FILIPAIEBI

KAWƆL NƐ PƆƆL SIBƐ N SA

FILIPAIEBI

NA

¹Kawɔl ere shi ma Pɔɔl nɛ Timoti nɛ an la Kristo Yesu be anya na kutɔ nna. K bee yɔ menyi kikɛ nɛ men la Ebɔrɛ be basa ashi Yesu Kristo to nɛ men be asɔriana to be bejuŋkparpoana nɛ bechɛtopoana nɛ men kikɛ wɔ Filipai be kade to na kutɔ nna. ²Ebɔrɛ an Tuto na nɛ Enyɛnpe Yesu Kristo na e sa menyi kuwɔr be kakɛ nɛ kagbenewushi.

Pɔɔl be kabɔrɛkule be asheŋ

³Saŋkama nɛ n nyiŋi menyi be asheŋ, mee chɔrɔ ma Ebɔrɛ nna. ⁴Saŋkama malɛ ashi ma kabɔrɛkule nɛ mee kule a sa menyi kikɛ to, ŋ kɔ kagbenefuli nna a kule a sa menyi kikɛ, ⁵ŋkpal kananɛ men chɛ ma to ashi baru lela na be kebɔ be kushuŋ na to so baŋ yili kachɛ sososo nɛ n yɔ men kutɔ na m ba fo mbre. ⁶Amoso, m baa nyi fanɛ Ebɔrɛ nɛ e baŋ fara le be kushuŋ lela menyi to ere beeŋ shin nɛ k baa wɔ menyi to loŋ n ya loge nɛnɛ kachɛ nɛ Kristo Yesu beeŋ naŋ ba na. ⁷Saŋkama men be asheŋ baa wɔ ma kagbene to nna, amoso, k baŋ dii efuli nna fanɛ meeŋ baa fɛ le be nfɛra ere a yɔ men be kaplɛa so. Ŋkpal manɛ so, men kikɛ tu ma nna n nya kuwɔr be kakɛ nɛ Ebɔrɛ sa ma naniere ashi ma kabuti ere to nɛ saŋɛ nɛ n daa wɔ ma kumu a wɔtɔ a kɔ a fin baru lela na be kelela nseŋ naa malga a ŋini basa fanɛ kashenteŋ wɔ Kristo to na. ⁸Ŋ ka kaŋɛ fanɛ men kikɛ be asheŋ wɔ ma kagbene to ere, Ebɔrɛ e la ma shɛdajipo fanɛ kasha damta nɛ ŋ kɔ a sa menyi na kikɛ la Kristo Yesu be kasha nna.

⁹Ma kabɔrɛkule nɛ mee kule a sa menyi e la fanɛ Ebɔrɛ e shin nɛ men be kasha e baa wora keshi a ti so ashi kashennyi nɛ kenya lakal ashi asheŋ to to. ¹⁰Saŋɛ na so menyeeŋ tiŋ m pin kusɔ nɛ k chɔ kekama kela n lara kumo. Nɛ loŋ e shin nɛ kulubi kikɛ e sa maŋ mata menyi so nsaa maŋ naŋ shin nɛ b kaŋɛ fanɛ men ji n lar ŋ gben kachɛ nɛ Kristo beeŋ naŋ ba na. ¹¹Nɛ menyi alɛ baa wɔ loŋ be kebaawɔtɔ to, kashenteŋ be edalelasheŋ nɛ a shi Yesu Kristo nawule kutɔ e naaŋ bɔlɔ menyi to nɛ basa e ta kemaŋkura nɛ epaŋ be kedi n sa Ebɔrɛ.

Kananɛ Pɔɔl be kabuti ki nɛfa be asheŋ

¹²Ŋ kurgepoana mee sha men ka pin fanɛ asheŋ nɛ a nya ma na kilgi nna n chɛ ma to nɛ baru lela na be kebɔ na yɔ anishito. ¹³Ŋkpal manɛ so, naniere k baŋ dii efuli ewurkpa be bekumpo kutɔ nɛ bekama nɛ b wɔ nfe ere kutɔ nna fanɛ Kristo na so e shin nɛ n wɔ kabuti ere to. ¹⁴Ŋkpal loŋ be kabuti na malɛ so, bekurgepo be bedamta be keyirda Enyɛnpe na wora eleŋ nna n ti so nɛ baa nya kagbene a ti so a wɔtɔ a bɔ kubɔya na kenyɛnso. ¹⁵Kashenteŋ nna fanɛ basa nɛ baa bɔ kubɔya na be beko bee bɔ kumo nna ŋkpal kayurbesa nɛ kolusha so, ama beko bugi bumo be ŋgbene kikɛ nna a bɔ kumo kelela so. ¹⁶Kasha so nɛ bumo ere bee bɔ kumo, ŋkpal manɛ so, b nyi fanɛ Ebɔrɛ shin nɛ n wɔ nfe nna nɛ ŋ ŋini basa fanɛ baru lela na kɔ kashenteŋ. ¹⁷Ama bumo na bre maa bugi ŋgbene a bɔ Kristo na be asheŋ, kajɛ be ketresha so nɛ baa bɔ kubɔya na a fɛ fanɛ nɛ b wora loŋ baaŋ shin nɛ n nya tɔrɔ n ti so ashi ma kabuti ere to.

¹⁸Ama le be asheŋ ere malɛ tir nna a? Ayai, a maŋ tir, kumo alɛ bee par ma, ŋkpal manɛ so, nɛ basa kɔ kebirkɔnshi be nfɛra nna a bɔ kubɔya na ŋko b kɔ nfɛra lela nna a bɔ kumo, kusɔ nɛ k bee lar amo kikɛ to e la fanɛ baa bɔ Kristo be asheŋ nna a sa basa. Kumo be loŋ malɛ so nɛ ma kagbene bee fuli ma na. ¹⁹Kashenteŋto, meeŋ shin nɛ ma kagbene e fuli ma, ŋkpal manɛ so, m baa nyi fanɛ ŋkpal men be kabɔrɛkule so nɛ Yesu Kristo be Kiyoyu na be eleŋ to so meeŋ nya ma kumu n lar kabuti ere to. ²⁰Kusɔ nɛ m baa sha ga nsaa tama e la fanɛ m maaŋ pɔ aba ashi ma kushuŋ to, ama saŋkama, fɔnfɔŋ naniere meeŋ baa kɔ kenyɛn nɛnɛ, saŋɛ na so nɛ n wu nna ŋko n wɔ ŋkpa to nna meeŋ ta ma eyur ere kikɛ m bar Yesu Kristo bunyaŋ. ²¹Ŋkpal manɛ so, ma ere kutɔ n wɔ ŋkpa ere to nna ŋkpal Kristo so, nɛ ma alɛ naaŋ wu nna, luwu na la nɛfa nna. ²²Ama nɛ fanɛ ŋ ka wɔ ŋkpa to ere nɛ meeŋ tiŋ n shuŋ ashuŋ nɛ a kɔ kifito bre, kumo ere m maŋ nyi asɔ anyɔ na to be kumo nɛ meeŋ lara. ²³M baŋ ki nna cham a wɔ asɔ anyɔ na to be nferinto, ŋkpal manɛ so, kusɔ nɛ mee sha e la kelar durnya ere to n ya kaa wɔ Kristo kutɔ, kusɔ nɛ k baa bɔ malɛ nna na. ²⁴Ama ma alɛ be kebaawɔ eyur ere to e bɔ n sa menyi. ²⁵M baa kɔ kumo be yirda nna nɛnɛ, amoso, n nyi ma nɛ menyi ka beeŋ baa wɔtɔ nɛ n tiŋ n chɛ menyi to nɛ men yɔ anishito ashi yirda na nɛ kagbenefuli to n ti so. ²⁶Saŋɛ na so, ŋ ka naŋ ba men kutɔ menyeeŋ bɔla Kristo Yesu so n nya ekpa m puchi n ti so ŋkpal ma so.

²⁷Amoso, kusɔ kama nɛ k la gba, men baa kɔ men be amu to nɛnɛ a du fanɛ kananɛ Kristo be baru lela na bee ŋini na. Saŋɛ na so, nɛ m ba wu menyi nna ŋko n wɔ kufɔ nna nsaa nu menyi be asheŋ, n nyi men ka yil to nɛnɛ kɔnɔkoŋwuleso a kɔ fanɛ esa koŋwule ŋkpal yirda nɛ k shi baru lela na to na so. ²⁸Menyi alɛ e sa maa ŋana men doŋana. Men baa kɔ kenyɛn ashi kusɔ kama nɛ baa wora menyi to nɛ loŋ e tiŋ ŋ ŋini bumo fanɛ baaŋ shin nɛ menyi ere e ji n lar ŋkpal Ebɔrɛ ka sa menyi kumɔlga so. ²⁹Ŋkpal manɛ so, mannɛ fanɛ Ebɔrɛ sa menyi ekpa nna fanɛ men yirda Kristo na nawule, ama e ta tɔrɔ gba nna n ti yirda na so n sa menyi ŋkpal Kristo koŋwule na so. ³⁰To, menyi alɛ gba tu mo nna a kɔ nna na. Kekɔ koŋwule nɛ men daŋ wu ŋ ka kɔ dra dra na koŋwule na nɛ ŋ kraa kɔ nɛ menyee nu kumo be asheŋ na.

Yesu be kumu be kebar kaseto nɛ mbe keshi be asheŋ

¹Nɛ fanɛ fo kɔ keleŋ n wɔtɔ be kebaawɔtɔ ŋkpal fo ka wɔ Kristo to so, mbe kasha bee wushi fo kagbene to nɛ fo nɛ Kiyoyu na kɔ kebaawɔtɔ koŋwule nna ŋko nɛ men la basa nna a sa abar nsaa wu abar kuwɔr kashenteŋto, ²men baa kɔ loŋ be nfɛra koŋwule na a ŋini abar kasha koŋwule na nsaa la basa koŋwule ashi men be ayoyu nɛ nfɛra to nɛ loŋ e fuli ma kagbene nɛnɛ m baŋ so. ³Sa maŋ ta kejimuni be ketresha n juŋkpar n wora asheŋ, fo alɛ e sa maa kɔ kamoowu fuloŋ. Ama baa bar fo kumu kaseto kusɔ kama to a ta basa fanɛ bumo e bɔ fo. ⁴Men be ekama e sa maa wɔtɔ a de mo gbagba nawule be aparsheŋ so, a daga fanɛ e baa de mo braana gba be aparsheŋ so. ⁵A daga fanɛ men be nfɛra e baa du fanɛ Kristo Yesu be nfɛra na.

⁶Mo nɛ Ebɔrɛ la kukoŋwule nna saŋkikɛ,

ama e daa maŋ ta tintiŋ ŋ kɔ n fin fanɛ mo nɛ Ebɔrɛ e baa sasa.

⁷Ayai, e maŋ wora loŋ,

mo gbagba e yili kumo n sa mbe kumu

nseŋ yige kusɔ kama n nase

nseŋ shin nɛ b kurge mo fanɛ nyiŋgbasa

nɛ e wɔtɔ a kɔ kenya be kebaawɔtɔ gbagba chap.

⁸E daa la nyiŋgbasa loŋ nna nseŋ bar mbe kumu kaseto a wɔ kasonu be kebaawɔtɔ to loŋ n ya luri luwu to hale kedibi largato so be luwu gba kuraa.

⁹Ŋkpal loŋ so Ebɔrɛ maŋ mo so nna ga n yɔ kakpa nɛ k chɔ kusɔ kikɛ nseŋ sa mo ketre mo nɛ k chɔ ketre kikɛ nyam.

¹⁰Nseŋ yili kumo fanɛ kumuli kikɛ nɛ k wɔ ebɔrɛso nɛ kasawule so nɛ durnya nɛ k wɔ kaseto beeŋ gbir m bunyaŋ Yesu be ketre na.

¹¹Ekama beeŋ gbir loŋ nseŋ bugi kɔnɔ basa kikɛ to ŋ kaŋɛ fanɛ Yesu Kristo e la Enyɛnpe na nɛ Ebɔrɛ Etuto na e nya kemaŋkura.

Kebaanyaŋɛ a fuli to ashi durnya ere to be asheŋ

¹²Amoso, n teri shasoana, men baa kraa nu a sa ma fanɛ kananɛ men chɛr a wora na, mannɛ fanɛ saŋɛ nɛ n wɔ menyi kutɔ nawule, ama saŋɛ nɛ m maŋ wɔ menyi kutɔ gba a chɔ ŋ ka wɔ men kutɔ. Men baa ta kagbene ŋana asheŋ ŋ kraa kɔ a fin men be kumɔlga kikɛ be kenya. ¹³Ŋkpal manɛ so, Ebɔrɛ e wɔ menyi to a shuŋ saŋkikɛ a shin nɛ menyee sha Ebɔrɛ nsaa tiŋ a nu a sa mo gbagba be aparsheŋ. ¹⁴Men baa shuŋ ashuŋ kikɛ nsaa maa bile asheŋ ŋko a ji emɔrɔ. ¹⁵Saŋɛ na so esa kama maaŋ wu kulubi kikɛ menyi so, ama menyeeŋ baa du cheembi a la Ebɔrɛ be mbia lela nɛ b wea nfɛralubiwuraana nɛ asheŋlubiwuraana to a wɔ durnya ere to. Men baa wɔ bumo to loŋ a du fanɛ achɛkpabi a fuli to a nyɛkpɛ a sa bumo, ¹⁶nsaa kɔ ŋkpa be kamalga na to kpakpa. Loŋ malɛ e naaŋ shin nɛ n ji njɔŋ kachɛ nɛ Kristo beeŋ naŋ bɛta m ba na nɛ loŋ malɛ e ŋini fanɛ m maŋ shile kebɛso na to jiga ŋko m pere kenishi n shuŋ jiga. ¹⁷Nɛ fanɛ b lara ma ŋklaŋ ere ma to n chulgi amo n wurge n ti men be yirda nɛ men kɔ a deŋi Ebɔrɛ so fanɛ sarga na so gba, k par ma. Ma alɛ beeŋ tu menyi a kɔ kagbenefuli. ¹⁸Menyi alɛ gba e shin nɛ men be ŋgbene e baa dese menyi nɛ men tu ma n shin nɛ men be ŋgbene e baa fuli menyi.

Timoti nɛ Epafrodaites be asheŋ

¹⁹Nɛ Enyɛnpe Yesu malɛ shuli, mee tama fanɛ k maaŋ chɛr nɛ n shuŋi Timoti menyi kutɔ, saŋɛ na so e beeŋ ya bar ma men be baru nɛ ma kagbene e fuli ma. ²⁰Mo nawule nɛ ma nɛ mo baa kɔ nfɛra koŋwule nseŋ naa la esa nɛ men be kebaawɔtɔ be asheŋ wɔ mo to fanɛ kananɛ k wɔ ma to na. ²¹Bumo nɛ b ka na kikɛ be ekama wɔtɔ nna a de mo gbagba nawule be asheŋ so, ekama maŋ de Kristo be asheŋ so. ²²Ama Timoti bre, menyi alɛ gba nyi kananɛ mo ere maŋ kɔ le be kebaawɔtɔ ere, ŋkpal manɛ so, men nyi fanɛ ma nɛ mo e baa wɔ baru lela ere be kushuŋ ere to a shuŋ fanɛ kananɛ ebi nɛ mo tuto bee shuŋ na. ²³Amoso, mee ta mo fanɛ ŋ kaŋ ba kaa wu kananɛ ma asheŋ ere bee nite, meeŋ shuŋi mo menyi kutɔ manaŋ. ²⁴Ma alɛ naa kɔ yirda Enyɛnpe so fanɛ k maaŋ chɛr nɛ ma ere gbagba e ba.

²⁵Mee fɛ nna fanɛ a daga fanɛ n naŋ shin nɛ Epafrodaites e bɛta n yɔ menyi kutɔ. E la ŋ kurgepo nɛ m barkasa eshumpo nɛ m barkasa ekɔpo nɛ mo koŋwule na naa la men be kabɔ nɛ men shuŋi mo fanɛ e ba kaa chɛ ma to ashi ma asheŋ tirso to na. ²⁶Ŋkpal manɛ so, e baŋ pere kenishi nna a sha kenaŋwu menyi kikɛ. Kumo be kaman, mbe kagbene baŋ jija mo nna ŋkpal men ka nu fanɛ e daa lɔ so. ²⁷Kashenteŋ malɛ nna fanɛ e ka daa lɔ, hale nɛ k daŋ ka gbrɛ nɛ e wu. Ama Ebɔrɛ wu mo kuwɔr nseŋ wu ma alɛ gba kuwɔr n ti so n shin nɛ e maŋ wu nɛ n sa maŋ nya ŋgbenejija n deŋi abar so. ²⁸Amoso, naniere k baa wɔ ma kagbene to nna nɛnɛ n ti so fanɛ n shin nɛ e ba menyi kutɔ. Saŋɛ na so, men kaŋ wu mo, men be ŋgbene beeŋ naŋ dese menyi nɛ ma alɛ gbagba be kafɔŋ e lar ma to. ²⁹Amoso, men ta kagbenefuli kikɛ n sɔ mo fanɛ ekurgepo ashi Enyɛnpe to. Ekama malɛ nɛ e du fanɛ mo, men sa amodoŋwura bunyaŋ, ŋkpal manɛ so, a daŋ ka gbrɛbi nɛ e wu ŋkpal Kristo be kushuŋ na so. ³⁰E daŋ ta mbe kumu nna a sha kesa ma kechɛto nɛ menyi ere gbagba daa maaŋ tiŋ n sa ma.

Kebaala elelapo Ebɔrɛ be anishito be asheŋ

¹Ŋ kurgepoana, ma lalaloge be kamalga nde fanɛ Enyɛnpe e sa menyi kagbenefuli nɛnɛ. Kashenteŋto, ma kenaŋ n sibɛ asheŋ koŋwule ere gbagba n sa menyi maŋ tir ma, kumo be loŋ malɛ e naaŋ chɛ menyi to gba.

²Men baa de basa nɛ b du fanɛ njɔnɔ na so. Bumo e naa wora alubi nsaa wɔtɔ a sha eyur ere be keku na. ³Ŋkpal manɛ so, anyi e la kashenteŋ be katutukuebi a bɔla Ebɔrɛ be Kiyoyu na so a bunyaŋ mo nsaa ji anyi be ŋkpa nɛ an kɔ ashi Kristo Yesu to ere be njɔŋ. Anyi nɛ anyee wora asheŋ ere maa ta anyi be yirda a wɔtɔ eyur ere be kedulgi to. ⁴Kashenteŋto, ma ere gbagba kɔ ekpa nɛ n tiŋ n ta ma yirda n wɔtɔ eyur ere be asheŋ to.

Ŋkpal manɛ so, nɛ esa kama nɛ e bee fɛ fanɛ e kɔ ekpa nɛ e tiŋ ŋkpal kumo so n ta mbe yirda n wɔtɔ eyur ere be asheŋ to, meya chɔ amodoŋwura peya. ⁵Ŋkpal manɛ so, b kurge ma Israɛl be efuli so be esa nna nɛ n shi Bɛnjamin be kanaŋ to. N la Hibruw kashenteŋto nna, ŋkpal manɛ so, n tuto nɛ n nio kikɛ la Hibruwebi nna. B ka kurge ma be kachɛ burwasopo to nɛ b ku ma kututu, mbra na be kaplɛa so n daa la Farisi nna. ⁶Keshuŋ Ebɔrɛ malɛ be asheŋ daŋ pere ma kenishi ga hale nɛ n daa wɔtɔ a tɔrɔ asɔri to ebi. Mbra na malɛ be kebɛso be kulubi kikɛ daa maŋ wɔ ma to. ⁷Ama naniere bre, asɔ nɛ a daa kɔ tɔnɔ ma kutɔ na kikɛ, m maŋ naa tre amo shɛŋ ŋkpal Kristo Yesu so. ⁸Kashenteŋto, naniere shɛŋ maŋ naa kɔ tɔnɔ ma anishito ŋkpal kebaanyi Kristo Yesu n Nyɛnpe na ka chɔ kusɔ kikɛ na so. Mo so nɛ m paŋ asɔ kikɛ nseŋ naa ta kusɔ kama fanɛ asɔ fuloŋ ŋkpal kananɛ meeŋ wora n nya Kristo na so nɛ n tiŋ n nya a wɔ mo to. ⁹Ama mannɛ fanɛ ŋ gbagba ka bɔla mbra na so a kɔ alelasheŋ Ebɔrɛ be anishito so. M bɔla Kristo so nna n nya alelasheŋ Ebɔrɛ be anishito. Yirda nɛ baa ta a nya amo ashi mo koŋwule na kutɔ. ¹⁰Kusɔ nɛ m baa sha asheŋ ere kikɛ to e la fanɛ m baa nyi Kristo na nsaa tiŋ a wu mbe ketiŋi luwu to be eleŋ na ma kebaawɔtɔ to nseŋ naa tiŋ a tu mo a ji mbe awurfoŋ na n tiŋ ŋ ki fanɛ mo gbagba ashi mbe luwu na to. ¹¹Saŋɛ na so kachako Ebɔrɛ beeŋ tiŋi ma alɛ gba ashi luwu to.

Kepere kenishi n yɔ anishito be asheŋ

¹²M maa ŋini fanɛ n teŋ nya asɔ nɛ ma anishi yuu so ere nna ŋko fanɛ n teŋ ki esa cheembi nna, ama m baa pere kenishi nna a kɔ to a yɔ anishito a fin kenya ma tɔnɔ, kumo alɛ so nɛ Kristo Yesu teŋ sɔ ma n sa mbe kumu na. ¹³Ŋ kurgepoana, ma ere kutɔ m maa fɛ fanɛ n teŋ nya le be asɔ ere nna, ama kusɔ koŋwule nɛ m baa wora e la fanɛ mee teŋ asheŋ dra nɛ a choŋ na so nna nsaa wora ania nɛ n tiŋ n fo kusɔ nɛ k kraa wɔ ma anishito na. ¹⁴Amoso, m baŋ niŋi tinini nna a yɔ nɛ n ya ji ŋkpa be tɔnɔ nɛ Ebɔrɛ kpal kumo so a bɔla Kristo Yesu so a tre basa esoso fanɛ b ba sɔ na.

¹⁵A daga fanɛ anyi nɛ an kɔ kebɛso ere to be kenimufɛra ere e baa kɔ asheŋ nɛ n teŋ kaŋɛ ere be nfɛra loŋ. Ama nɛ fo kama nɛ fo nfɛra kɔr le be asheŋ ere be ako to, Ebɔrɛ beeŋ bugi amo alɛ gba to n sa fo. ¹⁶Kusɔ nɛ k tir e la fanɛ men shin nɛ an ba kraa wɔtɔ a bɛ asɔ nɛ an chɛr a bɛ so na so.

¹⁷Ŋ kurgepoana, men chala a kute ma kebaawɔtɔ to nsaa pɛshɛ bekama nɛ baa bɛ kebɛso na so fanɛ kananɛ an nase na. ¹⁸Ŋkpal manɛ so, loŋ koŋwule na gbagba nɛ mee kaa kaŋɛ menyi nsaa sha kenaŋ n lɔŋɛ n ta anishichubi ŋ kaŋɛ menyi n ti so na fanɛ basa damta be kebaawɔtɔ du fanɛ b ka bee kishi Kristo be kedibi largato na be asheŋ nna. ¹⁹Bumo be ekar la kemur nna, ŋkpal manɛ so, bumo be epunana e la bumo be Ebɔrɛ nɛ bumo be kemaŋkura malɛ la anishinyɔr be asɔ. Kashenteŋto, bumo be ŋgbene kikɛ wɔ durnya ere to be asɔ to nna. ²⁰Ama anyi ere, ebɔrɛso be basa e la anyi nɛ an baa jɔŋ anyi be aya so a jo anyi be Emɔlgapo, Enyɛnpe Yesu Kristo nɛ e shi ebɔrɛso m ba. ²¹E kaŋ ba, e beeŋ chɛrga an be eyur pɔsoana ere n shin nɛ an ki fanɛ mo gbagba be eyur na. Eleŋ koŋwule nɛ e beeŋ ta n ji kusɔ kikɛ so kuwura na nɛ e beeŋ ta n chɛrga anyi.

Asheŋ ŋiniso be asheŋ

¹Amoso, ŋ kurgepoana, mee sha men be asheŋ ga nsaa sha kewu menyi. Menyi e naa shin nɛ ma kagbene bee fuli ma, menyi alɛ nseŋ naa la ma kegben be tɔnɔ. N teriana, amoso nɛ a daga fanɛ men baa kɔ Enyɛnpe na to a yil kpakpa na.

²Yuodia nɛ Sintiki, men jande, mee kule menyi nna fanɛ men wora ania n lɔŋɛ abar a wɔtɔ fanɛ besipoche nɛ b la Enyɛnpe na peya. ³Mee kule fo, ma kagbene koŋwuleso be echɛtopo fanɛ fo chɛ bumo beche anyɔ na to, ŋkpal manɛ so, b chɛ ma to n shuŋ baru lela na be kebɔ be kushuŋ na ga. Bumo nɛ Klɛment nɛ m braana beshumpo nɛ bumo be atre wɔ Ebɔrɛ be ŋkpa be kawɔl na to na kikɛ nna.

⁴Men shin nɛ men be ŋgbene e baa fuli menyi ashi Enyɛnpe to saŋkikɛ. Kashenteŋto, meeŋ naŋ lɔŋɛ ŋ kaŋɛ loŋ fanɛ: Men shin nɛ men be ŋgbene e baa fuli menyi. ⁵Men shin nɛ ekama nyam e baa wu kananɛ men du boeŋ, ŋkpal manɛ so, Enyɛnpe na be keba taga to. ⁶Men sa maa fɔŋ kusɔ kama so men be kebaawɔtɔ to, ama kusɔ kama to men baa kaŋɛ Ebɔrɛ men be asheŋ tirso be asheŋ a kule mo fanɛ e chɛ menyi to nsaa chɔrɔ mo. ⁷Nɛ men wora loŋ, kagbene wushi nɛ k bee shi Ebɔrɛ kutɔ a ba nsaa chɔ kananɛ dimɛdi beeŋ fɛ na beeŋ shin nɛ men be ŋgbene nɛ men be nfɛra e nya edesekpa ashi Kristo Yesu to.

⁸Ŋ kurgepoana, ma kamalga be ekar nde fanɛ men shin nɛ asɔ lela nɛ a daga kapandi e bɔlɔ men be nfɛra to. Loŋ be asɔ na e la kashenteŋ be asɔ nɛ asɔ nɛ a maŋ kɔ eyurpi amo to nɛ asɔ nɛ amo be asheŋ bee bɔla ekpa nɛ asɔ nɛ a bee par basa nɛ asɔ nɛ a walɛ kenya nɛ asɔ nɛ a daga kesa bunyaŋ. Loŋ be asɔ ere kikɛ e daga fanɛ men baa fɛ amo be asheŋ. ⁹Men baa kraa wora asɔ nɛ men koya ashi ma kutɔ nɛ amo nɛ ŋ ŋini menyi na nɛ amo nɛ men nu ŋko n wu ŋ ka wora na kikɛ. Saŋɛ na so Ebɔrɛ nɛ kagbenewushi wɔ mo to na beeŋ baa wɔ menyi to.

Pɔɔl be kechɔrɔ Filipaiebi be asheŋ

¹⁰Ma kagbene bee fuli ma ga ashi Enyɛnpe to fanɛ men ka naŋ lɔŋɛ n fara nɛ men chɛ ma to so. Kashenteŋto, ma asheŋ wɔ men be ŋgbene to, ama ekpa nɛ men maŋ nya nɛ men ŋini kumo be loŋ. ¹¹Mannɛ fanɛ ŋ ka bee sha kechɛto so e shin nɛ mee malga le ere, ŋkpal manɛ so, naniere ŋ koya fanɛ a daga fanɛ kusɔ kama nɛ ŋ kɔ n shin nɛ k baa kukwe ma. ¹²N nyi kusɔ nɛ k la ketir nseŋ naa nyi kusɔ nɛ k la kanya damta malɛ gba. Ŋ koya amo kikɛ be asheŋ nna, amoso, kaplɛkama nɛ n yɔ saŋkikɛ, kusɔ nɛ ŋ kɔ bee kukwe ma nna. Nɛ m moɛ nna ŋko nɛ akoŋ kɔ ma nna ŋko nɛ fanɛ ŋ kɔ ga nna ŋko gbrɛbi gba nna, a bee kukwe ma nna. ¹³Meeŋ tiŋ m bɔla Kristo nɛ e bee sa ma eleŋ na so n wora kusɔ kikɛ nyam. ¹⁴Ama mee chɔrɔ menyi ga ŋkpal kananɛ men chɛ ma to ashi ma etɔrɔ na to so. ¹⁵Menyi Filipaiebi malɛ gba baa nyi geeŋ fanɛ ŋ ka lar Masɛdonia be efuli so, saŋɛ nɛ n daŋ baŋ fara a bɔ baru lela na a sa basa na, menyi nawule e daa la asɔriebi nɛ b daŋ chɛ ma to ashi kesa nɛ kesɔ to. ¹⁶Hale ŋ ka daa wɔ Tɛsalɔnika be kade to, men daŋ yɛr ma kechɛto. ¹⁷Mannɛ fanɛ mee sha kechɛto nna so nɛ mee malga le ere, ama nɛfa nɛ mee sha fanɛ Ebɔrɛ e ta n ti menyi so so. ¹⁸Men teŋ sa ma kusɔ kama nɛ k daga hale a chɔ kananɛ mee sha gba. Ŋ ka wu men be kakɛ nɛ Epafrodaites bar na, a bɔlɔ ma kenishi tain. K du fanɛ sarga lela nna, nɛ k bee par Ebɔrɛ nɛ kumo be efɛa wɔ ebel ga. ¹⁹Ma Ebɔrɛ kɔ dama nɛnɛ, mo alɛ beeŋ bɔla Kristo Yesu so n sa menyi men be asheŋ tirso kikɛ nyam. ²⁰Kemaŋkura e baa wɔ Ebɔrɛ an Tuto na so mbaanaayɔ. Amɛn.

Lalaloge be kechɔrɔ be asheŋ

²¹Mee chɔrɔ Ebɔrɛ be basa nɛ b la Kristo Yesu peya na kikɛ. Bekurgepo nɛ b wɔ ŋ kutɔ nfe ere bee chɔrɔ menyi. ²²Ebɔrɛ be basa nɛ b wɔ nfe ere kikɛ, fɔnfɔŋ bumo nɛ b shi Romebi be ewurgboŋ pe na bee chɔrɔ menyi.

²³Enyɛnpe Yesu Kristo be kuwɔr be kakɛ e baa wɔ men kikɛ so nyam.