋ

¹Ndoŋ nna nɛ n wu ebɔrɛso popɔr nɛ kasawule popɔr, ŋkpal manɛ so, ebɔrɛso dra na nɛ kasawule dra na daa maŋ naa wɔtɔ nɛ etekuana malɛ gba daa maŋ naa wɔtɔ. ²Nɛ n wu kadegboŋ cheembi na, kumo e la Jerusalɛm popɔr na ka shi Ebɔrɛ kutɔ ashi ebɔrɛso fanɛ kejafɔ ka mea to nɛ e tu mo kul na. ³Kumo be kaman nɛ n nu ebɔl ko awɔrso ka shi kuwurputi na akpa ŋ kaŋɛ: “Naniere bre, basa to e ki kakpa nɛ Ebɔrɛ ba nɛ e ba kaa wɔ. Mo nɛ basa beeŋ ba kaa wɔtɔ nɛ b baa la mbe basa. Ebɔrɛ gbagba e naaŋ ba kaa wɔ bumo to a la bumo be Ebɔrɛ. ⁴E beeŋ kpra anishichubi kikɛ ashi bumo be anishito, luwu maaŋ naa wɔtɔ, luwu so be kagbenejija nɛ kushu maaŋ naa wɔtɔ, ebesa malɛ gba maaŋ naa wɔtɔ, ŋkpal manɛ so, amo be saŋɛ nɛ sososo be asheŋ kikɛ beeŋ choŋ.” ⁵Nɛ emo nɛ e daa tase kuwurputi na so na kaŋɛ le: “Mee ta kusɔ kama nna a ki kepopɔr.” Kumo be kaman nɛ e naŋ kaŋɛ ma le: “Sibɛ asɔ ere n nase, ŋkpal manɛ so, a la mmalga mo nɛ a la kashenteŋ nna nseŋ naa la asɔ nɛ baaŋ tiŋ n yirda.” ⁶Nɛ e naŋ kaŋɛ: “K teŋ wora. Ma e la Alfa nɛ Omega, Faraŋko nɛ Lalaloge. Ekama nɛ achukoŋ kɔ mo, meeŋ jɔ nchu ashi ŋkpa be kebuye to n sa mo nɛ e nuu ŋkaa maaŋ ka shɛŋ. ⁷Ekama nɛ e kɔ m pɔɔ so beeŋ nya ade kikɛ, nɛ m baa la amodoŋwura be Ebɔrɛ nɛ mo alɛ e baa la m pibi. ⁸Ama befupo bre nɛ bumo nɛ b maa yirda na nɛ basa jiga nɛ bemɔpo nɛ kesakaleasheŋ wuraana nɛ bumo nɛ baa wora ŋ kilgi nɛ agbirshumpoana nɛ befɛpo kikɛ bre kikɛ be kaboŋ e la edɛ be kepa nɛ jɛrbi wɔ kumo to a chɔɔ na to. Ndoŋ be luwu e la luwu nyɔsopo na.”

Jerusalɛm popɔr na be asheŋ

⁹Ndoŋ nna nɛ emalaika ashunu mo nɛ b daa kɔ ntishaŋ ashunu nɛ a daŋ bɔlɔ lalaloge be etɔrɔ ashunu na be eko ba ŋ kutɔ m ba kaŋɛ ma le: “Ba nɛ ŋ ŋini fo kejafɔ na, Kpakpafɔlbi na be eche na.” ¹⁰Ndoŋ nna nɛ e ta ma kiyoyu to n yɔ kebee gboŋgboŋi jeŋgreŋ ko so n ya ŋini ma kadegboŋ cheembi na, kumo e la Jerusalɛm na nɛ k shi Ebɔrɛ kutɔ ashi ebɔrɛso a ba. ¹¹Nɛ kadegboŋ na kikɛ sɔ Ebɔrɛ be kemaŋkura a nyɛkpɛ so palpal fanɛ kejembubi mo nɛ baa tre jaspa nɛ k bee wu to fanɛ abɔrɛjembubi na. ¹²Kade na daa kɔ egbal gboŋgboŋi ko nna nsaa kɔ mbuna kuduanyɔ nɛ emalaika kuduanyɔ yil a keni amo so. B daŋ sibɛ Israɛl be nnaŋ kuduanyɔ na be ekama be ketre nna n deŋi kabuna kama so. ¹³Mbuna asa e daa wɔ epeŋilarkpa be kaba so nɛ mbuna asa wɔ kelargato be esoso be kaba so nɛ mbuna asa wɔ kelargato be kaseto be kaba so nɛ mbuna asa wɔ epeŋitɔrkpa be kaba so. ¹⁴Kadegboŋ na be egbal daa kɔ egbaltɔlase kuduanyɔ nɛ gbaltɔlase kama malɛ daa kɔ Kpakpafɔlbi na be beshuŋipo kuduanyɔ na be ekoŋwule kama be ketre.

¹⁵Malaika mo nɛ e daŋ malga ŋ kutɔ na daa kɔ shuwa be kekpabi nɛ b kɔ a karga asɔ enɔ to nna nɛ e ta ŋ karga kadegboŋ na nɛ kumo be mbuna nɛ kumo be egbal. ¹⁶Kade na kikɛ daŋ bonte nna a dese nɛ kumo be nteŋ nɛ mparto kikɛ sasa. Malaika na ka ta mbe kekpabi na ŋ karga kade na, kumo be nteŋ daa wɔ emayɛl kagboŋ nɛ alfa anu nɛ kumo be mparto nɛ kumo be jeŋgreŋ malɛ gba kikɛ daa sa loŋ. ¹⁷Kumo be kaman nɛ malaika na karga egbal na be jeŋgreŋ n nya ayadra alfa anyɔ nɛ kuduashe. Basa be kekargato nɛ malaika na daŋ ta ŋ karga na. ¹⁸Jaspa be ajembu nɛ b daŋ ta m pɔr egbal na nseŋ ta shuwa gbagba malɛ nɛ a bee wu to fanɛ digi n wora kadegboŋ na malɛ kikɛ. ¹⁹Ajembu nɛ amo be yawu du kpakpa be yiri kikɛ malɛ nɛ b daŋ ta n ji kadegboŋ na be egbaltɔlaseana kebita. Jaspa be kejembu nɛ b daŋ ta m mea gbaltɔlase juŋkparso na n ta kejembu mo nɛ baa tre safiri na n wora kenyɔsopo na n ta chalkedoni malɛ n wora gbaltɔlase sasopo na nseŋ ta kejembu mo nɛ baa tre ɛmeraldi na n wora kenasopo. ²⁰Sardɔniksi nɛ b daŋ ta n wora gbaltɔlase nusopo nseŋ ta sardie n wora keshesopo na n ta krisolit n wora keshunusopo na. Kuburwasopo na peya e la berɛl, kekpanusopo e la kejembu mo nɛ baa tre topas na, kudusopo peya e la krisoprasi nɛ kudukakosopo peya la jasinɛf. Kejembu kuduanyɔsopo mo nɛ b daŋ ta n wora gbaltɔlase kuduanyɔsopo na nɛ baa tre ametiste. ²¹Mbuna kuduanyɔ na daa la asɔ nɛ baa tre apɛl na nna. Pɛɛl koŋwule nɛ b daŋ ta n lɔŋɛ kabuna na be kekama. Kadegboŋ na be kubɔrbi daa la shuwa gbagba nna a wu to fanɛ digi.

²²N daa maŋ wu bɔrɛlambu kama kadegboŋ na to, ŋkpal manɛ so, Enyɛnpetale Enyɛnpe Ebɔrɛ nɛ Kpakpafɔlbi na e la ndoŋ be bɔrɛlambu. ²³Epeŋi be kenyaŋɛ ŋko kufɔl be kefulto ndoŋ be asheŋ daa maŋ tir kadegboŋ na to ebi kikɛ, ŋkpal manɛ so, Ebɔrɛ be kemaŋkura e daa nyaŋɛ a yuu kade na so nɛ Kpakpafɔlbi na malɛ la kumo be fitila. ²⁴Kumo be kefulto nɛ efuliana so ebi beeŋ wu n nite nɛ kasawule ere so be bewurgboŋana e bar bumo be kemaŋkura kumo to. ²⁵Ndoŋ be mbuna maa ti kikɛ, ŋkpal manɛ so, kanyɛ maa biri ndoŋ kikɛ. ²⁶Baaŋ bar efuliana so be kemaŋkura nɛ amo be bunyaŋ kade na to. ²⁷Eyurpi be kusɔ kikɛ maaŋ luri ndoŋ kikɛ. Esa kama malɛ gba nɛ e bee wora anishinyɔrsheŋ ŋko a fule, e maaŋ luri ndoŋ kikɛ. Bumo nɛ b sibɛ bumo be atre n wɔtɔ Kpakpafɔlbi na be ŋkpa be kawɔl na to na nawule e naaŋ luri ndoŋ.

Ŋkpa be lɔr be asheŋ

¹Malaika na daŋ ŋini ma ŋkpa be lɔr be nchu gba nɛ a bee wu to fanɛ abɔrɛjembubi ashi Ebɔrɛ nɛ Kpakpafɔlbi be kuwurputiakpa ²a shile a bɔla kadegboŋ na be kubɔrbi be nferinto so. Ŋkpa be kedibi daa yil lɔr na be kaba kama so nna a sɔr kumo be asɔrso ale kuduanyɔ, kumo e la fanɛ kufɔl kikɛ to nɛ kumo be asɔrso. Kedibi na be afantaŋ e la efuliana be kechɛ be asɔ. ³Kusɔ kama nɛ Ebɔrɛ so kɔnɔ maaŋ naa wɔ ndoŋ. Ebɔrɛ nɛ Kpakpafɔlbi na be kuwurputi e naaŋ baa wɔ ndoŋ nɛ mbe anya e baa maŋ mo so. ⁴Baaŋ wu mbe anishiakpa nɛ mbe ketre malɛ e baa deŋ bumo be nsɔtoana so. ⁵Kanyɛ maaŋ naa wɔ ndoŋ. Fitila be kefulto ŋko epeŋi be kefulto be asheŋ maaŋ naŋ tir bumo, ŋkpal manɛ so, Enyɛnpe Ebɔrɛ e naaŋ baa sa bumo kefulto. Bumo alɛ beeŋ ji kuwura mbaanaayɔ.

⁶Nɛ malaika na kaŋɛ ma le: “Mmalga ere la kashenteŋ nna nɛ baaŋ tiŋ n yirda amo. Amo alɛ so nɛ Enyɛnpe Ebɔrɛ malɛ ta mbe Kiyoyu na n sa mbe anebi nseŋ shuŋi mbe malaika fanɛ e ba ŋini mbe anya asɔ nɛ a maaŋ naŋ chɛr nseŋ wora na kikɛ. ⁷Yesu yɛ: ‘Men keni, m maaŋ naŋ chɛr nseŋ ba. Kagbenefuli beeŋ baa la ekama nɛ e bee ta mmalgawuŋkaŋɛ nɛ a wɔ kawɔl ere to ere a wɔtɔ mbe kagbene to peya nna.’ ”

⁸Ma Jɔn e nu nseŋ wu asɔ ere kikɛ. Ma alɛ ka daŋ nu amo nseŋ wu amo nɛ ŋ gbir n dese kasawule malaika mo nɛ e daa ŋini ma asɔana na be anishito nɛ m maŋ mo so ⁹nɛ e kaŋɛ ma le: “A maŋ daga fanɛ fo wora loŋ. Ma alɛ gba la fo nɛ fo niopibiana anebiana nɛ bumo nɛ baa ta kawɔl ere to be mmalga a wɔtɔ bumo be ŋgbene to na bumo barkasa kenya nna. Ebɔrɛ e daga fanɛ fo baa maŋ mo so.”

¹⁰Kede be kaman nɛ e kaŋɛ ma: “Sa maŋ kaŋ ta le be mmalgawuŋkaŋɛ ere ŋ ŋana wulo to, ŋkpal manɛ so, jemanɛ na bee taga to. ¹¹Esa kama nɛ e bee wora alubi e baa kraa wora amo, ekama malɛ nɛ e kɔ eyurpi mo to e baa kraa du loŋ. Ekama nɛ e bee wora alela e baa kraa wora alela na nɛ ekama malɛ nɛ e du cheembi e baa kraa du cheembi loŋ.”

¹²E yɛ: “Keni nfe, m maaŋ naŋ chɛr nseŋ ba. Ma alɛ kɔ ma kakɔka nna a ba nɛ m ba yili kanaŋkama nɛ ekama shuŋ so ŋ ka mo. ¹³Ma e la Alfa nɛ Omega, Faraŋko nɛ Lalaloge nɛ Ejuŋkparpo nɛ Emantopo na. ¹⁴Kagbenefuli la bekama nɛ b fɔr bumo be epiŋi nɛ a lar so nseŋ nya ekpa nɛ b ji ŋkpa be kedibi na be asɔrso nseŋ naŋ nya m bɔla mbuna to na n luri kadegboŋ na to na peya nna. ¹⁵Bumo nɛ b la njɔnɔ nɛ basa nɛ baa wora ŋ kilgi nɛ kesakaleawuraana nɛ bemɔpo nɛ agbirshumpoana nɛ esa kama nɛ e bee sha nsaa bɛ efɛsheŋ kama so na nawule e maŋ wɔ kadegboŋ na to.

¹⁶Ma Yesu e shuŋi ma malaika nɛ e ba ta le be shɛda be kubɔya ere m bɔ n sa asɔriana na. N la Ewura Deevid be kanaŋ to be Ejuŋkparpo nna nseŋ naa la mo Nanabi nɛ kachipurso be Nyanwuleji fuliso parr nna.”

¹⁷Ndoŋ nna nɛ Kiyoyu na nɛ kejafɔ na kaŋɛ: “Ba.” Ekama malɛ gba nɛ e nu loŋ e kaŋɛ: “Ba.” Ekama nɛ achukoŋ kɔ mo e ba, ekama malɛ nɛ e bee sha e ba sɔ ŋkpa be nchu na n nuu ŋkaa maaŋ ka shɛŋ.

¹⁸Mee fiɛ ekama nɛ e nu kewuŋkaŋɛ ere be mmalga mo nɛ a wɔ kawɔl ere to ere so nna fanɛ ekama nɛ e ta kusɔ kama n ti amo so, Ebɔrɛ beeŋ ta etɔrɔ mo nɛ b malga amo be asheŋ kawɔl ere to ere n ti amodoŋwura so. ¹⁹Ekama malɛ nɛ e lara mmalga ashi abɔrɛsheŋ wuŋkaŋɛ be kawɔl ere to, Ebɔrɛ beeŋ lara mbe kachigeso ashi ŋkpa be kedibi be asɔrso na to nseŋ naŋ lara mbe kachigeso ashi kadegboŋ cheembi nɛ b malga kumo nɛ ŋkpa be kedibi sɔrso be kananɛ a du be asheŋ ashi kawɔl ere to na.

²⁰Esa nɛ e bee ji asheŋ ere be shɛda e naa kaŋɛ fanɛ: “Kashenteŋto, m maaŋ naŋ chɛr nseŋ ba.” Amɛn, Enyɛnpe Yesu, ba naniere! ²¹Enyɛnpe Yesu be kuwɔr be kakɛ e baa wɔ Ebɔrɛ be basa kikɛ so. Amɛn.