NSHƐ

NSHƐ

BE KAWƆL

SOSOSO

(Nshɛ 1—41)

Kashenteŋ be kagbenefuli be asheŋ

¹Kagbenefuli la bekama nɛ b maa sɔ

alubiworapoana be kasotoji,

ŋko a kute alubiworapoana to

a wora asheŋ,

ŋko a tu basa nɛ b maŋ kɔ saŋɛ

a sa Ebɔrɛ na peya nna.

²Bumo be kagbenefuli bee shi

Enyɛnpe Ebɔrɛ na be keŋini

be kebaawɔtɔ to nna;

nɛ kumo be loŋ malɛ

wɔ bumo be nfɛra to

kapa nɛ kanyɛ.

³Loŋ be basa du fanɛ

boŋkarase be ndibi

nɛ a bee sɔr asɔrso

saŋɛ nɛ k daga na nna.

Amo be afantaŋ maa

gbaŋgbaŋ kikɛ.

Kusɔ kama nɛ baa wora

bee nite nɛnɛ nna a sa bumo.

⁴Ama mannɛ loŋ nɛ k du

n sa alubiworapoana bre.

Bumo ere du fanɛ asɔ be afɔfɔ

nɛ afu bee foŋ n ya kaa lɛ nna.

⁵Ebɔrɛ be demujiachɛ na,

alubiworapoana kikɛ beeŋ ji n tɔr.

Ebɔrɛ beeŋ barga bumo

ashi basa nɛ baa ŋana mo

nsaa wora asheŋ

nɛ a niŋi ekpa na kutɔ.

⁶Enyɛnpe Ebɔrɛ na e naa kuŋ

loŋ be basa nsaa ŋini bumo ekpa.

Ama alubiworapoana bre be ekpa

kɔ bumo nna a yɔ kemur to.

Ebɔrɛ be ewura laraso be asheŋ

¹Manɛ nna nɛ efuliana na

bee kre ŋkre lubi loŋ?

Manɛ nna nɛ amo be basa

bee kre asheŋ fuloŋ?

²Nɛ manɛ nna nɛ amo be bewura

nɛ bejuŋkparpoana bee wora kɔnɔ

a kini kenu n sa Enyɛnpe Ebɔrɛ

nɛ mbe esa lara so na?

³Le nɛ baa kaŋɛ:

“Men shin nɛ an suge anyi be amu

ashi bumo be enɔ to,

nseŋ nya anyi be amu a ji.”

⁴Ebɔrɛ tase mbe kuwurputi so

esoso nna ŋ kplaŋ bumo so,

nsaa mushe bumo.

⁵Enyɛnpe Ebɔrɛ fɛa bumo so agbo so,

nɛ kufu pɛ bumo ga, nɛ e kaŋɛ bumo le:

⁶“M buu ma ewura nna n chena Zayɔn

nɛ k la ma kebee cheembi na so

ashi Jerusalɛm to.”

⁷Nɛ ewura na kaŋɛ le:

“Meeŋ bɔ kɔnɔ nɛ Enyɛnpe Ebɔrɛ na

nase n sa ma na be kubɔya.”

E yɛ: “Fo e la m pibinyɛn na;

kabre, ŋ ki fo tuto.

⁸Amoso kule ma,

nɛ n ta efuliana ere kikɛ n sa fo;

nseŋ shin nɛ durnya ere kikɛ

e ki feya.

⁹Feeŋ ta fo kebɛlso be kuwurkpabi

n ji amo so kuwura.

Fo alɛ beeŋ bure amo to

fanɛ ebɔ be kapuya na

¹⁰Amoso menyi bewura e kaŋ asoe

n nu le be kefiɛso ere;

Menyi, durnya to be bejuŋkparpo

e koya le be asheŋ ere.

¹¹Men ta kufu nɛ kechicha chicha

a shuŋ Ebɔrɛ, nseŋ shin nɛ

men be ŋgbene e fuli.

¹²Men baa jɔŋɛ a bunyaŋ mo pibi na,

nɛ mannɛ aloŋ e beeŋ nya agbo

epul to m mur menyi.

E bee nɛfa nsaa kuŋ bekama

nɛ baa shile a yɔ mo kutɔ na nna.”

Saŋɛ nɛ Ewura David bee shile mo pibinyɛn Absalɔm be kena na nɛ e boŋ kashɛ ere.

¹N nyɛnpe Ebɔrɛ,

ŋ kɔ bedoŋ damta ga.

Basa damta e naa kɔ ma.

²Baa malga a gbiti ma nna

a kaŋɛ le:

“Ebɔrɛ maaŋ mɔlga mo.”

³Ama, fo Enyɛnpe Ebɔrɛ na,

e naa kuŋ ma saŋkikɛ.

Fo e naa shin nɛ mee kɔ a pɔɔ so,

nsaa shin nɛ mee nya

bunyaŋgboŋ nɛ keleŋto.

⁴N shu n tre fo Enyɛnpe Ebɔrɛ na;

nɛ fo nu ma kushu

ashi fo kebee cheembi na so.

⁵Saŋkama nɛ n dese a di,

Enyɛnpe Ebɔrɛ na

bee keni ma so nna,

a kuŋ ma kanyɛ na kikɛ.

⁶Hale bedoŋ kagboŋ kulti ma gba,

m maa lɔ kufu.

⁷Enyɛnpe Ebɔrɛ, mɔlga ma.

Gberge ma doŋana kusoe,

n shin nɛ bumo be eleŋ e yɔɔ,

nɛ b sa maŋ tiŋ m pɔɔ ma so.

Fɛta ma doŋana be atayamu,

nseŋ gbaŋ bumo be anyi.

⁸Kekuŋ shi Enyɛnpe Ebɔrɛ kutɔ nna.

Enyɛnpe nɛfa fo basa.

Ewura Deevid be kashɛ be asheŋ

¹Enyɛnpe Ebɔrɛ

nɛ fo la ma ekumpo,

nu ma kekule.

N daa wɔ tɔrɔ to nna

nɛ fo chɛ ma to.

Amoso wu ma kuwɔr

nseŋ nu ma kekule.

²Saŋɛ mo nɛ menyi basa ere

beeŋ yige ma katege?

Saŋɛ mo nɛ menyeeŋ yige

asheŋ fuloŋ be kasha,

nɛ kebaaju a buu efɛ so?

³Men nyi fanɛ Enyɛnpe Ebɔrɛ na,

ta basa nɛ baa wora asheŋ niŋiso nna

ŋ ki mbe mbia;

saŋkama nɛ n shu n tre mo,

e bee nu ma kekule nna.

⁴Men ta kufu nɛ kechicha chicha

n lar men be alubi to.

Men keni men be ŋgbene to nɛnɛ,

saŋɛ nɛ men nawule dese kelaŋ so na.

⁵Men lara sarga nɛ k daga

n sa Enyɛnpe Ebɔrɛ na,

nseŋ yirda mo.

⁶Basa damta bee kule

Ebɔrɛ nna a kaŋɛ le:

“Enyɛnpe Ebɔrɛ nɛfa anyi,

nseŋ wu anyi kuwɔr.”

⁷Kagbenefuli nɛ fo sa ma na chɔ

kumo nɛ aboyu damta be keburi

ŋko nsa damta be kenya

bee sa basa ga.

⁸Mee dese nna a di nɛ kagbenewushi,

ŋkpal manɛ so, fo Enyɛnpe Ebɔrɛ

nawule e naa kuŋ ma.

Ewura Deevid be kashɛ

Kekuŋ be kabɔrɛkule be asheŋ

¹Enyɛnpe Ebɔrɛ;

nu ma kekule;

nɛ ma kushuto.

²Ma Ebɔrɛ nɛ ma ewura,

nu ma kushu.

Enyɛnpe Ebɔrɛ,

mee kule fo nna,

chɛ ma to.

³Kachipurso kikɛ

fee nu ma kekule nna.

Mee ta ma asheŋ tirso nna

a ba kaa nase fo anishito,

nsaa jo fo atuwebi.

⁴Alubi maa par fo.

Fo alɛ nɛ alubiworapo

maaŋ tiŋ n chena abar so.

⁵Ŋkpensheŋ wura maaŋ tiŋ

n yili fo anishito.

Fo kishi basa

nɛ baa wora alubi ga.

⁶Feeŋ mur befɛpo kikɛ.

Fo kishi kumukpakpaso

nɛ kafule ga.

⁷Ama ŋkpal fo kuwɔrwu ka shi so,

meeŋ tiŋ m ba fo bɔrɛlambu to;

m ba gbir bunyanso,

m maŋkura fo.

⁸Enyɛnpe Ebɔrɛ, juŋkpar ma

ŋkpal fo ka bee wora asheŋ niŋiso so.

Ŋini ma fo ekpa niŋiso na,

ŋkpal ŋ ka kɔ bedoŋ damta so.

⁹M maaŋ tiŋ n yirda

kusɔ nɛ ma doŋana bee kaŋɛ.

Esa be kejija nɛ baa fin.

Efɛ e bɔlɔ bumo be mmalga to

fanɛ kemaŋ chiŋgeliŋ nɛ asɔ buu so.

Bumo be adonduloŋ malɛ bee ku

efɛ nawule nna.

¹⁰Enyɛnpe Ebɔrɛ, shin nɛ b ji n tɔr.

Shin nɛ bumo gbagba be ŋkre

e shin nɛ b mur.

Ju bumo ashi fo anishito,

ŋkpal bumo be alubi nɛ

kumukpakpaso so.

¹¹Ama bumo nɛ baa fin kekuŋ

ashi fo kutɔ na bre be ŋgbene

bee fuli bumo nna,

nɛ baa boŋ nshɛ kagbenefuliso

saŋkama.

Baa kuŋ bumo nɛ baa sha fo na;

Shin nɛ bumo be ŋgbene

e baa fuli bumo ŋkpal fo so.

¹²Enyɛnpe Ebɔrɛ,

fee nɛfa bekama nɛ baa wora

fo kasonu nsaa wora asɔ nɛ niŋi nna.

Fee kuŋ bumo nna fanɛ kananɛ

kebɛlso be kusɔ kuŋso

bee kuŋ benapo na.

Ewura Deevid be kashɛ

Tɔrɔ to be kabɔrɛkule be asheŋ

¹Enyɛnpe Ebɔrɛ,

sa maŋ nya agbo ŋ kaŋɛ fanɛ

n wora n jija,

nseŋ gberge ma kusoe agbo so.

²Wu ma kuwɔr nseŋ sa ma eleŋ;

ŋkpal manɛ so,

ma eyur kikɛ chɛl ma nna

³nɛ mee shin nɛ n wu.

Saŋɛ mo nɛ feeŋ chɛ ma to,

Enyɛnpe Ebɔrɛ?

⁴Enyɛnpe, ba mɔlga ma.

Wu ma kuwɔr,

nseŋ mɔlga ma ashi luwu to.

⁵M baŋ wu,

m maaŋ naŋ tiŋ n fur fo,

ŋko n nyiŋi fo asheŋ.

⁶Kebɔltofinfin e naa mɔ ma.

Kanyɛso kikɛ, ma anishichubi

bee pɔ ma gedo nɛ kaputi nna.

⁷N doŋana shin nɛ

kagbenejija pɛ ma,

nɛ n shu nɛ ma anishi puŋi

a maŋ naa wu nɛnɛ.

⁸Basa lubi, men shile ma so!

Enyɛnpe Ebɔrɛ na,

nu ma kushu.

⁹E nu ma kekule nseŋ wu ma kuwɔr,

n wora ma asheŋ tirso n sa ma.

¹⁰Anishinyɔr beeŋ pɛ ma doŋana kikɛ

nɛ kufu e pɛ bumo ga nɛ b wulto,

nseŋ pal kaman n ta nyɔmɔ n shile n yɔ.

Ewura Deevid be kashɛ be asheŋ

¹N nyɛnpe nɛ ma Ebɔrɛ,

m ba fo kutɔ nna nɛ fo kuŋ ma,

nseŋ mɔlga ma.

Sɔ ma n yige ashi basa nɛ b ju

a buu ma so na kutɔ.

²Nɛ mannɛ aloŋ baaŋ kpɛa ma to

fanɛ buluŋ ka kpɛa kusɔbɔya to na.

Esa kama maaŋ tiŋ n sɔ ma

ama fo nawule.

³Enyɛnpe Ebɔrɛ,

nɛ n wora kulubi n da

esa ko so,

⁴ŋko n lar nlɔpo kikɛ kaman,

ŋko ŋ kɔ n sɔ n doŋ be asɔ

nɛ e maŋ wora shɛŋ;

⁵nɛ n wora asɔ ere be kekama,

kumo ere fo shin nɛ

ma doŋana e ju ma n pɛ.

Shin nɛ b chichi ma so m mɔ

nseŋ yige ma n lɛ shishɛr to.

⁶Enyɛnpe Ebɔrɛ,

nya agbo ŋ kpa n niŋi to

n tu ma doŋana nɛ b nya agbo ga na;

yili to n shin nɛ kashenteŋji e di efuli.

⁷Shin nɛ basa kikɛ e shɛr fo anishito

nɛ fo yili esoso n ji bumo so kuwura.

⁸Fo e la durnya kikɛ be demujipo na.

Amoso Enyɛnpe Ebɔrɛ,

shin nɛ n ji n lar;

ŋkpal ŋ kaa bee ji kashenteŋ,

a maŋ wora n jija so.

⁹Fo la Ebɔrɛ nɛ e bee wora

asheŋ nɛ a niŋi nna,

a nyi esa be kagbene to

nɛ mbe nfɛra to be asheŋ kikɛ.

Shin nɛ alubiworapo e yige

alubi be kebaawora,

nseŋ kuŋ basa lela ashi alubi to.

¹⁰Fo, Ebɔrɛ e la ma ekumpo.

Fo e naa kuŋ

kagbene koŋwulewurana kikɛ.

¹¹Fee ji asheŋ nɛ amo

be ekpa so nna,

nsaa nya agbo karechɛ kikɛ

ŋkpal alubi so.

¹²Nɛ alubiworapo maŋ tuba

ashi mbe alubi to,

fo yee fo tokobi nna

nseŋ gberge fo keta to;

¹³fo ta kudur lubi nna n daŋɛ

fo atanyembi nɛ fo gberge

alubiworapoana kusoe.

¹⁴Basa di alubi be dampo,

nseŋ bela ase nɛ b kurge

kafulesheŋ nɛ kumukpakpaso.

¹⁵Ama bumo gbagba

e naŋ kilgi n tɔr amaŋ chiŋgeliŋ

nɛ b kur n nase beko na to.

¹⁶Bumo gbagba be alubi beeŋ laŋɛ

n deŋi bumo be amu so,

nɛ kananɛ baa tintiŋ basa

a shin nɛ baa wora asheŋ na

e laŋɛ bumo so.

¹⁷Mee chɔrɔ Enyɛnpe Ebɔrɛ ga

ŋkpal e ka bee wora asheŋ

nɛ amo be ekpa so so.

Meeŋ boŋ kashɛ n di

Enyɛnpetale Ebɔrɛ

nɛ e wɔ esoso na epaŋ.

Ewura Deevid be kashɛ be asheŋ

Ebɔrɛ be kemaŋkura nɛ dimɛdi be bunyaŋ be asheŋ

¹Enyɛnpe, anyi be Ebɔrɛ,

fo keshi nɛ fo mamachi

be aworbi wɔ durnya ere

be kaplɛkama;

nɛ fo kemaŋkura wɔ esoso.

²Hale mbi popɔrbi nɛ mbiwurbi

kikɛ bee boŋ nshɛ a di fo epaŋ.

Fo kuŋ fo kumu

ashi fo doŋana be enɔ to.

Fo alɛ maaŋ sa

fo doŋ kikɛ kashuli.

³N baŋ keni awɔlpa nɛ fo to,

nɛ kananɛ fo ta kufɔl nɛ

achɛkpabi n yili amo be eyilikpa,

⁴kusɔ nɛ mee bishi e la fanɛ:

“Manɛ bre e baa la dimɛdi

nɛ mbe asheŋ tir fo,

nɛ fee fɛ mbe asheŋ loŋ?”

⁵Fo nawule e chɔ dimɛdi

ashi fo asɔ toso kikɛ to.

Fo alɛ e sa mo

kemaŋkura nɛ bunyaŋ.

⁶Nseŋ shin nɛ e ki fo

asɔ toso kikɛ to be ejuŋkparpo.

Fo ta asɔ kikɛ fanɛ

⁷mbolpɔ nɛ ana

nɛ kupuŋ to be asɔbɔya,

⁸nɛ mbuibi nɛ ekɔrɔtɔ

nɛ teku to be asɔ kikɛ

m bɔɔ mo enɔ nna.

⁹Enyɛnpe anyi be Ebɔrɛ,

fo keshi nɛ fo mamachi be aworbi

wɔ durnya ere be kaplɛkama nna.

Ewura Deevid be kashɛ be asheŋ

Ebɔrɛ be kapandi be kashɛ

¹Enyɛnpe Ebɔrɛ, meeŋ bugi

ma kagbene kikɛ n fur fo,

nseŋ kaŋɛ etumasesheŋ

nɛ fo wora kikɛ.

²Ma kagbene beeŋ fuli ma

nɛ n ji eyur ŋkpal fo so.

Enyɛnpetale Ebɔrɛ,

meeŋ boŋ kashɛ

n di fo ketre epaŋ.

³N doŋana baŋ wu fo,

baa kilgi nna a shile,

nsaa fiti a tɔr a wu.

⁴Eshenteŋjipo e la fo

nɛ fee ji asheŋ nɛ amo be ekpa so.

Fo ji ma asheŋ kashenteŋ be ekpa so

n ŋini fanɛ n ji n lar.

⁵Fo fɛa efuliana so

nseŋ shin nɛ alubiworapoana mur;

nɛ fo bubɔ bumo be atre mbaanaayɔ.

⁶Ama doŋana mur cheche.

Fo jija bumo be ndeana kikɛ,

nɛ esa kikɛ maaŋ naŋ nyiŋi

bumo hale mbaanaayɔ.

⁷Fo Enyɛnpe Ebɔrɛ e naa ji kuwura

durnya kikɛ so mbaanaayɔ,

nsaa tase fo kuwurputi so a ji demu.

⁸Feeŋ ji durnya ebi demu

nɛ kumo be ekpa so,

nseŋ ji basa so kuwura

ekpa niŋiso so.

⁹Fo Enyɛnpe Ebɔrɛ kutɔ

nɛ basa nɛ baa mɛaŋ

beeŋ tiŋ n shile m ba

nɛ fo kuŋ bumo.

Fo e la ekuŋkpa lempo

awurfoŋ be saŋɛ.

¹⁰Bumo nɛ b nyi fo na

beeŋ ta bumo be yirda n deŋi fo so;

Ŋkpal manɛ so, fo Enyɛnpe Ebɔrɛ na

maŋ naŋ pal kama n sa bekama

nɛ baa fin fo kikɛ.

¹¹Men boŋ nshɛ n fur Enyɛnpe Ebɔrɛ

nɛ e wɔ Zayɔn be kebee so

a ji basa so kuwura na,

n shin nɛ efuliana e nu kusɔ nɛ e wora.

¹²Mo e maŋ teŋ kegberge

alubiworapo kusoe so,

mo alɛ maa kplaŋ kenu

bumo nɛ b wɔ awurfoŋ to

be kushu so.

¹³Enyɛnpe Ebɔrɛ, keni kananɛ

ndoŋana shin nɛ mee ji awurfoŋ.

Wu ma kuwɔr,

m mɔlga ma ashi luwu to,

¹⁴nɛ n yili Jerusalɛmebi be anishito

n fur fo ŋ kaŋɛ asɔ nɛ fo wora,

nseŋ ji eyur ŋkpal fo kumɔlga so.

¹⁵Efuli pɔtɛana so ebi tɔr amaŋ

nɛ bumo gbagba kur to,

nɛ ajigbelɛ nɛ b sho na

kilgi m pɛ bumo.

¹⁶Enyɛnpe Ebɔrɛ be kebaaji

asheŋ nɛ amo be ekpa so

nɛ baa ta a pin mo.

Ama alubiworapoana gbagba

be alubi e naa kilgi a ji bumo.

¹⁷Belubiworapo bee yɔ luwu to nna,

nɛ b ya tu efuli pɔtɛana so ebi

nɛ b kini fo na.

¹⁸Ama fo maaŋ teŋ bekama

nɛ asheŋ tir bumo na

bre so mbaanaayɔ;

ŋko n shin nɛ betentaŋasepo

be tama e loge cheche.

¹⁹Enyɛnpe Ebɔrɛ, maŋ kumu so,

sa maŋ shin nɛ dimɛdi

e kini kebaanu a sa fo.

Shin nɛ efuli pɔtɛana kikɛ so ebi

e yili fo anishito nɛ fo ji bumo demu.

²⁰Enyɛnpe Ebɔrɛ, shin nɛ kufugboŋ

e tɔr efuli pɔtɛana na so,

nɛ b pin fanɛ b la edimɛdi nna

ashi fo anishito.

Kekule Ebɔrɛ n fin kechɛto be asheŋ

¹Enyɛnpe Ebɔrɛ,

Manɛ nna nɛ k du fanɛ

fo ka kplaŋ ma so loŋ?

Manɛ nna nɛ fee ta

fo kumu a ŋana ma so

saŋɛ nɛ n wɔ tɔrɔ to?

²Ŋkpensheŋ e luri

m bɔlɔ basa lubi to

nɛ baa fin bebɔlpo

nɛ b baa tɔrɔ saŋkama.

Shin nɛ b tɔr ajigbelɛ

nɛ bumo gbagba sho na to.

³Belubiworapo bee ji njɔŋ nna

ŋkpal bumo be aparsheŋ lubi so.

Nɛ kejimuniwuraana malɛ kishi fo

nsaa shoduu fo.

⁴Belubiworapo be shɛŋ

maŋ wɔ Enyɛnpe Ebɔrɛ to.

Bumo be kamoowu so,

b maa fɛ Ebɔrɛ be asheŋ gba kuraa.

⁵Ama saŋkikɛ asheŋ

bee nite nɛnɛ nna a sa bumo.

Bumo be shɛŋ maŋ wɔ fo mbra to;

bumo alɛ naa keni bumo

doŋana jiga nna saŋkikɛ.

⁶Le nɛ baa kaŋɛ bumo be ŋgbene to:

“Shɛŋ shɛŋ maaŋ tiŋ n wora anyi.

Anyi be ŋgbene beeŋ baa fuli saŋkama.

Asheŋ lubi maaŋ tu anyi kikɛ.”

⁷Bumo be mmalga kikɛ la

shoduu nɛ kafule nɛ kafunti nna,

nɛ bumo be bare kikɛ malɛ yil

asheŋ lubi nɛ alubi be kewora so.

⁸Baa ŋana ndekarso be ekpa to nna a jo,

a fin esa nɛ e maŋ wora alubi nɛ b mɔ

kenyanyaŋɛso.

Baa dara nna a fin loŋ be esa.

⁹Baa jo bumo be eŋanakpa nna

fanɛ buluŋ na,

a tɛ basa nɛ b maaŋ tiŋ m mɔlga

bumo be amu

nɛ b tɔr bumo be ajigbelɛ to,

nɛ b pɛ bumo.

¹⁰Baa nyaŋ basa nɛ baa pɛ na nna

nɛ bumo be eleŋ kikɛ

nɛ b suge ŋ gben.

¹¹Le nɛ baa kaŋɛ bumo be amu:

“Ebɔrɛ be shɛŋ maŋ wɔtɔ.

E buu mbe anishi so nna.

E maa wu anyi.”

¹²Enyɛnpe Ebɔrɛ, wora kusɔ ko.

Maŋ fo enɔ lempo na so

n chɛ bumo nɛ b maaŋ tiŋ n chɛ

bumo be amu to na to.

¹³Manɛ nna nɛ belubiworapo

bee keni fo jiga

nsaa kaŋɛ bumo be ŋgbene to le:

“Ebɔrɛ maaŋ ji anyi demu

ŋ gberge anyi kusoe”?

¹⁴Ama fo Ebɔrɛ na bee wu

tɔrɔ nɛ awurfoŋ ere kikɛ,

nseŋ wora shiriya nɛ fo chɛ to.

Basa nɛ baa wu awurfoŋ na

bɔɔ fo enɔ nna.

Fo e naa chɛ amunibi to na.

¹⁵Jija belubiworapo

nɛ basa lubi be eleŋ.

Gberge bumo kusoe

ŋkpal bumo be alubi so,

nseŋ shin nɛ b yige

alubi be kebaawora.

¹⁶Enyɛnpe Ebɔrɛ na e naa ji

kuwura kusɔ kama so mbaanaayɔ.

Efuli pɔtɛana na beeŋ mur

ashi mbe kasawule so.

¹⁷Enyɛnpe Ebɔrɛ, fo e naa nu

bumo nɛ baa ji awurfoŋ be kekule.

Feeŋ nu bumo be nfubel

nseŋ leŋ bumo to.

¹⁸Fo e naa kuŋ amunibi

nɛ basa nɛ baa mɛaŋ na;

saŋɛ na so, dimɛdi nɛ e la

shishɛr na maaŋ naa tɔrɔ

mo braana n shin nɛ

kufu e baa pɛ bumo ga.

Keta yirda ŋ deŋi Enyɛnpe Ebɔrɛ so be asheŋ

¹Ŋkpal Enyɛnpe Ebɔrɛ na

ka la ma ekumpo so,

k maŋ la kesheŋ tirso fanɛ

fo kaŋɛ ma fanɛ n firgi fanɛ

kabuibi n yɔ kebeegboŋ so

be kakpa nɛ meeŋ nya kekuŋ.

²Ŋkpal basa lubi ka ŋana

ayoyul to ŋ gberge bumo be ata

nɛ b to n da basa lela

be ŋgbene to so,

³manɛ nɛ basa lela

beeŋ naŋ tiŋ n wora

saŋɛ nɛ kusɔ kikɛ jija?

⁴Enyɛnpe Ebɔrɛ na wɔ

mbe bɔrɛlambu cheembi na to.

E tase mbe kuwurputi so

ashi ebɔrɛso nna

a keni basa kaplɛkama.

E bee wu kusɔ

nɛ ekama bee wora.

⁵Enyɛnpe Ebɔrɛ na bee wora

basa lela nna a keni.

Ama e kishi kumu kpakpasowuraana

nɛ baa sha alubi be kebaawora

nsaa maa wu kuwɔr na nna.

⁶E beeŋ ta ajanwulɛ tushiso

nɛ edɛ wuloŋwuloŋ n lɛ basa lubi so

nseŋ ta kawuliwuli tushiso

ŋ gberge bumo kusoe.

⁷Ŋkpal manɛ so, Enyɛnpe Ebɔrɛ na

bee wora asheŋ nɛ amo be ekpa so nna

nsaa sha kashenteŋji.

Bumo nɛ baa wora asheŋ niŋiso

e naŋ baa wɔ mo kutɔ.

Kefin kechɛto be kabɔrɛkule be asheŋ

¹Enyɛnpe Ebɔrɛ, chɛ ma to.

Basa nɛ baa ŋana Ebɔrɛ

maŋ naa wɔtɔ.

Beshenteŋjipo

loge durnya to.

²Ekama bee fule

mo barkasa nna.

Mmalga belbelso

nɛ b kɔ a fule abar.

³Enyɛnpe Ebɔrɛ,

shin nɛ kafule be

mmalga belbelso na e ku,

nɛ adonduloŋ nɛ a bee ji

njɔŋ a kaŋɛ fanɛ

⁴anyi be mmalga bee sa anyi

kusɔ kama nɛ anyee sha nna.

Anyeeŋ kaŋɛ kusɔ kama

nɛ k tir anyi nɛ esa kama

maaŋ tiŋ ŋ kaŋɛ fanɛ an loto.

⁵Ndoŋ nna nɛ Enyɛnpe Ebɔrɛ kaŋɛ le:

“Meeŋ koso,

ŋkpal bepɔshipo be kamɛaŋ,

nɛ basa nɛ asheŋ bee tɔrɔ

be kushuto so.

Meeŋ sɔ bumo n yige.”

⁶Enyɛnpe be nnɔ naseso

la kashenteŋ nna.

A du fanɛ gbiti nɛ b ta

n wɔtɔ edɛ to ale shunu

n lara amo to be eyurpi

kikɛ na nna.

⁷O, Enyɛnpe Ebɔrɛ, feeŋ kuŋ anyi,

n shin nɛ an nya kekuŋ ashi

loŋ be basa kutɔ mbaanaayɔ.

⁸Belubiworapo bee feŋ ŋgbene

a nite kamoowuso nna;

a kpaŋ bumo be asheŋ woraso

nsaa keni asɔ nɛ a daga

kemaŋkura jiga.

Kefin kechɛto be kabɔrɛkule be asheŋ

¹Enyɛnpe Ebɔrɛ,

feeŋ teŋ ma so mbaanaayɔ a?

Feeŋ ŋana ma so n chɛr a?

²Nchɛ afanɛ nɛ fee sha fanɛ

ma nfɛra e sa maŋ dese ma?

Nchɛ afanɛ nɛ fee sha fanɛ

kagbenejija e baa wɔ ma to?

Feeŋ shin nɛ n doŋana

e pɔɔ ma so n chɛr a?

³Enyɛnpe Ebɔrɛ kaŋ kusoe

n nu ma kabɔrɛkule,

nseŋ wora kusɔ nɛ mee

kule fo ere n sa ma.

Shin nɛ ma anishito e saŋɛ to;

nɛ mannɛ aloŋ meeŋ wu,

⁴nɛ n doŋana e kaŋɛ fanɛ

b kɔ m pɔɔ ma so nna,

nɛ bumo be ŋgbene e fuli bumo

ŋkpal ŋ ka tɔr so.

⁵Ama ma tama deŋ fo kasha

nɛ k maa loge na so nna.

Ma kagbene beeŋ fuli ma

ŋkpal fo ka beeŋ mɔlga ma so.

⁶Enyɛnpe Ebɔrɛ,

meeŋ boŋ kashɛ m maŋkura fo,

ŋkpal fo ka wora ma kelela so.

Esa kikɛ ka maaŋ tiŋ ŋ kplaŋ Enyɛnpe Ebɔrɛ so be asheŋ

¹Ewulpo e naa kaŋɛ mbe

kagbene to fanɛ Ebɔrɛ maŋ wɔtɔ.

Loŋ be basa maa wora asheŋ

nɛ a bee bɔla ekpa.

Bumo be asheŋ woraso kikɛ

la alubi nna.

Bumo be ekama maa wora

asheŋ lela.

²Enyɛnpe Ebɔrɛ wɔ ebɔrɛso

a keni a fin fanɛ basa ko wɔtɔ

a nyi asheŋ nsaa fin mo a?

³Ama basa kikɛ wora n foe ekpa.

Bumo kikɛ wora alubi.

Ekama maŋ wɔtɔ a wora alela;

esa koŋwule gba maŋ wɔtɔ.

⁴Ama alubiworapo maaŋ koya a?

Menyee suge ma basa nna a ji,

nsaa kini kekule Ebɔrɛ.

⁵Menyi alɛ nɛ kufu nɛ keyeŋiyeŋi nna,

ŋkpal manɛ so, Ebɔrɛ wɔ basa

nɛ baa wora asheŋ niŋiso kutɔ nna.

⁶Menyi, alubiworapoana

e naa jija betirpo be ŋkre.

Ama Enyɛnpe Ebɔrɛ

e naa kuŋ bumo.

⁷Israɛl be kumɔlga beeŋ shi Zayɔn nna.

Enyɛnpe Ebɔrɛ na e naŋ shin nɛ

asheŋ e naa nite nɛnɛ n sa bumo;

nɛ Israɛlebi be ŋgbene e fuli bumo ga.

Esa nɛ e beeŋ shuŋ Enyɛnpe Ebɔrɛ be asheŋ

¹Enyɛnpe Ebɔrɛ, wanɛ e naŋ nya ekpa

a wɔ fo bɔrɛlambu na to?

Wanɛ e naŋ chena

fo kebee cheembi na so?

²Basa nɛ baa wora Ebɔrɛ

kasonu kusɔ kama to na,

nɛ bumo nɛ bumo be asheŋ

woraso niŋi akpa na,

nɛ bumo nɛ baa ji kashenteŋ

ashi bumo be ŋgbene to

³nsaa maa ku efɛ

a deŋi bumo braana,

ŋko a malga asheŋ lubi

a gbiti bumo na;

nɛ bumo nɛ baa sa

basa bunyaŋ na,

⁴nɛ bumo nɛ bumo nɛ

alubiworapoana maŋ kɔ shɛŋ na.

Bumo e naa sa basa

nɛ baa ŋana Ebɔrɛ bunyaŋ

nsaa wora a bɔlɔ

bumo be nnɔ naseso so,

hale k du kpakpa gba na.

⁵Bumo nɛ baa ta bumo

be amansherbi a paŋ basa

nsaa maa wɔtɔ nchu na;

ŋko a sɔ brɔbu nsaa ji

a chɛ alubiworapoana to na.

Loŋ be basa bre maaŋ ji

anishinyɔr kikɛ.

Kekuŋ be kabɔrɛkule be asheŋ

¹Enyɛnpe Ebɔrɛ,

baa keni ma so;

nsaa kuŋ ma.

²Enyɛnpe,

Fo e la ma Ebɔrɛ

Asɔ lela nɛ ŋ kɔ kikɛ

shi fo kutɔ nna.

³Enyɛnpe Ebɔrɛ fo basa

la basa cheembi nna.

Ma kagbene beeŋ fuli ma ga

fanɛ n ti bumo so.

⁴Ama bekama nɛ b shil

a bɛ agbirana so na

bre be etɔrɔ beeŋ wora keshi ga.

M maaŋ tu bumo n lara

bumo be agbir na be esarga.

Ma alɛ maaŋ bunyaŋ amo.

⁵Enyɛnpe Ebɔrɛ fo nawule nɛ ŋ kɔ.

Fo alɛ bee sa ma kusɔ kama

nɛ k tir ma.

Fo enɔ to nɛ ma echefoso

be kebaawɔtɔ wɔ.

⁶Ŋkɛ nɛ fo sa ma na walɛ

nsaa a par ma ga.

⁷Meeŋ chɔrɔ Enyɛnpe Ebɔrɛ

nɛ e bee ji ma asoeto na.

E bee bɔla ma kagbene to nna

a malga a sa ma kanyɛso gba.

⁸Enyɛnpe Ebɔrɛ na be asheŋ

deŋ ma kagbene so nna saŋkama.

Ŋkpal e ka taga ma to so,

shɛŋ shɛŋ maa keta ma kufu.

⁹Amoso ma kagbene fuli ma nna,

nɛ mee ji eyur

ŋkpal ŋ ka nya kekuŋ so.

¹⁰Ŋkpal manɛ so,

fee kuŋ ma ashi luwu to.

Fo maaŋ shin nɛ fo kenya

e luri nchaŋ to;

ŋko n shin nɛ fo esa cheembi

e wu m bɛ.

¹¹Fo shin nɛ m pin

fo ŋkpa be ekpa na.

Fo kebaawɔ ma kutɔ,

e naa shin nɛ ma kagbene

bee fuli ga saŋkama.

Deevid be kabɔrɛkule.

¹O Enyɛnpe Ebɔrɛ,

nu ma kekule ere;

ŋkpal ŋ ka maŋ

wora n da so so,

Nu ma kushu.

Kaŋ kusoe n nu

ma kabɔrɛkule.

Mannɛ efɛ be

kudonduloŋ to nɛ k shi.

²Feeŋ ji n chɛ ma to;

ŋkpal manɛ so,

fo anishi e naa wu

asheŋ niŋiso.

³Fo nyi ma kagbene to.

Fo wora ma ŋ keni kanyɛso

n wu fanɛ maŋ wora n jija.

N yili kumo ma kagbene to

fanɛ m maaŋ ku efɛ kikɛ.

⁴M maa wora asheŋ

nɛ basa bee wora na.

Mee bɛ fo mbra na so nna.

M maa tu basa nɛ baa tintiŋ

basa a suge asɔ na a wora asheŋ.

⁵Saŋɛ kikɛ mee nite fo ekpa to nna.

M maa kple kumo kikɛ.

⁶Enyɛnpe Ebɔrɛ, mee kule fo nna.

Ŋkpal fo ka beeŋ chɛ ma to so.

Kaŋ kusoe n nu ma kabɔrɛkule.

⁷Ŋini fo mamachi be kasha na.

Fo enɔ lempo na nɛ fee ta a mɔlga

bumo nɛ baa shile a ba fo kutɔ

ashi bumo doŋana be enɔ to.

⁸Kuŋ ma fanɛ fo kenishi na.

Ta ma ŋ ŋana fo atɛ to

⁹ashi basa lubi nɛ baa kɔ ma

nsaa fin ma nɛ b mɔ na,

nɛ ma doŋana nɛ b kulti

ma n wɔtɔ na so.

¹⁰B maa wu kuwɔr

nsaa ji njɔŋ.

¹¹B ju ma m pɛ

nseŋ kulti ma n wɔtɔ,

a fin keŋin ma n lɛ nna.

¹²B du fanɛ ebuluŋ nɛ akoŋ kɔ

nɛ baa fin kusɔ ko nɛ b pɛ n ji nna;

ŋko ebulumbi nɛ b ŋana a dese

a jo kusɔ ko nɛ b pɛ n ji na.

¹³Enyɛnpe Ebɔrɛ koso

ŋ kɔ m pɔɔ bumo so.

Ta fo tokobi m mɔlga ma

ashi amu kpakpasowuraana

be enɔ to.

¹⁴Enyɛnpe Ebɔrɛ ta fo enɔ lempo na

m mɔlga ma ashi loŋ be basa be enɔ to.

Basa nɛ durnya ere be kebaawɔtɔ

nawule la bumo be tɔnɔ.

Fo e naa sa basa nɛ fee sha ajibi;

bumo be mbia beeŋ nya

n ji kanaŋkama so,

nɛ bumo nanabiana gba

e nya n ji kanaŋkama so.

¹⁵Meeŋ ba fo anishito,

ŋkpal manɛ so,

m maŋ wora kulubi kikɛ.

M baŋ tiŋi nseŋ wu

fanɛ fo wɔ ma kutɔ,

ma kagbene beeŋ fuli nna.

Kashɛ nɛ Deevid boŋ jemanɛ nɛ Enyɛnpe Ebɔrɛ mɔlga mo ashi mo doŋana, fɔŋfɔŋ ewura Sɔɔl be enɔ to na.

¹Enyɛnpe Ebɔrɛ mee sha fo;

fo kutɔ nɛ ma eleŋ bee shi.

²Enyɛnpe Ebɔrɛ na

e la ma kefalta gboŋ;

Mo kutɔ nɛ mee nya

kekuŋ nɛ kumɔlga.

Ma Ebɔrɛ na e la

kefaltagboŋ nɛ mee

ŋana mo to.

Mo e du fanɛ benapo

be kusɔ kuŋso a kuŋ ma.

Mo e naa kɔ a mɔlga ma

nsaa sa ma eleŋ.

³Meeŋ di Enyɛnpe Ebɔrɛ na epaŋ;

ŋkpal e ka mɔlga ma ashi

ma doŋana be enɔ to.

⁴Luwu be ŋgbɛlɛbi chambɔ ma nna;

nɛ kemur be nchu kulti ma n wɔtɔ,

⁵nɛ luwu sho ma ajigbelɛ,

nɛ kenishipere gboŋgboŋi tɔr ma so.

⁶Nɛ n ta kebɔltofinfin

n shu n tre Enyɛnpe Ebɔrɛ.

N shu n tre ma Ebɔrɛ

fanɛ e chɛ ma to;

nɛ ma kushu tɔr mbe asoe to

nɛ e yili mbe bɔrɛlambu to

n nu ma ebɔl.

⁷Nɛ kasawule gbuŋgbuŋ to m baŋɛ,

nɛ abeegboŋ be kaseto gbuŋgbuŋ.

A gbuŋgbuŋ nna ŋkpal

Ebɔrɛ ka nya agbo so.

⁸Edishi shi mbe

kamuna to nna a lar;

nɛ edɛ nɛ a bee chɔɔ a mɔ

malɛ shi mbe kɔnɔ to a lar,

fanɛ ajanwulɛ nɛ a bee suse na.

⁹Nɛ esoso bugi nɛ e lar m ba

nɛ awɔlpa jimajima wɔ

mbe aya ase.

¹⁰Nɛ e dii n chena asɔ firgiso

nɛ baa tre chɛrubim na so

n firgi afu to a ba.

¹¹E ta tentembiri nna

ŋ kulti mbe kumu,

nɛ abɔrɛwɔlpa ta mo

ŋ ŋana awɔlpa to.

¹²Nɛ abɔrɛjembubi

nɛ bɔrɛ be kenyɛkpɛ

be edɛ juŋkpar mo

n fulto ashi awɔlpa

jimajima na to.

¹³Enyɛnpe Ebɔrɛ

shi esoso m ponte,

nɛ basa nu mbe ebɔl.

¹⁴Nɛ e to atanyembi,

nɛ mo doŋana kikɛ pesaŋ to,

nɛ bɔrɛ nyɛkpɛ nɛ b lara aya fuful.

¹⁵Nɛ fo kaponte na shin

nɛ teku be kasawulebi

wɔlto a dese kpantaŋkpalaŋ,

nɛ kasawule be gbaltɔlase

lar n dese kpatokplo.

¹⁶Nɛ Enyɛnpe Ebɔrɛ na

shi esoso n to m pɛ ma to,

ŋ gberge ma n chule

ashi nchu chiŋgeliŋ na to.

¹⁷E mɔlga ma ashi

bedoŋ lempoana na be enɔ to,

nɛ bumo nɛ b kishi ma

nsaa chɔ ma eleŋ na kutɔ.

¹⁸Saŋɛ nɛ kenishipere tu ma na,

nɛ b baa ka kɔ ma,

nɛ Enyɛnpe Ebɔrɛ na kɔ n sɔ ma.

¹⁹Mo e lara ma

ashi kenishipere na to,

nseŋ mɔlga ma ŋkpal ma

asheŋ ka bee bɔlɔ mo kenishi so.

²⁰Enyɛnpe Ebɔrɛ wora loŋ nna

n sa ma ŋkpal ŋ kaa bee wora asheŋ

nɛ a niŋi so.

Ŋ ka maa wora alubi na

be kakɔka nna na.

²¹Ŋkpal manɛ so,

Enyɛnpe Ebɔrɛ na

be ekpa so nɛ m bɛ.

Ma alɛ maŋ naŋ wora

kulubi nseŋ pal kaman

n sa mo.

²²Mee bɛ mbe mbra kikɛ so nna.

Ma alɛ maŋ naŋ kini

kebɛ mbe keŋini so kikɛ.

²³M maŋ naŋ wora

n da mo so kikɛ.

Saŋkama mee

gelge alubi nna.

²⁴Enyɛnpe Ebɔrɛ wora ma

kelela nna ŋkpal ŋ ka bee wora

asheŋ nɛ a niŋi ekpa so.

E wora loŋ nna ŋkpal e ka nyi

ŋ kaa maa wora alubi so.

²⁵Fee ji kashenteŋ nna a sa

bekama nɛ baa ji kashenteŋ na.

Fo alɛ maa pɔlɔ bumo

nɛ b maŋ kɔ mpulɔ na.

²⁶Fee ta kagbenekoŋwule nna

a wora asheŋ a sa

bumo nɛ b kɔ kagbenekoŋwule.

Ama fee gberge alubiworapoana

bre kusoe nna.

²⁷Fee mɔlga bumo nɛ b kɔ

kamubrase nna,

nsaa bar kamoowuwuraana

kaseto.

²⁸Fo Enyɛnpe Ebɔrɛ na

e naa ŋini ma kefulto be ekpa,

nsaa ta tentembiri a ki

kefulto a sa ma.

²⁹Fo e naa sa ma eleŋ

nɛ mee kɔ ma doŋana.

Fo so nɛ mee pɔɔ

bumo so.

³⁰Enyɛnpe Ebɔrɛ

maa wora shɛŋ a foe.

Mbe kamalga la kashenteŋ nna.

E du fanɛ benapo

be kusɔ kuŋ so gboŋ nna,

a kuŋ ekama nɛ e bee shile

a ba mo kutɔ.

³¹Enyɛnpe na nawule

e la Ebɔrɛ.

Mo nawule e du fanɛ

kefalta gboŋ a kuŋ.

³²Mo e naa sa ma eleŋ,

nsaa shin nɛ mee

wora asheŋ niŋiso.

³³Mo e naa sa ma aya shileso

fanɛ chibir na,

a shin nɛ mee tiŋ a dii abee

a maa fiti a tɔr.

³⁴Mo e naa ŋini ma

kananɛ baa kɔ kena;

nsaa chɛ ma to nɛ mee tiŋ a ta

danyaŋ be keta a kɔ kena.

³⁵Mo e naa kuŋ ma nsaa mɔlga ma.

Mbe enɔ lempo na e naa pɛ ma to.

Mbe kechɛto so nɛ e ki esagboŋ.

³⁶Mo e naa lɔŋɛ ekpa a sa ma

nɛ maa nite a fiti.

³⁷N ju m bɛ ndoŋana so nna

n ya pɔɔ bumo so.

M maŋ bɛta kaman kikɛ;

m mur bumo cheche nna.

³⁸Ŋ ŋmɛa bumo n lɛ

nɛ b koso ŋ gben,

nɛ n chichi bumo so n nase

ma aya to.

³⁹Fo e sa ma eleŋ nɛ ŋ kɔ kena,

nseŋ shin nɛ ŋ kɔ m pɔɔ ma doŋana so.

⁴⁰Fo shin nɛ ndoŋana kilgi

n lara aya fuful n shile,

nɛ ju m bɛ bumo so m mɔ

bekama nɛ b kishi ma na.

⁴¹B daa yɛla kenishi to nna

a fin kechɛto;

ama esa kama maŋ mɔlga bumo,

nɛ b shu n tre Enyɛnpe Ebɔrɛ;

ama e daa maŋ tuge bumo.

⁴²Nɛ n nɔkɔr bumo fanɛ

kepumpuŋ nɛ afu bee ta na,

nseŋ chichi bumo so fanɛ

ekpa to be depɔ na.

⁴³Fo mɔlga ma ashi

kumukpakpaso wuraana

be enɔ to;

nseŋ ta ma ŋ ki efuli pɔtɛana

be ejuŋkparpo.

Basa nɛ n daa maŋ tama fanɛ

baaŋ shuli n sɔ ma

ŋ ki bumo be ewura na.

⁴⁴Efuli pɔtɛ so ebi bee jɔŋɛ

ma ase nna.

M baŋ yili kesheŋ n sa bumo,

baa bɛ so nna.

⁴⁵Bumo be aba pɔ bumo,

nɛ baa lar bumo be

ekuŋkpa lempoana to

a chicha kufuso a ba.

⁴⁶Fo Enyɛnpe Ebɔrɛ na

wɔ ŋkpa to nna.

Meeŋ fur fo, Enyɛnpe Ebɔrɛ,

ma kefaltagboŋ nɛ fee kuŋ ma.

Meeŋ maŋkura fo,

ma emɔlgapo.

⁴⁷Fo e bishi kuwule n sa ma

nseŋ shin nɛ efuliana bee nu

a sa ma.

⁴⁸Fo e mɔlga ma

ashi ndoŋana be enɔ to

nseŋ ta ma n yili eyilikpagboŋ.

Fo sɔ ma n yige ashi basa nɛ baa

ta tintiŋ a suge basa be asɔ na be enɔ to.

⁴⁹Amoso, Enyɛnpe Ebɔrɛ,

meeŋ fur fo ashi efuli pɔtɛana kikɛ

be anishito to.

Meeŋ boŋ nshɛ n di fo epaŋ.

⁵⁰Fo e shin nɛ fo ewura kɔ m pɔɔ so.

Fo ŋini fo esa laraso,

ewura Deevid, fo kasha

nɛ k maŋ kɔ ekar na,

nseŋ wu mo nɛ mbe kaman to ebi

kuwɔr mbaanaayɔ.

Ebɔrɛ be kemaŋkura ashi mbe asɔ toso to be asheŋ

¹Esoso bee di Ebɔrɛ

be kemankura efuli nna,

nɛ awɔlpa malɛ bee ŋini

mbe asɔ toso.

²Karechɛ kikɛ bee shin nɛ

mbe kemaŋkura nɛ kenyi

malɛ bee di efuli nna,

nɛ kanyɛso kikɛ malɛ gba

bee wora loŋ.

³A maa bugi kɔnɔ a malga

ŋko a gbar ŋgbar kikɛ;

⁴ama durnya to ebi kikɛ bee wu

kusɔ nɛ a bee ŋini saŋkama nna.

Ebɔrɛ wora awɔlpa nna

fanɛ wajɛbu n sa epeŋi.

⁵Chipurso kikɛ k bee lar nna a ba

fanɛ kejafɔ mo kul ka bee lar ebu to,

ŋko fanɛ ekpampo ka bee lege

kusɔbɔya be kubɔr na.

⁶K bee fara awɔlpa to

be kaba ko so nna;

n ta loŋ n ya fo kaba ko.

Shɛŋ malɛ maaŋ tiŋ ŋ ŋana

kumo be loŋ so.

Enyɛnpe be mbra na be asheŋ

⁷Enyɛnpe Ebɔrɛ be mbra na

bee niŋi ekpa nsaa sa ŋkpa nna.

Asɔ nɛ Enyɛnpe be mbra bee ŋini na

la asɔ nɛ esa beeŋ tiŋ n yirda nna.

Amo alɛ bee sa bebɔlpo,

kanyiasheŋ nna.

⁸Enyɛnpe be mbra na bee niŋi ekpa,

nsaa sa basa nɛ baa bɛ

amo so na kagbenefuli nna.

Enyɛnpe be mbra na di efuli nna,

a shin nɛ esa bee pin kebaawɔtɔ to nɛnɛ.

⁹Kabɔrɛŋana walɛ nna,

nsaa beeŋ baa wɔtɔ mbaanaayɔ.

Enyɛnpe be mbra na la kashenteŋ nna.

Amo alɛ maa wora a foe ekpa.

¹⁰A walɛ a chɔ shuwa lela kikɛ,

hale shuwa nɛ k maŋ

kɔ eyurpi gba.

Enyɛnpe be mbra wɔ ebel

a chɔ mushoŋchu,

hale mushoŋchu nɛ a maŋ

kɔ eyurpi gba.

¹¹Enyɛnpe be mbra na

bee kpele basa kusoe nna.

Basa nɛ baa bɛ amo so

bee nya tɔnɔ gboŋgboŋi nna.

¹²Esa kikɛ maaŋ tiŋ m pin

alubi nɛ e wora kikɛ.

Ta ma alubi nɛ m maŋ kute

n wora na m paŋ ma.

¹³Nseŋ pete ma ashi alubi

be kekute n wora to.

Sa maŋ shin nɛ loŋ be alubi

e pɔɔ ma so.

Saŋɛ na so ma nfɛra maaŋ ji

m bri ma nɛ n ji n lar alubi to.

¹⁴Enyɛnpe Ebɔrɛ nɛ fo la

ma kefaltagboŋ nɛ ma emɔlgapo.

Shin nɛ ma kɔnɔ to be mmalga

nɛ ma kagbene to be nfɛra,

e baa bɔlɔ fo kenishi.

Kekɔmpɔɔso be kabɔrɛkule be asheŋ

¹Enyɛnpe Ebɔrɛ na,

e nu fo kekule saŋɛ so

nɛ kebaawɔtɔ ki fo so jiga na.

An nananyɛn Jeekɔb be Ebɔrɛ na

e baa kuŋ fo.

²E shin nɛ kechɛto e shi

mbe bɔrɛlambu to m ba fo kutɔ;

nseŋ yili Zayɔn be kebeegboŋ na so

ashi Jerusalɛm to m mɔlga fo.

³E nyiŋi fo esarga nɛ fo lara na kikɛ,

nseŋ sɔ fo esarga chɔɔso.

⁴E shin nɛ fo nya fo kagbene

be aparsheŋ kikɛ;

nseŋ shin nɛ fo ŋkre kikɛ

bɔlɔ so.

⁵Nɛ asheŋ nite nɛnɛ n sa fo,

anyeeŋ cha awɔr kagbenefuliso;

nseŋ maŋ anyi be etuta so

ashi anyi be Ebɔrɛ be ketre to.

Enyɛnpetale Ebɔrɛ na e wora

asɔ nɛ fee bishi na n sa fo.

⁶N nyi geeŋ fanɛ Enyɛnpe Ebɔrɛ na

beeŋ mɔlga mbe ewura lara so.

E beeŋ yili mbe ebɔrɛso

cheembi na n nu ma kekule

nseŋ ta mbe enɔ lempo na

m mɔlga ma.

⁷Basa ko bee wu bumo be amu nna

ŋkpal bumo be kena to

be egbaŋɛturko so.

Nɛ beko malɛ bee wu bumo be amu

ŋkpal bumo be kena to be egbaŋɛ so.

Ama anyi ere be yirda wɔ fo

Enyɛnpe Ebɔrɛ na to nna.

⁸Loŋ be basa na beeŋ fiti n tɔr,

ama anyi ere baa yil nna kiŋkiŋ.

Shɛŋ shɛŋ maa gbuŋgbuŋ anyi.

⁹Enyɛnpetale Ebɔrɛ,

mɔlga anyi be ewura.

Enyɛnpe Ebɔrɛ,

nu anyi be kekule.

Kekɔmpɔɔso be kapandi be asheŋ

¹Enyɛnpe Ebɔrɛ,

ewura be kagbene fuli nna

ŋkpal fo ka sa mo eleŋ so.

Kechɛto nɛ fo sa mo na

e shin nɛ mbe kagbene fuli ga.

²Fo wora mbe kagbene be

aparsheŋ n sa mo.

Fo maŋ kini kewora kusɔ

nɛ e bishi fo na.

³Fo nɛfa mo kashenteŋto,

nseŋ ta shuwa be

kuwurwuro m buu mo.

⁴E kule fo ŋkpa tenteŋ

nɛ fo sa mo ŋkpa

nɛ k maŋ kɔ ekar.

⁵E nya bunyaŋ gboŋgboŋi

ŋkpal kechɛto nɛ fo sa mo na so.

Fo shin nɛ e nya ketre nɛ eleŋ.

⁶Kashenteŋto,

fo sa mo nɛfa mbaanaayɔ;

fo nɛ mo be kebaala na

malɛ bee fuli mo kagbene nna.

⁷Ewura na yirda Enyɛnpe Ebɔrɛ nna.

Ŋkpal Ebɔrɛ malɛ be kasha

nɛ k maa loge na so,

shɛŋ shɛŋ maa gbuŋgbuŋ mo.

⁸Fo ta fo enɔ lempo na

ŋ ŋmɛa fo doŋana n lɛ.

Fo enɔ jisa nɛ feeŋ ta

m pɛ basa nɛ b kishi fo kikɛ.

⁹Fo kaŋ ba, feeŋ ta edɛ fuful

n chɔɔ bumo m mur,

nɛ fo agbo e shin nɛ b ki fanɛ

edɛ be kepa.

¹⁰Feeŋ mur bumo be kaman to ebi

kasawule ere so cheche;

nɛ b maaŋ naŋ nyiŋi bumo

be asheŋ kuraa.

¹¹Kanaŋkama so

nɛ b kre fo ŋkre lubi gba;

b maaŋ tiŋ m pɔɔ fo so kikɛ.

¹²Fo baŋ to bumo fo atanyembi,

baaŋ pal kaman n shile.

¹³Enyɛnpe Ebɔrɛ,

kemaŋkura e baa la fo peya.

Anyeeŋ boŋ nshɛ m maŋkura fo

ŋkpal fo eleŋgboŋ na so.

Kebɔltofinfin be kabɔrɛkule be asheŋ

¹Ma Ebɔrɛ,

manɛ nna nɛ fo kplaŋ ma so?

Manɛ nna nɛ fo wɔ kufɔ loŋ?

Fo maaŋ nu ma

kebɔltofinfin be kushuto,

nseŋ ba mɔlga ma a?

²Ma Ebɔrɛ, mee shu a tre fo

kapa nɛ kanyɛ nna,

fo alɛ maa nu.

Amoso ma kagbene

maŋ dese ma.

³Ama fo la esa cheembi nna

a tase fo kuwurputi so.

Fo nɛ Israɛlebi bee kpaŋ.

⁴Fo nɛ an nananyɛnana

ta bumo be yirda n deŋi so.

B yirda fo nna,

nɛ fo mɔlga bumo.

⁵B shu n tre fo,

nɛ fo lara bumo ashi tɔrɔ to.

B yirda fo,

nɛ fo alɛ maŋ shin nɛ

b ji anishinyɔr.

⁶Ama m maŋ naa du fanɛ dimɛdi.

Ŋ ki fanɛ kushushombi nna

nɛ basa bee keni ma jiga

nsaa wora ma eyurto.

⁷Ekama nɛ e wu ma

bee wora ma shia nna.

Baa fifi amu nna

nsaa tege ma a kaŋɛ:

⁸“Fo yɛ fo yirda Ebɔrɛ nna,

nɛ manɛ nna nɛ e maŋ mɔlga fo?

Nɛ fo asheŋ bee bɔlɔ mo kenishi,

manɛ nna nɛ e maŋ chɛ fo to.”

⁹Ŋkeshin nɛ fo

e shin nɛ b kurge ma.

Fo e keni ma so saŋɛ so nɛ

n la kebi nyiposo gba na.

¹⁰B ka kurge ma kikɛ

fo enɔ to nɛ n wɔ;

fo alɛ e la ma Ebɔrɛ

saŋkikɛ.

¹¹Sa maŋ barga ma n yɔ kufɔ;

ŋkpal manɛ so,

ma nɛ tɔrɔ maŋ wɔ kufɔ.

Esa kama malɛ maŋ wɔtɔ

nɛ e chɛ ma to.

¹²Bedoŋ damta e kulti ma

n wɔtɔ fanɛ apuntona.

B kɔ eleŋ nna nseŋ lubi fanɛ

Bashan be efuli so be egbolu.

¹³N doŋana na du nna

fanɛ ebuluŋ nɛ b ya bumo be

nnɔ to a ponte to,

nsaa kpɛa kusɔ kama

nɛ b pɛ to na.

¹⁴Ma eleŋ kikɛ loge nna

fanɛ nchu ka feeto na,

nɛ ma echɛkpaana du

fanɛ ma awibi ka maŋ naa

chɔ abar so na.

Ma kagbene malɛ ki fanɛ

ŋku bumbuŋ ka ŋalga na nna.

¹⁵Ma eleŋ kikɛ loge fanɛ

kusɔ nuunchu ka baŋɛ to na;

nɛ ma kudonduloŋ wɔl

m mata ma anyifar to.

Fo Enyɛnpe Ebɔrɛ na

yige ma nna nɛ n wu

n tɔr shishɛr to a?

¹⁶Basa lubi be katuŋ

kulti ma nna n wɔtɔ fanɛ njɔnɔ,

a chɛ a far ma aya nɛ enɔana.

¹⁷Meeŋ tiŋ ŋ karga ma awibi kikɛ,

nɛ ma doŋana mɛrge anishi

n yuu ma so a keni

nsaa mushe ma.

¹⁸B to beri nna

m barga ma asɔbuuso to

n sa abar.

¹⁹Ama Enyɛnpe Ebɔrɛ,

sa maŋ barga ma ga.

Ma elempo,

ba manaŋ m ba chɛ ma to.

²⁰N doŋana du fanɛ njɔnɔ nna.

Mɔlga ma nɛ b sa maŋ mɔ ma.

²¹Mɔlga ma ashi

ebuluŋ na kutɔ.

Sɔ ma n yige ashi

apuntona na kutɔ.

²²Meeŋ kaŋɛ ma basa

kusɔ nɛ fo wora;

nseŋ yili fo basa

nɛ b shɛr to n fur fo.

²³Menyi nɛ menyee ŋana

Ebɔrɛ na e fur mo.

Menyi nɛ men la an nananyɛn

Jeekɔb be kenana kikɛ

e bunyaŋ mo.

Israɛlebi, men shuŋ

Enyɛnpe Ebɔrɛ na bunyaŋ so.

²⁴Ŋkpal manɛ so

e maŋ pal kaman n sa

bumo nɛ b wɔ awurfoŋ to na.

E maŋ kplaŋ bumo so

saŋɛ so nɛ b shu n tre mo na.

E nu bumo be kushu nna.

²⁵Saŋɛ nɛ ma nɛ fo basa shɛr na,

nɛ meeŋ fur fo

ŋkpal kusɔ nɛ fo wora so;

nseŋ tia nnɔ nɛ n nase n sa fo na

ashi bumo be anishito.

²⁶Betirpo beeŋ ji m moɛ,

nɛ bekama nɛ baa

bunyaŋ fo na e chɔrɔ fo.

Shin nɛ asheŋ e baa nyalɛ

a sa bumo saŋkama.

²⁷Efuliana kikɛ so ebi

beeŋ nyiŋi Enyɛnpe Ebɔrɛ na,

nɛ basa e shi durnya be kaplɛkama,

ŋ kilgi m bɛ mo so a bunyaŋ mo.

²⁸Ŋkpal manɛ so

Enyɛnpe Ebɔrɛ e naa ji

kusɔ kama so eleŋ,

nsaa ji efuliana kikɛ so kuwura.

²⁹Durnya to be amansherbiwuraana

nɛ b kɔ asɔ ga beeŋ bunyaŋ mo,

nɛ bumo nɛ b gbar nchaŋ

be kɔnɔ gba e fur mo.

³⁰Echefosoebi kikɛ beeŋ bunyaŋ mo,

nseŋ ji mbe asheŋ be shɛda

n sa bumo be kaman to ebi.

³¹Bumo nɛ b kurge kaman to gba

beeŋ ba nu fanɛ Enyɛnpe Ebɔrɛ na

e mɔlga anyi.

¹Enyɛnpe Ebɔrɛ na e naa keni ma so,

fanɛ kananɛ mbolpɔkpapo bee keni

mbe mbɔlpo so na.

Amoso mee nya kusɔ kama

nɛ k tir ma nna.

²Kakpa nɛ afitiri bumbuŋ lela wɔ

nɛ e bee yɛr ma nɛ mee ya ka ji

nsaa dese a wushi.

Mo e naa juŋkpar ma a yɔ

eboŋ be kakpa nɛ nchu

maa shile eleŋso.

³Mo e naa sa ma eleŋ popɔr,

nsaa ŋini ma kebaawɔtɔ niŋiso

fanɛ kananɛ e nase kɔnɔ na.

⁴Hale nɛ n na

tentembiri to mina gba,

kufu maa pɛ ma.

Ŋkpal manɛ so,

fo wɔ ma kutɔ.

Fo kuwurkpabi

nɛ fo kuchuchɔ

e naa kuŋ ma.

⁵N doŋana be anishito,

nɛ fee wora kejigboŋ a yili ma.

Fo sɔ ma fanɛ fo efɔgboŋ nna,

a keta ma kananɛ k daga so.

⁶Kashenteŋto,

feeŋ baa wora ma kelela,

nsaa ŋini ma kasha,

jemanɛ nɛ n wɔ ŋkpa to kikɛ.

Meeŋ chena Enyɛnpe Ebɔrɛ

be laŋ to hale mbaanaayɔ.

Deevid be kashɛ be asheŋ

¹Kasawule ere nɛ kusɔ kikɛ

nɛ k wɔ kumo so,

la Enyɛnpe Ebɔrɛ na peya nna.

Basa nɛ b wɔ durnya ere to kikɛ,

la Enyɛnpe Ebɔrɛ na peya nna.

²Mo e ta kumo n yili,

nseŋ ta teku nɛ nchuana

n wɔtɔ kumo be kaseto.

³Wanɛ e kɔ ekpa nɛ e dii n yɔ

Enyɛnpe be kebee na be esoso?

Wanɛ e naŋ tiŋ n luri n ya

yili mbe bɔrɛlambu cheembi na to?

⁴Basa nɛ bumo be ashuŋ shuŋso

nɛ nfɛra fɛso niŋi ekpa,

nɛ bumo alɛ maa shuŋ agbir,

ŋko a bɔ ntaŋ a ku efɛ na.

⁵Loŋ be basa nɛ Enyɛnpe Ebɔrɛ na

bee nɛfa nsaa mɔlga,

a shin nɛ baa ji a lar mbe anishito

fanɛ basa nɛ b maŋ wora n jija na.

⁶Loŋ be basa e naa fin

Enyɛnpe Ebɔrɛ be ekpa,

nsaa shuŋ an nananyɛn

Jeekɔb be Ebɔrɛ na.

⁷Men bugi kadegboŋ na

be mbuna dra na;

nɛ ewura nɛ kemankura

kulti mo na e luri to.

⁸Wanɛ e la le be kemankura

be ewura ere?

Mo e la an nyɛnpe nɛ e kɔ eleŋ

nsaa kɔ ana a pɔɔ so saŋkama na.

⁹Men bugi kadegboŋ na

be mbuna dra na

nɛ ewura nɛ kemankura

kulti na e luri.

¹⁰Wanɛ e la ewura

nɛ kemankura kulti ere?

Mo e la Enyɛnpetale Ebɔrɛ,

elempo na.

¹Fo Enyɛnpe Ebɔrɛ na nɛ mee kule.

²Ma Ebɔrɛ, fo nɛ n yirda.

Sa maŋ shin nɛ n ji anishinyɔr,

ŋko n shin nɛ ma doŋana

e pɔɔ ma so.

³Esa kama nɛ mbe tama deŋ fo so

maaŋ ji anishinyɔr kikɛ.

Ama bekama nɛ b kɔ kebɔrkɔnshi

bre beeŋ ji anishinyɔr.

⁴Enyɛnpe, ŋini ma fo ekpa na;

nseŋ ŋini ma kananɛ

meeŋ bɛ kumo so.

⁵Ta fo kashenteŋ na n ŋini ma ekpa.

Ŋkpal manɛ so,

fo e la Ebɔrɛ a mɔlga ma,

nɛ ma tama deŋ fo so saŋkikɛ.

⁶N nyɛnpe, nyiŋi fo kuwɔrwu

nɛ fo kasha nɛ k maa loge,

nsaa wɔtɔ dra dra na kikɛ na.

⁷Ta ma kebiato be alubi

nɛ kusoe kpakpaso

be asheŋ woraso m paŋ ma,

nseŋ nyiŋi ma ŋkpal fo kasha

nɛ fo alelasheŋ so.

⁸Ŋkpal Enyɛnpe Ebɔrɛ ka walɛ

nɛ mbe asheŋ woraso niŋi ekpa so,

e bee ŋini alubiworapoana

mbe ekpa nna nɛ b bɛ so.

⁹Nsaa ŋini basa nɛ b kɔ

kamubrase malɛ mbe ekpa

niŋiso nɛ kusɔ nɛ k daga na.

¹⁰E bee ji kashenteŋ nna

nsaa kɔ kasha.

E bee juŋkpar bekama

nɛ baa wora asheŋ niŋiso

nsaa wora mbe mbra kasonu nna.

¹¹O Enyɛnpe Ebɔrɛ,

ta alubi damta

nɛ n wora m paŋ ma,

ŋkpal fo ketre so.

¹²Fee ŋini basa nɛ baa ŋana

fo bunyaŋ so na ekpa

nɛ fo lara n sa bumo fanɛ

b bɔla so na nna.

¹³Asheŋ beeŋ baa nite

nɛnɛ a sa bumo,

nɛ bumo be mbia e ji

bumo be kasawule be kapetɛ.

¹⁴Enyɛnpe Ebɔrɛ,

fo nɛ basa nɛ baa ŋana fo

bee ji keteri nna.

Fo e naa shin nɛ baa pin

kɔnɔ naseso be ŋkre nɛ fo

nase dra na n sa fo basa na.

¹⁵Ma anishi yuu Enyɛnpe na so nna;

ŋkpal manɛ so,

mo e naa mɔlga ma ashi ajigbelɛ to.

¹⁶Kenawule nɛ awurfoŋ kɔ ma nna;

amoso Enyɛnpe Ebɔrɛ,

ba chɛ ma to.

¹⁷Mɔlga ma ashi etɔrɔ

nɛ ma kagbenejija gboŋgboŋi

nɛ k bee ti so ere to.

¹⁸Keni ma awurfoŋ

nɛ kebɔltofinfin ere so,

nseŋ ta ma alubi m paŋ ma.

¹⁹Keni kananɛ ma doŋana wora keshi,

nɛ kananɛ b kishi ma alegaiso.

²⁰Kuŋ ma nseŋ mɔlga ma.

Sa maŋ shin nɛ n ji anishinyɔr,

ŋkpal manɛ so,

fo kutɔ nɛ mee fin kechɛto.

²¹Keni ma alelasheŋ

nɛ aworbi nɛ a niŋi ekpa so,

nseŋ kuŋ ma ŋkpa.

Ŋkpal manɛ so,

ma tama deŋ fo so nna.

²²O Enyɛnpe Ebɔrɛ,

jande mɔlga Israɛlebi

ashi bumo be awurfoŋ to.

Deevid be kashɛ be asheŋ

¹Enyɛnpe shin nɛ n ji n lar;

ŋkpal manɛ so,

ma kebaawɔtɔ maŋ kɔ mpulɔ kikɛ.

Ma yirda kikɛ deŋ fo so nna,

ma alɛ maa wora shikashika kikɛ.

²Enyɛnpe Ebɔrɛ, wora ma ŋ keni;

mige ma asheŋ to ŋ keni

ma nfɛra to.

³M maaŋ teŋ fo kasha

nɛ k maa loge na so kikɛ.

Fo kashenteŋji e naa

juŋkpar ma saŋkikɛ.

⁴Ma nɛ befɛpo maa gama

abar so a wora asheŋ.

Ma nɛ kebirkɔnshiwuraana

malɛ maŋ kɔ shɛŋ.

⁵Ma nɛ belubiworapo maŋ kɔ shɛŋ.

Ma alɛ maa tu

kumukpakpasowuraana a chena.

⁶Enyɛnpe Ebɔrɛ, n fɔr ma enɔ n lar,

nsaa kulti fo bɔrɛsure a bunyaŋ fo,

⁷nsaa boŋ kapandi be nshɛ,

a malga fo mamachi

be ashuŋ be asheŋ.

⁸Mee sha fo bɔrɛlambu na,

nɛ kakpa nɛ fo

kemaŋkura wɔ ga na.

⁹Sa maŋ gama ma nɛ alubiworapo

n ti abar so m mɔ.

Ŋko n ta ma n ti bemɔpo,

¹⁰nɛ baa wora asheŋ lubi,

nsaa sa basa brɔbu saŋkikɛ so.

¹¹Ma ere maŋ du fanɛ bumo.

Ŋkpal manɛ so,

ma kebaawɔtɔ niŋi nna.

Amoso wu ma kuwɔr

nseŋ mɔlga ma.

¹²Ŋkpal fo ka wɔ ŋ kutɔ

nsaa beeŋ chɛ ma to

saŋɛ nɛ k daga so,

meeŋ fur fo

ashi fo basa be nshɛr to.

Deevid be kashɛ be asheŋ

¹Enyɛnpe Ebɔrɛ na

e la ma kefulto,

mo alɛ e naa mɔlga ma;

amoso maaŋ ŋana esa kikɛ.

Enyɛnpe Ebɔrɛ na du fanɛ

ekuŋkpagboŋ nna a kuŋ ma;

amoso maa lɔ kufu.

²Basa lubi baa fin ma nɛ b mɔ,

ŋko nɛ bedoŋ bee kɔ ma gba,

baaŋ fiti n tɔr.

³Hale benapo damta

kulti ma n wɔtɔ gba,

kufu maaŋ pɛ ma.

Hale nɛ baa kɔ ma kena gba,

ŋ kraa beeŋ yirda fo.

⁴Kusɔ koŋwule nɛ mee fin

Enyɛnpe Ebɔrɛ kutɔ;

Kumo e la fanɛ,

ŋ ka beeŋ baa wɔ mbe laŋ to

saŋɛ so nɛ n wɔ ŋkpa to ere;

saŋɛ na so mbe alelasheŋ

beeŋ baa bɔlɔ ma kenishi,

nɛ m baa wɔ mo kutɔ

ashi mbe bɔrɛlambu to.

⁵Saŋɛ na so e beeŋ baa kuŋ ma

tɔrɔ be jemanɛ;

a ta ma a ŋana mbe bɔrɛlambu to.

E beeŋ ta ma n yili kefaltagboŋ so,

nɛ n nya kekuŋ.

⁶Ndoŋ nna nɛ ŋ kɔ m pɔɔ n doŋana so

nseŋ lara sarga ashi mbe bɔrɛlambu to;

nseŋ cha awɔr kagbenefuliso

m boŋ nshɛ m fur Enyɛnpe Ebɔrɛ na.

⁷M baŋ shu n tre fo, Enyɛnpe Ebɔrɛ,

jande nu ma ebɔl,

nseŋ wu ma kuwɔr n nu ma kekule.

⁸N yili ma kagbene to nna

fanɛ meeŋ fin fo;

amoso nɛ m pere kenishi

nɛ n wu fo na.

⁹Jande sa maŋ pal kaman n sa ma,

sa maŋ nya agbo n ju fo kenya n lɛ.

Fo e la ma echɛtopo,

amoso, ma Ebɔrɛ nɛ ma emɔlgapo;

sa maŋ kplaŋ ma so ŋko n yige ma.

¹⁰Hale nɛ tuto nɛ n nio kini ma gba;

Enyɛnpe Ebɔrɛ na bre beeŋ keni ma so.

¹¹Ŋini ma ekpa lela nɛ fee sha

fanɛ m baa bɔla so,

nɛ ma doŋana maaŋ nya ma.

¹²Sa maŋ yige ma n sa ma doŋana

nɛ b ta efɛ nɛ kafunti a kɔ ma,

nseŋ nya ma n wora kusɔ nɛ baa sha.

¹³M baa nyi geeŋ fanɛ meeŋ ji efute,

nseŋ wu fo alelasheŋ durnya ere to.

¹⁴Yirda Enyɛnpe Ebɔrɛ na.

Baa kɔ eleŋ nseŋ nya kagbene

a keni mbe anishito.

Kechɛto be kefin be kabɔrɛkule be asheŋ

¹Enyɛnpe Ebɔrɛ,

fo e la kefaltagboŋ a kuŋ ma.

Amoso, nu ma kekule

nsaa maŋ kplaŋ ma so.

Fo baŋ kplaŋ ma so,

k maaŋ chɛr nɛ n wu

n yɔ nchaŋ to.

²Jande, nu ma kekule,

saŋɛ so nɛ m maŋ ma enɔana so

n shoŋi fo bɔrɛlambu cheembi na

a bunyaŋ fo nsaa kule fo,

a fin kechɛto ere.

³Sa maŋ ta ma n ti

kumukpakpasowuraana

nɛ basa lubi nɛ baa malga

bumo braana kutɔ kashaso

nsaa kre bumo ŋkre lubi

ashi bumo be ŋgbene to na so

ŋ kaŋɛ fanɛ n ji n tɔr.

⁴Gberge bumo kusoe

ŋkpal bumo be ashuŋ lubi so;

Shin nɛ b nya bumo

be asheŋ lubi be kakɔka;

n shin nɛ bumo be asheŋ lubi

nɛ b wora na kikɛ e laŋɛ bumo so.

⁵Bumo be shɛŋ maŋ wɔ

Enyɛnpe Ebɔrɛ be asheŋ to.

Amoso e beeŋ gberge bumo kusoe

nseŋ mur bumo cheche.

⁶Meeŋ di Enyɛnpe Ebɔrɛ na epaŋ,

ŋkpal e ka nu ma kushu

nseŋ chɛ ma to so.

⁷Enyɛnpe Ebɔrɛ na e naa

sa ma eleŋ nsaa kuŋ ma.

N yirda mo kashenteŋto.

E chɛ ma to n shin nɛ

ma kagbene fuli ma.

Amoso meeŋ ji eyur

nseŋ boŋ nshɛ

n di mo epaŋ.

⁸Enyɛnpe Ebɔrɛ na

e naa sa mbe basa eleŋ.

Mo e naa kuŋ nsaa mɔlga

mbe ewura laraso.

⁹Enyɛnpe Ebɔrɛ,

mɔlga fo basa;

nɛfa fo basa laraso.

Baa keni bumo so

fanɛ kananɛ mbolpɔkpapo

bee keni mbe mbɔlpo so

na mbanaayɔ na.

Enyɛnpe Ebɔrɛ be ebɔl ashi afugboŋ to be asheŋ

¹Menyi emalaika nɛ men wɔ

ebɔrɛso e di Enyɛnpe Ebɔrɛ na epaŋ,

ŋkpal mbe kemaŋkura nɛ eleŋ so.

²Men di mbe ketre

nɛ k kɔ kemaŋkura na epaŋ;

nseŋ bunyaŋ mo ŋkpal e ka du

cheembi nsaa kɔ kemaŋkura so.

³Enyɛnpe Ebɔrɛ na

be ebɔl bee gbri teku so nna

fanɛ bɔrɛ ka bee ponte na.

⁴Enyɛnpe Ebɔrɛ na

be ebɔl kɔ eleŋ nna;

nɛ mbe kamalga kɔ

yuku kumo to.

⁵Enyɛnpe Ebɔrɛ be kamalga

bee buri ndibi nɛ baa

tre sida na to nna.

K bee buri sida be ndibi

nɛ a wɔ Lebanɔn be kebeegboŋ

na so burburbi nna.

⁶Enyɛnpe Ebɔrɛ na

be kamalga e naa shin nɛ

Lebanɔn be kebeegboŋ na

bee tɛto fanɛ kenabi,

nɛ Hɛɛmɔn be kebeegboŋ

malɛ bee tɛto fanɛ gbolu fɔlbi.

⁷Enyɛnpe Ebɔrɛ be kamalga

bee nyɛkpɛ nna fanɛ

bɔrɛ ka nyɛkpɛ na.

⁸Enyɛnpe Ebɔrɛ na be kamalga

bee shin nna nɛ keshishɛrsawule

bee gbuŋgbuŋ to.

Mbe kamalga e shin nɛ Kadɛsh

be keshishɛrsawule gbuŋgbuŋ to.

⁹Enyɛnpe Ebɔrɛ be kamalga

e naa shin nɛ ndibigboŋ

bee gbuŋgbuŋ to;

nɛ kupo to be ndibi be afantaŋ

bee chuge a tɔr;

nɛ basa nɛ b wɔ mbe bɔrɛlambu na to

bee ponte a kaŋɛ fanɛ kemaŋkura

e baa la Enyɛnpe Ebɔrɛ peya.

¹⁰Enyɛnpe Ebɔrɛ na e naa ji kuwura

nchuaana nɛ a wɔ nchiŋ gba so.

E bee ji kuwura nna mbaanaayɔ.

¹¹Enyɛnpe Ebɔrɛ na

e naa sa mbe basa eleŋ,

nsaa nɛfa bumo nɛ kagbenewushi.

Kechɔrɔ be kabɔrɛkule be asheŋ

¹Enyɛnpe Ebɔrɛ, meeŋ fur fo;

ŋkpal fo ka mɔlga ma

nsaa maŋ shin nɛ ma doŋana

ji eyur ŋkpal b ka pɔɔ ma so so.

²N shu n tre fo Enyɛnpe ma Ebɔrɛ;

nɛ fo chɛ ma to,

³nsaa maŋ shin nɛ n yɔ nchaŋ to.

N daa gbar nchaŋ be kɔnɔ nna,

nɛ fo mɔlga ma, a maŋ shin nɛ n wu.

⁴Menyi nɛ menyee ji kashenteŋ na

e boŋ nshɛ n chɔrɔ Enyɛnpe Ebɔrɛ,

ŋkpal asɔ lela nɛ e wora n sa anyi na so.

⁵E maa nya agbo a chɛr;

Mbe kelela bre wɔtɔ nna

n sa esa saŋɛ nɛ e wɔ ŋkpa to kikɛ.

Kushu beeŋ tiŋ m ba kanyɛso,

ama kare tea ka chɛ nɛ kagbenefuli ba.

⁶Ŋ ka daŋ nya asɔ nɛ mee sha na;

n daŋ fɛ nna fanɛ shɛŋ

maaŋ naŋ tir ma kikɛ.

⁷Enyɛnpe Ebɔrɛ,

fo daŋ wora ma kelela,

n sa ma eleŋ fanɛ kebeegboŋ na.

Ama fo ka pal kaman n sa ma

nɛ kufu pɛ ma ga.

⁸Fo Enyɛnpe Ebɔrɛ na

nɛ mee shu a tre,

fanɛ fo wu ma kuwɔr.

⁹Manɛ be tɔnɔ nɛ ma luwu

kɔ n sa fo?

Manɛ nɛ ma keyɔ nchaŋ to

beeŋ wora fo?

Bubuni beeŋ tiŋ n fur fo a?

Baaŋ tiŋ m malga fo kashenteŋji

nɛ alelasheŋ be asheŋ a?

¹⁰Enyɛnpe Ebɔrɛ,

jande, nu ma kekule,

nseŋ wu ma kuwɔr n chɛ ma to.

¹¹Fo e chɛrga ma kushu

ŋ ki kayurji;

nɛ m maŋ naŋ buu

kagbenejijaso be asɔbuuso.

¹²Amoso m maaŋ lo ma kɔnɔ.

Enyɛnpe Ebɔrɛ, meeŋ fur fo,

a di fo ketre epaŋ mbaanaayɔ.

Yirda be kabɔrɛkule be asheŋ

¹Fo Enyɛnpe Ebɔrɛ na

kutɔ nɛ m ba nɛ fo kuŋ ma.

Sa maŋ shin nɛ n ji anishinyɔr.

Enyɛnpe, jande, sɔ ma n yige;

ŋkpal fo ka la esa niŋiso so.

²Nu ma kekule

nseŋ mɔlga ma manaŋ.

Baa la ma kefaltagboŋ,

nɛ kumɔlga be kakpa lempo

nɛ mee nya kumɔlga fo kutɔ.

³Fo Enyɛnpe Ebɔrɛ na,

e la ma kefaltagboŋ a kuŋ ma.

Amoso baa juŋkpar

a ŋini ma ekpa lela na;

nɛ fo ketre e nya kemaŋkura.

⁴Kuŋ ma ashi ajigbelɛ

nɛ ma doŋana sho ma to,

n shin nɛ n nya kumɔlga.

⁵Enyɛnpe Ebɔrɛ,

fo e naa keni ma so.

Jande mɔlga ma ŋkpal fo

ka la eshenteŋjipo so.

⁶Ŋ kishi basa nɛ baa shuŋ agbir

nɛ a maŋ la shɛŋ na ga.

Fo Enyɛnpe Ebɔrɛ na nɛ n yirda.

⁷Ma kagbene beeŋ fuli ma, nɛ n ji eyur

ŋkpal fo kasha nɛ k maa loge na so.

Fo wu ma etɔrɔ nɛ awurfoŋ

nseŋ chɛ ma to.

⁸Fo maŋ yige ma n wɔtɔ

ma doŋana be enɔ to.

Ama fo sɔ ma n yige,

nɛ n nya ma kumu a ji.

⁹Enyɛnpe Ebɔrɛ wu ma kuwɔr

ŋkpal tɔrɔ nɛ n wɔtɔ so.

N shu nɛ ma anishi puŋi m puŋi;

hale ma eyur to kikɛ bee besa ma.

¹⁰Kagbenejija shin nɛ n bel katiŋso;

nɛ kebɔltofinfin bee ku ma ŋkpa so.

Awurfoŋ shin nɛ ŋ ki esa pɔso,

nɛ ma awibi to maŋ naa kɔ eleŋ.

¹¹N doŋana nɛ ma bechenashapo

kikɛ bee keni ma jiga nna.

Ŋ ki kusɔ ŋana so n teriana kutɔ,

nɛ baa wu ma nsaa shile.

¹²B teŋ ma so nna fanɛ esa nɛ e wu,

nɛ ŋ ki fanɛ kapɛlanfu na.

¹³N nu basa ka bee kuli ma,

nɛ kufu pɛ ma ga.

B yɛ, baa kre ma ŋkre nna,

a fin ma nɛ b mɔ.

¹⁴Ama ma yirda deŋ fo so nna.

Enyɛnpe, fo e la ma Ebɔrɛ.

¹⁵Ma ŋkpa wɔ fo enɔ to nna.

Mɔlga ma ashi ma doŋana

nɛ b ju a buu ma so

saŋkama na kutɔ.

¹⁶Wu fo kenya kuwɔr

nseŋ mɔlga ma,

ŋkpal fo kasha

nɛ k maŋ kɔ ekar na so.

¹⁷Enyɛnpe Ebɔrɛ,

fo nɛ mee shu a tre.

Sa maŋ shin nɛ anishinyɔr

e ji ma.

Ama shin nɛ basa lubi bre

e ji anishinyɔr,

hale n ya wu n yɔ nchaŋ to.

¹⁸Shin nɛ befɛpo na

e lo bumo be nnɔ.

Bumo e naa wu bumo be amu

nsaa keni basa niŋiso jiga na.

¹⁹Fo kelela shi m baŋ so;

nɛ fee sha kebaawora basa

nɛ baa ŋana fo kelela.

Ekama nyi fo kelela nɛ kananɛ

fee kuŋ basa nɛ b yirda fo.

²⁰Fee kuŋ bumo ashi basa

nɛ baa kre bumo ŋkre lubi

be enɔ to nna,

nsaa ta bumo a gelge katege

nɛ asheŋ nɛ bedoŋ bee ku

a deŋi bumo.

²¹Kapandi e baa la Enyɛnpe na peya.

Ŋkpal manɛ so e ŋini ma kashagboŋ,

saŋɛ so nɛ bedoŋ kulti ma n wɔtɔ

fanɛ kananɛ benapo bee kulti kadegboŋ

nɛ b pɔr egbal ŋ kulti a wɔtɔ na.

²²Kufu daa kɔ ma nna,

nɛ n daa fɛ fanɛ Ebɔrɛ ju ma

ashi mbe anishito nna.

Ama n shu n tre mo

fanɛ e chɛ ma to,

nɛ e nu ma kekule.

²³Menyi Ebɔrɛ be basa

e baa sha Enyɛnpe na.

Ŋkpal manɛ so,

e bee kuŋ beshenteŋjipo nna,

nsaa gberge kamoowuwuraana

bre kusoe kananɛ k daga bumo.

²⁴Amoso menyi kikɛ nɛ men be yirda

deŋ Enyɛnpe Ebɔrɛ na so na,

e baa kɔ eleŋ nsaa leŋ men be amu to.

Ketampaŋ be kabɔrɛkule be asheŋ

¹Kagbenefuli la bekama

nɛ Ebɔrɛ ta bumo be alubi

m paŋ bumo na peya nna.

Bumo nɛ e ta bumo

be aworandeso ŋ kɛ bumo na.

²Kagbenefuli la esa nɛ

Enyɛnpe Ebɔrɛ maŋ naa nyiŋi

mbe alubi na peya nna.

Mo e maŋ ta kulubi kikɛ

ŋ ŋana mbe kagbene to na.

³Ŋ ka daa maŋ tuba

ashi ma alubi to na;

egbɛ ko daa deŋ ma so nna

ŋkpal kare chɛ kikɛ be kushu so.

⁴Fo kasogberge daa wɔ ma so

kapa nɛ kanyɛ nna;

nɛ ma eleŋ kikɛ loge fanɛ ketarso

be epeŋi ka shin nɛ nchu feeto na.

⁵Nɛ n tuba nseŋ kaŋɛ fo ma alubi kikɛ.

M maŋ naŋ ta kulubi kikɛ n ŋana;

nɛ fo ta ma alubi kikɛ m paŋ ma.

⁶Amoso fo kama nɛ fee ŋana Ebɔrɛ,

nsaa wɔ tɔrɔ to, fo kule mo.

Saŋɛ na so, tɔrɔ be awɔrfoŋ nɛ k du

fanɛ nchu ka to chufulgboŋ

a ba eleŋso na maaŋ sulɔ fo n yɔ.

⁷Fo e la ma eŋanakpa.

Fo alɛ beeŋ mɔlga ma ashi tɔrɔ to;

nɛ m boŋ nshɛ awɔrso

ŋkpal fo ka mɔlga ma so.

⁸Fo yɛ feeŋ ŋini ma

ekpa nɛ meeŋ bɔla so.

Feeŋ ji ma asoeto

nseŋ keni ma so.

⁹Amoso n sa maŋ wuli

fanɛ gbaŋɛ ŋko kurma;

nɛ baa wɔtɔ kebarga ŋko efɔl

pɔɛŋ nɛ e bee shuli

a sa mo nyɛnpe na.

¹⁰Belubiworapo beeŋ luri

awurfoŋ be yiri yiri to.

Ama Enyɛnpe Ebɔrɛ na

beeŋ ta mbe kasha

nɛ k maa loge na ŋ kuŋ

basa nɛ b yirda mo na bre.

¹¹Amoso, menyi bekama

nɛ menyee wora asheŋ niŋiso na;

e shin nɛ men be ŋgbene

e fuli menyi nɛ men ji eyur;

ŋkpal kusɔ nɛ Enyɛnpe na wora so.

Menyi nɛ menyee wora mo kasonu na

e boŋ nshɛ kagbenefuliso.

Kapandi be kashɛ be asheŋ

¹A daga fanɛ menyi bekama

nɛ menyee wora asheŋ niŋiso na;

e boŋ nshɛ kagbenefuliso

ŋkpal kusɔ nɛ Enyɛnpe na wora so.

Menyi nɛ menyee wora mo kasonu na;

e boŋ nshɛ kagbenefuliso n fur mo.

²Men ta alaŋsɔ n fur mo.

Men ta ejaŋjilaŋ n laŋ

m boŋ nshɛ n dele mo.

³Men boŋ nshɛ popɔr n dele mo.

Men laŋ ejaŋjilaŋ kenyiso,

nseŋ cha awɔr kagbenefuliso.

⁴Ŋkpal manɛ so,

Enyɛnpe Ebɔrɛ na be kamalga

la kashenteŋ nna.

Nɛ mbe asheŋ woraso niŋi,

nɛ esa beeŋ tiŋ n yirda mo.

⁵Kusɔ nɛ k niŋi ekpa nɛ

kebaaji asheŋ nɛ amo be ekpa so;

nɛ Enyɛnpe Ebɔrɛ na bee sha.

Mbe kasha nɛ k maŋ kɔ ekar na

bɔlɔ durnya kikɛ to nna.

⁶Enyɛnpe Ebɔrɛ na be kamalga so

nɛ e bɔla n to esoso.

E malga nna nɛ epeŋi nɛ kufɔl

nɛ achɛkpabi lar.

⁷Mo e gbargbar teku be nchu kikɛ

n wɔtɔ kakpa koŋwule.

Mo koŋwule na e koli nchu na

n wɔtɔ kakpa chiŋgeliŋ to fanɛ ebu na.

⁸Kasawule so ebi kikɛ

e shuŋ Enyɛnpe na,

nɛ durnya to be basa kikɛ

e bunyaŋ mo.

⁹Mo e malga nɛ durnya fara.

Mo e kaŋɛ nɛ kusɔ kama ba.

¹⁰Enyɛnpe Ebɔrɛ na

e naa jija efuliana be ŋkre.

Mo e naa kuŋ bumo be nfɛra

lubiana ekpa.

¹¹Kusɔ nɛ Enyɛnpe na kre bre

wɔtɔ nna mbaanaayɔ.

Kusɔ nɛ e yili maa chɛrga kikɛ.

¹²Kagbenefuli la efuli kama so ebi

nɛ bumo be Ebɔrɛ la Enyɛnpe na

peya nna.

Kagbenefuli la bekama nɛ e lara

fanɛ b baa la mbe basa na

peya nna.

¹³Enyɛnpe Ebɔrɛ na wɔ

ebɔrɛso nna a wu basa kikɛ.

¹⁴E wɔ kakpa nɛ e bee ji

kuwura na nna nsaa keni kaseto

a wu basa nɛ b wɔ durnya to kikɛ.

¹⁵Mo e sa bumo nfɛra nɛ baa fɛ asheŋ.

Amoso e nyi kusɔ kama nɛ baa fɛ.

¹⁶Mannɛ ewura be benapo be eleŋ so,

nɛ e bee tiŋ a kɔ a pɔɔ so.

Mannɛ benapo gba be eleŋ so,

nɛ baa tiŋ a kɔ kena a pɔɔ so.

¹⁷Egbaŋɛ nɛ b kɔ a kɔ kena

be eleŋgboŋ na maaŋ tiŋ

m mɔlga esa ŋko ŋ kuŋ mo.

¹⁸Enyɛnpe Ebɔrɛ na bee keni

bekama nɛ baa wora mo

kasonu so nna;

nɛ mbe kasha nɛ k maa loge na

malɛ wɔ bekama nɛ b yirda

mo na so.

¹⁹E bee mɔlga bumo nna

nɛ b maa wu manaŋ,

nsaa sa bumo ŋkpa

akoŋgboŋ be saŋɛ.

²⁰Enyɛnpe Ebɔrɛ na to

nɛ anyi be tama wɔ.

Mo e la anyi be ekumpo

nɛ echɛtopo.

²¹Anyi be ŋgbene fuli anyi nna;

ŋkpal an ka yirda mbe ketre so.

²²Enyɛnpe Ebɔrɛ, an ka ta anyi

be yirda n wɔtɔ fo to ere,

shin nɛ fo kasha nɛ k wɔtɔ

mbaanaayɔ na e baa wɔ anyi so.

¹Meeŋ baa fur Enyɛnpe na saŋkama.

M maaŋ yige mbe kechɔrɔ kikɛ.

²Meeŋ fur mo ŋkpal kusɔ nɛ e wora so,

nɛ bekama nɛ baa ji awurfoŋ na

e nu kumo be loŋ nɛ bumo be ŋgbene

e fuli bumo.

³Men ba chɛ ma to nɛ an malga

Enyɛnpe na be keshi be asheŋ.

Men shin nɛ an cha abar

n fur mbe ketre.

⁴Ŋ kule Enyɛnpe Ebɔrɛ na

nɛ e nu ma kekule,

nseŋ sɔ ma n yige ashi asɔ

nɛ a bee da ma kufu na to.

⁵Bekama nɛ bumo be anishi

yuu mo so be ŋgbene

bee fuli bumo nna.

Bumo alɛ maaŋ ji nyɔmɔ kikɛ.

⁶Mo nɛ betentaŋasepo bee shu a tre,

nɛ e bee nu bumo be kushu,

nsaa mɔlga bumo ashi bumo

be etɔrɔ to na.

⁷Enyɛnpe be emalaika bee kulti

bekama nɛ baa bunyaŋ mo nna a wɔtɔ,

nsaa mɔlga bumo ashi kenishipere to.

⁸Nɛ fo firgi n taga Enyɛnpe na to,

feeŋ wu fanɛ e walɛ.

Nɛfa la bekama nɛ baa nya kekuŋ

ashi Enyɛnpe na to peya nna.

⁹Bekama nɛ b la Enyɛnpe Ebɔrɛ

be basa na e bunyaŋ mo.

Ŋkpal manɛ so,

e bee sa bumo nɛ b yirda mo na

asɔ nɛ a tir bumo nna saŋkikɛ.

¹⁰Ebuluŋ gba bee kaa di akoŋ

ama bekama nɛ baa wora

Enyɛnpe na kasonu bre,

maa fin kusɔ lela a gben.

¹¹Ma mbia, men kaŋ kusoe n nu;

nɛ n ŋini menyi kananɛ

menyeeŋ baa bunyaŋ Enyɛnpe na.

¹²Menyeeŋ baa sha kenu

kebaawɔtɔ to be ebel a?

Menyeeŋ baa sha

efute tenteŋ nɛ kagbenefuli a?

¹³Kumo ere men sa maa

tuge malga lubi,

ŋko n shin nɛ men be nnɔ

e baa ku efɛ.

¹⁴Men yige alubi be kebaawora

nsaa wora alela;

meeŋ baa kɔ a fin kagbenewushi

ashi men be ŋgbene to.

¹⁵Enyɛnpe Ebɔrɛ na bee keni

basa nɛ baa wora asheŋ niŋiso so

nsaa nu bumo be kekule nna.

¹⁶Ama e bee pal kaman nna

a sa alubiworapo bre.

Bumo alɛ baŋ wu e bee

shin nɛ baa teŋ bumo so

kuraa nna.

¹⁷Enyɛnpe Ebɔrɛ na bee nu

esa nɛ e bee wora asheŋ niŋiso

be kushu nna,

nsaa mɔlga mo ashi mbe tɔrɔ to.

¹⁸Enyɛnpe Ebɔrɛ na taga basa

nɛ bumo be aba pɔ bumo na to nna.

E bee mɔlga bekama

nɛ b maŋ naa kɔ tama na nna.

¹⁹Basa lela bee kaa nya etɔrɔ damta nna.

Ama Enyɛnpe Ebɔrɛ na

beeŋ mɔlga bumo ashi etɔrɔ na kikɛ to.

²⁰Enyɛnpe Ebɔrɛ na e naa kuŋ bumo.

Bumo be kuwibi koŋwule gba maaŋ bu.

²¹Alubiworapoana be asheŋ lubi

bee kilgi nna a ji bumo.

Ebɔrɛ beeŋ gberge bekama

nɛ b kishi mbe basa kusoe.

²²Enyɛnpe Ebɔrɛ na

beeŋ mɔlga mbe basa.

E beeŋ kuŋ bekama nɛ baa fin

kekuŋ ashi mo kutɔ na.

Kechɛto be kabɔrɛkule be asheŋ

¹Enyɛnpe Ebɔrɛ,

kɔ bekama nɛ baa kɔ ma na;

nseŋ kuŋ bumo nɛ baa kuŋ ma

ekpa na ekpa.

²Chɛ ma to nseŋ kuŋ ma.

³Maŋ fo kekpa nɛ chutre so

ŋ kuŋ bumo nɛ b ju

a bɛ ma so na ekpa;

n shin nɛ m pin fanɛ

fo e la ma emɔlgapo.

Nase kɔnɔ fanɛ feeŋ

mɔlga ma.

⁴Shin nɛ bekama nɛ baa

fin ma nɛ b mɔ na

e ji anishinyɔr nseŋ kɔ n tɔr.

Shin nɛ bekama nɛ baa kre ma

ŋkre lubi na kikɛ e wulto

m bɛta kaman.

⁵Shin nɛ b ki fanɛ afɔfɔ

nɛ afu bee foŋ a lɛ na,

saŋɛ so nɛ Enyɛnpe be malaika

bee ŋin bumo na.

⁶Shin nɛ bumo be ekpa to

e ki tentembiri nsaa fɛrge,

saŋɛ so nɛ Enyɛnpe be malaika

ju a bɛ bumo so na.

⁷M maŋ wora bumo shɛŋ

nɛ b fe ma kejigbelɛ;

nseŋ kur kemaŋ chiŋgeliŋ

n nase fanɛ n tɔr to.

⁸Ama kemur beeŋ purgi bumo.

Bumo gbagba be ajigbelɛ

nɛ b fe na beeŋ kilgi m pɛ bumo.

Baaŋ tur amaŋ nɛ bumo

gbagba kur na to.

⁹Nɛ ma kagbene e fuli ma

ŋkpal Enyɛnpe Ebɔrɛ na so;

nɛ n ji eyur ŋkpal e ka mɔlga ma so.

¹⁰Nseŋ ta ma kagbene kikɛ

ŋ kaŋɛ Enyɛnpe na le:

“Esa kama maŋ du fanɛ fo.

Fo e naa kuŋ bepɔshipo

ashi belempo be enɔ to,

nsaa mɔlga betirpo

ashi basa lempo be kamɛaŋ to.”

¹¹Belubiworapo bee ku efɛ

a ji shɛda a gbiti ma.

Baa ku ma kɔnɔ a kaŋɛ fanɛ

n wora asɔ nɛ m maŋ nyi

amo be asheŋ gba.

¹²Baa ta alubi nna a ka

ma alela be kukɔ;

nɛ kenawule nɛ kebɔltofinfin

tɔr ma so.

¹³Ama b ka bee lɔ,

kagbenejijaso be asɔbuuso nɛ m buu;

m mɔn ma kumu ajibi;

m bar ma kumu ase ŋ kule Ebɔrɛ

¹⁴fanɛ kananɛ meeŋ wora

n sa n teri ŋko n niopibi na.

N shu kagbenejijaso nna fanɛ

ŋ ka bee shu n nio be keeli na.

¹⁵Ama asheŋ ka tu ma ere

bumo be ŋgbene fuli bumo nna

nɛ b shɛr a wora ma eyurto.

Nɛ befɔ kulti ma n wɔtɔ

a bri ma, nɛ b la ma to.

¹⁶B wora ma eyurto nna

fanɛ kananɛ basa nɛ b maa ŋana

Ebɔrɛ bee wora ebobi eyurto na;

nsaa keni ma yurkishi so.

¹⁷Enyɛnpe Ebɔrɛ, feeŋ ba tase a keni

nɛ b baa wora ma le a?

Mɔlga ma ashi basa lubi ere be enɔ to.

Mɔlga ma ŋkpa ashi basa nɛ b du fanɛ

ebuluŋ ere be enɔ to.

¹⁸Saŋɛ na so meeŋ chɔrɔ fo

ashi fo basa nɛ b shɛr be anishito;

nseŋ yili bumo to n fur fo.

¹⁹Sa maŋ shin nɛ ma doŋana,

befɛpo na, be ŋgbene e fuli bumo

ŋkpal b ka pɔɔ ma so so.

Sa maŋ shin nɛ bumo nɛ b kishi ma

kenyanyaŋɛso na e mushe ma

ŋkpal ŋ ka wɔ tɔrɔ to so.

²⁰B maa malga kelɔposo kikɛ.

B wɔtɔ nna a ku efɛ a sa basa

nɛ ma nɛ bumo wɔtɔ

kagbenewushiso na.

²¹Baa nya manaŋ a ku asheŋ

a deŋi ma nna; nsaa ponte a kaŋɛ le:

“An gbagba be kenishi e wu

kusɔ nɛ fo wora.”

²²Enyɛnpe Ebɔrɛ,

fo gbagba wu kesheŋ ere.

Amoso sa maŋ lo to.

Enyɛnpe Ebɔrɛ,

sa maŋ yɔ kufɔ ŋ ka ma.

²³Niŋi to, ŋ koso m ba kuŋ ma.

Enyɛnpe, ma Ebɔrɛ;

ba kɔ n sɔ ma.

²⁴Enyɛnpe Ebɔrɛ,

ŋkpal fo ka la esa niŋiso so,

n shin nɛ b pin fanɛ m maŋ wora n foe.

Sa maŋ shin nɛ ma doŋana e mushe ma.

²⁵Sa maŋ shin nɛ b kaŋɛ le:

“Mannɛ mo nde a?

An nya mo n wɔtɔ enɔ to a!”

²⁶Shin nɛ bumo nɛ bumo be ŋgbene

bee fuli ŋkpal ma awurfoŋ so na

be nfɛra e wea to nɛ b kɔ n tɔr cheche.

Shin nɛ bumo nɛ baa kaŋɛ fanɛ

b bɔ ma na e ji nyɔmɔ nseŋ sipa.

²⁷Shin nɛ bumo nɛ baa

fin fanɛ n ji n lar na e cha awɔr

kagbenefuliso ŋ kaŋɛ le:

“Kemaŋkura e baa la Enyɛnpe na peya,

Mbe kagbene e naa fuli

ŋkpal mbe kenya be nɛnɛ so na.”

²⁸Nɛ m malga kananɛ fee wora

asheŋ niŋiso be asheŋ,

nseŋ fur fo kachɛ lelemu.

Dimɛdi be alubi nɛ Ebɔrɛ be alelasheŋ be asheŋ

¹Belubiworapo maa sa Ebɔrɛ bunyaŋ.

Alubi nawule be asheŋ nɛ baa fɛ

ashi bumo be ŋgbene to.

²Ŋkpal b kaa bee sha bumo gbagba

be amu ga so so;

b maa wu alubi nɛ baa wora,

hale nɛ baa kishi amo gba.

³Kafulesheŋ nɛ efɛ e bɔlɔ

bumo be nnɔ to.

Bumo be nfɛra maa ŋini

bumo kebaawɔtɔ lela;

bumo alɛ maa wora kelela.

⁴B dese bumo be edesekpa gba

alubi be kewora be ŋkre nɛ baa kre.

B maa wora asheŋ lela kikɛ.

Kulubi kama malɛ maa choŋ bumo so.

⁵Enyɛnpe Ebɔrɛ, fo kashenteŋji

nɛ kasha nɛ fo kɔ a sa basa shi ga.

Kumo alɛ maa chɛrga;

k bee fo kaplɛkama,

hale esoso nɛ awɔlpa to kikɛ.

⁶Fo asheŋ woraso niŋi ekpa nna

nsaa du fanɛ kebeegboŋ

nɛ k maa gbuŋgbuŋ na.

Kananɛ fee mige basa be asheŋ to

a ji asheŋ nɛ amo be ekpa so

du chiŋgeliŋ fanɛ teku nna.

Fo enɔ to nɛ edimɛdi

nɛ asɔbɔya kikɛ wɔ.

⁷Fo kasha nɛ k maa chɛrga

nsaa maa loge na du fanɛ shuwa nna;

nɛ bebɔlpo nɛ basagboŋ kikɛ

bee nya kekuŋ ashi fo kiyoyul to.

⁸Fee wora kejigboŋ nna a sa

fo befɔ ashi fo laŋ to.

Fo kasha nɛ fo kɔ a sa anyi na

baŋ anyi be nfɛra so.

⁹Fo kutɔ nɛ ŋkpa kikɛ shi;

nɛ fo kefulto bee bugi

anyi be anishi nɛ anyee pin fo.

¹⁰Enyɛnpe Ebɔrɛ, baa ŋini bekama

nɛ b nyi fo na kasha saŋkama;

nsaa wora bumo nɛ baa wora

asheŋ niŋiso na kelela.

¹¹Sa maŋ shin nɛ kanyishawuraana

e baa kɔ ma, ŋko n shin nɛ

kumukpakpasowuraana

e ju ma n lɛ.

¹²Keni kakpa nɛ belubiworapoana,

tɔr a dese.

Bumo alɛ maaŋ naŋ tiŋ n wora

shɛŋ kikɛ.

Keyirda Ebɔrɛ be asheŋ

¹Sa maŋ shin nɛ belubiworapoana

be asheŋ woraso e baa fɔŋ fo,

ŋko n shin nɛ bumo be kanya be asheŋ

e baa besa fo.

²Ŋkpal manɛ so, b du fanɛ

afitiri ŋko afantaŋ bumbuŋ nna,

b maa chɛr nsaa wɔl a wu.

³Yirda Enyɛnpe Ebɔrɛ na,

nsaa wora alelasheŋ.

Saŋɛ na so feeŋ chena

kasawule ere so n nya kekuŋ.

⁴Shin nɛ fo kagbene e baa fuli fo ga;

ŋkpal fo ka bee wora Enyɛnpe Ebɔrɛ na

be aparsheŋ so.

Mo alɛ beeŋ baa wora kusɔ

nɛ fee sha a sa fo.

⁵Shin nɛ Enyɛnpe Ebɔrɛ na

e baa juŋkpar fo kusɔ kama to.

Yirda fanɛ e beeŋ chɛ fo to.

⁶Shin nɛ fo asheŋ woraso niŋiso

e baa kpa edɛ fanɛ karechɛ,

nɛ kananɛ fee ji asheŋ

nɛ amo be ekpa so,

e baa di efuli fanɛ kapiidi be epeŋi.

⁷Baa kɔ kanyiti a jo Enyɛnpe be saŋɛ.

Sa maŋ shin nɛ k baa tɔrɔ fo

ŋkpal asheŋ ka bee nite nɛnɛ

a sa belubiworapo so.

⁸Saa maa nya agbo

ŋko a wora asheŋ agbo so.

Agbo bee yɛra esa alubi to nna.

⁹Alubiworapoana kikɛ beeŋ mur.

Ama bekama nɛ b yirda

Enyɛnpe Ebɔrɛ na bre

beeŋ ji kasawule ere so be tɔnɔ.

¹⁰K maaŋ chɛr nɛ alubiworapoana e mur,

nɛ fo keni n fin bumo ŋ gben.

¹¹Ama bebɔlpo bre beeŋ ji

kasawule ere so be tɔnɔ;

nseŋ nya kagbenewushi gboŋgboŋi.

¹²Belubiworapo bee kre

basa lela asheŋ lubi nna,

nsaa keni bumo yurkishiso.

¹³Ama Enyɛnpe Ebɔrɛ na

bee mushe belubiworapo nna,

ŋkpal bumo be kasogberge

be saŋɛ ka maaŋ chɛr nseŋ ba so.

¹⁴Belubiworapo bee pe nsaŋɛ nna

nsaa gberge bumo be ata to

a fin betirpo nɛ betentaŋasepo

nɛ basa nɛ baa wora asheŋ niŋiso

nɛ b mɔ.

¹⁵Ama bumo gbagba be nsaŋɛ na

beeŋ kilgi n da bumo m mɔ,

nɛ bumo be ata na e buri to.

¹⁶Kebaa kɔ kebaawɔtɔ niŋiso

nsaa la etirpo

bɔ kebaala damawura

nsaa la alubiworapo.

¹⁷Ŋkpal manɛ so,

Enyɛnpe Ebɔrɛ na beeŋ jija

belubiworapo be eleŋ kikɛ;

nseŋ sa bumo nɛ baa bɔla mbe

ekpa niŋiso so na eleŋ.

¹⁸Enyɛnpe Ebɔrɛ na e naa keni

bekama nɛ baa wora mo kasonu so.

Kusɔ kama nɛ mo alɛ sa bumo

beeŋ baa la bumo peya mbaanaayɔ.

¹⁹B maaŋ ji awurfoŋ jɛrbi be saŋɛ.

Akoŋ be jemanɛ malɛ,

bumo ere beeŋ baa kɔ

ajibi yɛlyɛla so.

²⁰Ama belubiworapo,

nɛ b la Ebɔrɛ mo doŋana na bre,

beeŋ foe fanɛ kananɛ edishi

bee shi edɛ to a lar a foe na.

²¹Belubiworapo bee paŋ asɔ nna,

nsaa kini keka.

Ama basa nɛ baa wora asheŋ

nɛ a niŋi na bre bee bugi

kagbene nna a kɛ basa asɔ saŋkama.

²²Basa nɛ Enyɛnpe Ebɔrɛ nɛfa na,

e naŋ ji kasawule ere so be tɔnɔ.

Ama bekama nɛ Ebɔrɛ sho kɔnɔ na

bre beeŋ mur.

²³Nɛ esa be asheŋ woraso baa fuli

Enyɛnpe Ebɔrɛ na be kagbene;

e bee ŋini mo kananɛ e beeŋ baa

tia mbe aya nna.

²⁴E fiti gba, e maaŋ tɔr;

ŋkpal manɛ so,

Enyɛnpe Ebɔrɛ gbagba

e naŋ pɛ mo to n yili.

²⁵Yili ma kebiato kikɛ m ba

fo ma mbel to;

m maŋ naŋ wu Enyɛnpe Ebɔrɛ

ka kplaŋ esa lela so;

ŋko n wu esa lela be mbia

ka ta kawie a na a kule ajibi.

²⁶Ama baa nya a ji nɛnɛ nna,

nsaa bugi kagbene a kɛ

basa asɔ yɛlyɛla so;

nɛ bumo be mbia malɛ

bee nya nɛfa.

²⁷Yige asheŋ lubi be kebaawora;

nseŋ fara a wora alelasheŋ.

Saŋɛ na so fo kaman to ebi

beeŋ nya kasawule ere so

n chena mbaanaayɔ.

²⁸Ŋkpal manɛ so,

Enyɛnpe Ebɔrɛ na bee sha

bekama nɛ baa wora asheŋ

nɛ amo be ekpa so na nna.

Mo alɛ maaŋ kplaŋ bekama

nɛ baa ji kashenteŋ so.

Enyɛnpe na beeŋ baa kuŋ bumo,

ama e beeŋ mur belubiworapo

bre be kaman to ebi.

²⁹Kasawule ere beeŋ baa la basa

nɛ baa wora asheŋ nɛ a niŋi na peya,

nɛ b chena kumo so mbaanaayɔ.

³⁰Kanyiasheŋ be mmalga

e naa lar esa nɛ e bee wora

asheŋ nɛ a niŋi be kɔnɔ to,

nɛ mbe kudonduloŋ bee tuge

asheŋ nɛ a niŋi ekpa.

³¹E ta Ebɔrɛ be mbra na nna

n wɔtɔ mbe kagbene to;

amoso e bee pere kenishi nna

a bɛ kumo so saŋkikɛ.

³²Belubiworapo bre bee

ŋana nna a fin

basa lela nɛ b mɔ.

³³Ama Enyɛnpe Ebɔrɛ na

wɔ basa lela kutɔ nna;

nsaa beeŋ malga n sɔ bumo n yige;

saŋɛ nɛ baŋ bar bumo demujikpa na.

³⁴Ta fo yirda n wɔtɔ Enyɛnpe na to,

nsaa bɛ mo so.

E beeŋ shin nɛ fo chena kasawule ere so

n wu kananɛ belubiworapo beeŋ mur.

³⁵N wu amukpakpasowuraana

ka puni basa n nyalɛ;

fanɛ kananɛ ndibi bee daŋ

a walɛ nɛnɛ ashi kasawule lela so na.

³⁶Ama k maaŋ chɛr ko nɛ b foe;

nɛ ŋ keni nɛ b maaŋ naa wɔtɔ.

³⁷Keni, asheŋ lela bee jo

basa nɛ baa ji kashenteŋ

nsaa maa wora a foe;

nsaa fin kayurwushi na

be kaman to ebi nna.

³⁸Ama alubiworapoana

nɛ bumo be kaman to ebi kikɛ

beeŋ mur.

³⁹Enyɛnpe Ebɔrɛ na

e naa kuŋ mbe basa,

nsaa mɔlga bumo tɔrɔ be saŋɛ.

⁴⁰Enyɛnpe na e naa mɔlga bumo;

ashi alubiworapoana be enɔ to,

ŋkpal b kaa bee fin kekuŋ

ashi mo kutɔ so.

Tɔrɔ be jemanɛ be kabɔrɛkule be asheŋ

¹Enyɛnpe Ebɔrɛ,

sa maŋ nya agbo n fiɛ ma so,

ŋko ŋ gberge ma kusoe.

²Fo to ma fo atanyembi

nseŋ ta fo enɔ ŋ ŋmɛa ma.

³Ma eyur kikɛ bee besa nna

ŋkpal fo agbo so,

nɛ mee nu ebesa ma awibi to,

⁴nɛ ma alubi wora ma so egbɛ

hale a buri ma to.

⁵Ŋkpal ma kawuli so,

ma eyur kikɛ kɔ achuu

nɛ a bɛ a dufɛ nna.

⁶Ma eyur banto nna nɛ n nyɔŋ to

a tekeŋto saŋkama.

⁷Ma kaman bel edɛ nna

a besa ma pelpelpel.

Ma eyur kikɛ maŋ kɔ alenfia.

⁸Ma eyur kikɛ bɛa ma to nna,

nɛ eleŋ fimbi kikɛ maŋ naa wɔ ma to.

⁹Enyɛnpe Ebɔrɛ,

fo nyi ma asheŋ tirso

nɛ ma kushuto nɛ mee

shuto kikɛ.

¹⁰Ma kagbene bee to nna pep pep pep,

nɛ ma eleŋ kikɛ loge

nɛ ma anishi ki m pere

a maŋ naa wu.

¹¹Ŋkpal ma achuu na so,

n nekpaana nɛ ŋ kurgepoana

bee gelge ma nna;

hale n niopibiana gba

maŋ naa taga ma to.

¹²Bumo nɛ baa fin ma luwu

bee sho ma ajigbelɛ nna;

nɛ bumo nɛ baa fin ma nɛ b jija

malɛ bee kre ma ŋkre lubi

karechɛ kikɛ.

¹³Ŋ ki fanɛ kpawu nna,

m maŋ naa nu.

Ŋ ki fanɛ neemu nna,

m maŋ naa tiŋ a malga.

¹⁴Ŋ ki kpawu nna nɛ ma kɔnɔ

maaŋ naŋ tiŋ n tuge shɛŋ.

¹⁵Fo Enyɛnpe Ebɔrɛ na

nɛ n yirda;

amoso, jande wora kusɔ ko.

¹⁶Sa maŋ shin nɛ b wora ma eyurto;

ŋko a wu bumo be amu n wɔtɔ ma

ŋkpal ŋ ka fɛrge n tɔr so.

¹⁷Ŋkpal ma eyur to be ebesa damta so,

mee shin nɛ n lar n tɔr nna.

¹⁸Ŋ kaŋɛ fo ma alubi kikɛ,

nɛ kananɛ n tuba n lar amo to.

¹⁹Bedoŋ lempo damta

e kishi ma kenyanyaŋɛso.

²⁰Baa ta kulubi nna a ka

ma kelela be kukɔ,

nsaa malga a gbiti ma

ŋkpal ŋ kaa bee wora alela so.

²¹Enyɛnpe Ebɔrɛ,

sa maŋ kini ma n lɛ!

N nyɛnpe, sa maŋ yɔ kufɔ ŋ ka ma.

²²Fo e naa chɛ ma to saŋkama;

Amoso jande wora manaŋ

m mɔlga ma.

Alubi be ketampaŋ be kabɔrɛkule be asheŋ

¹Ŋ kaŋɛ fanɛ meeŋ baa de so,

nɛ ma kudonduloŋ maaŋ wora alubi.

N yɛ, meeŋ kre ma kɔnɔ so,

saŋɛ nɛ ma nɛ basa lubi wɔtɔ na.

²Ŋ ka loto n yili shruum

a maa malga kelela na,

nɛ ma eyur to be ebesa

nɛ tɔrɔ na wora kishi n ti so.

³Nɛ kewora fanɛ edɛ

ka bee chɔɔ ma eyur to na.

M baa fɛ kumo be asheŋ,

k bee chɔɔ ma to ga nna.

Ndoŋ nna nɛ ŋ kaŋɛ le:

⁴“Enyɛnpe Ebɔrɛ, jande ŋini ma

kusɔ nɛ k beeŋ wora ma echefoso.

Meeŋ wu naniere nna a?”

⁵Fo wora ma ŋkpa shiŋgblembi nna;

nɛ nfɛ nɛ meeŋ ji maŋ la shɛŋ fo kutɔ.

Dimɛdi be ŋkpa du fanɛ

afu ka ber n choŋ nna.

⁶K bee choŋ manaŋ manaŋ nna

fanɛ kiyoyul na.

Awurfoŋ nɛ anyee ji ere

kikɛ la fuloŋ nna.

Anyee fin asɔ nna

a deŋi abar so a yili

nsaa maŋ nyi esa nɛ e beeŋ ba

ji amo be kapetɛ kachako so.

⁷Naniere, Enyɛnpe Ebɔrɛ,

manɛ bre nɛ n naa fin?

Ma tama deŋ fo so nna.

⁸Mɔlga ma ashi ma alubi to.

Jande, sa maŋ shin nɛ

bewulpo e mushe ma.

⁹Fo e shin nɛ n ji le be awurfoŋ

n shin nɛ n loto

a maŋ bugi kɔnɔ ŋ kaŋɛ shɛŋ na.

¹⁰Fo maaŋ yige kebaa gberge

ma kusoe loŋ a?

Ebɔl lar ma.

¹¹Fee gberge dimɛdi kusoe alegaiso

ŋkpal mbe alubi so nna.

Fee jija anyi be asɔ lela nna

fanɛ kananɛ elala bee jija asɔbuuso na.

Dimɛdi du fanɛ afu ka ber n choŋ nna.

¹²Enyɛnpe Ebɔrɛ,

jande, nu ma kekule.

Nu ma kushu nseŋ chɛ ma to.

Anishichubi e bɔlɔ ma anishi kikɛ to.

N du fanɛ efɔ nna ashi fo kutɔ,

fanɛ kananɛ n nananyɛnana

daa la befɔ na.

¹³Sa maŋ naŋ nya agbo n wɔtɔ ma,

saŋɛ na so meeŋ nya kagbenefuli gbrɛbi

pɔɛŋ nseŋ lar durnya ere to.

Kechɛto be kabɔrɛkule be asheŋ

¹N ta kanyiti nna n jo

Enyɛnpe Ebɔrɛ na fanɛ

e chɛ ma to,

nɛ e nu ma kekule

nseŋ chɛ ma to.

²K du fanɛ n daŋ tɔr

kemaŋ chiŋgeliŋ nɛ depɔ

bɔlɔ kumo to nna,

nɛ e gberge ma

n lara ashi kumo to.

Nseŋ ta ma n yili kefalta so;

kakpa nɛ m maaŋ naŋ nia.

³E sa ma kashɛ popɔr nna,

nɛ m boŋ n fur mo,

nɛ basa damta e wu kusɔ nɛ

Enyɛnpe Ebɔrɛ na wora,

nsaa ŋana mo;

saŋɛ na so, baaŋ ta bumo

be yirda n deŋi mo so.

⁴Enyɛnpe Ebɔrɛ na bee nɛfa

bekama nɛ b yirda mo

nɛ bumo nɛ b maa shuŋ agbir

nɛ a la asɔ fuloŋ na nna.

⁵Enyɛnpe Ebɔrɛ,

fo wora emamachisheŋ damta.

Ŋkre nɛ fo kɔ n sa anyi

shi m pɔɔ anyi be nfɛra so.

Esa kama maŋ du fanɛ fo.

M maaŋ tiŋ ŋ kute fo asheŋ

woraso kikɛ.

⁶Mannɛ basa be esarga nɛ ŋkɛ

e naa bɔlɔ fo kenishi.

Mannɛ esarga chɔɔso

nɛ alubi be ketampaŋ be esarga

nɛ amo be ŋkɛ nɛ fee fin.

Ama kusɔ nɛ k tir fo kashenteŋto

e la ŋ kaa beeŋ baa wora fo kasonu.

⁷Amoso nɛ ŋ kaŋɛ fanɛ ma nde na.

Meeŋ wora asheŋ nɛ b sibɛ n wɔtɔ

fo mbra be kawɔl na to fanɛ m bɛ so na;

Kumo e kaŋɛ le na:

⁸“Kebaa wora fo aparsheŋ

e naa fuli ma kagbene,

amoso n ta fo mbra n wɔtɔ

ma kagbene to nna.”

⁹Meeŋ kaŋɛ kananɛ fee

mɔlga anyi saŋkama

ashi fo basa be nshɛrgboŋ to.

Enyɛnpe, fo nyi ŋ ka maaŋ lo

ma kɔnɔ to kikɛ.

¹⁰M maŋ ta fo kumɔlga be asheŋ na

n wɔtɔ n nawule be kagbene to nna na.

Ŋ ji fo kumɔlga nɛ fo kashenteŋji

nɛ fo kasha nɛ k maa chɛrga na

be asheŋ be shɛda nna

ashi fo basa be nshɛrgboŋ to.

¹¹Enyɛnpe Ebɔrɛ, n nyi fo ka

maaŋ yige kebaawu ma kuwɔr.

Fo kasha nɛ k maa chɛrga na

nɛ fo kashenteŋji e naa

kuŋ ma saŋkama.

¹²Ma etɔrɔsheŋ shi alegaiso

nɛ ma alubi kulti ma

n wɔtɔ kaplɛkama

nɛ m maŋ naa nyi

kusɔ nɛ meeŋ wora.

Ma alubi shi a chɔ emin

nɛ a wɔ ma kumu so gba,

nɛ kumo be loŋ shin nɛ m pɔ aba.

¹³Enyɛnpe Ebɔrɛ, jande, mɔlga ma.

Ba chɛ ma to manaŋ.

¹⁴Wul basa nɛ baa fin ma

nɛ b mɔ na be nfɛra to

nseŋ shin nɛ b ji anishinyɔr.

Shin nɛ bekama nɛ baa fin ma

luwu na e sipa.

¹⁵Shin nɛ anishinyɔr gboŋgboŋi e pɛ

bekama nɛ baa kaŋɛ ma le na:

“Men keni kananɛ e ki a.”

Nɛ kufu e pɛ bumo nɛ b baa chicha.

¹⁶Enyɛnpe Ebɔrɛ,

shin nɛ bumo nɛ baa bunyaŋ fo na

be ŋgbene e fuli bumo nɛ b ji eyur.

Shin nɛ bekama nɛ baa sha fo

kumɔlga na e baa kaŋɛ le saŋkama:

“Enyɛnpe Ebɔrɛ na shibi ga.”

¹⁷N la etirpo nɛ etentaŋasepo nna;

m maaŋ tiŋ n wora shɛŋ.

Ama ma asheŋ tir fo,

Enyɛnpe Ebɔrɛ na.

Fo e la ma emɔlgapo,

amoso jande,

nya manaŋ m ba mɔlga ma.

Kulɔ be saŋɛ be kabɔrɛkule be asheŋ

¹Enyɛnpe Ebɔrɛ, fee nɛfa bekama

nɛ baa chɛ betirpo to nna,

nsaa mɔlga loŋ be basa

tɔrɔ be saŋɛ so.

²Bumo be ŋkpa wɔ fo enɔ to nna

nɛ fee kuŋ bumo saŋkikɛ.

Fee shin nɛ bumo be ŋgbene bee fuli

kasawule ere so nfe nna.

Fo alɛ maa ta bumo a bɔɔ

bumo doŋana enɔ.

³B baa lɔ fee leŋ bumo to nna

nsaa chɛ bumo be alɔ.

⁴Enyɛnpe, jande wu ma kuwɔr!

Hale ŋ ka wora alubi

n da fo so ere gba kikɛ,

ta m paŋ ma.

⁵Bedoŋ bee malga asheŋ lubi

a laŋɛ ma kaplɛa so nna

a kaŋɛ le: “Saŋɛ mo nɛ feeŋ wu

nɛ b teŋ fo ketre so?”

⁶Bekama nɛ baa ba kaa bɔɔ ma so na,

bee malga mmalga fuloŋ nawule nna.

B baŋ naŋ laŋɛ a yɔ malɛ

ŋkuli nɛ efɛ nɛ b kɔ a salga to a yɔ.

⁷Bedoŋ baa kuli ma,

nfɛra lubi nawule nɛ b kɔ

a laŋɛ ma kaplɛa so;

⁸a kaŋɛ fanɛ kulɔ mɔso e kɔ mo,

amoso e maaŋ naŋ koso

ashi kakpa nɛ e dese ere.

⁹Nteri kpakpasoana nɛ n yirda ga,

nɛ b daa tu ma a ji gba

pal kaman nna n sa ma.

¹⁰Ama, Enyɛnpe, jande,

fo ere e wu ma kuwɔr,

n shin nɛ n niŋi to

n wora bumo n tal to.

¹¹Sa maŋ shin nɛ ndoŋana

e pɔɔ ma so, nɛ m pin

fanɛ ma asheŋ bee bɔlɔ

fo kenishi kashenteŋto.

¹²Ŋkpal ŋ kaa bee wora

asheŋ niŋiso so,

feeŋ chɛ ma to, nseŋ shin nɛ

m baa wɔ fo kutɔ saŋkama.

¹³Kechɔrɔ e baa la Enyɛnpe

Israɛl be Ebɔrɛ na peya

hale mbaanaayɔ.

Amɛn.

KENYƆSOPO

(Nshɛ 42—72)

Esa nɛ b pɛ n yɔ efuli pɔtɛ so be kabɔrɛkule be asheŋ

¹Kananɛ achukoŋ bee pɛ chibir

nɛ e bee yɛla kenishi to a fin

eboŋ nɛ k kɔ nchu na,

aloŋ nɛ mee fin fo Ebɔrɛ

kenishipereso ashi ma

kagbene to.

²Kananɛ achukoŋ bee pɛ esa

nɛ e bee fin nchu na,

aloŋ nɛ mee fin fo

Enyɛnpe Ebɔrɛ na

ashi ma kagbene to.

Saŋɛ mo nɛ meeŋ wu fo?

³M ma anishichubi e ki ma

kapa nɛ kanyɛ be ajibi.

Nɛ saŋkama basa

bee bishi ma fanɛ

nnɛ nɛ fo Ebɔrɛ na wɔ.

⁴M baŋ nyiŋi kananɛ

n daa juŋkpar basa nɛ

baa bɛ abar so a yɔ

fo bɔrɛlambu to

nsaa cha awɔr a boŋ nshɛ

kagbenefuliso a bunyaŋ fo na,

ma kagbene bee jija

alegaiso nna.

⁵Manɛ nna nɛ ma aba pɔ ma?

Manɛ nna nɛ ma kagbene

maŋ dese ma?

Ŋ kraŋ yirda fo;

ma alɛ kraŋ beeŋ di fo epaŋ

ŋkpal fo ka chɛ ma to so.

⁶Fo e la ma Ebɔrɛ.

M baŋ fɛ fo asheŋ

ashi kakpa nɛ Jɔɔdan

be lɔr na fara ashi abeegboŋ

nɛ baa tre Hɛɛmɔn

nɛ Miza na ase,

ma aba bee pɔ ma nna.

⁷Fo agbo ba ma so nna fanɛ

teku be nchu ka baga to

m muni ma so na,

ŋko nchu ka shi kebee

be awɔlto a wurge waa waa na.

⁸Karechɛ kikɛ fee wora alela nna.

Kanyɛso malɛ kikɛ fee sa ma

kashɛ popɔr nna,

a ŋini ma fo kasha

nɛ k maa chɛrga na,

nɛ k la ma kabɔrɛkule

a yɔ fo kutɔ.

Enyɛnpe Ebɔrɛ,

fo wɔ ŋkpa to nna.

⁹Fo e du fanɛ kefalta a kuŋ ma.

Manɛ nna nɛ fo teŋ ma so?

Manɛ nna nɛ bedoŋ bee mɛaŋ ma,

a shin nɛ ma kagbene maa fuli ma?

¹⁰Ma eyur to kikɛ bee besa ma nna

nɛ bedoŋ bee wora ma eyurto

a bishi fanɛ ma Ebɔrɛ na wɔ nnɛ?

¹¹Manɛ nna nɛ ma aba pɔ ma?

Manɛ nna nɛ ma kagbene

maŋ dese ma?

Ŋ kraŋ yirda fo;

ma alɛ kraŋ beeŋ di fo epaŋ

ŋkpal fo ka chɛ ma to so.

Fo e la ma Ebɔrɛ.

¹Enyɛnpe, ŋini fanɛ m maŋ

wora n jija!

Malga ŋ kuŋ ma ashi basa

nɛ b maŋ nyi fo na kutɔ.

Mɔlga ma ashi befɛpo nɛ b kɔ

amu kpakpaso na kutɔ.

²Fo e la ma ekumpo lempo;

manɛ nna nɛ fee ju ma a lɛ?

Sa maŋ shin bedoŋ e baa mɛaŋ ma

n shin nɛ ma kagbene e baa jija.

³Shin nɛ fo kefulto nɛ k bee

shin nɛ mee pin fo na,

nɛ fo kashenteŋ na e baa

ŋini ma fo ekpa na.

Shin nɛ a baa juŋkpar ma a ba

fo lambu nɛ fo wɔ kumo to

ashi kebee cheembi nɛ baa tre

Zayɔn nɛ k wɔ Jerusalɛm na to.

⁴Saŋɛ na so meeŋ ya bunyaŋ fo

ashi fo bɔrɛsure na ase,

ŋkpal fo ka sa ma kagbenefuli

gboŋgboŋi so so.

Meeŋ ta ma jaŋjilaŋ

n laŋ m maŋkura fo,

ma Ebɔrɛ na.

⁵Manɛ nna nɛ ma aba pɔ ma?

Manɛ nna nɛ ma kagbene

maŋ dese ma?

Ŋ kraŋ yirda fo,

ma alɛ kraŋ beeŋ di fo epaŋ

ŋkpal fo ka chɛ ma to so.

Fo alɛ e la ma Ebɔrɛ.

Kefin kechɛto be kabɔrɛkule be asheŋ

¹Enyɛnpe anyi be Ebɔrɛ,

an nananyɛnana kaŋɛ anyi

kusɔ nɛ fo wora dra dra na.

Nɛ anyi alɛ kaŋ asoe n nu,

²kananɛ fo ta fo eleŋ n ju basa

nɛ b daa wɔ efuli ere so dra dra na,

nseŋ shin nɛ an nananyɛnana

sɔ kasawule ere

nɛ kananɛ fo shin nɛ asheŋ nite

nɛnɛ n sa bumo.

³Mannɛ bumo gbagba be eleŋ nɛ akɔsɔ

e daŋ shin nɛ b sɔ kasawule ere,

ŋko n shin nɛ b kɔ m pɔɔ so.

Ama ŋkpal fo kagbene

ka fuli bumo so so,

nɛ fo chɛ bumo to

nɛ b kɔ m pɔɔ bumo

doŋana so.

⁴Fo e la ma Ebɔrɛ nɛ ma ewura;

fo e shin nɛ Israɛlebi kɔ m pɔɔ so.

⁵Fo eleŋgboŋ na e shin nɛ

an ŋmɛa an doŋana n lɛ

nseŋ chichi bumo so.

⁶M maŋ ta ma yirda n deŋi

ma keta ŋko ma tokobi so,

fanɛ amo e naŋ mɔlga ma

ashi bedoŋ be enɔ to.

⁷Fo nɛ n yirda fanɛ feeŋ shin nɛ

ŋ kɔ m pɔɔ bedoŋ so n shin nɛ

anishinyɔr e pɛ bumo nɛ

b kishi anyi na.

⁸Fo anyi be Ebɔrɛ na so

nɛ anyee ji njɔŋ

nsaa fur fo ketre

saŋkama.

⁹Ama naniere, fo pal kaman

n sa anyi

n shin nɛ an ki bebɔlpo.

Fo maŋ naa tu anyi

be benapo a yɔ kena to.

¹⁰Fo shin nɛ an bɛta n shile

an doŋana be anishito

nɛ b ba muu anyi be asɔ.

¹¹Fo yige anyi nna

nɛ an ki fanɛ asɔbɔya

nɛ basa bee mɔ a ji,

nseŋ pesaŋ anyi to

n wɔtɔ efuli pɔtɛana to.

¹²K du fanɛ fo maŋ fa

fo basa yawu kpakpaso,

amoso fo maŋ nya tɔnɔ kikɛ.

¹³Fo shin nɛ an ki basa fuloŋ

ashi an braana be anishito nna.

Nseŋ shin nɛ anyi

be bechenashapo bee wora

anyi amɔmɔshiasheŋ

nsaa keni anyi jiga.

¹⁴Fo shin nɛ an ki basa

musheso ashi efuliana so,

nɛ baa wu anyi nsaa fifi amu

nsaa wora anyi eyurto.

¹⁵Sipa wɔ ma so kachɛ kama nna,

nɛ mee ji anishinyɔr saŋkama.

¹⁶Bedoŋ bee bishi ma kuwule nna,

nɛ basa bee jule a keni ma

nsaa wora ma eyurto.

¹⁷An maŋ teŋ fo so,

ŋko n lar anyi nɛ fo

be kɔnɔ koŋwule

be ŋkre na to.

Ama asheŋ ere

kikɛ tu anyi.

¹⁸An maŋ lar fo kaman,

ŋko ŋ kplaŋ fo keŋini so.

¹⁹Ama k du nna fanɛ fo yige

anyi n lɛ kakpa chil,

nɛ teŋtembiri mina buu anyi so

n wɔtɔ kakpa nɛ asɔkpaŋ wɔ,

nɛ anyi maaŋ tiŋ n wora shɛŋ.

²⁰An daŋ teŋ fo so nna,

nseŋ ya kaa bunyaŋ efuli

pɔtɛana so be agbirana,

²¹fo daŋ beeŋ pin;

ŋkpal manɛ so, fo nyi

kagbene to be ashiri kikɛ.

²²Ŋkpal fo so anyee luri

luwu to nna saŋkikɛ.

An du fanɛ mbolpɔ

nɛ b gberge a yɔ nɛ

b ya mɔ nna.

²³Enyɛnpe Ebɔrɛ,

jande ba chɛ anyi to.

Wora kusɔ ko.

Sa maŋ kini anyi n lɛ.

²⁴Manɛ nna nɛ fo ŋana anyi so,

nseŋ teŋ anyi be awurfoŋ

nɛ kamɛaŋ so?

²⁵Bedoŋ pɔɔ anyi so cheche

nɛ an tɔr kasawule

a dese shishɛr to.

²⁶Jande wora kusɔ ko n chɛ anyi to.

Mɔlga anyi ŋkpal fo kasha

nɛ k maa chɛrga na so.

Kijafo to be kashɛ be asheŋ

¹Ŋ kɔ mmalga lela ma

nfɛra to nɛ n sa ewura.

Meeŋ ta ma kudonduloŋ

m boŋ amo fanɛ kananɛ

esibɛpo lela bee ta

kelembi a sibɛ na.

²Enyɛn kikɛ maŋ walɛ

keyɛrbi fanɛ fo.

Mmalga belbelso nawule

e naa shi fo kɔnɔ to.

Amoso nɛ Ebɔrɛ bee

nɛfa fo.

³Ewurgboŋ, kemaŋkura wura

nɛ ejuŋkparpo,

ta fo tokobi n wɔtɔ kumo

be efar to ŋ kre kashɛr to.

⁴Nseŋ dii fo kediiso bunyaŋ so

ŋ kɔ m pɔɔ so

a laŋɛ kashenteŋ nɛ kuwɔrwu

nɛ keji asheŋ nɛ amo be ekpa so

be kaplɛa so.

Ta fo enɔjiso lempo na

n wora asheŋ nɛ a bee mɔ kɔnɔ.

⁵Shin nɛ fo atanyembi pelpelso na

e da ewura mo doŋana be ŋgbene to.

Shin nɛ efuli pɔtɛana so ebi

e tɔr fo aya ase.

⁶Kuwurji nɛ Ebɔrɛ sa fo na

beeŋ baa wɔtɔ mbaanaayɔ.

Nɛ fo baa ji basa be asheŋ

nɛ amo be ekpa so.

⁷Fee sha asɔ nɛ a niŋi ekpa nna

nseŋ ŋ kishi alubi.

Amoso nɛ fo Ebɔrɛ lara fo,

nseŋ sa fo kagbenefuli nɛ

k chɔ fo braana peya na.

⁸Etulale lela dufɛso nɛ baa

tre mir nɛ alowe na be efɛa

a wɔ fo asɔbuuso so,

nɛ baa laŋ ejaŋjilaŋ nɛ alaŋsɔ

a deŋi fo anishito ashi fo lambu

nɛ b ta ejebotenyi n ji kumo kebita na to.

⁹Bewura be mbichesobi

e wɔ fo lambu to,

nɛ eche nɛ fee shin nɛ fo ta na

wɔtɔ shuwa be abitasɔ

a yil fo kuwurputi be jisoso.

¹⁰Eche nɛ ewura bee shin nɛ

e ta na, e kaŋ kusoe n nu.

Teŋ fo basa nɛ fo tuto

be laŋ to ebi so.

¹¹Fo kela e shin nɛ ewura

be kagbene pɛ fo ga na.

Amoso baa sa mo bunyaŋ

nsaa wora kusɔ kama nɛ

e bee sha a sa mo.

¹²Basa beeŋ shi Tayɛ be kade to

m bar fo ŋkɛ,

nɛ damawuraana e ta

mmalga belbelso m ba fule fo

nɛ fo wora asɔ nɛ baa sha n sa bumo.

¹³Ma ewura, eche nɛ fee

shin nɛ fo ta na be kebita

shi mbe kagbene to nna.

Shuwa be ejesebi nɛ b ta n jɔ

mbe kejafɔ to be kale.

¹⁴Kale nɛ b jɔ nɛnɛ nɛ e buu,

nɛ b keta mo m bar fo,

nɛ mo teriana nɛ b la etumbache

bɛ mo so m ba fo kutɔ.

¹⁵Nɛ b ta kagbenefuli m bɛ fo so

n luri ewura be laŋ to.

¹⁶Fo mbinyɛnsobi nɛ fo nanabiana

beeŋ ba ki bewura

fanɛ fo nananyɛnana.

Feeŋ ta bumo ŋ ki bejuŋkparpo

durnya be kaplɛkama.

¹⁷Yili kabre a yɔ meeŋ shin nɛ

fo ketre e dii nɛ ekama

e baa fur fo saŋkama mbaanaayɔ.

Ebɔrɛ ka la an be ekumpogboŋ be asheŋ

¹Ebɔrɛ e la anyi be

ekumpogboŋ saŋkikɛ,

nsaa sa anyi eleŋ.

Mo e wɔtɔ saŋkama a chɛ

anyi to tɔrɔ be jemanɛ.

²Amoso hale nɛ kasawule

gbuŋgbuŋ to nɛ abeegboŋ tia

n tɔr teku be kakpa chiŋgeliŋ gba,

kufu maŋ kɔ anyi.

³Hale teku bee baga to a kaa apɔpɔ

a gbuŋgbuŋ abeegboŋ a lɛ gba,

⁴eboŋ ko wɔtɔ nna a shile boeŋ boeŋ,

a bar kagbenefuli ashi Ebɔrɛ

be kadegboŋ cheembi

nɛ Enyɛnpetale Ebɔrɛ na

wɔ kumo be basa to na so.

⁵Ŋkpal Ebɔrɛ ka wɔ kadegboŋ na to so,

shɛŋ shɛŋ maa gbuŋgbuŋ kumo.

Kachipurdidi kikɛ e bee chɛ kumo to nna.

⁶Nɛ efuli pɔtɛana bee baga to,

nɛ kuwurjiana bee tɔr,

nɛ Ebɔrɛ ponte nɛ

kasawule ŋalga gba,

⁷Enyɛnpetale Ebɔrɛ na

wɔ anyi kutɔ nna.

Ebɔrɛ nɛ an nananyɛn

Jeekɔb shuŋ na e la

anyi be ekumpogboŋ.

⁸Ba keni kusɔ nɛ

Enyɛnpe Ebɔrɛ wora.

E wora asheŋ gboŋgboŋi

ashi durnya to kikɛ.

⁹E shin nɛ kena loge durnya to.

E buri benapo be atanyembi

nɛ akpa to nseŋ chɔɔ

bumo be asɔ kuŋso kikɛ.

¹⁰E yɛ: “Wushi eyur boeŋ,

feeŋ wu fanɛ ma e la Ebɔrɛ!

Durnya to be efuliana so ebi kikɛ

malɛ beeŋ maŋkura ma.”

¹¹Enyɛnpetale Ebɔrɛ na

wɔ anyi kutɔ.

An nananyɛn Jeekɔb

be Ebɔrɛ na e la

anyi be ekumpogboŋ.

Ebɔrɛ ka bee ji efuliana so kuwura be asheŋ

¹Menyi efuliana na be basa

kikɛ e kpla enɔ,

nseŋ ponte kagbenefuliso

n di Ebɔrɛ epaŋ.

²Enyɛnpetale Ebɔrɛ na be asheŋ

woraso kɔ mamachi nɛ kufu nna.

Mo e la ewurgboŋ,

a ji durnya kikɛ so kuwura.

³Ebɔrɛ na e shin nɛ an pɔɔ

efuli kikɛ so nsaa

ji amo so eleŋ.

⁴Mo e lara kasawule

nɛ an nananyɛn Jeekɔb,

nɛ e bee sha ga na

bee puchi so na, n sa anyi.

⁵Kagbenefuli be awɔr be kecha,

nɛ mbel be kefoŋ be awɔr to

nɛ Ebɔrɛ bɔla so n dii n yɔ

mbe kuwurputi so

ashi bɔrɛlambu na to.

⁶Men boŋ nshɛ n di

an be ewura Ebɔrɛ epaŋ.

⁷Ŋkpal manɛ so mo, e la

durnya kikɛ be ewura nna.

Amoso men boŋ nshɛ

n di mo epaŋ.

⁸Ebɔrɛ tase mbe kuwurputi

cheembi so nna a ji

durnya kikɛ so kuwura.

⁹Durnya be bejuŋkparpo kikɛ

ba abar so nna m ba ki

an nananyɛn Eebraham

be Ebɔrɛ na be basa.

Durnya to be bewura kikɛ

la Ebɔrɛ peya nna.

Kemaŋkura e baa la

Ebɔrɛ na peya.

Ebɔrɛ be kadegboŋ nɛ baa tre Zayɔn na be asheŋ

¹Enyɛnpe Ebɔrɛ na shi

nseŋ daga an ka fur mo ga

ashi kadegboŋ nɛ e wɔ kumo to

nɛ k tase mbe kebeegboŋ cheembi

nɛ baa tre Zayɔn na so na.

²Mbe kebeegboŋ cheembi na

du jeŋgreŋ nna nsaa walɛ.

Nɛ Ebɔrɛ Ewurgboŋ

nɛ e wɔ kumo so na

bee sa durnya to

be basa kikɛ kagbenefuli.

³Ebɔrɛ na e wɔ kumo so

a kuŋ kumo.

E shin nɛ basa pin fanɛ,

mo Ebɔrɛ na e la

kadegboŋ na be ekumpo.

⁴Bewura chala abar m ba

nɛ b ba kɔ kadegboŋ na kena,

⁵ama b ka wu kumo

nɛ kufu pɛ bumo ga

nɛ b shile.

⁶Kechichachicha nɛ ebesa

daŋ tɔr bumo so nna fanɛ

eche ka bee shin nɛ e kurge na.

⁷Ŋko fanɛ afugboŋ ka koso teku so

a kpata nchu so be kuloŋgboŋ

a yɔ a ba na.

⁸An daŋ nu kusɔ nɛ

Enyɛnpe Ebɔrɛ na wora,

ama naniere an wu kumo ashi

Enyɛnpetale anyi be Ebɔrɛ na

be kadegboŋ nɛ baa tre

Jerusalɛm na to.

Mo alɛ beeŋ baa

kuŋ kumo saŋkama.

⁹Enyɛnpe Ebɔrɛ, saŋkama nɛ

an yɔ fo bɔrɛlambu na to,

fo kasha nɛ k maa chɛrga na

be asheŋ bee ba anyi

be nfɛra to nna.

¹⁰Fo asheŋ woraso

niŋi saŋkama nna,

nɛ fo ketre dii nɛ basa bee fur fo

ashi durnya ere be kaplɛkama.

¹¹Amoso Jerusalɛm nɛ Juda

be ndeana to ebi be ŋgbene

fuli bumo nna ŋkpal fo kaa

bee ji asheŋ nɛ amo

be ekpa so so.

¹²Ebɔrɛ be basa,

men nite ŋ kulti Jerusalɛm

ŋ karga kumo be atempreŋ jeŋgreŋ.

¹³Men keni kumo be egbal lempo

nɛ kumo be ekuŋkpa lempoana na.

Saŋɛ na so menyeeŋ tiŋ ŋ kaŋɛ

men be kaman to ebi le:

¹⁴“Ebɔrɛ ere e la anyi

be Ebɔrɛ mbaanaayɔ.

Mo alɛ beeŋ baa juŋkpar

anyi saŋkama.”

Sa maŋ ta fo egbɛ ŋ deŋi amansherbi so

¹Esa kama nɛ e wɔ durnya to,

e kaŋ kusoe n nu kusɔ

nɛ mee kaŋɛ ere.

²Kanaŋkama nɛ fo du,

nɛ fo la etirpo

ŋko damawura nna,

fo kaŋ kusoe n nu.

³Kanyiasheŋ be mmalga

nɛ mee malga,

nɛ kusɔ nɛ mee kaŋɛ

malɛ kɔ kifito.

⁴Aŋasa nɛ mee shin nɛ m bɔ,

ama meeŋ ŋini amo be afito

saŋɛ nɛ mee laŋ jaŋjilaŋ na.

⁵Saŋɛ nɛ kenishipere tu ma,

ŋko saŋɛ nɛ bedoŋ fɛpo

kulti ma n wɔtɔ na,

m maaŋ baa lɔ kufu.

⁶Bumo ere yirda asɔ nɛ b kɔ nna

nsaa puchi ŋkpal bumo

be kedamaya so.

⁷Esa maaŋ tiŋ ŋ ka dimɛdi kukɔ

n sɔ mo barkasa n yige,

ŋko ŋ ka Ebɔrɛ kukɔ n wora loŋ.

⁸Ŋkpal manɛ so,

ŋkpa be yawu du kpakpa ga.

Esa maaŋ tiŋ ŋ ka Ebɔrɛ

kumo be kukɔ,

⁹nseŋ nya a wɔ ŋkpa to

mbaanaayɔ;

ŋko nɛ e maaŋ wu kikɛ.

¹⁰Anyee wu benyiashempo

nɛ bewulpo kikɛ ka bee wu;

nɛ basa pɔtɛ e ta bumo be asɔ.

¹¹Hale b daa kɔ bumo gbagba

be nsawule gba,

nchaŋ e naŋ ki bumo pe

mbaanaayɔ, nɛ b baa

wɔ ndoŋ saŋkama.

¹²Anyi edimɛdi be eyilikpa

maa chɛr nsaa loge nɛ an wu,

fanɛ kananɛ kusɔbɔya bee wu na.

¹³Kusɔ nɛ k dese a jo bekama

nɛ b yirda bumo gbagba be amu

nɛ kusɔ nɛ bumo be beyaasepo

bee kaŋɛ bumo na nna na.

¹⁴B du fanɛ mbolpɔ nna

nɛ luwu bee kpa bumo

a yɔ bumo be nchaŋ to.

Ebɔrɛ be basa e naŋ ji

bumo so kuwura chipurso

nɛ bumo be eyurana

e baa dese nchaŋ to a bɛ.

¹⁵Ama Ebɔrɛ beeŋ mɔlga ma ere

ashi nchaŋ to n ta ma

n yɔ mo kutɔ.

¹⁶Saŋ maŋ shin nɛ beko

be kebaala damawuraana,

a ji bumo be amu na e tir fo.

¹⁷K maaŋ chɛr nɛ b wu

nseŋ yige bumo be asɔ na kikɛ.

¹⁸Nɛ dimɛdi baa kɔ ŋkpa,

nɛ asheŋ bee nite nɛnɛ a sa mo

nɛ basa bee fur mo,

k bee wora mo ebel nna.

¹⁹Ama an kikɛ beeŋ ya tu

an nananyɛnana,

nsaa maaŋ naŋ wu

karechɛ be kefulto kikɛ.

²⁰Dimɛdi be eyilikpa

kikɛ beeŋ choŋ,

nɛ e wu fanɛ kusɔbɔya na.

Kashenteŋ be kabɔrɛbunyaŋ be asheŋ

¹Enyɛnpetale Ebɔrɛ, elempo na,

bee tre durnya to be basa kikɛ

nɛ b wɔ epeŋitɔrkpa nɛ

epeŋilarkpa na nna fanɛ b shɛr.

²Ebɔrɛ wɔ kadegboŋ nɛ k walɛ ga,

nɛ baa tre kumo Jerusalɛm na to

a kpa edɛ pɛlpɛl nna.

³Anyi be Ebɔrɛ na bee ba,

nɛ an nu mbe egbri,

nɛ edɛ be adondulombi

juŋkpar mo,

nɛ afugboŋ lempo kulti

mo n wɔtɔ.

⁴E tre esoso nɛ kasawule kikɛ

fanɛ eshɛdajipo nna,

nɛ b keni kananɛ e bee ji

mbe basa demu.

⁵E yɛ: “Men tre ma basa nɛ

baa ji kashenteŋ a sa ma

nsaa lara sarga a sa ma na,

nɛ ma nɛ bumo e wora

kɔnɔkoŋwule be ŋkre.”

⁶Esoso bee ŋini anyi nna fanɛ

Ebɔrɛ bee ji basa be asheŋ

nɛ amo be ekpa so nna.

⁷Ma basa, men nu.

Israɛlebi, menyi be Ebɔrɛ na

bee ji demu nna a gbiti menyi.

⁸M maŋ kaŋɛ fanɛ men

wora n jija nna;

ŋkpal men ka bee lara

esarga chɔɔso nɛ ŋkɛ

a sa ma saŋkama na so.

⁹Mannɛ men be egbolu

nɛ mboe nɛ a shibi a wɔ

men be aluu to

nɛ mee sha.

¹⁰Ŋkpal manɛ so,

kupuŋ to be kusɔbɔya kikɛ

la meya nna,

aloŋ e la ana nɛ a wɔ abee

kagboŋ so na gba.

¹¹N nyi mbuibi nɛ a wɔ

abeegboŋ so kikɛ,

nɛ kusɔ toso kikɛ la meya.

¹²Nɛ akoŋ kɔ ma gba

m maaŋ kaŋɛ menyi,

ŋkpal manɛ so,

durnya nɛ kusɔ kama

nɛ k wɔ kumo to kikɛ

la meya nna.

¹³M maa we egbolu be eblaŋ

ŋko a nuu mboe be ŋklaŋ.

¹⁴Ma e la Enyɛnpetale Ebɔrɛ na.

Kechɔrɔ, nɛ k baa nase nnɔ

nsaa bɛ amo so be esarga

nɛ mee sha.

¹⁵Men shu n tre ma

ashi men be etɔrɔ to

nɛ n mɔlga menyi,

nɛ men bunyaŋ ma.

¹⁶Ama mee kaŋɛ alubiworapo bre

nna fanɛ, e maŋ kɔ ekpa

nɛ e malga ma mbra na be asheŋ

ŋko n ji ma kɔnɔ naseso

be ŋkre na be asheŋ.

¹⁷Men kini ma keŋini

nsaa kplaŋ ma mbra so.

¹⁸Beyu nɛ basa lubi nɛ

menyee ji keteri nsaa

sha basa nɛ b maa bɛ

bumo be kakil to

be nnɔ naseso so.

¹⁹Asheŋ lubi be kewora

nawule be bare nɛ menyee bir;

men be mmalga malɛ kikɛ la efɛ nna.

²⁰Men tase nna a kuli

men kurgepoana nsaa jija

men niopibiana gbagba be atre.

²¹Men ka wora ade kikɛ,

m maŋ bugi kɔnɔ,

nɛ men fɛ fanɛ ma Ebɔrɛ

gba du fanɛ menyi nna.

Ama naniere bre meeŋ malga

ŋ gbiti menyi ashi men be anishito.

²²Men kplaŋ ma so,

amoso men kaŋ kusoe n nu nfe,

nɛ mannɛ aloŋ meeŋ mur menyi

nɛ esa kama maaŋ chɛ menyi to.

²³Sarga nɛ k bee bar ma kemaŋkura

e la kagbene nɛ k bee ji a chɔrɔ.

Men wora ma kasonu

nɛ ma, menyi be Ebɔrɛ na

e ŋini menyi kumɔlga be ekpa.

Alubi be ketampaŋ be kabɔrɛkule be asheŋ

¹Enyɛnpe Ebɔrɛ, wu ma kuwɔr

ŋkpal fo kasha nɛ k maa loge na so.

Kpra ma alubi

ŋkpal fo kuwɔrwu na so.

²Fɔr ma alubi nɛ ma kewora

n da so kikɛ nɛ n nyalɛ so.

³Ŋkpal manɛ so, n nyi ma alubi

kikɛ be asheŋ.

Ma alɛ maaŋ teŋ asheŋ lubi

nɛ n wora na so kikɛ.

⁴Kashenteŋto, fo nɛ n wora n da so.

N wora n jija ŋkpal ŋ ka kini

kewora fo kasonu so.

Amoso k daga nna nsaa walɛ

fanɛ fo gberge ma kusoe

n niŋi ma ekpa.

⁵Kachɛ nɛ b kurge ma na kikɛ

nɛ n la alubiworapo.

⁶Kashenteŋ nawule nɛ

fo ere bee sha.

Amoso ŋini ma kashenteŋ

be kanyiasheŋ.

⁷Ta hisɔp n fɔr ma so

nɛ n nyalɛ so

n fuli fanɛ ateebi.

⁸Shin nɛ ma kagbene e fuli

nɛ n ji eyur.

Fo daŋ shin nɛ ma eyur

buri ma nna

ama naniere, shin nɛ

n ji ma kumu.

⁹Kplaŋ ma alubi so

nseŋ da m buu ma

kewora n da so so.

¹⁰Shin nɛ n nya nfɛra niŋiso

nseŋ shin nɛ n naa ji kashenteŋ.

¹¹Sa maŋ ju ma ashi fo anishito.

Ŋko n lara fo kiyoyu cheembi na

ashi ma to.

¹²Shin nɛ ma kagbene e naŋ

fuli ma fanɛ kananɛ k daa du

saŋɛ so nɛ fo mɔlga ma na;

nseŋ shin nɛ n naa sha

kebaawora fo kasonu.

¹³Nɛ n ŋini alubiworapoana

fo mbra nɛ b bɛta m ba fo kutɔ.

¹⁴Mɔlga ma ashi kamɔ be kulubi to.

Ŋkpal manɛ so, fo nawule

e naŋ tiŋ m mɔlga ma.

Saŋɛ na so meeŋ boŋ

kashɛ awɔrso ŋ kaŋɛ

fo kumɔlga be eleŋ na be asheŋ.

¹⁵Enyɛnpe Ebɔrɛ,

bugi ma kɔnɔ nɛ n fur fo.

¹⁶Esarga nɛ etoto daa bɔlɔ fo

kenishi nna,

n daa beeŋ bar fo amo.

¹⁷Esa be kagbene be kejija mo ga

ŋkpal alubi so e naa bɔlɔ fo kenishi.

¹⁸Enyɛnpe Ebɔrɛ, jande,

shin nɛ asheŋ e nyalɛ Zayɔn to,

nɛ b pɔr Jerusalɛm be egbal na.

¹⁹Saŋɛ na so baaŋ lara esarga cheembi

nɛ esarga chɔɔso nɛ a bee par fo,

nseŋ ta egbolu n lara sarga n sa fo.

Kusɔ kama ka wɔ Ebɔrɛ be enɔ to be asheŋ

¹Feeŋ tiŋ a la elempo

nsaa ji njɔŋ ŋkpal fo alubi so.

Ama esa beeŋ tiŋ n yirda

Ebɔrɛ saŋkama.

²Asheŋ lubi nɛ fee kre saŋkikɛ;

fo kudonduloŋ fɛpo na

bee ji fanɛ bɔrfɔ nna.

³Fee sha asheŋ lubi a chɔ asheŋ lela;

nsaa sha efɛ a chɔ kashenteŋ be keji.

⁴Asheŋ besaso nɛ fee sha kebaamalga,

nɛ kafule bɔlɔ fo kudonduloŋ to.

⁵Kashenteŋto, Ebɔrɛ beeŋ

jija fo mbaanaayɔ;

E beeŋ to m pɛ fo to

ŋ gberge fo n lar fo laŋ to.

E beeŋ tia fo ashi basa keniso

be kasawule so.

⁶Nɛ basa cheembi e wu loŋ be

kusɔ nɛ k bee keta kufu ere

nseŋ mushe ŋ kaŋɛ le:

⁷“Men keni basa nɛ b kini

keta bumo be yirda n deŋi Ebɔrɛ so,

nseŋ ta bumo be yirda n deŋi

bumo be kedamaya nɛ asheŋ lubi

be kewora so na.”

⁸Ama ma ere du fanɛ ɔlif be kedibi nna,

a daŋ nsaa walɛ saŋkama

ashi Ebɔrɛ be laŋ to.

Ma alɛ be yirda deŋ mbe kasha

nɛ k maŋ kɔ ekar na so saŋkikɛ nna.

⁹Ŋkpal kusɔ nɛ fo wora so

meeŋ baa fur fo saŋkikɛ.

Ŋ kɔ tama ashi fo ketre to,

ŋkpal manɛ so, fo ketre walɛ.

Amoso meeŋ baa fur fo

ashi fo basa cheembi be anishito.

Esa kikɛ ka maaŋ tiŋ ŋ kplaŋ Ebɔrɛ so be asheŋ

¹Ewulpo nawule e naa kaŋɛ

mbe kagbene to fanɛ

Ebɔrɛ maŋ wɔtɔ.

Loŋ be basa la basa fuloŋ,

nɛ b maa wu kuwɔr nna.

Bumo alɛ maa wora

asheŋ niŋiso kikɛ.

²Ebɔrɛ wɔ esoso nna a keni kaseto

a fin enyiashempo

nɛ e bee fin mo ere Ebɔrɛ!

³Ama esa kama maa

wora asheŋ niŋiso.

Ekama maa wora asheŋ

nɛ amo be ekpa so.

Esa koŋwule gba maŋ

wɔtɔ a wora alela.

⁴Menyi alubiworapoana

maaŋ koya a?

Menyi nɛ men maa kule Ebɔrɛ

nsaa wɔtɔ a kpɛa ma basa to

fanɛ b ka bee we bodobodo na.

⁵Kufu beeŋ pɛ menyi a chɔ

kananɛ k daŋ pɛ menyi dra na.

Ebɔrɛ beeŋ farnyaŋ

mo doŋana be awibi to

nɛ anishinyɔr e pɛ menyi

ŋkpal Ebɔrɛ ka kini menyi so.

⁶Mee jo saŋɛ nɛ esa

ko beeŋ shi Zayɔn

m ba mɔlga Israɛl nna.

Anyi be Ebɔrɛ,

fo baŋ naŋ nɛfa fo basa,

Jeekɔb be kanaŋ to ebi

be ŋgbene beeŋ fuli bumo,

nɛ Israɛlebi e ji eyur.

Keyirda Ebɔrɛ ashi awurfoŋ to be asheŋ

¹Enyɛnpe Ebɔrɛ,

ta fo eleŋ na m mɔlga ma,

ŋ ŋini fanɛ m maŋ wora n jija.

²O Enyɛnpe Ebɔrɛ,

jande, nu ma kekule;

jande nu kusɔ nɛ mee kaŋɛ.

³Befɔ nɛ b la amukpakpasowuraana

e naa kɔ ma.

Bumo alɛ be ekama be shɛŋ

maŋ wɔ fo to.

⁴Enyɛnpe Ebɔrɛ fo e naŋ

chɛ ma to, ŋ kuŋ ma

nɛ n sa maŋ tɔr.

⁵Feeŋ gberge ma doŋana kusoe,

ŋkpal bumo be alubi nɛ b wora so.

Feeŋ mur bumo

ŋkpal fo kashenteŋji so.

⁶Meeŋ ber kagbene

n lara sarga n sa fo.

Enyɛnpe Ebɔrɛ,

meeŋ fur fo ketre,

ŋkpal fo ka walɛ so.

⁷Ŋkpal manɛ so, fo mɔlga ma

ashi ma awurfoŋ kikɛ to,

nseŋ shin nɛ ŋ gbagba wu

ma doŋana ka kɔ n tɔr.

Esa nɛ b lar mo kaman be kabɔrɛkule be asheŋ

¹Enyɛnpe Ebɔrɛ, nu ma kekule.

Jande, sa maŋ kplaŋ kusɔ nɛ

mee bishi fo ere so.

²Wora ania n nu ma kekule ere;

ŋkpal manɛ so,

ma kagbene jija nna ga;

³ŋkpal bedoŋ ka bee cha awɔr

nsaa ponte to a kɔ ma agboso so.

⁴Ma kagbene bee to nna pep pep pep,

nɛ mee lɔ kufu fanɛ meeŋ wu.

⁵Kufu gboŋgboŋi nɛ kechicha chicha

tɔr ma so nna nɛ ma kagbene

maŋ dese ma kuraa.

⁶N daa kɔ atɛ fanɛ keli nna,

n daa beeŋ firgi n yɔ

kakpa nɛ meeŋ nya

kagbenewushi.

⁷N daa beeŋ ya kaa wɔ

keshishɛrsawule so kufɔ kufɔ.

⁸N daa beeŋ nya manaŋ n yɔ

kakpa nɛ meeŋ nya kekuŋ

ashi afugboŋ nɛ atiligboŋ so.

⁹Enyɛnpe Ebɔrɛ,

shin nɛ ma doŋana e wulto to.

Jija bumo be ŋkre kikɛ.

Kumukpakpaso nɛ kebaamaashu

basa so nawule nɛ mee wu,

ashi kadegboŋ na to.

¹⁰B du nna fanɛ bekumpo

ka kulti kumo be egbal n wɔtɔ

kapa nɛ kanyɛ na.

Asheŋ lubi nɛ tɔrɔ e bɔlɔ

kadegboŋ na to.

¹¹Durmu be keji nɛ kebaada

asheŋ a wea abar to

nɛ efɛ e sɔ kadegboŋ na

be agbembi so kikɛ.

¹²Nɛ bedoŋ e daa tege ma

nsaa wora ma eyurto,

n daa beeŋ tiŋ n nyiti

ŋko n shile ŋ ŋana bumo so.

¹³Ama nteri kpakpaso

nɛ n yirda,

¹⁴nɛ ma nɛ mo bee ji kakurge,

nsaa tu m braana a yɔ

anyi be Ebɔrɛ be lambu to na

e naa wora ma loŋ.

¹⁵Alubi e naa ji bekama

nɛ b kishi ma na so eleŋ.

Amoso shin nɛ luwu e purgi bumo

nɛ b yɔ nchaŋ to nɛ b kraa keni.

¹⁶Ama n shu n tre Enyɛnpe Ebɔrɛ

nɛ e mɔlga ma.

¹⁷Chipurso nɛ kapaso

nɛ kanyɛso kikɛ,

e bee nu ma nfubel nna.

¹⁸Bedoŋ bee kɔ ma

kaba kama so nna;

ama e beeŋ mɔlga ma

ashi kena na to

nɛ m maaŋ nya doro kikɛ.

¹⁹Ebɔrɛ nɛ e bee ji kuwura

saŋkama mbaanaayɔ na

beeŋ nu ma kushu.

E beeŋ shin nɛ m pɔɔ bedoŋ so

ŋkpal manɛ so, b maa bunyaŋ mo.

²⁰N teri pal kaman n sa

mbe kɔnɔ naseso

nsaa kɔ ma.

²¹Mbe kamalga wɔ ebel nna

fanɛ mushoŋ;

ama kekishi e bɔlɔ mbe

kagbene to nɛ e wora shiriya

nɛ e ta tokobi ŋ kɔ ma.

²²Enyɛnpe Ebɔrɛ, an la fo basa nna

nsaa kaŋɛ fo asheŋ nɛ a tir anyi.

Fo alɛ maaŋ shin nɛ an kɔ n tɔr.

²³Ama fo Enyɛnpe Ebɔrɛ beeŋ ta

basa nɛ b maa shu basa so na bre

n lɛ kemaŋ chiŋgeliŋ

nɛ k maŋ kɔ ekar na to,

pɔɛŋ nɛ bumo be saŋɛ e fo.

Ma ere yirda fo nna.

Yirda be kabɔrɛkule be asheŋ

¹O, Enyɛnpe Ebɔrɛ, wu ma kuwɔr.

Bedoŋ ju a buu ma so

kapa nɛ kanyɛ nna.

Saŋɛ kikɛ baa firgi

a taga ma to nna.

²Bumo be bedamta

baa yuu ma so nna,

a kɔ ma kamoowuso.

³Ama hale kufu kɔ ma gba

ŋ kraa beeŋ yirda fo.

⁴Meeŋ fur fo ŋkpal fo

kɔnɔ naseso so.

N yirda fo,

amoso kufu maŋ kɔ ma.

Manɛ nɛ dimɛdi beeŋ tiŋ

n wora ma?

⁵Karechɛ kikɛ bedoŋ bee

wu ma kulubi nna.

Bumo be nfɛra e baa la

kananɛ baaŋ wora n doro ma.

⁶Baa ŋana a pugi nna a kɔ ma.

Baa dara keya kama nɛ n tia nna,

a fin kananɛ baa nya ma m mɔ.

⁷Enyɛnpe Ebɔrɛ,

sa maŋ shin nɛ b ta

bumo be amu n ji kikɛ.

Ŋkpal manɛ so,

fo baaŋ nya agbo,

fee mur efuliana na nna.

⁸Awurfoŋ nɛ mee ji kikɛ

be asheŋ bɔɔ fo enɔ nna,

nɛ fo nyi ma anishichubi

nɛ a lar be asheŋ.

Amo kikɛ maŋ belaŋ fo so.

⁹Saŋkama nɛ m baŋ kule fo

ndoŋana bee bɛta kaman nna.

Kumo be loŋ e shin nɛ m pin

fanɛ fo wɔ ma kutɔ.

¹⁰Meeŋ fur fo ŋkpal fo

kɔnɔ naseso be mmalga na so.

¹¹Enyɛnpe Ebɔrɛ n yirda fo,

amoso kufu maŋ kɔ ma.

Manɛ nɛ dimɛdi beeŋ

tiŋ n wora ma?

¹²Enyɛnpe ma Ebɔrɛ, meeŋ bɛ

kɔnɔ nɛ n nase n sa fo na so.

Meeŋ ta ma kechɔrɔ

be kakɛ m bar fo.

¹³Ŋkpal manɛ so,

fo mɔlga ma ashi luwu to,

a maŋ shin nɛ n fiti n tɔr.

Amoso meeŋ baa wora fo

aparsheŋ nsaa na fo kefulto

nɛ k bee yɛra esa ŋkpa to na to.

Kedi Ebɔrɛ epaŋ be asheŋ

¹Enyɛnpe Ebɔrɛ,

jande wu ma kuwɔr.

Wu ma kuwɔr, ŋkpal manɛ so

fo kutɔ nɛ mee nya kekuŋ.

Fo aba to nɛ mee shile a ŋana

nɛ kenishipere e choŋ

pɔɛŋ nɛ n lar.

²Fo Enyɛnpetale Ebɔrɛ

nɛ fo la ma ekumpo na

nɛ mee shu a tre.

³Feeŋ shin nɛ kechɛto

e shi ebɔrɛso

m ba sɔ ma n yige.

Nseŋ shin nɛ tɔrɔ

e tɔr bumo nɛ baa kɔ ma

kenishipereso na bre so.

Fo la eshinteŋjipo nɛ esa

beeŋ tiŋ n yirda nna.

⁴N wɔ bedoŋ nɛ b du fanɛ ebuluŋ,

nɛ baa kpɛa basa to na to nna.

Bumo be anyii du fanɛ

atanyembi nɛ akpa nna.

Nɛ bumo be adonduloŋ

bee ji fanɛ etokobi.

⁵Shin nɛ basa e wu fo aworbigboŋ

ashi awɔlpa to,

nɛ fo kemaŋkuragboŋ

ashi kasawule so kikɛ.

⁶Bedoŋ bee fe ma ajigbelɛ nna

a da ma a lɛ.

Baa kur amaŋ chiŋgeliŋ

ma ekpa to nna, nsaa kilgi

a tɔr amo to bumo gbagba.

⁷Mee ji kashenteŋ nna a sa fo,

nɛ feeŋ tiŋ n yirda ma.

Meeŋ boŋ kashɛ nseŋ laŋ alaŋsɔ

n sa fo ma, Ebɔrɛ na.

⁸Edi maŋ wɔ ma anishi to,

meeŋ laŋ ma jaŋjilaŋ

hale nɛ kare e ya chɛ.

⁹Enyɛnpe Ebɔrɛ, meeŋ fur fo

nɛ ekama e nu.

Nseŋ boŋ kabɔrɛshuŋ be nshɛ

ashi basa kikɛ be anishito.

¹⁰Ŋkpal manɛ so,

fo kasha baŋ esoso so,

nɛ fo kemankura

choŋ awɔlpa so.

¹¹Enyɛnpe Ebɔrɛ shin nɛ

fo keshi e choŋ so esoso so

nɛ fo kemankura e baa wɔ

durnya be kaplɛkama.

Kekule Ebɔrɛ nɛ e gberge bedoŋ kusoe be asheŋ

¹Menyi bejuŋkparpo, bee ji asheŋ

nɛ amo be ekpa so a?

Menyee ji basa be asheŋ

kananɛ k daga so a?

²M-m, asheŋ lubi nawule be asheŋ

nɛ menyee kre ashi men be ŋgbene to,

nsaa ta men be enɔana a mɔ basa.

³Yili men be kakurgeachɛ kikɛ

m ba fo mbre, men wɔtɔ nna

a wora alubi nsaa ku efɛ.

⁴Men be mmalga du fanɛ kuwɔ

ka duŋ esa nna,

⁵nɛ e kini kenu esa nɛ e kɔ awɔ

be kudur be ebɔl nna.

⁶Mee ŋana bedoŋ nna fanɛ ebuluŋ na.

Enyɛnpe Ebɔrɛ, buri bumo anyii

nɛ a du fanɛ ebuluŋ be anyii na.

⁷Shin nɛ b foe fanɛ kabombi to

be nchu ka wɔlto na.

B baŋ gberge bumo be ata to,

fo shin nɛ atanyembi na

be nnɔ e gbel.

⁸Shin nɛ b wɔlso fanɛ konte

nseŋ shin nɛ b sa maŋ wu epeŋi

fanɛ kebia nɛ e laŋɛ.

⁹Pɔɛŋ nɛ kapuliya nɛ k bɛ edɛ

wuloŋwuloŋ so beeŋ bel edɛ,

nɛ fo teŋ m mur bumo.

¹⁰Nɛ belelaworapo baŋ wu

alubiworapoana ka nya

bumo be alubi be kasogberge,

bumo be ŋgbene beeŋ fuli bumo

nɛ b fɔr bumo be aya ashi

bumo doŋana na be ŋklaŋ to.

¹¹Nɛ basa e kaŋɛ:

“Kashenteŋ, basa cheembi kraa

nya bumo be kakɔka.

Kashenteŋ, Ebɔrɛ kraa ji asheŋ

nɛ amo be ekpa so ashi durnya to.”

Kekuŋ be kabɔrɛkule

¹Mɔlga ma, Enyɛnpe Ebɔrɛ,

kuŋ ma ashi bedoŋ nɛ baa kɔ

ma na kutɔ.

²Kuŋ ma ashi kumukpakpasowuraana

nɛ baa fin ma nɛ b mɔ na kutɔ.

³Enyɛnpe Ebɔrɛ, keni kananɛ

b ŋana m pugi a jo ma.

Basa lubi bee kre ma

ŋkre lubi nna,

a fin ma nɛ b mɔ.

Ma alɛ maŋ wora bumo shɛŋ,

ŋko n wora kulubi ko

n da bumo so.

⁴M maŋ wora kulubi kikɛ,

ama b wora shiriya nɛ b kɔ ma.

Keni ma awurfoŋ nɛ mee ji ere so

nseŋ wora kusɔ ko n chɛ ma to.

⁵Enyɛnpetale Israɛlebi be Ebɔrɛ,

niŋi to ŋ gberge efuli pɔtɛana na

be basa kikɛ kusoe.

Sa maŋ wu basa lubi,

nɛ baa mɔ basa na kuwɔr.

⁶Baa bɛta a ba kaaseso kikɛ nna

m ba kaa na kade to

a gbu fanɛ njɔnɔ na.

⁷Nu mmalga nɛ a bee lar

bumo be nnɔ to.

Asɔ nɛ baa kaŋɛ bee besa nna

fanɛ b ka da esa kasaŋɛ na.

Baa kaŋɛ bumo be amu nna

fanɛ esa kama maa

nu kusɔ nɛ baa kaŋɛ na.

⁸Ama fo Enyɛnpe Ebɔrɛ na

bre bee mushe bumo nna,

nsaa wora efuliana na eyurto.

⁹Fo e la ma ekumpogboŋ

nɛ ma tama deŋ fo so.

¹⁰Ma Ebɔrɛ nɛ e bee sha ma na

beeŋ chɛ ma to,

n shin nɛ n wu bedoŋ ka kɔ n tɔr.

¹¹Ama sa maŋ mɔ bumo.

Mannɛ aloŋ ekama beeŋ teŋ so.

Ta fo eleŋgboŋ na

n shin nɛ b chicha n tɔr.

Fo e la kusɔ kuŋsogboŋ

a kuŋ fo basa.

¹²Bedoŋ na la befɛpo nna,

amoso shin nɛ bumo

be njɔŋ fuloŋ nɛ baa ji na

e kilgi m pɛ bumo.

¹³Nya agbo m mur bumo cheche.

Saŋɛ na so efuli pɔtɛana na

kikɛ beeŋ pin fanɛ fo e naa

ji Israɛl so kuwura.

¹⁴Baa bɛta a ba kaaseso kikɛ nna,

m ba kaa na kade to

a gbu fanɛ njɔnɔ na.

¹⁵Baa nite nna a gbu

a yɛla kenishi to a fin ajibi,

ama b baŋ moɛ nna pɔɛŋ nseŋ yɔ.

¹⁶Ama ma ere beeŋ boŋ kasha

a laŋɛ fo Ebɔrɛ be

eleŋgboŋ na be kaplɛa so.

Chipurso kikɛ, meeŋ boŋ kashɛ

a laŋɛ fo kasha be kaplɛa so.

Ŋkpal manɛ so,

fo e la ma ekumpo,

kakpa nɛ mee shile a ŋana

ashi tɔrɔ be jemanɛ.

¹⁷Meeŋ boŋ nshɛ n fur fo.

Fo e la ma ekumpogboŋ

nsaa sha ma.

Tama be keta n deŋi Ebɔrɛ so be asheŋ

¹Enyɛnpe Ebɔrɛ, fo nya agbo nna

n wɔtɔ anyi nseŋ kini anyi,

n shin nɛ an tɔr m buri to.

Naniere naaŋ sa anyi eleŋ.

²Fo shin nɛ kasawule gbuŋgbuŋ to

m baŋɛ to m bugi to.

Naniere shin nɛ kasawule na

e cha abar so nseŋ yige

kebaa gbuŋgbuŋ to.

³Fo shin nɛ saŋɛ kpakpaso

tu fo basa, nɛ afu bee ber

anyi nɛ anyee lente.

⁴Ama fo sa basa

nɛ baa ŋana fo bre tɔɔnɛ

nɛ b bɔla kumo so ŋ gelge

bedoŋ be atanyembi.

⁵Enyɛnpe Ebɔrɛ,

nu anyi be kekule

nseŋ ta fo enɔ lempo na

m mɔlga anyi nɛ an la

fo basa shaso na.

⁶An Nyɛnpe nɛ anyi be Ebɔrɛ,

fo nase kɔnɔ fanɛ feeŋ barga

kadegboŋ nɛ baa tre

Shɛkim na to,

nseŋ chige ketaŋɛ nɛ baa tre

Sukɔf na to.

⁷Fo yɛ Giliad nɛ Manase la feya nna,

nɛ Efrayim la fo kebɛlso be kuwuro,

nɛ Juda malɛ la fo kekpabi.

⁸Nɛ Mowab la fo kusɔ fɔr enɔ,

nɛ fee ta fo asɛbta malɛ

a deŋi Edɔm so,

nsaa yili Filisti malɛ so a cha

kekɔmpɔɔso be awɔr.

⁹Wanɛ e naaŋ yɛr ma

kadegboŋ nɛ b pɔr

egbal ŋ kulti na to?

Wanɛ e naaŋ juŋkpar ma

n yɔ Edɔm be efuli so?

¹⁰Enyɛnpe Ebɔrɛ,

fo kini anyi kashenteŋto

nsaa maaŋ naŋ juŋkpar

anyi be benapo nna a?

¹¹Chɛ anyi to nɛ an kɔ m pɔɔ

an doŋana so, ŋkpal manɛ so,

dimɛdi bre be kechɛto maŋ la shɛŋ.

¹²Fo Ebɔrɛ nawule e naŋ tiŋ n

shin nɛ an kɔ m pɔɔ so,

nɛ fo fifɛa an doŋana

m mata kasawule.

Kebaa wɔ Ebɔrɛ be kekuŋ to be asheŋ

¹Enyɛnpe Ebɔrɛ,

jande nu ma kushu

nɛ ma kabɔrɛkule!

²Ma tama kikɛ loge

nɛ n wɔ efuli wɔfɔ so

a shu a tre fo.

Juŋkpar ma n yɔ kefalta gboŋ

nɛ k du jeŋgreŋ a chɔ ma na so.

³Ŋkpal manɛ so, fo e la

ma ekuŋkpa lempo,

nɛ mee shile n ya kaa ŋana to

ashi ma doŋana so.

⁴Enyɛnpe, ma Ebɔrɛ,

shin nɛ m baa wɔ fo kutɔ

mbaanaayɔ,

saŋɛ na so meeŋ nya kekuŋ

ashi fo aba to.

⁵Enyɛnpe Ebɔrɛ,

fo nu ma kɔnɔ naseso na

nseŋ nɛfa ma fanɛ

kananɛ fo nɛfa bumo nɛ

baa bunyaŋ fo na.

⁶Sa fo ewura ŋkpa tenteŋ

nɛ eyur be alenfia.

⁷Shin nɛ e baa ji kuwura

fo anishito mbaanaayɔ

nɛ fo kasha nɛ kashenteŋji

e baa kuŋ mo.

⁸Saŋɛ na so meeŋ baa di fo

ketre epaŋ saŋkama

nsaa wora a bɔlɔ ma kɔnɔ

naseso so saŋkama.

Enyɛnpe na ka kɔ eleŋ nsaa wu kuwɔr be asheŋ

¹Enyɛnpe Ebɔrɛ na to

nɛ ma kiyoyu bee nya ewushi.

Mo nawule e naa mɔlga ma.

²Mo e la kefaltagboŋ nɛ emɔlgapo.

Mo e la ma ekuŋkpa lempo

a kuŋ ma.

³Nchɛ afanɛ nɛ menyeeŋ ta

m bri esa?

Menyeeŋ yili egbal

nɛ k kulti ere so

n ta mo n lɛ to a?

⁴Menyee fin kananɛ menyee lara mo

ashi mbe kemaŋkura be eyilikpa nna.

Efɛ nawule nɛ menyee kuu.

Nɛ mmalga lela lar menyi be nnɔ to gba,

kekishi nɛ shoduu e bɔlɔ men

be ŋgbene bre to.

⁵Enyɛnpe Ebɔrɛ na nawule

e naa sa kagbenewushi;

amoso mo so nɛ ma tama yil so.

⁶Mo nawule e la ma kefaltagboŋ

nɛ ma emɔlgapo.

Mo e la maa ekuŋkpagboŋ,

amoso ma lɔ kufu.

⁷Mo e naa mɔlga ma

nsaa sa ma kemaŋkura.

Mo e la kefaltagboŋ nɛ mee nya

kekuŋ ashi kumo so na.

⁸Basa, men yirda Enyɛnpe Ebɔrɛ na

nsaa kaŋɛ mo men be asheŋ

tirso saŋkama.

Ŋkpal manɛ so, Ebɔrɛ na nawule

e la anyi be ekumpo.

⁹Anyi edimɛdi baa du fanɛ

esa ka fute afu nna.

Anyi be ekama maŋ la shɛŋ.

Anyi kikɛ be egbɛ maŋ fo

esa be efute be egbɛ so.

¹⁰Sa maŋ ta fo tama n deŋi

kapuni be asɔ so,

ŋko a wu fo kumu ŋkpal

kayu be asɔ so.

Loŋ beeŋ tiŋ n sa fo asɔ damta,

ama sa maŋ ta fo kagbene n deŋi

amo so.

¹¹Kusɔ koŋwule nɛ Ebɔrɛ malga,

ama asɔ anyɔ nɛ n nu.

Amo e la fanɛ,

fo Enyɛnpe Ebɔrɛ na kɔ eleŋ

¹²nsaa kɔ kasha.

Kashenteŋto malɛ nɛ feeŋ

yili kusɔ kama nɛ esa wora so

ŋ ka mo kumo be kukɔ.

Ebɔrɛ be kasha be asheŋ

¹Enyɛnpe, fo e la ma Ebɔrɛ.

Mee fin fo ma kagbene

to kashenteŋto;

fanɛ kananɛ meeŋ pere kenishi

n fin nchu ketarso kpantaŋkpalaŋ

ashi keshishɛrsawule so na.

²N wu fo eleŋ nɛ fo kemaŋkura

ashi fo bɔrɛlambu to.

³Ŋkpal fo kasha ka shi

a chɔ kebaawɔtɔ so

meeŋ di fo epaŋ.

⁴Meeŋ di fo epaŋ saŋɛ so

nɛ n wɔ ŋkpa to kikɛ;

nseŋ maŋ ma enɔana so

ashi fo ketre to.

⁵Meeŋ boŋ kapandi be nshɛ

kagbenefuliso;

nɛ ma eyur e saŋɛ ma to

n shin nɛ m moɛ,

fanɛ b ka wora

kejigboŋ nɛ n ji na.

⁶Kanyɛso nɛ m baŋ dese

gedo so mee nyiŋi fo nna,

a fɛ fo asheŋ ashi ma

edesekpa saŋkama.

⁷Ŋkpal fo ka la ma echɛtopo so,

meeŋ chena fo aba be kiyoyul to,

m boŋ kagbenefuli be nshɛ.

⁸M baa mar fo nna,

nɛ fo enɔ lempo na,

e baa kɔ ma to.

⁹Bekama nɛ baa fin ma ŋkpa

be kelara na,

beeŋ wu n yɔ nchaŋ to.

¹⁰Etokobi nɛ baaŋ ta m mɔ bumo,

nɛ kupuŋ to be njɔnɔ e ji bumo.

¹¹Ama ewura na nɛ bumo nɛ

b yirda fo na bre beeŋ ji eyur,

ŋkpal fo Enyɛnpe Ebɔrɛ na so.

Ama befɛpo bre beeŋ

lo bumo be nnɔ.

Baa ji eyur ŋkpal Enyɛnpe na so

¹Enyɛnpe Ebɔrɛ,

nu ma nfubel,

nseŋ kuŋ ma ashi

bedoŋ be enɔ to.

²Jande, kuŋ ma ashi

kumukpakpaso wuraana

nɛ basa lubi be katuŋ na

be ŋkre nɛ baa kre ma na to.

³Bumo be atuwebi bee besa nna

fanɛ b ka ŋe esa kasaŋɛ na,

nɛ bumo be mmalga du fanɛ

b ka da esa ketanyembi na.

⁴Baa ŋana kupuŋ to nna,

a to basa nɛ b maŋ wora alubi,

nɛ kumo be loŋ maŋ kɔ bumo kufu.

⁵Baa leŋ abar to nna a wɔtɔ

alubi be kewora to,

nsaa malga kananɛ baaŋ sho

bumo be ajigbelɛ ŋ ŋana,

nsaa kaŋɛ fanɛ esa kikɛ

maaŋ wu bumo.

⁶Baa kre asheŋ nɛ a maŋ

niŋi be kewora nna,

a kaŋɛ fanɛ kusɔ nɛ

b kre na walɛ ga.

Kashenteŋto dimɛdi

be kagbene nɛ mbe nfɛra lubi ga.

⁷Ama Ebɔrɛ gbagba beeŋ to bumo

atanyembi n doro bumo.

⁸Bumo gbagba be mmalga

beeŋ kilgi n ji bumo,

nɛ kufu e pɛ bekama

nɛ b wu bumo,

nɛ b fifi amu n chicha.

⁹Kufu beeŋ pɛ basa, nɛ b ji

Ebɔrɛ be ashuŋ shuŋso

be asheŋ be shɛda,

nsaa fɛ kusɔ nɛ

e wora na be asheŋ.

¹⁰Basa nɛ baa wora asheŋ

niŋiso na beeŋ ji eyur ŋkpal

kusɔ nɛ Enyɛnpe na wora so;

nseŋ ta bumo be amu

ŋ ŋana Enyɛnpe na to.

Enyɛnpe Ebɔrɛ ka bee nu kekule be asheŋ

¹Anyi be Ebɔrɛ, k daga fanɛ

an fur fo ashi Zayɔn to.

Ndoŋ nɛ anyeeŋ bɛ nnɔ nɛ

an nase n sa fo na so.

²Ekama beeŋ ba fo kutɔ

ŋkpal fo ka bee nu kekule so.

³Anyi be alubi pɔɔ anyi so,

nɛ fo ta anyi be aworandeso

m paŋ anyi.

⁴Fo nɛfa bekama nɛ fo lara na nna,

n shin nɛ b chena n sha fo

ashi fo bɔrɛlambu to.

Anyeeŋ ji anyi be amu

ashi fo laŋ to nɛ fo

bɔrɛlambu cheembi na to.

⁵An be Ebɔrɛ, fo mɔlga anyi,

nɛ fo aworbi nɛ a bee keta kufu na

shin nɛ an pin fanɛ fo nu kekule

nɛ anyee kule a fin kashenteŋji na.

Fo e naa sa durnya ere be basa kikɛ tama,

hale bumo nɛ b wɔ teku be kaba

nɛ anyi maŋ nyi na kikɛ gba.

⁶Fo e kɔ eleŋ nɛ yuku n ta

abeegboŋ n yili amo be eyilikpa.

⁷Fo e naa shin nɛ teku be awɔr bee lo.

Fo e yɔɔ nchu be atili nɛ efuliana na

be awɔr nɛ baa cha.

⁸Fo aworbi nɛ a bee keta kufu na

bee chinchiŋ basa nɛ b wɔ kufɔ kufɔ gba.

Durnya ere to ebi kikɛ bee boŋ nshɛ

nsaa ji eyur nna ŋkpal fo so.

⁹Fo e naa keni kasawule ere so

nsaa shin nɛ bɔrɛ bee ba a wushi kumo

nɛ asɔ duuso be yiri yiri kikɛ

bee wora kumo so.

Fo eboŋana maa wɔlto kikɛ;

fo alɛ e naa shin nɛ kasawule

bee wora ajibi nɛnɛ.

¹⁰Fo e naa wurge adɔana so nchu

a shin kasawule bee wushi

a ki pɔtɔ pɔtɔ nɛ asɔ bee tiŋ a kɔr.

¹¹Fo e naa shin nɛ adɔjibi bee wora

nɛnɛ nɛ mpuro bee bɔlɔ a wurge.

¹²Fo e naa shin nɛ afitiri

nɛ a wɔ keshishɛrsawule so

bee daŋ nɛnɛ;

nsaa shin nɛ abeeana bee ji eyur.

¹³Fo shin nɛ asɔbɔya sɔ kaplɛkama

nɛ ataŋɛ to be ajibi bee wora alegaiso;

nɛ amo kikɛ bee boŋ nshɛ awɔrso

kagbenefuliso.

Kapandi nɛ kechɔrɔ be kashɛ

¹Menyi basa nɛ men wɔ

kasawule ere so kikɛ

e cha awɔr n fur Ebɔrɛ.

²Men boŋ nshɛ m maŋkura mbe

ketre nseŋ ta kapandi n fur mo.

³Men kaŋɛ Ebɔrɛ fanɛ mbe

aworbi kikɛ kɔ kufu nna,

nɛ mbe eleŋgboŋ na bee

shin nɛ mo doŋana bee

chicha a jɔŋɛ mo ase kufuso.

⁴Durnya ere to be esa kikɛ

bee bunyaŋ fo nsaa fur fo.

⁵Ba keni kusɔ nɛ Ebɔrɛ wora;

nɛ ashuŋ nɛ a bee keta kufu

nɛ e shuŋ dimɛdi be kaplɛa so.

⁶Mo e shin nɛ teku wɔlto ŋ ki kasawule,

nɛ an nananyɛnana nite kumo to n dii,

nɛ an ji eyur ŋkpal kusɔ nɛ e wora na so.

⁷E kɔ mbe eleŋgboŋ nna

a ji kuwura mbaanaayɔ,

nɛ efuliana na maaŋ tiŋ

n wora shɛŋ shɛŋ ŋ ŋana mo so.

Amoso, amukpakpasowuraana

maaŋ tiŋ ŋ kre kena ŋ kɔ mo.

⁸Basa, men kikɛ e ba nɛ an fur

anyi be Ebɔrɛ na.

Men fur mo nɛ basa e nu.

⁹Mo e kuŋ anyi be ŋkpa

n shin nɛ an nya a wɔtɔ.

¹⁰Anyi be Ebɔrɛ, fo wora

anyi ŋ keni,

fanɛ kananɛ baa wora

gbiti a keni na.

¹¹Fo shin nɛ an tɔr kashewu to;

fo sulɔ anyi esulɔ gbɛgbɛso.

¹²Fo shin nɛ an doŋana pɔɔ anyi so

nɛ an luri edɛ nɛ nchu to,

ama fo bar anyi kasawule

nɛ k kɔ asɔ damta so.

^13-14Meeŋ wora m bɛ kɔnɔ

nɛ n nase n sa fo saŋɛ so

nɛ n daa wɔ tɔrɔ to na so.

Meeŋ ba lara sarga ashi fo

bɔrɛlambu to n sa fo.

¹⁵Meeŋ ta mbolpɔ lela n lara

sarga n sa fo,

nseŋ mɔ egbolu nɛ mboe n lara

sarga chɔɔso ashi fo bɔrɛsure so.

¹⁶Menyi nɛ menyee bunyaŋ

Enyɛnpe Ebɔrɛ na kikɛ e ba,

nɛ ŋ kaŋɛ menyi kusɔ kama

nɛ Ebɔrɛ wora n sa ma.

¹⁷N shu n tre Enyɛnpe na

nseŋ fur mo.

¹⁸Alubi daa wɔ ma kagbene to,

e daa maaŋ nu ma kekule.

¹⁹Ama Enyɛnpe Ebɔrɛ na

nu ma kekule nseŋ wora

kusɔ nɛ ŋ kule mo na n sa ma.

²⁰Meeŋ di Ebɔrɛ epaŋ;

ŋkpal e ka bee nu ma kekule

nsaa wora ma kelela saŋkikɛ so.

Kechɔrɔ be kashɛ

¹Anyi be Ebɔrɛ, wu anyi kuwɔr,

n shin nɛ fo kagbene e fuli anyi so,

nɛ fo wora anyi kelela nseŋ nɛfa anyi;

²nɛ ekama durnya ere to

e pin fo ekpa na,

nɛ efuliana na kikɛ be basa

e wu fo kumɔlga na.

³Shin nɛ basa kikɛ e fur fo awɔrso.

⁴Shin nɛ efuliana na be basa

kikɛ be ŋgbene e fuli bumo,

nɛ b boŋ nshɛ kagbenefuliso

Ŋkpal manɛ so, fee ji asheŋ

nɛ amo be ekpa so nna

nsaa ŋini efuliana na be basa

ekpa nɛ k daga.

⁵Shin nɛ ekama e fur fo awɔrso.

⁶Anyi be Ebɔrɛ na nɛfa kasawule

n shin nɛ k wora ajibi n sa anyi.

⁷Ebɔrɛ beeŋ nɛfa anyi,

nɛ durnya to be basa kikɛ

e bunyaŋ mo.

Ebɔrɛ ka beeŋ kɔ m pɔɔ so be asheŋ

¹Ebɔrɛ koso,

n shin nɛ fo doŋana

e pesaŋ to n shile.

²Shin nɛ b pesaŋ to fanɛ edishi.

Shin nɛ b ŋalga fo anishito

fanɛ kananɛ kemushoŋmar

bee ŋalga edɛ to na.

³Ama shin nɛ basa nɛ baa wora

asheŋ niŋiso na bre

be ŋgbene e fuli bumo,

nɛ b ji eyur fo anishito.

⁴Men boŋ nshɛ n sa Ebɔrɛ,

men boŋ nshɛ n fur mbe ketre.

Mo e dii n chena awɔlpa so,

amoso men maŋkura mo.

Mbe ketre e la Enyɛnpe na,

nɛ anyee tiŋ n ji eyur

nseŋ maŋkura mo.

⁵Mo e wɔ mbe kakpa cheembi,

nsaa la amunibi bumo tuto

a kuŋ bekulpoche na.

⁶Mo e naa ta bumo nɛ b maŋ

kɔ basa a ki kanaŋ wurana.

Mo e naa sɔ basa nɛ b ti ebu

a yige, nsaa shin nɛ asheŋ

bee nite nɛnɛ a sa bumo.

Ama e bee yɛr bumo

nɛ b kɔ asoe kpakpaso

nsaa maa nu a sa mo na bre

epeŋi kpakpaso be

kasawule so nna.

⁷Fo e sa fo basa kamooji,

nseŋ juŋkpar bumo

m bɔla keshishɛrsawule so,

⁸nɛ kasawule gbuŋgbuŋ

nɛ bɔrɛ chulgi.

Fo nawule e la Ebɔrɛ,

nsaa tase kebee nɛ baa

tre Sainai na so a ji kuwura.

⁹Kasawule ka wɔl nɛ fo

shin nɛ bɔrɛ ba nɛ kaboŋ wushi.

¹⁰Nɛ fo basa chena kumo so,

nɛ fo sa bumo to be bumo

nɛ b maŋ kɔ shɛŋ na kusɔ jiso.

¹¹Fo e sa mbra na,

nɛ beche damta cha awɔr,

ŋ kaŋɛ kusɔ nɛ k wora.

¹²Bewura, nɛ bumo be benapo

kilgi n shile, nɛ b chige asɔ

nɛ b shile ŋ ka na to n sa abar.

¹³Abɛlso be ali nɛ b ta gbiti

m mata amo be aba so

nseŋ ta shuwa nɛ a bee kpa edɛ

n wora amo be atɛ

e ki basa nɛ b shir kaman a keni

mbolpɔ so na peya.

¹⁴Enyɛnpetale Ebɔrɛ na shin nɛ

efuli na so be bewura pesaŋ to,

fanɛ kananɛ abɔrɛjembubi bee tɔr

kebee nɛ baa tre Zalmɔn na so

a pesaŋ to na.

¹⁵Bashan be kebeegboŋ na shi nna

nseŋ lar n lar ayabi.

¹⁶Kebeegboŋ, manɛ nna nɛ fee besa

Zayɔn be kebeegboŋ nɛ Enyɛnpe na

lara fanɛ mbe echenakpa nsaa

wɔ kumo so saŋkama na eyur?

¹⁷Enyɛnpe Ebɔrɛ, egbaŋɛturko lempo

ŋgboŋto ŋgboŋto nɛ fo ta n shi Sainai

be kebeegboŋ na so m ba fo

lambu cheembi na to.

¹⁸Fo keta basa nɛ b ti ebu nna

n dii n yɔ kebeegboŋ na be esoso.

Ndoŋ nɛ basa ya kɛ fo asɔ.

Fo doŋana nɛ b daa maa sha fanɛ fo

baa wɔ ndoŋ gba sa fo ŋkɛ.

¹⁹Anyee fur fo Enyɛnpe

nɛ anyi be Ebɔrɛ nɛ

fee mɔlga anyi nsaa wora

anyi kelela karechɛ kikɛ na.

²⁰Saŋkikɛ fee kuŋ anyi nna,

nsaa mɔlga anyi ashi luwu to.

²¹Kashenteŋto, Ebɔrɛ beeŋ bure

mo doŋana be amu to;

bumo nɛ b kini kelar bumo be

alubi to na be amu.

²²Enyɛnpe Ebɔrɛ na yɛ,

e beeŋ lara bumo ashi

Bashan be kebeegboŋ na so

nɛ teku chiŋgeliŋ to m ba.

²³Saŋɛ na so anyeeŋ chichi

bumo be ŋklaŋ to nɛ an be njɔnɔ

malɛ e bure bumo be awibi to.

²⁴An Nyɛnpe nɛ anyi be Ebɔrɛ,

an wu basa damta ka bɛ

abar so a yɔ fo bɔrɛlambu to.

²⁵Beshɛbompo e juŋkpar

nɛ bumo nɛ baa laŋ alaŋsɔ bɛso

nɛ besuŋgurbi bee laŋ

echakachaka a chaŋ bumo.

²⁶Le nɛ baa ponte a kaŋɛ:

“Men fur Enyɛnpe Ebɔrɛ ashi

mbe basa Israɛlebi be nshɛr to.”

²⁷Bɛnjamin be yiri to ebi

nɛ b maŋ shi na e juŋkpar

n ta Juda be yiri to

be benimu m bɛso.

Nɛ Zɛbyulɔn nɛ Naftali

malɛ bɛ benimu bɛso.

²⁸Anyi be Ebɔrɛ, ŋini fo eleŋ;

naaŋ ŋini anyi fo eleŋ na.

²⁹Nɛ bewura e ta ŋkɛ m ba

fo bɔrɛlambu to ashi Jerusalɛm.

³⁰Gberge kusɔbɔya nɛ k wɔ

ketaŋɛ to na kusoe.

Gberge efuliana na be basa

nɛ bumo be bejuŋkparpo

du fanɛ apuntona na kusoe,

n shin nɛ b ta gbiti be ŋkɛ

ŋ gbeye amuli so m ba.

Shin nɛ efuliana nɛ amo be basa

bee sha kebaa ku kena na e pesaŋ to.

³¹Shin nɛ basa nɛ efuliana na

bee yɛr efuli pɔtɛ so nɛ b ya yili amo

be katelamu to a fin kɔnɔkoŋwule na

e shi Ijipt be efuli so m ba.

Nseŋ shin nɛ Itiopiaebi e ba bunyaŋ

fo Enyɛnpe Ebɔrɛ na.

³²Men boŋ nshɛ n fur Ebɔrɛ.

Durnya to be efuli kikɛ so ebi

e boŋ nshɛ n sa Enyɛnpe Ebɔrɛ na.

³³Men fur emo nɛ e yili

dra na kikɛ a dii awɔlpa na.

Men kaŋ kusoe n nu mbe ebɔl

nɛ k bee gbri fanɛ bɔrɛ

ka bee ponte na.

³⁴Men kaŋɛ basa Ebɔrɛ be

eleŋgboŋ na be asheŋ.

Mbe kemaŋkura e buu Israɛl so

nɛ e wɔ awɔlpa to a ji kuwura na.

³⁵O, Ebɔrɛ, fo asheŋ woraso bee

keta kufu ashi fo bɔrɛlambu to nna,

nɛ fee sa fo basa eleŋ nɛ yuku.

Men shin nɛ an fur anyi be Ebɔrɛ na!

Esa ka beeŋ tiŋ n yirda Ebɔrɛ be asheŋ

¹O Ebɔrɛ, mɔlga ma.

Ŋkpal manɛ so,

nchu bɔlɔ n fo ma kubɔ

nsaa shin nɛ a mur ma.

²Mee nia depɔ to nna

nɛ ma aya maŋ naa mur efar.

N fo kakpa chiŋgeliŋ

nɛ nchu na bee muni ma so.

³N shu n tre fo hale ma eleŋ kikɛ loge,

nɛ ma ebɔl to wɔl.

N mɛrge anishi ŋ keni fo ekpa,

hale ma anishi bee kurge.

⁴Basa nɛ b kishi ma kenyanyaŋɛso

shibi a chɔ ma kumu so be emin.

Ebɔrɛ, bedoŋ lubi nɛ baa fin ma

nɛ b jija na shi alegaiso.

Baa tintiŋ ma nna nɛ ŋ ka

kusɔ nɛ m maŋ yuri be kukɔ.

⁵Fo nyi ma kawuliso be alubi kikɛ.

Amo be kukoŋwule kama

maŋ ŋana fo so.

⁶Enyɛnpetale Ewurgboŋ,

nɛ fee ji Israɛlebi so kuwura,

sa maŋ shin nɛ ekama

nɛ e bee bunyaŋ fo e ji

anishinyɔr ŋkpal ma so.

⁷Fo nawule so nɛ mee sɔ katege

nsaa ji nyɔmɔ na.

⁸Ŋ ki fanɛ efɔ ashi ŋ kurgepoana kutɔ nna;

nsaa du fanɛ esa nɛ e shi efuli pɔtɛ so

ashi n niopibiana to.

⁹Kasha nɛ ŋ kɔ n sa fo bɔrɛlambu na

bee chɔ ma to nna fanɛ edɛ,

nɛ basa baa tege fo,

k bee lɛa ma alɛ gba nna.

¹⁰Mee kishi nsaa shu;

ama b kraa tege ma.

¹¹M buu kagbenejijaso

be asɔbuuso gba

basa bee wora ma eyurto nna.

¹²Bejuŋkparpo nɛ demujipoana

bee kuli ma nna,

nɛ basa nɛ baa nuu nsa a boo,

bee boŋ nshɛ a wora ma eyurto.

¹³Ama fo Enyɛnpe na

nɛ mee shu a tre.

Nu ma kekule saŋɛ nɛ k par fo

nseŋ yili fo kashagboŋ na so

m mɔlga ma.

¹⁴Sa maŋ shin nɛ n nia depɔ to.

Mɔlga ma ashi bedoŋ

nɛ nchu nɛ a bee shin nɛ

a mur ma na to.

¹⁵Sa maŋ shin nɛ chuful

e sulɔ ma n yɔ,

ŋko n shin nɛ teku e mur ma,

ŋko n shin nɛ luwu e ta ma m min.

¹⁶Enyɛnpe Ebɔrɛ, nu ma kekule,

ŋkpal fo ka walɛ nsaa la esa so.

Chɛ ma to, ŋkpal fo

kuwɔrwu gboŋgboŋi na so.

¹⁷Saŋ maŋ pal kaman n sa fo kenya.

Jande nu ma kekule manaŋ,

ŋkpal manɛ so, n wɔ tɔrɔ to nna.

¹⁸Ba mɔlga ma ashi bedoŋ be enɔ to.

¹⁹Fo nyi kananɛ baa wora ma eyurto,

a tege ma nsaa wɔtɔ ma nyɔmɔ to.

Fo nyi n doŋana na be ekama.

²⁰Ma kagbenejija ŋkpal katege so,

n shin nɛ ŋ ki elɔpo katinso.

N daa fɛ fanɛ baaŋ wu ma kuwɔr nna;

ma alɛ maŋ nya loŋ.

²¹Baa ta kɔrtɔ nna a wɔtɔ ma ajibi to

nsaa sa ma nsa nyaŋnyaŋso

fanɛ nchu nuuso.

²²Shin nɛ bumo be ejikpa

e ki ajigbelɛ n sa bumo

nɛ bumo teriana.

²³Shin nɛ tentembiri e tan bumo

nɛ b baa chicha.

²⁴Shin nɛ b pin fo ka nya agbo ga,

nseŋ shin nɛ fo agbo e ba bumo so.

²⁵Jija bumo be echenakpa.

Sa maŋ shin nɛ esa koŋwule gba

e ka a wɔ bumo be keeyi to.

²⁶Ŋkpal manɛ so, baa malga nna

a gbiti basa nɛ fo gberge kusoe na;

nɛ bumo be ŋkuli bee tɔrɔ basa

nɛ fo doro na.

²⁷Shin nɛ b ji n tɔr ekpa kama so.

Sa maŋ ta bumo be alubi

m paŋ bumo kikɛ.

²⁸Bubɔ bumo be atre

ashi basa nɛ b wɔ ŋkpa to na

be atre be kawɔl na to.

Lara bumo ashi bumo nɛ

b maŋ wora n jija to.

²⁹B maa keta ma nɛnɛ

nɛ ebesa kɔ ma.

Ebɔrɛ kuŋ ma

nseŋ mɔlga ma.

³⁰Meeŋ boŋ kashɛ n fur

Enyɛnpe Ebɔrɛ na,

nseŋ chɔrɔ mo

ma kagbene to.

³¹Kumo be loŋ beeŋ par

Enyɛnpe Ebɔrɛ na a chɔ

keta gbolu fɛlso ŋko

gbolu danso n lara sarga

n sa mo.

³²Betirpo beeŋ wu kumo be loŋ

nɛ bumo be ŋgbene e fuli bumo.

Saŋɛ na so basa nɛ baa bunyaŋ

Enyɛnpe na beeŋ nya keleŋto.

³³Bumo nɛ b maŋ kɔ epe baŋ shu

n tre Enyɛnpe Ebɔrɛ na,

e beeŋ nu. Mo alɛ maaŋ teŋ mbe

basa nɛ b wɔ kabuti to na so.

³⁴Esoso nɛ kasawule nɛ teku

nɛ asɔ nɛ a wɔ amo to kikɛ

beeŋ fur anyi be Ebɔrɛ na.

³⁵Ebɔrɛ beeŋ sɔ Jerusalɛm n yige

nseŋ lɔŋɛ m pɔr Juda be ndeana,

nɛ mbe basa e baa wɔ amo to

ashi bumo gbagba be kasawule so.

³⁶Kasawule na beeŋ ki bumo

be mbia be kapetɛ kachako.

Nɛ esa kama nɛ e bee sha Ebɔrɛ

e chena kumo so.

Ebɔrɛ ka la mamachi be Ebɔrɛ be asheŋ

¹Enyɛnpe Ebɔrɛ,

jande, mɔlga ma.

Ba chɛ ma to manaŋ.

²Wul basa nɛ baa fin ma

nɛ b mɔ na be nfɛra to,

nseŋ shin nɛ anishinyɔr

e pɛ bumo.

Shin nɛ bekama nɛ baa

fin ma nɛ luwu na e sipa.

³Shin nɛ anishinyɔr nɛ nyɔmɔ

e ji bekama nɛ baa kaŋɛ ma le na:

“Men keni kananɛ e ki.”

⁴Enyɛnpe Ebɔrɛ, shin nɛ bumo nɛ baa

bunyaŋ fo na be ŋgbene e fuli bumo

nɛ b ji eyur.

Shin nɛ bekama nɛ baa sha fo

kumɔlga na e baa kaŋɛ saŋkama

fanɛ Enyɛnpe na shibi.

⁵N la etirpo nɛ etentaŋasepo nna,

a maaŋ tiŋ n wora shɛŋ shɛŋ,

ama Enyɛnpe, ma asheŋ tir fo.

Fo e la ma emɔlgapo,

amoso jande, ba mɔlga ma manaŋ.

¹Fo Enyɛnpe Ebɔrɛ na kutɔ nɛ m ba,

nɛ fo baa kuŋ ma.

Sa maŋ shin nɛ n ji anishinyɔr.

²Jande Enyɛnpe Ebɔrɛ, sɔ ma n yige;

ŋkpal fo ka la esa niŋiso so.

Nu ma kekule nseŋ

mɔlga ma manaŋ.

³Baa la ma kefaltagboŋ,

ma ekuŋkpagboŋ nɛ mee

nya kumɔlga fo kutɔ.

Fo Enyɛnpe Ebɔrɛ na e la ma

kefaltagboŋ a kuŋ ma.

Amoso baa juŋkpar ma

a ŋini ma ekpa lela na,

nɛ fo ketre e nya kemaŋkura.

⁴Enyɛnpe Ebɔrɛ, ba mɔlga

ma ashi kumukpakpaso wuraana

nɛ basa nɛ baa mɛaŋ ma be enɔ to.

⁵O Enyɛnpetale Ebɔrɛ,

fo e la ma tama kikɛ,

ma kebifɔlbi to kikɛ

nɛ n ta yirda n deŋi fo so.

⁶Ma kebiato kikɛ nɛ n ta ma

kumu n to fo so hale m ba fo mbre.

Fo e shin nɛ b kurge ma

nɛ kayurwushi; ma alɛ beeŋ

baa kpaŋ fo mbaanaayɔ.

⁷Ma kebaawɔtɔ ki tɔɔnɛ nna

n sa basa damta ŋkpal fo

ka la ma ekumpo lempo so.

⁸Meeŋ kpaŋ fo nsaa

ber fo kemaŋkura

be kebomboŋ karechɛ kikɛ.

⁹Mee kule fo nna, nɛ fo sa maŋ

pal kaman n sa ma jemanɛ

nɛ m bel ŋko ŋ kini ma n lɛ

jemanɛ nɛ ma eleŋ loge.

¹⁰Bedoŋ bee malga a gbiti ma nna;

b shɛr nna a kre ma kemɔ be nia.

¹¹B yɛ: “Ebɔrɛ kini mo n lɛ;

men shin nɛ an ju m bɛ so n ya pɛ mo,

ŋkpal manɛ so, esa kikɛ maŋ wɔtɔ

nɛ e kɔ m mɔlga mo.”

¹²O Ebɔrɛ, sa maŋ barga ma n yɔ kufɔ;

O ma Ebɔrɛ, ba manaŋ m ba chɛ ma to!

¹³Shin nɛ basa nɛ baa fin ma

nɛ luwu na e kɔ n tɔr nseŋ mur.

Nseŋ shin nɛ basa nɛ baa kɔrfɛ ma

e ŋaba n ji anishinyɔr.

¹⁴Ma ere beeŋ ta ma

tama n wɔtɔ fo to;

ma alɛ maaŋ yige

kebaakpaŋ fo kikɛ.

¹⁵Karechɛ kikɛ meeŋ baa

malga fo alelasheŋ

nɛ fo kumɔlga be asheŋ;

ŋkpal manɛ so, fo wora

asheŋgboŋ nɛ a baŋ ma

kepinto so.

¹⁶O Enyɛnpetale Ebɔrɛ,

fo nawule be asheŋgboŋ

nɛ kebaawɔtɔ niŋiso

be kubomboŋ nɛ meeŋ

baa ber.

¹⁷Ma kebiato kikɛ nɛ

fo ŋini ma asheŋ;

hale nɛ mbre,

ŋ kraa malga fo emamachisheŋ

be asheŋ a sa basa.

¹⁸Naniere, nɛ m bel n fuli kumu,

sa maŋ pal kaman n sa ma,

O Ebɔrɛ.

Shin nɛ m baa kraa wɔtɔ

a malga fo eleŋgboŋ

be asheŋ a sa kaman to ebi

nɛ baa ba na.

¹⁹O Ebɔrɛ, fo kebaawɔtɔ

niŋiso shi ga,

k salga to hale n ya fo awɔlpa to.

Fo e wora asheŋgboŋ ga,

esa kikɛ maŋ du fanɛ fo.

²⁰Fo shin nɛ n ji awurfoŋ damta,

ama fo naŋ wɔtɔ ma eleŋ;

nseŋ kuŋ ma

nɛ m maŋ wu n yɔ nchaŋ to.

²¹Fo naŋ shin nɛ n nya

kemaŋkura n ti so,

nseŋ naŋ lolo ma nɛ

ma kagbene dese ma.

²²Meeŋ ta jaŋjilaŋ m boŋ

nshɛ ŋ kpaŋ fo;

meeŋ kpaŋ fo ma Ebɔrɛ,

ŋkpal fo kashenteŋji so.

Meeŋ laŋ jaŋjilaŋ m boŋ

nshɛ belbelso n sa fo,

Israɛl be Ebɔrɛ cheembi na.

²³Meeŋ ta kagbenefuli m boŋ

nshɛ awɔrso ŋ kpaŋ fo,

ŋkpal fo ka mɔlga ma so.

²⁴Meeŋ malga fo kebaawɔtɔ

niŋiso be asheŋ kachɛ lelemu.

Ŋkpal manɛ so,

basa nɛ baa kɔrfɛ ma na

kɔ n tɔr nseŋ ji anishinyɔr.

Kekule Ebɔrɛ a sa ewura be asheŋ

¹O Ebɔrɛ, shin nɛ ewura

e baa ji kashenteŋ;

nsaa ji asheŋ nɛ amo be

ekpa so fanɛ fo.

²Saŋɛ na so, e beeŋ baa ji

fo basa demu ekpa niŋiso so,

nsaa keni basa nɛ b wɔ tɔrɔ to

ekpa nɛ k daga so.

³Shin nɛ kayurwushi nɛ keji

asheŋ nɛ amo be ekpa so

e baa wɔ basa nɛ b tase

abeegboŋ nɛ abeebi kikɛ so.

⁴Shin nɛ ewura na e baa

kɔ a sa betirpo, nsaa

kɔ a suge betentaŋasepo

nseŋ naa kɔ a pɔɔ bekama

nɛ baa kɔrfɛ bumo na so.

⁵Shin nɛ ewura e baa wɔtɔ

mbaanaayɔ fanɛ kananɛ

epeŋi nɛ kufɔl wɔtɔ na.

⁶Shin nɛ e baa kɔ kechɛto a sa

basa fanɛ kananɛ bɔrɛchu

bee sa adɔsawule kayul na.

⁷Shin nɛ ewura na e baa ji asheŋ

nɛ amo be ekpa so a sa ekama,

nseŋ shin nɛ kayurwushi nɛ

kedamaya e sɔ kaplɛkama

hale nɛ kufɔl e ya wu.

⁸Shin nɛ mbe kuwurji e yili

teku ko ase n salga to n ya fo

teku nyɔsopo ase.

Ŋko n yili Yufreetes be Lɔr na ase

n salga to n ya fo durnya be ekar.

⁹Saŋɛ na so keshishɛrsawule so

be basa beeŋ ba jɔŋɛ mo ase

m bunyaŋ mo.

Nɛ b tintiŋ mo doŋana nɛ b ba

dese kasawule ashi mbe anishito.

¹⁰Speen be efuli so nɛ mplasawule so

be bewuraana beeŋ bar bumo be ŋkɛ

m ba sa mo;

nɛ Areebia nɛ Itiopia be bewuraana gba

e bar bumo be ŋkɛ m ba sa mo.

¹¹Kumo be kaman nɛ bewura kikɛ

e ba jɔŋɛ mo ase.

Nɛ efuliana na be basa kikɛ e shuŋ mo.

¹²Ŋkpal manɛ so, e beeŋ kɔ n suge

betentaŋasepo nɛ bekama nɛ b wɔ

tɔrɔ to nseŋ shu n tre mo na n yige.

¹³Ewura na kɔ kushuso n sa

bepɔshipo nɛ betirpo nna,

mo alɛ e naa mɔlga betentaŋasepo

ashi luwu to.

¹⁴Mo e naa mɔlga bumo ashi

kamɛaŋ nɛ awurfoŋ to,

ŋkpal manɛ so, bumo be ŋkpa

be asheŋ tir mo nna.

¹⁵Shin nɛ ewura na be ŋkpa

e teŋi so!

N shin nɛ e nya Areebia be

kasawule so be shuwa.

Shin nɛ basa e baa kule

Ebɔrɛ a sa mo jemanɛ kikɛ

nsaa nɛfa mo karechɛ kama.

¹⁶Shin nɛ ndegboŋ nɛ e wɔ

kasawule na so kikɛ e bɔlɔ ajibi,

nɛ abeeana so kikɛ e bɔlɔ aboyu

nɛ ayu be yiri kikɛ.

Shin nɛ kasawule na so

be ndibi sɔrso e wora ga,

fanɛ Lebanɔn be kebee so

be ndibi sɔrso peya,

nseŋ shin nɛ ndegboŋ na e bɔlɔ

basa fanɛ kupuŋ to be afitiri.

¹⁷Shin nɛ basa e baa nyiŋi

ewura na be ketre mbaanaayɔ,

n shin nɛ mbe kemaŋkura

e baa fulto fanɛ epeŋi.

Shin nɛ efuliana na be basa

e bɔla mo so n dii kedama

nseŋ kule Ebɔrɛ be nɛfa n sa mo.

¹⁸Anyee kpaŋ fo, Enyɛnpe,

Israɛl be Ebɔrɛ na nna.

Fo nawule e naa tiŋ

a wora emamachisheŋ.

¹⁹Anyeeŋ baa kpaŋ fo ketre

nɛ k kɔ kemaŋkura na jemanɛ kikɛ.

Shin nɛ fo kemaŋkuragboŋ na

e dii efuli durnya ere be kaplɛkama.

Amɛn! Amɛn!

²⁰Jɛsi pibinyɛn, Ewura Deevid,

be kabɔrɛkule be ekar nna na.

KESASOPO

(Nshɛ 73—89)

Ebɔrɛ ka walɛ be asheŋ

¹Kashenteŋto, Ebɔrɛ walɛ n sa Israɛl

nɛ bekama nɛ baa bunyaŋ mo

nɛ ŋgbene fuful na.

²Ama ma ere, a daŋ ka gbrɛ

nɛ n fɛrge n tɔr.

³Ŋkpal manɛ so, ŋ ka daŋ wu

kamoowuwuraana ka dii kedama na,

n daa besa bumo eyur nna.

⁴B maa ji awurfoŋ ŋko ebesa kikɛ;

b baa kɔ eyur be alenfia nɛ eleŋ nna.

⁵B maa ji awurfoŋ nɛ beko bee ji na;

bumo alɛ maŋ naa kɔ etɔrɔ

nɛ ekama kɔ na.

⁶Amoso kamoowu ki fanɛ kubɔtoshembi

ashi bumo be ebɔ to nna,

nɛ kebaanyaŋɛto a wora asheŋ

malɛ ki fanɛ bumo be asɔbuuso.

⁷Asheŋ lubi nawule e naa shi

bumo be ŋgbene to a lar,

nɛ ŋkre lubi malɛ bɔlɔ bumo

be nfɛra to.

⁸Baa tege basa nna nsaa malga

mmalga jiga,

nseŋ naa kre beko be kamɛaŋ

kamoowuso.

⁹Baa malga mmalga lubi

a gbiti Ebɔrɛ nna,

nsaa malga ŋkpensheŋ so

ekama kutɔ durnya to.

¹⁰Amoso Ebɔrɛ be basa gba

maŋ naa fɛ bumo be mmalga na

be asheŋ pɔɛŋ nsaa yirda bumo.

¹¹Le nɛ baa kaŋɛ:

“Enyɛnpetale Ebɔrɛ na maaŋ

tiŋ m pin kusɔ kikɛ!”

¹²Kananɛ kumukpakpasowuraana

du nna na.

B maŋ ta asheŋ lubi fanɛ asheŋ lubi;

bumo alɛ bee dii kedama a ti so nna.

¹³Manɛ be tɔnɔ nɛ n nya ashi

ma kebaakɔ nfɛra lela,

nɛ kekini kewora asheŋ lubi to bre?

¹⁴O Ebɔrɛ, fo shin nɛ n ji

awurfoŋ kachɛ lelemu.

Kachipurso kikɛ fee gberge

ma kusoe nna.

¹⁵Nɛ n daŋ malga mmalga lubi nna,

ndafanɛ n daa beeŋ ki

edebɔrpo fo basa to.

¹⁶Kedaa du kpakpa n sa ma

nɛ n tiŋ m pin asheŋ ere kikɛ to.

¹⁷Ebɔrɛ be bɔrɛlambu to nɛ n yɔ

pɔɛŋ nseŋ ya pin kusɔ nɛ k beeŋ tu

kumukpakpasowuraana.

¹⁸Abaanaaworasheŋ feeŋ

shin nɛ b fɛrge n tɔr

nsaa maŋ naŋ tiŋ ŋ koso kikɛ.

¹⁹Baaŋ mur epul to nɛ kufu e pɛ

bumo nɛ b baa chicha.

Bumo be lalaloge beeŋ lubi pasaa!

²⁰Baaŋ baa du fanɛ edare

nɛ kare beeŋ chɛ nɛ k choŋ na nna.

O Enyɛnpe Ebɔrɛ, fo baŋ kpa n niŋi to,

baaŋ foe fanɛ afu.

²¹Ma kagbene to ka daa ji edɛ

ŋkpal kusɔ nɛ k daa wora so na,

²²kawulisheŋ nɛ kebaamaŋ nyi

asheŋ e daa kɔ ma,

nɛ n daa wora asheŋ fo anishito

fanɛ kusɔbɔya na.

²³Ama amo nɛ amo kikɛ ŋ kraa

wɔ fo kutɔ jemanɛ kikɛ.

Fo daa kɔ ma to fo enɔ jisa to nna.

²⁴Fo kasotoji e daa ŋini ma

kananɛ meeŋ baa wora asheŋ,

kumo be lalaloge nɛ fo ba ta ma

n yɔ kemaŋkura to.

²⁵M maŋ naa kɔ esa kikɛ ebɔrɛso

n naŋ ti fo so.

Ŋ ka baa kɔ fo ere, m maŋ naa

sha shɛŋ durnya ere to.

²⁶Ma eyur nɛ nfɛra beeŋ tiŋ

n wora asheŋ ŋ gben,

ama Ebɔrɛ e la ma eleŋ

ashi ma kagbene to.

Mo alɛ be asheŋ a tir ma

jemanɛ kikɛ.

²⁷O Enyɛnpe Ebɔrɛ,

bekama nɛ b kplaŋ fo so

beeŋ mur cheche.

Fo alɛ beeŋ mur bekama

nɛ b maŋ ji kashenteŋ n sa fo.

²⁸Ama k walɛ ga ŋkpal ma ere

ka taga fo, Ebɔrɛ na, to so.

N ta fo, Enyɛnpetale Ebɔrɛ na,

fanɛ ma ekumpo nna.

Ma alɛ beeŋ baa bɔ fo

emamachisheŋ na be kubɔya.

Kekule Ebɔrɛ n sa efuli na be asheŋ

¹O Ebɔrɛ, manɛ nna nɛ fo

kplaŋ anyi so loŋ?

Feeŋ baŋ nya agbo n wɔtɔ fo

basa mbaanaayɔ a?

²Baa nyiŋi fo basa nɛ fo lara n sa

fo kumu dra dra kikɛ na.

Basa nɛ fo lara kenyaya to na;

yiri nɛ fo lara fanɛ

fo gbagba be basa na.

Baa nyiŋi Zayɔn be kebee

nɛ b daa wɔ kumo so na gba.

³Naŋ bɛta m ba bɔla fo bɔrɛlambu

nɛ k bure a dese na ase;

kakpa nɛ an doŋana jija

kusɔ kama nyam na.

⁴Fo doŋana daŋ yili bɔrɛlambu na

to n ji njɔŋ nseŋ yuu bumo be etuta

a ŋini fanɛ b kɔ m pɔɔ so nna.

⁵B daa wora asheŋ fanɛ basa ka keta

akpanfu a ku kupo to be ndibi a lɛ nna.

⁶B daŋ ta bumo be akpanfugboŋ

nɛ awurbi m buri m buri asɔ nɛ b shɛl

n ta n ji bɔrɛlambu na kebita na nna.

⁷B daŋ chɔɔ fo bɔrɛlambu na

m mur cheche nna,

nseŋ shin nɛ kakpa nɛ basa daa

bunyaŋ fo na wora eyurpi

daŋkare be ekpa so.

⁸Le nɛ an doŋana na daŋ kaŋɛ

ashi bumo be ŋgbene to:

“Anyeeŋ mur bumo cheche!”

B daŋ chɔɔ kaplɛkama nɛ basa

bee bunyaŋ Ebɔrɛ na ashi

kasawule na kikɛ so nna

m mur cheche.

⁹Emamachisheŋ maŋ naa wɔtɔ,

anebiana na gba maŋ naa wɔtɔ.

Ekama malɛ maŋ nyi saŋɛ nɛ asheŋ na

beeŋ fo amo be ekar.

¹⁰O Ebɔrɛ, saŋɛ mo nɛ an doŋana

beeŋ yige kebaa tege anyi

nɛ kebaawora fo eyur to?

¹¹Manɛ nna nɛ fo kini

kechɛ anyi to?

Manɛ nna nɛ fo maaŋ

gberge bumo kusoe?

¹²O Ebɔrɛ, sososo na kikɛ,

fo e la anyi be ewura;

fo alɛ e bar kumɔlga durnya kikɛ

be basa to.

¹³Fo eleŋgboŋ nɛ fo ta n nase

ekpa teku peper na to,

nseŋ bure nchu to be asɔ

keniso lubi gboŋgboŋi na

be amu to.

¹⁴Fo e daŋ bure teku to be

kusɔbɔya lubi gboŋgboŋi

nɛ baa tre Liviatan na

be kumu to.

Nseŋ shin nɛ k ki keji n sa

keshishɛrsawule so be asɔbɔya.

¹⁵Fo e daŋ shin nɛ kasawule

pante n lar nchu ŋ ki fanɛ

kebuye nɛ mbombi.

Nseŋ shin nɛ elɔr nɛ a daa

shile bre wɔlto na.

¹⁶Fo e to kapa nɛ kanyɛ kikɛ,

nseŋ taŋɛ epeŋi nɛ kufɔl;

nɛ kekama kɔ kumo be eyilikpa.

¹⁷Fo e yili durnya be egbaŋ kikɛ,

nseŋ to kechali nɛ ketar.

¹⁸Enyɛnpe Ebɔrɛ,

baa nyiŋi kananɛ fo doŋana

wora fo eyurto a mushe fo na,

nɛ kananɛ bewulpo

keni fo ketre jiga na.

¹⁹Sa maŋ yige fo basa nɛ b du

fanɛ alepɔ na n sa bedoŋ nɛ b du

fanɛ kupuŋ to be asɔbɔya lubi na.

Fo alɛ e sa maŋ teŋ basa nɛ baa ji

awurfoŋ na so.

²⁰Baa nyiŋi kɔnɔkoŋwule be ŋkre

nɛ anyi nɛ fo wora na.

Ŋkpal manɛ so, kebagato e sɔ durnya

be kukɔlɔbi kikɛ to, n shin nɛ

tentembiri sɔ kaplɛkama.

²¹Sa maŋ shin nɛ anishinyɔr a ji

basa nɛ baa ji awurfoŋ.

Ama fo shin nɛ betirpo nɛ

betentaŋasepo e kpaŋ fo ketre na.

²²O Ebɔrɛ, koso ŋ kɔ n sa fo kumu!

Baa nyiŋi kananɛ bewulpo na

wora fo eyurto kachɛ lelemu kikɛ na.

²³Sa maŋ teŋ awɔr nɛ fo

doŋana wora na so,

awɔr nɛ b baa wora jemanɛ

kikɛ na so.

Ebɔrɛ ka la demujipo be asheŋ

¹O Ebɔrɛ, anyee di fo epaŋ,

ŋkpal fo ka taga anyi to so!

Ekama bee ji eyur nna a malga

fo mamachisheŋ be asheŋ.

²Fo yɛ:

“N lara demuji

be jemanɛ nna n yili;

ma alɛ beeŋ ji demu nɛ

kumo be ekpa so.

³Nɛ kasawule gbuŋgbuŋ

nɛ basa bee chicha gba,

ma e kraa kɔ kumo be gbaltɔlase

to a yil dindiŋ.

⁴Ma e naa kaŋɛ

kumukpakpasowura fanɛ

e sa maa kpeŋ a wu mbe kumu.

⁵Ma e naa kaŋɛ bumo fanɛ

b yige kebaapuchi a malga

bumo be keshi be asheŋ.”

⁶Esa kikɛ maŋ wɔ epeŋilarkpa

ŋko epeŋitɔrkpa ŋko durnya be

kaplɛkama nɛ e tiŋ n ta esa

n yili eyilikpagboŋ.

⁷Ebɔrɛ e naa ji kusɔ kama demu.

Mo e naa bar eko kaseto

nsaa maŋ eko so!

⁸K du fanɛ Enyɛnpe Ebɔrɛ na

ka kɔ kawiebi mbe enɔ to nna,

nɛ mbe agbo du fanɛ yabra kpakpaso

a wɔ kawiebi na to.

E bee duga mbe agbo na nna

a sa durnya to be amukpakpasowuraana,

nɛ baa chise amo kikɛ nyam a nuu.

⁹Ama ma ere beeŋ baa malga fo,

Jeekɔb be Ebɔrɛ na, be asheŋ,

nsaa boŋ nshɛ a kpaŋ fo mbaanaayɔ.

¹⁰O Enyɛnpe Ebɔrɛ,

feeŋ mur basa lubi be eleŋ,

nseŋ shin nɛ basa niŋiso bre

be eleŋ e ti so.

Ebɔrɛ ka bee kɔ a pɔɔ so jemanɛ kikɛ be asheŋ

¹Ekama nyi Ebɔrɛ be asheŋ

ashi Juda be efuli so,

nɛ mbe ketre malɛ bee nya

kemaŋkura Israɛl to.

²Zayɔn be kebee nɛ k wɔ

Jerusalɛm to na

e la kakpa nɛ e wɔ.

³Ndoŋ nɛ e buri m buri edompo na

be atanyembi nɛ etokobi nɛ

abɛlso be asɔkuŋso to.

⁴Fo kemaŋkura bee nyɛkpɛ nna

fanɛ edɛ;

kumo alɛ kɔ eleŋ a walɛ ga

a chɔ abee nɛ kupuŋ to

be asɔbɔya bee nite so na.

⁵Bedoŋ tiŋ n suge benapo lempo

nɛ b kɔ dama na gba be asɔ;

ama naniere bumo alɛ gba wu

n dese a di nchaŋ to nɛ bumo

be eleŋ nɛ kenyi kikɛ to jiga.

⁶Jeekɔb be Ebɔrɛ, fo ka ponte to,

egbaŋɛ nɛ bumo be bediipo

kikɛ tɔr nna n wu a dese shruum.

⁷Fo Enyɛnpe Ebɔrɛ na e daga fanɛ

ekama e baa ŋana fo.

Fo baŋ nya agbo,

esa kikɛ maaŋ tiŋ

n yili fo anishito.

⁸Ebɔrɛso nɛ fo wɔ nseŋ bɔ

fo demuji be kubɔya;

nɛ kufu tɔr durnya so,

nɛ kakpa kikɛ wora shruum.

⁹Jemanɛ nɛ fo kpa n niŋi to

nɛ fo fara demuji m mɔlga basa

nɛ baa ji awurfoŋ durnya to nna na.

¹⁰Kashenteŋto nɛ fo baŋ nya agbo,

basa nɛ b nya agbo n wɔtɔ fo gba

bee kpaŋ fo nna.

¹¹Men nase nnɔ n sa Enyɛnpe,

menyi be Ebɔrɛ na.

Menyi alɛ e wora m bɔlɔ

men be nnɔ naseso na so.

Enyɛnpe Ebɔrɛ na e daga keŋana,

mo e daga fanɛ efuli pɔtɛana

nɛ a kulti anyi na kikɛ be basa

ka bar ŋkɛ m ba sa mo.

¹²Mo e naa bar bewura kama

nɛ baa boo kenyɛn na kaseto;

a shin nɛ baa ki befupo.

Ebɔrɛ ka wɔ mbe basa to tɔrɔ be jemanɛ be asheŋ

¹N shu n tre Ebɔrɛ nna

a fin kechɛto.

Ŋ ka shu n tre mo,

nɛ e nu ma kushu na.

²Enyɛnpe Ebɔrɛ na nɛ mee

kule tɔrɔ be jemanɛ;

mee maŋ ma enɔana so

kanyɛ na kikɛ nna

ashi kabɔrɛkule to,

ama n daa maŋ nya

kagbenewushi.

³N daŋ nyiŋi fo Ebɔrɛ na nna,

nseŋ tekeŋto;

n fɛ nfɛra ga, nɛ aba pɔ ma.

⁴Ŋkpal fo, Enyɛnpe Ebɔrɛ na so,

m maŋ tiŋ nɛ n di.

Ewushi kikɛ maŋ wɔ ma to,

m maŋ tiŋ nɛ m malga gba.

⁵Mee fɛ nchɛ nɛ a choŋ na

nɛ nfɛ dra na be asheŋ nna.

⁶Mee nyiŋi kanyɛso kikɛ be

nshɛ nɛ n daa boŋ,

nsaa fɛ nfɛra ga na nna,

a bishi ma kumu le:

⁷“Enyɛnpe Ebɔrɛ na kini anyi nna

n lɛ le mbaanaayɔ a?

E maaŋ naŋ wu anyi kuwɔr a?

⁸Mbe kasha nɛ k maŋ kɔ ekar na

loge anyi so nna ere a?

Mbe nnɔ naseso na malɛ gba

ba ekar nna ere a?

⁹Ama Ebɔrɛ teŋ so kananɛ

baa wu kuwɔr nna a?

E kpal agbo so m pɛ mbe

kuwɔrwu be kasha nna ere a?”

¹⁰Ade be kaman nɛ n fɛ le:

“Enyɛnpetale Ebɔrɛ,

kusɔ nɛ k baa tɔrɔ ma ga

e la fo ka maŋ naa ta fo

eleŋgboŋ na a chɛ anyi to na.

¹¹Enyɛnpe Ebɔrɛ,

meeŋ baa nyiŋi fo asheŋgboŋ

nɛ emamachisheŋ nɛ fo wora

dra dra na be asheŋ.

¹²Meeŋ baa fɛ asheŋ tumase

nɛ fo wora na kikɛ be asheŋ.

¹³O Ebɔrɛ, kusɔ kama nɛ fee wora

du cheembi nna.

Kegbir kikɛ maŋ shi nsaa kɔ

eleŋ fanɛ fo.

¹⁴Fo nawule e la Ebɔrɛ

nɛ e bee wora emamachisheŋ;

nsaa ŋini fo eleŋgboŋ

ashi efuliana na be basa to.

¹⁵Fo eleŋgboŋ na nɛ fo ta

m mɔlga fo basa nɛ b la

Jeekɔb nɛ Josɛf be

kaman to ebi na.

¹⁶O Ebɔrɛ, kewora fanɛ

teku be nchu na ka wu fo,

kufu pɛ amo nna nɛ kumo

be kechimbi to baga to

m pulgi to kufuso.

¹⁷Abɔrɛwɔlpa daŋ chulgi

bɔrɛchu nna n wurge to;

nɛ bɔrɛ nyɛkpɛ awɔlpa to

nseŋ ponte to.

¹⁸Bɔrɛ na ka nyɛkpɛ m ponte to

nɛ kusɔ kikɛ nu kumo.

K ka nyɛkpɛ na

nɛ durnya kikɛ fulto.

K ka ponte to na

nɛ kasawule gbuŋgbuŋ to

fanɛ k kaa bee chicha na.

¹⁹Fo daŋ nase ekpa teku be

nchugboŋ na to nna,

nɛ k wora fanɛ fo ka bɔla

kumo to n choŋ;

ama esa maŋ wu

fo aya ka dese.

²⁰Fo daŋ bɔla Mosis

nɛ Ɛɛrɔn so nna n juŋkpar

fo basa fanɛ mbolpɔkpapo na.”

Kusɔ nɛ Ebɔrɛ wora n sa mbe basa be asheŋ

¹Ma basa, men nu ma keŋini ere,

nseŋ nu kusɔ nɛ mee kaŋɛ ere nɛnɛ.

²Meeŋ ta kanyiasheŋ be

mmalga m bugi wulo to be

mmalga nɛ a choŋ na to.

³A la asheŋ nɛ an nu nsaa nyi nna,

nsaa la asheŋ nɛ an nanaana

kaŋɛ anyi na nna.

⁴Anyi maaŋ ta amo ŋ ŋana

anyi be mbia so.

Anyeeŋ malga Enyɛnpe Ebɔrɛ na

be eleŋgboŋ nɛ mbe asheŋgboŋ

nɛ emamachisheŋ nɛ e wora na

be asheŋ n sa anyi be mbia

nɛ baaŋ ba anyi be kaman na.

⁵Mo e ta mbe mbraana n sa

Israɛl be basa nɛ b la Jeekɔb

be kaman to ebi na.

Mo e kaŋɛ an nanaana fanɛ

b baa ŋini bumo be mbia

mbe mbraana na;

⁶saŋɛ na so mbia nɛ baaŋ ba

kaman to na beeŋ koya amo

nseŋ ŋini bumo alɛ be mbia amo.

⁷Aloŋ e naŋ shin nɛ mbia na gba

e ta bumo be yirda n wɔtɔ Ebɔrɛ to

nsaa maŋ teŋ asɔ nɛ e wora so.

Saŋɛ na so, jemanɛ kikɛ baaŋ baa

wora mbe mbraana na kasonu.

⁸Bumo ere maaŋ baa du fanɛ

bumo nanaana nɛ b daŋ lar

Ebɔrɛ kaman nseŋ kini kewora

mo kasonu, nɛ bumo be yirda

ashi Ebɔrɛ to daa maa yil to kpakpa,

nɛ b maŋ ji kashenteŋ n sa mo na.

⁹Kena be kachɛ ka fo,

Efrayimebi nɛ b daa kɔ

ata nɛ atanyembi to na

daŋ lara keya nna n shile.

¹⁰B daa maŋ wora m bɔlɔ

bumo nɛ Ebɔrɛ be kɔnɔkoŋwule

be ŋkre na so.

B daŋ kini kewora mbe mbraana

kasonu nna.

¹¹B daŋ teŋ kusɔ e wora so nna,

emamachisheŋ nɛ b daŋ wu

e ka wora na kikɛ nɛ b daŋ teŋ so.

¹²Bumo nanaana be anishito

nɛ e daŋ wora emamachisheŋ na.

Ijipt be efuli so be kebonfu

nɛ baa tre Zowan na so

nɛ e daŋ wora amo.

¹³E daŋ shin nɛ teku na ku to nna,

nseŋ shin nɛ nchu na ki

fanɛ egbal a yil,

nɛ e juŋkpar bumo m bɔla

kumo to n choŋ.

¹⁴E daa bɔla kuwɔlpa so nna

a ŋini bumo ekpa kapaso,

nseŋ daa bɔla edɛ be kabulpi so

a ŋini bumo ekpa kanyɛso malɛ.

¹⁵E daŋ shin nɛ afalta pante a lar

nchu a shile fanɛ mbombi nna

ashi keshishɛrsawule so nɛ b nya

nchu n nuu bumo be kepar.

¹⁶Mo e daŋ shin nɛ nchu

shi kefalta to n lar

a shile fanɛ lɔr na.

¹⁷Ama b kraŋ wora alubi

n da Enyɛnpetale Ebɔrɛ so;

nseŋ lar mbe kaman ashi

keshishɛrsawule na so.

¹⁸B daŋ kute nna n wora

Ebɔrɛ ŋ keni;

jemanɛ nɛ b daa yil mo so

fanɛ e sa bumo ajibi

nɛ b daa sha ga na.

¹⁹B daŋ malga nna ŋ gbiti Ebɔrɛ

ŋ kaŋɛ le: “Ebɔrɛ beeŋ tiŋ n sa anyi

ajibi kiyi ere to nfe nna ere a?

²⁰E ka daŋ shin nɛ kefalta na pante na,

nchu daŋ lar a shile fanɛ mbombi na.

Ama e kraa beeŋ tiŋ n sa

anyi ajibi nna ere a?

E beeŋ tiŋ n sa mbe basa

eblaŋ nna ere a?”

²¹Enyɛnpe Ebɔrɛ na ka nu

kusɔ nɛ b kaŋɛ na,

nɛ e nya agbo ga

nseŋ shin nɛ mbe edɛ suse so

ashi mbe basa nɛ b la Jeekɔb

be kaman to ebi to,

²²ŋkpal b ka daa maŋ yirda mo

nseŋ daŋ ji mbe kumɔlga

be eleŋ emɔrɔ so.

²³Ama e daŋ naŋ malga

n sa awɔlpa nseŋ daŋ

bugi esoso be mbuna

²⁴nɛ ajibi nɛ baa tre manna na

tɔr to nɛ basa na nya n ji.

Ebɔrɛso be ajibi nɛ

e daŋ sa bumo.

²⁵Amoso emalaika be ajibi

nɛ b daŋ nya n ji;

Ebɔrɛ daŋ sa bumo ajibi

kama nɛ baaŋ tiŋ n ji nna.

²⁶Kumo be kaman nɛ Ebɔrɛ

be eleŋgboŋ shin nɛ afu shi

epeŋilarkpa, a laŋɛ kelargato

be kaseto be kaba so na

ber m ba.

²⁷Afu na daŋ sulɔ mbuibi ko nna

m ba sɔ kasawule na kikɛ so

fanɛ teku ase be eshishɛr na.

²⁸Basa na be keeyi to gbagba

nɛ Ebɔrɛ shin nɛ mbuibi na tɔr

ŋ kulti bumo be ewajɛbu n wɔtɔ.

²⁹Ndoŋ nna nɛ b pɛ bumo m mɔ

n we m moɛ.

Ŋkpal manɛ so, Ebɔrɛ e daŋ sa

bumo asɔ nɛ b daa sha ga

nseŋ daa kɔ a fin amo na.

³⁰Ama b daa maŋ naŋ nya amo

n we bumo be keparso gba,

a kraa wɔ bumo be nnɔ to nna

³¹nɛ Ebɔrɛ be agbo koso bumo so,

nɛ e shin nɛ bumo to be belempo wu.

Israɛl be efuli so be mbifɔlbi

e daŋ wu na.

³²Ama amo nɛ amo kikɛ,

b kraa wora alubi nna.

Emamachisheŋ nɛ Ebɔrɛ

wora na kikɛ be kaman,

b kraa maŋ yirda mo.

³³Amoso e daŋ shin nɛ bumo

be ŋkpa ku so nna,

nseŋ daŋ shin nɛ kufugboŋ ko

tɔr bumo so.

³⁴Jemanɛ kikɛ nɛ Ebɔrɛ baŋ

shin nɛ bumo be beko wu,

bumo nɛ b ka na bee tuba nna

nsaa kule mo kenishipere so.

³⁵B daŋ nyiŋi fanɛ Ebɔrɛ la

bumo be ekumpo nna,

nseŋ daŋ naŋ nyiŋi fanɛ

Enyɛnpetale Ebɔrɛ e la

bumo be emɔlgapo.

³⁶Ama bumo be nnɔ to

be mmalga kikɛ la efɛ nna.

Asheŋ kama nɛ baa malga

maa shi bumo be ŋgbene to.

³⁷B daa maa ji kashenteŋ a sa mo;

bumo alɛ daa maa bɛ mo nɛ bumo

be kɔnɔkoŋwule be ŋkre so.

³⁸Ama Ebɔrɛ kraa wu

mbe basa kuwɔr.

E daŋ ta bumo be alubi

m paŋ bumo nna,

nsaa maŋ mur bumo.

Ale damta nɛ e pɛ mbe kagbene,

a maŋ shin nɛ mbe agbo

koso bumo so alegaiso.

³⁹E daŋ nyiŋi fanɛ b la

eyur nɛ ŋklaŋ nna.

B du fanɛ afu nɛ k bee ber

a yɔ a maŋ naa laŋɛ nna.

⁴⁰Jemanɛ nɛ b daa wɔ

keshishɛrsawule na so na,

ale damta nɛ b daŋ lar

Ebɔrɛ kaman n jija mbe kagbene!

⁴¹B daŋ baa wɔtɔ nna

a wora mo a keni,

nsaa wɔtɔ Israɛl be Ebɔrɛ

cheembi na ebesa to.

⁴²B daa maa nyiŋi mbe

eleŋ nɛ e kɔ,

bumo alɛ daa maa nyiŋi

kachɛ nɛ e mɔlga bumo

ashi bumo doŋana be

enɔ to na gba.

⁴³B daŋ teŋ emamachisheŋ

nɛ e wora ashi Zowan be

kebonfu so ashi Ijipt be

efuli so na nna.

⁴⁴Ebɔrɛ e daŋ shin nɛ Ijipt be

elɔrana be nchu kilgi ŋ ki ŋklaŋ

nɛ b daa maŋ nya nchu nuuso na.

⁴⁵E daŋ shin nɛ ashushombi

ba sɔ kaplɛkama a tɔrɔ bumo nna;

nɛ ebɔl lar bumo.

E daŋ shin nɛ epulo ba ta

kenishi m pere bumo ashi

kasawule na so nna ga.

⁴⁶E daŋ shin nɛ elotɔr nɛ alonte

lar nna m ba mur bumo be

adɔjibi kikɛ kasawule na so.

⁴⁷E daŋ shin nɛ abɔrɛjembubi ba mur

bumo be ndibi sɔrsoana nna,

nseŋ shin nɛ kunyɔlɔ malɛ mur

bumo be figi be ndibi kikɛ.

⁴⁸Mo e shin nɛ abɔrɛjembubi bri

bumo be ana m mɔ,

nseŋ shin nɛ bɔrɛ nyɛkpɛ m mɔ

bumo be asɔbɔya nɛ a ka na.

⁴⁹Ebɔrɛ daŋ nya agbo nna

nɛ mbe kagbene koso bumo so ga,

fanɛ luwu be mbɔ damta

ka mel abar so na.

⁵⁰E daa maŋ pɛ mbe kagbene

ashi mbe agbo na to,

ŋko n yige m paŋ bumo

nɛ b ji efute kikɛ.

E daŋ mɔ bumo nna

n shin nɛ kenishi pere bumo.

⁵¹E daŋ shin nɛ Ijipt be efuli so

be ewurkoŋnyɛn kikɛ wu nna.

⁵²Kumo be kaman nɛ

Ebɔrɛ juŋkpar mbe basa

fanɛ mbolpɔkpapo n lar

Ijipt be efuli so m bɔla

keshishɛrsawule so n choŋ.

⁵³E ka daa juŋkpar bumo so,

kufu daa maa kɔ bumo;

ama Teku Peper na daŋ mur

bumo doŋana bre nna.

⁵⁴Ebɔrɛ daŋ juŋkpar mbe basa nna

n yɔ kepreŋsawule nɛ e bɔla mbe

eleŋgboŋ so n suge n sa bumo na so.

⁵⁵E daŋ ju efuli pɔtɛana na

be basa nna n lar nseŋ barga

kasawule na nɛ bumo be

nwuana to n sa Israɛl be

eyiri yiri nɛ b la mbe basa na.

⁵⁶Ama b daŋ lar Ebɔrɛ kaman

nseŋ wora Enyɛnpetale Ebɔrɛ na

ŋ keni nna.

B daa maŋ bɛ mbe mbraana so.

⁵⁷B daa du fanɛ bumo nanaana

nɛ b daa maa ji kashenteŋ

nseŋ paŋ yirda na nna.

Bumo alɛ daa du fanɛ

ketanyembi kɔnto nɛ esa maaŋ

tiŋ n fute n yige kumo so nna.

⁵⁸B daŋ pɔr agbirana nna

n yili agurɔŋgu so a shuŋ;

n shin nɛ Ebɔrɛ be kukɔrkɔ

koso nɛ e nya agbo ga.

⁵⁹Ŋkpal kusɔ nɛ b wora na so,

Ebɔrɛ daŋ nya agbo nna

nseŋ kini Israɛl be basa na n lɛ.

⁶⁰E daŋ kini mbe wajɛbu nɛ e

daa wɔ kumo to ashi mbe basa to

ashi Shilo be kade to nna n lɛ.

⁶¹Kumo be kaman nɛ e shin nɛ

an doŋana kɔ n suge kɔnɔkoŋwule

be ŋkre be deka nɛ k yili n sa

mbe kemaŋkura nɛ eleŋgboŋ na.

⁶²E daŋ nya agbo nna n wɔtɔ mo

gbagba be basa nseŋ shin nɛ

bumo doŋana mɔ bumo.

⁶³Edɛ e daŋ mur bumo be

mbrantiɛbia, nɛ bumo be

besuŋgurbi maŋ nya

benyɛn nɛ b kil.

⁶⁴Bɔrɛmatapoana na daŋ wu

luwu nyaŋgraŋ nna,

bumo be bekulpoche maŋ nya

n shu bumo be nli gba.

⁶⁵Kumo be kaman nɛ

Enyɛnpe Ebɔrɛ na kpa niŋi to

fanɛ esa ka tiŋi edi to,

ŋko enapo ka diewu ŋ koso na.

⁶⁶E daŋ bri mo doŋana nna n ju,

n shin nɛ b ji nyɔmɔ mbaanaayɔ.

⁶⁷Ama e daŋ kini kebaawɔ

an nananyɛn Josɛf be kaman to ebi to

nseŋ daŋ kini kelara Efrayim be yiri to

ebi n yili n sa mbe kumu nna.

⁶⁸Juda be yiri to ebi nɛ Zayɔn be kebee

nɛ e daa sha ga ashi Jerusalɛm to na

nɛ e daŋ lara n yili n sa mbe kumu.

⁶⁹Kumo be awɔlto,

nɛ e daŋ pɔr mbe bɔrɛlambu

nɛ kumo be gbaltɔlase daa kɔ

eleŋ fanɛ kasawule nɛ e to

n yili mbaanaayɔ na.

⁷⁰Ewura Deevid nɛ e daa

kpa mbolpɔ na nɛ e daŋ

lara fanɛ mbe kayɛrbi.

⁷¹Mbolpɔ na be kekpa to nɛ e daa wɔ

nɛ Ebɔrɛ lara mo nseŋ buu mo

Israɛl be kuwura nɛ e baa juŋkpar

mbe basa nɛ b la Jeekɔb

be kaman to ebi na.

⁷²Ewura Deevid malɛ daŋ ta

kagbene koŋwule n juŋkpar bumo

nseŋ wora asheŋ kanyiasheŋ so

ashi bumo to nna.

Efuli na be kesɔnyige be kabɔrɛkule be asheŋ

¹O Ebɔrɛ, efuli pɔtɛana so ebi

ba kɔ n suge fo kasawule.

B shin nɛ fo bɔrɛlambu cheembi

na wora eyurpi daŋkare be ekpa so,

nseŋ shin nɛ Jerusalɛm ki

kade bureso a dese fuloŋ.

²B ta fo basa nɛ b wu na

n sa ejita nɛ kupuŋ to

be asɔbɔya nɛ e bee ji.

³B chulgi ŋklaŋ n wurge

nɛ e bee shile fanɛ nchu

ashi Jerusalɛm to.

Esa kikɛ maŋ wɔtɔ

nɛ e puli bubuni na.

⁴Efuliana nɛ a kulti anyi na

be basa bee mushe nsaa

wora anyi eyurto nna.

⁵O Enyɛnpe Ebɔrɛ,

fo nya agbo n wɔtɔ

anyi nna mbaanaayɔ a?

Fo agbo kraa beeŋ baa

suse fanɛ edɛ nna a?

⁶Laŋɛ fo agbo na n deŋi

efuli pɔtɛana nɛ b maa bunyaŋ fo

ŋko a shu a tre fo ketre na so,

⁷ŋkpal b ka mɔ Jeekɔb

be kaman to ebi

nseŋ mur fo efuli na so.

⁸Sa maŋ gberge anyi kusoe

ŋkpal an nanaana be alubi so.

Wu anyi kuwɔr naniere.

Ŋkpal manɛ so,

anyi maŋ naa kɔ tama kikɛ.

⁹O Ebɔrɛ nɛ fo la anyi be emɔlgapo,

chɛ anyi to!

Ŋkpal fo ketre be kemaŋkura so,

mɔlga anyi nseŋ ta anyi be

alubi m paŋ anyi.

¹⁰Manɛ nna nɛ efuli pɔtɛana na

bee bishi anyi fanɛ,

nnɛ nɛ menyi be Ebɔrɛ na wɔ?

Shin nɛ an wu kasogberge

nɛ k bee ba efuliana na so,

ŋkpal b ka chulgi basa

nɛ b shuŋ fo be ŋklaŋ

n wurge so.

¹¹Kaŋ kusoe n nu basa

nɛ b wɔ kabuti to be kushu.

Ta fo eleŋgboŋ na n sɔ basa

nɛ baa shin nɛ b mɔ na n yige.

¹²O Enyɛnpe Ebɔrɛ,

fo e naaŋ ka efuli pɔtɛana

nɛ a kulti anyi ere kukɔ

ale shunu so;

ŋkpal b ka tege fo na so.

¹³Saŋɛ na so anyi nɛ an la fo basa,

a du fanɛ fo mbolpɔ ere,

beeŋ baa di fo epaŋ

nsaa kpaŋ fo mbaanaayɔ.

Kechɛ anyi be efuli to be kabɔrɛkule be asheŋ

¹O Israɛl be ekenipo,

nu anyi be kekule!

Fo nɛ fee juŋkpar Josɛf be

kaman to ebi fanɛ mbolpɔ

nseŋ chena fo kuwurputi so

ashi asɔ pɔrso nɛ baa tre

chɛrubim na be nferinto na,

²lara fo kumu ŋ ŋini Efrayim

nɛ Bɛnjamin nɛ Manase

be eyiri to ebi.

Ŋini fo eleŋ nseŋ ba mɔlga anyi!

³O Ebɔrɛ, naŋ shin nɛ an nya eleŋ!

Mushe n wɔtɔ anyi nseŋ mɔlga anyi.

⁴O Enyɛnpetale Ewurbɔrɛ,

jemanɛ mo nɛ fo basa be

kabɔrɛkule maaŋ naa nu fo agbo?

⁵Fo shin nɛ anishichubi ki

bumo be ajibi jiso

nɛ nchu nuuso.

⁶Fo shin nɛ efuli pɔtɛana

nɛ a kulti anyi na bee kɔ abar

kena ŋkpal anyi be kasawule so,

nseŋ shin nɛ an doŋana bee tege

anyi nsaa mushe anyi.

⁷O Enyɛnpetale Ebɔrɛ,

naŋ mushe n wɔtɔ anyi,

nɛ an naŋ nya kumɔlga.

⁸An du fanɛ asɔrso nɛ baa

tre greeps na be kefeelebi nna,

nɛ fo keta anyi n lar Ijipt be efuli so

nseŋ ba ju efuli pɔtɛana so be basa

n lɛ nseŋ ta anyi n fɛa bumo

be kasawule so.

⁹Fo e lɔŋɛ kasawule na so,

nɛ kefeelebi na e tiŋ n daŋ;

nɛ kumo be nliŋi e nya

n luri kasawule to nɛnɛ.

Saŋɛ na so k beeŋ purge

m buu kasawule na kikɛ so.

¹⁰Nɛ kumo be kayul e daŋ m buu

abeeana na so nɛ kumo be ayabi

malɛ e daŋ m buu sida

be ndibigboŋ so.

¹¹Nseŋ daŋ n ya fo Mɛditerenia

be teku na ase, n ta n ya fo

Yufreetes be lɔr na ase gba.

¹²Manɛ nna nɛ fo buri kunji

nɛ k bee kuŋ kumo na to,

nɛ ekama nɛ e bɔla ndoŋ

a choŋ bee nya kumo be

asɔrso a chuge?

¹³Kupuŋ to be asɔbɔya alubi gba

bee nya amo be asɔrso a ji.

¹⁴O Enyɛnpetale Ebɔrɛ,

naŋ bɛta m ba anyi kutɔ!

Shi ebɔrɛso n to kenishi

ŋ keni anyi nseŋ ba mɔlga

fo basa!

¹⁵Ba mɔlga kefeelebi popɔrbi

nɛ fo gbagba fɛa nseŋ shin nɛ

k daŋ n nya eleŋ ga na.

¹⁶Bedoŋ ba ku kefeelebi na n lɛ

nseŋ nya edɛ n wɔtɔ kumo to.

Naniere shin nɛ fo agbo e ba

mur bedoŋ na.

¹⁷Chɛ esa nɛ e chena fo

enɔ jisa so na to.

Mo e la nyiŋgbasa pibinyɛn

nɛ fo bela mo n sa fo kumu na.

¹⁸Anyi maaŋ naŋ lar fo

kaman kikɛ.

Sa anyi ŋkpa popɔr nɛ an baa

bunyaŋ fo.

¹⁹O Enyɛnpetale Ewurbɔrɛ,

naŋ bɛta anyi m ba fo kutɔ!

Mushe n wɔtɔ anyi n shin nɛ

an nya kumɔlga.

Ebɔrɛ ka bee sa anyi eleŋ be asheŋ

¹Men boŋ nshɛ kagbenefuliso

n sa Ebɔrɛ nɛ e bee sa anyi

eleŋ na!

Men boŋ nshɛ ŋ kpaŋ

an nananyɛn Jeekɔb be Ebɔrɛ na!

²Men fara a boŋ nshɛ nsaa

laŋ echakachaka a wɔtɔ;

men baa laŋ ejaŋjilaŋ nɛ egoji

a boŋ nshɛ belbelso.

³Men foŋ mbel n fara kufɔl popɔr

be kejigboŋ be kasheŋwora na

kufɔl kikɛ be kachɛ sososo nɛ

kumo be kachɛ baŋɛto na.

⁴Mbra nɛ k dese Israɛl

be efuli so nna na;

an nananyɛn Jeekɔb be

Ebɔrɛ na e yili kumo.

⁵Mo e ta kumo n sa Israɛl be basa,

nɛ b la Josɛf be kaman to ebi na,

jemanɛ nɛ Ebɔrɛ daŋ juŋkpar bumo

n lar Ijipt be efuli so na.

N daŋ nu esa ko ka kaŋɛ ma

ashi ŋgbar nɛ m maŋ nyi to le:

⁶“Ma e daŋ bɛge esulɔ

gbɛgbɛso na ashi menyi so,

nseŋ sɔ nlantaŋɛ gbɛgbɛso na

menyi be enɔana to.

⁷Men ka daa wɔ etɔrɔ to,

ma nɛ men shu n tre,

nɛ m mɔlga menyi.

Abɔrɛwɔlpa to nɛ n daa wɔ

nseŋ nu menyi be kushu.

Kumo be kaman nɛ n wora

menyi ŋ keni ashi Mɛriba

be kebuye na ase.

⁸O ma basa, men nu ma

kasokpele ere.

Israɛlebi, n daa beeŋ baa sha

fanɛ men nu n sa ma!

⁹Men sa maŋ kaŋ shuŋ efuli pɔtɛ

kikɛ be kegbir, ŋko kegbir kikɛ

nɛ menyi maŋ nyi shɛŋ a laŋɛ

kumo kaplɛa so!

¹⁰Ma e la Enyɛnpe menyi be Ebɔrɛ

nɛ e lara menyi ashi Ijipt

be efuli so m ba na.

Menyi ere e bugi kɔnɔ ŋ kaŋɛ ma

kusɔ nɛ menyee sha de,

nɛ n wora kumo n sa menyi.

¹¹Ama ma basa maa nu a sa ma;

Israɛl be basa na maa wora ma

kasonu.

¹²Ŋkpal loŋ so nɛ n yige bumo

n sa bumo be ŋkpensheŋ

be kebaawɔtɔ nɛ b wɔtɔ a wora

asheŋ nɛ baa sha.

¹³Ma basa, Israɛlebi,

daa beeŋ nu n sa ma

nseŋ bɛ ma ekpaana so nna,

¹⁴ndafanɛ ma, Enyɛnpe Ebɔrɛ na

daa beeŋ nya manaŋ n ta ma

eleŋgboŋ na m pɔɔ bumo doŋana

kikɛ so n sa bumo.

¹⁵Bekama nɛ b kishi ma,

Enyɛnpe Ebɔrɛ na,

beeŋ ta kufu m ba jɔŋɛ ma ase;

bumo alɛ be kasogberge beeŋ

baa wɔtɔ mbaanaayɔ.

¹⁶Ama menyi ere, ayu lela

nɛ abee to be mushoŋchu

nɛ meeŋ ta m bela menyi

nɛ men ji m moɛ.”

Ebɔrɛ Ewurgboŋ na be asheŋ

¹Ebɔrɛ e naa juŋkpar ebɔrɛso

be nshɛrgboŋ na;

mo e naa ji agbirana na demu

a kaŋɛ amo le:

²“A maŋ daga men baa ji demu

a kpɛa beko to;

men sa maa ji a chɛ

kumukpakpaso wuraana to!

³Men baa ji asheŋ nɛ amo

be ekpa so a sa bepɔshipo

nɛ amunibi nɛ betentaŋasepo

nɛ basa nɛ b maŋ kɔ

echɛtopo kikɛ na.

⁴Men baa kɔ a suge bepɔshipo

nɛ betentaŋasepo ashi

kumukpakpasowuraana be enɔ to.

⁵Menyi be ekama maŋ nyi shɛŋ

ŋko a pin asheŋ to!

Tentembiri to nɛ men wɔ

a nite a kulti;

saŋɛ so nɛ durnya kikɛ be

gbaltɔlase bee gbuŋgbuŋ.

⁶Ma, Enyɛnpetale Ebɔrɛ na

e kaŋɛ fanɛ men kikɛ la

agbirana nna nsaa la

ŋ gbagba be asɔ toso.

⁷Ama menyeeŋ baa wu

fanɛ edimɛdi;

menyi alɛ be ŋkpa beeŋ baa

loge fanɛ ewurjipo kama peya.”

⁸O Ebɔrɛ, koso n ji durnya demu,

ŋkpal manɛ so,

efuliana na kikɛ la fo peya nna.

Ebɔrɛ ka bee ji kuwura durnya kikɛ so be asheŋ

¹O Ebɔrɛ, sa maŋ wora shruum,

n lo to a maa wora shɛŋ!

²Keni, fo doŋana e lar fo kaman

nseŋ koso a kɔ fo na.

³Baa kre fo basa ŋkre lubi

ashiri to nna;

Basa nɛ fee sha ga na be

ŋkre lubi nɛ baa kre.

⁴B yɛ: “Men ba nɛ an ya mur

bumo be efuli na,

nɛ esa maaŋ naa nyiŋi

Israɛl be asheŋ hale mbaanaayɔ.”

⁵B wora kɔnɔkoŋwule nna ŋ kre

fanɛ baaŋ chɛ abar ŋ kɔ fo.

⁶Basa nɛ b kre loŋ be ŋkre na

e la Edɔmebi nɛ Ishmaɛlebi,

nɛ Mowabebi nɛ Hegaebi,

⁷nɛ basa nɛ b shi Gebal nɛ Ammɔn

nɛ Amalɛk be efuliana so,

nɛ Filisti nɛ Tayɛ be ndegboŋana to.

⁸Asiriya be efuli so ebi gba shuli so

fanɛ baaŋ ya ti Ammɔnebi nɛ

Mowabebi, nɛ b la Lɔt be kaman to

ebi na so, nɛ b nya eleŋ n ti so.

⁹Wora bumo kusɔ nɛ fo wora

Midianebi nɛ basa nɛ baa tre

Sisɛra nɛ Jabin, ashi Kishɔn be

lɔr na ase na.

¹⁰Kakpa nɛ baa tre Ɛndɔ na

nɛ fo daŋ mur bumo;

bumo be kebuni daŋ dese

kasawule so nna m bɛ.

¹¹Wora bumo be bejuŋkparpo

kusɔ nɛ fo daŋ wora Ɔrɛb nɛ Ziib na.

Pɔɔ bumo be bewuraana so

fanɛ kananɛ fo daŋ pɔɔ

Zeba nɛ Zalmuna gba so na.

¹²Kusɔ nɛ b daŋ kaŋɛ nde:

“Men shin nɛ an sɔ Ebɔrɛ be

kasawule na ŋ ki anyi peya.”

¹³O anyi be Ebɔrɛ, shin nɛ b ki

fanɛ eshishɛr ŋko amimi nɛ afu

foŋ n ya lɛ na.

¹⁴Kananɛ edɛ baa ji kupo na,

ŋko a suse abee so na,

¹⁵aloŋ a daga fanɛ fo ta bɔrɛfugboŋ

n ju bumo n lɛ, nseŋ shin nɛ afugboŋ

a funti bumo nɛ b baa chicha.

¹⁶O Enyɛnpe Ebɔrɛ,

shin nɛ b ji anishinyɔr,

saŋɛ na so basa beeŋ

yɛla kenishi to n fin fo.

¹⁷Shin nɛ b kɔ n tɔr nɛ kufu

e pɛ bumo mbaanaayɔ,

nseŋ shin nɛ b wu ŋaba be luwu.

¹⁸Shin nɛ b pin fanɛ fo e la

Enyɛnpetale Ebɔrɛ.

Fo alɛ nawule e naa ji kuwura

durnya kikɛ so.

Kabɔrɛshuŋ to be kagbenefuli be asheŋ

¹O Enyɛnpetale Ebɔrɛ,

fo bɔrɛlambu na walɛ pasaa!

²Kumo to be keyɔ bee yɛlga ma ga!

Enyɛnpe Ebɔrɛ na be bɔrɛlambu to

be keyɔ wɔ ma kagbene to ga.

N ta ma kagbene nɛ ma eyur kikɛ nna

a boŋ nshɛ kagbenefuliso a sa Ebɔrɛ

nɛ e wɔ ŋkpa to na.

³Enyɛnpetale Ebɔrɛ nɛ fo la ma

Ewura nɛ ma Ebɔrɛ.

Etitibi nɛ abɔrɛpɔpɔbi kikɛ tɔ

bumo be asha nna m mata

fo bɔrɛsure nsaa to a bure ndoŋ.

⁴Kagbenefuli la bekama nɛ b wɔ

fo bɔrɛlambu to a boŋ nshɛ

jemanɛ kikɛ e kpaŋ fo na peya nna.

⁵Kagbenefuli la bekama nɛ

baa nya eleŋ fo kutɔ nsaa pere

kenishi a yɔ Zayɔn be kebee so

n ya kaa shuŋ fo na peya nna.

⁶Jemanɛ kikɛ nɛ b baŋ ya kaa

bɔla ketaŋɛ wɔlso nɛ baa

tre Baka na to, k bee ki kebuye

nna a shile.

Kpanchali so be bɔrɛ gba bee

shin nɛ k bee bɔlɔ nchu nna a shile.

⁷Fo basa bee nya eleŋ nna a ti so,

n ya fo fanɛ ekama ka beeŋ baa

tiŋ a ba Ebɔrɛ na be anishito

ashi Zayɔn be kebee na so.

⁸O Enyɛnpetale Ebɔrɛ,

nu ma kabɔrɛkule;

O Jeekɔb be Ebɔrɛ,

kaŋ kusoe n nu ŋ kutɔ!

⁹O Ebɔrɛ, nɛfa anyi be ewura,

nɛ fo gbagba lara n sa fo kumu na.

¹⁰Keji kachɛ koŋwule ashi

fo bɔrɛlambu to bɔ keji nchɛ

kagboŋ ashi kakpa pɔtɛ.

Ŋ ka yili ma Ebɔrɛ be lambu

be kabuna to bɔ ŋ ka wɔ

kumukpakpasowura pe.

¹¹Ŋkpal manɛ so,

Enyɛnpe Ebɔrɛ na du fanɛ epeŋi

nɛ kebɛlso be kusɔ kuŋso nna.

Mo e naa wu kuwɔr nsaa ta

bunyaŋ a buu esa so,

mo alɛ maa ta kusɔ lela

a ŋana basa niŋiso so.

¹²O Enyɛnpetale Ebɔrɛ,

kagbenefuli la esa kama nɛ

e yirda fo na peya nna!

Efuli na be nɛnɛ be kabɔrɛkule be asheŋ

¹O Enyɛnpe Ebɔrɛ,

fo e nɛfa fo kasawule

nseŋ shin nɛ kusɔ kama

nite nɛnɛ n sa Israɛlebi nɛ

b la Jeekɔb be kaman to ebi na.

²Fo e ta fo basa be alubi

m paŋ bumo nɛ kejimbri

maŋ naa wɔ bumo so.

³Fo daŋ kaa kagbene nna,

n nya agbo n wɔtɔ bumo.

⁴O Ebɔrɛ nɛ fo la anyi be emɔlgapo,

naŋ bɛta anyi m ba fo kutɔ,

nsaa maŋ nya agbo n wɔtɔ anyi!

⁵Feeŋ nya agbo n wɔtɔ anyi nɛ

anyi be nnaŋ to ebi mbaanaayɔ a?

⁶Naŋ sa anyi eleŋ nɛ anyi,

nɛ an la fo basa na be ŋgbene

e baa fuli fo so nɛ an baa kpaŋ fo.

⁷O Enyɛnpe Ebɔrɛ,

ŋini anyi fo kasha nɛ

k maŋ kɔ ekar na,

nseŋ kumɔlga anyi.

⁸Mee kaŋ kusoe a nu kusɔ nɛ

Enyɛnpe Ebɔrɛ na bee kaŋɛ nna.

E nase kayurwushi be kɔnɔ n sa

anyi, mbe basa; nɛ anyi maŋ naŋ

bɛta n yɔ anyi be kawulisheŋ to nna.

⁹Kashenteŋto e wora shiriya

nɛ e mɔlga bekama nɛ baa

ŋana mo na nna;

saŋɛ na so mo gbagba be

kemaŋkura beeŋ baa wɔ

anyi be kasawule so.

¹⁰Kasha nɛ kashenteŋji

beeŋ ba abar so,

nɛ alelasheŋ nɛ kayurwushi

malɛ e ki kukoŋwule.

¹¹Edimɛdi be kashenteŋji

beeŋ shi kasawule so nna;

nɛ Ebɔrɛ be kebaawɔtɔ

niŋiso bee shi ebɔrɛso.

¹²Enyɛnpe Ebɔrɛ na beeŋ

nɛfa anyi nɛ anyi be kasawule

e wora adɔjibi nɛnɛ.

¹³Kebaawɔtɔ niŋiso beeŋ juŋkpar

a lɔŋɛ akpa a sa Enyɛnpe Ebɔrɛ na

nɛ e baa bɛ so.

Kekule Ebɔrɛ n fin kechɛto be asheŋ

¹O Enyɛnpe Ebɔrɛ,

kaŋ kusoe n nu ma kekule,

ŋkpal manɛ so, etirpo nɛ

etentaŋasepo e la ma.

²Ŋkpal ŋ kaa bee nu a sa fo so,

mɔlga ma ashi luwu to.

Ŋkpal ŋ ka la fo kayɛrbi

nseŋ yirda fo so, baa kuŋ ma.

³O Enyɛnpe Ebɔrɛ, wu ma kuwɔr!

Kachɛ lelemu nɛ mee shu a tre fo.

⁴Shin nɛ fo kayɛrbi be kagbene

e fuli mo;

ŋkpal ŋ ka shi ma kagbene

to a kule fo so.

⁵O Enyɛnpe Ebɔrɛ, fo la esa lela

nɛ fee ta alubi a paŋ nna.

Fo alɛ kɔ kasha damta n sa

bumo nɛ baa shu a tre fo na nna.

⁶O Enyɛnpe Ebɔrɛ,

kaŋ kusoe n nu ma kabɔrɛkule,

nseŋ wu ma kuwɔr n chɛ ma to.

⁷M baa wɔ tɔrɔ to,

fo nɛ mee shu a tre;

ma alɛ nyi fanɛ fee

nu ma kabɔrɛkule.

⁸O Enyɛnpe Ebɔrɛ,

agbirana kikɛ maŋ du fanɛ fo,

Ebɔrɛ kikɛ maŋ naa wɔtɔ

a du fanɛ fo.

Esa malɛ kikɛ maŋ naŋ wora

asheŋ nɛ fee wora ere be kekama.

⁹Efuliana nɛ fo to ere be basa

beeŋ ba jɔŋɛ fo ase m bunyaŋ fo

n shin nɛ fo ketre e nya kemaŋkura.

¹⁰Fo ka la Ebɔrɛ so,

fo nawule e naa wora

emamachisheŋ nɛ e

bee mɔ kɔnɔ.

¹¹O Enyɛnpe Ebɔrɛ,

ŋini ma kusɔ nɛ fee sha fanɛ n wora.

Meeŋ baa nu a sa fo kashenteŋ na.

Ŋini ma kananɛ meeŋ ta ma kagbene

kikɛ a shuŋ fo nsaa bunyaŋ fo ketre na.

¹²O Enyɛnpe ma Ebɔrɛ,

meeŋ bugi ma kagbene to ŋ kpaŋ fo,

nseŋ maŋkura fo ketre mbaanaayɔ.

¹³Ŋkpal manɛ so,

kasha nɛ fo kɔ n sa ma na

shi alegaiso!

Fo mɔlga ma ashi luwu

gbagba to.

¹⁴O Ebɔrɛ, kamoowuwuraana

koso ma so nna;

nɛ basa lubi cha abar a fin ma

nɛ b mɔ.

Bumo alɛ kikɛ maŋ ta fo n tre shɛŋ.

¹⁵Ama fo, Enyɛnpe Ebɔrɛ na,

la ewɔrwupo nɛ kasha be Ebɔrɛ nna.

Fo la esa nna nsaa kɔ kanyiti,

a wu kuwɔr jemanɛ kikɛ.

¹⁶Keni ma nseŋ wu ma kuwɔr!

Sa fo kayɛrbi fo gbagba be eleŋ na

nseŋ mɔlga fo kenyache pibinyɛn.

¹⁷Shin nɛ ekama e pin alelasheŋ

nɛ fee wora a sa ma.

Saŋɛ na so ma doŋana beeŋ wu

kumo be loŋ nɛ nyɔmɔ e pɛ bumo.

Ŋkpal manɛ so, fo Enyɛnpe Ebɔrɛ na,

e chɛ ma to nseŋ lolo ma

nɛ ma kagbene wushi ma.

Jerusalɛm be kekpaŋ be asheŋ

¹Enyɛnpe Ebɔrɛ na pɔr mbe

kadegboŋ n yili kebee

cheembi na so nna.

²Mo alɛ bee sha kadegboŋ na

a chɔ kade kikɛ ashi Israɛl

be efuli na kikɛ so.

³Jerusalɛm la Ebɔrɛ be kadegboŋ nna,

nɛ baa malga asheŋ lela damta ga

a laŋɛ kumo be kaplɛa so.

⁴Nɛ m baa ti efuliana nɛ a bee nu

a sa ma be atre, meeŋ ti Ijipt nɛ

Babilɔn be efuliana n ti so.

Nɛ m baa naa karga Jerusalɛm

to be basa, meeŋ karga Filisti nɛ

Itiopia be efuliana nɛ Tayɛ

be kadegboŋ to be basa gba n ti so.

⁵Kashenteŋto, kusɔ nɛ baaŋ baa kaŋɛ

a laŋɛ Jerusalɛm be kaplɛa so nde:

“Jerusalɛm to nɛ b kurge kuti nɛ kuti.

Enyɛnpetale Ebɔrɛ na malɛ e naa

sa kumo eleŋ.”

⁶Enyɛnpe Ebɔrɛ na beeŋ shin nɛ

b sibɛ mbe basa be atre n nase

nseŋ ta bekama nɛ b kurge ndoŋ

gba be atre n ti so fanɛ b ka la

Jerusalɛm to be ndetobia na;

⁷nɛ bumo be bekama nɛ baaŋ

baa boŋ nshɛ a cha na e baa kaŋɛ le:

“Anyi alɛ gba la Jerusalɛm to be

ndetobia gbagba nna.”

Kekule Ebɔrɛ be kechɛto be asheŋ

¹O Enyɛnpe Ebɔrɛ

nɛ fo la ma emɔlgapo,

kapa nɛ kanyɛ,

fo nɛ mee shu a tre.

²Jande nu ma kabɔrɛkule

nseŋ kaŋ kusoe n nu ma kushu.

³Etɔrɔ damta e ba ma so,

hale nɛ n taga to luwu.

⁴Baa karga ma nna a ti

basa nɛ b wu so;

ŋ ki fanɛ esa nɛ e maŋ

naa kɔ eleŋ nna.

⁵Ŋ ki fanɛ ebuni nɛ b kplaŋ

mbe asheŋ so ŋko esa nɛ

b mɔ m puli nchaŋ to nna.

Ŋko esa nɛ fo maŋ naa

nyiŋi mbe asheŋ,

fo alɛ be kechɛto maŋ naa

tu mo na nna.

⁶Fo ta ma n lɛ nchaŋ chiŋgeliŋ

nɛ k biri to mina to nna.

⁷Fo kanya agbo muni ma so nna

fanɛ nchu ka muni esa so na.

⁸Fo shin nɛ nteriana kini ma n lɛ,

nɛ ma asheŋ bee nu bumo agbo.

M baŋ nyaŋto nna a wɔtɔ,

a maaŋ naŋ tiŋ n suge ma kumu.

⁹Ma alɛ shu nna m puŋi anishi,

ŋkpal awurfoŋ nɛ kagbenejijaso.

O Enyɛnpe Ebɔrɛ, fo nɛ mee maŋ

ma enɔana so a shu a tre

karechɛ kikɛ.

¹⁰Fo maa wora emamachisheŋ

a sa bubuni.

Bumo alɛ maa koso a kpaŋ fo.

¹¹B maa malga fo kasha

nɛ k maŋ kɔ ekar na

ŋko fo kashenteŋji be asheŋ

ashi bubuni to.

¹²B maa wu fo emamachisheŋ

ashi kakpa nɛ k biri to mina;

ŋko a nyi fo alelasheŋ be asheŋ

ashi kakpa nɛ b maŋ naa nyiŋi

shɛŋ be asheŋ.

¹³Ama fo Enyɛnpe Ebɔrɛ na

nɛ mee shu a tre kachipurso

kikɛ fanɛ fo chɛ ma to.

¹⁴O Enyɛnpe Ebɔrɛ,

manɛ nna nɛ fee kini ma a lɛ,

nsaa ta fo kumu a ŋana ma so?

¹⁵Ma kebia to kikɛ nɛ n ji awurfoŋ,

hale a taga to luwu gba kuraa.

Fo kasogberge shin nɛ kufugboŋ

tɔr ma so, hale ma aba pɔ ma ga.

¹⁶Fo agbo ki fanɛ nchu nna

m muni ma so;

nɛ fo etɔrɔ malɛ mur ma cheche.

¹⁷Karechɛ kikɛ a kulti ma

n wɔtɔ kaba kama so nna.

¹⁸Fo shin nɛ nteri kpakpasoana

nɛ ma beshapo kikɛ kini ma n lɛ

nseŋ kplaŋ ma so, nɛ k wora fanɛ

tentembiri e ki nteri kpakpaso.

Enyɛnpe Ebɔrɛ nɛ Deevid ka wora kɔnɔkoŋwule be ŋkre be asheŋ

¹O Enyɛnpe Ebɔrɛ,

meeŋ baa boŋ nshɛ a laŋɛ

fo kasha nɛ k maŋ kɔ ekar na

be kaplɛa so jemanɛ kikɛ.

Ma alɛ beeŋ naa ber fo

kashenteŋji na be kebomboŋ

mbaanaayɔ.

²Meeŋ kaŋɛ ekama fanɛ fo kasha

wɔtɔ nna mbaanaayɔ,

nɛ fo kashenteŋji malɛ wɔ

ebɔrɛso jemanɛ kikɛ.

³Fo yɛ: “Ma nɛ esa nɛ n lara na

wora kɔnɔkoŋwule be ŋkre nna.

Ma alɛ nase kɔnɔ nna n sa ma

kayɛrbi Deevid fanɛ

⁴mbe kaman to ebi e naaŋ baa

ki bewura jemanɛ kikɛ.

Ma alɛ beeŋ shin nɛ mbe kabuna

ebi e baa wɔtɔ mbaanaayɔ.”

⁵O Enyɛnpe Ebɔrɛ,

shin nɛ asɔ nɛ a wɔ ebɔrɛso

e baa kpaŋ fo emamachisheŋ,

nseŋ shin nɛ fo emalaika e baa

kpaŋ fo kashenteŋji.

⁶Ekama maŋ du fanɛ fo,

Enyɛnpe Ebɔrɛ na ashi ebɔrɛso;

Ekama malɛ maaŋ tiŋ n ta mbe

kumu m ber fo ashi ndoŋ.

⁷Fo nɛ ekama bee ŋana ga

ashi ebɔrɛso ndoŋ.

Fo asheŋ malɛ bee keta

kufu nsaa kɔ bunyaŋ ga

a chɔ bekama nɛ b wɔ

ebɔrɛso.

⁸Fo e la Enyɛnpetale Ebɔrɛ na.

Ekama maŋ naa kɔ kasha

nsaa ji kashenteŋ fanɛ fo.

⁹Fo e naa ji kuwura ashi teku

nɛ k bee baga to na so,

a shin nɛ atili nɛ a bee koso

kumo so na bee wora shruum.

¹⁰Fo e daŋ to m pɛ teku to

be kusɔbɔya lubi gboŋgboŋi

nɛ baa tre Reehab na to kpakpa

nseŋ mɔ kumo na.

Fo gbagba be eleŋgboŋ nɛ fo ta

m pɔɔ fo doŋana so, nseŋ shin nɛ

b pesaŋ to n sɔ kaplɛkama.

¹¹Ebɔrɛso nɛ kasawule so

kikɛ la feya nna;

fo e to durnya nɛ kusɔ

kama nɛ k wɔ kumo to.

¹²Fo e to kelargato be esoso

nɛ kaseto kikɛ.

K du fanɛ abee nɛ baa tre

Tabɔɔ nɛ Hɛɛmɔn na bee boŋ

nshɛ kagbenefuliso nna

a kpaŋ fo ketre.

¹³Fo shibi nsaa kɔ eleŋ pasaa!

¹⁴Fee ji kuwura ekpa niŋiso so,

nsaa ji asheŋ nɛ amo be ekpa so nna.

Kasha nɛ kashenteŋji bee dii efuli

kusɔ kama nɛ fee wora to nna.

¹⁵O Enyɛnpe Ebɔrɛ,

kagbenefuli la bekama nɛ baa

bugi ŋgbene to a bunyaŋ fo

nsaa wɔ fo kefultogboŋ na to

na peya nna.

¹⁶Baa ji eyur nna ashi fo ketre to

karechɛ lelemu kikɛ,

nsaa kpaŋ fo ŋkpal fo alelasheŋ so.

¹⁷Ŋkpal manɛ so,

bumo be kemaŋkura nɛ eleŋ

shi fo kutɔ nna, nɛ fo

kuwɔrwu malɛ bee shin nɛ

anyee nya eleŋ a ti so.

¹⁸Kashenteŋto, anyi be kekuŋ

bee shi Enyɛnpe Ebɔrɛ na kutɔ nna.

Israɛl be Ebɔrɛ cheembi na

e la anyi be ewura.

¹⁹Le nɛ fo daŋ bɔla bɔrɛdare to

ŋ kaŋɛ fo bebɛsopo nɛ baa

ji kashenteŋ a sa fo na:

“Ma e naa sa enapo eleŋ.

Ma alɛ e ta kuwurputi na

n sa esa nɛ ŋ gbagba lara

ashi ma basa to.

²⁰Ma e lara ma kayɛrbi Deevid

nseŋ duga ma ŋku cheembi

n do mbe kumu so n ta

mo ŋ ki ewura.

²¹Jemanɛ kikɛ ma eleŋ

beeŋ baa wɔ mo so,

nɛ ma eleŋgboŋ na

e baa sa mo eleŋ.

²²Mo doŋana maaŋ tiŋ

m pɔɔ mo so kikɛ,

kumukpakpasowuraana gba

beeŋ kɔ mo ŋ gben.

²³Meeŋ tɔrɔ mo doŋana ga

nseŋ mɔ ekama nɛ e kishi mo.

²⁴Ma kashenteŋji be kasha na

beeŋ baa wɔ mo so;

ma alɛ beeŋ shin nɛ e baa

kɔ a pɔɔ so jemanɛ kikɛ.

²⁵Meeŋ shin nɛ mbe kuwurji e yili

Teku nɛ baa tre Mɛditerenia na

n salga to n ya fo lɔr nɛ baa

tre Yufreetes na.

²⁶Ndoŋ nna nɛ e kaŋɛ ma le:

‘Fo e la n tuto nɛ ma Ebɔrɛ;

Fo e la ma ekumpo nɛ

ma emɔlgapo.’

²⁷Meeŋ shin nɛ e ki ma wurkoŋnyɛn,

nseŋ ki esagboŋ a chɔ durnya to

be bewura kikɛ.

²⁸Jemanɛ kikɛ meeŋ baa wora

a bɔlɔ ma nnɔ nɛ n nase a sa mo;

nɛ ma nɛ mo be kɔnɔkoŋwule

be ŋkre na e baa wɔtɔ mbaanaayɔ.

²⁹Meeŋ shin nɛ mbe kabuna ebi

e baa ji kuwura mbaanaayɔ;

mbe kanaŋ to be esa e naaŋ

baa ji kuwura jemanɛ kikɛ.

³⁰Ama nɛ fanɛ mbe kaman to ebi

kini kewora ma mbraana kasonu,

nseŋ kini kewora m bɔlɔ ma

atande so,

³¹ŋko nɛ b kplaŋ ma keŋini so

nsaa maŋ bɛ ma mbraana so,

³²kumo ere meeŋ gberge bumo

kusoe ŋkpal bumo be alubi so.

Meeŋ shin nɛ b ji awurfoŋ

ŋkpal bumo be kewora n jija so.

³³Ama m maaŋ yige kebaasha Deevid,

ŋko ŋ kini kebɛ nnɔ nɛ n nase

n sa mo na so.

³⁴Ma alɛ maaŋ ku ma nɛ mo

be kɔnɔkoŋwule be ŋkre na to,

ŋko n lar nnɔ nɛ n nase n sa mo

na be kekama kaman.

³⁵Kelekoŋwule pati nɛ n ta ma

Ketre cheembi na m bɔ ntaŋ fanɛ,

m maaŋ ku efɛ n sa Deevid kikɛ.

³⁶Mbe kanaŋ to ebi e naaŋ baa

ji kuwura jemanɛ kikɛ.

Kananɛ epeŋi nɛ kufɔl baa

lar awɔlpa so ere,

aloŋ nɛ mbe kuwurji gba beeŋ baa

wɔtɔ mbaanaayɔ.

³⁷Mbe kuwurji na beeŋ baa wɔtɔ

mbaanaayɔ nna fanɛ kananɛ

kufɔl baa wɔ esoso mbaanaayɔ na.”

³⁸Ama naniere fo, Ebɔrɛ na

nya agbo nna n wɔtɔ ewura

nɛ fo lara na nseŋ kini mo n lɛ,

nseŋ pal kaman n sa mo.

³⁹Fo lar fo nɛ fo kayɛrbi be

kɔnɔkoŋwule be ŋkre na

kaman kuraa nseŋ shin nɛ

mbe kuwura terge m paŋ

kumo be kemaŋkura kikɛ.

⁴⁰Fo shin nɛ egbal nɛ a kulti

kadegboŋ na kikɛ bure

nɛ kumo be mboŋ lempoana na

kikɛ ki alambure a dese.

⁴¹Bekama nɛ b bɔla kumo ase

a choŋ nya ewura na be asɔ ko n ta,

nɛ mbe bechenashapoana bee

mushe mo nsaa wora mo eyurto.

⁴²Fo shin nɛ mo doŋana

sɔ kelempo mo so,

nɛ bumo kikɛ be ŋgbene

fuli bumo.

⁴³Fo shin nɛ mbe akɔsɔ kikɛ

ki asɔ jiga,

nseŋ shin nɛ e kɔ kena n tɔr.

⁴⁴Fo suge mbe kuwurwuro

n shin nɛ mbe kuwura paŋ

kumo be kemaŋkura.

⁴⁵Fo shin nɛ e bel katinso

nɛ e kraa la kebifɔlbi,

nseŋ ta anishinyɔr be piŋi

m buu mo nɛ nyɔmɔ pɛ mo.

⁴⁶O Enyɛnpe Ebɔrɛ,

feeŋ ta fo kumu ŋ ŋana

mbaanaayɔ a?

Jemanɛ mo nɛ fo agbo

nɛ k bee suse fanɛ edɛ na

beeŋ wushi?

⁴⁷Baa nyiŋi fanɛ ma ŋkpa

maŋ wɔ nteŋ.

Fo to anyi nna nɛ an baa wɔ ŋkpa

to gbrɛbi nseŋ wu!

⁴⁸Dimɛdi kikɛ maaŋ tiŋ n suge

mbe kumu ashi luwu nɛ nchaŋ

be eleŋana to.

⁴⁹O Enyɛnpe Ebɔrɛ,

nnɛ nɛ kashagboŋ nɛ fo

daa kɔ na wɔ?

Nnɔ nɛ fo nase kashenteŋ

be ekpa so n sa Deevid

na wɔ nnɛ?

⁵⁰Enyɛnpe Ebɔrɛ baa nyiŋi

kananɛ basa tege ma

nseŋ wora fo kayɛrbi eyurto,

nɛ n ta amo kikɛ n wɔtɔ

kagbene to na be asheŋ.

⁵¹O Enyɛnpetale Ebɔrɛ,

fo doŋana bee tege ewura

nɛ fo lara n sa fo kumu nna na.

Kaplɛkama nɛ e yɔ, baa tege mo

nsaa wora mo eyurto nna.

⁵²Men baa kpaŋ

Enyɛnpe Ebɔrɛ na

mbaanaayɔ!

Amɛn! Amɛn!

KENASOPO

(Nshɛ 90—106)

Mosis be kabɔrɛkule be asheŋ

¹O Enyɛnpe Ebɔrɛ,

fo kutɔ e la anyi pe,

jemanɛ kikɛ.

²Pɔɛŋ nɛ fo to abeeana nɛ

kasawule nɛ durnya kikɛ na,

nɛ fo la Ebɔrɛ nna nsaa

wɔtɔ mbaanaayɔ.

³Fo e yili kumo fanɛ an baa wu

nsaa bɛta a yɔ eshishɛr to.

⁴Nfɛ kagboŋ du fanɛ kachɛ

koŋwule fo kutɔ nna,

ŋko kanyɛso be jemanɛ

gbrɛbi ko ka choŋ nna.

⁵Fo e naa shin nɛ anyi be ŋkpa

bee ba ekar fanɛ edare na.

An du fanɛ kachipurso be afitiri

nɛ a purge a walɛ nna.

⁶Kachipurso, afitiri bee daŋ nna

a purge a walɛ;

ama ta a ba kaaseso nɛ a bolo

nseŋ wu n wɔl.

⁷Fo kanya agbo bee ta kufu nna

a da anyi nsaa mur anyi kuraa.

⁸Fo alɛ nyi anyi be alubi

kikɛ be asheŋ;

hale amo nɛ an ŋana n wora

ashiri to gba.

⁹Anyi be nchɛ bee ku so nna

ŋkpal fo agbo so,

nfubel damta malɛ e bɔlɔ nfɛ

nɛ anyee ji kikɛ to.

¹⁰Nfɛ nɛ anyee ji kikɛ la nfɛ

adushunu nna,

nɛ an baa kɔ eleŋ malɛ nɛ

an ji nfɛ aduburwa;

Ama etɔrɔ wurbi nɛ kagbenejija

damta e wɔ amo to,

ŋkpal manɛ so, a maa chɛr

nsaa choŋ fanɛ afu.

¹¹Esa kikɛ maŋ nyi kananɛ

fo agbo be eleŋ sa.

Ŋkpal manɛ so, k shi alegaiso,

nseŋ daga fanɛ an baa ŋana fo

ŋkpal kumo so.

¹²Ŋini anyi kananɛ anyi be nchɛ sa,

saŋɛ na so, anyeeŋ baa wora

asheŋ kanyiasheŋ so.

¹³Enyɛnpe Ebɔrɛ, chɛ anyi to!

Sa maŋ naŋ jo gbrɛbi kama!

Wu fo nyɛrbi kuwɔr,

n shu anyi so!

¹⁴Kachipurso kikɛ, shin nɛ fo kasha

nɛ k maŋ kɔ ekar na e kukwe anyi,

saŋɛ na so, anyeeŋ baa ta kagbenefuli

a boŋ nshɛ anyi be kebaawɔtɔ kikɛ to.

¹⁵Shin nɛ an nya kagbenefuli n tal

nchɛ nɛ anyi be ŋgbene jija anyi na to.

¹⁶Wora emamachisheŋ n sa anyi,

fo nyɛrbi, nseŋ shin nɛ anyi

be mbia e wu fo eleŋgboŋ na.

¹⁷Enyɛnpe anyi be Ebɔrɛ,

shin nɛ fo nɛfa e baa wɔ anyi so,

nseŋ shin nɛ asheŋ e baa nite

nsaa loge to nɛnɛ a sa anyi!

Ebɔrɛ ka la anyi be ekumpo be asheŋ

¹Esa kama nɛ e shile n ya

mata Enyɛnpetale Ebɔrɛ na

e naŋ nya mbe kekuŋ.

²Kumo be kaman nɛ e kaŋɛ

Enyɛnpe Ebɔrɛ na le:

“Fo nɛ mee shile n ya kaa

mata nɛ fee kuŋ ma,

fo e la ma Ebɔrɛ nɛ n yirda fo.”

³Kashenteŋto, Enyɛnpe Ebɔrɛ na

beeŋ kuŋ fo ashi ajigbelɛ

nɛ alɔ mɔso kikɛ to.

⁴E beeŋ parga mbe atɛ m buu

fo so a kuŋ fo nɛ fo nya fo kumu,

Mbe kashenteŋji du fanɛ

kebɛlso be kusɔ kuŋkumuso

ŋko egbal nɛ k bee kuŋ kade nna.

⁵Fo maaŋ naa ŋana kanyɛso

be asɔ nɛ a bee keta kufu

ŋko kapaso be kelantokɔ kikɛ,

⁶ŋko tentembiri to be alɔ mɔso

ŋko kapiidi be kayurnyaŋ lubi kikɛ.

⁷Basa kagboŋ beeŋ tiŋ n wu

n dese fo kekel ko so,

nɛ ŋgboŋ kudu e wu

n dese fo jisoso,

ama shɛŋ maaŋ wora fo ere.

⁸Fo anishi nɛ feeŋ

ta n wu kasogberge nɛ

kumukpakpasowuraana beeŋ nya.

⁹Nɛ fo ta Enyɛnpetale Ebɔrɛ na

fanɛ esa nɛ fee shile n ya kaa mata

nɛ e baa kuŋ fo,

¹⁰kumo ere alɔ lubi maaŋ ba fo so,

ŋko ŋ bɔla fo kowu ase n choŋ gba.

¹¹Ŋkpal manɛ so, Ebɔrɛ beeŋ

shin nɛ mbe emalaika e baa kuŋ

fo ashi kusɔ kama nɛ fee wora to.

¹²Baaŋ ta bumo be enɔana

n suse fo to,

nɛ fo maaŋ doro fo anashibi

kejembu so.

¹³Feeŋ pɔɔ ebuluŋ lempo so

nseŋ chichi awɔ lubi gba so,

nɛ e maaŋ tiŋ n wora fo shɛŋ.

¹⁴Enyɛnpe Ebɔrɛ yɛ:

“Nɛ fee sha ma nsaa nyi esa

nɛ e la ma kashenteŋto,

meeŋ mɔlga fo nsaa kuŋ fo.

¹⁵Nɛ fo luri asheŋ to nseŋ

shu n tre ma,

meeŋ nu fo kekule m ba mɔlga fo

nseŋ ta kemaŋkura m buu fo so.

¹⁶Meeŋ sa fo ŋkpa tenteŋ

nseŋ ŋini fo ma kumɔlga.”

Keboŋ nshɛ n fur Enyɛnpe Ebɔrɛ na be asheŋ

¹Kekpaŋ Enyɛnpetale Ebɔrɛ na

nɛ keboŋ nshɛ n dele mo walɛ ga.

²Keber mbe kasha be asheŋ

be kebomboŋ kachipurso,

nɛ mbe kashenteŋji be asheŋ

kanyɛso gba walɛ ga.

³Keta alaŋsɔ be yiri kikɛ

a boŋ nshɛ a kpaŋ fo ketre

bee wora ma ebel

nsaa par ma ga.

⁴Ŋkpal manɛ so,

fo asheŋ woraso bee wushi

ma kagbene nna, a shin nɛ

mee tiŋ a boŋ nshɛ

kagbenefuliso,

O Enyɛnpe Ebɔrɛ.

⁵O Enyɛnpe Ebɔrɛ,

fee wora asheŋgboŋ pasaa,

fo nfɛra fɛso malɛ du

chiŋgeliŋ alegaiso!

⁶Esa nɛ e maŋ nyi asheŋ

maa pin fo asheŋ to;

ewulpo malɛ maaŋ tiŋ

m pin amo to fanɛ,

⁷kumukpakpasowura beeŋ tiŋ

m purge fanɛ afitiri,

nɛ belubiworapoana e nya asɔ

nseŋ dii dama.

E maŋ nyi fanɛ bumo kikɛ beeŋ

mur cheche mbaanaayɔ.

⁸Fo, Enyɛnpe Ebɔrɛ na e naŋ baa

ji kuwura kusɔ kama so mbaanaayɔ.

⁹An nyi fanɛ fo doŋana beeŋ mur

kashenteŋto,

nɛ alubiworapoana kikɛ

e pesaŋ to.

¹⁰Fo shin nɛ n nya eleŋ

fanɛ kupuntona nna,

nɛ fo lara ma n yili n sa

fo gbagba be kumu.

¹¹Ŋ gbagba be anishi wu,

nɛ ma asoe nu kumulubi

nɛ kemur nɛ a ba bedoŋ so.

¹²Basa lela beeŋ dii dama

fanɛ ŋkubadibi ka purge na;

baaŋ daŋ n yili fanɛ Lebanɔn

be ndibi nɛ baa tre sida na.

¹³Baaŋ mur achin ashi fo,

Enyɛnpe Ebɔrɛ na be laŋ to,

nseŋ nyalɛ ashi anyi be

Ebɔrɛ na be bɔrɛlambu to.

¹⁴Baaŋ baa du fanɛ ndibi nɛ e bel

nseŋ kraa kɔ eleŋ a sɔr asɔrso.

¹⁵Saŋɛ na so nɛ b baa kaŋɛ le:

“Kusɔ kama nɛ Enyɛnpe Ebɔrɛ na

wora niŋi nna!

Ebɔrɛ e la anyi be kefaltagboŋ

a kuŋ anyi,

kulubi kikɛ maŋ wɔ mo to.”

Ebɔrɛ ka la ewura be asheŋ

¹Enyɛnpe Ebɔrɛ na e la ewura.

Kemaŋkuragboŋ nɛ eleŋ

buu mo nna fanɛ kuwurpiŋi.

Mo e tɔl durnya n yili kpakpa,

nɛ shɛŋ shɛŋ maaŋ tiŋ n fifir kumo.

²Dra na kikɛ nɛ fee ji kuwura,

fo alɛ wɔtɔ nna mbaanaayɔ.

³Enyɛnpe Ebɔrɛ,

etekuana bee baga to nna

a wora awɔr fanɛ e ka

bugi ebɔl a boŋ nshɛ na!

Atiligboŋ bee koso

etekuana so nna pasaa!

⁴Teku so be atili bee wora

awɔr nna nsaa kɔ eleŋ ga,

ama Enyɛnpe Ebɔrɛ na

be eleŋ shi a chɔ amo

be eleŋana.

⁵O Enyɛnpe Ebɔrɛ,

fo mbraana wɔtɔ nna mbaanaayɔ,

jemanɛ kikɛ fo bɔrɛlambu na du

cheembi nna nsaa walɛ kebita.

Ebɔrɛ ka la ekama be demujipo be asheŋ

¹O Enyɛnpe Ebɔrɛ nɛ fee gberge

basa nɛ b wora n jija kusoe;

ŋini bumo esa nɛ e la fo

nseŋ gberge bumo kusoe!

²Fo e naa ji durnya kikɛ demu.

Ba chɛ anyi to!

Ka kamoowuwuraana kukɔ,

ŋkpal kusɔ nɛ b wora so.

³O Enyɛnpe Ebɔrɛ, saŋɛ mo nɛ

kumukpakpasowuraana

be kagbenefuliso be kamooji ere

beeŋ fo ekar?

⁴Basa lubi ere bee nite nna

a puchi bumo be asheŋ lubi so.

⁵O Enyɛnpe Ebɔrɛ,

baa mɛaŋ basa nna a pira bumo;

fo gbagba be basa laraso

nɛ baa mɛaŋ.

⁶Baa mɔ bekulpoche nɛ amunibi

nɛ befɔ nɛ b wɔ kasawule na so nna.

⁷Kumo be kaman nɛ b kaŋɛ le:

“Enyɛnpe Ebɔrɛ na maa wu anyi.

Jeekɔb be Ebɔrɛ na be shɛŋ

maŋ wɔ anyi to.”

⁸Ma basa, manɛ nna nɛ men

paŋ nfɛra loŋ?

Saŋɛ mo nɛ menyi beeŋ naŋ

nya kanyiasheŋ?

⁹Ebɔrɛ nɛ e to anyi be

asoe nɛ anishi na,

maŋ kɔ asoe a nu nɛ

anishi a wu nna a?

¹⁰Mo ere Ebɔrɛ nɛ e bee

fɛa efuliana na so na;

nɛ b wora n da mo so,

e maaŋ gberge bumo kusoe a?

Mo ere nɛ e bee ŋini bumo

asheŋ na bre maŋ nyi asheŋ a?

¹¹Enyɛnpe Ebɔrɛ na nyi

dimɛdi kikɛ be nfɛra ka la

nfɛra fuloŋ a maŋ kɔ tɔnɔ.

¹²Kagbenefuli la ekama nɛ fo

Enyɛnpe Ebɔrɛ na bee bela

nsaa ŋini mo fo mbra na peya nna!

¹³Fo e naa wushi mo kagbene

ashi mbe tɔrɔ to,

n ya fo jemanɛ nɛ baaŋ kur

kemaŋ n nase nɛ

kumukpakpasowura e tɔr to.

¹⁴Ama fo Enyɛnpe Ebɔrɛ

maaŋ kini fo basa n lɛ;

fo alɛ maaŋ kplaŋ efuli nɛ fo

gbagba lara na so.

¹⁵Demujipoana beeŋ baa ji

asheŋ nɛ amo be ekpa so,

nɛ basa niŋiso malɛ e yili

bumo be kaman.

¹⁶Wanɛ e naŋ yili ma kaman

n tu ma ŋ kɔ basa lubi ere?

¹⁷Nɛ Enyɛnpe Ebɔrɛ na

daa maŋ chɛ ma to,

ndafanɛ n wu n yɔ bubuni to.

¹⁸Ŋ ka daŋ fɛrge a shin nɛ tɔr

nseŋ boŋ to na,

fo Enyɛnpe Ebɔrɛ na e bɔla fo

kasha nɛ k maŋ kɔ ekar na so

n suse ma to nɛ n yili dindiŋ.

¹⁹Jemanɛ kikɛ nɛ kafɔŋ

damta baŋ tɔr ma so,

fo e naa lolo ma a

wushi ma kagbene.

²⁰Ama fo maa sa basa nɛ b maa

ta mbra a shuŋ na kashuli kikɛ.

²¹Loŋ be basa e naa kre

basa lela ŋkre lubi nsaa kaŋɛ

fanɛ basa nɛ b maŋ wora n jija

e daga luwu na.

²²Ama fo Enyɛnpe Ebɔrɛ na

e ki kakpa lempo

nɛ kefaltagboŋ a kuŋ ma.

²³Ebɔrɛ beeŋ gberge

kumukpakpasowuraana kusoe

nseŋ mur bumo ŋkpal bumo be

asheŋ lubi so.

Enyɛnpe anyi be Ebɔrɛ na

e naŋ mur bumo.

Kapandi be kashɛ be asheŋ

¹Men ba nɛ an boŋ kagbenefuli

be nshɛ n sa Enyɛnpe Ebɔrɛ

nɛ e bee kuŋ anyi na.

²Men shin nɛ an ta kapandi

m ba boŋ nshɛ ŋ kpaŋ mo.

³Ŋkpal manɛ so,

Enyɛnpe Ebɔrɛ na e la Ewurgboŋ;

agbirana maŋ la shɛŋ mbe anishito.

⁴Asɔ nɛ a wɔ kasawule be

kechimbi to nɛ abee be awɔlto

kikɛ be eleŋ bɔɔ mbe enɔ nna.

⁵Teku la mo peya nna,

ŋkpal manɛ so, mo e to kumo.

Mo gbagba be enɔana

nɛ e ta n tɔl kasawule.

⁶Men ba nɛ an jɔŋɛ m bunyaŋ

Enyɛnpe Ebɔrɛ nɛ e to anyi na!

⁷Mo e la anyi be Ebɔrɛ,

nɛ anyi alɛ la mbe basa.

An du fanɛ mbe mbolpɔ

nɛ e bee keni so nna.

Men baŋ nu mbe ebɔl kabre,

⁸men sa maŋ wora menyi

be ŋgbene kpakpa, fanɛ kananɛ

men nanaana daŋ wora ashi mboŋ

nɛ baa tre Mɛriba nɛ Maasa ashi

keshishɛrsawule so na.

⁹Asheŋ nɛ b daŋ wu Ebɔrɛ

ka wora na kikɛ be kaman,

b daŋ chɔ mo nseŋ wora mo

ŋ keni ndoŋana nna.

¹⁰Nfɛ adena nɛ bumo be asheŋ

daa nu Ebɔrɛ agbo, nɛ e kaŋɛ le:

“Saŋkikɛ basa ere bee wora

a foe ekpa nna;

bumo alɛ maa pin ma

asheŋ woraso to.”

¹¹Ebɔrɛ daŋ nya agbo nna

nseŋ bɔ ntaŋ ŋ kaŋɛ le:

“B maaŋ luri ma

kewushi na to kikɛ!”

Men boŋ kashɛ popɔr n sa Enyɛnpe Ebɔrɛ na

¹Ekama nɛ e wɔ durnya to,

e boŋ kashɛ popɔr

n sa Enyɛnpe Ebɔrɛ na!

²Men boŋ kashɛ n sa

Enyɛnpe Ebɔrɛ na,

nseŋ kpaŋ mbe ketre na.

Karechɛ kama men baa ber

mbe kumɔlga na be asheŋ

be kubomboŋ.

³Men baa malga mbe kemaŋkura