AŊASA

EWURA SƆLƆMƆN BE

AŊASA

BE KAWƆL

Aŋasa be tɔnɔ be asheŋ

¹Israɛl be ewura Sɔlɔmɔn nɛ e la Deevid pibinyɛn na be aŋasa nde.

²Aŋasa ere beeŋ chɛ fo to nɛ fo nya kanyiasheŋ nɛ kasonu nsaa tiŋ a pin mmalga chiŋgeliŋ be afito.

³A beeŋ chɛ fo to nɛ fo nya

kebaawɔtɔ to be kanyiasheŋ

nsaa kɔ kashenteŋji a tiŋ

a wora asɔ nɛ a daga.

A beeŋ shin nɛ fo baa wɔ

kebaawɔtɔ niŋiso to

nsaa ji asheŋ nɛ amo be ekpa so.

⁴Aŋasa ere beeŋ tiŋ n sa

esa nɛ e maa pin asheŋ to

manaŋ manaŋ kanyiasheŋ;

nseŋ sa mbifɔlbi kenyi, n chɛ bumo to

nɛ b baa wora asheŋ nɛ a kɔ tɔnɔ.

⁵A bee sa benyiashempo

kenyi nna a ti so,

nsaa chɛ bekoyapo to

nɛ baa tiŋ a lara asɔ

nɛ a daga kewora;

⁶nsaa tiŋ a pin aŋasa

nɛ ablɔmbi nɛ mmalga chiŋgeliŋ

nɛ benyiashempo be mmalga be

atrɔmbi nɛ amo be afito.

Mbrantiɛbia be kasotoji be asheŋ

⁷Kabɔrɛŋana e la kenyi be sososo.

Ewulpo e naa kini

kanyiasheŋ be kekoya

nɛ kebela be kasogberge.

⁸M pibinyɛn, kaŋ kusoe n nu

fo tuto be kusɔ nɛ e bee kaŋɛ fo,

nsaa maŋ kplaŋ

fo nio be ŋini gba so.

⁹Ŋkpal manɛ so

bumo be keŋini na

beeŋ sa fo da lela,

fanɛ kananɛ neemu

ŋko kubɔtoshembi

bee sa esa kela na.

¹⁰M pibinyɛn,

belubiworapo baa fule fo

a ŋin fo a wɔtɔ alubi to,

fo sa maa sa bumo kashuli.

¹¹Nɛ b baŋ kaŋɛ fo le:

“Ba tu anyi nɛ an ya ŋana

n dese ekpakar n fin

esa ko m mɔ kenyanyaŋɛso,

¹²n shin nɛ bumo nɛ b kɔ eleŋ

nɛ alenfia

na e ki bubuni n luri nchaŋ to.

¹³An wora loŋ anyeeŋ nya

yawukpakpaso be asɔ lela

be yiri yiri,

nɛ an be ebuana e bɔlɔ asɔ

nɛ an suge

fanɛ b ka kɔ kena n suge asɔ na.

¹⁴Amoso ba ti anyi so,

saŋɛ na so anyi nɛ fo

beeŋ barga kusɔ kama

nɛ an nya na to.”

¹⁵M pibinyɛn,

sa maa tu loŋ be basa

a wora asheŋ.

Baa ji a gelge bumo.

¹⁶Ŋkpal manɛ so,

saŋkikɛ, baa jujo nna

nɛ b wora alubi.

Kemɔ esa maŋ la shɛŋ bumo kutɔ.

¹⁷Kebaa sho kabuibi kejigbelɛ

nɛ e jɔŋ a keni fo

la asheŋ fuloŋ nna!

¹⁸To, loŋ be basa lubi na

bee sho bumo gbagba be amu

ajigbelɛ nna.

B yɛ basa nɛ baa pugi a jo,

ama bumo gbagba be amu

nɛ baa kilgi a mɔ.

¹⁹Kayu to nɛ beyu bee paŋ

bumo be ŋkpa.

Loŋ nɛ basa kama

nɛ baa nyaŋɛ to a buu

basa kikɛ bee loge to.

Kanyiasheŋ be asheŋ;

²⁰Men nu nfe,

kanyiasheŋ e wɔ agbembi so

nɛ kebɛ to a tre awɔrso na.

²¹K wɔ nde be mbunagboŋ

nɛ basa bee bɔla to a lar

nsaa luri na ase nna

a ponte a tre awɔrso a kaŋɛ le:

²²“Ewulpo, fee sha fanɛ

fo baa la ewulpo saŋkikɛ nna

nsaa keni kenyi jiga a?

Fo kini kenyi be kekoya nna a?

Saŋɛ mo nɛ feeŋ fara a koya asheŋ?

²³Fo daa nu ma kefiɛ so nna,

ndafanɛ meeŋ sa fo kasotoji lela

nseŋ bugi kagbene

n ŋini fo kusɔ nɛ n nyi.

²⁴Saŋkama mee tre fo

a kaŋɛ fanɛ fo ba ma kutɔ

ama fo kplaŋ ma so

nseŋ kini kenu n sa ma.

²⁵Fo kplaŋ ma kasotoji kikɛ so,

nseŋ kini fanɛ fo maaŋ shin nɛ

n niŋi fo ekpa.

²⁶Amoso, fo baŋ luri tɔrɔ to,

meeŋ mushe fo.

Awurfoŋgboŋ baŋ tu fo,

meeŋ wora fo eyurto.

²⁷Tɔrɔ nɛ awurfoŋ

beeŋ ba fo so

fanɛ afugboŋ ka ber

m bar etɔrɔ

nɛ ebesa nɛ kebaawɔtɔ kekra na.

²⁸Loŋ be saŋɛ na,

feeŋ shu n tre ma, kanyiasheŋ,

ama m maaŋ tuge fo.

Feeŋ fin ma kenishipereso

ama fo maaŋ wu ma.

²⁹Fo yɛ kenyi maŋ la shɛŋ

nseŋ kini kewora

Enyɛnpe Ebɔrɛ kasonu.

³⁰Fo kini ma kasotoji

nsaa maŋ shin nɛ

n niŋi fo ekpa.

³¹Amoso feeŋ ji

kusɔ nɛ fo du na be asɔrso,

nɛ fo gbagba be aworbi

e kilgi a bishi fo.

³²Ewulpo be kawuli

e naa bar mo luwu,

nɛ kekini kenyi be kekoya malɛ

bee yɛr esa kemur to.

³³Ama esa kama nɛ e bee

wora ma kasonu beeŋ nya kekuŋ.

E maaŋ ba lɔ kufu

fanɛ kusɔ lubi ko beeŋ wora mo.”

Kanyiasheŋ be tɔnɔ be asheŋ

¹M pibinyɛn,

baa koya asɔ nɛ mee ŋini fo

nsaa nyiŋi asɔ nɛ ŋ kaŋɛ fanɛ

fo baa wora na saŋkikɛ.

²Baa bugi asoe

a koya kanyiasheŋ

nsaa pin asheŋ to.

³Baa kɔ a fin kenyi

nɛ asheŋ be kepinto.

⁴Baa fin kenyi kenishipereso

fanɛ kananɛ feeŋ fin gbiti

nɛ yawu kpakpaso

be asɔ nɛ a ŋana na.

⁵Fo wora loŋ,

kumo ere feeŋ pin

kusɔ nɛ k la kabɔrɛŋana

nsaa tiŋ a pin Ebɔrɛ be asheŋ to.

⁶Ŋkpal manɛ so,

Enyɛnpe Ebɔrɛ na

e naa sa kanyiasheŋ.

Mo kutɔ nɛ kenyi

nɛ asheŋ be kepinto bee shi.

⁷Mo e naa chɛ basa nɛ

baa wora asheŋ niŋiso to

nsaa kuŋ bumo.

⁸Mo e naa kuŋ basa nɛ

baa wora asheŋ nɛ a daga,

nsaa ŋini bekama nɛ baa shuŋ mo

nɛ kagbene koŋwule na ekpa.

⁹Nɛ fee nu ma mmalga,

feeŋ pin kusɔ nɛ k walɛ

nɛ kusɔ nɛ k niŋi ekpa

nɛ kusɔ nɛ k daga fanɛ

fo baa wora.

¹⁰Kanyiasheŋ beeŋ luri

m bɔlɔ fo to,

nɛ fo kenyi e bɔlɔ fo kenishi.

¹¹Fo lakal nɛ asheŋ be kepinto

beeŋ baa kuŋ fo.

¹²Kanyiasheŋ e naŋ kuŋ fo

ashi asheŋ lubi be kewora to;

nseŋ mɔlga fo ashi basa nɛ

bumo be mmalga bee bar asheŋ to.

¹³Loŋ be basa e kini

kebaawɔtɔ niŋiso

nsaa wɔ tentembiri be alubi

be kebaawɔtɔ to na.

¹⁴Bumo, nɛ alubi be kewora

bee wora ebel

nɛ bumo be ŋgbene

bee fuli alubi so na.

¹⁵Bumo be asheŋ woraso

e maa bɔla ekpa,

nɛ esa maaŋ tiŋ n yirda bumo na.

¹⁶Kanyiasheŋ beeŋ mɔlga fo

ashi beche nɛ baa lar

bumo kulana be mman

a ta kɔnɔ belbelso

a fule benyɛn a ji na kutɔ.

¹⁷Loŋ be beche

e naa yige

bumo be etumbanyɛn

nsaa kplaŋ kakil to be ŋkre be kɔnɔ

nɛ b nase Ebɔrɛ

be anishito na so na.

¹⁸Ekpa nɛ k bee yɔ

loŋ be beche pe na

bee yɛr basa luwu

nɛ kemur to nna.

¹⁹Esa kama nɛ e yɔ loŋ be eche pe

maŋ naa bɛta a yɔ epe,

ŋko a bɔla ekpa

nɛ k bee yɛr esa ŋkpa to na.

²⁰Amoso a daga fanɛ fo baa kute

basa lela be aworbi to nna;

nsaa wɔ kebaawɔtɔ niŋi so to.

²¹Ŋkpal manɛ so basa

nɛ baa wora asheŋ niŋiso

nɛ basa nɛ b maŋ kɔ mpulɔ

e naaŋ nya

anyi be kasawule ere so a wɔtɔ.

²²Ama Ebɔrɛ beeŋ lara basa lubi

nɛ basa nɛ b maa ji kashenteŋ

ashi kasawule ere so.

Mbrantiɛbia be kasotoji be asheŋ

¹M pibinyɛn, sa maŋ kaŋ teŋ

asɔ nɛ mee ŋini fo na so.

Baa nyiŋi asɔ nɛ mee kaŋɛ fo fanɛ

fo baa wora na saŋkikɛ.

²Asɔ nɛ mee ŋini fo na

beeŋ sa fo ŋkpa tenteŋ,

nɛ nɛfa.

³Sa maŋ shin nɛ kebaayɛ a wora

e baa barga fo kikɛ.

Chɛ kumo n shɛga

fo kubɔ to fanɛ kubɔtoshembi,

n shin nɛ k bɔlɔ fo kagbene to

a dii efuli ashi fo kebaawɔtɔ to.

⁴Ŋkpal manɛ so

nɛ fo baa wora loŋ,

fo asheŋ beeŋ baa bɔlɔ Ebɔrɛ

nɛ dimɛdi kikɛ kenishi.

⁵Ta fo kagbene kikɛ nyam

n yirda Enyɛnpe Ebɔrɛ na.

Sa maa ta fo tama a deŋi

kusɔ nɛ fo nyi so.

⁶Baa nyiŋi Enyɛnpe Ebɔrɛ na

ashi kusɔ kama nɛ fee wora to,

nɛ e baa lɔŋɛ ekpa nɛ fee bɔla so

kananɛ k daga a sa fo.

⁷Sa maa fɛ fanɛ

fo nyi asheŋ ga.

Baa nu a sa Enyɛnpe Ebɔrɛ na

nsaa gelge alubi.

⁸Nɛ fo baa wora loŋ,

k beeŋ baa du fanɛ

kudur lela nna a chɛ fo,

nsaa wushi fo eyur to be ebesa.

⁹Baa ta fo kanya

nɛ fo sososo be adɔjibi

a bunyaŋ Enyɛnpe Ebɔrɛ na.

¹⁰Nɛ fee wora loŋ,

fo mpuro beeŋ baa bɔlɔ a wurge

nɛ fo nsapuya gba

e baa bɔlɔ

asɔ nuuso popɔr a wurge.

¹¹M pibinyɛn, sa maa kini

Enyɛnpe Ebɔrɛ na be kebela

be kasogberge

ŋko mbe kefiɛso be keŋini.

¹²Ŋkpal manɛ so,

basa nɛ Enyɛnpe Ebɔrɛ na bee sha

nɛ e bee niŋi ekpa,

fanɛ kananɛ etuto

bee wora mo pibi shaso na.

¹³Kagbenefuli la

ekama nɛ e ki enyiashempo,

ŋko ekama nɛ e nya

asheŋ be kepinto

be nfɛra na peya nna.

¹⁴Ŋkpal manɛ so

kanyiasheŋ kɔ tɔnɔ

a chɔ shuwa nɛ gbiti.

¹⁵Kanyiasheŋ kɔ tɔnɔ

a chɔ abitasɔ kikɛ.

Fo maaŋ tiŋ n ta shɛŋ shɛŋ

m ber kanyiasheŋ.

¹⁶Kanyiasheŋ e naa sa

esa ŋkpa tenteŋ,

nɛ kedamaya nɛ kemaŋkura.

¹⁷Kanyiasheŋ beeŋ sa fo

kebaawɔtɔ belbelso,

nseŋ ŋini fo ekpa lela

nɛ feeŋ baa bɔla so a wora asheŋ

ashi fo kebaawɔtɔ to.

¹⁸Bekama nɛ b kɔ kanyiasheŋ na,

be ŋgbene bee fuli bumo nna.

Bumo be kanyiasheŋ bee sa bumo

ŋkpa tenteŋ nna.

¹⁹Enyɛnpe Ebɔrɛ be kanyiasheŋ

nɛ e ta n to durnya,

nseŋ ta mbe kenyi

n wora awɔlpaana

n yili kakpa nɛ a wɔ.

²⁰Mbe kanyiasheŋ

e shin nɛ eboŋana bee shile,

nɛ awɔlpa bee bar

bɔrɛchu kasawule so.

²¹M pibinyɛn,

baa kɔ fo kanyiasheŋ

nɛ fo lakal to kpakpa.

Sa maŋ shin nɛ a shile fo kikɛ.

²²Ŋkpal manɛ so,

amo e naŋ sa fo

kagbenefuli be ŋkpa

nɛ k wɔ ebel.

²³Kanyiasheŋ nɛ lakal

beeŋ kuŋ fo,

nɛ fo maaŋ foe ekpa.

²⁴Kanyiasheŋ beeŋ shin nɛ

fo ya dese nɛ kufu e baa kɔ fo,

ŋko a di a yeŋi a tiŋi.

²⁵Ŋko a fɔŋ etɔrɔ purgiso

nɛ a bee kaa ba basa lubi so

fanɛ afugboŋ na so.

²⁶Enyɛnpe Ebɔrɛ na

beeŋ baa kuŋ fo ashi etɔrɔ to.

E maaŋ shin nɛ fo tɔr

kejigbelɛ kama to.

²⁷Saŋkama nɛ feeŋ tiŋ,

fo chɛ bekama

nɛ baa fin kechɛto to.

²⁸Nɛ feeŋ tiŋ n chɛ fo kurgepo to,

fo chɛ mo to,

sa maŋ shin nɛ e jo

nɛ kare e chɛ pɔɛŋ.

²⁹Sa maa kre fo kurgepo

nɛ e yirda fo ŋkre lubi.

³⁰Ŋko ŋ ku asheŋ n deŋi

esa kama,

nɛ e maŋ wora fo kulubi kikɛ.

³¹Sa maa yɛlga

basa lubi be aworbi,

ŋko a wora

bumo be asheŋ woraso.

³²Ŋkpal manɛ so,

Enyɛnpe Ebɔrɛ na kishi

basa nɛ baa wora alubi be asheŋ ga,

ama e yirda basa

nɛ bumo be aworbi niŋi na bre nna.

³³Enyɛnpe Ebɔrɛ na be shoduu

wɔ basa lubi pe nna,

nɛ mbe nɛfa malɛ wɔ basa lela pe.

³⁴Mo nɛ basa

nɛ baa maŋ bumo be amu so

maŋ kɔ shɛŋ,

ama e bee shu basa

nɛ baa bar bumo be amu ase

bre so nna.

³⁵Benyiashempo bee nya

ketre lela nna,

ama bewulpo bre

bee ji nyɔmɔ nna

a ti bumo be anishinyɔr so.

Tɔnɔ nɛ kanyiasheŋ kɔ be asheŋ;

¹Ma mbinyɛnso,

men baa nu asɔ nɛ,

men tuto bee ŋini menyi na;

men baa bugi asoe a nu amo,

saŋɛ so menyeeŋ pin amo to nɛnɛ.

²Asɔ nɛ a walɛ

nɛ mee ŋini menyi;

amoso men baa nyiŋi amo.

³Ŋ kaa daa la kebibi

nsaa la n tuto

nɛ n nio be ebinyɛn koŋwule na,

⁴n tuto daa ŋini ma

asheŋ nna a kaŋɛ ma le:

“Baa nyiŋi asɔ nɛ mee kaŋɛ na,

nsaa maa teŋ amo so.

Baa bɛ asɔ nɛ mee kaŋɛ

fo na so nseŋ nya ŋkpa tenteŋ.

⁵Nya kanyiasheŋ nɛ lakal,

n sa maŋ teŋ ŋko ŋ kplaŋ

asɔ nɛ ŋ kaŋɛ fo na so.

⁶Sa maŋ kplaŋ kanyiasheŋ so,

nɛ k kuŋ fo,

baa sha kumo, nɛ k baa keni fo so.

⁷Kanyiasheŋ e chɔ

kusɔ kama nyam,

amoso fin kanyiasheŋ nɛ lakal.

⁸Baa sha kanyiasheŋ

nɛ k ta fo ŋ ki esa gboŋ.

Pɛ kumo to kpakpa

nɛ k bar fo kemaŋkura.

⁹Kumo e naŋ ki fanɛ kemaŋkura,

be kuwurwuro m buu fo.

¹⁰M pibinyɛn,

kaŋ kusoe kenishipereso

n nu kusɔ nɛ mee kaŋɛ fo ere,

nseŋ nya ŋkpa tenteŋ.

¹¹Ŋ ŋini fo kanyiasheŋ,

nɛ kananɛ feeŋ baa kɔ

kebaawɔtɔ niŋi so.

¹²Nɛ fo kɔ kanyiasheŋ,

shɛŋ shɛŋ maaŋ kagle fo ekpa to.

Fee shile gba fo maaŋ fiti n tɔr.

¹³Baa nyiŋi asɔ nɛ fo

koya na saŋkikɛ,

nsaa kɔ amo to kpakpa,

ŋkpal manɛ so kusɔ nɛ fo koya

e la fo ŋkpa.

¹⁴Sa maa yɔ mboŋ nɛ

basa lubi bee yɔ,

ŋko a koya basa lubi

be aworbi.

¹⁵Baa gelge loŋ be ekpa,

nseŋ lar alubi to.

Kini alubi be kewora,

nseŋ m pɛ fo ekpa a yɔ.

¹⁶Basa lubi bre

baŋ maŋ wora kulubi,

b maaŋ tiŋ n di.

B maaŋ tiŋ n di nɛ b maŋ wora

kulubi ŋ gbiti esa ko.

¹⁷Asheŋ lubi nɛ kelantokɔ,

du nna fanɛ

ajibi nɛ nchu n sa bumo.

¹⁸Ama ekpa nɛ belelaworapo

bɔ so na bre

du nna fanɛ karechɛ so

be epeŋi na.

K bee fulto nna a ti so

hale nɛ kare e ya chɛ

nɛ kaboŋ e fulto parr.

¹⁹Ama belubiworapo bre

be ekpa

biri to nna fanɛ tentembiri plɔ.

Baa fiti a tɔr,

ama b maa wu asɔ nɛ baa fiti na.

²⁰M pibinyɛn, bugi asoe

nɛnɛ n nu

kusɔ nɛ mee kaŋɛ fo ere.

Kaŋ kusoe n nu

ma mmalga ere.

²¹Sa maŋ shin nɛ

ma mmalga na e barga fo.

Baa nyiŋi amo

nseŋ ta amo n wɔtɔ

fo kagbene to saŋkama.

²²Ŋkpal manɛ so a beeŋ sa

esa kama nɛ e pin amo to

ŋkpa nɛ alenfia.

²³Baa da fo nfɛra fɛso so,

ŋkpal manɛ so

amo e naa ŋini fo kebaawɔtɔ.

²⁴Sa maŋ malga kusɔ kama nɛ

kashenteŋ maŋ wɔ kumo to.

Fo nɛ efɛsheŋ nɛ mmalga nɛ

a bee shin nɛ

basa bee wora a foe ekpa

e sa maa kɔ shɛŋ.

²⁵Baa keni tenini

nseŋ ta kashenteŋji

nɛ kebaa teŋ a wora

be kebaawɔtɔ a yɔ anishito.

Sa maŋ kaŋ shin nɛ anishinyɔr e ji fo

nɛ fo kurgi fo kumu n yuu to kikɛ.

²⁶Baa chena a fɛ asheŋ nɛnɛ,

nsaa kre kusɔ kama

nɛ fee sha kewora

be asheŋ nɛnɛ

pɔɛŋ nsaa wora kumo.

Aloŋ nɛ kusɔ kama nɛ fee wora

beeŋ nite nɛnɛ.

²⁷Baa gelge kulubi

nsaa nite teteri,

Sa maa kpele ekpa

niŋiso na kikɛ.”

Kesakalea be keji be kefiɛso be asheŋ

¹M pibinyɛn,

bugi asoe nɛnɛ n nu

ma kanyiasheŋ

be mmalga

nɛ a bee sa lakal ere.

²Amo e naaŋ sa fo da lela,

nseŋ shin nɛ fo mmalga e baa

ŋini fanɛ fo kɔ kenyi.

³Eche nɛ lar mo kul be kaman

be kɔnɔpurbi

beeŋ tiŋ a du mɔlmɔlbi

fanɛ ŋku,

nɛ kumo be kepipe e baa wɔ ebel

fanɛ mushoŋchu na,

⁴ama fo baŋ di mo n loge,

ebesa nɛ n daa nyi nna

e naa bɛ kumo so.

⁵Fo bɛ mo so

e beeŋ yɛr fo bubuni to,

ŋkpal manɛ so ekpa nɛ e bɔ so na

bee yɔ luwu to nna.

⁶E maŋ bɔ ekpa nɛ

k bee yɔ ŋkpa to na,

ama mo alɛ maŋ nyi kumo be loŋ,

ŋkpal manɛ so

e maŋ kɔ epe.

⁷Amoso m pibinyɛn,

bugi asoe nɛnɛ n nu.

Sa maŋ teŋ

kusɔ nɛ mee kaŋɛ ere so.

⁸Baa gelge loŋ be beche na.

Sa maa ji a taga bumo to kuraa.

⁹Nɛ mannɛ aloŋ, feeŋ paŋ

fo bunyaŋ nɛ kemaŋkura,

nɛ basa lubi

e nya ekpa m mɔ Juwebi;

¹⁰nɛ befɔ e ta asɔ lela

nɛ fo gben n nya na kikɛ.

¹¹Fo ŋkpa be lalaloge,

feeŋ dese a shuto,

nɛ fo eleŋ nɛ eyur kikɛ

e fo amo be ekar.

¹²Loŋ be jemanɛ na so

nɛ fo kaŋɛ le:

“Manɛ e ba nɛ n daa maŋ koya?

Manɛ nna nɛ

m maŋ shuli n sɔ keŋini?

¹³N daa maŋ nu n sa

ma beŋinipoana;

n daŋ kplaŋ bumo so nna.

¹⁴Kabre ma e ŋaba

basa kikɛ be anishito na!

¹⁵Amoso shin nɛ fo laŋ to be ajibi

e baa kukwe fo.

¹⁶Mbia nɛ fo nɛ bejipoche

beeŋ kurge na,

maaŋ lar tɔnɔ n sa fo.

¹⁷Shin nɛ fo gbagba be mbia

e daŋ n chɛ fo to,

mannɛ basa pɔtɛ be mbia.

¹⁸Amoso shin nɛ fo kagbene

e baa fuli

fo kebiato be eche so.

Shin nɛ mbe asheŋ

e baa par fo.

¹⁹E walɛ kebita nna

a du shreembi fanɛ chibir na,

amoso shin nɛ mbe

kebita e baa sa fo kagbenefuli.

Shin nɛ mbe kasha

e baa bɔlɔ fo kenishi.

²⁰M pibinyɛn, manɛ e ba

nɛ fee ta fo kasha

n ya kaa sa eche pɔtɛ?

Manɛ e ba nɛ enyɛn ko

be eche be kebita

bee par fo a chɔ fo eche peya?

²¹Enyɛnpe Ebɔrɛ na

bee wu kusɔ kama

nɛ fee wora.

Kaplɛkama nɛ fee yɔ

e bee wu fo.

²²Esa lubi be alubi

du fanɛ kegba,

nɛ mo gbagba

bee kilgi a tɔr to

nɛ k bee pɛ mo nna.

²³Loŋ be basa bee wu nna

ŋkpal b ka maŋ kɔ kamootiŋ so.

Bumo gbagba be kawulisheŋ

e naa yɛr bumo nchaŋ to.”

Kawulisheŋ be asheŋ

¹M pibinyɛn,

nɛ fo nase kɔnɔ

fanɛ feeŋ yili

esa ko be katelamu

ŋ ka mbe kukɔ bre,

²fo gbagba be kɔnɔ to

be mmalga kre fo nna na;

nɛ fo kɔnɔ naseso na

e kilgi m pɛ fo.

³M pibinyɛn, ŋkpal fo ka tɔr

amodoŋwura be enɔ to so,

kananɛ feeŋ wora n nya

fo kumu nde.

Nya manaŋ n ya kule

amodoŋwura fanɛ

e ta kukɔ na m paŋ fo.

⁴Sa maŋ ta loŋ be kesheŋ na

n wora ewɔji,

ŋko ŋ kplaŋ kumo so

a dese a di.

⁵Wora ania n lar

kesheŋ na to manaŋ,

fanɛ kananɛ kusɔbɔya

ŋko kabuibi nɛ e wɔ

kejigbelɛ to bee wu ekpampo

nsaa kɔ a fin

kumɔlga kumo be kumu na.

⁶Betɔlpo, men keni

kananɛ atutulombi

bee wora asheŋ so,

ŋ koya kebaawɔtɔ.

⁷B maŋ kɔ bejuŋkparpo

ŋko bewura

ŋko basa nɛ baa ji bumo

be edemu a sa bumo,

⁸ŋkeshin nɛ bumo alɛ bee fin

bumo be ajibi ketarso nna

a yili pɔɛŋ nɛ kechali e fo.

⁹Etɔlpo, nuso be ewushi

nɛ fee sha nɛ fo wushi?

Saŋɛ mo nɛ feeŋ tiŋi edi to

ŋ koso n shuŋ?

¹⁰Kusɔ nɛ etɔlpo bee kaa kaŋɛ

e la fanɛ;

shin nɛ n di gbrɛbi,

ŋko shin nɛ n chena

n wushi gbrɛbi.

¹¹Ama saŋɛ nɛ e dese a di na

nɛ ketir bee nyaŋ mo

a wɔtɔ fanɛ

beyu ka ta adoŋsɔ ŋ kuŋ

esa ekpa n suge mbe asɔ na.

¹²Basa lubi nɛ basa fuloŋ

e naa nite a ku efɛ.

¹³Baa kaa wora basa

anishi nna

ŋko a ta bumo be eyur be mba

a malga basa kutɔ

a fule bumo.

¹⁴Baa wora loŋ nna

nsaa kɔ nfɛra lubi a kre asheŋ

a bar kebagato

basa to kaplɛkama.

¹⁵Ŋkpal loŋ so

tɔrɔ nɛ k bee yɛr basa

kemur to na,

beeŋ tɔr bumo so

m mur bumo

saŋɛ nɛ b maa tama kumo na.

¹⁶Asɔ ashunu nɛ Enyɛnpe Ebɔrɛ

kishi ga na nde:

¹⁷Kamoowu

nɛ kudonduloŋ fɛpo

nɛ enɔ nɛ k bee mɔ

basa nɛ b maŋ wora n da so,

¹⁸nɛ nfɛra fɛso lubi

nɛ basa nɛ alubi be kewora

maa choŋ bumo so

¹⁹nɛ shɛdajipo nɛ e bee ku efɛ

a deŋi abar so

nɛ edebɔrpo nɛ

e bee ta beteri be amu

a ŋmɛa abar.

Kesakalea be asheŋ

²⁰M pibinyɛn, baa bɛ

kusɔ nɛ fo tuto kaŋɛ fo so,

nsaa maa kplaŋ asɔ nɛ

fo nio ŋini fo so.

²¹Shin nɛ bumo be mmalga

e baa wɔ fo

nfɛra to saŋkama

fanɛ a ka la kubɔtoshembi

a di fo na.

²²Shin nɛ a baa ŋini fo ekpa;

nsaa kuŋ fo kanyɛso.

Saŋkama nɛ fo di n tiŋi,

fo shin nɛ a baa ji fo asoeto.

²³Ŋkpal manɛ so fo nio

nɛ fo tuto be keŋini

du fanɛ kefulto nna n sa fo;

nɛ bumo be kasogberge malɛ

bee sa fo kebaawɔtɔ lela.

²⁴Bumo be keŋini na

e naaŋ kuŋ fo

ashi esa pɔtɛ be eche

be kayɛlga

be mmalga belbelso to.

²⁵Sa maŋ kpal

loŋ be beche be kebita so

n yɛlga bumo;

ŋko n shin nɛ

bumo be kayɛlga so

be kekeni fo,

e shin nɛ fo sha bumo.

²⁶Sakaleche be yawu maŋ fo

bodobodo be amansherbi so,

ama esa be eche be kasha

beeŋ tiŋ n shin nɛ fo luri

tɔrɔ gboŋgboŋi to.

²⁷Esa beeŋ tiŋ n chɔɔ edɛ

n wɔtɔ mbe kusɔbuuso to,

nɛ kusɔbuuso na maaŋ chɔɔ a?

²⁸Ŋko esa beeŋ tiŋ n ta aya fuloŋ

n nite ajanwulɛ so

nɛ a maaŋ chɔɔ mo a?

²⁹To, loŋ koŋwule na

nɛ k du n sa

esa kama nɛ

e di mo barkasa be eche.

Esa kama nɛ e wora loŋ

maaŋ paŋ kasogberge kikɛ.

³⁰Basa maa sha beyu be asheŋ;

hale eyu yuri ajibi n ji

ŋkpal akoŋ so gba,

nɛ b pɛ mo,

³¹baaŋ gberge mo kusoe

n shin nɛ e ka kusɔ nɛ

e yur na be kukɔ

ale ashunu.

Hale kumo be loŋ

beeŋ shin nɛ e paŋ

kusɔ nɛ e kɔ kikɛ gba,

baaŋ shin nɛ e wora loŋ.

³²Enyɛn kama nɛ e bee sha

mo braana be beche

maŋ kɔ nfɛra nna na.

Mo alɛ gbagba be kumu nɛ

e baa jija na.

³³Kebri nɛ ŋaba e

naa jo loŋ be esa.

Mo alɛ nɛ anishinyɔr

e naa baa la saŋkikɛ.

³⁴Ŋkpal manɛ so

kedata be agbo lubi ga,

nɛ enyɛn bee bishi

kumo be kuwule

a maa wu kuwɔr kuraa.

³⁵Sheŋ malɛ maa tiŋ a ka

kedata be agbo be kukɔ.

Kakɛ kama maŋ wɔtɔ

a wushi kedata be agbo.

Sakaleche be kasokpele be asheŋ

¹M pibinyɛn,

baa nyiŋi asɔ nɛ ŋ kaŋɛ fo na.

Sa maŋ teŋ kusɔ nɛ

ŋ kaŋɛ fo na so kikɛ.

²Baa wora asɔ nɛ ŋ kaŋɛ na

nseŋ ji efute tenteŋ;

Baa de so,

nsaa bɛ ma keŋini na so

fanɛ kananɛ esa bee kuŋ

kusɔ nɛ e bee sha ga na.

³Baa kɔ asɔ nɛ

ŋ ŋini fo na to saŋkikɛ,

n shin nɛ a baa wɔ

fo kagbene to.

⁴Ta kanyiasheŋ ŋ

ki fanɛ fo sipoche,

nseŋ ta lakal malɛ

ŋ ki fo teri kpakpaso.

⁵Amo e naŋ kuŋ fo

ashi fo braana be beche,

nɛ beche nɛ b kɔ

kesakalea so

be mmalga belbelso to.

Sakaleche be asheŋ

⁶Kachako nɛ n jule ŋ keni

ma ebu be tokuro to,

⁷n wu mbrantiɛbia damta

nɛ b maa pin asheŋ to

manaŋ manaŋ,

nseŋ keni bumo to

n wu ewulpo ko.

⁸E daa na kubɔrbi so nna

a mata kakpa

nɛ eche ko daa wɔ,

nseŋ bɔla eche na be kawu ase.

⁹Kaaseso e daa la,

nɛ kaboŋ birito.

¹⁰Nɛ kache na mɛato

kesakalea so

n lar n yɔ mo kutɔ.

Mbe nfɛra daa yil

kananɛ e beeŋ wora

n nya kabrantiɛbia na n yɔ

mbe laŋ to nna.

¹¹Eche na daŋ paŋ

anishinyɔr nna,

nsaa nite kubɔrbi so saŋkikɛ

a malga awɔrso.

¹²Saŋko e bee yili

kebonfu ko to nna a jo,

saŋko malɛ kubɔrbi so,

saŋko malɛ kebɛ to.

¹³E ka ya tu kebinyɛnbi na

nɛ e pɛ mo to,

m pepe mbe kɔnɔpurbi

nseŋ keni mbe anishito diimbi

ŋ kaŋɛ le:

¹⁴“Kabre nɛ m mɔ

asɔbɔya n lara sarga;

eblaŋ wɔ ma laŋ to.

¹⁵Amoso nɛ n lar a fin fo

nseŋ keni n wu fo nfe!

¹⁶Ma alɛ ta ljipt be efuli so

be ago peper

be asɔ deseso nna

n deŋi ma gedo so.

¹⁷Nseŋ ta etulale nɛ baa tre

mir nɛ alowe

nɛ Sinamɔn na

ŋ ŋmenyaŋ kumo kikɛ so.

¹⁸Amoso, baa ba

nɛ an ya sha abar

nseŋ ji anyi be amu

hale nɛ kare e ya chɛ.

¹⁹Ma kul maŋ wɔ epe,

e yɔ kade wɔfɔ ko nna.

²⁰E ta amansherbi damta

nna n yɔ.

Bɔkwe anyɔ pɔɛŋ e beeŋ ba.”

²¹Kache na ta

mmalga belbelso nna,

n fule mo, m pɛ mo

nɛ e shuli n sa mo.

²²Nseŋ bɛ mo so epul na to

fanɛ kananɛ baa keta kusɔbɔya

a yɔ nɛ b ya mɔ,

ŋko kananɛ chibir bee shile a luri

kejigbelɛ to nɛ k bee pɛ kumo,

²³nɛ b ya too ketanyembi

n wɔtɔ kumo be kagbene to

m mɔ na.

Kebinyɛnbi na daa du nna fanɛ

kabuibi nɛ e bee yɔ

kejigbelɛ to.

E daa maŋ nyi fanɛ

kenishipere to nɛ

e bee yɔ na.

²⁴Amoso, naniere,

ma mbinyɛnsobi,

men nu nfe.

Men kaŋ kusoe n nu

kusɔ nɛ mee kaŋɛ ere.

²⁵Men sa maŋ kaŋ shin nɛ

men be ekama

be kagbene e yɔ

loŋ be eche so.

Men sa maa sa

loŋ be beche kashuli.

²⁶Eche na shin nɛ

benyɛn damta

paŋ bumo be eyilikpa.

Esa maaŋ tiŋ ŋ karga basa

nɛ e shin nɛ b mur.

²⁷Fo baa yɔ mo pe,

kumo ere luwu be ekpa

nɛ fo bɔ na.

Mo pe e la ekpa shimbi

nɛ k bee yɔ luwu to.

Kanyiasheŋ ka walɛ be asheŋ

¹Nu nfe,

kanyiasheŋ e naa tre na.

Lakal e naa kaŋɛ awɔrso

fanɛ fo nu n sa mo na.

²K wɔ abee so nna

nseŋ mata ekpakar

nɛ ŋkpancheri.

³Kade be kabunagboŋ

nɛ baa bɔla a luri kade to na

ase nɛ k wɔ a tre a kaŋɛ:

⁴“Dimɛdi kikɛ nɛ e wɔ

kasawule so nɛ mee kaŋɛ na.

⁵Menyee wora abibisheŋ nna a?

Men nya kenimufɛra.

Men wuli nna ŋko?

Men wora nfɛra.

⁶Men kaŋ kusoe n nu

ma mmalga lela ere.

Kusɔ kama nɛ ŋ kaŋɛ menyi na

niŋi ekpa nna.

⁷Kashenteŋ nɛ mee ji,

maa sha efɛ.

⁸Kusɔ kama nɛ ŋ kaŋɛ

la kashenteŋ nna,

efɛ ŋko kafulesheŋ kikɛ

maŋ wɔ kumo to.

⁹K baŋ di efuli nna

n sa esa kama nɛ

e bee pin asheŋ to,

nseŋ bugi to n sa esa

nɛ e kɔ kenyi.

¹⁰Lara ma keŋini ere

nseŋ yige gbiti.

Baa fin kenyi

a chɔ shuwa lela.

¹¹Kanyiasheŋ kɔ tɔnɔ

a chɔ abitasɔ kikɛ.

Dimɛdi be kusɔ shaso kikɛ

maaŋ tiŋ n ta kumo be kumu

m ber kanyiasheŋ.

¹²Ma, kanyiasheŋ,

e naa sa asheŋ be kepin to

nɛ kenyi nɛ demu be keji

nɛ kumo be ekpa so be nfɛra.

¹³Enyɛnpe Ebɔrɛ

be kesa bunyaŋ

e la alubi be kekishi.

Kamoowu nɛ ŋkpensheŋ,

nɛ asheŋ lubi nɛ efɛ be mmalga

maa par Ebɔrɛ kikɛ.

¹⁴Ma e naa kre ŋkre

nsaa wora a bɔlɔ so na.

Ma e naa pin asheŋ to,

nsaa kɔ eleŋ na.

¹⁵Ma e naa chɛ bewurjipo to

nɛ baa keni bumo be efuliana so,

nsaa chɛ bejuŋkparpo to

nɛ baa wora mbra lela.

¹⁶Ma e naa chɛ

ejuŋkparpo kikɛ to

nɛ e bee juŋkpar basa.

Ma e naa chɛ ekrachi

nɛ bewurjipo kikɛ to.

¹⁷Mee sha bumo nɛ

baa sha ma nna.

Esa kama nɛ e bee fin ma

kenishipereso beeŋ wu ma.

¹⁸Ŋ kɔ kedamaya,

nɛ kemaŋkura,

nɛ anishito be keyɔ,

nɛ kɔŋkɔŋ be keji

be kebaawɔtɔ nna a sa basa.

¹⁹Kusɔ nɛ feeŋ nya ma kutɔ

bɔ shuwa

nɛ gbiti lela.

²⁰Ekpa niŋi so,

nɛ kebaaji asheŋ

nɛ amo be ekpa so

be ekpa nɛ m bɔ.

²¹Mee sa bumo nɛ baa sha

ma kedamaya nna

nsaa shin nɛ asɔ lela bee bɔlɔ

bumo be nwu.

²²Ma nɛ Enyɛnpe Ebɔrɛ na

juŋkpar n to.

Dradra na kikɛ nɛ e to ma.

²³Sososo kikɛ nɛ e to ma.

N wɔtɔ nna pɔɛŋ

nɛ durnya fara.

²⁴B kurge ma nna pɔɛŋ

nɛ etekuana kikɛ fara.

Ŋ ka fara

nɛ nchu be abuye maŋ wɔtɔ.

²⁵N wɔtɔ nna pɔɛŋ

nɛ Enyɛnpe Ebɔrɛ to abeegboŋ,

n ta amo n yili

amo be eyilikpa.

²⁶N wɔtɔ nna pɔɛŋ nɛ

Ebɔrɛ to kasawule,

nɛ sososo nɛ shishɛr

nɛ kasawule dɔso.

²⁷N wɔtɔ nna pɔɛŋ,

nɛ e ta awɔlpa n yili

amo be kaboŋ,

nseŋ yili kakpa

nɛ esa be kenishi

beeŋ tiŋ n wu

n ya tar ashi teku so.

²⁸N wɔtɔ nna pɔɛŋ

nɛ e ta abɔrɛwɔlpa

n wɔtɔ esoso,

nseŋ bugi nchu n wɔtɔ teku to,

²⁹nseŋ ponte ŋ kaŋɛ nchu na

fanɛ a sa maŋ bɔlɔ n dii

a chɔ kananɛ e kaŋɛ amo

saŋɛ nɛ e tɔl

durnya be gbaltɔlase na.

³⁰N daa wɔ mo kutɔ nna fanɛ

esa nɛ e nyi asɔ be kewora,

nsaa chɛ mo to a lɔŋɛ asɔ

nsaa du fanɛ kebibi.

Ma kagbene bee fuli ma nna

ashi mbe anishito,

nɛ ma alɛ bee sa mo

kagbenefuli kachɛ kama.

³¹Ma kagbene fuli durnya so,

nɛ basa nɛ b wɔ kumo to be asheŋ

bee bɔlɔ ma kenishi ga.

³²Naniere, mbifɔlbi,

men kaŋ kusoe n nu,

Men wora asɔ nɛ

ŋ kaŋɛ ere nɛ a shin nɛ

men be ŋgbene e fuli menyi.

³³Men nu kusɔ nɛ mee

ŋini menyi ere,

nseŋ nya kanyiasheŋ.

Men sa maŋ kplaŋ kumo so.

³⁴Bekama nɛ baa ba

ma laŋ to m ba kaa chena

ma kabuna to,

a jo a nu ma mmalga na

be ŋgbene beeŋ fuli bumo.

³⁵Bekama nɛ b nya ma,

nya ŋkpa;

nɛ Enyɛnpe Ebɔrɛ malɛ

be kagbene fuli bumo so.

³⁶Bekama nɛ b maŋ nya ma bre

bee tɔrɔ bumo be amu nna.

Ekama nɛ e kishi ma

bee sha luwu nna na.”

Kanyiasheŋ nɛ kawuli be asheŋ

¹Kanyiasheŋ pɔr kumo be ebu nna

n yili eshabɔrɛ ashunu so.

²Nseŋ shin nɛ b mɔ

kusɔbɔya n wora kejigboŋ;

nseŋ ta asɔ

nɛ amo be efɛa bee dufɛ viim

n wɔtɔ nsa to n yili.

³Nseŋ shuŋi mbe mbita fanɛ

b ya yili kade be mboŋ jeŋgreŋ

m ponte n tre basa ŋ kaŋɛ:

⁴“Menyi nɛ men maa pin asheŋ to

manaŋ manaŋ na e luri m ba.”

Nseŋ kaŋɛ bewulpo malɛ le:

⁵“Men ba ji ma ajibi

nseŋ nu nsa belbelso

nɛ n wora n yili na.

⁶Men lar basa nɛ

b maa pin asheŋ to

manaŋ manaŋ na be katuŋ to

nseŋ ji efute.

Men shin nɛ asheŋ be kepin to

e baa ŋini menyi ekpa.”

⁷Fo baa ŋini esa nɛ

e kɔ mpuchi ekpa,

katege nɛ fee fin a sa fo kumu na.

Nɛ fo fiɛ esa lubi so,

feeŋ luri tɔrɔ to.

⁸Sa maŋ kaŋ fiɛ

esa nɛ e bee puchi so,

fo baŋ wora loŋ,

e beeŋ kishi fo.

Ama fo baŋ ŋini enyiashempo bre

ekpa e beeŋ sa fo bunyaŋ.

⁹Kusɔ kama nɛ fo

kaŋɛ enyiashempo,

bee sa mo kanyiasheŋ nna a ti so.

Kusɔ kama malɛ

nɛ fo kaŋɛ basa nɛ

baa wora asheŋ niŋiso,

bee sa bumo kenyi nna a ti so.

¹⁰Nɛ fee sha kanyiasheŋ,

fo fara a ŋana Enyɛnpe Ebɔrɛ.

Nɛ fo baa nyi Ebɔrɛ cheembi na,

feeŋ baa pin asheŋ to.

¹¹Kanyiasheŋ beeŋ shin nɛ

fo ŋkpa e teŋi so.

¹²Fo nyiasheŋ,

feeŋ ji kumo be tɔnɔ;

Fo kpal kamoowuso

ŋ kini kanyiasheŋ

feeŋ ji awurfoŋ.

¹³Kawuli du fanɛ

eche nɛ e maa pin

asheŋ to manaŋ manaŋ

nsaa da asheŋ a wea abar to nna.

¹⁴E bee chena mbe kabuna to

ashi kaboŋ jeŋgreŋ nɛ

baaŋ wu mo nna,

¹⁵a tre a kaŋɛ basa nɛ baa choŋ le:

¹⁶“Basa nɛ b maa pin

asheŋ to manaŋ manaŋ,

e luri m ba.”

Nsaa kaŋɛ bewulpo malɛ le:

¹⁷“Keyuri nchu wɔ ebel,

ama ajibi nɛ fo ŋana n ji

e wɔ ebel a chɔ amo”

¹⁸Basa nɛ baa nu mbe kafulesheŋ

maŋ nyi fanɛ

bekama nɛ b luri mbe laŋ to kikɛ

bee yɔ bubuni to nna.

Ewura Sɔlɔmɔn be aŋasa

¹Ewura Sɔlɔmɔn be aŋasa nde:

Kebia nyiashempo

bee bar mo tuto nɛ mo nio

kumu saŋɛ nna,

ama kebia wulpo bre

bee wɔtɔ bumo ebesa to nna.

²Kapuni be kedamaya

maa lar tɔnɔ a sa esa

ama kashenteŋji bre

bee mɔlga esa be ŋkpa nna.

³Enyɛnpe Ebɔrɛ maaŋ shin nɛ

basa lela e di akoŋ,

Mo alɛ maaŋ shin nɛ

alubiworapoana e nya

kusɔ nɛ baa sha.

⁴Ntɔl bee bar esa ketir nna,

ama kepere kenishi n shuŋ

bre bee shin nɛ esa bee

dii dama nna.

⁵Enyiashempo bee teŋi

asɔ saŋɛ nɛ a bel nna,

ama k la anishinyɔr nna fanɛ

esa e baa dese a di

kasɔteŋi be jemanɛ.

⁶Basa lela bee nya nɛfa nna;

ama nfɛra lubi e ŋana

a wɔ esa lubi

be mmalga be kaman.

⁷Basa lela be alela so

nɛ baa nyiŋi bumo,

ama b maa nyiŋi

belubiwurapo bre kikɛ.

⁸Basa nɛ b kɔ lakal

bee sɔ kasotoji nna,

ama basa nɛ baa malga

kawuliso bre

maa chɛr nsaa tɔr.

⁹Beshenteŋjipo bee nya kekuŋ nna,

nɛ shɛŋ maa gbuŋgbuŋ bumo;

ama kebirkɔnshiwura be asheŋ

beeŋ lar efuli.

¹⁰Esa nɛ e bee dɔ

a buu kashenteŋ so

bee wɔtɔ basa ebesa to nna,

ama esa nɛ e maa fɛ nfɛra

pɔɛŋ nsaa malga

maa chɛr nsaa tɔr.

¹¹Esa lela be mmalga du fanɛ

kebuye nna a sa ŋkpa,

ama kamɔ be nfɛra lubi

e ŋana a wɔ esa lubi

be mmalga be kaman.

¹²Kekishi bee bar kamɔrɔji

nɛ kebagato nna,

ama kasha bre bee kplaŋ

aworandeso kikɛ so nna.

¹³Esa be mmalga e naa ŋini fanɛ

e la enyiashempo,

ama ewulpo bre

daga kasogberge nna.

¹⁴Enyiashempo bee fin kenyi nna

a ti so saŋkikɛ,

ama ewulpo be mmalga

e naa da mo a lɛ.

¹⁵Kedamaya bee kuŋ

damawuraana nna

fanɛ kananɛ baa pɔr egbal

a kuŋ kade na,

ama ketir bre maa kuŋ betirpo.

¹⁶Alela be kakɔka

e la ŋkpa tenteŋ,

ama alubi bre bee shin nɛ

esa bee wora alubi nna a ti so.

¹⁷Basa nɛ baa shuli a sɔ keŋini

be kasogberge beeŋ ji efute,

ama bumo nɛ b maa shuli

kewora n jija bre

be lalaloge maa kaa walɛ.

¹⁸Esa kama nɛ kekishi wɔ mo to

la efɛpo nna.

Ewulpo e naa ta

b yɛ b yɛ a shuŋ.

¹⁹Fo baa malga ga

fo maa kra malga a foe.

Nɛ fo nyi asheŋ

fo maaŋ baa malga ga.

²⁰Esa lela be mmalga

du fanɛ gbiti nna,

ama esa lubi maa sa

esa nfɛra nɛ k kɔ tɔnɔ.

²¹Esa lela be mmalga

kɔ tɔnɔ nna n sa basa damta,

ama kawuli beeŋ tiŋ m mɔ fo.

²²Enyɛnpe Ebɔrɛ e naa ta

esa e ki damawura.

Kepere kenishi n shuŋ

maaŋ tiŋ n shin nɛ fo dii dama.

²³Ewulpo nɛ alubi be kewora

bee wora ebel.

Kanyiasheŋ e naa par benyipo bre.

²⁴Basa nɛ baa wora asheŋ niŋiso

bee nya kusɔ nɛ baa sha nna,

ama kusɔ nɛ belubiworapo bre

maa sha nɛ baa nya ga.

²⁵Afugboŋ bee ba nna

m ba kaa ber alubiworapoana a lɛ,

ama beshenteŋjipo bre

bee nya kumɔlga nna saŋkama.

²⁶Sa maŋ shin nɛ etɔlpo

e wora shɛŋ n sa fo,

mbe asheŋ wora so kikɛ

du nna fanɛ fo ka ji dorobi

nɛ anyi bee nyiri fo;

ŋko edishi ka luri fo anishito nna.

²⁷Wora Enyɛnpe Ebɔrɛ na kasonu

nseŋ ji efute n chɛr.

Kumu kpakpasowura

bee wu nna nɛ mbe saŋɛ maŋ naŋ fo.

²⁸Basa lela be kanya

bee bar kagbenefuli nna,

ama belubiworapo bre

maaŋ nya kusɔ nɛ baa tama kikɛ.

²⁹Enyɛnpe Ebɔrɛ

bee kuŋ beshenteŋjipo nna,

nsaa mur bumo nɛ

baa wora alubi.

³⁰Basa nɛ baa wora asheŋ nɛ a niŋi

bee nya kekuŋ

saŋkikɛ nna,

ama belubiworapo bre

maaŋ ji efute n chɛr kasawule so.

³¹Basa nɛ baa wora asheŋ nɛ a niŋi

bee malga

kanyiasheŋ be mmalga nna,

ama baaŋ kuŋ

mmalga lubi wora bre ekpa.

³²Basa nɛ baa wora asheŋ nɛ a niŋi

e nyi asheŋ lela

nɛ a daga kemalga,

ama asheŋ besaso nɛ belubiworapo

bre bee malga saŋkama.

¹Enyɛnpe Ebɔrɛ kishi

kapuni be kasɔkarga ga.

Kasɔkarga nɛ k bɔla ekpa

e naa fuli mbe kagbene.

²Kamoowuwuraana maa chɛr

nsaa ji anishinyɔr.

Kamubrase bre

bee sa esa kanyiasheŋ nna.

³Basa lela be kashenteŋji

e naa kuŋ bumo.

Basa nɛ esa maaŋ tiŋ n yirda bre

gbagba be kebirkɔnshi

e naa mur bumo.

⁴Kedamaya maaŋ ba kɔ tɔnɔ

n sa fo gbagba fo kaluwuachɛ,

ama kashenteŋji bre

beeŋ tiŋ m mɔlga fo ŋkpa.

⁵Kashenteŋji bee shin nɛ

kebaawɔtɔ bee ki pɔpɔtɔ nna

a sa esa lela,

ama belubiworapo bre

gbagba e naa da bumo amu a lɛ.

⁶Kecheembiya e naa

mɔlga beshenteŋjipo,

ama basa nɛ esa maaŋ tiŋ n yirda bre

gbagba be kejimuni

e naa ki kejigbelɛ a pɛ bumo.

⁷Belubiworapo nɛ tama e naa wu,

nɛ bumo be yirda

nɛ k deŋ bumo be kedamaya so

e ki fuloŋ.

⁸Basa cheembi bee nya kekuŋ

ashi tɔrɔ nɛ k bee ba

belubiworapo so na to nna.

⁹Basa nɛ b maa ŋana Ebɔrɛ be mmalga

beeŋ tiŋ n yɛr esa kemur to,

ama basa cheembi

be kanyiasheŋ be mmalga

bee sa esa kumɔlga nna.

¹⁰Beshenteŋjipo baŋ dii dama,

bumo be kade to ebi kikɛ be ŋgbene

bee fuli bumo nna.

Alubiworapo malɛ baŋ wu

mbe kade to ebi be ŋgbene

bee fuli bumo nna.

¹¹Basa cheembi be nɛfa

bee maŋ bumo be kade so nna,

ama basa lubi bre be mmalga

bee mur bumo be kade nna.

¹²Ewulpo e naa ji beko be asheŋ,

enyiashempo bre bee loto nna.

¹³Esheŋjipo kikɛ maŋ kɔ ashiri,

ama feeŋ tiŋ n yirda

esa nɛ basa bee sa yirda bre.

¹⁴Efuli nɛ k maŋ kɔ

bejuŋkparpo nyiashempo

bee mur nna;

ama besoetojipo damta

bee kuŋ efuli nna.

¹⁵Nɛ fo yili kajinamu

n sa esa nɛ fo maŋ nyi,

feeŋ wora n daa nyi nna.

Amoso sa maŋ ta fo kumu m baga nfɔl.

¹⁶Eche nɛ e bee bugi enɔ a kɛ

bee nya kemaŋkura nna,

ama eche nɛ e maŋ kɔ da bre

bee bar anishinyɔr nna.

Etɔlpo maaŋ dii dama kikɛ,

ama basa nɛ baa pere kenishi a shuŋ bre

beeŋ dii dama.

¹⁷Nɛ fee wora kelela

fo kumu nɛ fee wora a sa.

Nɛ basa be awurfoŋ bee wora fo ebel,

fo alɛ gba beeŋ luri tɔrɔ to.

¹⁸Belubiworapo maa nya tɔnɔ kikɛ,

ama esa nɛ e bee wora kelela bre

maaŋ paŋ kumo be tɔnɔ kikɛ.

¹⁹Esa kama nɛ e yili

mbe kagbene to fanɛ

e beeŋ wora kelela beeŋ ji efute tenteŋ,

ama esa kama nɛ e yili

mbe kagbene to fanɛ

e beeŋ wora alubi bre

maaŋ ji efute n chɛr kikɛ.

²⁰Enyɛnpe Ebɔrɛ kishi

nfɛra lubiwura ga,

ama e bee sha bekama

nɛ baa wora asheŋ lela bre ga.

²¹K baa dese nna geeŋ fanɛ

baaŋ gberge belubiworapo kusoe,

ama bekama nɛ baa wora

asheŋ niŋiso bre

beeŋ gelge kasogberge.

²²Eche nɛ e walɛ kebita

nsaa maŋ kɔ da

du fanɛ shuwa be kepinibi nna

ashi preku be kamuna to.

²³Asɔ kama nɛ basa lela bee fin

bee ki asɔ lela nna.

Ama belubiworapo bre baŋ nya asɔ

k bee pɛ basa agbo nna.

²⁴Kakɛ maa loge asɔ.

Beko bee kɛ ga,

bumo alɛ nsaa dii dama saŋkikɛ,

nɛ beko malɛ kɔ miri ga

nsaa la betirpo saŋkikɛ.

²⁵Fo baa bugi enɔ a kɛ

feeŋ dii dama.

Chɛ beko to

nɛ beko malɛ e chɛ fo to.

²⁶Basa bee sho bumo

nɛ baa ti ajibi so a yili fanɛ

amo be yawu e di pɔɛŋ nɛ b fa na

kɔnɔ nna,

nsaa chɔrɔ bekama nɛ baa fa

amo saŋkikɛ na.

²⁷Esa kama nɛ e bee fin asheŋ lela

bee nya asheŋ lela nna,

nɛ asheŋ lubi malɛ bee tu

ekama nɛ e bee fin asheŋ lubi.

²⁸Bekama nɛ b ta

bumo be tama n deŋi

bumo be kanya so

beeŋ gbaŋgbaŋ n tɔr

fanɛ ketarso be afantaŋ,

ama basa cheembi bre

beeŋ baa purge afantaŋ popɔr

fanɛ kechaliso be ndibi nna saŋkama.

²⁹Bekama nɛ baa fin asheŋ lubi

a ba bumo be laŋ to ebi so

maaŋ nya kapetɛ n ji kikɛ.

Bewulpo malɛ beeŋ baa la

benyiashempo be anya nna saŋkama.

³⁰Kecheembiya bee sa ŋkpa nna,

ama kumu kpakpaso

be kebaawɔtɔ bre bee mɔ nna.

³¹Nɛ basa lela bee nya

kelela be kakɔka durnya ere to,

kumo ere kashenteŋto,

basa lubi gba beeŋ nya kasogberge.

¹Ekama nɛ e bee sha keniŋi

bee nya kenyi nna.

Ama ekama nɛ e kishi keniŋi

la ewulpo nna.

²Enyɛnpe Ebɔrɛ be kagbene

bee fuli basa lela so nna,

ama e maa sa bekama

nɛ baa kre asheŋ lubi bre

kashuli kikɛ.

³Kumu kpakpaso be asheŋ woraso

maa kuŋ esa,

ama kecheembiya bre

bee shin nɛ esa

bee yili to kiŋkiŋ nna.

⁴Eche nɛ e kɔ da lela

bee bar mo kul kamusaŋɛ

nɛ kagbenefuli nna,

ama eche nɛ e bee wɔtɔ

mo kul anishinyɔr to bre

du fanɛ kɔrtɔ lubi nna.

⁵Beshenteŋjipo bee wora asheŋ

nɛ amo be ekpa so nna,

ama belubiworapo bre

bee fule basa nna.

⁶Belubiworapo be mmalga

bee bar kamɔ nna,

ama basa cheembi bre be mmalga

bee lara esa eyilikpa lubi to nna.

⁷Belubiworapo baŋ tɔr,

bumo nɛ bumo kanaŋ kikɛ

bee mur nna,

ama basa cheembi bre

be kanaŋ wɔtɔ nna mbaanaayɔ.

⁸Esa be kanyiasheŋ

e naa sa mo kechɔrɔ,

nɛ kawulisheŋ malɛ

bee shin nɛ baa keni esa jiga.

⁹Kebaa la ebɔlpo a shuŋ a ji

bɔ keta fo kumu n yili

eyilikpagboŋ nsaa di akoŋ.

¹⁰Basa lela bee keni

bumo be asɔbɔya gba so nɛnɛ nna,

ama basa lubi bre

be shɛŋ maŋ wɔ

bumo be asɔbɔya to.

¹¹Bedɔpo nɛ b pere kenishi a shuŋ

maaŋ paŋ kusɔ jiso kikɛ,

ewulpo e naa jija saŋɛ

a bɛ asheŋ fuloŋ so.

¹²Belubiworapo bee kɔ nna a fin

alubi be kewora,

ama basa cheembi bre

mur achin nna

n yili fanɛ ndibi,

a maa gbuŋgbuŋ to kikɛ.

¹³Belubiworapo gbagba be mmalga

e naa kilgi a kre bumo,

ama beshenteŋjipo bre

bee lara bumo be amu asheŋ to nna.

¹⁴Feeŋ nya kusɔ kama

nɛ fo wora ŋko ŋ kaŋɛ be tɔnɔ.

¹⁵Ewulpo nawule

e naa fɛ fanɛ

e kɔ kashenteŋ nna saŋkama.

Enyiashempo bre

bee kaŋ kusoe nna a nu kasotoji.

¹⁶Ewulpo e naa nya agbo a puŋi kɔnɔ.

Enyiashempo bre

bee kplaŋ katege so nna.

¹⁷Fo baŋ ji kashenteŋ,

basa bee wora asheŋ a niŋi ekpa nna,

ama efɛ bre bee shin nɛ basa

bee wora asheŋ a gbɛto nna.

¹⁸Esa nɛ e maa fɛ nfɛra

pɔɛŋ nsaa malga

be mmalga bee besa nna fanɛ

b ka ŋe esa kasaŋɛ nna,

ama enyiashempo be mmalga bre

bee wushi ebesa nna.

¹⁹Efɛ maa chɛr nsaa fo ekar,

ama kashenteŋ bre

wɔtɔ nna mbaanaayɔ.

²⁰Efɛ e wɔ basa nɛ baa kre

asheŋ lubi be nfɛra to,

ama bekama nɛ baa kre asheŋ lela bre

kɔ kagbenefuli nna.

²¹Asheŋ lubi maa tiŋ a tu

basa lela,

ama belubiworapo bre

maaŋ gelge tɔrɔ kikɛ.

²²Enyɛnpe Ebɔrɛ kishi befɛpo

be asheŋ ga,

ama mbe kagbene bee fuli

bekama nɛ baa ji kashenteŋ so nna.

²³Enyiashempo bee ta

mbe kenyi nna a ŋana,

ama ewulpo bre

bee shin nɛ mbe kawuli

bee di efuli nna.

²⁴Basa nɛ baa pere kenishi a shuŋ

e naŋ ji kuwura;

ntɔl bre bee ta esa nna

a ki kenya.

²⁵Kafɔŋ beeŋ tiŋ n shin nɛ

fo paŋ kagbenefuli,

ama kamalga lela

bee leŋ basa to nna.

²⁶Basa cheembi bee ŋini

bumo teriana ekpa lela nna,

ama belubiworapo bre

be ekpa bee yɛr bumo

kefoe to nna.

²⁷Etɔlpo maa nya

kusɔ nɛ e bee sha kikɛ,

ama esa nɛ e bee pere kenishi

a shuŋ bre beeŋ pɛ mbe anishi

be kabuibi.

²⁸Kecheembiya be ekpa

e kɔ ŋkpa,

luwu maŋ wɔ kumo be

ekpa to kikɛ.

¹Kebia nyiashempo kikɛ

bee kaŋ kusoe nna a nu

mo tuto be keŋini,

ama kumukpakpasowura bre

maa shuli a sɔ keŋini.

²Basa lela be mmalga

e naa ka bumo kukɔ,

basa lubi bre be kusɔ nɛ baa sha e la

kebaa tintiŋ basa a wɔtɔ

alubi be kewora to.

³Esa nɛ e bee tiŋ a keta

mbe kudonduloŋ

beeŋ kuŋ mbe ŋkpa,

ama esa nɛ mbe kɔnɔ

maŋ kɔ kemɔrɛbi

bee mur mbe kumu nna.

⁴Etɔlpo bee yɛlga kusɔ gba,

jiga nna,

e maaŋ tiŋ n nya kumo,

ama esa kama nɛ e bee pere kenishi

a shuŋ bre

beeŋ tiŋ n nya kusɔ kama

nɛ e bee sha.

⁵Esa cheembi kikɛ

kishi kafulesheŋ nna,

ama basa lubi bre

be aworbi bee bar bumo

anishinyɔr nɛ nyɔmu nna.

⁶Kebaawora asheŋ niŋiso

bee kuŋ esa niŋiso nna,

ama alubi bre

bee da basa lubi nna a lɛ.

⁷Basa ko bee ta bumo be amu nna

fanɛ damawuraana,

ama bumo alɛ maŋ kɔ shɛŋ.

Beko malɛ bee ta bumo be amu

nna fanɛ betirpo,

bumo alɛ nsaa la damawuraana kashenteŋto.

⁸Saŋko, damawuraana bee kaa ta

bumo be kanya nna

a kuŋ bumo be amu,

ama betirpo bre

maa kaa luri loŋ be asheŋ to.

⁹Basa cheembi du fanɛ

kefulto nɛ k bee nyaŋɛ

nsaa nyɛkpɛ saŋkama nna,

ama basa lubi bre du fanɛ

fitila nɛ k bee mɔrɛ

a shin nɛ k duŋ nna.

¹⁰Kamoowu bee bar

esa tɔrɔ nna.

Enyiashempo bre

bee fin kasotoji nna.

¹¹Ekpa lubi so be kanya

maa chɛr nsaa loge.

Ama esa kama nɛ e bee fin

gbrɛgbrɛbi be kanya bee ti so

saŋkama nna.

¹²Tama nɛ k bee chɛr

pɔɛŋ nsaa ba

bee shin nɛ esa

be aba bee pɔ mo nna,

ama esa baa nya

kusɔ nɛ e bee fin,

k bee bar mo kagbenefuli nna.

¹³Esa nɛ e bee kini kasotoji lela

bee wɔtɔ mbe kumu tɔrɔ to nna,

ama emo nɛ e bee shuli

a sɔ kasotoji bre

bee nya kumo be tɔnɔ nna.

¹⁴Benyiashempo be keŋini

du fanɛ ŋkpa be kebuye nna,

a chɛ esa to nɛ

e bee gelge luwu be kenishipere.

¹⁵Esa nɛ e bee nase asheŋ

amo be edesekpa

bee nya kemaŋkura nna,

ama esa nɛ e paŋ lakal bre

wɔ ekpa nɛ k bee yɔ

kemur to so nna.

¹⁶Enyiashempo bee fɛ nfɛra nna

pɔɛŋ nsaa wora asheŋ,

ama ewulpo bre bee ta

mbe kawulisheŋ

nna a deŋi kelafa so.

¹⁷Kabɔ wulpo e naa bar

kebagato,

ama kabɔ nɛ e bee ji

kashenteŋ bre

bee bar kayurwushi nna.

¹⁸Esa kama nɛ e bee kplaŋ

keŋini so mo

nɛ ketir nɛ anishinyɔr

e naa baa la,

ama ekama nɛ e bee shuli

a sɔ keŋini bre

bee nya kemaŋkura nna.

¹⁹Kenya kusɔ nɛ esa bee sha

wɔ ebel nna nsaa wushi kagbene.

Bewulpo nawule e naa kini

kechɛrga ashi alubi to.

²⁰Esa kama nɛ

e bee tu benyiashempo a nite

bee ki enyiashempo nna,

ama esa nɛ mo nɛ

bewulpo bee wora asheŋ bre

bee luri tɔrɔ to nna.

²¹Kumu lubi e ju a buu

alubiworapoana so,

ama basa nɛ baa wora

asheŋ niŋiso bre

be kakɔka la kumulela nna.

²²Basa lela bee yige kapetɛ nna

a yili bumo be kaman to ebi,

ama belubiworapo bre

bee fin asɔ nna a yili

basa nɛ baa wora asheŋ niŋiso.

²³Etirpo be kasawule

beeŋ tiŋ n wora adɔjibi nɛnɛ,

ama basa nɛ b maa ji kashenteŋ

beeŋ puni n suge kanya na

kikɛ ŋ ka mo.

²⁴Esa kama nɛ e maa gberge

mbe mbia kusoe

a ŋini bumo asheŋ

maa sha bumo nna na.

Esa kama nɛ e bee sha mbe mbia

bee gberge bumo kusoe nna

a ŋini bumo asheŋ saŋɛ nɛ k daga.

²⁵Basa niŋiso kɔ ajibi

saŋkikɛ nna a ji,

ama belubiworapo bre

nɛ akoŋ e wɔ aya.

¹Eche nyiashempo

bee koli kanaŋ nna,

ama eche wulpo bre

bee bure laŋ nna.

²Basa nɛ bumo be

asheŋ wora so niŋi

bee ŋana Ebɔrɛ nna,

ama esa kama nɛ

e maa wora asheŋ niŋiso

maa sa Ebɔrɛ bunyaŋ.

³Ewulpo be kamoowu be mmalga

bee bar mo kasogberge nna,

ama enyiashempo bre be kɔnɔ

bee mɔlga mo nna.

⁴Nɛ ana dɔso maŋ wɔtɔ,

ajibi maŋ wɔtɔ.

Ana dɔso be eleŋ e naa shin nɛ

ajibi damta bee ba.

⁵Kashenteŋ be shɛdajipo maa fule,

ama efɛ be shɛdajipo bre

be kamalga kikɛ la efɛ nna.

⁶Shiaworapo maaŋ tiŋ n nya

kanyiasheŋ kikɛ

ama lakalwura bre bee

nya kenyi manaŋ manaŋ nna.

⁷Sa maa tu bewulpo a wora asheŋ,

ŋkpal manɛ so

fo maaŋ tiŋ n nya

kanyiasheŋ bumo kutɔ.

⁸Enyiashempo be kanyiasheŋ

e naa ŋini mo ekpa,

ama ewulpo bre be kawuli

bee fule mo nna n ya kaa lɛ.

⁹Ewulpo nɛ asheŋ lubi maa fɔŋ,

ama esa lela bre bee fin

asheŋ be kelɔŋɛ nna.

¹⁰Esa pɔtɛ maaŋ tiŋ m pin

kagbenefuli ŋko ebesa

nɛ k wɔ esa be kagbene to.

¹¹Esa lubi be laŋ maa chɛr

nsaa bure,

ama esa lela bre

be laŋ to be asheŋ

bee yɔ anishito nna saŋkama.

¹²Kebaawɔtɔ ko bee kaa duli

kebaawɔtɔ lela nna,

ama kumo be lalaloge

bee yɛr esa luwu to nna.

¹³Esa beeŋ tiŋ m mushe

nɛ mbe kagbene maŋ fuli mo

n loge.

Kagbenefuli malɛ baŋ loge,

kagbenejija e naa bɛ so.

¹⁴Kusɔ kama nɛ esa duu,

kulubi ŋko kelela,

kumo nɛ e beeŋ teŋi.

¹⁵Ewulpo e maa shika kasheŋ to,

enyiashempo bre

bee fɛ nfɛra nna

pɔɛŋ nsaa wora asheŋ.

¹⁶Enyiashempo bee ŋana

Ebɔrɛ nna

nsaa gelge alubi,

ewulpo bre du brembreŋ nna,

e maa fɛ nfɛra pɔɛŋ

nsaa wora asheŋ.

¹⁷Esa nɛ e bee nya agbo

manaŋ manaŋ

maa kraa wora a foe.

Enyiashempo bre

bee wushi eyur nna

a wora asheŋ.

¹⁸Ewulpo bee ji mbe kawuli

be tɔnɔ nna,

ama enyiashempo bre

bee nya kenyi nna a ti so.

¹⁹Belubiworapo e naaŋ jɔŋɛ

belelaworapo ase

n fin kechɛto ashi bumo kutɔ.

²⁰Etirpo maŋ kɔ elopo,

ama damawuraana bre

kɔ beteri damta nna.

²¹Kekishi fo kurgepo

la kulubi nna,

ama Ebɔrɛ beeŋ nɛfa bekama

nɛ baa chɛ betirpo to.

²²Bumo nɛ baa kre asheŋ lubi

beeŋ foe,

ama bumo nɛ

baa kre alelasheŋ

beeŋ nya

basa be kasha nɛ yirda.

²³Kepere kenishi n shuŋ

bee bar tɔnɔ nna,

ama k baa tase a malga

nawule bre

bee bar ketir nna.

²⁴Benyiashempo beeŋ nya

kedamaya be tɔnɔ,

ama bewulpo bre be kawulisheŋ

e naa shin nɛ basa bee pin fanɛ

b la bewulpo.

²⁵Kashenteŋ be shɛdajipo

bee mɔlga basa be ŋkpa nna,

ama efɛ be shɛdajipo bre

bee lar basa kaman nna.

²⁶Esa kama nɛ

e bee ŋana Ebɔrɛ,

mo nɛ mbe mbia beeŋ nya

Ebɔrɛ be kekuŋ.

²⁷Kabɔrɛŋana du fanɛ

ŋkpa be kebuye nna;

a kuŋ esa ashi

luwu be ajigbelɛ to.

²⁸Basa e la kuwura.

Ewura nɛ e maŋ kɔ basa

be kuwura maa ji eleŋ.

²⁹Enyitipo e la enyiashempo.

Esa nɛ e bee nya agbo

manaŋ manaŋ

bee shin nɛ mbe kawulisheŋ

bee dii efuli nna.

³⁰Kagbenewushi bee sa esa

ŋkpa nna,

ama kayurbesa bre

du fanɛ kɔrtɔ lubi nna a ji esa.

³¹Esa nɛ e bee mɛaŋ betirpo

maa sa Ebɔrɛ nɛ

e to bumo na bunyaŋ nna na,

ama esa nɛ

e bee wu betirpo kuwɔr bre

bee bunyaŋ Ebɔrɛ nna.

³²Belubiworapo gbagba

be asheŋ lubi

e naa mur bumo,

ama belelaworapo bre be alela

e naa kuŋ bumo.

³³Kanyiasheŋ wɔ basa nɛ

baa pin asheŋ to be ŋgbene to nna,

ama bewulpo bre

maŋ kɔ kumo.

³⁴Kebaawora asheŋ niŋiso

e naa sa efuli kemaŋkura,

ama alubi bre

bee shin nɛ efuli bee sipa nna.

³⁵Nyɛrbi nyiashempo be asheŋ

bee bɔlɔ bewura kenishi nna,

ama nyɛrbi wulpo bre

bee nya bewura

be kasogberge nna.

¹Kɔnɔ belbelso bee ju agbo nna,

ama kɔnɔ nyaŋnyaŋso bre

bee kaa agbo nna.

²Enyiashempo be kamalga

bee koli basa nna a ba mo kutɔ,

ama kawulisheŋ e naa lar

ewulpo bre be kɔnɔ to.

³Enyɛnpe Ebɔrɛ be anishi

wɔ kaplɛkama nna,

a wu kusɔ nɛ basa lubi

nɛ belela kikɛ bee wora.

⁴Kamalga lela

bee sa basa ŋkpa nna,

ama efɛ be mmalga bre

bee mɔ esa be kiyoyu nna.

⁵Ewulpo e naa kplaŋ mo tuto

nɛ mo nio be keŋini so.

Enyiashempo kikɛ

bee shin nɛ mo tuto

nɛ mo nio bee niŋi mo ekpa nna.

⁶Basa nɛ baa wora asheŋ niŋiso

e naa ji bumo be kanya be tɔnɔ.

Ama tɔrɔ be saŋɛ belubiworapo bre

bee paŋ bumo be kanya nna.

⁷Benyiashempo be atuwebi

e naa sa basa kenyi,

mannɛ bewulpo peya.

⁸Enyɛnpe Ebɔrɛ kishi

belubiworapo be sarga ga,

ama basa lela bre be kabɔrɛkule

bee bɔlɔ mo kenishi nna ga.

⁹Enyɛnpe Ebɔrɛ kishi

belubiworapo be asheŋ wora so ga,

ama e bee sha basa nɛ baa wora

asheŋ lela bre ga.

¹⁰Kasogberge gboŋgboŋi

bee jo ekama

nɛ e maa bɔla ekpa niŋiso so

a wora asheŋ na nna.

Ekama nɛ e kini keŋini

nsaa bɛ ekpa nɛ k maŋ niŋi na so

beeŋ wu.

¹¹Luwu nɛ nchaŋ gba

maaŋ tiŋ ŋ ŋana Enyɛnpe Ebɔrɛ so,

a bishi dimɛdi

be kagbene to be nfɛra.

¹²Esa nɛ e bee wora

basa eyurto kikɛ

maa sha keŋini,

amoso mo alɛ maaŋ yɔ

enyiashempo kutɔ

n ya fin kasotoji.

¹³Esa nɛ mbe kagbene fuli

maa gbir kenishito,

ama kagbenejija bre bee shin nɛ

esa be ŋkpa bee barga mo to nna.

¹⁴Enyiashempo kikɛ

bee koya nna a ti so,

ama kawulisheŋ e bɔlɔ

bewulpo bre to.

¹⁵Kebaawɔtɔ kpakpaso to

nɛ betirpo wɔ saŋkama,

ama esa nɛ

asheŋ bee bɔlɔ kenishi bre

be kebaawɔtɔ du fanɛ

esa nɛ e bee ji

kejigboŋ saŋkama nna.

¹⁶Kebaa la etirpo

nsaa ŋana Ebɔrɛ

bɔ kedamaya nɛ tɔrɔ.

¹⁷Kebaatu esa nɛ e bee sha fo

a ji nchu nɛ nfɔl bɔ kebaatu bedoŋ

n ji gbetɛgbetɛ.

¹⁸Esa nɛ e bee nya agbo

manaŋ manaŋ kikɛ

bee bar kolu nna,

ama enyitipo bre

bee kuŋ kolu nna.

¹⁹Etɔlpo be ekpa to e kɔ ewi,

ama esa nɛ e bee wora alela bre

be ekpa to du fanɛ

kegbembi nna.

²⁰Kebia nyiashempo kikɛ

bee bar mo tuto kagbenefuli nna,

kebia wulpo e naa kplaŋ

mo nio be keŋini so.

²¹Kawulisheŋ bee fuli

ewulpo kagbene nna,

ama enyiashempo bre

bee wora asheŋ niŋiso nna.

²²Ŋkre lela kikɛ bee shi

kasotoji lela to nna.

Kechena ŋ kre asheŋ nɛnɛ

pɔɛŋ nseŋ wora

e naa shin nɛ asheŋ bee nite nɛnɛ.

²³Keshuli n wora kesheŋ

saŋɛ nɛ k daga nɛ kananɛ k daga

e naa bar kagbenefuli.

²⁴Ekpa nɛ benyiashempo bɔ

bee yɛr bumo ŋkpa to nna,

mannɛ luwu to.

²⁵Enyɛnpe Ebɔrɛ na bee shin nɛ kamoowuwuraana be nwu

bee ki alambure nna,

ama e bee kuŋ bekulpoche bre

be asɔ nna a sa bumo.

²⁶Enyɛnpe Ebɔrɛ na kishi

nfɛra lubi ga,

kamalga lela

e naa fuli mo kagbene.

²⁷Ekpa lubi so be kanya

bee bar tɔrɔ kanaŋ to nna.

Sa maa sɔ brɔbu

nseŋ kuŋ fo kumu.

²⁸Basa lela bee fɛ

nfɛra nna pɔɛŋ

nsaa tuge asheŋ to,

ama basa lubi bre

bee jujo nna

a malga mmalga lubi pɔɛŋ

nsaa fɛ amo be nfɛra.

²⁹Enyɛnpe Ebɔrɛ na maa nu

basa lubi be kabɔrɛkule,

basa nɛ baa wora

asheŋ niŋiso peya

nɛ E bee nu.

³⁰Kenishitosaŋɛ bee bar

kagbenefuli nna,

nɛ baru lela bee shin nɛ

esa be ŋkpa bee ba mo abar so.

³¹Enyiashempo e naa nu kasotoji.

³²Esa kama nɛ e maa shuli

a sɔ kasogberge

maa sha mbe kumu nna na,

ama esa kama nɛ e bee sɔ keŋini

bee nya kanyiasheŋ nna a ti so.

³³Kabɔrɛŋana e naa sa

esa kanyiasheŋ,

nɛ kamoobarase malɛ

bee sa esa kemaŋkura.

¹Dimɛdi e wɔ afɛso

ama Enyɛnpe Ebɔrɛ e wɔ aworbi.

²Dimɛdi beeŋ fɛ fanɛ

mbe asheŋ woraso walɛ,

ama Enyɛnpe Ebɔrɛ nawule

e nyi kusɔ nɛ k walɛ.

³Ta kusɔ kama

nɛ fee sha kewora m bɔɔ

Enyɛnpe Ebɔrɛ enɔ

nɛ asheŋ e nite nɛnɛ n sa fo.

⁴Enyɛnpe Ebɔrɛ e nyi

kusɔ so so nɛ e lɔŋɛ

kusɔ kama nɛ e lɔŋɛ;

E wora belubiworapo gba nna

a jo bumo be kemur be kachɛ.

⁵Enyɛnpe Ebɔrɛ kishi

esa nɛ e kɔ mpuchi ga.

Kumo alɛ maŋ kɔ emɔrɔ fanɛ

e beeŋ gberge loŋ be basa kusoe.

⁶Fo baa kɔ kasonu nɛ kashenteŋji,

Ebɔrɛ beeŋ ta fo alubi m paŋ fo.

Kabɔrɛŋana e naa shin nɛ

esa bee ŋana kulubi.

⁷Esa be asheŋ woraso

baa bɔlɔ Enyɛnpe Ebɔrɛ kenishi,

E bee shin nna nɛ

amodoŋwura nɛ mo doŋana gba

bee chena kagbenewushi so.

⁸Kebɔla ekpa niŋiso so

n nya asɔ gbrɛ

bɔ kebirkɔshi so be kedamaya.

⁹Dimɛdi e wɔ afɛso,

ama Enyɛnpe Ebɔrɛ e wɔ aworbi.

¹⁰Ewura be mmalga kɔ yuku nna,

nɛ mbe kɔnɔ to be atuwebi malɛ

bee bɛ kashenteŋ be ekpa so.

¹¹Kashenteŋ be kasɔkarga

nɛ Enyɛnpe Ebɔrɛ bee sha.

E maa sha kapuni be kayawuji.

¹²Kebaaji asheŋ

nɛ amo be ekpa so

e naa sa kuwurji eleŋ,

amoso a daga fanɛ bewura

ka kishi durmu be keji.

¹³Kashenteŋji nɛ bewura bee sha,

amoso nɛ beshenteŋjipo be asheŋ

bee bɔlɔ bumo kenishi na.

¹⁴Ewura be agbo du fanɛ

luwu be kabɔ nna,

enyiashempo e naŋ tiŋ

n shin nɛ k wushi.

¹⁵Ewura be kagbenefuli

bee bar ŋkpa nna

nɛ mbe kasha malɛ du fanɛ

dɔchubɔrɛso be bɔrɛ.

¹⁶Kanyiasheŋ nɛ kenyi

bɔ shuwa nɛ gbiti.

¹⁷Basa lela bee gelge

alubi be ekpa nna.

Esa nɛ e da ekpa nɛ e bee bɔla so so

beeŋ kuŋ mbe ŋkpa.

¹⁸Kamoowu e naa yɛr

esa kemur to

nɛ ŋkpensheŋ malɛ

bee bar esa kaseto.

¹⁹Fo ki etirpo ŋkpal fo ka

bar fo kumu ase so

bɔ fo ka tu kamoowuwuraana

m barga asɔ nɛ b suge to.

²⁰Asheŋ bee nite nɛnɛ nna

a sa esa kama nɛ e bee

kaŋ kusoe a nu keŋini,

nɛ Enyɛnpe Ebɔrɛ malɛ

bee nɛfa esa kama nɛ

e ta mbe yirda n deŋi mo so.

²¹Enyiashempo e naa pin

asheŋ to manaŋ manaŋ,

nɛ kamalga lela malɛ

bee chɛ to a shin nɛ

esa be keŋini asheŋ bee nite nɛnɛ.

²²Kanyiasheŋ bee sa

benyiashempo ŋkpa nna,

ama kawulisheŋ bre

bee bar bewulpo kasogberge nna.

²³Enyiashempo bee fɛ

nfɛra nna pɔɛŋ nsaa malga,

amoso mbe keŋini bee leŋ

basa to nna a wɔtɔ kasheŋwora to.

²⁴Kamalga lela du fanɛ

mushoŋchu nna a wora basa ebel;

nsaa sa eyur be alenfia.

²⁵Asheŋ ko bee kaa du fanɛ

asheŋ lela nna n sa dimɛdi,

ama amo be lalaloge

bee yɛr mo luwu to nna.

²⁶Akoŋ e naa kaa shin nɛ

basa bee pere kenishi a shuŋ.

²⁷Belubiworapo e naa kre alubisheŋ,

nɛ bumo be m malga

malɛ du fanɛ

ajanwulɛ a chɔɔ basa.

²⁸Esa nɛ e bee ku asheŋ

bee bar kebagato nna

nɛ esa nɛ e bee sha ŋkuli

malɛ bee ku beteri kpakpaso to.

²⁹Basa nɛ baa tintiŋ basa

nɛ baa wora asheŋ na

bee fule bumo braana nna

a wɔtɔ asheŋ lubi to.

³⁰Esa nɛ e bee ŋe basa anishi

bee ku asheŋ nna,

nɛ esa nɛ e duŋ kɔnɔwuro malɛ

yil kulubi be kewora so.

³¹Kumu fuful la kemankura

be kuwurwuro nna,

basa nɛ baa wora

asheŋ niŋiso nawule

e naa buu kumo.

³²Kanyiti be keji

bɔ kenyɛn be keji.

Enyitipo chɔ enapo

nɛ e kɔ m pɔɔ nde damta so.

³³Basa bee kaa bishiso nna

a fin kananɛ baaŋ wora asheŋ,

ama Enyɛnpe Ebɔrɛ nawule

e naa yili kusɔ kikɛ.

¹Ŋ kaa bee ji nchu nɛ nfɔl nawule

nsaa kɔ kagbenewushi

bɔ ŋ kaa bee ji ebel nsaa wɔ

kagbenejija to saŋkama.

²Kenya nyiashempo

bee ji ebi wulpo so kuwura nna,

nɛ mo nɛ bibi e barga kapetɛ to.

³Edɛ nɛ baa ta a wora

shuwa nɛ gbiti a keni

a pin amo be kela;

ama Enyɛnpe Ebɔrɛ na

e naa wora

dimɛdi be kagbene a keni.

⁴Alubisheŋ bee wora

belubiworapo ebel nna

nɛ efɛ malɛ bee wora befɛpo ebel.

⁵Fo baa wora betirpo eyurto,

Ebɔrɛ nɛ E to bumo na

nɛ fee wora eyurto na.

Ebɔrɛ malɛ beeŋ gberge bekama

nɛ bumo braana be awurfoŋ

bee wora bumo ebel na kusoe.

⁶Benanabi du fanɛ

kuwurwuro nna n sa bumo nanaana;

nɛ mbia malɛ bee ji njɔŋ

ŋkpal bumo kurgepoana so so.

⁷Kananɛ kamalga nɛ k bee lar

anishi maaŋ tiŋ n shi

ewulpo be kɔnɔ to na;

aloŋ nɛ efɛ maŋ daga ewurjipo

be kɔnɔ to.

⁸Brɔbu bee shuŋ nna

fanɛ kananɛ baa shuŋ esa kushuŋ

nɛ e bee wora esa nɛ

e shuŋ mo kushuŋ na be aparsheŋ na.

K bee shin nna nɛ

asheŋ bee nite nɛnɛ a sa

esa nɛ e sa kumo na.

⁹Esa nɛ e bee ta asheŋ a paŋ

bee nya beteri damta nna;

ama esa nɛ e maa ta asheŋ a paŋ bre

bee paŋ beteri nna.

¹⁰Enyiashempo be kegbɛlɛ gba

bee shin nɛ e bee koya

asheŋ manaŋ manaŋ

a chɔ ewulpo be kebri

alɛ damta n ŋini mo asheŋ.

¹¹Kumu kpakpasowura kutɔ

nɛ baa shuŋi belubiworapo

nɛ b kɔ kusoe kpakpaso

a kini kenu n sa na.

¹²Fo ka purgi buluŋ cheso

nɛ k bee yɛla kenishi to

a fin kumo pibi

bɔ fo ka tu ewulpo

a wora kawulisheŋ.

¹³Fo baa ta kulubi

a ka kelela be kukɔ,

alubi maaŋ lar fo laŋ to kikɛ.

¹⁴Emɔrɔ be kefara

du fanɛ nchu be gbi

ka bee shin nɛ k futi nna.

Lar kamɔrɔji to manaŋ

pɔɛŋ nɛ k kurge asheŋ n sa fo.

¹⁵Enyɛnpe Ebɔrɛ kishi bumo

nɛ baa malga a kuŋ belubiworapo,

nɛ bumo nɛ baa ku asheŋ a deŋi

basa nɛ b maŋ wora kulubi na ga.

¹⁶Amansherbi be kejija

a laŋɛ ewulpo be kekoya so

maŋ kɔ tɔnɔ,

ŋkpal manɛ so ewulpo maaŋ tiŋ

ŋ koya shɛŋ.

¹⁷Beteri bee sha abar nna;

nɛ bekurgepo malɛ

bee cha abar to ashi tɔrɔ to.

¹⁸Esa nɛ e maŋ kɔ lakal

e naa sɔ mo barkasa

be kukɔ a sulɔ mbe kumu.

¹⁹Elushapo kikɛ

maa barga alubi be kewora.

Fo baa puchi ga fee fin

asheŋ nna a sa fo kumu.

²⁰Esa kama nɛ e maa ji kashenteŋ

maaŋ yɔ anishito kikɛ.

Efɛ bee bar esa tɔrɔ nna.

²¹Ebesa nɛ kagbenejija e

naa mɔ ewulpo mo tuto.

²²Kebaa du wasawasa

bee teŋi esa be ŋkpa so nna;

ama saŋkama be kenishitogbir

bee ku esa be ŋkpa so

manaŋ manaŋ nna.

²³Edemujipo lubiana nɛ baa ŋana a sɔ brɔbu na

maa tiŋ a ji demu nɛ kumo be ekpa so.

²⁴Enyiashempo kikɛ bee pin kusɔ nɛ k daga kewora nna;

ama ewulpo bre maa tiŋ a yili mbe nfɛra kukoŋwule.

²⁵Mbia wulpo bee wɔtɔ bumo tutoana ebesa to nna,

nsaa shin nɛ bumo nioana malɛ bee wora n daa nyi.

²⁶Esa nɛ e maŋ wora n jija maŋ daga kasogberge;

nɛ esa nɛ e bee wora asheŋ nɛ a niŋi ekpa maŋ daga tɔrɔ.

²⁷Enyiashempo maa malga ga.

E bee wora asheŋ boeŋ boeŋ nna.

²⁸Hale ewulpo gba baa maa tuge asheŋ to chilchil

baa ta mo nna a yili enyiashempo be eyilikpa.

¹Kebaafɛ fo nawule be kumu so be asheŋ,

nɛ kekini kesɔ esa pɔtɛ be nfɛra

la kejimuni nɛ kawulisheŋ nna.

²Ewulpo e naa kini asheŋ be kepin to,

nsaa kaŋɛ fanɛ mo nawule be nfɛra e walɛ.

³Kulubi nɛ anishinyɔr e wɔ aya.

Alubiworapo kikɛ nɛ nyɔmɔ nna.

⁴Enyiashempo be mmalga du fanɛ ketirbu chiŋgeliŋ to be nchu

nɛ a bee bul a teŋi a shile eleŋso fanɛ kabombi nna.

⁵Alubiworapo maŋ daga kesɔ n yige ashi kasogberge to,

esa nɛ e maŋ wora n jija malɛ maŋ daga kemɔn kashenteŋ.

⁶Ewulpo be kudonduloŋ bee wɔtɔ mo asheŋ to nna,

nɛ mbe kɔnɔ malɛ bee bar mo kebri.

⁷Ewulpo be mmalga e naa ki fanɛ efɔl a kre mo,

nɛ mbe atuwebi malɛ bee gberge mo a wɔtɔ asheŋ to.

⁸Ŋkuli wɔ ebel ga; nɛ basa bee sha kumo.

⁹Etɔlpo nɛ esa nɛ e bee jija asɔ kikɛ la kukoŋwule nna.

¹⁰Enyɛnpe Ebɔrɛ du fanɛ

ketempreŋ kuŋso nna nɛ basa

nɛ baa wora asheŋ niŋiso bee shile a yɔ mo kutɔ n ya kaa nya kekuŋ.

¹¹Damawuraana bee fɛ nna fanɛ

bumo be amansherbi e naa kuŋ bumo

fanɛ kananɛ baa pɔr egbal a kulti kade a kuŋ kumo na.

¹²Kamoowu bee yɛr esa kemur to nna;

ama kamoobarase bre bee sa esa kemaŋkura nna.

¹³Esa kama nɛ e maa kaŋ kusoe

a nu asheŋ nɛnɛ pɔɛŋ nsaa tuge amo to

la ewulpo nna nɛ anishinyɔr bee tiŋ a ji mo.

¹⁴Kagbenefuli bee chɛ to nna a sa esa alenfia ashi kulɔ to;

fo baŋ paŋ kumo, kumo ere fo tama loge.

¹⁵Enyiashempo kikɛ bela ase nna nɛ e koya asheŋ saŋkama.

¹⁶Kakɛ bee bugi ekpa nna a sa esa,

nɛ e bee tiŋ a yɔ basagboŋ kutɔ.

¹⁷Esa baŋ juŋkpar m malga ashi demujikpa,

fee fɛ nna fanɛ mo e kɔ kashenteŋ ama mo barkasa gba baŋ malga nna.

¹⁸Basa anyɔ baa gberge demu to nɛ k maa nya edesekpa,

kesulgeso e naŋ ku demu na to.

¹⁹Keyɔ eteri nɛ fo wora n da so kutɔ n ya fin kechɛto

du kpakpa a chɔ kebure n luri kade nɛ b pɔr egbal ŋ kulti to.

²⁰Kɔnɔlelawura maa wora n daa nyi nna kikɛ.

²¹Atugebi beeŋ tiŋ m mɔ esa,

ŋko n sa mo ŋkpa;

Esa kama malɛ beeŋ nya mbe m malga be kakɔka.

²²Fo baŋ nya eche fo nya kakɛ lela.

Eche lela la Enyɛnpe Ebɔrɛ be kakɛ nna.

²³Etirpo bee kule nna pɔɛŋ nsaa nya kechɛto;

ama damawura bre bee malga kanaŋkama nna.

²⁴Beteri damta beeŋ tiŋ n jija esa be kebaawɔtɔ;

ama eteri ko chɔ eniopibi.

¹Fo ka bee ji kashenteŋ nsaa la etirpo

bɔ fo ka la ewulpo nɛ efɛpo.

²Kebaa sha kusɔ be kewora nsaa maa kɔ kumo be kenyi maŋ walɛ;

kewora gerger n to kusɔ n da malɛ maŋ kɔ tɔnɔ.

³Kawuli e naa yɛr basa ko tɔrɔ to

nɛ baa pɔlɔ Enyɛnpe Ebɔrɛ.

⁴Damawura bee nya beteri saŋkama nna;

ama etirpo bre mo teriana bee shile nna a ka mo.

⁵Efɛ be shɛdajipo ashi demujikpa maaŋ ta mbe kumu n ji

nɛ e maŋ nya kasogberge.

⁶Ekama beeŋ ba sha keji esagboŋ,

ŋko esa nɛ e beeŋ tiŋ n chɛ mo to keteri.

⁷Etirpo maŋ kɔ eniopibi, a bishi eteri.

Kanaŋ kamaso nɛ e pere kenishi a sha bumo baa shile nna a ka mo.

⁸Esa kama nɛ e bee fin kanyiasheŋ

bee sha mbe kumu nna na.

Esa kama nɛ e pere kenishi ŋ koya, asheŋ beeŋ nite nɛnɛ n sa mo.

⁹Efɛ be shɛdajipo ashi demujikpa maaŋ paŋ mbe kasogberge kikɛ.

Efɛpo malɛ kikɛ beeŋ mur.

¹⁰Ewulpo maŋ daga kedamaya;

Kenya malɛ maŋ daga keji ewurbi so kuwura.

¹¹Kanyiti be keji la kanyiasheŋ nna.

Esa baŋ wora fo kulubi nɛ fo kplaŋ mo so,

k la kemaŋkura nna n sa fo.

¹²Ewura be agbo du fanɛ buluŋ ka bee ponte to nna

nɛ mbe kuwɔrwu malɛ du fanɛ bunyaŋ ka tɔr afitiri so.

¹³Kebia wulpo bee wɔtɔ mo tuto asheŋ to nna;

Eche nɛ asheŋ maa bɔlɔ kenishi

malɛ du nna fanɛ bɔrɛfurbi

nɛ k maa teŋ manaŋ.

¹⁴Esa beeŋ tiŋ n ji nwu nɛ amansherbi be kapetɛ;

ama Enyɛnpe Ebɔrɛ nawule e naa sa eche lela.

¹⁵Nɛ fo kɔ ntɔl nsaa dese a di,

akoŋ e naa mɔ fo.

¹⁶Bɛ Ebɔrɛ be mbra so nseŋ ji efute n chɛr.

Fo kplaŋ amo so feeŋ wu manaŋ.

¹⁷Kekɛ etirpo kusɔ

du fanɛ fo ka ta kumo m paŋ Enyɛnpe Ebɔrɛ nna;

Ebɔrɛ beeŋ ka fo kumo be kukɔ.

¹⁸Ŋini fo mbia kusɔ nɛ k daga pɔɛŋ nɛ b daŋ;

Fo baa maa gberge bumo kusoe a ŋini bumo asheŋ

fee mɔ bumo ŋgblaŋto nna na.

¹⁹Shin nɛ esa kama nɛ mbe agbo wɔ mo,

e ka mbe agbo na be kukɔ mo gbagba.

Nɛ fo baŋ ka kumo be kukɔ kelekoŋwule,

feeŋ baa ka mbe agbo be kukɔ saŋkikɛ.

²⁰Esa nɛ e bee nu kasotoji nɛ keŋini,

bee ki enyiashempo nna.

²¹Dimɛdi beeŋ tiŋ ŋ kre ŋkre;

ama Enyɛnpe Ebɔrɛ be aparsheŋ e naŋ wora.

²²Kusɔ nɛ dimɛdi bee fin e la kashenteŋji;

K baa la etirpo bɔ k baa la efɛpo.

²³Fo baa wora Ebɔrɛ kasonu feeŋ ji efute tenteŋ;

Esa nɛ e bee ŋana Ebɔrɛ be kagbene bee dese mo nna;

e maa lɔ kufu.

²⁴Ajibi be keku n ji gba du betɔlpo ko so kpakpa nna.

²⁵Gberge kumukpakpasowura kusoe, nɛ esa nɛ e maŋ nyi e koya kebaawɔtɔ;

Ama kefiɛ enyiashempo bre so bee sa mo lakal nna.

²⁶Kebia nɛ e bee yuri mo tuto,

nsaa ju mo nio ashi laŋ to bee ŋaba mbe kumu nna na.

²⁷Fo baŋ yige kebaa koya,

feeŋ teŋ kusɔ nɛ fo nyi gba so.

²⁸Efɛ be shɛdajipo bee kuŋ kashenteŋji ekpa nna;

Asheŋ lubi bee wora alubiworapo ebel nna.

²⁹Kasogberge wɔtɔ nna

ŋkpal basa kpeŋso so.

Ewulpo kikɛ bee nya kebri nna.

¹Nsa bee ta esa nna a ki elushapo,

a shin nɛ e bee nite a puchi.

Esa kama nɛ nsa wɔ mo la ewulpo nna.

²Ewura be kanya agbo du fanɛ buluŋ ka nya agbo nna.

Keshin nɛ ewura e nya agbo du fanɛ kapotɔ nna.

³Kebaa maa sha kolu bee sa esa kemaŋkura nna.

Ewulpo e naa sha kamɔrɔji.

⁴Edɔpo tɔlpo nɛ e maa dɔ saŋɛ nɛ k daga maa nya adɔjibi.

⁵Dimɛdi be nfɛra fɛso du chiŋgeliŋ nna

fanɛ ketirbu chiŋgeliŋ to be nchu na.

Enyiashempo nawule e naa tiŋ a saŋ amo.

⁶Basa damta bee tre bumo amu beshenteŋjipo nna,

ama kashenteŋ be beshenteŋjipo maa tiŋ a nya.

⁷Esa nɛ e niŋi kikɛ be kebaawɔtɔ niŋi nna.

Mbia nɛ baa koya mbe asheŋ woraso bee nya nɛfa nna.

⁸Ewura baa tase a ji demu mbe anishi yuu alubiworapoana so nna.

⁹Wanɛ e naŋ tiŋ m puchi ŋ kaŋɛ fanɛ mbe nfɛra walɛ nɛ e maŋ wora kulubi?

¹⁰Enyɛnpe Ebɔrɛ kishi kapuni be kasɔkarga

nɛ kapuni be asɔ karga asɔ ga.

¹¹Mbia be aworbi e naa ŋini basa nɛ baaŋ ba ki echefoso.

¹²Enyɛnpe Ebɔrɛ e sa anyi asoe nɛ anyee ta a nu asheŋ,

nɛ anishi nɛ anyee ta a wu.

¹³Fo baa sha edi ga fee ki etirpo nna,

ama fo pere kenishi a shuŋ bre, fo maŋ paŋ fo kusɔ jiso.

¹⁴B baŋ ku yawujipo kikɛ asɔ be yawu e beeŋ fubel,

ama kumo be kaman nɛ e naa puchi

ŋkpal e ka nya asɔ na n tɔ pɔtɔ pɔtɔ so.

¹⁵Kanyiasheŋ be kamalga bɔ shuwa nɛ yawu kpakpaso be abitasɔ.

¹⁶Esa baŋ ta mbe kusɔbuuso

n nase tarma n ji kukɔ n sa efɔ,

nɛ efɔ na baŋ maŋ tiŋ ŋ ka kukɔ na,

fo sɔ amodoŋwura be kusɔbuuso na n tal to.

¹⁷Ajibi be kepuni n ji wɔ ebel nna,

ama amo be lalaloge du fanɛ shishɛr nna kɔnɔ to.

¹⁸Fo baa bela ase nɛ fo kɔ kena,

kumo ere fin kasotoji lela nɛ k chɛ fo to.

¹⁹Esheŋjipo kikɛ maŋ tiŋ ŋ keta ashiri,

amoso baa gelge mo.

²⁰Esa nɛ e bee sho mo tuto nɛ mo nio kɔnɔ be ŋkpa maa teŋiso,

k du nna fanɛ fitila ka duŋ tentembiri to epul to nna.

²¹Fo baa maŋ gben pɔɛŋ nseŋ dii dama,

fo asɔ na maa chɛr nsaa mur.

²²Sa maa kɔ a fin kewora n tal esa nɛ e wora fo kulubi to.

Shin nɛ Enyɛnpe Ebɔrɛ e bishi kuwule n sa fo.

²³Enyɛnpe Ebɔrɛ kishi basa nɛ baa ta kapuni be asɔ karga asɔ a ber asɔ ga.

²⁴Enyɛnpe Ebɔrɛ e nyi kananɛ dimɛdi be asheŋ bee nite.

Nuso nɛ esa gbagba beeŋ tiŋ m pin

kananɛ asheŋ beeŋ ba kaa du n sa mo.

²⁵Fɛ nfɛra nɛnɛ pɔɛŋ nseŋ nase kɔnɔ n sa Ebɔrɛ.

Nɛ fo baŋ maŋ tiŋ n wora m bɔlɔ fo kɔnɔ naseso so, k maŋ walɛ.

²⁶Ewura nyiashempo kikɛ bee gberge belubiworapo kusoe kenishipereso nna.

²⁷Enyɛnpe Ebɔrɛ be fitila bee wu dimɛdi be nfɛra,

nɛ mbe kebaawɔtɔ to kikɛ nna.

²⁸Kashenteŋji nɛ kasha e naa shin nɛ bewura bee ji a chɛr.

²⁹Mbifɔlbi be kemaŋkura e la bumo be eleŋ,

nɛ benimu malɛ be kemaŋkura la bumo be emin fuful.

³⁰Kenishipereso be kebri beeŋ tiŋ n lara esa ashi asheŋ lubi to.

¹Enyɛnpe Ebɔrɛ e naa ŋini Ewura be kagbene ekpa,

fanɛ nchu be kubɔr na.

²Dimɛdi be aworbi beeŋ tiŋ m par mo,

ama Enyɛnpe Ebɔrɛ e nyi esa be kagbene to.

³Kewora kusɔ nɛ k niŋi nɛ kashenteŋji bee par Enyɛnpe Ebɔrɛ a chɔ sarga be kelara.

⁴Ŋkpensheŋ nɛ kamoowu la alubi be asɔrso nna,

nɛ belubiworapo bee sha amo ga.

⁵Kewushi eyur ŋ kre asheŋ pɔɛŋ nseŋ wora amo bee bar tɔnɔ nna,

ama brembreŋ be kasheŋwora bee bar ketir nna.

⁶Kebirkɔshi be kanya maa chɛr nsaa mur,

amo alɛ maa chɛr nsaa yɛr esa luwu to.

⁷Belubiworapo be kenyaŋɛto a fin basa be kemɔ

e naa yɛr bumo kemur to

ŋkpal b kaa maa sha kewora

kusɔ nɛ k niŋi so.

⁸Basa nɛ bumo be nfɛra bee ji a biri bumo kikɛ be asheŋ woraso maa niŋi,

ama basa nɛ b maa wora a foe bre be asheŋ kikɛ niŋi nna.

⁹Kechoŋi be awɔlto be kedese,

bɔ fo nɛ eche elushapo kaa wɔ ebu to.

¹⁰Asheŋ lubi bee wora belubiworapo ebel nna,

bumo alɛ maa wu bumo braana kuwɔr.

¹¹Alubiworapo be kasogberge bee ŋini ewulpo asheŋ nna.

Enyiashempo kikɛ bee nya kenyi nna ashi kusɔ nɛ b ŋini mo to.

¹²Ebɔrɛ nɛ e niŋi na,

nyi kusɔ nɛ k bee wora belubiworapoana pe.

Mo alɛ e naŋ bar bumo kaseto.

¹³Fo baŋ kini kenu etirpo be kushu,

fo alɛ gba beeŋ shu nɛ basa maaŋ tuge fo.

¹⁴Ashiri to be kakɛ beeŋ tiŋ n lɔŋɛ fo nɛ esa nɛ e nya agbo n wɔtɔ fo be kefɛato.

¹⁵Asheŋ be keji nɛ amo be ekpa so bee sa belelaworapo kagbenefuli nna,

nsaa shin nɛ belubiworapo malɛ bee nyɔŋkɔŋ to.

¹⁶Esa nɛ e maa pin asheŋ to maa chɛr nsaa luri luwu to.

¹⁷Kɔnɔbel be kebaa sha ga

nɛ kamooji nɛ kasanuu

bee ta esa nna a ki etirpo.

¹⁸Belelaworapo be etɔrɔ bee kilgi nna

a ba belubiworapo so.

¹⁹Kiyi to chil be kechena bɔ ketu eche elushapo n chena.

²⁰Enyiashempo bee ji nna a ka a yili echefoso,

ama ewulpo bre bee ji kusɔ nɛ e nya kikɛ nna a loge kachɛ koŋwule.

²¹Esa kama nɛ e bee wora asheŋ nɛ a niŋi

nsaa sha basa

bee yɔ anishito nna,

nsaa nya kemaŋkura nɛ kebaawɔtɔ lela.

²²Enyiashempo koŋwule beeŋ tiŋ ŋ kɔ m pɔɔ kade nɛ b pɔr egbal ŋ kulti so,

n jija asɔ nɛ a bee kuŋ basa nɛ b wɔ kumo to kikɛ.

²³Esa kama nɛ e bee tiŋ a keta mbe kɔnɔ nɛ kudonduloŋ,

bee mɔlga mbe kumu ashi asheŋ lubi nɛ tɔrɔ to nna.

²⁴Esa kama nɛ kamoowu nɛ ŋkpensheŋ bɔlɔ mo to,

bee wora basa eyur to nna.

²⁵Etɔlpo nɛ e maa sha kushuŋ,

be asɔ shaso bee yɛr mo luwu to nna,

²⁶ŋkpal manɛ so saŋkikɛ e bee fin kenya kusɔ ko nna.

Ama esa nɛ e bee wora asheŋ niŋiso bre

bee kaa kɔ asɔ nna a kɛ saŋkama.

²⁷Enyɛnpe Ebɔrɛ kishi belubiworapo be sarga ga.

Fɔŋfɔŋ saŋɛ nɛ b nya kumo ekpa lubi so na.

²⁸Efɛ be shɛda maaŋ tiŋ n yili kikɛ,

kashenteŋ be shɛda nawule e naŋ yili.

²⁹Kenyɛn nɛ belubiworapo kɔ a wora asheŋ,

ama basa nɛ baa wora asheŋ niŋiso bre

bee fɛ nfɛra nna pɔɛŋ nsaa wora asheŋ.

³⁰Dimɛdi be kanyiasheŋ kikɛ nɛ asheŋ be kepinto nɛ ŋkre kikɛ maaŋ tiŋ m pɔɔ Enyɛnpe Ebɔrɛ so.

³¹Kanaŋkama so nɛ fo bela ase;

hale nɛ fo kena to be egbaŋɛ nɛ benapo wora shiriya gba,

Enyɛnpe Ebɔrɛ na e naŋ pɔɔ so.

¹Ketre lela bɔ kedamaya.

Ketre lela chɔ shuwa nɛ gbiti.

²Enyɛnpe Ebɔrɛ na e to etirpo nɛ damawura kikɛ.

³Enyiashempo baaŋ wu kenishipere ka bee ba e bee gelge kumo nna,

ama esa nɛ e maa pin asheŋ to manaŋ manaŋ bre bee suse kumo to nna;

kumo be kaman nɛ e wora n daa nyi nna.

⁴Kamoobarase nɛ kabɔrɛŋana e naa sa esa kanya

nɛ kemaŋkura nɛ ŋkpa tenteŋ.

⁵Ewi nɛ ajigbelɛ e wɔ belubiworapo be ekpa to,

ama esa nɛ e bee kuŋ mbe kumu bre

bee gelge amo nna.

⁶Ŋini kebia ekpa nɛ k daga fanɛ e bɔla so,

saŋɛ na so, e kaŋ daŋ

e maaŋ kpele ashi kumo so.

⁷Damawuraana e naa ji betirpo so kuwura,

nɛ basa nɛ baa paŋ asɔ bee ki

bumo nɛ b paŋ bumo kutɔ na be anya.

⁸Bekama nɛ baa duu alubi beeŋ nya amo be tɔnɔ.

Bumo be agbo lubi e naŋ yɛr bumo kemur to.

⁹Esa kama nɛ e bee bugi kagbene a kɛ beeŋ nya nɛfa,

ŋkpal mo nɛ betirpo ka bee barga mbe kusɔ jiso to so.

¹⁰Ju esa nɛ e bee wora basa eyurto n lar,

nɛ kolu, nɛ katege, nɛ asheŋ wurbi e loge.

¹¹Fo baa sha asheŋ niŋiso nsaa kɔ kamalga belbelso,

kumo ere feeŋ tiŋ n ji ewura kenekpa.

¹²Enyɛnpe Ebɔrɛ be anishi yuu beshenteŋjipo kikɛ so nna,

ama e maa sa befɛpo bre be malga kashuli.

¹³Etɔlpo e naa kaŋɛ fanɛ buluŋ wɔ kowushina,

amoso e maaŋ lar kowu nɛ buluŋ na e pɛ mo.

¹⁴Eche nɛ e bee lar mo kul kaman be mmalga du fanɛ kemaŋ chiŋgeliŋ nna,

nɛ bumo nɛ Enyɛnpe Ebɔrɛ be agbo wɔ so na

bee tɔr kumo to.

¹⁵Kasogberge be kuchuchɔ

e naa ju kawulisheŋ nɛ k bɔlɔ kebia to.

¹⁶Basa nɛ baa puni betirpo a dii dama na,

nɛ bumo nɛ baa kɛ damawuraana asɔ na,

beeŋ ki betirpo.

Benyiashempo be keŋini

¹⁷Kaŋ kusoe n nu benyiashempo be mmalga ere,

nsaa ta bumo be keŋini a wɔtɔ kagbene to.

¹⁸Nɛ fee nyiŋi amo nsaa kute amo to,

fo kagbene beeŋ fuli fo.

¹⁹Mee ŋini fo kesheŋ ere kabre nna,

saŋɛ na so feeŋ ta fo yirda n wɔtɔ Enyɛnpe Ebɔrɛ na to.

²⁰M maŋ sibɛ mmalgamu adesa n sa fo,

nɛ a baa ŋini fo asheŋ nsaa sa fo lakal, ²¹a shin nɛ fo baa tiŋ a pin asheŋ to,

m ba kaa kute kusɔ nɛ b shuŋi fo fanɛ fo ya wora na be kashenteŋ a?

Sososo

²²Sa maŋ puni esa ŋkpal e ka la etirpo so,

ŋko m mutir esa ashi demujikpa

ŋkpal e ka maŋ kɔ shɛŋ so.

²³Ŋkpal manɛ so Enyɛnpe Ebɔrɛ na e naŋ chɛ bumo to,

nseŋ tɔrɔ bekama nɛ b tɔrɔ bumo na n tal to.

Kenyɔsopo

²⁴Saa maa ji basa nɛ baa nya agbo manaŋ manaŋ kenekpa,

²⁵nɛ mannɛ aloŋ fo alɛ gba beeŋ ki kananɛ b du na

nsaa maŋ naŋ tiŋ n chɛrga.

Kesasopo

²⁶Sa maa sɔ beko be akɔ a deŋi fo kumu,

²⁷nɛ fo baŋ maŋ tiŋ ŋ ka amo,

baaŋ sɔ fo asɔ kikɛ n ta fo gedo gba n ti so n tal to.

Kenasopo

²⁸Sa maa lɔŋɛ fo nɛ basa be egbaŋ to

be kedulgijembu dra nɛ fo nananyɛnana yuu na a yuu.

Kenusopo

²⁹Nɛ fo baa shuŋ fo kushuŋ nɛnɛ,

bewura nɛ feeŋ baa shuŋ a sa mannɛ bebɔlpo.

Keshesopo

¹Ewura baŋ tre fo fanɛ fo ba tu mo n ji,

fo koli fo kumu nɛnɛ.

²Nɛ fee ji ga fo ku fo epun so,

³nsaa maa fin fanɛ fo ji

kusɔ nɛ k wɔ ndoŋ kikɛ.

Mannɛ ajibi na kikɛ e deŋ fo.

Keshunusopo

⁴Sa maa mɔ fo kumu a fin kedii dama.

Ba nyi fo eleŋ be ekar.

⁵Ŋkpal manɛ so fo amansherbi beeŋ tiŋ n loge epul to,

fanɛ kananɛ kusore beeŋ yili epul to n firgi n choŋ na.

Keburwasopo

⁶Sa maa tu Miiriworaana a ji,

ŋko a yɛlga mbe ajibi lela.

⁷E beeŋ kaŋɛ fanɛ fo ji kananɛ fee sha,

ama kumo be loŋ maŋ shi mbe kagbene to.

⁸Feeŋ kwiɛ ajibi nɛ fo ji na kikɛ,

nɛ kechɔrɔ nɛ fo chɔrɔ mo na e ki jiga.

Kekpanusopo

⁹Sa maŋ jija saŋɛ a ŋini ewulpo asheŋ.

E maaŋ ta fo kanyiasheŋ be mmalga na n shuŋ.

Kudusopo

¹⁰Sa maa lɔŋɛ egbaŋ to be kedulgijembu dra a yili,

ŋko a dɔ a luri amunibi be kasawule to.

¹¹Enyɛnpe Ebɔrɛ gbagba e naa kɔ a mɔlga bumo.

Mo alɛ beeŋ yili bumo be katelamu

n ji bumo be demu n sa bumo.

Kudukakosopo

¹²Baa kaŋ kusoe a nu keŋini

nsaa wora ania a koya asheŋ.

Kuduanyɔsopo

¹³Sa maŋ yige kegberge fo kebia kusoe ŋ ŋini mo asheŋ.

Fo gberge mo kusoe e maaŋ wu.

¹⁴Kuya kebia so ŋ ŋini mo asheŋ,

nɛ kumo be loŋ e mɔlga mo

ashi luwu to kachako so.

Kuduasasopo

¹⁵Ma kebia, nɛ fo baa nyi asheŋ

k bee fuli ma kagbene nna.

¹⁶M ba nu fo ka bee ji kashenteŋ malɛ,

ma kumu bee tin nna.

Kuduanasopo

¹⁷Sa maŋ shin nɛ belubiworapo be asheŋ

e baa keta fo kayɛlga,

ama shin nɛ kabɔrɛŋana be kebaawɔtɔ e pere fo kenishi.

¹⁸Nɛ fo wora loŋ bre,

asheŋ beeŋ nyalɛ n sa fo echefoso.

Kuduanusopo

¹⁹M pibi, nu nfe,

ta kanyiasheŋ a bɛ ekpa niŋiso so.

²⁰Sa maa tu basa nɛ baa wu nsa a choŋ a gben,

ŋko n wu ajibi a choŋ a gben a wora asheŋ.

²¹Ketir beeŋ pɛ besanuupo nɛ bejibishapo,

baaŋ baa dese a di nna,

nsaa buu asɔ farbi.

Kuduashesopo

²²Baa nu fo tuto be mmalga,

mo e kurge fo.

Sa maŋ kplaŋ fo nio so ashi mbe mbel to.

²³Jija amansherbi ŋ koya kashenteŋji

nɛ kanyiasheŋ nɛ kamootiŋ.

Sa maŋ yige amo n lɛ kikɛ.

²⁴Esa nɛ e bee wora asheŋ niŋiso kikɛ,

mo tuto be kagbene bee fuli mo nna.

Kebia nyiashempo be asheŋ bee par mo kurgepo nna.

²⁵Shin nɛ fo tuto nɛ fo nio be ŋgbene

e baa fuli bumo.

Shin nɛ eche nɛ e kurge fo be kumu e saŋɛ mo.

Kuduashunusopo

²⁶M pibi baa kaŋ kusoe a nu ma mmalga,

nsaa wora ma asheŋ woraso.

²⁷Sakaleche du fanɛ kejamaŋ chiŋgeliŋ nna,

nɛ eche nɛ e bee lar mo kul be kaman

malɛ du fanɛ ketirbu chiŋgeliŋ na.

²⁸Baa jo fo nna fanɛ eyu na,

nɛ b da fo n lɛ alubiworapoana to.

Kuduaburwasopo

²⁹Wanɛ e naa luri asheŋ to saŋkama?

Wanɛ e naa kɔ kolu saŋkama?

Wanɛ e naa tɔr a margaso?

Wanɛ be anishi e pere kpaw ŋkpal kasanuu so?

³⁰Basa nɛ baa nuu nsa

n ya kaa fo kiidiso na.

³¹Sa maŋ keni kananɛ nsa pere nsaa walɛ,

ŋko a kpa edɛ glashi to,

ŋko a wushi ebɔl to so.

³²Amo be lalaloge du fanɛ kuwɔ ka duŋ fo,

n ta kumo be kɔrtɔ lubi n wɔtɔ fo to nna.

³³Nsa beeŋ tiŋ n shin nɛ fo anishi e baa kurge,

nɛ fo nfɛra e baa wul fo to.

³⁴A bee wora fo fanɛ fo ka wɔ nchu so be kuloŋ to

ashi teku so nna, nɛ afu bee ber fo a yɔ a ba na.

³⁵Feeŋ pira nɛ fo maŋ pin

kananɛ fo wora m pira.

Feeŋ baa dese a fin kananɛ feeŋ koso ŋ gben,

ama nsaa fin kananɛ kare beeŋ cha

nɛ fo naŋ nya nsa n nu.

Kuduakpanusopo

¹Sa maa besa belubiworapo eyur,

ŋko a yɛlga kebaa tu bumo a wora asheŋ.

²Asheŋ lubi nawule be asheŋ nɛ baa fɛ saŋkama.

Bumo be mmalga kikɛ la kananɛ baaŋ wora kulubi nna.

Adunyɔsopo

³Kanyiasheŋ e naa pɔr kowu,

nɛ kenu n sa abar malɛ bee shin nɛ k bee yili.

⁴Kenyi malɛ e naa shin nɛ asɔ lela

nɛ yawu kpakpaso be asɔ bee bɔlɔ laŋ.

Adunyɔ nɛ kako

⁵Enyiashempo e la elempo.

Kenyi bee shin nɛ esa be eleŋ nɛ yuku bee ti so nna.

⁶Ŋkpal manɛ so kasotoji lela

nɛ kebela ase nɛnɛ e naa shin nɛ baa kɔ kena a pɔɔ so.

Adunyɔ nɛ anyɔ

⁷Ewulpo maaŋ tiŋ m pin kanyiasheŋ be mmalga to.

B baa malga kenishipere be mmalga ewulpo maŋ kɔ shɛŋ a kaŋɛ.

Adunyɔ nɛ asa

⁸Esa nɛ e bee kre alubisheŋ

nɛ baa tre alubiworapo.

⁹Ewulpo be nfɛra fɛso kikɛ maŋ walɛ.

Basa kishi ewulpo nɛ e bee wora basa eyur to ga.

Adunyɔ nɛ ana

¹⁰Kesɔ kapɔshi be tɔrɔ be jemanɛ

bee shin nɛ esa be eleŋ bee kuso nna.

Adunyɔ nɛ anu

¹¹Sɔ bumo nɛ b gberge a yɔ nɛ b ya mɔ

kenyanyaŋɛso na n yige.

¹²Nɛ fo kaŋɛ fanɛ k maŋ la fo asheŋ,

Ebɔrɛ nɛ e nyi nfɛra nɛ aworbi na bre nyi

kusɔ so so nɛ fee wora kusɔ kama.

Mo alɛ e naŋ ka fo kusɔ kama nɛ fo wora be kukɔ.

Adunyɔ nɛ ashe

¹³M pibi, baa ji mushoŋ ŋkpal manɛ so mushoŋ walɛ.

Kananɛ mushoŋ wɔ ebel kudonduloŋ so na,

¹⁴loŋ nɛ kanyiasheŋ gba walɛ n sa fo kiyoyu.

Fo baŋ nya kumo fo alɛ nya echefoso be tama

nɛ k maaŋ loge kikɛ.

Adunyɔ nɛ ashunu

¹⁵Sa maa kɔ kumu kpakpaso

fanɛ belubiworapo nɛ baa yuri basa lela be asɔ,

ŋko a suge bumo be nwu na.

¹⁶Basa niŋiso bee tɔr alɛ damta nsaa koso

ama tɔrɔ baŋ ba alubiworapo bre so

nɛ e tɔr kela koŋwule gba

e maaŋ naŋ tiŋ n niŋi to kikɛ.

Adunyɔ nɛ aburwa

¹⁷Sa maŋ shin nɛ fo doŋ be tɔrɔ e baa fuli fo kagbene.

Fo doŋ baŋ fiti n tɔr, sa maa mushe.

¹⁸Mannɛ a loŋ Enyɛnpe Ebɔrɛ beeŋ wu kumo be loŋ,

nseŋ kilgi mbe tɔrɔ na m ba fo so.

Adunyɔ nɛ akpanu

¹⁹Sa maŋ shin nɛ belubiworapo be asheŋ e baa tir fo

ŋko a besa fo.

²⁰Ŋkpal manɛ so alubiworapo maŋ kɔ echefoso be tama.

Mo alɛ beeŋ choŋ fanɛ kananɛ fitila beeŋ duŋ na.

Adesa

²¹M pibi, baa ŋana Enyɛnpe Ebɔrɛ na

nsaa ŋana bewura gba,

sa maa tu amukpakpaso wuraana a wora asheŋ.

²²Wanɛ e nyi tɔrɔ nɛ Enyɛnpe Ebɔrɛ ŋko ewura beeŋ sa bumo?

Aŋasa ko gba nde

²³Kanyiasheŋ be mmalga ko gba nde:

A maŋ daga demujipo ka bee kpɛa to.

²⁴Fo baŋ kaŋɛ fanɛ esa nɛ e wora n jija e kɔ kashenteŋ,

basa beeŋ sho fo kɔnɔ,

nɛ efuli pɔtɛ so ebi gba e kishi fo.

²⁵Ama demujipo nɛ e bee gberge belubiworapo kusoe bre

beeŋ nya nɛfa nna nɛ asheŋ e baa nite nɛnɛ a sa mo.

²⁶Kashenteŋ be atuwebi e la kashenteŋ be keteri be tɔɔnɛ.

²⁷Nase kudɔ n du fo adɔjibi

pɔɛŋ nsaa pɔr kowu.

²⁸Sa maŋ kaŋ ji efɛ be shɛda ŋ gbiti fo barkasa

ŋko ŋ ku efɛ ŋ deŋi mo.

²⁹Sa maŋ kaŋɛ fanɛ: “Meeŋ wora mo n tal to.”

³⁰Ŋ ka bɔla ewulpo tɔlpo be ndɔ

nɛ mbe ndibi sɔrso be dɔkar,

³¹nɛ afitiri nɛ ewi sɔ kudɔ na kikɛ,

nɛ ajembu be egbal nɛ e pɔr ŋ kulti kumo na kikɛ tɔr.

³²Nɛ n yili ŋ keni kudɔ na,

nseŋ fɛ kumo be asheŋ ŋ koya kusɔ ko

ashi kusɔ nɛ n wu na to.

³³Edi gbrɛbi, ewushi gbrɛbi

nɛ enɔ be kefar n chena gbrɛbi,

³⁴nɛ ketir ba fo so fanɛ eyu na,

nɛ asheŋ kikɛ e ki fo so kpakpa.

Ewura Sɔlɔmɔn be aŋasa ko nde

¹Ewura Sɔlɔmɔn be aŋasa nɛ Ewura Hɛzekaya be ekrachi sibɛ na nde.

²Ebɔrɛ bee nya bunyaŋ nna

ŋkpal e ka kɔ ashiri so,

nɛ bewura malɛ bee nya kemaŋkura

ŋkpal bumo be kebaa bugi asheŋ to so.

³Wanɛ e naa tiŋ a pin ewura be nfɛra?

Ewura be nfɛra du chiŋgeliŋ nna

fanɛ kasawule be nchiŋ

ŋko awɔlpa be kufɔ na.

⁴Baa lara gbiti be eyurpi nna pɔɛŋ

nsaa ta kumo a lɔŋɛ asɔ lela.

⁵Lara besoetojipo lubi ashi ewura kutɔ

nɛ e ji kuwura ekpa niŋiso so.

⁶Sa maa maŋ fo kumu so

ashi ewura be anishito,

ŋko a ta fo kumu a yili basagboŋ be eyilikpa.

⁷Ewura gbagba ka ta fo n yili esagboŋ be eyilikpa

bɔ fo gbagba ka ta fo kumu n yili ndoŋ nɛ e ŋaba fo.

⁸Sa maa kuse a ta asheŋ a yɔ demujikpa.

Mannɛ aloŋ b baŋ ji m bri fo

anishinyɔr beeŋ pɛ fo.

⁹Nɛ fo nɛ fo barkasa bee ji emɔrɔ,

fo sa maa lara mbe ashiri.

¹⁰Mannɛ aloŋ basa beeŋ kaŋɛ fanɛ fo maŋ kɔ ashiri

nsaa maŋ naa yirda fo.

¹¹Kemalga kamalga nɛ k daga saŋɛ nɛ k daga

du nna fanɛ b ka ta shuwa m mata gbiti so na.

¹²Kenu enyiashempo be kasotoji

du fanɛ shuwa be akonde, ŋko abitasɔ nna.

¹³Kabɔ nɛ e bee ji kashenteŋ

du fanɛ kebleŋ to be nchu wushiso nna.

¹⁴Esa nɛ e bee nase kɔnɔ

nsaa maa tia kumo

du fanɛ kuwɔlpa nɛ k maa bar bɔrɛ nna.

¹⁵Kenyiti nɛ kɔnɔ lela

e naŋ tiŋ n shin nɛ ewura e chɛrga mbe nfɛra

nseŋ shuli n sɔ kusɔ nɛ fee kaŋɛ mo na.

¹⁶Sa maŋ kpal mushoŋ ka wɔ ebel so

n ji amo m baŋ fo kumu so,

mannɛ aloŋ feeŋ kwiɛ amo.

¹⁷Sa maa tir fo kurgepo to ga,

mannɛ aloŋ fo asheŋ beeŋ fi mo

nɛ e kishi fo.

¹⁸Keji efɛ be shɛda ŋ gbiti esa

du nna fanɛ fo ka da mo kasaŋɛ

ŋko ketanyembi ŋko ŋ ŋe mo kedibi nna.

¹⁹Keta yirda n deŋi efɛpo so ashi awurfoŋ be saŋɛ

du fanɛ fo ka na keya koŋwule so

ŋko fo kenyi ka bee besa fo nna.

²⁰Keboŋ kashɛ n sa esa nɛ mbe kagbene jija

du nna fanɛ fo ka sɔ esa be wajɛ awo to

ŋko fo ka ta nfɔl be nchu n wurge kuchuu popɔr so na.

²¹Nɛ akoŋ kɔ fo doŋ fo sa mo ajibi nɛ e ji,

nɛ achukoŋ kɔ mo

fo sa mo nchu nɛ e nuu.

²²Nɛ fo wora loŋ,

kumo ere kedɛmurmur nɛ fo muu n deŋi mbe kumu so na.

Ebɔrɛ malɛ beeŋ nɛfa fo.

²³Kananɛ kebɔrɛfito be afu bee bar bɔrɛ na,

aloŋ nɛ ŋkuli bee bar agbo.

²⁴Kedese kuchoŋi be awɔlto bɔ

ketu eche elushapo a wɔ ebu to.

²⁵Baru lela nɛ k shi kufɔ

bee wushi kagbene nna,

fanɛ kananɛ nchu wushiso bee wushi eyur na.

²⁶Esa nɛ e bee wora asheŋ niŋiso baŋ yige mbe kumu to n sa esa lubi,

e bee ki fanɛ nchu nɛ a fɔnɔto ŋko eboŋ nɛ b bɔ kumo kesa nna.

²⁷Kananɛ mushoŋ maŋ daga keji m baŋ so na,

aloŋ nɛ k maŋ daga esa ka bee fin fanɛ basa e baa fur mo saŋkama.

²⁸Esa nɛ e maŋ kɔ kanyiti

du nna fanɛ kade nɛ kumo egbal bure

nɛ basa beeŋ tiŋ n luri kumo to ŋ kɔ kumo na.

¹Ketarso be bɔrɛ kɔ tɔnɔ

a chɔ kesa ewulpo bunyaŋ.

²Kɔnɔsho nɛ k maŋ bɛ ekpa so

maaŋ tiŋ m pɛ esa.

K du nna fanɛ mbuibi ka firgi a choŋ na.

³Kananɛ baa ta kebarga nɛ chembi

a keta gbaŋɛ nɛ kurma a shuŋ na,

aloŋ nɛ ewulpo daga kuchuchɔ.

⁴Fo baa tuge ewulpo to,

baaŋ tre fo alɛ gba ewulpo.

⁵Shin nɛ ewulpo e pin mbe kawulisheŋ,

nɛ mannɛ aloŋ e beeŋ baa fɛ fanɛ

e nyi asheŋ nna.

⁶Keta kubɔya ŋ shuŋi ewulpo

du nna fanɛ

fo ka ku fo gbagba be aya so

ŋko fo ka ji kɔrtɔ nna.

⁷Ewulpo be keŋasa,

du nna fanɛ bobi be aya na.

⁸Ewulpo be kesa bunyaŋ

du nna fanɛ fo ka kre kejembu n wɔtɔ katebabu to nɛ fo to na.

⁹Ewulpo be keŋasa

du nna fanɛ ewi

ashi nsanuupo be enɔ to.

¹⁰Ewulpo nɛ e na chamcham a choŋ

be kebir paa

du nna fanɛ ekpampo ka bee to

asɔbɔya a lɛ jijiga na.

¹¹Kananɛ jɔnɔ bee gbu

nsaa bɛta a ji amo na,

aloŋ nɛ bewulpo bee lɔŋɛ a tal bumo be kawulisheŋ to.

¹²Ewulpo bɔ esa nɛ

e bee tre mbe kumu enyiashempo,

mo alɛ nseŋ wuli.

¹³Etɔlpo e naa kaŋɛ fanɛ

buluŋ wɔ ekpa to so

e maaŋ yɔ ndɔ to.

¹⁴Kananɛ kukuloŋ yil epul to

a yɔ a ba na,

aloŋ nɛ etɔlpo bee dese gedo so

a kilgi a laŋɛ a dese.

¹⁵Lɔma be keku m min gba

du betɔlpo ko so gba kpakpa nna.

¹⁶Etɔlpo kikɛ bee fɛ nna fanɛ

e nyi asheŋ a chɔ basa damta.

¹⁷Keta fo kɔnɔ n wɔtɔ

kolu nɛ k maŋ la feya to,

du nna fanɛ fo ka bee gberge jɔnɔ

nɛ e maŋ nyi fo be kusoe na.

^18-19Kefule esa nseŋ kaŋɛ fanɛ

fee pel mo nna,

du nna fanɛ ebompo ka bee to

atanyembi kpalakpala na.

²⁰Ndibi baa maŋ wɔ edɛ to

edɛ na bee duŋ nna,

aloŋ nɛ ŋkuli baa maŋ wɔtɔ kolu bee ku.

²¹Kananɛ ndibi nɛ ajanwulɛ

bee shin nɛ edɛ bee nyɛrga na,

aloŋ nɛ elushapo bee keta kolu to a chɛr.

²²Ŋkuli wɔ ebel ga

nɛ basa bee sha kumo.

²³Kamalga belbelso

nɛ nfɛra lubi wɔ kumo be kaman

du nna fanɛ b ka ta shuwa

n fɛfa ebɔ be kusɔ so nɛ k bee nyɛkpɛ na.

²⁴Esa lubi be kamalga belbelso so,

b maa pin fanɛ e kɔ nfɛra lubi.

²⁵Kanaŋ kamaso nɛ

esa lubi be kamalga wɔ ebel,

sa maŋ kaŋ yirda mo.

²⁶Kanaŋ kama nɛ e wora,

mbe nfɛra lubi na beeŋ lar efuli

nɛ ekama e pin kumo.

²⁷Fo baa kur fo barkasa be kemaŋ,

fo gbagba e naŋ kilgi n tɔr kumo to.

Fo baa gbelti kejembu nɛ fo bɛa fo barkasa,

k beeŋ kilgi m bɛa fo gbagba.

²⁸Esa nɛ fo kishi nɛ fee ku efɛ a deŋi.

Kefur esa kɔnɔ to

nɛ k maŋ shi kagbene to

du fanɛ fo ka mɔ mo ŋgblaŋ to nna.

¹Sa maa puchi echefoso,

ŋkpal manɛ so fo maŋ nyi

kananɛ asheŋ beeŋ ba du echefo.

²Shin nɛ basa pɔtɛ e baa kpaŋ fo,

fo gbagba e sa maa kpaŋ fo kumu.

³Ewulpo be kewɔtɔ esa agbo to

wɔgbɛ a chɔ e ka sulɔ ajembu nɛ leele.

⁴Esa nɛ e bee nya agbo manaŋ manaŋ

lubi a chɔ,

esa nɛ e bee kɔ kukɔrkɔ lubi.

⁵Keji esa kashenteŋ kpakpaso

bɔ kebaa sha mo ŋgblaŋto.

⁶Eteri lela be kefiɛso bɔ edoŋ ka lela fo so.

⁷Fo baŋ ji m moɛ,

mushoŋ gba maŋ naa wora fo keji,

ama nɛ akoŋ kɔ fo feeŋ ji ajibi kama.

⁸Esa baŋ lar laŋ to,

e du nna fanɛ kabuibi ka lar kesha to na.

⁹Tulale nɛ efɛa belbelso be duwu

bee sa kagbenefuli nna,

ama a maŋ fo eteri lela be kasotoji so.

¹⁰Sa maŋ kplaŋ fo teri

ŋko fo tuto mo teri so.

Fo alɛ e sa maŋ yɔ fo niopibi nɛ

e wɔ kufɔ kutɔ n ya kaa fin kechɛto

tɔrɔ be saŋɛ.

Eteri nɛ e taga fo to

beeŋ tiŋ n chɛ fo to a chɔ

fo niopibi nɛ e wɔ kufɔ.

¹¹M pibi ba kɔ kanyiasheŋ,

nɛ kumo be loŋ e sa ma kagbenefuli

nɛ n nya kɔnɔ n tuge

esa kama nɛ e bee malga a gbiti ma to.

¹²Enyiashempo bee gelge asheŋ nna,

ama esa nɛ e maa pin asheŋ to

manaŋ manaŋ bre bee suse amo to nna.

¹³Esa baŋ ta mbe kusɔbuuso

n nase tarma n ji kukɔ n sa efɔ,

nɛ efɔ na baŋ maŋ tiŋ ŋ ka kukɔ na

fo sɔ amodoŋwura be kusɔbuuso na

n tal to.

¹⁴Awɔr be kecha n chɔrɔ esa chipurdidi

beeŋ tiŋ a la tɔrɔ n sa

esa nɛ fee chɔrɔ na ekpa ko so.

¹⁵Eche elushapo du fanɛ

bɔrɛfurbi nɛ k maa teŋ manaŋ nna.

¹⁶Keshin nɛ e yige kolu

du fanɛ kekuŋ afu ekpa nna,

ŋko keta enɔ n jɔ ŋkuchu.

¹⁷Kananɛ baa ta kebɛlso a yee kebɛlso na,

aloŋ nɛ beteri bee chɛrga abar be nfɛra.

¹⁸Fo baŋ keni kedibisɔrso so nɛnɛ

feeŋ ji kumo be asɔrso.

Fo baŋ keta fo nyɛnpe nɛnɛ

feeŋ baa nya kechɔrɔ saŋkama.

¹⁹Kananɛ fee keni nchu kleŋklembi to

a wu fo kumu na,

aloŋ nɛ fo kagbene bee ŋini

esa nɛ e la fo kashenteŋto.

²⁰Kananɛ luwu nɛ nchaŋ maa moɛ na,

aloŋ nɛ dimɛdi maa nya asɔ a moɛ.

²¹Kananɛ baa ta edɛ a keni a pin

shuwa nɛ gbiti be kela na,

aloŋ nɛ esa be kefur gba

beeŋ tiŋ n shin nɛ fo pin mbe da.

²²Kebri maaŋ tiŋ n ju kawuli ashi esa to.

²³Baa keni fo mbolpɔ nɛ mboe so nɛnɛ,

²⁴ŋkpal manɛ so kanya

nɛ kemaŋkura maaŋ baa wɔtɔ mbaanaayɔ.

²⁵Fo baa kuya afitiri a sa fo asɔbɔya

nɛ a bee laŋɛ a purge nɛnɛ,

²⁶feeŋ nya mbɔlpo nɛ mboe

n fa n tɔ asɔbuuso nɛ kasawule.

²⁷Fo alɛ nɛ fo mbia

nɛ fo nyɛrbi beeŋ naŋ nya kenyipochu damta n nuu.

¹Basa lubi bee shile nna nsaa gbɛ a keni

fanɛ esa ko ka bee ju bumo na,

ama basa nɛ baa wora asheŋ niŋiso bre

bee nite kenyɛnso nna

fanɛ buluŋ na.

²Efuli be basa baa kɔ kumu kpakpaso,

baa chɛrga bejuŋkparpo manaŋ manaŋ nna.

Ama ejuŋkparpo nyiashempo bre

bee ji kuwura nna a chɛr.

³Ejuŋkparpo nɛ e bee mɛaŋ betirpo,

du nna fanɛ bɔrɛgboŋ

nɛ k bee jija adɔjibi na.

⁴Basa nɛ baa wora a da mbra so

e naa ji a chɛ belubiworapo to.

Basa nɛ baa bɛ mbra so bre

maa sha belubiworapo be asheŋ.

⁵Belubiworapo maŋ nyi

kananɛ baa wora asheŋ

nɛ amo be ekpa so,

mannɛ aloŋ nɛ bumo

nɛ baa ŋana Enyɛnpe Ebɔrɛ bre du.

⁶Kebaa la etirpo nsaa ji kashenteŋ bɔ

kebaa la damawura fɛpo.

⁷Enyiashempo e naa bɛ mbra so.

Esa nɛ e bee ta basa nɛ b maa fɛ nfɛra

pɔɛŋ nsaa wora asheŋ keteri,

bee wɔtɔ mo tuto anishinyɔr to nna.

⁸Esa kama nɛ e bee wɔtɔ basa nɛ

b paŋ mo amansherbi nchu ga,

be kapetɛ beeŋ yɔ esa nɛ

e bee wu betirpo kuwɔr kutɔ.

⁹Ebɔrɛ maa nu esa nɛ e maa bɛ

mbra so be kabɔrɛkule.

¹⁰Esa kama nɛ e bee ŋin basa nɛ

baa wora asheŋ nɛ a niŋi a wɔtɔ alubi to,

beeŋ tɔr kejigbelɛ nɛ mo gbagba sho to,

ama esa nɛ e maŋ kɔ alubi

beeŋ ji kapetɛ lela.

¹¹Damawuraana bee fɛ nna fanɛ

b nyi asheŋ,

ama etirpo nɛ e bee pin asheŋ to

beeŋ tiŋ m pin fanɛ

mannɛ damawuraana kikɛ e nyi asheŋ.

¹²Esa lela baŋ ji kuwura

basa bee ji eyur nna,

ama esa lubi bre baŋ ji kuwura

basa bee shile nna a ŋana.

¹³Esa kama nɛ e bee ta mbe alubi a ŋana

maaŋ yɔ anishito kikɛ,

ama Ebɔrɛ beeŋ wu esa nɛ e bee bugi to

a kaŋɛ mbe alubi

nsaa tuba a lar amo to bre kuwɔr.

¹⁴Esa kama nɛ e bee ŋana Ebɔrɛ

bee nya nɛfa nna,

ama esa kama nɛ e kɔ kagbene kpakpaso

bre bee luri asheŋ to nna.

¹⁵Ewura lubi nɛ e bee tɔrɔ betirpo

du nna fanɛ buluŋ nɛ e bee ponte to na,

ŋko shishiri nɛ akoŋ kɔ.

¹⁶Ewura nɛ e bee mɛaŋ mbe basa

maa ji asheŋ nɛ amo be ekpa so,

ama emo nɛ e maa sha kapuni bre

beeŋ ji efute tenteŋ.

¹⁷Esa kama nɛ e mɔ esa,

be nfɛra beeŋ baa ji a bri mo

hale nɛ e ya wu.

Mo alɛ maaŋ nya kechɛto kikɛ.

¹⁸Kashenteŋji bee kuŋ esa nna,

ama esa nɛ e maŋ niŋi bre bee tɔr manaŋ manaŋ nna.

¹⁹Edɔpo nɛ e pre kenishi a shuŋ

beeŋ nya ajibi yɛlyɛla so,

ama basa nɛ baa jija bumo be saŋɛ bre

nɛ ketir e naa ba la saŋkama.

²⁰Ebɔrɛ beeŋ nɛfa bekama

nɛ baa ji kashenteŋ,

ama E beeŋ gberge bekama

nɛ baa sha fanɛ b bɔla ekpa lubi so

n dii dama manaŋ na kusoe.

²¹Ŋkpɛato maŋ walɛ,

ama brɔbu fimbi beeŋ tiŋ n shin nɛ

basa ko e wora kusɔ nɛ k maŋ daga.

²²Esa kama nɛ e bɔlɔ miri so n dii dama

beeŋ ki etirpo.

²³Ji esa kashenteŋ nɛ

e chɔrɔ fo echefoso a chɔ

kemalga efɛ be mmalga nɛ a beeŋ wora mo ebel.

²⁴Esa kama nɛ e bee fɛ fanɛ,

keyuri mo tuto ŋko mo nio maŋ la kulubi

maŋ kɔr eyu pɔtɛ to.

²⁵Bejimunipo bee baga asheŋ to nna,

ama asheŋ beeŋ nite nɛnɛ n sa esa kama nɛ

e ta mbe yirda n deŋi Enyɛnpe Ebɔrɛ so.

²⁶Esa kama nɛ e ta mbe yirda n deŋi

mo gbagba be kumu so la ewulpo nna,

ama ekama nɛ e bee sɔ benyiashempo

be mmalga, beeŋ nya kekuŋ.

²⁷Esa kama nɛ e bee bugi enɔ a kɛ betirpo

maaŋ fin shɛŋ ŋ gben,

ama basa damta beeŋ sho ekama

nɛ e bee kplaŋ betirpo so kɔnɔ.

²⁸Esa lubi baŋ ji kuwura

basa bee shile nna a ŋana,

ama b baaŋ gboŋi mo kuwura bre

basa nɛ baa wora asheŋ nɛ a niŋi

bee nya bumo be amu nna.

¹Fo baŋ wora kumu kpakpaso ŋ kini kenu kasokpele damta,

k maaŋ chɛr nɛ fo mur.

²Asheŋ baa nyala a sa basa niŋiso

basa kikɛ be ŋgbene bee fuli nna,

ama basa lubi baa ji kuwura basa bee shuto nna.

³Esa nɛ e bee sha kanyiasheŋ

bee bar mo tuto kagbenefuli nna,

ama esa nɛ e ju a buu e sakaleche so bre

be kanya bee mur nna.

⁴Ewura nɛ e bee ji kashenteŋ

be efuli kɔ eleŋ nna,

ama emo nɛ e kɔ kejimuni

nsaa sɔ brɔbu bre be efuli bee bure nna.

⁵Esa nɛ e bee malga mmalga belbelso

nɛ a maŋ la kashenteŋ a sa mo braana

bee sho mbe kumu kejigbelɛ nna na.

⁶Belubiworapo be alubi

e naa kilgi a pɛ bumo,

ama basa nɛ baa wora asheŋ nɛ a niŋi bre

bee boŋ kagbenefuli be nshɛ nna.

⁷Betirpo be kenya kashenteŋ be asheŋ tir ga

n sa basa nɛ baa wora asheŋ niŋiso nna,

ama belubiworapo bre be shɛŋ

maŋ wɔ loŋ to.

⁸Basa nɛ baa wora basa eyurto

bee bar kebagato kade to nna,

ama benyiashempo bre bee shin nɛ agbo bee wushi nna.

⁹Enyiashempo baŋ yɛr ewulpo ewurkpa,

ewulpo na beeŋ ya kaa mushe chilchil n jija demu na.

¹⁰Emɔpo maa sha basa nɛ baa wora

asheŋ nɛ a niŋi be asheŋ.

Saŋkama e bee fin bumo nɛ e mɔ nna.

¹¹Ewulpo e naa nya agbo

a puŋi kɔnɔ basa to,

enyiashempo bre nya agbo gba

fo maaŋ pin.

¹²Ewura nɛ e bee nu efɛ

be beyaasepo bee ki basa lubi nna.

¹³Enyɛnpe Ebɔrɛ e naa sa etirpo

nɛ esa nɛ e bee mɛaŋ mbe basa kikɛ anishi nɛ baa wu.

¹⁴Ewura nɛ e bee ji betirpo be demu

nɛ kumo be ekpa so

beeŋ ji kuwura n chɛr.

¹⁵Keŋini be kasogberge

bee sa kebia kanyiasheŋ nna,

ama kebia nɛ b yige nɛ e bee wora mbe kepar

bee wɔtɔ mo nio anishinyɔr to nna.

¹⁶Belubiworapo baa ji kuwura,

alubi bee wora keshi nna,

ama basa nɛ baa wora asheŋ niŋiso

e naŋ wu bumo be ekar.

¹⁷Fo baa gberge fo mbia kusoe

a ŋini bumo asheŋ

baaŋ sa fo kasotowushi nɛ kagbenefuli.

¹⁸Efuli be basa baa maa bɛ

Ebɔrɛ be keŋini so,

mbra be kebɛso

nɛ kebaa wora asheŋ nɛ a niŋi maa wɔtɔ.

Ebɔrɛ bee nɛfa basa kama

nɛ baa bɛ mbe mbra so nna.

¹⁹Kamalga nawule maaŋ tiŋ ŋ ŋini

kayɛrbi ekpa.

Hale e pin asheŋ to gba e maaŋ wora

kusɔ nɛ k daga.

²⁰Ewulpo be asheŋ kɔ tama

a chɔ esa nɛ e bee kuse a malga.

²¹Fo baŋ yili kayɛrbi be kebia to n di mo kefɛ,

e beeŋ bar fo kebɔltofinfin kacha ko.

²²Esa nɛ e bee nya agbo manaŋ manaŋ

bee bar kebagato nna,

nsaa wora a foe ekpa manaŋ manaŋ.

²³Kamoowu bee bar esa kaseto nna,

ama kamoobarase bee sa esa kemaŋkura nna.

²⁴Esa nɛ e bee tu eyu a yuri

la mo gbagba be kumu so be edoŋ nna.

Ŋkpal manɛ so, nɛ b bɔ ntaŋ n lɛ mo so gba

e maaŋ tiŋ n ji kashenteŋ.

²⁵Sa maŋ shin nɛ kusɔ nɛ basa bee fɛ

a laŋɛ fo kaplɛa so e baa tir fo.

Yirda Ebɔrɛ nɛ e baa kuŋ fo.

²⁶Esa kama bee sha fanɛ e ji ewura keteri nna,

ama Enyɛnpe Ebɔrɛ nawule

e naa shin nɛ

ewura bee wora asheŋ nɛ a niŋi.

²⁷Basa nɛ baa wora asheŋ nɛ a niŋi

kishi belubiworapo ga.

Nɛ belubiworapo malɛ gba kishi basa

nɛ ba wora asheŋ nɛ a niŋi.

Agɔr be aŋasa

¹Jake pibi Agɔr be kubɔya nde.

Esa ko bee ponte a kaŋɛ Ebɔrɛ le:

“Ma eleŋ loge, ma eleŋ loge.

²N duli kusɔbɔya a chɔ dimɛdi;

M maŋ naa kɔ dimɛdi be nfɛra

³M maŋ kɔ kanyiasheŋ,

ma alɛ maŋ nyi shɛŋ a laŋɛ

Ebɔrɛ be kaplɛa so.

⁴Wanɛ e dii n yɔ Ebɔrɛ so m bɛta m ba?

Wanɛ e tiŋ m pɛ afu n wɔtɔ enɔ to?

Ŋko ŋ gbargbar nchu

n wɔtɔ mbe kusɔbuuso to?

Wanɛ e ta kasawule n yili kumo be eyilikpa?

Loŋ be esa be ketre

ŋko mo pibi be ketre e la nuso?

Nɛ fo nyi, fo kaŋɛ ma.

⁵Ebɔrɛ be kamalga kikɛ la kashenteŋ nna.

E la kusɔ kuŋso nna n sa bekama

nɛ baa shile a ba mo kutɔ

m baa ka fin kekuŋ na.

⁶Sa maŋ ta shɛŋ n ti mbe m mmalga so,

mannɛ aloŋ, e beeŋ fiɛ fo so n ta fo ŋ ki efɛpo.”

⁷Enyɛnpe Ebɔrɛ, asɔ anyɔ nɛ mee kule

fanɛ fo wora n sa ma

pɔɛŋ nɛ n wu.

⁸Sa maŋ shin nɛ ŋ ki efɛpo

Fo alɛ e sa maŋ shin nɛ m baa la

etirpo ŋko damawura.

Baa sa ma kacha kama be kusɔ jiso.

⁹Saŋɛ na so maaŋ ki damawura

nseŋ teŋ fo so

ŋko nɛ ketir e shin nɛ n ya yuri n jija fo ketre.

¹⁰Sa maa debɔr kayɛrbi a ŋini mo nyɛnpe,

nɛ mannɛ aloŋ

e beeŋ sho fo kɔnɔ nɛ fo ji awurfoŋ.

¹¹Basa ko bee sho bumo tutoana kɔnɔ nna

nsaa maa keni bumo nioana a bɔlɔ kenishi.

¹²Beko malɛ bee fɛ fanɛ

baa wora asheŋ nɛ a niŋi nna

ama alubi damta e bɔlɔ bumo to.

¹³Basa ko bee wu bumo be amu nna

a maa keni basa a bɔlɔ kenishi.

¹⁴Basa ko be kebaawɔtɔ e la

kebaa kɔ kumu kpakpaso

a mɛaŋ betirpo nɛ bebɔlpo.

¹⁵Kejimuni la mborobicheso anyɔ nna.

Bumo kikɛ be atre e la: ‘Ta n sa ma.’

Asɔ asa e wɔtɔ a maa moɛ.

Asɔ ana malɛ e maa kaŋɛ fanɛ a kukwe loŋ.

¹⁶Amo e la, nchaŋ, nɛ eche egbentepo,

nɛ kasawule wɔlso,

nɛ edɛ nɛ esa maaŋ naŋ tiŋ n duŋ.

¹⁷Ejita e naŋ ji

bekama nɛ baa fɛl bumo tutoana

nsaa keni bumo nioana jiga na

be eblaŋ kupuŋ to.

¹⁸Asɔ ana e naa wul ma nfɛra to

a shin nɛ maa pin asheŋ to.

¹⁹Amo e la, kananɛ kusore bee firgi,

nɛ kananɛ kuwɔ bee gbeye ajembu so,

nɛ kananɛ teku so be ekuloŋgboŋ

bee wu a yɔ kakpa nɛ k bee yɔ,

nɛ kananɛ enyɛn nɛ eche bee sha abar.

²⁰Eche nɛ e bee lar mo kul kaman be da

e la keji nseŋ kpra kɔnɔ so

ŋ kaŋɛ fanɛ e maŋ wora kulubi.

²¹Asɔ ana nɛ kasawule maa tiŋ a nyiti

nsaa kpal amoso a gbuŋgbuŋ to.

²²Amo e la, kenya ka ki ewura,

nɛ ewulpo ka ji m moɛ,

²³nɛ eche nɛ basa maa sha ka nya ekul,

nɛ kebita nɛ e suge mo chepe mo kul.

²⁴Asɔ fimfimbi ana e wɔ kasawule so

a kɔ kanyiasheŋ ga.

²⁵Atutulombi maŋ kɔ eleŋ

ama amo alɛ bee fin amo be ajibi a yili dɔchubɔrɛ so nna.

²⁶Kukukaka maŋ shi

kumo alɛ bee tiŋ a futi kedibi a luri to.

²⁷Elotɔr maŋ kɔ ewura,

amo alɛ nsaa bɛ abar so

kenimu kenimu so fanɛ esoji na.

²⁸Ketigbolu maŋ la shɛŋ

kumo alɛ bee nya ekpa a luri ewurkpa.

²⁹Asɔ ana e naa wora asheŋ fanɛ bewura,

nsaa tia awurya.

³⁰Buluŋ nɛ e la asɔbɔya to be enyɛn

nsaa maa tu shɛŋ a bɛta kaman na,

³¹nɛ kananɛ kaboelote bee nite,

nɛ kananɛ koshinyɛn bee nite,

nɛ ewura nɛ mbe benapo kulti mo.

³²Nɛ fee puchi nsaa kɔ kumu kpakpaso

nɛ kawuli a kre asheŋ lubi

fo yige amo be kewora.

³³Fo bri kenyipochu to a beeŋ lar ŋku

Fo ŋmɛa fo kamuna

k beeŋ gbege n lar ŋklaŋ.

Aloŋ nɛ fo wɔtɔ basa agbo to,

kolu beeŋ ba.

Ewura Lamwɛl be aŋasa

¹Kanyiasheŋ be mmalga

nɛ Masa be ewura Lamwɛl mo nio ŋini mo nde.

²M pibi Lamwɛl, kabɔrɛkule so nɛ

m bɔla n nya fo;

amoso kaŋ kusoe n nu kusɔ

nɛ mee shin nɛ ŋ kaŋɛ fo ere.

³Sa maa ta fo eleŋ a jija a bɛ beche so.

Beche ko bee da bewura nna a lɛ.

⁴A maŋ daga bewura nɛ bejuŋkparpo

ka bee nuu nsa a boo

ŋko a sha nsa ga.

⁵Nɛ mannɛ aloŋ baaŋ boo

nseŋ teŋ efuli be mbra

nɛ edaŋkaresheŋ so

nsaa maaŋ tiŋ n ji kashenteŋ

n sɔ bumo nɛ basa bee mɛaŋ na n yige.

⁶Yige nsa n sa bumo nɛ

b maŋ naa kɔ tama kikɛ

nsaa yɔ kemur to na.

⁷Shin nɛ loŋ be basa

e baa nuu nsa a boo

a teŋ bumo be ketir nɛ awurfoŋ so.

⁸Baa malga a sa bumo nɛ

b maa tiŋ a malga a kuŋ

bumo be amu na

nsaa kɔ a sa bepɔshipo.

⁹Baa ji demu nɛ kumo be ekpa so

a sa betirpo

nɛ bumo nɛ b maŋ la shɛŋ na.

¹⁰Eche nɛ e kɔ da lela

a tiŋ a wora asheŋ nɛnɛ maa tiŋ a nya.

E bɔ shuwa nɛ gbiti.

¹¹Mo kul bee yirda mo nna

a maa fɔŋ shɛŋ shɛŋ so.

¹²Eche na be kebaawɔtɔ to kikɛ

asheŋ lela nawule

nɛ e bee wora mo kul.

¹³E maa chena jiga.

Saŋkama e bee fɛa nna a lue ewajɛ.

¹⁴E du fanɛ yawujipo nna

a fin ajibi kaplɛkama a ba epe.

¹⁵E bee wule a koso nna a wora ajibi

a sa mbe laŋ to ebi pɔɛŋ nɛ kare bee cha,

nsaa ŋini mbe mbita ashuŋ nɛ

baaŋ baa shuŋ.

¹⁶Mo gbagba e naa nite a fin

kasawule lela a tɔ

nsaa ta mbe amansherbi a nase kudɔ.

¹⁷E bee pre kenishi nna a shuŋ

nsaa ta mbe eleŋ

a wɔtɔ kusɔ kama nɛ e bee wora to.

¹⁸E bee ji yawu nna a nya tɔnɔ

nsaa shuŋ a fo kiidiso.

¹⁹Mo gbagba e naa fɛa jese a lue ewajɛ.

²⁰E bee bugi enɔ nna a chɛ betirpo

nɛ bumo nɛ asheŋ bee pɔɔ bumo so to.

²¹E maa fɔŋ awo so

ŋkpal manɛ so mbe laŋ to ebi kikɛ kɔ awo to be asɔbuuso.

²²Mo gbagba e naa baa mbe asɔbuuso,

nsaa buu asɔ lela fanɛ ago be ewajɛ.

²³Mo kul bee nya kemaŋkura nna

nsaa tiŋ a luri kade be benimu to.

²⁴E bee lue ewajɛ nɛ eshata nna

a fa a sa eyawujipo.

²⁵E kɔ eleŋ nna

nsaa sa mbe kumu bunyaŋ;

e maa fɔŋ echefoso be asheŋ so.

²⁶E kɔ kanyiasheŋ nna

nsaa fɛ nfɛra pɔɛŋ a malga.

²⁷E bee keni mbe laŋ to ebi so nɛnɛ nna,

mo alɛ maŋ kɔ ntɔl.

²⁸Mbe mbia bee puchi mo so nna

nɛ mo kul bee kpaŋ mo a kaŋɛ le:

²⁹“Beche damta bee wora asɔ

ama fo peya chɔ bumo kikɛ.”

³⁰Kebita bee loge,

nɛ kela bee chɛrga,

ama eche nɛ e bee sha Ebɔrɛ bre

daga k baa fur nna.

³¹Shin nɛ loŋ be eche be asheŋ

e baa bɔlɔ fo kenishi

nɛ fo baa kpaŋ mo basa to.